Luận tạng Tây Tạng (Tengyur) — Tập 167

འགའ་ཞིག་ཀྱང་གནས་པ་མེད་ན་མ་དང་བུ་མོ་དང་སྲིང་མོའི་འདུ་ཤེས་བྱས་ཏེ་ཉེ་བར་གདོན་པར་བྱའོ། །བུད་མེད་རྣམས་ལ་ཆགས་པ་མེད་པའི་སེམས་ཀྱིས་ཆོས་སྨྲ་

བར་བྱའོ། །གཅིག་པུ་བུད་མེད་རྣམས་ལ་ཆོས་བསྟན་པར་མི་བྱའོ། །བུད་མེད་དང་ལྷན་ཅིག་ཁྱིམ་གཅིག་ཏུ་ཉལ་བར་མི་བྱའོ། །སྟན་གཅིག་ལ་འདུག་པར་མི་བྱའོ། །ལམ་དུ་འགྲོ་བར་ཡང་མི་བྱའོ། །གལ་ཏེ་སྐྱེས་པ་ཡོད་ན་ཉེས་པ་མེད་དོ། །བུད་མེད་རྣམས་མཐོང་ན་ལོའི་ཚད་དང་རྗེས་སུ་མཐུན་པར་
ཤེས་ནས་མ་དང་བུ་མོ་དང་སྲིང་མོའི་འདུ་ཤེས་སུ་བྱའོ། །བུད་མེད་གནས་ཁང་དུ་འཇུག་པ་སྦྱིན་པར་མི་བྱའོ། །གལ་ཏེ་སྨན་ལ་སོགས་པ་དང་དགེ་བའི་ཕྱོགས་བྱེད་ན་ཉེས་པ་མེད་དོ། །དེར་ཡང་གཅིག་པུ་འདུག་པར་མི་བྱའོ། །བུད་མེད་དང་ལྷན་ཅིག་བཟའ་བར་མི་བྱའོ། །སྣོད་མེད་ན་ཕ་མ་དག་དང་ལྷན་
ཅིག་དབེན་པའི་ཕྱོགས་སུ་བཟའ་བར་བྱའོ། །ཡང་ན་དེ་དག་འུ་བུ་ཅག་ལྷན་ཅིག་བཟའོ་ཞེས་ཟེར་ན་བདག་ཉིད་དབེན་པའི་ཕྱོགས་སུ་བཟའ་བར་བྱའོ། །གལ་ཏེ་བུད་མེད་བྱ་བ་མ་ཡིན་པ་མི་རིགས་པས་མགྲོན་དུ་གཉེར་ན་ལྷག་པར་གནས་པར་མི་བྱའོ། །བུད་མེད་གལ་ཏེ་མདུན་དུ་བུད་མེད་སླུ་
ཞིང་། བུད་མེད་གཡོ་བྱེད་ཅིང་། བུད་མེད་སྒྱུ་བྱེད་པ་ལ་བལྟ་བར་མི་བྱའོ། །ལམ་དུ་འགྲོ་བས་བུད་མེད་དང་ལྷན་ཅིག་རེག་པས་འགྲོ་བར་མི་བྱའོ། །བུད་མེད་ཀྱི་གཏམ་མི་བྱའོ། །གང་དུ་བུད་མེད་ཁྲུས་བྱེད་པ་དེས་མི་བྱའོ། །བུད་མེད་གཅེར་བུ་ཡོད་པ་དེར་འདུག་པར་མི་བྱ་ཞིང་བལྟ་བར་ཡང་
མི་བྱའོ། །རང་གོས་མེད་པས་ཀྱང་བུད་མེད་ཀྱི་དྲུང་དུ་འདུག་པར་མི་བྱའོ། །བུད་མེད་ཀྱི་ཡན་ལག་དང་ཉིང་ལག་ལ་བལྟ་བར་མི་བྱའོ། །བུད་མེད་འཁྲིག་པ་ཡང་དག་པར་འཛིན་པར་བྱེད་དུ་མི་གཞུག་གོ། །གཞན་ལ་འཁྲིག་པའི་ཕྱིར་རིན་སྦྱིན་པར་མི་བྱའོ། །བུད་མེད་ཀྱི་གར་དང་། གླུ་དང་རོལ་
མོ་དང་། གོས་རྣམས་དང་། རྒྱན་རྣམས་ཀྱི་སྒྲ་ལ་ཉན་པས་རོ་མྱང་བར་མི་བྱའོ། །བུད་མེད་ཀྱི་ཐད་ལས་དྲིལ་ཕྱིས་དང་། ཁྲུས་དང་། བསྐུ་མཉེ་བདག་གིར་མི་བྱའོ། །ཨེ་མ་བདག་ཚུལ་ཁྲིམས་སམ། བརྟུལ་ཞུགས་སམ། དཀའ་ཐུབ་ཀྱི་ཚངས་པར་སྤྱོད་པ་ལ་བརྟེན་པ་འདིས་ལྷ་ཉིད་དམ།
གཞན་གང་ཡང་རུང་སྙོམ་དུ་སྨོན་པས་ཚངས་པར་སྤྱོད་པ་སྤྱད་པར་མི་བྱའོ། །བུད་མེད་དང་ལྷན་ཅིག་དགོད་པ་དང་རྩབ་ཧྲལ་དང་རྩེད་མོ་མི་བྱའོ། །མི་ཚངས་པར་སྤྱོད་པ་བྱེད་པ་ལ་ལྟ་བ་དང་དགའ་བར་མི་བྱ་ཞིང་སྤྲོ་བར་ཡང་མི་བྱའོ། །གང་ཡང་གཞོན་ནུ་མི་ཚངས་པར་སྤྱོད་པ་འཁྲིག་པའི་

ཆོས་བསྟེན་པའི་མཐུ་དང་ལྡན་པ་དེ་ཡང་སྔར་བསྟན་པའི་རྣམ་པས་ཡོངས་སུ་དོར་བར་བྱའོ། །གལ་ཏེ་ནད་པ་འདི་སྐད་དུ་གང་བདག་བུད་མེད་དང་ལྷན་ཅིག་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ཅིང་བདག་ལ་བུད་མེད་ཁྱེར་ཏེ་འོང་བ་དེ་ལྟ་ན་བདག་འཚོའོ་ཞེས་སྨྲ་ན་རྐྱེན་དེས་
མི་འཚོ་ན་ཡང་འདི་ལ་ཀུན་ཏུ་སྦྱིན་པར་མི་བྱའོ། །ནད་པས་མི་ཚངས་པར་སྤྱོད་པ་མི་བྱའོ། །མི་ཚངས་པར་སྤྱོད་པ་བྱེད་པ་ལ་ལྟ་བ་ཐག་རིང་པོར་ཡོངས་སུ་སྤང་བར་བྱའོ། །ཇི་ལྟར་འབར་བའི་མེའི་ཕྲེང་བས་ཁྱབ་པ་ཡོངས་སུ་དོར་བར་བྱ་བ་ཡིན་པ་དེ་བཞིན་དུ་བུད་མེད་ཀྱང་ཡོངས་སུ་དོར་བར་བྱའོ། །དེ་
ལྟ་བུ་ལ་སོགས་པ་མི་ཚངས་པར་སྤྱོད་པ་རྣམ་པ་དུ་མ་ཡིན་པ་དེའི་ཕྱིར་རྣམ་པ་ཐམས་ཅད་དུ་ཐབས་ཐམས་ཅད་ཀྱི་སྒོ་ནས་སྲོག་ལ་བབ་ཀྱང་མི་ཚངས་པར་སྤྱོད་པ་བསྲུང་བར་བྱ་སྟེ། གང་གི་ཕྱིར་མི་ཚངས་པར་སྤྱོད་པ་བྱེད་པ་ལ་ནི་ཚངས་པ་མཚུངས་པར་སྤྱོད་པ་རྣམས་ཀྱིས་སྤོང་བ་དང་། དམྱལ་བར་
ལྟུང་བ་ཡང་ཡིན་ནོ། །དགེ་ཚུལ་གྱི་བསླབ་པའི་གཞིའི་མདོ་ལས་མི་ཚངས་པར་སྤྱོད་པ་སྤོང་བ་ཞེས་བྱ་བའི་བསླབ་པའི་གཞི་གསུམ་པའོ།། །།བརྫུན་དུ་སྨྲ་བ་སྤོང་བ་ཞེས་བྱ་བ་ནི་མིའི་ཆོས་བླ་མ་མེད་པ་ལ་མེད་བཞིན་དུ་ཡོད་པར་མི་སྨྲ་བ་སྟེ། འདི་ལྟ་སྟེ། དཔེར་ན་ལྷ་ལ་སོགས་པ་
རྣམས་མཐོང་ངོ་། །ལྷ་ལ་སོགས་པ་རྣམས་ཀྱིས་ཀྱང་བདག་མཐོང་ངོ་། །ལྷ་ལ་སོགས་པ་རྣམས་ཀྱི་སྒྲ་ཐོས་སོ། །ལྷ་ལ་སོགས་པ་རྣམས་ཀྱིས་ཀྱང་བདག་གི་སྒྲ་ཐོས་སོ་ཞེས་བྱ་བ་ལ་སོགས་པ་དང་། དེ་བཞིན་དུ་བསམ་གཏན་དང་། ཚད་མེད་པ་དང་། གཟུགས་མེད་པ་དང་། འབྲས་བུ་དང་།
མངོན་པར་ཤེས་པ་དང་། འདུ་ཤེས་མེད་པ་ལ་སོགས་པ་ཟག་པ་མེད་པའི་ཆོས་རྣམས་བདག་གིས་ཐོས་པ་མི་སྨྲ་བའོ། །སྟན་ཁྲ་བོ་ལ་སོགས་པ་ནི་དགྲ་བཅོམ་པས་རྙེད་ལ། བདག་གིས་ཀྱང་དེ་རྙེད་ཀྱི་གཞན་གྱིས་ནི་མ་ཡིན་ནོ། །བདག་གིས་དགྲ་བཅོམ་པ་ཐོབ་སྟེ་བདག་ཁྱད་པར་ཐོབ་པ་ལས་
ཡོངས་སུ་ཉམས་སོ། །ཁྱིམ་འདི་གང་གིས་ཡིན་པ་འདོད་ཆགས་དང་བྲལ་བ་ཡིན་ཏེ། བདག་གིས་ཡང་འདི་ཡིན་ནོ། །དགྲ་བཅོམ་པས་བདག་མཐོང་ནས་སྨིན་པར་བྱེད་པ་དེ་ལ་སོགས་པའི་ཚིག་བརྗོད་པར་མི་བྱའོ། །བདག་གི་ཕྱིར་རམ་ཟང་ཟིང་གི་ཕྱིར་ཡང་ཤེས་བཞིན་དུ་བརྫུན་དུ་སྨྲ་བ་བརྗོད་

པར་མི་བྱའོ། །བདག་གི་ལུས་སམ་ངག་གིས་སྡིག་པའི་ལས་ཅུང་ཟད་བྱས་པ་དེ་ལ་མཁན་པོ་ལ་སོགས་པ་རྣམས་ཀྱིས་ཅི་འདི་དང་འདི་ལྟ་བུ་ཁྱོད་ཀྱིས་བྱས་སམ་ཞེས་འདྲི་ན་དེ་ལ་ཇི་ལྟར་གྱུར་པ་བཞིན་དུ་བརྗོད་པར་བྱའོ། །ཉེ་དུ་དང་གྲོགས་ལ་སོགས་པ་རྣམས་དང་། གཞན་དང་གཞན་གྱི་ལུས་དང་
ངག་གིས་སྡིག་པའི་ལས་ཅུང་ཟད་བྱས་པར་གྱུར་ན་དེ་ལ་རྒྱལ་པོའི་ཕོ་བྲང་འཁོར་དུ་གཏོགས་པའམ། གཞན་གྱི་འཁོར་དུ་གཏོགས་པའི་དབང་པོ་ལ་འཕགས་པ་འདིས་ཅི་ཞིག་བྱས་ཞེས་འདྲི་བར་གྱུར་ན། དེ་ལ་འདི་སྐད་དུ་གལ་ཏེ་འདི་ལ་ཉེ་བར་གནོད་པ་ཅུང་ཟད་ཀྱང་མི་བྱེད་པ་དེ་ལྟ་ན་བདག་ཆེ་བཞི་
བྱེད་ཀྱི་གཞན་དུ་མ་ཡིན་ནོ་ཞེས་བརྗོད་པར་བྱའོ། །གལ་ཏེ་མི་བྱེད་ཅེས་ཟེར་ན་དམ་ཚིག་ལ་བཀོད་ན་ཇི་ལྟ་བ་བཞིན་དུ་གྱུར་པའི་ཆེ་བཞི་དབྱེ་བར་བྱའོ། །འོན་ཏེ་མི་སྨྲ་ན་རྣམ་པ་ཐམས་ཅད་དུ་སྲོག་ལ་བབ་ཀྱང་བརྗོད་པར་མི་བྱའོ། །བཞད་གད་ཀྱི་ཕྱིར་ཡང་ཤེས་བཞིན་དུ་བརྫུན་དུ་སྨྲ་བར་མི་
བྱའོ། །སློབ་དཔོན་དང་མཁན་པོ་དང་ཚངས་པ་མཚུངས་པར་སྤྱོད་པ་རྣམས་ཀྱིས་དྲིས་པའི་ཚིག་ལ་གཞན་དང་གཞན་དུ་སྤྲོ་བར་མི་བྱ་མོད་ཀྱི། འོན་ཀྱང་གཡོ་སྒྱུ་བྱེད་པ་མ་ཡིན་པས་གང་ཁོ་ན་དྲིས་པ་དེ་ཁོ་ན་བརྗོད་པར་བྱའོ། །གལ་ཏེ་མི་གསད་པར་བྱ་བ་བྲོས་པ་མཐོང་ན་དེ་ལ་གསོད་པར་བྱེད་
པས་ཁྱོད་ཀྱིས་འདི་ལྟ་བུ་བྲོས་པ་མཐོང་ངམ་ཞེས་འདྲི་ན། དེ་ལ་གཞན་དང་གཞན་སྤྲོ་བར་བྱའོ། །དེ་ལྟར་བྱས་པ་ན་གལ་ཏེ་འཕགས་པས་སྨྲ་བར་བྱ་བ་རྗོད་ཅིག་ཅེས་ཟེར་ན་རེ་ཞིག་སེན་མོ་མཐོང་ངོ་རེ་ཞིག་ནམ་མཁའ་མཐོང་ངོ་ཞེས་བརྗོད་པར་བྱའོ། །དེ་ལྟར་བྱས་ཀྱང་འཕགས་པས་སྨྲ་བར་བྱ་བ་
རྗོད་ཅིག །གཞན་དྲིས་པ་ན་གཞན་ལུང་བསྟན་པས་ཅི་བྱ་ཞེས་ཟེར་ན། ཕྱོགས་བཞིར་བལྟས་ཏེ་འདི་སྐད་དུ་དོན་དམ་པར་སེམས་ཅན་མ་མཐོང་ཞེས་བརྗོད་པར་བྱའོ། །ཉེ་བར་གནོད་པ་རྣམས་ཡོངས་སུ་བསྲུང་བའི་ཕྱིར་གཞན་དང་གཞན་དུ་སྤྲོ་བར་བྱའོ། །སློབ་དཔོན་དང་མཁན་པོ་རྣམས་ཅུང་
ཟད་སྨྲ་ན་ཆོས་དང་ལྡན་པའི་ཚིག་རྣམས་བྱ་སྟེ། གང་གི་ཕྱིར་དེ་བཞིན་གཤེགས་པ་དང་། དགྲ་བཅོམ་པ་དང་། སློབ་དཔོན་དང་། མཁན་པོ་དང་། དགེ་འདུན་དང་། དགེ་འདུན་གྱི་གནས་བརྟན་དང་། རྒྱལ་པོ་དང་། དེའི་འཁོར་རྣམས་ཀྱི་ཚིག་སྤང་བར་བྱ་བ་མ་ཡིན་ནོ། །རྣམ་པར་འགྱུར་

བ་ཐོབ་པའི་སློབ་དཔོན་དང་མཁན་པོ་ནི་དོར་བར་བྱའོ། །ཚིག་རྩུབ་པོ་སྨྲ་བར་མི་བྱའོ། །མིའི་སྐྱོན་ནས་སྨྲ་བར་མི་བྱའོ། །ཆེ་གེ་མོའི་རིགས་ནི་རིགས་འདི་ཡིན་ནོ་ཞེས་བརྗོད་པར་མི་བྱ་སྟེ། དེ་བཞིན་དུ་རྫ་མཁན་དང་། མགར་བ་ལ་སོགས་པའི་རིགས་ཀྱང་ངོ་། །
ཕྲ་མ་མི་བྱའོ། །ནད་པས་བརྫུན་སྨྲ་བར་མི་བྱའོ། །གཞན་ལ་བརྫུན་དུ་སྨྲ་བ་ཡང་དག་པར་འཛིན་དུ་གཞུག་པར་མི་བྱ་ཞིང་། སྤྲོ་བ་བསྐྱེད་པར་མི་བྱའོ། །དེ་ལྟ་བུ་ལ་སོགས་པ་བརྫུན་དུ་སྨྲ་བ་རྣམ་པ་དུ་མ་ཡིན་པ་དེའི་ཕྱིར་སྲོག་ལ་བབ་ཀྱང་ཤེས་བཞིན་དུ་བརྫུན་དུ་སྨྲ་བར་མི་བྱའོ། །བརྫུན་དུ་སྨྲ་བ་ནི་
རྣམ་པ་ཐམས་ཅད་ཀྱིས་ཐབས་ཐམས་ཅད་དུ་བསྲུང་བར་བྱ་སྟེ། གང་གི་ཕྱིར་བརྫུན་དུ་སྨྲ་བ་ནི་ཚངས་པ་མཚུངས་པར་སྤྱོད་པ་རྣམས་ཀྱིས་སྤོང་བར་འགྱུར་བ་དང་། དམྱལ་བར་ལྟུང་བར་འགྱུར་བའི་ཕྱིར་རོ། །བསླབ་པའི་གཞི་བཞི་པོ་འདི་རྣམས་ནི་རང་བཞིན་གྱི་ཁ་ན་མ་ཐོ་བ་དང་བཅས་པ་ཡིན་པས་
སྲོག་ལ་བབ་ཀྱང་འདི་རྣམས་ནད་པས་ཀྱང་སྤྱད་པར་མི་བྱའོ། །དགེ་ཚུལ་གྱི་བསླབ་པའི་གཞིའི་མདོ་ལས་བརྫུན་དུ་སྨྲ་བ་སྤོང་བ་ཞེས་བྱ་བའི་བསླབ་པའི་གཞི་བཞི་པའོ།། །།འབྲུའི་ཆང་དང་བཅོས་པའི་ཆང་མྱོས་པར་འགྱུར་བའི་ཁུ་བ་སྤོང་བ་ཞེས་བྱ་བ་ནི་འབྲུའི་ཆང་དང་། བཅོས་
པའི་ཆང་ཐ་ན་རྩྭའི་མཆོག་མས་ཀྱང་བཏུང་བར་མི་བྱེད་པའོ། །འབྲུའི་ཆང་ནི་ཟས་ཀྱི་བཏུང་བའོ། །བཅོས་པའི་ཆང་ནི་མེ་ཏོག་དང་སྡོང་བུའི་བཏུང་བའོ། །མྱོས་པར་འགྱུར་བ་ན་འབྲས་བུའི་བཏུང་བའོ། །མྱོས་པར་བྱེད་པའི་འབྲས་བུ་གང་ཡིན་པ་དེ་ནི་བཟའ་བར་མི་བྱ་སྟེ་ཀོ་ཊ་བ་ཡང་ངོ་། །
མྱོས་པར་འགྱུར་བའི་བཏུང་བ་ལ་མྱོས་པར་འགྱུར་བར་འདུ་ཤེས་པའམ། ཡིད་གཉིས་ཟ་བའམ་མྱོས་པར་འགྱུར་བ་མ་ཡིན་པ་ལ་མྱོས་པར་འགྱུར་བར་འདུ་ཤེས་པར་བཏུང་བར་མི་བྱའོ། །ཚིགས་མ་བཟའ་བར་མི་བྱའོ། །མྱོས་པར་འགྱུར་བ་བསྐོལ་བ་ལ་ཉེས་པ་མེད་དེ། དེ་ཡང་གལ་
ཏེ་མྱོས་པར་འགྱུར་བའི་རོ་དང་དྲི་དང་བྲལ་བ་ཡིན་ཞིང་མྱོས་པར་འགྱུར་བའི་ཁ་དོག་དང་ལྡན་པ་ལ་ཉེས་པ་མེད་དོ། །གཞན་ལ་འབྲུའི་ཆང་དང་བཅོས་པའི་ཆང་གི་ཁུ་བ་མི་སྦྱིན་ཞིང་སྦྱིན་དུ་ཡང་མི་གཞུག་གོ། །འབྲུའི་ཆང་དང་བཅོས་པའི་ཆང་གི་རིན་མི་སྦྱིན་ཞིང་སྦྱིན་དུ་ཡང་མི་གཞུག་གོ། །

