Luận tạng Tây Tạng (Tengyur) — Tập 152

་ངོ་ཞེས་དེ་བོར་ནས་གཞན་བྱེད་དུ་འཇུག །སྟན་འདི་ནི་ཧ་ཅང་དོག་གོ། །སྟན་འདི་ནི་ཧ་ཅང་ཡངས་སོ། །འདི་ནི་ཐམས་ཅད་ནས་ཐམས་ཅད་དུ་བུག་རྡོལ་དང་ཤ་ཟད་པ་དང་བཅོས་དཀའ་བ་ཡིན་ནོ་ཞེས་དེ་བོར་ནས་གཞན་བྱེད་དུ་འཇུག་པས་དགེ་སློང་འདི་དག་
སྟན་བྱས་ཤིང་བྱས་ཤིང་འདོར་བ་ན། བྱ་བ་མང་བ་དང་། བྱེད་པ་མང་བར་གྱུར་ཅིང་། ལུང་ནོད་པ་དང་། ཀླག་པ་དང་། ཁ་ཏོན་དང་། རྣལ་འབྱོར་དང་། ཡིད་ལ་བྱ་བ་དང་། ནང་གི་སེམས་ཀྱི་ཞི་གནས་གཏོང་བར་བྱེད་ཅེས་སྨོད་པར་བྱེད། ཕྱར་ཁ་གཏོང་བར་བྱེད། ཁ་ཟེར་བར་བྱེད་པའི་
སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དེ། དགེ་སློང་རྣམས་ལ་རྨས་ནས། རྣམ་གྲངས་དུ་མར་སྨད་དེ། བསླབ་པ་བཅའ་བའི་ཕན་
ཡོན་བཅུ་ཡང་དག་པར་གཟིགས་པས་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་སྟན་སར་པ་བྱེད་ན་མི་འདོད་བཞིན་དུ་ལོ་དྲུག་ཏུ་བཅང་བར་བྱའོ། །གལ་ཏེ་དགེ་སློང་གིས་ལོ་དྲུག་ཚུན་ཆད་དུ་སྟན་རྙིང་པ་དེ་སྤངས་ཀྱང་རུང་མ་སྤངས་ཀྱང་རུང་
སྟན་སར་པ་གཞན་བྱེད་ན་སྤང་བའི་ལྟུང་བྱེད་དོ་ཞེས་བཅའ་བ་མཛད་དེ། ཡུལ་ནི་མཉན་ཡོད། གང་ཟག་ནི་དགེ་སློང་རབ་ཏུ་མང་པོ། ཉོན་མོངས་པ་ནི་འདོད་ཞེན། ཉེས་པ་ནི་སྟན་ལོ་དྲུག་མ་ལོན་པར་སྟན་སར་པ་གཞན་བྱེད་པའོ། །གནང་བའི་གླེང་གཞི་ནི་སངས་རྒྱས་བཅོམ་ལྡན་འདས་
འབྲོག་གནས་ན་འབྲོག་གི་གནས་མཆོག་ན་བཞུགས་སོ། །འབྲོག་གནས་གྲང་ཞིང་རླུང་ཆེ་བས་དགེ་སློང་ལག་གི་བླ་དག་ལོ་དྲུག་ཏུ་སྟན་གྱིས་མི་ཐུབ་པ་དེ་དག་གྲང་བ་དག་གིས་མཁར་ལན་དག་རྒྱུན་བཅད་པར་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་
མཛད་པ་སྟེ། མཁྱེན་བཞིན་དུ་རྨེད་པ། མཁྱེན་ཀྱང་མི་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ། དོན་དང་མི་ལྡན་པ་ནི་མི་རྨེད་པས་སངས་རྒྱས་བཅོམ་ལྡན་འདས་རྣམས་ནི་དོན་དང་མི་ལྡན་པ་རྨེད་པ་ལ་ཆུ་ལོན་གྱིས་བཟློག་པ་མཛད་པ་ཡིན་ནོ། །དེ་ལ་སངས་

རྒྱས་བཅོམ་ལྡན་འདས་རྣམས་ནི་དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་ཅིའི་ཕྱིར་དགེ་སློང་ལག་གི་བླ་དག་གིས་མཁར་ལེན་དག་རྒྱུན་བཅད་པར་གྱུར། བཙུན་པ་བཅོམ་
ལྡན་འདས་ཀྱིས་འདི་ལྟར་དགེ་སློང་གིས་སྟན་སར་པ་བྱེད་ན་མི་འདོད་བཞིན་དུ་ལོ་དྲུག་ཏུ་བཅང་བར་བྱའོ། །གལ་ཏེ་དགེ་སློང་གིས་ལོ་དྲུག་ཚུན་ཆད་དུ་སྟན་རྙིང་པ་དེ་སྤངས་ཀྱང་རུང་། མ་སྤངས་ཀྱང་རུང་། སྟན་སར་པ་གཞན་བྱེད་ན་སྤང་བའི་ལྟུང་བྱེད་དོ་ཞེས་འདུལ་བ་ལ་ཉན་ཐོས་རྣམས་ཀྱི་
བསླབ་པའི་གཞི་བཅའ་བ་མཛད་པས། དགེ་སློང་ལག་གི་བླ་དག་དགུང་ལོ་དྲུག་གི་བར་དུ་སྟན་གྱིས་མི་ཐུབ་པ་དེ་དག་གྲང་བ་དག་གིས་མཁར་ལན་དག་རྒྱུན་བཀུམ་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དགེ་སློང་ལག་གི་བླ་གང་ལ་ལ་ལོ་དྲུག་ཏུ་སྟན་གྱིས་
མི་ཐུབ་པའི་དགེ་སློང་དེས་དགེ་འདུན་ལས་ལོ་དྲུག་ཚུན་ཆད་དུ་སྟན་གྱི་གནང་བ་གསོལ་བར་བྱའོ། །འདི་ལྟར་གསོལ་པར་བྱ་སྟེ། དེ་རང་གི་གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་
ཅིང་མཐུན་པར་གྱུར་པ་ལ་དགེ་སློང་ལག་གི་བླ་དེས་མཆིལ་ལྷམ་གཉིས་ཕུད་དེ་བླ་གོས་ཕྲག་པ་གཅིག་ཏུ་བྱས་ནས་རྒན་རིམས་བཞིན་དུ་ཕྱག་འཚལ་ཏེ། རྒན་པའི་མཐའ་ལོགས་སུ་ཙོག་པུར་འདུག་ནས་ཐལ་མོ་སྦྱར་ཏེ། འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་
གསན་དུ་གསོལ། བདག་དགེ་སློང་ལག་གི་བླ་མིང་འདི་ཞེས་བགྱི་བ་ལོ་དྲུག་སྟན་མི་བགྱིད་པ་ལས། བདག་དགེ་སློང་ལག་གི་བླ་མིང་འདི་ཞེས་བགྱི་བ་དགེ་འདུན་ལས་ལོ་དྲུག་ཚུན་ཆད་དུ་སྟན་གནང་བ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་
བའི་སླད་དུ། བདག་དགེ་སློང་ལག་གི་བླ་མིང་འདི་ཞེས་བགྱི་བ་ལ་ལོ་དྲུག་ཚུན་ཆད་དུ་སྟན་གནང་བ་སྩལ་དུ་གསོལ། དེ་བཞིན་དུ་ལན་གཉིས་ལན་གསུམ་དུ་བཟླས། དེ་ནི་དགེ་སློང་ལག་གི་བླས་ལོ་དྲུག་ཚུན་ཆད་དུ་དགེ་འདུན་ལས་སྟན་གྱི་གནང་བ་གསོལ་བའོ། །དེའི་འོག་ཏུ་དགེ་སློང་དེ་དག་

གིས་ཀྱང་དགེ་སློང་ལག་གི་བླ་དེ་ལ་དད་པས་སམ། ཡིད་ཆེས་པས་འགྲོ་བར་མི་བྱ་བར་འདི་ལྟར་དགེ་འདུན་ཐམས་ཅད་དེར་འདོང་བར་བྱ་བ་དང་། དགེ་འདུན་གྱིས་བསྐོས་པའི་དགེ་སློང་དག་གཏང་བར་བྱ་ཞིང་། དེ་དག་གིས་སྟན་དེ་རང་གི་མིག་སྔར་བབ་པར་བྱ་བའམ། ཡང་ན་སྟན་དེ་དགེ་འདུན་གྱི་དབུས་སུ་དབྱུང་བར་བྱ་སྟེ།
གལ་ཏེ་སྟན་དེ་ཧ་ཅང་རིང་བ་ཡིན་ན་དེ་དག་གིས་གཅད་པར་བྱའོ། །གལ་ཏེ་ཧ་ཅང་ཐུང་བ་ཡིན་ན་བལ་སྦྱིན་པར་བྱའོ། །གལ་ཏེ་ཧ་ཅང་ཡངས་པ་ཡིན་ན་དེ་དེ་དག་གིས་གཅད་པར་བྱའོ། །གལ་ཏེ་ཧ་ཅང་དོག་པ་ཡིན་ན་བལ་སྦྱིན་པར་བྱའོ། །གལ་ཏེ་རལ་བ་དང་རྡོལ་བ་ཡིན་ན་བལ་སྦྱིན་པར་བྱའོ། །གལ་ཏེ་ཐམས་
ཅད་ཀྱི་ཐམས་ཅད་དུ་བུག་རྡོལ་དང་ཤ་ཟད་པ་དང་། བཅོས་དཀའ་བ་ཉིད་ཡིན་ན་དེའི་ཚེ་དགེ་སློང་དེ་དག་གིས་རྒན་པའི་མཐའ་ལོགས་སུ་གུས་པ་དང་བཅས་པས་འདུག་སྟེ། འདི་སྐད་ཅེས་བརྗོད་པར་བྱའོ། །གནས་བརྟན་དག་དགེ་སློང་ལག་གི་བླ་མིང་འདི་ཞེས་བགྱི་བའི་སྟན་དེ་དག་ཐམས་
ཅད་ཀྱི་ཐམས་ཅད་དུ་བུག་རྡོལ་དང་ཤ་ཟད་པ་དང་། བཅོས་དཀའ་བ་ཉིད་ལགས་ཀྱི་ད་དེའི་དུས་ལ་བབ་པར་མཁྱེན་པར་མཛོད་ཅིག །དེ་ནི་དུས་དང་པོར་བྱ་བའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །འདི་ལྟར་བྱ་སྟེ། འདུག་ལ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་
པ་རྣམས་གསན་དུ་གསོལ། དགེ་སློང་ལག་གི་བླ་མིང་འདི་ཞེས་བགྱི་བ་འདི་ལོ་དྲུག་ཏུ་སྟན་མི་བགྱིད་པ་ལས་དགེ་སློང་ལག་གི་བླ་མིང་འདི་ཞེས་བགྱི་བ་འདི་དགེ་འདུན་ལས་ལོ་དྲུག་ཚུན་ཆད་དུ་སྟན་གནང་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་
བར་མཛོད་ཅིག་དང་། དགེ་འདུན་གྱིས་དགེ་སློང་ལག་གི་བླ་མིང་འདི་ཞེས་བགྱིས་པ་ལ་ལོ་དྲུག་ཚུན་ཆད་དུ་སྟན་གནང་བ་སྩོལ་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་ལག་གི་བླ་མིང་འདི་ཞེས་བགྱི་བ་ལོ་དྲུག་ཏུ་སྟན་
མི་བགྱིད་པ་ལས། དགེ་སློང་ལག་གི་བླ་མིང་འདི་ཞེས་བགྱི་བ་འདི་དགེ་འདུན་ལས་ལོ་དྲུག་ཚུན་ཆད་དུ་སྟན་གནང་བར་གསོལ་ཏེ། དེའི་སླད་དུ་དགེ་འདུན་གྱིས་དགེ་སློང་ལག་གི་བླ་མིང་འདི་ཞེས་བགྱི་བ་ལ་ལོ་དྲུག་ཚུན་ཆད་དུ་སྟན་གནང་བ་སྩོལ་ན། ཚེ་དང་ལྡན་པ་གང་དག་དགེ་སློང་ལག་

གི་བླ་མིང་འདི་ཞེས་བགྱི་བ་འདི་ལ་ལོ་དྲུག་ཚུན་ཆད་དུ་སྟན་གནང་བ་སྩལ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་ལག་གི་བླ་མིང་འདི་ཞེས་
བགྱི་བ་ལ་ལོ་དྲུག་ཚུན་ཆད་དུ་སྟན་གནང་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་འདུན་གྱིས་དགེ་སློང་ལག་གི་བླ་གང་ལ་ལོ་དྲུག་ཚུན་ཆད་དུ་སྟན་གནང་བ་བྱིན་པ་དེས་ལོ་དྲུག་ཚུན་ཆད་དུ་སྟན་བྱེད་དུ་བཞུག་སྟེ་འདི་ལ་འགྱོད་པར་མི་བྱའོ། །དེ་ནས་
བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་དེ། དགེ་སློང་རྣམས་ལ་ཡང་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས། དགེ་སློང་རྣམས་
ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ་འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་སྟན་སར་པ་བྱེད་ན་མི་འདོད་བཞིན་དུ་ལོ་དྲུག་ཏུ་བཅང་བར་བྱའོ། །གལ་ཏེ་དགེ་སློང་གིས་
ལོ་དྲུག་ཚུན་ཆད་དུ་སྟན་རྙིང་པ་དེ་སྤངས་ཀྱང་རུང་མ་སྤངས་ཀྱང་རུང་སྟན་སར་པ་གཞན་བྱེད་ན་དགེ་འདུན་གྱིས་གནང་བ་མ་གཏོགས་ཏེ་སྤང་བའི་ལྟུང་བྱེད་དོ་ཞེས་གནང་བ་མཛད་དེ། ཡུལ་ནི་འབྲོག་གནས། གང་ཟག་ནི་དགེ་སློང་ལག་གི་བླ། ཉོན་མོངས་པ་དང་ཉེས་པ་ནི་མེད་དོ། །དེ་ལ་དགེ་
སློང་གིས་ཞེས་བྱ་བ་ནི་ཆོས་འདི་པས་སོ། །སྟན་ཞེས་བྱ་བ་ནི་སྟན་གཉིས་ཏེ། ནང་ཚངས་ཅན་དང་། བླིངས་པའོ། །དོན་འདིར་ནི་བླིངས་པ་ཡིན་པར་དགོངས་སོ། །སར་པ་ཞེས་བྱ་བ་ནི་སར་པ་གཉིས་ཏེ། གསར་པས་སར་པ་དང་། རྙེད་པས་སར་པའོ། །དོན་འདིར་ནི་གསར་པས་སར་པ་ཡིན་
པར་དགོངས་སོ། །བྱེད་ན་ཞེས་བྱ་བ་ནི་བདག་ཉིད་ཀྱིས་བྱེད་དམ་གཞན་བྱེད་དུ་འཇུག་ནའོ། །མི་འདོད་བཞིན་དུ་ཞེས་བྱ་བ་ནི་མ་དད་བཞིན་དུའོ། །ལོ་དྲུག་ཏུ་བཅང་བར་བྱའོ་ཞེས་བྱ་བ་ནི་ལོ་དྲུག་ཚུན་ཆད་དུ་བཅང་བར་བྱ་བའོ། །གལ་ཏེ་དགེ་སློང་གིས་ལོ་དྲུག་ཚུན་ཆད་དུ་ཞེས་བྱ་བ་ནི་དེ་ཚུན་ཆད་དུའོ། །

