Kinh tạng Tây Tạng (Kangyur Đại Học) — 046_མདོ་སྡེ།_ཁ

པར་འཇིག་པར་མཛད་པ་མེད། །ཕུང་པོ་འདི་དང་ཁམས་རྣམས་འདི་དག་དང་། །སྐྱེ་མཆེད་འདི་རྣམས་གཞན་དུ་འགྱུར་བ་མེད། །གང་དག་སྔོན་ཆད་ཉེས་ལྡན་དུག་བཅས་པ། །དེ་དག་དེ་ནི་དུག་མེད་འགྱུར་
བ་མེད། །དེ་ནས་སྨད་འཚོང་མའི་བུ་མོ་གསེར་མཆོག་འོད་དཔལ་གྱིས་ཚིགས་སུ་བཅད་པ་དེ་དག་སྨྲས་ནས། ཡང་འཇམ་དཔལ་གཞོན་ནུར་གྱུར་པའི་རྐང་པ་ལ་མགོ་བོས་ཕྱག་བྱས་ཏེ། ཡང་འཇམ་དཔལ་གཞོན་ནུར་གྱུར་པ་ལ་བསྐོར་བ་བྱས་ནས། ཚོང་
དཔོན་གྱི་བུ་འཇིགས་བྱིན་དང་། ལྷན་ཅིག་ཏུ་ཤིང་རྟ་ལ་ཞོན་ཏེ། དེ་ལྟ་བུའི་འབྱོར་པ་ཉིད་ཀྱིས་སྐྱེད་མོས་ཚལ་གྱི་སར་སོང་ངོ་། །འཇམ་དཔལ་གཞོན་ནུར་གྱུར་པས་ཀྱང་ཐམས་ཅད་དང་ལྡན་པའི་འཁོར་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན།
ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་སོ། །ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས།
དེ་དག་ལ་འདི་སྐད་ཅེས་སྨྲས་སོ། །གྲོགས་པོ་དག་གང་དག་ཆོས་ཉན་པར་དགའ་བ་རྣམས་དེ་ཡང་ཕྱི་དྲོའི་དུས་ཀྱི་ཚེ། དེ་བཞིན་གཤེགས་པའི་སྤྱན་སྔར་དེང་ཤིག །དེ་སྐད་ཅེས་སྨྲས་ནས། ས་ཕྱོགས་དེ་ནས་ལངས་ཏེ། རང་རང་གི་གནས་ག་ལ་བ་དེ་ལོགས་སུ་

སོང་ངོ་། །དེ་ནས་སྨད་འཚོང་མའི་བུ་མོ་གསེར་མཆོག་འོད་དཔལ་དང་། ཚོང་དཔོན་གྱི་བུ་འཇིགས་བྱིན་གཉིས་ལྷན་ཅིག་ཏུ་སྐྱེད་མོས་ཚལ་དུ་ཕྱིན་པ་དང་། དེར་མེ་ཏོག་གི་ཆལ་བར་བཀྲམ་སྟེ་བདུག་པས་བདུགས། བླ་རེ་བྲེས་ནས་གདུགས་དང་། རྒྱལ་མཚན་
དང་། བ་དན་སྣ་ཚོགས་ཀྱིས་ལེགས་པར་བརྒྱན་ཏེ། བཟའ་བཏུང་འབྱོར་པ་དག་ཀྱང་བཤམས་ནས། དགའ་བའི་རྩེད་མོ་དང་རྗེས་སུ་འཐུན་པའི་སིལ་སྙན་དང་། ཕེག་རྡོབ་པར་གླུ་དབྱངས་ལེན་པར་བྱེད་ཅིང་སྐྱེད་མོས་ཚལ་ན་གནས་པར་གྱུར་ཏོ། །དེ་དག་གིས་
ཟོས་ཤིང་འཐུངས་ནས་རབ་ཏུ་མྱོས་པར་གྱུར་པ་དང་། སྨད་འཚོང་མའི་བུ་མོ་གསེར་མཆོག་འོད་དཔལ། ཚོང་དཔོན་གྱི་བུ་འཇིགས་བྱིན་གྱི་པང་པར་སྔས་བཅས་ཏེ་ཉལ་ལོ། །དེ་ནས་བུ་མོ་དེས་མངོན་པར་ཤེས་པའི་སྟོབས་ཀྱིས་རང་གི་ལུས་རྙིས་པར་བསྟན་ནས།
དེས་འཆི་བའི་འདུ་ཤེས་བསྐྱེད་དེ། དེའི་ལུས་ཐམས་ཅད་མི་སྡུག་པར་གྱུར་ནས། རོ་མྱགས་པ་འདྲ་བར་སྣང་ཞིང་དེའི་རྣ་བའི་བུ་ག་གཉིས་དང་། མིག་གི་དབང་པོ་དང་། སྣའི་ནང་ནས་མི་གཙང་བའི་དྲི་མི་ཞིམ་པ་དག་འབྱུང་ཞིང་བྱུང་ནས་ཀྱང་ལུས་ཐམས་ཅད་ལ་ཁྱབ་
པར་གྱུར་ཏོ། །དེའི་ཁའི་ནང་ནས་ཀྱང་དྲི་མནམ་པོ་དག་བྱུང་སྟེ། དྲི་མནམ་པོ་དེ་དག་གིས་སྐྱེད་མོས་ཚལ་དེ་ཐམས་ཅད་ཀྱང་ཁྱབ་པར་གྱུར་ཏོ། །སྤུའི་ཁུང་བུ་ཐམས་ཅད་ནས་ཀྱང་ཁྲག་དང་རྣག་མནམ་པོ་དག་འཛག་གོ། །ལྟོ་བ་དང་ལྟེ་བའི་དབུས་རྡོལ་བ་ནས་
ཀྱང་མཚེར་པ་དང་རྒྱུ་མ་ཐམས་ཅད་བྱུང་ངོ་། །རྐུབ་དང་མདོམས་ནས་ཀྱང་བཤང་གཅི་དག་འབྱུང་ཞིང་འཛག་གོ། །དེའི་སྤྱི་བོ་ནས་ཀྱང་གླད་པ་འཛག་གོ། །རྐང་ལག་གི་སོར་མོ་རྣམས་ལ་ཡང་སྦྲང་མ་སྔོན་པོ་དག་རྒྱུ་བར་གྱུར་ཏོ། །དེ་ནས་ཚོང་དཔོན་གྱི་བུ་
འཇིགས་བྱིན་གྱིས། བུ་མོ་དེའི་ལུས་ལ་དེ་ལྟ་བུའི་གནས་སྐབས་སུ་གྱུར་པ་དག་མཐོང་ངོ་། །མཐོང་ནས་ཀྱང་འཇིགས་སྐྲག་སྟེ་ཡི་ཆད་ཅིང་སྐྱབས་མེད་རྟེན་མེད་དཔུང་གཉེན་མེད་པར་གྱུར་ནས། སྐྱབས་ཚོལ་ཞིང་འཇིགས་པ་ཆེན་པོས་སྐྲག་པར་གྱུར་ནས་འདར་ཞིང་

ཆོ་ངེས་འདེབས་པར་གྱུར་ཏོ། །དེ་འཇིགས་པ་ཆེན་པོ་སྐྱེས་པའི་རྒྱུ་ནི་གཉིས་ཏེ། སོ་སོའི་སྐྱེ་བོ་ཉིད་ཡིན་པ་དང་། འཇིགས་པའི་སྐྱོན་དེ་དག་མཐོང་བའོ། །བདག་རེ་ཤིག་ན། བུ་མོ་འདིའི་ལེ་ལན་གྱིས། རྒྱལ་པོ་མ་སྐྱེས་དགྲས་བསད་
པར་འོང་ངོ་སྙམ་ནས། དེས་བུ་མོ་དེ་པང་པ་ནས་དོར་བ་དང་འབྲོས་པར་བཙལ་ནའང་མ་ནུས་སོ། །དེའི་འཁོར་ཐམས་ཅད་ཀྱིས་ཀྱང་འཇིགས་སུ་རུང་བའི་འཇིགས་པ་ཆེན་པོ་དེ་མཐོང་ནས་བྲོས་པར་གྱུར་ཏོ། །དེ་ནས་དེ་གཅིག་པུ་གྲོགས་མེད་པར་དེ་ན་ཤིན་ཏུ་
འཇིགས་ཤིང་སྐྲག་ནས། བདག་འཇིགས་སྐྲག་པ་ཆེན་པོ་འདི་ལས་ཡོངས་སུ་ཐར་བར་བྱེད་པ་ལྷའམ། ཀླུའམ། གནོད་སྦྱིན་ནམ། དྲི་ཟའམ། ལྷ་མ་ཡིན་ནམ། ནམ་མཁའ་ལྡིང་འམ། མིའམ་ཅིའམ། ལྟོ་འཕྱེ་ཆེན་པོའམ། མིའམ།
མི་མ་ཡིན་པའམ། དགེ་སློང་ངམ། བྲམ་ཟེ་སུ་ཡོད་སྙམ་སེམས་ཤིང་འདུག་གོ། །ཚོང་དཔོན་གྱི་བུ་དེ་ཡང་དགེ་བའི་རྩ་བ་ཡོངས་སུ་མ་སྨིན་པས་འཇམ་དཔལ་གཞོན་ནུར་གྱུར་པས་བུ་མོ་དེ་ལ་ཆོས་བཤད་པ་དག་ཀྱང་མ་ཐོས་མི་ཤེས་སོ། །དེ་ནས་འཇམ་
དཔལ་གཞོན་ནུར་གྱུར་པའི་བྱིན་གྱི་རླབས་ཀྱིས་སྐྱེད་མོས་ཚལ་དེའི་ཤིང་ལྗོན་པ་ཐམས་ཅད་ལས་ཚིགས་སུ་བཅད་པ་འདི་དག་བྱུང་ངོ་། །འཇིག་རྟེན་ཐམས་ཅད་ཡང་དག་མིན། །ཇི་ལྟར་སྒྱུ་མ་མཐོང་བ་བཞིན། །ཁྱེའུས་ཇི་ལྟར་མཐོང་གྱུར་པ། །ཆོས་རྣམས་
རང་བཞིན་དེ་ཡིན་ནོ། །ཤ་དང་ཁྲག་གིས་བསྐུས་པ་ནི། །བྱིས་པ་རྣམས་ཀྱིས་འཁྲུལ་པ་སྟེ། །ཡང་དག་མིན་དེར་རྣམ་བརྟགས་ནས། །མི་མཁས་བྱིས་པ་ཆགས་པར་བྱེད། །ཇི་ལྟར་མི་མཁས་མི་ཞིག་ནི། །དྲི་ང་སླ་ཙའི་བུམ་པ་ལ། །ཕྱི་རོལ་
རི་མོ་བྲིས་པ་ཞིག །མགོ་ལ་ཁྱེར་ཏེ་སོང་བ་ལས། །འགྲོ་བ་དེ་ཡི་དེ་ཡང་ནི། །དེ་ལས་ལྷུང་སྟེ་ཆག་གྱུར་ནས། །དྲི་ང་སླ་ཙ་མཐོང་གྱུར་ཏེ། །ཆགས་པ་མེད་ཅིང་འབྲོས་པ་ལྟར། །དེ་བཞིན་བྱིས་པ་མི་མཁས་པ། །བུད་མེད་རྣམས་ལ་

ཡིད་ཞེན་ཅིང་། །ཁ་དོག་གཟུགས་དང་དབྱིབས་རྣམས་ལ། །བརྟགས་ནས་དེ་ལ་ཆགས་པར་བྱེད། །ལུས་ཀྱི་རང་བཞིན་གང་ཡིན་པ། །དེ་ལ་ཁྱེའུ་ཁྱོད་རབ་རྟོགས་ཤིག །དུར་ཁྲོད་རུལ་པའི་དྲི་ལ་ནི། །མཁས་པ་སུ་ཞིག་ཆགས་པར་འགྱུར། །
ཡང་དག་མིན་ལ་འཇིགས་མེད་ཀྱིས། །ཁྱོད་ནི་འཇིགས་པར་མ་བྱེད་པར། །གང་ལ་ཁྱོད་སྔོན་བརྒྱལ་གྱུར་པའི། །ཆོས་རྣམས་ཀྱི་ནི་རང་བཞིན་ལྟོས། །ཆོས་ཀྱི་དམ་པ་སྟོན་མཛད་ཅིང་། །འཇིགས་གྱུར་འཇིགས་པ་སེལ་མཛད་པ། །
ཤཱཀྱ་སེང་གེ་ཞེས་བྱ་བའི། །སྟོན་པ་ཡང་དག་བྱུང་བ་ཡོད། །འདོད་པ་མི་རྟག་མི་བརྟན་པ། །གློག་འོད་སྣང་བ་ཇི་བཞིན་ཏེ། །སྣང་ཡང་ཡང་དག་མ་ཡིན་པས། །མཁས་པ་དེ་ལ་ཆགས་པ་མེད། །ཇི་ལྟར་ཆུ་ནི་འཁྲུགས་པ་ལས། །
དབུ་བ་རྡོས་པ་བྱུང་བ་ཡང་། །རྒྱུ་ཡི་སྦྱོར་ལས་སྐྱེས་པ་སྟེ། །དེ་ལ་བྱེད་པ་པོ་ཡང་མེད། །དེ་བཞིན་མིང་དང་གཟུགས་རྣམས་ཀྱང་། །ལས་ཀྱི་སྦྱོར་ལས་སྐྱེས་པ་སྟེ། །རྒྱུ་ལས་བྱུང་བ་ཡིན་པས་ན། །བྱེད་པ་པོ་ནི་གང་ཡང་མེད། །ཁ་དོག་བཟང་
པོ་གར་སོང་ཞིང་། །གང་གིས་ཁྱོད་འདིར་སྐྲག་པ་ཡི། །མི་གཙང་བ་ཡང་ག་ལས་འོངས། །ཁྱེའུ་ཁྱོད་དེ་ལ་མངོན་སུམ་གྱིས། །ཆོས་རྣམས་ཡུལ་ན་མི་གནས་ཤིང་། །དེ་དག་ཕྱོགས་ནས་འོང་བ་མེད། །འོང་བ་མེད་ཅིང་འགྲོ་མེད་ཀྱང་། །
དེ་དག་རང་བཞིན་སྟོན་པར་བྱེད། །འདི་ལ་བྱེད་པ་པོ་མེད་ཅིང་། །ཚོར་བ་པོ་ཡང་འདི་ལ་མེད། །བྱེད་མེད་ཚོར་བ་པོ་མེད་པའི། །ཆོས་རྣམས་སྒྱུ་འདྲ་དངོས་པོ་མེད། །རང་གི་ལུས་ལ་རྟོགས་ཤིག་དང་། །དེ་ཡང་འདི་དང་འདྲ་བས་ན། །ཁྱེའུ་
ཁྱོད་གཞན་གྱི་ལུས་ཀྱིས་ནི། །འདིར་ཡང་སྐྲག་པར་མ་བྱེད་ཅིག །ཇི་ལྟར་རྨི་ལམ་རྨིས་པ་ན། །རྩེད་མོ་བྱེད་ཅིང་དགའ་བ་ལྟར། །དེ་བཞིན་དགའ་བའི་རྩེད་མོ་ཀུན། །རྨི་ལམ་རྩེད་མོ་བྱས་དང་འདྲ། །ཤཱཀྱ་སེང་གེའི་སྤྱན་སྔར་ནི། །ཁྱེའུ་ཁྱོད་

འགྲོ་བར་གྱིས་ཤིག་དང་། །དེས་ནི་ཁྱེའུ་ཁྱོད་འཇིགས་དང་སྐྲག །རྩ་དང་བཅས་ཏེ་འབྱིན་པར་འགྱུར། །ཕ་མ་ཁྱོད་ཀྱི་སྐྱབས་མ་ཡིན། །མཛའ་བཤེས་རྩ་ལག་རྣམས་ཀྱང་མིན། །དེ་དག་གིས་ནི་ཁྱོད་བོར་ནས། །ཇི་ལྟར་འདོད་པ་བཞིན་
དུ་འགྲོ། །འཇིགས་གྱུར་འཇིགས་པ་སེལ་མཛད་ཅིང་། །སྐྱབས་མེད་སྐྱོབས་པའི་སངས་རྒྱས་དང་། །ཆོས་དང་ཚོགས་མཆོག་དགེ་འདུན་ལ། །དེར་ནི་སྐྱབས་སུ་འགྲོ་བར་གྱིས། །ལྷ་དང་དྲི་ཟ་མི་རྣམས་ལས། །གང་དག་དེ་ལ་སྐྱབས་སོང་
བ། །འཇིགས་པ་ཀུན་ལས་ཐར་བར་འགྱུར། །བདེ་བ་རྙེད་པར་དཀའ་བ་མེད། །དེ་ནས་ཚོང་དཔོན་གྱི་ཁྱེའུ་དེས་ཚིགས་སུ་བཅད་པ་དེ་དག་ཐོས་ནས། དགའ་མགུ་ཞིང་ཡི་རངས་ཏེ། འཇིགས་སྐྲག་པ་དང་བྲལ་ནས་དགའ་བ་དང་། མཆོག་ཏུ་དགའ་
བ་སྐྱེས་ཏེ། ཤི་བའི་རོ་མྱགས་པ་དེ་བོར་ནས་ནགས་ཁྲོད་དེ་ནས་བྱུང་ངོ་། །དེ་ནས་བཅོམ་ལྡན་འདས་ཀྱིས་ཚོང་དཔོན་གྱི་བུ་དེ་གདུལ་བའི་དབང་གི་ཕྱིར་སྐུ་ལས་འོད་རབ་ཏུ་ཕྱུང་སྟེ། འོད་དེས་ཡུལ་མ་ག་དྷཱ་ཐམས་ཅད་སྣང་བས་ཁྱབ་པར་གྱུར་ཏོ། །ཁྱེའུ་དེས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མའི་དཀྱིལ་འཁོར་འཆར་བ་དང་འདྲ་བ་གཟི་བརྗིད་དང་དཔལ་གྱིས་འབར་བ། མཛེས་པ་དགའ་བར་བྱ་བ། དབང་པོ་ཞི་བ། ཐུགས་ཞི་བ། དུལ་བ་མཆོག་མཚུངས་པ་མེད་པ། དམ་
པའི་མཆོག་བརྙེས་པ། གསེར་གྱི་མཆོད་སྡོང་ལྟར་མངོན་དུ་འབར་བ། གླང་པོ་ཆེ་ལྟར་དབང་པོ་ཐུལ་ཅིང་བསྲུངས་པ། མཚོ་ལྟར་དང་ཞིང་གསལ་ལ་རྙོག་པ་མེད་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པ། ཉན་ཐོས་ཀྱི་ཚོགས་ཀྱིས་ཡོངས་
སུ་བསྐོར་ནས་ཆོས་སྟོན་ཅིང་བཞུགས་པར་རྒྱང་རིང་པོ་ནས་མཐོང་ངོ་། །དེའི་ལམ་བཀྲ་བ་བལྟ་ན་སྡུག་པ། རིན་པོ་ཆེའི་ལན་ཀན་བྲེས་པ། མེ་ཏོག་བཀྲམ་པ་ཞིག་ཀྱང་བྱུང་བར་གྱུར་ཏོ། །ལྷའི་དབང་པོ་བརྒྱ་བྱིན་ཡང་ཁྱེའུ་དེའི་མདུན་དུ་འགྲེང་ནས་ཁྱེའུ་དེ་ལ་འདི་

