Kinh tạng Tây Tạng (Kangyur Đại Học) — 060_མདོ་སྡེ།_མ

མས་ཀྱང་ཚུལ་ཁྲིམས་ཀྱི་ཕུང་པོ་ཤིན་ཏུ་དག་པ་ལ་བཀོད་པར་གྱུར་ཏེ། སྦྱངས་པའི་ཡོན་ཏན་སྡོམ་པ་ལ་མོས་པར་གྱུར་ཏོ། །དགེ་སློང་དེ་ནི་བརྩོན་འགྲུས་བརྩམས་ཤིང་རྟག་པར་བྱང་ཆུབ་ཀྱི་སེམས་ལ་གནས་པར་གྱུར་
ཏོ། །བྱང་ཆུབ་སེམས་དཔའ་གཞན་དག་ཀྱང་སྤྱོད་ལམ་དེ་ཉིད་ལ་ཡང་དག་པར་བསྐུལ་ཏེ། དམིགས་པ་ཅན་གྱི་ལྟ་བ་ལ་ཡང་དག་པར་བསྐུལ་ཏོ། །དེས་འདུ་བྱེད་ཐམས་ཅད་མི་རྟག་པ་ཞེས་བྱ་བར་འཛིན་དུ་བཙུད་དོ། །འདུ་བྱེད་ཐམས་ཅད་སྡུག་བསྔལ་ཞེས་བྱ་བར་འཛིན་དུ་བཙུད་དོ། །འདུ་
བྱེད་ཐམས་ཅད་བདག་མེད་པ་ཞེས་བྱ་བར་འཛིན་དུ་བཙུད་དོ། །དགེ་སློང་དེ་ནི་ཏིང་ངེ་འཛིན་ལ་མཁས་པར་གྱུར་ཏེ། བྱང་ཆུབ་སེམས་དཔའི་སྤྱོད་པ་ལ་མཁས་པ་མ་ཡིན་ཞིང་། དགེ་བའི་རྩ་བ་དང་ལྡན་པར་གྱུར་ཏོ། །དགེ་སློང་ཆོས་སྨྲ་བ་སྤྱོད་པ་རྣམ་པར་དག་པ་དེ་ནི་སེམས་ཅན་རྣམས་ཀྱི་

དབང་པོ་མཆོག་དང་ཐ་མ་ཤེས་པ་ལ་མཁས་པར་གྱུར་ཏེ། དེའི་འཁོར་དུ་གྱུར་པ་ཇི་སྙེད་པ་དེ་དག་ཀྱང་སྦྱངས་པའི་ཡོན་ཏན་གྱི་སྡོམ་པ་ལྷུར་ལེན་པར་གྱུར་ཏེ། མི་དམིགས་པའི་བཟོད་པ་ཅན་ཐབས་ལ་མཁས་པ་དག་ཏུ་གྱུར་ཏོ། །རིགས་ཀྱི་བུ་དེ་ནས་ཆོས་སྨྲ་བ་སྤྱོད་པ་རྣམ་པར་
དག་པ་འཁོར་དང་བཅས་ཏེ། དགེ་སློང་སྤྱོད་པའི་བློ་གྲོས་གང་ན་གནས་པའི་གཙུག་ལག་ཁང་དེར་ཕྱིན་ནས་དེ་ན་གནས་པར་གྱུར་ཏེ། དེ་གཙུག་ལག་ཁང་དེ་ནས་ཡང་དང་ཡང་སེམས་ཅན་ལ་སྙིང་བརྩེ་བའི་ཕྱིར་གྲོང་དུ་འགྲོ་ཞིང་། དེ་དག་ཏུ་ཟས་ཀྱི་བྱ་བ་བྱས་ནས་ཕྱིར་འོངས་པར་གྱུར་ཏོ། །
དེས་དེ་དག་ཏུ་རིགས་བརྒྱ་སྟོང་དུ་མ་དད་པར་བྱས་པར་གྱུར་ཏོ། །དེའི་འཁོར་ཇི་སྙེད་པ་དེ་དག་ཀྱང་ཚུལ་ལ་མཁས་པར་གྱུར་ཏོ། །དེ་དག་ཀྱང་དེ་དག་ཏུ་དོང་ཞིང་སེམས་ཅན་རྣམས་ལ་ཆོས་སྟོན་ཏོ། །དེ་དག་གིས་ཀྱང་སྲོག་ཆགས་བརྒྱ་སྟོང་མང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་བཀོད་པར་གྱུར་ཏོ། །དགེ་སློང་སྤྱོད་པའི་བློ་གྲོས་ཀྱི་འཁོར་དེ་དག་ནི་བསམ་གཏན་ལྷུར་ལེན་ཅིང་། གྲོང་དག་ཏུ་ཡང་འཁོར་བར་མི་འདོང་ངོ་། །དེ་ནས་དགེ་སློང་སྤྱོད་པའི་བློ་གྲོས་ཀྱིས་བྱང་ཆུབ་སེམས་དཔའ་གཞན་དག་ལ་མ་དད་པའི་སེམས་བསྐྱེད་ནས་དེས་གཎ་ཌཱི་རྡུངས་ཏེ། དགེ་སློང་
གི་དགེ་འདུན་བསྡུས་ནས་དམ་ཚིག་བྱས་པ་བདག་ཅག་གི་ནང་ནས་སུ་ཡང་རུང་སྟེ། སུས་ཀྱང་གྲོང་དུ་འགྲོ་བར་མི་བྱའོ། །ཁྱེད་ནི་ཤེས་བཞིན་མེད་པར་སྤྱོད་པ་ཡིན་ཏེ། ཉུང་ངུ་སྨྲ་བ་མ་ཡིན་གྱིས། ཁྱོད་གྲོང་དུ་དོང་བས་ཀྱང་ཅི་ཞིག་བྱ་སྟེ། དགོན་པ་ལ་གནས་པ་ནི་བཅོམ་ལྡན་འདས་ཀྱིས་གནང་ཞིང་
བསྔགས་པ་ཡིན་གྱིས། ཁྱོད་གྲོང་དུ་མ་འདོང་བར་བསམ་གཏན་གྱི་བདེ་བས་རྣམ་པར་སྤྱོད་ཅིག་ཅེས་བསྒོའོ། །དེ་དག་གིས་དེ་ཟེར་བ་ལྟར་མ་མཉན་ཏེ། ཡང་གྲོང་དག་ཏུ་འདོང་བར་གྱུར་ཏོ། །རིགས་ཀྱི་བུ་དེ་ནས་དགེ་སློང་དེ་དག་ནམ་གྲོང་ནས་ཕྱིར་འོངས་པར་གྱུར་པ་དེའི་ཚེ། དགེ་སློང་སྤྱོད་པའི་བློ་
གྲོས་ཀྱིས་ཡང་གཎ་ཌཱི་བརྡུངས་ནས། དགེ་སློང་གི་དགེ་འདུན་བསྡུས་ཏེ། འདི་སྐད་དུ་གལ་ཏེ་ད་ཕན་ཆད་ཁྱེད་གྲོང་དུ་འདོང་དང་། ཁྱེད་གཙུག་ལག་ཁང་འདི་ན་མ་གནས་ཤིག་ཅེས་བསྒོའོ། །རིགས་ཀྱི་བུ་དེ་ནས་དགེ་སློང་ཆོས་སྨྲ་བ་སྤྱོད་པ་རྣམ་པར་དག་པས་དགེ་སློང་དེའི་སེམས་བསྲུང་བའི་ཕྱིར།

རང་གི་འཁོར་རྣམས་བོས་ཏེ། འདི་སྐད་དུ་ཁྱེད་གྲོང་དུ་སུ་ཡང་མ་འདོང་ཤིག་ཅེས་སྨྲས་སོ། །དེ་ནས་དེའི་ཚེ་དགེ་སློང་དེ་དག་གིས་སེམས་ཅན་གང་ཇི་སྙེད་ཅིག་སྨིན་པར་བྱས་པ་དེ་དག་དགེ་སློང་དེ་དག་དང་། མ་ཕྲད་པས་ཤིན་ཏུ་མི་དགའ་བར་ཡང་གྱུར། དགེ་བའི་རྩ་བ་ཡང་ཡོངས་སུ་འགྲིབ་
པར་གྱུར་ཏོ། །རིགས་ཀྱི་བུ་དེ་ནས་དགེ་སློང་ཆོས་སྨྲ་བ་སྤྱོད་པ་རྣམ་པར་དག་པ་ཟླ་བ་གསུམ་པོ་དེ་དག་འདས་ནས། གཙུག་ལག་ཁང་དེ་ནས་གཙུག་ལག་ཁང་གཞན་དུ་འཕོས་ནས། གྲོང་དང་། གྲོང་ཁྱེར་དང་། ལྗོངས་དང་། ཡུལ་དང་། རྒྱལ་པོའི་ཕོ་བྲང་འཁོར་དག་ཏུ་འགྲོ་ཞིང་།
སེམས་ཅན་དག་ལ་ཆོས་སྟོན་པར་གྱུར་ཏོ། །རིགས་ཀྱི་བུ་དེ་ནས་དགེ་སློང་སྤྱོད་པའི་བློ་གྲོས་ཀྱིས། ཆོས་སྨྲ་བ་སྤྱོད་པ་རྣམ་པར་དག་པ་ཡང་དང་ཡང་གྲོང་དུ་འགྲོ་བ་ཡང་མཐོང་། དེའི་འཁོར་དུ་སྤྱོད་ལམ་ཐ་མལ་པ་ཅན་དུ་མཐོང་ནས། དེས་ཡང་དེ་ལ་མ་དད་པའི་སེམས་བསྐྱེད་པར་གྱུར་ཏེ། དགེ་
སློང་འདི་ནི་ཚུལ་ཁྲིམས་འཆལ་པ་ཅན། ཚུལ་ཁྲིམས་ལོག་པ་ཅན་ཏེ། འདིས་བྱང་ཆུབ་ག་ལ་འཐོབ། དགེ་སློང་འདིའི་བྱང་ཆུབ་ནི་རྒྱང་རིང་ངོ་། །དགེ་སློང་འདི་ནི་འདུ་འཛིར་གནས་གནས་པའོ་ཞེས་འགྲོ་བ་མང་པོ་དག་ལ་དེ་སྐད་བརྗོད་དོ། །རིགས་ཀྱི་བུ་དེ་ནས་དུས་གཞན་ཞིག་ན། དགེ་སློང་སྤྱོད་
པའི་བློ་གྲོས་དེ་འཆི་བའི་དུས་བྱས་པར་གྱུར་ནས། དེ་དེ་ལྟར་འཆི་བའི་དུས་བྱས་པ་དང་། ལས་དེའི་རྣམ་པར་སྨིན་པས་མནར་མེད་པའི་སེམས་ཅན་དམྱལ་བ་ཆེན་པོར་ལྷུང་ངོ་། །དེ་བསྐལ་པ་བྱེ་བ་སྟོང་ཕྲག་དགུ་བཅུ་རྩ་དགུར་སེམས་ཅན་དམྱལ་བ་ཆེན་པོར་སྡུག་བསྔལ་གྱི་ཚོར་བ་མྱོང་བར་གྱུར་
ནས་ཚེ་རབས་དྲུག་ཅུར་མི་སྙན་པར་བརྗོད་པ་ཐོབ་པར་གྱུར་ཏོ། །ཚེ་རབས་སྟོང་ཕྲག་སུམ་ཅུ་རྩ་གཉིས་སུ་རབ་ཏུ་བྱུང་བ་ལས་ཕྱིར་བབས་པར་གྱུར་ཏོ། །ལས་ཀྱི་སྒྲིབ་པ་དེ་ཉིད་ཀྱི་ལྷག་མས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་འཕྲོ་དྲི་མ་མེད་པའི་
གསུང་རབ་ལ་རབ་ཏུ་བྱུང་བར་གྱུར་ཏོ། །དེ་རབ་ཏུ་བྱུང་ནས་ལོ་བྱེ་བ་བརྒྱ་སྟོང་ཕྲག་དྲུག་ཏུ་མགོའི་ཐོད་ལ་མེ་འབར་བ་ལྟར་རྣམ་པར་སྤྱོད་ཀྱང་། འཐུན་པའི་བཟོད་པ་ཙམ་ཡང་མ་ཐོབ་སྟེ། ཚེ་རབས་བརྒྱ་སྟོང་མང་པོར་དབང་པོ་རྟུལ་པོར་གྱུར་ཏོ། །རིགས་ཀྱི་བུ་དེའི་ཚེ་དེའི་དུས་ན། དགེ་སློང་ཆོས་

སྨྲ་བ་སྤྱོད་པ་རྣམ་པར་དག་པ་ཞེས་བྱ་བ་དེ་གཞན་ཞིག་ཡིན་པར་སེམས་ན། དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། དེ་བཞིན་གཤེགས་པ་མི་སྒུལ་བ་ནི་དེའི་ཚེ་དེའི་དུས་ན། དགེ་སློང་ཆོས་སྨྲ་བ་སྤྱོད་པ་རྣམ་པར་དག་པ་ཞེས་བྱ་བར་གྱུར་ཏོ། །རིགས་ཀྱི་བུ་དེའི་ཚེ་དེའི་དུས་ན།
དགེ་སློང་ཆོས་སྨྲ་བ་སྤྱོད་པའི་བློ་གྲོས་ཞེས་བྱ་བ་དེ་གཞན་ཞིག་ཡིན་པ་སྙམ་དུ་སེམས་ན། དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། ང་ནི་དགེ་སློང་ཆོས་སྨྲ་བ་སྤྱོད་པའི་བློ་གྲོས་ཞེས་བྱ་བར་གྱུར་ཏོ། །ང་ཡང་དེ་ལྟ་བུའི་ཐབས་ཕྲ་མོས་དེ་ལ་མ་དད་པའི་སེམས་བསྐྱེད་དེ། ལས་ཀྱི་སྒྲིབ་པ་མངོན་པར་འདུ་བྱས་
པས་སེམས་ཅན་དམྱལ་བ་དག་ཏུ་ལྷུང་བར་གྱུར་ཏོ། །རིགས་ཀྱི་བུ་དེ་ལྟར་ཕྲ་བ་ནི་ལས་ཀྱི་སྒྲིབ་པ་ཡིན་གྱིས། རིགས་ཀྱི་བུ་སུ་ལས་ཀྱི་སྒྲིབ་པ་དེ་ལྟ་བུ་མི་འདོད་པ་དེ་དག་གིས་གཞན་གྱི་སྤྱོད་པ་ལ་ཁོང་ཁྲོ་བར་མི་བྱའོ། །དེའི་སྤྱོད་པ་ཐམས་ཅད་ལ་ཡིད་ཆེས་པར་བྱའོ། །འདི་སྙམ་དུ་ཕ་རོལ་གྱི་
སེམས་ནི་བདག་གིས་མི་ཤེས་ཏེ། སེམས་ཅན་གྱི་སྤྱོད་པ་ནི་ཤེས་པར་དཀའོ་སྙམ་དུ་སེམས་བསྐྱེད་པར་བྱའོ། །དོན་གྱི་དབང་དེ་གཟིགས་ནས། དེ་བཞིན་གཤེགས་པས་འདི་སྐད་དུ་ཆོས་སྟོན་ཏེ། གང་ཟག་གིས་གང་ཟག་ལ་ཚོད་གཟུང་བར་མི་བྱའོ། །གང་ཟག་གིས་གང་ཟག་ལ་ཚོད་
བཟུང་ན་རྨ་འབྱུང་བར་འགྱུར་ཏེ། ངའམ་གཞན་ཡང་ང་དང་འདྲ་བ་དག་གིས་གང་ཟག་ལ་ཚོད་གཟུང་ངོ་། །རིགས་ཀྱི་བུ་སུ་བདག་བསྲུང་བར་འདོད་པ་དེས་གཞན་སུའི་སྤྱོད་པ་ལའང་བརྟག་པར་མི་བྱ་སྟེ། དེ་དག་ལ་འདི་ནི་འདི་འདྲའོ། །འདི་ནི་འདི་འདྲའོ་ཞེས་དཔྱ་བར་མི་བྱའོ། །ཉིན་མཚན་
དུ་སངས་རྒྱས་ཀྱི་ཆོས་ལ་བརྩོན་པར་བྱའོ། །རིགས་ཀྱི་བུ་ཆོས་ལ་བསྒོམས་པའི་ཡིད་ཀྱིས་བསམ་པ་ཐག་པ་ནས་ཡང་དག་པར་ཞུགས་པའི་བྱང་ཆུབ་སེམས་དཔའ་ནི་གཞན་ལ་དཔྱ་བར་བརྩོན་པར་མི་གནས་སོ། །རིགས་ཀྱི་བུ་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན།
སེམས་ཅན་གང་ཅི་སྙེད་ཅིག་ཡོད་པ་དེ་དག་ཐམས་ཅད་བྱང་ཆུབ་སེམས་དཔའ་ལ་ལ་ཞིག་གིས་དགེ་བ་བཅུའི་ལས་ཀྱི་ལམ་ལ་བཀོད་པ་བས། བྱང་ཆུབ་སེམས་དཔའ་གང་གཅིག་པུ་དབེན་པར་འདུག་སྟེ། ཆུང་ངུ་ན་སེ་གོལ་གཏོགས་པ་ཙམ་དུའང་ཆོས་ཐམས་ཅད་ཚུལ་གཅིག་པར་ཡིད་ཆེས་

