Luận tạng Tây Tạng (Tengyur) — Tập 78

མྱུར་དུ་འདོད་པ་བཞིན་དུ་མཐོང་བར་འགྱུར་གྱིས་གཞན་དུ་ནི་མ་ཡིན་ནོ། །དེ་ཡང་ཐམས་ཅད་གསང་བའི་རྒྱུད་ལས། འབྲས་བུ་རྒྱུས་ནི་རྒྱས་བཏབ་ཅིང་། །རྒྱུ་ཡང་འབྲས་བུས་རྒྱས་བཏབ་པར། །སྒོམ་གྱི་གཞན་ན་དངོས་གྲུབ་ནི། །
བསྐལ་པ་བྱེ་བར་འབྱུང་མི་འགྱུར། །ཞེས་གསུངས་པ་དང་། རྟོག་པ་ཀུན་ལས་བཏུས་པ་ལས་ཀྱང་། དག་པའི་སེམས་ནི་བཟུང་གྱུར་ནས། །རྡོ་རྗེའི་ལུས་ནི་རྣམ་བསྒོམས་པས། །བརྟན་ལུས་ཁོང་སྟོང་མ་ཡིན་པས། །རྡོ་རྗེའི་སྐུ་ནི་ངེས་ཐོབ་འགྱུར། །ཞེས་གསུངས་པ་དང་། བྱང་ཆུབ་ཀྱི་
སེམས་བཤད་པ་ལས། གང་གིས་སྟོང་ཉིད་མི་ཤེས་པ། །དེ་ཡིས་ཐར་པའི་སྐལ་ཅན་མིན། །རྨོངས་པ་དེ་ནི་འགྲོ་དྲུག་གི །སྲིད་པའི་བཙོན་ར་འདིར་འཁྱམ་འགྱུར། །ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་ལ་རྒྱ་ཆེ་བསྒོམས་པས་ནི་ཐ་མལ་པའི་འདུ་ཤེས་འགོག་པར་
འགྱུར་ཞིང་། རྣམ་པར་གྲོལ་བ་དང་རྗེས་སུ་མཐུན་པར་བྱིན་གྱིས་བརླབས་པ་ཡིན་ནོ། །དེ་ཡང་ཀུན་དུ་བཟང་པོ་སྒྲུབ་པའི་ཐབས་ལས། ཐ་མལ་རྣམ་རྟོག་རྒྱུན་ལས་གཞན་པ་ཡི། །སྲིད་པའི་སྡུག་བསྔལ་གཞན་དག་ཡོད་མ་ཡིན། །ཞེས་གསུངས་པ་དང་། དཔལ་གསང་བ་འདུས་པ་

ལས་ཀྱང་། སྐུ་གསུང་ཐུགས་ཀྱི་རྡོ་རྗེ་རྣམས། །ལུས་དང་ངག་སེམས་བསྒོམ་པ་ནི། །བྱང་ཆུབ་ཐམས་ཅད་ཐོབ་པའི་ཕྱིར། །ཡེ་ཤེས་རྡོ་རྗེ་དག་གིས་བྱ། །ཞེས་གསུངས་པ་དང་། ཡང་དེ་ཉིད་ལས། མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔར་ནི་རབ་ཏུ་
གྲགས། །རྡོ་རྗེ་སྐྱེ་མཆེད་ཉིད་དག་ནི། །བྱང་ཆུབ་སེམས་དཔའི་དཀྱིལ་འཁོར་མཆོག །ས་ནི་སྤྱན་ཞེས་བྱ་བར་གྲགས། །ཆུ་ཡི་ཁམས་ནི་མཱ་མ་ཀཱི། གོས་དཀར་མ་དང་སྒྲོལ་མ་ནི། །མེ་དང་རླུང་ཞེས་བྱ་བར་གྲགས། །གཟུགས་སྒྲ་ལ་སོགས་སྔགས་པ་ཡིས། །ལྷ་
