Kinh tạng Tây Tạng (Kangyur Đại Học) — 046_མདོ་སྡེ།_ཁ

ྡིག་ཅན་གྱིས་ཀྱང་དེ་དག་ཐམས་ཅད་ཀྱི་དོན་གཏན་ལ་བབ་པར་བསྟན་པས་སེམས་རངས་པར་གྱུར་ཏོ། །དེ་ནས་ལྷའི་བུ་མཚམས་བཟངས་འཁོར་དེ་ཉིད་དུ་འདུས་པར་གྱུར་ཏེ་འདུག་པ་
དེས། བདུད་སྡིག་ཅན་དེ་ལ་འདི་སྐད་ཅེས་སྨྲས་སོ། །སྡིག་ཅན་འཇམ་དཔལ་གཞོན་ནུར་གྱུར་པས་ནི་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་བཤད་ཟིན་གྱིས་ཁྱོད་ཀྱང་སྤོབས་པར་གྱིས་ཤིག །སྡིག་ཅན་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་གང་། དེ་སྐད་
ཅེས་སྨྲས་པ་དང་། སྡིག་ཅན་གྱིས་ལྷའི་བུ་མཚམས་བཟངས་ལ་འདི་སྐད་ཅེས་སྨྲས་སོ། །ལྷའི་བུ་ཉི་ཤུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་ཡང་དག་ཕུལ་ཡིན་ནོ། །ཉི་ཤུ་གང་ཞེ་ན། འདི་ལྟ་སྟེ། རྣལ་འབྱོར་སྤྱོད་པ་རྣམ་པར་གྲོལ་བ་འདོད་ཅིང་
འཁོར་བས་སྐྲག་པ་རྣམས་ལ་བསྙེན་པ་དང་། བསྟེན་པ་དང་། བསྙེན་བཀུར་བྱེད་པ་ནི་བདུད་ཀྱི་ལས་སོ། །སྟོང་པ་ཉིད་ལ་སོ་སོར་རྟོག་ཅིང་སེམས་ཅན་ཡལ་བར་འདོར་བ་ཡང་བདུད་ཀྱི་ལས་སོ། །འདུས་མ་བྱས་ལ་སོ་སོར་རྟོག་ཅིང་འདུས་བྱས་ཀྱི་དགེ་བའི་རྩ་བས་ཡོངས་སུ་སྐྱོ་བ་
ཡང་བདུད་ཀྱི་ལས་སོ། །བསམ་གཏན་སྐྱེད་ཅིང་བསམ་གཏན་ལས་རྣམ་པར་ལྡོག་པ་ཚོལ་བ་ཡང་བདུད་ཀྱི་ལས་སོ། །ཆོས་སྟོན་ཀྱང་ཆོས་ཉན་པ་རྣམས་ལ་སྙིང་རྗེ་ཆེན་པོ་མི་སྐྱེད་པ་ཡང་བདུད་ཀྱི་ལས་སོ། །ཡོན་ཏན་དང་ལྡན་པ་དང་སྦྱིན་གནས་ཚོལ་ཞིང་ཚུལ་ཁྲིམས་འཆལ་པ་
རྣམས་ལ་ཁྲོ་བ་ཡང་བདུད་ཀྱི་ལས་སོ། །ཉན་ཐོས་དང་། རང་སངས་རྒྱས་ཀྱི་གཏམ་སྟོན་ཅིང་ཐེག་པ་ཆེན་པོའི་གཏམ་འཆབ་པ་ཡང་བདུད་ཀྱི་ལས་སོ། །ཟབ་མོའི་གཏམ་འཆབ་ཅིང་གཏམ་སྣ་ཚོགས་སྟོན་པ་ཡང་བདུད་ཀྱི་ལས་སོ། །བྱང་ཆུབ་སེམས་དཔའི་ལམ་ཤེས་ཀྱང་ཕ་རོལ་

ཏུ་ཕྱིན་པའི་ལམ་ཡོངས་སུ་མི་ཚོལ་བ་ཡང་བདུད་ཀྱི་ལས་སོ། །རབ་ཏུ་བརྩོན་པའི་བསྔགས་པ་བརྗོད་ཀྱང་སེམས་ཅན་མི་བརྩོན་པ་རྣམས་མངོན་པར་མི་སྦྱོར་བ་ཡང་བདུད་ཀྱི་ལས་སོ། །དགེ་བའི་རྩ་བ་སོགས་ཀྱང་བྱང་ཆུབ་ཀྱི་སེམས་མངོན་དུ་མི་བྱེད་པ་ཡང་བདུད་
ཀྱི་ལས་སོ། །ལྷག་མཐོང་གི་རྣལ་འབྱོར་དང་ལྡན་པར་གནས་ཀྱང་སེམས་ཅན་རྣམས་ལྷག་མཐོང་ཡང་དག་པར་འཛིན་དུ་མི་འཇུག་པ་ཡང་བདུད་ཀྱི་ལས་སོ། །ཉོན་མོངས་པ་མ་ལུས་པར་ཟད་པར་ཚོལ་ཞིང་འཁོར་བའི་རྒྱུན་གྱི་ཉོན་མོངས་པ་རྣམས་ལ་སྨོན་པའང་བདུད་ཀྱི་ལས་སོ། །
ཤེས་རབ་ཀྱིས་རྣམ་པར་དཔྱོད་ཅིང་སྙིང་རྗེ་ཆེན་པོ་ལ་དམིགས་པ་མི་འཛིན་པ་ཡང་བདུད་ཀྱི་ལས་སོ། །ཐབས་དང་མི་ལྡན་པར་དགེ་བར་སྤྱོད་པ་ཐམས་ཅད་ཀྱང་བདུད་ཀྱི་ལས་སོ། །བྱང་ཆུབ་སེམས་དཔའི་སྡེ་སྣོད་མི་ཚོལ་གྱི་འཇིག་རྟེན་རྒྱང་ཕན་པའི་གསང་ཚིག་འཛིན་པའང་བདུད་ཀྱི་ལས་སོ། །
མང་དུ་ཐོས་ཀྱང་གཞན་གྱིས་ཤེས་ཀྱིས་དོགས་ཏེ་ཆོས་ལ་སློབ་དཔོན་གྱིས་དཔེ་མཁྱུད་བྱེད་པའང་བདུད་ཀྱི་ལས་སོ། །འཇིག་རྟེན་པའི་དགོས་པའི་ཞལ་ཏ་བྱེད་ཅིང་མང་དུ་ཐོས་པ་མི་ཚོལ་བ་ཡང་བདུད་ཀྱི་ལས་སོ། །བྱང་ཆུབ་སེམས་དཔའ་ཆོས་སྨྲ་བ་ཐེག་པ་ཆེན་པོ་ལ་ཡང་དག་པར་ཞུགས་པ་སྐལ་བ་མཉམ་པ་
རྣམས་ལ་མི་སྟེན། མི་སྙེན། བསྙེན་བཀུར་མི་བྱེད། ཉན་ཐོས་དང་། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་སྐལ་བ་མི་མཉམ་པར་དགའ་བའང་བདུད་ཀྱི་ལས་སོ། །གང་གི་ཚེ་བརྒྱ་བྱིན་ནམ། ཚངས་པའམ། འཇིག་རྟེན་སྐྱོང་བའམ། རྒྱལ་པོ་འམ། ཚངས་
དཔོན་ནམ། ཁྱིམ་བདག་གི་ལོངས་སྤྱོད་དང་། ནོར་དང་། རིན་པོ་ཆེ་དང་། དབང་ཕྱུག་གི་ཆེ་བ་ཉིད་དུ་གྱུར་པ་དེའི་ཚེ་ཆོས་ཀྱི་ཆེ་བ་ཉིད་དང་ལྡན་པ་རྣམས་ལ་མི་སྟེན། མི་སྙེན། བསྙེན་བཀུར་མི་བྱེད་པ་འདི་དག་ནི་ལྷའི་བུ་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་ཡང་དག་ཕུལ་ཉི་ཤུའོ། །
དེ་ནས་བཅོམ་ལྡན་འདས་ཀྱིས་བདུད་སྡིག་ཅན་ལ་སྡིག་ཅན་ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་འདི་དག་ལེགས་པར་བཤད་པ་ནི་ལེགས་སོ་ལེགས་སོ་ཞེས་བྱ་བ་བྱིན་ནོ། །བྱང་ཆུབ་སེམས་དཔའ་གང་དག་བདུད་ཀྱི་ལས་འདི་རྣམས་ཐོས་ཤིང་ཐོས་ནས་ཀྱང་རྣམ་པར་སྤོང་བ་དེ་དག་བྱང་ཆུབ་

ཡོངས་སུ་སྨིན་པར་བྱེད་པའི་ཆོས་ཉི་ཤུ་ཐོབ་པར་འགྱུར་རོ། །ཉི་ཤུ་གང་ཞེ་ན། འདི་ལྟ་སྟེ། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། འཁོར་བ་ན་ཡོངས་སུ་མི་སྐྱོ་བ་དང་། དགེ་བའི་བཤེས་གཉེན་གྱིས་ཡོངས་སུ་ཟིན་པ་དང་། སངས་རྒྱས་འབྱུང་བ་མཉེས་པར་བྱེད་པ་དང་།
ཕ་རོལ་ཏུ་ཕྱིན་པ་རྣམས་ཉན་པ་དང་། བྱང་ཆུབ་སེམས་དཔའི་འཁོར་དང་སྐལ་བ་མཉམ་པ་དང་། གཟུངས་རབ་ཏུ་ཐོབ་པ་དང་། སྤོབས་པ་ཕུན་སུམ་ཚོགས་པ་དང་། མངོན་པར་ཤེས་པ་ཤེས་པ་དང་། ཆོས་མ་ཐོས་པ་ཉན་པ་དང་། ཚེ་རབས་ཚེ་རབས་སུ་བྱང་ཆུབ་ཀྱི་སེམས་མངོན་དུ་འགྱུར་
བ་དང་། རྟག་ཏུ་རྒྱུན་མི་འཆད་པར་རབ་ཏུ་འབྱུང་བ་རྙེད་པ་དང་། དལ་བ་ཕུན་སུམ་ཚོགས་པ་དང་། ཇི་ལྟར་ཐོས་པའི་ཆོས་རྣམས་སྒྲུབ་པ་དང་། ཐབས་དང་ཤེས་རབ་ཀྱིས་ཤེས་པས་སེམས་ཅན་སྡུད་ཅིང་ཡོངས་སུ་འཛིན་པ་དང་། དམ་པའི་ཆོས་ཡོངས་སུ་འཛིན་པ་དང་། གཡོ་མེད་ཅིང་
སྒྱུ་མེད་པ་དང་། ཕངས་པའི་དངོས་པོ་ཐམས་ཅད་ཡོངས་སུ་གཏོང་བ་དང་། སེམས་ཅན་ཐམས་ཅད་ལ་ཁོང་ཁྲོ་བ་མེད་པ་སྟེ། བྱང་ཆུབ་ཡོངས་སུ་སྨིན་པར་བྱེད་པའི་ཆོས་ཉི་ཤུ་པོ་འདི་དག་ཐོབ་པར་འགྱུར་རོ། །དེ་ནས་ལྷའི་བུ་མཚམས་བཟངས་ཀྱིས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་
ཅན་ཁྱོད་ལ་བཅོམ་ལྡན་འདས་ཀྱིས་ལེགས་སོ་ཞེས་བྱ་བ་གནང་བ་ནི་སྡིག་ཅན་ཁྱོད་ཀྱིས་རྙེད་པ་ལེགས་པར་རྙེད་དོ། །བདུད་ཀྱིས་སྨྲས་པ། ལྷའི་བུ་འདི་ལ་ཁོ་བོས་རྙེད་པ་ཅི་ཞིག་ལེགས་པར་རྙེད། དེ་ཅིའི་ཕྱིར་ཞེ་ན། ལྷའི་བུ་འདི་ལྟ་སྟེ་དཔེར་ན། མི་གང་འབྱུང་པོ་བབས་པ་བསྟན་པ་དེ་ནི་མི་དེའི་
འགྱུར་བ་མ་ཡིན་གྱི། དེ་ནི་འབྱུང་པོ་དེའི་འགྱུར་བར་བལྟའོ། །ལྷའི་བུ་དེ་བཞིན་དུ་ཁོ་བོ་ཡང་འཇམ་དཔལ་གྱིས་བྱིན་གྱིས་བརླབས་ནས་སྟོན་གྱི། འདི་ཁོ་བོའི་སྐྱེས་བུའི་རྩལ་དུ་ནི་མི་བལྟའོ། །ལྷའི་བུས་སྨྲས་པ། སྡིག་ཅན་ཁྱོད་སངས་རྒྱས་ཀྱི་གཟུགས་ཀྱི་མཚན་དང་ལྡན་ཞིང་སངས་
རྒྱས་ཀྱི་སེང་གེའི་ཁྲི་ལ་འདུག་སྟེ། སངས་རྒྱས་ཀྱི་སྤོབས་པ་དང་ལྡན་ཞིང་ཆོས་སྟོན་པས་དགའ་བར་མ་གྱུར་ཏམ། བདུད་ཀྱིས་སྨྲས་པ། ཁྱོད་ཀྱིས་ནི་ཁོ་བོ་བརྒྱན་པར་མཐོང་བ་ལྟ་ན་ཁོ་བོས་ནི་བཅིང་བ་དམ་པོས་བདག་བཅིངས་པར་ཤེས་སོ། །ལྷའི་བུས་སྨྲས་པ། སྡིག་ཅན་

འཇམ་དཔལ་གཞོན་ནུར་གྱུར་པ་ལ་བཟོད་པར་གསོལ་ཅིག་དང་དེ་ནས་གཏོང་བར་འགྱུར་རོ། །དེ་ནས་འཇམ་དཔལ་གྱི་བྱིན་གྱི་རླབས་ཀྱིས་བདུད་ཀྱིས་ལྷའི་བུ་མཚམས་བཟངས་ལ་འདི་སྐད་ཅེས་སྨྲས་སོ། །ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་
ཆེན་པོ་ལ་ཡང་དག་པར་ཞུགས་པ་རྣམས་ལ་བཟོད་པར་གསོལ་མི་དགོས་སོ། །དེ་ཅིའི་ཕྱིར་ཞེ་ན། དེ་དག་ལ་འཁྲུག་པ་མེད་ཁྲོ་བ་མེད་པའི་ཕྱིར་རོ། །གང་དག་འཁྲུག་ཅིང་ཁྲོ་བ་དེ་དག་ལ་ནི་བཟོད་པ་གསོལ་དགོས་སོ། །ལྷའི་བུས་སྨྲས་པ། སྡིག་ཅན་བྱང་ཆུབ་སེམས་དཔའ་རྣམས་
ཀྱི་བཟོད་པ་ཅི་འདྲ། བདུད་ཀྱིས་སྨྲས་པ། ལྷའི་བུ་བྱང་ཆུབ་སེམས་དཔའ་རྣམས་ཀྱི་བཟོད་པ་ནི་རྣམ་པ་བཅུ་གཉིས་ཏེ། རྣམ་པ་བཅུ་གཉིས་གང་ཞེ་ན་འདི་ལྟ་སྟེ། བཅོས་མ་མ་ཡིན་པས་བསམ་པའི་བཟོད་པ་དང་། ཁོང་ཁྲོ་བ་མེད་པའི་སེམས་ཀྱིས་ལྷག་པའི་བསམ་པའི་བཟོད་པ་དང་།
སེམས་ཅན་ཐམས་ཅད་ལ་མི་སླུ་བས་གཡོ་བ་མེད་པའི་བཟོད་པ་དང་། དབུལ་ཞིང་ཕོངས་པ་ཡོངས་སུ་སྐྱོབ་པས་སྙིང་བརྩེ་ཞིང་སྙིང་རྗེ་བའི་བཟོད་པ་དང་། ལྡོག་པ་མེད་པས་ཇི་སྐད་སྨྲ་བ་དེ་བཞིན་དུ་བྱེད་པའི་བཟོད་པ་དང་། ལྟ་བར་སོང་བ་དང་བྲལ་བས་སྟོང་པ་ཉིད་ཀྱི་བཟོད་པ་དང་། ཆོས་ཉིད་ལ་
རྟོན་པས་ཆོས་ངེས་པར་སེམས་པའི་བཟོད་པ་དང་། བདག་མེད་པས་ཟབ་མོའི་བཟོད་པ་དང་། འཕགས་པའི་སྐྱེ་བོའི་རྗེས་སུ་འཇུག་པས་འཐུན་པའི་བཟོད་པ་དང་། རྟེན་ཅིང་འབྲེལ་པར་འབྱུང་བ་དང་འཐུན་པས་ཡང་དག་པའི་བཟོད་པ་དང་། སེམས་ཅན་ཐམས་ཅད་རྗེས་སུ་སྲུང་བས་ངོ་བྱེད་པ་ཡང་
མེད་ལ་མི་འཐུན་པའང་མེད་པའི་བཟོད་པ་དང་། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པའི་ཕྱིར་སྐྱེ་བ་མེད་ཅིང་འབྱུང་བ་མེད་པའི་བཟོད་པ་སྟེ། ལྷའི་བུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བཟོད་པ་རྣམ་པ་བཅུ་གཉིས་སོ། །ལྷའི་བུས་སྨྲས་པ། སྡིག་ཅན་ཁྱོད་གལ་ཏེ་བཀྲོལ་ན་དགའ་བར་འགྱུར་
རམ། བདུད་ཀྱིས་སྨྲས་པ། ལྷའི་བུ་ཁོ་བོ་དགའ་སྟེ་མཆོག་ཏུ་དགའོ། །དེ་ནས་ལྷའི་བུ་མཚམས་བཟངས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་བདུད་སྡིག་ཅན་ཐོང་ཤིག་དང་རང་གི་གནས་སུ་འགྲོའོ། །དེ་ནས་འཇམ་དཔལ་གཞོན་ནུར་གྱུར་པས་བདུད་

སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་ཁྱོད་སུ་ཞིག་གིས་བཅིངས། གང་ལས་དགྲོལ། བདུད་ཀྱིས་སྨྲས་པ། འཇམ་དཔལ་བདག་ནི་སུས་བཅིངས་མི་ཤེས་སོ། །འཇམ་དཔལ་གྱིས་སྨྲས་པ། སྡིག་ཅན་ཁྱོད་ཇི་ལྟར་བཅིངས་པ་མེད་པ་ལ་བཅིངས་པར་འདུ་ཤེས་པ་དེ་བཞིན་དུ་
བྱིས་པ་སོ་སོའི་སྐྱེ་བོ་ཐམས་ཅད་ཀྱང་། མི་རྟག་པ་ལ་རྟག་པར་འདུ་ཤེས། སྡུག་བསྔལ་བ་ལ་བདེ་བར་འདུ་ཤེས། བདག་མེད་པ་ལ་བདག་ཏུ་འདུ་ཤེས། མི་སྡུག་པ་ལ་སྡུག་པར་འདུ་ཤེས། གཟུགས་མེད་པ་ལ་གཟུགས་སུ་འདུ་ཤེས། ཚོར་བ་མེད་པ་དང་། འདུ་ཤེས་
མེད་པ་དང་། འདུ་བྱེད་རྣམས་མེད་པ་དང་། རྣམ་པར་ཤེས་པ་མེད་པ་ལ། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པར་འདུ་ཤེས་སོ། །སྡིག་ཅན་ཁྱོད་དགྲོལ་ན་གང་ནས་དགྲོལ། བདུད་ཀྱིས་སྨྲས་པ། བདག་ནི་གང་ལས་ཀྱང་མི་དགྲོལ་ལོ། །
སྨྲས་པ། སྡིག་ཅན་དེ་བཞིན་དུ་གང་དག་རྣམ་པར་དགྲོལ་བ་ཡང་། ཡང་དག་པ་མ་ཡིན་པའི་འདུ་ཤེས་ཡོངས་སུ་ཤེས་པ་མ་གཏོགས་པར་གང་ལས་ཀྱང་རྣམ་པར་གྲོལ་བར་འགྱུར་བ་མེད་དེ། དེ་དག་ཡོངས་སུ་ཤེས་པས་རྣམ་པར་གྲོལ་བ་ཞེས་བྱའོ། །དེ་ནས་འཇམ་དཔལ་གཞོན་ནུར་གྱུར་
པས་བྱིན་གྱིས་བརླབས་དེ་བསྡུས་པ་དང་། སྡིག་ཅན་དེའང་རང་གི་གཟུགས་དང་ལྡན་པར་བདག་གིས་ཤེས་སོ། །དེ་ནས་གནས་བརྟན་འོད་སྲུང་ཆེན་པོས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་ཁྱོད་ཀྱིས་སངས་རྒྱས་ཀྱི་མཛད་པ་བྱས་པ་ལེགས་སོ། །ལེགས་སོ། །བདུད་ཀྱིས་
སྨྲས་པ། བཙུན་པ་འོད་སྲུང་ཆེན་པོ་འདི་ནི་ཁོ་བོའི་ཡུལ་མ་ཡིན་གྱི། འདི་ནི་འཇམ་དཔལ་གཞོན་ནུར་གྱུར་པའི་ཡུལ་དུ་བལྟའོ། །དེ་ནས་ལྷའི་བུ་མཚམས་བཟངས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་སངས་རྒྱས་ཀྱི་མཛད་པ་གང་དུ་བཙལ་བར་
བྱ། འཇམ་དཔལ་གྱིས་སྨྲས་པ། ལྷའི་བུ་སངས་རྒྱས་ཀྱི་མཛད་པ་ནི་སེམས་ཅན་ཐམས་ཅད་ཀྱི་ཉོན་མོངས་པ་རྣམས་སུ་བཙལ་བར་བྱའོ། །དེ་ཅིའི་ཕྱིར་ཞེ་ན། གལ་ཏེ་སེམས་ཅན་རྣམས་ཉོན་མོངས་པས་གཟིར་བ་མེད་ན་སངས་རྒྱས་ཀྱིས་ཀྱང་མཛད་པར་མི་འགྱུར་བའི་ཕྱིར་རོ། །ལྷའི་བུ་འདི་ལྟ་སྟེ་

དཔེར་ན། གལ་ཏེ་སེམས་ཅན་རྣམས་ན་བར་མ་གྱུར་ན། སྨན་པས་ཀྱང་བྱ་བར་མི་འགྱུར་བ་དེ་བཞིན་དུ། ལྷའི་བུ་གལ་ཏེ་སེམས་ཅན་རྣམས་ཉོན་མོངས་པས་གཟིར་བར་མ་གྱུར་ན། སངས་རྒྱས་ཀྱིས་ཀྱང་མཛད་པར་མི་འགྱུར་རོ། །ལྷའི་བུས་སྨྲས་
པ། འཇམ་དཔལ་གང་བྱུང་ན་སངས་རྒྱས་འབྱུང་། འཇམ་དཔལ་གྱིས་སྨྲས་པ། ལྷའི་བུ་སྐྱེ་བ་དང་། རྒ་བ་དང་། ན་བ་དང་། འཆི་བ་བྱུང་ན་སངས་རྒྱས་འབྱུང་ངོ་། །དེ་ཅིའི་ཕྱིར་ཞེ་ན། ཆོས་དེ་དག་སྤང་བའི་དོན་དུ་སངས་རྒྱས་བཅོམ་ལྡན་འདས་རྣམས་འབྱུང་
བའི་ཕྱིར་རོ། །ལྷའི་བུས་སྨྲས་པ། འཇམ་དཔལ་གང་དེ་བཞིན་གཤེགས་པས་བྱང་ཆུབ་བརྙེས་ནས་ཆོས་བསྐྱེད་པ་དེ་གང་། ཆོས་བཀག་པ་གང་། འཇམ་དཔལ་གྱིས་སྨྲས་པ། ལྷའི་བུ་དེ་བཞིན་གཤེགས་པས་བྱང་ཆུབ་བརྙེས་ནས་ཆོས་གང་ཡང་བསྐྱེད་པ་ཡང་མེད།
བཀག་པ་ཡང་མེད་དོ། །དེ་ཅིའི་ཕྱིར་ཞེ་ན། ལྷའི་བུ་ཆོས་ཐམས་ཅད་ནི་སྐྱེ་བ་མ་ཡིན། འགག་པ་མ་ཡིན་པའི་ཕྱིར་རོ། །ལྷའི་བུ་སངས་རྒྱས་འབྱུང་བ་སངས་རྒྱས་འབྱུང་བ་ཞེས་བྱ་བ་འདི་ནི་རང་བཞིན་གྱི་ངོ་བོ་ཉིད་ཀྱིས་སྐྱེ་བ་མེད་པའི་ཚིག་བླ་དགས་སོ། །ལྷའི་བུས་སྨྲས་པ། འཇམ་
དཔལ་ཇི་ལྟར་ན་བྱང་ཆུབ་སེམས་དཔའ་བསམ་པ་ཕུན་སུམ་ཚོགས་པ་ཡིན། འཇམ་དཔལ་གྱིས་སྨྲས་པ། གང་དམིགས་པའི་ལྟ་བས་ཆོས་གང་ལ་ཡང་ཀུན་ཏུ་མི་སྤྱོད་པའོ། །ལྷའི་བུས་སྨྲས་པ། ཇི་ལྟར་ན་ལྷག་པའི་བསམ་པ་ཕུན་སུམ་ཚོགས་པ་ཡིན། འཇམ་དཔལ་
གྱིས་སྨྲས་པ། གང་ནང་དང་ཕྱིའི་ཆོས་རྣམས་ལ་ཆགས་པ་མེད་པའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་སྦྱིན་པ་ཕུན་སུམ་ཚོགས་པ་ཡིན། འཇམ་དཔལ་གྱིས་སྨྲས་པ། གང་ཉོན་མོངས་པ་ཐམས་ཅད་ཀྱང་འདོར་ལ་སེམས་ཅན་ཐམས་ཅད་ཀྱང་ཡོངས་སུ་མི་
གཏོང་བའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་ཚུལ་ཁྲིམས་ཕུན་སུམ་ཚོགས་པ་ཡིན། འཇམ་དཔལ་གྱིས་སྨྲས་པ། ཇི་ལྟར་སྟོན་པས་བསྟན་པ་བཞིན་དུ་སྒྲུབ་ཅིང་སེམས་ཅན་ཐམས་ཅད་ཀྱང་ཚུལ་ཁྲིམས་ལ་འགོད་ལ། ལྷག་པའི་བསམ་པས་བྱང་ཆུབ་

ཀྱི་སེམས་ཀྱང་མི་འདོར་བའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་བཟོད་པ་ཕུན་སུམ་ཚོགས་པ་ཡིན། འཇམ་དཔལ་གྱིས་སྨྲས་པ། གང་ཆོས་ཐམས་ཅད་ཤིན་ཏུ་ཟད་པའི་མཚན་ཉིད་དུ་ཤེས་ནས་སེམས་ཅན་ཐམས་ཅད་ཀྱི་གནོད་སེམས་དང་། ཁྲོ་བ་དང་།
ཐ་བ་སྤང་བའི་ཕྱིར་ཐམས་ཅད་མཁྱེན་པ་ཉིད་ཀྱི་ཆོ་ག་མི་འདོར་བའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་བརྩོན་འགྲུས་ཕུན་སུམ་ཚོགས་པ་ཡིན། །འཇམ་དཔལ་གྱིས་སྨྲས་པ། ནམ་བྱང་ཆུབ་སེམས་དཔའ་ཆོས་གང་གི་ཕྱིར་བརྩོན་འགྲུས་བརྩམ་པའི་ཆོས་དེ་ནི་འདི་
ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྟེ། དེ་ཉིད་ཤིན་ཏུ་ཡང་དག་པར་རྗེས་སུ་མི་མཐོང་ལ། སེམས་ཅན་ཐམས་ཅད་ཀྱི་ལེ་ལོ་སྤང་བའི་ཕྱིར། བརྩོན་འགྲུས་གཅེས་པ་ཡང་མི་འདོར་བ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་བསམ་གཏན་
ཕུན་སུམ་ཚོགས་པ་ཡིན། འཇམ་དཔལ་གྱིས་སྨྲས་པ། ནམ་ཆོས་ཐམས་ཅད་རང་བཞིན་གྱིས་སྙོམས་པར་ཞུགས་པར་ཤེས་ཀྱང་སེམས་ཅན་ཐམས་ཅད་ཀྱི་ཉོན་མོངས་པ་འདུལ་བའི་ཕྱིར་ཡང་བསམ་གཏན་བྱེད་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་ཤེས་
རབ་ཕུན་སུམ་ཚོགས་པ་ཡིན། འཇམ་དཔལ་གྱིས་སྨྲས་པ། ནམ་རྒྱུ་བ་མེད་པ་ཐོབ་པར་གྱུར་ཏེ། སྤྲོས་པ་ཐམས་ཅད་དང་བྲལ་ཞིང་སེམས་ཅན་ཐམས་ཅད་ཀྱི་ལྟ་བ་སྤོང་བའི་ཕྱིར། ཤེས་རབ་ཀྱི་རྣམ་པར་དཔྱོད་པ་ན་སྟེ། དེ་ལྟར་ན་བྱང་ཆུབ་སེམས་དཔའ་ཤེས་རབ་
ཕུན་སུམ་ཚོགས་པ་ཡིན་ནོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་བྱམས་པ་ལ་གནས་པ་ཡིན། འཇམ་དཔལ་གྱིས་སྨྲས་པ། ནམ་ཆོས་ཐམས་ཅད་རང་བཞིན་གྱིས་ཡོངས་སུ་མྱ་ངན་ལས་འདས་པར་མཐོང་བ་ནའོ། །ལྷའི་བུས་སྨྲས་པ། ཇི་ལྟར་
ན་བྱང་ཆུབ་སེམས་དཔའ་སྙིང་རྗེ་ལ་གནས་པ་ཡིན། འཇམ་དཔལ་གྱིས་སྨྲས་པ། ནམ་ཆོས་ཐམས་ཅད་ལ་ལས་ཀྱི་རྣམ་པར་སྨིན་པ་མེད་པར་ཤེས་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་དགའ་བ་ལ་གནས་པ་ཡིན། འཇམ་དཔལ་གྱིས་

སྨྲས་པ། ནམ་ཆོས་ཐམས་ཅད་ལ་དགའ་བ་ཡང་མི་སྐྱེད་ལ། མི་དགའ་བ་ཡང་མ་ཡིན་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་བཏང་སྙོམས་ལ་གནས་པ་ཡིན། འཇམ་དཔལ་གྱིས་སྨྲས་པ། ནམ་ཆོས་ཐམས་
ཅད་ལ་གཉིས་དང་བྲལ་བར་གྱུར་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་ལ་བྱང་ཆུབ་སེམས་དཔའ་ཡང་དག་པ་ཞེས་བྱ། འཇམ་དཔལ་གྱིས་སྨྲས་པ། ནམ་ཆོས་ཐམས་ཅད་སྒྱུ་མ་ལྟ་བུར་བྱུང་བ་མེད་པར་ཤེས་པ་ནའོ། །ལྷའི་བུས་སྨྲས་
པ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན། འཇམ་དཔལ་གྱིས་སྨྲས་པ། ནམ་བྱང་ཆུབ་སེམས་དཔས་ཆོས་ཐམས་ཅད་བདག་མེད་པར་མཐོང་བ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་སེམས་ཅན་གྱི་མཆོག་
ཡིན། འཇམ་དཔལ་གྱིས་སྨྲས་པ། ནམ་ཆོས་ཐམས་ཅད་གཟུང་བ་མེད་པ་དང་། གཞི་མེད་པར་ཤེས་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་གོ་ཆ་ཆེན་པོ་བགོས་པ་ཡིན། འཇམ་དཔལ་གྱིས་སྨྲས་པ། ནམ་བྱང་ཆུབ་
སེམས་དཔས་ཆོས་ཐམས་ཅད་ནམ་མཁའ་དང་མཉམ་པར་ཐོས་ནས་མི་དངངས་མི་སྐྲག་སྐྲག་པར་མི་འགྱུར་ཞིང་གོ་ཆ་ཆེན་པོ་མི་འདོར་བ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་དེས་པ་ཡིན། འཇམ་དཔལ་གྱིས་སྨྲས་པ། ནམ་སྙིང་
རྗེ་ཆེན་པོས་སེམས་ཅན་ཐམས་ཅད་རིང་དུ་བསྲིངས་པ་ཡང་མ་ཡིན་ལ་སྲེད་པའི་བག་ལ་ཉལ་གྱིས་ཉེ་བར་བསྙེན་པ་ཡང་མ་ཡིན་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་འགྲོགས་ན་བདེ་བ་ཡིན། འཇམ་དཔལ་གྱིས་སྨྲས་པ། ནམ་
བདག་དང་གཞན་མི་དམིགས་པས་ལུས་དང་། ངག་དང་ཡིད་ཀྱིས་གཞན་ལ་གནོད་པ་མི་བྱེད་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་བཀའ་བློ་བདེ་བ་ཡིན། འཇམ་དཔལ་གྱིས་སྨྲས་པ། ནམ་ཇི་ལྟར་ཐོས་པའི་ཆོས་རྣམས་སྒྲུབ་ཅིང་