ཤིང་ཐ་ན་ཆུང་ངུ་དྲི་བའམ། དཔྱད་པའམ། ལུང་འབོག་པའམ། ཁ་ཏོན་བྱ་བའི་ཕྱིར་གནས་ན། འདི་ནི་དེ་བས་ཆེས་བསོད་ནམས་མང་དུ་འཕེལ་ལོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཚུལ་འདི་ཁོང་དུ་ཆུད་པས་བྱང་ཆུབ་སེམས་དཔའ་རྣམས་ལས་ཀྱི་སྒྲིབ་པ་ཐམས་ཅད་རྣམ་པར་དག་པ་
འཐོབ་བོ། །སེམས་ཅན་ཐམས་ཅད་ལ་ཆགས་པ་དང་། ཁོང་ཁྲོ་བ་དང་བྲལ་བར་འགྱུར་རོ། །རྣམ་པ་ཐམས་ཅད་མཁྱེན་པའང་མྱུར་དུ་འཐོབ་པར་འགྱུར་རོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ལས་ཀྱི་སྒྲིབ་པ་
རྣམ་པར་དག་པ་ཞེས་བྱ་བ་ཇི་ཙམ་གྱིས་ན་ལས་ཀྱི་སྒྲིབ་པ་རྣམ་པར་དག་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་བྱང་ཆུབ་སེམས་དཔའ་གང་ཆོས་ཐམས་ཅད་ལས་མེད་ཅིང་། རྣམ་པར་སྨིན་པ་མེད་པར་ཤེས་པ་དེས་ལས་ཀྱི་སྒྲིབ་པ་རྣམ་པར་དག་པ་འཐོབ་བོ། །
འཇམ་དཔལ་གཞན་ཡང་བྱང་ཆུབ་སེམས་དཔའ་གང་གིས་འདོད་ཆགས་ཀྱི་མཐའ་ཡང་དག་པའི་མཐར་མཐོང་བ་དང་། ཞེ་སྡང་གི་མཐའ་ཡང་དག་པའི་མཐར་མཐོང་བ་དང་། གཏི་མུག་གི་མཐའ་ཡང་དག་པའི་མཐར་མཐོང་བ་དེས་ལས་ཀྱི་སྒྲིབ་པ་རྣམ་པར་དག་པ་འཐོབ་བོ། །འཇམ་དཔལ་
གཞན་ཡང་བྱང་ཆུབ་སེམས་དཔའ་གང་གིས་སེམས་ཅན་ཐམས་ཅད་དང་། ཆོས་ཐམས་ཅད་མྱ་ངན་ལས་འདས་པའི་དབྱིངས་སུ་མཐོང་བ་དེས་ལས་ཀྱི་སྒྲིབ་པ་རྣམ་པར་དག་པ་འཐོབ་བོ། །འཇམ་དཔལ་དེ་ཅིའི་ཕྱིར་ཞེ་ན། ལྟ་བ་ཡོད་ན་ལས་མངོན་པར་འདུ་བྱེད་པར་འགྱུར་ཏེ། འཇམ་དཔལ་བྱིས་པ་ཐོས་པ་
མེད་པ་སོ་སོའི་སྐྱེ་བོ་ནི་ཆོས་ཐམས་ཅད་ཤིན་ཏུ་ཡོངས་སུ་མྱ་ངན་ལས་འདས་པར་མི་ཤེས་པས། བདག་དང་གཞན་དུ་དམིགས་སོ། །དམིགས་ནས་ལུས་དང་། ངག་དང་། ཡིད་ཀྱི་ལས་རྣམ་པ་གསུམ་མངོན་པར་འདུ་བྱེད་དེ། དེ་ཡང་དག་པ་མ་ཡིན་པར་སྒྲོ་འདོགས་པས་བདག་ནི་འདོད་
ཆགས་སོ། །བདག་ནི་ཞེ་སྡང་ངོ་། །བདག་ནི་གཏི་མུག་གོ་ཞེས་རྣམ་པར་རྟོག་གོ། །གལ་ཏེ་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་ན། དེ་འདི་སྙམ་དུ་བདག་ནི་ཚུལ་ཁྲིམས་དང་ལྡན་པའོ། །བདག་ནི་ཚངས་པར་སྤྱོད་པའོ། །བདག་གིས་ནི་འཁོར་བ་ལས་ཡང་དག་པར་འདའ་

བར་བྱའོ། །བདག་གིས་ནི་མྱ་ངན་ལས་འདས་པ་ཐོབ་པར་བྱའོ། །བདག་གིས་ནི་སྡུག་བསྔལ་ལས་རྣམ་པར་གྲོལ་བ་ཐོབ་པར་བྱའོ་སྙམ་དུ་སེམས་ཤིང་། དེ་ཡང་དག་པ་མ་ཡིན་པར་སྒྲོ་འདོགས་པས། ཆོས་འདི་དག་ནི་དགེ་བའོ། །ཆོས་འདི་དག་ནི་མི་དགེ་བའོ། །ཆོས་
འདི་དག་ནི་ཡོངས་སུ་ཤེས་པར་བྱའོ། །ཆོས་འདི་དག་ནི་སྤང་བར་བྱའོ། །ཆོས་འདི་དག་ནི་མངོན་དུ་བྱ་བའོ། །ཆོས་འདི་དག་ནི་བསྒོམ་པར་བྱའོ། །སྡུག་བསྔལ་ནི་ཤེས་པར་བྱའོ། །ཀུན་འབྱུང་བ་ནི་སྤང་བར་བྱའོ། །འགོག་པ་ནི་མངོན་དུ་བྱའོ། །ལམ་ནི་བསྒོམ་པར་བྱའོ་ཞེས་རྣམ་པར་
རྟོག་གོ། །དེ་འདུ་བྱེད་ཐམས་ཅད་ནི་མི་རྟག་པའོ། །འདུ་བྱེད་ཐམས་ཅད་ནི་སྡུག་བསྔལ་བའོ། །འདུ་བྱེད་ཐམས་ཅད་ནི་ཀུན་ནས་འབར་བའོ། །ཅི་ནས་ཀྱང་བདག་ནི་འདུ་བྱེད་རྣམས་ལས་འབྲོས་པར་བྱའོ་སྙམ་དུ་རྣམ་པར་རྟོག་སྟེ། དེ་དེ་ལྟར་རྟོག་པའི་ཚེ། སྐྱོ་བ་དང་ལྡན་པའི་འདུ་ཤེས་
ཡིད་ལ་བྱེད་པ། མཚན་མ་སྔོན་དུ་བཏང་བ་དག་འབྱུང་སྟེ། དེ་འདི་སྙམ་དུ་གང་འདི་ཆོས་རྣམས་ཡོངས་སུ་ཤེས་པ་འདི་ནི་སྡུག་བསྔལ་ཡོངས་སུ་ཤེས་པའོ། །དེ་འདི་སྙམ་དུ་ཇི་ནས་ཀྱང་བདག་གིས་ཀུན་འབྱུང་བ་སྤང་བར་བྱའོ་ཞེས་དེ་ཆོས་ཐམས་ཅད་ལ་ངོ་མི་མཐོ་ཞིང་ཁྲེལ་བར་སེམས། འཇིགས་
པ་དང་། རབ་ཏུ་འཇིགས་པ་དང་། ཡོངས་སུ་འཇིགས་པ་སྐྱེད་ཅིང་། དེ་འདི་སྙམ་དུ་གང་འདི་ཆོས་དེ་དག་ལས་ངོ་ཚ་བར་གྱུར་པ་དེ་ནི་ཀུན་འབྱུང་བ་སྤང་བའོ་སྙམ་དུ་སེམས་སོ། །དེ་འདི་སྙམ་དུ་ཅི་ནས་ཀྱང་བདག་གིས་འགོག་པ་མངོན་དུ་བྱའོ་སྙམ་ནས། དེ་ཆོས་དེ་དག་རྣམ་པར་བརྟགས་ནས་
དེའི་འོག་ཏུ་དེ་དག་འགོག་པར་འདུ་ཤེས་ཤིང་། དེ་འདི་སྙམ་དུ་གང་ཆོས་རྣམས་མངོན་དུ་བྱ་བ་དེ་ནི་འགོག་པ་ཡིན་ནོ་སྙམ་མོ། །དེ་འདི་སྙམ་དུ་ཅི་ནས་ཀྱང་བདག་གིས་ལམ་བསྒོམ་པར་བྱའོ་སྙམ་སྟེ། དེ་གཅིག་པུ་དབེན་པར་སོང་ནས་ཆོས་དེ་དག་ཡིད་ལ་བྱས་པས་ཞི་གནས་འཐོབ་སྟེ། དེའི་
སྐྱོ་བ་དང་ལྡན་པའི་ཡིད་ལ་བྱ་བ་དེ་དང་། ཞི་གནས་ཐོབ་པ་དེས་ཆོས་ཐམས་ཅད་ལས་སེམས་རབ་ཏུ་ཞུམ་པར་འགྱུར། སེམས་རབ་ཏུ་འགོང་བར་འགྱུར། སེམས་ཕྱིར་ལྡོག་པར་འགྱུར་ཞིང་ངོ་མི་མཐོ་སྟེ། ངོ་ཚ་ལ་རྣམ་པར་སྨོད་དེ། མངོན་པར་དགའ་བ་མེད་པ་སྐྱེད་དོ། །དེ་འདི་

སྙམ་དུ་བདག་ནི་སྡུག་བསྔལ་ཐམས་ཅད་ལས་གྲོལ་བ་སྟེ། བདག་གིས་དེ་ལས་གོང་དུ་བྱ་བ་གཞན་མེད་དོ། །བདག་ནི་དགྲ་བཅོམ་པ་ཡིན་ནོ་ཞེས་དམ་འཆའོ། །དེ་འཆི་བའི་དུས་ལ་བབ་པའི་ཚེ། བདག་སྐྱེ་བར་འགྱུར་བ་མཐོང་ནས། སངས་རྒྱས་ཀྱི་བྱང་ཆུབ་ལ་ནེམ་ནུར་དང་ཐེ་ཙོམ་དུ་གྱུར་ཏེ།
དེ་ཐེ་ཙོམ་དུ་ལྟུང་བའི་སེམས་ཀྱིས་དུས་བྱས་ནས་སེམས་ཅན་དམྱལ་བ་ཆེན་པོ་དག་ཏུ་སྐྱེ་སྟེ། དེ་ཡང་མ་སྐྱེས་པའི་ཆོས་རྣམས་ལ་རྣམ་པར་བརྟགས་པའི་ཕྱིར་རོ།། །།བམ་པོ་གཉིས་པ། དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་
ཅེས་གསོལ་ཏོ། །བཅོམ་ལྡན་འདས་འཕགས་པའི་བདེན་པ་བཞི་པོ་རྣམས་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་གང་གིས་འདུ་བྱེད་ཐམས་ཅད་མ་སྐྱེས་པར་མཐོང་བ་དེས་སྡུག་བསྔལ་ཡོངས་སུ་ཤེས་སོ། །གང་གིས་ཆོས་ཐམས་ཅད་འབྱུང་
བ་མེད་པར་མཐོང་བ་དེས་ཀུན་འབྱུང་བ་རབ་ཏུ་སྤངས་སོ། །གང་གིས་ཆོས་ཐམས་ཅད་ཤིན་ཏུ་མྱ་ངན་ལས་འདས་པར་མཐོང་བ་དེས་འགོག་པ་མངོན་དུ་བྱས་སོ། །གང་གིས་ཆོས་ཐམས་ཅད་དངོས་པོ་མེད་པར་མཐོང་བ་དེས་ལམ་བསྒོམས་སོ། །འཇམ་དཔལ་གང་གིས་འཕགས་པའི་བདེན་པ་
བཞི་དེ་ལྟར་མཐོང་བ་དེ་ནི། ཆོས་འདི་དག་ནི་དགེ་བའོ། །ཆོས་འདི་དག་ནི་མི་དགེ་བའོ། །ཆོས་འདི་དག་ནི་ཡོངས་སུ་ཤེས་པར་བྱ་བའོ། །ཆོས་འདི་དག་ནི་སྤང་བར་བྱ་བའོ། །ཆོས་འདི་དག་ནི་མངོན་དུ་བྱ་བའོ། །ཆོས་འདི་དག་ནི་བསྒོམ་པར་བྱ་བའོ། །སྡུག་བསྔལ་ནི་ཡོངས་སུ་
ཤེས་པར་བྱ་བའོ། །ཀུན་འབྱུང་བ་ནི་སྤང་བར་བྱ་བའོ། །འགོག་པ་ནི་མངོན་དུ་བྱ་བའོ། །ལམ་ནི་བསྒོམ་པར་བྱ་བའོ་ཞེས་མི་རྟོག་རྣམ་པར་མི་རྟོག་གོ། །དེ་ཅིའི་ཕྱིར་ཞེ་ན། ཆོས་གང་དག་ལ་བྱིས་པ་སོ་སོའི་སྐྱེ་བོ་དག་འདོད་ཆགས་པ་དང་། ཞེ་སྡང་བ་དང་། གཏི་མུག་པར་འགྱུར་
བའི་ཆོས་དེ་དག་དེས་མ་སྐྱེས་པ་དང་། མེད་པ་དང་། ནོར་བ་དང་། ཡོངས་སུ་བརྟགས་པ་དང་། ཡོངས་སུ་བསྐྱེད་པར་མཐོང་བའི་ཕྱིར་ཏེ། དེ་ཆོས་གང་ཡང་མི་ལེན་མི་འདོར་རོ། །དེའི་སེམས་ནི་ཁམས་གསུམ་པ་ལ་ཆགས་པ་མེད་དེ། ཁམས་གསུམ་པ་ཐམས་ཅད་མ་