ཉིད་དུ་ནི་རྣམ་པར་བསྒོམ། །ཞེས་གསུངས་པ་དང་། དཔལ་སངས་རྒྱས་ཐམས་ཅད་དང་མཉམ་པར་སྦྱོར་བ་ལས་ཀྱང་། བདག་ཉིད་སངས་རྒྱས་ཐམས་ཅད་དང་། །དཔའ་བོ་ཐམས་ཅད་བདག་ཡིན་ནོ། །དེ་བས་བདག་ཉིད་ལྷར་སྦྱོར་བས། །བདག་ཉིད་རབ་ཏུ་བསྒྲུབ་
པར་བྱ། །ཞེས་གསུངས་པ་དང་། དགྱེས་པའི་རྡོ་རྗེ་ལས་ཀྱང་། ཐ་མལ་རྣམ་རྟོག་གཉེན་པོའི་ཚུལ། །སངས་རྒྱས་སྐུར་ནི་ཡོངས་བརྟགས་པ། །ལྷ་ཡི་སྐུར་ནི་གོམས་བྱས་ན། །དེས་ནི་སྣ་ཚོགས་རྒྱ་ཆེན་འགྲུབ། །ཅེས་གསུངས་པ་དང་། དཔའ་བོ་གཅིག་ཏུ་གྲུབ་པ་
ལས་ཀྱང་། ལྷ་ཉིད་གསང་སྔགས་ཚུལ་དུ་ནི། །དངོས་གྲུབ་ཐམས་ཅད་སྩོལ་མཛད་པས། །སྔགས་པ་ལྷ་ཉིད་བསྒོམས་ནས་ནི། །དེ་གྲུབ་ན་ནི་དེ་འགྲུབ་འགྱུར། །རིམ་པ་འདི་ཡིས་འདི་ལ་ནི། །ས་ལ་སོགས་པ་འཐོབ་བོ་ཀྱེ། །ཞེས་གསུངས་པ་དང་། གཞན་ཡང་། རྡོ་རྗེ་
སེམས་དཔའ་ལ་སོགས་པ། །ལྷ་རྣམས་མངོན་དུ་མཐོང་བ་ལས། །བསོད་ནམས་རྟག་པ་ཇི་ལྟ་བ། །ཕྱིས་བྱས་པ་ཡང་དེ་བཞིན་ནོ། །ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་ལ་གུས་པས་སློབ་དཔོན་ལ་ཆགས་པར་བྱ་བ་ནི་སྐྱབས་གསུམ་ཡོངས་སུ་གཟུང་
བའི་རྩ་བ་ཡིན་ཏེ། དངོས་གྲུབ་ཐམས་ཅད་ནི་གནས་སྐབས་གསུམ་དུ། སློབ་དཔོན་ལ་རག་ལས་པར་གྱུར་པའི་ཕྱིར་རོ། །དེ་ཡང་ཡེ་ཤེས་གྲུབ་པ་ལས། བླ་མ་སངས་རྒྱས་ཆོས་གྱུར་ཅིང་། །དགེ་འདུན་ཡང་ནི་དེ་ཉིད་དེ། །འདི་ལ་དྲིན་གྱིས་ཤེས་གྱུར་པས། །དེ་བས་དཀོན་མཆོག་

གསུམ་ཡིན་ནོ། །ཞེས་གསུངས་པ་དང་། གཞན་ཡང་སྒྱུ་འཕྲུལ་དྲ་བ་ལས། །སློབ་དཔོན་ཅི་འདྲ་བར་ལྟ་ཞེ་ན། བླ་མ་སངས་རྒྱས་ཀུན་དང་མཉམ། །དེ་བས་རྟག་ཏུ་རྡོ་རྗེ་འཆང་། །དེ་བཞིན་གཤེགས་པ་རིན་ཆེན་ཏོག །དེ་ནི་ཡེ་ཤེས་རྒྱ་མཚོ་ཆེ། །ཡིད་བཞིན་
