Sattaka Nipāta — Bảy Pháp

va agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihareyyā’ti. 
Evampi kho, mārisa moggallāna, tesaṁ devānaṁ ñāṇaṁ hoti: 
‘saupādisese vā saupādisesoti, anupādisese vā anupādiseso’ti. 
Idha pana, mārisa moggallāna, bhikkhu diṭṭhippatto hoti …pe… 
saddhāvimutto hoti …pe… 
dhammānusārī hoti. 
Tamenaṁ te devā evaṁ jānanti: 
‘ayaṁ kho āyasmā dhammānusārī. 
Appeva nāma ayamāyasmā anulomikāni senāsanāni paṭisevamāno kalyāṇamitte bhajamāno indriyāni samannānayamāno—
yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihareyyā’ti. 
Evampi kho, mārisa moggallāna, tesaṁ devānaṁ ñāṇaṁ hoti: 
‘saupādisese vā saupādisesoti, anupādisese vā anupādiseso’”ti. 
Atha kho āyasmā mahāmoggallāno tissassa brahmuno bhāsitaṁ abhinanditvā anumoditvā—seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ—brahmaloke antarahito gijjhakūṭe pabbate pāturahosi. 
Atha kho āyasmā mahāmoggallāno yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. 
Ekamantaṁ nisinno kho āyasmā mahāmoggallāno yāvatako ahosi tissena brahmunā saddhiṁ kathāsallāpo taṁ sabbaṁ bhagavato ārocesi. 
“Na hi pana te, moggallāna, tisso brahmā sattamaṁ animittavihāriṁ puggalaṁ deseti”. 
“Etassa, bhagavā, kālo, etassa, sugata, kālo. 
Yaṁ bhagavā sattamaṁ animittavihāriṁ puggalaṁ deseyya. Bhagavato sutvā bhikkhū dhāressantī”ti. 
“Tena hi, moggallāna, suṇāhi, sādhukaṁ manasi karohi; bhāsissāmī”ti. 
“Evaṁ, bhante”ti kho āyasmā mahāmoggallāno bhagavato paccassosi. 
Bhagavā etadavoca: 
“Idha, moggallāna, bhikkhu sabbanimittānaṁ amanasikārā animittaṁ cetosamādhiṁ upasampajja viharati. 
Tamenaṁ te devā evaṁ jānanti: 
‘ayaṁ kho āyasmā sabbanimittānaṁ amanasikārā animittaṁ cetosamādhiṁ upasampajja viharati. 
Appeva nāma ayamāyasmā anulomikāni senāsanāni paṭisevamāno kalyāṇamitte bhajamāno indriyāni samannānayamāno—
yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihareyyā’ti. 
Evaṁ kho, moggallāna, tesaṁ devānaṁ ñāṇaṁ hoti: 
‘saupādisese vā saupādisesoti, anupādisese vā anupādiseso’”ti. 
Tatiyaṁ. 

Aṅguttara Nikāya 7.57 
6. Abyākatavagga 
Sīhasenāpatisutta 
Evaṁ me sutaṁ—
ekaṁ samayaṁ bhagavā vesāliyaṁ viharati mahāvane kūṭāgārasālāyaṁ. 
Atha kho sīho senāpati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho sīho senāpati bhagavantaṁ etadavoca: 
“sakkā nu kho, bhante, sandiṭṭhikaṁ dānaphalaṁ paññāpetun”ti? 
“Tena hi, sīha, taññevettha paṭipucchissāmi, yathā te khameyya tathā naṁ byākareyyāsi. 
Taṁ kiṁ maññasi, sīha, 
idha dve purisā—
eko puriso assaddho maccharī kadariyo paribhāsako, eko puriso saddho dānapati anuppadānarato. 
Taṁ kiṁ maññasi, sīha, kaṁ nu kho arahanto paṭhamaṁ anukampantā anukampeyyuṁ: 
‘yo vā so puriso assaddho maccharī kadariyo paribhāsako, yo vā so puriso saddho dānapati anuppadānarato’”ti? 
“Yo so, bhante, puriso assaddho maccharī kadariyo paribhāsako, kintaṁ arahanto paṭhamaṁ anukampantā anukampissanti. 
Yo ca kho so, bhante, puriso saddho dānapati anuppadānarato taṁyeva arahanto paṭhamaṁ anukampantā anukampeyyuṁ”. 
“Taṁ kiṁ maññasi, sīha, kaṁ nu kho arahanto paṭhamaṁ upasaṅkamantā upasaṅkameyyuṁ: 
‘yo vā so puriso assaddho maccharī kadariyo paribhāsako, yo vā so puriso saddho dānapati anuppadānarato’”ti? 
“Yo so, bhante, puriso assaddho maccharī kadariyo paribhāsako, kintaṁ arahanto paṭhamaṁ upasaṅkamantā upasaṅkamissanti. 
Yo ca kho so, bhante, puriso saddho dānapati anuppadānarato taṁyeva arahanto paṭhamaṁ upasaṅkamantā upasaṅkameyyuṁ”. 
“Taṁ kiṁ maññasi, sīha, kassa nu kho arahanto paṭhamaṁ paṭiggaṇhantā paṭiggaṇheyyuṁ: 
‘yo vā so puriso assaddho maccharī kadariyo paribhāsako, yo vā so puriso saddho dānapati anuppadānarato’”ti? 
“Yo so, bhante, puriso assaddho maccharī kadariyo paribhāsako, kintaṁ tassa arahanto paṭhamaṁ paṭiggaṇhantā paṭiggaṇhissanti. 
Yo ca kho so, bhante, puriso saddho dānapati anuppadānarato tasseva arahanto paṭhamaṁ paṭiggaṇhantā paṭiggaṇheyyuṁ”. 
“Taṁ kiṁ maññasi, sīha, kassa nu kho arahanto paṭhamaṁ dhammaṁ desentā deseyyuṁ: 
‘yo vā so puriso assaddho maccharī kadariyo paribhāsako, yo vā so puriso saddho dānapati anuppadānarato’”ti? 
“Yo so, bhante, puriso assaddho maccharī kadariyo paribhāsako, kintaṁ tassa arahanto paṭhamaṁ dhammaṁ desentā desessanti. 
Yo ca kho so, bhante, puriso saddho dānapati anuppadānarato tasseva arahanto paṭhamaṁ dhammaṁ desentā deseyyuṁ”. 
“Taṁ kiṁ maññasi, sīha, kassa nu kho kalyāṇo kittisaddo abbhuggaccheyya: 
‘yo vā so puriso assaddho maccharī kadariyo paribhāsako, yo vā so puriso saddho dānapati anuppadānarato’”ti? 
“Yo so, bhante, puriso assaddho maccharī kadariyo paribhāsako, kintaṁ tassa kalyāṇo kittisaddo abbhuggacchissati. 
Yo ca kho so, bhante, puriso saddho dānapati anuppadānarato tasseva kalyāṇo kittisaddo abbhuggaccheyya”. 
“Taṁ kiṁ maññasi, sīha, ko nu kho yaṁyadeva parisaṁ upasaṅkameyya, yadi khattiyaparisaṁ yadi brāhmaṇaparisaṁ yadi gahapatiparisaṁ yadi samaṇaparisaṁ visārado upasaṅkameyya amaṅkubhūto: 
‘yo vā so puriso assaddho maccharī kadariyo paribhāsako, yo vā so puriso saddho dānapati anuppadānarato’”ti? 
“Yo so, bhante, puriso assaddho maccharī kadariyo paribhāsako, kiṁ so yaṁyadeva parisaṁ upasaṅkamissati, yadi khattiyaparisaṁ yadi brāhmaṇaparisaṁ yadi gahapatiparisaṁ yadi samaṇaparisaṁ visārado upasaṅkamissati amaṅkubhūto. 
Yo ca kho so, bhante, puriso saddho dānapati anuppadānarato so yaṁyadeva parisaṁ upasaṅkameyya, yadi khattiyaparisaṁ yadi brāhmaṇaparisaṁ yadi gahapatiparisaṁ yadi samaṇaparisaṁ visārado upasaṅkameyya amaṅkubhūto”. 
“Taṁ kiṁ maññasi, sīha, ko nu kho kāyassa bhedā paraṁ maraṇā sugatiṁ saggaṁ lokaṁ upapajjeyya: 
‘yo vā so puriso assaddho maccharī kadariyo paribhāsako, yo vā so puriso saddho dānapati anuppadānarato’”ti? 
“Yo so, bhante, puriso assaddho maccharī kadariyo paribhāsako, kiṁ so kāyassa bhedā paraṁ maraṇā sugatiṁ saggaṁ lokaṁ upapajjissati. 
Yo ca kho so, bhante, puriso saddho dānapati anuppadānarato so kāyassa bhedā paraṁ maraṇā sugatiṁ saggaṁ lokaṁ upapajjeyya. 
Yānimāni, bhante, bhagavatā sandiṭṭhikāni dānaphalāni akkhātāni, nāhaṁ ettha bhagavato saddhāya gacchāmi. 
Ahampi etāni jānāmi. 
Ahaṁ, bhante, dāyako dānapati, maṁ arahanto paṭhamaṁ anukampantā anukampanti. 
Ahaṁ, bhante, dāyako dānapati, maṁ arahanto paṭhamaṁ upasaṅkamantā upasaṅkamanti. 
Ahaṁ, bhante, dāyako dānapati, mayhaṁ arahanto paṭhamaṁ paṭiggaṇhantā paṭiggaṇhanti. 
Ahaṁ, bhante, dāyako dānapati, mayhaṁ arahanto paṭhamaṁ dhammaṁ desentā desenti. 
Ahaṁ, bhante, dāyako dānapati, mayhaṁ kalyāṇo kittisaddo abbhuggato: 
‘sīho senāpati dāyako kārako saṅghupaṭṭhāko’ti. 
Ahaṁ, bhante, dāyako dānapati yaṁyadeva parisaṁ upasaṅkamāmi, yadi khattiyaparisaṁ …pe… yadi samaṇaparisaṁ visārado upasaṅkamāmi amaṅkubhūto. 
Yānimāni, bhante, bhagavatā sandiṭṭhikāni dānaphalāni akkhātāni, nāhaṁ ettha bhagavato saddhāya gacchāmi. 
Ahampi etāni jānāmi. 
Yañca kho maṁ, bhante, bhagavā evamāha: 
‘dāyako, sīha, dānapati kāyassa bhedā paraṁ maraṇā sugatiṁ saggaṁ lokaṁ upapajjatī’ti. 
Etāhaṁ na jānāmi, ettha ca panāhaṁ, bhagavato saddhāya gacchāmī”ti. 
“Evametaṁ, sīha, evametaṁ, sīha. 
Dāyako, sīha, dānapati kāyassa bhedā paraṁ maraṇā sugatiṁ saggaṁ lokaṁ upapajjatī”ti. 
Catutthaṁ. 

