Luận tạng Tây Tạng (Tengyur) — Tập 167

 །མགོན་པོ་དེ་ལ་ཕྱག་འཚལ་ལོ། །གང་ཞིག་བྱོན་པས་བདག་དེ་ཉིད། །ཕུན་ཚོགས་འདི་འདྲ་ཐོབ་འགྱུར་བ། །ཐམས་ཅད་མཁྱེན་པ་རྣམ་
པར་གཟིགས། །འཇིག་རྟེན་མགོན་ལ་ཕྱག་འཚལ་ལོ། །རྣམ་པར་རྒྱལ་བཞིན་བསམ་ཡས་པའི། །ཡོན་ཏན་དཔག་མེད་རྣམས་ཀྱིས་བརྒྱན། །ཡང་དག་བྱོན་ནས་དེ་བདག་ནི། །གཞལ་ཡས་ཁང་མཆོག་ཐོབ་པར་མཛད། །སྟོན་པ་དེ་ནི་ལེགས་རྙེད་པས། །ཏི་སེའི་རྩེ་མོ་བསྒྲེངས་པ་

ལྟའི། །སྟོན་ཀའི་ཟླ་བ་ལྟར་དཀར་བའི། །གཞལ་ཡས་ཁང་མཐོ་ཐོབ་པར་གྱུར། །དེ་ཉིད་གྲོང་ཁྱེར་འདི་མགོན་མེད། །དབུལ་བའི་སྡུག་བསྔལ་ཅན་གྱུར་ནས། །དེ་ཉིད་ཀུན་གྱི་མཆོག་གྱུར་ཅིང་། །ནོར་ཆེ་བ་དང་ལྡན་པར་གྱུར། །ས་བོན་དེ་ཉིད་བཏབ་ཙམ་གྱིས། །འབྲས་
བུ་འཕྲལ་དུ་སྩོལ་བ་པོ། །འཇིག་རྟེན་མཆོག་གྱུར་ཁྱབ་བདག་དེ། །སུ་ཞིག་གིས་ནི་མཆོག་འོས་མིན། །དེ་ནས་དེད་དཔོན་རྣ་ཅན་དད་པའི་ཤུགས་དྲག་པོས་སེམས་ཀྱི་རྒྱུད་བརླན་པ་དང་བསམས་པ། བཅོམ་ལྡན་འདས་བྱོན་ནས། ང་ལ་འབྱོར་པ་འདི་ལྟ་བུ་ཐོབ་པར་མཛད་པ་ཡིན་པས།
ད་ཡང་ངས་དང་པོ་ཉིད་དུ་བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་ཁང་པ་འདིར་སྤྱན་དྲངས་ལ། ཉན་ཐོས་ཀྱི་ཚོགས་དང་བཅས་པ་ལ་བཤོས་གཙང་དབུལ་བར་བྱའོ་སྙམ་ནས། གུས་པ་ཆེན་པོས་དེ་བཞིན་གཤེགས་པ་རྣམ་པར་གཟིགས། ཉན་ཐོས་ཀྱི་དགེ་འདུན་
དང་བཅས་པ། ཁང་པའི་ནང་དུ་སྤྱན་དྲངས་ཏེ། ཞལ་ཟས་རོ་བརྒྱ་པ་ཉིན་ཞག་བདུན་གྱི་བར་དྲངས་ནས་ཞབས་གཉིས་ལ་ཕྱག་བྱས་ཏེ། ཇི་སྲིད་འཚོའི་བར་དུ་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པར་གྱུར་ཏོ། །དེ་ནས་ཉི་མ་གཞན་ཞིག་ལ་ཞིང་བསྲུང་བའི་སྐྱེས་བུ་ཞོ་ཤས་འཚོ་བ་ཞིག་ལ།
རྗེ་བོས་འབྲས་ཆན་གྱི་ཐུམ་བུ་ཞིག་བྱིན་པ་དང་། དེ་ཐོགས་ཏེ་ཞིང་ལས་ལ་ཆས་པ་དང་། ལམ་གྱི་བར་ཞིག་ཏུ་ཞོ་ཤས་འཚོ་བའི་སྐྱེས་བུ་དེས་དགེ་བསྙེན་གཞན་ཞིག་ལ། དེད་དཔོན་རྣ་ཅན་གྱིས་མ་ཤའི་སྣུམ་ཁུར་གཅིག་སངས་རྒྱས་བཅོམ་ལྡན་འདས་ལ་ཕུལ་བས། འབྱོར་པ་འདི་ལྟ་བུ་ཐོབ་ཅེས་
ཐོས་སོ། །ཐོས་ནས་ཀྱང་། སྐྱེས་བུ་དེས་དགེ་བསྙེན་དེ་ལ་སྨྲས་པ། ཀྱེ་བཞིན་བཟངས་བཅོམ་ལྡན་འདས་དེ་ཆེ་བའི་ཡོན་ཏན་དེ་ཇི་ལྟ་བུ་ཞིག་ཡོད། དེས་སྨྲས་པ། བཞིན་བཟངས་བཅོམ་ལྡན་འདས་དེའི་ཡོན་ཏན་དེའི་ཁྱད་པར་སྨྲ་བར་ག་ལ་ནུས། འོན་ཀྱང་མདོར་བསྡུས་པའི་དོན་འདི་ཉོན་
ཅིག །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་དེ་ནི་སྐྱེས་བུ། རབ་མཆོག་མཚན་གྱིས་བརྒྱན་པས། གསེར་གྱི་རི་ལྟར་སྣང་བས། ཉི་མ་དང་ཟླ་བ་བས་ལྷག་པའི་འོད་གཅིག་པུ་ལ། དུལ་བ། བརྟུལ་ཞུགས་བཟང་བ། ཐུགས་དུལ་བ། གསུང་སྙན་བ། ཆ་ལུགས་བཟང་བ།

སྐུ་མཛེས་པ། ཞལ་མཛེས་པ། སྤྱན་མཛེས་པ། ཕྲིན་ལས་བཟང་བ། ཆོས་བཟང་བ། བཟོད་པ་དང་ལྡན་པ། སྤོབས་པ་དང་ལྡན་པ། དེས་པ་ཤིན་ཏུ་འདྲེན་པ་དུལ་བ་མཁྱེན་པ། ཞི་བ་མཁྱེན་པ། སྤྱན་ཡངས་པ། བྱས་པ་མཁྱེན་པ། དབང་པོ་རབ་ཏུ་ཞི་བ། དབང་པོའི་རྟ་ཤིན་ཏུ་དུལ་བ།
དབང་པོ་ཤིན་ཏུ་ཞི་བ། ཆོས་ཀྱི་རྒྱལ་པོ་ཆེན་པོ། སེམས་ཅན་གྱི་སྙིང་པོ་ཆེན་པོ། འཇིག་རྟེན་གྱི་མགོན་པོ་ཆེན་པོ། ཡེ་ཤེས་ཀྱི་ཏོག་ཆེན་པོ། སྨྲ་བའི་དཔའ་བོ་ཆེན་པོ། བསོད་ནམས་ཀྱི་མཛོད་ཆེན་པོ། ཆོས་ཀྱི་གྲུ་ཆེན་པོ། དེད་དཔོན་ཆེན་པོ། སྦྱིན་གནས་ཆེན་པོ། གྲུ་བ་ཆེན་པོ་
ཆོས་ཀྱི་སྦྱིན་བདག་ཆེན་པོ། སྲེད་པ་རྣམས་གཅོད་པར་མཛད་པ། རྨོངས་པ་ངེས་པར་འཇིག་པར་མཛད་པ། ཁྲོ་བ་ཞི་བར་མཛད་པ། ཐར་པ་སྟོན་པར་མཛད་པ། ཆོས་ཡང་དག་པར་མཛད་པ། ངན་པ་ལས་འཕོ་བར་མཛད་པ། ལམ་བཟང་པོ་སྟོན་པར་མཛད་པ། ཐེ་ཚོམ་གཅོད་པར་
མཛད་པ། བདེན་པ་ཡང་དག་པར་སྟོན་པར་མཛད་པ། ཉོན་མོངས་པ་ཞི་བར་མཛད་པ། བདུད་འཇོམས་པར་མཛད་པ། འཇིག་རྟེན་རྣམས་སྒྲོལ་བར་མཛད་པ། ཚངས་པས་མཆོད་པ། བརྒྱ་བྱིན་གྱིས་ཡང་དག་པར་བཀུར་བ། འཇིག་རྟེན་ཐམས་ཅད་པས་ལྷག་པ། འཇིག་རྟེན་ཐམས་ཅད་
ཀྱི་མཛེས་པ། སེམས་ཅན་ཐམས་ཅད་ཀྱི་མཆོག །སྡུག་བསྔལ་ཐམས་ཅད་གཅོད་པར་མཛད་པ། ཐམས་ཅད་རིག་པ། ཚུལ་དང་དུལ་བ་ལ་མཁས་པ། ཟག་པ་ཐམས་ཅད་ལས་འདས་པ། སྨྲ་བའི་གཙོ་བོ་ཟིལ་གྱིས་མ་མནན་པ། ཉེས་པ་ཐམས་ཅད་ཟིལ་གྱིས་མ་གཡེངས་པ། དོན་ཐམས་
ཅད་ལ་མངོན་པར་བརྩོན་པ། གཟུགས་དང་ལྡན་པ། ཚུལ་ཁྲིམས་དང་ལྡན་པ། བསམ་གཏན་དང་ལྡན་པ། བརྩོན་འགྲུས་དང་ལྡན་པ། ཡེ་ཤེས་དང་ལྡན་པ། རེ་བ་མི་མངའ་བ། སྒྱུ་མི་མངའ་བ། ནན་མི་མངའ་བ། སྤྲོས་པ་མི་མངའ་བ། སྐྱོན་མེད་པར་ཞུགས་པ། འཇུག་པ་དང་ཟད་པའི་
སྟོབས་ཉེ་བར་སྟོན་པར་མཛད་པ། སེམས་ཅན་ཐམས་ཅད་ལ་བྱམས་པའི་དགོངས་པ་ཅན། སྡིག་པ་རྣམས་ལས་གྲོལ་བ། ལྷག་པར་མོས་པ་དང་ལྡན་པ། བླ་ན་མེད་པ། གཙོ་བོ། སྟོན་པ་པོ། ཉོན་མོངས་པའི་ནད་ཀྱིས་གདུངས་པ་རྣམས་ཀྱི་སྨན་པ་ཆེན་པོ། རང་བྱུང་ཁྱབ་བདག་ཡང་

དག་པར་སྡོམ་པའི་བདག་ཉིད་ཅན། མཐུ་ཚད་མེད་པ། མཛད་པ་ཉུང་བ། ཆོ་ག་མཁྱེན་པ་དང་ལྡན་པ། དུས་དང་ལྡན་པ། ཡེ་ཤེས་དང་ལྡན་པ། ཉོན་མོངས་པའི་དགྲ་ལས་ངེས་པར་རྒྱལ་བ། མེ་རབ་ཏུ་ཞི་བ། མི་བསྐྱོད་པའི་ཆོས་དང་ལྡན་པ། མཆོག་ཏུ་སྡུག་བསྔལ་བའི་འཇིག་
རྟེན་མ་རིག་པའི་འདམ་ལ་ནུབ་པ་ལ་གཟིགས་ཤིང་དེ་ལ་ཉིད་ཀྱིས་ཡང་དག་པར་འདོན་པར་སྤྱོད་ལ། ཉིད་ཀྱི་མཐུའི་བདག་ཉིད་སེམས་ཅན་ཐམས་ཅད་ལ་མཚུངས་པར་ཡོད་པར་བཞེད་པའི་ཐུགས་རྗེ་ཆེན་པོས་དོན་མཛད་པའི་བློ་གྲོས་ཀྱི་མཆོག་གིས་འདི་ལས་འགྲོ་བ་འདོན་པར་མཛད་པ།
ཇི་ལྟར་སྡུག་བསྔལ་རྣམས་གནོན་པར་བྱ། ཇི་ལྟར་སྐྲག་པ་རྣམས་དབུགས་དབྱུང་བར་བྱ། ཇི་ལྟར་ན་འཁོར་བར་ནུབ་པ་རྣམས་གདོན་པར་བྱ། ཇི་ལྟར་ན་བཀྲེས་པ་རྣམས་ཚིམ་པར་བྱ་ཞེས་དེ་ལྟ་བུའི་བརྟན་པོ་ཡང་དག་པར་བསྐྱེད་དེ། བརྩོན་འགྲུས་མཆོག་རྩོམ་པར་མཛད་ཅིང་། སྐུ་ཚེ་བྱེ་བ་བརྒྱ་སྟོང་
དུ་སྔ་མ་བཞིན་དུ་ཟས་དང་། སྐོམ་དང་གནས་དང་། ལྷམ་དང་། བཟའ་བ་དང་། གདུགས་དང་། བཞོན་པ་དང་། སྟན་ལ་སོགས་པ་ཡིད་དུ་འོང་བ་དང་། གླང་པོ་ཆེ་དང་། རྟ་དང་ཆུང་མ་དང་བུ་དང་། བྲན་ཕོ་དང་། བྲན་མོ་དང་། མགོ་དང་། མིག་དང་། བདག་གི་ཤ་དྲོན་པོ་བཅད་ནས་བརྒྱ་བྱིན་ཁྲའི་
གཟུགས་ཅན་ལ་སོགས་པ་དང་། སེམས་ཅན་ཐམས་ཅད་ལ་ཐབས་ཐམས་ཅད་ཀྱིས་ཕན་པར་དགོངས་པ། དུས་ཐམས་ཅད་དུ་ཡང་རྒས་པ་དང་། ན་བ་དང་། ཕོངས་པ་དང་། ཀུན་དུ་རྨོངས་པ་དང་། ཀུན་དུ་འཁྲུལ་པ་དང་། འཁྲུགས་པ་དང་། མི་བདེ་བར་གནས་པ་རྣམས་ལ་གཟིགས་ནས་ཐམས་
ཅད་དབུགས་ཕྱུང་སྟེ། ཡོད་དམ་མེད་པ་ལ་ཡང་སྤྱོད་པ་ཇི་ལྟ་བས་བརྟན་པར་མཛད་པ། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ལ་སོགས་པའི་ཡོན་ཏན་སྐུ་ཚེ་བརྒྱ་སྟོང་དུ་མར་བསགས་པས་ཞི་བའི་བྱང་ཆུབ་ཀྱི་མཆོག་བླ་ན་མེད་པ་བརྙེས་
པའོ། །གཞན་ཡང་ཡང་དག་པར་རྫོགས་པའི་སངས་རྒྱས་གྲགས་པས་ཁྱབ་པ། དབུགས་འབྱིན་པའི་ཆོས་ཐུགས་རྗེ་སྟོན་པར་མཛད་པ་ཡེ་ཤེས་ཡོངས་སུ་རྫོགས་པ། བརྩོན་འགྲུས་ཆེ་བ། དམ་བཅས་པ་ཐམས་ཅད་མཐར་ཕྱིན་པར་མཛད་པའོ། །ཉེས་པ་ཐམས་ཅད་ལས་ཉེ་བར་གྲོལ་བ་རྨོངས་

པ་རྣམས་ཉེ་བར་བསལ་བ། དུལ་བ་དང་། ཞི་བ་དང་། དབང་པོའི་ཡུལ་ཐམས་ཅད་ལ་མ་ཆགས་པ། ཐམས་ཅད་ཀྱི་དབང་ཕྱུག །ལུས་ཀྱི་ཐ་མ་བརྙེས་པ། ཚད་མེད་པའི་མཐུའི་འོད་ཀྱིས་བརྒྱན་པའི་ཡེ་ཤེས་ཀྱི་མཛོད། ཟླ་བ་རྒྱས་པ་བས་ལྷག་པའི་འོད་དང་ལྡན་པའི་ཞལ་མངའ་བ། ལྷའི་དབང་
པོ་དང་། ལྷ་མ་ཡིན་གྱི་དབང་པོ་དང་། ཀླུའི་དབང་པོ་རྣམས་ཀྱིས་མོས་པས་རབ་ཏུ་དང་བ་དང་། རྟག་ཏུ་ཕྱག་བྱས་པ། གཟི་བརྗིད་རབ་ཏུ་འབར་བ། བསོད་ནམས་དང་གྲགས་པ་དང་ལྡན་པ། དྲང་སྲོང་ཆེན་པོ་བྱུང་བ། གསེར་ཤིན་ཏུ་སྦྱངས་པ། ཆོས་ཀྱི་དབང་ཕྱུག་མཆོག་གི་ཆོས་ཀྱི་ཕ་རོལ་
ཏུ་ཕྱིན་པ། སེམས་ཅན་གྱི་མཆོག །ཅང་ཤེས་པ་གྲོལ་བ། དཔའ་བ། ལྷའི་ཡང་ལྷ། ཡང་དག་པར་རྫོགས་པའི་སངས་རྒྱས། དེའི་ཡོན་ཏན་མ་ལུས་པར་སྟོན་པ་སུ་ཞིག་གིས་ནུས། གཞན་ཡང་། གཟུགས་དང་མདངས་བཟང་ཐམས་ཅད་ཀྱི། །ཕུན་སུམ་ཚོགས་པས་ལེགས་བརྒྱན་པ། །
སྐུར་ལྡན་སངས་རྒྱས་མ་གཏོགས་པ། །འདི་འདྲའི་མཆོག་གཞན་ཡོད་མ་ཡིན། །སངས་རྒྱས་འདྲ་བའི་སྟོན་པ་མེད། །སངས་རྒྱས་འདྲ་བའི་བློ་བཟང་མེད། །སངས་རྒྱས་འདྲ་བའི་རྟོགས་པ་མེད། །སངས་རྒྱས་འདྲ་བའི་ཐུབ་པ་མེད། །སངས་རྒྱས་འདྲ་བའི་སྣོད་མེད་དེ། །སངས་རྒྱས་འདྲ་བའི་
བདེ་ལྡན་མེད། །སངས་རྒྱས་འདྲ་བའི་དུལ་བ་མེད། །སངས་རྒྱས་འདྲ་བའི་གཙོ་བོ་མེད། །སངས་རྒྱས་འདྲ་བའི་སྨྲ་བ་མེད། །སངས་རྒྱས་འདྲ་བའི་ཕ་མེད་དེ། །སངས་རྒྱས་འདྲ་བའི་གཉེན་འདུན་མེད། །སངས་རྒྱས་འདྲ་བའི་བཤེས་མེད་དོ། །བདག་གི་མེད་ཅིང་དྲེགས་པ་མེད། །འཇིགས་
པ་མེད་ཅིང་ཉེས་པ་མེད། །སྲིད་པའི་དགོན་པ་ངེས་རྒལ་ཞིང་། །འགྲན་ཟླ་མེད་ཅིང་སྐྱོན་མི་མངའ། །མཛེས་དུལ་ཞི་ཞིང་གཙང་བ་དང་། །དྲན་ལྡན་སྟོབས་ལྡན་དབང་དང་ལྡན། །སེམས་ཅན་ཀུན་ལ་ཕན་མཛད་པ། །སངས་རྒྱས་འདྲ་བ་གཞན་མེད་དོ། །མདོར་ན་ཡོན་ཏན་དམ་པ་ནི། །ཁྱད་པར་
སྣ་ཚོགས་ལྡན་པས་ན། །ཁམས་གསུམ་ན་ནི་སངས་རྒྱས་དང་། །མཉམ་པ་མེད་པར་གཟུང་བར་གྱིས། །དེ་ཐོས་པ་དང་ཞོ་ཤས་འཚོ་བའི་སྐྱེས་བུ་དེ་དད་པས་བ་སྤུ་ལྡང་ཞིང་ཤིན་ཏུ་རྙེད་པར་དཀའ་བའི་སྤོབས་པ་འཕྲལ་དུ་སྐྱེས་ཏེ། དེས་སྨྲས་པ། དེད་དཔོན་རྣ་ཅན་གྱི་སྲེད་པས་དེ་ལྟ་བུའི་སྦྱིན་

