Sattaka Nipāta — Bảy Pháp

Aṅguttara Nikāya 7.10 
1. Dhanavagga 
Macchariyasutta 
“Sattimāni, bhikkhave, saṁyojanāni. 
Katamāni satta? 
Anunayasaṁyojanaṁ, paṭighasaṁyojanaṁ, diṭṭhisaṁyojanaṁ, vicikicchāsaṁyojanaṁ, mānasaṁyojanaṁ, issāsaṁyojanaṁ, macchariyasaṁyojanaṁ. 
Imāni kho, bhikkhave, satta saṁyojanānī”ti. 
Dasamaṁ. 
Dhanavaggo paṭhamo. 
Tassuddānaṁ 
Dve piyāni balaṁ dhanaṁ, 
Saṅkhittañceva vitthataṁ; 
Uggaṁ saṁyojanañceva, 
Pahānaṁ macchariyena cāti. 

Aṅguttara Nikāya 7.11 
2. Anusayavagga 
Paṭhamaanusayasutta 
“Sattime, bhikkhave, anusayā. 
Katame satta? 
Kāmarāgānusayo, paṭighānusayo, diṭṭhānusayo, vicikicchānusayo, mānānusayo, bhavarāgānusayo, avijjānusayo. 
Ime kho, bhikkhave, satta anusayā”ti. 
Paṭhamaṁ. 

Aṅguttara Nikāya 7.12 
2. Anusayavagga 
Dutiyaanusayasutta 
“Sattannaṁ, bhikkhave, anusayānaṁ pahānāya samucchedāya brahmacariyaṁ vussati. 
Katamesaṁ sattannaṁ? 
Kāmarāgānusayassa pahānāya samucchedāya brahmacariyaṁ vussati, paṭighānusayassa …pe… 
diṭṭhānusayassa … 
vicikicchānusayassa … 
mānānusayassa … 
bhavarāgānusayassa … 
avijjānusayassa pahānāya samucchedāya brahmacariyaṁ vussati. 
Imesaṁ kho, bhikkhave, sattannaṁ anusayānaṁ pahānāya samucchedāya brahmacariyaṁ vussati. 
Yato ca kho, bhikkhave, bhikkhuno kāmarāgānusayo pahīno hoti ucchinnamūlo tālāvatthukato anabhāvaṅkato āyatiṁ anuppādadhammo. 
Paṭighānusayo …pe… 
diṭṭhānusayo … 
vicikicchānusayo … 
mānānusayo … 
bhavarāgānusayo … 
avijjānusayo pahīno hoti ucchinnamūlo tālāvatthukato anabhāvaṅkato āyatiṁ anuppādadhammo. 
Ayaṁ vuccati, bhikkhave, bhikkhu acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassā”ti. 
Dutiyaṁ. 

Aṅguttara Nikāya 7.13 
2. Anusayavagga 
Kulasutta 
“Sattahi, bhikkhave, aṅgehi samannāgataṁ kulaṁ anupagantvā vā nālaṁ upagantuṁ, upagantvā vā nālaṁ upanisīdituṁ. 
Katamehi sattahi? 
Na manāpena paccuṭṭhenti, na manāpena abhivādenti, na manāpena āsanaṁ denti, santamassa pariguhanti, bahukampi thokaṁ denti, paṇītampi lūkhaṁ denti, asakkaccaṁ denti no sakkaccaṁ. 
Imehi kho, bhikkhave, sattahi aṅgehi samannāgataṁ kulaṁ anupagantvā vā nālaṁ upagantuṁ, upagantvā vā nālaṁ upanisīdituṁ. 
Sattahi, bhikkhave, aṅgehi samannāgataṁ kulaṁ anupagantvā vā alaṁ upagantuṁ, upagantvā vā alaṁ upanisīdituṁ. 
Katamehi sattahi? 
Manāpena paccuṭṭhenti, manāpena abhivādenti, manāpena āsanaṁ denti, santamassa na pariguhanti, bahukampi bahukaṁ denti, paṇītampi paṇītaṁ denti, sakkaccaṁ denti no asakkaccaṁ. 
Imehi kho, bhikkhave, sattahi aṅgehi samannāgataṁ kulaṁ anupagantvā vā alaṁ upagantuṁ, upagantvā vā alaṁ upanisīditun”ti. 
Tatiyaṁ. 

Aṅguttara Nikāya 7.14 
2. Anusayavagga 
Puggalasutta 
“Sattime, bhikkhave, puggalā āhuneyyā pāhuneyyā dakkhiṇeyyā añjalikaraṇīyā anuttaraṁ puññakkhettaṁ lokassa. 
Katame satta? 
Ubhatobhāgavimutto, paññāvimutto, kāyasakkhī, diṭṭhippatto, saddhāvimutto, dhammānusārī, saddhānusārī. 
Ime kho, bhikkhave, satta puggalā āhuneyyā pāhuneyyā dakkhiṇeyyā añjalikaraṇīyā anuttaraṁ puññakkhettaṁ lokassā”ti. 
Catutthaṁ. 

Aṅguttara Nikāya 7.15 
2. Anusayavagga 
Udakūpamāsutta 
“Sattime, bhikkhave, udakūpamā puggalā santo saṁvijjamānā lokasmiṁ. 
Katame satta? 
Idha, bhikkhave, ekacco puggalo sakiṁ nimuggo nimuggova hoti; 
idha pana, bhikkhave, ekacco puggalo ummujjitvā nimujjati; 
idha pana, bhikkhave, ekacco puggalo ummujjitvā ṭhito hoti; 
idha pana, bhikkhave, ekacco puggalo ummujjitvā vipassati viloketi; 
idha pana, bhikkhave, ekacco puggalo ummujjitvā patarati; 
idha pana, bhikkhave, ekacco puggalo ummujjitvā patigādhappatto hoti; 
idha pana, bhikkhave, ekacco puggalo ummujjitvā tiṇṇo hoti pāraṅgato thale tiṭṭhati brāhmaṇo. 
Kathañca, bhikkhave, puggalo sakiṁ nimuggo nimuggova hoti? 
Idha, bhikkhave, ekacco puggalo samannāgato hoti ekantakāḷakehi akusalehi dhammehi. 
Evaṁ kho, bhikkhave, puggalo sakiṁ nimuggo nimuggova hoti. 
Kathañca, bhikkhave, puggalo ummujjitvā nimujjati? 
Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī …pe… 
sādhu ottappaṁ … 
sādhu vīriyaṁ … 
sādhu paññā kusalesu dhammesūti. 
Tassa sā saddhā neva tiṭṭhati no vaḍḍhati hāyatiyeva, tassa sā hirī …pe… 
tassa taṁ ottappaṁ … 
tassa taṁ vīriyaṁ … 
tassa sā paññā neva tiṭṭhati no vaḍḍhati hāyatiyeva. 
Evaṁ kho, bhikkhave, puggalo ummujjitvā nimujjati. 
Kathañca, bhikkhave, puggalo ummujjitvā ṭhito hoti? 
Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī …pe… 
sādhu ottappaṁ … 
sādhu vīriyaṁ … 
sādhu paññā kusalesu dhammesūti. 
Tassa sā saddhā neva hāyati no vaḍḍhati ṭhitā hoti. 
Tassa sā hirī …pe… 
tassa taṁ ottappaṁ … 
tassa taṁ vīriyaṁ … 
tassa sā paññā neva hāyati no vaḍḍhati ṭhitā hoti. 
Evaṁ kho, bhikkhave, puggalo ummujjitvā ṭhito hoti. 
Kathañca, bhikkhave, puggalo ummujjitvā vipassati viloketi? 
Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī …pe… 
sādhu ottappaṁ … 
sādhu vīriyaṁ … 
sādhu paññā kusalesu dhammesūti. 
So tiṇṇaṁ saṁyojanānaṁ parikkhayā sotāpanno hoti avinipātadhammo niyato sambodhiparāyaṇo. 
Evaṁ kho, bhikkhave, puggalo ummujjitvā vipassati viloketi. 
Kathañca, bhikkhave, puggalo ummujjitvā patarati? 
Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī …pe… 
sādhu ottappaṁ … 
sādhu vīriyaṁ … 
sādhu paññā kusalesu dhammesūti. 
So tiṇṇaṁ saṁyojanānaṁ parikkhayā rāgadosamohānaṁ tanuttā sakadāgāmī hoti, sakideva imaṁ lokaṁ āgantvā dukkhassantaṁ karoti. 
Evaṁ kho, bhikkhave, puggalo ummujjitvā patarati. 
Kathañca, bhikkhave, puggalo ummujjitvā patigādhappatto hoti? 
Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī …pe… 
sādhu ottappaṁ … 
sādhu vīriyaṁ … 
sādhu paññā kusalesu dhammesūti. 
So pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā. 
Evaṁ kho, bhikkhave, puggalo ummujjitvā patigādhappatto hoti. 
Kathañca, bhikkhave, puggalo ummujjitvā tiṇṇo hoti pāraṅgato thale tiṭṭhati brāhmaṇo. 
Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī …pe… 
sādhu ottappaṁ … 
sādhu vīriyaṁ … 
sādhu paññā kusalesu dhammesūti. 
So āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati. 
Evaṁ kho, bhikkhave, puggalo ummujjitvā tiṇṇo hoti pāraṅgato thale tiṭṭhati brāhmaṇo. 
Ime kho, bhikkhave, satta udakūpamā puggalā santo saṁvijjamānā lokasmin”ti. 
Pañcamaṁ. 

