Luận tạng Tây Tạng (Tengyur) — Tập 154

ོང་གིས་འཁྲིག་པ་དང་ལྡན་པ་སྨྲ་བ་དང་། བསྙེན་བཀུར་བསྔགས་པ་སྨྲས་ན་དགེ་འདུན་ལྷག་མ་ཁོ་ནར་འགྱུར་ཏེ་ན་སྨད་པ་མེད་དོ། །དེས་ན་རྫུ་འཕྲུལ་གྱི་ཆོས་ཅན་ཉིད་ནི་རེག་པ་མ་ཡིན་པ་དེ་དག་གི་ཡན་
ལག་མ་ཡིན་ཏེ། རྫུ་འཕྲུལ་གྱི་ཆོས་ཅན་མོ་ཉིད་ནི་བསམ་གཏན་ཐོབ་པ་འདོད་ཆགས་དང་བྲལ་བ་ཡིན་པས་དེའི་ཡུལ་ལ་འཁྲིག་པའི་བསམ་པ་ཤས་ཆེན་པོ་མི་སྐྱེ་བས་དེའི་ཕྱིར་དེ་ལ་རེག་པ་མ་ཡིན་པ་འཁྲིག་པ་དང་ལྡན་པ་སྨྲ་བ་དང་། བསྙེན་བཀུར་བསྔགས་པ་ནི་ན་སྨད་པར་ཤེས་སོ། །རེག་པ་མི་ཚངས་པར་སྤྱོད་པ་དང་
ལུས་ཀྱིས་རེག་པ་ནི་ཐམས་ཅད་ལ་ན་སྨད་པ་མེད་དེ། མི་ཚངས་པར་སྤྱད་ན་ནི་ཕམ་པར་འགྱུར་ལ་ལུས་ཀྱིས་རེག་ན་ནི་དགེ་འདུན་ལྷག་མར་འགྱུར་རོ། །འདིར་གཞུང་ནི་འདུལ་བྱེད་དག་ལས་སྨྲ་བའི་སྐབས་ནས་རྫུ་འཕྲུལ་གྱི་རྣམ་པར་འཕྲུལ་བའི་ཆོས་ཅན་མོ་ལ་སྨྲས་ན་ཉེས་པ་སྦོམ་པོའོ། །རྫུ་འཕྲུལ་གྱི་རྣམ་པར་འཕྲུལ་བའི་
ཆོས་ཅན་མོ་མ་ཡིན་པ་ལ་སྨྲས་ན་དགེ་འདུན་ལྷག་མའོ་ཞེས་གསུངས་པ་ཡིན་ནོ། །རེག་པར་བྱ་བ་ནི་མ་ཉམས་པའོ་ཞེས་བྱ་བ་ནི་གང་ལ་བརྟེན་པར་བྱ་བའི་ལུས་ཀྱིས་རེག་པ་ཉིད་ཡན་ལག་ཏུ་རྣམ་པར་གཞག་པ་དེ་ལ་མ་ཉམས་པའི་རེག་པར་བྱ་བ་ཉིད་ཡན་ལག་ཡིན་པར་རིག་པར་བྱ་སྟེ། འདིར་ལུས་ཀྱིས་རེག་པའི་བདེ་བ་ཉམས་
སུ་མྱོང་བ་གཙོ་བོ་ཡིན་པའི་ཕྱིར་རོ། །དཔེར་ན་རྨ་དང་ནད་ལ་སོགས་པས་ཉམས་པ་མཚན་མི་མཐུན་པའི་ཡན་ལག་གིས་ལུས་ལ་རེག་ན་དགེ་སློང་ལ་ནི་དགེ་འདུན་ལྷག་མར་གཏོགས་པའི་སྦོམ་པོར་འགྱུར་ལ། དགེ་སློང་མ་ལ་ནི་ཕམ་པར་གཏོགས་པའི་སྦོམ་པོར་འགྱུར་བ་ལ་སོགས་པ་ལྟ་བུའོ། །ཤུ་བ་ཅན་དང་གཡན་པ་

ཅན་དང་། ཁྱི་རྔོ་ཅན་གྱིས་རེག་ན་ཡང་དེ་བཞིན་དུ་སྦོམ་པོའོ། །གང་གི་ཚེ་རེག་པར་བྱེད་ན་བདག་ཉིད་ཀྱི་ལུས་དེ་ལྟར་གྱུར་ན་དེའི་ཚེ་ཡང་སྦོམ་པོ་ཁོ་ནའོ། །གཉི་གའི་ལུས་དེ་ལྟར་གྱུར་ན་ནི་ཉེས་བྱས་སོ། །རྣམ་པར་བསྔོས་པ་མོ་དང་། རྣམ་པར་རྣགས་པ་མོ་དང་། རྣམ་པར་འབུས་གཞིགས་པ་མོ་དང་། རྣམ་པར་བམ་པ་མོ་
དང་། རྣམ་པར་ཟོས་པ་མོ་དང་། རྣམ་པར་དམར་བ་མོ་དང་། རྣམ་པར་འཐོར་བ་མོ་དག་ལ་འཁྱུད་པ་ན་སྦོམ་པའོ། །འདིར་ཡང་མི་ཚངས་པར་སྤྱོད་པ་དང་འདྲ་བར་མཐུ་ཡོང་པ་ཉིད་ཡན་ལག་ཡིན་པས་དེ་བས་ཆུང་བའི་དམ་དུམ་ནི་མཐུ་དང་ལྡན་པ་ཉིད་མ་ཡིན་ནོ། །རོ་ཉིད་ལ་ནི་ན་སྨད་པ་མེད་པའི་ཕྱིར་དེས་ན་རྣམ་པར་བསྔོས་
པ་ལ་སོགས་པ་དག་ལ་སྦོམ་པོར་གསུངས་སོ། །ག་ག་ཚིལ་བྱེད་ལ་ལ་ཡང་ངོ་ཞེས་བྱ་བ་ནི་གཉི་གའི་ལུས་མ་ཉམས་པ་ཉིད་ལ་ནི་ན་སྨད་པ་མེད་དོ། །གཅིག་གི་ལུས་ཉམས་པའི་རྣམ་པ་ཇི་སྐད་བསྟན་པ་དེ་ལྟ་བུ་ལ་ག་ག་ཚིལ་བྱེད་པ་ལ་ནི་ན་སྨད་དོ། །གཉི་གའི་ལུས་ཇི་སྐད་བསྟན་པ་དེ་ལྟ་བུར་ཉམས་པ་དག་ལ་ནི་ན་སྨད་
པ་དེ་བས་ཀྱང་ན་སྨད་དོ་ཞེས་སྦྱར་རོ། །སེན་མོ་དང་སོ་དང་། ཤ་མེད་པའི་རུས་པ་དང་། སྤུ་དག་ནི་གཞན་དང་ལྡན་པ་ཉིད་དོ་ཞེས་བྱ་བ་ནི་མ་ཉམས་པ་ལས་གཞན་ཉམས་པ་དང་ལྡན་པ་ཉིད་དེ། དེས་ན་དེ་དག་ལ་ཡན་ལག་གཞན་གྱིས་སམ། དེ་དག་གིས་ཡན་ལག་གཞན་ལ་རེག་པ་དང་། ག་ག་ཚིལ་བྱེད་པ་དག་ལ་ནི་
གོ་རིམས་བཞིན་དུ་སྦོམ་པོ་དང་ཉེས་བྱས་སུ་འགྱུར་རོ། །སེན་མོ་ལ་སོགས་པ་དག་གིས་སེན་མོ་ལ་རེག་པ་དང་། ག་ག་ཚིལ་བྱེད་པ་དག་ལ་ནི་གོ་རིམས་བཞིན་དུ་ཉེས་བྱས་དང་ཉེས་བྱས་ཕྲ་མོར་འགྱུར་རོ། །མིའི་འགྲོ་བ་པ་ནི་ཐ་སྙད་དུ་བྱ་བ་ཉིད་ཡིན་ནོ་ཞེས་བྱ་བ་ནི་ཁ་ན་མ་ཐོ་བ་གང་དག་བསྟེན་པ་འཁྲིག་པ་དང་ལྡན་པ་
སྨྲ་བ་དང་། བསྙེན་བཀུར་བསྔགས་པ་དང་། བརྫུན་སྨྲ་བ་དང་། སྐྱོན་ནས་སྨྲ་བ་དང་། དགེ་སློང་ལ་ཕྲ་མ་བྱེད་པ་དང་། གནས་ངན་ལེན་བརྗོད་པ་དང་། མིའི་ཆོས་བླ་མ་བྱེད་པ་ལ་སོགས་པ་དེ་དག་ལས་གྱུར་པའི་ཁ་ན་མ་ཐོ་བ་དེ་དག་ཐམས་ཅད་ལ་མིའི་འགྲོ་བ་པའི་སྲོག་ཆགས་དག་ཁ་ན་མ་ཐོ་བ་ཡོངས་སུ་རྫོགས་པའི་ཡན་
ལག་ཉིད་ཡིན་ནོ། །མི་མ་ཡིན་པའི་འགྲོ་བ་ལ་ནི་ན་སྨད་དོ། །དུད་འགྲོ་ལ་དེ་བས་ཀྱང་ན་སྨད་དོ། །འདི་ལྟར་མིའི་འགྲོ་བར་སྐྱེས་པ་རྣམས་ནི་ཐ་སྙད་ཐམས་ཅད་ལ་ལྟུང་བ་ཉིད་ཡིན་པའི་ཕྱིར་དེ་དག་ཉིད་ཀྱི་ཐ་སྙད་རྫོགས་པར་འགྲུབ་ཀྱི་འགྲོ་བ་གཞན་དུ་གཏོགས་པ་དག་གིས་ནི་མ་ཡིན་པའི་ཕྱིར་རོ། །དེའི་ཕྱིར་མི་མ་

ཡིན་པའི་མཐུ་དང་མི་ལྡན་པ་ལ་ལུས་ཀྱིས་རེག་པ་དང་འཁྲིག་པ་དང་ལྡན་པ་སྨྲ་བ་དང་། བསྙེན་བཀུར་བསྔགས་པ་ནི་སྦོམ་པོའོ། །སྨྱན་བྱེད་པ་ལ་ནི་གལ་ཏེ་མོ་མ་ཡིན་པའམ། ཕོ་མ་ཡིན་པའམ། ཕོ་མོ་གཉི་ག་མ་ཡིན་པར་གྱུར་ན་ཡང་དེའི་ཕྱིར་སྦོམ་པའོ། །དུད་འགྲོ་ལ་ནི་ཉེས་
བྱས་སོ། །ལྷ་ཀླུ་ལ་སོགས་པ་མི་མ་ཡིན་དག་ལས་སློང་བ་ལ་སོགས་པ་ལ་ནི་ཉེས་བྱས་སོ། །རང་བཞིན་ཉམས་པ་ནི་མ་ཡིན་ནོ་ཞེས་བྱ་བ་ནི་མིའི་འགྲོ་བ་ཡིན་ཡང་རང་བཞིན་ཉམས་པ་སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་སོགས་པ་ལ་ནི་ཐ་སྙད་དུ་བྱ་བའི་ཡན་ལག་མ་ཡིན་པས་
དེ་དག་ལ་ཡང་ན་སྨད་དོ། །མ་ནིང་དང་མཚན་གཉིས་པ་དག་ནི་དེ་དང་འདྲ་བ་ཉིད་དོ་ཞེས་བྱ་བ་ནི་མ་ནིང་དང་མཚན་གཉིས་པ་དག་ནི་ཉམས་པ་དེ་དག་དང་ལྡན་པ་ཉིད་དེ་དེ་དག་ལ་སོགས་པ་སློང་བའི་ཕྱིར་འདི་བཤད་དེ། དཔེར་ན་ཁྱིམ་བདག་དང་ཆུང་མ་མ་ནིང་དང་མཚན་གཉིས་པ་ལས་གོས་སློང་བ་དང་། སྨད་གཡོགས་
སྟོད་གཡོགས་དང་བཅས་པ་ལས་ལྷག་པར་ལེན་པ་དང་། སྦྱིན་བདག་དེ་གཉིས་སམ། ཐ་ག་པ་དེ་གཉིས་ལས་རིན་དང་སོ་སོ་བ་དང་། འཐག་ཏུ་འཇུག་པ་དང་། འཐག་པ་སྐྱེད་པ་དང་། མ་ནིང་ཕོ་དང་། མ་ནིང་མོ་དང་། གླེ་འདམས་པ་དང་། མཚན་གཉིས་པ་ཉལ་པོ་བྱེད་པར་ཤོམ་པའི་ཁྱིམ་ན་འདུག་པ་དང་།
འགྲེང་བ་དང་། དེ་དག་ལ་རྡེག་པ་དང་། གཟས་པ་དང་། མ་ནིང་ཕོ་དང་། མ་ནིང་མོ་དང་། མཚན་གཉིས་པ་དང་ལྷན་ཅིག་ཉལ་བ་དང་། དེ་དག་དང་ནུབ་གསུམ་ལས་ལྷག་པར་ཉལ་བ་དང་། མ་ནིང་ཕོ་དང་། མཚན་གཉིས་པ་དང་ལྷན་ཅིག་སྐྱེས་པ་མེད་པར་ལམ་དུ་འགྲོ་བ་ལ་ནི་ཉེས་བྱས་སོ། །རེག་པ་ནི་ཐ་སྙད་དང་
འདྲའོ་ཞེས་བྱ་བ་ནི་ལུས་ཀྱིས་རེག་པ་ཡང་ཐ་སྙད་དང་འདྲ་སྟེ། སྨྲ་བའི་ཐ་སྙད་ཀྱིས་བསླབ་པའི་གཞི་དག་ལ་ལྟུང་བ་གང་རྣམ་པར་གཞག་པ་དེ་འདི་ལ་ཡང་དེ་བཞིན་དུ་རིག་པར་བྱའོ། །དེས་ན་མི་མ་ཡིན་པ་མཐུ་མེད་པ་ལ་རེག་པ་དང་སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་རེག་པ་ལ་ནི་སྦོམ་
པའོ། །དུད་འགྲོ་ལ་ནི་ཉེས་བྱས་སོ། །ཕྱི་རོལ་པའི་རབ་ཏུ་བྱུང་བ་དང་མ་ཆགས་པ་དང་། ཉམས་པ་དག་ནི་ཕྱེད་ཉིད་ཁྱིམ་པའོ་ཞེས་བྱ་བ་ནི་འདི་གསུམ་ནི་ཕྱེད་ཉིད་ཁྱིམ་པ་དང་འདྲ་བས། འདི་གསུམ་གྱི་ཡུལ་ལས་ལྟུང་བ་གང་དག་རྣམ་པར་གཞག་པ་དེ་དག་ནི་ཕྱེད་ཉིད་དུ་ན་སྨད་དོ། །མུ་སྟེགས་ཅན་གྱི་དགེ་སྦྱོང་

ལས་ཆོས་གོས་དང་ལྷུང་བཟེད་བླངས་ཏེ་ཐོགས་པ་དང་། དེ་ལས་སྟོད་གཡོགས་དང་སྨད་གཡོགས་དང་བཅས་པ་ལས་ལྷག་པར་ལེན་པ་དང་། རིན་ཐང་དང་སོ་སོ་དང་། སྐུར་བ་ཡང་སྦྱིན་བདག་དང་ཕོ་ཉ་དང་ཞལ་ཏ་བ་གང་ཡང་རུང་བ་གཅིག་མུ་སྟེགས་ཅན་གྱི་དགེ་སྦྱོང་ཡིན་པ་དང་། བདག་པོ་མུ་སྟེགས་ཅན་
གྱི་དགེ་སྦྱོང་གི་འདུག་གནས་སུ་ཞག་གཉིས་པ་ལས་ཟན་ཟོས་པ་ལ་ཉེས་བྱས་སུ་འགྱུར་རོ། །སྔོན་ལྟུང་བ་བྱུང་བ་དང་པོ་འཁྲུགས་པ་དང་། རྐུ་ཐབས་སུ་གནས་པ་དང་། དགེ་སློང་མ་སུན་ཕྱུང་བ་དག་དང་། ལྷན་ཅིག་མཚན་མ་ཅན་གྱིས་སྤྱོད་པ་དང་ཉོ་ཚོང་བྱས་ཏེ་ཐོབ་པ་ལ་ཡང་ཉེས་བྱས་སོ། །ཕྱི་རོལ་པའི་རབ་
ཏུ་བྱུང་བ་ལས་ལྷུང་བཟེད་དོ་གསུམ་ཙམ་ལས་ལྷག་པར་བླངས་ཏེ་ཟོས་པ་ལ་ཡང་ཉེས་བྱས་སོ། །དེ་དག་ཉལ་པོ་བྱེད་པར་ཤོམ་པའི་ཁྱིམ་ན་འདུག་པ་དང་འགྲེང་བ་ལ་ཡང་ཉེས་བྱས་སོ། །དེ་དག་གིས་སྦྱོར་དུ་བཅུག་པའི་ཟས་ཟ་བ་ལ་ཡང་ཉེས་བྱས་སོ། །དགེ་སློང་དང་དགེ་སློང་མ་བསྙེན་པར་རྫོགས་པ་ཅན་མ་
ཉམས་པ་ཉིད་ནི་བསླབ་པ་དག་ལ་ཡན་ལག་ཡིན་ནོ་ཞེས་བྱ་བ་འདི་གཉིས་ནི་དགེ་སློང་དང་དགེ་སློང་མའི་བསླབ་པ་དག་ལ་ཡན་ལག་ཡིན་གྱི་ཆོས་གཞན་པའི་རབ་ཏུ་བྱུང་བ་དང་། དགེ་ཚུལ་ཉིད་ལ་སོགས་པ་དང་། མ་ཆགས་པ་དང་། ཁས་བླངས་པ་དང་ཉམས་པ་ལ་སོགས་པ་དག་ཀྱང་མ་ཡིན་ཏེ། དེ་དག་ལས་
གཞི་མེད་པ་དང་བག་ཙམ་དག་གིས་སྐུར་པ་བཏབ་པ་ཡང་སྦོམ་པོའོ། །དེ་དག་གི་ཡུལ་ལ་ལྟུང་བ་གཞན་ཡང་ཅི་རིགས་པར་ན་སྨད་དོ། །མཚན་དང་ལྟ་བ་ཁས་བླངས་པ་དག་གིས་ནི་རང་གི་ཕྱོགས་ཀྱི་ཁོངས་སུ་གཏོགས་སོ་ཞེས་བྱ་བ་ནི་ཕོ་དང་མོའི་མཚན་དང་ལྟ་བ་ཁས་བླངས་པ་དང་། མ་བླངས་པ་དག་གིས་
ནི་རང་གི་ཕྱོགས་ཉིད་ཀྱི་ཁོངས་སུ་གཏོགས་པར་འགྱུར་ཏེ་རང་གི་ཕྱོགས་ཉིད་དང་ཕྱོགས་གཅིག་པ་ཡིན་ནོ་ཞེས་བྱ་བའི་ཐ་ཚིག་གོ། །རང་གི་ཕྱོགས་ཀྱི་ཁོངས་སུ་གཏོགས་པ་གང་ཡིན་པ་དེ་ལས་ནི་རང་གི་ཕྱོགས་དང་མཐུན་པ་དེ་ལ་བརྟེན་པའི་ཁ་ན་མ་ཐོ་བ་ཉིད་དུ་འགྱུར་བར་རིག་པར་བྱས་ཏེ་རང་གི་ཕྱོགས་དང་
མཐུན་པའི་དགེ་སློང་དང་། དགེ་ཚུལ་མ་ལ་སོགས་པའི་གང་ཟག་དག་གི་ཕྱིར་དེ་དག་ལ་བརྡེག་པ་དང་གཟས་པ་ལ་སོགས་པའི་ལྟུང་བ་གང་དག་ཡིན་པ་དེ་དག་ནི་མཚན་མཐུན་པ་དང་། ལྟ་བ་མཐུན་པ་ཉིད་ཀྱིས་མཚན་མཐུན་པ་དང་ལྟ་བ་མཐུན་པ་ཉིད་དུ་ཁས་བླངས་པ་ཉིད་གང་ཡིན་པ་དེ་ལ་ནི་ཡན་ལག་ཡིན་