གནས་དམ་པ་བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་ལ་མ་ཤའི་སྣུམ་ཁུར་ཅིག་ཕུལ་ནས། སྐད་ཅིག་དེ་ཉིད་ལ་དེད་དཔོན་དེ་དབུལ་བ་མེད་པར་གྱུར་ཅིག་ཅེས་དེ་ལྟར་སེམས་ཀྱི་ནོར་བུ་རིན་པོ་ཆེར་གྱུར་པ་དེ་བཞིན་གཤེགས་པ་ལས་རྙེད་དེ། ཤིན་
ཏུ་ཞན་པ་ལ་ལོངས་སྤྱོད་ཀྱི་རྒྱུར་གྱུར་པའི་སྨོན་ལམ་བཏབ་པ་ཡིན་ལ། ང་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྐལ་པ་བྱེ་བ་བརྒྱ་སྟོང་དཔག་ཏུ་མེད་པར་ཡང་མི་མཐོང་བ། ཤིན་ཏུ་བལྟ་བར་འོས་པ། བླ་ན་མེད་པ་
བསྐལ་པ་བརྒྱ་སྟོང་དཔག་ཏུ་མེད་པར་སེམས་ཅན་ཐམས་ཅད་ཀྱི་དོན་ལ་ཞུགས་པར་བསགས་པའི་བསོད་ནམས་ཀྱི་ཚོགས་མངའ་བ་ཐུགས་རྗེ་ཆེན་པོ་ལས་མི་ལྡོག་པ། འཁོར་བ་དུ་མའི་ཉོན་མོངས་པའི་དུག་ཅན་གྱི་སྦྲུལ་ཆེན་པོས་ཟིན་པའི་དམན་པ་རྣམས་ལ་རྗེས་སུ་ཐུགས་བརྩེ་བ། རྣམ་པར་
ལྟུང་པའི་འགྲོ་བ་རྣམས་ལ་ཁྱད་པར་དུ་མཉེན་གཤིན་པ་རྗེས་སུ་མི་སྤོང་བའི་ཉེ་དུ་ཡིན་ལ། ངས་ནི་དུས་དཔག་ཏུ་མེད་པར་ལོངས་སྤྱོད་མ་བསྒྲུབས་པ་ཡིན་ཏེ། ངས་ཞིང་ལས་ཀྱིས་བསྒྲུབས་པའི་འབྲས་ཆན་གྱི་སློང་མོ་ཤིན་ཏུ་ཞན་པ་རྙེད་པ་འདི་ཕུལ་ལ་མཉེས་པར་བྱ་སྟེ། དེའི་ཚེ་གང་གིས་སེམས་ཅན་
ཐམས་ཅད་ཀྱི་མཆོག་ཏུ་འགྱུར་བ་དེ་ལྟ་བུའི་སྨོན་ལམ་གདབ་པར་བྱའོ་སྙམ་པའི་ཡིད་ལ་བརྗོད་པའི་རྗེས་ཐོགས་ཉིད་ལ་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་སེམས་དང་སེམས་ཀྱི་རྟོགས་པ་མཁྱེན་ནས་རྫུ་འཕྲུལ་གྱིས་གཤེགས་ཏེ་དེའི་མདུན་དུ་བཞུགས་
སོ། །ལས་བྱེད་པའི་སྐྱེས་བུ་དེས་དེ་བཞིན་གཤེགས་པ་རྣམ་པར་གཟིགས་སྐུ་བལྟ་བས་ཆོག་མི་ཤེས་པ། གསེར་ཤིན་ཏུ་སྦྱངས་པ་ལྟར་མངོན་པར་མཛེས་པའི་མདངས་དང་ལྡན་པའི་ལྷའི་རིའི་རྩེ་མོ་ལ་ཉི་མ་འཆར་ཀའི་འོད་ཟེར་རྣམ་པར་འབྱུང་བས་མཚམས་སྣང་བར་བྱས་པས་ཤིན་ཏུ་གསལ་བར་
བྱས་པ་ལྟ་བུའི་སྐུ་ལ་འོད་དང་ལྡན་པ་མཐོང་ངོ་། །མཐོང་ནས་ཀྱང་མཆོག་ཏུ་དགའ་བ་དང་ཡིད་བདེ་བ་སྐྱེས་ནས་དད་པའི་ཤུགས་ཆེན་པོས་འབྲས་ཆན་ཐུམ་བུ་བླངས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ལྷུང་

བཟེད་དུ་ཕུལ་ཏེ། དད་པའི་ཤུགས་ཆེན་པོས་ཞབས་གཉིས་ལ་ཕྱག་བྱས་ཏེ་སྨོན་ལམ་བྱེད་པར་བརྩམས་པ། མགོན་པོའི་བསོད་ནམས་འདི་ཡིས་ནི། །སྐྱེ་བ་འདི་ནས་བཟུང་ནས་སུ། །སེམས་ཅན་ཀུན་ལ་ཕན་སེམས་ཤིང་། །སྙིང་རྗེའི་བདག་ཉིད་ཅན་གྱུར་ཅིག །ཇི་ལྟར་ཁྱོད་ནི་མཚན་ལྡན་ཞིང་། །བླ་
མེད་བྱང་ཆུབ་བརྙེས་གྱུར་པ། །དེ་བཞིན་བདག་ཀྱང་རྫོགས་བྱང་ཆུབ། །དྲི་མེད་ཡང་དག་ཐོབ་གྱུར་ཅིག །ཇི་ལྟར་ཁྱེད་ནི་ཀུན་མཁྱེན་ཞིང་། །ཆོས་རྣམས་ཇི་ལྟར་སྟོན་མཛད་པ། །བརྙེས་པ་དེ་བཞིན་བདག་ཀྱང་ནི། །ཀུན་མཁྱེན་ཉིད་ནི་ཐོབ་པར་ཤོག །ཇི་ལྟར་ཁྱེད་བདུད་ལས་རྒྱལ་ཞིང་། །ཆོས་ཀྱི་
འཁོར་ལོ་བསྐོར་མཛད་པ། །དེ་བཞིན་བདག་ཀྱང་ངེས་རྒྱལ་ནས། །ཆོས་ཀྱིས་འཁོར་ལོ་བསྐོར་གྱུར་ཅིག །ཇི་ལྟར་མགོན་པོས་འཁོར་བ་ཡི། །རྒྱ་མཚོའི་ངོགས་སུ་སྒྲོལ་མཛད་བཞིན། །ཐུབ་པའི་དམ་པ་དེ་ལྟར་ནི། །བདག་གིས་སེམས་ཅན་མང་དགྲོལ་བགྱི། །དེ་ནས་བཅོམ་ལྡན་འདས་ཡང་དག་
པར་རྫོགས་པའི་སངས་རྒྱས་རྣམ་པར་གཟིགས་ཆར་དང་བཅས་པའི་སྤྲིན་བཞིན་ཟབ་ཅིང་གསལ་བའི་གསུང་གིས་བཀའ་སྩལ་པ། བཞིན་བཟངས་དོན་གྲུབ་ཅེས་བྱའི་སྟོན་པར་ནི། །མཐུ་ལྡན་ཁྱོད་ནི་སྟོན་པར་རབ་འགྱུར་ཏེ། །བདུད་སྡེ་བཅས་ལས་འདི་ན་མངོན་རྒྱལ་ཞིང་། །ཀུན་ནས་འཇིགས་པ་
མངོན་པར་ལྟུང་བྱེད་འགྱུར། །དེ་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་སྐྱེས་བུ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏེ། ལུང་བསྟན་ཟིན་པ་དང་། ཇི་ལྟར་གྱུར་པ་དེ་རྒྱལ་པོའི་ཕོ་བྲང་མཉན་ལྡན་ཀུན་དུ་གྲགས་པར་གྱུར་ཏོ། །ཇི་ཙམ་ན་
རྒྱལ་པོ་མཉན་ལྡན་གྱིས་ཐོས་པ་དང་། དེར་རང་ཉིད་སོང་སྟེ། དགེ་བའི་རྩ་བའི་ཚོགས་དེས་སྤྲོ་བའི་སེམས་ཀྱིས་སྐྱེས་བུ་དེ་ལ་བསྙེན་བཀུར་ཆེན་པོས་གླང་པོ་ཆེའི་རྒྱབ་ལ་བསྐྱོན་ཏེ་ཕོ་བྲང་དུ་ཁྱེར་ནས་སྟན་ཕྱེད་ལ་བཞག་སྟེ། རྒྱལ་སྲིད་ཀྱི་ཕྱེད་བྱིན་པས་མཆོད་པ་དང་། དེས་སྨྲས་པ། རྒྱལ་པོ་
ཆེན་པོ་བདག་ནི་འདོད་པ་དོན་དུ་གཉེར་བ་མ་ལགས་ཏེ། བདག་རབ་ཏུ་བྱུང་ནས་ཚངས་པར་སྤྱོད་པ་སྤྱད་པར་གནང་བར་མཛད་དུ་གསོལ། དེ་ཡང་རྒྱལ་པོས་གནང་ནས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས། དེ་དེར་ཇི་སྲིད་འཚོའི་བར་དུ་ཚངས་པར་སྤྱོད་པ་སྤྱད་དེ། དུས་བྱས་

ནས་འཕྲུལ་དགའི་ལྷ་རྣམས་སུ་སྐྱེས་སོ། །རྒྱལ་པོ་མཉན་ལྡན་ཡང་དུས་བྱས་ནས་དེའི་རྒྱལ་སྲིད་ལ་བཞག་གོ། །དེས་ཀྱང་དུས་ཆུང་ཟད་ཅིག་རྒྱལ་སྲིད་བྱས་ནས་དུས་བྱས་པ་དང་། བློན་པོ་རྣམས་ཀྱིས་བསྙེན་བཀུར་ཆེན་པོས་གཟུགས་བཟང་རྒྱལ་པོར་བསྐོས་ཏེ། དེ་ལོ་དྲུག་
ཁྲིའི་བར་དུ་ཆོས་ཀྱི་རྒྱལ་པོ་བྱས་ཏེ། དེ་ནས་ཤི་འཕོས་ནས་དགའ་ལྡན་གྱི་ལྷའི་ནང་དུ་སྐྱེས་སོ། །རྒྱལ་པོ་ཆེན་པོ་འདི་ཇི་སྙམ་དུ་སེམས། དེའི་ཚེ་དེའི་དུས་ན་གཟུགས་བཟང་ཞེས་བྱ་བའི་རྒྱལ་པོ་དེ་གཞན་ཞིག་ཡིན་པ་སྙམ་དུ་སེམས་ན་དེ་དེ་ལྟར་མི་བལྟ་སྟེ། གསེར་མདོག་འདི་དེའི་ཚེ་དེའི་དུས་ན་
གཟུགས་བཟང་ཞེས་བྱ་བའི་རྒྱལ་པོར་གྱུར་ཏེ། གང་འདིས་དེ་བཞིན་གཤེགས་པ་རྣམ་པར་གཟིགས་ལ་ཡུང་བས་བཙོས་པའི་གོས་ཀྱི་དུམ་བུ་ཕུལ་ནས་སྨོན་ལམ་བཏབ་སྟེ། ལས་ཀྱི་རྣམ་པར་སྨིན་པ་འདིས་ལྷ་དང་མི་རྣམས་ཀྱི་བདེ་བ་དཔག་ཏུ་མེད་པ་ཉམས་སུ་མྱོང་སྟེ། གང་དང་གང་དུ་སྐྱེས་པ་
དེ་དང་དེར་ལུས་གསེར་གྱི་མདོག་ཅན་དང་གསེར་གྱི་མདོག་ཅན་གྱི་གོས་ལུས་ལ་གྱོན་པ་དང་། བཙས་པའི་དུས་སུ་ཡང་ཀར་ནི་ཀ་རའི་མེ་ཏོག་གི་ཆར་བབ་པར་གྱུར་པ་དང་། ཇི་སྲིད་ད་ལྟར་ཡང་རང་གི་ལུས་ལ་གོས་ལན་ཅིག་ཕུད་ན་དེའི་སྐད་ཅིག་ཉིད་ལ་ལུས་ལས་སྐྱེས་པར་འགྱུར་བའི་བསོད་
ནམས་ཀྱི་མཐུ་ཆེན་པོ་དང་ལྡན་པ་ཡིན་ནོ། །དེའི་ཚེ་དེའི་དུས་ན་དེད་དཔོན་རྣ་ཅན་ཞེས་བྱ་བ་དེ་ནི་དེད་དཔོན་ཉི་མ་འདི་ཉིད་ཡིན་ནོ། །དེད་དཔོན་རྣ་ཅན་གྱི་ཆུང་མ་གང་ཡིན་པ་དེ་ནི་ད་ལྟར་དེད་དཔོན་ཉི་མའི་ཆུང་མ་ཡིན་ནོ། །བྲན་མོ་ནི་ཀ་ཤི་མཛེས་དགའ་མོ་ཡིན་ནོ། །དེའི་ཚེ་དེའི་དུས་ཀྱི་བྲན་པོ་ནི་བློན་
པོ་རབ་གཏུམ་ཡིན་ནོ། །ཡང་རྒྱལ་པོ་མ་སྐྱེས་དགྲས་གནས་བརྟན་ཀུན་དགའ་བོ་ལ་འདི་སྐད་ཅེས་གསོལ་ཏོ། །བཙུན་པ་ཀུན་དགའ་བོ་དགེ་སློང་གསེར་མདོག་གིས་ལས་ཅི་ཞིག་བགྱིས་ན་ལས་གང་གི་རྣམ་པར་སྨིན་པས་ཉེས་པ་མེད་ཅིང་གནོད་པ་མི་བྱེད་པ་གསལ་ཤིང་ལ་བསྐྱོན་པ་དང་། རབ་
ཏུ་བྱུང་ནས་ཀྱང་དགྲ་བཅོམ་པ་ཉིད་ཐོབ་པ་ལགས། གནས་བརྟན་ཀུན་དགའ་བོས་བཀའ་སྩལ་པ། རྒྱལ་པོ་ཆེན་པོ་སྔོན་བྱུང་བ་འདས་པའི་དུས་ན་ཡང་དག་པར་རྫོགས་པའི་སངས་རྒྱས་ཟླ་བ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་

སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་རྒྱལ་པོའི་ཕོ་བྲང་གཞན་ཞིག་ན་ཉེ་བར་བསྟེན་ཞིང་བཞུགས་སོ། །ཡང་དེའི་ཚེ་དེའི་དུས་ན་གཙུག་
ལག་ཁང་གཞན་ཞིག་ན་དགེ་སློང་ག་གེ་མོ་ཞེས་བྱ་བའི་ཆོས་སྟོན་པ་ཞིག་གནས་པ་དང་། དེ་དུས་དང་དུས་སུ་འོང་ཞིང་འགྲོ་བའི་བྲམ་ཟེ་དང་། ཁྱིམ་བདག་རྣམས་ལ་ཆོས་སྟོན་པར་བྱེད་པ་ན་དེས་རྙེད་པ་དང་བཀུར་སྟི་ཆེན་པོ་ཐོབ་པར་གྱུར་ཏོ། །ཇི་ཙམ་ན་དུས་གཞན་ཞིག་ན་མ་ཕམ་པ་ཞེས་བྱ་བའི་
དགེ་སློང་ཆོས་སྨྲ་བ། རིག་པ་དང་གྲོལ་བའི་སྤོབས་པ་ཅན། སྣ་ཚོགས་པའི་གཏམ་དང་། སྙན་པའི་གཏམ་དང་། ཡུལ་གྱི་ལྗོངས་རྒྱུ་ཞིང་གཙུག་ལག་ཁང་དེར་འོངས་པ་དང་། དེ་འཁོར་བཞི་པོ་ལ་ཚངས་པར་སྤྱོད་པ། ཐོག་མར་དགེ་བ་དང་། བར་དུ་དགེ་བ་དང་། ཐ་མར་དགེ་བ་དང་།
དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་དག་པ། ཡོངས་སུ་བྱང་བ་ཡོངས་སུ་རྫོགས་པ་ཡང་དག་པར་སྟོན་ཏེ། དེས་ཡུལ་གྱི་ཕྱོགས་དེ་ན་གནས་པའི་སྐྱེ་བོ་ཐམས་ཅད་མངོན་པར་དད་པར་བྱས་ཤིང་། དེ་ཆོས་གོས་དང་བསོད་སྙོམས་དང་། མལ་སྟན་དང་། ནད་ཀྱི་
གསོས་སྨན་དང་། ཡོ་བྱད་རྣམས་རྙེད་པར་གྱུར་ཅིང་། གཞི་ན་གནས་པའི་ཆོས་སྨྲ་བ་དེའི་རྙེད་པ་དང་བཀུར་སྟི་ཆད་པར་གྱུར་པ་དང་། དེ་འདི་སྙམ་དུ་སེམས་ཏེ། དགེ་སློང་མ་ཕམ་པས་ངའི་རྙེད་པ་དང་། བཀུར་སྟི་རྒྱུན་བཅད་པར་བྱས་ཏེ། ཇི་སྲིད་འདི་ན་གནས་པ་དེ་སྲིད་ཀྱི་བར་བུ་ངས་རྙེད་
པ་དང་བཀུར་སྟི་ག་ལ་རྙེད་ཀྱི་འགྲོ་བའི་ཕྱིར་ཐབས་བསམ་པར་བྱའོ་སྙམ་མོ། །ཡང་བསམས་པ། འདི་ནི་ཐོས་པ་མང་བ་ཡིན་པས་བསྙེན་བཀུར་མེད་པས་འཇིགས་པ་ཡིན་ཏེ། དེ་བས་ན་བསྙེན་བཀུར་མེད་པ་ལ་སྦྱར་བར་བྱའོ་སྙམ་ནས་བྲམ་ཟེ་མོ་གཞོན་ནུ་མ་གཞན་ཞིག་ལ་སྨྲས་པ། སྲིང་
མོ་ངས་ཁྱོད་ལ་རས་ཟུང་ཅིག་སྦྱིན་པར་བྱ་ཡིས་ཁྱེད་ཀྱིས་འདི་དང་ལྷན་ཅིག་མི་ཚངས་པར་སྤྱད་པར་བྱ་བ་ཡིན་ནོ་ཞེས་དགེ་སློང་མ་ཕམ་པ་ལ་སྐུར་པ་ཐོབ་ཤིག །དེས་སྨྲས་པ། འཕགས་པ་ངས་དེ་ལྟར་སྨྲས་ན་ང་སུ་ཞིག་ལན་པར་འགྱུར་ཏེ། ཇི་སྲིད་འཚོའི་བར་དུ་ཕ་དང་མ་གསོ་བར་བྱེད་པ་ཞིག་ཏུ་མི་