སྐད་ཅེས་སྨྲས་སོ། །ཁྱེའུ་ཁྱོད་ཀྱིས་དེ་བཞིན་གཤེགས་པ་མཐོང་ནས་སེམས་རབ་ཏུ་དང་བར་གྱུར་པ་ནི། རྙེད་པ་ལེགས་པར་རྙེད་པ་ཡིན་ནོ། །དེ་བཞིན་གཤེགས་པ་ཡང་ཁྱོད་ཉིད་ལ་དགོངས་ཀྱིས། ཁྱེའུ་ཁྱོད་ལམ་འདིར་ཞུགས་ལ་དེ་བཞིན་གཤེགས་པའི་
སྤྱན་སྔར་སོང་ཤིག །དེ་ནས་ཁྱེའུ་དེ་ལྷའི་དབང་པོ་བརྒྱ་བྱིན་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་སོང་ངོ་། །དེ་ནས་ལྷའི་དབང་པོ་བརྒྱ་བྱིན་གྱིས་ཁྱེའུ་དེ་ལ། ཁྱེའུ་ཁྱོད་ཀྱིས་མེ་ཏོག་འདི་དག་གིས་དེ་བཞིན་གཤེགས་པ་ལ་མངོན་པར་གཏོར་ཅིག་ཅེས་
མེ་ཏོག་མན་དཱ་ར་བ་ཐུ་བ་གང་བྱིན་ནོ། །དེ་ནས་ཁྱེའུ་དེས་མེ་ཏོག་དེ་དག་བཅོམ་ལྡན་འདས་ལ་མངོན་པར་གཏོར་ཏོ། །གཏོར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་
འདུག་སྟེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆིའོ། །བདག་གི་དགེ་བའི་རྩ་བ་འདི་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
ཡོངས་སུ་བསྔོ་བར་བགྱིའོ། །བཅོམ་ལྡན་འདས་བདག་གིས་ཡུལ་གྱི་བཟང་མོ་རྒྱལ་པོས་ཐུགས་སུ་ཆུད་པ་གསེར་མཆོག་འོད་དཔལ་ཞེས་བགྱི་བ་ཞིག་དགའ་བར་རྩེ་བའི་སླད་དུ་སྐྱེད་མོས་ཚལ་དུ་ཁྲིད་པ་ལས། བཅོམ་ལྡན་འདས་དེ་མདོག་ཡལ་ཞིང་ལུས་
མྱགས་ཏེ་ཉེ་དུའི་ཚོགས་ཐམས་ཅད་ཀྱིས་ཀྱང་སྤངས་ནས་བདག་ཀྱང་འཇིགས་པ་ཆེན་པོ་སྐྱེས་ན། བཅོམ་ལྡན་འདས་འདིའི་ལེ་ལན་གྱིས་བདག་རྒྱལ་པོས་བཀུམ་དུ་མ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཁྱེའུ་མ་དོགས་
ཤིག །སངས་རྒྱས་ལ་སྐྱབས་སུ་སོང་བ་རྣམས་ལ་འཇིགས་པ་ཕྱིས་མི་འབྱུང་བས། ངས་ཁྱོད་མི་འཇིགས་པས་མགྲོན་དུ་གཉེར་གྱིས་འཇིགས་པ་མ་བསྐྱེད་ཅིག །ཁྱེའུ་དེ་ལྟ་མོད་ཀྱི་གཞི་གང་ལས་འཇིགས་པ་དང་སྐྲག་པར་གྱུར་པའི་གཞི་དེ་ཡོངས་སུ་

སྤོངས་ཤིག །གསོལ་པ་བཅོམ་ལྡན་འདས། འཇིགས་སྐྲག་པར་འགྱུར་བའི་གཞི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཁྱེའུ་འདོད་ཆགས་དང་ཞེ་སྡང་དང་། གཏི་མུག་ནི་འཇིགས་པ་དང་སྐྲག་པར་འགྱུར་བའི་
གཞིའོ། །ངའོ་སྙམ་པའི་ང་རྒྱལ་ནི་གཞིའོ། །ལྟ་བའི་ཀུན་ནས་ལྡང་བ་ནི་གཞིའོ། །སྲེད་པས་ལྷག་པར་ཆགས་པ་ནི་གཞིའོ། །ངར་འཛིན་པ་དང་ང་ཡིར་འཛིན་པ་ནི་གཞིའོ། །དངོས་པོ་ལ་མངོན་པར་ཞེན་པ་ནི་གཞིའོ། །ཡོངས་སུ་འཛིན་པ་དང་
རྩོད་པ་ནི་གཞིའོ། །འཇིག་ཚོགས་ལ་ལྟ་བའི་འཆིང་བ་ནི་གཞིའོ། །མི་རྟག་པ་ལ་རྟག་པར་འདུ་ཤེས་པ་ནི་གཞིའོ། །སྡུག་བསྔལ་བ་ལ་བདེ་བར་འདུ་ཤེས་པ་ནི་གཞིའོ། །མི་སྡུག་པ་ལ་སྡུག་པར་འདུ་ཤེས་པ་ནི་གཞིའོ། །བདག་མེད་པ་ལ་བདག་ཏུ་འདུ་
ཤེས་པ་ནི་གཞིའོ། །ཕུང་པོ་རྣམས་ལ་ཡོངས་སུ་འཛིན་པའི་འདུ་ཤེས་ནི་གཞིའོ། །ཁམས་རྣམས་ལ་སོ་སོར་མི་རྟོག་པ་ནི་གཞིའོ། །སྐྱེ་མཆེད་རྣམས་ཡོངས་སུ་མི་ཤེས་པ་ནི་གཞིའོ། །ལུས་ལ་སྐྱོན་དུ་མི་ལྟ་བ་ནི་གཞིའོ། །སྲོག་ལ་མངོན་པར་དགའ་
བ་ནི་གཞི་སྟེ། ཁྱེའུ་གཞི་དེ་དག་ལས་འཇིགས་པ་དང་སྐྲག་པ་འབྱུང་བས་དེ་དག་སྤང་བར་བྱའོ། །ཁྱེའུ་ཁྱོད་ཀྱིས་བུ་མོ་དེའི་ལུས་རྣམ་པར་ཞིག་པ་མཐོང་ངམ། གསོལ་པ། བཅོམ་ལྡན་འདས་བདག་གིས་མཐོང་ལགས་སོ། །བཅོམ་ལྡན་འདས་ཀྱིས་
བཀའ་སྩལ་པ། ཁྱེའུ་འདུས་བྱས་ཐམས་ཅད་ནི་དེ་ལྟར་མི་རྟག་པ། སྡུག་བསྔལ་བ། བདག་མེད་པ། རྣམ་པར་འགྱུར་བའི་ཆོས་ཅན། མི་བརྟན་པ། ཐེར་ཟུག་མ་ཡིན་པ། བྱིས་པ་འདྲིད་པ། ལོག་པ་ལས་བྱུང་བ། གཡོ་བ་མེད་པ། རྣམ་པར་བསྒྲུབས་
པ་སྟེ། མེད་པ་ལས་སྣང་བས་སྒྱུ་མ་ལྟ་བུའོ། །རོ་མྱང་བ་ཆུང་བས་རྨི་ལམ་ལྟ་བུའོ། །འཁྲུལ་པར་སྣང་བས་སྨིག་རྒྱུ་ལྟ་བུའོ། །གཟོད་མ་ནས་མ་སྐྱེས་པས་མིག་ཡོར་ལྟ་བུའོ། །ལས་ཀྱི་རྣམ་པར་སྨིན་པ་ཆུད་མི་ཟ་བའི་ཚུལ་གྱིས་གཟུགས་བརྙན་ལྟ་

བུའོ། །འཕོ་བ་མེད་པའི་ཚུལ་གྱིས་ཆུ་ཟླ་ལྟ་བུའོ། །སྒྲ་མེད་པ་ལས་སྒྲར་གོ་བར་བྱེད་པས་བྲག་ཅ་ལྟ་བུའོ། །མངོན་པར་འདུ་བྱེད་པ་མེད་པའི་སྒོ་ཡིན་པས་གྲིབ་མའི་གཟུགས་ལྟ་བུའོ། །རང་བཞིན་གྱིས་ཡ་མ་བརླ་ཡིན་པས་ཆད་པ་སྟོང་པ་ལྟ་བུའོ། །གཟུང་དུ་
མེད་པའོ། །རླུང་དང་མཚུངས་པའོ། །བརྫུན་པའོ། །གཞི་མེད་པའོ། །གསོག་གོ། །འགྲིབ་པ་མེད་པའོ། །རྫོགས་པ་མེད་པའོ། །ཁྱེའུ་དེ་ལྟར་ན་ཆོས་ཐམས་ཅད་བདག་པོ་མེད་པ་སྟེ། དེ་ལ་ཁྱོད་མངོན་པར་ཞེན་པར་མི་བྱའོ། །ཁྱེའུ་དེ་ཇི་སྙམ་དུ་
སེམས། ཁྱོད་ཀྱི་འདོད་པ་དང་ལྡན་པའི་རྟོག་པ་དང་དཔྱོད་པ་གང་ཡིན་པ་དེ་དག་ཇི་ལྟར་མཐོང་། ཁྱེའུས་གསོལ་པ། བཅོམ་ལྡན་འདས་བྱིས་པ་སོ་སོའི་སྐྱེ་བོ་རྣམས་ཀྱི་འདོད་ཆགས་ནི་ཁ་དོག་དང་དབྱིབས་བཟང་པོ་ལས་ཡོངས་སུ་བརྟགས་པས་སྐྱེ་ལགས་སོ། །
དེ་ནི་འཕགས་པའི་ཆོས་འདུལ་བས་མི་གཙང་བ་ལ་སོགས་པར་སོ་སོར་བརྟགས་པས་མི་འབྱུང་སྟེ། བཅོམ་ལྡན་འདས་དེ་ལས་མི་རྟོག་ན་འདོད་ཆགས་ཀྱི་ཀུན་འབྱུང་བ་ཀུན་ཏུ་འབྱུང་བར་མི་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱེའུ་ལེགས་སོ་
ལེགས་སོ། །འདི་ལྟ་སྟེ། མི་རྟོག་ཅིང་རྣམ་པར་མི་རྟོག་པ་འདི་ནི་འདོད་ཆགས་ཀྱི་རང་བཞིན་ཡིན་ནོ། །ཁྱེའུ་ཁྱོད་ཀྱིས་བདག་ཏུ་ལྟ་བ་མེད་པ་དང་། གཞན་དུ་ལྟ་བ་མེད་པ་དང་། གཞན་དུ་ལྟ་བར་སྒྲོ་འདོགས་པ་མེད་པར་ཆོས་ལ་ཚུལ་བཞིན་དུ་སེམས་པར་བརྩོན་པར་
བྱའོ། །ཁྱེའུས་གསོལ་པ། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་ཆོས་ལ་ཚུལ་བཞིན་དུ་སེམས་པར་བརྩོན་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཁྱེའུ་བྱང་ཆུབ་སེམས་དཔའ་ནི་འདོད་ཆགས་ཀྱི་རང་བཞིན་གྱིས་བྱང་ཆུབ་ཡོངས་སུ་ཚོལ་
ལོ། །ཁྱེའུ་དེ་བཞིན་དུ་བྱང་ཆུབ་སེམས་དཔའ་ནི་ཞེ་སྡང་གི་རང་བཞིན་དང་། གཏི་མུག་གི་རང་བཞིན་དང་། ཉོན་མོངས་པ་ཐམས་ཅད་ཀྱི་རང་བཞིན་གྱིས་བྱང་ཆུབ་ཡོངས་སུ་ཚོལ་ལོ། །ཁྱེའུ་ཇི་ལྟར་འདོད་ཆགས་དང་ཞེ་སྡང་དང་གཏི་མུག་དངོས་པོ་མེད་པ་དེ་ལྟར་ཆོས་ཐམས་ཅད་

ལ་བྱང་ཆུབ་སེམས་དཔའི་ཤེས་པ་འཇུག་གོ། །ཁྱེའུ་འདོད་ཆགས་དང་ཞེ་སྡང་དང་གཏི་མུག་རྣམས་ནི་རྩ་བ་མེད་པ། གནས་མེད་པ། གཞི་མེད་པ། བྱེད་པ་པོ་མེད་པ། ཚོར་བ་པོ་མེད་པ། ནང་དང་ཕྱི་རོལ་དབེན་པ། སྟོང་པ། བདག་དང་།
སེམས་ཅན་དང་། སྲོག་དང་། གསོ་བ་དང་། སྐྱེས་བུ་དང་། གང་ཟག་དང་བྲལ་བ་མཚན་མ་མེད་པ་སྟེ། མཚན་མར་རྟོག་པ་དང་བྲལ་བ། སྨོན་པ་མེད་པ། མངོན་པར་དགའ་བ་མེད་པ། དགའ་བ་དང་། སྲེད་པ་དང་བྲལ་བ། མངོན་པར་འདུ་
བྱེད་པ་མེད་པ། རང་བཞིན་མེད་པའོ། །ཁྱེའུ་འདོད་ཆགས་དང་ཞེ་སྡང་དང་། གཏི་མུག་ཇི་ལྟ་བ་དེ་བཞིན་དུ་ཆོས་ཐམས་ཅད་ལ་བྱང་ཆུབ་སེམས་དཔའི་ཤེས་པ་འཇུག་གོ། །ཁྱེའུ་གཞན་ཡང་ཚུལ་བཞིན་ལ་བརྩོན་པའི་བྱང་ཆུབ་སེམས་དཔའི་སེམས་བསྐྱེད་པ་ཐམས་ཅད་ནི་བྱང་
ཆུབ་ཡིན་ནོ། །དེ་ཅིའི་ཕྱིར་ཞེ་ན། སེམས་རྟོགས་པ་གང་ཡིན་པ་དེ་ནི་བསྟན་དུ་མེད་པ་དང་། སྨོན་པ་མེད་པ་དང་། རྣམ་པར་རིག་པ་མེད་པ་དང་། སྒྱུ་མའི་རང་བཞིན་ལྟ་བུ་དང་། ནང་མ་ཡིན་པ་དང་། ཕྱི་རོལ་མ་ཡིན་པ་དང་། གཞན་དང་ལྡན་པ་མ་
ཡིན་པས་གཟུགས་མེད་པ་སྟེ། ཁྱེའུ་དེ་ཉིད་བྱང་ཆུབ་སེམས་དཔའི་བྱང་ཆུབ་ཡིན་ཏེ། ཁྱེའུ་བྱང་ཆུབ་སེམས་དཔས་རང་གི་སེམས་རྟོགས་པ་མ་གཏོགས་པར་ཁོང་དུ་ཆུད་པར་བྱ་བ་གཞན་ཅི་ཡང་མེད་དོ། །རང་གི་སེམས་རྟོགས་པ་གང་ཡིན་པ་དེ་ཉིད་སེམས་ཅན་ཐམས་
ཅད་ཀྱི་སེམས་རྟོགས་པ་ཡིན་ནོ། །རང་གི་སེམས་དབེན་པས་སེམས་ཅན་ཐམས་ཅད་ཀྱི་སེམས་དབེན་ནོ། །རང་གི་སེམས་ཀྱི་རང་བཞིན་གྱིས་སེམས་ཅན་ཐམས་ཅད་ཀྱི་སེམས་ཀྱི་རང་བཞིན་ནོ། །རང་གི་སེམས་རྣམ་པར་དག་པས་སེམས་ཅན་ཐམས་ཅད་ཀྱི་སེམས་
རྣམ་པར་དག་གོ། །རང་གི་སེམས་འདོད་ཆགས་དང་བྲལ་བས་སེམས་ཅན་ཐམས་ཅད་ཀྱི་སེམས་འདོད་ཆགས་དང་བྲལ་ལོ། །རང་གི་སེམས་ལ་ཞེ་སྡང་མེད་པས་སེམས་ཅན་ཐམས་ཅད་ཀྱི་སེམས་ལ་ཞེ་སྡང་མེད་དོ། །རང་གི་སེམས་ལ་གཏི་མུག་མེད་པས་

