Kinh tạng Tây Tạng (Kangyur Đại Học) — 056_མདོ་སྡེ།_ན

ན་ལའང་སྟོན་ཅིང་བྲིས་ནས་འཇོག་བྱེད་པ། །དེ་འདྲ་དེས་ནི་ཏིང་འཛིན་འདི་རྙེད་འགྱུར། །ནམས་ཀྱང་ཆོས་ལ་འཇུངས་པར་མི་འགྱུར་ཞིང་། །བདེ་གཤེགས་
སྲས་འགྱུར་ཕྱིར་ནི་མ་གཏོགས་པར། །རྙེད་དང་བཀུར་སྟིའི་ཕྱིར་ནི་མི་འཆད་པ། །དེ་འདྲ་དེས་ནི་ཆོས་འདི་རྙེད་པར་འགྱུར། །ཕྲག་དོག་མེད་ཅིང་སྒྲིབ་པ་རྣམ་པར་སྤངས། །གཉིད་དང་བྲལ་ལ་ཀུན་ཏུ་གདུང་བ་མེད། །བདག་ལ་མི་སྟོད་གཞན་ལ་མི་སྨོད་པ། །དེས་ནི་བདག་མེད་འདུ་
ཤེས་རྙེད་མི་དཀའ། །དད་དང་ལྡན་ལ་སྒྱུ་མེད་གཡོ་མེད་ཅིང་། །སངས་རྒྱས་ཆོས་དང་དགེ་འདུན་རྣམས་ལ་དད། །དེས་ནི་བྱས་པ་ཤེས་ཤིང་བྱས་པ་སྲུང་། །དེས་ནི་ཅུང་ཟད་ཙམ་ཡང་རྙེད་མི་དཀའ། །རྟག་ཏུ་བདེན་པའི་ཚིག་ནི་སྨྲ་བྱེད་ཅིང་། །ཆུང་ངམ་ཉུང་ངམ་མང་ངམ་བཟང་ཡང་
རུང་། །ནམས་ཀྱང་ལེགས་སྤྱད་ཆུད་མི་གསོན་པ་ཡི། །ཆོས་འདོད་དེ་ནི་རྙེད་པར་དཀའ་མི་འགྱུར། །ཚུལ་ཁྲིམས་རྣམ་དག་བྱས་པ་བསྲུང་བ་ཡི། །མི་གང་ལ་ལ་ཆོས་འདི་འཆང་བྱེད་པ། །དེས་ནི་བྱང་ཆུབ་རྙེད་པར་མི་དཀའ་ན། །ཏིང་འཛིན་ཞི་བ་འདི་ལྟ་སྨོས་ཅི་དགོས། །བཟང་
སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅུ་དྲུག་པའོ།། །།བཟང་སྐྱོང་ངས་མངོན་པར་ཤེས་ཏེ་འདས་པའི་དུས་ན་དེ་བཞིན་གཤེགས་པ་མར་མར་མེ་མཛད་མཐོང་མ་ཐག་ཏུ། དེ་ལས་ངས་ཏིང་ངེ་འཛིན་འདི་འཐོབ་པོ། །ངས་ཏིང་ངེ་འཛིན་འདི་ཐོབ་མ་ཐག་ཏུ། དེའི་མོད་ལ་ངས་
ཚད་མེད་གྲངས་མེད་པའི་སངས་རྒྱས་བཅོམ་ལྡན་འདས། ངའི་མིག་ལམ་དུ་སྣང་བར་གྱུར། དམ་པའི་ཆོས་འཆད་པ་ཡང་ཐོས་ཤིང་དེ་ཐམས་ཅད་ཀྱང་ཇི་སྐད་དུ་ཐོས་པ་བཞིན་དུ་འཛིན་པར་གྱུར་ཏོ། །སངས་རྒྱས་བཅོམ་ལྡན་འདས་དེ་དག་ཀྱང་ང་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་
རྒྱས་བཅོམ་ལྡན་འདས་སུ་འགྱུར་རོ་ཞེས་ལུང་བསྟན་ཏོ། །བཟང་སྐྱོང་དེ་བས་ན་ཁྱེད་ཀྱིས་འཕགས་པ་བྱིས་པ་རྣམས་སྤངས་པ་མཚན་མ་ཐམས་ཅད་དང་བྲལ་བའི་ཆོས་འདི་ལ་བསླབ་པར་བྱའོ། །དེས་ན་ཁྱེད་ཏིང་ངེ་འཛིན་འདི་ལ་གནས་པ་རྣམས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་མི་དཀའ་བར་རྙེད་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སངས་རྒྱས་མར་མེ་མཛད་མཐོང་ནས། །ངས་ནི་ཏིང་ངེ་འཛིན་ཀྱང་བསྒོམ། །སངས་རྒྱས་མང་པོ་མཐོང་ནས་ཀྱང་། །མཆོག་གི་ཆོས་ཀྱང་ཐོབ་པར་གྱུར། །
ཇི་ལྟར་བསོད་ནམས་བྱས་པ་དག །བསམ་པ་བཟང་པོ་འགྲུབ་པ་བཞིན། །ཁྱེད་ཀྱང་ཆོས་ལ་སྤྱོད་ཅིག་དང་། །བྱང་ཆུབ་མཆོག་ནི་ཐོབ་པར་འགྱུར། །སངས་རྒྱས་བྱེ་བ་བསམ་མི་ཁྱབ། །མཐའ་མེད་ཅིང་ནི་མུ་མེད་པ། །བྱང་ཆུབ་ཞི་བ་ཚོལ་བྱེད་ཅིང་། །གང་དག་ངས་ནི་སྔོན་བཀུར་
བ། །བྱང་ཆུབ་དེ་ནི་ངས་རྙེད་དེ། །ཆོས་ཀྱི་འཁོར་ལོ་རབ་ཏུ་བསྐོར། །གང་དག་བྱང་ཆུབ་བཞག་པ་ནི། །སེམས་ཅན་བྱེ་བ་དུ་མའོ། །ལྷ་དང་ཀླུ་དང་གནོད་སྦྱིན་དང་། །དྲི་ཟ་མིའམ་ཅི་ཡི་རྣམས། །ཨེ་མའོ་སངས་རྒྱས་བསམ་ཡས་ཞེས། །མཆོད་པས་ང་ལ་མཆོད་པ་བྱེད། །
མཁས་པའི་མི་ནི་གང་དག་ཀྱང་། །སངས་རྒྱས་ཆོས་ལ་སྟེན་འདོད་པས། །མང་དུ་ཐོས་པར་བྱ་བའི་ཕྱིར། །འདུན་པ་ཉིད་ནི་བསྟན་པར་བྱ། །སངས་རྒྱས་བྱེ་བ་ཕྲག་སུམ་ཅུ། །ཤཱཀྱ་སེང་གེ་མི་ཡི་མཆོག །བྱང་ཆུབ་ཞི་བ་ཚོལ་བྱེད་ཅིང་། །གང་དག་ངས་ནི་སྔོན་བཀུར་བ། །སངས་
རྒྱས་བསམ་ཡས་དེ་དག་གིས། །དེར་ནི་ང་ལ་ལུང་མ་བསྟན། །དམིགས་སུ་མེད་པའི་ཡེ་ཤེས་ལ། །ང་ནི་གནས་པར་མ་གྱུར་ཏོ། །སངས་རྒྱས་གཙོ་བོ་སྐྱོབ་པའི་རྣམས། །དེ་བཞིན་བསྡུས་པར་ཤེས་པར་བྱ། །བྱེ་བ་ཁྲག་ཁྲིག་དུ་མའི་རྣམས། །གང་དག་ངས་ནི་སྔོན་བཀུར་བ། །

དེས་ནི་ང་ཡི་བསམ་མཁྱེན་ནས། །དེ་བཞིན་གཤེགས་པས་ལུང་བསྟན་ཀྱང་། །སངས་རྒྱས་ཡེ་ཤེས་བསམ་ཡས་ལ། །ང་ནི་གནས་པར་མ་གྱུར་ཏོ། །དེ་ཡི་ཕྱིར་ནི་དོན་དམ་ལ། །བརྩོན་པ་བཟང་པོ་དག་ཀྱང་བྱོས། །སངས་རྒྱས་བསམ་གྱིས་མི་ཁྱབ་པའི། །ཡེ་ཤེས་
མཆོག་ལའང་བསླབ་པར་བྱོས། །མདོ་སྡེ་འདི་ལ་བསླབ་བྱས་ནས། །འཇིག་རྟེན་མགོན་པོའི་སྤྱོད་ཡུལ་ལ། །བླ་ན་མེད་པའི་ཡེ་ཤེས་མཆོག །བསམ་གྱིས་མི་ཁྱབ་རྟོགས་པར་འགྱུར། །ཨེ་མའོ་བླ་མེད་ཡེ་ཤེས་དང་། །སངས་རྒྱས་ཡེ་ཤེས་བསམ་ཡས་ཤེས། །བཟང་སྐྱོང་
སེམས་ནི་དགའ་མགུ་ཞིང་། །གུས་པ་དང་ཡང་བཅས་པར་འགྱུར། །མ་འོངས་དུས་ན་བདག་ཅག་ཀྱང་། །ཆོས་འཛིན་ཕྱི་མར་འགྱུར་ཞེས་ཏེ། །ལྔ་བརྒྱར་ཚང་བ་དེ་དག་ཀྱང་། །སེམས་དགའ་གུས་དང་བཅས་པར་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་
བཅུ་བདུན་པའོ།། །།བམ་པོ་དྲུག་པ། དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔས་ཏིང་ངེ་འཛིན་འདི་ཇི་ལྟར་བསྒོམ་པར་
བགྱི། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཏིང་ངེ་འཛིན་འདི་བསྒོམ་འདོད་པར་གྱུར་ན། དེས་གཟུགས་ལ་གནས་པར་མི་བྱའོ། །ཚོར་བ་དང་། སེམས་དང་། ཆོས་ལ་གནས་པར་མི་བྱའོ། །སྐྱེ་བ་ལ་གནས་པར་
མི་བྱའོ། །ཆོས་ཐམས་ཅད་ལ་གནས་པར་མི་བྱའོ། །སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ལ་གནས་པར་མི་བྱའོ། །བྱམས་པ་ལ་གནས་པར་མི་བྱའོ། །བཟང་སྐྱོང་དེ་ལ་ཏིང་ངེ་འཛིན་གང་ཞེ་ན། གང་ཆོས་དེ་དག་ལ་ནན་ཏན་དུ་བྱེད་ཀྱི་ལོག་པའི་ནན་ཏན་དུ་བྱེད་པ་མ་
ཡིན་པའོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་གང་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཀྱི་ལུས་དང་ལྡན་པའི་རྣམ་པར་རྟོག་པ་ནི་རྣམ་པར་མི་རྟོག་པ་དང་། ཚོར་བ་དང་། སེམས་དང་། ཆོས་ལ་ཆོས་ཀྱི་རྗེས་སུ་ལྟ་ཞིང་གནས་ཀྱི་ཆོས་དང་ལྡན་པའི་རྣམ་པར་རྟོག་པ་ནི་རྣམ་པར་མི་

རྟོག་པའི་བྱང་ཆུབ་སེམས་དཔའ་དེ་ནི་ཏིང་ངེ་འཛིན་འདི་འཐོབ་བོ། །དེ་ཅིའི་ཕྱིར་ཞེ་ན། བཟང་སྐྱོང་དེ་ནི་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ལུས་དང་ལྡན་པའི་རྣམ་པར་རྟོག་པ་ནི་རྣམ་པར་མི་རྟོག །ཚོར་བ་དང་། སེམས་
དང་། ཆོས་ལ་ཆོས་ཀྱི་རྗེས་སུ་ལྟ་ཞིང་གནས་ཏེ། ཆོས་དང་ལྡན་པའི་རྣམ་པར་རྟོག་པ་ནི་རྣམ་པར་མི་རྟོག་ན། ཆོས་ཐམས་ཅད་མི་དམིགས་པར་འགྱུར་རོ། །ཆོས་ཐམས་ཅད་མི་དམིགས་པས་དེ་མི་རྟོག་རྣམ་པར་མི་རྟོག་གོ །བཟང་སྐྱོང་གང་མི་རྟོག་རྣམ་པར་མི་རྟོག་པ་དེ་ནི། ཆོས་གང་
ཡང་མི་མཐོང་ངོ་། །བཟང་སྐྱོང་གང་ལ་ཆོས་གང་ཡང་མི་མཐོང་བ་དེ་ནི་སྒྲིབ་པ་མེད་པའི་ཡེ་ཤེས་ཤེས་བྱའོ། །བཟང་སྐྱོང་གང་སྒྲིབ་པ་མེད་པའི་ཡེ་ཤེས་དེ་ནི་བཟང་སྐྱོང་ཏིང་ངེ་འཛིན་ཅེས་བྱའོ། །བཟང་སྐྱོང་བྱང་ཆུབ་སེམས་དཔའ་གང་ཏིང་ངེ་འཛིན་འདི་དང་ལྡན་པ་དེ་ནི། སངས་རྒྱས་ཚད་
མེད་གྲངས་མེད་པ་རྣམས་མཐོང་ངོ་། །དམ་པའི་ཆོས་ཀྱང་ཐོས་སོ། །ཐོས་ནས་ཀྱང་ཀུན་ཆུབ་པར་བྱེད་དོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་གང་སྒྲིབ་པ་མེད་པའི་རྣམ་པར་གྲོལ་བའི་ཡེ་ཤེས་མཐོང་བ་དང་། ཐོགས་པ་མེད་པའི་ཡེ་ཤེས་
ཀྱང་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། གནས་ནས་ཀྱང་ཆོས་གང་ཡང་མི་མཐོང་ངོ་། །མ་མཐོང་ནས་ཀྱང་མི་རྟོག་རྣམ་པར་མི་རྟོག་ཅིང་། དམུས་ལོང་ཡང་མ་ཡིན། འོན་པ་ཡང་མ་ཡིན་ནོ། །དེ་བཞིན་དུ་ཚོར་བ་དང་།
སེམས་དང་། ཆོས་ལ་ཆོས་ཀྱི་རྗེས་སུ་ལྟ་ཞིང་གནས་ཏེ་གནས་ནས་ཀྱང་། ཆོས་གང་ཡང་མི་མཐོང་ངོ་། །མ་མཐོང་ནས་ཀྱང་མི་རྟེན་པར་འགྱུར། མི་རྟེན་ནས་ཀྱང་ལམ་སྒོམ་པར་བྱེད། ལམ་རྣམ་པར་བསྒོམས་པའི་ཕྱིར། དེ་ཆོས་རྣམས་ལ་ཐེ་ཙོམ་དུ་མི་འགྱུར། ཐེ་ཙོམ་མེད་པས་སངས་
རྒྱས་མཐོང་བར་འགྱུར་རོ། །སངས་རྒྱས་མཐོང་ནས་ཀྱང་ཆོས་ཐམས་ཅད་འབྱུང་བ་མེད་པའི་ཕྱིར་རྣམ་པར་གྲོལ་བ་འབྱུང་ངོ་། །དེ་ཅིའི་ཕྱིར་ཞེ་ན། བཟང་སྐྱོང་གལ་ཏེ་བྱང་ཆུབ་སེམས་དཔའ་ཆོས་ཀྱི་འདུ་ཤེས་འཇུག་ན། དེ་ཉིད་དེའི་དམིགས་པར་ལྟ་བར་འགྱུར་རོ། །དེ་ཉིད་ཡོད་པར་ལྟ་བ་