Aṅguttara Nikāya 7.58 
6. Abyākatavagga 
Arakkheyyasutta 
“Cattārimāni, bhikkhave, tathāgatassa arakkheyyāni, tīhi ca anupavajjo. 
Katamāni cattāri tathāgatassa arakkheyyāni? 
Parisuddhakāyasamācāro, bhikkhave, tathāgato; 
natthi tathāgatassa kāyaduccaritaṁ yaṁ tathāgato rakkheyya: 
‘mā me idaṁ paro aññāsī’ti. 
Parisuddhavacīsamācāro, bhikkhave, tathāgato; 
natthi tathāgatassa vacīduccaritaṁ yaṁ tathāgato rakkheyya: 
‘mā me idaṁ paro aññāsī’ti. 
Parisuddhamanosamācāro, bhikkhave, tathāgato; 
natthi tathāgatassa manoduccaritaṁ yaṁ tathāgato rakkheyya: 
‘mā me idaṁ paro aññāsī’ti. 
Parisuddhājīvo, bhikkhave, tathāgato; 
natthi tathāgatassa micchāājīvo yaṁ tathāgato rakkheyya: 
‘mā me idaṁ paro aññāsī’ti. 
Imāni cattāri tathāgatassa arakkheyyāni. 
Katamehi tīhi anupavajjo? 
Svākkhātadhammo, bhikkhave, tathāgato. 
Tatra vata maṁ samaṇo vā brāhmaṇo vā devo vā māro vā brahmā vā koci vā lokasmiṁ sahadhammena paṭicodessati: 
‘itipi tvaṁ na svākkhātadhammo’ti. 
Nimittametaṁ, bhikkhave, na samanupassāmi. 
Etamahaṁ, bhikkhave, nimittaṁ asamanupassanto khemappatto abhayappatto vesārajjappatto viharāmi. 
Supaññattā kho pana me, bhikkhave, sāvakānaṁ nibbānagāminī paṭipadā. 
Yathāpaṭipannā mama sāvakā āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharanti. 
Tatra vata maṁ samaṇo vā brāhmaṇo vā devo vā māro vā brahmā vā koci vā lokasmiṁ sahadhammena paṭicodessati: 
‘itipi te na supaññattā sāvakānaṁ nibbānagāminī paṭipadā. Yathāpaṭipannā tava sāvakā āsavānaṁ khayā …pe… sacchikatvā upasampajja viharantī’ti. 
Nimittametaṁ, bhikkhave, na samanupassāmi. 
Etamahaṁ, bhikkhave, nimittaṁ asamanupassanto khemappatto abhayappatto vesārajjappatto viharāmi. 
Anekasatā kho pana me, bhikkhave, sāvakaparisā āsavānaṁ khayā …pe… sacchikatvā upasampajja viharanti. 
Tatra vata maṁ samaṇo vā brāhmaṇo vā devo vā māro vā brahmā vā koci vā lokasmiṁ sahadhammena paṭicodessati: 
‘itipi te na anekasatā sāvakaparisā āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharantī’ti. 
Nimittametaṁ, bhikkhave, na samanupassāmi. 
Etamahaṁ, bhikkhave, nimittaṁ asamanupassanto khemappatto abhayappatto vesārajjappatto viharāmi. 
Imehi tīhi anupavajjo. 
Imāni kho, bhikkhave, cattāri tathāgatassa arakkheyyāni, imehi ca tīhi anupavajjo”ti. 
Pañcamaṁ. 

Aṅguttara Nikāya 7.59 
6. Abyākatavagga 
Kimilasutta 
Evaṁ me sutaṁ—
ekaṁ samayaṁ bhagavā kimilāyaṁ viharati niculavane. 
Atha kho āyasmā kimilo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā kimilo bhagavantaṁ etadavoca: 
“ko nu kho, bhante, hetu ko paccayo yena tathāgate parinibbute saddhammo na ciraṭṭhitiko hotī”ti? 
“Idha, kimila, tathāgate parinibbute bhikkhū bhikkhuniyo upāsakā upāsikāyo satthari agāravā viharanti appatissā, dhamme agāravā viharanti appatissā, saṅghe agāravā viharanti appatissā, sikkhāya agāravā viharanti appatissā, samādhismiṁ agāravā viharanti appatissā, appamāde agāravā viharanti appatissā, paṭisanthāre agāravā viharanti appatissā. 
Ayaṁ kho, kimila, hetu ayaṁ paccayo yena tathāgate parinibbute saddhammo na ciraṭṭhitiko hotī”ti. 
“Ko pana, bhante, hetu ko paccayo yena tathāgate parinibbute saddhammo ciraṭṭhitiko hotī”ti? 
“Idha, kimila, tathāgate parinibbute bhikkhū bhikkhuniyo upāsakā upāsikāyo satthari sagāravā viharanti sappatissā, dhamme sagāravā viharanti sappatissā, saṅghe sagāravā viharanti sappatissā, sikkhāya sagāravā viharanti sappatissā, samādhismiṁ sagāravā viharanti sappatissā, appamāde sagāravā viharanti sappatissā, paṭisanthāre sagāravā viharanti sappatissā. 
Ayaṁ kho, kimila, hetu ayaṁ paccayo yena tathāgate parinibbute saddhammo ciraṭṭhitiko hotī”ti. 
Chaṭṭhaṁ. 

Aṅguttara Nikāya 7.5 
1. Dhanavagga 
Saṅkhittadhanasutta 
“Sattimāni, bhikkhave, dhanāni. 
Katamāni satta? 
Saddhādhanaṁ, sīladhanaṁ, hirīdhanaṁ, ottappadhanaṁ, sutadhanaṁ, cāgadhanaṁ, paññādhanaṁ. 
Imāni kho, bhikkhave, satta dhanānīti. 
Saddhādhanaṁ sīladhanaṁ, 
hirī ottappiyaṁ dhanaṁ; 
Sutadhanañca cāgo ca, 
paññā ve sattamaṁ dhanaṁ. 
Yassa ete dhanā atthi, 
itthiyā purisassa vā; 
Adaliddoti taṁ āhu, 
amoghaṁ tassa jīvitaṁ. 
Tasmā saddhañca sīlañca, 
Pasādaṁ dhammadassanaṁ; 
Anuyuñjetha medhāvī, 
Saraṁ buddhāna sāsanan”ti. 
Pañcamaṁ. 

Aṅguttara Nikāya 7.60 
6. Abyākatavagga 
Sattadhammasutta 
“Sattahi, bhikkhave, dhammehi samannāgato bhikkhu nacirasseva āsavānaṁ khayā …pe… sacchikatvā upasampajja vihareyya. 
Katamehi sattahi? 
Idha, bhikkhave, bhikkhu saddho hoti, sīlavā hoti, bahussuto hoti, paṭisallīno hoti, āraddhavīriyo hoti, satimā hoti, paññavā hoti. 
Imehi kho, bhikkhave, sattahi dhammehi samannāgato bhikkhu nacirasseva āsavānaṁ khayā …pe… sacchikatvā upasampajja vihareyyā”ti. 
Sattamaṁ. 

Aṅguttara Nikāya 7 
11. Rāgapeyyāla 
~ 
“Rāgassa, bhikkhave, abhiññāya satta dhammā bhāvetabbā. 
Katame satta? 
Satisambojjhaṅgo …pe… 
upekkhāsambojjhaṅgo—
rāgassa, bhikkhave, abhiññāya ime satta dhammā bhāvetabbā”ti. 

Aṅguttara Nikāya 7 
11. Rāgapeyyāla 
~ 
“Rāgassa, bhikkhave, abhiññāya satta dhammā bhāvetabbā. 
Katame satta? 
Aniccasaññā, anattasaññā, asubhasaññā, ādīnavasaññā, pahānasaññā, virāgasaññā, nirodhasaññā—
rāgassa, bhikkhave, abhiññāya ime satta dhammā bhāvetabbā”ti. 

Aṅguttara Nikāya 7 
11. Rāgapeyyāla 
~ 
“Rāgassa, bhikkhave, abhiññāya satta dhammā bhāvetabbā. 
Katame satta? 
Asubhasaññā, maraṇasaññā, āhāre paṭikūlasaññā, sabbaloke anabhiratasaññā, aniccasaññā, anicce dukkhasaññā, dukkhe anattasaññā—
rāgassa, bhikkhave, abhiññāya ime satta dhammā bhāvetabbā”ti. 