ཚིག་ཇི་སྐད་སྨྲས་པ་བཞིན་བྱེད་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་འཐུན་པར་འཛིན་པ་ཡིན། འཇམ་དཔལ་གྱིས་སྨྲས་པ། ནམ་རང་གི་སེམས་དང་འཐུན་པའི་ཕྱིར། སེམས་ཅན་ཐམས་ཅད་ཀྱིས་བསྒོ་བ་ལས་མི་འགྱུར་ཞིང་།
སེམས་ཅན་ཐམས་ཅད་དང་འཐུན་པར་གནས་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་ངོ་ཚ་ཤེས་ཤིང་ཁྲེལ་ཡོད་པ་ཕུན་སུམ་ཚོགས་པ་ཡིན། འཇམ་དཔལ་གྱིས་སྨྲས་པ། ནམ་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་
ནང་ཡང་ཉེ་བར་ཞི་ལ་ཕྱི་རོལ་ཏུ་རྒྱུ་བ་ལ་ཡང་རྒྱུ་བ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་དད་པ་དང་ལྡན་པ་ཡིན། འཇམ་དཔལ་གྱིས་སྨྲས་པ། ནམ་ཆགས་པ་ཐམས་ཅད་ལ་ཡང་སྤྱོད་ལ། ཆགས་པ་ཐམས་ཅད་ལ་ཞེན་པ་ཡང་མེད་པ་ནའོ། །ལྷའི་
བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་མཛའ་བ་བརྟེན་པ་ཡིན། འཇམ་དཔལ་གྱིས་སྨྲས་པ། ནམ་སངས་རྒྱས་ཀྱི་རིགས་མི་གཅོད་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་བྱས་པ་གཟོ་བ་ཡིན། འཇམ་དཔལ་གྱིས་
སྨྲས་པ། ནམ་ཇི་ལྟར་བྱས་པའི་དགེ་བའི་རྩ་བ་ཆུད་མི་གཟོན་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་བྱས་པ་ཤེས་པ་ཡིན། འཇམ་དཔལ་གྱིས་སྨྲས་པ། ནམ་ཐེག་པ་གཞན་ལ་འདོད་པ་མི་བྱེད་པ་ནའོ། །ལྷའི་བུས་སྨྲས་པ། ཇི་
ལྟར་ན་བྱང་ཆུབ་སེམས་དཔའ་འདོད་པ་ཉུང་བ་ཡིན། འཇམ་དཔལ་གྱིས་སྨྲས་པ། ནམ་རང་གི་ཉོན་མོངས་པ་རྣམས་ཀྱང་མི་འདོད་ལ། སེམས་ཅན་ཐམས་ཅད་ཀྱི་ཉོན་མོངས་པ་རྣམས་སྤང་བར་ཡང་འདོད་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་
ཆུབ་སེམས་དཔའ་ཆོ་ག་ཤེས་པ་ཡིན། འཇམ་དཔལ་གྱིས་སྨྲས་པ། ནམ་འཕགས་པའི་ཤེས་རབ་ཀྱི་ཤེས་པས་ཆོས་གང་ཡང་མི་ལེན་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་ངོམས་པ་ཡིན། འཇམ་དཔལ་གྱིས་སྨྲས་པ།

ནམ་འཇིག་རྟེན་ལས་འདས་པའི་ཤེས་རབ་ལ་ཡང་གནས་ལ། འཇིག་རྟེན་པའི་རྒྱུ་བས་ཀྱང་སེམས་ཅན་རྣམས་ཡོངས་སུ་སྨིན་པར་བྱེད་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་རབ་ཏུ་དབེན་པ་ཡིན། འཇམ་དཔལ་
གྱིས་སྨྲས་པ། ནམ་ཉོན་མོངས་པ་ཐམས་ཅད་ཀྱིས་ཀྱང་ཀུན་ནས་ཉོན་མོངས་པར་མི་འགྱུར་ལ། སེམས་ཅན་ཐམས་ཅད་ཀྱི་ཉོན་མོངས་པ་སྤོང་བའི་ཕྱིར་བརྩོན་པར་ཡང་སྣང་བ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་རང་དགའ་རང་དབང་ཅན་
ཡིན། འཇམ་དཔལ་གྱིས་སྨྲས་པ། ནམ་ཟག་པ་མེད་པའི་ལུས་ཀྱིས་སངས་རྒྱས་ཀྱི་ཞིང་ཐམས་ཅད་དུ་སྣང་སྟེ། ཡེ་ཤེས་ཀྱི་དབང་བྱེད་ཀྱི་ཉོན་མོངས་པས་དབང་བྱེད་པ་མ་ཡིན་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་མང་དུ་ཐོས་པ་ཡིན། འཇམ་
དཔལ་གྱིས་སྨྲས་པ། ནམ་བདག་ཉིད་ཀྱང་མ་ཐོས་པའི་ཆོས་ཉན་ཅིང་གཞན་ལ་ཡང་མ་ཐོས་པའི་ཆོས་ཐོས་པར་བྱེད་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་ཚུལ་བཞིན་ལ་བརྩོན་པ་ཡིན། འཇམ་དཔལ་གྱིས་སྨྲས་པ། ནམ་དམིགས་པ་
ཐམས་ཅད་ལས་འབྱུང་བ་རབ་ཏུ་ཤེས་ཀྱང་ཆོས་ཐམས་ཅད་འཕྲོས་པར་ཡང་མི་བྱེད། མི་འཕྲོ་བར་ཡང་མི་བྱེད་པ་ནའོ། །ལྷའི་བུས་སྨྲས་པ། ཇི་ལྟར་ན་བྱང་ཆུབ་སེམས་དཔའ་སྒྲུབ་པ་སྙིང་པོར་བྱེད་པ་ཡིན། འཇམ་དཔལ་གྱིས་སྨྲས་པ། ནམ་གཞན་དང་འབྲེལ་པའི་རྣམ་
པར་རིག་པ་མི་སྐྱེད་ཅིང་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དབེན་པར་ཡང་རྟོག་ལ། རང་གི་སེམས་ཀྱི་སྤྱོད་པ་ལ་ཡང་མི་ལྟ་ཞིང་། བདག་དང་གཞན་དུ་འདུ་ཤེས་པས་སྒྲུབ་པ་སྙིང་པོར་བྱེད་པ་མ་ཡིན་པ་ནའོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་
བྱང་ཆུབ་སེམས་དཔའ་གཟུངས་དང་སྤོབས་པ་ཕུན་སུམ་ཚོགས་པ་ཡིན། འཇམ་དཔལ་གྱིས་སྨྲས་པ། ལྷའི་བུ་ནམ་བྱང་ཆུབ་སེམས་དཔའ་ཐོས་པ་ཐམས་ཅད་ཀྱང་འཛིན་ལ་སེམས་ཅན་ཐམས་ཅད་ཀྱི་དབང་པོ་རྣམས་ལ་ཡང་མཚུངས་པར་རབ་ཏུ་འབྱེད་ཅིང་། སྒྲ་སྐད་

བྲག་ཅ་དང་མཚུངས་པར་ཡང་ཤེས་ནས་མངོན་པར་ཞེན་པ་མེད་པ་ན་སྟེ། དེ་ལྟར་ན་བྱང་ཆུབ་སེམས་དཔའ་གཟུངས་དང་སྤོབས་པ་ཕུན་སུམ་ཚོགས་པ་ཡིན་ནོ། །དེ་ནས་ལྷའི་བུ་འོད་མང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་
དཔལ་ཁྱོད་ཀྱིས་བཤད་པའི་དོན་འདི་སུས་ཀུན་ཤེས་པར་འགྱུར། འཇམ་དཔལ་གྱིས་སྨྲས་པ། ལྷའི་བུ་གང་དག་དགེ་བའི་བཤེས་གཉེན་གྱིས་ཡོངས་སུ་ཟིན་པར་གྱུར་པ། སྔོན་གྱི་སྦྱོར་བ་ཕུན་སུམ་ཚོགས་པ། དགེ་བའི་རྩ་བ་བསྐྱེད་པ། དམིགས་
པ་མེད་པར་སྤྱོད་པ་དེ་དག་གིས་ཁོ་བོས་བཤད་པའི་དོན་འདི་ཀུན་ཤེས་པར་འགྱུར་རོ། །ལྷའི་བུས་སྨྲས་པ། དེ་དག་ཅི་ལ་མོས་པར་འགྱུར། བསམ་པ་ནི་གང་། འཇམ་དཔལ་གྱིས་སྨྲས་པ། དེ་དག་ནི་ཟབ་མོ་ལ་མོས་པར་འགྱུར་ཏེ། ལྷག་པའི་ང་
རྒྱལ་མེད་པ་ནི་བསམ་པའོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་དགེ་སློང་ལྷག་པའི་ང་རྒྱལ་མེད་པ་ཡིན། འཇམ་དཔལ་གྱིས་སྨྲས་པ། ལྷའི་བུ་ནམ་དགེ་སློང་འཇིག་ཚོགས་ལ་ལྟ་བ་ངོ་བོ་ཉིད་ཀྱིས་བགྲོད་པ་གཅིག་པུའི་ལམ་དུ་སྒོམ་སྟེ། གཉིས་སུ་
མེད་པས་འཇིག་ཚོགས་ལ་ལྟ་བའི་ངོ་བོ་ཉིད་གང་ཡིན་པ་དེ་བགྲོད་པ་གཅིག་པུའི་ལམ་གྱི་ངོ་བོ་ཉིད་དུ་མཉམ་པར་ཤེས་ཤིང་མ་རིག་པ་དང་སྲིད་པ་དང་སྲེད་པ་ལས་འབྱུང་བ་ཡང་ཚོལ་ལ། མ་རིག་པ་དང་སྲིད་པ་དང་སྲེད་པ་ལས་འབྱུང་བ་ལ་སོ་སོར་རྟོག་པ་ན།
མ་རིག་པ་དང་སྲིད་པ་དང་སྲེད་པའི་ངོ་བོ་ཉིད་ཀྱང་རིག་པ་དང་རྣམ་པར་གྲོལ་བར་ཤེས་པ་ན་སྟེ། དེ་ལྟར་ན་དགེ་སློང་ལྷག་པའི་ང་རྒྱལ་མེད་པ་ཡིན་ནོ། །ལྷའི་བུ་གཞན་ཡང་ནམ་དགེ་སློང་འདོད་ཆགས་ཀྱི་མཐའ་ལ་འདོད་ཆགས་དང་བྲལ་བའི་མཐར་ཤེས་ཤིང་། །འདོད་
ཆགས་དང་བྲལ་བའི་མཐའི་རང་བཞིན་ཡང་འདོད་ཆགས་སུ་ཤེས་པ་དང་། ཞེ་སྡང་གི་མཐའ་ལ་ཞེ་སྡང་དང་བྲལ་བའི་མཐར་ཤེས་ཤིང་། ཞེ་སྡང་དང་བྲལ་བའི་མཐའི་རང་བཞིན་ཡང་ཞེ་སྡང་དུ་ཤེས་པ་དང་། གཏི་མུག་གི་མཐའ་ལ་གཏི་མུག་དང་བྲལ་བའི་མཐར་ཤེས་ཤིང་། གཏི་

མུག་དང་བྲལ་བའི་མཐའི་རང་བཞིན་ཡང་གཏི་མུག་ཏུ་ཤེས་པ་ན་སྟེ། དེ་ལྟར་ན་དགེ་སློང་ལྷག་པའི་ང་རྒྱལ་མེད་པ་ཡིན་ནོ། །ལྷའི་བུ་གཞན་ཡང་ནམ་དགེ་སློང་སྡུག་བསྔལ་ཡོངས་སུ་ཤེས་པར་མི་བྱེད། ཀུན་འབྱུང་བ་སྤོང་བར་མི་བྱེད།
འགོག་པ་མངོན་སུམ་དུ་མི་བྱེད། ལམ་སྒོམ་པར་ཡང་མི་བྱེད་ལ། སྡུག་བསྔལ་མི་སྐྱེ་བར་ཤེས་པས་འཕགས་པའི་བདེན་པ་བཞི་རྗེས་སུ་རྟོགས་ཏེ། སྡུག་བསྔལ་མི་སྐྱེ་བ་ཤེས་པ་གང་ཡིན་པ་དེ་ལ་ཀུན་འབྱུང་བ་གང་ཡང་མེད། སྡུག་བསྔལ་མི་སྐྱེ་བ་ཤེས་པ་གང་
ཡིན་པ་དེ་ལ་འགོག་པ་གང་ཡང་མེད། སྡུག་བསྔལ་མི་སྐྱེ་བ་ཤེས་པ་གང་ཡིན་པ་དེ་ལ་ལམ་གང་ཡང་མེད་པ་དེ་ལྟར་དགེ་སློང་ཚུལ་བཞིན་ལ་བརྩོན་པ་ནི་ཆོས་གང་ཡང་སྐྱེད་པར་མི་བྱེད། འགག་པར་མི་བྱེད། གནས་པར་མི་བྱེད་དོ། །གང་ལ་སྐྱེ་བ་མེད་པ་དང་།
འགག་པ་མེད་པ་དང་། གནས་པ་མེད་པ་དེ་འདུས་མ་བྱས་པའོ། །འདུས་མ་བྱས་ཀྱི་རང་བཞིན་ཡང་འཕགས་པ་རྣམས་ཀྱི་བདེན་པ་སྒོམ་པ་སྟེ། ལྷའི་བུ་དེ་ལྟར་ན་དགེ་སློང་ལྷག་པའི་ང་རྒྱལ་མེད་པ་ཡིན་ནོ། །དེ་ནས་བདུད་སྡིག་ཅན་སྡུག་བསྔལ་ཞིང་ཡིད་མི་བདེ་སྟེ། གདོང་
མཆི་མས་གང་ཞིང་མཆི་མས་བརྣངས་བཞིན་དུ་ཚིག་འདི་སྐད་ཅེས་སྨྲས་སོ། །གང་ན་ཆོས་ཀྱི་རྣམ་གྲངས་འདི་སྤྱོད་པ་དེ་ན་བདུད་རྣམས་ཀྱི་སྐབས་མེད་དོ། །གང་དག་ཆོས་ཀྱི་རྣམ་གྲངས་འདི་འཛིན་པར་འགྱུར་བ་དེ་དག་གི་བདུད་ཀྱི་ལས་ཐམས་ཅད་བཀག་པར་འགྱུར་རོ་ཞེས་དེ་སྐད་
སྨྲས་ནས་བདུད་སྡིག་ཅན་སྡུག་བསྔལ་ཞིང་ཡིད་མི་བདེ་སྟེ། ཡིད་ལ་གཅགས་བཞིན་དེ་ཉིད་དུ་མི་སྣང་བར་གྱུར་ཏོ། །དེ་ནས་ལྷའི་བུ་འོད་མང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱི་བཤད་པའི་དོན་ཇི་ལྟར་བདག་གིས་ཤེས་པ་
ལྟར་ན། གང་དག་ལྷག་པའི་ང་རྒྱལ་མེད་པའི་ཚུལ་ཟབ་མོ་འདི་ཐོས་ནས་སྤོང་བའི་དགེ་སློང་དེ་དག་གི་རབ་ཏུ་བྱུང་བ་མེད་དོ། །བསྙེན་པར་རྫོགས་པ་མེད་དོ། །ལྷག་པའི་ང་རྒྱལ་མེད་པའི་ཚུལ་མཆོག་ཏུ་ཟབ་པ་འདིས་སྐྲག་པར་འགྱུར་བའི་ཁྱིམ་དེ་དག་གི་སྟོན་པ་དེ་བཞིན་གཤེགས་པ་མ་

ཡིན་ནོ། །དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་དག་ལྷག་པའི་ང་རྒྱལ་མེད་པའི་ཚུལ་མཆོག་ཏུ་ཟབ་པ་འདི་ཐོས་ནས་མི་སྐྲག་མི་དངང་ལ་དངང་བར་མི་འགྱུར་ཞིང་མོས་པར་འགྱུར་བ་དེ་དག་རྣམ་པར་གྲོལ་བ་ཉིད་དུ་རིག་པར་བྱའོ། །དེ་ནས་
བཅོམ་ལྡན་འདས་ཀྱིས་ལྷའི་བུ་འོད་མང་པོ་ལ་འདི་སྐད་ཅེས་བཀའ་སྩལ་ཏོ། །ལྷའི་བུ་དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་དག་ལྷག་པའི་ང་རྒྱལ་མེད་པའི་ཚུལ་མཆོག་ཏུ་ཟབ་པ་འདི་
ཐོས་ནས་མི་སྐྲག་མི་དངང་ལ་དངང་བར་མི་འགྱུར་ཞིང་མོས་པར་འགྱུར་བ་དེ་དག་རྣམ་པར་གྲོལ་བ་ཉིད་དུ་རིག་པར་བྱའོ། །དེ་ཅིའི་ཕྱིར་ཞེ་ན། བཟོད་པ་འདིས་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པ་དང་། བཟོད་པ་འདིས་
ཉན་ཐོས་དང་། རང་སངས་རྒྱས་ཐམས་ཅད་ངེས་པར་འབྱུང་བའི་ཕྱིར་རོ། །ལྷའི་བུ་འོད་མང་པོས་གསོལ་པ། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་དེའི་ཕྱིར་
ཁྱོད་ཀྱིས་ཆོས་ཀྱི་རྣམ་གྲངས་འདི་འཇམ་དཔལ་རྣམ་པར་འཕྲུལ་པའི་ལེའུ་ཞེས་བྱ་བར་ཟུང་ཤིག །བདུད་འདུལ་བའི་ལེའུ་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། འཇམ་དཔལ་གཞོན་ནུར་གྱུར་པ་དང་། ལྷའི་བུ་འོད་མང་པོ་
དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་འཇམ་དཔལ་རྣམ་པར་འཕྲུལ་པའི་ལེའུ་ཞེས་
བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཤཱི་ལེན་དྲ་བོ་དྷི་དང་ཛི་ན་མི་ཏྲ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་བཅོས་ནས་གཏན་ལ་ཕབ་པ།། །།

