Kinh tạng Tây Tạng (Kangyur Đại Học) — 002_འདུལ་བ།_ཁ

འུ་གཅིག་དང་། གསོ་སྦྱོང་བཅྭ་ལྔ་པ་དེ་ཉིད་
མ་གཏོགས་པར་བྲམ་ཟེའི་ཁྱེའུ་སུ་ཡང་མཁན་པོ་ལྟ་ཞིང་འགྲོ་བར་མི་བྱའོ། །བདག་ཅག་ལས་དབྱར་གྱི་ནང་ལོགས་སུ་རྩ་བ་དང་འབྲས་བུ་སྟོབས་པའི་བྲམ་ཟེའི་ཁྱེའུ་གཅིག་དང་། གསོ་སྦྱོང་བཅྭ་ལྔ་པ་དེ་ཉིད་མ་གཏོགས་པར་གང་ཞིག་མཁན་པོ་ལྟ་ཞིང་
སོང་བར་གྱུར་ན་དེ་ནི་བདག་ཅག་གིས་ཉེས་པ་ཅན་དུ་བརྩིའོ་ཞེས་བྱས་ནས། སྟོན་པ་ལྐུགས་འཕྱེ་ཟླ་བ་གསུམ་པོ་དེ་ལ་ནང་དུ་ཡང་དག་འཇོག་ལ་ཞུགས་པ་དང་། རྩ་བ་དང་འབྲས་བུ་སྟོབས་པའི་བྲམ་ཟེའི་ཁྱེའུ་གཅིག་དང་། གསོ་སྦྱོང་བཅྭ་ལྔ་པ་དེ་ཉིད་མ་
གཏོགས་པར་བྲམ་ཟེའི་ཁྱེའུ་སུ་ཡང་དེའི་དྲུང་དུ་མི་འགྲོའོ། །སྟོན་པ་ལྐུགས་འཕྱེས་རྒྱང་རིང་པོ་ཁོ་ན་ནས་རི་དགས་ཞིག་མཐོང་ངོ་། །མཐོང་ནས་ཀྱང་འདི་སྐད་ཅེས་སྨྲས་སོ། །རི་དགས་འོངས་པ་ལེགས་སོ་ཚུར། རི་དགས་ཁྱོད་དང་ཁོ་བོ་ནི་མཚུངས་ཏེ། ཁྱོད་
ཀྱང་ཟས་ལྟོ་འགྲངས་ཙམ་གྱིས་ཆོག་ཅིང་ཀུན་དུ་ཆོག་ལ། ཁོ་བོ་ཡང་ལྟོ་འགྲངས་ཙམ་གྱིས་ཆོག་ཅིང་ཀུན་དུ་ཆོག་ན། འདི་ན་ཁ་ཅིག་ནི་དེ་ལྟ་མ་ཡིན་ཏེ། ཧ་ཀྱང་ཚོད་རྔད་དང་། ཨུཏྤ་ལའི་རྩ་བ་སྦྱོར་བ་ལ་བརྩོན་པར་གནས་སོ། །དེ་ནས་བྲམ་ཟེའི་ཁྱེའུ་དེ་
རྣམས་འདི་སྙམ་དུ་སེམས་ཏེ། གདོན་མི་ཟ་བར་མཁན་པོ་ནི་བརྟུལ་ཞུགས་རྫོགས་པར་གྱུར་ཏེ། འདི་ལྟར་མཁན་པོ་རི་དགས་དང་ལྷན་ཅིག་སྨྲ་བར་བྱེད་དོ་སྙམ་དུ་བསམས་ནས། སྟོན་པ་ལྐུགས་འཕྱེ་གང་ན་བ་དེར་དོང་སྟེ་ལྷགས་པ་དང་། སྟོན་པའི་
རྐང་པ་གཉིས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ། །དེ་ནས་སྟོན་པ་ལྐུགས་འཕྱེ་ཅང་མི་སྨྲའོ། །དེ་ནས་བྲམ་ཟེའི་ཁྱེའུ་དེ་རྣམས་འདི་སྙམ་དུ་སེམས་ཏེ། གདོན་མི་ཟ་བར་མཁན་པོ་ནི་བརྟུལ་ཞུགས་རྫོགས་པར་གྱུར་ཏེ། འདི་

ལྟར་མཁན་པོ་རི་དགས་དང་ལྷན་ཅིག་སྨྲ་བར་བྱེད་དོ་སྙམ་དུ་བསམས་ནས། སྟོན་པ་ལྐུགས་འཕྱེ་ནི་གང་གི་ཕྱིར་རི་དགས་དང་ལྷན་ཅིག་སྨྲ་བར་བྱེད་ཀྱི། མི་རྣམས་དང་ནི་མ་ཡིན་ནོ། །ཞེས་སྨྲས་ནས་སྟན་ལས་ལངས་ཏེ་དོང་ངོ་། །དེ་ནས་
རི་དགས་ཀྱི་བརྟུལ་ཞུགས་ཅན་ཞིག་སྟོན་པ་ལྐུགས་འཕྱེ་གང་ན་བ་དེར་སོང་བ་དང་། སྟོན་པ་ལྐུགས་འཕྱེས་རྒྱང་རིང་པོ་ཁོ་ན་ནས་རི་དགས་ཀྱི་བརྟུལ་ཞུགས་ཅན་མཐོང་ངོ་། །མཐོང་ནས་ཀྱང་འདི་སྐད་ཅེས་སྨྲས་སོ། །རི་དགས་ཀྱི་བརྟུལ་ཞུགས་ཅན་ཁྱོད་འོངས་པ་
ལེགས་སོ་ཚུར། ཁྱོད་དང་ཁོ་བོ་ནི་མཚུངས་ཏེ། ཁྱོད་ཀྱང་གཡང་གཞི་གཅིག་ཐོགས། ཁོ་བོ་ཡང་གཡང་གཞི་གཅིག་ཐོགས། ཁྱོད་ཀྱང་རིལ་བ་དང་། དབྱུག་གུ་དང་། བླུགས་གཟར་གྱི་སྣོད་རེ་རེ་ཐོགས། ཁོ་བོ་ཡང་རེ་རེ་ཐོགས། ཁྱོད་ཀྱང་བསོད་
སྙོམས་ལྟོ་འགྲངས་ཙམ་གྱིས་ཆོག་ཅིང་ཀུན་དུ་ཆོག་ལ། ཁོ་བོ་ཡང་བསོད་སྙོམས་ལྟོ་འགྲངས་ཙམ་གྱིས་ཆོག་ཅིང་ཀུན་དུ་ཆོག་ན། འདི་ན་ཁ་ཅིག་ནི་དེ་ལྟ་མ་ཡིན་ཏེ། གཡང་གཞི་དང་། ཤིང་ཤུན་དང་། དབྱུག་གུ་དང་། རིལ་བ་དང་། བླུགས་གཟར་གྱི་
སྣོད་ལྷག་པ་འཆང་ཞིང་། ཧ་ཅང་ཚོད་རྔད་དང་། ཁྲེ་རྒོད་དང་། ཨུཏྤ་ལའི་རྩ་བ་སྦྱོར་བ་ལ་བརྩོན་པར་གནས་སོ། །དེ་ནས་བྲམ་ཟེའི་ཁྱེའུ་དེ་རྣམས་འདི་སྙམ་དུ་སེམས་ཏེ། ཇི་ལྟར་མཁན་པོ་འདོད་ཆེན་ཆེ་བ་ལ་ནི་རྣམ་པར་སྨོད་ལ། འདོད་ཆེན་ཆུང་བ་ལ་བསྟོད་
པས་དོན་གྱིས་ན་མཁན་པོས་བདག་ཅག་ལ་ནན་ཏུར་བྱས་ཀྱིས། མ་ལ་བདག་ཅག་གི་གཡང་གཞི་དང་། ཤིང་ཤུན་དང་། དབྱུག་གུ་དང་། རིལ་བ་དང་། བླུགས་གཟར་གྱི་སྣོད་ལྷག་པ་ཆུ་བོ་རྟག་འབབ་ཀྱི་ནང་དུ་བོར་ལ་མཁན་པོ་གང་ན་བ་དེར་འདོང་ངོ་ཞེས་དེ་རྣམས་ཀྱིས་
གཡང་གཞི་དང་། ཤིང་ཤུན་དང་། དབྱུག་གུ་དང་། རིལ་བ་དང་། བླུགས་གཟར་གྱི་སྣོད་ལྷག་མ་རྣམས་ཆུ་བོ་རྟག་འབབ་ཀྱི་ནང་དུ་བོར་ནས་རྒྱུད་གཙང་བ་དང་། སྤྱོད་པ་གཞུང་བཞིན་དུ་བྱས་ནས་སྟོན་པ་ལྐུགས་འཕྱེ་གང་ན་བ་དེར་དོང་སྟེ་ལྷགས་པ་དང་།

སྟོན་པ་ལྐུགས་འཕྱེའི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །སྟོན་པ་ལྐུགས་འཕྱེས་བྲམ་ཟེའི་ཁྱེའུ་དེ་རྣམས་ཀྱི་བསམ་པ་དང་། བག་ལ་ཉལ་དང་ཁམས་དང་། རང་བཞིན་ཤེས་ནས། ཇི་ལྟར་བྲམ་ཟེའི་ཁྱེའུ་ལྔ་བརྒྱ་པོ་
དེ་དག་གིས་མངོན་པར་ཤེས་པ་ལྔ་མངོན་སུམ་དུ་བྱས་པ་དེ་ལྟ་བུའི་ཆོས་བཤད་པ་བྱས་སོ། །རྒྱལ་པོ་ཆེན་པོ་ཇི་སྙམ་དུ་སེམས། དེའི་ཚེ་དེའི་དུས་ཀྱི་སྟོན་པ་ལྐུགས་འཕྱེ་གང་ཡིན་པ་དེ་ནི་ང་ཉིད་ཡིན་ནོ། །རྒྱལ་པོ་ཆེན་པོ་ངས་སེམས་ཅན་ལ་ཕན་པ་བྱས་
པ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ངའི་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །རྒྱལ་པོ་ཆེན་པོ་གཞན་
ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་བྱང་ཆུབ་སེམས་དཔའི་སྤྱོད་པས་སེམས་ཅན་ལ་ཕན་པ་བྱས་པ་གང་ཡིན་པ་དེ་ཉོན་ཅིག །རྒྱལ་པོ་ཆེན་པོ་སྔོན་བྱུང་བའི་མི་རྣམས་ཀྱི་ཚེ་ལོ་བརྒྱད་ཁྲི་ཐུབ་པར་གྱུར་ཏོ། །མི་རྣམས་
ཀྱི་ཚེ་ལོ་བརྒྱད་ཁྲི་ཐུབ་པ་ན་འཛམ་བུའི་གླིང་འདི་ཉིད་འབྱོར་པར་གྱུར་ཅིང་ཞེས་བྱ་བ་རྒྱས་པར་ཇི་སྐད་ཆོས་ལྡན་གྱི་མདོ་ལས་འབྱུང་བ་ལྟ་བུའོ། །ཇི་ཙམ་ན་མི་ཚེ་ལོ་བརྒྱད་ཁྲི་ཐུབ་པ་རྣམས་ལ་ལུས་ཀྱི་གནོད་པ་འདི་ལྟ་བུ་བྱུང་སྟེ། འདི་ལྟ་སྟེ་གྲང་བ་དང་། ཚ་བ་
དང་། བཀྲེས་པ་དང་། སྐོམ་པ་དང་། འདོད་པ་དང་། ཟ་བ་དང་རྒ་བའོ། །མི་རྣམས་ཀྱི་ཚེ་ལོ་བརྒྱད་ཁྲི་ཐུབ་པ་ན་རྒྱལ་པོ་བྱེད་ལྡན་ཞེས་བྱ་བ་བྱུང་སྟེ། རྒྱལ་པོ་བྱེད་ལྡན་གྱི་སྐྱེད་མོས་ཚལ་གྱི་གནས་ན་ཤིང་ནྱ་གྲོ་དྷའི་རྒྱལ་པོ་ཤིན་ཏུ་རབ་གནས་
ཞེས་བྱ་བ་ཞིག་ཡོད་དོ། །ནྱ་གྲོ་དྷའི་རྒྱལ་པོ་ཤིན་ཏུ་རབ་གནས་ཀྱི་དྲུང་ན་བྲམ་ཟེ་ཤིང་སཱ་ལ་ཆེན་པོ་ལྟ་བུ་རྩིབས་ཀྱི་མུ་ཁྱུད་ཅེས་བྱ་བ་བྲམ་ཟེའི་ཁྱེའུ་ལྔ་བརྒྱ་ཙམ་ལ་བྲམ་ཟེ་རྣམས་ཀྱི་གསང་ཚིག་ཀློག་ཏུ་འཇུག་གོ། །དེ་ནས་བྲམ་ཟེ་ཤིང་སཱ་ལ་ཆེན་པོ་

ལྟ་བུ་རྩིབས་ཀྱི་མུ་ཁྱུད་གཅིག་པུ་དབེན་པར་སོང་ནས་སེམས་ལ་སེམས་ཀྱི་རྟོག་པ་འདི་ལྟ་བུ་སྐྱེས་ཏེ། མི་རྣམས་ནི་ཚེ་ཐུང་ལ་ཚེ་ཕྱི་མར་འགྲོ་དགོས་ཏེ། སྐྱེས་པ་ལ་མི་འཆི་བ་མེད་པས་དགེ་བ་བྱ་ཞིང་ཚངས་པར་སྤྱོད་པ་སྤྱད་དགོས་ན། འོན་ཀྱང་ད་
ལྟར་མི་འདི་དག་ནི་འདི་ལྟ་སྟེ་དོན་སྤྱད་པ་དང་། བསོད་ནམས་སྤྱད་པ་དང་དགེ་བ་སྤྱད་པ་ལ་སེམས་ལས་ཆུང་ངུ་སེམས་ལས་ཆུང་ངུར་གནས་པར་བྱེད་ཀྱིས། མ་ལ་བདག་སྐྲ་དང་ཁ་སྤུ་བྲེགས་ལ་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་
མེད་པར་རབ་ཏུ་འབྱུང་བར་བྱའོ་སྙམ་མོ། །དེ་ནས་བྲམ་ཟེ་ཤིང་སཱ་ལ་ཆེན་པོ་ལྟ་བུ་རྩིབས་ཀྱི་མུ་ཁྱུད་ཀྱིས་བྲམ་ཟེའི་ཁྱེའུ་རྣམས་ལ་སྨྲས་པ། བྲམ་ཟེའི་ཁྱེའུ་དག་ཤེས་པར་གྱིས་ཤིག །འདི་ན་ཁོ་བོ་གཅིག་པུ་ཞེས་བྱ་བ་ནས་རབ་ཏུ་འབྱུང་ངོ་ཞེས་བྱ་བའི་བར་རྒྱས་
པར་སྦྱར་རོ། །བྲམ་ཟེའི་ཁྱེའུ་དག་བདག་ནི་སྐྲ་དང་ཁ་སྤུ་བྲེགས་ཏེ་ཞེས་བྱ་བ་ནས་རབ་ཏུ་འབྱུང་ན་ཤེས་ལྡན་དག་ཅི་བྱེད། ཀྱེ་མཁན་པོ་བདག་ཅག་གིས་གང་ཅུང་ཟད་ཅི་འཚལ་བ་དེ་ཐམས་ཅད་ནི་ཤེས་ལྡན་མཁན་པོ་ལ་བརྟེན་ནས་ལགས་པས་གལ་ཏེ་ཤེས་ལྡན་
མཁན་པོ་སྐྲ་དང་ཁ་སྤུ་བྲེགས་ཞེས་བྱ་བ་ནས་རབ་ཏུ་འབྱུང་ན་བདག་ཅག་ཀྱང་ཤེས་ལྡན་མཁན་པོ་རབ་ཏུ་བྱུང་བའི་རྗེས་སུ་རབ་ཏུ་འབྱུང་བར་བགྱིའོ། །བྲམ་ཟེའི་ཁྱེའུ་དག་དེའི་དུས་ལ་དབབ་པར་ཤེས་པར་གྱིས་ཤིག །དེ་ནས་བྲམ་ཟེ་ཤིང་སཱ་ལ་ཆེན་པོ་ལྟ་བུ་
རྩིབས་ཀྱི་མུ་ཁྱུད་སྐྲ་དང་ཁ་སྤུ་བྲེགས་ནས་ཞེས་བྱ་བ་ནས་རབ་ཏུ་བྱུང་ཞེས་བྱ་བའི་བར་དུ་སྟེ། བྲམ་ཟེའི་ཁྱེའུ་ལྔ་བརྒྱ་པོ་དེ་རྣམས་ཀྱང་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་བྲམ་ཟེ་ཤིང་སཱ་ལ་ཆེན་པོ་ལྟ་བུ་རྩིབས་ཀྱི་མུ་ཁྱུད་རབ་ཏུ་བྱུང་བའི་རྗེས་སུ་རབ་ཏུ་བྱུང་ངོ་། །དེ་ནས་
བྲམ་ཟེ་ཤིང་སཱ་ལ་ཆེན་པོ་ལྟ་བུ་རྩིབས་ཀྱི་མུ་ཁྱུད་ཀྱིས་མྱ་ངན་ལས་འདའ་བར་མི་འགྱུར་བའི་སྒྲིབ་པ་ལྔ་སྤངས་ནས་ཞེས་བྱ་བ་ནས་རྒྱས་པར་བྱམས་པ་དང་ལྡན་པའི་སེམས་ཞེས་བྱ་བ་དང་། རྒྱས་པར་སྙིང་རྗེ་དང་། དགའ་བ་དང་། བཏང་སྙོམས་ཀྱི་བར་དུ་

