Luận tạng Tây Tạng (Tengyur) — Tập 152

ེ་སྦྱོང་གི་དབང་ཉིད་ལས་གཞན་པས་ཁྱིམ་དག་ཏུ་འགྲོ་བར་མི་བྱའོ། །གཡོགས་མ་གཅིག་པར་མལ་བཤམ་པར་མི་བྱའོ། །རབ་ཏུ་བྱུང་བ་དང་། བསྙེན་
པར་རྫོགས་པ་དང་། གནས་སྦྱིན་པ་དང་། དགེ་ཚུལ་ཉེ་བར་གཞག་པར་མི་བྱའོ། །གསོལ་བ་དང་ལས་བརྗོད་པ་དག་བྱ་བར་ཁས་མི་བླང་ངོ་། །ལས་བྱེད་པ་དང་དགེ་སློང་མའི་སྟོན་པ་དང་དགེ་འདུན་གྱི་ཡིད་བརྟན་པར་བསྒོ་བ་ཁས་མི་བླང་ངོ་། །དེ་དག་ཏུ་སྔར་བསྐོས་པས་ཀྱང་མི་བྱའོ། །
དགེ་སློང་མ་ལ་སྟོན་པར་བསྐོས་པས་ཀྱང་བསྟན་པར་མི་བྱའོ། །འདོན་པ་གཞན་མེད་ན་ཡང་གསོ་སྦྱོང་ལ་སོ་སོར་ཐར་པ་འདོན་པར་མི་བྱའོ། །དགེ་སློང་དགེ་འདུན་ལས་མ་བཀར་བ་ལ་ཚུལ་ཁྲིམས་དང་། ལྟ་བ་དང་། ཆོ་ག་དང་འཚོ་བ་ཉམས་པས་གླེང་བར་མི་བྱའོ། །བརྗོད་པ་དང་བཅས་པ་
དང་། ཕུར་པ་དང་བཅས་པ་ཉིད་དག་མི་བྱའོ། །གདམས་ངག་དང་གསོ་སྦྱོང་དང་། དགག་དབྱེ་དང་། གསོལ་བ་དང་། བརྗོད་པ་དག་གཞག་པར་མི་བྱའོ། །རང་བཞིན་དུ་གནས་པ་དང་མགོ་མཉམ་དུ་བསྟེན་པར་མི་བྱའོ། །སྤོ་བ་བྱིན་པ་དེའི་རྒྱུ་གང་ཡིན་པའི་ཉེས་པ་དེ་སྤོང་ངོ་། །
ཉེས་པ་གཞན་ཡང་སྤང་ངོ་། །ཚངས་པ་མཚུངས་པར་སྤྱོད་པ་རྣམས་ལ་ཉེས་པ་དང་མཐུན་པ་ཉིད་མི་བྱའོ། །ཀུན་དུ་སྤྱད་པའི་ཆོས་ཇི་ལྟར་སྤྱད་པ་དག་ཉམས་སུ་མ་བླངས་ན་བརྟུལ་ཞུགས་སྙིང་པོ་མེད་པར་འགྱུར་རོ་སྙམ་དུ་ཡིད་ལ་བྱའོ། །ནང་པར་སྔ་བར་ལངས་ཏེ་གཙུག་ལག་ཁང་དུ་སྒོ་དབྱེ་བ་
དང་། མར་མེའི་ཀོང་བུ་བསལ་བར་བྱའོ། །གཙུག་ལག་ཁང་དུ་ཆག་ཆག་དང་ཕྱག་དར་དང་། ལྕི་བ་འཇམ་པོའི་བྱུག་པས་བསྐུ་བ་དག་བྱའོ། །དགེ་འདུན་གྱི་བཤང་བ་དང་གཅི་བའི་སྐྱབས་དག་སྦྱང་ངོ་། །དེར་ས་ཕྱགས་པ་དང་དུས་དང་མཐུན་པའི་ཆུ་དག་གཞག་པར་བྱའོ། །

གཙུག་ལག་ཁང་གི་ཝའི་ཁ་དག་བསལ་ལོ། །དགེ་འདུན་གྱི་གདན་བཤམ་པར་བྱའོ། །མཆོད་པའི་དུས་ཤེས་པར་བྱ་སྟེ། བདུག་སྤོས་དང་དེའི་པོག་ཕོར་དག་ཉེ་བར་གཞག་པར་བྱའོ། །གལ་ཏེ་ནུས་པ་ཉིད་ཡིན་ན་སྟོན་པའི་ཡོན་ཏན་ཡང་དག་པར་བསྒྲག་པར་
བྱའོ། །གལ་ཏེ་མི་ནུས་ན་སྨྲ་བ་པོ་ལ་བཅོལ་ལོ། །དགེ་འདུན་གྱི་བཤོས་ཀྱི་སྤྱི་བུངས་བཤམས་པ་ན་གཎྜཱི་བརྡུང་ངོ་། །གལ་ཏེ་དགེ་སློང་རྣམས་ཚ་ན་བསིལ་ཡབ་བྱའོ། །དེའི་འདུག་པ་ལ་སོགས་པ་ནི་བསྙེན་པར་རྫོགས་པ་ཐམས་ཅད་ཀྱི་མཐའ་ཉིད་དུའོ། །ཟས་ཀྱི་བྱ་བ་བྱས་ནས་གདན་
ཆ་དབེན་པར་བརྟུལ་ལོ། །ལྷུང་བཟེད་ཀྱི་གཞི་དོར་རོ། །དུས་ཤེས་པར་བྱས་ཏེ་མཆོད་རྟེན་དག་གི་ཕྱག་དར་བྱའོ། །ལྕི་བ་འཇམ་པོའི་བྱུག་པས་བསྐུའོ། །དགེ་འདུན་འདུ་བའི་དུས་སུ་ཡང་སྔར་བསྟན་པ་བཞིན་དུ་གདན་བཤམས་ནས། སྟོན་པའི་ཡོན་ཏན་ཡང་དག་པར་
བསྒྲག་པའི་བར་དག་བྱའོ། །གལ་ཏེ་ནུས་པ་ཉིད་ཡིན་ན་ཚེས་གྲངས་ཉིད་ཀྱི་ཉི་མ་བརྗོད་པ་དག་བྱའོ། །གལ་ཏེ་མི་ནུས་ན་དགེ་སློང་གཞན་ལ་བཅོལ་ལོ། །དགོངས་ཀར་དུས་དང་མཐུན་པའི་ཆུས་དགེ་སློང་རྣམས་ཀྱི་རྐང་པ་བཀྲུའོ། །དགོངས་ཀར་དགེ་སློང་རྣམས་ཀྱི་རྐང་པ་
བསྐུའོ། །དགེ་སློང་དག་རྐང་པ་བཀྲུ་བ་དང་བསྐུ་བར་མི་འདོད་ན་སྣུམ་དབུལ་ལོ། །དེའི་གཙུག་ལག་ཁང་ཐ་མར་འོས་པ་ཉིད་ཡིན་ནོ། །ཐམས་ཅད་དུ་རྙེད་པ་དབང་བ་ཉིད་ཡིན་ནོ། །དགེ་བའི་ཕྱོགས་ལ་མི་གཡེལ་བར་བྱའོ། །སྤོ་བ་བྱེད་པས་དགེ་སློང་རང་བཞིན་དུ་གནས་པ་
མ་ཡིན་པ་དང་། དགེ་འདུན་དུ་མ་ལོངས་པ་དང་གནས་དེ་ནས་དགེ་སློང་ཡོངས་སུ་བཅད་པ་དག་ལ་སྤོ་བ་སྤྱད་པ་མི་འཆགས་སོ། །དགེ་སློང་མང་པོ་ཉིད་ཡོངས་སུ་སྤང་བར་མི་བྱའོ། །གནས་བརྟན་དང་སོ་སོར་ཐར་པ་དང་བཅས་པ་ཉིད་དུ་སྤྱད་པར་འབད་པར་བྱའོ། །མཚམས་གཞན་
དུ་ཞག་ལོན་པར་མི་བྱའོ། །མཚམས་གཞན་དུ་ཞག་ལོན་ན་མཚན་མོ་དེ་སྤོ་བ་སྤྱོད་པའི་ཞག་གི་ཁ་ནས་བཅད་དོ། །དགེ་འདུན་གྱི་ཁ་བསྐང་བའི་གྲངས་ལས་མ་གཏོགས་སོ། །དེའི་ཀུན་དུ་སྤྱོད་པ་དགེ་འདུན་ལ་སྤྱད་པར་བྱའོ། །སྤོ་བ་སྤྱོད་པ་བཞི་ཡན་ཆད་མཚམས་གཅིག་གི་དགེ་

འདུན་ལ་སྤྱོད་དུ་མི་གནང་ངོ་། །ལས་བརྒྱ་རྩ་གཅིག་ནི་དགེ་འདུན་དང་མཐུན་པར་བྱའོ། །བསླབ་པ་ལས་འདས་པའི་ལྟུང་བ་ཐམས་ཅད་ནི་དགེ་སློང་རང་བཞིན་དུ་གནས་པ་དང་འདྲའོ། །དེ་ལ་འདུན་པ་དབུལ་དུ་མི་རུང་ངོ་། །དེའི་འདུན་པ་བླང་དུ་མི་རུང་ངོ་། །དེ་ལ་དགེ་སློང་དང་དགེ་སློང་
མ་དང་། དགེ་སློབ་མ་དང་། དགེ་ཚུལ་དང་དགེ་ཚུལ་མས་གཏུགས་ཏེ་ཕྱག་མི་བྱའོ། །སྤོ་བ་སྤྱོད་པ་དེ་རང་བཞིན་དུ་གནས་པ་དང་ལྷན་ཅིག་གཡོགས་མ་གཅིག་པར་ཉལ་བར་མི་བྱའོ། །དེར་ཉལ་ན་མཚན་མོ་དེ་གཅད་དོ། །སྤོ་བ་བྱེད་པས་སྤོ་བ་བྱེད་པ་གཞན་དང་ལྷན་ཅིག་གཡོགས་མ་གཅིག་
པར་ཉལ་བར་མི་བྱའོ། །མ་གུས་པས་སྤྱོད་པ་གཏོང་ན་ཉེས་བྱས་སོ། །དེ་ལ་དེའི་བདེ་བ་ལྷག་པར་སྤྱོད་པ་ཡང་ཉེས་བྱས་སོ། །སྤོ་བ་སྤྱོད་པའི་ས་ནས་མི་སྤྱོད་པའི་སར་སོང་སྟེ་ཡང་ཕྱིར་འོང་ན་སྤྱོད་པའི་གནས་སྐབས་ཉིད་ཡིན་ནོ། །དེས་སྦྱངས་པའི་གཞི་ལྷག་མ་རྗེས་སུ་བསྒྲུབ་
དགོས་སོ། །ཉི་མ་དེ་ཉིད་ལ་ཕྱིར་འོང་ན་མཚམས་གཞན་དུ་འགྲོ་བ་ལ་ཉེས་པ་མེད་དོ། །དེ་དང་མུ་སྟེགས་ཅན་གནས་པ་ལ་གནས་པ་དང་ལྷན་ཅིག་གཡོགས་མ་གཅིག་པར་ཉལ་བ་ལ་ཉེས་པ་མེད་དོ། །རེ་ཞིག་དེ་དག་ནི་དེས་ཀུན་དུ་སྤྱད་པའི་ཆོས་ཇི་ལྟར་བཅས་པ་རྣམས་ལ་སྤྱད་
པར་བྱ་བ་ཡིན་ནོ། །དགེ་འདུན་ལ་བརྗོད་པར་བྱ་བ་ནི་འདི་ཡིན་ཏེ། སྤོ་བ་སྤྱོད་པ་དེས་སྤྱད་པའི་དུས་ཟླ་བ་ཕྱེད་ཚུན་ཆད་ནི་ཡུན་ཐུང་ངུ་བ་ཡིན་ལ། ཟླ་བ་ཕྱེད་ཕན་ཆད་ནི་རིང་བ་ཡིན་ཏེ། གལ་ཏེ་ཡུན་ཐུང་ངུ་སྤྱོད་པ་ཡིན་ན་དེས་ཉིན་རེ་ལན་རེ་ནང་པར་རམ་དྲོ་ཀའམ་དགོངས་ཀ་གང་
ཡང་རུང་བར་མཚམས་དེའི་དགེ་འདུན་གཎྜཱི་བརྡུངས་ཏེ་འདུས་པ་ཐམས་ཅད་དམ་བཞི་ཡན་ཆད་ཚོགས་པ་ལ་རང་གིས་སྤོ་བ་བླངས་པ་དེའི་སྔར་ཞག་དུ་འདས་པ་དང་ཕྱིས་ཞག་དུ་འབྱུང་བ་དེ་སྔགས་ཀྱི་ཚིག་གིས་བརྗོད་པར་བྱའོ། །གལ་ཏེ་ཡུན་རིང་དུ་སྤྱོད་པ་ཡིན་ན་ནི། དེས་ཉི་མ་
གསུམ་མམ། བཞི་ཞིང་ལན་རེ་བརྗོད་པར་བྱའོ། །དེའི་ཆོ་ག་དང་སྔགས་ནི་རང་གིས་གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་སློང་བཞི་ཡན་ཆད་ཇི་སྙེད་ཚོགས་པ་ལ་མཆིལ་ལྷམ་གཉིས་ཕུད་དེ་བླ་གོས་ཕྲག་

གཅིག་ཏུ་བྱས་ནས་རྒན་རིམས་ལ་ཕྱག་འཚལ་ཏེ། རྒན་པའི་མཐའ་ལོགས་སུ་ཙོག་པུར་འདུག་ནས་ཐལ་མོ་སྦྱར་བ་བཏུད་དེ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་མིང་འདི་ཞེས་པ་ལ་ཆེ་གེ་མོ་ལས་བྱུང་བའི་
དགེ་འདུན་ལྷག་མའི་ལྟུང་བ་བྱུང་བ་ལ་ཟླ་བ་ཕྱེད་བཅབས་པས་བདག་དགེ་སློང་མིང་འདི་ཞེས་བགྱི་བ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་ཟླ་བ་ཕྱེད་བཅབས་པ་དེའི་སླད་དུ་དགེ་འདུན་ལས་ཟླ་བ་ཕྱེད་སྤོ་བ་གསོལ་ཏེ། དགེ་འདུན་གྱིས་བདག་དགེ་སློང་མིང་འདི་ཞེས་བགྱི་
བ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་ལ་ཟླ་བ་ཕྱེད་བཅབས་པ་དེའི་སླད་དུ་སྤོ་བ་སྩལ་བས་ཞག་འདི་སྙེད་ཅིག་ནི་བགྱིས་ལགས་བགྱི་བ་ནི་ཞག་འདི་སྙེད་ཅིག་མཆིས་ཏེ། དགེ་འདུན་བཙུན་པ་རྣམས་ཀྱིས་བདག་སྤོ་བ་བགྱིད་པ་གཟུང་དུ་གསོལ་ཞེས་ལན་གསུམ་
དུ་བཟླས། གལ་ཏེ་དུས་རིང་ཐུང་ལས་ཉིན་རེ་ལ་ལན་རེའམ་ཉི་མ་གསུམ་མམ་བཞི་ཞིང་དེ་སྐད་མ་བརྗོད་ན་དུས་གང་གི་ཚེ་མ་བརྗོད་པའི་ཉིན་མཚན་དེ་བཅད་པར་ཟླ་བ་ཕྱེད་བྱའོ། །དེ་ནི་དེས་དགེ་འདུན་ལ་བརྗོད་པར་བྱ་བའི་ཆོ་ག་དང་སྔགས་སོ། །དེས་འཐབ་ཀྲོལ་བྱེད་པ་འོང་ན་བཏང་
བའི་ཆོ་ག་དང་སྔགས་འདི་ཡིན་ཏེ། སྤོ་བ་སྤྱོད་པ་དེས་གལ་ཏེ་གང་ཟག་ཐམས་ཅད་ལ་འཐབ་ཀྲོལ་བྱེད་ཅིང་ཕྱིར་རྒོལ་བའམ་དེ་ཉིད་དང་མི་མཛའ་བ་ཉིད་དུ་གནས་པའི་གང་ཟག་འཐབ་ཀྲོལ་བྱེད་པ་གཅིག་གན་དུ་འོང་བར་ཐོས་ཤིང་གལ་ཏེ་དེ་དག་གིས་གཞི་དེས་དྲན་པ་དང་གླེང་བར་བྱེད་
པས་འཇིགས་ན་དེའི་ཚེ་དེས་དགེ་འདུན་ཚོགས་པ་ལ་ཡང་རུང་གང་ཟག་ལ་ཡང་རུང་སྟེ། སྤོ་བ་སྤྱོད་པ་དེའི་ཆོ་ག་དང་སྔགས་ཀྱིས་ཕྱིར་གཏང་བར་བྱ་ཞིང་། བདག་ཉིད་རང་བཞིན་དུ་གནས་པ་ཉིད་དུ་གཞག་པར་བྱའོ། །དགེ་འདུན་ལ་ཕྱིར་བཏང་བའི་ཆོ་ག་དང་སྔགས་ནི་འདི་ཡིན་ཏེ།
བདག་ཉིད་ཀྱིས་གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་མཆིལ་ལྷམ་གཉིས་ཕུད་དེ་བླ་གོས་ཕྲག་པ་གཅིག་ཏུ་བྱས་ནས་རྒན་རིམས་ལ་ཕྱག་འཚལ་ཏེ། རྒན་