ནད་པས་འབྲུའི་ཆང་དང་བཅོས་པའི་ཆང་མྱོས་པར་འགྱུར་བའི་བཏུང་བ་བཏུང་བར་མི་བྱ་སྟེ། བཅས་པའི་ཁ་ན་མ་ཐོ་བ་དང་བཅས་པ་ཡང་ཡིན་པའི་ཕྱིར་རོ། །བསྐོལ་བའི་ཁུ་བའི་རྣམ་པ་ལྟ་བུ་དང་། ཆབ་ལྟ་བུ་བཏུང་བར་བྱའོ། །བུམ་པ་ནི་གསུམ་སྟེ། བཤང་བའི་བུམ་པ་དང་། གཅི་བའི་བུམ་
པ་དང་། ཆང་གི་བུམ་པའོ། །དེ་ལ་ཇི་ལྟར་བསྟན་མ་ཐག་པའི་བུམ་པ་གཉིས་པོ་ཡོངས་སུ་དོར་བར་བྱ་བ་ཡིན་པ་དེ་བཞིན་དུ་ཆང་གི་བུམ་པ་ཡང་ངོ་། །བཅོམ་ལྡན་འདས་ཀྱིས་ཀྱང་དགེ་སློང་དག་ང་ལ་སྟོན་པར་སྨྲ་བ་རྣམས་ཀྱིས་མྱོས་པར་འགྱུར་བ་ཐ་ན་རྩྭའི་མཆོག་མས་ཀྱང་མི་སྦྱིན་ཞིང་མི་བཏུང་ངོ་
ཞེས་གསུངས་སོ། །འབྲུའི་ཆང་དང་བཅོས་པའི་ཆང་མྱོས་པར་འགྱུར་བའི་བཏུང་བ་ཡང་དག་པར་འཛིན་དུ་མི་གཞུག་གོ། །དེ་ལྟ་བུ་ལ་སོགས་པ་མྱོས་པར་འགྱུར་བའི་བཏུང་བ་རྣམ་པ་དུ་མ་ཡིན་པ་དེའི་ཕྱིར་འབྲུའི་ཆང་དང་བཅོས་པའི་ཆང་ཐབས་ཐམས་ཅད་ཀྱི་སྒོ་ནས་ཐམས་ཅད་དུ་བསྲུང་བར་བྱ་
སྟེ། གང་གི་ཕྱིར་འབྲུའི་ཆང་དང་བཅོས་པའི་ཆང་འཐུངས་པ་ལ་ཚངས་པ་མཚུངས་པར་སྤྱོད་པ་རྣམས་ཀྱིས་ཡོངས་སུ་སྤོང་བར་འགྱུར་བ་དང་། དམྱལ་བར་ལྟུང་བར་ཡང་འགྱུར་བའི་ཕྱིར་རོ། །དགེ་ཚུལ་གྱི་བསླབ་པའི་གཞིའི་མདོ་ལས་འབྲུའི་ཆང་དང་བཅོས་པའི་ཆང་གི་བཏུང་བ་སྤོང་བ་ཞེས་
བྱ་བའི་བསླབ་པའི་གཞི་ལྔ་པའོ།། །།གར་དང་གླུ་དང་རོལ་མོའི་སྒྲ་སྤོང་བ་ཞེས་བྱ་བ་ནི་གར་དང་གླུ་དང་རོལ་མོའི་སྒྲ་མི་བྱ་ཞིང་གཞན་བྱེད་དུ་གཞུག་པར་ཡང་མི་བྱ་བའོ། །མཆོད་པའི་དོན་དུ་སངས་རྒྱས་བཅོམ་ལྡན་འདས་ལ་བསྟོད་པ་དང་། རྒྱུན་ཆགས་གསུམ་པ་ལ་དབྱངས་ཀྱིས་འདོན་པར་
བྱེད་པ་ལ་ཉེས་པ་མེད་དོ། །དབྱངས་ཀྱི་ང་རོ་རང་བཞིན་མངོན་པར་མི་ཤེས་ན་དབེན་པར་ཞུགས་ཏེ་བསླབ་པར་བྱའོ། །གར་མཁན་ལ་སོགས་པ་གར་བྱེད་པ་ལ་བལྟ་བར་མི་བྱའོ། །གང་དུ་གར་བྱེད་པ་དང་། གླུ་ལེན་པ་དེར་འདུག་པར་མི་བྱའོ། །སྟེང་དུ་འགྲོ་བ་དང་། མཆོང་བ་དང་།
རྒྱུག་པ་དང་། རྩེད་མོ་མི་བྱའོ། །ཆུ་ལ་རྩེད་མོ་ཉམས་སུ་མྱོང་བར་མི་བྱའོ། །དགེ་ཚུལ་གྱི་བསླབ་པའི་གཞིའི་མདོ་ལས་གར་དང་གླུ་དང་རོལ་མོ་སྤོང་བ་ཞེས་བྱ་བའི་བསླབ་པའི་གཞི་དྲུག་པའོ།། །།ཕྲེང་བ་དང་སྤོས་ཉུག་པ་དང་རྒྱན་དང་ཁ་དོག་འཆང་བ་དང་སྤོང་བ་ཞེས་བྱ་བ་ནི་ཕྲེང་བ་དང་།

མེ་ཏོག་སིལ་མ་དག་བདག་གི་ལུས་ལ་མི་འདོགས་པ་དང་། རང་ལ་དྲིའི་ཆུས་ཁྲུས་མི་བྱེད་པ་དང་། དགའ་བའི་ཕྱིར་གདུ་བུ་དང་། དཔུང་རྒྱན་དང་། མགུལ་རྒྱན་ལ་སོགས་པས་བདག་ཉིད་ཀྱི་ལུས་ལ་རྒྱན་མི་བྱེད་པ་དང་། བདག་ཉིད་ལ་དྲི་ཞིམ་པོའི་རྫས་ཀྱིས་ཉུག་པ་
ལ་སོགས་པ་མི་བྱེད་ཅིང་། ལུས་ལ་དྲི་ཞིམ་པོའི་རྫས་ཀྱིས་ཡང་དག་པར་འབྱུག་པར་མི་བྱེད་པའོ། །ཆོས་གོས་ལ་བདུག་སྤོས་ཀྱིས་བདུག་པར་མི་བྱའོ། །གལ་ཏེ་དྲི་མི་ཞིམ་པ་ཡིན་ན་དྲི་ང་བ་སྤང་བའི་ཕྱིར་ཆོས་གོས་ལ་བདུག་སྤོས་ཀྱིས་བདུག་པ་དེ་ཉིད་བྱའོ། །སངས་རྒྱས་བཅོམ་
ལྡན་འདས་ལ་ཕྲེང་བ་དང་། སྤོས་ཉུག་པ་དང་། རྒྱན་དང་ཁ་དོག་ལ་སོགས་པ་དྲི་མ་ཞིམ་པོའི་རྫས་ཀྱིས་ཉུག་པར་བྱའོ། །གལ་ཏེ་དགེ་བསྙེན་དད་པ་ཅན་གྱིས་དྲི་ཆུ་དང་ཁྲུས་བྱེད་ན་བཀྲུ་བར་བྱས་ཏེ། དེའི་བསོད་ནམས་སྤེལ་བར་བྱ་བའི་ཕྱིར་རོ། །ཨུཏྤལ་སྔོན་པོ་ལ་སོགས་པའི་མེ་
ཏོག་རྙེད་པར་གྱུར་ན་བསྣམ་པར་བྱ་སྟེ། སློབ་དཔོན་དང་། མཁན་པོ་དང་། དགེ་སློང་དང་། འཇིག་རྟེན་པའི་མདུན་དུ་ནི་མ་ཡིན་ནོ། །གང་གི་ཕྱིར་དྲི་ཞིམ་པོ་ཐམས་ཅད་ནི་མིག་དང་རྗེས་སུ་མཐུན་པ་ཡིན་ནོ། །སོ་ཕག་དག་གིས་རྐང་པ་དག་མ་གཏོགས་པའི་ལུས་ལ་ཡོངས་སུ་
ཁྲུད་པར་མི་བྱའོ། །གལ་ཏེ་དད་པ་ཅན་དག་གིས་ལག་པ་རྐང་པ་དག་ལ་དྲི་ཞིམ་པོས་འབྱུག་པར་བྱེད་ན་དེའི་མདུན་དུ་དོར་བར་མི་བྱའོ། །དེ་བཞིན་གཤེགས་པ་དང་། ཉན་ཐོས་ཀྱི་སྐུ་གཟུགས་དང་། མཆོད་རྟེན་དག་ལ་རྗེས་སུ་བྱུག་པར་བྱའོ། །གལ་ཏེ་དེ་ཁྱོད་འདི་ལྟར་ལོངས་
སྤྱོད་པར་མཛོད་ཅིག་ཅེས་ཟེར་ན་དེའི་ཕྱིར་དགེ་བསྙེན་གྱི་ཚིག་ལས་ལོངས་སྤྱོད་པར་བྱའོ། །ནད་པ་ལ་སྨན་པའི་ཚིག་གིས་དྲི་ཞིམ་པོ་འབྱུག་པ་དང་། དྲིའི་ཆུས་ཁྲུས་བྱེད་ན་ནད་པ་ལ་ཉེས་པ་མེད་དོ། །དགེ་ཚུལ་གྱི་བསླབ་པའི་གཞིའི་མདོ་ལས་ཕྲེང་བ་དང་སྤོས་ཉུག་པ་དང་། རྒྱན་དང་ཁ་
དོག་འཆང་བ་སྤོང་བ་ཞེས་བྱ་བའི་བསླབ་པའི་གཞི་བདུན་པའོ།། །།མལ་མཐོན་པོ་དང་། མལ་ཆེན་པོ་སྤོང་བ་ཞེས་བྱ་བ་ལ་མལ་མཐོན་པོ་ནི་གང་ཞིག །སྟན་ལ་འདུག་པའི་རྐང་པ་ས་ལ་མ་རེག་པ་ཡིན་ལ། མལ་ཆེན་པོ་ནི་དངུལ་དང་གསེར་དང་མུ་ཏིག་ལ་སོགས་པ་རྣམས་ལས་

བྱས་པ་ཡིན་ཏེ། དེ་ལ་ཉལ་བ་དང་འདུག་པར་མི་བྱའོ། །དངུལ་དང་གསེར་དང་ནོར་བུ་དང་མུ་ཏིག་ལ་སོགས་པ་རྣམས་ལས་བྱས་པའི་སེང་གེའི་ཁྲི་ལ་མི་རྟག་པའི་འདུ་ཤེས་ཀྱིས་འདུག་ལ་ཆོས་ཉན་པ་སྦྱིན་པར་བྱ་སྟེ། དམ་པའི་ཆོས་མཆོད་པའི་ཕྱིར་རོ། །སྟན་མཐོན་པོ་བཀྲ་བའམ་ཉེ་བར་
བཀྲ་བ་ལ་འདུག་སྟེ་ཆོས་མཉན་པ་སྦྱིན་པར་བྱའོ། །མ་གསོལ་བར་ཆོས་ཉེ་བར་བསྟན་པར་མི་བྱའོ། །བཀྲ་བ་དང་ཉེ་བར་བཀྲ་བའི་སྟན་ལ་ཐུན་མོང་གི་གནས་སྐབས་སུ་འདུག་པར་མི་བྱའོ། །གལ་ཏེ་དད་པ་ཅན་གྱིས་ཁྱིམ་གྱི་ནང་དུ་ཉེ་བར་མགྲོན་དུ་བོས་པ་དེར་དངུལ་དང་གསེར་ལ་སོགས་
པ་རྣམས་ལས་བྱས་པའི་སྟན་བསྟབས་པར་གྱུར་ན། དེ་ལ་མི་རྟག་པའི་འདུ་ཤེས་ཀྱིས་འདུག་པར་བྱ་བ་དང་། དད་པ་ཅན་རྣམས་ལ་ཆོས་སྦྱིན་ཞིང་ལོངས་སྤྱད་པར་བྱ་བའི་ཡང་ཕྱིར་རོ། །གཡོགས་མ་མེད་པར་དགེ་འདུན་ནམ་གང་ཟག་གི་མལ་ཆ་དང་སྟན་ལ་སོགས་པ་ལོངས་སྤྱད་
པར་མི་བྱའོ། །ཀོ་ལྤགས་ཀྱི་རང་བཞིན་ནམ། ཀོ་ལྤགས་དང་བརྟགས་པའི་སྟན་ལ་འདུག་པར་མི་བྱ་བ་དང་། ཉལ་བར་ཡང་མི་བྱ། ཁྱིམ་པའི་ཁྱིམ་གྱི་ནང་དུ་སྟན་མེད་ན་འདུག་པ་ལ་ཉེས་པ་མེད་དོ། །གཙུག་ལག་ཁང་གི་ནང་དུ་ཤིང་གི་རང་བཞིན་གྱི་ལྷམ་བགོ་བར་མི་བྱའོ། །གཅི་བའི་
ཁང་པའམ། བཤང་བའི་ཁང་པའམ། ཁྱིམ་གྱི་ནང་དུ་ནི་དོར་བར་མི་བྱའོ། །རྗེས་སུ་མ་གནང་བར་སྟན་ལ་འདུག་པར་མི་བྱའོ། །མཛེ་ཅན་གྱིས་ཀྱང་མ་ཡིན་ཏེ། དགེ་འདུན་གྱི་ཁྲི་དང་མལ་ཆ་དང་སྟན་ལ་སོགས་པ་ཡང་སྤང་བར་བྱའོ། །གཙུག་ལག་ཁང་གི་ཕྱི་རོལ་དུ་འདིའི་གནས་
ཁང་བྱའོ། །ནད་པའམ་རྒན་པོ་དག་གིས་ནི་ཁྱོགས་ལ་འགྲོ་བར་བྱའི། ཐུན་མོང་གི་གནས་སྐབས་སུ་ནི་གླང་པོ་ཆེ་དང་། རྟ་དང་། ཤིང་རྟའི་བཞོན་པས་འགྲོ་བར་མི་བྱའོ། །དགེ་ཚུལ་གྱི་བསླབ་པའི་གཞིའི་མདོ་ལས་མལ་མཐོན་པོ་དང་མལ་ཆེན་པོ་སྤོང་བ་ཞེས་བྱ་བའི་བསླབ་པའི་
གཞི་བརྒྱད་པའོ།། །།དུས་མ་ཡིན་པའི་ཁ་ཟས་སྤོང་བ་ཞེས་བྱ་བ་ནི་དུས་མ་ཡིན་པར་ཟ་བར་མི་བྱེད་པ་སྟེ། ཇི་སྲིད་སྐྱ་རེངས་སྔོན་པོ་ཤར་ནས་རང་གི་ཉི་མ་ཕྱེད་ཀྱི་བར་དེ་སྲིད་དུ་དུས་ཡིན་ལ། དེ་ལས་གཞན་པ་ནི་དུས་མ་ཡིན་པའོ། །ནང་པར་ལངས་ནས་གདོང་བཀྲུ་བར་བྱའོ། །དུས་ལས་

ཡོལ་བ་ན་ལོ་མ་དང་འབྲས་བུ་ལ་སོགས་པ་ལོངས་སྤྱད་པར་མི་བྱ་ཞིང་། ཟང་ཟིང་ཡོངས་སུ་མ་དག་པ་ཅུང་ཟད་ཀྱང་སྤྱད་པར་མི་བྱའོ། །རྒུན་འབྲུམ་ལ་སོགས་པའི་བཏུང་བ་མྱོས་པར་མི་འགྱུར་བ་དང་། ཙང་ཤུ་དག་རས་ཀྱིས་བཙགས་ལ་ཟང་ཟིང་མེད་པར་བྱས་ནས། དུས་
མ་ཡིན་པར་བཏུང་བར་བྱའོ། །སྐོམ་པར་གྱུར་ན་བུ་རམ་དང་ལྷན་ཅིག་པ་དང་སྦྲང་རྩི་དང་ལྷན་ཅིག་པའི་ཆུ་ཡོངས་སུ་བཙགས་ཏེ་དུས་མ་ཡིན་པར་བཏུང་བར་བྱའོ། །ཡ་རབས་རྣམས་ཀྱིས་གནང་བའི་ཉ་དང་ཤ་གང་ཡིན་པ་ད་ནི་གཞི་གསུམ་གྱིས་ཡོངས་སུ་དག་པ་ན་ལོངས་སྤྱད་པར་བྱའོ། །རོ
ལ་སོགས་པ་ལ་སྲེད་པར་མི་བྱའོ། །ཤན་པ་ལས་ཁྱིམ་པ་དད་པ་ཅན་གྱིས་ཉོས་ལ་བཟའ་བར་བྱའོ། །ཤ་རྗེན་པ་མི་ཟའོ། །ནད་པ་ལ་དུས་མ་ཡིན་པར་ཟ་བ་ལ་ཉེས་པ་མེད་དོ། །ནད་པ་ཉིད་ནི་ནུས་པ་མེད་པ་ཉིད་མཐར་ཐུག་པ་ཡིན་ནོ། །ཟང་ཟིང་དང་བཅས་པའི་ཆུ་ལ་སོགས་པ་བཏུང་བར་མི་
བྱའོ། །དགེ་ཚུལ་གྱི་བསླབ་པའི་གཞིའི་མདོ་ལས་དུས་མ་ཡིན་པའི་ཟས་སྤོང་བ་ཞེས་བྱ་བའི་བསླབ་པའི་གཞི་དགུ་པའོ།། །།གསེར་དངུལ་ལེན་པ་སྤོང་བ་ཞེས་བྱ་བ་ནི་ས་ལེ་སྦྲམ་དང་དངུལ་བདག་གིར་བྱེད་པ་མི་རུང་བ་ཡིན་གྱི། ལེན་པ་ནི་རུང་བ་ཡིན་ནོ། །འགའ་ཞིག་གསེར་དང་
དངུལ་ལ་སོགས་པ་ཡོན་གྱི་ཆེད་དུ་འབུལ་བར་བྱེད་ན། དེ་ལ་འདི་སྐད་དུ་ངའི་ཆོས་གོས་དང་བཟའ་བ་ཉོས་ལ་བྱིན་ཅིག་ཅེས་བརྗོད་པར་བྱའོ། །ཡང་ན་འདིས་བདག་གིས་ཆོས་གོས་དང་བཟའ་བ་ལ་སོགས་པ་ཉོ་བར་བྱའོ་སྙམ་པ་འདི་ལྟ་བུའི་སེམས་ཀྱིས་བླང་བར་བྱ་བའམ། སྦྱིན་བདག་
སྤྲོ་བར་བྱ་སྟེ་བླང་བར་བྱའོ། །གླང་པོ་ཆེ་དང་། རྟ་དང་། བ་ལང་དང་། ཁྱི་དང་། ཕག་དང་། བུད་མེད་དང་། སྐྱེས་པ་དང་། ཁྱེའུ་དང་། བུ་མོ་དང་། བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་ལ་སོགས་པའི་ཡོན་ནི་བླང་བར་མི་བྱའོ། །ལོག་པར་འཚོ་བས་རྙེད་པ་
བསྒྲུབ་པར་མི་བྱའོ། །ཚུལ་འཆོས་དང་། ཁ་གསག་དང་། གཞོགས་སློང་དང་། ཐོབ་ཀྱིས་འཇལ་བ་དང་། རྙེད་པས་རྙེད་པར་བྱེད་འདོད་པ་མི་བྱའོ། །དགེ་ཚུལ་གྱི་བསླབ་པའི་གཞིའི་མདོ་ལས་གསེར་དངུལ་ལེན་པ་སྤོང་བ་ཞེས་བྱ་བའི་བསླབ་པའི་གཞི་བཅུ་པའོ།། །།ཁྱིམ་པའི་