དང་། བདག་ཏུ་ལྟ་བ་དང་། སེམས་ཅན་དུ་ལྟ་བ་དང་། སྲོག་ཏུ་ལྟ་བ་དང་། གང་ཟག་ཏུ་ལྟ་བར་འགྱུར་རོ། །དེ་ཉིད་ཕུང་པོར་ལྟ་བ་དང་། ཁམས་སུ་ལྟ་བ་དང་། སྐྱེ་མཆེད་དུ་ལྟ་བ་དང་། མཚན་མར་ལྟ་བ་དང་། དངོས་པོར་ལྟ་བ་དང་། རྒྱུར་ལྟ་བ་དང་། རྐྱེན་དུ་ལྟ་བ་དང་། དམིགས་པ་
འཛིན་པར་འགྱུར་རོ། །དེ་ཅིའི་ཕྱིར་ཞེ་ན། བཟང་སྐྱོང་ཆོས་ཐམས་ཅད་ནི་རང་བཞིན་གྱིས་སྟོང་པ། ཆོས་ཐམས་ཅད་ནི་མཚན་མ་མེད་པ། མི་གཟུང་བ། གཟུང་བ་མེད་པར་བྱང་ཆུབ་སེམས་དཔས་མཐོང་སྟེ། དེ་དག་ཆོས་ཐམས་ཅད་མི་དམིགས་སོ། །རློམ་སེམས་སུ་མི་བྱེད་དོ། །མི་
མཐོང་ངོ་། །ཇི་ལྟར་མི་དམིགས་ཤིང་རློམ་སེམས་སུ་མི་བྱེད་ལ་མི་མཐོང་ཞེ་ན། བཟང་སྐྱོང་འདི་ལྟ་སྟེ། དཔེར་ན་གཞན་མུ་སྟེགས་ཅན་ནམ། གཞན་མུ་སྟེགས་ཅན་གྱི་ཉན་ཐོས་བདག་ཏུ་འདུ་ཤེས་པ་ལ་གནས་པ། སེམས་ཅན་དང་། སྲོག་དང་། གང་ཟག་ཏུ་འདུ་ཤེས་པ་ལ་གནས་པ་
ཆོས་ཐམས་ཅད་དུ་འདུ་ཤེས་པ་ལ་གནས་པ། ཆོས་རྣམས་ལ་དམིགས་ཤིང་། རློམ་སེམས་སུ་བྱེད་པ། མཐོང་བར་བྱེད་པ་དེ་ལྟར་བཟང་སྐྱོང་བྱང་ཆུབ་སེམས་དཔས་མི་མཐོང་ངོ་། །བཟང་སྐྱོང་ཡང་བྱང་ཆུབ་སེམས་དཔས་ཇི་ལྟར་མཐོང་ཞེ་ན། བཟང་སྐྱོང་འདི་ལྟ་སྟེ་དཔེར་ན། དེ་བཞིན་
གཤེགས་པ་དང་། ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་དང་། རང་སངས་རྒྱས་རྣམས་དང་། ཉན་ཐོས་དགྲ་བཅོམ་པ་རྣམས་ཀྱིས་ཆོས་ཐམས་ཅད་མཐོང་བ་དེ་བཞིན་དུ། བཟང་སྐྱོང་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་བལྟ་བར་བྱའོ། །དེ་མཐོང་
ནས་མངོན་པར་དགའ་བར་མི་བྱའོ། །མངོན་པར་དགའ་བ་མེད་པས་དགའ་བ་ཅན་དུ་མི་འགྱུར་ཞིང་དགའ་བ་དང་བྲལ་ཏེ་དགའ་བ་ཡང་དག་པར་བཅོམ་པའི་བྱང་ཆུབ་སེམས་དཔའ་ནི་ཏིང་ངེ་འཛིན་འདི་སྒོམ་མོ། །བཟང་སྐྱོང་འདི་ལྟ་སྟེ་དཔེར་ན། ནམ་མཁའ་གཟུགས་མེད་པ། བསྟན་དུ་མེད་
པ། གནས་པ་མེད་པ། ཤིན་ཏུ་རྣམ་པར་དག་པ། ཉོན་མོངས་པ་མེད་པ་དེ་བཞིན་དུ། བྱང་ཆུབ་སེམས་དཔས་ཆོས་ཐམས་ཅད་ལ་བལྟ་སྟེ། འདུས་བྱས་དང་། འདུས་མ་བྱས་ཀྱི་ཆོས་རྣམས་ལ་དེའི་མིག་ཐོགས་པ་མེད་པར་འགྱུར་རོ། །བྱང་ཆུབ་སེམས་དཔའ་མིག་ཐོགས་པ་མེད་

པ་དེ་ལ་ཆོས་རྣམས་མངོན་སུམ་དུ་འགྱུར་ཏེ། དེ་ཡིད་ལ་བྱས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་གྱི་ཀ་བ་བརྒྱན་པ་ལྟ་བུ། འོད་ཟེར་གྱི་རྒྱལ་པོ་མངོན་པར་འཕགས་པ་ལྟ་བུ། ཟླ་བ་ཉ་བ་སྐར་མས་བསྐོར་བ་ལྟ་བུ། འཁོར་
ལོས་སྒྱུར་བའི་རྒྱལ་པོ་སྟོབས་ཀྱི་ཚོགས་ཀྱིས་བསྐོར་བ་ལྟ་བུ། ཚངས་པ་ཚངས་པའི་འཇིག་རྟེན་ན་ཚངས་པའི་སྟན་ལ་འདུག་པ་ལྟ་བུ། ལྷའི་རྒྱལ་པོ་བརྒྱ་བྱིན་སུམ་ཅུ་རྩ་གསུམ་པའི་ལྷས་བསྐོར་བ་ལྟ་བུ། རི་ཡི་རྩེ་མོ་ལ་མེ་འབར་བ་ལྟ་བུ། སྨན་པའི་རྒྱལ་པོ་སྨན་གཏོང་བ་ལྟ་བུ། རི་དགས་
ཀྱི་རྒྱལ་པོ་སེང་གེ་རལ་པ་ཅན་འཇིགས་པ་མེད་པར་ཝ་ཐམས་ཅད་སྐྲག་པར་བྱེད་པ་ལྟ་བུ། ངང་པའི་མཆོག་བར་སྣང་ལ་འཕུར་བ་ལྟ་བུ། རིའི་རྒྱལ་པོ་རི་རབ་རྒྱ་མཚོའི་ནང་ནས་མངོན་པར་འཕགས་པ་ལྟ་བུ། རིའི་རྒྱལ་པོ་གངས་རི་མེ་ཏོག་དང་སྨན་ཐམས་ཅད་ཡོངས་སུ་རྒྱས་པ་ལྟ་བུ། རི་ཁོར་
ཡུག་རླུང་གི་བུ་ལས་སྐྱེས་པས་འཛིན་ཅིང་འགྲེང་བ་ལྟ་བུ། རླུང་གི་ཕུང་པོ་ས་ཆུའི་ཕུང་པོ་འཛིན་པ་ལྟ་བུ། ཆུའི་ཕུང་པོས་སའི་ཕུང་པོ་འཛིན་པ་ལྟ་བུར་མཐོང་ངོ་། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །རི་རབ་ཀྱི་ནི་རྩེ་མཛེས་པ། །དྲི་མེད་དྲི་
མ་བྲལ་ཞིང་དག །ནམ་མཁའ་དང་ནི་མཉམ་ཞིང་འདྲ། །ལྷ་རྣམས་ཀྱིས་ནི་རབ་ཏུ་བརྒྱན། །བཟང་སྐྱོང་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གཟི་བརྗིད་དང་། དཔལ་གྱིས་སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ། ལྷམ་མེ་ལྷན་ནེ་ལྷང་ངེར་དམིགས་པར་བྱས་ཏེ། མཐོང་ཞིང་ཆོས་འཆད་པའང་ཐོས་པར་འགྱུར་རོ། །ཐོས་ནས་ཀྱང་འཛིན་པར་བྱེད། ཀུན་ཆུབ་པར་བྱེད། །འཆང་བར་བྱེད་དེ། །བྱང་ཆུབ་སེམས་དཔའ་དེ་ཏིང་ངེ་འཛིན་འདི་
ལས་ལངས་ནས་ཀྱང་། ཆོས་ཇི་སྐད་དུ་ཐོས་པ་དང་། ཇི་ལྟར་བཟུང་བ་དང་། ཇི་ལྟར་ཀུན་ཆུབ་པར་བྱས་པ་བཞིན་དུ་གཞན་དག་ལའང་རྒྱ་ཆེར་སྟོན་པར་འགྱུར། འཆད་པར་འགྱུར་རོ། །བཟང་སྐྱོང་དེ་ལྟར་ཏིང་ངེ་འཛིན་འདི་ནི། བྱང་ཆུབ་སེམས་དཔའ་རྣམས་ལ་ཕན་འདོགས་པ་མང་དུ་བྱེད་

པའོ། །འདི་ལྟ་སྟེ་འཇིག་རྟེན་དང་། འཇིག་རྟེན་ལས་འདས་པའི་ཆོས་རྣམས་ཀྱི་ཡོན་ཏན་མང་པོ་སྐྱེད་པར་བྱེད་པའོ། །བཟང་སྐྱོང་དེ་བས་ན་བྱང་ཆུབ་འདོད་པའི་རིགས་ཀྱི་བུའམ་རིགས་ཀྱི་བུ་མོས་ཏིང་ངེ་འཛིན་འདི་གཟུང་བར་བྱའོ། །ཀུན་ཆུབ་པར་བྱའོ། །བཅང་བར་བྱའོ། །བཀླག་
པར་བྱའོ། །བྲི་བར་བྱའོ། །གཞན་དག་ལ་ཡང་རྒྱ་ཆེར་བཤད་པར་བྱའོ། །བསྟན་པར་བྱའོ། །བསྒྲགས་པར་བྱའོ། །བསྒོམ་པའི་སྦྱོར་བ་ལའང་བརྩོན་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །དྲི་བྲལ་རྡུལ་བྲལ་དྲི་མེད་སངས་
རྒྱས་ཏེ། །ཆགས་པ་མེད་ཅིང་སྐྱེ་བོ་མང་པོས་མཆོད། །རྔ་རྡུང་འཁར་རྔ་ལྷ་ཡི་རོལ་མོའི་སྒྲ། །རོལ་མོ་ཕྲག་བརྒྱས་ཕན་མཛད་ཕྱག་བྱ་བ། །མེ་ཏོག་སིལ་མ་དག་གིས་གཏོར་བྱས་ཤིང་། །སྐྱེ་བོ་མང་པོས་རིང་བསྲེལ་མཆོད་རྟེན་མཆོད། །ལྷ་ཡི་ཕྲེང་བ་དྲི་དང་གདུགས་སྣ་ཚོགས། །ཏིང་འཛིན་
འདི་ནི་ཚོལ་ཞིང་འདོགས་པར་བྱེད། །གང་ཞིག་ཀུན་རྫོབ་ལ་ནི་གནས་བྱས་ནས། །ཤིན་ཏུ་རྒྱས་ཆོས་བལྟ་དཀའ་གྱ་ནོམ་འབྱེད། །མ་ཆགས་ཡེ་ཤེས་རྒྱལ་བ་དྲན་བྱེད་ཅིང་། །སྟོང་པ་ཉིད་ལས་ནམས་ཀྱང་ཉམས་མི་འགྱུར། །ཟླ་བ་དྲི་མེད་ཉི་མ་ཤར་བ་འམ། །ཚངས་པའི་འཇིག་རྟེན་ཚངས་
པ་འདུག་པ་བཞིན། །རྣམ་དག་སེམས་ཀྱིས་རྒྱལ་བ་དྲན་བྱེད་ཅིང་། །སྟོང་པ་ཉིད་ནི་ནམས་ཀྱང་མི་འདོར་རོ། །ཇི་ལྟར་སུམ་ཅུ་རྩ་གསུམ་ལྷ་ཡི་རྒྱལ། །སུམ་ཅུ་རྩ་གསུམ་ལྟ་བས་ཟིལ་གྱིས་གནོན། །དེ་ལྟར་རྒྱལ་བས་འཇིག་རྟེན་ཟིལ་མནན་ཏེ། །དཔལ་གྱི་ལྷམ་མེ་ལྷན་ནེ་ལྷང་ངེའོ། །
ཚལ་གྱི་མཆོག་ལ་མེ་དག་མཆེད་གྱུར་ཏེ། །མར་གྱི་མེ་བསྲེགས་མེ་ལྕེ་རབ་འབར་བ། །འོད་ཟེར་བརྒྱ་སྟོང་དག་ནི་འབྱུང་བ་ལྟར། །དེ་བཞིན་རྒྱལ་བ་མཚན་གྱིས་རྒྱས་པར་ལྟོས། །ཇི་ལྟར་སྨན་པ་ཟུག་རྔུ་འབྱིན་བྱེད་པ། །ནད་པ་རྣམས་ལ་ནད་དཔྱད་བྱེད་པ་ལྟར། །རྒྱལ་བ་མི་ཡི་སེང་གེ་
སྨན་པ་མཆོག །ཇི་ལྟར་འཐུན་པ་བདེ་གཤེགས་གཏམ་ཡང་གསུང་། །འཁོར་ལ་སེང་གེའི་སྒྲ་ནི་སྒྲོགས་མཛད་ཅིང་། །ཁྱུ་མཆོག་སངས་རྒྱས་འཇིག་རྟེན་ཀུན་མི་བསྙེངས། །ནགས་གནས་སེང་གེ་ཝ་ལ་བཞིན་དུ། །ཕས་ཀྱི་རྒོལ་བ་ཐམས་ཅད་ཟིལ་གྱིས་གནོན། །ཇི་ལྟར་ངང་པའི་