Aṅguttara Nikāya 7.16 
2. Anusayavagga 
Aniccānupassīsutta 
“Sattime, bhikkhave, puggalā āhuneyyā pāhuneyyā dakkhiṇeyyā añjalikaraṇīyā anuttaraṁ puññakkhettaṁ lokassa. 
Katame satta? 
Idha, bhikkhave, ekacco puggalo sabbasaṅkhāresu aniccānupassī viharati, aniccasaññī, aniccapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno. 
So āsavānaṁ khayā …pe… sacchikatvā upasampajja viharati. 
Ayaṁ, bhikkhave, paṭhamo puggalo āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa. 
Puna caparaṁ, bhikkhave, idhekacco puggalo sabbasaṅkhāresu aniccānupassī viharati, aniccasaññī, aniccapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno. 
Tassa apubbaṁ acarimaṁ āsavapariyādānañca hoti jīvitapariyādānañca. 
Ayaṁ, bhikkhave, dutiyo puggalo āhuneyyo …pe… anuttaraṁ puññakkhettaṁ lokassa. 
Puna caparaṁ, bhikkhave, idhekacco puggalo sabbasaṅkhāresu aniccānupassī viharati, aniccasaññī, aniccapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno. 
So pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti …pe… 
upahaccaparinibbāyī hoti …pe… 
asaṅkhāraparinibbāyī hoti …pe… 
sasaṅkhāraparinibbāyī hoti …pe… 
uddhaṁsoto hoti akaniṭṭhagāmī. 
Ayaṁ, bhikkhave, sattamo puggalo āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa. 
Ime kho, bhikkhave, satta puggalā āhuneyyā pāhuneyyā dakkhiṇeyyā añjalikaraṇīyā anuttaraṁ puññakkhettaṁ lokassā”ti. 
Chaṭṭhaṁ. 

Aṅguttara Nikāya 7.17 
2. Anusayavagga 
Dukkhānupassīsutta 
Sattime, bhikkhave, puggalā āhuneyyā …pe… anuttaraṁ puññakkhettaṁ lokassa. 
Katame satta? 
Idha, bhikkhave, ekacco puggalo sabbasaṅkhāresu dukkhānupassī viharati …pe…. 
Sattamaṁ. 

Aṅguttara Nikāya 7.18 
2. Anusayavagga 
Anattānupassīsutta 
Sabbesu dhammesu anattānupassī viharati …pe…. 
Aṭṭhamaṁ. 

Aṅguttara Nikāya 7.19 
2. Anusayavagga 
Nibbānasutta 
“Nibbāne sukhānupassī viharati sukhasaññī sukhapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno. 
So āsavānaṁ khayā …pe… sacchikatvā upasampajja viharati. 
Ayaṁ bhikkhave, paṭhamo puggalo āhuneyyo …pe… puññakkhettaṁ lokassa. 
Puna caparaṁ, bhikkhave, idhekacco puggalo nibbāne sukhānupassī viharati sukhasaññī sukhapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno. 
Tassa apubbaṁ acarimaṁ āsavapariyādānañca hoti jīvitapariyādānañca. 
Ayaṁ, bhikkhave, dutiyo puggalo āhuneyyo …pe… anuttaraṁ puññakkhettaṁ lokassa. 
Puna caparaṁ, bhikkhave, idhekacco puggalo nibbāne sukhānupassī viharati sukhasaññī sukhapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno. 
So pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti …pe… 
upahaccaparinibbāyī hoti …pe… 
asaṅkhāraparinibbāyī hoti …pe… 
sasaṅkhāraparinibbāyī hoti …pe… 
uddhaṁsoto hoti akaniṭṭhagāmī. 
Ayaṁ, bhikkhave, sattamo puggalo āhuneyyo …pe… anuttaraṁ puññakkhettaṁ lokassa. 
Ime kho, bhikkhave, satta puggalā āhuneyyā …pe… anuttaraṁ puññakkhettaṁ lokassā”ti. 
Navamaṁ. 

Aṅguttara Nikāya 7.1 
1. Dhanavagga 
Paṭhamapiyasutta 
Evaṁ me sutaṁ—
ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme. 
Tatra kho bhagavā bhikkhū āmantesi: 
“bhikkhavo”ti. 
“Bhadante”ti te bhikkhū bhagavato paccassosuṁ. 
Bhagavā etadavoca: 
“Sattahi, bhikkhave, dhammehi samannāgato bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca. 
Katamehi sattahi? 
Idha, bhikkhave, bhikkhu lābhakāmo ca hoti, sakkārakāmo ca hoti, anavaññattikāmo ca hoti, ahiriko ca hoti, anottappī ca, pāpiccho ca, micchādiṭṭhi ca. 
Imehi kho, bhikkhave, sattahi dhammehi samannāgato bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca. 
Sattahi, bhikkhave, dhammehi samannāgato bhikkhu sabrahmacārīnaṁ piyo ca hoti, manāpo ca garu ca bhāvanīyo ca. 
Katamehi sattahi? 
Idha, bhikkhave, bhikkhu na lābhakāmo ca hoti, na sakkārakāmo ca hoti, na anavaññattikāmo ca hoti, hirīmā ca hoti, ottappī ca, appiccho ca, sammādiṭṭhi ca. 
Imehi kho, bhikkhave, sattahi dhammehi samannāgato bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti. 
Paṭhamaṁ. 

Aṅguttara Nikāya 7.20 
2. Anusayavagga 
Niddasavatthusutta 
“Sattimāni, bhikkhave, niddasavatthūni. 
Katamāni satta? 
Idha, bhikkhave, bhikkhu sikkhāsamādāne tibbacchando hoti āyatiñca sikkhāsamādāne avigatapemo, 
dhammanisantiyā tibbacchando hoti āyatiñca dhammanisantiyā avigatapemo, 
icchāvinaye tibbacchando hoti āyatiñca icchāvinaye avigatapemo, 
paṭisallāne tibbacchando hoti āyatiñca paṭisallāne avigatapemo, 
vīriyārambhe tibbacchando hoti āyatiñca vīriyārambhe avigatapemo, 
satinepakke tibbacchando hoti āyatiñca satinepakke avigatapemo, 
diṭṭhipaṭivedhe tibbacchando hoti āyatiñca diṭṭhipaṭivedhe avigatapemo. 
Imāni kho, bhikkhave, satta niddasavatthūnī”ti. 
Dasamaṁ. 
Anusayavaggo dutiyo. 
Tassuddānaṁ 
Duve anusayā kulaṁ, 
Puggalaṁ udakūpamaṁ; 
Aniccaṁ dukkhaṁ anattā ca, 
Nibbānaṁ niddasavatthu cāti. 

Aṅguttara Nikāya 7.21 
3. Vajjisattakavagga 
Sārandadasutta 
Evaṁ me sutaṁ—
ekaṁ samayaṁ bhagavā vesāliyaṁ viharati sārandade cetiye. 
Atha kho sambahulā licchavī yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinne kho te licchavī bhagavā etadavoca: 
“satta vo, licchavī, aparihāniye dhamme desessāmi. 
Taṁ suṇātha, sādhukaṁ manasi karotha, bhāsissāmī”ti. 
“Evaṁ, bhante”ti kho te licchavī bhagavato paccassosuṁ. 
Bhagavā etadavoca: 
“Katame ca, licchavī, satta aparihāniyā dhammā? 
Yāvakīvañca, licchavī, vajjī abhiṇhaṁ sannipātā bhavissanti sannipātabahulā; 
vuddhiyeva, licchavī, vajjīnaṁ pāṭikaṅkhā, no parihāni. 
Yāvakīvañca, licchavī, vajjī samaggā sannipatissanti, samaggā vuṭṭhahissanti, samaggā vajjikaraṇīyāni karissanti; 
vuddhiyeva, licchavī, vajjīnaṁ pāṭikaṅkhā, no parihāni. 
Yāvakīvañca, licchavī, vajjī apaññattaṁ na paññāpessanti, paññattaṁ na samucchindissanti, yathāpaññatte porāṇe vajjidhamme samādāya vattissanti; 
vuddhiyeva, licchavī, vajjīnaṁ pāṭikaṅkhā, no parihāni. 
Yāvakīvañca, licchavī, vajjī ye te vajjīnaṁ vajjimahallakā te sakkarissanti garuṁ karissanti mānessanti pūjessanti, tesañca sotabbaṁ maññissanti; 
vuddhiyeva, licchavī, vajjīnaṁ pāṭikaṅkhā, no parihāni. 
Yāvakīvañca, licchavī, vajjī yā tā kulitthiyo kulakumāriyo tā na okassa pasayha vāsessanti; 
vuddhiyeva, licchavī, vajjīnaṁ pāṭikaṅkhā, no parihāni. 
Yāvakīvañca, licchavī, vajjī yāni tāni vajjīnaṁ vajjicetiyāni abbhantarāni ceva bāhirāni ca tāni sakkarissanti garuṁ karissanti mānessanti pūjessanti, tesañca dinnapubbaṁ katapubbaṁ dhammikaṁ baliṁ no parihāpessanti; 
vuddhiyeva, licchavī, vajjīnaṁ pāṭikaṅkhā, no parihāni. 
Yāvakīvañca, licchavī, vajjīnaṁ arahantesu dhammikā rakkhāvaraṇagutti susaṁvihitā bhavissati: 
‘kinti anāgatā ca arahanto vijitaṁ āgaccheyyuṁ, āgatā ca arahanto vijite phāsuṁ vihareyyun’ti; 
vuddhiyeva, licchavī, vajjīnaṁ pāṭikaṅkhā, no parihāni. 
Yāvakīvañca, licchavī, ime satta aparihāniyā dhammā vajjīsu ṭhassanti, imesu ca sattasu aparihāniyesu dhammesu vajjī sandississanti; 
vuddhiyeva, licchavī, vajjīnaṁ pāṭikaṅkhā, no parihānī”ti. 
Paṭhamaṁ. 