ནོ། །དེ་ལྟ་བས་ན་རང་གི་ཕྱོགས་ཉིད་ཀྱི་ཁོངས་སུ་གཏོགས་པ་མ་ཡིན་པ་ལ་ནི་ཚིག་འོག་མར་ན་སྨད་པར་འགྱུར་རོ། །ཇི་ལྟར་རང་གི་ཕྱོགས་ལ་ལོག་པར་བསྒྲུབ་ན་ན་སྨད་པར་བྱ་བ་ཉིད་ཡིན་པ་དེ་ལྟར་གཞན་ལ་ལོག་པར་བསྒྲུབ་པ་ནི་ན་སྨད་པར་བྱ་བ་ཉིད་མ་ཡིན་པའི་རྣམ་པ་དེ་ལས་འདི་ལྟར་ཤེས་
སོ། །དགེ་སློང་མ་རྣམས་ལ་ཡང་ཐམས་ཅད་དུ་རྣམ་པ་འདི་བཞིན་དུ་རིག་པར་བྱའོ། །དཔེར་ན་ཁས་བླངས་པས་ཁས་མ་བླངས་པ་ལ་གོས་བྱིན་ནས་ཕྲོགས་པ་དང་། དགེ་སློང་མ་དང་། དགེ་སློབ་མ་དག་ལ་སྐྱོན་ནས་བརྗོད་པ་དང་། དེ་གཉིས་ལ་ཕྲ་མ་བྱས་པ་དང་། སྐྱོ་སྔོགས་བྱས་པ་དང་། དེ་དག་གིས་གནས་
ངན་ལེན་བརྗོད་པ་དང་། དགེ་སློང་མའི་དགེ་འདུན་དབང་བའི་རྙེད་པ་དགེ་སློང་མས་བཤེས་ངོར་བྱས་ཏེ་གཞན་དུ་བསྒྱུར་རོ་ཞེས་སྐུར་བ་འདེབས་པ་དང་། དེ་དག་གིས་བསླབ་པ་ལ་ཁྱད་དུ་གསོད་པ་དང་། དགེ་སློང་མའི་དགེ་འདུན་གྱི་གཙུག་ལག་ཁང་གི་གནས་མལ་མ་བརྟུལ་བར་འགྲོ་བ་དང་། དགེ་སློང་མའི་གཙུག་ལག་
ཁང་ནས་བཏིང་བ་མ་བརྟུལ་བར་འགྲོ་བ་དང་། དགེ་སློང་མའི་གཙུག་ལག་ཁང་དུ་ཕྱིས་གནོན་བྱེད་པ་དང་། དེ་ནས་སྐྲོད་པ་དང་དེར་རྩ་བ་འབྱུང་བ་ལ་འདུག་པ་དང་། ཁས་བླངས་པས་ཁས་མ་བླངས་པའི་དགེ་སློང་མ་རྣམས་ལ་མ་བསྐོས་པར་སྟོན་པ་དང་། གོས་སྦྱིན་པ་དང་། གོས་བྱེད་པ་དག་དང་། ཁས་མ་བླངས་པས་
ཁས་བླངས་པའི་དགེ་སློང་མ་རྣམས་ལ་མ་བསྐོས་པར་སྟོན་པ་དང་། གོས་སྦྱིན་པ་དང་། གོས་བྱེད་པ་དག་དང་། ཁས་མ་བླངས་པས་ཁས་བླངས་པ་དག་ལ་ཟང་ཟིང་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་བ་འདེབས་པ་དང་། ཁས་བླངས་པས་ཁས་མ་བླངས་པ་ལ་ཟང་ཟིང་ཅུང་ཟད་ཙམ་གྱི་ཕྱིར་སྟོན་ནོ་ཞེས་སྐུར་བ་འདེབས་པ་
དང་། ཁས་མ་བླངས་པ་མོ་དང་ལྷན་ཅིག་ལམ་དང་གྲུར་འགྲོ་བ་དང་། ཁས་བླངས་པས་ཁས་མ་བླངས་པ་མོ་དང་ལྷན་ཅིག་ལམ་དང་གྲུར་འགྲོ་བ་དང་། ཁས་མ་བླངས་པས་ཁས་བླངས་པ་མོས་སྦྱོར་དུ་བཅུག་པ་ཟ་བ་དང་། ཁས་བླངས་པས་ཁས་མ་བླངས་པ་མོས་སྦྱོར་དུ་བཅུག་པ་ཟ་བ་དང་། ཁས་མ་བླངས་པས་ཁས་བླངས་
པའི་ཁྱིམ་ནས་ལྷུང་བཟེད་དོ་གསུམ་ལས་ལྷག་པར་ལེན་པ་དང་ཁས་བླངས་པས་ཁས་མ་བླངས་པའི་ཁྱིམ་ནས་ལྷུང་བཟེད་དོ་གསུམ་ཙམ་ལས་ལྷག་པར་ལེན་པ་དག་ལ་སོགས་པ་དག་ནི་ཉེས་བྱས་སོ། །བྱིན་ལེན་ནི་རྣམ་པ་ཐམས་ཅད་དུ་རང་གི་ཕྱོགས་ཉིད་ཀྱི་ཁོངས་སུ་གཏོགས་པ་མ་ཡིན་པས་བླངས་ན་མ་བྱས་པ་ཡིན་

ནོ། །འདིར་གཏོགས་པ་ལ་ཁྱིམ་པའི་རྟགས་ཅན་ཉིད་ནི་ན་སྨད་དོ་ཞེས་བྱ་བ་ནི་དགེ་སློང་དང་དགེ་སློང་མ་ཉིད་ཀྱི་རྒྱུ་མཚན་གྱི་ཁ་ན་མ་ཐོ་བ་འདིར་གཏོགས་པ་ལ། ཁྱིམ་པ་རབ་ཏུ་བྱུང་བའི་གང་ཟག་གི་རྟགས་ཅན་ཉིད་ནི་ན་སྨད་པར་བྱ་བ་སྟེ་ཇི་ལྟར་འདིར་ཕྱི་རོལ་པའི་རབ་ཏུ་བྱུང་བ་ལ་ནི་ན་སྨད་པ་ཉིད་བཞིན་དུ་ཁྱིམ་པ་ལ་
ཡང་དེ་བཞིན་ཏེ། ཕྱི་རོལ་པའི་རབ་ཏུ་བྱུང་བའི་རྒྱུ་མཚན་ལས་ན་སྨད་པར་བྱ་བ་དེ་བས་ཀྱང་ཁྱིམ་པ་ལ་ཆེས་ན་སྨད་པར་ཤེས་པར་བྱའོ། །དཔེར་ན་ཁྱིམ་པར་གྱུར་པའི་སྐྱེས་པ་དང་བུད་མེད་ལ་གཞི་མེད་པ་དང་། བག་ཙམ་དག་གིས་སྐུར་པ་འདེབས་པ་དང་། རྡེག་པ་དང་གཟས་པ་ལ་སོགས་པའི་ཚུལ་གཞན་ལ་
ཡང་ཉེས་བྱས་ཕྲ་མོར་འགྱུར་བ་ལ་སོགས་པ་ལྟ་བུ་དང་། མི་མ་ཡིན་པ་རྟགས་ཅན་མ་ཡིན་པ་ལ་སྐྱོན་ནས་སྨྲ་བ་དང་། ཕྲ་མ་བྱེད་པ་ཡང་ཉེས་བྱས་ཕྲ་མོར་འགྱུར་བ་ལ་སོགས་པ་ལྟ་བུ་སྟེ། འདིར་མི་མ་ཡིན་པ་ལ་རྒྱུ་གཉིས་ཀྱིས་ན་སྨད་པར་ཤེས་པར་བྱ་སྟེ། ཁྱིམ་པ་ཉིད་ཡིན་པའི་ཕྱིར་དང་། མི་མ་ཡིན་པ་ཉིད་ཡིན་
པའི་ཕྱིར་རོ། །རབ་ཏུ་བྱུང་བའི་རྫས་དག་ལ་ནི་རུང་བ་ཉིད་དང་ཚད་དང་ལྡན་པ་ལ་སོགས་པ་ཉིད་དོ་ཞེས་བྱ་བ་ནི་རབ་ཏུ་བྱུང་བའི་རྫས་ལྷུང་བཟེད་དང་ཆོས་གོས་ལ་སོགས་པ་དག་ལ་ནི་རུང་བ་ཉིད་དང་ཚད་དང་ལྡན་པ་ལ་སོགས་པ་ཉིད་ཅེས་བྱ་བ་དེ་གཉིས་ལྟུང་བའི་ཡན་ལག་ཡིན་ཏེ། དེ་གཉིས་དང་བྲལ་བ་ལྟུང་བ་མ་
ཡིན་པ་ཉིད་དང་ཚད་དང་ལྡན་པ་མ་ཡིན་པ་ཉིད་ལ་སོགས་པ་ལ་ནི་ལྟུང་བ་ན་སྨད་པ་ཡིན་གྱི་དངོས་གཞིར་ནི་མི་འགྱུར་རོ། །དེ་ལ་རུང་བ་མ་ཡིན་པ་ཉིད་ཅེས་བྱ་བ་ནི་གོས་གང་ཐ་ག་བས་མ་བཏགས་པ་དང་། བ་ལང་དང་། རྔ་མོ་དང་ར་དང་རི་དགས་ཀྱི་བལ་ལས་བྱས་པ་དང་། ཨརྐའི་ཤིང་བལ་ལས་བྱས་པ་དང་།
རྒྱུ་སྤུན་གཉིས་ལས་གང་ཡང་རུང་བ་བ་ལང་དང་རྔ་མོ་དང་ར་དང་རི་དགས་ཀྱི་བལ་ལ་སོགས་པ་དང་འདྲེས་པ་དང་། དེ་ལྟ་བུ་དག་ནི་རུང་བ་ནི་མ་ཡིན་པ་ཉིད་དོ། །ལྷུང་བཟེད་རུང་བ་མ་ཡིན་པ་ཉིད་ནི་སོ་མ་བཏང་བ་དང་དཀར་པོ་དང་། རིན་པོ་ཆེ་ལ་སོགས་པ་ལས་བྱས་པའོ། །དེ་དག་ལས་བཟློག་པ་ནི་ཆོས་གོས་དང་ལྷུང་
བཟེད་ལ་སོགས་པ་རུང་བ་ཉིད་ཡིན་ནོ། །ཚད་དང་ལྡན་པ་ཉིད་ཅེས་བྱ་བ་ལ་ཚད་དང་ལྡན་པ་ཞེས་བྱ་བ་ནི་ཆོས་གོས་རང་གི་ཁྲུ་ཚད་དང་ལྡན་པ་དང་། གོས་ལྷག་ཀྱང་ཁྲུ་གང་གི་ཚད་དང་ལྡན་པའོ། །ལྷུང་བཟེད་ཀྱང་བྱིན་གྱིས་བརླབ་ཏུ་རུང་བ་གསུམ་གྱི་ཚད་དང་ལྡན་པའོ། །སོགས་པ་ཞེས་བྱ་བའི་སྒྲས་ནི་ཚད་ལས་

ལྷག་པར་བསྡུས་ཏེ། ཆོས་གོས་རང་གི་ཁྲུ་ཚད་པས་ལྷག་པ་དང་། གོས་ལྷག་ཀྱང་ཁྲུ་གང་གི་ཚད་ལས་ལྷག་པ་དང་། ལྷུང་བཟེད་ཀྱང་བྱིན་གྱིས་བརླབ་ཏུ་རུང་བ་གསུམ་གྱི་ཚད་པས་ལྷག་པའོ། །དེ་ལྟར་ན་རབ་ཏུ་བྱུང་བའི་རྫས་དག་ལ་ནི་རུང་བ་ཉིད་དང་ཚད་དང་ལྡན་པའམ་ཚད་
པས་ལྷག་པ་ཉིད་ལ་དངོས་གཞིའི་ཁ་ན་མ་ཐོ་བར་འགྱུར་རོ། །དེ་ལས་བཟློག་པ་ལ་ནི་ན་སྨད་དོ། །འདིར་དགེ་ཚུལ་ལ་སོགས་པ་དབང་བའི་རྫས་དག་ལ་ཡང་ཡན་ལག་དེ་གཉིས་འཇུག་པར་བསྟན་པའི་ཕྱིར་རབ་ཏུ་བྱུང་བའི་རྫས་དག་ལ་ཞེས་སྨོད་དེ། བསྙེན་པར་རྫོགས་པའི་ཞེས་མ་སྨོས་སོ། །རང་གི་
དོན་དེ་ཉིད་གཙོ་ཆེར་ཡོད་པའོ་ཞེས་བྱ་བ་ནི་ཁ་ན་མ་ཐོ་བ་གང་ལ་རང་གི་དོན་དེ་ཉིད་གཙོ་ཆེར་ཡོད་པ་བྱེད་པ་པོ་ཡིན་ཏེ། ཁ་ན་མ་ཐོ་བ་གང་ལ་རང་གི་དོན་དེ་ཉིད་གཙོ་ཆེར་ཡོད་པ་དེ་ལ་རང་གི་དོན་དེ་ཉིད་ཁ་ན་མ་ཐོ་བ་ཡོངས་སུ་རྫོགས་པར་བྱེད་པ་ཡིན་གྱི། གཞན་གྱི་དོན་ནི་ཁ་ན་མ་ཐོ་བ་ཡོངས་སུ་རྫོགས་པར་བྱེད་
པ་མ་ཡིན་ཏེ། རང་གི་དོན་མ་ཡིན་པ་གཞན་གྱི་དོན་དུ་བྱེད་པ་དེ་ནི་ཚིག་འོག་མར་ན་སྨད་པའི་བྱེད་པ་པོ་ཡིན་ནོ། །དཔེར་ན་གཞན་གྱི་དོན་དུ་འཁྲིག་པ་དང་ལྡན་པ་སྨྲ་བ་དང་། བསྙེན་བཀུར་བསྔགས་པ་དག་ནི་སྦོམ་པོའོ། །གཞན་གྱི་དོན་དུ་དགེ་སློང་མ་ཉེ་དུ་མ་ཡིན་པ་ལ་གོས་འཁྲུར་འཇུག་པ་ལ་སོགས་པ་ནི་
ཉེས་བྱས་སོ། །འདིར་དགེ་འདུན་གྱི་དོན་དུ་བྱེད་དུ་འཇུག་པ་ཡང་གཞན་གྱི་དོན་ཁོ་ན་ཡིན་ནོ། །རང་དང་གཞན་གཉི་གའི་དོན་དུ་བྱེད་དུ་འཇུག་པ་ཡང་གཞན་གྱི་དོན་ཁོ་ན་ཡིན་ཏེ། དེ་ལ་བདག་ཉིད་མ་གཏོགས་པར་དོན་དུ་གཉེར་བ་གཞན་ཡོད་པའི་ཕྱིར་རོ། །རྣམ་པར་རིག་བྱེད་ལ་ནི་དོན་གོ་བའོ་ཞེས་བྱ་བ་ནི་ངག་གི་རྣམ་པར་
རིག་བྱེད་ཀྱིས་སྨྲ་བ་དང་སློང་བ་ལ་སོགས་པ་ལ་ནི་གཞན་གྱི་དོན་གོ་བ་ཉིད་དངོས་གཞིར་འགྱུར་བའི་ཡན་ལག་ཡིན་ཏེ། རྣམ་པ་རིག་བྱེད་ཀྱི་འབྲས་བུ་ནི་དོན་གོ་བ་ཡིན་པའི་ཕྱིར་རོ། །དོན་མ་གོ་བ་ལ་ནི་ན་སྨད་དོ། །དེས་ན་སྙོམས་པར་ཞུགས་པ་ལ་འཁྲིག་པ་དང་ལྡན་པ་སྨྲ་བ་དང་། བསྙེན་བཀུར་བསྔགས་པ་དག་ནི་
སྦོམ་པོའོ། །དེ་བཞིན་དུ་གཉིད་ལོག་པ་དང་། སྙོམས་པར་ཞུགས་པ་དང་། གླེན་པ་དང་འོན་པ་དག་ལ་གཞི་མེད་པ་དང་། བག་ཙམ་གྱིས་སྐུར་པ་འདེབས་པ་ལ་ཡང་སྦོམ་པོའོ། །གླེན་པ་དང་འོན་པ་དང་ལྷན་ཅིག་མངོན་མཚན་ཅན་གྱི་སྤྱོད་པ་དང་། ཉོ་ཚོང་བྱེད་པ་ལ་ནི་ཉེས་བྱས་དང་། འཐག་པ་དང་། འཐག་པ་

