Luận tạng Tây Tạng (Tengyur) — Tập 186

ྱུར་རོ་ཞེས་བྱ་བ་དེ་ལྟ་བུའི་ཚུལ་དུའོ། །སྔ་མ་བཞིན་ཞེས་བྱ་བ་ནི་རང་བཞིན་སྔ་མ་དག་ཉིད་དོ། །གང་གི་ཕྱིར་དེ་ལྟར་གསལ་བ་
ཉིད་གསལ་བ་རྣམས་ཀྱི་རང་བཞིན་མ་ཡིན་པ་དེའི་ཕྱིར་རོ། །དེས་ན་ཞེས་བྱ་བ་ནི་ཐ་དད་པ་ཉིད་ཀྱིས་སོ། །གསལ་བ་ཉིད་ཡིན་ན་རང་བཞིན་གཉིས་པོ་དེ་སྤྱི་མ་ཡིན་ནོ། །འོ་ན་སྤྱི་དེ་དང་ལྡན་པའི་ཕྱིར། རང་བཞིན་ཉིད་སྤྱི་ཡིན་ནོ་ཞེས་དོགས་པ་ནི། འོན་ཏེ་ཞེས་བྱ་བའོ། །ལན་ནི་དེ་ལ་ཞེས་བྱ་བ་སྟེ་རང་བཞིན་
གཉིས་ལའོ་ཞེས་བྱ་བ་རང་བཞིན་གཉིས་པོའོ། །ཅིའི་ཕྱིར་ཞེ་ན། སྤྱི་དང་ཞེས་བྱ་བའོ། །གསལ་བ་རྣམས་ནི་སྤྱི་དང་ལྡན་པས་སྤྱི་མ་ཡིན་ནོ། །གང་གི་ཕྱིར་རང་བཞིན་གཉིས་པོ་སྤྱི་དང་ལྡན་པ་ཡིན་གྱི་སྤྱི་ནི་མ་ཡིན་པ་དེས་ནའོ། །ཅིའི་ཕྱིར་ཞེ་ན། དེ་ཞེས་བྱ་བ་སྟེ་གསལ་བའོ། །ཅི་སྟེ་ལྡན་པ་མ་ཡིན་ཞེ་
ན། སྤྱིའི་ཞེས་བྱ་བའོ། །ཐ་དད་པས་ཞེས་བྱ་བ་ནི་རང་བཞིན་གཉིས་ཀྱི་མཚན་ཉིད་ཀྱིས་སོ། །གལ་ཏེ་རང་བཞིན་གཉིས་དང་ལྡན་པའི་སྤྱིའི་གསལ་བ་ཡིན་པའི་ཕྱིར། སྤྱི་རང་བཞིན་འགས་ཐ་མི་དད་པ་ཡང་ཡིན་ཏེ། དེས་ན་བར་ཆད་པ་མ་ཡིན་ནོ་ཞེས་དོགས་པ་བསུ་བ་ནི་འོན་ཏེ་ཞེས་བྱ་བའོ། །ཁྱད་
པར་རང་བཞིན་གཉིས་ཀྱི་བདག་ཉིད་ཅན་དང་། སྤྱི་རང་བཞིན་གཉིས་ལ་བརྟེན་པ་དེ་གཉིས་སོ། །ལན་ནི་དེ་དག་གི་ཞེས་བྱ་བའོ། །རང་བཞིན་གང་དག་གིས་ཐ་དད་པ་དང་ཐ་མི་དད་པ་དེ་དག་གི་ཐ་མི་དད་པ་ལ་ཡང་སྟེ་གསལ་བ་ཉིད་དུ་གྱུར་པ་ལ་ཡང་ངོ་། །འཕྱོ་བར་འགྱུར་རོ་ཞེས་བྱ་བ་ནི། རང་བཞིན་
གཉིས་ཀྱི་བདག་ཉིད་ཅན་གྱི་སྤྱིའི་སྟེང་དུ་ལྡིང་བའི་ཕྱིར་རོ། །དེ་ལྟ་ཡིན་དང་ཞེས་བྱ་བ་ནི་འཕྱོ་བ་ཡིན་དང་ངོ་། །བརྟེན་པའི་སྤྱི་དང་སྤྱི་གསུམ་པའི་རྟེན་གྱི་རང་བཞིན་གྱི་སྤྱི་གཉིས་པ་དེ་དག་གསལ་བ་ཉིད་དོ། །དེས་ན་ཞེས་བྱ་བ་གསལ་བ་ཡིན་པའི་ཕྱིར་རོ། །གསལ་བ་ལས་ཐ་དད་པ་དང་ཐ་མི་དད་པའི་རྒྱུ་མཚན་སྤྱི་
སྔ་མ་དག་ལ་མཚུངས་པ་ཉིད་དུ་མི་འགྱུར་རོ། །ཅིའི་ཕྱིར་ཞེ་ན། སྤྱི་དང་ཞེས་བྱ་བ་སྤྱི་གསུམ་པ་དང་མི་ལྡན་པའི་ཕྱིར་རོ། །ཅིའི་ཕྱིར་ཞེ་ན། སྤྱི་ཐ་མས་ཞེས་བྱ་བ་སྟེ། སྤྱི་ཐ་མ་ནི་རང་བཞིན་གཉིས་ཀྱི་བདག་ཉིད་ཅན་ཏེ། དེའི་འོག་ཏུ་ཡང་རང་བཞིན་གཉིས་པའི་སྤྱི་གཞན་མེད་པའི་ཕྱིར་རོ། །འོན་ཏེ་སྤྱི་ཐ་མ་

ལས་གསུམ་པ་ཐ་མི་དད་པར་ཡང་འདོད་དེ་དེས་ན་ཆོད་པ་ཡིན་ནོ་ཞེ་ན། དེ་ལྟ་ན་འོ་ན་སྤྱི་དེ་ཡང་རང་བཞིན་གཉིས་པ་ཡིན་པའི་ཕྱིར་དེ་ལ་ཡང་སྤྱི་གཞན་འཕྱོ་བར་འགྱུར་རོ། །དེས་གསལ་བ་ཉིད་ཡིན་པས་སྤྱི་སྔ་མ་མཚུངས་པ་ཉིད་དུ་མི་འགྱུར་ཏེ། སྤྱི་དང་མི་ལྡན་པའི་ཕྱིར་ཏེ། སྤྱི་ཐ་མས་བར་ཆོད་པའི་ཕྱིར་རོ། །དེ་ལྟ་
ཡིན་དང་ཆོད་པས་སྤྱི་དང་མི་ལྡན་པའི་ཕྱིར་གཅིག་ཀྱང་མཚུངས་པར་མི་འགྱུར་རོ་ཞེས་བརྗོད་པ་ནི་དེས་ན་ཞེས་བྱ་བའོ། །གཅིག་ཀྱང་ཞེས་བྱ་བ་ནི་གསལ་བའི་རང་བཞིན་ནམ། རང་བཞིན་གཉིས་པའི་སྤྱིའོ། །དེས་ན་ཞེས་བྱ་བ་གསལ་བའི་རང་བཞིན་ནི་རྣམ་པ་མཚུངས་པ་མ་ཡིན་པས་ནའོ། །རྟོགས་པ་གང་
ལ་སྤྱིའི་མཚན་ཉིད་ཀྱི་དངོས་པོ་མེད་པ་དེ་ནི་དངོས་པོ་དང་མི་ལྡན་པའི་རྟོགས་པའོ། །ཅི་ལྟར་དངོས་པོ་དང་མི་ལྡན་སྙམ་ན། ངེས་པ་མེད་པར་ཞེས་བྱ་བའོ། །འོན་ཏེ་རྫོགས་པ་ཡོད་པ་ཁོ་ན་སྟེ། ཐ་མ་རང་བཞིན་གཉིས་པའི་སྤྱི་ལ་སྤྱི་གཞན་ཁས་མི་ལེན་པའི་ཕྱིར་རོ་སྙམ་ན། རྫོགས་པ་ཡོད་ཀྱང་ཞེས་བྱ་བའོ། །
གསལ་བ་ཉིད་དོ་ཞེས་བྱ་བ་ནི་རྟོགས་པའི་སྤྱོད་ཡུལ་ཞེས་བྱ་བ་རྗེས་སུ་འཇུག་གོ། །འདི་ག་ལས་ཤེ་ན། དེ་ལ་ཞེས་སྨོས་ཏེ་རང་བཞིན་གཉིས་པ་ཐ་མ་ལའོ། །སྤྱི་གཞན་མི་འདོད་པ་ནི་མ་ངེས་པར་སྨྲ་བའོ། །སྔ་མ་ལ་ཡང་ཞེས་བྱ་བ་ནི་རང་བཞིན་གཉིས་པ་ལའོ། །དེའི་ཕྱིར་གསལ་བ་ཁོ་ན་རྟོགས་པའི་སྤྱོད་ཡུལ་ཡིན་ཏེ།
དེས་ན་མཚུངས་པའི་རྣམ་པ་ཅན་གྱི་རྟོགས་པ་ནི་དམིགས་པ་མེད་པ་ཁོ་ནའོ། །འོ་ན་གང་མེད་པས་དམིགས་དང་བཅས་པར་འགྱུར་བ་ཅི་ལྟར་འདི་དམིགས་པ་དང་བཅས་པ་ཡིན་ཞེ་ན། ཐ་མ་ཞེས་སྨོས་སོ། །རང་བཞིན་གཉིས་པ་པའི་སྤྱིའི་ཐ་མ་སྤྱི་ཉིད་ཡིན་ན་ནི། རང་བཞིན་གཉིས་པ་སྔ་མ་སྤྱིར་འགྱུར་རོ། །
ཅིའི་ཕྱིར་ཞེ་ན། དེ་ལས་ཐ་མི་དད་པས་ཏེ། སྤྱི་ཐ་དད་དང་ཐ་མི་དད་པའི་ཕྱིར་རོ། །དེ་ལས་ཞེས་བྱ་བ་ནི་སྔ་མ་ལས་ཀྱང་སྔ་མ་སྟེ། དང་པོའི་རང་བཞིན་གཉིས་པ་དག་ཀྱང་ཅིར་འགྱུར་ཏེ་དེ་དང་ཐ་མི་དད་པའི་ཕྱིར་རོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་རོ། །འོ་ན་ཅི་ལྟར་དངོས་པོ་དང་མི་ལྡན་སྙམ་ན། དེ་ལྟར་ཡང་
མ་ཡིན་ཏེ་ཞེས་བྱ་བ་སྟེ། བརྗོད་པའི་ཚུལ་གྱིས་དམིགས་པ་དང་བཅས་པར་ཡང་འཐད་པ་མ་ཡིན་ཏེ། སྤྱི་ཐ་མ་ལ་སྤྱི་མེད་པས་སྤྱི་ཉིད་མ་ཡིན་པའི་ཕྱིར་རོ། །འདི་ནི་ཞེས་བྱ་བ་ནི་ཅི་ཡང་རུང་བ་སྨྲ་བའོ། །དེ་ལྟ་ན་ནི་དོན་མེད་ཕྱིར། །ཞེས་བྱ་བ་སྟེ་རྣམ་པར་འགྲེལ་པ་ནི། དེ་བཞིན་དུ་ཞེས་བྱ་བའོ། །ཅི་ལྟར་

རང་གི་ངོ་བོས་ལོགས་པ་མ་ཡིན་པ་ནི། དེ་ལས་གཞན་པའི་སྤྱི་དང་ལྡན་པས་ལྡོག་པ་མ་ཡིན་པ་དེ་བཞིན་དུ། གལ་ཏེ་ཁྲ་བོ་ལ་སོགས་པ་ཐ་དད་པ་རྣམས་ཀྱི་རིགས་མི་མཐུན་པ་ལས་ཐ་དད་པ་ཡང་། དེ་དག་ལས་ཐ་དད་པ་ཁྲ་བོ་ལ་སོགས་པའི་ཐ་དད་པ་ཐམས་ཅད་ལ་ཁྱབ་པ་ཡིན་ན། དེའི་ཚེ་
དེའི་ཕྱིར་ཞེས་བྱ་བ་ཐ་དད་པ་ཐ་དད་པ་ཡིན་པའི་ཕྱིར་རྟ་དང་བ་ལང་ལ་སོགས་པ་ཕན་ཚུན་ཐ་དད་པ་མེད་པ་རྣམས་ཐ་དད་པ་གཞན་དང་ལྡན་ཡང་། དེ་དང་ཞེས་བྱ་བ་ཐ་དད་པ་གཞན་དེ་དང་ལྡན་པ་དག་ཕན་ཚུན་ཐ་མི་དད་པ་གསལ་བར་འགྱུར་བ་མ་ཡིན་པའི་ཕྱིར་རོ། །གལ་ཏེ་ཐམས་ཅད་ཐ་མི་དད་པར་ཞེས་བྱ་བ་ནི་མི་འཐད་དེ།
རིགས་དང་གསལ་བ་དག་ཐ་དད་པའི་ཕྱིར་རོ་ཞེས་དོགས་པ་ནི། སྤྱི་དང་ཞེས་བྱ་བའོ། །ལན་ནི་ཐ་དད་པ་མ་ཡིན་ནོ། །ཅིའི་ཕྱིར་ཞེ་ན། འདི་ལྟར་གསལ་བ་རྣམས་ལས་སྤྱི་ཐ་དད་པ་མེད་པར་ཁས་བླངས་པར་གྱུར་ན། དེ་ནི་སྤྱི་མ་ཡིན་པར་འགྱུར་གྱི། འོན་ཀྱང་དེ་ནི་གསལ་བ་ཉིད་ཡིན་པར་འགྱུར་རོ། །འོ་ན་དེ་ཉིད་སྤྱི་
ཡིན་པར་འགྱུར་རོ་ཞེ་ན། དེ་ཡང་མ་ཡིན་ཏེ་ཐ་དད་པ་མེད་པའི་ཕྱིར་རོ་ཞེས་བརྗོད་པ་ནི། དེ་ཡང་ཞེས་བྱ་བའོ། །ཕྱིར་ཏེ་དེའི་ཕྱིར་རིགས་དང་གསལ་བ་དག་ཀྱང་ཐ་དད་པ་མ་ཡིན་ནོ། །དེས་ན་ཞེས་བྱ་བ་ཐ་མི་དད་པས་ན། གཉིས་མེད་ཉིད་དུ་སྟེ་དོན་དངོས་པོ་མེད་པ་ཉིད་དུ་ཐལ་བར་འགྱུར་རོ། །གང་གི་ཕྱིར་དེ་ལྟར་དངོས་
པོར་གྱུར་པའི་སྤྱི་མི་འཐད་པ་དེའི་ཕྱིར་རོ། །མ་རིག་པ་ཙམ་ཉིད་དུ་འགྱུར་ཞེས་བྱ་བ་དེ་བཤད་པའི་དོན་དུ་ཕྱོགས་སྔ་མ་ཉེ་བར་འགོད་པ་ནི། གལ་ཏེ་ཞེས་བྱ་བའོ། །དེའི་ཚེ་ནི་གསལ་བ་ལས་ཐ་དད་པ་མེད་པ། ལྡོག་པའི་རང་བཞིན་རྣམ་པར་ཕྱེ་ནས་ཅི་ལྟར་ཡང་རྟོགས་པར་ནུས་པ་མ་ཡིན་ནོ། །འོ་ན་གང་གི་ཚེ་རྣམ་པར་ཕྱེ་ནས་
རྟོགས་སྙམ་ན། གང་གི་ཚེ་ཞེས་གསུངས་སོ། །ཐ་དད་པ་འབའ་ཞིག་ཏུ་ནི་མ་ཟད་ཀྱི་ཐ་མི་དད་པར་ཡང་རྟོགས་ཞེས་བརྗོད་པ་ནི། ཁྲ་བོ་ལ་སོགས་པ་ཐ་དད་པ་དག་དང་འདྲ་བ་གཅིག་པ་ཉིད་གང་ཡིན་པ་དེ་གང་ལ་ཡོད་པའི་ཐ་དད་པ་མེད་པ་དེ་ལྟར་ཡང་རྟོགས་པར་འགྱུར་རོ། །དོན་དམ་པར་གསལ་བ་ལས་ཐ་མི་དད་ཀྱང་
ཐ་སྙད་དུ་ཐ་དད་པར་རྟོགས་པར་འགྱུར་རོ་ཞེས་བྱ་བའི་དོན་ཏོ། །གལ་ཏེ་དོན་དམ་པར་གསལ་བ་ལས་ཐ་མི་དད་པ་ཅི་ལྟར་ཐ་དད་པ་དང་ཐ་མི་དད་པ་ཉིད་དུ་རྟོགས་པར་འགྱུར་སྙམ་ན། ཡུལ་ཞེས་བྱ་བའོ། །ཅིའི་ཕྱིར་ཐ་དད་པ་ཡོད་ཀྱང་རྟོགས་པར་མི་ནུས་སྙམ་ན། དེར་ཞེས་བྱ་བའོ། །འོ་ན་དབྱིབས་ཙམ་ཉིད་

ཡོད་དོ་སྙམ་ན། ཁྱད་པར་དང་ཞེས་བྱ་བའོ། །འོ་ན་ཅི་ཡིན་ཞེ་ན། ཡུལ་ཐག་རིང་པོ་ཞེས་སྨོས་སོ། །དེ་ནི་ཁྱད་པར་རོ། །སྣང་བ་ཙམ་ནི་དབྱིབས་ཙམ་མོ། །ཐམས་ཅད་དུ་ཞེས་སྐྱེས་བུ་ལ་ཡང་། དེ་ཉིད་ཅེས་བྱ་བ་ནི་སྣང་བ་ཙམ་མོ། །འོ་ན་ཅི་ལྟར་ཐ་མི་དད་སྙམ་ན། སྣང་བ་དང་ཞེས་བྱ་བའོ། །དེ་ཉིད་ཅེས་བྱ་བ་ནི་སྣང་བ་
ཙམ་མོ། །དོགས་པ་ནི་དོན་དམ་པ་ཉིད་དུ་ཞེས་བྱ་བའོ། །ལན་ནི་གཅིག་ཏུ་ཞེས་བྱ་བའོ། །གཉིས་ཞེས་བྱ་བ་ནི་སྣང་བ་དང་རྣམ་པར་བརྟགས་པ་དག་གོ། །འོ་ན་ནི་ཞེས་བྱ་བ་ནི་དོགས་པའོ། །ཅིའི་ཕྱིར་ཞེ་ན། སྤྱི་ཉིད་ཅེས་བྱ་བ་སྟེ་ཁྱད་པར་མ་ཡིན་པའོ། །གལ་ཏེ་དེ་ལྟ་ན་ཡང་ཅི་ལྟར་ཐ་དད་སྙམ་ན། གང་ཞིག་ཅེས་
བྱ་བའོ། །ལན་ནི་དེ་ཡང་ཞེས་བྱ་བའོ། །གོང་བུ་དང་འབྲེལ་བ་མེད་པའི་རང་བཞིན་དུ་སྣང་ན་གསལ་བ་དང་མ་འདྲེས་པའི་རང་བཞིན་དེ་ནི་སྤྱིར་དེར་མི་འགྱུར་རོ། །ཅིའི་ཕྱིར་ཞེ་ན། གང་གི་ཕྱིར་ཅི་ལྟར་གསལ་བའི་རང་བཞིན་སྤྱི་ལ་མི་ལྟོས་པ་དེ་བཞིན་དུ་ནི་གསལ་བ་ལ་མི་ལྟོས་པ་མ་ཡིན་གྱི། འོན་ཀྱང་གསལ་བའི་རང་བཞིན་
དང་འབྲེལ་པ་ཁོ་ནའོ། །དེ་ལ་ཞེས་བྱ་བ་ནི་གང་དང་ལྡན་པས་སྤྱི་རྣམས་མཚུངས་པ་ཉིད་ཡིན་པ་དེ་ལས་ཕ་རོལ་གྱི་སྤྱི་ནི་གསལ་བ་ཉིད་དུ་འགྱུར་རོ། །དེས་ན་གསལ་བའི་རང་བཞིན་ལྟར་འབའ་ཞིག་པ་ནི་སྤྱི་ལ་ཡིན་ནོ་ཞེས་གནས་པ་ཁོ་ནའོ། །དོགས་པ་བསུ་བ་ནི་འོ་ན་ནི་ཞེས་བྱ་བའོ། །ཅི་ལྟར་རྟོགས་པ་ཅི་ཡིན་སྙམ་ན།
དེ་ནི་ཞེས་བྱ་བའོ། །འོ་ན་ཞེས་བྱ་བ་ནི་ལན་ནོ། །ཅི་ལྟར་མི་འགྱུར་སྙམ་ན་བློ་ཞེས་བྱ་བའོ། །འཁྲུལ་པས་ཞེས་བྱ་བ་ནི་དོགས་པའོ། །ལན་ནི་འཁྲུལ་པས་འཇུག་པ་ནི་མ་ཡིན་ནོ། །ཅིའི་ཕྱིར་ཞེ་ན། གཞན་ཞེས་བྱ་བ་འཁྲུལ་པའི་བློའི་རང་བཞིན་ལས་གཞན་མེད་པའི་ཕྱིར་རོ། །ཁས་བླངས་ནས་ཀྱང་ཉེས་པ་བརྗོད་པ་ནི་
དེའི་ཚེ་ཡང་ཞེས་བྱ་བ་སྟེ། འཁྲུལ་པ་གཞན་གྱི་ཚེ་ཡང་ངོ་། །དེས་ན་ཞེས་བྱ་བ་ནི་གསལ་བ་རྟོགས་པ་མེད་པས་ནའོ། །གལ་ཏེ་ཞེས་བྱ་བ་ནི་དོགས་པའོ། །ཐ་དད་པ་དང་ཅིག་ཤོས་ནི་ཐ་དད་པ་དང་ཐ་མི་དད་པའོ། །ལན་ནི་འོས་གཞན་ཞེས་བྱ་བའོ། །དེ་དག་སྤྱི་དང་ལྡན་པ་ལ་སོགས་པ་བཀག་པས་ན་འོས་གཞན་
མེད་པས་རྣམ་པར་གཅོད་པའི་འབྲས་བུ་ཅན་ཡིན་པའི་ཕྱིར་རོ། །དེས་ན་རྣམ་པར་གཅོད་པ་རྟོགས་པ་དོར་ནས་སྒྲའི་དོན་རྟོགས་པ་ལ་ཚུལ་གཞན་ནི་ཚད་མ་ཅི་འདྲ་བ་ཞིག་ཡོད་པར་འགྱུར་ཏེ། ཚུལ་མེད་པ་ཁོ་ནའོ་ཞེས་བྱ་བའི་དོན་ཏོ། །གལ་ཏེ་འོས་གཞན་མེད་པ་ཡིན་ཡང་རྒྱུད་གཞན་དང་འབྲེལ་བའི་རྣམ་པར་གཅོད་