༄༅༅། །རྒྱ་གར་སྐད་དུ། ཨཱརྱ་སརྦ་ཏ་ཐཱ་ག་ཏ་ཨ་དྷིཥྛཱ་ན་ས་ཏྭཱ་བ་ལོ་ཀེ་ན་བུད་དྷ་ཀྵེ་ཏྲ་ནིར་དེ་ཤ་ན་བྱཱུ་ཧ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་སེམས་ཅན་ལ་གཟིགས་ཤིང་སངས་རྒྱས་ཀྱི་ཞིང་གི་
བཀོད་པ་ཀུན་ཏུ་སྟོན་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་གྲུ་འཛིན་ན་འཕགས་པ་སྤྱན་རས་གཟིགས་དབང་ཕྱུག་གི་གནས་
ལྷའི་ནོར་བུ་རིན་པོ་ཆེ་དཔལ་གྱི་སྙིང་པོ་དང་། མེ་ཏོག་རྒྱས་པ་དང་། ལྷའི་སེང་གེའི་ཁྲི་བཀོད་པ་ན། དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། སེམས་ཅན་ཐམས་ཅད་ཀྱི་དབང་གི་དམ་པའི་ཕ་རོལ་ཏུ་
སོན་པ་ཤ་སྟག་དང་། བྱང་ཆུབ་སེམས་དཔའ་ཐམས་ཅད་ཀྱང་སྙིང་རྗེ་ཆེན་པོའི་ཤེས་པ་ལ་གནས་པ་ཐམས་ཅད་ཀྱང་སྐྱེ་བ་གཅིག་གིས་ཐོགས་པ་དང་། སྐྱེ་བ་གཉིས་དང་། སྐྱེ་བ་གསུམ་དང་། སྐྱེ་བ་བཅུ་དང་། སྐྱེ་བ་ཉི་ཤུ་དང་། སྐྱེ་བ་སུམ་ཅུ་དང་། སྐྱེ་བ་བརྒྱའི་
བར་དག་གིས་ཐོགས་པ། ཐམས་ཅད་ཀྱང་ས་བརྒྱད་པ་དང་། ས་བཅུ་པ་ལ་གནས་པ་ཤ་སྟག་སྟེ། འཕགས་པ་སྤྱན་རས་གཟིགས་དབང་ཕྱུག་དང་། འཇམ་དཔལ་དང་། དྲི་མེད་ཏོག་དང་། ནོར་དཔལ་དང་། གློག་གི་ཏོག་དང་། དྲི་མེད་འོད་དང་།
ཙན་དན་དང་། བདུད་རྩིའི་ཏོག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་བདུན་བརྒྱ་དང་། དགེ་བསྙེན་དང་། དགེ་བསྙེན་མ་ཐམས་ཅད་ཀྱང་ལུང་བསྟན་པ་དང་ལྡན་པ། ཏིང་ངེ་འཛིན་ཐོབ་པ། འཇིག་རྟེན་གྱི་ཁམས་ཐ་དད་པ་ནས་འདུས་པ་ལྔ་སྟོང་
དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་ཐམས་ཅད་ཀྱང་སྔོན་གྱི་སངས་རྒྱས་ལ་བསྙེན་བཀུར་བྱས་པ། དེ་བཞིན་གཤེགས་པའི་ཆོ་འཕྲུལ་མཐོང་བ་བརྒྱ་སྟོང་དང་། གནོད་སྦྱིན་མོ་ཆེན་མོ་ཐམས་ཅད་ཀྱང་བྱང་ཆུབ་སེམས་དཔའི་ཡེ་ཤེས་ཐོབ་པ། ལུང་བསྟན་

པ་ཐོབ་པ། ཕྱིར་མི་ལྡོག་པ་དཔེ་མེད་པ་དང་། དྲི་མེད་འོད་དང་། འོད་ཅན་མ་དང་། འཇིགས་བྱེད་མ་དང་། དཔལ་ལྡན་མ་དང་། འཕྲོག་མ་དང་། དུང་ཅན་མ་ལ་སོགས་པ་གནོད་སྦྱིན་མོ་ཆེན་མོ་བརྒྱད་ཅུ་དང་། བརྒྱ་བྱིན་དང་། ཚངས་པ་དང་། རྣམ་ཐོས་ཀྱི་
བུ་དང་། ཡུལ་འཁོར་སྲུང་དང་། འཕགས་སྐྱེས་པོ་དང་། མིག་མི་བཟང་དང་། ནོར་བུ་བཟང་པོའི་བུ་དང་། གང་བ་བཟང་པོ་ལ་སོགས་པ་འཇིག་རྟེན་སྐྱོང་བ་ཐམས་ཅད་ཀྱི་བར་དག་དང་ཐབས་ཅིག་ཏུ་བཞུགས་སོ། །དེ་ནས་དེ་དག་ཐམས་ཅད་ཀྱིས་དེ་བཞིན་
གཤེགས་པ་སེང་གེའི་ཁྲི་ལ་བཞུགས་པར་རིག་ནས་རང་རང་གི་དགེ་བའི་རྩ་བ་དག་གིས་དེ་བཞིན་གཤེགས་པ་ལ་ལྷའི་རྒྱན་དང་། ན་བཟའ་དང་། མེ་ཏོག་དང་། མེ་ཏོག་ཕྲེང་དང་། སྤོས་དང་། བྱུག་པ་དང་། རོལ་མོའི་སྒྲ་རྣམས་ཀྱིས་མཆོད་པར་བྱས། རི་མོར་
བྱས་སོ། །ཁ་ཅིག་གིས་ནི་ལན་འབུམ་ཕྲག་དུ་མར་བསྐོར་བ་བྱས་ཏེ་བསྟོད་དོ། །དེ་ནས་དེའི་ཚེ་བཅོམ་ལྡན་འདས་སེམས་ཅན་ཐམས་ཅད་ལ་དམིགས་པ་སྙིང་རྗེ་ཆེན་པོའི་ཤེས་པ་ལ་གནས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཏིང་ངེ་འཛིན་དེའི་མཐུས་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འོད་ཀྱིས་སྣང་བར་གྱུར་ཅིང་། གཟུགས་ཐམས་ཅད་སྣང་བས་ཁྱབ་པར་གྱུར་ནས། སེམས་ཅན་དམུས་ལོང་གང་ཡིན་པ་དེ་དག་གིས་ནི་མིག་གིས་གཟུགས་རྣམས་མཐོང་བར་གྱུར་ཏོ། །འོན་པ་རྣམས་ཀྱིས་ནི་རྣ་བས་
སྒྲ་དག་ཐོས་པར་གྱུར་ཏོ། །ནད་ཀྱིས་བཏབ་པ་རྣམས་ནི་ནད་དག་དང་བྲལ་བར་གྱུར་ཏོ། །གོས་མེད་པ་རྣམས་ནི་གོས་དག་ཐོབ་པར་གྱུར་ཏོ། །སྨྱོན་པ་རྣམས་ནི་དྲན་པ་ཐོབ་པར་གྱུར་ཏོ། །ལུས་ཉམས་པ་དང་དབང་པོ་མ་ཚང་བ་རྣམས་ནི་ལུས་དང་དབང་པོ་ཡོངས་སུ་རྫོགས་
པར་གྱུར་ཏོ། །དབུལ་པོ་རྣམས་ཀྱིས་ནི་ནོར་དག་ཐོབ་པར་གྱུར་ཏོ། །སེམས་ཅན་གང་དག་ནོར་དང་། ཡོ་བྱད་དང་། ལོངས་སྤྱོད་མེད་པ་དེ་དག་ནི་ནོར་དང་། ཡོ་བྱད་དང་། ལོངས་སྤྱོད་དག་དང་ལྡན་པར་གྱུར་ཏོ། །སེམས་ཅན་ཐམས་ཅད་ཀྱང་བདེ་བ་ཐམས་ཅད་དང་ལྡན་ཞིང་བསམ་

པ་ཐམས་ཅད་ཡོངས་སུ་རྫོགས་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་གང་ཡིན་པ་དེ་དག་ཐམས་ཅད་ལ་ཡང་བསྐུལ་ནས་ཐམས་ཅད་ཆོས་མཉན་པའི་ཕྱིར། བཅོམ་ལྡན་འདས་ག་ལ་བ་དེར་ལྷགས་ཏེ། སེམས་ཅན་
གང་དག་ལྷ་རྣམས་ཀྱི་ནང་དུ་སྐྱེས་པ་དེ་དག་ཐམས་ཅད་ཀྱིས་ནི་ལྷའི་བདེ་བ་ཡོངས་སུ་སྤངས་ནས་སངས་རྒྱས་རྗེས་སུ་དྲན་པར་བྱས་ཏེ་ཆོས་མཉན་པའི་ཕྱིར། བཅོམ་ལྡན་འདས་ག་ལ་བ་དེར་ལྷགས་སོ། །སེམས་ཅན་གང་དག་མི་རྣམས་ཀྱི་ནང་དུ་སྐྱེས་པ་དེ་དག་གིས་ཀྱང་མིའི་བདེ་བ་
ཡོངས་སུ་སྤངས་ནས་ཆོས་མཉན་པའི་ཕྱིར། བཅོམ་ལྡན་འདས་ག་ལ་བ་དེར་ལྷགས་སོ། །སེམས་ཅན་གང་དག་ཀླུ་དང་། གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་རྣམས་ཀྱི་ནང་ན་སྐྱེས་པ་དེ་དག་གིས་ཀྱང་སངས་རྒྱས་རྗེས་སུ་དྲན་པ་སོ་སོར་ཐོབ་ནས་སེམས་
ཅན་ཐམས་ཅད་ལ་བྱམས་པར་གནས་པ་དང་། ལུས་དང་སེམས་བདེ་བར་གྱུར་ནས་ཆོས་མཉན་པའི་ཕྱིར། བཅོམ་ལྡན་འདས་ག་ལ་བ་དེར་ལྷགས་སོ། །སེམས་ཅན་གང་དག་གཤིན་རྗེའི་འཇིག་རྟེན་རྣམས་སུ་མུན་པ་མུན་ནག་གི་ནང་དུ་སྐྱེས་པ་དེ་དག་ཀྱང་སངས་རྒྱས་ཀྱི་མཐུས་
ཡུད་ཙམ་ཞིག་དྲན་པ་སོ་སོར་ཐོབ་ནས་གཅིག་གིས་གཅིག་ཀུན་ཏུ་ཤེས་པར་གྱུར་ཏེ། དེ་དག་མུན་པ་ཆེན་པོ་དེ་ནས་ཡོངས་སུ་ཐར་བར་གྱུར་ཏོ། །སེམས་ཅན་ཐམས་ཅད་གཅིག་ལ་གཅིག་བྱམས་པར་གནས་ཤིང་ཉེ་བའི་ཉོན་མོངས་པ་རྣམས་དང་བྲལ་བར་གྱུར་ཏོ། །དེ་ནས་དེའི་
ཚེ་ས་ཆེན་པོ་འདི་རྣམ་པ་དྲུག་ཏུ་རབ་ཏུ་གཡོས་ཏེ་མཐོ་བ་དང་དམའ་བར་གྱུར་ཏོ། །དེ་ནས་འཁོར་འདུས་པ་དེར་འཇམ་དཔལ་གཞོན་ནུར་གྱུར་པ་འདུས་ཏེ་འདུག་པར་གྱུར་ནས། དེས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་
སྐད་ཅེས་སྨྲས་སོ། །རིགས་ཀྱི་བུ་བྱང་ཆུབ་སེམས་དཔའི་འདུས་པ་ཆེན་པོ་ཀུན་ཏུ་སྣང་ཞིང་འདུས་པ་ཆེན་པོའི་སྔ་ལྟས་ཀྱང་ཀུན་ཏུ་སྣང་ལ། རིགས་ཀྱི་བུ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་མང་པོ་དག་ལུང་སྟོན་པ་ཡང་ཀུན་ཏུ་སྣང་ཞིང་ཆོས་ཀྱི་འབེལ་བའི་

གཏམ་ཆེན་པོའི་སྔ་ལྟས་ཀྱང་ཀུན་ཏུ་སྣང་བ་ལས་ན་རིགས་ཀྱི་བུ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མ་དག་གི་རེ་བ་ཐམས་ཅད་ཡོངས་སུ་རྫོགས་པར་འགྱུར་ཞིང་ཡེ་ཤེས་ཆེན་པོ་ཡང་འཐོབ་པར་འགྱུར་གྱིས། རིགས་ཀྱི་བུ་དེའི་ཕྱིར་ཁྱེད་ཀྱིས་སེམས་ཅན་
ཐམས་ཅད་ལ་སྙིང་རྗེ་སྐྱེད་ལ། ཕན་པ་དང་། བདེ་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་དགོད་པར་བྱ་བའི་བར་གྱི་ཕྱིར། དེ་བཞིན་གཤེགས་པ་ལ་ཡོངས་སུ་ཞུས་ཤིག །རིགས་ཀྱི་བུ་ཕྱི་མའི་དུས་ཕྱི་མའི་ཚེ་ན་སེམས་ཅན་སྡིག་པ་བྱེད་པ།
དབུལ་བ། ཉམ་ཆུང་བ། ལུས་མདོག་ངན་པ། རྒ་བ་དང་ན་བས་ཡོངས་སུ་གཟིར་བ། ལོངས་སྤྱོད་ཆུང་བ་ལུས་ཡོངས་སུ་མ་བསྒོམས་པ། ཚེ་ཐུང་བ། བློ་ཆུང་བ། འདོད་ཆགས་དང་། ཞེ་སྡང་དང་། གཏི་མུག་གིས་ཡོངས་སུ་གཟིར་བ་དག་འབྱུང་བ་ཡོད་དེ།
རིགས་ཀྱི་བུ་དེ་དག་གི་དོན་དུ་ཆོས་བསྟན་པར་བྱ་བའི་ཕྱིར། དེ་བཞིན་གཤེགས་པ་ལ་གསོལ་བ་ཐོབ་ཤིག་དང་། རིགས་ཀྱི་བུ་དེའི་ཕྱིར་ཁྱོད་ཀྱིས་ཡུན་རིང་པོར་སེམས་ཅན་རྣམས་ཀྱི་དོན་དང་། ཕན་པ་དང་། བདེ་བ་དང་། ནད་ཐམས་ཅད་རབ་ཏུ་ཞི་བར་བྱ་བ་དང་། སྡིག་པ་
ཐམས་ཅད་བཟློག་པར་བྱ་བ་དང་། སྡིག་པ་ཐམས་ཅད་རབ་ཏུ་ཞི་བར་བྱ་བ་དང་། རེ་བ་ཐམས་ཅད་ཡོངས་སུ་རྫོགས་པར་བྱ་བ་དང་། བླ་ན་མེད་པའི་ཡོངས་སུ་མྱ་ངན་ལས་འདའ་བའི་བར་དག་བྱས་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་
སྤྱན་རས་གཟིགས་དབང་ཕྱུག་གིས་ཕྱོགས་བཅུར་རྣམ་པར་བལྟས་ཏེ། དེ་བཞིན་གཤེགས་པ་བྱེ་བ་ཕྲག་གང་གཱའི་ཀླུང་གི་བྱེ་མ་སྙེད་དག་ཡིད་ལ་བྱས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། ལན་གསུམ་བསྐོར་བ་བྱས་ནས་ཡན་ལག་ལྔས་
ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སླད་མའི་དུས་སླད་མའི་ཚེ་ན་སེམས་ཅན་རྒ་བ་དང་། ན་བ་དང་། འཆི་བ་དང་། མྱ་ངན་གྱིས་ནོན་པར་གྱུར་པ། དུས་མ་ལགས་པར་འགུམ་པས་ཡོངས་སུ་གཟིར་བ། ཉམ་ཆུང་བ། མདོག་

ངན་པ། ཚེ་ཐུང་བ། ལོངས་སྤྱོད་ཆུང་བ། ལུས་ཡོངས་སུ་མ་བསྒོམས་པ་དག་འབྱུང་བར་མཆིས་ཏེ། དེ་དག་ནི་སེར་སྣ་དང་། འཆལ་པའི་ཚུལ་ཁྲིམས་ཀྱི་སེམས་ཀྱིས་གཅིག་ལ་གཅིག་འགུམ་པར་འགྱུར་ལ། གཅིག་གིས་གཅིག་གི་ནོར་
དང་། ལོངས་སྤྱོད་དང་། དབང་ཕྱུག་དག་འཕྲོག་པར་འགྱུར་ཞིང་། གད་མོ་དང་། འཇོ་སྒེག་དང་། བྲོ་གར་དང་། རྩེད་མོ་དག་གིས་མངོན་པར་རྩེ་བ་དང་། མི་རྟག་པ་ལ་རྟག་པར་འདུ་ཤེས་པ་དང་། མི་སྡུག་པ་ལ་སྡུག་པར་འདུ་ཤེས་པར་བགྱིད་ལགས་སོ། །
དེ་ཅིའི་སླད་དུ་ཞེ་ན། དེ་དག་རྒྱུ་དེ་དང་གཞི་དེས་སེམས་ཅན་རྣམས་ལ་མི་དགེ་བ་རྣམ་པ་སྣ་ཚོགས་དག་གིས་གཙེས་ནས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དག་ཏུ་ཡང་སྐྱེ་བར་འགྱུར་ལགས་པས། བཅོམ་ལྡན་འདས་དེའི་སླད་དུ་
བདག་དེ་དག་གི་དོན་དང་། སྨན་པ་དང་། བདེ་བ་དང་། རེ་བ་ཐམས་ཅད་ཡོངས་སུ་རྫོགས་པར་བགྱི་བ་དང་། དེ་བཞིན་གཤེགས་པའི་ཡེ་ཤེས་ཐོབ་པར་བགྱི་བའི་བར་དང་། སངས་རྒྱས་ཀྱི་ཞིང་དུ་སྐྱེ་བར་བགྱི་བ་དང་། སྡིག་པ་ཐམས་ཅད་བཟློག་པར་བགྱི་བའི་སླད་དུ། དེ་
བཞིན་གཤེགས་པ་ལ་གསོལ་བ་འདེབས་པར་འཚལ་གྱིས། བཅོམ་ལྡན་འདས་དེ་བཞིན་གཤེགས་པ་ལ་ནི་མི་མཁྱེན་པ་དང་། མ་རྟོགས་པ་དང་། མ་གཟིགས་པ་དང་། མ་གསན་པ་དང་། རྣམ་པར་མི་མཁྱེན་པ་ཅི་ཡང་མི་མངའ་བས་ཆོས་ཀྱི་འབེལ་བའི་གཏམ་ཉན་པར་
འཚལ་བ་དང་། སྔོན་གྱི་སངས་རྒྱས་ལ་བསྙེན་བཀུར་བགྱིས་པ་དང་། ཤེས་རབ་དང་ལྡན་པའི་རང་བཞིན་ཅན་གྱི་བྱང་ཆུབ་སེམས་དཔའ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་
ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་མང་པོ་ལྷགས་པ་འདི་དག་རེ་བ་མ་མཆིས་པར་གྱུར་ཅིང་། སླར་མཆི་བར་མི་འགྱུར་བར་བཅོམ་ལྡན་འདས་བཤད་དུ་གསོལ། བདེ་བར་གཤེགས་པ་བཤད་དུ་གསོལ། དེ་ནས་ཐམས་ཅད་དང་

