Luận tạng Tây Tạng (Tengyur) — Tập 168

ཁྱིམ་ན་གནས་པའི་བདག་ཉིད་ཀྱིས་མངོན་སུམ་དུ་སྐྱོན་མཐོང་བའི་ཕྱིར་རོ། །ནགས་ན་གནས་པ་ཡང་བདག་
ཉིད་ཀྱིས་མངོན་སུམ་དུ་ཡོན་ཏན་མཐོང་བའི་ཕྱིར་རོ། །དེ་བས་ན་ནགས་དང་ཁྱིམ་གྱི་ཁྱད་པར་མི་ཤེས་པ་དག་ནི་སྨྲ་བར་མི་རིགས་ཀྱི། དེ་ནི་འདིར་མཉན་པར་ཡང་རིགས་པ་མ་ཡིན་ཏེ། གཉི་ག་ཡང་ངོ་ཤེས་པའི་ཕྱིར་རོ། །བཙོན་ར་འདྲ་བའི་ཁྱིམ་ཞེས་བྱ་
བ་ནི་ཁྱིམ་ནི་བཙོན་རར་གྱུར་པ་ཡིན་ཏེ། ངན་སོང་དུ་འགྲོ་བར་བྱེད་པའི་ཕྱིར་རོ། །ཕྱུག་པོ་ནི་ཕལ་ཆེར་གཅིག་ཏུ་སྡུག་བསྔལ་བ་ཡིན་ནོ། །ཅིག་ཤོས་དབུལ་བ་ཡང་ངོ་། །དགའ་བ་ཉིད་དུ་ཀུན་དུ་རྨོངས་པ་ནི་དགའ་བས་རྨོངས་པ་སྟེ། སྡུག་བསྔལ་ལ་བདེ་བར་
ཕྱིན་ཅི་ལོག་པ་ཞེས་བྱ་བའི་དོན་ཏོ། །སྡིག་པའི་འབྲས་བུ་སྨིན་པ་ཉིད། །ཅེས་བྱ་བ་ནི་སྐྱེ་བ་སྔ་མ་དག་ལ་རང་གི་གོམས་པས་སྡུག་བསྔལ་ལ་བདེ་བར་ཕྱིན་ཅི་ལོག་པའི་འབྲས་བུ་སྨིན་པའོ། །འདིར་བྱར་རུང་ངོ་ཞེས་བྱ་བ་གལ་ཏེ་དེ་ལྟར་ཆོས་བརྙེས་པར་རུང་བ་
ཞེས་བྱ་བ་ནི་མ་ཡིན་ནོ། །ཆོས་ཀྱི་གཉེན་པོ་དང་འདོམ་པའི་ཕྱིར་ཏེ་ཆོས་དང་འགལ་བ་དང་། ཕྱོགས་རྣམ་པར་འཇིག་པའི་ཕྱིར་རོ། །ལས་སུ་བྱ་བ་མང་ཆེས་པས། །ཞེས་བྱ་བ་ནི་ཁྱིམ་གྱི་བདེ་བ་ཡིན་ནོ་སྙམ་ནས་ཁྱིམ་མ་བཏང་བས་ནི་ཆོས་བྱ་བར་འདོད་

ཀྱང་ཁྱིམ་མ་བཏང་བར་ནི་གཞན་དུ་འགྱུར་བས་ཇི་ལྟར་ཆོས་བྱ་བར་མི་རུང་སྟེ། འདི་ནི་ཁྱིམ་གྱི་བདེ་བ་དེ་དང་དེ་ལ་མངོན་པར་ཞེན་པ་དེ་ལ་སྡུག་བསྔལ་ཡིན་པར་བསྟན་པར་བྱ་བའི་ཕྱིར། ལས་སུ་བྱ་བ་མང་ཆེས་པས། །ཞེས་བྱ་བ་འདི་བསྟན་པ་
ཡིན་ནོ། །ཆོས་ཀྱི་གཉེན་པོ་དང་འདོམ་པ་ཞེས་བྱ་བའི་དབང་དུ་མཛད་ནས། ཁྱིམ་གྱི་སོ་ནམ་བྱ་ན་ནི། །ཞེས་བྱ་བ་ལ་སོགས་པའི་ཚིགས་བཅད་བཞི་ཡིན་ཏེ། ཆོས་ཀྱི་གཉེན་པོའི་ཆོས་གང་ཡིན་ཞེ་ན། དེ་དང་མི་མཐུན་པར་གྲགས་པ། །ཞེས་བྱ་བའི་དོན་
ཏེ། ཁྱིམ་གྱི་སོ་ནམ་བྱ་ན་ནི། །ཞེས་བྱ་བའི་ཚིགས་བཅད་ཡིན་ནོ། །ཁྱིམ་ན་ནོར་མེད་ན་ནི་སོ་ནམ་བྱ་བ་ཡིན་ནོ། །སོ་ནམ་གྱི་བྱ་བ་བྱས་པར་གྱུར་ན་ནི་ཆོས་ཀྱི་དོན་ཉམས་པ་ཡིན་ནོ། །དེ་ལྟར་ལུང་དུ་མ་བསྟན་པའི་ལས་ཀྱང་ཆོས་ཀྱི་གཉེན་པོ་ཡིན་པར་བསྟན་ཏོ། །
བརྫུན་དུ་མི་སྨྲ་མི་རུང་ཞིང་། །ཞེས་བྱ་བ་ནི་མི་དགེ་བ་དེ་ལ་འཇུག་པའི་དབང་དུ་བྱས་ནས་བརྫུན་དུ་སྨྲ་བཞེས་བྱ་བ་སྨོས་ཏེ། ངག་གི་ལས་ཀྱི་ལམ་གྱི་མི་དགེ་བ་བཞི་བཟུང་སྟེ། སྨྲ་བ་ཞེས་སྨོས་པས་དེ་ལ་གཞན་དག་ཀྱང་འགྲུབ་པོ། །ཉེས་པ་བྱེད་པ་ལ་ནན་ཏུར་ནི་
ཞེས་བྱ་བ་ནི། སྲོག་གཅོད་པར་ནན་ཏུར་བྱ་བ་ཡིན་ཏེ། མི་དགེ་བའི་ལས་ཀྱི་ལམ་དག་ལས་སྲོག་གཅོད་པ་ཐོག་མར་སྨོས་པ་ཡིན་ཏེ། དེ་དང་པོར་སྨོས་པས་ལུས་ཀྱི་མི་དགེ་བའི་ལས་དག་ཀྱང་འགྲུབ་པོ། །དེ་བས་ན་གཞན་ལ་ནན་ཏུར་ཞེས་བྱ་བས་མི་དགེ་བའི་
ལམ་ལས་བཟློག་སྟེ། རལ་གྲི་དང་ཐལ་ལྕག་ལ་སོགས་པའི་མཚན་ཉིད་ཀྱིས་བཅད་ཅིང་ནན་ཏུར་བྱ་བ་ཡིན་ཏེ། གཞན་སླུ་བས་སྒྲུབ་པ་ལ་སོགས་པ་དེས་གཞན་དག་ལ་གནོད་པར་འགྱུར་བ་ཡིན་ཏེ་དེ་ལ་ནན་ཏན་དུ་བྱ་བའོ། །འདི་དག་གིས་ནི་འདི་ལྟར་སྟོན་ཏེ། ལུང་དུ་
མ་བསྟན་པའི་ལས་ཀྱི་སོ་ནམ་གྱིས་ཀྱང་མི་དགེ་བའི་ལས་ཀྱི་ལམ་ཡང་དག་པར་འཛིན་པ་སྟེ། ལུས་དང་ངག་གི་ལས་ཀྱི་ནན་ཏུར་བྱ་བ་སྟེ། ལས་ཀྱི་ལམ་རྣམ་པར་སྤངས་པའི་མི་དགེ་བའི་ལས་བྱེད་པ་ལ་ནན་ཏུར་བྱའོ། །ཡིད་ཀྱི་མི་དགེ་བ་གནོད་སེམས་ལ་

སོགས་པ་ཡང་ཁྱིམ་ན་མེད་པ་མ་ཡིན་ནོ། །སོ་ནམ་བྱ་བ་ལ་སོགས་པ་ལ་འཇུག་པའི་རྒྱུའི་དབང་དུ་བྱས་ནས། དེ་ལྟ་བས་ན་སྐྱེ་བོ་འདི་དག་ཅེས་བྱ་བ་ལ་སོགས་པའི་ཚིག་གོ། །དེ་ལྟ་བས་ན་ཞེས་བྱ་བ་ནི་གང་གི་ཕྱིར་ཁྱིམ་གྱི་སོ་ནམ་མ་བྱས་པར་ཁྱིམ་མེད་དོ། །ཁྱིམ་མེད་ན་བདེ་
བ་མེད་དོ། །དེ་སྒྲུབ་པ་ལ་འབད་པ་ཞེས་བྱ་བ་ནི་ཁྱིམ་གྱི་བདེ་བ་སྒྲུབ་པ་ལ་འབད་པ་སྟེ། ཁྱིམ་གྱི་བདེ་བ་སྒྲུབ་པའི་སོ་ནམ་ལ་སོགས་པའོ། །ད་ནི་ཁྱིམ་ན་གནས་པས་ནི་ཆོས་དང་ཆོས་མ་ཡིན་པ་ཕན་ཚུན་འགལ་བས་རབ་ཏུ་དཀའ་བ་ཡིན་པའི་ཕྱིར་དེ་སྒྲུབ་པའི་
དབང་དུ་བྱས་ནས། གལ་ཏེ་ཆོས་སྤྱོད་ཁྱིམ་གྱི་སོ་ནམ་འཆོར། །ཞེས་བྱ་བ་འདི་ཡིན་ནོ། །གལ་ཏེ་ཆོས་སྤྱོད་པར་གྱུར་ཏེ་སོ་ནམ་ལ་སོགས་པ་མི་བྱེད་ན་ནི་ཁྱིམ་མེད་དེ། སོ་ནམ་འཆོར་བའི་ཕྱིར་ཇི་ལྟར་བསྟན་མ་ཐག་པའི་ཚིགས་སུ་བཅད་པ་བསྟན་པའོ། །གལ་ཏེ་ཁྱིམ་ལ་
མངོན་པར་ཕྱོགས་ན་ནི། །ཞེས་བྱ་བ་ནི་སོ་ནམ་ལ་སོགས་པ་བྱས་ནའོ། །དེ་སྒྲུབ་པའི་ཕྱིར་སྨྲས་པ། ཆོས་ཀྱི་ལམ་ནི་རབ་ཏུ་ཞི་བ་ཞེས་བྱ་བའི་ཚིགས་བཅད་ཕྱེད་ཀྱིས་བསྟན་ཏེ། རབ་ཏུ་ཞི་བ་ནི་ཉོན་མོངས་པ་ཉེ་བར་ཞི་པའོ། །ཡང་ན་རབ་ཏུ་ཞི་བ་ནི་སེམས་ཅན་
གྱི་རྩོམ་པ་ལས་ལྡོག་པ་སྟེ། ཐར་པ་ནི་དོན་ཐམས་ཅད་ལས་ལྡོག་པ་ཡིན་ནོ་ཞེས་བྱ་བའི་ཚིག་གིས་སོ། །དྲག་ཤུལ་ཅན་ཞེས་བྱ་བ་ནི་སྔར་བཤད་པའི་སོ་ནམ་ལ་སོགས་པའི་རིམ་པའོ། །དེ་བས་ཆོས་དང་འགལ་བའི་སྐྱོན་ཡོད་ཕྱིར། །ཞེས་བྱ་བའི་ཚིགས་
བཅད་ཀྱི་དོན་རྣམ་པར་གཞག་པ་ནི་སྔར་བཤད་པའི་དོན་ཁྱིམ་ན་གནས་པའི་བདེ་བ་དང་གཅིག་པ་མ་ཡིན་ནོ་ཞེས་པའོ། །གཉིས་སུ་ན་ཁྱིམ་ནི་བདེ་བ་ཕྱོགས་གཅིག་ཏུ་མ་ངེས་པར་བསྟན་པའི་ཕྱིར་ངེས་པ་ཡོད་པ་མ་ཡིན་ཞེས་སྨོས་ཏེ། གཅིག་ཏུ་བདེ་བ་ཉིད་མ་ངེས་སོ། །དེ་སྒྲུབ་
པའི་ཕྱིར། གདོན་མི་ཟ་བར་གྲགས་པ་མེད་པར་འགྱུར། །ཞེས་བྱ་བའི་ཚིགས་བཅད་ཡིན་ཏེ། གྲགས་པ་མེད་པར་འགྱུར་ཞེས་བྱ་བ་ནི་བདེ་བའི་རྒྱུ་འཇིག་རྟེན་པ་རྣམས་དགའ་བ་ལ་སོགས་པ་མེད་པར་བདེ་བ་འགྲུབ་པ་མེད་དོ། །གདུང་བ་སྐྱེ་བ་ཞེས་བྱ་བ་ནི་འཆི་

བའི་དུས་སུ་ཡིད་ལ་གཅགས་བཞིན་དུ་འཆི་བའི་ཕྱིར་རོ། །ཡིད་ལ་གདུང་བ་སྐྱེ་བ་ལས་ནི་ངན་འགྲོ་སྐྱེ་བར་འགྱུར་ཏེ། འཇིག་རྟེན་ཕ་རོལ་དུ་ངན་སོང་གི་སྡུག་བསྔལ་འབྱུང་བའི་ཕྱིར་བདེ་བ་འགྲུབ་པ་མེད་དོ། །བདེ་བའི་ཐབས་ཞེས་བྱ་བ་ནི།
གང་གི་ཕྱིར་ཁྱིམ་དང་ཁྱིམ་ལ་གནས་པ་བདེ་བའི་རྒྱུའོ་ཞེས་མངོན་པར་ཞེན་པའི་དབང་དུ་བྱས་པ་ནི་ཁྱིམ་ལ་བདེ་བའི་ཐབས་ཞེས་བརྗོད་དོ། །ངན་འགྲོ་བཞིན་དུ་ཞེས་བྱ་བ་ནི་ངན་འགྲོ་བཞིན་དུའོ། །ཁྱིམ་ན་གནས་པ་བདེ་བར་ནི་ག་ལ་བཤད་དེ། དེ་བས་ན་དད་
པས་ཡིད་ཆེས་པར་བྱ་བ་ཡིན་པར་བདག་གིས་མ་མཐོང་ངོ་ཞེས་བཤད་པ་ནི་གཞན་གྱི་ལས་བྱེད་པ་དག་ཀྱང་ཞེས་བྱ་བའི་ཚིགས་བཅད་ཀྱིས་སོ། །བཅིང་བ་དང་གསད་པ་དང་སྡུག་བསྔལ་ནི་བཅིང་ཞིང་གསད་པའི་སྡུག་བསྔལ་ལོ། །དེ་དག་ཉིད་ཀྱི་གཞིར་གྱུར་
པ་ཡིན་ཏེ། ཡོད་པར་གྱུར་ན་བཅིང་བ་དང་། གསད་པའི་སྡུག་བསྔལ་གྱི་གཞིར་གྱུར་པའོ། །འདོད་པ་དེ་དག་གལ་ཏེ་ངོམས་པར་གྱུར་ན་མི་རུང་ན་དེ་ཡང་མེད་དེ། དེ་བསྟན་པའི་ཕྱིར་རྒྱལ་པོ་དག་ཀྱང་ཞེས་བྱ་བའི་ཚིགས་བཅད་ཕྱེད་ཡིན་ནོ། །ཡངས་
སུ་རྟོགས་པའི་དབང་དུ་བྱས་པའི་ཚིགས་བཅད་ནི། བསྒྲུབ་ཅིང་བསྲུང་བ་ལ་སོགས་པ་ཞེས་བྱ་བའི་ཚིགས་བཅད་དེའི་དོན་རྣམ་པར་འགྲེལ་ཏེ། འདི་ག་ལ་བདེ་ཞེས་བྱ་བ་ནི་བཅིངས་པ་དང་གསད་པའི་སྡུག་བསྔལ་གྱི་གཞིར་གྱུར་པས་ག་ལ་བདེ་སྟེ། དེ་བས་ན་ག་ལ་
བདེའོ། །ཇི་ལྟར་བདེ་ཞེས་བྱ་བ་ནི་རྒྱལ་པོ་དག་ཀྱང་འབྱོར་པས་ཆོག་པ་མེད་དེ། དེས་ན་ཇི་ལྟར་བདེ་བའོ། །ནམ་ཞིག་བདེ་ཞེས་བྱ་བ་ནི་བསྒྲུབ་ཅིང་བསྲུང་ལ་སོགས་པའི་ཚེ་ན་སྡུག་བསྔལ་བའི་ཕྱིར་ནམ་ཞིག་བདེ་བ་ཡིན་ཏེ། དེས་ན་ཡང་རྣམ་པ་གསུམ་གྱིས་བདེ་
བ་མེད་དོ། །ཇི་ལྟར་དེ་ལ་འཇིག་རྟེན་པ་རྣམས་བདེ་བའི་བློ་འབྱུང་ཞེ་ན། སྨྲས་པ། ཡོངས་སུ་རྟོགས་པའི་དབང་གིས་བདེ་བ་འབྱུང་བ་ཡིན་གྱི། ངོ་བོ་ཉིད་ཀྱིས་ནི་མ་ཡིན་ནོ། །དེ་ལྟར་རེ་ཞིག་བདེ་བ་ཡིད་ཀྱིས་ཡོངས་སུ་རྟོགས་པའི་མཐུ་ཡིན་པར་བསྟན་ནས། ཡུལ་