པ་རྟོགས་པ་ནི་མི་འགྲུབ་སྟེ་ཚད་མ་མེད་པའི་ཕྱིར་རོ་ཞེས་དོགས་པ་ནི། གལ་ཏེ་ཞེས་བྱ་བའོ། །དངོས་པོ་རྣམ་པར་འཇོག་པ་ཞེས་བྱ་བ་ནི་རྒྱུད་གཞན་དང་འབྲེལ་པ་རྣམ་པར་གཅོད་པ་རྟོགས་པ་རྣམ་པར་འཇོག་པའོ། །ངེས་པའི་ཡུལ་ལ་འཇུག་པ་གཞན་དུ་མི་འཐད་པས་རྣམ་པར་གཅོད་པ་རྟོགས་
པ་འགྲུབ་བོ་ཞེས་ལན་འདེབས་པ་ནི། དེ་ལས་ཞེས་བྱ་བའོ། །དེ་ནི་ཞེས་བྱ་བ་ནི་དེ་ལས་གཞན་རྣམ་པར་བཅད་ནས་འཇུག་པས་ནའོ། །གལ་ཏེ་རྣམ་པར་གཅོད་པ་དོགས་པ་ནི་མེད་པ་ཁོ་ན་ཡིན་ནམ། དེ་ཅི་ལྟར་འཇུག་པ་གཞན་དུ་མི་འཐད་པས་གཞན་ལ་ཡོད་པར་རྟོགས་སྙམ་ན། རང་གི་རྒྱུད་ལ་གྲུབ་པ་ཡིན་ནོ་ཞེས་བརྗོད་
པ་ནི། དེ་ནི་ཞེས་བྱ་བའོ། །དེས་ན་ཞེས་བྱ་བ་ནི་དངོས་པོའི་ཡུལ་ཅན་མ་ཡིན་པས་ནའོ། །འདིས་ནི་ཚད་མ་འདི་མངོན་པར་འདོད་པ་ཡིན་ཏེ། གང་ཞིག་ངེས་པའི་ཡུལ་ལ་འཇུག་པ་དེ་ནི་རྣམ་པར་གཅོད་པ་རྟོགས་པ་སྔོན་དུ་འགྲོ་བ་ཅན་ཡིན་ཏེ། དཔེར་ན་བདག་ཉིད་ཀྱི་བཞིན་ནོ། །ཐ་སྙད་པ་རྣམས་ཀྱི་འཇུག་པ་ཡང་ངེས་
པའི་ཡུལ་ལ་འཇུག་པ་ཡིན་ནོ་ཞེས་བྱ་བའོ། །ལྡོག་པ་ཞེས་བྱ་བ་ནི་དངོས་པོ་ལ་གནས་པའོ། །དུམ་བུར་བཀོལ་ཏེ་ལྡོག་པ་རྟོགས་པ་ཡང་མི་བདེན་ནོ་ཞེས་བྱ་བའི་ཐ་ཚིག་གོ། །ལྡོག་པ་ནི་རྣམ་པར་རྟོག་པའི་ཡང་ཡུལ་ཡིན་ནོ་ཞེས་ལན་བརྗོད་པ་ནི། དངོས་པོ་ཞེས་བྱ་བ་ནི་རྣམ་པར་རྟོག་པ་ལ་སྣང་བའོ། །ལྡོག་པའི་ཞེས་
བྱ་བ་ནི་རྣམ་པར་གཅོད་པའི་འབྲེལ་པའི་ཡུལ་ལོ། །དེ་གང་ཡིན་ཞེ་ན། རྟོག་པ་སྤྱོད་ཡུལ་ཏེ་རྣམ་པར་རྟོག་པའི་རྣམ་པ་གང་ཡིན་པའོ། །འོན་ཏེ་ཡང་རྟོག་པའི་སྤྱོད་ཡུལ་གྱི་དངོས་པོ་གང་ཡོད་པ་ནི་ཡོད་པ་ཉིད་ཡིན་མོད་ཀྱི་འོན་ཀྱང་འདི་ནི་མི་བདེན་པ་ཡིན་ནོ་སྙམ་ན། བདེན་དང་ཞེས་བྱ་བའོ། །གང་ཐོབ་པར་བྱ་བ་ནི་བདེན་
པ་ཡིན་ལ། གང་ཞིག་རྣམ་པར་བརྟགས་པ་དེ་ནི་མི་བདེན་པ་ཡིན་ནོ་ཞེས་དེ་ལྟར་བདེན་པ་དང་བདེན་པ་མ་ཡིན་པ་ཉིད་དུ་སྣང་བ་དང་རྣམ་པར་རྟོག་པར་བྱ་བ་དག་ཐ་དད་པར་ནི་སུ་ཡང་རྟོག་པར་མི་བྱེད་དོ་ཞེས་བྱ་བའི་དོན་ཏོ། །གལ་ཏེ་བདེན་པ་གཉིས་ལ་སོགས་པར་རྟོག་པ་མེད་ན། རྣམ་པར་རྟོག་པ་ལ་སྣང་བའི་དངོས་པོ་དངོས་
པོ་ཙམ་ལས། ཁྱེད་ལྟར་ཐ་སྙད་པ་བདག་ཅག་ལྡོག་པ་རྟོགས་པ་མ་ཡིན་ནོ་ཞེ་ན། ལྡོག་དང་ཞེས་བྱ་བའོ། །ཅི་ཙམ་གྱིས་ཞེས་བྱ་བ་ནི། བདེན་བརྫུན་གྱི་རྣམ་པར་དབྱེ་བ་དང་། བྲལ་བ་རྣམ་པར་རྟོག་པ་ལ་སྣང་བའི་དངོས་པོ་ཙམ་གྱིས་ཏེ། ལྡོག་པ་ཕྱིན་ཅི་མ་ལོག་པར་རྟོགས་པའི་རྣམ་པ་ལ་འགྱུར་བ་ཁོ་ནའོ། །ཁྱེད་ལ་

ཡང་ལྡོག་པ་རྟོགས་པའི་མཚན་ཉིད་ཀྱི་དགོས་པ་གྲུབ་པའི་དོན་དུ་དེ་ཙམ་གྱིས་ཆོག་མོད། མཚུངས་པར་རྣམ་པར་རྟོག་པ་ལ་སྣང་བའི་རང་བཞིན་ཉམས་སུ་མྱོང་བ་གཉིས་ལས། གཅིག་ལ་ནི་ལྡོག་པ་རྟོགས་པ་ཡོད་ལ་གཞན་ལ་ནི་མེད་དོ་ཞེས་ནི་མི་འཐད་དོ། །གལ་ཏེ་རྣམ་པར་རྟོག་པ་ལ་སྣང་བའི་དངོས་པོ་ཙམ་གྱིས་དགོས་པ་འགྲུབ་
ཀྱང་དེ་ཐ་དད་པར་ཅི་སྟེ་མི་རྟོག་སྙམ་ན། གལ་ཏེ་ཐུན་མོང་དུ་རྣམ་པར་རྟོག་པ་ལ་སྣང་བ་ཙམ་གྱི་དངོས་པོའི་སྤྱིས་ལྡོག་པ་རྟོགས་པའི་མཚན་ཉིད་ཀྱི་དགོས་པ་འགྲུབ་ན་དེའི་ཚེ་རྣམ་པར་རྟོག་པའི་རྣམ་པར་བྱེ་བྲག་སྟེ་བརྟགས་པ་དེ་ལ་ཡོན་ཏན་ཅི་ཞིག་ཡོད་དེ་འགའ་ཡང་མེད་དོ། །གལ་ཏེ་བདེན་པའི་དངོས་པོ་དང་འབྲེལ་པ་ཁོ་ནས་རྣམ་
པར་གཅོད་པར་རྟོག་པར་ནུས་པ་ཡིན་གྱི་གཞན་གྱིས་ནི་མ་ཡིན་ཏེ། དེ་ནི་ཅི་ལྟར་དེ་ཙམ་གྱིས་ལྡོག་པ་རྟོགས་པར་ནུས་སྙམ་པའི་དོགས་པ་བསུ་བས་རྐང་པ་བཞི་པ་རྣམ་པར་འགྲེལ་པ་ནི། བདེན་པའི་ཞེས་བྱ་བའོ། །ཅི་ལྟར་ངེས་པ་འདི་མེད་ཅེ་ན། བདེན་པ་དང་འབྲེལ་པ་མ་ཡིན་པ་རྣམ་པར་བརྟག་པའི་རྣམ་པས་ཀྱང་ལྡོག་
པ་སྟེ་རྟོགས་པར་མཐོང་བའི་ཕྱིར་རོ། །གང་གི་ཕྱིར་དེ་ལྟར་མི་བདེན་པ་དང་འབྲེལ་པས་ཀྱང་རྣམ་པར་གཅོད་པ་རྟོགས་པ་དེའི་ཕྱིར་རོ། །ངག་རྣམ་པར་གཅོད་པའི་ཡུལ་ཅན་ཁོ་ན་ཡིན་ནོ་ཞེས་བྱ་བ་ཅི་ལྟར་ངེས་ཤེ་ན། དེ་ལ་ཞེས་བྱ་བ་སྟེ། ངག་གིས་བསྟན་པའི་རྣམ་པར་རྟོག་པའི་རྣམ་པ་ལ་གནས་པའི་རྣམ་པར་གཅོད་པ་
ལའོ། །འདིས་ནི་ཕྱེད་ཕྱི་མ་བཤད་དོ། །དངོས་པོ་མི་བདེན་ན་ལྡོག་པ་ཡང་ཅི་ལྟར་བདེན་ཞེས་འབྲེལ་ཏོ། །དེ་ལ་ཏེ་དངོས་པོ་མི་བདེན་པ་ལ་གནས་པའོ། །དེ་ལ་གནས་པའི་རྒྱུ་བརྗོད་པ་ནི་དེ་དང་ཞེས་བྱ་བ་སྟེ་དངོས་པོ་མི་བདེན་པ་དང་ཐ་དད་པ་མེད་པས་སོ། །རྐང་པ་དང་པོ་འབྲེལ་པས་ལན་བརྗོད་པ་ནི།
རྟོགས་བཞིན་དུ་ཡང་ཞེས་བྱ་བའོ། །རྟོགས་བཞིན་པ་རྣམ་པར་རྟོག་པ་ལ་སྣང་བའི་རང་བཞིན་འདི། རྟོགས་བཞིན་པའི་རང་བཞིན་གྱིས་བདེན་པ་མ་ཡིན་ནོ་ཞེས་བྱ་བའི་ཚུལ་འདི་ཅི་ཞིག་ཡིན། གང་ཞིག་ཅི་ལྟར་རྟོགས་པ་དེ་ནི། དེ་ཁོ་ན་ལྟར་བདེན་པ་མ་ཡིན་ནོ་ཞེས་བྱ་བར་ནི་མི་འཐད་དོ། །མ་རྟོགས་པའི་
རང་བཞིན་གྱིས་ཀྱང་འདི་ཉིད་མི་བདེན་ནོ་ཞེས་བྱ་བའི་ཚུལ་ཅི་ཞིག་ཡིན་ཏེ་དེ་ལྟར་ཡིན་ན་ཐམས་ཅད་མི་བདེན་པར་འགྱུར་ཏེ། མ་རྟོགས་པའི་རང་བཞིན་གྱིས་མཐའ་དག་མི་བདེན་པའི་ཕྱིར་རོ། །དེ་ལྟར་ཡང་མ་ཡིན་ཏེ། དེས་ན་རྣམ་པར་རྟོག་པའི་སྤྱོད་ཡུལ་མི་བདེན་པའི་ཕྱིར་དེ་ལ་གནས་པའི་ལྡོག་པ་མི་བདེན་

པར་ཅི་ལྟར་འགྱུར། རྟོགས་བཞིན་པ་བདེན་ཡང་སླུ་བས་མི་བདེན་པ་ཡིན་ནོ་ཞེས་དོགས་པ་བསུ་བ་ནི། གལ་ཏེ་ཞེས་བྱ་བའོ། །དེ་ལྟ་ན་འོ་ན་ཐ་དད་པ་མི་སླུ་བར་ཉམས་སུ་མྱོང་བས་བདེན་པ་ཁོ་ན་ཡིན་ནོ་ཞེས་ལན་འདེབས་པ་ནི། ཐ་དད་ཅེས་བྱ་བའོ། །རྣམ་པར་རྟོག་པའི་སྤྱོད་ཡུལ་མི་བདེན་
པར་སྨྲ་བ་ལ་དྲི་བར་བྱ་བ་ཉིད་སྟོན་པ་ནི་རྣམ་པར་ཞེས་བྱ་བའོ། །རྣམ་པར་བརྗོད་པ་ནི་རྟོགས་པའི་ཞེས་བྱ་བའོ། །ཅི་རྟོགས་བཞིན་པས་མི་བདེན་ནམ་དེ་ལས་གཞན་པས་ཡིན། ཕྱོགས་དང་པོ་རྗེས་སུ་བརྗོད་ནས་སུན་འབྱིན་པ་ནི་གལ་ཏེ་ཞེས་བྱ་བའོ། །ཕྱོགས་གཉིས་པ་རྗེས་སུ་བརྗོད་པ་ནི། འོན་ཏེ་ཞེས་བྱ་
བའོ། །སུན་འབྱིན་པ་ནི་འོ་ན་ནི་ཞེས་བྱ་བའོ། །གལ་ཏེ་སླུ་བས་ཞེས་བྱ་བ་རྣམ་པར་འགྲེལ་པ་ནི། འོན་ཏེ་ཞེས་བྱ་བ་ནས་ཞེ་ནའི་བར་རོ། །གལ་ཏེ་རང་གི་ངོ་བོས་མི་བདེན་པ་ཉིད་མ་ཡིན་ན་ཅི་ལྟར་མི་བདེན་པ་ཡིན་ཞེ་ན། རང་གི་ངོ་བོ་ཡོད་ཀྱང་ཞེས་བྱ་བའོ། །དེ་ཞེས་བྱ་བ་ཐོབ་བྱའི་རང་བཞིན་མེད་ན་ནིའོ། །དེ་མེད་
ཀྱང་ཅི་ལྟར་མི་བདེན་ཞེ་ན། ཕྱིན་ཅི་ལོག་ཅེས་བྱ་བའོ། །དེ་ལས་ཅིར་འགྱུར་ཞེ་ན། ཐོབ་པར་བྱ་བའི་ཞེས་བྱ་བའོ། །འོན་ཀྱང་ཕྱིན་ཅི་ལོག་རྟོགས་པ་ཉིད་དེ་འཛིན་པ་ཡིན་ནོ། །དེས་ན་གང་ཞིག་ཐོབ་པར་བྱ་བ་དེ་བདེན་པ་ཡིན་པས་ཐམས་ཅད་མི་བདེན་པར་མི་འགྱུར་རོ་ཞེས་བྱ་བའི་དོན་ཏོ། །ཐ་དད་ཅི་སྟེ་ཞེས་བྱ་བ་
རྣམ་པར་འགྲེལ་པས་བརྗོད་པ་ནི། དེ་ལྟ་ན་ནི་འོ་ན་ཞེས་བྱ་བའོ། །གང་ཞིག་དངོས་པོ་མ་ཡིན་པའི་རྣམ་པར་གཅོད་པ་དེ་ནི་ཐོབ་པར་བྱ་བ་མ་ཡིན་ཏེ། དེས་ན་སླུ་བའི་ཕྱིར་མི་བདེན་པ་ཡིན་ནོ་ཞེས་བྱ་བའི་དོགས་པ་སེལ་བས་རྐང་པ་གཉིས་པ་རྣམ་པར་འགྲེལ་པ་ནི་རྣམ་གཅོད་དངོས་དང་ཞེས་བྱ་བའོ། །འདིར་ཞེས་
བྱ་བའོ། །འདིར་ཞེས་བྱ་བ་ནི་ཐ་དད་པ་ཐོབ་པར་བྱེད་པ་ཡིན་པ་ནའོ། །འདི་ཉིད་ཀྱི་ཕྱེད་སྔ་མ་རྣམ་པར་འགྲེལ་པ་ནི། གལ་ཏེ་ཞེས་བྱ་བའོ། །གལ་ཏེ་ཞེས་བྱ་བ་ནི་དོགས་པ་བསུ་བའོ། །རྣམ་པར་རྟོག་པ་དེས་ནི་མི་བདེན་པ་རྣམ་པར་རྟོག་པ་ལ་སྣང་བའི་དངོས་པོ་དེའི་གཞན་ལས་རྣམ་པར་གཅོད་པ་
རྟོགས་པ་ཡིན་ལ། མི་བདེན་པའི་དངོས་པོའི་རྣམ་པར་གཅོད་པ་དེ་ནི་ཐོབ་པ་མ་ཡིན་ནོ། །ཅིའི་ཕྱིར་ཞེ་ན། བདེན་པའི་ཞེས་བྱ་བའོ། །དེས་ན་ཞེས་བྱ་བ་ནི་མི་སླུ་བ་མ་ཡིན་པས་སོ། །ཕྱེད་ཕྱི་མ་རྣམ་པར་འགྲེལ་པས་ལན་འདེབས་པ་ནི། གནས་ཞེས་བྱ་བའོ། །ཅི་ལྟར་གནས་མ་ཡིན་པ་ལ་བརྟེན་པ་ཡིན་ཞེ་ན། རེ་