ལྡན་པའི་འཁོར་ཇི་ལྟར་ལྷགས་པ་དེ་དག་གིས་ཀྱང་ཡན་ལག་ལྔས་ཕྱག་བྱས་ཏེ་ཚིག་འཐུན་པར་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་པར་བཤད་དུ་གསོལ། བདེ་བར་གཤེགས་པ་ལེགས་པར་བཤད་དུ་གསོལ། དེ་ནས་བཅོམ་ལྡན་འདས་ཀྱིས་ལན་གཉིས་ལན་
གསུམ་དུ་གསོལ་བ་བཏབ་པར་ཐུགས་སུ་ཆུད་ནས་ཕྱོགས་བཅུར་རྣམ་པར་གཟིགས་ཏེ། སྙན་ཅིང་འཇེབས་ལ་ཡིད་དུ་འོང་བའི་གསུང་དབྱངས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་བཞིན་
གཤེགས་པ་ཐམས་ཅད་ཀྱིས་བྱིན་གྱི་རླབས་སེམས་ཅན་ལ་གཟིགས་ཤིང་སངས་རྒྱས་ཀྱི་ཞིང་གི་བཀོད་པ་ཀུན་ཏུ་སྟོན་པ་ཞེས་བྱ་བའི་ཏིང་ངེ་འཛིན་ཡོད་དེ། ངས་སྔོན་དང་པོ་སེམས་བསྐྱེད་པ་ནས་བཟུང་སྟེ། དེ་བཞིན་གཤེགས་པ་མེ་ཏོག་སྣང་བ་ཀུན་ཏུ་སྟོན་པ་ཞེས་བྱ་བའི་སྤྱན་སྔར་དེ་ཐོས་
སོ། །རིགས་ཀྱི་བུ་ཏིང་ངེ་འཛིན་དེའི་མིང་ཐོས་མ་ཐག་ཏུ་སེམས་ཅན་བྱེ་བ་ཕྲག་དགུ་བཅུས་དེ་བཞིན་གཤེགས་པའི་ཡེ་ཤེས་ཐོབ་པར་གྱུར་ནས། ཐམས་ཅད་ཀྱང་དེ་བཞིན་གཤེགས་པས་སངས་རྒྱས་ཀྱི་ཞིང་ཐ་དད་པ་དག་ཏུ་ལུང་བསྟན་ཏེ། ངས་ཀྱང་ལུང་བསྟན་པ་ཐོབ་པོ། །རིགས་ཀྱི་བུ་
ངས་དེ་བཞིན་གཤེགས་པའི་ལྷའི་མཁྱེན་པས་སྔོན་དེ་བཞིན་གཤེགས་པ་སུམ་ཁྲིས་སེམས་ཅན་ཐམས་ཅད་ཀྱི་དོན་དུ་ཆོས་ཀྱི་རྣམ་གྲངས་འདི་བཤད་དེ། ཐམས་ཅད་དུ་ཡང་དེ་བཞིན་གཤེགས་པ་ལ་གསོལ་བ་འདེབས་པ་ནི་འཕགས་པ་སྤྱན་རས་གཟིགས་དབང་ཕྱུག་ཁྱོད་ཉིད་དང་། འཇམ་དཔལ་
གཞོན་ནུར་གྱུར་པ་ཡིན་ལ། བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་རྣམས་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མའི་འཁོར་ཇི་ལྟར་ལྷགས་པ་འདི་དག་གིས་ཀྱང་ཐོས་ནས་རི་མོ་དང་མཆོད་པ་དག་བྱས་ཏེ། དེའི་འོག་ཏུ་སེམས་ཅན་བྱེ་
བ་ཁྲག་ཁྲིག་འབུམ་ཕྲག་དུ་མ་དག་གིས་ལུང་བསྟན་པ་ཐོབ་ཅིང་བྱང་ཆུབ་སེམས་དཔའི་ཏིང་ངེ་འཛིན་དག་ཀྱང་ཐོབ་པར་གྱུར་ནས། འདོད་པ་ཐམས་ཅད་དུ་འགྲོ་བ་དང་། རེ་བ་ཐམས་ཅད་གྲུབ་པ་དང་། ནད་རྣམས་དང་བྲལ་བར་ཡང་གྱུར་ལ། དགེ་བའི་རྩ་བ་རྣམས་ཡོངས་སུ་སྨིན་པ་དང་། སྒྲིབ་

པ་ཐམས་ཅད་སྤངས་པ་དང་། གཟུགས་བཟང་ཞིང་མཛེས་པ་བལྟ་ན་སྡུག་པ་དང་། ནོར་དང་། འབྲུ་དང་། མཛོད་དང་། བང་བ་རྣམས་འབྱོར་པ་དང་། རྒྱལ་པོ་དང་། རྒྱལ་བུ་དང་། བློན་པོ་རྣམས་ཀྱིས་མངོན་པར་བསྟོད་པར་འོས་པ་དང་། སེམས་ཅན་ཐམས་
ཅད་ཀྱིས་ཕྱག་བྱ་བར་འོས་པ་དང་། དྲན་པ་དང་ལྡན་པ་དང་། ཤེས་རབ་དང་ལྡན་པ་དང་། སངས་རྒྱས་དང་། ཆོས་དང་། དགེ་འདུན་ལ་དད་པ་མི་ཕྱེད་པ་དང་ལྡན་པ་དང་། རྫུ་འཕྲུལ་དང་ལྡན་པ་དང་། ཚེ་དང་ཁ་དོག་དང་། གཟི་བརྗིད་དང་། མཐུ་སྟོབས་དང་ལྡན་ཞིང་རྣམ་པ་ཐམས་ཅད་
ཀྱི་མཆོག་དང་ལྡན་པར་གྱུར་ཏེ། ནམ་ཡང་སྡུག་པ་དང་བྲལ་བར་མ་གྱུར་ཅིང་། སྡུག་པའི་སྡུག་བསྔལ་མེད་པར་གྱུར་པ་དེ་དྲན་ཏེ། རིགས་ཀྱི་བུ་དེ་ལྟར་ན་རིགས་ཀྱི་བུའམ། རིགས་ཀྱི་བུ་མོ་གང་དག་ཆོས་སྨྲ་བ་དེ་ལ་མཆོག་ཏུ་གུས་པའི་སེམས་བསྐྱེད་དེ། ཆོས་ཀྱི་རྣམ་གྲངས་འདི་ལ་ཡན་
ལག་ལྔས་ཕྱག་བྱས་ཤིང་། མེ་ཏོག་དང་། བདུག་སྤོས་དང་། སྤོས་དང་། མེ་ཏོག་ཕྲེང་དང་། བྱུག་པ་དང་། གདུགས་དང་། རྒྱལ་མཚན་དང་། བ་དན་དག་གིས་ལེགས་པར་བརྒྱན་ནས་སངས་རྒྱས་ལ་ཕྱག་འཚལ་ལོ་ཞེས་བརྗོད་ཅིང་ཕྱག་འཚལ་བར་བྱེད་པ་དང་། ལེགས་
སོ་ཞེས་བྱ་བར་སྦྱིན་པར་བྱེད་པ་དང་། འཛིན་པ་དང་། འཆང་བ་དང་། ཀློག་པ་དང་། ཡི་གེར་འདྲི་བ་དང་། ཡི་གེར་འདྲིར་འཇུག་པ་དེ་དག་ནི་ཡོན་ཏན་མང་པོ་དང་ལྡན་པར་འགྱུར་རོ། །དེ་དག་ནི་ཚེ་འདི་ཉིད་ལ་ཡང་ཡོན་ཏན་མང་པོ་དང་ལྡན་པར་འགྱུར་ཏེ། གཟུགས་བཟང་ཞིང་
མཛེས་ལ་བལྟ་ན་སྡུག་པ་དང་། ནད་རྣམས་དང་བྲལ་བ་དང་། ཚེ་རིང་བ་དང་། བློ་བརྟན་པ་དང་། དྲན་པ་དང་ལྡན་པ་དང་། བརྟན་པ་དང་ལྡན་པ་དང་། རྒྱལ་པོ་ཐམས་ཅད་དང་། རྒྱལ་པོའི་བཙུན་མོ་ཐམས་ཅད་དང་། རྒྱལ་བུ་ཐམས་ཅད་དང་། བློན་པོ་ཐམས་ཅད་དང་། དགྲ་
ཐམས་ཅད་དང་། སེམས་ཅན་ཐམས་ཅད་ཀྱིས་མངོན་པར་བསྟོད་པར་འོས་པ་དང་། ཕྱག་བྱ་བར་འོས་པ་དང་། བསྙེན་བཀུར་བྱ་བར་འོས་པར་འགྱུར་རོ། །ནོར་དང་ཡོ་བྱད་མང་པོར་ཡང་འགྱུར་རོ། །དེ་དག་གི་ཁ་ནས་ཙན་དན་གྱི་དྲིའི་ངད་འབྱུང་བར་ཡང་འགྱུར་རོ། །མིག་ཨུད་པ་ལ་སྔོན་

པོའི་འདབ་མ་འདྲ་བར་ཡང་འགྱུར་རོ། །དེ་དག་གིས་ཉིན་མཚན་དུ་སངས་རྒྱས་དང་བྱང་ཆུབ་སེམས་དཔའ་དག་མཐོང་བར་ཡང་འགྱུར་རོ། །མཚམས་མེད་པ་ལྔ་ལ་སོགས་པའི་སྒྲིབ་པ་ཐམས་ཅད་ཟད་པར་ཡང་འགྱུར་རོ། །དེ་དག་ལ་ལྷ་རྣམས་སྲུང་བར་ཡང་འགྱུར་རོ། །དེ་དག་
འཆི་བའི་དུས་ན་སངས་རྒྱས་དང་བྱང་ཆུབ་སེམས་དཔའ་དག་མཐོང་བར་ཡང་འགྱུར་རོ། །ཕྲག་དོག་མེད་པ་དང་། སེམས་རྣམ་པར་གཡེངས་པ་མེད་པར་འཆི་བའི་དུས་བྱེད་པར་ཡང་འགྱུར་རོ། །ཤི་འཕོས་ནས་ཀྱང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བའི་བར་དུ་འགྱུར་རོ། །རིགས་
ཀྱི་བུ་གང་དག་ཆོས་ཀྱི་རྣམ་གྲངས་འདི་འཛིན་པ་དང་། བསྙེན་བཀུར་བྱས་ཏེ་ཡི་གེར་འདྲི་བ་དང་། ཡི་གེར་འདྲིར་འཇུག་པ་དང་། ཀློག་པ་དང་། མཆོད་པར་བྱེད་པ་དང་། འཆང་བ་དང་། མིང་ཙམ་ཐོས་པར་འགྱུར་བ་དེ་དག་ནི་ངས་མངོན་སུམ་དུ་ལུང་བསྟན་པས་ལུང་བསྟན་པ་ཡིན་ཏེ།
དེ་དག་གིས་ང་མཐོང་ཞིང་བསྙེན་བཀུར་བྱས། རི་མོར་བྱས། མཆོད་པ་བྱས་པ་ཡང་ཡིན་པས། དེ་དག་གིས་ནི་སངས་རྒྱས་ཀྱི་བྱང་ཆུབ་ལ་ཐེ་ཙོམ་བསྐྱེད་པར་མི་བྱའོ། །གང་དག་རྣ་ལམ་དུ་གྲག་པར་གྱུར་པ་དེ་དག་ཀྱང་བྱང་ཆུབ་སེམས་དཔའ་ཡིན་པར་ཡིད་ལ་བྱས་ལ་བསྙེན་བཀུར་
བྱའོ། །དེའི་སྔོན་གྱི་ལས་ཀྱི་རྣམ་པར་སྨིན་པས་གཟུགས་མི་མཛེས་པ་དང་། ལོངས་སྤྱོད་མེད་པ་དང་། བློ་མེད་པ་དང་། སྲེད་པ་ཆེ་བ་དང་། སྡུག་པ་དང་བྲལ་བ་དང་། རྒྱལ་སྲིད་འཁྲུགས་པར་གྱུར་པ་གང་ཡིན་པ་དེ་དག་དང་། གླད་པ་ན་བ་གང་ཡིན་པ་དང་། ཟན་ཆད་པ་གང་ཡིན་
པ་དང་། གོས་ངན་པར་གྱུར་པ་གང་ཡིན་པ་དང་། ལུས་དང་སེམས་ལ་གནོད་པ་གང་ཡིན་པ་དང་། རེག་ན་མི་བདེ་བའི་མལ་བཅས་པ་གང་ཡིན་པ་དང་། སྤྱོ་བ་གང་ཡིན་པའི་ལས་ཀྱི་སྒྲིབ་པ་དེ་དག་ཐམས་ཅད་ཀྱང་ཏིང་ངེ་འཛིན་འདི་ཐོས་པའི་མཐུས་ཡོངས་སུ་ཟད་པར་འགྱུར་རོ། །དེས་ཀྱང་
འདི་ལྟར་སེམས་བསྐྱེད་པར་བྱ་སྟེ། བདག་གིས་སྔོན་འཁོར་བ་ན་འཁོར་བའི་ཚེ་སེམས་ཅན་རྣམས་ལ་སྡིག་པ་མི་དགེ་བ་རྣམ་པ་སྣ་ཚོགས་བསགས་པ་དེ་དག་སོ་སོར་བཤགས་པར་བྱའོ། །བསལ་བར་བྱའོ། །མི་བཅབ་པར་བྱའོ། །སངས་རྒྱས་དང་། ཆོས་དང་། དགེ་འདུན་ལ་དད་པ་