སེམས་ཅན་ཐམས་ཅད་ཀྱི་སེམས་ལ་གཏི་མུག་མེད་དོ། །རང་གི་སེམས་ལ་ཉོན་མོངས་པ་མེད་པས་སེམས་ཅན་ཐམས་ཅད་ཀྱི་སེམས་ལ་ཉོན་མོངས་པ་མེད་དོ། །དེ་ལྟར་རྟོགས་པ་གང་ཡིན་པ་དེ་ཐམས་ཅད་མཁྱེན་པའི་ཡེ་ཤེས་རྟོགས་པ་ཡིན་ནོ། ཁྱེའུ་དེ་ལྟར་ཚུལ་
བཞིན་ལ་བརྩོན་པའི་བྱང་ཆུབ་སེམས་དཔས་ནི་སེམས་ཅན་ཐམས་ཅད་ཀྱི་སེམས་ལ་རང་བཞིན་གྱིས་ཀུན་ནས་ཉོན་མོངས་པ་མེད་པར་རབ་ཏུ་ཤེས་སོ། །གང་གློ་བུར་གྱི་ཉོན་མོངས་པས་ཉེ་བར་ཉོན་མོངས་ཀྱང་སེམས་ཀྱི་རྒྱུད་ལ་ནི་ཉོན་མོངས་པར་འགྱུར་བ་ཡང་མེད་ལ། ཆོས་ཀྱི་
རིགས་པའི་ལྷག་མཐོང་གིས་དེ་དག་དེ་ལ་ཡོངས་སུ་གདུང་བ་ཡང་མེད་དེ། དེས་བྱང་ཆུབ་སེམས་དཔའ་དེ་དག་གིས་གློ་བུར་གྱི་ཉོན་མོངས་པ་རྣམས་མཐོང་བས་ན་ཀུན་ནས་ཉོན་མོངས་པར་མི་འགྱུར་རོ། །བསྟན་པ་འདི་བཤད་པ་ན་ཚོང་དཔོན་གྱི་བུ་འཇིགས་བྱིན་ཆོས་
རྣམས་ལ་རྗེས་སུ་འཐུན་པའི་བཟོད་པ་སྐྱེས་པར་གྱུར་ཏོ། །དེ་ནས་སྨད་འཚོང་མའི་བུ་མོ་གསེར་མཆོག་འོད་དཔལ་གྱིས། ཚོང་དཔོན་གྱི་བུ་དེ་དུལ་བར་རིག་ནས། ལྷའི་བུ་མོ་ལྔ་བརྒྱ་ཙམ་གྱིས་ཡོངས་སུ་བསྐོར་ཏེ། སིལ་སྙན་དང་། ཕེག་རྡོབ་པ་དང་། གླུ་དབྱངས་
ལེན་པ་དག་བྱེད་ཅིང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་ནས་འཇམ་དཔལ་གཞོན་
ནུར་གྱུར་པས་ཚོང་དཔོན་གྱི་བུ་འཇིགས་བྱིན་ལ་འདི་སྐད་ཅེས་སྨྲས་སོ། །ཁྱེའུ་ཁྱོད་ཀྱིས་སྲིང་མོ་འདི་ཤེས་སམ། སྨྲས་པ། འཇམ་དཔལ་འཚལ་ལགས་སོ། །འཇམ་དཔལ་གྱིས་སྨྲས་པ། ཇི་ལྟ་བུར་ཤེས། དེ་ནས་ཁྱེའུ་དེས་འཇམ་དཔལ་གཞོན་ནུར་གྱུར་པ་ལ་
ཚིགས་སུ་བཅད་དེ་སྨྲས་པ། གཟུགས་ནི་དབུ་བ་རྡོས་པ་འདྲ། །ཚོར་བ་ཆུ་ཡི་ཆུ་བུར་བཞིན། །འདུ་ཤེས་སྨིག་རྒྱུ་ལྟ་བུ་སྟེ། །འདུ་བྱེད་རྣམས་ནི་ཆུ་ཤིང་བཞིན། །རྣམ་ཤེས་སྒྱུ་མ་ལྟ་བུ་སྟེ། །ཡོངས་སུ་རྟོགས་པས་ཀུན་ཏུ་བསྐྱེད། །བྱིས་པས་ཡང་དག་མིན་བརྟགས་པ། །

དེ་ལྟར་བདག་གིས་ཡོངས་སུ་འཚལ། །འདི་ལུས་མི་གཡོ་བེམས་པོ་སྟེ། །རྩྭ་དང་རྩིག་པ་ལྟ་བུ་ལགས། །རྣམ་ཤེས་བསྟན་དུ་མ་མཆིས་ཏེ། །དེ་ལྟར་བདག་གིས་ཡོངས་སུ་འཚལ། །འདི་ལ་སེམས་ཅན་བདག་མ་མཆིས། །སྲོག་དང་གང་ཟག་མ་མཆིས་
ཏེ། །ལུས་འདི་བསགས་པ་ཙམ་ལགས་པར། །དེ་ལྟར་བདག་གིས་ཡོངས་སུ་འཚལ། །འདི་ལ་འདོད་ཆགས་སྡང་མ་མཆིས། །གཏི་མུག་འབྱུང་བའང་མ་མཆིས་ཏེ། །ཉོན་མོངས་མ་མཆིས་བདག་མ་མཆིས། །དེ་ལྟར་བདག་གིས་ཡོངས་སུ་འཚལ། །ཚུལ་བཞིན་
མ་ལགས་བསླད་པ་འདི། །བྱིས་པ་རྣམས་ཀྱི་འཁྲུལ་པ་སྟེ། །མཁས་པ་དེ་ལ་མི་ཆགས་པར། །དེ་ལྟར་བདག་གིས་ཡོངས་སུ་འཚལ། །དཔེར་ན་འདི་ནི་ནགས་ཁྲོད་ན། །ཤི་བའི་རོ་ནི་མནམ་པ་བཞིན། །གཟུགས་འདི་རང་བཞིན་དེ་འདྲ་བར། །དེ་ལྟར་བདག་
གིས་ཡོངས་སུ་འཚལ། །འདི་ནི་སྔོན་མཐར་མ་སྐྱེས་ཏེ། །ཕྱི་མཐར་འཆི་འཕོར་འགྱུར་མ་མཆིས། །ད་ལྟར་བྱུང་བ་མ་མཆིས་པར། །དེ་ལྟར་བདག་གིས་ཡོངས་སུ་འཚལ། །འདི་ཡིས་བདག་ནི་རྒྱལ་བ་ལས། །མི་གཙང་བ་ཡིས་བཀྲོལ་བས་ན། །འཇམ་དབྱངས་རྣམ་པ་ཇི་
ལྟས་ཀྱང་། །འདི་ལ་ལན་གླན་རྔོ་མི་ཐོགས། །མི་འགུམ་འཆི་འཕོ་མ་མཆིས་ཀྱང་། །སེམས་ཅན་ཡོངས་སྨིན་བགྱི་སླད་དུ། །བདག་ནི་འཆི་བར་སྟོན་བགྱིད་པས། །སུ་ཞིག་བྱང་ཆུབ་ཚོལ་མི་བགྱིད། །ཇི་ལྟར་བདག་གིས་ཆགས་སྡང་དང་། །ཉོན་མོངས་ཐམས་ཅད་
ཚུལ་བཞིན་མིན། །སེམས་ཅན་ཀུན་གྱི་མཚན་དེ་འདྲ། །འདི་ནི་ཆོས་རྣམས་ཆོས་ཉིད་ལགས། །དེ་ནས་དེའི་ཚེ་བཅོམ་ལྡན་འདས་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ། གང་གི་ཚེ་འཛུམ་པ་མཛད་པ་དེའི་ཚེ། བཅོམ་ལྡན་འདས་
ཀྱི་ཞལ་གྱི་སྒོ་ནས་འོད་ཟེར་ཁ་དོག་སྣ་ཚོགས། ཁ་དོག་དུ་མ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་སྟེ། དེ་དག་བྱུང་ནས་ཚངས་པའི་འཇིག་རྟེན་གྱི་བར་དུ་སོང་སྟེ། འཇིག་

རྟེན་གྱི་ཁམས་མཐའ་ཡས་མུ་མེད་པ་དག་སྣང་བས་ཁྱབ་པར་བྱས་ནས། སླར་ལོག་སྟེ། བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་འཛུམ་པ་མཛད་པ་མཐོང་ནས་སྟན་ལས་ལངས་ཏེ། བླ་གོས་ཕྲག་པ་གཅིག་
ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་
དང་རྐྱེན་མ་མཆིས་པར་འཛུམ་པ་མི་མཛད་ན། བཅོམ་ལྡན་འདས་འཛུམ་པ་མཛད་པའི་རྒྱུ་ནི་གང་ལགས། རྐྱེན་ནི་གང་ལགས། དེ་ནས་དེའི་ཚེ་ཚིགས་སུ་བཅད་པ་འདི་དག་ཀྱང་གསོལ་ཏོ། །རྣམ་འདྲེན་འཇིག་རྟེན་མཁྱེན་ལ་ཡ་མཚན་མི་མངའ་བས། །སྟོན་པ་རྒྱུ་མ་མཆིས་པར་
འཛུམ་པ་མི་མཛད་ན། །འདི་ལྟར་ཁྱོད་ནི་འཛུམ་པར་མཛད་པར་གྱུར་པ་ཡི། །ཁྱོད་ཀྱི་འཛུམ་པའི་རྒྱུ་ནི་བདག་ཅག་ཤིན་ཏུ་འཚལ། །རྒྱལ་བའི་ཞལ་འཛུམ་མཛད་པར་གྱུར་པ་མཐོང་ནས་ནི། །ལྷར་བཅས་འགྲོ་བ་འདི་དག་ཐེ་ཙོམ་སྐྱེས་པར་གྱུར། །ཐེ་ཙོམ་གྱུར་པ་རྣམས་ཀྱི་སོམ་ཉི་
བསལ་སླད་དུ། །མི་དབང་འཛུམ་པ་མཛད་པའི་རྒྱུ་ནི་བསྟན་དུ་གསོལ། །གང་གིས་དེ་རིང་ཆོས་རྣམས་ལ་ནི་ཡིད་བཞག་གམ། །ཆོས་ཉིད་དུ་ནི་རྒྱལ་བ་ལ་ལས་མཐོང་གྱུར་ཏམ། །སངས་རྒྱས་བསྔགས་པའི་མཆོད་པ་གང་གིས་དེང་བགྱིས་སམ། །བདག་ཅག་དེ་དག་ཉན་པར་འཚལ་
ལོ་མི་ཡི་གཙོ། །གང་གིས་དེ་རིང་བདུད་རྣམས་བཞོན་དང་བཅས་བཅོམ་མམ། །གང་གིས་སྟོན་པའི་ཐུགས་ནི་དེ་རིང་དགྱེས་བགྱིས་སམ། །གང་གིས་དེ་རིང་འདུས་བྱས་རྣམས་ཀྱི་གཏིང་རྟོགས་སམ། །དེ་དག་ཉན་པར་འཚལ་གྱིས་ཐེ་ཙོམ་བསལ་དུ་གསོལ། །འདྲེན་པ་འཛུམ་པ་མཛད་པའི་རྒྱུ་
ནི་མཉན་སླད་དུ། །འགྲོ་བ་ཐམས་ཅད་ཐལ་མོ་སྦྱར་བ་བགྱིས་ཏེ་སྡོད། །རྐང་གཉིས་རྣམས་ཀྱི་གཙོ་བོ་ཐུགས་རྗེ་བསྐྱེད་མཛོད་ལ། །ཐེ་ཙོམ་གྱུར་པ་རྣམས་ཀྱི་ཡིད་གཉིས་བསལ་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་སྨད་འཚོང་མའི་བུ་མོ་གསེར་མཆོག་

འོད་དཔལ་ཞེས་བྱ་བ་འདི་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་སྨད་འཚོང་མའི་བུ་མོ་གསེར་མཆོག་འོད་དཔལ་འདི་ནི་སྔོན་འཇམ་དཔལ་
གཞོན་ནུར་གྱུར་པས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་སྟེ། འདིས་དེ་ལས་ཐོས་ནས་ཆོས་རྣམས་ལ་རྗེས་སུ་འཐུན་པའི་བཟོད་པ་ཐོབ་པར་གྱུར་ཏོ། །ཀུན་དགའ་བོ་ཁྱོད་ཀྱིས་ཚོང་དཔོན་གྱི་བུ་འཇིགས་བྱིན་ཞེས་བྱ་བ་འདི་མཐོང་ངམ། གསོལ་པ།
བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་འདི་ནི་ངས་སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་སྟེ། འདིས་ཀྱང་ང་ལས་ཆོས་ཐོས་ནས་ཆོས་རྣམས་ལ་རྗེས་སུ་
འཐུན་པའི་བཟོད་པ་ཐོབ་པར་གྱུར་ཏོ། །ཀུན་དགའ་བོ་སྨད་འཚོང་མའི་བུ་མོ་གསེར་མཆོག་འོད་དཔལ་འདི་ནི་བསྐལ་པ་འབུམ་ཕྲག་དགུ་བཅུ་རྩ་གཉིས་འདས་པའི་འོག་ཏུ་བསྐལ་པ་རིན་ཆེན་འབྱུང་བ་ཞེས་བྱ་བ་ལ། འཇིག་རྟེན་གྱི་ཁམས་རིན་ཆེན་ཅན་ཞེས་བྱ་བར་མངོན་པར་རྫོགས་པར་འཚང་རྒྱ་སྟེ།
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འོད་ཅེས་བྱ་བར་འགྱུར་རོ། །ཀུན་དགའ་བོ་འཇིག་རྟེན་གྱི་ཁམས་དེའི་སེམས་ཅན་རྣམས་ཀྱི་ལོངས་སྤྱོད་དང་། ཉེ་བར་སྤྱོད་པ་ནི་སུམ་ཅུ་རྩ་གསུམ་གྱི་ལྷ་རྣམས་ཅི་འདྲ་བ་དེ་འདྲ་བར་འགྱུར་རོ། །དེ་ན་བྱང་ཆུབ་
སེམས་དཔའ་རིན་པོ་ཆེ་དག་མ་གཏོགས་པར་རིན་པོ་ཆེ་གཞན་འབྱུང་བར་མི་འགྱུར་རོ། །དེ་བཞིན་གཤེགས་པ་དེའི་ཚེའི་ཚད་ནི་དཔག་ཏུ་མེད་པར་འགྱུར་རོ། །དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་ཚོང་དཔོན་གྱི་བུ་འཇིགས་བྱིན་འདི་ཡང་བྱང་ཆུབ་
སེམས་དཔའ་ཡོན་ཏན་རིན་ཆེན་འོད་ཅེས་བྱ་བར་གྱུར་ཏེ། དེ་བཞིན་གཤེགས་པ་དེའི་ཆོས་ཀྱི་མཛོད་འཛིན་པར་བྱེད་དོ། །གང་གི་ཚེ་དེ་བཞིན་གཤེགས་པ་རིན་ཆེན་འོད་ཡོངས་སུ་མྱ་ངན་ལས་འདའ་བར་འགྱུར་བ་དེའི་ཚེ། བྱང་ཆུབ་སེམས་དཔའ་ཡོན་ཏན་རིན་ཆེན་འོད་དེ་ལ། བྱང་ཆུབ་སེམས་དཔའ་ཡོན་

ཏན་རིན་ཆེན་འོད་འདི་ནི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འོད་འཕྲོ་ཞེས་བྱ་བར་འགྱུར་རོ། །དེའི་སངས་རྒྱས་ཀྱི་ཞིང་བཀོད་པ་ཡང་ངའི་ཅི་འདྲ་བ་
དེ་འདྲ་བར་འགྱུར་རོ་ཞེས་ལུང་སྟོན་པར་འགྱུར་རོ། །སྨད་འཚོང་མའི་བུ་མོ་གསེར་མཆོག་འོད་དཔལ་དང་། ཚོང་དཔོན་གྱི་བུ་འཇིགས་བྱིན་གཉིས་ལུང་བསྟན་མ་ཐག་ཏུ་དེའི་མོད་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ཤིང་འཇིག་རྟེན་དུ་སྣང་བ་
ཆེན་པོས་ཁྱབ་པར་གྱུར་ཏོ། །ལུང་བསྟན་པ་བཤད་པ་འདི་བསྟན་པ་ན་སྲོག་ཆགས་བརྒྱ་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་
གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་བཀོད་པ་ཆེན་པོའི་སྒོའི་ལེའུ་ཞེས་བྱ་བར་ཟུང་ཤིག །འཇམ་དཔལ་རྣམ་པར་རོལ་པ་ཞེས་བྱ་བར་ཡང་ཟུང་ཤིག །སྨད་འཚོང་མའི་
བུ་མོ་གསེར་མཆོག་འོད་དཔལ་བཏུལ་བ་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཀུན་དགའ་བོ་དང་། སྨད་འཚོང་མའི་བུ་མོ་གསེར་མཆོག་འོད་དཔལ་དང་། ཚོང་དཔོན་གྱི་བུ་འཇིགས་བྱིན་དང་། འཇམ་དཔལ་གཞོན་ནུར་གྱུར་པ་དང་།
བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་འཇམ་དཔལ་རྣམ་པར་
རོལ་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་སུ་རེན་དྲ་བོ་དྷི་དང་། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་ཞུས་ཏེ་གཏན་ལ་ཕབ་པ།། །།

༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་བི་ཀུརྦཱ་ཎ་པ་རི་བརྟ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་འཇམ་དཔལ་རྣམ་པར་འཕྲུལ་པའི་ལེའུ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་
ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། བྱང་ཆུབ་སེམས་དཔའི་དགེ་
འདུན་ཆེན་པོ་དང་། འདོད་པ་ན་སྤྱོད་པ་དང་། གཟུགས་ན་སྤྱོད་པ་དང་། གནས་གཙང་མའི་རིས་ཀྱི་ལྷའི་བུ་དུ་མ་དག་དང་ཡང་ཐབས་ཅིག་གོ། །དེ་ན་བཅོམ་ལྡན་འདས་འཁོར་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏོ། །དེའི་ཚེ་ལྷའི་བུ་འོད་མང་པོ་ཞེས་
བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ །འཇམ་དཔལ་གཞོན་ནུར་གྱུར་པ་ཡང་འཁོར་དེ་ཉིད་དུ་འདུས་པར་གྱུར་ཏེ་འདུག་གོ། །དེ་ནས་ལྷའི་བུ་འོད་མང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ལ་བདུད་བར་ཆད་བྱེད་ན། འཇམ་དཔལ་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་གང་ཡིན། དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས་ལྷའི་བུ་འོད་མང་པོ་ལ་འདི་སྐད་ཅེས་སྨྲས་སོ། །ལྷའི་བུ་ཇི་ཙམ་དུ་ལས་རྣམས་འབྱུང་བ་དེ་ཙམ་དུ་བདུད་
ཀྱི་ལས་སོ། །ཇི་ཙམ་དུ་སྨོན་པ་དང་། ཇི་ཙམ་དུ་ལོག་པར་འཛིན་པ་དང་། ཇི་ཙམ་དུ་མཆོག་ཏུ་འཛིན་པ་དེ་ཙམ་དུ་བདུད་ཀྱི་ལས་སོ། །ཇི་ཙམ་དུ་འདོད་པ་དང་། ཇི་ཙམ་དུ་འདུ་ཤེས་པ་དང་། ཇི་ཙམ་དུ་རློམ་སེམས་པ་དང་། ཇི་ཙམ་དུ་ཡོངས་སུ་རྟོགས་པ་དེ་ཙམ་དུ་བདུད་ཀྱི་ལས་སོ། །ལྷའི་
བུ་གཞན་ཡང་བྱང་ཆུབ་ཀྱི་སེམས་ལ་མངོན་པར་ཞེན་པ་ཡང་བདུད་ཀྱི་ལས་སོ། །སྦྱིན་པའི་སེམས་ལ་མངོན་པར་ཞེན་པ་ཡང་བདུད་ཀྱི་ལས་སོ། །ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་སེམས་ལ་མངོན་པར་ཞེན་པ་ཡང་བདུད་ཀྱི་ལས་སོ། །སྦྱིན་

པ་རློམ་སེམས་སུ་བྱེད་པ་དང་། ཚུལ་ཁྲིམས་མཆོག་ཏུ་འཛིན་པ་དང་། བཟོད་པ་འཛིན་པ་དང་། བརྩོན་འགྲུས་ལེན་པ་དང་། བསམ་གཏན་ལ་མཚན་མ་དང་། ཤེས་རབ་རྒྱུ་བ་ཡང་བདུད་ཀྱི་ལས་སོ། །དགོན་པ་ལ་དགའ་ཞིང་མོས་པའི་སེམས་དང་། བཏང་སྙོམས་སུ་ལྷུང་
བ་ཡང་བདུད་ཀྱི་ལས་སོ། །འདོད་པ་ཉུང་བ་དང་། ཆོག་ཤེས་པ་དང་། སྦྱངས་པའི་ཡོན་ཏན་དང་། ཡོ་བྱད་བསྙུངས་པ་རློམ་སེམས་སུ་བྱེད་པ་ཡང་བདུད་ཀྱི་ལས་སོ། །བདག་ནི་སྟོང་པ་ཉིད་ལ་གནས་པ། བདག་ནི་མཚན་མ་མེད་པ་ལ་གནས་པ། བདག་ནི་སྨོན་པ་མེད་པ་ལ་གནས་
པ། བདག་ནི་སྤྲོས་པ་མེད་པ་ལ་གནས་པ། བདག་ནི་དེ་བཞིན་གཤེགས་པའི་བཀའ་བསྒྲུབ་ཅིང་གནས་པའོ་སྙམ་དུ་རློམ་སེམས་སུ་བྱེད་ཅིང་རྣམ་པར་རྟོག་པ་ཡང་བདུད་ཀྱི་ལས་སོ། །ལྷའི་བུ་རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པ་དང་། མཐོང་བ་དང་། ཐོས་པ་དང་།
བྱེ་བྲག་ཕྱེད་པ་དང་། རྣམ་པར་ཤེས་པའི་གནས་ཇི་ཙམ་པ་དེ་ཙམ་དུ་བདུད་ཀྱི་ལས་སོ། །ལྷའི་བུས་སྨྲས་པ། འཇམ་དཔལ་བདུད་ཀྱི་ལས་ག་ལས་འབྱུང་། འཇམ་དཔལ་གྱིས་སྨྲས་པ། ལྷའི་བུ་བདུད་ཀྱི་ལས་ནི་བརྩོན་པ་ལས་འབྱུང་ངོ་། །དེ་ཅིའི་ཕྱིར་ཞེ་ན། ལྷའི་བུ་བརྩོན་པ་ལ་བདུད་ཀྱི་
གླགས་ཚོལ་གྱི་མི་བརྩོན་པ་ལ་བདུད་ཀྱིས་ཅི་ཞིག་བྱ་བར་འགྱུར་ཏེ། དེ་ཉིད་བདུད་ཀྱི་ལས་ཡིན་ནོ། །ལྷའི་བུས་སྨྲས་པ། འཇམ་དཔལ་བྱང་ཆུབ་སེམས་དཔའ་ཇི་ལྟར་ན་བརྩོན་པ་ཡིན། ཇི་ལྟར་ན་མི་བརྩོན་པ་ཡིན། འཇམ་དཔལ་གྱིས་སྨྲས་པ། ལྷའི་བུ་ཇི་ཙམ་དུ་གཉིས་ལ་སྦྱོར་བ་དེ་ཙམ་
དུ་བརྩོན་པ་མ་ཡིན་ནོ། །དེ་ཅིའི་ཕྱིར་ཞེ་ན། འཇིག་རྟེན་གནས་པ་ནི་གཉིས་ལ་སྦྱོར་བ་དང་ལྡན་པའོ། །ལྷའི་བུ་བརྩོན་པ་ཞེས་བྱ་བ་འདི་ནི་སྦྱོར་བ་ཡང་དག་པའི་ཚིག་བླ་དགས་སོ། །སྦྱོར་བ་ཡང་དག་པ་ཞེས་བྱ་བ་འདི་ནི་སྦྱོར་བ་མེད་པའི་ཚིག་བླ་དགས་སོ། །སྦྱོར་བ་མེད་པ་ཞེས་བྱ་བ་འདི་ནི་སྤྲོས་པ་
མེད་པའི་ཚིག་བླ་དགས་སོ། །སྤྲོས་པ་མེད་པ་ཞེས་བྱ་བ་འདི་ནི་སྦྱོར་བ་ཡང་དག་པའི་ཚིག་བླ་དགས་སོ། །ལྷའི་བུ་གང་ན་མིག་ལ་མི་སྦྱོར་བ་དང་། གཟུགས་ལ་མི་སྦྱོར་བ་འདི་ནི་བྱང་ཆུབ་སེམས་དཔའི་སྦྱོར་བ་ཡང་དག་པ་ཞེས་བྱའོ། །གང་ན་རྣ་བ་ལ་མི་སྦྱོར་བ་དང་། སྒྲ་ལ་མི་སྦྱོར་བ་དང་། སྣ་ལ་མི་སྦྱོར་

བ་དང་། དྲི་ལ་མི་སྦྱོར་བ་དང་། ལྕེ་ལ་མི་སྦྱོར་བ་དང་། རོ་ལ་མི་སྦྱོར་བ་དང་། ལུས་ལ་མི་སྦྱོར་བ་དང་། རེག་བྱ་ལ་མི་སྦྱོར་བ་དང་། ཡིད་ལ་མི་སྦྱོར་བ་དང་། ཆོས་ལ་མི་སྦྱོར་བ་འདི་ནི་བྱང་ཆུབ་སེམས་དཔའི་སྦྱོར་བ་ཡང་དག་པ་ཞེས་བྱའོ། །ལྷའི་བུ་གཞན་ཡང་ཉོན་
མོངས་པ་ཐམས་ཅད་ལ་ཡང་མི་སྦྱོར་ལ། སེམས་ཅན་ཐམས་ཅད་ཀྱི་ཉོན་མོངས་པ་སྤང་བའི་ཕྱིར་ཡང་བརྩོན་པ་འདི་ནི་བྱང་ཆུབ་སེམས་དཔའི་སྦྱོར་བ་ཡང་དག་པ་ཞེས་བྱའོ། །ལྷའི་བུ་གཞན་ཡང་ཁམས་གསུམ་པ་ཐམས་ཅད་ལ་ཡང་མི་སྦྱོར་ལ། ཁམས་གསུམ་དུ་གཏོགས་པའི་སེམས་
ཅན་རྣམས་ཀྱང་འབྱུང་བར་སྦྱོར་བ་འདི་ནི་བྱང་ཆུབ་སེམས་དཔའི་སྦྱོར་བ་ཡང་དག་པ་ཞེས་བྱའོ། །གཞན་ཡང་སྦྱིན་པ་ལ་རློམ་སེམས་མེད་པར་ཡང་སྦྱོར་ལ། སེམས་ཅན་སེར་སྣ་ཅན་སྡུད་པར་ཡང་སྦྱོར་བ་དང་། ཚུལ་ཁྲིམས་ལ་རློམ་སེམས་མེད་པར་ཡང་སྦྱོར་ལ། སེམས་ཅན་ཚུལ་ཁྲིམས་
འཆལ་པ་སྡུད་པར་ཡང་སྦྱོར་བ་དང་། བཟོད་པ་ལ་རློམ་སེམས་མེད་པར་ཡང་སྦྱོར་ལ། སེམས་ཅན་གནོད་སེམས་ཅན་སྡུད་པར་ཡང་སྦྱོར་བ་དང་། བརྩོན་འགྲུས་ལ་རློམ་སེམས་མེད་པར་ཡང་སྦྱོར་ལ། སེམས་ཅན་ལེ་ལོ་ཅན་སྡུད་པར་ཡང་སྦྱོར་བ་དང་། བསམ་གཏན་ལ་རློམ་སེམས་
མེད་པར་ཡང་སྦྱོར་ལ། སེམས་ཅན་སེམས་རྣམ་པར་གཡེངས་པ་སྡུད་པར་ཡང་སྦྱོར་བ་དང་། ཤེས་རབ་ལ་རློམ་སེམས་མེད་པར་ཡང་སྦྱོར་ལ། སེམས་ཅན་ཤེས་རབ་འཆལ་པ་ཅན་སྡུད་པར་ཡང་སྦྱོར་བ་འདི་ཡང་བྱང་ཆུབ་སེམས་དཔའི་སྦྱོར་བ་ཡང་དག་པ་ཞེས་བྱའོ། །གཞན་ཡང་སྟོང་པ་ཉིད་
ལ་རློམ་སེམས་མེད་པར་ཡང་སྦྱོར་ལ། ལྟ་བར་སོང་བ་ཐམས་ཅད་དང་ཡང་བྲལ་ཞིང་ལྟ་བར་སོང་བ་ལས་རྣམ་པར་གྲོལ་བ་ཡང་མ་ཡིན་པ་ནི་སྟོང་པ་ཉིད་ལ་སྦྱོར་བ་སྟེ། སྟོང་པ་ཉིད་གང་གིས་སྟོང་པ་ཉིད་སྟོང་པའི་སྟོང་པ་ཉིད་དེས་ལྟ་བར་གྱུར་པ་རྣམས་སྟོང་པ་དང་། སྟོང་པ་ཉིད་གང་གིས་ལྟ་བར་གྱུར་
པ་རྣམས་སྟོང་པའི་སྟོང་པ་ཉིད་དེས་ཆོས་ཐམས་ཅད་སྟོང་པར་འདི་ཤེས་ཤིང་ཤེས་པ་ལ་ལྷག་པའི་ང་རྒྱལ་ཡང་མེད་པ་གང་ཡིན་པ་འདི་ཡང་བྱང་ཆུབ་སེམས་དཔའི་སྦྱོར་བ་ཡང་དག་པའོ། །ལྷའི་བུ་གཞན་ཡང་མཚན་མ་མེད་པ་ལ་རློམ་སེམས་མེད་པར་ཡང་སྦྱོར་ལ། །རྣམ་པར་རྟོག་པ་ཐམས་ཅད་དང་བྲལ་

ཞིང་རྣམ་པར་རྟོག་པ་ལས་གྲོལ་བ་ཡང་མ་ཡིན་པ་ནི་མཚན་མ་མེད་པ་ལ་སྦྱོར་བ་སྟེ། རྣམ་པར་རྟོག་པ་གང་གིས་མཚན་མ་མེད་པ་ལ་རྣམ་པར་རྟོག་པའི་རྣམ་པར་རྟོག་པ་དེ་ཡང་མཚན་མ་མེད་པ་དང་མཉམ་ཞིང་རྣམ་པར་རྟོག་པ་དེ་དང་མཚན་མ་མེད་པ་ཡང་མཚན་མ་མེད་པར་རྣམ་པར་རྟོག་པས་མཉམ་
པར་ཤེས་ཏེ། འདི་ཤེས་ཤིང་ཤེས་པ་ལ་ལྷག་པའི་ང་རྒྱལ་ཡང་མེད་པ་གང་ཡིན་པ་འདི་ཡང་བྱང་ཆུབ་སེམས་དཔའི་སྦྱོར་བ་ཡང་དག་པའོ། །གཞན་ཡང་སྨོན་པ་མེད་པ་ལ་རློམ་སེམས་མེད་པར་ཡང་སྦྱོར་ལ། བསམས་བཞིན་དུ་སྐྱེ་བ་ཡོངས་སུ་འཛིན་པར་ཡང་སྦྱོར་ཏེ། དེ་སྨོན་ལམ་
འདེབས་ཀྱང་སེམས་ཀྱིས་བག་ལ་ཉལ་བར་མི་བྱེད་ཅིང་། སྨོན་ལམ་འདེབས་ཀྱང་སྨོན་ལམ་གྱིས་རྒྱུ་བ་ཡང་མེད་ལ། སྐྱེ་ཡང་སྐྱེ་ཞིང་མཐའ་གཉི་གར་ལྟ་བ་དང་བྲལ་བ་འདི་ལྟ་སྟེ། ངར་འཛིན་པ་དང་། ང་ཡིར་འཛིན་པའི་ལྟ་བ་དང་བྲལ་བར་གྱུར་ཅིང་། སྐྱེ་ཡང་སྐྱེ་ལ་འཆི་འཕོ་དང་སྐྱེ་བ་
དང་ཡང་བྲལ་བ་ཡིན་ཏེ། འདི་ཤེས་ཤིང་ཤེས་པ་ལ་ལྷག་པའི་ང་རྒྱལ་ཡང་མེད་པ་གང་ཡིན་པ་འདི་ཡང་བྱང་ཆུབ་སེམས་དཔའི་སྦྱོར་བ་ཡང་དག་པའོ། །ལྷའི་བུ་གཞན་ཡང་བྱང་ཆུབ་སེམས་དཔའ་རྣམས་ཀྱི་སྦྱོར་བ་ཡང་དག་པ་ཡང་དག་ཕུལ་ནི་གང་ཤེས་རབ་ཀྱི་ཤེས་པས་བརྩོན་པ་ཡང་མེད་ལ།
ཐབས་ཀྱི་ཤེས་པས་དགེ་བའི་ཆོས་ཐམས་ཅད་སྡུད་པར་ཡང་སྦྱོར་བ་དང་། ཤེས་རབ་ཀྱི་ཤེས་པས་བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གསོ་བ་མེད་པ་དང་། གང་ཟག་མེད་པར་ཡང་སྦྱོར་ལ། ཐབས་ཀྱི་ཤེས་པས་སེམས་ཅན་ཐམས་ཅད་ཡོངས་སུ་སྨིན་པར་བྱེད་
པར་ཡང་སྦྱོར་བ་དང་། ཤེས་རབ་ཀྱི་ཤེས་པས་ཆོས་ཐམས་ཅད་བླང་བ་མེད་པ་དང་། དོར་བ་མེད་པར་ཡང་སྦྱོར་ལ། ཐབས་ཀྱི་ཤེས་པས་ཆོས་ཐམས་ཅད་ཡོངས་སུ་འཛིན་པར་ཡང་སྦྱོར་བ་དང་། ཤེས་རབ་ཀྱི་ཤེས་པས་སངས་རྒྱས་ཐམས་ཅད་དང་ཆོས་ཀྱི་དབྱིངས་དབྱེར་མེད་པར་ཡང་སྦྱོར་ལ།
ཐབས་ཀྱི་ཤེས་པས་སངས་རྒྱས་ཐམས་ཅད་ལ་བླ་མར་བྱ་བ་དང་། གུས་པར་བྱ་བ་དང་། མཆོད་པ་དང་། རིམ་གྲོ་བྱེད་པར་ཡང་སྦྱོར་བ་དང་། ཤེས་རབ་ཀྱི་ཤེས་པས་སངས་རྒྱས་ཀྱི་ཞིང་ཐམས་ཅད་ནམ་མཁའི་ཞིང་དུ་ཡང་སྦྱོར་ལ། ཐབས་ཀྱི་ཤེས་པས་སངས་རྒྱས་ཀྱི་ཞིང་གི་ཡོན་ཏན་བཀོད་པ་