སྟན་རྙིང་པ་དེ་ཞེས་བྱ་བ་ནི་སྟན་གང་ཡོད་པ་དེའོ། །སྤངས་ཀྱང་རུང་མ་སྤངས་ཀྱང་རུང་ཞེས་བྱ་བ་ནི་ཡོད་ཀྱང་རུང་མེད་ཀྱང་རུང་སྟེའོ། །སྟན་སར་པ་གཞན་བྱེད་ན་ཞེས་བྱ་བ་ནི་གཉིས་པའོ། །དགེ་འདུན་གྱིས་གནང་བ་མ་གཏོགས་ཏེ་ཞེས་བྱ་བ་ནི་དགེ་འདུན་གྱིས་གནང་བ་གཞག་སྟེའོ། །སྤང་བའི་
ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། འདིར་ཡང་དངོས་གཞི་དང་། སྦྱོར་བ་དང་། སྦྱོར་བའི་སྦྱོར་བས་ལྟུང་བ་རྣམ་པར་གཞག་པ་དང་། ལྟུང་བ་མེད་
པ་དང་། བསླབ་པར་བྱ་བ་དང་། ཕྱིར་བཅོས་པ་རྣམས་ཀྱིས་འདིའི་མཚན་ཉིད་ཤེས་པར་བྱའོ། །དེ་ལ་འདིར་དངོས་གཞིའི་ལྟུང་བ་རྣམ་པར་གཞག་པ་ནི། དགེ་སློང་ལོ་དྲུག་ཚུན་ཆད་དུ་སྟན་སར་པ་བྱ་བའི་ཕྱིར་དགེ་འདུན་ལས་གནང་བ་མ་ཐོབ་པ་སྟན་སྔ་མ་གཞན་ཡོད་པའམ་རང་དགར་
བཏང་བས། ལོ་དྲུག་མ་ལོན་པར་སྟན་བླིངས་པ་ཕྱི་མ་གཞན་བྱེད་ན་ཟིན་པའི་མཐའ་ལོ་དྲུག་ཏུ་བཅང་བའི་སྤང་བའི་ལྟུང་བྱེད་ཀྱི་དངོས་གཞིར་འགྱུར་རོ། །དགེ་སློང་ལ་ལོ་དྲུག་ཏུ་བཅང་བའི་སྤང་བའི་ལྟུང་བྱེད་བྱུང་ན། དེ་མ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་རམ།
སྤངས་ཤིང་བྲལ་བར་མ་བྱས་ལ་ལྟུང་བར་མ་བཤགས་པར་རམ། སྤངས་ཤིང་བྲལ་བར་བྱས་ལ་ལྟུང་བ་མ་བཤགས་པར་ལོ་དྲུག་ཏུ་བཅང་བའི་སྟན་དེ་ལྟ་བུ་གཞན་ཞིག་རྙེད་ན་དེ་ཡང་སྔ་མའི་ཤུགས་ཀྱིས་སྤང་བར་འགྱུར་ཏེ། དེ་ལས་ལྟུང་བར་ནི་མི་འགྱུར་རོ། །དགེ་སློང་གིས་ལོ་དྲུག་
ཏུ་བཅང་བའི་སྤང་བའི་ལྟུང་བྱེད་བྱུང་ལ་ཇི་སྲིད་དུ་སྤང་བའི་དངོས་པོ་ལས་མ་བཤགས་ཤིང་སོ་སོར་མ་བཤགས་པར་ལྷུང་བཟེད་དམ་ཆོས་གོས་སམ་དྲ་བའམ། ཕོར་བུའམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་གཞན་ཉེ་བར་འཇོག་ན་དེ་ཡང་སྔ་མའི་
ཤུགས་ཀྱིས་སྤང་བར་འགྱུར་ཏེ། དེ་ལས་ལྟུང་བར་ནི་མི་འགྱུར་རོ། །གནང་བ་མ་ཐོབ་པ་ལ་ན་སྨད་པ་མེད་དོ། །སྟན་སྔ་མ་གཞན་ཡོད་པ་དང་མེད་པ་ལ་ན་སྨད་པ་མེད་དོ། །ལོ་དྲུག་ཏུ་མ་ལོན་པ་ལ་ན་སྨད་པ་མེད་དོ། །སྟན་བླིངས་པ་ལ་ན་སྨད་པ་མེད་དོ། །སྟན་གསར་

པས་སར་པ་ལ་ན་སྨད་པ་མེད་དོ། །རང་གིས་བྱས་པ་དང་གཞན་བྱེད་དུ་བཅུག་པ་ལ་ན་སྨད་པ་མེད་དོ། །སྟན་ལ་ནི་བཀྲམ་པ་ཉིད་བྱེད་པ་མཐར་ཐུག་པ་འདིའི་དང་པོ་ཡིན་པས་དེར་དགོས་པའི་བལ་དག་འབྱེད་པ་དང་། འཇིག་པ་དང་རྨེལ་བའི་འོག་རོལ་དུ་དང་པོ་
བཀྲམ་པ་ཉིད་ལ་ན་སྨད་པ་མེད་དོ། །བལ་གྱི་རྫས་བཟང་ངན་དང་མཉམ་པ་ལ་ན་སྨད་པ་མེད་དོ། །བལ་མ་ཉམས་པ་ལ་ན་སྨད་པ་མེད་དོ། །བལ་དང་སྲིན་བལ་ལ་སོགས་པ་དཀོན་ཞིང་རིན་ཆེ་བ་ཆ་མཉམ་པར་བསྲེས་པ་ལ་ན་སྨད་པ་མེད་དོ། །རྒྱུ་རུང་བ་ལ་ན་སྨད་པ་མེད་དོ། །སྟན་གྱི་ཚད་ནི་
གསུམ་སྟེ། ཆེན་པོ་དང་འབྲིང་དང་ཆུང་ངུའོ། །ཆེན་པོའི་སྲིད་ནི་ཁྲུ་ཕྱེད་དང་ལྔ། ཆུང་ངུའི་སྲིད་ནི་ཁྲུ་ཕྱེད་དང་གསུམ། འབྲིང་གི་ཚད་ནི་དེ་གཉིས་ཀྱི་བར་ཏེ་ཁྲུ་ཕྱེད་དང་བཞིའོ། །དེ་དག་གི་ཞེང་ཚད་ནི་གདིང་བའི་ཞེང་དང་མཉམ་སྟེ། ཞེང་དུ་བདེ་བར་གཤེགས་པའི་མཐོ་ཕྱེད་དང་དོ་སྟེ། ཐ་
མལ་པའི་ཁྲུ་དོ་དང་སོར་དྲུག་གོ། །བལ་གང་ཡང་རུང་བ་ལས་སྟན་བླིངས་པ་ཚད་དེ་དག་དང་དེ་དག་པས་ལྷག་པ་ལ་ན་སྨད་པ་མེད་དོ། །འདིའི་བྱེད་པ་པོ་ནི་གནང་བ་མ་ཐོབ་པས་ལོ་དྲུག་ཚུན་ཆད་དུ་སྟན་བླིངས་པ་ཚད་དང་ལྡན་པ་དང་། དེ་བས་ལྷག་པ་བྱེད་པ་ཉིད་དོ། །འདི་ལ་ཡན་ལག་དྲུག་
གིས་དངོས་གཞིའི་ལྟུང་བར་འགྱུར་ཏེ། གནང་བ་མ་ཐོབ་པ་དང་། ལོ་དྲུག་མ་ལོན་པ་དང་། སར་པ་དང་། སྟན་དང་། བྱས་པ་དང་། བྱེད་པ་ཐམས་ཅད་མཐར་ཐུག་པའི་དང་པོ་བཀྲམ་པ་ཉིད་དོ། །དེ་དག་ལས་ཡན་ལག་མ་ཚང་ན་ཅི་རིགས་པར་ན་སྨད་དོ། །དེ་ལ་གནང་བ་མ་ཐོབ་པ་
ཞེས་སྨོས་པ་ནི་གནང་བ་ཐོབ་པ་ལ་ལྟུང་བ་མེད་པའི་ཕྱིར་རོ། །ལོ་དྲུག་མ་ལོན་པ་ཞེས་སྨོས་པ་ནི་ལོ་དྲུག་ལོན་པ་ལ་ལྟུང་བ་མེད་པའི་ཕྱིར་རོ། །སར་པ་ཞེས་སྨོས་པ་ནི་རྙིང་པ་དང་ཉམས་པ་དག་ལ་ཉེས་བྱས་སུ་གསུངས་པའི་ཕྱིར་རོ། །སྟན་ཞེས་སྨོས་པ་ནི་སྟན་ལས་གཞན་པ་གདིང་བ་
ལ་སོགས་པ་དག་ལ་མེད་པའི་ཕྱིར་རོ། །བྱས་པ་ཞེས་སྨོས་པ་ནི་མ་བྱས་པ་དང་བྱེད་དུ་མ་བཅུག་པ་ལ་ལྟུང་བ་མེད་པའི་ཕྱིར་རོ། །བྱེད་པ་མཐར་ཐུག་པའི་དང་པོར་བཀྲམ་པ་ཉིད་ཅེས་སྨོས་པ་ནི། སྟན་བྱེད་པ་ལ་དེར་གཏོགས་པའི་བྱེད་པ་མཐར་ཐུག་པའི་དང་པོ་ནི་བལ་བཀྲམ་པ་ཉིད་ཡིན་ཏེ།

དེ་ཙམ་བྱས་ན་དངོས་གཞིར་འགྱུར་ཞིང་། དེ་ཕྱིན་ཆད་གང་བྱེད་པ་དེ་ནི་དེའི་ཁོངས་སུ་འདུས་པ་ཡིན་ལ། བཀྲམ་པ་ཉིད་ཀྱི་སྔོན་རོལ་དུ་འབྱེད་པ་དང་། འཇིག་པ་དང་། རྨེལ་བ་དག་ནི་སྦྱོར་བའི་ཉེས་བྱས་ཡིན་པའི་ཕྱིར་རོ། །སྦྱོར་བ་གཅིག་གིས་ལོ་དྲུག་ཚུན་ཆད་དུ་སྟན་གཅིག་གམ་
གཉིས་སམ་མང་པོ་ཞིག་བྱེད་ན་ཡང་ལྟུང་བའི་དངོས་གཞི་གཅིག་རྣམ་པར་གཞག་གོ། །སྦྱོར་བའི་ལྟུང་བ་ནི་ཉེས་བྱས་ཏེ། ཇི་སྲིད་དུ་ལོ་དྲུག་ཏུ་བཅང་བའི་སྤང་བའི་ལྟུང་བྱེད་ཀྱི་སྦྱོར་བ་བརྩམས་ནས་དངོས་གཞི་ལ་མ་ཐུག་གི་བར་དུ་ཉེས་བྱས་སོ། །དངོས་གཞི་ལ་སྦྱོར་བ་ཐ་དད་པ་ཇི་སྙེད་
བརྩམས་པ་རེ་རེ་ལ་ཉེས་བྱས་རེ་རེའོ། །བལ་རྙིང་པ་དང་ཉམས་པ་ཉིད་ལ་ཉེས་བྱས་སོ། །བྱེད་པ་མཐར་ཐུག་པའི་དང་པོ་འགྲེམས་པའི་མདུན་རོལ་དུ་འབྱེད་པ་དང་། འཇིག་པ་དང་། རྨེལ་བ་དག་ལ་ཉེས་བྱས་སོ། །རྒྱུ་རུང་བ་མ་ཡིན་པ་ལ་ཉེས་བྱས་སོ། །ཚད་པས་ཆུང་བ་ལ་ཉེས་བྱས་སོ། །
སྟན་སྔ་མ་མ་ཟིན་པའི་འོག་རོལ་དུ་ཕྱི་མ་རྩོམ་པ་ལ་ཉེས་བྱས་སོ། །སྟན་སྔ་མ་བརྩམས་པ་ཉིད་ན་དེ་དང་ལྷན་ཅིག་ཏུའམ་ཕྱིས་སྟན་གཉིས་པ་རྩོམ་པ་ལ་ཉེས་བྱས་སོ། །སྟན་སྔ་མ་བརྩམས་པ་མ་ཟིན་པར་དེ་ཉིད་དང་ལྷན་ཅིག་ཏུའམ་ཕྱིས་སྟན་གཉིས་པ་ལ་བརྩམས་པ་སྔར་ཟིན་པར་གྱུར་
ན་ཉེས་བྱས་སོ། །སྦྱོར་བའི་སྦྱོར་བའི་ལྟུང་བ་ནི་ཉེས་བྱས་ཕྲ་མོ་སྟེ། སྦྱོར་བ་ཇི་སྙེད་པ་ལ་སྦྱོར་བའི་སྦྱོར་བ་ཡང་དེ་སྙེད་དེ། སྦྱོར་བ་ཉེས་བྱས་ཀྱི་སྦྱོར་བའི་སྦྱོར་བ་ཡང་ཉེས་བྱས་ཏེ་ཉེས་བྱས་ཕྲ་མོའོ། །དེ་ཡང་དང་པོ་ཡིད་ལ་སེམས་པ་ནི་སྦྱོར་བའི་སྦྱོར་བའི་ཉེས་བྱས་ཕྲ་མོའོ། །དེ་ནས་
ལུས་དང་ངག་གིས་སྦྱོར་བ་ནི་སྦྱོར་བའི་ཉེས་བྱས་དངོས་སོ། །དེ་ནས་མཐར་ཐུག་པ་ནི་སྤང་བའི་ལྟུང་བྱེད་ཀྱི་དངོས་གཞིའོ་ཞེས་བྱ་བར་ཤེས་པར་བྱའོ། །ལྟུང་བ་མེད་པ་ནི་བྱས་ཟིན་པ་རྙེད་པ་དང་། གཞན་གྱིས་བྱས་པ་ལ་ཡོངས་སུ་ལོངས་སྤྱོད་པ་དང་། རྙིང་པའི་བྱི་དོར་མངོན་པར་འདུ་བྱེད་པ་
ལ་ལྟུང་བ་མེད་དོ། །སྔར་སྟན་བརྩམས་ནས་བར་དུ་ཁྱིམ་པ་ལ་སོགས་པར་བབས་ཏེ་ཡང་ཕྱིས་རབ་ཏུ་བྱུང་ཞིང་བསྙེན་པར་རྫོགས་པའི་ཚེ་མཐར་ཐུག་པར་བྱེད་པ་ལ་ལྟུང་བ་མེད་དོ། །གནང་བ་ཐོབ་པ་ལ་ལྟུང་བ་མེད་དོ། །ལོ་དྲུག་ལོན་པ་ལ་ལྟུང་བ་མེད་དོ། །མ་བྱས་པ་དང་། བྱེད་

དུ་མ་བཅུག་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པར་བྱ་བ་ནི་དགེ་སློང་གིས་ཡུལ་ཐམས་ཅད་ལ་གནས་སྐབས་ཐམས་ཅད་དུ་ལོ་དྲུག་ཏུ་བཅང་པའི་སྤང་
བར་འགྱུར་བ་རྣམ་པ་ཐམས་ཅད་མི་བསྟེན་པར་བསླབ་པར་བྱའོ། །སྟན་ཐམས་ཅད་ཀྱི་ཐམས་ཅད་དུ་བུག་རྡོལ་དང་ཤ་ཟད་པ་དང་། བཅོས་དཀའ་བ་ཉིད་མ་ཡིན་པས་གནང་བ་གསོལ་བར་མི་བྱའོ། །དགེ་སློང་རང་དག་རྟོག་ཏུ་འདོང་བར་བྱའོ། །ཡང་ན་དགེ་སློང་བསྐོས་པ་དག་རྟོག་ཏུ་
བཏང་ངོ་། །རྟོག་པའི་དགེ་སློང་དག་གིས་ཀྱང་། ཆུ་དང་ཞེང་གཉི་གར་ལྷག་པ་ཉིད་ཡིན་ན་གཅད་པར་བྱའོ། །ཐུང་བ་ཉིད་དང་དོག་པ་ཉིད་དག་ནི་བསྐྱེད་པར་བྱའོ། །རལ་ན་བཙེམ་པར་བྱའོ། །བུག་རྡོལ་དུ་གྱུར་ཏམ་ཤ་ཟད་པ་དག་ནི་སྦྱར་བར་བྱའོ། །བཅོས་དཀའ་བ་ཉིད་ཡིན་ན་དགེ་འདུན་
གྱིས་གསོལ་བ་དང་གཉིས་ཀྱི་ལས་ཀྱིས་སྟན་གྱི་གནང་བ་སྦྱིན་པར་བྱའོ། །ལག་གི་བླ་ནི་གླེང་གཞིའི་དབང་གིས་སྨོས་པར་ཟད་ཀྱི་དགེ་སློང་གཞན་དག་ལ་ཡང་ཆོ་ག་འདྲ་བར་ཤེས་པར་བྱའོ། །ཕྱིར་བཅོས་པ་ནི་སྔ་མ་བཞིན་ནོ། །ལོ་དྲུག་ཏུ་བཅང་བའི་སྤང་བ་སྟེ་བཅུ་བཞི་པ་བཤད་ཟིན་ཏོ།། །།
མཐོ་གང་གི་སྤང་བའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་བླ་ན་མེད་པའི་མཁྱེན་པ་ཐུགས་སུ་ཆུད་པ་དེའི་ཚེ་ན་ཐམས་ཅད་དུ་ཡུལ་དབུས་སུ་སངས་རྒྱས་འཇིག་
རྟེན་དུ་བྱུང་ངོ་ཞེས་གྲག་གོ་ཞེས་སྒྲ་གྲགས་སོ། །བྱང་ཕྱོགས་ན་ཚོང་པ་དག་གིས་ཡུལ་དབུས་སུ་སངས་རྒྱས་འཇིག་རྟེན་དུ་བྱུང་སྟེ། གང་དག་དེ་ལ་མཆོད་པ་དག་བྱེད་པ་དེ་དག་གི་མཆོད་པ་བྱས་པ་དེ་དག་ནི་ཤིན་ཏུ་འབྲས་བུ་ཆེ་བ་དང་། ཕན་ཡོན་ཆེ་བ་དང་གསལ་བ་ཆེ་བ་དང་། རྒྱ་ཆེན་
པོར་འགྱུར་རོ་ཞེས་ཐོས་སོ། །ཐོས་ནས་ཀྱང་དེ་དག་འདི་སྙམ་དུ་སེམས་ཏེ། བདག་ཅག་ཟོང་དག་ཐོགས་ཏེ་མཉན་ཡོད་དུ་འདོང་ཞིང་། དེར་བདག་ཅག་གིས་ཁེ་སྤོགས་ཀྱང་བསྒྲུབ་པར་བྱ། བཅོམ་ལྡན་འདས་ལ་ཡང་བསྙེན་བཀུར་བྱའོ་སྙམ་དུ་རིག་ནས། ཚོང་པ་ལྔ་བརྒྱ་བྱང་ཕྱོགས་