Aṅguttara Nikāya 7.22 
3. Vajjisattakavagga 
Vassakārasutta 
Evaṁ me sutaṁ—
ekaṁ samayaṁ bhagavā rājagahe viharati gijjhakūṭe pabbate. 
Tena kho pana samayena rājā māgadho ajātasattu vedehiputto vajjī abhiyātukāmo hoti. 
So evamāha: 
“ahaṁ hime vajjī evaṁmahiddhike evaṁmahānubhāve ucchecchāmi, vajjī vināsessāmi, vajjī anayabyasanaṁ āpādessāmī”ti. 
Atha kho rājā māgadho ajātasattu vedehiputto vassakāraṁ brāhmaṇaṁ māgadhamahāmattaṁ āmantesi: 
“ehi tvaṁ, brāhmaṇa, yena bhagavā tenupasaṅkama; upasaṅkamitvā mama vacanena bhagavato pāde sirasā vandāhi, appābādhaṁ appātaṅkaṁ lahuṭṭhānaṁ balaṁ phāsuvihāraṁ puccha: 
‘rājā, bhante, māgadho ajātasattu vedehiputto bhagavato pāde sirasā vandati, appābādhaṁ appātaṅkaṁ lahuṭṭhānaṁ balaṁ phāsuvihāraṁ pucchatī’ti. 
Evañca vadehi: 
‘rājā, bhante, māgadho ajātasattu vedehiputto vajjī abhiyātukāmo. 
So evamāha—
ahaṁ hime vajjī evaṁmahiddhike evaṁmahānubhāve ucchecchāmi, vajjī vināsessāmi, vajjī anayabyasanaṁ āpādessāmī’ti. 
Yathā te bhagavā byākaroti, taṁ sādhukaṁ uggahetvā mama āroceyyāsi. 
Na hi tathāgatā vitathaṁ bhaṇantī”ti. 
“Evaṁ, bho”ti kho vassakāro brāhmaṇo māgadhamahāmatto rañño māgadhassa ajātasattussa vedehiputtassa paṭissutvā yena bhagavā tenupasaṅkami; upasaṅkamitvā bhagavatā saddhiṁ sammodi. 
Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho vassakāro brāhmaṇo māgadhamahāmatto bhagavantaṁ etadavoca: 
“rājā, bho gotama, māgadho ajātasattu vedehiputto bhoto gotamassa pāde sirasā vandati, appābādhaṁ appātaṅkaṁ lahuṭṭhānaṁ balaṁ phāsuvihāraṁ pucchati. 
Rājā, bho gotama, māgadho ajātasattu vedehiputto vajjī abhiyātukāmo. 
So evamāha: 
‘ahaṁ hime vajjī evaṁmahiddhike evaṁmahānubhāve ucchecchāmi, vajjī vināsessāmi, vajjī anayabyasanaṁ āpādessāmī’”ti. 
Tena kho pana samayena āyasmā ānando bhagavato piṭṭhito ṭhito hoti bhagavantaṁ bījayamāno. 
Atha kho bhagavā āyasmantaṁ ānandaṁ āmantesi: 
“kinti te, ānanda, sutaṁ: ‘vajjī abhiṇhaṁ sannipātā sannipātabahulā’”ti? 
“Sutaṁ metaṁ, bhante: ‘vajjī abhiṇhaṁ sannipātā sannipātabahulā’”ti. 
“Yāvakīvañca, ānanda, vajjī abhiṇhaṁ sannipātā bhavissanti sannipātabahulā; vuddhiyeva, ānanda, vajjīnaṁ pāṭikaṅkhā, no parihāni. 
Kinti te, ānanda, sutaṁ: ‘vajjī samaggā sannipatanti, samaggā vuṭṭhahanti, samaggā vajjikaraṇīyāni karontī’”ti? 
“Sutaṁ metaṁ, bhante: ‘vajjī samaggā sannipatanti, samaggā vuṭṭhahanti, samaggā vajjikaraṇīyāni karontī’”ti. 
“Yāvakīvañca, ānanda, vajjī samaggā sannipatissanti, samaggā vuṭṭhahissanti, samaggā vajjikaraṇīyāni karissanti; vuddhiyeva, ānanda, vajjīnaṁ pāṭikaṅkhā, no parihāni. 
Kinti te, ānanda, sutaṁ: ‘vajjī apaññattaṁ na paññāpenti, paññattaṁ na samucchindanti, yathāpaññatte porāṇe vajjidhamme samādāya vattantī’”ti? 
“Sutaṁ metaṁ, bhante: ‘vajjī apaññattaṁ na paññāpenti, paññattaṁ na samucchindanti, yathāpaññatte porāṇe vajjidhamme samādāya vattantī’”ti. 
“Yāvakīvañca, ānanda, vajjī apaññattaṁ na paññāpessanti, paññattaṁ na samucchindissanti, yathāpaññatte porāṇe vajjidhamme samādāya vattissanti; vuddhiyeva, ānanda, vajjīnaṁ pāṭikaṅkhā, no parihāni. 
Kinti te, ānanda, sutaṁ: ‘vajjī ye te vajjīnaṁ vajjimahallakā te sakkaronti garuṁ karonti mānenti pūjenti, tesañca sotabbaṁ maññantī’”ti? 
“Sutaṁ metaṁ, bhante: ‘vajjī ye te vajjīnaṁ vajjimahallakā te sakkaronti garuṁ karonti mānenti pūjenti, tesañca sotabbaṁ maññantī’”ti. 
“Yāvakīvañca, ānanda, vajjī ye te vajjīnaṁ vajjimahallakā te sakkarissanti garuṁ karissanti mānessanti pūjessanti, tesañca sotabbaṁ maññissanti; vuddhiyeva, ānanda, vajjīnaṁ pāṭikaṅkhā, no parihāni. 
Kinti te, ānanda, sutaṁ: ‘vajjī yā tā kulitthiyo kulakumāriyo tā na okassa pasayha vāsentī’”ti? 
“Sutaṁ metaṁ, bhante: ‘vajjī yā tā kulitthiyo kulakumāriyo tā na okassa pasayha vāsentī’”ti. 
“Yāvakīvañca, ānanda, vajjī yā tā kulitthiyo kulakumāriyo tā na okassa pasayha vāsessanti; vuddhiyeva, ānanda, vajjīnaṁ pāṭikaṅkhā, no parihāni. 
Kinti te, ānanda, sutaṁ: ‘vajjī yāni tāni vajjīnaṁ vajjicetiyāni abbhantarāni ceva bāhirāni ca tāni sakkaronti garuṁ karonti mānenti pūjenti, tesañca dinnapubbaṁ katapubbaṁ dhammikaṁ baliṁ no parihāpentī’”ti? 
“Sutaṁ metaṁ, bhante: ‘vajjī yāni tāni vajjīnaṁ vajjicetiyāni abbhantarāni ceva bāhirāni ca tāni sakkaronti garuṁ karonti mānenti pūjenti, tesañca dinnapubbaṁ katapubbaṁ dhammikaṁ baliṁ no parihāpentī’”ti. 
“Yāvakīvañca, ānanda, vajjī yāni tāni vajjīnaṁ vajjicetiyāni abbhantarāni ceva bāhirāni ca tāni sakkarissanti garuṁ karissanti mānessanti pūjessanti, tesañca dinnapubbaṁ katapubbaṁ dhammikaṁ baliṁ no parihāpessanti; vuddhiyeva, ānanda, vajjīnaṁ pāṭikaṅkhā, no parihāni. 
Kinti te, ānanda, sutaṁ: ‘vajjīnaṁ arahantesu dhammikā rakkhāvaraṇagutti susaṁvihitā—kinti anāgatā ca arahanto vijitaṁ āgaccheyyuṁ, āgatā ca arahanto vijite phāsuṁ vihareyyun’”ti? 
“Sutaṁ metaṁ, bhante: ‘vajjīnaṁ arahantesu dhammikā rakkhāvaraṇagutti susaṁvihitā bhavissati—kinti anāgatā ca arahanto vijitaṁ āgaccheyyuṁ, āgatā ca arahanto vijite phāsuṁ vihareyyun’”ti. 
“Yāvakīvañca, ānanda, vajjīnaṁ arahantesu dhammikā rakkhāvaraṇagutti susaṁvihitā bhavissati: ‘kinti anāgatā ca arahanto vijitaṁ āgaccheyyuṁ, āgatā ca arahanto vijite phāsuṁ vihareyyun’ti; vuddhiyeva, ānanda, vajjīnaṁ pāṭikaṅkhā, no parihānī”ti. 
Atha kho bhagavā vassakāraṁ brāhmaṇaṁ māgadhamahāmattaṁ āmantesi: 
“ekamidāhaṁ, brāhmaṇa, samayaṁ vesāliyaṁ viharāmi sārandade cetiye. 
Tatrāhaṁ, brāhmaṇa, vajjīnaṁ ime satta aparihāniye dhamme desesiṁ. 
Yāvakīvañca, brāhmaṇa, ime satta aparihāniyā dhammā vajjīsu ṭhassanti, imesu ca sattasu aparihāniyesu dhammesu vajjī sandississanti; vuddhiyeva, brāhmaṇa, vajjīnaṁ pāṭikaṅkhā, no parihānī”ti. 
“Ekamekenapi, bho gotama, aparihāniyena dhammena samannāgatānaṁ vajjīnaṁ vuddhiyeva pāṭikaṅkhā, no parihāni; 
ko pana vādo sattahi aparihāniyehi dhammehi. 
Akaraṇīyā ca, bho gotama, vajjī raññā māgadhena ajātasattunā vedehiputtena yadidaṁ yuddhassa, aññatra upalāpanāya, aññatra mithubhedā. 
Handa ca dāni mayaṁ, bho gotama, gacchāma, bahukiccā mayaṁ bahukaraṇīyā”ti. 
“Yassadāni tvaṁ, brāhmaṇa, kālaṁ maññasī”ti. 
Atha kho vassakāro brāhmaṇo māgadhamahāmatto bhagavato bhāsitaṁ abhinanditvā anumoditvā uṭṭhāyāsanā pakkāmīti. 
Dutiyaṁ. 