རྟགས་སྤོང་བ་ཞེས་བྱ་བ་ནི་ཇི་ལྟར་ཁྱིམ་བདག་གོས་གྱོན་པ་དེ་ལྟར་གོས་གྱོན་པར་མི་བྱེད་པ་དང་། ཉིན་པར་ཕྱི་རོལ་ནས་གོས་དཀར་པོ་དང་། ཁ་ཚར་རིང་པོ་ཅན་གྱོན་པར་མི་བྱེད་པའོ། །ཚོན་རྩི་གསུམ་པོ་དག་གིས་ཁ་བསྒྱུར་བར་བྱས་ནས་འཆང་དུ་རུང་སྟེ། ཚོན་རྩི་གསུམ་ནི་ངུར་སྨྲིག་དང་། ནི་ལི་
ཀ་དང་། དམར་པོ་དག་ཡིན་ནོ། །ཚོན་ཆེན་པོ་བརྒྱད་པོ་དག་ནི་མི་རུང་སྟེ། མཚལ་དང་། རྒྱ་སྐྱེགས་དང་། བཙོད་དང་། གུར་གུམ་དང་། མཐིང་ཤིང་དང་། ལི་ཁྲི་དང་། རྨ་ཤིང་དང་། ལེ་བརྒན་ཞེས་བྱ་བ་ནི་ཚོན་ཆེན་པོ་དག་ཡིན་ནོ། །ཆོས་གོས་ཐམས་ཅད་ནི་སྔོན་པོའི་ཁ་དོག་ཅན་དུ་བགོ་
བར་མི་བྱའོ། །ཁྲ་བོ་ཉེ་བར་བཀྲ་བའི་གདུགས་བཅང་བར་མི་བྱའོ། །སྟེའུའི་སོ་ཅི་ལྟ་བ་དེ་བཞིན་དུ་སེན་མོ་གཅད་པར་བྱའོ། །དགོན་པར་གནས་པས་ནི་སྐྲ་སོར་གཉིས་ལས་ལྷག་པར་གཞག་པར་མི་བྱའོ། །གྲོང་མཐའ་བས་ནི་དེ་ལས་དམན་པའོ། །གྲི་གུ་དང་ཆན་པས་སྐྲ་བྲེག་པར་
མི་བྱའོ། །བྱིན་པ་དང་། མཆན་ཁུང་དང་། རྐེད་པ་དང་། སྨིན་མ་བྲེག་པར་མི་བྱའོ། །སྐྲ་བྲེགས་པའི་རྗེས་ལ་ཁྲུས་བྱའོ། །ཚོགས་པ་མེད་ན་ཡན་ལག་ལྔ་བཀྲུ་བར་བྱའོ། །ཕྱོགས་གང་དུ་སྐྲ་བྲེགས་པའི་ཕྱོགས་དེར་ཆག་ཆག་གདབ་པར་བྱ་ཞིང་སྐྱང་ནུལ་བྱའོ། །རྔའི་རྣམ་
པ་ལྟ་བུའམ་མདུང་རྩེའི་རྣམ་པ་ལྟ་བུའི་དཀྱིལ་འཁོར་བྱའོ། །མིག་ལ་དུད་པ་བྱུག་པར་མི་བྱའོ། །གལ་ཏེ་མིག་ན་བ་ཡིན་ན་ཉེས་པ་མེད་དོ། །མེ་ལོང་ལ་གདོང་བལྟ་བར་མི་བྱའོ། །སྐྱོ་བ་བསྐྱེད་པའི་ཆེད་དུ་ནི་ཉེས་པ་མེད་དོ། །ཁུར་ལྕི་བ་མི་བསྐུར་ཞིང་། ཕྲག་པ་དང་། རྐེད་པ་དང་།
མགོ་བོ་རྣམས་ཀྱིས་བསྡུས་ཁུར་བུ་མ་ཡིན་ནོ། །ཆུའི་ཕྱོགས་སུ་རྩ་བར་ཞྭ་གཟུང་བར་བྱའོ། །སྨད་ཤམ་ཐབས་ཀུན་ནས་ཟླུམ་པོར་བགོ་བར་བྱ་ཞིང་། སྟོད་དུ་ཀུན་ནས་ཆོས་གོས་ཀྱང་ངོ་། །བྱ་བ་བྱེད་པའི་ཚེ་ཆོས་གོས་ཀྱི་མཐའ་མར་མདུད་པ་བཅིངས་ལ་ལས་བྱའོ། །རྣམ་པ་ཐམས་
ཅད་དུ་ཁྱིམ་པའི་རྟགས་ཀུན་ཏུ་སྤྱད་པར་མི་བྱའོ། །དགེ་ཚུལ་གྱི་བསླབ་པའི་གཞིའི་མདོ་ལས་ཁྱིམ་པའི་རྟགས་སྤོང་བ་ཞེས་བྱ་བ་རྫོགས་སོ།། །།རབ་ཏུ་བྱུང་བའི་རྟགས་ཡང་དག་པར་ལེན་པ་ཞེས་བྱ་བ་ནི་རེ་ཞིག་རིམ་གྱིས་བརྗོད་པར་བྱ་སྟེ། མཁན་པོ་དང་སློབ་དཔོན་དག་ལ་ཉེ་བར་

ལྡང་བར་བྱའོ། །ཇེ་དང་པོར་བཤང་བ་དང་གཅི་བའི་ཁང་པར་འགྲོ་བར་བྱ་སྟེ། ཆོས་གོས་བརྫེས་ལ་སེ་གོལ་བྱས་ནས་འཆག་པའི་ཁང་པར་འཇུག་པར་བྱའོ། །བཤང་བ་དང་གཅི་བ་བྱས་ནས་མཆན་ཁུང་དུ་བུམ་པ་བཟུང་སྟེ་ལག་པ་གཡོན་པས་བཤང་བའི་ལམ་དང་པོར་
ས་འཇམ་པོའམ་བོང་བས་ཕྱི་བར་བྱའོ། །དེ་ནས་ས་ཕུང་གསུམ་པོ་དག་གིས་བཤང་བའི་ལམ་དག་པར་བྱས་ནས་ཕྱིར་བྱུང་སྟེ། རྗེས་སུ་མཐུན་པའི་གནས་སུ་ས་ཕུང་བདུན་སོ་སོར་གཞག་པར་བྱའོ། །དེ་ནས་གཞན་ས་ཕུང་བདུན་པོ་དག་གིས་ལག་པ་གཡོན་པ་དག་པར་བྱའོ། །
དེ་ནས་ལག་པ་གཉིས་ས་ཕུང་དེ་རྣམས་ཀྱིས་དག་པར་བྱའོ། །ས་བླངས་ནས་སེན་མོའི་དྲི་མ་བསལ་བར་བྱའོ། །ས་བླངས་ནས་ལག་ངར་དག་པར་བཀྲུ་བར་བྱའོ། །བུམ་པ་ནི་ས་ཕུང་གཅིག་གིས་དག་པར་བྱའོ། །བྱིན་པ་དག་དང་རྐང་པ་དག་བཀྲུ་བར་བྱའོ། །རབ་ཏུ་དབེན་པའི་
ཕྱོགས་སུ་བཤང་གཅི་བྱའོ། །དེ་དག་དང་ཉེ་བར་གཏམ་སྣ་ཚོགས་མི་བྱ། ཡུན་རིང་དུ་གནས་པར་ཡང་མི་བྱའོ། །ཁ་དོན་དང་བཙོ་བླག་ལ་སོགས་པ་ཡང་དེར་མི་བྱའོ། །དེ་ལས་དལ་བུས་འོངས་ནས། དལ་བུ་དལ་བུས་སྒོ་གཏན་ཕྱེ་སྟེ། གནས་ཁང་དུ་འཇུག་པར་བྱ་ཞིང་སྒོ་སྐྱེས་ལ་
མ་བརྗེད་པར་བྱའོ། །རུང་བའི་ཆུའི་ལག་པ་དག་མཁྲིག་མའི་བར་དུ་བཀྲུ་བའམ་ཕྱི་བ་བྱའི། རྡུལ་ལམ་སས་ནི་མ་ཡིན་ནོ། །རིལ་བ་སྤྱི་བླུགས་ཐོགས་ཏེ་རབ་ཏུ་དབེན་པའི་ཕྱོགས་སུ་སོང་ནས་སོ་ཤིང་དོར་བར་བྱའོ། །སོ་ཤིང་ནི་རྣམ་པ་གསུམ་སྟེ། ཆེན་པོ་དང་། འབྲིང་དང་།
ཆུང་ངུ་དང་། ཆེན་པོ་ནི་སོར་བཅུ་གཉིས་པའོ། །ཆུང་ངུ་ནི་སོར་བརྒྱད་པའོ། །འབྲིང་ནི་དེ་དག་ལས་བར་པའོ། །དེ་རྣམས་ལས་གཞན་གང་ཡང་རུང་བས་དོར་བར་བྱའི་ཤིན་ཏུ་རྩུབ་པ་དང་ཕྲ་བ་དག་གིས་དང་ཡུན་རིང་དུ་ཡང་མ་ཡིན་ནོ། །དེ་རྣམ་པ་གཉིས་སུ་བཀས་ཏེ་ཕན་ཚུན་འབྲུད་པ་ལ་
དལ་བུས་ལྕེ་བཞར་བར་བྱའོ། །ཆུས་བཀྲུ་བའམ་རྡུལ་ལམ། སོ་ལ་བྲུད་པར་བྱའོ། །དེ་བཞིན་གཤེགས་པའམ། མཆོད་རྟེན་ནམ། སློབ་དཔོན་ནམ། མཁན་པོའི་མདུན་དུ་སོ་ཤིང་དོར་བར་མི་བྱའོ། །དགེ་སློང་མཆོག་ཏུ་གནས་བརྟན་རྣམས་ཀྱི་དྲུང་དུ་མ་ཡིན་ནོ། །ཉེ་བར་ལོངས་སྤྱོད་

པའི་གནས་སུ་མ་ཡིན་ནོ། །འཆག་ས་དང་ཉེ་བར་མ་ཡིན་མོད་ཀྱི་འོན་ཀྱང་རབ་ཏུ་དབེན་པར་བྱའོ། །ཁ་གདོང་བཀྲུས་ནས་དེ་མ་ཐག་པ་ཉིད་དུ་བཅོམ་ལྡན་འདས་ལ་ཕྱག་འཚལ་ལོ། །དེ་གལ་ཏེ་མཁན་པོ་ལ་ཕྱག་བྱེད་ན་མཁན་པོས་གདོང་བཀྲུ་བ་དང་སོ་ཤིང་དོར་བར་བྱས་ནས། དེའི་ཕྱིར་
དགོངས་སུ་གསོལ་ཞེས་བྱ་བས་ཕྱག་བྱས་ནས་གུས་པ་དང་བཅས་པས་བསྐུལ་ལ་མཉམ་མམ་དྲི་བ་དང་། ཀུན་ཏུ་དྲི་བར་བྱའོ། །མཁན་པོ་དགོངས་སུ་གསོལ། ཆག་ཆག་དང་། ཕྱག་དར་དང་། སྐྱང་ནུལ་དང་། ཀློག་པ་དང་། ཁ་དོན་དང་། ཀུན་ཏུ་སྤྱོད་པ་དག་བགྱིད་ཅེས་ཞུ་བར་
བྱའོ། །བརྩམ་པའི་བྱ་བ་ཐམས་ཅད་ཀུན་ཏུ་དྲི་བར་བྱའོ། །ཀུན་ཏུ་ཞུས་ཏེ་དེ་བཞིན་གཤེགས་པ་ལ་དཀྱིལ་འཁོར་བྱ་བ་དང་། ཆག་ཆག་དང་། ཕྱག་དར་དང་། སྐྱང་ནུལ་དང་། བསྟོད་པ་མངོན་པར་བརྗོད་པ་དག་བྱ་བ་དང་། དེ་བཞིན་གཤེགས་པ་ལ་བསྐོར་བ་བྱ་བ་དང་། ཡན་
ལག་ལྔས་དགེ་སློང་རྣམས་ལ་ཕྱག་དག་བྱའོ། །ཚུལ་ཁྲིམས་འཆལ་པ་ལ་ཡན་ལག་ལྔས་ཕྱག་མི་བྱའོ། །ནང་དང་བཅས་པ་ལའང་ཕྱག་མི་བྱའོ། །གཉིས་པོ་དག་དང་ལྷན་ཅིག་སྟན་གཅིག་ལ་འདུག་པར་མི་བྱའོ། །དེའི་རྗེས་ལ་ཉི་མ་ཤར་བ་ན་ཆུ་བརྟག་པར་བྱའོ། །མཁན་པོ་ལ་ཀུན་
ཏུ་ཞུས་ཏེ་མདུན་དུ་འགྲོ་བ་གུས་པར་བྱའོ། །མ་ཞུས་པར་མཚམས་ཀྱི་ནང་དུ་མཆོད་རྟེན་ལ་ཕྱག་བྱེད་པ་དང་། ཆུ་བཏུང་བ་དང་། སོ་ཤིང་དོར་བ་དང་། བཤང་གཅི་དག་བྱའོ། །མ་ཞུས་པར་ནི་ཐ་ན་ཁབ་མིག་ཏུ་སྐུད་པ་གཞུག་པར་ཡང་མི་བྱའོ། །མཁན་པོ་གནས་པ་མེད་ན་གནས་
ཀྱི་སློབ་དཔོན་ལ་ཞུ་བར་བྱའོ། །གནས་ཀྱི་སློབ་དཔོན་གནས་པར་མ་གྱུར་ན་དགེ་སློང་འགྲོགས་བཤེས་ལ་ཀུན་ཏུ་ཞུ་བར་བྱའོ། །མ་ཞུས་པར་གནས་པར་མི་བྱའོ། །གནས་མེད་པར་ལྗོངས་རྒྱུ་ཞིང་འགྲོ་བར་མི་བྱའོ། །ཚུལ་ཁྲིམས་འཆལ་བ་དང་། ནང་དང་བཅས་པ་དང་། ལྷན་ཅིག་
གང་དུའང་འགྲོ་བར་མི་བྱའོ། །དྲན་པ་དང་ཤེས་བཞིན་དང་ལྡན་པ་དང་། གཉའ་ཤིང་གང་ཙམ་བལྟ་བ་དང་། ཕྱོགས་སུ་མི་བལྟ་བ་དང་། ཞི་བའི་སྤྱོད་ལམ་དང་། གཏམ་སྣ་ཚོགས་མི་བྱེད་པ་དང་། ཆོས་ཀྱི་གཏམ་སྨྲ་བའམ། འཕགས་པའི་མི་སྨྲ་བ་ཉིད་ཀྱིས་འགྲོ་བར་བྱའོ། །