པའི་མཐའ་ལོགས་སུ་ཙོག་པུར་འདུག་ནས་ཐལ་མོ་སྦྱར་བ་བཏུད་དེ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་མིང་འདི་ཞེས་བགྱི་བ་སྤོ་བ་བགྱིད་པས་དགེ་སློང་འཐབ་ཀྲོལ་བགྱིད་པ། མཚང་འབྲུ་བར་བགྱིད་པ། འཐབ་མོ་བགྱིད་
པ། འགྱེད་པར་བགྱིད་པ། རྩོད་པར་བགྱིད་པ་དག་མཆི་ཞེས་ཐོས་ཏེ། དེ་དག་གིས་བདག་ལ་གཞི་འདིས་གླེང་བར་འགྱུར་དྲན་པར་བགྱིད་པར་འགྱུར་བས་བདག་གིས་ཚེ་དང་ལྡན་པ་དག་གི་མདུན་དུ་སྤོ་བ་སླར་གཏང་བར་བགྱིའོ། །ཕྱིར་རྒོལ་བ་མི་མཛའ་བ་དེ་དག་སླར་མཆིས་ནས་
ཡང་སྤོ་བ་བླང་བར་བགྱིའོ། །དགེ་འདུན་བཙུན་པ་རྣམས་ཀྱིས་བདག་རང་བཞིན་དུ་གནས་པར་གཟུང་དུ་གསོལ་ཞེས་ལན་གསུམ་བཟླས། གང་ཟག་ལ་ཕྱིར་གཏང་བའི་ཆོ་ག་དང་སྔགས་ཀྱི་གཞུང་ནི་ཞུ་བ་ལས། བཙུན་པ་བཅོམ་ལྡན་འདས་ཀྱིས་གལ་ཏེ་སྤོ་བ་བྱེད་པའི་དགྲ་བོ་འོང་ན་
དེས་སྤོ་བའི་སྤྱོད་པ་བག་ཡངས་སུ་བྱའོ་ཞེས་བཀའ་སྩལ་ན། དེར་ཇི་ལྟར་བག་ཡངས་སུ་བགྱི། ཉེ་བ་འཁོར་དགེ་སློང་དེས་མཆིལ་ལྷམ་གཉིས་ཕུད་དེ་བླ་གོས་ཕྲག་པ་གཅིག་ཏུ་བྱས་ནས་ཕྱག་འཚལ་ཏེ། དགེ་སློང་གི་མདུན་དུ་ཙོག་པུར་འདུག་ནས་ཐལ་མོ་སྦྱར་བ་བཏུད་དེ་འདི་
སྐད་ཅེས་བརྗོད་པར་བྱའོ། །ཚེ་དང་ལྡན་པ་དགོངས་སུ་གསོལ། བདག་དགེ་སློང་སྤོ་བ་བགྱིད་པའི་དགེ་སློང་དགྲ་བོ་མཆིས་ཏེ། བདག་དགེ་སློང་མིང་འདི་ཞེས་བགྱི་བའི་སྤོ་བའི་སྤྱོད་པ་བག་ཡངས་སུ་བགྱིད་སླར་ཡང་ལེན་པར་བགྱིད་དོ། །ཡང་བླངས་ཏེ་སྤྱད་པར་བགྱིད་ན་ཚེ་དང་
ལྡན་པས་བདག་ངོ་ཚ་མ་མཆིས་པར་མི་གཟུང་དུ་གསོལ་ཞེས་ལན་གསུམ་དུ་བཟླས། དགེ་སློང་ཉན་པས་ཐབས་ཡིན་ནོ་ཞེས་བརྗོད་པར་བྱ། སྤོ་བ་གཏོང་བས་ལེགས་སོ་ཞེས་བརྗོད་པར་བྱའོ་ཞེས་གསུངས་པ་ཡིན་ནོ། །དེས་སྤོ་བ་བཏང་ནས་ཕྱིར་མ་བླངས་ཀྱི་བར་དུ་སྤོ་བ་སྤྱོད་
མི་དགོས་པར་རང་བཞིན་དུ་གནས་པར་བྱའོ། །དེ་ནི་འཐབ་ཀྲོལ་བྱེད་པ་འོང་བ་ན་སྤོ་བ་གཏོང་བའི་ཆོ་ག་དང་སྔགས་སོ། །འཐབ་ཀྲོལ་བྱེད་པ་སོང་ན་བླང་བའི་ཆོ་ག་དང་སྔགས་ནི་འདི་ཡིན་ཏེ། གང་ཟག་འཐབ་ཀྲོལ་ཅན་དེ་སོང་ཞིང་འཇིགས་པ་དང་བྲལ་ན་གཙུག་ལག་ཁང་དེ་ཉིད་དུ་སྤོ་བ་

སྤྱོད་པ་དེ་དགེ་འདུན་ནམ་གང་ཟག་ལས་ཆོ་ག་དང་སྔགས་ཀྱིས་ཕྱིར་བླང་བར་བྱའོ། །དགེ་འདུན་ལས་བླང་བའི་ཆོ་ག་དང་སྔགས་ནི་དེ་རང་གིས་གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་
ཐམས་ཅད་འདུག་ཅིང་མཐུན་པར་གྱུར་པ་ལ་མཆིལ་ལྷམ་གཉིས་ཕུད་དེ་བླ་གོས་ཕྲག་པ་གཅིག་ཏུ་བྱས་ནས་རྒན་རིམས་ལ་ཕྱག་འཚལ་ཏེ། རྒན་པའི་མཐའ་ལོགས་སུ་ཙོག་པུར་འདུག་ནས་ཐལ་མོ་སྦྱར་བ་བཏུད་ནས་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་
གསན་དུ་གསོལ། བདག་དགེ་སློང་མིང་འདི་ཞེས་བགྱི་བ་སྤོ་བ་བགྱིད་པས་དགེ་སློང་འཐབ་ཀྲོལ་བགྱིད་པ། མཚང་འབྲུ་བར་བགྱིད་པ། འཐབ་མོ་བགྱིད་པ། འགྱེད་པར་བགྱིད་པ། རྩོད་པར་བགྱིད་པ་དག་མཆི་ཞིང་ཐོས་ཏེ། དེ་དག་གིས་བདག་ལ་གཞི་འདིས་གླེང་བར་འགྱུར།
དྲན་པར་བགྱིད་པར་འགྱུར་བས་བདག་གིས་དེ་སྐད་ཐོས་ནས་དགེ་སློང་རྣམས་ཀྱི་མདུན་དུ་སྤོ་བ་སླར་བཏང་བ་ཕྱིར་རྒོལ་བ་མི་མཛའ་བ་དེ་དག་སླར་མཆིས་ལགས་པས་བདག་སྤོ་བ་ཡང་སླར་ལེན་ཏོ། །སྤོ་བ་ཞག་མ་འཁོར་བ་རྣམས་བགྱིའོ། །དགེ་འདུན་བཙུན་པ་རྣམས་ཀྱིས་བདག་
སྤོ་བ་བགྱིད་པར་གཟུང་དུ་གསོལ་ཞེས་ལན་གསུམ་དུ་བཟླས། གང་ཟག་གི་མདུན་དུ་ཕྱིར་བླང་བའི་ཆོ་ག་དང་སྔགས་ཀྱང་དེས་མཆིལ་ལྷམ་གཉིས་ཕུད་དེ་བླ་གོས་ཕྲག་པ་གཅིག་ཏུ་བྱས་ནས་ཕྱག་འཚལ་ཏེ། དགེ་སློང་གི་མདུན་དུ་ཙོག་པུར་འདུག་ནས་ཐལ་མོ་སྦྱར་བ་བཏུད་དེ་འདི་
སྐད་ཅེས་བརྗོད་པར་བྱའོ། །ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་སྤོ་བ་བགྱིད་པའི་དགྲ་བོ་དགེ་སློང་མཆིས་ཏེ། བདག་མིང་འདི་ཞེས་བགྱི་བས་སྤོ་བའི་སྤྱོད་པ་བག་ཡངས་སུ་བགྱིས་པ། དགྲ་བོ་དགེ་སློང་དེ་དག་སླར་མཆིས་
ལགས་པས་བདག་སྤོ་བ་ཡང་སླར་ལེན་ཏོ། །སྤོ་བ་ཞག་མ་འཁོར་བ་རྣམས་བགྱིའོ། །ཚེ་དང་ལྡན་པས་བདག་སྤོ་བ་བགྱིད་པར་གཟུང་དུ་གསོལ་ཞེས་ལན་གསུམ་དུ་བཟླས། ཉན་པས་ཐབས་ཡིན་ནོ་ཞེས་བརྗོད་པར་བྱའོ། །སྤོ་བ་ལེན་པས་ལེགས་སོ་ཞེས་བརྗོད་པར་བྱའོ། །

དེས་སྤོ་བ་ཕྱིར་བླངས་ནས་ཀུན་དུ་སྤྱད་པའི་ཆོས་སྔ་མ་བཞིན་དུ་སྤོ་བ་ཞག་མ་འཁོར་བ་རྣམས་བྱའོ། །རེ་ཞིག་དེ་དག་ནི་སྤོ་བ་སྤྱོད་པ་དེས་དུས་དེ་སྲིད་དུ་ས་གཞན་ན་གནས་པའི་སྤྱོད་པས་སྤོ་བ་སྤྱད་པར་བྱ་བའི་ཆོས་རྣམས་ཡིན་ཏེ། དེ་ལྟ་བུས་བཅབས་པའི་ཞག་འཁོར་ན་སྤོ་བ་སྤྱད་ཟིན་པར་
རིག་པར་བྱའོ། །ད་ནི་སྤོ་བ་བྱས་ལ་མགུ་བར་བྱ་བ་མ་བྱིན་གྱི་བར་དུ་དེས་ཀུན་དུ་སྤྱད་པར་བྱ་བའི་ཆོས་རྣམས་བསྟན་པར་བྱ་སྟེ། སྤོ་བ་བྱས་ལ་མགུ་བར་བྱ་བ་མ་བྱིན་པ་དེ་ནི་སྤོ་བའི་ལས་ནི་བྱས་ལ་རང་བཞིན་དུ་གནས་པ་ཉིད་ནི་མ་ཡིན་པའི་ཕྱིར་དེས་ནི་སྔར་སྤོ་བ་སྤྱོད་པའི་ཀུན་དུ་སྤྱད་
པའི་ཆོས་ཇི་སྐད་བསྟན་པ་རྣམས་ལས་དེས་དགེ་སློང་རང་བཞིན་དུ་གནས་པ་ལས་མངོན་པར་སྨྲ་བ་དང་ཕྱག་དང་མངོན་དུ་ལྡང་བ་དང་། ཐལ་མོ་སྦྱར་བ་དང་། གུས་པའི་ལས་དག་བདག་གིར་མི་བྱའོ་ཞེས་བྱ་བ་མན་ཆད་ནས་ནང་པར་སྔར་ལངས་ཏེ་གཙུག་ལག་ཁང་དུ་སྒོ་དབྱེ་བ་དང་
མར་མེའི་ཀོང་བུ་བསལ་བར་བྱའོ་ཞེས་སྨོས་པ་ཉིད་མ་གཏོགས་པ་དེ་ཡན་ཆད་དང་། དེའི་འོག་ནས་དེའི་གཙུག་ལག་ཁང་ཐ་མར་འོས་པ་ཡིན་ནོ། །ཐམས་ཅད་དུ་རྙེད་པ་དབང་བ་ཉིད་ཡིན་ནོ། །དགེ་བའི་ཕྱོགས་ལ་མི་གཡེལ་བར་བྱའོ་ཞེས་སྨོས་པའི་ཚིག་དེ་གསུམ་ནི་རིལ་
གྱིས་སྤྱད་པར་བྱ་དགོས་སོ། །གཞན་ནི་སྤྱད་པར་བྱ་བ་ལ་ཅི་དགར་ཟད་དོ། །དེ་ལྟར་དེ་དག་ནི་བཅབས་པའི་ཉེས་པ་ཡོད་པ་ལ་སྤོ་བ་སྦྱིན་པའི་ཆོ་ག་དང་ལས་ཡིན་ནོ། །མགུ་བར་བྱ་བ་སྦྱིན་པའི་གོ་རིམས་ནི་འདི་ཡིན་ཏེ། དགེ་འདུན་ལྷག་མའི་ལྟུང་བ་བྱུང་ལ་བཅབས་པའི་ཉེས་པ་སྤོ་བའི་
ལས་ཀྱིས་མེད་པར་བྱས་པ་ཡང་རུང་བཅབས་པའི་ཉེས་པ་ཡེ་མེད་པ་ཡང་རུང་སྟེ། དེས་དགེ་འདུན་ལ་ཞག་དྲུག་མགུ་བར་བྱ་བ་སྤྱད་པར་གསོལ་བ་དང་། དགེ་འདུན་གྱིས་དེ་ལ་གསོལ་བ་དང་བཞིའི་ལས་ཀྱིས་ཞག་དྲུག་མགུ་བར་བྱ་བ་སྤྱད་པ་སྦྱིན་པ་དང་། དེས་ཞག་དྲུག་ཏུ་ས་གཞན་ན་
གནས་པའི་སྤྱོད་པས་མགུ་བར་བྱ་བ་སྤྱད་པར་བྱའོ། །དེ་ལ་དེས་དགེ་འདུན་ལ་ཞག་དྲུག་མགུ་བར་བྱ་བ་སྤྱད་པ་གསོལ་བའི་ཆོ་ག་དང་སྔགས་ནི་འདི་ལྟར་བྱ་སྟེ། དེས་དགེ་འདུན་ལྷག་མའི་ལྟུང་བ་གང་ཡང་རུང་བ་བྱུང་བ་ལ་བཅབས་པའི་ཉེས་པ་མེད་ན་དེ་ཉིད་ཀྱིས་གནས་མལ་

བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་མཆིལ་ལྷམ་གཉིས་ཕུད་དེ་བླ་གོས་ཕྲག་པ་གཅིག་ཏུ་བྱས་ནས་རྒན་རིམས་ལ་ཕྱག་འཚལ་ཏེ། རྒན་
པའི་མཐའ་ལོགས་སུ་ཙོག་པུར་འདུག་ནས་ཐལ་མོ་སྦྱར་བ་བཏུད་དེ་རང་གིས་ཞག་དྲུག་མགུ་བར་བྱ་བ་སྤྱད་པར་གསོལ་བའི་སྔགས་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་
མའི་ལྟུང་བ་བྱུང་སྟེ། བདག་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བས་དེའི་སླད་དུ་དགེ་འདུན་ལས་ཞག་དྲུག་མགུ་བར་བགྱི་བ་གསོལ་ན་ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་དགེ་སློང་འཆར་ཀ་ལ་ཆེ་
གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱི་བ་སྩལ་དུ་གསོལ་ཞེས་ལན་གསུམ་དུ་བཟླས། དེ་ནི་དེས་དགེ་འདུན་ལ་ཞག་དྲུག་མགུ་བར་བྱ་བ་སྤྱད་པ་གསོལ་བའི་ཆོ་ག་དང་སྔགས་སོ། །དེ་དགེ་འདུན་གྱིས་དེ་ལ་གསོལ་བ་དང་བཞིའི་ལས་
ཀྱིས་ཞག་དྲུག་མགུ་བར་བྱ་བ་སྤྱད་པ་སྦྱིན་པའི་ཆོ་ག་དང་ལས་ནི་འདི་ལྟར་བྱ་སྟེ། དེས་དེ་ལྟར་ཞག་དྲུག་མགུ་བར་བྱ་བ་སྤྱད་པར་གསོལ་མ་ཐག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །འདི་ལྟར་བྱ་སྟེ། འདུག་ལ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་
རྣམས་གསན་དུ་གསོལ། དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དགེ་སློང་འཆར་ཀ་འདི་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་དགེ་འདུན་ལས་ཞག་དྲུག་མགུ་བར་བགྱི་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་
ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱི་བ་སྤྱད་པར་གསོལ་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་