Aṅguttara Nikāya 7.23 
3. Vajjisattakavagga 
Paṭhamasattakasutta 
Evaṁ me sutaṁ—
ekaṁ samayaṁ bhagavā rājagahe viharati gijjhakūṭe pabbate. 
Tatra kho bhagavā bhikkhū āmantesi: 
“satta vo, bhikkhave, aparihāniye dhamme desessāmi. 
Taṁ suṇātha, sādhukaṁ manasi karotha, bhāsissāmī”ti. 
“Evaṁ, bhante”ti kho te bhikkhū bhagavato paccassosuṁ. 
Bhagavā etadavoca: 
“Katame ca, bhikkhave, satta aparihāniyā dhammā? 
Yāvakīvañca, bhikkhave, bhikkhū abhiṇhaṁ sannipātā bhavissanti sannipātabahulā; vuddhiyeva, bhikkhave, bhikkhūnaṁ pāṭikaṅkhā, no parihāni. 
Yāvakīvañca, bhikkhave, bhikkhū samaggā sannipatissanti, samaggā vuṭṭhahissanti, samaggā saṅghakaraṇīyāni karissanti; vuddhiyeva, bhikkhave, bhikkhūnaṁ pāṭikaṅkhā, no parihāni. 
Yāvakīvañca, bhikkhave, bhikkhū apaññattaṁ na paññāpessanti, paññattaṁ na samucchindissanti, yathāpaññattesu sikkhāpadesu samādāya vattissanti; vuddhiyeva, bhikkhave, bhikkhūnaṁ pāṭikaṅkhā, no parihāni. 
Yāvakīvañca, bhikkhave, bhikkhū ye te bhikkhū therā rattaññū cirapabbajitā saṅghapitaro saṅghapariṇāyakā te sakkarissanti garuṁ karissanti mānessanti pūjessanti, tesañca sotabbaṁ maññissanti; vuddhiyeva, bhikkhave, bhikkhūnaṁ pāṭikaṅkhā, no parihāni. 
Yāvakīvañca, bhikkhave, bhikkhū uppannāya taṇhāya ponobhavikāya na vasaṁ gacchissanti; vuddhiyeva, bhikkhave, bhikkhūnaṁ pāṭikaṅkhā, no parihāni. 
Yāvakīvañca, bhikkhave, bhikkhū āraññakesu senāsanesu sāpekkhā bhavissanti; vuddhiyeva, bhikkhave, bhikkhūnaṁ pāṭikaṅkhā, no parihāni. 
Yāvakīvañca, bhikkhave, bhikkhū paccattaññeva satiṁ upaṭṭhāpessanti: ‘kinti anāgatā ca pesalā sabrahmacārī āgaccheyyuṁ, āgatā ca pesalā sabrahmacārī phāsuṁ vihareyyun’ti; vuddhiyeva, bhikkhave, bhikkhūnaṁ pāṭikaṅkhā, no parihāni. 
Yāvakīvañca, bhikkhave, ime satta aparihāniyā dhammā bhikkhūsu ṭhassanti, imesu ca sattasu aparihāniyesu dhammesu bhikkhū sandississanti; vuddhiyeva, bhikkhave, bhikkhūnaṁ pāṭikaṅkhā, no parihānī”ti. 
Tatiyaṁ. 

Aṅguttara Nikāya 7.24 
3. Vajjisattakavagga 
Dutiyasattakasutta 
“Satta vo, bhikkhave, aparihāniye dhamme desessāmi. 
Taṁ suṇātha, sādhukaṁ manasi karotha …pe… 
katame ca, bhikkhave, satta aparihāniyā dhammā? 
Yāvakīvañca, bhikkhave, bhikkhū na kammārāmā bhavissanti, na kammaratā, na kammārāmataṁ anuyuttā; vuddhiyeva, bhikkhave, bhikkhūnaṁ pāṭikaṅkhā, no parihāni. 
Yāvakīvañca, bhikkhave, bhikkhū na bhassārāmā bhavissanti …pe… 
na niddārāmā bhavissanti … 
na saṅgaṇikārāmā bhavissanti … 
na pāpicchā bhavissanti na pāpikānaṁ icchānaṁ vasaṁ gatā … 
na pāpamittā bhavissanti na pāpasahāyā na pāpasampavaṅkā … 
na oramattakena visesādhigamena antarāvosānaṁ āpajjissanti; vuddhiyeva, bhikkhave, bhikkhūnaṁ pāṭikaṅkhā, no parihāni. 
Yāvakīvañca, bhikkhave, ime satta aparihāniyā dhammā bhikkhūsu ṭhassanti, imesu ca sattasu aparihāniyesu dhammesu bhikkhū sandississanti; vuddhiyeva, bhikkhave, bhikkhūnaṁ pāṭikaṅkhā, no parihānī”ti. 
Catutthaṁ. 

Aṅguttara Nikāya 7.25 
3. Vajjisattakavagga 
Tatiyasattakasutta 
“Satta vo, bhikkhave, aparihāniye dhamme desessāmi. 
Taṁ suṇātha, sādhukaṁ manasi karotha …pe… 
katame ca, bhikkhave, satta aparihāniyā dhammā? 
Yāvakīvañca, bhikkhave, bhikkhū saddhā bhavissanti; vuddhiyeva, bhikkhave, bhikkhūnaṁ pāṭikaṅkhā, no parihāni. 
Yāvakīvañca, bhikkhave, bhikkhū hirimanto bhavissanti …pe… 
ottappino bhavissanti … 
bahussutā bhavissanti … 
āraddhavīriyā bhavissanti … 
satimanto bhavissanti … 
paññavanto bhavissanti; vuddhiyeva, bhikkhave, bhikkhūnaṁ pāṭikaṅkhā, no parihāni. 
Yāvakīvañca, bhikkhave, ime satta aparihāniyā dhammā bhikkhūsu ṭhassanti, imesu ca sattasu aparihāniyesu dhammesu bhikkhū sandississanti; vuddhiyeva, bhikkhave, bhikkhūnaṁ pāṭikaṅkhā, no parihānī”ti. 
Pañcamaṁ. 

Aṅguttara Nikāya 7.26 
3. Vajjisattakavagga 
Bojjhaṅgasutta 
“Satta vo, bhikkhave, aparihāniye dhamme desessāmi. 
Taṁ suṇātha, sādhukaṁ manasi karotha …pe… 
katame ca, bhikkhave, satta aparihāniyā dhammā? 
Yāvakīvañca, bhikkhave, bhikkhū satisambojjhaṅgaṁ bhāvessanti; vuddhiyeva, bhikkhave, bhikkhūnaṁ pāṭikaṅkhā, no parihāni. 
Yāvakīvañca, bhikkhave, bhikkhū dhammavicayasambojjhaṅgaṁ bhāvessanti …pe… 
vīriyasambojjhaṅgaṁ bhāvessanti … 
pītisambojjhaṅgaṁ bhāvessanti … 
passaddhisambojjhaṅgaṁ bhāvessanti … 
samādhisambojjhaṅgaṁ bhāvessanti … 
upekkhāsambojjhaṅgaṁ bhāvessanti; vuddhiyeva, bhikkhave, bhikkhūnaṁ pāṭikaṅkhā, no parihāni. 
Yāvakīvañca, bhikkhave, ime satta aparihāniyā dhammā bhikkhūsu ṭhassanti, imesu ca sattasu aparihāniyesu dhammesu bhikkhū sandississanti; vuddhiyeva, bhikkhave, bhikkhūnaṁ pāṭikaṅkhā, no parihānī”ti. 
Chaṭṭhaṁ. 

Aṅguttara Nikāya 7.27 
3. Vajjisattakavagga 
Saññāsutta 
“Satta vo, bhikkhave, aparihāniye dhamme desessāmi. 
Taṁ suṇātha, sādhukaṁ manasi karotha …pe…. 
Katame ca, bhikkhave, satta aparihāniyā dhammā? 
Yāvakīvañca, bhikkhave, bhikkhū aniccasaññaṁ bhāvessanti; vuddhiyeva, bhikkhave, bhikkhūnaṁ pāṭikaṅkhā, no parihāni. 
Yāvakīvañca, bhikkhave, bhikkhū anattasaññaṁ bhāvessanti …pe… 
asubhasaññaṁ bhāvessanti … 
ādīnavasaññaṁ bhāvessanti … 
pahānasaññaṁ bhāvessanti … 
virāgasaññaṁ bhāvessanti … 
nirodhasaññaṁ bhāvessanti; 
vuddhiyeva, bhikkhave, bhikkhūnaṁ pāṭikaṅkhā, no parihāni. Yāvakīvañca, bhikkhave, ime satta aparihāniyā dhammā bhikkhūsu ṭhassanti, imesu ca sattasu aparihāniyesu dhammesu, bhikkhū sandississanti; vuddhiyeva, bhikkhave, bhikkhūnaṁ pāṭikaṅkhā, no parihānī”ti. 
Sattamaṁ. 