བརྗོད་པར་བྱ་སྟེ། །བཏང་སྙོམས་དང་ལྡན་པའི་སེམས་ཁོན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ་རྒྱ་ཆེན་པོར་གྱུར་པ། ཚད་མེད་པ་ཤིན་ཏུ་བསྒོམས་པས་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་སོ། །དེ་ནས་
བྲམ་ཟེ་ཤིང་སཱ་ལ་ཆེན་པོ་ལྟ་བུ་རྩིབས་ཀྱི་མུ་ཁྱུད་ཀྱི་མིང་བྲམ་ཟེ་ཤིང་སཱ་ལ་ཆེན་པོ་ལྟ་བུ་རྩིབས་ཀྱི་མུ་ཁྱུད་བྲམ་ཟེ་ཤིང་སཱ་ལ་ཆེན་པོ་ལྟ་བུ་རྩིབས་ཀྱི་མུ་ཁྱུད་ཅེས་བྱ་བའི་མིང་གང་ཡིན་པ་ནུབ་པར་གྱུར་ཅིང་། སྟོན་པ་རྩིབས་ཀྱི་མུ་ཁྱུད་ཅེས་བྱ་བར་གྲགས་སོ། །དེ་ནས་
སྟོན་པ་རྩིབས་ཀྱི་མུ་ཁྱུད་ཀྱིས་བྲམ་ཟེའི་ཁྱེའུ་རྣམས་ལ་སྨྲས་པ། བྲམ་ཟེའི་ཁྱེའུ་དག་མི་རྣམས་ནི་ཚེ་ཐུང་བ། ཉོན་མོངས་པ། རིང་པོ་མི་ཐོགས་པ་ཡིན་ལ། དེ་ཡང་སྡུག་བསྔལ་དང་ལྡན་ནོ། །དཔེར་ན་རྩྭའི་རྩེ་མོ་ལ་ཆགས་པའི་ཟིལ་བ་ནི་ཉི་མ་ཤར་བའི་ཚེ་
མྱུར་དུ་ལྟུང་ཞིང་རིང་པོར་མི་གནས་སོ། །བྲམ་ཟེའི་ཁྱེའུ་དག་དེ་བཞིན་དུ་མི་རྣམས་ཀྱི་ཚེ་ཡང་ཟིལ་པ་དང་འདྲ་བར་རིང་པོར་མི་ཐོགས་པ་ཉོན་མོངས་པ་ཡིན་ལ་དེ་ཡང་སྡུག་བསྔལ་དང་ལྡན་ནོ། །དཔེར་ན་ཆུ་ལ་རི་མོ་མཁན་གྱིས་རི་མོ་བྲིས་པ་ནི་མྱུར་དུ་འཇིག་ཅིང་རིང་
པོར་མི་གནས་སོ། །བྲམ་ཟེའི་ཁྱེའུ་དག་དེ་བཞིན་དུ་མི་རྣམས་ཀྱི་ཚེ་ཡང་ཆུའི་རི་མོ་བཞིན་དུ་རིང་པོར་མི་གནས་པ་ཉོན་མོངས་པ་ཡིན་ལ་དེ་ཡང་སྡུག་བསྔལ་དང་ལྡན་ནོ། །དཔེར་ན་ཆུ་ལ་དབྱུག་པས་ཁྲམ་བཏབ་པ་ནི་མྱུར་དུ་འཇིག་ཅིང་རིང་པོར་མི་གནས་
སོ། །དེ་བཞིན་དུ་ཚེ་ཡང་དབྱུག་པས་བྲིས་པ་ལྟ་བུ་ཡིན་ནོ། །དཔེར་ན་ཁོར་ཡུག་ཆུར་བོར་བ་ནི་མྱུར་དུ་འབྱིན་ཞིང་རིང་པོར་མི་གནས་སོ། །དེ་བཞིན་དུ་ཚེ་ཡང་ཁོར་ཡུག་ལྟ་བུ་ཡིན་ནོ། །དཔེར་ན་རྡོ་རྗེ་ཆུར་བོར་བ་ནི་མྱུར་དུ་འབྱིན་ཞིང་རིང་པོར་མི་གནས་སོ། །
དེ་བཞིན་དུ་ཚེ་ཡང་རྡོ་རྗེ་ཆུར་བོར་བ་ལྟ་བུ་ཡིན་ནོ། །དཔེར་ན་དབྱུག་པ་གནམ་དུ་འཕངས་པ་ནི་མྱུར་དུ་ལྟུང་ཞིང་རིང་པོར་མི་གནས་སོ། །དེ་བཞིན་དུ་ཚེ་ཡང་དབྱུག་པ་གནམ་དུ་འཕངས་པ་ལྟ་བུ་ཡིན་ནོ། །དཔེར་ན་ཐགས་བཅས་པ་ཇི་ཙམ་བཏགས་པ་དེ་ཙམ་དུ་

བཏག་པར་བྱ་བ་རྟིང་ལ་ཐུག་པར་འགྱུར་རོ། །དེ་བཞིན་དུ་སྲོག་ཀྱང་བཏག་པར་བྱ་བ་རྟིང་ལ་ཐུག་པ་ལྟ་བུ་ཡིན་ནོ། །དཔེར་ན་གསད་པར་ཁྲིད་པའི་ཕྱུགས་ནི་གོམ་རེ་བོར་ཞིང་གསད་པ་ལ་ཉེ་བ་ཡིན་ནོ། །དེ་བཞིན་དུ་ཚེ་ཡང་གསད་པའི་ཕྱུགས་ལྟ་
བུ་ཡིན་ནོ། །དཔེར་ན་གསད་པར་ཁྲིད་པའི་མི་ནི་གོམ་རེ་བོར་ཞིང་གསད་པ་ལ་ཉེ་བ་ཡིན་ནོ། །དེ་བཞིན་དུ་ཚེ་ཡང་གསད་པའི་མི་ལྟ་བུ་ཡིན་ནོ། །དཔེར་ན་ཤའི་ཁམ་ཚད་ཅིག་ཟངས་ཆུ་མང་པོའི་ནང་དུ་བཅུག་སྟེ་འོག་ནས་མེ་སྦར་ན་མྱུར་དུ་གོར་བར་འགྱུར་ཞིང་རིང་པོར་
མི་གནས་སོ། །དེ་བཞིན་དུ་ཚེ་ཡང་ཤའི་ཁམ་ཚད་ལྟ་བུ་ཡིན་ནོ།། །།འདུལ་བ་གཞི། བམ་པོ་ལྔ་བཅུ་པ། དཔེར་ན་རི་ལས་འབབ་པའི་ཆུ་བོ་གཏིང་ཟབ་པ། ཤུགས་དྲག་པ། ཐག་རིང་པོར་འབབ་པ་ཤིང་རྩི་དེད་པར་བྱེད་པ་ནི་ཉིན་ཞག་དེ་དག་འདས་
ཤིང་སྐད་ཅིག་དང་། ཐང་ཅིག་དང་། ཡུད་ཙམ་དེ་དག་འདས་ན་ཆུའི་གནས་པ་དང་འཇིག་པ་མི་མངོན་ནོ། །དེ་བཞིན་དུ་མི་རྣམས་ཀྱི་ཚེ་ཡང་ཆུ་བོའི་རྒྱུན་ལྟ་བུ་སྟེ། རིང་པོར་མི་ཐོགས་པ། ཉོན་མོངས་པ་ཡིན་ལ་དེ་ཡང་སྡུག་བསྔལ་དང་ལྡན་ནོ། །བྲམ་
ཟེའི་ཁྱེའུ་དག་བདག་ནི་བྱམས་པ་དང་ལྡན་པ་ཞེས་བྱ་བ་ནས། རྒྱས་པར་སྙིང་རྗེ་དང་། དགའ་བ་དང་། བཏང་སྙོམས་དང་ལྡན་པའི་སེམས་ཞེས་བྱ་བ་ནས་གནས་སོ་ཞེས་བྱ་བའི་བར་དུའོ། །བྲམ་ཟེའི་ཁྱེའུ་དག་ཚུར་ཁྱེད་ཀྱིས་ཀྱང་བྱམས་པ་དང་ལྡན་
པའི་སེམས་དང་། སྙིང་རྗེ་དང་། དགའ་བ་དང་། བཏང་སྙོམས་དང་ལྡན་པའི་སེམས་ཀྱི་བར་གྱིས་གནས་པར་གྱིས་ཤིག །རྒྱལ་པོ་ཆེན་པོ་སྟོན་པ་རྩིབས་ཀྱི་མུ་ཁྱུད་དེ་དེ་ཙམ་དུ་ཚེ་རིང་། དེ་ཙམ་དུ་རིང་དུ་གནས། དེ་ཙམ་གྱིས་ཚེའི་མཐར་ཐུག་པ་ཡང་རེ་ཞིག་
དགེ་སློང་དག་ལ་མི་རྣམས་ནི་ཚེ་ཐུང་བ། རིང་པོར་མི་ཐོགས་པ། ཉོན་མོངས་པ་ཡིན་ལ། དེ་ཡང་སྡུག་བསྔལ་དང་ལྡན་ནོ་ཞེས་བྱ་བ་དེ་ལྟ་བུའི་ཆོས་སྟོན་ཏོ། །རྒྱལ་པོ་ཆེན་པོ་དེ་ཇི་སྙམ་དུ་སེམས། དེའི་ཚེ་དེའི་དུས་ན་སྟོན་པ་རྩིབས་ཀྱི་མུ་ཁྱུད་ཅེས་བྱ་

བར་གྱུར་པ་དེ་གཞན་ཞིག་ཡིན་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ང་ཉིད་དེའི་ཚེ་དེའི་དུས་ན་སྟོན་པ་རྩིབས་ཀྱི་མུ་ཁྱུད་ཅེས་བྱ་བར་གྱུར་ཏོ། །རྒྱལ་པོ་ཆེན་པོ་ངས་སེམས་ཅན་རྣམས་ལ་ཕན་པ་བྱས་པ་དེས་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཐོབ་བོ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ངའི་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །སྟོན་པ་མིག་མཛེས་ཇི་ལྟ་བ་བྲམ་ཟེའི་བུ་འཇོམས་བྱེད་དང་། གླང་པོ་
སྐྱོང་ཡང་དེ་དང་འདྲའོ། །རྒྱལ་པོ་ཆེན་པོ་གཞན་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བ་ན་ང་བྱང་ཆུབ་སེམས་དཔའི་སྤྱོད་པ་ལ་ཤེས་རབ་ཆེན་པོ་དང་སྤོབས་པ་ཆེན་པོར་གྱུར་ནས་སེམས་ཅན་ལ་ཕན་པ་བྱས་པ་གང་ཡིན་
པ་དེ་ཉོན་ཅིག །རྒྱལ་པོ་ཆེན་པོ་སྔོན་བྱུང་བ་རྒྱལ་པོ་ཕྱོགས་བདག་ཅེས་བྱ་བ་ཞིག་བྱུང་སྟེ། རྒྱལ་པོ་ཕྱོགས་བདག་གི་བུ་གཞོན་ནུ་རྡུལ་ཕྲན་ཞེས་བྱ་བ་ཞིག་བྱུང་ངོ་། །རྒྱལ་པོ་ཕྱོགས་བདག་ལ་བྲམ་ཟེ་ཤིང་སཱ་ལ་ཆེན་པོ་ལྟ་བུ་གནག་ལྷས་སྐྱེས་ཞེས་བྱ་
ཞིག་ཡོད་དེ། བྲམ་ཟེ་ཤིང་སཱ་ལ་ཆེན་པོ་ལྟ་བུ་གནག་ལྷས་སྐྱེས་ཀྱི་བུ་བྲམ་ཟེའི་ཁྱེའུ་མེ་གསོ་ཞེས་བྱ་བ་མཁས་པ། གསལ་བ། ཡིད་གཞུངས་པ། གཞུང་དང་མཐུན་པར་དཔྱོད་པའི་ཤེས་རབ་དང་ལྡན་པ་ཞིག་ཡོད་དེ། འདི་ལྟར་དེའི་ཕ་བྲམ་ཟེ་
གནག་ལྷས་སྐྱེས་ཞིང་ལས་ཀྱི་མཐའ་གང་ཡིན་པ་དེ་རྣམས་བྲམ་ཟེའི་ཁྱེའུ་མེ་གསོ་ལ་འདྲི་ཞིང་བྱེད་དོ། །དོན་དུ་བྱ་བའི་དོན་ངེས་པར་བརྟག་པ་གང་ཡིན་པ་དེ་རྣམས་ཀྱང་བྲམ་ཟེའི་ཁྱེའུ་མེ་གསོ་ལ་དྲིས་ནས་བྱེད་ཀྱི་མ་དྲིས་པར་ནི་མ་ཡིན་ནོ། །གཞོན་ནུ་རྡུལ་
ཕྲན་དང་། རྒྱལ་པོའི་འཁོར་རྒྱལ་རིགས་དྲུག་གི་གྲོགས་པོ་དང་། སྙིང་དུ་སྡུག་པ་དང་། ནེའུ་ཟླ་ཡང་ཡིན་ནོ། །གང་གི་ཚེ་རྒྱལ་པོ་ཕྱོགས་བདག་རྩེ་བར་འདོད་པའམ། དགའ་བར་འདོད་པའམ། དགའ་མགུར་སྤྱོད་འདོད་པར་གྱུར་པ་དེའི་ཚེ་དེས་དགོས་པ་

ཐམས་ཅད་དང་། ལས་སུ་བྱ་བ་ཐམས་ཅད་བྲམ་ཟེ་གནག་ལྷས་སྐྱེས་ལ་སླར་བཏང་ནས་སྟེང་གི་ཁང་བཟངས་ཀྱི་གཞི་ལ་སྐྱེས་པ་མེད་པར་སོང་སྟེ་རོལ་མོ་རྣམས་ཀྱིས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ནས་
དུས་གཞན་ཞིག་ན་བྲམ་ཟེ་གནག་ལྷས་སྐྱེས་ཤིའོ། །དེ་ཤི་བ་ན་རྒྱལ་པོ་ཕྱོགས་བདག་ཤིན་དུ་སྡུག་བསྔལ་ཞིང་ཡིད་མི་བདེ་བའི་ཚོར་བ་ཉམས་སུ་མྱོང་ནས། ཀྱི་ཧུད་བྲམ་ཟེ་གནག་ལྷས་སྐྱེས་ཤི་བས་བདག་ཆེ་ཐང་དུ་དམས་པར་གྱུར་ཏོ། །ཀྱི་ཧུད་བྲམ་ཟེ་གནག་
ལྷས་སྐྱེས་ཤི་བས་བདག་ཤིན་དུ་ཆེ་ཐང་དུ་དམས་པར་གྱུར་ཏོ་ཞེས་ཟེར་རོ། །དེ་ནས་གཞོན་ནུ་རྡུལ་ཕྲན་རྒྱལ་པོ་ཕྱོགས་བདག་གང་ན་བ་དེར་སོང་སྟེ་ཕྱིན་པ་དང་། རྒྱལ་པོ་ཕྱོགས་བདག་ལ་འདི་སྐད་ཅེས་སྨྲས་སོ། །ལྷ་ཅིའི་སླད་དུ་བྲམ་ཟེ་གནག་ལྷས་སྐྱེས་
གུམ་པས་ཤིན་དུ་སྡུག་བསྔལ་ཞིང་ཐུགས་ལ་གཅགས་པར་གྱུར་ཏེ་སྡུག་བསྔལ་ཞིང་ཐུགས་ལ་གཅགས་པའི་ཚོར་བ་ཉམས་སུ་མྱོང་བར་མཛད། གཞོན་ནུ་ཁོ་བོ་གང་གི་ཚེ་རྩེ་བར་འདོད་པའམ། དགའ་བར་འདོད་པའམ། དགའ་མགུར་སྤྱོད་འདོད་པར་གྱུར་
པ་དེའི་ཚེ་ཁོ་བོའི་དགོས་པ་ཐམས་ཅད་དང་ལས་སུ་བྱ་བ་ཐམས་ཅད་བྲམ་ཟེ་གནག་ལྷས་སྐྱེས་ལ་སླར་བཏང་ནས་སྟེང་གི་ཁང་བཟངས་ཀྱི་གཞི་ན་སྐྱེས་པ་མེད་པར་སོང་ནས་རོལ་མོ་རྣམས་ཀྱིས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །
ད་ནི་ཁོ་བོ་འདི་སྙམ་དུ་སེམས་ཏེ། ཀྱི་ཧུད་བྲམ་ཟེ་གནག་ལྷས་སྐྱེས་ཤི་བས་བདག་ཆེ་ཐང་དུ་དམས་པར་གྱུར་ཏོ། །ཀྱི་ཧུད་བྲམ་ཟེ་གནག་ལྷས་སྐྱེས་ཤི་བས་བདག་ཤིན་ཏུ་ཆེ་ཐང་དུ་དམས་པར་གྱུར་ཏོ་སྙམ་མོ། །ལྷ་བྲམ་ཟེ་གནག་ལྷས་སྐྱེས་གུམ་པས་ཤིན་ཏུ་
སྡུག་བསྔལ་ཞིང་ཐུགས་མི་དགྱེས་པར་གྱུར་ཏེ། སྡུག་བསྔལ་ཞིང་ཐུགས་མི་དགྱེས་པའི་ཚོར་བ་ཉམས་སུ་མྱོང་བར་མ་མཛད་ཅིག །དེ་ཅིའི་སླད་དུ་ཞེ་ན། ལྷ་བྲམ་ཟེ་གནག་ལྷས་སྐྱེས་ཀྱི་བུ་བྲམ་ཟེའི་ཁྱེའུ་མེ་གསོ་ཞེས་བགྱི་བ་མཁས་པ་གསལ་བ།

