Kinh tạng Tây Tạng (Kangyur Đại Học) — 002_འདུལ་བ།_ཁ

་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་
འདི་སྐད་ཅེས་གསོལ་ཏོ། །བཙུན་པ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་པ་དགེ་སློང་གི་དངོས་པོ་འཐོབ་པ་ལྟ་ན། བདག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། །ཁྱིམ་བདག་
གི་བུ་ཕ་དང་མ་གཉིས་ཀྱིས་གནང་ངམ། བཙུན་པ་མ་གནང་ངོ་། །ཁྱིམ་བདག་གི་བུ་དེ་བཞིན་གཤེགས་པའམ། དེ་བཞིན་གཤེགས་པའི་ཉན་ཐོས་རྣམས་ནི་ཕ་དང་མ་གཉིས་ཀྱིས་མ་གནང་བ་རབ་ཏུ་འབྱིན་པ་དང་། བསྙེན་པར་རྫོགས་པར་མི་བྱེད་དོ། །བཙུན་
པ་བདག་གིས་ཅི་ནས་ཕ་དང་མས་གནང་བ་དེ་ལྟར་བགྱི་ལགས་སོ། །དེ་ནས་ཁྱིམ་བདག་གི་བུ་ཡུལ་འཁོར་སྐྱོང་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་ཡི་རངས་ནས། རང་གི་ཁྱིམ་གང་ན་བ་དེར་སོང་སྟེ་ཕྱིན་པ་དང་། ཕ་དང་མ་ལ་འདི་སྐད་ཅེས་
སྨྲས་སོ། །ཡབ་ཡུམ་མཁྱེན་པར་མཛོད་ཅིག །བདག་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མ་མཆིས་པར་རབ་ཏུ་འབྱུང་བར་བགྱིའོ། །བུ་ཡུལ་འཁོར་སྐྱོང་ཤེས་པར་གྱིས་ཤིག །ཁྱོད་ངེད་ཀྱི་བུ་གཅིག་པ་སྡུག་པ་ཡིད་དུ་འོང་བ་བཟོད་པ་མི་མཐུན་པ་མེད་པ་
ཡིན་པས་ཁྱོད་ཤི་བར་གྱུར་ན་ངེད་མི་འདོད་བཞིན་དུ་འབྲལ་གྲང་། གསོན་བཞིན་དུ་ག་ལ་གཏང་། ཡབ་ཡུམ་གལ་ཏེ་རེ་ཞིག་གནང་ན་ལེགས། གལ་ཏེ་མ་གནང་ན་དེང་སླན་ཅད་འཚལ་མ་ཡང་མི་འཚལ། ཕྱག་ཡང་མི་འཚལ་ལོ། །དེ་ནས་ཁྱིམ་བདག་གི་བུ་ཡུལ་འཁོར་

སྐྱོང་གིས་ཉི་མ་གཅིག་ཀྱང་ཟན་བཅད་པ་བྱས་སོ། །གཉིས་དང་གསུམ་ནས་བདུན་གྱི་བར་དུ་ཟན་བཅད་པ་བྱས་སོ། །དེ་ནས་ཁྱིམ་བདག་གི་བུ་ཡུལ་འཁོར་སྐྱོང་གི་ཕ་དང་མས་ཁྱིམ་བདག་གི་བུ་ཡུལ་འཁོར་སྐྱོང་ལ་འདི་སྐད་ཅེས་སྨྲས་སོ། །བུ་
ཡུལ་འཁོར་སྐྱོང་ཤེས་པར་གྱིས་ཤིག །ཁྱོད་ནི་ཤིན་ཏུ་གཞོན་པ་བདེ་བ་འདོད་པ་ཡིན་པས་ཁྱོད་ཀྱི་སྡུག་བསྔལ་མི་ཤེས་ཏེ། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པ་བྱ་དཀའོ། །གཅིག་པུ་ཉིད་ལ་མངོན་པར་དགའ་བ་དཀའོ། །གནས་མལ་དགོན་པ་དང་།
ནགས་ཁྲོད་དང་། བས་མཐར་གནས་པ་ནི་མནགས་དཀའོ། །བུ་ཡུལ་འཁོར་སྐྱོང་ཚུར་འདུག་ལ་འདོད་པ་དག་ལ་ཡང་སྤྱོད་ཅིག །སྦྱིན་པ་དག་ཀྱང་བྱིན་ཅིག །བསོད་ནམས་དག་ཀྱང་གྱིས་ཤིག །དེ་སྐད་སྨྲས་ན་ཁྱིམ་བདག་གི་བུ་ཡུལ་འཁོར་སྐྱོང་ཅང་མི་སྨྲའོ། །དེ་
ནས་ཁྱིམ་བདག་གི་བུ་ཡུལ་འཁོར་སྐྱོང་གི་ཕ་དང་མས་ཉེ་དུ་རྣམས་ལ་བཅོལ་བ། ཀྱེ་ཉེ་དུ་དག་རེ་ཞིག་བུ་ཡུལ་འཁོར་སྐྱོང་སློང་ཤིག །དེ་ནས་ཁྱིམ་བདག་གི་བུ་ཡུལ་འཁོར་སྐྱོང་གི་ཉེ་དུ་རྣམས་ཁྱིམ་བདག་གི་བུ་ཡུལ་འཁོར་སྐྱོང་གང་ན་བ་དེར་དོང་སྟེ་ཕྱིན་ནས། ཁྱིམ་བདག་གི་བུ་ཡུལ་
སྐྱོང་ལ་འདི་སྐད་ཅེས་སྨྲས་སོ། །བུ་ཡུལ་འཁོར་སྐྱོང་མཁྱེན་པར་མཛོད་ཅིག །ཁྱོད་ནི་ཤིན་ཏུ་གཞོན་པས་བདེ་བ་བཞེད་པ་ལགས་ཞེས་བྱ་བ་ནས་བསོད་ནམས་དག་གྱིས་ཤིག་ཅེས་བྱ་བའི་བར་གོང་མ་བཞིན་དུའོ། །དེ་སྐད་སྨྲས་ན་ཁྱིམ་བདག་གི་བུ་ཡུལ་འཁོར་སྐྱོང་ཅང་མི་སྨྲའོ། །དེ་ནས་
ཁྱིམ་བདག་གི་བུ་ཡུལ་འཁོར་སྐྱོང་གི་ཕ་དང་མས་ཡུལ་འཁོར་སྐྱོང་གི་ནེའུ་ལྡངས་རྣམས་ལ་བཅོལ་བ། ཀྱེ་གཞོན་ནུ་དག་རེ་ཞིག་བུ་ཡུལ་འཁོར་སྐྱོང་སློང་ཤིག །དེ་ནས་ཁྱིམ་བདག་གི་བུ་ཡུལ་འཁོར་སྐྱོང་གི་ནེའུ་ལྡངས་རྣམས་ཀྱིས་ཡུལ་འཁོར་སྐྱོང་ལ་འདི་སྐད་ཅེས་སྨྲས་སོ། །ཀྱེ་སྲས་
དེས་པ་ཡུལ་འཁོར་སྐྱོང་མཁྱེན་པར་མཛོད་ཅིག །ཁྱོད་ནི་ཤིན་ཏུ་གཞོན་པས་བདེ་བ་བཞེད་པ་ལགས་ལ་ཞེས་བྱ་བ་ནས། བསོད་ནམས་དག་མཛོད་ཅིག་ཅེས་བྱ་བའི་བར་སྔ་མ་བཞིན་དུའོ། །དེས་དེ་སྐད་སྨྲས་ན་ཁྱིམ་བདག་གི་བུ་ཡུལ་འཁོར་སྐྱོང་ཅང་མི་སྨྲའོ། །དེ་ནས་གཞོན་

ནུ་དག་གིས་ཡུལ་འཁོར་སྐྱོང་གི་ཕ་དང་མ་ལ་འདི་སྐད་ཅེས་སྨྲས་སོ། །ཡབ་ཡུམ་སྲས་ཡུལ་འཁོར་སྐྱོང་འདི་གུམ་པས་ཅི་ཞིག་བགྱི། རབ་ཏུ་འབྱུང་དུ་གནོང་དང་། གལ་ཏེ་དགའ་བར་གྱུར་ན་འདི་གསོན་པོ་ཉིད་དུ་གཟིགས་པར་འགྱུར་ལ། གལ་ཏེ་མངོན་པར་མི་དགའ་
བར་གྱུར་ན་ཡང་བུའི་གནས་ཕ་མ་གཉིས་མ་ལགས་པ་གཞན་སུ་ཞིག་མཆིས། གཞོན་ནུ་དག་བདག་ཅག་ལ་གལ་ཏེ་རབ་ཏུ་བྱུང་ནས་ལྟ་བར་བྱེད་ན་དེ་བཞིན་དུ་གནང་བར་བྱའོ། །དེ་ནས་ཡུལ་འཁོར་སྐྱོང་གི་ནེའུ་ལྡངས་དག་གིས་ཁྱིམ་བདག་གི་བུ་ཡུལ་འཁོར་སྐྱོང་ལ་འདི་
སྐད་ཅེས་སྨྲས་ས་། །དེས་པ་ཡུལ་འཁོར་སྐྱོང་མཁྱེན་པར་མཛོད་ཅིག །ཕ་དང་མས་གནང་སྟེ་འདི་སྐད་ཅེས་གལ་ཏེ་རབ་ཏུ་བྱུང་ནས་ལྟ་བར་བྱེད་ནའོ་ཞེས་ཀྱང་ཟེར་རོ། །ཤེས་ལྡན་དག་བལྟ་བར་བྱའོ། །དེ་ནས་ཁྱིམ་བདག་གི་བུ་ཡུལ་འཁོར་སྐྱོང་རིམ་གྱིས་ལུས་
ཀྱི་མཐུ་དང་སྟོབས་བསྐྱེད་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཁྱིམ་བདག་གི་བུ་ཡུལ་འཁོར་སྐྱོང་
གིས་འདི་སྐད་ཅེས་གསོལ་ཏོ། །བཙུན་པ་བདག་ནི་ཕ་དང་མས་གནང་ལགས་ཀྱིས། བཙུན་པ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཐོབ་པ་ལྟ་ན། བདག་བཅོམ་ལྡན་འདས་ཀྱི་སྤྱན་སྔར་ཚངས་པར་
སྤྱོད་པ་སྤྱད་པར་བགྱིའོ། །ཁྱིམ་བདག་གི་བུ་ཡུལ་འཁོར་སྐྱོང་གིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་གི་བུ་ཡུལ་འཁོར་སྐྱོང་རབ་ཏུ་ཕྱུང་བསྙེན་པར་རྫོགས་
པར་མཛད་ནས་བང་མཛོད་སྟུག་པོ་ཅན་དུ་ཇི་ཙམ་བཞེད་ཀྱི་བར་དུ་བཞུགས་ནས་མཉན་ཡོད་གང་ན་བ་དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་དང་མཉན་ཡོད་དུ་བྱོན་ནས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །

དེ་ནས་ཚེ་དང་ལྡན་པ་ཡུལ་འཁོར་སྐྱོང་བསྙེན་པར་རྫོགས་ཏེ་ལོ་བཅུ་ལོན་ནས་དགྲ་བཅོམ་པ་ཐོབ་སྟེ་རྣམ་པར་གྲོལ་བའི་དགའ་བ་དང་བདེ་བ་ཉམས་སུ་མྱོང་ནས་འདི་སྙམ་དུ་སེམས་ཏེ། སྔོན་བདག་ཁྱིམ་པར་གྱུར་པ་ན་ཕ་དང་མ་ལ་རབ་ཏུ་བྱུང་ནས་བལྟ་བར་བྱའོ་
ཞེས་ཁས་བླངས་པ་ཡོད་ཀྱིས། མ་ལ་བདག་གིས་ཁས་བླངས་པ་དེ་མཐར་དབྱུང་ངོ་སྙམ་ནས། དེ་ནས་ཚེ་དང་ལྡན་པ་ཡུལ་འཁོར་སྐྱོང་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་ཕྱོགས་
གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཡུལ་འཁོར་སྐྱོང་གིས་འདི་སྐད་ཅེས་གསོལ་ཏོ། །བཙུན་པ་སྔོན་བདག་ཁྱིམ་པར་གྱུར་པ་ན་ཕ་དང་མ་ལ་བལྟ་བར་བགྱིའོ་ཞེས་གཡར་གྱིས་བླངས་པས་བདག་གཡར་གྱིས་བླངས་པ་དེ་མཐར་
འབྱིན་དུ་མཆིའོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་ཚེ་དང་ལྡན་པ་ཡུལ་འཁོར་སྐྱོང་གི་སེམས་ཁྱབ་པར་མཛད་ཅིང་ཁྱབ་པར་མཛད་ནས་ཐུགས་ལ་མཛད་ཅིང་། ཐུགས་ལ་མཛད་ནས་འདི་སྙམ་དུ་དགོངས་ཏེ། རིགས་ཀྱི་བུ་ཡུལ་འཁོར་སྐྱོང་ནི་སླར་ཡང་ཁྱིམ་ན་
གནས་པའམ། སོགས་འཇོག་སྤྱོད་པས་འདོད་པ་དག་ལ་ལོངས་སྤྱོད་པའི་འོས་མ་ཡིན་ནོ་སྙམ་དུ་མཁྱེན་ནས། ཚེ་དང་ལྡན་པ་ཡུལ་འཁོར་སྐྱོང་ལ་འདི་སྐད་ཅེས་བཀའ་སྩལ་ཏོ། །ཡུལ་འཁོར་སྐྱོང་ཁྱོད་སོང་ལ་སེམས་ཅན་མ་རྒལ་བ་རྣམས་ནི་སྒྲོལ་ཅིག །མ་གྲོལ་བ་རྣམས་
ནི་གྲོལ་བར་གྱིས་ཤིག །དབུགས་མ་ཕྱིན་པ་རྣམས་ནི་དབུགས་ཕྱུང་ཤིག །ཡོངས་སུ་མྱ་ངན་ལས་མ་འདས་པ་རྣམས་ནི་ཡོངས་སུ་མྱ་ངན་ལས་ཟློས་ཤིག །དེ་ནས་ཚེ་དང་ལྡན་པ་ཡུལ་འཁོར་སྐྱོང་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་ཡི་རངས་
ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་ཚེ་དང་ལྡན་པ་ཡུལ་འཁོར་སྐྱོང་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་

ཞུགས་ཏེ། མཉན་ཡོད་དུ་བསོད་སྙོམས་སྤྱད་ནས་ཟས་ཀྱི་བྱ་བ་བྱས་ཏེ་ཟས་ཕྱི་མའི་བསོད་སྙོམས་ལས་སླར་ལོག་ནས་གནས་མལ་ཇི་ལྟར་སྤྱད་པ་མཁོས་སུ་ཕབ་སྟེ་ལྷུང་བཟེད་དང་ཆོས་གོས་བླངས་ནས་བང་མཛོད་སྟུག་པོ་ཅན་གང་ན་བ་དེར་སོང་སྟེ། རིམ་གྱིས་
སྤྱད་པ་སྤྱོད་ཅིང་རྒྱུ་བ་ན་བང་མཛོད་སྟུག་པོ་ཅན་དུ་ཕྱིན་ནས། བང་མཛོད་སྟུག་པོ་ཅན་གྱི་བང་མཛོད་སྟུག་པོའི་ཚལ་དུ་འདུག་གོ། །དེ་ནས་ཚེ་དང་ལྡན་པ་ཡུལ་འཁོར་སྐྱོང་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་བང་མཛོད་
སྟུག་པོ་ཅན་དུ་བསོད་སྙོམས་ལ་ཞུགས་ནས། དེ་རིམ་གྱིས་བང་མཛོད་སྟུག་པོ་ཅན་ནས་བསོད་སྙོམས་ལ་རྒྱུ་བ་ན་རང་གི་ཁྱིམ་གང་ན་དེར་སོང་ནས། དེའི་ཚེ་ཚེ་དང་ལྡན་པ་ཡུལ་འཁོར་སྐྱོང་གི་ཕ་བར་སྒོའི་ཁྱམས་ན་སྐྱེས་པ་སྐྲ་མཁན་གྱིས་སྐྲ་དང་ཁ་སྤུ་འཆོས་པ་ན། ཚེ་དང་ལྡན་
པ་ཡུལ་འཁོར་སྐྱོང་གི་ཕས་ཚེ་དང་ལྡན་པ་ཡུལ་འཁོར་སྐྱོང་སྒོ་དྲུང་ན་འདུག་པ་མཐོང་ངོ་། །མཐོང་ནས་ཀྱང་ཁ་ཟེར་བར་བྱེད་དེ། དགེ་སྦྱོང་མགོ་རེག་འོ་ནི་དག་གིས་ཁོ་བོའི་རིགས་ཀྱི་རྒྱུན་བཅད་དེ། འོ་ནི་དག་གིས་ཁོ་བོའི་བུ་གཅིག་པ་སྡུག་པ་ཡིད་དུ་འོང་བ་བཟོད་པ་མི་
མཐུན་པ་མེད་པ་ཡུལ་འཁོར་སྐྱོང་རབ་ཏུ་ཕྱུང་བསྙེན་པར་རྫོགས་པར་བྱས་ན། དགེ་སྦྱོང་མགོ་རེག་འོ་ནི་རྣམས་ལ་སུ་ཞིག་བསོད་སྙོམས་སྦྱིན་པར་བྱ་བར་སེམས། དེ་ནས་ཚེ་དང་ལྡན་པ་ཡུལ་འཁོར་སྐྱོང་གིས་རང་གི་ཁྱིམ་ནས་རྒྱ་གག་མ་གཏོགས་པ་སྦྱིན་པ་ཡང་མ་ཐོབ།
བསྐྲད་ཀྱང་མ་བསྐྲད་པ་དང་མྱུར་བ་མྱུར་བར་ཕྱིར་བྱུང་ངོ་། །དེའི་ཚེ་ཚེ་དང་ལྡན་པ་ཡུལ་འཁོར་སྐྱོང་གི་སྔོན་གྱི་བྲན་མོ་རྒན་མོ་ཞིག་ཟན་དྲོན་རུལ་པ་ཞག་ལོན་པ་ཞིག་དོར་བའི་ཕྱིར་ཐོགས་ཏེ་སྒོར་བྱུང་བ་དང་། ཚེ་དང་ལྡན་པ་ཡུལ་འཁོར་སྐྱོང་གིས་སྔོན་གྱི་བྲན་མོ་རྒན་མོ་དེ་མཐོང་ངོ་། །
མཐོང་ནས་ཀྱང་བྲན་མོ་རྒན་མོ་དེ་ལ་འདི་སྐད་ཅེས་སྨྲས་སོ། །སྲིང་མོ་གལ་ཏེ་ཟན་དྲོན་རུལ་པ་ཞག་ལོན་པ་འདོར་བ་ཡིན་ན་ཁོ་བོས་བཟས་ལྷུང་བཟེད་འདིར་ཆུག་ཤིག །འཕགས་པ་གསོལ་ཅིག །དེ་ནས་སྔོན་གྱི་བྲན་མོ་རྒན་མོ་དེས་ཟན་དྲོན་རུལ་པ་ཞིག་ལོན་པ་ལྷུང་བཟེད་དུ་འཇུག་

