Kinh tạng Tây Tạng (Kangyur Đại Học) — 056_མདོ་སྡེ།_ན

་འཛིན་འདི་ལ་འཇུག་
པར་བྱ། །ནད་མེད་བྱ་ཞིང་སུ་དག་ལ་ཡང་ནི། །མི་བསྙེན་མི་བརྗོད་མང་པོ་ཐམས་ཅད་སྤང་། །སྐྱོན་མེད་བཟོད་པ་དག་ལ་གནས་ནས་སུ། །ཏིང་ངེ་འཛིན་འདི་ལ་ནི་འཇུག་པར་བྱ། །ཏིང་འཛིན་འཕགས་པ་འདི་ལ་འཇུག་པ་ན། སངས་རྒྱས་ཆོས་ལ་རྟག་ཏུ་གུས་བཅས་ཤིང་། །སེམས་ནི་
དང་ལ་གཡོ་མེད་ཕྲག་དོག་མེད། །དགེ་འདུན་བསྙེན་བཀུར་བྱ་བར་སྤྲོ་བར་བྱོས། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅུ་གཅིག་པའོ།། །།དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་བསྙེན་མ་གང་ཏིང་ངེ་འཛིན་འདི་ཐོས་ནས་ལུང་མནོད་པའམ། བསྒོམ་པར་འཚལ་ན། བཙུན་པ་བཅོམ་ལྡན་འདས་དེས་ཆོས་གང་ལ་གནས་ཏེ། ཏིང་ངེ་འཛིན་འདི་ལུང་

མནོད་པར་བགྱི། བསྒོམ་པར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་དེ་བས་ན་ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་བསྙེན་མ་
གང་ཏིང་ངེ་འཛིན་འདི་ཐོས་ནས་ལུང་མནོད་པའམ། བསྒོམ་པར་འདོད་པ་དེས་བསླབ་པའི་གཞི་ལྔ་ཡོངས་སུ་གཟུང་བར་བྱའོ། །བཟང་སྐྱོང་དགེ་བསྙེན་མས་གསུམ་ལ་སྐྱབས་སུ་སོང་ཞིང་ལྷ་གཞན་མེད་པར་བྱའོ། །བཟང་སྐྱོང་དགེ་བསྙེན་མས་དགེ་མཚན་དང་ལྟས་ཡོངས་སུ་
སྤང་བ་དང་སྒྱུ་མེད་པར་བྱའོ། །བཟང་སྐྱོང་དགེ་བསྙེན་མས་སྤྱོད་ལམ་མི་བཅོས་པ་དང་། འཇུངས་པ་མེད་པར་བྱའོ། །བཟང་སྐྱོང་དགེ་བསྙེན་མས་སྦྱིན་པ་བགེད་པ་ལ་དགའ་བ་དང་། ཆོས་འདོད་པར་བྱའོ། །བཟང་སྐྱོང་དགེ་བསྙེན་མས་ཡོངས་སུ་འདྲི་བའི་རང་བཞིན་ཅན་དང་། གུས་
པ་དང་བཅས་པ་དང་། ཞེ་ས་དང་བཅས་པར་བྱའོ། །དགེ་སློང་དང་དགེ་སློང་མ་དག་མཐོང་ན་སྟན་ལ་བདར་བར་བྱའོ། །བཟང་སྐྱོང་དེ་བས་ན་ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་བསྙེན་མ་གང་ཏིང་ངེ་འཛིན་འདི་ཐོས་ནས་ལུང་མནོད་པའམ། བསྒོམ་པར་འདོད་ན། དགེ་བསྙེན་མ་
དེས་ཆོས་དེ་ལྟ་བུ་དེ་དག་ལ་གནས་ཏེ་ཏིང་ངེ་འཛིན་འདི་ལུང་ནོད་པར་བྱའོ། །བསྒོམ་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སངས་རྒྱས་གནང་ཞིང་བདེ་གཤེགས་བསྔགས་པ་ཡི། །དགེ་བསྙེན་མ་གང་ཏིང་འཛིན་འདི་ཚོལ་བ། །
བསླབ་གཞི་ལྔ་པོ་དག་ནི་ཡོངས་བཟུང་སྟེ། །ཏིང་ངེ་འཛིན་འདི་ལ་ནི་འཇུག་པར་བྱ། །སངས་རྒྱས་ཆོས་དང་དེ་བཞིན་དགེ་འདུན་ལས། །ལྷ་གཞན་མེད་ཅིང་གུས་དང་བཅས་བྱས་ཏེ། །ལོག་པའི་ལམ་ནི་ཐམས་ཅད་སྤང་བྱས་ལ། །ཏིང་ངེ་འཛིན་འདི་ལ་ནི་འཇུག་པར་བྱ། །སྲོག་
ཆགས་མི་གསོད་མ་བྱིན་མི་ལེན་ཅིང་། །བརྫུན་དུ་སྨྲ་བ་རྣམས་ཀྱང་མི་ཟེར་ལ། །ནམ་ཡང་འདོད་ལ་ལོག་པར་མི་གཡེམ་པར། །དེས་ནི་ཏིང་ངེ་འཛིན་འདི་ལུང་མནོད་བྱ། །འཇུངས་པ་མེད་ལ་རྣམ་སྨིན་མི་རེ་ཞིང་། །སྤྱོད་ལམ་བཅོས་མ་དག་ཀྱང་མེད་བྱས་ལ། །ཕྲག་དོག་དང་ནི་ང་རྒྱལ་

ཁྲོ་སྤངས་ཏེ། །དེས་ནི་ཏིང་ངེ་འཛིན་འདི་ལུང་ནོད་བྱ། །དགེ་སློང་དེ་བཞིན་དགེ་སློང་མ་མཐོང་ན། །གུས་དང་བཅས་པས་ལངས་ཤིང་སྟན་འབུལ་བ། །ཆོས་འདོད་དགེ་བ་གང་ཞེས་ཚོལ་བྱེད་ཅིང་། །དེས་ནི་ཏིང་ངེ་འཛིན་འདི་ལུང་མནོད་བྱ། །བཟང་སྐྱོང་གིས་ཞུས་པའི་ཏིང་ངེ་འཛིན་ལས་
དགེ་བསྙེན་མའི་ལེའུ་སྟེ་བཅུ་གཉིས་པའོ།། །།དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་འདི་ལྟར་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཀྱིས། བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་རྣམས་ཀྱི་ཆེད་དང་། བྱང་ཆུབ་སེམས་དཔའ་འདོད་ཆེན་པ་རྣམས་དང་། ལྷག་པའི་བསམ་པ་ཕུན་སུམ་ཚོགས་པ་རྣམས་དང་། བརྩོན་འགྲུས་བརྩམས་པ་རྣམས་དང་། བརྩོན་
པ་མི་འདོར་བ་རྣམས་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་རྣམས་ཀྱི་ཆེད་དུ་ཆོས་གང་ལ་གནས་ན། ཏིང་ངེ་འཛིན་འདི་ལུང་མནོད་པར་བགྱི་བའམ། བསྒོམ་པར་བགྱི་བའི་ཆོས་རྒྱ་ཆེ་ཞིང་བཟང་བ་གསུངས་པ་ངོ་མཚར་ཏོ། །བཙུན་པ་བཅོམ་
ལྡན་འདས་མ་འོངས་པའི་དུས་ན་དེ་བཞིན་གཤེགས་པ་མྱ་ངན་ལས་འདས་པ་དེའི་ཚེ། ཅི་ཏིང་ངེ་འཛིན་འདི་འཛམ་བུའི་གླིང་འདིར་སྤྱོད་པར་འགྱུར་ལགས་སམ། རྒྱས་པར་བགྱིད་པར་འགྱུར་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་ང་ཡོངས་སུ་མྱ་ངན་ལས་འདས་
ནས་ལོ་བཞི་སྟོང་དུ་ཏིང་ངེ་འཛིན་འདི་འཛམ་བུའི་གླིང་ན་སྤྱོད་པར་འགྱུར་རོ། །རྒྱས་པར་བྱེད་པར་འགྱུར་རོ། །དེའི་འོག་ཏུ་སའི་ཁུང་དུ་སོང་བར་འགྱུར་རོ། །ཡང་དེ་ལོ་ལྔ་བརྒྱ་པ་ཐ་མ་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མར་གྱུར་པ། དམ་པའི་ཆོས་འཇིག་པར་གྱུར་པ། དགེ་སྦྱོང་འཇིག་
པར་གྱུར་པ། དམ་པའི་ཆོས་སྤོང་བར་གྱུར་པ། སེམས་ཅན་འཇིག་པར་གྱུར་པ། རྒྱལ་སྲིད་འཁྲུག་པར་གྱུར་པ། ཚུལ་ཁྲིམས་དང་ལྡན་པའི་ཕྱོགས་དམས་པའི་དུས་ལ་བབ་པ། ཚུལ་ཁྲིམས་འཆལ་པའི་ཕྱོགས་འཕེལ་བའི་དུས་ལ་བབ་པ། དམ་པའི་ཆོས་ཀྱི་ཕྱོགས་

དམས་པའི་དུས་ལ་བབ་པ། དམ་པ་མ་ཡིན་པའི་ཕྱོགས་ཀྱི་ཆོས་འཕེལ་བའི་དུས་ལ་བབ་པ། ཟད་པའི་དུས་ལ་བབ་པ་ན། སེམས་ཅན་གང་མདོ་སྡེ་འདི་ལྟ་བུ་ཐོབ་པར་འགྱུར་བའི་ཕྱིར་དགེ་བའི་རྩ་བ་འབར་བ། སྔོན་གྱི་རྒྱལ་བ་ལ་བྱ་བ་བྱས་པ། དགེ་བའི་རྩ་བ་
སྐྱེད་པ། དགེ་བའི་རྩ་བ་སྨིན་པ། ས་བོན་བཏབ་པའི་སེམས་ཅན་རྣམས་ནི་ཉུང་ཟད་ཅིག་འབྱུང་སྟེ། སེམས་ཅན་དེ་ལྟ་བུ་དེ་དག་གི་དོན་དུ་འདི་ལྟ་སྟེ་སངས་རྒྱས་ཀྱི་མཐུས་ཏིང་ངེ་འཛིན་འདི་འཛམ་བུའི་གླིང་དུ་སྤྱོད་པར་འགྱུར་རོ། །རྒྱས་པར་བྱེད་པར་འགྱུར་རོ། །དེ་དག་གིས་ཀྱང་ཏིང་ངེ་
འཛིན་འདི་ཐོས་ནས་དགའ་བ་དང་། མགུ་བ་དང་། དང་བ་རྒྱ་ཆེན་པོ་འཐོབ་བོ། །ཐོས་ནས་ཀྱང་འཛིན་པར་འགྱུར། འཆང་བར་འགྱུར། ཀློག་པར་འགྱུར། ཀུན་ཆུབ་པར་བྱེད་པར་འགྱུར། ཡི་གེར་འདྲི་བར་འགྱུར། འཆད་པར་འགྱུར། རྒྱས་པར་བྱེད་པར་འགྱུར། བསྒོམ་
པའི་སྦྱོར་བ་ལ་བརྩོན་པར་འགྱུར། ཐ་ན་གླེགས་བམ་དུ་བྲིས་ཤིང་འཆང་བར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རིན་ཆེན་འབྱུང་གནས་དང་། ལིད་ཙ་བཱི་གཞོན་ནུས་བཅོམ་ལྡན་འདས་ལ་
ཕྱི་མའི་དུས་ན་དམ་པའི་ཆོས་འདི་འགྱུར་བ་དང་། རྣམ་པར་འཇིག་པ་ཐོས་ནས་ཆོས་ཀྱི་ཤུགས་ཀྱིས་ངུ་ཞིང་མཆི་མ་ཀློག་པར་བྱེད་དེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རིན་ཆེན་འབྱུང་གནས་དང་།
ལིད་ཙ་བཱི་གཞོན་ནུ་མཆི་མ་ཕྱིས་ཏེ། སྟན་ལས་ལངས་ནས་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་
བཅོམ་ལྡན་འདས་བདག་ཅག་གིས་དེ་བཞིན་གཤེགས་པ་མྱ་ངན་ལས་འདས་ནས་ལོ་བརྒྱ་བའི་ཐ་མར་གྱུར་པ། ཕྱི་མའི་དུས་ཕྱི་མའི་ཚེ་ལྔ་བརྒྱ་བ་ཐ་མར་གྱུར་པ། དམ་པའི་ཆོས་སྤོང་བར་གྱུར་པ་ན་ཡང་། མདོ་སྡེ་འདི་ལྟ་བུ་འདི་དག་གཟུང་བར་བགྱིའོ། །ཀུན་ཆུབ་པར་བགྱིའོ། །

ཡི་གེར་བྲི་བར་བགྱིའོ། །བཅང་བར་བགྱིའོ། །བཀླག་པར་བགྱིའོ། །རྒྱས་པར་བགྱིའོ། །བསྒོམ་པའི་སྦྱོར་བ་ལ་བརྩོན་པར་བགྱིའོ། །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས་བདག་ཅག་ནི་དེ་བཞིན་གཤེགས་པས་གསུངས་པའི་མདོ་སྡེ་ཟབ་མོ་འདི་ལྟ་བུ་འདི་
ཉན་པ་དང་། འདྲི་བ་དང་། འཛིན་པ་དང་། ཀུན་ཆུབ་པར་བགྱིད་པ་དང་། འཆང་བ་དང་། ཀློག་པ་དང་། འཆད་པ་དང་། རྒྱས་པར་བགྱིད་པ་དང་། བསྒོམ་པས་ཆོག་མ་འཚལ་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་བདག་དེད་དཔོན་ཆེ་བཟང་དང་། བྱང་
ཆུབ་སེམས་དཔའ་སེམས་དཔའ་ཆེན་པོ་ཚོང་དཔོན་གྱི་བུ་ཕུག་སྦས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཁྱེའུ་འདམ་བུས་བྱིན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཚམས་བཟངས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དབང་པོས་བྱིན་དང་།
བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་རྣམས་བཅོམ་ལྡན་འདས་ལས་ལོ་ལྔ་བརྒྱ་པ་ཐ་མར་གྱུར་པ་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ་དམ་པའི་ཆོས་འདི་འགྱུར་བ་དང་། རྣམ་པར་འཇིག་པ་ཐོས་ནས་ཆོས་ཀྱི་ཤུགས་ཀྱིས་ངུ་ཞིང་མཆི་མ་ཀློག་པར་བྱེད་དོ། །དེ་ནས་བྱང་
ཆུབ་སེམས་དཔའ་སེམས་དཔའ་ཆེན་པོ་ཁྱིམ་བདག་དེད་དཔོན་ཆེ་བཟང་དང་། ཚོང་དཔོན་གྱི་བུ་ཕུག་སྦས་དང་། ཁྱེའུ་འདམ་བུས་བྱིན་དང་། རིགས་ཀྱི་བུ་མཚམས་བཟངས་དང་། དབང་པོས་བྱིན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་རྣམས་མཆི་མ་ཕྱིས་ནས་སྟན་
ལས་ལངས་ཏེ། གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་ཀྱང་མ་འོངས་
པའི་དུས་ན། དེ་བཞིན་གཤེགས་པ་མྱ་ངན་ལས་འདས་ནས་ལོ་ལྔ་བརྒྱ་པ་ཐ་མར་གྱུར་པ་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མར་གྱུར་པ། དམ་པའི་ཆོས་སྤོང་བར་གྱུར་པ་ན་ཡང་། མདོ་སྡེ་འདི་ལྟ་བུ་འདི་དག་གཟུང་བར་བགྱིའོ། །ཀུན་ཆུབ་པར་བགྱིའོ། །ཡི་གེར་བྲི་བར་བགྱིའོ། །