ནོར་བུ་རིན་ཆེན་སྦྱིན། །སློབ་དཔོན་གྱི་ནི་ཡོན་ཏན་བཟུང་། །སྐྱོན་རྣམས་ནམ་ཡང་མ་ཡིན་ནོ། །ཡོན་ཏན་གྱིས་ནི་དངོས་གྲུབ་ཅིང་། །སྐྱོན་རྣམས་ཀྱིས་ནི་དངོས་གྲུབ་ཉམས། །དེ་ཕྱིར་ཀུན་ནས་རབ་བསྒྲིམས་ཏེ། །བསམ་ཡས་འབྲས་བུ་སྨིན་བྱེད་པ། །སངས་རྒྱས་འབྲས་བུ་
འདོད་པ་ཡིས། །སེམས་ཅན་དད་པས་དེ་མཆོད་ཅིང་། །ཞེས་གསུངས་པ་དང་། གཞན་ཡང་རྒྱུད་ཐམས་ཅད་ཀྱི་དགོངས་པ་བསྡུས་པ་བླ་མ་ལྔ་བཅུ་པ་ལ་སོགས་པར་གསུངས་པ་ཡིན་ནོ། །དེ་ལ་སྙིང་རྗེས་སེམས་ཅན་ལ་ཆགས་པར་བྱ་བ་ནི་ཐེག་པ་ཆེན་པོའི་དོན་ལ་ཞུགས་པ་
རྣམས་ཀྱིས་ཐབས་ཀྱི་མཆོག་ཏུ་གསུངས་པ་ཡིན་ནོ། །དེ་ཡང་མངོན་པར་བྱང་ཆུབ་པ་ལས་སྙིང་རྗེ་ནི་རྩ་བ་ཡིན་ནོ་ཞེས་གསུངས་པ་དང་། གསང་བ་འདུས་པའི་རྒྱུད་ཕྱི་མ་ལས། ཐབས་ནི་བྱང་ཆུབ་སེམས་དཔའ་ཡི། །འགྲོ་ལ་སྙིང་རྗེ་ཆེན་པོ་སྟེ། །དེ་ཡང་དམིགས་པའི་བྱེ་བྲག་གིས། །
རྣམ་པ་གསུམ་དུ་བཤད་པ་ཡིན། །ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་ལྟར་བཅོམ་ལྡན་འདས་ཀྱི་གསུང་ཐམས་ཅད་ནི་གདུལ་བྱའི་དབང་པོ་མོས་པ་དང་སྐལ་བ་ཐ་དད་པ་ལ་དགོངས་ནས་ཐུགས་རྗེ་ཆེན་པོས་གསུངས་པ་ཡིན་ནོ། །དེ་ཡང་ཇི་སྐད་དུ། བསམ་པ་གང་དང་གང་གིས་
ནི། །མི་རྣམས་ཡིད་ནི་ཡང་དག་སྦྱོར། །དེས་ནི་དེ་ཡི་རང་བཞིན་འགྱུར། །སྣ་ཚོགས་ནོར་བུ་ཇི་བཞིན་ནོ། །ཞེས་གསུངས་པ་ལྟ་བུའོ། །དེ་ལ་དབང་པོ་དམན་པའི་དོན་དུ་ནི་མངོན་པར་མཐོ་བའི་ཐེག་པ་དང་ཉན་ཐོས་དང་རང་སངས་རྒྱས་ཀྱི་སྡེ་སྣོད་གསུངས་པ་ཡིན་ནོ། །དེ་ཡང་། ཉན་ཐོས་རྣམས་ནི་
འཇུག་པའི་ཕྱིར། །སྡུག་བསྔལ་སྩོགས་བདེན་ཉིད་གསུངས་པ། །མེད་དུ་ཟིན་ཀྱང་ཐུགས་རྗེ་ཡིས། །བདག་ཡོད་ཅེས་གསུངས་ལྟ་བུ་ཡིན། །ཞེས་གསུངས་པ་ཡིན་ནོ། །དབང་པོ་འབྲིང་གི་དོན་དུ་ཕ་རོལ་ཏུ་ཕྱིན་པའི་ཐེག་པའི་སྡེ་སྣོད་གསུངས་པ་ཡིན་ནོ། །དེ་ཡང་ཇི་སྐད་དུ། ཐུབ་པ་ཆེན་

