Luận tạng Tây Tạng (Tengyur) — Tập 186

ཆོས་ཅན་འབའ་ཞིག་འདོད་ལ། དེ་བཞིན་དུ་ཡན་ལག་དང་རེག་པ་ལ་

སོགས་པའི་ཡོན་ཏན་ཉིད་འདོད་པ་ཡིན་ན། དེའི་ཚེ་རྗེས་སུ་དཔག་པ་དང་། རྗེས་སུ་དཔག་པར་བྱ་བའི་ཐ་སྙད་དང་། བདག་གིས་མཐོང་བ་གང་ཡིན་པ་དེ་ཉིད་ལ་རེག་གོ་ཞེས་བྱ་བ་ལ་སོགས་པའི་ཐ་སྙད་མེད་པར་འགྱུར་ཏེ། དེས་ན་གཉི་ག་ལ་ཉེ་བར་ལེན་ཏོ། །གང་གི་ཕྱིར་དོན་དམ་པར་མེད་པ་
དེའི་ཕྱིར་གང་གི་ཚེ་ཐ་དད་པར་སྣང་བར་གྱུར་པ་དེའི་ཚེ་དེ་ནི་ཐ་སྙད་ཀྱི་རྟེན་ཡིན་ནོ། །ཅི་ལྟར་སྣང་བ་གཞན་གྱི་ཆོས་དང་ཆོས་ཅན་ལ་བརྟེན་ནས་བསྒྲུབ་པར་བྱ་བ་དང་སྒྲུབ་པར་བྱེད་པའི་ཐ་སྙད་དུ་འགྱུར་བ་ཡིན་གྱི་དེ་ཁོ་ནར་ནི་མ་ཡིན་ནོ། །དོན་ལ་མི་སླུ་བ་ནི་འབྲེལ་པའི་ཕྱིར་རོ་ཞེས་བཤད་ཟིན་ཏོ། །དེ་ལྟར་གང་ལ་སྣང་སྙམ་ན་
ཤེས་ལ་སྟེ་རྣམ་པར་རྟོག་པ་ལའོ། །ཅི་ལྟ་བུ་ཞིག་ལ་ཞེ་ན། དོན་གང་གི་བདག་ཉིད་གང་ཞིག་དེ་ལྟ་བུ་མ་ཡིན་པ་ལས་ཐ་དད་པ་དེའི་མཐར་ཐུག་པའི་ཤེས་པ་གང་ཡིན་པ་དེ་ལའོ། །དེ་ལྟ་མ་ཡིན་ན་ནི་ཞེས་བྱ་བ་ནི་བརྟགས་པའི་ཐ་དད་པ་མེད་ནའོ། །དེ་སྐད་དུ་ཡང་སློབ་དཔོན་ཕྱོགས་ཀྱི་གླང་པོས་བཤད་དོ། །སྐབས་
སུ་བབ་པ་ལ་ནི་ལྡོག་པ་ཐ་དད་པ་ཡང་མེད་པའི་ཕྱིར་མ་གྲུབ་པ་ཁོ་ནའོ། །གང་གི་ཕྱིར་ཐ་སྙད་དུ་བཞག་པའམ། ཡང་ན་ཐ་སྙད་ཀྱིས་བཞག་པ་སྒྲ་ནི་རྟག་སྟེ་ཞེས་བྱ་བའི་བསྒྲུབ་པར་བྱ་བའི་ཆོས་ཅན་དེ་ཉིད་སྒྲ་ཡིན་པའི་ཕྱིར་ཞེས་སྒྲུབ་བྱེད་དུ་བྱས་པ་ཡིན་ནོ། ཅི་འདྲ་བ་ཞིག་སྒྲུབ་བྱེད་དུ་བྱས་ཤེ་ན། གང་ཞིག་ཐ་དད་པའི་
བློ་དང་མ་འབྲེལ་པ་དེ་ལ་དེ་སྐད་ཅེས་བྱ་སྟེ། བསྒྲུབ་པར་བྱ་བའི་ཆོས་ཅན་ཉིད་དུ་བྱས་པའི་རྣམ་པ་ལས་རང་བཞིན་གཞན་གྱིས་བློ་གཞན་ལ་གནས་མེད་པ་སྟེ། ཐ་དད་པའི་བློ་དང་མ་འབྲེལ་པ་ཞེས་བྱ་བའི་དོན་ཏོ། །གང་གི་ཕྱིར་དེ་ལྟར་རྣམ་པར་གཅད་པར་བྱ་བ་ལོགས་ཤིག་པ་མེད་པའི་ཕྱིར་ན། རྟོགས་པར་གྲུབ་པའི་
ཐ་དད་པ་ཙམ་ཡང་མེད་པ་དེས་ན་སྒྲ་ཡིན་པའི་ཕྱིར་ཞེས་བྱ་བའི་གཏན་ཚིགས་འདི་དམ་བཅས་པའི་དོན་གྱི་ཕྱོགས་གཅིག་ཡིན་པས་ན། མ་གྲུབ་པར་བསྟན་པ་ཡིན་ནོ། །གང་གིས་འདི་མ་གྲུབ་པར་འགྱུར་བ་ཅི་ལྟར་ན་འདིར་བསྒྲུབ་པར་བྱ་བ་གང་ཡིན་པ་དེ་ཉིད་སྒྲུབ་པར་བྱེད་པ་ཉིད་དུ་བྱས་ཤེ་ན། ལོག་པ་ཞེས་བྱ་བ་སྟེ།
མི་རྟག་པ་དང་བྱས་པའི་སྒྲ་ཐ་དད་པས་ནི་བྱས་པ་ཉིད་ལ་སོགས་པའི་མཚན་ཉིད་ཀྱི་ལྡོག་པ་ཐ་དད་པ་མ་ཡིན་ནོ། །ཅིའི་ཕྱིར་ཞེ་ན། ལོག་པ་དེ་ནི་གཅིག་ཡིན་པའི་ཕྱིར་རོ། །འོ་ན་ཅི་ལྟར་ཐ་དད་སྙམ་ན། འོན་ཀྱང་སྒྲ་མ་ཡིན་པ་ལ་སོགས་པ་ལྡོག་པའི་མཚམས་གང་ལས་ལྡོག་པ་སྟེ་ཐ་དད་པ་ལས་ལྡོག་པ་རྣམས་ཐ་དད་

པ་ཡིན་ནོ་ཞེས་འབྲེལ་ཏོ། །ཐུན་མོང་ནི་བྱས་པ་ཉིད་དེ། སྒྲ་དང་སྒྲ་མ་ཡིན་པ་གཉི་ག་ལ་ཡོད་པའི་ཕྱིར་རོ། །ཐུན་མོང་མ་ཡིན་པ་ནི་སྒྲ་ཉིད་དེ་སྒྲའི་བསལ་བ་ཁོ་ན་ལ་ཡོད་པའི་ཕྱིར་རོ། །ཡང་ན་ཐུན་མོང་བ་ནི་གཟུགས་དང་སྒྲ་ལ་སོགས་པའི་ཡན་ལག་རྣམས་ཡིན་ལ། ཐུན་མོང་མ་ཡིན་པ་ནི་བུམ་པ་ལ་སོགས་པའི་ཡན་
ལག་ཅན་ནོ། །དེ་ལྟ་ཞེས་བྱ་བ་ནི་ཐུན་མོང་དང་ཐུན་མོང་མ་ཡིན་པའི་ཐ་དད་པའོ། །དངོས་པོའི་རྐྱེན་ཞེས་བྱ་བ་ནི་སྒྲ་ཉིད་དོ། །གཞན་གྱི་ལྟར་ན་ནི་དངོས་པོའི་རྐྱེན་དོན་དམ་པ་པའི་ཐ་དད་པས་འཇུག་པ་ཡིན་ལ། སངས་རྒྱས་པའི་ལྟར་ན་ནི་ལོག་པའི་ཐ་དད་པར་བརྟགས་པས་ཡིན་ནོ། །འདིར་ནི་གཉི་ག་ལྟར་ཡང་
ཐ་དད་པ་མི་སྲིད་དོ། །འགྱུར་ན་ཡང་ཞེས་བྱ་བ་ནི་ཐ་དད་པ་རྣམ་པ་གཉིས་མེད་བཞིན་དུའོ། །དོགས་པ་ནི་དངོས་པོའི་རྐྱེན་ཞེས་བྱ་བའོ། །ཕན་ཚུན་བརྟེན་པ་ཉིད་བརྗོད་པ་ནི། དྲུག་པའི་ཞེས་བྱ་བའོ། །དོན་ནི་སྒྲའི་རྒྱུ་མཚན་ཅན་མ་ཡིན་ནོ་ཞེས་བྱ་བ་ནི། དོན་མཐོང་བ་ན་ནི་བརྡ་ལས་ནི་རྗོད་པར་བྱེད་པའི་སྒྲ་ཡིན་ནོ། །
དོན་མཐོང་བ་མེད་ན་ནི་བརྡ་མེད་པའི་ཕྱིར་སྒྲ་རྗོད་བྱེད་མ་ཡིན་པ་ཁོ་ནར་འགྱུར་རོ། །དེས་ན་འདིའི་རྗོད་པར་བྱེད་པ་ནི་དོན་གྱི་རྒྱུ་མཚན་ཅན་ཡིན་ནོ། །དོགས་པ་ནི་དོན་དེ་ནི་ཞེས་བྱ་བའོ། །དེ་ལྟ་བུར་གྱུར་པ་ཉིད་ཅེས་བྱ་བ་ནི། སྒྲ་ལས་རྟོགས་པར་འགྱུར་བ་ཉིད་དོ། །གང་ཞེས་བྱ་བ་ནི་བརྗོད་པར་བྱ་བའོ། །ཚད་མ་
ཡིན་ནོ་ཞེས་བྱ་བ་ནི་བླང་བར་བྱ་བའོ། །དེ་ལྟ་མ་ཡིན་ན་སྒྲས་བརྗོད་པར་བྱ་བ་གཞལ་བྱ་ཡིན་པའི་ཕྱིར་ཅི་ལྟར་དེ་ལ་ཚད་མ་འཇུག་པར་འགྱུར། སྒྲ་གཞན་གྱིས་ཞེས་བྱ་བ་ཉིད་ཀྱི་སྒྲས་སོ། །ལན་ནི་དེ་ལྟ་ན་ཞེས་བྱ་བའོ། །སྒྲ་དུ་མ་ལས་དོན་དུ་མ་ཉིད་ཡིན་ན་ཤིང་དང་རྐང་འཐུང་ལ་སོགས་པ་དུ་མས་དོན་དུ་མར་འགྱུར་བས་
རྣམ་གྲངས་སུ་མི་འགྱུར་ཏེ། བུམ་པ་དང་སྣམ་བུ་ལ་སོགས་པའི་སྒྲ་བཞིན་ནོ། །གང་གི་ཕྱིར་ལོག་པ་ཐ་དད་པས་ལྡོག་པ་ཐ་དད་པ་མ་ཡིན་གྱི། འོན་ཀྱང་ལྡོག་མཚམས་ཐ་དད་པ་ལས་ཡིན་ལ། འདིར་ནི་ལྡོག་མཚམས་ཀྱང་ཐ་དད་པ་མེད་པ་དེའི་ཕྱིར་སྒྲ་ནི་ཞེས་བྱ་བ་ལ་སོགས་པ་གོ་སླའོ། །འདིས་ནི་ཐ་དད་པ་མེད་
པའི་ཕྱིར་མ་གྲུབ་པར་བརྗོད་པ་ཡིན་ནོ། །ད་ནི་དམ་བཅའ་བ་སྦྱར་བའི་དུས་ཉིད་དུ་རྟོགས་པའི་ཕྱིར་ཟློས་པ་ཡིན་པར་བསྟན་པ་ནི། གཞན་ཡང་ཞེས་བྱ་བ་ནི། སྒྲ་ཞེས་བྱ་བ་ཉིད་ཀྱིས་ཞེས་བྱ་བ་ནི་སྒྲའི་མཉན་པ་ཉིད་ལས་སོ། །ཡང་སྒྲ་ཉིད་བརྗོད་པས་ཅི་བྱ། དོགས་པ་ནི་ཡང་བརྗོད་པ་ནི་ཞེས་བྱ་བ་སྟེ། ཆོས་སྒྲ་ཉིད་གཙོར་

བྱ་བའི་དོན་དུའོ། །གཙོར་བྱ་བ་མ་ཡིན་ནོ། །ཅིའི་ཕྱིར་ཞེ་ན་འབྲས་བུ་མེད་པའི་ཕྱིར་རོ། །འོན་ཏེ་དེ་གཙོར་བྱས་པ་ལ་འབྲས་བུ་གོ་བར་བྱེད་པ་ཉིད་ཡིན་པ་ཡོད་དོ་ཞེ་ན། ཆོས་ཅན་ཞེས་སྨོས་སོ། །བྱས་པས་ཞེས་བྱ་བ་ཆོས་ཅན་གྱི་ཁྱད་པར་དངོས་པོའི་རྐྱེན་དང་བྲལ་བ་འདིས་ཀྱང་མི་རྟག་པ་ཉིད་
རྟོགས་པ་ཁོ་ནའོ། །འོན་ཏེ་ཡང་ཅི་ལྟར་སྒྲོན་མེའི་ཆོས་གསལ་བར་བྱེད་པ་ཉིད་རང་རྟོགས་པའི་རྒྱུ་ཡིན་པ་དེ་བཞིན་དུ་སྒྲའི་སྒྲ་ཉིད་ཀྱང་རང་མི་རྟག་པ་ཉིད་དུ་གོ་བར་བྱེད་པ་ཡིན་ནོ་སྙམ་ན། མར་མེའི་ཞེས་སྨོས་སོ། །མར་མེའི་དཔེའི་དབང་གིས་ཆོས་ཅན་ཆོས་ཀྱིས་གོ་བར་བྱེད་པ་ཡིན་ན། ལྐོག་ཏུ་གྱུར་པའི་མེ་ཡང་
ཆོས་ཅན་དེ་ལ་གནས་པའི་ཆོས་ཀྱིས་ཤེས་པར་བྱེད་པར་འགྱུར་ཏེ། མར་མེ་བཞིན་དུ་འབྲེལ་པ་ལ་མི་ལྟོས་པའི་ཕྱིར་རོ། །དེས་ན་རི་འདི་ནི་མེ་དང་ལྡན་པ་ཡིན་ཏེ། རི་ཡིན་པའི་ཕྱིར་ཞེས་བྱ་བ་ཡང་སྒྲུབ་བྱེད་ཡིན་པས་དུ་བ་བརྗོད་པ་དོན་མེད་པར་འགྱུར་རོ། །རྗེས་སུ་དཔག་པ་ནི་ཐ་སྙད་འགྱུར་བ་མ་ཡིན་ནོ་ཞེས་བྱ་བ་
ལ། རྗེས་སུ་དཔག་པའི་དུ་བ་ལ་སོགས་པའི་རྟགས་སོ། །དུ་བ་ལ་སོགས་པའི་རྟགས་གཞན་བརྗོད་པར་མི་འགྱུར་རོ་ཞེས་བྱ་བའི་དོན་ཏོ། །དེས་ན་ཞེས་བྱ་བ་ནི་འབྲས་བུ་མེད་པས་ནའོ། །སྔར་བརྗོད་པའི་མཇུག་སྡུད་པ་ནི་ཐ་དད་པ་ཞེས་བྱ་བའོ། །དཔེར་ན་རྩོལ་བྱུང་ཉིད་ཀྱི་ཕྱིར་ཞེས་རྩོལ་བ་ལས་བྱུང་བའི་སྒྲའི་རང་
བཞིན་ཉིད་ཆོས་ཅན་ཡིན་ལ། སྒྲ་དང་བུམ་པ་ལ་སོགས་པའི་ཐུན་མོང་བ་ནི་རྟགས་ཡིན་ནོ་ཞེས་བྱ་བའི་དོན་ཏོ། །གང་གི་ཕྱིར་ཞེས་བྱ་བ་ནི་རྣམ་པར་འབྲེལ་པའོ། །ཅིའི་ཕྱིར་མ་གྲུབ་པ་ཉིད་མ་ཡིན་སྙམ་ན། སྒྲ་ལ་གནས་པའི་ཞེས་བྱ་བའོ། །ཐ་དད་པ་ཅི་ལྟར་ཞེ་ན། སྒྲ་ལ་གནས་པའི་ཞེས་གསུངས་སོ། །རྩོལ་བ་
ལས་བྱུང་བ་ལས་གཞན་ལས་ནི་བུམ་པ་ལ་སོགས་པ་ལས་ཀྱང་ངོ་། །དེ་ལས་གཞན་བུམ་པ་ལ་སོགས་པ་ལས་སོ། །འོ་ན་གང་ལས་ཐ་དད་སྙམ་ན། འོན་ཀྱང་ཞེས་བྱ་བའོ། །གློག་ལ་སོགས་པ་ཁོ་ན་ལས་སོ། །དེ་ལྟར་ན་རེ་ཞིག །རྩོལ་བ་ལས་བྱུང་བའི་སྒྲ་ནི་མི་རྟག་སྟེ་རྩོལ་བ་ལས་བྱུང་བ་ཡིན་པའི་ཕྱིར་ཞེས་
བྱ་བའི་སྦྱོར་བ་འདི་ལ། ཆོས་ཅན་དང་སྒྲུབ་པར་བྱེད་པ་རྗོད་པའི་སྒྲ་དག་རྣམ་གྲངས་མ་ཡིན་པར་བསྟན་པ་ཡིན་ནོ། །འདི་འདྲ་བའི་རྣམ་གྲངས་མ་ཡིན་པ་ཉིད་ནི། སྒྲ་ཉིད་ཡིན་པའི་ཕྱིར་ཞེས་བྱ་བ་འདི་ལ་མེད་པ་དེས་ན་མ་གྲུབ་པར་བརྗོད་པ་ཡིན་ནོ། །དེས་ན་ཞེས་བྱ་བ་འདི་ལྡོག་པའི་ཐ་དད་པས་སོ། །དེ་དང་དེ་