འགྱུར་རམ། དེས་སྨྲས་པ། ངས་ཇི་ལྟར་ན་སྐྱེ་བོ་མང་པོས་ཤེས་པར་མི་འགྱུར་བ་དེ་ལྟར་བྱ་ཡིས་གཞན་དུ་ན་ང་འདི་ན་དགེ་སློང་གཞན་གསུམ་མམ་བཞི་དང་ལྷན་ཅིག་འདུག་གིས། དེའི་ཚེ་ཁྱོད་གསང་བའི་ཚིག་གིས་སྨྲོས་ཤིག །དེས་དེ་ལྟར་བགྱིའོ་ཞེས་ཁས་བླངས་སོ། །
ཇི་ཙམ་ན་ཉི་མ་གཞན་ཞིག་ན་ཆོས་སྟོན་པའི་དགེ་སློང་དེ་དགེ་སློང་དེ་རྣམས་དང་ལྷན་ཅིག་ཁང་པའི་སྒོ་ན་འདུག་སྟེ་གཏམ་གྱིས་སྦྱོར་བར་གནས་པ་དང་། བྲམ་ཟེ་མོ་དེ་འོངས་ན་སྨྲས་པ། འཕགས་པ་ཁྱེད་རྣམས་ནི་རབ་ཏུ་བྱུང་བ་ལགས་སོ་སྙམ་ནས་བདག་ཅག་བག་ཕེབས་པས་འགྲོ་ཞིང་རྒྱུ་བར་བྱའོ་
སྙམ་དུ་བདག་སེམས་ན། གང་དགེ་སློང་མ་ཕམ་པ་འདིས་བདག་སྟོབས་ཀྱིས་གཟུང་ནས་གཞོན་ནུ་མའི་ཚུལ་ཉམས་པར་བྱས་ན། ཅི་རིགས་པ་ལགས་སམ་དེ་ནས་དགེ་སློང་དེ་རྣམས་ཀྱིས་རྣ་བ་བཀག་སྟེ། སྲིང་མོ་དེ་སྐད་མ་ཟེར་ཅིག །འདི་ནི་མཉན་པར་བྱ་བ་མ་ཡིན་ནོ། །དེ་ནས་ཆོས་སྟོན་པའི་དགེ་སློང་
དེས་ལེགས་པར་བྱས་པ་མ་ཡིན་ནོ། །ལེགས་པར་བྱས་པ་མ་བྱས་པ་ཡིན་ནོ་ཞེས་ཟེར་ཞིང་དགེ་སློང་མ་ཕམ་པའི་གྲགས་པ་མ་ཡིན་པ་སྒྲོགས་སོ། །ཅི་ཙམ་ན་ཐོས་པ་གཅིག་ནས་གཅིག་ཏུ་བརྒྱུད་པས་དགེ་སློང་མ་ཕམ་པས་ཐོས་སོ། །ཐོས་ནས་ཀྱང་སྨྲས་པ། སུ་ཞིག་དེ་སྐད་ཟེར། ཡང་སྨྲས་པ། དགེ་
སློང་ཆོས་སྟོན་པ་འདི་དེ་སྐད་ཟེར་རོ། །དེ་ནས་དེ་ཆོས་སྨྲ་བའི་དགེ་སློང་གང་ན་བ་དེར་སོང་སྟེ་ཕྱིན་ནས་ཀྱང་སྨྲས་པ། བཙུན་པ་བདག་གིས་ཁྱེད་ལ་གནོད་པ་ཅི་ཞིག་བྱས་ན་གང་འདི་ལྟ་བུའི་བསྔགས་པ་མ་ཡིན་པ་སྒྲོགས་པར་བྱེད། དེས་དེ་ལ་སེམས་ཤིན་ཏུ་འཁྲུགས་པས་ངག་གི་ལས་ཤིན་ཏུ་མི་
བཟད་པ་སྨྲས་པ། ཁྱོད་ཀྱིས་ནི་གང་གིས་གསལ་ཤིང་ལ་གཟུགས་པར་འོས་པ་དེ་བྱས་སོ། །དེ་ཐོས་པ་དང་དགེ་སློང་མ་ཕམ་པ་འདི་སྙམ་དུ་སེམས་ཏེ། དཀའ་ཐུབ་ཅན་འདི་ནི་ཉེ་བར་བཅོམ་ཞིང་ཉམས་པར་གྱུར་ཏོ་སྙམ་ནས། ཆོས་གོས་དང་ལྷུང་བཟེད་བླངས་ཏེ། ཇི་ལྟར་ཡོངས་སུ་ལོངས་
སྤྱོད་པའི་མལ་སྟན་བསྡུས་ནས་གཙུག་ལག་ཁང་དེ་ནས་བྱུང་སྟེ་ཆས་སོ། །དེ་ཆས་པ་མཐོང་ནས་དགེ་སློང་དང་། དགེ་སློང་མ་དང་། ཡུལ་དེ་ན་གནས་པའི་སྐྱེ་བོའི་ཚོགས་རྣམས་དེ་བཟློག་པའི་ཕྱིར་ཕྱི་བཞིན་འབྲངས་སོ། །ཆོས་སྨྲ་བའི་དགེ་སློང་དེ་ཡང་འདི་སྙམ་དུ་ངས་ནི་བཟང་པོ་བྱས་པ་

མ་ཡིན་ཏེ། གང་རྙེད་པ་དང་བཀུར་སྟི་ཙམ་གྱི་ཕྱིར་འདི་ལྟ་བུའི་ངན་སོང་ཙམ་དུ་འགྲོ་བར་འཇུག་པའི་ལས་བྱེད་པ་ལ་ཞུགས་པ་ནི་བདག་གིས་ལེགས་པར་བྱས་པ་མ་ཡིན་ནོ་སྙམ་ནས་འགྱོད་པ་སྐྱེས་ཏེ། ཡིད་མི་བདེ་བར་གྱུར་ནས་བསམས་པ། སོང་ལ་བཟོད་པར་གསོལ་བར་བྱའོ་སྙམ་ནས་རིངས་པ་
རིངས་པར་གཙུག་ལག་ཁང་དེ་ནས་བྱུང་སྟེ། ཤིན་ཏུ་སྐྱོ་བའི་ཡིད་དང་། མཆི་མའི་རྒྱུན་གྱིས་བརླན་པར་གྱུར་པའི་དམན་པའི་བཞིན་དང་། བྱིས་པ་གཞོན་ནུ་བཞིན་དུ་གསང་མཐོན་པོས་ངུ་ཞིང་བྲམ་ཟེ་དང་། ཁྱིམ་བདག་བརྒྱ་སྟོང་དཔག་ཏུ་མེད་པས་མཐོང་ཞིང་དགེ་སློང་མ་ཕམ་པའི་རྐང་པ་ལ་ཕྱག་བྱས་
ནས། མི་རིགས་པར་བགྱིས་ཀྱི་མཐོལ་ལོ་མཐོལ་ལོ་ཞེས་འཆགས་པར་རྩོམ་སྟེ། བཙུན་པ་བྱིས་པ་ཇི་ལྟ་བ་དང་། རྨོངས་པ་ཇི་ལྟ་བ་དང་། བྱེ་བྲག་མི་ཕྱེད་པ་ཇི་ལྟ་བའི་དགེ་བས་རྙེད་པ་དང་། བཀུར་སྟི་ཟིལ་གྱིས་མནན་ཏེ། བདག་གིས་ཁྱེད་ལ་མེད་བཞིན་དུ་བསྔགས་པ་མ་ཡིན་པ་བསྒྲགས་པ་དེ་བཟོད་པར་
མཛོད་ཅིག །མི་རིགས་པར་བགྱིས་པ་དེ་འཆགས་ཀྱི་ཐུགས་བརྩེ་བས་ཟུང་ལ་བཟོད་པ་མཛོད་ཅིག །དགེ་སློང་མ་ཕམ་པས་ཚེ་དང་ལྡན་པ་བཟོད་པ་གྱིས་ཞེས་སྨྲས་ཏེ། ཤིན་ཏུ་སྐྱོ་བའི་སེམས་དང་ཤིང་དྲུང་གཞན་ཞིག་ལ་རྟེན་ཅིང་འདུག་ནས་སྐྱིལ་མོ་ཀྲུང་བཅས་ཏེ་ལུས་དྲང་པོར་བསྲང་ནས་དྲན་པ་
ཉེ་བར་བཞག་སྟེ། དེས་དེ་ཉིད་དུ་ཤིན་ཏུ་སྐྱོ་བས་བརླན་པར་བྱས་པའི་སེམས་དང་། འབད་ཅིང་རྩོལ་ལ། བརྩོན་འགྲུས་བརྩམས་པས་འཁོར་བའི་འཁོར་ལོ་ཕོལ་མིག་ལྔ་དང་བཅས་པ་གཡོ་བ་དང་མི་གཡོ་བ་ཤེས་ནས། ཇི་སྲིད་དབང་པོ་དང་། ཉེ་དབང་དང་བཅས་པའི་ལྷ་རྣམས་ཀྱིས་མཆོད་ཅིང་རྗེད་ལ།
མངོན་པར་བསྟོད་པའི་དགྲ་བཅོམ་པ་ཞིག་ཏུ་གྱུར་ནས། དེ་ངང་པའི་རྒྱལ་པོ་འདབ་མ་བརྐྱང་བ་བཞིན་དུ་ནམ་མཁའི་དཀྱིལ་དུ་མངོན་པར་འཕགས་ཏེ་སྐྱེ་བོའི་ཚོགས་ཆེན་པོ་ཡིད་མངོན་པར་དད་པར་བྱེད་པའི་ཆོ་འཕྲུལ་སྣ་ཚོགས་པ་བྱ་བར་བརྩམས་སོ། །དགེ་སློང་ཆོས་སྨྲ་བ་དེ་ཡང་ནམ་མཁའི་དཀྱིལ་
ན་གནས་པ་དེ་ལ་བལྟས་ཏེ། ཀྱི་ཧུད་འདི་ལྟ་བུའི་དྲང་སྲོང་ཆེན་པོ་ལ་ངན་སེམས་ཀྱིས་སྨད་ཅིང་སྐུར་བ་བཏབ་བོ་ཞེས་སྨྲས་ནས་བརྒྱལ་ཏེ་ས་ལ་འགྱེལ་བར་གྱུར་ཏོ། །བར་སྐབས་དེར་ཡང་དག་པར་རྫོགས་པའི་སངས་རྒྱས་ཟླ་བ་ཐུགས་རྗེ་ཆེན་པོས་ཡོངས་སུ་གདུངས་པའི་ཐུགས་དང་ལྡན་པས་དགེ་སློང་ཆོས་སྨྲ་བ་ཁྲག་

དྲོན་མོ་སྐྱུགས་ནས་འཆི་བར་གྱུར་ན་མི་རུང་ངོ་སྙམ་དུ་དགོངས་ནས་རྫུ་འཕྲུལ་གྱིས་ས་ཕྱོགས་དེར་གཤེགས་སོ། །དེ་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཟླ་བས་འཁོར་ལོ་དང་། གཡུང་དྲུང་དང་། དགའ་བ་འཁྱིལ་པ་དང་། དྲ་བས་འབྲེལ་བ་དང་། བསོད་ནམས་དཔག་
ཏུ་མེད་པ་ལས་བྱུང་བ་དང་། སྐྲག་པ་རྣམས་དབུགས་འབྱིན་པར་མཛད་པའི་ཕྱག་གིས་དགེ་སློང་ཆོས་སྨྲ་བའི་མགོ་ལ་བྱུགས་སོ། །དེས་རེག་པ་ཙམ་གྱིས་དྲན་པ་སླར་རྙེད་དེ་ལངས་ནས་བཅོམ་ལྡན་འདས་དང་། དགེ་སློང་གི་དགེ་འདུན་ལ་བདག་ནི་མི་རིགས་པའོ་ཞེས་འཆགས་པར་བརྩམས་སོ། །དེ་ནས་
བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཟླ་བས་དེའི་ཚེ་ཚིགས་སུ་བཅད་དེ་གསུངས་པ། སྐྱེས་བུ་སྐྱེས་པའི་ཁ་ནས་ནི། །ཚིག་ངན་སྨྲ་བར་བྱེད་པ་ཡི། །ཚིག་གི་སྟ་རེ་སྐྱེས་གྱུར་ནས། །བདག་ཉིད་གཅོད་པར་བྱེད་པར་འགྱུར། །གང་ཞིག་སྨད་འོས་སྐྱེ་བོ་སྟོད་བྱེད་དང་། །བསྟོད་འོས་སྐྱེ་བོ་རྣམ་
པར་སྨོད་བྱེད་པ། །དེ་ནི་ཁའི་འཐབ་ཀྲོལ་ཀུན་སྩོགས་ཤིང་། །འཐབ་ཀྲོལ་ཅན་གང་དེས་ནི་བདེ་མི་འཐོབ། །གང་འདིར་ཆོ་ལོས་རང་ནོར་ཕམ་བྱེད་པ། །འཐབ་ཀྲོལ་དེ་ནི་ཅུང་ཟད་ཙམ་དུ་ཟད། །གང་ཡིད་བདེ་བར་གཤེགས་ལ་ཡིད་འཁྲུགས་པ། །དེ་འདིར་འཐབ་ཀྲོལ་ཤིན་ཏུ་ཆེན་པོ་ཡིན། །ངག་ཡིད་
འཕགས་པས་སྨད་པའི་སྡིག་བསྟེན་ན། །བྱེ་བ་ཆུ་བུར་ཅན་དང་སྟོང་ཕྲག་ནི། །བཞི་བཅུ་གཅིག་ཏུ་ཆུ་བུར་རྡོལ་བ་ཡི། །སེམས་ཅན་དམྱལ་བ་རྣམས་སུ་སྐྱེ་བར་འགྱུར། །སྡིག་པའི་སེམས་ཀྱིས་མ་ཉེས་སྐྱོན་བརྗོད་པ། །བདག་ཉིད་བསད་ཕྱིར་དམྱལ་བ་སྤེལ་བར་ཟད། །སྟོབས་ལྡན་ཉེས་མེད་པ་དག་
བཟོད་བྱེད་ཅིང་། །དེ་ལ་སེམས་ཀྱང་འཁྲུགས་པར་མི་བྱེད་དོ། །སེམས་ནི་འཁྲུགས་པར་གྱུར་པའི་རྒྱུས། །སེམས་ཅན་ངན་འགྲོར་འགྲོ་འགྱུར་ལ། །སེམས་ནི་རབ་ཏུ་དང་བའི་རྒྱུས། །སེམས་ཅན་བདེ་འགྲོ་རྣམས་སུ་འགྲོ། །དེ་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཟླ་བས་ཇི་སྲིད་
ཆོས་དང་ལྡན་པའི་གཏམ་གྱིས་ཡང་དག་པར་མགུ་བར་གྱུར་གྱི་བར་དུ་མཛད་དེ། གདན་ལས་བཞེངས་ནས་གཤེགས་སོ། །རྒྱལ་པོ་ཆེན་པོ་ཇི་སྙམ་དུ་སེམས། །དེའི་ཚེ་དེའི་དུས་ན་དགེ་སློང་ཆོས་སྟོན་པ་དེ་གཞན་ཞིག་ཡིན་པ་སྙམ་དུ་སེམས་ན་དེ་ལྟར་མི་བལྟ་སྟེ། གཞན་དུ་ན་དགེ་སློང་གསེར་མདོག་

འདི་ཉིད་ཡིན་ཏེ། དེའི་ཚེ་དེའི་དུས་ན་དགེ་སློང་དེ་ལ་སེམས་འཁྲུགས་ཤིང་ངག་གི་ལས་རྩུབ་པ་སྨྲས་པས་ལས་དེའི་རྣམ་པར་སྨིན་པས་སྐྱེ་བ་ལྔ་བརྒྱའི་བར་དུ་སེམས་ཅན་དམྱལ་བ་ཉམས་སུ་མྱོང་ནས། མིར་སྐྱེས་ནས་ཀྱང་སྐྱེ་བ་ལྔ་བརྒྱའི་བར་དུ་ཉེས་པ་མེད་ཅིང་གནོད་པ་མི་བྱེད་བཞིན་དུ་གསལ་ཤིང་ལ་
བསྐྱོན་ཏེ། ད་ལྟར་ཡང་ལས་དེ་ཉིད་ཀྱི་དབང་གིས་ཡང་གནོད་པ་མི་བྱེད་པར་གསལ་ཤིང་ལ་བསྐྱོན་པ་ཡིན་ནོ། །གལ་ཏེ་འདི་ལས་དེ་མི་རིགས་པ་ཡིན་པར་ཕན་ཚུན་བཤགས་པ་མ་བྱས་ན་ནི་སེམས་ཅན་དམྱལ་བ་རེ་རེར་ཡང་སྐྱེ་བ་ལྔ་བརྒྱ་ལྔ་བརྒྱ་མྱོང་བར་འགྱུར་ཞིང་། སྐྱེ་བ་ལྔ་བརྒྱར་ནི་ཡི་དགས་རྣམས་
སུ། སྐྱེ་བ་ལྔ་བརྒྱར་ནི་དུད་འགྲོ་རྣམས་སུ་སྐྱེ་བར་འགྱུར་རོ། །གང་ཡང་འདིས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཟླ་བའི་བསྟན་པ་ལ་རབ་ཏུ་བྱུང་སྟེ། ཚངས་པར་སྤྱོད་པ་སྤྱད་པས་ལས་དེའི་རྣམ་པར་སྨིན་པས་ད་ལྟར་ཡང་འདི་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་སྟེ། ཉོན་མོངས་
པ་ཐམས་ཅད་སྤངས་ནས་དགྲ་བཅོམ་པའི་འབྲས་བུ་ཉིད་མངོན་སུམ་དུ་བྱས་པ་ཡིན་ནོ། །རྒྱལ་པོ་ཆེན་པོ་དེ་བས་ན་བདག་སྡུག་བསྔལ་བར་མི་འདོད་པས་གཞན་དག་ལ་ཐ་ན་སེམས་ཀྱིས་སྨད་པ་ཙམ་ཡང་མི་བྱའོ། །གྲགས་པ་མེད་པས་འཇིགས་པས་གཞན་དག་ལ་གྲགས་པ་མ་ཡིན་པ་བསྒྲགས་པར་མི་
བྱའོ། །བདག་ཉིད་བདེ་བར་འདོད་པས་གཞན་རྣམས་ཀྱི་བདེ་བ་དབྲོག་པར་མི་བྱའོ། །དེ་ནས་ཆོས་ཀྱི་རྣམ་གྲངས་འདི་བསྟན་པ་ན་སྲོག་ཆགས་བརྒྱ་སྟོང་དུ་མ་དཔག་ཏུ་མེད་པས་ཁྱད་པར་རྟོགས་པར་གྱུར་ཏེ། ལ་ལ་ནི་རྒྱུན་དུ་ཞུགས་པའི་འབྲས་བུ་དང་། ལ་ལ་ནི་ལན་ཅིག་ཕྱིར་འོང་པའི་འབྲས་
བུའོ། །ལ་ལ་ནི་རབ་ཏུ་བྱུང་བས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱས་སོ། །ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལ་ལ་ནི་ཉན་ཐོས་ཀྱི་བྱང་ཆུབ་བོ། །ལ་ལ་ནི་སྐྱབས་སུ་སོང་ཞིང་བསླབ་པའི་གཞི་རབ་ཏུ་བཟུང་བར་གྱུར་
ཏོ། །ཡང་འཁོར་ཕལ་མོ་ཆེ་སངས་རྒྱས་ལ་གཞོལ་བ་དང་། ཆོས་ལ་བབ་པ་དང་། དགེ་འདུན་ལ་བབ་པ་ལ་བཞག་པར་གྱུར་ཏོ། །དེ་ནས་དེད་དཔོན་ཉི་མ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ཏེ་གནས་བརྟན་ཀུན་དགའ་བོ་ལ་འདི་སྐད་

