Luận tạng Tây Tạng (Tengyur) — Tập 197

ག་གི་དོན་ཏེ། ཟུར་ལྟ་མ་ཞེས་བྱའོ། །བཱ་མཱ། གཡོན་མ་དང་། བ་ནི་ཏཱ། གཡོན་བྱེད་དང་། མ་ཧེ་ལ། དགའ་སྟོན་ས་གཞི་སྟེ། མ་ཧཱ་དགའ་སྟོན་དང་། ཨི་ལ་ས་གཞིའོ་ཞེས་ཀསྤི་ཎ་མངོན་པར་འབྱུང་བ་ལས་བཤད་དོ། །ཁྱད་པར་དུ་ཞེས་པ་ནི་བུད་

མེད་ཁྱད་པར་ཅན་བརྗོད་པར་བྱ་བ་དེ་ལ། ཨངྒ་ནཱ་ཞེས་པ་ཤྲེཥྛཱ་ངྒཱི། ལུས་མཆོག་མ་ཞེས་བྱ་སྟེ། བུད་མེད་ཀྱི་མཚན་ཉིད་དང་ལྡན་པ་རབ་ཏུ་ཤིས་པའི་རྐང་པ་དང་ལག་པ་ལ་སོགས་པའི་ལུས་འདི་ལ་ཡོད་པ་སྟེ། ལུས་བཟང་མ་ཞེས་བྱའོ། །བྷཱི་རུ་འཇིགས་ཅན་མ་སྟེ། འཇིགས་པའི་རང་
བཞིན་མའོ། །ཀཱ་མ་ནི། འདོད་ལྡན་པའོ། །བཱ་མ་ལོ་ཙ་ནཱ། གཡོན་མིག་མ་སྟེ། མིག་མཛེས་མའོ། །པྲ་མ་དཱ། རབ་མྱོས་མ་སྟེ། མཆོག་ཏུ་རྒྱགས་པའི་གཟུགས་དང་སྐལ་བ་བཟང་པོ་དག་གིས་བསྐྱེད་པའི་རྣམ་འགྱུར་ཅན་མའོ། །བྷཱ་བི་ནཱི། སྒེག་ལྡན་མ་སྟེ། བྷ་བ་ནི་སྒེག་པའི་སྤྱོད་པ་
ཡིན་ལ་དེ་དང་ལྡན་པས་སོ། །ཀཱནྟཱ། །ལུས་མཛེས་མའོ། །ལ་ལ་ནཱ། གཞོན་ལུས་མ་སྟེ། ཤིན་ཏུ་གཞོན་པའི་ལུས་ཅན་མའོ། །ནི་ཏམྦི་ནཱི། སྨད་རྒྱས་མའོ། །སུནྡ་ནི། མཛེས་མ་སྟེ། གཟུགས་མཛེས་པ་ཕུན་སུམ་ཚོགས་པ་དང་ལྡན་པའོ། །ར་མ་ཎཱི་དང་། རཱ་མཱ། དགའ་བྱེད་མའོ། །
དེ་ནས་ཀོ་པཱ་ནཱ་ཁྲོ་བྱེད་མ་སྟེ། དེ་ལྟ་བུ་ལ་སོགས་པ་བུད་མེད་དང་འབྲེལ་པའི་མིང་ཇི་སྙེད་པ་རྟོགས་པར་བྱའོ། །རཱ་ཛ་སྭ་ལཱ་ལ་སོགས་པ་བརྒྱད་ནི། རྒུལ་ལྡན་མ་སྟེ་བུད་མེད་ཟླ་མཚན་ཅན་མའི་མིང་ངོ་། །བུད་མེད་སྦྲུམ་མ་ལ་མིང་བཞི་སྟེ། ཨཱ་པནྣ་ས་ཏྭ། སེམས་ཅན་ཞུགས་མ་དང་།
གུརྦི་ཎཱི་ལུས་ལྕིམ་དང་། ཨནྟ་རྦཏྟྭཾ། ནང་ལྡན་མ་དང་། གརྒྷི་ཎཱི། སྙིང་པོ་ལྡན་མའོ། །བུ་ལ་མིང་ལྔ་སྟེ། ཨཱཏྨ་ཛ། བདག་སྐྱེས་དང་། ཏ་ན་ཡ། ལུས་འཕེལ་དང་། སཱུ་ནཱུ་སུ་ཏ། པུ་ཏྲ་རྣམས་ཀྱང་བུ་སྟེ་དེ་རྣམས་སོ། །ཕ་ལ་མིང་གསུམ་སྟེ། ཏཱ་ཏ། ཡབ་བམ་ཕ་འམ་སྐྱོང་
བྱེད་དོ། །ཛ་ན་ཀ་སྐྱེད་བྱེད་དོ། །པི་ཏྲ། ཕ་སྟེ་སྲུང་བྱེད་དོ། །མ་ལ་མིང་བཞི་སྟེ། ཛ་ན་ཡ་ཏཱི། ཡུམ་མམ་སྐྱེད་བྱེད་མ་དང་། པྲ་སཱུ་རབ་སྐྱེད་མ་དང་། མཱ་ཏཱ། འཚོ་མ་དང་། ཛ་ན་ནཱི། སྐྱེད་བྱེད་མའོ། །སྲིང་མོ་ལ་གཉིས་ཏེ། བྷ་གི་ནཱི། སྲིང་མོ་འམ་ཆེ་ཞེ་དང་། སྭ་སཱ་སྲིང་
མོའོ། །ཚ་བོའི་མིང་ལ་གཉིས་ཏེ། ན་ཏྲི་དང་། པཽ་ཏྲཱི། བུའི་བུའོ། །ཉེ་དུ་སྤྱིའི་མིང་ལ་དྲུག་སྟེ། ས་གོ་ཏྲ། རུས་མཚུངས་པ་དང་། བཱ་ནྟ་པ། འབྲེལ་པ་དང་། ཛྙཱ་ཏི། མཛའ་བཤེས་དང་། །བནྡྷུ་རྩ་ལག་དང་། སྭ་གཉེན་དང་། སྭ་ཛ་ན། རང་རིགས་སམ་རང་གི་སྐྱེ་བོ་འམ་

གཉེན་གྱི་སྐྱེ་བོའོ། །བཟའ་མི་ལ་མིང་བཞི་སྟེ། དཾ་པ་ཏི། བཟའ་མི་དང་། ཛཾ་པ་ཀི། ཁྱོ་ཤུག་སྟེ། འདི་དག་གི་དམ་དང་། ཛཾ་ཞེས་པའི་སྐྲ་དག་ནི་མི་ཟད་པའི་ཚིག་ཆུང་མ་རྗོད་པར་བྱེད་པ་དག་གོ། །བྷཱཪྻཱ་པ་ཏཱི། ཁྱིམ་ཐབ་དང་། ཛཱ་ཡཱ་པ་ཏཱི། བཟའ་མི་དང་། བྱིས་པའི་མིང་
ལ་རྐང་པ་གཅིག་ཏེ། ཤི་ཤུ། བྱིས་པ་དང་། ཤཻ་ཤ་རཾ། བུ་ཚ་དང་། བ་ལྱཾ་ཕྲུ་གུའོ། །དར་མའི་མིང་ལ་རྐང་བ་གཅིག་སྟེ། ཏཱ་རུ་ཎྱ། དར་མ་དང་། ཡོ་བ་ནཾ། ཤེད་ལྡན་ནམ་ལང་ཚོ་ཅན་ནོ། །རྒན་པོའི་མིང་ལ་རྐང་པ་གཅིག་སྟེ། སྠ་བཱི་རཾ། གནས་བརྟན་དང་། བྲྀདྡྷ་ཏྭཾ། རྒན་པོ་དང་། ཛཱིརྞ་དང་
ཛ་རན། རྒས་པ་དང་འཁོག་པའོ། །ད་ཤ་མཱི། བཅུ་པ་དང་། ཛྱ་ཡཱ་ན། ཆེས་རྒན་པ་སྟེ། ལོ་དགུ་བཅུ་ལས་གོང་དུ་འཕགས་པ་ནི་བཅུ་པའི་གནས་སྐབས་དང་ཆེས་རྒན་པའོ། །དེ་ནས་སྨན་གྱི་སྤྱིའི་མིང་ལ་ལྔ་སྟེ། བྷེ་ཥ་ཛ། རྩི་དང་། ཨོ་ཥ་དྷ། སྨན་དང་། བྷཻ་ཥ་ཛྱ། རྩི་སྨན་དང་། ཨ་ག་ད། ནད་
མེད་དང་། ཛཱ་ཡུཿའཚོ་བྱེད་ཅེས་པ་རྣམས་སོ། །ནད་ཙམ་ལ་མིང་བདུན་ཏེ། རུག་དང་། རུ་ཛ། ནད་དང་། ཨུ་པ་ཏཱ་པ། ཉེ་བར་གདུང་བས་སྟེ། ནད་ཀྱིས་ལུས་དང་ཡིད་ཉེ་བར་གདུང་བས་སོ། །རོ་ག་དང་། བྱཱ་དྷི་དང་། ག་ད་དང་། ཨཱ་མ་ཡ་རྣམས་ཀྱང་ནད་དེ། ན་ཚ་དང་ཉམས་མི་བདེ་བ་ལ་སོགས་པའོ། །
དེ་ནས་གྲ་ཎ་དང་། ཨ་རུ་ནི་རྨའི་མིང་ངོ་། །སྨན་པའི་མིང་ལ་ཚིགས་སུ་བཅད་པ་ཕྱེད་དེ། །རོ་ག་ཧཱ་རི། ནད་འཇོམས་ཏེ་ནད་འཕྲོག་པར་བྱེད་པས་སོ། །ཨ་གད་མ་ཀཱ་ར། ནད་སེལ་ཏེ། ནད་མེད་པར་བྱེད་པས་སོ། །བྷི་ཥ་ག་སྨན་པའོ། །བཻ་དྱ་འཚོ་བྱེད་དེ། ཚེའི་རིག་བྱེད་རིག་པས་སོ། །ཙི་ཀིཏྶ་ཀ་གསོ་
དཔྱད་མཁན་རྣམས་སོ། །ཁུ་བ་ལ་མིང་དྲུག་སྟེ། ཤུ་ཀྲ་ཁུ་བ་དང་། ཏེ་ཛཿཟླ་བའམ་གཟི་བརྗིད། རེ་ཏ་སཱི། ཐིག་ལེ་དང་། བཱི་ཛ་ས་བོན་དང་། བཱིརྻ། ནུས་པ་དང་། ཨིནྡྲི་ཡ། དབང་པོ་རྣམས་སོ། །དེ་ནས་མ་ཡུ་དང་སིཏྟཾ་ནི་མཁྲིས་པའོ། །ཀ་ཕ་དང་། ཤླེཥྨ་ནི་བད་ཀན་ནོ། །དེ་ནས་ཏྭཀ་པགས་པ་སྟེ།
ཏྭ་ཙ་ཡང་དག་པར་སྒྲིབ་པ་ལའོ་ཞེས་པས་རུས་པའི་གཟེབ་དང་ཤ་དང་ཁྲག་སྒྲིབ་པར་བྱེད་པས་སོ། །ཨ་སྲྀགྔྷ་ར། བྲག་འཛིན་པགས་པའོ། །ཤ་ལ་མིང་དྲུག་སྟེ། པི་ཤ་ཏཾ། ཆ་ཤས་ཀྱི་དོན་གྱིས་ཤ་སྟེ། པ་ཤ་ཆ་ཤས་ལ། ཀྟ་རྐྱེན་ནོ། །ཏ་ར་སཾ། བསྒྲལ་བས་ཤ་སྟེ། ཏྲྀ་སྒྲོལ་བར་བྱེད་པ་ལ། དེ་བ་པ་བཞིན་

དུ། ཨས་ཙ་རྐྱེན་ནོ། །མནྶ། མཆོད་བྱེད་དོ། །མཱ་ན་མཆོད་པ་ལ། ཧ་སའི་སྒྲ་བཞིན་དུ་སའི་རྐྱེན་ནོ། །པཱ་ལ་ལ་སྐྱོང་བྱེད་དེ་ཤའོ། །གྲ་བྱ་དང་། ཨཱ་མིཥ་ཤའོ། །ཚིགས་བཅད་ཕྱེད་ཀྱིས་ཁྲག་གི་མིང་སྟེ། རུ་དྷིར། ཁྱབ་གནས་ཏེ་ཁྲག་གོ །ཨ་སྲྀག་ཨ་ཏི་སྲྀ་ཛ་ཏི་ལྷག་པར་འདོར་བྱེད་ལ་པྲྀ་ཥོ་ད་ར་ལ་
སོགས་པས་ཨ་སྲྀག་ཏུ་བསྒྱུར་བ་སྟེ། མཚོན་མ་བཏབ་ན་མི་ལྟུང་ལ། བཏབ་ན་ལྷག་པར་འདོར་བས་སོ། །ལོ་ཧི་ཏ་དང་རཀྟ་ནི་དམར་བས་ཁྲག་གོ །ཀྵ་ཏ་ཛ། རྨ་སྐྱེས་ཏེ་ཁྲག་གོ། །ཤོ་ཎི་ཏཾ། རྒྱུད་ལྡན་ནམ་དམར་པོའོ། །སྙིང་ལ་བཞི་སྟེ། པུཀྐ་སྙིང་དང་། ཨ་གྲ་མཱནྶ། ཤ་མཆོག་དང་།
ཧྲྀ་ད་ཡ། སྙིང་པོ་དང་། ཧྲད་ཅེས་པ་ཡང་སྙིང་སྟེ། ལུས་ཀྱི་ནང་ན་གནས་པས་ཤའི་ཁྱད་པར་པདྨའི་རྣམ་པ་ལྟ་བུ་ཁ་འོག་ཏུ་ཕྱོགས་པ་སྟེ། དེ་ལྟར་ཡང་། པདྨའི་ཟེའུ་འབྲུ་དང་འདྲ་བ། །བུ་ག་ལྡན་པ་འོག་ཏུ་ཕྱོགས། །དེ་ནི་སྙིང་ཞེས་བྱ་བ་སྟེ། ཀུན་གྱི་སྐྱེ་མཆེད་ཆེན་པོའོ། །ཞེས་པ་པདྨ་དཀར་
པོའི་ཕྲེང་བ་ཞེས་བྱ་བ་ལས་སོ། །ལུས་ཀྱི་རྩ་ལ་མིང་གསུམ་སྟེ། ནཱ་ཌི་དང་། དྷ་མ་ནི་དང་། ཤི་རཱ་རྣམས་ཏེ། བུ་ག་དང་ལྡན་ཞིང་རླུང་འབབ་པ་དང་། སྲད་བུ་བཞིན་རུས་པ་འཆིང་བར་བྱེད་པ་དང་། ཀློ་མ་དང་། མ་སྟི་ཥྐཾ། ཀླད་རྒྱས་སམ་ཀླད་པ་སྟེ། མགོ་བོ་ལས་བྱུང་བ་མར་གྱི་གོང་དུ་ལྟ་བུ་གྷི་བྷི་
ཞེས་གྲགས་པའོ། །ནང་ན་གནས་པའི་ཟས་ལས་བྱུང་བའི་དྲི་མ་འབབ་པ་ནི་སྣབས་ལ་སོགས་པ་རྣམ་པ་བཅུ་གཉིས་ཏེ། དེ་ལྟར་ཡང་། ཞག་དང་ཁུ་བ་རྐང་དང་ཁྲག །རྣ་སྤབས་བཤང་གཅི་སྣབས་མཚན་མ། །བད་ཀན་དང་ནི་མཆིམ་རྡུལ། །མི་ཡི་དྲི་མ་བཅུ་གཉིས་སོ། །ཞེས་སོ། །
གསུམ་གྱིས་མཆིལ་མའི་མིང་སྟེ། སྲྀ་ཎི་ཀ་ཁ་ཆུ་ངང་། སྱནྡི་ནཱི་དང་། ལཱ་ལཱ། མཆིལ་མའོ། །གཉིས་ཀྱིས་དྲི་ཆུའི་མིང་སྟེ། མཱུ་ཏྲ། དྲི་ཆུའམ་གཅིན་དང་། པྲ་སྲ་བ། གཅི་བའམ་རྒྱུན་འབབ་པོ། །ཨཱུ་ཙྩཱ་ར་ལ་སོགས་པ་བཤང་བའི་མིང་སྟེ། ཨཱུ་ཙྩཱ་ར་དོར་བྱའོ། །ཨ་བསྐ་ར། ཁྱབ་ལྡན་
ནོ། །ཤམ་ལ། འདྲེས་མའོ། །ཤ་ཀྲྀཏ། འགྲོ་བྱེད་དོ། །པུ་རི་ཥཾ། བཤང་བའོ། །གུ་ཐ། ཕྱི་སའོ། །བརྩ་སྐཾ། དྲི་མའོ། །བིཥྛཱ་དང་། བི་ཌ་དྲི་ཆེན་ནོ། །དེ་ནས་ཐོད་པའི་མིང་ལ། ཀ་རོ་ཊི་དང་། ཀརྦ་ཊ་དང་། ཀ་པཱ་ལ་རྣམས་སོ། །རུས་པ་ཙམ་ལ་མིང་གསུམ་སྟེ། ཀཱི་ཀ་སཾ་དང་། ཀུ་ལྱཾ། གདུང་ངམ་རུས་དང་། ཨསྠི།