རྣམས་གསན་དུ་གསོལ། དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ་དགེ་སློང་འཆར་ཀ་འདི་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་དགེ་འདུན་ལས་ཞག་དྲུག་མགུ་བར་བགྱི་བ་གསོལ་ཏེ། དེའི་སླད་དུ་དགེ་འདུན་གྱིས་དགེ་སློང་
འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་དེའི་སླད་དུ་ཞག་དྲུག་མགུ་བར་བགྱི་བ་གསོལ་ན། ཚེ་དང་ལྡན་པ་གང་དག་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱི་བ་སྩལ་བར་བཟོད་པ་དེ་དག་ནི་ཅང་
མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་
སླད་དུ་ཞག་དྲུག་མགུ་བར་བགྱི་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེ་ནི་དགེ་འདུན་གྱིས་དེ་ལ་གསོལ་བ་དང་བཞིའི་ལས་ཀྱིས་ཞག་དྲུག་མགུ་བར་བྱ་བ་སྤྱད་པ་སྦྱིན་པའི་ཆོ་ག་དང་ལས་སོ། །དེས་ཞག་དྲུག་ཏུ་ས་གཞན་ན་གནས་པའི་སྤྱོད་པས་མགུ་
བར་བྱ་བའི་གོ་རིམས་ནི་འདི་ཡིན་ཏེ། དེས་ཀུན་དུ་སྤྱད་པའི་ཆོས་ཇི་ལྟར་བཅས་པ་རྣམས་ལ་སྤྱད་པར་བྱ་བ་དང་། དགེ་འདུན་ལ་བརྗོད་པར་བྱ་བ་དང་། འཐབ་ཀྲོལ་བྱེད་པ་འོང་ན་བཏང་བ་དང་། དེ་སོང་ན་བླང་བའོ། །ཞག་དྲུག་མགུ་བར་བྱ་བ་སྤྱོད་པ་དེས་ཀུན་དུ་སྤྱད་པའི་ཆོས་ནི་ས་
གཞན་ན་གནས་པའི་སྤྱོད་པའི་གཞི་ལས་འབྱུང་སྟེ། སྔར་སྤོ་བ་སྤྱོད་པས་ཀུན་དུ་སྤྱོད་པའི་ཆོས་ཇི་སྐད་བསྟན་པ་ཐམས་ཅད་ལྷག་ཆད་མེད་པར་འདིར་ཡང་སྦྱར་བར་བྱའོ། །རེ་ཞིག་དེ་དག་ནི་དེས་ཀུན་དུ་སྤྱད་པའི་ཆོས་ཇི་ལྟར་བཅས་པ་རྣམས་ལ་སྤྱད་པར་བྱ་བ་ཡིན་ནོ། །དགེ་འདུན་ལ་
བརྗོད་པར་བྱ་བ་ནི་འདི་ཡིན་ཏེ། སྔར་སྤོ་བ་སྤྱོད་པ་དེས་སྤྱད་པའི་དུས་ཟླ་བ་ཕྱེད་ཚུན་ཆད་ནི་ཡུན་ཐུང་བ་ཡིན་ལ། ཟླ་བ་ཕྱེད་ཕན་ཆད་ནི་ཡུན་རིང་བ་ཡིན་ཏེ་ཞེས་བྱ་བ་ལྟ་བུ་འདི་ལ་མེད་དེ། འདིས་ནི་ཞག་དྲུག་ཁོ་ན་མགུ་བར་བྱ་བ་སྤྱད་པར་ཟད་པས་དེས་ཉིན་རེ་ལན་རེ་ནང་པར་རམ། དྲོ་

ཁའམ། དགོངས་ཀ་གང་ཡང་རུང་བར་མཚམས་དེའི་དགེ་འདུན་ལ་གཎྜཱི་བརྡུངས་ཏེ་འདུས་པ་ཐམས་ཅད་དམ་བཞི་ཡན་ཆད་ཚོགས་པ་ལ་རང་གིས་ཞག་དྲུག་མགུ་བར་བྱ་བ་སྤྱད་པ་བླངས་པ་དེའི་སྔར་ཞག་དུ་འདས་པ་དང་། ཕྱིས་ཞག་དུ་འབྱུང་བ་དེ་སྔགས་ཀྱི་
ཚིག་གིས་བརྗོད་པར་བྱའོ། །དེའི་ཆོ་ག་དང་སྔགས་ནི་རང་གིས་གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་སློང་བཞི་ཡན་ཆད་ཇི་སྙེད་ཚོགས་པ་ལ་མཆིལ་ལྷམ་གཉིས་ཕུད་དེ་བླ་གོས་ཕྲག་པ་གཅིག་
ཏུ་བྱས་ནས་རྒན་རིམས་ལ་ཕྱག་འཚལ་ཏེ། རྒན་པའི་མཐའ་ལོགས་སུ་ཙོག་པུར་འདུག་ནས་ཐལ་མོ་སྦྱར་བ་བཏུད་དེ་འདི་སྐད་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་མིང་འདི་ཞེས་བགྱི་བ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་
མའི་ལྟུང་བ་བྱུང་ལ་བདག་དགེ་སློང་མིང་འདི་ཞེས་བགྱི་བ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་དགེ་འདུན་ལས་ཞག་དྲུག་མགུ་བར་བགྱི་བ་གསོལ་ཏོ། །དགེ་འདུན་གྱིས་བདག་དགེ་སློང་མིང་འདི་ཞེས་བགྱི་བ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་
མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱི་བ་སྩལ་བས་ཞག་འདི་སྙེད་ཅིག་ན་བགྱིས་ལགས། བགྱི་བ་ནི་ཞག་འདི་སྙེད་ཅིག་མཆིས་ཏེ། དགེ་འདུན་བཙུན་པ་རྣམས་ཀྱིས་བདག་མགུ་བར་བགྱི་བ་སྤྱོད་པར་གཟུང་དུ་གསོལ་ཞེས་ལན་གསུམ་དུ་བཟླས། གལ་ཏེ་ཉིན་རེ་ལན་རེ་དེ་སྐད་
མ་བརྗོད་ན་དུས་གང་གི་ཚེ་མ་བརྗོད་པ་ཉིན་མཚན་དེ་གཅད་པར་བྱའོ། །དེ་ནི་དེས་དགེ་འདུན་ལ་བརྗོད་པར་བྱ་བའི་ཆོ་ག་དང་སྔགས་སོ། །དེས་འཐབ་ཀྲོལ་བྱེད་པ་འོང་ན་གཏང་བའི་ཆོ་ག་དང་སྔགས་ནི་འདི་ཡིན་ཏེ། ཞག་དྲུག་མགུ་བར་བྱ་བ་སྤྱོད་པ་དེས་གལ་ཏེ་གང་ཟག་ཐམས་ཅད་ལ་འཐབ་
ཀྲོལ་བྱེད་ཅིང་ཕྱིར་རྒོལ་བའམ། དེ་ཉིད་དང་མི་མཛའ་བ་ཉིད་དུ་གནས་པའི་གང་ཟག་འཐབ་ཀྲོལ་བྱེད་པ་གཅིག་གམ་དུ་མ་འོང་བར་ཐོས་ཤིང་གལ་ཏེ་དེ་དག་གིས་གཞི་དེས་གླེང་བ་དང་དྲན་པར་བྱེད་པས་འཇིགས་ན་དེའི་ཚེ་དེས་དགེ་འདུན་ཚོགས་པ་ལ་ཡང་རུང་གང་ཟག་ལ་ཡང་རུང་སྟེ། མགུ་

བར་བྱ་བ་སྤྱོད་པ་དེས་ཆོ་ག་དང་སྔགས་ཀྱིས་ཕྱིར་གཏང་བར་བྱ་ཞིང་བདག་ཉིད་རང་བཞིན་དུ་གནས་པ་ཉིད་དུ་གཞག་པར་བྱའོ། །དགེ་འདུན་ལ་ཕྱིར་བཏང་བའི་ཆོ་ག་དང་སྔགས་ནི་འདི་ཡིན་ཏེ། བདག་ཉིད་ཀྱིས་གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་
དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་མཆིལ་ལྷམ་གཉིས་ཕུད་དེ་བླ་གོས་ཕྲག་པ་གཅིག་ཏུ་བྱས་ནས་རྒན་རིམས་ལ་ཕྱག་འཚལ་ཏེ། རྒན་པའི་མཐའ་ལོགས་སུ་ཙོག་པུར་འདུག་ནས་ཐལ་མོ་སྦྱར་བ་བཏུད་དེ་འདི་སྐད་
ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་མིང་འདི་ཞེས་བགྱི་བ་མགུ་བར་བགྱིད་པས་དགེ་སློང་འཐབ་ཀྲོལ་བགྱིད་པ་མཚང་འབྲུ་བར་བགྱིད་པ། འཐབ་མོ་བགྱིད་པ། འགྱོད་པར་བགྱིད་པ། རྩོད་པར་བགྱིད་པ་དག་མཆི་ཞེས་ཐོས་ཏེ།
དེ་དག་གིས་བདག་ལ་གཞི་འདིས་གླེང་བར་འགྱུར་དྲན་པར་བགྱིད་པར་འགྱུར་བས་བདག་གིས་ཚེ་དང་ལྡན་པ་དག་གི་མདུན་དུ་མགུ་བར་བགྱིད་པ་སླར་གཏང་བར་བགྱིའོ། །ཕྱིར་རྒོལ་བ་མི་མཛའ་བ་དེ་དག་སླར་མཆིས་ནས་ཡང་མགུ་བར་བགྱི་བ་བླང་བར་བྱའོ། །དགེ་འདུན་བཙུན་པ་རྣམས་
ཀྱིས་བདག་རང་བཞིན་དུ་གནས་པར་གཟུང་དུ་གསོལ་ཞེས་ལན་གསུམ་དུ་བཟླས། གང་ཟག་ལ་ཕྱིར་བཏང་བའི་ཆོ་ག་དང་སྔགས་ཀྱི་གཞུང་ནི་ཞུ་བ་ལས། བཙུན་པ་བཅོམ་ལྡན་འདས་ཀྱིས་གལ་ཏེ་མགུ་བ་བྱེད་པའི་དགྲ་བོ་འོང་ན་དེས་མགུ་བ་བྱེད་པའི་སྤྱོད་པ་བག་ཡངས་སུ་བྱའོ་ཞེས་བཀའ་
སྩལ་ན། དེས་ཇི་ལྟར་བག་ཡངས་སུ་བགྱི། ཉེ་བ་འཁོར་དགེ་སློང་དེས་མཆིལ་ལྷམ་གཉིས་ཕུད་དེ་བླ་གོས་ཕྲག་པ་གཅིག་ཏུ་བྱས་ནས་རྒན་རིམས་ལ་ཕྱག་འཚལ་ཏེ་དགེ་སློང་གཅིག་གི་མདུན་དུ་ཙོག་པུར་འདུག་ནས་ཐལ་མོ་སྦྱར་བ་བཏུད་དེ་འདི་སྐད་ཅེས་བརྗོད་པར་བྱའོ། །ཚེ་དང་
ལྡན་པ་དགོངས་སུ་གསོལ། བདག་དགེ་སློང་མགུ་བར་བགྱིད་པའི་དགྲ་བོ་དགེ་སློང་མཆིས་ཏེ། བདག་མིང་འདི་ཞེས་བགྱི་བ་མགུ་བའི་སྤྱོད་པ་བག་ཡངས་སུ་བགྱིད་ཅིང་སླར་ཡང་ལེན་པར་བགྱིད་དོ། །ཡང་བླངས་ཏེ་སྤྱོད་པར་བགྱིད་ན། ཚེ་དང་ལྡན་པས་བདག་ངོ་ཚ་མ་མཆིས་

པར་མི་གཟུང་དུ་གསོལ་ཞེས་ལན་གསུམ་དུ་བཟླས། དགེ་སློང་ཉན་པས་ཐབས་ཡིན་ནོ་ཞེས་བརྗོད་པར་བྱ། མགུ་བར་བྱ་བ་གཏོང་བས་ལེགས་སོ་ཞེས་བརྗོད་པར་བྱའོ་ཞེས་གསུངས་པ་ཡིན་ནོ། །དེས་མགུ་པར་བྱ་བ་སྤྱོད་པ་བཏང་ནས་ཕྱིར་མ་བླངས་ཀྱི་བར་དུ་
མགུ་བར་བྱ་བ་སྤྱད་མི་དགོས་པར་རང་བཞིན་དུ་གནས་པར་བྱའོ། །དེ་ནི་འཐབ་ཀྲོལ་བྱེད་པ་འོང་ན་བཏང་བའི་ཆོ་ག་དང་སྔགས་སོ། །འཐབ་ཀྲོལ་བྱེད་པ་སོང་ན་བླང་བའི་ཆོ་ག་དང་སྔགས་ནི་འདི་ཡིན་ཏེ། གང་ཟག་འཐབ་ཀྲོལ་ཅན་དེ་སོང་ཞིང་འཇིགས་པ་དང་བྲལ་ན་གཙུག་ལག་ཁང་
དེ་ཉིད་དུ་མགུ་བར་བྱ་བ་སྤྱད་པ་དེ་དགེ་འདུན་ནམ་གང་ཟག་ལས་ཆོ་ག་དང་སྔགས་ཀྱིས་ཕྱིར་བླང་བར་བྱའོ། །དགེ་འདུན་ལས་བླང་བའི་ཆོ་ག་དང་སྔགས་ནི་དེ་རང་གིས་གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་
འདུན་ཐམས་ཅད་འདུག་ཅིང་མཐུན་པར་གྱུར་པ་ལ་མཆིལ་ལྷམ་གཉིས་ཕུད་དེ་བླ་གོས་ཕྲག་པ་གཅིག་ཏུ་བྱས་ནས་རྒན་རིམས་ལ་ཕྱག་འཚལ་ཏེ། རྒན་པའི་མཐའ་ལོགས་སུ་ཙོག་པུར་འདུག་ནས་ཐལ་མོ་སྦྱར་བ་བཏུད་དེ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་
དུ་གསོལ། བདག་དགེ་སློང་མིང་འདི་ཞེས་བགྱི་བ་མགུ་བར་བགྱིད་པས་དགེ་སློང་འཐབ་ཀྲོལ་བགྱིད་པ། མཚང་འདྲུ་བར་བགྱིད་པ། འཐབ་མོ་བགྱིད་པ། འགྱེད་པར་བགྱིད་པ། རྩོད་པར་བགྱིད་པ་དག་མཆི་ཞེས་ཐོས་ཏེ། དེ་དག་གིས་བདག་ལ་གཞི་འདིས་གླེང་བར་འགྱུར་དྲན་པར་
བགྱིད་པར་འགྱུར་བས་བདག་གིས་དེ་སྐད་ཐོས་ནས་དགེ་འདུན་རྣམས་ཀྱི་མདུན་དུ་མགུ་བར་བགྱི་བ་སླར་བཏང་བའི་ཕྱིར་རྒོལ་བ་མི་མཛའ་བ་དེ་དག་སླར་མཆིས་ལགས་པས་བདག་མགུ་བར་བགྱི་བ་ཡང་སླར་ལེན་ཏོ། །མགུ་བར་བགྱི་བ་ཞག་མ་འཁོར་བ་རྣམས་བགྱིའོ། །དགེ་འདུན་
བཙུན་པ་རྣམས་ཀྱིས་བདག་མགུ་བར་བགྱིད་པར་གཟུང་དུ་གསོལ་ཞེས་ལན་གསུམ་དུ་བཟླས། གང་ཟག་གི་མདུན་དུ་ཕྱིར་བླང་བའི་ཆོ་ག་དང་སྔགས་ཀྱང་དེས་མཆིལ་ལྷམ་གཉིས་ཕུད་དེ་བླ་གོས་ཕྲག་པ་གཅིག་ཏུ་བྱས་ནས་ཕྱག་འཚལ་ཏེ། དགེ་སློང་གི་མདུན་དུ་ཙོག་པུར་འདུག་