ཡིད་གཞུངས་པ། གཞུང་དང་མཐུན་པར་དཔྱོད་པའི་ཤེས་རབ་དང་ལྡན་པ་ཞིག་མཆིས་ཏེ། འདི་ལྟར་དེའི་ཕ་བྲམ་ཟེ་གནག་ལྷས་སྐྱེས་ཀྱིས་ལས་ཀྱི་མཐའ་བགྱིས་པ་གང་ལགས་པ་དེ་དག་ཀྱང་བྲམ་ཟེའི་ཁྱེའུ་མེ་གསོ་ལ་དྲིས་ནས་བགྱིས་ཀྱི་མ་དྲིས་པས་ནི་མ་ལགས་
སོ། །དོན་དུ་བགྱི་བའི་དོན་ངེས་པར་བརྟག་པ་གང་ལགས་པ་དེ་དག་ཀྱང་བྲམ་ཟེའི་ཁྱེའུ་མེ་གསོ་ལ་དྲིས་ནས་བགྱིས་ཀྱི་མ་དྲིས་པར་ནི་མ་ལགས་སོ། །ལྷ་དེ་ལྟ་ལགས་པས་ཕ་གནག་ལྷས་སྐྱེས་ཀྱི་ལས་ཐབས་སུ་དབང་བསྐུར་དུ་གསོལ། །དེ་ནས་རྒྱལ་པོ་ཕྱོགས་
བདག་གིས་བྲམ་ཟེའི་ཁྱེའུ་མེ་གསོ་ཕོ་ཉས་བཀུག་ནས་འདི་སྐད་ཅེས་སྨྲས་སོ། །བྲམ་ཟེའི་ཁྱེའུ་ཁྱོད་ངས་དེང་ཕྱིན་ཆད་ནས་ཕ་གནག་ལྷས་སྐྱེས་ཀྱི་ལས་ཐབས་སུ་བཅུག་གོ། །བཀའ་བཞིན་འཚལ་ཞེས་བྲམ་ཟེའི་ཁྱེའུ་མེ་གསོས་མཉན་ཏོ། །དེ་ནས་བྲམ་ཟེའི་
ཁྱེའུ་མེ་གསོ་དེ་ཕ་བྲམ་ཟེ་གནག་ལྷས་སྐྱེས་བྱེད་བྱེད་པའི་ཞིང་བླས་ཀྱི་མཐའ་གང་ཡིན་པ་དེ་རྣམས་ཀྱང་བྱེད་དོ། །དེའི་ཕ་བྲམ་ཟེ་གནག་ལྷས་སྐྱེས་དོན་དུ་བྱ་བའི་དོན་ངེས་པར་རྟོག་རྟོག་པ་གང་ཡིན་པ་དེ་དག་ཀྱང་དེ་ངེས་པར་རྟོག་གོ། །དེ་ནས་བྲམ་ཟེའི་ཁྱེའུ་མེ་གསོའི་
མིང་བྲམ་ཟེའི་ཁྱེའུ་མེ་གསོ་ཞེས་བྱ་བ་གང་ཡིན་པ་དེ་ནུབ་པར་གྱུར་ཅིང་བྲམ་ཟེ་གནག་ལྷས་སྐྱེས་བྲམ་ཟེ་གནག་ལྷས་སྐྱེས་ཞེས་བྱ་བར་གྲགས་སོ། །དེ་ནས་བྲམ་ཟེ་གནག་ལྷས་སྐྱེས་ཀྱིས་རྒྱལ་པོའི་འཁོར་རྒྱལ་རིགས་དྲུག་ཕོ་ཉས་བཀུག་ནས་འདི་སྐད་ཅེས་སྨྲས་སོ། །ཤེས་ལྡན་
དག་ཚུར་ཁྱེད་གཞོན་ནུ་རྡུལ་ཕྲན་གང་ན་བ་དེར་དོང་ལ་ཕྱིན་པ་དང་། གཞོན་ནུ་རྡུལ་ཕྲན་ལ་རྒྱལ་བ་དང་། ཚེ་སྤེལ་བ་དག་བྱོས་ལ། གཞོན་ནུ་རྡུལ་ཕྲན་ལ་འདི་སྐད་ཅེས་ཇི་ལྟར་རྡུལ་ཕྲན་ཁྱོད་བདེ་ན་དེ་བཞིན་དུ་བདག་ཅག་ཀྱང་བདེ་ཞིང་། ཇི་ལྟར་རྡུལ་ཕྲན་ཁྱོད་སྡུག་
བསྔལ་ན་དེ་བཞིན་དུ་བདག་ཅག་སྡུག་བསྔལ་བར་འགྱུར་ལ། རྒྱལ་པོའི་འཁོར་རྒྱལ་རིགས་དྲུག་པོ་ནི་རྡུལ་ཕྲན་ཁྱོད་ཀྱི་གྲོགས་པོ་དང་། སྙིང་དུ་སྡུག་པ་དང་། ནེའུ་ཟླ་ཡིན་གྱིས། རྡུལ་ཕྲན་ཁྱོད་གལ་ཏེ་ཡབ་འདས་ནས་ཡབ་ཀྱི་རྒྱལ་སྲིད་ཀྱི་དབང་ཕྱུག་ལ་

བཞག་ན། ཅི་ནས་ཀྱང་བདག་ཅག་ལ་ལོངས་སྤྱོད་དག་ལས་ལོངས་སྤྱོད་ཀྱི་བགོ་བཤའ་མཛོད་ཅེས་གྱིས་ཤིག །མཁན་པོ་བཀའ་བཞིན་འཚལ་ཞེས་རྒྱལ་པོའི་འཁོར་རྒྱལ་རིགས་དྲུག་གིས་བྲམ་ཟེ་གནག་ལྷས་སྐྱེས་ལས་མཉན་ནས་གཞོན་ནུ་རྡུལ་
ཕྲན་གང་ན་བ་དེར་དོང་སྟེ་ཕྱིན་པ་དང་། གཞོན་ནུ་རྡུལ་ཕྲན་ལ་རྒྱལ་བ་དང་ཚེ་སྤེལ་བ་དག་བྱས་ནས་གཞོན་ནུ་རྡུལ་ཕྲན་ལ་འདི་སྐད་ཅེས་སྨྲས་སོ། །ཇི་ལྟར་རྡུལ་ཕྲན་ཁྱོད་བདེ་ན་དེ་བཞིན་དུ་བདག་ཅག་བདེ་ཞིང་། ཇི་ལྟར་རྡུལ་ཕྲན་ཁྱོད་སྡུག་བསྔལ་ན་དེ་བཞིན་དུ་བདག་ཅག་
སྡུག་བསྔལ་བར་འགྱུར་ལ། རྒྱལ་པོའི་འཁོར་རྒྱལ་རིགས་དྲུག་ནི་རྡུལ་ཕྲན་ཁྱོད་ཀྱི་གྲོགས་པོ་དང་། སྙིང་དུ་སྡུག་པ་དང་། ནེའུ་ཟླ་ལགས་ཀྱིས། རྡུལ་ཕྲན་ཁྱོད་གལ་ཏེ་ཡབ་འདས་ནས་རྒྱལ་སྲིད་ཀྱི་དབང་ཕྱུག་ལ་བཞག་ན་ཅི་ནས་ཀྱང་བདག་ཅག་ལ་ལོངས་
སྤྱོད་དག་ལས་ལོངས་སྤྱོད་ཀྱི་བགོ་བཤའ་མཛོད་ཅིག །དེ་བཞིན་དུ་བྱའོ་ཞེས་གཞོན་ནུ་རྡུལ་ཕྲན་གྱིས་མཉན་ཏོ། །དེ་ནས་དུས་གཞན་ཞིག་ན་རྒྱལ་པོ་ཕྱོགས་བདག་དུས་ལས་འདས་ཏེ་ཤི་བར་གྱུར་ནས་བློན་པོའི་ཚོགས་རྣམས་དང་། སྣ་ཆེན་པོ་ལ་གཏོགས་
པ་རྣམས་དང་། རྒྱལ་ཁྲིམས་འདོན་པ་རྣམས་དང་། གསང་ཚིག་གིས་ལྷན་ཅིག་འཚོ་བ་རྣམས་ཀྱིས་གཞོན་ནུ་རྡུལ་ཕྲན་ཕའི་རྒྱལ་སྲིད་ཀྱི་དབང་ཕྱུག་ལ་བཞག་ཅིང་། དེ་རྒྱལ་སྲིད་ལ་དབང་བསྐུར་བའི་ཕྱིར་དབང་བསྐུར་རོ། །དེ་ནས་གཞོན་ནུ་རྡུལ་
ཕྲན་གྱི་མིང་གཞོན་ནུ་རྡུལ་ཕྲན་ཞེས་བྱ་བ་གང་ཡིན་པ་དེ་ནུབ་ཅིང་། རྒྱལ་པོ་རྡུལ་ཕྲན་ཞེས་བྱ་བར་གྲགས་སོ། །དེ་ནས་རྒྱལ་པོ་རྡུལ་ཕྲན་གྱིས་བྲམ་ཟེ་གནག་ལྷས་སྐྱེས་ཕོ་ཉས་བཀུག་ནས་འདི་སྐད་ཅེས་སྨྲས་སོ། །མཁན་པོས་ངའི་ཡབ་ལ་ཇི་
ལྟར་རྗེས་སུ་སྟོན་པ་དེ་ལྟར་ང་ལ་ད་ཕྱིན་ཆད་རྗེས་སུ་བསྟན་པར་བྱ་བར་སོམས་ཤིག །བཀའ་བཞིན་འཚལ་ཞེས་བྲམ་ཟེ་གནག་ལྷས་སྐྱེས་ཀྱིས་མཉན་ཏོ། །དེ་ནས་བྲམ་ཟེ་གནག་ལྷས་སྐྱེས་ཀྱིས་རྒྱལ་པོའི་འཁོར་རྒྱལ་རིགས་དྲུག་ཕོ་ཉས་བཀུག་

སྟེ་འདི་སྐད་ཅེས་སྨྲས་སོ། །ཤེས་ལྡན་དག་ཁྱེད་ཅག་རྒྱལ་པོ་རྡུལ་ཕྲན་གང་ན་བ་དེར་དོང་ལ་ཕྱིན་པ་དང་། རྒྱལ་པོ་རྡུལ་ཕྲན་ལ་རྒྱལ་བ་དང་ཚེ་སྤེལ་བདག་བྱོས་ལ་འདི་སྐད་ཅེས་ལྷ་ལྷ་གཞོན་ནུར་གྱུར་པ་ན་བདག་ཅག་སྤྱན་སྔར་མཆིས་ནས་འདི་སྐད་ཅེས་ཇི་ལྟར་རྡུལ་ཕྲན་ཁྱོད་བདེ་ན་དེ་བཞིན་
དུ་བདག་ཅག་བདེ་ཞིང་། ཇི་ལྟར་རྡུལ་ཕྲན་ཁྱོད་སྡུག་བསྔལ་ན་དེ་བཞིན་དུ་བདག་ཅག་སྡུག་བསྔལ་བར་འགྱུར་ལ། རྒྱལ་པོའི་འཁོར་རྒྱལ་རིགས་དྲུག་པོ་ནི་རྡུལ་ཕྲན་ཁྱོད་ཀྱི་གྲོགས་པོ་དང་། སྙིང་དུ་སྡུག་པ་དང་། ནེའུ་ཟླ་ལགས་ཀྱིས། རྡུལ་ཕྲན་ཁྱོད་གལ་ཏེ་ཡབ་འདས་ཏེ་ཡབ་ཀྱི་རྒྱལ་སྲིད་
ཀྱི་དབང་ཕྱུག་ལ་བཞག་ན་ཅི་ནས་ཀྱང་བདག་ཅག་ལ་ལོངས་སྤྱོད་དག་ལས་ལོངས་སྤྱོད་ཀྱི་བགོ་བཤའ་མཛོད་ཅིག་ཅེས་གསོལ་པ་དགོངས་སམ་ཞེས་སྨྲོས་ཤིག །གལ་ཏེ་འདི་སྐད་ཅེས་ངས་དྲན་ནོ་ཟེར་ན། ལྷ་ད་ནི་དེའི་དུས་ལ་བབ་ལགས་སོ་ཞེས་སྨྲོས་ཤིག །འོན་ཏེ་དེ་འདི་སྐད་ཅེས་ས་ཆེན་པོ་
ནང་ཡངས་ལ་ཕྱི་ཤིང་རྟའི་དབྱིབས་ལྟར་འདུག་པ་འདི་ཆ་བདུན་དུ་འགེད་པ་སུ་ཞིག་ཡོད་ཅེས་ཟེར་ན། ལྷ་གནག་ལྷས་སྐྱེས་མ་ལགས་པ་གཞན་ཡང་མ་མཆིས་སོ་ཞེས་སྨྲོས་ཤིག །མཁན་པོ་བཀའ་བཞིན་འཚལ་ཞེས་རྒྱལ་པོའི་འཁོར་རྒྱལ་རིགས་དྲུག་གིས་བྲམ་ཟེ་གནག་ལྷས་སྐྱེས་ལས་
མཉན་ནས། རྒྱལ་པོ་རྡུལ་ཕྲན་གང་ན་བ་དེར་དོང་སྟེ་ཕྱིན་པ་དང་། རྒྱལ་པོ་རྡུལ་ཕྲན་ལ་རྒྱལ་བ་དང་ཚེ་སྤེལ་བ་དག་བྱས་ནས་རྒྱལ་པོ་རྡུལ་ཕྲན་ལ་འདི་སྐད་ཅེས་སྨྲས་སོ། །ལྷ་ལྷ་སྔོན་གཞོན་ནུར་གྱུར་པ་ན་བདག་ཅག་སྤྱན་སྔར་མཆིས་ནས་འདི་སྐད་ཅེས་ཇི་ལྟར་རྡུལ་ཕྲན་ཁྱོད་བདེ་ན་དེ་བཞིན་
དུ་བདག་ཅག་བདེ་ཞིང་། ཇི་ལྟར་རྡུལ་ཕྲན་ཁྱོད་སྡུག་བསྔལ་ན་དེ་བཞིན་དུ་བདག་ཅག་སྡུག་བསྔལ་བར་འགྱུར་ལ། བདག་ཅག་རྒྱལ་པོའི་འཁོར་རྒྱལ་རིགས་དྲུག་པོ་ནི་རྡུལ་ཕྲན་ཁྱོད་ཀྱི་གྲོགས་པོ་དང་། སྙིང་དུ་སྡུག་པ་དང་། ནེའུ་ཟླ་ལགས་ཀྱིས། རྡུལ་ཕྲན་ཁྱོད་གལ་ཏེ་ཡབ་འདས་ཏེ་ཡབ་
ཀྱི་རྒྱལ་སྲིད་ཀྱི་དབང་ཕྱུག་ལ་བཞག་ན་ཅི་ནས་ཀྱང་བདག་ཅག་ལ་ལོངས་སྤྱོད་དག་ལས་ལོངས་སྤྱོད་ཀྱི་བགོ་བཤའ་མཛོད་ཅིག་ཅེས་གསོལ་པ་དགོངས་ལགས་སམ། ཤེས་ལྡན་དག་ངས་དྲན་ནོ། །ལྷ་ད་ནི་དེའི་དུས་ལ་བབ་ལགས་སོ། །འོ་ན་ས་ཆེན་པོ་ནང་ཡངས་ལ་ཕྱི་ཤིང་རྟའི་དབྱིབས་ལྟར་

འདུག་པ་འདི་ཆ་བདུན་དུ་འགེད་པ་སུ་ཞིག་ཡོད། ལྷ་གནག་ལྷས་སྐྱེས་མ་ལགས་པ་གཞན་མ་མཆིས་སོ། །དེ་ནས་རྒྱལ་པོ་རྡུལ་ཕྲན་གྱིས་བྲམ་ཟེ་གནག་ལྷས་སྐྱེས་ཕོ་ཉས་བཀུག་ནས་འདི་སྐད་ཅེས་སྨྲས་སོ། །མཁན་པོ་ཁྱོད་ཀྱིས་ས་ཆེན་པོ་འདི་ནང་ཡངས་ལ་ཕྱི་ཤིང་རྟའི་
དབྱིབས་ལྟར་འདུག་པ་འདི་ཆ་བདུན་དུ་འགེད་ནུས་སམ། ལྷ་ལེགས་པར་ར་རྔོ་ཐོག་གོ། །དེ་ནས་བྲམ་ཟེ་གནག་ལྷས་སྐྱེས་ཀྱིས་རྒྱལ་པོ་རྡུལ་ཕྲན་ལས་མཉན་ནས་དཀྱིལ་དང་དཀྱིལ་ན་ཡུལ་འཁོར་བུ་ཆུང་དང་འཁོར་བུ་ཆུང་ཡོད་པ་གང་ཡིན་པ་དེ་དག་རྒྱལ་པོ་རྡུལ་ཕྲན་གྱི་རིས་སུ་བཅད་པ་དང་། དེས་
རྒྱལ་པོ་རྡུལ་ཕྲན་ཡི་རངས་པར་གྱུར་ཏོ། །བྲམ་ཟེ་གནག་ལྷས་སྐྱེས་ཀྱིས་ཁོ་བོའི་རིས་ཇི་ལྟ་བུ་ཞིག་ཏུ་བཅད་ན། ད་ལྟ་དཔེར་ན་མཁས་པ་གསལ་བ་བྱེ་བྲག་ཤེས་པས་བྱས་པ་ལྟ་བུར་གྱུར་ཏེ་ཞེས་ཡི་རངས་པ་ཡང་གོ་བར་བྱས་སོ། །ཡུལ་འཁོར་བུ་ཆུང་གཞན་གང་དག་ཡིན་པ་དེ་དག་རྒྱལ་པོའི་
འཁོར་རྒྱལ་རིགས་དྲུག་གི་རིས་སུ་བཅད་པ་དང་། དེས་རྒྱལ་པོའི་འཁོར་རྒྱལ་རིགས་དྲུག་ཀྱང་ཡི་རངས་པར་གྱུར་ཏེ། བྲམ་ཟེ་གནག་ལྷས་སྐྱེས་ཀྱིས་ཇི་ལྟ་བུ་ཞིག་ཏུ་བགོས་ན། ཇི་ལྟར་མཁས་པ་གསལ་བ་བྱེ་བྲག་ཤེས་པས་བྱས་པ་བཞིན་དུ་ཁོ་བོ་ཅག་གིས་ཡུན་རིང་པོ་ནས་བསམས་
བསམས་པའི་ཡུལ་དེ་དག་ད་ཁོ་བོ་ཅག་གི་རིས་སུ་བཅད་ཅེས་ཡི་རངས་པ་ཡང་གོ་བར་བྱས་སོ། །དེ་ནས་རྒྱལ་པོའི་ཞམ་རིང་རྒྱལ་རིགས་དྲུག་གིས་བྲམ་ཟེ་གནག་ལྷས་སྐྱེས་ལ་འདི་སྐད་ཅེས་སྨྲས་སོ། །མཁན་པོ་རྒྱལ་པོ་རྡུལ་ཕྲན་ལ་ཇི་ལྟར་རྗེས་སུ་སྟོན་པ་དེ་བཞིན་དུ་དེང་སླན་ཆད་བདག་
ཅག་ལ་ཡང་ཁྱོད་ཀྱིས་རྗེས་སུ་བསྟན་པར་དགོངས་སུ་གསོལ། དེ་བཞིན་དུ་བྱའོ་ཞེས་བྲམ་ཟེ་གནག་ལྷས་སྐྱེས་ཀྱིས་མཉན་ཏོ། །དེ་ནས་བྲམ་ཟེ་གནག་ལྷས་སྐྱེས་རྒྱལ་པོ་རྡུལ་ཕྲན་དང་། རྒྱལ་པོའི་འཁོར་རྒྱལ་རིགས་དྲུག་དང་། རྒྱལ་རིགས་ཤིང་སཱ་ལ་ཆེན་པོ་ལྟ་བུ་བདུན་དང་། བྲམ་ཟེ་ཤིང་
སཱ་ལ་ཆེན་པོ་ལྟ་བུ་བདུན་དང་། ཁྱིམ་བདག་ཤིང་སཱ་ལ་ཆེན་པོ་ལྟ་བུ་བདུན་དང་། ཐབས་རིར་བབ་པའི་ཆུང་མ་བཞི་བཅུ་ལ་རྗེས་སུ་སྟོན་ཏོ། །བྲམ་ཟེའི་ཁྱེའུ་ལྔ་བརྒྱ་ཙམ་ལ་བྲམ་ཟེའི་གསང་ཚིག་ཀློག་ཏུ་འཇུག་གོ། །འདུལ་སྦྱོང་མཁན་དང་། གླང་པོ་ཆེ་ལ་ཞོན་པ་དང་། རྟ་ལ་ཞོན་