Aṅguttara Nikāya 7 
11. Rāgapeyyāla 
~ 
“Rāgassa, bhikkhave, pariññāya …pe… 
parikkhayāya … 
pahānāya … 
khayāya … 
vayāya … 
virāgāya … 
nirodhāya … 
cāgāya …pe… 
paṭinissaggāya ime satta dhammā bhāvetabbā”ti. 

Aṅguttara Nikāya 7.61 
6. Abyākatavagga 
Pacalāyamānasutta 
Evaṁ me sutaṁ—
ekaṁ samayaṁ bhagavā bhaggesu viharati susumāragire bhesakaḷāvane migadāye. 
Tena kho pana samayena āyasmā mahāmoggallāno magadhesu kallavāḷaputtagāme pacalāyamāno nisinno hoti. 
Addasā kho bhagavā dibbena cakkhunā visuddhena atikkantamānusakena āyasmantaṁ mahāmoggallānaṁ magadhesu kallavāḷaputtagāme pacalāyamānaṁ nisinnaṁ. 
Disvā—
seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ—bhaggesu susumāragire bhesakaḷāvane migadāye antarahito magadhesu kallavāḷaputtagāme āyasmato mahāmoggallānassa sammukhe pāturahosi. 
Nisīdi bhagavā paññatte āsane. 
Nisajja kho bhagavā āyasmantaṁ mahāmoggallānaṁ etadavoca: 
“Pacalāyasi no tvaṁ, moggallāna, pacalāyasi no tvaṁ, moggallānā”ti? 
“Evaṁ, bhante”. 
“Tasmātiha, moggallāna, yathāsaññissa te viharato taṁ middhaṁ okkamati, taṁ saññaṁ mā manasākāsi, taṁ saññaṁ mā bahulamakāsi. 
Ṭhānaṁ kho panetaṁ, moggallāna, vijjati yaṁ te evaṁ viharato taṁ middhaṁ pahīyetha. 
No ce te evaṁ viharato taṁ middhaṁ pahīyetha, tato tvaṁ, moggallāna, yathāsutaṁ yathāpariyattaṁ dhammaṁ cetasā anuvitakkeyyāsi anuvicāreyyāsi, manasā anupekkheyyāsi. 
Ṭhānaṁ kho panetaṁ vijjati yaṁ te evaṁ viharato taṁ middhaṁ pahīyetha. 
No ce te evaṁ viharato taṁ middhaṁ pahīyetha, tato tvaṁ, moggallāna, yathāsutaṁ yathāpariyattaṁ dhammaṁ vitthārena sajjhāyaṁ kareyyāsi. 
Ṭhānaṁ kho panetaṁ vijjati yaṁ te evaṁ viharato taṁ middhaṁ pahīyetha. 
No ce te evaṁ viharato taṁ middhaṁ pahīyetha, tato tvaṁ, moggallāna, ubho kaṇṇasotāni āviñcheyyāsi, pāṇinā gattāni anumajjeyyāsi. 
Ṭhānaṁ kho panetaṁ vijjati yaṁ te evaṁ viharato taṁ middhaṁ pahīyetha. 
No ce te evaṁ viharato taṁ middhaṁ pahīyetha, tato tvaṁ, moggallāna, uṭṭhāyāsanā udakena akkhīni anumajjitvā disā anuvilokeyyāsi, nakkhattāni tārakarūpāni ullokeyyāsi. 
Ṭhānaṁ kho panetaṁ vijjati yaṁ te evaṁ viharato taṁ middhaṁ pahīyetha. 
No ce te evaṁ viharato taṁ middhaṁ pahīyetha, tato tvaṁ, moggallāna, ālokasaññaṁ manasi kareyyāsi, divāsaññaṁ adhiṭṭhaheyyāsi—
yathā divā tathā rattiṁ yathā rattiṁ tathā divā. 
Iti vivaṭena cetasā apariyonaddhena sappabhāsaṁ cittaṁ bhāveyyāsi. 
Ṭhānaṁ kho panetaṁ vijjati yaṁ te evaṁ viharato taṁ middhaṁ pahīyetha. 
No ce te evaṁ viharato taṁ middhaṁ pahīyetha, tato tvaṁ, moggallāna, pacchāpuresaññī caṅkamaṁ adhiṭṭhaheyyāsi antogatehi indriyehi abahigatena mānasena. 
Ṭhānaṁ kho panetaṁ vijjati yaṁ te evaṁ viharato taṁ middhaṁ pahīyetha. 
No ce te evaṁ viharato taṁ middhaṁ pahīyetha, tato tvaṁ, moggallāna, dakkhiṇena passena sīhaseyyaṁ kappeyyāsi pāde pādaṁ accādhāya sato sampajāno uṭṭhānasaññaṁ manasi karitvā. 
Paṭibuddhena ca te, moggallāna, khippaññeva paccuṭṭhātabbaṁ: 
‘na seyyasukhaṁ na passasukhaṁ na middhasukhaṁ anuyutto viharissāmī’ti. 
Evañhi te, moggallāna, sikkhitabbaṁ. 
Tasmātiha, moggallāna, evaṁ sikkhitabbaṁ: 
‘na uccāsoṇḍaṁ paggahetvā kulāni upasaṅkamissāmī’ti. 
Evañhi te, moggallāna, sikkhitabbaṁ. 
Sace, moggallāna, bhikkhu uccāsoṇḍaṁ paggahetvā kulāni upasaṅkamati, santi hi, moggallāna, kulesu kiccakaraṇīyāni. 
Yehi manussā āgataṁ bhikkhuṁ na manasi karonti, tatra bhikkhussa evaṁ hoti: 
‘kosu nāma idāni maṁ imasmiṁ kule paribhindi, virattarūpā dānime mayi manussā’ti. 
Itissa alābhena maṅkubhāvo, maṅkubhūtassa uddhaccaṁ, uddhatassa asaṁvaro, asaṁvutassa ārā cittaṁ samādhimhā. 
Tasmātiha, moggallāna, evaṁ sikkhitabbaṁ: 
‘na viggāhikakathaṁ kathessāmī’ti. 
Evañhi te, moggallāna, sikkhitabbaṁ. 
Viggāhikāya, moggallāna, kathāya sati kathābāhullaṁ pāṭikaṅkhaṁ, kathābāhulle sati uddhaccaṁ, uddhatassa asaṁvaro, asaṁvutassa ārā cittaṁ samādhimhā. 
Nāhaṁ, moggallāna, sabbeheva saṁsaggaṁ vaṇṇayāmi. 
Na panāhaṁ, moggallāna, sabbeheva saṁsaggaṁ na vaṇṇayāmi. 
Sagahaṭṭhapabbajitehi kho ahaṁ, moggallāna, saṁsaggaṁ na vaṇṇayāmi. 
Yāni ca kho tāni senāsanāni appasaddāni appanigghosāni vijanavātāni manussarāhasseyyakāni paṭisallānasāruppāni tathārūpehi senāsanehi saṁsaggaṁ vaṇṇayāmī”ti. 
Evaṁ vutte, āyasmā mahāmoggallāno bhagavantaṁ etadavoca: 
“kittāvatā nu kho, bhante, bhikkhu saṅkhittena taṇhāsaṅkhayavimutto hoti accantaniṭṭho accantayogakkhemī accantabrahmacārī accantapariyosāno seṭṭho devamanussānan”ti? 
“Idha, moggallāna, bhikkhuno sutaṁ hoti: 
‘sabbe dhammā nālaṁ abhinivesāyā’ti; 
evañcetaṁ, moggallāna, bhikkhuno sutaṁ hoti: 
‘sabbe dhammā nālaṁ abhinivesāyā’ti. 
So sabbaṁ dhammaṁ abhijānāti, sabbaṁ dhammaṁ abhiññāya sabbaṁ dhammaṁ parijānāti. Sabbaṁ dhammaṁ pariññāya yaṁ kiñci vedanaṁ vediyati sukhaṁ vā dukkhaṁ vā adukkhamasukhaṁ vā. 
So tāsu vedanāsu aniccānupassī viharati, virāgānupassī viharati, nirodhānupassī viharati, paṭinissaggānupassī viharati. 
So tāsu vedanāsu aniccānupassī viharanto virāgānupassī viharanto nirodhānupassī viharanto paṭinissaggānupassī viharanto na kiñci loke upādiyati, 
anupādiyaṁ na paritassati, aparitassaṁ paccattaṁyeva parinibbāyati. 
‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānāti. 
Ettāvatā kho, moggallāna, bhikkhu saṅkhittena taṇhāsaṅkhayavimutto hoti accantaniṭṭho accantayogakkhemī accantabrahmacārī accantapariyosāno seṭṭho devamanussānan”ti. 
Aṭṭhamaṁ. 