སྐྱེས་པ་དང་། སྒྱུ་མ་ལྟ་བུ་དང་། རྨི་ལམ་ལྟ་བུ་དང་། བྲག་ཅ་ལྟ་བུ་དང་། མིག་ཡོར་ལྟ་བུར་ཡང་དག་པར་མཐོང་ངོ་། །དེས་དགེ་བ་དང་། མི་དགེ་བའི་ཆོས་ཐམས་ཅད་སྨིག་རྒྱུ་ལྟ་བུར་མཐོང་སྟེ། དེས་འདོད་ཆགས་ཀྱི་ཁམས་མྱ་ངན་ལས་འདས་པའི་དབྱིངས་སུ་
མཐོང་ངོ་། །དེ་བཞིན་དུ་ཞེ་སྡང་གི་ཁམས་དང་། གཏི་མུག་གི་ཁམས་མྱ་ངན་ལས་འདས་པའི་དབྱིངས་སུ་མཐོང་ངོ་། །དེས་ཆོས་རྣམས་དེ་ལྟ་བུའི་རང་བཞིན་དུ་མཐོང་བས། སེམས་ཅན་ཐམས་ཅད་ལ་ཆགས་པ་དང་། ཁོང་ཁྲོ་བ་མེད་པར་འགྱུར་རོ། །དེ་ཅིའི་ཕྱིར་ཞེ་ན། དེས་གང་ལ་
ཆགས་པར་བྱ་བ་དང་། ཁོང་ཁྲོ་བར་བྱ་བ་དེ་ལྟ་བུའི་ཆོས་མི་དམིགས་སོ། །དེ་ནམ་མཁའ་དང་མཉམ་པའི་སེམས་ཀྱིས་སངས་རྒྱས་ཀྱང་ཡང་དག་པར་རྗེས་སུ་མི་མཐོང་ངོ་། །ཆོས་དང་དགེ་འདུན་ཡང་དག་པར་རྗེས་སུ་མི་མཐོང་ངོ་། །དེ་ཆོས་ཐམས་ཅད་ཡང་དག་པར་རྗེས་སུ་མི་མཐོང་བས་
ཆོས་གང་ལ་ཡང་ཐེ་ཙོམ་མི་སྐྱེད་དེ། ཐེ་ཙོམ་མེད་པས་ཉེ་བར་ལེན་པ་མེད་དོ། །ཉེ་བར་ལེན་པ་མེད་པས་ཉེ་བར་ལེན་པ་མེད་པར་ཡོངས་སུ་མྱ་ངན་ལས་འདས་ཏེ། འཇམ་དཔལ་དེ་ལྟ་བུའི་ཆོས་ཤེས་པས་གནས་བརྟན་རབ་འབྱོར་དེ་བཞིན་གཤེགས་པའི་ཞབས་ལ་ཕྱག་འཚལ་དུ་མི་འོང་ངོ་། །
དེ་ཅིའི་ཕྱིར་ཞེ་ན། བདག་ཉིད་ཀྱང་མི་དམིགས་ན། དེ་བཞིན་གཤེགས་པ་དམིགས་པ་ལྟ་སྨོས་སུ་ག་ལ་ཡོད་དེ། དེ་ནི་གནས་མེད་དོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དྲན་པ་ཉེ་བར་གཞག་པ་བཞི་རྣམས་ཇི་ལྟར་
བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་མ་འོངས་པའི་དུས་ན་དགེ་སློང་དག་འབྱུང་སྟེ། དེ་དག་མི་སྡུག་པའི་རྣམ་པས་ལུས་ལ་ལུས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་སྟོན་ཏོ། །སྐྱེ་བ་དང་འགག་པའི་རྣམ་པས་ཚོར་བ་ལ་ཚོར་བའི་རྗེས་སུ་ལྟ་བའི་
དྲན་པ་ཉེ་བར་གཞག་པ་སྟོན་ཏོ། །སེམས་སྐྱེ་བ་དང་། འགག་པའི་ཆོས་ཅན་དུ་ལྟའོ་ཞེས་སེམས་ལ་སེམས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་སྟོན་ཏོ། །གང་ལ་རིལ་པོའི་འདུ་ཤེས་མེད་པ་དེ་ལ་ཆོས་ཀྱི་འདུ་ཤེས་མེད་དོ་ཞེས་ཆོས་ལ་ཆོས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་

སྟོན་ཏོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་འོ་ན་དྲན་པ་ཉེ་བར་གཞག་པ་བཞི་རྣམས་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་
ཆོག་མོད། དེ་བཞིན་གཤེགས་པ་རྣམས་ཀྱི་ལྡེམ་པོ་དག་ནི་ཤེས་པར་དཀའོ། །འཇམ་དཔལ་གྱིས་གསོལ་པ། བཅོམ་ལྡན་འདས་འོན་ཀྱང་དྲན་པ་ཉེ་བར་གཞག་པ་བསྒོམ་པ་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་གང་གིས་ལུས་ནམ་
མཁའ་དང་མཉམ་པར་མཐོང་ན། དེ་ནི་ལུས་ལ་ལུས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པའོ། །འཇམ་དཔལ་གང་གིས་ཚོར་བ་ནང་དང་། ཕྱི་དང་། གཉིས་ཀ་མེད་པར་ཡང་མི་དམིགས་ན། དེ་ནི་ཚོར་བ་ལ་ཚོར་བའི་རྗེས་སུ་ལྟ་བའི་དྲན་པ་ཉེ་བར་གཞག་པའོ། །འཇམ་དཔལ་གང་
གིས་སེམས་མིང་ཙམ་དུ་ཤེས་ན། དེ་ནི་སེམས་ལ་སེམས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པའོ། །འཇམ་དཔལ་གང་གིས་དགེ་བ་དང་མི་དགེ་བའི་ཆོས་མ་དམིགས་ན། དེ་ནི་ཆོས་ལ་ཆོས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པའོ། །འཇམ་དཔལ་དྲན་པ་ཉེ་བར་གཞག་པ་བཞི་ནི་
དེ་ལྟར་བལྟའོ། །འཇམ་དཔལ་གྱིས་གསོལ་པ། བཅོམ་ལྡན་འདས་དབང་པོ་ལྔ་རྣམས་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་གང་གིས་ཆོས་ཐམས་ཅད་རང་བཞིན་གྱིས་མ་བྱུང་བའི་ཕྱིར། མ་སྐྱེས་པར་མཐོང་ན། དེ་ནི་དད་པའི་དབང་པོའོ། །
འཇམ་དཔལ་གང་གིས་ཉེ་བ་དང་རིང་བའི་འདུ་ཤེས་དང་བྲལ་བའི་ཕྱིར། ཆོས་ཐམས་ཅད་ལ་སེམས་མི་གཏོང་ན། དེ་ནི་བརྩོན་འགྲུས་ཀྱི་དབང་པོའོ། །འཇམ་དཔལ་གང་དམིགས་པ་དང་བྲལ་བའི་ཕྱིར། ཆོས་ཐམས་ཅད་ཡིད་ལ་མི་བྱེད་ཅིང་དྲན་པ་ལ་མི་འདོགས་ན། དེ་ནི་དྲན་པའི་དབང་
པོའོ། །འཇམ་དཔལ་གང་ཆོས་ཐམས་ཅད་ལ་མི་སེམས་པ་འདི་ནི་ཏིང་ངེ་འཛིན་གྱི་དབང་པོའོ། །འཇམ་དཔལ་གང་གིས་ཆོས་ཐམས་ཅད་སྐྱེ་བ་དང་འཇིག་པ་དང་བྲལ་ཞིང་། ཤེས་པ་དང་མི་ཤེས་པ་དང་བྲལ་བ་སྟེ། རང་བཞིན་གྱིས་སྟོང་པར་མཐོང་ན། དེ་ནི་ཤེས་རབ་ཀྱི་དབང་པོའོ། །

འཇམ་དཔལ་དབང་པོ་ལྔ་དག་ནི་དེ་ལྟར་བལྟའོ། །འཇམ་དཔལ་གྱིས་གསོལ་པ། བཅོམ་ལྡན་འདས་བྱང་ཆུབ་ཀྱི་ཡན་ལག་བདུན་རྣམས་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་གང་གིས་ཆོས་ཐམས་ཅད་རང་བཞིན་མེད་ཅིང་
ཡིད་ལ་བྱར་མེད་པར་མཐོང་བ་འདི་ནི་དྲན་པ་ཡང་དག་བྱང་ཆུབ་ཀྱི་ཡན་ལག་གོ། །འཇམ་དཔལ་གང་གིས་དགེ་བ་དང་མི་དགེ་བ་དང་། ལུང་དུ་མ་བསྟན་པར་རབ་ཏུ་ཕྱེ་སྟེ་བརྟགས་ན་ཡོངས་སུ་མ་གྲུབ་པས་ཆོས་ཐམས་ཅད་མི་དམིགས་པ་འདི་ནི་ཆོས་རབ་ཏུ་འབྱེད་པ་ཡང་དག་བྱང་ཆུབ་ཀྱི་ཡན་ལག་
གོ། །འཇམ་དཔལ་གང་གིས་ཁམས་ཀྱི་འདུ་ཤེས་ཤིན་ཏུ་རིག་པའི་ཕྱིར་ཁམས་གསུམ་པ་མི་ལེན་མི་འདོར་བ་འདི་ནི་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་གོ། །འཇམ་དཔལ་གང་གིས་དགའ་བ་དང་། མི་དགའ་བ་ཤིན་ཏུ་རྟོགས་པའི་ཕྱིར། འདུ་བྱེད་ཐམས་ཅད་ལ་དགའ་བ་མི་
སྐྱེད་པ་འདི་ནི་དགའ་བ་ཡང་དག་བྱང་ཆུབ་ཀྱི་ཡན་ལག་གོ། །འཇམ་དཔལ་གང་གིས་དམིགས་པའི་དངོས་པོ་མ་དམིགས་ཏེ། ཆོས་ཐམས་ཅད་ལ་སེམས་བག་ཡོངས་སུ་གྱུར་པ་འདི་ནི་བག་ཡངས་ཡང་དག་བྱང་ཆུབ་ཀྱི་ཡན་ལག་གོ། །འཇམ་དཔལ་གང་གིས་ཆོས་ཐམས་ཅད་རྣམ་པར་བསྒོམ་
པ་རྗེས་སུ་རྟོགས་པས་སེམས་མི་དམིགས་པ་འདི་ནི་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་གོ། །གང་ཆོས་ཐམས་ཅད་ལ་མི་གནས་མི་རྟེན་ལ་ཆགས་པར་མི་འགྱུར། ཤེས་པར་མི་འགྱུར་ཞིང་ཆོས་ཐམས་ཅད་ཡང་དག་པར་རྗེས་སུ་མ་མཐོང་བས། བཏང་སྙོམས་སུ་གནས་པ་འདི་ནི་
བཏང་སྙོམས་ཡང་དག་བྱང་ཆུབ་ཀྱི་ཡན་ལག་གོ། །འཇམ་དཔལ་བྱང་ཆུབ་ཀྱི་ཡན་ལག་བདུན་ནི་དེ་ལྟར་བལྟའོ། །འཇམ་དཔལ་གྱིས་གསོལ་པ། བཅོམ་ལྡན་འདས་འཕགས་པའི་ལམ་ཡན་ལག་བརྒྱད་པ་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ།
འཇམ་དཔལ་གང་གིས་ཆོས་ཐམས་ཅད་མི་མཉམ་པ་མེད་ཅིང་གཉིས་སུ་མེད་དེ་གཉིས་སུ་བྱར་མེད་པར་མཐོང་བ་འདི་ནི་ཡང་དག་པའི་ལྟ་བའོ། །འཇམ་དཔལ་གང་གིས་ཆོས་ཐམས་ཅད་མཐོང་བ་མེད་པའི་ཚུལ་གྱིས་བརྟག་ཏུ་མེད་ཅིང་རྣམ་པར་བརྟག་ཏུ་མེད་ལ། ཡོངས་སུ་བརྟག་ཏུ་

མེད་པར་མཐོང་བ་འདི་ནི་ཡང་དག་པའི་རྟོག་པའོ། །འཇམ་དཔལ་གང་གིས་བརྗོད་དུ་མེད་པ་མཉམ་པ་ཉིད་ཤིན་ཏུ་བསྒོམས་པའི་ཕྱིར། ཆོས་ཐམས་ཅད་བརྗོད་དུ་མེད་པར་མཐོང་བ་འདི་ནི་ཡང་དག་པའི་ངག་གོ། །འཇམ་དཔལ་གང་གིས་བྱེད་པ་མི་དམིགས་པའི་ཕྱིར། ཆོས་ཐམས་
ཅད་བྱ་བ་མེད་ཅིང་བྱེད་པ་མེད་པར་མཐོང་བ་འདི་ནི་ཡང་དག་པའི་ལས་ཀྱི་མཐའོ། །འཇམ་དཔལ་གང་འཚོ་བ་མཉམ་པ་ཉིད་ལ་གནས་པའི་ཕྱིར། ཆོས་ཐམས་ཅད་མི་སོགས་མི་འབྲི་བ་འདི་ནི་ཡང་དག་པའི་འཚོ་བའོ། །འཇམ་དཔལ་གང་རྩོལ་བ་མེད་ཅིང་སྒྲུབ་པ་མེད་པའི་ཚུལ་གྱིས།
ཆོས་ཐམས་ཅད་ཡོངས་སུ་སྒྲུབ་པ་མེད་པ་འདི་ནི་ཡང་དག་པའི་རྩོལ་བའོ། །འཇམ་དཔལ་གང་དྲན་པའི་ལས་ཀྱིས་དབེན་པའི་ཕྱིར་ཆོས་ཐམས་ཅད་ཡིད་ལ་མི་བྱེད་ཅིང་། དྲན་པ་མེད་པ་འདི་ནི་ཡང་དག་པའི་དྲན་པའོ། །འཇམ་དཔལ་གང་ཆོས་ཐམས་ཅད་མི་དམིགས་པའི་ཕྱིར། རང་བཞིན་
གྱིས་མཉམ་པར་གཞག་ཅིང་། འཁྲུག་པ་མེད་ལ་དམིགས་པ་མེད་པར་མཐོང་བ་འདི་ནི་ཡང་དག་པའི་ཏིང་ངེ་འཛིན་ཏོ། །འཇམ་དཔལ་འཕགས་པའི་ལམ་ཡན་ལག་བརྒྱད་པ་ནི་དེ་ལྟར་བལྟ་སྟེ། འཇམ་དཔལ་གང་ལ་ལས་འཕགས་པའི་བདེན་པ་བཞི་དེ་ལྟར་ཤེས་ཤིང་། དྲན་པ་ཉེ་
བར་གཞག་པ་བཞི་དང་། དབང་པོ་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་དེ་ལྟར་མཐོང་བ་དེ་ནི་ངན་པ་རྒལ་བ། ཕ་རོལ་ཏུ་ཕྱིན་པ། ཐང་ལ་གནས་པ། བདེ་བར་གྱུར་པ། མི་འཇིགས་པ་རྙེད་པ། ཁུར་བོར་བ། རྡུལ་སྤྲུགས་པ། ཅི་
དང་ཡང་བྲལ་བ། ཉོན་མོངས་པ་མེད་པ། དགྲ་བཅོམ་པ། དགེ་སྦྱོང་། བྲམ་ཟེ། ཁྲུས་བྱས་པ། མཐར་ཕྱིན་པ། གཙང་བ། ཤཱཀྱའི་བུ། སངས་རྒྱས་ཀྱི་སྲས། ཚེར་མ་ཕྱུང་བ། འོབས་བོར་བ། འོབས་ལས་རྒལ་བ། གསལ་ཤིང་ཕྱུང་བ། རིམས་དང་བྲལ་བ། དགེ་སློང་
འཕགས་པ་རྒྱལ་མཚན་རྫོགས་པ་ཞེས་བརྗོད་དོ། །འཇམ་དཔལ་དེ་ལྟ་བུའི་བཟོད་པ་དང་ལྡན་པའི་དགེ་སློང་ནི་འཇིག་རྟེན་ལྷ་དང་བཅས་པའི་སྦྱིན་པའི་གནས་ཡིན་ཏེ། དེ་ལ་ཐོབ་པ་དང་། བཀུར་སྟི་ཐམས་ཅད་ཀྱང་འོས་སོ། །འཇམ་དཔལ་དེ་ལྟ་བས་ན་དགེ་སློང་ཡུལ་གྱི་ཟས་དོན་ཡོད་པར་