ཞིག་ཅེས་བྱ་བའོ། །གལ་ཏེ་ཆོག་པར་འཛིན་ཀྱང་། གང་གི་སླུ་བ་རིག་པར་འགྱུར་བ། བདེན་པ་དང་མི་བདེན་པར་དབྱེ་བ་ངེས་པར་བྱེད་པ་ཡིན་ནོ་ཞེ་ན་གང་གིས་ཞེས་བྱ་བའོ། །དེ་ལྟར་ལྡོག་པའི་འབྲེལ་ཡུལ་ཞེས་བྱ་བ་ལ་སོགས་པའི་ཚིགས་སུ་བཅད་པ་བཤད་པ་ཡིན་ནོ། །དེའི་ཕྱིར་ཞེས་བྱ་བ་ནི། དབྱེ་བ་ངེས་པར་
མི་བཟློག་པའི་ཕྱིར་རོ། །ཐ་སྙད་པའི་སྐྱེ་བའི་རྟོགས་པས་ཡིན་གྱི་འཆད་པ་པོའི་སྐྱེ་བོའི་རྟོགས་པས་ནི་མ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། དོན་དམ་པར་ནི་ཞེས་བྱ་བའོ། འདི་ཡང་སྔར་ཉིད་བསྒྲུབས་ཟིན་ཏོ་ཞེས་སྟོན་པ་ནི་འདི་ནི་ཞེས་བྱ་བའོ། །དེ་སྐད་བརྗོད་པས་ཅི་བྱ་སྟེ། །རྣམ་པ་གཞན་དུ་
ཡང་ཚད་མའི་རྟོགས་པ་ཡོད་པའི་ཕྱིར་རོ་ཞེས་དོགས་ན། རྣམ་པ་གཞན་དུ་ཚད་མའི་རྟོགས་པ་ཡོད་པ་སེལ་བ་ནི། གལ་ཏེ་ཞེས་བྱ་བའོ། །ཐུག་པ་མེད་པར་འགྱུར་རོ་ཞེས་བྱ་བ་ནི་དེ་ཡང་ཚད་མ་གཞན་གྱིས་ཚད་མ་ཡིན་པའི་ཕྱིར་རོ། །འོན་ཏེ་ཉེས་པ་འདིས་འཇིགས་པས་ཚད་མ་མེད་པར་དེ་རྟོགས་པ་ཁས་
ལེན་པ་ཡིན་ན། དེ་ལྟ་ན་འོ་ན་གཞལ་བྱ་རྟོགས་པ་ཡང་དེ་ལ་རག་ལས་པར་མི་འགྱུར་རོ་ཞེས་བརྗོད་པ་ནི། ཚད་མ་མེད་པར་ཞེས་བྱ་བའོ། །གང་གི་ཕྱིར་ཚད་མ་ཡོད་པ་དང་མེད་པ་དག་གིས་ཁས་བླངས་ཚད་མ་མི་རྟོགས་པ་དེའི་ཕྱིར་བཤད་པའོ། །ཅི་སྐད་བཤད་སྙམ་ན་ཚད་མ་ཉིད་ནི་ཞེས་བྱ་བའོ། །ཅིའི་ཕྱིར་
ཞེ་ན། གང་གི་ཕྱིར་ཚད་མའི་བློ་དེའི་བདག་ཉིད་ཡིན་པར་རྟོགས་པ་ནི་དེ་ཉིད་དེ་ཚད་མ་ཉིད་མ་ཡིན་ནོ། །འོ་ན་གཞན་གྱིས་རྟོགས་སོ་སྙམ་ན། དེ་ལྟ་ཡིན་ན་སྟེ་གཞན་གྱིས་ཁས་བླངས་པ་ཡིན་ན་ཐུག་པ་མེད་པར་བརྗོད་དོ། །ཅི་ལྟར་ཞེ་ན་གང་གི་ཕྱིར་ཞེས་བྱ་བའོ། །ཚད་མ་འབའ་ཞིག་ཏུ་མ་ཟད་དེ། འོན་ཀྱང་གཞན་ཐ་
སྙད་ལ་ཡང་རྣམ་པར་དཔྱད་ནའོ། །རྣམ་པར་དཔྱད་པ་ཉིད་བརྗོད་པ་ནི་གལ་ཏེ་ཞེས་བྱ་བའོ། །འོན་ཏེ་ཐ་སྙད་ཚད་མ་མ་ཡིན་ན། དེའི་ཚེ་ཚད་མ་མ་ཡིན་པའི་ཐ་སྙད་ལས་ཚད་མ་རྟོགས་པ་མ་ཡིན་ན། གཞལ་བྱ་ལ་ཡང་དེ་ལྟར་རྟོགས་པར་འགྱུར་རོ། །དེ་ལྟ་ན་ཡང་ཚད་མའི་མཚན་ཉིད་དོན་མེད་པར་
འགྱུར་རོ། །ཅིའི་ཕྱིར་ཞེ་ན། ཚད་མ་མེད་པ་ཐམས་ཅད་ནི། གྲུབ་ཕྱིར་ཏེ་ངེས་པའི་ཕྱིར་རོ། །དེའི་ཕྱིར་ཚད་མ་མ་ཡིན་པ་ལས་ངེས་པ་འདི་ནི་འབྲེལ་པ་མ་ཡིན་ནོ། །དེའི་ཕྱིར་ཞེས་བྱ་བ་དེ་ཁོ་ན་རྟོགས་པ་མེད་པའི་ཕྱིར་རོ། །ཐ་སྙད་ཙམ་ཞེས་བྱ་བ་ཙམ་སྨོས་པས་ནི་ཚད་མ་དང་བྲལ་བ་ཉིད་བརྗོད་དོ། །མི་སླུ་བ་དོན་

དམ་པར་མ་ཡིན་པ་ཅི་ལྟར་ཞེ་ན། འདི་ལྟར་ཞེས་བྱ་བའོ། །འདི་ཉིད་སྦྱོར་བ་ནི་ཐ་དད་ཅེས་བྱ་བ་སྟེ་གང་གི་ཕྱིར་ཐ་དད་པ་དང་ཐ་མི་དད་པ་གཉི་ག་ལ་མི་སླུ་བ་མི་འཐད་པས་སོ། །མི་འཐད་པ་ཉིད་བརྗོད་པ་ནི། གལ་ཏེ་ཞེས་བྱ་བའོ། །གལ་ཏེ་སྒྲས་བསྟན་པའི་རྟོགས་བཞིན་པ་ལས་བསྲེག་པ་ལ་སོགས་
པ་གཞན་ཐོབ་པ་ཡིན་ན། དེའི་ཚེ་བསྲེག་པ་ལ་སོགས་པ་གཞན་ཐོབ་པས། མེད་དགག་གི་རང་བཞིན་སླུ་བ་མེད་པའམ། མ་ཡིན་པའི་རང་བཞིན་གྱིས་མི་སླུ་བར་ཅི་ལྟར་འགྱུར་ཏེ། མི་འགྱུར་བ་ཁོ་ནའོ། །འོན་ཏེ་རྟོགས་བཞིན་པ་ལས་ཐོབ་པར་བྱ་བ་ཐ་མི་དད་ན། དེ་ལྟ་ཡིན་ན་ཐོབ་པར་བྱ་བ་དེ་ཡང་རྟོགས་
བཞིན་པ་ཉིད་བཞིན་དུ་རྟོགས་པས་སོ། །དེས་ན་ཞེས་བྱ་བ་ནི་ཐོབ་པར་བྱ་བ་རྟོགས་བཞིན་པ་དང་ཐ་མི་དད་པའི་ཕྱིར་སླུ་བ་མ་ཡིན་ནོ། །ཤེས་པ་སྐྱེས་པའི་དུས་ཉིད་ན་མི་སླུ་བ་ཡོད་པར་འགྱུར་རོ། །དེས་ན་སླུ་བའི་དོགས་པ་མེད་པས་ན་འཇུག་པར་བྱ་བ་མ་ཡིན་པ་ཁོ་ནའོ། །དེས་ན་དོན་དམ་པར་ན། མངོན་སུམ་
གྱི་རྗེས་ལས་བྱུང་བའི་རྣམ་པར་རྟོག་པ་དང་སྒྲ་དག་ཀྱང་མི་སླུ་བ་མ་ཡིན་ནོ། །སྤྱིའི་ཡུལ་ལ་སོགས་པ་མེད་པ་དེའི་ཕྱིར་རོ། །ཅི་ལྟར་ངག་རྣམ་པར་གཅོད་པའི་འབྲས་བུ་ཅན་ཡིན་ཞེ་ན། ཁོ་ནའོ་ཞེས་བྱ་བའོ། །གང་གི་ཕྱིར་ཁོ་ནའི་སྒྲ་སྦྱར་བར་མ་ཟད་ཀྱི་མ་སྦྱར་བ་ཡང་ཚིག་རྣམས་ཀྱིས་ཏེ། ངག་རྣམས་སུ་མ་ཟད་
པར་རྣམ་པར་གཅོད་པ་རྟོགས་པར་འགྱུར་བ་ཡིན་ནོ། །གཞན་གྱིས་འདི་ནི་རེ་ཞིག་གཞག་གོ་ཞེས་སྨྲས་ཏེ། རྣམ་པར་གཅོད་པའི་འབྲས་བུ་ཅན་འདིའོ། །དེ་ལྟར་ཞེས་བྱ་བ་རྣམ་པ་གསུམ་དུ་མཐོང་བའོ། །གྲུབ་པའི་མཐའ་པས་ནག་པ་ཞེས་བྱ་བའོ། །རྣམ་པར་ཕྱེ་ནས་མཐོང་བ་ཉིད་དོ་ཞེས་སྦྱར་རོ། །རྣམ་
པར་ཕྱེ་བའི་རྣམ་པ་བརྗོད་པ་ནི་ཁྱད་པར་དང་ངེས་པར་བཟུང་ན་ནི་ཞེས་བྱ་བ་ལ་སོགས་པའོ། །གང་གི་ཚེ་རྣམ་པར་དབྱེ་བ་འདིར་འགྱུར་ཞེ་ན། ཁྱད་པར་དང་ཞེས་བྱ་བའོ། །ཅི་ལྟར་ཁྱད་པར་ལ་སོགས་པ་ལ་སྦྱོར་ཞེ་ན། ནག་པ་ཞེས་བྱ་བའོ། །དོགས་པ་ནི་སྦྱར་བ་མེད་པར་ཞེས་བྱ་བའོ། །ལན་ནི་སྐབས་དང་ཞེས་བྱ་
བ་ལ་སོགས་པ་སྟེ། འདི་ཡང་རྟིང་བཞིན་དུ་འཆད་པར་འགྱུར་རོ། །ཁྱད་པར་གཞན་ཞེས་བྱ་བ་ན་གཏོང་ཕོད་པ་ལ་སོགས་པ་རྣམ་པར་གཅོད་པར་འགྱུར་བའོ། །དེས་ན་ཞེས་བྱ་བ་ཡོན་ཏན་གཞན་རྣམ་པར་གཅོད་པར་འགྱུར་བས་སོ། །དེ་ལྟར་འགྱུར་མོད་སྙམ་ན། དེ་ལྟར་ནི་ཞེས་བྱ་བ་སྟེ་ཡོན་ཏན་ཐམས་

ཅད་རྣམ་པར་གཅོད་པ་ནི་མི་འཐད་དེ་ཚད་མ་དང་འགལ་བའི་ཕྱིར་རོ། །སུན་འབྱིན་པ་གཞན་ནི་མི་ལྡན་པ་དང་ཞེས་བྱ་བ་སྟེ། གཉི་གས་ཀྱང་འགའ་ཞིག་འགོག་པའི་ཕྱིར་རོ། །དེར་ཡང་ཞེས་བྱ་བ་ནི་མ་འགྲེལ་པ་རྣམ་པར་གཅོད་པའི་ངག་ལ་ཡང་ངོ་། །ནག་པ་ལ་སོགས་པའི་དོན་རྣམས་ལ་ནིའོ། །ཅི་ལྟར་
མ་འབྲེལ་པ་ལ་སོགས་པའི་བཟློག་ཟླ་ཡིན་ཞེ་ན། དེ་ཉིད་ཅེས་བྱ་བ་ནི་འཕོང་སྐྱེན་པ་ཉིད་དོ། །ད་ལྟར་མ་ཡིན་ན་ཞེས་བྱ་བ་ནི་གཏོང་ཕོད་པ་ལ་སོགས་པ་རྣམ་པར་གཅོད་ནའོ། །དེ་ལྟར་གཞན་དང་ལྡན་པ་རྣམ་པར་གཅོད་པའི་ངག་ལ་ཡང་ཟླ་བོ་རྣམ་པར་གཅོད་པ་ཉིད་རྟོགས་པར་འགྱུར་བ་ཡིན་ནོ་ཞེས་བརྗོད་པ་ནི་དེ་བཞིན་
དུ་ཞེས་བྱ་བའོ། །ར་མ་ལ་སོགས་པ་ནི་རྣམ་པར་གཅོད་པ་མ་ཡིན་ནོ་ཞེས་བྱ་བ་ནི་དེ་སྐབས་སུ་མ་བབ་པའི་ཕྱིར་ཏེ། གཉིས་པོ་ཁོ་ན་སྐབས་སུ་བྱས་པའི་ཕྱིར་རོ། །ར་མ་ལ་སོགས་པ་སྐབས་སུ་བབ་ན་ནི་དེ་ཡང་རྣམ་པར་གཅོད་དོ་ཞེས་འཆད་པར་འགྱུར་རོ། །སྐབས་སུ་ཡིན་ན་ཞེས་བྱ་བ་ནི་སྐབས་སུ་བབ་པར་བྱས་ནའོ། །
དེ་ཉིད་བརྗོད་པ་ཅི་ཞེས་བྱ་བ་ནི། མཁས་པ་ལ་སོགས་པའི་ཡོན་ཏན་གཞན་ནོ། །གལ་ཏེ་ཡོན་ཏན་མཐའ་དག་རྣམ་པར་གཅོད་ན། ནག་པ་ཉིད་ལ་སོགས་པ་ཡང་རྣམ་པར་གཅོད་པར་འགྱུར་རོ། །དེ་ལྟར་ནི་འཐད་པ་ཡང་མ་ཡིན་ཏེ། ཚད་མ་དང་འགལ་བའི་ཕྱིར་རོ་ཞེས་དོགས་ན། འཁྲུལ་པ་མེད་པ་སྤངས་པའོ་
ཞེས་བྱ་བ་སྟེ། ཅི་ལྟར་འཁྲུལ་པ་མེད་པ་སྤངས་པ་དེ་ལྟར་ཡོན་ཏན་མཐའ་དག་རྣམ་པར་གཅོད་པ་ཡིན་ནོ། །ཐེ་ཚོམ་ཟ་བའི་སྐབས་སུ་བབ་པའི་ཚུལ་བརྗོད་པ་ནི། ཅི་འདྲ་བ་ན་ཞེས་བྱ་བའོ། །མཐའ་དག་ཅེས་བྱ་བ་ནི་ར་མ་ལ་སོགས་པ་ཡང་ངོ་། །ཅིའི་ཕྱིར་ཞེ་ན། དེའི་ཚེ་ཞེས་བྱ་བའོ། །དེ་བཞིན་དུ་ཤིན་ཏུ་མི་
སྲིད་པ་རྣམ་པར་གཅོད་པའི་ངག་གིས་ཀྱང་པདྨ་སྔོན་པོ་ནི་མི་སྲིད་པ་ཁོ་ནའོ་ཞེས། པདྨ་ལ་སྔོན་པོ་དང་གཏན་མི་ལྡན་པའི་སྐབས་ཡིན་པའི་ཕྱིར་དེ་ཉིད་རྣམ་པར་གཅོད་པར་བྱེད་པ་ཡིན་ཏེ། པདྨའི་རིགས་ཀྱི་ཕྱོགས་གཅིག་དང་སྔོན་པོ་ལྡན་པར་མཐོང་བའི་ཕྱིར་རོ། །གང་གི་ཕྱིར་དེ་ལྟར་རྣམ་གཅོད་རྣམ་པ་གསུམ་ཡོད་
ཀྱི། རྣམ་པ་འབྲེལ་པ་རྣམ་པར་གཅོད་པ་དང་། ཅིག་ཤོས་ཁོ་ན་ནི་མ་ཡིན་པ་དེས་ན། བྱས་པ་ཉིད་ལ་སོགས་པའི་ཆོས་དང་མི་ལྡན་པ་གང་ཡིན་པ་དེ་རྣམ་པར་གཅོད་པས་ན། ཆོས་ཅན་བྱས་པ་ལ་སོགས་པ་ཆོས་ཀྱི་ཁྱད་པར་ཡིན་གྱི། གཞན་དང་ལྡན་པ་རྣམ་པར་གཅོད་པ་དང་། ཤིན་ཏུ་མི་ལྡན་པ་

རྣམ་པར་གཅོད་པས་ནི་མ་ཡིན་ནོ། །ཅི་ལྟར་ཐུན་མོང་མ་ཡིན་པ་ཁོ་ན་གཏན་ཚིགས་སུ་འགྱུར་རོ་ཞེས་བྱ་བ་ནི་ཉེས་པས་འཇིགས་པས། གཞན་དང་ལྡན་པ་རྣམ་པར་གཅོད་པས་ཁྱད་པར་དུ་མ་བཟུང་བ་དེ་བཞིན་དུ་ཕྱོགས་ཀྱི་ཕྱོགས་གཅིག་ལ་མ་གྲུབ་པ་གཏན་ཚིགས་སུ་འགྱུར་རོ་ཞེས་བྱ་བའི་
ཉེས་པས་ཤིན་ཏུ་མི་ལྡན་པ་རྣམ་པར་གཅོད་པས་ཀྱང་ཁྱད་པར་དུ་གཟུང་བར་བྱ་བ་མ་ཡིན་ནོ། །ཤིང་གི་རིགས་ནི་ཉལ་བ་དང་ཤིན་ཏུ་མི་ལྡན་པ་རྣམ་པར་གཅད་པའི་ཕྱིར་ཏེ། ཕྱོགས་གཅིག་དང་ལྡན་པའི་ཕྱིར་རོ། །དེའི་ཕྱིར་མ་འབྲེལ་བ་རྣམ་པར་གཅོད་པ་ཁོ་ནས་ཁྱད་པར་ཡིན་ནོ། །དེས་ཆོས་ཅན་དེའི་ཁྱད་
པར་ཅན་གྱི་ཆོས་བྱས་པ་ཉིད་ལ་སོགས་པ་རྗེས་འགྲོ་བ་མེད་པ་ཞེས་བྱ་བ་ལ། དཔེ་ལ་རྗེས་སུ་འགྲོ་བ་མེད་པའམ། ཕྱོགས་ཀྱི་ཕྱོགས་གཅིག་ལ་རྗེས་སུ་འགྲོ་བ་མེད་པའི་སྐྱོན་དེ་ལ་བརྟེན་པ་མ་ཡིན་ནོ། །ཐུན་མོང་མ་ཡིན་པ་དང་ཕྱོགས་ཀྱི་ཕྱོགས་གཅིག་ལ་མ་གྲུབ་པའི་ཉེས་པ་དག་ལ་བརྟེན་པ་མ་ཡིན་ནོ་ཞེས་
བྱ་བའི་དོན་ཏོ། །གང་གིས་རྗེས་སུ་འགྲོ་བ་མེད་པའི་ཉེས་པར་མི་འགྱུར་བ། ཅི་ལྟར་ན་གཞན་དང་ལྡན་པ་ལ་སོགས་པ་རྣམ་པར་གཅོད་པ་མ་ཡིན་ཞེ་ན། ཆོས་དེ་ཞེས་གསུངས་སོ། །གཞན་དང་ནི་དཔེའི་ཆོས་ཅན་དང་ངོ་། །དེས་ན་ཞེས་བྱ་བ་ནི་དོགས་པས་ནའོ། །དེ་ཞེས་བྱ་བ་ནི་མི་ལྡན་པ་རྣམ་པར་གཅོད་པ་
བསྟན་པས། གཞན་དང་ལྡན་པ་དང་། གཏན་མི་ལྡན་པ་རྣམ་པར་གཅོད་པ་མ་ཡིན་པ་དེའི་ཕྱིར་རྗེས་སུ་འགྲོ་བ་མེད་པའི་སྐྱོན་མེད་དོ་ཞེས་བྱ་བ་སྔ་མ་བཞིན་བཤད་པར་བྱའོ། །གལ་ཏེ་ཕྱོགས་ཀྱི་ཆོས་ཉིད་ཅེས་བརྗོད་ཀྱང་། ཅི་ལྟར་མ་འབྲེལ་པ་རྣམ་པར་གཅོད་པ་ཉིད་རྟོགས་ཞེས་དོགས་པ་བཟློག་པ་ནི་དེ་
ལྟར་གྲགས་དང་ཞེས་བྱ་བ་ལ་སོགས་པ་རྣམ་པར་འགྲེལ་པ་ནི། འདི་ལྟར་ཞེས་བྱ་བའོ། །གཞན་དང་ལྡན་པ་ནི་ཞེས་ནིའི་སྒྲས་གཏན་མི་ལྡན་པ་ཡང་བསྡུའོ། །བཟློག་པའི་ཕྱིར་ཞེས་བྱ་བ་ནི་བཟློག་ཟླ་མ་ཡིན་པའི་ཕྱིར་རོ། །དོན་འདི་ཞེས་བྱ་བ་ནི་མ་འབྲེལ་པ་རྣམ་པར་གཅོད་པའོ། །ཅི་ལྟར་ཞེ་ན། གཞན་དང་
ཞེས་བྱ་བ་སྟེ་དཔེའི་ཆོས་ཅན་དང་ལྡན་པའོ། །དེར་ཞེས་བྱ་བ་ནི་ཁྱད་པར་དུའོ། །དེ་ཉིད་ལ་ཞེས་བྱ་བ་ནི་གཞན་དང་ལྡན་པ་རྣམ་པར་གཅོད་པ་ཉིད་ལའོ། །ཅི་ལྟར་འགལ་སྙམ་ན་ཐེ་ཚོམ་དུ་ཞེས་བྱ་བའོ། །སྒྲུབ་པར་བྱེད་པ་ཉིད་དཔེ་དང་ལྡན་པར་གྲུབ་པ་ཁོ་ན་ཡིན་པས་ཅི་ལྟར་གསལ་བར་ནུས་ཞེས་བྱ་བའི་དོན་