Aṅguttara Nikāya 7.62 
6. Abyākatavagga 
Mettasutta 
“Mā, bhikkhave, puññānaṁ bhāyittha. 
Sukhassetaṁ, bhikkhave, adhivacanaṁ yadidaṁ puññāni. 
Abhijānāmi kho panāhaṁ, bhikkhave, dīgharattaṁ katānaṁ puññānaṁ dīgharattaṁ iṭṭhaṁ kantaṁ manāpaṁ vipākaṁ paccanubhūtaṁ. 
Satta vassāni mettacittaṁ bhāvesiṁ. 
Satta vassāni mettacittaṁ bhāvetvā satta saṁvaṭṭavivaṭṭakappe nayimaṁ lokaṁ punāgamāsiṁ. 
Saṁvaṭṭamāne sudāhaṁ, bhikkhave, loke ābhassarūpago homi, 
vivaṭṭamāne loke suññaṁ brahmavimānaṁ upapajjāmi. 
Tatra sudaṁ, bhikkhave, brahmā homi mahābrahmā abhibhū anabhibhūto aññadatthudaso vasavattī. 
Chattiṁsakkhattuṁ kho panāhaṁ, bhikkhave, sakko ahosiṁ devānamindo; 
anekasatakkhattuṁ rājā ahosiṁ cakkavattī dhammiko dhammarājā cāturanto vijitāvī janapadatthāvariyappatto sattaratanasamannāgato. 
Tassa mayhaṁ, bhikkhave, imāni satta ratanāni ahesuṁ, seyyathidaṁ—
cakkaratanaṁ, hatthiratanaṁ, assaratanaṁ, maṇiratanaṁ, itthiratanaṁ, gahapatiratanaṁ, pariṇāyakaratanameva sattamaṁ. 
Parosahassaṁ kho pana me, bhikkhave, puttā ahesuṁ sūrā vīraṅgarūpā parasenappamaddanā. 
So imaṁ pathaviṁ sāgarapariyantaṁ adaṇḍena asatthena dhammena abhivijiya ajjhāvasinti. 
Passa puññānaṁ vipākaṁ, 
Kusalānaṁ sukhesino; 
Mettaṁ cittaṁ vibhāvetvā, 
Satta vassāni bhikkhavo; 
Sattasaṁvaṭṭavivaṭṭakappe, 
Nayimaṁ lokaṁ punāgamiṁ. 
Saṁvaṭṭamāne lokamhi, 
homi ābhassarūpago; 
Vivaṭṭamāne lokasmiṁ, 
suññabrahmūpago ahuṁ. 
Sattakkhattuṁ mahābrahmā, 
vasavattī tadā ahuṁ; 
Chattiṁsakkhattuṁ devindo, 
devarajjamakārayiṁ. 
Cakkavattī ahuṁ rājā, 
jambumaṇḍassa issaro; 
Muddhāvasitto khattiyo, 
manussādhipatī ahuṁ. 
Adaṇḍena asatthena, 
vijeyya pathaviṁ imaṁ; 
Asāhasena kammena, 
samena manusāsi taṁ. 
Dhammena rajjaṁ kāretvā, 
asmiṁ pathavimaṇḍale; 
Mahaddhane mahābhoge, 
aḍḍhe ajāyihaṁ kule. 
Sabbakāmehi sampanne, 
ratanehi ca sattahi; 
Buddhā saṅgāhakā loke, 
tehi etaṁ sudesitaṁ. 
Eso hetu mahantassa, 
pathabyo me na vipajjati; 
Pahūtavittūpakaraṇo, 
rājā hoti patāpavā. 
Iddhimā yasavā hoti, 
jambumaṇḍassa issaro; 
Ko sutvā nappasīdeyya, 
api kaṇhābhijātiyo. 
Tasmā hi attakāmena, 
mahattamabhikaṅkhatā; 
Saddhammo garukātabbo, 
saraṁ buddhānasāsanan”ti. 
Navamaṁ. 

Aṅguttara Nikāya 7.63 
6. Abyākatavagga 
Bhariyāsutta 
Atha kho bhagavā pubbaṇhasamayaṁ nivāsetvā pattacīvaramādāya yena anāthapiṇḍikassa gahapatissa nivesanaṁ tenupasaṅkami; upasaṅkamitvā paññatte āsane nisīdi. 
Tena kho pana samayena anāthapiṇḍikassa gahapatissa nivesane manussā uccāsaddā mahāsaddā honti. 
Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca: 
“Kiṁ nu te, gahapati, nivesane manussā uccāsaddā mahāsaddā kevaṭṭā maññe macchavilope”ti? 
“Ayaṁ, bhante, sujātā gharasuṇhā aḍḍhakulā ānītā. 
Sā neva sassuṁ ādiyati, na sasuraṁ ādiyati, na sāmikaṁ ādiyati, bhagavantampi na sakkaroti na garuṁ karoti na māneti na pūjetī”ti. 
Atha kho bhagavā sujātaṁ gharasuṇhaṁ āmantesi: 
“ehi, sujāte”ti. 
“Evaṁ, bhante”ti kho sujātā gharasuṇhā bhagavato paṭissutvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho sujātaṁ gharasuṇhaṁ bhagavā etadavoca: 
“Satta kho imā, sujāte, purisassa bhariyāyo. 
Katamā satta? 
Vadhakasamā, corīsamā, ayyasamā, mātāsamā, bhaginīsamā, sakhīsamā, dāsīsamā. 
Imā kho, sujāte, satta purisassa bhariyāyo. 
Tāsaṁ tvaṁ katamā”ti? 
“Na kho ahaṁ, bhante, imassa bhagavatā saṅkhittena bhāsitassa vitthārena atthaṁ ājānāmi. 
Sādhu me, bhante, bhagavā tathā dhammaṁ desetu yathāhaṁ imassa bhagavatā saṅkhittena bhāsitassa vitthārena atthaṁ jāneyyan”ti. 
“Tena hi, sujāte, suṇāhi, sādhukaṁ manasi karohi; bhāsissāmī”ti. 
“Evaṁ, bhante”ti kho sujātā gharasuṇhā bhagavato paccassosi. 
Bhagavā etadavoca: 
“Paduṭṭhacittā ahitānukampinī, 
Aññesu rattā atimaññate patiṁ; 
Dhanena kītassa vadhāya ussukā, 
Yā evarūpā purisassa bhariyā; 
‘Vadhā ca bhariyā’ti ca sā pavuccati. 
Yaṁ itthiyā vindati sāmiko dhanaṁ, 
Sippaṁ vaṇijjañca kasiṁ adhiṭṭhahaṁ; 
Appampi tassa apahātumicchati, 
Yā evarūpā purisassa bhariyā; 
‘Corī ca bhariyā’ti ca sā pavuccati. 
Akammakāmā alasā mahagghasā, 
Pharusā ca caṇḍī duruttavādinī; 
Uṭṭhāyakānaṁ abhibhuyya vattati, 
Yā evarūpā purisassa bhariyā; 
‘Ayyā ca bhariyā’ti ca sā pavuccati. 
Yā sabbadā hoti hitānukampinī, 
Mātāva puttaṁ anurakkhate patiṁ; 
Tato dhanaṁ sambhatamassa rakkhati, 
Yā evarūpā purisassa bhariyā; 
‘Mātā ca bhariyā’ti ca sā pavuccati. 
Yathāpi jeṭṭhā bhaginī kaniṭṭhakā, 
Sagāravā hoti sakamhi sāmike; 
Hirīmanā bhattuvasānuvattinī, 
Yā evarūpā purisassa bhariyā; 
‘Bhaginī ca bhariyā’ti ca sā pavuccati. 
Yācīdha disvāna patiṁ pamodati, 
Sakhī sakhāraṁva cirassamāgataṁ; 
Koleyyakā sīlavatī patibbatā, 
Yā evarūpā purisassa bhariyā; 
‘Sakhī ca bhariyā’ti ca sā pavuccati. 
Akkuddhasantā vadhadaṇḍatajjitā, 
Aduṭṭhacittā patino titikkhati; 
Akkodhanā bhattuvasānuvattinī, 
Yā evarūpā purisassa bhariyā; 
‘Dāsī ca bhariyā’ti ca sā pavuccati. 
Yācīdha bhariyā vadhakāti vuccati, 
‘Corī ca ayyā’ti ca yā pavuccati; 
Dussīlarūpā pharusā anādarā, 
Kāyassa bhedā nirayaṁ vajanti tā. 
Yācīdha mātā bhaginī sakhīti ca, 
‘Dāsī ca bhariyā’ti ca sā pavuccati; 
Sīle ṭhitattā cirarattasaṁvutā, 
Kāyassa bhedā sugatiṁ vajanti tāti. 
Imā kho, sujāte, satta purisassa bhariyāyo. 
Tāsaṁ tvaṁ katamā”ti? 
“Ajjatagge maṁ, bhante, bhagavā dāsīsamaṁ sāmikassa bhariyaṁ dhāretū”ti. 
Dasamaṁ. 

Aṅguttara Nikāya 7 
11. Rāgapeyyāla 
~ 
“Dosassa …pe… 
mohassa … 
kodhassa … 
upanāhassa … 
makkhassa … 
paḷāsassa … 
issāya … 
macchariyassa … 
māyāya … 
sāṭheyyassa … 
thambhassa … 
sārambhassa … 
mānassa … 
atimānassa … 
madassa … 
pamādassa abhiññāya …pe… 
pariññāya … 
parikkhayāya … 
pahānāya … 
khayāya … 
vayāya … 
virāgāya … 
nirodhāya … 
cāgāya … 
paṭinissaggāya …pe… 
ime satta dhammā bhāvetabbā”ti. 
Idamavoca bhagavā. 
Attamanā te bhikkhū bhagavato bhāsitaṁ abhinandunti. 
Rāgapeyyālaṁ niṭṭhitaṁ. 
Sattakanipātapāḷi niṭṭhitā. 