ནས་ཐལ་མོ་སྦྱར་བ་བཏུད་དེ་འདི་སྐད་ཅེས་བརྗོད་པར་བྱའོ། །ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་མགུ་བར་བགྱིད་པ་དགེ་སློང་དགྲ་བོ་མཆིས་ཏེ། བདག་མིང་འདི་ཞེས་བགྱི་བས་མགུ་བའི་སྤྱོད་པ་བག་ཡངས་སུ་བགྱིས་པ། དགྲ་བོ་དགེ་སློང་དེ་
དག་སླར་མཆིས་ལགས་པས་བདག་མགུ་བར་བགྱི་བ་ཡང་སླར་ལེན་ཏོ། །མགུ་བར་བགྱི་བ་ཞག་མ་འཁོར་བ་རྣམས་བགྱིའོ། །ཚེ་དང་ལྡན་པ་བདག་མགུ་བར་བགྱིད་པར་གཟུང་དུ་གསོལ་ཞེས་ལན་གསུམ་དུ་བཟླས། ཉན་པས་ཐབས་ཡིན་ནོ་ཞེས་བརྗོད་པར་བྱའོ། །མགུ་བར་བྱ་བ་ལེན་
པས་ལེགས་སོ་ཞེས་བརྗོད་པར་བྱའོ། །དེས་མགུ་བར་བྱ་བའི་སྤྱོད་པ་ཕྱིར་བླངས་ནས། ཀུན་དུ་སྤྱོད་པའི་ཆོས་སྔ་མ་བཞིན་དུ་མགུ་བར་བྱ་བ་ཞག་མ་འཁོར་བ་རྣམས་བགྱིའོ། །དེ་དག་ནི་མགུ་བར་བྱ་བ་སྤྱོད་པ་དེས་ཞག་དྲུག་ཏུ་ས་གཞན་ན་གནས་པའི་སྤྱོད་པས་མགུ་བར་བྱ་བ་སྤྱད་པའི་
ཆོས་རྣམས་ཡིན་ཏེ། དེ་ལྟ་བུས་ཞག་དྲུག་སྤྱད་ན་མགུ་བར་བྱ་བ་སྤྱད་ཟིན་པར་རིག་པར་བྱའོ། །ད་ནི་མགུ་བར་བྱ་བ་བྱས་ལ་མ་ཕྱུང་གི་བར་དུ་དེས་ཀུན་དུ་སྤྱད་པའི་ཆོས་རྣམས་བསྟན་པར་བྱ་སྟེ། མགུ་བར་བྱ་བ་བྱས་ལ་མ་ཕྱུང་བ་དེ་ནི་མགུ་བར་བྱ་བའི་ལས་ནི་བྱས་ལ་རང་བཞིན་དུ་
གནས་པ་ཉིད་མ་ཡིན་པའི་ཕྱིར་དེས་ཀྱང་སྔར་སྤོ་བ་བྱས་ལ་མགུ་བར་བྱ་བ་མ་ཡིན་པས་ཀུན་དུ་སྤྱད་པའི་ཆོས་ཇི་སྐད་བསྟན་པ་རྣམས་ལྷག་ཆད་མེད་པར་སྤྱད་པར་བྱའོ། །དེ་ལྟར་ན་སྤོ་བ་སྤྱད་པ་དང་མགུ་བ་སྤྱོད་པ་གཉིས་ཀྱི་ཀུན་དུ་སྤྱད་པའི་ཆོས་ཀྱང་འདྲ་ལ། སྤོ་བ་བྱས་ལ་མགུ་བ་མ་བྱིན་པ་
དང་། མགུ་བར་བྱས་ལ་མ་ཕྱུང་བ་གཉིས་ཀྱི་ཀུན་ཏུ་སྤྱད་པའི་ཆོས་ཀྱང་འདྲའོ། །དབྱུང་བ་བྱས་ཟིན་པས་ནི་ཀུན་དུ་སྤྱད་པའི་ཆོས་དེ་དག་གང་ཡང་སྤྱད་མི་དགོས་ཏེ་རང་བཞིན་དུ་གནས་པར་འགྱུར་ཟིན་པའི་ཕྱིར་རོ་ཞེས་བྱ་བར་ཤེས་པར་བྱའོ། །དེ་ལྟར་དེ་དག་ནི་ཞག་དྲུག་མགུ་བར་
བྱ་བ་སྦྱིན་པའི་ཆོ་ག་དང་ལས་ཡིན་ནོ། །དེའི་འོག་ཏུ་དབྱུང་བ་སྦྱིན་པའི་གོ་རིམས་ནི་འདི་ཡིན་ཏེ། མགུ་བར་བྱ་བ་སྤྱད་ཟིན་པ་དེས་མཚམས་གང་ན་དགེ་སློང་སྟོང་ཉི་ཤུ་ཡན་ཆད་ཀྱི་དགེ་འདུན་གནས་པ་གུད་དུ་མ་སྤྱད་པ་ཐམས་ཅད་དམ་དཀྱིལ་འཁོར་བར་གུད་དུ་སྤྱད་པ་ལ་ཡང་རུང་སྟེ། དེ་དག་

ལ་རང་གིས་དབྱུང་བ་གསོལ་བ་དང་དགེ་འདུན་གྱིས་དེ་ལ་གསོལ་བ་དང་བཞིའི་ལས་ཀྱིས་བསྡིགས་པ་དང་གཟེངས་བསྟོད་པ་དང་བཅས་པས་གང་ཟག་དེ་དགེ་འདུན་ལྷག་མའི་ལྟུང་བ་ལས་དབྱུང་བར་བྱའོ། །དེ་ལ་དགེ་འདུན་ལ་རང་གིས་དབྱུང་བར་གསོལ་བའི་ཆོ་ག་དང་སྔགས་ནི་འདི་ལྟར་བྱ་སྟེ། དེས་དགེ་འདུན་
ལྷག་མའི་ལྟུང་བ་གང་ཡང་རུང་བ་བྱུང་ལ་མགུ་བ་ཞག་དྲུག་སྤྱད་ཟིན་ན་དེ་ཉིད་ཀྱིས་གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་མཆིལ་ལྷམ་གཉིས་ཕུད་དེ་བླ་གོས་ཕྲག་པ་གཅིག་ཏུ་བྱས་
ནས་རྒན་རིམས་ལ་ཕྱག་འཚལ་ཏེ། རྒན་པའི་མཐའ་ལོགས་སུ་ཙོག་པུར་འདུག་ནས་ཐལ་མོ་སྦྱར་བ་བཏུད་དེ་རང་གི་དབྱུང་བ་གསོལ་བའི་སྔགས་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། བདག་
དགེ་སློང་འཆར་ཀ་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་དགེ་འདུན་ལས་ཞག་དྲུག་མགུ་བར་བགྱི་བ་གསོལ་ནས་དགེ་འདུན་གྱིས་བདག་དགེ་སློང་འཆར་ཀ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་
བར་བགྱི་བ་སྩལ་ཏེ། བདག་དགེ་སློང་འཆར་ཀས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱིས་ལགས་ཏེ། དགེ་འདུན་ལས་དབྱུང་བ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་དགེ་སློང་འཆར་ཀ་ལ་ཆེ་གེ་
མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བ་བགྱིས་ལགས་པ་ལས་དབྱུང་བ་སྩལ་དུ་གསོལ། ལན་གསུམ་དུ་བཟླས། དེ་ནི་དགེ་འདུན་ལ་རང་གི་དབྱུང་བ་གསོལ་བའི་ཆོ་ག་དང་སྔགས་སོ། །དགེ་འདུན་གྱིས་དེ་ལ་གསོལ་བ་དང་བཞིའི་ལས་ཀྱིས་བསྡིགས་པ་དང་། གཟེངས་བསྟོད་པ་དང་བཅས་པས་དེ་དབྱུང་
བར་བྱ་བའི་གོ་རིམས་ནི་འདི་ཡིན་ཏེ། དང་པོར་དགེ་སློང་གཅིག་གིས་གསོལ་བ་བྱའོ། །དེའི་རྗེས་ལ་བསྡིགས་པ་བྱའོ། །དེའི་རྗེས་ལ་ལས་བརྗོད་པ་དང་པོ་དང་གཉིས་པ་དང་གསུམ་པ་མཇུག་སྡུད་པ་དང་བཅས་པ་བྱའོ། །དེའི་རྗེས་ལ་གཟེངས་བསྟོད་པར་བྱ་སྟེ། དེ་ཙམ་གྱིས་ན་དགེ་འདུན་ལྷག་མའི་ལྟུང་བ་ལས་བྱུང་བ་ཡིན་ནོ། །དེ་ལ་དང་པོར་དགེ་སློང་

གཅིག་གིས་གསོལ་བ་བྱ་བའི་ཆོ་ག་དང་སྔགས་འདི་ཡིན་ཏེ། དེས་དེ་ལྟར་དབྱུང་བ་གསོལ་མ་ཐག་ཏུ་དགེ་སློང་གཅིག་གིས་གསོལ་བ་བྱའོ། །འདི་ལྟར་བྱ་སྟེ། འདུག་ལ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ལ་ཆེ་གེ་མོ་
ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་དགེ་འདུན་ལས་ཞག་དྲུག་མགུ་བར་བགྱི་བ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་
ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱི་བ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བ་བགྱིས་ལགས་ཏེ། དགེ་འདུན་ལས་དབྱུང་བ་གསོལ་ན།
གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བ་བགྱིས་པ་དབྱུང་བར་བགྱིའོ། །འདི་ནི་གསོལ་བའོ། །དེ་ནི་
དང་པོར་དགེ་སློང་གཅིག་གིས་གསོལ་བ་བྱ་བའི་ཆོ་ག་དང་སྔགས་སོ། །དེའི་རྗེས་ལ་བསྡིགས་པར་བྱ་བའི་ཆོ་ག་དང་སྔགས་ནི་འདི་ཡིན་ཏེ། དེ་ལྟར་དགེ་སློང་དེས་གསོལ་བ་བྱས་མ་ཐག་ཏུ་དགེ་སློང་དེ་ཉིད་ཀྱིས་ལྟུང་བ་བྱུང་བ་རྩ་བ་བཅད་དེ་ས་ལ་བཀྲམ་པ་ལྟར་ལུས་ཐམས་ཅད་ས་ལ་
ཁ་བུབ་བམ་གན་རྐྱལ་ལམ་གློས་འགྱེལ་དུ་བཅུག་སྟེ། དེ་ལྟར་སྒྱེལ་བ་དེ་ལ་འདི་སྐད་ཅེས་བརྗོད་པར་བྱའོ། །འཆར་ཀ་ཁྱོད་ཉོན་ཅིག་ཁྱོད་ཀྱིས་ལེགས་པ་མ་བྱས་སོ། །ལེགས་པ་ཤིན་ཏུ་མ་བྱས་སོ། །བྱ་བ་གཞན་ཡིན་ན་གཞན་བྱས་སོ། །བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་དེའི་ཆོས་ནི་འདི་ལྟར་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བའི་ཆོས་སྟོན་ཅིང་ཞེ་སྡང་འདོད་ཆགས་དང་བྲལ་བར་བྱ་བ་དང་། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་

སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བའི་ཆོས་སྟོན་བཞིན་དུ་ཁྱོད་ཀྱིས་མི་མཛེས་པ་འདི་ལྟ་བུ་འདི་བྱས་པ་མི་རིགས་སོ། །མི་གཏི་མུག་ཅན་ཁྱོད་ཀྱིས་སྦྲུལ་ནག་པོ་དུག་མྱུར་དུ་ཁྱབ་པར་བྱེད་པ་དུག་དྲག་པ་དུག་རྣོ་བ་ལ་ལག་པ་གཉིས་ཀས་གཟུང་
བ་ནི་བླའི། ཀུན་དུ་ཆགས་པའི་སེམས་ཀྱིས་རང་གི་ཡན་ལག་གི་རྣམ་པ་ལ་བཟུང་བ་ནི་དེ་ལྟ་མ་ཡིན་ནོ། །མི་གཏི་མུག་ཅན་ཁྱོད་ལག་པ་གང་དག་གིས་བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་དད་པས་སྦྱིན་པར་བྱ་བ་བླང་པར་བྱ་བའི་ལག་པ་དེ་གཉིས་ཀྱིས་མི་མཛེས་པ་འདི་ལྟ་བུ་
འདི་བྱ་བར་མི་རིགས་སོ། །མི་གཏི་མུག་ཅན་ཁྱོད་ཀྱིས་བདག་ལ་བསྙེན་བཀུར་བྱ་བ་ཉམས་སུ་བླངས་པར་གྱུར་ཏོ། །འཆར་ཀ་གཉིས་པོ་འདི་དག་ནི་ཆོས་ཀྱི་སྒྲོན་མ་དང་། ཆོས་ཀྱི་སྣང་བ་དང་། ཆོས་ཀྱི་འོད་དང་། ཆོས་ཀྱི་གསལ་བ་དང་། ཆོས་ཀྱི་སྣང་གསལ་དང་། ཆོས་ཀྱི་མར་མེ་
དང་། ཆོས་ཀྱི་རབ་གསལ་མེད་པར་བྱེད་པ་སྟེ། གཉིས་གང་ཞེ་ན། ལྟུང་བ་འབྱིན་པ་གང་ཡིན་པ་དང་། ལྟུང་བ་བྱུང་ནས་ཆོས་བཞིན་དུ་ཕྱིར་མི་འཆོས་པ་གང་ཡིན་པའོ། །གཉིས་ནི་སྡིག་པའི་རྩ་བ་མི་རྐོ། རྒྱུན་ལས་བཟློག་པ་ལ་མི་འབད། འབབ་ཆུ་དང་འཁྲི་ཤིང་མི་སྐེམས། བདུད་མི་
འདུལ། བདུད་ཀྱི་རྒྱལ་མཚན་མི་སྙོལ། ཆོས་ཀྱི་རྒྱལ་མཚན་མི་བསྒྲེང་། སྡིག་པའི་རྒྱུན་མི་གཅད་དོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཆོས་ཀྱི་འཁོར་ལོ་ཆོས་དང་རྗེས་སུ་མཐུན་པར་བསྐོར་བ་རྗེས་སུ་མི་བསྐོར་བ་སྟེ། གཉིས་གང་ཞེ་ན།
ལྟུང་བ་འབྱིན་པ་གང་ཡིན་པ་དང་། ལྟུང་བ་བྱུང་ནས་ཆོས་བཞིན་དུ་ཕྱིར་མི་འཆོས་པ་གང་ཡིན་པའོ། །གཉིས་ནི་ཀུན་ནས་ཉོན་མོངས་པར་འགྱུར་བ་དང་། གཉིས་ཀྱིས་ཟག་པ་འཕེལ་བར་འགྱུར་བ་སྟེ། གཉིས་གང་ཞེ་ན། ལྟུང་བ་འབྱིན་པ་གང་ཡིན་པ་དང་། ལྟུང་བ་བྱུང་ནས་ཆོས་བཞིན་
དུ་ཕྱིར་མི་འཆོས་པ་གང་ཡིན་པའོ། །འཆར་ཀ་ཁྱོད་ཀྱིས་ལྟུང་བ་བྱུང་བ་འདི་མ་བཤགས་ཤིང་སོ་སོར་མ་བཤགས་ན་མི་རྟག་པའི་འདུ་ཤེས་དང་། མི་རྟག་པ་ལ་སྡུག་བསྔལ་བའི་འདུ་ཤེས་དང་། སྡུག་བསྔལ་བ་ལ་བདག་མེད་པའི་འདུ་ཤེས་དང་། ཟས་ལ་མི་མཐུན་པའི་འདུ་ཤེས་དང་།

འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང་། ཉེས་དམིགས་ཀྱི་འདུ་ཤེས་དང་། སྤོང་བའི་འདུ་ཤེས་དང་། འདོད་ཆགས་དང་བྲལ་བའི་འདུ་ཤེས་དང་། འགོག་པའི་འདུ་ཤེས་དང་། འཆི་བའི་འདུ་ཤེས་དང་། མི་སྡུག་པའི་འདུ་ཤེས་དང་། རྣམ་པར་བསྔོས་པའི་འདུ་
ཤེས་དང་། རྣམ་པར་རྣགས་པའི་འདུ་ཤེས་དང་། རྣམ་པར་བམ་པའི་འདུ་ཤེས་དང་། རྣམ་པར་འབུས་གཞིགས་པའི་འདུ་ཤེས་དང་། རྣམ་པར་ཟོས་པའི་འདུ་ཤེས་དང་། རྣམ་པར་དམར་བའི་འདུ་ཤེས་དང་། རྣམ་པར་འཐོར་བའི་འདུ་ཤེས་དང་། རུས་གོང་གི་འདུ་ཤེས་དང་། སྟོང་པ་ཉིད་
དུ་སོ་སོར་རྟོག་པའི་འདུ་ཤེས་ཀྱི་འོས་མ་ཡིན། བསམ་གཏན་དང་པོ་དང་། གཉིས་པ་དང་། གསུམ་པ་དང་། བཞི་པ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་མེད་
པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང་། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། རྫུ་འཕྲུལ་གྱི་ཡུལ་དང་། ལྷའི་རྣ་བ་དང་། སེམས་ཀྱི་རྣམ་གྲངས་དང་། སྔོན་གྱི་གནས་དང་། འཆི་
འཕོ་དང་། སྐྱེ་བ་དང་། ཟག་པ་ཟད་པའི་འོས་མ་ཡིན་ནོ། །འཆར་ཀ་ལྟུང་བ་འདི་མ་བཤགས་ཤིང་སོ་སོར་མ་བཤགས་ན། འགྲོ་བ་གཉིས་ལས་གང་ཡང་རུང་བ་ཞིག་ཁྱོད་ཀྱི་འགྲོ་བ་ཡིན་པར་ཤེས་པར་བྱ་སྟེ། སེམས་ཅན་དམྱལ་བའམ་དུད་འགྲོའོ། །བཅོམ་ལྡན་འདས་ཀྱིས་ཀྱང་ལས་ཀྱི་
མཐའ་འཆབ་པའི་འགྲོ་བ་ནི་གཉིས་ཏེ། སེམས་ཅན་དམྱལ་བའམ་དུད་འགྲོའོ། །གང་དག་ཉེས་པ་ལ་ཡིད་མི་ཆེས་པ་དེ་དག་ནི་འཆབ་པར་སེམས་སོ་ཞེས་གསུངས་སོ། །དེ་ནི་བསྡིགས་པར་བྱ་བའི་ཆོ་ག་དང་སྔགས་སོ། །དེའི་འོག་ཏུ་ལས་བརྗོད་པ་དང་པོ་དང་གཉིས་པ་དང་གསུམ་པ་མཇུག་
སྡུད་པ་དང་བཅས་པ་བྱ་བའི་ཆོ་ག་དང་སྔགས་ནི་འདི་ཡིན་ཏེ། དེ་ལྟར་བསྡིགས་པ་བྱས་མ་ཐག་ཏུ་དེའི་མཇུག་ཐོགས་སུ་དགེ་སློང་ལས་བྱེད་པ་དེ་ཉིད་ཀྱིས་ལྟུང་བ་བྱུང་བ་དེ་ཡང་ཐལ་མོ་སྦྱར་ཏེ། ཙོག་པུར་འདུག་ཏུ་བཅུག་ལ་བདག་ཀྱང་འདུག་བཞིན་དུ་འདི་སྐད་ཅེས་བརྗོད་པར་བྱའོ། །དགེ་