བཅང་བར་བགྱིའོ། །བཀླག་པར་བགྱིའོ། །གཞན་དག་ལ་ཡང་རྒྱ་ཆེར་བཤད་པར་བགྱིའོ། །བསྒོམ་པར་བགྱིའོ། །བཙུན་པ་བཅོམ་ལྡན་འདས་བདག་ཅག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བསྐལ་པ་བྱེ་
བ་ཁྲག་ཁྲིག་བརྒྱ་སྟོང་དུ་ཡང་དག་པར་བསྒྲུབས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་རིང་དུ་གནས་པར་བགྱིའོ། །རྒྱ་ཆེ་བ་དང་རྒྱས་པར་བགྱིའོ། །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས་བདག་ཅག་ནི་སྔོན་མ་ཐོས་པའི་ཆོས་རྣམས་ཡང་དག་པར་ལེན་པར་
བགྱིད་པ་དང་། ཡང་དག་པར་སྒྲོགས་པར་བགྱིད་དོ། །བཙུན་པ་བཅོམ་ལྡན་འདས་བདག་ཅག་ནི་ཆོས་ཟབ་མོ་འཇིག་རྟེན་པ་ཐམས་ཅད་ཡིད་ཆེས་པར་མི་འགྱུར་བ་བསྒོམ་པར་བགྱིའོ། །བསྟན་པར་བགྱིའོ། །དེ་ནས་འཁོར་དེ་དག་ནས་དགེ་སློང་དང་། དགེ་སློང་མ་དང་། དགེ་
བསྙེན་དང་། དགེ་བསྙེན་མ་སྲོག་ཆགས་ལྔ་བརྒྱ་ཙམ་སྟན་ལས་ལངས་ཏེ། གུས་པ་དང་བཅས། ཞེ་ས་དང་བཅས་པས། བཅོམ་ལྡན་འདས་ལས་ལོ་ལྔ་བརྒྱ་པ་ཐ་མར་གྱུར་པ་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མར་གྱུར་པ་ན་དམ་པའི་ཆོས་རྣམ་པར་འཇིག་པ་དང་། དམ་པའི་ཆོས་
མི་ལེན་པའི་དུས་ཐོས་ནས་དམ་པའི་ཆོས་འགྱུར་བའི་ཤུགས་ཀྱིས་ངུ་ཞིང་མཆི་མ་ཀློག་པར་གྱུར་ཏོ། །དེ་ནས་སྲོག་ཆགས་ལྔ་བརྒྱ་ཙམ་པོ་དེ་དག་གིས་མཆི་མ་ཕྱིས་ནས་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་
ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་ཀྱང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ལོ་ལྔ་བརྒྱ་པ་ཐ་མར་གྱུར་པ་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མར་གྱུར་པ་ན་མདོ་སྡེ་འདི་ལྟ་
བུ་འདི་དག་གཟུང་བར་བགྱིའོ། །བསྒོམ་པར་བགྱིའོ། །གཞན་དག་ལ་ཡང་རྒྱ་ཆེར་བསྒྲག་པར་བགྱིའོ། །སྐྱེས་བུ་དམ་པ་འདི་དག་ལ་ཡང་ལུས་ཀྱིས་ཞལ་ཏར་བགྱི་བ་བགྱིའོ། །དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་བུ་འདི་ཡང་དེའི་ཚེ་མཉན་པར་བགྱིའོ། །དེར་

ཡང་དམ་པའི་ཆོས་ཡོངས་སུ་གཟུང་བར་བགྱིའོ། །དམ་པའི་ཆོས་ཀྱི་སྣོད་དུ་གྱུར་པ་གཞན་དག་ཀྱང་དམ་པའི་ཆོས་དཀོན་མཆོག་འདིས་ཕན་གདགས་པར་བགྱིའོ། །བཅོམ་ལྡན་འདས་ཏིང་ངེ་འཛིན་འདི་སྐྱེས་བུ་དམ་པ་འདི་དག་ལ་གཏད་པར་གསོལ། བཅོམ་ལྡན་འདས་ཏིང་ངེ་
འཛིན་འདི་སྐྱེས་བུ་དམ་པ་འདི་དག་ལ་གདམས་པར་གསོལ། དེ་ནས་དེའི་ཚེ་བཅོམ་ལྡན་འདས་ཀྱིས་གསེར་གྱི་ཁ་དོག་ལྟ་བུའི་འཛུམ་པ་མཛད་དེ། དེས་འཇིག་རྟེན་གྱི་ཁམས་མཐའ་ཐུག་པ་མེད་པ་རྣམས་འོད་ཀྱིས་ཁྱབ་པར་བྱས་ཏེ། ཚངས་པའི་འཇིག་རྟེན་གྱི་བར་དུ་
མངོན་པར་བྱུང་ནས་ཉི་མ་དང་ཟླ་བའི་འོད་ཀྱང་ཟིལ་གྱིས་མནན་ཏེ་སླར་ལྷགས་ནས། བཅོམ་ལྡན་འདས་ལ་གཡས་ཕྱོགས་ནས་ལན་གསུམ་དུ་བསྐོར་བ་བྱས་ཏེ། བཅོམ་ལྡན་འདས་ཀྱི་དབུའི་གཙུག་གི་མཚམས་སུ་ནུབ་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་
ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འཐུན་པའི་ཚིགས་སུ་བཅད་པ་འདི་ལྟ་བུ་དག་གིས་མངོན་པར་བསྟོད་དོ། །ཚུལ་ཁྲིམས་
རྣམ་དག་སྤྱོད་ཡུལ་ཡོངས་སུ་དག །མཐུ་ཆེ་བ་ཡི་ནང་ནའང་རྫུ་འཕྲུལ་ཆེ། །སྐྱེ་དགུ་ཀུན་ལས་མཆོག་ཏུ་འཕགས་གྱུར་པ། །དྲི་མ་བྲལ་བའི་ཉི་མ་བཞིན་དུ་མཛེས། །མ་ཆགས་མཁྱེན་ལྡན་ཤིན་ཏུ་རྣམ་གྲོལ་ཐུགས། །ཀ་ལ་པིང་ཀའི་གསུངས་ལྡན་ལྷ་ཡི་ལྷ། །ཕས་ཀྱི་རྒོལ་
བ་ཀུན་གྱིས་མི་བསྐྱོད་པ། །འཛུམ་པ་འདི་མཛད་རྒྱུ་རྐྱེན་ཅི་ཞིག་ལགས། །ཕན་ཕྱིར་ཐུགས་བརྩེ་རྐང་གཉིས་ནང་ན་གཙོ། །དོན་དམ་གསལ་བས་ལུང་ནི་བསྟན་པར་གསོལ། །ཁྱོད་ཀྱི་གསུང་སྒྲ་ཡིད་དུ་འོང་ཐོས་ན། །འཕགས་པའི་དགའ་བ་ཟང་ཟིང་མེད་པ་འཐོབ། །རྒྱལ་
མཆོག་རྣམ་པར་འདྲེན་པ་རྒྱུ་མེད་པར། །གང་ཟག་མཆོག་ནི་འཛུམ་པ་མི་མཛད་ན། །འཛུམ་པ་འདི་མཛད་རྒྱུ་རྐྱེན་ཅི་ཞིག་ལགས། །འཇིག་རྟེན་ཕན་ཕྱིར་ཐུགས་བརྩེ་ཁྱོད་ལ་ཞུའོ། །འཇིག་རྟེན་མགོན་པོ་འཛུམ་པ་མཛད་པ་ལས། །དེ་རིང་སུ་ཡི་དགོས་པ་རྒྱ་ཆེར་འབྱུང་། །སུ་ཞིག་

སངས་རྒྱས་ཡེ་ཤེས་བརྟན་པར་གནས། །སུ་ཞིག་དེ་རིང་རྒྱལ་སྲིད་མཆོག་ཐོབ་འགྱུར། །སུ་ཞིག་དེ་རིང་བསོད་ནམས་བརྟན་པར་གནས། །སུ་ཞིག་ཆོས་མཛོད་འདི་ནི་འཛིན་པར་འགྱུར། །སུ་ཞིག་དེ་རིང་ཅོད་པན་ཆེ་ཐོགས་ཏེ། །རང་གི་ལག་གིས་རང་
གི་མགོ་ལ་འདོགས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་སླར་ཚིགས་སུ་བཅད་དེ་གསུངས་པ། ཀུན་དགའ་གྲོགས་པོ་ལྔ་བརྒྱ་ཚོགས་པ་དག །དགའ་བའི་སེམས་ཀྱིས་མདུན་དུ་འཁོད་གྱུར་ཅིང་། །བདག་ཅག་ཆོས་འདི་ཐོབ་པར་ཤོག་ཤིག་ཅེས། །
ཚིག་ཏུ་རྗོད་པར་བྱེད་པ་འདི་དག་ལྟོས། །ནམ་ཞིག་བདག་ཅག་འདི་འདྲར་འགྱུར་ཞེས་ཏེ། །དེ་དག་ང་ལ་ཡང་ནི་ལྟ་བར་བྱེད། །བདག་ཅག་བྱང་ཆུབ་མཆོག་འདི་འཛིན་ཏོ་ཞེས། །ང་ཡི་མདུན་དུ་འདུག་ནས་ཚིག་ཏུ་བརྗོད། །མ་འོངས་ཕྱི་དུས་དེ་འདྲར་གྱུར་པའི་ཚེ། །མདོ་སྡེ་འདི་དག་
བསྒྲགས་པར་བྱ་བའི་ཕྱིར། །མཁས་པ་བརྒྱད་པོ་འདི་དག་ལ་སོགས་པ། །ལྔ་བརྒྱ་འདི་དག་རྣམས་ཀྱང་ལངས་པར་གྱུར། །མོས་པར་བྱ་ཞིང་ཁོང་དུ་ཆུད་པར་བྱ། །འདིར་ནི་ང་ཡི་ཡེ་ཤེས་ཆགས་པ་མེད། །འདི་དག་གིས་ནི་རྒྱལ་བ་གཅིག་པུ་ལ། །ཐལ་མོ་སྦྱར་བ་བྱས་ནས་
ལངས་པ་མིན། །སྔོན་དག་དྲན་ཏེ་སྐྱེ་བ་སྔ་མ་ལ། །སངས་རྒྱས་སྟོང་ཕྲག་བརྒྱད་ཅུ་ཚང་བར་བྱུང་། །ཆོས་འདི་དག་ནི་བསྒྲགས་པར་བྱ་བའི་ཕྱིར། །དེ་ལའང་འདི་དག་བརྒྱད་ལ་སོགས་པའང་ལངས། །དེ་བས་ཀྱང་ནི་ཤིན་ཏུ་སྔ་བ་ན། །ཚུལ་ཁྲིམས་རྣམ་དག་གྲགས་པ་ཆེན་
པོ་པ། །བྱེ་བ་ཁྲག་ཁྲིག་སྟོང་ཕྲག་བརྒྱད་ཅུ་བྱུང་། །དེ་དག་ལས་ཀྱང་རྒྱ་ཆེ་ཆོས་འདི་བླངས། །ང་ཡི་གསུང་རབ་རྒྱ་ཆེ་བ་དག་ཀྱང་། །དོན་དུ་གཉེར་ཅིང་ཡོངས་སུ་འཛིན་པར་བྱེད། །སེམས་ནི་དགའ་ཞིང་མགུ་བ་དཔེ་མེད་པས། །མང་པོ་བྱང་ཆུབ་སེམས་ལ་སྐུལ་བར་བྱེད། །
དེ་ནི་ཕྱི་དུས་མྱ་ངན་ང་འདས་ཚེ། །སྐུ་གདུང་ཐམས་ཅད་རྒྱས་པར་བྱས་གྱུར་ནས། །སངས་རྒྱས་བྱང་ཆུབ་འདི་དག་ལེགས་བཟུང་སྟེ། །ཡི་གེ་བྲིས་ནས་སྒྲོམ་དུ་བཅུག་ནས་ཀྱང་། །མཆོད་རྟེན་ས་དང་བྲག་དང་རི་དག་དང་། །ལྷ་དང་དེ་བཞིན་ཀླུ་ཡི་ལག་དག་ཏུ། །མདོ་སྡེ་བཞག་པ་

བྱས་ནས་དེ་དག་རྣམས། །ལྷ་ཡི་བརྟུལ་ཞུགས་འདྲ་བར་བྱ་ཕྱིར་འགྲོ། །དེ་དག་ཕྱི་མའི་དུས་ཚེ་སོ་སོའི་རིགས། །ཐམས་ཅད་བོར་སྟེ་སླད་དུ་བབས་གྱུར་ནས། །སངས་རྒྱས་བྱང་ཆུབ་འདི་དག་ལེགས་བཟུང་སྟེ། །བསམ་པ་ཇི་བཞིན་དུ་ནི་བྱེད་པར་འགྱུར། །དེ་དག་ཆོས་འདི་འདོད་
པས་ཡུལ་ཡུལ་དུ། །དོང་ཞིང་མདོ་སྡེ་བཟང་པོ་འདི་རྙེད་འགྱུར། །རྙེད་ནས་ཡིད་ནི་མཆོག་ཏུ་དགའ་གྱུར་པས། །རྟེན་པ་མེད་པར་སྐྱེ་བོ་མང་ལ་གཏོང་། །ལུས་དང་དེ་བཞིན་སྲོག་ཀྱང་སྤང་བྱས་ཏེ། །མཁས་པ་དེ་དག་ཆོས་འདོད་ཆོག་མི་ཤེས། །ཕས་ཀྱི་རྒོལ་བ་ཀུན་དང་མི་
འཐུན་ཞིང་། །གྱ་ནོམ་རྒྱ་ཆེ་ཆོས་ནི་སྦྱིན་པར་བྱེད། །གང་དག་ང་ཡི་མདུན་ན་ལངས་གྱུར་པ། །ལྔ་བརྒྱ་འདི་དག་ཐམས་ཅད་མ་གཏོགས་པར། །མདོ་སྡེ་འདི་ལ་འཛིན་པར་བྱེད་པ་དང་། །འཆང་དང་ཀློག་པར་བྱེད་པ་སུ་ཡང་མེད། །དགེ་སློང་བརྒྱད་དང་དེ་བཞིན་བྱང་ཕྱོགས་
སུ། །ཡོངས་སུ་ལེན་ཅིང་ཆོས་འཛིན་དགའ་བ་དག །ཆོས་འདོད་འཇིག་རྟེན་ཕན་ཞིང་བརྩེ་བ་དག །ལེན་པའི་ཕྱིར་ནི་མང་པོ་འབྱུང་བར་འགྱུར། །གང་དག་དེར་ནི་ཤིན་ཏུ་རྒྱས་འཛིན་ཅིང་། །སྙན་ཚིག་རྙེད་ལ་མ་རྟེན་འབྱུང་བ་ནི། །བརྒྱད་ལ་སོགས་པ་དགེ་སློང་ལྔ་བརྒྱ་པོ། །
འདི་དག་ཐམས་ཅད་རྣམས་ནི་ཚང་བའོ། །དགེ་སློང་དགེ་སློང་མ་དང་དགེ་བསྙེན་དང་། །དགེ་བསྙེན་མ་ནི་མཁས་ཤིང་འཇུངས་བྲལ་འདི། །གང་དག་ལངས་ཤིང་ཕྱི་དུས་ཆོས་འཛིན་པ། །དེ་དག་ཐམས་ཅད་མི་མཆོག་རྒྱལ་བར་འགྱུར། །ཡོན་ཏན་བསམ་གྱིས་མི་ཁྱབ་ཀུན་དང་
ལྡན། །གསེར་གྱི་ཁ་དོག་བསོད་ནམས་བརྒྱ་ཡི་མཚན། །ཕན་ཕྱིར་ཐུགས་བརྩེ་སེམས་ཅན་མང་པོ་འགྲོལ། །བདེ་བ་སྦྱིན་ཞིང་ཉོན་མོངས་ཐམས་ཅད་སེལ། །དེ་དག་འདི་ནས་འཆི་འཕོས་ཕྱི་ནས་ཡང་། །ལོག་ལྟུང་སར་ནི་ནམས་ཀྱང་འགྲོ་མི་འགྱུར། །སྐྱེ་བ་ཐམས་ཅད་དུ་ནི་འདུས་
གྱུར་ཅིང་། །མི་མཆོག་རྣམས་ནི་མཉེས་པ་བྱེད་པར་འགྱུར། །དེ་དག་གིས་ནི་མི་ཁོམ་བརྒྱད་ཀྱང་སྤངས། །དེས་ནི་ངན་སོང་ཐམས་ཅད་སྤངས་པའོ། །དེས་ནི་བསོད་ནམས་ཚད་མེད་ཇི་སྙེད་བཟུང་། །ཡོན་ཏན་མཐའ་ནི་བཤད་པར་མི་ནུས་སོ། །སངས་རྒྱས་ཞིང་འདིར་མཉེས་པར་