པ་ན་ཚེ་དང་ལྡན་པ་ཡུལ་འཁོར་སྐྱོང་གི་ལག་པ་དང་། རྐང་པ་དང་། བཞིན་དང་། སྣ་དང་། སྨྲ་དངགས་དག་གི་མཚན་མ་ཤིན་ཏུ་ལེགས་པར་བཟུང་ནས་འདི་སྐད་ཅེས་ཀྱང་སྨྲས་སོ། །རྗེའི་སྲས་ཡུལ་འཁོར་སྐྱོང་ལགས་སམ། སྲིང་མོ་
ཁོ་བོ་སྐྱེ་བོ་དག་གིས་དེ་ལྟར་ཤེས་སོ། །དེ་ནས་སྔོན་གྱི་བྲན་མོ་རྒན་མོ་དེ་རིངས་པ་རིངས་པར་ཚེ་དང་ལྡན་པ་ཡུལ་འཁོར་སྐྱོང་གི་ཕ་གང་ན་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཡུལ་འཁོར་སྐྱོང་གི་ཕ་ལ་འདི་སྐད་ཅེས་སྨྲས་སོ། །ཇོ་བོ་མཁྱེན་པར་མཛོད་ཅིག །སྲས་
ཡུལ་འཁོར་སྐྱོང་བང་མཛོད་སྟུག་པོ་ཅན་དུ་བྱོན་ནས་རིང་མོ་ཞིག་ལགས་ན་ཉིད་ཀྱི་ཁབ་ཏུ་ནི་བྱོན་མི་བཞེད་དོ། །དེ་ནས་ཚེ་དང་ལྡན་པ་ཡུལ་འཁོར་སྐྱོང་གི་ཕས་ལག་པ་གཡོན་པས་སྐྲ་བསྡུས་ནས་རས་ཡུག་གཅིག་གི་སྨད་གཡོགས་བགོས་བཞིན་དུ་ཚེ་དང་ལྡན་པ་ཡུལ་
འཁོར་སྐྱོང་གང་ན་བ་དེར་སོང་བ་དང་། དེའི་ཚེ་ཚེ་དང་ལྡན་པ་ཡུལ་འཁོར་སྐྱོང་རྩིག་དྲུང་ཞིག་ཏུ་འདུག་ནས་ཟན་དྲོན་རུལ་པ་ཞག་ལོན་པ་ཟ་བར་བྱེད་པ་དང་། དེ་ནས་ཚེ་དང་ལྡན་པ་ཡུལ་འཁོར་སྐྱོང་གི་ཕས་ཚེ་དང་ལྡན་པ་ཡུལ་འཁོར་སྐྱོང་ལ་འདི་སྐད་ཅེས་སྨྲས་སོ། །ཡུལ་
འཁོར་སྐྱོང་ཁྱོད་བང་མཛོད་སྟུག་པོ་ཅན་དུ་ཕྱིན་ནས་རིང་མོ་ཞིག་ལོན་ན་ཅིའི་ཕྱིར་རང་གི་ཁྱིམ་དུ་འཇུག་པར་མི་འདོད། ཟན་དྲོན་རུལ་པ་ཞག་ལོན་པ་ཁྱོད་ཀྱི་གྲེ་བར་ཡང་ཇི་ལྟར་འགྲོར་བཏུབ། ཁྱིམ་བདག་ཁྱོད་ཀྱི་ཁྱིམ་དུ་འོངས་ན་རྒྱ་གག་མ་གཏོགས་པ་སྦྱིན་པ་ཡང་མ་ཐོབ། བསྐྲད་
ཀྱང་མ་བསྐྲད་པ་དང་མྱུར་བ་མྱུར་བར་བྱུང་ངོ་། །བུ་ཡུལ་འཁོར་སྐྱོང་ཡིན་པར་ཁོ་བོས་མི་ཤེས་མོད། གལ་ཏེ ཁོ་བོས་ཤེས་ན་དེ་སྐད་མི་སྨྲ་བ་ཞིག །བུ་ཡུལ་འཁོར་སྐྱོང་བཟོད་པར་གསོལ་ལོ། །ཁྱིམ་བདག་བཟོད་དོ། །དེ་ནས་ཚེ་དང་ལྡན་པ་ཡུལ་འཁོར་སྐྱོང་གི་ཕས་ཚེ་དང་ལྡན་པ་
ཡུལ་འཁོར་སྐྱོང་ལ་ཡན་ལག་ཐམས་ཅད་ཀྱིས་འཁྱུད་པ་བྱས་ནས་རང་གི་ཁྱིམ་དུ་སྟན་བཤམས་པ་ཉིད་ལ་འདུག་ཏུ་བཅུག་གོ། །དེ་ནས་ཚེ་དང་ལྡན་པ་ཡུལ་འཁོར་སྐྱོང་གི་ཕས་ཡུལ་འཁོར་སྐྱོང་གི་མ་ལ་འདི་སྐད་ཅེས་སྨྲས་སོ། །བུ་ཡུལ་འཁོར་སྐྱོང་ཡུན་རིང་ཞིག་ལོན་ནས་

ཁྱིམ་དུ་འོངས་ཀྱིས། ཀྱེ་རེ་ཞིག་ཁྱོད་བདག་ཉིད་ཀྱིས་སྣོད་དུ་ཚོས་ལ་སྟ་གོན་གྱིས་ཤིག་དང་དེ་ལ་བུ་ཡུལ་འཁོར་སྐྱོང་ལོངས་སྤྱོད་པར་འགྱུར་རོ། །དེ་ནས་ཚེ་དང་ལྡན་པ་ཡུལ་འཁོར་སྐྱོང་གི་མས་རང་ཉིད་ཀྱིས་སྣོད་དུ་བཙོས་ནས་སྟ་གོན་བྱས་སོ། །དེ་ནས་མི་ཞིག་གིས་ཚེ་དང་
ལྡན་པ་ཡུལ་འཁོར་སྐྱོང་གི་མདུན་དུ་གསེར་གྱི་ཕུང་པོ་ཆེན་པོ་གལ་ཏེ་མི་གཅིག་ཕ་རོལ་ན་འགྲེང་ན་མི་གཅིག་ཚུ་རོལ་ན་འདུག་པ་མི་མཐོང་ལ། མི་གཅིག་ཚུ་རོལ་ན་འདུག་ན་གཅིག་ཕ་རོལ་ན་འགྲེང་བ་མི་མཐོང་བ་སྤུངས་སོ། །ཚེ་དང་ལྡན་པ་ཡུལ་འཁོར་སྐྱོང་གི་མས་ཚེ་དང་
ལྡན་པ་ཡུལ་འཁོར་སྐྱོང་ལ་འདི་སྐད་ཅེས་སྨྲས་སོ། །བུ་ཡུལ་འཁོར་སྐྱོང་ཁྱོད་ཀྱི་མ་ལ་བུད་མེད་རྣམས་ཀྱི་བུད་མེད་ཀྱི་ནོར་དང་། བུད་མེད་ཀྱི་བག་རྫོངས་དང་། བུད་མེད་ཀྱི་ཁུད་པ་ཞེས་བྱ་བ་གང་ཡིན་པ་ཡང་འདི་སྙེད་ཅིག་ཡོད་དོ། །གཞན་ཡང་ཁྱོད་ཀྱི་ཕའི་ནི་མཚན་མས་ཐེབས་
པའི་གསེར་དང་ས་ལེ་སྦྲམ་ཡང་བརྒྱ་ཕྲག་དུ་མ་དང་། སྟོང་ཕྲག་དུ་མ་དང་། བརྒྱ་སྟོང་ཕྲག་དུ་མ་ཡོད་ན་ཕལ་གཞན་ལྟ་སྨོས་ཀྱང་ཅི་དགོས། བུ་ཡུལ་འཁོར་སྐྱོང་ཚུར་ཁྱོད་འདུག་ལ་འདོད་པ་དག་ལ་ཡང་ཡོངས་སུ་སྤྱོད་ཅིག །སྦྱིན་པ་དག་ཀྱང་ཐོང་ཤིག །བསོད་ནམས་དག་ཀྱང་
གྱིས་ཤིག །ཁྱིམ་བདག་གི་ཆུང་མ་ཁྱོད་གལ་ཏེ་ཁོ་བོའི་ཚིག་ལ་དད་པས་མཉན་པར་བྱ་བར་སེམས་པ་ལྟ་ན། བདག་གིས་གདམས་ཤིང་རྗེས་སུ་བསྟན་ཏོ། །བུ་ཡུལ་འཁོར་སྐྱོང་གདམས་ངག་སྩོལ་ཅིག །བུ་ཡུལ་འཁོར་སྐྱོང་རྗེས་སུ་སྟོན་ཅིག་དང་། ཁྱོད་ཀྱི་ཚིག་ལ་
བདག་དད་པས་མཉན་པར་བགྱིའོ་སྙམ་དུ་སེམས་སོ། །ཁྱིམ་བདག་གི་ཆུང་མ་ཚུར་ཁྱོད་ཀྱིས་ཤ་ནའི་རས་སྐྱེ་སར་པར་བྱོས་ལ། གསེར་དང་ས་ལེ་སྦྲམ་གྱིས་ཁོང་སྟེ་ཤིང་རྟའི་ནང་དུ་ཆུག་ལ་ཆུ་བོ་གང་གཱའི་རྒྱུན་ཤུགས་དྲག་ཅིང་གཏིང་ཟབ་པ་གང་ན་ཡོད་པ་དེར་འོར་ཅིག །གཞི་དེ་ལས་
ཁྱོད་ཀྱི་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་སྐྱེ་བར་གྱུར་ཏ་རེ། དེ་ནས་ཚེ་དང་ལྡན་པ་ཡུལ་འཁོར་སྐྱོང་གི་མ་འདི་སྙམ་དུ་སེམས་ཏེ། བདག་གིས་དེ་ལྟ་བུའི་བྱ་བས་ཀྱང་བུ་ཡུལ་འཁོར་སྐྱོང་བཟློག་པར་བྱ་བ་མ་

ནུས་སོ་སྙམ་མོ། །དེ་ནས་ཚེ་དང་ལྡན་པ་ཡུལ་འཁོར་སྐྱོང་གི་མས་མནའ་མ་ལ་བཅོལ་བ། ཀྱེ་བག་སར་རེ་ཞིག་ཇི་ལྟ་བུའི་མཉེ་བ་རྣམས་ཀྱིས་མཉེས་པ་དང་། ཁྲུས་རྣམས་ཀྱིས་བཀྲུས་པ་དང་། དྲི་རྣམས་ཀྱིས་བྱུགས་པ་དང་། གོས་རྣམས་བསྐོན་པ་
དང་། རྒྱན་རྣམས་ཀྱིས་བརྒྱན་པ་དང་། བདུག་པ་རྣམས་ཀྱིས་བདུགས་པ་དང་། ཕྱེ་མ་རྣམས་ཀྱིས་གཏོར་བས། བུ་ཡུལ་འཁོར་སྐྱོང་དེ་སྔོན་ཁྱིམ་པར་གྱུར་པ་ན་དགའ་བ་དང་ཡིད་དུ་འོང་བར་འགྱུར་བ་དེ་ལྟ་བུའི་མཉེ་བ་རྣམས་ཀྱིས་མཉེས་པ་དང་། ཁྲུས་རྣམས་ཀྱིས་ཁྲུས་དང་།
དྲི་རྣམས་ཀྱིས་བྱུགས་པ་དང་། གོས་རྣམས་བསྐོན་པ་དང་། རྒྱན་རྣམས་ཀྱིས་བརྒྱན་པ་དང་། བདུག་པ་རྣམས་ཀྱིས་བདུགས་པ་དང་། ཕྱེ་མ་རྣམས་ཀྱིས་གཏོར་བ་གྱིས་ལ་བུ་ཡུལ་འཁོར་སྐྱོང་གི་རྐང་པ་གཉིས་ལ་གཏུགས་ལ་འདི་སྐད་ཅེས། གང་གི་སླད་དུ་རྗེའི་སྲས་
བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་ལྷའི་བུ་མོ་ཇི་ལྟ་བུ་ཞིག་ཅེས་ཀྱང་སྨྲོས་ཤིག །དེ་ནས་ཚེ་དང་ལྡན་པ་ཡུལ་འཁོར་སྐྱོང་གི་སྔོན་གྱི་ཆུང་མས་ཇི་ལྟ་བུའི་མཉེ་བ་རྣམས་ཀྱིས་མཉེས་པ་དང་། ཁྲུས་རྣམས་ཀྱིས་བཀྲུས་པ་དང་། དྲི་རྣམས་ཀྱིས་བྱུགས་པ་དང་། གོས་
རྣམས་བསྐོན་པ་དང་། རྒྱན་རྣམས་ཀྱིས་བརྒྱན་པ་དང་། བདུག་པ་རྣམས་ཀྱིས་བདུགས་པ་དང་། ཕྱེ་མ་རྣམས་ཀྱིས་གཏོར་བས་ཚེ་དང་ལྡན་པ་ཡུལ་འཁོར་སྐྱོང་སྔོན་ཁྱིམ་པར་གྱུར་པ་ན་དགའ་བ་དང་ཡིད་དུ་འོང་བར་འགྱུར་བ་དེ་ལྟ་བུའི་མཉེ་བ་རྣམས་ཀྱིས་མཉེས་པ་དང་། ཁྲུས་
རྣམས་ཀྱིས་ཁྲུས་དང་། དྲི་རྣམས་ཀྱིས་བྱུགས་པ་དང་། གོས་རྣམས་བསྐོན་པ་དང་། རྒྱན་རྣམས་ཀྱིས་བརྒྱན་པ་དང་། བདུག་པ་རྣམས་ཀྱིས་བདུགས་པ་དང་། ཕྱེ་མ་རྣམས་ཀྱིས་གཏོར་བ་བྱས་ནས་ཚེ་དང་ལྡན་པ་ཡུལ་འཁོར་སྐྱོང་གི་རྐང་པ་གཉིས་ལ་གཏུགས་ཏེ་འདི་
སྐད་ཅེས་སྨྲས་སོ། །རྗེའི་སྲས་གང་གི་སླད་དུ་བཅོམ་ལྡན་འདས་ཀྱི་སྤྱན་སྔ་ན་ཚངས་པར་སྤྱད་པ་སྤྱོད་པ་ལྷའི་བུ་མོ་དེ་ཇི་ལྟ་བུ་ཞིག་ལགས། སྲིང་མོ་ཁོ་བོ་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་ནི་ལྷའི་བུ་མོའི་ཆེད་དུ་མ་ཡིན་ནོ། །དེ་ནས་ཚེ་དང་ལྡན་པ་ཡུལ་འཁོར་