Aṅguttara Nikāya 7.28 
3. Vajjisattakavagga 
Paṭhamaparihānisutta 
Evaṁ me sutaṁ—
ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme. 
Tatra kho bhagavā bhikkhū āmantesi: 
“sattime, bhikkhave, dhammā sekhassa bhikkhuno parihānāya saṁvattanti. 
Katame satta? 
Kammārāmatā, bhassārāmatā, niddārāmatā, saṅgaṇikārāmatā, indriyesu aguttadvāratā, bhojane amattaññutā, santi kho pana saṅghe saṅghakaraṇīyāni; tatra sekho bhikkhu iti paṭisañcikkhati: 
‘santi kho pana saṅghe therā rattaññū cirapabbajitā bhāravāhino, te tena paññāyissantī’ti attanā tesu yogaṁ āpajjati. 
Ime kho, bhikkhave, satta dhammā sekhassa bhikkhuno parihānāya saṁvattanti. 
Sattime, bhikkhave, dhammā sekhassa bhikkhuno aparihānāya saṁvattanti. 
Katame satta? 
Na kammārāmatā, na bhassārāmatā, na niddārāmatā, na saṅgaṇikārāmatā, indriyesu guttadvāratā, bhojane mattaññutā, santi kho pana saṅghe saṅghakaraṇīyāni; tatra sekho bhikkhu iti paṭisañcikkhati: 
‘santi kho pana saṅghe therā rattaññū cirapabbajitā bhāravāhino, te tena paññāyissantī’ti attanā na tesu yogaṁ āpajjati. 
Ime kho, bhikkhave, satta dhammā sekhassa bhikkhuno aparihānāya saṁvattantī”ti. 
Aṭṭhamaṁ. 

Aṅguttara Nikāya 7.29 
3. Vajjisattakavagga 
Dutiyaparihānisutta 
“Sattime, bhikkhave, dhammā upāsakassa parihānāya saṁvattanti. 
Katame satta? 
Bhikkhudassanaṁ hāpeti, 
saddhammassavanaṁ pamajjati, 
adhisīle na sikkhati, 
appasādabahulo hoti, 
bhikkhūsu theresu ceva navesu ca majjhimesu ca upārambhacitto dhammaṁ suṇāti randhagavesī, 
ito bahiddhā dakkhiṇeyyaṁ gavesati, 
tattha ca pubbakāraṁ karoti. 
Ime kho, bhikkhave, satta dhammā upāsakassa parihānāya saṁvattanti. 
Sattime, bhikkhave, dhammā upāsakassa aparihānāya saṁvattanti. 
Katame satta? 
Bhikkhudassanaṁ na hāpeti, 
saddhammassavanaṁ nappamajjati, 
adhisīle sikkhati, 
pasādabahulo hoti, 
bhikkhūsu theresu ceva navesu ca majjhimesu ca anupārambhacitto dhammaṁ suṇāti na randhagavesī, 
na ito bahiddhā dakkhiṇeyyaṁ gavesati, 
idha ca pubbakāraṁ karoti. 
Ime kho, bhikkhave, satta dhammā upāsakassa aparihānāya saṁvattantī”ti. 
Idamavoca bhagavā. 
Idaṁ vatvāna sugato athāparaṁ etadavoca satthā: 
“Dassanaṁ bhāvitattānaṁ, 
Yo hāpeti upāsako; 
Savanañca ariyadhammānaṁ, 
Adhisīle na sikkhati. 
Appasādo ca bhikkhūsu, 
bhiyyo bhiyyo pavaḍḍhati; 
Upārambhakacitto ca, 
saddhammaṁ sotumicchati. 
Ito ca bahiddhā aññaṁ, 
dakkhiṇeyyaṁ gavesati; 
Tattheva ca pubbakāraṁ, 
yo karoti upāsako. 
Ete kho parihāniye, 
satta dhamme sudesite; 
Upāsako sevamāno, 
saddhammā parihāyati. 
Dassanaṁ bhāvitattānaṁ, 
Yo na hāpeti upāsako; 
Savanañca ariyadhammānaṁ, 
Adhisīle ca sikkhati. 
Pasādo cassa bhikkhūsu, 
bhiyyo bhiyyo pavaḍḍhati; 
Anupārambhacitto ca, 
saddhammaṁ sotumicchati. 
Na ito bahiddhā aññaṁ, 
dakkhiṇeyyaṁ gavesati; 
Idheva ca pubbakāraṁ, 
yo karoti upāsako. 
Ete kho aparihāniye, 
Satta dhamme sudesite; 
Upāsako sevamāno, 
Saddhammā na parihāyatī”ti. 
Navamaṁ. 

Aṅguttara Nikāya 7.2 
1. Dhanavagga 
Dutiyapiyasutta 
“Sattahi, bhikkhave, dhammehi samannāgato bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca. 
Katamehi sattahi? 
Idha, bhikkhave, bhikkhu lābhakāmo ca hoti, sakkārakāmo ca hoti, anavaññattikāmo ca hoti, ahiriko ca hoti, anottappī ca, issukī ca, maccharī ca. 
Imehi kho, bhikkhave, sattahi dhammehi samannāgato bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca. 
Sattahi, bhikkhave, dhammehi samannāgato bhikkhu sabrahmacārīnaṁ piyo ca hoti manāpo ca garu ca bhāvanīyo ca. 
Katamehi sattahi? 
Idha, bhikkhave, bhikkhu na lābhakāmo ca hoti, na sakkārakāmo ca hoti, na anavaññattikāmo ca hoti, hirīmā ca hoti, ottappī ca, anissukī ca, amaccharī ca. 
Imehi kho, bhikkhave, sattahi dhammehi samannāgato bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti. 
Dutiyaṁ. 

Aṅguttara Nikāya 7.30 
3. Vajjisattakavagga 
Vipattisutta 
Sattimā, bhikkhave, upāsakassa vipattiyo …pe… 
sattimā, bhikkhave, upāsakassa sampadā …pe…. 
Dasamaṁ. 

Aṅguttara Nikāya 7.31 
3. Vajjisattakavagga 
Parābhavasutta 
“Sattime, bhikkhave, upāsakassa parābhavā …pe… 
sattime, bhikkhave, upāsakassa sambhavā. 
Katame satta? 
Bhikkhudassanaṁ na hāpeti, 
saddhammassavanaṁ nappamajjati, 
adhisīle sikkhati, 
pasādabahulo hoti, 
bhikkhūsu theresu ceva navesu ca majjhimesu ca anupārambhacitto dhammaṁ suṇāti na randhagavesī, 
na ito bahiddhā dakkhiṇeyyaṁ gavesati, 
idha ca pubbakāraṁ karoti. 
Ime kho, bhikkhave, satta upāsakassa sambhavāti. 
Dassanaṁ bhāvitattānaṁ, 
Yo hāpeti upāsako; 
Savanañca ariyadhammānaṁ, 
Adhisīle na sikkhati. 
Appasādo ca bhikkhūsu, 
bhiyyo bhiyyo pavaḍḍhati; 
Upārambhakacitto ca, 
saddhammaṁ sotumicchati. 
Ito ca bahiddhā aññaṁ, 
dakkhiṇeyyaṁ gavesati; 
Tattheva ca pubbakāraṁ, 
yo karoti upāsako. 
Ete kho parihāniye, 
satta dhamme sudesite; 
Upāsako sevamāno, 
saddhammā parihāyati. 
Dassanaṁ bhāvitattānaṁ, 
Yo na hāpeti upāsako; 
Savanañca ariyadhammānaṁ, 
Adhisīle ca sikkhati. 
Pasādo cassa bhikkhūsu, 
bhiyyo bhiyyo pavaḍḍhati; 
Anupārambhacitto ca, 
saddhammaṁ sotumicchati. 
Na ito bahiddhā aññaṁ, 
dakkhiṇeyyaṁ gavesati; 
Idheva ca pubbakāraṁ, 
yo karoti upāsako. 
Ete kho aparihāniye, 
Satta dhamme sudesite; 
Upāsako sevamāno, 
Saddhammā na parihāyatī”ti. 
Ekādasamaṁ. 
Vajjisattakavaggo tatiyo. 
Tassuddānaṁ 
Sāranda vassakāro ca, 
tisattakāni bhikkhukā; 
Bodhisaññā dve ca hāni, 
vipatti ca parābhavoti. 