ཅེས་གསོལ་ཏོ། །འཕགས་པ་ཀུན་དགའ་བོ་བདག་གིས་སངས་རྒྱས་ལ་སོགས་པའི་དགེ་སློང་གི་དགེ་འདུན་རྣམས་ལྡུམ་བུའི་ནང་དུ་སྤྱན་དྲངས་ལ་ཞལ་ཟས་རོ་དྲུག་ཅུ་པའི་བཤོས་དྲངས་ཏེ། དགེ་སློང་རེ་རེ་ཞིང་སྲང་འབུམ་རི་བའི་ཆོས་གོས་དབུལ་བར་བྱའོ་སྙམ་དུ་དགོངས་ན་
བཅོམ་ལྡན་འདས་དེ་ཡོངས་སུ་མྱ་ངན་ལས་འདས་པས། ད་ནི་འཕགས་པ་ཀུན་དགའ་བོ་ལ་སོགས་པ་དགེ་སློང་གི་དགེ་འདུན་རྣམས་ལ་བཤོས་གཙང་སྦྱར་བར་འཚལ་ལོ། །གནས་བརྟན་ཀུན་དགའ་བོས་བཀའ་སྩལ་པ། དེད་དཔོན་དེ་བཞིན་དུ་གྱིས་ཤིག །ངས་ཇི་ལྟར་བཅོམ་ལྡན་འདས་ཀྱི་
ཉན་ཐོས་ཀྱི་དགེ་འདུན་འཛམ་བུའི་གླིང་ན་ཇི་སྙེད་ཅིག་གནས་པ་ཐམས་ཅད་འདིར་འདུ་བར་འགྱུར་བ་དེ་ལྟར་བྱའོ། །དེ་ནས་དེད་དཔོན་ཉི་མ་རབ་ཏུ་དགའ་བས་རྒྱས་པའི་ཡིད་དང་། རྒྱལ་པོའི་ཁབ་ཀྱི་གྲོང་ཁྱེར་གྱི་ཕྱི་རོལ་འདུ་བའི་གནས་རྡོ་དང་གྱོ་མོ་དང་གསེག་མ་བསལ་ཏེ། ཙན་དན་གྱི་ཆུས་ཆག་
ཆག་བཏབ་ནས་གདུགས་དང་། རྒྱལ་མཚན་དང་། བ་དན་བསྒྲེངས་ཏེ། མུ་ཏིག་དང་། གོས་ཀྱི་ཆུན་འཕྱང་གདགས་ཤིང་། མེ་ཏོག་སྣ་ཚོགས་ཀྱི་གཅལ་བཀྲམ་པ་དང་། སྤོས་དྲི་ཞིམ་པོའི་སྤོས་སྣོད་ཉེ་བར་བཀྲམ་པ་དང་། ཤིན་ཏུ་མཛེས་པའི་བླ་རེ་དང་། རྟ་བབས་བྲེས་པས་ཤིན་ཏུ་ཉམས་
དགའ་བ་བྱེད་དུ་བཅུག་སྟེ། དེ་ཉིད་ཀྱི་མཚན་མོ་གཙང་ཞིང་བསོད་པའི་བཟའ་པ་དང་བཅའ་བ་རྣམས་གཡོས་ཏེ། ནང་པར་སྔ་བ་ཉིད་དུ་ལངས་ནས་གདན་བཤམས་ཏེ། ཆུ་བཞག་ནས། གནས་བརྟན་ཀུན་དགའ་བོ་ལ་ཕོ་ཉས་དུས་ལ་བབ་པར་གསོལ་པ། བཙུན་པ་བཟའ་བ་དང་། བཅའ་བ་
རྣམས་སྟ་གོན་བགྱིས་ལགས་ཏེ། ད་དེ་དུས་ལ་བབ་པ་ལགས་པར་མཁྱེན་པར་མཛད་དུ་གསོལ། དེ་ནས་གནས་བརྟན་ཀུན་དགའ་བོ་རྫུ་འཕྲུལ་གྱིས་ནམ་མཁའི་དཀྱིལ་དུ་མངོན་པར་འཕགས་ཏེ། འཛམ་བུའི་གླིང་འདི་མ་ལུས་པར་གསེར་བཙོ་མ་ལྟ་བུའི་མདོག་གིས་ཀུན་དུ་སྣང་བར་མཛད་ནས་
རང་ཉིད་ཀྱིས་གཎྜཱི་བརྡུངས་ཏེ། ཆུ་དང་བཅས་པའི་སྤྲིན་གྱིས་འབྲུག་སྒྲ་བཞིན་དུ་ཟབ་ཅིང་གསལ་བའི་སྐད་ཀྱིས་སྒྲ་བསྒྲགས་པ། བཅོམ་ལྡན་འདས་ཀྱི་ཉན་ཐོས་ལས་གང་རྫུ་འཕྲུལ་ཐོབ་པ་རྣམས་ནི་རང་ཉིད་ཀྱི་རྫུ་འཕྲུལ་གྱིས་ཤོག་ཤིག །གང་དག་སོ་སོའི་སྐྱེ་བོ་རྣམས་ནི་ངའི་རྫུ་འཕྲུལ་

གྱིས་ཤོག་ཤིག །དེ་ནས་གྷཎྜཱི་དེ་ཐོས་པས་ཁ་བ་ཅན་དང་། འབིགས་བྱེད་དང་མ་ལ་ཡ་དང་། བ་རི་ཡ་ཏྲ་དང་སྤོས་ཀྱི་ངད་ལྡང་དང་། རིའི་རྒྱལ་པོ་རི་རབ་དང་། གཉའ་ཤིང་འཛིན་དང་། གཤོལ་མདའ་འཛིན་དང་། སེང་ལྡེང་ཅན་དང་། བལྟ་ན་སྡུག་དང་། རྟ་རྣ་རིན་དང་། རྣམ་པར་འདུད་དང་། མུ་
ཁྱུད་འཛིན་ལ་སོགས་པ་ནགས་ཚལ་དང་། འབབ་ཆུ་དང་གཡའ་ཆུ་དང་། རྒྱ་མཚོ་དང་། གྲོང་རྡལ་དང་། ཤིང་གི་མཆོག་དང་། གཙུག་ལག་ཁང་རྣམས་ན་གང་དག་གནས་པ་དང་། ཆུ་མདོ་དང་། ཁང་སྟོང་དང་། དུར་ཁྲོད་ལ་སོགས་པ་ན་དགེ་སློང་གང་ཞིག་ཏིང་ངེ་འཛིན་ལ་སྙོམས་པར་ཞུགས་
ཤིང་བདེ་བ་ཐོབ་ནས་རབ་ཏུ་གནས་པ་རྣམས་སྐད་ཅིག་མ་དེ་ལ་དེ་དག་ཐམས་ཅད་ནམ་མཁའི་ངོས་ནས་ཨ་ཤོ་ཀ་དང་། ཀིང་ཤུ་ཀ་དང་། ཟངས་དང་། དུས་མཚམས་ཀྱི་སྤྲིན་དྲི་མ་མེད་པས་ནམ་མཁའ་ཁེབས་པ་དེ་ལྟ་བུར་བྱས་ཏེ། རྒྱལ་པོའི་ཁབ་ཀྱི་གྲོང་ཁྱེར་དུ་ལྷགས་ནས་འདུ་བའི་གནས་དེར་འཚོགས་
ཏེ། སྐད་ཅིག་མ་དེ་ཉིད་ལ་དགེ་སློང་བྱེ་བ་ཕྲག་གསུམ་ཡང་དག་པར་འདུས་པར་གྱུར་ཏེ། བྱེ་བ་གཅིག་ནི་ཟག་པ་ཟད་པ་རྣམས་སོ། །གཉིས་པ་ནི་བསླབ་པ་ལ་ཞུགས་པ་རྣམས་སོ། །གསུམ་པ་ནི་སོ་སོའི་སྐྱེ་བོ་དགེ་བ་ཅན་རྣམས་ཏེ། དེ་ནས་རྒན་པའི་རིམ་པ་ཇི་ལྟ་བ་བཞིན་དུ་གདན་བཤམས་པ་ལ་
བཞུགས་སོ། །དེ་ནས་དེད་དཔོན་ཉི་མས་གནས་བརྟན་ཀུན་དགའ་བོ་ལ་སོགས་པ། དགེ་སློང་གི་དགེ་འདུན་རྣམས་བདེ་བར་གཤེགས་པར་རིག་ནས་གཙང་ཞིང་བསོད་པའི་བཟའ་བ་དང་། བཏུང་བ་རྣམས་རང་གི་ལག་ནས་ཀུན་དུ་ཚིམ་པར་བསྟབས་ཏེ། ཇི་སྲིད་དགེ་སློང་གི་དགེ་འདུན་གྱིས་ལོངས་སྤྱད་པར་རིག་
ནས། བྱག་བཅབས་ཤིང་ལྷུང་བཟེད་བསྡུས་ནས་ཆོས་གོས་གསུམ་པོ་བརྒྱ་སྟོང་དུ་མ་གསོལ་བར་འདོད་ནས་དགེ་སློང་དང་དགེ་འདུན་དེ་རྣམས་ལ་བལྟས་པ་དང་། ཡིད་ཤིན་ཏུ་དགའ་བ་སྐྱེས་པར་གྱུར་ཏོ། །དགེ་སློང་གསེར་མདོག་གིས་བསམ་པ་ཤེས་ནས་སྨྲས་པ། ཡབ་ཁྱེད་ཐུགས་ལས་ཆུང་བར་མཛོད་
ཅིག །བདག་ཉིད་ཀྱིས་དགེ་སློང་གི་དགེ་འདུན་ལ་གསེར་གྱི་མདོག་ཅན་གྱི་ཆོས་གོས་གསུམ་གསུམ་དབུལ་བར་བགྱིའོ། །དེ་ནས་དགེ་སློང་གསེར་མདོག་གི་རང་གི་ལུས་ལས་གསེར་གྱི་མདོག་ཅན་གྱི་གོས་ཕུད་ཅིང་ཕུད་ཅིང་སྲང་འབུམ་རི་བའི་ཆོས་གོས་གསུམ་གསུམ་དགེ་སློང་བྱེ་བ་ཕྲག་གསུམ་ལ་རྒན་པའི་རིམ་པ་

བཞིན་དུ་བསྟབས་སོ། །བར་སྐབས་དེར་ལྷ་བརྒྱ་སྟོང་དུ་མས་ཅ་ཅོའི་སྒྲ་སྒྲོགས་ཤིང་རོལ་མོ་སྣ་ཚོགས་ཡང་དག་པར་རྡུང་བ་དང་། ལྷའི་མེ་ཏོག་དང་། ཕྱེ་མ་དང་། གོས་ཀྱི་ཆར་ཕབ་པར་གྱུར་ཏོ། །ཇི་ལྟར་ཕྱོགས་དེར་ཕྱོགས་སྣ་ཚོགས་ནས་ལྷགས་པའི་སྐྱེ་བོའི་ཚོགས་རྣམས་དང་།
རྒྱལ་པོ་མ་སྐྱེས་དགྲ་བཙུན་མོ་དང་། གཞོན་ནུ་དང་། བློན་པོ་དང་། གྲོང་ཁྱེར་པ་རྣམས་དང་། སྐྱེ་བོའི་ཚོགས་དང་བཅས་པ་དེ་རྣམས་ཀྱིས་རྣམ་པ་དེ་ལྟ་བུའི་ངོ་མཚར་ལ་བལྟས་ནས་རྨད་དུ་བྱུང་ནས་མིག་གདངས་ཏེ། ལན་གསུམ་གྱི་བར་དུ་ཆེད་དུ་བརྗོད་པ་ཆེད་དུ་བརྗོད་དེ། ཨེ་མའོ་བསོད་ནམས་ཀྱི་
འབྲས་བུའི་རྣམ་པར་སྨིན་པ། ཨེ་མའོ་བསོད་ནམས་ཀྱི་སྟོབས། ཨེ་མའོ་སྦྱིན་གནས་ཀྱི་ཞིང་ལ་སྦྱིན་པའི་ས་བོན་བཏབ་པའི་རྣམ་པར་སྨིན་པར་གདའ་བར་མི་བྱེད་པ་ཡིན་ན། མཁས་པ་སུ་ཞིག་གིས་རྣམ་པ་འདི་ལྟ་བུའི་བསོད་ནམས་ཀྱི་འབྲས་བུའི་རྣམ་པར་སྨིན་པ་ཡང་དག་པར་མཐོང་ན། སྦྱིན་
པའི་ཞིང་ལ་སུ་ཞིག་སྦྱིན་པར་མི་བྱེད་ཅེས་ཟེར་ཞིང་། དེ་ལྟར་སྲོག་ཆགས་བརྒྱ་སྟོང་དུ་མ་རྣམས་ཐལ་མོ་སྦྱར་ཏེ། སྒྲ་གསང་མཐོན་པོས་སངས་རྒྱས་ལ་ཕྱག་འཚལ་ཞེས་ཟེར་བར་གྱུར་ཏོ། །དེ་ནས་གནས་བརྟན་ཀུན་དགའ་བོས་སྦྱིན་པའི་རབ་བཏོན་པ་མཛད་དོ། །དེ་ནས་དེད་དཔོན་ཉི་མ་སྟན་
ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། པུས་མོ་གཉིས་ས་ལ་བཙུགས་ཏེ། གནས་བརྟན་ཀུན་དགའ་བོ་གང་ན་བ་དེར་ཐལ་མོ་སྦྱར་ཏེ། ཕྱག་བྱས་ནས་ལན་གསུམ་གྱི་བར་དུ་ཆེད་དུ་བརྗོད་པ་ཆེད་དུ་བརྗོད་དེ། བཙུན་པ་གང་བདག་ཅག་ལ་འཕགས་པ་ཀུན་དགའ་བོས་
མཛད་པ་འདི་ནི་མས་ཀྱང་མ་བགྱིས། ཕས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། ནང་མི་དང་ཉེ་དུའི་ཚོགས་ཡིད་དུ་འོང་བས་ཀྱང་མ་བགྱིས། སྔོན་གུམས་པ་རྣམས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་སྐམས་པ་ནས། །ལྷ་དང་
ལྷ་མིན་རྣམས་ཀྱིས་མཆོད་གྱུར་ཅིང་། །སྐྱེ་བ་རྒ་ཤིའི་སྐྱོན་དང་རྣམ་བྲལ་བས། །སྲིད་པ་བརྒྱ་སྟོང་དག་ན་མཐོང་དགའ་བ། །ཐུབ་པ་ཁྱོད་མཐོང་དེང་བདག་འབྲས་ལྡན་གྱུར། །དེ་ནས་གནས་བརྟན་ཀུན་དགའ་བོས་རྒྱལ་པོ་དང་བཅས་པའི་འཁོར་དེ་རྣམས་ཆོས་དང་ལྡན་པའི་གཏམ་ཡང་དག་པར་

བསྟན་པ་དང་། ཡང་དག་པར་འཛིན་དུ་འཇུག་པར་མཛད་པ་དང་། ཡང་དག་པར་གཟེངས་བསྟོད་པ་དང་། ཡང་དག་པར་རབ་ཏུ་དགའ་བར་མཛད་ནས་ལྷ་བརྒྱ་སྟོང་དེ་དག་དང་། རྒྱལ་པོའི་ཁབ་ན་གནས་པའི་སྲོག་ཆགས་བརྒྱ་སྟོང་གིས་ཕྱག་བྱས་ནས་གདན་ལས་བཞེངས་ཏེ་གཤེགས་སོ། །དེ་ལྟར་ན་
སངས་རྒྱས་བཅོམ་ལྡན་འདས་ལ་ནི་བྱ་བ་ཅུང་ཟད་ཅིག་བྱས་ན་ཡང་འབྲས་བུ་ཆེན་པོར་འགྱུར་བ་ཡིན་ནོ། །གསེར་མདོག་གི་རྟོགས་པ་བརྗོད་པ་རྫོགས་སོ།། །།རྒྱ་གར་གྱི་མཁན་པོ་དྷརྨ་ཤྲཱི་བྷ་དྲ་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པོ།། །།
༄༅༅། །རྒྱ་གར་སྐད་དུ། ཀུ་ན་ལ་ཨ་བ་དཱ་ནཾ། བོད་སྐད་དུ། ཀུ་ན་ལའི་རྟོགས་པ་བརྗོད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཀུ་ན་ལའི་རྟོགས་པ་བརྗོད་པ་ལ། འདི་ལྟར་རྒྱལ་པོ་ཨ་ཤོ་ཀའི་ན་ཚོད་གསུམ་གྱི་ཚད་དུ་གྱུར་པ་ལ། དེ་ན་ཚོད་དང་པོ་ལ་ནི་
འདོད་པའི་ཨ་ཤོ་ཀར་གྱུར་ཏོ། །ན་ཚོད་གཉིས་པ་ལ་ནི་གཏུམ་པའི་ཨ་ཤོ་ཀར་གྱུར་ཏེ། གང་གིས་བཙོན་ར་བཟང་པོ་བྱས་ནས་སྐྱེ་བོ་བྱེ་བའི་སྲོག་བརླག་པར་གྱུར་ཏོ། །ན་ཚོད་གསུམ་པ་ལ་ནི་ཆོས་ཀྱི་ཨ་ཤོ་ཀར་གྱུར་ཏེ། གང་གིས་ཆོས་ཀྱི་རྒྱལ་པོ་པ་བརྒྱད་ཁྲི་བཞི་སྟོང་རབ་ཏུ་གནས་ཤིང་སྤྱན་ཕྱེའོ། །དེ་
ནས་ཉི་མ་དེ་ཉིད་ལ་རྒྱལ་པོ་ཨ་ཤོ་ཀའི་བཙུན་མོ་པདྨ་ཅན་ཞེས་བྱ་བ་ལ་བུ་བཙས་པ་དང་། དེ་ལས་བུ་གཟུགས་བཟང་བ་མཛེས་པ་བལྟ་ན་སྡུག་པ་དེའི་མིག་ཤིན་ཏུ་མཛེས་པ་ཞིག་སྐྱེས་སོ། །དེ་ནས་སྐྱེས་བུ་ཉུང་རུམ་ཞིག་རྒྱལ་པོའི་ཁབ་ཏུ་སོང་སྟེ་སྨྲས་པ། ལྷ་ཁྱེད་ལ་སྲས་བལྟམ་གྱིས་དགྱེས་པ་བསྐྱེད་དུ་གསོལ།
རྒྱལ་པོས་སྨྲས་པ། དེང་ནི་ང་ཡིས་དགའ་བ་རྒྱ་ཆེན་ཐོབ། །དཔའ་བོའི་རིགས་ཀྱི་སྒྲ་ནི་གྲགས་གྱུར་ཅིང་། །ཆོས་ཀྱིས་རྒྱལ་སྲིད་རྣམ་པར་འཕེལ་བ་ན། །བུ་སྐྱེས་པས་ནི་ཆོས་ཀྱི་རྣམ་འཕེལ་འགྱུར། །དེ་ནས་རྒྱལ་པོ་མྱ་ངན་མེད་དེས་བཙས་སྟོན་བྱ་བར་བརྩམས་ཏེ། གྲོང་ཁྱེར་པ་ཏ་ལི་པུ་ཏྲ་ཐམས་ཅད་
དང་ལྡན་པ་ལེགས་པར་ཆག་ཆག་བཏབ་ཅིང་ཕྱག་དར་བྱས་ཤིང་སྦྱངས་ཏེ། རྡོ་དང་། གསེག་མ་དང་། གྱོ་མོ་བསལ་ཞིང་། ཤིང་དང་། སོ་ཕག་དང་། མི་གཙང་བའི་འདམ་རྫབ་དང་། ཕྱག་དར་གྱི་ཚོགས་མེད་པར་བྱས་ནས་དར་དང་མེ་ཏོག་གི་ཆུན་འཕྱང་བཏགས་ཏེ། བདུག་སྤོས་ཀྱི་སྣོད་ནས་སྤོས་གཏུལ་