ཡོངས་སུ་སྦྱོར་བའི་རྒྱན་ལ་སྦྱོར་བ་དང་། ཤེས་རབ་ཀྱི་ཤེས་པས་འཕགས་པ་ཐམས་ཅད་འདུས་མ་བྱས་ཀྱིས་རབ་ཏུ་ཕྱེ་བར་ཡང་སྦྱོར་ལ། ཐབས་ཀྱི་ཤེས་པས་འཕགས་པ་ཐམས་ཅད་ལ་བླ་མ་དང་། གུས་པ་དང་། རིམ་གྲོ་བྱེད་པར་ཡང་སྦྱོར་བ་དང་། ཤེས་རབ་ཀྱི་
ཤེས་པས་སངས་རྒྱས་ཀྱི་སྐུ་ཟག་པ་མེད་པར་སོ་སོར་རྟོག་པར་ཡང་སྦྱོར་ལ། ཐབས་ཀྱི་ཤེས་པས་མཚན་དང་དཔེ་བྱད་བཟང་པོ་དང་། རྒྱན་ལ་ཡང་སྦྱོར་བ་དང་། ཤེས་རབ་ཀྱི་ཤེས་པས་འདུ་བྱེད་ཐམས་ཅད་མ་སྐྱེས་པ་དང་། མ་བྱུང་བར་སོ་སོར་རྟོག་པར་ཡང་སྦྱོར་ལ། ཐབས་ཀྱི་ཤེས་
པས་བསམས་བཞིན་དུ་སྲིད་པར་སྐྱེ་བ་ཡོངས་སུ་འཛིན་པར་ཡང་སྦྱོར་བ་དང་། ཤེས་རབ་ཀྱི་ཤེས་པས་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པར་ཡང་སྦྱོར་ལ། ཐབས་ཀྱི་ཤེས་པས་ལྟ་བ་དང་རྣམ་པར་རྟོག་པ་དང་། སྨོན་ལམ་སྤང་བ་སྟོན་པར་ཡང་སྦྱོར་བ་དང་། ཤེས་
རབ་ཀྱི་ཤེས་པས་མངོན་པར་ཤེས་པ་སྐྱེ་བ་མེད་པར་ཡང་སྦྱོར་ལ། ཐབས་ཀྱི་ཤེས་པས་མངོན་པར་ཤེས་པ་ཐམས་ཅད་ཀྱིས་རྣམ་པར་འཕྲུལ་བར་ཡང་སྦྱོར་བ་དང་། ཤེས་རབ་ཀྱི་ཤེས་པས་ཕུང་པོ་དང་། ཁམས་དང་། སྐྱེ་མཆེད་མ་སྐྱེས་པ་དང་། མི་སྩོགས་པར་ཡང་སྦྱོར་ལ།
ཐབས་ཀྱི་ཤེས་པས་ཕུང་པོ་དང་། ཁམས་དང་། སྐྱེ་མཆེད་ཡོངས་སུ་འདོར་བར་ཡང་སྦྱོར་བ་དང་ཤེས་རབ་ཀྱི་ཤེས་པས་སྲིད་པ་མྱ་ངན་ལས་འདས་པའི་རང་བཞིན་དུ་རྟོགས་པར་བྱེད་པར་ཡང་སྦྱོར་ལ། ཐབས་ཀྱི་ཤེས་པས་འཁོར་བ་ན་སེམས་ཅན་ཡོངས་སུ་སྨིན་པར་བྱེད་པར་ཡང་སྦྱོར་བ་
དང་། ཤེས་རབ་ཀྱི་ཤེས་པས་ཤེས་རབ་ཀྱི་མིག་ལ་ཡང་སྦྱོར་ལ། ཐབས་ཀྱི་ཤེས་པས་ལྷའི་མིག་མངོན་པར་བསྒྲུབ་པ་ལ་ཡང་སྦྱོར་བ་དང་། ཤེས་རབ་ཀྱི་ཤེས་པས་ཆོས་བརྗོད་དུ་མེད་པར་ཁོང་དུ་ཆུད་པར་ཡང་སྦྱོར་ལ། ཐབས་ཀྱི་ཤེས་པས་ཡི་གེ་དང་ངེས་པའི་ཚིག་གིས་ཆོས་སྟོན་
པར་ཡང་སྦྱོར་བ་དང་། ཤེས་རབ་ཀྱི་ཤེས་པས་དོན་དང་ཆོས་སོ་སོ་ཡང་དག་པར་རིག་པ་ལ་ཡང་སྦྱོར་ལ། ཐབས་ཀྱི་ཤེས་པས་ངེས་པའི་ཚིག་དང་སྤོབས་པ་སོ་སོ་ཡང་དག་པར་རིག་པ་ལ་ཡང་སྦྱོར་བ་དང་། ཤེས་རབ་ཀྱི་ཤེས་པས་སེམས་ཅན་གྱི་དབང་པོ་མཆོག་དང་། མཆོག་མ་ཡིན་པ་

ཐམས་ཅད་ཤེས་པ་ལ་ཡང་སྦྱོར་ལ། ཐབས་ཀྱི་ཤེས་པས་སོ་སོ་ཅི་རིག་པར་ཆོས་སྟོན་པར་ཡང་སྦྱོར་བ་དང་། ཤེས་རབ་ཀྱི་ཤེས་པས་སེམས་ཅན་གྱི་སྤྱོད་པ་བརྒྱད་ཁྲི་བཞི་སྟོང་ཁོང་དུ་ཆུད་པར་བྱེད་པར་ཡང་སྦྱོར་ལ། ཐབས་ཀྱི་ཤེས་པས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཡང་དག་
པར་སྟོན་པར་ཡང་སྦྱོར་བ་འདི་ནི་ལྷའི་བུ་བྱང་ཆུབ་སེམས་དཔའ་རྣམས་ཀྱི་སྦྱོར་བ་ཡང་དག་པ་ཡང་དག་ཕུལ་ལོ། །འཇམ་དཔལ་གཞོན་ནུར་གྱུར་པས་སྦྱོར་བ་ཡང་དག་པ་འདི་བསྟན་པ་ན། འཁོར་དེ་ལས་ལྷའི་བུ་བརྒྱད་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །
བྱང་ཆུབ་སེམས་དཔའ་ལྔ་སྟོང་ནི་མི་སྐྱེ་བའི་ཆོས་ལ་བཟོད་པ་སྐྱེས་སོ། །བཅོམ་ལྡན་འདས་ཀྱིས་ཀྱང་འཇམ་དཔལ་གཞོན་ནུར་གྱུར་པ་ལ། འཇམ་དཔལ་ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་སྦྱོར་བ་ཡང་དག་པ་འདི་ལེགས་པར་བཤད་པ་ལེགས་སོ་ཞེས་ལེགས་སོ་ཞེས་བྱ་བ་བྱིན་ནོ། །དེ་
ནས་ལྷའི་བུ་འོད་མང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ལ་དེ་བཞིན་གཤེགས་པས་གང་གི་ཕྱིར་ལེགས་སོ་ཞེས་བྱ་བ་བྱིན་པས་ཅི་ཁྱོད་དགའ་བར་འགྱུར་རམ། འཇམ་དཔལ་གྱིས་སྨྲས་པ། ལྷའི་བུ་འདི་ཇི་སྙམ་དུ་སེམས། གང་
སྤྲུལ་པས་སྤྲུལ་པ་ལ་ལེགས་སོ་ཞེས་བྱ་བ་བྱིན་ན་སྤྲུལ་པ་དེ་ལ་ཅི་དགའ་བ་འགྱུར་བ་ལྟ་ཡོད་དམ། ལྷའི་བུས་སྨྲས་པ། འཇམ་དཔལ་སྤྲུལ་པ་ལ་རྗེས་སུ་ཆགས་པ་ཡང་མེད། ཁོང་ཁྲོ་བ་ཡང་མེད་ན་དེ་ལ་དགའ་བར་འགྱུར་བ་ཅི་ཞིག་ཡོད། འཇམ་དཔལ་གྱིས་སྨྲས་པ། ལྷའི་བུ་དེ་
བཞིན་དུ་ཆོས་ཐམས་ཅད་ཀྱང་སྤྲུལ་པའི་ངོ་བོ་ཉིད་ཀྱི་མཚན་ཉིད་དེ། དེ་བཞིན་གཤེགས་པ་ཡང་དེའི་མཚན་ཉིད་ལ་འཇམ་དཔལ་ཡང་དེའི་མཚན་ཉིད་ཡིན་ན། དེ་ལ་ལེགས་སོ་ཞེས་བྱ་བས་ཁོ་བོ་དགའ་བར་འགྱུར་དུ་ཅི་ཞིག་ཡོད། ལྷའི་བུ་འདི་ལྟ་སྟེ་དཔེར་ན། བྲག་ཅ་ནི་སྒྲ་སྙན་པ་
དང་། མི་སྙན་པ་རྣམས་ལ་རྗེས་སུ་ཆགས་པར་ཡང་མི་འགྱུར། ཁོང་ཁྲོ་བར་ཡང་མི་འགྱུར་རོ། །ལྷའི་བུ་དེ་བཞིན་དུ་ཆོས་ཐམས་ཅད་ནི་བྲག་ཅའི་ངོ་བོ་ཉིད་ཀྱི་རང་བཞིན་ཏེ། དེ་བཞིན་གཤེགས་པ་ཡང་དེའི་རང་བཞིན་འཇམ་དཔལ་ཡང་དེའི་རང་བཞིན་ཡིན་ན། དེ་ལ་ལེགས་སོ་ཞེས་

བྱ་བས་ཁོ་བོ་དགའ་བར་འགྱུར་དུ་ཅི་ཡོད། ལྷའི་བུས་སྨྲས་པ། འཇམ་དཔལ་དེ་བཞིན་གཤེགས་པས་སུ་ལ་ལེགས་སོ་ཞེས་བྱ་བ་གནང་། འཇམ་དཔལ་གྱིས་སྨྲས་པ། ལྷའི་བུ་རྣམ་པར་ཤེས་པ་མི་གནས་པར་སྟོན་པ་དང་། བསྟན་པ་ཐམས་ཅད་ལ་སུའི་བློ་ཐོགས་
པར་མི་འགྱུར་བ་དང་། སུ་སེམས་ཅན་ཐམས་ཅད་ལ་སེམས་ཅན་དུ་འདུ་ཤེས་མི་འཇུག་པ་དང་། སུ་ཆོས་ཐམས་ཅད་ལ་ཆོས་སུ་འདུ་ཤེས་མི་འཇུག་པ་དང་། སུ་བསམ་པ་མྱ་ངན་ལས་འདས་པ་ལ་ཡང་གནས་ལ། སྦྱོར་བ་འཁོར་བ་ལ་ཡང་གནས་པ་དང་། སུ་བདུད་ཀྱི་ལས་ཁོང་དུ་ཆུད་ནས་
བདུད་ཀྱི་ལས་ཀྱང་སངས་རྒྱས་ཀྱི་ཕྲིན་ལས་སུ་ཤེས་ཤིང་། སངས་རྒྱས་ཀྱི་ཕྲིན་ལས་ལ་མངོན་པར་ཞེན་ན། སངས་རྒྱས་ཀྱི་ཕྲིན་ལས་ཀྱང་བདུད་ཀྱི་ལས་སུ་ཤེས་པ་དེ་ལྟ་བུའི་ཆོས་དང་ལྡན་པའི་བྱང་ཆུབ་སེམས་དཔའ་ལ། ལྷའི་བུ་དེ་བཞིན་གཤེགས་པས་ལེགས་སོ་ཞེས་བྱ་བ་གནང་ངོ་། །ལྷའི་
བུས་སྨྲས་པ། འཇམ་དཔལ་ཅི་དེ་ལྟ་བུའི་ཆོས་དང་ལྡན་པས་དེ་བཞིན་གཤེགས་པས་ཁྱོད་ལ། ལེགས་སོ་ཞེས་བྱ་བ་གནང་ངམ། འཇམ་དཔལ་གྱིས་སྨྲས་པ། ལྷའི་བུ་འདི་ཇི་སྙམ་དུ་སེམས། གང་མཉམ་པ་ཉིད་དེ་ལ་མི་མཉམ་པ་གང་ཡང་ཡོད་དམ། ལྷའི་བུས་སྨྲས་པ། འཇམ་
དཔལ་མཉམ་པ་ཉིད་ལ་མི་མཉམ་པ་གང་ཡང་མེད་དོ། །འཇམ་དཔལ་གྱིས་སྨྲས་པ། ལྷའི་བུ་མཉམ་པ་ཉིད་གང་དང་མཉམ་པ་དེ་དང་མཚམས་མེད་པ་མཉམ་མོ། །མཚམས་མེད་པ་གང་དང་མཉམ་པ་དེ་དང་ཁོ་བོ་མཉམ་མོ། །མཉམ་པ་ཉིད་གང་དང་མཉམ་པ་དེ་དང་ལྟ་བར་གྱུར་པ་རྣམས་
མཉམ་མོ། །ལྟ་བར་གྱུར་པ་རྣམས་གང་དང་མཉམ་པ་དེ་དང་ཁོ་བོ་མཉམ་མོ། །མཉམ་པ་ཉིད་གང་དང་མཉམ་པ་དེ་དང་ཕྱིན་ཅི་ལོག་རྣམས་མཉམ་མོ། །ཕྱིན་ཅི་ལོག་རྣམས་གང་དང་མཉམ་པ་དེ་དང་ཁོ་བོ་མཉམ་མོ། །མཉམ་པ་ཉིད་གང་དང་མཉམ་པ་དེ་དང་དམིགས་པ་མཉམ་མོ། །
དམིགས་པ་གང་དང་མཉམ་པ་དེ་དང་ཁོ་བོ་མཉམ་མོ། །མཉམ་པ་ཉིད་གང་དང་མཉམ་པ་དེ་དང་འཁོར་བའི་མཐའ་མཉམ་མོ། །འཁོར་བའི་མཐའ་གང་དང་མཉམ་པ་དེ་དང་མྱ་ངན་ལས་འདས་པའི་མཐའ་མཉམ་མོ། །མྱ་ངན་ལས་འདས་པའི་མཐའ་གང་དང་མཉམ་པ་དེ་དང་བདག་གི་མཐའ་

མཉམ་མོ། །བདག་གི་མཐའ་གང་དང་མཉམ་པ་དེ་དང་ཡང་དག་པའི་མཐའ་མཉམ་མོ། །ཡང་དག་པའི་མཐའ་གང་དང་མཉམ་པ་དེ་དང་མ་རིག་པ་དང་། སྲིད་པ་དང་། སྲེད་པའི་མཐའ་མཉམ་མོ། །མ་རིག་པ་དང་། སྲིད་པ་དང་། སྲེད་པའི་མཐའ་གང་དང་མཉམ་པ་དེ་དང་རིག་པ་དང་། རྣམ་པར་
གྲོལ་བའི་མཐའ་མཉམ་མོ། རིག་པ་དང་། རྣམ་པར་གྲོལ་བའི་མཐའ་གང་དང་མཉམ་པ་དེ་དང་འདོད་ཆགས་དང་། ཞེ་སྡང་དང་། གཏི་མུག་གི་མཐའ་མཉམ་མོ། །འདོད་ཆགས་དང་། ཞེ་སྡང་དང་། གཏི་མུག་གི་མཐའ་གང་དང་མཉམ་པ་དེ་དང་སྟོང་པ་ཉིད་དང་། མཚན་མ་མེད་པ་
དང་སྨོན་པ་མེད་པའི་མཐའ་མཉམ་མོ། །སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་མཐའ་གང་དང་མཉམ་པ་དེ་དང་འདུས་བྱས་ཀྱི་མཐའ་མཉམ་མོ། །འདུས་བྱས་ཀྱི་མཐའ་གང་དང་མཉམ་པ་དེ་དང་། འདུས་མ་བྱས་ཀྱི་མཐའ་མཉམ་མོ། །འདུས་མ་བྱས་ཀྱི་མཐའ་གང་དང་
མཉམ་པ་དེ་དང་འཇམ་དཔལ་གཞོན་ནུར་གྱུར་པ་མཉམ་སྟེ། ལྷའི་བུ་མཉམ་པ་ཉིད་དེས་ཆོས་ཐམས་ཅད་མཉམ་མོ། །དེ་ལ་སུ་འཆད་པ་དང་། གང་བཤད་པ་དང་། གང་ལ་བཤད་པ་དང་། སུ་ལ་ལེགས་སོ་ཞེས་བྱ་བ་སྦྱིན་པའི་ཆོས་དེ་དག་ཐམས་ཅད་ནམ་མཁའ་དང་མཉམ་པ་ཉིད་ཀྱིས་
མཉམ་སྟེ། ནམ་མཁའ་ཡང་འདུས་མ་བྱས་ཡིན་པས་ནམ་མཁའ་ནི་མཉམ་པ་ཡང་མེད། མི་མཉམ་པ་ཡང་མེད་དེ། སུ་རྗེས་སུ་མི་འགྲོ་བའི་ཚུལ་གྱིས་མཉམ་པ་ཉིད་འདི་དག་གི་རྗེས་སུ་སོང་བ་དེ་ལ་དེ་བཞིན་གཤེགས་པས་ལེགས་སོ་ཞེས་བྱ་བ་གནང་ངོ་། །ལྷའི་བུས་སྨྲས་པ། འཇམ་དཔལ་
ཁྱོད་ལེགས་སོ་ཞེས་བྱ་བ་དང་ལེགས་སོ་ཞེས་བྱ་བ་མ་ཡིན་པ་ལས་བརྩམས་ཏེ་ཆོས་བསྟན་པ་ལ་སྤོབས་པར་གྱིས་ཤིག །འཇམ་དཔལ་གྱིས་སྨྲས་པ། ལྷའི་བུ་ལྷག་པའི་བསམ་པས་བྱང་ཆུབ་ཀྱི་ཕྱིར་འཇུག་པ་ནི་ལེགས་པའོ། །གཡོ་དང་སྒྱུས་ཉེ་བར་སྤྱོད་པ་ནི་ལེགས་པ་མ་ཡིན་པའོ། །སྙིང་རྗེ་ཆེན་
པོས་སེམས་ཅན་ཐམས་ཅད་མི་གཏོང་བ་ནི་ལེགས་པའོ། །སེམས་ཅན་རྣམས་ལ་རྣམ་པར་འཚེ་བ་ནི་ལེགས་པ་མ་ཡིན་པའོ། །སེམས་ཅན་ཐམས་ཅད་ལ་ཞེ་འགྲས་པ་མེད་པའི་སེམས་ནི་ལེགས་པའོ། །གནོད་སེམས་ཀྱི་བསམ་པ་ནི་ལེགས་པ་མ་ཡིན་པའོ། །ཉེས་པ་བྱུང་བ་མི་འཆབ་ཅིང་འཆགས་