འདུན་བཙུན་པ་རྣམས་གསན་དུ་གསོལ། དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་ལ། དགེ་སློང་འཆར་ཀ་འདི་དགེ་འདུན་གྱི་གན་དུ་མཆིས་ཏེ། ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་དགེ་
འདུན་ལས་ཞག་དྲུག་མགུ་བར་བགྱི་བ་གསོལ་ནས། དགེ་འདུན་གྱིས་དགེ་སློང་འཆར་ཀ་འདི་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱི་བ་སྩལ་ཏེ། དགེ་སློང་འཆར་ཀ་འདིས་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་
དེའི་སླད་དུ་ཞག་དྲུག་མགུ་བར་བགྱིས་ལགས་ཏེ། དགེ་འདུན་ལས་དབྱུང་བ་གསོལ་ན། དེའི་སླད་དུ་དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱིས་པ་དབྱུང་བར་མཛད་ནས། ཚེ་དང་ལྡན་པ་གང་
དག་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱིས་པ་དབྱུང་བར་བཟོད་པ་དེ་དག་ནི་ཅང་མ་གསུང་ཤིང་། །གང་དག་མི་བཟོད་པ་དེ་དག་ནི་གསུངས་ཤིག །འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་
གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས། དགེ་འདུན་གྱིས་དགེ་སློང་འཆར་ཀ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དེའི་སླད་དུ་ཞག་དྲུག་མགུ་བར་བགྱིས་པ་ཕྱུང་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེ་ནི་ལས་བརྗོད་པ་དང་
པོ་དང་གཉིས་པ་དང་གསུམ་པ་མཇུག་སྡུད་པ་དང་བཅས་པ་བྱ་བའི་ཆོ་ག་དང་སྔགས་སོ། །དེའི་འོག་ཏུ་གཟེངས་བསྟོད་པའི་ཆོ་ག་དང་སྔགས་ནི་འདི་ཡིན་ཏེ། དགེ་སློང་ལས་བྱེད་པ་དེ་ཉིད་ཀྱིས་དེའི་མོད་ལ་དགེ་འདུན་གྱི་དབུས་སུ་གང་ཟག་དེ་ཐལ་མོ་སྦྱར་ཏེ་ཙོག་པུར་འདུག་ཏུ་བཅུག་ལ་འདི་
སྐད་ཅེས་བརྗོད་པར་བྱའོ། །འཆར་ཀ་ཁྱོད་ཀྱིས་ལེགས་པ་བྱས་སོ། །ལེགས་པ་ཤིན་ཏུ་བྱས་སོ། །གཉིས་ནི་མཁས་པ། གཉིས་ནི་གསལ་བ། གཉིས་ནི་དགེ་བ། གཉིས་ནི་སྐྱེས་བུ་དམ་པ་སྟེ། གཉིས་གང་ཞེ་ན། ལྟུང་བ་མི་འབྱིན་པ་གང་ཡིན་པ་དང་། ལྟུང་བ་བྱུང་ནས་ཆོས་བཞིན་དུ་

ཕྱིར་བཅོས་པ་གང་ཡིན་པའོ། །གཉིས་ནི་སྡིག་པའི་རྩ་བ་རྐོ་བ། རྒྱུན་ལས་བཟློག་པ་ལ་འབད་པ། འབབ་ཆུ་དང་འཁྲི་ཤིང་སྐེམས་པ། བདུད་འདུལ་བ། བདུད་ཀྱི་རྒྱལ་མཚན་སྙོལ་བ། ཆོས་ཀྱི་རྒྱལ་མཚན་སྒྲེང་བ། སྡིག་པའི་རྒྱུན་གཅོད་པ། དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་ཀྱི་ཆོས་ཀྱི་འཁོར་ལོ་ཆོས་དང་མཐུན་པར་བསྐོར་བ་རྗེས་སུ་བསྐོར་བ་སྟེ། གཉིས་གང་ཞེ་ན། ལྟུང་བ་མི་འབྱིན་པ་གང་ཡིན་པ་དང་། ལྟུང་བ་བྱུང་ནས་ཆོས་བཞིན་དུ་ཕྱིར་འཆོས་པ་གང་ཡིན་པའོ། །གཉིས་ནི་རྣམ་པར་བྱང་བར་འགྱུར་ཞིང་ཀུན་ནས་ཉོན་
མོངས་པར་མི་འགྱུར་བ་དང་། གཉིས་ཀྱིས་ཟག་པ་འཕེལ་བར་མི་འགྱུར་ཏེ། གཉིས་གང་ཞེ་ན། ལྟུང་བ་མི་འབྱིན་པ་གང་ཡིན་པ་དང་། ལྟུང་བ་བྱུང་ནས་ཆོས་བཞིན་དུ་ཕྱིར་འཆོས་པ་གང་ཡིན་པའོ། །འཆར་ཀ་ཁྱོད་ལྟུང་བ་འདི་བཤགས་ཤིང་སོ་སོར་བཤགས་པས། མི་རྟག་པའི་འདུ་ཤེས་དང་
མི་རྟག་པ་ལ་སྡུག་བསྔལ་བའི་འདུ་ཤེས་དང་། སྡུག་བསྔལ་བ་ལ་བདག་མེད་པའི་འདུ་ཤེས་དང་། ཟས་ལ་མི་མཐུན་པའི་འདུ་ཤེས་དང་། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང་། ཉེས་དམིགས་ཀྱི་འདུ་ཤེས་དང་། སྤོང་བའི་འདུ་ཤེས་དང་། འདོད་ཆགས་དང་
བྲལ་བའི་འདུ་ཤེས་དང་། འགོག་པའི་འདུ་ཤེས་དང་། འཆི་བའི་འདུ་ཤེས་དང་། མི་སྡུག་པའི་འདུ་ཤེས་དང་། རྣམ་པར་བསྔོས་པའི་འདུ་ཤེས་དང་། རྣམ་པར་རྣགས་པའི་འདུ་ཤེས་དང་། རྣམ་པར་བམ་པའི་འདུ་ཤེས་དང་། རྣམ་པར་འབུས་གཞིགས་པའི་འདུ་ཤེས་དང་། རྣམ་པར་ཟོས་པའི་
འདུ་ཤེས་དང་། རྣམ་པར་དམར་བའི་འདུ་ཤེས་དང་། རྣམ་པར་འཐོར་བའི་འདུ་ཤེས་དང་། རུས་གོང་གི་འདུ་ཤེས་དང་། སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཀྱི་འོས་སུ་གྱུར་པ་ཡིན། བསམ་གཏན་དང་པོ་དང་། གཉིས་པ་དང་། གསུམ་པ་དང་། བཞི་པ་དང་། བྱམས་པ་དང་། སྙིང་རྗེ་དང་།
དགའ་བ་དང་། བཏང་སྙོམས་དང་། ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང་། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་།

ཕྱིར་མི་འོང་བའི་འབྲས་བུ་དང་། རྫུ་འཕྲུལ་གྱི་ཡུལ་དང་། ལྷའི་རྣ་བ་དང་། སེམས་ཀྱི་རྣམ་གྲངས་དང་། སྔོན་གྱི་གནས་དང་། འཆི་འཕོ་དང་སྐྱེ་བ་དང་། འབྲས་བུའི་མཆོག་དགྲ་བཅོམ་པའི་འོས་སུ་གྱུར་པ་ཡིན་ནོ། །འཆར་ཀ་ལྟུང་བ་འདི་བཤགས་ཤིང་སོ་སོར་
བཤགས་པས་འགྲོ་བ་གཉིས་པོ་ལས་གང་ཡང་རུང་བ་ཞིག་ཁྱོད་ཀྱི་འགྲོ་བ་ཡིན་པར་ཤེས་པར་བྱ་སྟེ། ལྷ་དང་མིའོ། །བཅོམ་ལྡན་འདས་ཀྱིས་ཀྱང་ལས་ཀྱི་མཐའ་མི་འཆབ་པའི་འགྲོ་བ་ནི་གཉིས་ཏེ། ལྷ་དང་མིའོ། །གང་དག་ངས་བཤད་པ་ལ་ཡིད་ཆེས་པ་དེ་དག་ནི་འཆབ་པར་མི་སེམས་
སོ་ཞེས་གསུངས་སོ། །ཡང་གསུངས་པ། བཅབས་པ་ཆར་པ་བཞིན་དུ་བབ། །བཤགས་པ་ཆར་བཞིན་བབ་མི་འགྱུར། །དེ་ལྟ་བས་ན་བཤགས་པར་བྱ། །དེ་ལྟར་ཆར་བཞིན་མི་འབབ་ཅེའོ། །ཚེ་དང་ལྡན་པ་འཆར་ཀ་ཁྱོད་ཕྱུང་ཟིན་གྱིས་བག་ཡོད་པར་སྒྲུབས་ཤིག །དེ་ནི་གཟེངས་
བསྟོད་པའི་ཆོ་ག་དང་སྔགས་ཏེ། དེ་ཙམ་གྱིས་ན་དེ་དགེ་འདུན་ལྷག་མའི་ལྟུང་བ་ལས་བྱུང་བར་རིག་པར་བྱའོ། །ད་ནི་འདུལ་བའི་གཞི་བསྡུ་བའི་ཁྱད་པར་ཅུང་ཞིག་བཤད་པར་བྱ་སྟེ། སྤོ་བ་ཞེས་བྱ་བའི་ཁྱད་པར་ནི་རྣམ་པ་གསུམ་སྟེ། སྤོ་བ་དང་། གཞི་ནས་སྤོ་བ་དང་། ཡང་གཞི་ནས་བླང་སྟེ་སྤོ་བའོ། །
མགུ་བར་བྱ་བ་ཞེས་བྱ་བའི་ཁྱད་པར་ཡང་རྣམ་པ་གསུམ་སྟེ། མགུ་བར་བྱ་བ་དང་། གཞི་ནས་མགུ་བར་བྱ་བ་དང་། ཡང་གཞི་ནས་བསླང་སྟེ་མགུ་བར་བྱ་བའོ། །དེ་ལ་སྤོ་བ་ཞེས་བྱ་བ་ནི་དགེ་འདུན་ལྷག་མའི་ལྟུང་བ་བྱུང་ལ། ཇི་སྲིད་དུ་བཅབས་པའི་དུས་དེ་སྲིད་དུ་ས་གཞན་ན་གནས་པའི་སྤྱོད་པས་
སྤོ་བ་བྱེད་དུ་གཞུག་པ་ཇི་སྐད་སྔར་བསྟན་པའོ། །གཞི་ནས་སྤོ་བ་བྱེད་པ་ཉིད་ནི་དགེ་འདུན་ལྷག་མའི་ལྟུང་བ་རིགས་མཐུན་པ་ཡང་བྱུང་ན། སྤོ་བ་སྔ་མ་མནོས་ཏེ་བྱས་པ་དེ་ཞིག་པས་དེའི་ཕྱིར་ཡང་གཞི་ནས་བསླང་སྟེ་སྤོ་བ་གདོད་བརྩམ་པའོ། །ཡང་གཞི་ནས་བསླང་སྟེ་སྤོ་བ་ཞེས་བྱ་བ་
ནི་གཞི་ནས་སྤོ་བ་བྱེད་པ་ཉིད་ན་དགེ་འདུན་ལྷག་མའི་ལྟུང་བ་རིགས་མཐུན་པ་ཡང་བྱུང་ན། སྤོ་བ་དང་གཞི་ནས་སྤོ་བ་སྔ་མ་མནོས་ཏེ་བྱས་པ་དེ་ཉིད་ཞིག་པས་དེའི་ཕྱིར་ཡང་གཞི་ནས་བསླང་སྟེ་སྤོ་བ་གདོད་བརྩམ་པའོ། །མགུ་བར་བྱ་བ་ཞེས་བྱ་བ་ནི་དགེ་འདུན་ལྷག་མའི་ལྟུང་བ་ལས་དབྱུང་བའི་ཕྱིར་

ཞག་དྲུག་གི་བར་དུ་ས་གཞན་ན་གནས་པའི་སྤྱོད་པས་མགུ་བར་བྱ་བ་སྤྱད་པ་ཇི་སྐད་སྔར་བསྟན་པའོ། །གཞི་ནས་མགུ་བར་བྱ་བ་ཞེས་བྱ་བ་ནི་མགུ་བར་བྱ་བ་བྱེད་པ་ཉིད་ནི་དགེ་འདུན་ལྷག་མའི་ལྟུང་བ་རིགས་མཐུན་པ་ཡང་བྱུང་ན་མགུ་བར་བྱ་བ་སྔ་མ་མནོས་ཏེ་བྱས་པ་དེ་ཞིག་པས་དེའི་ཕྱིར་
གཞི་ནས་མགུ་བར་བྱ་བ་གདོད་བརྩམ་པའོ། །ཡང་གཞི་ནས་བསླང་སྟེ་མགུ་བར་བྱ་བ་ཞེས་བྱ་བ་ནི་གཞི་ནས་མགུ་བར་བྱ་བ་བྱེད་པ་ཉིད་ན་དགེ་འདུན་ལྷག་མའི་ལྟུང་བ་རིགས་མཐུན་པ་ཡང་བྱུང་ན་མགུ་བར་བྱ་བ་དང་། གཞི་ནས་མགུ་བར་བྱ་བ་སྔ་མ་མནོས་ཏེ་བྱས་པ་དེ་གཉིས་ཞིག་པས་
དེའི་ཕྱིར་ཡང་གཞི་ནས་བསླང་སྟེ་མགུ་བར་བྱ་བ་གདོད་བརྩམ་པའོ། །དེ་དག་ལ་དགེ་འདུན་ལྷག་མའི་ལྟུང་བ་རིགས་མཐུན་པར་བྱུང་བས་དེ་ལྟར་འགྱུར་གྱི་རིགས་མི་མཐུན་པས་ནི་དེ་ལྟར་མི་འགྱུར་རོ། །དེ་དག་ལས་སྤོ་བ་སྦྱིན་པའི་ཚིགས་ལ་མུ་གསུམ་ཡོད་དེ། སྤོ་བ་སྦྱིན་པ་དང་། གཞི་ནས་
སྤོ་བ་སྦྱིན་པ་དང་། ཡང་གཞི་ནས་བསླང་སྟེ་སྤོ་བ་སྦྱིན་པའོ། །མགུ་བར་བྱ་བ་སྦྱིན་པའི་ཚིགས་ལ་མུ་བཅུ་གཉིས་ཡོད་དེ། མགུ་བར་བྱ་བ་སྦྱིན་པ་དང་། གཞི་ནས་མགུ་བར་བྱ་བ་སྦྱིན་པ་དང་། ཡང་གཞི་ནས་བསླང་སྟེ་མགུ་བར་བྱ་བ་སྦྱིན་པ་གསུམ་དང་། སྤོ་བ་བྱས་པ་ལ་མགུ་བར་བྱ་
བ་སྦྱིན་པ་དང་། སྤོ་བ་བྱས་པ་ལ་གཞི་ནས་མགུ་བར་བྱ་བ་སྦྱིན་པ་དང་། སྤོ་བ་བྱས་པ་ལ་ཡང་གཞི་ནས་བསླང་སྟེ་མགུ་བར་བྱ་བ་སྦྱིན་པ་གསུམ་དང་། གཞི་ནས་སྤོ་བ་བྱས་པ་ལ་མགུ་བར་བྱ་བ་སྦྱིན་པ་དང་། གཞི་ནས་སྤོ་བ་བྱས་པ་ལ་གཞི་ནས་མགུ་བར་བྱ་བ་སྦྱིན་པ་དང་། གཞི་ནས་
སྤོ་བ་བྱས་པ་ལ་ཡང་གཞི་ནས་བསླང་སྟེ་མགུ་བར་བྱ་བ་སྦྱིན་པ་གསུམ་དང་། ཡང་གཞི་ནས་བསླང་སྟེ་སྤོ་བ་བྱས་པ་ལ་མགུ་བར་བྱ་བ་སྦྱིན་པ་དང་། ཡང་གཞི་ནས་བསླང་སྟེ་སྤོ་བ་བྱས་པ་ལ་གཞི་ནས་མགུ་བར་བྱ་བ་སྦྱིན་པ་དང་། ཡང་གཞི་ནས་བསླང་སྟེ་སྤོ་བ་བྱས་པ་ལ་ཡང་གཞི་ནས་བསླང་
སྟེ་མགུ་བར་བྱ་བ་སྦྱིན་པ་གསུམ་སྟེ་བཅུ་གཉིས་སོ། །དེ་དག་སྦྱིན་པའི་རིམ་པ་ཡང་དང་པོར་བདག་གིས་ལན་གསུམ་གསོལ་བ་དང་། དེ་ནས་དགེ་འདུན་གྱིས་གསོལ་བ་དང་བཞིའི་ལས་ཀྱིས་སྦྱིན་པ་དང་། བྱིན་ནས་ས་གཞན་ན་གནས་པའི་སྤྱོད་པ་ཀུན་དུ་སྤྱོད་པའི་ཆོས་ཇི་ལྟར་བཅས་