རྒྱལ་པོ་མཆོག་དག་ནི། །མཁའ་ལ་འཕུར་ན་དཀར་ཞིང་རྣམ་དག་མཛེས། །དེ་ལྟར་བདེ་བར་གཤེགས་པ་གསེར་གྱི་མདོག །བདེ་གཤེགས་སྲས་ཀྱི་ཐུ་བོ་རྣམས་ཀྱང་དྲན། །ཇི་ལྟར་རི་རྒྱལ་གངས་ཅན་ལྷམ་མེ་ཞིང་། །ལྷག་གེ་བ་དང་རྒྱལ་རིགས་རྒྱལ་པོ་འམ། །
ཇི་ལྟར་ཀ་བ་རིན་ཆེན་སྣ་ཚོགས་བརྒྱན། །དེ་ལྟར་རྒྱལ་བ་མཚན་གྱིས་བརྒྱན་པར་བལྟ། །མི་གཡོ་མ་རལ་ཇི་ལྟར་རྡོ་རྗེ་འདྲ། །ཁོར་ཡུག་རི་ནི་རླུང་གི་བུ་སྐྱེས་འཛིན། །དེ་ལྟར་བདེ་གཤེགས་བསྐལ་པ་ཕྱོགས་འཛིན་ཅིང་། །ཕན་དང་ལྡན་ཞིང་བྱམས་ལྡན་ཆོས་ཀྱང་ཆེ། །ཇི་ལྟར་ཆུ་ལ་ས་དག་
རྟེན་པ་དང་། །ཇི་ལྟར་རླུང་ལ་ཆུ་ཡང་རྟེན་པ་དང་། །ཇི་ལྟར་ནམ་མཁའ་ལ་ནི་རླུང་རྟེན་པ། །དེ་ལྟར་རྒྱལ་བ་ཡོན་ཏན་ཀུན་ལ་བཞུགས། །ཇི་ལྟར་སུམ་ཅུ་རྩ་གསུམ་རི་རབ་རྒྱལ། །ལྷན་ནེ་ལྷག་གེ་ཐམས་ཅད་ཡོངས་སུ་རྒྱས། །དེ་ལྟར་བདེ་གཤེགས་རི་རབ་ལྟ་བུ་ཡང་། །རིན་ཆེན་
ཚོགས་ཀྱི་ནང་ན་བཞུགས་པ་མཛེས། །མ་ཆགས་སེམས་ལྡན་རྒྱལ་བ་དྲན་བྱེད་ན། །མུན་དང་བྲལ་ཞིང་མི་སྣང་མེད་པ་ཡི། །ཏིང་འཛིན་རྡུལ་བྲལ་རྣམ་དག་དེ་མིག་འགྱུར། །དེ་ནི་དངོས་པོའི་འདུ་ཤེས་ཀུན་དང་བྲལ། །རྒྱལ་བ་རྣམ་དག་སེམས་ནི་དྲན་བྱེད་ན། །རྡུལ་དང་དྲི་མ་བྲལ་
ཞིང་ཁྲོ་བ་སྤངས། །མ་རིག་བྲལ་ཞིང་དེ་ཡི་ཡེ་ཤེས་དག །དེ་ཡི་ཡེ་ཤེས་རྡུལ་བྲལ་འབྱུང་བར་འགྱུར། །རྒྱལ་བ་ཚུལ་ཁྲིམས་རྣམ་དག་དྲན་བྱེད་ན། །དེ་ཡི་ཡེ་ཤེས་རབ་རིབ་བྲལ་ཞིང་དག །ང་དང་བདག་ལྟ་དེ་ལ་ཕྱིས་ཀྱང་མེད། །དངོས་པོའི་འདུ་ཤེས་ནམས་ཀྱང་འབྱུང་མི་
འགྱུར། །དེ་ནི་སྲིད་པའི་རྒྱུད་ལ་ལྟ་དང་བྲལ། །ཐེ་ཚོམ་ལམ་བྲལ་ཡེ་ཤེས་རྣམ་པར་དག །ནམས་ཀྱང་གཟུགས་ཀྱི་འདུ་ཤེས་མི་འགྱུར་ཞིང་། །ཞི་ལམ་བསིལ་བའི་དངོས་པོའི་ཆོས་ཀྱང་ཉན། །ས་དང་ཆུ་དང་མེ་དང་རླུང་དག་ནི། །རང་གི་དངོས་པོ་མེད་ཅིང་ཐམས་ཅད་སྟོང་། །རྒྱལ་
བ་མཆོག་རབ་བསྟན་པ་ཐོས་ནས་ཀྱང་། །དེ་ནི་དངོས་པོའི་འདུ་ཤེས་མི་འབྱུང་ངོ་། །དངོས་སུ་ཤེས་པ་ཐམས་ཅད་ཚར་བཅད་ཅིང་། །འགྲོ་བ་ཐམས་ཅད་སྟོང་པར་རིག་ནས་ཀྱང་། །ཇི་ལྟར་འདབ་ཆགས་ནམ་མཁར་མི་ཆགས་བཞིན། །ནམས་ཀྱང་ཡིད་ནི་ཆགས་པར་མི་འགྱུར་རོ། །མཆོག་

རབ་རྒྱལ་ལ་རི་མོ་བྱས་པས་ནི། །རྫུ་འཕྲུལ་སྟོབས་ལ་གནས་ཤིང་ཡིད་རྣོ་བས། །འཇིག་རྟེན་ཀུན་ན་ཕྱོགས་བཅུར་རྣམ་པར་སྣང་། །ཡོན་ཏན་ཚད་མེད་པ་ནི་ཀུན་དང་ལྡན། །ལག་པ་རྐང་པ་དེ་བཞིན་མགོ་བོ་མིག །རྒྱལ་སྲིད་རྟ་དང་བ་གླང་ཐམས་ཅད་དང་། །འཇིག་རྟེན་པ་ཡི་རིན་ཆེན་
ཀུན་གཏོང་ཡང་། །ཚུལ་ཁྲིམས་ཕུང་པོ་ཡོངས་སུ་གཏོང་མི་བྱེད། །སྙིང་རྗེ་བསྐྱེད་ནས་འཇིག་རྟེན་ཀུན་ཕན་ཕྱིར། །ཆོས་ཀྱི་གཙོ་བོ་རིན་ཆེན་སྟོན་པར་བྱེད། །འདུས་བྱས་མ་ལུས་ཐམས་ཅད་སྤོང་བྱེད་ཀྱང་། །བྱང་ཆུབ་སེམས་ནི་ཡོངས་སུ་གཏོང་མི་བྱེད། །དགེ་སློང་དང་ནི་རྒྱལ་སྲས་
ལེགས་ཞུགས་དང་། །དེ་བཞིན་དགེ་སློང་མ་དང་དགེ་བསྙེན་དང་། །དད་ལྡན་ཆགས་དང་བྲལ་བའི་དགེ་བསྙེན་མས། །རྗེས་སུ་དྲན་པར་བྱས་ན་གནས་འདི་འཐོབ། །ཏིང་འཛིན་ཞི་བ་འདི་ནི་སུ་འཆང་བའི། །བདེ་གཤེགས་སྲས་པོ་ཏིང་ངེ་འཛིན་མཁས་པ། །དེ་ལ་ཡོན་ཏན་མང་པོ་དེ་དག་
འབྱུང་། །བླ་མེད་རྣམ་པ་མང་པོའི་གནས་འབྱུང་ངོ་། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅྭ་བརྒྱད་པའོ།། །།བཟང་སྐྱོང་དེ་ལྟ་བས་ན། བྱང་ཆུབ་སེམས་དཔའ་གང་ཏིང་ངེ་འཛིན་འདི་འཆད་པའམ་འཐོབ་པར་འདོད་པ་དེས་དང་པོ་ཉིད་ནས་མཚན་མའི་འདུ་
ཤེས་རྣམས་བསལ་བར་བྱའོ། །མཚན་མའི་འདུ་ཤེས་རྣམས་བསལ་ནས་ལྷག་པའི་ང་རྒྱལ་དུ་མི་བྱ་སྟེ། བྱང་ཆུབ་སེམས་དཔའ་ལྷག་པའི་ང་རྒྱལ་སྤངས་ཤིང་། ཡིད་ལ་མཚན་མ་དང་བྲལ་བས། ཏིང་ངེ་འཛིན་འདི་ལུང་མནོད་པར་བྱ་སྟེ། བརྩད་པར་མི་བྱའོ། །དེ་ལ་ཇི་ལྟར་ན་རྩོད་
པ་མེད་པར་འགྱུར་ཞེ་ན། གང་སྟོང་པ་ཉིད་མི་སྤོང་བ་སྟེ། འདི་ནི་རྩོད་པ་མེད་པའོ། །བཟང་སྐྱོང་རྩོད་པ་མེད་པ་གཙོ་བོར་བྱེད་པའི་བྱང་ཆུབ་སེམས་དཔས་ཏིང་ངེ་འཛིན་འདི་ལུང་མནོད་པར་བྱའོ། །བཟང་སྐྱོང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག །ཏིང་ངེ་འཛིན་འདི་ལུང་ནོད་
པར་འདོད་པར་གྱུར་ན། དེས་ཆོས་བཅུ་དང་ལྡན་པར་བྱ་སྟེ། ཏིང་ངེ་འཛིན་འདི་ལུང་མནོད་པར་བྱའོ། །བཅུ་གང་ཞེ་ན། འདི་ལྟ་སྟེ། བཟང་སྐྱོང་ང་རྒྱལ་བཅོམ་པའི་རིགས་ཀྱི་བུ་དང་རིགས་ཀྱི་བུ་མོ་གཞན་གྱི་རྙེད་པ་དང་བཀུར་སྟི་དང་། ཚིགས་སུ་བཅད་པ་ལ་ཕྲག་དོག་མེད་པ་དང་། གུས་པ་དང་བཅས་ཤིང་

རྗེ་ས་དང་བཅས་པ་དང་། བྱས་པ་ཤེས་ཤིང་བྱས་པ་གཟོ་བ་དང་། འཇུངས་པ་མེད་ཅིང་འགྱོད་པ་དང་བྲལ་བ་དང་། དད་པ་དང་ལྡན་ཞིང་བརྟག་པ་མང་བ་དང་། བརྩོན་འགྲུས་བརྩམས་ཤིང་འཆག་པ་ལ་ཞུགས་པ་དང་། མགྲོན་དུ་གཉེར་བ་ལ་མི་ལྟོས་པར་བསོད་སྙོམས་
བྱེད་པ་དང་། ཟབ་མོ་ལ་མོས་པས་ཏིང་ངེ་འཛིན་འདི་ལུང་མནོད་པར་བྱའོ། །རིགས་ཀྱི་བུའམ་རིགས་ཀྱི་བུ་མོ་གང་ལ་ལས་ཏིང་ངེ་འཛིན་འདི་ལུང་མནོད་པར་འདོད་པ་དེ་ལ་སྟོན་པའི་འདུ་ཤེས་ཉེ་བར་གཞག་སྟེ། ཏིང་ངེ་འཛིན་འདི་ལུང་མནོད་པར་བྱ། གདོན་པར་བྱ། བཅང་བར་བྱ་སྟེ།
བཟང་སྐྱོང་ཆོས་བཅུ་པོ་དེ་དག་དང་ལྡན་ན་རིགས་ཀྱི་བུའམ་རིགས་ཀྱི་བུ་མོ་དེས་ཏིང་ངེ་འཛིན་འདི་མནོད་པར་བྱའོ། །དེ་ལྟར་ཞུགས་པ་དེ་ནི་ཆོས་བརྒྱད་འཛིན་ཏོ། །བརྒྱད་གང་ཞེ་ན་འདི་ལྟ་སྟེ། ཤིན་ཏུ་བྱང་ཕྱིར་ཚུལ་ཁྲིམས་རྣམ་པར་དག་པ་དང་། ཤེས་རབ་དང་ལྡན་པས་ལྟ་བ་རྣམ་པར་
དག་པ་དང་། ཡང་འབྱུང་བ་མེད་པས། ཤེས་རབ་རྣམ་པར་དག་པ་དང་། འཁོར་ཐམས་ཅད་ལ་དོན་དུ་མི་གཉེར་བས་གཏོང་བ་ཡོངས་སུ་དག་པ་དང་། ཤིན་ཏུ་བརྗེད་པ་མེད་པས་ཐོས་པ་རྣམ་པར་དག་པ་དང་། བྱང་ཆུབ་འཐོབ་པས་བརྩོན་འགྲུས་རྣམ་པར་དག་པ་དང་། རྟེན་མེད་པས་
བཀུར་སྟི་ཐོབ་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སེམས་ཅན་ཐམས་ཅད་ཀྱིས་མི་བསྐྱོད་པ་སྟེ། བཟང་སྐྱོང་བྱང་ཆུབ་སེམས་དཔའ་ནི་ཆོས་བརྒྱད་པོ་འདི་དག་རབ་ཏུ་འཛིན་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །
མཁས་པས་མཚན་མའི་འདུ་ཤེས་མི་བསྐྱེད་ཅིང་། །ང་རྒྱལ་ངའོ་སྙམ་པའི་ང་རྒྱལ་སྤང་། །བཟོད་པ་རྡུལ་བྲལ་འདུས་མ་བྱས་བསྐྱེད་ནས། །དེས་ནི་ཏིང་འཛིན་འདི་ཡང་ལུང་མནོད་བྱ། །མཁས་པས་སྟོང་པ་ཉིད་དང་མཚན་མེད་དང་། །ཞི་བ་མྱ་ངན་འདས་ལ་བརྩད་མི་བྱ། །མི་བསྐྱོད་ཆོས་
ཅན་སྟོན་པ་དང་ཡང་འཐུན། །དེ་འདྲ་དེས་ནི་ཏིང་འཛིན་འདི་ལུང་མནོས། །མཁས་པ་ང་རྒྱལ་ཕྲག་དོག་མི་བྱེད་ཅིང་། །བྱས་གཟོ་སངས་རྒྱས་ཆོས་དང་དགེ་འདུན་ལ། །དང་བ་སྐྱེས་པར་གྱུར་ཅིང་མི་བསྐྱོད་པ། །དེས་ནི་ཏིང་འཛིན་འདི་ཡང་མྱུར་ལུང་ནོས། །འཇུངས་པ་མེད་ཅིང་མུན་བྲལ་

མི་རྩུབ་ལ། །བརྟག་དང་ལྡན་ལ་ཤིན་ཏུ་དད་པ་ཅན། །འཆག་སར་ཞུགས་ཤིང་བརྩོན་འགྲུས་རྩོམ་བྱེད་པས། །ཏིང་འཛིན་འདི་ནི་རབ་ཏུ་འདོད་པར་བྱ། །དགེ་སློང་རྟག་ཏུ་བསོད་སྙོམས་སྤྱད་བྱ་སྟེ། །མགྲོན་དུ་བོས་པའང་སྤང་ན་སོགས་ཅི་སྨོས། །དོན་དམ་དམིགས་སུ་མེད་ལ་རབ་ཏུ་
མཁས། །དེ་འདྲ་དེས་ནི་ཏིང་འཛིན་འདི་ཟུང་ཤིག །གང་ལས་ཏིང་འཛིན་འཕགས་པ་འདི་བྲིས་སམ། །བཅངས་སམ་གཞན་དག་ལ་ཡང་བསྟན་བྱས་ན། །དེ་ལས་དེས་ནི་དང་པོར་འདི་ཐོབ་ནས། །མཁས་པས་དེ་ལ་སྟོན་པར་འདུ་ཤེས་བསྐྱེད། །ཡོན་ཏན་ཕུན་སུམ་ཚོགས་པར་
འདིར་གནས་ཏེ། །གང་ཞིག་ཏིང་འཛིན་འདི་ལུང་ནོད་བྱེད་པ། །དེ་ནི་རྒྱལ་བས་གནང་ཞིང་རྡུལ་བྲལ་ལ། །རྣམ་པར་དག་པའི་ཆོས་བརྒྱད་མྱུར་དུ་འཛིན། །མཁས་པ་གང་ལ་ཡོན་ཏན་འདི་སྣང་བ། །ཚུལ་ཁྲིམས་ཀྱང་ནི་རྣམ་པར་དག་པར་འགྱུར། །ཏིང་འཛིན་དག་ཅིང་དེ་
བཞིན་ལྟ་བ་དག །དེས་ནི་སྲིད་པར་སྲེད་པ་དག་ཀྱང་སྦྱངས། །མཁས་པ་གང་ལ་ཡོན་ཏན་འདི་སྣང་བ། །ཡང་སྲིད་མེད་པས་ཤེས་རབ་རྣམ་པར་དག །རྟེན་པ་དག་ཀྱང་མེད་ཅིང་གཏོང་བ་དག །མང་དུ་ཐོས་ཤིང་ཉམས་པར་མི་འགྱུར་རོ། །མཁས་པ་གང་ལ་ཡོན་ཏན་འདི་སྣང་བ། །བརྩོན་འགྲུས་
བརྩམས་ཤིང་བྱང་ཆུབ་ལས་མི་ཉམས། །རྙེད་དང་བཀུར་སྟི་ཅུང་ཟད་མི་རྟེན་ཏེ། །དེ་ནི་བླ་ན་མེད་པའི་བྱང་ཆུབ་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅུ་དགུ་པའོ།། །།བཟང་སྐྱོང་ཆོས་བརྒྱད་པོ་འདི་དག་དང་ལྡན་ན་བྱང་ཆུབ་སེམས་དཔའ་དེ་བཞིན་
གཤེགས་པའི་སྟོབས་བཅུ་འཐོབ་བོ། །བཅུ་གང་ཞེ་ན། བཟང་སྐྱོང་འདི་ལ་དེ་བཞིན་གཤེགས་པ་གནས་ལ་གནས་སུ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། གནས་མ་ཡིན་པ་ལ་གནས་མ་ཡིན་པར་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། བཟང་སྐྱོང་གང་ཡང་དེ་
བཞིན་གཤེགས་པས་གནས་ལ་གནས་དང་། གནས་མ་ཡིན་པ་ལ་ཡང་གནས་མ་ཡིན་པར་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་པ་འདི་ནི་བཟང་སྐྱོང་། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་དང་པོ་སྟེ། སྟོབས་དེ་ལ་བརྟེན་ནས། དེ་བཞིན་

གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང་འཇིག་རྟེན་འདི་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་
ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་འདས་པ་དང་། མ་འོངས་པ་དང་། ད་ལྟར་བྱུང་བའི་ལས་རྣམས་དང་། ལས་ཡང་དག་པར་འཛིན་པ་རྣམས་ཀྱི་གནས་དང་། རྒྱུ་དང་། རྣམ་པར་སྨིན་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་
མཁྱེན་པ་འདི་ནི་བཟང་སྐྱོང་། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་གཉིས་པ་སྟེ། སྟོབས་དེ་ལ་བརྟེན་ནས། དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང་། འཇིག་
རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་ཐམས་ཅད་དུ་འགྲོ་བའི་ལམ་མཁྱེན་པ་ཡང་དག་པ་ཇི་ལྟ་བ་བཞིན་དུ་
རབ་ཏུ་མཁྱེན་ཏེ། བཟང་སྐྱོང་གང་དེ་བཞིན་གཤེགས་པས་ཐམས་ཅད་དུ་འགྲོ་བའི་ལམ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི་བཟང་སྐྱོང་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་གསུམ་པ་སྟེ། སྟོབས་དེ་ལ་བརྟེན་ནས། དེ་བཞིན་གཤེགས་
པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་
སྐྱོང་གཞན་ཡང་དེ་བཞིན་གཤེགས་པས་ཁམས་དུ་མ་དང་། ཁམས་སྣ་ཚོགས་པའི་འཇིག་རྟེན་མཁྱེན་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། བཟང་སྐྱོང་གང་དེ་བཞིན་གཤེགས་པས་ཁམས་དུ་མ་དང་། ཁམས་སྣ་ཚོགས་པའི་འཇིག་རྟེན་མཁྱེན་པ། ཡང་དག་པ་ཇི་ལྟ་བ་བཞིན་

རབ་ཏུ་མཁྱེན་པ་འདི་ནི་བཟང་སྐྱོང་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བཞི་པ་སྟེ། སྟོབས་དེ་ལ་བརྟེན་ནས། དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང་འཇིག་རྟེན་ན་
དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་སེམས་ཅན་གཞན་དག་དང་། གང་ཟག་གཞན་རྣམས་ཀྱི་མོས་པ་དུ་མ་
མཁྱེན་པ། ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། བཟང་སྐྱོང་གང་ཡང་དེ་བཞིན་གཤེགས་པས་སེམས་ཅན་གཞན་དང་། གང་ཟག་གཞན་མོས་པ་དུ་མ་དང་། མོས་པ་སྣ་ཚོགས་རྣམས་ཀྱི་མོས་པ་མཁྱེན་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་པ་འདི་ནི་བཟང་སྐྱོང་དེ་བཞིན་
གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་ལྔ་པ་སྟེ། སྟོབས་དེ་ལ་བརྟེན་ནས་དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང་། འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ།
བདུད་དམ། ཚངས་པའམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་སེམས་ཅན་གཞན་དག་དང་། གང་ཟག་གཞན་རྣམས་ཀྱི་དབང་པོ་མཆོག་དང་། །མཆོག་མ་ཡིན་པ་མཁྱེན་པ་
ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། བཟང་སྐྱོང་གང་ཡང་དེ་བཞིན་གཤེགས་པས་སེམས་ཅན་གཞན་དག་དང་། གང་ཟག་གཞན་རྣམས་ཀྱི་དབང་པོ་མཆོག་དང་། མཆོག་མ་ཡིན་པ་མཁྱེན་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་པ་འདི་ནི་བཟང་སྐྱོང་། དེ་བཞིན་གཤེགས་
པ་རྣམས་ཀྱི་དེ་བཞིན་གཤེགས་པའི་སྟོབས་དྲུག་པ་སྟེ། སྟོབས་དེ་ལ་བརྟེན་ནས། དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང་འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ།

ཚངས་པའམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་ཀུན་ནས་ཉོན་མོངས་པ་
དང་། རྣམ་པར་བྱང་བ་དང་། རྣམ་པར་གཞག་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། བཟང་སྐྱོང་གང་ཡང་དེ་བཞིན་གཤེགས་པས། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་ཀུན་ནས་ཉོན་མོངས་པ་དང་། རྣམ་པར་བྱང་བ་དང་།
རྣམ་པར་གཞག་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་པ་འདི་ནི་བཟང་སྐྱོང་། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བདུན་པ་སྟེ། སྟོབས་དེ་ལ་བརྟེན་ནས། དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ། འཁོར་གྱི་ནང་དུ་གཤེགས་
ཏེ། སེང་གེའི་སྒྲ་ཡང་དག་པར་སྒྲོགས་ཤིང་། འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་སྔོན་གྱི་
གནས་རྗེས་སུ་དྲན་པ་མཁྱེན་པ། ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། བཟང་སྐྱོང་གང་ཡང་དེ་བཞིན་གཤེགས་པས་སྔོན་གྱི་གནས་རྗེས་སུ་དྲན་པ་མཁྱེན་པ། ཡང་དག་པ་ཇི་ལྟ་བ་བཞིན་རབ་ཏུ་མཁྱེན་པ་འདི་ནི་བཟང་སྐྱོང་དེ་བཞིན་གཤེགས་པ་རྣམས་ཀྱི། དེ་བཞིན་གཤེགས་
པའི་སྟོབས་བརྒྱད་པ་སྟེ། སྟོབས་དེ་ལ་བརྟེན་ནས། དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང་། འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་
ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་ལྷའི་མིག་མཁྱེན་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། བཟང་སྐྱོང་གང་ཡང་དེ་བཞིན་གཤེགས་པས། ལྷའི་མིག་མཁྱེན་པ་ཡང་དག་པ་ཇི་ལྟ་

བ་བཞིན་རབ་ཏུ་མཁྱེན་པ་འདི་ནི། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་དགུ་པ་སྟེ། སྟོབས་དེ་ལ་བརྟེན་ནས། དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང་འཇིག་
རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང་གཞན་ཡང་དེ་བཞིན་གཤེགས་པས་ཟག་པ་ཟད་པ་མཁྱེན་པ་ཡང་དག་པ་ཇི་ལྟ་བ་བཞིན་རབ་ཏུ་
མཁྱེན་ཏེ། བཟང་སྐྱོང་གང་ཡང་དེ་བཞིན་གཤེགས་པས་ཟག་པ་ཟད་པ་མཁྱེན་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་པ་འདི་ནི། དེ་བཞིན་གཤེགས་པ་རྣམས་ཀྱི། དེ་བཞིན་གཤེགས་པའི་སྟོབས་བཅུ་པ་སྟེ། སྟོབས་དེ་ལ་བརྟེན་ནས། དེ་བཞིན་གཤེགས་པས་ཁྱུ་
མཆོག་གི་གནས་རབ་ཏུ་མཁྱེན་ལ། འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་སྒྲོགས་ཤིང་། འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པས་བསྐོར་བར་མི་ནུས་པའི་ཚངས་པའི་འཁོར་ལོ་
བསྐོར་རོ། །བཟང་སྐྱོང་དེ་བཞིན་གཤེགས་པའི་སྟོབས་བཅུ་པོ་འདི་དག་བྱང་ཆུབ་སེམས་དཔས་ཡོངས་སུ་འཛིན་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །འཇིག་རྟེན་མགོན་པོ་སྐྱོབ་པ་ཡིས། །སྟོབས་རྣམས་ཀྱི་ནི་ས་བཤད་
པ། །ཏིང་འཛིན་འདི་ལ་གནས་ན་ནི། །བྱང་ཆུབ་སེམས་དཔས་ཐོབ་པར་འགྱུར། །གནས་དང་དེ་བཞིན་གནས་མ་ཡིན། །ཡང་དག་ཇི་བཞིན་མཁྱེན་པ་ནི། །འཇིག་རྟེན་མགོན་པོ་སྐྱོབ་མཛད་པ། །སངས་རྒྱས་རྣམས་ཀྱི་སྟོབས་དང་པོ། །འཇིག་རྟེན་མགོན་པོ་སྐྱོབས་མཛད་པ།
རང་བྱུང་རྣམས་ཀྱི་སྟོབས་དང་པོ། །དེ་ལ་གནས་ནས་རྫོགས་སངས་རྒྱས། །སྲོག་ཆགས་རྣམས་ལ་ཆོས་སྟོན་ཏོ། །འདས་དང་མ་འོངས་ད་ལྟར་གྱི། །ལས་རྣམས་རབ་ཏུ་མཁྱེན་པ་ནི། །འཇིག་རྟེན་མགོན་པོ་སྐྱོབ་མཛད་པ། །སངས་རྒྱས་རྣམས་ཀྱི་སྟོབས་གཉིས་པའོ། །མོས་

པ་ཆུང་དང་མཆོག་རྣམས་དང་། །འབྲིང་དག་རབ་ཏུ་མཁྱེན་པ་ནི། །དཔལ་ལྡན་རྫོགས་པར་སངས་རྒྱས་པའི། །སྟོབས་གསུམ་པ་ནི་དེ་ཡིན་ནོ། །དབང་པོ་རྣོ་དང་བར་མ་དང་། །ཐ་མའི་ཁྱད་པར་མཁས་པ་ནི། །དྲང་སྲོང་ཆེན་པོ་རྫོགས་སངས་རྒྱས། །སངས་
རྒྱས་རྣམས་ཀྱི་སྟོབས་བཞི་པའོ། །ཁམས་རྣམས་སྣ་ཚོགས་རབ་མཁྱེན་ཅིང་། །ཁམས་རྣམས་ཀྱི་ནི་ཕ་རོལ་ཕྱིན། །གནས་འདི་དག་ནི་རང་བྱུང་གི། །སྟོབས་ནི་ལྔ་པ་ཉིད་ཡིན་ནོ། །ཐམས་ཅད་དུ་ནི་འགྲོ་བའི་ལམ། །དེ་དང་དེར་ནི་བགྲོད་པ་སྟེ། །དེ་དག་ཐམས་ཅད་རབ་མཁྱེན་
པ། །བསམ་གྱིས་མི་ཁྱབ་སྟོབས་དྲུག་པའོ། །བསམ་གཏན་རྣམ་ཐར་སྙོམས་པར་འཇུག །ཀུན་ནས་ཉོན་མོངས་རབ་མཁྱེན་ཅིང་། །གནས་དང་གནས་མིན་མཁྱེན་པ་ནི། །སྟོབས་བདུན་པ་ཞེས་བྱ་བའོ། །སྔོན་གྱི་བྱེ་བ་ཚུན་ཆད་ཀྱི། །བདག་ནི་སྔོན་ན་གར་གནས་པའི། །སྔོན་
གྱི་གནས་རྣམས་རབ་མཁྱེན་པ། །དེ་ནི་སྟོབས་ཀྱང་བརྒྱད་པའོ། །འཆི་འཕོ་དང་ནི་སྐྱེ་བ་མཁྱེན། །མཐོ་རིས་དང་ནི་ངན་སོང་གཟིགས། །མིག་གི་ཕ་རོལ་ཕྱིན་ཐོབ་པ། །འདི་ནི་སྟོབས་ཀྱང་དགུ་པའོ། །གང་དག་ལྷ་འམ་གང་དག་མི། །ཟག་པ་ཐམས་ཅད་ང་ལ་ཟད། །ང་ལ་ཡང་
སྲིད་མེད་པ་ནི། །བསམ་གྱིས་མི་ཁྱབ་སྟོབས་བཅུ་པའོ། །འཇིག་རྟེན་མགོན་པོ་སྐྱོབ་མཛད་པ། །རང་བྱུང་རྣམས་ཀྱི་སྟོབས་འདི་དག །ཏིང་འཛིན་འདི་ལ་གནས་ན་ནི། །དེ་དག་ཐམས་ཅད་རྙེད་མི་དཀའ། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ཉི་ཤུ་པའོ།། །།
བཟང་སྐྱོང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན། དེ་བཞིན་གཤེགས་པའི་མི་འཇིགས་པ་གང་དག་ཐོབ་པར་འགྱུར་བ་དེ་གང་ཞེ་ན། བཟང་སྐྱོང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་ཐོབ་པར་འགྱུར་བའི་དེ་བཞིན་གཤེགས་པའི་མི་འཇིགས་པ་ནི་འདི་བཞིའོ། །བཞི་
གང་ཞེ་ན། འདི་ལྟ་སྟེ། ང་ཡང་དག་པར་རྫོགས་པར་སངས་རྒྱས་པ་ལ་འདི་ལ་ཆོས་འདི་མངོན་པར་སངས་མ་རྒྱས་སོ་ཞེས་ང་ལ་འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པར་ཚིག་ཏུ་བརྗོད་ཅིང་རྒོལ་བར་འགྱུར་བའི་

རྒྱུ་ཡང་དག་པར་རྗེས་སུ་མི་མཐོང་སྟེ། རྒྱུ་ཡང་དག་པར་རྗེས་སུ་མ་མཐོང་བས། དབུགས་འབྱིན་པ་ཐོབ་པར་གནས་སོ། །བག་ཚ་བ་མེད་པ་ཐོབ་པར་གནས་སོ། །བདེ་བ་ཐོབ་པར་གནས་སོ། །མི་འཇིགས་པ་ཐོབ་པར་གནས་སོ། །འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་
པར་བསྒྲག་པར་བྱའོ། །འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པར་མ་བསྐོར་བའི་ཚངས་པའི་འཁོར་ལོ་བསྐོར་བར་བྱའོ་ཞེས་བྱ་བ་འདི་ནི། བཟང་སྐྱོང་གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་
འཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་དང་པོའོ། །བཟང་སྐྱོང་གཞན་ཡང་ང་ཟག་པ་ཟད་པ་ལ་དེ་ལ་ཟག་པ་འདི་རྣམས་ཡོངས་སུ་ཟད་པར་མ་གྱུར་ཏོ། །ཞེས་འཇིག་རྟེན་ན། དགེ་སྦྱོང་ངམ། བྲམ་ཟེའམ། ལྷའམ། བདུད་དམ།
ཚངས་པའམ། སུས་ཀྱང་ཆོས་དང་འཐུན་པར་ཚིག་ཏུ་བརྗོད་ཅིང་རྒོལ་བར་འགྱུར་བའི་རྒྱུ་ཡང་དག་པར་རྗེས་སུ་མི་མཐོང་སྟེ། རྒྱུ་ཡང་དག་པར་རྗེས་སུ་མ་མཐོང་བས། དབུགས་འབྱིན་པ་ཐོབ་པར་གནས་སོ། །བག་ཚ་བ་མེད་པ་ཐོབ་པར་གནས་སོ། །བདེ་བ་ཐོབ་པར་གནས་སོ། །མི་
འཇིགས་པ་ཐོབ་པར་གནས་སོ། །འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་བསྒྲག་པར་བྱའོ། །འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པར་མ་བསྐོར་བའི་ཚངས་པའི་འཁོར་ལོ་བསྐོར་བར་བྱའོ། །
ཞེས་བྱ་བ་འདི་ནི་བཟང་སྐྱོང་། གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་ཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་གཉིས་པའོ། །བཟང་སྐྱོང་གཞན་ཡང་གང་ངས་བར་དུ་གཅོད་པའི་ཆོས་སུ་བསྟན་པ་དེ་དེ་དག་ལ་བསྟེན་ན་བར་
དུ་གཅོད་པའི་ཆོས་སུ་མི་འགྱུར་རོ། །ཞེས་ང་ལ་འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པར་ཚིག་ཏུ་བརྗོད་ཅིང་རྒོལ་བར་འགྱུར་བའི་རྒྱུ་ཡང་དག་པར་རྗེས་སུ་མི་མཐོང་སྟེ། རྒྱུ་ཡང་དག་པར་རྗེས་སུ་མ་མཐོང་བས་