ཏོ། །གྲུབ་པ་ནི་སེལ་བའམ་བཀག་པ་ནི་སྒྲུབ་པ་མ་ཡིན་ཏེ། བསལ་བ་ནི་གཏན་ཚིགས་ཀྱི་རྟེན་མ་ཡིན་པའི་ཕྱིར་རོ། །བཟློག་པའི་ཟླ་བོར་མ་ཟད་ཀྱི་སྒྲ་དག་ཀྱང་བརྗོད་པར་འདོད་པའི་རྗེས་སུ་འབྲང་བ་ཡིན་ནོ། །འདི་ག་ལས་ཤེ་ན་དེ་ལྟ་བུ་ཉིད་དུ་ཞེས་བྱ་བའོ། །སྒྲ་དང་བརྗོད་འདོད་ཅི་ལྟ་བ་བཞིན་འཇུག་
པ་ཡིན་གྱི་དོན་དང་འབྲལ་པ་ཅི་ལྟ་བ་བཞིན་ནི་མ་ཡིན་ནོ་ཞེས་བྱ་བ་འདི་ག་ལས་ཤེས་ཤེ་ན། སྒྲ་ནི་ཞེས་བྱ་བའོ། །གལ་ཏེ་ཞེས་བྱ་བ་ལ་སོགས་པའི་རྩོད་པ་ལ་དོན་འདི་ཡིན་ཏེ། ཁྱད་པར་དང་ལྷན་ཅིག་བརྗོད་པའི་ངེས་པར་གཟུང་བ་ཡང་མི་ལྡན་པ་རྣམ་པར་གཅོད་པ་མ་ཡིན་གྱི་འོན་ཀྱང་གཞན་དང་ལྡན་པ་
རྣམ་པར་གཅོད་པ་ཁོ་ན་བྱེད་པར་འགྱུར་ཏེ། དཔེར་ན་ལྷ་སྦྱིན་ཁོ་ནའི་བུ་ཞེས་ཁྱད་པར་དང་ལྷན་ཅིག་བརྗོད་པའི་ངེས་པར་གཟུང་བས་གཞན་དང་ལྡན་པ་ཁོ་ན་རྣམ་པར་གཅོད་ཀྱི། མི་ལྡན་པ་ནི་མ་ཡིན་པ་བཞིན་ནོ་ཞེས་བྱ་བ་ལྟ་བུའོ་ཞེས་བྱ་བའོ། །སྐབས་དང་འགལ་བའོ་ཞེས་བྱ་བ་ནི། སྒྲུབ་པར་བྱེད་པ་
མཐུན་པའི་ཕྱོགས་ལ་ཡོད་པར་སྟོན་པའི་སྐབས་སུ་བབ་པ་ཡིན་པས་དེ་དང་འགལ་བའོ། །འགལ་བ་མེད་དོ་ཞེས་བྱ་བའི་གྲུབ་པའི་མཐར་ནི་དོན་འདི་ཡིན་ཏེ། སྒྲའི་ཚུལ་གྱིས་ཕྱོགས་དང་སྲིད་སྒྲུབ་དག་ཁྱད་པར་ཉིད་དུ་བསྟན་ཀྱང་། དོན་གྱིས་ནི་དེ་ཉིད་ཁྱད་པར་ཅན་ཁོ་ན་ཡིན་ཏེ། རྟེན་ཡིན་པའི་ཕྱིར་རོ། །
ཆོས་དང་འཕོང་སྐྱེན་པ་ནི་ཁྱད་པར་ཡིན་ཏེ་བརྟེན་པ་མ་ཡིན་པའི་ཕྱིར་རོ། །དེས་ན་ཁོ་ནའི་སྒྲས་ཆོས་དང་འཕོང་སྐྱེན་པ་གཉིས་དང་ལྷན་ཅིག་བརྗོད་པས་ནི་མ་འབྲེལ་པ་ཁོ་ན་རྣམ་པར་གཅོད་པ་ཡིན་ནོ་ཞེས་བྱ་བའོ། །དེ་ལ་ནི་སྲིད་སྒྲུབ་ལའོ། །དེ་ནི་ཁྱད་པར་རོ། །དམ་པའི་དོན་དུ་ཞེས་བྱ་བ་ནི་དོན་གྱི་ཚུལ་གྱིས་
སོ། །ཚུལ་གཉིས་ཡོད་ན་འདིར་གང་གཟུང་ཞེ་ན། འདིར་ནི་ཞེས་གསུངས་སོ། །དངོས་པོའི་ཆོས་ཞེས་བྱ་བ་ནི་དངོས་པོ་པའི་ཚུལ་ལོ། །སྐྱོན་ཞེས་བྱ་བ་སྐབས་དང་འགལ་བའི་སྐྱོན་མེད་དོ་ཞེས་བྱ་བའི་དོན་ཏོ། །ངེས་པར་གཟུང་བ་འདི་ན་ཚད་མ་དང་ཡང་མི་འགལ་ལོ་ཞེས་བརྗོད་པ་ནི་འདིར་ཞེས་བྱ་བ་སྟེ་
ཕྱོགས་ཀྱི་ཆོས་ལའོ། །རྣམ་པར་གཅོད་པའི་རང་བཞིན་ཞེས་བྱ་བ་ནི་འདི་ནི་ཕྱོགས་ཀྱི་ཆོས་ཁོ་ན་ཡིན་གྱི། ཆོས་མ་ཡིན་པ་ནི་མ་ཡིན་ནོ་ཞེས་མི་ལྡན་པ་འགོག་པའི་རང་བཞིན་ནོ། །ས་ཕྱོགས་ལ་ཡོད་པའི་དུ་བ་ལ་ནི་དེ་ཡང་མངོན་སུམ་གྱིས་གྲུབ་པ་ཡིན་ལ། སྒྲ་ལ་ཡོད་པའི་བྱས་པ་ལ་ནི་རྐྱེན་གྱི་བྱེ་བྲག་གིས་ཐ་

དད་པའི་རྟགས་ལས་སྐྱེས་པའི་རྗེས་སུ་དཔག་པ་ལས་སོ། །དེའི་ཕྱིར་མ་འབྲེལ་པ་རྣམ་པར་གཅོད་པ་མི་རྟོགས་པའི་སྐྱོན་མེད་དོ། །གལ་ཏེ་ཁྱད་པར་དང་ལྷན་ཅིག་བརྗོད་པའི་ངེས་པར་གཟུང་བས་ཀྱང་། གཞན་དང་ལྡན་པ་ཅི་སྟེ་རྣམ་པར་མི་གཅོད་སྙམ་ན། གཞན་དང་ཞེས་བྱ་བའོ། །རི་
ལ་སོགས་པ་གཅིག་དེ་ལྟར་ཏེ། དུ་བ་ལ་སོགས་པ་དང་འབྲེལ་པ་ཡིན་ན། གཞན་ཚང་བང་ལ་སོགས་པ་དེ་ལྟར་ཏེ་དུ་བ་ལ་སོགས་པ་དང་མ་འབྲེལ་པར་འགྱུར་རོ། །ཉེས་པ་གཞན་ཡང་བརྗོད་པ་ནི་ཁྱད་པར་དང་ཞེས་བྱ་བའོ། །གཞན་དང་ལྡན་པས་རྣམ་པར་གཅོད་པ་ཞེས་བྱ་བ་ལ་སོགས་པ་ཉིད་
རྣམ་པར་འགྲེལ་པ་ནི། གལ་ཏེ་ཞེས་བྱ་བ་ལ་སོགས་པའོ། །དེ་ལས་གཞན་ནི་བུམ་པ་ལ་སོགས་པའོ། །དེ་ལྟར་འགྱུར་མོད་སྙམ་ན། དེ་དེ་ལྟར་ཞེས་གསུངས་སོ། །ཅི་ལྟར་ཞེ་ན་མངོན་སུམ་གྱིས་ནི་ཞེས་བྱ་བའོ། །བསྒྲུབ་པར་བྱ་བའི་ཆོས་ཅན་ལས་གཞན་མཐུན་པའི་ཕྱོགས་ལ་དུ་བ་མངོན་སུམ་གྱིས་
རྟོགས་པའོ། །བུམ་པ་ལ་ཡང་རྗེས་སུ་དཔག་པས་བྱས་པ་ཉིད་ཡོད་པར་རྟོགས་པ་ཡིན་ནོ། །རྗེས་སུ་དཔག་པ་དེ་ག་ལས་སྐྱེ་སྙམ་ན། འཇིམ་གོང་ལ་སོགས་པའི་རྐྱེན་གྱིས་བྱེ་བྲག་ཆེ་བ་དང་ཆུང་བ་ལ་སོགས་པའི་དབྱེ་བས་ཐ་དད་པར་འགྱུར་བའི་རང་བཞིན་གང་ལ་ཡོད་པའོ། །དེའི་དངོས་པོ་ནི་ཉིད་
དེ་དེ་ལ་སོགས་པ་བརྩལ་མ་ཐག་ཏུ་འབྱུང་བ་ལ་སོགས་པ་སྟེ། རྟགས་དེའི་ཕྱིར་རོ། །མངོན་སུམ་ལས་ཞེས་བྱ་བའི་བུམ་པ་ལ་མངོན་སུམ་གྱིས་རྟོགས་པའོ། །གལ་ཏེ་མི་ལྡན་པ་དང་། གཞན་དང་ལྡན་པ་དང་། གཏན་མི་ལྡན་པ་རྣམ་པར་གཅོད་པས་ཁྱད་པར་དུ་བྱེད་པ་རྣམས་ཐ་དད་པ་ཡིན་ཡང་
རྗོད་པར་བྱེད་པ་ཁོ་ན་དང་། བརྗོད་པར་བྱ་བ་མི་ལྡན་པ་རྣམ་པར་གཅོད་པ་ལ་སོགས་པའོ། །བརྗོད་པར་བྱ་བ་དང་རྗོད་པར་བྱེད་པའི་མཚན་ཉིད་དམ། ཡུལ་དང་ཡུལ་ཅན་གྱི་འབྲེལ་པ་གང་ཡིན་པ་དེ་ཅི་ལྟར་རྟོགས་ཤེ་ན། རྗེས་སུ་དཔག་པའི་ཞེས་བྱ་བའོ། །འཇིག་རྟེན་གྱི་གྲགས་པ་ལས་བརྗོད་པར་བྱ་
བ་དང་རྗོད་པར་བྱེད་པའི་དངོས་པོའམ། གཞན་དག་ཅེས་བྱ་བ་ཡུལ་དང་ཡུལ་ཅན་གྱི་དངོས་པོ་རྟོགས་པ་ཡིན་ནོ་ཞེས་འབྲེལ་ཏོ། །ཅི་ལྟ་བུར་གྱུར་པ་ལས་ཤེ་ན། རྗེས་སུ་དཔག་པའི་མཚན་ཉིད་ལས་སོ། །འཇིག་རྟེན་གྱི་གྲགས་པ་ནི་རྟོགས་པ་སྟེ། རྣམ་པར་རྟོགས་པའི་ཤེས་པ་ལ་བརྗོད་ལ། དེའང་རྗེས་སུ་

དཔག་པ་ཡིན་ནོ། །གང་དང་གང་རྣམ་པར་རྟོག་པའི་ཡུལ་ཡིན་པ་དེ་དང་དེ་ནི་བརྗོད་པར་བྱ་བ་དང་རྗོད་པར་བྱེད་པ་ཡིན་ཏེ། དཔེར་ན་རྣམ་པར་རྟོག་པ་ལ་གནས་པའི་བུམ་པའི་དོན་དང་། བུམ་པའི་སྒྲའི་རྣམ་པ་དག་བཞིན་ནོ། །རྣམ་པར་གཅོད་པ་དང་ངེས་པར་གཟུང་བ་ཡང་རྣམ་པར་རྟོག་པའི་ཡུལ་
ཡིན་ནོ་ཞེས་བྱ་བའོ། །སོགས་པའི་སྒྲས་ནི་ཁྱད་པར་བྱ་བ་དང་བྱ་བ་དག་གཟུང་ངོ་། །ཁྱད་པར་ལ་སོགས་པ་དང་ལྷན་ཅིག་སྤྱོད་པ་ངེས་པར་གཟུང་བའི་དོན་གང་ལ་ཡོད་པའི་ཚིག་ཕྲད་དང་། ཚིག་ཕྲད་དེའི་དོན་དག་བརྗོད་པར་བྱ་བ་དང་རྗོད་པར་བྱེད་པའོ། །དེ་ལ་ཞེས་བྱ་བ་ནི་འབྲེལ་བར་རྟོགས་པ་
ལའོ། །དེ་ལྟར་ཞེན་པ་ནི་མི་ལྡན་གཞན་དང་ལྡན་པ་དང་ཞེས་བྱ་བ་ལ་སོགས་པར་ཕྱོགས་ཆོས་ཞེས་བྱ་བའི་བསྡུ་བ་གང་ཡིན་པ་དེའི་དོན་དེ་བཤད་པ་ཡིན་ནོ། །དེ་གང་ཡིན་ཞེ་ན་ཐ་དད་ཅེས་བྱ་བ་སྟེ། གཞན་ལས་ལྡོག་པ་དང་འབྲེལ་བ་རྗེས་སུ་འགྲོ་བའམ། གཉི་ག་བརྗོད་པ་ནི་ཐ་དད་པ་དང་
འབྲེལ་པ་ཞེས་བྱ་བའོ། །ཕྱོགས་ཆོས་ཞེས་དྲུག་པའི་བསྡུ་བ་ཅན་གྱི་ངག་ལ་དོན་རྣམ་པ་གསུམ་སློབ་དཔོན་བཞེད་པ་ཡིན་ནོ་ཞེས་བྱ་བ་ནི་རྣམ་པར་བཤད་པ་མཛད་པ་བཞེད་པའོ། །གལ་ཏེ་ངག་འདི་ལ་དོན་གསུམ་ཡོད་དོ་ཞེས་བྱ་བ་འདི་ཅི་ལྟར་རྟོགས་ཤེ་ན། བྱེ་བྲག་ཏུ་ཞེས་བྱ་བ་དོན་དུ་མར་དོན་
གསུམ་རྟོགས་པའི་ཕྱིར་རོ། །ཕྱོགས་ཞེས་བརྗོད་པ་ནི་ཕྱོགས་ཆོས་མ་ཡིན་པ་ནི་གཏན་ཚིགས་མ་ཡིན་ནོ་ཞེས་རྣམ་པར་གཅོད་པ་རྟོགས་ལ། དེའི་ཆོས་གཏན་ཚིགས་ཡིན་ནོ་ཞེས་ནི་སྒྲུབ་པར་བྱེད་དོ། །དེ་ལྟ་ཡིན་དང་གཉི་ག་ཡང་རྟོགས་སོ། །འོ་ན་ཅི་ལྟར་ཕྱོགས་ཀྱི་ཆོས་བསྟན་པར་བྱ་བ་སྙམ་
ན། མ་གྲུབ་པ་དྲུག་རིགས་ཐིགས་ལས་བརྗོད་པ་དང་། གསལ་བ་གཉིས་དང་། མ་ངེས་པ་དྲུག་དང་། ཡང་དག་པའི་གཏན་ཚིགས་གསུམ་སྟེ་དེ་དག་བརྗོད་པའི་དོན་དུའོ། །དེ་ཙམ་ཞིག་ཅེས་བྱ་བ་ནི་མ་ཡིན་པ་དང་། འགལ་བ་དང་། མ་ངེས་པ་དང་། ཡང་དག་པའི་གཏན་ཚིགས་རྣམས་
ཉིད་དོ། །དེ་གཉིས་ཉིད་ཅེས་བྱ་བ་ནི་རང་བཞིན་དང་འབྲས་བུ་དག་ཉིད་དོ། །གཞན་གཉིས་སོ་ཞེས་བྱ་བ་ནི། གཞལ་བྱ་ཉིད་དང་མཉན་བྱ་ཉིད་དོ། །དེས་ན་ཞེས་བྱ་བ་ནི། ལྡོག་པའི་སྒོ་ནས་གོ་བྱེད་ཡིན་པས་ནའོ། །གང་དག་མཐུན་པའི་ཕྱོགས་གང་མི་མཐུན་པའི་ཕྱོགས་དག་ལ་ཡོད་པ་དང་མེད་པ་དང་།