Aṅguttara Nikāya 7.64 
6. Abyākatavagga 
Kodhanasutta 
“Sattime, bhikkhave, dhammā sapattakantā sapattakaraṇā kodhanaṁ āgacchanti itthiṁ vā purisaṁ vā. 
Katame satta? 
Idha, bhikkhave, sapatto sapattassa evaṁ icchati: 
‘aho vatāyaṁ dubbaṇṇo assā’ti. 
Taṁ kissa hetu? 
Na, bhikkhave, sapatto sapattassa vaṇṇavatāya nandati. 
Kodhanoyaṁ, bhikkhave, purisapuggalo kodhābhibhūto kodhapareto, kiñcāpi so hoti sunhāto suvilitto kappitakesamassu odātavatthavasano; 
atha kho so dubbaṇṇova hoti kodhābhibhūto. 
Ayaṁ, bhikkhave, paṭhamo dhammo sapattakanto sapattakaraṇo kodhanaṁ āgacchati itthiṁ vā purisaṁ vā. 
Puna caparaṁ, bhikkhave, sapatto sapattassa evaṁ icchati: 
‘aho vatāyaṁ dukkhaṁ sayeyyā’ti. 
Taṁ kissa hetu? 
Na, bhikkhave, sapatto sapattassa sukhaseyyāya nandati. 
Kodhanoyaṁ, bhikkhave, purisapuggalo kodhābhibhūto kodhapareto, kiñcāpi so pallaṅke seti gonakatthate paṭalikatthate kadalimigapavarapaccattharaṇe sauttaracchade ubhatolohitakūpadhāne; 
atha kho so dukkhaññeva seti kodhābhibhūto. 
Ayaṁ, bhikkhave, dutiyo dhammo sapattakanto sapattakaraṇo kodhanaṁ āgacchati itthiṁ vā purisaṁ vā. 
Puna caparaṁ, bhikkhave, sapatto sapattassa evaṁ icchati: 
‘aho vatāyaṁ na pacurattho assā’ti. 
Taṁ kissa hetu? 
Na, bhikkhave, sapatto sapattassa pacuratthatāya nandati. 
Kodhanoyaṁ, bhikkhave, purisapuggalo kodhābhibhūto kodhapareto, anatthampi gahetvā ‘attho me gahito’ti maññati, atthampi gahetvā ‘anattho me gahito’ti maññati. 
Tassime dhammā aññamaññaṁ vipaccanīkā gahitā dīgharattaṁ ahitāya dukkhāya saṁvattanti kodhābhibhūtassa. 
Ayaṁ, bhikkhave, tatiyo dhammo sapattakanto sapattakaraṇo kodhanaṁ āgacchati itthiṁ vā purisaṁ vā. 
Puna caparaṁ, bhikkhave, sapatto sapattassa evaṁ icchati: 
‘aho vatāyaṁ na bhogavā assā’ti. 
Taṁ kissa hetu? 
Na, bhikkhave, sapatto sapattassa bhogavatāya nandati. 
Kodhanassa, bhikkhave, purisapuggalassa kodhābhibhūtassa kodhaparetassa, yepissa te honti bhogā uṭṭhānavīriyādhigatā bāhābalaparicitā sedāvakkhittā dhammikā dhammaladdhā, tepi rājāno rājakosaṁ pavesenti kodhābhibhūtassa. 
Ayaṁ, bhikkhave, catuttho dhammo sapattakanto sapattakaraṇo kodhanaṁ āgacchati itthiṁ vā purisaṁ vā. 
Puna caparaṁ, bhikkhave, sapatto sapattassa evaṁ icchati: 
‘aho vatāyaṁ na yasavā assā’ti. 
Taṁ kissa hetu? 
Na, bhikkhave, sapatto sapattassa yasavatāya nandati. 
Kodhanoyaṁ, bhikkhave, purisapuggalo kodhābhibhūto kodhapareto, yopissa so hoti yaso appamādādhigato, tamhāpi dhaṁsati kodhābhibhūto. 
Ayaṁ, bhikkhave, pañcamo dhammo sapattakanto sapattakaraṇo kodhanaṁ āgacchati itthiṁ vā purisaṁ vā. 
Puna caparaṁ, bhikkhave, sapatto sapattassa evaṁ icchati: 
‘aho vatāyaṁ na mittavā assā’ti. 
Taṁ kissa hetu? 
Na, bhikkhave, sapatto sapattassa mittavatāya nandati. 
Kodhanaṁ, bhikkhave, purisapuggalaṁ kodhābhibhūtaṁ kodhaparetaṁ, yepissa te honti mittāmaccā ñātisālohitā, tepi ārakā parivajjanti kodhābhibhūtaṁ. 
Ayaṁ, bhikkhave, chaṭṭho dhammo sapattakanto sapattakaraṇo kodhanaṁ āgacchati itthiṁ vā purisaṁ vā. 
Puna caparaṁ, bhikkhave, sapatto sapattassa evaṁ icchati: 
‘aho vatāyaṁ kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyyā’ti. 
Taṁ kissa hetu? 
Na, bhikkhave, sapatto sapattassa sugatigamane nandati. 
Kodhanoyaṁ, bhikkhave, purisapuggalo kodhābhibhūto kodhapareto kāyena duccaritaṁ carati, vācāya duccaritaṁ carati, manasā duccaritaṁ carati. 
So kāyena duccaritaṁ caritvā vācāya …pe… 
kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati kodhābhibhūto. 
Ayaṁ, bhikkhave, sattamo dhammo sapattakanto sapattakaraṇo kodhanaṁ āgacchati itthiṁ vā purisaṁ vā. 
Ime kho, bhikkhave, satta dhammā sapattakantā sapattakaraṇā kodhanaṁ āgacchanti itthiṁ vā purisaṁ vāti. 
Kodhano dubbaṇṇo hoti, 
atho dukkhampi seti so; 
Atho atthaṁ gahetvāna, 
anatthaṁ adhipajjati. 
Tato kāyena vācāya, 
vadhaṁ katvāna kodhano; 
Kodhābhibhūto puriso, 
dhanajāniṁ nigacchati. 
Kodhasammadasammatto, 
āyasakyaṁ nigacchati; 
Ñātimittā suhajjā ca, 
parivajjanti kodhanaṁ. 
Anatthajanano kodho, 
kodho cittappakopano; 
Bhayamantarato jātaṁ, 
taṁ jano nāvabujjhati. 
Kuddho atthaṁ na jānāti, 
kuddho dhammaṁ na passati; 
Andhatamaṁ tadā hoti, 
yaṁ kodho sahate naraṁ. 
Yaṁ kuddho uparodheti, 
sukaraṁ viya dukkaraṁ; 
Pacchā so vigate kodhe, 
aggidaḍḍhova tappati. 
Dummaṅkuyaṁ padasseti, 
dhūmaṁ dhūmīva pāvako; 
Yato patāyati kodho, 
yena kujjhanti mānavā. 
Nāssa hirī na ottappaṁ, 
na vāco hoti gāravo; 
Kodhena abhibhūtassa, 
na dīpaṁ hoti kiñcanaṁ. 
Tapanīyāni kammāni, 
yāni dhammehi ārakā; 
Tāni ārocayissāmi, 
taṁ suṇātha yathā tathaṁ. 
Kuddho hi pitaraṁ hanti, 
hanti kuddho samātaraṁ; 
Kuddho hi brāhmaṇaṁ hanti, 
hanti kuddho puthujjanaṁ. 
Yāya mātu bhato poso, 
imaṁ lokaṁ avekkhati; 
Tampi pāṇadadiṁ santiṁ, 
hanti kuddho puthujjano. 
Attūpamā hi te sattā, 
attā hi paramo piyo; 
Hanti kuddho puthuttānaṁ, 
nānārūpesu mucchito. 
Asinā hanti attānaṁ, 
visaṁ khādanti mucchitā; 
Rajjuyā bajjha mīyanti, 
pabbatāmapi kandare. 
Bhūnahaccāni kammāni, 
attamāraṇiyāni ca; 
Karontā nāvabujjhanti, 
kodhajāto parābhavo. 
Itāyaṁ kodharūpena, 
maccupāso guhāsayo; 
Taṁ damena samucchinde, 
paññāvīriyena diṭṭhiyā. 
Yathā metaṁ akusalaṁ, 
samucchindetha paṇḍito; 
Tatheva dhamme sikkhetha, 
mā no dummaṅkuyaṁ ahu. 
Vītakodhā anāyāsā, 
Vītalobhā anussukā; 
Dantā kodhaṁ pahantvāna, 
Parinibbanti anāsavā”ti. 
Ekādasamaṁ. 
Abyākatavaggo chaṭṭho. 
Tassuddānaṁ 
Abyākato purisagati, 
Tissa sīha arakkhiyaṁ; 
Kimilaṁ satta pacalā, 
Mettā bhariyā kodhekādasāti. 

Aṅguttara Nikāya 7.65 
7. Mahāvagga 
Hirīottappasutta 
“Hirottappe, bhikkhave, asati hirottappavipannassa hatūpaniso hoti indriyasaṁvaro; 
indriyasaṁvare asati indriyasaṁvaravipannassa hatūpanisaṁ hoti sīlaṁ; 
sīle asati sīlavipannassa hatūpaniso hoti sammāsamādhi; 
sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ; 
yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo; 
nibbidāvirāge asati nibbidāvirāgavipannassa hatūpanisaṁ hoti vimuttiñāṇadassanaṁ. 
Seyyathāpi, bhikkhave, rukkho sākhāpalāsavipanno. 
Tassa papaṭikāpi na pāripūriṁ gacchati, tacopi pheggupi sāropi na pāripūriṁ gacchati. 
Evamevaṁ kho, bhikkhave, hirottappe asati hirottappavipannassa hatūpaniso hoti indriyasaṁvaro; 
indriyasaṁvare asati indriyasaṁvaravipannassa hatūpanisaṁ hoti sīlaṁ; 
sīle asati sīlavipannassa hatūpaniso hoti sammāsamādhi; 
sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ; 
yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo; 
nibbidāvirāge asati nibbidāvirāgavipannassa hatūpanisaṁ hoti vimuttiñāṇadassanaṁ. 
Hirottappe, bhikkhave, sati hirottappasampannassa upanisasampanno hoti indriyasaṁvaro; 
indriyasaṁvare sati indriyasaṁvarasampannassa upanisasampannaṁ hoti sīlaṁ; 
sīle sati sīlasampannassa upanisasampanno hoti sammāsamādhi; 
sammāsamādhimhi sati sammāsamādhisampannassa upanisasampannaṁ hoti yathābhūtañāṇadassanaṁ; 
yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo; 
nibbidāvirāge sati nibbidāvirāgasampannassa upanisasampannaṁ hoti vimuttiñāṇadassanaṁ. 
Seyyathāpi, bhikkhave, rukkho sākhāpalāsasampanno. Tassa papaṭikāpi pāripūriṁ gacchati, tacopi pheggupi sāropi pāripūriṁ gacchati. 
Evamevaṁ kho, bhikkhave, hirottappe sati hirottappasampannassa upanisasampanno hoti …pe… 
vimuttiñāṇadassanan”ti. 
Paṭhamaṁ. 