རྣམས་ལ་རྨོངས་པས་ཉེ་བར་སྤྱོད་པ་ཞེས་བྱ་བ་ཡིན་ཏེ། དབང་པོ་ལྔའི་ཡུལ་གྱི་ཉེ་བར་སྤྱོད་པའི་བདེ་བ་ནི་དེ་ལ་རྣམ་པར་རྟོག་པ་མེད་པས་ཇི་ལྟར་བདེ་བར་འགྱུར་ཏེ་དེ་ལ་བདེ་བའི་རྣམ་པར་རྟོག་པ་མེད་པས་སོ། །རྣམ་པར་རྟོག་པ་ཙམ་ཡང་མངོན་པར་ཤེས་
པ་ལྔ་དང་ལྡན་པས་ན་དེ་ཉིད་སྨྲས་པ། རྨ་གཡའ་ཕྲུགས་པའི་བདེ་བ་བཞིན་དུ་ཟད། ཅེས་བྱ་བ་ཡིན་ཏེ། རྨ་གཡའ་བ་ལ་ཕྲུགས་པའི་བདེ་བ་འབྱུང་བ་དེ་བཞིན་དུ་ཡུལ་རྣམས་ལ་ཡང་བརྟེན་པས་ཀྱང་བདེ་བ་བཞིན་ནོ། །ཆོས་ཀྱི་ལམ་ནི་རབ་ཏུ་ཞི་བ་
ཡིན། །ཞེས་བྱ་བ་གང་སྔར་བཤད་པའི་རབ་ཏུ་ཞི་བ་ཡང་གཉིས་པ་བཤད་པ་ལས། འདིར་ཁྱིམ་ན་གནས་ན་ཉོན་མོངས་པ་རབ་ཏུ་ཞི་བར་མི་འགྱུར་ཞིང་མི་བཟློག་པར་བརྟན་པའི་ཕྱིར། གཞན་ཡང་ཕལ་ཆེར་ཞེས་བྱ་བའི་ཚིགས་བཅད་འདི་
བརྩམས་པ་ཡིན་ནོ། །འདིའི་བསྡུས་པའི་དོན་ནི་ཕུན་སུམ་ཚོགས་པའི་གནས་སྐབས་དང་། རྒུད་པའི་གནས་སྐབས་གཉི་ག་ན་ཡང་ཉོན་མོངས་པ་ཉེ་བར་ཞི་བ་མེད་པར་བསྟན་ཏོ། །ཚིགས་བཅད་ཕྱེད་དང་པོས་ནི་ཕུན་སུམ་
ཚོགས་པའི་གནས་སྐབས་སུ་ཉོན་མོངས་པ་ཉེ་བར་མ་ཞི་བར་བསྟན་ཏོ། །གཉིས་པའི་ཕྱེད་ཀྱི་ཚིག་རྐང་དང་པོས་ནི་རྒུད་པའི་གནས་སྐབས་བསྟན་ཏོ། །དེ་ན་ཞེས་བྱ་བ་ནི་ཁྱིམ་དེ་ན་སྟེ་ཕུན་སུམ་ཚོགས་པ་དང་། རྒུད་པའི་གནས་སྐབས་གཉི་ག་ན་
ཡང་ཉེ་བར་ཞི་བ་མེད་དེ། དེ་གཉིས་མ་གཏོགས་པའི་གནས་སྐབས་གསུམ་པ་ནི་མེད་པའི་ཕྱིར། ནམ་ཞིག་རབ་ཏུ་ཞི་བར་འགྱུར། །ཞེས་བསྟན་ཏོ། །དྲེགས་དང་ང་རྒྱལ་ཞེས་བྱ་བའི་ཚིགས་བཅད་འདིས་ནི་སྔར་བཤད་པ་ཐམས་ཅད་ཀྱི་དོན་མཇུག་
བསྡུ་བ་ཡིན་ཏེ། དྲེགས་དང་ང་རྒྱལ་གཏི་མུག་སྦྲུལ་གྱི་ཚང་། །ཞེས་བྱ་བ་ནི་ཕལ་ཆེར་ཁྱིམ་ན་འབྱོར་ན་ཞེས་བྱ་བའི་ཚིགས་བཅད་བསྟན་པ་དེའི་ནམ་ཞིག་རབ་ཏུ་ཞི་བར་འགྱུར་ཞེས་པའི་མཇུག་བསྡུ་བ་ཡིན་ནོ། །དྲེགས་དང་ང་རྒྱལ་གཏི་མུག་སྦྲུལ་གྱི་ཚང་བཞིན་དུ་

གནས་དང་གཞིར་གྱུར་པ་སྟེ། དེ་བས་ན། རབ་ཏུ་ཞི་ལ་དགའ་བའི་བདེ་འཇིག་པ། །ཞེས་བྱ་བ་ཡིན་ཏེ། དགའ་བའི་བདེ་བ་འཇིག་པ་སྟེ། ཚང་དང་གནས་བཞིན་དུ་སྡུག་བསྔལ་དྲག་པོའི་གཞིར་གྱུར་པའི་ཕྱིར་རོ། །འདིས་ནི་གང་སྔར་བསྟན་
པའི་བསྒྲུབ་ཅིང་བསྲུང་ལ་སོགས་པའི་སྡུག་བསྔལ་ཞེས་བྱ་བ་དེའི་མཇུག་བསྡུ་བ་ཡིན་ནོ། །རབ་ཏུ་ཞི་ལ་དགའ་བའི་བདེ་འཇིག་པ། །ཞེས་བྱ་བ་ནི་ཇི་ལྟར་རབ་ཏུ་ཞི་བ་བདེ་བ་ཡིན་ཞེ་ན། བདེ་བ་བསྟན་པའི་ཕྱིར་སྐྱེ་བོ་ཆོག་ཤེས་ཞེས་བྱ་བའི་ཚིགས་
བཅད་ཡིན་ཏེ། བདེ་བ་ཡང་རྣམ་པ་གཉིས་ཏེ། ལུས་དང་སེམས་ཀྱི་དབང་དུ་བྱས་པའོ། །སེམས་ཀྱི་བདེ་བའི་དབང་དུ་བྱས་ནས། སྐྱེ་བོ་ཆོག་ཤེས་ཞེས་བྱ་བའི་ཚིགས་བཅད་ཡིན་ནོ། །ཡོ་བྱད་རྣམས་ཀྱིས་ཆོག་ཤེས་པའི་འཚོ་བ་ནི་ཆོས་གོས་
ལ་སོགས་པ་ངན་ངོན་ཙམ་གྱིས་ཆོག་ཤེས་པའི་ཕྱིར་རོ། །ཆོག་ཤེས་པའི་སྐྱེ་བོ་ནི་དཀའ་ཐུབ་ཅན་གྱི་སྐྱེ་བོའོ། །ཆོག་ཤེས་པའི་སྐྱེ་བོ་རྣམས་ནི་ཁྱིམ་བཞིན་དུ་ནགས་ན་དེ་བཞིན་ནོ། །རབ་ཏུ་དབེན་པའི་བདེ་བ་ནི་ལུས་དང་། སེམས་ཀྱི་རབ་ཏུ་
དབེན་པའི་བདེ་བ་ཡིན་ཏེ། སེམས་དབེན་པའི་བདེ་བས་སེམས་དགའ་བར་གྱུར་པ་ཡིན་ཏེ། འདིས་ནི་ཡིད་དགའ་བར་བསྟན་ཏོ། །དེ་ཉིད་ཀྱི་ཕྱིར་ཡིད་བདེ་བའི་དབང་དུ་བྱས་ཏེ། དེ་འདྲ་ལྷ་ཡི་ཡུལ་ནའང་མེད། །ཅེས་བྱ་བ་ནི་མིའི་འཇིག་རྟེན་ན་
ལྷ་ག་ལ་ཡོད་ཅེས་བྱ་བ་ཡིན་ནོ། །ལུས་ཀྱི་བདེ་བའི་དབང་དུ་བྱས་ནས། དེ་བས་ཚལ་ན་ཞེས་བྱ་བའི་ཚིགས་བཅད་ཡིན་ནོ། །ཚིགས་བཅད་འདིའི་དང་པོའི་ཕྱེད་ཀྱིས་ནི་ཟས་དང་། གནས་མལ་དང་། ཆོས་གོས་དམན་པར་བསྟན་པ་ཡིན་ནོ། །
འཚོ་བ་སྒྲུབ་པ་ཉིད་ཀྱང་འདི་ལྟར་མི་སྒྲུབ་སྟེ། ཆོས་མིན་འདྲེས་པ་ཞེས་བྱ་བ་སྟེ་སྔར་བསྟན་པའི་བྱ་བས་སོ། །བདེ་བ་ནི་ཁྱིམ་གྱི་བདེ་བའོ། །མི་འདོད་པ་ནི་དུག་དང་འདྲེས་པའི་བཟའ་བ་འདྲ་བ་སྟེ། ཟས་དང་བཏུང་བ་དང་ཁྱིམ་གྱི་འཚོ་བས་བསྒྲུབས་ཤིང་

བསྐྱེད་པའི་ཁྱིམ་གྱི་བདེ་བ་དུག་ཆེན་བོ་དང་འདྲེས་པའི་ཟས་དང་འདྲ་བ་དེ་ནི་ཆོས་མ་ཡིན་པ་དང་འདྲེས་པའི་ཕྱིར་རོ། །བདག་ལ་ཕན་པར་འདོད་པ་ནི་བློ་དང་ལྡན་པའོ། །བཀུར་སྟིའི་བྱ་བ་ཁྱད་པར་ཅན་གྱིས་ཞེས་བྱ་བ་ནི་མངོན་དུ་སྨྲ་བ་དང་། ཕྱག་ལ་
སོགས་པའོ། །འདོད་པ་ལས་སླར་ལྡོག་གོ་ཞེས་བྱ་བ་ནི་ཕྱིས་ཡང་འདོད་པ་ལ་འཇུག་པར་མི་བྱེད་པའོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་རྒྱལ་རིགས་ཕྱུག་པོའི་སྐྱེས་པའི་རབས་སོ།། །།
འཕྱས་ཀྱི་གནས་ཞེས་བྱ་བ་ནི་རྗེས་སུ་བྱེད་པ་ལྟ་བུའོ། །གནོད་པ་ལྟ་བུར་ཞེས་བྱ་བ་ནི་ཉེ་བར་མཚོན་པ་ལྟ་བུའོ། །དེའི་གཟུགས་དང་ཡོན་ཏན་དང་མཐུན་པ་ཞེས་བྱ་བ་ནི་དེ་དང་མཉམ་པ་སྟེ། རྟག་ཏུ་རྗེས་སུ་འབྲང་བ་ཞེས་བྱ་བའི་དོན་ཏོ། །རིག་བྱེད་ཀྱི་ཡན་
ལག་ཅེས་བྱ་བ་ནི་སོ་མ་ནི་བཤད་ཅེས་བྱ་བའི་རིག་བྱེད་དོ། །བདག་ནི་རབ་ཏུ་འབྱུང་བར་འདོད། །ཅེས་བྱ་བ་འགྲོ་བར་འགྱུར་རོ། །ལམ་གང་གིས་ཤེ་ན། དེ་ཉིད་སྨྲས་པ། དེ་བས་ན་ཕན་པའི་ལམ་བཟང་པོས་ཞེས་བྱ་བ་ཡིན་ཏེ། དགེ་བ་དང་ལེགས་
པའི་ལམ་ཡིན་པས་ལམ་བཟང་པོ་སྟེ། ལམ་འདིས་ཐམས་ཅད་དུ་འབྱུང་ངོ་ཞེས་བྱ་བའོ། །རིག་བྱེད་སློབ་བ་ལ་ནི་འགྲུས། །ཞེས་བྱ་བ་ནི་རིག་བྱེད་སློབ་པ་ནི་བྲམ་ཟེའི་ལུས་སུ་བཤད་དོ། །མཛའ་བོ་དང་མགྲོན་དང་གཉེན་བཤེས་དང་། སློང་བ་
རྣམས་ནི་རེ་ཐག་མི་གཅོད་ཅེས་བྱ་བ་ནི་སྦྱིན་པའི་ལས་ཀྱིས་སོ། །ཆོས་ལ་གཞོལ་བ་ཞེས་བྱ་བ་ནི་འཚེ་བ་སྤངས་པའི་མཆོད་སྦྱིན་གྱི་ལས་སོ། །འདུལ་བ་ལ་ནི་རྟག་ཏུ་འབད། །ཅེས་བྱ་བ་འདིས་ནི་ཆོས་ལ་གཞོལ་བར་བྱ་བ་ཉིད་བསྟན་ཏེ། འདི་དག་ནི་སླའོ། །
དེ་ལྟར་ཞེས་བྱ་བ་ནི། འདུལ་བ་ལ་ནི་རྟག་ཏུ་འབད། །ཅེས་བྱ་བ་ལ་སོགས་པ་གསུམ་ལ་ལེགས་པར་འཇུག་པས་སོ། །རང་གི་ཆོས་ལ་འབད་པས་ནི་གྲགས་པ་དང་། སྲིད་དང་བདེ་བ་འགྲུབ་སྟེ། གསུམ་གྱི་དོན་ལ་ལེགས་པར་ཞུགས་ན་ནི་དགའ་

བར་བྱེད་པའི་རྒྱུ་ཡིན་པའི་ཕྱིར་རོ། །དེ་ལྟར་རེ་ཞིག་ཚེ་འདིའི་ཕན་ཡོན་བསྟན་ནས། ད་ནི་འཇིག་རྟེན་ཕ་རོལ་གྱི་ཕན་ཡོན་བསྟན་ཏེ། འཇིག་རྟེན་ཕྱི་མ་ལ་ཡང་བདེ་བར་འགྱུར། །ཞེས་བྱ་བ་འདིས་སོ། །ཕ་མ་གཉིས་དང་བྲལ་བ་ནི་ཕ་མ་དང་
བྲལ་བའོ། །ཕ་མ་དང་བྲལ་བས་བྱས་པའི་མྱ་ངན་ནི། ཕ་མ་དང་བྲལ་བའི་མྱ་ངན་ནོ། །ཕ་མ་དང་བྲལ་བའི་མྱ་ངན་ཉིད་ཟུག་རྔུའི་རྨ་ཡིན་ཏེ། ཟུག་རྔུ་དེའི་རྨ་གང་ཡིན་པ་དེ་ལ། སྡུག་བསྔལ་གཞན་གྱིས་བསྣན་ཏེ་ཞེས་བྱ་བ་ནི་ཕ་མ་དང་བྲལ་བའི་སྡུག་བསྔལ་གྱི་
སྟེང་དུ་བསྣན་པའོ། །ཡང་ན་ཕ་དང་མ་དང་བྲལ་བའི་མྱ་ངན་ཉིད་ཟུག་རྔུ་ཡིན་བས་ཕ་མ་དང་བྲལ་བའི་མྱ་ངན་གྱི་ཟུག་རྔུའོ། །དེས་བྱས་པའི་ཡིད་ཀྱི་རྨ་གང་ཡིན་པ་དེ་ནི་ཕ་མ་དང་བྲལ་བའི་མྱ་ངན་གྱི་ཟུག་རྔུའི་རྨ་སྟེ། དེ་ལ་ཡིད་ཅེས་བྱ་བ་ནི་ཚིག་གི་ལྷག་མའོ། །
དེ་བས་བརྟན་པའི་བློ་ཅན་འདི་བཏང་ལེགས། །ཞེས་བྱ་བ་ནི་རབ་ཏུ་བྱུང་བའི་བློའོ། །འདིར་རྨ་ཞེས་བྱ་བ་ལ་ཡིད་ཅེས་བྱ་བ་ཡང་ཚིག་གི་ལམ་བསྟན་ཏོ། །དེ་ལྟར་ཁྱོད་འདོད་ན་ཞེས་བྱ་བ་ནི་རབ་ཏུ་འབྱུང་བར་རོ། །ཀུ་མུ་ཏ་མང་པོ་ཁ་འབུས་པ་ཡོད་པའི་མཚོ་
གང་ཡིན་པ་དེ་ནི་ཀུ་མུ་ཏ་མང་པོ་ཁ་འབུས་པའི་མཚོའོ། །བརྟུལ་ཞུགས་དང་སྡོམ་པ་ལ་འབད་ཅེས་བྱ་བས་ནི་ལུས་དང་ངག་གི་ལམ་བསྟན་ཏོ། །ཡིད་བསམ་གཏན་ལ་སྦྱོར་ཞེས་བྱ་བས་ནི་ཡིད་ཀྱི་ལམ་བསྟན་ཏོ། །བསམ་གཏན་གྱི་མན་ངག་ནི་བསམ་
གཏན་མན་ངག་གོ། །དེའི་ཕྱིར་འཇུག་པ་ནི་བསམ་གཏན་གྱི་མན་ངག་ལ་འཇུག་པའོ། །དེ་ཇི་ལྟར་བསམ་གཏན་གྱི་མན་ངག་ལ་འཇུག་པའི་རྣམ་པས་བསམ་གཏན་བསྟན་པ་ཡིན་ཞེ་ན། འདོད་པའི་ཉེས་དམིགས་ཞེས་བྱ་བ་ལ་སོགས་པ་བརྩམས་པ་
ཡིན་ཏེ། དབེན་པ་རྣམ་པར་བསྒོམ་པའི་ཕྱིར་བསམ་གཏན་དང་པོའི་ཉེས་དམིགས་བསྟན་པ་སྟེ། ཇི་ལྟར་མདོ་སྡེ་ཉིད་ལས་རིག་པར་བྱ་སྟེ། གསོག་དང་། བརྫུན་དང་། སླུ་བའི་ཆོས་ཅན་དང་། བྱིས་པ་འདྲིད་པར་བྱེད་པ་ཞེས་བྱ་བ་དང་། ཤིང་གི་

འབྲས་བུ་ཞེས་བྱ་བ་ལ་སོགས་པའོ། །ཅིའི་ཕྱིར་འདོད་པའི་ཉེས་དམིགས་སྟོན་ཅེ་ན་སྨྲས་པ། འདོད་ཁམས་ལས་སྐྱོ་ཞིང་ཡིད་འབྱུང་བར་འགྱུར་བ་དང་། རབ་ཏུ་དབེན་པ་དང་། ཆོག་ཤེས་པའི་བསྔགས་པ་མང་དུ་འབྱུང་ཞེས་བྱ་བ་ཡིན་ཏེ། འདོད་པ་
ལས་དབེན་པ་དང་། ཆོག་ཤེས་པའི་བསྔགས་པའི་ཡོན་ཏན་མང་པོ་བརྗོད་པའོ། །དེའི་གཏམ་མང་པོ་གང་ཡིན་པ་དེ་ནི་རབ་ཏུ་དབེན་པ་དང་ཆོག་ཤེས་པའི་གཏམ་མང་པོ་འབྱུང་བའོ། །དེ་ལྟར་འདོད་པ་ལས་རབ་ཏུ་དབེན་པའི་ཕན་ཡོན་བསྟན་ནས་
ཚུལ་འཆོས་པ་དང་གཅམ་སྒྱུ་ལ་སོགས་པས་ནི་སྡིག་པ་མི་དགེ་བའི་ཆོས་རྣམས་ལས་དབེན་པའི་ཐབས་བསྟན་པ་ཡིན་ཏེ། ཚུལ་འཆོས་པ་ལ་སོགས་པའི་ཉེས་པ་བསྟན་པ་དེ་དག་ལས་རབ་ཏུ་དབེན་པར་གྱུར་པའོ། །དེ་ལྟར་རེ་ཞིག་བསམ་གཏན་
དང་པོའི་མན་ངག་ལ་འཇུག་པའི་གཏམ་བསྟན་ཏོ། །ཉེ་བར་ཞི་བ་དང་རབ་ཏུ་ཞི་བ་ནི་ཉེ་བར་ཞི་བ་དང་རབ་ཏུ་ཞི་བའོ། །དེ་གཉིས་ལམ་དུ་གྱུར་པ་ནི་ཉེ་བར་ཞི་བ་དང་རབ་ཏུ་དང་བའི་ལམ་དུ་གྱུར་པའོ། །དེ་ལ་ཉེ་བར་ཞི་བ་ནི་ཉོན་མོངས་པ་ཉེ་བར་ཞི་བའོ། །རབ་ཏུ་དང་བ་ནི་
སེམས་ཀྱི་དད་པའོ། །ཉོན་མོངས་པ་དང་ཉེ་བར་ཞི་བ་མངོན་སུམ་དུ་བསྟན་པ་དེས་ནི་བསམ་གཏན་གཉིས་པ་ལ་སོགས་པའི་མན་ངག་ལ་འཇུག་པའི་གཏམ་བསྟན་པ་ཡིན་ནོ། །ཆོས་ཀྱི་གཏམ་དེ་དང་དེ་ཞེས་བྱ་བ་ནི་འདིར་མ་བསྟན་པའི་ལྷག་མའི་ཆོས་ཀྱི་
གཏམ་མ་ལུས་པར་བསྟན་ཏོ། །དེ་བཞིན་དུ་གཡོག་བྱེད་ཅེས་བྱ་བ་ནི་ཇི་ལྟར་ཁྱིམ་ན་གནས་པའི་དུས་ལྟ་བུར་རོ། །པདྨའི་ལོ་མ་ཆེན་པོ་ལ། །ཞེས་བྱ་བ་སྨོས་པ་ནི་བསམ་གཏན་གྱི་སྦྱོར་བ་དང་མཐུན་པའི་ཟས་ཙམ་བསྟན་པའི་ཕྱིར་རོ། །སླར་སོང་ངོ་ཞེས་བྱ་
བྱ་བའི་ཚིག་གིས་ནི་སྔར་བསྟན་པའི་ཞག་ལྔ་ཞིང་བྱང་ཆུབ་སེམས་དབའི་དྲུང་དུ་ཆོས་མཉན་པའི་ཕྱིར་འདུའོ་ཞེས་བྱ་བ་འདིའི་གནས་སྐབས་ཡོངས་སུ་མི་ཉམས་པར་བྱ་བའི་ཕྱིར་རོ། །དེ་ཉིད་ཀྱི་ཕྱིར་ཡང་རིང་པར་ཡང་ཡོངས་སུ་ཤེས་ནས་ཞེས་བྱ་བ་སྟེ། ཉི་མ་ལྔས་