ནས་ཟོང་དག་ཐོགས་ཏེ་ཡུལ་དབུས་སུ་འཕགས་སོ། །དེ་དག་མཐར་གྱིས་མཉན་ཡོད་དུ་ཕྱིན་ནས་དེ་དག་གིས་ཟོང་མཁོས་སུ་ཕབ་སྟེ། ཁྱིམ་བདག་མགོན་མེད་ཟས་སྦྱིན་ག་ལ་བ་དེར་དོང་ནས་ཕྱིན་པ་དང་། ཁྱིམ་བདག་མགོན་མེད་ཟས་སྦྱིན་ལ་འདི་སྐད་ཅེས་སྨྲས་སོ། །ཁྱིམ་བདག་བདག་
ཅག་སངས་རྒྱས་བཅོམ་ལྡན་འདས་ལྟ་བར་འདོད་དོ། །ཤེས་ལྡན་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་བལྟ་བར་བྱ་བ་རིན་པོ་ཆེ་ཁོ་ན་ཡིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་འདི་ལྟ་སྟེ།
དཔེར་ན་ཨུ་དུམ་བཱ་རའི་མེ་ཏོག་ལྟར་བལྟ་བ་དང་འབྱུང་བ་དཀོན་པ་ཡིན་ནོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་ཚོང་པ་ལྔ་བརྒྱ་པོ་དེ་དག་ཁྲིད་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་
འདུག་གོ་མཐའ་གཅིག་ཏུ་འདུག་ནས། བཅོམ་ལྡན་འདས་ཚོང་པ་དེ་དག་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །
རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་ཚོང་པ་དེ་དག་གིས་བཅོམ་ལྡན་འདས་ལ་བསྙེན་བཀུར་བྱས་
ནས། དགེ་སློང་གནས་བརྟན་གནས་བརྟན་རྣམས་ཀྱི་གཙུག་ལག་ཁང་བལྟ་བར་བརྩམས་པ་དང་། ཚོང་པ་དེ་དག་གིས་དགེ་སློང་གནས་བརྟན་གནས་བརྟན་རྣམས་ཀྱི་མལ་དག་ནི་གདིང་བ་དབུས་རྡོལ་བ་དག་མཐོང་ངོ་། །མཐོང་ནས་ཀྱང་ཁྱིམ་བདག་མགོན་མེད་ཟས་སྦྱིན་ལ་འདི་སྐད་
ཅེས་སྨྲས་སོ། །ཁྱིམ་བདག་ཅིའི་ཕྱིར་དགེ་སློང་གནས་བརྟན་གནས་བརྟན་འདི་དག་གི་གདིང་བ་དག་དབུས་རྡོལ་བར་གྱུར། ཁྱིམ་བདག་མགོན་མེད་ཟས་སྦྱིན་གྱིས་སྨྲས་པ། བདག་ཉིད་ཆེན་པོ་འདི་དག་ནི་ཕལ་ཆེར་མཚན་མོ་སྐྱིལ་མོ་ཀྲུང་གིས་འདའ་བར་བྱེད་དོ། །དེ་དག་སེམས་མངོན་

པར་དད་པར་གྱུར་ནས། དད་པ་སྐྱེས་པ་དེ་དག་གིས་དགེ་སློང་རྣམས་ལ་རས་ཡུག་ཆེན་ལྔ་བརྒྱ་ཕུལ་ལོ། །དགེ་སློང་རྣམས་ཀྱིས་གདིང་བ་རྙིང་པ་དེ་དག་ཁང་པ་ཆེན་པོའི་གཙུག་ལག་ཁང་བླ་གབ་མེད་པ་ཞིག་ཏུ་གཞག་གོ། །དེའི་ཚེ་ན་ཁྱིམ་བདག་གཅིག་གིས་
སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་པ་དང་། དགེ་སློང་གི་དགེ་འདུན་ནི་ཞུགས་སོ། །བཅོམ་ལྡན་འདས་ནི་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབས་སོ། །སངས་རྒྱས་བཅོམ་ལྡན་འདས་རྣམས་ནི་རྒྱུ་
ལྔས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབ་པར་མཛད་དེ། ལྔ་གང་ཞེ་ན། ནང་དུ་ཡང་དག་འཇོག་ལ་བཞེད་པ་དང་ལྷ་རྣམས་ལ་ཆོས་སྟོན་པར་བཞེད་པ་དང་། ནད་པ་ལ་བལྟ་བར་བཞེད་པ་དང་། གནས་མལ་ལ་རྟོག་པར་བཞེད་པ་དང་། འདུལ་བ་ལ་ཉན་ཐོས་
རྣམས་ཀྱི་བསླབ་པའི་གཞི་བཅའ་བར་བཞེད་པའོ། །དོན་འདིར་ནི་བཅོམ་ལྡན་འདས་གནས་མལ་ལ་རྟོག་པར་བཞེད་པ་དང་། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བཞེད་པས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབ་པར་མཛད་དོ། །དེ་
ནས་བཅོམ་ལྡན་འདས་ཀྱིས་དགེ་སློང་གི་དགེ་འདུན་སོང་ནས་རིང་པོ་མ་ལོན་པར་ཐུགས་སུ་ཆུད་ནས། ལྡེ་མིག་བསྣམས་ཏེ་ཀུན་དགའ་ར་བ་ནས་ཀུན་དགའ་ར་བར། གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆག་ས་ནས་འཆག་སར་དང་། གོལ་
བ་ནས་གོལ་བར་གཤེགས་ཤིང་མཐར་གྱིས་གཤེགས་པ་ན་ཁང་པ་ཆེན་པོའི་གཙུག་ལག་ཁང་ག་ལ་བ་དེར་གཤེགས་སོ། །དེའི་ཚེ་ན་ཁང་པ་ཆེན་པོའི་གཙུག་ལག་ཁང་དེ་ན་གདིང་བ་རྙིང་པ་རྡོལ་བ་དང་རལ་བས་རྡུལ་གྱི་ཕྱེ་མ་དང་འདྲེས་པ་རབ་ཏུ་མང་པོ་དག་ས་ལ་བཀྲམ་ཞིང་འདུག་
གོ། །བཅོམ་ལྡན་འདས་ཀྱིས་གདིང་བ་རྙིང་པ་རྡོལ་བ་དང་རལ་བས་རྡུལ་གྱི་ཕྱེ་མ་དང་འདྲེས་པ་རབ་ཏུ་མང་པོ་དག་ས་ལ་བཀྲམ་ཞིང་འདུག་པ་དག་གཟིགས་སོ། །གཟིགས་ནས་ཀྱང་ཨེ་མ་ཞེས་གསུང་ཞིང་སྨད་ནས་འདི་སྙམ་དུ་དགོངས་ཏེ། བྲམ་ཟེ་དང་ཁྱིམ་བདག་དད་པ་ཅན་དག་གིས་

པགས་པ་དང་ཤ་དང་ཁྲག་དག་བཙིར་ཞིང་བཙིར་ཞིང་སྦྱིན་པ་དག་སྦྱིན་བསོད་ནམས་དག་བྱེད་པ་གང་ཡིན་པ་དེ་ལ་དགེ་སློང་དག་དྲོད་མི་ཤེས་པ་དང་། སོ་སོར་མི་རྟོག་པར་ཡོངས་སུ་ལོངས་སྤྱོད་པར་བྱེད་དོ་སྙམ་དུ་དགོངས་སོ། །དེ་ནས་བཅོམ་ལྡན་འདས་ཀྱིས་གདིང་བ་རྙིང་པ་དེ་དག་
ལེགས་པར་བརྟུལ་ཞིང་སྤྲུགས་ནས་བཏིང་ཞིང་བསྐམས་ཏེ་རྩིག་པ་ལ་མི་རེག་པར་མཛད་ནས་གཙུག་ལག་ཁང་གི་ཕྱི་རོལ་དུ་ཞབས་གཉིས་བསིལ་ཏེ། ནང་དུ་ཡང་དག་འཇོག་གི་སླད་དུ་གཙུག་ལག་ཁང་དུ་གཤེགས་སོ། །དེ་ནས་དགེ་སློང་བསོད་སྙོམས་བསྒྲུབས་པས་བསོད་སྙོམས་
བླངས་ནས་བཅོམ་ལྡན་འདས་ག་ལ་བ་དེར་སོང་ངོ་། །སངས་རྒྱས་བཅོམ་ལྡན་འདས་རྣམས་ནི་ཆོས་ཉིད་ཀྱིས་བསོད་སྙོམས་སྒྲུབ་པའི་དགེ་སློང་ལ་དགེ་སློང་ཇི་ལྟར་ཟས་བསོད་དམ་དགེ་སློང་གི་དགེ་འདུན་ཚིམ་པར་བྱས་སམ་ཞེས་སོ་སོར་ཀུན་དགའ་བར་མཛད་པ་འདིས་སོ་སོར་ཀུན་དགའ་བར་
མཛད་པ་ཡིན་པས་བཅོམ་ལྡན་འདས་ཀྱིས་དགེ་སློང་བསོད་སྙོམས་བསྒྲུབ་པ་ལ། དགེ་སློང་ཇི་ལྟར་ཟས་བསོད་དམ། དགེ་སློང་གི་དགེ་འདུན་ཚིམ་པར་བྱས་སམ་ཞེས་སོ་སོར་ཀུན་དགའ་བར་མཛད་པ་དང་། དེས་གསོལ་པ་དང་། བཙུན་པ་ཏེ་པོར་ཟས་བསོད་ཅིང་དགེ་སློང་གི་དགེ་འདུན་
ཚིམ་པར་བགྱིས་སོ། །དེ་ནས་བཅོམ་ལྡན་འདས་ཞལ་ཟས་ཀྱི་བྱ་བ་མཛད་ནས། གཙུག་ལག་ཁང་གི་ཕྱི་རོལ་དུ་ཞབས་གཉིས་བསིལ་ཏེ་ནང་དུ་ཡང་དག་འཇོག་གི་སླད་དུ་གཙུག་ལག་ཁང་དུ་གཤེགས་སོ། །དེ་ནས་བཅོམ་ལྡན་འདས་ཕྱི་དྲོ་ནང་དུ་ཡང་དག་འཇོག་ལས་བཞེངས་ནས་དགེ་སློང་གི་
དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ན་ངས་དགེ་སློང་གི་དགེ་འདུན་སོང་ནས་རིང་པོ་མ་ལོན་པར་ཤེས་ནས། ལྡེ་མིག་ཁྱེར་ཏེ་ཀུན་དགའ་ར་བ་ནས་ཀུན་དགའ་ར་བར།
གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆག་ས་ནས་འཆག་སར་དང་། གོལ་བ་ནས་གོལ་བར་སོང་ཞིང་མཐར་གྱིས་འགྲོ་བ་ན་ཁང་པ་ཆེན་པོའི་གཙུག་ལག་ཁང་ཞིག་ག་ལ་བ་དེར་ཕྱིན་ནས། ངས་ཁང་པ་ཆེན་པོའི་གཙུག་ལག་ཁང་དེ་ན་གདིང་བ་

རྙིང་པ་རྡོལ་བ་དང་། རལ་བས་རྡུལ་གྱི་ཕྱེ་མ་དང་འདྲེས་པ་རབ་ཏུ་མང་པོ་དག་ས་ལ་བཀྲམ་ཞིང་འདུག་པ་མཐོང་ངོ་། །མཐོང་ནས་ཀྱང་ཨེ་མ་ཞེས་བྱས་ཏེ་སྨད་ནས་འདི་སྙམ་དུ་བྲམ་ཟེ་དང་ཁྱིམ་བདག་དད་པ་ཅན་དག་གིས་པགས་པ་དང་ཤ་དང་ཁྲག་དག་བཙིར་ཞིང་བཙིར་ཞིང་
སྦྱིན་པ་དག་སྦྱིན་བསོད་ནམས་དག་བྱེད་པ་གང་ཡིན་པ་དེ་ལ། དགེ་སློང་དག་དྲོད་མི་ཤེས་པ་དང་སོ་སོར་མི་རྟོག་པར་ཡོངས་སུ་ལོངས་སྤྱོད་པར་བྱེད་དོ་སྙམ་དུ་དགོངས་ཀྱི། དགེ་སློང་དག་ཁྱེད་ཀྱིས་དད་པས་སྦྱིན་པར་བྱ་བ་ལ་དྲོད་རན་པར་ཡོངས་སུ་ལོངས་སྤྱོད་པ་དང་། སྤང་ཞིང་ཡོངས་སུ་ལོངས་
སྤྱད་པ་དང་། དུས་སུ་ཡོངས་སུ་ལོངས་སྤྱད་པ་དང་། བརྟག་ཅིང་བརྟག་ཅིང་ཡོངས་སུ་ལོངས་སྤྱད་པ་དང་། ཁད་ཀྱིས་ཡོངས་སུ་ལོངས་སྤྱད་ན་ལེགས་སོ། །དེ་ནས་བཅོམ་ལྡན་འདས་ཀྱིས་དྲོད་རན་པ་དང་། སྤང་བ་དང་། དུས་དང་། བརྟག་པ་དང་། ཁད་ཀྱིས་ཡོངས་སུ་ལོངས་སྤྱད་པའི་
བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་གདིང་བ་སར་པ་སྤྱོད་ན་སར་པ་ཁ་དོག་མི་སྡུག་པར་
བྱ་བའི་ཕྱིར་གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བས་གླན་པར་བྱའོ། །གལ་ཏེ་དགེ་སློང་གིས་སར་པ་ཁ་དོག་མི་སྡུག་པར་བྱ་བའི་ཕྱིར་གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བས་མ་གླན་པར་གདིང་བ་སར་པ་སྤྱོད་ན་སྤང་བའི་ལྟུང་བྱེད་དོ་ཞེས་བཅའ་
བ་མཛད་དེ། ཡུལ་ནི་མཉན་ཡོད། གང་ཟག་ནི་དགེ་སློང་རབ་ཏུ་མང་པོ། །ཉོན་མོངས་པ་ནི་དྲོད་མི་ཤེས་པ་དང་སོ་སོར་མི་རྟོག་པར་ཡོངས་སུ་ལོངས་སྤྱོད་པར་བྱེད་པ། ཉེས་པ་ནི་གདིང་བ་སར་པ་ལ་རྙིང་པས་མ་གླན་པར་རྙིང་པ་བོར་བའོ། །དེ་ལ་དགེ་སློང་གིས་ཞེས་བྱ་བ་ནི་ཆོས་འདི་
པས་སོ། །གདིང་བ་ཞེས་བྱ་བ་ནི་སོ་སོར་གདིང་བའོ། །སར་པ་ཞེས་བྱ་བ་ནི་སར་པ་གཉིས་ཏེ། གསར་པས་སར་པ་དང་རྙེད་པས་སར་པའོ། །དོན་འདིར་ནི་གསར་པས་སར་པ་ཡིན་པར་དགོངས་སོ། །བྱེད་ན་ཞེས་བྱ་བ་ནི་བདག་ཉིད་ཀྱིས་བྱེད་དམ་གཞན་བྱེད་དུ་འཇུག་པའོ། །

སར་པ་ཁ་དོག་མི་སྡུག་པར་བྱ་བའི་ཕྱིར་ཞེས་བྱ་བ་ནི་སར་པ་སྲ་བར་བྱ་བའི་ཕྱིར་རོ། །གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བས་གླན་པར་བྱའོ་ཞེས་བྱ་བ་ནི་གལ་ཏེ་དེ་ལ་གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བ་གཞན་ཡོད་ནའོ། །བདེ་བར་གཤེགས་
པའི་ཞེས་བྱ་བ་ནི་སྟོན་པའོ། །བདེ་བར་གཤེགས་པའི་མཐོ་གང་ལ་ནི་ཚད་དང་ལྡན་པའི་ཁྲུའི་ཁྲུ་ཕྱེད་དང་དོ་ཡོད་དོ། །འཁོར་བས་ཞེས་བྱ་བ་ནི་ཀུན་ནས་མཐོ་རེ་ཡོད་པས་སོ། །གླན་པར་བྱའོ་ཞེས་བྱ་བ་ནི་སྦྱར་བར་བྱ་བའོ། །གལ་ཏེ་དགེ་སློང་གིས་སར་པ་ཁ་དོག་མི་སྡུག་པར་བྱ་བའི་
ཕྱིར་གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བས་མ་གླན་པར་ཞེས་བྱ་བ་ནི་མ་སྦྱར་རོ། །གདིང་བ་སར་པ་སྤྱོད་ན་ཞེས་བྱ་བ་ནི་གདིང་བའི་དགོས་པར་སྤྱོད་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་
སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། འདིར་ཡང་དངོས་གཞི་དང་། སྦྱོར་བ་དང་། སྦྱོར་བའི་སྦྱོར་བས་ལྟུང་བ་རྣམ་པར་གཞག་པ་དང་། ལྟུང་བ་མེད་པ་དང་། བསླབ་པར་བྱ་བ་དང་། ཕྱིར་བཅོས་པ་རྣམས་ཀྱིས་འདིའི་མཚན་ཉིད་ཤེས་པར་བྱའོ། །དེ་ལ་
འདིར་དངོས་གཞིའི་ལྟུང་བ་རྣམ་པར་གཞག་པ་ནི་དགེ་སློང་གིས་གདིང་བ་རྙིང་པ་ལས་བདེ་བར་གཤེགས་པའི་མཐོ་གང་གིས་མ་གླན་པའི་གདིང་བ་སར་པ་སྤྱོད་ན་སྤྱད་པར་བརྩམས་པའི་ཚེ་ཉིད་ན་མཐོ་གང་གི་སྤང་བའི་ལྟུང་བྱེད་ཀྱི་དངོས་གཞིར་འགྱུར་རོ། །དགེ་སློང་ལ་མཐོ་གང་གི་སྤང་བའི་
ལྟུང་བྱེད་བྱུང་ན། དེ་མ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་རམ། སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་རམ། སྤངས་ཤིང་བྲལ་བར་བྱས་ལ་ལྟུང་བ་མ་བཤགས་པར་བདེ་བར་གཤེགས་པའི་མཐོ་གང་གིས་གླན་དགོས་པའི་གདིང་བ་དེ་
ལྟ་བུ་གཞན་ཞིག་རྙེད་ན་དེ་ཡང་སྔ་མའི་ཤུགས་ཀྱིས་སྤང་བར་འགྱུར་ཏེ། དེ་ལས་ལྟུང་བར་ནི་མི་འགྱུར་རོ། །དགེ་སློང་གིས་མཐོ་གང་གིས་སྤང་བའི་ལྟུང་བྱེད་བྱུང་ལ། ཇི་སྲིད་དུ་སྤང་བའི་དངོས་པོ་ལས་མ་བཤགས་ཤིང་སོ་སོར་མ་བཤགས་པར་ལྷུང་བཟེད་དམ། ཆོས་གོས་སམ། དྲ་