གལ་ཏེ་མཆོད་སྟོན་གྱི་དུས་སུ་དགེ་འདུན་གྱི་ནང་དུ་འཇུག་པ་ན་ཆོས་གོས་ཀྱི་མཐའ་མར་སྒྲོ་གུ་བཅིངས་ནས་ལག་པ་གཉིས་བཀྲུས་ཏེ། རྐང་པ་དག་བཀྲུས་ནས་གུས་པ་དང་བཅས་པས་དགེ་འདུན་གྱི་ནང་དུ་འཇུག་པར་བྱས་ལ། གྲལ་རིམས་ཇི་ལྟ་བ་བཞིན་དུ་འདུག་སྟེ།
དྲན་པ་དང་ཤེས་བཞིན་དང་ལྡན་པས་ལོངས་སྤྱད་པར་བྱའོ། །སྐད་གསང་མཐོན་པོས་བྲིམ་པར་བྱ་བ་འབྲིམ་དུ་མི་གཞུག་གོ། །བྱིན་ཅིག་བྱིན་ཅིག་ཅེས་བརྗོད་པར་མི་བྱ་མོད་ཀྱི་འོན་ཀྱང་བྲིམས་ཤིག་ཅེས་སོ། །བསོད་སྙོམས་ལ་ཡོངས་སུ་ལོངས་སྤྱོད་པ་ནི་རྒྱགས་པའི་ཕྱིར་མ་ཡིན། སྒེག་
པའི་ཕྱིར་མ་ཡིན། བརྒྱན་པའི་ཕྱིར་ཡང་མ་ཡིན་མོད་ཀྱི་འོན་ཀྱང་ཇི་སྲིད་ཁོ་ནར་ལུས་འདི་གནས་པར་བྱ་བའི་ཕྱིར་དང་། ཚངས་པར་སྤྱོད་པ་རྗེས་སུ་གཟུང་བར་བྱ་སྙམ་པ་དེ་ལྟ་བུའི་སེམས་ཀྱིས་ལོངས་སྤྱད་པར་བྱའོ། །བཅའ་བ་དང་བཟའ་བ་ལ་སོགས་པ་གྱ་ནོམ་པ་རྙེད་ན་དེ་མཁན་པོ་དང་སློབ་དཔོན་དག་
ལ་བསྟབས་པར་བྱའོ། །དེ་དག་གིས་ཀྱང་ཚོད་རིག་པར་བྱ་བ་ཡིན་ནོ། །ཁ་ཁམ་དང་བཅས་པས་སྨྲ་བར་མི་བྱའོ། །ཁམ་ཆུང་བའམ། ཆེ་བ་གཞུག་པར་མི་བྱ། མགྲོན་དུ་མ་བོས་པའི་ཟས་མི་བཟའ། སྒོག་པ་བཟའ་བར་མི་བྱའོ། །ནད་པས་ནི་སྨན་པས་ལུང་ཕོག་ན་བཟའ་བར་བྱའོ། །
ཇི་སྲིད་དུ་དྲི་དང་མ་བྲལ་བ་དེ་སྲིད་དུ་དབེན་པའི་ཕྱོགས་སུ་གནས་པར་བྱའོ། །དགེ་འདུན་གྱི་ནང་དུ་མཆིལ་ལྷམ་བགོས་ནས་འཇུག་པར་མི་བྱའོ། །ཟས་ཀྱི་ཚོད་རིག་པར་བྱ་བ་ཡིན་ནོ། །བྱ་རོག་རྣམས་ཀྱིས་ལྷག་མར་བྱས་པ་གང་ཡིན་པ་དེ་ནི་མཆུས་སླེབ་ཚད་བོར་ནས་བཟའ་བར་བྱའོ། །ཆེད་
དུ་མི་བྱ་བར་ཟས་ཀྱི་ཆང་པ་གཞག་པར་བྱའོ། །སྣོད་དམ་ཚོགས་པ་མེད་ན་ཕ་མ་དང་ཉེ་དུ་རྣམས་སམ། འགྲོགས་བཤེས་དང་། ཚུལ་ཁྲིམས་དང་ལྡན་པའི་དགེ་ཚུལ་དང་ལྷན་ཅིག་དབེན་པའི་ཕྱོགས་སུ་བཟའ་བར་བྱའོ། །ཚུལ་ཁྲིམས་འཆལ་པ་དང་། ལྷན་ཅིག་བཟའ་བར་ནི་མི་
བྱའོ། །ཟང་ཟིང་མེད་པའི་ཆུ་དང་། ལྕེ་བཞར་དང་། སོ་ཤིང་དག་གིས་ཁ་ཟང་ཟིང་མེད་པར་བྱའོ། །དེ་ནས་མཁན་པོ་ལ་ཡན་ལག་ལྔས་ཕྱག་བྱས་ནས་ཀུན་དུ་ཞུ་བར་བྱའོ། །མཁན་པོ་དགོངས་སུ་གསོལ། ཀློག་པ་དང་། ཁ་དོན་དང་། ཀུན་དུ་སྤྱོད་པ་དག་སྤྱད་པར་ཞུའོ་ཞེས་ཞུས་ནས་

ཀློག་པ་དང་ཁ་ཏོན་ལ་སོགས་པ་བྱའོ། །ཟན་ཟོས་པའི་དེ་མ་ཐག་ཉིད་དུ་སྦྱིན་བདག་གི་ཡོན་བཤད་པར་བྱའོ། །སྒྲ་བརྡ་བྱས་ནས་མཆིལ་མ་ལ་སོགས་པ་དོར་བར་བྱའོ། །དགེ་འདུན་གྱི་རྩིག་པའམ། ཀ་བའམ་ཁང་པའམ། རྗེས་སུ་མཐུན་པའི་གནས་པ་གཞན་དུ་ནི་མ་ཡིན་ནོ། །ཤམ་
ཐབས་ཀྱི་མཐའ་མ་གཉིས་དང་དབུས་སུ་བཟུང་ནས་ཡ་གད་ལ་སོགས་པ་ལ་འཛེགས་པ་དང་ཐུར་དུ་འབབ་པ་དང་། ཉིན་པར་གཉིད་ལོག་པར་བྱའོ། །སློབ་དཔོན་དང་མཁན་པོ་དག་གི་ཐད་དུ་མ་དང་ཕའི་འདུ་ཤེས་ཉེ་བར་གཞག་པར་བྱའོ། །དེ་དག་ལ་ཡང་རྐང་པ་དག་བཀྲུ་བ་ལ་སོགས་པས་བསྙེན་
བཀུར་བྱའོ། །དེ་དག་གིས་ཀྱང་དེའི་སྟེང་དུ་བུ་ལྟ་བུའི་འདུ་ཤེས་ཉེ་བར་གཞག་པར་བྱའོ། །དེ་དག་ལ་ཡང་སྟོན་པ་བཞིན་དུ་གུས་པས་བསྙེན་བཀུར་བྱའོ། །མཆོག་ཏུ་ཚུལ་ཁྲིམས་འཆལ་པ་ཡིན་ན་ཡང་སློབ་དཔོན་དང་མཁན་པོ་དང་མ་དང་ཕ་དང་ནད་པ་དག་ལ་བསྙེན་བཀུར་བྱའོ། །སློབ་
དཔོན་དང་མཁན་པོ་ལ་སོགས་པ་རྣམས་ལ་མུན་ཁུང་དུ་ཕྱག་མི་བྱ། ནད་པ་རྣམས་ལ་མ་ཡིན། གོས་གཅིག་པ་རྣམས་ལ་མ་ཡིན། ཁྱིམ་གྱི་ནང་དུ་གནས་པ་རྣམས་ལ་མ་ཡིན། ཟས་ཟ་བ་རྣམས་ལ་མ་ཡིན། ཁ་ཟང་ཟིང་དང་བཅས་པ་རྣམས་ལ་མ་ཡིན། བཤང་བ་དང་གཅི་བའི་ཁང་
པའི་སྟེང་དུ་གནས་པ་རྣམས་ལ་མ་ཡིན། བྱ་བ་གཞན་ལ་སེམས་གཡེངས་པ་རྣམས་ལ་ཕྱག་མི་བྱའོ། །རང་ཉིད་དེ་ལྟ་བུར་གྱུར་པས་ཀྱང་ཕྱག་མི་བྱའོ། །ཕྱག་བྱེད་པར་འདོད་པས་དགོངས་སུ་གསོལ་ཞེས་བརྗོད་པར་བྱའོ། །ཅང་མི་སྨྲ་བར་བྱེད་ན་ཕྱག་དག་བྱའོ། །ཡང་མ་བྱེད་ཅིག་
ཅེས་ཟེར་ན་མི་བྱའོ། །སློབ་དཔོན་དང་མཁན་པོ་དང་ཚངས་པ་མཚུངས་པར་སྤྱོད་པ་རྣམས་མཐོང་ནས་དེ་མ་ཐག་པ་ཉིད་དུ་སྟན་སྤང་བར་བྱའོ། །ཕྱག་ནི་རྣམ་པ་གཉིས་ཏེ། སྒྱིད་པ་ནས་བཟུང་བ་དང་། ཡན་ལག་ལྔས་སོ། །གལ་ཏེ་བདག་ཉིད་སྐྲ་བྲེགས་པར་གྱུར་ན་སློབ་དཔོན་དང་
མཁན་པོ་ལ་སོགས་པ་དང་། བཅོམ་ལྡན་འདས་ལ་ཡན་ལག་ལྔས་ཕྱག་བྱའོ། །སློབ་དཔོན་དང་མཁན་པོ་ལ་སོགས་པ་རྣམས་ཀྱི་སྐྲ་བྲེགས་པར་གྱུར་ན་ཡན་ལག་ལྔས་ཕྱག་བྱའོ། །གསར་བུ་དང་ཁྱིམ་པ་དག་གིས་གལ་ཏེ་ཕྱག་བྱས་པར་གྱུར་ན་ཨ་རོག་གྱ་ཞེས་བརྗོད་པར་བྱའོ། །

ཁྱིམ་པ་ལ་ཕྱག་མི་བྱ། ལྷ་གཞན་དག་ལ་ཕྱག་མི་བྱའོ། །ལམ་དུ་འགྲོ་བའི་ཚེ་ལྷ་གཞན་གྱི་རྟེན་མཐོང་ན་བདེ་བར་གཤེགས་པའི་ཚིགས་སུ་བཅད་པ་གདོན་པར་བྱའོ། །ཁྲོན་པ་ལ་སོགས་པ་རྣམས་ནས་ཆུ་བླངས་ནས་སྦྱིན་པ་དང་ལྡན་པའི་ཚིགས་སུ་བཅད་པ་གདོན་
པར་བྱའོ། །ཤིང་ལྗོན་པའི་རྩ་བ་དང་། ལྷ་ཁང་ལ་སོགས་པ་རྣམས་སུ་གནས་པ་ན་རྒྱུན་ཆགས་གསུམ་པ་བརྗོད་པར་བྱའོ། །རྒྱུན་ཆགས་གསུམ་པ་ནི། དཀོན་མཆོག་གསུམ་ལ་ཕྱག་འཚལ་བ་དང་། བསོད་ནམས་ཡོངས་སུ་བསྔོ་བ་དང་། ངེས་པར་བྱ་བ་དག་ཡིན་ནོ། །ལག་པ་དག་དང་
རྐང་པ་དག་བཀྲུས་ནས་ཆོས་གོས་རྣམས་སྤྲུགས་ལ་མཆིལ་ལྷམ་དག་ཕྱིས་ཏེ་ཞི་བའི་སྤྱོད་ལམ་གྱིས་གཙུག་ལག་ཁང་དུ་འཇུག་པར་བྱའོ། །དེ་གླལ་བར་གྱུར་ན་ལག་པའམ་གཞན་གོས་ཀྱིས་ཁ་དགབ་པར་བྱའོ། །མཆོད་རྟེན་གྱི་གྲིབ་མའམ་བདེ་བར་གཤེགས་པའི་སྐུ་གཟུགས་ཀྱི་གྲིབ་མ་
མཐོང་ནས་གཙུག་ལག་ཁང་གི་ཚིགས་སུ་བཅད་པ་བརྗོད་ལ་འགོམ་པར་བྱའོ། །འཐབ་པར་བྱེད་པའམ། འཐབ་ཏུ་གཞུག་པའམ། བལྟ་བར་ཡང་མི་བྱའོ། །རྒྱན་པོ་བྱེད་པ་མི་བྱའོ། །གང་དུ་ཆོ་ལོ་བྱེད་པ་དེར་འདུག་པར་མི་བྱའོ། །དཔང་པོ་བྱེད་པ་དེར་འདུག་པར་མི་བྱའོ། །གཉའ་བོ་
མི་བྱའོ། །ཆོས་ཟོང་དུ་མི་བྱའོ། །བསོད་ནམས་ཀྱི་བློས་ལས་བྱའི་གླ་རྔན་གྱིས་ནི་མ་ཡིན་ནོ། །དད་པས་སྦྱིན་པར་བྱ་བ་དགེ་འདུན་ནམ་གང་ཟག་ལས་བྱུང་བ་ཡོངས་སུ་ལོངས་སྤྱད་ནས་སྙོམ་ལས་ཀྱིས་དུས་འདའ་བར་མི་བྱའོ། །འོན་ཀྱང་ཀློག་པ་དང་ཁ་ཏོན་དག་གིས་སོ། །རྒོད་པ་མེད་པ་དང་
རྣམ་པར་གཡེངས་པ་མེད་པར་བྱའོ། །གནས་བརྟན་རྣམས་དང་བར་མ་རྣམས་དང་། གསར་བུ་རྣམས་ལ་གུས་པ་དང་བཅས་པ་དང་། ཞེ་ས་དང་བཅས་པར་བྱའོ། །མུ་ཅོར་མ་ཡིན་པ་དང་། རྣམ་པར་གཡེངས་པའི་ཚིག་མ་ཡིན་པར་བྱའོ། །ངོ་ཚ་དང་ལྡན་པར་བྱ་ཞིང་དབང་པོའི་སྒོ་
བསྡམ་པར་བྱའོ། །གསོང་པོར་སྨྲ་བ་དང་། དགའ་བའི་གཏམ་དང་། ཀྱེ་ཚུར་ཤོག་འོངས་པ་ལེགས་སོ་ཞེས་སྨྲ་བ་དང་། ཁྲོ་གཉེར་མེད་པ་དང་། འཛུམ་པ་སྔོན་དུ་འགྲོ་བར་བྱའོ། །དུས་སུ་མཁན་པོ་ལ་ཀུན་ཏུ་དྲི་བར་བྱ་སྟེ། མཁན་པོ་དགོངས་སུ་གསོལ། ཀུན་ཏུ་དྲི་བ་ནི་བདག་

ཀློག་པ་དང་། ཁ་ཏོན་དང་། ཀུན་ཏུ་སྤྱོད་པ་དག་བགྱིད་ཅིང་། མཚན་མོའི་ཐུན་དང་པོ་དང་། མཚན་མོའི་ཐུན་ཐ་མ་ལ་མི་ཉལ་བར་སྦྱོར་བ་ལ་རྗེས་སུ་བརྩོན་པར་བགྱིད་དོ་ཞེས་ཀུན་ཏུ་དྲི་བར་བྱའོ། །ཀུན་ཏུ་དྲིས་ནས་ཀྱང་ཀློག་པ་དང་། ཁ་ཏོན་ལ་སོགས་པ་དག་བྱ་ཞིང་མཚན་མོའི་ཐུན་དང་པོ་དང་།
མཚན་མོའི་ཐུན་ཐ་མ་ལ་མི་ཉལ་བར་སྦྱོར་བའི་རྗེས་སུ་བརྩོན་པ་ཉིད་དུ་བྱའོ། །དུས་སུ་སྤྱད་པར་བྱའི་དུས་མ་ཡིན་པར་སྤྱད་པར་མི་བྱའོ། །འདུག་པ་ལ་མཁས་པ་དང་། ཉལ་བ་ལ་མཁས་པར་བྱའོ། །འདུག་པ་དང་ཉལ་བ་ལ་སོ་སོར་བརྟག་པར་བྱའོ། །ཤིན་ཏུ་ཁྱད་པར་ཅན་དང་། ཤིན་ཏུ་
དམན་པའི་གོས་བགོ་བར་མི་བྱའོ། །ལྷག་པར་ཆགས་པ་མེད་པའམ། མགོ་ལྷག་པར་གཡོགས་པ་མེད་པར་བྱ་བའམ། རྐང་པའི་སྟེང་དུ་རྐང་པ་མི་གཞག་པའམ། ཀུན་ནས་གཡོགས་པར་མི་བྱ་བའམ། དེ་བཞིན་གཤེགས་པའམ། སློབ་དཔོན་ནམ་མཁན་པོའམ་གནས་བརྟན་
རྣམས་སམ། དགེ་སློང་རྣམས་ཀྱི་མདུན་དུ་འདུག་པར་མི་བྱའོ། །དེ་དག་གི་མདུན་དུ་བཅག་པར་ཡང་མི་བྱ་བ་ཉིད་དོ། །འདུག་པ་ལ་འགྲེང་སྟེ་ཆོས་བཤད་པར་མི་བྱ། ཉལ་བ་ལ་འདུག་པས་མ་ཡིན། སྟན་ཆེས་མཐོ་བར་འདུག་པ་ལ་སྟན་ཆེས་དམའ་བར་འདུག་པས་མ་ཡིན། མགོ་ཞྭ་ཅན་
དང་། ཅོད་པན་ཅན་ལ་མ་ཡིན། གླང་པོ་ཆེ་ལ་ཞོན་པ་དང་། རྟ་དང་ཤིང་རྟ་དང་ཁྱོགས་ན་འདུག་པའམ། མཆིལ་ལྷམ་ཅན་ལ་མ་ཡིན་ནོ། །ལྷུང་བཟེད་གཉིས་བཅང་བར་བྱ་སྟེ། ས་དང་ལྕགས་ཀྱི་རང་བཞིན་ནོ། །གོ་བར་བྱ་བའི་ཕྱིར་དང་། ཁྱི་རྣམས་བསྐྲད་པར་བྱ་བའི་ཕྱིར་ཁར་སིལ་སྒྲ་དང་
ལྡན་པ་བཅང་བར་བྱའོ། །རྒན་པོ་ལ་ནི་གནས་བརྟན་ནམ། བཙུན་པའི་ཚིག་གིས་བརྗོད་པར་བྱའོ། །བར་མ་ལ་ནི་གནས་བརྟན་གྱི་ཚིག་གིས་སོ། །གསར་བུ་ལ་ནི་ཚེ་དང་ལྡན་པའི་ཚིག་གིས་སོ། །སློབ་དཔོན་དང་མཁན་པོ་དང་གནས་བརྟན་རྣམས་ལ་ནི་ཚེ་དང་ལྡན་པའི་ཚིག་གིས་ཀུན་
ཏུ་བརྗོད་པར་མི་བྱའོ། །གཞན་དག་ལ་སློབ་དཔོན་དང་མཁན་པོ་དག་གི་མིང་གིས་བརྗོད་པར་མི་བྱའོ། །དབྱར་རྣམས་ལས་སྔ་མའམ་ཕྱི་མ་དག་ཏུ་དབྱར་ཉེ་བར་ཁས་བླང་བར་བྱའོ། །སྔ་མ་ནི་ཇི་སྲིད་དབྱར་ཟླ་ཐ་ཆུངས་ཀྱི་ཟླ་བའི་ཚེས་གཅིག་ནས། སྟོན་ཟླ་འབྲིང་པོའི་ཚེས་བཅོ་ལྔའི་དགག་དབྱེའི་