Aṅguttara Nikāya 7.66 
7. Mahāvagga 
Sattasūriyasutta 
Evaṁ me sutaṁ—
ekaṁ samayaṁ bhagavā vesāliyaṁ viharati ambapālivane. 
Tatra kho bhagavā bhikkhū āmantesi: 
“bhikkhavo”ti. 
“Bhadante”ti te bhikkhū bhagavato paccassosuṁ. 
Bhagavā etadavoca: 
“Aniccā, bhikkhave, saṅkhārā; 
adhuvā, bhikkhave, saṅkhārā; 
anassāsikā, bhikkhave, saṅkhārā. 
Yāvañcidaṁ, bhikkhave, alameva sabbasaṅkhāresu nibbindituṁ alaṁ virajjituṁ alaṁ vimuccituṁ. 
Sineru, bhikkhave, pabbatarājā caturāsītiyojanasahassāni āyāmena, caturāsītiyojanasahassāni vitthārena, caturāsītiyojanasahassāni mahāsamudde ajjhogāḷho, caturāsītiyojanasahassāni mahāsamuddā accuggato. 
Hoti kho so, bhikkhave, samayo yaṁ kadāci karahaci dīghassa addhuno accayena bahūni vassāni bahūni vassasatāni bahūni vassasahassāni bahūni vassasatasahassāni devo na vassati. 
Deve kho pana, bhikkhave, avassante ye kecime bījagāmabhūtagāmā osadhitiṇavanappatayo te ussussanti visussanti, na bhavanti. 
Evaṁ aniccā, bhikkhave, saṅkhārā; 
evaṁ adhuvā, bhikkhave, saṅkhārā …pe… 
alaṁ vimuccituṁ. 
Hoti kho so, bhikkhave, samayo yaṁ kadāci karahaci dīghassa addhuno accayena dutiyo sūriyo pātubhavati. 
Dutiyassa, bhikkhave, sūriyassa pātubhāvā yā kāci kunnadiyo kusobbhā tā ussussanti visussanti, na bhavanti. 
Evaṁ aniccā, bhikkhave, saṅkhārā …pe… 
alaṁ vimuccituṁ. 
Hoti kho so, bhikkhave, samayo yaṁ kadāci karahaci dīghassa addhuno accayena tatiyo sūriyo pātubhavati. 
Tatiyassa, bhikkhave, sūriyassa pātubhāvā yā kāci mahānadiyo, seyyathidaṁ—
gaṅgā, yamunā, aciravatī, sarabhū, mahī, tā ussussanti visussanti, na bhavanti. 
Evaṁ aniccā, bhikkhave, saṅkhārā …pe… 
alaṁ vimuccituṁ. 
Hoti kho so, bhikkhave, samayo yaṁ kadāci karahaci dīghassa addhuno accayena catuttho sūriyo pātubhavati. 
Catutthassa, bhikkhave, sūriyassa pātubhāvā ye te mahāsarā yato imā mahānadiyo pavattanti, seyyathidaṁ—
anotattā, sīhapapātā, rathakārā, kaṇṇamuṇḍā, kuṇālā, chaddantā, mandākiniyā, tā ussussanti visussanti, na bhavanti. 
Evaṁ aniccā, bhikkhave, saṅkhārā …pe… 
alaṁ vimuccituṁ. 
Hoti kho so, bhikkhave, samayo yaṁ kadāci karahaci dīghassa addhuno accayena pañcamo sūriyo pātubhavati. 
Pañcamassa, bhikkhave, sūriyassa pātubhāvā yojanasatikānipi mahāsamudde udakāni ogacchanti, dviyojanasatikānipi mahāsamudde udakāni ogacchanti, tiyojanasatikānipi, catuyojanasatikānipi, pañcayojanasatikānipi, chayojanasatikānipi, sattayojanasatikānipi mahāsamudde udakāni ogacchanti; 
sattatālampi mahāsamudde udakaṁ saṇṭhāti, chatālampi, pañcatālampi, catutālampi, titālampi, dvitālampi, tālamattampi mahāsamudde udakaṁ saṇṭhāti; 
sattaporisampi mahāsamudde udakaṁ saṇṭhāti, chaporisampi, pañcaporisampi, catuporisampi, tiporisampi, dviporisampi, porisampi, aḍḍhaporisampi, kaṭimattampi, jaṇṇukāmattampi, gopphakamattampi mahāsamudde udakaṁ saṇṭhāti. 
Seyyathāpi, bhikkhave, saradasamaye thullaphusitake deve vassante tattha tattha gopadesu udakāni ṭhitāni honti; 
evamevaṁ kho, bhikkhave, tattha tattha gopphakamattāni mahāsamudde udakāni ṭhitāni honti. 
Pañcamassa, bhikkhave, sūriyassa pātubhāvā aṅgulipabbamattampi mahāsamudde udakaṁ na hoti. 
Evaṁ aniccā, bhikkhave, saṅkhārā …pe… 
alaṁ vimuccituṁ. 
Hoti kho so, bhikkhave, samayo yaṁ kadāci karahaci dīghassa addhuno accayena chaṭṭho sūriyo pātubhavati. 
Chaṭṭhassa, bhikkhave, sūriyassa pātubhāvā ayañca mahāpathavī sineru ca pabbatarājā dhūmāyanti sandhūmāyanti sampadhūmāyanti. 
Seyyathāpi, bhikkhave, kumbhakārapāko ālepito paṭhamaṁ dhūmeti sandhūmeti sampadhūmeti; 
evamevaṁ kho, bhikkhave, chaṭṭhassa sūriyassa pātubhāvā ayañca mahāpathavī sineru ca pabbatarājā dhūmāyanti sandhūmāyanti sampadhūmāyanti. 
Evaṁ aniccā, bhikkhave, saṅkhārā …pe… 
alaṁ vimuccituṁ. 
Hoti kho so, bhikkhave, samayo yaṁ kadāci karahaci dīghassa addhuno accayena sattamo sūriyo pātubhavati. 
Sattamassa, bhikkhave, sūriyassa pātubhāvā ayañca mahāpathavī sineru ca pabbatarājā ādippanti pajjalanti ekajālā bhavanti. 
Imissā ca, bhikkhave, mahāpathaviyā sinerussa ca pabbatarājassa jhāyamānānaṁ dayhamānānaṁ acci vātena khittā yāva brahmalokāpi gacchati. 
Sinerussa, bhikkhave, pabbatarājassa jhāyamānassa dayhamānassa vinassamānassa mahatā tejokhandhena abhibhūtassa yojanasatikānipi kūṭāni palujjanti dviyojanasatikānipi, tiyojanasatikānipi, catuyojanasatikānipi, pañcayojanasatikānipi kūṭāni palujjanti. 
Imissā ca, bhikkhave, mahāpathaviyā sinerussa ca pabbatarājassa jhāyamānānaṁ dayhamānānaṁ neva chārikā paññāyati na masi. 
Seyyathāpi, bhikkhave, sappissa vā telassa vā jhāyamānassa dayhamānassa neva chārikā paññāyati na masi; 
evamevaṁ kho, bhikkhave, imissā ca mahāpathaviyā sinerussa ca pabbatarājassa jhāyamānānaṁ dayhamānānaṁ neva chārikā paññāyati na masi. 
Evaṁ aniccā, bhikkhave, saṅkhārā; 
evaṁ adhuvā, bhikkhave, saṅkhārā; 
evaṁ anassāsikā, bhikkhave, saṅkhārā. 
Yāvañcidaṁ, bhikkhave, alameva sabbasaṅkhāresu nibbindituṁ alaṁ virajjituṁ alaṁ vimuccituṁ. 
Tatra, bhikkhave, ko mantā ko saddhātā: 
‘ayañca pathavī sineru ca pabbatarājā dayhissanti vinassissanti, na bhavissantī’ti aññatra diṭṭhapadehi? 
Bhūtapubbaṁ, bhikkhave, sunetto nāma satthā ahosi titthakaro kāmesu vītarāgo. 
Sunettassa kho pana, bhikkhave, satthuno anekāni sāvakasatāni ahesuṁ. 
Sunetto, bhikkhave, satthā sāvakānaṁ brahmalokasahabyatāya dhammaṁ desesi. 
Ye kho pana, bhikkhave, sunettassa satthuno brahmalokasahabyatāya dhammaṁ desentassa sabbena sabbaṁ sāsanaṁ ājāniṁsu te kāyassa bhedā paraṁ maraṇā sugatiṁ brahmalokaṁ upapajjiṁsu. 
Ye na sabbena sabbaṁ sāsanaṁ ājāniṁsu te kāyassa bhedā paraṁ maraṇā appekacce paranimmitavasavattīnaṁ devānaṁ sahabyataṁ upapajjiṁsu, appekacce nimmānaratīnaṁ devānaṁ sahabyataṁ upapajjiṁsu, appekacce tusitānaṁ devānaṁ sahabyataṁ upapajjiṁsu, appekacce yāmānaṁ devānaṁ sahabyataṁ upapajjiṁsu, appekacce tāvatiṁsānaṁ devānaṁ sahabyataṁ upapajjiṁsu, appekacce cātumahārājikānaṁ devānaṁ sahabyataṁ upapajjiṁsu, appekacce khattiyamahāsālānaṁ sahabyataṁ upapajjiṁsu, appekacce brāhmaṇamahāsālānaṁ sahabyataṁ upapajjiṁsu, appekacce gahapatimahāsālānaṁ sahabyataṁ upapajjiṁsu. 
Atha kho, bhikkhave, sunettassa satthuno etadahosi: 
‘na kho metaṁ patirūpaṁ yohaṁ sāvakānaṁ samasamagatiyo assaṁ abhisamparāyaṁ, yannūnāhaṁ uttari mettaṁ bhāveyyan’ti. 
Atha kho, bhikkhave, sunetto satthā satta vassāni mettaṁ cittaṁ bhāvesi. 
Satta vassāni mettaṁ cittaṁ bhāvetvā satta saṁvaṭṭavivaṭṭakappe nayimaṁ lokaṁ punarāgamāsi. 
Saṁvaṭṭamāne sudaṁ, bhikkhave, loke ābhassarūpago hoti. 
Vivaṭṭamāne loke suññaṁ brahmavimānaṁ upapajjati. 
Tatra sudaṁ, bhikkhave, brahmā hoti mahābrahmā abhibhū anabhibhūto aññadatthudaso vasavattī. 
Chattiṁsakkhattuṁ kho pana, bhikkhave, sakko ahosi devānamindo. 
Anekasatakkhattuṁ rājā ahosi cakkavattī dhammiko dhammarājā cāturanto vijitāvī janapadatthāvariyappatto sattaratanasamannāgato. 
Parosahassaṁ kho panassa puttā ahesuṁ sūrā vīraṅgarūpā parasenappamaddanā. 
So imaṁ pathaviṁ sāgarapariyantaṁ adaṇḍena asatthena dhammena abhivijiya ajjhāvasi. 
So hi nāma, bhikkhave, sunetto satthā evaṁ dīghāyuko samāno evaṁ ciraṭṭhitiko aparimutto ahosi: 
jātiyā jarāya maraṇena sokehi paridevehi dukkhehi domanassehi upāyāsehi, ‘aparimutto dukkhasmā’ti vadāmi. 
Taṁ kissa hetu? 
Catunnaṁ dhammānaṁ ananubodhā appaṭivedhā. 
Katamesaṁ catunnaṁ? 
Ariyassa, bhikkhave, sīlassa ananubodhā appaṭivedhā, ariyassa samādhissa ananubodhā appaṭivedhā, ariyāya paññāya ananubodhā appaṭivedhā, ariyāya vimuttiyā ananubodhā appaṭivedhā. 
Tayidaṁ, bhikkhave, ariyaṁ sīlaṁ anubuddhaṁ paṭividdhaṁ, ariyo samādhi anubodho paṭividdho, ariyā paññā anubodhā paṭividdhā, ariyā vimutti anubodhā paṭividdhā, ucchinnā bhavataṇhā, khīṇā bhavanetti, natthi dāni punabbhavo”ti. 
Idamavoca bhagavā. 
Idaṁ vatvāna sugato athāparaṁ etadavoca satthā: 
“Sīlaṁ samādhi paññā ca, 
vimutti ca anuttarā; 
Anubuddhā ime dhammā, 
gotamena yasassinā. 
Iti buddho abhiññāya, 
dhammamakkhāsi bhikkhunaṁ; 
Dukkhassantakaro satthā, 
cakkhumā parinibbuto”ti. 
Dutiyaṁ. 