བར་དུ་ཆོད་པའི་ཕྱིར་རོ། །ཚུལ་ཁྲིམས་དང་སྤྱོད་ཚུལ་དེ་ལྟར་ཞེས་བྱ་བ་ནི་གང་སྔར་བསྟན་པའི་དཀའ་ཐུབ་དང་། བཟླས་བརྗོད་དང་། སྦྱིན་སྲེག་གི་ཆོ་ག་དེ་ཉིད་བསྟན་པ་ཡིན་ཏེ། འདིར་ཡང་ཚུལ་ཁྲིམས་དང་བརྟུལ་ཞུགས་ནི་དོན་གཞན་
མ་ཡིན་ཏེ། བཟླས་བརྗོད་དང་། སྦྱིན་སྲེག་ལ་སོགས་པ་བྱས་ནས་དུས་བསྟན་ཏེ། སླར་དོང་བ་ལ་སོགས་པའོ། །རབ་ཏུ་དབེན་པ་ལ་དགའ་བ་ཞེས་བྱ་བ་ནི་ཞག་ལྔ་ཞིང་ལྔ་ཞིང་བྱང་ཆུབ་སེམས་དཔའི་གན་དུ་འོང་བའི་ཕྱིར་རོ། །བསམ་གཏན་ལ་གཞོལ་བས་ཞེས་
བྱ་བ་ནི་གང་སྔར་བསྟན་པའི་ཡིད་བསམ་གཏན་ལ་སྦྱོར་བས་གནས་ཞེས་བྱ་བ་དེ་ཉིད་བསྟན་པའོ། །བྱ་བ་ངན་པ་དང་མ་འབྲེལ་ཞིང་ཞེས་བྱ་བ་ནི་གང་སྔར་བསྟན་པའི་བརྟུལ་ཞུགས་དང་། བཟླས་བརྗོད་དང་སྦྱིན་སྲེག་གི་ཆོ་ག་བྱེད་ཀྱི་ལས་གཞན་མི་བྱེད་པས་
སོ། །གདུང་བ་མེད་ལ་ཞེས་བྱ་བ་ནི་བསྟན་པའི་ལམ་ལ་དགའ་བར་སྟོན་ཏོ། །རབ་ཏུ་ཞི་བ་ལ་མངོན་པར་དགའ་ཞིང་འཁོད་པར་ཞེས་བྱ་བ་ནི་སྤྱོད་ཡུལ་ལ་སོགས་པའི་གནས་པའོ། །རྩོལ་བ་མེད་པར་ཞེས་བྱ་བ་འདིས་ནི་བྱ་བ་ངན་པ་མ་འབྲེལ་ཞིང་གདུང་
བ་མེད་པ་རབ་ཏུ་ཞི་བ་ཉིད་དུ་བསྟན་ཏོ། །ཡོན་ཏན་རེ་བ་སྙིང་ལ་ཞེས་བྱ་བ་ནི་ཕྱི་རོལ་གྱི་འཇུག་པ་སྟོན་པའི་ཕྱིར་ཏེ། སྙིང་གི་ཡོན་ཏན་ལ་རེ་བ་ཞེས་བྱ་བའི་དོན་ཏོ། །པདྨའི་རྩ་བའི་ཆ་དང་པོ་མི་སྣང་བར་བྱས་སོ་ཞེས་བྱ་བ་ལ། ཅིའི་ཕྱིར་ཞེ་ན། དེ་མི་སྣང་བར་
བྱས་པ་བསྟན་པའི་ཕྱིར། སྡུག་བསྔལ་བྱུང་བར་གྱུར་པ་ལ། །ཞེས་བྱ་བའི་ཚིགས་བཅད་སྨོས་པ་ཡིན་ཏེ། བདེ་བ་སྡུག་བསྔལ་གཉིས་ཡོད་པ་དང་མེད་པར་གྱུར་ཀྱང་བྱང་ཆུབ་སེམས་དཔའ་ལ་ནི་བློ་དང་ལྡན་པའི་ཕྱིར་མི་སྣང་བར་བྱས་ཀྱང་མི་གཡོ་ཞིང་དེ་ལྟར་
ཤེས་པར་འགྱུར་བས་སོ། །དེ་ལྟར་མི་སྣང་བར་བྱས་པས་དེ་ལ་སེམས་འཁྲུགས་པས་ཤི་ཡང་སླ་ཞེས་བྱ་བ་ནི་སྐྱེ་བ་དུ་མར་མི་སྡུག་པའི་རྣམ་པར་སྨིན་པའི་རྒྱུར་འགྱུར་བའི་ཕྱིར་རོ། །སེམས་འཁྲུགས་པ་ནི་ཚེ་ཟད་པ་ཡིན་ཏེ། ཚེ་ཟད་པ་དེའི་རྒྱུ་ཡིན་པའི་

ཕྱིར་རོ། །སྲོག་གི་ཕྱིར་ཡང་ཞེས་བྱ་བ་ནི་སྲོག་གི་ཆེད་དུ་ཡང་ངོ་། །གལ་ཏེ་འཁྲུགས་ཤིང་གསོན་པར་རུང་ངོ་ཞེས་འགའ་ཞིག་སྨྲ་ན་ནི། དེའི་ཚེ་འཁྲུགས་པར་གྱུར་ན་དེ་མ་ཐག་འཆི་བ་ལྟ་བུ་སྟེ། འཆི་བར་ཉེ་བར་འགྲོ་བ་ཡིན་ཏེ། དེས་སེམས་
འཁྲུགས་པ་ཡིན་པའི་ཕྱིར་རོ། །དེས་ན་སེམས་འཁྲུགས་བཞིན་དུ་འཚོ་བ་ནི་མ་ཡིན་ནོ་ཞེས་བྱ་བའི་དོན་ཏོ། །འགྲམ་པ་དང་མིག་ནི་ཀོང་ཞེས་བྱ་བས་དབྱིབས་འགྱུར་བ་ཉིད་དོ། །བཞིན་གྱི་མདངས་ནི་ངན་ཞེས་བྱ་བ་ནི་མདོག་འགྱུར་བའོ། །སྐད་ཀྱི་
གདངས་ཟབ་མོ་ནི་ཆུང་ཞེས་བྱ་བས་ནི་སྒྲ་འགྱུར་བའོ། །ཉམ་དམས་ཀྱང་བརྟན་པ་དང་རབ་ཏུ་ཞི་བའི་ཡོན་ཏན་ཞེས་བྱ་བ་འདིས་ནི་རྣམ་པར་རིག་བྱེད་མ་འགྱུར་བར་བསྟན་ཏོ། །དེ་ལྟར་ཕྱི་རོལ་གྱི་ཡུལ་གྱིས་མཐོང་བ་སྟེ། མིག་དང་རྣ་བའི་དབང་པོ་
གཉིས་ཀྱིས་མདོག་དང་དབྱིབས་རྣམ་པར་རིག་པ་ཡིན་ནོ། །རིད་པར་གྱུར་པའི་རྒྱུ་དེ་ལ་དྲིས་སོ་ཞེས་བྱ་བ་ནི་ཅིའི་ཕྱིར་རིད་པའི་རྒྱུ་དེ་ལ་དྲིས་ཤེ་ན། རིད་པ་དང་འབྲེལ་པར་གྱུར་པའི་ཕྱིར་རོ། །འགྱུར་བ་གཞན་དག་ནི་མི་རིགས་པའི་ཕྱིར་ཏེ། དྲི་བ་གཞན་དག་
ནི་མ་བརྗོད་ཀྱང་གྲུབ་པ་ཉིད་དེ། དེ་ལས་གཞན་དུ་འགྱུར་བའི་རྒྱུའོ། །ཇི་ལྟར་གྱུར་པ་ཞེས་བྱ་བ་ནི་དང་པོའི་གནས་ན་པདྨའི་རྩ་བ་ནི་མེད་དེ། པདྨའི་ལོ་མ་ནི་རྒྱན་འཁྲུགས་ཤིང་འདུག་པར་མཐོང་ཞེས་བྱ་བ་དེ་དག་བསྟན་པར་གྱུར་པའོ། །ཆོས་མ་ཡིན་
པ་ཞེས་བྱ་བ་ནི་པདྨའི་རྩ་བ་ཁྱེར་བའོ། །ཤེས་པ་འཇུག་པའི་ཡུལ་ཡང་བསྒྲིབས་ཞེས་བྱ་བ་ནི་ཤེས་པ་འཇུག་པ་ཡིན་པས་ཤེས་པ་འཇུག་པའོ། །ཤེས་པ་འཇུག་པར་བྱེད་པའི་ཡུལ་ནི་ཤེས་པ་འཇུག་པའི་ཡུལ་ལོ། །ཤེས་པ་འཇུག་པའི་ཡུལ་
བསྒྲིབས་པ་གང་ཡིན་པ་དེ་ནི་ཤེས་པ་འཇུག་པའི་ཡུལ་བསྒྲིབས་པ་སྟེ། མངོན་པར་ཤེས་པ་ལས་བྱུང་བའི་ལྷའི་མིག་གིས་མཐོང་བའི་ཡུལ་དེ་བསྒྲིབས་པའི་ཕྱིར་རོ། །ཅིའི་ཕྱིར་ཞེ་ན། བརྒྱ་བྱིན་གྱི་མཐུ་ལས་བྱུང་བའི་རྫུ་འཕྲུལ་གྱི་ཁྱད་པར་གྱིས་མངོན་པར་ཤེས་

བ་ལས་བྱུང་བའི་མིག་གི་ཡུལ་ཡང་མི་སྣང་བར་བྱེད་ནུས་པས་སོ། །ཅི་ལས་གྱུར་ཞེས་བྱ་བ་ནི་གང་གིས་འདི་ལྟར་བྱས་ཞེས་པའོ། །འདི་ཞེས་བྱ་བ་ནི་པདྨའི་རྩ་བ་མེད་པའོ། །རང་གི་ཡིད་ལ་གཅགས་པ་ཞེས་བྱ་བ་ནི་བྱང་ཆུབ་སེམས་དཔའ་
དེ་ཉམ་ཐག་པའི་རྒྱུས་སོ། །བདག་ཉིད་གཙང་བ་ཞེས་བྱ་བ་ནི་བདག་ཉིད་པདྨའི་རྩ་བ་མ་ཁྱེར་བའོ། །འདིར་ཚིགས་བཅད་བཅུ་གཅིག་གིས་མནའ་ཁྱད་པར་ཅན་བོར་བ་སྟེ། རབ་དང་། འབྲིང་དང་། ཐ་མ་རྣམས་ཀྱི་འདོད་པའི་ཉེས་དམིགས་བསྟན་པའི་ཕྱིར་ཇི་ལྟར་རིགས་
པར་སྦྱར་ཏེ། དང་པོ་གསུམ་གྱིས་མནའ་ཁྱད་པར་ཅན་བོར་བ་ནི་ཐ་མའི་དབང་དུ་བྱས་པའོ། །ཁྱོད་ཀྱི་རྩ་བ་བརྐམ་པས་གང་ཁྱེར་བ། །ཞེས་བྱ་བའི་ཚིགས་བཅད་ནི་རབ་ཀྱི་དབང་དུ་བྱས་པའོ། །ཁྱོད་ལྟའི་རྩ་བ་གང་ཁྱེར་བ། །ཞེས་བྱ་བ་ནས། ཁྱོད་ལྟ་བུ་ཡི་རྩ་བ་ལ་
ཆགས་གང་། །ཞེས་བྱ་བའི་ཚིགས་བཅད་གསུམ་ནི་འབྲིང་གི་དབང་དུ་བྱས་པའོ། །རྩ་བའི་ཕྱིར་ནི་བདག་ཉིད་ཆུད་གསོན་པ། ཞེས་བྱ་བ་དང་། གང་གིས་རྩ་བ་མཐོང་ལ་ཆོས་མ་མཐོང་། །ཞེས་བྱ་བའི་ཚིགས་བཅད་གཉིས་ནི་ཐ་མའི་དབང་དུ་བྱས་པའོ། །
དམ་པའི་མཆོག་ཏུ་གྱུར་ཞེས་བྱ་བའི་ཚིགས་བཅད་ནི་རབ་ཀྱི་གནས་སྐབས་ཀྱི་དབང་དུ་བྱས་པའོ། །གནོད་སྦྱིན་དང་། གླང་པོ་ཆེ་དང་། སྤྲེའུ་རྣམས་ཀྱིས་ཀྱང་འདོད་པའི་ཉེས་དམིགས་བསྟན་པའི་ཕྱིར་ཏེ། དེ་དག་ནི་འདོད་ཆགས་དང་མ་བྲལ་བའི་ཕྱིར་གནས་སྐབས་དང་རྗེས་སུ་
མཐུན་པའི་མནའ་གསུམ་བོར་བ་ཡིན་ནོ། །གང་ཞིག་མ་བརླག་པར་ནི་བརླག་ཅེའམ། །ཞེས་བྱ་བའི་ཚིགས་བཅད་འདི་ནི་བར་མའི་དབང་དུ་བྱས་པའོ། །གང་དག་ཐོབ་ཕྱིར་ཡིད་ལ་རྩོལ་བྱེད་ཅིང་། །ཞེས་བྱ་བའི་ཚིགས་བཅད་ཕྱེད་ནི་མཐོང་བའི་ཆོས་ཀྱི་བདེ་བ་འདོད་པའི་དབང་དུ་
བྱས་པའོ། །དཀའ་ཐུབ་འབད་པས་གང་དག་ཐོབ་འདོད་པའི། །ཞེས་བྱ་བའི་ཕྱེད་འོག་མས་ནི་འཇིག་རྟེན་ཕ་རོལ་གྱི་བདེ་བ་འདོད་པའི་དབང་དུ་བྱ་བའོ། །འདོད་པའི་ཕྱིར་ནི་འཇིག་རྟེན་བཅིངས་ཤིང་གསོད་པར་འགྱུར། །ཞེས་བྱ་བ་དང་། གང་གིས་མཛའ་བོ་

རྣམས་དང་མྱུར་དུ་འཁོན་འབྱུང་འགྱུར། །ཞེས་བྱ་བའི་ཚིགས་བཅད་འདི་གཉིས་དང་། དེ་བས་རབ་དང་འབྲིང་དང་ཐ་མ་རྣམས། །ཞེས་བྱ་བའི་ཚིགས་བཅད་ཕྱེད་ཀྱིས་ནི་རྣམ་པ་གསུམ་གྱི་འདོད་པའི་ཉེས་དམིགས་མདོར་བསྡུས་ནས་བསྟན་པ་སྟེ། ཐ་མའི་འདོད་པའི་ཉེས་དམིགས་ཀྱི་དབང་དུ་
བྱས་པ་ནི། འདོད་པའི་ཕྱིར་ནི་འཇིག་རྟེན་བཅིངས་ཤིང་གསོད་པར་འགྱུར། །ཞེས་བྱ་བ་ཕྱེད་དོ། །རབ་ཀྱི་དབང་དུ་བྱས་པ་ནི། རྒྱལ་པོ་རྣམས་ཀྱང་འདོད་པའི་ཕྱིར། །ཞེས་བྱ་བ་ཕྱེད་འོག་མའོ། །འབྲིང་གི་དབང་དུ་བྱས་པ་ནི། གང་གིས་མཛའ་བོ་རྣམས་དང་མྱུར་དུ་འཁོན་འབྱུང་འགྱུར། །
ཞེས་བྱ་བའི་ཚིགས་བཅད་ཕྱེད་འོག་མ་ཡིན་ནོ། །འདི་དང་ཕ་རོལ་དུ་ཡང་འདོད་པས་གསོད་པར་བྱེད། །ཅེས་བྱ་བ་ནི། གྲགས་པ་ཉམས་ཤིང་ཕྱི་མ་ལ་ཡང་སྡུག་བསྔལ་མྱོང་། །ཞེས་བྱ་བ་ཚིགས་བཅད་དེའི་དབང་དུ་བྱས་པ་སྟེ། གྲགས་པ་ཉམས་པ་ཞེས་བྱ་བ་ནི་མཐོང་བའི་ཆོས་
ཀྱི་ཉེས་དམིགས་སོ། །སྡུག་བསྔལ་མྱོང་ཞེས་བྱ་བ་ནི་འཇིག་རྟེན་ཕ་རོལ་གྱི་ཉེས་དམིགས་སོ། །བདག་ལ་ཕན་འདོད་སྦྲུལ་གདུག་ཁྲོས་པ་བཞིན། །ཞེས་བྱ་བ་ནི་དུས་རྟག་ཏུ་ཕུང་ཁྲོལ་གྱི་རྒྱུར་གྱུར་པའི་ཕྱིར་རོ། །བདག་གིས་འདིར་པདྨའི་རྩ་བ་སྦས་པ་ཞེས་བྱ་བ་ཅིའི་ཕྱིར་
ཞེ་ན་སྨྲས་པ་བརྟག་པའི་ཕྱིར་རོ། །ཅིའི་ཕྱིར་བརྟག་ཅེ་ན། སྨྲས་པ། ཡོན་ཏན་རྣམས་རེ་བ་བཞིན་པ་རྟོགས་པར་འགྱུར་བའོ། །སྤྱོད་པ་རྣམ་པར་དག་པ་ནི་གང་གི་ཡིད་འཁྲུགས་པ་མ་ཡིན་ཞིང་དོན་གཞན་དུ་མ་གྱུར་པའི་ཕྱིར་རོ། །བརྟན་པའི་སྤྱོད་པ་ནི་བདེ་བ་དང་སྡུག་བསྔལ་
ལྡོག་པ་དང་འཇུག་པ་གཉིས་ལ་ཡང་བརྟན་པའི་ཁྱད་པར་གྱིས་གཞན་དུ་མི་འགྱུར་བའི་ཕྱིར་རོ། །ངེད་ཅག་ཁྱོད་ཀྱི་གཉེན་དང་གྲོགས་མ་ཡིན། །ཞེས་བྱ་བའི་ཚིགས་བཅད་འདིའི་བསྡུས་པའི་དོན་ནི་རྩེད་མོའི་ལམ་འབྱུང་བའི་རྒྱུ་ནི་རྣམ་པ་བཞི་སྟེ། དེའི་དབང་དུ་བྱས་ནས། ངེད་ཅག་ཁྱེད་ཀྱི་གཉེན་
དང་ཞེས་བྱ་བ་ནི་གང་གིས་ལྷན་ཅིག་སྐྱེས་པའི་སྤུན་ཟླའོ། །གྲོགས་ནེའུ་ལྡངས་ཏེ། འདི་གཉིས་ཀྱིས་ནི་རང་གི་སྐྱེ་བོ་ཡིན་པའི་ཕྱིར་དང་། ན་ཚོད་མཉམ་པའི་ཕྱིར་རྩེད་མོའི་ལམ་བཞིན་དུ་བྱ་བར་རིགས་པ་ཡིན་ནོ། །གར་མཁན་ནི་འདྲ་བར་བྱེད་པ་ཡིན་ཏེ། གར་མཁན་དང་འཕྱས་གདགས་པ་ནི་གཅིག་ལ་