པར་སྤྱད་ཅིང་ཉིན་རེ་ལན་རེའམ་ཉི་མ་གསུམ་མམ་བཞི་ཞིང་དགེ་འདུན་ནམ་གང་ཟག་ལ་ཉི་མ་ཐལ་བ་དང་། འབྱུང་བ་བརྗོད་པ་དང་། དགྲ་བོ་འོང་ན་ཕྱིར་བཏང་ལ་དགྲ་བོ་སོང་ན་ཕྱིར་བླང་བའི་ཆོ་ག་དང་རིམ་པ་ནི་སྔ་མ་བཞིན་ནོ། །སྔགས་ཀྱི་ཚིག་ལ་ནི་བྱེ་བྲག་ཡོད་
དེ། ཁ་ཅིག་ནི་འདུལ་བའི་གཞི་དང་། ལས་བརྒྱ་རྩ་གཅིག་པ་དག་ལས་འབྱུང་བ་བཞིན་དངོས་སུ་སྦྱར་རོ། །ཁ་ཅིག་ནི་འཁོར་ལོ་བཞིན་དུ་སྦྱར་རོ། །དབྱུང་བ་སྦྱིན་པའི་ཚིགས་ལ་ཡང་མུ་བཅུ་གཉིས་ཡོད་དེ། མགུ་བར་བྱ་བ་སྤྱད་པ་དབྱུང་བ་དང་། གཞི་ནས་མགུ་བར་བྱ་བ་སྤྱད་པ་
དབྱུང་བ་དང་། ཡང་གཞི་ནས་བསླང་སྟེ་མགུ་བར་བྱ་བ་སྤྱད་པ་དབྱུང་བ་གསུམ་དང་། སྤོ་བ་དང་མགུ་བར་བྱ་བ་སྤྱད་པ་དབྱུང་བ་དང་། སྤོ་བ་དང་གཞི་ནས་མགུ་བར་བྱ་བ་སྤྱད་པ་དབྱུང་བ་དང་། སྤོ་བ་དང་ཡང་གཞི་ནས་བསླང་སྟེ་མགུ་བར་བྱ་བ་སྤྱད་པ་དབྱུང་བ་གསུམ་དང་། གཞི་
ནས་སྤོ་བ་དང་མགུ་བར་བྱ་བ་སྤྱད་པ་དབྱུང་བ་དང་། གཞི་ནས་སྤོ་བ་དང་གཞི་ནས་མགུ་བར་བྱ་བ་སྤྱད་པ་དབྱུང་བ་དང་། གཞི་ནས་སྤོ་བ་དང་ཡང་གཞི་ནས་བསླང་སྟེ་མགུ་བར་བྱ་བ་སྤྱད་པ་དབྱུང་བ་གསུམ་དང་། ཡང་གཞི་ནས་བསླང་སྟེ་སྤོ་བ་དང་མགུ་བར་བྱ་བ་སྤྱད་པ་དབྱུང་བ་དང་། ཡང་
གཞི་ནས་བསླང་སྟེ་སྤོ་བ་དང་གཞི་ནས་མགུ་བར་བྱ་བ་སྤྱད་པ་དབྱུང་བ་དང་། ཡང་གཞི་ནས་བསླང་སྟེ་སྤོ་བ་དང་ཡང་གཞི་ནས་བསླང་སྟེ་མགུ་བར་བྱ་བ་སྤྱད་པ་དབྱུང་བ་གསུམ་སྟེ་བཅུ་གཉིས་སོ། །དེ་དག་སྦྱིན་པའི་རིམ་པ་ཡང་དང་པོར་བདག་གིས་ལན་གསུམ་དབྱུང་བ་གསོལ་བ་དང་། དེ་ནས་
དགེ་འདུན་གྱིས་གསོལ་བ་དང་བཞིའི་ལས་ཀྱིས་བསྡིགས་པ་དང་། གཟེངས་བསྟོད་པ་དང་བཅས་པས་དབྱུང་བའི་ཆོ་ག་དང་རིམ་པ་ནི་སྔ་མ་བཞིན་ནོ། །སྔགས་ཀྱི་ཚིག་ལ་ནི་བྱེ་བྲག་ཡོད་དེ། ཁ་ཅིག་ནི་འདུལ་བའི་གཞི་དང་ལས་བརྒྱ་རྩ་གཅིག་པ་དག་ལས་འབྱུང་བ་བཞིན་དངོས་སུ་སྦྱར་རོ། །
ཁ་ཅིག་ནི་འཁོར་ལོ་བཞིན་དུ་སྦྱར་རོ། །གཞི་ནས་སྤོ་བ་དང་ཡང་གཞི་ནས་བསླང་སྟེ་སྤོ་བ་སྦྱིན་པའི་ཚིགས་འདི་གཉིས་ལ་ནི་ལྟུང་བ་ཕྱིས་བྱུང་བ་དེ་བཅབས་པའི་དུས་ལྷག་པ་དེར་གཞུག་དགོས་ལ། དུས་མཉམ་པ་དང་ཉུང་བ་ནི་དེར་གཞུག་མི་དགོས་ཏེ། དེས་གང་ལ་ལྟུང་བ་སྔ་མ་བཅབས་

པའི་དུས་ཟླ་བ་ཕྱེད་ཡོད་ལ། ལྟུང་བ་ཕྱི་མ་བཅབས་པའི་དུས་ཀྱང་ཟླ་བ་ཕྱེད་དམ་དེ་བས་ཉུང་བ་ཡོད་པ་དེ་ལ་ནི། མཐོལ་བ་དང་གཞི་ནས་སྤོ་བ་དང་། ཡང་གཞི་ནས་བསླང་སྟེ་སྤོ་བ་གསོལ་བ་དང་། སྦྱིན་པའི་སྔགས་ཀྱི་ཚིག་ཏུ་ཡང་ཟླ་བ་ཕྱེད་ཁོ་ན་སྨོས་ལ། གཞི་ནས་སྤོ་བ་དང་ཡང་གཞི་
ནས་བསླང་སྟེ་སྤོ་བ་ཡང་ཟླ་བ་ཕྱེད་ཁོ་ན་སྦྱིན་པར་བྱའོ། །གང་ལ་ལྟུང་བ་སྔ་མ་བཅབས་པའི་དུས་ཟླ་བ་ཕྱེད་ཡོད་ལ། ལྟུང་བ་ཕྱི་མ་བཅབས་པའི་དུས་ཟླ་བ་གཅིག་ཡོད་པ་དེ་ལ་ནི་མཐོལ་བ་དང་། གཞི་ནས་སྤོ་བ་དང་། ཡང་གཞི་ནས་བསླང་སྟེ་སྤོ་བ་གསོལ་བ་དང་། སྦྱིན་པའི་སྔགས་
ཀྱི་ཚིག་ཏུ་ཡང་ཟླ་བ་གཅིག་སྨོས་ལ། གཞི་ནས་སྤོ་བ་དང་ཡང་གཞི་ནས་བསླང་སྟེ་སྤོ་བ་ཡང་ཟླ་བ་གཅིག་སྦྱིན་པར་བྱ་སྟེ། དེས་ལྟུང་བ་སྔ་མ་ཟླ་བ་ཕྱེད་བཅབས་པ་དང་། ལྟུང་བ་ཕྱི་མ་བཅབས་པའི་ཉེས་པ་གཉིས་ཀ་མེད་པར་འགྱུར་བར་ཤེས་པར་བྱའོ། །ལྟུང་བ་ཕྱི་མ་བཅབས་པའི་དུས་
ལྷག་མ་གནས་སྐབས་གང་ལ་སྲིད་ཅེ་ན། སྤོ་བ་སྤྱོད་བཞིན་པ་ཉིད་ན་ལྟུང་བ་སྔ་མ་དང་འདྲ་བ་བྱུང་ལ་དེའི་མོད་ལ་སྤོ་བ་སྤྱོད་པ་མཐར་ཐུག་པའི་དུས་དང་། དེ་བས་འཕྱི་བའི་དུས་གཞན་དུ་ཡང་ལྟུང་བ་བར་མ་མཐོལ་བའི་གནས་སྐབས་དང་། སྤོ་བའམ་གཞི་ནས་སྤོ་བ་བས་ལྟུང་བ་རིགས་
མཐུན་པ་བྱུང་ནས་འཐབ་ཀྲོལ་བྱེད་པ་འོང་བའི་ཚེ་ཕྱིར་སྤོ་བ་ལ་སོགས་པ་བཏང་སྟེ། ཡང་ཕྱིར་ལེན་པ་དེས་བཏང་བའི་གནས་སྐབས་སུ་ལྟུང་བ་བར་མ་དང་ཕྱི་མ་མ་མཐོལ་བར་བཅབས་པའི་དུས་ཆེས་རིང་དུ་སྒྲུབ་པའི་གནས་སྐབས་ལ་སྲིད་དོ། །སྤོ་བ་སྦྱིན་པ་དང་། གཞི་ནས་སྤོ་བ་
སྦྱིན་པ་དང་། ཡང་གཞི་ནས་བསླང་སྟེ་སྤོ་བ་སྦྱིན་པའི་མུ་འདི་གསུམ་ལ་བཅབས་པའི་དུས་ངེས་པར་མི་ཤེས་པ་དང་། ལྟུང་བའི་གྲངས་ངེས་པར་མི་ཤེས་པ་དང་། ལྟུང་བ་མང་པོ་བྱུང་བ་ལ་སྤོ་བ་ལ་སོགས་པ་སྦྱིན་པའི་ཆོ་ག་དང་སྔགས་ནི་འདི་ལྟར་བྱ་སྟེ། བཅབས་པའི་དུས་ངེས་པར་མི་
ཤེས་ན་བཅབས་པའི་ཕྱིར་ནི་དུས་དཔག་ཏུ་མེད་པ་ལ་བརྟེན་པར་བྱ། སྤོ་བ་སྤྱད་པའི་ཕྱིར་ནི་དག་པའི་མཐའ་ཅན་ཟླ་བ་བཞི་ལ་སོགས་པ་ལ་བརྟེན་པར་བྱ་སྟེ། དེས་ན་སྤོ་བ་ལ་སོགས་པ་གསོལ་བ་དང་། སྦྱིན་པ་དང་། བརྗོད་པ་དང་གཏོང་བ་དང་ལེན་པའི་སྔགས་ཀྱི་ཚིག་ལ་འདི་སྐད་ཅེས་

དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་བྱུང་བ་དཔག་ཏུ་མ་མཆིས་པར་བཅབས་པས་བདག་དགེ་སློང་མིང་འདི་ཞེས་བགྱི་བ་ལ་ཆེ་གེ་མོ་ལས་བྱུང་བའི་དགེ་འདུན་
ལྷག་མའི་ལྟུང་བ་བྱུང་ལ། དཔག་ཏུ་མ་མཆིས་པར་བཅབས་པ་དེའི་སླད་དུ་དགེ་འདུན་ལས་དག་པའི་མཐའ་ཅན་ཟླ་བ་བཞི་སྤོ་བ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་དགེ་སློང་མིང་འདི་ཞེས་བགྱི་བ་ལ་ཆེ་གེ་མོ་ལས་བྱུང་བའི་
དགེ་འདུན་ལྷག་མའི་ལྟུང་བ་བྱུང་བ་དཔག་ཏུ་མ་མཆིས་པར་བཅབས་པ་དེའི་སླད་དུ་དག་པའི་མཐའ་ཅན་ཟླ་བ་བཞི་སྤོ་བ་སྩལ་དུ་གསོལ་ཞེས་བརྗོད་པར་བྱའོ། །དེ་ལ་བཅབས་པའི་དུས་ངེས་པར་མི་ཤེས་པའི་ཕྱིར་དཔག་ཏུ་མེད་པར་བཅབས་ཞེས་སྨོས་པས་ནི་བཅབས་པའི་དུས་ཉུང་ངུར་
མི་འགྱུར་རོ། །སྤོ་བ་སྤྱོད་པའི་ཕྱིར་དག་པའི་མཐའ་ཅན་ཟླ་བ་བཞི་སྨོས་པས་ནི་སྤྱད་པའི་དུས་ཉུང་ངུར་མི་འགྱུར་ཏེ། དགེ་བའི་མཐའ་ཅན་ཞེས་བྱ་བ་ནི་སྔོན་ལྟུང་བ་མ་བྱུང་བ་དག་པའི་མཐའ་གང་ཡིན་པ་རང་གིས་དྲན་པ་ཚུན་ཆད་ནས་ལྟུང་བ་མཐོལ་བའི་བར་རོ། །ཟླ་བ་བཞི་ཞེས་བྱ་བ་ནི་
མཚོན་པ་སྟེ། ཟླ་བ་ཕྱེད་དམ་གཅིག་གམ་གཉིས་སམ་གསུམ་མམ་བཞིའམ་ལྔ་ལ་སོགས་པ་དང་པོ་དག་པའི་མཐའ་ནས་བཟུང་སྟེ། ཇི་ཙམ་གྱིས་ན་བཅབས་པའི་དུས་མི་དྲན་པ་དེ་ཉུང་བ་ཉིད་དུ་མི་འགྱུར་བ་དེ་ཙམ་གྱི་དུས་ལ་བརྟེན་ན་སྤོ་བ་སྤྱོད་པའི་དུས་ཚང་བར་འགྱུར་རོ། །ལྟུང་བའི་
གྲངས་ངེས་པར་མི་ཤེས་ན་ལྟུང་བའི་ཕྱིར་ཡང་དཔག་ཏུ་མེད་པ་ལ་བརྟེན་པར་བྱ། བཅབས་པའི་དུས་ངེས་པར་ཤེས་ན་ནི་སྤོ་བ་སྤྱད་པའི་ཕྱིར་ནི་དུས་ཟླ་བ་ཕྱེད་ལ་སོགས་པ་ངེས་པ་ལ་བརྟེན་པར་བྱ། བཅབས་པའི་དུས་ཀྱང་ངེས་པར་མ་ཤེས་ན་ནི་དཔག་ཏུ་མེད་པ་དང་དག་པའི་མཐའ་ཅན་ཟླ་
བ་བཞི་ལ་བརྟེན་པར་བྱ་སྟེ། དེས་ན་སྤོ་བ་ལ་སོགས་པ་གསོལ་བ་དང་། སྦྱིན་པ་དང་བརྗོད་པ་དང་། གཏོང་བ་དང་ལེན་པའི་སྔགས་ཀྱི་ཚིག་འདི་སྐད་ཅེས། དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ཆེ་གེ་མོ་ལས་བྱུང་བའི་དགེ་འདུན་