སྐྱེད་དུ་གཞུག་པའི་ཕྱིར་དེ་གཉིས་ལ་གོ་བར་བྱེད་པ་དང་། དབུས་དང་མཐའ་འཁོབ་པ་ལ་སྐད་གཞན་གྱིས་སྐྱོན་ནས་སྨྲས་ཏེ། དོན་མ་གོ་ན་ཡང་ཉེས་བྱས་སོ། །དེ་གཉིས་ལ་ཕྲ་མ་བྱེད་པ་དང་། གླེན་པ་དང་འོན་པ་གཉིས་ལ་སྐྱོ་སྔོགས་བྱེད་པ་དང་། བུད་མེད་གཉིད་ལོག་པ་ལ་ཆོས་སྟོན་པ་དང་། ངོ་ཚ་མེད་པ་
དང་། མཐའ་འཁོབ་པ་དང་། གླིང་གཞན་ནས་སྐྱེས་པ་དང་། གཉིད་ལོག་པ་དང་། སྨྱོས་པ་དང་། བག་མེད་པ་དང་། སྙོམས་པར་ཞུགས་པ་དང་། གླེན་པ་དང་འོན་པའི་རིགས་པའི་སྐྱེས་པ་དང་ལྷན་ཅིག་ཆོས་སྟོན་པ་ནི་ཉེས་བྱས་སོ། །གླེན་པ་དང་འོན་པ་དག་དང་ཚིག་མཐུན་པ་དང་། ཚིག་ལྷག་པར་ཟློས་པ་
ཡང་ཉེས་བྱས་སོ། །ངོ་ཚ་མེད་པ་དང་མཐའ་འཁོབ་པ་དང་དབུས་པ་དག་ལ་སྐད་གཞན་གྱིས་གནས་ངན་ལེན་བརྗོད་པ་དང་། འོན་པ་དང་གླེན་པ་དག་ལ་མིའི་ཆོས་བླ་མ་བརྗོད་པ་དང་། མཐའ་འཁོབ་པ་དང་དབུས་པ་དག་ལ་སྐད་གཞན་གྱིས་བཤེས་ངོར་བྱས་སོ་ཞེས་སྐུར་བ་འདེབས་པ་དང་འོན་པ་དང་གླེན་པ་དག་ལ་བསླབ་
པ་ཁྱད་དུ་གསོད་པ་དང་། འཕྱ་བ་དང་། གཞོགས་འཕྱས་བྱེད་པ་དང་བསྒོ་བ་རྣ་ལ་གཟོན་པ་ཡང་ཉེས་བྱས་སོ། །དེ་དག་ལ་མ་བསྐོས་པར་སྟོན་པ་དང་། དེ་དག་ལ་ཟས་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་པ་འདེབས་པ་དང་། དེ་དག་གིས་སྦྱོར་དུ་བཅུག་པ་ཟ་བ་དང་། མེ་འབུད་དུ་བཅུག་པ་དང་། འགྱོད་པ་སྐྱེད་པ་དང་།
སྔངས་པར་བྱེད་པ་དང་། གཞི་མེད་པར་སྐུར་བ་འདེབས་པ་དང་། སྐད་གཞན་གྱིས་བསླབ་པ་ལ་ཉེ་བར་འཇོག་པ་སྤོང་བ་ཡང་ཉེས་བྱས་སོ། །སྨྲ་བ་པོ་ཉིད་ལ་ཡོད་པ་སྟེ་གསོད་པ་དང་རང་གི་དོན་དུ་རྐུ་བ་དག་ལས་གཞན་པའིའོ་ཞེས་བྱ་བ་ནི་སྨྲ་བ་པོ་ཉིད་ལ་དོན་གོ་བ་ཡོད་པ་རྣམ་པར་རིག་བྱེད་ཀྱི་ཡན་ལག་ཡིན་པ་སྟེ། སྨྲ་ཡང་
ཤེས་ཤིང་དོན་གོ་བ་ནི་རྣམ་པར་རིག་བྱེད་ཀྱི་ཡན་ལག་ཡིན་ལ། སྨྲ་མི་ཤེས་ཤིང་དོན་གོ་བ་ནི་གསོད་པ་དང་རང་གི་དོན་དུ་རྐུ་བའི་ཡུལ་ལ་ཡན་ལག་ཡིན་གྱི། དེ་ལས་གཞན་པ་རྣམ་པར་རིག་བྱེད་ཀྱི་ཡུལ་ལ་ཡན་ལག་མ་ཡིན་ཏེ། གང་ཟག་གང་སྨྲ་ཡང་ཤེས་ཤིང་དོན་ཡང་གོ་བ་དེ་ནི་རྣམ་པར་རིག་བྱེད་ཀྱི་ཡན་ལག་ཡིན་
གྱི་ལྐུགས་པ་དང་ཀླ་ཀློ་ལ་སོགས་པ་སྨྲ་མི་ཤེས་ཤིང་དོན་གོ་བ་གང་ཡིན་པ་དེ་ནི་རྣམ་པར་རིག་བྱེད་ཀྱི་ཡན་ལག་མ་ཡིན་ནོ། །དེས་ན་གང་ཟག་སྨྲ་ཤེས་ཤིང་དོན་གོ་བ་ལ་གཞི་མེད་པ་དང་། བག་ཙམ་དག་གིས་སྐུར་བ་འདེབས་པ་ལ་ནི་དགེ་འདུན་ལྷག་མར་འགྱུར་རོ། །ལྐུགས་པ་དང་ཀླ་ཀློ་ལ་སོགས་པ་སྨྲ་མི་ཤེས་

ཤིང་དོན་གོ་བ་ལ་གཞི་མེད་པར་བག་ཙམ་དག་གིས་སྐུར་བ་འདེབས་པ་ལ་ནི་ན་སྨད་པ་དེ་སྦོམ་པོའོ། །སྨྲ་ཤེས་ཤིང་དོན་གོ་བ་དང་ལྷན་ཅིག་མངོན་མཚན་ཅན་གྱི་སྤྱོད་པ་དང་། ཉོ་ཚོང་བྱེད་པ་དང་། འཐག་ཏུ་གཞུག་པ་དང་། འཐག་པ་སྐྱེད་པའི་ཕྱིར་གོ་བར་བྱེད་པ་དང་། སྐྱོན་ནས་སྨྲ་བ་
དང་ཕྲ་མ་བྱེད་པ་དང་། སྐྱོ་སྔོགས་བྱེད་པ་དང་། སྟོན་པ་དང་ཀློག་པ་དང་། དེ་དག་ལ་གནས་ངན་ལེན་དང་། མིའི་ཆོས་བླ་མ་བརྗོད་པ་དང་། བཤེས་ངོར་བྱས་སོ་ཞེས་སྨྲ་བ་དང་། བསླབ་པ་ཁྱད་དུ་གསོད་པ་དང་། འཕྱ་བ་དང་། གཞོགས་འཕྱས་བྱེད་པ་དང་། བསྒོ་བ་རྣ་ལ་གཟོན་པ་དང་། དེ་དག་ལ་
མ་བསྐོས་པར་སྟོན་པ་དང་། དེ་དག་ལ་སྟོན་པ་ལ་ཟང་ཟིང་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་པ་འདེབས་པ་དང་། དེ་དག་གིས་སྦྱོར་དུ་བཅུག་པ་ཟ་བ་དང་། དེ་དག་མེ་འབུད་དུ་བཅུག་པ་དང་། དེ་དག་གི་བསླབ་པ་ལ་ཉེ་བར་འཇོག་པ་སྤོང་བ་ལ་ནི་ལྟུང་བྱེད་དོ། །ལྐུགས་པ་དང་ཀླ་ཀློ་ལ་སོགས་པ་སྨྲ་མི་ཤེས་ཤིང་
དོན་གོ་བ་དང་ལྷན་ཅིག་མངོན་མཚན་ཅན་གྱི་སྤྱོད་པ་ལ་སོགས་པ་དེ་དག་བྱས་པ་ལ་ནི་ཉེས་བྱས་སོ། །སྨྲ་མི་ཤེས་ཤིང་དོན་གོ་བ་ནི་གསོད་པ་དང་རང་གི་དོན་དུ་རྐུ་བའི་ཡུལ་ལ་ནི་ཡན་ལག་ཡིན་ཏེ། དེ་གཉིས་ཀྱི་ཡུལ་ལ་ནི་དངོས་གཞིར་འགྱུར་རོ། །དེས་ན་ལྐུགས་པ་དང་ཀླ་ཀློ་ལ་སོགས་པ་སྨྲ་མི་ཤེས་ཤིང་དོན་གོ་བ་ནི་
སྨྲ་བ་པོ་མ་ཡིན་དུ་ཟིན་ཀྱང་གསོད་པ་དང་རང་གི་དོན་དུ་རྐུ་བའི་ཡུལ་ལ་ཡན་ལག་ཡིན་ཏེ། འདི་ལྟར་དགེ་སློང་གིས་གང་ཟག་ཕ་རོལ་པོ་སྨྲ་མི་ཤེས་ཤིང་དོན་གོ་བ་གསོད་པ་དང་། དགེ་སློང་གིས་གང་ཟག་ཕ་རོལ་པོ་སྨྲ་མི་ཤེས་ཤིང་དོན་གོ་བ་གང་ཡིན་པ་དེ་ལས་རང་གི་དོན་དུ་བརྐུས་ན་དངོས་གཞིར་འགྱུར་བའི་ཕྱིར་རོ། །གཞན་
གྱི་དོན་དུ་རྐུབ་ལ་ན་སྨད་པས་འདིར་རང་གི་དོན་དུ་རྐུ་བ་ཞེས་སྨོས་སོ། །ཡང་དག་པར་ལེན་པར་བྱེད་པ་ལ་ནི་དེར་མ་ཟད་དོ་ཞེས་བྱ་བ་ནི་སྡོམ་པ་ཡང་དག་པར་ལེན་པར་བྱེད་པ་ལ་ནི་སྔར་སྨྲ་ཤེས་ཤིང་དོན་གོ་བ་ཞེས་བསྟན་པ་གང་ཡིན་པ་དེ་འབའ་ཞིག་ཡན་ལག་ཡིན་པར་མ་ཟད་ཀྱི། སྨྲ་མི་ཤེས་ཤིང་དོན་གོ་བ་ཡང་ཡན་ལག་ཡིན་ཏེ།
འདི་ལྟར་ལྐུགས་པ་ལ་སོགས་པ་སྨྲ་མི་ཤེས་པ་དོན་གོ་བ་དག་ལ་ཡང་སྲོག་གཅོད་པ་སྤོང་བ་ལ་སོགས་པ་ཡང་དག་པར་ལེན་པ་འབྱུང་བའི་ཕྱིར་རོ། །དེ་ནི་སྣོད་ཡིན་ནོ་ཞེས་བྱ་བ་ནི་སྨྲ་མི་ཤེས་ཤིང་དོན་གོ་བ་དེ་ནི་སྣོད་ཡིན་ཏེ་དེ་ནི་རྣམ་པར་རིག་བྱེད་ཀྱི་ཡན་ལག་གི་སྣོད་དམ་གཞིའམ་ཡུལ་ཡིན་ནོ། །དཔེར་ན་དགེ་སློང་གིས་

གང་ཟག་སྨྲ་ཤེས་ཤིང་དོན་གོ་བ་གཞན་ཡོད་བཞིན་དུ་དེ་ལ་བདག་ཉིད་ཀྱིའམ། གཞན་གྱི་ལྟུང་བ་བརྗོད་ན་མཐོལ་བར་ཆུད་པས་བཅབས་པའི་ཉེས་པར་མི་འགྱུར་ལ། མ་བརྗོད་ན་ཡང་བཅབས་པའི་ཉེས་པར་འགྱུར་རོ། །དེ་ལས་བཟློག་པ་ནི་སྣོད་མ་ཡིན་པས་དེ་ལ་ན་སྨད་དེ་དེས་ན་དགེ་སློང་གིས་གང་ཟག་སྨྲ་མི་ཤེས་
ཤིང་དོན་གོ་བ་གཞན་ཡོད་ཀྱང་དེ་ལ་བདག་ཉིད་ཀྱིའམ་གཞན་གྱི་ལྟུང་བ་བརྗོད་ཀྱང་མཐོལ་བར་མི་འགྱུར་བས་དོན་མེད་པ་ཉིད་ཡིན་ལ། དེ་ལ་ལྟུང་བ་མ་བརྗོད་པ་ལ་ཡང་བཅབས་པའི་ཉེས་པ་འགའ་ཡང་ཡོད་པར་མི་འགྱུར་བའི་ཕྱིར་རོ། །རང་གིའོ། །ངག་གིའོ། །བདག་ཉིད་དང་འབྲེལ་བའོ་ཞེས་བྱ་བ་དག་ནི་རང་གི་
ངག་གིས་བདག་ཉིད་དང་འབྲེལ་པ་ཡན་ལག་ཉིད་ཡིན་ཏེ། ངག་གི་རྣམ་པར་རིག་བྱེད་ལ་ནི་རང་གི་ངག་གིས་བདག་ཉིད་དང་འབྲེལ་བར་སྨྲ་བ་ཡན་ལག་ཉིད་ཡིན་པས་དེ་ལ་དངོས་གཞིར་འགྱུར་གྱི་རང་གི་མ་ཡིན་པ་དང་ངག་གིས་མ་སྨྲས་པ་དང་། བདག་ཉིད་དང་མ་འབྲེལ་བ་ནི་ཡན་ལག་མ་ཡིན་པས་དེ་ལ་ནི་ན་སྨད་དོ། །
དེས་ན་དགེ་སློང་གིས་རང་གི་ངག་གིས་བདག་ཉིད་དང་འབྲེལ་བར་བདག་འདི་སྐད་ཟེར་ཞེའམ་བདག་གིས་བྱེད་དུ་འཇུག་གོ་ཞེའམ་བདག་གི་ཕྱིར་གྱིས་ཤིག་ཅེས་བྱ་བ་ལ་སོགས་པ་ལྟ་བུས་འཁྲིག་པ་དང་ལྡན་པ་སྨྲ་བ་དང་། བསྙེན་བཀུར་བསྔགས་པ་དང་། གཞི་མེད་པ་དང་། བག་ཙམ་དག་གིས་སྐུར་བ་འདེབས་
པ་གོ་བར་བྱེད་པ་ལ་ནི་དགེ་འདུན་ལྷག་མར་འགྱུར་རོ། །བདག་གི་ངག་གིས་བདག་ཉིད་དང་འབྲེལ་པར་དགེ་སློང་མ་ཉེ་དུ་མ་ཡིན་པ་ལ་གོས་འཁྲུར་འཇུག་པ་ལ་སོགས་པ་དང་། དེ་ལས་གོས་ལེན་པ་དང་། ཁྱིམ་བདག་དང་། ཁྱིམ་བདག་གི་ཆུང་མ་དག་ལས་སློང་བ་དང་། རིན་སྤགས་པ་དང་། སོ་སོ་ནས་
སྤགས་པ་དང་། འཐག་ཏུ་འཇུག་པ་དང་། འཐག་པ་སྐྱེད་པ་དང་། འཕྲོག་པ་དང་། བརྫུན་སྨྲ་བ་དང་། སྐྱོན་ནས་སྨྲ་བ་དང་། ཕྲ་མ་བྱེད་པ་དང་། སྐྱོ་སྔོགས་བྱེད་པ་དང་། སྟོན་པ་དང་། ཟློས་པ་དང་། གནས་ངན་ལན་བརྗོད་པ་དང་། མིའི་ཆོས་བླ་མ་བརྗོད་པ་དང་། བཤེས་ངོར་བྱས་སོ་ཞེས་ཟེར་
པ་དང་། བསླབ་པ་ཁྱད་དུ་གསོད་པ་དང་། ཤིང་ལྗོན་པ་གཅོད་པ་དང་། འཕྱ་བ་དང་། གཞོགས་འཕྱས་བྱེད་པ་དང་། བསྒོ་བ་རྣ་ལ་གཟོན་པ་དང་། སྐྲོད་པ་དང་རིམ་པ་གསུམ་ལས་ལྷག་པར་བརྩིགས་པ་དང་། མ་བསྐོས་པར་སྟོན་པ་དང་། ཟས་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་བ་འདེབས་པ་དང་།

དགེ་སློང་མས་སྦྱར་དུ་བཅུག་པའི་ཟས་ཟ་བ་དང་། ཟས་གཅོད་དུ་འཇུག་པ་དང་། མེ་ལ་རེག་ཏུ་འཇུག་པ་དང་། འགྱོད་པ་སྐྱེད་པ་དང་། སྔངས་བར་བྱེད་པ་དང་། ཡོ་བྱད་སྦེད་པ་དང་། སྐུར་བ་འདེབས་པ་དང་། ས་རྐོ་བ་དང་། ཤིང་བལ་གྱིས་གོས་པར་བྱེད་པ་དང་། དགེ་སློང་
མའི་ལག་ནས་ཟས་ལེན་པ་དང་། མ་བཟློག་པར་ཟ་བ་ལ་སོགས་པ་དག་ནི་སྤང་བའི་ལྟུང་བྱེད་དང་ལྟུང་བྱེད་ཀྱི་དངོས་གཞི་ཅི་རིགས་པར་འགྱུར་རོ། །མངགས་པ་དང་བརྒྱུད་པ་ལ་སོགས་པ་དང་། སྤྲིང་ཡིག་དང་། ལག་ཡིག་དང་། ལག་རྩིས་ལ་སོགས་པ་དང་། གཞན་དག་ཅེའམ། ཆེ་གེ་མོ་ཞེའམ་གཞན་
ལ་ཐ་སྙད་འདོགས་པ་ལ་སོགས་པས་འཁྲིག་པ་དང་ལྡན་པ་སྨྲ་བ་དང་། བསྙེན་བཀུར་བསྔགས་པ་དང་། གཞི་མེད་པ་དང་། བག་ཙམ་དག་གིས་སྐུར་བ་འདེབས་པ་གོ་བར་བྱེད་པ་ལ་ནི་སྦོམ་པོའོ། །མངགས་པ་དང་བརྒྱུད་པ་ལ་སོགས་པ་དེ་དག་གིས་དགེ་སློང་མ་ཉེ་དུ་མ་ཡིན་པ་ལ་གོས་འཁྲུར་འཇུག་པ་ལ་
སོགས་པ་དེ་དག་བྱེད་པ་ལ་ནི་ཉེས་བྱས་སོ། །རང་གིས་བསྐོས་པ་ཉིད་བྱེད་དུ་གཞུག་པ་ཡིན་ནོ་ཞེས་བྱ་བ་ནི་བྱེད་དུ་གཞུག་པ་ལ་ནི་རང་གིས་བསྐོས་པ་ཉིད་ཡན་ལག་སྟེ། གསོད་པ་དང་། རང་གི་དོན་དུ་རྐུ་བ་ལས་གཞན་པའི་དོན་ལ་མངགས་པ་ལ་སོགས་པ་གཞན་བྱེད་དུ་གཞུག་ཅིང་རྗེས་སུ་སྒྲུབ་ཏུ་གཞུག་པ་གང་ཡིན་
པ་དེ་ལ་ནི་རང་གིས་བསྐོས་པ་ཉིད་ཡན་ལག་ཡིན་པས། དེ་ལ་དངོས་གཞིར་འགྱུར་ལ་ལྐོག་ནས་བརྒྱུད་པས་བྱེད་དུ་བཅུག་པ་ནི་ཡན་ལག་མ་ཡིན་པས་དེ་ལ་ན་སྨད་དོ། །དེས་ན་རང་གིས་མངོན་སུམ་དུ་བསྐོས་པ་མ་ཡིན་པ་ལྐོག་ནས་བསྐོས་པས་བྱེད་དུ་བཅུག་པས་འཁྲིག་པ་དང་ལྡན་པ་སྨྲ་བ་དང་། བསྙེན་བཀུར་བསྔགས་པ་དང་།
གཞི་མེད་པ་དང་། བག་ཙམ་དག་གིས་སྐུར་བ་འདེབས་པ་ལ་སོགས་པ་ནི་སྦོམ་པོའོ། །དེ་དག་གིས་དགེ་སློང་མ་ཉེ་དུ་མ་ཡིན་པ་ལ་གོས་འཁྲུར་འཇུག་པ་ལ་སོགས་པ་དང་། དེ་ལས་གོས་ལེན་པ་དང་། ཁྱིམ་བདག་དང་ཁྱིམ་བདག་གི་ཆུང་མ་དག་ལས་སློང་བ་དང་། རིན་སྤགས་པ་དང་། སོ་སོ་ནས་སྤགས་པ་
ཐོབ་པ་དང་། ལྷུང་བཟེད་ཚོལ་བ་དང་། འཐག་ཏུ་འཇུག་པ་དང་། འཐག་པ་བསྐྱེད་པ་དང་། འཕྲོག་པ་དང་། བརྫུན་སྨྲ་བ་དང་། སྐྱོན་ནས་སྨྲ་བ་དང་། ཕྲ་མ་བྱེད་པ་དང་། སྐྱོ་སྔོགས་བྱེད་པ་དང་། སྟོན་པ་དང་། ཟློས་པ་དང་། གནས་ངན་ལེན་བརྗོད་པ་དང་། མིའི་ཆོས་བླ་མ་བརྗོད་པ་དང་། བཤེས་ངོར་བྱས་སོ་