མ་ཡིན་པ་ལས་ཞེས་བྱ་བ་སྒྲ་དང་སྒྲ་མ་ཡིན་པ་ལ་གནས་པའོ། །དེ་ལྟར་གྱུར་ན་རྗེས་སུ་འགྲོ་བ་མེད་པའི་ཉེས་པ་ཉིད་དུ་འགྱུར་རོ་སྙམ་ན། འོ་ན་ཞེས་སྨྲས་ཏེ། རྩོལ་བ་ལས་བྱུང་བ་བཞིན་དུ་ཁྱབ་པ་ཉིད་མེད་པའི་ཕྱིར་སྒྲ་ཉིད་ལ་རྗེས་སུ་འགྲོ་བ་མེད་པའི་སྐྱོན་ཁོ་ན་ཡོད་པར་འགྱུར་གྱི་མ་གྲུབ་པར་ནི་མི་འགྱུར་རོ་ཞེས་བྱ་བའི་
དོན་ཏོ། །འདི་ཉིད་བརྗོད་པ་ནི། དེས་ན་ཞེས་བྱ་བའོ། །ཅི་ལྟར་མ་གྲུབ་པའི་སྐྱོན་དུ་མི་འགྱུར་སྙམ་ན། མ་གྲུབ་པ་ལ་ཡང་ཞེས་བྱ་བའོ། །གྲུབ་པའི་མཐའི་དོན་ནི་འདི་ཡིན་ཏེ། ཉེས་པ་གཉིས་ཡོད་ཀྱང་མ་འབྲེལ་པ་རྣམ་པར་བཅད་པས་མ་གྲུབ་པ་ཉིད་དུ་བརྗོད་པ་ཡིན་ནོ་ཞེས་བྱ་བའོ། །གལ་ཏེ་ཉེས་པ་གཉིས་
ཡོད་ན། དེའི་ཚེ་གཉི་ག་ཡང་བརྗོད་དོ་ཅོག་སྙམ་ན། དེས་ཞེས་བྱ་བའོ། །ཕྱོགས་ཀྱི་ཆོས་མེད་པར་ནི་གཏན་ཚིགས་ལ་རྗེས་སུ་འགྲོ་བ་མེད་པའི་ཉེས་པར་འགྱུར་བ་མ་ཡིན་ཏེ། མེད་པ་ཉིད་ཀྱིས་ཐེ་ཚོམ་སྐྱེད་པར་མི་བྱེད་པའི་ཕྱིར་རོ་ཞེས་བརྗོད་པ་ནི་གཏན་ཚིགས་ཡོད་ན་ཞེས་བྱ་བའོ། །དེ་རྗེས་སུ་འགྲོ་བ་
མེད་པ་ནི་གཏན་ཚིགས་རྗེས་སུ་འགྲོ་བ་མེད་པ་བཟློག་པས་ཁྱབ་པ་དང་། སོགས་པའི་སྒྲས་ཐུན་མོང་མ་ཡིན་པ་ལ་སོགས་པའོ། །དེ་ནི་རྗེས་སུ་འགྲོ་བ་ལ་ཐེ་ཚོམ་ཟ་བའི་ཕྱིར་རོ། །གང་གི་ཕྱིར་རྗེས་སུ་འགྲོ་བ་མེད་པ་ལ་སོགས་པའི་ཉེས་པ་ནི་མ་བཤད་པ་དེའི་ཕྱིར། སྒྲ་ཉིད་ཡིན་པའི་ཕྱིར་ཞེས་བྱ་བ་འདི་ནི་མ་གྲུབ་པ་
ཉིད་ཀྱིས་སྐྱོན་དུ་འགྱུར་རོ། །ཐ་དད་ན་ནི་ཞེས་བྱ་བ་ནི་རྩོལ་ལས་བྱུང་བ་ཉིད་ཆོས་ཅན་ལས་ཐ་དད་ན་མ་གྲུབ་པ་ཉིད་ཀྱི་སྐྱོན་མེད་དོ་ཞེས་བྱ་བར་རོ། །དེས་ན་ཞེས་བྱ་བ་ནི་ཐ་དད་མེད་པས་ནའོ། །ཕྱོགས་ཡན་ལག་ཞེས་བྱ་བ་ནི། རྩོལ་བ་ལས་བྱུང་བ་ཉིད་སྒྲ་ལ་གནས་པ་ཆོས་ཅན་ཡིན་པར་མ་ཟད་པའོ། །སྒྲ་ལ་གནས་
པའི་རྩོལ་བ་ལས་བྱུང་བ་ཉིད་བསྒྲུབ་པར་བྱ་བའི་ཆོས་ཅན་དེ་ལས་ཐ་དད་པའམ། ཡང་ན་དཔེའི་ཆོས་ཅན་དེ་ལ་ནི་ཐ་དད་པ་ལ་ནིའོ། །གནོད་མེད་ཕྱིར་ཏེ་འགལ་བ་མེད་པའི་ཕྱིར་ཏེ་དེ་དང་དེ་མ་ཡིན་པ་ལ་བརྟེན་པ་ནི་སྒྲུབ་པའི་བྱེད་པའམ་གྲུབ་པ་མ་ཡིན་ནོ། །ཕྱོགས་ཀྱི་ཁྱད་པར་ཉིད་ཡིན་ཡང་སྒྲུབ་པར་བྱེད་
པ་ལས་ཐ་དད་པའི་བསྒྲུབ་བྱའི་ཆོས་ཅན་ནོ། །ཡང་ན་དེ་ལས་ཐ་དད་པའི་དཔེའི་ཆོས་ཅན་བུམ་པ་ལ་སོགས་པ་ལ་མ་གྲུབ་པ་མ་ཡིན་ཏེ། གནོད་པ་མེད་པའི་ཕྱིར་རོ། །བསྒྲུབ་པར་བྱ་བའི་ཆོས་ཅན་གྱི་ཁྱད་པར་ཡིན་ཡང་། མ་གྲུབ་པ་ཉིད་དུ་རྗེས་སུ་འགྲོ་བ་མེད་པའི་ཉེས་པ་ཡོད་པ་མ་ཡིན་ནོ་ཞེས་བྱ་བའི་དོན་

ཏོ། འདི་དཔེར་བརྗོད་པ་ནི། དཔེར་ན་ཞེས་བྱ་བའོ། །ཅིའི་ཕྱིར་གཏན་ཚིགས་ཉིད་འགལ་བ་མ་ཡིན་སྙམ་དུ་དོགས་པ་བསུ་ནས། རྗེས་སུ་འགྲོ་བ་ཡོད་པའི་ཕྱིར་རོ་ཞེས་བརྗོད་པ་ནི་བསྒྲུབ་པར་བྱ་བ་དང་ཞེས་བྱ་བའོ། །དེ་བཞིན་དུ་ཞེས་བྱ་བ་ནི་འབྲེལ་པ་ཉིད་དུའོ། །འོན་ཏེ་ཕྱོགས་ཀྱི་ཡན་ལག་
ཡིན་ན་བསྒྲུབ་པར་བྱ་བ་དང་འབྲེལ་པ་ཅི་ལྟར་ཞེ་ན། འབྲེལ་པ་དེ་ནི་ཞེས་བྱ་བའོ། །དེས་ན་ཞེས་བྱ་བ་ནི་འབྲེལ་པ་མི་འགལ་བས་ནའོ། །གཏན་ཚིགས་ཡིན་པ་ཉིད་དོ་ཞེས་བྱ་བ་ནི། མ་གྲུབ་མིན་ཞེས་བྱ་བ་འདིའི་བཤད་པའོ། །ཡང་ན་སྒྲུབ་པར་བྱེད་པ་རྩོལ་བ་ལས་བྱུང་བ་ཉིད། བསྒྲུབ་བྱ་ངེས་པའི་དུས་
ན་ཕྱོགས་ཀྱི་ཁྱད་པར་ཉིད་ཁས་བླང་བར་བྱ་བ་མ་ཡིན་པ་ཁོ་ནའོ། །ཅིའི་ཕྱིར་ཞེ་ན། སྒྲའི་རང་བཞིན་རྟོགས་པར་བྱས་ནས་རྩོལ་བ་ལས་བྱུང་བ་ཉིད་ལྡོག་པའི་ཕྱིར་རོ། །ཁྱད་པར་ནི་ཞེས་བྱ་བ་ནི། ཁྱད་པར་ནི་གདོན་མི་ཟ་བར་བསྒྲུབ་པར་བྱ་བ་ཉེ་བར་མཚོན་པ་སྟེ་ངེས་པའི་དུས་ན་ཡོད་པ་མ་ཡིན་ནོ། །ལྷས་
བྱིན་གྱིས་ཞེས་བྱ་བ་ནི་སྲོག་ཆགས་ཙམ་གྱིས་ཉེ་བར་མཚོན་པར་བྱེད་དོ། །དེ་ཉིད་ཀྱི་ཕྱིར་ལྷ་སྐྱབས་ལ་སོགས་པའི་ཁྱིམ་ཉེ་བར་མཚོན་ནས་ཞེས་གསུངས་སོ། །དེ་ཞེས་བྱ་བ་ནི་ཉེ་བར་མཚོན་བྱེད་དུ་གྱུར་པའི་བྱ་རོག་གོ། །དེའི་འབྲས་བུ་ཞེས་བྱ་བ་ནི་གྲུབ་པའི་མཐའ་སྨྲ་བའོ། །ཁྱད་པར་ཞེས་བྱ་བ་ནི་
མཆོད་སྦྱིན་ལ་སོགས་པའི་ཁྱིམ་ལས་ཁྱད་པར་དུ་གྱུར་པས་ན་ཁྱད་པར་སྟེ་ལྷས་སྦྱིན་ལ་སོགས་པའི་ཁྱིམ་སྟེ། དེའི་མཐར་ཐུག་པའི་བློ་གང་ལ་ཡོད་པ་སྟེ་ཡོད་པའི་ཕྱིར་རོ། །ཉེ་བར་མཚོན་པ་ཞེས་བྱ་བ་ནི་ཆོས་ཅན་ལས་ཐ་དད་པ་རྩོལ་བ་ལས་བྱུང་བ་ཉིད་ལ་སོགས་པའོ། །དེས་ན་བྱེ་བྲག་སྤྱི་ཆོས་ཐ། །དད་ཕྱིར་
རྟགས་དང་རྟགས་ཅན་ཉིད། །ཅེས་བྱ་བའི་དོན་དཔྱོད་པ་ནི། གལ་ཏེ་ཆོས་ཅན་ཞེས་བྱ་བའོ། །བྱས་པ་ཉིད་དང་མི་རྟག་པ་ཉིད་ཀྱང་དམ་བཅས་པའི་དོན་གྱིས་ཕྱོགས་གཅིག་ཉིད་དོ་ཞེས་བྱ་བར་འགྱུར་རོ་ཞེས་འབྲེལ་ཏོ། །ལྡོག་མཚམས་ཐ་དད་པ་མེད་པའི་ཕྱིར་ཆོས་ཐ་དད་པ་མེད་པའི་དོགས་པ་བསུ་བ་ནི། གལ་ཏེ་
ཞེས་བྱ་བའོ། །དེ་ཙམ་ཉིད་ཀྱིས་ཞེས་བྱ་བ་ནི་སྒྲ་ཙམ་ཉིད་ཀྱིས་སོ། །དེ་སྐད་དུ་ཡང་སློབ་དཔོན་དབྱིག་གཉེན་གྱིས་ཆོས་མངོན་པའི་བསྟན་བཅོས་ལས་བཤད་པ་ཡིན་ནོ། །ཕན་ཚུན་ཞེས་བྱ་བ་ལ་སོགས་པ་ནི་ལྡོག་པའི་དབྱེ་བ་སྟོན་པའོ། །སྒྲ་ཉིད་དང་མཉན་བྱ་ཉིད་དག་ནི། ལྡོག་པ་གཅིག་གི་མཐར་ཐུག་པས་

ཕན་ཚུན་ནང་དུ་འདུ་བར་བརྗོད་པ་ཡིན་ཏེ། གལ་ཏེ་དེར་གྱུར་ན་ནི་དེའི་ཚེ་འདི་གཉིས་ཐ་དད་པར་རིགས་པ་དང་ལྡན་པ་མིན་པར་འགྱུར་བ་ཞིག་ན། འོན་ཀྱང་ལྡོག་པས་བརྟགས་པའི་ཆོས་ཐ་དད་པ་ཡོད་པ་ཡིན་ནོ་ཞེས་བརྗོད་པ་ནི། དོན་གཞན་དང་ནི་ཞེས་བྱ་བའོ་དོན་གཞན་ཉན་པའི་ཤེས་པ་དང་འབྲེལ་པ་དང་མ་
འབྲེལ་པ་ཡང་སྒྲ་ལ་ཡོད་པ་ཡིན་ནོ། །དེ་ལྟར་གྱུར་དང་མཉན་བྱ་ཉིད་ནི་སྒྲ་ཉིད་ལས་ཐ་དད་པར་གསལ་བ་ཁོ་ནའོ། །མཉན་བྱ་ཞེས་བྱ་བ་ལ་སོགས་པ་ནི་རྣམ་པར་འགྲེལ་བའོ། །མཉན་པར་བྱ་བ་མ་ཡིན་པ་མེད་པ་ཞེས་བྱ་བ་ནི། རུང་བའི་ཡུལ་ན་གནས་པའི་སྒྲ་ལ་ནི་འོན་པ་མ་ཡིན་པའི་དབང་དུ་བྱས་ཏེ། མཉན་
བྱ་མ་ཡིན་པ་ཉིད་མེད་པའོ། །ཚོགས་པ་མེད་པའི་ཕྱིར་ཞེས་བྱ་བ་ནི་རྣ་བ་མི་གསང་བ་ལ་སོགས་པ་ལས་སོ། །སྐྱེས་བུ་གཞན་ལ་ཞེས་བྱ་བ་ནི་འོན་པ་དང་ཡུལ་ཐག་རིང་པོ་ལ་སོགས་པ་ལའོ། །སྒྲ་མ་ཡིན་པར་ནི་ཞེས་བྱ་བ་ནི། སྐྱེས་བུ་གཞན་ལ་ལྟོས་ཀྱང་སྒྲ་སྒྲས་མ་ཡིན་པར་མི་འགྱུར་གྱི། འོན་ཀྱང་སྒྲ་ཁོ་
ནའོ། །ལྡོག་པ་ཐ་དད་པའི་མཇུག་སྡུད་པ་ནི། མཉན་བྱ་མ་ཡིན་པ་ལས་ལོག་པས་ནི་ཞེས་བྱ་བའོ། །འོ་ན་མཉན་བྱ་མ་ཡིན་པ་ལས་ལྡོག་པས་ཅིར་འགྱུར་ཞེ་ན། མཉན་བྱ་ཉིད་དེ་ལྟར་ཞེས་བྱ་བ་མཉན་བྱ་མ་ཡིན་པ་ལས་ལྡོག་པར་འགྱུར་གྱི། སྒྲ་ཉིད་ནི་དེ་ལྟར་འགྱུར་བ་མ་ཡིན་ནོ། །ཅིའི་ཕྱིར་ཞེ་ན། སྒྲ་ཉིད་
དེ་ནིའོ། །འདིས་ནི་ཞེས་བྱ་བ་ལྡོག་པས་བརྟགས་པའི་དབྱེ་བ་བསྟན་པ་ནི། སློབ་དཔོན་གྱིས་ཅི་སྐད་དུ་གསུངས་པ་དེ་ནི་ལེགས་པར་བཤད་པ་ཡིན་ནོ་ཞེས་མཆོད་པ་དང་འབྲེལ་ཏོ། །སློབ་དཔོན་ཕྱོགས་ཀྱི་གླང་པོས་ཚད་མ་ཀུན་ལས་བཏུས་པའི་འགྲེལ་པར་གང་གསུངས་པ་དེ་བཤད་པ་ཡིན་ནོ། །ཡང་ན་སློབ་
དཔོན་གྱིས་གསུངས་པ་གང་ཡིན་པ་དེ་ཉིད་བཤད་པ་ཡིན་གྱི་ལྷག་པ་ནི་མ་ཡིན་པའོ། །སློབ་དཔོན་ཉིད་ཀྱིས་རྩོད་པ་དང་ལན་མཛད་པས་འདི་དག་ཉིད་འདིར་བཤད་པ་ཡིན་ནོ་ཞེས་བྱ་བའི་དོན་ཏོ། །གསུངས་པའི་ཚུལ་བསྟན་པ་ནི། གལ་ཏེ་ཞེས་བྱ་བ་ནས་སྐྱོན་ཡིན་ནོ་ཞེས་བྱ་བའི་བར་རོ། །སློབ་དཔོན་
ཕྱོགས་ཀྱི་གླང་པོས་ནི། འདིར་ནི་གཏན་ཚིགས་ཉེར་གཏོད་ཀྱིས། །བསྒྲུབ་བྱ་དེ་ནི་འགལ་ལྡན་མིན། །ཞེས་བྱ་བ་སྐབས་འདིར། སྒྲ་ཉིད་ཀྱི་མཚན་ཉིད་ཐམས་ཅད་མ་ཡིན་པ་ཉིད་ནི། སྒྲ་མི་རྟག་པ་ཉིད་དུ་བསྒྲུབ་པར་བྱ་བ་ལ་དམ་བཅས་པའི་དོན་གྱི་ཕྱོགས་གཅིག་ཡིན་པ་ཉིད་ཀྱིས་མ་གྲུབ་པ་ཡིན་པར་གསུངས་པ་ན།

རྩོད་པར་བྱེད་པས་གལ་ཏེ་ཞེས་བྱ་བ་ལ་སོགས་པས་འཁྲུལ་པར་བྱེད་དེ། དམ་བཅས་པའི་དོན་གྱིས་ཕྱོགས་གཅིག་ཀྱང་ཡིན་ལ། སྒྲུབ་པར་བྱེད་པ་ཡང་ཡིན་མོད་ཅེས་སོ། །འདིར་ཞེས་བྱ་བ་ལ་སོགས་པ་ནི་ལན་སྦྱོར་བ་འདིས་སོ། །མིག་ལ་སོགས་པ་ཞེས་བྱ་བ་ནི་འདུས་པ་རྣམས་ཀྱི་ནང་
ནས་མིག་ལ་སོགས་པ་ཁོ་ན་དམ་བཅས་པའི་དོན་ཡིན་པའོ། །དེའི་ཕྱོགས་གཅིག་ཅེས་བྱ་བ་འདུས་བྱས་ཀྱི་ཕྱོགས་གཅིག་ཀྱང་དམ་བཅས་པའི་དོན་ཡིན་པའོ། །སྤྱི་དང་ཁྱད་པར་གྱི་དངོས་པོ་བསྒྲུབ་པར་བྱ་བ་དང་སྒྲུབ་པར་བྱེད་པ་ཡིན་ནོ་ཞེས་བྱ་བའི་དོན་ཏོ། །ཅི་སྟེ་ཡང་ཞེས་བྱ་བ་ལ་སོགས་པའི་རྩོད་པར་དོན་ནི་འདི་
ཡིན་ཏེ། སྒྲ་མི་རྟག་སྟེ་སྒྲ་ཉིད་ཡིན་པའི་ཕྱིར་རོ་ཞེས་བྱ་བའི་གཏན་ཚིགས་འདི་མ་གྲུབ་པར་ནི་མི་འཐད་ཀྱི་ཐུན་མོང་མ་ཡིན་པའི་མ་ངེས་པ་ཁོ་ནར་འགྱུར་རོ། །སྒྲ་ཉིད་ནི་སྒྲ་ཁོ་ན་ལ་གནས་ཏེ། དེས་ན་ཐུན་མོང་མ་ཡིན་པ་ཁོ་ན་ཡིན་པས་དེ་ཅི་ལྟར་མ་གྲུབ་པ་ཉིད་དུ་བརྗོད་ཅེས་བྱ་བའོ། །དེ་ལྟར་ནི་ཞེས་བྱ་བ་ལ་
སོགས་པའི་གྲུབ་པའི་མཐར་དོན་འདི་ཡིན་ཏེ། ཆོས་ཅན་དང་བསྒྲུབ་པར་བྱ་བའི་ཆོས་ལས་ལྟོས་ཏེ་ཐ་དད་པའི་ཆོས་གང་ཡིན་པ་བསྒྲུབ་པར་བྱ་བའི་ཆོས་ཅན་ཉིད་ལ་གནས་པ་གང་ཡིན་པ་དེ་ནི་ཐུན་མོང་མ་ཡིན་པར་རིགས་ཏེ། དཔེར་ན་མཉན་བྱ་ཉིད་སྒྲ་ཉིད་དང་མི་རྟག་པ་ཉིད་ལས་ལྡོག་པའི་དབྱེ་བས་ཐ་དད་པ་ཡིན་པ་དེས་
ན་དེ་མ་ངེས་པ་ཉིད་དུ་འཐད་པ་བཞིན་ནོ། །སྒྲ་ཉིད་ནི་ཆོས་ཅན་ལས་ལྡོག་པའི་དབྱེ་བས་ཀྱང་ཐ་དད་པ་ཡོད་པ་མ་ཡིན་ཏེ། ཆོས་ཅན་ཉིད་སྒྲུབ་བྱེད་ཉིད་དུ་ཉེ་བར་བཀོད་པའི་ཕྱིར་རོ། །དེས་ན་འདི་ནི་མ་གྲུབ་པ་ཁོ་ན་ཡིན་གྱི། ཐུན་མོང་མ་ཡིན་པའི་མ་ངེས་པ་ནི་མ་ཡིན་ནོ་ཞེས་སོ། །མ་གྲུབ་པ་ཉིད་ཀྱིས་ཞེས་བྱ་
བ་ཉིད་ཀྱི་སྒྲ་ནི་ཐུན་མོང་མ་ཡིན་པའི་མ་ངེས་པ་ཉིད་སེལ་བའོ། །དེ་ལ་ཡང་ཞེས་བྱ་བ་ནི་གཏན་ཚིགས་ཀྱི་མཚན་ཉིད་བརྗོད་པར་བྱ་བ་ལ་ཡང་ངོ་། །དེ་དབྱེ་བ་ནི་ཕྱོགས་ཆོས་ཀྱི་དབྱེ་བའོ། །གཏན་ཚིགས་ལྟར་སྣང་པའི་སྔོན་དུ་བསྟན་པར་བྱ་སྟེ། གཏན་ཚིགས་ཀྱི་མཚན་ཉིད་དང་གཏན་ཚིགས་ལྟར་སྣང་
བའི་མཚན་ཉིད་ཀྱི་སྔོན་རོལ་ཏུ་བརྗོད་པར་བྱའོ། །ཅིའི་ཕྱིར་ཞེ་ན། གང་གི་ཕྱོགས་ཀྱི་ཆོས་ཉིད་གང་ཡིན་དེ་ཕལ་ཆེར་ནི་མང་དུ་ནི་གཏན་ཚིགས་ལྟར་སྣང་བ་ཡིན་ལ། ཕྱོགས་ཀྱི་ཆོས་འགའ་ཞིག་ནི་ཡང་དག་པའི་གཏན་ཚིགས་ཡིན་པ་དེའི་ཕྱིར་རོ། །འདི་སྐད་བརྗོད་པ་ཡིན་ཏེ། གལ་ཏེ་ཡང་དེ་ལ་རིགས་མཐུན་