བཟའ་བར་འདོད་པ་དང་། བདུད་འདུལ་བར་འདོད་པ་དང་། འཁོར་བ་ལས་འདའ་བར་འདོད་པ་དང་། མྱ་ངན་ལས་འདས་པ་ཐོབ་པར་འདོད་པ་དང་། སྡུག་བསྔལ་ལས་བྲལ་བར་འདོད་པ་དང་། འཇིག་རྟེན་ལྷ་དང་བཅས་པའི་སྦྱིན་པའི་གནས་སུ་འགྱུར་བར་འདོད་པས་ཆོས་
དེ་དག་ལ་དེ་ལྟར་བརྩོན་པར་བྱའོ། །ཆོས་ཀྱི་རྣམ་གྲངས་འདི་བསྟན་པའི་ཚེ། ལྷའི་བུ་སྟོང་ཕྲག་སུམ་ཅུ་རྩ་གཉིས་ཀྱིས་ཆོས་མངོན་པར་རྟོགས་པ་ཐོས་པར་གྱུར་ནས་དེ་དག་གིས་བཅོམ་ལྡན་འདས་དང་། འཇམ་དཔལ་གཞོན་ནུར་གྱུར་པ་ལ་མེ་ཏོག་མན་དཱ་ར་བ་མང་པོས་མངོན་པར་གཏོར་ནས།
འདི་སྐད་ཅེས་སྨྲས་སོ། །བཅོམ་ལྡན་འདས་གང་གིས་ཆུང་ངུ་ན་བསྟན་པ་འདི་རྣ་ལམ་དུ་གྲག་པ་ཙམ་དུ་ཐོས་ཀྱང་དེ་དག་ནི་དེ་བཞིན་གཤེགས་པའི་བསྟན་པ་ལ་ལེགས་པར་རབ་ཏུ་བྱུང་བ་ལགས་ན། གང་གིས་ཐོས་ཏེ་མོས་ཤིང་ཡིད་ཆེས་པར་འགྱུར་བ་དང་། དེ་བཞིན་ཉིད་དུ་ནན་ཏན་དུ་བགྱིད་
པ་ལྟ་སྨོས་ཀྱང་ཅི་འཚལ་ཏེ། བཅོམ་ལྡན་འདས་གང་གིས་བསྟན་པ་འདི་ཐ་ན་རྣ་ལམ་དུ་གྲག་པ་ཙམ་དུ་ཐོས་ཀྱང་དེ་དག་ནི་མངོན་པའི་ང་རྒྱལ་མ་མཆིས་པར་འགྱུར་རོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་
གཤེགས་པས་གཟུངས་ཀྱི་ཚིག་གང་གིས་བྱང་ཆུབ་སེམས་དཔའ་རྣམས་ཐོགས་པ་མ་མཆིས་པའི་སྤོབས་པ་ཐོབ་པར་འགྱུར་ཞིང་། སྒྲ་གང་གིས་ཀྱང་འཇིགས་པར་མི་འགྱུར་བ་དང་། ཆོས་ཐམས་ཅད་སངས་རྒྱས་ཀྱི་ཆོས་དང་། སྦྱོར་བར་འགྱུར་བ་དང་། ཆོས་ཐམས་ཅད་ཚུལ་གཅིག་པར་
རྟོགས་པར་འགྱུར་བ་དེ་ལྟ་བུའི་གཟུངས་ཀྱི་ཚུལ་གྱི་ཚིག་བཀའ་སྩལ་དུ་གསོལ། དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་དེ་བས་ན་ཆོས་ཀྱི་སྒོ་གང་གིས་བྱང་ཆུབ་སེམས་དཔའ་ཆོས་ཐམས་ཅད་
ལ་སྣང་བ་ཐོབ་པར་འགྱུར་ཞིང་། མྱུར་དུ་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་བའི་ཕུར་པའི་ཚིག་དང་། ས་བོན་གྱི་ཚིག་བསྟན་པ་ཞེས་བྱ་བའི་ཆོས་ཀྱི་སྒོ་འདི་ཉོན་ཅིག །འཇམ་དཔལ་ཕུར་པའི་ཚིག་དང་། ས་བོན་གྱི་ཚིག་བསྟན་པ་ཞེས་བྱ་བའི་ཆོས་ཀྱི་སྒོ་དེ་ཡང་གང་ཞེ་ན། འཇམ་

དཔལ་སེམས་ཅན་ཐམས་ཅད་སེམས་གཅིག་པའོ་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་དམིགས་པ་མི་དམིགས་པའི་ཕྱིར་སེམས་
མེད་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་དཔལ་སེམས་ཅན་ཐམས་ཅད་ནི་འགྱུར་བ་གཅིག་གོ་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་
ཆོས་ཐམས་ཅད་ནི་ཆགས་པ་མེད་པར་གཞོལ་བ་སྟེ། ནམ་མཁའ་འགྱུར་བ་ཡིན་པས་དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་དཔལ་སེམས་ཅན་ཐམས་ཅད་ནི་སེམས་ཅན་གཅིག་པའོ་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ས་བོན་གྱི་ཚིག་ཅེས་
བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་སེམས་ཅན་ཐམས་ཅད་ནི་མ་སྐྱེས་ཤིན་ཏུ་མ་སྐྱེས་ཤིང་མིང་མེད་ལ། ལམ་གཅིག་པ་དམིགས་སུ་མེད་པས་གཅིག་ཏུ་བསྟན་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་དཔལ་འདོད་ཆགས་ཞེས་བྱ་བ་འདི་ནི་ཕུར་པའི་
ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ཕུར་པའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདོད་ཆགས་ནི་མི་གནས་པའི་ཚུལ་གྱི་ཆོས་ཀྱི་དབྱིངས་ལ་གནས་པ་སྟེ། མི་གཡོ་མི་འགུལ་ཞིང་རང་བཞིན་གྱིས་དབེན་པ་སྟེ། གཡོ་བ་མེད་
པས་དེའི་ཕྱིར་དེ་ནི་ཕུར་པའི་ཚིག་གོ། །འཇམ་དཔལ་ཞེ་སྡང་ཞེས་བྱ་བ་འདི་ནི་རྡོ་རྗེའི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་རྡོ་རྗེའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཞེ་སྡང་ནི་དབྱེར་མེད་པ་སྟེ་འདི་ལྟར་དཔེར་ན། འཇམ་དཔལ་རྡོ་རྗེ་ནི་མི་ཕྱེད་མི་
ཤིགས་པའོ། །འཇམ་དཔལ་དེ་བཞིན་དུ་ཆོས་ཐམས་ཅད་ནི་དངོས་པོ་མ་གྲུབ་པའི་ཕྱིར། གཞིག་ཏུ་མེད་ཅིང་དབྱེར་མེད་པ་སྟེ། དེའི་ཕྱིར་འདི་ནི་རྡོ་རྗེའི་ཚིག་གོ། །འཇམ་དཔལ་གཏི་མུག་ཅེས་བྱ་བ་འདི་ནི་ཡེ་ཤེས་ཀྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ཡེ་ཤེས་ཀྱི་ཚིག་ཅེས་

བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་ཡེ་ཤེས་ཀྱིས་གྲུབ་ཅིང་མི་ཤེས་པ་དང་བྲལ་བ་སྟེ། འདི་ལྟར་དཔེར་ན། འཇམ་དཔལ་ནམ་མཁའ་ནི་ཤེས་པ་དང་ལྡན་པ་ཡང་མ་ཡིན། མི་ཤེས་པ་དང་ལྡན་པ་ཡང་མ་ཡིན་ནོ། །འཇམ་
དཔལ་དེ་བཞིན་དུ་ཆོས་ཐམས་ཅད་ནི་ཤེས་པ་དང་ལྡན་པ་ཡང་མ་ཡིན། མི་ཤེས་པ་དང་ལྡན་པ་ཡང་མ་ཡིན། ཤེས་པར་བྱ་བའི་རང་བཞིན་ཤིན་ཏུ་ཞི་བའི་ཕྱིར་ཤེས་པ་ཡང་མ་ཡིན། མི་ཤེས་པ་ཡང་མ་ཡིན་ཏེ་དེའི་ཕྱིར་ཡེ་ཤེས་ཀྱི་ཚིག་ཅེས་བྱའོ། །འཇམ་དཔལ་གཟུགས་ཞེས་བྱ་བ་
འདི་ནི་ཕུར་པའི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ཕུར་པའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ལྟ་སྟེ་དཔེར་ན། དབང་པོའི་ཕུར་པ་ནི་རབ་ཏུ་གནས་པའི་ཕྱིར་མི་གཡོ་མི་འགུལ་ལོ། །འཇམ་དཔལ་དེ་བཞིན་དུ་ཆོས་
ཐམས་ཅད་མི་གནས་པའི་ཚུལ་གྱིས་ཆོས་ཀྱི་དབྱིངས་ལ་གནས་པ་ནི་འགྲོ་བ་དང་འོང་བ་མེད་དེ། བླང་དུ་མེད་ཅིང་རྩོལ་བ་མེད་ལ་ཤིན་ཏུ་བརྟན་པའི་ཕྱིར་མི་གནས་པ་སྟེ། དེའི་ཕྱིར་དེ་ནི་ཕུར་པའི་ཚིག་གོ། །འཇམ་དཔལ་ཚོར་བ་ཞེས་བྱ་བ་འདི་ནི་ཞི་བའི་ཚིག་གོ། །གསོལ་པ། བཅོམ་
ལྡན་འདས་ཅིའི་སླད་དུ་དེ་ཞི་བའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་རང་བཞིན་གྱིས་ཤིན་ཏུ་ཞི་བ་སྟེ། ཚོར་བ་ནི་ནང་ན་ཡང་མེད། ཕྱི་རོལ་ན་ཡང་མེད། ཤར་ཕྱོགས་ན་ཡང་མེད། ལྷོ་ཕྱོགས་ན་ཡང་མེད། ནུབ་
ཕྱོགས་ན་ཡང་མེད། བྱང་ཕྱོགས་ན་ཡང་མེད། སྟེང་ན་ཡང་མེད། འོག་ན་ཡང་མེད། ཕྱོགས་མཚམས་རྣམས་ན་ཡང་མེད་དོ། །འཇམ་དཔལ་གལ་ཏེ་བདེ་བའི་ཚོར་བ་ནང་ན་ཡོད་ན་ནི། སེམས་ཅན་ཐམས་ཅད་ཀྱང་བདེ་བས་ཤིན་ཏུ་བདེ་བར་འགྱུར་རོ། །འཇམ་དཔལ་འོན་ཏམ་གལ་
ཏེ་སྡུག་བསྔལ་གྱི་ཚོར་བ་ནང་ན་ཡོད་ན་ནི། སེམས་ཅན་ཐམས་ཅད་ཀྱང་སྡུག་བསྔལ་གྱིས་ཤིན་ཏུ་སྡུག་བསྔལ་བར་འགྱུར་རོ། །འཇམ་དཔལ་གལ་ཏེ་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པའི་ཚོར་བ་ནང་ན་ཡོད་ན་ནི་སེམས་ཅན་ཐམས་ཅད་ཀྱང་ཤིན་ཏུ་རྨོངས་པར་འགྱུར་རོ། །

འཇམ་དཔལ་གང་གི་ཕྱིར་ཚོར་བ་ཐམས་ཅད་ནི་ནང་ན་ཡང་མེད། ཕྱི་རོལ་ན་ཡང་མེད། ཤར་ཕྱོགས་ན་ཡང་མེད། ལྷོ་ཕྱོགས་ན་ཡང་མེད། ནུབ་ཕྱོགས་ན་ཡང་མེད། བྱང་ཕྱོགས་ན་ཡང་མེད། སྟེང་ན་ཡང་མེད། འོག་ན་ཡང་མེད། ཕྱོགས་མཚམས་རྣམས་ན་ཡང་མེད་པས། དེའི་
ཕྱིར་སེམས་ཅན་ཐམས་ཅད་ནི་རྩྭ་ཤིང་དང་། རྩིག་པ་ལྟ་བུ་སྟེ། རང་བཞིན་གྱིས་མ་སྐྱེས་ཤིང་འགག་པ་མེད་པར་མཚན་ཉིད་མཉམ་པ་སྟེ། དེའི་ཕྱིར་དེ་ནི་ཞི་བའི་ཚིག་གོ། །འཇམ་དཔལ་འདུ་ཤེས་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་
ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདུ་ཤེས་དེ་ཡོངས་སུ་བརྟགས་པ་ལས་བྱུང་བ་སྟེ། ལོག་པ་ལས་བྱུང་བ། ཆད་བ་སྟོང་པ་ལྟ་བུ། སྨིག་རྒྱུའི་ངོ་བོ་ཉིད་རང་བཞིན་གྱིས་དབེན་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་
དཔལ་འདུ་བྱེད་ཅེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་བགྲང་དུ་མེད་ཅིང་། བགྲང་བ་མཉམ་པ་ཉིད་དང་ལྡན་པ། ཆུ་ཤིང་གི་སྙིང་
པོ་ལྟ་བུ་སྟེ། འཇམ་དཔལ་འདི་ལྟར་དཔེར་ན། ཆུ་ཤིང་གི་སྙིང་པོ་ནི་རང་བཞིན་གྱིས་མ་སྐྱེས་པའི་ཕྱིར་ཤིན་ཏུ་མེད་ཅིང་མི་དམིགས་སོ། །འཇམ་དཔལ་དེ་བཞིན་དུ་ཆོས་ཐམས་ཅད་ནི་རང་བཞིན་གྱིས་དབེན་ཞིང་མིང་མེད་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་དཔལ་རྣམ་པར་ཤེས་
པ་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་རྣམ་པར་ཤེས་པ་ནི་སྒྱུ་མ་ལྟ་བུ་སྟེ། མ་སྐྱེས་པ། མ་བྱུང་བ། སྟོང་པ། མཚན་མ་མེད་པ། ངོ་བོ་ཉིད་མེད་པ། མཚན་
ཉིད་མེད་པ། ནམ་མཁའ་དང་སོར་མོ་ལྔ་ལྟ་བུ་མིང་མེད་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་དཔལ་གཟུགས་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ། དེ་ནི་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ།

འདི་ལྟ་སྟེ་དཔེར་ན། མིག་ཡོར་ནི་སྣང་བ་ལ་ཡོད་པ་མ་ཡིན་ནོ། །འཇམ་དཔལ་དེ་བཞིན་དུ་ཆོས་ཐམས་ཅད་ནི་སྣང་བ་ལ་ཡོད་པ་མ་ཡིན་ཏེ། མིག་སླུ་བ། སེམས་སླུ་བ། གསོག །གསོབ། བརྫུན་པ། སྒྱུ་མའི་ཆོས་ཅན་ཏེ། དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་
དཔལ་སྒྲ་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་ཐ་དད་དུ་བྱར་མེད་ཅིང་གཉིས་སུ་མེད་པ་སྟེ། རིའི་སྒྲའི་ཚིག་གི་ལམ་བྲག་ཅ་དང་འདྲ་བ་སྟེ།
དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་དཔལ་དྲི་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་སྣ་དང་དྲི་དང་། རྣམ་པར་ཤེས་པ་མི་དམིགས་པའི་
ཕྱིར་མནམ་དུ་མེད་ཅིང་རང་བཞིན་གྱིས་བླུན་ལ། ནམ་མཁའ་དང་འདྲ་བ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་དཔལ་རོ་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་
པ། འཇམ་དཔལ་ཆོས་ཐམས་ཅད་ནི་རང་བཞིན་དང་། ངོ་བོ་ཉིད་ཀྱིས་དབེན་པའི་ཕྱིར་བསམ་གྱིས་མི་ཁྱབ་ཅིང་རོའི་ཁམས་མི་དམིགས་པས་རོ་དམིགས་སུ་མེད་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་དཔལ་རེག་ཅེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ།
བཅོམ་ལྡན་འདས་ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་ནམ་མཁའ་ལྟར་དབེན་པ་དང་། ལུས་ཤིན་ཏུ་བསྒོམ་པ་དང་། རེག་བྱ་འབྱུང་བ་མེད་པ་དང་། རེག་པ་དབེན་པའི་ཕྱིར་རེག་པ་མེད་པ་སྟེ།
དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་དཔལ་ས་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་སེམས་དང་བྲལ་བ། སེམས་མེད་པ།