རུས་པའོ། །ཀ་ལེ་བ་ར་ལ་སོགས་པ་བཅུ་གཉིས་ནི་ལུས་སྤྱིའི་མིང་ངོ་། །དེ་ལ་ཀ་ལེ་བར་འམ་ཀ་རེ་བ་ར་ནི་ཁོག་པ་འམ་ལུས་སོ། །གཱ་ཏྲཾ་གོང་བུའམ་ལུས་དང་། བ་སུ་འདུས་པ་དང་། སཾ་ཧ་ན་ནཾ། ཚོགས་པ་དང་། ཤ་རཱི་རཾ། ཐོས་བྱེད་དང་། བརྵྻ། གཟུགས་པོ་དང་། བི་གྲ་ཧ། རྣམ་
འཛིན་དང་། ཀཱ་ཡ་ལུས་དང་། དེ་ཧ། ཁྱབ་པ་དང་། མཱ་རྟི། ལུས་དང་། ཏ་ནུ་དང་། ཏ་ནཱུ་ཡང་ལུས་ཏེ། སྔ་མ་ནི་ཏ་ནུ་རྒྱས་པ་ལ། མེ་རུའི་སྒྲ་བཞིན། ཨུ་རྐྱེན་དང་། ཕྱི་མ་ནི། ཙ་མི་ཏ་ནི་བ་དྷི་རྣམས་ལས་ཨུའོ་ཞེས་པས་ཨུ་རྐྱེན་དུ་བྱས་པའོ། །རྐང་པ་ལ་མིང་བཞི་སྟེ། པཱ་ད། པ་ད། འགྲོ་བར་བྱེད་
པས་རྐང་པ་དང་། ཙ་ར་ཎ། རྒྱུ་བྱེད་དང་། ཨཾ་གྷྲི་འགྲོ་བྱེད་དེ། ཨ་ཧི་འགྲོ་བ་ལ། མང་པོ་ལས་སོ་ཞེས་པས་ཀྲིན་འོ། །འཇིག་རྟེན་དབང་ཕྱུག་གི་བསྟོད་པ་བརྒྱ་པར། ཨཾ་ཧྲི་ཞེས་ཧ་ཡིག་གི་རྗེས་ཁྲིད་ཡོད་དེ། ཀླེ་ཤ་བྷུ་ཧཱ་ཧི་ཏེ་ཧཱ་ཧུ་ཏི་བི་ཧི་ཏ་བྲྀ་ཧ་ཏྲོ་ཧི་དུ་ཥྱ་གྣི་དཱ་ཧཱ་བཱ་ཧཱི་ནཱི་སྟཱ་རྦ་ཧུ་བི་ཧི་ཏ་ཧི་ཏཱ་པདྨ་ཧ་སྟཱཾ་
ཧྲི་བྷ་བཿ ཞེས་འབྱུང་ངོ་། །བུད་མེད་ཀྱི་རྟགས་ལ་མིང་གསུམ་སྟེ། ཨུ་པ་སྠ། ཉེར་གནས་དང་། བྷ་ག་ཆ་བའམ་སྐལ་བ་དང་། ཡོ་ནི་སྐྱེ་གནས་སོ། །སྐྱེས་བུའི་རྟགས་ལ་མིང་བཞི་སྟེ། ཤ་ཤྨ་ཕོ་རྟགས་དང་། མེ་ཏྲ་མཇུག་དོ་དང་། མ་ཧེ་ན་ཆུ་འདར་ཏེ། གཅི་བ་དང་ཁུ་བ་རྣམ་པར་འདོར་
བས་སོ་ཞེས་སོ། །ཤེ་ཕ་སི། ཉལ་གནས་ཏེ། ཤིང་ཉལ་བ་ལ། ཨ་སུན་རྐྱེན་དང་། ཕུཊ་ཨཱ་ག་མའོ། །གསུམ་ནི་འབྲས་བུའི་སྒོ་ངའི་མིང་སྟེ། མུཥྐོ་ཉཎྜ། འབྲས་བུའི་སྒོ་ང་དང་། ཀོ་ཥ་མཛོད་ཅན་དང་། བྲྀ་ཥ་ཎ། སྤུབས་ཅན་ནོ། །ལྟོ་བ་ལ་མིང་ལྔ་སྟེ། པི་ཙི་ཎྜཾ། གསུས་པ་དང་།
ཀུ་ཀྵེ་དཀུ་དང་། ཛ་ཋ་ར་དང་། ཨུ་ད་ར། ལྟོ་བ་དང་། རུནྡ་རཱུ་ཎ་གང་བ་ལའོ། །ཨདྷ་ལ་སོགས་པ་བཞིན་དུ་དན་རྐྱེན་དང་། ཐུང་དུ་ལ་སོགས་པའོ། །དེ་ནས་སྟ་ན་དང་། ཀུ་ཙ་ནུ་མའི་མིང་ངོ་། །ཕྲག་པ་ལ་མིང་གསུམ་སྟེ། སྐནྡྷ་ཕྲག་པ་སྟེ། ཀཾ་མ་སྟེ་ཀཾ་ད་དྷཱ་ཏི་སྐནྡྷ། ཞེས་པས། ཀཾ་
མགོ་བོ་ཡིན་པ་འཛིན་པར་བྱེད་པས་ཕྲག་པ་སྟེ། པཱ་ར་སྐ་ར་ལ་སོགས་པས་སུ་ཊ་ཨཱ་ག་མ་སྦྱར་བའོ། །བྷུ་ཛ་ཤི་རཿདཔུང་པའི་མགོའོ། །ཨཾ་ས་ཕྲག་པའོ། །དེ་ནས་ལག་པའི་མིང་ལ། བྷུ་ཛ། ལག་པ་སྟེ་སྐྱོད་པར་བྱེད་པས་སོ། །བཱ་ཧུ་འབར་བར་བྱེད་པས་ལག་པའོ། །པྲ་བིཥྚ། འཇུག་

པར་བྱེད་པས་ལག་པའོ། །དོཿཞི་བར་བྱེད་པས་ལག་པ་སྟེ། དམུ་ཉེ་བར་ཞི་བ་ལ་སོགས་རྐྱེན་ནོ། །པཉྩ་ཤ་ཁ། ཡལ་ག་ལྔ་པ་སྟེ་ཤིང་ཡལ་ག་ལྔ་པ་དང་འདྲ་བས་སོ། །ཤ་ཡ་ལག་པ་སྟེ་ཉལ་བྱེད་དོ། །པཱ་ཎི་ལག་པ་སྟེ་ཐ་སྙད་སྟོན་པར་བྱེད་པས་སོ། །དེ་ནས་ཀུརྤ་ར་ཞེས་པ་གྲུ་མོ་ཡིན་ལ།
དེའི་གོང་དུ་གནས་པ་པྲ་གཎྜ། བར་ལྷུའོ། །གྲུ་མོ་ལས་འོག་ཏུ། པྲ་ཀོཥྛ་ལག་ངར་རོ། །དེ་དང་ལག་མགོའི་བར། མ་ཎི་བནྡྷ། ནོར་བུ་འཆིང་བ་ཞེས་བྱ་སྟེ་མཁྲིག་མའོ། །དེ་ནས་མཐེའུ་ཆུང་གི་བར་ལ། ཀ་ར་བྷ་ཞེས་བྱའོ། །མཛུབ་མོའི་མིང་ལ། ཏརྫ་ནཱི། སྡིགས་མཛུབ་དང་། པྲ་དེ་ཤི་ནཱི།
རབ་ཏུ་སྟོན་བྱེད་ཅེས་བྱའོ། །སོར་མོ་ལ། ཨངྒུ་ལཱི་དང་། ཨངྒུ་རཱི། སོ་ར་མོ་དང་། ཀ་ར་ཤ་ཁ། ལག་པའི་ཡལ་ག་ཞེས་བྱའོ། །མཐེ་བོང་ལ་སོགས་ལ་སོ་སོའི་མིང་ལ། ཨངྒུ་ཥྛ། མཐེ་བོང་སྟེ། ཨངྒ་ཏིཥྛ་ཏི། ཞེས་པ་ལུས་ལ་གནས་པས་མཐེ་བོང་ངོ་། །མཛུབ་མོ་ལ་པྲ་དེ་ཤི་ནཱི། སྔར་བཤད་
པ་སྟེ། འཕྲལ་གྱི་ཐ་སྙད་རབ་ཏུ་སྟོན་ཅིང་གོ་བར་བྱེད་པས་སོ། །མ་དྷྱ་མ། གུང་མོ་ཐམས་ཅད་ཀྱི་དབུས་སུ་སྐྱེས་པས་སོ། །ཨ་ནཱ་མི་ཀཱ་མིང་མེད་དེ་འདི་ལ་མིང་མེད་པས་སོ། །ཀན་ཥྛ། མཐེའུ་ཆུང་སྟེ། ཐམས་ཅད་ཀྱི་ཐ་མར་གྱུར་པས་སོ། །དེ་ནས་སེན་མོའི་མིང་ལ། པུ་ནརྦྷ་བ། སླར་སྐྱེ་བ་
དང་། ཀ་ར་དུ་ཧ། ལག་སྐྱེས་དང་། ན་ཁ་དང་། ན་ཁ་ར། སེན་མོ་ཞེས་པ་རྣམས་སོ། །དེ་ནས་ཚད་ཀྱི་མིང་ལ། མཛུབ་མོ་དང་བཅས་པའི་མཐེ་བོང་བརྐྱང་བ་ནི། པྲ་དེ་ཤ་རབ་ཏུ་སྟོན་བྱེད་ཅེས་བྱ་ཞིང་། དེ་བཞིན་དུ་གུང་མོ་དང་ལྡན་པའི་མཐེ་བོང་བརྐྱང་བ་ནི། ཏཱ་ལཱ་སྟེ། མཐོ་གང་ཞེས་བྱ་
ལ། མིང་མེད་དང་ཡང་དག་པར་ལྡན་པའི་མཐེ་བོང་བརྐྱང་བ་ནི་ཀརྞ། བ་ལང་རྣ་བ་ཞེས་བྱ་བ་དང་། མཐེའུ་ཆུང་དང་ལྡན་པའི་མཐེ་བོང་བརྐྱང་བ་ནི། བི་སྟ་སྟེ་ཞེས་བྱ་བའི་མཐོའོ། །དེ་ནས་མགྲིན་པའི་མིང་ལ། ཀཎྛ་མགྲིན་པ་དང་། གལ་སྐེ་དང་། གྲའི་བ་མགྲིན་པ་དང་། ཤི་རོ་དྷི་དང་།
ཀནྡྐ་ར་མགོ་འཛིན་དང་། ཀམཱུ་གྲའི་བ། དུང་འདྲའི་མགྲིན་པ་དང་། ཏྲི་རེ་ཁཱ། རི་མོ་གསུམ་པ་སྟེ། འདི་གཉིས་སྐྱེས་བུ་ཆེན་པོའི་མིང་སྟེ། །དེ་ནས་ཁའི་བུ་ག་ལ་མིང་བདུན་ཏེ། བཀྟྲ་སྨྲ་བྱེད་དང་། ཨ་སྱ་ཁ་དང་། བད་ན། སྨྲ་བྱེད་དང་། རུཎྜ་དང་། ཨཱ་ན་ན། ཁ་འམ་ཞལ་དང་། ལ་པ་ནཾ། རྗོད་བྱེད་

དང་། མུ་ཁ། སྒོ་འམ་ཁ་རྣམས་སོ། །སྣའི་མིང་ལ། གྷྲཱ་ཎ་སྣོམ་བྱེད་དང་། གནྡྷ་བ་ཧ། དྲི་ལེན་དང་། གྷོ་ཎཱ། ནཱ་སཱ་དང་། ནཱ་སི་ཀ སྣ་འམ་ཤངས་སོ། །མཆུའི་མིང་ལ། ཨོཥྛ་དང་། ཨ་དྷ་ར་ཡ་མཆུ་མ་མཆུ་དང་། ར་ད་ནཱ་ཙྪ་ད་སོ་སྒྲིབ་དང་། ད་ཤ་ན་བཱ་ས་སཱི།
སོའི་གོས་ཏེ་དེ་དག་དང་ཆོས་མཚུངས་པས་སོ། །དེ་ནས་གྷཎྜ་དང་། ཀ་པོ་ལ་ནི་མཁུར་ཚོས་སོ། །དེ་ནས་སོའི་མིང་ལ། ར་ད་ནཱ་ལྡད་བྱེད་དང་། ད་ཤ་ནཱ། གཅོད་བྱེད་དང་། དནྟ་སྙེམས་བྱེད་དང་། ར་དཱ་སོ་རྣམས་སོ། །དེ་ནས་ཏཱ་ལུ་དང་། ཀཱ་ཀུ་དམ་རྐན་གྱི་མིང་ངོ་། །དེ་ནས་ལྕེའི་མིང་ལ།
ར་ས་ཛྙཱ། རོ་ཤེས་དང་། ར་ས་ནཱ། རོ་མྱང་དང་། ཛི་ཧྭ། ལྕེ་རྣམས་སོ། །དཔྲལ་བའི་མིང་ལ། ལ་ལཱ་ཊ། དཔྲལ་བ་དང་། ཨ་ལི་ཀ་རྒྱན་གནས་དང་། གོ་དྷི་མིག་འཛིན་ཏེ། གོརྣེ་ཏྲ་དྷཱི་ཡ་ཏི། ཞེས་པ། གོ་མིག་ཡིན་ཏེ་འཛིན་པར་བྱེད་དོ་ཞེས་སོ། །མིག་ལ་མིང་བརྒྱད་དེ། ལོ་ཙ་ནཾ། ལྟ་བྱེད་
དང་། ན་ཡ་ནཾ་འདྲེན་བྱེད་དང་། ནེཏྲཾ་མིག་དང་། ཨཀྵི་ཎཾ། མཐོང་བྱེད་དང་། ཙཀྵུཿགསལ་བྱེད་དང་། ཨཀྵིཎཱི། ཁྱབ་བྱེད་དང་། བྲྀ་ཀ་དང་། དྲྀཥྚི་དང་། སྣང་བྱེད་དང་ལྟ་བྱེད་དོ། །མགོ་བོ་ལ་མིང་ལྔ་སྟེ། ཨུཏྟ་མངྒཱ། ཡན་ལག་མཆོག་དང་། ཤི་རཿམགོ་བོ་དང་། ཤཱིཪྵ་མགོ་བོ་དང་། མཱུརྡྷ་
ན་སྤྱི་བོ་དང་། མསྟ་ཀ་ཀླད་པ་ཅན་ནོ། །སྐྲ་ལ་མིང་དྲུག་སྟེ། ཙི་ཀུ་རུ་བསགས་ནས་གཅོད་པས་སྐྲ་སྟེ། ཙི་སོགས་པ་ལའོ། །ཀུར་གཅོད་པ་ལའོ། །དེ་དག་ལ་པྲི་ཥོ་ད་ར་ལ་སོགས་པས་རྐྱེན་ཕྱིས་ཏེ། ཙི་ཀུ་རའོ། །ཀུནྟ་ལ། འཁྲིལ་བའོ། །བཱ་ལ་ཕྲ་བས་ན་སྐྲ་སྟེ། ཀ་ཙ་འཆིང་བར་བྱེད་པས་སྐྲ་སྟེ། ཀ་ཙ་འཆིང་བ་ལ། ཨཙ་
རྐྱེན་ནོ། །ཀེ་ཤ་ཞེས་ཀེ་མསྟ་ཀེ་ཤེ་ཏེ། ཏིཥྛ་ཏི། ཞེས་འབྱུང་སྟེ། ཀེ་ཞེས་པས་མགོ་བོ་ལ་ཞེས་པ་དང་། ཤ་ནི་ཤེ་ཏེ། ཉལ་བའི་ཆ་ཤས་ཀྱི་ཡི་གེ་སྟེ། མགོ་བོར་ཉལ་ཏེ་གནས་པ་དང་འདྲ་བས་མགོ་ཉལ་ཏེ་སྐྲའོ། །ཤི་རོ་རུ་ཧ། མགོ་སྐྱེས་སོ། །བ་སྤུ་ལ་མིང་གསུམ་སྟེ། ཏ་ནཱུ་རུ་ཧ། ལུས་སྐྱེས་སོ། །རོ་མ། བ་
སྤུ་སྟེ། རུ་ཧ་རབ་ཏུ་སྐྱེ་བ་ལ། བྱོ་མ་ལ་སོགས་པ་རྣམས་སོ་ཞེས་པས་མ་ནིང་རྐྱེན་དང་། མཐའ་དབྱི་བ་བྱས་པས། རོ་མ་ཞེས་གྲུབ་པ། དེ་ཉིད་ཀ་པི་རི་ག་ལ་སོགས་པ་རྣམས་སོ་ཞེས་པས་ལ་རུ་བསྒྱུར་བས་ལོ་མ། སྤུ་འམ་བ་སྤུའོ། །དེ་ནས་རྒྱན་གྱི་མིང་ལ། ཨ་ལཾ་ཀཱ་ར། ཨ་ལཾ་ཀྲི་ཡཱ། ཨཱ་བྷ་ར་ཎ། པ་རིཥྐཱ་ར་

བྷཱུ་ཥཎ། མཎྜ་ནཾ་རྣམས་རྒྱན་སྤྱིའི་མིང་ངོ་། །མུ་ཀུ་ཊ་དང་། ཀ་རི་ཊཾ་ཅོད་པན་དང་། ཙཱུ་ཌ་མ་ཎི། གཙུག་གི་ནོར་བུ་དང་། ཤི་རོ་མ་ཎི། སྤྱི་བོའི་ནོར་བུ་སྟེ་མགོ་རྒྱན་གྱི་མིང་ངོ་། །རྣ་རྒྱན་གྱི་མིང་ལ། ཀརྞི་ཀ་ཟེའུ་འབྲུ་ཅན་དང་། ཏཱ་ལ་པཏྟྲ། ཏ་ལའི་འདབ་དང་། ཀུཎྜ་ལ། འཁྱེལ་པ་ཅན་དང་། ཀརྞ་བེཥྚེ་ཀཾ་རྣ་
བ་དཀྲིས་པ་སྟེ་དེ་རྣམས་སོ། །དེ་ནས་གྲཻ་བེ་ཡ་ཀ་དང་། ཀནྛ་བྷཱུ་ཥ་མགྲིན་རྒྱན་ནོ། །ལག་གདུབ་ལ། ཀ་ཊ་ཀ་དང་བ་ལ་ཡའོ། །སྐེ་རགས་ལ། མེ་ཁ་ལཱ་འོག་པག་གམ་སྐེ་རགས་རྒྱན་ཅན་དང་། ར་ས་ནཱ་རོ་ལྡན་ཞེས་པ་གཉིས་སོ། །རྐང་གདུབ་ལ་མཉྫི་ར་དང་། ནཱུ་པུ་ར་དང་ཧཾ་ས་ཀ་ངང་པ་ཅན་
ཞེས་པ་ལ་སོགས་པའོ། །དེ་ནས་པགས་པ་ལ་སོགས་པ་རྣམ་པ་བཞི་ནི་གོས་ཀྱི་བྱེ་བྲག་སྟེ། གོས་ཀྱི་རྒྱུ་ཡིན་པས་སོ། །དེ་ལ་ཏྭ་ཀ་པགས་པ་སྟེ། ཤིང་ཤུན་དང་ཟར་མའི་རས་ལ་སོགས་པའོ། །པ་ལ་འབྲས་བུ་སྟེ། རས་བལ་ཤིང་གི་འབྲས་བུ་ལས་བྱུང་བའོ། །ཀྲྀ་མི་སྲིན་བུ་སྟེ། ད་ར་ལ་སོགས་
པ་སྲིན་བུའི་སྦུབས་ལས་སྐྱེས་པས་སོ། །རོ་མ་སྤུ་སྟེ་རི་དགས་ཨངྐུ་ཞེས་བྱ་བ་དང་། ལུག་ལ་སོགས་པའི་སྤུ་ལས་སྐྱེས་པའོ། །ན་བ་ཨམྦར་ལ་སོགས་པ་ནི། གོས་སར་ཞེས་པ་ལ་སོགས་པ་གོས་ཀྱི་ཁྱད་པར་རོ། །གོས་ཙམ་གྱི་མིང་ལ་བརྒྱད་དེ། ནཀྟ་ཀ། གཅེར་སྒྲིབ་དང་། ཀནྤ་ཊ་རས་
གོས་དང་། བསྟྲ་གོས་དང་། ཨཱཙྪ་ད་ནཾ། །གཡོགས་མའམ་དགབ་བྱ་དང་། བཱ་ས་བགོ་བ་དང་། ཙེམ་ལ་གོས་དང་། བཱ་ས་ནཾ་གཅེར་སྐྱོབ་དང་། ཨཾ་ཤུ་ཀཾ་བགོ་རྒྱུའོ། །མཆུ་དང་ཞེང་གི་མིང་ལ་དཻརྒྷྱ། རིང་བའམ་སྲིད་དུའོ། །ཨཱ་ཡཱ་མ་དང་ཨཱ་རོ་ཧ་རིང་བའོ། །པ་རི་ཎཱ་ཧ་དང་བི་ཤཱ་ལ་ཞིང་ཆེ་བ་འམ་
ཡངས་པའམ་རྒྱ་ཆེ་བའོ། །པུ་ཙེ་ལ་གོས་བཟང་དང་པ་ཊ་དར་གོས་ཏེ་གཉིས་ནི་གོས་བཟང་པོའི་མིང་ངོ་། །བ་རཱ་ཤི་གོས་ཀྱི་ཕུང་པོ་དང་སྠཱུ་ལ་ཤཊ་གོས་མཐུག་པོ་སྟེ་གཉིས་ནི་གོས་བརྩེགས་པའམ་སྤོམ་པོའི་མིང་ངོ་། །དེ་ནས་ནི་ཙོལ་དང་པྲཙྪ་ད་པཊ་སྨད་གོས་སམ་དོར་མའོ། །རལླ་ཀ་དང་ཀམྦ་ལ་ལ་བའམ་སྣམ་
བུའོ། །པ་རི་དྷཱ་ན་དང་ཨ་དྷོ་ཨཾ་ཨཾ་ཤུ་ཀ་ནི། ཤམ་ཐབས་སམ་མཐང་གོས་སོ། །པྲ་བཱ་ར་དང་ཨུ་ཏྟ་ར་སཾ་ག་ནི་སྟོད་གོས་སམ་བླ་གོས་སོ། །དེ་ནས་བི་ཏཱ་ནཾ་བླ་རེ་དང་། ཨུལློར་སྟེང་གཡོགས་དང་། དཱུ་ཥྱ་གུར་དང་། བཏྟྲ་བིཥཾ་སྦྲ་སྟེ། གོས་ཀྱི་ཁྱིམ་ཞེས་པའོ། །དེ་ནས་པྲ་ཏི་སི་ར་དང་ཛ་བ་ནི་ཀའམ་ཡ་བ་ནི་ཀཱ་ཡོལ་བ་དང་།