རྣམ་པ་གཉིས་སུ་ཡང་བརྗོད་པ་ཕྱོགས་ཀྱི་ཆོས་རྣམ་པ་དགུ་པོ་དེ་དག་ཀྱང་གང་དག་ཡིན་ཞེ་ན། ཕྱོགས་ཀྱི་ཆོས་དགུ་པོ་དེ་དག་ནི་ཞེས་བྱ་བའོ། །རྟག་སོགས་ལ་ཞེས་བྱ་བ་ནི་བསྒྲུབ་པར་བྱ་བ་ལའོ། །འདས་པས་ཅི་ལྟར་དུ་མ་ཉིད་ཅེས་བྱ་བ་རྣམ་པ་བཞི་ཉིད་དུའོ། །གྲུབ་པའི་མཐར་
ནི་དོན་འདི་ཡིན་ཏེ། རྩོལ་བ་ལས་བྱུང་བ་དང་བྱས་པ་གཉིས་རང་གི་ངོ་བོས་རྣམ་པ་བཞི་མེད་ཀྱང་། གཅོར་གྱུར་པའི་བསྒྲུབ་བྱའི་དབྱེ་བ་ལས་རྣམ་པ་བཞི་ཡིན་ནོ་ཞེས་བྱ་བའོ། །འདི་ཉིད་བརྗོད་པ་ནི་རང་གི་ངོ་བོས་ནི་ཞེས་བྱ་བ་ལ་སོགས་པའོ། །དེས་ན་ནི་འཐད་པས་ནའོ། །བྱས་པ་ཞེས་བྱ་བ་ལ་སོགས་པ་ནི་
རྩོད་པའོ། །དེའི་མཚན་ཉིད་དང་ཞེས་བྱ་བ་ལ་སོགས་པ་ནི་ལན་ནོ། །བྱས་པ་ལ་ནི་རང་བཞིན་གྱི་མཚན་ཉིད་དང་། རྩོལ་བ་ལས་བྱུང་བ་ཉིད་ལ་ནི་འབྲས་བུའི་མཚན་ཉིད་ཡོད་དོ། །བྱས་པ་ལ་ནི་རང་བཞིན་ལས་གཞན་འབྲས་བུའི་མཚན་ཉིད་མེད་ལ། རྩོལ་བ་ལས་བྱུང་བ་ལ་ནི་འབྲས་བུ་ཉིད་ལས་གཞན་གྱི་
མཚན་ཉིད་མེད་དོ། །དེའི་ཕྱིར་བཟློག་པ་སྟེ། བྱས་པ་ཉིད་ནི་འབྲས་བུ་ལ་བརྩལ་མ་ཐག་ཏུ་འབྱུང་བ་ཉིད་དུ་རང་བཞིན་མ་ཡིན་ནོ། །ཅིའི་ཕྱིར་ཞེ་ན། རང་བཞིན་ཞེས་བྱ་བའོ། །གང་གི་ཕྱིར་འབྲས་བུ་གོ་བར་བྱ་བ་ལ་མ་ཁྱབ་ཀྱི། འོན་ཀྱང་རང་བཞིན་ཁོ་ནས་ཁྱབ་པ་ཡིན་ནོ། །ཁྱབ་པ་ཁོ་ན་ནི་མ་ཡིན་ཏེ། ཤ་པ་
ཉིད་ཀྱིས་ཤིང་ཉིད་ལ་མ་ཁྱབ་པའི་ཕྱིར་རོ། །ཅིའི་ཕྱིར་འབྲས་བུས་མ་ཁྱབ་སྙམ་ན། རྒྱུ་ནི་འབྲས་བུ་ལ་འཁྲུལ་པ་སྲིད་པའི་ཕྱིར་རོ། །འཁྲུལ་པ་དེའི་ཕྱིར་འབྲས་བུ་ནི་རྒྱུ་ལ་རྣམ་པ་གཉིས་སུ་འཇུག་པ་ཡིན་ནོ། །རང་བཞིན་གྱིས་ཅི་ལྟར་ཁྱབ་སྙམ་ན། བྱས་པ་ཉིད་ནི་ཞེས་བྱ་བའོ། །ཅི་ལྟར་ན་འབྲས་བུ་རྣམ་པ་
གཉིས་སུ་འཇུག་སྙམ་ན། མི་རྟག་པ་ཙམ་གྱིས་ཞེས་སྨོས་སོ། །དེས་ན་ཞེས་བྱ་བ་ནི་འབྲས་བུ་རྩོམ་པར་མ་ངེས་པས་སོ། །དེ་ནི་བརྩལ་མ་ཐག་ཏུ་འབྱུང་བའོ། །རྒྱུའི་ཞེས་བྱ་བ་ནས་བཞིན་ནོའི་བར་ནི་རྩོད་པའོ། །འདི་ལ་བསམ་པ་ནི་འདི་ཡིན་ཏེ། མི་རྟག་པ་ཐམས་ཅད་ནི་རྫ་མཁན་ལ་སོགས་པ་རྒྱུའི་རྩོལ་
བའི་དེ་མ་ཐག་ཏུ་འབྱུང་བའི་ཤེས་པ་སྐྱེད་པ་ཡིན་ཏེ། དེས་ན་འབྲས་བུ་ནི་རྣམ་པ་གཉིས་སུ་འཇུག་པ་མ་ཡིན་ནོ། །དེས་ན་ཅི་ལྟར་བྱས་པ་ཉིད་ཀྱིས་མི་རྟག་པ་ཉིད་ཁྱབ་པ་དེ་བཞིན་དུ་ཤེས་པས་ཀྱང་ཡིན་ནོ། །དེས་ན་བརྩལ་མ་ཐག་ཏུ་འབྱུང་བ་ཡང་རང་བཞིན་གྱི་གཏན་ཚིགས་སུ་འགྱུར་རོ་ཞེས་བྱ་བའོ། །

གལ་ཏེ་ཤེས་པས་ཁྱབ་པ་ཡིན་པ་དེ་ལྟ་ན་ཡང་བུམ་པ་ལ་སོགས་པ་ནི་ཤེས་པ་ལས་དོན་གཞན་ཉིད་མ་ཡིན་ནམ། དེས་ན་འདི་རང་བཞིན་གྱི་ནང་དུ་ཅི་ལྟར་བསྡུ་སྙམ་ན། ཅི་ལྟར་ཞེས་བྱ་བའོ། །བརྩལ་མ་ཐག་ཏུ་ཞེས་བྱ་བ་ནི་ལན་ནོ། །བརྩལ་མ་ཐག་ཏུ་འབྱུང་བའི་མཚན་ཉིད་ཀྱི་ཤེས་པ་ནི། དོན་རྣམས་
ཀྱི་ཡོད་པ་མ་ཡིན་ནོ། །ཅིའི་ཕྱིར་ཞེ་ན། ཤེས་པ་སྐྱེད་པར་བྱེད་པའི་དོན་དེ་ལས་གཞན་ཤེས་པ་སྐྱེད་པར་མི་བྱེད་པ་རྣམས་མེད་པར་ཐལ་བའི་ཕྱིར་རོ། །དེས་ན་ཞེས་བྱ་བ་ནི་བརྩལ་མ་ཐག་ཏུ་འབྱུང་བའི་ཤེས་པའི་མཚན་ཉིད་ཡོད་པ་མ་ཡིན་པས་ནའོ། །བརྩལ་མ་ཐག་ཏུ་འབྱུང་བ་འགའ་ཞིག་ལ་རྣམ་པར་ཡོད་པ་
ཡོད་པ་ནི་རྗེས་སུ་འགྲོ་བའོ། །ཡོད་པ་འགའ་ཞིག་ལ་ཡང་མེད་པ་ནི་ལྡོག་པའོ། །དེ་དག་གིས་བརྩིགས་པའི་ཐ་དད་པ་གང་ལ་ཡོད་པའི་ཤེས་པ་དེ་ལ་དེ་སྐད་ཅེས་བྱ་བའོ། །བརྩལ་མ་ཐག་ཏུ་འབྱུང་བའི་དོན་ཐམས་ཅད་ནི་ཤེས་པ་སྐྱེད་པར་བྱེད་པ་མ་ཡིན་གྱི། འོན་ཀྱང་འགའ་ཞིག་ཁོ་ནས་ཡིན་ནོ། །
དེས་ན་ཞེས་བྱ་བ་ནི་བརྩིགས་པའི་ཐ་དད་པ་ཡོད་པས་ནའོ། །ཅི་ལྟར་རྟོགས་ཞེས་བྱ་བ་ལ་སོགས་པའི་དོན་ནི་འདི་ཡིན་ཏེ། བརྩལ་མ་ཐག་ཏུ་འབྱུང་བ་ཉིད་ཀྱིས་ནི། སྒྲ་མི་རྟག་པ་ཉིད་དུ་བསྒྲུབ་པར་བྱ་བ་མ་ཡིན་ནོ། །དེ་ཡང་འདི་ལས་འགྲུབ་པ་མ་ཡིན་ཏེ། བརྩལ་མ་ཐག་ཏུ་འབྱུང་བའི་ཤེས་པ་ནི་རྟག་
པ་དང་མི་རྟག་པའི་འབྲས་བུ་ཡིན་པ་ཉིད་ཀྱིས་མ་ངེས་པའི་ཕྱིར་རོ་ཞེས་བྱ་བའོ། །རྩོད་པར་བྱེད་པས་མ་ངེས་པ་ཉིད་བརྗོད་པ་ནི། དེ་ལྟར་ཡང་ཞེས་བྱ་བ་སྟེ། རིགས་པའི་མདོ་བྱེད་པས་བཤད་པ་ཡིན་ནོ། །རྩོལ་བའི་འབྲས་བུ་ནི་དུ་མ་ཡིན་ཏེ། མངོན་པར་གསལ་བ་ལ་སོགས་པའི་དབྱེ་བས་འབྲས་
བུ་དུ་མ་ཡོད་པའི་ཕྱིར་རོ། །དེ་ཉིད་བརྗོད་པ་ནི་གསལ་བའང་ཞེས་བྱ་བ་སྟེ། རྩོལ་བས་ནི་ཤེས་པ་ལྟར་བྱེད་ལ་རེས་འགའ་ནི་དོན་ཀྱང་ཡིན་ནོ་ཞེས་བྱ་བའི་དོན་ཏོ། །སྐྱེས་བུའི་མར་མེ་འདེགས་པའི་རྩོལ་བ་ནི་བུམ་པ་སྐྱེད་པ་མ་ཡིན་གྱི། འོན་ཀྱང་ཤེས་པར་བྱེད་པ་ཡིན་ནོ། །དེ་ལྟར་ཞེས་བྱ་བ་ནི།
བུམ་པ་རྫ་མཁན་གྱི་འབྲས་བུར་སྒྲུབ་པར་བྱེད་པ་ཡིན་ནོ་ཞེས་བྱ་བ་ནི་སྐབས་ལས་སོ། །གཉི་ག་ཞེས་བྱ་བ་ནི་དོན་དང་ཤེས་པའི་འབྲས་བུར་རོ། །རྣམ་པར་བཤད་པ་བྱེད་པ་ནི་རི་ཁྲོད་རྗེའོ། །དེ་ལྟ་མ་ཡིན་ན་ཞེས་བྱ་བ་ནི་རྟག་པར་མི་འཐད་ནའོ། །བྱེད་པའི་ཐ་སྙད་ལས་ཀྱང་སྒྲ་འབྲས་བུར་མི་འགྲུབ་བོ་

ཞེས་བརྗོད་པ་ནི་སྒྲ་བྱེད་དོ་ཞེས་བྱ་བའོ། །ཅིའི་ཕྱིར་ཞེ་ན། སྦྱོར་བའི་ཞེས་བྱ་བ་ལ་སོགས་པར་བྱེད་པའི་དོན་ཡིན་པའི་ཕྱིར་རོ། །འོ་ན་རྟག་པ་ཉིད་ཇི་ལྟར་འགྲུབ་སྙམ་ན། སྒྲ་རྟག་པ་ཉིད་ཀྱི་ཞེས་བྱ་བའོ། །དེས་ན་ཞེས་བྱ་བ་ནི་ངོ་ཤེས་པས་གྲུབ་པའི་ཕྱིར་རོ། །གློག་ལ་སོགས་
པ་འབའ་ཞིག་ཏུ་ནི་མ་ཟད་ཀྱི་སྒྲ་རྟག་པ་ཡང་ངོ་། །རྩོལ་བས་གསལ་བར་བྱ་བ་ཉིད་ཡིན་གྱི། བསྐྱེད་པར་བྱ་བ་ནི་མ་ཡིན་པའོ། །ཅི་དང་འདྲ་བར་ཞེ་ན། མར་མེ་ལས་བུམ་པ་གསལ་བ་དེ་བཞིན་ནོ། །མངོན་པར་གསལ་བ་འདི་གང་གི་ཡིན་ཞིང་། མཚན་ཉིད་ཀྱང་ཅི་ལྟ་བུ་ཞིག་ཡིན་ཞེ་ན། རྟག་པ་ཉིད་ཀྱི་
དང་དམིགས་པའི་མཚན་ཉིད་དུ་ནི་བུམ་པའི་དཔེས་གྲུབ་པོ་ཞེས་བརྗོད་པ་ནི། དེ་དང་དེ་མིན་ཞེས་བྱ་བ་དམིགས་པ་དང་མ་དམིགས་པའི་དུས་དག་དང་ལྡན་པར་ཡོད་པར་བུམ་པ་ངོ་ཤེས་པའི་ཚད་མས་གྲུབ་པ་དང་ལྡན་པ་གང་ཡིན་པ་དེ་ནི། ཡང་ཞེས་བྱ་བ་ཕྱིས་དམིགས་པ་ནི་མངོན་པར་གསལ་བ་
ཞེས་བརྗོད་དོ། །ཅིའི་ཕྱིར་དེ་ཉིད་གསལ་བ་ཡིན་ཞེ་ན། གང་གི་ཕྱིར་ཉེ་བར་དམིགས་པ་ལས་གསལ་བའི་མཚན་ཉིད་གཞན་ནི་སྟེ་རང་གི་ངོ་བོ་ཡོད་པ་མ་ཡིན་ཏེ་དེས་ན་དེ་ཉིད་གསལ་བ་ཡིན་ནོ། །དེ་བཞིན་ཞེས་བྱ་བ་དམིགས་པ་དང་མ་དམིགས་པའི་དུས་དག་ཏུ་ཡོད་པར་གྲུབ་པ་ཡིན་ན།
བུམ་པ་སྔར་ཡོད་པ་མར་མེ་བཏེག་པ་ལ་སོགས་པའི་རྐྱེན་འགའ་ཞིག་ལ་ཉེ་བར་དམིགས་པར་འགྱུར་གྱི། སྔར་ཡོད་པའི་བུམ་པ་འབྲས་བུ་ཉིད་ནི་མ་ཡིན་ནོ། །དོན་ལ་སྦྱར་བ་ནི་དེ་བཞིན་ཞེས་བྱ་བ་བརྩལ་མ་ཐག་ཏུ་འབྱུང་བའི་རྣམ་པར་ཤེས་པ་ཡོད་ཀྱང་སྒྲའི་འབྲས་བུ་མ་ཡིན་ནོ། །གལ་ཏེ་སྒྲ་
རྟག་པ་ཉིད་ཡིན་ན་དེའི་ཚེ་སྒྲ་སྔར་ཡོད་པའི་ཤེས་པ་ནི། བརྩལ་མ་ཐག་ཏུ་འབྱུང་བ་ཁོ་ནར་ངེས་པར་མི་འགྱུར་རོ། །ཅིའི་ཕྱིར་ཞེ་ན། སྒྲིབ་བྱེད་དང་དབང་པོ་དང་སྒྲ་རྣམས་ལ་རྩོལ་བ་དེ་རྣམ་པ་ཐམས་ཅད་དུ་ཅི་ཡང་མི་བྱེད་པའི་ཕྱིར་རོ། །སུན་འབྱིན་པ་འདི་ཡང་རྩོལ་བས་གསལ་བ་ཉིད་ཁས་
བླངས་ནས་བརྗོད་པ་ཡིན་ཏེ། འདི་ནི་རྩོལ་བས་གསལ་བར་བྱས་པ་ཡང་མ་ཡིན་ཏེ། འོན་ཀྱང་རྩོལ་བའི་འབྲས་བུ་ཁོ་ནའོ། །ཅི་དང་འདྲ་བར་ཞེ་ན། དཔེར་ན་ཞེས་བྱ་བའོ། །རྫ་མཁན་གྱི་རྩོལ་བས་ཞེས་བྱ་བ་ནི་གྲངས་ཅན་གྱི་ལུགས་དགག་པའོ། །ཅིའི་ཕྱིར་ཞེ་ན། རྒྱུའི་ཚོགས་ཞེས་བྱ་བའི་

མངོན་པར་གསལ་བར་བྱེད་པའི་ཕྱིར་རྒྱུ་རྣམས་དོན་མེད་པ་མ་ཡིན་ནོ་སྙམ་ན། ཐམས་ཅད་ཅེས་བྱ་བའོ། །དོགས་པ་ནི་རྒྱུ་རྣམས་ཞེས་བྱ་བ་སྟེ། འཇིམ་གོང་ལ་ནི་བུམ་པ་ཁོ་ནའི་ཤིང་ནི་མ་ཡིན་ནོ་ཞེས་བྱ་བར་ངེས་པའོ། །དེ་ལྟ་མ་ཡིན་ན་ཞེས་བྱ་བ་བྱེད་པ་པོ་ལ་མི་ལྟོས་ནའོ། །ངེས་པ་ཞེས་བྱ་
བ་ནི་གྲུབ་པའི་མཐའོ། །བྱེད་པ་པོས་བྱས་པ་གང་ཡིན་པའི་ངེས་པ་དེ་ནི་མེད་པ་ཁོ་ནའོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། འདི་ལྟར་ཞེས་བྱ་བའོ། །རྫ་མཁན་གྱིས་འཇིམ་གོང་ལ་ཤིང་ལ་སོགས་པ་བཟློག་པར་བྱ་བ་ལ་མ་གཏོགས་པར་ནི། བུམ་པ་ཁོ་ན་བྱེད་དོ་ཞེས་བྱ་བ་ལ་སོགས་པ་དེ་ལྟ་བུའི་
རང་བཞིན་གྱི་ངེས་པ་ཞེས་བྱ་བ་ཡོད་པ་མ་ཡིན་གྱི། འོན་ཀྱང་རྣམ་པ་འདི་འདྲ་བའི་ངེས་པ་ནི། གཞན་བཟློག་པ་ཁོ་ན་ཡིན་ནོ། །རྣམ་པ་འདི་འདྲ་བ་ཁོ་ནར་ངེས་པར་བྱེད་དོ་ཞེ་ན། ཡོད་པ་ཞེས་གསུངས་སོ། །ཐམས་ཅད་ཐམས་ཅད་ལ་ཡོད་དོ་ཞེས་ཁས་བླངས་པའི་ཕྱིར་ན། འཇིམ་གོང་ལ་ཤིང་ལ་
སོགས་པ་ཡོད་པ་ནི་རྫ་མཁན་ལ་སོགས་པས་ཀྱང་བཟློག་པར་མི་ནུས་ཏེ། འཇིམ་པའི་རྒྱུ་མི་རུང་བའི་ཕྱིར་རོ། །ཡང་ན་བཟློག་མེད་དེ་ལྟ་ན་ཡང་ཉེས་པ་ཡོད་པ་ཁོ་ནའོ་ཞེས་བརྗོད་པ་ནི། བཟློག་པ་ཞེས་བྱ་བའོ། །གལ་ཏེ་རྫ་མཁན་ལ་སོགས་པས་འཇིམ་གོང་ལ་ཤིང་ལ་སོགས་པ་བཟློག་པ་
མེད་པར་བྱེད་པ་ཡིན་ན། དེའི་ཚེ་ལྗོན་པ་ལ་སོགས་པ་ཡོད་པ་མ་ཡིན་པ་དེ་ཡང་ཕྱིས་རྟོགས་པར་ཇི་ལྟར་འགྱུར། གྲངས་ཅན་གྱི་ལྟར་ན་ནི་དུས་གཅིག་གི་ཚེ་བུམ་པའི་རང་བཞིན་ཡོངས་སུ་གྱུར་པའི་འཇིམ་གོང་ཉིད་གཞན་གྱི་ཚེ་ལྗོན་པ་ལ་སོགས་པའི་རང་བཞིན་དུ་འགྲོ་བ་ཡིན་ཞེས་བྱ་བ་ལུགས་
ཡིན་ནོ། །དེ་ཡང་བུམ་པ་སྐྱེད་པའི་ཚེ་ལོག་པའི་ཕྱིར། ཕྱིས་ཡང་རྟོགས་པར་མི་འགྱུར་རོ། །མེད་པ་ཁོ་ན་ལས་ཕྱིས་དམིགས་པར་འགྱུར་བ་ཡིན་ནོ་ཞེ་ན། ཡོད་པ་མ་ཡིན་ནོ་ཞེས་གསུངས་སོ། །སྐྱེ་བ་ཁོ་ནའི་གསལ་བ་ནི་མ་ཡིན་ནོ། །འབྲས་བུ་ཡོད་པར་སྨྲ་བའི་འདོད་པ་ལ་ནི། སྒྲ་ངེས་
པར་འབྱེད་པ་ཡང་མི་འཐད་དེ་ངེས་པ་ཉིད་ཀྱང་ཡོད་པའི་ཕྱིར་རོ་ཞེས་བརྗོད་པ་ནི། འབྲས་བུ་སྔ་མ་ཞེས་བྱ་བའོ། །དེས་ན་ཞེས་བྱ་བ་ནི་ཡོད་པས་ནའོ། །དེ་ཡང་ཞེས་བྱ་བ་ནི་མྱུ་གུ་འབའ་ཞིག་ཏུ་མ་ཟད་ཀྱི་ངེས་པ་ཡང་ངོ་། །ཡོད་དེ་ཞེས་བྱ་བ་ནི་ངེས་པའོ། །ལན་ནི་གལ་ཏེ་དེ་ཡང་ཞེས་བྱ་བ་སྟེ་མངོན་