བྱེད་པར་འགྱུར། །འདུས་པར་གྱུར་ནས་སངས་རྒྱས་གང་འགྱུར་བ། །དེ་དག་ཕན་པའི་ཕྱིར་ནི་སྙིང་བརྩེ་ལ། །བླ་མེད་ཞི་ལམ་ཚོལ་ཞིང་གུས་པར་བྱེད། །དེ་དག་བསྐལ་པ་གཅིག་ལ་འདུས་གྱུར་ཏེ། །རྐང་གཉིས་གཙོ་ལ་མཆོད་པ་དག་བྱས་ནས། །བླ་ན་མེད་པའི་རྡུལ་
མེད་བྱང་ཆུབ་ཕྱིར། །འཕགས་པ་ཟང་ཟིང་མེད་པའི་བཟོད་འཐོབ་འགྱུར། །དེ་དག་ན་ཡང་དེ་བཞིན་ཆོས་འཛིན་པ། །ཕྱི་མའི་དུས་དང་དེ་བཞིན་བར་མའི་དུས། །དེ་ན་ཚངས་པར་སྤྱོད་པ་འདི་སྤྱད་ནས། །ཚེ་དཔག་མེད་པའི་སངས་རྒྱས་མཉེས་པར་བྱེད། །བསྐལ་པ་བཟང་པོ་
འདི་ལ་ཇི་སྙེད་ཀྱི། འཇིག་རྟེན་དོན་མཛད་འོད་མཛད་འབྱུང་བ་དག །དེ་དག་གི་ཡང་ཆོས་ཀྱི་ཚུལ་འཛིན་པ། །དུས་གསུམ་ལ་ནི་གནས་པའི་དཔའ་བོའོ། །མ་འོངས་སངས་རྒྱས་བྱེ་བ་ཕྲག་མང་པོ། །བསམ་གྱིས་མི་ཁྱབ་གང་དག་ཚད་མེད་པ། །དེ་ལ་དེས་ནི་རྒྱ་ཆེ་མཆོད་བྱས་
ནས། །སངས་རྒྱས་བྱང་ཆུབ་ལ་ནི་མཉེས་བྱེད་འགྱུར། །བྱང་ཆུབ་ཞི་ལ་དེ་དག་རེག་པར་འགྱུར། །དེ་ལ་འདུས་ནས་གུས་པར་བྱེད་པར་འགྱུར། །བསྐལ་པ་ཁྲག་ཁྲིག་མང་པོ་འདས་གྱུར་པ། །དེ་སྲིད་ན་ནི་ས་བོན་དངོས་པོར་འགྱུར། །ཁྱིམ་གྱི་བདག་པོ་བཟང་སྐྱོང་འདི་དང་ནི། །
རིན་ཆེན་འབྱུང་བའི་རིན་ཆེན་འབྱུང་གནས་དང་། །དེད་དཔོན་བཟང་དང་ཕུག་སྦས་བྲམ་ཟེའི་ཁྱེའུ། །སངས་རྒྱས་གང་གཱའི་བྱེ་སྙེད་མཐོང་བར་འགྱུར། །དེ་དག་དེ་རྣམས་དང་ནི་དེ་བས་ཀྱང་། །སངས་རྒྱས་བྱེ་བ་མང་པོའི་ཆོས་འཛིན་པ། །བསྐལ་པ་བྱེ་བ་མང་པོ་དེ་ཡི་ཚད། །བརྗོད་
པར་བྱ་ཞིང་མཐའ་རྟོགས་མི་ནུས་སོ། །སེམས་ཅན་ཆེན་པོ་གང་གིས་རྨི་ལམ་ནའང་། །དཔའ་བོ་འདི་དག་གི་ནི་མིང་དང་ཐབས། །ཐོས་པ་དེ་དག་རྒྱལ་བ་ཆེན་པོར་འགྱུར། །གང་དག་མཐོང་ངམ་ཡང་ན་ཐོས་ནས་ཀྱང་། འདོད་པར་བྱེད་དམ་ཡང་ན་དང་བྱེད་ན། །ཐམས་ཅད་བྱང་ཆུབ་
འགྱུར་བར་ཐེ་ཚོམ་མེད། །དེ་ལ་བསྙེན་བཀུར་བྱེད་པ་སྨོས་ཅི་དགོས། །བསམ་གྱིས་མི་ཁྱབ་ཆོས་འདི་ཡོངས་སུ་འཛིན། །མིང་དང་དེ་བཞིན་ཚེ་ཡང་བསམ་མི་ཁྱབ། །སྣང་བ་བསམ་མེད་ཡོན་ཏན་བསམ་མི་ཁྱབ། །ཤེས་རབ་ཡེ་ཤེས་དེ་བཞིན་བསམ་མི་ཁྱབ། །བླ་ན་མེད་པའི་བྱང་ཆུབ་

ཚོལ་བྱེད་ཅིང་། །སྔོན་གྱི་སངས་རྒྱས་ཚུལ་ཁྲིམས་རྣམ་དག་པ། །གང་གཱའི་བྱེ་སྙེད་བསམ་མི་ཁྱབ་བྱུང་བ། །དེ་ལའང་སྦྱིན་པ་རྒྱ་ཆེན་དག་ནི་ཕུལ། །སངས་རྒྱས་བྱེ་བ་མང་པོ་བཤད་གྱུར་ཀྱང་། །དེ་ཡི་བསོད་ནམས་ཚད་ནི་ཅུང་ཟད་མེད། །འདྲ་བའི་སྲས་དང་གྲོགས་པོ་དེ་དག་
ཀྱང་། །བྱང་ཆུབ་འགྱུར་བར་ཐེ་ཚོམ་འགའ་ཡང་མེད། །ཀུན་དགའ་ལ་ལ་གང་ཞིག་མདོ་སྡེ་འདི། །ལེན་ཏམ་འཛིན་ཏམ་ཀློག་པར་བྱེད་པ་དང་། །ལྔ་བརྒྱ་ཚང་བ་པོ་ནི་དེ་དག་ལ། །ཐེ་ཙོམ་མེད་པར་དེ་ལ་དགའ་བ་སྐྱེད། །ཀུན་དགའ་ལ་ལ་གང་ཞིག་མདོ་སྡེ་འདི། བཙལ་བའི་
ཕྱིར་ནི་འདུན་པ་བརྟན་བྱེད་ཅིང་། །གཉིད་ནི་སྤངས་ལ་བརྩོན་འགྲུས་རྩོམ་བྱེད་ན། །དེ་དག་ཏིང་ངེ་འཛིན་འདི་རྙེད་མི་དཀའ། །མདོ་སྡེ་འདི་འདྲ་བ་དག་གཟུང་བྱས་ནས། །རྙེད་པ་རབ་རྙེད་ངན་འགྲོ་དག་ཀྱང་སྤངས། །བདེ་གཤེགས་བསྟན་པ་ལ་ནི་དོན་ཡོད་དང་། །མི་ཁོམ་ཐམས་
ཅད་རྣམ་པར་སྤངས་པར་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་ལས་སྤྲོ་བ་སྐྱེད་པའི་ལེའུ་སྟེ་བཅུ་གསུམ་པའོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང་བྱང་ཆུབ་སེམས་དཔའ་སེམས་དཔའ་ཆེན་པོ་ལིད་ཙ་བི་གཞོན་ནུ་
རིན་ཆེན་འབྱུང་གནས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཚོང་དཔོན་གྱི་བུ་ཕུག་སྦས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྲམ་ཟེའི་ཁྱེའུ་འདམ་བུས་བྱིན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རིགས་ཀྱི་བུ་མཚམས་བཟངས་དང་།
བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་བདག་དེད་དཔོན་བཟང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དབང་པོས་བྱིན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་རྣམས་བྱང་ཆུབ་སེམས་དཔའ་ལྔ་བརྒྱ་ཙམ་པོ་དེ་དག་དང་ལྷན་ཅིག་ཏུ་
ལེགས་པར་གསུངས་པའི་ཕྱིར་རས་བཅོས་བུ་ཟུང་ལྔ་བརྒྱ་བཅོམ་ལྡན་འདས་ཀྱི་སྐུ་ལ་གསོལ་ཏོ། །བཅོམ་ལྡན་འདས་ལ་རིན་པོ་ཆེ་འགྲེམས་པར་ཡང་བྱེད་དོ། །བཅོམ་ལྡན་འདས་ལ་བསྙེན་བཀུར་ཡོངས་སུ་སྤྱོད་པར་བྱེད་པར་གསོལ་བའང་འདེབས་སོ། །དེ་ནས་བཅོམ་ལྡན་འདས་

ཀྱིས་བཟང་སྐྱོང་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ལྔ་བརྒྱ་ཙམ་པོ་དེ་དག་ལ་ཆོས་ཀྱི་གཏམ་གྱིས་ཡང་དག་པར་རབ་ཏུ་དགའ་བར་མཛད། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་མགུ་བར་མཛད་
དོ། །དེ་དག་དགའ་བའི་སེམས་དང་། སྐྱོན་མེད་པའི་སེམས་དང་། འཇམ་པའི་སེམས་དང་། འདོད་པར་བྱ་བའི་སེམས་དང་། དང་བའི་སེམས་དང་། སྒྲིབ་པ་དང་བྲལ་བའི་སེམས་ཀྱིས་བཅོམ་ལྡན་འདས་ཀྱི་སྤྱན་སྔར་ཐལ་མོ་སྦྱར་ཏེ་འཁོད་དོ། །དེ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་དུ་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་པར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་
དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་པོ། །བཞི་གང་ཞེ་ན། འདི་ལྟ་སྟེ། གཞན་མུ་སྟེགས་ཅན་གྱི་གསང་ཚིག་ལ་མི་རྟེན་པ་དང་། འདོད་པའི་ཡོན་ཏན་ལ་མི་ཆགས་
པ་དང་། སྦྱངས་པའི་ཡོན་ཏན་དང་ཡོ་བྱད་བསྙུངས་པ་རྣམས་ཀྱིས་མ་ཕམ་པ་དང་། སྲིད་པའི་འགྲོ་བའི་སྐྱེ་བའི་གནས་རྣམས་ལ་སྨོད་པ་སྟེ། བཟང་སྐྱོང་ཆོས་བཞི་པོ་དེ་དག་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་པོ། །བཟང་སྐྱོང་བྱང་ཆུབ་
སེམས་དཔའ་གང་ལ་ལ་ཞིག་ཏིང་ངེ་འཛིན་འདི་འཆང་བར་བྱེད། ཀློག་པར་བྱེད། ཡི་གེར་འདྲི་བར་བྱེད། འཛིན་པར་བྱེད། ཀུན་ཆུབ་པར་བྱེད། གཞན་དག་ལ་ཡང་རྒྱ་ཆེར་ཡང་དག་པར་སྟོན་པར་བྱེད་ན། བཟང་སྐྱོང་བྱང་ཆུབ་སེམས་དཔའ་དེའི་ཡོན་ཏན་གང་ཚེ་འདི་ཉིད་ལ་འཐོབ་པར་
འགྱུར་བ་ལྔ་བརྒྱ་ཡོད་པར་རིག་པར་བྱའོ། །ལྔ་བརྒྱ་གང་ཞེ་ན། བཟང་སྐྱོང་འདི་ལྟ་སྟེ་དཔེར་ན། བྱམས་པ་ལ་གནས་པའི་ལུས་ལ་དུག་གིས་མི་ཚུགས། མཚོན་གྱིས་མི་ཚུགས། ཆུར་མི་འཆི། མེས་མི་འཚིག །རྒྱལ་པོ་གླགས་ལྟ་བ་དག་གིས་གླགས་མི་རྙེད་པ་དེ་བཞིན་དུ་