ངོ་བོ་ཉིད་མེད་པ། ཡོངས་སུ་མ་གྲུབ་པ། མིང་དང་བྲལ་བ། མཚན་ཉིད་ཀྱིས་དབེན་པ། ཆོས་ཀྱི་དབྱིངས་ཀྱི་རང་བཞིན་ཏེ། དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་དཔལ་ཆུ་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ས་བོན་གྱི་ཚིག་ཅེས་
བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་ཆུ་མེད་པ་སྟེ། མ་འདྲེས་ཤིང་རླན་མེད་པ། སྨིག་རྒྱུའི་ཆུ་ལྟ་བུ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་དཔལ་མེ་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་
སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་ཚ་བ་མེད་པ་སྟེ། ཡོངས་སུ་གདུང་བ་དང་བྲལ་བ། རང་བཞིན་གྱིས་མེད་པ། ངོ་བོ་ཉིད་ཀྱིས་ཞི་བ། ཕྱིན་ཅི་ལོག་གིས་ཡོངས་སུ་བརྟགས་པ་ཤིན་ཏུ་མ་སྐྱེས་པ་སྟེ། དེའི་ཕྱིར་
དེ་ནི་ས་བོན་གྱི་ཚིག་གོ། །འཇམ་དཔལ་རླུང་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་གཡོ་བ་དང་ཡང་དག་པར་བྲལ་བའི་ཕྱིར་ཆགས་པ་མེད་
ཅིང་སྒྲིབ་པ་མེད་པ་སྟེ། རླུང་གི་ལམ་ལས་ཡང་དག་པར་འདས་ཤིང་མཚན་ཉིད་མེད་ལ་ངོ་བོ་ཉིད་མེད་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་དཔལ་སངས་རྒྱས་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་
ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་འཚང་རྒྱ་བར་བྱེད་པ་མེད་པ་སྟེ། སངས་རྒྱས་པ་མེད། རྗེས་སུ་སངས་རྒྱས་པ་མེད། རྫོགས་པར་སངས་རྒྱས་པ་མེད། འཚང་རྒྱ་བར་ཉེ་བ་དང་བྲལ་བ། འཚང་རྒྱ་བར་བྱེད་པས་དབེན་པ་སྟེ། དེའི་ཕྱིར་དེ་ནི་ས་བོན་གྱི་
ཚིག་གོ། །འཇམ་དཔལ་ཆོས་ཞེས་བྱ་བ་འདི་ནི་ས་བོན་གྱི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ས་བོན་གྱི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་དབྱེར་མེད་ཅིང་བཅད་དུ་མེད་པ་སྟེ། གཅད་པ་དང་བྲལ་བ་འཆད་

པས་དབེན་པ། མིང་མེད་པ། མཚན་མ་མེད་པ། མཚན་ཉིད་མེད་པ། ངོ་བོ་ཉིད་མེད་པ་ཚིག་གི་ལམ་ལས་ཡང་དག་པར་འདས་པ་སྟེ། དེའི་ཕྱིར་དེ་ནི་ས་བོན་གྱི་ཚིག་གོ། །འཇམ་དཔལ་དགེ་འདུན་ཞེས་བྱ་བ་འདི་ནི་ཕུར་པའི་ཚིག་གོ། །གསོལ་པ། བཅོམ་ལྡན་འདས་
ཅིའི་སླད་དུ་དེ་ཕུར་པའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འཕགས་པའི་དགེ་འདུན་ནི་ཆོས་ཉིད་ལ་ཤིན་ཏུ་གནས་པ། ཆོས་ཀྱི་དབྱིངས་དང་། ཡང་དག་པའི་མཐའ་དང་། ཚུལ་ཁྲིམས་དང་། ཚུལ་ཁྲིམས་འཆལ་པ་མཉམ་པ་ཉིད་དང་། ཏིང་
ངེ་འཛིན་དང་། འཁྲུགས་པ་མཉམ་པ་ཉིད་དང་། ཤེས་རབ་དང་། ཤེས་རབ་འཆལ་པ་མཉམ་པ་ཉིད་དང་། རྣམ་པར་གྲོལ་བ་དང་། ཀུན་ནས་ཉོན་མོངས་པ་མཉམ་པ་ཉིད་ལ་ཤིན་ཏུ་གནས་ཤིང་། གནས་དང་། གནས་མ་ཡིན་པ་མི་དམིགས་པའི་ཕྱིར་ཆོས་ཐམས་ཅད་ལ་རབ་ཏུ་
གནས་པས། དེའི་ཕྱིར་དེ་ནི་ཕུར་པའི་ཚིག་གོ། །འཇམ་དཔལ་ཆོས་ཐམས་ཅད་ཡུལ་མ་ཡིན་ནོ་ཞེས་བྱ་བ་འདི་ནི་ཕུར་པའི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ཕུར་པའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་
ཅད་ནི་ནམ་མཁའི་ཡུལ་བསམ་གྱིས་མི་ཁྱབ་པའི་ཡུལ། ཡུལ་མེད་པ། ཡུལ་ཡང་དག་པར་ཆད་པ། དངོས་པོ་མེད་པ། ཆད་པ་དང་བྲལ་བའི་ཕྱིར་དབང་དང་བྲལ་བ་སྟེ། དེའི་ཕྱིར་དེ་ནི་ཕུར་པའི་ཚིག་གོ། །འཇམ་དཔལ་ཆོས་ཐམས་ཅད་དམིགས་པ་མེད་དོ་ཞེས་བྱ་བ་འདི་ནི་
ཕུར་པའི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ཕུར་པའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་གནས་པ་མེད་ཅིང་རྟེན་པ་ཡང་མེད་པ་སྟེ། དེ་དག་ནི་དམིགས་པས་དབེན་པའི་ཕྱིར་མི་དམིགས། རྣམ་པར་
མི་དམིགས། མི་སྦྱོར་རྣམ་པར་མི་སྦྱོར་ཡོངས་སུ་མི་སྦྱོར་བ་སྟེ། དེའི་ཕྱིར་དེ་ནི་ཕུར་པའི་ཚིག་གོ། །འཇམ་དཔལ་ཆོས་ཐམས་ཅད་ནི་ལེན་པ་མེད་དོ་ཞེས་བྱ་བ་འདི་ནི་ཕུར་པའི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ཕུར་པའི་ཚིག་ཅེས་བགྱི། བཅོམ་ལྡན་འདས་ཀྱིས་

བཀའ་སྩལ་པ། འཇམ་དཔལ་ཆོས་ཐམས་ཅད་ནི་ཆོས་ཀྱི་དབྱིངས་ལ་ཡང་དག་པར་ཞེན་པ་སྟེ། དེ་དག་ནི་མི་འདོར། མི་ལེན་མི་ཚོལ། མི་སྨོན་ཅིང་སྨོན་པ་ཡང་དག་པར་ཆད་པ། རང་བཞིན་གྱིས་རྣམ་པར་ཞི་བ། ནམ་མཁའ་དང་མཉམ་ཞིང་འདྲ་བ་སྟེ། དེའི་ཕྱིར་དེ་ནི་ཕུར་པའི་ཚིག་གོ །
འཇམ་དཔལ་ཆོས་ཐམས་ཅད་ནི་ཉོན་མོངས་པ་མེད་ཅེས་བྱ་བ་འདི་ནི་ཕུར་པའི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ཕུར་པའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་དྲི་མ་མེད་པ་སྟེ། ཅིའང་མ་ཡིན་པ། དག་པ་
འོད་གསལ་བ་སྟེ། ནམ་མཁའ་ཡོངས་སུ་དག་པའི་ཕྱིར་ཤིན་ཏུ་དག་པ། ཉོན་མོངས་པ་མི་དམིགས་པའི་ཕྱིར་ཉོན་མོངས་པ་མེད་པ་སྟེ། དེའི་ཕྱིར་དེ་ནི་ཕུར་པའི་ཚིག་གོ། །འཇམ་དཔལ་ཆོས་ཐམས་ཅད་གཞི་མེད་པ་ཞེས་བྱ་བ་འདི་ནི་ཕུར་པའི་ཚིག་གོ། །གསོལ་པ། བཅོམ་ལྡན་
འདས་ཅིའི་སླད་དུ་དེ་ཕུར་པའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་དངོས་པོ་མེད་ཅིང་དབང་དང་བྲལ་བས་དེ་དག་ལ་ཀུན་གཞི་མེད་པ་སྟེ། དེའི་ཕྱིར་དེ་ནི་ཕུར་པའི་ཚིག་གོ། །འཇམ་དཔལ་ཆོས་ཐམས་ཅད་ནི་བསླབ་པ་མེད་ཅེས་བྱ་བ་
འདི་ནི་ཕུར་པའི་ཚིག་གོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ཕུར་པའི་ཚིག་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ནི་བསླབ་པ་དང་བྲལ་བ་སྟེ། དེ་དག་ནི་བསླབ་པར་བྱ་བ་མ་ཡིན། བསྒོམ་པར་བྱ་བ་མ་ཡིན། བསམ་པར་
བྱ་བ་མ་ཡིན། ཡིད་ལ་བྱ་བ་མ་ཡིན། གནས་པར་བྱ་བ་མ་ཡིན། འགྲོ་བར་བྱ་བ་མ་ཡིན། ནན་ཏན་དུ་བྱ་བ་མ་ཡིན། ལོག་པའི་ནན་ཏན་དུ་བྱ་བ་མ་ཡིན། སྤང་བར་བྱ་བ་མ་ཡིན། མངོན་དུ་བྱ་བ་མ་ཡིན། བཤགས་པར་བྱ་བ་མ་ཡིན། རབ་ཏུ་བཤགས་པར་བྱ་བ་མ་ཡིན།
དགོད་པར་བྱ་བ་མ་ཡིན། དགྲོལ་བར་བྱ་བ་མ་ཡིན། བརྗོད་པར་བྱ་བ་མ་ཡིན། སྨོས་པར་བྱ་བ་མ་ཡིན། གཟུང་བར་བྱ་བ་མ་ཡིན། གཏང་བར་བྱ་བ་མ་ཡིན། རབ་ཏུ་གཏང་བར་བྱ་བ་མ་ཡིན། ཡོངས་སུ་གཏང་བར་བྱ་བ་མ་ཡིན་ཏེ། དེ་ཅིའི་ཕྱིར་ཞེ་ན། འཇམ་དཔལ་ཆོས་ཐམས་

ཅད་ནི་ཤིན་ཏུ་བཏང་བ། རང་བཞིན་གྱིས་མ་བཟུང་བ། རྟག་པར་བཏང་བ་སྟེ། དེ་དག་ནི་ཤེས་པས་ཁོང་དུ་ཆུད་པར་བྱ་བ་མ་ཡིན། མི་ཤེས་པས་ཁོང་དུ་ཆུད་པར་བྱ་བ་ཡང་མ་ཡིན་ཏེ། དེའི་ཕྱིར་དེ་ནི་ཕུར་པའི་ཚིག་གོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་
ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཕུར་པའི་ཚིག་ལས་བརྩམས་ཏེ། བདག་ཀྱང་སྤོབས་པ་སྐྱེའོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཀྱིས་སྤོབས་པ་སྐྱེད་ཅིག །འཇམ་དཔལ་གྱིས་གསོལ་པ། བཅོམ་ལྡན་འདས་སེམས་ཅན་ཐམས་
ཅད་བྱང་ཆུབ་ཐོབ་པའོ་ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ། འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་ཆོས་ཐམས་ཅད་ནི་ཐོབ་པ་མ་མཆིས་པ། ཡང་དག་པར་ཐོབ་པ་མ་མཆིས་པ། རྗེས་སུ་ཐོབ་པ་མ་མཆིས་
པ། ཐོབ་པར་བགྱི་བ་དང་བྲལ་བ། རྟོགས་པར་བགྱི་བ་མ་མཆིས་པ། མངོན་པར་རྟོགས་པར་བགྱི་བ་མ་མཆིས་པ་སྟེ། བཅོམ་ལྡན་འདས་དེའི་སླད་དུ་དེ་ནི་ཕུར་པའི་ཚིག་གོ། །བཅོམ་ལྡན་འདས་སེམས་ཅན་ཐམས་ཅད་ཐམས་ཅད་མཁྱེན་པ་ཉིད་ཐོབ་པའོ་ཞེས་བགྱི་བ་འདི་ནི་ཕུར་པའི་
ཚིག་གོ། །བཀའ་སྩལ་པ། འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་སེམས་ཅན་རྣམས་ནི་ཐམས་ཅད་ཀྱི་ཐམས་ཅད་དུ་མ་མཆིས་ལ་ཐམས་ཅད་མཁྱེན་པ་ཉིད་ཀྱང་དངོས་པོ་མ་མཆིས་པའི་རྗེས་སུ་འབྲང་བ་སྟེ། དེའི་སླད་
དུ་ཐམས་ཅད་མཁྱེན་པ་ཉིད་ཐོབ་པའོ་ཞེས་བགྱི་སྟེ། བཅོམ་ལྡན་འདས་ཐམས་ཅད་མཁྱེན་པ་ཉིད་ནི་སུ་ལ་ཡང་ཐོབ་པར་བགྱི་བའི་ཚུལ་གྱིས་ཉེ་བར་གནས་པ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཐམས་ཅད་མཁྱེན་པ་ཉིད་ནི་སེམས་ཅན་གྱི་རང་བཞིན་ཏེ། དེའི་སླད་དུ་
དེ་ནི་ཕུར་པའི་ཚིག་གོ། །བཅོམ་ལྡན་འདས་སེམས་ཅན་ཐམས་ཅད་ནི་ཐམས་ཅད་མཁྱེན་པའི་ཡེ་ཤེས་དང་ལྡན་ནོ་ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ། འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་

སེམས་ཅན་ཐམས་ཅད་ནི་ངོ་བོ་ཉིད་མ་མཆིས་ཤིང་ངོ་བོ་ཉིད་དང་བྲལ་བ་སྟེ། ངོ་བོ་ཉིད་གཅིག་པའི་མཚན་ཉིད་པས། དེ་བཞིན་གཤེགས་པ་དང་མཉམ་པ་ཉིད་ཀྱི་རྗེས་སུ་མཆིས་པ། ཐམས་ཅད་མཁྱེན་པའི་ཡེ་ཤེས་ཀྱི་རང་བཞིན་ཅན་ཏེ། དེའི་སླད་དུ་དེ་ནི་ཕུར་པའི་ཚིག་གོ། །བཅོམ་
ལྡན་འདས་སེམས་ཅན་ཐམས་ཅད་བྱང་ཆུབ་ཀྱི་སྙིང་པོ་ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ། འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་བྱང་ཆུབ་ཀྱི་སྙིང་པོ་ཞེས་བགྱི་བའི་ཚིག་གི་དོན་ཅི་ལགས། བཅོམ་
ལྡན་འདས་ཀྱིས་བཀའ་སྩལ་པ། འཇམ་དཔལ་བྱང་ཆུབ་ཀྱི་སྙིང་པོ་ཞེས་བྱ་བ་ནི་ཆོས་ཐམས་ཅད་ཞི་བའི་སྙིང་པོའོ། །ཆོས་ཐམས་ཅད་སྐྱེ་བ་མེད་པའི་སྙིང་པོའོ། །ཆོས་ཐམས་ཅད་དངོས་པོ་མེད་པའི་སྙིང་པོའོ། །ཆོས་ཐམས་ཅད་གཟུང་དུ་མེད་པའི་སྙིང་པོའོ། །ཆོས་ཐམས་ཅད་ངོ་བོ་ཉིད་
མེད་པའི་སྙིང་པོ་སྟེ། འཇམ་དཔལ་དེ་ནི་བྱང་ཆུབ་ཀྱི་སྙིང་པོའི་ཚིག་གི་དོན་ཏོ། །གསོལ་པ། བཅོམ་ལྡན་འདས་འོ་ན་སེམས་ཅན་ཐམས་ཅད་སྙིང་པོ་དེ་དང་རྟག་པར་ལྡན་པ་མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ནོ། །གསོལ་པ། བཅོམ་
ལྡན་འདས་དེ་ལྟར་རྣམ་གྲངས་དེས་ཀྱང་སེམས་ཅན་ཐམས་ཅད་ནི་བྱང་ཆུབ་ཀྱི་སྙིང་པོ་སྟེ། དེའི་སླད་དུ་དེ་ནི་ཕུར་པའི་ཚིག་གོ། །བཅོམ་ལྡན་འདས་སེམས་ཅན་ཐམས་ཅད་བཟོད་པ་ཐོབ་བོ་ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ། འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་
བྱ། འཇམ་དཔལ་གྱིས་གསོལ་པ། བཅོམ་ལྡན་འདས་སེམས་ཅན་ཐམས་ཅད་ནི་མི་ཟད་པའི་ཆོས་དང་མི་འགྲིབ་པའི་ཆོས་དང་། མི་སྐྱེ་བའི་ཆོས་ཅན་ཏེ། མིང་གི་མཚན་ཉིད་ཀྱིས་དབེན་པའི་བཟོད་པ་མཉམ་པ་ཉིད་ཀྱི་རྗེས་སུ་མཆིས་པས་དེའི་སླད་དུ་དེ་ནི་ཕུར་པའི་ཚིག་གོ། །བཅོམ་
ལྡན་འདས་སེམས་ཅན་ཐམས་ཅད་ཐོགས་པ་མེད་པའི་སྤོབས་པ་ཅན་ནོ་ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ། འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་སེམས་ཅན་ཐམས་ཅད་ཀྱིས་གང་ཅི་འང་རུང་སྟེ། གང་