བའམ། ཕོར་བུའམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་གཞན་ཉེ་བར་འཇོག་ན་དེ་ཡང་སྔ་མའི་ཤུགས་ཀྱིས་སྤང་བར་འགྱུར་ཏེ། དེ་ལས་ལྟུང་བར་ནི་མི་འགྱུར་རོ། །གལ་ཏེ་གདིང་བ་རྙིང་པ་རིལ་གྱིས་ཡོད་ན་དེས་དེ་ལྟར་བྱ་སྟེ། དེ་ལ་
ན་སྨད་པ་མེད་དོ། །གལ་ཏེ་གདིང་བ་རྙིང་པ་བདེ་བར་གཤེགས་པའི་མཐོ་གང་ཙམ་ཞིག་ཡོད་ན་ཡང་དེས་དེ་ལྟར་བྱ་སྟེ། དེ་ལ་ན་སྨད་པ་མེད་དོ། །གལ་ཏེ་གདིང་བ་རྙིང་པ་མི་སྲ་བ་བཅོས་པར་ནུས་པ་ཞིག་ཡོད་ན་ཡང་དེས་དེ་ལྟར་བྱ་སྟེ། དེ་ལ་ན་སྨད་པ་མེད་དོ། །གལ་ཏེ་གདིང་བ་རྙིང་པ་དམ་དུམ་
མཐུད་ཅིང་སྦྱར་དུ་རུང་བ་ཞིག་ཡོད་ན་ཡང་དེས་དེ་ལྟར་བྱ་སྟེ། དེ་ལ་ན་སྨད་པ་མེད་དོ། །གདིང་བ་སར་པ་ཤོས་གསར་པས་སར་པ་ཡིན་ན་དེས་དེ་ལྟར་བྱ་སྟེ། དེ་ལ་ན་སྨད་པ་མེད་དོ། །རང་གིས་བྱས་པ་དང་། གཞན་བྱེད་དུ་བཅུག་པ་ལ་ན་སྨད་པ་མེད་དོ། །གདིང་བའི་རྫས་བཟང་ངན་དང་
མཉམ་པ་ལ་ན་སྨད་པ་མེད་དོ། །རྒྱུ་རུང་བ་ལ་ན་སྨད་པ་མེད་དོ། །གདིང་བའི་ཚད་ནི་སྲིད་དུ་བདེ་བར་གཤེགས་པའི་མཐོའི་མཐོ་དོ། ཞེང་དུ་བདེ་བར་གཤེགས་པའི་མཐོའི་མཐོ་ཕྱེད་དང་དོ་སྟེ། གདིང་བ་གསར་པས་སར་པ་ཚད་དེ་དག་དང་དེ་དག་པས་ལྷག་པ་ལ་ན་སྨད་པ་མེད་དོ། །འདིའི་
བྱེད་པ་པོ་ནི་གདིང་བ་གསར་པས་སར་པ་བྱས་པ་དང་། གདིང་བ་རྙིང་པ་ཡོད་པ་ཉིད་ཡིན་ནོ། །འདི་ལ་ཡན་ལག་ལྔས་དངོས་གཞིའི་ལྟུང་བར་འགྱུར་ཏེ། གདིང་བ་གསར་པས་སར་པ་དང་། བྱས་པ་དག་གདིང་བ་རྙིང་པ་ཡོད་པ་དང་། བདེ་བར་གཤེགས་པའི་མཐོ་གང་གིས་མ་གླན་པ་དང་
སྤྱོད་པ་ཉིད་དོ། །དེ་དག་ལས་ཡན་ལག་མ་ཚང་ན་ཅི་རིགས་པར་ན་སྨད་དོ། །དེ་ལ་གདིང་བ་གསར་པས་སར་པ་དང་། བྱས་པ་ཞེས་སྨོས་པ་ནི། གསར་པས་སར་པ་མ་ཡིན་པ་དང་། མ་བྱས་པ་ལ་ལྟུང་བ་མེད་པའི་ཕྱིར་རོ། །གདིང་བ་རྙིང་པ་ཡོད་པ་ཞེས་སྨོས་པ་ནི་གདིང་བ་རྙིང་པ་
མེད་པ་ལ་ལྟུང་བར་མི་འགྱུར་བའི་ཕྱིར་རོ། །བདེ་བར་གཤེགས་པའི་མཐོ་གང་གིས་མ་གླན་པ་ཞེས་སྨོས་པ་ནི་ཚད་དེ་ཙམ་དང་། དེ་བས་ཆེ་བས་གླན་པ་ལ་ནི་ལྟུང་བ་མེད་ལ། དེ་བས་ཆུང་བས་གླན་པ་ལ་ནི་ན་སྨད་པའི་ཕྱིར་རོ། །སྦྱོར་བ་ཉིད་ཅེས་སྨོས་པ་ནི་རང་གིར་མི་སྦྱོར་བར་ལྟུང་

བ་མེད་པའི་ཕྱིར་རོ། །སྦྱོར་བ་གཅིག་གིས་གདིང་བ་གཅིག་གམ་གཉིས་སམ་མང་པོ་ཞིག་བྱེད་ན་ཡང་ལྟུང་བའི་དངོས་གཞི་གཅིག་རྣམ་པར་གཞག་གོ། །སྦྱོར་བའི་ལྟུང་བ་ནི་ཉེས་བྱས་ཏེ། ཇི་སྲིད་དུ་མཐོ་གང་གི་སྤང་བའི་ལྟུང་བྱེད་ཀྱི་སྦྱོར་བ་བརྩམས་ནས་དངོས་གཞི་ལ་མ་ཐུག་གི་བར་དུ་
ཉེས་བྱས་སོ། །དངོས་གཞི་ལ་སྦྱོར་བ་ཐ་དད་པ་ཇི་སྙེད་བརྩམས་པ་རེ་རེ་ལ་ཉེས་བྱས་རེ་རེའོ། །རྒྱུ་རུང་བ་མ་ཡིན་པ་ལ་ཉེས་བྱས་སོ། །ཚད་པས་ཚུང་བ་ལ་ཉེས་བྱས་སོ། །སྦྱོར་བའི་སྦྱོར་བའི་ལྟུང་བ་ནི་ཉེས་བྱས་ཕྲ་མོ་སྟེ། སྦྱོར་བ་ཇི་སྙེད་པ་ལ་སྦྱོར་བའི་སྦྱོར་བ་ཡང་དེ་སྙེད་དེ། སྦྱོར་བ་ཉེས་
བྱས་ཀྱི་སྦྱོར་བའི་སྦྱོར་བ་ཡང་ཉེས་བྱས་ཏེ་ཉེས་བྱས་ཕྲ་མོའོ། །དེ་ཡང་དང་པོ་ཡིད་ལ་སེམས་པ་ནི་སྦྱོར་བའི་སྦྱོར་བའི་ཉེས་བྱས་ཕྲ་མོའོ། །དེ་ནས་ལུས་དང་ངག་གིས་སྦྱོར་བ་ནི་སྦྱོར་བའི་ཉེས་བྱས་དངོས་སོ། །དེ་ནས་མཐར་ཐུག་པ་ནི་སྤང་བའི་ལྟུང་བྱེད་ཀྱི་དངོས་གཞིའོ་ཞེས་བྱ་བར་ཤེས་
པར་བྱའོ། །ལྟུང་བ་མེད་པ་ནི་བྱས་ཟིན་པ་རྙེད་པ་དང་། གཞན་གྱིས་བྱས་པ་ལ་ཡོངས་སུ་ལོངས་སྤྱོད་པ་དང་། རྙིང་པའི་བྱི་དོར་མངོན་པར་འདུ་བྱེད་པ་ལ་ལྟུང་བ་མེད་དོ། །གདིང་བ་གསར་པ་མ་བྱས་པ་དང་། རྙིང་པ་མི་བདོག་པ་དང་། བདེ་བར་གཤེགས་པའི་མཐོ་གང་གིས་
གླན་པ་དང་མི་སྤྱོད་པ་ལ་ལྟུང་བ་མེད་དོ། །གདིང་བ་རྙིང་པ་རིལ་གྱིས་མི་བདོག་པ་དང་། བདེ་བར་གཤེགས་པའི་མཐོ་གང་ཙམ་ཡང་མི་བདོག་པ་དང་། མི་སྲ་བར་བཅོས་པར་མི་ནུས་པ་དང་། དམ་དུམ་མཐུད་ཅིང་སྦྱར་དུ་མི་རུང་བ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་།
སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པར་བྱ་བ་ནི་དགེ་སློང་གིས་ཡུལ་ཐམས་ཅད་ལ་གནས་སྐབས་ཐམས་ཅད་དུ་མཐོ་གང་གི་སྤང་བར་འགྱུར་བ་རྣམ་པ་ཐམས་ཅད་མི་བསྟེན་པར་བསླབ་པར་བྱའོ། །གདིང་བ་རྙིང་པ་རིལ་གྱིས་བདོག་གམ། བདེ་
བར་གཤེགས་པའི་མཐོ་གང་གི་ཚད་ཙམ་ཞིག་བདོག་གམ། མི་སྲ་བར་བཅོས་པར་ནུས་པ་ཞིག་བདོག་གམ། དམ་དུམ་མཐུད་ཅིང་སྦྱར་དུ་རུང་བ་ཞིག་བདོག་ན་ཡང་དེ་དག་གིས་ཅི་རིགས་པར་གླན་པར་བྱའོ། །ཕྱིར་བཅོས་པ་ནི་སྔ་མ་བཞིན་ནོ། །མཐོ་གང་གི་སྤང་བ་སྟེ་བཅོ་ལྔ་པ་བཤད་

ཟིན་ཏོ།། །།སོ་སོར་ཐར་པའི་མདོ་རྒྱ་ཆེར་འགྲེལ་པ་འདུལ་བ་ཀུན་ལས་བཏུས་པ། བམ་པོ་བཅོ་ལྔ་པ། བལ་ཐོགས་པའི་སྤང་བའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །
དྲུག་སྡེ་དག་གིས་སྨྲས་པ། ཀྱེ་དགའ་བོ་ཉེ་དགའ་ལྷུང་བཟེད་ནག་པོ་ཅན་འདི་དག་ནི་རྐང་པ་སྤྲེའུ་ཞག་གིས་བསྐུས་ཏེ་འགྲོ་ན་ཡང་འགྲོ་བར་ཆས་པའི་རྙེད་པ་སྒྲུབ་པར་བྱེད། འོང་ན་ཡང་གློ་བུར་དུ་འོངས་པའི་རྙེད་པ་སྒྲུབ་པར་བྱེད་ཅིང་། སྐྱེ་བོ་མང་པོ་དགའ་བ་དང་ཡིད་དུ་འོང་བར་ཡང་འགྱུར་
རོ། །ཡུ་བུ་ཅག་ནི་ཁྲོན་པའི་རུས་སྦལ་དང་འདྲ་བར་གར་ཡང་མི་འདོང་གང་ནས་ཀྱང་མི་འོང་བས་རྙེད་པ་འཐོབ་པ་དང་། སྐྱེ་བོ་མང་པོ་དགའ་བ་དང་ཡིད་དུ་འོང་བ་ག་ལ་འགྱུར་གྱི་ཡུ་བུ་ཅག་ཀྱང་འདོང་ངོ་། །གང་དུ་འདོང་། གང་དུ་འདྲོན་པ་དོན་མཐུན་འགྲུབ་པར་རོ། །དེ་དག་གིས་བསམས་པ།
གལ་ཏེ་ཐམས་ཅད་འདོང་བར་གྱུར་ན་བདག་ཅག་གི་སློང་མོ་སྟེར་བའི་ཁྱིམ་གང་དག་ཡིན་པ་དེ་དག་ཀྱང་ལྷུང་བཟེད་ནག་པོ་ཅན་དག་གིས་ཁ་ཕྱིན་པར་འགྱུར་གྱིས་བདག་ཅག་གིས་གཅིག་གཞག་སྟེ་འདོང་བར་བྱ་ན་སུ་གཞག་པར་བྱ། བཙུན་པ་འཆར་ཀའོ། །བཙུན་པ་འཆར་ཀ་ཁྱོད་ནི་འདི་ཉིད་དུ་
འདུག་ཤིག་དང་། ཁོ་བོ་ཅག་འདོང་བར་བྱའོ། །དེ་བཞིན་གྱིས་ཤིག་ཅེས་འཆར་ཀ་དེ་ཉིད་དུ་འདུག་གོ། །ལྔ་པོ་དག་གིས་འདྲོན་པ་དོན་མཐུན་བཙལ་བར་བརྩམས་པ་དང་། དེ་དག་གིས་བལ་ཡུལ་དུ་འགྲོ་བའི་འདྲོན་པ་དོན་མཐུན་མཐོང་ནས་དེའི་དྲུང་དུ་སོང་སྟེ་སྨྲས་པ། བཞིན་བཟངས་
དག་ཁྱེད་གང་དུ་འདོང་། འཕགས་པ་དག་བལ་ཡུལ་དུའོ། །བཞིན་བཟངས་དག་ཁོ་བོ་ཅག་ཀྱང་ཁྱེད་དང་ལྷན་ཅིག་འདོང་ངོ་། །འཕགས་པ་དག་བལ་ཡུལ་ནི་རྔ་མོའི་རྒྱབ་འདྲ་བ་ལགས་པས་ཁྱེད་ཅག་དེར་དགྱེས་པར་མི་འགྱུར་རོ། །བཞིན་བཟངས་དག་གལ་ཏེ་དེ་ལྟ་བུ་ཡིན་དུ་ཟིན་ཀྱང་
ཡུལ་མཐོང་བར་འགྱུར་གྱི་འདོང་བར་བྱའོ། །འཕགས་པ་དག་གལ་ཏེ་དེ་ལྟ་ན་ཚུར་སྤྱོན་བཞུད་དོ། །དྲུག་སྡེ་དག་འདྲོན་པ་དོན་མཐུན་དེ་དང་ལྷན་ཅིག་བལ་ཡུལ་དུ་འཕགས་ནས་མཐར་གྱིས་བལ་ཡུལ་དུ་ཕྱིན་པ་དང་། ཉི་མ་གང་ཁོ་ན་ལ་བལ་ཡུལ་དུ་ཕྱིན་པའི་ཉི་མ་དེ་ལ་མངོན་པར་མི་དགའ་