གཅིག་རྩེད་མོའི་ལམ་རིགས་པ་ཡིན་ཏེ། དེས་ཀུན་དུ་འཚོ་བའི་ཕྱིར་རོ། །ཅིའི་ཕྱིར་ཁྱད་དུ་བསད་ནས་ཞེས་བྱ་བ་ནི་གཟི་བྱིན་གྱིས་ནོན་པའི་ཚིག་སྟེ། རྩེད་མོའི་ལས་ཞེས་བྱ་བའི་ཚིག་གིས་ནི་སྤྱོད་པ་གླང་པོས་སྤྱོས་སོ་ཞེས་བྱ་བའོ། །སློབ་དཔོན་དཔའ་བོས་མཛད་པའི་སྐྱེས་
པའི་རབས་རྒྱ་ཆེར་བཤད་པ་ལས་པདྨའི་རྩ་བའི་སྐྱེས་པའི་རབས་སོ།། །།ཐོས་པ་དང་། དུལ་བ་དང་། ཆོ་རིགས་བཙུན་པ་ཞེས་བྱ་བ་ལ་ཐོས་པ་ནི་ད་ལྟར་བྱུང་བའི་ཤེས་རབ་ཀྱི་ཚོགས་སོ། །དུལ་བ་དང་། ཆོ་རིགས་བཙུན་པ་ནི་འདས་པའི་སྐྱེ་བའི་ཚུལ་ཁྲིམས་ཀྱི་
ཕ་རོལ་ཏུ་ཕྱིན་པའི་འབྲས་བུ་སྟེ། རྣམ་པར་སྨིན་པ་དང་། རྒྱུ་མཐུན་པའི་འབྲས་བུ་འོ། །མ་འཇུངས་ཤིང་ཁོང་བཟོ་བ་ཞེས་བྱ་བ་ནི་འདས་པའི་སྐྱེ་བའི་ཤེས་རབ་ཀྱི་ཚོགས་དེའི་འབྲས་བུའོ། །འཇིག་རྟེན་གྱི་ཐ་སྙད་དུ་བྱ་བ་ལ་འགལ་བ་མེད་པ་ཞེས་བྱ་བ་ནི་ད་ལྟར་བྱུང་བའི་
དུས་ཀྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །གཙུག་ལག་མང་པོ་ལ་གོམས་པས་ཚིག་ལ་མཁས་པར་གྲགས་པ་ཞེས་བྱ་བ་ནི་སྔར་བསྟན་པའི་ཐོས་པ་གསལ་བར་བྱེད་པ་ཡིན་ནོ། །སྙིང་རྗེ་དང་ལྡན་ཞེས་བྱ་བ་ལ་སོགས་པའི་ཚིག་གིས་ནི་ད་ལྟར་བྱུང་བའི་སྐྱེ་བའི་སྦྱིན་པའི་ཕ་རོལ་ཏུ་
ཕྱིན་པའོ། །རབ་ཏུ་ཕྱུག་པས་ཞེས་བྱ་བ་ནི་ཚེ་སྔ་མའི་སྦྱིན་པའི་ཕ་རོལ་ཏུ་ཕྱིན་བའི་འབྲས་བུའོ། །དེ་ལྟར་འདི་དག་ཐམས་ཅད་ཀྱི་བསོད་ནམས་དང་ཡེ་ཤེས་ཀྱི་ཚོགས་ཀྱི་རྒྱུ་དང་འབྲས་བུ་ལ་འཇུག་པ་བསྟན་པའོ། །དེ་ནི་རང་བཞིན་ཆོས་ཀྱི་བདག །ཅེས་བྱ་བ་འདིས་ནི་སྦྱིན་པ་དང་།
ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་གནས་པ་ཉིད་དུ་བསྟན་ཏོ། །ཐོས་ལ་སོགས་པའི་ཡོན་ཏན་བརྒྱན། །ཅེས་བྱ་བ་འདིས་ནི་ཡེ་ཤེས་ཀྱི་ཚོགས་ཀྱི་ཕ་རོལ་ཏུ་ཕྱིན་པ་ལ་གནས་པ་ཉིད་དུ་བསྟན་ཏོ། །ཚོགས་གཉིས་ཀྱི་གནས་ཉིད་དུ་གྱུར་པས་བཀུར་སྟི་བྱ་བའི་གཞིར་གྱུར་པ་ཡིན་ནོ། །
ཕྲད་པའི་ཕྱིར་ཞེས་བྱ་བ་ནི་བལྟ་བའི་ཕྱིར་རོ། །དེའི་ཁྱིམ་དུ་ཞེས་བྱ་བ་ནི་སེམས་དཔའ་ཆེན་པོའོ། །མགྲོན་འོངས་པའི་བཀུར་སྟིའི་བྱ་བ་བྱས་པ་གང་ཡིན་པ་དེ་ནི་མགྲོན་འོངས་པའི་བཀུར་སྟིའི་བྱ་བ་བྱས་པའོ། །གཏམ་སྨྲ་བའི་སྐབས་ལ་བབ་པ་ནི་སྐབས་ལ་བབ་པའི་གཏམ་གླེང་བའོ། །

དེ་ལས་འཕྲོས་པའི་གླེང་ལངས་པའོ། །ཁྱོད་ལ་བྱམས་སམ་ཞེས་བྱ་བ་ནི་རྗེས་སུ་བརྩེ་འམ་ཞེས་དྲི་བ་ཡིན་ཏེ། བུད་མེད་གཞན་ལ་ཆགས་པ་མེད་དམ་ཞེས་དྲི་བ་འོ། །ཁྱོད་ཀྱིས་ནི་བཀུར་སྟི་བྱས་པའི་ཡོན་ཏན་དྲིན་དུ་གཟོ་འམ་མི་གཟོ་ཞེས་བྱ་བ་ནི་གསོ་ཞིང་བསྐྱེད་པ་ལ་སོགས་པ་སྟེ། གནོད་
པ་མ་བྱས་པ་ཉིད་དང་། བཀུར་སྟི་བྱས་པའི་ཡོན་ཏན་ཡོངས་སུ་ཤེས་པར་གྱུར་པའོ། །མི་བདེ་བ་ལྟ་ཡོད་དམ་མེད་ཅེས་བྱ་བའི་ཚིགས་བཅད་ལ་སོགས་པ་རྣམ་པ་གཉིས་ཏེ། འདི་གསུམ་གྱིས་ནི་བདག་ཉིད་དང་མཉམ་པར་ལོངས་སྤྱོད་དང་ཉེ་བར་སྤྱོད་པས་རྗེས་སུ་འཛིན་པ་ཡིན་ཏེ། མི་བདེ་
བ་མེད་པ་ནི་ཉེ་བར་འཚེ་བ་མེད་པར་བསྟན་ཏོ། །དེ་ལྟར་རེ་ཞིག་བུད་མེད་རྣམས་གཞན་ལ་རག་ལུས་པའི་ཚུལ་ཡིན་པས་འདྲི་བར་བྱེད་པའོ། །དེ་ངོ་ཚ་བས་མགོ་སྨད་དེ་མི་སྤོབས་བཞིན་དུ་ཞེས་བྱ་བས་ནི་གནས་མ་ཡིན་པར་དྲིས་པས་དེ་ངོ་ཚ་སྟེ་མགོ་སྨད་པའོ། །སྤོབས་པ་ནི་དེའི་ལན་དེ་མི་སྤོབས་
བཞིན་དུའོ། །དར་ལ་བབ་ཅིང་བྱད་གཟུགས་བཟང་། །ཞེས་བྱ་བའི་དོན་ནི་བདག་གི་དབང་ངམ་གཞན་གྱི་དབང་གིས་རབ་ཏུ་བྱུང་བར་བྱེད་པའི་རྒྱུ་ཡིན་ན་རབ་ཏུ་བྱུང་བའི་རྒྱུ་དེ་གཉི་ག་མེད་པར་སྟོན་ཏོ། །བདག་གི་དབང་ཡང་རྣམ་པ་གཉིས་ཀྱིས་རབ་ཏུ་བྱུང་བ་ཡིན་ཏེ། ལོངས་སྤྱོད་
སྤྱོད་པར་མི་ནུས་པ་དང་། དཀའ་ཐུབ་ཀྱི་ནགས་སུ་གནས་པར་འོས་པ་སྟེ་གཉིས་སོ། །དེ་གཉི་ག་ཡང་མེད་པར་བསྟན་པའི་ཕྱིར་དང་པོའི་ཕྱེད་ཀྱིས་བསྟན་པ་ཡིན་ཏེ། དར་ལ་བབ་ཅིང་བྱད་གཟུགས་བཟང་། །ཞེས་བྱ་བ་འདི་གཉིས་ཀྱིས་ནི་ཉེ་བར་ལོངས་སྤྱོད་པར་རིགས་པར་བསྟན་ཏེ།
དར་ལ་བབ་པས་ནི་རང་ཉིད་ཀྱིས་ལོངས་སྤྱོད་པར་ནུས་པ་དེས་སོ། །བྱད་གཟུགས་བཟང་ཞེས་བྱ་བས་ནི་བུད་མེད་རྣམས་ཀྱིས་ཀྱང་འདོད་པར་བྱ་བ་དེས་སོ། །གཞོན་ཤ་ཅན་དང་བདེ་བར་གསོས། །ཞེས་བྱ་བ་འདི་གཉིས་ནི་ནགས་སུ་གནས་པ་མི་རིགས་པར་བཤད་དེ། ལུས་གཞོན་ཤ་ཅན་
ཡིན་པའི་ཕྱིར་དང་། བདེ་བ་དང་རྗེས་སུ་མཐུན་པའི་རྐྱེན་ཐོབ་པའི་ཕྱིར་རོ། །དེ་ལྟར་བཞི་པོ་འདིས་བདག་གི་དབང་གིས་རབ་ཏུ་བྱུང་བ་མི་རིགས་པར་སྟོན་ཏོ། །གཞན་གྱི་དབང་གིས་ཀྱང་རབ་ཏུ་འབྱུང་བ་མི་རིགས་པར་སྟོན་ཏོ། །དེ་ནི་རྒྱལ་པོའི་གནང་ཆེན་ཡིན། །ཞེས་པ་སྟེ།

གལ་ཏེ་རྒྱལ་པོས་གཞན་དུ་སྤྱུགས་ན་ནི་རབ་ཏུ་འབྱུང་གི། དེ་ནི་གནང་ཆེན་ཡིན་ཞེས་བྱ་བའི་ཚིག་གིས་དེ་མེད་པར་སྟོན་ཏོ། །དེ་ལྟར་ནགས་གནས་སུ་རིག་ནས་ཁྱིམ་ཡོངས་སུ་གཏོང་བའི་རྒྱུ་མེད་དོ། །དེས་ན་ཁྱིམ་ཡོངས་སུ་གཏང་བའི་རྒྱུ་མེད་པར་བསྟན་
བའི་ཕྱིར། ནང་མི་དག་དང་ཞེས་བྱ་བའི་ཚིགས་བཅད་བརྩམས་པ་ཡིན་ཏེ། རྒྱུ་གསུམ་གྱིས་ནི་ཁྱིམ་ཡོངས་སུ་གཏང་བར་བྱ་བ་ཡིན་ཏེ། རྣམ་པ་གསུམ་པོ་ཡང་བསོད་ནམས་ཀྱི་འབྲས་བུས་ཕོངས་པར་བསྟན་པའོ། །དེ་མེད་ན་ཇི་ལྟར་བབ་ཅོལ་དུ་ཁྱིམ་ཡོངས་སུ་གཏད་
ཞེས་བྱ་བ་ནི་ཚིགས་བཅད་འདིའི་བསྡུས་པའི་དོན་ཏོ། །ནང་མི་དག་དང་འཁོན་མ་བྱུང་། །ཞེས་བྱ་བ་འདིས་ནི་བཟོད་པའི་ཕ་རོལ་ཏུ་ཕྱིན་པས་ཕོངས་པ་མེད་པར་བསྟན་ཏོ། །རྒས་པས་མི་སྡུག་མ་གྱུར་ཅིང་། །ཞེས་བྱ་བ་དང་། ནད་མེད་ཅེས་བྱ་བ་འདི་གཉིས་ཀྱིས་ནི་
བདག་ཉིད་ཚུལ་ཁྲིམས་ཀྱི་བསོད་ནམས་ཀྱི་ཚོགས་ཀྱི་འབྲས་བུ་ཡོད་པར་བསྟན་ཏོ། །ཁྱིམ་གྱི་ལོངས་སྤྱོད་སྤྱོད་པ་ཞེས་བྱ་བ་འདིས་ནི་སྦྱིན་པ་ལས་བྱུང་བའི་བསོད་ནམས་ཀྱི་ཚོགས་ཀྱི་འབྲས་བུ་ཕོངས་པ་མེད་པར་བསྟན་ཏོ། །ཚིག་གཅིག་ཅེས་བྱ་བ་ནི་གསུམ་པོ་དེ་དག་མ་ཚང་
བ་མེད་ཀྱང་བབ་ཅོལ་དུ་གཏོང་བར་ནུས་ཞེས་པའོ། །དེ་མཆོག་ཏུ་གསལ་བའི་ཕྱིར། མཛངས་ཤིང་དུལ་བའི་རྒྱན་གྱིས་བརྒྱན། །ཞེས་བྱ་བའི་ཚིགས་བཅད་ཡིན་ཏེ། རང་གི་ཆུང་མ་བོར་བ་མི་རིགས་པ་ལས་བརྩམས་པའོ། །འདི་ལྟ་བུ་ཞེས་བྱ་བ་ནི་འདོད་པའི་དོན་དང་ལྡན་
པའོ། །ནང་མི་ནི་རང་གི་ཆུང་མའོ། །མི་བརྟན་ནང་མི་སྙིང་རྗེ་མེད་པ་ནི་མི་བརྟན་སྙིང་རྗེ་མེད་པས་སོ། །ཇི་ལྟར་འདོད་པ་དང་འགལ་བ་ཡིན་ཞེ་ན། སྨྲས་པ། དུལ་བའི་རྒྱན་གྱིས་བརྒྱན་ཞེས་བྱ་བ་སྨོས་ཏེ། བརྒྱལ་འདོད་པའི་དོན་དུ་རང་གི་ཆུང་མ་ཡོངས་སུ་བཏང་སྟེ། བུད་མེད་
གཞན་དག་ལ་ཆགས་ན་དེས་ནི་དེ་ལ་སྙིང་ཉེ་བ་མེད་ན་འདི་ནི་དེ་ལྟ་མ་ཡིན་ཏེ། ཅིའི་ཕྱིར་ཞེ་ན། དུལ་བའི་རྒྱན་གྱིས་བརྒྱན་པའི་ཕྱིར་ཏེ། གང་གི་ཕྱིར་མ་དུལ་བ་ནི་བུད་མེད་གཞན་ལ་ཡང་ཆགས་པར་འགྱུར་ན། དེ་མེད་པས་རང་གི་ཆུང་མ་ཡང་ཡོངས་སུ་གཏོང་བ་འདི་ནི་འདོད་བའི་དོན་དང་འགལ་

བའོ། །མཛངས་ཤིང་ཞེས་བྱ་བ་འདིས་ནི་ནོར་དང་འགལ་བར་བསྟན་ཏེ། གང་གི་ཕྱིར་མཛངས་ན་ནི་རིགས་ལ་སོགས་པའི་ཡོན་ཏན་དང་། ཡོན་ཏན་མ་ཡིན་པའི་བྱ་བྲག་མཐོང་བ་ཡིན་ཏེ། དེའི་ནུས་པ་དང་ལྡན་པའི་ཕྱིར་རོ། །རིགས་ལ་སོགས་པའི་ཡོན་ཏན་གྱིས་ཁྱད་པར་དུ་འཕགས་པ་
དང་ལྡན་པ་གཞན་ནི་མ་མཐོང་ལ། དེ་དག་མ་མཐོང་ཡང་རང་གི་ཆུང་མ་ཡོངས་སུ་གཏོང་བས་ནི་ནོར་དང་འགལ་བར་གྱུར་པའོ། །མཉེས་ཀྱང་གཤིན་ཞེས་བྱ་བ་འདིས་ནི་ཆོས་དེ་ལྟ་བུ་དང་ལྡན་ཡང་རང་གི་ཆུང་མ་ཡོངས་སུ་གཏོང་བ་ཉིད་དེ། དེ་ལྟར་རེ་ཞིག་བདག་ལ་ལྟོས་པ་ནང་
མི་ཡོངས་སུ་གཏོང་བར་མི་རིགས་པར་བསྟན་ཏེ། ད་ནི་ནང་མི་ལ་ལྟོས་ནས་ནང་མི་ཡོངས་སུ་གཏོང་བར་མི་རིགས་པར་སྟོན་ཏེ། གཞན་ལ་སྙིང་བརྩེ་བ་ཞེས་པས་སོ། །གཞན་གྱི་སྡུག་བསྔལ་ལ་ལྟོས་པས་ཀྱང་གཞན་ལ་སྙིང་བརྩེ་བའི་ཕྱིར་ནང་མི་ཡོངས་སུ་གཏོང་བར་མི་རིགས་
པ་ཉིད་དུ་བསྟན་ཏོ། །མཉེས་ཀྱང་གཤིན་ཞེས་བྱ་བ་བཤད་པས་མཉེས་གཤིན་པས་ནི་མཆོག་ཏུ་ནང་མི་ཡོངས་སུ་གཏང་བར་རིགས་ཏེ། ཅིའི་ཕྱིར་ཞེ་ན། རབ་ཏུ་བྱུང་བའི་ཆོས་དང་མཐུན་པར་འདོད་པས་སོ་ཞེས་གང་དག་ཡོངས་སུ་རྟོག་པ་ལ། དེའི་ལན་བརྩམས་པའི་
ཕྱིར། དགེ་སྦྱོང་བྲམ་ཟེ་མཛའ་བོའི་རྟེན། །ཞེས་བྱ་བ་དང་། རྗེས་སུ་མཐུན་ཞིང་ཆོས་གྲོགས་བྱེད། །ཅེས་བྱ་བའི་ཚིག་གཉིས་ཡིན་ཏེ། དགེ་སྦྱོང་བྲམ་ཟེ་ཞེས་བྱ་བའི་ཚིགས་བཅད་ཀྱི་དོན་ནི་རབ་ཏུ་བྱུང་ནས་ནགས་སུ་གང་རྙེད་པའི་ཆོས་དེ་ནི་ཁྱིམ་དུ་ཡང་རྙེད་པ་དང་། ཁྱད་
པར་གྱི་ཆོས་ཀྱང་རྙེད་པ་ཉིད་དུ་བསྟན་པའི་ཕྱིར་སྨྲས་པའོ། །དགེ་སྦྱོང་དང་བྲམ་ཟེ་ཞེས་བྱ་བའི་ཚིགས་བཅད་ཕྱེད་ཀྱིས་ནི་སྦྱིན་པའི་ཞིང་རྙེད་པར་དཀའ་བ་བསྟན་ཏེ། དགེ་སྦྱོང་བྲམ་ཟེ་ཞེས་བྱ་བ་སྨོས་པས་ནི་ཡོན་ཏན་གྱི་ཞིང་ངོ་། །མཛའ་བོའི་རྟེན་དང་ནང་མི་ཞེས་སྨོས་པས་ནི་ཕན་འདོགས་པའི་
ཞིང་ཉིད་དོ། །ཕོངས་པ་ཞེས་སྨོས་པས་ནི་སྙིང་རྗེའི་ཞིང་ཉིད་དོ། །འདི་ནི་རེ་ཞིག་ནགས་ན་གནས་པ་ལས་ཁྱད་པར་དུ་བྱ་བའི་ཆོས་སོ། །གཙང་སྦྲ་ཚུལ་ཁྲིམས་ནོར་ཞེས་བྱ་བ་འདིས་ནི་ནགས་དང་ཁྱིམ་གཉིས་ཀྱི་ཐུན་མོང་གི་ཐོབ་པའི་ཆོས་བསྟན་ཏོ། །ནགས་ཚལ་དགོན་པར་གང་བཙལ་