པ་དང་། རལ་གྲི་འཛིན་སྟངས་མཁན་དང་། གཞུ་འཛིན་པ་དང་། ཞབས་འབྲིང་བྱེད་པ་དང་། གོ་རེ་ལོང་བྱེད་པ་དང་། བྲོ་གར་ལེན་པ་དང་། རྒྱལ་པོའི་བུ་རྟུལ་ཕོད་པ་དཔའ་བ་རབ་གནོན་ཚན་པོ་ཆེ་དང་ལྡན་པ་རྣམས་དང་། སེམས་སྲུང་བ་དང་། སྐྲ་མཁན་དང་། ཁྲུས་བྱེད་པ་དུ་མ་
ལ་ཡང་རྗེས་སུ་སྟོན་པར་བྱེད་དོ། །དེ་ནས་བྲམ་ཟེ་གནག་ལྷས་སྐྱེས་ཀྱི་མིང་བྲམ་ཟེ་གནག་ལྷས་སྐྱེས་ཞེས་བྱ་བའི་མིང་གང་ཡིན་པ་དེ་ནུབ་པར་གྱུར་ཅིང་། བྲམ་ཟེ་ཆེན་པོ་གནག་ལྷས་སྐྱེས་བྲམ་ཟེ་ཆེན་པོ་གནག་ལྷས་སྐྱེས་ཞེས་བྱ་བར་གྲགས་སོ། །དེ་ནས་བྲམ་ཟེ་ཆེན་པོ་གནག་ལྷས་སྐྱེས་བྲམ་ཟེ་
རྣམས་ཀྱིས་ནི་ཚངས་པར་བཀུར་རོ། །རྒྱལ་པོས་ནི་ལྷར་བཀུར་རོ། །གྲོང་མི་དང་ཡུལ་མི་རྣམས་ཀྱིས་ནི་རྒྱལ་པོར་བཀུར་རོ། །བྲམ་ཟེ་རྣམས་ཀྱིས་ནི་འདི་སྙམ་དུ་ཤེས་ཏེ། བྲམ་ཟེ་ཆེན་པོ་གནག་ལྷས་སྐྱེས་ཀྱིས་ཚངས་པའི་ལམ་མཐོང་སྟེ། ཚངས་པའི་ལམ་ཤེས་ཤིང་མཐོང་ནས་
མཐའ་དག་རྫོགས་པར་བྱས་ཏེ་གནས་སོ་སྙམ་མོ། །རྒྱལ་པོ་དང་། གྲོང་མི་དང་། ཡུལ་མི་རྣམས་ཀྱིས་ཀྱང་འདི་སྙམ་དུ་ཤེས་ཏེ། བྲམ་ཟེ་ཆེན་པོ་གནག་ལྷས་སྐྱེས་ཀྱིས་ཚངས་པའི་ལམ་ཤེས་ཤིང་། ཚངས་པའི་ལམ་མཐོང་སྟེ། ཚངས་པའི་ལམ་ཤེས་ཤིང་མཐོང་ནས་མཐའ་དག་
རྫོགས་པར་བྱས་ཏེ་གནས་སོ་སྙམ་མོ། །དེ་ནས་བྲམ་ཟེ་ཆེན་པོ་གནག་ལྷས་སྐྱེས་འདི་སྙམ་དུ་སེམས་ཏེ། བདག་ད་ལྟར་བྲམ་ཟེ་རྣམས་ཀྱིས་ནི་ཚངས་པར་བཀུར། རྒྱལ་པོས་ནི་ལྷར་བཀུར། གྲོང་མི་དང་ཡུལ་མི་རྣམས་ཀྱིས་ནི་རྒྱལ་པོ་བཀུར། བྲམ་ཟེ་རྣམས་ནི་འདི་སྙམ་དུ་ཤེས་ཏེ།
བྲམ་ཟེ་ཆེན་པོ་གནག་ལྷས་སྐྱེས་ཀྱིས་ཚངས་པའི་ལམ་མཐོང་སྟེ། ཚངས་པའི་ལམ་ཤེས་ཤིང་མཐོང་ནས་མཐའ་དག་རྫོགས་པར་བྱས་ཏེ་གནས་སོ་སྙམ་མོ། །རྒྱལ་པོ་དང་། གྲོང་མི་དང་། ཡུལ་མི་རྣམས་ཀྱིས་ཀྱང་འདི་སྙམ་དུ་ཤེས་ཏེ། བྲམ་ཟེ་ཆེན་པོ་གནག་ལྷས་
སྐྱེས་ནི་ཚངས་པའི་ལམ་ཤེས་ཤིང་ཚངས་པའི་ལམ་མཐོང་སྟེ། ཚངས་པའི་ལམ་ཤེས་ཤིང་མཐོང་ནས་མཐའ་དག་རྫོགས་པར་བྱས་ཏེ་གནས་སོ་སྙམ་མོ། །བདག་གིས་ནི་ཚངས་པའི་ལམ་ཡང་མི་ཤེས། བདག་ནི་ཚངས་པའི་ལམ་ཤེས་ཤིང་མཐོང་ནས་མཐའ་དག་རྫོགས་པར་བྱས་ཏེ་

གནས་པ་ཡང་མ་ཡིན་ན། བདག་གིས་བདག་གི་ཕ་བྲམ་ཟེ་གནག་ལྷས་སྐྱེས་ལས་བྲམ་ཟེ་གང་ཞིག་དབྱར་ཟླ་བ་བཞི་པོ་དག་ལ་དབེན་པར་སྙིང་རྗེའི་བསམ་གཏན་གྱིས་གནས་ན་དེའི་དྲུང་དུ་ཚངས་པ་འོང་བར་འགྱུར་རོ་ཞེས་ཐོས་ཀྱིས། མ་ལ་བདག་གིས་དབྱར་ཟླ་བ་བཞི་དག་
ལ་དབེན་པར་སྙིང་རྗེའི་བསམ་གཏན་གྱིས་གནས་པར་བྱའོ་སྙམ་མོ། །དེ་ནས་བྲམ་ཟེ་ཆེན་པོ་གནག་ལྷས་སྐྱེས་ཀྱིས་རྒྱལ་པོ་རྡུལ་ཕྲན་ལ་འདི་སྐད་ཅེས་སྨྲས་སོ། །ལྷ་རེ་ཞིག་རྗེས་སུ་སྟོན་པ་གཞན་ཞིག་བཙལ་དུ་གསོལ། བདག་ནི་དབྱར་ཟླ་བ་བཞི་པོ་དག་ལ་དབེན་པར་སྙིང་རྗེའི་བསམ་
གཏན་གྱིས་གནས་པར་འཚལ་ལོ། །མཁན་པོ་དག་དེའི་དུས་ལ་བབ་པར་མཁྱེན་པར་མཛོད་ཅིག །རྒྱལ་པོའི་འཁོར་རྒྱལ་རིགས་དྲུག་དང་། རྒྱལ་རིགས་ཤིང་སཱ་ལ་ཆེན་པོ་ལྟ་བུ་བདུན་དང་། བྲམ་ཟེ་ཤིང་སཱ་ལ་ཆེན་པོ་ལྟ་བུ་བདུན་དང་། ཁྱིམ་བདག་ཤིང་སཱ་ལ་ཆེན་པོ་ལྟ་བུ་བདུན་དང་། ཐབས་
རིར་བབ་པའི་ཆུང་མ་བཞི་བཅུ་ལ་སྨྲས་པ། ཤེས་ལྡན་དག་རེ་ཞིག་མ་གཡེང་བར་བག་ཡོད་པར་ཁྱིམ་ན་འཁོད་ཅིག །བདག་ནི་དབྱར་གྱི་ཟླ་བ་བཞི་པོ་དག་ལ་དབེན་པར་སྙིང་རྗེའི་བསམ་གཏན་གྱིས་གནས་པར་འདོད་དོ། །རྗེའི་སྲས་ད་དེའི་དུས་ལ་བབ་ལགས་སོ། །བྲམ་ཟེའི་ཁྱེའུ་ལྔ་
བརྒྱ་པོ་དག་ལ་སྨྲས་པ། བྲམ་ཟེའི་ཁྱེའུ་དག་རེ་ཞིག་ཇི་སྐད་ཐོས་པ་དང་། ཇི་སྐད་བསྟན་པ་དང་། ཇི་ལྟར་ཀུན་ཆུབ་པར་བྱས་པའི་རིག་པ་དག་ཟུང་ཤིག །ལྷོགས་ཤིག །བདག་ནི་དབྱར་ཟླ་བ་བཞི་པོ་དག་ལ་དབེན་པར་སྙིང་རྗེའི་བསམ་གཏན་གྱིས་གནས་པར་འདོད་དོ། །མཁན་
པོ་ད་དེའི་དུས་ལ་བབ་ལགས་སོ། །འདུལ་སྦྱོང་མཁན་དང་། གླང་པོ་ཆེ་ལ་ཞོན་པ་དང་། རྟ་ལ་ཞོན་པ་དང་། ཤིང་རྟ་པ་དང་། རལ་གྲི་འཛིན་སྟངས་མཁན་དང་། གཞུ་འཛིན་པ་དང་། ཞབས་འབྲིང་བྱེད་པ་དང་། གོ་རེ་ལོང་བྱེད་པ་དང་། བྲོ་གར་ལེན་པ་དང་། རྒྱལ་པོའི་བུ་
རྟུལ་ཕོད་པ་དཔའ་བ་རབ་གནོན་ཚན་པོ་ཆེ་དང་ལྡན་པ་རྣམས་དང་། སེམས་སྲུང་བ་དང་། སྐྲ་མཁན་དང་། ཁྲུས་བྱེད་པ་དུ་མ་ལ་སྨྲས་པ། ཤེས་ལྡན་དག་རེ་ཞིག་རྗེས་སུ་སྟོན་པ་གཞན་ཚོལ་ཅིག །ཁོ་བོ་ནི་དབྱར་ཟླ་བ་བཞི་པོ་དག་ལ་དབེན་པར་སྙིང་རྗེའི་བསམ་གཏན་གྱིས་གནས་པར་

འདོད་དོ། །མཁན་པོ་ད་དེའི་དུས་ལ་བབ་ལགས་སོ། །དེ་ནས་བྲམ་ཟེ་ཆེན་པོ་གནག་ལྷས་སྐྱེས་ཀྱིས་གྲོང་ཁྱེར་གྱི་ཤར་ཕྱོགས་སུ་ཁང་བཟངས་ཤིག་བརྩིགས་ནས། དབྱར་ཟླ་བ་བཞི་པོ་དག་ལ་དབེན་པར་སྙིང་རྗེའི་བསམ་གཏན་གྱིས་གནས་པ་ལས་དེའི་དྲུང་དུ་ཚངས་པ་མ་འོངས་སོ། །
དེ་ནས་བྲམ་ཟེ་ཆེན་པོ་གནག་ལྷས་སྐྱེས་ཀྱིས་དབྱར་གྱི་ཟླ་བ་བཞིར་ཞག་གཅིག་གིས་མ་ལོན་པ་དང་འདི་སྙམ་དུ་སེམས་ཏེ། བདག་གི་ཕ་བྲམ་ཟེ་གནག་ལྷས་སྐྱེས་ལས་དབྱར་ཟླ་བ་བཞི་པོ་དག་ལ་དབེན་པར་སྙིང་རྗེའི་བསམ་གཏན་གྱིས་གནས་ན། དེའི་དྲུང་དུ་ཚངས་པ་འོང་བར་འགྱུར་རོ་ཞེས་
ཐོས་ན་བདག་གི་དྲུང་དུ་ནི་ཚངས་པ་མ་འོངས་སོ་སྙམ་མོ། །དེ་ནས་ཚངས་པ་མི་མཇེད་ཀྱི་བདག་པོས་བྲམ་ཟེ་ཆེན་པོ་གནག་ལྷས་སྐྱེས་ཀྱི་བསམ་པ་སེམས་ཀྱིས་ཤེས་ནས། དཔེར་ན་སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་བའམ། བརྐྱང་བ་ལས་བསྐུམ་པ་ཙམ་གྱིས་
ཚངས་པ་མི་མཇེད་ཀྱི་བདག་པོ་ཚངས་པའི་འཇིག་རྟེན་ནས་མི་སྣང་བར་གྱུར་ཅིང་། བྲམ་ཟེ་ཆེན་པོ་གནག་ལྷས་སྐྱེས་ཀྱི་ཁང་བཟངས་སུ་འོངས་སོ། །དེའི་ཚེ་ཚངས་པ་མི་མཇེད་ཀྱི་བདག་པོའི་ཁ་དོག་གི་མཐུས་ཁང་བཟངས་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །བྲམ་ཟེ་ཆེན་
པོ་གནག་ལྷས་སྐྱེས་ཀྱིས་ནམ་གྱི་ཆ་སྨད་ལ་བབ་པ་དང་། ཁང་བཟངས་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་པ་མཐོང་ངོ་། །མཐོང་ནས་ཀྱང་དེའི་ཚེ་ཚིགས་སུ་བཅད་དེ་སྨྲས་པ། འདི་འདྲ་བ་ཡི་ཁ་དོག་ནི། །བདག་གིས་མ་མཐོང་མ་ཐོས་ན། །གཟུགས་བཟང་ཁ་དོག་ལྡན་པ་ཡི། །
གྲོགས་པོ་ཁྱོད་ནི་སུ་ཞིག་ཡིན། །གང་ལ་ལྷར་བཅས་ཚངས་རིས་དང་། །དེ་བཞིན་རིས་ནི་གཞན་དག་གིས། །གཞོན་ནུར་རབ་ཤེས་དེ་ལྟ་བུར། །གནག་ལྷས་སྐྱེས་ཀྱིས་ང་ཤེས་བྱོས། །ཚངས་པ་ཁྱོད་ལ་འདུད་བགྱིད་ཅིང་། །བཀུར་སྟི་ཡང་ནི་བགྱིད་ལགས་ཀྱིས། །བདག་གི་ཚིག་
རྣམས་གསན་མཛོད་ལ། །མྱུར་དུ་གནང་བར་མཛད་དུ་གསོལ། །གནག་ལྷས་སྐྱེས་པ་ཁྱོད་ཀྱིས་ནི། །སྨྲས་པའི་ཚིག་དེ་གཟུང་བར་བྱས། །ཚེ་འདིའི་དོན་ནི་གང་ཡིན་དང་། །ཕྱི་མའི་དོན་ནི་གང་ཡིན་པ། །ཡིད་ལ་བསམས་པ་དེ་དག་ནི། །བྲམ་ཟེ་ང་ལ་དྲིས་ཤིག་དང་། །དྲིས་

པ་དེ་དང་དེ་དག་ནི། །ང་ཡིས་ཁྱོད་ལ་གཏན་ལ་དབབ། །དེ་ནས་བྲམ་ཟེ་ཆེན་པོ་གནག་ལྷས་སྐྱེས་འདི་སྙམ་དུ་སེམས་ཏེ། རེ་ཞིག་བདག་གིས་མཐོང་བའི་ཆོས་ཀྱི་དོན་གྱིས་ཐོབ་པར་བྱ་བ་གང་ཡིན་པ་དེ་ནི་བདག་གིས་ཐོབ་ཀྱིས། མ་ལ་བདག་གིས་ཚེ་ཕྱི་མའི་དོན་ལས་བརྩམས་ཏེ་
དྲི་བར་བྱའོ་སྙམ་ནས་དེའི་ཚེ་ཚིགས་སུ་བཅད་དེ་སྨྲས་པ། བློ་ལ་བསྡོགས་པའི་ཡིད་གཉིས་ཐེ་ཚོམ་དག །ཚངས་པ་ཀུན་བགེད་གཞོན་ནུ་ལ་འདྲི་བ། །གང་དུ་གནས་ཤིང་གང་ལ་བསླབ་བྱས་ན། །ཚངས་པའི་འཇིག་རྟེན་མི་འཆི་འཐོབ་པར་འགྱུར། །བྲམ་ཟེ་མི་ཡི་ནང་ན་ངའོ་སྙམ་
སྤངས་ཤིང་། །གཅིག་པུར་གྱུར་པ་སྙིང་རྗེར་མོས་པ་དང་། །དྲི་ང་མེད་ཅིང་འཁྲིག་ལས་ཆགས་བྲལ་བ། །འདི་ལ་གནས་ཤིང་འདི་ཉིད་ལ་བསླབས་ནས། །མི་ཡིས་ཚངས་པའི་འཇིག་རྟེན་འཆི་མེད་འཐོབ། །དེ་ནས་བྲམ་ཟེ་ཆེན་པོ་གནག་ལྷས་སྐྱེས་འདི་སྙམ་དུ་སེམས་ཏེ། ཚངས་པས་
བཤད་པ། བྲམ་ཟེ་མི་ཡི་ནང་ན་ངའོ་སྙམ་སྤངས་ཤིང་། །ཞེས་བྱ་བ་འདིའི་དོན་ཡང་བདག་གིས་ཀུན་ཤེས། ཚངས་པས་བཤད་པ། གཅིག་པུར་གྱུར་པ་སྙིང་རྗེར་མོས་པ་དང་། །ཞེས་བྱ་བ་འདིའི་དོན་ཡང་བདག་གིས་ཀུན་ཤེས་ན། ཚངས་པས་བཤད་པ། དྲི་ང་མེད་ཅིང་འཁྲིག་ལས་
ཆགས་བྲལ་བ། །ཞེས་བྱ་བ་འདིའི་དོན་བདག་གིས་མི་ཤེས་སོ་སྙམ་དུ་བསམས་ནས་དེའི་ཚེ་ཚིགས་སུ་བཅད་དེ་སྨྲས་པ། ཚངས་པ་མིའི་ནང་དྲི་ང་གང་ཞིག་ལགས། །འཇིག་རྟེན་ཀུན་ནི་ངོགས་ཀྱིས་འབབ་ཆུ་ལྟར། །གང་གིས་བསྒྲིབས་ན་ངན་སོང་སྒྲིབ་པ་ཅན། །ཚངས་པ་འཐོབ་
འགྱུར་ལམ་ནི་མི་ཤེས་པའོ། །ཁྲོ་དང་བརྫུན་དང་ཁོན་དང་རྣམ་འཚེ་དང་། །འཇུངས་དང་མངོན་པའི་ང་རྒྱལ་མི་བཟོད་དང་། །ཆགས་དང་ཞེ་སྡང་དེ་བཞིན་གཏི་མུག་དང་། །ཕྲག་དོག་སེར་སྣ་དག་དང་འཚིག་པ་སྟེ། །དེ་དག་བྲམ་ཟེ་མིའི་ནང་དྲི་ང་ཡིན། །འཇིག་རྟེན་ཀུན་ན་ངོགས་
ཀྱིས་འབབ་ཆུ་ལྟར། །དེ་ཡིས་བསྒྲིབས་ན་ངན་སོང་སྒྲིབ་པ་ཅན། །ཚངས་པ་འཐོབ་འགྱུར་ལམ་ནི་མི་ཤེས་སོ། །དེ་ནས་བྲམ་ཟེ་ཆེན་པོ་གནག་ལྷས་སྐྱེས་འདི་སྙམ་དུ་སེམས་ཏེ། ཇི་སྐད་དུ་བདག་གིས་ཚངས་པས་སྨྲས་པའི་དོན་ཤེས་པ་ལྟར་ན། ཁྱིམ་པ་ཁྱིམ་ན་གནས་པས་ཇི་