ནས་ཁྱིམ་དང་། སྲང་བར་དང་། བཞི་མདོ་དང་། སུམ་མདོ་ལ་སོགས་པ་བརྒྱན་པར་བྱས་པ་ནི་འདི་ལྟ་སྟེ། རས་དང་། དར་དང་། བེའུ་རས་དང་། དར་ལྭ་དང་། ཟར་མའི་རས་དང་། དུ་གུ་ལའི་རས་དང་། རས་ཡུག་ཆེན་ལ་སོགས་པ་བཏགས་པ་དང་། རྔ་ཡབ་དང་། མཛེས་པའི་
གདུ་བུ་དང་། དཔུང་རྒྱན་དང་། དོ་ཤལ་དང་། སེ་མོ་དོ་དང་། མུ་ཏིག་གི་ཆུན་འཕྱང་དང་། དྲིལ་བུ་དང་། ནོར་བུ་ཆུ་ཤེལ་དང་། མེ་ཤེལ་ལ་སོགས་པ་དང་། ནོར་བུ་ཆེན་པོའི་རྣ་རྒྱན་བཏགས་པ་དང་། བ་དན་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་བསྒྲེང་བའི་
ཤིང་དང་། ཁྱིམ་ལ་བཏགས་པ་དང་། རས་ཀྱི་བླ་རེ་དང་། དར་གྱི་བླ་རེས་སྤུད་པས་གྲོང་ཁྱེར་པ་ཏ་ལི་པུ་ཏྲ་ཀུན་ནས་དྲི་ཟའི་རྒྱལ་པོའི་གནས་དང་འདྲ་བར་རྣམ་པར་བཞག་པར་གྱུར་ཏོ། །པ་ཏ་ལི་པུ་ཏྲ་དང་། པ་ཏ་ལི་པུ་ཏྲའི་ཉེ་འཁོར་ཇི་སྙེད་པར་སིལ་སྙན་གྱི་སྒྲ་སྒྲོགས་པ་རྣམས་རབ་ཏུ་གནས་པ་ནི་
འདི་ལྟ་སྟེ། གར་མཁན་དང་། གར་སྟོན་པ་དང་། གཏམ་བརྗོད་པ་དང་། བཞད་གད་བྱེད་པ་དང་། མཛེས་བྱེད་པ་དང་། གླུ་ལེན་པ་དང་མིག་འཕྲུལ་མཁན་དང་། མཆོད་པ་དང་། བུད་མེད་ཀྱི་ཆ་ལུགས་འགེབས་པ་དང་། ཁར་གསིལ་དཀྲོལ་བ་དང་། རྔ་རྐེད་ཉག་རྡུང་བ་དང་། བྱིས་པ་ལྔ་
ཚོམས་པ་དང་། སྲང་བར་ན་རྩེ་བ་སྟེ། དེ་དག་ཐམས་ཅད་སྲང་དང་། སྲང་བར་དང་། བཞི་མདོ་དང་སུམ་མདོ་དེ་ཐམས་ཅད་དུ་རང་རང་གི་བྱ་བ་ཐམས་ཅད་ཀྱིས་མཛེས་པར་བྱས་སོ། །གྲོང་ཁྱེར་གྱི་སྒོ་བཞིར་ཡང་སྦྱིན་པ་ནི་གཏོང་། བསོད་ནམས་དག་བྱེད་པ་ནི་འདི་ལྟ་སྟེ། ཟས་འདོད་པ་རྣམས་
ལ་ནི་ཟས། གོས་འདོད་པ་རྣམས་ལ་ནི་གོས། དྲི་དང་། ཕྲེང་བ་དང་། བྱུག་པ་འདོད་པ་རྣམས་ལ་ནི་དྲི་དང་ཕྲེང་བ་དང་། བྱུག་པ། རས་ཟུང་དང་། རས་ཡ་བ་དང་། ཀཱཪྵཱ་པ་ཎ་འདོད་པ་རྣམས་ལ་ནི། རས་ཟུང་དང་རས་ཡ་བ་དང་ཀཱཪྵཱ་པ་ཎ་སྦྱིན་པར་བྱེད་པ་དང་། རབ་ཏུ་དགའ་བའི་རོལ་མོ་རྣམས་
རྡུང་། སྤྱི་བོ་ལ་ཏིལ་མར་གྱིས་ནི་ཉུག་པར་བྱེད་དོ། །ཞག་གཅིག་ལ་ཇི་ལྟ་བ་དེ་བཞིན་དུ་གསུམ་པ་ནས་བདུན་པ་ནས། ཉིན་ཞག་ཉི་ཤུ་རྩ་གཅིག་གི་བར་དུ་བཙས་སྟོན་རྒྱ་ཆེར་བྱས་ཏེ། པང་ན་འཚོ་བའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། རྩེད་གྲོགས་

ཀྱི་མ་མ་གཉིས་ཏེ་མ་མ་བརྒྱད་ལ་གཏད་དོ། །དེ་ལྟར་གཞོན་ནུ་དེ་མ་མ་བརྒྱད་པོ་ཐམས་ཅད་ཀྱིས་རང་གི་བཟོ་ལེགས་པར་བྱས་པས་ཡོངས་སུ་བསྐྱངས་ཤིང་། མཁས་པ་དང་ལྡན་པ་རྣམས་ཀྱིས་འོ་མ་དང་། མར་སར་དང་། ཞོ་དང་། མར་གྱི་སྙིང་པོ་དང་། སྦྲང་རྩིས་སྐྱེད་པར་བྱེད་པར་རྩོམ་པར་གྱུར་ཏོ། །དེ་
ནས་རྒྱལ་པོ་ཨ་ཤོ་ཀ་བུ་བལྟ་བར་མངོན་པར་དགའ་བས་སླས་རྣམས་ལ་གཞོན་ནུ་ཅི་འདྲ་བ་བལྟ་བར་བྱའོ་ཞེས་སྨྲས་སོ། །དེ་ནས་མ་མ་རྣམས་ཀྱིས་རྒྱལ་པོ་ལ་བསྟན་པའི་ཕྱིར་ཁྱེར་བ་དང་། མཐོང་ནས་རྒྱལ་པོས་གཞོན་ནུའི་མིང་ཇི་ལྟར་གདགས་པར་བྱ་ཞེས་བསམས་པ་དང་། གང་གི་ཕྱིར་འདི་ནི་ང་ལ་ཆོས་
རབ་ཏུ་ཞུགས་པ་ན་སྐྱེས་པས་ན་དེའི་ཕྱིར་ཆོས་འཕེལ་བ་ཉིད་དུ་མིང་གདགས་པར་བྱའོ་ཞེས་སྨྲས་ནས། གཞོན་ནུ་རྒྱལ་པོ་ཨ་ཤོ་ཀས་བླངས་སོ། །དེ་ནས་རྒྱལ་པོས་གཞོན་ནུ་ལ་བལྟས་ནས་དགའ་བཞིན་དུ་སྨྲས་པ། ངའི་བུ་ལ་མིག་བཟང་ལེགས་སྐྱེས་པ། །ཨུཏྤལ་སྔོ་འདྲ་རབ་ཡངས་རྫི་མ་ཅན། །གང་
གིས་བཞིན་རྒྱན་མཛེས་པར་བྱས་པ་ནི། །སྒྲ་གཅན་ཁ་ལས་ཐར་པའི་ཟླ་བ་འདྲ། །ཇི་ཙམ་ན་རྒྱལ་པོས་བློན་པོ་རྣམས་ལ་སྨྲས་པ། ཁྱེད་རྣམས་ཀྱིས་འགའ་ཞིག་ལ་འདི་ལྟ་བུའི་མིག་ཡོད་པ་མཐོང་ངམ། བློན་པོ་རྣམས་ཀྱིས་སྨྲས་པ། ལྷ་མ་མཐོང་ལགས་སོ། །དེ་ནས་དེ་ན་གནས་པའི་འཁོར་རྣམས་ལ་དེ་
སྐད་རྒྱལ་པོས་སྨྲས་པ་དང་། རིའི་རྒྱལ་པོ་ཁ་བ་ཅན་ན་ལོར་བསྟེན་པའི་བྲམ་ཟེ་རྣམས་དེ་ཉིད་དུ་ལྷགས་པ་དང་། དེ་རྣམས་ལ་རྒྱལ་པོས་གཞོན་ནུ་བསྟན་ཏེ། ཁྱེད་རྣམས་ཀྱིས་ཀྱང་འགའ་ཞིག་ལ་འདི་ལྟ་བུའི་མིག་ཡོད་པར་མཐོང་ངམ། ལྷ་མིར་གྱུར་པ་རྣམས་ལ་ནི་མ་མཐོང་སྟེ། དེ་ལྟ་མོད་ཀྱི་འོན་ཀྱང་
ལྷ་རིའི་རྒྱལ་པོ་ཁ་བ་ཅན་ན་ཀུ་ན་ལ་ཞེས་བྱ་བའི་བྱ་དེ་ལ་འདི་ལྟ་བུའི་མིག་མཆིས་སོ། །ཡང་སྨྲས་པ། རི་རྒྱལ་ཁ་བ་ཅན་ནི་བྲག་གི་རྩེ། །མེ་ཏོག་མང་ཞིང་ཆུ་ཕྲན་རབ་འབབ་པ། །དེ་ན་ཀུ་ན་ལ་ཞེས་བྱ་བའི་བྱ། །འདི་ཡི་མིག་དང་རྣམ་པར་འདྲ་བ་ཡོད། །དེ་ནས་རྒྱལ་པོས་བྱ་ཀུ་ན་ལ་མྱུར་དུ་ཁྱེར་ལ་ཤོག་
ཅིག་ཅེས་སྨྲས་པ་དང་། དེའི་སྟེང་གི་དཔག་ཚད་ཅིག་ཙམ་དུ་གནོད་སྦྱིན་རྣམས་ཀྱིས་ཐོས་སོ། །འོག་གི་དཔག་ཚད་གཅིག་ཙམ་དུ་ནི་ཀླུ་རྣམས་ཀྱིས་ཐོས་སོ། །དེ་ནས་གནོད་སྦྱིན་གྱིས་སྐད་ཅིག་མ་དེ་ཉིད་ལ་བྱ་ཀུ་ན་ལ་ཁྱེར་ཏེ་འོངས་སོ། །དེ་རྒྱལ་པོས་གཞོན་ནུ་དང་། ཀུ་ན་ལའི་མིག་ལ་ཤིན་ཏུ་ཡུན་རིང་

བར་བརྟགས་ན་ཁྱད་པར་ཅུང་ཟད་ཀྱང་མ་རྟོགས་སོ། །དེ་ནས་རྒྱལ་པོས་སྨྲས་པ། ཨེ་མ་ཧོ། གཞོན་ནུ་དང་། ཀུ་ན་ལའི་མིག་ཤིན་ཏུ་འདྲ་བ་ཡིན་པས་ན་གཞོན་ནུ་ལ་མིང་ཀུ་ན་ལ་ཞེས་གདགས་པར་བྱའོ། །ཡང་སྨྲས་པ། ས་བདག་དེ་ནི་མིག་ལ་རྗེས་དགའ་བས། །དེ་ཚེ་བུ་ལ་ཀུ་ན་
ལ་ཞེས་སྨྲས། །དེ་ནས་འཕགས་པའི་སེམས་ཅན་རྒྱལ་པོའི་བུ། །དེ་ཡི་མིང་ནི་ས་སྟེངས་རབ་ཏུ་གྲགས། །དེ་ནས་རྒྱ་ཆེར་གཞོན་ནུ་ཆེན་པོར་གྱུར་བའི་བར་དུ་སྟེ། དེ་ལ་གསེར་ཕྲེང་ཅན་ཞེས་བྱ་བའི་བུ་མོ་ཆུང་མའི་དོན་དུ་བཀུག་ནས་བྱིན་ཏེ། ཕའི་བཟོའི་གནས་དང་ལས་ཀྱི་གནས་འདི་ལྟ་སྟེ། གླང་པོ་
ཆེའི་གཉར་བཞོན་པ་དང་། རྟ་ལ་བཞོན་པ་དང་། ཤིང་རྟའི་ཐབས་དང་། མདའ་གཞུའི་ཐབས་དང་། ལྕགས་ཀྱུས་བསྒྱུར་བའི་ཐབས་དང་། མདའ་བོ་ཆེ་འཕེན་པའི་ཐབས་དང་། ལྕགས་མདའ་འཕེན་པའི་ཐབས་དང་། ཐག་མདུང་འཕེན་པའི་ཐབས་དང་། མདུན་དུ་བསྣུར་བ་དང་།
ཕྱིར་བསྣུར་བ་དང་། བཅད་པ་དང་། དྲལ་བ་དང་། རྒྱང་ནས་ཕོག་པ་དང་། སྒྲ་གྲགས་པར་ཕོག་པ་དང་། གནད་དུ་ཕོག་པ་དང་། མི་འཆོར་བར་ཕོག་པ་དང་། ཚབས་ཆེ་བ་དང་། དགས་པ་དང་། འཛིན་སྟངས་དང་། གོམ་སྟངས་ལ་བྱང་བར་གྱུར་ཏོ། །རྒྱལ་པོ་ཨ་ཤོ་ཀས་དེའི་དོན་དུ་ཁྱིམ་
གསུམ་བྱེད་དུ་བཅུག་སྟེ། གཅིག་ནི་རྒུན་གྱིའོ། །གཉིས་པ་ནི་སོ་གའི་འོ། །གསུམ་པ་ནི་དབྱར་གྱིའོ། །དེ་ལ་རེ་ཞིག་རྒུན་གྱི་ནི་གཅིག་ཏུ་དྲོ་བའོ། །སོ་གའི་ནི་གཅིག་ཏུ་བསིལ་བའོ། །དབྱར་གྱི་ནི་དེ་གཉིས་ཀ་ཡོད་པ་སྟེ། ཤིན་ཏུ་གྲང་བ་ཡང་མ་ཡིན། ཤིན་ཏུ་དྲོ་བ་ཡང་མ་ཡིན་པའོ། །ཆུང་མ་
རྣམ་པ་གསུམ་འཇོག་སྟེ། ཆེ་བ་དང་བར་མ་དང་ཆུང་བའོ། །དེ་ནས་གཞོན་ནུ་ལྷའི་བུ་མོ་དང་འདྲ་བའི་བུད་མེད་ཀྱི་རབ་མཆོག་དགོད་པ་དང་མིག་ཟུར་དང་སྟེག་པ་དང་། སྒེག་པ་དང་། གར་དང་། གླུའི་ཉེ་བར་སྤྱོད་པ་ལ་མཁས་པ་རྣམས་དང་ལྷན་ཅིག་ཁང་བཟངས་ཀྱི་སྟེང་གི་གཞིར་གཏོགས་པ་ན་བཙུན་མོ་
གསེར་ཕྲེང་ཅན་དང་ལྷན་ཅིག་དགའ་བ་དང་། རྩེ་བ་དང་། ཡོངས་སུ་སྤྱོད་པ་ནས་ཇི་སྲིད་དུས་གཞན་ཞིག་ན་རྒྱལ་པོ་ཀུན་ལ་དང་ལྷན་ཅིག་ཁྱིམ་བྱའི་ཀུན་དགའ་ར་བར་སོང་བ་དང་། དེ་ནས་གནས་བརྟན་གྲགས་པ་མངོན་པར་ཤེས་པ་དྲུག་དང་ལྡན་པ་དེས་མཐོང་ངོ་། །མཐོང་ནས་ཀྱང་ཀུ་ན་ལའི་མིག་ནི་ཡུན་རིང་