སྐྱོང་གིས་སྔོན་གྱི་ཆུང་མ་ལ་སྲིང་མོ་ཞེས་ཚིག་ཏུ་སྨྲས་པས་བརྒྱལ་ནས་ས་ལ་འགྱེལ་ཏོ། །དེ་ནས་ཚེ་དང་ལྡན་པ་ཡུལ་འཁོར་སྐྱོང་གིས་ཕ་དང་མ་ལ་སྨྲས་པ། དེ་ཡབ་ཡུམ་གལ་ཏེ་ཁ་ཟས་བཏང་བ་ལགས་ན་ཅི་མི་སྩལ་ཏམ། བཏང་སྙོམས་སུ་བཞག་སྟེ་ཅི་མཐོ་
འཚམ་ལགས་སམ། བུ་ཡུལ་འཁོར་སྐྱོང་ལོངས་སྤྱོད་ཅིག །ཅེས་དེ་ནས་ཚེ་དང་ལྡན་པ་ཡུལ་འཁོར་སྐྱོང་གི་ཕ་དང་མས་ཚེ་དང་ལྡན་པ་ཡུལ་འཁོར་སྐྱོང་ལ་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་སྟོབས་ཤིང་ཚིམ་པར་བྱེད་དེ། རྣམ་གྲངས་དུ་མར་གཙང་
ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་བསྟབས་ཤིང་ཚིམ་པར་བྱས་སོ། །ཚེ་དང་ལྡན་པ་ཡུལ་འཁོར་སྐྱོང་གིས་ཟོས་ནས་ལག་པ་བཀྲུས་ཏེ་ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ཞིག་བླངས་ཏེ་ཆོས་མཉན་པའི་ཕྱིར་འཁོད་དོ། །དེ་ནས་ཚེ་དང་ལྡན་པ་ཡུལ་
འཁོར་སྐྱོང་གིས་དེའི་ཚེ་ཚིགས་སུ་བཅད་དེ་སྨྲས་པ། ལྟོས་ཤིག་ལུས་ནི་ནོར་བུ་དང་། །རྣ་རྒྱན་གྱིས་ནི་བཀྲ་བྱས་པའང་། །ནད་དང་སླུ་བའི་ཆོས་ཅན་ཏེ། །བརྟན་པར་གནས་པ་ཡོད་མ་ཡིན། །སྐྲ་ཡི་ལན་བུ་བརྒྱད་ལྷས་ཤིང་། །མིག་ནི་མིག་སྨན་གྱིས་བསྐུས་པའང་། །
བྱིས་པ་རྨོངས་པར་བྱེད་ནུས་ཀྱི། །ཕ་རོལ་ཚོལ་བ་མ་ཡིན་ནོ། །དྲི་རྣམས་ཀྱིས་ནི་ལུས་བསྐུས་ལ། །རྐང་པ་བཙག་གིས་བྱུགས་པ་ཡང་། །བྱིས་པ་རྨོངས་པར་བྱེད་ནུས་ཀྱི། །ཕ་རོལ་ཚོལ་བ་མ་ཡིན་ནོ། །མིག་སྨན་གསེར་གྱིས་བཀྲ་བྱས་ཤིང་། །དུལ་བའི་ལུས་ནི་
བརྒྱན་པ་ཡང་། །བྱིས་པ་རྨོངས་པར་བྱེད་ནུས་ཀྱི། །ཕ་རོལ་ཚོལ་བ་མ་ཡིན་ནོ། །རི་དགས་འཆོར་བས་རྙི་བཙུགས་ནས། །རི་དགས་གཟུང་བར་མ་ནུས་ལྟར། །རྔོན་པ་འོ་དོད་འབོད་བཅུག་ལ། །ཟོས་ནས་གནས་སུ་འགྲོ་བར་བྱ། །དེ་ནས་ཚེ་དང་ལྡན་པ་ཡུལ་འཁོར་
སྐྱོང་གིས་ཕ་དང་མ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་དེ་ཉིད་ནས་སྟེང་གི་ནམ་མཁའ་ལ་སོང་ངོ་། །དེ་ནས་ཚེ་དང་ལྡན་པ་ཡུལ་འཁོར་སྐྱོང་

བང་མཛོད་སྟུག་པོ་ཅན་གང་ན་བ་དེར་སོང་སྟེ་ཕྱིན་ནས་བ་རུ་རའི་ཤིང་ཞིག་གི་དྲུང་དུ་ཉིན་པར་གནས་པར་བྱ་བའི་ཕྱིར་འདུག་གོ། །དེའི་ཚེ་རྒྱལ་པོ་ཀཽ་རབ་བྱ་ཚེ་དང་ལྡན་པ་ཡུལ་འཁོར་སྐྱོང་གི་སྙན་པ་ཡང་སྒྲོགས་ཤིང་གནས་ཏེ། ནམ་ཞིག་ན་བདག་ཤེས་
ལྡན་ཡུལ་འཁོར་སྐྱོང་མངོན་སུམ་དུ་མཐོང་བར་འགྱུར། ནམ་ཞིག་ན་གལ་ཏེ་ཞུ་བ་ལུང་བསྟན་པའི་ཕྱིར་སྐབས་ཕྱེ་ན་བདག་ཕྱོགས་འགའ་ཞིག་ཞུ་བར་འགྱུར་སྙམ་མོ། །དེ་ནས་རྒྱལ་པོ་ཀཽ་རབ་བྱས་ཚལ་སྲུང་བའི་མི་ལ་བསྒོ་བ། ཀྭའི་ནང་རྗེ་ཁྱོད་སོང་ལ་མྱུར་དུ་བང་མཛོད་སྟུག་པོ་ཅན་
གྱི་ཚལ་ཕྱག་དར་བྱོས་ཤིག །སང་ང་དེར་སྐྱེད་མོས་ཚལ་གྱི་སར་འགྲོའོ། །ལྷ་བཀའ་བཞིན་འཚལ་ཞེས་སྐྱེས་པ་དེས་རྒྱལ་པོ་ཀཽ་རབ་བྱའི་ལྟར་མཉན་ནས་བང་མཛོད་སྟུག་པོ་ཅན་གྱི་ཚལ་ཐམས་ཅད་ཕྱག་དར་བྱེད་པ་ན། མི་དེས་ཚེ་དང་ལྡན་པ་ཡུལ་འཁོར་སྐྱོང་བ་རུ་རའི་ཤིང་ཞིག་གི་
དྲུང་ན་ཉིན་པར་གནས་པར་བྱ་བའི་ཕྱིར་འདུག་པ་མཐོང་ངོ་། །མཐོང་ནས་ཀྱང་དེ་འདི་སྙམ་དུ་སེམས་ཏེ། རྒྱལ་པོ་ཀཽ་རབ་བྱ་གང་གི་སྙན་པ་ཡང་དང་ཡང་དུ་སྒྲོགས་ཤིང་གནས་ཏེ། ནམ་ཞིག་ན་བདག་ཤེས་ལྡན་ཡུལ་འཁོར་སྐྱོང་མངོན་སུམ་དུ་མཐོང་བར་འགྱུར། ནམ་ཞིག་ན་
གལ་ཏེ་ཞུ་བ་ལུང་བསྟན་པའི་ཕྱིར་སྐབས་ཕྱེ་ན་བདག་ཕྱོགས་འགའ་ཞིག་ཞུ་བར་འགྱུར་སྙམ་པའི་ཤེས་ལྡན་ཡུལ་འཁོར་སྐྱོང་དེ་ནི་འདི་ཡིན་ཏེ། བང་མཛོད་སྟུག་པོ་ཅན་གྱི་འདི་ལྟ་བུ་ཞིག་ཏུ་ཕྱིན་གྱིས། མ་ལ་བདག་གིས་རྒྱལ་པོ་ཀཽ་རབ་བྱ་ལ་སྦྲན་པར་བྱའོ་སྙམ་ནས། དེ་ནས་སྐྱེས་པ་
དེས་རྒྱལ་པོ་ཀཽ་རབ་བྱ་གང་ན་བ་དེར་སོང་སྟེ་ཕྱིན་ནས་རྒྱལ་པོ་ཀཽ་རབ་བྱ་ལ་འདི་སྐད་ཅེས་སྨྲས་སོ། །ལྷ་གང་གི་སྙན་པ་ཡང་དང་ཡང་དུ་སྒྲོགས་ཤིང་བཞུགས་ལ་ནམ་ཞིག་ན་བདག་ཤེས་ལྡན་ཡུལ་འཁོར་སྐྱོང་མངོན་སུམ་དུ་མཐོང་བར་འགྱུར། ནམ་ཞིག་ན་གལ་ཏེ་ཞུ་བ་ལུང་བསྟན་པའི་ཕྱིར་
སྐབས་ཕྱེ་ན་བདག་ཕྱོགས་འགའ་ཞིག་ཞུ་བར་འགྱུར་སྙམ་པའི་ཤེས་ལྡན་ཡུལ་འཁོར་སྐྱོང་དེ་ནི་དེ་ལགས་ཏེ། བང་མཛོད་སྟུག་པོ་ཅན་གྱི་འདི་ལྟ་བུ་ཞིག་ཏུ་མཆིས་ལགས་ཏེ། ལྷ་ད་དེའི་དུས་ལ་བབ་པར་དགོངས་སུ་གསོལ། དེ་ནས་རྒྱལ་པོ་ཀཽ་རབ་བྱས་མི་གཞན་ཞིག་ལ་བསྒོ་བ། ཀྭའི་ནང་

རྗེ་ཚུར་བཞོན་པ་བཟང་པོ་མྱུར་དུ་སྡོགས་ཤིག །དེ་ལ་ང་ཞོན་ནས་དེང་ཁོ་ན་ཤེས་ལྡན་ཡུལ་འཁོར་སྐྱོང་བལྟ་བའི་ཕྱིར་འགྲོའོ། །ལྷ་བཀའ་བཞིན་འཚལ་ཞེས་མི་དེས་རྒྱལ་པོ་ཀཽ་རབ་བྱའི་ལྟར་མཉན་ནས་བཞོན་པ་བཟང་པོ་མྱུར་དུ་བསྡོགས་ཏེ། རྒྱལ་པོ་ཀཽ་རབ་བྱ་གང་ན་བ་དེར་སོང་
ནས་ཕྱིན་པ་དང་། རྒྱལ་པོ་ཀཽ་རབ་བྱ་ལ་འདི་སྐད་ཅེས་སྨྲས་སོ། །ལྷ་བཅིབས་པ་བཟང་པོ་བསྡོགས་ལགས་ཏེ། ལྷ་ད་དེའི་དུས་ལ་བབ་པར་དགོངས་སུ་གསོལ། དེ་ནས་རྒྱལ་པོ་ཀཽ་རབ་བྱ་བཞོན་པ་བཟང་པོ་ལ་ཞོན་ནས་བང་མཛོད་སྟུག་པོ་ཅན་ནས་བྱུང་སྟེ། ཚེ་དང་ལྡན་པ་ཡུལ་
འཁོར་སྐྱོང་ལ་བལྟ་བ་དང་། བསྙེན་བཀུར་བྱ་བའི་ཕྱིར་སོང་ནས། དེ་ཇི་ཙམ་བཞོན་པའི་བར་དུ་བཞོན་པས་སོང་སྟེ། བཞོན་པ་ལས་བབས་ནས་རྐང་པ་ཁོ་ནས་ཀུན་དགའ་ར་བར་ཞུགས་སོ། །ཚེ་དང་ལྡན་པ་ཡུལ་འཁོར་སྐྱོང་གིས་རྒྱལ་པོ་ཀཽ་རབ་བྱ་རྒྱང་རིང་པོ་ཁོ་ན་ནས་འོངས་པ་
མཐོང་ངོ་། །མཐོང་ནས་ཀྱང་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། རྒྱལ་པོ་ཆེན་པོ་བྱོན་པ་ལེགས་སོ་ཚུར་སྤྱོན། རྒྱལ་པོ་ཆེན་པོ་ཁྱོད་ཉིད་ཀྱི་ཡུལ་ལགས་པས་བཞེད་ན་བདག་ཀྱང་སྟན་ལ་གཡར་དྲོངས་ཤིག །ཀྱེ་ཡུལ་འཁོར་སྐྱོང་བདག་གི་ཡུལ་ལགས་མོད་ཀྱི། འོན་ཀྱང་
ཡུལ་འཁོར་སྐྱོང་གིས་བདག་སྟན་ལ་གཡར་དྲང་བར་འཚལ་ལོ། །རྒྱལ་པོ་ཆེན་པོ་གདན་མཆིས་ཀྱིས་གལ་ཏེ་བཞེད་ན་བཞུགས་ཤིག །དེ་ནས་རྒྱལ་པོ་ཀཽ་རབ་བྱ་ཚེ་དང་ལྡན་པ་ཡུལ་འཁོར་སྐྱོང་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང་། མགུ་བར་འགྱུར་བའི་གཏམ་
རྣམ་པ་སྣ་ཚོགས་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་རྒྱལ་པོ་ཀཽ་རབ་བྱས་ཚེ་དང་ལྡན་པ་ཡུལ་འཁོར་སྐྱོང་ལ་འདི་སྐད་ཅེས་སྨྲས་སོ། །ཤེས་ལྡན་ཡུལ་འཁོར་སྐྱོང་གལ་ཏེ་རིགས་དམན་པའམ། ལོངས་སྤྱོད་རྣམས་ཡོངས་སུ་ཟད་པའམ། གཏུགས་
པར་གྱུར་ན་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བ་ཡོད་ན། བདག་ཅག་རིགས་ནི་ཀཽ་རབ་བྱ་ཡིན་ལ། ལོངས་སྤྱོད་ནི་རྒྱ་ཆེ་བ་ཡིན་གྱིས། འདི་ལྟར་ཁོ་བོས་ཤེས་ལྡན་ཡུལ་འཁོར་སྐྱོང་ལ་ལོངས་སྤྱོད་ཀྱི་སྐལ་

བ་དག་ལས་བགོ་བཤའ་བྱས། ཤེས་ལྡན་ཡུལ་འཁོར་སྐྱོང་ཚུར་ཁྱོད་འདུག་ལ་འདོད་པ་དག་ལ་ཡང་ཡོངས་སུ་སྤྱོད་ཅིག །སྦྱིན་པ་དག་ཐོང་ཤིག །བསོད་ནམས་དག་གྱིས་ཤིག །རྒྱལ་པོ་ཆེན་པོ་ཆ་མ་ལགས་པའི་མགྲོན་དུ་འབོད་པས་བདག་
མགྲོན་དུ་འབོད་ཀྱི་འཚམ་པས་ནི་མ་ལགས་སོ། །ཁྱོད་ལྟ་བུས་བདག་འདྲ་བའི་སྐྱེས་བུ་མཁས་པ་འདི་ལྟ་བུའི་མགྲོན་དུ་འབོད་པས་མགྲོན་དུ་ཡང་མ་འབོད་ཅིག །བདག་གིས་ཤེས་ལྡན་ཡུལ་འཁོར་སྐྱོང་དང་འཚམ་པའི་མགྲོན་དུ་འབོད་པས་མགྲོན་དུ་འབོད་པ་ཇི་ལྟ་བུ་ཞིག་ལགས།
རྒྱལ་པོ་ཆེན་པོ་ཚུར་སྤྱོན། ཁྱོད་ཀྱིས་འདི་སྐད་ཅེས་ཀྱེ་ཡུལ་འཁོར་སྐྱོང་ཁོ་བོའི་ཡུལ་འབྱོར་ཅིང་གནོད་པ་མེད་པ། སྡོ་བ་མེད་ཅིང་འཚེ་བ་མེད་ལ་སློང་བ་པོའི་བསོད་སྙོམས་རྙེད་སླ་བ་ཡིན་གྱིས། ཤེས་ལྡན་ཡུལ་འཁོར་སྐྱོང་བང་མཛོད་སྟུག་པོ་ཅན་འདིར་གནོས་ཤིག་དང་།
བདག་གིས་ཤེས་ལྡན་ཡུལ་འཁོར་སྐྱོང་ཆོས་བཞིན་གྱིས་བསྲུང་བ་དང་། བསྐྱབ་པ་དང་། སྦ་བ་བྱའོ་ཞེས་བགྱི་བ་ལགས་ན། རྒྱལ་པོ་ཆེན་པོ་སེམས་མངོན་པར་དད་པ་གང་ལ་གང་ལགས་པ་དེ་ཙམ་གྱིས་བགྱིས་ལགས་ཏེ་འཚལ་ལོ། །གཞན་ཡང་གལ་ཏེ་ཞུས་པ་ལུང་བསྟན་
པའི་ཕྱིར་སྐབས་ཕྱེ་ན་ཤེས་ལྡན་ཡུལ་འཁོར་སྐྱོང་ལ་བདག་ཞུ་ལགས་སོ། །རྒྱལ་པོ་ཆེན་པོ་གསུངས་ཤིག །ཐོས་ནས་ཁྱོད་ལ་རིག་པར་བགྱིའོ། །ཀྱེ་ཡུལ་འཁོར་སྐྱོང་བཞི་པོ་འདི་དག་ནི་ཡོངས་སུ་ཉམས་པ་ལགས་ཏེ། དེ་དག་གིས་ཡོངས་སུ་ཉམས་པའི་རིགས་ཀྱི་བུ་དག་སྐྲ་དང་ཁ་སྤུ་
བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་རོ། །བཞི་གང་ཞེ་ན། འདི་ལྟ་སྟེ། རྒ་བས་ཡོངས་སུ་ཉམས་པ་དང་། ནད་ཀྱིས་ཡོངས་སུ་ཉམས་པ་དང་། ཉེ་དུས་ཡོངས་སུ་ཉམས་པ་དང་། ལོངས་སྤྱོད་ཀྱིས་
ཡོངས་སུ་ཉམས་པའོ། །ཀྱེ་ཡུལ་འཁོར་སྐྱོང་རྒ་བས་ཡོངས་སུ་ཉམས་པ་གང་ཞེ་ན། འདི་ལ་རིགས་ཀྱི་བུ་རྒས་འཁོགས་གཏུགས་པར་གྱུར་ནས་དེ་འདི་སྙམ་དུ་སེམས་ཏེ། ད་ནི་བདག་རྒས་འཁོགས་གཏུགས་པས་བདག་གིས་རེ་ཞིག་འདོད་པ་དག་བདོག་ཀྱང་ལོངས་སྤྱད་པར་