Aṅguttara Nikāya 7.32 
4. Devatāvagga 
Appamādagāravasutta 
Atha kho aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhitā kho sā devatā bhagavantaṁ etadavoca: 
“Sattime, bhante, dhammā bhikkhuno aparihānāya saṁvattanti. 
Katame satta? 
Satthugāravatā, dhammagāravatā, saṅghagāravatā, sikkhāgāravatā, samādhigāravatā, appamādagāravatā, paṭisanthāragāravatā. 
Ime kho, bhante, satta dhammā bhikkhuno aparihānāya saṁvattantī”ti. 
Idamavoca sā devatā. 
Samanuñño satthā ahosi. 
Atha kho sā devatā “samanuñño me satthā”ti bhagavantaṁ abhivādetvā padakkhiṇaṁ katvā tatthevantaradhāyi. 
Atha kho bhagavā tassā rattiyā accayena bhikkhū āmantesi: 
“imaṁ, bhikkhave, rattiṁ aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhitā kho, bhikkhave, sā devatā maṁ etadavoca: 
‘sattime, bhante, dhammā bhikkhuno aparihānāya saṁvattanti. 
Katame satta? 
Satthugāravatā, dhammagāravatā, saṅghagāravatā, sikkhāgāravatā, samādhigāravatā, appamādagāravatā, paṭisanthāragāravatā—
ime kho, bhante, satta dhammā bhikkhuno aparihānāya saṁvattantī’ti. 
Idamavoca, bhikkhave, sā devatā. 
Idaṁ vatvā maṁ abhivādetvā padakkhiṇaṁ katvā tatthevantaradhāyīti. 
Satthugaru dhammagaru, 
saṅghe ca tibbagāravo; 
Samādhigaru ātāpī, 
sikkhāya tibbagāravo. 
Appamādagaru bhikkhu, 
paṭisanthāragāravo; 
Abhabbo parihānāya, 
nibbānasseva santike”ti. 
Paṭhamaṁ. 

Aṅguttara Nikāya 7.33 
4. Devatāvagga 
Hirigāravasutta 
“Imaṁ, bhikkhave, rattiṁ aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhitā kho, bhikkhave, sā devatā maṁ etadavoca: 
‘sattime, bhante, dhammā bhikkhuno aparihānāya saṁvattanti. 
Katame satta? 
Satthugāravatā, dhammagāravatā, saṅghagāravatā, sikkhāgāravatā, samādhigāravatā, hirigāravatā, ottappagāravatā. 
Ime kho, bhante, satta dhammā bhikkhuno aparihānāya saṁvattantī’ti. 
Idamavoca, bhikkhave, sā devatā. 
Idaṁ vatvā maṁ abhivādetvā padakkhiṇaṁ katvā tatthevantaradhāyīti. 
Satthugaru dhammagaru, 
saṅghe ca tibbagāravo; 
Samādhigaru ātāpī, 
sikkhāya tibbagāravo. 
Hiriottappasampanno, 
sappatisso sagāravo; 
Abhabbo parihānāya, 
nibbānasseva santike”ti. 
Dutiyaṁ. 

Aṅguttara Nikāya 7.34 
4. Devatāvagga 
Paṭhamasovacassatāsutta 
“Imaṁ, bhikkhave, rattiṁ aññatarā devatā …pe… maṁ etadavoca: 
‘sattime, bhante, dhammā bhikkhuno aparihānāya saṁvattanti. 
Katame satta? 
Satthugāravatā, dhammagāravatā, saṅghagāravatā, sikkhāgāravatā, samādhigāravatā, sovacassatā, kalyāṇamittatā. 
Ime kho, bhante, satta dhammā bhikkhuno aparihānāya saṁvattantī’ti. 
Idamavoca, bhikkhave, sā devatā. 
Idaṁ vatvā maṁ abhivādetvā padakkhiṇaṁ katvā tatthevantaradhāyīti. 
Satthugaru dhammagaru, 
saṅghe ca tibbagāravo; 
Samādhigaru ātāpī, 
sikkhāya tibbagāravo. 
Kalyāṇamitto suvaco, 
sappatisso sagāravo; 
Abhabbo parihānāya, 
nibbānasseva santike”ti. 
Tatiyaṁ. 

Aṅguttara Nikāya 7.35 
4. Devatāvagga 
Dutiyasovacassatāsutta 
“Imaṁ, bhikkhave, rattiṁ aññatarā devatā abhikkantāya rattiyā abhikkantavaṇṇā …pe… 
‘sattime, bhante, dhammā bhikkhuno aparihānāya saṁvattanti. 
Katame satta? 
Satthugāravatā, dhammagāravatā, saṅghagāravatā, sikkhāgāravatā, samādhigāravatā, sovacassatā, kalyāṇamittatā. 
Ime kho, bhante, satta dhammā bhikkhuno aparihānāya saṁvattantī’ti. 
Idamavoca, bhikkhave, sā devatā. 
Idaṁ vatvā maṁ abhivādetvā padakkhiṇaṁ katvā tatthevantaradhāyī”ti. 
Evaṁ vutte, āyasmā sāriputto bhagavantaṁ etadavoca: 
“imassa kho ahaṁ, bhante, bhagavatā saṅkhittena bhāsitassa evaṁ vitthārena atthaṁ ājānāmi. 
Idha, bhante, bhikkhu attanā ca satthugāravo hoti, satthugāravatāya ca vaṇṇavādī. 
Ye caññe bhikkhū na satthugāravā te ca satthugāravatāya samādapeti. 
Ye caññe bhikkhū satthugāravā tesañca vaṇṇaṁ bhaṇati bhūtaṁ tacchaṁ kālena. 
Attanā ca dhammagāravo hoti …pe… 
saṅghagāravo hoti … 
sikkhāgāravo hoti … 
samādhigāravo hoti … 
suvaco hoti … 
kalyāṇamitto hoti, kalyāṇamittatāya ca vaṇṇavādī. 
Ye caññe bhikkhū na kalyāṇamittā te ca kalyāṇamittatāya samādapeti. 
Ye caññe bhikkhū kalyāṇamittā tesañca vaṇṇaṁ bhaṇati bhūtaṁ tacchaṁ kālenāti. 
Imassa kho ahaṁ, bhante, bhagavatā saṅkhittena bhāsitassa evaṁ vitthārena atthaṁ ājānāmī”ti. 
“Sādhu sādhu, sāriputta. 
Sādhu kho tvaṁ, sāriputta, imassa mayā saṅkhittena bhāsitassa evaṁ vitthārena atthaṁ ājānāsi. 
Idha, sāriputta, bhikkhu attanā ca satthugāravo hoti, satthugāravatāya ca vaṇṇavādī. 
Ye caññe bhikkhū na satthugāravā te ca satthugāravatāya samādapeti. 
Ye caññe bhikkhū satthugāravā tesañca vaṇṇaṁ bhaṇati bhūtaṁ tacchaṁ kālena. 
Attanā ca dhammagāravo hoti …pe… 
saṅghagāravo hoti … 
sikkhāgāravo hoti … 
samādhigāravo hoti … 
suvaco hoti … 
kalyāṇamitto hoti, kalyāṇamittatāya ca vaṇṇavādī. 
Ye caññe bhikkhū na kalyāṇamittā te ca kalyāṇamittatāya samādapeti. 
Ye caññe bhikkhū kalyāṇamittā tesañca vaṇṇaṁ bhaṇati bhūtaṁ tacchaṁ kālenāti. 
Imassa kho, sāriputta, mayā saṅkhittena bhāsitassa evaṁ vitthārena attho daṭṭhabbo”ti. 
Catutthaṁ. 

Aṅguttara Nikāya 7.36 
4. Devatāvagga 
Paṭhamamittasutta 
“Sattahi, bhikkhave, aṅgehi samannāgato mitto sevitabbo. 
Katamehi sattahi? 
Duddadaṁ dadāti, dukkaraṁ karoti, dukkhamaṁ khamati, guyhamassa āvi karoti, guyhamassa pariguhati, āpadāsu na jahati, khīṇena nātimaññati. 
Imehi kho, bhikkhave, sattahi aṅgehi samannāgato mitto sevitabboti. 
Duddadaṁ dadāti mitto, 
dukkarañcāpi kubbati; 
Athopissa duruttāni, 
khamati dukkhamāni ca. 
Guyhañca tassa akkhāti, 
guyhassa parigūhati; 
Āpadāsu na jahāti, 
khīṇena nātimaññati. 
Yamhi etāni ṭhānāni, 
saṁvijjantīdha puggale; 
So mitto mittakāmena, 
bhajitabbo tathāvidho”ti. 
Pañcamaṁ. 

Aṅguttara Nikāya 7.37 
4. Devatāvagga 
Dutiyamittasutta 
“Sattahi, bhikkhave, dhammehi samannāgato bhikkhu mitto sevitabbo bhajitabbo payirupāsitabbo api panujjamānenapi. 
Katamehi sattahi? 
Piyo ca hoti manāpo ca garu ca bhāvanīyo ca vattā ca vacanakkhamo ca gambhīrañca kathaṁ kattā hoti, no ca aṭṭhāne niyojeti. 
Imehi kho, bhikkhave, sattahi dhammehi samannāgato bhikkhu mitto sevitabbo bhajitabbo payirupāsitabbo api panujjamānenapīti. 
Piyo garu bhāvanīyo, 
vattā ca vacanakkhamo; 
Gambhīrañca kathaṁ kattā, 
no caṭṭhāne niyojako. 
Yamhi etāni ṭhānāni, 
saṁvijjantīdha puggale; 
So mitto mittakāmena, 
atthakāmānukampato; 
Api nāsiyamānena, 
bhajitabbo tathāvidho”ti. 
Chaṭṭhaṁ. 