བ། ཞེས་བྱ་བ་ནི་གང་ནགས་ཀྱི་ཕྱོགས་སུ་འདོད་ཅིང་བཙལ་བ་དེ་ཅི་ཁྱིམ་འདིར་མི་རྙེད་དམ་ཞེས་པའོ། །དེ་ལྟར་ཡང་ནགས་སུ་འཇུག་པ་ལ་ནི་སྐྱོན་དང་འབྲེལ་པའོ་ཞེས་བསྟན་པའི་ཕྱིར། རྗེས་སུ་མཐུན་ཞིང་ཆོས་གྲོགས་བྱེད། །ཅེས་བྱ་བའི་
ཚིགས་བཅད་བརྩམས་སོ། །རྒྱུ་གསུམ་གྱིས་བུད་མེད་ཡོངས་སུ་སྤང་བར་བྱ་བ་ཡིན་ཏེ། རྒྱུ་གསུམ་མ་གཏོགས་པར་རང་གི་ཆུང་མ་ཡོངས་སུ་གཏོང་བ་ལས་ནི་ཆོས་མ་ཡིན་པར་འགྱུར་ཏེ། ཅི་ཆོས་མ་ཡིན་པ་ལ་མི་ལྟ། ཞེས་བྱ་བ་ནི་བསྡུས་པའི་དོན་ཏོ། །ཉེས་པ་
བའམ། རྗེས་སུ་མི་མཐུན་པའམ། རང་དགར་བྱེད་པའི་གཡོག་འཁོར་ནི་ཡོངས་སུ་སྤངས་ཀྱང་ཆོས་མ་ཡིན་པ་ཐོབ་པར་མི་འགྱུར་རོ། །ཡོན་ཏན་གསུམ་དང་ལྡན་ན་ནི་ཆོས་མ་ཡིན་པ་ཐོབ་པར་འགྱུར་རོ། །ཉེས་པ་མ་བྱས་པ་ནི་གུས་པའི་སྐྱེ་བོ་སྤངས་པ་ཉིད་ཡིན་ཏེ། འཁྲུལ་
པའི་སྐྱོན་མེད་པས་སོ། །རྗེས་སུ་མཐུན་ཞེས་བྱ་བ་ནི་ཁྱིམ་ཐབ་ལས་མི་འཕྱོ་བའོ། །ཆོས་གྲོགས་བྱེད་ཅེས་བྱ་བ་ནི་བདེན་པའི་ཆུང་མའོ། །བུད་མེད་སྤངས་པའི་རྒྱུ་གཞན་ཡང་ཡོད་དེ་སྔོན་ལས་ངན་པ་བྱས་པའི་རྒྱུ་དང་ལྡན་པ་ཡིན་ཏེ། དེས་ན་ཡིད་ལ་སྙིང་རྗེ་ཅུང་ཟད་མེད། །ཅེས་
བྱ་བའི་ཚིགས་བཅད་བརྩམས་སོ། །དེ་ཡོངས་སུ་བཏང་བ་དང་མཐུན་པ་ཉིད་ནི་བཏང་ཞིང་སྙང་རྗེ་སྤངས་པའི་ཕྱིར་ཏེ། འདིས་ནི་ཆོས་དང་མི་ལྡན་པར་སྟོན་ཏེ། སྙིང་རྗེ་ཅུང་ཟད་མེད་ཅེས་བྱ་བས་སོ། །ཀྱེ་མའོ་ཆོས་ནི་ཅུང་ཟད་འགྲུབ་རེ་སྐན། །ཞེས་བྱ་བ་ནི་སྐྱེ་བོ་སྙིང་ཉེ་བ་སྤངས་པའི་
ཕྱིར་རོ། །ཁྱིམ་ཐབ་རབ་ཏུ་བྱུང་བའི་སྨྲེ་སྔགས་འདོན་པ་གང་ཡིན་པ་དེ་ནི་དེས་སྨྲེ་སྔགས་འདོན་པའོ། །བདེ་བ་དང་སྡུག་བསྔལ་མཚུངས་ཞེས་བྱ་བའི་ཚིགས་བཅད་ཀྱི་བདེ་བ་སྤྱོད་པ་ནི་བདེ་བའི་རིམ་པའོ། །སྡུག་བསྔལ་སྤྱོད་པ་ནི་སྡུག་བསྔལ་ཀྱི་རིམ་པའོ། །ཐོས་ནས་ནི་སྐྱེ་བོ་འདི་
དག་གང་ཞིག་ནས་ཞེས་བྱ་བ་ནི་གང་ལས་རབ་ཏུ་འབྱུང་ངོ་ཞེས་དེ་ཐོས་པའོ། དེ་ཐོས་ནས་བྱམས་པའི་དབང་གིས་དེར་ལྷགས་ཏེ། ཞེས་བྱ་བ་ནི་ཆོ་ངེས་འདེབས་པར་གྱུར་པའོ། །ངོ་ཚ་ཞིང་མི་དགའ་བར་གྱུར་པ་གང་ཡིན་པ་དེ་ནི་ངོ་ཚ་ཞིང་མི་དགའ་བར་གྱུར་པའོ། །ངོ་ཚ་ན་ནི་ཡོན་ཏན་དམ་

པ་སྟེ། དམ་པ་དེ་ཡོད་པ་དང་། མི་དགའ་བ་ནི་རང་གི་ཁྱིམ་ཡོངས་སུ་སྤང་བར་འདོད་པ་སྟེ། དེ་གཉིས་ཀ་བསྒྲུབ་པའི་ཕྱིར། སྐྱེ་བོ་རྣམས་ཀྱི་ཡོན་ཏན་དུ་ཞེས་བྱ་བ་དང་། དེ་ལྟར་བདག་ནི་སྐྱོན་ལ་དད་གྱུར་ཅིང་། །ཞེས་བྱ་བའི་ཚིགས་བཅད་གཉིས་ཀྱིས་བསྟན་ཏོ། །
དེ་ལ་སྐྱེ་བོ་རྣམས་ཀྱི་ཡོན་ཏན་དུ་ཞེས་བྱ་བའི་ཚིགས་བཅད་ཀྱིས་ནི་ངོ་ཚ་ཞིང་ཞེས་བྱ་བ་དེ་ཉིད་བསྒྲུབ་པ་ཡིན་ཏེ། བདག་ལྟ་མིར་ཡང་ག་ལ་རུང་། །ཞེས་བྱ་བའི་ཚིག་གིས་སོ། །དེ་ལྟར་བདག་ནི་སྐྱོན་ལ་དད་གྱུར་ཅིང་། །ཞེས་བྱ་བའི་ཚིགས་བཅད་ཀྱིས་ནི་མི་དགའ་བར་གྱུར་པ་དེ་ཉིད་
བསྒྲུབ་པ་ཡིན་ཏེ། དེ་ལྟར་བདག་ནི་ཞེས་བྱ་བ་ནི་ཁྱིམ་ལ་མངོན་པར་ཕྱོགས་པ་ཉིད་དུ་སྟེ། ཡོན་ཏན་ཁྱད་དུ་གསོད་ལ་ཚུལ་ངན་པས་ཡོན་ཏན་གྱི་བསྔགས་པ་བརྗོད་པ་ལས་འཇུག་པའི་བྱ་བས་ལེགས་པར་མ་བསྐྱེད་པའི་ཕྱིར། བརྩི་བར་འགྱུར་ཞེས་བྱ་བ་ཡིན་ཏེ། སྐྱོན་ལ་དད་པར་
གྱུར་ཅིང་ཡོན་ཏན་ལ་ནི་ཁྱད་དུ་གསོད་ལ་ཚུལ་ངན་པར་གྱུར་པ་འདི་གཉིས་ཀྱིས་སོ། །དེ་ལྟར་གྱུར་ན་ཞེས་བྱ་བ་ནི་སྐྱེ་བོ་དགེ་བ་ཡང་བརྩི་བར་གྱུར་ན་གསོན་ཡང་ཅི་ཞིག་རུང་ཞེས་བྱ་བ་འདིས་ནི་མི་དགའ་བ་ཉིད་བསྟན་ཏོ། །དེ་བས་སྐྱེ་བོ་རེ་བར་གྱུར་པ་ཞེས་བྱ་བའི་ཚིགས་བཅད་ནི་ཁྱིམ་
ལ་མངོན་པར་ཕྱོགས་པའི་ཉེས་དམིགས་བསྟན་པ་དང་། དེ་དང་མི་མཐུན་ནགས་ན་གནས་པའི་དབང་དུ་བྱས་པ་སྟེ། རེ་བ་ནི་ཡོན་ཏན་ལ་རེ་བར་གྱུར་པའོ། །དེ་བས་ན་ཞེས་བྱ་བ་ནི་ཁྱིམ་ལ་མངོན་པར་ཕྱོགས་ན་ནི་མིར་མི་རུང་བའི་ཕྱིར་རོ། །སྐྱེ་བོ་དགེ་བས་ཡང་དག་པར་བརྩི་བར་འགྱུར་ཏེ།
དེའི་འཚོ་བ་ནི་དགོས་པ་ཅི་ཡང་མེད་པའི་ཕྱིར་རོ། །ཡོན་ཏན་ཉམས་སུ་བླངས་ཏེ་བསྐང་། །ཞེས་བྱ་བ་ནི་བསྒྲུབ་ཅིང་འབད་པས་རེ་བ་ཡོངས་སུ་བསྐང་བར་བྱ་སྟེ་ཉམས་སུ་བླངས་པས་སོ། །ཕན་ཡོན་གྱི་དབང་དུ་བྱས་ནས། སྤྱོད་པ་ངན་པའི་ཉོན་མོངས་ཁྱིམ་སྤངས་ནས། །དཀའ་ཐུབ་
ནགས་ན་དགའ་བའི་ཡོན་ཏན་གྱིས། །ཞེས་བྱ་བ་ཡིན་ནོ། །ནོར་དང་ཐབས་ཞེས་བྱ་བ་འདིས་ནི་གཞུང་ལུགས་བསྟན་ཏེ། ནོར་གྱི་བསྡུ་བའམ་དབྱེ་བ་གཉིས་ཀྱིས་སོ། །མཐུ་རྩལ་གང་དག་གིས་ཞེས་བྱ་བ་ནི་བཀའ་ཁྲིམས་ཀྱི་ཚུལ་གྱིས་སོ། །རེ་ཞིག་ཚིགས་བཅད་དེས་ནི་རྒྱལ་

པོ་གཞན་ལས་སྐྱེ་བའི་སྡུག་བསྔལ་གྱི་དབང་དུ་བྱས་པའོ། །ད་ནི་རང་གི་ཡུལ་འཁོར་གྱི་དབང་དུ་བྱས་ནས། གལ་ཏེ་ནོར་འདོད་ཅེས་བྱ་བའི་ཚིགས་བཅད་ཡིན་ཏེ། ནོར་མ་ཚང་བའམ། གནོད་པ་ཐོབ་པས་རང་གི་ཡུལ་ལས་པས་མཐར་འགྲོ་ཞེས་བྱ་བ་དེའི་དབང་
དུ་བྱས་ནས། ཅི་ཞིག་འདོད་ཕྱིར་ཞེས་བྱ་བ་ཡིན་ཏེ་རྒྱུ་གཞན་གང་གིས་སོ། །གལ་ཏེ་ནོར་འདོད་ཅེས་བྱ་བ་དེས་ནི་སྡུག་བསྔལ་ལམ་གནོད་པ་སྟེ། སྔར་བསྟན་པའི་སྡུག་བསྔལ་གང་གིས་ཁྱོད་ནི་བས་མཐར་འགྲོ་ཞེས་བྱ་བ་དེ་གསལ་བ་ཡིན་ནོ། །སྐྱེ་བོའི་ཚིག་བསྲུངས་པ་ཙམ་གྱིས་
ཞེས་བྱ་བ་ནི་གང་དེ་འཇིག་རྟེན་གྱི་ཚིག་ནི་འཇིག་རྟེན་གྱི་གཏམ་ལ་ཞེན་པའོ། །དེ་ལས་ཞེས་བྱ་བ་ནི་དགེ་བའི་ཆོས་ལས་ཉམས་པར་མི་བགྱི་བ་སྟེ། ཆོས་ཞེས་བྱ་བ་ནི་བདག་ལ་ཕན་པར་འདོད་པ་སྟེ། དེ་ལྟར་བདག་ཉིད་ཀྱི་ཆོས་ལ་ལྟོས་པར་བསྟན་པའོ། །ངོ་ཚའི་ཕྱིར་ཡང་ཞེས་བྱ་བ་ནི་བལྟས་
པས་ཀྱང་སྟེ། ངོ་ཚའི་ཕྱིར་ཡང་རབ་ཏུ་འབད་པའི་རིགས། །ཞེས་བྱ་བ་ཡིན་ཏེ། ངོ་ཚའི་ཕྱིར་ཡང་ཆོས་དང་ལྡན་པ་ལ་འབད་པར་བྱ་བའོ། །དེའི་ཕན་ཡོན་བསྟན་པའི་ཕྱིར། ཡོན་ཏན་ཡོད་ཅེས་གྲགས་ཤིང་རེ་བ་དག །ཅེས་བྱ་བའི་ཚིགས་བཅད་ཡིན་ཏེ། ཡོན་ཏན་འབྱུང་བ་ཡིན་པས་ཡོན་
ཏན་ཡོད་ཅེས་པའོ། །ཇི་ལྟར་གྱུར་ཀྱང་རུང་སྟེ་ཞེས་བྱ་བ་ནི་ངོ་ཚ་བའི་ཕྱིར་ཡང་གཏམ་སྙན་འཕེལ་བར་འགྱུར་ཏེ། ཅིའི་ཕྱིར་ཞེ་ན། གྲགས་པ་རབ་ཏུ་འགྲུབ་པས་ངོ་ཚའི་ཕྱིར་ཡང་དེ་རབ་ཏུ་འབད་པའི་རིགས་ཏེ། འདི་ལྟར་གྲགས་པས་རབ་ཏུ་འགྱུར་བས་སོ། །གཞན་དུ་བགྱིས་ན་ཞེས་བྱ་བ་ནི་
བདག་ཉིད་ཀྱི་ཕུན་སུམ་ཚོགས་པའི་ཡོན་ཏན་ཐམས་ཅད་མེད་བར་བྱས་པ་སྟེ། རེ་བའི་ཚུལ་གྱིས་ལྟ་བ་ན་ཆུ་མིག་སྐམ་པོའི་གནས་དང་འདྲ་བར་འགྱུར་ཏེ། དེ་ལྟར་ཆུ་མིག་སྐམ་པོ་ལ་སྐོམ་ཞིང་ཆུ་འདོད་པ་རྣམས་ཀྱིས་ཆུ་དོན་དུ་གཉེར་ཞིང་རེ་བ་དང་བཅས་པ་ལས་སྐམས་པར་གྱུར་ན་དེ་དག་གི་རེ་
བ་ཉམས་པར་འགྱུར་ཏེ། དེ་བཞིན་དུ་འདིར་ཡང་ཡོན་ཏན་ཡོད་པར་རེ་བ་དང་བཅས་པ་རྣམས་ཏེ། ཡོན་ཏན་ལ་སྐོམ་པའི་སྐྱེ་བོ་དགའ་བ་རྣམས་ཀྱིས་རེ་བ་དང་བཅས་པ་ལས་མ་མཐོང་ན་ནི་འཇིག་པ་ཡིན་ཏེ། ཡོན་ཏན་གཉེར་བ་རྣམས་ཀྱིས་ཁྲོན་པ་སྐམ་པོ་བཞིན་དུ་མཐོང་བར་

འགྱུར་རོ། །གཞན་དུ་བགྱིས་ན་ཞེས་བྱ་བས་ཡོན་ཏན་ཡེད་ཅེས་གྲགས་ཤིང་རེ་བ་དག་ལས་མཐོང་ན་མི་མཛེས་པར་འགྱུར་རོ། །ཇི་ལྟར་མི་མཛེས་པར་འགྱུར་ཞེ་ན། དེ་ཉིད་བསྒྲུབ་པའི་ཕྱིར་དོན་བཞིན་མ་ཡིན་ཞེས་བྱ་བའི་ཚིགས་བཅད་སྨོས་སོ། །དོན་བཞིན་མ་ཡིན་ཡོན་ཏན་གྲགས་
པ་འཕེལ། །ཞེས་བྱ་བ་ནི་ཡོན་ཏན་གྱི་གནས་སྐབས་མ་ཡིན་པའི་ཡོན་ཏན་གྱི་འཕེལ་བ་སྟེ། གང་མི་རྣམས་ཀྱི་གྲགས་པ་མདུན་ན་བརྗོད་པ་མ་ཡིན་ཏེ། དོན་བཞིན་མ་ཡིན་པ་ཡུན་རིང་དུ་འཕེལ་བའོ། །རྣམ་པར་རྟོག་པའི་རླུང་གིས་བསྐྱོད་པ་ནི་རྟོག་པའི་རླུང་གིས་ཉམས་པར་
བྱས་པའོ། །མི་རྣམས་ཀྱི་གྲགས་པ་དེ་ཉམས་པར་གྱུར་ན་ནི་དེ་ཕྱིས་ཡང་གྲགས་པར་འགྱུར་བ་ཞེས་བྱ་བ་ནི་འཕེལ་བར་འགྱུར་བའོ། །སྦྲུལ་ནག་ཅེས་བྱ་བ་འདི་ནི་མཇུག་བསྡུ་བའི་ཚིགས་བཅད་ཡིན་ཏེ། ལྷ་གཅིག་བདག་ནི་བཟློག་པར་མི་རིགས་སོ། །ཞེས་བྱ་བ་ནི་བཟློག་པ་རིགས་
པ་ཡང་ཡིན་མོད་ཀྱི་འོན་ཀྱང་བདག་ནི་བཟློག་པར་མ་མཛད་ཅིག་ཅེས་པ་སྟེ། ངེས་པར་གཟུང་བ་མ་ཡིན་བ་དང་ངེས་པར་གཟུང་བའི་རྒྱུ་སྟེ། གུས་པར་མཁྱེན་ནས་ཞེས་བྱ་བའི་ཚིགས་བཅད་སྨོས་ཏེ། གུས་པར་མཁྱེན་ནས་ཞེས་བྱ་བའི་ཚིགས་བཅད་ཕྱད་ཀྱིས་ནི་ངེས་པར་གཟུང་བ་མ་ཡིན་པའི་རྒྱུ་བསྟན་ཏེ། །
ངེས་པར་གཟུང་བ་ནི། བདག་ནི་སེམས་ཀྱིས་རབ་ཏུ་བྱུང་། །ཞེས་བྱ་བ་ཕྱེད་འོག་མས་བསྟན་ཏོ། །བྱམས་པ་ཡིས་ཞེས་བྱ་བ་ནི་རྗེ་བོའི་ཡོན་ཏན་ནོ། །གུས་པར་མཁྱེན་ནས་ཞེས་བྱ་བ་ནི་འབངས་ཀྱང་ཡོན་ཏན་གུས་པ་དང་ལྡན་པར་ཁྱོད་ཀྱིས་དེ་མི་ཤེས་པ་ཡང་མ་ཡིན་ཏེ། ཁྱོད་ཀྱིས་འབངས་ཀྱི་སྐྱེ་བོ་ལ་དེ་ལྟར་བགྱི་བ་རིགས་ཏེ།
དེ་བས་ན་ཁྱོད་ཀྱིས་བཟློག་པའི་རིགས་སོ། །བདག་ནི་རེ་ཞིག་བཟློག་པར་བྱ་བ་མ་ཡིན་ཏེ། ཅིའི་ཕྱིར་ཞེ་ན། སེམས་ཀྱིས་རབ་བྱུང་ཟིན་པའི་ཕྱིར་རོ། །དེས་ན་རབ་ཏུ་བྱུང་བ་ནི་འདུ་འཛིའི་ཉོན་མོངས་ཅན་འཛིན་པ་མི་རིགས་པའི་ཕྱིར་རོ། དེ་ནས་དེ་ཡི་མཛའ་བོ་དང་། ཞེས་བྱ་བ་ལ་སོགས་
པའི་ཚིག་གིས་ནི་མཛའ་བོ་ལ་སོགས་པ་དམན་པ་དང་། བར་མ་དང་། གོང་མ་དག་གིས་བཟློག་པའི་ལུས་དང་ངག་གི་ལས་ཀྱི་བྱ་བ་རྣམས་བསྟན་ཏོ། །དེ་ལ་རྐང་པ་ལ་འཇུས་ཏེ་ཞེས་བྱ་བས་ནི་དམན་པ་རྣམས་ཀྱི་ལུས་ཀྱི་ལས་ཀྱི་བྱ་བ་བསྟན་ཏོ། །ཁ་ཅིག་ཐལ་མོ་སྦྱར་ཏེ་ཞེས་བྱ་བས་