སླ་བ་མ་ཡིན་ན་མི་བདོག་ན་ལྟ་སྨོས་ཀྱང་ཅི་དགོས། མ་ལ་བདག་སྐྲ་དང་ཁ་སྤུ་བྲེགས་ལ་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ་སྙམ་ནས། དེ་རྒ་བའི་ཡོངས་སུ་ཉམས་པས་ཡོངས་སུ་ཉམས་པས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་
བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་སྟེ། འདི་ནི་རྒ་བའི་ཡོངས་སུ་ཉམས་པ་ཞེས་བྱའོ། །ཤེས་ལྡན་ཡུལ་འཁོར་སྐྱོང་རྒ་བའི་ཡོངས་སུ་ཉམས་པས་ཡོངས་སུ་ཉམས་པ་མ་ཡིན་ན་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་
པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་། དེ་ཅིའི་ཕྱིར་ཞེ་ན། ཤེས་ལྡན་ཡུལ་འཁོར་སྐྱོང་ནི་གཞོན་ནུ་ཐོར་བུ་ལང་ཚོ་ལ་བབ་པ། སྐྲ་གནག་པ། ན་ཚོད་དར་ལ་བབ་པ་དང་ལྡན་པ་ཡིན་ཏེ། གང་གི་ཚེ་རྩེད་མོ་དང་། དགའ་བ་དང་། མགུ་བ་དང་། ཆ་བ་དང་། བརྒྱན་པའི་
གནས་ལ་བརྩོན་པ་དང་ལྡན་པས་གནས་པར་བྱ་བ་དེའི་ཚེ་ཉེ་དུ་རྣམས་མཆི་མས་བརྣངས་ཤིང་ངུ་བཞིན་དང་བཅས་པས་མ་རངས་བཞིན་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ན། ཤེས་ལྡན་ཡུལ་འཁོར་སྐྱོང་
གིས་ཅི་ཞིག་ཤེས་མཐོང་ཐོས་རྟོགས་ནས་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་། དེ་ལ་ནི་ཁོ་བོས་རངས་པ་མ་ཡིན་ཏེ་མི་བཟོད་དོ། །ཀྱེ་ཤེས་ལྡན་ཡུལ་འཁོར་སྐྱོང་ནད་ཀྱིས་ཡོངས་སུ་ཉམས་པ་གང་ཞེ་ན།
འདི་ལ་རིགས་ཀྱི་བུ་ན་བ་སྡུག་བསྔལ་བ་ནད་ཚབས་ཆེ་བར་གྱུར་ནས་དེ་འདི་སྙམ་དུ་སེམས་ཏེ། བདག་ནི་ན་བ་སྡུག་བསྔལ་བ་ནད་ཚབས་ཆེ་བས་བདག་གིས་རེ་ཞིག་འདོད་པ་དག་བདོག་ཀྱང་ལོངས་སྤྱད་པར་སླ་བ་མ་ཡིན་ན་མི་བདོག་ན་ལྟ་སྨོས་ཀྱང་ཅི་དགོས། མ་ལ་བདག་སྐྲ་དང་ཁ་སྤུ་བྲེགས་
ནས་གོས་ངུར་སྨྲིག་བགོས་ནས་ཞེས་བྱ་བ་ནས་རབ་ཏུ་འབྱུང་ངོ་ཞེས་བྱ་བའི་བར་གོང་མ་བཞིན་དུའོ། །དེ་ནད་ཀྱིས་ཡོངས་སུ་ཉམས་པས་ཡོངས་སུ་ཉམས་པས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་ཞེས་བྱ་བ་ནས་རབ་ཏུ་འབྱུང་ཞེས་བྱ་བའི་བར་གོང་མ་བཞིན་དུའོ། །འདི་ནི་

ནད་ཀྱིས་ཡོངས་སུ་ཉམས་པ་ཞེས་བྱའོ། །ཤེས་ལྡན་ཡུལ་འཁོར་སྐྱོང་ནི་ནད་ཀྱིས་ཡོངས་སུ་ཉམས་པས་ཡོངས་སུ་ཉམས་པ་མ་ཡིན་ནོ། །སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཞེས་བྱ་བ་ནས་རབ་ཏུ་བྱུང་ཞེས་བྱ་
བའི་བར་གོང་མ་བཞིན་དུའོ། །དེ་ཅིའི་ཕྱིར་ཞེ་ན། ཤེས་ལྡན་ཡུལ་འཁོར་སྐྱོང་གནོད་པ་མེད་ཅིང་ནད་མེད་པའི་རང་བཞིན་ཅན་དང་། རན་པར་འཇུག་པའི་དྲོད་དང་ལྡན་པ་སྟེ། ཧ་ཅང་བསིལ་བ་མ་ཡིན་པ་དང་། ཧ་ཅང་ཚ་བ་མ་ཡིན་པ་དང་། ཁམས་སྙོམས་པས་གནོད་
པ་མེད་པ་དང་ལྡན་པས་ཁྱོད་ཀྱིས་ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་ལེགས་པར་བདེ་བར་འཇུ་བར་འགྱུར་ན། ཤེས་ལྡན་ཡུལ་འཁོར་སྐྱོང་དེ་ལ་ཅི་ཞིག་ཤེས་མཐོང་ཞེས་བྱ་བ་ནས་རབ་ཏུ་འབྱུང་ཞེས་བྱ་བའི་བར་གོང་མ་བཞིན་དུའོ། །
དེ་ལ་ནི་ཁོ་བོ་རངས་པ་མ་ཡིན་ཏེ་མི་བཟོད་དོ། །ཀྱེ་ཡུལ་འཁོར་སྐྱོང་ཉེ་དུས་ཡོངས་སུ་ཉམས་པ་གང་ཞེ་ན། འདི་ལ་རིགས་ཀྱི་བུའི་ཉེ་དུ་རྣམས་རབས་ཆད་ཉེ་དུ་རྣམས་ཁ་དག་ནས་དེ་འདི་སྙམ་དུ་སེམས་ཏེ། བདག་གི་ཉེ་དུ་རྣམས་རབས་ཆད་ཉེ་དུ་རྣམས་ཁ་དག་པས་མ་ལ་བདག་སྐྲ་དང་ཁ་སྤུ་
བྲེགས་ནས་ཞེས་བྱ་བ་ནས་རབ་ཏུ་འབྱུང་བར་བྱའོ་ཞེས་བྱ་བའི་བར་གོང་མ་བཞིན་དུའོ། །དེ་ཉེ་དུའི་ཡོངས་སུ་ཉམས་པས་ཡོངས་སུ་ཉམས་པས་སྐྲ་དང་ཁ་སྤུ་བྲེགས་ཏེ་ཞེས་བྱ་བ་ནས་རབ་ཏུ་འབྱུང་ངོ་ཞེས་བྱ་བའི་བར་གོང་མ་བཞིན་དུའོ། །འདི་ནི་ཉེ་དུས་ཡོངས་སུ་ཉམས་པ་ཞེས་བྱའོ། །ཤེས་
ལྡན་ཡུལ་འཁོར་སྐྱོང་ནི་ཉེ་དུས་ཡོངས་སུ་ཉམས་པས་ཡོངས་སུ་ཉམས་པ་མ་ཡིན་ན། སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་ཅིའི་ཕྱིར་ཞེ་ན། ཡུལ་འཁོར་སྐྱོང་གི་ཉེ་དུ་ནི་ཀཽ་རབ་བྱའི་རིགས་ནས་བཟུང་སྟེ་
བརྒྱུད་པ་བང་མཛོད་སྟུག་པོ་ཅན་འདི་ཉིད་ན་རྒྱས་པར་ཡོད་ན། ཤེས་ལྡན་ཡུལ་འཁོར་སྐྱོང་གིས་ཅི་ཞིག་ཤེས་མཐོང་ཞེས་བྱ་བ་ནས་རབ་ཏུ་བྱུང་ཞེས་བྱ་བའི་བར་གོང་མ་བཞིན་དུའོ། །དེ་ལ་ནི་ཁོ་བོས་རངས་པ་མ་ཡིན་ཏེ་མི་བཟོད་དོ། །ཀྱེ་ཡུལ་འཁོར་སྐྱོང་ལོངས་སྤྱོད་ཀྱིས་ཡོངས་སུ་ཉམས་

པ་གང་ཞེ་ན། འདི་ལ་རིགས་ཀྱི་བུའི་ལོངས་སྤྱོད་སྲབས་པ་དང་། ཡོངས་སུ་ཟད་པ་དང་། གཏུགས་པར་གྱུར་ནས་དེ་འདི་སྙམ་དུ་སེམས་ཏེ། བདག་གི་ལོངས་སྤྱོད་ནི་སྲབས་པ་དང་། ཡོངས་སུ་ཟད་པ་དང་། གཏུགས་པར་གྱུར་གྱིས། མ་ལ་བདག་སྐྲ་དང་ཁ་སྤུ་བྲེགས་
ནས་ཞེས་བྱ་བ་ནས་རབ་ཏུ་འབྱུང་ངོ་ཞེས་བྱ་བའི་བར་དུའོ། །དེ་ལོངས་སྤྱོད་ཡོངས་སུ་ཉམས་པས་ཡོངས་སུ་ཉམས་པས་སྐྲ་དང་ཁ་སྤུ་བྲེགས་ནས་ཞེས་བྱ་བ་ནས་རབ་ཏུ་འབྱུང་ངོ་། །ཞེས་བྱ་བའི་བར་གོང་མ་བཞིན་དུའོ། །འདི་ནི་ལོངས་སྤྱོད་ཀྱིས་ཡོངས་སུ་ཉམས་པ་ཞེས་བྱའོ། །ཤེས་
ལྡན་ཡུལ་འཁོར་སྐྱོང་ནི་ལོངས་སྤྱོད་ཡོངས་སུ་ཉམས་པས་ཡོངས་སུ་ཉམས་པ་མ་ཡིན་ན། ཞེས་བྱ་བ་ནས་རབ་ཏུ་བྱུང་ཞེས་བྱ་བའི་བར་གོང་མ་བཞིན་དུའོ། །ཤེས་ལྡན་ཡུལ་འཁོར་སྐྱོང་ནི་བང་མཛོད་སྟུག་པོ་ཅན་འདི་ན་རིགས་མཆོག་དང་རིགས་བཟང་པོ་ཡིན་པས་འདི་ལྟ་སྟེ། ལོངས་
སྤྱོད་ཆེན་པོ་དང་ལྡན་པ་ཡིན་ན། འདི་ལ་ཤེས་ལྡན་ཡུལ་འཁོར་སྐྱོང་གིས་ཅི་ཞིག་ཤེས་མཐོང་ཐོས་རྟོགས་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་། དེ་ལ་ནི་ཁོ་བོ་རངས་པ་མ་ཡིན་ཏེ་མི་བཟོད་དོ། །རྒྱལ་པོ་
ཆེན་པོ་བཞི་པོ་འདི་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་ཡིད་འབྱུང་བའི་ལམ་དུ་གསུངས་ཏེ། ཡིད་འབྱུང་བ་དེ་དག་གིས་ཡིད་བྱུང་ནས་རིགས་ཀྱི་བུ་རྣམས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་
ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་ཏེ། རྒྱལ་པོ་ཆེན་པོ་འཇིག་རྟེན་འདི་ཐམས་ཅད་ནི་རྒ་བས་ཉེ་བར་ཁྲིད་པ་ཡིན། འཇིག་རྟེན་འདི་ནི་རྗེས་སུ་འགྲོ་བ་མེད་པས་སྐྱབས་མེད་པ་ཡིན། འཇིག་རྟེན་འདི་ནི་ཐམས་ཅད་བོར་ཏེ་འགྲོ་བར་འགྱུར་བས་
བདོག་པ་མེད་པ་ཡིན། འཇིག་རྟེན་འདི་ནི་ངོམས་མི་ཤེས་ཏེ་སྲེད་པས་འཁོལ་བས་ཆོག་མི་ཤེས་པ་ཡིན་པར་བདག་གིས་ཤེས་མཐོང་ཐོས་རྟོགས་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །བདག་གིས་མདོར་

བསྡུས་ཏེ་གསུངས་ཤིང་རྣམ་པར་མ་ཕྱེ་བ་འདིའི་དོན་རྒྱས་པར་འཚལ་བར་མི་འགྱུར་བས། ཤེས་ལྡན་ཡུལ་འཁོར་སྐྱོང་གིས་དོན་དེ་ཉིད་ཅི་ནས་བདག་གི་ཤེས་ལྡན་ཡུལ་འཁོར་སྐྱོང་གིས་མདོར་བསྡུས་ཏེ་གསུངས་ཤིང་རྣམ་པར་མ་ཕྱེ་བ་འདིའི་དོན་རྒྱས་པར་འཚལ་བར་
འགྱུར་བར་རྒྱས་པར་བཤད་དུ་གསོལ། ཤེས་ལྡན་ཡུལ་འཁོར་སྐྱོང་གིས་འདི་སྐད་ཅེས་འཇིག་རྟེན་འདི་ཐམས་ཅད་ནི་རྒ་བས་ཉེ་བར་ཁྲིད་པ་ཡིན་ནོ། །ཞེས་གསུངས་པ་གང་ལགས་པ་དེ་ཤེས་ལྡན་ཡུལ་འཁོར་སྐྱོང་གིས་ཅི་ལས་དགོངས་ཏེ་གསུངས། དེའི་ཕྱིར་རྒྱལ་པོ་ཆེན་པོ་ཁྱོད་ཉིད་
ལ་དྲིས་ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་ལན་ཐོབ་ཤིག །རྒྱལ་པོ་ཆེན་པོ་ཇི་སྙམ་དུ་སེམས། གང་གི་ཚེ་ཁྱོད་ལོ་ཉི་ཤུ་འམ་ལོ་ཉི་ཤུ་རྩ་ལྔ་ལོན་པར་གྱུར་པ་ན་ན་ཚོད་ཀྱིས་གཞོན་ནུ་ཐོར་བུ་ལང་ཚོ་ལ་བབ་པ། སྐྲ་གནག་པ། ཉམ་རྩལ་བདོ་བ་དང་ལྡན་པ་དེ་དང་ད་ལྟར་གྱི་ལུས་སུ་
འདི་ལྟ་སྟེ་ཚེ་འམ། ཁ་དོག་གམ། སྟོབས་སམ། ཤུགས་སམ། སྨྲ་དངགས་སམ། སྲིད་དུ་འམ། སྦོམས་སུ་མཉམ་ཞིང་མཚུངས་པར་མཐོང་ངམ། ཀྱེ་ཡུལ་འཁོར་སྐྱོང་གང་གི་ཚེ་བདག་ལོ་ཉི་ཤུ་འམ་ལོ་ཉི་ཤུ་རྩ་ལྔ་ལོན་པར་གྱུར་པ་ན་ན་ཚོད་ཀྱིས་གཞོན་ནུ་ཐོར་བུ་ལང་ཚོ་ལ་
བབ་པ། སྐྲ་གནག་པ། ཉམ་རྩལ་བདོ་བ་དང་ལྡན་པ་དེ་དང་ད་ལྟར་གྱི་ལུས་སུ་འདི་ལྟ་སྟེ་ཚེ་འམ། ཁ་དོག་གམ། སྟོབས་སམ། ཤུགས་སམ། སྲིད་དུ་འམ། སྦོམས་སུ་འམ། སྨྲ་དངགས་སུ་མཉམ་ཞིང་མཚུངས་པར་མ་མཐོང་སྟེ། ད་ནི་བདག་ན་ཚོད་ཀྱིས་ལོ་
བརྒྱད་བཅུ་ལོན་པས་རྒས་འཁོགས་གཏུགས་ཏེ་བར་འགའ་བདག་འདུག་པ་དང་ལངས་པ་ཡང་གཞན་གྱིས་བྱ་དགོས་སོ། །རྒྱལ་པོ་ཆེན་པོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་འདི་ལས་
དགོངས་ནས་འཇིག་རྟེན་འདི་ཐམས་ཅད་ནི་རྒ་བས་ཉེ་བར་ཁྲིད་པ་ཡིན་ནོ། །ཞེས་གསུངས་པ་དེ་བདག་གིས་ཤེས་མཐོང་ཐོས་རྟོགས་ནས་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་དེ་ལ་ནི་བདག་རངས་ཏེ་བཟོད་དོ། །