Aṅguttara Nikāya 7.38 
4. Devatāvagga 
Paṭhamapaṭisambhidāsutta 
“Sattahi, bhikkhave, dhammehi samannāgato bhikkhu nacirasseva catasso paṭisambhidā sayaṁ abhiññā sacchikatvā upasampajja vihareyya. 
Katamehi sattahi? 
Idha, bhikkhave, bhikkhu ‘idaṁ me cetaso līnattan’ti yathābhūtaṁ pajānāti; 
ajjhattaṁ saṅkhittaṁ vā cittaṁ ‘ajjhattaṁ me saṅkhittaṁ cittan’ti yathābhūtaṁ pajānāti; 
bahiddhā vikkhittaṁ vā cittaṁ ‘bahiddhā me vikkhittaṁ cittan’ti yathābhūtaṁ pajānāti; 
tassa viditā vedanā uppajjanti, viditā upaṭṭhahanti, viditā abbhatthaṁ gacchanti; 
viditā saññā uppajjanti, viditā upaṭṭhahanti, viditā abbhatthaṁ gacchanti; 
viditā vitakkā uppajjanti, viditā upaṭṭhahanti, viditā abbhatthaṁ gacchanti; 
sappāyāsappāyesu kho panassa dhammesu hīnappaṇītesu kaṇhasukkasappaṭibhāgesu nimittaṁ suggahitaṁ hoti sumanasikataṁ sūpadhāritaṁ suppaṭividdhaṁ paññāya. 
Imehi kho, bhikkhave, sattahi dhammehi samannāgato bhikkhu nacirasseva catasso paṭisambhidā sayaṁ abhiññā sacchikatvā upasampajja vihareyyā”ti. 
Sattamaṁ. 

Aṅguttara Nikāya 7.39 
4. Devatāvagga 
Dutiyapaṭisambhidāsutta 
“Sattahi, bhikkhave, dhammehi samannāgato sāriputto catasso paṭisambhidā sayaṁ abhiññā sacchikatvā upasampajja viharati. 
Katamehi sattahi? 
Idha, bhikkhave, sāriputto ‘idaṁ me cetaso līnattan’ti yathābhūtaṁ pajānāti; 
ajjhattaṁ saṅkhittaṁ vā cittaṁ ‘ajjhattaṁ me saṅkhittaṁ cittan’ti yathābhūtaṁ pajānāti; 
bahiddhā vikkhittaṁ vā cittaṁ ‘bahiddhā me vikkhittaṁ cittan’ti yathābhūtaṁ pajānāti; 
tassa viditā vedanā uppajjanti, viditā upaṭṭhahanti, viditā abbhatthaṁ gacchanti; 
viditā saññā …pe… 
vitakkā uppajjanti, viditā upaṭṭhahanti, viditā abbhatthaṁ gacchanti; 
sappāyāsappāyesu kho panassa dhammesu hīnappaṇītesu kaṇhasukkasappaṭibhāgesu nimittaṁ suggahitaṁ sumanasikataṁ sūpadhāritaṁ suppaṭividdhaṁ paññāya. 
Imehi kho, bhikkhave, sattahi dhammehi samannāgato sāriputto catasso paṭisambhidā sayaṁ abhiññā sacchikatvā upasampajja viharatī”ti. 
Aṭṭhamaṁ. 

Aṅguttara Nikāya 7.3 
1. Dhanavagga 
Saṅkhittabalasutta 
Evaṁ me sutaṁ—
ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme …pe… 
sattimāni, bhikkhave, balāni. 
Katamāni satta? 
Saddhābalaṁ, vīriyabalaṁ, hirībalaṁ, ottappabalaṁ, satibalaṁ, samādhibalaṁ, paññābalaṁ. 
Imāni kho, bhikkhave, satta balānīti. 
Saddhābalaṁ vīriyañca, 
hirī ottappiyaṁ balaṁ; 
Satibalaṁ samādhi ca, 
paññā ve sattamaṁ balaṁ; 
Etehi balavā bhikkhu, 
sukhaṁ jīvati paṇḍito. 
Yoniso vicine dhammaṁ, 
paññāyatthaṁ vipassati; 
Pajjotasseva nibbānaṁ, 
vimokkho hoti cetaso”ti. 
Tatiyaṁ. 

Aṅguttara Nikāya 7.40 
4. Devatāvagga 
Paṭhamavasasutta 
“Sattahi, bhikkhave, dhammehi samannāgato bhikkhu cittaṁ vase vatteti, no ca bhikkhu cittassa vasena vattati. 
Katamehi sattahi? 
Idha, bhikkhave, bhikkhu samādhikusalo hoti, samādhissa samāpattikusalo hoti, samādhissa ṭhitikusalo hoti, samādhissa vuṭṭhānakusalo hoti, samādhissa kalyāṇakusalo hoti, samādhissa gocarakusalo hoti, samādhissa abhinīhārakusalo hoti. 
Imehi kho, bhikkhave, sattahi dhammehi samannāgato bhikkhu cittaṁ vase vatteti, no ca bhikkhu cittassa vasena vattatī”ti. 
Navamaṁ. 

Aṅguttara Nikāya 7.41 
4. Devatāvagga 
Dutiyavasasutta 
“Sattahi, bhikkhave, dhammehi samannāgato sāriputto cittaṁ vase vatteti, no ca sāriputto cittassa vasena vattati. 
Katamehi sattahi? 
Idha, bhikkhave, sāriputto samādhikusalo hoti, samādhissa samāpattikusalo, samādhissa ṭhitikusalo, samādhissa vuṭṭhānakusalo, samādhissa kalyāṇakusalo, samādhissa gocarakusalo, samādhissa abhinīhārakusalo hoti. 
Imehi kho, bhikkhave, sattahi dhammehi samannāgato sāriputto cittaṁ vase vatteti, no ca sāriputto cittassa vasena vattatī”ti. 
Dasamaṁ. 

Aṅguttara Nikāya 7.42 
4. Devatāvagga 
Paṭhamaniddasasutta 
Atha kho āyasmā sāriputto pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisi. 
Atha kho āyasmato sāriputtassa etadahosi: 
“atippago kho tāva sāvatthiyaṁ piṇḍāya carituṁ. 
Yannūnāhaṁ yena aññatitthiyānaṁ paribbājakānaṁ ārāmo tenupasaṅkameyyan”ti. 
Atha kho āyasmā sāriputto yena aññatitthiyānaṁ paribbājakānaṁ ārāmo tenupasaṅkami; upasaṅkamitvā tehi aññatitthiyehi paribbājakehi saddhiṁ sammodi. 
Sammodanīyaṁ kathaṁ sāraṇīyaṁ vītisāretvā ekamantaṁ nisīdi. 
Tena kho pana samayena tesaṁ aññatitthiyānaṁ paribbājakānaṁ sannisinnānaṁ sannipatitānaṁ ayamantarākathā udapādi: 
“yo hi koci, āvuso, dvādasavassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāyā”ti. 
Atha kho āyasmā sāriputto tesaṁ aññatitthiyānaṁ paribbājakānaṁ bhāsitaṁ neva abhinandi nappaṭikkosi. 
Anabhinanditvā appaṭikkositvā uṭṭhāyāsanā pakkāmi: 
“bhagavato santike etassa bhāsitassa atthaṁ ājānissāmī”ti. 
Atha kho āyasmā sāriputto sāvatthiyaṁ piṇḍāya caritvā pacchābhattaṁ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā sāriputto bhagavantaṁ etadavoca: 
“Idhāhaṁ, bhante, pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisiṁ. 
Tassa mayhaṁ, bhante, etadahosi: 
‘atippago kho tāva sāvatthiyaṁ piṇḍāya carituṁ. 
Yannūnāhaṁ yena aññatitthiyānaṁ paribbājakānaṁ ārāmo tenupasaṅkameyyan’ti. 
Atha khvāhaṁ, bhante, yena aññatitthiyānaṁ paribbājakānaṁ ārāmo tenupasaṅkamiṁ; upasaṅkamitvā tehi aññatitthiyehi paribbājakehi saddhiṁ sammodiṁ. 
Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁ. 
Tena kho pana, bhante, samayena tesaṁ aññatitthiyānaṁ paribbājakānaṁ sannisinnānaṁ sannipatitānaṁ ayamantarākathā udapādi: 
‘yo hi koci, āvuso, dvādasavassāni paripuṇṇaṁ parisuddhaṁ brahmacariyaṁ carati, niddaso bhikkhūti alaṁvacanāyā’ti. 
Atha khvāhaṁ, bhante, tesaṁ aññatitthiyānaṁ paribbājakānaṁ bhāsitaṁ neva abhinandiṁ nappaṭikkosiṁ. 
Anabhinanditvā appaṭikkositvā uṭṭhāyāsanā pakkamiṁ: 
‘bhagavato santike etassa atthaṁ ājānissāmī’ti. 
Sakkā nu kho, bhante, imasmiṁ dhammavinaye kevalaṁ vassagaṇanamattena niddaso bhikkhu paññāpetun”ti? 
“Na kho, sāriputta, sakkā imasmiṁ dhammavinaye kevalaṁ vassagaṇanamattena niddaso bhikkhu paññāpetuṁ. 
Satta kho imāni, sāriputta, niddasavatthūni mayā sayaṁ abhiññā sacchikatvā paveditāni. 
Katamāni satta? 
Idha, sāriputta, bhikkhu sikkhāsamādāne tibbacchando hoti āyatiñca sikkhāsamādāne avigatapemo, dhammanisantiyā tibbacchando hoti āyatiñca dhammanisantiyā avigatapemo, icchāvinaye tibbacchando hoti āyatiñca icchāvinaye avigatapemo, paṭisallāne tibbacchando hoti āyatiñca paṭisallāne avigatapemo, vīriyārambhe tibbacchando hoti āyatiñca vīriyārambhe avigatapemo, satinepakke tibbacchando hoti āyatiñca satinepakke avigatapemo, diṭṭhipaṭivedhe tibbacchando hoti āyatiñca diṭṭhipaṭivedhe avigatapemo. 
Imāni kho, sāriputta, satta niddasavatthūni mayā sayaṁ abhiññā sacchikatvā paveditāni. 
Imehi kho, sāriputta, sattahi niddasavatthūhi samannāgato bhikkhu dvādasa cepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāya; 
catubbīsati cepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāya; 
chattiṁsati cepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāya, aṭṭhacattārīsañcepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāyā”ti. 
Ekādasamaṁ. 