དབུགས་འབྱིན་པ་ཐོབ་པར་གནས་སོ། །བག་ཚ་བ་མེད་པ་ཐོབ་པར་གནས་སོ། །བདེ་བ་ཐོབ་པར་གནས་སོ། །མི་འཇིགས་པ་ཐོབ་པར་གནས་སོ། །འཁོར་གྱི་ནང་དུ་གཤེགས་ཏེ། སེང་གེའི་སྒྲ་ཡང་དག་པར་བསྒྲག་པར་བྱའོ། །འཇིག་རྟེན་ན་དགེ་སྦྱོང་ངམ། བྲམ་ཟེ་
འམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པར་མ་བསྐོར་བའི་ཚངས་པའི་འཁོར་ལོ་བསྐོར་བར་བྱའོ་ཞེས་བྱ་བ་འདི་ནི་བཟང་སྐྱོང་གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་འཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་དེ་བཞིན་
གཤེགས་པའི་མི་འཇིགས་པ་གསུམ་པའོ། །བཟང་སྐྱོང་གཞན་ཡང་གང་ངས་འཕགས་པའི་ངེས་པར་འབྱུང་བར་འགྱུར་བ་དེ་བྱེད་པའི་སྡུག་བསྔལ་ཡང་དག་པར་ཟད་པར་འགྱུར་བའི་ཆོས་བཤད་པ་དེ་ལ་འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ།
སུས་ཀྱང་ཆོས་དང་འཐུན་པར་ཚིག་ཏུ་བརྗོད་ཅིང་རྒོལ་བར་འགྱུར་བའི་རྒྱུ་ཡང་དག་པར་རྗེས་སུ་མི་མཐོང་སྟེ། རྒྱུ་ཡང་དག་པར་རྗེས་སུ་མ་མཐོང་བས་དབུགས་འབྱིན་པ་ཐོབ་པར་གནས་སོ། །བག་ཚ་བ་མེད་པ་ཐོབ་པར་གནས་སོ། །བདེ་བ་ཐོབ་པར་གནས་སོ། །མི་འཇིགས་པ་ཐོབ་པར་
གནས་སོ། །འཁོར་གྱི་ནང་དུ་གཤེགས་ཏེ་སེང་གེའི་སྒྲ་ཡང་དག་པར་བསྒྲག་པར་བྱའོ། །འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པར་མ་བསྐོར་བའི་ཚངས་པའི་འཁོར་ལོ་བསྐོར་བར་བྱའོ། །ཞེས་བྱ་བ་འདི་ནི་བཟང་
སྐྱོང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་ཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་བཞི་པའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སངས་རྒྱས་མི་འཇིགས་གང་ཡིན་པ། །
མི་འཇིགས་རྣམས་ནི་བཤད་པར་བྱ། །སེང་གེའི་སྒྲ་ནི་བསྒྲག་བྱས་ཏེ། །འཁོར་རྣམས་ལ་ནི་ཆོས་ཀྱང་སྟོན། །ཡང་དག་རྫོགས་སངས་རྒྱས་སྨྲ་ལ། །ཆོས་འདི་སངས་རྒྱས་མ་གྱུར་ཅེས། །རྒོལ་བ་དེ་ནི་མ་མཐོང་སྟེ། །དེ་ཕྱིར་སངས་རྒྱས་མི་འཇིགས་པའོ། །ཟག་

པ་ཟད་པར་སྨྲས་པ་ལ། །ཟག་པ་འདི་དག་མ་ཟད་ཅེས། །ལྷ་དང་བཅས་པའི་འཇིག་རྟེན་ན། །རྒོལ་བ་དེ་ནི་མ་མཐོང་ངོ་། །གང་དག་བར་དུ་གཅོད་པའི་ཆོས། །དེ་དག་གང་གིས་བསྟེན་བྱས་ཀྱང་། །བར་དུ་གཅོད་པར་མི་འགྱུར་ཞེས། །ང་ལ་རྒོལ་བ་དེ་མ་མཐོང་། །མྱ་
ངན་འདས་པ་ཐོབ་པའི་ཕྱིར། །ངས་ནི་ཆོས་མཆོག་གང་བཤད་པ། །མྱ་ངན་འདའ་བའི་ཚིག་གི་མཆོག །དེས་ནི་ང་ལ་རྒོལ་བ་མེད། །འཇིག་རྟེན་མགོན་པོ་སྐྱོབ་མཛད་པས། །མི་འཇིགས་གསུངས་པ་འདི་དག་ནི། །ཏིང་འཛིན་འདི་ལ་གནས་པ་ཡི། །བྱང་ཆུབ་སེམས་
དཔས་འཐོབ་པར་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ཉི་ཤུ་རྩ་གཅིག་པའོ།། །།བཟང་སྐྱོང་གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་འཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་སངས་རྒྱས་ཀྱི་ཆོས་མ་འདྲེས་པ་
བཅྭ་བརྒྱད་པོ་དེ་དག་གང་ཞེ་ན། བཟང་སྐྱོང་འདི་ལྟ་སྟེ། ནམ་གྱི་ནུབ་མོ་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ནས། ནམ་གྱི་ནུབ་མོ་ཕུང་པོའི་ལྷག་མ་མ་ལུས་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་
ལས་འདས་པ་དེའི་བར་དུ་དེ་བཞིན་གཤེགས་པ་ལ་འཁྲུལ་པ་མི་མངའོ། །ཅ་ཅོ་མི་མངའོ། །བསྙེལ་བ་མི་མངའོ། །སེམས་མཉམ་པར་མ་བཞག་པ་མི་མངའོ། །ཐ་དད་པའི་འདུ་ཤེས་མི་མངའོ། །སོ་སོར་མ་བརྟགས་པའི་བཏང་སྙོམས་མི་
མངའོ། །འདུན་པ་ཉམས་པ་མི་མངའོ། །བརྩོན་འགྲུས་ཉམས་པ་མི་མངའོ། །དྲན་པ་ཉམས་པ་མི་མངའོ། །ཏིང་ངེ་འཛིན་ཉམས་པ་མི་མངའོ། །ཤེས་རབ་ཉམས་པ་མི་མངའོ། །རྣམ་པར་གྲོལ་བ་ཉམས་པ་མི་མངའོ། །རྣམ་པར་གྲོལ་བའི་ཡེ་ཤེས་གཟིགས་པ་ཉམས་པ་མི་མངའོ། །
འདས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་གོ། །མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་གོ། །ད་ལྟར་གྱི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་གོ། །དེ་བཞིན་གཤེགས་པའི་སྐུའི་ཕྲིན་ལས་ཐམས་ཅད་ཡེ་ཤེས་སྔོན་དུ་

འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ་། །དེ་བཞིན་གཤེགས་པའི་གསུང་གི་ཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ་། །དེ་བཞིན་གཤེགས་པའི་ཐུགས་ཀྱི་ཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ་། །བཟང་
སྐྱོང་འདི་དག་ནི་གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་གནས་ན་འཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །གང་ལ་གནས་ནས་དེ་བཞིན་
གཤེགས། །ཆོས་ཀྱི་འཁོར་ལོ་བསྐོར་མཛད་པའི། །སངས་རྒྱས་ཀྱི་ནི་མ་འདྲེས་ཆོས། །བཤད་ཀྱིས་ང་ལ་མཉན་པར་བྱོས། །ནམ་གྱི་ནུབ་མོ་རྫོགས་སངས་རྒྱས། །དེ་བཞིན་གཤེགས་པས་བྱང་ཆུབ་བརྙེས། །ནམ་གྱི་ནུབ་མོ་ལེན་མེད་པར། །མྱ་ངན་ལས་ནི་འདས་པར་གྱུར། །
དེ་ཡི་བར་དུ་གང་གསུངས་དང་། །གསུང་དང་གསུང་བར་འགྱུར་བའི་རྣམས། །དེ་ཀུན་ཡང་དག་ཇི་བཞིན་ཏེ། །དེ་ནི་མ་འདྲེས་དང་པོའོ། །ང་ལ་འཁྲུལ་པ་ཅུང་ཟད་མེད། །ཅ་ཅོ་ང་ལ་མི་མངའོ། །གསུང་ལ་ཉམས་པ་མི་མངའ་སྟེ། །ང་ལ་ཞུམ་པ་མི་མངའོ། །ང་ལ་བསྙེལ་བ་ཡོད་མ་
ཡིན། །ང་ལ་མ་བརྟགས་བཏང་སྙོམས་མེད། །ཆོས་ལ་སྣ་ཚོགས་བྱེད་པ་མེད། །རྟག་ཏུ་མཉམ་པར་བཞག་པ་ཉིད། །ང་ཡི་འདུན་པ་མ་ཉམས་ཤིང་། །བརྩོན་འགྲུས་ཀྱང་ནི་མ་ཉམས་སོ། །ཏིང་འཛིན་ལས་ནི་མི་གཡེང་ཞིང་། །ང་ལ་ཉམས་པ་མི་མངའོ། །ང་ཡི་ཤེས་རབ་
ཉམས་པ་མེད། །རྣམ་པར་གྲོལ་བའང་ཉམས་པ་མེད། །ང་ཡི་རྣམ་གྲོལ་ཡེ་ཤེས་མཐོང་། །ང་ལའང་ཉམས་པ་མི་མངའོ། །ང་ནི་འདས་པའི་དུས་ལ་ཡང་། །ཡེ་ཤེས་ཐོགས་པ་མི་མངའོ། །མ་འོངས་པ་ཡི་དུས་ལ་ཡང་། །ང་ལ་སྒྲིབ་པ་མི་མངའོ། །ད་ལྟར་བྱུང་བའི་དུས་ལ་ཡང་། །
ང་ལ་ཆགས་པ་མི་མངའོ། །སྐྱོབ་པ་ང་ནི་ཆོས་ཀུན་ལ། །ཡེ་ཤེས་བསྒྲིབས་པ་མེད་པའོ། །ང་ཡི་སྐུ་ཡི་ཕྲིན་ལས་ཀུན། །ཡེ་ཤེས་ཀྱི་ནི་རྗེས་སུ་འབྲེང་། །ང་ཡི་གསུང་ཐུགས་ཕྲིན་ལས་ཀུན། །ཡེ་ཤེས་སྔོན་དུ་འགྲོ་བ་ཡིན། །གང་ལ་གནས་ནས་དེ་བཞིན་གཤེགས། །ཆོས་ཀྱི་

འཁོར་ལོ་བསྐོར་མཛད་པའི། །རྫོགས་སངས་རྒྱས་ཀྱི་མ་འདྲེས་ཆོས། །བཅྭ་བརྒྱད་པོ་ནི་དེ་དག་གོ། །ཏིང་འཛིན་འདི་ལ་བསྒོམ་བྱས་ན། །སངས་རྒྱསཆས་ནི་བཅྭ་བརྒྱད་དང་། །སྟོན་པ་ཡི་ནི་སྟོབས་བཅུ་དང་། །མི་འཇིགས་རྣམས་ནི་རྙེད་མི་དཀའ། །བཟང་སྐྱོང་གིས་ཞུས་པའི་ཏིང་
ངེ་འཛིན་གྱི་ལེའུ་སྟེ་ཉི་ཤུ་རྩ་གཉིས་པའོ།། །།བཟང་སྐྱོང་གཞན་ཡང་བྱང་ཆུབ་སེམས་དཔས་ཏིང་ངེ་འཛིན་འདི་ལ་རྗེས་སུ་ཡི་རང་བ་བཞིས་རྗེས་སུ་ཡི་རང་བར་བྱའོ། །བཞི་གང་ཞེ་ན་འདི་ལྟ་སྟེ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་དེ་དག་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཏིང་ངེ་འཛིན་འདི་གསན་ནས་ལུང་མནོས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ་ཡོངས་སུ་རྫོགས་པར་བྱ་བའི་ཕྱིར་རྗེས་སུ་ཡི་རང་བ་དེ་བཞིན་དུ་བདག་ཀྱང་ཏིང་ངེ་འཛིན་འདི་ཐོས་ནས། བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ་ཡོངས་སུ་རྫོགས་པར་བྱ་བའི་ཕྱིར་རྗེས་སུ་ཡི་རང་ངོ་། །བཟང་སྐྱོང་འདི་ནི་བྱང་ཆུབ་སེམས་དཔའི་རྗེས་སུ་ཡི་རང་བ་དང་པོའོ། །བཟང་སྐྱོང་གཞན་ཡང་ཇི་ལྟར་མ་བྱོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་དེ་དག་བྱང་ཆུབ་སེམས་དཔའི་སྤྱད་པ་སྤྱོད་པར་འགྱུར་བ་ན། ཏིང་ངེ་འཛིན་འདི་གསན་ནས་ལུང་མནོས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ་ཐོབ་པར་བྱ་བ་དང་། མང་དུ་ཐོས་པ་ཡོངས་སུ་རྫོགས་པར་བྱ་བའི་ཕྱིར་རྗེས་སུ་ཡི་རང་བར་འགྱུར་
བ་དེ་བཞིན་དུ་བདག་ཀྱང་རྗེས་སུ་ཡི་རང་ངོ་། །བཟང་སྐྱོང་འདི་ནི་བྱང་ཆུབ་སེམས་དཔའི་རྗེས་སུ་ཡི་རང་བ་གཉིས་པའོ། །བཟང་སྐྱོང་གཞན་ཡང་བྱང་ཆུབ་སེམས་དཔས་འདི་སྐད་དུ། ཇི་ལྟར་ད་ལྟར་བྱུང་བའི་དུས་ན་ད་ལྟར་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་དེ་དག་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཏིང་ངེ་འཛིན་འདི་གསན་ནས་ལུང་མནོས་ཏེ། རྗེས་སུ་ཡི་རང་ནས། མང་དུ་ཐོས་པ་ཡོངས་སུ་རྫོགས་པར་མཛད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང་། ད་ལྟར་བྱང་ཆུབ་སེམས་