ལྷག་མའི་ལྟུང་བ་དཔག་ཏུ་མ་མཆིས་པ་བྱུང་ལ། ཟླ་བ་ཕྱེད་དང་དཔག་ཏུ་མ་མཆིས་པར་བཅབས་པས། བདག་དགེ་སློང་མིང་འདི་ཞེས་བགྱི་བ་ལ་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ལྟུང་བ་དཔག་ཏུ་མ་མཆིས་པ་བྱུང་ལ་ཟླ་བ་ཕྱེད་དམ་དཔག་ཏུ་མ་མཆིས་པ་བཅབས་པ་དེའི་
སླད་དུ་དགེ་འདུན་ལས་ཟླ་བ་ཕྱེད་དམ་དག་པའི་མཐའ་ཅན་ཟླ་བ་བཞི་སྤོ་བ་གསོལ་ན་ཞེས་བརྗོད་པར་བྱའོ། །དེ་ལ་ལྟུང་བའི་གྲངས་ངེས་པར་མི་ཤེས་པའི་ཕྱིར། དཔག་ཏུ་མེད་པ་བྱུང་ལ་ཞེས་སྨོས་པས་ནི་ལྟུང་བ་བཅབས་པ་ཉུང་ངུར་མི་འགྱུར་རོ། །བཅབས་པའི་དུས་ངེས་པར་ཤེས་པའི་
ཕྱིར་ཟླ་བ་ཕྱེད་ལ་སོགས་པ་སློབ་པས་ནི་སྤོ་བ་ཟླ་བ་ཕྱེད་ལ་སོགས་པའི་དུས་ཉུང་ངུར་མི་འགྱུར་རོ། །བཅབས་པའི་དུས་ངེས་པར་མི་ཤེས་པའི་ཕྱིར་དཔག་ཏུ་མེད་པར་བཅབས་པས་ཞེས་སྨོས་པས་ནི་སྤོ་བ་དག་པའི་མཐའ་ཅན་ཟླ་བ་བཞི་ལ་སོགས་པ་ལས་ཉུང་ངུར་མི་འགྱུར་རོ། །ལྟུང་བ་མང་
པོ་བྱུང་ན་ལྟུང་བའི་ཕྱིར་ནི་ཚད་ཤིན་ཏུ་མང་པོ་དང་ལྡན་པ་ཞེས་བྱ་བ་ལ་བརྟེན་པར་བྱ། བཅབས་པའི་དུས་ངེས་པར་ཤེས་པ་དང་། མི་ཤེས་པའི་ཕྱིར་ནི་སྔ་མ་བཞིན་ཏེ། ཤེས་ན་ཟླ་བ་ཕྱེད་ལ་སོགས་པ་ལ་བརྟེན་པར་བྱ། མི་ཤེས་ན་ནི་དཔག་ཏུ་མེད་པ་དང་དག་པའི་མཐའ་ཅན་ཟླ་བ་བཞི་ལ་
སོགས་པ་ལ་བརྟེན་པར་བྱའོ། །ལྟུང་བ་གྲངས་མང་པོ་འདི་ལ་ནི་བཅབས་པའི་དུས་ནི་ལྟུང་བ་བཅབས་པའི་དུས་ཐ་དད་པ་རྣམས་ལས་གང་གི་དུས་ཡུན་རིང་བར་གཞི་གཟུང་ངོ་། །གང་དག་གང་བྱུང་བའི་རིགས་རྣམས་ཀྱི་མིང་ནི་སྩོགས་པ་ཞེས་བྱ་བས་མགོ་དྲང་ངོ་། །དེ་བས་ནི་སྤོ་བ་ལ་
སོགས་པ་གསོལ་བ་དང་། སྦྱིན་པ་དང་། བརྗོད་པ་དང་། གཏོང་བ་དང་། ལེན་པའི་སྔགས་ཀྱི་ཚིག་ལ་འདི་སྐད་ཅེས་དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་མིང་འདི་ཞེས་བགྱི་བ་ལ་བསམས་བཞིན་དུ་ཁུ་བ་ཕྱུང་བའི་དགེ་འདུན་ལྷག་མའི་ལྟུང་བ་ལ་སོགས་པ་
ལུས་ཀྱིས་རེག་པ་ལས་བྱུང་བའི་དགེ་འདུན་ལྷག་མའི་ལྟུང་བ་དང་། འཁྲིག་པ་དང་ལྡན་པ་སྨྲ་བ་ལས་བྱུང་བའི་དགེ་འདུན་ལྷག་མའི་ལྟུང་བ་དང་། བསྙེན་བཀུར་བསྔགས་པ་ལས་བྱུང་བའི་དགེ་འདུན་ལྷག་མའི་ལྟུང་བ་དང་། སྨྱན་བགྱིད་པ་ལས་བྱུང་བའི་དགེ་འདུན་ལྷག་མའི་ལྟུང་བ་ཚད་

ཤིན་ཏུ་མང་པོ་དང་ལྡན་པ་བྱུང་ལ་ཟླ་བ་ཕྱེད་དམ་དཔག་ཏུ་མ་མཆིས་པར་བཅབས་པས་བདག་དགེ་སློང་མིང་འདི་ཞེས་བགྱི་བ་ལ་བསམས་བཞིན་དུ་ཁུ་བ་ཕྱུང་བའི་དགེ་འདུན་ལྷག་མ་ལ་སོགས་པ་ལུས་ཀྱིས་རེག་པ་ལས་བྱུང་བའི་དགེ་འདུན་ལྷག་མའི་ལྟུང་བ་དང་། འཁྲིག་
པ་དང་ལྡན་པ་སྨྲ་བ་ལས་བྱུང་བའི་དགེ་འདུན་ལྷག་མའི་ལྟུང་བ་དང་བསྙེན་བཀུར་བསྔགས་པ་ལས་བྱུང་བའི་དགེ་འདུན་ལྷག་མའི་ལྟུང་བ་དང་། སྨྱན་བགྱིད་པ་ལས་བྱུང་བའི་དགེ་འདུན་ལྷག་མའི་ལྟུང་བ་ཚད་ཤིན་ཏུ་མང་པོ་དང་ལྡན་པ་བྱུང་བ་ལ་ཟླ་བ་ཕྱེད་དམ་དཔག་ཏུ་མ་མཆིས་པར་བཅབས་
པ་དེའི་སླད་དུ་དགེ་འདུན་ལས་ཟླ་བ་ཕྱེད་དམ། དག་པའི་མཐའ་ཅན་ཟླ་བ་བཞི་སྤོ་བ་གསོལ་ན་ཞེས་བརྗོད་པར་བྱའོ། །དེ་ལྟར་ལྟུང་བ་མང་པོའི་ཕྱིར་ཚད་ཤིན་ཏུ་མང་པོ་དང་ལྡན་པ་ཞེས་སྨོས་པས་ནི་གྲངས་ཉུང་ངུར་བཅབས་པར་མི་འགྱུར་རོ། །བཅབས་པའི་དུས་ངེས་པར་ཤེས་པའི་ཕྱིར་ཟླ་བ་
ཕྱེད་ལ་སོགས་པ་སྨོས་པས་ནི་སྤོ་བ་ཟླ་བ་ཕྱེད་ལ་སོགས་པའི་དུས་ལས་ཉུང་ངུར་མི་འགྱུར་རོ། །བཅབས་པའི་དུས་ངེས་པར་མི་ཤེས་པའི་ཕྱིར་དཔག་ཏུ་མེད་པར་བཅབས་པས་ཤེས་ཞེས་སྨོས་པས་ནི་སྤོ་བ་དག་པའི་མཐའ་ཅན་ཟླ་བ་བཞི་ལ་སོགས་པ་ལས་ཉུང་ངུར་མི་འགྱུར་རོ། །བཅབས་པའི་
དུས་གང་ཡུན་རིང་བས་གཞི་གཟུང་བས་ནི་གཞན་དག་གི་བཅབས་པའི་དུས་ཐུང་ངུ་རྣམས་མ་ལུས་པར་འགྱུར་རོ། །སོགས་པ་ཞེས་སྨོས་པས་ནི་ལྷག་མ་རྣམས་དེའི་ཁོངས་སུ་འདུ་བར་འགྱུར་རོ། །གོ་རིམས་གང་ལྕི་བ་དང་། བསམ་པ་དྲག་པོས་བྱས་པ་དང་པོར་སྨོས་པས་ན་ཉེས་པ་ཆེ་རིམས་
ཀྱིས་སྦྱང་བ་བསྟན་པར་འགྱུར་བས་དེའི་ཕྱིར་ལྟུང་བ་གྲངས་མང་པོ་དེ་དག་གི་གོ་རིམས་ཀྱང་སྔར་ལྟུང་བ་གང་བྱུང་བ་དེའི་མིང་དང་པོར་སྨོས་པར་མི་བྱ་བར་ལྕི་བ་དང་བསམ་པ་དྲག་པོས་བྱས་པ་ཉིད་དང་པོར་སྨོས་པར་བྱ་སྟེ། འདིར་གཞུང་ནི་ཞུ་བ་ལས། བཙུན་པ་དགེ་སློང་ལ་དགེ་འདུན་ལྷག་
མའི་ལྟུང་བ་བྱུང་ཞིང་བསམས་བཞིན་དུ་ཁུ་བ་ཕྱུང་བ་ལས་བྱུང་བའི་དགུང་གཅིག་བཅབས་ལ་རེག་པ་ལས་བྱུང་བ་ནི་དགུང་གཉིས་བཅབས་པ་ནས་བཀའ་བློ་མི་བདེ་བ་ལས་བྱུང་བ་དགུང་བཅུ་གསུམ་བཅབས་པའི་བར་དུ་བྱུང་ན། བཙུན་པ་ལྟུང་བ་དེ་དག་དུས་གཅིག་དང་སྐད་ཅིག་གཅིག་

ལ་ལས་བགྱིས་པ་གཅིག་གིས་སྤོ་བ་དང་། གཞི་ནས་སྤོ་བ་དང་། མགུ་བར་བགྱི་བ་དང་། གཞི་ནས་མགུ་བར་བགྱི་བ་སྩལ་ཞིང་དབྱུང་བར་བགྱི་བ་དང་། ལས་དེ་དག་ཀྱང་བགྱིས་པར་བརྗོད་པ་དང་། དེས་དགེ་འདུན་ལ་ཡང་འགལ་ཚབས་ཅན་དུ་མི་འགྱུར་བར་རུང་ངམ། ཉེ་བ་འཁོར་
རུང་སྟེ། བསམས་བཞིན་དུ་ཁུ་བ་ཕྱུང་བ་ལས་བྱུང་བ་ཞག་གཅིག་བཅབས་པའི་ལྟུང་བ་གང་ཡིན་པ་ནས། བཀའ་བློ་མི་བདེ་བ་ལས་བྱུང་བ་ཞག་བཅུ་གསུམ་བཅབས་པའི་བར་གྱི་ལྟུང་བ་གང་དག་ཡིན་པ་དེ་དག་ལས་དམ་པ་དང་རབ་ཏུ་དམ་པ་དང་། ལྕི་བ་དང་ཞག་མང་དུ་བཅབས་པ་གང་
ཡིན་པ་དེའི་ཕྱིར་སྤོ་བ་དང་། གཞི་ནས་སྤོ་བ་དང་། མགུ་བར་བྱ་བ་དང་། གཞི་ནས་མགུ་བར་བྱ་བ་སྦྱིན་ཞིང་དབྱུང་བར་བྱ་སྟེ། ལས་དེ་དག་ཀྱང་བྱས་པར་བརྗོད་པར་བྱས་ལ་དེས་དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ་ཞེས་གསུངས་པ་ཡིན་ནོ། །སྤོ་བ་སྤྱོད་པ་ལ་གཞི་ནས་
སྤོ་བ་དང་། ཡང་གཞི་ནས་བསླང་སྟེ་སྤོ་བ་བྱུང་བ་ཕྱིར་གསོ་བར་འདོད་པ་སྐྱེས་ན་ཐ་དད་པར་སྦྱིན་ཞིང་ཅིག་ཅར་སྤྱད་དུ་རུང་ངོ་། །མགུ་བར་བྱ་བ་སྤྱོད་པ་ལ་གཞི་ནས་མགུ་བར་བྱ་བ་དང་། ཡང་གཞི་ནས་བསླང་སྟེ་མགུ་བར་བྱ་བ་བྱུང་བའི་ཕྱིར་གསོལ་བར་འདོད་པ་སྐྱེས་ན་ཡང་ཐ་དད་པར་
སྦྱིན་ཞིང་ཅིག་ཅར་སྤྱད་དུ་རུང་ངོ་། །སྤོ་བ་དང་མགུ་བར་བྱ་བ་གཉིས་ནི་ཅིག་ཅར་སྦྱིན་ཞིང་ཅིག་ཅར་སྤྱད་དུ་མི་རུང་སྟེ། །མགུ་བར་བྱ་བ་ནི་སེམས་མགུ་བར་བྱ་བའི་ཕྱིར་ཡིན་ལ། སྤོ་བ་ནི་བཅབས་པའི་ཁ་ན་མ་ཐོ་བ་གཞོམ་པར་བྱ་བའི་ཕྱིར་ཡིན་པའི་ཕྱིར་རོ། །དེས་ན་དེ་གཉིས་ཅིག་ཅར་སྤྱད་
པ་མི་སྲིད་དེ། སྔར་བཅབས་པའི་ཕྱིར་སྤོ་བ་བྱེད་དུ་གཞུག་ཅིང་། དེའི་འོག་ཏུ་དབྱུང་བའི་ཕྱིར་མགུ་བར་བྱ་བ་བྱེད་དུ་གཞུག་གོ། །དགེ་འདུན་ལྷག་མ་ཕྱིར་བཅོས་པ་བཤད་ཟིན་ཏོ།། །།ད་ནི་དགེ་འདུན་ལྷག་མ་རྣམ་པར་གཞག་པ་བསྒྲག་པར་བྱ་བ་བཤད་པར་བྱ་སྟེ། དེའི་ཕྱིར་དེ་ལ་
བདག་གིས་ཚེ་དང་ལྡན་པ་དག་ལ་ཅི་འདི་ལ་ཁྱེད་ཡོངས་སུ་དག་གམ་ཞེས་དྲིའོ། །ཅི་འདི་ལ་ཁྱོད་ཡོངས་སུ་དག་གམ་ཞེས་ལན་གཉིས་ལན་གསུམ་དུ་དྲིའོ། །འདི་ལ་ཚེ་དང་ལྡན་པ་དག་ཡོངས་སུ་དག་ན་འདི་ལྟར་ཅང་མི་སྨྲ་བས་དེ་དེ་བཞིན་དུ་འཛིན་ཏོ་ཞེས་བྱ་བ་གསུངས་ཏེ། དེ་ལ་ཞེས་བྱ་བ་

ནི་དགེ་འདུན་ལྷག་མ་བཏོན་པ་དེ་ལའོ། །ཅི་ཞེས་བྱ་བ་ནི་ཡོངས་སུ་དྲི་བའོ། །འདི་ལ་ཞེས་བྱ་བ་ནི་གསོ་སྦྱོང་ལའོ། །ཁྱེད་ཅེས་བྱ་བ་ནི་ཁྱེད་ཅག་གོ། །ཡོངས་སུ་དག་གམ་ཞེས་བྱ་བ་ནི་ལྟུང་བ་མ་བྱུང་ངམ་ཞེས་བྱ་བའོ་ཞེས་ཞེས་བྱ་བ་ནི་དྲི་བ་སྤྱི་ལ་སྙེགས་སོ། །དྲིའོ་ཞེས་བྱ་བ་ནི་དྲི་བ་
དང་པོའོ། །ལན་གཉིས་ལན་གསུམ་དུ་དྲིའོ་ཞེས་བྱ་བ་ནི་ལན་གསུམ་ཁོ་ན་དྲི་བར་བྱ་དགོས་པས་ལན་གཉིས་ལན་གསུམ་དུ་ཞེས་བྱ་བ་སྨོས་ཏེ། ཉུང་ན་ཡང་ལ་ལས་མི་ཐོས་ལ། མང་ན་ཡང་དུས་ཡོལ་བ་ལ་སོགས་པའི་ཉེས་དམིགས་ཡོད་པས་དེའི་ཕྱིར་ལན་གསུམ་ནི་རན་པར་དགོངས་ཏེ། བཤགས་
པ་དང་། བྱིན་གྱིས་བརླབས་པ་གཉིས་ཀྱིས་ལྟུང་བ་མ་བཅབས་པ་ཤ་སྟག་ཚོགས་པ་ཡིན་ནམ་ཞེས་བྱ་བའི་ཐ་ཚིག་གོ། །ཅང་མི་སྨྲ་བས་བརྡ་བྱས་པས་དགེ་འདུན་ལྷག་མ་རྣམ་པར་གཞག་པ་བསྒྲག་པར་བྱ་བའི་མཇུག་བསྡུ་བ་བསྟན་པའི་ཕྱིར། འདི་ལ་ཚེ་དང་ལྡན་པ་དག་ཡོངས་སུ་དག་ན་འདི་
ལྟར་ཅང་མི་སྨྲ་བས་དེ་དེ་བཞིན་དུ་འཛིན་ཏོ་ཞེས་བྱ་བ་གསུངས་ཏེ། བཤགས་པ་དང་། བྱིན་གྱིས་བརླབས་པ་གཉིས་ཀྱིས་ལྟུང་བ་མ་བཅབས་པ་ཤ་སྟག་ཚོགས་པ་ཡིན་ནོ་ཞེས་བྱ་བའི་ཐ་ཚིག་གོ། །དགེ་འདུན་ལྷག་མ་གདོན་པ་བཤད་ཟིན་ཏོ།། །།ད་ནི་མ་ངེས་པ་གདོན་པ་བཤད་པར་བྱ་སྟེ།
དེའི་ཕྱིར་སྡོམ་ལ། དབེན་པ་སྐྱབས་ཡོད་འདུག་པའོ་ཞེས་བྱ་བ་གསུངས་སོ། །སྡོམ་ལ་ཞེས་བྱ་བའི་དགོས་པ་དང་ཚིག་གི་དོན་ནི་སྔ་མ་བཞིན་ནོ། །མ་ངེས་པ་ནི་རྣམ་པ་གཉིས་ཏེ། ཕམ་པར་འགྱུར་བ་དང་། དགེ་འདུན་ལྷག་མ་དང་། ལྟུང་བྱེད་ཀྱི་ཆོས་གསུམ་ལས་གང་ཡིན་མ་ངེས་པ་དང་།
དགེ་འདུན་ལྷག་མ་དང་། ལྟུང་བྱེད་ཀྱི་ཆོས་གཉིས་ལས་གང་ཡིན་མ་ངེས་པའོ། །དེ་གཉིས་ཀ་ཡང་སྡོམ་ལས། དབེན་པ་སྐྱབས་ཡོད་འདུག་པའོ་ཞེས་གསུངས་པ་འདིའི་ཁོངས་སུ་འདུས་ཏེ། དབེན་པ་སྐྱབས་ཡོད་པ་ནས་འདོད་པ་བྱར་རུང་བར་འགྱུར་ལ་འདུག་པ་ལས་ནི་མ་ངེས་པ་དང་པོར་
འགྱུར་ལ། དབེན་པ་སྐྱབས་ཡོད་པ་ན་འདོད་པ་བྱར་མི་རུང་བར་སྟན་ལ་འདུག་པ་ལས་ནི་མ་ངེས་པ་གཉིས་པར་འགྱུར་རོ། །འདི་གཉིས་ནི་གླེང་གཞིའི་དབང་གིས་དགེ་སློང་གིས་མ་ངེས་པའི་ཆོས་འདི་ལྟ་བུར་འགྱུར་བའི་གནས་སུ་འདུག་པར་མི་བྱའོ་ཞེས་བཅའ་བ་མཛད་པར་ཟད་ཀྱི།