དང་གང་སྤོབས་པར་གྱུར་པ་དེ་དང་དེ་ནི་ཕྱོགས་བཅུ་ཀུན་ལ་འང་མ་མཆིས་ཏེ། བཅོམ་ལྡན་འདས་སེམས་ཅན་ཐམས་ཅད་སྒྲིབ་པ་མ་མཆིས་པ་མཉམ་པ་ཉིད་ཀྱི་རྗེས་སུ་མཆིས་ཤིང་དབེན་ལ་རང་གི་མཚན་ཉིད་ལ་གནས་པས་དེ་ལྟར་དེ་དག་མ་མཆིས་པ་ལགས་ཏེ། བཅོམ་
ལྡན་འདས་རྣམ་གྲངས་དེའི་སླད་དུ་དེ་ནི་ཕུར་པའི་ཚིག་གོ །བཅོམ་ལྡན་འདས་སེམས་ཅན་ཐམས་ཅད་གཟུངས་ཐོབ་བོ་ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ། འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་
སེམས་ཅན་ཐམས་ཅད་ནི་སེམས་ཅན་གྱི་འདུ་ཤེས་ཅན་ཏེ། ཡང་དག་པ་མ་ལགས་པར་ཡོངས་སུ་བརྟགས་པའི་ཕྱིན་ཅི་ལོག་གི་རྟོག་པས་མཚན་མར་འཛིན་པའི་སླད་དུ། གཟུགས་དང་། སྒྲ་དང་། དྲི་དང་། རོ་དང་། རེག་རྣམས་འཛིན་པས་དེའི་སླད་དུ་དེ་ནི་ཕུར་པའི་ཚིག་གོ། །
བཅོམ་ལྡན་འདས་སེམས་ཅན་ཐམས་ཅད་བྱམས་པའི་སེམས་དང་ལྡན་ནོ་ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ། འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་སེམས་ཅན་ཐམས་ཅད་ནི་སེམས་ཅན་མ་མཆིས་པ་
སྟེ། རང་བཞིན་གྱིས་གནོད་སེམས་མ་མཆིས་ཤིང་། གནོད་སེམས་དང་བྱམས་པ་རྟག་ཏུ་མ་མཆིས་པ་མཉམ་པ་ཉིད་ཐོབ་པས་དེའི་སླད་དུ་དེ་ནི་ཕུར་པའི་ཚིག་གོ། །བཅོམ་ལྡན་འདས་སེམས་ཅན་ཐམས་ཅད་སྙིང་རྗེ་ཆེན་པོ་དང་ལྡན་ནོ་ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ།
འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་སེམས་ཅན་ཐམས་ཅད་ནི་མ་བཅོས་མ་བགྱིས་པའི་སྙིང་རྗེ་ཅན་ཏེ། དེ་བཞིན་གཤེགས་པའི་མཉམ་པ་ཉིད་ལས་མ་འདས་པ་སྙིང་རྗེ་ཆེན་པོའི་ངོ་བོ་ཉིད་དང་ལྡན་པས། དེའི་སླད་དུ་དེ་ནི་
ཕུར་པའི་ཚིག་གོ། །བཅོམ་ལྡན་འདས་སེམས་ཅན་ཐམས་ཅད་ནི་ཏིང་ངེ་འཛིན་དང་ལྡན་ནོ་ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ། འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་སེམས་ཅན་ཐམས་ཅད་ནི་དམིགས་

པས་དབེན་པའི་སླད་དུ་རང་བཞིན་དང་ལྡན་པ་སྟེ། བཅོམ་ལྡན་འདས་དམིགས་པ་གང་གིས་སེམས་ཅན་གང་གི་རྣམ་པར་ཤེས་པ་འབྱུང་བ་དེ་ནི་དམིགས་པ་དེ་ལ་མ་འཁྲུགས་པ་སྟེ། དེ་ཅིའི་སླད་དུ་ཞེ་ན། བཅོམ་ལྡན་འདས་དམིགས་པའི་རྣམ་པར་ཤེས་པ་རྣམས་སྐད་ཅིག་མའི་སླད་དུ་
སྟེ། དེའི་སླད་དུ་དེ་ནི་ཕུར་པའི་ཚིག་གོ། །བཅོམ་ལྡན་འདས་སངས་རྒྱས་ཐམས་ཅད་འདོད་ཆགས་དང་ལྡན་ནོ་ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ། འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་
སངས་རྒྱས་ཐམས་ཅད་ནི་འདོད་ཆགས་དང་ལྡན་པ་སྟེ། འདོད་ཆགས་ཀྱི་ངོ་བོ་ཉིད་དང་ལྡན་ཞིང་རྗེས་སུ་རྟོགས་པས་མཉམ་པ་ཉིད་ལས་མ་འདས་ཏེ། དགྱེས་ཤིང་རབ་ཏུ་དགྱེས་ལ་རྣམ་པར་དགྱེས་ཏེ་ཉོན་མོངས་པ་མི་མངའ་བས་ན། བཅོམ་ལྡན་འདས་འདོད་ཆགས་ཉིད་ནི་བྱང་ཆུབ་སྟེ། དེ་
ཅིའི་སླད་དུ་ཞེ་ན། བཅོམ་ལྡན་འདས་འདོད་ཆགས་ཀྱི་ངོ་བོ་ཉིད་རྗེས་སུ་རྟོགས་པས་བྱང་ཆུབ་ཅེས་བགྱི་སྟེ། དེའི་སླད་དུ་དེ་ནི་ཕུར་པའི་ཚིག་གོ། །བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ནི་ཞེ་སྡང་དང་ལྡན་པའོ་ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ། འཇམ་
དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ནི་ཞེ་སྡང་མཉམ་པ་ཉིད་ལ་བཞུགས་ཤིང་། འདུ་བྱེད་ཐམས་ཅད་ཀྱི་སྐྱོན་ཡང་དག་པར་སྟོན་པ་སྟེ། ཞེ་སྡང་གི་ངོ་བོ་ཉིད་རྗེས་སུ་རྟོགས་པས་ཞེ་སྡང་དང་ལྡན་པ་
ཞེས་བགྱི་སྟེ། དེའི་སླད་དུ་དེ་ནི་ཕུར་པའི་ཚིག་གོ། །བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ནི་གཏི་མུག་དང་ལྡན་ནོ་ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ། འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་
འདས་སངས་རྒྱས་བཅོམ་ལྡན་འདས་རྣམས་ནི་གཏི་མུག་གི་ངོ་བོ་ཉིད་རྗེས་སུ་རྟོགས་པས། གཏི་མུག་མཉམ་པ་ཉིད་ལ་བཞུགས་ཤིང་མིང་ཐམས་ཅད་ལས་འགྲེལ་པ་སྟེ། དེའི་སླད་དུ་དེ་ནི་ཕུར་པའི་ཚིག་གོ། །བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་འཇིག་ཚོགས་དང་ལྡན་ནོ་

ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ། འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ནི་འཇིག་ཚོགས་ལ་བཞུགས་པ་སྟེ། འཇིག་ཚོགས་མི་སྐྱེ་མི་འབྱུང་
བར་ཐུགས་སུ་ཆུད་པས་ཆོས་ཐམས་ཅད་ཀྱིས་རྒྱས་པར་མི་འགྱུར། རྣམ་པར་རྒྱས་པར་མི་འགྱུར། ཡོངས་སུ་རྒྱས་པར་མི་འགྱུར་ཏེ། མི་བཞུགས་པའི་ཚུལ་གྱིས་བཞུགས་པས་དེའི་སླད་དུ་དེ་ནི་ཕུར་པའི་ཚིག་གོ། །བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ལོག་པར་
ལྟ་བ་དང་ལྡན་ནོ་ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ། འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ནི་འདུས་བྱས་ལོག་པར་ཡང་དག་པར་སྟོན་ཅིང་། འདུས་བྱས་ཡང་དག་
པ་མ་ལགས་པར་ཡང་དག་པར་སྟོན། འདུས་བྱས་ནོར་བར་ཡང་དག་པར་སྟོན་པ་སྟེ། ལོག་པར་ལྟ་བའི་ངོ་བོ་ཉིད་མཚན་ཉིད་ཀྱིས་མཉམ་པ་ཉིད་ཐུགས་སུ་ཆུད་པས། འདུས་བྱས་ཐམས་ཅད་གསོབ་གསོག་སྟེ། བརྫུན་པ་སླུ་བའི་ཆོས་ཅན་དུ་སྟོན་པ་མཛད་པས། དེའི་སླད་དུ་དེ་ནི་ཕུར་པའི་ཚིག་གོ། །
བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ཀྱིས་ཕྱིན་ཅི་ལོག་ལ་གནས་ཏེ། བྱང་ཆུབ་བརྙེས་སོ་ཞེས་བགྱི་བ་དང་། སངས་རྒྱས་བཅོམ་ལྡན་འདས་རྣམས་ཀྱིས་སྒྲིབ་པ་ལ་གནས་འདོད་པའི་ཡོན་ཏན་ལྔ་ལ་གནས། འདོད་ཆགས་ལ་གནས། ཞེ་སྡང་ལ་གནས། གཏི་མུག་ལ་
གནས་ཏེ་བྱང་ཆུབ་བརྙེས་སོ་ཞེས་བགྱི་བ་འདི་ནི་ཕུར་པའི་ཚིག་གོ། །བཀའ་སྩལ་པ། འཇམ་དཔལ་ཅིའི་ཕྱིར་དེ་ཕུར་པའི་ཚིག་ཅེས་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་གནས་ཞེས་བགྱི་བ་འདི་ནི་ལོག་པར་གནས་པའི་ཚིག་གོ། །བཅོམ་ལྡན་འདས་ཀྱིས་བཀའ་སྩལ་པ།
འཇམ་དཔལ་ལོག་པར་གནས་པ་ཞེས་བྱ་བའི་ཚིག་གི་དོན་ཅི། འཇམ་དཔལ་གྱིས་གསོལ་པ། བཅོམ་ལྡན་འདས་ལོག་པར་གནས་པ་སྨད་པར་གནས་པ། གཡོ་བ་རབ་ཏུ་གཡོ་བ་ཞེས་བགྱི་བ་འདི་ནི། སོ་སོའི་སྐྱེ་བོ་རྣམས་ཀྱི་ཚིག་བླ་དགས་ཏེ། སངས་རྒྱས་བཅོམ་ལྡན་འདས་རྣམས་

ནི་འདོད་ཆགས་མཉམ་པ་ཉིད་དང་། ཞེ་སྡང་མཉམ་པ་ཉིད་དང་། གཏི་མུག་མཉམ་པ་ཉིད་དང་། འདོད་པའི་ཡོན་ཏན་ལྔ་མཉམ་པ་ཉིད་དང་། སྒྲིབ་པ་མཉམ་པ་ཉིད་དང་། ཕྱིན་ཅི་ལོག་མཉམ་པ་ཉིད་ལ་ཡང་དག་པར་བཞུགས་ཤིང་ལེགས་པར་བཞུགས་པ་སྟེ། དེ་དག་ནི་འདོད་
ཆགས་ཀྱི་ངོ་བོ་ཉིད་ཀྱི་གནས་ན་བཞུགས་བཞིན་དུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱའོ། །ཞེ་སྡང་གི་ངོ་བོ་ཉིད་ཀྱི་གནས་ན་བཞུགས། གཏི་མུག་གི་ངོ་བོ་ཉིད་ཀྱི་གནས་ན་བཞུགས། འདོད་པའི་ཡོན་ཏན་ལྔའི་ངོ་བོ་ཉིད་ཀྱི་གནས་ན་
བཞུགས། སྒྲིབ་པའི་ངོ་བོ་ཉིད་ཀྱི་གནས་ན་བཞུགས། ཕྱིན་ཅི་ལོག་གི་ངོ་བོ་ཉིད་ཀྱི་གནས་ན་བཞུགས་བཞིན་དུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་
ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་ལ་གལ་ཏེ་ལ་ལ་ཞིག་གིས་འདི་སྐད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་མི་དགེ་བའི་ཆོས་ཐམས་ཅད་སྤངས་པ། དགེ་བའི་ཆོས་ཐམས་ཅད་དང་ལྡན་པའོ་ཞེས་ཟེར་ཞིང་དེ་སྐད་ཅེས་འདྲི་ན།
ལན་ཅི་སྐད་ཅེས་གདབ། གསོལ་པ། བཅོམ་ལྡན་འདས་གལ་ཏེ་ལ་ལ་ཞིག་གིས་བདག་ལ་དེ་སྐད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་མི་དགེ་བའི་ཆོས་ཐམས་ཅད་སྤངས་པ། དགེ་བའི་ཆོས་ཐམས་ཅད་དང་ལྡན་པའོ་ཞེས་མཆི་ན། བཅོམ་
ལྡན་འདས་དེ་སྐད་ཅེས་འདྲི་བ་དེ་ལ་བདག་གིས་འདི་སྐད་བགྱི་སྟེ། རེ་ཤིག་དགེ་བའི་བཤེས་གཉེན་དག་ལ་རིམ་གྲོ་གྱིས་ཤིག །རྣལ་འབྱོར་ལ་བརྩོན་པར་གྱིས་ཤིག །ཆོས་གང་ལ་ཡང་སྦྱར་བ་དང་། དབྱེ་བ་མ་བྱེད་ཅིག །གཟུང་བ་དང་། གཏང་བར་མ་བྱེད་ཅིག །དམིགས་པ་དང་། རྣམ་པར་དམིགས་
པར་མ་བྱེད་ཅིག །བཏང་སྙོམས་དང་། སྤོང་བར་མ་བྱེད་ཅིག །ཚོལ་བ་དང་། སྨོན་པར་མ་བྱེད་ཅིག །ཆོས་གང་ལ་ཡང་རབ་ཅེའམ། ཐ་མ་ཞེའམ། མཆོག་ཅེས་བྱ་བར་ཡང་དག་པར་རྗེས་སུ་མ་ལྟ་ཤིག་དང་། དེའི་འོག་ཏུ་དེ་བཞིན་གཤེགས་པའི་ཡུལ་ཤེས་པར་འགྱུར་རོ། །དེ་བཞིན་གཤེགས་པའི་