ཤེས་ལྡན་ཡུལ་འཁོར་སྐྱོང་གང་ལ་རངས་ཏེ་བཟོད་པ་དེ་ལ་བདག་ཀྱང་རངས་ཏེ་བཟོད་དོ། །གང་ཡང་ཤེས་ལྡན་ཡུལ་འཁོར་སྐྱོང་འདི་སྐད་ཅེས་འཇིག་རྟེན་འདི་ནི་རྗེས་སུ་འགྲོ་བ་མེད་པས་སྐྱབས་མེད་པ་ཡིན་ནོ་ཞེས་གསུངས་པ་བདག་ལ་ནི་བུ་དང་། ཆུང་མ་དང་། བྲན་དང་། ལས་
བགྱིད་པ་དང་། བཞད་གད་པ་དང་། སྐྲ་མཁན་དང་། ཁྲུས་མཁན་དང་། འདུལ་སྦྱོང་མཁན་དང་། གླང་པོ་ཆེ་ལ་ཞོན་པ་དང་། རྟ་རྐྱ་དང་། ཤིང་རྟ་པ་དང་། བཤན་ཐོགས་དང་། གཞུ་འཛིན་པ་དང་། འདྲོལ་བུ་དང་། གོ་རེ་ལོང་བགྱིད་པ་དང་། བྲོ་གར་ལེན་པ་རྣམས་དང་།
རྒྱལ་པོའི་བུ་དཔའ་བརྟུལ་ཕོད་པ། རབ་ཏུ་གནོན་ཚན་པོ་ཆེ་ཆེན་པོ་དང་ལྡན་པ་གང་དག་བདག་གི་གཤེད་མ་ཕྱིར་རྒོལ་བ་མི་མཛའ་བ་དག་མཆིས་པ་སླར་འཇོམས་པར་བགྱིད་པ་མཆིས་ན། འོན་ཀྱང་ཤེས་ལྡན་ཡུལ་འཁོར་སྐྱོང་འདི་སྐད་ཅེས་འཇིག་རྟེན་འདི་ནི་རྗེས་སུ་འགྲོ་བ་མེད་པས་
སྐྱབས་མེད་པ་ཡིན་ནོ་ཞེས་གསུངས་པ་དེ་ཤེས་ལྡན་ཡུལ་འཁོར་སྐྱོང་གིས་ཅི་ལས་དགོངས་ཏེ་གསུངས་རྒྱལ་པོ་ཆེན་པོ་དེའི་ཕྱིར་ཁྱོད་ཉིད་ལ་དྲིས་ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་ལན་ཐོབ་ཤིག །རྒྱལ་པོ་ཆེན་པོ་ད་ལྟར་ཁྱོད་ལ་ལུས་ཀྱིས་གནོད་པ་འགའ་མཆིས་སམ། ཀྱེ་ཡུལ་
འཁོར་སྐྱོང་བདག་ལ་མཆིས་ཏེ་ད་ལྟར་རླུང་གིས་རྒྱབ་ཏུ་གནོད་དོ། །རྒྱལ་པོ་ཆེན་པོ་གང་གི་ཚེ་རླུང་གིས་རྒྱབ་ཏུ་གནོད་པར་གྱུར་པ་དེའི་ཚེ་བདག་གི་བུ་དང་། ཆུང་མ་དང་། བྲན་དང་། ལས་བྱེད་པ་དང་། བཞད་གད་པ་དང་། སྐྲ་མཁན་དང་། ཁྲུས་མཁན་དང་། འདུལ་སྦྱོང་མཁན་
དང་། གླང་པོ་ཆེ་ལ་ཞོན་པ་དང་། རྟ་རྐྱ་དང་། ཤིང་རྟ་པ་དང་། བཤན་ཐོགས་དང་། གཞུ་འཛིན་དང་། འདྲོལ་བུ་དང་། གོ་རེ་ལོང་བྱེད་པ་དང་། བྲོ་གར་ལེན་པ་དང་། རྒྱལ་པོའི་བུ་དཔའ་བ་རྟུལ་ཕོད་པ། རབ་ཏུ་གནོན་ཚན་པོ་ཆེ་ཆེན་པོ་དང་ལྡན་པ་གང་དག་ཡིན་པ་ཚུར། བདག་
ལ་སྐྱེས་ཤིང་བྱུང་བའི་སྡུག་བསྔལ་དྲག་པོ་རྩུབ་པ་ཚ་བ་མི་བཟོད་པ་ཡིད་དུ་མི་འོང་བའི་ཚོར་བ་རྣམས་ཆོམས་ཤིག་ཅེས་བགྱིས་ན་འགྲུབ་བམ། ཀྱེ་ཡུལ་འཁོར་སྐྱོང་མ་ལགས་སོ། །གང་གི་ཚེ་རླུང་གིས་བདག་གི་རྒྱབ་ཏུ་གནོད་པར་གྱུར་པ་དེའི་ཚེ་བདག་གི་བུ་དང་། ཆུང་མ་དང་། བྲན་དང་། ལས་

བགྱིད་པ་དང་། བཞད་གད་པ་དང་། སྐྲ་མཁན་དང་། ཁྲུས་མཁན་དང་། འདུལ་སྦྱོང་མཁན་དང་། གླང་པོ་ཆེའི་གཉར་ཞོན་པ་དང་། རྟ་རྐྱ་དང་། ཤིང་རྟ་དང་། བཤན་ཐོགས་དང་། གཞུ་འཛིན་དང་། འདྲོལ་བུ་དང་། གོ་རེ་ལོང་བགྱིད་པ་དང་། བྲོ་གར་ལེན་པ་དང་།
རྒྱལ་པོའི་བུ་དཔའ་བ་རྟུལ་ཕོད་པ། རབ་ཏུ་གནོན་ཚན་པོ་ཆེ་ཆེན་པོ་དང་ལྡན་པ་གང་དག་ཡིན་པ་ཚུར། བདག་ལ་བྱུང་ཞིང་སྐྱེས་པའི་སྡུག་བསྔལ་དྲག་པོ་རྩུབ་པ་ཚ་བ་མི་བཟད་པ་ཡིད་དུ་མི་འོང་བའི་ཚོར་བ་རྣམས་ཆོམས་ཤིག་ཅེས་བགྱིས་ཀྱང་མི་འགྲུབ་ཀྱི། དེའི་ཚེ་བདག་འབའ་ཞིག་སྡུག་བསྔལ་
དྲག་པོ་རྩུབ་པ་ཚ་བ་མི་བཟོད་པ་ཡིད་དུ་མི་འོང་བའི་ཚོར་བ་རྣམས་མྱོང་ངོ་། །རྒྱལ་པོ་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་འདི་ལས་དགོངས་ནས་འཇིག་རྟེན་འདི་ནི་རྗེས་སུ་འགྲོ་བ་མེད་དེ་སྐྱབས་མེད་པ་ཡིན་ནོ་ཞེས་གསུངས་
པ་དེ་བདག་གིས་ཤེས་མཐོང་ཐོས་རྟོགས་ནས་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་ལ་ནི་བདག་རངས་ཏེ་བཟོད་དོ། །ཤེས་ལྡན་ཡུལ་འཁོར་སྐྱོང་གང་ལ་རངས་ཏེ་བཟོད་པ་དེ་ལ་བདག་ཅག་ཀྱང་རངས་ཏེ་
བཟོད་དོ། །གང་ཡང་ཤེས་ལྡན་ཡུལ་འཁོར་སྐྱོང་འདི་སྐད་ཅེས་འཇིག་རྟེན་འདི་ནི་ཐམས་ཅད་བོར་ནས་འགྲོ་བར་འགྱུར་བས་བདོག་པ་མེད་པ་ཡིན་ནོ་ཞེས་གསུངས་པ། ཀྱེ་ཡུལ་འཁོར་སྐྱོང་བདག་ཅག་ལ་བུ་དང་། ཆུང་མ་དང་། བྲན་དང་། ལས་བགྱིད་པ་དང་། ཞེས་བྱ་བ་ནས། རྒྱལ་
པོའི་བུ་རྣམས་མཆིས་ཏེ་ཞེས་བྱ་བའི་བར་གོང་མ་བཞིན་དུའོ། །གང་དག་བདག་མཆི་ན་རྗེས་བཞིན་འབྲང་ལ། འགྲེང་ན་འགྲེང་བ་དང་། ཉལ་ན་ཞུགས་ཚེ་བགྱིད་པ་དག་མཆིས་ན། འོན་ཀྱང་ཤེས་ལྡན་ཡུལ་འཁོར་སྐྱོང་འདི་སྐད་ཅེས་འཇིག་རྟེན་འདི་ནི་ཐམས་ཅད་བོར་ཏེ་འགྲོ་བར་འགྱུར་བས་
བདོག་པ་མེད་པ་ཡིན་ནོ། །ཞེས་གསུང་བ་དེ་ཤེས་ལྡན་ཡུལ་འཁོར་སྐྱོང་གིས་ཅི་ལས་དགོངས་ཏེ་གསུངས། རྒྱལ་པོ་ཆེན་པོ་དེའི་ཕྱིར་ཁྱོད་ཉིད་ལ་དྲིས་ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་ལན་ཐོབ་ཤིག །རྒྱལ་པོ་ཆེན་པོ་ཇི་སྙམ་དུ་སེམས། གང་གི་ཚེ་སྐྱེ་བོ་མང་པོ་ལ་མི་སྡུག་པ། སྐྱེ་བོ་

མང་པོ་མི་འདོད་པ། སྐྱེ་བོ་མང་པོ་མི་དགའ་བ། སྐྱེ་བོ་མང་པོའི་ཡིད་དུ་མི་འོང་བ་འཇིག་རྟེན་ཐམས་ཅད་ཀྱི་ཐུན་མོང་འདི་ལྟ་སྟེ། འཆི་བ་ཞེས་བྱ་བའི་ཆོས་དེ་འོངས་པར་གྱུར་པ་དེའི་ཚེ་བདག་གི་བུ་དང་། ཆུང་མ་དང་། བྲན་དང་། ལས་བྱེད་པ་ཞེས་བྱ་བ་ནས་རྒྱལ་པོའི་བུ་དག་
ཚུར་ཞེས་བྱ་བའི་བར་དུའོ། །གང་དག་འཇིག་རྟེན་འདི་ནས་འཇིག་རྟེན་ཕ་རོལ་དུ་འགྲོ་བའི་ཕྱི་བཞིན་ཤོག་ཤིག་ཅེས་བགྱིས་ན་འགྲུབ་བམ། ཀྱེ་ཡུལ་འཁོར་སྐྱོང་མ་ལགས་སོ། །ཀྱེ་ཡུལ་འཁོར་སྐྱོང་གང་གི་ཚེ་སྐྱེ་བོ་མང་པོ་ལ་མི་སྡུག་པ། སྐྱེ་བོ་མང་པོ་མི་འདོད་པ། སྐྱེ་བོ་མང་པོ་
མི་དགའ་བ། སྐྱེ་བོ་མང་པོའི་ཡིད་དུ་མི་འོང་བ་འཇིག་རྟེན་ཐམས་ཅད་ཀྱི་ཐུན་མོང་འདི་ལྟ་སྟེ། འཆི་བ་ཞེས་བྱ་བའི་ཆོས་དེ་འོངས་པར་གྱུར་པ་དེའི་ཚེ་བདག་གི་བུ་དང་། ཆུང་མ་དང་། བྲན་དང་། ལས་བགྱིད་པ་རྣམས་དང་ཞེས་བྱ་བ་ནས། རྒྱལ་པོའི་བུའི་བར་གང་དག་ཡིན་པ་ཚུར་
ཞེས་བྱ་བའི་བར་དུའོ། །བདག་འཇིག་རྟེན་འདི་ནས་འཇིག་རྟེན་ཕ་རོལ་དུ་མཆི་བའི་ཕྱི་བཞིན་ཤོག་ཤིག་ཅེས་བགྱིས་ཀྱང་མི་འགྲུབ་སྟེ། བདག་འབའ་ཞིག་འཇིག་རྟེན་འདི་ནས་འཇིག་རྟེན་ཕ་རོལ་དུ་མཆི་བར་འགྱུར་རོ། །རྒྱལ་པོ་ཆེན་པོ་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་འདི་ལས་དགོངས་ནས་འཇིག་རྟེན་འདི་ནི་ཐམས་ཅད་བོར་ཏེ་འགྲོ་བར་འགྱུར་བས་བདོག་པ་མེད་པ་ཡིན་ནོ་ཞེས་གསུངས་པ་དེ་བདག་གིས་ཤེས་མཐོང་ཐོས་རྟོགས་ནས། སྐྲ་དང་ཁ་སྤུ་བྲེགས་ནས་གོས་ངུར་སྨྲིག་
བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་ལ་ནི་བདག་རངས་ཏེ་བཟོད་དོ། །ཤེས་ལྡན་ཡུལ་འཁོར་སྐྱོང་གང་ལ་རངས་ཏེ་བཟོད་པ་དེ་ལ་བདག་ཀྱང་རངས་ཏེ་བཟོད་དོ། །ཤེས་ལྡན་ཡུལ་འཁོར་སྐྱོང་གང་ཡང་འདི་སྐད་ཅེས་འཇིག་རྟེན་འདི་ནི་ངོམས་
མི་ཤེས་ཤིང་སྲེད་པས་བཀོལ་བས་ཆོག་མི་ཤེས་པ་ཡིན་ནོ་ཞེས་གསུངས་པ། ཀྱེ་ཡུལ་འཁོར་སྐྱོང་བདག་སྒྲ་ངན་རྒྱས་པ་འདི་ཉིད་ལ་ཡོངས་སུ་སྤྱོད་ཅིང་བཙུན་མོ་མང་པོ་དང་། མཛོད་དང་། བང་མཛོད་རྒྱས་པ་ལ་ཡོངས་སུ་ལོངས་སྤྱོད་ན། འོན་ཀྱང་ཤེས་ལྡན་ཡུལ་འཁོར་སྐྱོང་འདི་སྐད་

སྐད་ཅེས་འཇིག་རྟེན་འདི་ནི་ངོམས་མི་ཤེས་ཤིང་སྲེད་པས་བཀོལ་བས་ཆོག་མི་ཤེས་པ་ཡིན་ནོ་ཞེས་གསུངས་པ་དེ་ཤེས་ལྡན་ཡུལ་འཁོར་སྐྱོང་གིས་ཅི་ལས་དགོངས་ཏེ་གསུངས། རྒྱལ་པོ་ཆེན་པོ་དེའི་ཕྱིར་ཁྱོད་ཉིད་ལ་དྲིས་ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་ལན་
ཐོབ་ཤིག །རྒྱལ་པོ་ཆེན་པོ་ཇི་སྙམ་དུ་སེམས། ཁྱོད་འདི་ན་སྒྲ་ངན་རྒྱས་པ་ལ་ཡོངས་སུ་སྤྱོད་ཅིང་བཙུན་མོ་མང་པོ་དང་། མཛོད་དང་། བང་མཛོད་རྒྱས་པ་ལ་ཡོངས་སུ་སྤྱོད་པ་ལས་ཤར་ཕྱོགས་ནས་མི་ཡིད་གཅུགས་པ། ཡིད་ཆེས་པ། བརྟན་པོ། འཇིག་རྟེན་
ལ་མི་སླུ་བ་ཞིག་འོངས་ནས་དེ་འདི་སྐད་ཅེས་ལྷ་བདག་ཤར་ཕྱོགས་ནས་འདིར་མཆི་བ་ན་དེ་ན་བདག་གིས་ལྗོངས་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་རབ་ཏུ་གང་བ་དག་ཅིག་མཐོང་སྟེ། ལྷ་ལྗོངས་དེ་དག་འདི་ལྟ་བུའི་དཔུང་
དང་འདི་ལྟ་བུའི་དབྱིག་དང་། འདི་ལྟ་བུའི་བཞོན་པས་དྲ་མ་དྲངས་ཏེ་གཞོམ་པ་དང་། ཆོམས་ནས་རྣལ་དུ་དགོད་པར་རུང་ངོ་། །ཞེས་སྨྲ་ན། རྒྱལ་པོ་ཆེན་པོ་ཇི་སྙམ་དུ་སེམས། ཁྱོད་ཡུལ་དེར་དྲ་མ་དྲང་ཞིང་དྲངས་ནས་བཅོམ་སྟེ། རྣལ་དུ་འགོད་དམ། ཁྱོད་ལྗོངས་དེ་དག་འདོད་
དམ། ཀྱེ་ཡུལ་འཁོར་སྐྱོང་གལ་ཏེ་བདག་གིས་ལྗོངས་དེ་དག་འདི་ལྟ་བུའི་དབྱིག་དང་། འདི་ལྟ་བུའི་དཔུང་དང་། འདི་ལྟ་བུའི་བཞོན་པས་དྲ་མ་དྲང་བ་དང་། དྲ་མ་དྲངས་ནས་ཆོམས་པ་དང་བཅོམ་ནས་རྣལ་དུ་དགོད་དུ་རུང་བར་ཤེས་ན། ལྗོངས་དེ་དག་ཏུ་དྲ་མ་དྲང་ཞིང་དྲ་མ་དྲངས་ནས་
བཅོམ་ལ། བཅོམ་ནས་རྣལ་དུ་དགོད་དོ། །བདག་ལྗོངས་དེ་དག་ཀྱང་འཚལ་ལོ།། །།འདུལ་བ་གཞི། བམ་པོ་སུམ་བཅུ་རྩ་ལྔ་པ། རྒྱལ་པོ་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་མཁྱེན་ཅིང་གཟིགས་
པ་དེས་དེ་ལས་དགོངས་ནས་འཇིག་རྟེན་འདི་ནི་ངོམས་མི་ཤེས་ཤིང་སྲེད་པས་བཀོལ་བས་ཆོག་མི་ཤེས་པ་ཡིན་ནོ། །ཞེས་གསུངས་པ་དེ་བདག་གིས་ཤེས་མཐོང་ཐོས་རྟོགས་ནས་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་