ནི་རབ་དང་མཉམ་པ་བར་མའི་བསྟན་ཏོ། །མགུལ་ནས་འཇུས་ཏེ་ཞེས་བྱ་བས་ནི་གོང་མ་རྣམས་ཀྱི་དབང་དུ་བྱས་པའོ། །འདི་གསུམ་ནི་ལུས་ཀྱི་ལས་ལས་བརྩམས་པའོ། །བཟློག་པར་རྩོམ་པ་བཤད་པའོ། །ཁ་ཅིག་ནི་སྤོབས་པའི་ཚུལ་གྱིས་ཞེས་བྱ་བ་ལ་
སོགས་པའི་ངག་གི་ལས་ལས་བརྩམས་ཏེ་བཟློག་པའི་དབང་དུ་བྱས་པ་སྟེ། ཁ་ཅིག་ནི་སྤོབས་པའི་ཚུལ་གྱིས་ཞེས་བྱ་བ་ནི་བར་མའི་དབང་དུ་བྱས་པའོ། །ཁ་ཅིག་ནི་མཛའ་བོ་དང་ནང་མི་ཞེས་བྱ་བ་ནི་དམན་པའི་དབང་དུ་བྱས་པའོ། །ལ་ལ་ནི་ཁྱིམ་ན་གནས་པའི་ཚུལ་གྱིས་ཞེས་བྱ་བ་ལ་
སོགས་པས་ནི་གོང་མའི་དབང་དུ་བྱས་པའོ། །མཛའ་བོར་འཐམས་པར་ཞེས་བྱ་བ་ལ་སོགས་པའི་ཚིགས་བཅད་གཉིས་ཀྱིས་ནི་བྱང་ཆུབ་སེམས་དཔའ་ལ་ཕན་པར་འདོད་པ་དེས་ནགས་སུ་འགྲོ་བ་མི་རིགས་སོ་ཞེས་འགོག་པའི་དབང་དུ་བྱས་པའོ། །མཛའ་བོར་འཐམས་པ་ཞེས་བྱ་
བའི་ཚིགས་བཅད་འདིའི་དོན་ནི་མཛའ་བོ་བག་མེད་པ་ལས་མཛའ་བོ་རྣམས་ཀྱིས་ཕན་པའི་ཚིག་སྨྲས་པ་སྟེ། ཡུན་རིང་པོར་འཇུག་པའི་ཕྱིར་རོ། །ཕན་པའི་ལམ་འདི་ལ་ནི་ལེགས་པ་དང་ཕན་པ་གཉིས་ལྷན་ཅིག་མི་འཐོབ་སྟེ། རྩུབ་པ་ཡིན་ན་ཡང་ཕན་པར་འགྱུར་བ་སྦྱར་བའི་
རིགས་ཏེ། དེ་ལ་མ་སྦྱར་བར་གྱུར་ན་མི་དགེ་བར་འགྱུར་ཏེ། དགེ་བ་དང་མི་དགེ་བ་རྣམས་ལས་དགེ་བའི་ཆོས་མི་སྒོམ་ཞིང་། མི་དགེ་བའི་ཆོས་ལ་འཇུག་པར་འགྱུར་ཏེ། མི་ཕན་པར་སྒྲུབ་པའི་ཕྱིར་རོ། །ནགས་པས་ཁྱིམ་དགའ་ཞེས་བྱ་བའི་ཚིགས་བཅད་འདིའི་དོན་ནི་
ནགས་ན་གནས་པ་ལས་བདག་ལ་ཟློག་པར་བྱེད་དེ། ཇི་ལྟར་ལྡོག་པར་བྱེད་ཅེ་ན། སྡིག་པས་གོས་པ་བཞིན་དུ་སྟེ། དོགས་ཤིང་འཇིགས་པ་མེད་པར་རོ། །ཇི་ལྟར་སྡིག་པས་གོས་པ་ནི་དོགས་ཤིང་འཇིགས་པ་མེད་པར་རྩུབ་པ་ཡིན་ན་ཡང་ཟློག་ཅིང་འགོག་པར་བྱེད་པ་དེ་བཞིན་དུ་
འདི་དག་སེམས་ཞེས་བྱ་བ་ཡིན་ཏེ་མཛའ་བོ་ལ་སོགས་པ་རྣམས་སོ། །ཐ་མལ་གནས་པའི་སེམས་ཞེས་བྱ་བ་ནི་ནད་མེད་པ་སྟེ། ནགས་པས་ཁྱིམ་དགའ་སྙམ་དུ་ཇི་ལྟར་སེམས་པའོ། །ཇི་ལྟར་སེམས་པ་དེ་ཉིད་སྒྲུབ་པའི་ཕྱིར་སྨྲས་པ། ནགས་ན་གནས་པ་དོགས་ཤིང་ཞེས་བྱ་བ་དང་།

སྡིག་པས་གོས་བཞིན་དུ་ཞེས་བྱ་བ་གཉིས་ཀྱིས་བསྟན་ཏོ། །དེ་ནི་བྱང་ཆུབ་སེམས་དཔའ་ལ་ཕན་པར་འདོད་པའི་དབང་དུ་བྱས་ནས་ངུ་བ་ལ་ནགས་ཚལ་གནས་པ་ལ་ཞེས་བྱ་བ་ནི་ཆོས་བསྒྲུབ་པར་འདོད་པའོ། །གསོན་བཞིན་དུ་ཞེས་བྱ་བ་ནི་ཤི་བ་ཡང་མ་ཡིན། ཤི་བར་འགྱུར་བ་
ཡང་མ་ཡིན་པའི་དོན་ཏོ། །ད་ནི་བདག་ཉིད་དང་བྲལ་བའི་མྱ་ངན་གྱི་རྒྱུ་ལ་ཡང་། ང་དང་བྲལ་བས་དེ་ལྟར་མི་དགའ་ན། །ཞེས་བྱ་བའི་ཚིགས་བཅད་ཡིན་ཏེ། རབ་ཏུ་མི་འབྱུང་བའི་རྒྱུ་ནི་ཁྱིམ་ཡོངས་སུ་གཏང་བར་དཀའ་བའི་ཕྱིར་ང་དང་མི་འབྲལ་ན་ནི་ཞེས་བྱ་བའི་དབང་
དུ་བྱས་ནས་ཚིགས་བཅད་ཀྱི་ཕྱེད་འོག་མས་བསྟན་ཏོ། །ནང་མི་ཡོངས་སུ་གཏོང་བ་ཤིན་ཏུ་དཀའ་བ་ཡིན་ཡང་རབ་ཏུ་མི་འབྱུང་བ་ནི་མི་རིགས་སོ། །ཞེས་བསྟན་པའི་ཕྱིར། དེ་སྟེ་བདག་གི་མི་ལ་ཆགས་པའི་ཕྱིར། །ཞེས་བྱ་བའི་ཚིགས་བཅད་སྨོས་སོ། །དེ་ལྟར་ཅིས་མི་བྱེད་ཅེས་བྱ་
བ་ནི་ཇི་ལྟར་ངའི་རྗེས་སུ་རབ་ཏུ་འབྱུང་བའི་རང་མི་ལ་ཆགས་པས་བགེགས་སུ་བྱེད་པ་ཡིན་ན་དེ་ལྟར་དགྲ་དང་དམག་འགྱེད་ཅིང་འཇུག་པ་ན་ཡང་རང་མེའི་སྐྱེ་བོ་མང་པོ་ལ་ཆགས་པས་བགེགས་ཅིའི་ཕྱིར་མི་བྱེད་ཅེས་པའོ། །ཕོངས་པར་གྱུར་པའི་ཚེ་ན་མཐོང་བར་གྱུར་པའི་མཛའ་བོའི་རང་བཞིན་གང་
ཡིན་པ་དེ་ནི་ཕོངས་པར་གྱུར་པའི་ཚེ་མཐོང་བའོ། །མཛའ་བོའི་རང་བཞིན་ནི་ཕོངས་པའི་ཚེ་རྗེས་སུ་འབྲང་བ་དང་ངུ་བའོ། །དེ་ལ་ཕོངས་པའི་ཚེ་མཐོང་བ་ནི་སྔར་དུས་གཞན་གྱི་ཚེ་ན་ཡིན་ཏེ། སྔར་མཐོང་བའི་ཕྱིར་ཕོངས་པའི་རྗེས་སུ་འབྲང་བའོ། །མཛའ་བོ་བརྟེན་པར་གྱུར་ཀྱང་ཞེས་བྱ་བ་ནི་
ཡུན་རིང་པོ་ནས་འདྲིས་པར་གྱུར་ཀྱང་ངོ་། །གཡོ་ཉིད་གཡོ་ཡིན་པས་གཡོ་ཕྱི་བཞིན་མི་འབྲང་བ་ཞེས་བྱ་བ་ནི་རྗེས་སུ་འགྲོ་བ་མེད་པ་སྟེ། མཆི་མས་འཇུ་ཞིང་འོང་བ་ཉི་ཚེར་ཟད་པའོ། །མཛའ་བོའི་རང་བཞིན་ནི་ངུ་བ་དང་ཕོངས་པ་རྗེས་སུ་འབྲང་བ་ཡིན་ཏེ། དེ་ལ་དེ་གཉིས་ལས་ཕོངས་
པའི་རྗེས་སུ་འབྲང་བ་མེད་དོ། །རབ་ཏུ་འབྱུང་བའི་མཚན་ཉིད་ནི་རབ་དུ་བྱུང་བ་དེ་ཕོངས་པ་ཉིད་ཡིན་ཏེ། ངུ་བར་འོས་པའི་ཕྱིར་རོ། །གལ་ཏེ་ཕོངས་པ་མ་ཡིན་ན་ནི་རབ་དུ་བྱུང་བ་ལ་མི་ངུ་བ་ཡིན་ཏེ། དེས་ན་དེ་ཕོངས་པ་ཡིན་པས་ཕོངས་པ་དེའི་རྗེས་སུ་འབྲང་བར་བྱ་སྟེ་རྗེས་སུ་རབ་དུ་

འབྱུང་བར་བྱའོ། །ཇི་ལྟར་མཛའ་བོ་མྱ་ངན་གྱིས་གདུངས་ཤིང་ངུ་བ་ལ། མཛའ་བོས་མྱ་ངན་བྱ་བ་དང་ངུ་བ་ཡིན་ཏེ། དེ་བཞིན་དུ་འདིར་ཡང་འཇིགས་པ་མེད་པར་བྱ་བ་ཡིན་ཏེ། རྒྱུ་གཅིག་ལས་ནི་མཛའ་བོའི་རང་བཞིན་གཡོ་ཉིད་དུ་འགྲོ་བ་སྟེ། ཇི་ལྟར་ཤེས་ཤེ་ན།
རྗེས་སུ་འགྲོ་བ་ནི་མེད་དེ། མཆི་མས་འཇུ་བ་ཉི་ཚེའོ། །དེ་ཉིད་བསྟན་པའི་ཕྱིར། སླར་དུ་བཟློག་པའི་ཕྱིར་ནི་སྐད་འཛེར་ཞིང་། །ཞེས་བྱ་བའི་ཚིགས་བཅད་སྨོས་སོ། །ཇི་ལྟར་སྐད་འཛེར་བ་དང་བཅས་པ་དང་། མཆི་མ་དང་བཅས་པའི་མིག་དང་། མགོ་བོ་བཏུད་དེ་མཚུངས་པ་
ལ་ཡང་བླ་མ་འདྲ་བ་ཕྱག་འཚལ་ཞིང་ཞེས་བྱ་བ་ཡིན་ཏེ། ཅིའི་ཕྱིར་བྱེད་ཅེ་ན། བཟློག་པ་དེའི་ཕྱིར་ཏེ། དེ་ལྟར་དེ་དག་ཐམས་ཅད་ནི་བཟློག་པའི་ཕྱིར་བྱེད་པ་ཡིན་གྱི། རྗེས་སུ་འགྲོ་བའི་ཕྱིར་ནི་མ་ཡིན་ནོ། །གལ་ཏེ་རྗེས་སུ་འགྲོ་བ་ཡིན་ན་ནི་ཅིའི་ཕྱིར་དེ་དག་ཉི་ཚེ་བྱེད་པ་ཡིན་ཏེ། རྗེས་
སུ་འགྲོ་བར་མི་བྱེད་པའོ། །གང་གི་ཕྱིར་རྗེས་སུ་འགྲོ་བར་མི་བྱེད་ཀྱི། བཟློག་པའི་ཕྱིར་བྱེད་པ་ཡིན་པས། དེ་བས་ན་མཛའ་བོའི་རང་བཞིན་ཏེ། གཡོ་དང་ཐབས་སུ་འགྱུར་བའོ། །དེ་ལྟར་རེ་ཞིག་ཚིགས་བཅད་འདིས་ནི་གང་སྔར་བཤད་པའི་མཆི་མས་འཇུ་ཞིང་ངུ་བ་ཞེས་བྱ་བ་དེ་
ཉིད་བསྒྲུབ་པ་ཡིན་ནོ། །ཕྱི་བཞིན་མི་འབྲང་བ་དེ་བསན་པར་བྱ་བའི་ཕྱིར། རབ་ཏུ་བྱུང་བའི་རྗེས་སུ་ཞེས་བྱ་བའི་ཚིགས་བཅད་ཡིན་ཏེ། འདི་དག་ཅེས་བྱ་བ་ནི་མཆི་མས་འཇུ་བའོ། །ཇི་ལྟར་བྱམས་པས་མཆི་མ་འབྱུང་བར་བྱེད་པ་དེ་བཞིན་དུ་རབ་ཏུ་འབྱུང་བ་ལ་ཡང་བྱ་བའི་རིགས་སོ། །
ཅིའི་ཕྱིར་དེ་ལྟར་བྱ་བའི་རིགས་ཤེ་ན། སྨྲས་པ། ངོ་མཚར་བར་འགྱུར་བ་འདི་བཞིན་དུ་མི་འགྱུར་རམ་ཞེས་པ་སྟེ། དམ་པའི་སེམས་ལ་སྤྱོད་པ་དེའོ། །ནགས་སུ་བདག་ཉིད་གཅིག་པུ་འགྲོ་ཡང་གྲོགས་ཤིན་ཏུ་རྙེད་པར་དཀའ་ལ། གཞན་དག་གིས་ནི་རྙེད་པར་སླའོ་ཞེས་བྱ་བ་དེའི་དབང་དུ་བྱས་
ནས། ཡོན་ཏན་མེད་པ་ཞེས་བྱ་བ་དེའི་ཚིགས་བཅད་སྨོས་སོ། །ཕོངས་པར་གྱུར་པའི་ཚེ་ཞེས་བྱ་བ་ནི་བསད་པ་དང་། བཅིང་བ་དང་བརྡེག་པའི་ཕོངས་པར་གྱུར་པའོ། །ཡོན་ཏན་ཡོད་བཞིན་ཞེས་བྱ་བ་ཕོངས་པ་ཉིད་བསྟན་པའི་ཕྱིར། ཡོན་ཏན་ཡོད་བཞིན་དུ་ཞེས་བྱ་བ་ཡིན་ཏེ། ནགས་སུ་འགྲོ་

ཞིང་རབ་ཏུ་བྱུང་བ་དེ་ནི་ཕོངས་པ་བཞིན་དུ་ཕོངས་པར་གྱུར་པ་ཡིན་ནོ། །ཐམས་ཅད་དུ་གྲོགས་ཡོད་ཀྱང་དེ་དག་ཉིད་ནགས་སུ་འགྲོ་ཞིང་རྗེས་སུ་འགྲོ་བ་མེད་པ་ཉིད་ཀྱི་དབང་དུ་བྱས་ནས། གླང་ཆེན་སྨྱོན་པ་ཞེས་བྱ་བའི་ཚིགས་བཅད་ཡིན་ཏེ། གང་ལ་རྗེས་སུ་མི་འགྲོ་བ་དང་། གང་གི་ཕྱིར་རྗེས་སུ་
མི་འགྲོ་བ་ཞེས་བྱ་བའི་དོན་ཏོ། །དེ་དག་མིན་ནམ་ང་ཡང་དེ་མ་ཡིན། །ཞེས་བྱ་བ་ནི་ཐེ་ཚོམ་གྱི་ཚིག་གོ། །དེ་ལྟ་མོད་ཀྱི་བདག་གི་བྱམས་པ་མེད་པར་འགྱུར་བའི་རྒྱུ་ཅུང་ཟད་ཅིག་བྱས་ན་ནི། དེ་ལས་རྗེས་སུ་མི་འབྲང་བ་ཡིན་ཏེ། དེ་མེད་པར་བསྟན་པའི་ཕྱིར། དེ་ལྟར་བྱམས་པ་ཉམས་པར་
འགྱུར་བའི་རྒྱུ། །ཞེས་བྱ་བའི་ཚིགས་བཅད་སྨོས་སོ། །འདི་ལྟར་འཁོད་བཞིན་དུ་ཞེས་བྱ་བ་ནི་རྒྱབ་ཀྱིས་བལྟས་པར་གནས་པའོ། །འདི་ལྟར་གྱུར་པ་ཞེས་བྱ་བ་ནི་གླང་ཆེན་སྨྱོན་པ་ཞེས་བྱ་བའི་ཚིགས་བཅད་སྔར་བསྟན་པ་དེ་ཉིད་བདག་གི་ཡོན་ཏན་གང་གིས་སྔོན་དུ་འགྲོ་བར་བསྟོད་པ་དག་རུང་བར་འོང་ངམ་
ཀྱེ་ཞེས་བྱའོ། །བདག་ནི་ནགས་སུ་འགྲོ་ཕྱིར་ཞེས་བྱ་བ་ནི་བདག་ཉིད་ཀྱི་ཉེས་པ་སྟོན་པ་ཡིན་ནོ། །ཅིའི་ཕྱིར་དེ་ལྟར་རྟོག་ཅེ་ན་དེའི་རྒྱུ་བསྟན་པའི་ཕྱིར། གང་དག་ཁྱིམ་གྱི་ཉེས་པ་ཞེས་བྱ་བའི་ཚིགས་བཅད་སྨོས་སོ། །དེ་གང་ཡིན་ཞེ་ན། ཁྱིམ་གྱི་ཉེས་པ་གསལ་བར་མངོན་པ་དང་། དཀའ་
ཐུབ་ཀྱི་ནགས་ཀྱི་ཡོན་ཏན་གསལ་བར་མངོན་པའོ། །དེ་གསལ་བར་བསྟན་པའི་ཕྱིར། ཕྱི་མའི་ཚེ་དང་ཚེ་འདིའི་སྡུག་བསྔལ་རྒྱུ། །ཞེས་བྱ་བ་སྨོས་སོ། །ཕྱི་མའི་སྡུག་བསྔལ་གྱི་རྒྱུ་ནི་འདོད་པ་དེའི་ཆེད་དུ་ཉེས་པར་སྤྱོད་པ་དེ་ཉེས་པར་སྤྱད་པ་དེའི་རྒྱུ་ངན་འགྲོར་འགྲོ་བའི་ཕྱིར་རོ། །ཚེ་འདིའི་སྡུག་བསྔལ་
གྱི་རྒྱུ་ནི། གསད་པ་དང་། བཅིང་བ་དང་། བརྡེག་པ་ལ་སོགས་པ་སྡུག་བསྔལ་དུ་མའི་རྒྱུར་གྱུར་པའི་ཕྱིར་རོ། །དཀའ་ཐུབ་ཀྱི་ནགས་ནི་དེ་ལྟར་བཟློག་པ་སྟེ། འཇིག་རྟེན་འདི་དང་ཕ་རོལ་གྱི་བདེ་བའི་རྒྱུར་གྱུར་པའི་ཕྱིར་རོ། །འཇིག་རྟེན་འདིར་བདེ་བའི་རྒྱུ་ནི་འདོད་པ་རྣམས་ལ་ཆེད་ཆེར་མི་
འཛིན་པ་སྟེ། རང་གི་དོན་མཐོང་བའི་ཕྱིར་རོ། །འཇིག་རྟེན་ཕ་རོལ་དུ་ནི་བདེ་འགྲོ་དང་མྱ་ངན་ལས་འདས་པ་ཐོབ་པའི་ཕྱིར་རོ། །རང་གི་རྒྱུ་འདོད་པ་སྤོང་བར་མི་འདོད་པ་དེ་ནི་སྡུག་བསྔལ་གྱི་རྒྱུ་ཡིན་ནོ། །དཀའ་ཐུབ་ཀྱི་ནགས་ན་ནི་དེ་རྣམས་ཀྱིས་བཟློག་པ་ཡིན་ཏེ། འདི་དག་སྤོང་བ་ཡིན་ནོ། །དེའི་