པོར་མི་ཐོགས་པར་འཇིག་པར་འགྱུར་རོ་སྙམ་ནས་དེས་རྒྱལ་པོ་ལ་སྨྲས་པ། ཅིའི་ཕྱིར་གཞོན་ནུ་རང་གི་ལས་མ་སྦྱར། དེ་ནས་རྒྱལ་པོས་ཀུ་ན་ལ་ལ་སྨྲས་པ། ཀུ་ན་ལ་དགེ་འདུན་གྱི་གནས་བརྟན་ཇི་སྐད་གསུངས་པ་དེ་དྲིས་ཤིག །དེ་ནས་གཞོན་ནུས་གནས་བརྟན་གྱི་རྐང་པ་གཉིས་ལ་བཏུད་དེ་སྨྲས་པ། གནས་བརྟན་
ཅི་ཞིག་བཀའ་སྩལ། གནས་བརྟན་གྱིས་སྨྲས་པ། ཀུ་ན་ལ་མིག་ནི་མི་རྟག་པའོ་ཞེས་ཡིད་ལ་གྱིས་ཤིག །ཡང་སྨྲས་པ། གང་དུ་འགྲོ་མང་རྗེས་སུ་ཆགས་གྱུར་ནས། །མི་ཕན་ཐོབ་པའི་ལས་རྣམས་བྱེད་པ་ཡི། །མིག་ནི་རབ་གཡོ་སྡུག་བསྔལ་སྟོང་ལྡན་པར། །རྟག་ཏུ་སོ་སོར་རྟོག་བྱོས་ཀུ་ན་ལ། །དེ་དེ་
བཞིན་དུ་སློབ་པར་བྱེད་པའི་ཡིད་ལ་བྱེད་པ་དང་རབ་ཏུ་ལྡན་ཞིང་གཅིག་པུར་མངོན་པར་དགའ་བ་དང་། རབ་ཏུ་ཞི་བ་ལ་མངོན་པར་དགའ་བར་གྱུར་ཏོ། །དེ་ཡང་རྒྱལ་པོའི་ཕོ་བྲང་གི་གནས་དབེན་པར་འདུག་ཅིང་། མིག་གི་ཉེས་དམིགས་དང་། སྐྱེ་མཆེད་མི་རྟག་པ་ལ་སོགས་པའི་རྣམ་པར་ཡོངས་སུ་
རྟོག་པར་བྱེད་དོ། །དེ་ནས་རྒྱལ་སྲུང་མ་ཞེས་བྱ་བའི་བཙུན་མོ་དམ་པ་ཕྱོགས་དེར་ཉེ་བར་སོང་བ་དང་། དེས་ཀུ་ན་ལ་དེ་གཅིག་པུ་འདུག་པ་མཐོང་ནས། མིག་ལ་རྗེས་སུ་ཆགས་པས་ལུས་ལ་ཀུན་དུ་འཁྱུད་དེ། སྨྲས་པ། ཁྱེད་ཀྱི་ལུས་ལས་ངེས་བབ་པའི། །འདོད་ཆགས་མེ་ནི་སྟོབས་ཅན་གྱིས། །
ནགས་མེ་སྟོབས་ཅན་གཡོ་བ་ནི། །མང་པོས་རྣམ་པར་བསྲེགས་པར་གྱུར། །གཞོན་ནུ་བདག་དང་ལྷན་ཅིག་ཏུ། །དགའ་བ་རྗེས་སུ་མྱོང་བར་བྱ། །དེས་ཐོས་པ་དང་། ཀུ་ན་ལས་ལག་པ་གཉིས་ཀྱིས་རྣ་བ་བཀག་སྟེ་སྨྲས་པ། ཁྱེད་ནི་ཚིག་འདི་སྨྲ་བར་མི་རིགས་ཏེ། །བུ་ཡི་མ་བཞིན་ཁྱེད་ནི་བདག་
གི་མ། །འདི་ནི་ངན་འགྲོའི་ལམ་གྱི་སྒོ་ཡིན་པས། །ཆོས་མིན་འདོད་ཆགས་ཡོངས་སུ་སྤང་བར་གྱིས། །དེ་ནས་རྒྱལ་སྲུང་མས་སྨྲས་པ། །འདིར་ཉེས་པ་ཅི་ཞིག་མཐོང་། །གཞན་ཡང་གཞོན་ནུ་རེ་ཞིག་ཉོན་ཅིག །དཔེར་ན་ཉི་མའི་གཟི་བརྗིད་བསྟན་པའི་ཚ་བས་གདུངས་ཏེ་ཆུ་ནི་འཐུངས་པ་
དང་། ཇི་ལྟར་ལུས་ནི་ཆུ་ཡིས་ཚིམ་བར་བྱེད་ལ་སྡིག་པ་ཡོད་པར་རིགས་མ་ཡིན། །དེ་བཞིན་འདོད་པའི་མེ་ནི་ཆེན་པོས་ལྷག་པར་ཤིན་ཏུ་གདུངས་པར་གྱུར་པ་ན། །ལུས་ལ་རེག་པའི་ཆུ་ཡི་དགའ་བ་དེ་ལས་ཆོས་མིན་ཅི་ཞིག་འབྱུང་། །ཀུ་ན་ལས་སྨྲས་པ། ང་ཡི་གྲགས་པར་མི་འགྱུར་མཆོག་ཏུ་བརྙས་

ཤིང་ཕྱི་ནས་རྗེས་སུ་འགྱོད་པར་འགྱུར། །ང་ཡི་ཀུན་དུ་སྤྱོད་པར་མི་འགྱུར་དེ་བཞིན་རིགས་ཉམས་པ་ཡང་ཉིད་དུ་འགྱུར། །འཕགས་པ་ཉིད་དུ་མི་འགྱུར་བཀྲེན་འགྱུར་ངན་པར་ཚིག་གིས་ཆད་པ་བཅད་པར་འགྱུར། །སྤྱོས་པས་འགྱུར་གྱི་གྲགས་པར་མི་འགྱུར་ཆོས་ཀྱང་མི་སྣང་ཉིད་དུ་
འགྱུར་བའོ། །རྒྱལ་སྲུང་མས་སྨྲས་པ། ཀུ་ན་ལ་དེ་ལྟ་ཡིན་མོད་ཀྱི་གང་ཁྱེད་འཇིགས་པར་འགྱུར་བ་འདི་འགའ་ཞིག་གིས་མཐོང་ནས་གྲགས་པར་འགྱུར་བ་མ་ཡིན་ཏེ། དེ་ཡང་རྣམ་པར་དབེན་ཞིང་མིའི་འདུ་བ་དང་བྲལ་བའི་ཕྱིར་རོ། །ཡང་སྨྲས་པ། ཡུ་བུའི་མཐོང་ནས་སྨྲ་བ་ནི། །བུད་མེད་དག་གམ་
སླས་རྣམས་ཀྱང་། །གང་ཡང་ཡོད་པ་མ་ཡིན་ཏེ། །དེ་བས་བདག་གི་ཚིག་ཉོན་ཅིག །འདོད་དང་བཅས་པའི་བུད་མེད་ནི། །དབེན་པར་ཡོངས་སུ་སྤོང་བྱེད་ན། །དེ་ཡི་ཆོས་ཆེན་འཇིག་འགྱུར་ཞེས། །ཐོས་པ་ལས་གྲགས་ཐོས་སམ་ཅི། །གཟུགས་ཀྱི་རྗེས་སུ་མཐུན་པ་ཡི། །སྦྱིན་གནས་སྡིག་མེད་
མཐོང་ནས་ནི། །དེར་གང་ལེགས་པའི་མདངས་རྣམས་དང་། །ན་ཚོད་དང་ནི་འདྲ་བར་གྱིས། །ཀུ་ན་ལས་སྨྲས་པ། གང་ཁྱོད་ཀྱིས་འདི་ན་གནས་ཀྱང་མི་མཐོང་ངོ་ཞེས་སྨྲས་ན། དེ་རེ་ཞིག་ཉོན་ཅིག །འདི་ནི་གཟི་བརྗིད་འབར་བའི་ཤིང་ལ་གནས་པའི་མེ་ལྷས་བདག་ནི་མཐོང་གྱུར་ལ། །ཚངས་པས་
མཐོང་ཞིང་བརྒྱ་བྱིན་དག་དང་ཆུ་ལྷ་ཟླ་བ་གཤིན་རྗེ་དག་གིས་མཐོང་། །གཞན་ཡང་གཞལ་ཡས་ཁང་པ་མཆོག་ན་གནས་པ་གཞན་གྱིས་ངེས་པར་མཐོང་འགྱུར་ན། །བྱིས་པ་ཁྱེད་ཀྱིས་བདག་དང་གཉེན་གྱི་སྐྱེ་བོ་མི་མཐོང་རང་ཡང་མཐོང་མ་གྱུར། །མི་ནི་གང་ཞིག་དབེན་པར་མེར་འཇུག་བྱེད་ན་དེ་ཅི་མེ་ཡིས་
མི་འཚིག་གམ། །གང་ཞིག་དྲེགས་པས་འབྲས་བུ་མངར་ལྟར་དུག་ཟ་དེ་ནི་ཉམས་པར་མི་འགྱུར་རམ། །མི་ནི་གང་ཞིག་བྲང་འགྲོ་གདུག་པས་ཟིན་པ་དེ་ནི་གནོད་པར་མི་འགྱུར་རམ། །མི་ནི་གང་ཞིག་དབེན་པར་གཏོགས་པར་སྡིག་བྱས་གོས་པར་མི་འགྱུར་དེ་མི་སྲིད། །དེ་ནས་རྒྱལ་སྲུང་མས་སྨྲས་པ།
གཞོན་ནུ་རེ་ཞིག་ཁྱོད་དེ་ལྟར་བུར་ཞེན་པས་གནས་པར་མ་བྱེད་ཅིག །དེ་ཡང་། དུས་ཀྱི་སྒོ་ཡི་རྫོང་དང་བིནྡའི་རིགས་ཡང་འདོད་པའི་དོན་དུ་རབ་འཇུག་ལ། །འདོད་པའི་རྒྱ་མཚོའི་ཆུ་ཡང་རྒལ་ཅིང་མཛའ་བོ་གང་ཡིན་དག་ཀྱང་འབྱེ་བ་ཡོད། །འདོད་པའི་ཕྱིར་ནི་བརྟུལ་ཞུགས་ཐལ་བ་ཤིང་གོས་འཆང་

པའི་དཀའ་ཐུབ་དེས་དེ་ཐུབ། དེ་འདིར་བདེ་བ་ཡང་དག་ཐོབ་པ་འདི་ལ་ཅི་ཕྱིར་ཀུན་དུ་ཆགས་མི་བྱེད། །ཀུ་ན་ལས་སྨྲས་པ། ཁྱེད་ཀྱིས་ང་ནི་ཟིལ་གནོད་མི་འགྱུར་ཏེ། །ལྷ་ཡི་བུ་མོ་འདྲ་བའི་བུད་མེད་དག །དེ་ཡང་དམྱལ་བའི་སྡུག་བསྔལ་ཡོད་པས་ན། །གཞན་གྱི་བུད་མེད་ཡོངས་སུ་སྤང་བ་
ཡིན། །དེ་ནས་རྒྱལ་སྲུང་མས་རང་གི་འདོད་པའི་རྣམ་པ་ཐོབ་པར་མ་གྱུར་པས། །ཁྲོས་ཏེ་སྨྲས་པ། ཤིན་ཏུ་འདོད་པས་གདུངས་པར་གྱུར་བ་ན། །གལ་ཏེ་འདི་ན་ང་ཡིས་མི་འདོད་ན། །བློ་ངན་ཁྱོད་ནི་རིང་པོར་མི་ཐོགས་པར། །དངོས་པོ་ཐམས་ཅད་མེད་པར་འགྱུར་དུ་འོང་། །མིག་ནི་གཉིས་པོ་གང་
ཡིན་པས། །ཁྱོད་ནི་འདི་ན་དྲེགས་ཐོབ་པ། །མི་རིང་བ་ནི་དེ་དག་གིས། །རྒུད་པར་གྱུར་ལ་བལྟ་བར་བྱ། །ཀུ་ན་ལས་སྨྲས་པ། ཆོས་ནི་རྣམ་དག་གྱུར་ན་བདག་ནི་མྱུར་དུ་འཆི་བར་གནས་པར་གྱུར་ཀྱང་བླ། །སྐྱེ་བོ་དམ་པས་བདག་སྨད་གྱུར་པའི་འཚོ་བ་བདག་ལ་དགོས་མ་ཡིན། །གང་ལས་མཐོ་རིས་དག་
དང་ཆོས་འཇིག་འགྱུར་བའི་འཚོ་དེས་ཅི་ཞིག་བྱ། །མཁས་པས་ཟིལ་གྱིས་མནན་པའི་བཀྲེན་གྱུར་བདག་ནི་འཆི་བ་ཉིད་ཡིན་མོད། །ཇི་ཙམ་ན་རྒྱལ་སྲུང་མ་དེ་ཀུ་ན་ལ་ལ་གླགས་སྐབས་ཚོལ་ཞིང་གནས་པར་གྱུར་ཏོ། །དེ་ནས་རྒྱལ་པོ་ཨ་ཤོ་ཀས་བྱང་ཕྱོགས་ཀྱི་གྲོང་ཁྱེར་རྡོ་འཇོག་པ་དང་རྩོད་པར་གྱུར་
པ་ཐོས་པ་དང་། རྒྱལ་པོ་རང་ཉིད་ཆས་པར་གྱུར་ཏོ། །དེ་ནས་བློན་པོ་རྣམས་ཀྱིས་སྨྲས་པ། ལྷ་གཞོན་ནུ་བརྫང་དུ་གསོལ། དེས་ནི་ཐུལ་པར་འགྱུར་ལགས་སོ། །དེ་ནས་རྒྱལ་པོས་ཀུ་ན་ལ་བོས་ཏེ་སྨྲས་པ། ཀུ་ན་ལ་གྲོང་ཁྱེར་རྡོ་འཇོག་འདུལ་བར་འགྲོ་ནུས་སམ། ཀུ་ན་ལས་སྨྲས་པ། ལྷ་རབ་
ཏུ་མཆི་ལགས་སོ། །དེ་ནས་རྒྱལ་པོས་ཡིད་ལ་རབ་དད་པའི། །བུ་ཞེས་བྱ་བའི་བསམ་པ་ཤེས་པ་དང་། །བརྩེ་དང་ཕུན་ཚོགས་ན་ཚོད་ལ་རིགས་པའི། །ཆད་པའི་རྐྱེན་ནི་ལུང་དུ་བསྒོ་བར་གྱུར། །དེ་ནས་རྒྱལ་པོ་ཨ་ཤོ་ཀས་གྲོང་ཁྱེར་བརྒྱན་པ་དང་། ལམ་མཛེས་པར་བྱས་ཏེ། རྒན་པོ་དང་།
ནད་པ་དང་། བཀྲེན་པ་རྣམས་རང་གི་ལམ་ནས་བསལ་ཏེ། གཞོན་ནུ་དང་ལྷན་ཅིག་ཤིང་རྟ་ལ་ཞོན་ཏེ། བ་ཏ་ལི་པུ་ཏྲ་ནས་བྱུང་ཏེ་བསྐྱལ་ནས། ལྡོག་པ་ན་ཀུ་ན་ལའི་མདུན་ནས་ཡོངས་སུ་འཁྱུད་ནས་མིག་ལྟ་ཞིང་ངུས་ཏེ་སྨྲས་པ། འདབ་ཆགས་རབ་མཆོག་ཀུ་ན་ལ་མཚུངས་པའི། །མིག་ནི་

ཡངས་ཤིང་ཨུཏྤལ་སྔོན་པོ་དང་། །འདྲ་བ་འདི་ལ་བལྟ་བ་གང་ཡིན་པ། །དེར་ནི་དཔལ་ཡོད་བདེ་ལྡན་རིམས་ནད་བྲལ། །ཇི་ཙམ་ན་བྲམ་ཟེ་མཚན་མཁན་ཞིག་གིས་མཐོང་བ་དང་། ཀུ་ན་ལའི་མིག་ནི་ཡུན་རིང་པོ་མི་ཐོགས་པར་འགྱུར་ཏེ། རྒྱལ་པོ་ཨ་ཤོ་ཀས་དེའི་མིག་གཉིས་ལ་
ཤིན་ཏུ་ཆགས་པ་ལྟས་མཁན་དེས་མཐོང་ནས་སྨྲས་པ། མི་དབང་བུ་ཡི་མིག་ནི་རྣམ་དག་ལ། །ས་བདག་ཀྱང་ནི་མིག་ལ་རྗེས་ཆགས་པས། །རྣམ་དག་དཔལ་ལམ་ཡིད་དང་རྗེས་མཐུན་པ། །རིང་པོ་མི་ཐོགས་འཇིག་པར་འགྱུར་བ་མཐོང་། །ལྷ་ཡུལ་ལྟ་བུར་རབ་དགའི་གྲོང་ཁྱེར་འདི། །གཞོན་ནུ་
མཐོ་བ་ལས་བྱུང་སྐོམ་བ་དག །མིག་དང་བྲལ་ནས་འདི་ཡི་སེམས། །མྱ་ངན་དག་གིས་ཡོངས་སུ་གདུངས་པར་གྱུར། །ཅི་ཙམ་ན་ཀུ་ན་ལ་རིམ་གྱིས་གྲོང་ཁྱེར་རྡོ་འཇོག་ཏུ་ཉེ་བར་ཕྱིན་པ་དང་། རྡོ་འཇོག་གི་གྲོང་ཁྱེར་པས་ཐོས་ནས། དཔག་ཚད་ཕྱེད་དང་གསུམ་གྱི་བར་དུ་གྲོང་ཁྱེར་བརྒྱན་པ་དང་། ལམ་
མཛེས་པར་བྱས་ཏེ། བུམ་པ་གང་བ་མར་སར་གྱིས་བརྒྱན་པས་མདུན་བསུས་སོ། །ཡང་བཤད་པ། རྡོ་འཇོག་པ་ཡི་གྲོང་བས་ཐོས་ནས་ནི། །རིན་ཆེན་བུམ་གང་པ་ལ་སོགས་པ་ཡི། །མཆོད་པ་ཐོགས་ཏེ་མདུན་དུ་སོང་ནས་ནི། །ས་བདག་དེ་ལ་མང་དུ་རྗེད་པར་གྱུར། །མདུན་བསུས་ནས་ཐལ་མོ་སྦྱར་ཏེ་སྨྲས་
པ། བདག་ཅག་རྣམས་ནི་གཞོན་ནུ་ལ་འགལ་བར་བགྱིད་པ་ཡང་མ་ལགས་ལ། རྒྱལ་པོ་ཨ་ཤོ་ཀ་ལ་ཡང་མ་ལགས་མོད་ཀྱི། འོན་ཀྱང་བློན་པོ་མི་སྲུན་པ་དག་འོངས་ནས་བདག་ཅག་ལ་བརྙས་པར་བགྱིས་ལགས་མོད། ཅི་ཙམ་ན་ཀུ་ན་ལ་བསྙེན་བཀུར་ཆེན་པོས་གྲོང་ཁྱེར་རྡོ་འཇོག་ཏུ་ཞུགས་པར་གྱུར་
ཏོ། །དེ་ནས་རྒྱལ་པོ་ཨ་ཤོ་ཀ་ལ་ནད་ཆེན་པོ་ཞིག་བྱུང་བར་གྱུར་ཏེ། དེའི་ཁ་ནས་ངན་སྐྱུགས་འོང་ཞིང་། བ་སྤུའི་བུ་ག་ཐམས་ཅད་ནས་མི་གཙང་བ་འཛག་པར་གྱུར་ཀྱང་གསོ་བར་མ་ནུས་སོ། །དེ་ནས་རྒྱལ་པོས་སྨྲས་པ། ཀུ་ན་ལ་ཁུག་ཅིག །དེ་རྒྱལ་སྲིད་ལ་གཞག་པར་བྱ་སྟེ། ཁོ་བོ་ཡང་སླར་
འཚོ་བས་ཅི་ཞིག་བྱ། དེ་ཐོས་ནས་རྒྱལ་སྲུང་མས་བསམས་པ། གལ་ཏེ་ཀུ་ན་ལ་རྒྱལ་སྲིད་ལ་བཞག་ན། ངའི་འཚོ་བ་མེད་པར་འགྱུར་རོ་སྙམ་ནས་དེས་སྨྲས་པ། ལྷ་བདག་གིས་ཁྱེད་གསོས་པར་བགྱི་ལགས་ཀྱི། འོན་ཀྱང་སྨན་པ་རྣམས་ནང་དུ་མཆི་བ་དགག་ཏུ་གསོལ། ཇི་ཙམ་ན་རྒྱལ་པོས་