མི་ཕྱེད་པ་དང་ལྡན་པའི་སེམས་བསྐྱེད་པར་བྱ་སྟེ། རིགས་ཀྱི་བུའམ་རིགས་ཀྱི་བུ་མོ་དེའི་ལོངས་སྤྱོད་ཀྱི་འབྲས་བུ་མེད་པར་འགྱུར་བའི་ལས་ཀྱི་སྒྲིབ་པ་དང་། སངས་རྒྱས་དང་། ཆོས་དང་། དགེ་འདུན་དང་། ཉན་ཐོས་དང་། རང་སངས་རྒྱས་དག་དང་། ཕ་མ་
དག་ལ་སྡིག་པའི་ལས་བྱས་ཤིང་བསགས་པར་གྱུར་པ་གང་ཡིན་པ་དེ་དག་ཐམས་ཅད་ཀྱང་ཡོངས་སུ་ཟད་པར་འགྱུར་ཞིང་དབང་ཕྱུག་ཆེན་པོ་དག་ཀྱང་ཡང་དག་པར་འགྲུབ་པར་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་དེའི་སེམས་ཅན་དམྱལ་བའི་སྡུག་བསྔལ་མྱོང་བར་འགྱུར་བའི་ལས་
ཀྱི་སྒྲིབ་པ་དང་། སྡུག་པ་དང་བྲལ་བར་འགྱུར་བ་དང་། དམུས་ལོང་དུ་འགྱུར་བ་དང་། བུད་མེད་ཀྱི་དངོས་པོར་འགྱུར་བ་དང་། མཚན་གཉིས་པར་འགྱུར་བ་དང་། ཕྲག་དོག་དང་། ང་རྒྱལ་དང་། ཁྲོ་བའི་དབང་གིས་གཤིན་རྗེའི་འཇིག་རྟེན་དང་། ཡི་དགས་དང་། དུད་
འགྲོའི་སྐྱེ་གནས་སུ་འགྱུར་བ་གང་ཡིན་པ་དེ་དག་ཐམས་ཅད་ཀྱང་ཡོངས་སུ་ཟད་པར་འགྱུར་ཏེ། རིགས་ཀྱི་བུ་དེ་ལྟར་ན་ཏིང་ངེ་འཛིན་འདི་ནི་ཡོན་ཏན་ཐམས་ཅད་ཀྱི་འབྱུང་གནས་ཡིན་ནོ། །རིགས་ཀྱི་བུ་ཆོས་ཀྱི་རྣམ་གྲངས་འདི་ནི་ཡུན་རིང་དུ་གནས་པར་བྱེད་པ་དང་། རིགས་ཀྱི་བུ་དང་།
རིགས་ཀྱི་བུ་མོ་དེ་དག་ལ་སྲུང་བ་དང་། སྐྱོབ་པ་དང་། སྦེད་པར་བྱེད་པ་དང་། དེ་དག་ཐམས་ཅད་ཀྱི་ཡོན་ཏན་དང་། རེ་བ་ཐམས་ཅད་ཡོངས་སུ་རྫོགས་པར་བྱེད་པ་དང་། ལོངས་སྤྱོད་པ་དང་། དབང་ཕྱུག་དང་། བདེ་བ་ཆེན་པོར་བྱེད་པ་དང་། བསམ་པ་དང་འདོད་པ་ཐམས་ཅད་ཡང་
དག་པར་འགྲུབ་པར་བྱེད་པ་དང་། ལས་ཐམས་ཅད་ཟད་པར་བྱེད་པ་དང་། དུས་མ་ཡིན་པར་འཆི་བ་དང་། རྨི་ལམ་ངན་པ་ཐམས་ཅད་དང་། ནད་ཐམས་ཅད་རབ་ཏུ་ཞི་བར་བྱེད་པ་དང་། གཡུལ་ཐམས་ཅད་ལས་རྒྱལ་བར་བྱེད་པ་དང་། ཚེ་དང་། མདོག་དང་། སྟོབས་དང་།
བརྩོན་འགྲུས་དང་། མཐུ་ཆེ་བར་བྱེད་པ་དང་། གནོད་སྦྱིན་དང་། འབྱུང་པོ་དང་། མི་དང་མི་མ་ཡིན་པ་ཐམས་ཅད་དབང་དུ་བྱེད་པ་དང་། རིམས་དང་། དུག་དང་། མེ་དང་། ཆུ་ཐམས་ཅད་རབ་ཏུ་ཞི་བར་བྱེད་པ་དང་། ལུང་བསྟན་པའི་བར་དག་ཐོབ་པར་བྱེད་པའི་གཟུངས་ཀྱི་གསང་

སྔགས་གཞི་དག་ཡོད་དེ་དེ་དག་མཉན་ཅིང་བཟུང་སྟེ་བསྙེན་བཀུར་བྱེད་པ་དང་། ཀློག་པ་དང་། ཡི་གེར་འདྲི་བ་དང་། ཡི་གེར་འདྲིར་འཇུག་པའི་རིགས་ཀྱི་བུ་དང་། རིགས་ཀྱི་བུ་མོ་དག་ནི་ཡོན་ཏན་དེ་དག་ཐམས་ཅད་ཐོབ་པར་འགྱུར་རོ། །དེ་ནས་དེའི་ཚེ་ས་ཆེན་པོ་འདི་རྣམ་པ་དྲུག་ཏུ་
རབ་ཏུ་གཡོས་པ་དང་། ཇི་ལྟར་ལྷགས་པའི་འཁོར་དེ་དག་གིས་ཀྱང་དེ་བཞིན་གཤེགས་པའི་སྐུ་ལ་མེ་ཏོག་དང་། བདུག་སྤོས་དང་། སྤོས་དང་། མེ་ཏོག་ཕྲེང་དང་། ཕྱེ་མ་དང་། བྱུག་པ་དང་། རས་བཅོས་བུ་ཟུང་དག་གསོལ་ཏེ། ལེགས་སོ་ཞེས་བྱ་བ་གསོལ་ནས། བཅོམ་ལྡན་
འདས་ལེགས་སོ་ལེགས་སོ། །གཟུངས་ཀྱི་གསང་སྔགས་གཞི་དེ་དག་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ན་མཿསརྦ་ཏ་ཐཱ་ག་ཏཱ་ནཱན། ཏད་ཡ་ཐཱ། བུད་དྷེ། སུ་བུད་དྷེ། བུད་དྷ་མ་ཏེ། ལོ་ཀེ་བི་ལོ་ཀེ་ལོ་ཀ །ཨ་ཏི་ཀྲཱན་ཏེ། ས་ཏྭ་ཨ་བ་ལོ་ཀི་ནི། སརྦ་ཏ་ཐཱ་
ག་ཏ་ཨ་དྷིཥྛཱ་ན་ཨ་དྷིཥྛི་ཏེ། སརྦ་ཨཱ་ཤ་པ་རི་པཱུ་ར་ཎེ། བྱུ་ཏི་ན་དྷ་རེ། ན་ར་དེ་བ་པཱུ་ཛི་ཏེ། ཏ་ཐཱ་ག་ཏ་ཛྙཱ་ན་ད་དེ། ཏ་ཐཱ་ག་ཏ་ཨ་དྷིཥྛཱ་ནེ་ན། སརྦ་ལོ་ཀ་མ་སུ་ཁཱི་བྷ་བ་ཏུ། པཱུ་རྦ་ཀརྨ་ཀྵཱ་པ་ཡ་ཏུ། རཀྵ་བྷ་བ་ཏུ། སརྦ་ཡེ་བྷྱ་སྟ་ཐཱ་ག་ཏ་ཨ་དྷིཥྛཱ་ནེ་ན་སྭཱ་ཧཱ། ཀྱེ་རིགས་ཀྱི་བུ་དག་གཟུངས་
ཀྱི་གསང་སྔགས་གཞི་འདི་དག་ནི་དེ་བཞིན་གཤེགས་པ་སུམ་ཁྲིས་གསུངས་ཤིང་བྱིན་གྱིས་བརླབས་པ་ཡིན་ནོ། །ངས་ཀྱང་ད་ལྟར་སེམས་ཅན་ཐམས་ཅད་ཀྱི་དོན་དང་། ཕན་པ་དང་། བདེ་བ་དང་། བསྲུང་བ་དང་། བསྐྱབ་པ་དང་། སྦ་བ་དང་། ནད་ཐམས་ཅད་རབ་ཏུ་ཞི་བར་བྱ་བ་
དང་། སངས་རྒྱས་ཀྱི་ཞིང་དུ་སྐྱེ་བར་བྱ་བའི་ཕྱིར་བཤད་དེ། གྲོགས་པོ་དག་གང་ལ་ལ་ཞིག་འདི་སྙམ་དུ་བདག་གིས་ཇི་ལྟར་ན་དེ་བཞིན་གཤེགས་པས་གསུངས་པའི་ཡོན་ཏན་དེ་དག་ཐམས་ཅད་འཐོབ་པར་འགྱུར་སྙམ་དུ་སེམས་པ་དེས་ནང་པར་སྔར་ལངས་ཏེ། སེམས་ཅན་ཐམས་ཅད་ལ་
སྙིང་བརྩེ་བའི་སེམས་དང་། སྙིང་རྗེའི་སེམས་དང་། བྱམས་པའི་སེམས་དང་། ཕྲག་དོག་དང་། ང་རྒྱལ་དང་། འཆབ་པ་དང་། ཁྲོ་བ་ཡོངས་སུ་སྤངས་པའི་སེམས་དང་། རྩེ་གཅིག་པའི་སེམས་ཀྱིས་སངས་རྒྱས་དང་བྱང་ཆུབ་སེམས་དཔའ་རྣམས་ལ་མཆོད་པ་ཤིན་ཏུ་རྒྱ་ཆེར་བྱས་ལ་

ཕྱོགས་བཅུའི་དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ། གང་འདོད་པ་ཡིད་ལ་བྱས་ནས་མེ་ཏོག་ལ་བཟླས་བརྗོད་ལན་བརྒྱ་རྩ་བརྒྱད་བྱ་ཞིང་དེ་བཞིན་གཤེགས་པ་ལ་རེ་རེ་ནས་དབུལ་བར་བྱའོ། །དེས་ན་དེའི་རེ་བ་ཐམས་ཅད་ཡང་དག་པར་འགྲུབ་པར་འགྱུར་རོ། །
རྨི་ལམ་ན་དེ་བཞིན་གཤེགས་པ་མཐོང་བར་ཡང་འགྱུར་རོ། །དམ་པ་གང་འདོད་པ་དེ་ཐོབ་པར་ཡང་འགྱུར་རོ། །འཆི་བའི་ཚེ་ན་དེ་བཞིན་གཤེགས་པ་མཐོང་བར་ཡང་འགྱུར་རོ། །ཤི་འཕོས་ནས་ཀྱང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །ཚེ་དང་སྟོབས་དང་། མདོག་དང་།
བརྩོན་འགྲུས་དང་ལྡན་པར་ཡང་འགྱུར་རོ། །དགྲ་ཐམས་ཅད་ཀྱང་དེའི་དབང་དུ་འགྱུར་རོ། །གཟུངས་འདི་བཤད་པ་ན་སྲོག་ཆགས་དྲུག་ཁྲི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ནས་དེ་དག་ཐམས་ཅད་ལས་ཀྱི་སྒྲིབ་པ་ཐམས་ཅད་ལས་རྣམ་པར་གྲོལ་ཞིང་བསམ་པ་ཐམས་ཅད་ཡོངས་སུ་
རྫོགས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་ཕྱོགས་བཅུར་རྣམ་པར་བལྟས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་དམ་འཆའ་བ་མི་འཇིགས་པའི་གཟི་བརྗིད་ཅེས་བགྱི་
བའི་གཟུངས་མཆིས་ཏེ། བདག་གིས་དེ་བཞིན་གཤེགས་པ་འཇིགས་མེད་བཀོད་པ་གཟི་བརྗིད་རྒྱལ་པོའི་སྤྱན་སྔར་དེ་བཟུང་ལགས་སོ། །བཟུང་ནས་ཀྱང་སེམས་ཅན་ཐམས་ཅད་ལ་བཤད་ལགས་སོ། །བཅོམ་ལྡན་འདས་དེང་སླན་ཆད་བདག་གིས་མངོན་པར་འཚལ་ཏེ། གང་
གི་རྣ་ལམ་དུ་གཟུངས་དེ་གྲག་པར་གྱུར་ཏམ། གློ་བར་ཆུད་པར་གྱུར་པ་དེའི་ལུས་ལ་ཉམ་ང་བའམ། ཉོན་མོངས་པ་སྣ་ཚོགས་སམ། བྲོ་ནད་དམ། རིམས་སམ། ལུས་བྲོ་འཚལ་བའམ། སེམས་གདུང་བའམ། དུས་མ་ལགས་པར་འགུམ་པའམ། ཆབ་ཀྱིས་འཇིགས་པའམ།
མཚོན་གྱིས་འཇིགས་པའམ། དུག་གིས་འཇིགས་པའམ། དུག་སྦྱར་མས་འཇིགས་པའམ། མཁའ་འགྲོ་མ་དང་། འབྱུང་པོས་འཇིགས་པའམ། གནོད་སྦྱིན་ནམ། དགྲ་རྣམས་སམ། མི་དང་མི་མ་ལགས་པ་དག་གིས་མཐོ་འཚམ་པའམ། རྣམ་པར་གཙེ་བའམ། གནོད་

པ་བགྱིད་པར་འགྱུར་བ་དེ་ནི་གནས་མ་མཆིས་ལགས་སོ། །དེའི་སླད་དུ་བཅོམ་ལྡན་འདས་ཀྱིས་བདག་ལ་རྗེས་སུ་གནང་བ་སྩོལ་ཅིག་དང་། བདག་གིས་ཆོས་སྨྲ་བ་དང་། ཆོས་ཉན་པ་དེ་དག་གི་དོན་དུ་ཉན་པ་རྣམས་དང་། རི་མོར་བགྱིད་པ་རྣམས་དང་། མཆོད་པར་བགྱིད་པ་རྣམས་
དང་། འཛིན་པར་བགྱིད་པ་རྣམས་ཀྱི་རེ་བ་ཐམས་ཅད་ཡོངས་སུ་རྫོགས་པར་བགྱིད་པ། བྱང་ཆུབ་སེམས་དཔའ་རྣམས་ཀྱི་དམ་བཅའ་བའི་ཕྱག་རྒྱ་དག་སྩལ་བར་བགྱིའོ། །ན་མཿསརྦ་ཏ་ཐཱ་ག་ཏཱ་ནཱན། སརྦ་བོ་དྷི་སཏྭཱ་ནཱན། ཨ་ར་ཧཱ་ཏཱ་ན། ཏདྱ་ཐཱ། ཨོཾ་བཛྲ་དྷ་ར། བཛྲ་ཀཱ་ཡ།
བཛྲ་བ་ལ། བཛྲ་ཏེ་ཛ། ཧཱུཾ་ཧཱུཾ། བཛྲ་པཱ་ཎི། ཏ་ཐཱ་ག་ཏ་ཨཱ་ཛྙཱ་མ་བ་ལཱ་ཡ། སྨ་ར་པྲ་ཏི་ཛྙཱ་མ། སརྦ་བྱཱ་དྷཱིན་སརྦ་པཱ་པཱན་ནཱ་ཤ་ཡ། དེ་ཧི་མེ། ཡ་ཐཻ་བ་སི་ཏམ་བ་རམ། ཡན་ཡ་མེ་བ་ཨ་བྷི་པྲཱ་ཡན་ཡཱ་ཙ་མི་ཏན་ཏ་མེ་བ་ས་མྲྀ་དྷྱ་ཏུ། ཧེ་ཧེ། ཏུ་རུ་ཏུ་རུ། ཨཱ་གཙྪ་ཨཱ་གཙྪ་
མཱ་པི་ལམ་བ། དར་ཥ་ཡ། བཛྲ་ཀཱ་ཡམ། དར་ཥ་ཡ་བཛྲ་ཀཱ་ཡམ། བུད་དྷ་ཨ་དྷིཥྛཱ་ནེ་ན་སྭཱ་ཧཱ། གཟུངས་འདི་བརྗོད་པ་ན་ས་ཆེན་པོ་འདི་མཐོ་བ་དང་དམའ་བར་གྱུར་ཏོ། །གནོད་སྦྱིན་དང་སྲིན་པོ་ཐམས་ཅད་ཀྱང་རབ་ཏུ་དངངས་སོ། །ལྷ་ཐམས་ཅད་དང་། མི་དང་མི་མ་ཡིན་པའི་
བར་དག་ཀྱང་ངོ་མཚར་དུ་གྱུར་ནས་སེམས་ཅན་ཆེན་པོ་རབ་ཏུ་གྲུབ་པར་བྱེད་པའི་གཟུངས་ཀྱི་གསང་སྔགས་གཞི་འདི་དག་བཤད་པ་ནི་ལེགས་སོ་ལེགས་སོ་ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་
ཏོ། །བཙུན་པ་བཅོམ་ལྡན་འདས་གང་ལ་ལ་ཞིག་བྱང་ཆུབ་སེམས་དཔའི་སའམ། ནོར་དང་། འབྲུ་དང་། ལོངས་སྤྱོད་ཀྱི་དབང་ཕྱུག་གམ། རྒྱལ་སྲིད་ཀྱི་དབང་ཕྱུག་གམ། རིག་སྔགས་འཆང་བ་ཉིད་དམ། ཚེ་དང་། སྟོབས་དང་། མདོག་དང་། བརྩོན་འགྲུས་དང་། ཚེ་རིང་
པོ་ཉིད་འཚལ་བ་དེས་སྔ་ནས་བསྙེན་པར་བགྱིས་ལ་དགུང་ཟླ་ཡར་གྱི་ངོ་ཚེས་བརྒྱད་ལ་ཙན་དན་དཀར་པོ་ལས་རྡོ་རྗེ་འཛིན་པ་རྟ་གང་དུ་དགོད་ཅིང་རྒྱན་ཐམས་ཅད་ཀྱིས་བརྒྱན་པ། སྙིང་གར་སྐུ་གདུང་སྩལ་བ། སྐུ་གདུང་དང་བཅས་པའི་རྡོ་རྗེ་འཛིན་པ་རིག་སྔགས་འཆང་ཡང་དག་པར་དབུགས་འབྱིན་