བཟང་སྐྱོང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེའང་དུག་གིས་མི་ཚུགས། མཚོན་གྱིས་མི་ཚུགས། ཆུས་འཆི་བར་མི་བྱེད། མེས་མི་འཚིག །རྒྱལ་པོ་གླགས་ལྟ་བ་དག་གིས་གླགས་མི་རྙེད་དོ། །བཟང་སྐྱོང་གཞན་ཡང་གལ་ཏེ་བསྐལ་པས་སྲེག་པ་བྱུང་
བར་གྱུར་ཏེ། ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ཡང་མེའི་ཕུང་པོ་དེའི་ནང་དུ་མཆོངས་ན། མེའི་ཕུང་པོ་དེ་ཞི་བར་འགྱུར་རོ། །འདི་ལྟ་སྟེ་དཔེར་ན་ཆུའི་བུམ་པ་ཆེན་པོས་ནི་མེའི་ཕུང་པོ་ཞི་བར་བྱེད་དོ། །བཟང་སྐྱོང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་
དེ་ནི་སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་རྒྱལ་པོའམ། ཆོམ་རྐུན་ནམ། མེའམ། ཆུའམ། སྐྱེ་བོའམ། ཀླུའམ། རོ་ལངས་སམ། གནོད་སྦྱིན་ནམ། སྲིན་པོའམ། སེང་གེའམ། སྟག་གམ། ཁྱིའམ། ཝའམ། སྤྱང་ཀིའམ། མིའམ། མི་
མ་ཡིན་པའམ། ཡི་དགས་སམ། གྲུལ་བུམ་གྱིས་བར་ཆད་བྱེད་ན་ལུས་སམ། སྲོག་གམ། ལྷུང་བཟེད་དམ། གོས་སམ། ཚངས་པར་སྤྱོད་པའམ། འཆད་པའམ། ཁ་ཏོན་བྱེད་པའམ། བསམ་གཏན་ནམ་ཚུལ་བཞིན་ཡིད་ལ་བྱེད་པའི་བར་ཆད་བྱེད་པ་དེ་ནི་གནས་མ་ཡིན་སྐབས་མ་ཡིན་ཏེ་དེ་ནི་
གནས་མེད་དོ། །བཟང་སྐྱོང་ཏིང་ངེ་འཛིན་འདི་འཛིན་པའི་དགེ་སློང་དེ་སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་མིག་ནད་ཀྱིས་འདེབས་པའམ། རྣ་ནད་ཀྱིས་འདེབས་པའམ། སྣ་ནད་ཀྱིས་འདེབས་པའམ། ལྕེ་ནད་ཀྱིས་འདེབས་པའམ། ལུས་ནད་ཀྱིས་འདེབས་པའམ།
སེམས་ནད་ཀྱིས་འདེབས་པའམ། དེ་དག་ལས་གཞན་པའི་ནད་ཀྱི་རྣམ་པས་བྱང་ཆུབ་སེམས་དཔའ་དེའི་འཚོ་བ་འགོག་པར་བྱེད་པ་ནི་གནས་མ་ཡིན་སྐབས་མ་ཡིན་ཏེ་དེ་ནི་གནས་མེད་དོ། །བཟང་སྐྱོང་གཞན་ཡང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་ལྷ་རྣམས་ཀྱང་སྲུང་
ངོ་། །ཀླུ་རྣམས་ཀྱང་སྲུང་ངོ་། །གནོད་སྦྱིན་རྣམས་ཀྱང་སྲུང་ངོ་། །དྲི་ཟ་རྣམས་ཀྱང་སྲུང་ངོ་། །མི་རྣམས་ཀྱང་སྲུང་ངོ་། །མི་མ་ཡིན་པ་རྣམས་ཀྱང་སྲུང་ངོ་། །ལྷ་མ་ཡིན་རྣམས་ཀྱང་སྲུང་ངོ་། །ནམ་མཁའ་ལྡིང་རྣམས་ཀྱང་སྲུང་ངོ་། །མི་འམ་ཅི་རྣམས་ཀྱང་སྲུང་ངོ་། །ལྟོ་འཕྱེ་ཆེན་པོ་རྣམས་ཀྱང་

སྲུང་ངོ་། །རྒྱལ་པོ་ཆེན་པོ་བཞི་དང་། ལྷ་རྣམས་ཀྱི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། ལྷའི་བུ་མཚམས་བཟངས་རྣམས་ཀྱང་སྲུང་ངོ་། །དེ་དག་ལས་གཞན་པ་ལྷའི་བུ་གཟི་བརྗིད་ཆེ་བ་གཟི་བརྗིད་ཆེ་བ་དག་ཀྱང་སྲུང་ངོ་། །བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ཀྱང་སྲུང་ངོ་། །སངས་རྒྱས་བཅོམ་ལྡན་འདས་རྣམས་ཀྱང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་སྲུང་ངོ་། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་ལྷ་རྣམས་དང་། ཀླུ་རྣམས་དང་། གནོད་སྦྱིན་
རྣམས་དང་། ལྷ་མ་ཡིན་རྣམས་དང་། ནམ་མཁའ་ལྡིང་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། བརྒྱ་བྱིན་དང་། ཚངས་པ་རྣམས་དང་། རྒྱལ་པོ་ཆེན་པོ་རྣམས་དང་། བྱང་ཆུབ་སེམས་དཔའ་རྣམས་དང་། སངས་རྒྱས་བཅོམ་ལྡན་འདས་རྣམས་ལ་སྡུག་
པར་འགྱུར་རོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་ལྷ་རྣམས་ཀྱང་སྙན་པར་སྒྲོགས་སོ། །ཀླུ་རྣམས་ཀྱང་སྙན་པར་སྒྲོགས་སོ། །གནོད་སྦྱིན་རྣམས་ཀྱང་སྙན་པར་སྒྲོགས་སོ། །མི་རྣམས་ཀྱང་སྙན་པར་སྒྲོགས་སོ། །མི་མ་ཡིན་པ་རྣམས་ཀྱང་
སྙན་པར་སྒྲོགས་སོ། །ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་རྣམས་ཀྱང་སྙན་པར་སྒྲོགས་སོ། །བརྒྱ་བྱིན་དང་། ཚངས་པ་དང་། རྒྱལ་པོ་ཆེན་པོ་རྣམས་ཀྱང་སྙན་པར་སྒྲོགས་སོ། །བྱང་ཆུབ་སེམས་དཔའ་རྣམས་དང་། སངས་རྒྱས་བཅོམ་
ལྡན་འདས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་སྙན་པར་སྒྲོགས་སོ། །བཟང་སྐྱོང་གཞན་ཡང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་ལྷ་རྣམས་ཀྱང་ལྟ་བར་འདོད་དོ། །ཀླུ་རྣམས་ཀྱང་ལྟ་བར་འདོད་དོ། །གནོད་སྦྱིན་རྣམས་ཀྱང་ལྟ་བར་འདོད་དོ། །དྲི་
ཟ་རྣམས་ཀྱང་ལྟ་བར་འདོད་དོ། །མི་འམ་ཅི་རྣམས་ཀྱང་ལྟ་བར་འདོད་དོ། །མི་རྣམས་ཀྱང་ལྟ་བར་འདོད་དོ། །མི་མ་ཡིན་པ་རྣམས་ཀྱང་ལྟ་བར་འདོད་དོ། །ལྷ་མ་ཡིན་དང་། ནམ་མཁའ་ལྡིང་དང་། ལྟོ་འཕྱེ་ཆེན་པོ་རྣམས་ཀྱང་ལྟ་བར་འདོད་དོ། །བྱང་ཆུབ་སེམས་དཔའ་རྣམས་དང་།

སངས་རྒྱས་བཅོམ་ལྡན་འདས་དག་ཀྱང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་ཐ་ན་རྨི་ལམ་དུའང་ཞལ་སྟོན་པར་མཛད་དོ། །མིང་ནས་བརྗོད་པར་ཡང་མཛད་དོ། །བཟང་སྐྱོང་གཞན་ཡང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ། བྱང་ཆུབ་སེམས་དཔའ་
རྣམས་ཀྱང་ལྟ་བར་འདོད་དོ། །སངས་རྒྱས་བཅོམ་ལྡན་འདས་རྣམས་ཀྱང་གཟིགས་པར་བཞེད་དོ། །བཟང་སྐྱོང་གཞན་ཡང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་ལྷ་རྣམས་ཀྱང་ལྟར་འོང་ངོ་། །ཀླུ་རྣམས་ཀྱང་ལྟར་འོང་ངོ་། །གནོད་སྦྱིན་དང་། ལྷ་མ་ཡིན་དང་། ནམ་
མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་རྣམས་ཀྱང་ལྟར་འོང་ངོ་། །ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། ལྷའི་བུ་མཚམས་བཟངས་ཀྱང་ལྟར་འོང་ངོ་། །བཟང་སྐྱོང་གཞན་ཡང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་
མ་བཤད་ཅིང་མ་ཐོས་པའི་མདོ་སྡེ་དག་ཀྱང་ཐ་ན་རྨི་ལམ་དུ་ཡང་སྒྲ་གྲག་ཅིང་དབྱངས་ཐོས་པར་འགྱུར་རོ། །བཟང་སྐྱོང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་གང་ཏིང་ངེ་འཛིན་འདི་འཛིན་ཏམ། ཀུན་ཆུབ་པར་བྱེད་དམ། འཆང་ངམ། ཀློག་གམ། ཡི་གེར་འདྲི་འམ། འཆད་པར་
བྱེད་པ་དེ་ལ་བསྐལ་པའམ། བསྐལ་པ་ལས་ལྷག་པར་ཡང་ང་སྙན་པ་བརྗོད་ཅིང་ཡོན་ཏན་སྒྲོགས་པར་བྱེད་ན། གང་སྒྲུབ་པར་བྱེད་པ་ལྟ་ལ་སྨོས་ཀྱང་ཅི་དགོས། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །བྱང་ཆུབ་སེམས་དཔའ་གང་ཞིག་ཏིང་ངེ་
འཛིན། །བདེ་བར་གཤེགས་པས་གསུངས་པ་འདི་འཆད་པའི། །ཡོན་ཏན་ཡོངས་སུ་བཤད་པར་བྱ་བ་ནི། །གང་གཱའི་བྱེ་མ་སྙེད་ལས་གཅིག་བླངས་བཞིན། །གང་ཞིག་ཏིང་ངེ་འཛིན་འདི་འཆང་བྱེད་པ། །དེ་ལ་མེ་དང་མཚོན་གྱིས་མི་ཚུགས་ཤིང་། །དེ་ལ་རྐུན་པོས་གནོད་པ་བྱེད་མི་
འགྱུར། །དེ་ལ་རྒྱལ་པོ་མི་བྱམས་མི་བྱེད་དོ། །གདུག་པའི་སྦྲུལ་དག་འཁྲུགས་ཤིང་འཇིགས་བྱེད་པས། །གདུག་པའི་ཡིད་ཀྱིས་མི་ལ་འཚེ་བྱེད་ན། །གང་ཞིག་ཏིང་འཛིན་འདི་ལ་འཇུག་བྱེད་པ། །དེ་ཡི་བྱིན་གྱིས་དེ་དག་དུག་མེད་འགྱུར། །མི་དང་ཀླུ་དང་གནོད་སྦྱིན་སྲིན་པོ་དག །ཕས་ཀྱི་

རྒོལ་བ་འཁྲུགས་ཤིང་འཇིགས་བྱེད་པས། །གང་དག་ཏིང་འཛིན་འདི་ལ་འཇུག་བྱེད་པ། །དེ་ཡི་བྱིན་ལ་ནམས་ཀྱང་མི་བཟོད་དོ། །དགོན་པའི་གཅན་གཟན་མི་སྲུན་གང་འཁོད་པ། །སྤྱང་ཀི་ཝ་དང་དེ་བཞིན་སེང་གེ་སྟག །དེ་དག་དགོན་པའི་གནས་སུ་གནས་པ་དེའི། །
གྲོགས་བྱེད་པ་དང་གཡོག་བྱེད་པར་ཡང་འགྱུར། །གནོད་སྦྱིན་ཤ་ཟ་མདངས་འཕྲོགས་འཇིགས་བྱེད་པ། །གདུག་པའི་ཡིད་ཀྱིས་མི་ལ་འཚེ་བྱེད་ན། །གང་ཞིག་ཏིང་འཛིན་འདི་ལ་འཇུག་བྱེད་པ། །དེ་ཡི་བྱིན་གྱིས་དེ་དག་སྤ་ཡང་འགོང་། །གང་ཞིག་ཏིང་འཛིན་འདི་ནི་འཆད་བྱེད་པ། །
དེ་ནི་རྣ་ནད་མེད་ཅིང་ལུས་ནད་མེད། །མིག་གི་དབང་པོ་རྣམས་ཀྱང་ཉམས་མི་འགྱུར། །ཚིག་ཀྱང་གསལ་ཞིང་སྤོབས་པས་སྨྲ་བར་འགྱུར། །གང་ཞིག་ཏིང་འཛིན་འདི་ལ་འཇུག་པ་སྟེ། །དེ་ལ་ནམས་ཀྱང་སེམས་དམྱལ་ངན་འགྲོ་མེད། །དེ་ཡི་ལུས་ལ་ནད་ཀྱིས་མི་འདེབས་ཤིང་། །
དེ་ལ་ནམས་ཀྱང་ལོག་ལྟུང་འཇིགས་པ་མེད། །ཁ་ཏོན་བྱས་ཏེ་གཞན་ལ་སྟོན་བྱེད་ན། །དེ་ལ་ལྷ་དང་ཀླུ་དང་གྲུལ་བུམ་དང་། །ལྷ་མ་ཡིན་དང་ལྟོ་འཕྱེ་ཆེ་རྣམས་སྲུང་། །དེ་ལ་གདུག་པར་སེམས་པའང་དང་བར་འགྱུར། །ཁ་ཏོན་བྱས་ཏེ་གཞན་ལ་སྟོན་བྱེད་ན། །དེ་ལ་ལྷ་མི་ཀླུ་དང་ལྷ་མ་
ཡིན། །གནོད་སྦྱིན་མིའམ་ཅི་དག་ཆེར་སྙན་སྒྲོགས། །སངས་རྒྱས་རྣམས་ཀྱང་བུ་གཅིག་བཞིན་དུ་སྟོད། །ཁ་ཏོན་བྱས་ཏེ་གཞན་ལ་སྟོན་བྱེད་ན། །དེ་ནི་ཆོས་ལ་ཐེ་ཙོམ་འབྱུང་མི་འགྱུར། །དེ་ནི་བྱང་ཆུབ་ཐེ་ཙོམ་ཡོང་མི་འབྱུང་། །དེ་ཡི་གཟུགས་དང་མཉམ་པའང་མི་འབྱུང་ངོ་། །ཏིང་
འཛིན་འདི་ནི་ཁ་ཏོན་བྱེད་པ་དེ། །རྒྱལ་པོ་འཁྲུགས་དང་དེ་བཞིན་སེམས་ཅན་འཁྲུགས། །མུ་གེའི་དགོན་པ་བྱུང་བར་གྱུར་ན་ཡང་། །དེ་ལ་གནོད་དང་བཀྲེས་པར་མི་འགྱུར་རོ། །ཏིང་འཛིན་འདི་ནི་ཁ་ཏོན་བྱེད་པ་དེ། །སེམས་ཅན་དག་ལ་བདུད་ནི་ཉེར་གནས་ཀྱང་། །དེ་ནི་མི་སྐྲག་བ་སྤུ་མི་གཡོ་
སྟེ། །དེ་ཡི་ཡོན་ཏན་བསམ་གྱིས་མི་ཁྱབ་འགྱུར། །འཚེ་བ་དང་ནི་ཉེས་དང་ཉོན་མོངས་པ། །ཇི་སྙེད་གང་དག་ངས་ནི་བཤད་གྱུར་པ། །སྔོན་གྱི་ལས་ཀྱི་རྣམ་སྨིན་མ་གཏོགས་པར། །དེ་དག་དེ་ཡི་ལུས་ལ་མི་ཚུགས་སོ། །ཟད་པ་ཕྱི་མའི་དུས་ན་གང་ལག་ཏུ། །མདོ་སྡེ་རྒྱ་ཆེ་འདི་དག་འོངས་

