Luận tạng Tây Tạng (Tengyur) — Tập 168

ུན་སུམ་ཚོགས་པའོ། །ཁང་པ་ཆེན་པོའི་སྟེང་ནས་ཞེས་བྱ་བའི་ཚིགས་བཅད་འདི་ནི་སྐྱེ་བོ་སྦྱིན་པ་པོའི་སྒྲུབ་པ་ཕུན་སུམ་ཚོགས་པའི་དབང་དུ་བྱས་པའོ། །སྙིང་སྟོབས་དང་ལྡན་པ་དང་། བསོད་ནམས་བསགས་པའི་ཁྱད་པར་འདི་གཉིས་
ཀྱིས་ནི་རྒྱུ་ཕུན་སུམ་ཚོགས་པ་བསྟན་ཏེ། ཡེ་ཤེས་དང་། བསོད་ནམས་ཀྱི་ཚོགས་ཀྱི་རྒྱུ་ཡོངས་སུ་གཟུང་བའི་ཕྱིར། བསྲུང་བ་ལེགས་པར་བྱས་པས་ཞེས་བྱ་བ་ཡིན་ཏེ། ཡོངས་སུ་གཟུང་བའི་ཕྱིར་རེ། །རབ་ཏུ་ཞི་བ་ཞེས་བྱ་བ་ནི་ལུས་དང་ངག་གི་རབ་ཏུ་ཞི་བའོ། །དུལ་བ་ནི་བྱ་བ་མ་ཡིན་པ་
ལས་ལྡོག་པའོ། །ཡིད་གཞུངས་པའི་ཡོན་ཏན་ནི་ཤེས་རབ་ཀྱི་ཡོན་ཏན་ཏེ། སྲི་ཞུ་ཆེ་བ་དང་། མཉན་པ་ཟིན་པ་དང་། འཛིན་པ་དང་། རྣམ་པར་ཤེས་པ་དང་། རྟོག་པ་དང་། སེལ་ནུས་པས་མངོན་པར་འཇུག་པའི་མཚན་ཉིད་དོ། །རབ་ཏུ་ཞི་བ་དང་། དུལ་བ་དང་། ཤེས་རབ་ཀྱི་ཡོན་ཏན་
དེ་དག་དང་ལྡན་པ་ནི་རབ་ཏུ་ཞི་བ་དང་། དུལ་བ་དང་། ཤེས་རབ་ཀྱི་ཡོན་ཏན་དང་ལྡན་པའོ། །མ་དྲིས་པ་ནི་མ་ཤེས་པའོ། །གཉེན་དུ་མ་འབྲེལ་པའི་ཞེས་བྱ་བ་ནི་གང་དེ་ལ་རིགས་ལ་སོགས་པའི་མཚན་ཉིད་ཀྱིས་ན་གཉེན་དུ་འབྲེལ་བ་སྟེ། གཉེན་དུ་འབྲེལ་པ་དེ་མེད་པའི་ཕྱིར་རོ། །དམ་པའི་རིང་

དུ་གནས་གྱུར་ཀྱང་། །ཞེས་བྱ་བ་ནི་རབ་ཏུ་བསྐལ་པའོ། །རྒྱུ་གསུམ་གྱིས་ནི་བྱམས་པར་འགྱུར་ཏེ། ཡོངས་སུ་འདྲིས་པ་དང་། གཉེན་དུ་འབྲེལ་བ་དང་། ཉེ་བ་ན་གནས་པ་སྟེ། གསུམ་པོ་འདིའི་དབང་དུ་བྱས་པའོ། །སྡུག་པ་དང་བྲལ་བས་སྡུག་བསྔལ་ཉིད་ཀྱི་
ཕྱིར་ཏེ། དར་བ་ཞེས་བྱ་བ་ནི་བདག་གི་ཡོ་བྱད་ཕུན་སུམ་ཚོགས་པའོ། །རྒུད་པ་ཞེས་བྱ་བ་ནི་འཇིག་ཅིང་གཞན་དུ་འགྱུར་བས་དེ་མི་རྟག་པའོ། །བདག་ལ་ཕན་པ་བགྱི་བར་འཚལ། །ཞེས་བྱ་བ་ནི་དེར་གནས་ནའོ། །ཐུགས་དཔག་མཛད་དུ་གསོལ་ཞེས་བྱ་བ་ནི་རྗེས་སུ་གཟུང་བར་གསོལ་བའོ། །གླང་