རྒྱུ་ཉེས་པ་དག་ལ་བདག་ཉིད་ཀྱི་བསྒྲུབ་པ་བསྟན་པའི་ཕྱིར། བདག་གི་མཛའ་བོ་འདི་རྣམས་ཞེས་བྱ་བའི་ཚིགས་བཅད་སྨོས་སོ། །བསླུས་ཞེས་བྱ་བ་ནི་ཕྱིན་ཅི་ལོག་ལ་ཞེན་པའོ། །ཞི་བར་མ་གྱུར་པ་ནི་མྱ་ངན་ལས་འདས་པར་མ་གྱུར་པའོ། །ཉེས་པ་དེ་དག་ཅེས་བྱ་བ་
ནི་ཁམས་གསུམ་གྱི་ཉོན་མོངས་པ་ཐམས་ཅད་དོ། །མངོན་དུ་གཞོམ་པར་བྱ་ཞེས་བྱ་བ་ནི་བག་ཆགས་དང་བཅས་པ་གཞོམ་པར་བྱའོ་ཞེས་པའོ། །དེ་ལྟར་གྱུར་པ་ནི་དམ་པ་རྣམས་སུ་དེ་དགེ་སློང་དང་དགེ་བསྙེན་རྣམས་སུ་གྱུར་པས་སོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་
རྒྱ་ཆེར་བཤད་པ་ལས་ཚོང་དཔོན་གྱི་སྐྱེས་པའི་རབས་སོ།། །།སྡོམ་ལ། བརྒྱ་བྱིན་བྲམ་ཟེ་མྱོས་བྱེད་མ། །ལེགས་པར་ཕ་རོལ་ཕྱིན་དང་ཉ། །བྱ་དང་བུམ་པ་ཕྱུག་པོའི་བུ། །དཀའ་ཐུབ་ཅན་དང་ཚོང་དཔོན་ནོ། །ཞེས་པ་ལ། འདིར་ཡང་སྐྱེས་པའི་རབས་བཅུ་པོ་འདི་དག་གི་གོ་རིམས་
བདག་གིས་འདི་ལྟར་མཐོང་སྟེ། བརྒྱ་བྱིན་བྲམ་ཟེ་མྱོས་བྱེད་མ། །ལེགས་པར་ཕ་རོལ་ཕྱིན་དང་ཉ། །བྱ་དང་བུམ་པ་ཚོང་དཔོན་དང་། །ཕྱུག་པོའི་བུ་དང་དཀའ་ཐུབ་ཆེན། །སྐྱེས་པའི་རབས་བཅུ་པོ་འདི་དག་གིས་བསྡུས་པའི་དོན་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་དབང་དུ་བྱས་པའོ། །
ཚུལ་ཁྲིམས་ཀྱང་རྣམ་པ་གཉིས་ཏེ། ཁྱིམ་པའི་ཕྱོགས་ལ་བརྟེན་པ་དང་། རབ་ཏུ་བྱུང་བའི་ཕྱོགས་ལ་བརྟེན་པ་དང་། དེ་ལ་ཁྱིམ་པའི་ཕྱོགས་ལ་བརྟེན་པའི་ཚུལ་ཁྲིམས་ཀྱི་དབང་དུ་བྱས་པ་ནི་བདུན་ནོ། །རབ་ཏུ་བྱུང་བའི་ཕྱོགས་ལ་བརྟེན་པ་ནི་གསུམ་མོ། །དེ་ལ་ཁྱིམ་པའི་ཕྱོགས་ལ་
བརྟེན་པའི་ཚུལ་ཁྲིམས་ནི། སྲོག་གཅོད་པ་དང་། མ་བྱིན་པ་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་འཐུང་བ་ལས་ལྡོག་པ་སྟེ། འདི་དག་ནི་བསླབ་པའི་གཞི་ལྔའོ། །དེ་ལ་བརྒྱ་བྱིན་གྱི་སྐྱེས་པའི་
རབས་སུ་ནི་སྲོག་གཅོད་པ་ལས་ལྡོག་པའི་དབང་དུ་བྱས་ནས། ལྷའི་དབང་པོ་དེ་རང་གི་སྲོག་ལ་མི་ལྟ་བས་དུད་འགྲོའི་སྐྱེ་གནས་སུ་གྱུར་པའི་སྲོག་གཅོད་པར་འཇུག་པ་ལས་ལྡོག་པ་སྟེ། དེ་ནི་སྲོག་གཅོད་པ་སྤངས་པ་ཡིན་ནོ། །བྲམ་ཟེའི་སྐྱེས་པའི་རབས་སུ་རང་གི་བླ་མ་ལ་སོགས་པས་སྦྱོར་བ་

བྱས་ཤིང་ཐོས་པའི་རྗེས་སུ་དཔག་པས་ཡང་དག་པར་བསྟན་ཀྱང་སྐྱེ་བོས་གཞན་དག་ལས་ཉེ་བར་རྟོག་པ་དང་། བདག་གི་དབང་དུ་བྱས་ནས། ངོ་ཚ་བ་ཉིད་ཀྱིས་མ་བྱིན་པར་ལེན་པ་ལས་ལོག་པ་དེ་ནི་མ་བྱིན་པར་ལེན་པ་སྤངས་པའོ། །བདག་ཉིད་ལ་རང་དབང་དུ་བྱིན་པར་འགྱུར་ཏེ། སྨད་
འཚོང་མའི་གནས་སྐབས་སུ་བྱའོ་ཞེས་པས་བྱིན་ན་ཡང་བགྲོད་པ་མ་ཡིན་པར་འཇུག་པ་སྟེ། འདོད་པ་ལས་ལོག་པར་གཡེམ་པ་སྤོང་བ་ནི་མྱོས་བྱེད་མའི་སྐྱེས་པའི་རབས་སུ་བསྟན་ཏོ། །བརྫུན་རྣམ་པ་གསུམ་གྱི་དབང་དུ་བྱས་ནས་སྐྱེས་པའི་རབས་གསུམ་ཡིན་ཏེ། གནོད་པ་བཟློག་པའི་
ཕྱིར་དང་། གནོད་པ་བདག་གིས་ཐོབ་པ་ལ་འདོད་པའི་དོན་རྙེད་པའི་ཕྱིར་དང་། བརྫུན་སྨྲ་བ་ལ་གོམས་པར་མ་བྱས་པའོ། །གནོད་པ་བཟློག་པ་ནི་བདེན་པའི་ཚིག་ཉིད་ཀྱིས་འགྱུར་བར་བསྟན་པའི་ཕྱིར། ལེགས་པར་ཕ་རོལ་ཏུ་ཕྱིན་པའི་སྐྱེས་པའི་རབས་སོ། །བདག་ཉིད་ཀྱིས་ཕོངས་
པའི་གནས་སྐབས་དང་ཕྲད་པར་གྱུར་ཀྱང་། བདེན་པའི་ཚིག་ཉིད་ཐར་པར་གྱུར་པ་བསྟན་པ་ནི་ཉའི་སྐྱེས་པའི་རབས་སོ། །བདེན་པའི་ཚིག་ལ་གོམས་པས་ནི་མེའི་འཇིགས་པ་ལས་ཀྱང་ཐར་བར་བྱེད་ནུས་ན། གཞན་ལྟ་སྨོས་ཀྱང་ཅི་དགོས་ཞེས་བསྟན་པའི་ཕྱིར། སྲེག་པའི་ཕྲུ་གུའི་
སྐྱེས་པའི་རབས་བསྟན་ཏོ། །བུམ་པའི་སྐྱེས་པའི་རབས་སུ་ནི་ཆང་ལས་ལྡོག་པ་སྟེ། གཞན་ཡང་ལྡོག་པར་བྱེད་ན་བདག་ཉིད་ལྟ་སྨོས་ཀྱང་ཅི་དགོས་ཞེས་བྱ་བའི་ཚིག་གིས་སོ། །ད་ནི་རབ་ཏུ་བྱུང་བའི་ཕྱོགས་ལ་བརྟེན་པ་ལས་བརྩམས་ཏེ་སྐྱེས་པའི་རབས་གསུམ་མོ། །དེ་ལ་དང་པོར་རེ་ཞིག་
ཚོང་དཔོན་གྱི་སྐྱེས་པའི་རབས་སུ་རྒྱ་ཆུང་ངུས་ཀྱང་སྙིང་སྟོབས་དང་ལྡན་པ་དག་ཁྱིམ་ཡོངས་སུ་གཏང་བ་ཡིན་ཏེ། ཕུན་སུམ་ཚོགས་པ་ཐམས་ཅད་བོར་ཞིང་ནགས་སུ་གནས་པ་སྟེ། ངེས་པར་འབྱུང་བར་འདོད་པས་ནང་མི་དང་། ཉེ་དུའི་སྐྱེ་བོ་དང་། མཛའ་བཤེས་ལ་སོགས་པའི་ཚོགས་ཀྱིས་
བཟློག་པར་གྱུར་ཀྱང་མི་འདོད་ན། གཞན་དག་གིས་ལྟ་སྨོས་ཀྱང་ཅི་དགོས་ཞེས་བསྟན་པས་སོ། །རྒྱལ་རིགས་ཕྱུག་པོའི་བུ་སྐྱེས་པའི་རབས་སུ་ནི་མཛའ་བཤེས་ཀྱིས་ལོངས་སྤྱོད་ལ་སོགས་པ་བསྟབས་ཀྱང་། དེ་ལ་ཆགས་པ་མེད་པ་དེས་རབ་ཏུ་བྱུང་བ་ལ་མངོན་པར་དགའ་བར་གྱུར་

པ་བསྟན་པའི་ཕྱིར་རོ། །དཀའ་ཐུབ་ཅན་གྱི་སྐྱེས་པའི་རབས་སུ་ནི། སྨོན་ལམ་དང་། ཚངས་པར་སྤྱོད་པ་ལ་དགའ་ཞིང་ཆོག་ཤེས་པ་དང་། སེམས་འཁྲུགས་པ་མེད་པ་ལ་མངོན་དུ་ཕྱོགས་པའི་དབང་དུ་བྱས་ནས་བརྩམས་པའི་ཕྱིར་རོ། །དེ་ལྟར་སྐྱེས་པའི་རབས་
འདི་དག་གི་གོ་རིམས་ཀྱི་རྒྱུ་ནི་རིགས་པར་འགྱུར་ཏེ། གཞན་ལ་ཡང་ཕན་པའི་ཕྱིར་བསྟན་པའོ། །སྡེ་ཚན་གཉིས་པ་སྟེ། བཅུ་ཚན་གཉིས་པ་རྫོགས་སོ།། །།བྲམ་ཟེའི་རིགས་ཆེན་པོ་ཡོན་ཏན་ལ་གོམས་པའི་མཐུས་གྲགས་པ་རྒྱས་པ་ཞེས་བྱ་བ་འདིས་ནི་ཚུལ་
ཁྲིམས་ཀྱི་ཕ་རོལ་ཏུ་ཕྱིན་པའི་འབྲས་བུ་དང་། རྒྱུ་ལ་གོམས་པ་ཡང་བསྟན་ཏོ། །འབྱོར་པའི་ཡོན་ཏན་ངེས་པ་ཞེས་བྱ་བ་འདིས་ནི་སྔ་མའི་སྦྱིན་པའི་ཕ་རོལ་ཏུ་ཕྱིན་པའི་འབྲས་བུ་བསྟན་ཏོ། །རྒྱལ་པོས་བཀུར་སྟི་བྱས་པ་དང་། འཇིག་རྟེན་པས་ལྷ་བཞིན་དུ་བཀུར་བ་ཞེས་བྱ་བ་འདིས་ནི་
བཟོད་པའི་ཕ་རོལ་ཏུ་ཕྱིན་པའི་འབྲས་བུ་བསྟན་ཏོ། །དེ་ལྟར་འདི་དག་གིས་ནི་བསོད་ནམས་ཀྱི་ཚོགས་བསགས་པ་ཉིད་དུ་བསྟན་པ་ཡིན་ཏེ། འདི་ལྟར་དེར་སྐྱེས་པ་ཡིན་པས། དེ་བས་ན་དེ་ཡང་དེའི་བསོད་ནམས་ཀྱི་ཚོགས་ཉིད་དུ་བསྟན་ཏོ། །དེ་ལྟར་མང་དུ་ཐོས་པའི་ཡོན་ཏན་ལ་གོམས་
པ་ཞེས་བྱ་བ་ལ་སོགས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྦྱོར་བ་བསྟན་ཏོ། །མཁས་པ་རྣམས་ཀྱི་གྲགས་པ་ནི། །མཁས་པ་ཉིད་ཀྱི་ནང་དུ་འཕེལ། །ཞེས་བྱ་བ་ལ། དེའི་ནང་དུ་གྲགས་པ་ཅིའི་ཕྱིར་འཕེལ་ཞེ་ན། མཁས་པ་ནི་ཡོན་ཏན་རྟོག་པ་ལ་མཁས་པའི་ཕྱིར་ཏེ། རིན་ཆེན་
ཤེས་ལ་རིན་ཆེན་དང་། ཞེས་བྱ་བ་ཡིན་ཏེ། མཁས་པ་ཉིད་མཁས་པའི་ནང་དུ་གྲགས་པ་འཕེལ་བའོ། །ཅིའི་ཕྱིར་ཞེ་ན། དེ་ནི་རང་གི་ཡོན་ཏན་སྟོན་པར་ནུས་པའི་ཕྱིར་རོ། །ཅི་ལྟ་བུ་དག་ཅེ་ན། གཡུལ་ངོ་དག་ཏུ་དབའ་བོ་བཞིན། །ཞེས་བྱ་བ་ཡིན་ནོ། །ཚེ་རབས་སྔ་མ་ལ་རབ་
དུ་བྱུང་བ་ལ་གོམས་ཤིང་ཞེས་བྱ་བ་འདིས་ནི་རྒྱུ་མཐུན་པ་བསྟན་ཏོ། །ཆོས་ལ་སེམས་པ་ཞེས་བྱ་བ་ནི་ཆོས་དང་ལྷན་ཅིག་པའི་དྲན་པ་ཡོད་པའི་ཕྱིར་རོ། །ཆོས་དང་བཅས་པའི་སེམས་སོ། །དེར་གྱུར་པའི་ཆོས་ལ་སེམས་པ་ཉིད་དེ། དེ་བས་ན་ཆོས་དང་འགལ་བའི་ཕྱིར། ཁྱིམ་སྤངས་

ཞེས་བྱ་བའི་དོན་ཏོ། །བློ་དང་ཤེས་རབ་རབ་ཏུ་གསལ་བའི་ཕྱིར། །ཞེས་བྱ་བ་འདིས་ནི་ཁྱིམ་གྱི་ཉེས་དམིགས་ཡོངས་སུ་ཤེས་པའི་ཕྱིར་རོ། །རྒྱུ་འདི་གསུམ་གྱིས་ཁྱིམ་ལ་དགའ་བ་མེད་པར་འགྱུར་ཞིང་། དེ་དང་མི་མཐུན་པའི་ཕྱོགས་ནགས་ལ་ནི་མངོན་བར་དགའ་བ་ཡིན་ཏེ། ཁྱིམ་ན་
གནས་པ་ཞེས་བྱ་བ་ལ་སོགས་པའོ། །གང་སྔར་བསྟན་པའི་ཆས་པ་སེམས་པ་ཞེས་བྱ་བ་དེ་བསྟན་པའི་ཕྱིར། ཁྱིམ་ཡོངས་སུ་མ་བཏང་ཞིང་། འདོད་པ་རྣམས་ལ་ཉེ་བར་ལོངས་སྤྱོད་པ་ལས་ནི་ཆོས་དང་འགལ་བ་ཡིན་ཏེ། འཐབ་མོ་ལ་སོགས་པ་མང་བའི་ཕྱིར་རོ། །དེ་ལྟར་ཆོས་ལ་
སེམས་པ་ནི་ཁྱིམ་ན་གནས་པ་ན་དགའ་བར་མ་གྱུར་པའོ། །ཤེས་རབ་དང་ལྡན་པའི་ཕྱིར་ཁྱིམ་ན་གནས་པ་ལ་དགའ་བར་མ་གྱུར་པ་དེ་བསྟན་པའི་ཕྱིར། རྒྱལ་པོ་དང་། རྐུན་པོ་ལ་སོགས་པ་ལྔ་དང་ཐུན་མོང་དུ་གྱུར་པར་ཤེས་པའི་ཕྱིར་དང་། ཆོག་མི་ཤེས་པར་ཡོངས་སུ་ཤེས་པའི་ཕྱིར་དང་།
ཉེས་པ་དུ་མའི་གནས་སུ་གྱུར་པར་ཤེས་པའི་ཕྱིར་ཏེ། བློ་དང་ཤེས་རབ་རབ་ཏུ་གསལ་བའི་ཕྱིར། ཁྱིམ་ན་གནས་པ་ལ་དགའ་བར་མ་གྱུར་ཏོ། །ཁྱིམ་པའི་ཆ་ལུགས་བོར་ནས་ཞེས་བྱ་བ་ལ། ཇི་ལྟར་ཁྱིམ་པའི་ཆ་ལུགས་བོར་ཞེ་ན། སྐྲ་དང་ཁ་སྤུ་བཟང་པོ་བྲེགས་པའི་ཕྱིར་དང་། གོས་
ཁ་དོག་བསྒྱུར་བ་ངུར་སྨིག་བགོས་པའི་ཕྱིར་རོ། །ཇི་ལྟར་རབ་ཏུ་བྱུང་བའི་ཆ་ལུགས་བླངས་ཤེ་ན། རབ་ཏུ་བྱུང་བའི་སྡོམ་པའི་དཔལ་ལ་གནས་པར་གྱུར་པའི་ཕྱིར་རོ། །དེ་ཡང་དཀའ་ཐུབ་ཀྱི་ནགས་ཚལ་ན་གནས་མི་ནུས་པར་ཤེས་ནས་སོ། །རབ་ཏུ་དཀའོ་ཞེས་བྱ་བ་ནི་བགྲོད་པར་
དཀའ་བ་ཡིན་པའི་ཕྱིར་རོ། །དུར་ཁྲོད་དང་། ཁོང་སྟོང་སྨོས་པས་ནི། གནས་མལ་གྲོང་དང་ཉེ་བར་སྟོན་པ་ཡིན་ནོ། །དེ་ཡང་གཉིས་ཏེ། བྱམས་པ་དང་། མི་བྱམས་པའི་བྱེ་བྲག་གིས་སོ། །རི་བོ་དག་ནི་གཅན་གཟན་ཁྲོ་བོས་གང་བའོ། །དེ་གཉིས་སྨོས་པ་ནི་
གྲོང་ལས་ཐག་རིང་བར་སྟོན་ཏོ། །དེ་ལྟ་བུའི་གནས་མ་ལ་གྱི་བྱེ་བྲག་མཐུན་པ་དང་། མི་མཐུན་བ་དག་ཏུ་བསམ་གཏན་བྱེད་ཅིང་ཞེས་བྱ་བའི་ཚིགས་བཅད་སྨོས་སོ། །གྲོགས་མེད་པར་དེས་རབ་ཏུ་དཀའ་བས་བསམ་གཏན་བྱེད་པར་བསྟན་པའི་ཕྱིར། འདི་ས་ནི་སྐྱེས་བུ་གཅིག་པུ་གཉིས་