བར་གྱུར་ནས། དེ་དག་ནང་པར་སྔར་ལངས་ཏེ་ལམ་སྲང་དུ་དོང་བ་དང་། ཚོང་པ་དག་གིས་དྲུག་སྡེ་དག་མཐོང་ནས་དེ་དག་གི་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་དག་བལ་ཡུལ་ཇི་འདྲ། ཁྱེད་ཅག་མངོན་པར་མི་དགྱེས་པར་མ་གྱུར་ཏམ། བཞིན་བཟངས་དག་ཉི་མ་གང་ཁོ་ན་
ལ་བལ་ཡུལ་དུ་ཕྱིན་པའི་ཉི་མ་དེ་ཉིད་ལ་མངོན་པར་མི་དགའ་བར་གྱུར་ཏོ། །འཕགས་པ་དག་བདག་ཅག་གིས་ཁྱེད་ལ་དང་པོ་ཁོ་ན་ནས་བལ་ཡུལ་ན་ནི་རྔ་མོའི་རྒྱབ་འདྲ་བ་ལགས་པས་ཁྱེད་ཅག་དེར་དགྱེས་པར་མི་འགྱུར་རོ་ཞེས་མ་བགྱིས་སམ། བཞིན་བཟངས་དག་ཇི་དེ་ལྟ་ན་འགྲོའམ།
འདོང་ངོ་། །འཕགས་པ་དག་བདག་ཅག་གིས་ཟོང་མ་བསྒྱུར་ཏེ། དེ་ལྟར་ལགས་མོད་ཀྱི་འོན་ཀྱང་བདག་ཅག་དང་བཤེས་པའི་ཚོང་པ་གཞན་དག་མཆིས་པ་དེ་དག་གིས་ཟོང་བསྒྱུར་བས། དེ་དག་ལ་གཏད་པར་བགྱི་ཡིས་དེ་དག་དང་ཐབས་ཅིག་ཏུ་བཞུད་ཅིག །དྲུག་སྡེ་དག་གིས་
སྨྲས་པ། དེ་མ་ནོངས་ཀྱི་དེ་བཞིན་བགྱིའོ། །བལ་ཡུལ་ན་བལ་དང་ལྡོང་རོས་གཉིས་མོད་པས། འདྲོན་པ་དོན་མཐུན་དེ་དག་གིས་བལ་གྱིས་ཤིང་རྟ་བཀྲམ་སྟེ་ཆས་པ་དང་། དྲུག་སྡེ་དག་ཀྱང་འདྲོན་པ་དོན་མཐུན་པ་དེ་དག་དང་ལྷན་ཅིག་འཕགས་སོ། །དྲུག་སྡེ་དག་གི་ཀུན་དུ་སྤྱོད་པ་ནི་རྡུལ་
གྱིས་འཇིགས་པས་ཡང་ན་ནི་དོན་མཐུན་གྱི་མདུན་དུ་འགྲོ། །ཡང་ན་ནི་ཕྱི་བཞིན་འབྲང་ཞིང་འགྲོ་བས། དེ་དག་དོན་མཐུན་གྱི་ཕྱི་བཞིན་འགྲོ་བར་བརྩམས་པ་དང་། ཇི་ཙམ་ན་ཚོང་པ་དེ་དག་གི་ཤིང་རྟའི་སྲོག་ཤིང་ཆག་ནས་ཚོང་བ་དེ་དག་གིས་བསམས་པ། གལ་ཏེ་ཤིང་རྟའི་སྲོག་
ཤིང་བཅོས་ན། སྒྲས་ཆོམ་རྐུན་པ་དག་འོང་བར་འགྱུར་ཞིང་། དེ་དག་གིས་དང་པོར་བདག་ཅག་གསད་པར་འགྱུར་ལ་དེའི་འོག་ཏུ་ནོར་ཡང་འཕྲོག་པར་འགྱུར་གྱི། བདག་ཅག་གིས་གཅེས་པ་དག་ཁྱེར་ཏེ་འདོང་ངོ་སྙམ་ནས་ཡིད་མི་དགའ་ཞིང་འཁོད་པ་དང་། དྲུག་སྡེ་དག་ལྷགས་
ནས་དེ་དག་གིས་སྨྲས་པ། ཤེས་ལྡན་དག་ཅིའི་ཕྱིར་ཡིད་མི་དགའ་ཞིང་འཁོད། འཕགས་པ་དག་ཤིང་རྟའི་སྲོག་ཤིང་ཆག་སྟེ། གལ་ཏེ་ཤིང་རྟའི་སྲོག་ཤིང་བཅོས་ན་སྒྲས་ཆོམ་རྐུན་པ་དག་མཆི་བར་འགྱུར་ཞིང་དེ་དག་གིས་དང་པོར་བདག་ཅག་བཀུམ་པར་འགྱུར་ལ། དེའི་འོག་

ཏུ་ནོར་ཡང་འཕྲོག་པར་འགྱུར་བས་བདག་ཅག་གིས་གཅེས་པ་དག་འཚལ་ཏེ་མཆིའོ་སྙམ་ནས་ཡིད་མི་དགའ་ཞིང་མཆིས་སོ། །བཞིན་བཟངས་དག་ཁྱེད་ཀྱིས་བལ་དག་ཡོངས་སུ་བཏང་ངམ། གལ་ཏེ་ཁྱེད་ཅག་ལ་མི་གནོད་ན་ཞྭ་དང་ལྷམ་སྒྲོ་གུ་ཅན་དང་། སྟོད་
ཀོར་ནང་ཚངས་ཅན་དང་རྒྱ་ཅང་དང་ལྕག་པོད་དང་ཤུར་བུ་ཕྲེའུ་ལ་སོགས་པའི་དོན་དུ་ཅུང་ཞིག་བསྐུར་རོ། །འཕགས་པ་དག་བདག་ཅག་ལ་འདིས་ཅི་བགྱི། ཐམས་ཅད་སྣོམས་ཤིག །དྲུག་སྡེ་དག་གིས་སྨྲས་པ། ཀྱེ་དགའ་བོ་ཉེ་དགའ་ཕྱག་དར་ཁྲོད་རྙེད་དོ་ཞེས་དེ་དག་གིས་ལྔ་ཆར་
གྱི་ལྷུང་བཟེད་དང་ཆོས་གོས་དག་གཅིག་ལ་བསྐུར་ནས། མི་བཞིས་དེ་ཉིད་ལས་ཐག་པ་བཀལ་ཏེ། ཁུར་པོ་ཆེ་བཞི་དྲགས་ནས་དེ་དག་གིས་དེ་ཁུར་ཏེ་དོང་ངོ་། །དེ་དག་གིས་ཁུར་དེ་དག་ཁྱེར་ཏེ། འཕགས་པ་དང་། ཚོང་པ་དེ་དག་གིས་དྲུག་སྡེ་དག་བལ་གྱི་ཁུར་བསླང་སྟེ་ཕྱི་བཞིན་
འོང་བ་མཐོང་ནས་སྨྲས་པ། འཕགས་པ་དག་བདག་ཅག་གིས་གླ་མི་དག་ཁྲིད་དེ་མཆིའོ་སྙམ་དུ་བསམས་ན་ཁྱེད་ཅག་གིས་བལ་འདི་ཐམས་ཅད་བསྣམས་ཏེ་བྱིན་གྱིས་འཕགས་པ་དག་ལ་གླ་གསོལ་ལོ། །བཀྲེན་པ་དག་ཁོ་བོ་ཅག་ཁྱེད་ཀྱི་གླ་མི་དག་ཡིན་ནམ། འཕགས་པ་དག་
མེད་ཀྱང་བཞད་གད་བགྱིའོ། །དོན་མཐུན་དེའི་ནང་དུ་མུ་སྟེགས་ཅན་དག་ཅིག་འདོང་བ་དེ་དག་གིས་སྨྲས་པ། ཀྱེ་མ་དྲུག་སྡེ་དག་ཁྱེད་ཅག་གང་དུ་ཁུར་འཇིག་པར་འགྱུར། གང་དུ་རྙེད་པ་འགྲུབ་པར་འགྱུར། མུ་སྟེགས་ཅན་དག་ཁྱེད་ཀྱི་མའི་ལྟོ་དྲལ་ཏེ་དེར་འཇིག་པར་འགྱུར་ཞིང་།
དེར་རྙེད་པ་འགྲུབ་པར་འགྱུར་རོ། །དྲུག་སྡེ་དག་གིས་སྨྲས་པ། ཀྱེ་དགའ་བོ་ཉེ་དགའ་གལ་ཏེ་དོན་མཐུན་དང་ལྷན་ཅིག་འདོང་ན་ཐོ་འཚམས་པ་མང་དུ་འབྱུང་གི །དོན་མཐུན་གྱི་མདུན་དུ་འདོང་ངོ་ཞེས་དེ་དག་དོན་མཐུན་གྱི་མདུན་དུ་འཕགས་ཏེ་དོང་བ་དང་། རི་བྲགས་ཤིག་ན་ཆོམ་
རྐུན་པ་བཅད་པའི་ཕྱིར་ཡང་རྒོད་ཀྱི་མི་མང་པོ་བཀོད་ཅིང་འཁོད་པ་དེ་དག་གིས་དེ་དག་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་ཉམ་ང་བར་གྱུར་ནས། དེ་དག་གིས་སྨྲས་པ། ཤེས་ལྡན་དག་གླང་པོ་ཆེ་དང་བཅས་པའི་དམག་བྱུང་ངོ་ཞེས་རི་བྲགས་པ་དེ་དག་ཐམས་ཅད་སྐྲག་

ནས་ནགས་ཁྲོད་དུ་བྱེར་རོ། །དེ་དག་གི་ནང་ནས་ཁ་ཅིག་གིས་སྨྲས་པ། འདི་དག་ནི་གླང་པོ་ཆེ་དང་བཅས་པའི་དམག་མ་ཡིན་གྱི་འདི་ལྟར་རྔ་མོ་དག་ཅིག་འོངས་པ་ཡིན་ནོ། །ཁ་ཅིག་གིས་སྨྲས་པ། འདི་དག་ནི་རྔ་མོ་མ་ཡིན་གྱི་འདི་ལྟར་གླང་དག་ཅིག་ཡིན་ནོ། །ཁ་ཅིག་གིས་སྨྲས་པ།
འདི་དག་གླང་མ་ཡིན་གྱི་འདི་དག་ནི་ཁུར་ཐོགས་པ་དག་ཅིག་ཡིན་ནོ། །དེ་དག་ཐག་ཉེ་བར་གྱུར་པ་དང་། ཡང་རྒོད་དེ་དག་གིས་ངོ་ཤེས་ཏེ་སྨྲས་པ། འཕགས་པ་དག་ཁྱེད་ཅག་འདི་ལྟ་བུའི་ཁུར་དག་ཐོགས་པས་དེའི་ཕྱིར་རི་བྲགས་པ་ཐམས་ཅད་སྐྲག་སྟེ། ནགས་ཁྲོད་དུ་བྱེར་རོ། །
བཀྲེན་པ་དག་གལ་ཏེ་ཆོམ་རྐུན་པ་དག་གིས་ཁྱེད་ཅག་དེ་ལྟར་བྲེད་<ངས་‚ངེས་>པར་ཤེས་པར་གྱུར་ན་ཉིན་མོའི་ཉི་མ་ཁོ་ན་ལ་ཡང་བཅིངས་ཏེ་ནགས་ཁྲོད་དུ་ཁྲིད་པར་འགྱུར་རོ། །ཀྱེ་དགའ་བོ་ཉེ་དགའ་གལ་ཏེ་ལམ་དུ་འདོང་ན་ཐོ་འཚམས་པ་མང་དུ་འབྱུང་གི་ལམ་གོལ་བར་འདོད་དོ་ཞེས་དེ་དག་
ལམ་གོལ་བར་ཞུགས་ཏེ་དོང་བ་དང་། ཤོ་གམ་པ་དག་གིས་ཚོང་པ་ཤོ་གམ་འདྲལ་བ་བསྒུགས་པའི་ཕྱིར་འགག་སྒུགས་པའི་མི་མང་པོ་དག་བཀོད་ཅིང་འཁོད་པ་དེ་དག་གིས་དེ་དག་མཐོང་ནས་སྨྲས་པ། ཨེ་མའོ་ཚོང་པ་ཤོ་གམ་འདྲལ་བ་དག་ཅིའི་ཕྱིར་ཤོ་གམ་འདྲལ་ཏེ་འདོང་། བཀྲེན་
པ་དག་ཁོ་བོ་ཅག་ཁྱེད་ཀྱི་ཚོང་པ་ཤོ་གམ་འདྲལ་བ་དག་ཡིན་ནམ། ཁྱེད་ཅག་སུ་ཡིན། འཕགས་པ་དྲུག་སྡེ་དག་གམ། ཡིན་ནོ། །བཞུད་ཅིག །དེ་དག་གིས་སྨྲས་པ། ཀྱེ་དགའ་བོ་ཉེ་དགའ་གལ་ཏེ་རྒྱལ་བྱེད་ཀྱི་ཚལ་གྱི་སྒོ་ནས་ཞུགས་ན་ལྷུང་བཟེད་ནག་པོ་ཅན་དག་ལས་ཐོ་འཚམས་པ་
མང་དུ་འབྱུང་གི །སྒེའུ་ཆུང་ནས་འཇུག་པར་བྱའོ་ཞེས་དེ་དག་སྒེའུ་ཆུང་ནས་ཞུགས་པ་དང་། རྒན་ཞུགས་ཞིག་གིས་མཐོང་ནས་དེས་སྨྲས་པ། ཨེ་མ་འོ་ཁུར་ཙ་བ་དག་ཅིའི་ཕྱིར་གྲོང་དྲལ་ཏེ་འཇུག་པར་བྱེད། རྒན་ཞུགས་ཁོ་བོ་ཅག་ཁྱོད་ཀྱི་ཁུར་ཙ་བ་དག་ཡིན་ནམ། དེས་སྨྲས་པ་ཁྱེད་ཅག་སུ་
ཡིན། ཚེ་དང་ལྡན་པ་དྲུག་སྡེ་དག་གམ། ཡིན་ནོ། །ཚེ་དང་ལྡན་པ་དག་བྱོན་པ་ལེགས་སོ་བྱོན་པ་ལེགས་སོ། །དེ་དག་ནང་དུ་ཞུགས་ནས་དེ་དག་གིས་བལ་གྱི་ཁུར་དེ་དག་བཤིག་པ་དང་། རི་རབ་ཀྱི་རྣམ་པ་འདྲ་བའི་ཕུང་པོ་ཆེན་པོར་རྣམ་པར་གནས་སོ། །དེ་དག་ལ་དགེ་སློང་རྣམས་

ཀྱིས་སྨྲས་པ། ཚེ་དང་ལྡན་པ་དག་ཁྱེད་ཅག་ཁུར་འདི་ལྟ་བུ་དག་ཐོགས་ན་ཁྱོད་ལ་ཐོ་འཚམས་པ་དག་མི་འབྱུང་ངམ། ཚེ་དང་ལྡན་པ་དག་ཇི་ཁོ་བོ་ཅག་གིས་ཁ་ཟས་བཟའ་བ་ཁོ་ནའི་ཕྱིར་མངོན་པར་བསྒྲུབས་སམ། གང་ཁོ་བོ་ཅག་ལ་ཐོ་འཚམས་
བར་བྱེད་པ་དེ་ལ་ཁོ་བོ་ཅག་གིས་ཀྱང་ཉིས་བསྒྱུར་སྦྱིན་པར་བྱའོ་ཞེས་ཟེར་ན། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཡན་ལག་གང་གིས་ངོ་ཚ་བར་བྱ་བའི་ཡན་ལག་དེ་ཉིད་ཀྱིས་ཁེངས་པར་བྱེད་ཅེས་སྨོད་པར་བྱེད། ཕྱར་ཁ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་
དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དེ། དྲུག་སྡེ་དག་ལ་རྨས་ནས། རྣམ་གྲངས་དུ་མར་སྨད་དེ་བསླབ་པ་བཅའ་བའི་ཕན་ཡོན་བཅུ་ཡང་
དག་པར་གཟིགས་པས་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་ལམ་དུ་ཞུགས་པས་ལུག་བལ་དག་རྙེད་ལ་འདོད་ན་དགེ་སློང་དེས་བླང་བར་བྱའོ། །བླངས་ནས་ཁྱེར་བ་མེད་ན་དཔག་ཚད་གསུམ་གྱི་མཐའི་བར་དུ་བདག་ཉིད་ཀྱིས་བསྐུར་
བར་བྱའོ། །དེ་ལས་འདས་པར་ཁྱེར་ན་སྤང་བའི་ལྟུང་བྱེད་དོ་ཞེས་བཅའ་བ་མཛད་དེ། ཡུལ་ནི་མཉན་ཡོད། གང་ཟག་ནི་དྲུག་སྡེ། ཉོན་མོངས་པ་ནི་འདོད་ཞེན་དང་ངོ་ཚ་མེད་པ། ཉེས་པ་ནི་རྒྱང་གྲགས་ཀྱི་མཐར་བལ་ཁུར་བའོ། །དེ་ལ་དགེ་སློང་ཞེས་བྱ་བ་ནི་དྲུག་སྡེའམ། གཞན་
ཡང་དེ་ལྟ་བུ་གང་ཡིན་པའོ། །ལམ་དུ་ཞུགས་པས་ཞེས་བྱ་བ་ནི་དགོན་པའི་ལམ་དུ་ཞུགས་པས་སོ། །ལུག་བལ་དག་ཅེས་བྱ་བ་ནི་ལུག་གི་བལ་དག་གོ། །རྙེད་ལ་ཞེས་བྱ་བ་ནི་གཞན་ལས་སོ། །འདོད་ན་ཞེས་བྱ་བ་ནི་གལ་ཏེ་དོན་དུ་གཉེར་ནའོ། །དགེ་སློང་དེས་བླང་བར་བྱའོ་ཞེས་བྱ་བ་ནི་
མནོད་པར་བྱ་བའོ། །བླངས་ནས་ཁྱེར་བ་མེད་ན་ཞེས་བྱ་བ་ནི་རུང་བར་བྱེད་པ་མེད་ནའོ། །དཔག་ཚད་གསུམ་གྱི་མཐའི་བར་དུ་ཞེས་བྱ་བ་ནི་དཔག་ཚད་གསུམ་གྱི་མཐར་ཐུག་པའི་བར་ཚུན་ཆད་དུའོ། །བདག་ཉིད་ཀྱིས་བསྐུར་བར་བྱའོ་ཞེས་བྱ་བ་ནི་བདག་རང་གིས་བསྐུར་བར་བྱའོ། །དེ་ལས་