པར་གསལ་བའོ། །དེ་ལ་ནི་མངོན་པར་གསལ་བ་ལའོ། །འོ་ན་གཉི་ག་དང་ལྡན་པ་བྱེད་དོ་ཞེ་ན། ཡོད་པ་དང་མེད་པ་ཉིད་ཅེས་བྱ་བའོ། །བརྗོད་ཟིན་པའི་དོན་ཉིད་སྡུད་པ་ནི། ཡིན་ན་བསྟན་དུ་ཞེས་བྱ་བའོ། །དེའི་ཕྱིར་ཞེས་བྱ་བ་ནི་བྱེད་པ་པོའི་ཚོགས་དོན་མེད་པའི་ཕྱིར་རོ། །བུམ་
པ་རྩོལ་བས་གསལ་བར་བྱ་བ་མ་ཡིན་མོད། མར་མེ་གསལ་བར་བྱ་བ་ནི་ཡིན་ནོ། །དེ་བཞིན་དུ་སྒྲ་ཡང་རྩོལ་བས་གསལ་བར་བྱ་བར་འགྱུར་རོ་ཞེས་དོགས་པར་བྱེད་པ་ནི། འོ་ན་ཅི་ལྟར་ཞེས་བྱ་བའོ། །ལན་ནི་བུམ་པ་ལྟར་སྒྲ་ནི་གསལ་བར་བྱ་བ་ཡིན་ནོ། །ཅིའི་ཕྱིར་ཞེ་ན། བུམ་པ་ཞེས་བྱ་བའོ། །སྔར་
ནི་མར་མེ་ལ་སོགས་པ་ཡོད་པའི་སྔོན་རོལ་དུའོ། །ཚད་མ་རེག་པ་ལ་སོགས་པའི་ཡུལ་ཅན་གྱི་ཤེས་པ་ཡོད་པའི་ཕྱིར་རོ། །སྒྲ་ལ་ཡང་རྩོལ་བ་ལས་སྔར་ཡོད་པ་ལ་ངོ་ཤེས་པའི་ཚད་མ་ཡོད་དེ་ཞེས་དོགས་པར་བྱེད་པ་ནི། འདི་ལ་ཡང་ཞེས་བྱ་བ་སྟེ་སྒྲ་ལ་ཡང་ངོ་། །ཤེས་པ་གཉིས་ཀྱི་ཞེས་བྱ་བ་ནི་
ཤེས་ཟིན་པ་དང་ཤེས་བཞིན་པ་གཉིས་ཀྱི་དབུས་ན་ཡོད་པའོ། །དེ་ལ་ཞེས་བྱ་བ་ནི་ཤེས་པ་ལའོ། །གལ་ཏེ་ཞེས་བྱ་བ་ནི་རྩོད་པའོ། །དེ་ཞེས་བྱ་བ་སྔར་མཐོང་བའོ། །ལན་ནི་དེ་ནི་མ་ཡིན་ཏེ་ཞེས་བྱ་བའོ། །དབང་སྐྱེས་ཉིད་མ་ཡིན་ཞེས་བྱ་བ་ནི་དྲན་པ་ཉིད་དོ། །གལ་ཏེ་དེ་ལྟ་ཡིན་མོད། དེ་ལྟ་ན་
ཡང་ཅི་ལྟར་ཚད་མ་མ་ཡིན་ཞེ་ན་དབང་སྐྱེས་དྲན་པ་ཞེས་བྱ་བའོ། །དེས་ན་ཞེས་བྱ་བ་ནི་ཤེས་པ་གཞན་མེད་པས་ནའོ། །དབང་སྐྱེས་མ་ཡིན་པའི་ཕྱིར་དྲན་པ་སྟེ་ངོ་ཤེས་པ་ནི་ཚད་མ་ཡིན་པ་ཉིད་དོ། །ཅི་ལྟར་དབང་སྐྱེས་ཉིད་མིན་ཞེ་ན། དབང་པོ་རྣམས་ནི་ཞེས་བྱ་བའོ། །གཞན་དུ་ན་ཞེས་བྱ་བ་
ནི་འཇུག་ནའོ། །དེས་ན་ཞེས་བྱ་བ་ནི་དྲན་པར་བྱ་བ་ཡིན་པས་ནའོ། །འོན་ཏེ་ཞེས་བྱ་བ་ནི་རྩོད་པའོ། །ལན་ནི་ངོ་མཐོང་བཞིན་པ་ལ་ཡང་ཤེས་པས་ཞེས་བྱ་བའོ། །དོགས་པ་ནི་དྲན་པ་དང་ལྷན་ཅིག་མཐོང་བཞིན་པ་གཅིག་ཏུ་རྟོགས་པ་ལའོ། །དེ་ཞེས་བྱ་བ་ནི་དྲན་པས་གཞལ་བའོ། །གལ་ཏེ་
དྲན་པས་ཚད་མ་མ་ཡིན་པས། དྲན་པར་བྱ་བའི་ཆོས་ཅན་མི་བདེན་པ་ཉིད་ཡིན་ཡང་དེའི་གཅིག་ཉིད་ཅི་ལྟར་མི་བདེན་ཞེ་ན། ཆོས་ཅན་ཞེས་བྱ་བའོ། །གལ་ཏེ་སྔར་གྱི་དུས་དང་འབྲེལ་པ་ནི་དྲན་པས་རྟོགས་པ་མ་ཡིན་གྱི། འོན་ཀྱང་མངོན་སུམ་གྱིས་ཡིན་ནོ། །དེས་ན་དེའི་གཅིག་ཉིད་ཅི་

ལྟར་མི་བདེན་སྙམ་ན། སྔ་མའི་དུས་དང་ཞེས་བྱ་བའོ། །གལ་ཏེ་སྔོན་གྱི་དུས་དང་འབྲེལ་པ་བཞིན་དུ་རང་བཞིན་ཅི་སྣང་བ་ཡང་དྲན་པ་ཁོ་ནས་རྟོགས་པ་མ་ཡིན་ནམ་ཞེ་ན། དངོས་པོ་ཙམ་ཞིག་ཅེས་གསུངས་སོ། །ཅི་ལྟར་ངོ་ཤེས་པ་མེད་ཀྱང་རྟོགས་ཤེ་ན། དཀར་པོ་དང་ཞེས་བྱ་བའོ། །ཅིའི་ཕྱིར་ཞེ་ན།
དང་པོར་ཞེས་བྱ་བའོ། །དེ་ཞེས་བྱ་བ་ནི་རང་བཞིན་ཙམ་སྣང་བའོ། །དང་པོར་མཐོང་བ་ནི་སྔོན་པོར་ངེས་ཀྱི། རྟག་པ་ཉིད་དུ་ནི་མ་ཡིན་ནོ། །ཕ་རོལ་པོའི་གཞུང་གིས་ཀྱང་གཉིས་པ་ལ་སོགས་པ་མཐོང་བ་ཁོ་ནའི་ཚེ་རྟག་པ་ཉིད་དུ་སྣང་བ་ཡིན་ནོ། །དེ་ལ་ཡང་ཞེས་བྱ་བ་ནི་དང་པོ་སྣང་བ་ལ་ཡང་ངོ་། །གལ་
ཏེ་མངོན་སུམ་གྱི་བཀག་པ་ཇི་ལྟར་སྣང་ཞེ་ན། མངོན་སུམ་གྱིས་ནི་ཞེས་བྱ་བའོ། །དེ་ནི་རྟག་པ་ཉིད་དོ། །ལན་ནི་གལ་ཏེ་ཞེས་བྱ་བའོ། །དུས་ཀྱི་ཆ་ཐམས་ཅད་དམིགས་པ་དེ་ལྟར་གྱུར་ནའོ། །འདིའི་བར་གྱི་དངོས་པོ་ཙམ་ཞིག་སྣང་བ་ནི་ཞེས་བྱ་བ་བཤད་པ་ཡིན་ནོ། །མཇུག་བསྡུ་བའི་སྒོ་ནས་སྔ་མའི་དུས་དང་
འབྲེལ་པ་ནི་ཞེས་བྱ་བ་རྣམ་པར་འགྲེལ་པ་ནི། དེའི་ཕྱིར་ཞེས་བྱ་བ་སྟེ། ཤི་བའི་མཐར་ཐུག་པ་འཛིན་པའི་ཕྱིར་རོ། །དྲན་པ་ཚད་མ་མ་ཡིན་པའི་ཕྱིར་ཞེས་བྱ་བ་རྣམ་པར་འགྲེལ་པ་ནི། དེས་ན་ཞེས་བྱ་བ་སྟེ། སྔོན་གྱི་དུས་ཀྱི་དངོས་པོ་དམིགས་པ་མ་ཡིན་པས་ནའོ། །ཆོས་ཅན་བདེན་པ་མ་ཡིན་ན་ཞེས་བྱ་བ་
རྣམ་པར་འགྲེལ་པ་ནི། ཆོས་ཅན་མི་བདེན་ན་ཞེས་བྱ་བའོ། །གལ་ཏེ་སྔ་མ་དང་ཕྱི་མ་དག་གི་གཅིག་པ་ཉིད་མི་བདེན་ནོ་ཞེས་བྱ་བ་ནི་མི་འཐད་པ་ཁོ་ན་སྟེ། དེ་དག་བདེན་པ་དང་མི་བདེན་པས་ན་གཅིག་ཉིད་ཀྱང་བདེན་པ་དང་མི་བདེན་པར་འགྱུར་རོ་ཞེས་དོགས་པ་ནི་འོན་ཏེ་ཞེས་བྱ་བའོ། །སྔ་མ་ནི་དྲན་
པར་བྱ་བའོ། །བདེན་པ་དང་ཞེས་བྱ་བ་ནི་རྣམ་པར་འགྲེལ་པའོ། །དེ་ཡང་ཞེས་བྱ་བ་ནི་ལན་འདེབས་པའོ། །འདི་ཞེས་བྱ་བ་ནི་གཅིག་པ་ཉིད་དོ། །དེའི་ཚེ་ཆོས་ཅན་གྱི་རང་བཞིན་ད་ལྟར་བས་ནི་དེ་ལ་གནས་པའི་གཅིག་པ་ཉིད་བདེན་པར་འགྱུར་ཞིང་ད་ལྟར་མིན་པས་ནི་བརྫུན་པ་ཡིན་ནོ་ཞེས་བྱ་བར་འགྱུར་
རོ། །འཆད་པ་ནི་ད་ལྟར་བྱུང་བ་ཞེས་བྱ་བའོ། །ཅིའི་ཕྱིར་ཞེ་ན། འདི་ལྟར་ཆོས་ནི་ཆོས་ཅན་གྱི་རང་བཞིན་གྱི་རྗེས་སུ་འཇུག་པའི་ཕྱིར་རོ། །ཆོས་ཅན་གྱི་རང་བཞིན་གྱི་རྗེས་སུ་འཇུག་པ་དེ་ཉིད་ཀྱི་ཕྱིར་རོ། །དེས་ན་ཞེས་བྱ་བ་ནི་ཐ་དད་པས་ན། ད་ལྟ་བའི་དངོས་པོ་ལ་སྔ་མ་དང་གཅིག་པ་ཉིད་མ་གྲུབ་པའོ། །

གལ་ཏེ་ཚད་མ་མེད་པའི་ཕྱིར་ཆོས་ཅན་སྔ་མའི་རང་བཞིན་གྱི་གཅིག་ཉིད་བཞིན་དུ་ད་ལྟ་བའི་ཆོས་ཅན་གྱི་རང་བཞིན་ཡང་མི་བདེན་པར་མི་འགྱུར་རམ་ཞེས་དོགས་པར་བྱེད་པ་ནི། གཅིག་གཅིག་ཉིད་ཅེས་བྱ་བ་སྟེ། ད་ལྟར་བའི་རང་བཞིན་གཅིག་ཉིད་དོ། །ལན་ནི་ད་ལྟར་བའི་རང་
བཞིན་གྱི་གཅིག་ཉིད་ལ། མངོན་སུམ་གྱི་བདག་ཉིད་ཀྱི་རྟོགས་པ་མེད་དམ་ཅེ་ན་གང་གིས་མི་བདེན་པར་འགྱུར། འོན་ཀྱང་ཡོད་པ་ཁོ་ནའོ། །དེས་ན་དེ་གྲུབ་པ་ཅི་ལྟར་མི་བདེན་པ་ཉིད་དུ་འགྱུར། འགྱུར་ན་ཡང་ཉེས་པ་བརྗོད་པ་ནི་བདག་ཉིད་དང་ཞེས་བྱ་བའོ། །གལ་ཏེ་བདེན་པ་ཉིད་མི་བདེན་པར་
འགྱུར་ན། དེའི་ཚེ་བདག་ཉིད་ལ་བདག་ཉིད་ཀྱིས་གནོད་པར་འགྱུར་རོ། །ཅིའི་ཕྱིར་ཞེ་ན། བདེན་པ་ཉིད་མི་བདེན་པ་ཡིན་ནོ་ཞེས་སྨྲས་པས་ན། རང་གི་ཚིག་ལ་ཡང་གནོད་པར་འགྱུར་རོ། །གལ་ཏེ་མངོན་སུམ་ཉིད་ཀྱིས་ངོ་ཤེས་པ་རྟག་པའི་རྟོགས་པར་བྱེད་པ་མ་ཡིན་ན། འོ་ན་རྟགས་ཀྱི་སྒོ་ནས་རྟོགས་པར་བྱེད་
པ་ཡིན་པར་འགྱུར་རོ་སྙམ་པར་དོགས་པ་ནི་འོན་ཏེ་ཞེས་བྱ་བའོ། །གཞན་དུ་མཐོང་བ་ལ་ཞེས་བྱ་བ་ནི་བུམ་པ་དང་སྣམ་བུ་དང་སྒྲ་ལ་སོགས་པ་ལའོ། །དེ་སྔར་ཞེས་བྱ་བ་ནི། མི་མཐུན་པའི་ཕྱོགས་ཐ་དད་པ་ལ་ངོ་ཤེས་པ་མེད་པའི་ཕྱིར་རོ། །ངོ་ཤེས་པ་མཐོང་བ་ནི། དོན་ཐ་དད་པ་མེད་པ་ལ་འགྱུར་རོ་ངེས་
པ་ཡིན་ནོ། །རྣམ་པར་འགྲེལ་པ་ནི་ངོ་ཤེས་པ་ཞེས་བྱ་བའོ། །དེས་ན་ཞེས་བྱ་བ་ནི་ཐ་མི་དད་པ་ལ་ངེས་པས་ནའོ། །དེ་ལྟ་མ་ཡིན་ན་ཞེས་བྱ་བ་ནི་གཉི་ག་ལས་ལོག་ན་ཤེས་པ་མེད་པར་འགྱུར་བའོ། །ཅིའི་ཕྱིར་ཞེ་ན། ཐམས་ཅད་ལས་ཞེས་བྱ་བའོ། །འདིས་ནི་རྗེས་སུ་འགྲོ་བ་མེད་པའི་ཕྱིར་གཅིག་སྒྲུབ་པ་ལ་
ལྡོག་པ་ཅན་གཏན་ཚིགས་སུ་ཕ་རོལ་པོས་འདོད་པ་ཡིན་ནོ་ཞེས་བསྟན་པ་ཡིན་ནོ། །ཁྱད་པར་གང་གིས་བུམ་པ་དང་སྣམ་བུ་ལ་སོགས་པའི་སྒྲ་ཐ་དད་པ་དེ་ལས་ངོ་ཤེས་པའི་བློ་ལྡོག་པར་འགྱུར་བ། ཐ་དད་པ་ལ་ཡང་ཞེས་བྱ་བ་སྔར་དང་ཕྱི་མའི་དུས་ན་ཡོད་པའི་བུམ་པའི་སྒྲ་གཉིས་བཞིན་དུ་བུམ་པ་དང་
སྣམ་བུའི་སྒྲ་གཉིས་ཐ་དད་པ་ཡིན་ཡང་མི་འདྲ་བའི་མཚན་ཉིད་ཀྱི་ཁྱད་པར་དང་གཞན་ཡོད་པ་ཁོ་ནའོ། །དེས་ན་ངོ་ཤེས་པ་སྐྱེ་བ་ལས་ནི་གང་གིས་འགའ་ཞིག་ཁོ་ན་ལ་གནས་པར་འགྱུར་བ། ཐ་དད་པ་དེ་ཉིད་ཀྱི་འདྲ་བའི་མཚན་ཉིད་ཀྱི་ཁྱད་པར་ཡོད་པར་འགྱུར་མོད། གཅིག་ཉིད་ཀྱི་དོན་གཞན་དུ་རྟོགས་

པ་ནི་མ་ཡིན་ནོ། །ཕྱེད་ཕྱི་མ་འཆད་པ་ནི་ངོ་ཤེས་པའི་ཞེས་བྱ་བའོ། །མ་མཐོང་བ་འདི་ཅི་ལྟར་བརྟག་པར་རིགས་ཤེ་ན། ངོ་ཤེས་པ་འདི་ནི་ཞེས་བྱ་བའོ། །དེས་ན་ནི་མཐོང་བས་ནའོ། །གཞན་དུ་ཡང་ཞེས་བྱ་བ་ནི་སྔར་དང་ཕྱིས་ཀྱི་དུས་ན་ཡོད་པ་བུམ་པའི་སྒྲ་དག་ལ་ཡང་ངོ་། །དེས་ན་ཞེས་བྱ་བ་ནི་བར་དུ་ཆད་པར་
དམིགས་པས་ནའོ། །དེར་ནི་ཞེས་བྱ་བ་ནི་འབྲེགས་པ་ཡང་སྐྱེས་པའི་སྐྲ་ལ་སོགས་པར་རོ། །འདིར་ནི་ཞེས་བྱ་བ་ནི་སྔ་མ་དང་ཕྱི་མའི་དུས་ན་ཡོད་པའི་སྒྲ་ལ་སོགས་པ་རྣམས་ལའོ། །དེ་ལྟ་ཞེས་བྱ་བ་ནི་ཐ་དད་པ་ལ་ཡང་ཐ་མི་དད་པར་རྟོགས་པའོ། །ལན་ནི་དེ་ནི་ཞེས་བྱ་བའོ། །བདེན་པ་དེ་གང་
ཞེ་ན། ཤིན་ཏུ་གཡོར་ཆེ་བའི་དངོས་པོའི་གཡང་དུ་ལྷུང་བ་རྩྭ་ཀུ་ཤ་ཉག་མ་ལ་འཇུ་བ་དང་མཚུངས་སོ། །ཆོན་པ་ཉིད་ནི་ལྷུང་བའི་རྒྱུ་ཡིན་ནོ། །ཅི་སྟེ་ཁྲེལ་བགད་འདི་ལྟར་བྱེད་ཅེ་ན་འདི་ལྟར་ཞེས་བྱ་བའོ། །དེ་ནི་གཅད་པའོ། །དེས་ན་ནི་མ་འབྲེལ་པས་ནའོ། །རང་བཞིན་སྔ་མ་བོར་བའི་ཕྱིར་
རིག་པར་འགྱུར་བ་ན། དེ་དང་འབྲེལ་པ་ལ་ཅི་ལྟར་འགྱུར་ཏེ་མི་འགྱུར་བ་ཁོ་ནའོ། །གལ་ཏེ་འདིར་ནི་རྣམ་པར་ཆད་པ་སྲིད་པའི་ཕྱིར་ན་མཐོང་བ་མ་འབྲེལ་པ་ཁོ་ནའོ་གཞན་དུ་ནི་དེ་མེད་པའི་ཕྱིར་འབྲེལ་པ་ཁོ་ནའོ་ཞེ་ན། འབྲེལ་པ་མེད་པར་དེ་ཐ་དད་པར། མཐོང་བ་ནི་རྩོད་པའི་གནས་སུ་གྱུར་
པའི་དོན་སྒྲ་ལ་སོགས་པ་དང་གཞན་དཔེ་སྐྲ་བྲེགས་པ་ཡང་སྐྱེས་པ་ལ་སོགས་པ་ལ་མཚུངས་པ་ཉིད་དོ། །དེས་ན་ཐ་དད་པ་ལ་ཡང་མཐོང་བའི་ཕྱིར་ན། ངོ་ཤེས་པ་ནི་མ་ངེས་པ་ཁོ་ནའོ། །གལ་ཏེ་བྲེགས་པ་ཡང་སྐྱེས་པ་ལ་ཡང་ཞིག་པ་དང་ལྷན་ཅིག་གཅིག་པ་ཉིད་ཡོད་པ་ཁོ་ནའོ། །དེས་ན་ངོ་
ཤེས་པ་མ་ངེས་པ་མ་ཡིན་ནོ་ཞེས་འགའ་ཞིག་འདོད་པའི་དོགས་པ་བསུ་བ་ནི། གཞན་དག་ཅེས་བྱ་བའོ། །ལན་ནི་མ་རུངས་ཞེས་བྱ་བའོ། །ཅི་ལྟར་བདག་ཉིད་ཀྱིས་བདག་ཉིད་ཉམས་པར་བྱེད་སྙམ་ན། སྔ་མའི་རང་བཞིན་ཞིག་པར་གྱུར་པ་ན། གལ་ཏེ་མ་ཞིག་པ་དང་ལྷན་ཅིག་གཅིག་ཉིད་དུ་ཁས་
ལེན་ན་ནི་དེའི་ཚེ་ཐ་དད་པ་ལ་ཡང་དེ་བཞིན་དུ་གཅིག་ཉིད་དུ་འགྱུར་རོ་ཞེས་བསྟན་ཟིན་ཏོ། །གཞལ་བྱ་གཅིག་ཉིད་སུན་ཕྱུང་ནས་ད་ནི་གཅིག་ཉིད་སྒྲུབ་པར་བྱེད་པའི་ཚད་མ་ཡང་མེད་དོ་ཞེས་བརྗོད་པ་ནི་གཞན་ཡང་ཞེས་བྱ་བའོ། །དེས་ན་ཞེས་བྱ་བ་ནི་མངོན་སུམ་གྱི་སྤྱོད་ཡུལ་ཉིད་མ་ཡིན་པས་ནའོ། །དེ་ནི་