ཞེས་ཟེར་བ་དང་། བསླབ་པ་ཁྱད་དུ་གསོད་པ་དང་། ཤིང་ལྗོན་པ་གཅོད་པ་དང་། འཕྱ་བ་དང་། གཞོགས་འཕྱས་བྱེད་པ་དང་། བསྒོ་བ་རྣ་ལ་གཟོན་པ་དང་། སྐོད་པ་དང་། རིམ་པ་གསུམ་ལས་ལྷག་པར་བརྩིགས་པ་དང་། མ་བསྐོས་པར་སྟོན་པ་དང་། ཟས་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་བ་འདེབས་པ་དང་།
དགེ་སློང་མས་སྦྱོར་དུ་བཅུག་པའི་ཟས་ཟ་བ་དང་། ཟན་གཅོད་དུ་བཅུག་པ་དང་། མེ་ལ་རེག་ཏུ་འཇུག་པ་དང་། འགྱོད་པ་སྐྱེད་པ་དང་། སྔངས་པར་བྱེད་པ་དང་། ཡོ་བྱད་སྦེད་པ་དང་། སྐུར་བ་འདེབས་པ་དང་། ས་རྐོ་བ་དང་། ཤིང་བལ་གྱིས་གོས་པར་བྱེད་པ་དང་། རིན་པོ་ཆེ་ལ་རེག་ཏུ་འཇུག་པ་ལ་སོགས་པ་དང་།
དགེ་སློང་མའི་ལག་ནས་ཟན་ལེན་པ་དང་། མ་བཟློག་པར་ཟ་བ་ལ་སོགས་པ་དག་ཀྱང་ཉེས་བྱས་སོ། །དེ་ལྟར་ཇི་སྐད་བསྟན་པ་དེ་དག་ནི་རྣམ་པར་འབྱེད་པར་མ་གཏོགས་པ་ཕལ་ཆེར་འདུལ་བའི་ཕྱིར་བསྟན་པའི་ལྟུང་བ་རྣམ་པར་བཞག་པ་ཡིན་ནོ། །ད་ནི་འདུལ་བ་མདོར་བསྡུ་བའི་སྐབས་བཤད་པར་བྱ་སྟེ། དེ་ལ་འདུལ་བ་མདོར་
བསྡུ་བའི་སྐབས་སུ་གཏོགས་པ་ལུང་ལས་དངོས་སུ་མ་གསུངས་པ་ད་ལྟར་འཇིག་རྟེན་ན་སྣང་བ་ཡང་རུང་བས་ལུང་ལས་གསུངས་བ་དང་། ཆ་མཐུན་པ་དག་ལུང་དང་མཐུན་པར་མདོར་བསྡུ་བའོ། །དེའི་ཕྱིར་མི་རུང་བ་དང་མཐུན་ལ་རུང་བ་དང་འགལ་བ་ནི་རུང་བ་མ་ཡིན་པར་བསྡུའོ། །རུང་བ་དང་མཐུན་ལ་མི་རུང་བ་དང་
འགལ་བ་ནི་རུང་བར་བསྡུའོ་ཞེས་སྨྲས་པ་སྟེ། མི་རུང་བ་ཞེས་བྱ་བ་ནི་འདུལ་བ་དང་འགལ་བ་དེ་དགེ་སློང་གིས་སྤྱད་དུ་མི་རུང་བ་ཁ་ན་མ་ཐོ་བ་དང་བཅས་པའོ། །རུང་བ་ཞེས་བྱ་བ་ནི་འདུལ་བ་དང་མི་འགལ་བ་དགེ་སློང་གིས་སྤྱད་དུ་རུང་བ་ཁ་ན་མ་ཐོ་བ་མེད་པའོ། །དེ་ལ་མི་རུང་བ་དང་མཐུན་ལ་རུང་བ་དང་འགལ་བ་ནི་རུང་བ་མ་
ཡིན་པར་བསྡུའོ་ཞེས་བྱ་བ་ནི་བཅོམ་ལྡན་འདས་ཀྱིས་འདུལ་བའི་སྡེ་སྣོད་ལས་དངོས་སུ་བཀའ་མ་སྩལ་བ་འདུལ་བ་དང་ལྡན་པའི་བསླབ་པའི་གཞི་དགེ་སློང་གིས་སྤྱད་དུ་མི་རུང་བ་གང་དག་ད་ལྟར་འཇིག་རྟེན་ན་སྣང་བ་ཅི་ཡང་རུང་བ་དེ་དག་གར་བསྡུ་ཞེ་ན། དེ་དག་བཅོམ་ལྡན་འདས་ཀྱིས་འདུལ་བའི་སྡེ་སྣོད་ལས་འདུལ་
བ་དང་འགལ་བ་དགེ་སློང་གིས་སྤྱད་དུ་མི་རུང་བ་ཁ་ན་མ་ཐོ་བ་དང་བཅས་པར་གསུངས་པ་གང་དག་ཡིན་པ་དེ་དག་དང་ཆ་མཐུན་ལ་འདུལ་བ་དང་མི་འགལ་བ་དགེ་སློང་གིས་སྤྱད་དུ་རུང་བ་ཁ་ན་མ་ཐོ་བ་མེད་པར་གསུངས་པ་གང་དག་ཡིན་པ་དེ་དག་དང་། ཆ་མི་མཐུན་ཞིང་འགལ་བ་མ་ཡིན་ན་ནི་དེ་དག་རུང་བ་མ་ཡིན་པར་

བསྡུ་སྟེ། དགེ་སློང་གིས་དེ་དག་བསྟེན་ཅིང་སྤྱད་དུ་མི་རུང་སྟེ། དེ་བསྟེན་ཅིང་སྤྱད་ན་གཞི་ཇི་ལྟ་བ་ལས་ལྟུང་བ་སྡེ་ལྔའི་ཁ་ན་མ་ཐོ་བ་ཉིད་དུ་འགྱུར་ཏེ། དཔེར་ན་བཅོམ་ལྡན་འདས་ཀྱིས་འདུལ་བའི་སྡེ་སྣོད་ལས་མིང་གིས་བཀག་པ་དང་། གནང་བར་མ་གསུངས་པ་དངོས་སུ་བཀག་པ་དང་
མཐུན་ལ། གནང་བ་དང་འགལ་བ་ཐམས་ཅད་བཀག་པའི་ནང་དུ་བསྡུ་བ་ནི་འདི་ལྟ་སྟེ་མི་དགེ་བ་བཅུའི་ནང་ནས་ཚིག་ཀྱལ་པ་དང་། ངག་རྩུབ་མོ་དང་བརྣབ་སེམས་དང་། གནོད་སེམས་དང་། ལོག་པར་ལྟ་བ་དང་། གཞན་ཡང་དེ་ལྟ་བུ་དང་མཐུན་པ་དག་འདུལ་བ་ལས་དེ་དག་བྱས་ན་ལྟུང་བ་འདིར་འགྱུར་རོ་ཞེས་དངོས་སུ་
བཀག་པ་མེད་ཀྱང་དེ་དག་རང་བཞིན་གྱིས་ཁ་ན་མ་ཐོ་བ་དང་བཅས་པ་ལ་སོགས་པ་ཡིན་པས་བཀག་པ་དང་མཐུན་པ་ལ་གནང་བ་དང་འགལ་བའི་ཕྱིར་བཀག་པའི་ནང་དུ་བསྡུ་བ་ལྟ་བུའོ། །རུང་བ་དང་མཐུན་པ་མི་རུང་བ་དང་འགལ་བ་ནི་རུང་བར་བསྡུའོ་ཞེས་བྱ་བ་ནི་བཅོམ་ལྡན་འདས་ཀྱིས་འདུལ་བའི་སྡེ་སྣོད་ལས་དངོས་སུ་བཀའ་
མ་སྩལ་པ། འདུལ་བ་དང་ལྡན་པའི་བསླབ་པའི་གཞི་དགེ་སློང་གིས་སྤྱད་དུ་རུང་བ་གང་དག་ད་ལྟར་འཇིག་རྟེན་ན་སྣང་བ་ཅི་ཡང་རུང་བ་དེ་དག་གར་བསྡུ་ཞེ་ན་དེ་དག་བཅོམ་ལྡན་འདས་ཀྱིས་འདུལ་བའི་སྡེ་སྣོད་ལས་འདུལ་བ་དང་མི་འགལ་བའི་དགེ་སློང་གིས་སྤྱད་དུ་རུང་བ་ཁ་ན་མ་ཐོ་བ་མེད་པར་གསུངས་པ་གང་དག་ཡིན་པ་དེ་དག་དང་
ཆ་མཐུན་ལ། འདུལ་བ་དང་འགལ་བ་དགེ་སློང་གིས་སྤྱད་དུ་མི་རུང་བ་ཁ་ན་མ་ཐོ་བ་དང་བཅས་པར་གསུངས་པ་གང་དག་ཡིན་པ་དེ་དག་དང་ཆ་མི་མཐུན་ཞིང་འགལ་བ་ཡིན་ན་ནི་དེ་དག་རུང་བར་བསྡུ་བ་སྟེ། དགེ་སློང་གིས་དེ་དག་བསྟེན་ཅིང་སྤྱད་དུ་རུང་སྟེ། དེ་དག་བསྟེན་ཅིང་སྤྱད་ན་གཞི་གང་ལས་ཀྱང་རུང་བ་སྡེ་ལྔའི་ཁ་ན་མ་
ཐོ་བ་ཅིར་ཡང་མི་འགྱུར་ཏེ། དཔེར་ན་བཅོམ་ལྡན་འདས་ཀྱིས་འདུལ་བའི་སྡེ་སྣོད་ལས་མིང་གིས་བཀག་པ་དང་གནང་བར་མ་གསུངས་པ་དངོས་སུ་གནང་བ་དང་མཐུན་པ་ལས་བཀག་པ་དང་འགལ་བ་ཐམས་ཅད་གནང་བའི་ནང་དུ་བསྡུ་བ་འདི་ལྟ་སྟེ། རིག་པའི་གནས་ལྔ་དང་། བསོད་ནམས་བྱ་བའི་གཞི་བདུན་ལ་སོགས་
པ་དག་འདུལ་བ་ལས་དེ་དག་མ་བྱས་ན་ལྟུང་བ་འདིར་འགྱུར་རོ་ཞེས་དངོས་སུ་བྱ་བར་གནང་བ་མེད་ཀྱང་དེ་དག་དགེ་བ་ལ་སོགས་པ་ཡིན་པས་གནང་བ་དང་། མཐུན་པ་བཀག་པ་དང་འགལ་བའི་ཕྱིར་གནང་བའི་ནང་དུ་བསྡུ་བ་ལྟ་བུའོ། །འདི་སྐད་བསྟན་ཏེ། བཅོམ་ལྡན་འདས་ཀྱིས་མང་གིས་བཀག་པའི་ནང་དུ་བཀའ་མ་

སྩལ་ལ་དངོས་སུ་མི་རུང་བ་ཡང་བསྟན་པ་གང་ཡིན་པ་དེ་ནི་འདིས་བཀག་པར་རིག་པར་བྱའོ། །མིང་གི་རྗེས་སུ་གནང་བའི་ནང་དུ་བཀའ་མ་སྩལ་ལ་དངོས་སུ་རུང་བ་ཡང་བསྟན་པ་གང་ཡིན་པ་དེ་ནི་འདིས་རྗེས་སུ་གནང་བར་རིག་པར་བྱ་སྟེ། དཔེར་ན་ཁྲིའུ་རྐང་པ་བྲིས་བ་བཅང་བར་མི་བྱ་བ་ཉིད་དང་། ཉལ་བ་དང་། འགྲོ་བས་
བཤང་བ་དང་གཅི་བ་དག་མི་བྱ་བ་ཉིད་དང་། ཉལ་བ་དང་འགྲོ་བ་དང་ཟས་བཟའ་བར་མི་བྱ་བ་ཉིད་ཅེས་བྱ་བ་ལ་སོགས་པ་དག་ནི་དགག་པའི་རྣམ་པ་ཡིན་ལ། ཚྭ་དང་བསྲེས་པའི་དགུན་ཆུ་བཏུང་བར་བྱ་བ་ཉིད་དང་། ཁམ་ཕོར་དག་ཏུ་ཟས་བཟའ་བར་བྱ་བ་ཉིད་ཅེས་བྱ་བ་ལ་སོགས་པ་དག་ནི་རྗེས་སུ་གནང་བའི་
རྣམ་པ་ཡིན་པ་ལྟ་བུ་སྟེ། དེ་དག་ཐམས་ཅད་འདིས་བསྟན་པ་ཉིད་ཡིན་ནོ། །དེ་ལྟར་ཇི་སྐད་བསྟན་པ་དེ་དག་ནི་འདུལ་བ་མདོར་བསྡུས་པའི་ལྟུང་བ་དང་ལྟུང་བ་མ་ཡིན་པ་རྣམ་པར་གཞག་པ་ཡིན་ནོ། །འདུལ་བ་སྤྱིར་བསྟན་པ་དང་། མདོར་བསྡུས་པ་དེ་དག་ནི་ལྟུང་བ་སྡེ་ལྔ་འདུལ་བར་གཏོགས་པ་ཐམས་ཅད་ཀྱི་
གཞུང་རྒྱས་པའི་མཚན་ཉིད་དང་ཅི་རིགས་པར་སྤྱིར་སྦྱར་བ་ཡིན་ནོ། །གཞུང་རྒྱས་པའི་མཚན་ཉིད་བཤད་ཟིན་ཏོ། །དེའི་འོག་ཏུ་བསྡུ་བའི་མཚན་ཉིད་བཤད་པར་བྱ་སྟེ། བསྡུ་བའི་མཚན་ཉིད་ཅེས་བྱ་བ་ནི་སྔར་དེ་ལས་སོ་སོར་ཐར་པའི་མདོའི་བསྡུས་པའི་དོན་ནི་མཚན་ཉིད་རྣམ་པ་ལྔས་སྟོན་ཏེ། མཆོད་པ་དང་།
གླེང་བསླང་བ་དང་། ཡང་དག་པར་བརྩམས་པ་དང་གཞུང་རྒྱས་པ་དང་། བསྡུ་བའི་མཚན་ཉིད་ཀྱིས་སོ་ཞེས་སྨོས་པ་ལས་གཞུང་རྒྱས་པའི་མཚན་ཉིད་ཡན་ཆད་དུ་གོ་རིམས་བཞིན་བཤད་ཟིན་ཏོ། །ད་ནི་ལྔ་པ་སྟེ། བསྡུ་བའི་མཚན་ཉིད་ཅེས་བྱ་བ་ཐ་མ་བཤད་པར་བྱ་སྟེ། འདི་ནི་སོ་སོར་ཐར་པའི་མདོ་
མདོར་བསྡུས་ཏེ། གདོན་པའི་སྒོ་ནས་དེ་བཞིན་གཤེགས་པ་རིགས་བདུན་གྱི་འདུལ་བ་མདོར་བསྡུས་ཏེ་བསྟན་པའོ། །དེ་ལ་བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་ཀྱི་སློབ་མ་རྣམས་ནི་ཉེས་པ་ཆུང་བར་འགྱུར་ཏེ་ཆོས་ལ་དགའ་བའི་འདོད་ཆགས་དང་དམ་པ་མ་ཡིན་པའི་ཆོས་ལ་ཞུགས་པའི་
མུ་སྟེགས་ཅན་རྣམས་ལ་འཚེ་བ་ལ་མངོན་པར་དགའ་བ་ཙམ་ཞིག་ཡོད་པས། དེ་དག་གིས་ཉེས་པ་དེ་ཡོངས་སུ་སྤང་བའི་ཕྱིར་བཅོམ་ལྡན་འདས་དེས་སོ་སོར་ཐར་པའི་མདོ་འདི་ལྟར་མདོར་བསྡུས་ཏེ་ཟླ་བ་ཕྱེད་ཕྱེད་ཅིང་བཏོན་པར་འགྱུར་ཏེ། བཟོད་པ་དཀའ་ཐུབ་དམ་པ་བཟོད་པ་ནི། །མྱ་ངན་འདས་པ་མཆོག་

ཅེས་སངས་རྒྱས་གསུངས། །རབ་ཏུ་བྱུང་བ་གཞན་ལ་གནོད་པ་དང་། །གཞན་ལ་འཚེ་བ་དགེ་སྦྱོང་མ་ཡིན་ནོ། །ཞེས་གསུངས་ཏེ། དེ་ལ་བཟོད་པ་ཞེས་བྱ་བ་ནི་བཟོད་པར་བྱེད་པ་སྟེ། གཞན་གྱི་ཉེས་པ་དང་དུ་ལེན་པའམ་གཞན་ལ་ཞེ་སྡང་མེད་པའོ། །དེ་ཉིད་དཀའ་ཐུབ་དམ་
པ་ཡིན་ཏེ། སེམས་ཀྱི་ཞེ་སྡང་སྦྱོང་བའི་ཕྱིར་དང་། སྙིང་རྗེ་བསྐྱེད་པའི་ཕྱིར་རོ། །བཟོད་པའི་མྱ་ངན་ལས་འདས་པ་ཞེས་བྱ་བ་ནི་བཟོད་པར་བྱེད་པ་སྟེ། སྡུག་བསྔལ་གྱི་བདེན་པའི་ཡུལ་གྱི་རྣམ་པ་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་དག་བཟོད་པའི་ཤེས་རབ་སྡུག་བསྔལ་ལ་
ཆོས་ཤེས་པའི་བཟོད་པའོ། །དེ་སྔོན་དུ་བཏང་བའམ་དེས་ཉེ་བར་བསྟན་པའི་མྱ་ངན་ལས་འདས་པ་བཟོད་པའི་ཕྱིར་མྱ་ངན་ལས་འདས་པ་སྟེ། ཟག་པ་མེད་པའི་ལམ་གྱིས་ཐོབ་པའི་མྱ་ངན་ལས་འདས་པའོ། །དེ་མཆོག་ཅེས་སངས་རྒྱས་གསུངས་ཞེས་བྱ་བ་ནི་བཟོད་པའི་མྱ་ངན་ལས་འདས་པ་དེ་དངོས་པོ་ཐམས་ཅད་
ཀྱི་མཆོག་ཡིན་ནོ་ཞེས་སངས་རྒྱས་བཅོམ་ལྡན་འདས་རྣམས་ཀྱིས་བསྔགས་པ་སྟེ། འཇིག་རྟེན་པའི་ལམ་གྱིས་ཐོབ་པའི་མྱ་ངན་ལས་འདས་པ་ནི་གཏན་དུ་མ་ཡིན་ལ། ཟག་པ་མེད་པའི་ལམ་གྱིས་ཐོབ་པའི་མྱ་ངན་ལས་འདས་པ་ནི་གཏན་དུ་མ་ཡིན་པ་ཉིད་ཀྱིས་གནོད་པ་མེད་པ་སྟེ། ཞི་བའི་ངོ་བོ་ཉིད་ཡིན་པའི་ཕྱིར་རོ། །ཇི་ལྟར་
ན་བཟོད་པའི་དཀའ་ཐུབ་དམ་པ་ཡིན་ཞེ་ན་དེའི་ཕྱིར། རབ་ཏུ་བྱུང་བ་གཞན་ལ་གནོད་པ་དང་། །གཞན་ལ་འཚེ་བ་དགེ་སྦྱོང་མ་ཡིན་ནོ། །ཞེས་བྱ་བ་གསུངས་ཏེ། གཞན་ལ་གནོད་པ་ཞེས་བྱ་བ་ནི་ཡིད་ཀྱིས་གནོད་པ་བྱེད་པའོ། །གཞན་ལ་འཚེ་བ་ཞེས་བྱ་བ་ནི་ལུས་ངག་གཉིས་ཀྱིས་འཚེ་བའོ། །དགེ་སྦྱོང་ཞེས་བྱ་བ་
ནི་ཞི་བའི་བདག་ཉིད་དོ། །འདི་ལྟར་བསྟན་ཏེ། གང་གི་ཕྱིར་གཞན་ལ་གནོད་པ་དང་། གཞན་ལ་འཚེ་བ་རབ་ཏུ་བྱུང་བའི་དགེ་སྦྱོང་རྫོགས་པ་མ་ཡིན་པ་དེའི་ཕྱིར་བཟོད་པ་ནི་དཀའ་ཐུབ་དམ་པ་ཡིན་ལ། དེའི་འབྲས་བུ་བཟོད་པས་ཐོབ་པའི་མྱ་ངན་ལས་འདས་པ་ཡང་མཆོག་ཡིན་པས་དེའི་ཕྱིར་རབ་ཏུ་བྱུང་བས་བཟོད་པ་བསྟེན་
པར་བྱའོ་ཞེས་བསྟན་ཏོ། །བཅོམ་ལྡན་འདས་དེ་བཞིན་གཤེགས་པ་གཙུག་ཏོར་ཅན་གྱི་སློབ་མ་རྣམས་ཀྱང་ཉེས་པ་ཆུང་བར་འགྱུར་ཏེ། གཞན་གྱིས་ཉེས་པ་སྒྲོགས་པ་མང་བ་ཙམ་ཞིག་ཡོད་པས་དེ་དག་གི་ཉེས་པ་དེ་ཡོངས་སུ་སྤང་བའི་ཕྱིར་བཅོམ་ལྡན་འདས་དེས་སོ་སོར་ཐར་པའི་མདོ་འདི་ལྟར་མདོར་