ལྟུང་བ་རྣམ་པར་གཞག་པ་ལ་ནི་ཡང་ན་ཕམ་པར་འགྱུར། ཡང་ན་དགེ་འདུན་ལྷག་མར་འགྱུར། ཡང་ན་ལྟུང་བྱེད་དུ་འགྱུར་བར་ཅི་རིགས་པར་སྦྱར་ཏེ། ལྟུང་བ་སྡེ་ལྔར་གཞག་པ་ལ་ནི་མ་གཏོགས་སོ། །ཚེ་དང་ལྡན་པ་དག་མ་ངེས་པའི་ཆོས་གཉིས་པོ་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་
པའི་མདོ་འདོན་པ་ལས་འབྱུང་ངོ་ཞེས་བྱ་བས་ནི་མ་ངེས་པ་གདོན་པ་འདིའི་ལུང་དབོག་པ་བསྟན་ཏོ། །མ་ངེས་པའི་ཆོས་ཞེས་བྱ་བ་ནི་གང་ཡིན་གཏོལ་མེད་པས་མ་ངེས་པའོ། །དེ་ཉིད་ཁ་ན་མ་ཐོ་བའི་མཚན་ཉིད་འཛིན་པས་ཆོས་ཞེས་བྱའོ། །གཉིས་པོ་འདི་དག་ནི་ཞེས་བྱ་བ་ནི་ཕམ་པར་འགྱུར་བ་
དང་། དགེ་འདུན་ལྷག་མ་དང་། ལྟུང་བྱེད་ཀྱི་ཆོས་གསུམ་ལས་གང་ཡིན་མ་ངེས་པ་དང་། དགེ་འདུན་ལྷག་མ་དང་ལྟུང་བྱེད་ཀྱི་ཆོས་གཉིས་ལས་གང་ཡིན་མ་ངེས་པའོ། །ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་ལས་འབྱུང་ངོ་ཞེས་བྱ་བ་ནི་སྡེ་སྣོད་གསུམ་ལས་འདུལ་བའི་
སྡེ་སྣོད་ནི་ཡི་གེར་མི་འདྲི་བ་ཡིན་པས་ཐམས་ཅད་ཀྱི་མངོན་སུམ་དུ་མ་གྱུར་པའི་ཕྱིར་གསོ་སྦྱོང་འདོན་པས་མ་ངེས་པ་གདོན་པ་འདི་ག་ལས་ཤེས་སྙམ་པ་ལ་ཟླ་བ་ཕྱེད་ཕྱེད་ཅིང་གསོ་སྦྱོང་འདོན་པའི་ཚེ་འདུལ་བ་འཛིན་པའི་ཁ་ཏོན་ལས་འབྱུང་ངོ་ཞེས་བསྟན་པ་ཡིན་ནོ། །དེ་ལྟར་འདུལ་བའི་སྡེ་སྣོད་
ཡང་དག་པར་བསྡུས་པའི་གཞུང་འདི་ནི་མ་འོངས་པའི་སྐྱེ་བོ་དབང་པོ་རྟུལ་པོ་ཚིག་དང་དོན་གྱི་བདག་ཉིད་འཛིན་མི་ནུས་པ་རྣམས་ལ་ཕན་གདགས་པའི་ཕྱིར་བཅོམ་ལྡན་འདས་ཀྱིས་ཡང་དག་པར་བསྡུ་བར་གནང་བ་ཡིན་ཏེ། དེ་བས་ན་འདུལ་བའི་སྡེ་སྣོད་ཀྱི་ལས་གསང་བ་འདི་ནི་བསྙེན་པར་
མ་རྫོགས་པ་རྣམས་ཀྱིས་ཐོས་པར་མི་བྱའོ་ཞེས་སྔར་བསྟན་པ་བཞིན་འདིར་ཡང་སྦྱར་རོ། །དེ་ལ་མ་ངེས་པའི་ཆོས་དང་པོའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་འཆར་
ཀ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། མཉན་ཡོད་དུ་བསོད་སྙོམས་ལ་ཞུགས་ནས་མཐར་གྱིས་རྒྱུ་བ་ན་ཁྱིམ་བདག་གི་ཆུང་མ་སྦེད་མའི་ཁྱིམ་ག་ལ་བ་དེར་སོང་ངོ་། །ཁྱིམ་བདག་གི་ཆུང་མ་སྦེད་མས་ཚེ་དང་ལྡན་པ་འཆར་ཀ་རྒྱང་རིང་པོ་ཁོ་ན་ནས་མཐོང་སྟེ།

མཐོང་ནས་ཀྱང་ཚེ་དང་ལྡན་པ་འཆར་ཀའི་ཕྱིར་སྟན་ཤོམ་པར་བྱེད་ཅིང་འདི་སྐད་ཅེས་ཀྱང་སྨྲས་སོ། །བཙུན་པ་འཆར་ཀ་ཚུར་སྤྱོན། བཙུན་པ་འཆར་ཀ་བྱོན་པ་ལེགས་སོ། །བཙུན་པ་འཆར་ཀ་གདན་བཤམས་པ་ཉིད་ལ་བཞུགས་ཤིག །ཚེ་དང་ལྡན་པ་འཆར་ཀ་
སྟན་བཤམས་པ་དེ་ལ་འདུག་གོ། །དེ་ནས་ཁྱིམ་བདག་གི་ཆུང་མ་སྦེད་མས་ཚེ་དང་ལྡན་པ་འཆར་ཀའི་རྐང་པ་གཉིས་ལ་མགོ་བོས་ཕྱག་འཚལ་ཏེ། པུས་མོ་གཉིས་ལ་པུས་མོ་གཉིས་གཏད་དེ། ཆོས་མཉན་པའི་ཕྱིར་འདུག་གོ། །ཚེ་དང་ལྡན་པ་འཆར་ཀས་དེ་ལ་ཆོས་སྙན་པ་སྙན་པ་དག་
བསྟན་པར་བརྩམས་སོ། །དེའི་ཚེ་ན་རི་དགས་འཛིན་གྱི་མ་ས་ག་ཁྱིམ་དེའི་ཉེ་འཁོར་ན་འགྲོ་བས་ཁྱིམ་བདག་གི་ཆུང་མ་སྦེད་མའི་ཁྱིམ་ན་ཚེ་དང་ལྡན་པ་འཆར་ཀའི་སྐད་ཀྱི་གདངས་གྲག་པ་ཐོས་སོ། །ཐོས་ནས་ཀྱང་དེ་འདི་སྙམ་དུ་སེམས་ཏེ། ཀྱེ་མ་འཕགས་པ་འཆར་ཀ་སྐད་ཀྱི་གདངས་ཀྱིས་
ཁྱིམ་བདག་གི་ཆུང་མ་སྦེད་མ་ལ་སྦྲང་བུ་སྦྲང་རྩི་འབྱིན་པ་དང་འདྲ་བར་ཆོས་སྙན་པ་སྙན་པ་དག་སྟོན་པར་བྱེད་ཀྱི་བདག་ཀྱང་གཞན་ལ་བརྩམས་པའི་ཆོས་མཉན་པའི་ཕྱིར་དེར་འགྲོའོ་སྙམ་མོ། །དེ་ནས་རི་དགས་འཛིན་གྱི་མ་ས་ག་ཁྱིམ་བདག་གི་ཆུང་མ་སྦེད་མའི་ཁྱིམ་ག་ལ་བ་དེར་སོང་བ་དང་།
རི་དགས་འཛིན་གྱི་མ་ས་གས་ཁྱིམ་བདག་གི་ཆུང་མ་སྦེད་མ་ཚེ་དང་ལྡན་པ་འཆར་ཀའི་པུས་མོ་གཉིས་ལ་པུས་མོ་གཉིས་གཏད་དེ། ཆོས་མཉན་པའི་ཕྱིར་འདུག་པ་མཐོང་ངོ་། །མཐོང་ནས་ཀྱང་དེ་འདི་སྙམ་དུ་སེམས་ཏེ། གལ་ཏེ་ཁྱིམ་བདག་གམ་ཁྱིམ་བདག་གི་ཆུང་མའམ་ཁྱིམ་
བདག་གི་བུ་མོ་དད་པ་འགའ་ཞིག་གིས་འདི་མཐོང་བར་གྱུར་ན། འཕགས་པ་འཆར་ཀ་འདིས་ཁྱིམ་བདག་གི་ཆུང་མ་སྦེད་མ་དང་ལྷན་ཅིག་དབེན་པ་སྐྱབས་ཡོད་པར་དགེ་སྦྱོང་གི་ཚུལ་མ་ཡིན་པ་སྡིག་པའི་ལས་ཅུང་ཞིག་བྱས་སམ་བྱེད་པར་སེམས་སོ་སྙམ་དུ་གདོན་མི་ཟ་བར་མཐར་ཐུག་པར་འགྲོ་བར་
འགྱུར་བས་དེའི་ཕྱིར་འདི་ནི་བདག་གི་བྱ་བ་ཡིན་ནོ་སྙམ་ནས། དེ་ནས་རི་དགས་འཛིན་གྱི་མ་ས་ག་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་རི་

དགས་འཛིན་གྱི་མ་ས་གས་ཚེ་དང་ལྡན་པ་འཆར་ཀ་དང་ཁྱིམ་བདག་གི་ཆུང་མ་སྦེད་མའི་བྱུང་བའི་མཐའ་དེ་དག་རྒྱས་པར་གསོལ་ཏོ། །བཙུན་པ་དེའི་སླད་དུ་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་གང་གིས་འཕགས་པ་དག་བུད་མེད་ཀྱི་ཡུལ་དང་ལྷན་ཅིག་གཅིག་པུ་གཅིག་དང་དབེན་པ་སྐྱབས་
མཆིས་པ་ན་སྟན་ལ་མཆིས་པར་མི་འགྱུར་བར་འཕགས་པ་རྣམས་ལ་དྲན་པར་བགྱི་བ་ཅུང་ཞིག་བཅའ་བ་མཛད་ན་ལེགས་སོ་ཞེས་ཀྱང་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དེ། ཚེ་དང་ལྡན་པ་འཆར་ཀ་ལ་རྨས་
ནས་རྣམ་གྲངས་དུ་མར་སྨད་དེ། བསླབ་པ་བཅའ་བའི་ཕན་ཡོན་བཅུ་ཡང་དག་པར་གཟིགས་པས་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བུད་མེད་དང་ལྷན་ཅིག་གཅིག་པུ་གཅིག་དང་དབེན་པ་སྐྱབས་ཡོད་པ་ན་འདོད་པ་བྱར་རུང་བར་སྟན་
ལ་འདུག་པར་བྱེད་ཅིང་། དེ་ལ་གལ་ཏེ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཆོས་གསུམ་པོ་ཕམ་པར་འགྱུར་བའམ། དགེ་འདུན་ལྷག་མའམ། ལྟུང་བྱེད་ལས་ཆོས་གང་ཡང་རུང་བས་སྨྲས་པར་འགྱུར་ལ། །དགེ་སློང་གིས་འདུག་པར་ཁས་བླངས་ན། ཆོས་གསུམ་པོ་ཕམ་པར་
འགྱུར་བའམ། དགེ་འདུན་ལྷག་མའམ། ལྟུང་བྱེད་ལས་ཆོས་གང་ཡང་རུང་བས་བྱེད་དུ་གཞུག་ཅིང་། དགེ་སློང་དེ་ལ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཆོས་གང་དང་གང་གིས་སྨྲས་པར་གྱུར་པའི་ཆོས་དེ་དང་དེས་དགེ་སློང་དེ་བྱེད་དུ་གཞུག་སྟེ། དེ་ནི་མ་ངེས་པའི་ཆོས་སོ་
ཞེས་བཅའ་བ་མཛད་དེ། ཡུལ་ནི་མཉན་ཡོད། གང་ཟག་ནི་འཆར་ཀ །ཉོན་མོངས་པ་ནི་འདོད་ཆགས། ཉེས་པ་ནི་མ་ངེས་པའོ། །དེ་ལ་ཡང་དགེ་སློང་གང་ཞེས་བྱ་བ་ནི་འཆར་ཀའམ་གཞན་ཡང་དེ་ལྟ་བུ་གང་ཡིན་པའོ། །བུད་མེད་དང་ཞེས་བྱ་བ་ནི་བུད་མེད་དམ་གཞོན་ནུ་མ་མི་ཚངས་པར་
སྤྱོད་པ་འཁྲིག་པའི་ཆོས་བསྟེན་ནུས་པ་དང་ངོ་། །ལྷན་ཅིག་ཅེས་བྱ་བ་ནི་དེ་དང་ལྷན་ཅིག་གོ། །གཅིག་པུ་གཅིག་དང་ཞེས་བྱ་བ་ནི་དེ་དེ་དང་ངོ་། །དབེན་པ་ཞེས་བྱ་བ་ནི་གང་ན་སྐྱེས་པ་དང་། བུད་མེད་དང་མ་ནིང་གཞན་འགའ་ཡང་མེད་པའོ། །སྐྱབས་ཡོད་པ་ན་ཞེས་བྱ་བ་ནི་ལྔས་

བསྐྱབས་པ་སྟེ། རྩིག་པས་བསྐྱབས་པ་དང་། རིབ་མས་བསྐྱབས་པ་དང་། ཡོལ་བས་བསྐྱབས་པ་དང་། ཐིབས་པོས་བསྐྱབས་པ་དང་། མཚན་མོས་བསྐྱབས་པ་ནའོ། །འདོད་པ་བྱར་རུང་བར་ཞེས་བྱ་བ་ནི་བུད་མེད་མི་ཚངས་པར་སྤྱོད་པ་བྱར་རུང་བར་ཐག་ཉེ་བར་
རོ། །སྟན་ལ་ཞེས་བྱ་བ་ནི་ཁྲི་དང་ཁྲིའུ་ལ་སོགས་པ་ལའོ། །འདུག་པར་བྱེད་ཅིང་ཞེས་བྱ་བ་ནི་འདོམ་གང་གི་ནང་དུ་རྐུབ་ཚོས་འཇོག་པར་བྱེད་ཅིང་ངོ་། །དེ་ལ་གལ་ཏེ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཞེས་བྱ་བ་ལ། དེ་ལ་ཞེས་བྱ་བ་ནི་འཆར་ཀ་ལའོ། །དགེ་བསྙེན་མ་ཞེས་བྱ་བ་
ནི་རི་དགས་འཛིན་གྱི་མ་ས་གའོ། །ཡིད་ཆེས་པ་ཞེས་བྱ་བ་ནི་སངས་རྒྱས་ལ་མངོན་པར་དད་ཆོས་དང་དགེ་འདུན་ལ་མངོན་པར་དད་པ་དང་། སངས་རྒྱས་ལ་སྐྱབས