ཏི་རཥྐ་ར་བྷཱ་མི་སྣང་བྱེད་དོ་ཡོལ་བའི་མིང་ངོ་། །དེ་ནས་པ་རི་ཀརྨ་ཡོངས་བཅོས་དང་། ཨཾ་ག་སཾ་སྐ་ར་ལུས་ཀྱི་བཅས་ལེགས་ཏེ་ཁྲུས་ལ་སོགས་པ་སྤྱིའི་མིང་ངོ་། །དེ་ལ་མཱཪྵི། འདག་འཆལ་དང་། མཱརྫ་ནཱི་ཁྲུས་རྩི་དང་། མྲྀ་ཛ་དག་བྱེད་དོ། །ཨུདྡྷཏྟ་ན་དང་། ཨུཙྪ་ད་ན་དྲིལ་ཕྱིས་ཏེ། རྫས་ཀྱིས་དྲི་མ་སེལ་
བའི་མིང་ངོ་། །སྣཱ་ནཾ་ཁྲུས་སོ། །ཨཱ་སླ་བ་དང་སླ་བ་ཆུར་ཁྲུས་བྱེད་པའི་མིང་ངོ་། །ལུས་ལ་བྱུག་པའི་སྨན་དྲི་བཟང་པོའི་མིང་ལ། ཀུངྐུ་མ་གུར་གུམ་དང་། ཀཤྨཱི་ར་ཛནྨ་ཁ་ཆེ་སྐྱེས་དང་། ཨགྣི་ཤི་ཁ་མེའི་རྩེ་མོ་དང་། བར་མཆོག་ལྡན་དང་། བཱ་ཧྚཱི་ཀ་མེ་ལྡན་དང་། པཱི་ཏ་ན། སེར་པོ་དང་། སཱུ་ཪྱ་ཉི་མ་དང་། རཀྟ་
དམར་པོ་དང་། སཾ་ཀོ་ཙ་ཀུན་ནས་འཁུམས་དང་། པི་ཤུ་ན་ཕྲ་མ་ཅན་དང་། དེ་རྣམས་གུར་ཀུམ་གྱི་མིང་ངོ་། །དྷཱི་ར་བརྟན་པ་དང་། ལ་ཧི་ཏ་དམར་པོ་གཉིས་ནི་ཙནྡན་དམར་པོའི་མིང་ངོ་། །རྒྱ་སྐྱེགས་ལ་མིང་དྲུག་སྟེ། ལཀྵཱ་རྒྱ་སྐྱེགས་དང་། དེ་ཉིད་ཀ་པི་རི་ཀ་ལ་སོགས་པས་བསྒྱུར། རཀྵཱ་དེ་ཉིད་དོ། །ཛནྟུ་སྐྱེ་ལྡན་དང་།
ཡཱ་བ་དང་། ཨཱ་ལཀྟ་རྒྱ་ཚོས་དང་། དྲུ་མཱ་མ་ཡ་ཤིང་ནད་མེད་དོ། །ལི་ཤི་ལ་མིང་གསུམ་སྟེ། ལ་བངྒ་ལི་ཤི་དང་། དེ་བ་ཀུ་སུ་མ། ལྷའི་མེ་ཏོག་དང་། ཤྲཱི་སཾ་ཛྙ། དཔལ་གྱི་མིང་ཅན་ནོ། །དེ་ནས་ཛཱ་པ་ཀ་ཟློས་པ་པོ་དང་། ཀཱ་ལཱི་ཡ་དུས་སུ་ཕན་དང་། ཀཱ་ལ་ནཱུ་སཱ་རི་དུས་རྗེས་འབྲང་ཞེས་པ་རྣམས་ནི་ཚོང་པ་ལ་སོགས་པ་
ལ་ཀཱ་ལཱི་ཡ་ཞེས་གྲགས་པའི་ཤིང་སེར་པོའི་མིང་ངོ་། །དེ་ནས་ཨ་ག་རུའི་མིང་ལ་ས་མཱརྠ་ཀཾ་ནུས་ལྡན་དང་། བཾ་ཤི་ཀ་རྒྱུད་ལྡན་དང་། ཨ་གུ་རུ་ཞེས་པ། ལ་གྷུ་ནཱ་མ་ཏྭཱ་གུ་རུ་ཞེས་འབྱུང་སྟེ། ཡང་བའི་མིང་ཅན་ཉིད་ཀྱི་ཕྱིར་མི་ལྕི་བའོ་ཞེས་བྱའོ། །རཱ་ཛཱ་རྷ་རྒྱལ་པོ་ལ་འོས་ཞེས་བྱའོ། །ལོ་ཧ་ཀྲྀ་མི་ཛ་སྲིན་སྐྱེས་དང་། ཛོངྒ་
ཀཾ་ཞེས་པ་དང་། སློབ་དཔོན་བྱཱ་ཌིས།ཀྲྀཥྚ་དྲྀཀྵ་ཤིང་ནག་དང་། ནྲྀ་པ་པྲི་ཡ་མི་བདག་དགའ་བྱེད་ཅེས་ཀྱང་བཤད་དོ། །ཨ་ག་རུ་ཁྱད་པར་ཅན་ལ་ཨ་ག་རུ་ནག་པོ་དང་མཾ་ག་ལཱི་བཀྲ་ཤིས་ཅན་དང་མལླི་གནྡྷི་ཞེས་བཤད་དོ། །དེ་ནས་ཡཀྵ་དྷཱུ་པ་ལ་སོགས་པ་ལྔ་ནི་སྤོས་དཀར་གྱི་མིང་སྟེ། ཡཀྵ་དྷཱུ་པ་མཆོད་སྦྱིན་སྤོས་
དང་། སརྫ་ར་ས་ཐང་ཆུའི་སྤོས་དང་། ཨ་རཱ་ལ་པྲ་རྩི་སྤོས་དང་། སརྦ་ར་ས། ཁུ་བ་ཀུན་ལྡན་དང་། བ་ཧུ་རཱུ་པ། གཟུགས་མང་ངོ་། །པྲྀཀ་དྷཱུ་པ། སྦྱར་སྤོས་དང་། ཀྲྀ་ཏྲི་མ་དྷཱུ་པ། བཅོས་མའི་སྤོས་ཏེ། ཨ་ག་རུ་ལ་སོགས་པ་ལྷན་ཅིག་སྐྱེས་པའི་དྲི་རྣམས་དྲིའི་བསྟན་བཅོས་ལས་འབྱུང་བ་བཞིན་ཕན་ཚུན་ལེགས་པར་

སྦྱར་བ་ཡན་ལག་བཅུ་པ་ལྟ་བུའོ། །དེ་ནས་ཏུ་རུཥྐ་དང་པཎྜྀཀ་དང་། སིཧླ་དང་། ཡཱ་བན་ཞེས་པ་རྣམས་སིཧླའི་མིང་ངོ་། །དེ་ནས་ཤྲཱི་བ་ས་དཔལ་གོས་ཏེ་དེ་ལ་སོགས་པ་ལྔ་ནི་ཐང་ཆུའི་མིང་ངོ་། །དེ་ནས་གླ་རྩི་ལ་མིང་གསུམ་སྟེ། མྲྀ་ག་ནཱ་བྷེ་རི་དགས་ལྟེ་བ་དང་། མྲྀ་གམ་ད་རི་དགས་ཆང་དང་། ཀསྟཱུ་རི་གླ་རྩིའོ། །
ཀ་ཀོ་ལ་ལ་མིང་གསུམ་སྟེ་ཀོ་ལ་ཀ་མ་དང་ཀཀྐོ་ལ་ཀཾ་དང་ཀོ་ཤ་ཕ་ལ་སྦུབས་འབྲས་སོ། །ག་བུར་ལ་མིང་ལྔ་སྟེ། ཀརྦཱུ་ནུས་པ་དང་ལྡན་པས་ག་བུར་ཏེ། ཀྲྀ་པུ་ནུས་པ་ལ་ཨཱུ་ར་རྐྱེན་དུ་བྱས་པའོ། །གྷ་ན་སཱ་ར། སྤྲིན་གྱི་སྙིང་པོའོ། །ཙནྡྲ་སཾ་ཛྙཱ། ཟླ་བའི་མིང་ཅན་ཏེ། ཟླ་བ་དང་བུར་ཕན་ཚུན་མིང་གི་
རྣམ་གྲངས་སོ། །སི་ཏཱ་བྷྲ། འོད་དཀར་ཅན་ནོ། །ཧི་མ་བཱ་ལུ་ཀ་ཁ་བའི་བྱེ་མའོ། །དེ་ནས་ཚིགས་སུ་བཅད་པ་ཕྱེད་ཀྱིས་ཙནྡན་སྤྱིའི་མིང་སྟེ། གནྡྷ་སཱ་ར་དྲིའི་སྙིང་པོ་དང་། མ་ལ་ཡ་ཛ། མ་ལ་ཡ་སྐྱེས་ཏེ། རི་བོ་མ་ལ་ཡ་ལས་བྱུང་བའོ། །བྷ་དྲ་ཤྲཱི་དཔལ་བཟང་པོ། ཙནྡན་ཙན་དན་ཞེས་གྲགས་པ་སྟེ།
ཚིམ་བྱེད་ཅེས་བྱ་སྟེ། ཙ་དི་ཚིམ་པ་ལ་ལུཊ་རྐྱེན་ནོ། །ཙན་དན་དཀར་པོ་ལ་མིང་གསུམ་སྟེ། ཏཻ་ལ་པརྞི་ཀ་ཏིལ་མར་འདབ་ཅན་ཞེས་བྱ་བའི་ཙན་དན་རི་བོམ་ལ་ཡའི་ཕྱོགས་གཅིག་ནས་འབྱུང་བའོ། །གོ་ཤཱིཪྵ། ས་མཆོག་གམ་བ་ལང་མགོ་ཞེས་བྱ་བ་སྟེ་བ་ལང་མགོའི་རྣམ་པ་ཅན་མ་ལ་ཡའི་ཕྱོགས་སུ་
སྐྱེ་བའོ། །ཧ་རི་ཙནྡན། ཞེས་པ་ལ་ཧ་རི་ནི་སྦལ་པ་སྟེ། དེའི་དབྱིབས་ཅན་གྱི་རི་བོ་ཞིག་ལས་སྐྱེས་པས་ཧ་རི་ཙན་དན་ཞས་བྱའོ། །དེ་ནས་ཙན་དན་དམར་པོའི་མིང་སྟེ། ཏཻ་ལ་པརྞི། ཏིལ་མར་འདབ་ཅན་ནོ། །པ་ཏྲཱངྒཾ་འདབ་མའི་ལུས་ཅན་ཏེ་དབུས་དམར་བའི་འདབ་མ་ཅན་ནོ། །རཉྫ་ནཾ་ཚོས་བྱེད་དོ། །
རཀྟ་ཙནྡན་ཙན་དན་དམར་པོའོ། །ཀུ་ཙནྡན་ཙན་དན་ངན་པའི་མིང་ངོ་། །དེ་ནས་ཛཱ་ཏིའི་མིང་ལ། ཛཱ་ཏི། སྣ་མའམ་སྲི་ཤིང་སྣ་མ་དང་། ཀོ་ཥ་སྦུབས་ཅན་དང་། ཛཱ་ཏི་ཕ་ལ། སྤོས་ཀྱི་རྒྱལ་པོའམ་ལིག་ཤི་ཝེར་ཞེས་པའོ། །ཡཀྵ་ཀརྡ་མ། མཆོད་སྦྱིན་གྱི་བྱུག་པ་སྟེ། ག་པུར་དང་གླ་རྩི་དང་ཨ་ག་རུ་དང་ཀཀྐོ་ལ་རྣམས་སྦྱར་བའོ། །
བཀོད་པའམ་རྒྱན་གྱིས་བརྒྱན་པའི་མིང་ལ། ར་ཙ་ནཱ། བཀོད་པ་དང་པ་རི་སྱནྡ། ཆོས་རྩོམ་པ་དང་། ཨཱ་བྷོ་ག་དང་། པ་རི་པཱུརྞ། ཡོངས་སུ་རྫོགས་པའོ། །དཱི་པ། མར་མེ་དང་། པྲ་དཱེ་པ། རབ་འབར་ཏེ་སྒྲོན་མེའི་མིང་ངོ་། །གདན་ལ། པཱི་ཋ་དང་ཨཱ་ས་ནའོ། །དེ་ནས་ས་མུརྒ་ཏེ། ཟ་མ་ཏོག་དང་། སམྦུ་ཊ་ཀ། ཁ་སྦྱར་

རམ་གའུའོ། །པྲ་སཱ་དྷ་ནཱི། སྐྲ་ཤད་དང་། ཀངྐ་ཏི་ཀཱ་སོ་མངས་ཏེ། བ་སོ་ལ་སོགས་པ་ལས་བྱས་པ་སྐྲ་བྱི་དོར་བྱེད་པའི་ཆ་བྱད་དོ། །མེ་ལོང་ལ་དརྤ་ཎ་དང་མ་ཀུ་ར་དང་ཨཱ་དཪྴ། ཀུན་མཐོང་ཞེས་པ་རྣམས་སོ། །དེ་ནས་བྱཉྫ་ནཾ་རླུང་གཡབ་དང་ཏ་ལ་བྲྀཏྟ་ཀཾ་བསིལ་ཡབ་ཅེས་པ་སྟེ་དེ་རྣམས་མིའི་
སྡེ་ཚན་ནོ།། །།དེ་ནས་བྲམ་ཟེ་ལ་སོགས་པའི་སྡེ་ལ། ཐོག་མར་རིགས་ཙམ་གྱི་མིང་ལ། སནྟ་ཏི་རྒྱུད་དང་གོ་ཏྲ་རིགས་དང་ཛ་ན་ན་ཆོ་འབྲང་དང་། ཀུ་ལ། རུས་སམ་རིགས་དང་། ཨ་བྷི་ཛ་ན། རྩ་ལག་དང་། ཨ་ནྭ་ཡ་རྗེས་སྐྱེས་སམ་རྗེས་འགྲོ་དང་། བི་ཤ་རིགས་རྒྱུད་དང་། ཨ་ནྭ་བཱ་ཡ། རྩ་ཁྲིད་དང་སནྟཱ་ན་རྒྱུད་
དོ། །རིགས་དེ་ནི་རྣམ་པ་བཞི་སྟེ། བྲམ་ཟེ་དང་རྒྱལ་རིགས་དང་རྗེ་རིགས་དང་དམངས་རིགས་རྣམས་སོ། །བྲམ་ཟེ་ལ་མིང་དྲུག་སྟེ། དྭི་ཛ་གཉིས་སྐྱེས་ཏེ་བྲམ་ཟེ་དང་བྱ་དང་སོ་རྣམས་ལའོ། །ཨ་གྲ་ཛནྨ། སྔོན་སྐྱེས་ཏེ་རིགས་བཞིའི་ཐོག་མར་བྲམ་ཟེ་སྐྱེས་ཞེས་གྲག་གོ །བྷཱུ་དེ་བ་སའི་ལྷའོ། །བ་ཌ་བརྟ་
ཅན་ནོ། །བི་སྲ་བྲམ་ཟེའོ། །པྲཧྨ་ཎ་ཚངས་པའི་བུ་སྟེ། བྲམ་ཟེ་རྣམས་ཚངས་པའི་ཁ་ལས་སྐྱེས་པར་གྲག་གོ །མཁས་པའི་མིང་གི་རྣམ་གྲངས་ལ་འདིར་ཉི་ཤུ་རྩ་གསུམ་སྟེ། བིད་བཱན། རིག་པ་ཅན་ནམ་རིག་ལྡན་དང་། བི་པཤྩི་ཏ་རྣམ་གསལ་དང་། དོ་ཥ་ཛྙཱ་ཉེས་པ་ཤེས་དང་། སད་མཛེས་ལྡན་ནམ་དམ་པ་དང་
སུ་དྷཱི་བློ་བཟང་དང་། ཀོ་བི་ད། ཅི་ཡང་རིག་དང་། བུདྷ། རྟོགས་ལྡན་དང་། དྷཱི་ར་བརྟེན་པ་དང་། མ་ནཱི་ཥིཛྙ། སེམས་ཤེས་དང་། པྲཛྙཱ་ཤེས་རབ་ཅན་དང་། སཾ་ཁྱཱ་ན་གྲངས་ཅན་དང་། པཎྜི་ཏ་མཁས་པའམ་མཛངས་པ་དང་། ཀ་བི་སྙན་དངགས་མཁན་དང་། དྷཱི་མཱ་ན། བློ་ལྡན་དང་། སཱུ་རི་དཔའ་བོ་དང་། ཀྲྀ་ཏཱི་གོ་བ་
ཅན་དང་། ཀྲྀཥྚི་མཁས་པ་དང་། ལཔྡྷ་བརྞ་གྲགས་ལྡན་ནམ་གྲགས་ཐོབ་དང་། བི་ཙཀྵ་ཎ། རྣམ་པར་དངས་པའམ་རྣམ་པར་གསལ་བ་དང་། དཱུ་ར་དཪྴི་རིང་དུ་མཐོང་བ་དང་། དཱིརྒྷ་དིཪྴཱ་རིང་པོ་མཐོང་དང་། ཤོ་ཏྲི་ཡ། ཐོས་ལྡན་དང་། ཙྪནྡ་ས། སྡེབ་སྦྱོར་ཤེས་ཞེས་པ་རྣམས་སོ། ༈ ། རྒྱལ་རིགས་ཀྱི་སྡེ་
ལས་རྒྱལ་པོའི་མིང་ལ། རཱ་ཛ་རྒྱལ་པོ་དང་། བ་ཧུ་ཛ་དཔུང་བ་སྐྱེས་དང་། རྒྱལ་རིགས་རྣམས་ཚངས་པའི་དཔུང་པ་ལས་སྐྱེས་པར་གྲགས་པས་སོ། །ཀྵ་ཏྲི་ཡང་རྨ་སྐྱོབ་ཅེས་བྱ་སྟེ་རྒྱལ་རིགས་སོ། །པི་རཱ་ཊ། རྣམ་པར་རྒྱལ་དང་། རཱཊ་གསལ་བའམ་རྒྱལ་པོའོ། །པཱརྠི་བ། ས་བདག་དང་། ཀྵྨཱ་བྷུ་ཀ་ས་སྤྱོད་