པ་ནི། །སྲས་ཀྱི་ཐུ་བོ་བཞིན་དུ་མདུན་བཞག་སྟེ། །བསྟོད་ཅིང་བསླང་ལ་སྙན་པ་དག་ཀྱང་གསུང་། །བག་ཡོད་པར་ཡང་བརྩོན་འགྲུས་བརྩམས་པར་བྱོས། །འཐུན་པར་བྱས་ཏེ་ཆོས་ཀྱང་སྤྱད་པར་བྱོས། །གང་ཞིག་འཛིན་ཅིང་ཀློག་ལ་སྟོན་བྱེད་པ། ཁྱེད་ཀྱི་དོན་དུ་འདི་དག་འཆད་པར་
བྱེད། བཟང་སྐྱོང་གིས་ཞུས་པའི་ཏིང་ངེ་འཛིན་ལས་ཆོས་སྨྲ་བ་བསྔགས་པའི་ལེའུ་སྟེ་བཅུ་བཞི་པའོ།། །།བམ་པོ་ལྔ་པ། ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་བཀའ་སྩལ་པ། བཟང་སྐྱོང་ངས་མངོན་པར་ཤེས་ཏེ།
འདས་པའི་དུས་བསྐལ་བ་གྲངས་མེད་པ། རྒྱས་པ། ཚད་མེད་པ། བསམ་གྱིས་མི་ཁྱབ་པ། གཞལ་དུ་མེད་པར་གྱུར་པ། དེའི་ཚེ་དེའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་ཞེས་བྱ་བ། རིགས་པ་དང་ཞབས་སུ་ལྡན་པ། བདེ་
བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ་། །བཟང་སྐྱོང་དེའི་ཚེ་ཚོང་དཔོན་གྱི་བུ་བཟང་བྱིན་ཞེས་བྱ་བ་ཞིག་ཡོད་པར་གྱུར་ཏེ། དེ་སྲོག་ཆགས་ཉི་ཁྲིས་ཡོངས་
སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེ་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེའི་
ཞབས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཀྱང་། ཚོང་དཔོན་གྱི་བུ་བཟང་སྦྱིན་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེ་ལ་ཏིང་ངེ་འཛིན་འདི་ཡོངས་
སུ་ཞུས་སོ། །བཟང་སྐྱོང་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེས་ཀྱང་ཚོང་དཔོན་གྱི་བུ་བཟང་སྦྱིན་དེའི་ལྷག་པའི་བསམ་པ་མཁྱེན་ནས་ཏིང་ངེ་འཛིན་འདི་རྒྱ་ཆེར་བསྟན་ཏོ། །ཡང་དག་པར་བཤད་དོ། །བཟང་སྐྱོང་དེ་ནས་ཚོང་

དཔོན་གྱི་བུ་བཟང་སྦྱིན་དེས་ཏིང་ངེ་འཛིན་འདི་ཐོས་ནས་འཛིན་པར་བྱེད་དོ། །བཟུང་ནས་སྒོམ་པར་བྱེད་དོ། །བསྒོམས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེ་ལས་སྐྲ་དང་ཁ་སྤུ་བྲེགས་ཏེ་གོས་ཚོན་
ཅན་གྱོན་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། ཚངས་པར་སྤྱད་དོ། །ལོ་བརྒྱད་ཁྲིར་ཏིང་ངེ་འཛིན་འདི་བསྒོམ་ཞིང་གནས་པར་གྱུར་ཏོ། །དེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེ་ལས་ཐོས་པ་ཐམས་ཅད་
བཟུང་ཞིང་། འདས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལས་ཀྱང་ཐོས་པ་ཐམས་ཅད་བཟུང་སྟེ། དེ་མང་དུ་ཐོས་པ་བསམ་གྱིས་མི་ཁྱབ་པ་དང་ལྡན་པར་གྱུར་ཏོ། །དེ་དུས་གཞན་ཞིག་ན་ཚེ་བརྗེས་ནས་ལུས་ཞིག་སྟེ་ཤི་བ་དང་། བདེ་འགྲོ་
མཐོ་རིས་ཀྱི་འཇིག་རྟེན་དུ་སུམ་ཅུ་རྩ་གསུམ་པའི་ལྷ་རྣམས་དང་སྐལ་བ་མཉམ་པར་སྐྱེས་སོ། །སྐྱེས་ནས་ཀྱང་དེས་འཇིག་རྟེན་གྱིས་ཁམས་དེ་ཉིད་དུ་དེ་བཞིན་གཤེགས་པ་གཉིས་པ་གློག་གི་ལྷ་ཞེས་བྱ་བ་མཉེས་པར་བྱས་སོ། །བསྐལ་པ་དེ་ཉིད་ལ་རྒྱལ་རིགས་ཤིང་སཱ་ལ་ཆེན་པོ་ལྟ་
བུར་སྐྱེས་ཏེ། རྒྱལ་རིགས་ཤིང་སཱ་ལ་ཆེན་པོ་ལྟ་བུ་དེ་ལས་མངོན་པར་བྱུང་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གློག་གི་ལྷ་དེ་ལས་རབ་ཏུ་བྱུང་སྟེ། ལོ་བརྒྱད་ཁྲིར་ཏིང་ངེ་འཛིན་འདི་སྒོམ་ཞིང་ཚངས་པར་སྤྱོད་པ་སྤྱད་དོ། །དེས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསུམ་པ་འོད་ཟེར་གྱི་རྒྱལ་པོ་ཞེས་བྱ་བ་མཉེས་པར་བྱས་སོ། །བསྐལ་པ་དེ་ཉིད་ལ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུར་སྐྱེས་ཏེ། བྲམ་ཟེའི་རིགས་སཱ་ལ་ཆེན་པོ་ལྟ་བུ་དེ་ལས་མངོན་པར་བྱུང་ནས། དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་གྱི་རྒྱལ་པོ་དེ་ལས་རབ་ཏུ་བྱུང་སྟེ། ལོ་བརྒྱད་ཁྲི་བཞི་སྟོང་དུ་ཏིང་ངེ་འཛིན་འདི་བསྒོམ་ཞིང་ཚངས་པར་སྤྱོད་པ་སྤྱད་དོ། །ཚོང་དཔོན་གྱི་བུ་བཟང་སྦྱིན་དེ་ཡང་དེ་ནས་ཕྱིས་བསྐལ་པ་བརྒྱད་ཀྱིས་བླ་ན་མེད་པ་ཡང་དག་པར་རྫོགས་

པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །བཟང་སྐྱོང་དེའི་ཚེ་དེའི་དུས་ན་ཚོང་དཔོན་གྱི་བུ་བཟང་སྦྱིན་ཞེས་བྱ་བ་བྱུང་བ་དེ་གཞན་ཞིག་ཡིན་སྙམ་དུ་དེ་ལྟར་ཐེ་ཙོམ་མམ། ཡིད་གཉིས་སམ། སོམ་ཉི་ཟ་བར་གྱུར་ན་བཟང་སྐྱོང་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན།
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་དེ། དེའི་ཚེ་དེའི་དུས་ན་ཚོང་དཔོན་གྱི་བུ་བཟང་སྦྱིན་ཞེས་བྱ་བར་གྱུར་ཏོ། །བཟང་སྐྱོང་ཚོང་དཔོན་གྱི་བུ་བཟང་སྦྱིན་དེ་ཆོས་དོན་དུ་གཉེར་ཞིང་ཆོས་འདོད་ལ་ཆོས་ལ་འདུན་པ་དང་ལྡན་ཏེ། དེའི་ཕྱིར་
མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ལ་ལྟོས། བཟང་སྐྱོང་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་ཀྱི་ཡེ་ཤེས་སྐྱེད་
པ་དང་། །ཐོས་པ་རྒྱ་མཚོ་ལྟ་བུར་འགྱུར་ལ། ཇི་ཙམ་དུ་ཕན་པ་མང་པོར་གྱུར་པ་ལ་ལྟོས། བཟང་སྐྱོང་དེ་བས་ན་ཁྱོད་ཀྱིས་ཏིང་ངེ་འཛིན་འདི་གཟུང་བར་བྱའོ། །ཀུན་ཆུབ་པར་བྱའོ། །ཡི་གེར་བྲི་བར་བྱའོ། །བཅང་བར་བྱའོ། །བཀླག་པར་བྱའོ། །བཟུང་ཞིང་ཀུན་ཆུབ་པར་བྱས་ནས་གཞན་
དག་ལ་ཡང་རྒྱ་ཆེར་ཡང་དག་པར་བཤད་པར་བྱའོ། །བསྟན་པར་བྱའོ། །བརྗོད་པར་བྱའོ། །བསྒོམ་པའི་སྦྱོར་བ་ལའང་བརྩོན་པར་བྱའོ། །དེ་ཅིའི་ཕྱིར་ཞེ་ན། བཟང་སྐྱོང་དེ་ནི་འདི་ལྟར་ཏིང་ངེ་འཛིན་འདི་ཕྱི་ཕྱིར་བསྟེན་ཅིང་བསྒོམས་ལ་མང་དུ་བྱས་ན་སངས་རྒྱས་ཀྱི་ཡེ་ཤེས་འཐོབ་པར་འགྱུར་
བ་དང་། དེ་བཞིན་གཤེགས་པའི་ཡེ་ཤེས་དང་། རང་བྱུང་གི་ཡེ་ཤེས་དང་། ཐམས་ཅད་མཁྱེན་པའི་ཡེ་ཤེས་དང་། བསམ་གྱིས་མི་ཁྱབ་པའི་ཡེ་ཤེས་དང་། མི་མཉམ་པ་དང་མཉམ་པའི་ཡེ་ཤེས་དང་། བླ་ན་མེད་པའི་ཡེ་ཤེས་དང་། ལྟག་ན་མེད་པའི་ཡེ་ཤེས་འཐོབ་པར་འགྱུར་བ་མ་གཏོགས་
པར་ཆོས་གཞན་འཐོབ་པར་མི་འགྱུར་རོ། །ཡང་བཟང་སྐྱོང་ཡང་དག་པར་སྨྲ་བས་གང་ལ་མིག་ཏུ་གྱུར་པ་བྱང་ཆུབ་སེམས་དཔའ་རྣམས་སྐྱེད་པ། སངས་རྒྱས་ཀྱི་ཆོས་རྣམས་སྐྱེད་པར་བྱེད་པ་ཞེས་སྨྲ་བ་དེ་དག་ནི་བཟང་སྐྱོང་ཏིང་ངེ་འཛིན་འདི་ལ་ཡང་དག་པར་སྨྲ་བས་སྨྲ་བ་ཡིན་ནོ། །ཡང་བཟང་སྐྱོང་ཡང་དག་

པར་སྨྲ་བས་གང་ལ་སངས་རྒྱས་ཀྱི་རིགས་སོ། །ཆོས་ཀྱི་རིགས་སོ། །དགེ་འདུན་གྱི་རིགས་སོ། །སངས་རྒྱས་ཀྱི་སའོ། །ཐོས་པའི་རིགས་སོ། །ཐོས་པ་རྒྱ་མཚོ་ལྟ་བུའོ། །ཐོས་པ་བསགས་པའོ། །ཐོས་པའི་གཞིའོ། །ཡོན་ཏན་བསགས་པའོ། །བཟོད་པ་སྐྱེད་པའོ། །
བྱམས་པ་སྐྱེད་པའོ། །སྙིང་རྗེ་ཐོབ་པའོ། །བྱང་ཆུབ་སྐྱེད་པའི་ཆོས་སོ་ཞེས་སྨྲ་བ་དེ་དག་ནི་བཟང་སྐྱོང་ཏིང་ངེ་འཛིན་འདི་ལ་ཡང་དག་པར་སྨྲ་བས་སྨྲ་བ་ཡིན་ནོ། །ཡང་བཟང་སྐྱོང་ཡང་དག་པར་སྨྲ་བས་གང་ལ་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱི་མུན་པ་སེལ་བར་བྱེད་པའི་ཆོས་
སོ། །སྣང་བ་ཆེན་པོ་བྱེད་པའི་ཆོས་སོ་ཞེས་སྨྲ་བ་དེ་དག་ནི་བཟང་སྐྱོང་ཏིང་ངེ་འཛིན་འདི་ལ་ཡང་དག་པར་སྨྲ་བས་སྨྲ་བ་ཡིན་ནོ། །ཡང་བཟང་སྐྱོང་ཡང་དག་པར་སྨྲ་བས་གང་ལ་དེ་བཞིན་གཤེགས་པའི་སྟོབས་བཅུ་དང་། དེ་བཞིན་གཤེགས་པའི་མི་འཇིགས་པ་བཞི་དང་། སོ་སོ་ཡང་དག་
པར་རིག་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་སྐྱེད་པར་བྱེད་པའི་ཆོས་སོ་ཞེས་སྨྲ་བ་དེ་དག་ནི་བཟང་སྐྱོང་ཏིང་ངེ་འཛིན་འདི་ལ་ཡང་དག་པར་སྨྲ་བས་སྨྲ་བ་ཡིན་ནོ། །བཟང་སྐྱོང་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དག་འདི་ཉིད་ན་འདུག་བཞིན་དུ། འཇིག་རྟེན་
གྱི་ཁམས་གཞན་དག་གི་སངས་རྒྱས་ཀྱང་ལྟ། ཆོས་ཀྱང་ཉན། དགེ་འདུན་ཡང་ལྟ་བར་བྱེད་པའི་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཇི་ཙམ་དུ་རྒྱ་ཆེ་བ་ལ་ལྟོས། བཟང་སྐྱོང་དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་
འཛིན་རིན་པོ་ཆེ་འདི་སྒྲུབ་པར་འདོད་པས། དྲན་པ་ཉེ་བར་གཞག་པ་བཞི་ལ་བརྟུལ་བ་བརྟན་པར་བྱའོ། །བཟང་སྐྱོང་བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་དྲན་པ་ཉེ་བར་གཞག་པ་བཞི་ལ་བརྟུལ་བ་བརྟན་པར་བྱ་ཞེ་ན། བཟང་སྐྱོང་འདི་ལ་བྱང་ཆུབ་སེམས་དཔའ་སེམས་དཔའ་ཆེན་
པོས་ལུས་ལ་ལུས་ཀྱི་རྗེས་སུ་བལྟ་བར་བྱ་སྟེ། ལུས་དང་ལྡན་པའི་རྣམ་པར་རྟོག་པ་རྣམ་པར་བརྟག་པར་ནི་མི་བྱའོ། །ཚོར་བ་ལ་ཚོར་བའི་རྗེས་སུ་བལྟ་བར་བྱ་སྟེ། ཚོར་བ་དང་ལྡན་པའི་རྣམ་པར་རྟོག་པ་རྣམ་པར་བརྟག་པར་ནི་མི་བྱའོ། །སེམས་ལ་སེམས་ཀྱིས་རྗེས་སུ་བལྟ་བར་བྱ་སྟེ།