འདས་པར་ཁྱེར་ན་ཞེས་བྱ་བ་ནི་དེ་ལས་ཐལ་བར་བྱེད་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། འདིར་ཡང་དངོས་གཞི་དང་།
སྦྱོར་བ་དང་། སྦྱོར་བའི་སྦྱོར་བས་ལྟུང་བ་རྣམ་པར་གཞག་པ་དང་། ལྟུང་བ་མེད་པ་དང་། བསླབ་པར་བྱ་བ་དང་། ཕྱིར་བཅོས་པ་རྣམས་ཀྱིས་འདིའི་མཚན་ཉིད་ཤེས་པར་བྱའོ། །དེ་ལ་འདིར་དངོས་གཞིའི་ལྟུང་བ་རྣམ་པར་གཞག་པ་ནི་དགེ་སློང་ལམ་དུ་ཞུགས་པས་ལུག་བལ་
དག་རྙེད་ལ་འདོད་ཅིང་བླངས་ནས་ཁྱེར་བ་མེད་ན་དཔག་ཚད་གསུམ་ལས་རྒྱང་གྲགས་གཅིག་གི་མཐའ་ལས་འདས་པར་ཁྱེར་ན་བལ་ཐོགས་པའི་སྤང་བའི་ལྟུང་བྱེད་ཀྱི་དངོས་གཞིར་འགྱུར་རོ། །དགེ་སློང་ལ་བལ་ཐོགས་པའི་སྤང་བའི་ལྟུང་བྱེད་བྱུང་ན་དེ་མ་སྤངས་ཤིང་བྲལ་བར་མ་
བྱས་ལ་ལྟུང་བ་མ་བཤགས་པར་རམ། སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་རམ། སྤངས་ཤིང་བྲལ་བར་བྱས་ལ་ལྟུང་བ་མ་བཤགས་པར་ལུག་བལ་དེ་ལྟ་བུ་གཞན་ཞིག་རྙེད་ན་དེ་ཡང་སྔ་མའི་ཤུགས་ཀྱིས་སྤང་བར་འགྱུར་ཏེ་དེ་ལས་ལྟུང་བར་ནི་མི་འགྱུར་རོ། །
དགེ་སློང་གིས་བལ་ཐོགས་པའི་སྤང་བའི་ལྟུང་བྱེད་བྱུང་ལ། ཇི་སྲིད་དུ་སྤང་བའི་དངོས་པོ་ལས་མ་བཤགས་ཤིང་སོ་སོར་མ་བཤགས་པར་ལྷུང་བཟེད་དམ། ཆོས་གོས་སམ། དྲ་བའམ། ཕོར་བུའམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་གཞན་ཉེ་
བར་འཇོག་ན། དེ་ཡང་སྔ་མའི་ཤུགས་ཀྱིས་སྤང་བར་འགྱུར་ཏེ། དེ་ལས་ལྟུང་བར་ནི་མི་འགྱུར་རོ། །ཁྱེར་བ་མེད་པ་ལ་དཔག་ཚད་གསུམ་ལས་འདས་པའི་མཐའ་ནས་རྒྱང་གྲགས་གཅིག་གི་མཐར་ཕྱིན་པ་ལ་ན་སྨད་པ་མེད་དོ། །ཁྱེར་བ་ཡོད་བཞིན་དུ་བདག་ཉིད་ཀྱིས་ཁྱེར་ན་གཞི་ཉིད་ནས་
བརྩམས་ཏེ་རྒྱང་གྲགས་གཅིག་གི་མཐར་ཕྱིན་པ་ལ་ན་སྨད་པ་མེད་དོ། །ལུག་བལ་གྱི་རྫས་བཟང་ངན་དང་མཉམ་པ་ལ་ན་སྨད་པ་མེད་དོ། །བལ་རུང་བ་ལ་ན་སྨད་པ་མེད་དོ། །ཞྭ་དང་ལྷམ་སྒྲོ་གུ་ཅན་དང་སྟོད་ཀོར་ནང་ཚངས་ཅན་དང་རྒྱ་ཅང་དང་ལྕག་པོད་དང་ཤུར་བུ་ཕྲེའུ་ལ་སོགས་པ་དེ་ཙམ་

དག་གི་རྒྱུའི་ཚད་ལས་ལྷག་པ་ལ་ན་སྨད་པ་མེད་དོ། །འདིའི་བྱེད་པ་པོ་ནི་ལུག་བལ་རུང་བ་དང་རྒྱང་གྲགས་ཀྱི་མཐར་ཁྱེར་བ་ཉིད་ཡིན་ནོ། །འདི་ལ་ཡན་ལག་ལྔས་དངོས་གཞིའི་ལྟུང་བར་འགྱུར་ཏེ། ལུག་བལ་དང་རུང་བ་དང་། ཞྭ་རྒྱུ་ལ་སོགས་པའི་ཚད་ལས་
ལྷག་པ་དང་། རང་གིས་ཁྱེར་བ་དང་རྒྱང་གྲགས་ཀྱི་མཐར་ཕྱིན་པའོ། །དེ་དག་ལ་ཡན་ལག་མ་ཚང་ན་ཅི་རིགས་པར་ན་སྨད་དོ། །དེ་ལ་ལུག་བལ་དང་རུང་བ་ཞེས་སྨོས་པ་ནི་ལུག་བལ་མ་ཡིན་པ་དང་། ར་བལ་ལ་སོགས་པ་རུང་བ་མ་ཡིན་པ་ལ་ཉེས་བྱས་སུ་གསུངས་པའི་ཕྱིར་རོ། །ཞྭ་
རྒྱུ་ལ་སོགས་པའི་ཚད་ལས་ལྷག་པ་ཞེས་སྨོས་པ་ནི་དེ་དག་གི་དོན་དུ་དེ་ཙམ་དག་ཁྱེར་བ་ལ་ནི་ཉེས་པ་མེད་ལ་དེ་དག་གི་དོན་མ་ཡིན་པར་དེ་ཙམ་དག་ཁྱེར་བ་ལ་ནི་ན་སྨད་པའི་ཕྱིར་རོ། །རང་གིས་ཁྱེར་བ་ཞེས་སྨོས་པ་ནི་གཞན་གྱིས་བསྐུར་བ་ལ་ཉེས་པ་མེད་པའི་ཕྱིར་རོ། །རྒྱང་གྲགས་ཀྱི་མཐར་
ཕྱིན་པ་ཞེས་སྨོས་པ་ནི་རྒྱང་གྲགས་ཕྱེད་དུ་ཕྱིན་པ་ལ་ཉེས་བྱས་སུ་གསུངས་པའི་ཕྱིར་རོ། །སྦྱོར་བ་གཅིག་གིས་ལུག་བལ་རུང་བ་ཞྭ་རྒྱུ་ལ་སོགས་པའི་ཚད་ལས་ལྷག་པའི་ཆུན་པོ་གཅིག་གམ་གཉིས་སམ་མང་པོ་ཞིག་ཁྱེར་ན་ཡང་ལྟུང་བའི་དངོས་གཞི་གཅིག་རྣམ་པར་གཞག་གོ། །རྒྱང་
གྲགས་ཀྱི་མཐར་ཕྱིན་པ་ཞེས་སྨོས་པ་དེ་ལ་འདིར་རྒྱང་གྲགས་དང་དཔག་ཚད་ཀྱི་ཚད་རྡུལ་ཕྲ་རབ་ལ་སོགས་པ་ལས་བསྒྱུར་ཏེ་བསྒྲེ་བ་བསྟན་པའི་ཕྱིར་རྡུལ་ཕྲ་རབ་དང་རྡུལ་ཕྲ་མོ་དང་། ཆུ་དང་ལྕགས་དང་རི་བོང་དང་ལུག་དང་གླང་དང་ཉི་ཟེར་གྱི་རྡུལ་དང་། སྲོ་མ་དང་། ཤིག་དང་ནས་
དང་སོར་རྣམས་ནི་སྔ་མ་དྲུག་ལས་ཕྱི་མ་གཅིག་ཏུ་བསྒྲེའོ། །སོར་ཉི་ཤུ་རྩ་བཞི་ལ་ཁྲུ་གང་ངོ་། །ཁྲུ་ཕྱེད་དང་བཞི་ལ་མིའི་སྲིད་དོ། །ཁྲུ་བཞི་ལ་གཞུ་གཅིག་གོ། །གཞུ་ལྔ་བརྒྱ་ལ་ཡང་རྒྱང་གྲགས་གཅིག་གོ། །རྒྱང་གྲགས་བརྒྱད་ལ་དཔག་ཚད་གཅིག་གོ། །དགོན་པའི་དང་པོ་
ཡང་རྒྱང་གྲགས་གཅིག་གི་མཐའོ་ཞེས་གསུངས་སོ། །སྦྱོར་བའི་ལྟུང་བ་ནི་ཉེས་བྱས་ཏེ། ཇི་སྲིད་དུ་བལ་ཐོགས་པའི་སྤང་བའི་ལྟུང་བྱེད་ཀྱི་སྦྱོར་བ་བརྩམས་ནས་དངོས་གཞི་ལ་མ་ཐུག་གི་བར་དུ་ཉེས་བྱས་སོ། །དངོས་གཞི་ལ་སྦྱོར་བ་ཐ་དད་པ་ཇི་སྙེད་བརྩམས་པ་རེ་རེ་ལ་ཉེས་བྱས་

རེ་རེའོ། །བལ་རུང་བ་མ་ཡིན་པ་ལ་ཉེས་བྱས་སོ། །ཞྭ་རྒྱུ་ལ་སོགས་པའི་ཚད་དང་དེ་བས་ཆུང་བ་དེ་དག་གི་དོན་མ་ཡིན་པར་ཁྱེར་བ་ལ་ཉེས་བྱས་སོ། །ཁྱེར་བ་མེད་པ་ན་བདག་ཉིད་ཀྱིས་དཔག་ཚད་གསུམ་གྱི་མཐའ་ནས་བརྩམས་ཏེ་རྒྱང་གྲགས་ཕྱེད་དུ་ཁྱེར་ན་ཉེས་བྱས་སོ། །ཁྱེར་བ་ཡོད་
བཞིན་དུ་བདག་ཉིད་ཀྱིས་ཁྱེར་ན་ནི་རྩོམ་པའི་དུས་ཁོ་ན་ནས་ཉེས་བྱས་གཞན་གཅིག་གོ། །རྒྱང་གྲགས་ཕྱེད་དུ་ཕྱིན་ན་ཉེས་བྱས་གཞན་གཅིག་གོ། །རྫུ་འཕྲུལ་ལས་གཞན་པས་ནམ་མཁའ་ལ་ཁྱེར་ཏེ་འགྲོ་ན་ཉེས་བྱས་སོ། །སྤྲུལ་པས་ཁྱེར་ཏེ་འགྲོ་ན་ཉེས་བྱས་སོ། །སྦྱོར་བའི་སྦྱོར་བའི་
ལྟུང་བ་ནི་ཉེས་བྱས་ཕྲ་མོ་སྟེ། སྦྱོར་བ་ཇི་སྙེད་པ་ལ་སྦྱོར་བའི་སྦྱོར་བ་ཡང་དེ་སྙེད་དེ། སྦྱོར་བ་ཉེས་བྱས་ཀྱི་སྦྱོར་བའི་སྦྱོར་བ་ཡང་ཉེས་བྱས་ཏེ་ཉེས་བྱས་ཕྲ་མོའོ། །དེ་ཡང་དང་པོ་ཡིད་ལ་སེམས་པ་ནི་སྦྱོར་བའི་སྦྱོར་བའི་ཉེས་བྱས་ཕྲ་མོའོ། །དེ་ནས་ལུས་དང་ངག་གིས་སྦྱོར་བ་ནི་སྦྱོར་བའི་ཉེས་བྱས་
དངོས་སོ། །དེ་ནས་མཐར་ཐུག་པ་ནི་སྤང་བའི་ལྟུང་བྱེད་ཀྱི་དངོས་གཞིའོ་ཞེས་བྱ་བར་ཤེས་པར་བྱའོ། །ལྟུང་བ་མེད་པ་ནི་ཁྱེར་བ་མེད་ན་བདག་ཉིད་ཀྱིས་དཔག་ཚད་གསུམ་གྱི་བར་དུ་ཁྱེར་བ་ལ་ལྟུང་བ་མེད་དོ། །ཞྭ་དང་ལྷམ་སྒྲོ་གུ་ཅན་དང་། སྟོད་ཀོར་ནང་ཚངས་ཅན་དང་རྒྱ་ཅང་དང་ལྕག་པོད་
དང་ཤུར་བུ་ཕྲེའུ་ལ་སོགས་པའི་དོན་དུ་དེ་ཙམ་དག་ཁྱེར་བ་ལ་ཉེས་པ་མེད་དོ། །ལས་དང་བོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པར་བྱ་བ་ནི་དགེ་སློང་གིས་ཡུལ་ཐམས་ཅད་ལ་གནས་སྐབས་ཐམས་ཅད་དུ་བལ་ཐོགས་
པའི་སྤང་བར་འགྱུར་བ་རྣམ་པ་ཐམས་ཅད་མི་བསྟེན་པར་བསླབ་པར་བྱའོ། །ལུས་ཀྱི་ཁུར་ཕྲག་རྡང་ཞེས་བྱ་བ་ནི་མི་བསྐུར་རོ། །གློ་དང་རྒྱབ་དང་རྐེད་པ་དང་མགོ་བོ་དག་གིས་ཁུར་བ་ཡང་མི་བསྐུར་རོ། །ཁུར་ཕྱེད་ཀྱི་སྲང་ཚད་ལས་ལྷག་པ་མི་བསྐུར་རོ། །འདིར་དགེ་སློང་དང་དགེ་སློང་མ་ཐུན་མོང་མ་
ཡིན་པ་ཉིད་དུ་དོགས་པར་མི་བྱའོ། །ཕྱིར་བཅོས་པ་ནི་སྔ་མ་བཞིན་ནོ། །བལ་ཐོགས་པའི་སྤང་བ་སྟེ་བཅུ་དྲུག་པ་བཤད་ཟིན་ཏོ།། །།བལ་རྨེལ་དུ་འཇུག་པའི་སྤང་བའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་སྦྱིན་གྱི་ཀུན་དགའ་ར་<བ་ན‚བ་>

ན་བཞུགས་སོ། །དྲུག་སྡེ་དག་གིས་སྨྲས་པ། ཀྱེ་དགའ་བོ་ཉེ་དགའ་བལ་བགོ་བར་བྱའོ། །ཆ་དུར་བྱ། དེ་དག་གིས་སྨྲས་པ། བདག་ཅག་གིས་བཙུན་པ་འཆར་ཀ་འདི་ཉིད་ན་འདུག་འདུག་པ་ལ་ཅིའི་ཕྱིར་སྐལ་བ་སྦྱིན་ཆ་ལྔར་བྱའོ། །འཆར་ཀས་ཐོས་ནས་དེས་སྨྲས་པ་
ཚེ་དང་ལྡན་པ་དག་ཁྱེད་ཀྱིས་དེར་རྙེད་པ་གང་གྲུབ་པ་དེ་ཡང་ཁྱེད་ཉིད་ཀྱིར་གྱིས་ཤིག །ཁོ་བོ་འདི་ཉིད་ན་འདུག་འདུག་པས་རྙེད་པ་གང་གྲུབ་པ་དེ་ཡང་ཁོ་བོ་ཉིད་ཀྱིར་བྱའོ། །ཉེ་དགས་བསམས་པ། འདི་འདི་ཉིད་ན་འདུག་འདུག་པས་རྙེད་པ་མང་པོ་གྲུབ་གོར་མ་ཆག་སྙམ་ནས། དེས་སྨྲས་
པ། ཚེ་དང་ལྡན་པ་དག་བདག་ཅག་དུས་ཐམས་ཅད་དུ་དྲུག་སྡེ་ཡིན་ན། དེ་ཅིའི་ཕྱིར་ལྔ་སྡེར་འགྱུར་བར་བྱ། ཆ་དྲུག་ཁོ་ནར་བྱའོ། །སུ་འགོད་དུ་གཞུག །བཙུན་པ་འཆར་ཀ་སྡུམ་པ་ཡིན་གྱིས་དེ་འགོད་དུ་གཞུག་གོ། །འཆར་ཀས་ཆ་དྲུག་ཏུ་བྱས་ཏེ་བདག་ཉིད་ཀྱི་སྐལ་བ་རང་གི་
གནས་ཁང་དུ་བཅུག་སྟེ་གཞག་གོ། །དེ་དག་གིས་སྨྲས་པ། བཙུན་པ་འཆར་ཀ་ཁྱོད་ཀྱིས་རྙེད་པ་གང་གྲུབ་པ་དེ་ཁྱེར་ཤོག་བགོའོ། །འཆར་ཀས་སྨྲས་པ། ཁོ་བོས་དེའི་བར་དུ་ཀ་ཀ་ནི་གཅིག་ཙམ་ཡང་མ་རྙེད་དོ། །ཁྱོད་ཀྱིས་ཁོ་བོ་ཅག་བསླུས་སོ། །འཆར་ཀས་བསམས་པ། བདག་
གིས་བལ་ཉུང་ངུ་མ་ཞིག་རྙེད་པ་འདི་སུ་རྨེལ་དུ་གཞུག །གལ་ཏེ་ཁྱིམ་བདག་ལ་བཅོལ་ན་ནི་དེ་དག་བསླབ་པ་ཡང་དག་པར་མ་བླངས་པ་ཡིན་པས་ཐམས་ཅད་བརྐུ་བར་འགྱུར་རོ། །གལ་ཏེ་བཅུ་བདུན་སྡེ་དེ་དག་ལ་བཅོལ་ན་ནི་བཅའ་བའི་རིན་དུ་འཇོག་པར་འགྱུར་རོ། །ཆོས་བྱིན་ལ་བཅོལ་དུ་ཡང་
ཆོས་བྱིན་ན་མདོ་སྡེའི་མཐའ་པ་ཡིན་ལ། འཁོར་ཡང་མདོ་སྡེའི་མཐའ་པ་དང་ལྡན་པ་ཡིན་པས་དེ་མདོ་སྡེའི་ཚིག་དག་སེམས་པ་ན་དུས་འགྱངས་པར་འགྱུར་རོ། །གཽ་ཏ་མཱི་སྐེམ་མོ་ལ་བཅོལ་དུ་ཡང་གཽ་ཏ་མཱི་སྐེམ་མོ་ནི་འདུལ་བ་འཛིན་པ་ཡིན་ལ་འཁོར་ཡང་འདུལ་བ་འཛིན་པ་དང་ལྡན་པ་
ཡིན་པས་དེ་འདི་ནི་ལྟུང་བ་ཡིན་ནོ། །འདི་ནི་ལྟུང་བ་མ་ཡིན་ནོ་ཞེས་སེམས་པ་ན་དུས་འགྱངས་པར་འགྱུར་རོ། །སྐྱེ་དགུའི་བདག་མོ་ཆེན་མོ་གཽ་ཏ་མཱི་ནི་སྤོང་བ་ཡིན་ལ་འཁོར་ཡང་སྤོང་བ་དང་ལྡན་པ་ཡིན་པས་དེ་སེམས་རྩེ་གཅིག་ཏུ་འཇོག་པ་ལ་བལ་རྨེལ་བ་མི་གནོད་ཀྱི། བདག་གིས་