བར་དེ་སྲིད་དུ་དབྱར་འདྲལ་བར་མི་བྱའོ། །ཕྱི་མ་ནི་ཇི་སྲིད་སྟོན་ཟླ་ར་བའི་ཚེས་གཅིག་ནས་སྟོན་ཟླ་ཐ་ཆུངས་ཀྱི་ཟླ་བ་ཡར་གྱི་ངོའི་ཚེས་བཅོ་ལྔའི་བར་དེ་སྲིད་དུ་དབྱར་འདྲལ་བར་མི་བྱའོ། །དེ་ལྟར་ཡང་དབྱར་ཉེ་བར་ཁས་བླང་བར་བྱ་སྟེ། མཁན་པོའམ། སློབ་དཔོན་ནམ།
དགེ་སློང་གཞན་དག་གི་མདུན་དུ་ཙོག་པུས་འདུག་སྟེ། ཐལ་མོ་སྦྱར་བ་བྱས་ནས་ཚིག་འདི་སྐད་ཅེས་བརྗོད་པར་བྱའོ། །མཁན་པོ་དགོངས་སུ་གསོལ། དེང་དགེ་འདུན་གྱི་དབྱར་ཟླ་འབྲིང་པོ་ཉེ་བར་བསྒྲུབ་པའི་དུས་ཡིན་ལ། བདག་དགེ་ཚུལ་མིང་འདི་ཞེས་བགྱི་བའི་ཡང་དབྱར་ཟླ་འབྲིང་པོ་དབྱར་
ཉེ་བར་བསྒྲུབ་པའི་དུས་ཡིན་ཏེ། བདག་དགེ་ཚུལ་མིང་འདི་ཞེས་བགྱི་བ་མཚམས་ཀྱི་ནང་དང་བཅས་པའི་གནས་འདིར་ཇི་སྲིད་དུ་འདི་ལྟ་སྟེ། གནས་རལ་བ་དང་། འདྲུམས་པ་བཅོས་པའི་སླད་དུ་སྦྱིན་བདག་ཆེ་གེ་མོ་ཞེས་བགྱི་བ་དང་། ཞལ་ཏ་བྱེད་པ་ཆེ་གེ་མོ་ཞེས་བགྱི་བ་དང་། ནད་གཡོག་
བྱེད་པ་ཆེ་གེ་མོ་ཞེས་བགྱི་བ་དང་། སྤྱོད་ཡུལ་གྱི་གྲོང་ཁྱེར་ཆེ་གེ་མོ་ཞེས་བགྱི་བས་དབྱར་ཟླ་བ་གསུམ་ཉེ་བར་ཁས་བླང་བར་བགྱི་སྟེ། བདག་དབྱར་འདི་ནས་མཆིས་ཤིང་བདག་གི་དབྱར་གྱི་གནས་ནི་འདི་ལགས་སོ། །དེ་བཞིན་དུ་ལན་གཉིས་ལན་གསུམ་དུའོ། །ཐབས་ཡིན་ནོ། །ལེགས་སོ། །
དབྱར་ཉེ་བར་ཁས་བླངས་ནས་གལ་ཏེ་གཞན་གང་ཡང་རུང་བ་ཞིག་ཏུ་འགྲོ་བ་ན་ཆོས་ཀྱི་དོན་དུ་ཞག་བདུན་བྱིན་གྱིས་བརླབ་པར་བྱའོ། །མཁན་པོའམ། སློབ་དཔོན་ནམ་དགེ་སློང་གཞན་གང་ཡང་རུང་བའི་མདུན་དུ་ཕྱག་འཚལ་ནས་ཙོག་པུས་འདུག་སྟེ་འདི་སྐད་བརྗོད་པར་བྱའོ། །མཁན་པོ་དགོངས་
སུ་གསོལ། བདག་དགེ་ཚུལ་མིང་འདི་ཞེས་བགྱི་བ་མཚམས་ཀྱི་ནང་དང་བཅས་པའི་གནས་འདིར་དབྱར་སྔ་མ་ཟླ་བ་གསུམ་གནས་པར་ཁས་བླངས་པ་ལས་བདག་དགེ་ཚུལ་མིང་འདི་ཞེས་བགྱི་བ་ཆོས་དང་ལྡན་པའི་བགྱི་བ་ཉིད་ཀྱིས་ཞག་བདུན་མཚམས་ཀྱི་སླད་རོལ་དུ་མཆི་བ་དང་དེ་ཚུན་ཆད་ཀྱིས་སླར་
མཆི་བར་བྱིན་གྱིས་བརླབ་བོ། །བདག་དབྱར་འདི་ནས་མཆིས་ཤིང་བདག་གི་དབྱར་གྱི་གནས་འདི་ལགས་སོ། །དེ་བཞིན་དུ་ལན་གཉིས་ལན་གསུམ་མོ། །ཐབས་ཡིན་ནོ། །ལེགས་སོ། །བྱིན་གྱིས་བརླབས་ནས་འགྲོ་བ་ན་ཞག་བདུན་ནས་སླར་ལྡོག་པར་བྱ་ཞིང་དེ་བཞིན་དུ་ལན་གཉིས་དབྱར་འདྲལ་

བར་མི་བྱའོ། །སྲོག་གི་བར་ཆད་དང་། ཚངས་པར་སྤྱོད་པའི་བར་ཆད་དང་། བསོད་སྙོམས་ཆད་པར་གྱུར་ན་དབྱར་རལ་བ་ལ་ཉེས་པ་མེད་དོ། །དེ་ཇི་ལྟ་བ་བཞིན་དུ་དབྱར་ཕྱི་མ་ཁས་ལེན་པ་དང་། ཁས་བླངས་པ་བྱིན་གྱིས་བརླབས་པ་དག་ཅི་རིགས་པར་བརྗོད་པར་བྱའོ། །དེ་ནས་དགག་
དབྱེའི་ཉིན་མོ་དགག་དབྱེ་བྱའོ། །འདི་ལྟར་དགག་དབྱེ་བྱ་སྟེ། མཁན་པོའམ་སློབ་དཔོན་ནམ་གཞན་གང་ཡང་རུང་བའི་མདུན་དུ་ཙོག་པུས་འདུག་པ་ཉིད་ཀྱིས་ལག་པས་རྩྭ་དཱུར་བ་ལ་བཟུང་སྟེ། ཐལ་མོ་སྦྱར་བ་བྱས་ནས་འདི་སྐད་ཅེས་བརྗོད་པར་བྱའོ། །མཁན་པོ་དགོངས་སུ་གསོལ།
དེང་དགེ་འདུན་གྱི་དགག་དབྱེ་བཅོ་ལྔ་པ་ལགས་ལ། བདག་དགེ་ཚུལ་མིང་འདི་ཞེས་བགྱི་བའི་ཡང་དགག་དབྱེ་བཅོ་ལྔ་པ་ལགས་ཏེ། བདག་དགེ་ཚུལ་མིང་འདི་ཞེས་བགྱི་བས་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་བྱ་བའི་ཕྱིར་དགེ་འདུན་མ་ཚོགས་པས་དེང་དེ་སྲིད་ཚུན་ཆད་མཁན་པོའི་
མདུན་དུ་དགག་དབྱེ་བྱིན་གྱིས་བརླབ་བོ། །གང་གི་ཚེ་ཡང་དགེ་འདུན་ཚོགས་པ་རྙེད་པ་དེའི་ཚེ་དགེ་འདུན་ཚོགས་པ་དང་ལྷན་ཅིག་དགག་དབྱེ་བགྱིའོ། །དེ་བཞིན་དུ་ལན་གཉིས་ལན་གསུམ་དུའོ། །ཐབས་ཡིན་ནོ། །ལེགས་སོ། །ཅུང་ཟད་སྡིག་པའི་ལས་བྱས་པ་གང་ཡིན་པ་དེ་ནི་མཁན་
པོའམ་སློབ་དཔོན་ནམ་གཞན་དགེ་སློང་གང་ཡང་རུང་བའི་མདུན་དུ་ཙོག་ཙོག་པོར་འདུག་སྟེ། ཐལ་མོ་སྦྱར་ལ་སོ་སོར་བཤགས་པར་བྱའོ། །མཁན་པོ་དགོངས་སུ་གསོལ། བདག་དགེ་ཚུལ་མིང་འདི་ཞེས་བགྱི་བ་ལ་དུས་འདིའི་ནང་དུ་ལུས་དང་ངག་ལས་བྱུང་བའི་ཉེས་བྱས་ཀྱི་ལྟུང་བ་དཔག་ཏུ་
མ་མཆིས་པ་བྱུང་བ་གང་ཡིན་པ་དེ་བདག་དགེ་ཚུལ་མིང་འདི་ཞེས་བགྱི་བས། ཉེས་བྱས་ཀྱི་ལྟུང་བ་དཔག་ཏུ་མ་མཆིས་པ་དེ་འདི་ཉིད་དུ་མཐོལ་རབ་ཏུ་སྟོན་ཏོ། །འཆགས་སོ། །རྣམ་པར་སྨད་དོ། །མི་འཆབ་བོ། །མཐོལ་ཞིང་བཤགས་ན་བདག་དགེ་ཚུལ་མིང་འདི་ཞེས་བགྱི་བ་ལ་ཉེས་
བྱས་ཀྱི་ལྟུང་བ་དཔག་ཏུ་མ་མཆིས་པ་རྣམས་སྤངས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་མི་འགྱུར་རོ། །ལྟུང་བར་མཐོང་ངམ། མཐོང་ངོ་། །ཕྱིན་ཆད་སྡོམ་མམ། སྡོམ་མོ། །ལེགས་པར་ཤིན་ཏུ་སྡོམ་པར་བྱེད་དམ། སླན་ཆད་དེ་ལྟར་མི་བགྱིད་

དོ། །དེ་བཞིན་དུ་ལན་གཉིས་ལན་གསུམ་དུའོ། །ཐབས་ཡིན་ནོ། །ལེགས་སོ། །བཤགས་ནས་སླར་མི་བྱེད་ཅིང་དེ་ལྟར་བཤགས་ན་བདག་བདེ་བ་ལ་རེག་པར་གནས་པར་འགྱུར་རོ། །བཤགས་པ་བྱས་ནས་ཀྱང་གསོ་སྦྱོང་བྱའོ། །འདི་ལྟར་བྱ་སྟེ་མཁན་པོའམ་སློབ་དཔོན་ནམ་
གཞན་དགེ་སློང་གང་ཡང་རུང་བ་ལ་ཕྱག་བྱས་ནས་མདུན་དུ་ཙོག་ཙོག་པོར་འདུག་སྟེ། ཐལ་མོ་སྦྱར་བ་བྱས་ནས་འདི་སྐད་ཅེས་བརྗོད་པར་བྱ་སྟེ། མཁན་པོ་དགོངས་སུ་གསོལ། དགེ་འདུན་གྱི་གསོ་སྦྱོང་བཅུ་བཞི་པའམ། བཅོ་ལྔ་པ་ལགས་ཏེ། བདག་དགེ་ཚུལ་མིང་འདི་ཞེས་བགྱི་བའི་
ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་བགྱི་བའི་སླད་དུ་ལྟུང་བ་བྱིན་གྱིས་བརླབས་ཤིང་བཤགས་ཏེ། བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་བདག་ཉིད་མཆིའོ། །དེ་བཞིན་དུ་ལན་གཉིས་ལན་གསུམ་དུའོ། །ཐབས་ཡིན་ནོ། །ལེགས་སོ། །ཐམས་ཅད་དུ་བསླབ་པ་ལ་གུས་
པར་བྱའོ། །ཡོངས་སུ་དག་པར་ཡང་ཚུལ་ཁྲིམས་ཡོངས་སུ་བསྲུངས་པ་ལས་རྙེད་པ་འཐོབ་པ་དང་། མཐོ་རིས་ལ་སོགས་པ་མཐོ་བ་དང་། ལེགས་པར་ཚངས་པར་སྤྱོད་པ་དང་བཅས་པས་རང་གི་ཡོན་ཏན་གྲགས་པ་ཡིན་ནོ། །བཅོམ་ལྡན་འདས་ཀྱིས་ཀྱང་། གྲགས་དང་རྙེད་པ་འཐོབ་པ་
དང་། །ཕ་རོལ་དུ་ནི་མཐོ་རིས་དག །བདེ་བ་གསུམ་པོ་དོན་གཉེར་བས། །ཤེས་བཞིན་དུ་ནི་ཚུལ་ཁྲིམས་བསྟེན། །ཞེས་གསུངས་སོ། །ཡང་། གནས་རྣམས་འདི་དག་མཐོང་བ་ཡིས། །མཁས་པ་ཚུལ་ཁྲིམས་ལ་བརྟེན་པ། །འཕགས་པའི་མཐོང་བ་ཐོབ་པ་སྟེ། །འཇིག་རྟེན་དུ་ནི་ཞི་བ་
འཐོབ། །ཅེས་གསུངས་སོ། །མེ་ཏོག་དྲི་ནི་རྫི་ཕྱོགས་མིན་མི་འགྲོ། །རྩྭའམ་རྒྱ་སྤོས་ཙནྡན་ཡང་མ་ཡིན། །མཁས་རྣམས་དྲི་ནི་རྫི་ཕྱོགས་མི་འགྲོ་སྟེ། །སྐྱེས་བུ་དམ་པས་ཕྱོགས་རྣམས་ཀུན་ཏུ་འགྲོ། །རྒྱ་སྤོས་དང་ནི་ཙནྡན་ཉིད། །དབྱར་གྱི་དུས་ཀྱི་ཨུཏྤལ་བཅས། །དྲི་ཡི་རྣམ་པ་དེ་དག་ལས། །
ཚུལ་ཁྲིམས་དྲི་ནི་བླ་ན་མེད། །ཚུལ་ཁྲིམས་རྣམ་པར་མ་དག་པས། །དམྱལ་བའི་སྡུག་བསྔལ་ཆེན་པོ་ཡིན། །འདི་ལྟ་སྟེ་མིག་དབྱུང་བ་དང་། ཤིང་བཞིན་དུ་གཤགས་པ་དང་། འབྲས་བུ་བཞིན་དུ་བཙོས་པ་དང་། བུ་རམ་ཤིང་བཞིན་བཙིར་བ་དང་། གཏུན་གྱིས་ཕྱེ་མར་འཐག་པ་དང་།

ལག་པ་དང་། རྐང་པ་དང་། ལྕེ་གཅོད་པ་དང་། ཟངས་བསྐོལ་བ་འཐུང་བ་དང་། ལྕགས་ཀྱི་ཐུ་ལུམ་འབར་བ་ཟ་བ་དང་། ཐལ་ཚན་གྱི་ཆུ་བོ་ལས་རྒལ་བ་དང་། ལྕགས་ཀྱི་ཤལ་མ་རིའི་སྡོང་པོ་ལ་འཛེག་པ་དང་། ལྕགས་ཀྱི་བུམ་པའི་ནང་དུ་འཇུག་པ་དང་། མཆེ་བ་རྣོན་པོ་ཅན་གྱི་ཁྱིས་
ཟ་བ་དང་། རལ་གྱི་ལོ་མའི་ནགས་ཚལ་ལ་འཛེག་པ་སྟེ། དེ་ལྟ་བུ་ལ་སོགས་པ་དང་། རྣམ་པ་དུ་མས་དམྱལ་བ་རྣམས་སུ་སྲེག་པ་དང་། འཚེ་བ་དང་། རྡུང་བ་ལ་སོགས་པའི་སྡུག་བསྔལ་རྣམས་ཏེ། ལྷའི་ཕོ་ཉའི་མདོ་དང་། སྟོབས་ལ་མཁས་པའི་མདོ་ལས་བལྟ་བར་བྱའོ། །ཡི་དགས་
རྣམས་ཀྱང་བཀྲེས་པ་དང་། སྐོམ་པ་དང་། གནོད་པའི་སྡུག་བསྔལ་རྣམས་དང་། དུད་འགྲོ་གཅིག་ལ་གཅིག་ཟ་བའི་འཇིགས་པ་ལ་སོགས་པའི་སྡུག་བསྔལ་རྣམས་ཏེ། ཚུལ་ཁྲིམས་ཡོངས་སུ་མ་དག་པ་ལ་ཉེས་དམིགས་དེ་ལྟ་བུ་དང་གཞན་ཡང་ཡིན་ནོ། །ཇི་ལྟར་དགེ་སློང་རྣམས་ཆོས་
བཞི་དང་ལྡན་པས་དགེ་སློང་མ་ཡིན་པར་གྱུར་པ་དེ་བཞིན་དུ་དགེ་ཚུལ་ཡང་དགེ་ཚུལ་མ་ཡིན་པར་འགྱུར་བ་ཡིན་ནོ། །དེ་ལྟ་བས་ན་སྲོག་ལ་བབ་ཀྱང་ཡོངས་སུ་དག་པར་ཚུལ་ཁྲིམས་བསྲུང་བར་བྱའོ། །དགེ་ཚུལ་གྱི་བསླབ་པའི་གཞིའི་མདོ་ལས་རབ་ཏུ་བྱུང་བའི་རྟགས་ཡང་དག་པར་བླང་བ་རྫོགས་
སོ།། །།དགེ་ཚུལ་རྣམས་ཀྱི་བསླབ་པའི་གཞི། །ཡང་དག་བསྡུས་པ་བྱས་པ་ལས། །བསོད་ནམས་བྱུང་བ་གང་བསགས་པས། །སྐྱེ་བོ་དགེ་བའི་སྐལ་ལྡན་ཤོག། །།མདོ་སྡེ་འཛིན་པའི་སློབ་དཔོན་ཀ་ལྱཱ་ཎ་མི་ཏྲས་མཛད་པ། དགེ་ཚུལ་གྱི་བསླབ་པའི་གཞིའི་མདོ་རྫོགས་སོ།། །།
ཁ་ཆེའི་མཁན་པོ་གྲོང་ཁྱེར་དཔེ་མེད་ཀྱི་པཎྜི་ཏ་མ་ཧཱ་ཛ་ན་དང་། ཤཱཀྱའི་དགེ་སློང་གཞོན་ནུ་མཆོག་གིས་བསྒྱུར་ཅིང་ཞུས་ཏེ་གཏན་ལ་ཕབ་པ་ལས། སླད་ཀྱིས་ཁ་ཆེའི་པཎྜི་ཏ་པ་ར་ཧེ་ཏ་དང་། ལོ་ཙཱ་བ་ཤཱཀྱའི་དགེ་སློང་གཞོན་ནུ་མཆོག་གིས་བཅོས་ཤིང་ཞུས་པའོ།། །།
༄༅༅། །རྒྱ་གར་སྐད་དུ། ནི་དཱ་ན་པུངྒ་ལ་སཾ་གྲ་ཧ་ཀཱ་རི་ཀཱ། བོད་སྐད་དུ། གླེང་གཞི་དང་གང་ཟག་བསྡུས་པའི་ཚིག་ལེའུར་བྱས་པ། དཀོན་མཆོག་གསུམ་ལ་ཕྱག་འཚལ་ལོ། །ཡོན་ཏན་གཞི་དང་ཡོན་ཏན་རྒྱུད། །ཀུན་མཁྱེན་ལ་ནི་ཕྱག་འཚལ་ནས། །དང་པོ་གླེང་གཞི་