སུ་མེད་པར་གནས་པ་བསྟན་ཏོ། །བུད་མེད་དག་ནི་ལྟར་ཡང་མེད་པར་བྱེད། །ཅེས་བྱ་བ་འདིས་ནི། བསམ་གཏན་མི་བྱེད་ཀྱང་བུད་མེད་དང་རེག་པར་གནས་པ་དང་ལྷན་ཅིག་ཏུ་འགྲོགས་པར་མི་རུང་བ་ཉིད་དུ་བསྟན་ཏོ། །འཆི་བ་ལ་ཕྱོགས་པའི་གནས་དེ་ལྟ་བུ་གཉི་ག་
འགྲོ་བའི་འཇིགས་སུ་རུང་བ་དང་། གྲོགས་བྱེད་པ་བསྟན་པའི་སྡུག་བསྔལ་དེས་ནི་བདག་སྡུག་ཅིང་དེས་ཁྱོད་ཀྱང་མི་དགྱེས་པ་ཞེས་བྱ་བའི་དོན་ཏོ། །མཆིས་པར་ནུས་པ་ཞེས་བྱ་བ་ནི་འཚོ་བར་རོ། །དཔྱིད་ཀྱི་དུས་ལ་བབ་པའི་ཞེས་བྱ་བ་ལ་སོགས་པས་ནི། མིག་དང་། རྣ་བ་དང་། སྣ་
དང་། ལྕེ་དང་། ལུས་ཀྱི་དབང་པོས་ཉེ་བར་སྤྱོད་པ་སྤྱད་དུ་རུང་བའི་ནགས་ཚལ་བསྟན་ཏོ། །ཤིང་ལོ་ལྷག་པར་མཛེས་པ་དང་ནི་ལྡན། །ཞེས་བྱ་བ་འདིས་ནི་མིག་གི་དབང་པོས་ཉེ་བར་ལོངས་སྤྱད་དུ་རུང་བའོ། །བུང་བ་མང་པོ་སྒྲ་དི་རི་རི་ཟེར་ཞེས་པ་ལ་སོགས་པས་ནི་རྣ་བའི་དབང་པོས་ལོངས་
སྤྱད་དུ་རུང་བ་བསྟན་ཏོ། །པདྨ་དང་། ཨུཏྤ་ལ་ཁ་བྱེ་བ་ཞེས་བྱ་བ་འདིས་ནི་ལྕེ་དང་། ལུས་ཀྱི་དབང་པོས་ལོངས་སྤྱད་དུ་རུང་བ་བསྟན་ཏོ། །མེ་ཏོག་དྲི་ཞིམ་པོ་སྣ་ཚོགས་ཀྱི་བསུང་གིས་ཞེས་བྱ་བ་ལ་སོགས་པ་ནི་སྣའི་དབང་པོ་དང་། ལུས་ཀྱི་དབང་པོས་ལོངས་སྤྱད་དུ་རུང་བ་བསྟན་ཏོ། །མེ་
ཏོག་སྣ་ཚོགས་ཚོམ་བུ་རབ་ཏུ་མཛེས། །ཞེས་བྱ་བ་ལ་སོགས་པའི་ཚིགས་བཅད་གཉིས་ཀྱིས་ནི་ཚིག་རྐང་གོང་མ་དག་ནི་དོན་ཉིད་བསྟན་ཏོ། །གཡོན་ཅན་དང་ཐུབ་ཆོད་ཅན་རབ་ཏུ་མང་ན་ཞེས་བྱ་བ་ལ། གཡོན་ཅན་ནི་མ་དུལ་བས་བུད་མེད་ལ་སོགས་པ་ཡང་དུལ་བ་མེད་དོ། །ཐུབ་ཆོད་ནི་འཕྲོག་པར་འདོད་
པའོ། །དབེན་པ་འདི་ན་ཞེས་བྱ་བ་ནི་རབ་མདའ་བཟློག་ཏུ་མེད་པར་བསྟན་ཏོ། །དཀའ་ཐུབ་ཆུང་བ་ཞེས་བྱ་བ་འདིས་ནི་རང་ཉིད་ནུས་པ་མེད་པར་སྟོན་ཏོ། །ཆོས་དང་བཅས་ཏེ་ཞེས་བྱ་བ་ནི་ཁྱོད་དང་ཁྱོད་ཀྱི་ཆོས་ལ་བརྙས་པ་སྟེ། འདི་དག་གིས་ནི་འཇིག་རྟེན་འདི་དང་། འཇིག་རྟེན་ཕ་རོལ་ལ་འཇིགས་པ་མེད་པའི་རྒྱུ་ཉིད་
དུ་བསྟན་ཏོ། དབེན་པ་འདི་ནི་དཀའ་ཐུབ་ཅེས་བྱ་བའི་ཚིགས་བཅད་འདིས་ནི་ནགས་ན་གནས་པས་བུད་མེད་དེ་ལ་སྟོན་ཏོ། །ཁྲོ་བ་སྐྱེད་ན་ཞེས་བྱ་བའི་ཚིགས་བཅད་འདིས་ནི་ཁྱོད་ཉིད་ལ་ཡང་ཕན་པ་མེད་པར་བསྟན་པའི་ཕྱིར་ཏེ། འཇིག་རྟེན་གཉི་ག་ལ་ཡང་ཕན་པ་མེད་པར་ཁྲོ་བ་སྐྱེད་པ་མི་རིགས་

སོ། །དེ་ཅིའི་ཕྱིར་ཞེ་ན། ཡིད་འཁྲུགས་པ་ཉིད་ཀྱི་ཕྱིར་འདིས་ནི་ཆོས་དང་འགལ་བར་བསྟན་ཏེ། ཆོས་དང་འགལ་བར་གྱུར་པས་ནི་འཇིག་རྟེན་ཕ་རོལ་ཏུ་ཕན་པ་མེད་པ་ཉིད་དོ། །ཆོས་དང་འགལ་བ་ལས་ནི་གྲགས་པའང་མེད་པར་འགྱུར་ཏེ། འདིས་ནི་འཇིག་རྟེན་འདི་ཉིད་ལ་ཕན་
པ་མེད་པ་ཉིད་དོ། །དེས་ན་དེ་དང་ཁྱོད་གཉི་ག་ལ་ཕན་པ་མེད་པའི་ཕྱིར། གྲོང་དུ་ཞེས་བྱ་བ་ནི་སྐྱེ་བོའི་ནང་ཉིད་དུ་ཞེས་བྱ་བའི་དོན་ཏོ། །ཅི་སྟེ་སྐྱོན་དེ་གཉི་ག་མེད་ཀྱང་དཀའ་ཐུབ་ཅན་ལ་བུད་མེད་བསྙེན་ཅི་དགོས་ཞེས་བྱ་བ་སྨོས་ཏེ། འདི་ནི་བདག་ཉིད་དང་རྗེས་སུ་མཐུན་པར་སྟོན་ཏོ། རྒྱགས་
པར་བསྙེམས་སམ། གལ་ཏེ་མ་བརྟགས་པར་ཞེས་བྱ་བ་འདི་གཉིས་ཀྱིས་ནི། ཞེ་སྡང་གི་ཤས་ཆེ་བ་དང་དམན་པར་སྟོན་ཏོ། །རྒྱགས་པས་བསྙེམས་པས་ཞེས་བྱ་བ་ནི་བརྟགས་པར་བྱས་ཀྱང་སྤྱོད་པ་ཟིལ་གྱིས་མནོན་པའོ། །མ་བརྟགས་པར་ཞེས་བྱ་བ་ནི་དྲན་པ་ཉམས་པ་ལ་སོགས་པས་
སོ། །མི་མཐུན་པའི་ཕྱོགས་མི་བསྟན་པའི་ཕྱིར་དགྲ་ཞེ་སྡང་ལ་ཡང་རྒྱགས་པས་བསྙེམས་པ་དང་། མ་བརྟགས་པ་ཅི་རིགས་པར་བརྗོད་པར་བྱའོ། །དེས་གནོད་པ་བྱས་སུ་ཡང་མི་དོགས་ལ་ཞེས་བྱ་བ་ནི་དེའི་རྒྱུས་གནོད་པས་ན་དེས་གནོད་པ་ནི་དེས་གནོད་པའོ། །དེ་ལ་དོགས་པ་དང་
བྲལ་བ་གང་ཡིན་པ་དེ་ནི་དེས་གནོད་པ་བྱས་སུ་མི་དོགས་པའོ། །འདིས་ནི་འཇིག་རྟེན་འདིའི་འཇིགས་པ་མེད་པར་བསྟན་ཏོ། །འདོད་པའི་འདོད་ཆགས་ཀྱི་དབང་དུ་ཡང་གྱུར་པས་ཞེས་བྱ་བ་ནི་འཇིག་རྟེན་ཕ་རོལ་གྱི་འཇིགས་པ་མེད་པར་སྟོན་ཏོ། །འདོད་པའི་འདོད་ཆགས་ཀྱིས་ཟིལ་གྱིས་མནན་པ་དེས་ཆོས་ལ་
མི་ལྟ་བས་སོ། །འཇིགས་པ་དང་། བག་ཚ་བ་ནི་འཇིགས་པ་དང་བག་ཚ་བ་སྟེ། དེ་གཉིས་ཀྱིས་བཞིན་གྱུར་པ་གང་ཡིན་པ་དེ་ནི་འཇིགས་ཤིང་བག་ཚ་བས་ངོ་འཛུམ་འགྱུར་བའོ། །རྒྱལ་པོའི་མཐུས་ཕོ་བྲང་གི་ནང་དུ་ཁྲིད་ཅེས་ཐོས་པས་ནི། གཅན་གཟན་མ་རུངས་པས་དགོ་བ་མོ་གཙེས་
པ་བཞིན་དུ་འཇིགས་ཤིང་བག་ཚ་བས་ངོ་འཛུམ་འགྱུར་བའོ། །འདིར་སྐྱོབ་པ་ནི་གཞན་མེད་པའི་ཕྱིར། སྐྱེ་དགུ་སྐྱོང་བའི་རྒྱལ་པོས་ཁྱེར་བར་གྱུར་ན། གཞན་སུ་ཞིག་སྐྱོབ་པར་འགྱུར་ཏེ། ནགས་ཀྱི་དགོ་བ་མོ་བཞིན་ནོ། །དེ་བས་ན་དེ་ཉིད་ཀྱི་ཕྱིར། ནགས་ཞེས་སྨོས་པ་ཡིན་ཏེ།

གང་གི་ཕྱིར་གཞན་དུ་ན་ནི་དགོ་བ་མོ་ཞེས་བྱ་བ་ཉིད་སྟོན་པར་འགྱུར་རོ། །དེ་ཉིད་ཀྱི་ཕྱིར་འཇིགས་ཤིང་བག་ཚ་བས་ངོ་འཛུམ་འགྱུར་བ་ཉིད་ཀྱི་རྒྱུ་བསྟན་པའི་ཕྱིར། འཇིག་རྟེན་ཕོངས་ཤིང་ཞེས་བྱ་བའི་ཚིགས་བཅད་བརྩམས་པ་ཡིན་ནོ། །དེ་ཉིད་གང་ལ་མི་རིགས་བྱེད་གྱུར་ན། །
ཞེས་བྱ་བ་འདིས་ན་འཇིགས་པ་དང་། བག་ཚ་བའི་རྒྱུ་བསྟན་ཏོ། །ཡང་ན་དེ་ཉིད་གང་ལ་མི་རིགས་བྱེད་གྱུར་ན། །ཞེས་བྱ་བ་འདིས་ནི་འཇིགས་པའི་རྒྱུ་བསྟན་ཏེ། དེ་ཡིས་སུ་ལ་ཕ་སྐྱབས་བཙལ་བར་བྱ། །ཞེས་བྱ་བ་འདིས་ནི་བག་ཚ་བའི་རྒྱུ་བསྟན་ཏེ། ཕ་སྐྱབས་དེ་མེད་ཀྱང་གང་དག་འཇིག་
རྟེན་སྐྱོང་བ་དང་། གཞན་ཡང་སྐྱེ་བོས་བྱེད་པ་དག །སྐྱབས་བྱེད་པ་མེད་ཅེས་བསྟན་པའི་ཕྱིར། ཀྱེ་མ་འཇིག་རྟེན་སྐྱོང་བའང་། །ཞེས་བྱ་བའི་ཚིགས་བཅད་བརྩམས་པ་ཡིན་ཏེ། ཚུལ་ལས་ཉམས་ཞེས་བྱ་བ་ནི་འཇིག་རྟེན་སྐྱོང་བ་ཉིད་ཉམས་པའམ། འཇིག་རྟེན་སྐྱོང་བའི་མིང་ཉིད་
ཉམས་ནས་མེད་པ་སྟེ། གཞན་གྱི་དོན་མི་བྱེད་པའི་ཕྱིར། དེ་འཇིག་རྟེན་སྐྱོང་བ་དེ་ལས་ཉམས་པའམ་མེད་པའོ། །དེ་ཅིའི་ཕྱིར་ཞེ་ན། ལེགས་པར་མི་སྐྱོང་བས་སོ། །ཤི་བར་གྱུར་ཏམ་ཅི་ཞེས་བྱ་བས་ནི་ལྷའི་འགྲོ་བ་དེ་ལས་ཉམས་པའོ། །དེ་ནས་གལ་ཏེ་ཡོད་ཀྱང་ཚུལ་ལས་
ཉམས་པ་དེས་མི་ནུས་པའམ། ཤི་བས་གང་དག་ཕོངས་པ་ལེགས་པར་སྐྱོབ་པར་མི་བྱེད་པའོ། །རང་བཞིན་གྱིས་ཀྱང་ཡོངས་སུ་བསྲུང་བར་ནུས་མོད་ཀྱི། བདག་ལ་མི་བསྲུང་བ་ཡིན་ནོ་ཞེས་བསྟན་པའི་ཕྱིར། ཇོ་བོ་བཞུགས་བཞིན་ལྷ་ཡིས་ཅི་ཞིག་བགྱི། །ཞེས་བྱ་བའི་ཚིགས་བཅད་
སྨོས་སོ། །གཞན་ཞིག་ཡིན་ནའང་རྗེས་སུ་བསྲུང་བར་རིགས་ན་བདག་ནི་ཆོས་སྤྱོད་པའི་གྲོགས་ཡིན་པའི་ཕྱིར་རོ། སྙིང་རྗེའི་སྣོད་དུ་མ་གྱུར་ཅེས་བྱ་བ་ནི་སྙིང་རྗེའི་དངོས་པོ་དང་བདག་ཉིད་སྐལ་བར་འགྱུར་བའི་ཕྱིར་གསོ་བའི་དངོས་པོར་མ་གྱུར་པ་སྟོན་ཏོ། །བྱང་ཆུབ་སེམས་དཔའ་དེ་ནི་ཕོངས་
པ་རྣམས་ལ་བསྒྲུབ་པ་དང་། རྗེས་སུ་མཐུན་པར་བསྟན་པའི་ཕྱིར། ཕོངས་ལ་སྙིང་རྗེ་ཅན་གྱིས་ཞེས་བྱ་བའི་ཚིགས་བཅད་འོག་མ་ཡིན་ཏེ། བདག་ནི་སྙིང་རྗེའི་དོན་མ་གྱུར་པ་ཉིད་དོ། །རབ་ཏུ་བྱུང་བ་རྣམས་ནི་ཕོངས་པ་རྣམས་སྒྲུབ་པ་དང་མི་འགལ་བར་བྱེད་མོད་ཀྱི། འོན་ཀྱང་མི་

སྒྲུབ་པའི་རྒྱུ་གཞན་བསྟན་པའི་ཕྱིར། བདག་ནི་སླད་དུ་བཟློག་ཀྱང་མ་ལོག་པར་ཞེས་བྱ་བའི་ཚིགས་བཅད་སྨོས་སོ། །སོ་སོར་བརྟགས་པའི་སྟོབས་ཀྱིས་ཁྲོ་བའི་སྟོབས་བཅིལ་ཞེས་བྱ་བ་ནི་གང་སྔར་བསྟན་པའི་རྒྱགས་པས་བསྙེམས་སམ། གལ་ཏེ་མ་བརྟགས་པར་ཞེས་བྱ་བ་དེ་འདིས་བསྟན་པ་ཡིན་
ནོ། །དེ་འཁྲུགས་པ་དང་བྲལ་བ་གང་ཡིན་པ་དེ་ནི་འཁྲུགས་པ་མེད་པའོ། །སེམས་རབ་ཏུ་ཞི་བ་གང་ཡིན་པ་དེ་ནི་སེམས་རབ་ཏུ་ཞི་བའོ། །འཁྲུགས་པ་མེད་པ་དང་། སེམས་རབ་ཏུ་ཞི་བ་ནི་སེམས་འཁྲུགས་པ་མེད་ཅིང་རབ་ཏུ་ཞི་བའོ། །འཁྲུགས་པ་མེད་པ་ནི་ཁྲོ་བོའི་སྟོབས་ཀྱིས་
ཟིལ་གྱིས་མི་ནོན་པའི་ཕྱིར་རོ། །སེམས་རབ་ཏུ་ཞི་བ་ནི་སོ་སོར་བརྟགས་པའི་སྟོབས་ཀྱིས་སོ། །བསྙེངས་ཤིང་གསང་བསྟོད་ཅེས་བྱ་བ་ནི་གང་སྔར་བསྟན་པའི་རྒྱགས་པས་བསྙེམས་པས་ཞེས་བྱ་བའི་ཚིགས་བཅད་དོ། །མཐུ་མེད་པས་ཞུམ་ཞིང་ཞི་བར་གྱུར་པ་གང་ཡིན་པ་དེ་ནི་མཐུ་མེད་པས་
ཞུམ་ནས་རབ་ཏུ་ཞི་བ་སྟེ། གང་སྔར་བསྟན་པའི་སེམས་འཁྲུགས་པ་མེད་ཅིང་རབ་ཏུ་ཞི་བ་ཞེས་བྱ་བ་དེ་བསྟན་པའོ། །མཐུ་རྩལ་ཞེས་བྱ་བ་དེ་ལུས་ཀྱི་སྟོབས་སོ། །དཀའ་ཐུབ་གནས་པའི་གཟི་བརྗིད་བསགས་པའང་སྟོན། །ཞེས་བྱ་བ་ནི་དཀའ་ཐུབ་བསྟན་པའི་སྟོ