པོ་ཆེ་མདའ་དུག་ཅན་གྱིས་ཚབས་ཆེར་ཕོག་པ་བཞིན་དུ་དེའི་མྱ་ངན་གྱིས་སེམས་གདུངས་པ་དང་། རྒྱ་མཚོ་རབ་ཏུ་ཟབ་པ་རླུང་གིས་སློངས་པ་བཞིན་དུ་འཁམས་ཏེ་འདར་བར་གྱུར་པ་ཞེས་དེ་ལྟར་སྦྱར་རོ། །བདག་ཉིད་བུང་བར་བྱེད་པ་ཞེས་བྱ་བའི་ཚིགས་བཅད་ཕྱེད་པོ་འདིས་ནི་སུས་དེ་ལྟར་གནོད་པ་བྱས་
ཞེས་པའོ། །སུ་ཡིས་ང་ཡི་མི་ཞེས་བྱ་བ་ཕྱེད་འོག་མས་ནི། སུ་ཞིག་གསད་པར་བྱ་ཞེས་བསྟན་པའོ། །དང་པོ་མངལ་དུ་ཞུགས་པའི་ནུབ་མོ་ནས། །ཞེས་བྱ་བའི་ཚིགས་བཅད་འདིས་ནི། སྐད་ཅིག་མས་འཇིག་ཅིང་མི་རྟག་པ་ཉིད་དུ་བསྟན་ཏོ། །ཡང་ན་སྐྱེ་བ་དང་གནས་པ་བསྟན་ཏོ། །དང་པོ་
མངལ་དུ་ཞུགས་པའི་ནུབ་མོ་ཞེས་བྱ་བ་འདིས་ནི་སྐྱེ་བའོ། །དེ་ནས་བརྩམས་ཏེ་གཞན་དུ་མ་གོལ་བར། །ཞེས་བྱ་བ་འདིས་ནི་གནས་པ་བསྟན་ཏོ། །གནས་པ་ཞེས་བྱ་བ་ནི་སྐྱེ་བའི་གནས་ཏེ། སྐད་ཅིག་མའི་རེ་རེས་འཆི་བདག་གི་དྲུང་དུ་ཉེ་བར་འགྲོ་བའོ། །ཐབས་དང་རབ་ཏུ་ལྡན་པ་ཞེས་བྱ་བའི་
ཚིགས་བཅད་འདིས་ནི། རྒ་བ་དང་། མི་རྟག་པ་ཉིད་བསྟན་ཏེ། ཐབས་དང་ལྡན་ཡང་སུ་ཡང་ཐར་པ་མེད། །ཅེས་བྱ་བས་ནི་མཛངས་པས་ཀྱང་དགའ་བ་དང་། འཆི་བ་བཟློག་པར་མི་ནུས་པ་ཉིད་དུ་བསྟན་ཏོ། །མཐུ་ཡོད་ཀྱང་ཞེས་བྱ་བ་འདིས་ནི་གཟུགས་ཀྱི་ལུས་ཀྱི་སྟོབས་ཀྱིས་བཟློག་པར་
མི་ནུས་པ་ཉིད་དུ་བསྟན་ཏོ། །དེ་ལྟར་ཚིགས་བཅད་དེ་གཉིས་ཀྱིས་ནི་འདུས་བྱས་ཀྱི་མཚན་ཉིད་བཞི་དང་ལྡན་པའི་ཕྱིར། འདུས་བྱས་རྣམས་ཡོངས་སུ་དོར་བ་ཉིད་དུ་སྟོན་ཏོ། །འདུས་བྱས་ཀྱི་མཚན་ཉིད་བཞི་ནི་སྐྱེ་བ་དང་། གནས་པ་དང་། རྒ་བ་དང་མི་རྟག་པའོ། །མི་རྟ་གླང་ཆེན་ཤིང་རྟ་