Aṅguttara Nikāya 7.43 
4. Devatāvagga 
Dutiyaniddasasutta 
Evaṁ me sutaṁ—
ekaṁ samayaṁ bhagavā kosambiyaṁ viharati ghositārāme. 
Atha kho āyasmā ānando pubbaṇhasamayaṁ nivāsetvā pattacīvaramādāya kosambiṁ piṇḍāya pāvisi. 
Atha kho āyasmato ānandassa etadahosi: 
“atippago kho tāva kosambiyaṁ piṇḍāya carituṁ. 
Yannūnāhaṁ yena aññatitthiyānaṁ paribbājakānaṁ ārāmo tenupasaṅkameyyan”ti. 
Atha kho āyasmā ānando yena aññatitthiyānaṁ paribbājakānaṁ ārāmo tenupasaṅkami; upasaṅkamitvā tehi aññatitthiyehi paribbājakehi saddhiṁ sammodi. 
Sammodanīyaṁ kathaṁ sāraṇīyaṁ vītisāretvā ekamantaṁ nisīdi. 
Tena kho pana samayena tesaṁ aññatitthiyānaṁ paribbājakānaṁ sannisinnānaṁ sannipatitānaṁ ayamantarākathā udapādi: 
“yo hi koci, āvuso, dvādasavassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāyā”ti. 
Atha kho āyasmā ānando tesaṁ aññatitthiyānaṁ paribbājakānaṁ bhāsitaṁ neva abhinandi nappaṭikkosi. 
Anabhinanditvā appaṭikkositvā uṭṭhāyāsanā pakkāmi: 
“bhagavato santike etassa bhāsitassa atthaṁ ājānissāmī”ti. 
Atha kho āyasmā ānando kosambiyaṁ piṇḍāya caritvā pacchābhattaṁ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca: 
“Idhāhaṁ, bhante, pubbaṇhasamayaṁ nivāsetvā pattacīvaramādāya kosambiṁ piṇḍāya pāvisiṁ. 
Tassa mayhaṁ, bhante, etadahosi: 
‘atippago kho tāva kosambiyaṁ piṇḍāya carituṁ. 
Yannūnāhaṁ yena aññatitthiyānaṁ paribbājakānaṁ ārāmo tenupasaṅkameyyan’ti …pe… 
tehi saddhiṁ sammodiṁ. 
Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁ. 
Tena kho pana, bhante, samayena tesaṁ aññatitthiyānaṁ paribbājakānaṁ sannisinnānaṁ sannipatitānaṁ ayamantarākathā udapādi: 
‘yo hi koci, āvuso, dvādasavassāni paripuṇṇaṁ parisuddhaṁ brahmacariyaṁ carati, niddaso bhikkhūti alaṁvacanāyā’ti. 
Atha khvāhaṁ, bhante, tesaṁ aññatitthiyānaṁ paribbājakānaṁ bhāsitaṁ neva abhinandiṁ nappaṭikkosiṁ. 
Anabhinanditvā, appaṭikkositvā uṭṭhāyāsanā pakkamiṁ: 
‘bhagavato santike etassa bhāsitassa atthaṁ ājānissāmī’ti. 
Sakkā nu kho, bhante, imasmiṁ dhammavinaye kevalaṁ vassagaṇanamattena niddaso bhikkhu paññāpetun”ti? 
“Na kho, ānanda, sakkā imasmiṁ dhammavinaye kevalaṁ vassagaṇanamattena niddaso bhikkhu paññāpetuṁ. 
Satta kho imāni, ānanda, niddasavatthūni mayā sayaṁ abhiññā sacchikatvā paveditāni. 
Katamāni satta? 
Idhānanda, bhikkhu, saddho hoti, hirīmā hoti, ottappī hoti, bahussuto hoti, āraddhavīriyo hoti, satimā hoti, paññavā hoti. 
Imāni kho, ānanda, satta niddasavatthūni mayā sayaṁ abhiññā sacchikatvā paveditāni. 
Imehi kho, ānanda, sattahi niddasavatthūhi samannāgato bhikkhu dvādasa cepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāya; 
catubbīsati cepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāya; 
chattiṁsati cepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāya, aṭṭhacattārīsañcepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāyā”ti. 
Dvādasamaṁ. 
Devatāvaggo catuttho. 
Tassuddānaṁ 
Appamādo hirī ceva, 
dve suvacā duve mittā; 
Dve paṭisambhidā dve vasā, 
duve niddasavatthunāti. 

Aṅguttara Nikāya 7.44 
5. Mahāyaññavagga 
Sattaviññāṇaṭṭhitisutta 
“Sattimā, bhikkhave, viññāṇaṭṭhitiyo. 
Katamā satta? 
Santi, bhikkhave, sattā nānattakāyā nānattasaññino, seyyathāpi manussā, ekacce ca devā, ekacce ca vinipātikā. 
Ayaṁ paṭhamā viññāṇaṭṭhiti. 
Santi, bhikkhave, sattā nānattakāyā ekattasaññino, seyyathāpi devā brahmakāyikā paṭhamābhinibbattā. 
Ayaṁ dutiyā viññāṇaṭṭhiti. 
Santi, bhikkhave, sattā ekattakāyā nānattasaññino, seyyathāpi devā ābhassarā. 
Ayaṁ tatiyā viññāṇaṭṭhiti. 
Santi, bhikkhave, sattā ekattakāyā ekattasaññino, seyyathāpi devā subhakiṇhā. 
Ayaṁ catutthā viññāṇaṭṭhiti. 
Santi, bhikkhave, sattā sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanūpagā. 
Ayaṁ pañcamā viññāṇaṭṭhiti. 
Santi, bhikkhave, sattā sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanūpagā. 
Ayaṁ chaṭṭhā viññāṇaṭṭhiti. 
Santi, bhikkhave, sattā sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanūpagā. 
Ayaṁ sattamā viññāṇaṭṭhiti. 
Imā kho, bhikkhave, satta viññāṇaṭṭhitiyo”ti. 
Paṭhamaṁ. 

Aṅguttara Nikāya 7.45 
5. Mahāyaññavagga 
Samādhiparikkhārasutta 
“Sattime, bhikkhave, samādhiparikkhārā. 
Katame satta? 
Sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati. 
Yā kho, bhikkhave, imehi sattahaṅgehi cittassekaggatā parikkhatā, ayaṁ vuccati, bhikkhave, ariyo sammāsamādhi saupaniso itipi saparikkhāro itipī”ti. 
Dutiyaṁ. 

Aṅguttara Nikāya 7.46 
5. Mahāyaññavagga 
Paṭhamaaggisutta 
“Sattime, bhikkhave, aggī. 
Katame satta? 
Rāgaggi, dosaggi, mohaggi, āhuneyyaggi, gahapataggi, dakkhiṇeyyaggi, kaṭṭhaggi—
ime kho, bhikkhave, satta aggī”ti. 
Tatiyaṁ. 

Aṅguttara Nikāya 7.47 
5. Mahāyaññavagga 
Dutiyaaggisutta 
Tena kho pana samayena uggatasarīrassa brāhmaṇassa mahāyañño upakkhaṭo hoti. 
Pañca usabhasatāni thūṇūpanītāni honti yaññatthāya, pañca vacchatarasatāni thūṇūpanītāni honti yaññatthāya, pañca vacchatarisatāni thūṇūpanītāni honti yaññatthāya, pañca ajasatāni thūṇūpanītāni honti yaññatthāya, pañca urabbhasatāni thūṇūpanītāni honti yaññatthāya. 
Atha kho uggatasarīro brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi. 
Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho uggatasarīro brāhmaṇo bhagavantaṁ etadavoca: 
“Sutaṁ metaṁ, bho gotama, aggissa ādānaṁ yūpassa ussāpanaṁ mahapphalaṁ hoti mahānisaṁsan”ti. 
“Mayāpi kho etaṁ, brāhmaṇa, sutaṁ aggissa ādānaṁ yūpassa ussāpanaṁ mahapphalaṁ hoti mahānisaṁsan”ti. 
Dutiyampi kho uggatasarīro brāhmaṇo …pe… 
tatiyampi kho uggatasarīro brāhmaṇo bhagavantaṁ etadavoca: 
“sutaṁ metaṁ, bho gotama, aggissa ādānaṁ yūpassa ussāpanaṁ mahapphalaṁ hoti mahānisaṁsan”ti. 
“Mayāpi kho etaṁ, brāhmaṇa, sutaṁ aggissa ādānaṁ yūpassa ussāpanaṁ mahapphalaṁ hoti mahānisaṁsan”ti. 
“Tayidaṁ, bho gotama, sameti bhoto ceva gotamassa amhākañca, yadidaṁ sabbena sabbaṁ”. 
Evaṁ vutte āyasmā ānando uggatasarīraṁ brāhmaṇaṁ etadavoca: 
“na kho, brāhmaṇa,