སྲིད་འཚོ་བའི་བར་དུ་ཚངས་པར་སྤྱོད་པ་སལ་གྱིས་དག་པ། མ་འདྲེས་པ་ཡོངས་སུ་རྫོགས་པ་ཡོངས་སུ་དག་པ་རྣམ་པར་བྱུང་བ་སྤྱད་པ་འདི་ནི་སླ་བ་མ་ཡིན་པས་མ་ལ་བདག་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་མོ། །
དེ་ནས་ཚངས་པ་མི་མཇེད་ཀྱི་བདག་པོས་བྲམ་ཟེ་ཆེན་པོ་གནག་ལྷས་སྐྱེས་ཀྱི་བསམ་པ་སེམས་ཀྱིས་ཤེས་ནས་ཚིགས་སུ་བཅད་དེ་སྨྲས་པ། ཚངས་པར་སྐྱེ་བར་བྱ་བའི་ཕྱིར། །འདི་ལ་འབད་པ་བརྟན་པར་གྱིས། །ཆོས་འདི་དག་པ་གཡུང་དྲུང་ཡིན། །ཞེས་སྨྲས་ནས་ཚངས་པ་མི་
མཇེད་ཀྱི་བདག་པོ་དེ་ཉིད་དུ་མི་སྣང་བར་གྱུར་ཏོ། །དེ་ནས་དབྱར་ཟླ་བ་བཞི་པོ་དག་འདས་ནས་རྒྱལ་པོ་རྡུལ་ཕྲན་བྲམ་ཟེ་ཆེན་པོ་གནག་ལྷས་སྐྱེས་གང་ན་བ་དེར་དོང་སྟེ་ཕྱིན་པ་དང་། བྲམ་ཟེ་ཆེན་པོ་གནག་ལྷས་སྐྱེས་ཀྱི་རྐང་པ་གཉིས་ལ་མགོ་བོས་ཕྱག་བྱས་ཏེ་ཕྱོགས་
གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་། རྒྱལ་པོ་རྡུལ་ཕྲན་ལ་བྲམ་ཟེ་ཆེན་པོ་གནག་ལྷས་སྐྱེས་ཀྱིས་འདི་སྐད་ཅེས་སྨྲས་སོ། །ས་བདག་རྒྱལ་ཆེན་རྡུལ་ཕྲན་ཁྱོད། །བདག་གི་ཚིག་ནི་གསན་པར་མཛོད། །གནག་ལྷས་སྐྱེས་བདག་མི་སྤྲོ་ཡིས། །རྒྱལ་སྲིད་ཉིད་ཀྱིས་བསྐྱང་དུ་གསོལ། །དེ་ནས་རྒྱལ་
པོ་རྡུལ་ཕྲན་གྱིས་ཚིགས་སུ་བཅད་དེ་སྨྲས་པ། ཁྱོད་ཀྱི་འདོད་པ་མི་ཆོག་པ། །གང་ཡིན་དེ་ཡང་ཁྱོད་ལ་བསྐང་། །ཁྱོད་ལ་འཚེ་བ་དེ་བསད་ཀྱིས། །གནག་ལྷས་སྐྱེས་ཀྱིས་བདག་མ་སྤང་། །རྒྱལ་པོ་བདག་འདོད་མི་ཆོག་མིན། །བདག་ལ་འཚེ་བའང་མ་མཆིས་ཏེ། །མི་མ་
ཡིན་པའི་ཚིག་ཐོས་ནས། །ཁྱིམ་གྱི་གཞི་ལ་མི་སྤྲོའོ། །གང་ལས་ཐོས་ནས་བྲམ་ཟེ་ཁྱོད། །འདིར་ནི་བདག་དང་འདོད་སྤོང་བ། །མི་མ་ཡིན་པ་དེ་ཅི་འདྲ། །དྲི་ཡིས་དེ་ནི་བདག་ལ་སྨྲོས། །སྙིང་རྗེ་ཡི་ནི་གནས་པ་ཡིས། །རབ་དབེན་བསམ་གཏན་བྱེད་པ་ན། །དེ་ནས་ཚངས་པ་
མདུན་དུ་འོངས། །ཐ་དད་ཕྱོགས་ནི་སྣང་བར་བྱས། །བདག་གིས་དེ་ཡི་ཚིག་ཐོས་ནས། །ཁྱིམ་གྱི་གཞི་ལ་མི་སྤྲོའོ། །བྲམ་ཟེ་གང་དུ་འགྲོ་བ་དེར། །ཁོ་བོ་ཡང་ནི་འགྲོ་བྱ་ཞིང་། །ཁྱོད་ཀྱི་ཉན་ཐོས་འགྱུར་བར་བགྱིས། །གནག་ལྷས་སྐྱེས་ཁྱོད་སྟོན་པ་མཛོད། །གང་ལ་སོ་སོའི་སྐྱེ་བོ་

རྣམས། །ཆགས་པའི་འདོད་པ་དེ་དག་སྤོངས། །འདོད་པ་རྣམས་ལ་མི་ལྟ་ཞིང་། །བདེན་པའི་ཆོས་ལ་གནས་པར་མཛོད། །ཚངས་པར་སྐྱེ་བར་བགྱི་སླད་དུ། །ནོར་བུ་དག་པ་བཻ་ཌཱུརྱ། །ཇི་ལྟར་མ་བཅོས་དྲི་མེད་ལྟའི། །ཚངས་པར་སྤྱོད་པ་སྤྱད་པར་བགྱི། །མཁན་
པོ་ད་དེའི་དུས་ལ་བབ་པར་མཁྱེན་པར་མཛོད་ཅིག །དེ་ནས་བྲམ་ཟེ་ཆེན་པོ་གནག་ལྷས་སྐྱེས་ཀྱིས་རྒྱལ་པོའི་འཁོར་རྒྱལ་རིགས་དྲུག་རྣམས་ལ་སྨྲས་པ། ཤེས་ལྡན་དག་བདག་ནི་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་
འབྱུང་ན་ཤེས་ལྡན་དག་ཅི་བྱེད། མཁན་པོ་ལོ་བདུན་དུ་གཞེས་ཤིག་དང་། ལོ་བདུན་འདས་ནས་བདག་ཅག་བུ་དང་། སྤུན་དང་། གཞན་དག་རྒྱལ་སྲིད་ཀྱི་དབང་ཕྱུག་ལ་བཀོད་ནས་མཁན་པོ་རབ་ཏུ་བྱུང་བའི་རྗེས་སུ་རབ་ཏུ་འབྱུང་ངོ་། །ཤེས་ལྡན་དག་ལོ་བདུན་ལྟ་ཧ་ཅང་ཡང་ཐོགས་
ཆེས་སོ། །གཞན་ཡང་འདོད་པ་རྣམས་ནི་ཆགས་པར་འགྱུར་བ། ལོངས་སྤྱོད་རྣམས་ནི་མྱོས་པར་འགྱུར་བ། སྲོག་འཆད་པ་ནི་ཤེས་པར་དཀའ་བ་ཡིན་པས་ལོ་བདུན་འདས་ན་ཡང་ཤེས་ལྡན་དག་རབ་ཏུ་འབྱུང་ངམ་མི་འབྱུང་གཏོལ་མེད་པས་རེ་ཞིག་ཁོ་བོ་རབ་ཏུ་འབྱུང་ངོ་། །མཁན་པོ་ལོ་དྲུག་
གམ། ལྔ་འམ། བཞི་འམ། གསུམ་མམ། གཉིས་སམ། གཅིག་གམ། ཟླ་བ་བདུན་ནམ། དྲུག་གམ། ལྔ་འམ། བཞི་འམ། གསུམ་མམ། གཉིས་སམ། གཅིག་གམ། ཞག་བདུན་ཞིག་གཞེས་ཤིག་དང་། ཞག་བདུན་འདས་ནས་བདག་ཅག་བུ་དང་། སྤུན་དང་། གཞན་
དག་རྒྱལ་སྲིད་ཀྱི་དབང་ཕྱུག་ལ་བཀོད་ནས་མཁན་པོ་རབ་ཏུ་བྱུང་བའི་རྗེས་སུ་རབ་ཏུ་འབྱུང་བར་བགྱིའོ། །ཤེས་ལྡན་དག་ཞག་བདུན་ལྟ་རིང་པོ་ཡང་མི་ཐོགས་ན། འོན་ཀྱང་འདོད་པ་རྣམས་ནི་ཆགས་པར་འགྱུར་བ། ལོངས་སྤྱོད་རྣམས་ནི་རྒྱགས་པར་འགྱུར་བ། སྲོག་འཆད་པ་ཤེས་པར་དཀའ་བ་
ཡིན་པས་ཞག་བདུན་འདས་ན་ཡང་ཤེས་ལྡན་དག་རབ་ཏུ་འབྱུང་ངམ་མི་འབྱུང་གཏོལ་མེད་པས་རེ་ཞིག་བདག་རབ་ཏུ་འབྱུང་ངོ་། །མཁན་པོ་ད་དེའི་དུས་མཁྱེན་པར་མཛོད་ཅིག །དེ་ནས་བྲམ་ཟེ་ཆེན་པོ་གནག་ལྷས་སྐྱེས་ཀྱིས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་བདུན་དང་། བྲམ་ཟེ་ཤིང་སཱ་ལ་ཆེན་

པོ་ལྟ་བུ་བདུན་དང་། ཁྱིམ་བདག་ཤིང་སཱ་ལ་ཆེན་པོ་ལྟ་བུ་བདུན་དང་། ཐབས་རིར་བབ་པའི་ཆུང་མ་བཞི་བཅུ་ལ་སྨྲས་པ། ཤེས་ལྡན་དག་བདག་ནི་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་ན་ཤེས་ལྡན་དག་ཅི་བྱེད་རྗེའི་སྲས་
བདག་ཅག་བཙུན་མོ་བགྱི་བའི་དུས་ན་ནི་བཙུན་མོ། གྲོགས་བགྱི་བའི་དུས་ན་ནི་གྲོགས་ལགས་པས་རྗེའི་སྲས་གལ་ཏེ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་ན། རྗེའི་སྲས་རབ་ཏུ་བྱུང་བའི་རྗེས་སུ་བདག་ཅག་ཀྱང་རབ་ཏུ་འབྱུང་
བར་བགྱིའོ། །ཤེས་ལྡན་དག་ད་དེའི་དུས་ལ་བབ་པར་ཤེས་པར་གྱིས་ཤིག །དེ་ནས་བྲམ་ཟེ་ཆེན་པོ་གནག་ལྷས་སྐྱེས་ཀྱིས་བྲམ་ཟེའི་ཁྱེའུ་ལྔ་བརྒྱ་ཙམ་ལ་སྨྲས་པ། ཤེས་ལྡན་དག་བདག་ནི་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་
ཏུ་འབྱུང་ན་ཤེས་ལྡན་དག་ཅི་བྱེད། མཁན་པོ་བདག་ཅག་གང་ཅུང་ཟད་ཅི་འཚལ་བ་དེ་ཐམས་ཅད་ནི་མཁན་པོ་ལས་བརྟེན་ཏེ་ལགས་ཀྱིས། གལ་ཏེ་མཁན་པོ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་ན། མཁན་པོ་རབ་
ཏུ་བྱུང་བའི་རྗེས་སུ་བདག་ཅག་ཀྱང་རབ་ཏུ་འབྱུང་བར་བགྱིའོ། །ཤེས་ལྡན་དག་ད་དེའི་དུས་ལ་བབ་པར་ཤེས་པར་གྱིས་ཤིག །འདུལ་སྦྱོང་མཁན་དང་། གླང་པོ་ཆེ་ལ་ཞོན་པ་དང་། རྟ་ལ་ཞོན་པ་དང་། ཤིང་རྟ་པ་དང་། རལ་གྲིའི་འཛིན་སྟངས་མཁན་དང་། གཞུ་འཛིན་པ་དང་། ཞབས་
འབྲིང་བྱེད་པ་དང་། གོ་རེ་ལོང་བྱེད་པ་དང་། བྲོ་གར་ལེན་པ་དང་། རྒྱལ་པོའི་བུ་དཔའ་བ་རྟུལ་ཕོད་པ་རབ་གནོན་ཚན་པོ་ཆེ་དང་ལྡན་པ་རྣམས་དང་། སེམས་སྲུང་བ་དང་། སྐྲ་མཁན་དང་། ཁྲུས་བྱེད་པ་དུ་མ་ལ་སྨྲས་པ། ཤེས་ལྡན་དག་བདག་ནི་ཞེས་བྱ་བ་ནས། སྐྲ་དང་ཁ་སྤུ་
བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་ན་ཞེས་བྱ་བའི་བར་གོང་མ་བཞིན་དུ་སྟེ། མཁན་པོ་རབ་ཏུ་འབྱུང་བའི་རྗེས་སུ་བདག་ཅག་ཀྱང་རབ་ཏུ་འབྱུང་བར་བགྱིའོ། །ཤེས་ལྡན་དག་དེའི་དུས་ལ་དབབ་པར་ཤེས་པར་གྱིས་ཤིག །

དེ་ནས་བྲམ་ཟེ་ཆེན་པོ་གནག་ལྷས་སྐྱེས་སྐྲ་དང་། ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །རྒྱལ་པོ་རྡུལ་ཕྲན་ཡང་འཁོར་བརྒྱ་ཕྲག་དུ་མ་དང་། འཁོར་སྟོང་ཕྲག་དུ་མ་དང་། འཁོར་བརྒྱ་སྟོང་ཕྲག་དུ་མ་
དང་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ། དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་བྲམ་ཟེ་ཆེན་པོ་གནག་ལྷས་སྐྱེས་རབ་ཏུ་བྱུང་བའི་རྗེས་སུ་རབ་ཏུ་བྱུང་ངོ་། །རྒྱལ་པོའི་འཁོར་རྒྱལ་རིགས་དྲུག་དང་། རྒྱལ་རིགས་ཤིང་སཱ་ལ་ཆེན་པོ་ལྟ་བུ་བདུན་དང་། བྲམ་ཟེ་ཤིང་
སཱ་ལ་ཆེན་པོ་ལྟ་བུ་བདུན་དང་། ཁྱིམ་བདག་ཤིང་སཱ་ལ་ཆེན་པོ་ལྟ་བུ་བདུན་དང་། ཐབས་རིར་བབ་པའི་ཆུང་མ་བཞི་བཅུ་ཡང་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ། དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་བྲམ་ཟེ་ཆེན་པོ་གནག་ལྷས་སྐྱེས་རབ་ཏུ་བྱུང་བའི་རྗེས་སུ་རབ་ཏུ་བྱུང་
ངོ་། །བྲམ་ཟེའི་ཁྱེའུ་ལྔ་བརྒྱ་ཙམ་ཡང་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་བྲམ་ཟེ་ཆེན་པོ་གནག་ལྷས་སྐྱེས་རབ་ཏུ་བྱུང་བའི་རྗེས་སུ་རབ་ཏུ་བྱུང་ངོ་། །གླང་པོ་ཆེ་ལ་ཞོན་པ་དང་། རྟ་ལ་ཞོན་པ་དང་། ཤིང་རྟ་པ་དང་། རལ་གྲི་འཛིན་སྟངས་པ་དང་། གཞུ་འཛིན་པ་
དང་། ཞབས་འབྲིང་བྱེད་པ་དང་། གོ་རེ་ལོང་བྱེད་པ་དང་། བྲོ་གར་ལེན་པ་དང་། རྒྱལ་པོའི་བུ་དཔའ་བ་རྟུལ་ཕོད་པ་རབ་གནོན་ཚན་པོ་ཆེ་དང་ལྡན་པ་རྣམས་དང་། སེམས་སྲུང་བ་དང་། སྐྲ་མཁན་དང་། ཁྲུས་བྱེད་པ་རྣམས་ཀྱང་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་བྲམ་
ཟེ་ཆེན་པོ་གནག་ལྷས་སྐྱེས་རབ་ཏུ་བྱུང་བའི་རྗེས་སུ་རབ་ཏུ་བྱུང་ངོ་། །བྲམ་ཟེ་ཆེན་པོ་གནག་ལྷས་སྐྱེས་དེ་ལྟར་རབ་ཏུ་བྱུང་ནས་ཉོན་མོངས་པའི་སྒྲིབ་པ་ལྔ་པོ་སེམས་ཉེ་བར་ཉོན་མོངས་པར་བྱེད་པ། ཤེས་རབ་ཉམ་ཆུང་བར་བྱེད་པ། གནོད་པར་བྱེད་པའི་ཕྱོགས་དང་མཐུན་པ། མྱ་ངན་
ལས་མི་འདའ་བར་བྱེད་པ་རྣམས་སྤངས་ནས་བྱམས་པ་དང་ལྡན་པའི་སེམས་ཁོ་ན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ། རྒྱ་ཆེན་པོར་གྱུར་པ། ཚད་མེད་པ་ཤིན་ཏུ་བསྒོམས་པས་ཕྱོགས་གཅིག་ཏུ་མོས་ཏེ། ཁྱབ་པར་བྱས་ནས་རྫོགས་པར་བྱས་ཏེ་གནས་