དཔའ་རྣམས་ཏིང་ངེ་འཛིན་འདི་ལ་ཇི་ལྟར་རྗེས་སུ་ཡི་རང་བ་དེ་བཞིན་དུ་བདག་ཀྱང་། ད་ལྟར་གྱི་ཏིང་ངེ་འཛིན་འདི་ཐོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ་ཡོངས་སུ་རྫོགས་པར་བྱ་བའི་ཕྱིར་རྗེས་སུ་ཡི་རང་ངོ་། །ཞེས་བརྗོད་པར་བྱ་སྟེ། བཟང་
སྐྱོང་འདི་ནི་བྱང་ཆུབ་སེམས་དཔའི་རྗེས་སུ་ཡི་རང་བ་གསུམ་པའོ། །བཟང་སྐྱོང་གཞན་ཡང་བྱང་ཆུབ་སེམས་དཔས་འདི་སྐད་དུ་བདག་གིས་རྗེས་སུ་ཡི་རང་བ་དང་ལྡན་པའི་བསོད་ནམས་འདི་ཐམས་ཅད་སེམས་ཅན་ཐམས་ཅད་དང་ལྷན་ཅིག་ཏུ་ཐུན་མོང་དུ་བྱས་ཏེ། བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་གྱུར་ཅིག །ཏིང་ངེ་འཛིན་འདི་ཡང་ཐོབ་པར་གྱུར་ཅིག །མང་དུ་ཐོས་པ་ཡོངས་སུ་རྫོགས་པར་གྱུར་ཅིག་ཅེས་བརྗོད་པར་བྱ་སྟེ། བཟང་སྐྱོང་འདི་ནི་བྱང་ཆུབ་སེམས་དཔའི་རྗེས་སུ་ཡི་རང་བ་དང་ལྡན་པའི་བསོད་ནམས་བཞི་པའོ། །བཟང་སྐྱོང་རྗེས་སུ་ཡི་རང་བ་དང་ལྡན་པའི་བསོད་
ནམས་འདི་དང་། ཏིང་ངེ་འཛིན་འདི་ཐོབ་པའི་བྱང་ཆུབ་སེམས་དཔའ་དག་ནི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བཟང་སྐྱོང་བྱང་ཆུབ་སེམས་དཔས་ཏིང་ངེ་འཛིན་འདི་ལ་རྗེས་སུ་ཡི་
རང་བ་དེ་དག་གིས་རྗེས་སུ་ཡི་རང་ཞིང་བསྔོས་ན། བསོད་ནམས་ཀྱི་ཕུང་པོ་ཇི་སྙེད་ཅིག་འཛིན་པར་འགྱུར་བའི་དཔེ་ཙམ་ཞིག་བསྟན་ཏོ། །བཟང་སྐྱོང་འདི་ལྟ་སྟེ་དཔེར་ན། སྐྱེས་བུ་ལ་ལ་ཞིག་ཚེ་ལོ་བརྒྱ་ཕྲག་དུ་མ་ཐུབ་པ། ལོ་བརྒྱ་ཕྲག་དུ་མར་འཚོ་བ། མགྱོགས་པའི་མཐུ་རླུང་དང་འདྲ་བ་ཞིག་
ཡོད་ལ་དེ་མི་འདུག་པར་ལོ་བརྒྱ་ཚང་བར་ཤར་ཕྱོགས་སུ་ཡང་སོང་། དེ་བཞིན་དུ་ལྷོ་དང་། ནུབ་དང་། བྱང་དང་། འོག་དང་། སྟེང་གི་ཕྱོགས་སུ་ཡང་སོང་ན། བཟང་སྐྱོང་དེ་ཅི་སྙམ་དུ་སེམས། ཚེ་ལོ་བརྒྱ་ཐུབ་ཅིང་ལོ་བརྒྱར་འཚོ་བ། མགྱོགས་པའི་མཐུ་རླུང་དང་འདྲ་བའི་སྐྱེས་བུ་དེས་
མི་འདུག་པར་ཕྱོགས་དྲུག་ཏུ་ཕྱོགས་གཅིག་ཅིང་ཡང་ལོ་བརྒྱ་བརྒྱར་སོང་བའི་སྐྱེས་བུ་དེས་དཔག་ཚད་དུ་ཞིག་ཏུ་སོང་བར་གྱུར་པ་བགྲང་བའམ། གཞལ་བའམ། བསམ་པའམ། དཔག་པར་སྐྱེས་བུ་ལ་ལ་སྤྲོའམ། བྱང་ཆུབ་སེམས་དཔའ་བཟང་སྐྱོང་གིས་གསོལ་པ། བཙུན་པ་

བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང་། གནས་བརྟན་ཤ་ར་དྭ་ཏིའི་བུ་དང་། ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་མ་གཏོགས་པར་དེ་ནི་མི་ནུས་སོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་བུད་
མེད་དམ་སྐྱེས་པ་གང་ལ་ལ་ཞིག་གིས། སྐྱེས་བུ་ལོ་བརྒྱར་གནས་པ་རླུང་གི་མགྱོགས་པ་བཞིན་དུ་མགྱོགས་པར་འགྲོ་བ་དེའི་སྤྱོད་ཡུལ་རྣམས་གསེར་དང་དངུལ་གྱིས་གང་བར་བྱས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་ཕུལ་ལ་ཏིང་ངེ་
འཛིན་འདི་མི་ཉན་པ་དང་། བྱང་ཆུབ་སེམས་དཔའ་གང་ཡང་ཏིང་ངེ་འཛིན་འདི་ཐོས་ནས་རྗེས་སུ་ཡི་རང་བ་བཞི་པོ་དེ་དག་གིས་རྗེས་སུ་ཡི་རང་ཞིང་རྗེས་སུ་ཡི་རང་ནས་ཀྱང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ་འདོད་པས་སྔོ་བར་ཡང་བྱེད་ན་བཟང་སྐྱོང་བསོད་
ནམས་ཀྱི་ཕུང་པོ་འདི་ལ་བསོད་ནམས་ཀྱི་ཕུང་པོ་སྔ་མ་དེས་བརྒྱའི་ཆར་ཡང་ཉེ་བར་མི་འགྲོའོ། །སྟོང་དང་སྟོང་ཕྲག་བརྒྱ་དང་བྱེ་བ་ཕྲག་བརྒྱ་དང་། བྱེ་བ་ཁྲག་ཁྲིག་ཕྲག་བརྒྱ་སྟོང་དང་། གྲངས་དང་། ཆ་དང་། བགྲང་བ་དང་། དཔེ་དང་རྒྱུར་ཡང་ཉེ་བར་མི་འགྲོའོ།། །།བམ་པོ་བདུན་པ་སྟེ་ཐ་
མ། བཟང་སྐྱོང་ཏིང་ངེ་འཛིན་འདི་ལ་རྗེས་སུ་ཡི་རང་བ་དང་ལྡན་པའི་བསོད་ནམས་ཀྱི་ཕུང་པོ་བྱང་ཆུབ་སེམས་དཔའ་རྣམས་ལ་ཇི་ཙམ་དུ་དོན་ཆེ་བ་ལ་ལྟོས། བཟང་སྐྱོང་དེ་བས་ན་རྣམ་གྲངས་འདིས་ཀྱང་། ཏིང་ངེ་འཛིན་འདི་ལ་རྗེས་སུ་ཡི་རང་བ་དང་ལྡན་པའི་བསོད་ནམས་ཀྱི་ཕུང་པོ་བྱང་ཆུབ་སེམས་
དཔའ་རྣམས་ཀྱི་དོན་ཆེན་པོ་ཡིན་པར་རིག་པར་བྱའོ། །བཟང་སྐྱོང་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ་ཤིན་ཏུ་རྒྱས་པ། ཚད་མེད་པ། བསམ་གྱིས་མི་ཁྱབ་པ་བྱུང་བ་དེའི་ཚེ་དེའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་སེང་གེའི་བློ་གྲོས་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ་། །བཟང་སྐྱོང་དེའི་ཚེ་འཛམ་

བུའི་གླིང་འདི་ཡང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། ཉམས་དགའ་བ་དང་། སྐྱེ་བོ་མང་པོ་དང་། མིས་གང་བར་གྱུར་ཏོ། །བཟང་སྐྱོང་དེའི་ཚེ་འཛམ་བུའི་གླིང་འདི་ན་གྲོང་ཁྱེར་ཆེན་པོ་ཐམས་ཅད་ཀྱང་རིན་པོ་ཆེ་སྣ་བདུན་ལས་གྲུབ་པ་ཁྱིམ་བྱེ་བ་
ཕྲག་དགུ་ཡོད་པ་དཔག་ཚད་བཅུ་གཉིས་པ་སྟོང་ཕྲག་དྲུག་ཅུ་རྩ་བརྒྱད་ཡོད་པར་གྱུར་ཏོ། །བཟང་སྐྱོང་དེའི་ཚེ་འཛམ་བུའི་གླིང་འདི་ཡང་འདི་ལྟ་སྟེ། དཔག་ཚད་སྟོང་ཕྲག་དྲུག་ཅུ་རྩ་བརྒྱད་ཡོད་དེ། ཡངས་ཤིང་རྒྱ་ཆེ་བར་གྱུར་ཏོ། །བཟང་སྐྱོང་དེའི་ཚེ་འཛམ་བུའི་གླིང་འདི་ན་གང་དུ་དེ་བཞིན་
གཤེགས་པ་དེ་སྐྱེ་བའི་སར་གྱུར་པ་འདི་ལྟ་སྟེ། བཟང་པོ་བྱུང་བ་ཞེས་བྱ་བའི་གྲོང་ཁྱེར་ཆེན་པོ་གཅིག་ཅིག་ཡོད་དེ། གྲོང་ཁྱེར་ཆེན་པོ་དེ་ན་སྲོག་ཆགས་བྱེ་བ་ཕྲག་དྲུག་ཅུ་གནས་སོ། །བཟང་སྐྱོང་ཡང་དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་
བློ་གྲོས་དེའི་ཉན་ཐོས་འདུས་པ་དང་པོ་ནི་དགྲ་བཅོམ་པ་བྱེ་བ་ཕྲག་དགུ་བཅུ་འདུས་པར་གྱུར་ཏོ། །ཞག་བདུན་འདས་ནས་ཉན་ཐོས་འདུས་པ་གཉིས་པ་ནི་ཉན་ཐོས་བྱེ་བ་ཕྲག་དགུ་བཅུ་འདུས་པར་གྱུར་ཏོ། །ཞག་བདུན་པ་གཉིས་འདས་ནས་ཉན་ཐོས་འདུས་པ་གསུམ་པ་ནི་བྱེ་བ་ཕྲག་དགུ་བཅུ་འདུས་
པར་གྱུར་ཏོ། །དག་པའི་བྱང་ཆུབ་སེམས་དཔའ་བྱེ་བ་ཕྲག་དགུ་བཅུ་ཡང་འདུས་པར་གྱུར་ཏོ། །དེ་ནས་ཕྱིས་ནི། བཅོམ་ལྡན་འདས་དེའི་ཉན་ཐོས་གྲངས་ཀྱིས་མི་ཆོད་པ་ཞིག་བྱུང་ངོ་། །བཟང་སྐྱོང་དེའི་ཚེ་དེའི་དུས་ན་མི་དེ་དག་དགེ་བ་བཅུའི་ལས་ཀྱི་ལམ་ཡང་དག་པར་ལེན་པར་གྱུར་ཏེ། འདི་ལྟ་
སྟེ། དཔེར་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པའི་གསུང་རབ་ལ་སེམས་ཅན་རྣམས་དགེ་བ་བཅུའི་ལས་ཀྱི་ལམ་དང་ལྡན་པར་འགྱུར་བ་བཞིན་ནོ། །བཟང་སྐྱོང་དེའི་ཚེ་སེམས་ཅན་རྣམས་ཀྱི་ཚེའི་ཚད་ནི་ལོ་བརྒྱད་ཁྲི་བཞི་སྟོང་ཐུབ་པར་གྱུར་ཏོ། །
བཟང་སྐྱོང་དེའི་ཚེ་གྲོང་ཁྱེར་ཆེན་པོ་དེ་ན། འཁོར་ལོས་སྒྱུར་བའི་རྒྱལ་པོ་ཁྱད་པར་དུ་འགྲོ་བ་ཞེས་བྱ་བ་རིན་པོ་ཆེ་སྣ་བདུན་དང་ལྡན་པ་བུ་སྟོང་དུ་ཚང་བ་ཞིག་ཡོད་དེ། དེ་བཅོམ་ལྡན་འདས་དེ་བཞིན་གཤེགས་པ་སེང་གེའི་བློ་གྲོས་དེའི་དྲུང་དུ་སོང་ཞིང་བསྙེན་བཀུར་བྱེད་དོ། །བཟང་སྐྱོང་དེ་ནས་དེ་བཞིན་

གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་བློ་གྲོས་དེས་རྒྱལ་པོ་ཁྱད་པར་དུ་འགྲོ་བ་དེའི་བསམ་པ་ཐུགས་སུ་ཆུད་ནས་ཏིང་ངེ་འཛིན་འདི་བསྟན་ཏོ། །ཡང་དག་པར་བཤད་དོ། །བཟང་སྐྱོང་དེ་ནས་རྒྱལ་པོ་ཁྱད་པར་དུ་འགྲོ་བ་དེས་ཏིང་ངེ་འཛིན་འདི་ཐོས་ནས་རྗེས་སུ་ཡི་རང་ངོ་། །
རྗེས་སུ་ཡི་རང་ནས་ཀྱང་། བཅོམ་ལྡན་འདས་དེ་ལ་རིན་པོ་ཆེ་སྤར་གང་གིས་གཏོར་ཏོ། །དེ་དེ་ནས་ཤི་འཕོས་པ་དང་། དགེ་བའི་རྩ་བ་དེས་དེ་བཞིན་གཤེགས་པ་དེ་མྱ་ངན་ལས་འདས་པའི་འོག་ཏུ་ཡང་། འཛམ་བུའི་གླིང་འདིར་རྒྱལ་པོའི་ཁྱིམ་དེ་ཉིད་དུ་སྐྱེས་སོ། །བཟང་སྐྱོང་དེའི་ཚེ་དེ་བཞིན་
གཤེགས་པ་དེའི་གསུང་རབ་ལ་དགེ་སློང་ཆོས་སྨྲ་བ་རིན་ཆེན་མཆོག་ཅེས་བྱ་བ་ཞིག་བྱུང་སྟེ། དེས་འཁོར་བཞི་ལ་ཏིང་ངེ་འཛིན་འདི་རྒྱ་ཆེར་སྟོན་ཏོ། །ཡང་དག་པར་སྒྲོགས་སོ། །བཟང་སྐྱོང་དེའི་ཚེ་རྒྱལ་པོ་ཁྱད་པར་དུ་འགྲོ་བ་ཞེས་བྱ་བ་དེ་རྒྱལ་པོའི་བུ་ཚངས་པས་བྱིན་ཞེས་བྱ་བར་གྱུར་ཏེ། དེས་དགེ་སློང་དེ་ཏིང་
ངེ་འཛིན་འདི་འཆད་པ་ཐོས་སོ། །ཐོས་ནས་ཀྱང་ཐོས་མ་ཐག་ཏུ་དང་བ་རྙེད་པར་གྱུར་ཏེ། དང་བའི་སེམས་ཀྱིས་གསེར་སྟོང་ཕྲག་བརྒྱ་དང་། རས་བཅོས་བུ་ཟུང་གཅིག་གིས་དགེ་སློང་དེ་ལ་གཡོགས་སོ། །བཟང་སྐྱོང་དེ་ནས་རྒྱལ་པོའི་བུ་ཚངས་པས་བྱིན་དེས་དགེ་སློང་དེ་ལས་ཏིང་ངེ་འཛིན་འདི་ཐོས་ནས།
དགེ་སློང་དེས་ལེགས་པར་བཤད་པའི་ཕྱིར་དགབ་པ་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། ཏིང་ངེ་འཛིན་འདི་འདོད་པའི་ཕྱིར་ཆོས་སྨྲ་བའི་དགེ་སློང་དེ་ལས་སྲོག་ཆགས་སྟོང་དུ་ཚང་
བ་དང་ལྷན་ཅིག་ཆོས་འདོད་པས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་རབ་ཏུ་བྱུང་ནས་ལོ་བརྒྱད་སྟོང་དུ་རང་གི་འཁོར་སྲོག་ཆགས་སྟོང་པོ་དེ་དག་དང་ལྷན་ཅིག་ཏུ་དགེ་སློང་དེ་ལ་བསྙེན་བཀུར་བྱེད་ཅིང་རྗེས་སུ་འབྲངས་ཀྱང་མཉན་པ་ཙམ་ཞིག་
ཐོབ་པ་མ་གཏོགས་པར་དགེ་སློང་དེ་ལས་ཏིང་ངེ་འཛིན་འདི་མ་ཐོབ་པོ། །དེ་ཡང་ལན་གཉིས་མ་ཡིན་གྱི། ལན་ཅིག་ཁོ་ན་ཞིག་ཐོས་ནས་རྗེས་སུ་ཡི་རང་བ་བཞི་པོ་དེ་དག་གིས་རྗེས་སུ་ཡི་རང་ངོ་། །དེས་སྲོག་ཆགས་སྟོང་དུ་ཚང་བ་དེ་དག་དང་ལྷན་ཅིག་ཏུ་དགེ་བའི་རྩ་བ་དེས་སངས་རྒྱས་སྟོང་ཕྲག་