དང་། ནྲྀ་པ་མི་བདག་དང་། བྷཱུ་པ་ས་སྐྱོང་དང་། མ་ཧཱི་ཀྵི་ཏཿ། ས་གཞི་སྐྱོང་བའོ། །ཨ་དྷཱི་ཤྭ་ར། ལྷག་པའི་དབང་ཕྱུག་སྟེ། རྒྱལ་ཕྲན་དུ་མས་བཏུད་པའི་རྒྱལ་པོ་དང་། ཙཀྲ་བརྟི། འཁོར་ལོས་སྒྱུར་བ་དང་། སརྦ་བྷཽ་མ། ས་ཀུན་དབང་བ་རྣམས་སོ། །གླང་པོ་ཆེའི་མིང་ལ་དནྟཱི། སོ་ལྡན་དང་། དདྷཱ་སོ་ཅན་དང་། བ་ལ་
སྟོབས་ལྡན་དང་། ཧསྟི་ལག་ལྡན་དང་། དྭི་དནྟཱ་སོ་གཉིས་པ་དང་། ཨ་ནེ་ཀ་པཱ། མང་པོ་འཐུང་དང་། དྭི་པཱ་གཉིས་འཐུང་དང་། མཱ་ཏཾ་ག་ཛ། གླང་མོ་སྐྱེས་རྣམས་སོ། །རྟ་སྤྱིའི་མིང་ལ་གྷ་ཊ་ཀ་འདྲེན་བྱེད་དང་། བཱ་ཏི། ཆུ་འཐུང་དང་། ཏུ་རྂ་འོག་ཏུ། ནཱ་ག །ཀུཉྫ་ར། ག་ཛ། ཐ་ར་ཎ། ཀ་རཱི། ཨི་བྷ། སྟམྦེ་ར་མ། སད་མི་སྟེ་ཆགས་ཅན་རྣམས་སོ།
ག་ཏུ་རཾ་ག་མ་རྣམས་མྱུར་འགྲོའམ་མགྱོགས་འགྲོའམ་འགྲོ་མགྱོགས་ཞེས་བྱའོ། །བ་ཛཱི་གཤོག་པ་ཅན་དང་། བཱ་ཧ་བཞོན་པ་དང་། ཨརྦ་རྟ་དང་། གནྡྷརྦ་འགྲོ་བྱེད་དང་། ཨ་ཤྭ་དང་། ཧ་ཡརྟ་དང་། སཻནྡྷ་བ། རྒྱ་མཚོ་སྐྱེས་ཏེ་ལན་ཚྭ་དང་རལ་གྲི་ལ་ཡང་ངོ་། །སཔྟ་ཡ་བདུན་ལྡན་རྣམས་སོ། །རྟ་ཁྱད་པར་ཅན་
གྱི་མིང་ལ། ཨཱ་ཛཱ་ནེ་ཡ། ཅང་ཤེས་དང་ཀུ་ལིནྟ། ཀྱེ་ལིང་། བི་ནཱི་ཏ། རྣམ་དུལ་དང་། སཱ་དྷུ་མ་ཧི་ན། ལེགས་འགྲོ་དང་། བཱ་ན་ཡུ་ཛ་དང་། པཱ་ར་སཱི་ཀ་དང་། ཀཱམྦོ་ཛ་བཧྣི་ཀཱ་ཡ། རྣམས་ཡུལ་དེ་དག་ཏུ་སྐྱེས་པའི་མིང་སྟེ། རིམ་པ་བཞིན། བཱ་ནའི་ཡུལ་སྐྱེས། པར་སིག་སྐྱེས། འདར་བྱེད་སྐྱེས་དང་། མེ་ལྡན་སྐྱེས་
ཞེས་བྱའོ། །ཕུན་སུམ་ཚོགས་པ་ལ་མིང་བཞི་སྟེ། སམྤ་ད། ཕུན་སུམ་ཚོགས་པ་དང་། སམྤཏྟི། འབྱོར་ལྡན་ནམ་ཕུན་སུམ་ཚོགས་པ་དང་། ཤྲཱི་དཔལ་ལམ་གཡང་དང་། ལཀྵྨཱི་ཕུན་སུམ་ཚོགས་པའམ་དཔལ་ལམ་ཤིས་པའོ། །སློབ་དཔོན་རབ་འབྱོར་ཟླ་བས་མཛད་པའི་འཆི་བ་མེད་པའི་མཛོད་ཀྱི་རྒྱ་
ཆེར་འགྲེལ་པ་འདོད་པ་འཇོ་བ་ཇི་ལྟར་རྙེད་པ་རྫོགས་སོ།། །།འདི་ནི་མཁས་པ་རྣམས་ཀྱིས་ཤེས་པར་བྱ་བའི་གནས་ལ་རིག་པའི་གནས་ལྔ་ཡོད་པ་ལས། སྒྲ་རིག་པར་གཏོགས་པ། གསུང་རབ་དགོངས་འགྲེལ་དང་བཅས་པ་དང་། རིག་བྱེད་ལ་སོགས་པ་ཕྱི་ནང་གི་གཞུང་ལུགས་རབ་འབྱམས་
ལས་འབྱུང་བ་མཁས་པ་རྣམས་ལ་གྲགས་པའི་མིང་གི་ཐ་སྙད་རབ་འབྱམས་ལ་རྨོངས་པ་མེད་པར་བྱེད་པ། མངོན་བརྗོད་ཀྱི་བསྟན་བཅོས་འཆི་བ་མེད་པའི་མཛོད་ཅེས་བྱ་བའི་རྒྱ་ཆེར་འགྲེལ་པ་སྟེ། འདིའི་རྩ་བ་ནི་པཎྜི་ཏ་འཆི་མེད་སེང་གེ་ཞེས་བྱ་བས། སྔོན་གྱི་སློབ་དཔོན་བྱཱ་ཌི་དང་། མཆོག་སྲེད་དང་། ཙནྡྲ་གོ་

མི་དང་། བཱ་མན་ལ་སོགས་པའི་བསྟན་བཅོས་ལས་བཏུས་ཏེ་ཁྱད་པར་དང་བཅས་པ་ཕུལ་དུ་བྱུང་བར་མཛད་དེ། དེ་ཡང་ཨུཏྤ་ལི་ལ་སོགས་པ་ལ་མདོར་བསྡུས་པ་དང་། མིང་གི་ཕྲེང་བ་སོགས་ལ་རྟགས་ཀྱིས་དམན་པ་དང་། རྟགས་ཀྱི་རབ་ཏུ་བྱེད་པ་སོགས་ལ་མིང་གིས་དམན་པ་
དང་། འཆི་མེད་ཕྲེང་བ་སོགས་མ་རྫོགས་པ་དང་། པོ་པཱ་ལི་ཏ་ལ་སོགས་པ་སྡེ་ཚན་གྱིས་སྟོང་པས་འདི་ཡོན་ཏན་ཐམས་ཅད་ཀྱིས་ཁྱད་པར་དུ་འཕགས་པ་ཉིད་ཡིན་པས་འདི་ཉིད་སྔར་པཎྜི་ཏ་ཀཱིརྟི་ཙནྡྲ་དང་། ཡར་ལུངས་ལོ་ཙཱ་བ་གྲགས་པ་རྒྱལ་མཚན་གྱིས་ཚང་བར་བསྒྱུར་རོ། །འགྲེལ་པ་འདོད་པ་འཇོ་བ་
འདི་ནི་པཎྜི་ཏ་རབ་འབྱོར་ཟླ་བ་ཞེས་བྱ་བས། ཐ་སྙད་ཀྱི་གཙུག་ལག་རབ་འབྱམས་ལས་བཏུས་ནས་རྣམ་པར་ཕྱེ་བ་སྟེ། མིང་སོ་སོའི་སྒྲ་སྒྲུབ་ཚུལ་རྣམས་ནི། གཙོ་བོར་སློབ་དཔོན་ཙནྡྲ་གོ་མིའི་ལུགས་ཡིན་ཏེ། སྔར་མཆོད་བརྗོད་དུ། མཐའ་ཡས་རྒྱུད་ཀྱི་མངོན་བརྗོད་ཆུ་གཏེར་རིན་ཆེན་གང་། །སྙན་
དངགས་མགྲིན་པ་དོ་ཤལ་བང་མཛོད་རྣམས་བཀོད་རྣམས། །དཔལ་ལྡན་ཙནྡྲ་གོ་མིས་སྦྱར་བའི་ཕུལ་བྱུང་མོད། །དེས་ནི་རབ་ཏུ་བསྒྲུབས་པའི་ཆོ་ག་བདག་གིས་བརྩམ། །ཞེས་འབྱུང་ངོ་། །གཞན་ཡང་། ཙནྡྲ་པའི་འགྲེལ་པ་སློབ་དཔོན་དྷརྨ་དཱ་སས་མཛད་པ་དང་། དེའི་རྒྱས་འགྲེལ་པཎྜི་ཏ་རཏྣ་
མ་ཏིས་མཛད་པ་དང་། དེའི་ཡང་རྒྱ་ཆེར་འགྲེལ་པ་པཎྜི་ཏ་སཱུརྞ་ཙནྡྲ་ཛི་ཏེནྡྲ་སྟེ་རྒྱལ་དབང་ཟླ་བ་གང་བས་མཛད་པ་སྟོང་ཕྲག་སུམ་ཅུ་རྩ་དྲུག་པ་དང་། དེས་མཛད་པའི་བྱིངས་ཀྱི་དཔུང་གཉེན་དང་། འཇམ་དཔལ་གྱི་བྱཱ་ཀ་ར་ཎའི་འགྲེལ་པ་ཀ་ལིངྒའི་སློབ་དཔོན་རྒྱལ་པོ་དཔལ་གྱིས་མཛད་པ་སྟོང་ཕྲག་
བརྒྱད་པ་དང་། རྒྱུད་ཉུང་གི་རྣམ་བཤད་དུ་རྒས་མཛད་པ་སྟེ། ཀ་ལཱ་པའི་འགྲེལ་པ་དུརྒ་སིདྷ་དང་། བྲམ་ཟེ་པཱ་ཎིའི་སྒྲའི་བསྟན་བཅོས་དང་། སློབ་དཔོན་མཆོག་སྲེད་དང་། བྱཱ་ཌི་དང་། ར་བྷ་ས་དང་། བཱ་མན་དང་། དྲང་སྲོང་རྒྱས་པ་སོགས་ཀྱིས་ཅི་རིགས་པར་མཛད་པའི་འཆི་མེད་ཕྲེང་བ་དང་། རིན་ཆེན་
མཛོད་དང་། སྒེག་པ་གསལ་བ་དང་། སྐབས་གསུམ་གྱི་ལྷག་མ་དང་། སྔོན་བྱུང་ལོ་རྒྱུས་ཀྱི་སྙན་དངགས་བྷཱ་ར་ཏ་དང་། ཤམྦའི་སྔོན་རབས་དང་། རཱ་མ་ཡ་ཎ་དང་། མརྐཎྜེ་ཡ་དང་། དབྱངས་ཅན་གྱི་མགུལ་རྒྱན་དང་། ཤ་བ་ར་སྭ་མི། རི་ཁྲོད་རྗེའམ། ཤི་བཱ་སྭ་མི། ཞི་བའི་རྗེས་མཛད་པའི་ཀ་སྤིན་མངོན་པར་

འབྱུང་བ་རྩ་འགྲེལ་དང་། ནག་མོའི་ཁོལ་གྱིས་མཛད་པའི་གཞོན་ནུ་འབྱུང་བ་དང་། དཎྜིའི་ཚིག་རྒྱན་ལ་སོགས་པ་ལ་བརྟེན་ནས་གཞུང་ཆེན་པོའི་ཚིགས་སུ་བཅད་པའི་གྲངས་ཀྱིས་བཙལ་ན་སྟོང་ཕྲག་བཅུར་ལོངས་པ་ཙམ་མཛད་པའི་ཕྱེད་ལྷག་གི་རྒྱ་དཔེ་སྣེའུ་གདོང་རྩེའི་གཙུག་ལག་ཁང་ན་བཞུགས་
པ་ལས་ཕུལ་དུ་བྱུང་བའི་མཁྱེན་རབ་དང་ཐུགས་རྗེ་ཚད་མ་མཆིས་པ་མངའ་བ་གངས་རིའི་ཁྲོད་ཀྱི་ས་སྐྱོང་མཐའ་དག་གི་གཙུག་གི་ནོར་བུ་ལ་ཞབས་རྟེན་གྱི་པདྨོའི་གེ་སར་རྣམ་པར་འགོད་པས་སྐབས་གསུམ་དབང་པོའི་ཁེངས་པ་འཕྲོག་པར་མཛད་ཅིང་། ལུགས་གཉིས་ཀྱི་རིག་ལུགས་དྲི་མ་མེད་
པས། སྟོབས་བཅུ་མངའ་བའི་བསྟན་པ་ཡིད་བཞིན་གྱི་ནོར་བུ་དང་། ལྷར་བཅས་སྐྱེ་དགུའི་ཕན་བདེ་དབྱིག་འཛིན་གྱི་གཞི་ལ་རྒྱས་ཤིང་ཡུན་དུ་གནས་པར་མཛད་པའི་ས་ཐམས་ཅད་ཀྱི་དབང་ཕྱུག་ཆོས་ཀྱི་རྗེ་ཆོས་ཀྱི་རྒྱལ་པོ་སྤྱན་སྔ་རིན་པོ་ཆེ་དཔལ་ངག་གི་དབང་ཕྱུག་གྲགས་པ་ཕྱོགས་ཐམས་
ཅད་ལས་རྣམ་པར་རྒྱལ་བ་ལྷའི་ཞལ་སྔ་ནས་ཀྱིས་ལེགས་པར་བསྒྱུར་ཅེས་བཀའ་ལུང་དང་མཐུན་རྐྱེན་བཟང་པོ་སྩལ་བ་ལ་བརྟེན་ནས། ལེགས་པར་སྦྱར་བའི་སྐད་ཀྱི་བརྡ་སྤྲོད་པའི་བསྟན་བཅོས་ཆེན་པོ་ཀ་ལཱ་པ་དང་། ཙནྡྲ་པ་འགྲེལ་པ་དང་བཅས་པ་དག་ཐོས་ཤིང་ཆ་ཤས་ཙམ་ཁོང་དུ་
ཆུད་ལ། སྔོན་གྱི་ལོ་ཙཱ་བ་ཆེན་པོ་རྣམས་ཀྱིས་དམ་པའི་ཆོས་ཇི་ལྟར་བསྒྱུར་བའི་ཚུལ་ཕྱོགས་ཙམ་མཐོང་བ་དཔལ་ཞྭ་ལུའི་བཙུན་པ་འགོས་ལོ་ཙཱ་བ་གསུམ་པ་དགེ་སློང་དྷརྨ་པཱ་ལ་བྷ་དྲ་ཞེས་བྱ་བས་གསུང་རབ་རིན་པོ་ཆེའི་མིང་གི་ཆ་རྣམས་ལ་མ་རྟོགས་པའི་
འཁྲུལ་པ་བསལ་བ་དང་། དྲི་མ་མེད་པའི་གཙུག་ལག་གི་ཚུལ་ཕྱོགས་ཙམ་གསར་དུ་བསྟན་པས་བསྟན་པ་རིན་པོ་ཆེའི་སྒོ་ཐམས་ཅད་ནས་མི་ནུབ་ཅིང་འཕེལ་བ་དང་བཅས་པའི་རྟེན་འབྲེལ་དུ་གྱུར་པར་བསམས་ནས། དཔལ་ས་སྐྱོང་མཆོག་གི་བཀའ་སྤྱི་བོས་
མནོས་ཏེ་སྒྲའི་སྒྲུབ་ཚུལ་རྒྱ་ཆེན་པོ་རྣམས་ནི་སྔོན་གྱི་ལོ་ཙཱ་བ་ཆེན་པོ་རྣམས་ཀྱིས་ཀྱང་མངོན་པ་མཛོད་ཀྱི་འགྲེལ་པ་རྒྱལ་སྲས་མ་དང་། མ་ཧཱ་མཱ་ཡའི་བཀའ་འགྲེལ་ཡོན་ཏན་ལྡན་པ་ལ་སོགས་པ་བོད་རྣམས་ཀྱི་ཚུལ་བཞིན་མི་རྟོགས་པར་དགོངས་ནས་མ་བསྒྱུར་བར་སྣང་

བ་བཞིན་བཞག །མིང་སོ་སོ་ནས་རྒྱ་གར་སྐད་དང་བོད་སྐད་ཤན་སྦྱར་བས། སྐབས་དོན་འགའ་ཞིག་གི་བཤད་པ་གོ་བ་ལ་ཤིན་ཏུ་ཕན་པར་སྣང་བ་ནི་རྒྱ་དཔེ་ལ་མེད་ནའང་། འདུས་པའི་འགྲེལ་པ་དོན་གསལ་དུ་བནྡྷ་བནྡྷ་ནི་ཆིངས་ཤིག་པའོ་ཞེས་སོགས་
བསྒྱུར་སྣང་བ་ལྟར་སྐད་གཉིས་ཀ་བཀོད་དེ་བཤད། དབྲི་བསྣན་གྱི་དབང་གིས་བར་སྐབས་སུ་མཚམས་སྦྱོར་བའི་ཚིག་ཕྲད་དང་རྣམ་དབྱེ་རྣམས་བོད་སྐད་ལ་ཇི་ལྟར་བདེ་བས་བླ་ཐབས་སུ་བསྣན། སྒྲའི་སྒྲུབ་ཚུལ་ཉུང་ཞིང་གསལ་བ་འགའ་ཞིག་ཤོང་སྟོན་རྡོ་རྗེ་རྒྱལ་མཚན་ལ་སོགས་པས་
བརྡ་སྤྲོད་པའི་ཚུལ་བོད་སྐད་དུ་བསྒྱུར་བ་དང་། བཤད་པའི་སྲོལ་བཏོད་པ་ལ་བརྟེན་ནས། དེང་སང་ཡང་མཁས་པ་དག་སྣང་བས། འགའ་ཞིག་ལ་ཕན་པར་བསམས་ནས་བསྒྱུར་ཏེ། མདོར་ན་སྒྲ་སྦྱོར་བམ་པོ་གཉིས་པ་ལས། དམ་པའི་ཆོས་བསྒྱུར་བའི་ལུགས་ནི་དོན་དང་
མི་འགལ་ལ། བོད་སྐད་ལ་ཡང་གར་བདེ་བར་གྱིས་ཤིག་ཅེས་གསུངས་པ་ལྟར་བསྒྱུར་ཅིང་ལེགས་པར་གཏན་ལ་ཕབ་པའོ། །དེ་ལྟར་གཉིས་མེད་གསུང་བའི་གསུང་རབ་ཀྱི། །ཚིག་འབྲུ་བཟང་པོའི་ཚིག་གི་རྒྱན་འགྱུར་ཕྱིར། །ཐ་སྙད་གཙུག་ལག་འགྲེལ་འདི་ལེགས་བསྒྱུར་
ལས། །ཐོབ་པའི་ལེགས་སྤྱད་སྟོན་ཟླ་ལྟར་དཀར་ཞིང་། །རྒྱུ་སྐར་ལམ་ལྟར་ཡངས་པ་གང་ཐོབ་དེས། །མ་ལུས་འགྲོ་བའི་སྙིང་གི་མུན་བསལ་ཞིང་། །རྣམ་དཔྱོད་བློ་གྲོས་སྣང་བ་ཆེར་རྒྱས་ནས། །བློ་བཟང་སོ་སོ་ཡང་དག་རིག་ཐོབ་ཤོག །ཇི་ལྟར་འཇིག་རྟེན་ལས་དང་ཉོན་མོངས་
རྒྱུར་བཅས་བྱེད་རྒྱུར་ལྡན་བྱུང་དང་། །ལས་དང་ཉོན་མོངས་པ་དག་ལྡོག་རྒྱུ་དེ་ཡང་འདྲེན་པས་རབ་ཏུ་གསུངས། །གང་ན་སྐྱེ་དང་རྒ་དང་རྒུད་པའི་སྡུག་བསྔལ་ངེས་པར་མི་གནས་པ། །ཐར་པ་མཆོག་དེ་སྨྲ་བའི་ཁྱུ་མཆོག་དེ་ཡིས་རང་གིས་མཁྱེན་ཏེ་གསུངས། །གཙུག་ལག་གི་ཚིགས་སུ་བཅད་
པའོ། །འདིའི་འགྱུར་སྔ་ཕྱིའི་ཡི་གེ་པ་ནི། སྐད་གཉིས་སྨྲ་བའི་བཤེས་གཉེན། མཚན་གྱི་ཐོག་མ་ཡི་གེ་མཆོག །མཐའ་ནི་རིན་པོ་ཆེ་ཡིས་སྤྲས། །ཨ་ནུ་བ་མ་རཏྣ་སྟེ། །དཔེ་མེད་རིན་པོ་ཆེ་ཡིས་སོ། །ཞེས་བྱའོ།། །།