པོའི་ཆོས་རྣམས་ཀྱི། །ཕུང་པོ་བརྒྱད་ཁྲི་བཞི་སྟོང་ལ། །གང་གིས་དེ་ཉིད་མི་ཤེས་པ། །དེ་ཡི་ཐམས་ཅད་འབྲས་བུ་མེད། །ཅེས་གསུངས་པ་ལྟ་བུའོ། །དེ་ལ་དབང་པོ་རྣོན་པོའི་མོས་པ་དང་སྐལ་བ་དང་ལྡན་པ་རྣམས་ཀྱི་ཕྱིར་ནི་གསང་སྔགས་ཀྱི་ཐེག་པའི་སྡེ་སྣོད་གསུངས་པ་ཡིན་ནོ། །
དེ་ཡང་བྱ་བའི་རྒྱུད་ལ་སོགས་པ་དང་པོ་གསུམ་གྱིས་རྣལ་འབྱོར་པའི་སེམས་སྦྱངས་ཤིང་དེ་ཁོ་ན་མཐོང་བར་འགྱུར་བ་དང་འབྲེལ་པའི་ཚོགས་ཡོངས་སུ་བསགས་ནས་གོང་ནས་གོང་དུ་ལམ་སྦྱངས་ཏེ། རྣལ་འབྱོར་བླ་ན་མེད་པའི་རིམ་པས་དེ་ཁོ་ནའི་དོན་ལ་འཇུག་པར་འགྱུར་བ་ཡིན་ནོ། །དེ་
ཡང་ཇི་སྐད་དུ། ཡུལ་དུས་ལ་སོགས་བསྟན་པ་ནི། །མུན་དུ་བསྒྲིབས་པ་རྣམ་འཁོད་པས། །དེ་དག་ངེས་པར་གཟུང་བའི་ཕྱིར། །ཆོ་ག་འདི་ནི་བསྟན་པ་ཡིན། །ཞེས་བསྟན་པ་ཡིན་ནོ། །དེ་ལ་རྣལ་འབྱོར་བླ་ན་མེད་པའི་རྒྱུད་ཀྱི་རིམ་པའི་སྨིན་པ་དང་། གྲོལ་བར་བྱེད་པའི་ལམ་གྱིས་ནི་
དཀའ་བ་མེད་པར་མྱུར་དུ་འབྲས་བུ་འདོད་པ་བཞིན་འགྲུབ་པར་འགྱུར་རོ། །དེ་ཉིད་ཚིགས་སུ་བཅད་པ་ནི། །རིགས་དང་བརྟུལ་ཞུགས་སྐྱེ་གནས་ཡན་ལག་རིས། །ལས་དང་ཉོན་མོངས་ཡུལ་དུས་འཆིང་བ་མེད། །ཅེས་བྱ་བ་ཡིན་ནོ། །དེ་ཡང་དཔལ་གསང་བ་འདུས་པ་ལས། མཚམས་
མེད་པ་ལ་སོགས་པ་ཡི། །སྡིག་པ་ཆེན་པོ་བྱེད་པ་ཡང་། །ཐེག་པ་བླ་ན་མེད་པ་ཡི། །ཐེག་མཆོག་འདི་ལ་འགྲུབ་པར་འགྱུར། །ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་ལྟ་བས་ན་རྣལ་འབྱོར་པ་སྣོད་དུ་གྱུར་ཅིང་དེ་ཁོ་ན་ཉིད་ཀྱི་མན་ངག་དང་ལྡན་པ་རྣམས་ལ་ནི་རིག་པའི་གནས་
ལྔ་ལ་ཡོངས་སུ་སྦྱང་བ་མ་བྱས་ཀྱང་དངོས་གྲུབ་རྣམ་པ་གཉིས་ཇི་ལྟར་འདོད་པ་བཞིན་དུ་འབྱུང་བར་འགྱུར་རོ། །དེ་ཡང་ཇི་སྐད་དུ། གསང་སྔགས་སྨྲ་རྣམས་མང་དུ་ནི། །སྤྲོས་ཏེ་སྨྲ་བས་ཅི་ཞིག་བྱ། །ཁྱད་པར་དུ་ནི་སེམས་བསྒྲུབས་ཏེ། །སེམས་ལས་རྫོགས་པའི་བྱང་ཆུབ་འབྱུང་། །ཞེས་