Aṅguttara Nikāya 7.67 
7. Mahāvagga 
Nagaropamasutta 
“Yato kho, bhikkhave, rañño paccantimaṁ nagaraṁ sattahi nagaraparikkhārehi suparikkhataṁ hoti, catunnañca āhārānaṁ nikāmalābhī hoti akicchalābhī akasiralābhī. 
Idaṁ vuccati, bhikkhave, rañño paccantimaṁ nagaraṁ akaraṇīyaṁ bāhirehi paccatthikehi paccāmittehi. 
Katamehi sattahi nagaraparikkhārehi suparikkhataṁ hoti? 
Idha, bhikkhave, rañño paccantime nagare esikā hoti gambhīranemā sunikhātā acalā asampavedhī. 
Iminā paṭhamena nagaraparikkhārena suparikkhataṁ hoti rañño paccantimaṁ nagaraṁ abbhantarānaṁ guttiyā bāhirānaṁ paṭighātāya. 
Puna caparaṁ, bhikkhave, rañño paccantime nagare parikkhā hoti gambhīrā ceva vitthatā ca. 
Iminā dutiyena nagaraparikkhārena suparikkhataṁ hoti rañño paccantimaṁ nagaraṁ abbhantarānaṁ guttiyā bāhirānaṁ paṭighātāya. 
Puna caparaṁ, bhikkhave, rañño paccantime nagare anupariyāyapatho hoti ucco ceva vitthato ca. 
Iminā tatiyena nagaraparikkhārena suparikkhataṁ hoti rañño paccantimaṁ nagaraṁ abbhantarānaṁ guttiyā bāhirānaṁ paṭighātāya. 
Puna caparaṁ, bhikkhave, rañño paccantime nagare bahuṁ āvudhaṁ sannicitaṁ hoti salākañceva jevanikañca. 
Iminā catutthena nagaraparikkhārena suparikkhataṁ hoti rañño paccantimaṁ nagaraṁ abbhantarānaṁ guttiyā bāhirānaṁ paṭighātāya. 
Puna caparaṁ, bhikkhave, rañño paccantime nagare bahubalakāyo paṭivasati, seyyathidaṁ—
hatthārohā assārohā rathikā dhanuggahā celakā calakā piṇḍadāyakā uggā rājaputtā pakkhandino mahānāgā sūrā cammayodhino dāsakaputtā. 
Iminā pañcamena nagaraparikkhārena suparikkhataṁ hoti rañño paccantimaṁ nagaraṁ abbhantarānaṁ guttiyā bāhirānaṁ paṭighātāya. 
Puna caparaṁ, bhikkhave, rañño paccantime nagare dovāriko hoti paṇḍito byatto medhāvī aññātānaṁ nivāretā ñātānaṁ pavesetā. 
Iminā chaṭṭhena nagaraparikkhārena suparikkhataṁ hoti rañño paccantimaṁ nagaraṁ abbhantarānaṁ guttiyā bāhirānaṁ paṭighātāya. 
Puna caparaṁ, bhikkhave, rañño paccantime nagare pākāro hoti ucco ceva vitthato ca vāsanalepanasampanno ca. 
Iminā sattamena nagaraparikkhārena suparikkhataṁ hoti rañño paccantimaṁ nagaraṁ abbhantarānaṁ guttiyā bāhirānaṁ paṭighātāya. 
Imehi sattahi nagaraparikkhārehi suparikkhataṁ hoti. 
Katamesaṁ catunnaṁ āhārānaṁ nikāmalābhī hoti akicchalābhī akasiralābhī? 
Idha, bhikkhave, rañño paccantime nagare bahuṁ tiṇakaṭṭhodakaṁ sannicitaṁ hoti abbhantarānaṁ ratiyā aparitassāya phāsuvihārāya bāhirānaṁ paṭighātāya. 
Puna caparaṁ, bhikkhave, rañño paccantime nagare bahuṁ sāliyavakaṁ sannicitaṁ hoti abbhantarānaṁ ratiyā aparitassāya phāsuvihārāya bāhirānaṁ paṭighātāya. 
Puna caparaṁ, bhikkhave, rañño paccantime nagare bahuṁ tilamuggamāsāparaṇṇaṁ sannicitaṁ hoti abbhantarānaṁ ratiyā aparitassāya phāsuvihārāya bāhirānaṁ paṭighātāya. 
Puna caparaṁ, bhikkhave, rañño paccantime nagare bahuṁ bhesajjaṁ sannicitaṁ hoti, seyyathidaṁ—
sappi navanītaṁ telaṁ madhu phāṇitaṁ loṇaṁ abbhantarānaṁ ratiyā aparitassāya phāsuvihārāya bāhirānaṁ paṭighātāya. 
Imesaṁ kho, bhikkhave, catunnaṁ āhārānaṁ nikāmalābhī hoti akicchalābhī akasiralābhī. 
Yato kho, bhikkhave, rañño paccantimaṁ nagaraṁ imehi sattahi nagaraparikkhārehi suparikkhataṁ hoti, imesañca catunnaṁ āhārānaṁ nikāmalābhī hoti akicchalābhī akasiralābhī. 
Idaṁ vuccati, bhikkhave, rañño paccantimaṁ nagaraṁ akaraṇīyaṁ bāhirehi paccatthikehi paccāmittehi. 
Evamevaṁ kho, bhikkhave, yato ariyasāvako sattahi saddhammehi samannāgato hoti, catunnañca jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī. 
Ayaṁ vuccati, bhikkhave, ariyasāvako akaraṇīyo mārassa akaraṇīyo pāpimato. 
Katamehi sattahi saddhammehi samannāgato hoti? 
Seyyathāpi, bhikkhave, rañño paccantime nagare esikā hoti gambhīranemā sunikhātā acalā asampavedhī abbhantarānaṁ guttiyā bāhirānaṁ paṭighātāya. 
Evamevaṁ kho, bhikkhave, ariyasāvako saddho hoti, saddahati tathāgatassa bodhiṁ 
‘itipi so …pe… buddho bhagavā’ti. 
Saddhesiko, bhikkhave, ariyasāvako akusalaṁ pajahati, kusalaṁ bhāveti; 
sāvajjaṁ pajahati, anavajjaṁ bhāveti; 
suddhaṁ attānaṁ pariharati. 
Iminā paṭhamena saddhammena samannāgato hoti. 
Seyyathāpi, bhikkhave, rañño paccantime nagare parikkhā hoti gambhīrā ceva vitthatā ca abbhantarānaṁ guttiyā bāhirānaṁ paṭighātāya. 
Evamevaṁ kho, bhikkhave, ariyasāvako hirīmā hoti, hirīyati kāyaduccaritena vacīduccaritena manoduccaritena, hirīyati pāpakānaṁ akusalānaṁ dhammānaṁ samāpattiyā. 
Hirīparikkho kho, bhikkhave, ariyasāvako akusalaṁ pajahati, kusalaṁ bhāveti; 
sāvajjaṁ pajahati, anavajjaṁ bhāveti; 
suddhaṁ attānaṁ pariharati. 
Iminā dutiyena saddhammena samannāgato hoti. 
Seyyathāpi, bhikkhave, rañño paccantime nagare anupariyāyapatho hoti ucco ceva vitthato ca abbhantarānaṁ guttiyā bāhirānaṁ paṭighātāya. 
Evamevaṁ, kho, bhikkhave, ariyasāvako ottappī hoti, ottappati kāyaduccaritena vacīduccaritena manoduccaritena, ottappati pāpakānaṁ akusalānaṁ dhammānaṁ samāpattiyā. 
Ottappapariyāyapatho, bhikkhave, ariyasāvako akusalaṁ pajahati, kusalaṁ bhāveti; 
sāvajjaṁ pajahati, anavajjaṁ bhāveti; 
suddhaṁ attānaṁ pariharati. 
Iminā tatiyena saddhammena samannāgato hoti. 
Seyyathāpi, bhikkhave, rañño paccantime nagare bahuṁ āvudhaṁ sannicitaṁ hoti salākañceva jevanikañca abbhantarānaṁ guttiyā bāhirānaṁ paṭighātāya. 
Evamevaṁ kho, bhikkhave, ariyasāvako bahussuto hoti …pe… diṭṭhiyā suppaṭividdhā. 
Sutāvudho, bhikkhave, ariyasāvako akusalaṁ pajahati, kusalaṁ bhāveti; 
sāvajjaṁ pajahati, anavajjaṁ bhāveti; 
suddhaṁ attānaṁ pariharati. 
Iminā catutthena saddhammena samannāgato hoti. 
Seyyathāpi, bhikkhave, rañño paccantime nagare bahubalakāyo paṭivasati, seyyathidaṁ—
hatthārohā assārohā rathikā dhanuggahā celakā calakā piṇḍadāyakā uggā rājaputtā pakkhandino mahānāgā sūrā cammayodhino dāsakaputtā abbhantarānaṁ guttiyā bāhirānaṁ paṭighātāya. 
Evamevaṁ kho, bhikkhave, ariyasāvako āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu. 
Vīriyabalakāyo, bhikkhave, ariyasāvako akusalaṁ pajahati, kusalaṁ bhāveti; 
sāvajjaṁ pajahati, anavajjaṁ bhāveti; 
suddhaṁ attānaṁ pariharati. 
Iminā pañcamena saddhammena samannāgato hoti. 
Seyyathāpi, bhikkhave, rañño paccantime nagare dovāriko hoti paṇḍito byatto medhāvī aññātānaṁ nivāretā ñātānaṁ pavesetā abbhantarānaṁ guttiyā bāhirānaṁ paṭighātāya. 
Evamevaṁ kho, bhikkhave, ariyasāvako satimā hoti paramena satinepakkena samannāgato cirakatampi cirabhāsitampi saritā anussaritā. 
Satidovāriko, bhikkhave, ariyasāvako akusalaṁ pajahati, kusalaṁ bhāveti; 
sāvajjaṁ pajahati, anavajjaṁ bhāveti; 
suddhaṁ attānaṁ pariharati. 
Iminā chaṭṭhena saddhammena samannāgato hoti. 
Seyyathāpi, bhikkhave, rañño paccantime nagare pākāro hoti ucco ceva vitthato ca vāsanalepanasampanno ca abbhantarānaṁ guttiyā bāhirānaṁ paṭighātāya. 
Evamevaṁ kho, bhikkhave, ariyasāvako paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā. 
Paññāvāsanalepanasampanno, bhikkhave, ariyasāvako akusalaṁ pajahati, kusalaṁ bhāveti; 
sāvajjaṁ pajahati, anavajjaṁ bhāveti; 
suddhaṁ attānaṁ pariharati. 
Iminā sattamena saddhammena samannāgato hoti. 
Imehi sattahi saddhammehi samannāgato hoti. 
Katamesaṁ catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī? 
Seyyathāpi, bhikkhave, rañño paccantime nagare bahuṁ tiṇakaṭṭhodakaṁ sannicitaṁ hoti abbhantarānaṁ ratiyā aparitassāya phāsuvihārāya bāhirānaṁ paṭighātāya. 
Evamevaṁ kho, bhikkhave, ariyasāvako vivicceva kāmehi …pe… paṭhamaṁ jhānaṁ upasampajja viharati 
attano ratiyā aparitassāya phāsuvihārāya okkamanāya nibbānassa. 
Seyyathāpi, bhikkhave, rañño paccantime nagare bahuṁ sāliyavakaṁ sannicitaṁ hoti abbhantarānaṁ ratiyā aparitassāya phāsuvihārāya bāhirānaṁ paṭighātāya. 
Evamevaṁ kho, bhikkhave, ariyasāvako vitakkavicārānaṁ vūpasamā …pe… dutiyaṁ jhānaṁ upasampajja viharati 
attano ratiyā aparitassāya phāsuvihārāya okkamanāya nibbānassa. 
Seyyathāpi, bhikkhave, rañño paccantime nagare bahuṁ tilamuggamāsāparaṇṇaṁ sannicitaṁ hoti abbhantarānaṁ ratiyā aparitassāya phāsuvihārāya bāhirānaṁ paṭighātāya. 
Evamevaṁ kho, bhikkhave, ariyasāvako pītiyā ca virāgā …pe… tatiyaṁ jhānaṁ upasampajja viharati 
attano ratiyā aparitassāya phāsuvihārāya okkamanāya nibbānassa. 
Seyyathāpi, bhikkhave, rañño paccantime nagare bahuṁ bhesajjaṁ sannicitaṁ hoti, seyyathidaṁ—
sappi navanītaṁ telaṁ madhu phāṇitaṁ loṇaṁ abbhantarānaṁ ratiyā aparitassāya phāsuvihārāya bāhirānaṁ paṭighātāya. 
Evamevaṁ kho, bhikkhave, ariyasāvako sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati 
attano ratiyā aparitassāya phāsuvihārāya okkamanāya nibbānassa. 
Imesaṁ catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī. 
Yato kho, bhikkhave, ariyasāvako imehi sattahi saddhammehi samannāgato hoti, imesañca catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī. 
Ayaṁ vuccati, bhikkhave, ariyasāvako akaraṇīyo mārassa akaraṇīyo pāpimato”ti. 
Tatiyaṁ. 