སོ། །དེ་བཞིན་དུ་གཉིས་པ་དང་། དེ་བཞིན་དུ་གསུམ་པ་དང་། དེ་བཞིན་དུ་བཞི་པ་དང་། བླ་དང་འོག་དང་། ཐད་ཀར་རྣམ་པ་ཐམས་ཅད་དུ་འཇིག་རྟེན་འདི་ཐམས་ཅད་བྱམས་པ་དང་ལྡན་པའི་སེམས་ཁོན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ། རྒྱ་
ཆེན་པོར་གྱུར་པ། ཚད་མེད་པ་ཤིན་ཏུ་བསྒོམས་པས་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་སོ། །དེ་བཞིན་དུ་སྙིང་རྗེ་དང་། དགའ་བ་དང་། བཏང་སྙོམས་དང་ལྡན་པའི་སེམས་ཁོན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ། རྒྱ་ཆེན་པོར་གྱུར་
པ། ཚད་མེད་པ་ཤིན་ཏུ་བསྒོམས་པས་ཕྱོགས་གཅིག་ཏུ་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་སོ། །དེ་བཞིན་དུ་གཉིས་པ་དང་། དེ་བཞིན་དུ་གསུམ་པ་དང་། དེ་བཞིན་དུ་བཞི་པ་དང་། བླ་དང་འོག་དང་། ཐད་ཀར་རྣམ་པ་ཐམས་ཅད་དུ་འཇིག་རྟེན་འདི་ཐམས་ཅད་བཏང་
སྙོམས་དང་ལྡན་པའི་སེམས་ཁོན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ་རྒྱ་ཆེན་པོར་གྱུར་པ། ཚད་མེད་པ་ཤིན་ཏུ་བསྒོམས་པས་ཕྱོགས་གཅིག་ཏུ་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་སོ། །དེ་ནས་བྲམ་ཟེ་ཆེན་པོ་གནག་ལྷས་སྐྱེས་ཀྱི་མིང་བྲམ་ཟེ་ཆེན་
པོ་གནག་ལྷས་སྐྱེས། བྲམ་ཟེ་ཆེན་པོ་གནག་ལྷས་སྐྱེས་ཞེས་བྱ་བའི་མིང་གང་ཡིན་པ་དེ་ནུབ་པར་གྱུར་ཅིང་། སྟོན་པ་གནག་ལྷས་སྐྱེས་ཞེས་བྱ་བར་གྲགས་སོ། །དེ་ནས་སྟོན་པ་གནག་ལྷས་སྐྱེས་འཁོར་བརྒྱ་ཕྲག་དུ་མ་དང་། འཁོར་སྟོང་ཕྲག་དུ་མ་དང་། འཁོར་བརྒྱ་སྟོང་ཕྲག་དུ་མ་དང་།
གྲོང་རྡལ་ནས་གྲོང་རྡལ་དང་། གྲོང་ཁྱེར་ནས་གྲོང་ཁྱེར་དུ་ལྗོངས་རྒྱུ་ཞིང་དོང་ངོ་། །དེའི་ཚེ་སྐྱེས་པའམ་བུད་མེད་དག་ལས་ཉེས་པ་འགའ་བྱུང་ན་སྟོན་པ་གནག་ལྷས་སྐྱེས་ཕྱོགས་གང་ན་འདུག་པའི་ཕྱོགས་དེ་ལོགས་སུ་ཐལ་མོ་སྦྱར་བ་བཏུད་ནས་སྟོན་པ་གནག་ལྷས་སྐྱེས་དེ་ལ་ཕྱག་འཚལ་
ལོ། །ཕྱག་འཚལ་ལོ། །སྟོན་པ་གནག་ལྷས་སྐྱེས་དེ་ལ་ཕྱག་འཚལ་ལོ། །ཕྱག་འཚལ་ལོ། །སྟོན་པ་གནག་ལྷས་སྐྱེས་དེ་ལ་ཕྱག་འཚལ་ལོ། །ཕྱག་འཚལ་ལོ། །ཞེས་ཆེད་དུ་བརྗོད་པ། ལན་གསུམ་བརྗོད་དོ། །མདུན་ན་འདོན་བདུན་བྱུང་བ་གང་ཡིན་པ་ནི། རལ་གྲིས་

འཚོ་དང་ཚངས་སྦྱིན་དང་། །སྣ་ཚོགས་ཟ་དང་དེ་བཞིན་ས། །རྡུལ་ཅན་ཡུལ་འཁོར་སྐྱོང་གཉིས་གཉིས། །དེ་ཚེ་སྐྱེ་བོ་དེ་བདུན་བྱུང་། །ཀ་ལིང་ཀ་ན་མཆེ་བའི་ཁྱིམ། །རྡོ་མངས་ན་ནི་སྐེམ་བྱེད་དེ། །སྲུང་བྱེད་ན་ནི་མ་ཧེ་ལྡན། །ཨང་གར་ཙམ་པ་རིས་སུ་བཅད། །ལུས་
འཕགས་ན་ནི་མི་ཐི་ལ། །སྟང་ཟིལ་ཅན་ན་མ་རུངས་པ། །བཱ་རཱ་ཎ་སཱིར་ཀ་ཤི་སྟེ། །གནག་ལྷས་སྐྱེས་ཀྱིས་རིས་བཅད་དེའོ། །རྒྱལ་པོ་ཆེན་པོ་ཇི་སྙམ་དུ་སེམས། དེའི་ཚེ་དེའི་དུས་ཀྱི་སྟོན་པ་གནག་ལྷས་སྐྱེས་གང་ཡིན་པ་དེ་ནི་ང་ཉིད་ཡིན་ནོ། །རྒྱལ་པོ་ཆེན་པོ་ངས་སེམས་ཅན་ལ་
ཕན་པ་བྱས་པ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ངའི་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །བཙུན་པ་བཅོམ་ལྡན་འདས་ཀྱིས་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་ཐོག་མར་ཐུགས་གང་དུ་བསྐྱེད་ལགས། རྒྱལ་པོ་ཆེན་པོ་སྔོན་བྱུང་བ་རྒྱལ་པོ་འོད་ལྡན་ཞེས་བྱ་བ་བྱུང་སྟེ། དེའི་ཡུལ་དུ་གླང་པོ་རིན་པོ་ཆེ་མེ་ཏོག་ཀུ་མུ་དའི་མདོག་ལྟར་དཀར་བ། ཡན་ལག་བདུན་ཤིན་ཏུ་གནས་པ། གཟུགས་བཟང་བ། མཛེས་པ།
བལྟ་ན་སྡུག་པ་ཞིག་བྱུང་ངོ་། །དེ་ནས་རྒྱལ་པོ་འོད་ལྡན་གྱིས་གླང་པོ་འདུལ་མཁན་མཁས་པ་ཕོ་ཉས་བཀུག་ནས་འདི་སྐད་ཅེས་སྨྲས་སོ། །མཁས་པ་དེས་པ་ཁྱོད་ཀྱིས་གླང་པོ་ཆེ་དམ་པ་འདི་མྱུར་དུ་ལེགས་པར་དུལ་བར་བྱོས་ལ་ང་ལ་ཕུལ་ཅིག །ལྷ་བཀའ་བཞིན་འཚལ་ཞེས་གླང་པོ་
ཆེ་འདུལ་མཁན་མཁས་པས་རྒྱལ་པོ་འོད་ལྡན་ལས་མཉན་ནས་གླང་པོ་ཆེ་དམ་པ་དེ་འདུལ་བར་བྱེད་དེ། དེ་དུལ་བར་རིག་ནས་རྒྱལ་པོ་འོད་ལྡན་ལ་ཕུལ་ཏེ། ལྷའི་གླང་པོ་ཆེ་དམ་པ་ནི་དུལ་ལགས་པས་ལྷ་ད་དེའི་དུས་ལ་བབ་པར་མཁྱེན་པར་མཛད་དུ་གསོལ། དེ་ནས་རྒྱལ་པོ་འོད་ལྡན་
གླང་པོ་ཆེ་དམ་པ་དེ་ལ་ཞོན་ཏེ་གླང་པོའི་འདུལ་མཁན་ཡང་གོང་དུ་ཞོན་ནས་རི་དགས་འཆོར་དུ་སོང་ངོ་། །ཇི་ཙམ་ན་གླང་པོ་ཆེ་དེས་ནགས་ཀྱི་བལ་གླང་མོའི་དྲི་ཚོར་ནས་དེས་དྲི་དེའི་རྗེས་བཞིན་དུ་བརྒྱུགས་སོ། །དེ་ནས་རྒྱལ་པོ་གླང་པོ་ཆེ་རླུང་ལྟར་མགྱོགས་པས་ཁྱེར་བ་དང་། གླང་པོ་ཆེའི་

འདུལ་མཁན་ལ་སྨྲས་པ། ཀྱེ་གླང་པོ་འདུལ་མཁན་ནམ་མཁའ་འགུལ་བ་འདྲ་ཞིང་ཕྱོགས་ཀུན་མྱུར་དུ་འདུ་བར་འགྲོ་བ་འདྲ། །ས་ནི་མཐའ་དག་འཁོར་ལོ་བཞིན་འཁོར་ཤིང་རྣམས་མཁའ་ལ་འཁོར་བ་འདྲ། །གླང་པོའི་དབང་པོ་གངས་རི་འགྲོ་བ་ལྟ་བུ་འདི་རྒྱུག་མཐོང་ནས་ནི། །རི་བོ་འདི་
རྒྱུག་སྙམ་ནས་རི་རྣམས་གྱ་ཙོམ་མྱུར་དུ་རྒྱུག་པ་འདྲ། །ཀྱེ་གླང་པོ་ཆེ་འདུལ་མཁན་གླང་པོ་ཆེའི་དབང་པོ་ཐུལ་ཅིག་ཐུལ་ཅིག །གླང་ཆེན་དབང་པོ་ཚར་གཅད་པར། །བཟང་པོ་རབ་ཏུ་འབད་པར་གྱིས། །གླང་ཆེན་གཉེའུ་རེངས་ཁྱེར་བ་ཡིས། །ཁོ་བོ་ཅིར་འགྱུར་གཏོལ་མེད་ཁྱེར། །གླང་པོ་ཆེ་
འདུལ་བས་སྨྲས་པ། ལྷ་དྲང་སྲོང་དམ་པས་སྨྲས་པའི་གསང་སྔགས་བཟླས་བགྱི་ཞིང་། །འདི་ལ་ལྕགས་ཀྱུས་ཚར་བཅད་འབད་པ་ཡང་བགྱི་ན། །འཆི་བར་ངེས་པ་རྣམས་ཀྱི་ཚེ་ཡིས་སྨན་བཞིན་དུ། །གླང་པོ་འདི་ནི་བདག་སྟོབས་ཟིལ་གྱིས་མནན་ནས་མཆི། །མི་ཡི་དབང་པོ་
ལྕགས་ཀྱུ་འམ། །ཞགས་པ་འམ་ཡང་ན་ལྕག་གིས་ཀྱང་། །འདོད་ཆགས་གཉེའུ་རེངས་ཁྱེར་བའི་སེམས། །ཚར་གཅད་ནུས་པ་མ་ལགས་སོ། །འདོད་ཆགས་སེམས་ཀྱི་ཟུག་རྔུ་ནི། །ཇི་ཞིག་ལྟར་ན་སྐྱེ་འགྱུར་ཏེ། །ཚུལ་འགའ་ཞིག་གིས་རྒྱས་འགྱུར་ལ། །འགའ་
ཞིག་གིས་ཀྱང་ཞི་བར་འགྱུར། །གང་གི་ཚེ་གླང་པོའི་འདུལ་མཁན་དེས་གླང་པོ་ཆེ་དམ་པ་དེ་གནས་ཐམས་ཅད་དུ་བཟློག་པར་མ་ནུས་པ་དེའི་ཚེ། རྒྱལ་པོ་ལ་སྨྲས་པ། ལྷ་གླང་པོ་ཆེ་འདི་ནི་འཁྲུལ་གྱིས་ཤིང་གི་ཡལ་ག་ལ་འཇུས་མཛོད་ཅིག །དེ་ནས་རྒྱལ་པོ་དང་འདུལ་མཁན་
ཤིང་གི་ཡལ་ག་ལ་འཇུས་ཏེ་འདུག་གོ། །དེ་ནས་དིའུ་ཤི་བ་ལས་ཐར་ཏེ་བདེ་བར་གྱུར་ནས་རྒྱལ་པོས་འདུལ་མཁན་ལ་སྨྲས་པ། ཁྱོད་ཀྱིས་གླང་པོ་ཆེ་དམ་པ་མ་དུལ་བར་ང་ལ་ཕུལ་ལོ། །དེས་སྨྲས་པ། ལྷ་འདི་བདག་གིས་ཤིན་ཏུ་དུལ་བར་བགྱིས་ཏེ། འོན་ཀྱང་ནགས་ཀྱི་བལ་
གླང་མོའི་དྲི་ཚོར་ནས་ཉན་དུ་མ་བཏུབ་ལགས་སོ། །ལྷ་དེ་ལྟ་ལགས་མོད་ཀྱི་དཔྱད་དྲན་ནས་རིང་པོ་མི་ཐོགས་པར་མཆི་བར་འགྱུར་རོ། །དེ་ནས་གླང་པོ་ཆེ་དེ་མྱོས་པ་དང་བྲལ་བར་གྱུར་ནས་ཞག་བདུན་ལོན་པ་དང་དཔྱད་རྗེས་སུ་དྲན་ནས་རང་ཉིད་གནས་སུ་འོངས་ཏེ་འདུག་གོ། །དེ་ནས་

གླང་པོ་ཆེ་འདུལ་མཁན་གྱིས་རིངས་པ་རིངས་པར་རྒྱལ་པོ་ལ་སྨྲས་པ། ལྷ་གླང་པོ་ཆེ་དེ་ནི་མཆིས་ལགས་སོ། །རྒྱལ་པོས་སྨྲས་པ། ཁྱོད་ཀྱིས་ནི་འདི་མ་ཐུལ་ཏོ། །ལྷ་ཐུལ་ལགས་སོ། །ཅི་མངོན། ལྷའི་སྤྱན་སྔར་བབ་པར་བགྱིའོ་ཞེས་དེས་ལྕགས་ཀྱི་ཐུ་ལུམ་
སོ་མལ་དུ་ཚོས་པར་བསྲེགས་པ་ཞིག་དཔྱད་ཀྱི་སར་ཁྱེར་ཏེ་ལེན་དུ་གཞུག་པར་བརྩམས་སོ། །དེ་ནས་དེས་བག་ཚ་བ་མེད་པས་བླང་བར་བརྩམས་པ་དང་གླང་པོ་འདུལ་མཁན་གྱིས་སྨྲས་པ། ལྷ་ལེན་དུ་ནི་བཏུབ་ན་འོན་ཀྱང་འགུམ་པར་འགྱུར་རོ། །རྒྱལ་པོས་སྨྲས་པ། ཀྱེ་མཁས་པ་དེ་ལྟར་
ཤིན་ཏུ་དུལ་བ་འདིས་བདག་ཅག་གཡེངས་པ་འདི་ལ་རྒྱུ་ཅི་ཞིག་ཡོད། ལྷ་བདག་གིས་སྔར་ལུས་ཐུལ་གྱི་སེམས་ནི་མ་ལགས་སོ་ཞེས་མ་གསོལ་ཏམ། བདག་ནི་ལུས་འདུལ་བ་ལགས་ཀྱི། སེམས་འདུལ་བ་ནི་མ་ལགས་སོ། །རྒྱལ་པོས་སྨྲས་པ། སེམས་འདུལ་བ་འགའ་
ཡོད་པར་ཁྱོད་ཀྱིས་མཐོང་ངམ། ཐོས་སམ། དེ་ལྷས་བསྐུལ་ནས་སྨྲས་པ། ལྷ་ལུས་འདུལ་བ་དང་སེམས་འདུལ་བ་སངས་རྒྱས་བཅོམ་ལྡན་འདས་རྣམས་མཆིས་སོ། །འདོད་པའི་རྒྱུས་བྱུང་ཉེས་གཞོམ་ཕྱིར། །མང་པོ་བརྩོན་པར་བྱེད་མོད་ཀྱི། །མི་ནུས་པར་ནི་ཤེས་ནས་
ཀྱང་། །བརྩོན་འགྲུས་ཉམས་ནས་ལྡོག་པར་བྱེད། །དེ་དང་དེར་ནི་དེ་ལྟ་བུའི། །འབད་པ་རྣམ་པ་མང་བྱས་ཀྱང་། །འདོད་པའི་འདོད་ཆགས་ནགས་ཚལ་གྱི། །རྩ་ནས་ཕྱིན་པར་མི་འགྱུར་རོ། །འདོད་པ་གཞོམ་པར་འདོད་པ་ནི། །ཁ་ཅིག་ཡུལ་རྣམས་སྤོང་བར་བྱེད། །དེ་གཞོམ་
འདོད་པ་གཞན་དག་ནི། །དགའ་བཞིན་དབང་པོ་ཚིམ་པར་བྱེད། །ལྷ་དང་ལྷ་མིན་མི་དང་སེང་གེ་སྟག་དང་སྦྲུལ་དག་དང་། །སྲིན་བུ་བྱེ་བ་ཕྱེ་མ་ལེབ་དང་འཇིག་རྟེན་འདི་དག་ཀུན། །འདོད་པའི་ཞགས་པ་ཤིན་ཏུ་ཕྲ་མོ་རྣམས་ཀྱིས་ཡིད་བཅིངས་ནས། །སྲིད་འགྲོ་ཐིབས་པོ་འདིར་ནི་འཁོར་
ལོ་བཞིན་དུ་ཤིན་ཏུ་འཁོར། །བདག་ནི་སྣ་ཚོགས་ཐབས་ཀྱིས་འདི་ལྟ་བུ། །གཟུགས་བཟང་ཕུན་སུམ་ཚོགས་པའི་གླང་པོ་འདུལ། །རྒྱལ་པོ་གཟུགས་ཅན་མ་ལགས་ཕྲ་སེམས་ནི། །དྲང་སྲོང་ཆབ་ཀླུང་འཚལ་བས་མ་ཐུལ་ཏོ། །གླང་ཆེན་འདུལ་བ་གཟུགས་མེད་ཕྲ་བའི་སེམས། །དྲང་