པ་ཡོད་ཀྱང་ཞེས་བྱ་བ་ལ་སོགས་པ་གཏན་ཚིགས་ལྟར་སྣང་བ་དང་པོར་བརྗོད་པར་རིགས་ཀྱི། འོན་ཀྱང་འདི་གཉིས་བཞག་ནས་ཕྱོགས་ཆོས་ཀྱི་རབ་ཏུ་དབྱེ་བ་བསྟན་པ་གང་ཡིན་པ་དེ་ནི་དགོས་པ་གཞན་བསྒྲུབ་པའི་ཆེད་དུ་ཡིན་ནོ། །ཕྱོགས་ཀྱི་ཆོས་ལ་ནི་གཏན་ཚིགས་ཀྱང་སྲིད་ལ། གཏན་ཚིགས་ལྟར་སྣང་བ་ཡང་
སྲིད་དོ། །དེ་ལ་གལ་ཏེ་ཐ་དད་པར་ཕྱོགས་ཀྱི་ཆོས་འདི་ནི་གཏན་ཚིགས་ཉིད་ཡིན་ལ། འདི་ནི་གཏན་ཚིགས་ལྟར་སྣང་བ་ཡིན་ནོ་ཞེས་བསྟན་པར་མ་བྱས་ན། དེའི་ཚེ་སློབ་མ་རྣམས་ཅི་ཕྱོགས་ཀྱི་ཆོས་འདི་གཏན་ཚིགས་ཡིན་ནམ། དེ་སྟེ་གཏན་ཚིགས་ལྟར་སྣང་བ་ཡིན་ནོ་ཞེས་རྨོངས་པར་འགྱུར་རོ། །
དེས་ན་གཏན་ཚིགས་སུ་གྱུར་པའི་ཕྱོགས་ཆོས་ལ་གཏན་ཚིགས་ལྟར་སྣང་བའི་བློ་དང་། གཏན་ཚིགས་ལྟར་སྣང་བ་ལ་ཡང་གཏན་ཚིགས་ཀྱི་བློར་མི་འགྱུར་བར་བྱ་བའི་ཕྱིར། དེ་ལྟར་ཕྱོགས་ཆོས་ཀྱི་རབ་ཏུ་དབྱེ་བ་བསྟན་པ་ཡིན་ནོ། །དེ་ཉིད་བརྗོད་པ་ནི། ཕྱོགས་ཆོས་ཞེས་བྱ་བ་ལ་སོགས་པའོ། །མཐུན་
ཕྱོགས་ནམ་མཁའ་བུམ་པ་རྫ། །མཁའ་དང་ནམ་མཁའ་བར་སྣང་ལ། །གློག་དང་བར་སྣང་གློག་བུམ་དང་། །ནམ་མཁའ་དང་ནི་རྡུལ་ཕྲན་ནོ། །ཞེས་བྱ་བ་རྣམ་པ་དགུ་པོ་དག་ནི་ཕྲེང་བ་གསུམ་པའི་རེའུ་མིག་དགུ་པོ་རྣམས་སུ་གོ་རིམས་བཞིན་བྲི་བར་བྱའོ། །མཐུན་པའི་ཕྱོགས་རྣམས་པ་དགུ་བྲིས་པ་དེ་ལ་
རིམ་པ་བཞིན་དུ་ཕྱོགས་ཀྱི་ཆོས་འགའ་ཞིག་ནི་ཡོད་པ་ཡིན་ལ། འགའ་ཞིག་ནི་མེད་པ། འགའ་ཞིག་ནི་རྣམ་པ་གཉི་གར་ཡང་འགྱུར་རོ། །གལ་ཏེ་དེ་ལྟར་ན་རྣམ་པ་གསུམ་དུ་འགྱུར་གྱི། རྣམ་པ་དགུ་པོར་གོ་རིམས་ཅི་ལྟར་འགྱུར་སྙམ་ན། རེ་རེ་དག་ལ་ཡང་རྣམ་གསུམ་ཞེས་གསུངས་སོ། །གང་གི་ཕྱིར་
གང་ཞིག་མཐུན་པའི་ཕྱོགས་ལ་ཡོད་པ་དང་གང་ཞིག་མེད་པ་དང་། གང་ཞིག་གཉི་ག་ཡིན་པར་བརྗོད་པ་དེ་ཉིད་རེ་རེ་ཡང་རྣམ་པ་གསུམ་གསུམ་དུ་འགྱུར་རོ། །ཅི་ལྟར་ཞེ་ན། བརྗོད་པ་མི་མཐུན་ཕྱོགས་ལ་ཡང་ཞེས་བྱ་བའོ། །བུམ་པ་བར་སྣང་གློག་དང་མཁའ། །བུམ་པ་རྫ་མ་གློག་བུམ་དང་། །རྫ་མ་
ནམ་མཁའ་བུམ་དེ་ནི། །དེ་བཞིན་མི་མཐུན་ཕྱོགས་རྣམས་དགུ། །མཐུན་པའི་ཕྱོགས་རེ་མིག་དགུ་པ། །དེ་བྲིས་པ་དེ་ལ་ཡང་། རིམ་པ་བཞིན་ཡོད་པ་དང་མེད་པ་དང་རྣམ་པ་གཉི་གས་སོ་སོར་རྣམ་པ་གསུམ་གསུམ་དུ་འགྱུར་རོ། །དེས་ན་ཕྱོགས་ཀྱི་ཆོས་རྣམ་པ་དགུ་ཡིན་ནོ། །ཕྱོགས་ཀྱི་ཆོས་རྣམ་པ་དགུའི་

རང་བཞིན་ཡང་མདུན་དུ་འཆད་པར་འགྱུར་རོ། །གང་ཕྱིར་གཏན་ཚིགས་དག་དང་ནི་ཞེས་བྱ་བ་ལ་སོགས་པས་བཤད་པའི་དོན་དུ་ཕྱོགས་སྔ་མ་འགོད་པ་ནི། གལ་ཏེ་ཞེས་བྱ་བའོ། །གཏན་ཚིགས་དག་དང་ནི་ཞེས་བྱ་བ་ལ་སོགས་པ་ནི་གྲུབ་པའི་མཐའོ། །གང་གི་ཕྱིར་བདེ་བར་འཆད་པ་དང་
འཇིག་པར་འགྱུར་བ་དེ་ཉིད་ཀྱི་ཕྱིར་རྣམ་འགྲེལ་མཛད་པས་བཤད་ལ། གཏན་ཚིགས་ཀྱི་རབ་ཏུ་དབྱེ་བའི་དོན། མདོས་མདོར་བསྡུས་ཏེ་བརྗོད་པ་གང་ཡིན་པ་དེ་ནི། བདེ་བར་གཟུང་བ་གྲུབ་པའི་ཕྱིར་རོ། །གང་ཞིག་བདེ་བར་གཟུང་བ་གྲུབ་པའི་ཕྱིར་ཡིན་ཞེ་ན། སྐབས་ཀྱི་གཏན་ཚིགས་ཀྱི་རབ་ཏུ་བྱེད་པའི་དོན་ཉིད་
དོ། །དེ་ཉིད་ཀྱི་ཕྱིར་རྣམ་པར་བཤད་པ་ལས། གཏན་ཚིགས་ཀྱི་རབ་ཏུ་བྱེད་པའི་དོན་ཉིད་བདེ་བླག་ཏུ་གཟུང་བའི་དོན་དུའོ་ཞེས་སོ། །གཏན་ཚིགས་ཀྱི་རབ་ཏུ་བྱེད་པ་ནི་ཞེས་རྗེས་སུ་བརྗོད་ནས། གཏན་ཚིགས་ཀྱི་རབ་ཏུ་བྱེད་པ་ཞེས་བྱ་བའི། དོན་རེ་ཞིག་སྟོན་པ་ནི། གཏན་ཚིགས་དང་ཞེས་བྱ་བའོ། །གཏན་ཚིགས་
རབ་ཏུ་བྱེད་པ་ཞེས་བྱ་བ་འདིར་གཏན་ཚིགས་སྨོས་པ་ནི་ཉེ་བར་མཚོན་པ་སྟེ། དེས་ན་གཏན་ཚིགས་དང་གཏན་ཚིགས་ལྟར་སྣང་བ་སྟོན་པར་བྱེད་པའི་ཚིག་ལ་རབ་ཏུ་བྱེད་པ་ཞེས་བརྗོད་པ་ཡིན་ནོ། །དོན་གྱི་སྒྲ་རྣམ་པར་འགྲེལ་པ་ནི། དེའི་དོན་ནི་ཞེས་བྱ་བ་ནི་སྟེ་རབ་ཏུ་བྱེད་པ་དེའི་དོན་ཏོ། །དེ་གང་ཡིན་ཞེ་ན། གཏན་ཚིགས་དང་
གཏན་ཚིགས་ལྟར་སྣང་བ་ཉིད་དོ། །གལ་ཏེ་གཏན་ཚིགས་རབ་ཏུ་བྱེད་པའི་ཞེས་བྱ་བའི་སྒྲས་གཏན་ཚིགས་དང་གཏན་ཚིགས་ལྟར་སྣང་བ་བརྗོད་པ་ཡིན་ནོ་ཞེས་བྱ་བ་འདི་ཅི་ལྟར་ཤེས་སྙམ་ན་དེ་ཉིད་ཀྱི་ཕྱིར་ཞེས་གསུངས་སོ། །གང་གི་ཕྱིར་གཏན་ཚིགས་རབ་ཏུ་བྱེད་པ་ཞེས་བྱ་བའི་སྒྲས་གཏན་ཚིགས་དང་གཏན་
ཚིགས་ལྟར་སྣང་བརྗོད་པ་དེ་ཉིད་ཀྱི་ཕྱིར་གཏན་ཚིགས་ལྟར་སྣང་གི་མངོན་དུ་ཞེས་གསུངས་སོ། །དེ་ཉིད་རྣམ་པར་འགྲེལ་པ་ནི། གཏན་ཚིགས་དང་ཞེས་བྱ་བའོ། །ཕྱོགས་ཆོས་ཞེས་བྱ་བ་འདི་མི་རིགས་པར་དོགས་པ་བསུ་བ་ནི། གལ་ཏེ་ཞེས་བྱ་བའོ། །ཕྱོགས་ཀྱི་ཆོས་ཉིད་དུ་ཉེ་བར་བསྡུས་པའི་ཆོས་ནི་སྒྲུབ་པར་
བྱེད་པ་མ་ཡིན་ནོ་ཞེས་འབྲེལ་ཏོ། །འདི་ག་ལས་སྙམ་ན་ནགས་ཚང་ཚིང་ཞེས་བྱ་བའོ། །དེས་ན་ཕྱོགས་ཀྱི་ཆོས་གཏན་ཚིགས་ཡིན་ནོ་ཞེས་ཅི་ལྟར་བརྗོད་སྙམ་པའོ། །འོ་ན་ཕྱོགས་ཆོས་ཅན་ཙམ་ཡིན་ལ་རག་གོ་ཞེ་ན། ཆོས་ཅན་ཙམ་ནི་ཞེས་སྨོས་སོ། །གྲུབ་ཀྱང་བསྒྲུབ་པར་བྱ་བ་ཅི་སྟེ་མ་ཡིན་སྙམ་ན། ཆོས་ཀྱི་

ཁྱད་པར་ཅན་གྱི་ཞེས་བྱ་བའོ། །དེས་ན་ཕྱོགས་ཆོས་ཞེས་བྱ་བ་ནི་མི་འཐད་དོ་སྙམ་ན། འདི་ལ་ལན་དེ་ནི་བདེན་ཏེ་ཞེས་བྱ་བའོ། །འདིར་ཕྱོགས་ཀྱི་སྒྲས་གཏན་ཚིགས་ཀྱི་བྱེད་པའི་ཡུལ་ཆོས་དང་ཆོས་ཅན་ཚོགས་པའི་ཕྱོགས་ནི་མི་གཟུང་སྟེ། དེ་བཟུང་ན་ནི་དེའི་ཆོས་སུ་གཏན་ཚིགས་ཐམས་ཅད་མ་གྲུབ་པར་འགྱུར་རོ། །ཅིའི་
ཕྱིར་ཞེ་ན། སྤྱིའི་དོན་བསྒྲུབ་པར་བྱ་བ་ཡིན་པའི་ཕྱིར་རོ། །བསྒྲུབ་པར་བྱ་བ་ནི་ཆོས་ཅན་དང་། ཆོས་ཚོགས་པའི་དོན་འདི་ཡིན་ལ། དེ་ཡང་མ་གྲུབ་པའི་ཕྱིར་དེའི་ཆོས་སུ་གཏན་ཚིགས་ཅི་ལྟར་གྲུབ། གྲུབ་ན་ཡང་རྗེས་སུ་དཔག་པ་དོན་མེད་པར་ཅི་ལྟར་མི་འགྱུར། དེའི་ཕྱིར་ཤེས་པར་འདོད་པའི་ཆོས་ཀྱི་ཁྱད་པར་
ཅན་ནི་ཕྱོགས་ཡིན་ནོ། །དེའི་ཆོས་སུ་ཡང་གཏན་ཚིགས་མ་གྲུབ་པ་མ་ཡིན་ནོ། །གལ་ཏེ་ཤེས་པར་འདོད་པ་ཅི་ལྟར་ཁྱད་པར་ཉིད་ཡིན་ཏེ། བསྒྲུབ་པར་འདོད་པས་ན་མ་གྲུབ་པའི་ཕྱིར་རོ་ཞེས་དོགས་ན། གང་གི་ཕྱིར་ཆོས་ཅན་ཙམ་ལ་བསྒྲུབ་བྱ་ཉིད་དུ་ཞེས་བྱ་བས། ཤེས་པར་འདོད་པའི་ཆོས་ཀྱིས་ཁྱད་པར་དུ་བྱས་
པ་ཉིད་དུ་ཉེ་བར་འདོགས་པ་དེའི་ཕྱིར། ཉེ་བར་བརྟགས་པའི་བསྒྲུབ་བྱའི་ཁྱད་པར་ཅན་ནི་ཕྱོགས་ཡིན་ལ། དེའི་ཆོས་ནི་དེའི་རང་བཞིན་ངེས་པར་བྱེད་པའི་དུས་ན་ཕྱོགས་ཀྱི་ཆོས་ཀྱི་གཏན་ཚིགས་སུ་རྟོགས་པར་བྱའོ། །ཁྱབ་པ་ངེས་པའི་དུས་ན་ནི། ཆོས་ཅན་ཙམ་ལ་བསྒྲུབ་པར་བྱ་བ་ཉིད་དུ་ཉེ་བར་འདོགས་པ་ཡིན་
ཏེ། དེ་ལྟ་མ་ཡིན་ན་ཚོགས་པས་རྗེས་སུ་འགྲོ་བ་མེད་པར་ཐལ་བའི་ཕྱིར་རོ། །ཅི་ལྟར་འདི་གཉིས་ཁོ་ན་ལ་ཉེ་བར་གདགས་སྙམ་ན། ཕྱོགས་གཅིག་ཕྱིར་ཞེས་གསུངས་སོ། །གཏན་ཚིགས་ཀྱི་ཞེས་བྱ་བ་ནས་མ་གྲུབ་པའི་ཕྱིར་རོ་ཞེས་བྱ་བའི་མཐར་ཐུག་པས་ནི། གཏན་ཚིགས་ཀྱི་བྱེད་པའི་ཡུལ་ཕྱོགས་སུ་སྟོན་
པས་ཚོགས་དོན་བསྒྲུབ་བྱ་ཉིད་ཡིན་ཕྱིར་ཞེས་བྱ་བ་སྟེ། དེ་རྣམ་པར་འགྲེལ་པའོ། །འདིས་ནི་འདི་འདྲ་བའི་ཕྱོགས་ལ་ལྟོས་ནས་གཏན་ཚིགས་ཐམས་ཅད་ཀྱང་མ་གྲུབ་པ་ཉིད་དོ་ཞེས་བསྟན་པ་ཡིན་ནོ། །ད་ནི་ཕྱོགས་གང་ལ་ལྟོས་ནས་གཏན་ཚིགས་མ་གྲུབ་པ་དེ་སྟོན་པ་ནི། དེའི་ཕྱིར་ཞེས་བྱ་བའོ། །གང་གི་ཕྱིར་
གཏན་ཚིགས་ཀྱི་བྱེད་པ་ཡིན་ཡང་ཕྱོགས་ཉིད་དུ་འཛིན་པ་མ་ཡིན་ཏེ། དེ་ནི་མ་གྲུབ་པས་ན་གཏན་ཚིགས་ཐམས་ཅད་མ་གྲུབ་པར་ཐལ་བ་ཡིན་ནོ། །ཅི་ལྟར་མ་གྲུབ་པ་ཞེས་བྱ་བ་ནི་ཤེས་པར་འདོད་པའི་དོན་ནི་བསྒྲུབ་པར་བྱ་བ་ཉིད་ཀྱིས་མ་གྲུབ་པ་ཡིན་ན། མ་གྲུབ་པ་ཡང་ཅི་ལྟར་ཁྱད་པར་ཡིན། ཉེ་བར་བརྟག་པའི་