༄༅༅། །རྒྱ་གར་སྐད་དུ། ཀཱ་བྱཱ་དཪྴ། བོད་སྐད་དུ། སྙན་ངག་མེ་ལོང་། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གདོང་བཞི་གདོང་གི་པད་ཚལ་གྱི། །ངང་པའི་བུ་མོ་ཐམས་ཅད་དཀར། །དབྱངས་ཅན་མ་ནི་ཁོ་བོ་ཡི། །ཡིད་ལ་རིང་དུ་གནས་པར་མཛོད། །
བསྟན་བཅོས་སྔ་མ་རྣམས་བསྡུས་ཤིང་། །སྦྱོར་བ་རྣམས་ཀྱང་ཉེར་མཚོན་ཏེ། །ཇི་ལྟར་ནུས་བཞིན་བདག་གིས་ནི། །སྙན་ངག་རྣམས་ཀྱི་མཚན་ཉིད་བྱ། །འདི་ན་ཀུན་དུ་མཆོག་རྣམས་ཀྱང་། །མཆོག་གི་རྗེས་སུ་བསྟན་པ་ཡི། །ཚིག་རྣམས་ཉིད་ཀྱི་དྲིན་གྱིས་ནི། །འཇིག་རྟེན་ལུགས་ལ་འཇུག་པར་བྱེད། །
གལ་ཏེ་སྒྲ་དོན་སྣང་བ་ནི། །འཁོར་བའི་བར་དུ་མི་གསལ་ན། །འཇིག་རྟེན་གསུམ་པོ་མཐའ་དག་འདི། །སྨག་རུམ་མུན་པ་ཉིད་དུ་འགྱུར། །སྔོན་གྱི་རྒྱལ་པོ་གྲགས་པའི་གཟུགས། །ངག་གི་རང་བཞིན་མེ་ལོང་ཐོབ། །དེ་དག་ཉེ་བར་མི་གནས་ཀྱང་། །རང་ཉིད་ཉམས་པ་མེད་ལ་ལྟོས། །མཁས་པས་ཡང་
དག་རབ་སྦྱར་བའི། །ངག་ནི་ངག་གི་འདོད་འཇོར་བཤད། །དེ་ཉིད་ཉེས་པར་སྦྱར་ན་སླར། །སྦྱོར་པོ་བ་ལང་ཉིད་རྗོད་བྱེད། །དེ་ཕྱིར་སྙན་ངག་དག་ལ་སྐྱོན། །ཆུང་བར་གྱུར་ཀྱང་ཅི་ཞིག་ལྟར། །བཏང་སྙོམས་མི་བྱ་ལུས་མཛེས་ཀྱང་། །སྐྱོན་གཅིག་གིས་ནི་སྐལ་ངན་འགྱུར། །སྐྱེ་བོ་བསྟན་བཅོས་མི་ཤེས་པས། །
ཡོན་ཏན་སྐྱོན་དག་ཇི་ལྟར་དབྱེ། །གཟུགས་ཀྱི་དབྱེ་བ་དམིགས་པའི་སྐབས། །ལོང་བདག་ལ་ཡོད་དམ་ཅི། །དེ་ཕྱིར་མཁས་པས་སྐྱེ་དགུ་རྣམས། །བྱེ་བྲག་རྟོགས་ལ་མངོན་དགོངས་ནས། །རྣམ་བཀྲ་ལམ་ལྡན་ཚིག་རྣམས་ཀྱི། །བྱ་བའི་ཆོ་ག་ངེས་པར་སྦྱར། །དེ་རྣམས་ཀྱིས་ནི་སྙན་ངག་གི། །ལུས་དང་
རྒྱན་ཡང་རབ་ཏུ་བསྟན། །ལུས་ནི་རེ་ཞིག་འདོད་པ་ཡི། །དོན་གྱི་རྣམ་བཅད་ཚིག་གི་ཕྲེང་། །དེ་ཡང་ཚིགས་བཅད་ལྷུག་པ་དང་། །སྤེལ་མ་རྣམ་གསུམ་ཉིད་དུ་གནས། །ཚིགས་བཅད་རྐང་བཞི་དེ་ཡང་ནི། །པྲྀཏྟ་ཛཱ་ཏི་ཞེས་རྣམ་གཉིས། །དེ་ཡི་སྤྲོས་པ་མཐའ་དག་ནི། །སྡེབ་སྦྱོར་གཞུང་དུ་ངེས་པར་བསྟན། །
རིག་དེ་སྙན་ངག་རྒྱ་མཚོ་ནི། །ཟབ་མོ་བརྒལ་འདོད་རྣམས་ཀྱི་གྲུ། །གྲོལ་བ་དང་ནི་རིགས་དང་མཛོད། །འདུས་པ་ཞེས་བྱ་དེ་འདྲ་ཡི། །ཚིགས་བཅད་རྒྱ་ཆེས་རྒས་བཅིངས། །ཆ་ཤས་རང་བཞིན་ཕྱིར་མ་བརྗོད། །སརྒས་བཅིངས་པ་སྙན་ངག་ཆེ། །དེ་ཡི་མཚན་ཉིད་བརྗོད་པར་བྱ། །ཤིས་བརྗོད་ཕྱག་བྱ་

དངོས་པོ་ནི། །ངེས་པར་བསྟན་པའང་དེ་ཡི་སྒོ། །སྔོན་བྱུང་གཏམ་ལས་གྱུར་པའམ། །ཅིག་ཤོས་ལེགས་པ་ལ་བརྟེན་པ། །སྡེ་བཞི་འབྲས་བུའི་དབང་གྱུར་དང་། །མཁས་ཤིང་ཡིད་འོང་འདྲེན་པ་དང་། །གྲོང་ཁྱེར་རྒྱ་མཚོ་རི་དང་དུས། །ཉི་ཟླ་འཆར་བའི་བསྔགས་པ་དང་། །སྐྱེད་
ཚལ་ཆུ་ཡི་རོལ་རྩེད་དང་། །ཆང་འཐུང་དགའ་བའི་དགའ་སྟོན་དང་། །མ་ཚོགས་པ་དང་བག་མ་དང་། །གཞོན་ནུ་སྐྱེ་དང་འཕེལ་བ་དང་། །གྲོས་དང་ཕོ་ཉ་བགྲོད་པ་དང་། །གཡུལ་དང་འདྲེན་པ་དར་བས་ཀྱང་། །བརྒྱན་པར་གྱུར་ཅིང་མདོར་བསྡུས་མིན། །ཉམས་དང་འགྱུར་བ་དག་གིས་གཏམས། །
སརྒ་ཤིན་ཏུ་རྒྱ་ཆེ་མིན། །མཉན་འོས་པྲྀཏྟ་ལེགས་མཚམས་སྦྱར། །ཀུན་དུ་སརྒ་དག་གི་མཐའ། །ཐ་དད་ལྡན་པས་འཇིག་རྟེན་མཛེས། །སྙན་ངག་དམ་པའི་རྒྱན་ལྡན་ནི། །བསྐལ་པའི་བར་དུ་གནས་པར་འགྱུར། །གང་ཞིག་ཡན་ལག་འགས་དམན་ཡང་། །གལ་ཏེ་སྦྱར་རྣམས་ཕུན་ཚོགས་
ཀྱིས། །དེ་རིག་མགུ་བར་བྱེད་པས་ན། །འདི་ནི་སྙན་ངག་སྐྱོན་མ་ཡིན། །ཐོག་མར་འདྲེན་པ་ཡོན་ཏན་གྱིས། །ཉེ་བར་བཀོད་ནས་དེ་ཡིས་ནི། །དགྲ་ལ་གནོད་པ་བྱེད་ཅེས་པའི། །ལམ་འདི་རང་བཞིན་མཛེས་པ་ཡིན། །རིགས་དང་བརྩོན་འགྲུས་ཐོས་སོགས་ཀྱིས། །དགྲ་བོ་ལ་ཡང་བསྔགས་བྱས་ནས། །
དེ་ལས་རྒྱལ་ཕྱིར་འདྲེན་པ་ནི། །ཁྱད་འཕགས་བརྗོད་པའང་བདག་དགའ་སྐྱེས། །རྐང་པ་མེད་པའི་ཚིག་རྒྱུན་ནི། །ལྷུག་པ་བརྗོད་པ་དག་དང་གཏམ། །ཞེས་པ་དེ་ཡི་རབ་དབྱེ་གཉིས། །དེ་ལ་འདྲེན་པ་ཉིད་ཀྱིས་ནི། །བརྗོད་པར་བྱ་བ་བརྗོད་པ་ལོ། །གཞན་ནི་འདྲེན་པའམ་གཞན་གྱིས་ཀྱང་། །རང་གི་ཡོན་
ཏན་བསྒྲགས་སྐྱོན་འདིར། །ཡང་དག་དོན་བསྔགས་ཕྱིར་ཡོད་མིན། །འོན་ཀྱང་ངེས་པ་མ་མཐོང་སྟེ། །དེར་ཡང་གཞན་གྱིས་བརྗོད་པའི་ཕྱིར། །གཞན་གྱིས་བརྗོད་དམ་རང་གིས་ཞེས། །དབྱེ་བའི་རྒྱུ་ནི་ཅི་ཞིག་ཡོད། །གལ་ཏེ་སྒོ་དང་གཞན་སྒོ་དང་། །ཡིད་བརྟེན་ལྡན་ཉིད་བརྗོད་པ་ནི། །ཐ་དད་པ་ཡི་རྟགས་ཡིན་
ན། །ཞར་གྱི་གཏམ་རྣམས་དག་ལ་ཡང་། །འཕགས་པ་སོགས་བཞིན་སྒོ་དང་ནི། །གཞན་གྱི་སྒོ་དག་ཅིས་མི་འཇུག །ལམྦྷ་སོགས་སམ་ཨ་ཤྲཱ་སའི། །དབྱེ་བ་མཐོང་ཡང་དེ་ལས་ཅི། །དེ་ཕྱིར་གཏམ་དང་བརྗོད་པ་ཞེས། །མིང་གཉིས་དག་གིས་རིགས་གཅིག་མཚོན། །ལྷག་མ་བརྗོད་པའི་རིགས་རྣམས་

ཀྱང་། །འདི་ཉིད་ནད་དུ་འདུས་པར་འགྱུར། །བུ་མོ་འཕྲོག་དང་གཡུལ་དང་ནི། །བསླུ་དང་དར་བ་ལ་སོགས་པ། །སརྒས་བཅིངས་པ་མཚུངས་པ་ཉིད། །དེ་དག་ཁྱད་བྱེད་ཡོན་ཏན་མིན། །སྙན་ངག་མཁན་གྱིས་བསམ་བྱས་རྟགས། །གཞན་དུ་ཡང་ནི་སྐྱོན་མི་འགྱུར། །འདོད་དོན་བསྒྲུབ་ལ་སྒོ་རུ་ནི། །
མཁས་པ་རྣམས་ལ་ཅིས་མི་འགྱུར། །སྤེལ་མ་ཟློས་གར་ལ་སོགས་ཏེ། །དེ་དག་རྣམས་ནི་གཞན་ན་རྒྱས། །ལྷུག་པ་ཚིགས་བཅད་རང་བཞིན་གང་། །ཙམ་བུ་ཞེས་པ་མངོན་པར་བརྗོད། །ངག་གི་རང་བཞིན་དེ་དག་ཀྱང་། །ལེགས་སྦྱར་དེ་བཞིན་རང་བཞིན་དང་། །ཟུར་ཆག་འདྲེན་མ་ཞེས་པ་སྟེ། །རྣམ་
པ་བཞི་རུ་མཁས་པས་གསུངས། །ལེགས་སྦྱར་ཞེས་པ་ལྷ་ཡི་ནི། །སྐད་དུ་དྲང་སྲོང་ཆེན་པོས་གསུངས། །དེ་སྐྱེས་དེ་མཚུངས་ཡུལ་ཅན་ཞེས། །རང་བཞིན་རིམ་པ་དུ་མ་ཡོད། །ཡུལ་འཁོར་ཆེན་པོ་ལ་བརྟེན་སྐད། །ལེགས་བཤད་རིན་ཅན་དག་གི་མཚོ། །སེ་རུས་བཅིངས་པ་རང་བཞིན་གང་། །རང་བཞིན་
མཆོག་ཏུ་གྱུར་པར་རིག །སཽ་ར་སེ་ན་གཽ་ཌ་དང་། །ལཱ་ཌི་གཞན་ཡང་དེ་འདྲའི་སྐད། །རང་བཞིན་ཉིད་ཅེས་བྱ་བ་ཡི། །ཐ་སྙད་རྣམས་ལ་ཉེ་བར་འགྱུར། །བ་ལང་རྫི་ལ་སོགས་པའི་ཚིག །སྙན་ངག་ལ་ཟུར་ཆག་ཅེས་གནས། །བསྟན་བཅོས་རྣམས་ལ་ལེགས་སྦྱར་ལས། །གཞན་པ་ཟུར་ཆག་ཉིད་དུ་
བརྗོད། །ལེགས་སྦྱར་སརྒས་བཅིངས་ལ་སོགས། །རང་བཞིན་སྐནྡྷ་ཀ་སོགས་དང་། །ཟུར་ཆག་ཨོ་ས་ར་སོགས་ཏེ། །ཟློས་གར་ལ་སོགས་འདྲེས་པའོ། །གཏམ་སོགས་སྐད་ནི་ཐམས་ཅད་དང་། །ལེགས་སྦྱར་གྱིས་ཀྱང་བཅིངས་པ་སྟེ། །རྨད་བྱུང་དོན་ཅན་རྒྱ་ཆེའི་གཏམ། །འབྱུང་པོའི་སྐད་ཀྱི་རང་བཞིན་
བརྗོད། །སྒེག་དང་རོལ་དང་སྟབས་ལ་སོགས། །ལྟ་བའི་དོན་ཡིན་ཅིག་ཤོས་ཀྱང་། །མཉན་པར་བྱ་བ་ཉིད་ཅེས་པ། །འདི་ཡང་ལུགས་གཉིས་དག་ཏུ་བརྗོད། །ཕན་ཚུན་དབྱེ་བ་ཕྲ་མོ་ཅན། །ཚིག་གི་ལམ་ནི་དུ་མ་ཡོད། །དེ་ལ་ཕཻ་དརྦྷ་དང་ནི། །གཽ་ཌའི་ཁྱད་པར་གསལ་བར་བརྗོད། །སྦྱར་བ་རབ་དངས་
མཉམ་ཉིད་དང་། །སྙན་དང་ཤིན་ཏུ་གཞོན་པ་དང་། །དོན་གསལ་བ་དང་རྒྱ་ཆེ་དང་། །བརྗིད་དང་མཛེས་དང་ཏིང་ངེ་འཛིན། །ཡོན་ཏན་འདི་བཅུ་བཻ་དརྦྷའི། །ལམ་གྱི་སྲོག་ཏུ་བཤད་པ་ཡིན། །འདི་དག་ཕལ་ཆེར་བཟློག་པས་ནི། །གཽ་ཌའི་ལམ་དག་མཚོན་པ་ཡིན། །སྦྱར་བ་སྲོག་ཆུང་ཡི་གེ་མཆོག །ལྷོད་

པ་ཉིད་ཀྱིས་མ་རེག་པའོ། །ལྷོད་པ་མཱ་ལཱ་ཏཱི་མཱ་ལ། །ལོ་ལཱ་ལི་ཀ་ལི་ལཱ་བཞིན། །གཽ་ཌ་པ་ཡི་རྗེས་ཁྲིད་བློས། །དེ་འདོད་མཱ་ལ་ཏཱི་དཱ་མ། །ལཾ་གྷི་ཏཾ་བྷྲ་མ་རཻཿཞེས། །བཻ་དརྦྷ་ཡི་སྦྱོར་ལྕི་བྱེད། །རབ་དང་ས་ལྡན་པ་གྲགས་དོན་ཅན། །ཟླ་བའི་མཚན་མ་ཨུཏྤལ་གྱི། །འོད་ཀྱིས་མཛེས་པ་རྒྱས་
ཞེས་པ། །རྟོགས་པའི་སྐལ་བཟང་ལྡན་པའི་ཚིག །ངེས་ཚིག་ཡོད་ཕྱིར་གཽ་ཌ་པ། །ཤིན་ཏུ་གྲགས་པ་མིན་ཡང་འདོད། །ཤིན་ཏུ་དཀར་མིན་ཆུ་ལས་སྐྱེས། །དེ་འདྲས་མཚན་པ་འོད་དཀར་ཅན། །མཉམ་པ་སྦྱོར་བ་མི་མཉམ་དྲལ། །དེ་ནི་འཇམ་རྩུབ་པར་མ་སྟེ། །སྦྱོར་བ་འཇམ་རྩུབ་པར་མ་ཡི། །ཡི་
གེ་བཀོད་པའི་སྐྱེ་གནས་ཅན། །ཁུ་བྱུག་ཅ་ཅོ་སྒྲོག་བྱེད་ཅིང་། །ཉར་མ་རབ་འཐོར་དངས་ཤིང་དངས། །ཆུ་རྒྱུན་ཆུ་ཐིགས་ཀྱིས་བྲན་པའི། །མ་ལ་ཡ་རླུང་བདག་ལ་འོངས། །ཙནྡན་གྱིས་བསྒོས་དྲི་ལྡང་ཞིང་། །འཇམ་པ་མ་ལ་ཡ་ཡི་རླུང་། །བདག་གི་བརྟན་འགོག་དགའ་མ་ནི། །མཆོག་གི་ཁ་ཡི་རླུང་དང་
འགྲན། །ཞེས་པ་མི་མཉམ་མ་བརྟགས་པར། །དོན་དང་རྒྱན་གྱི་ཚོགས་དག་ལ། །ལྟོས་ནས་ཤར་ཕྱོགས་པ་དག་ལ། །སྙན་ངག་ལམ་འདི་འབྱུང་བར་འགྱུར། །སྙན་པ་ཉམས་ལྡན་ཚིག་དང་ནི། །དངོས་པོ་ལ་ཡང་ཉམས་གནས་པ། །སྦྲང་རྩི་སྤྱོད་པ་སྦྲང་རྩིས་བཞིན། །གང་གིས་བློ་ལྡན་དགའ་བྱེད་
པའོ། །སྒྲ་ནི་གང་དང་ཅི་ཡིས་ཀྱང་། །གང་ཞིག་མཚུངས་པར་ཉམས་མྱང་བ། །དེ་ཡི་གཟུགས་སོགས་ཚིག་ཉེ་བ། །རྗེས་སུ་ཁྲིད་བཅས་ཉམས་དང་ལྡན། །གང་ཚེ་བྲམ་ཟེ་དགའ་བ་ཡི། །རྒྱལ་པོ་འདི་ཡིས་དཔལ་ཐོབ་འགྱུར། །དེ་ནས་བཟུང་སྟེ་ཆོས་ཀྱི་ནི། །དགའ་སྟོན་འཇིག་རྟེན་འདི་རུ་འབྱུང་། །ཞེས་
འདི་གཽ་ཌ་པ་མི་འདོད། །དེ་དག་རྗེས་སུ་ཁྲིད་ལ་དགའ། །ཕལ་ཆེར་རྗེས་སུ་ཁྲིད་པས་ཀྱང་། །བཻ་དརྒྷ་ནི་འདི་ཉིད་འདོད། །རྐང་བ་རྣམས་དང་ཚིག་རྣམས་ལ། །ཡི་གེ་བསྐོར་བ་རྗེས་སུ་ཁྲིད། །གལ་ཏེ་སྔ་མའི་ཉམས་མྱོང་ནི། །འདུ་བྱེད་རྟོག་བྱེད་མི་རིང་ཉིད། །སྟོན་མཚན་དབུ་རྒྱན་ཟླ་བ་ནི། །ཀུནྡའི་
ཕོན་པོར་འཁྲུལ་པ་ལ། །མཚན་མ་ཨིནྡྲ་ནཱི་ལ་མཚུངས། །བུང་བའི་དཔལ་ནི་ཡང་དག་འཛིན། །མཛེས་མ་མཁའ་ལ་ཟླ་བ་ཡི། །དཀྱིལ་འཁོར་མཛེས་པས་བདག་གི་ཡིད། །ཡིད་སྲུབས་ཀྱིས་མནན་བརྩེ་མེད་དུ། །འཇོམས་པར་བརྩོན་པ་འདི་ལ་ལྟོས། །ཞེས་པ་ཤིན་ཏུ་མི་རིང་བར། །ཐོས་པ་དག་ནི་