བསྡུས་ཏེ་ཟླ་བ་ཕྱེད་ཕྱེད་ཅིང་བཏོན་པར་གྱུར་ཏེ། མིག་ལྡན་འགྲོ་བ་ཡོད་པ་ཡིས། །ཉམ་ང་བ་དག་ཇི་བཞིན་དུ། །མཁས་པ་འཚོ་བའི་འཇིག་རྟེན་འདིར། །སྡིག་པ་དག་ནི་ཡོངས་སུ་སྡོང་། །སྐུར་བ་མི་གདབ་གནོད་མི་བྱ། །སོ་སོར་ཐར་བ་འང་བསྡམ་པར་བྱ། །ཟས་ཀྱི་ཚོད་ཀྱང་རིག་པར་བྱ། །བས་མཐའི་གནས་
སུ་གནས་པར་བྱ། །ལྷག་པའི་སེམས་ལ་ཡང་དག་སྦྱོར། །འདི་ནི་སངས་རྒྱས་བསྟན་པ་ཡིན། །ཞེས་བྱ་བའོ། །དེ་ལ་མིག་ལྡན་འགྲོ་བ་ཡོད་པ་ཡིས། །ཉམ་ང་བ་དག་ཇི་བཞིན་དུ། །ཞེས་བྱ་བ་ནི་ཇི་ལྟར་མི་མིག་དང་ལྡན་པ་ལོང་བ་མ་ཡིན་པ་འགྲོ་བ་ཡོད་པ། འགྲོ་ཤེས་པས་ངམ་གྲོག་དང་། ཚེར་མ་དང་།
སྡིག་སྦྲུལ་ལ་སོགས་པས་ཉམ་ང་བ་སྡུག་བསྔལ་གྱི་རྒྱུར་གྱུར་པའི་གནས་མི་མཉམ་པ་དག་ཡོངས་སུ་སྤོང་བར་བྱེད་པ་དེ་བཞིན་དུ། མཁས་པ་འཚོ་བའི་འཇིག་རྟེན་འདིར། །སྡིག་པ་དག་ནི་ཡོངས་སུ་སྤོང་། །ཞེས་བྱ་བ་གསུངས་ཏེ་མཁས་པ་བློ་དང་ལྡན་པ་རྟོག་པ་དང་སེལ་ནུས་པ་ཡང་འཚོ་བའི་འཇིག་རྟེན་འདིར་
འཁོར་བ་འདི་ན་སྡིག་པ་གང་དག་ཡིན་པ་དེ་དག་ཡོངས་སུ་སྤོང་བར་བྱེད་དོ། །ཇི་ལྟར་སྡིག་པ་དེ་དག་ཡོངས་སུ་སྤང་བར་བྱ་ཞེ་ན། དེའི་ཕྱིར། སྐུར་པ་མི་གདབ་གནོད་མི་བྱ། །ཞེས་བྱ་བ་ལ་སོགས་གསུངས་ཏེ། སྐུར་པ་མི་གདབ་ཅེས་བྱ་བ་ནི་གཞན་ལ་ཡང་དག་པ་དང་ཡང་དག་པ་མ་ཡིན་པ་ཡང་རུང་བས་སྐུར་བ་མི་གདབ་
པའོ། །གནོད་མི་བྱ་ཞེས་བྱ་བ་ནི་གཞན་ལ་བརྡེག་པ་དང་། ཚིག་རྩུབ་མོ་ལ་སོགས་པས་གནོད་པ་མི་བྱ་བའོ། །སོ་སོར་ཐར་པ་བསྡམ་པར་བྱ། །ཞེས་བྱ་བ་ལ། སོ་སོར་ཐར་པ་ཞེས་བྱ་བ་ནི་སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་དང་། ཚིག་ཀྱལ་པ་དང་། ངག་
རྩུབ་མོ་ལ་སོགས་པ་སྤངས་པའི་སྡོམ་པ་དགེ་སློང་ལ་སོགས་པའི་རིས་བདུན་པོ་དག་གོ། །དེ་བསྡམ་པར་བྱ་བ་ནི་ཡོངས་སུ་བསྲུང་བར་བྱ་བ་སྟེ། དེ་ནི་བཟློག་པའི་མཚན་ཉིད་དང་། སྤྱད་པའི་མཚན་ཉིད་རྣམ་པ་གཉིས་ཀྱིས་ལྷག་པའི་ཚུལ་ཁྲིམས་བསྟེན་པར་ཤེས་པར་བྱ་བའོ། །ཟས་ཀྱི་ཚོད་ཀྱང་རིག་པར་བྱ། །ཞེས་བྱ་བ་ནི་འདི་ལྟར་
དགེ་སློང་རྣམས་ཀྱིས་ཟས་རུང་བ་འདི་ལ་ཟས་ཀྱི་ཚོད་ཀྱང་ཤེས་པར་བྱ་སྟེ། ཇི་ཙམ་གྱིས་ལུས་ལྕི་བ་དང་རྨྱ་བར་མི་འགྱུར་བ་དེ་ཙམ་གྱིས་ཚོད་ཡོངས་སུ་ཤེས་པར་བྱ་བའོ། །བས་མཐའི་གནས་སུ་གནས་པར་བྱ། །ཞེས་བྱ་བ་ནི་བས་མཐའ་མཐར་གྱུར་པ་གནས་དབེན་པར་གནས་པར་བྱ་བ་སྟེ། འདིས་ལུས་དང་ཡུལ་ལེགས་

པར་མཐུན་པ་དག་གིས་ལམ་བསྒོམ་པའི་ཚོགས་བསྟན་པར་ཤེས་པར་བྱའོ། །ལྷག་པའི་སེམས་ལ་ཡང་དག་སྦྱོར། །ཞེས་བྱ་བ་ལ་ལྷག་པའི་སེམས་ཞེས་བྱ་བ་ནི་སེམས་ཡོངས་སུ་སྦྱོང་བར་བྱེད་པ་སྟེ་གང་གིས་འདོད་ཆགས་ཀྱི་སྒྲིབ་པ་དང་། གཏི་མུག་གི་སྒྲིབ་པ་ལས་སེམས་རྣམ་པར་སྦྱོང་བ་
སྟེ། དེ་ཡང་ཟག་པ་དང་བཅས་པ་དང་ཟག་པ་མེད་པའི་བསམ་གཏན་ནོ། །དེ་ལ་ཡང་དག་པའི་སྦྱོར་བ་ནི་ཡང་དག་པའི་རྣལ་འབྱོར་དུ་བྱ་བ་སྟེ་འདིས་ནི་ལྷག་པའི་སེམས་ཀྱི་བསླབ་པ་དང་ལྷག་པའི་ཤེས་རབ་ཀྱི་བསླབ་པ་བསྟན་པར་ཤེས་པར་བྱའོ། །འདི་ནི་སངས་རྒྱས་བསྟན་པ་ཡིན། །ཞེས་བྱ་བ་ནི་དེ་བཞིན་གཤེགས་
པས་མདོར་བསྟན་པ་འདི་ནི་ཚོགས་དང་བཅས་པའི་ལམ་བསྟན་པ་ཡིན་ཏེ། དེ་ཉིད་སངས་རྒྱས་ཀྱི་བསྟན་པ་ཡིན་ནོ་ཞེས་བྱ་བའི་ཐ་ཚིག་གོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་སྐྱོབ་ཀྱི་སློབ་མ་རྣམས་ཀྱང་ཉེས་པ་ཆུང་བར་འགྱུར་ཏེ། འདི་ལྟར་ཁྱིམ་པའི་སྐྱེ་བོ་དང་འགྲོགས་པར་དགའ་བ་ཙམ་ཞིག་
ཡོད་པས་དེ་དག་གིས་ཉེས་པ་དེ་ཡོངས་སུ་སྤང་བའི་ཕྱིར་བཅོམ་ལྡན་འདས་དེས་སོ་སོར་ཐར་པའི་མདོ་འདི་ལྟར་མདོར་བསྡུས་ཏེ་ཟླ་བ་ཕྱེད་ཕྱེད་ཅིང་བཏོན་པར་འགྱུར་ཏེ། ཇི་ལྟར་བུང་བ་མེ་ཏོག་ལས། །ཁ་དོག་དྲི་ལ་མི་གནོད་པར། །ཁུ་བ་གཞིབས་ནས་འཕུར་བ་ལྟར། །དེ་བཞིན་ཐུབ་པ་གྲོང་དུ་རྒྱུ། །
ཞེས་བྱ་བའོ། །དེ་ལ་ཇི་ལྟར་སྲོག་ཆགས་བུང་བ་མེ་ཏོག་གི་ཁ་དོག་དང་དྲི་ལ་མི་གནོད་པར་ཁུ་བ་གཞིབས་ཏེ་འཕུར་བ་དེ་བཞིན་དུ་ཐུབ་པ་རབ་ཏུ་བྱུང་བ་བསོད་སྙོམས་ཀྱི་ཕྱིར་གྲོང་དུ་རྒྱུ་བས་ཀྱང་གྲོང་ནས་ཁ་དོག་དང་དྲི་ལྟ་བུ་སེམས་དང་ཚུལ་ཁྲིམས་ལ་མི་གནོད་པ་ཁུ་བ་ལྟ་བུའི་ཟས་བླངས་ཏེ་འགྲོ་བར་བྱའོ་ཞེས་བྱ་བའི་ཐ་ཚིག་
གོ། །བཅོམ་ལྡན་འདས་དེ་བཞིན་གཤེགས་པ་འཁོར་བ་འཇིག་གི་སློབ་མ་རྣམས་ཀྱང་ཉེས་པ་ཆུང་བར་འགྱུར་ཏེ། གཞན་གྱི་སྐྱོན་དང་ཡོན་ཏན་ལ་རྟོག་པ་ཙམ་ཞིག་ཡོད་པས་དེ་དག་གི་སྐྱོན་དེ་ཡོངས་སུ་སྤང་བའི་ཕྱིར་བཅོམ་ལྡན་འདས་དེས་སོ་སོར་ཐར་པའི་མདོ་འདི་ལྟར་མདོར་བསྡུས་ཏེ་ཟླ་བ་ཕྱེད་ཕྱེད་ཅིང་བཏོན་
པར་འགྱུར་ཏེ། བདག་གི་རིགས་དང་མི་རིགས་ལ། །བརྟགས་པར་བྱ་སྟེ་གཞན་རྣམས་ཀྱི། །མི་མཐུན་པ་དང་གཞན་དག་གིས། །བྱས་དང་མ་བྱས་རྣམས་ལ་མིན། །ཞེས་བྱ་བའོ། །དེ་ལ་བདག་གི་རིགས་དང་མི་རིགས་ལ་བརྟག་པར་བྱ་སྟེ་ཞེས་བྱ་བ་ནི་བདག་ཉིད་ཀྱིས་རིགས་པ་དང་མི་རིགས་པ་ལ་སོ་སོར་

བརྟག་པར་བྱ་བའོ། །གཞན་རྣམས་ཀྱི་མི་མཐུན་པ་ཞེས་བྱ་བ་ནི་གཞན་རྣམས་ཀྱི་མི་རིགས་པའོ། །གཞན་དག་གིས། བྱས་དང་མ་བྱས་རྣམས་ལ་མིན། །ཞེས་བྱ་བ་ནི་གཞན་དག་གིས་རྫོགས་པ་དང་མ་རྫོགས་པ་རྣམས་ལ་བརྟག་པར་མི་བྱའོ། །འདི་སྐད་བསྟན་པ་སྟེ་གཞན་དག་གི་ཡོན་ཏན་དང་སྐྱོན་ལ་རྟོག་པ་
ལ་ནི་རྗེས་སུ་ཆགས་པ་དང་ཁོང་ཁྲོ་བ་འབྱུང་བས་དེའི་ཕྱིར་གཞན་ལ་རྟོག་པ་སྤངས་ཏེ་བདག་ཉིད་ལ་བརྟག་ཅིང་བདག་ཉིད་ལ་ལེགས་པར་འདོད་པར་བྱས་ན་ཕྱིས་གཞན་དག་ལ་བརྟག་པའི་སྐབས་ཡོད་པར་འགྱུར་རོ་ཞེས་བསྟན་ཏོ། །བཅོམ་ལྡན་འདས་དེ་བཞིན་གཤེགས་པ་གསེར་ཐུབ་ཀྱི་སློབ་མ་རྣམས་ཀྱང་ཉེས་པ་
ཆུང་བར་འགྱུར་ཏེ། སྲེད་པ་དང་བཅས་པས་བསམ་གཏན་སྐྱེད་པར་བྱེད་པ་ཙམ་ཞིག་ཡོད་པར་དེ་དག་གི་ཉེས་པ་དེ་ཡོངས་སུ་སྤང་བའི་ཕྱིར་བཅོམ་ལྡན་འདས་དེས་སོ་སོར་ཐར་པའི་མདོ་འདི་ལྟར་མདོར་བསྡུས་ཏེ་ཟླ་བ་ཕྱེད་ཕྱེད་ཅིང་བཏོན་པར་འགྱུར་ཏེ། ལྷག་པའི་སེམས་ལ་བག་བྱ་སྟེ། །ཐུབ་པའི་ཐུབ་གཞི་རྣམས་ལ་བསླབ། །ཉེར་
ཞི་རྟག་ཏུ་དྲན་ལྡན་པའི། །སྐྱོབ་པ་མྱ་ངན་མེད་པ་ཡིན། །ཞེས་བྱ་བའོ། །དེ་ལ་ལྷག་པའི་སེམས་ཞེས་བྱ་བ་ནི་བསམ་གཏན་བཞི་པོ་དག་གོ། །དེ་ལ་བག་བྱ་སྟེ་ཞེས་བྱ་བ་ནི་སྲེད་པ་དང་ང་རྒྱལ་དང་། ལྟ་བ་མཆོག་ཏུ་འཛིན་པ་སྤང་ཞིང་བག་གྱིས་ཤིག་ཅེས་བྱ་བའོ། །སྤང་བ་བསྟན་ནས་བླང་བ་བསྟེན་པའི་ཕྱིར། ཐུབ་པའི་ཐུབ་
གཞི་རྣམས་ལ་བསླབ། །ཅེས་བྱ་བ་གསུངས་ཏེ། ཐུབ་པ་ཞེས་བྱ་བ་ནི་མཁྱེན་པ་དང་ལྡན་པ་སྟེ། ཡང་དང་ཡང་དུ་མཛད་པའི་ཕྱིར་ཐུབ་པ་ནི་སངས་རྒྱས་བཅོམ་ལྡན་འདས་སོ། །ཐུབ་པ་དེའི་ཐུབ་གཞི་ནི་འཕགས་པའི་བདེན་པ་བཞི་པོ་དག་སྟེ། གང་དག་གིས་ཐུབ་པ་སྐྱེད་པའོ། །དེ་རྣམས་ལ་བསླབ་པ་ནི་མཆོག་ཏུ་
བསླབ་ཅིང་ནན་ཏན་གྱིས་ཤིག་ཅེས་བྱ་བའི་ཐ་ཚིག་གོ། །དེ་ལ་བསླབ་ན་ཅིར་འགྱུར་ཞེ་ན། འབྲས་བུ་བསྟན་པའི་ཕྱིར། ཉེར་ཞི་རྟག་ཏུ་དྲན་ལྡན་པའི། །སྐྱོབ་པ་མྱ་ངན་མེད་པ་ཡིན། །ཞེས་བྱ་བ་གསུངས་ཏེ། ཉེ་བར་ཞི་བ་དང་རྟག་ཏུ་དྲན་པ་དང་ལྡན་པ་གཉིས་ཀྱིས་སྐྱོབ་པ་ཉིད་དུ་བསྟན་པར་ཤེས་པར་བྱའོ། །དེ་ལ་
ཉེ་བར་ཞི་བར་ཞེས་བྱ་བ་ནི་མཉམ་པར་གཞག་པ་སྟེ། ལུས་དང་ངག་གཉིས་ཀྱིས་བསྡམས་པའོ། །རྟག་ཏུ་དྲན་པ་དང་ལྡན་པ་ཞེས་བྱ་བ་ནི་རྟག་ཏུ་དྲན་པ་ཉེ་བར་གཞག་པའོ། །སྐྱོབ་པ་ཞེས་བྱ་བ་ནི་རང་གི་སེམས་རྗེས་སུ་བསྲུང་བའོ། །མྱ་ངན་མེད་པ་ཡིན་ཞེས་བྱ་བ་འདིས་ནི་སྐྱེ་བ་ཟད་པ་བསྟན་ཏེ། མྱ་ངན་ལས་