ཏེ་རྣམ་པར་འབྱེད་ལ་ཀུན་ནས་བསྐོར་བ་མེད་པར་གནས་པ་ནི་ལེགས་པའོ། །ཉེས་པ་བྱུང་བ་འཆབ་པ་ནི་ལེགས་པ་མ་ཡིན་པའོ། །བདག་གི་འཁྲུལ་པ་ལ་སོ་སོར་རྟོག་པ་ནི་ལེགས་པའོ། །གཞན་གྱི་འཁྲུལ་པའི་སྐྱོན་ཚོལ་བ་ནི་ལེགས་པ་མ་ཡིན་པའོ། །བྱས་པ་
གཟོ་བ་དང་། བྱས་པ་ཤེས་པ་དང་། བྱས་པ་ཆུད་མི་གཟོན་པ་དང་། བྱས་པ་ལ་ལན་དུ་ཕན་འདོགས་པ་ནི་ལེགས་པའོ། །བྱས་པ་མི་གཟོ་བ་དང་། བྱས་པ་མི་ཤེས་པ་དང་། བྱས་པ་ཆུད་གཟོན་པ་དང་། བྱས་པ་ལ་ལན་དུ་ཕན་མི་འདོགས་པ་ནི་ལེགས་པ་མ་ཡིན་པའོ། །ཐོས་པ་ཡང་དག་པར་
སྒྲུབ་པ་ནི་ལེགས་པའོ། །ཐོས་པ་ལོག་པར་བསྒྲུབ་པ་ནི་ལེགས་པ་མ་ཡིན་པའོ། །བསླབ་པ་ཡང་དག་པར་བླངས་ནས་མ་ཉམས་པ་ནི་ལེགས་པའོ། །བསླབ་པ་ཡང་དག་པར་བླངས་པ་ལས་འདའ་བ་ནི་ལེགས་པ་མ་ཡིན་པའོ། །དབེན་པ་ལ་སེམས་གཞོལ་ཞིང་དབེན་པ་ལ་དགའ་བ་ནི་ལེགས་པའོ། །འདུ་
འཛི་ལ་དགའ་བ་ནི་ལེགས་པ་མ་ཡིན་པའོ། །དགོན་པ་ལ་གནས་པར་ལུས་དང་སྲོག་འདོར་བ་ནི་ལེགས་པའོ། །ལུས་དང་སྲོག་ལ་ལྟ་བ་ནི་ལེགས་པ་མ་ཡིན་པའོ། །འཕགས་པའི་རིགས་ལ་ཡང་དག་པར་དགའ་བ་དང་རུང་བ་རྣམས་ལ་ཚོད་རིག་པ་ནི་ལེགས་པའོ། །ཆོག་མི་ཤེས་ཤིང་འདོད་པ་ཆེ་ལ་སྡིག་པ་འདོད་
པ་ནི་ལེགས་པ་མ་ཡིན་པའོ། །ཉམ་ཆུང་བ་རྣམས་ལ་བཟོད་ཅིང་དང་དུ་ལེན་པ་ནི་ལེགས་པའོ། །སེམས་ཅན་རྣམས་ལ་སྨ་འབེབས་པ་ནི་ལེགས་པ་མ་ཡིན་པའོ། །འཚོ་བ་དག་པ་ནི་ལེགས་པའོ། །སྙོམ་ལས་ཅན་ནི་ལེགས་པ་མ་ཡིན་པའོ། །སྐྱབས་སུ་སོང་བ་རྣམས་མི་གཏོང་བ་ནི་ལེགས་པའོ། །
སྐྱབས་སུ་སོང་བ་རྣམས་ལ་འཁུ་བ་ནི་ལེགས་པ་མ་ཡིན་པའོ། །དམ་བཅས་པ་ལས་མི་ཉམས་པའི་ཚིག་བདེན་པ་དང་། ཇི་སྐད་སྨྲས་པ་དེ་བཞིན་བྱེད་པ་ནི་ལེགས་པའོ། །འཇིག་རྟེན་ཐམས་ཅད་ལ་སླུ་བ་ནི་ལེགས་པ་མ་ཡིན་པའོ། །དམ་པའི་ཆོས་ཡོངས་སུ་འཛིན་པ་ནི་ལེགས་པའོ། །དམ་
པའི་ཆོས་ཡོངས་སུ་སྤོང་བ་ནི་ལེགས་པ་མ་ཡིན་པའོ། །ཐོས་པ་ལ་སེར་སྣ་མེད་ཅིང་ཆོས་ལ་སློབ་དཔོན་གྱིས་དཔེ་མཁྱུད་མེད་དེ་ཟང་ཟིང་མེད་པར་ཆོས་སྟོན་པ་ནི་ལེགས་པའོ། །ཆོས་ལ་སེར་སྣ་བྱེད་ཅིང་ཆོས་ལ་སློབ་དཔོན་གྱིས་དཔེ་མཁྱུད་བྱེད་དེ་ཟང་ཟིང་དང་འབྲེལ་བའི་སེམས་ཀྱིས་ཆོས་སྟོན་པ་ནི་ལེགས་

པ་མ་ཡིན་པའོ། །སེམས་ཅན་ཡོངས་སུ་སྨིན་པར་བྱེད་པའི་ཐབས་དང་ལྡན་པའི་བསྡུ་བ་ནི་ལེགས་པའོ། །སེམས་ཅན་ལ་མི་ལྟ་ཞིང་ཐབས་དང་མི་ལྡན་པར་བསྡུ་བའི་དངོས་པོ་སྟོན་པ་ནི་ལེགས་པ་མ་ཡིན་པའོ། །ཕ་རོལ་ཏུ་ཕྱིན་པ་དྲུག་ཚོལ་བ་ནི་ལེགས་པའོ། །ཕ་རོལ་ཏུ་ཕྱིན་པ་དྲུག་
གི་མི་འཐུན་པའི་ཕྱོགས་ནི་ལེགས་པ་མ་ཡིན་པའོ། །ཤེས་པས་བྱས་པའི་ལས་རྣམས་ནི་ལེགས་པའོ། །ང་རྒྱལ་གྱིས་བྱས་པའི་ལས་རྣམས་ནི་ལེགས་པ་མ་ཡིན་པའོ། །མཛའ་བ་བརྟན་པ་ནི་ལེགས་པའོ། །ངན་པ་དང་བཤེས་པ་ནི་ལེགས་པ་མ་ཡིན་པའོ། །དགེ་བ་བཅུའི་ལས་ཀྱི་ལམ་
ལ་སྟེན་པ་ནི་ལེགས་པའོ། །མི་དགེ་བ་བཅུའི་ལས་ཀྱི་ལམ་དུ་ཞུགས་པ་ནི་ལེགས་པ་མ་ཡིན་པའོ། །སྡིག་པའི་ལས་ཐམས་ཅད་མི་སྤྱོད་པ་ནི་ལེགས་པའོ། །སྡིག་པའི་ལས་ཐམས་ཅད་ལ་ཞུགས་པ་ནི་ལེགས་པ་མ་ཡིན་པའོ། །ལྷའི་བུ་དམིགས་པ་ཅན་གྱི་རབ་ཏུ་འབྱུང་བ་ནི་ལེགས་པ་མ་ཡིན་
པའོ། །སྟོང་པ་ཉིད་སྨྲ་བའི་མངོན་པར་འབྱུང་བ་ནི་ལེགས་པའོ། །འཇིག་རྟེན་རྒྱང་ཕན་པའི་གཏམ་སྨྲ་བའི་སེང་གེའི་ཁྲི་ནི་ལེགས་པ་མ་ཡིན་པའོ། །བྱང་ཆུབ་སེམས་དཔའི་སྡེ་སྣོད་རབ་ཏུ་ཐོབ་པའི་དམ་པའི་ཆོས་ཀྱི་གཏམ་སྨྲ་བའི་སེང་གེའི་ཁྲི་ནི་ལེགས་པའོ། །ཚུལ་ཁྲིམས་འཆལ་བས་
དད་པས་བྱིན་པ་སྤྱད་པ་ནི་ལེགས་པ་མ་ཡིན་པའོ། །ཚུལ་ཁྲིམས་དང་ལྡན་པའི་ཐོབ་པ་དང་། བཀུར་སྟི་དང་ཚིགས་སུ་བཅད་པ་ཐམས་ཅད་ནི་ལེགས་པའོ། །ལྷག་པའི་ང་རྒྱལ་ཅན་གྱི་བྱང་ཆུབ་ནི་ལེགས་པ་མ་ཡིན་པའོ། །ལྷག་པའི་ང་རྒྱལ་མེད་པར་ཤེས་པའི་བརྡ་སྤྲོད་པ་ནི་ལེགས་པའོ། །
བྱང་ཆུབ་སེམས་དཔའ་རྣམས་ལ་གནོད་པར་སེམས་པ་ནི་ལེགས་པ་མ་ཡིན་པའོ། །བྱང་ཆུབ་སེམས་དཔའ་རྣམས་ལ་སྟོན་པ་ཙམ་དུ་ཕངས་པར་འཛིན་པ་ནི་ལེགས་པའོ། །བྱང་ཆུབ་སེམས་དཔའི་མིང་གིས་རྙེད་པས་འཚོ་བ་ནི་ལེགས་པ་མ་ཡིན་པའོ། །བྱང་ཆུབ་སེམས་དཔའ་ཆོས་སྨྲ་
བ་ཡང་དག་པར་སྒྲུབ་པ་ལ་གནས་པའི་རྙེད་པ་ནི་ལེགས་པའོ། །ལྷའི་བུ་དེ་ལྟར་ན་ཇི་ཙམ་དུ་དེ་བཞིན་གཤེགས་པའི་བཀའ་དང་འགལ་བ་དེ་ཙམ་དུ་ཐམས་ཅད་ལེགས་པ་མ་ཡིན་པའོ། །ཇི་ཙམ་དུ་དེ་བཞིན་གཤེགས་པའི་བཀའ་དང་འཐུན་པ་དེ་ཙམ་དུ་ཐམས་ཅད་ལེགས་པའོ། །ལྷའི་བུས་

སྨྲས་པ། འཇམ་དཔལ་ཁྱོད་ཅི་ལེགས་སོ་ཞེས་བྱ་བའི་ཆོས་ལ་བརྩོན་ནམ། འོན་ཏེ་ལེགས་པ་མ་ཡིན་ཞེས་བྱ་བའི་ཆོས་ལ་བརྩོན། འཇམ་དཔལ་གྱིས་སྨྲས་པ། ལྷའི་བུ་ཁོ་བོ་ནི་ལེགས་སོ་ཞེས་བྱ་བའི་ཆོས་ལ་བརྩོན་པ་ཡང་མ་ཡིན། ལེགས་པ་མ་ཡིན་པ་ཞེས་བྱ་
བའི་ཆོས་ལ་བརྩོན་པ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། ལྷའི་བུ་ཁོ་བོ་ནི་ཆོས་ཐམས་ཅད་ལ་བརྩོན་པ་མ་ཡིན་ནོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་དགེ་བའི་ཆོས་ལ་མི་བརྩོན་ནམ། འཇམ་དཔལ་གྱིས་སྨྲས་པ། ལྷའི་བུ་ཁོ་བོ་ནི་དགེ་བའི་ཆོས་ལ་བརྩོན་པ་ཡང་མ་ཡིན། །
མི་དགེ་བའི་ཆོས་ལ་བརྩོན་པ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། ལྷའི་བུ་དགེ་བ་ཞེས་བྱ་བ་འདི་ཡང་འདུས་བྱས་སོ། །མི་དགེ་བ་ཞེས་བྱ་བ་འདི་ཡང་འདུས་བྱས་སོ། །མི་གཡོ་བ་ཞེས་བྱ་བ་འདི་ཡང་འདུས་བྱས་སོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་འདུས་མ་བྱས་པའམ།
འཇམ་དཔལ་གྱིས་སྨྲས་པ། ལྷའི་བུ་གལ་ཏེ་འདུས་བྱས་ཀྱིས་སྐྲག་པ་ལྟ་ན་ནི་ཁོ་བོ་འདུས་མ་བྱས་སུ་འགྱུར་རོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་འདུས་བྱས་ཀྱིས་མི་སྐྲག་གམ། འཇམ་དཔལ་གྱིས་སྨྲས་པ། ལྷའི་བུ་གལ་ཏེ་ཡང་དག་པར་འདུས་བྱས་ཀྱིས་ཡོངས་སུ་གྲུབ་པ་
ཞིག་མཐོང་ན་ནི་ཁོ་བོ་འདུས་བྱས་ཀྱིས་སྐྲག་པར་འགྱུར་རོ། །ལྷའི་བུས་སྨྲས་པ། འཇམ་དཔལ་ཅི་ཁྱོད་ཀྱིས་ཡང་དག་པར་འདུས་བྱས་ཀྱིས་ཡོངས་སུ་གྲུབ་པ་མ་མཐོང་ངམ། འཇམ་དཔལ་གྱིས་སྨྲས་པ། ལྷའི་བུ་ཁོ་བོས་ནི་ཡང་དག་པར་འདུས་བྱས་ཀྱིས་ཡོངས་སུ་གྲུབ་པ་མ་མཐོང་སྟེ། འདུས་
མ་བྱས་ཀྱིས་ཀྱང་མ་ཡིན་ནོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་འདུས་བྱས་སུ་གཏོགས་སམ། འོན་ཏེ་འདུས་མ་བྱས་སུ་གཏོགས། འཇམ་དཔལ་གྱིས་སྨྲས་པ། ལྷའི་བུ་ཁོ་བོ་ནི་འདུས་བྱས་སུ་གཏོགས་པ་ཡང་མ་ཡིན། འདུས་མ་བྱས་སུ་གཏོགས་པ་ཡང་མ་ཡིན་ནོ། །དེ་ཅིའི་
ཕྱིར་ཞེ་ན། གལ་ཏེ་འདུས་བྱས་སུ་གཏོགས་པར་གྱུར་ན་ནི་བྱིས་པ་སོ་སོའི་སྐྱེ་བོ་ཐམས་ཅད་དང་འདྲ་བར་འགྱུར་རོ། །གལ་ཏེ་འདུས་མ་བྱས་སུ་གཏོགས་པར་གྱུར་ན་ནི་ཉན་ཐོས་དང་རང་སངས་རྒྱས་ཐམས་ཅད་དང་འདྲ་བར་འགྱུར་རོ། །ལྷའི་བུས་སྨྲས་པ། འཇམ་དཔལ་གལ་ཏེ་ཁྱོད་འདུས་བྱས་སུ་གཏོགས་པ་

ཡང་མ་ཡིན། འདུས་མ་བྱས་སུ་གཏོགས་པ་ཡང་མ་ཡིན་ན་ཁྱོད་ཇི་ལྟར་ཤེས་པར་བྱ། འཇམ་དཔལ་གྱིས་སྨྲས་པ། ལྷའི་བུ་འདི་ཇི་སྙམ་དུ་སེམས། གང་དེ་བཞིན་གཤེགས་པས་སྤྲུལ་པ་འདུས་བྱས་སུ་གཏོགས་སམ། འོན་ཏེ་འདུས་མ་བྱས་སུ་གཏོགས། ལྷའི་བུས་སྨྲས་པ། འཇམ་
དཔལ་དེ་བཞིན་གཤེགས་པས་སྤྲུལ་པ་ནི་འདུས་བྱས་སུ་གཏོགས་པ་ཡང་མ་ཡིན། འདུས་མ་བྱས་སུ་གཏོགས་པ་ཡང་མ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ་དེ་བཞིན་གཤེགས་པས་སྤྲུལ་པའི་ཆོས་ཀྱི་དེ་བཞིན་ཉིད་ཅི་འདྲ་བ་དེ་འདྲ་བར་ཁོ་བོ་ཤེས་པར་གྱིས་ཤིག །ལྷའི་བུ་དེ་ཇི་
སྙམ་དུ་སེམས། དེ་བཞིན་གཤེགས་པའི་རྣམ་པར་ཤེས་པ་གང་ལ་གནས། གཟུགས་ལ་གནས་སམ། སྨྲས་པ་མ་ཡིན་ནོ། །སྨྲས་པ། དེ་ཅི་ཚོར་བ་དང་། འདུ་ཤེས་དང་། འདུ་བྱེད་རྣམས་ལ་གནས་སམ། སྨྲས་པ། མ་ཡིན་ནོ། །སྨྲས་པ། དེ་ཅི་འདུས་བྱས་ལ་གནས་སམ། སྨྲས་པ།
མ་ཡིན་ནོ། །སྨྲས་པ། དེ་ཅི་འདུས་མ་བྱས་ལ་གནས་སམ། སྨྲས་པ། མ་ཡིན་ནོ། །སྨྲས་པ། དེ་བཞིན་གཤེགས་པའི་རྣམ་པར་ཤེས་པ་གང་ལ་གནས། སྨྲས་པ། འཇམ་དཔལ་དེ་བཞིན་གཤེགས་པའི་རྣམ་པར་ཤེས་པ་ནི་གང་ལ་ཡང་མི་གནས་སོ། །འཇམ་དཔལ་གྱིས་སྨྲས་པ།
ལྷའི་བུ་དེ་བཞིན་གཤེགས་པའི་རྣམ་པར་ཤེས་པ་གང་ལ་གནས་པ་དེ་ལ་ཁོ་བོ་གནས་པར་ཤེས་པར་བྱའོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་དེ་བཞིན་གཤེགས་པ་ཡིན་ནམ། འཇམ་དཔལ་གྱིས་སྨྲས་པ། ལྷའི་བུ་དེ་བཞིན་ཉིད་ཀྱི་འོང་བ་མེད་པ་དང་འགྲོ་བ་མེད་པ་གང་ཡིན་པ་དེ་ཉིད་ཁོ་
བོའི་འགྲོ་བ་དེ་ཉིད་དེ་བཞིན་གཤེགས་པའི་འགྲོ་བ་སྟེ། དེས་ན་ཁོ་བོ་དེ་བཞིན་གཤེགས་པའོ། །དེ་བཞིན་ཉིད་ཇི་ལྟ་བར་ཁོ་བོ་ཡང་དེ་ལྟར་འོངས་པས་དེས་ན་ཁོ་བོ་དེ་བཞིན་གཤེགས་པའོ། །དེ་བཞིན་ཉིད་ཇི་ལྟ་བར་ཁོ་བོ་ཡང་དེ་ལྟར་གནས་ཏེ། དེས་ན་ཁོ་བོ་དེ་བཞིན་གཤེགས་པའོ། །ལྷའི་
བུ་འཇམ་དཔལ་ཞེས་བྱ་བ་འདི་ནི་དེ་བཞིན་ཉིད་ཅི་འདྲ་བ་དེ་འདྲ་སྟེ། དེས་ན་ཁོ་བོ་དེ་བཞིན་གཤེགས་པའོ། །དེ་བཞིན་ཉིད་སེམས་མེད་ཅིང་ཞི་བའི་ཕྱིར། འཇམ་དཔལ་ཡང་སེམས་མེད་ཅིང་ཞི་བ་སྟེ། །དེས་ན་ཁོ་བོ་དེ་བཞིན་གཤེགས་པའོ། །ལྷའི་བུས་སྨྲས་པ། འཇམ་དཔལ་དེ་བཞིན་ཉིད་གང་དུ་