ཕྱིར་རོ་ཞེས་བྱ་བ་ནི། གལ་ཏེ་ཡང་ཆོས་ཅན་ལ་ཁྱད་པར་མ་གྲུབ་པ་དེ་ལྟ་ན་ཡང་ཁྱད་པར་ཉེ་བར་བཏགས་པ་ཡིན་ཏེ། དེས་ན་ཉེ་བར་བཏགས་པའི་ཁྱད་པར་གྱིས་ཁྱད་པར་དུ་བྱས་པའི་ཆོས་ཅན་གྱི་ཆོས་ནི་གཏན་ཚིགས་ཡིན་ནོ། །ཕྱོགས་འདི་ཉིད་ཀྱི་ནི་ཕྱོགས་ནི་ཆོས་ཅན་ཏེ། ཡན་ལག་ལ་
སྤྱི་ཉེ་བར་བཏགས་པའི་ཕྱིར་རོ་ཞེས་བྱ་བ་ལ་སོགས་པ་ཡང་བཤད་པར་བྱའོ། །ཕྱོགས་ནི་ཤེས་པར་འདོད་པའི་བྱེ་བྲག་དང་ལྡན་པའི་ཆོས་ཅན་ནོ། །སྔར་བསྟན་ཟིན་པས་ཞེས་བྱ་བ་ནི་ལེའུ་དང་པོའི་འགྲེལ་པར་རོ། །འདི་ནི་ཡང་ན་ཆོས་སམ་ནི་ཞེས་བྱ་བའི་རྣམ་པར་འགྲེལ་པའོ། །དེ་ལ་ཞེས་བྱ་བ་ནི་ཕྱོགས་
ཆོས་ཞེས་བྱ་བ་དེ་ལའོ། །ཆོས་ཅན་གྱི་ཆོས་སྨོས་པ་ཉིད་ཀྱི་ཞེས་བྱ་བ་ནི་ཕྱོགས་ཆོས་སྨོས་པ་ཤེས་ལ། ཆོས་ཅན་གྱི་སྨོས་པ་བྱ་བ་ཡིན་ཏེ། མིག་གིས་གཟུང་བ་ཉིད་ལ་སོགས་པ་ནི་དེ་ཉིད་ཀྱིས་སེལ་བ་ཡིན་ནོ་ཞེས་བྱ་བའོ། །མ་ཡིན་ཏེ་ཞེས་བྱ་བ་ལ་སོགས་པ་ནི་ལན་ནོ། །ཡང་གི་སྒྲས་ནི་ཆོས་མཐུན་པའི་དཔེའི་
ཆོས་ཅན་གྱིའོ། །མ་ཡིན་ཏེ་ཞེས་བྱ་བ་ནི་རྩོད་པའོ། །ཆོས་མི་མཐུན་པའི་དཔེའི་ཆོས་ཅན་གྱི་ཆོས་ནི་གཏན་ཚིགས་སུ་མི་འགྱུར་ཏེ། མི་མཐུན་པའི་ཕྱོགས་ལ་མེད་པ་ཞེས་བརྗོད་པའི་ཕྱིར་རོ། །འོན་ཏེ་དེ་མི་མཐུན་པའི་ཕྱོགས་ལ་མེད་ཀྱང་ཡོད་པ་ཡང་ཡིན་ནོ་ཞེ་ན། ཅི་ལྟར་ཞེས་སྨོས་སོ། །མི་མཐུན་པའི་དཔེའི་
ཆོས་ཅན་དེ་ཉིད་ལ་ཡོད་པ་དང་། དེ་ཉིད་མེད་ཅེས་བྱ་བར་ཏེ། མི་འགྱུར་བ་ཁོ་ནའོ། །གང་གི་ཕྱིར་དེ་ཉིད་ལ་གཏན་ཚིགས་ཡོད་པ་དང་མེད་པར་མི་འཐད་པ་དེའི་ཕྱིར་འོས་གཞན་མེད་པས་སོ། །གང་ཞིག་ཡོངས་སུ་གཟུང་བར་བྱ་བ་ཆོས་ཅན་གསུམ་པ་དེ་གང་ཡིན་ཞེ་ན། དེ་ཡང་ཞེས་སྨོས་སོ། །མ་ཡིན་ཏེ་ཞེས་
བྱ་བ་ལ་སོགས་པ་ནི་ལན་ནོ། །རིགས་མཐུན་ཉིད་ཡོད་ལ་ཞེས་བྱ་བ་ལ་ལྟོས་ཏེ། ཆོས་ཅན་གྱི་ཆོས་ཞེས་ཡང་བརྗོད་པ་ནིའོ། །ངེས་པར་གཟུང་བའི་ཕྱིར་རོ་ཞེས་བྱ་བ་ཆོས་མཐུན་པའི་དཔེའི་ཆོས་ཅན་གྱི་ཆོས་ཁོ་ན་གཏན་ཚིགས་ཡིན་གྱི། བསྒྲུབ་པར་བྱ་བའི་ཆོས་ཅན་གྱི་ནི་མ་ཡིན་ནོ་ཞེས་བྱ་བར་རོ། །གལ་ཏེ་ཆོས་
ཅན་མ་སྨོས་ཀྱང་རིགས་མཐུན་པ་ཁོ་ན་ལ་ཞེས་ངེས་པར་གཟུང་བ་ཡོད་པ་ཁོ་ན་མ་ཡིན་ནམ། དེས་ན་དེའི་དོན་དུ་ཆོས་ཅན་སྨོས་པས་ཅི་བྱ། དེས་ན། འོ་ན་གཞན་མེད་པས་བསྒྲུབ་པར་བྱ་བའི་ཆོས་ཅན་ཡོངས་སུ་གཟུང་ངོ་ཞེས་དོགས་པ་བསུ་བ་ནི། གལ་ཏེ་ཡང་ཞེས་བྱ་བ་ལ་སོགས་པའོ། །མ་ཡིན་ཏེ་ཞེས་བྱ་

བ་ལ་སོགས་པ་ནི་ལན་ནོ། །ཉིད་ཀྱི་སྒྲ་རིམ་པ་བཞིན་དུ་བྱས་ནས་མཐུན་པའི་ཕྱོགས་ལ་ཡོད་པ་ཉིད་ཅེས་བྱ་བར་འགྱུར་རོ། །དེས་ན་ཞེས་བྱ་བ་ནི་ངེས་པར་གཟུང་བ་གཞན་སྲིད་པས་ནའོ། །ངེས་པར་གཟུང་བའི་ཕྱིར་ཆོས་ཅན་སྨོས་པར་བྱ་བ་ཡིན་པར་འགྱུར་རོ། །ངེས་པར་གཟུང་བའི་ཚུལ་བརྗོད་པ་ནི། དེ་ལ་ཞེས་
བྱ་བ་སྟེ་དཔེའི་ཆོས་ཅན་ཉིད་ལའོ། །གང་གི་ཕྱིར་ད་ལྟར་ཆོས་ཅན་སྨོས་པ་ངེས་པའི་དོན་ཡིན་པར་དོགས་པར་འགྱུར་བ་དེས་ནའོ། །འོ་ན་ཞེས་བྱ་བ་ལ་སོགས་པ་ནི་རྩོད་པའོ། །མ་ཡིན་ཏེ་ཞེས་བྱ་བ་ནི་ལན་ནོ། །དེ་ལ་ཡང་ཞེས་བྱ་བའི་བསྒྲུབ་པར་བྱ་བའི་ཆོས་ཅན་གྱི་ཆོས་ཞེས་བྱ་བ་ལ་ཡང་བསྒྲུབ་པར་བྱ་བའི་ཆོས་ཅན་
ལ་ཉེ་བར་བརྟགས་པ་ཉིད་སྐྱབས་ཡིན་ནོ། །དེ་ལྟ་མ་ཡིན་ཏེ་བསྒྲུབ་པར་བྱ་བའི་ཆོས་ཡིན་ན། དེའི་ཆོས་ཉིད་མ་གྲུབ་པར་འགྱུར་རོ། །བསྒྲུབ་པར་བྱ་བ་ཡང་ཁྱད་པར་དུ་འགྱུར་བ་མ་ཡིན་ནམ། ཉེ་བར་བཏགས་པས་ཅི་ཞིག་བྱ་སྙམ་ན། མ་གྲུབ་པ་ནི་ཞེས་བྱ་བའོ། །བསྒྲུབ་པར་བྱ་བ་ནི་མ་གྲུབ་པ་ཡིན་ལ། མ་གྲུབ་པ་
ནི་ཉེ་བར་བཏགས་པ་མེད་པར་རྟགས་སུ་གྱུར་པའི་ཆོས་ཀྱི་ཁྱད་པར་དུ་ཅི་ལྟར་འགྱུར། བསྒྲུབ་པར་བྱ་བ་དང་ཕྱོགས་ཀྱི་སྒྲ་གཉིས་དོན་གཅིག་པས་ཁྱད་པར་མེད་པའི་ཕྱིར་འདི་འདྲ་བའི་བསྟན་པ་མ་ཡིན་ནོ་ཞེས་བརྗོད་པ་ནི། ཕྱོགས་ཞེས་བྱ་བ་འདིས་ཀྱང་ཞེས་བྱ་བའོ། །མིང་དང་མིང་ཅན་གྱི་ཞེས་བྱ་བ་ལ་སོགས་པའི་དོགས་
པར་ནི་དོན་འདི་ཡིན་ཏེ། ཕྱོགས་ཆོས་ཞེས་བསྟན་པ་ན་ཕྱོགས་ཀྱི་སྒྲ་ནི་ཚོགས་པ་རྗོད་པར་བྱེད་པ་ཡིན་གྱི། ཤེས་པར་འདོད་པའི་བྱེ་བྲག་གིས་ཁྱད་པར་དུ་གྱུར་པའི་ཆོས་ཅན་ནི་མ་ཡིན་ནོ། །ཆོས་ཅན་ལ་འཇུག་པར་འདོད་པ་ཡང་ཡིན་ཏེ། དེས་ན་ཆོས་ཅན་ལ་ཕྱོགས་ཀྱི་མིང་གདགས་པར་བྱ་བ་མ་ཡིན་ཏེ། རྟོགས་
པར་དཀའ་བར་ཐལ་བའི་ཕྱིར་རོ་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་ལན་ནོ་རྣམ་གྲངས་ཡིན་པའི་ཕྱིར་རོ་ཞེས་བྱ་བ་ནི་འདིར་ཡང་མིང་དང་མིང་ཅན་གྱི་འབྲེལ་པ་མཚུངས་སོ་ཞེས་བྱ་བའི་དོན་ཏོ། །བསྒྲུབ་པར་བྱ་བའི་རྣམ་གྲངས་ཉིད་འཇིག་རྟེན་གྱི་གྲགས་པས་གསལ་བར་བྱེད་པ་སྟེ། དེ་ལྟར་ཡང་ཞེས་
བྱ་བའོ། །ཕྱོགས་ཀྱིས་སྒྲ་བསྒྲུབ་བྱའི་རྣམ་གྲངས་སུ་སློབ་དཔོན་ཡང་བཞེད་པ་ཡིན་ནོ་ཞེས་སྟོན་པ་ནི། དེ་ལྟར་ཡང་ཞེས་བྱ་བའོ། །ཅིའི་ཕྱིར་བསྒྲུབ་བྱ་ཉིད་དུ་ཉེ་བར་འདོགས་ཤེ་ན། ཉེ་བར་བཏགས་པ་མེད་པའི་ཞེས་བྱ་བའོ། །གལ་ཏེ་ཞེས་བྱ་བ་ལ་སོགས་པའི་རྩོད་པར་ནི་དོན་འདི་ཡིན་ཏེ། ཆོས་ཀྱི་ཁྱད་

པར་ཅན་གྱི་ཆོས་ཅན་ནི་རྗེས་སུ་དཔག་པར་བྱ་བར་བརྗོད་པ་ཡིན་ན། འདི་ནི་ཉེ་བར་བཏགས་པ་ཡང་མ་ཡིན་ན་དེ་ཅི་ལྟར་ཉེ་བར་བཏགས་ནས་ཆོས་ཅན་ཕྱོགས་ཡིན་ཞེས་རྗོད་ཅེས་བྱ་བའོ། །དེ་ལ་ནི་ཞེས་བྱ་བ་ནི་ཆོས་ཀྱི་ཁྱད་པར་ཅན་གྱི་ཆོས་ཅན་ལའོ། །ཉེ་བར་བཏགས་པ་མི་སྲིད་པ་མ་ཡིན་
ནོ་ཞེས་འབྲེལ་ཏོ། །ཅིའི་ཕྱིར་ཞེ་ན། དེར་ནི་ཞེས་བྱ་བ་སྟེ། ཆོས་ཀྱི་ཁྱད་པར་ཅན་གྱི་རྗེས་སུ་དཔག་པར་བྱ་བ་ཡིན་ནོ་ཞེས་བྱ་བའི་ཚིག་ལའོ། །འདི་ཉིད་ལ་འཐད་པ་གཞན་བརྗོད་པ་ནི་འདི་ལྟར་ནི་ཞེས་བྱ་བའོ། །རྒྱུ་གཉིས་པོ་འདི་གཉིས་གསལ་བར་བྱེད་པ་ནི། རྗེས་སུ་ཞེས་བྱ་བའོ། །གང་གི་ཕྱིར་བསྒྲུབ་
པར་བྱ་བ་ཉིད་ཉེ་བར་བཏགས་པ་ཁོ་ན་ཡིན་པ་དེའི་ཕྱིར་རོ། །འདི་ཉིད་གསལ་བར་བྱེད་པ་ནི། ཉེ་བར་བཏགས་པས་ཞེས་བྱ་བའོ། །བཟློག་པར་དོགས་པ་བསུ་བ་ནི། གལ་ཏེ་ཞེས་བྱ་བའོ། །དོན་ནི་འདི་ཡིན་ཏེ། ཅི་ལྟར་ཉེ་བར་བཏགས་པའི་བསྒྲུབ་པར་བྱ་བའི་ཆའི་ཁྱད་པར་ནི་ཕྱོགས་ཡིན་ལ། དེའི་ཆོས་ནི་
གཏན་ཚིགས་ཡིན་པ་དེ་བཞིན་དུ། ཉེ་བར་བཏགས་པའི་ཆོས་ཅན་གྱི་ཁྱད་པར་ཅན་གྱི་ཆོས་ནི་ཕྱོགས་ཡིན་ལ་དེའི་ཆོས་ནི་གཏན་ཚིགས་ཡིན་ནོ་ཞེས་བྱ་བར་ཡང་འགྱུར་རོ་ཞེས་བྱ་བའོ། །ཕྱོགས་ཞེས་བྱ་བ་ནི་ལན་ནོ། །ཕྱོགས་བརྗོད་པ་ནི་བསྒྲུབ་པར་བྱ་བའི་ཆོས་དོར་ནས་ཁྱད་པར་བྱ་བའི་ཆོས་ཅན་ཡོངས་སུ་
གཟུང་བའི་དོན་དུ་ཡིན་ཏེ། དེས་ན་མིག་གིས་གཟུང་བ་ལ་སོགས་པ་སྤངས་པར་འགྱུར་བ་ཡིན་ནོ། །བསྒྲུབ་པར་བྱ་བའི་ཆོས་བཟུང་ན་ནི་གཏན་ཚིགས་དེའི་ཆོས་མི་སྲིད་པའི་ཁོ་ནར་འགྱུར་ཏེ། ཆོས་རྣམས་ནི་ཆོས་ཀྱི་གཞིར་མི་སྲིད་པའི་ཕྱིར་རོ། །སྲིད་ན་ནི་མིག་གིས་གཟུང་བ་ཉིད་ཀྱང་གཏན་ཚིགས་སུ་འགྱུར་རོ། །
ཆོས་ཅན་སྒྲའི་ཆོས་མི་རྟག་པ་ཉིད་གང་ཡིན་པ་དེའི་ཆོས་ནི་མིག་གིས་གཟུང་བ་ཉིད་ཡིན་ནོ། །བུམ་པ་ལ་སོགས་པ་ལ་ནི་མིག་གིས་གཟུང་བར་བྱ་བ་ཉིད་མི་རྟག་པ་ཉིད་དང་འབྲེལ་པར་འགྱུར་བ་ཡིན་ལ། སྒྲའི་མི་རྟག་པ་གང་ཡིན་པ་དེ་ནི་བུམ་པ་ལ་ཡང་ཡོད་པ་ཡིན་ཏེ། སྤྱི་བསྒྲུབ་པར་བྱ་བ་ཡིན་པའི་ཕྱིར་རོ། །དེས་
ན་མིག་གིས་གཟུང་བ་ཉིད་མི་རྟག་པ་ཉིད་ཀྱི་ཆོས་སུ་འགྱུར་གྱི་སྒྲའི་ནི་མ་ཡིན་ནོ། །གལ་ཏེ་སྒྲ་ལ་གནས་པའི་མི་རྟག་པ་ཉིད་ཀྱི་ཆོས་ནི་མི་འགྱུར་བ་མ་ཡིན་ནམ། འོན་ཏེ་མི་རྟག་པ་ཉིད་ཀྱི་སྤྱི་དང་འབྲེལ་བ་ཡིན་ན་དེའི་ཚེ་ཆོས་ཅན་ཙམ་དང་ཡང་འབྲེལ་པར་འགྱུར་རོ། །དེ་སྟེ་ཆོས་ཅན་གྱི་ཁྱད་པར་དང་མ་འབྲེལ་ན་

དེའི་ཚེ་སྒྲ་ལ་གནས་པའི་མི་རྟག་པ་ཉིད་དང་། འབྲེལ་པར་མི་འགྱུར་རོ་ཞེ་ན། དེ་ནི་མ་ཡིན་ཏེ་ཆོས་ཅན་ནི་ཁྱད་པར་དུ་བྱེད་པ་ཁོ་ན་ཡིན་གྱི། བསྒྲུབ་པར་བྱ་བ་ནི་སྤྱི་ཁོ་ན་ཡིན་ནོ། །དེས་ཕྱོགས་སྨོས་པ་ནི་ཁྱད་པར་ཅན་གྱི་ཆོས་ཅན་གྱི་གཟུང་བའི་དོན་དུ་ཡིན་ནོ། །བསྒྲུབ་བྱའི་ཆོས་ཅན་གྱི་ཆོས་གང་ཡིན་པ་དེ་གཏན་
ཚིགས་ཡིན་ན། མིག་གིས་གཟུང་བ་ནི་དེ་ལྟ་མ་ཡིན་ཏེ། དེས་ནི་གཏན་ཚིགས་སུ་མི་འགྱུར་རོ། །བསྒྲུབ་པར་བྱ་བའི་ཆོས་ཅན་གྱི་ཆོས་ཀྱི་ཚད་བརྗོད་པ་ནི། གཏན་ཚིགས་དང་ཞེས་བྱ་བ་ལ་སོགས་པའོ། །དེ་ལྟར་ཕྱོགས་ཀྱི་རང་བཞིན་བརྗོད་ནས། ཆོས་ཀྱི་ཚིག་དང་བསྡུ་བའི་ཁྱད་པར་བརྗོད་པ་ནི།
ཕྱོགས་དེའི་ཞེས་བྱ་བའོ། །ཐུན་མོང་མ་ཡིན་པ་ཉིད་དུ་འགྱུར་རོ་ཞེས་བྱ་བ་ནི་དཔེ་ལ་རྗེས་སུ་འགྲོ་བའོ། །སྒྲའི་བདག་ཉིད་ཅན་གྱི་བྱས་པ་ཉིད་བུམ་པ་ལ་སོགས་པའི་བདག་ཏུ་ཅི་ལྟར་འགྱུར་ཞིང་བུམ་པ་ལ་སོགས་པ་དེ་ལ་ཡོད་པར་ཡང་ཅི་ལྟར་འགྱུར། སྒྲའི་བདག་ཉིད་ཡིན་པས་ཞེས་བྱ་བ་འདིའི་རྣམ་པར་
གཅོད་པར་བྱ་བ་བརྗོད་པ་ནི། ཐ་དད་པ་ཡིན་ན་ཞེས་བྱ་བའོ། །འདོད་པ་ཡང་མ་ཡིན་ཏེ་ཞེས་བྱ་བ་ནི་རང་བཞིན་གྱི་གཏན་ཚིགས་ལའོ། །ཆོས་ཅན་ལས་ཐ་དད་པའི་རྟགས་ཀྱི་རྒྱུ་ནི་རྒྱུ་ལས་གཞན་ཁྱད་པར་དུ་འགྱུར་བ་མ་ཡིན་ཏེ། རྒྱུ་ཉིད་ཁྱད་པར་དུ་འགྱུར་བ་ཡིན་ནོ་ཞེས་བྱ་བའི་དོན་ཏོ། །དེ་ལྟར་གྱུར་ན་
ཞེས་བྱ་བ་ནི་རྒྱུ་རྟགས་ཀྱི་ཁྱད་པར་ཡིན་ནའོ། །གང་གི་ཕྱིར་ཁྱད་པར་རྣམ་པར་གཅོད་པར་བྱེད་པ་མ་ཡིན་པར་མི་འགྱུར་བ་དེའི་ཕྱིར་ཕྱོགས་ཁྱད་པར་ཡིན་པར་ཁས་ལེན་པ་ཡིན་ན་ཐུན་མོང་མ་ཡིན་པ་ཉིད་དོ། །ཕྱོགས་ཁྱད་པར་མ་ཡིན་པར་ཁས་ལེན་ན། ཡང་མ་གྲུབ་པ་ཉིད་ཀྱི་སྐྱོན་དུ་འགྱུར་རོ། །ཕྱོགས་
ཀྱི་ཆོས་ཉིད་མ་ཡིན་པའི་ཕྱིར་ཞེས་བྱ་བ་ནི་དྲུག་པའི་དོན་མེད་པས་ན་ཕྱོགས་དང་འབྲེལ་པ་ཡོད་པའི་ཕྱིར་རོ། །གལ་ཏེ་ངེས་པར་གཟུང་བས་ནི་གཞན་དང་ལྡན་པ་རྣམ་པར་གཅོད་པ་ཁོ་ན་བརྗོད་པ་མ་ཡིན་ནམ་དེས་ན་རབ་ཏུ་དབྱེ་བ་འདི་ཙམ་དུ་ཅི་ལྟར་འགྱུར་སྙམ་ན་ལྡོག་པར་བྱེད་པའི་ཞེས་བྱ་བའོ། །
ཅིའི་ཕྱིར་ཞེ་ན། དེའི་ཞེས་སྨོས་ཏེ་ཚིག་ཕྲད་ཀྱིའོ། །གཞན་དུ་ཞེས་བྱ་བ་ནི་མི་ལྡན་པ་རྣམ་པར་གཅོད་ནའོ། །རྣམ་པར་དབྱེ་བ་ཞེས་བྱ་བ་ནི་རྩོད་པའོ། །ལན་ནི་འབའ་ཞིག་ནི་ཞེས་བྱ་བ་སྟེ་ཚིག་ཕྲད་དང་འབྲེལ་པ་དང་འབྲེལ་པའིའོ། །གང་གི་ཚེ་ཁྱད་པར་དང་ཁྱད་པར་ཅན་དང་། བྱ་བ་དང་ལྷན་