པར་བགྱིད་པ་བགྱིས་ལ། གཙང་མས་བདུག་སྤོས་ཀྱིས་བདུག་ཅིང་གདུགས་མཚན་གཅིག་ཏུ་སྨྱུང་བ་བགྱིས་ལ། དེ་ནས་ཚེས་བརྒྱད་ནས་ཚེས་བཅོ་ལྔའི་བར་དུ་དེ་བཞིན་གཤེགས་པའི་སྐུ་གཟུགས་བཞུགས་པའི་གནས་གཙང་མར་ཙན་དན་དཀར་པོའི་དཀྱིལ་
འཁོར་བགྱིས་ལ། བུམ་པ་གང་བ་བཞི་ཡང་གཞག་པར་བགྱི། ཕྱོགས་བཞིར་ཡང་རོ་དང་ལྡན་པ་དང་། དྲི་དང་ལྡན་པ་དང་། སྐྱེམས་དང་། འོ་ཐུག་གི་གཏོར་མ་དག་སྩལ་ལ་རད་པ་དཀར་པོ་བགོས་ཏེ། སེམས་རྩེ་གཅིག་ཏུ་བགྱིས་ནས། དུས་གསུམ་དུ་བདུག་སྤོས་དང་། མེ་ཏོག་
དང་། སྤོས་དང་། མར་མེ་དག་གིས་མཆོད་པ་ཆེན་པོ་བགྱི་ཞིང་། དེ་བཞིན་གཤེགས་པ་ཡང་མཆོད་པ་བགྱིས་ཏེ། དེ་བཞིན་གཤེགས་པ་ལ་ཕྱག་བགྱིས་ནས་སྣ་མའི་མེ་ཏོག་བརྒྱ་རྩ་བརྒྱད་ལ་བཟླས་བརྗོད་བརྒྱ་རྩ་བརྒྱད་བཟླས་ཤིང་། རེ་རེ་ནས་ལག་ན་རྡོ་རྗེ་ལ་བསྣུན་པར་
བགྱིའོ། །དེས་ན་སྒྲ་སྐད་ཆེན་པོ་འབྱུང་བར་འགྱུར་ཞིང་། དོག་ས་གཡོ་བ་དང་། འོད་ཟེར་དག་ཀྱང་འབྱུང་བར་འགྱུར་ཏེ། དེ་ནས་དམ་པ་ཅི་འཚལ་བ་ཡང་སྩལ་བར་བགྱིའོ། །བཟླས་བརྗོད་བགྱིས་པ་ཙམ་གྱིས་ལས་ཐམས་ཅད་དང་དགོས་པ་ཐམས་ཅད་ཀྱང་ཡང་དག་པར་འགྲུབ་པར་
འགྱུར་ལགས་སོ། །བྲོ་ནད་མ་མཆིས་པ་དང་། ཚེ་རིང་བ་དང་། སྡིག་པ་ཐམས་ཅད་དང་བྲལ་བར་འགྱུར་ཞིང་ཡོན་ཏན་སྟོང་ཡང་འཐོབ་པར་འགྱུར་ལགས་སོ། །འགུམ་པའི་ཚེ་ན་ཡང་སངས་རྒྱས་བཅོམ་ལྡན་འདས་སྟོང་མཐོང་བར་འགྱུར་ལགས་སོ། །བདག་མཐོང་བར་ཡང་སྩལ་
པར་བགྱི་ལགས་སོ། །དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་ལེགས་སོ་ཞེས་བྱ་བ་བྱིན་ཏེ། ལག་ན་རྡོ་རྗེ་ལེགས་སོ་ལེགས་སོ། །ཕྱག་རྒྱ་འདི་ནི་ལྷ་དང་བཅས་པའི་འཇིག་རྟེན་གྱིས་འདའ་བར་བྱ་བ་མ་ཡིན་ཏེ། འདི་ལ་སོམ་ཉི་མེད་པ་དང་། ཡིད་གཉིས་མེད་པ་དང་། ཐེ་ཙོམ་
མེད་པར་བྱའོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་ཏིང་ངེ་འཛིན་འདི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་སེམས་ཅན་ལ་གཟིགས་ཤིང་སངས་རྒྱས་ཀྱི་ཞིང་གི་བཀོད་པ་ཀུན་དུ་སྟོན་

པ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་དང་། བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དེ་ལས་ཏིང་ངེ་འཛིན་ཐམས་ཅད་དང་། གཟུངས་ཀྱི་སྒོ་ཐམས་ཅད་འཐོབ་པར་འགྱུར་བ་དང་། ལྷ་
རྣམས་དང་། ཀླུ་རྣམས་དང་། མི་རྣམས་དང་། གནོད་སྦྱིན་རྣམས་དང་། དྲི་ཟ་རྣམས་དང་། ཡི་དགས་རྣམས་དང་། དུད་འགྲོའི་སྐྱེ་གནས་སུ་སྐྱེས་པ་རྣམས་དང་། གཤིན་རྗེའི་འཇིག་རྟེན་པའི་སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བ་ལྷག་པར་གཡོ་བ་དང་བྲལ་བར་གཡོ་
བ་དག་རབ་ཏུ་ཤེས་ཤིང་། སེམས་ཅན་འདི་དག་ནི་བསོད་ནམས་སུ་ཉེ་བར་འགྲོ་བ་སྟེ་ལེགས་པར་སྤྱོད་པའི་ལས་བྱེད་པ། སངས་རྒྱས་དང་། ཆོས་དང་། དགེ་འདུན་དག་ལ་དད་པ་འཐོབ་པར་འགྱུར་བའོ། །འདི་དག་ནི་སེམས་ཅན་དམྱལ་བར་འགྲོ་བ་སྟེ། ཉེས་པར་སྤྱོད་པའི་ལས་བྱེད་པ། སྡིག་
པ་སྤྱོད་པར་བྱེད་པར་ཤེས་ནས་སྡིག་པའི་ལྟ་བར་གྱུར་པའི་སེམས་ཅན་དེ་དག་ལ་ཆོས་སྟོན་པར་བྱེད་ཅིང་། སྡིག་པ་ཐམས་ཅད་ལས་ཟློག་པར་བྱེད་པ་དང་། སངས་རྒྱས་ཀྱི་བྱང་ཆུབ་ལ་འགོད་པར་བྱེད་པ་དང་། བསམ་པ་ཐམས་ཅད་ཡོངས་སུ་རྫོགས་པར་བྱེད་པ་དང་། ཕྲག་དོག་དང་། ང་
རྒྱལ་དང་། ཁྲོ་བ་དང་། སེར་སྣ་དག་སེལ་བར་བྱེད་པ་དང་། སེམས་ཅན་དེ་དག་ཀྱང་སངས་རྒྱས་དང་། ཆོས་དང་། དགེ་འདུན་དག་ལ་དད་པ་རབ་ཏུ་ཐོབ་ནས་སངས་རྒྱས་ཀྱི་ཞིང་རྣམས་སུ་སྐྱེ་ཞིང་ནམ་དུ་ཡང་སྡུག་བསྔལ་ཉམས་སུ་མྱོང་བར་མི་འགྱུར་ལ། ཡིད་མི་བདེ་བར་མི་འགྱུར་བས་ན་
རིགས་ཀྱི་བུ་དེའི་ཕྱིར་ཏིང་ངེ་འཛིན་འདི་ནི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱི་རླབས་སེམས་ཅན་ལ་གཟིགས་ཤིང་སངས་རྒྱས་ཀྱི་ཞིང་གི་བཀོད་པ་ཀུན་ཏུ་སྟོན་པ་ཞེས་བྱ་སྟེ། འདི་ཐོས་པའི་སེམས་ཅན་རྣམས་ནི་ཕྱིར་མི་ལྡོག་པར་ངེས་པའི་ས་ཐོབ་པར་འགྱུར་རོ། །གསོལ་པ་བཅོམ་ལྡན་འདས་
ཅིའི་སླད་དུ། རིགས་ཀྱི་བུ་དང་རིགས་ཀྱི་བུ་མོ་དེ་དག་ལུང་བསྟན་པར་འགྱུར་ལགས། བཅོམ་ལྡན་འདས་དགྲ་བཅོམ་པ་ཉིད་ཀྱང་དཀའ་བ་ལགས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལྟ་ཅི་སྨོས་ཀྱང་མི་འཚལ་ལགས་ན་དེ་དག་གི་བསོད་ནམས་ཀྱི་ཕུང་པོ་དང་། དཀའ་བ་སྤྱོད་པ་ཇི་ཙམ་

ཞིག་ཏུ་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་དང་པོ་སེམས་བསྐྱེད་པ་ནས་ཉེ་བར་བཟུང་སྟེ། སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་།
བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱས་པ་གང་ཡིན་པ་དང་། མགོ་དང་། ལག་པ་དང་། རྐང་པ་དང་། མིག་དང་། ལུས་དང་། སྡུག་པའི་བུ་དང་། བུ་མོ་དང་།
ཆུང་མ་དང་། བྲན་དང་། བྲན་མོ་དག་ཡོངས་སུ་བཏང་བར་གྱུར་པ་གང་ཡིན་པ་བསོད་ནམས་མངོན་པར་འདུ་བྱ་བ་དང་། དགེ་བའི་རྩ་བ་མངོན་པར་འདུ་བྱ་བ་སྔ་མ་འདི་ནི། ཆོས་ཀྱི་རྣམ་གྲངས་འདི་ལ་མཆོད་པ་བྱེད་པ་དང་། བསྙེན་བཀུར་བྱེད་པ་དང་། ཡི་གེར་འདྲི་བ་
དང་། ཡི་གེར་འདྲིར་འཇུག་པ་དང་། ཀློག་པ་དང་། འཛིན་པའི་བསོད་ནམས་མངོན་པར་འདུ་བྱ་བ་དང་། གཞན་དག་ལ་ཡང་ཡང་དག་པར་སྟོན་པར་བྱེད་པའི་བསོད་ནམས་མངོན་པར་འདུ་བྱ་བ་གང་ཡིན་པ་དང་། ཆོས་སྨྲ་བ་དེ་དག་ལ་ཡང་མཆོད་པ་བྱེད་པ་དང་།
བསྙེན་བཀུར་བྱེད་པའི་བསོད་ནམས་མངོན་པར་འདུ་བྱ་བ་གང་ཡིན་པ་དེའི་བརྒྱའི་ཆར་ཡང་ཉེ་བར་མི་འགྲོའོ། །རིགས་ཀྱི་བུ་ངས་ཀུན་ཆུབ་པར་བྱས་ཤིང་། བཤད་པའི་ཆོས་དེ་དག་ཐམས་ཅད་ལ་བསྙེན་བཀུར་བྱེད་པ་དང་། བླ་མར་བྱེད་པ་དང་། རི་མོར་བྱེད་པ་དང་།
མཆོད་པ་བྱེད་པ་དང་། བསྙེན་བཀུར་བྱས་ཏེ་ཡི་གེར་འདྲི་བ་དང་། ཡི་གེར་འདྲིར་འཇུག་པ་གང་ཡིན་པ་དེ་བས་ནི་གང་ཞིག་ཆོས་ཀྱི་རྣམ་གྲངས་འདི་ཡི་གེར་འདྲི་བ་དང་། ཡི་གེར་འདྲིར་འཇུག་པ་དང་། ཀློག་པ་དང་། མཆོད་པ་བྱེད་པ་དང་། ཡང་དག་པར་སྟོན་པར་བྱེད་པ་དང་།
ཉན་པར་བྱེད་ན་དེ་ལས་བསོད་ནམས་མངོན་པར་འདུ་བྱ་བ་ཆེས་མང་དུ་ཡོངས་སུ་སྡུད་པར་འགྱུར་ཏེ། དེས་ན་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་ཏོ། །དེ་ཅིའི་ཕྱིར་ཞེ་ན། ཆོས་ཀྱི་རྣམ་གྲངས་འདི་ཉན་པ་དང་། འཛིན་པ་དང་། འཆང་

བ་དང་། ཀློག་པ་དང་། མཆོད་པ་དང་། ཡི་གེར་འདྲི་བ་དང་། ཡི་གེར་འདྲིར་འཇུག་པའི་བསོད་ནམས་ནི་དེ་ལྟར་དཀའ་བ་ཡིན་པའི་ཕྱིར་རོ། །རིགས་ཀྱི་བུ་སེམས་ཅན་གང་དག་སྡིག་པ་ཀུན་ཏུ་སྤྱོད་པ་དང་། བཟའ་བ་དང་། བཏུང་བ་དང་། བྲོ་གར་ལ་མངོན་
པར་དགའ་བ་དང་། མི་སྡུག་པ་ལ་སྡུག་པར་འདུ་ཤེས་པ་དང་། འདོད་པ་དང་། ཁྲོ་བ་དང་། གནོད་སེམས་མང་བ་དང་། མི་བདེ་བ་ལ་བདེ་བར་འདུ་ཤེས་པ་དང་། མཚོན་ཆ་དང་། སྤྱོ་བ་དང་། བསྡིགས་པ་དང་། རྡེག་པ་ལ་མངོན་པར་དགའ་བ་དང་། ཤེས་པར་
མི་འགྱུར་བ་དང་། ཡིད་ལ་བྱེད་པར་མི་འགྱུར་བ་དེ་དག་ནི་སྡིག་པའི་ལས་ཀྱི་གཞི་དེ་དང་། མི་ཤེས་པ་དེས་མི་དགེ་བའི་བཤེས་གཉེན་གྱིས་ཡོངས་སུ་ཟིན་ཅིང་རྒ་བ་དང་། ན་བ་དང་། མྱ་ངན་དང་། འཆི་བས་ཡོངས་སུ་ཟིན་པས་འཆི་བའི་ཚེ་ན་ཡོངས་སུ་གདུང་བར་
འགྱུར་ཏེ། དམིགས་པ་ན་སོ་སོ་ནས་དུར་ཁྲོད་དང་འདྲ་བ་ཁོ་ནར་མཐོང་ཞིང་། དགེ་བའི་སེམས་བསྐྱེད་པར་ཡང་མི་འགྱུར་ལ། དད་པ་མི་ཕྱེད་པ་ཐོབ་པར་ཡང་མི་འགྱུར་ཏེ། དེ་དག་དེ་ནས་ཤི་འཕོས་ནས་ཀྱང་། སྡུག་བསྔལ་དག་ཉམས་སུ་མྱོང་བར་འགྱུར་བས་ན་
ལུང་བསྟན་པའི་དགེ་བའི་རྩ་བ་མེད་པ་དང་། དེ་བཞིན་གཤེགས་པ་མ་མཐོང་བ་དང་། ལུང་བསྟན་པ་མ་ཐོབ་པ་དག་གིས་ནི་ཆོས་ཀྱི་རྣམ་གྲངས་འདི་མཉན་པ་དང་། རི་མོར་བྱ་བ་དང་། མཆོད་པར་བྱ་བ་དང་། གཟུང་བ་དང་། ཡི་གེར་འདྲི་བ་དང་། ཡི་གེར་
འདྲིར་གཞུག་པ་དང་། དད་པར་ཡང་མི་ནུས་ལ། ཆོས་སྨྲ་བ་དེ་ལ་ཡང་བསྙེན་བཀུར་བྱ་བ་དང་། བླ་མར་བྱ་བ་དང་། རི་མོར་བྱ་བ་དང་། མཆོད་པར་བྱ་བར་ཡང་མི་ནུས་སོ། །རིགས་ཀྱི་བུ་གང་དུ་ཆོས་ཀྱི་རྣམ་གྲངས་འདི་རབ་ཏུ་སྤྱོད་པར་འགྱུར་བའི་ཡུལ་དེར་ནི་
དེ་བཞིན་གཤེགས་པའི་མཛད་པ་འབྱུང་བར་འགྱུར་རོ། །དེ་ནས་ཇི་ལྟར་ལྷགས་པའི་འཁོར་དེ་དག་གིས་བཅོམ་ལྡན་འདས་ལ་ལེགས་སོ་ཞེས་བྱ་བ་གསོལ་ཏོ། །བཅོམ་ལྡན་འདས་ལེགས་སོ་ལེགས་སོ། །བཅོམ་ལྡན་འདས་བདག་ཅག་གིས་ཀྱང་ཆོས་སྨྲ་བ་དེ་དང་།