དྲུག་ཅུ་རྩ་བརྒྱད་མཉེས་པར་བྱས་སོ། །སྐྱེ་བ་ཐམས་ཅད་དུའང་ཏིང་ངེ་འཛིན་འདི་བཤད་ཅིང་གཞན་དག་ལའང་རྒྱ་ཆེར་ཡང་དག་པར་བསྒྲགས་ཏེ། དེས་རིམ་གྱིས་སངས་རྒྱས་གཞན་སྟོང་ཕྲག་དྲུག་ཅུ་རྩ་བརྒྱད་ཀྱང་མཉེས་པར་བྱས་སོ། །དེ་རྗེས་སུ་ཡི་རང་བ་དང་ལྡན་པའི་དགེ་
བའི་རྩ་བ་དེ་ཉིད་དང་། ཏིང་ངེ་འཛིན་འདི་ཐོབ་པས་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔའ་བརྟན་པ་
ཞེས་བྱ་བར་གྱུར་ཏེ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཞག་གོ། །སྲོག་ཆགས་སྟོང་པོ་དེ་དག་ཀྱང་ཏིང་ངེ་འཛིན་གྱིས་ཡོངས་སུ་སྨིན་པར་བྱས་པའི་དགེ་བའི་རྩ་བ་འདི་ཉིད་ཀྱི་ཕྱོགས་ཀྱི་ཆོས་རྣམས་རྫོགས་
ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ཐམས་ཅད་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔའ་བརྟན་པ་ཞེས་བྱ་བར་གྱུར་ཏེ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ལ་བཞག་གོ། །བཟང་སྐྱོང་ཏིང་ངེ་འཛིན་འདི་ལ་རྗེས་སུ་ཡི་རང་བ་དང་ལྡན་པའི་བསོད་ནམས་ཀྱི་ཕུང་པོ་ཇི་ཙམ་དུ་དོན་ཆེ་བ་ལ་ལྟོས། འདི་ལྟར་རྗེས་སུ་ཡི་རང་བ་དང་ལྡན་པའི་ཚིག་ཏུ་བརྗོད་པས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྒྲུབ་པར་བྱེད་ན། བཟང་སྐྱོང་བྱང་ཆུབ་
སེམས་དཔའ་གང་ཏིང་ངེ་འཛིན་འདི་ཐོས་ནས་འཛིན་པ་དང་། ཀུན་ཆུབ་པར་བྱེད་པ་དང་། འཆང་བ་དང་། ཀློག་པ་དང་། གཞན་དག་ལ་ཡང་རྒྱ་ཆེར་ཡང་དག་པར་སྒྲོགས་པ་དང་། སྒོམ་པའི་སྦྱོར་བ་ལ་བརྩོན་པར་གནས་པ་ལྟ་ཅི་སྨོས་ཏེ། བཟང་སྐྱོང་ཏིང་ངེ་འཛིན་འདི་ཐོས་ནས་རྗེས་སུ་ཡི་རང་བར་
མི་བྱེད། ལུང་ནོད་པར་མི་བྱེད། ཀུན་ཆུབ་པར་མི་བྱེད། འཆང་བར་མི་བྱེད། གཞན་དག་ལ་ཡང་རྒྱ་ཆེར་ཡང་དག་པར་སྒྲོགས་པར་མི་བྱེད། སྒོམ་པའི་སྦྱོར་བ་ལ་བརྩོན་པར་མི་གནས་པ་ལྟ་སུ་ཞིག་ཡོད། དེ་ཅིའི་ཕྱིར་ཞེ་ན། བཟང་སྐྱོང་འདི་ལྟར་ཏིང་ངེ་འཛིན་འདི་ཐོས་པས་བྱང་ཆུབ་སེམས་

དཔའ་རྣམས་ཀྱི་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཡོངས་སུ་རྫོགས་པར་འགྱུར་བའི་ཕྱིར་རོ། །བཟང་སྐྱོང་དེ་བས་ན་ཁྱོད་མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །བྱང་ཆུབ་སེམས་དཔའ་ལྷག་པའི་བསམ་པ་ཕུན་སུམ་ཚོགས་པ་བྱང་ཆུབ་དོན་དུ་གཉེར་བ་རྣམས་ཀྱིས། གལ་ཏེ་
ཏིང་ངེ་འཛིན་འདི་དཔག་ཚད་ཙམ་ན་ཡོད་པར་ཐོས་ན། བཟང་སྐྱོང་བྱང་ཆུབ་སེམས་དཔའ་ལྷག་པའི་བསམ་པ་ཕུན་སུམ་ཚོགས་པ་བྱང་ཆུབ་དོན་དུ་གཉེར་བ་དེས་ཏིང་ངེ་འཛིན་འདི་མཉན་པའི་ཕྱིར་དཔག་ཚད་ཙམ་གྱི་བར་དེར་འགྲོ་བར་བྱའོ། །ཐོས་ནས་ཀྱང་གཟུང་བར་བྱ། ཀུན་ཆུབ་པར་བྱ། བཅང་བར་བྱ།
བཀླག་པར་བྱ། གཞན་དག་ལ་ཡང་རྒྱ་ཆེར་བསྟན་པར་བྱ། བཤད་པར་བྱ། བསྒྲག་པར་བྱའོ། །བསྒོམ་པ་ལ་ཡང་མངོན་པར་དགའ་བར་བྱའོ། །བཟང་སྐྱོང་དཔག་ཚད་ཙམ་ལྟ་ཞོག་གི །དཔག་ཚད་གཉིས་ཙམའམ། དཔག་ཚད་གསུམ་ཙམའམ། དཔག་ཚད་བཞི་ཙམའམ། དཔག་ཚད་
ལྔ་ཙམ་ནས་དཔག་ཚད་བཅུའི་བར་ཙམའམ། བཟང་སྐྱོང་དཔག་ཚད་བཅུ་ཙམ་ལྟའང་ཞོག་གི །གལ་ཏེ་བྱང་ཆུབ་སེམས་དཔས་དཔག་ཚད་བརྒྱ་ན་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ལྗོངས་ཀྱི་ཕྱོགས་ཆེ་གེ་མོ་ཞིག་ན་སྤྱོད་དོ་ཞེས་ཏིང་ངེ་འཛིན་འདི་
དཔག་ཚད་བརྒྱའི་བར་ཙམ་ན་ཡོད་པར་ཐོས་ན་ཡང་། བཟང་སྐྱོང་བྱང་ཆུབ་སེམས་དཔའ་ལྷག་པའི་བསམ་པ་ཕུན་སུམ་ཚོགས་པ་བྱང་ཆུབ་དོན་དུ་གཉེར་བ་དེས་ཞུམ་པ་མེད་པ་དང་། སྙོམ་ལས་མེད་པ་དང་། འཇིགས་པ་མེད་པ་དང་། སྒྱིད་ལུག་པ་མེད་པ་དང་། གདུང་བ་མེད་པའི་སེམས་དང་། བརྩོན་
འགྲུས་བརྩམས་པ་མི་ལྷོད་པས་ཏིང་ངེ་འཛིན་འདི་ཐ་ན་མཉན་པ་ཉི་ཙེ་ཙམ་གྱི་ཕྱིར་ཡང་དཔག་ཚད་བརྒྱ་པོ་དེར་འགྲོ་བར་བྱ་ན་ལུང་མནོད་པ་དང་། ཀུན་ཆུབ་པར་བྱ་བ་དང་། བསྒྲག་པར་བྱ་བ་དང་། བསྒོམ་པར་བྱ་བའི་ཕྱིར་ལྟ་སྨོས་ཀྱང་ཅི་དགོས་ཏེ། དེ་ཅིའི་ཕྱིར་ཞེ་ན། བཟང་སྐྱོང་འདི་ལྟར་བྱང་ཆུབ་སེམས་
དཔའ་རྣམས་ཀྱི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ནི་ཏིང་ངེ་འཛིན་འདི་ལ་རག་ལས་པའི་ཕྱིར་རོ། །བཟང་སྐྱོང་དེ་ལ་བྱང་ཆུབ་སེམས་དཔའ་ལྷག་པའི་བསམ་པ་ཕུན་སུམ་ཚོགས་པ་བྱང་ཆུབ་དོན་དུ་གཉེར་བ་དེ་དག་གིས་དཔག་ཚད་བརྒྱ་པོ་དེར་སོང་ནས། གང་ལས་ཏིང་ངེ་འཛིན་འདི་ཐོས་པར་གྱུར་པའི་སློབ་

དཔོན་དེ་ལ་དེས་སྟོན་པའི་འདུ་ཤེས་བསྐྱེད་པར་བྱའོ། །ཆོས་སྨྲ་བའི་རིགས་ཀྱི་བུ་དེ་ལ་བསྙེན་བཀུར་ཐམས་ཅད་ཀྱིས་བསྙེན་བཀུར་བྱེད་ཅིང་ཕྱི་བཞིན་འབྲང་བར་བྱའོ། །ཐ་ན་ཏིང་ངེ་འཛིན་འདི་མཉན་པ་ཙམ་གྱི་ཕྱིར་ཡང་ལོ་གཅིག་གམ། གཉིས་སམ། གསུམ་མམ། བཞིའམ།
ལྔའམ། ལོ་བཅུའམ། བརྒྱའམ། ཇི་སྲིད་འཚོ་བའི་བར་དུ་ཕྱི་བཞིན་འབྲང་བར་བྱ་ན་ལུང་མནོད་པའམ། ཀུན་ཆུབ་པར་བྱ་བའམ། བྲི་བའམ། བཅང་བའམ། བསྒྲག་པའམ། བསྒོམ་པའི་ཕྱིར་ལྟ་སྨོས་ཀྱང་ཅི་དགོས། བཟང་སྐྱོང་རིགས་ཀྱི་བུའམ། རིགས་ཀྱི་བུ་མོ་དེས་རང་ཉམ་གཏང་བར་
བྱ་སྟེ། བཏང་ནས་ཀྱང་སློབ་དཔོན་དེའི་བློ་བཞིན་དུ་འཇུག་པར་བྱའོ། །གུས་པ་དང་བཅས་པ་དང་། ཞེ་ས་དང་བཅས་པས་སློབ་དཔོན་གྱི་ཕྱིར་འབྲང་བར་བྱའོ། །བཀའ་བཞིན་དུ་བྱེད་པས་ཕྱི་བཞིན་འབྲང་བར་བྱའོ། །བཀའ་མི་གཅོག་པ་དང་། མཛའ་བ་བརྟག་པ་དང་། ངོ་མི་རྟག་པ་སྤངས་པ་དང་།
ཉེས་པར་ལྟ་བ་མེད་པས་ཕྱི་བཞིན་འབྲང་བར་བྱའོ། །དགེ་བའི་བཤེས་གཉེན་གྱི་འདུ་ཤེས་ཀྱང་བསྐྱེད་པར་བྱའོ། །དེ་ལ་སྟོན་པའི་འདུ་ཤེས་ཀྱང་ཉེ་བར་གཞག་པར་བྱའོ། །བཟང་སྐྱོང་བྱང་ཆུབ་སེམས་དཔའ་དེས་སློབ་དཔོན་དེ་ལ་དེ་ལྟར་ནན་ཏན་བྱེད་ན་སྔོན་ཆོས་ཀྱིས་ཕོངས་པར་འགྱུར་བའི་ལས་བྱས་ཤིང་
བསགས་པ་མ་གཏོགས་པར་ཐ་ན་ཏིང་ངེ་འཛིན་འདི་ཉན་པ་ཙམ་ཡང་མི་ཐོབ་པ་ནི་གནས་མ་ཡིན་སྐབས་མ་ཡིན་ཏེ་དེ་ནི་གནས་མེད་དོ། །བྱང་ཆུབ་སེམས་དཔའ་དེས་སློབ་དཔོན་དེ་ལ་ཁྲེལ་ཡོད་པ་དང་། བྱས་པ་གཟོ་བ་དང་བྱས་པ་ཤེས་པར་བྱའོ། །དེ་ལྟར་ན་དེའི་ཏིང་ངེ་འཛིན་དེའི་ཚིག་དང་ཡི་གེ་དེ་ཡུན་
རིང་དུ་གནས་པ་དང་། རྨོངས་པ་མེད་པར་འགྱུར་ན། བཟང་སྐྱོང་བྱང་ཆུབ་སེམས་དཔའ་གང་ཏིང་ངེ་འཛིན་འདི་གྲོང་གཞན་ན་ཡོད་པར་ཐོས་སམ་གྲོང་གི་ཞིང་གཞན་ན་ཡོད་པར་ཐོས་ལ། ཐོས་ནས་ཀྱང་ཐ་ན་མཉན་པ་ཙམ་གྱི་ཕྱིར་ཡང་འགྲོ་བར་བྱ་བ་ལྟ་ཅི་སྨོས། ལུང་མནོད་པར་བྱ་བ་དང་། ཀུན་ཆུབ་པར་
བྱ་བ་དང་། བཅང་བར་བྱ་བ་དང་། བཀླག་པར་བྱ་བ་དང་། བྲི་བར་བྱ་བ་དང་། བསྒོམ་པར་བྱ་བ་དང་། གཞན་དག་ལ་ཡང་ཡང་དག་པར་བསྒྲག་པར་བྱ་བའི་ཕྱིར་ལྟའང་སྨོས་ཀྱང་ཅི་དགོས། བཟང་སྐྱོང་བྱང་ཆུབ་སེམས་དཔའ་གང་ཏིང་ངེ་འཛིན་འདི་ཚོལ་བས་ཐ་ན་ཏིང་ངེ་འཛིན་འདི་ཐོས་པ་ཙམ་ཡང་