ཅིག་ཚིག་བརྗོད་པར་གྱུར་པ་དེའི་ཚེ་ནི། ཚིག་ཕྲད་དང་འབྲེལ་པ་ཐ་དད་པར་འགྱུར་བ་ཡིན་ནོ། །ཡང་རྒྱུ་ཅིའི་ཕྱིར་འབྲེལ་བ་ཅན་ཐ་དད་པས་དོན་ཐ་དད་པར་འགྱུར་གྱི་གཞན་དུ་ནི་མ་ཡིན་ཞེ་ན། གཙོ་བོ་ནི་ཞེས་བྱ་བའོ། །འབྲེལ་པ་ཅན་གྱི་དོན་ཐ་དད་པ་ནི་གཙོ་བོ་ཡིན་གྱི་ཚིག་ཕྲད་ནི་མ་ཡིན་ནོ། །
གཙོ་བོར་གཞུང་འཛུགས་པ་ནི་འདི་ལྟར་ཞེས་བྱ་བའོ། །ཚིག་ཕྲད་ངེས་གཟུང་སྟོན་པར་བྱེད་པ་ཡིན་ན་དེ་ལ་མ་སྦྱར་བ་ལ་ཅི་ལྟར་ངེས་པར་རྟོགས་པར་འགྱུར་ཞེ་ན། ངེས་པར་གཟུང་བ་ནི་ཞེས་བྱ་བའོ། །འོ་ན་ཚིག་ཕྲད་སྦྱར་བ་དོན་མེད་དོ་ཞེ་ན། ཚིག་ཕྲད་ནི་ཞེས་བྱ་བ་སྨོས་སོ། །ཅིའི་ཕྱིར་ཞེ་ན། དེས་ནི་ཞེས་བྱ་བ་སྟེ་ཚིག་
ཕྲད་ཀྱིས་སོ། །དེ་ཉིད་ཅེས་བྱ་བ་ནི་ཁྱད་པར་ལ་སོགས་པའི་ཚིག་གིས་བརྗོད་པའི་ངེས་པར་གཟུང་བའོ། །ཚིག་ཕྲད་གསལ་བར་བྱེད་པ་ཉིད་ཡིན་པ་སྟོན་པ་ནི། འདི་ལྟར་ཞེས་བྱ་བའོ། །ཚིག་ཕྲད་མེད་ཀྱང་སྙིམ་པ་ལ་སོགས་པའི་བྱེད་པ་རྣམ་པར་གཅད་ནས་བུམ་པ་ཉིད་བྱེད་པར་རྟོགས་པ་ཡིན་ཏེ། དེ་ལྟ་མ་ཡིན་ན་
བྱེད་པའི་ཁྱད་པར་སྨོས་པ་དོན་མེད་པར་འགྱུར་རོ། །དེ་དག་ཀྱང་ཞེས་བྱ་བ་ནི་བྱེད་པ་ལ་སོགས་པའི་ཚིག་དག་གོ། །ཚིག་ཕྲད་རྗོད་བྱེད་ཡིན་པར་སྨྲ་བས་སྨྲས་པ་ནི་གལ་ཏེ་ཞེས་བྱ་བའོ། །དེ་དག་ཅེས་བྱ་བ་ནི་ལས་ལ་སོགས་པའི་ཚིག་རྣམས་ཐ་དད་པས། ངེས་པར་གཟུང་བའི་རང་བཞིན་གྱི་དོན་ཐ་དད་པ་ཉིད་དུ་ཐལ་
བར་འགྱུར་བའོ། །ཐལ་བ་ལས་ལྡོག་པ་བརྗོད་པ་ནི་ངེས་པར་གཟུང་བ་ནི་ཞེས་བྱ་བའོ། །གང་གི་ཕྱིར་དེ་ལྟ་ཡིན་པ་དེས་ན། རྗེས་སུ་འགྲོ་བ་སྟེ་ལས་ལ་སོགས་པའི་ཚིག་དང་རྗེས་སུ་འབྲེལ་པ་ཉིད་དང་། ངེས་པར་གཟུང་བས་ལྡོག་པ་སྟེ་ཐ་དད་པ་དག་ལས་ལ་སོགས་པའི་ཚིག་གི་དོན་ཐ་དད་པར་བརྟགས་པས་
ནད་ལ་སོགས་པའི་ཚིག་ནི་བརྗོད་པར་བྱ་བ་ནི་ཚིག་ཕྲད་ཀྱི་བརྗོད་བྱ་ཉིད་དོ་ཞེ་ན། གསལ་བར་བྱེད་པས་མ་ཡིན་ཏེ་ཞེས་སྨྲས་སོ། །དེ་མ་སྦྱར་ན་ཞེས་བྱ་བ་ནི་བུམ་པས་ཆུ་འོན་ཅིག་ཅེས་བྱ་བ་ལ་སོགས་པར་ཁོ་ནའི་ཚིག་སྦྱར་བ་ཉིད་ཡིན་ན་ངེས་པར་གཟུང་བར་ཡང་རྟོགས་སོ། །དེ་མེད་པར་རྟོགས་ཀྱང་དེའི་དོན་ཅི་སྟེ་མ་ཡིན་
སྙམ་ན་སྨྲས་པ་ངེས་པར་གཟུང་བའི་རང་བཞིན་གྱི་དོན་གང་ཞིག་ཁོ་ནའི་སྒྲ་གང་མེད་ཀྱང་རྟོགས་པའི་ངེས་པར་གཟུང་བ་དེ་ཅི་ལྟར་ཁོ་བོའི་ཚིག་དོན་ཡིན་ཏེ་བརྗོད་པར་བྱ་བ་ཡིན། འོ་ན་ཅི་ལྟར་ཞེས་བྱ་བ་གལ་ཏེ་ཁོ་ནའི་ཚིག་མེད་ཀྱང་བུམ་པ་ལ་སོགས་པ་སྒྲ་ཁོ་ན་ལས་ངེས་པར་གཟུང་བ་རྟོགས་པ་ཡིན་ན་དེའི་ཚེ་

ལས་དང་བྱེད་པ་ལ་སོགས་པ་ཐ་དད་པར་རྗོད་པར་བྱེད་པ་དག་ལས་ཅི་ལྟར་རྣམ་པར་གཅོད་པ་ཙམ་ཐ་མི་དད་པར་རྟོགས་པ། དོན་ཐ་དད་པར་བརྗོད་པ་རྣམས་ཀྱི་བརྗོད་པར་བྱ་བ་ནི་ཐ་མི་དད་པར་མི་འཐད་དོ། །འདི་ནི་ཁས་བླངས་ནས་བརྗོད་པ་ཡིན་ཏེ། འདི་ནི་འཐད་པ་ཡང་མ་ཡིན་ནོ་ཞེས་བརྗོད་པ་ནི། རྣམ་པར་
གཅོད་པ་ནི་ཞེས་བྱ་བའོ། །ཅིའི་ཕྱིར་ཞེ་ན། དེའི་ཞེས་སྨོས་སོ། །རྣམ་པར་གཅོད་པ་ཉིད་སྟོན་པར་བྱེད་པས། ངག་གང་ལ་འབྲས་བུ་ཡོད་པ་དེ་ནི་དེ་སྐད་ཅེས་བྱ་བའོ། །གཞན་རྟོགས་པའི་ཕྱིར་རབ་ཏུ་སྦྱར་བ་འདིས་ནི་གདོན་མི་ཟ་བར་མ་འབྲེལ་པ་ལ་སོགས་པ་འབའ་ཞིག་རྣམ་པར་གཅད་པར་བྱ་བ་ཡིན་ཏེ། དེ་
ལྟ་མ་ཡིན་ན་སྨྲ་བ་པོས་དེ་བརྗོད་པ་འབྲས་བུ་མེད་ལ་རྟོགས་པ་པོས་ཀྱང་མི་རྟོགས་པ་ཁོ་ནར་འགྱུར་རོ། །ཅི་ལྟར་འགའ་ཞིག་ཏུ་མཐོང་བ་ཡོད་དམ་སྙམ་ན། མཐོང་ངོ་ཞེས་བརྗོད་པ་ནི། དཔེར་ན་ཞེས་བྱ་བའོ། །རབ་ཏུ་གྲགས་པའི་ངག་གི་རང་བཞིན་བརྗོད་པ་ནི་ཕན་ཚུན་ཞེས་བྱ་བ་སྟེ། ཚིག་གི་ཚོགས་ཉིད་
ངག་ཡིན་གྱི། གདངས་ཞེས་བྱ་བ་ཐ་དད་པ་ནི་ཡོད་པ་མ་ཡིན་ནོ། །འདིར་ནི་འདི་འདྲ་བ་ཚིག་གི་ཚོགས་དག་ཏུ་མི་གཟུང་གི་འོན་ཀྱང་ཚིག་ཚོགས་པའི་རང་བཞིན་ངག་གིས་རྫོགས་པར་བྱེད་པ་སྒྲུབ་པར་བྱེད་པའི་ཚིག་ལ་ངག་ཅེས་བརྗོད་པ་ཡིན་ཏེ། འདིར་ནི་སྲིད་སྒྲུབ་ལ་སོགས་པའི་ཚིག་ཉིད་རྣམ་པར་གཅོད་
བྱེད་དུ་འདོད་ཀྱི་ཚིག་གི་ཚོགས་ནི་མ་ཡིན་ནོ། །དེ་དག་ཉིད་ཅེས་བྱ་བ་ནི་ཚིག་རྣམས་ཉིད་དོ། །གལ་ཏེ་ཚིག་ཚོགས་པའི་རང་བཞིན་ནམ་ཚིག་གི་རང་བཞིན་ལས་ཐ་དད་པ་གདངས་ཞེས་བྱ་བ་ངག་ཏུ་ཅི་སྟེ་མི་བཟུང་ཞེ་ན། དེ་ལས་ཞེས་བྱ་བ་སྟེ། དེ་དག་ལས་གཞན་གདངས་ཞེས་བྱ་བའི་ངག་ཀྱང་མེད་པའི་ཕྱིར་
འདིར་ཚིག་ཉིད་ངག་གི་སྒྲས་སྨོས་པ་ཡིན་ནོ། །གལ་ཏེ་ངག་གིས་འབྲས་བུ་རྣམ་པར་གཅོད་པ་ཡིན་ན་དེའི་ཚེ་བསྟན་པར་བྱ་བར་མི་འགྱུར་ཏེ། བསྟན་པར་བྱ་བ་ནི་འབྲས་བུ་ལས་གཞན་ཡིན་པའི་ཕྱིར་རོ་ཞེས་དོགས་ན་ངག་གང་གི་ཞེས་བྱ་བའོ། །དེ་ཉིད་ནི་འབྲས་བུ་ཉིད་དོ། །གལ་ཏེ་རྣམ་པར་གཅོད་པ་སྟོན་པ་ཡིན་
ནོ་དོན་མ་བསྟན་པའི་ཕྱིར་ཅི་ལྟར་དོན་བྱ་བ་དོན་དུ་གཉེར་བ་རྣམས་སྒྲ་ལས་འཇུག་སྙམ་ན། སྨྲས་པ་དོན་ནི་རྣམ་པར་གཅོད་པ་དེ་ཉིད་ཡིན་ནོ། །གལ་ཏེ་རྣམ་པར་གཅོད་པ་ནི་དངོས་པོ་མེད་པ་མ་ཡིན་ནམ་དེས་ན་ཅི་ལྟར་དེ་དོན་ཡིན་སྙམ་ན། རྣམ་པར་གཅོད་པ་ཡང་ཞེས་སྨོས་སོ། །རྣམ་པར་གཅད་པ་ནི་རིགས་མི་མཐུན་པ་

ལས་ལོག་པའོ། །འོ་ན་རྣམ་པར་གཅོད་པ་རྟོགས་པས་མ་ཡིན་ནོ་སྙམ་ན། དེས་ན་ཞེས་སྨོས་ཏེ་རྣམ་པར་གཅོད་པ་གཞན་མ་ཡིན་པས་ནའོ། །དེ་དང་ཞེས་བྱ་བ་རྣམ་པར་གཅད་བཞིན་པ་དང་། ཐ་མི་དད་པའི་ཕྱིར་རོ། །རྣམ་པར་གཅོད་པ་ཉིད་ཅེས་བྱ་བ་ནི་རྣམ་པར་གཅད་བཞིན་པ་ཉིད་དོ། །དངོས་
པོ་ཡིན་ལ་ཞེས་བྱ་བ་ནི་སྤྱིའོ། །རྣམ་པར་གཅོད་པ་ནི་དངོས་པོ་མེད་པའི་རང་བཞིན་དངོས་པོ་མེད་པའི་ཚད་མ་གཞན་གྱིས་རྟོགས་པར་བྱ་བ་སྒྲས་འཕེན་པ་ཡིན་ནོ། །རིགས་མི་མཐུན་པ་རྣམ་པར་གཅད་པ་དངོས་པོ་མེད་པའི་ཚད་མའི་ཡུལ་དུ་གྱུར་པ་གང་ཡིན་པ་དེ་ནི་རིགས་ལ་སོགས་པ་སྟོན་པར་བྱེད་པའི་སྒྲས་འཕེན་པ་
ཡིན་ནོ་ཞེས་བྱ་བའི་དོན་ཏོ། །དེ་ནི་རྣམ་པར་གཅོད་པའོ། །གཞན་རིགས་བརྗོད་པས་སོ། །གཞན་ནི་དངོས་པོ་མེད་པའོ། །གལ་ཏེ་འདི་དངོས་པོ་དང་འབྲེལ་པ་ཡིན་ན། དེ་ལྟ་ན་ནི་རིགས་ལ་སོགས་པའི་དངོས་པོ་བསྟན་པ་ནི། དངོས་པོ་མེད་པ་འཕེན་པར་འགྱུར་བ་ཞིག་ན་དེ་ནི་ཡོད་པ་མ་ཡིན་ནོ། །འབྲེལ་
པ་མེད་ཀྱང་འཕེན་ན་ནི་ཐམས་ཅད་ཐམས་ཅད་ཀྱིས་འཕེན་པར་འགྱུར་རོ་ཞེས་བརྗོད་པ་ནི་འབྲེལ་པ་མེད་ཀྱང་ཞེས་བྱ་བའོ། །འོ་ན་ཅི་ལྟར་འཕེན་སྙམ་ན། གལ་ཏེ་ཞེས་བྱ་བའོ། །ལྡོག་པ་ནི་རྣམ་པར་གཅོད་པའོ། །ལྡོག་པ་དང་ལྡན་པ་ལས་ཞེས་བྱ་བ་ལྡོག་པ་ཅན་རྣམ་པར་བཅད་བཞིན་པ་ལས་ཐ་དད་པ་མ་
ཡིན་ཏེ། ཐ་མི་དད་པ་ཡིན་ནའོ། །འདིས་ནི་དེའི་བདག་ཉིད་ཡིན་ན་འཕེན་པར་རིགས་པ་ཡིན་ན་ཁྱེད་ཀྱིས་ནི་དེའི་བདག་ཉིད་དུ་ཡང་ཁས་མ་བླངས་སོ་ཞེས་བསྟན་པ་ཡིན་ནོ། །དེའི་བདག་ཉིད་མེད་ཀྱང་འབྲེལ་པའི་ཕྱིར་འཕེན་པ་ཡིན་ནོ་ཞེས་དོགས་པ་བསུ་བ་ནི། ཐ་དད་ཀྱང་ཞེས་བྱ་བའོ། །དངོས་པོ་དང་དངོས་པོ་
མེད་པ་དེའི་བདག་ཉིད་མ་ཡིན་ཡང་། ཁྱད་པར་དང་ཁྱད་པར་ཅན་གྱི་དངོས་པོའི་མཚན་ཉིད་ཀྱི་འབྲེལ་པ་ལས་འཕེན་པ་ཡིན་ནོ་ཞེས་བྱ་བའི་དོན་ཏོ། །མ་ཡིན་ཏེ་ཞེས་བྱ་བ་ལ་སོགས་པའི་གྲུབ་པའི་མཐར་ནི་དོན་འདི་ཡིན་ཏེ། དངོས་པོ་དང་དངོས་པོ་མེད་པ་དེ་དག་དེའི་བདག་ཉིད་མ་ཡིན་ན་བུམ་པ་མེད་པ་ཤིང་གི་
རང་བཞིན་མ་ཡིན་པས་ན། བུམ་པ་དངོས་པོ་གཞན་ཤིང་ལས་ལྡོག་པ་མེད་པར་ཏེ། ཐ་མི་དད་པར་རྟོགས་པར་འགྱུར་རོ། །གང་ཞིག་བུམ་པ་མེད་པ་ལས་ལྡོག་པ་དེ་ནི་བུམ་པ་ཉིད་ཡིན་ཏེ་དཔེར་ན་མངོན་པར་འདོད་པའི་བུམ་པ་བཞིན་ནོ། །ཁྱོད་ཀྱིས་འདོད་པས་ཤིང་ཡང་བུམ་པ་མེད་པ་ལས་ལྡོག་པ་ཡིན་ནོ། །