མང་པོ་ཞེས་བྱ་བ་ནས་བརྩམས་པའི་ཚིགས་བཅད་ཐམས་ཅད་ཀྱིས་ནི་འཆི་བ་མི་ཟློགས་པ་ཉིད་ལས་བརྩམས་ནས་སོ། །ཚིགས་བཅད་འདི་དག་གི་དོན་ནི་འདི་ཡིན་ཏེ། མི་དང་། དུད་འགྲོ་དང་། ལྷ་དང་། ལྷ་མ་ཡིན་གྱི་འགྲོ་བ་ལ་གནས་པས་ཀྱང་འཆི་བ་ལས་མི་ཟློགས་པ་ཉིད་
དུ་བསྟན་ཏོ། །དམྱལ་བ་རྣམས་སུ་ནི་དེའི་བསམ་པའི་སྐབས་མེད་པའི་ཕྱིར། དམྱལ་བ་འདིར་མ་སྨོས་སོ། །དེ་ལྟར་རེ་ཞིག་ཚིགས་བཅད་འདི་དག་གི་ཁྱད་པར་ནི་འདི་ལྟར་སྣང་སྟེ། ཁྱད་པར་གཞན་ནི་གང་ཡང་མེད་དོ། །མི་རྟ་གླང་ཆེན་ཤིང་རྟ་ཞེས་བྱ་བའི་ཚིགས་བཅད་ཀྱིས་ནི་དགྲ་གཞན་
དག་ནི་ཐུབ་པར་ནུས་ཀྱི། འཆི་བདག་གི་དགྲ་ལས་ནི་རྒྱལ་བར་མི་ནུས་སོ་ཞེས་པའི་དོན་ཏོ། །རྟ་དང་གླང་ཆེན་རྐང་ཐང་ཞེས་བྱ་བའི་ཚིགས་བཅད་ཀྱིས་ནི་དམག་གིས་ཡོངས་སུ་བསྲུངས་ན། དགྲ་དག་ལས་ནི་ཐར་པར་འགྱུར་གྱི། འཆི་བདག་གི་དགྲ་ལས་ནི་དམག་གིས་ཐར་བར་མི་
འགྱུར་ར་ཞེས་པའི་དོན་ཏེ། དེ་བཞིན་དུ་ཚིགས་བཅད་གཞན་དག་ལ་ཡང་བྱེ་བྲག་དེ་ལྟར་བརྗོད་པར་བྱའོ། །གད་པ་ཆེན་པོའི་ངོས་དྲལ་རྒྱལ་བར་གྱུར་པ་ཡི། །ཞེས་བྱ་བ་ནི་ཆུ་བོའི་ངོགས་ཀྱི་གད་པ་ལས་རྒྱལ་བའོ། །རྩེ་མེ་ཉིད་འབར་བ་ཡིན་པས་རྩེ་མེ་འབར་བའོ། །ཁྲོས་པའི་རླུང་
གིས་རྩེ་མེ་འབར་བ་དེ་ནི་ཁྲོས་པའི་རླུང་གིས་རྩེ་མེ་འབར་བའོ། །འབྲུག་སྒྲ་དྲག་པོས་དཀྲུགས་པ་གང་ཡིན་པ་དེ་ནི་འབྲུག་སྒྲ་དྲག་པོས་དཀྲུགས་པའོ། །ནད་དང་དགའ་བའི་མཆེ་བ་གཙིགས་པའི་ཁ་གདངས་པ་གང་ཡིན་པ་དེ་ནི་ཁ་གདངས་ནད་དང་རྒ་བའི་མཆེ་བ་གཙིགས་པ་ཉིད་དོ། །མི་
སྡུག་པ་དང་། འཇིགས་པའི་གདོན་གང་ཡིན་པ་དེ་ནི་མི་སྡུག་པ་དང་འཇིགས་པའི་གདོན་ནོ། །དམ་དུ་འཛིན་པ་གང་ཡིན་པ་དེ་ནི་དམ་དུ་འཛིན་པའོ། །སྙེམས་པའི་མཐུ་རྩལ་ནི་རབ་ཏུ་སྙེམས་པའི་མཐུ་རྩལ་ཏེ། རབ་ཏུ་སྙེམས་པའི་མཐུ་རྩལ་རྒུད་པ་གང་ཡིན་པ་དེ་དག་ནི་རབ་ཏུ་སྙེམས་