ཞིག་པའོ། །དེས་ན་ཞེས་བྱ་བ་ནི་དྲན་པ་ཚད་མ་ཡིན་པས་ནའོ། །གལ་ཏེ་ཞེས་བྱ་བ་ནས་འགྱུར་རོ་ཞེ་ན་ཞེས་བྱ་བའི་བར་གྱི་རྩོད་པ་ནི་དོན་འདི་ཡིན་ཏེ། གལ་ཏེ་ཡང་། ད་ལྟར་བ་ལ་དྲན་པ་ཚད་མ་མ་ཡིན་པ་དེ་ལྟ་ན་ཡང་འདས་པ་ལ་ནི་ཚད་མར་འགྱུར་བ་ཁོ་ན་སྟེ། གནོད་བྱེད་
མེད་པས་ན་བསྟན་པའི་ཕྱིར་རོ་ཞེས་བྱ་བའོ། །དོན་སྡུད་པ་ལ་ཞེས་བྱ་བ་གཅིག་པ་ཉིད་ཀྱི་དོན་འཛིན་པ་ལའོ། །གལ་ཏེ་ཡང་ད་ལྟར་བའི་དུས་ཀྱི་དངོས་པོ་སྒྲུབ་པར་བྱེད་པ་མ་ཡིན་པ་དེ་ལྟ་ན་ཡང་དྲན་པ་དེས་དེའི་ཚེ་དངོས་པོ་ཞེས་བྱ་བ་འདས་པའི་དུས་སར་གྱུར་པ་དེས་རྟོགས་པ་ཡིན་ནོ། །དེས་ན་ཞེས་བྱ་
བ་ནི་དེའི་ཚེ་དངོས་པོ་རྟོགས་པས་ན་སྔ་མ་ཉིད་དྲན་པའི་མཚན་ཉིད་ཀྱི་ཚད་མས་རྟོགས་པ་ཡིན་ནོ། །དེ་དང་ཞེས་བྱ་བ་ཞེས་སྔ་མ་ཉིད་དང་ལྷན་ཅིག་གོ། །གཅིག་ཉིད་དུ་ངེས་པ་བསྟན་པ་ནི། ཚད་མ་ལས་གཞན་ཚད་མ་མ་ཡིན་པའི་རང་བཞིན་དུ་ཇི་ལྟར་འགྱུར། བསྟན་པ་ཡིན་ཡང་ཚད་མ་མ་ཡིན་ནོ་ཞེ་ན།
དངོས་ལ་ཞེས་སྨྲས་སོ། །ཡིད་ཆེས་ཞེས་བྱ་བ་ནི་བསླད་པ་མེད་པའི་བློའོ། །འགལ་འགྱུར་ཞེས་བྱ་བ་ནི་ངེས་པར་བསྟན་པར་ཁས་བླངས་པ་དང་དེ་སེལ་བ་ཕན་ཚུན་འགལ་བའོ། །ཅི་ལྟར་འགལ་སྙམ་ན། རྣམ་པར་འགྱུར་བ་མེད་པའི་ཞེས་བྱ་བའོ། །རྣམ་པར་འགྱུར་བ་མེད་པའི་ངེས་པའི་ཤེས་པ་སྤྱོ་བ་
སྐྱེད་པའི་ཡིད་གང་ལ་ཡོད་པའི་སྐྱེས་བུ་ཡང་སྟེ། གལ་ཏེ་ངེས་པ་དང་ལྡན་པ་ཡང་ངེས་པ་སེལ་བར་བྱེད་ན་དེའི་ཚེ་བརྗོད་པ་ལ་དོན་གཞན་ཡོད་པར་འགྱུར་ཏེ། ངོ་ཤེས་པ་ཚད་མ་མ་ཡིན་པར་བསྟན་པའི་ཕྱིར་རོ། །སེམས་པ་ཡང་གཞན་ཡིན་པར་ཏེ། ངོ་ཤེས་པར་ཚད་མར་སེམས་པར་འགྱུར་རོ་ཞེ་ན།
ངོ་ཤེས་པ་ཞེས་བྱ་བ་ལ་སོགས་པ་ནི་གྲུབ་པའི་མཐའོ། །ཅི་ལྟར་ཤིན་ཏུ་རྒྱང་རིང་བར་འཇོག་པ་ཡང་སྐད་ཅིག་ལ་ལྟུང་བར་འགྱུར་སྙམ་ན་ཤིན་ཏུ་ཞེས་བྱ་བའོ། །ཅི་དེ་ལྟར་འགའ་ཞིག་ཏུ་མཐོང་བ་ཡོད་དམ་སྙམ་ན། མར་མེ་ཞེས་བྱ་བའོ། །སྔར་ཆེར་འབད་ནས་དེའི་འོག་ཏུ་འཆིང་བ་དང་འདྲའོ། །ཅི་ལྟར་ན་
མར་མེ་དང་འདྲ་བར་ངོ་ཤེས་པར་སྨྲ་བ་རྣམས་དྲུང་ཁོ་ནར་རྟོགས་ཀྱིས་ལྷུང་ཞེ་ན། འདི་ལྟར་ཞེས་གསུངས་སོ། །གལ་ཏེ་ད་ལྟ་བའི་དྲན་པ་ཉམས་སུ་མྱོང་བའི་དོན་འཛིན་པ་ཡོད་ན་དེའི་ཚེ་ཡུལ་ཞིག་པ་ལ་སྟེ་འདས་པ་ལ་ཅི་ལྟར་འགྱུར་ཏེ། ཉེ་བར་གནས་པ་ཁོ་ན་ཉམས་སུ་མྱོང་བའི་ཕྱིར་ད་ལྟར་བ་ཁོ་ན་

དྲན་པའི་ཡུལ་ཡིན་པར་འགྱུར་རོ། །གལ་ཏེ་ཉམས་སུ་མྱོང་བའི་དོན་གྱི་ཡུལ་ཅན་དུ་ཁས་མི་ལེན་ན་དེའི་ཚེ་དེ་ནི་ཅི་ལྟར་དྲན་པ་ཡིན་ཏེ་མ་ཡིན་པ་ཁོ་ནའོ། །རྣམ་པར་འགྲེལ་པ་ནི་གལ་ཏེ་ཞེས་བྱ་བའོ། །གལ་ཏེ་དྲན་པ་ཉམས་སུ་མྱོང་བའི་དོན་མངོན་དུ་བྱེད་པའི་རང་བཞིན་ཅན་ཡིན་ན། དེའི་ཚེ་འདས་པའི་
དོན་དྲན་པར་མི་འགྱུར་རོ། །ཅིའི་ཕྱིར་ཞེ་ན། གང་གིས་ཕྱིར་འདས་པ་ཉིད་ན་མངོན་སུམ་གྱིས་གང་དུ་ཡང་རྟོགས་པ་མེད་དོ། །དྲན་པ་ཡུལ་དང་བཅས་པས་ན་མངོན་སུམ་གྱི་ཚད་མ་ཡིན་ན། མངོན་སུམ་ནི་འདས་པའི་ཡུལ་ཅན་མ་ཡིན་ནོ། །ཡང་ན་འདི་ནི་ཉེས་པ་གཞན་ཡིན་ཏེ། དྲན་པའི་གཟུང་བའི་
དོན་ལས་སྐྱེ་བ་ཡིན་ན། འདས་པ་ཉིད་ནི་མངོན་སུམ་གྱིས་འཛིན་པ་མ་ཡིན་ནོ། །མྱོང་མིན་ཞེས་བྱ་བ་ལ་སོགས་པ་ནི། འོན་ཏེ་ཞེས་བྱ་བ་ལ་སོགས་པས་རྣམ་པར་འགྲེལ་པའོ། །དེ་ལྟ་ན་ཡང་ཞེས་བྱ་བ་ནི་སྔ་ན་མེད་པའི་དོན་གྱི་ཡུལ་ཅན་ཉིད་ཡིན་ཡང་ངོ་། །སྔ་ན་མེད་པའི་ཡུལ་ཅན་ཡིན་ཡང་ངོ་
ཤེས་པ་མ་ཡིན་པ་ཅིའི་ཕྱིར་ཞེ་ན། ངོ་ཤེས་པ་ནི་ཞེས་བྱ་བའོ། །དེ་ཉིད་ཅེས་བྱ་བ་ལ་སོགས་པ་ནི་རྩོད་པའོ། །གང་ཚེ་ཞེས་བྱ་བ་ད་ལྟར་བའི་དུས་ན་སྔ་མའི་རང་བཞིན་འདས་པར་གྱུར་པ་ཡིན་ནོ། །དེའི་ཚེ་ཞེས་བྱ་བ་འདས་པ་ནི་གཟུང་བ་མིན་ནོ། །གཟུང་བའི་ཚེ་ཞེས་བྱ་བ་རང་གི་དུས་ན་ནི། གཟུང་བ་
ནི་དེ་ལྟར་ཞེས་བྱ་བ་འདས་པ་ཉིད་མ་ཡིན་ནོ། །ཅི་ལྟར་གཟུང་བ་འདས་པ་མ་ཡིན་ཞེ་ན། དྲན་པར་གྱུར་པའི་ཞེས་བྱ་བའོ། །གལ་ཏེ་ཞེས་བྱ་བ་ནས་ཞེ་ནའི་བར་ནི་རྩོད་པའོ། །གལ་ཏེ་འཇིག་རྟེན་ན་ངེས་པ་བསྟན་པའི་ཕྱིར་ཚད་མར་རིགས་པས་འཐད་པ་ཡིན་ན་དེའི་ཚེ་ངོ་ཤེས་པ་ཡང་དེར་འགྱུར་རོ། །འོན་
ཏེ་འདས་པ་ལ་དབང་པོ་དང་ལྡན་པ་མེད་པ་དེས་ན་ངོ་ཤེས་པ་ཚད་མ་མ་ཡིན་པར་བརྗོད་ན་ཞེས་དོགས་པ་བསུ་ནས་བརྗོད་པ་ནི། དབང་པོ་དང་ལྡན་པ་དོན་མེད་ཉིད་ཅེས་བྱ་བའོ། །འདི་ལྟར་ངེས་པར་བསྟན་པ་ཁོ་ནས་ཚད་མ་མ་ཡིན་ན་དབང་པོ་དང་ལྡན་པ་བརྟགས། ཅི་མི་མགོ་ཞེས་བྱ་བའི་དོན་ཏོ། །གལ་ཏེ་
ཞེས་བྱ་བ་ལ་སོགས་པ་ནི་རྣམ་པར་འགྲེལ་པའོ། །འདི་ནི་ཞེས་བྱ་བ་ལ་སོགས་པ་ནི་ལན་ནོ། །ཅི་ལྟར་མི་བཟོད་སྙམ་དུ་ཟད་སྙམ་ན། འདི་ལྟར་ཞེས་བྱ་བའོ། །མི་ལྟ་བ་དང་ལྡན་པ་ལས་ནི་ཡིན་གྱི་བསྐྲུན་པ་ལས་ནི་མ་ཡིན་ནོ། །གང་ལ་དེ་ཉིད་འདི་ཡིན་ནོ་སྙམ་ནས་ཞུགས་པ་དེར་ནི་ད་ལྟར་བ་ལ་མི་སླུ་བ་

ཡོད་ཀྱི་འདས་པ་ལ་མ་ཡིན་ནོ། །འོན་ཏེ་གཅིག་མེད་པར་ནི། མི་སླུ་བ་ཉིད་མི་རུང་ངོ་ཞེ་ན། གལ་ཏེ་ཞེས་བྱ་བ་སྟེ། སྔ་མ་དང་། ཕྱི་མ་དེ་དག་གཅིག་ཉིད་མིན་མོད། ཅི་དེའི་ཚེ་གཅིག་ཉིད་དང་བྲལ་བའི་དོན་དེ་ལས་དོན་བྱ་བ་དེ་མིན་པར་འགྱུར་རམ། གཅིག་མེད་ཀྱང་མི་སླུ་བར་འགྱུར་བ་ཁོ་
ནའོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། མེ་ཞེས་བྱ་བ་སྟེ། སྐད་ཅིག་གཞན་དུ་གྱུར་པའི་མེས་སོ། །འོ་ན་ཅི་ལྟར་གཅིག་གོ་ཞེས་བྱ་བའི་ཐ་སྙད་དུ་འགྱུར་ཞེ་ན། དེ་མི་བྱེད་པ་ཞེས་བྱ་བའོ། །དོན་བྱ་བ་དང་བྲལ་བའི་དོན། དོན་དམ་པ་པའི་གཅིག་ཉིད་ཀྱི་མཚན་ཉིད་དུ་གྱུར་པའི་ཡུལ་གང་དག་ལ་ཡོད་པ་དེ་
དག་ལ་དེ་སྐད་ཅེས་བརྗོད་དོ། །དེས་ན་ཞེས་བྱ་བ་ནི་གུས་པར་བྱ་བ་མ་ཡིན་པས་ནའོ། །གང་གི་ཕྱིར་དེ་ལྟ་ཡིན་པ་དེས་ན་དོན་བྱ་བ་བྱེད་པ་ཉིད་དེའི་རང་བཞིན་གྱི་རྟགས་གང་ལ་ཡོད་པའི་ངོ་ཤེས་པ་དེ་ནི་རྗེས་སུ་དཔག་པ་ཡིན་ནོ། །རང་བཞིན་དོན་བྱ་བ་བྱེད་པའོ། །དེ་ལས་གཞན་ཞེས་བྱ་བ་ནི་འཛིན་པ་གཅིག་པ་
ཉིད་ལས་སོ། །འོ་ན་ཞེས་བྱ་བ་ནི་གལ་ཏེ་རྒྱུ་གཅིག་ལ་དུ་མ་ཡིན་ཡང་ངོ་ཤེས་པ་ངོ་ཤེས་པ་ཡིན་ན་དེའི་ཚེ་དུ་མར་གྱུར་པའི་བུམ་པ་དུས་མཉམ་པ་ན་ཡོད་པའམ། དུས་ཐམས་ཅད་ཡོད་པ་ལ་ཡང་ངོ་ཤེས་པར་འགྱུར་རོ། །ངོ་ཤེས་པའི་རྣམ་པ་བརྗོད་པ་ནི་དེ་ཉིད་ཅེས་བྱ་བའོ། །དེ་དང་ཞེས་བྱ་བ་ནི་ལན་ནོ། །ངོ་
ཤེས་པ་ནི་རྣམ་པ་གཉིས་ཏེ། གཅིག་ན་དེ་དང་མཚུངས་སོ་སྙམ་པའི་རྣམ་པ་ཅན་ཡིན་ལ། གཞན་དེ་ཉིད་འདིའོ་ཞེས་བྱ་བའི་རྣམ་པའོ། །དེ་ལ་ཆུ་འཛིན་པ་ལ་སོགས་པའི་བྱ་བ་བྱེད་པ་ཉིད་ཀྱིས་འདི་ནི་བུམ་པ་གཞན་དང་མཚུངས་པའི་རྣམ་པའོ་ཞེས་བྱ་བར་རྟོགས་པ་ཉིད་ངོ་ཤེས་པ་ཡིན་ནོ། །གཉིས་
པར་ཡང་འགྱུར་རོ་ཞེས་བཤད་པ་ནི་གཞན་ཡང་ཞེས་བྱ་བའོ། །གལ་ཏེ་བུམ་པ་རྣམས་རྒྱུད་ཐ་དད་པ་ཉིད་དུ་འགྱུར་ན་ཅི་ལྟར་བུམ་པ་དེ་ཉིད་འདི་ཡིན་ནོ་ཞེས་ངོ་ཤེས་སྙམ་ན་འདི་ལྟར་ཞེས་བྱ་བའོ། །གཞན་ནི་བུམ་པ་ལས་གཞན་པར་རིགས་མི་མཐུན་པའི་དོན་ཏོ། །དེ་གསལ་གཞན་ནི་བུམ་པ་ལས་གཞན་པའི་
བུམ་པའོ། །གང་གི་ཚེ་ཞེས་བྱ་བ་ལ་སོགས་པ་ནི་རྣམ་པར་འགྲེལ་པའོ། །གལ་ཏེ་དོན་དམ་པ་པའི་གཅིག་ཉིད་མེད་པར་ངོ་ཤེས་པ་ནི་ཉེ་བར་བརྟགས་པ་ཉིད་དུ་འགྱུར་རོ་ཞེ་ན། ཐོག་མ་མེད་པའི་ཞེས་བྱ་བའོ། །དེའི་ཕྱིར་ཞེས་བྱ་བ་ནི་ངོ་ཤེས་ཀྱི་རྟོགས་པ་མ་ངེས་པ་ཉིད་ཡིན་པའི་ཕྱིར་རོ། །གལ་ཏེ་ངེས་