སྲོང་ཆུ་ཀླུང་ཟ་བས་མ་ཐུལ་ན། །གང་གི་དབང་དུ་གཟུགས་མེད་སེམས་འགྱུར་ཏེ། །མི་ཡི་འཇིག་རྟེན་དག་ན་ཡོད་དམ་ཀྱེ། །གང་གི་དབང་དུ་གཟུགས་མེད་སེམས་འགྱུར་ཏེ། །ལྷན་གཅིག་མི་ཡི་འཇིག་རྟེན་ན་མཆིས་ཏེ། །རྒྱལ་པོ་ཆེན་པོ་སངས་རྒྱས་མཐུ་བོ་ཆེ། །ཉོན་མོངས་སྤངས་པ་དཔའ་
བོ་སྟོབས་ལྡན་པ། །དེ་དང་གང་དག་དེ་འདྲར་རྗེས་འབྲང་བ། །དེའི་དབང་འདིར་ནི་གཟུགས་མེད་སེམས་འགྱུར་རོ། །དེ་ནས་རྒྱལ་པོ་འོད་ལྡན་གྱིས་སངས་རྒྱས་བཅོམ་ལྡན་འདས་རྣམས་ཀྱི་བརྩོན་འགྲུས་དང་སྟོབས་ཐོས་ནས་སྦྱིན་པ་དག་བྱིན། བསོད་ནམས་དག་བྱས་ཏེ་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་པ། སྦྱིན་པ་རྒྱ་ཆེན་གྱུར་པ་འདི་ཡིས་སུ། །འགྲོ་བར་རང་བྱུང་སངས་རྒྱས་གྱུར་ནས་ནི། །སྔོན་གྱི་རྒྱལ་དབང་རྣམས་ཀྱིས་མ་བསྒྲལ་བ། །སྐྱེ་བོའི་ཚོགས་དག་བདག་གིས་བསྒྲལ་བར་བྱ། །བདག་གིས་སྐྱེ་དགུ་ལེགས་བསྐྱངས་
ལས་བྱུང་བའམ། །བཏང་བ་ལས་བྱུང་བསོད་ནམས་ཡོད་པ་གང་། །དེས་ནི་སངས་རྒྱས་ཉིད་ཐོབ་འཇིག་རྟེན་དག །འདོད་པའི་རིམས་ནད་ལས་རབ་ཐར་བར་བྱ། །རྒྱལ་པོ་ཆེན་པོ་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་འོད་ལྡན་དུ་གྱུར་པ་གང་ཡིན་པ་དེ་ནི་དེའི་ཚེ་དེའི་དུས་ན་ང་ཉིད་དེ་
ཡིན་ཏེ། ངས་དེར་ཐོག་མར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བཙུན་པ་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་ཡང་དག་པར་རྫོགས་པའི་སངས་རྒྱས་གང་ལ་ཐོག་མར་བསོད་སྙོམས་ཕུལ་ལགས། རྒྱལ་
པོ་ཆེན་པོ་སྔོན་བྱུང་བ་ཡངས་པ་ཞེས་བྱ་བའི་གྲོང་ཁྱེར་ཡོད་དེ། ཡངས་པའི་གྲོང་ཁྱེར་དུ་རྫ་མཁན་ཡངས་པའི་འོད་ཅེས་བྱ་བ་ཞིག་བྱུང་ངོ་། །དེའི་ཚེ་སྟོན་པ་ཤཱཀྱ་ཐུབ་པ་ཞེས་བྱ་བ་འཇིག་རྟེན་དུ་བྱུང་ངོ་ཞེས་བྱ་བ་ནས་སངས་རྒྱས་བཅོམ་ལྡན་འདས་ཞེས་བྱ་བའི་བར་གོང་མ་བཞིན་ནོ། །དེའི་མཆོག་
ཟུང་དང་བཟང་པོ་ཟུང་ནི་ཤཱ་རིའི་བུ་དང་མཽད་གལ་གྱི་བུ་ཞེས་བྱའོ། །རིམ་གྲོ་བྱེད་པ་ནི་དགེ་སློང་ཀུན་དགའ་བོ་ཞེས་བྱའོ། །དེ་ནས་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དགེ་སློང་གི་ཚོགས་ཀྱིས་ཡོངས་སུ་བསྐོར་ནས་ལྗོངས་རྒྱུ་ཞིང་གཤེགས་པ་ན་ཡངས་པའི་གྲོང་ཁྱེར་དུ་བྱོན་པ་དང་།

དེ་རླུང་ཤས་ཆེ་བའི་སྙུན་གྱིས་ཐེབས་ནས་དེས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་རྫ་མཁན་ཡངས་པའི་འོད་ལས་མར་དང་། ཏིལ་མར་དང་། བུ་རམ་ཆུ་ཁྱེར་ཏེ་ཤོག་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་
བོས་བཅོམ་ལྡན་འདས་ལས་མཉན་ནས་རྫ་མཁན་ཡངས་པའི་འོད་གང་ན་བ་དེར་སོང་སྟེ་ཕྱིན་པ་དང་། རྫ་མཁན་ཡངས་པའི་འོད་ལ་འདི་སྐད་ཅེས་སྨྲས་སོ། །ཡངས་པའི་འོད་ཤེས་པར་གྱིས་ཤིག་བཅོམ་ལྡན་འདས་རླུང་ཤས་ཆེ་བའི་སྙུན་གྱིས་ཐེབས་ཏེ། དེ་ལ་མར་དང་། ཏིལ་མར་དང་
བུ་རམ་ཆུ་དགོས་སོ། །དེ་ནས་རྫ་མཁན་ཡངས་པའི་འོད་ཀྱིས་ཚེ་དང་ལྡན་པ་ཀུན་དགའ་བོ་ལས་མཉན་ནས་མར་དང་། ཏིལ་མར་དང་། བུ་རམ་ཆུ་ཁྱེར་ཏེ་བུ་དང་ལྷན་ཅིག་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་གང་ན་བ་དེར་དོང་སྟེ་ཕྱིན་པ་དང་། མར་དང་། ཏིལ་མར་གྱིས་
བཅོམ་ལྡན་འདས་ཀྱི་སྐུ་བྱུགས་ནས་ཆུ་འཇམ་པོས་སྐུ་ཁྲུས་བྱས་ཏེ། བུ་རམ་ཆུའི་བཏུང་བ་གསོལ་ཏོ། །དེས་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་བཟོད་ཅིང་འཚོ་བར་གྱུར་ཏོ། །དེ་ནས་རྫ་མཁན་ཡངས་པའི་འོད་ཀྱིས་དེའི་ཞབས་གཉིས་ལ་གཏུགས་ནས་སྨོན་ལམ་གདབ་
པར་བརྩམས་པ། བདག་ཀྱང་རབ་ཏུ་སྦྱིན་པ་འདི་ཡིས་ཤཱཀྱའི་རིགས་སྐྱེས་པ། །ཡོན་ཏན་རིགས་དང་རུས་དག་མཉམ་པའི་སངས་རྒྱས་ཉིད་གྱུར་ཅིང་། །བདག་གིས་ཚངས་པའི་འཇིག་རྟེན་བར་གྱི་ཉམ་ཐག་འཆི་བ་ཡི། །ཕ་རོལ་ཞི་བ་རྒྱ་ཆེན་འཇིགས་པ་མེད་པ་སྒྲོལ་བར་ཤོག །དེའི་
བུས་ཀྱང་སྨོན་ལམ་བཏབ་པ། བདག་ཀྱང་ལས་འདིས་ན་གཟུགས་མེད་པའི་ཆོས་རྣམས་རྟོགས་པ་དང་། བཅོམ་ལྡན་འདས་ཀྱི་རིམ་གྲོ་བྱེད་པར་གྱུར་ཅིག །ཅེས་བྱས་སོ། །རྒྱལ་པོ་ཆེན་པོ་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྫ་མཁན་ཡངས་པའི་འོད་གང་ཡིན་པ་དེ་ནི་ང་
ཉིད་ཡིན་ཏེ། དེར་ངས་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཐོག་མར་བསོད་སྙོམས་ཕུལ་ལོ། །དེའི་ཚེ་དེའི་དུས་ཀྱི་བུ་གང་ཡིན་པ་དེ་ནི་ཀུན་དགའ་བོ་ཡིན་ནོ།། །།འདུལ་བ་གཞི། བམ་པོ་ལྔ་བཅུ་རྩ་གཅིག་པ། བཙུན་པ་བཅོམ་ལྡན་འདས་ཀྱིས་བླ་ན་མེད་

པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་སླད་དུ་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་ལ་བསྙེན་བཀུར་བགྱིས་ལགས། རྒྱལ་པོ་ཆེན་པོ་རེ་ཞིག་གྲངས་མེད་པ་དང་པོ་ལ། སངས་རྒྱས་ཤཱཀྱ་ཐུབ་པ་ནས། འདྲེན་པ་ཡུལ་འཁོར་སྐྱོང་གི་བར། །
དེའི་བར་བདུན་ཁྲི་ལྔ་སྟོང་གི། །སངས་རྒྱས་རྣམས་ནི་ངས་མཆོད་དོ། །གྲངས་མེད་གཅིག་ནི་འདས་པ་ཡི། །རྒྱལ་བ་ངས་ནི་མཆོད་བྱས་ཏེ། །སངས་རྒྱས་ཉིད་ནི་འདོད་པའི་ཕྱིར། །ང་ལ་སྐྱོ་བའི་སེམས་མེད་དོ། །རྒྱལ་པོ་ཆེན་པོ་གྲངས་མེད་པ་གཉིས་པ་ལ་ནི།
སངས་རྒྱས་མར་མེ་མཛད་ནས་ནི། །དབང་པོའི་རྒྱལ་མཚན་ཐུབ་པའི་བར། །བདུན་ཁྲི་དྲུག་སྟོང་དག་གི་ནི། །སངས་རྒྱས་རྣམས་ནི་ང་ཡིས་མཆོད། །གྲངས་མེད་གཉིས་པོ་ཚང་བར་ནི། །རྒྱལ་བ་ང་ཡིས་མཆོད་བྱས་ཏེ། །སྐྱེ་བ་དེ་དང་དེ་དག་ཏུ། །ང་ལ་སྐྱོ་བའི་
སེམས་མེད་དོ། །གྲངས་མེད་པ་གསུམ་པ་ལ་ཡང་། །སངས་རྒྱས་ལེགས་མཛད་ནས་བཟུང་སྟེ། །སངས་རྒྱས་འོད་སྲུང་བར་དག་ཏུ། །བདུན་ཁྲི་བདུན་སྟོང་ང་ཡིས་མཆོད། །གྲངས་མེད་གསུམ་པོ་དེ་ལ་ནི། །རྒྱལ་བ་ངས་ནི་མཆོད་བྱས་ཏེ། །བྱང་ཆུབ་ཕྱིར་ནི་སྤྱོད་པ་
ན། །དེ་ཚེ་ང་ལ་སྐྱོ་སེམས་མེད། །ང་ནི་བྱང་ཆུབ་སེམས་དཔའ་ན། །སངས་རྒྱས་མཆོག་ནི་དེ་དག་མཆོད། །འཇིག་རྟེན་འདྲེན་པ་དེ་ཀུན་གྱིས། །ང་ནི་སངས་རྒྱས་ཉིད་དུ་བསྟན། །ངས་ནི་སྔོན་བསམས་གང་ཡིན་པ། །ང་ནི་སྨོན་ལམ་ཐམས་ཅད་རྫོགས། །ངས་
ནི་སངས་རྒྱས་ཁུར་བོར་ཏེ། །སེམས་ཅན་རྣམས་ནི་རྗེས་སུ་བཟུང་། །དེ་ནས་ཀོ་ས་ལའི་རྒྱལ་པོ་གསལ་རྒྱལ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ།
བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཞུས་པ། འཇིག་རྟེན་གཙོ་བོ་རྣམ་འདྲེན་པ། །ཐུབ་པ་ཁྱོད་ཀྱི་བྱང་ཆུབ་ཐུགས། །ཐོག་མར་གང་དུ་བསྐྱེད་པ་དག །སྐལ་ལྡན་ཆེན་པོ་

བདག་ལ་གསུངས། །ཁྱོད་སྔོན་བྱང་ཆུབ་སྤྱོད་པ་ན། །སངས་རྒྱས་ཇི་སྙེད་དུས་གང་དུ། །ཇི་ལྟ་བུར་ནི་བསྙེན་བཀུར་མཛད། །མི་མཆོག་དེ་ནི་བདག་ལ་གསུངས། །ཀུན་དགའ་བོ་ཡི་ཚིག་གསན་ནས། །རྐང་གཉིས་དམ་པ་རྫོགས་སངས་རྒྱས། །འགྲོ་ལ་ཐུགས་
རྗེ་མཛད་ནས་སུ། །ཐུབ་པས་བྱང་ཆུབ་སྤྱོད་པ་གསུངས། །སངས་རྒྱས་འདོད་ཆགས་བྲལ་ཐོས་ཤིང་། །གླང་པོ་དྲེགས་པའི་ཤས་ཆེན་དང་། །འཇིག་རྟེན་སྡུག་བསྔལ་གྱུར་མཐོང་ནས། །ངས་ནི་བྱང་ཆུབ་སེམས་བསྐྱེད་དོ། །མི་དབང་འོད་ལྡན་གྱུར་པ་ན། །ངས་ནི་བྱང་ཆུབ་
འདོད་པའི་ཕྱིར། །ངས་ནི་བརྟན་པོར་དམ་བཅས་ཏེ། །སྐྱོན་མེད་པ་ཡི་སྦྱིན་པ་བཏང་། །ང་ནི་རྫ་མཁན་གྱུར་པ་ན། །སངས་རྒྱས་ཤཱཀྱ་ཐུབ་མཐོང་ནས། །བྱང་ཆུབ་ཕྱིར་ནི་ཐོག་མར་ངས། །མར་དང་ཏིལ་མར་གྱིས་མཆོད་དོ། །སྔོན་གྱི་སྐྱེ་བ་གཞན་དག་ཏུ། །ཚོང་དཔོན་བུ་མོར་
གྱུར་པ་ན། །སངས་རྒྱས་ཀཽཎྜི་ནྱ་མཐོང་ནས། །ངས་ནི་མར་མེའི་སྦྱིན་པ་བྱས། །སངས་རྒྱས་གཞན་གྱིས་མི་ཐུལ་བའི། །ང་སྔོན་སྡེ་སྣོད་གསུམ་པ་ལས། །དགེ་སློང་དགེ་འདུན་རྩོད་པ་ལ། །དགེ་འདུན་ལ་ནི་བུད་མེད་སྨྲས། །ཚིག་གི་ཉེས་བྱས་བྱུང་བས་ན། །མོད་ལ་བུད་
མེད་ཉིད་དུ་གྱུར། །སླར་ཡང་སེམས་དད་བྱས་པས་ནི། །སྐྱེས་པ་ཉིད་ནི་ཐོབ་པར་གྱུར། །སྔོན་གྱི་སྐྱེ་བ་གཞན་དག་ཏུ། །ང་ནི་རྒྱལ་པོའི་སྲས་གྱུར་ཚེ། །གཅེན་པོ་རིན་ཆེན་གཙུག་ཏོར་ལ། །མར་མེའི་སྦྱིན་པས་མཆོད་བྱས་ཤིང་། །ངས་ནི་ཟླ་གསུམ་དྲུག་བཅུ་རུ། །བདེ་
མཛད་ཀྱི་ནི་ཞབས་འབྲིང་བྱས། །ངས་ནི་མྱ་ངན་འདས་པ་དེའི། །མཆོད་རྟེན་ལ་ནི་ནོར་ཀུན་ཕུལ། །ང་ནི་ཚོང་དཔོན་གྱུར་པ་ན། །སྒྲ་སྙན་དབྱངས་ལ་ཟླ་གསུམ་མཆོད། །དེ་ཡི་མཆོད་རྟེན་མཐོན་པོ་ནི། །དགུ་བཅུ་རྩ་གཅིག་རྩིག་ཏུ་བཅུག །ང་ནི་བྲམ་ཟེར་གྱུར་པ་ན། །སངས་
རྒྱས་དཔལ་འབྱུང་མཐོང་ནས་དགའ། །ལེགས་པར་ཐལ་སྦྱར་དེ་ནས་ཡང་། །མི་མཆོག་ལ་ནི་མཆོད་པ་བྱས། །ང་སྔོན་བྲམ་ཟེར་གྱུར་པ་ན། །བསྟན་བཅོས་དུ་མ་འཇིགས་མེད་ཚེ། །སངས་རྒྱས་ཕན་པར་བཞེད་མཛད་པ། །ང་ཡི་སྟན་ལ་སྤྱན་དྲངས་སོ། །སྔོན་ནི་དཀའ་ཐུབ་

ལྡན་པ་ཡི། །དྲང་སྲོང་ཆོས་ལ་གནས་གྱུར་ཚེ། །སངས་རྒྱས་ཀཽཎྜི་ནྱ་མཐོང་ནས། །ངས་ནི་རི་བོའི་ཁ་ནས་མཆོངས། །དྲང་སྲོང་གྱུར་ནའང་ཡིད་དགའ་བས། །སངས་རྒྱས་བལྟ་ན་སྡུག་མཐོང་ནས། །རྩ་བ་དང་ནི་འབྲས་བུའི་ཕྱིར། །བསྟི་གནས་བཞུགས་པ་
ངས་སྤྱན་དྲངས། །འཇིག་རྟེན་འདྲེན་པ་སྤྱན་མཛེས་ལ། །དྲང་སྲོང་གྱུར་ཚེ་བཀུར་སྟི་བྱས། །ཤིང་ཤུན་ཡིད་དུ་འོང་བ་ཡིས། །ངས་ནི་མི་ཡི་མཆོག་བཀབ་བོ། །ང་ནི་རྒྱལ་པོར་གྱུར་པ་ན། །ཡན་ལག་བཞི་པའི་དཔུང་སྤངས་ནས། །བྱང་ཆུབ་འདོད་པའི་ཆེད་དུ་ངས། །
ཡུལ་འཁོར་སྐྱོང་གི་ཞབས་འབྲིང་བྱས། །སངས་རྒྱས་ཤཱཀྱ་ཐུབ་པ་ནས། །འདྲེན་པ་ཡུལ་འཁོར་སྐྱོང་གི་བར། །བདུན་ཁྲི་དང་ནི་ལྔ་སྟོང་གི། །སངས་རྒྱས་རྣམས་ལ་ང་ཡིས་མཆོད། །གྲངས་མེད་གཅིག་ནི་འོངས་པ་ཡི། །རྒྱལ་བ་ངས་ནི་མཆོད་བྱས་ཏེ། །བྱང་ཆུབ་ཕྱིར་ནི་སྤྱོད་
པ་ན། །དེ་ཚེ་ང་ལ་སྐྱོ་སེམས་མེད། །གྲངས་མེད་པ་དང་པོའོ། །བྲམ་ཟེ་ཁྱེའུ་གྱུར་དེ་ཡི་ཚེ། །འོད་དང་གྲགས་པར་ལྡན་པ་ཡི། །སངས་རྒྱས་མར་མེ་མཛད་མཐོང་ནས། །ཨུཏྤལ་སྔོན་པོ་བདུན་གྱིས་མཆོད། །ང་ནི་རྒྱལ་པོར་གྱུར་པ་ན། །དཀའ་ཐུབ་སྤྱོད་ཅེས་བྱ་
བ་ཡི། །སངས་རྒྱས་མཚན་མངའ་མཐོང་ནས་ནི། །མི་མཆོག་ལ་ནི་བླ་རེས་མཆོད། །རྒྱལ་པོར་གྱུར་ཚེ་མུན་འཇོམས་པའི། །སྐལ་ཆེན་ལ་ནི་རིན་པོ་ཆེ། །སྣ་ཚོགས་བཀྲ་བའི་རོལ་མོ་ཡི། །མཆོད་པ་དག་གིས་བཞེངས་གསོལ་ཏོ། །ཀུན་དགའ་མི་དབང་ང་གྱུར་པས། །སེང་
གེ་སེང་གེའི་རྩལ་མངའ་ལ། །རིན་ཆེན་ཡུ་བ་ཅན་གདུགས་ཀྱིས། །མི་མཆོག་ལ་ནི་མཆོད་པ་བྱས། །རྒྱལ་པོར་གྱུར་ཚེ་གྲོང་ཁྱེར་ནི། །སྟོང་ཕྲག་དྲུག་བཅུ་རྣམས་སུ་ཡང་། །མི་ཡི་ཉི་མ་བདེ་མཛད་ནི། །སྤྱན་དྲངས་ནས་ནི་མཆོད་པ་བྱས། །འཇིག་རྟེན་འདྲེན་པ་མི་དབང་
ལ། །བསྲོ་གང་ལས་དང་དེ་བཞིན་དུ། །ཨ་གར་ནག་པོའི་དྲི་དག་གིས། །བྲམ་ཟེར་གྱུར་ཚེ་ཞབས་འབྲིང་བྱས། །གྲོང་ཁྱེར་རྒྱལ་སྲིད་འཕེལ་བར་ནི། །བྲམ་ཟེའི་སངས་རྒྱས་སུམ་བཅུ་པོ། །གཙུག་ཏོར་ཅན་ཞེས་འཇིག་རྟེན་གྲགས། །རྒྱལ་པོར་གྱུར་ཚེ་མཆོད་པ་བྱས། །