པའི་མཐུ་རྩལ་ཉམས་པར་འགྱུར་བའོ། །མཆོད་པར་འདོད་པ་དང་། གནོད་པ་ནི་མཆོད་འདོད་གནོད་པའོ། །དེ་དག་མཆོད་འདོད་གནོད་བྱེད་ནི། མཆོད་པར་བྱ་བ་དང་། གནོད་པ་བྱེད་པའི་ཆེད་དུ་འོངས་ཤིང་ལྷགས་པ་ཞེས་བྱ་བའི་དོན་ཏོ། །ཞི་བར་ནུས་པ་ནི་དེ་སེལ་བར་བྱེད་པའོ། །དཀའ་

ཐུབ་བདེ་ལེགས་ཞེས་བྱ་བ་ལ། དང་གི་སྒྲ་ནི་རིགས་པ་ཡང་བསྡུ་བའོ། །སྒྱུ་མ་མཁན་ཞེས་བྱ་བ་ནི་མིག་འཕྲུལ་ལ་མཁས་པའོ། །མང་པོ་འདུས་པ་ནི་སྐྱེ་བོ་མང་པོའི་ཚོགས་སོ། །སླུ་བར་ནུས་ཞེས་བྱ་བ་ནི་གང་གིས་རྨོངས་པར་བྱེད་པ་ཡིན་པས་སླུ་བར་ནུས་པ་སྟེ།
རྟ་དང་གླང་པོ་ཆེ་ལ་སོགས་པ་སྐྱེ་བོ་རྣམས་ཀྱིས་མཐོང་བའི་སྒྱུ་མ་བྱས་པའོ། །དཀའ་ཐུབ་ཉིད་མཐུ་ཡིན་པས་དཀའ་ཐུབ་མཐུའོ། །གྲུབ་པ་རྣམས་ཀྱི་གསང་སྔགས་ནི་གསང་སྔགས་གྲུབ་པའོ། །དཀའ་ཐུབ་ཀྱི་མཐུ་དང་གསང་སྔགས་གྲུབ་པ་ནི་དཀའ་ཐུབ་ཀྱི་མཐུའོ། །ཁ་ཅིག་ཏུ་ནི་གསང་
སྔགས་གྲུབ་པས་ཞེས་ཀྱང་བརྗོད་དེ། དཀའ་ཐུབ་ཀྱི་མཐུ་གྲུབ་པ་ནི། དཀའ་ཐུབ་ཀྱི་མཐུ་གྲུབ་པ་སྟེ། དཀའ་ཐུབ་ཀྱི་མཐུས་གསང་སྔགས་གྲུབ་པ་ནི་དཀའ་ཐུབ་ཀྱི་མཐུའོ། །ཆོས་ཕྱིར་བདག་བློ་བསམ་མཐར་ཞེས་བྱ་བ་ནི་ཆོས་ཀྱི་བློས་སོ། །མངོན་དུ་བྱུང་ནས་ཞེས་བྱ་བ་ནི་གསལ་བར་སྟོན་
པའོ། །སླར་ཡང་མི་སྣང་འགྱུར་ཞེས་བྱ་བ་ནི་མིག་ལམ་དུ་མི་སྣང་བར་གྱུར་པའོ། །བར་བར་མཁའ་ལ་འགྲོ་ཞིང་ཞེས་བྱ་བ་ནི། མི་སྣང་བར་འགྲོ་བ་ལས་ཀྱང་ནམ་མཁའ་ལ་འགྲོ་བའོ། །ས་འོག་ནུབ་པ་ཞེས་བྱ་བ་ནི། ཐོགས་པ་དང་བཅས་པ་ལ་ཐོགས་བ་མེད་པར་འགྲོ་བའོ། །མངོན་དུ་བྱུང་ནས་