དེའི་ཕྱིར་ཞེས་བྱ་བ་ནི་བུམ་པ་དང་ཤིང་དེའི་བདག་ཉིད་ཡིན་པའི་ཕྱིར་དངོས་པོ་མེད་པའི་ཚད་མ་གཞན་གྱིས་ལྡོག་པ་སྟེ་དངོས་པོ་མེད་པ་རྟོགས་པར་ཁས་ལེན་པ་ཡིན་ན་ཡང་། ལྡོག་པ་དེ་དང་གཅིག་ཏུ་གྱུར་པ་དེ་ཉིད་གཉིས་འབྲེལ་པ་མེད་པ་ཉིད་དུ་རྟོགས་པ་སྟེ་ངེས་པར་འགྱུར་རོ། །གང་ལས་སྙམ་ན་ལྡོག་པ་མེད་པ་དང་
ཞེས་བྱ་བའོ། །དངོས་པོ་ཕན་ཚུན་ཐ་དད་པ་མེད་པ་རྣམས་ནི་ཐ་དད་པ་དང་འབྲེལ་པར་རྟོགས་པར་ནུས་པ་མ་ཡིན་ནོ། །དེས་ན་གལ་ཏེ་བུམ་པ་དང་ཤིང་གཅིག་ཏུ་གྱུར་ན། དེའི་ཚེ་དེ་དག་དངོས་པོ་མེད་པ་དང་འབྲེལ་པར་རྟོགས་མི་ནུས་སོ་ཞེས་བྱ་བའི་དོན་ཏོ། །འོན་ཏེ་ཞེས་བྱ་བ་ལ་སོགས་པའི་དོན་ནི་འདི་ཡིན་ཏེ། གལ་
ཏེ་ཡང་དངོས་པོ་མེད་པ་ལས་དངོས་པོ་ཐ་དད་པས་ན་བུམ་པ་དང་ཤིང་དག་དེའི་བདག་ཉིད་ཡིན་པ་དེ་ལྟ་ན་ཡང་དངོས་པོ་མེད་པས་ཐ་དད་པ་དང་དངོས་པོ་ཚོགས་པ་ཡང་གཅིག་ལ་རག་ལས་པའི་འབྲེལ་པ་ཡོད་པ་ཉིད་དོ། །དེས་ན་ཐ་དད་པ་འབྲེལ་པ་རྟོགས་པར་མི་ནུས་སོ་ཞེས་ཅི་ལྟར་བརྗོད་སྙམ་པའོ། །ཐ་མི་དད་ཀྱང་
ཞེས་བྱ་བ་ནི་ཤིང་དང་བུམ་པ་ཐ་མི་དད་ཀྱང་། དངོས་པོ་དང་དངོས་པོ་མེད་པ་དག་ཚོགས་པ་གཅིག་ལ་རག་ལས་པའི་ཕྱིར་རོ། །ལྡོག་པ་དང་ཞེས་བྱ་བ་ནི་དངོས་པོ་མེད་པ་དང་ངོ་། །ལན་ནི་དེ་ནི་མི་འཐད་དོ་ཞེས་བྱ་བའོ། །དངོས་པོ་ལས་དངོས་པོ་མེད་པ་ཐ་དད་པར་ཁས་ལེན་ན། དངོས་པོ་མེད་པ་འདི་དངོས་པོ་དེའི་
འབྲེལ་ཟླ་མ་ཡིན་ནོ། །ཅིའི་ཕྱིར་ཞེ་ན། བུམ་པའི་དོན་ནི་རང་ཉིད་དེ་རང་གི་ངོ་བོས་རྗེས་སུ་འགྲོ་བའི་ཕྱིར་ཏེ་ཤིང་ལས་ཐ་མི་དད་པའི་ཕྱིར་རོ། །དངོས་པོ་མེད་པ་ཐ་དད་པ་ཡིན་ཡང་དངོས་པོ་གཉིས་ཐ་དད་པར་ཅི་སྟེ་མ་ཡིན་སྙམ་ན། དངོས་པོ་ལས་གཞན་པའི་དངོས་པོ་མེད་པ་ཡོད་ཀྱང་དེས་ནི། ཤིང་ལས་ཐ་མི་
དད་པའི་བུམ་པའི་ཐ་དད་པར་ནི་འགྱུར་བར་མི་འོས་སོ། །གལ་ཏེ་དངོས་པོ་དང་དངོས་པོ་མེད་པ་གཉིས་ཚོགས་པ་གཅིག་ལ་རག་ལས་པས་འབྲེལ་པའི་ཕྱིར་དངོས་པོ་དངོས་པོ་གཞན་ལས་དངོས་པོ་མེད་པས་འབྱེད་པར་འགྱུར་རོ་ཞེ་ན། རྭ་འདི་ནི་ཞེས་བྱ་བའོ། །དུས་མཉམ་དུ་བུམ་པའི་རྭ་དག་ནི་ཚོགས་པ་གཅིག་ལ་
རག་ལས་ཀྱང་ཁྱད་པར་དང་ཁྱད་པར་ཅན་གྱི་དངོས་པོ་མ་ཡིན་ནོ། །དེ་བཞིན་དུ་དངོས་པོ་དང་དངོས་པོ་མེད་པ་དག་ཀྱང་དེ་ལྟ་མ་ཡིན་ན་ཡང་དེར་མི་འགྱུར་རོ། །རྭ་གཉི་ག་ཡང་ངོ་། །རྣམ་པར་ཆད་པར་ནི་མི་འབྲེལ་པར་རོ། །རྭ་འདི་ནི་རྭ་འདི་ཡིན་ནོ་ཞེས་བྱ་བ་ནི་མ་ཡིན་ཏེ། འོ་ན་ཕན་ཚུན་ཕན་འདོགས་པས་ཁྱད་པར་དང་།

ཁྱད་པར་ཅན་གྱི་ངོ་བོ་ཡིན་ནོ་ཞེ་ན། ཕན་ཚུན་ཞེས་བྱ་བ་སྟེ་ཕན་འདོགས་པར་བྱེད་པ་ནི་རྒྱུ་ཉིད་ཀྱིས་སྔར་འགྱུར་བའི་ཕྱིར་རོ། །འོ་ན་གཞི་དང་གཞི་ཅན་གྱི་དངོས་པོ་དེའི་རྒྱུ་མཚན་ཡིན་ནོ་ཞེས་དོགས་པ་ནི། གཞི་དངོས་པོ་མེད་པ་དང་གཞི་ཅན་དངོས་པོ་སྟེ། དངོས་པོ་ནི་རིགས་མཐུན་པ་དང་
མི་མཐུན་པའི་དངོས་པོ་མེད་པ་ལ་གནས་པ་ཡིན་ནོ་ཞེས་བྱ་བའི་དོན་ཏོ། །གཞི་དང་གཞི་ཅན་གྱི་དངོས་པོ་མ་ཡིན་ནོ། །ཅིའི་ཕྱིར་ཞེ་ན། བླ་འོག་ཏུ་ཞེས་བྱ་བ་སྟེ་དངོས་པོ་མེད་པ་འོག་ཏུ་གནས་པའི་སྟེང་ན་དངོས་པོ་འདུག་པར་རྟོགས་པ་ནི་མེད་དོ། །ལྡོག་པའི་ཞེས་བྱ་བ་ལ་སོགས་པ་ནི་དོགས་པའོ། །ལན་ནི་གལ་ཏེ་
དེ་ལྟ་ན་གཞི་དང་གཞི་ཅན་གྱི་དངོས་པོ་ཡིན་ན་དེའི་ཚེ་འབྲེལ་པར་རྟོགས་པར་མི་འགྱུར་རོ། །ཅིའི་ཕྱིར་ཞེ་ན། གང་ཞིག་ཅེས་གསུངས་སོ། །འདི་ཉིད་ཁྱད་པར་དུ་རྟོགས་པ་ནི་བུམ་པའི་ནང་ན་གནས་པའི་སྣང་བའམ། མུན་པ་ལ་བུམ་པའི་ཞེས་བརྗོད་པའམ། སྣམ་བུའི་དབུས་ན་གནས་པའི་བུམ་པ་ལ་སྣམ་བུའི་
ཞེས་བརྗོད་པ་ནི་མེད་དོ། །དངོས་པོ་མེད་པའི་ཞེས་བྱ་བ་ལ་སོགས་པ་ནི་རྩོད་པའོ། །བུམ་པ་དང་སྣམ་བུ་དག་གི་དབུས་སུ་གནས་པ་ནི་གདོན་མི་ཟ་བར་དངོས་པོ་མེད་པའི་དབུས་སུ་གནས་པར་འགྱུར་རོ། །ཅིའི་ཕྱིར་ཞེ་ན། དངོས་པོ་མེད་པ་མེད་ན་ནི་ཞེས་བྱ་བའོ། །གང་གི་ཕྱིར་དངོས་པོ་དག་ནི། དབུས་
སུ་གནས་པ་ནི་དངོས་པོ་མེད་པ་ཡོད་པ་ཁོ་ནས་འགྱུར་བ་ཡིན་ན། ཅིའི་ཕྱིར་ཞེ་ན། དེ་ཞེས་བྱ་བ་བུམ་པ་ལ་སོགས་པ་ཁྱབ་པ་ཉིད་དུ་ཐལ་བའི་ཕྱིར་རོ། །བུམ་པ་ལ་སོགས་པས་སྣམ་བུ་ལ་སོགས་པ་ཁྱབ་པར་འགྱུར་རོ་ཞེས་བྱ་བའི་དོན་ཏོ། །དེས་ན་དངོས་པོ་ལས་ཐ་དད་པའི་དངོས་པོ་མེད་པ་ནི་ཡོད་པ་ཁོ་ན་ཡིན་
ལ། དེ་ཡང་དངོས་པོ་བསྟན་པའི་སྒོ་ནས་སྒྲས་འཕེན་པ་ཡིན་ནོ། །དེས་ན་དངོས་པོ་མེད་པ་ནི་དངོས་པོའི་རང་བཞིན་ཉིད་ཡིན་ནོ་ཞེས་གང་བརྗོད་པ་དང་། དངོས་པོ་ངེས་པ་ཉིད་དངོས་པོ་མེད་པའི་ངེས་པ་ཡིན་ནོ་ཞེས་བརྗོད་པ་དེ་ཡང་བསལ་བ་ཡིན་ནོ་ཞེས་བསམས་པའོ། །ལན་ནི་འོ་ན་ཞེས་བྱ་བའོ། །གལ་ཏེ་དངོས་
པོ་འགའ་ཞིག་དངོས་པོ་གཉིས་ཀྱི་དབུས་སུ་ཆུད་པ་དེ། དེའི་བར་ན་གནས་པའི་དངོས་པོ་མེད་པ་མེད་པར་མི་འཐད་ན། དེས་ན་དངོས་པོ་མེད་པའི་དབུས་སུ་ཡང་དངོས་པོ་གནས་པ་ཡིན་ན། དེ་ལྟ་ན་འོ་ན་དངོས་པོའི་དབུས་འབའ་ཞིག་ཏུ་མ་ཟད་ཀྱི། དངོས་པོ་མེད་པ་གཞན་མེད་ན། དངོས་པོ་མེད་པའི་དབུས་སུ་

ཡང་གནས་པར་མི་འགྱུར་གྱི། དངོས་པོ་མེད་པ་གཞན་ལ་ལྟོས་པ་ཁོ་ནས་གནས་པར་འགྱུར་རོ། །ཅིའི་ཕྱིར་ཞེ་ན། ཁྱབ་པར་ཐལ་བ་ཉིད་ཀྱི་ཕྱིར་རོ། །གལ་ཏེ་དངོས་པོ་མེད་པ་དང་པོ་ལ་ལྡོག་པའི་རྒྱུ་མཚན་དངོས་པོ་མེད་པ་གཉིས་པ་མ་བརྟགས་ན་དེའི་ཚེ་དངོས་པོ་དང་པོ་ལ་དངོས་པོ་དེའི་བདག་ཉིད་ཀྱིས་
ཁྱབ་པར་འགྱུར་རོ། །དེའི་ཕྱིར་དངོས་པོ་མེད་པ་དང་པོའི་དབུས་སུ་གནས་ན་ངེས་པར་དངོས་པོ་མེད་པ་གཞན་གྱི་བར་ན་གནས་པར་འགྱུར་ལ། དེ་ལྟ་ན་ཡང་དངོས་པོ་མེད་པ་གཞན་གྱི་ཡང་དབུས་ན་གནས་པར་འགྱུར་བས་ཐུག་པ་མེད་དོ། །འོན་ཏེ་ཡང་རང་གི་ངོ་བོ་ཁོ་ནས་དངོས་པོ་དངོས་པོ་མེད་པའི་དབུས་སུ་
གནས་པ་ཡིན་པ་དེས་ན་ཐུག་པ་མེད་པ་མ་ཡིན་ནོ་སྙམ་ན། དོན་དེ་ཞེས་བྱ་བའོ། །དངོས་པོ་མེད་པ་གཞན་ལ་གནས་པར་འགྱུར་རོ་ཞེས་བྱ་བའི་དོན་ཏོ། །དེ་ལྟ་ཡིན་དང་ཐུག་པ་མེད་པ་ཉིད་དུ་འགྱུར་རོ་ཞེས་བརྗོད་པ་ནི། གང་ཞིག་གནས་ན་ཞེས་བྱ་བའོ། །བུམ་པ་དང་སྣམ་བུ་དག་གི་བར་ན་གནས་པའི་ས་
ཕྱོགས་གང་ཡིན་པ་དེ་ནི་བུམ་པའི་གཞི་ཡིན་ལ། གཞི་དེ་ལས་ཐ་དད་པའི་དངོས་པོ་མེད་པ་གང་ཡིན་པ་མེད་པར་འགྱུར་རོ། །དཔེར་ན་སྣམ་བུའི་ཞེས་བྱ་བ་ནི། ཤིང་དང་བུམ་པ་དག་གི་བར་ན་གནས་པའི་སྣམ་བུའོ། །ཕྱོགས་ཀྱི་ཆོས་བརྗོད་པ་ནི། དངོས་པོ་མེད་པའི་ཞེས་བྱ་བའོ། །གལ་ཏེ་ཞེས་བྱ་བ་ལ་
སོགས་པ་ནི་རྩོད་པའོ། །རང་ཉིད་ཅེས་བྱ་བ་ནི་དངོས་པོ་མེད་པ་གཞན་ལ་མི་ལྟོས་པར་དངོས་པོ་དེའི་དབུས་ན་གནས་པའོ། །ཅིའི་ཕྱིར་ཞེ་ན། དངོས་པོ་མེད་པ་ཞེས་སྨོས་ཏེ། དེའི་ཞེས་བྱ་བ་དངོས་པོ་མེད་པའི་རང་བཞིན་ཡིན་པའི་ཕྱིར་རོ། །དངོས་པོ་ནི་དངོས་པོ་མེད་པ་ལས་ལྡོག་པ་ན། དངོས་པོ་མེད་པའི་
དབུས་སུ་གནས་པ་ཡིན་ལ། དངོས་པོ་མེད་པ་ལས་ལྡོག་པ་ཡང་དངོས་པོ་མེད་པ་གཞན་དང་ལྡན་པས་མ་ཡིན་ཏེ། དེ་ནི་རང་ཉིད་དངོས་པོ་མེད་པའི་རང་བཞིན་ཡིན་པའི་ཕྱིར་རོ། །འདི་ཉིད་བསྒྲུབ་པའི་དོན་དུ་དཔེ་བརྗོད་པ་ནི། ལ་ཆ་ཞེས་བྱ་བའོ། །དེ་ཡང་ནི་ལ་ཆ་ཡང་ངོ་། །ཅིའི་ཕྱིར་གཞན་ཡོད་པ་མ་
ཡིན་ཞེ་ན། རང་ཉིད་ཅེས་བྱ་བ་སྟེ། སྦྱོར་བ་བྱེད་པ་གཞན་མེད་པ་ཁོ་ནར་རོ། །དེ་ལྟ་བུ་ཞེས་བྱ་བ་ནི་སྦྱོར་བར་བྱེད་པ་ཉིད་དུའོ། །ལ་ཆ་ནི་རང་ཉིད་མེ་ལ་ལྟོས་ཏེ་ཤིང་སྦྱོར་བར་བྱེད་པར་འགྱུར་གྱི། དངོས་པོ་མེད་པ་ནི་རང་ཉིད་ཁྱབ་པའི་དངོས་པོའི་དབུས་སུ་གནས་སམ། མ་ཁྱབ་པའི་ཕྱོགས་དང་པོ་ལ་བརྗོད་

པ་ནི། དངོས་མེད་ཅེས་བྱ་བའོ། །གཉིས་པ་ལ་བརྗོད་པ་ནི་གལ་ཏེ་ཞེས་བྱ་བའོ། །དོན་མེད་འགྱུར་ཞེས་བྱ་བ་ནི་དངོས་པོས་མ་ཁྱབ་པ་ཉིད་ཀྱིས་བར་ན་གནས་པ་འགྲུབ་པའི་ཕྱིར་རོ། །གལ་ཏེ་རང་གི་ངོ་བོས་དངོས་པོ་མེད་པའི་བར་ན་གནས་ན། དེ་ཁོ་ན་བཞིན་དུ་དངོས་པོ་མེད་པའི་དབུས་སུ་ཡང་
ཅི་སྟེ་མི་གནས། དེ་ལྟ་ན་ཡང་དངོས་པོ་མེད་པའི་གཞལ་བྱ་སྨྲ་བ་ནི་དོན་མེད་དོ། །ཉེས་པ་ལྷག་པ་བརྗོད་པ་ནི་དངོས་པོ་མེད་པ་གང་ཞེས་བྱ་བ་སྟེ། དངོས་པོ་ཁྱབ་པ་ཉིད་ཡིན་ན་སྐྱོན་ཡིན་པ་འབའ་ཞིག་ཏུ་ནི་མ་ཟད་ཀྱི། འོན་ཀྱང་གལ་ཏེ་དངོས་པོ་མེད་པ་ཡང་ཁྱབ་པ་ཡིན་ན་དེའི་ཚེ་ཁམས་གསུམ་དངོས་པོ་མེད་པ་
ཉིད་ཀྱིས་ཁྱབ་པའི་ཕྱིར་དངོས་པོའི་དྲི་ཙམ་ཡང་ཡོད་པར་མི་འགྱུར་རོ། །དེ་མེད་ན་ཡང་། གང་གི་དབུས་སུ་སུ་ཞིག་གནས་པར་འགྱུར། །དངོས་མེད་ངོ་བོ་ཉིད་ཀྱིས་ནི། །ཞེས་བྱ་བ་ལ་སོགས་པ་འཆད་པ་ནི། དངོས་པོ་མེད་པ་ནི་ཞེས་བྱ་བའོ། །ཅིའི་ཕྱིར་ཞེ་ན། མ་ཁྱབ་པ་ཉིད་དང་ཞེས་བྱ་བ་སྟེ། མ་ཁྱབ་པ་ཉིད་མ་
ཁྱབ་པར་ཐལ་ལོ་ཞེས་བྱ་བའི་དོན་ཏོ། །གལ་ཏེ་དངོས་པོ་ཞེས་བྱ་བ་ལ་སོགས་པ་འཆད་པ་ནི། མ་ཁྱབ་པ་ཉིད་དུ་ཞེས་བྱ་བའོ། །དེ་ནི་ཞེས་བྱ་བ་ནི་མི་འདྲེ་བའོ། །གལ་ཏེ་ཞེས་བྱ་བ་ནི་རྩོད་པའོ། །གལ་ཏེ་དངོས་པོས་ཁྱབ་པ་མ་ཁྱབ་པར་བྱེད་ན། དེའི་ཚེ་བུམ་པ་ལ་སོགས་པའི་དངོས་པོ་དེ་ཁྱབ་པར་ཁས་བླངས་
པ་ན་འདྲེས་པར་འགྱུར་རོ། །ནམ་གྱི་ཚེ་ཞེ་ན། དངོས་པོ་མེད་པར་མ་འདྲེས་པར་མ་བྱས་པའི་སྔོན་རོལ་དུའོ། །དེ་ལྟ་མ་ཡིན་མོད་སྙམ་ན། ཕྱི་ནས་ཞེས་སྨོས་ཏེ། དངོས་པོ་ཁྱབ་པ་ཅི་ལྟར་གཞན་དུ་སྟེ་མ་ཁྱབ་པར་འགྱུར་ཅིའི་ཕྱིར་ཞེ་ན། ཁྱབ་པ་ནི་ཞེས་བྱ་བའོ། །སྔར་ཞེས་བྱ་བ་ནི་དངོས་པོ་མེད་པས་མ་འདྲེས་
པར་བྱས་པ་ལས་སྔར་རོ། །འོན་ཏེ་སྔར་ནི་དངོས་པོ་མ་ཁྱབ་པ་ཉིད་མེད་པ་ཉིད་དོ་ཞེ་ན་འོ་ན་ཞེས་བྱ་བ་ནི་ལན་ནོ། །དེ་ལྟ་བུ་ཞེས་བྱ་བ་ནི་གཞན་གྱི་རང་བཞིན་དང་མ་འདྲེས་པའོ། །གཞན་དུ་ཞེས་བྱ་བ་འདྲེས་པའི་རང་བཞིན་དུ་མ་མཐོང་བའི་ཕྱིར་རོ། །བུམ་པ་ལ་སོགས་པའི་དངོས་པོ་ནི་ཁྱབ་པ་མ་ཡིན་མ་ཁྱབ་པ་
ཡང་མ་ཡིན་པའོ། །དེ་མེད་པ་དང་ཞེས་བྱ་བ་ནི་ཁྱབ་པ་མེད་པ་དང་ངོ་། །དེ་སྐད་དུ་ཡང་། བྷ་ར་ཏི་ཧ་རིས་བཤད་པ་ཡིན་ནོ། །སྤྲོས་པའི་བདག་ཉིད་དངོས་རྣམས་ལ། །ཞེས་བྱ་བ་ནི། སྒྲའི་ཚངས་པའི་རང་བཞིན་དུ་ཡོངས་སུ་གྱུར་པ་རྣམས་ལ་ཤིང་ནི་ཤིང་མ་ཡིན་པ་ལས་ཐ་དད་དོ་ཞེས་བྱ་བའི་ཐ་སྙད་གང་