གྲོང་ཁྱེར་འབྲས་འཕེལ་དག་ཏུ་ནི། །སངས་རྒྱས་ཉི་ཤུ་རྩ་ལྔ་ལ། །ང་ནི་ཚོང་དཔོན་གྱུར་པ་ན། །ཚངས་པར་སྤྱད་པས་མཆོད་པ་བྱས། །གྲོང་ཁྱེར་དགའ་བ་དེ་ཉིད་དུ། །ང་ནི་ཚོང་དཔོན་གྱུར་པའི་ཚེ། །སངས་རྒྱས་གཙུག་ཏོར་འཇིག་རྟེན་གྲགས། །གཙུག་
ལག་ཁང་གིས་མཆོད་པ་བྱས། །ཚོང་དཔོན་གྱུར་ཚེ་རྒྱལ་བ་དྲུག །མཆོད་ཕྱིར་གླང་ཆེན་རྟ་གསེར་དང་། །བུད་མེད་རྣམས་དང་ནོར་བུ་ཡི། །རྒྱན་གྱིས་སྐྱེད་མོས་ཚལ་བྱས་སོ། །རྒྱལ་པོར་གྱུར་ཚེ་དད་པ་ཡིས། །གྲོང་ཁྱེར་ཡིད་འོང་དེ་ཉིད་དུ། །བྱང་ཆུབ་དོན་དུ་གཉེར་
བ་ངས། །གཙུག་ཏོར་ཅན་ལ་སྐྲ་བྲེགས་སོ། །ཀུན་དགའ་བྲམ་ཟེར་གྱུར་པ་ན། །ཐུབ་ཆེན་མ་འགགས་དེ་ལ་ནི། །བྱང་ཆུབ་དོན་དུ་གཉེར་བ་ངས། །འབྲས་བུ་མཆོག་གིས་མཆོད་པ་བྱས། །ཚོང་དཔོན་དུ་ནི་གྱུར་པ་ན། །འཇིག་རྟེན་འདྲེན་པ་སྤྱན་མཛེས་ལ། །ནོར་བུ་
རིན་ཆེན་གྱིས་མཆོད་ཅིང་། །གཙུག་ལག་ཁང་ནི་ཉམས་དགའས་མཆོད། །དེད་དཔོན་དུ་ནི་གྱུར་པ་ན། །བྱང་ཆུབ་ཤིང་གི་དྲུང་ན་ནི། །སངས་རྒྱས་ལེགས་འཁྲུངས་བཞུགས་མཐོང་ནས། །ཐོག་མར་བསོད་སྙོམས་ལ་སྤྱན་དྲངས། །ང་ནི་དེད་དཔོན་གྱུར་པ་ན། །
བྱང་ཆུབ་ཤིང་དྲུང་ཐུབ་པ་ནི། །འཇིག་རྟེན་དགའ་མཛད་བློ་བཟང་མཐོང་། །འཁོར་ནི་སྟོང་དང་རབ་ཏུ་བྱུང་། །ང་ནི་དེད་དཔོན་གྱུར་པ་ན། །སངས་རྒྱས་ཙན་དན་འོད་དཔག་མེད། །ཆུ་འཇམ་དང་ནི་ཏིལ་མར་དང་། །བུ་རམ་ལ་ནི་སྤྱན་དྲངས་སོ། །ཀུན་དགའ་རྒྱལ་པོར་
གྱུར་པ་ན། །ཚངས་སྦྱིན་གྲགས་པ་ཆེན་པོ་པ། །འདྲེན་པ་ལ་ནི་ཞལ་ཟས་དང་། །ཐམས་ཅད་སྦྱིན་པས་མཆོད་པ་བྱས། །བྲམ་ཟེར་ཡང་ནི་གྱུར་པ་ན། །ཐུགས་རྗེ་ཆེན་པོ་འོད་ཟེར་ཅན། །ཐུབ་པ་རྐང་གཉིས་མཆོག་མཐོང་ནས། །སྨྲ་བའི་རྒྱལ་མཚན་གྱིས་མཆོད་དོ། །
རྒྱལ་པོར་གྱུར་ནས་སངས་རྒྱས་ནི། །དོན་དམ་གཟིགས་པ་གྲོང་མཆོག་ཏུ། །འཇུག་པ་དེ་ལ་ཏ་ལ་ཡི། །ལོ་མའི་བསིལ་ཡབ་མཆོད་པ་བྱས། །ང་ནི་ཚོང་དཔོན་གྱུར་པ་ན། །འཇིག་རྟེན་གསལ་མཛད་སངས་རྒྱས་ནི། །ཤཱཀྱ་ཐུབ་ལ་མེ་ཏོག་གི། །སིལ་མ་སྣ་ཚོགས་དྲི་སྦྱར་

མཆོད། །གྲོང་ཁྱེར་མཆོག་ཏུ་མཐོར་འཕགས་པའི། །མི་མཆོག་འཇུག་པར་མཐོང་ནས་ནི། །རོལ་མོ་རྣམས་ཀྱི་སྒྲ་དག་དང་། །མེ་ཏོག་རྣམས་ཀྱིས་མཆོད་པ་བྱས། །རྒྱལ་པོར་གྱུར་ཚེ་དད་པ་ཡིས། །སངས་རྒྱས་དམ་པ་ཞེས་བྱ་བ། །སྲིད་པའི་མཚོ་ལས་རྒལ་བ་ལ། །ཐོག་མར་
ཤིང་རྟ་དག་གིས་བསྟབས། །ང་ནི་རྒྱལ་པོར་གྱུར་པ་ན། །གཙོ་བོའི་ཆེད་དུ་ལམ་བསྟན་ཅིང་། །དཔག་ཚད་བརྒྱ་ནི་གང་བར་ཡང་། །མེ་ཏོག་ཁང་བརྩེགས་མཆོད་པ་བྱས། །སངས་རྒྱས་དགྲ་ཞི་མཛད་པ་ནི། །གྲོང་ཁྱེར་གཤེགས་ཞེས་ངས་ཐོས་ནས། །ལམ་ནི་རྒྱལ་མཚན་
ཡོངས་བཀང་སྟེ། །རྒྱལ་པོའི་འབྱོར་པས་བསུ་བ་བྱས། །ང་ནི་མཉན་པར་གྱུར་པ་ན། །ཤིང་རྟའི་ཡན་ལག་ཆུ་འགྲམ་དུ། །བྱོན་པ་ངས་ནི་མཐོང་ནས་ནི། །ཐུབ་པ་ཆུ་ཡི་རྒྱུན་ལས་བསྒྲལ། །དེད་དཔོན་གྱུར་ཚེ་དད་པ་ཡིས། །ཤིང་རྟ་སྐལ་ལྡན་ཆེན་པོ་ནི། །ངས་ནི་གྲུ་ཟམ་
བཏགས་ནས་ཀྱང་། །མཚོ་ཆེན་ལས་ནི་བསྒྲལ་བ་བྱས། །ང་ནི་རྒྱལ་པོར་གྱུར་པ་ན། །རྐང་གཉིས་དམ་པ་སངས་རྒྱས་ནི། །ཚངས་ལ་ཙན་དན་ས་མཆོག་གི། །ཀ་བར་ལྡན་པའི་ཁང་པས་མཆོད། །རྒྱལ་པོར་གྱུར་ཚེ་སངས་རྒྱས་ནི། །བཅོམ་ལྡན་ཚངས་པའི་ཚེ་མཆོད་ཅིང་། །
སྣམ་སྦྱར་རྒྱལ་མཚན་བསྒྲེང་ནས་ནི། །ངས་ནི་ཡམས་ཀྱི་ནད་ཞི་བྱས། །ཙན་དན་ལྡན་ལ་ཆར་མེད་ཚེ། །རྒྱལ་པོ་ལྟ་བུའི་སྐུ་ཁྲུས་བྱས། །དེ་ཚེ་ལྷས་ནི་ཆར་ཕབ་པས། །སྐྱེ་བོ་རྣམས་ནི་སྐྱབས་སུ་དོང་། །ང་ནི་རྒྱལ་པོར་གྱུར་པ་ན། །སངས་རྒྱས་བཅོམ་ལྡན་ཟླ་བ་ལ། །མཆོད་
ནས་ངས་ནི་བྱམས་བསྒོམས་པས། །བདུད་ཀྱིས་བཏང་བའི་ཡམས་ནད་ཞི། །མི་ཡི་དབང་པོར་སྔོན་གྱུར་ཚེ། །ངས་ནི་བྱང་ཆུབ་འདོད་པའི་ཕྱིར། །སངས་རྒྱས་དབང་པོ་འདུལ་བ་ལ། །ཆོ་འཕྲུལ་ཕྱིར་ནི་གསོལ་བ་བཏབ། །རྒྱལ་པོ་དག་ཏུ་གྱུར་པ་ན། །རིན་ཆེན་རི་བོ་འོད་ཆེན་
ལྡན། །འཁོར་ནི་བརྒྱ་སྟོང་ཕྲག་མང་པོ། །མཐོང་ནས་ལོ་ལྔར་མཆོད་པ་བྱས། །བྲམ་ཟེར་གྱུར་ཚེ་དད་པ་ཡིས། །སངས་རྒྱས་དོན་ཀུན་སྒྲུབ་པ་ནི། །མཚན་དང་ལྡན་པ་མཐོང་ནས་ཀྱང་། །ངས་ནི་བསྟོད་པ་ལྔ་བརྒྱ་བྱས། །བྲམ་ཟེར་གྱུར་ཚེ་ཡིད་དགའ་བས། །སངས་རྒྱས་དབང་པོ་རྒྱལ་

མཚན་མཐོང་། །ངས་ནི་ཐལ་མོ་ལགས་སྦྱར་ཏེ། །དམ་པ་སྩོལ་བའི་འོས་ཞེས་གསོལ། །སངས་རྒྱས་མར་མེ་མཛད་པ་ནས། །ཐུབ་པ་དབང་པོའི་རྒྱལ་མཚན་བར། །བདུན་ཁྲི་དང་ནི་དྲུག་སྟོང་གི། །སངས་རྒྱས་རྣམས་ནི་ང་ཡིས་མཆོད། །གྲངས་མེད་གཉིས་
པ་ཚང་བར་ནི། །རྒྱལ་བ་ང་ཡིས་མཆོད་བྱས་ཏེ། །བྱང་ཆུབ་ཕྱིར་ནི་སྤྱོད་པ་ན། །དེ་ཚེ་ང་ལ་སྐྱོ་སེམས་མེད། །གྲངས་མེད་པ་གཉིས་པའོ། །སངས་རྒྱས་བདེ་མཛད་དམ་པ་ལ། །རྒྱལ་པོར་གྱུར་ཚེ་མཆོད་བྱས་ཏེ། །མྱ་ངན་འདས་ནས་མཆོད་རྟེན་བརྩིགས། །རྒྱལ་སྲིད་རབ་ཏུ་ཞི་
བར་བྱས། །རྒྱལ་པོར་གྱུར་ཚེ་དད་པས་ནི། །སངས་རྒྱས་གང་པོ་རེ་སྐོང་ལ། །ཚུལ་དང་འདྲ་བར་མཆོད་བྱས་ཏེ། །ཆོས་ཀྱི་རྒྱལ་པོ་ཞེས་བསྒྲགས་སོ། །སངས་རྒྱས་ཐམས་ཅད་ཟིལ་གནོན་ལ། །ཚོང་དཔོན་གྱུར་ཚེ་ལེགས་པར་ནི། །རིམ་གྲོ་བྱས་ཤིང་མི་མཆོག་ལ། །དེ་བཞིན་
གསེར་གྱི་མེ་ཏོག་གཏོར། །ང་ནི་ཚོང་དཔོན་གྱུར་པ་ན། །སངས་རྒྱས་རིན་ཆེན་གཙུག་ཏོར་ཅན། །ཐུབ་ཆེན་གྲོང་མཆོག་གཤེགས་དེ་ལ། །གསེར་གྱི་དྲ་བས་མཆོད་པ་བྱས། །ང་ནི་ཚོང་དཔོན་གྱུར་པ་ན། །པད་མ་དམ་པ་དཔའ་ཆེན་པོ། །རྒྱལ་པོར་གྲགས་པའི་གྲོང་མཆོག་ཏུ། །
དངུལ་གྱི་མེ་ཏོག་སིལ་མས་གཏོར། །ང་ནི་བྲམ་ཟེར་གྱུར་པ་ན། །སངས་རྒྱས་གྲགས་མཆོག་སློབ་མ་ཡི། །དགེ་འདུན་གྱིས་ནི་མདུན་བལྟས་པ། །མཐོང་ནས་མི་མཆོག་གནས་ཀྱིས་མཆོད། །ང་ནི་རྒྱལ་པོར་གྱུར་པ་ན། །ལེགས་གསུང་བྱང་ཆུབ་ཤིང་དྲུང་དུ། །བཞུགས་པ་
ངས་མཐོང་གླང་པོ་རྟ། །ཤིང་རྟ་དཔུང་བུ་ཆུང་གིས་བསྲུངས། །སངས་རྒྱས་དྲི་མེད་ཐུབ་ཆེན་ལ། །ཚོང་དཔོན་གྱུར་ཚེ་བསྲོ་གང་དང་། །མཆོད་རྟེན་ལས་དང་མར་མེས་ནི། །དེ་ཡི་ཚེ་ན་རྣམ་པར་མཆོད། །སངས་རྒྱས་སད་མཛད་རྡོ་ལེབ་སྟེང་། །སྙོམས་པར་ཞུགས་པ་མཐོང་ནས་
ནི། །དད་པས་རོལ་མོའི་སྒྲ་ཀུན་དང་། །རྒྱལ་པོའི་འབྱོར་པས་བཞེངས་གསོལ་ཏོ། །ཚོང་དཔོན་དུ་ནི་གྱུར་པ་ན། །འཇིག་རྟེན་དགའ་མཛད་དགྲ་ཐུལ་ལ། །སངས་རྒྱས་སྤྱོད་པས་གཤེགས་པ་ན། །ལམ་ནི་སྣ་ཚོགས་བརྒྱན་པས་མཆོད། །ཚོང་དཔོན་གྱུར་ཚེ་ཡིད་དགའ་བས། །

གནས་འཇོག་གཤེགས་པ་ཐོས་ནས་ནི། །སྐྱེད་མོས་ཚལ་ནི་བརྒྱན་བྱས་ནས། །ངས་ནི་གཙུག་ལག་ཁང་བརྩིགས་སོ། །སངས་རྒྱས་བཅོམ་ལྡན་སྐར་འོད་ལ། །བྱང་ཆུབ་འདོད་པས་དད་པས་ངས། །རྒྱལ་པོའི་མཛོད་ནི་ཐམས་ཅད་ནས། །ནོར་བུ་རིན་ཆེན་རྣམས་ཀྱིས་མཆོད། །
ང་ནི་རྒྱལ་པོར་གྱུར་པའི་ཚེ། །ཏོག་གིས་བདུད་རྣམས་བཅོམ་ནས་ནི། །ཆོས་ཀྱི་རྒྱལ་སྲིད་བསྒྲགས་པ་ན། །ངས་ནི་རྒྱལ་མཚན་ཁོ་ན་བཙུགས། །བྷ་ར་དྭ་ཛ་བློ་ལྡན་པ། །བྲམ་ཟེ་མྱ་ངན་འདས་པ་ལ། །རྒྱལ་པོ་ངས་ནི་རིལ་བ་དང་། །དབྱུག་གུ་གཙུག་ལག་ཁང་ཆེན་བྱས། །ང་
ནི་དེད་དཔོན་གྱུར་པ་ན། །སངས་རྒྱས་འདྲེན་པ་དོན་གཟིགས་པ། །གསེར་དང་ནོར་བུ་མུ་ཏིག་དང་། །དྲི་ཡི་སྙིང་པོ་རྣམས་ཀྱིས་མཆོད། །སངས་རྒྱས་དོན་ཀུན་སྒྲུབ་པ་ནི། །སངས་རྒྱས་སྤྱོད་པས་གཤེགས་པ་ན། །རྒྱལ་པོར་གྱུར་ཚེ་དཔུང་དག་གི། །ཚོགས་ཀུན་གྱིས་ནི་མཆོད་པ་བྱས། །
སངས་རྒྱས་དོན་དམ་གཟིགས་པ་ནི། །གྲོང་ཁྱེར་དམ་པར་གཤེགས་པ་ན། །རྒྱལ་པོར་གྱུར་ཚེ་རོལ་མོ་དང་། །མེ་ཏོག་ཀུན་གྱིས་མཆོད་པ་བྱས། །ང་ནི་དེད་དཔོན་གྱུར་པ་ན། །སངས་རྒྱས་སྐར་རྒྱལ་རྐང་གཉིས་མཆོག །དྲི་ཡི་