ཡུལ་ནི་བསམ་གྱིས་མི་ཁྱབ་པ་སྟེ། ཡུལ་དང་བྲལ་ཞིང་ཡུལ་མེད་པ། ཡུལ་ཐམས་ཅད་དང་ཡང་དག་པར་བྲལ་བ། ཆོས་ཡང་དག་པར་ཆད་པའོ་ཞེས་བགྱིའོ། །བཀའ་སྩལ་པ། འཇམ་དཔལ་ཁྱོད་ཀྱིས་དེ་སྐད་ཅེས་ལུང་བསྟན་ན་ཅི་ཞིག་ལུང་བསྟན་པར་འགྱུར། གསོལ་
པ། བཅོམ་ལྡན་འདས་བདག་གིས་དེ་སྐད་ཅེས་ལུང་བསྟན་པས་ཆོས་གང་ཡང་ལུང་བསྟན་པར་གྱུར་པ་མ་མཆིས་སོ། །བཅོམ་ལྡན་འདས་དེ་བཞིན་གཤེགས་པ་བཅོམ་ལྡན་འདས་ཀྱིས་བྱང་ཆུབ་ཀྱི་སྙིང་པོ་ལ་བཞུགས་པའི་ཚེ། ཆོས་ལ་ལའི་སྐྱེ་བའམ་འགག་པ་གང་ཡང་གཟིགས་སམ། བཀའ་
སྩལ་པ། འཇམ་དཔལ་དེ་ནི་མ་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཆོས་གང་མ་སྐྱེས་ཤིང་མ་བྱུང་ལ། དགེ་བའི་ཆོས་དང་ལྡན་པའང་མ་ལགས། མི་དགེ་བའི་ཆོས་དང་ལྡན་པའང་མ་ལགས་པ་དེ་ལ་ཡོངས་སུ་ཤེས་པར་བགྱི་བ་ནི་གང་ཞིག་མཆིས། སྤང་བ་
ནི་ཅི་ཞིག་མཆིས། བསྒོམ་པ་ནི་གང་ཞིག་མཆིས། མངོན་དུ་བགྱི་བ་ནི་གང་ཞིག་མཆིས། མངོན་པར་རྟོགས་པར་བགྱི་བ་ཡང་གང་ཞིག་མཆིས། དེ་ནས་སྟེང་གི་བར་སྣང་ལས་ལྷའི་བུ་སྟོང་ཕྲག་བཅུས། དེ་བཞིན་གཤེགས་པ་དང་། འཇམ་དཔལ་གཞོན་ནུར་གྱུར་པ་ལ་ལྷ་རྫས་
ཀྱི་མེ་ཏོག་ཨུད་པ་ལ་དང་། ཀུ་མུ་ད་དང་། པུན་ད་རཱི་ཀ་དང་། མན་དཱ་ར་བ་དང་། མན་དཱ་ར་བ་ཆེན་པོ་དང་། མཉྫུ་ཤི་ཀ་དང་། མཉྫུ་ཤི་ཀ་ཆེན་པོ་མང་པོས་མངོན་པར་གཏོར། རབ་ཏུ་གཏོར་ནས། བཅོམ་ལྡན་འདས་དང་། འཇམ་དཔལ་གཞོན་ནུར་གྱུར་པའི་ཞབས་ལ་ཕྱག་འཚལ་
ཞིང་འདི་སྐད་ཀྱི་ཚིག་བརྗོད་པར་གྱུར་ཏེ། བཅོམ་ལྡན་འདས་འདི་ནི་ཆགས་པ་མ་མཆིས་པའི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས་འདི་ནི་མི་གཉིས་པའི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས་འདི་ནི་དངོས་པོ་མ་མཆིས་པའི་དཔལ་ཏེ། དེ་ནི་འཇམ་
དཔལ་ལོ། །བཅོམ་ལྡན་འདས་འདི་ནི་ཉོན་མོངས་པ་མ་མཆིས་པའི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས་འདི་ནི་དེ་བཞིན་ཉིད་ཀྱི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས་འདི་ནི་མ་ནོར་བ་དེ་བཞིན་ཉིད་ཀྱི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་

འདས་འདི་ནི་ཆོས་ཀྱི་དབྱིངས་ཀྱི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས་འདི་ནི་ཡང་དག་པའི་མཐའི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས་འདི་ནི་དམ་པའི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས་འདི་ནི་མཆོག་གི་དཔལ་ཏེ། དེ་ནི་
འཇམ་དཔལ་ལོ། །བཅོམ་ལྡན་འདས་འདི་ནི་ཕུལ་གྱི་དཔལ་ཏེ། དེ་ནི་འཇམ་དཔལ་ལོ། །བཅོམ་ལྡན་འདས་འདི་ནི་བླ་ན་མ་མཆིས་པའི་དཔལ་ཏེ། དེ་ནི་འཇམ་དཔལ་ལོ། །དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས་ལྷའི་བུ་དེ་དག་ལ་འདི་སྐད་ཅེས་སྨྲས་སོ། །
ལྷའི་བུ་དག་ཆོག་གིས་བདག་ལ་མ་རྟོག་རྣམ་པར་མ་རྟོག་ཤིག །ཁོ་བོས་ནི་ཆོས་གང་ཡང་དམ་པ་ཞེས་བྱ་བའམ། མཆོག་ཅེས་བྱ་བའམ། ཕུལ་ཞེས་བྱ་བ་དེ་ལྟ་བུ་ཡང་དག་པར་རྗེས་སུ་མ་མཐོང་ངོ་། །ལྷའི་བུ་དག་ཁོ་བོ་ནི་འདོད་ཆགས་ཀྱི་དཔལ་ཏེ། དེའི་ཕྱིར་ཁོ་བོ་འཇམ་དཔལ་ལོ། །
ཁོ་བོ་ནི་ཞེ་སྡང་གི་དཔལ་ཏེ། དེའི་ཕྱིར་ཁོ་བོ་འཇམ་དཔལ་ལོ། །ཁོ་བོ་ནི་གཏི་མུག་གི་དཔལ་ཏེ། དེའི་ཕྱིར་ཁོ་བོ་འཇམ་དཔལ་ལོ། །ལྷའི་བུ་དག་ཁོ་བོ་ནི་འདོད་ཆགས་ལས་ཡོངས་སུ་འདས་པ་མ་ཡིན། ཞེ་སྡང་ལས་ཡོངས་སུ་འདས་པ་མ་ཡིན། གཏི་མུག་ལས་ཡོངས་སུ་འདས་པ་
མ་ཡིན་ཏེ། ལྷའི་བུ་དག་བྱིས་པ་སོ་སོའི་སྐྱེ་བོ་དག་ནི་འདའ་ཞིང་ཡོངས་སུ་འདའ་བ་དང་། རྣམ་པར་འདའ་བ་དག་བྱེད་ཀྱི། བྱང་ཆུབ་སེམས་དཔའ་རྣམས་ནི་ཆོས་གང་ལ་ཡང་འཕོ་བའམ། འགྲོ་བའམ། འདའ་བ་མེད་དོ། །ལྷའི་བུ་རྣམས་ཀྱིས་སྨྲས་པ། འཇམ་དཔལ་འོ་ན་
བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་རྣམས་རྣམ་པར་མི་གནོན་ཏམ། ས་བཅུ་རྗེས་སུ་མི་གནོན་ཏམ། འཇམ་དཔལ་གྱིས་སྨྲས་པ། ལྷའི་བུ་དག་དེ་ཇི་སྙམ་དུ་སེམས། སྒྱུ་མས་སྤྲུལ་པའི་སེམས་དང་སེམས་ལས་བྱུང་བ་དག་སངས་རྒྱས་ཀྱི་ཆོས་རྣམ་པར་གནོན་ཅིང་ས་བཅུ་
རྗེས་སུ་གནོན་པ་ཡོད་དམ། ལྷའི་བུ་རྣམས་ཀྱིས་སྨྲས་པ། འཇམ་དཔལ་སྒྱུ་མའི་སྐྱེས་བུ་ལ་གནས་ཀྱང་མེད་ན། སངས་རྒྱས་ཀྱི་ཆོས་རྣམ་པར་གནོན་པའམ། ས་རྗེས་སུ་གནོན་པ་ལྟ་ག་ལ་ཡོད། འཇམ་དཔལ་གྱིས་སྨྲས་པ། ལྷའི་བུ་དག་དེ་བཞིན་དུ་ཆོས་ཐམས་ཅད་ནི་སྒྱུ་མ་ལྟ་བུ་སྟེ།

དེ་དག་ནི་གནོན་པ་མེད། རྣམ་པར་གནོན་པ་མེད། ཡོངས་སུ་གནོན་པ་མེད་དེ་འདའ་བ་མེད་དོ། །ལྷའི་བུ་དག་གིས་སྨྲས་པ། འོ་ན་འཇམ་དཔལ་ཁྱོད་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་རམ། འཇམ་དཔལ་གྱིས་སྨྲས་པ། ལྷའི་བུ་དག་དེ་ཇི་
སྙམ་དུ་སེམས། བྱིས་པ་སོ་སོའི་སྐྱེ་བོ་འདོད་ཆགས་ཀྱིས་ཀུན་ནས་གླགས་པ་ཞིག་བྱང་ཆུབ་ཀྱི་སྙིང་པོར་འདུག་ན་ཐམས་ཅད་མཁྱེན་པའི་ཡེ་ཤེས་དང་ལྡན་པར་འགྱུར་རམ། ལྷའི་བུ་དག་གིས་སྨྲས་པ། ཅི་འཇམ་དཔལ་འོ་ན་ཁྱོད་འདོད་ཆགས་ཀྱིས་ཀུན་ནས་གླགས་པའི་བྱིས་པ་སོ་སོའི་སྐྱེ་བོ་
ཡིན་ནམ། འཇམ་དཔལ་གྱིས་སྨྲས་པ། ལྷའི་བུ་དག་དེ་དེ་བཞིན་ཏེ། བདག་ནི་འདོད་ཆགས་ཀྱིས་ཀུན་ནས་གླགས་པའོ། །ཞེ་སྡང་གིས་ཀུན་ནས་གླགས་པའོ། །གཏི་མུག་གིས་ཀུན་ནས་གླགས་པའོ། །བདག་ནི་མུ་སྟེགས་ཅན་གཞན་ནོ། །ལོག་པ་ལ་ཞེན་པའོ། །ལྷའི་བུ་དག་གིས་སྨྲས་པ།
འཇམ་དཔལ་ཅི་ལས་བསམས་ཏེ། དེ་སྐད་དུ་བདག་ནི་འདོད་ཆགས་ཀྱིས་ཀུན་ནས་གླགས་པའོ། །ཞེ་སྡང་གིས་ཀུན་ནས་གླགས་པའོ། །གཏི་མུག་གིས་ཀུན་ནས་གླགས་པའོ་ཞེས་སྨྲ། འཇམ་དཔལ་གྱིས་སྨྲས་པ། ལྷའི་བུ་དག་དེ་ནི་ཇི་ལྟར་མི་གནས་པའི་ཚུལ་གྱིས་འདོད་ཆགས་དང་། ཞེ་
སྡང་དང་། གཏི་མུག་གི་ངོ་བོ་ཉིད་ལ་གནས་པའི་ཕྱིར། ཇི་ལྟར་ཕྱོགས་བཅུ་ཀུན་ཏུ་གནས་མེད་པ་དེ་ལྟར་གནས་སོ། །ལྷའི་བུ་དག་གིས་སྨྲས་པ། འཇམ་དཔལ་ཁྱོད་ཇི་ལྟར་མུ་སྟེགས་ཅན་གཞན་ཞེས་བྱ་བ་ཡིན། སྨྲས་པ། ལྷའི་བུ་དག་ཁོ་བོ་ནི་མུ་སྟེགས་ཅན་གཞན་དུ་མི་འགྲོ་སྟེ། དེའི་
ཕྱིར་མུ་སྟེགས་ཅན་གཞན་ཞེས་བྱའོ། །ལྷའི་བུ་དག་གིས་སྨྲས་པ། འཇམ་དཔལ་ཁྱོད་ཇི་ལྟར་ལོག་པ་ལ་ཞེན་ཅེས་བྱ། འཇམ་དཔལ་གྱིས་སྨྲས་པ། ལྷའི་བུ་དག་ཁོ་བོས་ནི་ཆོས་ཐམས་ཅད་ལོག་པར་ཤེས་ཏེ། ཡང་དག་པ་མ་ཡིན་ཞིང་ནོར་བ་ཡོངས་སུ་བརྟགས་པར་ཁོང་དུ་ཆུད་པས།
དེའི་ཕྱིར་ཁོ་བོ་ནི་ལོག་པ་ལ་ཞེན་པའོ། །དེ་ནས་དེའི་ཚེ་ལྷའི་བུ་སྟོང་ཕྲག་བཅུ་པོ་དེ་དག་གིས། འཇམ་དཔལ་གྱིས་བསྟན་པ་དེ་ཐོས་ནས། མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །འདི་སྐད་ཅེས་ཀྱང་སྨྲས་ཏེ། རྡོ་རྗེའི་ཚིག་དང་། ས་བོན་གྱི་ཚིག་དང་། ཕུར་པའི་ཚིག་རྣམ་པ་འདི་ལྟ་བུ་

དག་གང་གི་རྣ་ལམ་དུ་གྲག་པར་གྱུར་པ་དེ་དག་ཀྱང་ཐོབ་པར་བྱ་བ་ལེགས་པར་ཐོབ་པ་ཡིན་ན། གང་གིས་ཐོས་ནས་མོས་པར་གྱུར་པ་དང་། ཡིད་ཆེས་པ་དང་། ལུང་འབོགས་པ་དང་། ཁ་ཏོན་བྱེད་པ་དང་། འཛིན་པ་དང་། ཀློག་པ་དང་། སྟོན་པ་དང་། དེ་བཞིན་ཉིད་དུ་ནན་ཏན་བྱེད་པ་ལྟ་སྨོས་ཀྱང་
ཅི་དགོས་ཏེ། དེ་དག་ནི་ཐོགས་པ་མེད་པའི་སྤོབས་པ་རྗེས་སུ་ཐོབ་པར་འགྱུར་རོ། །ཆོས་ཐམས་ཅད་ལ་སྣང་བ་ཐོབ་པར་འགྱུར་རོ། །ཚུལ་གཅིག་ཏུ་བསྟན་པ་ལ་མཁས་པར་འགྱུར་རོ། །ཆོས་ཐམས་ཅད་ཀྱང་སངས་རྒྱས་ཀྱི་ཆོས་དང་སྦྱོར་བར་འགྱུར་རོ།། །།བམ་པོ་གསུམ་པ་སྟེ་
ཐ་མ། དེ་ནས་བཅོམ་ལྡན་འདས་ལ་ལྷའི་བུ་པད་མོ་རྣམ་པར་རོལ་པའི་མངོན་པར་ཤེས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དུས་སླད་མ་ལ་བྱང་ཆུབ་སེམས་དཔའ་རྣམས་ཀྱིས་རྣམ་པ་འདི་ལྟ་བུའི་ཆོས་ཐོས་ན། མི་འཇིགས་མི་དངང་། སྐྲག་པར་མི་འགྱུར་བ་དང་། སྒྲ་ཐམས་
ཅད་རྟོགས་པར་འཚལ་བར་འགྱུར་བ་དང་། ཐོགས་པ་མ་མཆིས་ཤིང་། ཐེ་ཙོམ་མ་མཆིས་པར་བགྱི་བའི་སླད་དུ་སྒྲ་དང་ཚིག་ལ་འཇུག་པའི་རིག་པ་བསྟན་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ལྷའི་བུ་པད་མོ་རྣམ་པར་རོལ་པའི་མངོན་པར་ཤེས་པ་ལ་འདི་སྐད་ཅེས་བཀའ་
སྩལ་ཏོ། །ལྷའི་བུ་ཁྱོད་ལ་གནས་དེ་དྲིས་པས་ཅི་ཞིག་བྱ། ཆོག་མོད་སྒྲ་དང་། སྐད་ལ་འཇུག་པའི་རིག་པ་དེ་ནི་ལས་དང་པོ་པའི་བྱང་ཆུབ་སེམས་དཔའ་ཤེས་པའམ། ཁོང་དུ་ཆུད་པའམ། བསམ་པའམ། གཞལ་བའམ། དཔྱད་པར་སླ་བ་མ་ཡིན་ནོ། །དེ་ནི་བྱང་ཆུབ་སེམས་དཔའ་ལས་
དང་པོ་པའི་མདུན་དུ་བརྗོད་པར་བྱ་བ་མ་ཡིན་ཏེ། ལྷའི་བུ་སྒྲ་དང་སྐད་ལ་འཇུག་པ་ཁོང་དུ་ཆུད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་གལ་ཏེ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་ལོག་པའི་ཚིག་ཡང་དག་པ་མ་ཡིན་པའི་ངག་གིས་མི་སྙན་པ་བརྗོད་དེ། སྤྱོས་པས་དེ་ལ་ཁོང་ཁྲོ་བའི་
སེམས་མི་སྐྱེད་དོ། །གལ་ཏེ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བདེ་བའི་ཡོ་བྱད་གོས་དང་། ཟས་དང་། མལ་ཆ་དང་། ནད་ཀྱི་རྐྱེན་རྩི་དང་། ཡོ་བྱད་ཐམས་ཅད་ཀྱིས་རིམ་གྲོར་བྱས། བཀུར་སྟིར་བྱས། བསྟི་སྟང་དུ་བྱས། མཆོད་པར་བྱས་ཀྱང་དེ་ལ་ཆགས་པའི་སེམས་མི་འབྱུང་སྟེ།