བཙལ་བར་བྱ། འཇམ་དཔལ་གྱིས་སྨྲས་པ། ལྷའི་བུ་དེ་བཞིན་ཉིད་ནི་ལྟ་བར་སོང་བ་དྲུག་ཅུ་རྩ་གཉིས་རྣམས་སུ་བཙལ་བར་བྱའོ། །ལྷའི་བུས་སྨྲས་པ། ལྟ་བར་སོང་བ་དྲུག་ཅུ་རྩ་གཉིས་པོ་རྣམས་གང་དུ་བཙལ་བར་བྱ། འཇམ་དཔལ་གྱིས་སྨྲས་པ། ལྷའི་བུ་ལྟ་
བར་སོང་བ་དྲུག་ཅུ་རྩ་གཉིས་པོ་དག་ནི་དེ་བཞིན་གཤེགས་པ་མི་འཁྲུགས་པའི་ཆོས་ཅན་གྱི་རྣམ་པར་གྲོལ་བ་ལས་བཙལ་བར་བྱའོ། །ལྷའི་བུས་སྨྲས་པ། འཇམ་དཔལ་དེ་བཞིན་གཤེགས་པའི་རྣམ་པར་གྲོལ་བ་གང་དུ་བཙལ་བར་བྱ། འཇམ་དཔལ་གྱིས་སྨྲས་པ། ལྷའི་བུ་དེ་བཞིན་གཤེགས་པའི་
རྣམ་པར་གྲོལ་བ་ནི་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དང་། བསམ་པ་རྣམས་སུ་བཙལ་བར་བྱའོ། །ལྷའི་བུས་སྨྲས་པ། འཇམ་དཔལ་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དང་། བསམ་པ་གང་དུ་བཙལ་བར་བྱ། འཇམ་དཔལ་གྱིས་སྨྲས་པ། ལྷའི་བུ་སངས་རྒྱས་ཀྱི་སྤྱོད་ཡུལ་དུའོ། །
ལྷའི་བུས་སྨྲས་པ། འཇམ་དཔལ་སངས་རྒྱས་ཀྱི་སྤྱོད་ཡུལ་གང་དུ་བཙལ་བར་བྱ། འཇམ་དཔལ་གྱིས་སྨྲས་པ། ལྷའི་བུ་སེམས་ཅན་གྱི་དབང་པོ་མཆོག་དང་། མཆོག་མ་ཡིན་པ་ཐམས་ཅད་ཤེས་པ་ལས་བཙལ་བར་བྱའོ། །ལྷའི་བུས་སྨྲས་པ། འཇམ་དཔལ་ཁྱོད་ཇི་ལྟར་འདིར་ཤེས་པ་ཉུང་བར་འགྱུར་བ་
དེ་ལྟ་བུར་སྟོན་ཏམ། འཇམ་དཔལ་གྱིས་སྨྲས་པ། ལྷའི་བུ་སངས་རྒྱས་ཀྱི་ཡེ་ཤེས་ནི་སུས་ཀྱང་ཀུན་ཤེས་པའམ། རྣམ་པར་ཤེས་པར་མི་ནུས་སོ། །དེ་ཅིའི་ཕྱིར་ཞེ་ན། ལྷའི་བུ་སངས་རྒྱས་ཀྱི་ཡེ་ཤེས་ནི་ཆགས་པ་མེད་པ། རྣམ་པར་རྟོག་པ་མེད་པ། བརྗོད་དུ་མེད་པ། བསྙད་དུ་མེད་པ། སྦྱོར་བ་མེད་
པ། ཚིག་མེད་པ། སེམས་དང་ཡིད་དང་རྣམ་པར་ཤེས་པ་དང་བྲལ་བ་སྟེ། དེ་སུས་ཀྱང་ཀུན་ཤེས་པར་རམ་རྣམ་པར་ཤེས་པར་མི་ནུས་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ་གལ་ཏེ་སངས་རྒྱས་ཀྱི་ཡེ་ཤེས་ཀུན་ཤེས་པར་བྱ་བ་མ་ཡིན་ན་ཉན་ཐོས་འདི་དག་གིས་ཀུན་ཤེས་པར་ག་ལ་
འགྱུར། བྱང་ཆུབ་སེམས་དཔའ་རྣམས་ཀྱང་ཕྱིར་མི་ལྡོག་པ་ལ་གནས་པར་ག་ལ་འགྱུར། འཇམ་དཔལ་གྱིས་སྨྲས་པ། ལྷའི་བུ་གང་ཡི་གེ་རྣམས་ཀྱི་ཡེ་ཤེས་དེ་བསྟན་པ་འདི་ནི་དེ་བཞིན་གཤེགས་པ་རྣམས་ཀྱི་ཐབས་ཏེ་ཡེ་ཤེས་དེ་ནི་ཡི་གེ་མེད་པའོ། །ལྷའི་བུ་འདི་ལྟ་སྟེ་དཔེར་ན། མེ་གཙུབས་

པ་ལས་མེ་མི་འབྱུང་གི་གཙུབ་ཤིང་གཙུབས་པ་ལས་མེ་འབྱུང་བ་དེ་བཞིན་དུ་ལྷའི་བུ་དེ་བཞིན་གཤེགས་པས་གལ་ཏེ་ཐོག་མ་ཁོ་ནར་སངས་རྒྱས་ཀྱི་ཡེ་ཤེས་རྒྱ་ཆེན་ཡང་དག་པར་རབ་ཏུ་བསྟན་ན། སེམས་ཅན་གང་གིས་ཀྱང་དེ་བཞིན་གཤེགས་པའི་ཡེ་ཤེས་དེ་ཀུན་ཤེས་པར་མི་འགྱུར་བས། དེ་བཞིན་
གཤེགས་པས་གཙུབ་ཤིང་གི་གཏམ་གྱིས་ཡེ་ཤེས་དེ་བསྟན་ཏེ། ཡེ་ཤེས་དེ་ནི་ཡི་གེ་མེད་པའོ། །ལྷའི་བུས་སྨྲས་པ། འཇམ་དཔལ་གཙུབ་ཤིང་གི་གཏམ་གང་། འཇམ་དཔལ་གྱིས་སྨྲས་པ། ལྷའི་བུ་གང་ཅི་ཡང་རུང་སྟེ། སྡོམ་པ་དང་ཡོ་བྱད་བསྙུངས་པའི་གཏམ་དང་།
ཕ་རོལ་ཏུ་ཕྱིན་པ་ལ་སྦྱོར་བའི་གཏམ་དང་། བྱང་ཆུབ་ཀྱི་ཕྱོགས་ཀྱི་ཆོས་ལ་འཇུག་པའི་གཏམ་འདི་ནི་གཙུབ་ཤིང་གི་གཏམ་ཞེས་བྱའོ། །ལྷའི་བུས་སྨྲས་པ། འཇམ་དཔལ་གཙུབ་ཤིང་གི་གཏམ་མ་ཡིན་པའི་གཏམ་གང་། འཇམ་དཔལ་གྱིས་སྨྲས་པ། ལྷའི་བུ་གཏམ་གང་
སྐྱེ་བ་དང་། འཇིག་པ་དང་། གནས་པའི་གཏམ་མ་ཡིན་པ་དང་། འདྲེན་པ་དང་། སེལ་བའི་གཏམ་མ་ཡིན་པ་དང་། གཏམ་གང་ཀུན་ནས་ཉོན་མོངས་པ་ཡོངས་སུ་བརྗོད་པའི་གཏམ་མ་ཡིན་པ་དང་། རྣམ་པར་བྱང་བའི་ཕན་ཡོན་གྱི་གཏམ་མ་ཡིན་པ་དང་། གཏམ་གང་འཁོར་བ་ལ་ཡིད་
འབྱུང་བར་བྱ་བའི་གཏམ་མ་ཡིན་པ་དང་། མྱ་ངན་ལས་འདས་པ་ལ་མངོན་པར་དགའ་བར་བྱ་བ་མ་ཡིན་པའི་གཏམ་དང་། གཏམ་གང་ཡོངས་སུ་ཤེས་པར་བྱ་བའི་ཕྱིར་མ་ཡིན། སྤང་བར་བྱ་བའི་ཕྱིར་མ་ཡིན། བསྒོམ་པར་བྱ་བའི་ཕྱིར་མ་ཡིན། མངོན་སུམ་དུ་བྱ་བའི་ཕྱིར་མ་ཡིན་པ་དང་། གཏམ་
གང་ཐོབ་པར་བྱ་བའི་ཕྱིར་མ་ཡིན། མངོན་པར་རྟོགས་པར་བྱ་བའི་ཕྱིར་མ་ཡིན་པ་འདི་ནི་ལྷའི་བུ་དག་སྙིང་པོ་ཡོད་པའི་གཏམ་མོ། །ལྷའི་བུས་སྨྲས་པ། འཇམ་དཔལ་གཏམ་འདི་ལྟ་བུ་རྗོད་པའི་ཚེ། མིག་གིས་མི་རྩོལ་བར་བྱ་བའི་ཕྱིར་བདུད་སྡིག་ཅན་འདིར་མི་འོང་བ་ནི་ངོ་མཚར་ཏོ། །ཚིག་དེ་སྨྲས་ནས་
རིང་པོར་མ་ལོན་པར་དེའི་མོད་ལ་བདུད་སྡིག་ཅན་སྟེང་གི་བར་སྣང་ལ་སྤྲིན་ཆེན་པོ་འཁྲུགས་པར་མངོན་པར་སྤྲུལ་ནས་སྒྲ་ཆེན་པོའི་ང་རོ་ཕྱུང་བ་དང་། དེས་ཐམས་ཅད་དང་ལྡན་པའི་འཁོར་དེ་དངངས་སྐྲག་ནས་སྒྲ་སྐད་ཀྱི་ང་རོ་འདི་ལྟ་བུ་སུ་ཞིག་གི་སྙམ་མོ། །དེ་ནས་བཅོམ་ལྡན་འདས་ཀྱིས་འཇམ་དཔལ་

གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་ཀྱིས་བདུད་སྡིག་ཅན་གྱི་འགྱུར་བ་མཐོང་ངམ། འཇམ་དཔལ་གྱིས་གསོལ་པ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །དེ་ནས་འཇམ་དཔལ་གཞོན་ནུར་
གྱུར་པས་དེའི་ཚེ་བདུད་སྡིག་ཏོ་ཅན་བཅིང་བ་དམ་པོས་བཅིངས་ཏེ། སའི་སྟེང་དུ་ལྟུང་བ་དེ་ལྟ་བུའི་བསམ་པ་བསམས་པ་དང་། བདག་ནི་བཅིང་བ་དམ་པོས་བཅིངས་སོ། །བདག་ནི་བཅིང་བ་དམ་པོས་བཅིངས་སོ་ཞེས་སྒྲ་འབྱིན་ཏོ། །འཇམ་དཔལ་གྱིས་སྨྲས་པ། སྡིག་ཅན་བཅིང་བ་འདི་
བས་ཆེས་དམ་པའི་འཆིང་བ་གཞན་ཡོད་དེ། དེས་ཁྱོད་རྟག་ཏུ་བཅིངས་ཀྱང་ཁྱོད་ཀྱིས་ཁོང་དུ་མ་ཆུད་དོ། །དེ་ཡང་གང་ཞེ་ན་འདི་ལྟ་སྟེ། ངའོ་སྙམ་པའི་ང་རྒྱལ་གྱི་འཆིང་བ་དང་། ཕྱིན་ཅི་ལོག་གི་འཆིང་བ་དང་། སྲེད་པ་དང་ལྟ་བའི་འཆིང་བ་སྟེ། སྡིག་ཅན་འདི་ནི་འཆིང་བ་འདི་བས་
ཆེས་དམ་པའི་འཆིང་བ་དམ་པོ་གཞན་ཡིན་ཏེ། དེས་ཁྱོད་རྟག་ཏུ་བཅིངས་ཀྱང་ཁོང་དུ་མ་ཆུད་དོ། །བདུད་ཀྱིས་སྨྲས་པ། འཇམ་དཔལ་ཐོང་ཤིག་དང་བདག་གི་གནས་སུ་འགྲོའོ། །ཡང་བདུད་ཀྱི་ལས་མི་བྱའོ། །འཇམ་དཔལ་གྱིས་སྨྲས་པ། སྡིག་ཅན་སངས་རྒྱས་ཀྱི་མཛད་པ་ཁྱོད་ཀྱིས་བྱ་
དགོས་ན་ཁྱོད་ཅིའི་ཕྱིར་བཏང་། བདུད་ཀྱིས་སྨྲས་པ། འཇམ་དཔལ། བདག་ནི་སངས་རྒྱས་ཀྱི་ཆོས་རྣམས་ལ་བར་ཆད་བྱ་བའི་ཕྱིར་ཞུགས་པ་ཡིན་ན་བདག་གིས་སངས་རྒྱས་ཀྱི་མཛད་པ་ཇི་ལྟར་བྱ། འཇམ་དཔལ་གྱིས་སྨྲས་པ། སྡིག་ཅན་གང་སངས་རྒྱས་ཀྱི་མཛད་པ་བདུད་བྱེད་དུ་གཞུག་པ་
འདི་ནི་བྱང་ཆུབ་སེམས་དཔའ་རྣམས་ཀྱིས་ཐབས་དང་ཤེས་རབ་ཀྱི་ཤེས་པ་རྣམ་པར་སྤྲུལ་པའོ། །གང་སངས་རྒྱས་ཀྱིས་སངས་རྒྱས་ཀྱི་མཛད་པ་མཛད་པ་འདི་ནི་ངོ་མཚར་མ་ཡིན་ཏེ། གང་བདུད་སངས་རྒྱས་ཀྱི་མཛད་པ་བྱེད་པ་འདི་ནི་རབ་ཏུ་ངོ་མཚར་ཏོ། །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ་
གང་སྡིག་ཅན་སངས་རྒྱས་ཀྱི་གཟུགས་དང་ལྡན་པ་དང་། སངས་རྒྱས་ཀྱི་སེང་གེའི་ཁྲི་ལ་འདུག་པ་དང་། སངས་རྒྱས་ཀྱི་སྤོབས་པ་དང་ལྡན་པར་འགྱུར་བའི་བྱིན་གྱི་རླབས་དེ་ལྟ་བུའི་བྱིན་གྱིས་བརླབས་སོ། །དེ་ནས་བདུད་སྡིག་ཅན་གྱིས་ཚེ་དང་ལྡན་པ་དག་ཅི་དང་ཅི་འདོད་པ་ཁོ་བོ་ལ་དྲིས་ཤིག་དང་ཁོ་