ཡིན་པ་དེ་ནི་གཞན་གྱི་ཁྱད་པར་ཅན་ཏེ། ཕན་ཚུན་མེད་པའི་ཁྱད་པར་ཅན་ནམ། ཤིང་ཉིད་ཀྱི་སྤྱིའི་ཁྱད་པར་ཅན་ཡིན་ལ། དེ་བ་དང་སེང་ལྡེང་ལ་སོགས་པ་ཐ་མི་དད་དོ་ཞེས་བྱ་བའི་ཐ་སྙད་ཀྱང་གཞན་གྱི་ཁྱད་པར་ཅན་དེ་ཉིད་ཤིང་གི་སྤྱིའི་ཁྱད་པར་ཅན་ཡིན་ནོ། །དེ་ལྟར་ཐ་དད་པ་དང་ཐ་མི་དད་པའི་མཚན་ཉིད་ཀྱི་སྤྲོས་པ་འདི་ནི་
རྟོགས་པ་ཡིན་ནོ། །གལ་ཏེ་གཉིས་དང་ཞེས་བྱ་བ་ལ་སོགས་པའི་གྲུབ་པའི་མཐའི་དོན་ནི་འདི་ཡིན་ཏེ། དཔེར་ན་རྣམ་པ་གཞན་དུ་རྟོགས་པའི་གོས་ལ་ལེ་བརྒན་ལ་སོགས་པའི་ཚོན་རྩི་དང་ལྡན་པས་ཚོན་དང་ལྡན་པ་ཡིན་ནོ་ཞེས་རྟོགས་པ་དེ་བཞིན་དུ། གལ་ཏེ་ཐ་དད་པ་དང་ཐ་མི་དད་པའི་ཁྱད་པར་དང་བྲལ་བར་ཆོས་
ཅན་གྱི་རང་བཞིན་གྱི་དངོས་པོ་དེ་འབའ་ཞིག་གཞན་དུ་རྟོགས་པ་ཡོད་ནའོ། །ཅི་འདྲ་བ་ཞིག་ཅེ་ན། གཉིས་དང་བྲལ་བར་ཏེ། ཐ་དད་པ་དང་ཐ་མི་དད་པ་དང་བྲལ་བར་རོ། །དེའི་ཚེ་གཞན་ཏེ་ཐ་དད་པ་དང་ཐ་མི་དད་པའི་ཁྱད་པར་གཉིས་དང་ལྡན་པས་ན། གང་ཞིག་ཐ་དད་པ་དང་ཐ་མི་དད་པའི་ཁྱད་པར་དང་བྲལ་བར་
རྟོགས་པའི་དངོས་པོ་སྟེ། ཆོས་ཅན་གྱི་རང་བཞིན་ཏེ་གཉིས་ལ་ཞེས་བྱ་བ་ཐ་དད་པ་དང་ཐ་མི་དད་པ་ལ་བརྟེན་ཅེས་སྨྲ་བར་རྟོགས་པར་འགྱུར་རོ། །འདི་ཡང་གཞན་གྱི་ལུགས་ལ་བརྟེན་ནས་བརྗོད་པ་ཡིན་ཏེ། གང་ཞིག་རྣམ་པ་གཞན་དུ་རྟོགས་པ་དེ་ནི་གཞན་དང་ལྡན་པས་རྣམ་པ་གཞན་དུ་འགྱུར་བ་མི་སྲིད་དེ། དེ་ལས་
གཞན་དང་ལྡན་པས་ནི་དེ་ལ་ཅི་ཡང་མི་བྱེད་པའི་ཕྱིར་རོ། །དེ་ནི་རྣམ་པ་གཞན་དུ་རྟོགས་པ་ཡང་མ་ཡིན་ན་དེ་ཅི་ལྟར་གཞན་དང་ལྡན་པས་གཉིས་ལ་བརྟེན་པ་ཞེས་བྱ་བར་རྟོགས། དེ་ཉིད་ཀྱི་ཕྱིར་དེ་ལྟ་མ་ཡིན་ན་ནི་ཞེས་གསུངས་ཏེ། འབའ་ཞིག་པར་རྟོགས་པ་མེད་ནའོ། །འདི་ལྟར་འགྱུར་ཏེ་ཞེས་བྱ་བ་འདིའི་དོན་
བརྗོད་པ་ནི། དངོས་དེ་ཞེས་བྱ་བ་ཆོས་ཅན་གྱི་རང་བཞིན་གྱི་དོན་དང་། ཆོས་ཅན་དེ་ལས་གཞན་ཐ་དད་པ་དང་ཐ་མི་དད་པ་གཉིས་དང་། ཆོས་ཅན་དང་ཐ་དད་པ་དང་ཐ་མི་དད་པ་དེ་རྣམས་ཀྱི་འབྲེལ་པ་སྟེ་དེ་ལྟར་དེ་གསུམ་རྣམ་པར་རྟོག་པ་དང་བཅས་པའམ་རྟོག་པ་མེད་པའི་ཤེས་པས་རྟོགས་པར་འགྱུར་རོ། །ཅི་ལྟར་
འདི་གསུམ་རང་གི་ངོ་བོས་རྟོགས་པར་འགྱུར་ཞེ་ན། གང་གི་ཕྱིར་ཁྱད་པར་རྣམས་ཁྱད་པར་ཅན་དང་ལྷན་ཅིག་མ་འདྲེས་པར་རོ། །འོན་ཏེ་རང་གི་ངོ་བོ་ཉིད་དུ་ནི་རྟོགས་པ་མ་ཡིན་ཏེ། འོན་ཀྱང་འདྲེས་པ་ཉིད་དུ་ཡིན་ནོ་སྙམ་དུ་དོགས་པ་ནི། གལ་ཏེ་ཞེས་བྱ་བའོ། །ལན་ནི་དེ་ལྟ་ན་ནི་ཞེས་བྱ་བ་སྟེ། མ་འདྲེས་པ་

རྣམས་ལ་འདྲེས་པ་ཉིད་དུ་རྟོགས་ན་ནི་འཁྲུལ་པ་ཁོ་ནར་འགྱུར་ཏེ། ཁྱད་པར་གྱི་རང་གི་ངོ་བོ་འཛིན་པའི་རྟོགས་པ་མེད་པར་འགྱུར་རོ་ཞེས་བྱ་བའི་དོན་ཏོ། །དེ་ལྟར་འགྱུར་མོད་སྙམ་ན། དེ་ལྟ་ན་ནི་ཞེས་སྨོས་ཏེ་འཁྲུལ་པར་གྱུར་ན། ཁྱད་པར་གྱི་མཚན་ཉིད་དུ་གྱུར་པའི་དོན་མེད་པ་སྟེ་ཡོད་པའི་ཐ་སྙད་
དུ་མི་འགྱུར་རོ། །འོ་ན་སྒྲའི་དོན་གང་ཞིག་ཡིན་སྙམ་ན་མ་རིག་པ་ཞེས་བྱ་བ་སྟེ་རྣམ་པར་རྟོག་པའི་གཟུགས་བརྙན་དེ་ཁོ་ན་ཙམ་ཞིག་ཤིང་ལ་སོགས་པའི་སྒྲ་རྣམས་ཀྱི་དོན་ཡིན་པར་འགྱུར་རོ། །ཡང་ན་འོ་ན་ཁྱད་པར་རྣམས་འདྲེས་པ་ཁོ་ན་ཡིན་ནོ་ཞེ་ན། དེ་ལྟ་ན་ནི་ཞེས་གསུངས་ཏེ་ཐ་མི་དད་པར་གྱུར་ན། ཤིང་
ལ་སོགས་པའི་ཚིག་རྣམས་ཀྱི་དོན་ཁྱད་པར་དུ་གྱུར་པ་དག་མེད་པའི་ཕྱིར་ཏེ། ཡོད་པར་མི་འགྱུར་རོ། །དེ་ལྟ་ན་ནི་ཁྱད་པར་དང་ལྡན་པའི་དངོས་པོ་ཡང་མེད་པར་འགྱུར་ཏེ། མེད་པར་མེད་པས་ན་མེ་དང་ཆུ་ལ་སོགས་པའི་ཁྱད་པར་ཅན་རྣམས་ཐ་དད་པའི་ཕྱིར་རོ། །དེས་ན་ཤིང་ལ་སོགས་པའི་ཚིག་གིས་དོན་ཐ་དད་པ་
དང་ཐ་མི་དད་པའི་མཚན་ཉིད་ནི་མི་རིགས་པ་ཙམ་དུ་འགྱུར་རོ། །གཞན་ཡང་ཤིང་གི་མཚན་ཉིད་ཀྱི་དངོས་པོ་སྔར་བུམ་པ་ལ་སོགས་པ་དག་དང་འདྲེས་པ་གང་ཡིན་པ་ཐ་དད་པ་དང་ཐ་མི་དད་པའི་ཁྱད་པར་གྱི་དབང་གིས་ཁྱད་པར་གཞན་དང་ལྡན་པའི་བུམ་པ་ལ་སོགས་པ་ལས་ཐ་དད་པ་དང་ལྡན་ལ་དུ་བ་
ལ་སོགས་པའི་གསལ་བ་ལས་ནི་ཐ་མི་དད་པ་དང་ལྡན་པ་དེ་ཅི་ཁྱད་པར་དང་ལྡན་པ་གཞན་ལས་ཟློག་པ་ན་ཅི་ལྟར་ཁྱད་པར་གྱི་དབང་གིས་ལྡོག་པ་དང་རང་གི་གསལ་བ་ལ་ནི་རྗེས་སུ་འཇུག་པ་དེ་ཁོ་ན་ལྟར་ཁྱད་པར་ཡང་ཁྱད་པར་གཞན་གྱི་དབང་གིས་ལྡོག་གམ་འོན་ཏེ་རང་གི་ངོ་བོ་ཁོ་ནས་ཡིན། གལ་ཏེ་ཁྱད་
པར་གཞན་གྱི་དབང་གིས་ལྡོག་པ་ཡིན་ན། དེའི་ཚེ་ཡང་ཁྱད་པར་གཞན་གྱི་དབང་གི་ཡིན་པའི་ཕྱིར་དེ་ལྟར་ཁྱད་པར་རྣམས་ཐུག་པ་མེད་པར་གསལ་བ་ཁོ་ནའོ། །དེས་ན་ཕྱོགས་གཉིས་པ་ལ་བརྗོད་པ་ནི། ཁྱད་པར་དང་ལྡན་པ་དེ་ཡང་ཞེས་བྱ་བའོ། །གལ་ཏེ་ཁྱད་པར་ནི་རང་ཉིད་ཁོ་ན་ཐ་དད་ཀྱི། ཁྱད་པར་དང་
ལྡན་པ་ནི་ཁྱད་པར་དང་ལྡན་པ་གཞན་ལས་ཁྱད་པར་གྱིས་ལྡོག་པ་ཡིན་པ་དེས་ན་ཁྱད་པར་རྟོགས་པ་དོན་མེད་པར་ཅི་ལྟར་འགྱུར་ཞེ་ན། ཁྱད་པར་ལས་ནི་ཞེས་བྱ་བའོ། །རང་གི་ངོ་བོས་ཁྱད་པར་ལས་ཁྱད་པར་ཅན་ཐ་དད་ཡོད་ན་དེའི་ཚེ་ཁོ་ནས་ཕྱུང་ལ་ཐ་དད་པ་དེ་ཉིད་ཅེས་སྦྱར་རོ། །བལྟས་པ་ལ་ཡང་ཞེས་

ཡང་གི་སྒྲས་ནི་ཁྱད་པར་སྡུད་པའོ། །ཁྱད་པར་ལ་ལྟོས་ཏེ་དེ་ཐ་དད་པ་འབའ་ཞིག་ཏུ་ནི་མ་ཟད་ཀྱི་འོན་ཀྱང་ཁྱད་པར་དང་ལྡན་པ་གཞན་ལ་ལྟོས་ན་ཡང་ཡིན་ནོ། །ཁྱད་པར་ལ་ལྟོས་ཏེ་རང་གི་ངོ་བོ་ཐ་དད་པ་ཉིད་གང་ཡིན་པ་དེ་ནི་ཁྱད་པར་ཅན་ལ་ལྟོས་ཏེ་ཐ་དད་པ་གང་ཡིན་པ་དེ་ལས་གཞན་ཉིད་ཡིན་ནོ་ཞེ་ན། མ་ཡིན་ཏེ་ཞེས་བྱ་བ་
ནི་ལན་ནོ། །ཐ་དད་གཞན་དུ་ཡང་ཞེས་བྱ་བ་ནི། ཁྱད་པར་ཅན་གཞན་ལ་ལྟོས་ཏེ་བརྟགས་པས་སོ། །ཐ་དད་པ་རྣམས་ལ་ཡང་ཐ་དད་པའི་དོགས་པ་བསུ་བ་ནི། ཁྱད་པར་འདི་ལས་ཀྱང་ཞེས་བྱ་བ་ནི་ཁྱད་པར་ཅན་གཞན་ལས་ཀྱང་ཐ་དད་པའོ་ཞེས་དེ་སྙམ་དུ་སེམས་པའི་བློ་སྐྱེ་བའི་ཕྱིར་ཐ་དད་པར་གྱུར་པ་རྣམས་ཀྱི་ཐ་དད་
པ་རྟོགས་པའོ། །གལ་ཏེ་ཐ་དད་པར་རྟོགས་པ་ལ་དོན་དམ་པ་ཉིད་བརྗོད་ཟིན་ཁོ་ན་མ་ཡིན་ནམ། ཡང་དེ་བརྟགས་པ་དེས་ཅི་ལྟར་ཞེས་དོགས་ན། ཚད་མས་ཞེས་བྱ་བའོ། །དོན་གང་ཞིག་ཚད་མས་གྲུབ་པ་དེ་ནི་དོན་མེད་ཀྱང་དོར་བའི་ཡུལ་ཉིད་དུ་བརྟགས་པར་ནུས་པ་མ་ཡིན་ཏེ། ཚད་མས་གྲུབ་པོ་ཞེ་ན་ནི་དེའི་ཚེ་
གཟུང་བར་བྱ་བ་ཁོ་ནའོ་ཞེས་བྱ་བའི་དོན་ཏོ། །གལ་ཏེ་ཞེས་བྱ་བ་ལ་སོགས་པ་ནི་ལན་ནོ། །གལ་ཏེ་དེ་ལྟར་ཐ་དད་པར་གྱུར་པ་རྣམས་ལ་ཐ་དད་པར་བརྟགས་ན། དེའི་ཚེ་ཁྱད་པར་དང་ལྡན་པ་གཞན་འབའ་ཞིག་ལས་ཐ་དད་པར་ནི་མ་ཟད་ཀྱི་འོན་ཀྱང་ཁྱད་པར་ལས་ཀྱང་ཐ་དད་པར་འགྱུར་རོ་ཞེས་བྱ་བ་དེ་ལྟ་བུར་
རྣམ་པར་རྟོག་པའི་ཕྱིར་ཐ་དད་པ་གཞན་ཁས་བླང་བར་བྱའོ། །ཁས་བླངས་པའི་ཁྱད་པར་དེ་ལས་ཀྱང་ཐ་དད་པ་གཞན་ཁས་བླང་བར་བྱ་བ་ཡིན་པའི་ཕྱིར་ཐུག་པ་མེད་དོ། །དེས་ན་ཁྱད་པར་ལས་ནི་ཁྱད་པར་ཅན་རང་གི་ངོ་བོས་ལྡོག་པ་ཡིན་ནོ་ཞེས་བྱ་བ་དེ་མེད་པར་འགྱུར་རོ་ཞེས་བརྗོད་པ་ནི་རང་གི་ངོ་བོས་ནི་ཞེས་བྱ་
བའོ། །གལ་ཏེ་ཐ་དད་པ་ཁྱད་པར་གཞན་ལ་ལྟོས་པར་སྨྲ་བ་ནི། རང་གི་ངོ་བོ་ཐ་དད་པ་མེད་པ་ཁོ་ནའོ་ཞེས་ཞེ་ལ་བཞག་ནས་སྨྲས་པ་ནི། ལེགས་པར་བྱོན་ཏེ་ཞེས་བྱ་བའོ། །གྲུབ་པའི་མཐར་ནི་དོན་འདི་ཡིན་ཏེ། ཁྱད་པར་དང་ལྡན་པའི་ངོ་བོས་གཞན་ལ་ཐ་དད་པ་ཡོད་པ་མ་ཡིན་ནོ། །རང་བཞིན་གཞན་གྱིས་ཀྱང་ཐ་དད་པར་
མི་འགྱུར་རོ། །ཅིའི་ཕྱིར་ཞེ་ན་འདི་ལྟར་ཐ་དད་པར་བྱ་བའི་ཁྱད་པར་ལས་ཐ་དད་པ་མེད་ན་ཐ་དད་པར་བྱེད་པ་དེ་ཡང་གཞན་ཡིན་པར་ཅི་ལྟར་འགྱུར་ཏེ་མི་འགྱུར་བ་ཁོ་ནའོ། །འཇིག་རྟེན་གསུམ་ལས་ཆོས་ཅན་ཐ་དད་པ་མེད་པ་ཡིན་ན། །ཐ་དད་པར་བྱེད་པ་ལས་ཀྱང་ཐ་མི་དད་པ་ཁོ་ནའོ། །དེ་ལྟ་ན་ཡང་ཐ་དད་པར་

བྱེད་པ་ཆོས་ཅན་གྱི་རང་བཞིན་དུ་གྱུར་པ་ན། གཞན་གྱི་རང་བཞིན་གྱི་སྒྲས་བརྗོད་པར་བྱ་བ་ཉིད་མེད་པར་འགྱུར་ཏེ། དེས་ན་གཞན་གྱི་རང་བཞིན་གྱི་ཐ་དད་པར་ཡིན་ནོ་ཞེས་ཅི་ལྟར་བརྗོད། འདི་ཉིད་བརྗོད་པ་ནི་རང་གི་ཞེས་བྱ་བའོ། །ཐ་དད་པ་མ་ཡིན་པ་ནི་ཆོས་ཅན་གྱི་རང་བཞིན་ནོ། །དེ་ཞེས་བྱ་བ་ནི་
གཞན་གྱི་རང་བཞིན་གྱི་ཁྱད་པར་རོ། །གཞན་མ་ཡིན་པ་ནི་ཆོས་ཅན་གྱི་རང་བཞིན་ཉིད་དོ། །ནམ་གྱི་ཚེ་ཞེ་ན། ཆོས་ཅན་ལས་ཐ་དད་པ་མ་ཡིན་ན་ནིའོ། །དེ་ཞེས་བྱ་བ་ནི་ཆོས་ཅན་ནོ། །གཞན་ཉིད་ཅེས་བྱ་བ་ནི་གཞན་དུ་གྱུར་པའི་ཐ་དད་པར་བྱེད་པའོ། །དེ་མེད་པའི་ཕྱིར་ཏེ་གཞན་དུ་གྱུར་པའི་ཐ་དད་པར་བྱེད་པ་
མེད་པའི་ཕྱིར་རོ། །དེ་ལས་ཞེས་བྱ་བ་ནི་ཐ་དད་པར་བྱེད་པའི་ཆོས་ལས་ཏེ། དེའི་དབང་གིས་ཁྱད་པར་ཅན་གཞན་ལས་ཆོས་ཅན་ཐ་དད་པར་ཅི་ལྟར་འགྱུར། ཐ་དད་པར་བྱེད་པ་ཅི་ལྟ་བུ་ཞིག་ཅེ་ན། ཆོས་ཅན་ལས་རང་གི་ངོ་བོས་ཐ་དད་པའོ། །ཆོས་ཅན་གྱི་རང་བཞིན་ཅི་ལྟ་བུ་ཞིག་ཅེ་ན། ཐ་དད་པར་བྱེད་པ་ཐ་དད་པ་
དེ་ལས་རང་བཞིན་ཐ་དད་པ་མེད་པ་ཡང་ངོ་། །ཡང་ནི་ལྷག་པའི་དོན་ཏོ། །གལ་ཏེ་ཐ་དད་པ་བྱེད་པ་དེ་ནི་རང་ཉིད་ཆོས་ཅན་ལས་རང་བཞིན་གྱིས་ཐ་དད་པ་ཡིན་ན། དེའི་ཚེ་ཆོས་ཅན་གཞན་ཡང་ཐ་དད་པར་བྱེད་པ་ལས་དེ་ལྟར་ཐ་དད་པར་འགྱུར་རོ། །ཐ་དད་པར་བྱེད་པ་ཆོས་ཅན་གྱི་རང་བཞིན་ལས་ཐ་དད་པ་ཡིན་ཡང་།
ཆོས་ཅན་གྱི་རང་བཞིན་ནོ། །དེ་ལས་ཐ་དད་པར་ཅི་ལྟར་འགྱུར་སྙམ་ན། གང་གི་ཕྱིར་ཐ་དད་པར་བྱེད་པ་ཆོས་ཅན་ལས་རིང་དུ་སོང་བ་སྟེ། ཆོས་ཅན་རྒྱང་རིང་དུ་སྤངས་པས་ནི་ཆོས་ཅན་གྱི་སླར་འོང་བར་ནུས་པ་མ་ཡིན་ནོ། །གལ་ཏེ་ཆོས་ཅན་གྱིས་ཆོས་སྤངས་ཏེ། ཆོས་ཅན་གྱི་རང་བཞིན་ལས་ཐ་དད་པ་ཉམས་སུ་མྱོང་
ན། དེའི་ཚེ་ཆོས་ཅན་ཡང་ཆོས་ཀྱི་གམ་དུ་སླར་འོང་བ་སྟེ། ཆོས་ལས་ཐ་མི་དད་པ་ཉམས་སུ་མྱོང་བར་བྱེད་ནུས་པར་ཅི་ལྟར་འགྱུར། ཐ་དད་པ་དང་ནི་ཐ་མི་དད་པར་འགྱུར་བར་མི་ནུས་སོ། །དེས་ན་གཅིག་རང་གི་ངོ་བོས་ཐ་དད་པ་ཡིན་ན། གཞན་ཡང་དེ་ལྟར་ཐ་དད་པ་ཁོ་ནར་འགྱུར་རོ། །གང་གི་ཚེ་ཞེས་བྱ་བ་ལ་
སོགས་པ་ནི་ཕྱེད་སྔ་མ་རྣམ་པར་འགྲེལ་པའོ། །དེ་ལས་ཞེས་བྱ་བ་ནི་ཆོས་ཅན་ལས་སོ། །དེ་ལས་གཞན་དག་ཅེས་བྱ་བ་ནི་ཆོས་ཏེ། རང་གི་ངོ་བོས་ཐ་དད་པར་ཤིན་དུ་གསལ་ལོ་ཞེས་ཁོང་ནས་དབྱུང་ངོ་། །གལ་ཏེ་རང་གི་ངོ་བོས་ཐ་དད་པ་ན་ཡང་། ཐ་དད་པར་བྱེད་པ་དོན་དང་ལྡན་པར་འགྱུར་རོ་ཞེ་ན། རང་