ལྷའི་བུ་འདི་ལྟ་སྟེ་དཔེར་ན། དགྲ་བཅོམ་པ། ཟག་པ་ཟད་པ་ནི་ཆགས་པར་བྱ་བའི་གནས་ཀྱི་ཆོས་ཐམས་ཅད་ལ་ཡང་ཆགས་པར་མི་འགྱུར། ཁོང་ཁྲོ་བར་བྱ་བའི་གནས་ཀྱི་ཆོས་ཐམས་ཅད་ལ་ཡང་ཁོང་ཁྲོ་བར་མི་འགྱུར་རོ། །ལྷའི་བུ་དེ་བཞིན་དུ་སྒྲ་དང་། སྐད་ལ་
འཇུག་པ་ཁོང་དུ་ཆུད་པའི་བྱང་ཆུབ་སེམས་དཔའ་ཡང་། བསྐལ་པ་གང་གཱའི་ཀླུང་གི་བྱེ་མ་སྙེད་དུ། བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཀྱང་། དེ་ལ་ཆགས་པའི་སེམས་མི་སྐྱེད་དོ། །བསྐལ་པ་གང་གཱའི་ཀླུང་གི་བྱེ་མ་སྙེད་དུ་ལོག་པ་ཡང་དག་པ་མ་ཡིན་པའི་ཚིག་གིས་མི་
སྙན་པར་བརྗོད་དེ། སྤྱོས་ཀྱང་ཁོང་ཁྲོ་བའི་སེམས་མི་སྐྱེད་དོ། །ལྷའི་བུ་དེ་ལྟར་སྒྲ་དང་། སྐད་ལ་འཇུག་པ་ཁོང་དུ་ཆུད་པའི་བྱང་ཆུབ་སེམས་དཔའ་ནི་ཐོབ་པ་དང་། མ་ཐོབ་པ་དང་། གྲགས་པ་དང་། མ་གྲགས་པ་དང་། བསྟོད་པ་དང་། སྨད་པ་དང་། བདེ་བ་དང་། སྡུག་བསྔལ་ཐམས་
ཅད་ཀྱིས་མི་བསྐྱོད་མི་འཕྲོགས་ཏེ། འཇིག་རྟེན་གྱི་ཆོས་ཐམས་ཅད་ཟིལ་གྱིས་གནོན་ཅིང་། རིའི་རྒྱལ་པོ་ལྟར་མི་སྒུལ་བར་གནས་སོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ལྷའི་བུ་པད་མོ་རྣམ་པར་རོལ་པའི་མངོན་པར་ཤེས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་
འོན་ཀྱང་མ་བྱུང་བའི་དུས་ན། བྱང་ཆུབ་སེམས་དཔའ་འདུ་ཤེས་སྦྱངས་པ། འདུ་ཤེས་བྱང་བ་གང་ཇི་སྙེད་ཅིག་འབྱུང་བར་འགྱུར་བ་དེ་དག་གིས་སྒྲ་དང་སྐད་ལ་འཇུག་པའི་རིག་པ་འདི་ཐོས་ན། རང་གི་སྐྱོན་ཡང་རྟོགས་པར་འགྱུར། གཞན་ལ་ཡང་སྟོན་པར་འགྱུར་ན། བཅོམ་ལྡན་འདས་
སྒྲ་དང་། སྐད་ལ་འཇུག་པའི་རིག་པ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ལྷའི་བུ་པད་མོ་རྣམ་པར་རོལ་པའི་མངོན་པར་ཤེས་པ་ལ་འདི་སྐད་ཅེས་བཀའ་སྩལ་ཏོ། །ལྷའི་བུ་དེ་བས་ན་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། དོན་
འདི་ངས་ཁྱོད་ལ་བཤད་དོ། །བཅོམ་ལྡན་འདས་དེ་ལྟར་བགྱིའོ་ཞེས་ནས། ལྷའི་བུ་པད་མོ་རྣམ་པར་རོལ་པའི་མངོན་པར་ཤེས་པ། བཅོམ་ལྡན་འདས་ཀྱིས་བཀའ་སྩལ་པ་ལྟར་ཉན་ཏོ། །བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ལྷའི་བུ་གལ་ཏེ་བྱང་ཆུབ་

སེམས་དཔའ་འདོད་ཆགས་ཀྱི་སྒྲ་ལ་ཉེས་པའི་འདུ་ཤེས་སུ་འགྱུར་ཞིང་འདོད་ཆགས་དང་བྲལ་བའི་སྒྲ་ལ་ཆགས་པའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །ཞེ་སྡང་གི་སྒྲ་ལ་ཁ་ན་མ་ཐོ་བའི་འདུ་ཤེས་སུ་འགྱུར་ཞིང་། ཞེ་སྡང་དང་བྲལ་བའི་སྒྲ་ལ་ལེགས་
པའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །གཏི་མུག་གི་སྒྲ་ལ་ཁ་ན་མ་ཐོ་བའི་འདུ་ཤེས་སུ་འགྱུར་ཞིང་། གཏི་མུག་དང་བྲལ་བའི་སྒྲ་ལ་ལེགས་པའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །འདོད་པ་ཆུང་བའི་སྒྲ་ལ་ཆགས་ཤིང་འདོད་
པ་ཆེ་བའི་སྒྲ་ལ་ཁོང་ཁྲོ་ན། སྒྲ་དང་སྐད་ལ་འཇུག་པའི་རིག་པ་ལ་མི་སློབ་བོ། །ཆོག་ཤེས་པའི་སྒྲ་ལ་ཆགས་ཤིང་། ཆོག་མི་ཤེས་པའི་སྒྲ་ལ་ཁོང་ཁྲོ་ན། སྒྲ་དང་སྐད་ལ་འཇུག་པའི་རིག་པ་ལ་མི་སློབ་བོ། །སྡོམ་པའི་སྒྲ་ལ་ཆགས་ཤིང་། མི་སྡོམ་པའི་སྒྲ་ལ་ཁོང་ཁྲོ་ན། སྒྲ་དང་སྐད་ལ་
འཇུག་པའི་རིག་པ་ལ་མི་སློབ་བོ། །གཅིག་པུར་དགའ་བའི་སྒྲ་ལ་ཆགས་ཤིང་། སྐྱེ་བོ་ཕལ་པོ་ཆེའི་སྒྲ་ལ་ཁོང་ཁྲོ་ན། སྒྲ་དང་སྐད་ལ་འཇུག་པའི་རིག་པ་ལ་མི་སློབ་བོ། །སངས་རྒྱས་ཀྱི་སྒྲ་ལ་ཆགས་ཤིང་། མུ་སྟེགས་ཅན་གྱི་སྒྲ་ལ་ཁོང་ཁྲོ་ན། སྒྲ་དང་སྐད་ལ་འཇུག་པའི་རིག་པ་ལ་མི་
སློབ་བོ། །ཚངས་པར་སྤྱོད་པའི་སྒྲ་ལ་ཞེན་ཅིང་། ཚངས་པར་མི་སྤྱོད་པའི་སྒྲ་ལ་ཞེ་སྡང་ན། སྒྲ་དང་སྐད་ལ་འཇུག་པའི་རིག་པ་ལ་མི་སློབ་བོ། །ཀུན་ནས་ཉོན་མོངས་པའི་སྒྲ་ལ་ཁོང་ཁྲོ་ཞིང་། རྣམ་པར་བྱང་བའི་སྒྲ་ལ་ཆགས་ན། སྒྲ་དང་སྐད་ལ་འཇུག་པའི་རིག་པ་ལ་མི་སློབ་བོ། །འབྲས་
བུ་ལ་གནས་པའི་སྒྲ་ལ་ཆགས་ཤིང་། བྱིས་པ་སོ་སོའི་སྐྱེ་བོའི་སྒྲ་ལ་ཁོང་ཁྲོ་ན། སྒྲ་དང་སྐད་ལ་འཇུག་པའི་རིག་པ་ལ་མི་སློབ་བོ། །བདེ་བའི་སྒྲ་ལ་ཆགས་ཤིང་། སྡུག་བསྔལ་གྱི་སྒྲ་ལ་ཁོང་ཁྲོ་ན། སྒྲ་དང་སྐད་ལ་འཇུག་པའི་རིག་པ་ལ་མི་སློབ་བོ། །རབ་ཏུ་བྱུང་བའི་སྒྲ་ལ་ཆགས་ཤིང་།
ཁྱིམ་པའི་སྒྲ་ལ་ཁོང་ཁྲོ་ན། སྒྲ་དང་སྐད་ལ་འཇུག་པའི་རིག་པ་ལ་མི་སློབ་བོ། །འཇིག་རྟེན་ལས་འདས་པའི་སྒྲ་ལ་ཆགས་ཤིང་། འཇིག་རྟེན་པའི་སྒྲ་ལ་ཁོང་ཁྲོ་ན། སྒྲ་དང་སྐད་ལ་འཇུག་པའི་རིག་པ་ལ་མི་སློབ་བོ། །སྦྱིན་པའི་སྒྲ་ལ་ལེགས་པའི་འདུ་ཤེས་སུ་འགྱུར་ཞིང་། སེར་སྣའི་

སྒྲ་ལ་ཁོང་ཁྲོ་བའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །ཚུལ་ཁྲིམས་ཀྱི་སྒྲ་ལ་ཆགས་པའི་འདུ་ཤེས་སུ་འགྱུར་ཞིང་། ཚུལ་ཁྲིམས་འཆལ་པའི་སྒྲ་ལ་ཁོང་ཁྲོ་བའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །བཟོད་
པའི་སྒྲ་ལ་ལེགས་པའི་འདུ་ཤེས་སུ་འགྱུར་ཞིང་། གནོད་སེམས་ཀྱི་སྒྲ་ལ་ཁོང་ཁྲོ་བའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །བརྩོན་འགྲུས་བརྩམས་པའི་སྒྲ་ལ་ལེགས་པའི་འདུ་ཤེས་སུ་འགྱུར་ཞིང་། ལེ་ལོའི་སྒྲ་ལ་ཁོང་ཁྲོ་བའི་འདུ་ཤེས་སུ་འགྱུར་ན།
སངས་རྒྱས་ཀྱི་ཆོས་རྣམས་ལ་མི་སློབ་བོ། །བསམ་གཏན་གྱི་སྒྲ་ལ་ལེགས་པའི་འདུ་ཤེས་སུ་འགྱུར་ཞིང་། འཁྲུག་པའི་སྒྲ་ལ་ཁོང་ཁྲོ་བའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །ཤེས་རབ་ཀྱི་སྒྲ་ལ་ལེགས་པའི་འདུ་ཤེས་སུ་འགྱུར་ཞིང་། ཤེས་རབ་འཆལ་
པའི་སྒྲ་ལ་ཁོང་ཁྲོ་བའི་འདུ་ཤེས་སུ་འགྱུར་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །ཉེ་བའི་སྒྲ་ལ་ཆགས་ཤིང་། རིང་བའི་སྒྲ་ལ་ཁོང་ཁྲོ་ན། སྒྲ་དང་སྐད་ལ་འཇུག་པའི་རིག་པ་ལ་མི་སློབ་བོ། །འཁོར་བའི་སྒྲ་ལ་ཁ་ན་མ་ཐོ་བའི་འདུ་ཤེས་སུ་འགྱུར་ཞིང་། མྱ་ངན་ལས་འདས་
པའི་སྒྲ་ལ་ལེགས་པའི་འདུ་ཤེས་སུ་འགྱུར་ན། སྒྲ་དང་སྐད་ལ་འཇུག་པའི་རིག་པ་ལ་མི་སློབ་བོ། །ཚུ་རོལ་གྱི་སྒྲ་ལ་ཁོང་ཁྲོ་ཞིང་ཕ་རོལ་གྱི་སྒྲ་ལ་ཆགས་ན། སྒྲ་དང་སྐད་ལ་འཇུག་པའི་རིག་པ་ལ་མི་སློབ་བོ། །གྲོང་གི་སྒྲ་ལ་ཁ་ན་མ་ཐོ་བར་འདུ་ཤེས་པར་གྱུར་ཅིང་། དགོན་པའི་སྒྲ་ལ་
ཆགས་པར་གྱུར་ན། སྒྲ་དང་སྐད་ལ་འཇུག་པའི་རིག་པ་ལ་མི་སློབ་བོ། །གཅིག་པུར་སྤྱོད་པའི་སྒྲ་ལ་ཆགས་ཤིང་། འདུ་འཛིར་སྤྱོད་པའི་སྒྲ་ལ་ཁོང་ཁྲོ་ན། སྒྲ་དང་སྐད་ལ་འཇུག་པའི་རིག་པ་ལ་མི་སློབ་བོ། །དགེ་སློང་གི་སྤྱོད་པ་ལ་ཆགས་ཤིང་། ཁྱིམ་པའི་སྤྱོད་པ་ལ་ཁོང་ཁྲོ་ན། སྒྲ་
དང་སྐད་ལ་འཇུག་པའི་རིག་པ་ལ་མི་སློབ་བོ། །སྤྱོད་ལམ་གྱི་བྱ་བ་ལ་ཆགས་ཤིང་། སྤྱོད་ལམ་མ་ཡིན་པའི་བྱ་བ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །ཚུལ་དུ་ཤིས་པ་ལ་ཆགས་ཤིང་། ཚུལ་དུ་མི་ཤིས་པ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །

ཚུལ་ཁྲིམས་ཀྱི་སྤྱོད་པ་ལ་ཆགས་ཤིང་། ཚུལ་ཁྲིམས་འཆལ་པའི་སྤྱོད་པ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །མ་འདྲེས་པའི་སྤྱོད་པ་ལ་ཆགས་ཤིང་། འདྲེས་པའི་སྤྱོད་པ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །འདོད་ཆགས་དང་བྲལ་
བའི་སྤྱོད་པ་ལ་ཆགས་ཤིང་། འདོད་ཆགས་ཀྱི་སྤྱོད་པ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །ཞེ་སྡང་མེད་པའི་འདུ་ཤེས་ལ་ཆགས་ཤིང་། ཞེ་སྡང་གི་འདུ་ཤེས་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །གཏི་མུག་དང་བྲལ་བའི་འདུ་ཤེས་ལ་ཆགས་
ཤིང་། གཏི་མུག་གི་འདུ་ཤེས་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །སྟོང་པ་ཉིད་ལ་ཆགས་ཤིང་། དམིགས་པ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །མཚན་མ་མེད་པ་ལ་ཆགས་ཤིང་། མཚན་མ་ལ་ཁོང་ཁྲོ་ན། སངས