སླར་ཡང་མི་སྣང་འགྱུར། །ཞེས་བྱ་བ་འདིས་ནི་སྤྲུལ་པའི་རྫུ་འཕྲུལ་བསྟན་ཏོ། །བར་བར་མཁའ་ལ་འགྲོ་ཞིང་བར་བར་ས་འོག་ནུབ། །ཅེས་བྱ་བ་འདིས་ནི་འགྲོ་བའི་རྫུ་འཕྲུལ་བསྟན་ཏོ། །གསང་སྔགས་རྣམས་ཀྱི་མཐུ་ནི་གསང་སྔགས་ཀྱི་མཐུའོ། །གསང་སྔགས་ཀྱི་མཐུས་བྱས་པའི་སྟོབས་ནི་གསང་
སྔགས་ཀྱི་མཐུ་སྟོབས་སོ། །རྣམ་པ་སྣ་ཚོགས་པའི་གསང་སྔགས་ཀྱི་མཐུ་སྟོབས་གང་ཡིན་པ་དེ་དག་ནི་གསང་སྔགས་ཀྱི་མཐུ་སྟོབས་རྣམས་སོ། །ང་རྒྱལ་བདོ་བའི་བློ་ཅན་ཞེས་བྱ་བ་ནི་ལྷ་དང་ལྷ་མ་ཡིན་གྱི་དམག་ཚོགས་སོ། །ཁྲོས་པ་མ་མཆིས་ཞེས་བྱ་བ་འདིས་ནི་གང་སྔར་བསྟན་པའི་བདག་
ཉིད་ཕུང་བྱེད་པ་སུ་ཞིག་གིས་ཞེས་བྱ་བའི་ཚིགས་བཅད་དེའི་དོན་མ་ཡིན་པ་ཉིད་དུ་བསྟན་ཏོ། །བྱམས་པ་མ་མཆིས་ཞེས་བྱ་བ་འདིས་ནི་གང་སྔར་བསྟན་པའི་ང་ལ་ཅུང་ཟད་དོགས་པའམ་ཞེས་བྱ་བའི་ཚིགས་བཅད་དོན་དེ་མེད་པ་ཉིད་དུ་སྟོན་ཏེ། དེ་ལྟར་ན་ཅིའི་ཕྱིར་འགྲོ་ཞེ་ན། སྨྲས་པ། ཆོས་ཀྱི་དོན་དུ་

འགྲོ་ཞེས་བྱ་བ་ཡིན་ཏེ། གང་དུ་འགྲོ་ཞེ་ན། ནགས་སུའོ། ཇི་ལྟར་འགྲོ་ཞེ་ན། ངེས་པར་རོ། །གལ་ཏེ་འཆི་བདག་འོང་བར་གྱུར་ན་ཡང་། ཇི་ལྟར་ལོག་པར་སྤྱོད་པ་ནི་ཆོས་མ་ཡིན་པའི་བདག་ཉིད་དེ། རྗེས་སུ་གདུངས་པའི་རྒྱུ་ཡིན་པའི་ཕྱིར་རོ། །དེ་ལྟ་མོད་ཀྱི། ཅིའི་ཕྱིར། ཆོས་
ཀྱི་དོན་རྟོགས་པར་བྱ་བའི་ཕྱིར་རྒྱུར་འགྱུར་ཞེ་ན། སྨྲས་པ། ཆོས་ཀྱི་ནགས་ཚལ་དག་ན་བདེ་བར་སྒྲུབ་དུ་མཆིས། །ཞེས་བྱ་བ་སྨོས་སོ། །བག་མེད་དྲེགས་དང་འདོད་ཆགས་ཞེས་བྱ་བའི་ཚིགས་བཅད་འདིས་ནི། ཁྱིམ་ནི་ཉོན་མོངས་པའི་ཀུན་ནས་ཉོན་མོངས་པས་ཉོན་མོངས་པའི་
ཕྱིར། ཉོན་མོངས་པའི་ཀུན་ནས་ཉོན་མོངས་པ་ནི། ཆོས་ཀྱི་དགྲ་ཡིན་པའི་ཕྱིར་དེ་དང་མི་མཐུན་པ་ཉིད་དུ་བསྟན་ཏོ། །ལས་རྣམས་མང་པོ་ཞེས་བྱ་བའི་ཚིགས་བཅད་ནི། ལས་དང་སྐྱེ་བའི་ཀུན་ནས་ཉོན་མོངས་པས་ཉོན་མོངས་པ་ཉིད་དུ་བསྟན་ཏེ། སྡུག་བསྔལ་འབྱུང་བའི་གནས་