སེམས་དང་ལྡན་པའི་རྣམ་པར་རྟོག་པ་རྣམ་པར་བརྟག་པར་ནི་མི་བྱའོ། །ཆོས་ལ་ཆོས་ཀྱི་རྗེས་སུ་བལྟ་བར་བྱ་སྟེ། ཆོས་དང་ལྡན་པའི་རྣམ་པར་རྟོག་པ་རྣམ་པར་བརྟག་པར་ནི་མི་བྱའོ། །བཟང་སྐྱོང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། བྱང་
ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པ་རྣམས་དང་། ཉན་ཐོས་ལུས་མངོན་སུམ་དུ་བྱེད་པ་རྣམས་མ་གཏོགས་པར་ཏིང་ངེ་འཛིན་འདི་ལ་སུ་ཞིག་མངོན་པར་དད་པར་འགྱུར། བཟང་སྐྱོང་དེ་ཅིའི་ཕྱིར་ཞེ་ན། ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་
དཔའི་ཏིང་ངེ་འཛིན་འདི་ལ་བྱིས་པ་སོ་སོའི་སྐྱེ་བོ་ཐམས་ཅད་ཀྱིས་ནི་འཁྲུལ་ཏོ། །བཟང་སྐྱོང་དེ་ཅིའི་ཕྱིར་ཞེ་ན། ཆོས་དེ་དག་ཉིད་ཡིད་ལ་བྱ། ཆོས་དེ་དག་ཉིད་ལ་བལྟ་བར་བྱ། སངས་རྒྱས་བཅོམ་ལྡན་འདས་དག་ཀྱང་ཡིད་ལ་བྱ། དེ་བཞིན་གཤེགས་པ་རྣམས་ཀྱང་བལྟ་བར་བྱ། ཆོས་ཀྱང་
མཉན་པར་བྱ་སྟེ་མངོན་པར་ཞེན་པར་ནི་མི་བྱའོ། །བཟང་སྐྱོང་དེ་ཅིའི་ཕྱིར་ཞེ་ན། ཆོས་འདི་དག་ཐམས་ཅད་ནི་རང་བཞིན་གྱིས་སྟོང་པ། རང་བཞིན་གྱིས་ཡོངས་སུ་དག་པ་སྟེ། ཐོག་མ་ཉིད་ནས་ཉེ་བར་ཞི་བའོ། །བཟང་སྐྱོང་ཆོས་འདི་དག་ཐམས་ཅད་ནི་དམིགས་པའི་དབང་དུ་གྱུར་པས་
དམིགས་སུ་མེད་པའོ། །ཆོས་འདི་དག་ཐམས་ཅད་ནི་ཡིད་ལ་བྱ་བ་དེ་ཉིད་ཀྱིས་དབེན་པའོ། །ཆོས་འདི་དག་ཐམས་ཅད་ནི་རང་བཞིན་གྱིས་དམིགས་སུ་མེད་པས་གཟུང་དུ་མེད་པའོ། །ཆོས་འདི་དག་ཐམས་ཅད་ནི་ནམ་མཁའ་དང་འདྲ་བས་མི་ཆགས་པའོ། །ཆོས་འདི་དག་ཐམས་ཅད་ནི་བདག་
དང་སེམས་ཅན་གྱི་འདུ་ཤེས་དང་བྲལ་བའི་ཕྱིར་ཤིན་ཏུ་རྣམ་པར་དག་པའོ། །ཆོས་འདི་དག་ཐམས་ཅད་ནི་རྒྱུའི་དབང་ལས་གྱུར་པས་ཉོན་མོངས་པ་མེད་པའོ། །ཆོས་འདི་དག་ཐམས་ཅད་ནི་སྲོག་དང་གང་ཟག་མི་དམིགས་པའི་ཕྱིར་བགྲང་དུ་མེད་པའོ། །ཆོས་འདི་དག་ཐམས་ཅད་ནི་རང་བཞིན་གྱིས་
འོད་གསལ་བས་མྱ་ངན་ལས་འདས་པ་དང་མཉམ་པའོ། །ཆོས་འདི་དག་ཐམས་ཅད་ནི་དངོས་པོ་མི་དམིགས་པའི་ཕྱིར་ཉེ་བར་གྱུར་པའོ། །བཟང་སྐྱོང་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཏིང་ངེ་འཛིན་འདི་བསྒོམ་པར་འདོད་པར་གྱུར་ན། དེས་ཅི་ནས་ཀྱང་སངས་རྒྱས་བཅོམ་ལྡན་འདས་

རྣམས་ཀྱང་མཐོང་ཞིང་སངས་རྒྱས་རྗེས་སུ་དྲན་པ་དང་ལྡན་པའི་དྲན་པ་ཡང་དག་བྱང་ཆུབ་ཀྱི་ཡན་ལག་ཀྱང་སྒོམ་པར་བྱེད། ཆོས་ཀྱང་ཉན་ཅིང་ཆོས་ལ་ཆོས་འབྱེད་པ་ཡང་དག་བྱང་ཆུབ་ཀྱི་ཡན་ལག་ཀྱང་སྒོམ་པར་བྱེད་ལ། བདག་ཀྱང་མི་དམིགས་ཤིང་ཆོས་ཀྱང་མི་སྙེམས་པ་དེ་ལྟར་མཚན་
མའི་རྣམ་པའི་འཇུག་པས་མཚན་མ་མེད་པའི་འཇུག་པ་ལ་འཇུག་པར་བྱའོ། །བཟང་སྐྱོང་དེ་ཅིའི་ཕྱིར་ཞེ་ན། འདི་ལྟར་དངོས་པོའི་འདུ་ཤེས་ཅན་གྱིས་ནི་སངས་རྒྱས་མཐོང་བར་མི་འགྱུར་རོ། །ཆོས་ཀྱི་འདུ་ཤེས་ཅན་གྱིས་ཆོས་མཐོང་བར་མི་འགྱུར་རོ། །རྣམ་པར་སྨིན་པ་ལ་རེ་བས་ནི་གཏོང་བ་ཕུན་སུམ་ཚོགས་པར་མི་
འགྱུར་རོ། །བསྒོམ་པ་ལ་མངོན་པར་དགའ་བས་ནི་ཚུལ་ཁྲིམས་རྣམ་པར་དག་པར་མི་འགྱུར་རོ། །ཆོས་ལ་སེར་སྣ་བྱེད་པས་ནི་མང་དུ་ཐོས་པར་མི་འགྱུར་རོ། །གང་ཟག་ལ་རྟེན་པས་ནི་ཡོངས་སུ་མྱ་ངན་ལས་འདའ་བར་མི་འགྱུར་རོ། །བྲེ་མོ་གཏམ་ལ་མངོན་པར་དགའ་བས་ནི་དབེན་པ་མཐོང་
བར་མི་འགྱུར་རོ། །གནས་ལ་དགའ་བས་ནི་འབྲས་བུ་ཐོབ་པར་མི་འགྱུར་རོ། །རྗེས་སུ་ཆགས་པས་ནི་སྐྱོན་མཐོང་བར་མི་འགྱུར་རོ། །གནོད་སེམས་ལ་མངོན་པར་དགའ་བས་ནི་བཟོད་པ་དང་ངེས་པར་མི་འགྱུར་རོ། །སྡང་ཞིང་ཞེ་འགྲས་པས་ནི་ཕན་ཡོན་མཐོང་བར་མི་འགྱུར་རོ། །ཉན་
ཐོས་ཀྱི་ཐེག་པ་པའི་རིགས་ཀྱི་བུའམ། རིགས་ཀྱི་བུ་མོས་གང་གི་ཕྱིར་བཟོད་པ་ཐོབ་པར་འགྱུར་བའི་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་མངོན་སུམ་དུ་མི་འགྱུར་རོ། །བྱང་ཆུབ་སེམས་དཔའ་ལ་ནི་སེར་སྣ་མི་འབྱུང་ངོ་། །དམིགས་པ་
ཅན་གྱི་སྟོང་པ་ཉིད་སྒོམ་པར་མི་འགྱུར་རོ། །ལེ་ལོ་ཅན་ནི་མངོན་པར་རྟོགས་པ་ཐོབ་པར་མི་འགྱུར་རོ། །འདོད་པ་ལ་སྟེན་པ་ནི་ཞི་གནས་སུ་མི་འགྱུར་རོ། །རྟེན་པ་ནི་བསྒོམ་པ་འགྲུབ་པར་མི་འགྱུར་རོ། །བཟང་སྐྱོང་དེ་བས་ན་ཏིང་ངེ་འཛིན་འདི་ཅི་ནས་ཀྱང་ནུབ་པར་མི་འགྱུར་བར། ལྷ་དང་བཅས་
པའི་འཇིག་རྟེན་ལ་གཏད་དོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པའི་ཚེ་འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷའི་བུ་ཁྲག་ཁྲིག་ཕྲག་བཅྭ་བརྒྱད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །སྲོག་ཆགས་ལྷ་དང་མི་དང་ལྷ་མ་ཡིན་དུ་བཅས་

པའི་སྐྱེ་དགུ་བརྒྱད་སྟོང་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེ་དག་ཐམས་ཅད་ཀྱང་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་ལ་སེམས་རྣམ་པར་གྲོལ་བར་གྱུར་ནས། གང་བླ་ན་མེད་པའི་བྱང་ཆུབ་ཏུ་སེམས་དང་པོ་བསྐྱེད་པ་དེ་དག་མིང་ཐ་དད་ཀྱིས་
ཀྱང་ཚེའི་ཚད་གཅིག་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ན། བཟང་སྐྱོང་ཡང་གང་གིས་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ང་ལ་མཉེས་པར་བྱས་པ་ལྟ་ཅི་སྨོས། གང་གིས་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་གྲོགས་
པོར་གྱུར་པ་ལྟ་སྨོས་ཀྱང་ཅི་དགོས་ཏེ། དེ་དག་ནི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །བཟང་སྐྱོང་ཆོས་འདི་བཤད་པའི་ཚེ་སེམས་ཅན་ཚད་མེད་པ་རྣམས་ཀྱང་ཡེ་ཤེས་མཐོང་བ་སྐྱེས་སོ། །དགེ་སློང་བརྒྱད་བརྒྱ་ཡང་ལེན་པ་མེད་
པར་ཟག་པ་ལས་སེམས་རྣམ་པར་གྲོལ་ལོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །གང་དག་ཏིང་འཛིན་འདི་ནི་འཛིན་གྱུར་པ། །དེ་དག་ཤེས་རབ་ཚད་ནི་ཆུང་ཟད་མེད། །ཚུལ་ཁྲིམས་ཚད་དང་རྡུལ་དང་དྲི་མ་མེད། །ཚུལ་ཁྲིམས་རྣམ་དག་སེམས་
ཀྱང་ཡོངས་སུ་དག །གང་དག་ཏིང་འཛིན་འདི་ནི་འཛིན་གྱུར་པ། །དེ་དག་ཤེས་རབ་ནམས་ཀྱང་ཉམས་པ་མེད། །ཏིང་འཛིན་ཐོས་ནས་ནམས་ཀྱང་ཉམས་པ་མེད། །ཟླ་བ་བཞིན་དུ་ཡོན་ཏན་ཐམས་ཅད་སྟོན། །གང་དག་ཏིང་འཛིན་འདི་ནི་འཛིན་གྱུར་པ། །དེས་ནི་སངས་རྒྱས་བསམ་མི་ཁྱབ་པ་བསྟོད། །
དེས་ནི་ཆོས་ཀྱང་བསམ་མི་ཁྱབ་པ་མཐོང་། །དེ་ལ་བསམ་མི་ཁྱབ་པའི་ལྷ་རྣམས་བསྲུང་། །སྔོན་གྱི་སངས་རྒྱས་བསམ་གྱིས་མི་ཁྱབ་བྱུང་། །དེས་ནི་བསམ་གྱིས་མི་ཁྱབ་ཆོས་བཤད་པ། །གང་ཞིག་ཏིང་འཛིན་འདི་ནི་འཛིན་གྱུར་པ། །དེས་ནི་ཐམས་ཅད་མཐོང་ཞིང་བསྙེན་བཀུར་བྱས། །གང་ཞིག་ཏིང་
འཛིན་འདི་ནི་འཛིན་གྱུར་པ། །རྒྱལ་བ་གང་དག་སྡུག་བསྔལ་ཀུན་སྒྲོལ་བ། །འཇིག་རྟེན་དོན་དུ་བྱུང་སྟེ་བཞུགས་པ་ཡི། །རྒྱལ་བ་དེ་དག་དེ་ཡིས་གུས་བྱས་འགྱུར། །མ་བྱོན་སངས་རྒྱས་མང་པོ་བསམ་མི་ཁྱབ། །དང་བའི་སེམས་ཀྱིས་བསྙེན་བཀུར་བྱ་བའི་ཕྱིར། །བྱང་ཆུབ་སེམས་དཔའ་གང་

ཞིག་ལྟ་འདོད་པས། །ཏིང་ངེ་འཛིན་མཆོག་འདི་ནི་གཟུང་བར་བྱོས། །གང་ཞིག་ཏིང་འཛིན་འདི་ནི་འཛིན་འགྱུར་བ། །མི་དེ་དག་ནི་རྙེད་པ་བསམ་མི་ཁྱབ། །དེ་དག་མི་ཡི་འཇིག་རྟེན་ལེགས་པར་འོངས། །རབ་བྱུང་ལེགས་སྤྱད་བསོད་སྙོམས་ལེགས་པར་ཟོས། །ཕྱི་མའི་དུས་ན་ཏིང་
འཛིན་མཆོག་འདི་ནི། །གང་གི་ལག་ཏུ་གནས་པར་གྱུར་པ་དེ། །རྙེད་པ་དམ་པ་ཤིན་ཏུ་ལེགས་པར་རྙེད། །དེས་ནི་བསམ་གྱིས་མི་ཁྱབ་ཆོས་ཀྱང་བཟུང་། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅོ་ལྔ་པའོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་
པོ་བཟང་སྐྱོང་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བགོས་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཐུགས་བརྩེ་བའི་སླད་དུ་སང་
དགེ་སློང་གི་དགེ་འདུན་དང་ཐབས་ཅིག་ཏུ་བདག་གི་བཤོས་གསོལ་བར་ཅི་གནང་། བཅོམ་ལྡན་འདས་ཀྱིས་ཐུགས་བརྩེ་བའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་ཅང་མི་གསུང་བས་གནང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་
ལྡན་འདས་ཀྱིས་ཅང་མི་གསུང་བས་གནང་བར་ཤེས་ནས། བཅོམ་ལྡན་འདས་ཀྱིས་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་དྲུང་ནས་སོང་སྟེ། དགེ་སློང་མ་སྐྱེ་དགུའི་བདག་མོ་ཆེན་མོ་ག་ལ་བ་དེར་སོང་ནས་ཕྱིན་པ་དང་། དགེ་སློང་མ་སྐྱེ་དགུའི་
བདག་མོ་ཆེན་མོ་གོ་ཏ་མཱིའི་རྐང་པ་ལ་མགོ་བོས་ཕྱག་འཚལ་ནས། ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་དགེ་སློང་མ་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་འདི་སྐད་ཅེས་སྨྲས་སོ། །འཕགས་མ་
ཐུགས་བརྩེ་བའི་སླད་དུ་སང་དགེ་སློང་མའི་དགེ་འདུན་དང་། ཐབས་གཅིག་བདག་གི་བཤོས་གསོལ་བར་ཅི་གནང་། དགེ་སློང་མ་སྐྱེ་དགུའི་བདག་མོ་ཆེན་མོ་གཽ་ཏ་མཱིས་སྙིང་བརྩེ་བའི་ཕྱིར། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་ཅང་མི་སྨྲ་བས་གནང་ངོ་། །དེ་ནས་བྱང་ཆུབ་