སྨན་པ་རྣམས་འོང་བ་བཀག་པར་གྱུར་ཏོ། །དེ་ནས་རྒྱལ་སྲུང་མས་སྨན་པ་རྣམས་ལ་སྨྲས་པ། གལ་ཏེ་སྐྱེས་པའམ། བུད་མེད་འདི་ལྟ་བུའི་ནད་ཀྱིས་ཟིན་པ་ཡོད་ན་དེ་ཁྱེད་རྣམས་ཀྱིས་ང་ལ་སྟོན་ཅིག །དེ་ནས་རི་ཁྲོད་པ་གཞན་ཞིག་དེ་ལྟ་བུའི་ནད་ཀྱིས་ཟིན་པ་དང་། དེའི་ཆུང་མས་སྨན་པ་ལ་ནད་དེ་
སྨྲས་པ་དང་། སྨན་པས་སྨྲས་པ། ནད་པ་དེ་ནི་འོང་དུ་ཆུག་ཅིག །ནད་བལྟས་ལ་སྨན་བསྟན་བར་བྱའོ། །ཅི་ཙམ་ན་དེ་བཀུག་ནས་སྨན་པའི་གམ་དུ་ཕྱིན་པ་དང་། སྨན་པས་རྒྱལ་སྲུང་མའི་གམ་དུ་ཁྱེར་རོ། །རྒྱལ་སྲུང་མས་ཀྱང་ཤིན་ཏུ་དབེན་པའི་ས་ཕྱོགས་སུ་དེ་བསད་ནས་བལྟས་པ་དང་། དེ་ཞུ་
བའི་གནས་ན་རྒྱུ་མར་འབུ་ཆེན་པོ་ཞིག་བྱུང་སྟེ། དེ་སྟེང་དུ་འགྲོ་བ་དང་། དེའི་ངན་སྐྱུགས་གྱེན་དུ་འབྱུང་ངོ་། །གལ་ཏེ་ཐུར་དུ་འགྲོ་ན་ནི་འོག་ཏུ་འབྱུང་ངོ་། །དེས་དེར་ན་ལེ་ཤམ་བཏགས་ཏེ་བླུགས་ཀྱང་མ་ཤིའོ། །དེ་བཞིན་དུ་པི་པི་ལིང་དང་། སྲིང་ག་དང་། ལན་ཚྭ་ལ་སོགས་པ་བླུད་པ་ནས་ཇི་ཙམ་ན་སྒོག་སྐྱ་བླུགས་པ་དང་།
རེག་པ་ཙམ་གྱིས་ཤི་ནས། བཤང་བའི་ལམ་ནས་བྱུང་ངོ་། །དེས་དེ་ལྟ་བུའི་རྣམ་པ་རྒྱལ་པོ་ལ་གོ་བར་བྱས་ཏེ། ལྷ་སྒོག་སྐྱ་གསོལ་ཅིག །དེས་ན་ཁྱེད་སོས་པར་འགྱུར་རོ། །རྒྱལ་པོས་སྨྲས་པ། ལྷ་མོ་ང་ནི་རྒྱལ་རིགས་སྤྱི་བོ་ནས་དབང་བསྐུར་བ་ཡིན་ན། ཇི་ལྟར་ན་སྒོག་པ་ལ་ཡོངས་སུ་ལོངས་སྤྱོད། བཙུན་
མོས་སྨྲས་པ། ལྷ་འདི་ནི་སྲོག་གི་དོན་གྱི་སྨན་ཡིན་པས་ཉེ་བར་སྤྱོད་པར་མཛོད་ཅིག །ཇི་ཙམ་ན་རྒྱལ་པོས་ཡོངས་སུ་ལོངས་སྤྱད་ནས་འབུ་དེ་ཡང་ཤི་སྟེ། བཤང་བའི་ལམ་ནས་བྱུང་ངོ་། །རྒྱལ་པོ་སོས་པར་གྱུར་ནས། དེས་རྒྱལ་སྲུང་མ་ལ་མཆོག་སྦྱིན་པར་བརྩམས་སོ། །ཁྱོད་ལ་
མཆོག་ནི་ཅི་ཞིག་སྦྱིན་པར་བྱ། དེས་སྨྲས་པ། བདག་ལ་ཞག་བདུན་གྱི་བར་དུ་རྒྱལ་སྲིད་གསོལ་ཅིག །འོ་ན་ཁོ་བོ་ཅིར་འགྱུར། བཙུན་མོས་སྨྲས་པ། ཞག་བདུན་འདས་པ་དང་ལྷ་ཉིད་རྒྱལ་པོ་མཛོད་ཅིག །ཅི་ཙམ་ན་རྒྱལ་སྲུང་མ་ལ་ཞག་བདུན་གྱི་བར་དུ་རྒྱལ་སྲིད་སྦྱིན་ནོ། །དེ་བློ་སྐྱེས་པ།
ད་ནི་བདག་གིས་ཀུ་ན་ལ་ལ་འཁོན་གཅུགས་མངོན་དུ་བྱའོ་ཞེས་དེས་རྡོ་འཇོག་པའི་གྲོང་ཁྱེར་པ་རྣམས་ཀྱིས་ཀུ་ན་ལའི་མིག་བརླག་པར་གྱིས་ཤིག་ཅེས་བཅོས་མའི་ཡི་གེ་བྲིས་ཏེ། དེ་ཡང་རྒྱལ་པོ་མྱ་ངན་མེད་ཀྱིས་བཀའ་སྩལ་པ། ཤིན་ཏུ་དཔའ་ཞིང་སྟོབས་དང་ཕ་རོལ་གནོན་པ་ཐོགས་པ་མེད་པའི་

རྩལ་གྱིས་རྣམ་པར་གནོན་པ་ཐོབ་པའི་རྒྱལ་པོ་རྒྱ་མཚོ་བཞི་དང་། སའི་བདག་པོའི་སྤྱི་བོའི་ཅོད་པན་གྱིས་སྟན་དང་། རྐང་པར་ཡོངས་སུ་གཏུགས་པ། མྱ་ངན་དང་བྲལ་ནས་མྱ་ངན་མེད་པ། མ་ག་དྷཱའི་གྲོང་ཁྱེར་ནས་པ་ཏ་ལི་པུ་ཏྲ་དང་། རྡོ་འཇོག་ལ་གནས་པའི་བར་ལ་རྒྱུན་མི་འཆད་པར་
དགེ་བའི་ལས་ཀྱི་རྩོམ་པས་ཉེ་བར་འཚོ་བ། སྡེ་ཚོམ་གསུམ་པའི་གྲོང་ཁྱེར་གྱི་སྐས་ལ་གནས་པའི་སྐྱེ་བོ་རྣམས་ལ་ཇི་ལྟར་གྲོང་ཁྱེར་པ་རྣམས་ཀྱིས་ཤེས་པར་འགྱུར་བ་དེ་ལྟར་ཁོང་དུ་ཆུད་པར་གྱིས་ཤིག །འདིར་ངའི་བུ་ཞེས་བཏགས་པའི་དགྲ་བཅོས་མའི་སྤྱོད་པ་འཇམ་པ་ལ་མཁས་པས་སྦྱར་
བའི་རྒྱུའི་བསྒྱིངས་པས་ཐལ་མོ་སྦྱར་བ་བྱས་པ། རིགས་ཀྱི་སོལ་བར་གྱུར་པའི་ཀུ་ན་ལ་དེས། ཤིན་ཏུ་གཅམ་བག་གི་ཚུལ་གྱིས་ཁོ་བོ་ཕེབས་པར་བྱས་ནས། བག་ཕེབས་པས་གནོད་པ་བྱེད་ཅིང་། བཙུན་མོའི་འཁོར་ལ་ལྟ་བར་བྱེད་པས། གང་གི་ཕྱིར་འདི་ནི་མ་བརྟགས་པར་བྱེད་པ། སྙིང་རྗེ་
མེད་པ། འཇིག་རྟེན་ཕ་རོལ་སྤངས་པ་ཕའི་ཆུང་མ་ལ་ཡོངས་སུ་ལྟ་བས་དེའི་མོད་ལ་དངོས་པོའི་རྗེས་སུ་ཞུགས་པ། གཟུགས་ཀྱིས་ཁེངས་ཤིང་མའི་ཕྱོགས་ལ་དྲེགས་པ་འཕེལ་བར་བྱེད་པ། རིགས་ཀྱི་ཆོས་ཀྱི་གཞུང་ལུགས་སུན་འབྱིན་པར་བྱེད་པའི་མིག་གཉིས་མྱུར་དུ་ཕྱུང་ནས་བཀྲེན་
པ་ཉིད་དུ་གྱིས་ལ་ཤིན་ཏུ་དེངས་པའི་གོས་བསྐོན་ཏེ། ཆུང་མ་དང་བཅས་པ་ཕྱི་རོལ་དུ་སྐྲོད་ཅིག །གང་གི་མིག་གཉིས་ཀྱིས་དྲེགས་ཤིང་ཁེངས་པར་བྱེད་པ་དེ་མེད་པར་གྱིས་ལ། དེ་ཡང་སྐྱེ་བོ་རྣམས་ཀྱིས་མཐོང་བར་གྱིས་ཤིག །དེའི་ལན་གྱི་ཡི་གེ་ཡང་གཏོང་བར་མ་བྱེད་ཅིག །བྱས་པ་མི་
གཟོ་བའི་ཕོངས་པ་ཐོས་པས་ཀྱང་ངའི་སྙིང་འདར་བར་མ་བྱེད་ཅིག །ངས་ཁྱེད་རྣམས་ལ་གཞུང་ལུགས་བཞག་པའི་ལུང་བསྒོ་བ་འདི་ཁྱེད་རྣམས་ཀྱིས་གྱིས་ཤིག །ཡང་སྨྲས་པ། རྒྱལ་པོ་མྱ་ངན་མེད་གཏུམ་སྟོབས་ལྡན་པའི། །བཀའ་བཞིན་རྡོ་འཇོག་གྲོང་ཁྱེར་པ་ཡིས་གྱིས། །རྒྱལ་པོ་
ལ་གནོད་ཀུ་ན་ལ་ཞེས་བྱའི། །མིག་གཉིས་མྱུར་དུ་དབྱུང་བ་ཉིད་དུ་གྱིས། །དེ་ལྟར་རྒྱལ་སྲུང་མ་དེས་ཡི་གེ་བྲིས་ནས། རྒྱལ་པོ་མྱ་ངན་མེད་པའི་སོའི་རྒྱས་ཡི་གེ་ལ་རྒྱ་གདབ་པར་བྱའོ་སྙམ་ནས། ཇི་ཙམ་ན་རྒྱལ་སྲུང་མས་ཡི་གེ་དེ་རྒྱལ་པོ་གཉིད་ལོག་པ་དང་སོའི་རྒྱས་གདབ་པར་བྱའོ་སྙམ་

ཏེ། རྒྱལ་པོ་དང་ཉེ་བར་སོང་བ་དང་རྒྱལ་པོ་སྐྲག་པས་སད་པར་གྱུར་ཏོ། །ཆུང་མས་སྨྲས་པ། ལྷ་འདི་ཅི་ཞིག་ལགས། རྒྱལ་པོས་སྨྲས་པ། ལྷ་མོ་ངས་རྨི་ལམ་མི་དགེ་བ་མཐོང་སྟེ། བྱ་རྒོད་གཉིས་ཀྱིས་ཀུ་ན་ལའི་མིག་འབྱིན་པར་འདོད་པར་མཐོང་ངོ་། །བཙུན་མོས་སྨྲས་པ་གཞོན་ནུ་བདེ་
བར་གནས་ལགས་ཀྱི། དེ་བཞིན་དུ་རྒྱལ་པོ་སྐྲག་པས་སད་ནས་སྨྲས་པ། ལྷ་མོངས་རྨི་ལམ་རྨིས་སོ། །རྒྱལ་སྲུང་མས་སྨྲས་པ། རྨི་ལམ་ཇི་ལྟ་བུ། རྒྱལ་པོས་སྨྲས་པ། ཀུ་ན་ལ་སྐྲ་དང་སེན་མོ་རིང་པོ་འཆང་ཞིང་གོས་དྲི་མ་ཅན་གྱོན་པ་མཐོང་ངོ་། །བཙུན་མོས་སྨྲས་པ། གཞོན་ནུ་
བདེ་བར་གནས་ལགས་ཀྱི། ཇི་ཙམ་ན་རྒྱལ་པོ་གཉིད་ཀྱིས་ལོག་པ་དང་། རྒྱལ་སྲུང་མས་ཡི་གེ་དེ་སོའི་རྒྱས་བཏབ་ནས་རྡོ་འཇོག་ཏུ་བསྐུར་རོ། །ཡང་རྒྱལ་པོ་གཉིད་ལོག་པ་ན་རང་གི་སོ་ལྷགས་པར་གྱུར་པ་རྨིས་སོ། །དེ་ནས་རྒྱལ་པོ་མཚན་མོ་དེ་ཉིད་འདས་པ་དང་། ལྟས་མཁན་རྣམས་
བོས་ཏེ་རྨི་ལམ་བཟླས་ནས་འདི་དག་སྟོན་པར་གྱིས་ཤིག་ཅེས་བསྒོའོ། །ལྟས་མཁན་རྣམས་ཀྱིས་སྨྲས་པ། ལྷ་གང་གིས་འདི་ལྟ་བུའི་ལྟས་མཐོང་བ་དེས་ནི་བུའི་མིག་འཇིག་པར་མཐོང་བར་འགྱུར་རོ། །ཡང་སྨྲས་པ། གང་གི་སོ་ནི་དེངས་པ་དང་། །རྨི་ལམ་ནང་ན་ལྷགས་གྱུར་པ། །བུ་ཡི་མིག་
ནི་འཇིག་པ་དང་། །བརླག་པའི་བུ་ནི་དེས་མཐོང་འགྱུར། །དེ་སྐད་ཐོས་པ་དང་། རྒྱལ་པོ་མྱ་ངན་མེད་སྟན་ལས་མྱུར་བར་ལངས་ཏེ། ཕྱོགས་བཞིར་ལྷ་རྣམས་ལ་གསོལ་བ་འདེབས་པ་ལ་ཞུགས་པར་གྱུར་ཏོ། །སྨྲས་པ། སངས་རྒྱས་ཆོས་དང་ཚོགས་ཀྱི་གཙོར་གྱུར་པའི། །དགེ་འདུན་མངོན་
དང་ལྷ་ནི་གང་ཡིན་དང་། །གང་ཡང་འཇིག་རྟེན་དྲང་སྲོང་དཀའ་ཐུབ་མཆོག །བདག་གི་བུ་སྡུག་ཕོངས་ལས་བསྲུང་བར་མཛོད། །ཡི་གེ་དེ་ཡང་རིམ་གྱིས་རྡོ་འཇོག་ཏུ་ཕྱིན་ཏོ། །དེ་ནས་རྡོ་འཇོག་པའི་གྲོང་ཁྱེར་བ་དེ་རྣམས་ཀྱིས་ཡི་གེ་དེ་མཐོང་ནས་ཀུ་ན་ལའི་ཡོན་ཏན་རྒྱ་ཆེན་པོས་ཡོངས་སུ་མགུ་བས་མི་དགའ་བས་དེ་
བརྡའ་སྤྲོད་པར་མ་ནུས་ཏེ། ཡུན་རིང་པོར་རྣམ་པར་དཔྱད་ནས་རྒྱལ་པོ་གཏུམ་པོ་དང་ཚུལ་ངན་པ་བུ་ལ་ཡང་བཟོད་པར་མི་བྱེད་ན། བདག་ཅག་རྣམས་ལ་བཟོད་པར་ལྟ་ག་ལ་བྱེད། ཡང་སྨྲས་པ། ཐུབ་པའི་ངང་ཚུལ་ཅན་དུལ་བ། །འབྱུང་པོ་ཀུན་ལ་ཕན་འདོད་པའི། །ཀུ་ན་ལ་ལའང་སྡང་བྱེད་ན། །