རྗེས་ཁྲིད་འདོད། །དགའ་མ་བཞིན་གྱི་ཆུ་སྐྱེས་དང་། །མཚུངས་པ་ཟླ་བ་ཞེས་མི་འདོད། །བདག་གི་ལུས་དང་ཁྲོ་བ་ཕྲ། །འདོད་པ་རྩུབ་ཅིང་མཛའ་བོ་ངན། །ཁེངས་པ་ཉམས་ཤིང་ཆགས་པ་རྒྱས། །རྨོངས་པ་སྐྱེས་ཏེ་སྲོག་རྣམས་སོང་། །ཞེས་སོགས་སྦྱོར་བ་རྩུབ་པ་དང་། །ལྷོད་པ་ཡང་ནི་སྟེར་བར་
བྱེད། །དེ་ཕྱིར་དེ་ལྟའི་རྗེས་ཁྲིད་ནི། །ལྷོ་ཕྱོགས་པ་རྣམས་མི་སྦྱོར་རོ། །སྐོར་བ་ཁོ་ན་ཚོགས་པ་ཡི། །སྤྱོད་ཡུལ་ཟུང་དང་ལྡན་པར་རིག །དེ་ཡང་གཅིག་ཏུ་སྙན་པ་མིན། །དེ་ཕྱིར་ཕྱི་ནས་བཤད་པར་བྱ། །ངེས་པར་རྒྱན་རྣམས་ཀུན་ལ་ཡང་། །དོན་གྱི་ཉམས་དག་སྦྱིན་པར་བྱེད། །དེ་ལྟ་ན་ཡང་གྲོང་པ་ཉིད། །
མིན་པའི་ཁུར་འདི་ཕལ་ཆེར་འཛིན། །འདོད་ལྡན་བདག་ལ་གཞོན་ནུ་མ། །ཁྱོད་ནི་ཇི་ལྟར་འདོད་མི་བྱེད། །ཅེས་འདི་གྲོང་པའི་དོན་བདག་ཉིད། །ཉམས་དང་བྲལ་བ་ཁོ་ནར་བྱེད། །གཡོན་མིག་འདོད་པ་གཏུམ་པོ་འདི། །ངེས་པར་བདག་ལ་བརྩེ་བ་མེད། །ཁྱོད་ལ་ཁྲོ་མེད་དགའ་ཞེས་པ། །གྲོང་པའི་དོན་མིན་རོ་
དང་ལྡན། །སྒྲ་ལའང་གྲོང་པ་ཉིད་ཡོད་དེ། །དེ་ནི་ལེགས་པའི་ཅིག་ཤོས་གྲགས། །དགའ་བའི་དགའ་སྟོན་བརྗོད་པ་ལ། །ཇི་ལྟར་ཡ་ཡིག་ལ་སོགས་བཞིན། །ཚིག་གི་མཚམས་སྦྱོར་གྱིས་ཞུགས་དང་། །སླར་ཡང་དག་དོན་དག་གིས་ཀྱང་། །ངེས་པར་རྟོགས་བྱེད་གྲོད་པ་སྟེ། །ཡཱ་བྷཿབ་ཏཿཔྲི་ཡ་བཞིན། །
གཞན་ལ་བསྣུན་ནས་སྐྱེས་བུ་ནི། །བིརྻ་ལྡན་པའི་བི་ཤྲནྟ། །གཞན་ལ་བསྣུན་ནས་སྐྱེས་བུ་ནི། །ཁུ་བ་ལྡན་པ་རྣམ་པར་ངལ། །དེ་ལྟ་བུ་སོགས་ལམ་དག་ནི། །གཉིས་ཀ་ལ་ཡང་བསྔགས་མ་ཡིན། །བྷ་ག་བ་ཏཱི་བྷ་གི་ནཱི། །ཞེས་སོགས་ཀུན་དུ་ཁས་ལེན་ཉིད། །དེ་ལྟར་སྙན་པ་རྣམ་པར་ཕྱེ། །ཤིན་ཏུ་
གཞོན་པ་བཤད་པར་བྱ། །རྩུབ་མིན་ཡི་གེ་མང་བ་འདི། །ཤིན་ཏུ་གཞོན་པ་ཉིད་དུ་འདོད། །གང་ཕྱིར་ཐམས་ཅད་མཉེན་པ་ནི། །སྦྱོར་བ་ལྷོད་པའི་སྐྱོན་དུ་བཤད། །སྤྲིན་གྱི་ཕྲེང་བ་ལྡན་དུས་སུ། །སྙན་པར་སྒྲོགས་པའི་མགྲིན་ལྡན་པ། །རྨ་བྱ་ཡི་ནི་མཇུག་མ་དག །ཟླུམ་པོར་བྱས་ནས་གར་བྱེད་དོ། །ཞེས་
པ་དོན་རྒྱས་ཉིད་མ་ཡིན། །རྒྱན་ཡང་དེ་འདྲ་ཡོད་མིན་ཏེ། །ཤིན་ཏུ་གཞོན་པ་ཉིད་ཀྱི་དཔེ། །དམ་པ་རྣམས་ཀྱི་ཁ་ན་གནས། །གསལ་ཕྱིར་གཞན་དག་ཕལ་ཆེར་ནི། །བརྗོད་པར་དཀའ་བ་དག་ཀྱང་སྦྱོར། །ནྱཀྵ་ས་རྒྱལ་རིགས་རྣམས་ཀྱི་ཕྱོགས། །སྐད་ཅིག་གིས་ནི་ཉམས་པར་བྱས། །དོན་གསལ་དོན་

བརྟག་མི་དགོས་ཉིད། །འཕྲོག་བྱེད་ཀྱིས་ནི་ས་གཞི་དག །རྨིག་པས་བཅད་པའི་ཀླུ་ཁྲག་གིས། །དམར་བ་ཆུ་ཡི་གཏེར་ལས་ཕྱུང་། །ཕག་པ་ཆེན་པོ་དག་གིས་ས། །ཆུ་གཏེར་དམར་པོ་དག་ལས་ཕྱུང་། །ཞེས་པ་འདི་ཉིད་བསྟན་པ་ནི། །བྲང་འགྲོའི་ཁྲག་ནི་བརྟག་
དགོས་ཉིད། །ལམ་འདི་གཉིས་ཀ་དག་ལ་ཡང་། །རྟོགས་པའི་སྐལ་བཟང་མི་ལྡན་ཞིང་། །སྒྲ་དང་རིགས་པ་ལས་འགོངས་པ། །འདི་འདྲ་ཕལ་ཆེར་བཞེད་མ་ཡིན། །གང་དུ་འགའ་ཞིག་བརྗོད་པ་ལ། །ཁྱད་འཕགས་ལྡན་པའི་ཡོན་ཏན་རྟོགས། །དེ་ནི་རྒྱ་ཆེར་བརྗོད་དེ་དེས། །སྙན་ངག་ལམ་
ཀུན་མགོན་དང་བཅས། །སློང་བ་རྣམས་ཀྱི་བཀྲེན་པའི་མིག །ལན་ཅིག་ཁྱོད་གདོང་ལ་ལྷུང་བ། །ལྷ་གཅིག་གནས་སྐབས་དེ་ཡིས་སླར། །གཞན་གྱི་གདོང་ལ་བལྟ་མ་ཡིན། །ཞེས་པ་ཉིད་ཀྱི་ངག་འདི་ལ། །གཏོང་བ་ཁྱད་འཕགས་ལེགས་པར་མཚན། །ལམ་འདི་ཉིད་ཀྱིས་གཞན་དག་ཀྱང་། །རིགས་
པ་མཚུངས་པས་དཔག་པར་བྱ། །བསྔགས་པར་འོས་པའི་ཁྱད་པར་དང་། །ལྡན་པ་རྒྱ་ཆེར་འགའ་ཞིག་འདོད། །རོལ་པའི་ཆུ་སྐྱེས་རྩེ་དགའི་མཚོ། །གསེར་གྱི་རྒྱན་ལ་སོགས་པ་བཞིན། །བརྗིད་པ་ཚིག་སྡུད་མང་པོ་ཉིད། །འདི་ནི་ལྷུག་པ་དག་གི་གསོས། །ཚིགས་བཅད་ལ་ཡང་ཤར་ཕྱོགས་པ། །འདི་ཉིད་
དཔུང་དང་གཉེན་དུ་བཞེད། །དེ་ལ་ལྕི་དང་ཡང་བ་རྣམས། །མང་དང་ཉུང་བ་ཉིད་སྤེལ་བས། །མཐོ་དམའ་ཡི་ནི་རྣམ་པ་དེ། །བརྗོད་པ་ལ་སོགས་རྣམས་ལ་བལྟ། །ནུབ་ཀྱི་རིམ་གོར་ལྷུང་བ་ཡི། །མཐའ་དག་ཉི་འོད་མ་ལ་སྟན་ཅན། །མཁྲེགས་པའི་ནུ་མ་ལ་གནས་པའི། །གོས་དམར་གཡོ་བཞིན་ཆུ་
ལྡན་མ། །ཞེས་པ་བརྗིད་དང་ལྡན་པའི་ཚིག །ཚིགས་བཅད་ལ་ཡང་ཤར་པ་སྦྱོར། །གཞན་དག་འཁྲུགས་མིན་མཛེས་པ་ཡི། །ཚིག་རྣམས་བརྗིད་པར་འདོད་དེ་དཔེར། །ཆུ་འཛིན་ངོས་ཀྱི་ཕང་ན་ཆགས། །མཚམས་ཀྱི་ཉི་འོད་གོས་དང་ལྡན། །ཆུ་ལྡན་མ་ཡིས་སུ་ཡི་ཡིད། །འདོད་པས་གཟིར་བར་བྱེད་
མི་འགྱུར། །མཛེས་པ་འཇིག་རྟེན་དོན་དག་ལས། །མ་འདས་འགྲོ་ཀུན་ལ་མཛེས་པའོ། །དེ་ཡང་གཏམ་གྱི་མ་དོན་བརྗོད་དང་། །བསྔགས་པ་ལ་སོགས་རྣམས་ལའང་སྦྱར། །དཀའ་ཐུབ་ཕུང་པོ་ཁྱོད་འདྲ་ཡི། །ཞབས་ཀྱི་རྡུལ་ནི་གཙང་མ་རྣམས། །ཡང་དག་བཏབ་པ་གང་ཡིན་པ། །དེ་དག་ཁོ་ན་ངེས་པར་ཁྱིམ། །

སྐྱོན་མེད་ལུས་ཅན་ཁྱོད་ཀྱི་ནི། །ལག་པའི་འཁྲི་ཤིང་བར་དག་ཏུ། །ནུ་མ་རབ་རྒྱས་འདི་དག་གི །གོ་སྐབས་རྙེད་པར་འགྱུར་མ་ཡིན། །ཞེས་པ་ཁྱད་པར་བརྗོད་པ་ཡི། །ལེགས་སྦྱར་དེ་དག་སྲིད་པ་ཉིད། །འཇིག་རྟེན་ལུགས་ཀྱི་རྗེས་སུ་ནི། །འབྲང་བ་ཐམས་ཅད་མཛེས་པར་འགྱུར། །འཇིག་རྟེན་འདས་ཤིང་
བརྗོད་འདོད་ཀྱིས། །དོན་གང་ཤིན་ཏུ་བཀོད་གྱུར་པ། །དེ་ཡིས་མཁས་པ་ཤིན་ཏུ་ནི། །ཚིམ་འགྱུར་ཅིག་ཤོས་མ་ཡིན་དཔེར། །དེང་ནས་བཟུང་སྟེ་བདག་གི་ཁྱིམ། །ལྷ་ཡི་ཁྱིམ་བཞིན་བསྟེན་པར་འོས། །ཁྱོད་ཀྱི་ཞབས་རྡུལ་ལྷུང་བ་ཡིས། །ཉེས་པ་དག་ནི་མ་ལུས་བཀྲུས། །ཁྱོད་ཀྱི་ནུ་མ་འདི་ལྟ་བུར། །རྣམ་པར་
རྒྱས་པར་གྱུར་པ་འདི། །ངེས་པར་མ་བརྟགས་བྱེད་པོ་ཡི། །ནམ་མཁའ་དག་ནི་ཆུང་ངུར་སྤྲུལ། །འདི་ནི་ཧ་ཅང་བརྗོད་པས་ན། །གོ་ཌ་པ་མུལ་མཛེས་པར་བརྗོད། །འཇུག་པ་སྔ་མ་གཞན་གྱི་ནི། །ལམ་ལ་སྙིང་པོ་ཉིད་དུ་བཤད། །གཞན་གྱི་ཆོས་དེ་གཞན་དག་ལ། །འཇིག་རྟེན་ལུགས་ཀྱི་རྗེས་འབྲངས་ནས། །གང་དུ་
ཡང་དག་འཛིན་བྱེད་པ། །ཏིང་ངེ་འཛིན་དུ་བརྗོད་དེ་མུད་པེར། །ཀུ་མུ་ད་ནི་མིག་འཛུམས་ཤིང་། །པདྨ་དག་ཀྱང་མིག་འབྱེད་ཅེས། །མིག་གི་བྱ་བ་བཀོད་པ་ལས། །དེ་ཡི་རྗོད་བྱེད་སྒྲ་དག་ཐོབ། །ནིཥྛུ་ཏ་དང་ཨུངྒཱིརྞ། །སྐྱུགས་སོགས་ཕལ་པར་འཇུག་བསྟན་པ། །ཤིན་ཏུ་མཛེས་ཏེ་གཞན་དུ་ནི། །གྲོང་བ་ཉིད་ཀྱི་ནུས་པ་
བསྟན། །པདྨས་ཉི་ཟེར་སྐྱུགས་པ་རྣམས། །འཐུངས་ནས་རྡུལ་དམར་སྐྱུགས་པ་ཡི། །ཁ་ཡི་དག་བྱེད་ཟེར་མ་རྣམས། །ཤིན་ཏུ་སྐྱུག་པར་བྱེད་པ་བཞིན། །ཞེས་པ་མཛེས་ཏེ་མི་མཛེས་པ། །ཆུང་མ་སྐྱུག་པ་བྱེད་ཅེས་པའོ། །ཅིག་ཅར་ཉིད་དུ་ཆོས་དུ་མ། །བཀོད་པ་དག་ཀྱང་འདོད་དེ་དཔེར། །ལྕི་བའི་མངལ་ཁུར་གྱིས་
ངལ་ཞིང་། །འཁུན་པར་བྱེད་པ་སྤྲིན་གྱི་ཕྲེང་། །འདི་དག་གཡོ་མེད་སྟེང་གི་ནི། །ཕང་པ་དག་ཏུ་ཡང་དག་ཉལ། །གྲོགས་མོའི་ཕང་པར་ཉལ་བ་དང་། །འཁུན་དང་ལྕི་བ་ཉིད་དང་དལ། །ཞེས་པ་འདི་ནི་མངལ་ལྡན་མའི། །ཆོས་མང་པོ་རྣམས་གཞན་ལ་བསྟན། །ཏིང་འཛིན་ཞེས་བྱའི་ཡོན་ཏན་གང་། །འདི་ནི་སྙན་
ངག་བདོག་ཀུན་ཏེ། །སྙན་ངག་མཁན་པོ་དོན་མཐུན་གྱི། །ཚོགས་ཀྱང་འདི་ཉིད་རྗེས་སུ་འབྲང་། །དེ་ལྟར་རང་བཞིན་བརྟགས་པ་ལས། །ལམ་ནི་འདི་གཉིས་རྣམ་པར་ཕྱེ། །དེ་དག་དབྱེ་བ་སྙན་ངག་མཁན། །སོ་སོ་ལ་གནས་བརྗོད་མི་ནུས། །བུར་ཤིང་འོ་མ་བུར་སོགས་ཀྱི། །མངར་བ་ཉིད་ཀྱིས་ཁྱད་པར་ཆེ། །དེ་

ལྟ་མོད་ཀྱི་དེ་བརྗོད་པར། །དབྱངས་ཅན་མས་ཀྱང་ནུས་མ་ཡིན། །རང་བཞིན་གྱིས་གྲུབ་སྤོབས་པ་དང་། །མང་དུ་ཐོས་པ་དྲི་མེད་དང་། །མངོན་པར་སྦྱོར་བ་མི་དམན་པ། །སྙན་ངག་ཕུན་སུམ་ཚོགས་པའི་རྒྱུ། །གལ་ཏེ་སྔོན་གྱི་བག་ཆགས་ཡོན་ཏན་གྱི། །རྗེས་འབྲེལ་སྤོབས་པ་རྨད་
བྱུང་མེད་པ་ལའང་། །ཐོས་དང་འབད་པ་དག་གིས་ངག་བསྟེན་ན། །ཅི་ཞིག་ལྟར་ཡང་ངེས་པར་རྗེས་འཛིན་བྱེད། །དེ་ཕྱིར་གྲགས་འདོད་རྣམས་ཀྱིས་རྟག་ཏུ་ནི། །སྙོམ་ལས་མེད་པར་རིམ་པས་དབྱངས་ཅན་བསྟེན། །སྙན་ངག་ཆུང་ངུ་ལ་ཡང་ངལ་བྱས་མི། །མཁས་པའི་འདུན་ས་དག་ཏུ་འདུག་ལ་དབང་། །སྙན་ངག་
མེ་ལོང་ལས་ལེའུ་སྟེ་དང་པོའོ།། །།སྙན་ངག་མཛེས་པར་བྱེད་པ་ཡི། །ཆོས་རྣམས་རྒྱན་ཞེས་རབ་ཏུ་བརྗོད། །དེ་ནི་ད་ལྟའང་རྣམ་རྟོག་སྟེ། །དེ་དག་མ་ལུས་སུས་འཆད་ནུས། །འོན་ཀྱང་རྣམ་རྟོག་ས་བོན་ནི། །སྔོན་གྱི་སློབ་དཔོན་རྣམས་ཀྱིས་བསྟན། །དེ་ཉིད་རབ་ཏུ་ལེགས་སྦྱར་
ཕྱིར། །ཡོངས་སུ་ངལ་འདི་བདག་གིའོ། །ལམ་ནི་རྣམ་པར་དབྱེ་དོན་དུ། །རྒྱན་འགའ་ཞིག་ནི་སྔར་ཡང་བསྟན། །ཐུན་མོང་དག་ཏུ་རྒྱན་གྱི་ནི། །རིགས་གཞན་རབ་ཏུ་བསྟན་པར་བྱ། །རང་བཞིན་བརྗོད་དང་དཔེ་དང་ནི། །གཟུགས་ཅན་གསལ་བྱེད་བསྐོར་བ་དང་། །འགོག་དང་དོན་གཞན་བཀོད་པ་
དང་། །ལྡོག་པ་ཅན་དང་སྲིད་པ་ཅན། །བསྡུས་དང་ཕུལ་བྱུང་རབ་བརྟགས་དང་། །རྒྱུ་དང་ཕྲ་མོ་ཆ་དང་རིམ། །དགའ་དང་ཉམས་ལྡན་གཟི་བརྗིད་ཅན། །རྣམ་གྲངས་བརྗོད་དང་ཀུན་དུ་ཕན། །རྒྱ་ཆེ་བ་སྙོན་དོར་སྦྱར་བ་དང་། །ཁྱད་པར་མཚུངས་པར་སྦྱོར་བ་དང་། །འགལ་དང་སྐབས་མིན་བསྟོད་པ་དང་། །ཟོལ་
སྟོད་ངེས་པར་བསྟན་པ་དང་། །ལྷན་ཅིག་བརྗོད་དང་ཡོངས་བ་རྗེས་ཤིས། །རབ་སྤེལ་དེ་ནས་དགོངས་བ་ཅན། །འདི་དག་ཚིག་རྣམས་དག་གིས་ནི། །རྒྱན་དུ་སྔོན་གྱི་མཁས་པས་བསྟན། །དངོས་པོ་རྣམས་ཀྱི་རང་བཞིན་དང་། །གནས་སྐབས་སྣ་ཚོགས་དངོས་གསལ་བྱེད། །དེ་ནི་རང་བཞིན་བརྗོད་པ་སྟེ། །
དང་པོའི་རྒྱན་ཡིན་རིགས་སོགས་དཔེར། །མཆུ་ནི་དམར་ཞིང་གུག་པ་དང་། །གཤོག་པ་ལྗང་ཞིང་མཉེན་པ་དང་། །མགྲིན་པ་ཁ་དོག་སུམ་ཕྲེང་ཅན། །ནེེ་ཙོ་འདི་དག་ཚིག་འཇམ་ལྡན། །མགྲིན་པའི་ནང་ནས་སྙན་སྒྲགས་ཤིང་། །མིག་ནི་ཀུན་དུ་འཕྲུལ་པ་ཡི། །ཕུག་རོན་རྩེ་འདོད་དགའ་མ་ལ། །