དེ་ལ་བལ་རྨེལ་དུ་བཅོལ་ལོ་སྙམ་ནས། དེ་དེ་སྙམ་སེམས་ཤིང་འདུག་པ་ན་སྐྱེ་དགུའི་བདག་མོ་ཆེན་མོ་གཽ་ཏ་མཱི་བཅོམ་ལྡན་འདས་ག་ལ་བ་ལ་བ་དེར་འོངས་པ་དེའི་ཚེ་ཚེ་དང་ལྡན་པ་འཆར་ཀས་ཐག་རིང་པོ་ཁོ་ན་ནས་མཐོང་ནས་སྨྲས་པ། གཽ་ཏ་མཱི་བཅོམ་ལྡན་འདས་ཀྱིས་ཚུལ་ཁྲིམས་དང་
ལྡན་པའི་སེམས་ཀྱིས་སྨོན་པ་འགྲུབ་སྟེ། དེ་ཡང་ཚུལ་ཁྲིམས་རྣམ་པར་དག་པའི་ཕྱིར་རོ་ཞེས་བཀའ་སྩལ་པ་དེ་ལེགས་པར་གསུངས་པ་ཡིན་ཏེ། ད་གཟོད་ཁོ་ན་བདག་ཀྱེ་མ་སྐྱེ་དགུའི་བདག་མོ་ཆེན་མོ་གཽ་ཏ་མཱི་འོངས་ན་ཅི་མ་རུང་སྙམ་པའི་བློ་སྐྱེས་ན་ཁྱོད་ཀྱང་འདིར་འོངས་སོ། །བདག་
གིས་བལ་ཉུང་ངུ་ཞིག་རྙེད་པ་དེ་ཁྱོད་ཀྱིས་རྨེལ་དུ་ཆུག་སྟེ་བྱིན་ཅིག །འཕགས་པ་བདག་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་སླར་མཆིས་ནས། དགེ་སློང་མ་གཉིས་གཏང་གི་དེ་གཉིས་ཀྱི་སུག་པར་སྩོལ་ཅིག །འཆར་ཀས་བལ་དེ་དག་གཟར་ཐག་གིས་བམ་པོ་གཉིས་སུ་
དམ་རབ་ཏུ་བཅིངས་ཏེ་སྒོ་གླེགས་ཀྱི་ཕག་ཏུ་གཞག་སྟེ། དེ་ནས་སྐྱེ་དགུའི་བདག་མོ་གཽ་ཏ་མཱི་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། དབྱར་ཁོང་དུ་སོང་ནས་དེས་དེའི་གན་དུ་དགེ་སློང་མ་གཉིས་བཏང་སྟེ། འཕགས་པ་འཆར་ཀའི་གན་དུ་དེང་ལ་བལ་དེ་བསྐུར་དུ་གསོལ་ཞེས་གྱིས་
ཤིག་ཅེས་བསྒོའོ། །དེ་གཉིས་དེར་དོང་སྟེ་སྨྲས་པ། འཕགས་པ་གཽ་ཏ་མཱིའི་མཆིད་ནས་བལ་དེ་བསྐུར་དུ་གསོལ་ཞེས་མཆིའོ། །འཆར་ཀས་དེ་གཉིས་ལ་སྨྲས་པ། སྒོ་གླེགས་ཀྱི་ཕག་ན་བམ་པོ་གཉིས་སུ་འདུག་པ་དེ་གཉིས་ཁྱེར་ལ་དེང་ཤིག་དེ་གཉིས་གནས་ཁང་དུ་ཞུགས་ཏེ་གདེག་
པར་བརྩམས་པ་དང་། བསྒུལ་བ་ཙམ་དུ་ཡང་མ་ནུས་ནས་དེ་གཉིས་ཀྱིས་སྨྲས་པ། འཕགས་པ་ཅི་འདིར་རང་ཐག་གི་གོར་མ་དག་སྩལ་ཏམ། གཞོན་ནུ་མ་གཉིས་ཇི་ཁྱེད་གཉིས་གཞོན་ནུ་མ་གཏའ་གམ་པ་ཡིན་ནམ་ཞེས་དེས་མཐེའུ་ཆུང་གིས་གདེག་སྟེ་གཅིག་ནི་གཅིག་གི་མགོར་
བསྐུར། གཅིག་ནི་གཅིག་གི་རྐེད་དུ་བསྐུར་རོ། །དེ་གཉིས་མགོ་ཆག་ལ་ཐུག་གོ། །རྐེད་པ་ཆག་ལ་ཐུག་གོ་ཞེས་ཟེར་ཞིང་དབྱར་ཁང་དུ་དོང་ནས་ཁུར་ས་ལ་བཞག་སྟེ་ཁྲི་སྟེང་དུ་སྒྱེལ་ཅིང་འདུག་གོ། །དགེ་སློང་མ་རྣམས་ཀྱིས་དེ་གཉིས་ལ་སྨྲས་པ། འཕགས་མ་གཉིས་གཞོན་ནུ་

མ་གཏའ་གམ་པ་ཡིན་ནམ། དེ་གཉིས་ཀྱིས་སྨྲས་པ། ཁྱེད་ཅག་ལས་སྟོབས་དང་ལྡན་པ་གང་ཡིན་པ་དེས་ཇེ་འདི་ཐེགས་ཤིག །དེ་དག་གིས་དེ་གདེག་པར་བརྩམས་པ་དང་། བསྒུལ་བ་ཙམ་དུ་ཡང་མ་ནུས་ནས་དེ་དག་གིས་སྨྲས་པ། འཕགས་མ་གཉིས་
ཇི་འདིར་རང་ཐག་གི་རྡོ་དག་བཅུག་གམ་ཞེས་དེ་དག་གིས་བམ་པོ་དེ་གཉིས་བཤིག་པ་དང་། ཇི་ཙམ་ན་བལ་དེ་དག་འབོངས་ཏེ་ཕུང་པོ་ཆེན་པོར་རྣམ་པར་གནས་པར་གྱུར་ཏོ། །དགེ་སློང་མ་རྣམས་ཀྱིས་རྟ་གད་ཀྱིས་བཏབ་སྟེ་སྨྲས་པ། འཕགས་པ་འཆར་ཀ་ན་རེ་བལ་ཅུང་ཞིག་ཅེས་ཟེར་
བ་ཡང་འདི་ལྟ་བུར་གྱུར་ན། གལ་ཏེ་མང་བར་གྱུར་ན་ཇི་ལྟ་བུར་འགྱུར། སྐྱེ་དགུའི་བདག་མོ་ཆེན་མོ་གཽ་ཏ་མཱིས་སྨྲས་པ། ནུ་མོ་དག་མགོ་བྲེགས་ཤིང་མཆན་ཁུང་རལ་བུ་ཅན་དག་ཡིན་ན་དགོད་དུ་ཅི་ཡོད། འཕགས་པ་འཆར་ཀའི་མཆེད་ནས་བལ་ཉུང་ངུ་ཞིག་ཅེས་མཆི་བ་ཡང་འདི་ལྟ་བུར་
གྱུར་ན། གལ་ཏེ་མང་བར་གྱུར་ན་ནི་ཇི་ལྟ་བུར་འགྱུར། སྐྱེ་དགུའི་བདག་མོ་ཆེན་མོ་གཽ་ཏ་མཱིས་སྨྲས་པ། ནུ་མོ་དག་དེ་དག་ནི་གནས་ངན་ལེན་ཀུན་དུ་སྤྱོད་པ་དག་ཡིན་པས་དེ་དག་གིས་བཅོམ་ལྡན་འདས་ཀྱི་བསྟན་པ་ལ་འདྲུམས་པས་ལྟུང་བས་ལྟུང་བར་བྱེད་དོ། །ནུ་མོ་དག་བཅོམ་
ལྡན་འདས་ཀྱིས་འདི་གཉིས་ནི་སྐྱེས་བུ་དམ་པ་ཡིན་ཏེ་ཁུར་མ་བླངས་པ་མི་ལེན་པ་གང་ཡིན་པ་དང་། ཁུར་བླངས་པ་མཐར་ཕྱིན་པར་བྱེད་པ་གང་ཡིན་པའོ་ཞེས་གསུངས་ཏེ། འདིའི་ཁུར་བླངས་པ་ཡིན་པས་མཐར་ཕྱིན་པར་བྱ་དགོས་ཀྱི། ཁྱེད་ཅག་ལས་གང་གིས་ཇི་ཙམ་རྨེལ་
བར་སྤྲོ་བ་དེས་དེ་ཙམ་རྨེལ་བ་དེའི་གན་དུ་ཁྱེར་ཏེ་བྱིན་ཅིག །དེ་དག་ཡུན་རིང་དུ་ཐོགས་པ་དང་འཆར་ཀས་བསམས་པ། དེ་དག་གིས་བལ་དེ་བཅའ་བའི་རིན་དུ་གཞག་གོར་མ་ཆག །བདག་གིས་མ་ལེགས་པ་ཞིག་བྱས་ཏེ། བདག་གིས་བལ་དེ་ནི་ཆར་པས་འཇིག་པ་དང་ལ་
ཁར་བཞག་པ་དང་འདྲ་བར་གྱུར་ཏོ་སྙམ་མོ། །དགེ་སློང་མ་གཉིས་ཀྱིས་བལ་ཁ་ཅིག་རྨེལ་ཏེ་ཁྱེར་འོངས་ནས་སྨྲས་པ། འཕགས་པ་འཆར་ཀ་བལ་དག་འཚལ་ཏེ་མཆིས་ན་གང་དུ་གཞག་པར་བགྱི། འཆར་ཀས་བསམས་པ། ད་དུང་སྤྱོད་ཡུལ་ལྷག་མ་དང་བཅས་པ་ཡིན་ནོ་

སྙམ་ནས་སྨྲས་པ། གནས་ཁང་དུ་ཆུག་སྟེ་ཞོག་ཤིག །དེ་གཉིས་ཀྱིས་བཞག་སྟེ་སོང་བ་དང་། གཞན་དག་གིས་ཀྱང་ཁྱེར་ཏེ་འོངས་སོ། །ཇི་ཙམ་ན་ཐམས་ཅད་ཀྱིས་ཀྱང་ཁྱེར་ཏེ་ལྷགས་སོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་
ནས་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ཏེ་མཐའ་གཅིག་ཏུ་འདུག་གོ། །དེའི་ཚེ་ན་སྐྱེ་དགུའི་བདག་མོ་ཆེན་མོ་གཽ་ཏ་མཱིའི་ལག་པ་གཉིས་འདི་ལྟ་སྟེ་དཔེར་ན་བཙོ་བླག་མཁན་གྱི་ལག་པ་དམར་བ་ལྟར་དམར་བ་ཤིན་ཏུ་དམར་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་
སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་འདི་སྐད་ཅེས་བཀའ་སྩལ་ཏོ། །གཽ་ཏ་མཱི་ཅིའི་ཕྱིར་ཁྱོད་ཀྱི་ལག་པ་གཉིས་འདི་ལྟ་སྟེ་དཔེར་ན་བཙོ་བླག་མཁན་གྱི་ལག་པ་དམར་བ་ལྟར་དམར་བ་ཤིན་ཏུ་དམར་བར་གྱུར། བཅོམ་ལྡན་འདས་འདི་ན་བགྱི་བ་གཞན་ལགས་ན་གཞན་བགྱིད་དོ། །ཇི་
ལྟར་གྱུར། འཕགས་པ་འཆར་ཀས་བདག་བལ་རྨེལ་དུ་སྩལ་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་མ་ཉེ་དུ་མ་ཡིན་པ་ལ་ལུག་བལ་དག་རྨེལ་དུ་འཇུད་དམ། བཙུན་པ་རྨེལ་དུ་གསོལ་ཏོ། །དེ་ནས་བཅོམ་ལྡན་འདས་
ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དེ། འཆར་ཀ་ལ་རྨས་ནས་རྣམ་གྲངས་དུ་མར་སྨད་དེ། བསླབ་པ་བཅའ་བའི་ཕན་ཡོན་བཅུ་ཡང་དག་པར་གཟིགས་པས་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་
པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལ་ལུག་བལ་འཁྲུར་འཇུད་དམ་འཚེད་དུ་འཇུད་དམ་རྨེལ་དུ་འཇུག་ན་སྤང་བའི་ལྟུང་བྱེད་དོ་ཞེས་བཅའ་བ་མཛད་དེ། ཡུལ་ནི་མཉན་ཡོད། གང་ཟག་ནི་འཆར་ཀ །ཉོན་མོངས་པ་ནི་དགེ་སྦྱོང་གི་ཚུལ་མ་ཡིན་པར་འདོད་པ། ཉེས་
པ་ནི་དགེ་སློང་མ་ཉེ་དུ་མ་ཡིན་པ་ལ་ལུག་བལ་དག་རྨེལ་དུ་འཇུག་པའོ། །དེ་ལ་ཡང་དགེ་སློང་གང་ཞེས་བྱ་བ་ནི་འཆར་ཀའམ་གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །ཉེ་དུ་མ་ཡིན་པ་ལ་ཞེས་བྱ་བ་ནི་ཕྱི་མོ་དང་མེས་པོ་དང་ཕྲུགས་ལ་བརྟེན་པའི་བདུན་

པ་ཚུན་ཆད་ནི་ཉེ་དུ་ཡིན་ལ་དེ་ཕན་ཆད་ནི་ཉེ་དུ་མ་ཡིན་ནོ། །ལུག་བལ་ཞེས་བྱ་བ་ནི་ལུག་གི་བལ་ལོ། །འཁྲུར་འཇུད་དམ་ཞེས་བྱ་བ་ནི་ཐ་ན་ཆུར་སྨྱུག་པ་བྱེད་དུ་འཇུད་ནའོ། །འཚེད་དུ་འཇུད་དམ་ཞེས་བྱ་བ་ནི་ཐ་ན་ཚོན་དུ་སྨྱུག་པར་བྱེད་དུ་འཇུད་ནའོ། །རྨེལ་དུ་
འཇུད་ན་ཞེས་བྱ་བ་ནི་ཐ་ན་འདའ་བ་བྱེད་དུ་འཇུད་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན་འདིར་ཡང་དངོས་གཞི་དང་། སྦྱོར་བ་དང་། སྦྱོར་
པའི་སྦྱོར་བས་ལྟུང་བ་རྣམ་པར་གཞག་པ་དང་། ལྟུང་བ་མེད་པ་དང་། བསླབ་པར་བྱ་བ་དང་། ཕྱིར་བཅོས་པ་རྣམས་ཀྱིས་འདིའི་མཚན་ཉིད་ཤེས་པར་བྱའོ། །བལ་རྨེལ་དུ་འཇུད་པའི་སྤང་བ་འདི་ནི་སྔར་འཁྲུར་འཇུག་པའི་སྤང་བར་བསྟན་པ་དང་མཚན་ཉིད་ཐམས་ཅད་འདྲ་བར་ཤེས་པར་
བྱའོ། །འདིར་བྱེ་བྲག་འགའ་ཙམ་ཞིག་ཡོད་པ་གང་ཡིན་པ་དེ་བསྟན་པའི་ཕྱིར་ཆོས་གོས་རྙིང་པའི་གནས་སུ་ལུག་གི་བལ་དག་གོ། །འཆག་པར་རྨེལ་བའོ་ཞེས་བྱ་བ་སྨྲས་ཏེ། སྔར་འཁྲུར་འཇུག་པའི་སྐབས་སུ་བྱིན་གྱིས་བརླབས་པ་རང་གི་རྙིང་པ་འཁྲུར་གཞུག་པར་འོས་པ་ཆོས་གོས་
དང་གདིང་བ་དག་ལས་འགའ་ཞིག་ཅེས་སྨོས་པའི་གནས་སུ་འདིར་ལུག་གི་བལ་དག་ཅེས་བྱ་བའི་མིང་གཞུག་པ་དང་། སྔར་འཁྲུར་འཇུག་པའི་སྡང་བའི་སྐབས་སུ་འཆག་པ་ཞེས་སྨོས་པའི་གནས་སུ་འདིར་རྨེལ་བ་ཞེས་བྱ་བའི་མིང་གཞུག་པར་ཤེས་པར་བྱའོ། །དེ་ལ་འདིར་དངོས་གཞིའི་ལྟུང་
བ་རྣམ་པར་གཞག་པ་ནི་དགེ་སློང་གིས་ལུག་བལ་དག་དགེ་སློང་མ་ཉེ་དུ་མ་ཡིན་པ་ལ་བསྒོ་བས་འཁྲུར་འཇུག་གམ་འཚེད་དུ་འཇུག་གམ་རྨེལ་དུ་བཅུག་བ་དག་བྱས་པ་ཉིད་ན། བལ་རྨེལ་དུ་འཇུག་པའི་སྤང་བའི་ལྟུང་བྱེད་ཀྱི་དངོས་གཞིར་འགྱུར་རོ། །འཁྲུ་བ་དང་འཚེད་པ་དང་། རྨེལ་བའི་རིགས་
མི་མཐུན་པའི་ཚིགས་རྣམས་དང་། དེ་དག་གྲུབ་པའི་མཐའ་མན་ཆད་བར་སྐབས་སུ་ཆད་པའི་ཚིགས་རྣམས་ལ་ལྟུང་བ་རེ་རེར་རྣམ་པར་མི་གཞག་པར་སྤྱིར་དངོས་གཞིའི་འབྲས་བུ་གཅིག་རྣམ་པར་གཞག་གོ། །དགེ་སློང་ལ་བལ་རྨེལ་དུ་འཇུག་པ་ནི་སྤང་བའི་ལྟུང་བྱེད་བྱུང་ན་དེ་མ་སྤངས་ཤིང་