ཏུ་བྱུང་སྟེ། དེ་ལ་ནི་བདག་རངས་ཏེ་བཟོད་དོ། །ཤེས་ལྡན་ཡུལ་འཁོར་སྐྱོང་ཁྱོད་གང་ལ་རངས་ཏེ་བཟོད་པ་དེ་ལ་བདག་ཀྱང་རངས་ཏེ་བཟོད་དོ། །ཚེ་དང་ལྡན་པ་ཡུལ་འཁོར་སྐྱོང་གིས་དེ་སྐད་ཅེས་སྨྲས་ནས་གནས་བརྟན་དགྲ་བཅོམ་པས་གཞན་ཡང་འདི་སྐད་ཅེས་སྨྲས་སོ། །
འཇིག་རྟེན་དག་ན་ནོར་དང་ལྡན་པའི་མི། །དེ་དག་ཆགས་དང་བཅས་པས་སོགས་བྱེད་ཅིང་། །ནོར་རྣམས་རྙེད་ནས་གཏོང་བར་མི་བྱེད་ལ། །ཕྱིར་ཞིང་འདོད་པ་དོན་དུ་གཉེར་བ་མཐོང་། །མི་དབང་རྒྱ་མཚོ་མཐའ་ཡིས་གཏུགས་པའི་ས། །ཐག་བཅུག་བཅོམ་སྟེ་ཆམ་དུ་ཕབ་ནས་ནི། །
རྒྱ་མཚོ་ཚུན་ཅད་ཀྱིས་ཀྱང་མི་ཆོག་སྟེ། །ཆགས་པས་ཕ་རོལ་དོན་དུ་གཉེར་བར་འབད། །མི་དབང་དེ་བཞིན་མི་གཞན་མང་པོ་དག །ཡོངས་སུ་བཟུང་ལ་ངོམས་པ་ཡོད་མིན་པས། །ཆོག་མི་ཤེས་པས་རང་གི་ལུས་བོར་ཏེ། །སྲེད་དང་མ་བྲལ་བར་ནི་འཆི་བར་འགྱུར། །སྲོག་ནི་ཐེར་
ཟུག་མ་ཡིན་ཚེ་ཐུང་སྟེ། །རྒ་བས་གཟིར་བ་ལ་ནི་སྐྱབས་ཡོད་མིན། །འཆི་བ་ལ་ནི་ནོར་རྗེས་འབྲང་མི་འགྱུར། །ཉེ་དུ་མ་ཡིན་གྲོགས་མིན་བུ་མ་ཡིན། །སྤུན་དང་སྲིང་མོ་དེ་བཞིན་གྲོགས་ཀུན་དང་། །སྙིང་དུ་སྡུག་པའི་ཚོགས་ནི་འདུས་ནས་ནི། །ཀྱེ་མ་ཀྱི་ཧུད་འདི་ནི་ལྷར་གྱུར་
ཅེས། །སྐྲ་བཤིག་མཆི་མ་ཅན་གྱི་གདོང་གིས་ངུ་། །དེ་ནི་རས་ཀྱིས་དཀྲིས་ཏེ་ཕྱུང་ནས་ནི། །མེ་སྦར་ནས་ནི་དེ་ནས་སྲེག་པར་བྱེད། །རང་གི་ལས་ཀྱིས་སེམས་ཅན་དེ་ཁྲིད་ནས། །དེ་ཡི་ནོར་རྣམས་བགོ་སྐལ་སྤྱོད་པས་ཕྲོགས། །འདི་ནི་སྐྱེ་བ་ན་ཡང་གཅིག་པུ་སྐྱེ། །འཆི་
བ་ན་ཡང་གཅིག་པུ་འཆི་འགྱུར་ཞིང་། །གཅིག་པུས་སྡུག་བསྔལ་ཉམས་སུ་འདིར་མྱོང་འགྱུར། །སྐྱེ་བོ་འཁོར་བར་གྲོགས་ཡོད་མ་ཡིན་ནོ། །ཕྱུག་པོའམ་ཡང་ན་བཀྲེས་པའམ་བརྟན་པོའམ། །བུས་པ་དེ་བཞིན་གཉིས་ཀས་རེག་མྱོང་ན། །བརྟན་པོ་དེ་ཡིས་ནམས་ཀྱང་གཡོས་མི་
འགྱུར། །བུས་པ་བུས་པ་ཡིན་ཕྱིར་རྟག་ཏུ་གཡོ། །བློ་ཆུང་མི་མཁས་རྗེས་སུ་སློབ་བྱེད་ཅིང་། །དེ་ནས་ལས་རྣམས་གསུམ་པོ་བྱེད་འགྱུར་ཞིང་། །མངལ་དང་འཇིག་རྟེན་ཕ་རོལ་འགྲོ་བར་འགྱུར། །ཁོན་དང་རྗེས་འབྲེལ་སྡུག་བསྔལ་ལས་མི་འགྲོལ། །ཤེས་རབ་ནོར་རྣམས་ཀུན་གྱི་

མཆོག་ཏུ་གསུངས། །དེ་ཡིས་བདག་ཉིད་ཤེས་པས་བདག་ཉིད་རིག །སྲིད་དང་སྲིད་མིན་བདག་ཉིད་མ་རྟོགས་པས། །བླུན་པོ་སྡིག་པའི་ལས་རྣམས་བྱེད་པ་ཡིན། །ཕྲན་ཚེགས་ཐབས་སམ་ཡང་ན་ཆོས་མིན་པའམ། །མཐུ་ཡིས་གཞན་དག་ལས་ནི་གང་འཕྲོག་
པ། །ཉེས་བྱས་ལས་བྱེད་འཁོར་བ་ལ་བརྟེན་ནས། །ཉིང་ཏོར་བརྒྱུད་པས་གྲོལ་བར་འགྱུར་མ་ཡིན། །ཇི་ལྟར་རྐུན་པོ་ཁྱིམ་འབིགས་བཟུངས་ནས་ནི། །སྡིག་པའི་ལས་ཅན་རང་གི་ལས་ཀྱིས་བཅོམ། །དེ་བཞིན་སྐྱེ་དགུ་ཉེས་བྱེད་འདི་དང་ནི། །འཇིག་རྟེན་ཕ་རོལ་རང་གི་ལས་
ཀྱིས་བཅོམ། །ཤིང་ལས་ཤིང་ཏོག་བཞིན་དུ་མི་རྣམས་ནི། །གཞོན་དང་བར་མ་རྒན་པོ་རྣམས་ཀྱང་ལྟུང་། །འདོད་པ་སྣ་ཚོགས་སྡུག་ཅིང་ཡིད་འོང་བ། །རང་བཞིན་དེ་ལྟ་བུ་ཡིས་སེམས་རབ་འཇོམས། །འདོད་པ་རྣམས་ཀྱིས་འདི་འཆིང་ཆགས་པར་འགྱུར། །འདོད་པ་ཡོད་ན་ཁོན་
དང་འཇིགས་པ་སྐྱེ། །དེ་ལྟས་རྒྱལ་པོ་འདི་ནས་རབ་བྱུང་སྟེ། །དགེ་སྦྱོང་ཉིད་ནི་ཉམས་པ་མེད་མཆོག་ཡིན། །དེ་ནས་རྒྱལ་པོ་ཀཽ་རབ་བྱ་ཚེ་དང་ལྡན་པ་ཡུལ་འཁོར་སྐྱོང་གིས་སྨྲས་པ་ལ་མངོན་པར་དགའ་སྟེ་ཡི་རངས་ནས་རྐང་པ་གཉིས་ལ་མགོ་བོས་ཕྱག་བྱས་ཏེ་སྟན་ལས་ལངས་ནས་སོང་
ངོ་། །བཅོམ་ལྡན་འདས་གླང་པོ་ཆེའི་གྲོང་རྡལ་དུ་བྱོན་པ་དང་། བྲམ་ཟེ་ཞིག་གིས་བཅོམ་ལྡན་འདས་སྐུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ། དཔེ་བྱད་བཟང་པོ་བརྒྱད་བཅུས་མཛེས་པར་བྱས་པ། འོད་འདོམ་གང་གིས་བརྒྱན་པ། འོད་ཟེར་
ཉི་མ་སྟོང་པས་ལྷག་པ། རིན་པོ་ཆེའི་རི་བོ་འགྲོ་བ་ལྟར་ཀུན་ནས་བཟང་བ་དེ་རྒྱང་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་བཅོམ་ལྡན་འདས་ཀྱི་སྤྱན་སྔར་སོང་ནས་ཚིགས་སུ་བཅད་པས་བསྟོད་པར་བརྩམས་པ། གསེར་གྱི་མདོག་ཅན་མིག་ཏུ་སྡུག་པ་དང་། །དགའ་བའི་འབྱུང་
གནས་ཡོན་ཏན་ཀུན་དང་ལྡན། །མི་འདུལ་ཁ་ལོ་སྒྱུར་བ་ལྷ་ཡི་ལྷ། །སྲིད་པའི་རྒྱ་མཚོའི་ཕ་རོལ་བྱོན་པ་ལགས། །དེ་ནས་བཅོམ་ལྡན་འདས་ཀྱིས་འཛུམ་པ་མཛད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་ན་ཞེས་བྱ་བ་ནས། མཛོད་སྤུར་ནུབ་

པར་གྱུར་ཏོ། །ཞེས་བྱ་བའི་བར་གོང་མ་བཞིན་དུའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་བ་བྱས་ནས་ཞུས་པ། ཁ་དོག་སྣ་ཚོགས་སྟོང་གིས་བཀྲ་བ་ཡི། །ཞེས་བྱ་བ་ནས་ཀུན་དགའ་བོ་དེ་དེ་བཞིན་ཏེ། དེ་དེ་བཞིན་ནོ་ཞེས་བྱ་བའི་བར་
གོང་མ་བཞིན་དུའོ། །ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་དོ། །ཀུན་དགའ་བོ་ཁྱོད་ཀྱིས་བྲམ་ཟེས་དེ་བཞིན་གཤེགས་པ་ལ་ཚིགས་སུ་བཅད་པས་བསྟོད་པ་གང་ཡིན་པ་མཐོང་ངམ།
བཅོམ་ལྡན་འདས་མཐོང་ལགས་སོ། །འདི་དགེ་བའི་རྩ་བ་འདིས་བསྐལ་པ་ཉི་ཤུར་ལོག་པར་ལྟུང་བར་འགྲོ་བར་མི་འགྱུར་ཏེ། འོན་ཀྱང་ལྷ་དང་མི་རྣམས་སུ་ཉིང་མཚམས་སྦྱར་ཅིང་འཁོར་ནས་སྲིད་པ་ཕྱི་མ་སྐྱེ་གནས་ཕྱི་མ་དང་། ལུས་ཕྱི་མ་དང་། བདག་གི་ངོ་བོ་ཐོབ་པ་ཕྱི་
མ་ལ་རང་སངས་རྒྱས་བསྟོད་འོས་ཞེས་བྱ་བར་འགྱུར་རོ། །དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བྲམ་ཟེ་འདིས་བཅོམ་ལྡན་འདས་ལ་ཚིགས་སུ་བཅད་པ་གཅིག་གིས་བསྟོད་པ་དང་། བཅོམ་ལྡན་འདས་
ཀྱིས་རང་བྱང་ཆུབ་ཏུ་ལུང་བསྟན་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་འབའ་ཞིག་ཏུ་མ་ཟད་ཀྱི། ཇི་ལྟར་འདིས་འདས་པའི་དུས་ན་ཡང་ང་ལ་ཚིགས་སུ་བཅད་པ་གཅིག་གིས་བསྟོད་པས། ངས་གྲོང་མཆོག་ལྔ་བྱིན་པ་དེ་ལེགས་པར་རབ་ཏུ་
ཉོན་ལ་ཡིད་ལ་ཟུང་ཤིག་དང་བཤད་དོ། །དགེ་སློང་དག་སྔོན་བྱུང་བ་བཱ་རཱ་ཎ་སཱི་གྲོང་ཁྱེར་དུ་རྒྱལ་པོ་ཚངས་སྦྱིན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་སྐྱེ་བོ་དང་མི་མང་པོས་རབ་ཏུ་གང་བ་ལ་རྒྱལ་སྲིད་བྱེད་དུ་འཇུག་སྟེ། དེ་ལྷག་པར་སྙན་དངགས་ལ་དགའ་
བར་གྱུར་ཏོ། །བཱ་རཱ་ཎ་སཱི་ན་བྲམ་ཟེ་སྙན་དངགས་མཁན་གཞན་ཞིག་ཡོད་པ་དེ་ལ་བྲམ་ཟེ་མོས་སྨྲས་པ། བྲམ་ཟེ་གྲང་བའི་དུས་ལ་བབ་ཀྱིས་རྒྱལ་པོ་དེའི་སྤྱན་སྔར་སོང་ལ་རྗེས་སུ་མཐུན་པའི་ལེགས་པར་སྨྲ་བ་འགའ་བྱོས་དང་། གལ་ཏེ་ན་གྲང་བའི་སྐྱབས་ཅུང་ཟད་འཐོབ་པར་འགྱུར་

རོ། །དེ་སོང་བ་ལས་ཇི་ཙམ་ན་རྒྱལ་པོ་གླང་པོ་ཆེ་ལ་ཞོན་ནས་བྱུང་ངོ་། །བྲམ་ཟེ་དེས་བསམས་པ། ཅི་བདག་གིས་རྒྱལ་པོ་ལ་བསྟོད་དམ། འོན་ཏེ་གླང་པོ་ཆེ་དམ་པ་ལ་སྙམ་པ་ལས་དེ་འདི་སྙམ་དུ་སེམས་ཏེ། གླང་པོ་ཆེ་དམ་པ་འདི་ནི་འཇིག་རྟེན་
ཐམས་ཅད་ཀྱིས་སྡུག་ཅིང་ཡིད་དུ་འོང་བ་ཡིན་ལ་རྒྱལ་པོ་ལ་ནི་ཁྱད་པར་དུ་ཡིན་པས། རེ་ཞིག་གླང་པོ་ཆེ་དམ་པ་མངོན་པར་བསྟོད་པར་བྱའོ་སྙམ་ནས་དེས་ཚིགས་སུ་བཅད་དེ་སྨྲས་པ། ས་སྲུང་བུ་ཡི་ལུས་ཀྱི་ཤ་ཚུགས་ལྟར། །མཚན་མཆོག་ལྡན་པའི་གཟུགས་ནི་ཕུན་སུམ་
ཚོགས། །མདོག་དང་ཚད་ཀྱིས་ལུས་ཀྱི་གཟུགས་ལེགས་པ། །གླང་ཆེན་དབང་པོ་བཀྲ་ཤིས་རབ་ཏུ་བསྔགས། །དེ་ནས་རྒྱལ་པོ་མངོན་པར་དགའ་ནས་ཚིགས་སུ་བཅད་དེ་སྨྲས་པ། ཁོ་བོའི་གླང་ཆེན་སྡུག་ཅིང་ཡིད་འོང་བ། །མི་རྣམས་མིག་འཕྲོག་དགའ་བ་སྐྱེད་པ་གང་། །
དེ་ལ་ཁྱོད་ཀྱིས་བསྟོད་པའི་ཚིག་སྨྲས་ཀྱིས། །ཁྱོད་ལ་གྲོང་གི་མཆོག་ནི་ལྔ་སྦྱིན་ནོ། །དགེ་སློང་དག་དེའི་ཚེ་དེའི་དུས་ཀྱི་གླང་པོ་ཆེ་དམ་པ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་བྲམ་ཟེ་གང་ཡིན་པ་དེ་ནི་བྲམ་ཟེ་འདི་ཉིད་ཡིན་ཏེ། དེ་ན་ཡང་ང་ལ་འདིས་ཚིགས་སུ་བཅད་པ་
གཅིག་གིས་བསྟོད་པས་ངས་འདི་ལ་གྲོང་མཆོག་ལྔ་བྱིན་ནོ། །ད་ལྟར་ཡང་ང་ལ་འདིས་ཚིགས་སུ་བཅད་པ་གཅིག་གིས་བསྟོད་པས་ངས་ཡང་འདི་རང་བྱང་ཆུབ་ཏུ་ལུང་བསྟན་ཏོ། །གྲོང་ཁྱེར་ཆེན་པོར་གཤེགས་ནས་གྲོང་ཁྱེར་ཆེན་པོར་སངས་རྒྱས་བཞིའི་གདན་ཞེས་བྱ་བའི་བར་རྒྱས་པར་གོང་
མ་བཞིན་དུའོ། །ཡུལ་སྲུག་ནར་གཤེགས་པ་དང་ཡུལ་སྲུག་ན་ན་བྲམ་ཟེ་དབང་པོ་ཞེས་བྱ་བ་གཟུགས་དང་ལང་ཚོ་དང་། ཐོས་པས་རྒྱགས་པར་གྱུར་ནས་བདག་དང་འདྲ་བ་ནི་འགའ་ཡང་ཡོད་པ་མ་ཡིན་ནོ་ཞེས་སྒྲོགས་ཤིང་རྣམ་པར་སྒྲོགས་སོ། །བཅོམ་ལྡན་འདས་ཀྱང་ཕྱོགས་གཞན་ཞིག་
ན་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་ཏེ་ཆོས་འཆད་དོ། །བྲམ་ཟེ་དབང་པོ་ཞེས་བྱ་བས་དགེ་སྦྱོང་གཽ་ཏ་མ་ཡུལ་སྲུག་ནར་བྱོན་ཏོ་ཞེས་ཐོས་ནས་དེ་འདི་སྙམ་དུ་སེམས་ཏེ། དགེ་སྦྱོང་གཽ་ཏ་མ་གཟུགས་བཟང་བ་མཛེས་པ་བལྟ་ན་སྡུག་པ་ཞེས་ཐོས་ཀྱིས། ཅི་བདག་