བདག་ཅག་རྣམས་ལ་ཅིས་མི་འབྱུང་། །ཅི་ཙམ་ན་གྲོང་ཁྱེར་པའི་སྐྱེ་བོ་དེ་རྣམས་ཀྱིས་ཡི་གེ་དེ་གཞོན་ནུ་ལ་བསྟན་ཏོ། །དེ་ནས་གཞོན་ནུས་ཕའི་ཡི་གེ་སྤྱི་བོས་བླངས་ཏེ། ཡི་གེ་པ་ལ་སྨྲས་པ། ཡི་གེ་པ་ཁྱོད་རྣམས་ཀྱིས་རྒྱལ་པོས་འདིར་ཅི་ཞིག་བྲིས་པ་ཡི་གེ་ཀློགས་ཤིག །རྒྱལ་པོ་མྱ་ངན་མེད་
རང་ཉིད་ཀྱིས་བྲིས་སོ་ཞེས་བྱ་བའི་བར་དུའོ། །དེ་ནས་ཡི་གེ་བཀླགས་པ་དང་། མིག་མཆི་མ་དང་བཅས་པར་གྱུར་ཅིང་ཀུན་དུ་རྨོངས་པར་གྱུར་པས་ལག་པ་ལས་ཡི་གེ་ལྟུང་བར་གྱུར་ཏོ། །ཡི་གེ་པ་གཉིས་པས་བླངས་པ་དང་། དེ་ཡང་ཀུན་དུ་རྨོངས་པར་གྱུར་ནས་དེ་བཞིན་དུ་ལག་པ་ལས་ལྟུང་བར་གྱུར་
ཏོ། །དེ་བཞིན་དུ་ཡི་གེ་པ་མང་པོས་བླངས་ཏེ། ཡི་གེའི་དོན་ཐོས་པ་དང་། ཀུ་ན་ལའི་ཡོན་ཏན་ཡོངས་སུ་དྲན་པས་ཀྱི་ཧུད་འདི་ཅི་ཞིག་ཡིན་ཞེས་རྣམ་པར་སེམས་ཤིང་ཡི་གེ་ལྟུང་བར་གྱུར་ཏོ། །དེ་ནས་གཞོན་ནུས་དེ་རྣམས་ཀྱི་སྦྱོར་བ་དེ་མཐོང་ནས་སྨྲས་པ། རི་དགས་གཞོན་ནུའི་མིག་འདྲ་ཞིང་། །
བཞིན་ནི་པདྨའི་འདབ་འདྲ་བ། །པདྨ་ཞེས་བྱ་སྙན་སྨྲ་བའི། །ང་ཡི་མ་དུས་མ་བྱས་སམ། །ལྷ་ཡིས་མཐོང་ན་དགའ་བ་ཡི། །རྒྱལ་སྲུང་མ་ཞེས་བྱ་བ་དེ། །གང་ཞིག་མྱ་ངན་ནད་ཀྱིས་ནི། །དེ་ནི་དུས་བྱས་མ་གྱུར་ཏམ། །མིག་བཟང་འཇིག་རྟེན་གྲགས་པས་གསལ་བར་ནི། །གྲོང་ཁྱེར་མཆོག་གི་
བདེ་འབྱོར་མཐོང་ནས་ནི། །ཇི་ལྟར་མཆི་མས་མིག་ཁེབས་འཁྲུགས་པ་དང་། །སྐྱེ་བོའི་ངུ་སྒྲ་འདྲ་བ་འདི་ཅི་ཡིན། །དེ་བས་ན་རེ་ཞིག་ཡི་གེ་ཁྱེར་ལ་ཤོག་དང་། འདིར་ཅི་ཞིག་བྲིས་པ་ང་ཉིད་ཀྱིས་བཀླག་པར་བྱའོ་ཞེས་གཞོན་ནུ་རང་ཉིད་ཡི་གེ་ཀློག་པ་ལ་ཞུགས་པར་གྱུར་པ་དང་། རྒྱལ་པོ་ཨ་
ཤོ་ཀ་རང་ཉིད་ཀྱིས་བྲིས་སོ་ཞེས་བྱ་བའི་བར་དུ་རྒྱས་པར་རོ། །དེ་ནས་གཞོན་ནུས་ཡི་གེ་བཀླགས་ནས་གནས་བརྟན་གྲགས་པས་སྨྲས་པ་མངོན་དུ་གྱུར་པར་བྱས་ཏེ། གནས་བརྟན་གྲགས་པས་མིག་ནི་མི་རྟག་པའོ་ཞེས་བྱ་བ་ནི་ལེགས་པར་གསུངས་སོ། །དེ་ནས་གཞོན་ནུས་སྨྲས་པ། ཁྱེད་
རྣམས་ལས་འགའ་ཞིག་གིས་བག་ཕེབས་པ་ཉིད་ཀྱིས་ངའི་མིག་འབྱིན་པར་སྤྲོའམ། དེ་ནི་བྱ་དགོས་སོ། །དེ་རྣམས་ལས་འགའ་ཡང་སྤྲོ་བར་མ་གྱུར་ཏོ། །ཇི་ཙམ་ན་རིགས་ངན་རྣམས་བཀུག་ནས་ཀུ་ན་ལས་མིག་ཕྱུང་ཤིག་ཅེས་སྨྲས་པ་དང་། དེ་རྣམས་ཀྱིས་ཐལ་མོ་སྦྱར་ཏེ་སྨྲས་པ། བདག་

ཅག་རྣམས་ཀྱིས་རྔོ་མི་ཐོགས་ཏེ། ཅིའི་ཕྱིར་ཞེ་ན། གང་ཞིག་ཟླ་བའི་མདངས་ལྡན་པ། །བཞིན་ལས་འབྱིན་པར་བྱེད་པའི་མི། །དེ་ནི་ཟླ་འདྲའི་ཞལ་ནས་ནི། །ཁྱེད་ཀྱི་སྤྱན་ནི་འབྱིན་པར་བགྱིད། །དེ་ནས་གཞོན་ནུས་རྡོ་འཇོག་པའི་གྲོང་ཁྱེར་པ་རྣམས་ལ་གང་བསོད་ནམས་འདོད་པ་དེ་ཆོས་ཀྱི་རྒྱལ་པོ་ཅན་
དུ་ཤོག་ཤིག་ཅེས་དྲིལ་བསྒྲགས་སོ། །ཇི་ཙམ་ན་ཆོས་ཀྱི་རྒྱལ་པོ་ཅན་དུ་མར་མེའི་ཕྲེང་བ་བྱས་ནས། ཉི་མ་གཉིས་པ་ལ་དགེ་སློང་རྣམས་བཟའ་བ་དང་བཅའ་བས་བསྙེན་བཀུར་བྱ་བ་དང་། མེ་ཏོག་གི་གདུགས་བཏགས་པ་བྱས་སོ། །དེ་ལྟར་བྱས་ནས་ཆོས་ཀྱི་རྒྱལ་པོ་ཅན་ནས་བྱུང་སྟེ་སྐྱེ་བོའི་
ཚོགས་ཆེན་པོས་བསྐོར་ནས་རྡོ་ལེབ་གཞན་པ་གང་ན་བ་དེར་སོང་སྟེ་ཕྱིན་པ་དང་། དེར་འདུག་ཏེ་གསེར་གྱི་སྒྲོམ་བླངས་ནས་སྨྲས་པ། གང་ཞིག་སྤྲོ་བ་དེས་གསེར་གྱི་སྒྲོམ་འདི་ལོང་ལ་ངའི་མིག་ཕྱུང་ཤིག་ཅེས་སྨྲས་ཀྱང་ཐམས་ཅད་དུ་འགའ་ཡང་སྤྲོ་བར་མ་གྱུར་ཏོ། །ཇི་ཙམ་ན་རྒྱལ་པོ་མྱ་ངན་མེད་ཀྱི་
རྨི་ལམ་དུ་སྐྱེས་བུ་སྤྱི་ཅེར་མིག་སེར་བ་གཉིས་ཀྱིས། གཞོན་ནུའི་མིག་འབྱིན་པར་བྱེད་པར་མཐོང་བ་ཅི་འདྲ་བ་དེ་ལྟ་བུ་ཉིད་རིང་པོ་ཁོ་ན་ནས་འོང་བ་གཞོན་ནུས་མཐོང་ནས། སྨྲས་པ། ཀྱེ་གྲོང་ཁྱེར་པ་རྣམས་སྐྱེས་བུ་འོང་བ་འདི་དག་གིས་ངའི་མིག་དབྱུང་བར་བྱའོ། །གཞོན་ནུས་སྐྱེས་
བུ་དེ་གཉིས་ལ་བོས་ཏེ་དྲིས་པ། ཁྱེད་ཀྱིས་ངའི་མིག་འབྱིན་པར་སྤྲོའམ། སྐྱེས་བུ་གཉིས་ཀྱིས་སྨྲས་པ། གལ་ཏེ་ཁྱེད་དགའ་ན་མགོ་བོ་ཡང་དགས་པར་ནུས་ན། ཆུའི་ཆུ་བུར་ལྟ་བུའི་མིག་གཉིས་ལྟ་སྨོས་ཀྱང་ཅི་དགོས། དེ་ནས་གཞོན་ནུ་སྟན་ལས་ལངས་ཏེ། ཐལ་མོ་སྦྱར་བ་བྱས་ནས་
ཐམས་ཅད་དང་ལྡན་པའི་འཁོར་རྣམས་ལ་བཟོད་པ་གསོལ་བ་ལ་ཞུགས་པར་གྱུར་ཏོ། །བདག་ནི་བྱིས་པར་གྱུར་པས་གང་བྱས་དང་། །དབང་ཆེར་གྱུར་པའམ་འོན་ཏེ་མི་རིགས་བྱས། །དེ་ནི་དཔལ་ཉམས་ཤིན་ཏུ་སྡུག་བསྔལ་བ། །བདག་ལ་བརྩེ་བས་བཟོད་པར་བྱ་བའི་རིགས། །གཞན་
ཡང་། གཟུགས་རྣམས་མཐོང་བར་གྱུར་ཀྱང་འདི། །ཐ་མ་དག་ཏུ་གྱུར་པ་ཡི། །གཞོན་ནུ་ཀུ་ན་ལ་ལ་ནི། །གནོད་བྱས་གང་ཡིན་བཟོད་པར་གྱིས། །དེའི་ཚེ་གཞོན་ནུས་གནས་བརྟན་གྱི་ཚིག་མངོན་སུམ་དུ་བྱས་ནས། དེ་རྗེས་སུ་དྲན་བཞིན་དུ་སྨྲས་པ། རྒུད་པ་འདི་ནི་མཁྱེན་ནས་སུ། །

མིག་གི་བདག་ཉིད་ཀུ་ན་ལ། །མི་རྟག་ཡང་དག་ལྟོས་ཤིག་ཅེས། །དེ་ཉིད་སྨྲ་བ་དེ་ཡིས་གསུངས། །དེ་ནི་བདག་གི་དགེ་བའི་བཤེས། །འདོད་དོན་ཕན་པར་བཞེད་པ་ཡིན། །གང་ཞིག་ཆོས་འདི་སྟོན་པ་ནི། །ཕོངས་ལ་བརྟན་པར་བྱེད་པ་ཡིན། །མི་རྟག་འགྱུར་བས་དེ་ནི་རྟག་
མིན་བར། །བླ་མས་བསྟན་པས་ཁྱེད་ཀྱིས་ཡིད་ལ་གྱིས། །དངོས་པོ་འདི་དག་རང་བཞིན་གཡོ་བས་ན། །དེང་ཁྱོད་གནོད་པ་ལ་ནི་ང་མི་འཇིགས། །ཇི་ལྟར་ས་བདག་བཞེད་པ་ལྟར། །ཁྱེད་ཀྱིས་མིག་ནི་དབྱུང་བར་གྱིས། །མི་རྟག་སོགས་ཀྱིས་ཟག་མེད་པའི། །སྙིང་པོའི་མིག་ནི་ང་ལེན་ཏོ། །
དེ་ནས་ཀུ་ན་ལས་སྐྱེས་བུ་དེ་ལ་སྨྲས་པ། ཀྱེ་སྐྱེས་བུ་དེས་ན་རེ་ཞིག་ངའི་མིག་གཅིག་ཕྱུང་ལ་ངའི་ལག་ཏུ་བྱིན་ཅིག །ཇི་ཙམ་ན་སྐྱེས་བུ་དེས་ཀུ་ན་ལའི་མིག་འབྱིན་པར་བརྩམས་སོ། །དེ་ནས་སྲོག་ཆགས་བརྒྱ་སྟོང་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད་སྡུག་བསྔལ་ལོ། །དྲི་མེད་ཟེར་ལྡན་
ཟླ་བ་འདི། །ནམ་མཁའ་ལས་ནི་ལྷུང་བར་གྱུར། །པདྨ་དཀར་པོའི་ནགས་ལས་ཀྱང་། །དཔལ་གྱི་པདྨ་འབྱིན་པར་བྱེད། །དེ་ནས་སྲོག་ཆགས་བརྒྱ་སྟོང་དུ་བཞིན་དུ་དེས་ཀུ་ན་ལའི་མིག་གཅིག་ཕྱུང་སྟེ། ལག་ཏུ་བྱིན་ནོ། །དེ་ནས་གཞོན་ནུས་མིག་དེ་བླངས་ཏེ། ཡོངས་སུ་བསྒོ་བས་སྨྲས་པ།
འབྱུང་བ་ཆེན་པོའི་མཐུ་དང་ནི། །ལས་ཀྱི་རྒྱུ་ལས་འདི་བྱུང་སྟེ། །སྲོག་མེད་འཚོ་བ་མེད་སྟོང་པ། །མི་ཡི་སྲོག་གི་རྣམ་སྤངས་པའོ། །ཇི་ལྟར་སྔོན་ཆད་ཤའི་གོང་བུ་ཁྱོད། །བྱད་བཞིན་དེང་ནི་གཟུགས་ལ་ཅིས་མི་ལྟ། །མི་མཁས་ཁྱོད་ལ་བདག་ཏུ་གནས་བྱེད་པ། །དེ་བསླུས་དེ་ན་སྨད་པར་
བྱ་བ་ཡིན། །དབུ་བ་འདྲ་ཞིང་ཆུ་བུར་དག་དང་མཚུངས། །ཤིན་ཏུ་ཉམ་ཆུང་གནོད་བྱེད་རང་དབང་མེད། །དེ་ལྟར་མཐོང་བ་རྟག་ཏུ་དྲེགས་མེད་ཅིང་། །དེ་ལྟར་སླར་ཡང་སྡུག་བསྔལ་མཐོང་མི་འགྱུར། །དེ་ལྟར་རྣམ་པར་བསམས་པ་དང་། དེས་དངོས་པོ་ཐམས་ཅད་ལ་མི་རྟག་པ་ཉིད་
དུ་མཐོང་ཞིང་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་པར་སྐྱེ་བོའི་ཚོགས་རྣམས་ཀྱིས་ཀྱང་ཤེས་སོ། །དེ་ནས་གཞོན་ནུས་བདེན་པ་མཐོང་བ་དང་། །སྐྱེས་བུ་དེ་ལ་སྨྲས་པ། བག་ཕེབས་པས་ཇི་ལྟར་མངོན་པར་འདོད་པར་མིག་གཉིས་པ་ཡང་ཕྱུང་ཤིག །ཇི་ཙམ་ན་སྐྱེས་བུ་

དེས་མིག་གཉིས་པ་ཡང་ཕྱུང་ནས་ཀུ་ན་ལའི་ལག་ཏུ་བྱིན་ནོ། །དེ་ནས་ཀུ་ན་ལའི་ཤའི་མིག་ཕྱུང་བ་དང་། ཆོས་ཀྱི་མིག་རྣམ་པར་དག་པས་སྨྲས་པ། ང་ཡི་ཤ་ཡི་མིག་ཕྱུང་ཡང་། །འོན་ཀྱང་ཤིན་ཏུ་རྙེད་དཀའ་འདི། །ཤེས་རབ་མིག་ནི་རྣམ་དག་པ། །མ་སྨད་པ་ནི་ང་ཡིས་ཐོབ། །རྒྱལ་པོས་
རང་གི་བུ་ཡི་ནི། །བརྟགས་པ་སྤངས་པར་གྱུར་ཀྱང་ནི། །ཆོས་ཀྱི་རྒྱལ་པོའི་སྲས་གྱུར་པ། །བདག་ཉིད་ཆེན་པོ་ཐོབ་པར་གྱུར། །དབང་ཕྱུག་ལས་ནི་ཉམས་གྱུར་ཀྱང་། །མྱ་ངན་སྡུག་བསྔལ་རྣམས་སྤངས་པས། །སྡུག་བསྔལ་མྱ་ངན་རྣམ་འཇིག་པའི། །ཆོས་ཀྱི་དབང་ཕྱུག་ཐོབ་པར་གྱུར། །དེ་
ནས་ཀུ་ན་ལའི་མིག་ཕྱུང་བ་མཐོང་བ་དང་། སྐྱེ་བོའི་ཚོགས་ཆེན་པོས་མགྲིན་གཅིག་ཏུ་སྨྲེ་སྔགས་འདོན་ཞིང་ལ་ལ་ནི་གོས་དང་རྒྱན་རྣམས་གཅོད་པར་བྱེད། ལ་ལ་ནི་ས་ལ་འགྲེ་ཞིང་ལྡོག་པར་བྱེད། ལ་ལ་ནི་དབྱིག་པ་དང་གཏུན་ཤིང་ལག་ན་ཐོགས་ཏེ་སྐྱེས་བུ་གཉིས་པོ་དེ་བརླག་པའི་ཕྱིར་བརྩོན་པར་
བྱེད། གཞན་དག་ནི་རྒྱལ་པོ་ལ་ཡོངས་སུ་སྨོད་པར་བྱེད་དེ། ཀྱེ་མའོ་རྒྱལ་པོ་ཁྲོ་བོའི་སྟོབས་ཅན། ཀྱེ་མའོ་རྒྱལ་པོ་ཤེས་རབ་ཞན་པ། ཀྱེ་མའོ་རྒྱལ་པོ་དབང་ཕྱུག་གི་དྲེགས་པ་གང་ན་བུ་གཅིག་པར་གྱུར་པ་ལ་ཡང་གནས་སྐབས་འདི་ལྟ་བུར་བྱེད་ཅེས་དེ་ལྟ་བུའི་ཚུལ་རྣམ་པ་མང་པོར་སྨྲ་བཞིན་དུ་
གྲོང་ཁྱེར་དུ་ཞུགས་པར་གྱུར་ཏོ། །ཅི་ཙམ་ན་ཀུ་ན་ལས་འདི་ནི་རྒྱལ་པོ་མྱ་ངན་མེད་ཀྱི་བཀའ་མ་ཡིན་གྱི། གཞན་དུ་ན་སྦྱོར་བ་འདི་ནི་རྒྱལ་སྲུང་མའི་ཡིན་ནོ་ཞེས་ཐོས་སོ། །ཐོས་ནས་ཡང་སྨྲས་པ། གང་གིས་སྦྱོར་བ་འདི་ནི་བཀུར་བ་ཡིས། །གང་ཞིག་མྱོང་ནས་རང་དོན་བྱས་གྱུར་པའི། །རྒྱལ་
ཞེས་བྱ་བ་ཡུན་རིང་བདེར་གྱུར་ཅིང་། །ལྷ་མོའི་ཚེ་དང་སྟོབས་ནི་སྐྱོང་བར་ཤོག །དེ་ནས་གསེར་ཕྲེང་ཅན་མས་ཀུ་ན་ལའི་མིག་ཕྱུང་ངོ་ཞེས་ཐོས་སོ། །ཐོས་ནས་ཀྱང་ཁྱོ་ལ་བརྩེ་བས་ཀུ་ན་ལའི་ཐད་དུ་སོང་སྟེ། འཁོར་རྣམས་བསལ་ནས། ཀུ་ན་ལའི་མིག་ཕྱུང་བ་ལུས་ལ་ཁྲག་གིས་གང་བ་མཐོང་བ་
དང་། བརྒྱལ་ཏེ་ས་ལ་འགྱེལ་བར་གྱུར་ཏོ། །དེ་ཅི་ཙམ་ན་ཆུས་གཏོར་ཏེ་བསླངས་སོ། །དེ་ནས་ཇི་ཞིག་ལྟར་འདུ་ཤེས་རྙེད་པ་དང་། ང་རོ་དང་བཅས་པར་རབ་ཏུ་ངུ་ཞིང་སྨྲས་པ། ཁྱེད་ཀྱི་མིག་ནི་ཡིད་དུ་འོང་བ་གང་། །ང་ཡིས་བལྟས་ན་ཤིན་ཏུ་དགའ་གྱུར་པ། །དེ་ནི་ད་ལྟར་བལྟས་ན་འཇིགས་སྐྱེད་

ཅིང་། །སེམས་ཀྱི་མྱ་ངན་མ་ལུས་འབྱིན་པར་བྱེད། །དེ་ནས་ཀུ་ན་ལས་ཆུང་མ་ལ་རྗེས་སུ་བརྩེ་བས་སྨྲས་པ། མྱ་ངན་ལ་སྟེན་པ་རིགས་པ་མ་ཡིན་གྱི་ངུ་བ་ཐོང་། ཅིའི་ཕྱིར་ཞེ་ན། འདི་ནི་རང་གིས་བྱས་པའི་ལས་ཀྱི་འབྲས་བུ་ཉེ་བར་གནས་པ་ཡ