པ་ཡོད་པས་ཅི་ལྟར་བསྙོན་སྙམ་ན། སྒྲ་རྣམས་ཀྱི་རྟོགས་པར་བྱེད་པའི་ནུས་པ་མཚུངས་པའི་ཕྱིར་ན་དེ་ལྟར་གཅིག་ཉིད་དུ་འཁྲུལ་པའི་ངེས་པ་བྱུང་བ་ན་མི་བསྙོན་པ་ཡིན་ནོ། །དེས་ན་གལ་ཏེ་ཡང་ངོ་ཤེས་པ་ཚད་མ་མ་ཡིན་པའི་ཕྱིར་ན་སྒྲ་གཅིག་པ་ཉིད་མི་འགྲུབ་པ་དེ་ལྟ་ན་ཡང་བརྟགས་པའི་གཅིག་ཉིད་
ཀྱིས་རྗོད་པར་བྱེད་པ་ཉིད་དུ་ནི་གྲུབ་པ་ཁོ་ནའོ། །གལ་ཏེ་ཞེས་བྱ་བ་ནི་གལ་ཏེ་སྐད་ཅིག་ཉིད་ཀྱིས་ནི་གཞན་ཡིན་ན། དེའི་ཚེ་སྐད་ཅིག་གཞན་དུ་སྟེ་གཞན་ལ་དེ་ཉིད་འདི་ཡིན་ནོ་སྙམ་པའི་ཡིད་ཆེས་པ་ཅི་ལྟར་འཇུག་པར་འགྱུར། ཅིའི་ཕྱིར་ཞེ་ན། ཤེས་པ་མེད་པ་ཞེས་བྱ་བའོ། །འཁྲུལ་པ་ཞེས་བྱ་བ་ནི་
ལན་ནོ། །ཁྱོད་ཀྱིས་བསམ་པས་སྐད་ཅིག་མ་མ་ཡིན་པ་ལ་ཡང་ཡིད་ཆེས་པ་མ་ཡིན་ཏེ་སླུ་བ་མཐོང་བའི་ཕྱིར་རོ། །ཡིད་ཆེས་པ་འཇིག་པར་བྱེད་པའི་མ་རུངས་པའི་བདག་ཉིད་ཅན་རྣམས་མཐོང་བའི་ཕྱིར་རོ། །གཞན་གྱི་ཁྱད་པར་ལ་ནི་འགའ་ཞིག་གི་ཡིད་ཆེས་པར་འགྱུར་བ་ཁོ་ན་ཡིན་ནོ་ཞེས་བརྗོད་པ་ནི།
དེ་བཞིན་ཞེས་བྱ་བའོ། །ཡིད་ཆེས་པའི་ཡུལ་ཕ་ལས་གཞན་ཕ་དང་མཚུངས་པའི་བུ་ལ་དེ་བཞིན་ཁོ་ནར་ཡིད་ཆེས་པར་འགྱུར་བ་ཡིན་ནོ། །དེར་ཡིད་ཆེས་པར་འགྱུར་མོད། སྐབས་སུ་བབ་པ་ལ་ཅི་ལྟར་ཞེ་ན། འདི་ལྟར་ཞེས་བྱ་བའོ། །དེའི་ཞེས་བྱ་བ་ནི་ཡིད་ཆེས་པའི་ཡུལ་སྔ་མའི་ཉེ་བར་ལེན་པ་དེ་རྒྱུན་གང་ལ་
ཡོད་པ་སྟེ་དེ་ལ་ཡིད་ཆེས་པ་ཞེས་འབྲེལ་ཏོ། །གལ་ཏེ་སྐད་ཅིག་མ་ཉིད་ཡིན་ན། སླར་ལེན་པར་འདོད་པར་མི་འགྱུར་ན་ཡིད་ཆེས་པ་ཡང་ཡིན་ཏེ། དེས་ན་སྐད་ཅིག་མ་ཡིན་པ་དེ་ཉིད་དོ་ཞེས་དོགས་པ་བསུ་བ་ནི། །ཅི་སྟེ་ཞེས་བྱ་བའོ། །ལན་ནི་གཅིག་ཉིད་ཡིན་ན་ཞེས་བྱ་བའོ། །ཅི་ལྟར་མི་འཐད་སྙམ་ན། འདི་
ལྟར་ཞེས་བྱ་བའོ། །བྱིན་པ་ཕྱིར་ལེན་པ་ནི་རིགས་སོ། །ཅི་ལྟར་ཞེ་ན། འཇིགས་པའམ་ངོ་ཚ་བས་སོ། །འཇིགས་པ་དང་ངོ་ཚ་བས་རྣམ་པར་འགྱུར་བ་མེད་པའི་བདག་ལ་འཇིགས་དང་ངོ་ཚ་བ་གང་གིས་བྱས་ཏེ། གང་གིས་ཀྱང་མ་བྱས་སོ། །དོགས་པ་བསུ་བ་ནི། འོན་ཏེ་ཞེས་བྱ་བའོ། །ཉེ་བས་ཞེས་བྱ་བ་ནི་ནོར་གྱི་
བདག་པོ་མཐོང་བས་ནའོ། །བཅོལ་བའི་ཀ་ཆ་དང་འབྲེལ་བའི་བདག་ཉིད་ནོར་གྱི་བདག་པོ་དེས་ཟིན་པ་སྟེ་ཉེ་བར་སྙོགས་པའོ། །དེས་ན་བཅོལ་བའི་ཕྱིར་སྟེར་བར་རིགས་སོ་ཞེས་བསམས་པའོ། །ལན་ནི་དེ་ནི་ཞེས་བྱ་བ་སྟེ། སྐད་ཅིག་མ་ཡིན་པར་སྨྲ་བ་དེ་ནི་བདག་གི་ཡུལ་ལ་ནོར་གྱི་བདག་པོ་དེས་ཟིན་པ་མ་

ཡིན་ཡང་། དེས་ཟིན་པ་ཉིད་དུ་རྟོགས་པ་ནི་འཁྲུལ་པ་ཁོ་ནར་འགྱུར་གྱི་དོན་དམ་པ་ནི་མ་ཡིན་ནོ། །དེས་ན་ཇི་ལྟར་དེས་བྱས་པའི་གཏམས་པ་ཕྱིར་སྟེར་བ་དོན་དམ་པ་པ་མ་ཡིན་པར་འགྱུར། འོན་ཏེ་གཏམས་པ་ཕྱིར་སྟེར་བ་ནི་དོན་དམ་པ་པ་མ་ཡིན་པ་ཁོ་ན་ཡིན་ན། དེ་ལྟ་ན་འོ་ན་སྐད་ཅིག་མའི་རྒྱུན་
ལ་ཡང་གཅིག་ཏུ་སྒྲོ་བཏགས་པ་ལས་ཅི་སྟེ་མི་འགྱུར་ཞེས་བརྗོད་པ་ནི། འཁྲུལ་པ་ཞེས་བྱ་བའོ། །དེ་ཉིད་ཅེས་བྱ་བ་ནི་དེས་མ་ཟིན་ཀྱང་དེས་ཟིན་པའི་རང་བཞིན་ནམ། གཅིག་ཉིད་དུ་འཛིན་པའི་རང་བཞིན་ནོ། །དེའི་ཞེས་བྱ་བ་ནི་སྐད་ཅིག་མ་མ་ཡིན་པར་སྨྲ་བའིའོ། །དེ་ལྟའི་ཐ་སྙད་ཅེས་བྱ་བ་ནི་གཏམས་པ་སྔར་སྟེར་
བའི་ཐ་སྙད་ཀྱི་རྒྱུའོ། །ཅི་ལྟར་ན་འཁྲུལ་པ་ཁོ་ན་ཐ་སྙད་ཀྱི་རྒྱུ་ཡིན་ཞེ་ན། གཞན་གྱིས་ཞེས་བྱ་བའོ། །རྟག་པ་ཉིད་ལ་ཡང་རྒྱུ་དང་འབྲས་བུ་ལས་ཞེས་བྱ་བ་ནི། ཉེ་བར་ལེན་པ་དང་། ཉེ་བར་ལེན་པ་ལས་བྱུང་བར་རྣམ་པར་གནས་པ་གཅིག་ཉིད་དུ་ལྷག་པར་ཞེན་པའི་རྒྱུ་མཚན་ལས། གཅིག་ཉིད་ལ་སོགས་པར་
ལྷག་པར་སྒྲོ་འདོགས་པའི་མཚན་ཉིད་ཀྱི་མངོན་པར་ཞེན་པའི་རྒྱུ་གཞན་རྟག་པ་ཉིད་ལ་སོགས་པའི་མཚན་ཉིད་ཅན་གྱི་ཡོད་པ་མ་ཡིན་ནོ། །འཁྲུལ་པས་འཇིག་པ་དང་ངོ་ཚ་བར་འགྱུར་ལ། དེ་དག་གིས་ཀྱང་གཏམས་པ་ཕྱིར་གཏོད་པའི་འདོད་པ་སྐྱེད་དེ། དེས་ན་བརྒྱུད་ནས་འཁྲུལ་པ་དེ་ཁོ་ནའི་རྒྱུ་ཡིན་ནོ། །
གཞན་གྱི་རྟག་ལའང་ཞེས་བྱ་བ་རྣམ་པར་འགྲེལ་པ་ནི། བདག་རྟག་པར་ཞེས་བྱ་བ་སྟེ། དེ་དག་གི་འཇིག་རྟེན་ཕ་རོལ་དང་ལྡན་པ་སྐྱེས་བུའི་རང་བཞིན་རྟག་པར་རོ། །གཅིག་ཏུ་མངོན་པར་ཞེན་པའི་རྒྱུ་མཚན་ཉེ་བར་ལེན་པ་དང་ཉེ་བར་ལེན་པ་ལས་བྱུང་བ་དང་རྒྱུ་དང་འབྲས་བུས་བྱས་པའི་མངོན་པར་ཞེན་པ་དེ་
ལས་མི་འགྲེལ་ལོ། །ཅི་ལྟར་དེ་ལས་མི་འགྲེལ་སྙམ་ན། འཇིགས་དང་ངོ་ཚས་འགྱུར་མེད་ཀྱི་ཞེས་བྱ་བ་རྣམ་པར་འགྲེལ་པས་ལན་འདེབས་པ་ནི། འདི་ལྟར་ཞེས་བྱ་བའོ། །དེས་ན་ཞེས་བྱ་བ་ནི་འཕོ་བ་མ་ཡིན་པས་སོ། །དེ་ལ་ནི་བདག་ལའོ། །འཇིགས་པ་ལ་སོགས་པས་ཞེས་བྱ་བ་ནི་འཇིགས་པ་དང་ངོ་ཚ་བ་ཐ་དད་
པར་གྱུར་པས་སོ། །ཅི་ལྟར་རྣམ་པ་གཞན་དུ་འགྱུར་བ་ཉིད་ཀྱིས་བསྡིགས་ཞེས་བྱ་བའི་དོན་ཏོ། །འོན་ཏེ་དེ་དང་ཉེ་བས་ཞེས་བྱ་བ་རྣམ་པར་འགྲེལ་པ་ནི། འོན་ཏེ་ཞེས་བྱ་བའོ། །དེ་ནི་བདག་གོ་དེ་དང་ལྡན་པས་ནི་འཇིགས་པ་ལ་སོགས་པ་དང་ལྡན་པས་སོ། །དེ་ནི་བདག་ཉིད་དེས་ཟིན་པ་མིན་ཡང་ཞེས་བྱ་

བ་རྣམ་པར་འགྲེལ་པ་ནི་མ་ཡིན་ཏེ་ཞེས་བྱ་བའོ། །བདག་དེ་ལ་གནོད་པ་ཅི་ཡང་མེད་དོ་ཞེས་འབྲེལ་ཏོ། །ཅི་ལྟར་ཞེ་ན། རང་གི་ངོ་བོ་ཞེས་བྱ་བའོ། །འོ་ན་ཅི་ལྟར་བདག་ཏུ་སྨྲ་བ་རྣམས་ཀྱི་ལྟར་ན་འཇིགས་པ་དང་འཛེམ་པ་ལ་སོགས་པའི་ཐ་སྙད་དུ་འགྱུར་ཞེ་ན། རྒྱུ་དང་འབྲས་བུའི་ཞེས་བྱ་བའོ། །དེ་ལྟ་བུའི་ཞེས་
བྱ་བ་ནི་འཇིགས་པ་དང་འཛེམ་པ་ཉིད་དུ་ཐ་སྙད་བྱེད་པའི་རྒྱུའོ། །འཇིགས་པ་ལ་སོགས་པའི་ཐ་སྙད་ཙམ་གྱིས་གནོད་པ་གང་ཡིན་པ་དེ་ནི་གནོད་པ་མ་ཡིན་གྱི། འོན་ཀྱང་བདག་གི་རང་བཞིན་རྣམ་པ་གཞན་དུ་གྱུར་པ་ཉིད་གནོད་པ་ཡིན་ནོ། །གནོད་བྱེད་ཐ་དད་པས་གནོད་པར་འགྱུར་བ་ཉིད་དུ་དོགས་པ་བསུ་
བ་ནི། ཐ་དད་ཀྱང་ཞེས་བྱ་བའོ། །བུའི་གནོད་པས་ནི་གནོད་པ་མ་ཡིན་ནོ། །ཅིའི་ཕྱིར་ཞེ་ན། དེའི་ཞེས་བྱ་བའོ། །དེས་ཞེས་བྱ་བ་ནི་རང་གི་ངོ་བོར་གྱུར་པས་སོ། །དེ་ལྟ་མ་ཡིན་ན་ཞེས་བྱ་བ་ནི་གཞན་ལ་གནོད་པས་ཀྱང་གནོད་ནའོ། །འོན་ཏེ་བུ་དང་ནི་གང་འབྲེལ་པས་ན་དེའི་གནོད་པས་གནོད་པར་འགྱུར་གྱི།
དགྲའི་གནོད་པས་ནི་མ་ཡིན་ཏེ། འབྲེལ་པ་མེད་པའི་ཕྱིར་རོ་ཞེ་ན། དེ་དང་ཡང་ཞེས་བྱ་བ་སྟེ་དགྲ་དང་ངོ་། །དེས་ན་འབྲེལ་པ་ཡོད་ཀྱང་ཅི་ལྟར་དགྲ་ལ་གནོད་པས་མི་གནོད་པ་དེ་བཞིན་དུ་བུ་ལ་གནོད་པས་ཀྱང་གནོད་པར་མི་འགྱུར་རོ། །འགྱུར་བ་ཡང་ཡིན་ཏེ། དེས་ན་བུ་སྡུག་བསྔལ་བར་མཐོང་བས་
ཕའི་རྒྱུད་ལ་གནོད་པ་གཞན་ཁོ་ན་ཞིག་སྐྱེ་བ་ཡིན་ནོ། །གལ་ཏེ་ཕ་ལ་གནོད་པ་གཞན་ཡོད་པར་མ་གྱུར་ན། དེའི་ཚེ་ནི་བུའི་གནོད་པས་གནོད་པར་མི་འགྱུར་རོ་ཞེས་བརྗོད་པ་ནི། གལ་ཏེ་ཞེས་བྱ་བའོ། །གང་གི་ཕྱིར་དེ་ལྟར་གཞན་གྱི་གནོད་པས་གནོད་པ་མ་ཡིན་པ་དེས་ནའོ། །དེའི་ཕྱིར་ཞེས་བྱ་བ་ནི་རེས་འགའ་གནོད་པའི་
རང་བཞིན་གྱི་ཕྱིར་རོ། །རྒྱུན་ལས་ཞེས་བྱ་བ་ནི་སྐད་ཅིག་བརྒྱུད་མ་ལས་སོ། །དེས་ན་ཞེས་བྱ་བ་ནི་རྒྱུན་ཙམ་ཡིན་པས་ནའོ། །དེ་ཉིད་ཅེས་བྱ་བ་ནི་འཆད་པའོ། །དེས་ན་ཞེས་བྱ་བ་ནི། དེ་ཉིད་འདི་ཡིན་ནོ་ཞེས་བྱ་བ་ནི་ཐ་སྙད་ཀྱིས་ནའོ། །འདི་ནི་དགྲའོ། །དེའི་སྟེ་སྐྱེ་བའི་མཚན་ཉིད་ཅེས་བྱ་བའི་རྐྱེན་གྱི་
བྱེ་བྲག་གིས་ཐ་དད་པའི་རྟགས་ཏེ། དེ་དང་ལྡན་པའི་ཕྱིར་རོ། །རྐྱེན་གྱི་བྱེ་བྲག་གིས་ཐ་དད་པ་ཉིད་ལས། འབྲས་བུ་ཉིད་དུ་གྲུབ་པས་ན་རྗེས་སུ་དཔག་པའི་ཚད་མའི་ཡུལ་ཡིན་ནོ་ཞེས་བྱ་བའི་དོན་ཏོ། །དེ་ཉིད་བརྗོད་པ་ནི་རྐྱེན་གྱི་ཞེས་བྱ་བའོ། །གསལ་བྱེད་ཀྱི་དབྱེ་བས་ཀྱང་ཐ་དད་པར་དོགས་པ་བསུ་བ་

ནི། ཅི་སྟེ་ཞེས་བྱ་བའོ། །དེ་ལས་གཞན་པའི་རང་བཞིན་ཉིད་ཀྱི་འབྲས་བུ་གསལ་བར་བྱེད་པ་གང་ལ་ཡོད་པ་དེའི་དངོས་པོ་ཉིད་དེའི་ཕྱིར་རོ། །དེའི་རང་བཞིན་ལས་ནི་བུམ་པའི་རང་བཞིན་ལས་སོ། །རང་གི་རང་བཞིན་ཉམས་པའི་ཕྱོགས་ལ་སུན་འབྱིན་པ་བརྗོད་པ་ནི། དེ་ལ་མེད་པའི་
ཞེས་བྱ་བའོ། །གཞན་དུ་ཞེས་བྱ་བ་ནི་མེད་པ་ཡང་གསལ་བར་བྱ་བ་ཡིན་ནོ། །འོན་ཏེ་ཞེས་བྱ་བ་ནི་གསལ་བྱེད་དེའི་རང་བཞིན་གཞན་དུ་བྱེད་པ་ནི་མ་ཡིན་གྱི། འོན་ཀྱང་འཁྲུལ་པ་ཡིན་ནོ་ཞེས་བྱ་བའི་དོན་ཏོ། །འོ་ན་ཅི་ལྟར་གསལ་བྱེད་ཡིན་སྙམ་ན། འགའ་ཞིག་ཅེས་བྱ་བའོ། །དེ་ལྟ་ཡིན་ན་ཞེས་བྱ་བ་ནི་འཁྲུལ་
པ་སྐྱེད་པར་བྱེད་པ་ཡང་གསལ་བར་བྱེད་པ་ཡིན་ནའོ། །དེ་དག་ལ་ཡང་ཞེས་བྱ་བ་ནི་རབ་རིབ་ལ་སོགས་པ་ལ་ཡང་ངོ་། །འོན་ཏེ་འཁྲུལ་ཡང་ཞེས་བྱ་བ་ནི་ཆུང་ངུ་དང་ཆེན་པོ་ལ་སོགས་པའི་རང་བཞིན་དུ་འཁྲུལ་ཀྱང་ངོ་། །དེའི་ནི་སྒྲའིའོ། །གཞན་ནི་ཆེ་ཆུང་ལ་སོགས་པའི་རང་བཞིན་ནོ། །གང་གི་ཕྱིར་དེ་
ལྟ་ཡིན་པ་དེས་ན་རྩོལ་བ་ལ་སོགས་པ་ནི་གདངས་དེའི་གསལ་བྱེད་ཡིན་པ་འདོད་ནའོ། །འཆད་པ་ནི་གལ་ཏེ་ཞེས་བྱ་བའོ། །དེ་ནི་ཞེས་བྱ་བ་ནི་སྒྲ་ཐ་དད་པའོ། །དེ་ཁོ་ན་ཉིད་གཞན་ཞེས་བྱ་བ་ནི། ཡི་གེ་ག་ལ་སོགས་པ་ལ་ཐ་དད་པ་གོ་བའི་སྒྲ་ཉིད་དོ། །གཞན་དུ་ཞེས་བྱ་བ་ནི་དེ་ཁོ་ན་ཉིད་ཐ་དད་པར་
མི་སྣང་ན་ཆེན་པོ་དང་ཆུང་ངུ་ལ་སོགས་པའི་དབྱེ་བས་འཁྲུལ་པ་ཉིད་དུ་རྟོགས་པར་མི་འགྱུར་རོ། །རྣམ་པ་ཐམས་ཅད་དུ་ཟླ་བ་གཅིག་ཐ་དད་པར་མི་སྣང་ན་ནི། ཟླ་བ་གཉིས་སུ་སྣང་བ་འཁྲུལ་པ་ཉིད་དུ་རྟོགས་པར་མི་འགྱུར་རོ། །འོན་ཏེ་ཡང་ཐ་དད་པར་མི་སྣང་ཡང་དེ་ཐ་དད་པ་ཡིན་ནོ་ཞེ་ན། ཐ་དད་ཅེས་
བྱ་བའོ། །ཅི་ལྟར་ཐ་དད་པར་རྟོགས་པར་མི་འགྱུར་ཞེ་ན། དེ་ལྟ་མིན་ན་ཞེས་