ཡོངས་སུ་བསྐོར་ནས་མཆུ་དག་སྦྱོར། །དགའ་མ་ཡི་ནི་རེག་པ་འདིས། །ལུས་ལ་སྤུ་ལང་རྒྱས་པ་དང་། །ཡིད་ནི་བདེ་བར་བྱེད་པ་དང་། །མིག་དག་ཟུམ་པར་བྱེད་ཅིང་འཇུག །མགྲིན་སྔོན་ལག་ན་ཐོད་པ་ནི། །གནས་པ་ཟླ་བའི་ཅོད་པན་དང་། །སྣུམ་ཞིང་དམར་བའི་རལ་པ་ཅན། །ཁྱུ་མཆོག་རྒྱལ་མཚན་
འཁྲུངས་པར་གྱུར། །རིགས་དང་བྱ་བ་ཡོན་ཏན་རྫས། །རང་བཞིན་བརྗོད་པ་འདི་འདྲ་ནི། །བསྟན་བཅོས་ཀུན་ལ་རྒྱལ་སྲིད་ཉིད། །སྙན་ངག་ལ་ཡང་འདི་དག་འདོད། །ཇི་ལྟ་ཅི་ཞིག་ལྟར་མཚུངས་པར། །གསལ་བར་གང་དུ་རྟོགས་བྱེད་པ། །དེ་ནི་དཔེ་ཞེས་བྱ་སྟེ་དེའི། །སྤྲོས་པ་འདི་ནི་རབ་བཤད་
བྱ། །མཛེས་མ་ཁྱོད་ཀྱི་ལག་མཐིལ་ནི། །ཆུ་སྐྱེས་བཞིན་དུ་ཀུན་དུ་དམར། །ཞེས་པ་ཆོས་དཔེ་དངོས་སུ་ནི། །མཚུངས་པའི་ཆོས་དག་བསྟན་ཕྱིར་རོ། །ཁྱོད་ཀྱི་གདོང་ནི་པདྨ་བཞིན། །མིག་དག་ཨུཏྤལ་སྔོན་པོ་བཞིན། །ཞེས་པ་ཆོས་ཅིག་རྟོགས་བྱེད་པ། །དེ་ནི་དངོས་པོའི་དཔེ་ཉིད་དོ། །ཁྱོད་ཀྱི་
གདོང་བཞིན་པདྨ་ནི། །རྣམ་པར་རྒྱས་པར་གྱུར་ཞེས་པ། །དེ་ནི་གྲགས་པ་བཟློག་པའི་ཕྱིར། །བཟློག་པའི་དཔེ་ཞེས་བྱ་བར་འདོད། །ཁྱོད་ཀྱི་ཞལ་བཞིན་ཆུ་སྐྱེས་ཏེ། །ཆུ་སྐྱེས་བཞིན་དུ་ཁྱོད་ཀྱི་ཞལ། །ཞེས་པ་ཕན་ཚུན་ཁྱད་འཕགས་ནི། །རྗོད་པར་བྱེད་འདི་ཕན་ཚུན་དཔེ། །ཁྱོད་ཞལ་པདྨ་ཉིད་དང་
མཚུངས། །གཞན་ནི་འགའ་ཞིག་དང་ཡང་མིན། །ཞེས་པ་མཚུངས་པ་གཞན་བཟློག་ཕྱིར། །འདི་ནི་ངེས་པར་ཉིད་ཀྱི་དཔེ། །རེ་ཞིག་ཁྱོད་གདོང་པདྨ་ཡི། །རྗེས་འགྲོ་གཞན་ཡང་དེ་འདྲ་བ། །གལ་ཏེ་ཡོད་ན་དེ་བྱེད་འགྱུར། །ཞེས་པ་འདི་ནི་ངེས་མེད་དཔེ། །ཁྱོད་གདོང་མཛེས་པ་ཁོ་ན་ཡིས། །ཟླ་
བའི་རྗེས་སུ་འགྲོ་མིན་ཏེ། །དགའ་བསྐྱེད་ལས་ཀྱིས་ཀྱང་ཞེས་པ། །འདི་འདྲ་བསྡུས་པའི་དཔེ་ཡང་ཡོད། །ཁྱོད་ཀྱི་ཞལ་ནི་ཁྱོད་ཉིད་ལ། །མཐོང་ཞིང་ཟླ་བ་མཁའ་ལ་མཐོང་། །འདི་ཉིད་ཁོ་ན་ཐ་དད་དེ། །གཞན་མེད་ཅེས་ནི་ཕུལ་བྱུང་དཔེ། །དེ་ཡི་བཞིན་དཔལ་ང་ཉིད་ལ། །ཡོད་ཅེས་ཟླ་བ་
སྙེམས་མི་དགོས། །པདྨ་ལ་ཡང་དེ་ཡོད་ཕྱིར། །ཞེས་པ་འདི་ནི་རབ་བརྟག་དཔེ། །སྨིན་ལེགས་གལ་ཏེ་པདྨ་འགའ། །རྣམ་པར་འཕྲུལ་པའི་མིག་ལྡན་ན། །ཁྱོད་ཀྱི་བཞིན་གྱི་དཔལ་འཛིན་ཏེ། །ཞེས་པ་འདི་ནི་རྨད་བྱུང་དཔེ། །ལུས་ཕྲ་ཁྱོད་གདོང་རི་བོང་ཅན། །ཞེས་བཏགས་ཁྱོད་གདོང་བསམ་པ་

ཡི། །ཟླ་བ་འདི་ཡང་རྗེས་སུ་བསྙགས། །ཞེས་འདི་རྨོངས་པའི་དཔེ་རུ་བཤད། །པད་ནང་བུང་བ་འཁོར་རམ་ཅི། །ཁྱོད་གདོང་ལ་མིག་གཡོ་འམ་ཅི། །བདག་གི་སེམས་ནི་རྣམ་པར་གཡོ། །ཞེས་པ་འདི་ནི་ཐེ་ཚོམ་དཔེ། །ཟླ་བ་སྐྱེངས་བྱེད་མཛེས་པ་འདི། །ཟླ་བས་ཚར་གཅོད་པདྨ་མིན། །
དེ་ཕྱིར་ཁྱོད་ཀྱི་གདོང་ཉིད་དོ། །ཞེས་འདི་གཏན་ལ་ཕེབས་པའི་དཔེ། །བསིལ་ཟེར་ཅན་གྱི་འགྲན་ཟླ་དང་། །དཔལ་དང་ལྡན་དང་དྲི་བཟངས་ཀྱི། །ཁྱོད་ཀྱི་གདོང་ནི་ཆུ་སྐྱེས་བཞིན། །ཞེས་པ་སྦྱར་བའི་དཔེ་རུ་བཤད། །མཚུངས་པའི་སྒྲ་ཡིས་བརྗོད་བྱའི་ཕྱིར། །མཉམ་ཉིད་དཔེ་སྟེ་ཇི་ལྟར་ན། །སྐྱེད་ཚལ་ཕྲེང་འདི་བུ་མོ་
བཞིན། །མཛེས་ལྡན་སཱ་ལ་ཀཱ་ན་ན། །པདྨ་རྡུལ་མང་ཟླ་བ་འཛད། །དེ་དག་ལས་ནི་ཁྱོད་ཀྱི་བཞིན། །མཚུངས་པ་ལ་ཡང་ཁྱད་པར་བཅས། །ཞེས་པ་སྨད་པའི་དཔེ་རུ་འདོད། །པདྨས་ཚངས་པ་མཆོག་ཏུ་བསྐྱེད། །ཟླ་བ་བདེ་འབྱུང་གཙུག་གིས་འཛིན། །དེ་དག་ཁྱོད་གདོང་མཚུངས་ཞེས་པ། །དེ་ནི་བསྔགས་
པའི་དཔེར་བརྗོད་དོ། །ཡོན་ཏན་ལྡན་ཡང་སྐྱོན་འགྱུར་ཡང་། །ཟླ་བ་ཁྱོད་གདོང་མཚུངས་ཞེས་པ། །བརྗོད་འདོད་བདག་གི་ཡིད་ལ་ཡོད། །ཅེས་པ་བརྗོད་འདོད་དཔེ་ཞེས་རིག །འདབ་བརྒྱ་པ་དང་སྟོན་ཟླ་དང་། །ཁྱོད་ཀྱི་གདོང་དང་གསུམ་པོ་ནི། །ཕན་ཚུན་རྣམ་པར་འགལ་ཞེས་པ། །དེ་ནི་འགལ་བའི་
དཔེ་བརྗོད་དོ། །དྲི་མ་ལྡན་ཞིང་བླུན་གྱུར་པས། །ཟླ་བ་ལ་ནི་ཁྱོད་གདོང་དང་། །འགྲན་པའི་ནུས་པ་ནམ་ཡང་མེད། །ཅེས་པ་དགག་པའི་དཔེ་ཉིད་དོ། །ཁྱོད་གདོང་རི་དགས་མིག་གིས་མཚན། །ཟླ་བ་རི་དགས་ཉིད་ཀྱིས་མཚན། །དེ་ལྟ་ན་ཡང་འདི་མཚུངས་ཉིད། །ཁྱད་འཕགས་མིན་ཞེས་ངོ་
བསྟོད་དཔེ། །འདི་ནི་བཞིན་ཉིད་པདྨ་མིན། །འདི་དག་བུང་བ་མ་ཡིན་མིག །ཅེས་པ་རྣམ་གསལ་མཚུངས་པ་ལས། །དེ་ནི་དེ་ཉིད་བརྗོད་པའི་དཔེ། །ཟླ་བ་པདྨ་དག་གི་ནི། །མཛེས་པ་ལས་འདས་ཁྱོད་ཀྱི་གདོང་། །བདག་རང་ཉིད་དང་མཚུངས་པར་གྱུར། །ཞེས་པ་ཐུན་མོང་མིན་པའི་དཔེ། །པདྨ་མཛེས་
པའི་སྙིང་པོ་ཀུན། །འགའ་ཞིག་དག་ཏུ་བསྡུས་པ་བཞིན། །ཁྱོད་ཞལ་རྣམ་པར་མཛེས་ཞེས་པ། །དེ་ནི་འབྱུང་མིན་དཔེ་ཞེས་རིག །ཟླ་བའི་གཟུགས་ལས་དུག་བཞིན་དང་། །ཙནྡན་ལས་ནི་མེ་བཞིན་དུ། །ཞལ་འདི་ལས་ནི་རྩུབ་མོའི་ཚིག །ཅེས་པ་སྲིད་པ་མིན་པའི་དཔེ། །ཙནྡན་ཆུ་དང་ཟླ་བའི་ཟེར། །

ཟླ་ཤེལ་སོགས་བཞིན་ཁྱོད་ཀྱི་ནི། །རེག་པ་བསིལ་ཞེས་ཁྱད་པར་དག །གསལ་བར་བྱེད་པ་མང་བའི་དཔེ། །ལུས་ཕྲ་ཁྱོད་ཀྱི་བཞིན་རས་ནི། །ཟླ་བའི་དཀྱིལ་འཁོར་ལས་བཏོན་བཞིན། །པདྨའི་ནང་ནས་ཕྱུང་བ་བཞིན། །ཞེས་པ་འདི་ནི་རྣམ་འགྱུར་དཔེ། །འོད་ཀྱིས་ཉི་བཞིན་ཉི་མ་ཡིས། །ཉིན་བཞིན་
ཉིན་གྱིས་མཁའ་ལ་བཞིན། །རྣམ་པར་གནོན་པས་ཁྱོད་ལ་དཔལ། །འཛིན་ཞེས་དེ་ནི་ཕྲེང་བའི་དཔེ། །གང་ཡང་དག་དོན་ཉིད་ཀྱིས་ནི། །གལ་ཏེ་ངག་དོན་ཉེར་འཇལ་ན། །ངག་དོན་དཔེ་དེ་བཞིན་སྒྲ་ནི། །གཅིག་དང་དུ་མས་དེ་རྣམ་གཉིས། །ཁྱོད་གདོང་མིག་ནི་མི་བརྟན་ཞིང་། །སོ་ཡི་འོད་ཟེར་རབ་
གསལ་བ། །འདམ་སྐྱེས་བུང་བ་གཡོ་ལྡན་ནི། །གེ་སར་དག་གིས་མཚོན་བཞིན་མཛེས། །པདྨ་ཅན་བཞིན་ལུས་ཕྲ་མ། །པདྨ་བཞིན་དུ་དེ་ཡི་གདོང་། །སྦྲང་རྩི་སྤྱོད་པས་བཞིན་དུ་ནི། །བདག་གིས་འཐུངས་ཤིང་འཐུངས་ཤིང་རྩེས། །དངོས་པོ་འགའ་ཞིག་ཉེར་བཀོད་ནས། །དེ་ཡི་ཆོས་མཐུན་རབ་བཀོད་
པ། །མཉམ་པ་ཉིད་དུ་རྟོགས་པ་ཅན། །ཟླ་བོ་དངོས་པོའི་དཔེ་ཡིན་དཔེར། །རྒྱལ་པོ་རྣམས་ནི་སྐྱེས་གྱུར་ཀྱང་། །ད་ལྟ་ཁྱོད་འདྲ་གཅིག་ཀྱང་མེད། །ཡོངས་འདུ་དག་ལ་རྐང་འཐུང་ནི། །གཉིས་པ་ངེས་པར་ཡོད་མ་ཡིན། །ལྷག་པས་དམན་པ་བྱ་བ་ཡི། །ཆོ་ག་གཅིག་ལ་རབ་བསྡུས་ནས། །གང་སྨྲས་དེ་
ནི་མཚུངས་པ་དག །སྦྱོར་བའི་དཔེ་རུ་བཤད་དེ་དཔེར། །བུ་ལོ་མ་དགྲ་མཐོ་རིས་དང་། །ཁྱོད་ཀྱིས་ས་བསྲུང་མེལ་ཚེ་བྱེད། །དེ་ཡིས་དྲེགས་ལྡན་ལྷ་མིན་དང་། །ཁྱོད་ཀྱིས་མི་ཡི་བདག་པོ་འཇོམས། །རྒྱལ་པོ་མཛེས་པས་ཟླ་བ་དང་། །གཟི་བྱིན་གྱིས་ནི་ཉི་མ་དང་། །བརྟན་པས་རྒྱ་མཚོའི་རྗེས་སུ་བྱེད། །
ཅེས་པ་འདི་ནི་རྒྱུད་པེར་དྲན། །བློ་ལྡན་མི་དགྱེས་མེད་གང་ལ། །ངེས་པར་དཔེ་ཡི་སྐྱོན་དག་ནི། །ཐ་དང་རྟགས་དང་ཚིག་ལ་མེད། །དམན་དང་ལྷག་པ་ཉིད་ལའང་མེད། །མ་ནིང་འདི་འགྲོ་བུད་མེད་བཞིན། །བུད་མེད་འདི་སྨྲ་སྐྱེས་པ་བཞིན། །བདག་གི་གྲོགས་འདི་སྲོག་རྣམས་བཞིན། །རིག་པ་རྣམས་
བསྒྲུབ་ནོར་བཞིན་ནོ། །ས་གཞི་སྐྱོང་བ་ཁྱོད་བཞིན་དུ། །ལྷ་ཡི་རྒྱལ་པོ་རྣམ་པར་མཛེས། །ཚ་ཟེར་ཅན་གྱི་ནུས་པ་ལ། །མི་བདག །གཟི་ཡིས་འགོང་བར་ནུས། །ཞེས་པ་དེ་ལྟ་བུ་ལ་སོགས། །སྐལ་བཟང་ནམ་ཡང་གཏང་མིན་ཉིད། །སྦྱོར་བ་འགའ་ལ་ངག་རིག་རྣམས། །མི་དགྱེས་པ་ཡོད་ཇི་ལྟར་ན། །

ངང་མོ་བཞིན་དུ་ཟླ་བ་དཀར། །མཚོ་རྣམས་བཞིན་དུ་མཁའ་དྲི་མེད། །ཁྱི་བཞིན་དཔའ་བོ་རྗེ་ལ་གུས། །ཉི་མ་བཞིན་དུ་མེ་ཁྱེར་གསལ། །འདི་འདྲ་སྤངས་ཏེ་མཁས་རྣམས་ཀྱིས། །རྒྱུ་ཡང་འདིར་ནི་བསམ་པར་བྱོས། །བཞིན་ལྟར་ལྟ་བུ་ཇི་ལྟར་སྒྲ། །མཐུན་མཚུངས་ཡང་དག་མཚུངས་
དང་མཉམ། །ཡང་དག་གསལ་དང་ངེས་པར་གསལ། །རབ་གསལ་གཟུགས་ཀྱི་ཟླ་བོ་དང་། །གཉེན་པོ་དང་ནི་དགྲ་ཟླ་དང་། །སོ་སོར་རྟོག་དང་འགལ་དང་འདྲ། །བལྟ་བཅས་དང་ནི་བསླུ་བ་དང་། །རིགས་མཐུན་རྗེས་སུ་སྨྲ་བ་དང་། །གཟུགས་བརྙན་དང་ནི་སོ་སོར་སྡེབ། །གཟུགས་མཚུངས་མཉམ་དང་ཡང་དག་གཞལ། །མཚན་ཉིད་
མཐུན་འདྲ་མཚུངས་པ་དང་། །མཐུན་ཕྱོགས་དཔེར་བྱས་དཔེ་དང་རྟོག །དམན་དང་ཅུང་ཟད་དམན་སོགས་དང་། །རབ་ཏུ་སྨྲ་དང་སོ་སོར་བཟླག །རགས་མཐུན་མཉམ་བྱས་སྒྲ་དག་དང་། །གང་ཡང་དམན་མིན་དོན་ཅན་ཚིག །རི་བོང་མཚན་མའི་གདོང་ཅན་སོགས། །འབྲུ་མང་པོ་ཡི་ཚིག་སྡུད་དང་། །འགྲན་
དང་རྒྱལ་དང་སྡང་བ་དང་། །འཁུ་དང་མི་མཐུན་སྒྲོགས་པ་དང་། །འཐབ་པ་དང་ནི་འཕྱ་བ་དང་། །སྨ་འབེབས་བྱེད་དང་སྨོད་པ་དང་། །ཅོ་འདྲི་བ་དང་འགོག་པ་དང་། །རྒོད་དང་ཕྲག་དོག་མི་བཟོད་དང་། །དེ་ཡི་སྐལ་བཟང་འཕྲོག་བྱེད་དང་། །དེ་ཡི་མཛེས་པ་ཟུམ་བྱེད་དང་། །དེ་དག་འགྲན་ལས་ཚར་གཅོད་དང་། །
དེ་དག་མཚུངས་ལས་ལྷག་པར་མཛེས། །དེ་ཡི་རྗེས་སུ་རྐང་འཇོག་དང་། །དེ་ཡི་ནུས་པ་ལ་འཇུག་དང་། །དེ་ཡི་རྗེས་འགྲོ་རྗེས་སུ་འཆིང་། །དེ་ཡི་ངང་ཚུལ་དེ་འགོག་དང་། །དེ་ཡི་རྗེས་སུ་བྱེད་ཅེས་པའི། །སྒྲ་རྣམས་མཚུངས་པ་གསལ་བྱེད་ཡིན། །ཐ་དད་སྣང་མིན་གྱུར་པ་ཡི། །དཔེ་ཉིད་དག་ནི་གཟུགས་ཅན་
འདོད། །དཔུང་པ་འཁྲི་ཤིང་ལག་པ་ནི། །པདྨ་སོར་མོ་ཡལ་འདབ་བོ། །ལག་པའི་འཁྲི་ཤིང་སོར་མོ་རྣམས། །ཡལ་འདབ་སེན་མོའི་འོད་ཟེར་ནི། །མེ་ཏོག་ཏུ་གྱུར་དཔྱིད་ཀྱི་དཔལ། །ཁྱོད་ནི་ངེད་ལ་མངོན་སུམ་རྒྱུ། །ཞེས་པ་འདི་ནི་མ་བསྡུས་ཏེ། །སྔ་མ་བསྡུས་པའི་གཟུགས་ཅན་ནོ། །བཞིན་ཟླ་འཛུམ་པའི་
ཟླ་འོད་ཅེས། །གཟུགས་ཅན་བསྡུས་དང་མ་བསྡུས་པའོ། །སོར་མོ་དམར་བའི་འདབ་ཕྲེང་དང་། །སེན་མོའི་འོད་ཀྱི་གེ་སར་ཅན། །ཁྱོད་ཀྱི་ཞབས་ཀྱི་ཆུ་སྐྱེས་ནི། །ས་སྐྱོད་རྣམས་ཀྱི་སྤྱི་བོར་འཛིན། །སོར་མོ་ལ་སོགས་འདབ་སོགས་དང་། །རྐང་པ་པདྨ་ཉིད་བྱས་ནས། །དེ་འོས་གནས་སུ་རྣམ་བཀོད་པ། །འདི་