བོས་དྲིས་པ་ལུང་བསྟན་པས་ཁྱེད་ཀྱི་སེམས་རངས་པར་བྱའོ་ཞེས་ཚིག་དེ་སྐད་སྨྲས་སོ། །དེ་ནས་གནས་བརྟན་འོད་སྲུང་ཆེན་པོས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་དགེ་སློང་རྣལ་འབྱོར་སྤྱོད་པའི་འཆིང་བ་གང་ཡིན། བདུད་ཀྱིས་སྨྲས་པ། བཙུན་པ་འོད་སྲུང་ཆེན་པོ་བསམ་
གཏན་གྱི་རོ་མྱོང་བར་བྱེད་པ་ནི་དགེ་སློང་རྣལ་འབྱོར་སྤྱོད་པའི་འཆིང་བའོ། །ཞི་གནས་དེ་ལ་ཆགས་པ་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་སྙོམས་པར་འཇུག་པ་དང་། སྟོང་པ་ཉིད་ལ་སྙིང་པོར་འདུ་ཤེས་པ་དང་། ལྟ་བར་སོང་བ་རྣམས་བསལ་བར་འདུ་ཤེས་པ་
དང་། མཚན་མ་མེད་པ་ལ་སྙིང་པོར་འདུ་ཤེས་པ་དང་། མཚན་མ་རྣམས་ལ་བསལ་བར་འདུ་ཤེས་པ་དང་། སྨོན་པ་མེད་པ་ལ་སྙིང་པོར་འདུ་ཤེས་པ་དང་། སྨོན་ལམ་ལ་བསལ་བར་འདུ་ཤེས་པ་དང་། མྱ་ངན་ལས་འདས་པ་ལ་སྙིང་པོར་འདུ་ཤེས་པ་དང་། འཁོར་བ་ལ་བསལ་
བར་འདུ་ཤེས་པ་འདི་དག་ནི་བཙུན་པ་འོད་སྲུང་ཆེན་པོ་དགེ་སློང་རྣལ་འབྱོར་སྤྱོད་པའི་འཆིང་བའོ། །དེ་ཅིའི་ཕྱིར་ཞེ་ན། བཙུན་པ་འོད་སྲུང་ཆེན་པོ་ལྟ་བར་སོང་བ་བསལ་ནས་སྟོང་པ་ཉིད་བསྒོམ་པར་བྱ་བ་མ་ཡིན་གྱི། ལྟ་བར་སོང་བ་ཉིད་སྟོང་པ་ཉིད་དོ། །མཚན་མ་བསལ་ནས་མཚན་
མ་མེད་པ་བསྒོམ་པར་བྱ་བ་མ་ཡིན་གྱི། མཚན་མའི་ངོ་བོ་ཉིད་མཚན་མ་མེད་པའོ། །སྨོན་ལམ་བསལ་ནས་སྨོན་པ་མེད་པར་བསྒོམ་པར་བྱ་བ་མ་ཡིན་གྱི། སྨོན་ལམ་གྱི་ངོ་བོ་ཉིད་སྨོན་པ་མེད་པའོ། །འཁོར་བ་བསལ་ནས་མྱ་ངན་ལས་འདས་པ་བསྒོམ་པར་བྱ་བ་མ་ཡིན་གྱི།
འཁོར་བར་དམིགས་པ་ཉིད་མྱ་ངན་ལས་འདས་པའོ། །བཙུན་པ་འོད་སྲུང་ཆེན་པོ་མྱ་ངན་ལས་འདས་པ་ཞེས་བྱ་བ་ནི་འདུ་ཤེས་པ་དང་། རློམ་སེམས་དང་། མཚན་མ་ལ་དམིགས་པ་ཐམས་ཅད་ལ་མི་སྤྱོད་པ་སྟེ། མྱ་ངན་ལས་འདས་པ་ནི་སྐྱེ་བ་དང་། འཇིག་པ་དང་། ཟད་པ་
ལས་མ་ཡིན་གྱི། རང་བཞིན་གྱིས་སྐྱེ་བ་མེད་པ་ཉིད་མྱ་ངན་ལས་འདས་པའོ། །བསྟན་པ་འདི་བཤད་པ་ན་དགེ་སློང་ལྔ་བརྒྱ་ཉེ་བར་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་གནས་བརྟན་རབ་འབྱོར་གྱིས་དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་

ལྡན་པ་དག་སུས་བཏུལ། དགེ་སློང་དེ་དག་གིས་སྨྲས་པ། གང་ཐོབ་པ་ཡང་མེད་པ། མངོན་པར་རྫོགས་པར་སངས་རྒྱས་པ་ཡང་མེད་པས་སོ། །རབ་འབྱོར་གྱིས་སྨྲས་པ། བཏུལ་བ་དེ་ཇི་ལྟ་བུ། སྨྲས་པ། ཇི་ལྟར་གནས་པ་ཉིད་ཀྱི་ཕྱིར་ཆུང་ཟད་
ཀྱང་ཁྲིད་པ་ཡང་མེད། མ་ཁྲིད་པ་ཡང་མེད་དེ། ཇི་ལྟར་གནས་པ་བཞིན་དུ་ཤེས་པ་དང་། བསྐྱེད་པ་ཡང་མེད། བཀག་པ་ཡང་མེད་དེ། མཉམ་པ་ཉིད་དུ་ཤེས་པ་དེ་ལྟར་བདག་ཅག་བཏུལ་ཏོ། །དགེ་སློང་དེ་དག་གིས་བསྟན་པ་འདི་བཤད་པ་ན་ལྷའི་བུ་སྟོང་ཉིས་བརྒྱ་ཆོས་རྣམས་ལ་
ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །གནས་བརྟན་རབ་འབྱོར་གྱིས་གཞན་ཡང་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་ཇི་ལྟར་ན་དགེ་སློང་སྦྱིན་གནས་ཡིན། བདུད་ཀྱིས་སྨྲས་པ། བཙུན་པ་རབ་འབྱོར་ནམ་དགེ་སློང་ལེན་པ་ཡང་མེད་དེ། ནོད་པ་ཡང་མེད་
ལ་དད་ཅིང་དང་བ་ཐམས་ཅད་ལས་ཀྱང་ཡོངས་སུ་སྤྱོད་པ་ནའོ། །བཙུན་པ་རབ་འབྱོར་གང་དགེ་སློང་གང་ལ་བྱིན་པ་དེ་ལ་སྒྱུ་མའི་བློ་དང་། གང་ལེན་པ་དེ་ལ་མིག་ཡོར་གྱི་བློ་དང་། ཉེ་བར་ལེན་པའི་སེམས་དང་། ཉེ་བར་ལེན་པ་མེད་པའི་སེམས་ཀྱིས་ཀྱང་ཡོངས་སུ་མི་སྤྱོད་པའི་དགེ་སློང་དེ་ལྟ་བུ་ནི་
སྦྱིན་པའི་གནས་ཡིན་ནོ། །ཤ་ར་དྭ་ཏིའི་བུས་སྨྲས་པ། སྡིག་ཅན་བཅོམ་ལྡན་འདས་ཀྱིས་ཏིང་ངེ་འཛིན་འཁྲུགས་པ་མེད་པར་གསུངས་པ་གང་ཡིན། བདུད་ཀྱིས་སྨྲས་པ། བྱང་ཆུབ་སེམས་དཔའ་ཏིང་ངེ་འཛིན་གང་ལ་བརྟེན་ནས་ཤིན་ཏུ་ཟད་པའི་ཕྱིར་ཟད་པ་ཡང་ཟད་པར་མི་བྱེད། རང་བཞིན་
གྱིས་མ་སྐྱེས་པའི་ཕྱིར་མ་སྐྱེས་པ་ཡང་མི་སྐྱེད། མྱོང་བ་མེད་པ་ཡང་མྱོང་བར་མི་བྱེད་དེ། ཆོས་ཐམས་ཅད་ཀྱང་རང་བཞིན་གྱིས་སྙོམས་པར་ཞུགས་པར་ཤེས་ལ། ཤེས་ནས་ཀྱང་ཚོར་བ་ཐམས་ཅད་འགོག་པའི་སྙོམས་པར་འཇུག་པ་ལ་སྙོམས་པར་འཇུག་ཅིང་མཉམ་པར་ཡང་མཐོང་ལ་ཆུང་
ཟད་ཀྱང་མཐོང་བ་ཡང་མེད། མི་མཐོང་བ་ཡང་མེད་པ་འདི་ནི་བཅོམ་ལྡན་འདས་ཀྱིས་ཏིང་ངེ་འཛིན་འཁྲུགས་པ་མེད་པར་གསུངས་པའོ། །མཽད་གལ་གྱི་བུས་སྨྲས་པ། སྡིག་ཅན་ཇི་ལྟར་ན་དགེ་སློང་སེམས་ཐམས་ཅད་ལ་དབང་ཐོབ་པ་ཡིན། བདུད་ཀྱིས་སྨྲས་པ། བཙུན་པ་མཽད་གལ་གྱི་བུ་ཆེན་

པོ་ནམ་དགེ་སློང་ཆོས་ཐམས་ཅད་ལ་སེམས་རྣམ་པར་གྲོལ་བའི་མཚན་ཉིད་དུ་ཤེས་ལ། རྣམ་པར་གྲོལ་བའི་མཚན་ཉིད་ལ་མངོན་པར་ཞེན་པ་ཡང་མེད་ཅིང་སེམས་གཟོད་མ་ནས་རྣམ་པར་གྲོལ་བ་ཤེས་ལ། འཆིང་བར་ཡང་མི་བྱེད། གྲོལ་བར་ཡང་མི་བྱེད། སེམས་གཟུགས་མེད་
པས་ཆོས་ཐམས་ཅད་གཟུགས་མེད་པར་ཤེས། སེམས་གནས་པ་མེད་པས་ཆོས་ཐམས་ཅད་གནས་པ་མེད་པར་མཐོང་། སེམས་འཛིན་པ་མེད་པས་ཆོས་ཐམས་ཅད་འཛིན་པ་མེད་པར་ཤེས་ཀྱང་སེམས་ཀྱིས་སེམས་ཤེས་པ་ཡང་མེད་ལ། སེམས་ཀྱིས་ངོ་བོ་ཉིད་ཀྱི་རང་བཞིན་གྱིས་ཆོས་
ཐམས་ཅད་ཀྱི་ཆོས་ཀྱི་དབྱིངས་ཀྱི་ངོ་བོ་ཉིད་ཀྱི་རང་བཞིན་ཡང་ཤེས་ཤིང་། ཆོས་ཀྱི་དབྱིངས་ཀྱི་ངོ་བོ་ཉིད་ཀྱི་རང་བཞིན་གྱིས་གཞན་གྱི་དྲིང་ལ་མི་འཇོག་པར་དབང་ཐོབ་པ་ནི་མོས་པའི་རྫུ་འཕྲུལ་དང་ལྡན་པ་ཡིན་ཏེ། བཙུན་པ་མཽད་གལ་གྱི་བུ་ཆེན་པོ་དགེ་སློང་དེ་ལྟ་བུ་ནི་སེམས་ཐམས་ཅད་ལ་དབང་
ཐོབ་པ་ཡིན་ནོ། །གང་པོས་སྨྲས་པ། སྡིག་ཅན་ཇི་ལྟར་ན་དགེ་སློང་ཡོངས་སུ་དག་པར་ཆོས་སྟོན་པ་ཡིན། བདུད་ཀྱིས་སྨྲས་པ། བཙུན་པ་གང་པོ་ནམ་དགེ་སློང་གིས་གཞན་ལས་ཆོས་ཐམས་ཅད་ཤེས་ཀྱང་གཞན་དང་གཞན་མ་ཡིན་པའི་སེམས་ལ་མངོན་པར་ཞེན་པ་ཡང་མེད། ཆོས་
ཐམས་ཅད་ཀྱང་སྒྲོ་བཏགས་པར་ཡང་སྟོན། ཡི་གེ་དང་། སྐད་དང་། དབྱངས་དང་། ཚིག་གི་ལམ་ཐམས་ཅད་ཀྱང་བྲག་ཅ་ལྟ་བུར་ཤེས། ཆོས་ཉན་པ་ཐམས་ཅད་ཀྱང་སྒྱུ་མའི་སྐྱེས་བུ་ལྟར་མཐོང་། གང་གི་ལུས་ཀྱི་རྣམ་པར་རིག་བྱེད་ཀྱང་ཆུ་ཟླ་དང་འདྲ་བར་མཐོང་། ཉོན་མོངས་
པ་ཐམས་ཅད་ཀྱང་ཡོངས་སུ་རྟོག་པ་ལས་བྱུང་བར་ཤེས། ཆོས་འགའ་ཞིག་གཟུང་བའི་ཕྱིར་རམ། དོར་བའི་ཕྱིར་རམ། ཤིན་ཏུ་བཟླ་བའི་ཕྱིར་རམ། ཐོབ་པར་བྱ་བའི་ཕྱིར་ཡང་ཆོས་མི་སྟོན། སོ་སོ་ཡང་དག་པར་རིག་པ་བཞི་པོ་རྣམས་ལ་ཡང་དབང་ཐོབ་ཅིང་ལེགས་སོ་ཞེས་བྱ་བ་ལ་ཡང་
རེ་བ་མེད་ལ། ཟང་ཟིང་མེད་པར་ཆོས་སྟོན་ཅིང་རང་གི་སེམས་རང་བཞིན་གྱིས་ཡོངས་སུ་དག་པས་སེམས་ཅན་ཐམས་ཅད་ཀྱི་སེམས་རང་བཞིན་གྱིས་ཡོངས་སུ་དག་པར་ཤེས་ཏེ། སེམས་རང་བཞིན་གྱིས་ཡོངས་སུ་དག་པར་ཤེས་ནས་ཕུང་པོའི་བདུད་ལ་དབེན་པར་མཐོང་བ་དང་། ཉོན་

མོངས་པའི་བདུད་ལ་བཅོས་མར་འདུ་ཤེས་པ་དང་། འཆི་བདག་གི་བདུད་ལ་མ་སྐྱེས་པ་དང་། མི་སྐྱེ་བར་གནས་པ་དང་། ལྷའི་བུའི་བདུད་ལ་གཡོ་བ་དང་། རློམ་སེམས་ཐམས་ཅད་དང་བྲལ་བར་གྱུར་པ་ཡིན་ཏེ། དགེ་སློང་དེ་ལྟ་བུ་ནི་ཡོངས་སུ་དག་པར་
ཆོས་སྟོན་པ་ཡིན་ནོ། །ཉེ་བར་འཁོར་གྱིས་སྨྲས་པ། སྡིག་ཅན་ཇི་ལྟར་ན་དགེ་སློང་འདུལ་བ་འཛིན་པ་ཡིན། བདུད་ཀྱིས་སྨྲས་པ། བཙུན་པ་ཉེ་བར་འཁོར་དགེ་སློང་གིས་ནམ་ཆོས་ཐམས་ཅད་ཤིན་ཏུ་དུལ་བར་ཤེས་ཏེ། ཉེས་པ་རྣམས་ཀྱི་ཐོག་མའི་སྔོན་གྱི་མཐའ་ཡང་དབེན་པའི་
མཐར་ཤེས་ལ། ཉེས་པ་བྱུང་བ་རྣམས་ཀྱི་འགྱོད་པ་ཡང་སེལ་ཅིང་དམ་པོར་མི་བྱེད་དེ། དེ་དག་གང་གིས་མཚམས་མེད་པ་རྣམས་ཀྱང་རྣམ་པར་གནོན་ན། ཆོ་ག་དང་ཚུལ་ཁྲིམས་ལ་ལོག་པར་ཞུགས་པ་ཕྲན་ཚེགས་ལྟ་སྨོས་ཀྱང་ཅི་དགོས་པ་དེ་ལྟ་བུའི་ཆོས་ཀྱི་ཚུལ་གྱི་རྣམ་པ་ཡང་ཉེ་
བར་སྒྲུབ། ཉོན་མོངས་པ་འདུལ་བ་ལ་ཡང་མཁས། བློ་བུར་གྱི་ཉོན་མོངས་པ་རྣམས་ལ་ཡང་ཀུན་ནས་ཉོན་མོངས་པར་གྱུར་པ་མ་ཡིན་པ་དང་། འབྱུང་བར་འདུ་ཤེས། ཉོན་མོངས་པར་ནང་དུ་ཡང་མི་སྟོན། ཕྱི་རོལ་དུ་ཡང་མ་ཡིན། གཉི་ག་མེད་པར་ཡང་མ་ཡིན་ཏེ། ཉོན་
མོངས་པ་ཁོང་དུ་ཆུད་པ་ཉིད་ཉོན་མོངས་པ་མེད་པར་ཤེས་ཤིང་ཉོན་མོངས་པ་ཡང་མི་སེལ། ཉོན་མོངས་པ་མེད་པ་ཡང་མི་སྒྲུབ། ཉོན་མོངས་པ་ཐམས་ཅད་ཀྱང་སྤྲིན་འདྲ་བར་ཤེས་ཏེ། ཡེ་ཤེས་དང་ལྷག་མཐོང་གི་རླུང་གིས་གཏོར་ནས་ཕྱོགས་དང་ཡུལ་དུ་འགྲོ་བ་ཡང་མེད་གནས་པ་
ཡང་མེད་པ་དང་། ཉོན་མོངས་པ་རྣམས་ནི་ཆུ་ཟླ་དང་འདྲ་སྟེ། ཡོངས་སུ་རྟོག་པའི་གཟུགས་བརྙན་གྱིས་བཞིན་ཉེ་བར་སྟོན་པ་དང་། ཉོན་མོངས་པ་རྣམས་ནི་མུན་པའི་སྤྱོད་ཡུལ་ཏེ། ཤེས་རབ་ཀྱི་སྒྲོན་མས་མི་སྣང་བ་སྣང་བར་བྱེད་པ་དང་། ཉོན་མོངས་པ་རྣམས་ནི་ཆོམ་རྐུན་དང་། མཁའ་
འགྲོ་མ་དང་། གནོད་སྦྱིན་དང་། སྲིན་པོ་དང་འདྲ་སྟེ། ཚུལ་བཞིན་ཡིད་ལ་བྱེད་པས་བརྟགས་ན་གནས་པ་མ་ཡིན་པ་དང་། ཉོན་མོངས་པ་རྣམས་ནི་གླགས་ཚོལ་བ་སྟེ། ཚུལ་བཞིན་མ་ཡིན་པ་ཡིད་ལ་བྱེད་པས་འཕེལ་བ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་

པའི་ཤེས་པས་ཡིད་ལ་འཇུག་པར་མི་བྱེད་པས་སུས་ཉོན་མོངས་པ་རྣམས་འདི་འདྲ་བར་ཤེས་ཏེ། སེམས་ཅན་ཉོན་མོངས་པས་ཀུན་ནས་ཉོན་མོངས་པར་གྱུར་པ་རྣམས་ལ་སྙིང་རྗེ་ཞིང་བདག་མེད་པ་དང་། སེམས་ཅན་མེད་པ་མངོན་སུམ་དུ་གྱུར་པ་ན་འདུལ་བ་འཛིན་པ་ཡང་དག་པ་ཞེས་བྱའོ། །
དེ་ལྟར་ཉན་ཐོས་ཆེན་པོ་དེ་དག་ཐམས་ཅད་ཀྱིས་རང་རང་གི་འདོད་པ་བདུད་སྡིག་ཅན་དེ་ལ་ཀུན་དྲིས་ནས་བདུད་ས