ཐོབ་པ་ནི་བཟང་སྐྱོང་ཁྱོད་མོས་པར་བྱ་ཁྱོད་ཀྱིས་ཁོང་དུ་ཆུད་པར་བྱ་སྟེ། བྱང་ཆུབ་སེམས་དཔའ་དེ་ནི་ཏིང་ངེ་འཛིན་འདི་ཉིད་ཚོལ་བའི་དགེ་བའི་རྩ་བ་དང་། ཆོས་དོན་དུ་གཉེར་བའི་དགེ་བའི་རྩ་བ་དང་ཆོས་འདོད་པའི་དགེ་བའི་རྩ་བ་དང་། བརྩོན་འགྲུས་བརྩམས་པའི་དགེ་བའི་རྩ་བས་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཡིན་པར་རིག་པར་བྱ་ན། བཟང་སྐྱོང་བྱང་ཆུབ་སེམས་དཔའ་གང་ཏིང་ངེ་འཛིན་འདི་ལུང་ནོད་པར་བྱེད། ཀུན་ཆུབ་པར་བྱེད། འཆང་བར་བྱེད། ཀློག་པར་བྱེད་ལ། ལུང་མནོད་པ་དང་། ཀུན་ཆུབ་པར་བྱ་བ་དང་། བཅང་བར་བྱ་བ་དང་། བཀླག་པར་བྱས་
ནས་ཀྱང་གཞན་དག་ལ་སྟོན་པར་བྱེད། སྒྲོགས་པར་བྱེད། ཡང་དག་པར་སྒྲོགས་པར་བྱེད་ཅིང་བསྒོམ་པའི་སྦྱོར་བ་ལ་བརྩོན་པར་གནས་པ་ལྟ་སྨོས་ཀྱང་ཅི་དགོས་དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སྔོན་གྱི་དེ་བཞིན་གཤེགས་པ་མི་ཡི་མཆོག །སེང་གེ་བློ་
གྲོས་ཞེས་བྱ་རྗེས་དྲན་ཏེ། །དེར་ནི་མི་ཡི་དབང་པོ་རྒྱལ་པོ་དེས། །ཏིང་འཛིན་འདི་ནི་དེ་ཚེ་ཐོས་པར་གྱུར། །རྒྱལ་པོས་ཏིང་འཛིན་འདི་ནི་ཐོས་ནས་ཀྱང་། །སེམས་མགུ་དགའ་བ་དཔེ་མེད་པས་བཟུང་སྟེ། །མི་མཆོག་སངས་རྒྱས་སེང་གེའི་བློ་གྲོས་ལ། །སྤར་གང་གི་ནི་རིན་པོ་ཆེ་ས་ཀྱང་གཏོར། །
བཅོམ་ལྡན་འདས་ཀྱིས་ལེགས་གསུངས་ཏིང་འཛིན་འདི། །སེམས་ཅན་ཐམས་ཅད་ལ་ནི་ཕན་པར་ཤོག །ཁྱོད་ལ་སྐྱབས་སུ་དེ་རིང་མཆིའོ་ཞེས། །དེ་སྙམ་བསམས་ནས་ཚིག་ཏུའང་བརྗོད་པར་གྱུར། །རྒྱལ་པོ་དེ་ནི་དེ་ཡི་ལས་ཀྱིས་ནི། །ཤི་ནས་དེ་ཉིད་དུ་ནི་ཡང་སྐྱེས་ཏེ། །དེས་ནི་དགེ་
སློང་རིན་ཆེན་ཞེས་བྱ་བར། །ཕྱོགས་སུ་གྲགས་པ་མཐུ་ཆེན་མཐོང་བར་གྱུར། །དེ་ལས་དེ་ཉིད་ཀྱང་ནི་ཐོས་གྱུར་ཏེ། །ཐོས་ནས་དགའ་བ་ཤིན་ཏུ་རྒྱས་པ་སྐྱེད། །བསྐྱེད་ནས་བྱང་ཆུབ་ཞུགས་པ་དགའ་གྱུར་ཏེ། །གསེར་དང་གོས་ཀྱིས་དགེ་སློང་དགབ་བྱས་ནས། །དེ་ནི་ཏིང་འཛིན་འདི་ཡང་འདོད་
པའི་ཕྱིར། །སྲོག་ཆགས་སྟོང་དང་ལྷན་ཅིག་རབ་ཏུ་བྱུང་། །ལོ་ནི་སྟོང་ཕྲག་བརྒྱ་སྙེད་ཚང་བར་ཡང་། །དེ་དག་ཀུན་གྱི་དགེ་སློང་དེ་ཕྱིར་འབྲངས། །ཐོས་པ་རྒྱ་མཚོ་ལྟ་བུའི་ཏིང་འཛིན་འདི། །ལན་གཉིས་མ་ཡིན་ལན་གཅིག་ཁོ་ན་ཐོས། །དེ་ཡི་དྲན་པ་སྐྱོ་བ་མ་སྐྱེས་ཤིང་། །ཏིང་འཛིན་ཞི་བ་འདི་ནི་

ཡོངས་སུ་ཚོལ། །དེ་དག་ཀུན་གྱིས་ལས་འདི་བྱས་པའི་ཕྱིར། །སྟོང་ཕྲག་དྲུག་ཅུ་རྩ་བརྒྱད་ཚང་བ་ཡི། །སངས་རྒྱས་མཐུ་ཆེན་རྣམས་ནི་མཉེས་པར་བྱས། །དེ་ལས་ཏིང་འཛིན་འདི་ནི་ཐོས་པར་གྱུར། །དེ་བས་བདེ་བར་གཤེགས་པ་གཞན་དག་ཀྱང་། །སྟོང་ཕྲག་དྲུག་ཅུ་རྩ་
བརྒྱད་ཚང་བ་མཆོད། །བདེ་བར་གཤེགས་པ་སེང་གེའི་བློ་གྲོས་ལ། །བདག་ནི་རྗེས་སུ་ཡི་རང་བགྱིད་ཅེས་བརྗོད། །བསོད་ནམས་བྱས་པ་དེ་ཡིས་རྒྱལ་པོ་དེ། །བརྩོན་འགྲུས་བརྟན་པ་ཞེས་བྱའི་སངས་རྒྱས་གྱུར། །སྲོག་ཆགས་བྱེ་བ་ཁྲག་ཁྲིག་བསམ་མི་ཁྱབ། །ཐམས་ཅད་དེ་ཡིས་སྐྱེ་
ཞིང་འཆི་ལས་བཀྲོལ། །སྟོང་དུ་ཚང་བའང་རྗེས་སུ་སློབ་སློབ་ནས། །སངས་རྒྱས་གྱུར་ཏེ་དཔའ་བརྟན་ཞེས་བྱ་བར། །ལྷར་བཅས་འཇིག་རྟེན་ལ་ནི་གྲགས་པར་གྱུར། །ཏིང་འཛིན་སྒྲས་ཀྱང་བྱང་ཆུབ་རེག་གྱུར་ན། །སྲིད་པ་ཐམས་ཅད་ལ་ནི་མི་བརྟེན་པར། །གང་ཞིག་ཏིང་འཛིན་འདི་ནི་རྒྱ་ཆེ་བར། །
སྟོན་པ་དེ་དག་བྱང་ཆུབ་འགྱུར་བར་ནི། །སྨོས་ཅི་དགོས་ཏེ་ནམ་ཡང་ཐེ་ཙོམ་མེད། །སངས་རྒྱས་ཀྱིས་གསུངས་ཏིང་འཛིན་ཞི་བ་འདི། །དཔག་ཚད་བརྒྱ་ན་གལ་ཏེ་ཡོད་གྱུར་ཀྱང་། །བྱང་ཆུབ་དོན་དུ་གཉེར་བ་ཉིན་མཚན་དུ། །ནམ་ཡང་མི་འདུག་སོང་སྟེ་མཉན་པར་བྱ། །གལ་ཏེ་སོང་ནས་འདི་ནི་
མ་རྙེད་ན། །འོན་ཀྱང་དེ་ཡི་བསོད་ནམས་ཚད་མེད་དེ། །དེ་ནི་དེ་ཡི་བྱང་ཆུབ་བསྐྱེད་ཡིན་ན། །གང་གིས་སོང་སྟེ་འདི་ཐོས་སྨོས་མི་དགོས། །དེ་ཕྱིར་གང་ཞིག་ཏིང་འཛིན་འདི་འདོད་པས། །དང་པོར་ཚངས་པས་བྱིན་དེ་དྲན་པར་བྱོས། །དགེ་སློང་གང་ལ་ཏིང་འཛིན་འདི་ཡོད་ལ། །སྐྱོ་བའི་
སེམས་ནི་མེད་པར་བསྟེན་པར་བྱ། །རྗེས་སུ་དྲན་ཏེ་སྐྱེ་བ་སྔ་མ་ལ། །སྟོང་ཕྲག་སུམ་ཅུ་རྩ་དྲུག་ལོ་ཚང་བར། །ངས་ནི་ཆོས་སྨྲ་བ་ལ་རྟག་བརྟེན་ཀྱང་། །ཏིང་འཛིན་འདི་ནི་ནམ་ཡང་ཐོས་མ་གྱུར། །སྔོན་གྱི་སངས་རྒྱས་བདེན་པ་ཞེས་བྱ་བྱུང་། །དེ་ན་དགེ་སློང་གཞོན་ནུ་ཐོས་མང་ཞིང་། །བདེ་
བར་གཤེགས་པའི་བསྟན་པ་ནུབ་འོག་ཏུ། །དེ་ཚེ་དེས་ནི་ཏིང་འཛིན་འདི་ཉིད་བཟུང་། །ང་ནི་དེ་ན་རྒྱལ་རིགས་རྒྱལ་པོ་སྟེ། །དགེ་སློང་ཆེ་གེ་མོ་ཞིག་ཏིང་འཛིན་འདི། །འཛིན་གྱིས་དྲུང་དུ་ལེགས་པར་ཉོན་ཅིག་ཅེས། །རྨི་ལམ་དུ་ནི་ཏིང་འཛིན་འདི་ཐོས་ནས། །མྱུར་དུ་ལངས་ཏེ་རིངས་པའི་ཚུལ་གྱིས་

ནི། །འདི་འཛིན་པ་ཡི་དགེ་སློང་དེ་བཙལ་ཏེ། །མཐོང་ནས་རབ་ཏུ་བྱུང་བ་དེ་ལས་ནི། །འདི་ཉིད་ལན་འགའ་ཐོས་ལྟ་སྲིད་དམ་ཞེས། །སྟོང་ཕྲག་དྲུག་ཅུ་རྩ་དྲུག་ལོ་ཚང་བར། །ངས་ནི་དགེ་སློང་དེ་ལ་དགའ་བས་བཀུར། །བདུད་ཀྱིས་བྱིན་གྱིས་བརླབས་པར་གྱུར་པའི་ཕྱིར། །ལན་འགའ་ཙམ་
ཡང་ཐོས་པར་མ་གྱུར་ཏེ། །དེ་ཕྱིར་དགེ་སློང་རྣམས་དང་དགེ་སློང་མ། །དགེ་བསྙེན་དག་དང་དགེ་བསྙེན་མ་རྣམས་ལ། །ཏིང་འཛིན་ཐོས་ནས་མྱུར་དུ་ཟུང་ཤིག་ཅེས། །མོས་པར་བྱེད་ཅིང་ཁོང་དུ་ཆུད་པར་བྱེད། །དེར་ནི་བསྐལ་པ་ཚང་བར་འདུག་ནས་ཀྱང་། །ཏིང་འཛིན་འཛིན་པ་དེ་ནི་བསྙེན་ཅིང་
བསྟེན། །བསྐལ་པ་སྟོང་དུ་ལེགས་པར་བསྙེན་བཀུར་བྱས། །དེས་ནི་ཏིང་འཛིན་འདི་ཡང་བཤད་པར་གྱུར། །ཏིང་འཛིན་རྡུལ་མེད་འདི་ལ་རབ་སྤྱོད་པའི། །དགེ་སློང་གྲོང་དུ་སློང་བ་དེ་ཉིད་ལ། །བཟའ་བ་དང་ནི་བཅའ་དང་མལ་ཆ་དང་། །དེ་བཞིན་གོས་ཀྱང་བྱེ་བ་བྱིན་པར་གྱུར། །བཅའ་དང་
བཟའ་དང་མལ་སྟན་དེ་བཞིན་གོས། །མང་པོ་བྱེ་བ་ཐམས་ཅད་ལྟ་ཡང་ཞོག །གལ་ཏེ་རང་གི་ཤ་བྱིན་ཐོབ་ན་ནི། །ལེགས་སྤྱད་ཡིན་ན་ཟས་སྐོམ་སྨོས་ཅི་དགོས། །རྟག་ཏུ་བྲན་གྱུར་བསྙེན་བཀུར་བྱེད་ཅིང་ནི། །ཏིང་འཛིན་ཞི་བ་འདི་ཡང་ཚོལ་བྱེད་ལ། །མཁས་པས་རྙེད་ནས་དེ་ཡང་མྱུར་བྱེད་
ཀྱང་། །དེ་ལ་བྱས་པ་གཟོ་བ་མ་ཡིན་ནོ། །བསྐལ་པ་མང་པོ་བྱེ་བར་བཙལ་ཀྱང་ནི། །ཏིང་འཛིན་འདི་ནི་ཤིན་ཏུ་རྙེད་པར་དཀའ། །འདི་ཡི་སྒྲ་ཡང་བརྒྱ་ལམ་ཐོས་འགྱུར་ན། །ཁ་ཏོན་བྱས་ནས་སྟོན་པ་སྨོས་ཅི་དགོས། །གང་གིས་གང་གཱའི་བྱེ་སྙེད་འཇིག་རྟེན་ཁམས། །རིན་པོ་ཆེས་ནི་བཀང་སྟེ་
བྱིན་པ་བས། །གང་ཞིག་འདི་ལས་ཚིགས་བཅད་འགའ་ལུང་མནོས། །དེ་ཡི་བསོད་ནམས་ཚད་གཟུང་མི་སླའོ། །བསྐལ་པ་བྱེ་བ་གང་གཱའི་བྱེ་སྙེད་དུ། །གང་རྟག་བརྩོན་འགྲུས་བརྩམས་ཏེ་གནས་པ་བས། །གང་ཞིག་འདི་ལས་ཚིགས་བཅད་འགའ་ལུང་མནོས། །དེ་ཡི་བསོད་
ནམས་ཚད་གཟུང་མི་སླའོ། །བསྐལ་པ་བྱེ་བ་གང་གཱའི་བྱེ་སྙེད་དུ། །གང་རྟག་མི་རྟེན་བསམ་གཏན་སྒོམ་པ་བས། །གང་ཞིག་འདི་ལས་ཚིགས་བཅད་འགའ་ལུང་མནོས། །དེ་ཡི་བསོད་ནམས་ཚད་གཟུང་མི་སླའོ། །བསྐལ་པ་བྱེ་བ་གང་གཱའི་བྱེ་སྙེད་དུ། །གང་རྟག་ཤེས་རབ་གནས་

པར་གྱུར་པ་བས། །གང་ཞིག་འདི་ལས་ཚིགས་བཅད་འགའ་ལུང་མནོས། །དེ་ཡི་བསོད་ནམས་ཚད་གཟུང་མི་སླའོ། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ཉི་ཤུ་རྩ་གསུམ་པའོ།། །།བཟང་སྐྱོང་དེ་བས་ན་དད་པའི་རིགས་ཀྱི་བུའམ། རིགས་
ཀྱི་བུ་མོས་ཏིང་ངེ་འཛིན་འདི་གུས་པར་བྱས་ཏེ་མཉན་པར་བྱའོ། །ཐོས་ནས་ཀྱང་གཟུང་བར་བར་བྱ། ཀུན་ཆུབ་པར་བྱ། ཡི་གེར་བྲི་བར་བྱ། བཅང་བར་བྱ། བཀླག་པར་བྱའོ། །བཟུང་ཞིང་ཀུན་ཆུབ་པར་བྱས་ནས་ཀྱང་གཞན་དག་ལ་ཡང་རྒྱ་ཆེར་ཡང་དག་པར་བསྒྲག་པར་བྱའོ། །ལེགས་པར་བྲིས་
ཏེ་གཞག་པར་བྱའོ། །དེ་ཅིའི་ཕྱིར་ཞེ་ན། བཟང་སྐྱོང་ང་འདས་པའི་འོག་ཏུ་མ་འོངས་པའི་དུས་ན། བྱང་ཆུབ་སེམས་དཔའ་དད་པ་ཅན་དང་བ། བརྟག་པ་མང་བ་མང་པོ་འབྱུང་བར་འགྱུར་ཏེ། དེ་དག་སེམས་ཅན་རྣམས་ལ་ཕན་པ་དང་བདེ་བའི་ཕྱིར་མང་དུ་ཐོས་པ་ཚོལ་བར་འགྱུར་རོ། །དེ་དག་མང་
དུ་ཐོས་པ་ཚོལ་བས་དམ་པའི་ཆོས་ཚོལ་བའི་ཕྱིར་ཕྱོགས་དང་ཕྱོགས་མཚམས་དག་ཏུ་རྒྱུ་བར་འགྱུར་ཏེ། བཟང་སྐྱོང་སེམས་ཅན་དེ་ལྟ་བུ་ཆོས་དོན་དུ་གཉེར་བ། ཆོས་ལ་མོས་པ། ཆོས་འདོད་པ། ཆོས་ཡོངས་སུ་འཛིན་པ། ཤིན་ཏུ་རྒྱས་པ་འཛིན་པའི་སེམས་ཅན་རྣམས་ཀྱི་དོན་དང་ཆེད་དུ་
ཏིང་ངེ་འཛིན་འདི་ལུང་མནོས་ཤིང་བསྟན་ལ། དེ་བཞིན་གཤེགས་པ་རྣམས་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་ཏེ། གླེགས་བམ་ཆེན་པོར་ལེགས