སེམས་དཔའ་སེམས་དཔའ་ཆེན་པོ་བཟང་སྐྱོང་གིས་དགེ་སློང་མ་སྐྱེ་དགུའི་བདག་མོ་ཆེན་མོ་གཽའུ་ཏ་མཱིས་ཅང་མི་སྨྲ་བས་གནང་བར་རིག་ནས། དགེ་སློང་མ་སྐྱེ་དགུའི་བདག་མོ་ཆེན་མོ་གཽ་ཏ་མཱིའི་རྐང་པ་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་སོང་ངོ་། །སོང་ནས་ཀྱང་ལིང་
ཙ་བཱི་གཞོན་ནུ་རིན་ཆེན་འབྱུང་གནས་ག་ལ་བ་དེར་སོང་སྟེ་ཕྱིན་པ་དང་། ལིང་ཙ་བཱི་གཞོན་ནུ་རིན་ཆེན་འབྱུང་གནས་ལ་འདི་སྐད་ཅེས་སྨྲས་སོ། །ཉེ་དུ་བོ་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་འདིར་རྒྱལ་པོའི་ཁབ་འདིའམ། ལྗོངས་ཀྱི་ཕྱོགས་གཞན་དག་ནས་དགེ་བསྙེན་ཇི་སྙེད་ཅིག་
འདུས་ལ་ཐམས་ཅད་འཁོར་དང་བཅས་ཏེ། ཁོ་བོའི་ཚིག་གིས་སང་གི་གདུགས་ཚོད་ལ་མགྲོན་དུ་བོས་ཤིག །དེ་ནས་ལིང་ཙ་བཱི་གཞོན་ནུ་རིན་ཆེན་འབྱུང་གནས་ཀྱི་འཁོར་དེར་དགེ་བསྙེན་ཇི་སྙེད་ཅིག་འདུས་པ་དེ་དག་ཐམས་ཅད་ལ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་ཁྱེད་
ཅག་འཁོར་དང་བཅས་པར་སང་མགྲོན་དུ་བོས་སོ་ཞེས་བསྒོའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང་། ལིང་ཙ་བཱི་གཞོན་ནུ་རིན་ཆེན་འབྱུང་གནས་དང་། ཁྱིམ་བདག་དེད་དཔོན་ཆེ་བཟང་དང་། ཚོང་དཔོན་གྱི་བུ་ཕུག་སྦས་དང་། བྲམ་ཟེ་འདམ་བུས་བྱིན་དང་། ཁྱིམ་
བདག་ཆུ་ལྷ་དང་། ཁྱིམ་བདག་དབང་པོས་བྱིན་དང་། ཁྱིམ་བདག་གཞན་དག་ཀྱང་རང་རང་གི་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། དགེ་སློང་གི་དགེ་འདུན་གྱི་ཞབས་ལ་ཡང་མགོ་བོས་
ཕྱག་འཚལ་ཏེ། འོད་མའི་ཚལ་ནས་བྱུང་ནས། རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་། བཟང་སྐྱོང་གི་ཁྱིམ་ག་ལ་བ་དེར་དོང་སྟེ་ལྷགས་པ་དང་། དེ་ཉིད་ཀྱི་ནུབ་མོ་དེ་དག་ཐམས་ཅད་དང་ཐ་ན་སློང་བ་རྣམས་ཀྱི་ཕྱིར་ཡང་བཅའ་བར་བྱ་བ་དང་། བཟའ་བར་བྱ་བ་དང་། མྱང་བར་བྱ་བ་དང་། བལྡག་
པར་བྱ་བ་བསོད་པ་མང་དུ་སྦྱར་རོ། །ཟས་རོ་བརྒྱ་པ་ཡང་བཤམས་ཤིང་གཡོས་སོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསམ་པ་རླབས་པོ་ཆེ་དང་། བརྙས་པ་མེད་པ་ལ་གནས་ཤིང་། སེམས་ཅན་ཐམས་ཅད་ལ་སེམས་མཉམ་པར་ཞུགས་པ་ཡིན་ནོ། །དེ་

ནས་ལྷ་རྣམས་ཀྱི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། ལྷའི་བུ་མཚམས་བཟངས་དང་། རྒྱལ་པོ་ཆེན་པོ་བཞི་རྣམས་ཀྱིས་མི་མང་པོ་ཡང་སྤྲུལ་ཏེ། སྐྱོ་བ་སྐྱེ་བའི་ཚུལ་དུ་ཁྱིམ་བདག་དེ་རྣམས་ལ་བྱང་ཆུབ་ཀྱི་ཕན་གདགས་པ་དང་། ཡོངས་སུ་སྨིན་པར་བྱ་
བའི་ཕྱིར་བརྩོན་པར་བྱེད་པར་གྱུར་ཏོ། །དེ་ནས་བྱང་ཆུབ་སེམས་དཔའ་བཟང་སྐྱོང་དང་། ལིང་ཙ་བཱི་གཞོན་ནུ་རིན་ཆེན་འབྱུང་གནས་དེ་དག་དང་། ཁྱིམ་བདག་གཞན་དག་ཀྱང་རང་རང་གི་གཉེན་རྣམས་དང་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ཐམས་ཅད་དང་ལྡན་པར་ཕྱག་དར་བྱ་བ་རྣམས་ཀྱང་
ཕྱག་དར་ལེགས་པར་བྱས། དར་གྱི་ལྡ་ལྡི་ནི་བྲེས། སྤོས་ཀྱི་སྣོད་ཀྱིས་ནི་བདུགས། མེ་ཏོག་གི་སིལ་མས་ནི་འཐོར་དུ་བཙུད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་རང་གི་གཉེན་དང་བཅས་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའང་བརྒྱན། རོ་བརྒྱ་དང་ལྡན་པའི་
བཤོས་ཀྱང་སྦྱར་ཏེ། དེའི་མཚན་མོ་འདས་ནས་གཉེན་རྣམས་ཀྱིས་བསྐོར་ཅིང་མདུན་དུ་བདར་ཏེ་ལྷན་ཅིག་ཏུ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ།
བཙུན་པ་བཅོམ་ལྡན་འདས་བཤོས་ཀྱི་དུས་ལ་བབ་པོ། །བཙུན་པ་བཅོམ་ལྡན་འདས་བཤོས་ཀྱི་ཚོད་ལ་བབ་པོ། །བཤོས་ནི་སྦྱར་ལགས་ཏེ་ད་དེའི་དུས་ལ་བབ་པར་མཁྱེན་པར་མཛད་དུ་གསོལ། ཞེས་གདུགས་ཚོད་ལ་བབ་པར་གསོལ་ཏོ། །དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ་
ཆོས་གོས་དང་ཤམ་ཐབས་བནབས། ལྷུང་བཟེད་བསྣམས་ནས། དགེ་སློང་གི་དགེ་འདུན་དང་ཐབས་ཅིག །དགེ་སློང་མའི་དགེ་འདུན་དང་ཐབས་ཅིག །དགེ་བསྙེན་དང་། དགེ་བསྙེན་མའི་འཁོར་རྣམས་དང་ཡང་ཐབས་ཅིག་བསྐོར་ཅིང་མདུན་དུ་བདར་ཏེ། བྱང་ཆུབ་སེམས་དཔའ་
སེམས་དཔའ་ཆེན་པོ་བཟང་སྐྱོང་གི་ཁྱིམ་ག་ལ་བ་དེར་གཤེགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་ཇི་ལྟ་བུའི་རྫུ་འཕྲུལ་མངོན་པར་མཛད་པ་མངོན་པར་མཛད་པས། བདག་གི་ཁྱིམ་འདི་ཡངས་ཤིང་རྒྱ་ཆེ་

ལ་བཻ་དཱུརྱ་སྔོན་པོ་ལྟ་བུར་གྱུར་ཏེ། གྲོང་ཁྱེར་གྱི་སྐྱེ་བོ་ཐམས་ཅད་ཀྱིས་ཀྱང་མཐོང་ཞིང་འཁོར་མང་པོ་འདི་དག་ཀྱང་། བག་ཡངས་སུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་མཛད་པ་མངོན་པར་མཛད་ན་ལེགས་སོ་སྙམ་དུ་བསམས་སོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་བྱང་ཆུབ་སེམས་
དཔའ་སེམས་དཔའ་ཆེན་པོ་དེའི་སེམས་ཀྱི་རྟོག་པ་མཁྱེན་ནས། ཇི་ལྟ་བུའི་རྫུ་འཕྲུལ་མངོན་པར་མཛད་པ་མངོན་པར་མཛད་པས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གི་ཁྱིམ་དེ་ཡངས་ཤིང་རྒྱ་ཆེ་ལ་བཻ་དཱུརྱ་སྔོན་པོ་ལྟ་བུར་གྱུར་ཏེ། གྲོང་ཁྱེར་གྱི་སྐྱེ་བོ་ཐམས་ཅད་ཀྱིས་ཀྱང་ཅི་ནས་
ཀྱང་མཐོང་ཞིང་འཁོར་དེ་དག་ཐམས་ཅད་ཀྱང་། བག་ཡངས་སུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་དུ་མཛད་པ་མངོན་པར་མཛད་དོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གི་ཁྱིམ་དུ་གཤེགས་སོ། །གཤེགས་ནས་ཀྱང་དགེ་སློང་དང་། དགེ་
སློང་མའི་དགེ་འདུན་དང་། དགེ་བསྙེན་དང་། དགེ་བསྙེན་མའི་འཁོར་རྣམས་དང་། ཐབས་ཅིག་ཏུ་གདན་བཤམས་པ་ལ་བཞུགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང་། ལིང་ཙ་བཱི་གཞོན་ནུ་རིན་ཆེན་འབྱུང་གནས་དང་། ཁྱིམ་བདག་དེད་དཔོན་ཆེ་བཟངས་དང་
ཚོང་དཔོན་གྱི་བུ་ཕུག་སྦས་དང་། བྲམ་ཟེ་འདམ་བུས་བྱིན་དང་། ཁྱིམ་བདག་དབང་པོས་བྱིན་དང་། ཁྱིམ་བདག་ཆུ་ལྷ་རྣམས་ཀྱིས་བཅོམ་ལྡན་འདས་བཞུགས་པར་རིག །དགེ་སློང་གི་དགེ་འདུན་དང་། དགེ་སློང་མའི་དགེ་འདུན་དང་། དགེ་བསྙེན་དང་། དགེ་བསྙེན་མའི་འཁོར་རྣམས་
ཀྱང་འཁོད་པར་རིག་ནས། སངས་རྒྱས་ལ་སོགས་པ་དགེ་སློང་གི་དགེ་འདུན་དང་། དགེ་སློང་མའི་དགེ་འདུན་དང་། དགེ་བསྙེན་དང་། དགེ་བསྙེན་མའི་འཁོར་རྣམས་ལ་རང་གི་ལག་གིས་བཅའ་བར་བྱ་བ་དང་། བཟའ་བར་བྱ་བ་དང་། མྱང་བར་བྱ་བ་དང་། རོ་སྣ་བརྒྱ་དང་ལྡན་པའི་ཟས་བསོད་
པ་མང་པོས་ཚིམ་པར་བྱས་སོ། །བསྟབས་སོ། །རང་གི་ལག་གིས་བཟའ་བར་བྱ་བ་དང་། བཅའ་བར་བྱ་བ་དང་། མྱང་བར་བྱ་བ་དང་། རོ་སྣ་བརྒྱ་དང་ལྡན་པའི་ཟས་བསོད་པ་མང་པོས་ཚིམ་པར་བྱས་ཤིང་བསྟབས་ནས། བཅོམ་ལྡན་འདས་བཤོས་གསོལ་ཕྱག་བཅབས། ལྷུང་བཟེད་གྱུར་

པར་རིག་པ་དང་། ཅི་རིགས་པའི་སྟན་ཞིག་བླངས་ནས། བཅོམ་ལྡན་འདས་ལ་མདུན་གྱིས་བལྟས་ཏེ། བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང་། ལིད་ཙ་བཱི་གཞོན་ནུ་རིན་ཆེན་འབྱུང་
གནས་དང་། ཁྱིམ་བདག་དེད་དཔོན་ཆེ་བཟང་དང་། ཚོང་དཔོན་གྱི་བུ་ཕུག་སྦས་དང་། བྲམ་ཟེ་འདམ་བུས་བྱིན་དང་། ཁྱིམ་བདག་དབང་པོས་བྱིན་དང་། ཁྱིམ་བདག་ཆུ་ལྷ་རྣམས་དང་འཁོར་བཞི་པོ་དེ་དག་ལ་ཆོས་ཀྱི་གཏམ་གྱིས་ཡང་དག་པར་དགའ་བར་མཛད་དོ། །ཡང་དག་པར་འཛིན་
དུ་བཅུག་གོ། །ཡང་དག་པར་གཟེངས་བསྟོད་དོ། །ཡང་དག་པར་མགུ་བར་མཛད་དོ། །ཆོས་ཀྱི་གཏམ་གྱིས་ཡང་དག་པར་དགའ་བར་མཛད། ཡང་དག་པར་འཛིན་ཏུ་བཅུག །ཡང་དག་པར་གཟེངས་བསྟོད། ཡང་དག་པར་མགུ་བར་མཛད་ནས་བཞེངས་ཏེ། དགེ་སློང་གི་དགེ་འདུན་
དང་ཐབས་ཅིག་ཏུ་སླར་གཤེགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ཟས་ཀྱི་བྱ་བ་བྱས་ནས་རང་གི་མཛའ་བོ་དང་། གཉེན་དང་། སྣག་གི་གཉེན་མཚམས་རྣམས་དང་། ལྷན་ཅིག་ཏུ་སྲོག་ཆགས་འབུམ་དུ་ཚང་བས་བསྐོར་ཅིང་མདུན་དུ་བདར་ཏེ། ལྷན་
ཅིག་ཏུ་བཅོམ་ལྡན་འདས་ག་ལ་བ་དེ་ལོགས་སུ་དོང་སྟེ་ལྷགས་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། ལན་གསུམ་བསྐོར་བ་བྱས་ཏེ། ཕྱོགས་གཅིག་ཏུ་འཁོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རིན་ཆེན་འབྱུང་གནས་དང་། དེད་དཔོན་ཆེ་
བཟང་དང་། ཕུག་སྦས་དང་། འདམ་བུས་བྱིན་དང་། མཚམས་བཟངས་དང་། དབང་པོས་བྱིན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་རྣམས་ལྷན་ཅིག་ཏུ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། ལན་གསུམ་བསྐོར་བ་བྱས་ཏེ། ཕྱོགས་གཅིག་
ཏུ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་འཁོར་ཐམས་ཅད་འཁོད་པར་རིག་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཆོས་དུ་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་

རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་འཐོབ་པར་འགྱུར། རྣ་བླགས་ཏེ་ཉན་པ་དང་། སེམས་མི་གཡེང་བའི་སླད་དུ་ཀུན་ཏུ་འཛིན་པ་དང་མི་བསྐྱུད་པར་འགྱུར། ཀུན་ཏུ་བཟུང་ནས་ཀྱང་འཐོབ་པར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་
ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་ཆོས་ལྔ་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་འཐོབ་པར་འགྱུར་རོ། །རྣ་བླགས་ཏེ་
ཉན་པ་དང་། སེམས་མི་གཡེང་བའི་ཕྱིར་ཀུན་ཏུ་འཛིན་པ་དང་། མི་བརྗེད་པར་འགྱུར་བ། ཀུན་ཏུ་བཟུང་ནས་ཀྱང་འཐོབ་པར་འགྱུར་རོ། །བཟང་སྐྱོང་ལྔ་གང་ཞེ་ན། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཟབ་མོ་ལ་བཟོད་པ་དང་ལྡན་པ་ཡིན་ཏེ། ཟད་མི་ཤེས་པ་ཟད་
པ་དང་བྲལ་བ། མི་ཟད་པ་རྣམ་པར་མི་ཟད་པ། རྙོག་པ་མེད་པ་རྙོག་པ་ལས་ཡང་དག་པར་འདས་པ། དྲི་མ་མེད་པ། དྲི་མ་དང་བྲལ་བ། རྡུལ་མེད་པ་རྡུལ་དང་བྲལ་བ། རྡུལ་ལས་འདས་པ། རྡུལ་ཐམས་ཅད་དང་བྲལ་བ་མི་སྐྱེ་བའི་ཆོས་ལ་བཟོད་པ་དང་ལྡན་པ་སྟེ། བཟང་སྐྱོང་ཆོས་དང་པོ་
འདི་དང་ལྡན་ན། །བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འདུ་བྱེད་ཐམས་ཅད་ལ་སྨོད་ཅིང་། བྱང་ཆུབ་ལ་རྟེན་པ་མ་གཏོགས་པར་
སྐྱེ་བའི་གནས་ཐམས་ཅད་མི་འདོད་པ་དང་། སངས་རྒྱས་བཅོམ་ལྡན་འདས་ལ་བལྟ་བར་འདོད་ཅིང་། མུ་སྟེགས་ཅན་གྱི་སྐྱེ་མཆེད་ཐམས་ཅད་དང་། མུ་སྟེགས་ཅན་གྱི་སྔགས་ཐམས་ཅད་ལ་མི་རྟེན་པ་དང་། འདོད་པའི་ལོངས་སྤྱོད་མི་འདོད་པ་དང་། ཚངས་པར་སྤྱོད་པ་ལ་མངོན་པར་དགའ་
བ་སྟེ་འཁྲིག་པའི་ཆོས་སྤངས་ནས་དེ་རྟོག་པ་ཙམ་གྱིས་ཀྱང་འདོད་པ་ལ་མི་རྟེན་ན་དབང་པོ་གཉིས་སྤྲོད་པ་ལྟ་ཅི་སྨོས་ཏེ། བཟང་སྐྱོང་ཆོས་གཉིས་པ་འདི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་

ཆེན་པོ་སེམས་ཚད་མེད་པ་རྣམས་བསྒོམས་ཤིང་། སེམས་ཤིན་ཏུ་ལེགས་པར་བསྡུས་ལ་གནོད་པ་མེད་པའི་སེམས་སུ་གྱུར་པ་དང་། སེམས་ཅན་ཐམས་ཅད་ལ་སེམས་མཉམ་པར་གྱུར་ཅིང་སེམས་ཅན་ཐམས་ཅད་ལ་བསྡུ་བའི་དངོས་པོ་བཞིས་སྡུད་པ་སྟེ། བཞི་གང་ཞེ་ན།
སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ་དང་། དོན་འཐུན་པ་སྟེ་དེ་བཞིའོ། །བཟང་སྐྱོང་ཆོས་གསུམ་པོ་དེ་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཆེན་པོ་དང་
ལྡན་པར་གྱུར་པ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་ལ་སྤྱོད་པ་ཡིན་ཏེ། དེ་དགེ་སློང་ངམ། དགེ་སློང་མ་ལྟུང་བ་བྱུང་བ་མི་གླེང་ཞིང་དང་དུ་ལེན་པའི་རང་བཞིན་ཅན་ཡིན་པས་བཟོད་པ་ཡིན། དེ་མཁན་པོ་དང་སློབ་དཔོན་ལ་གུས་པ་དང་བཅས། ཞེ་ས་དང་
བཅས་ཤིང་སྟོན་པར་འདུ་ཤེས་པ་ཡིན། བདག་ཀྱང་བདག་ཏུ་སྨྲ་བ་མ་ཡིན། སེམས་ཅན་དུ་སྨྲ་བ་མ་ཡིན། སྲོག་ཏུ་སྨྲ་བ་མ་ཡིན། གང་ཟག་ཏུ་སྨྲ་བ་མ་ཡིན། གསོ་བར་སྨྲ་བ་མ་ཡིན། སྐྱེས་བུར་སྨྲ་བ་མ་ཡིན། ཤེད་ཅན་ལས་སྐྱེས་སུ་སྨྲ་བ་མ་ཡིན། ཤེད་བུར་སྨྲ་བ་མ་ཡིན་ཞིང་གཞན་དག་
ཀྱང་ཆོས་འདི་ལ་སྐུལ་བ་སྟེ། བཟང་སྐྱོང་ཆོས་བཞི་པོ་འདི་དག་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྗེས་སུ་འཐུན་པའི་ཆོས་ལ་ནན་ཏན་བྱེད་པ་ཡིན། ལུས་ཀྱི་སྤྱོད་
པ་ཡོངས་སུ་དག་པ་དང་། ངག་གི་སྤྱོད་པ་ཡོངས་སུ་དག་པ་དང་། ཡིད་ཀྱི་སྤྱོད་པ་ཡོངས་སུ་དག་པ་དང་། ལྟ་བ་ཡོངས་སུ་དག་པ་དང་། འཚོ་བ་ཡོངས་སུ་དག་ཅིང་མང་དུ་ཐོས་པ་ཡིན། སངས་རྒྱས་བཅོམ་ལྡན་འདས་རྣམས་དང་ཐབས་ཅིག་ཏུ་དགོངས་པའི་ཚིག་ལ་མཁས་པ་ཡིན་ཏེ། བཟང་སྐྱོང་
ཆོས་ལྔ་པོ་འདི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་ཏིང་ངེ་འཛིན་འདི་འཐོབ་བོ། །བཟང་སྐྱོང་ཆོས་ལྔ་པོ་དེ་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་

གཞན་ལྔ་དང་ལྡན་ན་ཏིང་ངེ་འཛིན་འདི་འཐོབ་སྟེ། ལྔ་གང་ཞེ་ན། བཟང་སྐྱོང་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་བདག་པོ་སྦྱིན་པ་བྱེད་པ་ཡིན་ཏེ། སེམས་ལ་བསྲི་བ་མེད་པ། འཇུངས་པ་མེད་པ། ལྷུག་པར་གཏོང་བ། ལག་པ་བརྐྱང་བ། སྦྱིན་པ་བགེང་བར་དགའ་
བ། རྣམ་པར་སྨིན་པ་ལ་རེ་བ་མེད་པར་བདོག་པ་ཐམས་ཅད་ཡོངས་སུ་གཏོང་བ། སེམས་ཅན་རྣམས་ལ་སྙིང་བརྩེ་བ། འགྱོད་པ་དང་བྲལ་བ། སྦྱིན་པ་བྱིན་ནས་འགྱོད་པར་མི་བྱེད་པ་ཡིན་ཏེ། བཟང་སྐྱོང་ཆོས་དང་པོ་འདི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་
རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ཐ་ན་ཐོས་པ་ཙམ་ཡང་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་བདག་པོ་སྦྱིན་པ་བྱེད་པ་ཡིན་ཏེ། འདི་ལྟར་བླ་ན་མེད་པའི་ཆོས་སྦྱིན་པར་བྱེད་པ། ཤིན་ཏུ་ངེས་པར་གསུངས་པའི་ཚིག་དང་།
ཡི་གེ་དང་། ཐོགས་པ་མེད་པའི་ཚིག་དང་། ཡི་གེ་དང་། འཆབ་པ་མེད་པའི་ངེས་པའི་ཚིག་དང་། ཟབ་མོ་དོན་དམ་པའི་ཚུལ་བསྟན་པ་དེ་བཞིན་གཤེགས་པས་གསུངས་པའི་བླ་ན་མེད་པའི་ཆོས་ཀྱི་སྦྱིན་པ་གཏོང་ཞིང་དེ་ལ་གནས་པར་གྱུར་པ་བཟོད་པ་ཕུན་སུམ་ཚོགས་པ་དང་། དེས་པ་ཕུན་
སུམ་ཚོགས་པར་གྱུར་པ་དང་། དེ་གཞན་གྱིས་ཁ་བྱས་ཤིང་སྤྱོས་ཀྱང་མི་ཁྲོ། མི་གཤེ། གནོད་པར་མི་བྱེད། རྨོངས་པར་མི་བྱེད། ཡི་ཆད་པར་མི་འགྱུར། ཁྲོ་བ་མང་བར་མི་འགྱུར་ཞིང་། འཇིགས་པ་མེད་པ་ཡིན་ཏེ། བཟང་སྐྱོང་ཆོས་གཉིས་པ་འདི་དང་ལྡན་ན་བྱང་ཆུབ་སེམས་
དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་ཐོས་ནས་དམ་པའི་ཆོས་ཡུན་རིང་དུ་གནས་པར་བྱ་བ་དང་། རྒྱས་པར་བྱེད་པར་བྱ་བའི་ཕྱིར་གཟུང་བར་བྱ། ཀུན་ཆུབ་པར་བྱ། བཅང་བར་བྱ། བཀླག་
པར་བྱ། གཞན་དག་ལ་ཡང་རྒྱ་ཆེར་ཡང་དག་པར་བཤད་པར་བྱ། གླེགས་བམ་དུའང་བྲིས་ཏེ་བཅང་བར་བྱ་ཞིང་ཆོས་ལ་འཇུངས་པ་མེད་པར་བྱ་སྟེ། བཟང་སྐྱོང་ཆོས་གསུམ་པོ་དེ་དག་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་

སེམས་དཔའ་སེམས་དཔའ་ཆེན་པོ་ཕྲག་དོག་མེད་པ། གདུང་བ་མེད་པ། རྨུགས་པ་དང་གཉིད་དང་བྲལ་བ། སྒྲིབ་པ་རྣམས་དང་བྲལ་བ། བདག་ལ་མི་སྟོད་པ། གཞན་ལ་མི་སྨོད་པ་ཡིན་ཏེ། བཟང་སྐྱོང་ཆོས་བཞི་པོ་དེ་དག་དང་ལྡན་ན། བྱང་ཆུབ་སེམས་དཔའ་སེམས་
དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དད་པ་དང་ལྡན་པ་དང་། དང་བ་མང་བ་ཡིན། རྒན་པ་དང་། བར་མ་དང་། གཞོན་པ་རྣམས་ལ་གུས་པ་དང་བཅས། རྫེས་དང་བཅས་པ་ཡིན། བྱས་པ་ཤེས་པ་དང་བྱས་པ་
གཟོ་བ་ཡིན། དེ་བྱས་པ་ཆུང་ཟད་ལའང་དྲིན་དུ་གཟོན་མང་པོ་ལྟ་ལ་ཅི་སྨོས། བདེན་པའི་ཚིག་ལ་གནས་ཤིང་གཞན་དུ་མི་སྨྲ་བ་ཡིན་ཏེ། བཟང་སྐྱོང་ཆོས་དེ་ལྔ་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་
སུ་བཅད་པ་འདི་དག་གསུངས་སོ། །ཟབ་མོའི་ཆོས་ལ་བཟོད་པ་སྐྱེད་བྱེད་ཅིང་། །འགྲོ་བ་ཐམས་ཅད་ལ་ནི་སྨོད་བྱེད་པ། །འགྲོ་བ་དྲུག་པོ་ཀུན་ཀྱང་མི་འདོད་པ། །དེ་འདྲ་དེས་ནི་ཏིང་འཛིན་མྱུར་དུ་འཐོབ། །ཕས་ཀྱི་རྒོལ་བ་ཀུན་ལ་མི་རྟེན་ཅིང་། །གསང་ཚིག་ཉན་པར་མི་བྱེད་ག་ལ་འཛིན། །
འདོད་པའི་ཡོན་ཏན་ལྔས་ནི་སྐྱོ་བར་གྱུར། །དེ་འདྲ་དེས་ནི་ཏིང་འཛིན་མྱུར་དུ་ཐོབ། །ཚུལ་ཁྲིམས་རྣམ་དག་ཚངས་པར་སྤྱོད་གནས་ཏེ། །བུད་མེད་ལ་ནི་ནམས་ཀྱང་རྟོག་མི་སྐྱེད། །འདོད་ཆགས་སྤངས་ཤིང་བདེ་གཤེགས་སྲས་གྱུར་པ། །དེ་འདྲ་དེས་ནི་ཏིང་འཛིན་མྱུར་དུ་ཐོབ། །རྣམ་སྨིན་མི་
རེ་བར་ནི་སྦྱིན་པ་སྦྱིན། །རྟེན་པ་མེད་པར་བྱིན་ནས་མི་གདུང་ཞིང་། །སངས་རྒྱས་ཡེ་ཤེས་རེག་བྱ་མ་གཏོགས་པར། །སྦྱིན་པ་སྦྱིན་ནས་སྨོན་པ་ཆུང་ཟད་མེད། །སེམས་ཅན་སྙིང་བརྩེའི་ཕྱིར་ནི་སྦྱིན་བྱིན་ནས། །མྱ་ངན་བྱེད་པ་མེད་ཅིང་འགྱོད་པ་མེད། །སྦྱིན་དང་དུལ་དང་བསྡམས་ལ་
རྟག་ཏུ་གནས། །དེ་འདྲ་དེས་ནི་ཏིང་འཛིན་འདི་རྙེད་འགྱུར། །གང་ཞིག་འཇུངས་མེད་སྦྱིན་བདག་སྦྱིན་བྱེད་པ། །གྱ་ནོམ་པ་དང་ཡིད་འོང་སྦྱིན་པ་བྱིན། །བྱིན་ནས་དེ་ནི་ཡིད་ཀྱང་དགའ་བར་འགྱུར། །དེ་འདྲ་དེས་ནི་ཏིང་འཛིན་འདི་རྙེད་འགྱུར། །བདེ་གཤེགས་གསུངས་པ་ཟབ་ཅིང་ཞི་བ་

ཡི། །གྱ་ནོམ་མདོ་སྡེ་དག་ནི་འཆང་བྱེད་ཅིང་། །གང་དག་ཆོས་ཀྱི་སྦྱིན་བདག་གྱུར་པ་ནི། །དེ་འདྲ་དེས་ནི་ཏིང་འཛིན་འདི་རྙེད་འགྱུར། །ཆོས་ལ་རྟག་ཏུ་གནས་པར་གྱུར་བྱས་ནས། །བཟོད་དང་དེས་ལ་གནས་ཤིང་ཕྲག་དོག་མེད། །གཞན་དག་འཁྲོས་ན་ཁྲོ་བར་མི་བྱེད་པ། །དེ་འདྲ་དེས་ནི་
ཏིང་འཛིན་འདི་རྙེད་འགྱུར། །གང་དག་ལ་ལ་ཏིང་འཛིན་འདི་འདོད་ཅིང་། །ཆོས་འདི་རིང་དུ་གནས་པར་བྱ་བའི་ཕྱིར། །གཞ