འདས་པ་ཡིན་པར་ཤེས་པར་བྱའོ། །བཅོམ་ལྡན་འདས་དེ་བཞིན་གཤེགས་པ་འོད་སྲུངས་ཀྱི་སློབ་མ་རྣམས་ཀྱང་ཉེས་པ་ཆུང་བར་གྱུར་ཏེ། སྦྱིན་པ་ལ་མ་གུས་པ་དང་དགྲ་མང་བར་བལྟ་བ་ཙམ་ཞིག་ཡོད་པས་དེ་དག་གི་ཉེས་པ་དེ་ཡོངས་སུ་སྤང་བའི་ཕྱིར་བཅོམ་ལྡན་འདས་དེས་མཐར་ཐུག་པའི་
ཆོས་བསྟན་པས་སོ་སོར་ཐར་པའི་མདོ་འདི་ལྟར་མདོར་བསྡུས་ཏེ་ཟླ་བ་ཕྱེད་ཕྱེད་ཅིང་བཏོན་པར་གྱུར་ཏེ། སྦྱིན་པས་བསོད་ནམས་རབ་ཏུ་འཕེལ། །ལེགས་བསྡམས་དགྲ་སོགས་མི་འགྱུར་རོ། །དགེ་དང་ལྡན་པས་སྡིག་པ་སྤོང་། །ཉོན་མོངས་ཟད་པས་མྱ་ངན་འདའ། །ཞེས་བྱ་བའོ། །དེ་ལ་སྦྱིན་པ་ཞེས་བྱ་བ་ནི་
སྦྱིན་པ་བྱེད་པའི་མི་སྟེ། དེས་ནི་ལོངས་སྤྱོད་ཀྱི་འབྲས་བུ་ཅན་གྱི་བསོད་ནམས་ཀྱི་ལས་རབ་ཏུ་འཕེལ་བར་འགྱུར་རོ། །ཚུལ་ཁྲིམས་ལེགས་པར་བསྡམས་པས་ནི་དགྲ་སོགས་པར་མི་འགྱུར་རོ། །ཚུལ་ཁྲིམས་ཀྱིས་དགྲའི་རྒྱུ་གསོད་པ་དང་། རྐུ་བ་དང་། བུད་མེད་ལ་ཆགས་པ་ལ་སོགས་པ་མི་བསྐྱེད་
པའི་ཕྱིར་རོ། །དགེ་སློང་དང་ལྡན་པས་ཞེས་བྱ་བ་ནི་བསམ་གཏན་བཞི་ཐོབ་པ་སྟེ། དེས་ནི་འདོད་པ་ལ་སྤྱོད་པའི་སྡིག་པ་ཁོང་ཁྲོ་བ་དང་ཕྲག་དོག་དང་། ཁྲོ་བ་ལ་སོགས་པ་རྣམ་པར་སྨིན་པ་མི་འདོད་པར་འགྱུར་བ་དག་ཡོངས་སུ་སྤོང་བར་འགྱུར་རོ། །འཕགས་པའི་ལམ་གྱིས་ཉོན་མོངས་པ་ཐམས་ཅད་
ཡོངས་སུ་ཟད་པས་ནི་ཕུང་པོའི་ལྷག་མ་དང་བཅས་པ་དང་། ལྷག་མ་མེད་པའི་མྱ་ངན་ལས་འདས་པ་ཐོབ་པར་འགྱུར་རོ། །དེ་བས་ན་སྦྱིན་པ་ནི་འཁོར་བའི་འབྲས་བུ་ཅན་ཡིན་པས་དེ་ལ་གུས་པར་མི་བྱ་ཞིང་དགྲ་མང་བ་ནི་སྡོམ་བརྩོན་དང་མི་མཐུན་པ་ཡིན་པས་དེ་མི་བྱ་ཞེས་པའི་ཐ་ཚིག་གོ། །བཅོམ་ལྡན་འདས་དེ་
བཞིན་གཤེགས་པ་ཤཱཀྱ་ཐུབ་པའི་བསྟན་པ་ལ་ཆུ་བུར་མ་བྱུང་བའི་ཚེ་ན་དེའི་སློབ་མ་རྣམས་ཀྱང་ཉེས་པ་ཆུང་བར་གྱུར་པས། བཅོམ་ལྡན་འདས་ཀྱིས་དེ་དག་ལ་སོ་སོར་ཐར་པའི་མདོ་འདི་ལྟར་མདོར་བསྡུས་ཏེ་ཚིགས་སུ་བཅད་པ་གསུམ་གྱིས་བཏོན་པར་འགྱུར་ཏེ། སྡིག་པ་ཐམས་ཅད་མི་བྱ་སྟེ། །དགེ་བ་ཕུན་སུམ་ཚོགས་
པར་བྱ། །རང་གི་སེམས་ནི་ཡོངས་སུ་གདུལ། །དེ་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པའང་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །སྡུག་བསྔལ་ཀུན་ལས་རབ་ཏུ་གྲོལ། །ངག་རྣམས་བསྲུང་ཞིང་ཡིད་ཀྱིས་རབ་

བསྡམས་ཏེ། །ལུས་ཀྱིས་མི་དགེ་བ་དག་མི་བྱེད་ཅིང་། །ལས་ལམ་གསུམ་པོ་འདི་དག་རབ་སྦྱངས་ན། །དྲང་སྲོང་གསུངས་པའི་ལམ་ནི་ཐོབ་པར་འགྱུར། །ཞེས་བྱའོ། །དེ་ལ་སྡིག་པ་ཐམས་ཅད་མི་བྱ་སྟེ། ཞེས་བྱ་བ་འདིས་ནི་ལྷག་པའི་ཚུལ་ཁྲིམས་ཀྱི་བསླབ་པ་བསྟན་ཏོ། །དགེ་བ་ཕུན་སུམ་ཚོགས་
པར་བྱ། །ཞེས་བྱ་བ་འདིས་ནི་ལྷག་པའི་ཤེས་རབ་ཀྱི་བསླབ་པ་བསྟན་ཏེ། ཉོན་མོངས་པ་ནི་ཐམས་ཅད་སྤངས་པ་ནི་དོན་དམ་པའི་དགེ་བ་ཡིན་པའི་ཕྱིར་རོ། །རང་གི་སེམས་ནི་ཡོངས་སུ་གདུལ། །ཞེས་བྱ་བ་འདིས་ནི་ལྷག་པའི་སེམས་ཀྱི་བསླབ་པ་བསྟན་ཏོ། །ལུས་ཀྱི་སྡོམ་པ་ལེགས་པ་སྟེ། །ཞེས་བྱ་
བ་ལ་སོགས་སྡོམ་པ་རྣམ་པ་བཞིས་ནི་ཚུལ་ཁྲིམས་ཕུན་སུམ་ཚོགས་པ་བསྟན་ཏོ། །སྡུག་བསྔལ་ཀུན་ལས་རབ་ཏུ་གྲོལ། །ཞེས་བྱ་བ་འདིས་ནི་ཚུལ་ཁྲིམས་གྱི་སྐྱེས་བུའི་རྩལ་གྱིས་འབྲས་བུ་ཐག་རིང་བ་བསྟན་ཏོ། །ཇི་ལྟར་ཚུལ་ཁྲིམས་ཀྱིས་སྡུག་བསྔལ་ཀུན་ལས་རབ་ཏུ་གྲོལ་བར་འགྱུར་ཞེ་ན། དེའི་ཕྱིར། ངག་
རྣམས་བསྲུང་ཞིང་ཡིད་ཀྱིས་རབ་བསྡམས་ཏེ། །ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་ཚུལ་ཁྲིམས་ཕུན་སུམ་ཚོགས་པས་ངན་སོང་གསུམ་གྱི་སྒོ་སྦྱངས་ཤིང་། འཕགས་པའི་ལམ་ཐོབ་པ་དེ་སྡུག་བསྔལ་ཐམས་ཅད་ལས་གྲོལ་བ་དེའི་ཕྱིར་འདི་ནི་ཚུལ་ཁྲིམས་ཀྱི་སྐྱེས་བུའི་རྩལ་གྱིས་འབྲས་བུ་ཐག་རིང་བ་
ཡིན་ནོ། །དེ་ལྟར་མདོར་བསྡུས་པ་དང་། རྒྱས་པར་བསྟན་པ་དག་གིས་སངས་རྒྱས་བདུན་གྱི་སོ་སོར་ཐར་པ་གདོན་པ་བསྟན་ནས། ད་ནི་མཇུག་བསྡུ་བའི་སྒོ་ནས་ནན་ཏན་བྱ་བ་བསྟན་པའི་ཕྱིར། སངས་རྒྱས་རྣམ་གཟིགས་གཙུག་ཏོར་ཐམས་ཅད་སྐྱོབ། །འཁོར་བ་འཇིག་དང་གསེར་ཐུབ་འོད་སྲུངས་དང་། །
ཤཱཀྱ་ཐུབ་པ་གཽ་ཏམ་ལྷ་ཡི་ལྷ། །མི་འདུལ་ཁ་ལོ་བསྒྱུར་བ་བླ་ན་མེད། །འཇིག་རྟེན་མགོན་པོ་སྐྱོབ་པ་མཆོག །སངས་རྒྱས་དཔའ་བོ་བདུན་པོ་དག །གྲགས་ལྡན་རྣམས་ཀྱིས་སོ་སོར་ཐར། །འདི་ནི་རབ་ཏུ་རྒྱས་པར་བསྟན། །འདི་ལ་སངས་རྒྱས་རྣམས་དང་གང་། །སངས་རྒྱས་ཉན་ཐོས་རྣམས་ཀྱང་
གུས། །འདི་ལ་གུས་དང་བཅས་གྱུར་པས། །འདུས་མ་བྱས་པ་འང་ཐོབ་པར་གྱིས། །ཞེས་བྱ་བའི་ཚིགས་སུ་བཅད་པ་གསུམ་ཡང་དག་པར་སྡུད་པ་བྱེད་པ་སྨྲས་སོ། །དེ་ལ་སངས་རྒྱས་རྣམ་གཟིགས་གཙུག་ཏོར་ཐམས་ཅད་སྐྱོབ། །འཁོར་བ་འཇིག་དང་གསེར་ཐུབ་འོད་སྲུངས་དང་། །ཤཱཀྱ་ཐུབ་པ་

ཞེས་བྱ་བ་རྣམས་ནི་སངས་རྒྱས་བདུན་གྱི་མཚན་ཏེ་གོ་རིམས་བཞིན་ནོ། །གཽ་ཏ་མ་ལྷ་ཡི་ལྷ། མི་འདུལ་ཁ་ལོ་བསྒྱུར་བ་བླ་ན་མེད། །ཅེས་བྱ་བ་དག་ནི་བཅོམ་ལྡན་འདས་ཤཱཀྱ་ཐུབ་པའི་གདུང་དང་ཡོན་ཏན་ཏེ། གཽ་ཏམ་ཞེས་བྱ་བ་ནི་གདུང་སྟེ། དྲང་སྲོང་གཽ་ཏ་མའི་རྒྱུད་ཡིན་པའི་ཕྱིར་
རོ། །ལྷའི་ལྷ་ཞེས་བྱ་བ་ནི་ཆོས་ཉིད་ཀྱིས་གྲགས་པའི་སྒོ་ནས་ནི་སྙིགས་མ་ལྔ་ཤས་ཆེ་བའི་དུས་ན་སེམས་ཅན་ལ་ཕན་པ་རྫོགས་པར་མཛད་པའི་ཕྱིར་རོ། །འཇིག་རྟེན་ལ་གྲགས་པའི་སྒོ་ནས་ནི་ལྷ་རྣམས་ཀྱིས་ཀྱང་ཞབས་ལ་བཏུད་དེ་ཕྱག་བྱས་པའི་ཕྱིར་རོ། །མི་འདུལ་ཁ་ལོ་བསྒྱུར་བ་བླ་ན་མེད། །ཅེས་བྱ་བ་ནི་
འཇམ་པ་དང་། རྩུབ་པོ་དང་། གཉི་གའི་རང་བཞིན་གྱི་འདུལ་བ་རྣམ་པ་གསུམ་གྱིས་འདུལ་བ། སྐྱེས་བུ་རྟ་ལྟ་བུ་དག་ཕྱིན་ཅི་མ་ལོག་པར་འདུལ་བར་མཛད་པའི་ཕྱིར་རོ། །འཇིག་རྟེན་མགོན་པོ་ཞེས་བྱ་བ་ནི་ཁམས་གསུམ་པའི་མགོན་པོ་སྟེ། ཕན་པ་དཔག་ཏུ་མེད་པ་མཛད་པས་ཡོངས་སུ་སྐྱོབ་པར་མཛད་པའི་ཕྱིར་རོ། །
སྐྱོབ་པ་ཞེས་བྱ་བ་ནི་མངའ་དབང་གི་ཆོས་ཐམས་ཅད་ལ་དབང་ཕྱུག་བརྙེས་པའི་ཕྱིར་རམ། འདུལ་བའི་སྐྱེ་བོ་དུས་ལས་མི་ཡོལ་བས་ཡོངས་སུ་སྐྱོབ་པར་མཛད་པའི་ཕྱིར་རོ། །མཆོག་ཅེས་བྱ་བ་ནི་གཙོ་བོ་སྟེ། བླ་ན་མེད་པའི་མཁྱེན་པ་དང་ལྡན་པའི་ཕྱིར་རམ། རྗེས་སུ་མཐུན་པའི་ཕན་པ་མཛད་པ་ཡོངས་སུ་མཁྱེན་པའི་
ཕྱིར་རོ། །སངས་རྒྱས་དཔའ་བོ་ཞེས་བྱ་བ་ནི་ཡེ་ཤེས་ལ་སོགས་པ་དག་གིས་འགྲོ་བ་ཐམས་ཅད་པས་དཔའ་བའི་སངས་རྒྱས་ཞེས་བྱ་བའི་ཐ་ཚིག་གོ། །གྲགས་ལྡན་ཞེས་བྱ་བ་ནི་སྙན་པ་དང་ལྡན་པ་སྟེ། འཇིག་རྟེན་གསུམ་ལས་ཤིན་ཏུ་འདས་པའི་སྙན་པའི་ཚོགས་དང་ལྡན་པ་ཞེས་བྱ་བའི་ཐ་ཚིག་གོ། །རབ་ཏུ་
རྒྱས་པར་བཏོན་ཞེས་བྱ་བ་ནི་དུས་དང་པོར་བྱ་བ་དང་། གསོལ་བ་བྱས་ནས་གདོན་པ་ལྔ་པོ་དག་བཏོན་པའོ། །འདི་ལ་སངས་རྒྱས་རྣམས་དང་གང་། །སངས་རྒྱས་ཉན་ཐོས་རྣམས་ཀྱང་གུས། །ཞེས་བྱ་བ་ནི་སངས་རྒྱས་བཅོམ་ལྡན་འདས་རྣམས་ནི་ཆོས་འདུལ་བ་གཙོ་བོར་མཛད་པ་དང་། སངས་རྒྱས་ཀྱི་ཉན་ཐོས་
རྣམས་ཀྱང་ཆོས་འདུལ་བ་ལ་གུས་པའི་ཕྱིར་རོ། །འདི་དག་གུས་དང་བཅས་གྱུར་པས། །འདུས་མ་བྱས་པ་ཐོབ་པར་གྱིས། །ཞེས་བྱ་བ་ནི་སོ་སོར་ཐར་པ་འདི་ལ་གུས་པ་དང་བཅས་པས་མྱ་ངན་ལས་འདས་པ་འདུས་མ་བྱས་པ་ཐོབ་པར་གྱིས་ཤིག་ཅེས་བྱ་བའི་ཐ་ཚིག་གོ། །ཇི་ལྟར་འདི་ལ་གུས་པ་དང་

བཅས་པས་འདུས་མ་བྱས་ཐོབ་པར་བྱ་ཞེ་ན། དེའི་ཕྱིར། བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱད་འགྱུར་བ། །སྐྱེ་བའི་འཁོར་བ་
རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་གསུངས་ཏེ། བརྩམ་པར་བྱ་ཞིང་ཞེས་བྱ་བ་ནི་བརྩོན་པར་གྱིས་ཤིག་པའོ། །འབྱུང་བར་བྱ་ཞེས་བྱ་བ་ནི་འཁོར་བ་ལས་ངེས་པར་འབྱུང་བའི་ཕྱིར་དགོན་པ་ལ་སོགས་པ་དབེན་པར་སོང་ཤིག་ཅེས་བྱ་བའི་ཐ་ཚིག་གོ། །སངས་རྒྱས་བསྟན་པ་
ཞེས་བྱ་བ་ནི་བདེན་པ་བཞི་བསྟན་པ་ལའོ། །འཇུག་པར་བྱ་ཞེས་བྱ་བ་ལ་ནི་མགོ་དང་གོས་ལ་མེ་འབར་བ་ལྟར་མངོན་པར་བརྩོན་པར་གྱིས་ཤིག་པའོ། །འདམ་བུའི་ཁྱིམ་ལ་གླང་ཆེན་བཞིན། །ཞེས་བྱ་བ་ནི། འཆི་བདག་སྡེ་ནི་གཞོམ་པར་བྱ། །ཞེས་བྱ་བའི་དཔེ་ཡིན་ཏེ། འདམ་བུའི་ཁྱིམ་གླང་པོ་ཆེས་འཇོམས་པ་ལྟ་བུའོ། །
འཆི་བདག་ཅེས་བྱ་བ་ནི་འཆི་བའོ། །སྡེ་ཞེས་བྱ་བ་ནི་སྲེད་པ་ལ་སོགས་པ་འཁོད་དོ། །གཞོམ་པར་བྱ་ཞེས་བྱ་བ་ནི་གཞིག་པར་གྱིས་ཤིག་ཅེས་བྱ་བའོ། །དེའི་ཕན་ཡོན་བསྟན་པའི་ཕྱིར། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་
མར་བྱེད་པར་འགྱུར། །ཞེས་བྱ་བ་གསུངས་ཏེ། རབ་ཏུ་བག་ཡོད་པར་ཞེས་བྱ་བ་ནི་རབ་ཏུ་བག་མེད་པ་སྤངས་པས་སོ། །ཆོས་ཞེས་བྱ་བ་ནི་འཕགས་པའི་ལམ་ཡན་ལག་བརྒྱད་པའོ། །འདུལ་བ་ཞེས་བྱ་བ་ནི་ཡང་དག་པར་བསྒྲུབ་པའི་མཚན་ཉིད་དོ། །འདི་ལ་སྤྱོད་འགྱུར་བ་ཞེས་བྱ་བ་ནི་རྗེས་སུ་སྒྲུབ་པར་འགྱུར་བའོ། །
སྐྱེ་བའི་འཁོར་བ་ཞེས་བྱ་བ་ནི་སྐྱེ་བའི་འཁོར་བ་ནི་འཁོར་བའི་གཙོ་བོ་ཡིན་པས་སྐྱེ་བའི་འཁོར་བ་སྟེ། འཁོར་བའི་སྡུག་བསྔལ་གྱི་རྩ་བ་ནི་སྐྱེ་བ་ཡིན་པའི་ཕྱིར་རོ། དེ་ལྟར་ཡང་། །སྐྱེ་བ་འདི་དོན་གང་ཕྱིར་སྐྱེ་བ་ཡོད་ན་རྒ་ཤི་དང་། །ན་དང་སྡུག་བསྔལ་གསད་དང་བཅིངས་ལ་སོགས་པའི་དགྲ་དག་ཡོད། །གལ་ཏེ་འཇིགས་མང་
སྐྱེ་བ་མེད་ན་དོན་མེད་དེ་མི་འབྱུང་། །ཤིང་སྐྱེས་མེད་ན་ནགས་མེ་རླུང་གིས་སྐྱེ་བར་མི་འགྱུར་བཞིན། །ཞེས་གསུངས་པའི་ཕྱིར་རོ། །ཡང་ན་སྐྱེ་བའི་འཁོར་བ་ཞེས་བྱ་བ་ནི་སྐྱེ་བ་དག་ཏུ་འཁོར་བའི་ཕྱིར་རོ། །རབ་སྤངས་ནས་ཞེས་བྱ་བ་ནི་གཏན་དུ་སྤངས་ནས་སོ། །སྡུག་བསྔལ་ཞེས་བྱ་བ་ནི་སྐྱེ་བ་ལ་སོགས་པའོ། །ཐ་