རྣམས་བྱུང་བའི། །སྟོན་བྱེད་ཅུང་ཟད་བཤད་པར་བྱ། །མ་ཡི་ཚིག་ནི་ཐོབ་པའི་ཕྱིར། །བཟང་བྱིན་ས་བོན་འདུ་ཤེས་ཀྱིས། །སྤོང་བྱེད་ཡུལ་དུ་འཁྲིག་པ་བྱུང་། །དང་པོ་ཆུ་བུར་བྱུང་བ་ཡིན། །དེ་མ་ཐག་ཏུ་མ་བྱིན་ལེན། །རབ་ཏུ་འཐོབ་པར་བཤད་པར་བྱ། །རྒྱལ་པོའི་ཁབ་ཏུ་
ནོར་ཅན་གྱིས། །ཤིང་ནི་མ་བྱིན་ལེན་པ་བྱུང་། །མི་སྡུག་ཆོས་དང་ཕྲད་པའི་ཕྱིར། །རི་དགས་དབྱིག་པ་ཅན་ཕྲད་ན། །སྲོག་གཅོད་པ་ཡི་བསླབ་གཞི་འདི། །སྤོང་བྱེད་ཡུལ་དུ་ཀུན་ཏུ་བྱུང་། །བསོད་ནམས་དོན་དུ་གཉེར་བ་ཡི། །ཡིད་འོང་འགྲམ་གྱི་དགེ་སློང་གིས། །བསམ་གཏན་དེ་མེད་
སྟོན་བྱེད་ཕྱིར། །ཡངས་པ་ཅན་དུ་བརྫུན་ཚིག་སྨྲས། །འཆར་ཀ་ཡིས་ནི་མཉན་ཡོད་དུ། །བསོད་སྙོམས་ཕྱིར་ནི་སྔོན་དུ་བྱུང་། །དེ་ནས་བྱུང་ནས་ཆགས་བཅས་པས། །ཁུ་བ་འབྱིན་པ་བྱུང་བ་ཡིན། །ཆོས་ནི་སྟོན་པར་བྱེད་བཞིན་དུ། །དེ་ཡིས་ཀུན་དུ་ཆགས་པ་ལས། །དགེ་འདུན་ལྷག་
མའི་ལྟུང་བ་ནི། །ལུས་ཀྱི་རེག་པ་བྱུང་བ་ཡིན། །དེ་ཉིད་ཀྱིས་དེར་རྒྱ་སོགས་ཀྱིས། །གནས་ངན་ལེན་ཚིག་བྱས་པ་ཡིན། །གལ་ཏེ་དེ་སྟོབས་བཅས་ཡིན་ན། །དེ་ལས་ཉེས་པ་ཡོངས་སུ་འཛིན། །ད་ལྟའི་དགེ་སློང་ཚུལ་ཁྲིམས་ལྡན། །དགེ་བའི་ཆོས་ཅན་ཚངས་སྤྱོད་དེ། །བདག་ལ་
བསྙེན་བཀུར་བྱེད་པ་ཡི། །བསྔགས་པ་བརྗོད་པ་འདི་ཡང་བཅས། །དགེ་སློང་ནག་པས་མཉན་ཡོད་དུ། །བུད་མེད་འདོད་པས་ཁྱིམ་རྣམས་སུ། །སྐྱེས་པས་བླང་བར་བྱས་པ་སྟེ། །སྨན་ནི་རྫོགས་པར་བྱས་པ་ཡིན། །དེ་ཡང་ཁང་པར་རབ་གསུངས་པ། །གང་ཚེ་ཚད་ལས་འདས་
པ་དང་། །དགེ་སློང་རྣམས་ཀྱི་ཆོས་ལུགས་འདས། །དེ་ཡིས་ལྟུང་བ་རྫོགས་པར་འགྱུར། །དྲུག་སྡེས་ལྗོན་ཤིང་བཅད་ནས་ནི། །རྗེས་སུ་གནང་བར་མ་བྱས་པར། །གནས་ཁང་དག་ནི་ཆེན་པོར་བྱས། །དགེ་འདུན་ལྷག་མ་ཐོབ་པ་ཡིན། །དགེ་སློང་མཛའ་བོ་ས་ལས་སྐྱེས། །རྒྱལ་
པོའི་ཁབ་ཏུ་མཛའ་བོ་ཡིས། །གྱད་བུ་ནོར་ལ་ལྷག་མེད་ཀྱིས། །ཡང་དག་མིན་པར་སྐུར་བ་བཏབ། །དེས་ནི་རི་དགས་མཐོང་བའི་ཕྱིར། །ཉེས་པ་བག་ཙམ་ཕྱོགས་གཏོགས་པ། །ཉོན་མོངས་བཅས་པ་དེ་ལ་ནི། །ཞེ་འགྲས་རྒྱུ་ནི་བཞག་པ་ཡིན། །རྒྱལ་པོའི་ཁབ་དག་ཉིད་དུ་ནི། །ལྷས་མཆོད་

འབྲེལ་པའི་དགེ་འདུན་དག །ལས་ཀྱིས་རྗེས་སུ་འབྲང་ཡིན་ཕྱིར། །ལྷས་བྱིན་གྱིས་ནི་ཐ་དད་ཕྱེ། །དེར་ནི་ཀོ་ཀ་ལི་ཀ་སོགས། །ཆོས་ནི་རྣམ་འགྱུར་བྱེད་པ་ཡི། །དགེ་སློང་སྡིག་པའི་ལས་ཅན་རྣམས། །དེ་དག་དེ་ཡི་གྲོགས་སུ་གྱུར། །རེ་ལྡེ་རི་ལ་གནས་བཅས་པའི། །
ནབ་སོ་འགྲོ་མགྱོགས་ལ་སོགས་པས། །ཁྱིམ་རྣམས་སུན་ཕྱུང་མཉན་ཡོད་དུ། །འདིར་ནི་བསླབ་པ་བཅས་པ་ཡིན། །ལྟུང་བ་མི་འདོད་བདུན་པ་ཡིན། །ཀཽ་ཤཱམ་བཱི་རུ་དགེ་སློང་ལ། །རྣམ་འགྱུར་བཀའ་བློ་མི་བདེ་བར། །ཉམས་པར་གྲགས་པ་མ་ཡིན་ནམ། །དགེ་འདུན་ལྷག་
མ་གླེང་གཞི་རུ། །ཡང་དག་དགོས་པ་བཤད་པ་ཡིན། །ད་ནི་འཆད་པར་འགྱུར་རྣམས་ཀྱི། །མདོར་བསྡུས་ནས་ནི་བཤད་པར་བྱས། །མཉན་ཡོད་དུ་ནི་འཆར་ཀ་ཡིས། །སྦེད་མ་དང་ནི་ལྷན་ཅིག་ཏུ། །བརླ་དང་བརླ་སྤྲད་དབེན་པར་གནས། །དེ་ཚེ་ས་ག་མ་ཡིས་མཐོང་། །རྒྱལ་པོའི་
ཁབ་ཏུ་ཤི་རི་ཀས། །གསོ་སྦྱོང་འཕགས་དང་ལྷན་ཅིག་ཏུ། །ལེགས་སྐྱེས་ཚིག་གིས་རྣམ་པར་བྱས། །འདས་མ་ཐག་པ་དེ་བཞིན་བྱས། །དགེ་སློང་རྣམས་ཀྱིས་མཉན་ཡོད་དུ། །གོས་ལྷག་བྱིན་གྱིས་མ་བརླབས་པར། །ཞག་བཅུ་ལས་ནི་འདས་པར་བཅངས། །དེ་ཕྱིར་སྤངས་
པ་ཉིད་དུ་ཤེས། །སྟོད་གཡོགས་སྨད་གཡོགས་བཅས་འགྲོ་བས། །སྐྱ་རེངས་དག་ནི་ཤར་བ་ལས། །དགེ་འདུན་གནང་བ་མ་གཏོགས་པ། །དགེ་སློང་རྣམས་ལ་འབྲལ་བ་བཤད། །གོས་ནི་མང་པོ་མེད་པ་ཡིན། །དགེ་སློང་གི་ནི་ཁ་སོགས་ཕྱིར། །འདོད་པས་བརྟགས་ན་ཟླ་
གཅིག་ཏུ། །གཞག་བྱ་ལྷག་པར་མ་ཡིན་ནོ། །ཆོས་བསྟན་པས་ནི་གང་གི་ཚེ། །འཆར་ཀ་ཆགས་ནས་དགེ་སློང་མ། །ཉེ་དུ་མ་ཡིན་སྦེད་མ་ཡི། །ལམ་མཆོག་ཏུ་ནི་གོས་ཁྲུས་བྱས། །ཉེ་དགའ་སྒོ་ན་གནས་པ་ཡིས། །ཨུཏྤ་ལ་ཡི་མདོག་ལ་ནི། །རས་ཀྱི་མཆོག་ནི་བླངས་པ་
ལ། །བརྗེ་བ་མ་གཏོགས་བླང་མི་བྱ། །ཉེ་དགའ་ཡིས་ནི་ཁྱིམ་པ་ལ། །ཆོས་བསྟན་ནས་ནི་དུས་བྱུང་གྲོས། །དེ་མེད་པར་ནི་དེ་ཡིས་ཀྱང་། །མངོན་དུས་ཕྱེད་ཀྱིས་བགོས་པ་ཡིན། །དྲུག་སྡེ་རྣམས་ནི་ཆགས་ནས་ནི། །སྟོད་གཡོགས་སྨད་གཡོགས་བཅས་ལྷག་པར། །སློང་

བ་འཕྲོག་པའི་དགེ་སློང་རྣམས། །རུང་བ་ལ་ནི་བརྟེན་པ་ཡིན། །ཉེ་དགའ་ཡིས་ནི་གཞན་དག་གི། །འཁྲིག་པ་ན་ནི་ཆགས་པ་བརྟུལ། །ཇི་སྲིད་རྣམ་པར་སྤགས་པའི་གོས། །དེས་ནི་མངོན་དུས་ཕྱེད་ཀྱིས་བགོས། །གོས་ནི་སོ་སོར་སྤགས་པ་ལས། །ཅུང་ཟད་
ཙམ་གྱི་ཕྱོགས་ཀྱིས་ཤེས། །དེས་ནི་དེ་ཡི་ཇི་སྲིད་དུ། །མངོན་དུས་ཕྱེད་ཀྱིས་བསླངས་པ་ཡིན། །དབྱར་འབྱེད་ཀྱིས་ནི་ཕོ་ཉ་ལ། །གཟོད་བྱིན་ནས་ནི་ཉེ་དགའ་དེས། །སྤོས་འཚོང་དེ་ལ་ཆད་པ་དེས། །དགག་པ་རབ་ཏུ་བྱས་པ་ཡིན། །དགེ་སློང་གིས་ནི་སྟན་གྱི་ཕྱིར། །སྲིན་བལ་ལས་
ནི་བྱས་པ་ཡིན། །སྲོག་ཆགས་གསོད་པའང་དེ་ཡི་ཕྱིར། །སྟན་ལས་དེ་ནི་ལྡོག་པ་ཡིན། །དེ་བཞིན་དེ་ཉིད་དག་ལ་ནི། །བལ་གྱི་སྟན་ལས་ཆས་སྐྱེས་ཏེ། །བལ་ནི་ནག་པོ་ཚོལ་གྱུར་པས། །དེ་ཕྱིར་ཀློག་པ་ཉམས་པར་གྱུར། །འཁོབ་བལ་གྱིས་ནི་ཆ་གཅིག་དང་། །དེ་བཞིན་དུ་ནི་
དཀར་པོ་དང་། །བལ་ནི་ནག་པོ་ཕྱེད་ཕྱིན་ཏེ། །འདི་ནི་སྟན་དུ་བྱ་བ་ཡིན། །སྟན་བྱས་ནས་ནི་དགེ་སློང་གིས། །ལོ་དྲུག་བར་དུ་བཅངས་བྱས་ཏེ། །ལས་སར་པ་ནི་མ་གཏོགས་པར། །དེ་ཡི་ནང་དུ་དོར་བྱའི་ཕྱིར། །རབ་ཏུ་དད་བྱས་ཚོང་པ་ཡིས། །གང་ཚེ་གོས་ཀྱི་སྦྱིན་པ་ཕུལ། །མཐོ་
གང་བར་གྱིས་གླན་བྱ་བ། །ཞེས་བྱའི་བསླབ་པ་བཅས་པ་ཡིན། །དྲུག་སྡེས་ནེ་བ་ལ་ཡུལ་དུ། །ཕྱིན་ནས་དེ་ནས་སླར་འོངས་ཏེ། །ཤིང་རྟ་ཡི་ནི་ཚོགས་ཀྱི་བལ། །དེ་དག་གིས་ནི་ཁུར་གྱིས་ཁྱེར། །འཕགས་མ་སྐྱེ་དགུ་བདག་མོ་ལ། །འཆར་ཀས་བལ་གྱི་ལས་ཀྱི་ཕྱིར། །ཅུང་
ཟད་བལ་རྨེལ་བཅོལ་དེའི་ཕྱིར། །ཉེ་དུ་མིན་པས་རྨེལ་མི་བྱ། །ས་ལེ་སྦྲམ་ལེན་རྒྱལ་ཁབ་ཏུ། །ནོར་བུ་གཙུག་ཕུད་ཅན་གྱིས་བཀག །དྲུག་སྡེ་དག་ནི་དེ་བཞིན་དུ། །ཡོངས་སུ་ལེན་པར་བྱེད་པའང་ཡིན། །མཉན་ཡོད་དུ་ནི་ཉེ་དགའ་ཡིས། །གཅེར་བུ་པ་ལས་ལ་བ་བླངས། །དེ་
ཕྱིར་དཀོན་མཆོག་མ་གཏོགས་པར། །མངོན་མཚན་ཅན་ནི་བཀག་པ་ཡིན། །དེ་དག་ཉིད་ལ་མདོར་བསྡུས་ནི། །ཉོ་ཚོང་དག་ནི་བྱུང་བ་ཡིན། །དེ་ཕྱིར་དེ་ནི་ཉོ་ཚོང་དག །དགེ་སློང་རྣམས་ལ་རབ་ཏུ་བཀག །རྙེད་ཅིང་རྙེད་ཅིང་ལྷུང་བཟེད་རྣམས། །སྐྱེས་བུ་ཆེ་བའི་སྟོབས་རྣམས་ནི། །རྨོངས་

པ་ཡིས་ནི་འཆང་བར་བྱེད། །འོན་ཀྱང་ཞག་བཅུ་བཅང་བྱ་སྟེ། །དེ་ལས་ལྷག་པར་བཅང་མི་བྱ། །གང་ཕྱིར་དེ་བཞིན་ཉེ་དགའ་ནི། །བསོད་སྙོམས་པ་ཡི་སྦྱོར་བ་ཡིན། །ལྷུང་བཟེད་ཡོངས་སུ་བཙལ་བར་བྱས། །དེ་ཚེ་ཐུབ་པས་བཀག་པ་ཡིན། །བསླངས་པས་སྔོན་འགྲོ་སྣལ་མ་
ཡིས། །དགེ་སློང་ཉེ་དགས་རྒྱལ་པོ་ཡི། །སྐྱེས་བུ་ཆེ་བའི་སྟོབས་ཀྱིས་ནི། །རས་ཡུག་འཐག་ཏུ་བཅུག་པ་ཡིན། །ཆུང་མ་དང་ནི་ལྷན་ཅིག་ཏུ། །ཁྱིམ་བདག་གང་ཞིག་དེ་ཡིས་བཏུལ། །ཇི་སྲིད་དེ་ཡི་ཁྱིམ་སོང་ནས། །འཐག་པ་བསྐྱེད་པར་མི་བྱའོ། །སྦྱིན་པ་བྱིན་པའི་རྒྱུ་ཡིས་སུ། །
དགའ་བོས་ཆོས་ལ་སྣམ་སྦྱར་བྱིན། །ཁྲོས་པས་སླར་ཡང་དེ་ལས་བླངས། །དེ་ཕྱིར་སྤང་བའི་ལྟུང་བར་ཤེས། །དབྱར་གནས་ཀྱི་ནི་རྙེད་པ་དག །དབྱར་གྱི་ནང་དུ་བགོ་མི་བྱ། །དྲུག་སྡེ་རྣམས་ཀྱིས་འབད་པ་ཡིས། །དབྱར་གྱི་ནང་དུ་བགོས་པ་ཡིན། །དགོན་པ་པ་ཡི་སྡོམ་བརྩོན་གྱི། །ཆོས་གོས་
ཁྱིམ་གཞན་ཡོད་ན་ནི། །ཞག་དྲུག་མཚམས་ཀྱི་ཕྱི་རོལ་དུ། །གནས་བྱ་བདུན་པ་མ་ཡིན་ནོ། །གཅེར་བུས་ཁྲུས་བྱས་ལས་བྱུང་བའི། །དབྱར་གྱི་རས་ཆེན་ཚོལ་ལགས་ན། །རྟག་ཏུ་དུས་མིན་དེ་སྲིད་དུ། །ཐུབ་པ་ཡིས་ནི་དགག་པ་མཛད། །ཁྱིམ་པ་འགའ་ཡིས་དགེ་འདུན་ལ། །སྔར་ནི་ཆོས་
གོས་བསྡོམ་པ་ལས། །མཐུ་དང་ལྡན་ཕྱིར་ཉེ་དགའ་ཡིས། །བདག་ཉིད་ལ་ནི་ཡོངས་སུ་བསྒྱུར། །འཕགས་པ་པི་ལིན་ད་པ་ཡི། །སློབ་མས་སྨན་དག་བསྲེས་པ་ལས། །ཇི་སྲིད་འཚོ་བའི་འདུ་ཤེས་ཀྱིས། །རྒྱལ་པོའི་ཁབ་ཏུ་ཟོས་པ་ཡིན། །སྤང་བ་རྣམས་ཀྱི་གླེང་གཞི་ནི། །ཅུང་ཟད་
ཕྱོགས་ཙམ་བསྟན་པ་ཡིན། །ད་ནི་དག་པའི་ལྟུང་བྱེད་པའི། །ཡང་དག་བསྒྲུབ་ཕྱིར་བསྟན་པར་བྱ། །སྒྲ་གཅན་དང་ནི་ལག་རྒྱུད་ཀྱི། །དད་པ་ཅན་རྣམས་རྣམ་འགྱུར་ཞིང་། །རྒོལ་བ་དེ་ལྟར་གྱུར་པ་ཡིན། །རྒྱལ་པོའི་ཁབ་ཏུ་བརྫུན་ཚིག་སྨྲས། །ཁྲོས་པར་གྱུར་པའི་དྲུག་སྡེ་ཡིས། །དགེ་སློང་
རྣམས་ལ་མཉན་ཡོད་དུ། །སྐྱེས་བུ་སྨན་པས་སྟོན་བྱེད་ཚིག །ཁྱེད་ནི་ཐེང་པོ་ཡིན་སྨྲས་གྲག །དགེ་སློང་དབྱེ་བའི་བྱེད་པ་པོར། །དེ་ཡང་དེར་ནི་རབ་ཏུ་བསྒྲགས། །འདི་ནས་ཐོས་ནས་གཞན་སོང་སྟེ། །ཕྱིན་ཅི་ལོག་ཏུ་སྨྲ་བར་བྱེད། །ཆོས་ཀྱིས་ཀྱང་ལས་བྱས་པ་ཡང་། །སྐྱོ་སྔོགས་