ཚོན་གྱིས་མ་བསྒྱུར་བར་ཞེས་བྱ་བའོ། །གལ་ཏེ་ཆོས་ཅན་ལས་ཐ་དད་པར་བྱེད་པ་ཐ་དད་ཀྱི། ཐ་དད་པར་བྱེད་པ་ལས་ནི་ཆོས་ཅན་གྱི་རང་བཞིན་མ་ཡིན་ནོ་ཞེས་དོགས་པ་སེལ་བས་ཕྱེད་ཕྱི་མ་འཆད་པ་ནི། ཐ་མི་དད་པ་ལས་ནི་ཞེས་བྱ་བ་སྟེ། ཐ་དད་པར་བྱེད་པ་དང་ཐ་མི་དད་པ་ཆོས་ཅན་གྱི་རང་བཞིན་ལས་ནི་ཐ་དད་
པར་བྱེད་པ་ཐ་དད་པར་འགྱུར་བར་རོ། །ཅི་ལྟར་ཐ་མི་དད་པ་ལས་ཐ་དད་པར་མི་འགྱུར་ཞེ་ན། ཐ་དད་པ་ཞེས་སྨོས་ཏེ་ཐ་དད་པར་བྱེད་པའོ། །ཆོས་ཅན་ཐ་དད་པ་མེད་པར་ཞེས་བྱ་བ་རང་ལས་ཐ་དད་པར་མ་བྱས་པར་རོ། །ཐ་དད་པར་ཞེས་བྱ་བ་ནི་ཆོས་ཅན་ལས་གཞན་དུ་གྱུར་པར་རོ། །གང་གི་ཕྱིར་དེ་ལྟར་གཉི་ག་
ཡང་གཅིག་ཉིད་ལས་ཐ་དད་པ་མེད་པ་དེའི་ཕྱིར། ཐ་དད་པ་གཅིག་རང་གི་ངོ་བོས་ཐ་དད་པར་གྱུར་པ་ན། ཆོས་ཅན་ཐ་དད་པ་དང་ལྡན་པ་ཡང་དེ་བཞིན་དུ་ཞེས་བྱ་བ་རང་གི་ངོ་བོས་ཐ་དད་པ་དེར་འགྱུར་རོ། །དེས་ན་དེ་ལྟར་ཁྱད་པར་དང་ཁྱད་པར་ཅན་བཞིན་དུ་ཆུ་དང་མེ་ལ་སོགས་པ་ཁྱད་པར་དང་ལྡན་པ་རྣམས་ཀྱི་གཞན་ལས་
ཁྱད་པར་གྱི་ཐ་དད་པ་མ་ཡིན་ནོ། །ཁྱད་པར་ནི་རང་གི་ངོ་བོས་ཐ་མི་དད་པ་རྣམས་ཀྱི་ཐ་དད་པ་བྱེད་པ་ནི་མ་ཡིན་ཏེ་ནུས་པ་མེད་པའི་ཕྱིར་རོ། །ཐ་དད་པ་རྣམས་ལ་ཡང་ཁྱད་པར་གྱིས་ཅི་ཞིག་བྱ་སྟེ། རང་ཉིད་ཁོ་ནས་ཐ་དད་པའི་ཕྱིར་ན་དོན་མེད་པས་སོ། །དེའི་ཕྱིར་ཞེས་བྱ་བ་ནི་གཞན་ལས་ཁྱད་པར་གྱི་ཐ་དད་པ་ཡོད་པ་མ་ཡིན་
པའི་ཕྱིར་རོ། །ཅི་སྐད་དུ་རྣམ་པར་གཅད་བཞིན་པ་ལས་མ་གཏོགས་པའི་རྣམ་པར་གཅོད་པ་ནི་མེད་དོ་ཞེས་བརྗོད་པའི་དེའི་མཇུག་སྡུད་པ་ནི། ཐ་དད་པ་དང་དོན་གྱི་རང་བཞིན་ཞེས་བྱ་བའོ། །ལྡོག་པ་དང་ལྡོག་པ་དང་ལྡན་པ་དག་ཐ་མི་དད་དོ་ཞེས་བྱ་བའི་དོན་ཏོ། །སྐབས་ཀྱི་མཇུག་སྡུད་པའོ། །དེས་ན་ཐ་དད་པ་
ཉིད་ཅེས་བྱ་བ་སྟེ་གྲུབ་པ་ནི་མ་ཡིན་པའོ། །འདི་ཉིད་བརྗོད་པ་ནི་དེ་ཉིད་ཅེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་ཐ་དད་པ་བརྗོད་བྱ་མ་ཡིན་ནའོ། །ཐ་དད་པ་སྤངས་པ་ལ་ནི་སྒྲུབ་པ་ཡང་བརྗོད་པར་མི་འགྱུར་རོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། འཆོལ་པ་སྟེ་འདྲེས་པའི་རང་བཞིན་ནི་དངོས་པོ་ཉིད་དུ་མི་
རུང་བའི་ཕྱིར་རོ། །འདྲེས་ན་དངོས་པོར་ཅི་ལྟར་མི་རུང་ཞེ་ན། དངོས་པོ་ནི་ཞེས་བྱ་བའོ། །གལ་ཏེ་དེ་ལྟ་ཡིན་དུ་ཆུག་མོད་དེ་ལྟ་ན་ཡང་ཅི་ཞིག་གྲུབ་སྙམ་ན། ཐམས་ཅད་འདྲེས་ན་ཞེས་བྱ་བའོ། །དེས་འཆོལ་ན་དངོས་པོར་མི་རུང་བའི་ཕྱིར་རྣམ་པར་གཅོད་པ་མ་བརྗོད་ན་དངོས་པོ་བརྗོད་པ་ཉིད་དུ་མི་འགྱུར་རོ། །

དེ་བས་ན་དེ་ཉིད་ལྷུར་བརྗོད་པར་བྱ་བ་ཡིན་ནོ། །གལ་ཏེ་རྣམ་པར་གཅོད་པ་ཡང་ཅི་ལྟར་བརྗོད་བྱ་ཡིན་ཏེ། ཚད་མས་མ་རྟོགས་པས་ན། དེ་ལ་བརྡ་མེད་པའི་ཕྱིར་རོ་ཞེ་ན། དོན་གཞན་ལས་ཞེས་བྱ་བའོ། །དེ་ལ་ཞེས་བྱ་བ་ནི་མངོན་སུམ་དུ་གྱུར་པའི་རྣམ་པར་གཅོད་པ་ལའོ། །རྣམ་པར་གཅོད་
པ་ཉིད་ཅེས་བྱ་བ་ནི་རྣམ་པར་གཅད་བཞིན་པའོ། །དེའི་ཕྱིར་དེ་ཉིད་བརྗོད་པར་བྱ་བ་ཡིན་ཞེ་ན། ལོག་པ་ནི་ཞེས་བྱ་བའོ། །ཐ་དད་པ་དང་དོན་གྱི་ངོ་བོ་དག་དེའི་བདག་ཉིད་ཡིན་ན་ཡང་ཅི་ལྟར་ཐ་དད་པ་མ་བརྗོད་ན། དངོས་པོ་མ་བརྗོད་པ་དེ་བཞིན་དུ་དངོས་པོ་མ་བརྗོད་ན་ཡང་ཐ་དད་པར་བརྗོད་པར་མི་འགྱུར་རོ་ཞེས་དོགས་
པ་བསུ་བ་ནི་གལ་ཏེ་ཞེས་བྱ་བའོ། །ཐ་དད་ན་ནི་དེ་ཉིད་སྤྱི་ཡིན་ཏེ། དེས་ན་སྤྱི་ཉིད་བརྗོད་པར་བྱ་བ་ཡིན་ནོ་དེའི་ཕྱིར་རྣམ་པར་གཅོད་པ་ནི་ངག་གི་འབྲས་བུ་མ་ཡིན་ནོ་ཞེས་དོགས་པ་ནི། འོན་ཏེ་ཞེས་བྱ་བའོ། །དེ་ལྟ་ན་ཡང་ཞེས་བྱ་བ་ནི་རིགས་ཉིད་དུ་གྱུར་པ་ནའོ། །བུམ་པ་དེ་ཉིད་རིགས་མི་མཐུན་པ་ལས་རང་གི་ངོ་
བོས་ལྡོག་པར་བརྗོད་པ་ཡིན་ནོ། །དེ་རང་གི་ངོ་བོས་མ་ལོག་པ་ནི། སྤྱི་དང་ལྡན་པས་ལྡོག་པར་འགྱུར་བ་ནི་མ་ཡིན་ནོ། །ཅིའི་ཕྱིར་དེ་ལྟ་མ་ཡིན་ཞེ་ན། འདི་ནི་ཞེས་གསུངས་སོ། །གལ་ཏེ་མ་ལོག་པ་དེ་དང་ལྡན་པས་ལྡོག་པར་འགྱུར་བ་མ་ཡིན་ན། འོ་ན་ཅི་ལྟར་འགྱུར་སྙམ་དུ་དོགས་ན། སྤྱི་དང་ཞེས་བྱ་བའོ། །མཚུངས་
པ་ཉིད་དུ་འགྱུར་གྱི་ལྡོག་པ་ནི་མ་ཡིན་ནོ་ཞེས་བྱ་བའི་དོན་ཏེ། འདི་ཡང་ཁས་བླངས་ནས་བརྗོད་པ་ཡིན་ནོ་ཞེས་གསུངས་པ་ནི། མཚུངས་པ་དེར་ཡང་འགྱུར་བ་མ་ཡིན་ནོ། །ཅིའི་ཕྱིར་ཞེ་ན། སྤྱི་གཞན་དང་ལྡན་པ་མི་མཚུངས་པ་ནི་མཚུངས་པ་ཉིད་དུ་འཐད་པ་མ་ཡིན་ནོ། །རང་གི་ངོ་བོ་ཉིད་ཀྱིས་མཚུངས་པ་དང་མི་
མཚུངས་པ་ཡིན་ན་ནི་སྤྱི་དོན་མེད་པ་དང་ནུས་པ་མེད་པའི་ཉེས་པས་ཟིན་པར་འགྱུར་རོ་ཞེས་བརྗོད་པ་ནི། གལ་ཏེ་ཞེས་བྱ་བའོ། །འདི་ཉིད་བརྗོད་པ་ནི་གལ་ཏེ་ཞེས་བྱ་བའོ། །ཅི་ལྟར་སྤྱི་དང་ལྡན་པར་འགྱུར་ཞེ་ན། སྤྱི་དེ་ནི་མཚུངས་པ་ལས་ཐ་དད་པ་རང་གི་རང་བཞིན་དུའོ། །འདི་ཉིད་གསལ་བར་བྱེད་པ་ནི། ཐ་དད་
པར་ཞེས་བྱ་བ་ནི། སྤྱི་དང་དེ་དང་ལྡན་པ་དག་གོ། །ཐ་མི་དད་པར་ཞེས་བྱ་བ་ནི་རྗེས་སུ་སོང་བ་གཅིག་གི་རང་བཞིན་དུ་སྣང་བའོ། །གལ་ཏེ་ཐ་དད་པར་མ་བཟུང་ན་ནི་ཞེས་བྱ་བ་ནི་སྤྱི་དང་ཁྱད་པར་དག་ཕན་ཚུན་ནང་དུ་འདུས་པར་གཟུང་བའི་ཕྱིར་རོ། །གསལ་བའི་རང་བཞིན་ལས་ཐ་དད་པ་དང་ཐ་མི་དད་པ་དག་ཏུ་

སྣང་བའི་ཕྱིར་སྤྱི་དང་རང་བཞིན་གཉི་ག་ཡིན་ནོ་ཞེས་དོགས་པ་ནི། འོན་ཏེ་ཞེས་བྱ་བའོ། །ཐ་དད་པར་སྣང་ན་གསལ་བའི་རང་བཞིན་ལ་ཐ་མི་དད་པར་མི་འགྱུར་རོ་ཞེས་ལན་བརྗོད་པ་ནི་གལ་ཏེ་ཐ་དད་པར་ཞེས་བྱ་བའོ། །དེས་ན་ཞེས་བྱ་བ་ནི་ཐ་དད་པར་སྣང་བས་ནའོ། །གསལ་བའི་རང་བཞིན་སྤྱི་གཞན་
དང་ལྡན་པར་འགྱུར་ཏེ། དེས་ན་གསལ་བའི་རང་བཞིན་ལས་ཐ་མི་དད་པར་མི་འགྱུར་རོ་ཞེས་བྱ་བའི་དོན་ཏོ། །ཐ་མི་དད་པར་སྣང་ན་ཡང་ཐ་དད་པར་མི་འགྱུར་བ་ཁོ་ནའོ་ཞེས་བརྗོད་པ་ནི། ཐ་དད་མེད་པར་ཞེས་བྱའོ། །དེས་ན་ཞེས་བྱ་བ་ནི་ཐ་མི་དད་པར་སྣང་བས་ན། གསལ་བའི་རང་བཞིན་དེ་ནི་སྤྱིར་འགྱུར་ཏེ།
གསལ་བ་ཐ་དད་པར་མི་འགྱུར་རོ་ཞེས་བྱ་བའི་དོན་ཏོ། །དེས་ན་སྤྱི་རང་བཞིན་གཉིས་པར་ཅི་ལྟར་འགྱུར། འདི་ཉིད་བརྗོད་པར་ནི། གཅིག་ལ་ནི་ཞེས་བྱ་བའོ། །གཅིག་ཉིད་ལ་ཐ་དད་པ་དང་མི་དད་པའི་རང་བཞིན་གཉིས་ཐ་དད་པ་ཁོ་ནའོ་ཞེས་དོགས་པ་བསུ་བ་ནི། གལ་ཏེ་ཞེས་བྱ་བའོ། །རང་བཞིན་
གཉིས་པར་འགྱུར་བ་མ་ཡིན་ཞེས་བྱ་བ་ནི་རང་བཞིན་གང་གིས་ཐ་དད་པ་དེ་ནི་རང་བཞིན་གཅིག་ཡིན་ལ། གང་གིས་ཐ་མི་དད་པ་དེ་ཡང་གཞན་ཡིན་ནོ་ཞེས་བྱ་བ་དེ་ལྟར་སྤྱི་རང་བཞིན་གཉིས་པ་མ་ཡིན་པ་ཁོ་ནའོ། །ཅིའི་ཕྱིར་ཞེ་ན། ཕན་ཚུན་ཞེས་བྱ་བའོ། །དེ་ལྟ་ཡིན་ན་ཅི་སྐྱོན་སྙམ་ན། དེ་ལ་ཞེས་བྱ་བ་སྟེ་
རང་བཞིན་དེ་གཉིས་ལའོ། །རང་བཞིན་གཉིས་སུ་གྱུར་ན་སྤྱིའི་རང་བཞིན་ཉིད་ཀྱང་མ་ཡིན་ནོ་ཞེས་བརྗོད་པ་ནི་སྤྱི་ཞེས་བྱ་བའོ། །གསལ་བ་ལ་ལྟོས་ཏེ་རང་བཞིན་གཉིས་པོ་སྤྱིའི་རང་བཞིན་ཉིད་ཡིན་ནོ་ཞེ་ན། རང་བཞིན་ཞེས་བྱ་བའོ། །འདི་ནི་རང་བཞིན་གཉིས་པོའོ། །སྤྱིའི་རང་བཞིན་ཐ་དད་ཕྱིར། །ཞེས་བྱ་
བ་རྣམ་པར་འགྲེལ་པ་ནི། གལ་ཏེ་ཞེས་བྱ་བའོ་གལ་ཏེ་རང་བཞིན་ཐ་དད་ཀྱང་ཅི་ལྟར་གསལ་བའི་རང་བཞིན་དུ་འགྱུར་སྙམ་ན། ཐ་དད་པའི་ཞེས་བྱ་བའོ། །དོགས་པ་ནི་གསལ་བ་ཉིད་ཅེས་བྱ་བ་སྟེ། ཐ་དད་པའི་ཕྱིར་ནི་མ་ཡིན་ནོ་ཞེས་བྱ་བའོ། །ལན་ནི་གསལ་བ་ཉིད་ཅེས་བྱ་བའོ། །དེ་དང་ཞེས་བྱ་བ་ནི་གསལ་བ་ཉིད་
ཀྱིས་སྤྱི་དང་ངོ་། །རང་བཞིན་གཉིས་ནི་མཚུངས་པ་ཉིད་དུ་འགྱུར་གྱི་གསལ་བའི་རང་བཞིན་ནི་མ་ཡིན་ལ། དེ་ནི་སྤྱིར་ཡང་འཐད་པ་མ་ཡིན་ནོ་ཞེས་བརྗོད་པ་ནི། དེ་ནི་ཞེས་བྱ་བ་སྟེ་གསལ་བ་ཉིད་ཀྱི་སྤྱིའོ། །གསལ་བ་ལས་ཞེས་བྱ་བ་ནི་རང་བཞིན་གཉིས་ཀྱི་མཚན་ཉིད་ལས་སོ། །འོན་ཏེ་ཁྱབ་པ་ཉིད་དུ་གྲུབ་

པའི་དོན་དུ་ཐ་དད་པར་རྟོགས་པ་ཡིན་ནོ་སྙམ་ན། རང་བཞིན་གཉིས་སུ་ཞེས་བྱ་བའོ། །ཐལ་བར་འགྱུར་ཞེས་བྱ་བ་སྟེ་དེ་ལ་ཡང་སྤྱི་གཞན་ཡོད་པར་འག