མར་བྱེད་པར་འགྱུར་བ་ཞེས་བྱ་བ་ནི་རྒྱུན་གཅོད་པར་བྱེད་པར་འགྱུར་བའོ། །ད་ནི་སོ་སོར་ཐར་པའི་མདོ་གདོན་པ་མཇུག་བསྡུ་བའི་ཕྱིར་ཡང་དག་པ་སྡུད་པར་བྱེད་པས། ཕན་ཚུན་ཚུལ་ཁྲིམས་བསྲུངས་པ་དང་། །བསྟན་པ་འཕེལ་བར་བྱ་བའི་ཕྱིར། །སོ་སོར་ཐར་པ་འདི་བཏོན་པས། །དགེ་འདུན་གྱིས་ནི་གསོ་
སྦྱོང་བྱས། །ཞེས་བྱ་བ་སྨྲས་ཏེ། དེ་ལ་ཕན་ཚུན་ཚུལ་ཁྲིམས་བསྲུངས་པ་ཞེས་བྱ་བ་ནི་གཅིག་ལ་གཅིག་འདོམས་ཤིང་རྗེས་སུ་སྟོན་པ་དང་། གཅིག་གིས་གཅིག་ལྟུང་བ་ལས་བསླང་བའོ། །བསྟན་པ་འཕེལ་བར་བྱ་བའི་ཕྱིར། །ཞེས་བྱ་བ་ནི་ཕན་ཚུན་ཚུལ་ཁྲིམས་བསྲུངས་པ་ཉིད་དེ་ལྟ་བུས་བཅོམ་ལྡན་འདས་དེ་བཞིན་
གཤེགས་པ་དེའི་འཁོར་འདི་འཕེལ་བར་འགྱུར་བ་རིམ་གྱིས་སྟོན་པའི་བསྟན་པ་འཕེལ་ཞིང་ཡུན་རིང་དུ་གནས་པར་བྱ་བའི་ཕྱིར་རོ། །སོ་སོར་ཐར་པ་འདི་བཏོན་པས། །ཞེས་བྱ་བས་ནི་སེམས་དྲང་པོར་བསྒྲུབ་པ་དང་། འགལ་བ་བཟློག་པ་ལ་སོགས་པ་རྣམ་པ་གཞན་གྱིས་ཀྱང་གསོ་སྦྱོང་བྱ་བ་ཡོད་མོད་ཀྱི་སྐབས་འདིར་ནི་སོ་སོར་
ཐར་པའི་མདོ་གདོན་པ་རྣམ་པ་ལྔ་པོ་གླེང་གཞི་གདོན་པ་དང་། ཕམ་པར་འགྱུར་བ་གདོན་པ་དང་། དགེ་འདུན་ལྷག་མ་གདོན་པ་དང་། མ་ངེས་པར་གདོན་པ་དང་། རིལ་གྱིས་གདོན་པ་དག་གིས་གསོ་སྦྱོང་བྱ་དགོས་པས་སོ་སོར་ཐར་པ་འདི་བཏོན་པས་ཞེས་བྱ་བ་གསུངས་སོ། །དགེ་འདུན་གྱིས་ནི་གསོ་སྦྱོང་བྱས། །ཞེས་བྱ་བ་
ནི་ཞི་གནས་ཀྱི་གསོ་སྦྱོང་དང་། མཐུན་པའི་གསོ་སྦྱོང་ལས། འདིར་ནི་མཐུན་པའི་གསོ་སྦྱོང་དང་སྦྱར་རོ། །མཐུན་པའི་གསོ་སྦྱོང་རྣམ་པ་ལྔ་པོ་བཅུ་བཞི་པ་དང་། བཅོ་ལྔ་པ་དང་། བཀྲ་ཤིས་ཀྱི་གསོ་སྦྱོང་དང་། གནོད་པ་བྱུང་བའི་གསོ་སྦྱོང་དང་། བསྡུམ་པའི་གསོ་སྦྱོང་དག་ལས་འདིར་ཅི་རིགས་པར་སྦྱར་ཏེ། གཙོ་
ཆེར་ནི་བཅུ་བཞི་པའམ། བཅོ་ལྔ་པ་དང་སྦྱར་རོ། །དེའི་འོག་ཏུ་མཇུག་བསྡུ་བའི་སྒོ་ནས་ནན་ཏན་བྱ་བ་བསྟན་པའི་ཕྱིར། གང་གི་ཕྱིར་ནི་མདོ་བཏོན་དང་། །གང་ཕྱིར་གསོ་སྦྱོང་བྱས་གྱུར་པ། །ཚུལ་ཁྲིམས་དེ་ནི་བསྲུང་བྱ་སྟེ། །གཡག་རྔའི་རྩེ་མོ་ཇི་བཞིན་ནོ། །ཞེས་བྱ་བ་གསུངས་ཏེ། དེ་ལ་གང་གི་ཕྱིར་ནི་མདོ་
བཏོན་དང་། །གང་ཕྱིར་གསོ་སྦྱོང་བྱས་གྱུར་པ། །ཞེས་བྱ་བ་ནི་ཕན་ཕུན་ཚུལ་ཁྲིམས་བསྲུང་བ་དང་། བསྟན་པ་འཕེལ་བར་བྱ་བའི་ཕྱིར། །ཞེས་གོང་དུ་སྨོས་པ་དེའི་ཕྱིར་རོ། །ཚུལ་ཁྲིམས་དེ་ནི་བསྲུང་བྱ་སྟེ། །ཞེས་བྱ་བ་ནི་སོ་སོར་ཐར་པའི་སྡོམ་པས་བསྡུས་པའི་ཚུལ་ཁྲིམས་རྣམ་པ་དྲུག་པོ་རྣམ་པར་དབྱེ་

བ་དང་། བསྡུ་བ་དང་། ཕུན་སུམ་ཚོགས་པ་དང་། རྣམ་གྲངས་དང་། རྣམ་པར་དག་པ་དང་། ཕན་ཡོན་དེ་དག་སྦྱོར་བ་དང་། དངོས་དང་། མཇུག་གི་སྒོ་ནས་བག་ཡོད་པར་སྲུང་བར་གྱིས་ཤིག་ཅེས་བྱ་བའི་ཐ་ཚིག་གོ། །གཡག་རྔའི་རྩེ་མོ་ཇི་བཞིན་ནོ། །ཞེས་བྱ་བ་ནི་བག་ཡོད་པར་བསྲུང་བར་བྱ་བའི་དཔེ་སྟེ། ཇི་
ལྟར་བསིལ་རུམ་གངས་ཁྲོད་ན་གནས་པའི་གཡག་རྒོད་རྔ་མ་ལ་བག་ཡོད་པས་བསྲུང་བ་རྔ་མ་ཝ་མཇུག་ལྟར་མི་རྐྱོང་བར་རྩེ་མོ་ལྡང་དུ་གཟར་ཏེ་འགྲོ་བ་དེ་བཞིན་དུ་ཚུལ་ཁྲིམས་འདི་ཡང་བག་ཡོད་པས་སྲུང་བར་གྱིས་ཤིག་ཅེས་བྱ་བའི་ཐ་ཚིག་གོ། །ད་ནི་ཡང་དག་པར་སྡུད་པར་བྱེད་པས་འདུལ་བའི་སྡེ་སྣོད་ཡང་དག་པར་བསྡུ་
བ་མཐར་ཕྱིན་ནས་དགེ་བའི་རྩ་བ་དེ། སོ་སོར་ཐར་པ་བཏོན་པ་ཡིས། །བསོད་ནམས་གྲུབ་པ་གང་ཡོད་པ། །དེས་ནི་འཇིག་རྟེན་མ་ལུས་པ། །ཐུབ་དབང་གོ་འཕང་ཐོབ་པར་ཤོག །ཅེས་བྱ་བ་གསུངས་ཏེ། སོ་སོར་ཐར་པ་འདི་བཏོན་པའི་བསོད་ནམས་སྒྲུབ་པ་གང་ཡོད་པ་དེས་འཇིག་རྟེན་མ་ལུས་པ་ཐམས་ཅད་ཐུབ་
པའི་དབང་པོ་སངས་རྒྱས་བཅོམ་ལྡན་འདས་ཀྱི་གོ་འཕང་ཐོབ་པར་ཤོག་ཤིག་ཅེས་བྱ་བའི་ཐ་ཚིག་སྟེ། ཐུབ་པ་ནི་ཉན་ཐོས་དང་རང་སངས་རྒྱས་སོ། །དེའི་དབང་པོ་ནི་དེ་བཞིན་གཤེགས་པ་སྟེ། འཇིག་རྟེན་མ་ལུས་པས་དེ་ཐོབ་པར་གྱུར་ཅིག་ཅེས་ཐམས་ཅད་ཀྱིས་དེ་ལྟར་ཡོངས་སུ་བསྔོ་བར་བྱའོ། །བསྡུ་བའི་མཚན་ཉིད་བཤད་ཟིན་ཏོ།། །།
དེ་ལྟར་ཡང་དག་པར་སྡུད་པར་བྱེད་པས་སོ་སོར་ཐར་པའི་མདོ་ཡང་དག་པར་བསྡུ་བ་འདི་ཡང་རྒྱུད་ཆགས་གསུམ་པའི་ཚུལ་དུ་བརྩམས་པ་ཡིན་ཏེ། སྙན་པའི་བ་དན་འཇིག་རྟེན་གསུམ་དུ་གྲགས། །དམ་པའི་ཆོས་སྒྲ་སེང་གེའི་སྒྲ་བསྒྲགས་པ། །ཐམས་ཅད་མཁྱེན་པ་དཀོན་མཆོག་མཛོད་བརྙེས་པ། །ཞབས་ལ་ཚངས་
དབང་གཙུག་གི་ནོར་བུས་གཏུགས། །སྡུག་བསྔལ་རྒྱ་མཚོ་གཏིང་མཐའ་མེད་བརྒལ་བ། །འགྲོ་བའི་གཙོ་ལ་སྤྱི་བོས་ཕྱག་འཚལ་ཏེ། །ཞེས་སྨོས་པས་ནི་ཕྱག་འཚལ་བའི་རྒྱུད་བསྟན་ཏོ། །དེའི་འོག་ཏུ། ཐམས་ཅད་མཁྱེན་པའི་བསླབ་གཞི་དཀོན་མཆོག་སྣོད། །འཕགས་པའི་ཚོགས་ཀྱིས་དབུས་སུ་དབྱེ་བར་
བྱ། །ཞེས་བྱ་བ་ནས། ཚུལ་ཁྲིམས་དེ་ནི་བསྲུང་བྱ་སྟེ། །གཡག་རྔའི་རྩེ་མོ་ཇི་བཞིན་ནོ། །ཞེས་གསུངས་པའི་བར་གྱིས་ནི་མདོ་གདོན་པའི་རྒྱུད་བསྟན་ཏོ། །མཇུག་ཏུ། སོ་སོར་ཐར་པ་བཏོན་པ་ཡིས། །བསོད་ནམས་གྲུབ་པ་གང་ཡོད་པ། །དེས་ནི་འཇིག་རྟེན་མ་ལུས་པ། །ཐུབ་དབང་གོ་འཕང་ཐོབ་པར་ཤོག །

ཅེས་གསུངས་པས་ནི་བསྔོ་བའི་རྒྱུད་བསྟན་ཏོ། །སོ་སོར་ཐར་པའི་མདོ་རྒྱ་ཆེར་འགྲེལ་བ་འདུལ་བ་ཀུན་ལས་བཏུས་པ་རྫོགས་སོ།། །།དབང་ཕྱུག་དམ་པའི་མངའ་བདག་རྒྱལ་པོ་ཆེན་པོ་དཔལ་ལྷ་བཙན་པོའི་བཀའ་ལུང་གིས་འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་
བ་འཛིན་པ་ཆེན་པོ་ཁ་ཆེའི་བྱེ་བྲག་ཏུ་སྨྲ་བའི་སློབ་དཔོན་ཛི་ན་མི་ཏྲ་དང་། སརྦ་ཛྙཱ་དེ་བ་དང་། བོད་ཀྱི་ཞུ་ཆེན་གྱི་ལོ་ཙཱ་བ་དགེ་སློང་ཅོག་རོ་ཀླུའི་རྒྱལ་མཚན་གྱིས་བསྒྱུར་ཅིང་ཞུ་ཆེན་བགྱིས་ཏེ་གཏན་ལ་ཕབ་པའོ། །འདི་ལ་ཤླཽ་ཀ་ནི་ཁྲི་ལྔ་སྟོང་ཡོད། བམ་པོ་ནི་ལྔ་བཅུར་བྱས་སོ།། །།
༄༅༅། །རྒྱ་གར་སྐད་དུ། པྲ་ཏི་མོ་ཀྵ་སཱུ་ཏྲ་བྲྀ་ཏྟི། བོད་སྐད་དུ། སོ་སོར་ཐར་པའི་མདོའི་འགྲེལ་པ། ཐམས་ཅད་མཁྱེན་པ་ལ་ཕྱག་འཚལ་ལོ། །འདི་རྣམས་ཀྱི་དོན་ནི་འོག་ནས་འབྱུང་ངོ་། །འདི་མན་ཅད་ཚིགས་བཅད་ཕྱེད་དང་གཉིས་ནི་ཨུ་པ་ལིའི་སངས་རྒྱས་ལ་བསྟོད་ཅིང་ཕྱག་བྱ་བ་སྟེ།
དེ་ཡང་སངས་རྒྱས་བཅོམ་ལྡན་འདས་ཡོན་ཏན་ཕུན་སུམ་ཚོགས་པ་བཞི་དང་ལྡན་ཏེ། གང་ཞེ་ན། རྒྱུ་དང་། གཞན་གྱི་དོན་དང་། བདག་གི་དོན་དང་། འབྲས་བུ་ཕུན་སུམ་ཚོགས་པ་སྟེ། ཡི་གེ་གཞུང་དང་ཐད་ཀར་སྦྱར་རོ། །སྙན་པའི་བ་དན་འཇིག་རྟེན་གསུམ་དུ་གྲགས། །རྩ་བ་འདི་ནི་རྒྱུ་ཕུན་སུམ་ཚོགས་པ་
དང་སྦྱར་ཏེ། དེ་ལ་སྙན་པ་ནི་སངས་རྒྱས་ཀྱི་སྤྱོད་པ་དང་། ཡོན་ཏན་ཕུན་སུམ་ཚོགས་པ་དང་ལྡན་པ་ཞེས་བསྔགས་པའམ་གྲགས་པ་དང་ལྡན་པ་ཉིད་ལ་བྱའོ། །བ་དན་ནི་དཔེ་སྟེ། མཚོན་ལྟ་བུ་གཞན་ལས་འཕགས་པར་སྣང་ཞིང་མངོན་པ་བཞིན་དུ་སངས་རྒྱས་ཀྱང་འགྲོ་བ་ཐམས་ཅད་ལས་འཕགས་པར་
སྣང་ཞིང་མངོན་པའོ། །འཇིག་རྟེན་གསུམ་དུ་གྲགས་ཞེས་པ་ནི་འདོད་པ་དང་། གཟུགས་དང་། གཟུགས་མེད་པའི་ཁམས་སུ་སངས་རྒྱས་ཀྱི་ཡོན་ཏན་གྲགས་པའོ། །དེ་ལ་ཐེ་ཚོམ་པས་བྱ་བ། འདོད་པ་དང་གཟུགས་ཀྱི་ཁམས་ན་ནི་ལྡན་པས་གྲགས་སུ་ཡང་རུང་ན་གཟུགས་ཀྱི་ཕུང་པོ་མེད་པས། དེ་ནི་ཇི་
ལྟར་གྲགས་པར་རུང་ཞེས་བྱ་བའི་ལན་དུ་དེ་ནི་སྔོན་འདོད་པ་དང་། གཟུགས་ཀྱི་ཁམས་སུ་སྐྱེས་པའི་ཚེ། སྔོན་ཐོས་པ་དེ་ཡིད་ལ་དྲན་ཞིང་ཤེས་པ་ཡོད་པས་དེ་ཉིད་ལ་གྲགས་པ་ཞེས་བྱའོ། །དེ་ཇི་ལྟར་རྒྱུ་ཕུན་སུམ་ཚོགས་པ་ཡིན་ཞེ་ན། སྦྱིན་པ་ལ་སོགས་ཕ་རོལ་ཏུ་ཕྱིན་པ་བཅུ་རབ་ཏུ་རྫོགས་པས། སྦྱིན་པ་ཆེན་པོ་