བྲལ་བར་མ་བྱས་ལ་ལྟུང་བ་མ་བཤགས་པར་རམ། སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་རམ། སྤངས་ཤིང་བྲལ་བར་བྱས་ལ་ལྟུང་བ་མ་བཤགས་པར་ལུག་བལ་འཁྲུར་གཞུག་པ་དང་འཚེད་དུ་གཞུག་པ་དང་རྨེལ་དུ་གཞུག་པ་དེ་ལྟ་བུ་གཞན་ཞིག་རྙེད་ན་དེ་ཡང་སྔ་མའི་
ཤུགས་ཀྱིས་སྤང་བར་འགྱུར་ཏེ། དེ་ལས་ལྟུང་བར་ནི་མི་འགྱུར་རོ། །དགེ་སློང་གིས་བལ་རྨེལ་དུ་འཇུག་པའི་སྤང་བའི་ལྟུང་བྱེད་བྱུང་ལ། ཇི་སྲིད་དུ་སྤང་བའི་དངོས་པོ་ལས་མ་བཤགས་ཤིང་སོ་སོར་མ་བཤགས་པར་ལྷུང་བཟེད་དམ་ཆོས་གོས་སམ་དྲ་བའམ་ཕོར་བུའམ་སྐ་རགས་སམ། དགེ་སློང་
གི་འཚོ་བའི་ཡོ་བྱད་གང་ཡང་རུང་བ་གཞན་ཉེ་བར་འཇོག་ན་དེ་ཡང་སྔ་མའི་ཤུགས་ཀྱིས་སྤང་བར་འགྱུར་ཏེ། དེ་ལས་ལྟུང་བར་ནི་མི་འགྱུར་རོ། །བལ་གྱི་གྲྭ་ལ་སོགས་པ་ཕྱོགས་གཅིག་ལ་བྱས་པ་དང་། འཁྲུ་བ་ལ་སོགས་པ་ལས་ཕྱོགས་གཅིག་བྱས་པ་ལ་ན་སྨད་པ་མེད་དོ། །ལུག་བལ་གྱི་རྫས་
བཟང་ངན་དང་མཉམ་པ་ལ་ན་སྨད་པ་མེད་དོ། །བལ་རུང་བ་ལ་ན་སྨད་པ་མེད་དོ། །ཞྭ་དང་ལྷམ་སྒྲོ་གུ་ཅན་དང་སྟོད་ཀོར་ནང་ཚངས་ཅན་དང་རྒྱ་ཅང་དང་ལྕག་པོད་དང་ཤུར་བུ་ཕྲེའུ་ལ་སོགས་པ་དེ་ཙམ་གྱི་རྒྱུའི་ཚད་ལས་ལྷག་པ་ལ་ན་སྨད་པ་མེད་དོ། །དགེ་སློང་མ་ཉེ་དུ་མ་ཡིན་པ་བསྙེན་པར་རྫོགས་པ་
མ་ཉམས་པ་ལ་ན་སྨད་པ་མེད་དོ། །བཤང་བ་དང་གཅི་བ་དང་ལྗན་ལྗིན་དང་། འདམ་རྫབ་ལ་སོགས་པས་མ་རུང་བར་གྱུར་པ་འཁྲུ་བ་དང་འཚེད་པ་དང་རྨེལ་དུ་འཇུག་པ་ལ་ན་སྨད་པ་མེད་དོ། །འདིའི་བྱེད་པ་པོ་ནི་ལུག་བལ་དང་དགེ་སློང་མ་ཉེ་དུ་མ་ཡིན་པའི་ཡུལ་ལ་འདུ་ཤེས་གཙོ་ཆེར་བྱེད་པ་པོ་
ཉིད་ཡིན་ནོ། །འདི་ལ་ཡན་ལག་ལྔས་དངོས་གཞིའི་ལྟུང་བར་འགྱུར་ཏེ། ལུག་བལ་དང་རུང་བ་དང་དགེ་སློང་མ་ཉེ་དུ་མ་ཡིན་པ་དང་བསྒོ་བ་དང་བྱས་པའོ། །དེ་དག་ལས་ཡན་ལག་མ་ཚང་ན་ཅི་རིགས་པར་ན་སྨད་དོ། །དེ་ལ་ལུག་བལ་དང་རུང་བའོ་ཞེས་སྨོས་པ་ནི་ལུག་བལ་མ་ཡིན་པ་དང་ར་
བལ་ལ་སོགས་པ་རུང་བ་མ་ཡིན་པ་ལ་ཉེས་བྱས་སུ་གསུངས་པའི་ཕྱིར་རོ། །དགེ་སློང་མ་ཉེ་དུ་མ་ཡིན་པ་ལ་ཞེས་སྨོས་པ་ནི་ཉེ་དུ་ལ་ལྟུང་བ་མེད་པའི་ཕྱིར་རོ། །བསྒོ་བ་ཞེས་སྨོས་པས་ནི་མངགས་པ་ལ་སོགས་པ་ལ་ཉེས་བྱས་སུ་གསུངས་པའི་ཕྱིར་རོ། །བྱས་པའོ་ཞེས་སྨོས་པ་ནི་དགེ་སློང་མ་ཉེ་དུ་

མ་ཡིན་པས་བཀྲུ་བ་ལ་སོགས་པ་མ་བྱས་ན་ཉེས་བྱས་སུ་གསུངས་པའི་ཕྱིར་རོ། །སྦྱོར་བ་གཅིག་གིས་ལུག་བལ་རུང་བ་ཞྭ་རྒྱུ་ལ་སོགས་པའི་ཚད་ལས་ལྷག་པའི་ཆུན་པོ་གཅིག་གམ་གཉིས་སམ་མང་པོ་ཞིག་འཁྲུ་བ་དང་འཚེད་པ་དང་རྨེལ་བ་དང་བར་སྐབས་སུ་བཅད་ན་ཡང་
ལྟུང་བའི་དངོས་གཞི་གཅིག་རྣམ་པར་གཞག་གོ། །སྦྱོར་བའི་ལྟུང་བ་ནི་ཉེས་བྱས་ཏེ་ཇི་སྲིད་དུ་བལ་རྨེལ་དུ་འཇུག་པའི་སྤང་བའི་ལྟུང་བྱེད་ཀྱི་སྦྱོར་བ་བརྩམས་ནས་དངོས་གཞི་ལ་མ་ཐུག་གི་བར་དུ་ཉེས་བྱས་སོ། །དངོས་གཞི་ལ་སྦྱོར་བ་ཐ་དད་པ་ཇི་སྙེད་བརྩམས་པ་རེ་རེ་ལ་ཉེས་བྱས་རེ་རེའོ། །ཕྱི་རོལ་པའི་རབ་ཏུ་
བྱུང་བ་དང་མ་ཆགས་པ་དང་ཉམས་པ་ལ་ཉེས་བྱས་སོ། །བལ་རུང་བ་མ་ཡིན་པ་ལ་ཉེས་བྱས་སོ། །ཞྭ་རྒྱུ་ལ་སོགས་པའི་ཚད་དང་དེ་བས་ཆུང་བ་ལ་ཉེས་བྱས་སོ། །ལུག་བལ་མ་ཡིན་པར་ར་བལ་ལ་སོགས་པ་ལ་ཉེས་བྱས་སོ། །ཚིག་གིས་མ་བསྒོ་བར་མངགས་པ་ལ་སོགས་པ་ནི་ཉེས་བྱས་
སོ། །དགེ་སློང་མས་མ་བྱས་པ་ལ་ཉེས་བྱས་སོ། །ཉེ་དུ་ལ་ཉེ་དུ་མ་ཡིན་པར་འདུ་ཤེས་པ་དང་ཉེ་དུ་ལ་ཡིད་གཉིས་ཟ་བ་ལ་ཉེས་བྱས་སོ། །རུང་བར་བྱས་པ་དང་། སྤངས་པ་དང་དགེ་འདུན་གྱི་ལ་ཉེས་བྱས་སོ། །ཉེ་དུ་དང་ཉེ་དུ་མ་ཡིན་པའི་མཚན་ཉིད་ནི་སྔར་འཁྲུར་འཇུག་པའི་སྤང་བའི་སྐབས་སུ་
བསྟན་པ་བཞིན་ནོ། །སྦྱོར་བའི་སྦྱོར་བའི་ལྟུང་བ་ནི་ཉེས་བྱས་ཕྲ་མོ་སྟེ། སྦྱོར་བ་ཇི་སྙེད་པ་ལ་སྦྱོར་བའི་སྦྱོར་བ་ཡང་དེ་སྙེད་དོ། སྦྱོར་བ་ཉེས་བྱས་ཀྱི་སྦྱོར་བའི་སྦྱོར་བ་ཡང་ཉེས་བྱས་ཏེ་ཉེས་བྱས་ཕྲ་མོའོ། །དེ་ཡང་དང་པོ་ཡིད་ལ་སེམས་པ་ནི་སྦྱོར་བའི་སྦྱོར་བའི་ཉེས་བྱས་ཕྲ་མོའོ། །དེ་ནས་ལུས་དང་
ངག་གིས་སྦྱོར་བ་ནི་སྦྱོར་བའི་ཉེས་བྱས་དངོས་སོ། །དེ་ནས་མཐར་ཐུག་པ་ནི་སྤང་བའི་ལྟུང་བྱེད་ཀྱི་དངོས་གཞིའོ་ཞེས་བྱ་བར་ཤེས་པར་བྱའོ། །ཁྱིམ་པའི་རྟགས་ཅན་མོ་ལ་ཉེས་བྱས་ཕྲ་མོའོ། །ལྟུང་བ་མེད་པ་ནི་དགེ་སློང་མ་ཉེ་དུ་ལ་ཉེ་དུ་ཉིད་དུ་འདུ་ཤེས་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་
པ་དང་། སེམས་འཁྲུགས་པ་དང་ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པར་བྱ་བ་ནི་དགེ་སློང་གིས་ཡུལ་ཐམས་ཅད་ལ་གནས་སྐབས་ཐམས་ཅད་དུ་བལ་རྨེལ་དུ་འཇུག་པའི་སྤང་བར་འགྱུར་བ་རྣམ་པ་ཐམས་ཅད་མི་བསྟེན་པར་བསླབ་པར་བྱའོ། །ཕྱིར་བཅོས་པ་ནི་སྔ་མ་བཞིན་ནོ། །

བལ་རྨེལ་དུ་འཇུག་པའི་སྤང་བ་སྟེ་བཅུ་བདུན་པ་བཤད་ཟིན་ཏོ།། །།གསེར་དངུལ་ལ་རེག་པའི་སྤང་བའི་གླེང་གཞི་ནི་བྱུང་བ་དང་བཅས་པའི་དབང་གིས་རྣམ་པ་གཉིས་ཏེ། དེ་ལ་རེ་ཞིག་བྱུང་བའི་གླེང་གཞི་ནི་སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་
ན་བཞུགས་སོ། །དེ་ནས་གྲོང་དཔོན་གཙུག་ན་ནོར་བུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་གྲོང་དཔོན་གཙུག་ན་ནོར་བུས་འདི་སྐད་
ཅེས་གསོལ་ཏོ། །བཙུན་པ་སྔོན་གྱི་གདུགས་རྣམས་ཀྱི་ཆེས་སྔ་བ་ཞིག་ན་རྒྱལ་པོའི་ཕོ་བྲང་ན་རྒྱལ་པོ་དང་བློན་པོའི་འཁོར་མཆིས་ཤིང་མཐུན་པར་གྱུར་པ་རྣམས་ལ་བར་སྐབས་ཀྱི་བཀའ་མཆིད་ཀུན་དུ་བརྗོད་པ་ནི་འདི་ལྟ་བུ་བྱུང་བར་གྱུར་ཏེ། ཤེས་ལྡན་དག་ཇི་ལྟར་དགེ་སློང་རྣམས་ལ་མངོན་
མཚན་ཅན་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་བགྱིད་དམ་འོན་ཏེ་དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་མི་བགྱིད་ཅེས་མཆི་ནས་དེ་ན་ཁ་ཅིག་ནི་འདི་སྐད་ཅེས་དགེ་སློང་རྣམས་ལ་མངོན་མཚན་ཅན་རུང་ཞིང་ཤཱཀྱའི་
སྲས་ཀྱི་དགེ་སྦྱོང་རྣམས་གསེར་བདག་གིར་བགྱིད་དོ་ཞེས་མཆི། ཁ་ཅིག་ནི་འདི་སྐད་ཅེས་དགེ་སློང་རྣམས་ལ་མངོན་མཚན་ཅན་མི་རུང་ཞིང་ཤཱཀྱའི་སྲས་ཀྱི་དགེ་སློང་རྣམས་གསེར་བདག་གིར་མི་བགྱིད་དོ་ཞེས་མཆི་ན་བཙུན་པ་དེ་ལ་གང་དག་དེ་སྐད་ཅེས་དགེ་སློང་རྣམས་ལ་མངོན་མཚན་ཅན་རུང་ཞིང་
ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་བགྱིད་དོ་ཞེས་མཆི་ན། བཙུན་པ་ཇི་ལྟར་གང་དག་དེ་སྐད་མཆི་བ་དེ་དག་དེ་ལྟར་བརྡ་སྤྲོད་པར་བགྱིད་པ་ན་བཅོམ་ལྡན་འདས་ལ་སྐུར་པ་འདེབས་པར་མི་བགྱིད་ཅིང་ཧ་ཅང་ཐལ་བར་ཡང་མི་བགྱིད་པ་དང་། དེ་དག་བཅོམ་ལྡན་འདས་ཀྱིས་གསུངས་པའི་རྗེས་སུ་
སྨྲ་བ་དང་། ཆོས་སྨྲ་བ་དང་། ཆོས་ཀྱི་རྗེས་སུ་མཐུན་པའི་ཆོས་བརྡ་སྤྲོད་པར་བགྱིད་པ་དང་། གསུངས་པའི་རྗེས་སུ་སྨྲ་བ་དེ་དག་ལ་གཞན་ལས་ཆོས་དང་མཐུན་པས་སྨད་པའི་གནས་ལྟ་བུའི་ཆོས་འགའ་ཡང་མི་མཆི་བ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། གྲོང་དཔོན་གང་དག་

དེ་སྐད་ཅེས་དགེ་སློང་རྣམས་ལ་མངོན་མཚན་ཅན་རུང་ཞིང་ཤཱཀྱའི་སྲས་ཀྱི་དགེ་སྦྱོང་རྣམས་གསེར་བདག་གིར་བྱེད་དོ་ཞེས་ཟེར་བ་དེ་དག་དེ་ལྟར་བརྡ་སྤྲོད་པར་བྱེད་ན་ང་ལ་སྐུར་པ་འདེབས་པར་བྱེད་ཅིང་ཧ་ཅང་ཐལ་བར་བྱེད་པ་དང་། དེ་དག་ངས་སྨྲས་པའི་རྗེས་སུ་སྨྲ་བ་མ་ཡིན་
པ་དང་། ཆོས་སྨྲ་བ་མ་ཡིན་པ་དང་། ཆོས་ཀྱི་རྗེས་སུ་མཐུན་པའི་ཆོས་བརྡ་སྤྲོད་པར་བྱེད་པ་མ་ཡིན་པ་དང་། སྨྲས་པའི་རྗེས་སུ་སྨྲ་བ་མ་ཡིན་པ་དེ་དག་ལ་གཞན་ལས་ཆོས་དང་མཐུན་པས་ན་སྨད་པའི་གནས་ལྟ་བུའི་ཆོས་ཤིན་དུ་འོང