ལས་ལྷག་པར་གཟུགས་བཟང་བ་ཡིན་ནམ། འོན་ཏེ་མ་ཡིན་ལྟར་འགྲོའོ་སྙམ་ནས་དེ་བྱུང་བ་དང་། ཇི་ཙམ་ན་བཅོམ་ལྡན་འདས་སྐུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ། དཔེ་བྱད་བཟང་པོ་བརྒྱད་བཅུས་མཛེས་པར་བྱས་པ། འོད་འདོམ་གང་གིས་
བརྒྱན་པ་འོད་ཟེར་ཉི་མ་སྟོང་བས་ལྷག་པ། རིན་པོ་ཆེའི་རི་བོ་འགྲོ་བ་ལྟར་ཀུན་ནས་བཟང་བ་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། དགེ་སྦྱོང་གཽ་ཏ་མ་ནི་བདག་བས་གཟུགས་ལྷག་པར་བཟང་མོད་ཀྱི། ཚད་ནི་ལྷག་པར་རིང་བ་ནི་མ་ཡིན་ནོ་སྙམ་ནས། བཅོམ་
ལྡན་འདས་དེའི་གཙུག་ཏོར་བལྟ་བར་བརྩམས་པ་དང་། ཇི་ཙམ་ན་མ་མཐོང་ནས་དེ་ཕྱོགས་ཤིན་ཏུ་མཐོ་བ་ཞིག་ལ་འཛེགས་ན་འོན་ཀྱང་མ་མཐོང་ངོ་། །དེ་ནས་བཅོམ་ལྡན་འདས་ཀྱིས་བྲམ་ཟེ་དབང་པོ་ལ་བཀའ་སྩལ་པ། བྲམ་ཟེ་ཉོན་མོངས་ཀྱིས་ཐོང་ཤིག །གལ་ཏེ་རི་རབ་ཀྱི་རྩེ་
ལ་འཛེགས་ཏེ་བལྟས་ཀྱང་འོན་ཀྱང་ཆེས་ཉོན་མོངས་སུ་ཟད་ཀྱི་དེ་བཞིན་གཤེགས་པའི་གཙུག་ཏོར་ནི་མཐོང་བར་མི་འགྱུར་རོ། །གཞན་ཡང་ཁྱོད་ཀྱིས་ལྷ་དང་ལྷ་མ་ཡིན་དུ་བཅས་པའི་འགྲོ་བས་སངས་རྒྱས་བཅོམ་ལྡན་འདས་རྣམས་ཀྱི་གཙུག་ཏོར་མི་མཐོང་ངོ་། །ཞེས་མ་ཐོས་སམ།
འོན་ཀྱང་གལ་ཏེ་དེ་བཞིན་གཤེགས་པའི་སྐུའི་ཚད་མཐོང་བར་འདོད་ན་ཁྱོད་ཀྱི་ཁྱིམ་ན་མེའི་སྦྱིན་སྲེག་བྱེད་པའི་འོག་ན་ཙན་དན་ས་མཆོག་ལས་བྱས་པའི་མཆོད་སྡོང་ཉིད་ཡོད་ཀྱིས་དེ་ཕྱུང་ལ་གཞོལ་ཅིག་དང་། དེ་བཞིན་གཤེགས་པའི་ཡབ་དང་། ཡུམ་ལས་འཁྲུངས་པའི་སྐུའི་ཚད་
ནི་དེ་ཡིན་ནོ། །བྲམ་ཟེ་དབང་པོས་བསམས་པ། དེ་ཡང་ངོ་མཚར་ཞིག་སྟེ་བདག་གིས་ལན་འགའ་ཡང་མ་ཐོས་ན་སོང་སྟེ་བལྟའོ་སྙམ་ནས་དེ་རིངས་པ་རིངས་པར་སོང་ནས་མེའི་སྦྱིན་སྲེག་བྱེད་པའི་ཐབ་ཀྱི་འོག་ཏུ་བརྐོ་བར་བརྩམས་པ་ལས་དེ་ཐམས་ཅད་དུ་དེ་བཞིན་དུ་གྱུར་ཏོ། །དེ་མངོན་
པར་དད་པར་གྱུར་ནས་བསམ་པ། དགེ་སྦྱོང་གཽ་ཏ་མ་ནི་གདོན་མི་ཟ་བར་ཐམས་ཅད་མཁྱེན་པ་ཡིན་གྱིས་སོང་ལ་བསྙེན་བཀུར་བྱའོ་སྙམ་ནས་དེ་དད་པ་སྐྱེས་ཏེ་བཅོམ་ལྡན་འདས་གང་ན་བ་དེར་སོང་ནས་ཕྱིན་པ་དང་། བཅོམ་ལྡན་འདས་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་

བ་དང་། ཡང་དག་པར་མགུ་བར་འགྱུར་བའི་གཏམ་རྣམ་པ་སྣ་ཚོགས་བྱས་ཏེ་ཕྱོགས་གཅིག་ཏུ་འདུག་གོ། །དེ་ནས་བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས་ཞེས་བྱ་བ་ནས་ཐོག་མ་མེད་
པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེས་བདེན་པ་མཐོང་ནས་སྨྲས་པ། བཅོམ་ལྡན་འདས་བདག་ནི་འཕགས་སོ། །མངོན་པར་འཕགས་སོ། །བདག་
བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས། བདག་དགེ་བསྙེན་དུ་གཟུང་དུ་གསོལ། དེང་སླན་ཅད་ཇི་སྲིད་འཚོའི་བར་དུ་སྲོག་དང་ཡང་བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །དེ་ནས་བྲམ་ཟེ་དབང་པོ་སྟན་ལས་
ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་བཅོམ་ལྡན་འདས་ཀྱིས་གནང་ན་བདག་གིས་ཙན་དན་ས་མཆོག་གི་མཆོད་སྡོང་གི་དུས་མཆོད་བཤམས་ལགས་སོ། །
བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་གནང་གིས་སོང་ལ་ཤོམས་ཤིག །དེ་ནས་དེས་ས་ཕྱོགས་དབེན་པ་སྐབས་ཡོད་པ་ཞིག་ཏུ་རིམ་གྲོ་ཆེན་པོས་མཆོད་སྡོང་དེ་བསྒྲེངས་ནས་དུས་མཆོད་ཆེན་པོ་བཤམས་སོ། །བྲམ་ཟེ་དང་ཁྱིམ་བདག་གཞན་དག་གིས་ཀྱང་རྟེན་དགེ་བར་གྱུར་
ཅིག་ཅེས་བྱ་བར་རིག་ནས། རྩྭ་ཀུ་ཤ་བཏགས་ཏེ་བྲམ་ཟེ་དབང་པོས་མཆོད་སྡོང་གི་དུས་མཆོད་བཤམས་པས་ན་དབང་པོའི་དུས་མཆོད་ཅེས་བྱ་བར་གྲགས་སོ། །གང་གི་ཚེ་བཅོམ་ལྡན་འདས་ཀྱིས་མཉན་ཡོད་དུ་ཆོ་འཕྲུལ་ཆེན་པོ་བསྟན་པས་མུ་སྟེགས་ཅན་རྣམས་ནི་སྤ་བཀོང་། ལྷ་དང་མི་
རྣམས་ནི་དགའ་བར་མཛད། སྐྱེ་བོ་དམ་པ་རྣམས་ནི་ཡི་རངས་པར་མཛད་པ་དེའི་ཚེ་མུ་སྟེགས་ཅན་རྣམས་བྲོས་ནས་མཐའ་འཁོབ་ཏུ་གནས་ཤིང་ཁ་ཅིག་ནི་བྲམ་ཟེའི་གྲོང་ཞེས་བྱ་བར་དོང་ནས་གནས་སོ། །དེའི་ཚེ་བཅོམ་ལྡན་འདས་ཀོ་ས་ལའི་ལྗོངས་རྒྱུ་ཞིང་གཤེགས་པ་ན་བྲམ་ཟེའི་གྲོང་དུ་གཤེགས་

སོ། །མུ་སྟེགས་ཅན་རྣམས་ཀྱིས་ནི་དགེ་སྦྱོང་གཽ་ཏ་མ་འོང་ངོ་ཞེས་ཐོས་སོ། །ཐོས་ནས་ཀྱང་རིངས་པ་རིངས་པར་བྲམ་ཟེ་དང་ཁྱིམ་བདག་རྣམས་ཀྱི་ཁྱིམ་དུ་དོང་སྟེ་ལྷགས་ནས་སྨྲས་པ། ཆོས་ཐོས་པར་གྱུར་ཅིག །ཆོས་ཐོབ་པར་གྱུར་ཅིག །དེ་རྣམས་ཀྱིས་སྨྲས་པ། འཕགས་
པ་དག་དེ་ཅི་ཞིག་ཁོ་བོ་ཅག་གིས་ཁྱེད་ཀྱི་ཕུན་སུམ་ཚོགས་པ་ནི་མཐོང་གིས། ཇི་སྲིད་རྒུད་པ་མ་མཐོང་བ་དེའི་བར་དུ་འགྲོ་བར་བྱའོ། །དེ་རྣམས་ཀྱིས་སྨྲས་པ། འཕགས་པ་དག་བདག་ཅག་གི་རྒུད་པ་གང་ལགས། ཤེས་ལྡན་དག་དགེ་སྦྱོང་གཽ་ཏ་མ་འཁོར་སྟོང་ཉིས་བརྒྱ་ལྔ་བཅུ་
དང་སྤུ་གྲིའི་སེར་བ་འབེབས་ཤིང་འོང་སྟེ། བུ་དང་བཅས་པ་དུམ་བུ་མེད་པར་བྱེད་པར་འགྱུར་རོ། །དེ་རྣམས་ཀྱིས་སྨྲས་པ། འཕགས་པ་དག་གང་གི་ཚེ་ཁོ་ན་བཞུགས་ཤིང་གྲོགས་བགྱི་བ་ལ་ཐུག་པ་དེ་ཁོ་ནའི་ཚེ་བཞུད་པ་ནི་བཟང་པོ་མ་ལགས་ཏེ། བདག་ཅག་རྣམ་པ་ཐམས་ཅད་དུ་མ་རུང་ངོ་། །
དེ་རྣམས་ཀྱིས་སྨྲས་པ། དམ་ཞིག་བཅའ་སྟེ། གལ་ཏེ་དགེ་སྦྱོང་གཽ་ཏ་མ་གསོད་ན་ནི་འཁོད་པར་བྱའོ། །བཞུགས་ཤིག་གསད་པར་བགྱིའོ་ཞེས་དེ་རྣམས་ལག་ན་དབྱུག་པ་དང་གཞུ་ཐོགས། ཁུ་ཚུར་བཅངས། གོ་བགོས་ཏེ་བྱུང་བ་དང་། ལམ་གྱི་དབུས་ན་ཤཱཀྱ་རྒན་པོ་ཞིག་
འདུག་པས་མཐོང་ནས་སྨྲས་པ། ཤེས་ལྡན་དག་གང་དུ་འདོང་། དེ་རྣམས་ཀྱིས་སྨྲས་པ། དགྲ་བསད་པའི་ཕྱིར་རོ། །ཁྱེད་ཅག་གི་དགྲ་སུ་ཡིན། དགེ་སྦྱོང་གཽ་ཏ་མའོ། །ཤེས་ལྡན་དག་གལ་ཏེ་བཅོམ་ལྡན་འདས་དགྲ་ཡིན་ན་བྱམས་པ་གཞན་ཅི་འདྲ་བ་ཞིག་ཡིན། ཤེས་ལྡན་དག་
སླར་ལོག་ཤིག །དེ་རྣམས་ལྡོག་ཏུ་མ་བཏུབ་པ་དང་། དེས་བསམས་པ། འདི་དག་ནི་ཆོས་བཤད་པའི་འོས་སུ་འགྱུར་བ་མ་ཡིན་གྱིས། རྣམ་པ་ཐམས་ཅད་དུ་ཕ་རོལ་གནོན་པ་ཞིག་བྱའོ་སྙམ་ནས། དེས་རི་བྲགས་སུ་ཞུགས་ནས་མེ་བཏང་བ་དང་། རི་བྲགས་ཀུན་ཚིག་པས་ཅ་ཅོ་
དང་ཀུ་ཅོའི་སྒྲ་ཆེན་པོ་བྱུང་བ་དེ་རྣམས་ཀྱིས་ཐོས་ནས་སྡངས་ཏེ་སྨྲས་པ། ཤེས་ལྡན་དག་བདག་ཅག་དང་དགེ་སྦྱོང་གཽ་ཏ་མ་ནི་ཐག་རིང་པོ་ཁོ་ན་ཡིན་གྱི། རི་བྲགས་འདིར་ནི་ཕུང་བ་ཆེན་པོ་གཞན་འདི་བྱུང་སྟེ་རི་བྲགས་བསྲེགས་ཀྱིས་མེ་བསད་ཀྱིས་སླར་ལྡོག་གོ་ཞེས་དེ་རྣམས་ཀྱིས་བསད་པར་བརྩམས་

པ་དང་། བསད་པར་མ་ནུས་པ་དང་། བཅོམ་ལྡན་འདས་ཀྱང་དེ་ཉིད་དུ་བྱོན་ནས་བཀའ་སྩལ་པ། གནས་འཇོག་དག་འདི་ཅི་བྱེད། བཅོམ་ལྡན་འདས་རི་བྲགས་རྣམས་ཞུགས་ཀྱིས་ཚིག་ན་དགུམ་པར་རྔོ་མ་ཐོག་ལགས་སོ། །ངས་བསད་དམ། བཅོམ་
ལྡན་འདས་དགུམ་དུ་གསོལ། བཅོམ་ལྡན་འདས་ཀྱིས་གསུང་ཕྱུང་མ་ཐག་ཁོ་ནར་འདི་ལྟར་ཡང་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང་། ལྷ་རྣམས་ཀྱི་ལྷའི་མཐུས་མེ་དེ་ཞི་བར་གྱུར་ཏོ། །དེ་རྣམས་མངོན་པར་དད་པར་གྱུར་ནས་གསོལ་པ། བཅོམ་ལྡན་འདས་ཅི་ཞིག་གི་
སླད་དུ་གཤེགས་ལགས། ཁྱེད་ཅག་ཁོ་ན་རྗེས་སུ་གཟུང་བའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དེ་རྣམས་ཀྱི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་མཁྱེན་ནས་དེ་དང་འདྲ་བའི་འཕགས་པའི་བདེན་པ་བཞི་སོ་སོར་རྟོགས་པར་འགྱུར་བའི་ཆོས་
བཤད་པ་མཛད་དེ་ཞེས་བྱ་བ་ནས། ཐོག་མ་མེད་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ་ཞེས་བྱ་བའི་བར་གོང་མ་བཞིན་དུའོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་
ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཤཱཀྱ་རྒན་པོ་འདིས་ཉེ་དུ་ལ་ཆགས་པས་བསོད་ནམས་མ་ལགས་པ་མང་དུ་བསགས་ཏེ་རི་བྲགས་བསྲེགས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་འབའ་
ཞིག་ཏུ་མ་ཟད་དེ། ཇི་ལྟར་འདིས་འདས་པའི་དུས་ན་ཡང་གཉེན་ལ་ཆགས་པས་བསོད་ནམས་མ་ཡིན་པ་མང་དུ་བསགས་ཏེ་རི་བྲགས་བསྲེགས་པ་དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །དགེ་སློང་དག་སྔོན་བྱུང་བ་རི་བྲགས་ཞིག་ན་སྤྲེའུ་ལྔ་བརྒྱའི་ཚོགས་
གནས་པས་ལོ་ཐོག་སྐྱེས་ཤིང་སྐྱེས་པ་རྣམས་ཆུད་གསན་ཏོ། །རི་བྲགས་ན་གནས་པའི་སྐྱེ་བོའི་ཚོགས་འདུས་ནས་ཕན་ཚུན་དུ་གྲོས་བྱ་བར་བརྩམས་པ། ཤེས་ལྡན་དག་སྤྲེའུ་རྣམས་ཀྱིས་ལོ་ཐོག་ལ་གནོད་པ་བྱེད་ན་དེ་ལ་ཇི་ལྟར་བསྒྲུབ་པར་བྱ། གཞན་དག་གིས་སྨྲས་པ་སྤྲེའུ་