དང་ལྡན་ནོ་ཞེས་པ་ནས་ཡེ་ཤེས་དང་ལྡན་ནོ་ཞེས་པའི་བར་དུ་གྲགས་པས་ན་རྒྱུ་ཕུན་སུམ་ཚོགས་པ་ཡིན་ནོ། །དམ་པའི་ཆོས་སྒྲ་སེང་གེའི་སྒྲ་བསྒྲགས་པ། །རྩ་བ་འདི་ནི་གཞན་གྱི་དོན་ཕུན་སུམ་ཚོགས་པ་དང་སྦྱར་ཏེ། དེ་ལ་དམ་པ་ནི་སྐྱེས་བུ་དམ་པ་སྟེ། སངས་རྒྱས་བཅོམ་ལྡན་འདས་སྒྲིབ་པ་སྤངས་པའི་མཐར་
ཕྱིན་ཅིང་བསོད་ནམས་དང་ཡེ་ཤེས་ཀྱི་ཚོགས་དང་ལྷན་ཅིག་པ་ཡིན་ནོ། །དེ་ལ་ཆོས་སྒྲ་ནི་སངས་རྒྱས་ཀྱི་བདེན་པ་བཞི་ལ་སོགས་དམ་ཆོས་བསྒྲགས་པ་སྟེ། དེས་མུ་སྟེགས་ཅན་དང་འཇིག་རྟེན་པའི་གཙུག་ལག་ཟིལ་གྱིས་གནོན་པ་དཔེར་ན་རི་དགས་ཀྱི་རྒྱལ་པོ་སེང་གེ་རལ་པ་ཅན་གྱི་སྒྲ་བསྒྲགས་པས་
བྱོལ་སོང་ཐམས་ཅད་ཀྱི་སྒྲ་ཟིལ་གྱིས་གནོན་པ་བཞིན་ནོ། །ཐམས་ཅད་མཁྱེན་པ་རིན་ཆེན་མཛོད་བརྙེས་པ། །ཐམས་ཅད་མཁྱེན་པ་ནི་བདག་གི་དོན་དང་སྦྱར་ཏེ། དེ་ལ་ཐམས་ཅད་ཅེས་བྱ་བ་གང་ཞེ་ན། བྲམ་ཟེས་གསོལ་པའི་ལན་དུ་བཀའ་སྩལ་པ་ལས། བྲམ་ཟེ་ཐམས་ཅད་ཅེས་བྱ་བ་ནི་སྐྱེ་མཆེད་བཅུ་གཉིས་ཡིན་
ནོ་ཞེས་འབྱུང་བས་ན། སྐྱེ་མཆེད་བཅུ་གཉིས་ཀྱི་ནང་དུ་ཕྱི་ནང་གི་ཆོས་མ་ལུས་པར་འདུས་པས་དེ་དག་མཁྱེན་པ་ཡང་བྱའོ། །ཡང་ན་འདོད་ཆགས་དང་བྲལ་བ་སྟོང་ཞིང་དབེན་པའི་མཚན་ཉིད་ཇི་ལྟ་བ་བཞིན་དུ་མཁྱེན་པ་ཡང་ཡིན་ནོ། །ཡང་གཅིག་ཏུ་ན་དངོས་པོ་ཐམས་ཅད་མཁྱེན་པ་ལ་བྱ་སྟེ། དེ་ཡང་རྣམ་པ་བཞི་ལྟར་
མཁྱེན་ཏེ། གང་ཞེ་ན། མ་ལུས་པར་མཁྱེན་པ། མ་འདྲེས་པར་མཁྱེན་པ། ཚད་མེད་པར་མཁྱེན་པ། ཕྱིན་ཅི་མ་ལོག་པར་མཁྱེན་པ། དེ་ལ་མ་ལུས་པ་ནི་གང་། དངོས་པོ་གཟུགས་ལ་སོགས་པ་མ་ལུས་པ་མཁྱེན་པའོ། །མ་འདྲེས་པ་ནི་སངས་རྒྱས་ཀྱི་མཁྱེན་པ་དེ་ཉིད་ཉན་ཐོས་དང་རང་སངས་རྒྱས་ཀྱི་ཤེས་པ་དང་
མ་འདྲེས་པར་ཁྱད་དུ་ཞུགས་པའོ། །ཚད་མེད་པ་ནི་ཇི་སྙེད་ཤེས་པར་བྱ་བ་ཚད་མེད་པ་ཐམས་ཅད་རབ་ཏུ་མཁྱེན་པའོ། །ཕྱིན་ཅི་མ་ལོག་པ་ནི་མུ་སྟེགས་ཅན་དང་འཇིག་རྟེན་པ་ལྟ་བུ་ཕྱིན་ཅི་ལོག་ཏུ་རྟོག་ཅིང་ཤེས་པ་ལྟར་མ་ཡིན་ཏེ། འཕགས་པའི་བདེན་པ་དང་། ལམ་གྱི་ཆོས་ལ་སོགས་པ་ངོ་བོ་ཉིད་ཀྱིས་ཇི་ལྟ་བ་
བཞིན་དུ་མཁྱེན་པ་སྟེ། དེ་ནི་བདག་གི་དོན་ཕུན་སུམ་ཚོགས་པ་ཡིན་ཏེ། གཞན་གྱི་དོན་ཕུན་སུམ་ཚོགས་པའི་རྒྱུར་ཡང་འགྱུར་རོ། །ཇི་ལྟ་ཞེ་ན། བཅིངས་པ་པ་དང་ལོང་བས་གཞན་དགྲོལ་ཞིང་མཚོན་པའི་གནས། བདག་གྲོལ་བས་གཞན་དགྲོལ་བའི་གནས་ཡོད་པ་བཞིན་དུ་བདག་གི་དོན་ཆེན་པོ་གྲུབ་

པས་ན་གཞན་གྱི་དོན་ཡང་གྲུབ་པར་གྱུར་ཏེ། འདིས་ནི་ཡེ་ཤེས་ཚད་མེད་པ་བསྟན་པ་ཡིན་ནོ། །དེ་ལ་རིན་ཆེན་མཛོད་ཅེས་བྱ་བ་ལ་རིན་ཆེན་ནི་བསྟན་པའི་ཆོས་ཏེ་ཞལ་ནས་གསུངས་པའི་མདོ་སྡེ་དང་། བསྒྲུབ་པའི་ཆོས་ཏེ་བདེན་པ་བཞི་དང་ལམ་གྱི་ཡན་ལག་གི་ཆོས་ལ་བྱའོ། །མཛོད་ཅེས་
བྱ་བ་ནི་འཕགས་པའི་དགེ་འདུན་ལ་བྱ་སྟེ། ཅིའི་ཕྱིར་རིན་པོ་ཆེའི་མཛོད་དུ་གདགས་ཤེ་ན། བསྟན་པའི་ཆོས་དང་བསྒྲུབ་པའི་ཆོས་དག་ཟག་པ་མེད་པའི་དགེ་འདུན་དེ་དག་གིས་རྫོགས་པར་བསྒྲུབས་པས། རིན་ཆེན་མཛོད་དུ་གྱུར་པ་ཡིན་ནོ། །བརྙེས་ཞེས་བྱ་བ་ནི་གོང་མ་ལྟ་བུའི་དོན་ཕུན་སུམ་ཚོགས་
པ་བརྙེས་པ་ཡིན་ཏེ། ཇི་ལྟ་ཞེ་ན། སྐལ་པ་ཡོད་པ་དེ་དག་ལ་དགེ་བའི་ཆོས་བསྟན་ནས་ཟག་པའི་དགྲ་བཅོམ་པ་ཡིན་ཏེ། འདི་ནི་གཞན་གྱི་དོན་ཕུན་སུམ་ཚོགས་པ་དང་སྦྱར་ཏེ། འདི་ནི་ཐུགས་རྗེ་ཚད་མེད་པ་ཡིན་ནོ། །ཞབས་ལ་ཚངས་དབང་གཙུག་གི་ནོར་བུས་གཏུགས། །རྩ་བ་འདིར་ནི་འབྲས་བུ་ཕུན་སུམ་ཚོགས་
པ་དང་སྦྱར་ཏེ། ཚངས་པ་ནི་འདོད་པའི་འདོད་ཆགས་དང་བྲལ་བས་ཚངས་པ་དང་། བསམ་གཏན་དང་པོ་རིས་ཀྱི་ལྷའི་རྒྱལ་པོའོ། །དབང་པོ་ནི་སུམ་ཅུ་རྩ་གསུམ་ལྷའི་རྒྱལ་པོ་སྟེ། །ལྷ་རྣམས་དབང་བྱེད་པས་ན་དབང་པོ་འཇིག་རྟེན་གྱི་མཆོག་ཏུ་གྲགས་པ་འདི་གཉིས་ཀྱི་གཙུག་ན་རིན་པོ་ཆེ་ཡོད་པས་ཀྱང་
ཞབས་ལ་གཏུགས་ཏེ་ཕྱག་འཚལ་བས་ན། སངས་རྒྱས་ནི་འགྲོ་བ་ཐམས་ཅད་ཀྱི་གཙོ་བོ་སངས་རྒྱས་ཞིང་མཆོད་པའི་གནས་སུ་མངོན་ཏེ། དེ་བས་ན་འབྲས་བུ་ཕུན་སུམ་ཚོགས་པ་དང་སྦྱར་རོ། །སྡུག་བསྔལ་རྒྱ་མཚོ་གཏིང་མཐའ་མེད་བརྒལ་བ། །རྩ་བ་འདི་ནི་བདག་གི་དོན་ཕུན་སུམ་ཚོགས་པ་དང་སྦྱར་ཏེ།
དཔེར་ན་རྒྱ་མཚོ་མཆིང་རྣམས་ཟབ་ཅིང་རྒྱ་ཆེ་བ་བཞིན་དུ་སྲིད་པའི་སྡུག་བསྔལ་དཔག་ཏུ་མེད་པ་ལས་བརྒལ་བ་ནི་སངས་རྒྱས་བཅོམ་ལྡན་འདས་ཡིན་པར་སྦྱར་རོ། །དེ་ལ་ཐེ་ཚོམ་པས་བྱ་བ་དེ་ལྟར་མཐའ་མེད་ན་བརྒལ་ཞེས་བྱར་ཀྱང་མི་བཏུབ་ཅེས་པའི་ལན་དུ། དེ་ནི་དཔེར་ན་རྒྱ་མཚོ་ཆེན་པོའི་འགྲམ་ན་གནས་པས་
མཐའ་ཡོད་པར་མི་ཤེས་པ་བཞིན་དུ། སེམས་ཅན་མ་རབས་ཀྱིས་མཐའ་ཡོད་པར་མི་མཐོང་མི་ཤེས་པས་ན་མཐའ་མེད་ཅེས་བྱ་བར་ཟད་ཀྱི། འཕགས་པས་ཀྱང་མཐའ་མི་གཟིགས་པ་ནི་མ་ཡིན་ནོ། །འགྲོ་བའི་གཙོ་ལ་སྤྱི་བོས་ཕྱག་འཚལ་ཏེ། རྩ་བ་འདི་ནི་བདག་དོན་ཕུན་སུམ་ཚོགས་པ་དང་སྦྱར་ཏེ། སངས་

རྒྱས་འགྲོ་བའི་གཙོ་བོ་ཡིན་པར་ཅི་མངོན་ཞེ་ན། མཆོག་གསུམ་ཞེས་བྱ་བའི་མདོ་སྔགས་བྱུང་བ་རྐང་གཉིས་དང་། རྐང་མངས་ཐམས་ཅད་ཀྱི་གཙོ་བོ་ནི་སངས་རྒྱས་ཡིན། འདུས་བྱས་དང་འདུས་མ་བྱས་པའི་ཆོས་ཐམས་ཅད་ཀྱི་གཙོ་བོ་ནི་འདོད་ཆགས་དང་བའི་ཆོས་ཡིན། མང་པོ་ཐམས་ཅད་ཀྱི་གཙོ་བོ་ནི་དགེ་འདུན་
ཡིན་ཞེས་འབྱུང་བས་ན། འགྲོ་བའི་གཙོ་བོར་དེ་ལྟར་མངོན་ནོ། །སྤྱི་བོས་ཕྱག་བྱས་ནི་ལྷག་པར་དད་ཅིང་གུས་པའི་ཚུལ་ལོ། །འདི་མན་ཆད་རྩ་བ་གཉིས་ནི་གོང་མ་ལྟར་བསྟོད་པར་བྱས་ཟིན་ནས། འདི་ལྟར་ངས་སོ་སོར་ཐར་པའི་མདོ་དགྲོལ་ཞིང་རྒྱས་པར་སྟོན་པའོ། །ཐམས་ཅད་མཁྱེན་པའི་བསླབ་གཞི་
དཀོན་མཆོག་སྣོད། །འཕགས་པའི་ཚོགས་ཀྱི་དབུས་སུ་དབྱེ་བར་བྱ། །ཐམས་ཅད་མཁྱེན་པ་ནི་ལྟག་ཏུ་སྨོས་པ་དང་འདྲ། བསླབ་པ་ནི་གང་མི་བྱ་བའི་དངོས་པོ་རྣམས་ཏེ། སྲོག་མི་གཅད་པ་ལ་སོགས་པའོ། །ཚིག་ནི་གང་མི་བྱ་བའི་དངོས་པོ་དེ་དག་མ་བྱེད་ཅིག་པར་བསྟན་པ་སྟེ། སོ་སོར་ཐར་པ་འདི་ཉིད་
ལ་བྱའོ། །དཀོན་མཆོག་སྣོད་ཅེས་བྱ་བ་ལ། དཀོན་མཆོག་ནི་རིན་ཆེ་ཞིང་དམ་པ་ཡིན་ཏེ། དངོས་སུ་ན་འདུལ་བ་འབུམ་སྡེར་གཏོགས་པ་རྣམས་སོ། །དེ་ལ་སྣོད་ཅེས་བྱ་བ་ནི་སོ་སོར་ཐར་པ་འདི་ཉིད་ལ་བྱ་སྟེ། འདུལ་བ་འབུམ་སྡེའི་མདོ་མ་ལུས་པར་སོ་སོར་ཐར་པའི་ནང་དུ་འདུས་ཤིང་གནས་པ་ལ་བྱའོ། །འཕགས་
པའི་ཚོགས་ཀྱི་དབུས་སུ་དབྱེ་བ་ནི་ཟག་པ་མེད་པའི་དགེ་འདུན་དང་། ཕྱིན་ཅི་ལོག་ལས་རིང་དུ་གྱུར་པའི་དགེ་འདུན་བཞི་ཡན་ཆད་ལ་བྱའོ། །དཔེར་ན་གཙུག་ལག་ཤེས་ཤིང་རིན་པོ་ཆེ་ཉིད་རིན་ཆེ་བར་ཤེས་པའི་མདུན་དུ་རིན་པོ་ཆེའི་སྣོད་དབྱེ་བར་བྱ་བ་བཞིན་དུ་སོ་སོར་ཐར་པ་འདི་རིན་ཆེ་བར་ཤེས་པ་དད་པ་དང་
ཚུལ་ཁྲིམས་ཅན་གྱི་དབུས་སུ་དབྱེ་བར་བྱ་བ་ཡིན་ཏེ། མི་དབྱེ་བ་ཡང་འདི་ལས་ཟློག་པར་རིག་པར་བྱའོ། །སངས་རྒྱས་ཀྱིས་ནི་འདུལ་བའི་མཚོ། །འདི་མན་ཆད་ནས་གཞོན་ནུའི་ལྕགས་ཀྱུ་ཞེས་པའི་བར་དུ་ཚིགས་བཅད་གསུམ་ནི་མཐོང་བའི་འབྲས་བུའི་སྒོ་ནས་སོ་སོར་ཐར་པ་འདི་ཉིད་བསྟོད་པར་རིག་པར་
བྱའོ། །སངས་རྒྱས་ཀྱིས་ནི་འདུལ་བའི་མཚོ། །མ་ལུས་གཏིང་དང་ཕ་རོལ་མེད། །གནས་དང་སྙིང་གི་སྙིང་པོ་ནི། །སོ་སོར་ཐར་པ་འདི་ཡིན་ནོ། །འདི་མན་ཆད་ནི་དགོས་པའི་དགོས་དོན་འཆད་དེ། བཤད་པའི་དམིགས་དང་། དགོས་འབྲེལ་ཡང་ཞར་ལ་འདུ་བར་རིག་པར་བྱའོ། །དེ་ལ་བཤད་པའི་

དམིགས་ནི་གང་ཚིག་ཏུ་བརྗོད་པའི་དངོས་པོ་ཉིད། དགོས་པ་ནི་ཚིག་ཏུ་བརྗོད་པ་དེ་དགོས་པར་ཤེས་པའོ། །འབྲེལ་པ་ནི་བརྗོད་པའི་ཚིག་གིས་མཚོན་ནས་དོན་ཤེས་པ་ཉིད་དེ། ཐབས་དང་འབྲེལ་བའི་དོན་ཏོ། །དཔེར་ན་རྒྱ་མཚོ་མཆིང་རྣམས་ཟབ་ཅིང་རྒྱ་ཆེ་བ་བཞིན་དུ། སངས་
རྒྱས་ཀྱི་འདུལ་བ་ཡང་ཟབ་ཅིང་རྒྱ་ཆེ་བ་ཡིན་ཏེ། དེ་ལ་ཟབ་པ་ནི་ལྟུང་བ་འབྱིན་པའི་རྩིས་མགོ་མང་པོར་གསུངས་པ་རྣམས་ཡིན། རྒྱ་ཆེ་བ་ནི་འབུམ་སྡེ་ལས་ལྟུང་བ་དང་མི་ལྟུང་བའི་རིམ་པ་རྒྱས་པར་འབྱུང་བ་རྣམས་སོ། །དེ་ལ་སངས་རྒྱས་ཀྱི་འདུལ་བ་ཞེས་སྨོད་པ་ནི། མུ་སྟེགས་ཅན་ལ་སོགས་པའི་འདུལ་བ་
མ་ཡིན་པར་སྟོན་པའོ། །དེ་ལྟར་འདུལ་བ་གཏིང་དང་མཐའ་མེད་པའི་མདོ་མ་ལུས་པར་འདུས་ཤིང་གནས་པས་ནས་ཆེན་པོ་དང་འདྲའོ། །སྙིང་གི་ཞེས་བྱ་བ་ནི་ལུས་ཀྱི་གཙོ་བོ་ཡིན་པ་དང་འདྲ་བར་སྟོན་པ་ཡིན། སྙིང་པོ་ཞེས་བྱ་བ་ནི་སྙིང་ཁུ་ལྟ་བུ་སྟེ། འདུལ་བ་ཐམས་ཅད་ཀྱི་སྙིང་ཁུ་ཡིན་པས་ན་ཕྱིར་རྒོལ་བས་མི་ཕྱེད་
པའོ། །དེ་ལ་འདུལ་བ་ཞེས་བྱ་བ་ནི་གང་ཉོན་མོངས་པ་གདུལ་བ་དང་། དགེ་སྦྱོང་གི་སློབ་མ་འདུལ་བ་སྟེ། གང་མི་བྱ་བ་མི་བྱེད་པ་ལ་བྱའོ། །དམ་པ་ཆོས་ཀྱི་རྒྱལ་པོ་ཡིས། །དམ་ཆོས་མི་བྲི་བསྡུས་པ་ཡིན། །དམ་པ་ནི་སྐྱེས་བུ་དམ་པ་ཡིན་ཏེ། སངས་རྒྱས་བཅོམ་ལྡན་འདས་ལ་ཡང་བྱ། ཡང་ན་དམ་པའི་ཆོས་
སྡེ་སྣོད་གསུམ་ལྟ་བུ་ལ་སྐྱོན་མེད་པའི་ཆོས་ལ་བྱ་སྟེ། ཆོས་དེ་ལྟ་བུའི་འབྱུང་ཁུང་ངམ་མངའ་མཛད་པ་ན་ཆོས་ཀྱི་རྗེར་གྱུར་པ་སྟེ། རྒྱལ་པོ་ཞེས་བྱའོ། །ཡིས་ཞེས་བྱ་བ་ནི་དེའི་ཆོས་ལ་བྱའི་གཞན་གྱིས་མ་ཡིན་པར་སྟོན་པའོ། །དེ་ལ་དམ་ཆོས་ནི་སྡེ་སྣོད་གསུམ་ལྟ་བུ་མི་བྲི་བ་ནི་འདུལ་བ་ཉི་ཚེ་དུས་དང་པོ་བཟང་པོའི་ཚེ་མི་
བྲི་གཟུང་བར་བསྟན་པའོ། །བསྡུས་པ་ནི་འདུལ་བའི་མདོ་སོ་སོར་ཐར་པའི་ནང་དུ་བསྡུས་པ་ལ་བྱའོ། །འདི་ནི་དགེ་སློང་ཚོང་པ་ཡི། །བསླབ་ཟོང་ཚོང་དུས་ཆེན་པོའོ། །དཔེར་ན་ནོར་ཆུང་ངུ་ལ་སྤེལ་ཞིང་བསྐྱེད་པར་སྤོགས་བྱས་ན། ཟོང་དུ་རིན་པོ་ཆེ་བཀྲམ་ན་ནོར་མང་པོར་འདུ་བའི་གཞིར་འགྱུར་བ་བཞིན་དུ། དགེ་སློང་
གིས་དགེ་བའི་སྤོགས་བྱ་ཞིང་དགེ་བའི་རྩ་བ་ཆུང་ངུ་ལས་འཕེལ་ཞིང་རྒྱས་པར་བྱ་བའི་ཟོང་དམ་པ་ནི་སོ་སོར་ཐར་པ་འདི་ཡིན་ཏེ། འདིས་ནི་ཟོང་ལྟ་བུར་བསྡུས་པར་བསྟན་པའོ། །ཚུལ་ཁྲིམས་ངན་པས་ཟིན