ཞེས་བྱ་བ་འདིས་ནི་སྐྱེ་བའི་ཀུན་ནས་ཉོན་མོངས་པས་ཉོན་མོངས་པ་ཉིད་དུ་བསྟན་ཏོ། །ཞི་བའི་ལམ་ནི་ཐར་པའི་ལམ་མོ། །དེ་ལྟར་ཀུན་ནས་ཉོན་མོངས་པ་གསུམ་གྱིས་ཉོན་མོངས་པའི་ཕྱིར་ཆོས་དང་འགལ་བ་ཉིད་དོ། །ནགས་ན་ནི་ཀུན་ནས་ཉོན་མོངས་པ་གསུམ་པོ་དེ་དག་མེད་པའི་
ཕྱིར། ནགས་ན་བྱ་བ་ངན་པ་ཞེས་བྱ་བའི་ཚིགས་བཅད་སྨོས་སོ། །ནགས་ན་བྱ་བ་ངན་པ་མང་པོ་བཏང་། །ཞེས་བྱ་བ་འདིས་ནི་ལས་ཀྱི་ཀུན་ནས་ཉོན་མོངས་པ་ནགས་ན་མེད་པ་ཉིད་དུ་བསྟན་ཏོ། །བསོད་ནམས་འཐོབ་ཅིང་ཡོངས་སུ་བཟུང་བའི་སྡུག་བསྔལ་སྤངས་ལ་གཙང་ཞེས་བྱ་བ་འདིས་
ནི་སྐྱེ་བའི་ཀུན་ནས་ཉོན་མོངས་པ་མེད་པར་བསྟན་ཏོ། །དེ་མེད་པ་ཉིད་ཀྱིས། གཙང་ལ་ཞི་བ་འབའ་ཞིག་བྱེད། །ཅེས་བྱ་བ་འདིས་ནི་བྱ་བ་ངན་པ་མང་པོ་བཏང་བ་དེའི་གཉེན་པོ་ཉོན་མོངས་པ་ཉེ་བར་ཞི་བ་འབའ་ཞིག་བྱེད་པའི་ཕྱིར་ཡང་ཆོས་ཡོངས་སུ་བཟུང་བ་ནི་ཉོན་མོངས་པའི་ཕྱོགས་
ཡོངས་སུ་སྤངས་པའོ། །མགུ་བ་དང་། གྲགས་པ་དེ་གཉིས་ནི་མཐོང་བའི་ཆོས་ཉིད་ཀྱིའོ། །མི་རྣམས་ཆོས་ཀྱིས་བསྲུངས་ཀྱིས་ནོར་དང་དཔུང་གིས་མིན། །ཞེས་བྱ་བ་འདིས་ནི་དོན་བཟློག་པའི་རྒྱུ་ཉིད་དུ་ཆོས་སྟོན་ཏེ། ནོར་དང་དཔུང་ནི་མ་ཡིན་ནོ། །ཞེས་བྱ་བ་སྟེ། སེམས་

ཅན་དང་། སེམས་ཅན་མ་ཡིན་པས་མི་བསྲུང་ངོ་ཞེས་པའོ། །ཆོས་ཀྱི་བདེ་བ་ཞེས་བྱ་བ་ནི། ཆོས་ཉིད་ཀྱིས་འདོད་པའི་དོན་སྒྲུབ་པ་ཉིད་དུ་སྟོན་ཏོ། །འཐོབ་ཅེས་བྱ་བ་ནི་སེམས་ཅན་དང་སེམས་ཅན་མ་ཡིན་པའི་དབང་ཕྱུག་གོ། །ཆོས་ཀྱི་བདག་