ཆོས་ཉན་པ་དེ་དག་ལ་དེ་བཞིན་གཤེགས་པའི་མཛད་པས་བསྙེན་བཀུར་བགྱི། བླ་མར་བགྱི། རི་མོར་བགྱི། མཆོད་པར་བགྱི་ཞིང་བདེ་བའི་ཡོ་བྱད་ཐམས་ཅད་ཀྱང་ཉེ་བར་བསྒྲུབ་པར་བགྱི་ལགས་སོ། །ཆོས་ཀྱི་རྣམ་གྲངས་འདི་ཡང་རྒྱས་པར་
བགྱི། བསྲུང་བར་བགྱི་སྟེ། དེས་ན་ཆོས་ཀྱི་རྣམ་གྲངས་འདི་ཡུན་རིང་དུ་གནས་པར་ཡང་འགྱུར་ལགས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཇི་ལྟར་ལྷགས་པའི་འཁོར་རྣམས་ལ་རྣམ་པར་གཟིགས་ཏེ། བཀའ་སྩལ་པ། ཀྱེ་རིགས་ཀྱི་བུ་དག་ལེགས་སོ་
ལེགས་སོ། །ཁྱེད་ཅག་གིས་དེ་བཞིན་དུ་གྱིས་ཤིག །གནོད་པ་བྱེད་པ་དང་། བརྙས་པ་དང་། གཤེ་བ་དང་། བསྡིགས་པ་དང་། མཚོན་འབྱིན་པ་དང་། རྒྱ་འགལ་བར་བྱེད་ན་ཡང་ལུས་དང་། སྲོག་ལ་མི་ལྟ་བར་བྱས་ལ་ཆོས་ཀྱི་རྣམ་གྲངས་འདི་མཉན་པར་
བྱ། ཡི་གེར་བྲི་བར་བྱ། ཡི་གེར་འདྲིར་གཞུག་པར་བྱ། བཀླག་པར་བྱའོ། །ཆོས་སྨྲ་བ་དེ་ལ་ཡང་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱའོ། །ཡུལ་ཕྱོགས་དེ་དང་། གླིང་དེ་དང་། གྲོང་ཁྱེར་དེ་དག་ཀྱང་འཇིགས་པ་དང་། གནོད་པ་དང་། འགོ་བའི་ནད་
དང་། འཁྲུག་པ་དག་ལ་བསྲུང་བར་བྱའོ། །རིགས་ཀྱི་བུ་དང་། རིགས་ཀྱི་བུ་མོ་དེ་དག་ལ་ཡང་རྟག་པར་རྒྱུན་དུ་བསམ་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །བསྐལ་པ་གྲངས་མེད་སྟོང་ཕྲག་བྱེ་སྙེད་དུ། །
སངས་རྒྱས་འབྱུང་བ་ལན་འགའ་རྙེད་པ་ལ། །ཕྱི་མའི་དུས་ན་འགྱོད་པར་མི་འགྱུར་བར། །རིགས་ཀྱི་བུ་རྣམས་བག་ཡོད་ཆོས་ཉོན་ཅིག །ཡོན་ཏན་ཉན་ཅིང་མངོན་པར་དད་བྱེད་པ། །དེ་དག་གིས་ནི་ཏིང་འཛིན་རྙེད་མི་དཀའ། །གང་གིས་རྐང་གཉིས་གཙོ་བོ་རྣམས་ལ་ནི། །བསྐལ་
པ་བྱེ་བ་གང་གཱའི་བྱེ་སྙེད་དུ། །ནོར་དང་འབྲུ་དང་དེ་བཞིན་གོས་དང་རྒྱན། །སྤོས་དང་ཕྲེང་བ་བྱུག་པ་ཕུལ་བ་བས། །གང་གིས་མདོ་སྡེ་འདི་ལ་དད་བྱས་ཏེ། །ཉན་ཅིང་ཀློག་ལ་ཡི་གེར་འདྲི་བྱེད་པ། །དེ་ལ་བསོད་ནམས་ཚད་ནི་ཡོད་མིན་ཏེ། །བདེ་བར་གཤེགས་པས་དེ་སྙེད་

ཚད་མ་གསུངས། །རྟག་ཏུ་བག་ཡོད་དགོན་པར་སྟེན་བྱེད་ཅིང་། །སེམས་གཞན་མེད་པར་བསམ་གཏན་དག་སྒོམ་དང་། །སྡུག་པའི་བུ་དང་བུ་མོ་སྦྱིན་བྱེད་ཅིང་། །ལག་པ་རྐང་པ་ཡོངས་སུ་གཏོང་བ་བས། །གང་སུ་མདོ་སྡེ་འདི་ནི་འཛིན་བྱེད་པ། །དེ་ནི་དེ་བས་བསོད་ནམས་
མང་པོ་འཐོབ། །མདོ་མཆོག་འདི་ནི་ནོར་སྦྱིན་བྱེད་པ་སྟེ། །དེ་ཡི་ངན་སོང་ཀུན་ཀྱང་རྟག་ཏུ་སྤངས། །འདི་ནི་ནོར་དང་འབྲུ་སྦྱིན་བྱེད་པ་སྟེ། །གང་ཞིག་མདོ་སྡེ་རྣམ་དག་འདི་འཛིན་པ། །དེ་ལ་ཡོན་ཏན་ཀུན་ཀྱང་མི་དཀོན་ཞིང་། །དེ་ལ་ཚེ་སྟོབས་བརྩོན་འགྲུས་མོད་པ་ཡིན། །
འདྲེན་པ་སངས་རྒྱས་འོད་དཔག་མེད་མཐོང་ཞིང་། །ངས་དེ་སངས་རྒྱས་བྱང་ཆུབ་ལུང་ཡང་བསྟན། །དེ་ལ་ནམ་ཡང་སྡིག་པ་ཡོད་མིན་ཞིང་། །བདེ་བ་ཅན་གྱི་འཇིག་རྟེན་ཁམས་ཀྱང་མཐོང་། །དེ་ལ་རྟག་ཏུ་ལས་གང་འབྱུང་འགྱུར་བ། །སེམས་གདུང་ལུས་ལ་ན་བའམ་དེ་བཞིན་དུ། །
ཀླད་པ་ན་བས་ཐམས་ཅད་ཟད་འགྱུར་ཞིང་། །དེ་ནི་ནམས་ཀྱང་རྣམ་པར་ལྟུང་མི་འགྱུར། །དེས་ནི་མཐོང་བའི་ཆོས་ལའང་ཡོན་ཏན་ཀུན། །ཇི་ལྟར་བསམས་ཤིང་འདོད་པས་འཐོབ་པར་འགྱུར། །དེ་ལྟར་རྟག་ཏུ་དགེ་སློང་ཕོ་མོ་དང་། །དགེ་བསྙེན་རྣམས་དང་རྒྱལ་པོས་
རྟག་ཏུ་ནི། །མི་ཡི་དབང་པོ་དེ་བཞིན་གཤེགས་པ་ལྟར། །ཆོས་སྨྲ་བ་ལ་རྗེས་སུ་གུས་བྱས་ཏེ། །མདོ་སྡེ་འདི་ནི་རྟག་ཏུ་གཟུང་བྱ་ཞིང་། །འཛིན་པ་ལ་ཡང་རྟག་ཏུ་བསྙེན་བཀུར་བྱ། །སྤོས་དང་ཕྲེང་བ་བྱུག་པ་རྣམས་ཀྱིས་ནི། །བསྙེན་བཀུར་བྱས་ཏེ་ཡི་གེར་འདྲིར་ཡང་
གཞུག །ཕྱི་མའི་དུས་ལ་རྒ་ནས་གདུངས་གྱུར་ལ། །འཁྲུག་པ་སྟོང་ཕྲག་དུ་མས་གཡེན་སྤྱོ་ཞིང་། །སེམས་དམྱལ་ཡི་དགས་རྣམས་སུ་ཡོངས་འཁྱམ་དང་། །ཟ་མ་མ་ནིང་དམད་པར་བྱ་བ་དང་། །དམུས་ལོང་ཉིད་དང་རོ་དང་ཁྱི་ཡི་དྲི། །རིགས་དམའ་བུད་མེད་
རྣམས་སུ་སྐྱེ་བར་བྱེད། །ཕྲག་དོག་ཆེ་ཞིང་རྟག་ཏུ་སྡིག་བྱེད་ལ། །ཁྲོ་བས་ཟིལ་ནོན་རྟག་ཏུ་སེར་སྣ་ཅན། །སངས་རྒྱས་ཆོས་ལ་གུས་པར་མ་བྱས་པས། །དེ་ནི་དེ་འདྲའི་རིགས་སུ་སྐྱེ་འགྱུར་ལ། །དེར་ཡང་སྡུག་བསྔལ་ཚོར་བ་མྱོང་འགྱུར་ཞིང་། །དེ་ནི་ཕྱི་མའི་དུས་

ལའང་གདུང་བར་འགྱུར། །དེ་ཕྱིར་གང་དག་འཛིན་ཅིང་སྟོན་བྱེད་པ། །དེ་དག་གིས་ནི་རྟག་ཏུ་མཆོད་པར་བྱ། །གང་གིས་དེ་ལ་ཡོངས་སུ་སྤྱོ་བ་དང་། །སྨད་ཅིང་བརྡེགས་ལ་བཅིང་བ་བྱས་གྱུར་པ། །དེ་ནི་ང་ཡང་ཡོངས་སུ་སྤྱོས་པ་ཡིན། །
འཛིན་ལ་ཕུ་དུད་བྱས་ན་ང་ལའང་བྱས། །དེ་ཕྱིར་དེ་དག་གིས་ནི་ཆོས་སྨྲ་དང་། །གང་ཞིག་འདི་འཛིན་འདྲི་ཞིང་ཀློག་བྱེད་པ། །དེ་དག་ལ་ནི་རྟག་ཏུ་བསྙེན་བཀུར་ཞིང་། །ཚིག་འཇམ་སྙན་པའང་རྒྱུན་དུ་བརྗོད་པར་བྱ། །དེ་ནས་བྱང་ཆུབ་སེམས་དཔའ་སེམས་དཔའ་
ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རྣམ་པར་ལྟ་བའི་ཆོ་འཕྲུལ་ཞེས་བགྱི་བའི་གཟུངས་མཆིས་པར་རྗེས་སུ་དྲན་ཏེ།
བདག་གིས་སྔོན་དེ་བཞིན་གཤེགས་པ་འོད་མཛད་ཡེ་ཤེས་ཏོག་ཅེས་བགྱི་བའི་སྤྱན་སྔར་དེ་ཐོས་ཤིང་བཟུང་ལགས་སོ། །དེ་མཉན་ཅིང་བཟུང་ལ་བཅངས་ཤིང་བཀླགས་ཏེ། གཞན་དག་ལ་ཡང་བསྒྲགས་ཤིང་བསྙེན་བཀུར་བགྱིས་ནས་ཡི་གེར་བྲིས་སམ། ཡི་གེར་འདྲིར་
སྩལ་ན། ཕྱིར་མི་ལྡོག་པའི་ས་འཐོབ་པར་འགྱུར་ཞིང་། དེ་བཞིན་གཤེགས་པས་གསུངས་པའི་ཡོན་ཏན་དེ་དག་ཐམས་ཅད་ཀྱང་འཐོབ་པར་འགྱུར། དེས་ཇི་ལྟར་བསམས་པ་ཐམས་ཅད་ཀྱང་ཡང་དག་པར་འགྲུབ་པར་འགྱུར། དེའི་ལས་ཀྱི་སྒྲིབ་པ་ཐམས་ཅད་ཀྱང་
བྱང་བར་འགྱུར། ཏིང་ངེ་འཛིན་ཀྱང་འཐོབ་པར་འགྱུར། བྲོ་ནད་རྣམས་དང་བྲལ་བར་ཡང་འགྱུར། སངས་རྒྱས་མཐོང་བ་དང་། བྱང་ཆུབ་སེམས་དཔའ་ཡང་མཐོང་བར་འགྱུར་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་
ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱོད་ལ་དེ་བཞིན་གཤེགས་པས་བྱིན་གྱིས་བརླབས་ཟིན་གྱིས་ཤོད་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་

པོ་འཕགས་པ་སྤྱན་རས་གཟིགས་དབང་ཕྱུག་གིས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ་གསང་སྔགས་ཀྱི་གཞི་འདི་དག་སྨྲས་སོ། །ན་མཿསརྦ་ཏ་ཐཱ་ག་ཏཱ་ནཱན། སརྦ་ཨཱ་ཤཱ་པ་རི་པཱུ་ར་ཀཱ་ནཱན། ན་མ་ཨཱརྱཱ་བ་ལོ་ཀི་ཏེ། ཤྭ་རཱ་ཡ། བོ་དྷི་
ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏད་ཡ་ཐཱ། ཧ་ཧ་ཧ། མ་མ་མ། དྷི་རི་དྷི་རི་དྷི་རི། ཤཱན་ཏེ། བྲ་ཤཱན་ཏེ། སརྦ་པཱ་པཀྵ་ཡང་ཀ་རི། ཨ་བ་ལོ་ཀཱ་ཡ། ཀཱ་རུ་ཎི་ཀ། བོ་དྷི་ཙིཏ་ཏ་མ་མ་ན་སི་ཀུ་རུ། བྱ་བ་ལོ་ཀཱ་ཡ། མཱ་མ། སྨ་ར་སྨ་
ར། ཡན་ཏྭ་ཡཱ་པཱུརྦེ། སཏྱ་ཨ་དྷིཥྛཱ་ནཾ་ཀྲྀ་ཏེན། ཏེ་ནས་ཏྱེ་ན། པ་ཙ་ནེ་ན། སརྦ་ཨཱ་ཤཱ་མེ་པ་རི་པཱུ་ར་ཡ། བུད་དྷ་ཀྵེ་ཏྲམ་པ་རི་ཤོ་དྷ་ཡ། མ་མེ་ཀ་ཤྩིད་བི་ཧེ་ཐཾ་ཀ་རོ་ཏུ། བུད་དྷ་ཨ་དྷིཥྛཱ་ནེན་སྭཱ་ཧཱ། ཏད་ཡ་ཐཱ། ཏེ་ཛེ་ཏེ་ཛེ། མ་ཧཱ་ཏེ་ཛེ། ཡན་མ་མ་ཀཱ་ཡ་
དུ་ཤྩ་རི་ཏམ་བཱ། ཝཱག་དུཤྩ་རི་ཏ་མ་བཱ། མ་ནོ་དུཤྩ་རི་ཏམ་བཱ། དཱ་རི་དྲྱམ་བཱ། ཏད་ས་ཀྵཱ་པ་ཡ། ཨ་ལོ་ཀ་ཡ། བི་ལོ་ཀ་ཡ། ཏ་ཐཱ་ག་ཏ་དར་ཥ་ཎན་ཙ། ཨ་ཧ་མ་དྷི་ཀཱཾ། ཀྵཱ་མི། བོ་དྷི་སཏྱ་དར་ཥ་ཎམ། དྷུ་དྷུ་མ། ད་དས་སྭ་མེ་ད་ར་ཥ་ཎམ།
སརྦ་མེ་ཀུ་ཤ་ལ། ཨ་བྷི་བར་དྷ་ན་ཏུ། ན་མཿསརྦ་ཏ་ཐཱ་ག་ཏཱ་ནཱན། ན་མ་ཨཱལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། སྨ་ར་པྲ་ཏི་ཛྙཱ་མ་སཏྭ། སི་དྷྱན་ཏུ་མན་ཏྲ་པ་དཱ་སྭཱ་ཧཱ། གཟུངས་འདི་བརྗོད་པ་ན་ས་ཆེན་པོ་འདི་ཡང་རབ་ཏུ་གཡོས་ཤིང་ག་ཞའི་སྒྲ་ཆེན་པོ་
དང་། ལྷའི་མེ་ཏོག་གི་ཆར་དག་ཀྱང་མངོན་པར་རབ་ཏུ་བབ་པར་གྱུར་ཏོ། །ཐམས་ཅད་དང་ལྡན་པའི་འཁོར་དེས་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ལེགས་སོ་ལེགས་སོ། །སེམས་ཅན་ཆེན་པོ་ཁྱོད་ཀྱིས་སེམས་ཅན་ཐམས་ཅད་བསྐྱབ་པའི་ཕྱིར་རེ་བ་
ཐམས་ཅད་ཡོངས་སུ་རྫོགས་པར་བྱེད་པ། འཇིགས་པ་ཐམས་ཅད་ལས་སྲུང་བར་བྱེད་པ། ལས་ཐམས་ཅད་བྱང་བར་བྱེད་པ་དང་། སྡང་བ་དང་རྨི་ལམ་ངན་པའི་གནོད་པ་ཐམས་ཅད་རབ་ཏུ་ཞི་བར་བྱེད་པའི་གཟུངས་འདི་ལེགས་པར་སྨྲས་སོ། །བདག་ཅག་

ཐམས་ཅད་ཀྱིས་ཀྱང་གཟུང་བར་བྱ། བསྙེན་བཀུར་བྱའོ། །སྤྱན་རས་གཟིགས་དབང་ཕྱུག་གིས་སྨྲས་པ། རིགས་ཀྱི་བུ་དག་གང་ལ་ལ་ཇི་ལྟར་དེ་བཞིན་གཤེགས་པས་ཡོངས་སུ་བསྒྲགས་པའི་ཡོན་ཏན་དེ་དག་མངོན་པར་འདོད་ཅིང་ལུང་
བསྟན་པ་དང་། ཁོ་བོ་ཡང་མངོན་སུམ་དུ་མཐོང་བ་དང་། ཏིང་ངེ་འཛིན་འཐོབ་པ་དང་། སངས་རྒྱས་དང་བྱང་ཆུབ་སེམས་དཔའ་མཐོང་བ་དང་། ལོངས་སྤྱོད་དང་དབང་ཕྱུག་འཐོབ་པ་དང་། སངས་རྒྱས་ཀྱི་ཞིང་དུ་སྐྱེ་བར་འདོད་པ་དེས་ཟླ་བ་ཡར་གྱི་ངོ་ལ་ལུས་ལེགས་
པར་ཁྲུས་བྱས་ཤིང་གཙང་ལ། བསྙེན་ཏེ་གནས། འཕགས་པ་ཡན་ལག་བརྒྱད་པ་ལ་གནས་པར་བྱས་ལ་ཚེས་བརྒྱད་ནས་བརྩམས་ཏེ། དེ་བཞིན་གཤེགས་པས་བྱིན་གྱིས་བརླབས་པའི་ས་ཕྱོགས་སུ་སྤོས་དང་། མེ་ཏོག་དང་། རྒྱལ་མཚན་དང་། བ་དན་
དག་དང་། བུམ་པ་གང་བ་དག་གིས་ས་ཕྱོགས་དེ་དང་། ཆོས་སྨྲ་བ་དེ་ཡང་མཆོད་པ་བྱས་ནས་ལུས་ལེགས་པར་ཁྲུས་བྱས་པ་གཙང་མས་གོས་དཀར་པོ་བགོས་ཏེ། མེ་ཏོག་དང་། བདུག་སྤོས་དང་། སྤོས་དང་། མེ་ཏོག་ཕྲ