བྱེད་པར་ཤེས་ནས་ནི། །ལེགས་བྱས་སླར་ནི་བྱ་བ་ལ། །ཞི་བ་དག་ནི་མ་ཡིན་ཉིད། །ཡན་ལག་ནོར་བུའི་རིགས་ཐོབ་ནས། །བུད་མེད་ཡུལ་ལ་སྟོན་པ་བཀག །དེ་ཡིས་རིག་པ་གནས་པ་དང་། །ཐེ་ཚོམ་ཅན་ལ་སྟོན་པར་བྱེད། །བྲམ་ཟེ་སྔགས་ནི་འདོན་པ་
ལྟར། །དགེ་ཚུལ་རྣམས་དང་ལྷན་ཅིག་ཏུ། །དགེ་སློང་མཉམ་པའི་ཚིག་དག་གིས། །ཆོས་ནི་འདོན་པར་བྱེད་པ་ཡིན། །གནས་བརྟན་འདི་ནི་ཆོས་བསྙེན་བཀུར། །བྲམ་ཟེ་རྣམས་ནི་སྨྲ་བར་བྱེད། །མ་ཡིན་དེ་དག་ལྷག་མ་ཅན། །དྲུག་སྡེ་དག་ནི་སྟོན་པར་བྱེད། །ཆུ་ཀླུང་ཡིད་འོང་
འགྲམ་གནས་པའི། །དགེ་སློང་དག་གི་བདེན་པ་ཡིན། །བླ་མའི་ཆོས་ནི་ཟབ་པའི་ཕྱིར། །ཡངས་པ་ཅན་དུ་སྨྲས་པ་ཡིན། །རྒྱལ་པོའི་ཁབ་ཏུ་གྱད་ནོར་ལ། །ཚོགས་པས་གསོལ་བ་བྱས་ནས་ནི། །དགེ་འདུན་གྱིས་ནི་ཆོས་གོས་བྱིན། །མཛའ་བོ་སོགས་ཀྱིས་སྐུར་པ་བཏབ། །མཉན་
ཡོད་དུ་ནི་ཟླ་ཕྱེད་ཅིང་། །སོ་སོར་ཐར་པ་རྟག་ཏུ་འདོན། །ཅི་ཡི་ཕྱིར་ནི་རྨ་སོས་པ། །འདྲལ་བར་བྱེད་པ་དྲུག་སྡེས་ཤེས། །སྔོན་ནི་ཤིང་མཁན་གྱུར་པ་ཡིས། །ཤིང་བཅད་ནས་ནི་གཙུག་ལག་ཁང་། །བྱས་ཏེ་ལྷ་ཉིད་དག་ལ་ཡང་། །མཆོག་ཏུ་གནོད་པ་བྱུང་གྱུར་པ། །དགེ་འདུན་གྱི་ནི་
ལས་དང་འབྲེལ། །རྒྱལ་པོའི་ཁབ་ཏུ་ཕྱིན་པ་ཡི། །གྱད་ནོར་དེ་ལ་དེ་དག་གིས། །ཡོན་ཏན་སུན་པར་བྱས་པ་ཡིན། །མདོར་བསྡུས་པ་ནི་ཀཽ་ཤཱམ་བཱིར། །འདུན་པ་དེ་ཡིས་ལྟུང་ཤེས་ནས། །ཁས་ལེན་པར་ནི་མི་བྱེད་པས། །བསྒོ་བ་རྣ་ལ་གཟོན་པ་ཡིན། །དགེ་སློང་དག་གིས་མཉན་
ཡོད་དུ། །གནས་མལ་བླ་གབ་མེད་བོར་ནས། །ཟས་ཀྱི་དོན་དུ་སོང་བར་གྱུར། །དེ་ནས་ཐུབ་པས་གསུངས་མཛད་དོ། །ལྷོ་ཕྱོགས་ནས་ནི་འོངས་པ་ཡི། །བསྙེན་བཀུར་དོན་དུ་དགེ་སློང་དག །རྒྱལ་བྱེད་ཚལ་དུ་ཕྱིན་པ་ཡིན། །རྩྭ་ཡི་སྟན་ནི་བཏིང་ནས་སོང་། །སྔོན་ནི་འཆར་ཀས་མཉན་
ཡོད་དུ། །སློབ་མ་གཙུག་ལག་ཁང་དུ་ཕྱུང་། །སླར་ནི་བྱ་བ་མ་ཡིན་ཏེ། །བཟློག་པའི་དོན་དུ་བྱས་པ་ཡིན། །དེས་ནི་འདུ་འཛིའི་གཏམ་བྱས་ནས། །ཕྱི་ནས་སྒོ་ནི་འབྱེད་པར་བྱེད། །ཉལ་བ་རྣམས་ཀྱིས་བར་དེ་ནི། །ཉལ་བ་རྣམས་ལ་གནོད་པ་བྱས། །ཁྲོས་པར་གྱུར་པས་ཉེ་དགའ་

ཡིས། །འབྱུང་དུ་རུང་བའི་ཁྲི་རྐང་གིས། །དེར་འོག་འདུག་པའི་གྲོགས་པོ་ཡི། །མགོ་ནི་མཚན་མོ་འགས་པར་བྱས། །འདུན་པ་ཡིས་ནི་ཀཽ་ཤཱམ་བཱིར། །སྲོག་ཆགས་དག་དང་བཅས་པ་ཡི། །ཆུ་དང་ས་དག་ངེས་པར་བསྲེས། །ཕྱི་ནས་རྩྭ་དང་ལྕི་སོགས་བསྲེས། །ཆུ་ཁུང་མེད་པ་ཉིད་
དང་ནི། །སྦྱང་གི་རྣམ་པ་ལྟ་བུ་ཡི། །འདིར་ནི་གཙུག་ལག་ཁང་པ་བརྩིགས། །དེ་ལྟ་བུ་ནི་མི་བྱའོ། །མཉན་ཡོད་དུ་ནི་དྲུག་སྡེ་ཡིས། །དགེ་སློང་རྣམས་ཀྱིས་མ་བསྐོས་པར། །དགེ་སློང་མ་རྣམས་གདམས་པ་ཡིན། །ཕན་ཚུན་འདོད་པས་གཟུང་བར་བྱས། །དགའ་བྱེད་ཀྱིས་
ནི་དུས་མིན་པར། །དགེ་སློང་མ་རྣམས་ཆོས་སྟོན་བྱས། །ཕྱི་རོལ་དུ་ནི་གནས་པའི་བར། །སྐྱེ་བོ་རྣམས་ཀྱིས་སྨན་པ་ཡིན། །ཟང་ཟིང་དག་ནི་ཅུང་ཟད་ཙམ། །དགེ་སློང་མ་ཡི་དགག་དབྱེ་ལ། །འཇིགས་པ་མེད་པར་བྱ་ཕྱིར་ཕུལ། །དེ་ཕྱིར་ཉེ་དགས་སྐུར་པ་བཏབ། །འཆར་ཀས་
འདིར་ནི་སྐུད་པ་ཡིས། །སྦེད་མ་ཡི་ནི་ཆོས་གོས་ལ། །སྦེད་མ་འཁྱུད་པ་དང་ལྡན་པའི། །རང་གི་གཟུགས་ནི་བྲིས་པར་གླན། །དགེ་སློང་མ་ནི་བརྩོན་པ་ཡིས། །དགེ་སློང་གིས་ནི་ཆོས་གོས་བྱིན། །ལྷག་མ་མེད་པས་གནོད་པའི་ཕྱིར། །དེ་བཞིན་དུ་ནི་བསླབ་པ་བཅས། །སྦོམ་དགའ་མོ་
ཡི་གྲོགས་དང་ནི། །ལྷན་ཅིག་དྲུག་སྡེ་འགྲོ་བར་བྱེད། །ཆུང་མར་སྨྲ་བའི་གླེང་གཞི་ལས། །དེ་ཕྱིར་སྨད་པར་བྱས་པ་ཡིན། །དེ་ཉིད་ཀྱི་ནི་རྒྱུན་གནས་ཏེ། །གྲུ་ཡི་བཞོན་པས་འགྲོ་མི་བྱ། །རྒྱུན་ཕྱོགས་སུ་ཡང་མི་བྱ་ཉིད། །འབད་པ་ཡིས་ནི་ཕ་རོལ་འགྲོ། །སྔོན་གྱི་རྩེད་མོ་རྣམས་དང་ནི། །
ཉམས་རྣམས་དང་ནི་དྲན་པ་ཡིས། །འཆར་ཀ་སྦེད་མ་ལྷན་ཅིག་ཏུ། །དབེན་པར་ལྷན་ཅིག་འདུག་སྟེ་གནས། །དེ་ནི་རིམ་པ་དེ་ཉིད་ཀྱིས། །དབེན་པར་གནས་ཏེ་སྤྱོད་མ་ཡིན། །དགེ་སློང་གིས་ནི་དགེ་སློང་མ། །དེ་ཉིད་ཀྱང་ནི་བསྒྲུབ་འདིར་ཤེས། །སྦྱིན་པ་པོ་ནི་དེ་དག་གིས། །ལྔ་
པོ་རྣམས་ལ་བསད་སྙོམས་སྤགས། །དྲུག་སྡེ་རྣམས་ལ་དགེ་སློང་མ། །སྦོམ་དགའ་མོ་ཡིས་བསྐོ་ཤམ་བྱས། །དྲག་ཤུལ་ཅན་གྱིས་མགྲོན་བོས་པའི། །དྲུག་སྡེས་ཡངས་པ་ཅན་དུ་ནི། །ཨ་མྲ་དང་ནི་ཁུར་བ་དང་། །གཞན་དུ་ཟོས་ནས་མ་དད་བྱས། །མཉན་ཡོད་དུ་ནི་ཕྱི་རོལ་ཏུ། །

རབ་ཏུ་བྱུང་བ་རྣམས་ཀྱི་ཕྱིར། །ཁྱིམ་པ་ཡི་ནི་འདུག་གནས་བྱས། །དྲུག་སྡེས་དེར་སོང་མ་དད་གྱུར། །གཡས་ཞར་བག་མར་བླངས་པ་ཡིས། །རྒྱུ་མཚན་བཟང་བ་གང་ཡིན་པ། །ལྷུང་བཟེད་བྱུར་བུར་བསྒྲུབ་པ་ཡིས། །དྲུག་སྡེས་བླངས་པས་དེ་མ་གྲུབ། །
སྤངས་པ་དང་ནི་མ་སྤངས་པ། །དྲུག་སྡེ་དག་གིས་ཟོས་པ་ཡིན། །དེ་ཕྱིར་ཐམས་ཅད་མཁྱེན་པ་ཡིས། །ཕྱིས་ནི་ལྷག་པོར་རྗེས་སུ་གནང་། །སློབ་དཔོན་འདི་ཡིས་བདག་ཀུན་དུ། །ཀླན་ཀ་དག་ནི་བཙལ་སྙམ་ནས། །ཡང་ཡང་ལྟུང་བྱུང་རྒན་ཞུགས་དེས། །ལྷག་པོར་མ་བྱས་པས་
བསླུས་གྲག །རྒྱལ་པོའི་ཁབ་ཀྱི་གནས་སུ་ནི། །དགེ་སློང་ལྔ་བརྒྱ་དང་ལྷན་ཅིག །ལྷ་སྦྱིན་གྱིས་ནི་བཟའ་བ་ཟོས། །དེ་ཚེ་འདུས་ཤིང་ཟ་བ་དྲན། །མཉན་ཡོད་སྐྱེད་མོས་ཚལ་དུ་ནི། །ཁྱིམ་པ་རྣམས་དང་ལྷན་ཅིག་ཏུ། །བཅུ་བདུན་སྡེ་ཡིས་བཟའ་བ་ཟོས། །དེ་ཕྱིར་དུས་མིན་བསླབ་པ་
བཅས། །དགེ་སློང་ནག་པོས་འབྲས་ཆན་ནི། །བསོད་སྙོམས་བྱས་ཏེ་བསྐམ་བྱས་ནས། །བཞག་པར་བྱས་པ་མ་ཡིན་ནམ། །དེ་ཕྱིར་དེ་ནི་བསླབ་པ་བཅས། །དུར་ཁྲོད་གཅན་གཟན་ཟོས་པའི་ཕྱིར། །ནག་པོ་ཆེན་པོ་སྨད་པ་ཡིན། །བྱིན་ལེན་མ་བྱས་པ་ཡི་ཟས། །བཀག་པ་དྲུག་སྡེ་
རྣམས་ཀྱིས་ཟོས། །དེ་མ་ཐག་ཏུ་སེར་སྐྱ་བཞིན། །མིང་ཆེན་གྱི་ནི་གནས་སུ་ནི། །ཟ་བཞིན་པ་ཡི་དྲུག་སྡེ་ཡིས། །གཞན་ནས་འོ་མ་བླངས་ནས་སྤྱད། །འདུས་པས་སྲོག་ཆགས་དང་འདྲེས་པའི། །ཆུ་ནི་གང་ཕྱིར་ཉེར་སྤྱད་པ། །དེ་ཕྱིར་བཅོམ་ལྡན་འདས་ཀྱིས་ནི། །ཀཽ་ཤཱམ་བཱིར་ནི་
བཀག་ཅེས་གྲགས། །ཚོང་པ་ཆགས་དེ་ལ་གནོད་ཕྱིར། །འཆར་ཀ་ཁྱིམ་དུ་མྱུར་སོང་ནས། །ཆོས་ནི་སྟོན་པར་བྱེད་པ་ཡིས། །གནས་པར་འགྱུར་བ་མ་ཡིན་ནམ། །དེར་དེ་ལྟ་བུའི་རྣམ་པ་རུ། །ཤེས་ནས་འཆར་ཀ་དེ་བཞིན་ཡང་། །ཁྱིམ་དུ་མྱུར་དུ་སོང་ནས་ནི། །སྒོ་ཡི་རྒྱབ་ཏུ་
གནས་པ་ཡིན། །མཉན་ཡོད་སྐུད་འཁལ་རྣམས་ཟས་ལ། །འཕགས་པ་ཀུན་དགའ་ཞལ་ཏ་བྱེད། །གཅེར་བུ་མོ་ལ་འཁུར་བ་གཉིས། །ལྟུང་བས་ཉེས་པ་ཀུན་ནས་སློང་། །དམག་ནི་འཐབ་ཕྱིར་ཡང་དག་འབྱུང་། །དྲུག་སྡེས་བོང་བུ་ལྟར་སྨྲས་པས། །ཁྲོས་པར་གྱུར་པ་དེ་ཡི་ཚེ། །

དམག་ལ་ལྟ་བར་གྱུར་པ་བཀག །དེ་ཚེ་དེ་ལྟར་ཉིད་སོང་བ། །དེ་དག་གིས་ནི་སྨད་ཅིང་དཀྲུགས། །གནས་པར་མི་བྱ་རྐྱེན་ཡོད་ན། །ནུབ་གཉིས་བར་དུ་གནས་པར་བྱ། །གང་ཕྱིར་དེ་ན་གནས་པས་ཀྱང་། །བཤམས་པའི་རིམ་པ་དཀྲུགས་བྱེད་ཅིང་། །འཇིགས་པ་སྐྱེད་པར་བྱེད་པ་ཉིད། །
དེ་ཕྱིར་ཐུབ་པས་བཀག་པ་ཡིན། །ཉེ་དགའ་ལ་ནི་བརྟེན་པ་ནི། །བཅུ་བདུན་སྡེ་རྣམས་བཙོ་བླག་གི། །ལས་ཀྱི་དོན་དུ་རབ་ཏུ་བོས། །དེ་དག་མི་ཉན་དེ་ཚེ་རྡེག །དེ་བཞིན་དུ་ནི་ལས་བྱའི་ཕྱིར། །མངོན་བརྗོད་གང་ཚེ་མི་བྱེད་ལ། །དེ་ཡིས་དེ་དག་རྡེག་པར་གཟས། །དེ་ཚེ་བསླབ་པ་བཅས་པ་
ཡིན། །དགེ་འདུན་ལྷག་མ་བཅས་པར་ནི། །དགེ་སློང་ཆོས་ཀྱིས་མཐོང་འགྱུར་ཏེ། །ཉེ་དགའ་ཡིས་ནི་བཟློག་བྱས་ཀྱང་། །དེས་ནི་དགེ་འདུན་ལ་རིག་བྱས། །སྔོན་གྱི་གནོད་པ་བྱེད་པ་ཡི། །རྒྱུ་མཚན་ཡོངས་སུ་བསམས་ནས་ཀྱང་། །ཉེ་དགས་དགེ་སློང་ཆོས་ཀྱི་ནི། །ཟན་ནི་ཡོངས་སུ་
གཅོད་པར་བྱེད། །ལྗོན་པ་ལ་ནི་མེ་བཏང་བས། །སྦྲུལ་ནི་ལྟུང་བར་གྱུར་ཕྱིར་དང་། །དྲུག་སྡེས་མགལ་མེས་བསྐོར་བྱས་ཕྱིར། །མེ་ལ་རེག་པ་བཀག་པ་ཡིན། །ཉེ་དགའ་གནས་ནས་དབྱུང་བའི་ཕྱིར། །དགེ་སློང་རྣམས་ཀྱིས་སྦྱོར་བ་བརྩམས། །འདུན་པ་བྱིན་པ་དགའ་བོ་ཡིས། །སླར་ནི་
ཉམས་པར་བྱས་པ་ཡིན། །དགེ་ཚུལ་རྣམས་དང་དགེ་སློང་རྣམས། །ལྷན་ཅིག་ཏུ་ནི་ཉལ་བ་བཀག །སྒྲ་གཅན་འཛིན་ལ་བརྟེན་ནས་ནི། །ནུབ་གཉིས་རྗེས་སུ་གནང་བ་དང་། །རྒྱལ་པོའི་ཁབ་ཏུ་བད་ཚ་ཆོས། །སྡིག་ཅན་ལྟ་བུ་ཀུན་ཏུ་སྐྱེས། །ཉེས་པ་བྱེད་པའི་འཆི་ལྟས་ནི། །བཟློག་
བཞིན་དུ་ཡང་དེ་མི་གཏོང་། །གནས་ནས་ཕྱུང་ཡང་ཉེ་དགའ་ཡིས། །འདུ་འཛིའི་གཏམ་གྱིས་གནས་པར་བྱེད། །སྔར་སྨོས་ཆོས་དང་ཟང་ཟིང་གིས། །མཆོག་ཏུ་ལྟུང་བ་བཅས་པར་འགྱུར། །ལྟུང་བ་བྱུང་ནས་གྲོལ་བ་ཡང་། །ཚེར་མ་དང་ནི་ཆེན་པོ་བའི། །མཐོང་བའི་ཡུལ་དུ་གྱུར་པའི་
བར། །བསྙིལ་བསྡུད་པ་ཡི་ཉེས་པ་ཡིན། །རི་བོ་ཡིད་འོང་དུས་སྟོན་ཚེ། །གར་མཁན་གྱི་ནི་བཞད་གད་པའི། །དྲུག་སྡེ་དག་གིས་དཀར་པོའི་གོས། །གོན་བྱས་དེ་ནི་མི་བྱའོ། །ལི་ཙྪའི་སྐྱེད་མོས་ཚལ་དང་ནི། །རོལ་མོ་རྒྱན་དང་དེ་བཞིན་དུ། །གཡུལ་འགྱེད་པ་ན་སྤྱོད་པའི་ཕྱིར། །