ཉིད་ཅན་ནི་ཤི་ནའང་དགའ་བར་འགྱུར། །ཞེས་བྱ་བ་འདིས་ནི་འཆི་བའི་འཇིགས་པ་མེད་པ་ཉིད་དུ་སྟོན་ཏོ། །ངན་འགྲོའི་འཇིགས་པ་མེད་པར་འགྱུར། །ཞེས་བྱ་བ་འདིས་ནི་ངན་སོང་དུ་འགྲོ་བའི་འཇིགས་པ་མེད་པར་སྟོན་ཏོ། །འཆི་བའི་དུས་སུ་ངན་སོང་གི་འཇིགས་པ་
མེད་པ་ནི་ཆོས་ལ་གནས་པའི་ཕྱིར་རོ། །ད་ནི་དེའི་རྒྱུ་བསྟན་པའི་ཕྱིར། ལས་ཀྱི་ཁྱད་པར་དག་ཀྱང་ཞེས་བྱ་བའི་ཚིགས་བཅད་སྨོས་སོ། །དགེ་བའི་མཚན་ཉིད་ཐ་དད་པ་ནི། སྲོག་གཅོད་པ་ལ་སོགས་པ་ལས་ལྡོག་པའི་མཚན་ཉིད་ཀྱི་ལས་ཀྱི་ཁྱད་པར་རོ། །སྡིག་པའི་ལས་
ཀྱི་མཚན་ཉིད་ནི། སྲོག་གཅོད་པ་ལ་སོགས་པའི་མཚན་ཉིད་དང་། སྦྱིན་པ་ལ་སོགས་པ་མེད་པའི་མཚན་ཉིད་དོ། །ཇི་ལྟར་དགེ་བ་དང་མི་དགེ་བའི་ལས་ཀྱི་ཁྱད་པར་ཐ་དད་པ་དེ་བཞིན་དུ། རྣམ་པར་སྨིན་པ་ཡང་ཐ་དད་པ་ཡིན་ཏེ། ཇི་ལྟར་ཞེ་ན་སྨྲས་པ། མི་དགེ་བས་ནི་ངན་སོང་
དུ་ལྟུང་བ་ཡིན་ལ། བསོད་ནམས་བསགས་པས་ནི་བདེ་བའི་གནས་སུ་འགྱུར་ཏེ། བདེ་བའི་གནས་སུ་འགྲོ་བ་གང་ཡིན་པ་དེ་ནི་བདེ་བའི་གནས་སུ་འགྲོ་བའོ། །རྒྱལ་སྲིད་དཔལ་ཡང་རྩྭ་དང་འདྲ་བར་བོར། །ཞེས་བྱ་བ་ནི་ཕུན་སུམ་ཚོགས་པ་ཆེན་པོ་ལ་ཡང་མ་ཆགས་པ་སྟེ། དེས་ནི་བསམ་
པ་ཕུན་སུམ་ཚོགས་པ་བསྟན་ཏོ། །དཀའ་ཐུབ་ཀྱི་ནགས་ཚལ་དུ་གནས་པར་གྱུར་ཏོ་ཞེས་བྱ་བས་ནི་སྦྱོར་བ་ཕུན་སུམ་ཚོགས་པ་བསྟན་ཏོ། །བསམ་གཏན་ནི་བསམ་གཏན་བཞིའོ། །ཚད་མེད་པ་ནི་བྱམས་པ་ལ་སོགས་པ་བཞིའོ། །སློབ་དཔོན་དཔའ་བོས་མཛད་པའི་སྐྱས་པའི་རབས་རྒྱ་ཆེར་
བཤད་པ་ལས། ལྕགས་ཀྱི་ཁྱིམ་ནས་བསྐྱེད་པའི་སྐྱེས་པའི་རབས་སོ། །སྐྱེས་པའི་རབས་ཀྱི་རྒྱ་ཆེར་བཤད་པ་སློབ་དཔོན་དྷརྨ་ཀླི་རྟིས་མཛད་པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་ཛ་ནཱར་དྷ་ན་དང་། ཞུ་ཆེན་གྱི་ལོ་ཙཱ་བ་ཨི་བུ་དགེ་སློང་ཤཱཀྱ་བློ་གྲོས་ཀྱིས་བསྒྱུར་བའོ།། །།