རྣམས་གསད་མོད། དེ་རྣམས་ཇི་ལྟར་གསད་པར་བྱ། རི་བྲགས་ཀྱི་ཉེན་ཀོར་གྱི་ཤིང་ཐམས་ཅད་བཅད་དེ་ཤིང་ཏིན་ཏུ་ཀ་གཅིག་པུ་ཞིག་བཞག་ལ་ཉེན་ཀོར་རྣམས་ཚེར་མས་བསྐོར་ཏང་དེ་ལ་བཟའ་བའི་ཕྱིར་སྤྲེའུ་རྣམས་འཛེག་པར་འགྱུར་ཏེ། དེ་ལྟར་གྱུར་ཏང་དེར་དེ་རྣམས་
གསད་པར་བྱའོ། །དེ་ནས་དེ་རྣམས་ཀྱིས་བྲགས་ཀྱི་ཉེན་ཀོར་གྱི་ཤིང་ཐམས་ཅད་བཅད་དེ་ཤིང་ཏིན་ཏུ་ཀ་གཅིག་པུ་བཞག་ནས་ཉེན་ཀོར་རྣམས་ཚེར་མའི་ར་བས་བསྐོར་ཏེ་སྲུང་མ་པའི་མི་བཞག་ནས་བསྒོ་བ། ཁྱོད་ཀྱིས་གང་གི་ཚེ་སྤྲེའུ་རྣམས་ཚོགས་པར་གྱུར་པ་དེའི་ཚེ་ཁོ་བོ་ཅག་ལ་སྦྲོན་
ཅིག །དེ་ནས་དུས་གཞན་ཞིག་ན་ཤིང་ཏིན་ཏུ་ཀའི་མེ་ཏོག་དང་འབྲས་བུ་ཆགས་ཏེ་སྨིན་པ་དང་། སྤྲེའུ་རྣམས་ཀྱིས་སྡེ་དཔོན་ལ་སྨྲས་པ། སྡེ་དཔོན་ཤིང་ཏིན་ཏུ་ཀ་སྨིན་ཅིང་མཆིས་ཀྱིས་གསོལ་དུ་གཤེགས་སོ། །དེ་ནས་སྡེ་དཔོན་འཁོར་ལྔ་བརྒྱ་དང་ཤིང་ཏིན་ཏུ་ཀ་ལ་འཛེགས་
ཏེ་ཤིང་ཏིན་ཏུ་ཀ་དེ་ལ་བཟའ་བར་བརྩམས་སོ། །དེ་ནས་སྲུང་མའི་མིས་རི་བྲགས་ན་གནས་པའི་སྐྱེ་བོའི་ཚོགས་ལ་སྨྲས་པ། ཤེས་ལྡན་དག་ཤིང་ཏིན་ཏུ་ཀ་ལ་སྤྲེའུ་ཐམས་ཅད་འཛེགས་ནས་ཟ་བར་བྱེད་ཀྱིས་ཁྱེད་ཅག་གི་བྱ་བའམ་བྱེད་པ་གང་ཡིན་པ་དེ་གྱིས་ཤིག །དེ་ནས་རི་བྲགས་
ན་གནས་པའི་སྐྱེ་བོའི་ཚོགས་ལག་ན་མདའ་གཞུ་དང་དགྲ་སྟ་ཐོགས། ཁུ་ཚུར་བཅངས་ཏེ་རིངས་པར་སོང་ནས་ཤིང་ཏིན་ཏུ་ཀ་བཅད་པར་བརྩམས་པ་དང་། དེ་ནས་སྤྲེའུ་དེ་རྣམས་བྲེད་དེ་མཆོང་རྒལ་ཞིང་ཤིང་ཀ་ཕན་ཚུན་རྒྱུ་བར་བྱེད་དོ། །སྡེ་དཔོན་ནི་སེམས་ལས་ཆུང་ངུས་ཟ་བར་བྱེད་པ་དང་།
སྤྲེའུ་དེ་རྣམས་ཀྱིས་དེ་ལ་སྨྲས་པ། སྡེ་དཔོན་བདག་ཅག་ནི་སྡུག་བསྔལ་མི་བཟད་པ་ཉམ་ང་བ་ཐོབ་ཅིང་མཆིས་ཏེ་ཕན་ཚུན་དུ་རྒྱུ་ལགས་ན། ཁྱོད་ཅིའི་སླད་དུ་ཐུགས་ཁྲལ་ཆུང་ངུས་བཞུགས་དེས་ཚིགས་སུ་བཅད་དེ་སྨྲས་པ། བྱ་བ་མང་པོའི་མི་རྣམས་ལ། །བྱ་བ་མིན་པའང་དེ་དང་འདྲ། །
ཤིང་གི་འཕྲོ་ནི་མང་ཡོད་པས། །སེམས་ལས་བསྐྱུངས་ཏེ་བཟའ་བར་གྱིས། །དེ་ནས་ཡང་སྡེ་དཔོན་གྱི་ཕྲུ་གུ་ཞིག་རི་བྲགས་དེ་ན་བཅིངས་ཏེ་འདུག་པ་དེ་ལག་པ་འགྲམ་པ་ལ་གཏད་ནས་སེམས་ཁོང་དུ་ཆུད་ཅིང་འདུག་པ་དང་། ཇི་ཙམ་ན་སྤྲེའུ་བཟང་པོ་ཞིག་ཕྱོགས་དེར་འོངས་པ་དང་། དེ་སེམས་

ཁོང་དུ་ཆུད་པ་མཐོང་ནས་སྨྲས་པ། གྲོགས་པོ་ཅིའི་ཕྱིར་ལག་པ་འགྲམ་པ་ལ་གཏད་ནས་སེམས་ཁོང་དུ་ཆུད། དེས་སྨྲས་པ། ད་ལྟར་རི་བྲགས་ན་གནས་པའི་སྐྱེ་བོའི་ཚོགས་ཐམས་ཅད་ཁོ་བོའི་ཉེ་དུ་གསོད་དུ་དོང་ན་ཅིའི་ཕྱིར་སེམས་ཁོང་དུ་ཆུད་པར་མི་འགྱུར། ཅིའི་ཕྱིར་ཁྱོད་
ཀྱིས་ཕ་རོལ་གནོན་པ་མ་བྱས། བཅིངས་ན་ཇི་ལྟར་ཕ་རོལ་གནོན་པ་བྱ། ཁོ་བོས་ཁྱོད་དགྲོལ་ལོ་ཞེས་དེས་དེ་བཀྲོལ་བ་དང་། དེ་ནས་དེས་རི་བྲགས་དེར་མེ་བཏང་སྟེ། རི་བྲགས་ཀུན་ཚིག་པས་ཅ་ཅོ་དང་ཀུ་ཅོའི་སྒྲ་ཆེན་པོ་བྱུང་བ་དེ་རྣམས་ཀྱིས་ཐོས་ནས་སྔངས་ཏེ་སྨྲས་པ། ཤེས་ལྡན་
དག་བདག་ཅག་དང་སྤྲེའུ་རྣམས་ནི་ཐག་རིང་པོ་ཁོ་ན་ཡིན་གྱི། ཕུང་བ་ཆེན་པོ་གཞན་འདི་བྱུང་སྟེ་རི་བྲགས་བསྲེགས་ཀྱིས་མེ་གསད་ཀྱིས་སླར་ལྡོག་གོ་ཞེས་དེ་རྣམས་མེ་གསད་པའི་ཕྱིར་བརྒྱུགས་པ་དང་། སྤྲེའུ་རྣམས་ཀྱང་ཤིང་ཏིན་ཏུ་ཀ་ལས་བབས་ནས་བྲོས་སོ། །དགེ་སློང་དག་ཇི་
སྙམ་དུ་སེམས། སྤྲེའུའི་ཕྲུ་གུ་གང་ཡིན་པ་དེ་ནི་ཤཱཀྱ་རྒན་པོ་འདི་ཉིད་ཡིན་ཏེ། དེ་ན་ཡང་འདིས་ཉེ་དུ་ལ་ཆགས་པས་རི་བྲགས་བསྲེགས་ལ་ད་ལྟར་ཡང་འདིས་ཉེ་དུ་ལ་ཆགས་པས་རི་བྲགས་བསྲེགས་སོ། །ནག་པོའི་གྲོང་ཁྱེར་དུ་གཤེགས་ནས་ནག་པོའི་གྲོང་ཁྱེར་དུ་སངས་རྒྱས་བཞིའི་
གདན་ཞེས་བྱ་བ་རྒྱས་པར་གོང་མ་བཞིན་དུའོ། །རོ་ཧི་ཏ་ཀར་བྱོན་ནས་རོ་ཧི་ཏ་ཀ་ན་གནོད་སྦྱིན་གླང་ཆེན་སྟོབས་ཀྱི་གནས་ན་བཞུགས་སོ། །དེའི་ཚེ་གནོད་སྦྱིན་གླང་ཆེན་སྟོབས་གནོད་སྦྱིན་རྣམས་ཀྱི་གནོད་སྦྱིན་གྱི་འདུན་སར་སོང་བ་དང་། གནོད་སྦྱིན་གླང་ཆེན་སྟོབས་ཀྱིས། བཅོམ་ལྡན་འདས་
བསྐྱེད་པར་བྱོན་ནས་རོ་ཧི་ཏ་ཀ་ན་བདག་གི་གནས་ཁོ་ན་ན་བཞུགས་སོ་ཞེས་ཐོས་སོ། །ཐོས་ནས་ཀྱང་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་།
བཅོམ་ལྡན་འདས་ཀྱིས་གནོད་སྦྱིན་གླང་ཆེན་སྟོབས་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད་ཅེས་བྱ་བ་ནས། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་ཞེས་བྱ་བའི་བར་གོང་མ་བཞིན་དུའོ། །དེ་ནས་

གནོད་སྦྱིན་གླང་ཆེན་སྟོབས་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དོ་མོད་བདག་གི་གནས་སུ་བཞུགས་པར་གནང་བར་མཛད་
དུ་གསོལ། བཅོམ་ལྡན་འདས་ཀྱིས་གནོད་སྦྱིན་གླང་ཆེན་སྟོབས་ལ་ཅང་མི་གསུང་བས་གནང་ངོ་། །དེ་ནས་གནོད་སྦྱིན་གླང་ཆེན་སྟོབས་ཀྱིས་བཅོམ་ལྡན་འདས་ཀྱི་ཕྱིར་གཙུག་ལག་ཁང་ལྔ་བརྒྱ་སྤྲུལ་ཏེ། སྟན་ནང་ཚངས་ཅན་དང་། སྔས་ནང་ཚངས་ཅན་དང་། གོར་བུ་ལྔ་བརྒྱ་
དང་། ཞུགས་ལིང་ལྔ་བརྒྱ་བཤམས་སོ། །དེ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་
གནོད་སྦྱིན་གླང་ཆེན་སྟོབས་ལ་ཅང་མི་གསུང་བས་གནང་ངོ་། །དེ་ནས་གནོད་སྦྱིན་གླང་ཆེན་སྟོབས་ཀྱིས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་སྟན་ལས་ལངས་ཏེ་སོང་ནས་དེའི་ནེའུ་ཟླ་ཁ་ཆེ་ཡུལ་གྱི་གནོད་སྦྱིན་སྒྲ་སྒྲོགས་ཞེས་བྱ་བ་དེ་ལ་དེས་བསྒོ་བ། ཁོ་བོས་
སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་ལ་སྤྱན་དྲངས་ཀྱིས་བྱང་ཕྱོགས་ཀྱི་འབྲས་བུ་རྣམས་སྐུར་ཅིག་ཅེས་དེས་དེ་ལ་ཕོ་ཉ་བཏང་ནས་དེ་ཉིད་ཀྱི་མཚན་མོ་ནས་གཙང་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་ནས། ནང་པར་སྔར་ལངས་ཏེ་གཙུག་ལག་ཁང་
ཆག་ཆག་དང་ཕྱག་དར་བྱས་ནས་གདན་བཤམས་ཏེ་ནོར་བུའི་ཆུ་སྣོད་བཞག་ནས། ཁང་སྐྱོང་གིས་གཎྜཱི་བརྡུངས་པ་དང་། གནོད་སྦྱིན་སྒྲ་སྒྲོགས་ཀྱིས་རྒུན་འབྲུམ་གྱིས་སྐོན་པ་བཀང་སྟེ་གནོད་སྦྱིན་རྣམས་ཀྱི་ལག་ཏུ་བསྐུར་ཏེ། དེ་དག་གིས་གཙུག་ལག་ཁང་གི་དབུས་སུ་ཕུང་པོར་
སྤུངས་ཏེ་བཞག་གོ། །དགེ་སློང་རྣམས་ཀྱིས་འབྲས་བུ་འདི་དག་ཅིའི་ཡིན་པ་དང་། ཇི་ལྟར་བརྟག་པར་བྱ་བ་མི་ཤེས་ནས། དེ་རྣམས་ཀྱིས་བཅོམ་ལྡན་འདས་ལ་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྱང་ཕྱོགས་ཀྱི་ནགས་ཀྱི་འབྲས་བུ་རྒུན་

འབྲུམ་ཞེས་བྱ་སྟེ། མེས་བརྟག་པ་བྱོས་ལ་རིམ་ཤིག །དགེ་སློང་རྣམས་འབྲུམ་བུ་རེ་རེ་ནས་བྱེད་པ་ན་ཤིན་ཏུ་ཡུན་རིང་དུ་ཐོགས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཕུང་པོ་གཉིས་སམ་གསུམ་དུ་བྱོས་ལ་མེས་རེག་པར་བྱོས་ཤིག །དེ་ནས་
གནོད་སྦྱིན་གླང་ཆེན་སྟོབས་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས། གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་ཞེས་བྱ་བ་ནས། སྟན་ཆེས་དམའ་བ་ཞིག་བླངས་ཏེ། བཅོམ་ལྡན་འདས་ཀྱི་སྤྱན་སྔར་ཆོས་
མཉན་པའི་ཕྱིར་འདུག་གོ་ཞེས་བྱ་བའི་བར་གོང་མ་བཞིན་དུའོ། །དེ་ནས་བཅོམ་ལྡན་འདས་ཀྱིས་གནོད་སྦྱིན་གླང་ཆེན་སྟོབས་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་
དགའ་བར་མཛད་ནས་གདན་ལས་བཞེངས་པ་དང་རྒུན་འབྲུམ་མང་དུ་ལྷག་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། རྒུན་འབྲུམ་རྣམས་མཉེས་ལ་ཁུ་བ་བྲིམ་པར་བྱའོ། །འོན་ཀྱང་ལྷག་ནས་བཅོམ་ལྡན་འདས་ཀྱིས་བཀའ་སྩལ་པ། དྲོ་འཇར་བྱས་ཏེ་བཞག་པ་
དང་དགེ་འདུན་གྱི་དུས་མ་ཡིན་པའི་བཏུང་བར་འགྱུར་རོ། །དེ་ནས་བཅོམ་ལྡན་འདས་གཙུག་ལག་ཁང་གི་ཕྱི་རོལ་དུ་ཞབས་གཉིས་བཀྲུས་ནས་གཙུག་ལག་ཁང་དུ་ནང་དུ་ཡང་དག་འཇོག་གི་ཕྱིར་ཞུགས་སོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ང་ནི་ཚེ་ཐུང་ངུའི་
དུས་ལ་བྱུང་བས་མྱ་ངན་ལས་འདས་པའི་དུས་ལ་བབ་ན་གདུལ་བའི་དོན་བྱ་བ་ནི་རབ་ཏུ་མང་བས་གལ་ཏེ་ང་དགེ་སློང་ཀུན་དགའ་བོ་དང་ཐབས་ཅིག་ཏུ་བྱང་ཕྱོགས་སུ་གཤེགས་ན་ནི་གདུལ་བ་རྣམས་ཀྱི་དོན་བྱ་དཀའ་བར་འགྱུར་གྱིས། མ་ལ་ང་གནོད་སྦྱིན་ལག་ན་རྡོ་རྗེ་དང་ལྷན་ཅིག་གཤེགས་
པར་བྱའོ་སྙམ་ནས། དེ་ནས་བཅོམ་ལྡན་འདས་ཀྱིས་གཙུག་ལག་ཁང་གི་ཕྱི་རོལ་དུ་ཚིགས་སུ་བཅད་པ་གཉིས་ཀྱིས་གནོད་སྦྱིན་ལག་ན་རྡོ་རྗེ་བོས་པ། དྲན་དང་ལྡན་རྣམས་བཟང་པོར་ཤོག །དྲན་དང་ལྡན་རྣམས་རྟག་ཏུ་བཟང་། །ཞི་བ་ཐོབ་པའི་སེམས་ཀྱིས་ནི། །དྲན་དང་ལྡན་

པ་བདེ་བར་ཉལ། །དྲན་དང་ལྡན་རྣམས་བཟང་པོར་ཤོག །དྲན་དང་ལྡན་རྣམས་རྟག་ཏུ་བཟང་། །རྒྱལ་དང་ཕ་རོལ་རྒྱལ་སྤངས་ནས། །དྲན་དང་ལྡན་པ་བདེ་བར་ཉལ།། །།བར་སྡོམ་ལ། སྤུངས་པ་ཅན་ན་སངས་རྒྱས་སྟོབས། །རེ་ཏུ་ཀ་ན་ཆོས་སྟོབས་ཏེ། །སིན་
དུ་ན་ནི་ཕོར་ཆེན་ཞབས། །མགོ་རེག་སྤྱི་བླུགས་སོག་མ་མེད། །ཧུ་ལུ་ཀླུ་དང་དེ་བཞིན་ནགས། །གཉིད་འགྲོགས་དྲང་སྲོང་ཉམས་པ་དང་། །ཀན་ཐ་འབྲས་ཀྱི་གྲོང་ཁྱེར་དུ། །མཆོག་གི་མ་བཏུལ་དབང་ལྡན་རྫ། །གསིང་མའི་གནོད་སྦྱིན་ཆེན་པོ་དང་། །དེ་བཞིན་བརྩེགས་
སྐྱོང་དགའ་འཕེལ་དང་། །སྲིད་པའི་ལྷ་དང་གཏུམ་བྱེད་ཀྱི། །བུ་བདུན་རྣམས་ནི་བཏུལ་བ་དང་