ཡངས་པར་རིག་པའི་ཉེས་པ་བྱུང་། །རྒྱལ་པོ་ཁབ་ཀྱི་ཆུ་དྲོན་དུ། །དྲུག་སྡེ་དག་གིས་གཟུགས་ཅན་སྙིང་། །གནོད་བྱས་དེ་ནི་རབ་ཏུ་བཀག །ཇི་སྲིད་ཟླ་ཕྱེད་རྗེས་སུ་གནང་། །འཆར་ཀ་ཡིས་ནི་མཉན་ཡོད་དུ། །བསོད་སྙོམས་དོན་དུ་འགྲོ་བྱེད་པས། །འཕོང་གི་
གནས་སུ་ཞུགས་ནས་ནི། །ཇི་སྲིད་བྱ་རོག་གསད་པར་བྱས། །ཉེ་དགའ་ཡིས་ནི་བགྲོས་བྱས་ནས། །ཤིན་ཏུ་ཐོས་པར་འཛིན་བྱེད་པའི། །གཞོན་ནུ་བཅུ་བདུན་སྡེ་རྣམས་ལ། །འགྱོད་པ་སྐྱེད་པའི་གཏམ་བྱས་སོ། །དེ་རྣམས་ཀྱི་ནི་གནས་དང་གཅིག །དགེ་སྐོས་སུ་ནི་ཡང་དག་སྦྱར། །
ཡང་དག་ནང་དུ་ཞུགས་གཉིད་ལོག །དེ་ཁྲོས་ག་ག་ཚིལ་གྱིས་ཤི། །དེ་དག་ཆུ་ཀླུང་གནས་ཅན་དུ། །རྩེད་མོས་ཀུན་ཏུ་གནས་པའི་ཕྱིར། །རྒྱལ་པོས་མི་དག་རིག་པར་བྱེད། །ཆུ་ལ་རྩེ་བ་བཀག་པ་ཡིན། །མ་འགགས་པས་ནི་ལམ་ཞུགས་པས། །སྐྱེས་བུ་མེད་པའི་བུད་མེད་དང་། །ལྷན་
ཅིག་ཁྱིམ་དུ་ཉལ་བྱས་པས། །དེ་ཕྱིར་ཉེས་དམིགས་བྱུང་བར་གྱུར། །ཉེ་དགས་ལ་བ་གྱོན་ནས་ནི། །མཚན་མོ་ཀློག་པ་མངོན་བརྩོན་པའི། །བཅུ་བདུན་སྡེ་ཡི་བདག་ཉིད་དག །ངེས་པ་ཉིད་དུ་སྐྲག་པར་བྱེད། །ཉེ་དགའ་ལ་སོགས་པ་དག་གིས། །ཆུ་ནང་ནུབ་པ་བཅུ་བདུན་སྡེའི། །ལྷུང་བཟེད་
ལ་སོགས་སྦ་བྱས་པས། །བཟའ་བའི་དོན་དུ་སོང་བ་ཡིན། །ཉེ་དགས་རང་གི་ཆོས་གོས་ནི། །སློབ་མ་རྣམས་ལ་བྱིན་པ་དག །སླར་ནི་སྤྱད་ནས་སླར་ཡང་ནི། །དེ་བཞིན་དུ་ནི་བཞག་པ་ཡིན། །རྒྱལ་པོའི་ཁབ་ཏུ་དེ་བཞིན་དུ། །གྱད་བུ་ནོར་ལ་དེ་དག་གིས། །ཆོས་གོས་མགོ་ལ་རེག་མཐོང་ནས། །
དགེ་འདུན་ལྷག་མས་སྐུར་པ་བཏབ། །དགེ་སློང་མཉན་ཡོད་དུ་འགྲོ་ཞིང་། །ཐག་མཁན་བུད་མེད་དེ་བཞིན་སོང་། །ང་ཡི་ཆུང་མ་འདིར་ཁྱེར་སྙམ། །ཐག་པ་ཡིས་ནི་བརྡེག་པར་བྱས། །རྒྱལ་པོའི་ཁབ་ཏུ་དགེ་སྦྱོང་ཞིག །ཤོ་གམ་འཇོམས་པའི་ཚོང་པ་དང་། །ལྷན་ཅིག་འགྲོ་བར་གྱུར་པ་
ན། །ཤོ་གམ་པས་མཐོང་བཅོམ་པར་གྱུར། །འཕགས་པ་སྤངས་ནས་སྐྱེས་པ་དེས། །བྱིས་པ་ཉི་ཤུ་མ་ལོན་པ། །བསྙེན་པར་རྫོགས་པར་བྱས་པ་དག །དེ་དག་བཀྲེན་པས་ངུ་བར་བྱེད། །ཉེ་དགའ་ལ་སོགས་རྣམས་ཀྱིས་ནི། །མཉན་ཡོད་དུ་ནི་བརྟེན་བྱས་ནས། །ས་ནི་རྐོའམ་

རྐོར་འཇུག་བྱས། །དེ་ཕྱིར་ཆད་པས་ཀུན་ནས་བསླང་། །མིང་ཆེན་གྱིས་ནི་ཟླ་བ་བཞིར། །འཕགས་པའི་དགེ་འདུན་བསྟབས་པས་ན། །དྲུག་སྡེ་དེ་ལས་ལྷག་པར་ཡང་། །སྤོང་བར་བྱེད་པས་དེ་ཕྱིར་བཀག །དགེ་འདུན་གཉིས་གཏོགས་བསླབ་པ་ནི། །ལམ་པ་ཡིས་ནི་བསྒོ་བྱས་པ། །
རྨོངས་པ་ཁྱོད་ལ་སུ་ཞིག་སློབ། །དྲུག་སྡེ་དག་གིས་རབ་ཏུ་སྤངས། །བཅུ་བདུན་སྡེ་ཡི་བདག་ཉིད་ནི། །དྲུག་སྡེ་གནས་ནས་དབྱུང་བའི་ཚེ། །མཉན་ཡོད་དུ་ནི་གྲོས་བྱེད་པར། །དེ་དག་སོང་ནས་ཉན་རྣ་བྱས། །ཉེ་དགའ་གནས་ནས་དབྱུང་ལ་སོགས། །དེ་ལྟར་དེ་དག་གིས་བརྩམས་
པ། །སྟན་ལ་ལ་བ་བཞག་ནས་ནི། །དེ་ཕྱིར་དགའ་བོ་མི་སྨྲ་སོང་། །གང་ཚེ་དགེ་འདུན་གྱིས་ངེས་པར། །རྩོད་པ་ཞི་བར་བྱས་པ་ན། །དགེ་སློང་ནག་པ་རྒྱལ་ཁབ་ཏུ། །མ་གུས་པ་ནི་བྱས་པ་ཡིན། །འཕགས་པ་ལེགས་འོང་བཟང་པོ་ཡིས། །ཆང་དང་བསྲེས་པའི་བཏུང་བ་དག །
མཉན་ཡོད་དུ་ནི་འཐུངས་ནས་སུ། །མྱོས་པར་གྱུར་པས་སྲང་དུ་འགྱེལ། །གཏུམ་མོའི་མནའ་མའི་ཁྱིམ་དུ་ནི། །འཆར་ཀས་སྟན་ལ་ཉེར་སྤྱད་ཕྱིར། །སོང་བར་གྱུར་ནས་ཇི་སྲིད་དུ། །ཉེ་བར་བསད་པར་གྱུར་པ་ཡིན། །ཁྱིམ་པ་རབ་ཏུ་དད་གྱུར་པས། །ཇི་སྲིད་དེ་ཡི་ཚིག་གིས་ནི། །
དགེ་འདུན་མགྲོན་དུ་བོས་པས་ན། །ཉེ་དགའ་ཁྱིམ་གཞན་སོང་ནས་འདུག །དེས་ནི་འཆར་ཀ་མྱུར་རབ་ཏུ། །འཕྲེང་ལྡན་མ་ནི་གློག་པའི་ཕྱིར། །བཙུན་མོའི་ཕོ་བྲང་དུས་མིན་སོང་། །བསླབ་པ་བཅས་པ་ཀུན་ནས་བསླང་། །དྲུག་སྡེ་རྣམས་ནི་སོ་སོར་ཐར། །མ་གུས་པས་ནི་ཉན་པར་
བྱེད། །འདི་ནི་སངས་རྒྱས་ཀྱིས་བཤད་པར། །ཁོ་བོ་ཅག་གིས་ད་གདོད་ཐོས། །བ་སོ་མཁན་པོ་ཆོས་ཀྱིས་ནི། །རང་བཟོས་དགེ་སློང་མགྲོན་དུ་གཉེར། །སྦྱིན་པའི་སྦྱོར་བས་ལོངས་སྤྱོད་དག །ཟད་པར་ཉེ་བར་སོང་བར་གྱུར། །རྐང་པ་དམའ་བའི་ཁྲི་དག་ཀྱང་། །སྔོན་ནི་སྡོམ་
བརྩོན་ལྟ་བུ་ཡི། །དབང་དུ་བྱས་ནས་བཀག་པ་སྟེ། །ཁྲུ་གང་གི་ནི་ཚད་དང་ལྡན། །དགེ་འདུན་ཁྲི་ནི་ཉེ་དགའ་ཡི། །གཞན་གྱིས་ཐོབ་པར་འགྱུར་སྙམ་དུ། །ཤིང་བལ་གྱིས་ནི་གོས་པར་བྱས། །ཤིང་བལ་གྱིས་ནི་དཀར་པོར་གྱུར། །དགེ་སློང་མང་པོ་ལ་བརྟེན་ནས། །གོས་ཀྱི་ཚོགས་ནི་

མང་དུ་གྱུར། །གདིང་བའི་ཚད་ནི་མཐོ་གསུམ་སྟེ། །ཞེང་དུ་ཕྱེད་ཀྱི་ཚད་ཡིན་ནོ། །གཡན་པའི་ནད་ལ་བརྟེན་ནས་ནི། །གཡན་པ་དགབ་པར་བཤད་པ་ཡིན། །མཐོ་བཞི་དང་ནི་མཐོ་གཉིས་ཀྱི། །ཚད་དང་ལྡན་པའི་བར་དུ་བྱས། །ཆོས་གོས་བསྲུང་བར་བྱ་བའི་
ཕྱིར། །དབྱར་གྱི་གོས་ནི་རས་ཆེན་བྱ། །མཐོ་རྣམས་ཕྱེད་དང་གསུམ་དང་ནི། །དྲུག་དག་ཁོ་ན་ལྷག་མི་བྱ། །ཉེ་དགའ་ཡིས་ནི་མཉན་ཡོད་དུ། །ཐུབ་པ་ཡིས་ནི་ཆོས་གོས་བྱས། །མཐོ་བཅུ་དག་གི་ཚད་དང་ནི། །དྲུག་ཅེས་བྱ་བ་དག་ཀྱང་ཡིན། །ད་ནི་སོ་སོར་བཤགས་པའི་ཆོས། །
བཤད་པར་བྱས་ཏེ་གཞན་དག་གི། །བྱུང་བ་རྗེས་སུ་འབྲངས་ནས་ནི། །འཆང་བར་འགྱུར་བ་དེ་བཞིན་བཤད། །རྒྱལ་པོའི་ཁབ་ཏུ་ཉེ་དགའ་ཡིས། །ཨུཏྤ་ལ་མདོག་དགེ་སློང་མའི། །བསོད་སྙོམས་དག་ནི་རབ་ཏུ་བླངས། །ཀུན་ཏུ་བརྒྱལ་ནས་ས་ལ་འགྱེལ། །དྲུག་སྡེས་བདག་ཅག་
མཉན་ཡོད་དུ། །སྦོམ་དགའ་མོ་ལ་སྟོན་མོའི་ཚེ། །གྱ་ནོམ་བསྐོ་ཤམ་གྱིས་ཞེས་བརྗོད། །དེ་ཡིས་ཀྱང་ནི་དེ་ལྟར་བྱས། །ཡངས་པ་ཅན་དུ་སྦྱིན་བཏང་བས། །སེང་གེའི་ལོངས་སྤྱོད་མ་ལུས་འགྲིབ། །དེ་ཕྱིར་ཁྱིམ་དུ་བསོད་སྙོམས་ཕྱིར། །འགྲོ་བར་མི་བྱ་ཞེས་གྲགས་སོ། །དགོན་
པ་དྲུག་སྡེ་རྣམས་ལ་ནི། །སེར་སྐྱ་གཞི་ན་གནས་པ་ཡི། །གོས་དང་བྲལ་བའི་བུད་མེད་རྣམས། །དེ་ཡིས་བྱིན་ལེན་སྟོབས་སུ་བཅུག །རི་དགས་གནས་སུ་སྡོམ་བརྩོན་གྱིས། །ཁྱིམ་པ་རྣམས་ཀྱི་ཚུལ་དུ་ནི། །ཆོས་གོས་རྣམས་ནི་གོམས་པར་འགྱུར། །ཟླུམ་པོ་རུ་ནི་དྲུབ་པར་བྱ། །
སྨད་གཡོགས་ཀྱི་ནི་དྲུག་དག་དང་། །སྟོད་གཡོགས་ཀྱི་ནི་གསུམ་རྣམས་ཀྱི། །བྱེད་པ་པོ་ནི་དྲུག་སྡེར་བཤད། །དེ་ཕྱིར་བསླབ་པ་རབ་ཏུ་བསྟན། །ཤིན་ཏུ་བསྡམ་སོགས་ལྔ་རྣམས་དང་། །མགོ་གཡོགས་སོགས་ཀྱིའང་དེ་བཞིན་དུ། །མཆོད་སོགས་ལྡན་པ་ལྔ་རྣམས་ཀྱི། །ལུས་དག་ལྔ་
ནི་དེ་བཞིན་ནོ། །བྲམ་ཟེའི་སྟན་ལ་མཉན་ཡོད་དུ། །ཉེ་དགའ་འདུག་པ་ལ་བརྟེན་ནས། །རྗེས་སུ་གནང་བ་མ་བྱས་པར། །སྟན་ལ་འདུག་པ་བཀག་པ་ཡིན། །འཕགས་པ་འཆར་ཀ་ལ་བརྟེན་ནས། །བྱིས་པ་བསད་པར་གྱུར་པ་ཡིན། །དེ་ཕྱིར་ཁྱིམ་དུ་མ་བརྟགས་པར། །

སྟན་ནི་རབ་ཏུ་བཀག་པ་ཡིན། །བཙུན་མོའི་འཁོར་དུ་མ་སྦྱངས་པའི། །ཁྲིའུ་ལ་ནི་འདུག་པའི་ཕྱིར། །དེ་ཕྱིར་དེ་ལ་བརྟེན་ནས་ནི། །ལུས་ཀུན་གྱིས་ནི་འདུག་པ་དཀའ། །འཆག་པར་འགྱུར་བ་དྲུག་པོ་ཡི། །འདུག་པའི་བདག་ཉིད་དག་གི་ཡང་། །བྱེད་པོ་དྲུག་སྡེར་ཤེས་བྱ་ཡི། །གཞན་ནི་བརྗོད་
པར་མི་བྱ་ཡི། །བྱིས་པ་གསོད་རི་མཉན་ཡོད་དུ། །རྟོགས་ལྡན་ཁྱིམ་དུ་དྲུག་སྡེ་ཉིད། །བྱིན་ལེན་བརྒྱད་ཀྱི་བྱེད་པ་པོར། །ཡང་དག་པར་ནི་བཤད་པ་ཡིན། །ཟས་བྱས་ལེགས་བྱས་ལྔ་རྣམས་ཀྱི། །ཙུག་ཙུག་ལ་ཡང་དེ་བཞིན་ནོ། །ཐ་དད་བྱེད་པ་ལྔ་རྣམས་ཀྱི། །མཉན་ཡོད་དུ་ནི་ཤེས་པར་
བྱ། །ལག་པ་ལྡག་པ་ལྔ་རྣམས་དང་། །འཕྱ་བ་དག་ནི་གསུམ་པོ་དང་། །རྟོགས་ལྡན་ཁྱིམ་དུ་ཆུ་འབོད་པའི། །གང་ཡིན་པ་ནི་བཞི་པ་ཡི། །ལྷུང་བཟེད་གཅིག་གིས་དྲུག་སྡེ་ཡིན། །དགུ་པོ་ཡིས་ནི་དགེ་སློང་གཞན། །འགྲེང་བར་བྱེད་སོགས་ལྔ་པོ་ནི། །དྲུག་སྡེ་ཞེས་བྱར་རབ་ཏུ་གྲགས། །
མགོ་གཡོགས་ལ་སོགས་ལྔ་རྣམས་དང་། །དེ་བཞིན་གླང་ཆེན་སོགས་ཞོན་པ། །དོ་ཀེར་ཅན་སོགས་ལ་དེ་བཞིན། །འཁར་བ་དྲུག་ལ་དེ་ཉིད་ཤེས། །ཉེ་དགའ་ཡིས་ནི་བཤད་པ་དག །འགྲེངས་ནས་བཏང་བར་བྱས་པ་དག །སེར་སྐྱའི་གྲོང་དུ་དེ་དག་ཉིད། །དེ་ཡིས་རྩྭ་སྔོན་ཉམས་པར་བྱས། །
བཙོ་གླག་མཁན་གྱི་བཀྲུ་བཤལ་སར། །ཉེ་དགས་མི་གཙང་བས་བཀང་བའི། །གྱོ་མོ་རབ་ཏུ་བཅུག་པ་ཡིན། །དེ་ཕྱིར་སྨོད་པ་ཀུན་དུ་སློང་། །མཉན་ཡོད་དུ་ནི་ལྗོན་ཤིང་རྩེར། །མངོན་པར་འཛེག་པར་བྱས་ནས་ནི། །བསོད་སྙོམས་ལེན་པའི་དགེ་སློང་ལ། །ལྟ་བ་རབ་ཏུ་བརྩམས་པ་
ཡིན། །འགྱེད་དང་མི་གདམས་པ་དང་ནི། །ལྟུང་དང་བྱ་བ་ཞེས་བྱ་བའི། །རྩོད་པ་བཞི་པོ་འདི་དག་ཉིད། །རྗེས་སུ་རྟོགས་པར་བྱ་བ་ཡིན། །མུ་ཏིག་གིས་ཕུལ་མུ་ཏིག་ལས། །ཆོས་ཀྱི་སྐལ་བ་བགོ་བའི་ཕྱིར། །མདོ་སྡེ་འཛིན་སོགས་རྩོད་པ་ལས། །མཉན་ཡོད་དུ་ནི་དེ་དག་བྱུང་། །
གང་མང་རབ་ཏུ་འབྱེད་པ་དང་། །གཅིག་ཏུ་ངེས་པར་བྱེད་པ་ཡིས། །གཉིས་ཀྱིས་འགྱེད་པ་ཞི་བྱེད་པ། །སྔོན་ནི་ཐུབ་པས་བསྟན་པ་ཡིན། །མངོན་སུམ་དྲན་དང་མ་སྨྱོས་པས། །མི་གདམས་པ་ནི་ཞི་བར་བྱེད། །ཡང་དག་ལྟུང་བའི་རང་བཞིན་གྱིས། །གསུམ་པ་གཞན་ནི་ཁས་བླངས་

དང་། །རྩྭ་བཀྲམ་པ་དང་མངོན་སུམ་དང་། །དེ་ཉིད་ཚོལ་བས་ཞི་བར་བྱེད། །བྱ་བའི་བདག་ཉིད་ཞི་བ་ནི། །བདུན་པོ་དེ་ཡིས་ངེས་པར་འགྱུར། །བསླབ་པ་འདོད་པའི་དགེ་སློང་གིས། །རྩོད་པ་སྟན་ལ་དབབ་བྱའི་ཕྱིར། །གནས་ནི་རབ་ཏུ་གཟུང་བྱ་སྟེ། །བརྩོན་པས་
གནས་ནི་རྣམ་པར་དབྱེ། བསྡུས་པའི་དགེ་བ་འདི་ལས་ནི། །བདག་གིས་བསོད་ནམས་གང་བསགས་དེས། །འདི་ནི་འཇིག་རྟེན་ཉོན་མོངས་དང་། །ཉེ་བའི་ཉོན་མོངས་སྤོང་བར་ཤོག །བསླབ་པའི་ས་ལ་བརྟེན་ནས་ནི། །མདོ་ཡི་གཞུ་ནི་བཟུང་ནས་ནི། །སེམས་ཀྱི་མདའ་ནི་
བཀང་བྱས་ནས། །ཉོན་མོངས་དགྲ་རྣམས་ཉམས་པར་བྱས། །གལ་ཏེ་ཁྱོད་ལ་ཐར་པ་ཡི། །ཁྱིམ་དུ་གནས་པར་འདོད་ཡོད་ན། །དེ་ལྟ་བས་ན་ཁྱོད་ཀྱིས་ནི། །སེམས་ཅན་དོན་བྱེད་ལ་འབད་ཀྱི། །བྱང་ཕྱོགས་ཀྱི་ཁ་ཆེའི་ཡུལ་ནས་བྱུང་བའི་པཎྜི་ཏ་འདུལ་བ་འཛིན་པ་ཤཱཀྱའི་དགེ་
སློང་