ནི་མཐའ་དག་གཟུགས་ཅན་ནོ། །གཏུམ་མོ་གློ་བུར་ཉིད་དུ་ནི། །ཁྱོད་གདོང་མཆུ་ཡི་ཡལ་འདབ་གཡོ། །རྡུལ་གྱི་ཆུ་ཡི་ཐིག་པ་ཡི། །དོག་པ་མུ་ཏིག་འོད་ཅན་འཛིན། །འདི་ནི་རྡུལ་ཆུ་དོག་པར་བྱས། །མཆུ་ཡང་ཡལ་འདབ་ཉིད་བྱས་ཀྱི། །གདོང་ནི་རྣམ་པ་གཞན་མ་བྱས། །དེ་ཕྱིར་ཆ་ཤས་གཟུགས་ཅན་ནོ། །གདོང་
པའི་འདམ་སྐྱེས་སྨིན་འཁྱོག་ཅིང་། །རྡུལ་གྱི་ཆུ་ནི་ཟགས་པ་དང་། །མིག་དག་ཀུན་དུ་དམར་བ་འདི། །མྱོས་པའི་གནས་སྐབས་གསལ་བར་བྱེད། །འདིར་ནི་གདོང་བའི་ཆ་ཤས་དག །རྣམ་འགྱུར་མ་བྱས་གདོང་པ་ཉིད། །པདྨར་བཀོད་བྱས་དེས་ན་འདི། །ཆ་ཤས་ཅན་གྱི་གཟུགས་ཅན་ནོ། །མཛེས་མ་མྱོས་པའི་
མཁུར་ཚོས་དམར། །མིག་གི་ཨུཏྤལ་དམར་པོ་ཅན། །ཁྱོད་ཀྱི་གདོང་གིས་སྐྱེ་བོ་ནི། །འདིར་ཡང་དམར་བའི་རང་བཞིན་བྱས། །འདི་ནི་ཡན་ལག་གཅིག་གཟུགས་ཅན། །དེ་ལྟར་འདིར་ནི་གཉིས་སོགས་ཀྱི། །ཡན་ལག་རྣམས་ཀྱང་རྟོགས་པར་བྱ། །ལྡན་དང་མི་ལྡན་ཐ་དད་བྱེད། །གདོང་འདི་
འཛུམ་པའི་མེ་ཏོག་འབར། །གཡོ་བའི་མིག་གི་བུང་བ་ཅན། །ཞེས་པ་མེ་ཏོག་བུང་བ་དག །འགྲོགས་པས་ལྡན་པའི་གཟུགས་ཅན་ནོ། །གདོང་འདི་འཛུམ་གཤེར་ཟླ་འོད་དང་། །སྣུམ་པའི་མིག་གི་ཨུཏྤལ་ཅན། །ཟླ་འོད་ཨུཏྤལ་མི་ལྡན་པས། །ལྡན་མིན་ཞེས་པའི་གཟུགས་ཅན་ནོ། །ཡན་ལག་ཅན་དང་
ཡན་ལག་རྣམས། །གཟུགས་བྱས་གཟུགས་སུ་མ་བྱས་ལ། །བརྟན་པས་མི་མཉམ་པ་ཞེས་པའི། །གཟུགས་ཅན་མཛེས་པ་ཡིན་ཏེ་དཔེར། །མྱོས་པའི་མཁུར་ཚོས་རབ་དམར་ཞིང་། །སྨིན་མའི་འཁྲི་ཤིང་གར་བྱེད་པ། །ཁྱོད་གདོང་ཟླ་བ་ཡིད་སྲུབས་ཀྱིས། །འཇིག་རྟེན་གསུམ་པོ་གཞོམ་པར་ནུས། །
འཕྲོག་བྱེད་རྐང་པ་ཛཧྣུ་ཡི། །བུ་མོའི་ཆུ་གོས་རྩེ་ལ་བཏགས། །ལྷ་མིན་དོགས་མེད་ལྷ་དགའ་བའི། །དགའ་སྟོན་རྒྱལ་མཚན་རྒྱལ་གྱུར་ཅིག །གང་ཞིག་ཏོག་གི་ཁྱད་པར་གྱིས། །ཚོགས་ཀྱི་གཟུགས་ནི་འདི་འདྲ་བ། །དེ་ནི་རྐང་པ་ལ་བཀོད་འདི། །ཁྱད་པར་དང་བཅས་གཟུགས་ཅན་ནོ། །པདྨ་
རྣམས་ནི་མི་འཛུམ་ཞིང་། །ནམ་མཁའ་ལ་ཡང་མི་འགྲོ་བ། །ཁྱོད་གདོང་ཟླ་བས་བདག་གི་ནི། །སྲོག་རྣམས་འཕྲོག་པ་ཉིད་དུ་བལྟ། །ཟླ་བའི་བྱ་བ་བྱ་མིན་དང་། །གཞན་གྱི་བྱ་བའི་བྱ་བ་འདིར། །ཡང་དག་བསྟན་ཏེ་དེ་ཡི་ཕྱིར། །འགལ་བ་ཞེས་བྱའི་གཟུགས་ཅན་ནོ། །ཁྱོད་ནི་ཟབ་པས་རྒྱ་མཚོ་སྟེ། །

བརླིང་བ་ཉིད་ཀྱིས་རི་བོ་ཡིན། །འཇིག་རྟེན་རྣམས་ལ་འདོད་པ་ནི། །སྟེར་ཕྱིར་དཔག་བསམ་རྐང་འཐུང་ངོ་། །འདི་ནི་ཟབ་པ་ལ་སོགས་པའི། །རྒྱུ་རྣམས་དག་གིས་རྒྱ་མཚོ་རི། །དཔག་བསམ་ཤིང་ཡང་བྱེད་པས་ན། །འདི་ནི་རྒྱུ་ཡི་གཟུགས་ཅན་ནོ། །གྲོགས་མོ་ཁྱོད་ཀྱི་གདོང་པད་ནི། །རཱ་
ཛ་ཧཾ་སས་ཉེར་སྤྱད་འོས། །དྲི་ཞིམ་བུང་བས་དོན་གཉེར་འོས། །ཞེས་པ་སྦྱར་བའི་གཟུགས་ཅན་ནོ། །གཙོ་བོ་དང་ནི་ཕལ་བ་ལ། །ཆོས་མཐུན་ཆོས་མི་མཐུན་མཐོང་བས། །དཔེ་དང་ལྡོག་པ་ཅན་ཞེས་པའི། །གཟུགས་ཅན་རྣམ་པ་གཉིས་འདོད་དཔེར། །མྱོས་པས་ཀུན་དུ་དམར་བ་ཡིས། །བཀབ་པ་བཞིན་
གྱི་ཟླ་བ་འདི། །འཆར་ཀའི་དམར་བ་ཕུན་ཚོགས་པའི། །ཟླ་བ་ལ་ནི་རབ་ཏུ་འགྲན། །ལྷ་རྣམས་ཀྱིས་ནི་ཟླ་བ་དང་། །བདག་གིས་ཁྱོད་གདོང་ཟླ་བ་འཐུང་། །འདི་ནི་གང་བ་མ་ཡིན་ཡང་། །འདི་ནི་རྟག་ཏུ་དཀྱིལ་འཁོར་རྫོགས། །མཛེས་མ་ཁྱོད་གདོང་ཟླ་བས་ནི། །འདི་ལྟར་གཞན་དག་གདུང་བྱེད་པས། །ཟླ་བ་
ཉིད་དུ་བརྗོད་མིན་ཞེས། །འདི་ནི་འགོག་པའི་གཟུགས་ཅན་ནོ། །གཏུམ་མོ་ཁྱོད་གདོང་ཟླ་བས་ཀྱང་། །བརྩེ་བ་མེད་པར་བདག་སྲེག་པ། །བདག་གི་སྐལ་བ་ཉིད་ཀྱི་སྐྱོན། །ཞེས་འདི་མཉམ་འཇོག་གཟུགས་ཅན་ནོ། །ཁྱོད་གདོང་འདམ་སྐྱེས་དོར་འདིར། །སྨིན་མའི་འཁྲི་ཤིང་གར་མཁན་མ། །རོལ་སྒེག་
དགའ་བས་གར་བྱེད་དོ། །ཞེས་པ་གཟུགས་ཅན་གྱི་གཟུགས་ཅན། །འདི་ནི་གདོང་མིན་འདི་པདྨ། །འདི་དག་མིག་མིན་འདི་བུང་བ། །འདི་ཁྱོད་སོ་ཡི་འོད་ཟེར་མིན། །འདི་རྣམས་གེ་སར་ཉིད་ཡིན་ནོ། །གདོང་ལ་སོགས་པ་ཉིད་བཟློག་སྟེ། །པདྨ་ལ་སོགས་གཟུགས་བྱས་པས། །ཡོན་ཏན་ཁྱད་
འཕགས་གསལ་བྱེད་པ། །དེ་ཉིད་བསྙོན་དོར་གཟུགས་ཅན་ནོ། །གཟུགས་ཅན་དཔེ་ཡི་རྣམ་རྟོག་རྣམས། །མཐའ་ཡོད་མ་ཡིན་དེ་ཡི་ཕྱིར། །ཕྱོགས་ཙམ་བསྟན་ལ་བློ་ལྡན་རྣམས། །མ་བརྗོད་རྗེས་སུ་དཔག་པར་བྱ། །རིགས་དང་བྱ་བ་ཡོན་ཏན་རྫས། །ཚིག་གཅིག་ལ་ནི་གནས་པ་ཡིས། །གལ་ཏེ་
ངག་ཀུན་ལ་ཕན་ན། །དེ་ནི་གསལ་བྱེད་དུ་བརྗོད་དཔེར། །ལྷོ་ཡི་རླུང་གིས་འཁྲི་ཤིང་ནི། །འདབ་མ་རྙིང་བ་ལྷུང་བར་བྱེད། །དུད་པའི་ལུས་ཅན་རྣམས་ཀྱི་ཡང་། །ཁེངས་པ་གསར་དུ་འཇོམས་པར་ནུས། །རྒྱུའོ་ཆུ་གཏེར་བཞི་དོགས་ཀྱི། །སྐྱེད་མོས་ཚལ་དུ་སོ་ཅན་ཏེ། །ཁོར་ཡུག་རི་བོའི་ཁོངས་སུ་ཡང་། །

ཁྱོད་ཀྱི་ཡོན་ཏན་ཀུནྡ་དཀར། །སྔོ་བསངས་ཉིད་དོ་ཕྱོགས་རྣམས་ནི། །དབྱར་སྐྱེས་སྤྲིན་གྱི་ཕྲེང་བ་ཡིས། །ས་ཡང་རྩྭ་སྔོན་གསར་པ་ནི། །ཤིན་ཏུ་གཞོན་པའི་ཕྲེང་བས་སོ། །ཁྱབ་འཇུག་རྣམ་གནོན་ལ་གནས་པས། །དཱ་ནུའི་བུ་ཡི་འབྱོར་བ་དག །གང་དུ་བཏང་ཞིང་ལྷ་རྣམས་ཀྱི། །ཕུན་ཚོགས་
གང་ན་གནས་པ་བླངས། །ཞེས་པ་དང་པོའི་གསལ་བྱེད་བསྟན། །དེ་བཞིན་བར་དང་མཐའ་ཡི་ཡང་། །ཚིག་དག་བདག་གིས་བསྟན་པར་བྱ། །དེ་དག་འགའ་ཞིག་འདི་ལྟ་སྟེ། །གར་བྱེད་ནི་ཙུ་ལ་ཕང་དུ། །གླུ་ཡང་ལན་ནོ་མཇུག་སྒྲོ་ཅན། །དགའ་བས་རྒྱས་པའི་མིག་དག་ཀྱང་། །ཆུ་འཛིན་ལ་ནི་
གཏོད་པར་བྱེད། །དྲི་བཞོན་དལ་བུ་འགྱུར་བྱེད་དེ། །ཟླ་བ་དག་ཀྱང་མེ་རུ་འགྱུར། །ཙནྡན་བྱུག་པ་ལྷུང་བ་ཡང་། །མཚོན་ལྷུང་འཁྱམས་པ་རྣམས་ལའོ། །ཆུ་འཛིན་གྱིས་ནི་རབ་གཏོར་ཆུ། །ཁྱིམ་གྱི་གཙུག་ཕུད་ལྡན་པའི་ཚོགས། །གློག་གི་ཐག་པ་གཡོ་བ་ཡང་། །མེ་ཏོག་གཞུ་ཅན་དག་གིས་
དཔུང་། །ཁྱོད་ཀྱི་ཨུཏྤལ་རྣ་བ་ལ། །འདོད་པའི་མདའ་ནི་མདའ་སྟན་ལ། །ངས་ཀྱང་སེམས་ནི་འཆི་བ་ལ། །གསུམ་པོ་འདི་ནི་མཉམ་དུ་བྱས། །དཀར་ཕྱོགས་ཀྱིས་ནི་འོད་དཀར་ཅན། །འཕེལ་བྱེད་དེ་ཡིས་མདའ་ལྔ་པ། །དེས་ཀྱང་ཆགས་པ་ཆགས་པས་ཀྱང་། །ན་ཆུང་དགའ་བའི་དགའ་སྟོན་དཔལ། །
ཞེས་སོགས་གསལ་བྱེད་ཡིན་མོད་ཀྱང་། །སྔ་མ་སྔ་མ་ལ་ལྟོས་པའི། །ངག་གི་ཕྲེང་བ་རབ་ལྡན་ཕྱིར། །དེ་ནི་ཕྲེང་བའི་གསལ་བྱེད་འདོད། །རླུང་གིས་གཙུབས་པའི་ཆུ་ཐིགས་ཅན། །སྤྲིན་གྱི་ལུས་མེད་དག་གིས་ནི། །ཨ་བ་ལེ་བ་འཕེལ་བར་བྱེད། །རྡུལ་གྱི་དག་ནི་སེལ་བར་བྱེད། །འདིར་ནི་སྤྲིན་གྱི་ཚིག་དག་
དང་། །ཨ་བ་ལེ་བའི་ཚིག་དག་གིས། །བྱ་བ་འགལ་བ་ལྡན་པ་དེ། །འགལ་བའི་དོན་གྱི་གསལ་བྱེད་དོ། །ཆུ་འཛིན་དག་གི་ཕྲེང་བ་འདིས། །ཕྱོགས་རྣམས་ཀྱི་ནི་གོ་སྐབས་ཕྲོག །སྐར་མ་ཡི་ནི་ཚོགས་རྣམས་བཟུང་། །དེང་ཡང་བདག་གི་སྲོག་རྣམས་ལེན། །གང་ཕྱིར་ཆུ་འཛིན་ཕྲེང་བ་ཡི། །བྱ་བ་
གཅིག་ཉིད་གསལ་བྱེད་འདིར། །དུ་མའི་སྒྲ་ཡིས་ཉེར་བླངས་པ། །དེ་ཕྱིར་དོན་གཅིག་གསལ་བྱེད་དོ། །དྲི་ཡི་བཞོན་པ་ཡིད་འོང་མཐོ། །སྔོ་བསངས་ཏ་མ་ལ་ཡི་འོད། །སྤྲིན་ནི་མཁའ་ལ་རྒྱུ་བྱེད་དེ། །གླང་ཆེན་འདི་དགས་ལའོ། །འདིར་ནི་ཆོས་རྣམས་ཐ་དད་མིན། །སྤྲིན་དང་གླང་པོ་རྣམས་དག་ཀྱང་། །

རྒྱུ་བ་ཉིད་ཀྱིས་འབྲེལ་བའི་ཕྱིར། །སྦྱར་བའི་དོན་གྱི་གསལ་བྱེད་དོ། །རྣམ་པ་འདི་ཉིད་ཁོ་ན་ཡིས། །གསལ་བྱེད་ལ་ནི་རྣམ་རྟོག་པ། །ལྷག་མ་རྣམས་ཀྱང་རྗེས་མཐུན་པར། །མཁས་པ་རྣམས་ཀྱིས་རྟོགས་པར་བྱ། །གསལ་བྱེད་ཀྱི་ནི་གནས་ཉིད་དུ། །དོན་སྐོར་དང་ནི་ཚིག་སྐོར་དང་། །
གཉིས་ཀ་བསྐོར་བ་ཞེས་པ་ཡི། །རྒྱན་གསུམ་པོ་དག་འདོད་དེ་དཔེར། །ཀ་དམྦ་ནི་རྣམ་པར་རྒྱས། །ཀུཊ་ཛོདྐ་མ་རབ་གསལ། །ཀནྡ་ལྱ་ནི་རབ་ཏུ་བྱེ། །ཀ་ཀུ་བྷ་ཡང་གྱེས་པར་གྱུར། །སྤྲིན་གྱི་ཕྲེང་བ་དག་གིས་ནི། །རྨ་བྱའི་ཚོགས་རྣམས་འདོད་ལྡན་བྱེད། །ཆུ་སྲིན་རྒྱལ་མཚན་ཅན་གྱིས་དིང་། །ན་ཆུང་
རྣམས་ཡིད་འདོད་ལྡན་བྱེད། །ཀུན་ལས་རྒྱལ་ནས་དེ་རིང་ཁྱོད། །བཙུན་མོ་རྣམས་དང་རྩེ་བར་བྱེད། །ཁྱོད་ཀྱི་དགྲ་སྡེ་མཐོ་རིས་སོང་། །ལྷ་མོ་རྣམས་དང་རྩེ་བར་བྱེད། །དགག་པ་བརྗོད་པ་འགོག་པ་སྟེ། །དུས་གསུམ་ལ་ལྟོས་རྣམ་པ་གསུམ། །དེ་ནས་དེ་ཡང་དགག་བྱ་ཡི། །དབྱེ་བ་མཐའ་ཡས་ཕྱིར་
མཐའ་ཡས།