Aṅguttara Nikāya 7.68 
7. Mahāvagga 
Dhammaññūsutta 
“Sattahi, bhikkhave, dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa. 
Katamehi sattahi? 
Idha, bhikkhave, bhikkhu dhammaññū ca hoti atthaññū ca attaññū ca mattaññū ca kālaññū ca parisaññū ca puggalaparoparaññū ca. 
Kathañca, bhikkhave, bhikkhu dhammaññū hoti? 
Idha, bhikkhave, bhikkhu dhammaṁ jānāti—
suttaṁ geyyaṁ veyyākaraṇaṁ gāthaṁ udānaṁ itivuttakaṁ jātakaṁ abbhutadhammaṁ vedallaṁ. 
No ce, bhikkhave, bhikkhu dhammaṁ jāneyya—
suttaṁ geyyaṁ …pe… abbhutadhammaṁ vedallaṁ, nayidha ‘dhammaññū’ti vucceyya. 
Yasmā ca kho, bhikkhave, bhikkhu dhammaṁ jānāti—
suttaṁ geyyaṁ …pe… abbhutadhammaṁ vedallaṁ, tasmā ‘dhammaññū’ti vuccati. 
Iti dhammaññū. 
Atthaññū ca kathaṁ hoti? 
Idha, bhikkhave, bhikkhu tassa tasseva bhāsitassa atthaṁ jānāti: 
‘ayaṁ imassa bhāsitassa attho, ayaṁ imassa bhāsitassa attho’ti. 
No ce, bhikkhave, bhikkhu tassa tasseva bhāsitassa atthaṁ jāneyya: 
‘ayaṁ imassa bhāsitassa attho, ayaṁ imassa bhāsitassa attho’ti, nayidha ‘atthaññū’ti vucceyya. 
Yasmā ca kho, bhikkhave, bhikkhu tassa tasseva bhāsitassa atthaṁ jānāti: 
‘ayaṁ imassa bhāsitassa attho, ayaṁ imassa bhāsitassa attho’ti, tasmā ‘atthaññū’ti vuccati. 
Iti dhammaññū, atthaññū. 
Attaññū ca kathaṁ hoti? 
Idha, bhikkhave, bhikkhu attānaṁ jānāti: 
‘ettakomhi saddhāya sīlena sutena cāgena paññāya paṭibhānenā’ti. 
No ce, bhikkhave, bhikkhu attānaṁ jāneyya: 
‘ettakomhi saddhāya sīlena sutena cāgena paññāya paṭibhānenā’ti, nayidha ‘attaññū’ti vucceyya. 
Yasmā ca, bhikkhave, bhikkhu attānaṁ jānāti: 
‘ettakomhi saddhāya sīlena sutena cā