གསུངས་པ་དང་། གཞན་ཡང་། གང་ཟག་ཇི་ཙམ་ཡོན་ཏན་ཆུང་བས་ཀྱང་། །ལྷག་པའི་བསམ་པས་བསྐུལ་ནས་བྱང་ཆུབ་འཐོབ། །ཅེས་གསུངས་པ་དང་། ཉལ་ལམ་ཡང་ན་འདུག་པའམ། །འཆག་པའམ་ཡང་ན་ཅི་དགར་གནས། །དགོད་པའམ་རབ་ཏུ་སྨྲ་བའམ། །གང་དང་

གང་དུ་ཇི་ལྟར་གནས། །རང་ལྷར་སྦྱོར་བའི་བདག་ཉིད་ཅན། །བསོད་ནམས་ཆུང་ཡང་འགྲུབ་པར་འགྱུར། །ཞེས་གསུངས་པ་དང་། བསོད་ནམས་ཆུང་བའང་སངས་རྒྱས་མཆོད། །བསྒྲུབས་ན་དངོས་གྲུབ་ཐོབ་པར་འགྱུར། །ཞེས་གསུངས་པ་ཡིན་ནོ། །ཀྱེ་མའོ། །
བདེ་བར་གཤེགས་པ་མྱ་ངན་འདས་ནས་རིང་ཞིག་ལོན། །རྒྱལ་སྲས་དམ་ཆོས་འཛིན་པ་རྣམས་ཀྱང་དུས་ཀྱིས་མི་སྣང་འགྱུར། །སྙིགས་མའི་དུས་ཀྱི་ཐ་མར་གྱུར་པས་སྡེ་སྣོད་ཕལ་ཆེར་ནུབ། །དེས་ན་དམན་པའི་འཇིག་རྟེན་འདི་ནི་སྐྱབས་མེད་དམུས་ལོང་བཞིན། །དམྱལ་བ་ལྟ་བུར་
སྡུག་བསྔལ་གྱུར་ཀྱང་འཁྲུལ་པས་བདེ་བར་འཛིན། །ཡི་དགས་ལྟ་བུར་འབྱོར་པས་ཕོངས་ཀྱང་ཕུན་སུམ་ཚོགས་པར་སེམས། །དུད་འགྲོ་ལྟ་བུར་རྨོངས་པར་གྱུར་ཀྱང་བློ་ཡིས་མངོན་པར་དྲེགས། །ལུས་སྲོག་རླུང་བཞིན་གཡོ་བར་མཐོང་ཡང་འཆི་བའི་འཇིགས་པ་མེད། །དེ་ལྟར་བསྟན་
པ་ཉམ་ཆུང་འཁྲུལ་ཞིང་མི་ལུས་ཐོབ་པའི་ཚེ། །དཀའ་བའི་དུས་སུ་ཕྲད་པས་བསྒྲུབས་ན་འབྲས་བུ་མཆོག་ཏུ་འགྱུར། །འགྲོ་ཀུན་བདེ་གཤེགས་སྙིང་པོ་ཡོད་པས་བདག་གཞན་ཕན་པའི་ཕྱིར། །དོན་ལ་བརྟེན་ནས་དུས་དང་སྦྱར་ཏེ་སྒྲུབ་ལ་བརྩོན་པར་བྱའོ། །ཟབ་ཅིང་རྒྱ་ཆེའི་རང་བཞིན་
ཐེག་པ་མཆོག་དོན་ལ། །མོས་པ་ཡོད་ཀྱང་རྨོངས་སྡིག་མི་དགེའི་གྲོགས་བཅས་ཀྱིས། །སྤང་དང་བླང་བའི་རང་བཞིན་མངོན་པར་མི་རྟོགས་པས། །དང་པོའི་ལས་ཅན་རྣམས་ལ་རྣམ་བསྡུས་དོན་དུ་འགྱུར། །གང་དག་དབང་པོ་དམན་ཞིང་ཐོས་པས་ཕོངས་པ་དང་། །རྣལ་འབྱོར་དོན་
ལ་བརྩོན་པས་རྒྱས་བཤད་ཡུལ་མིན་དང་། །མི་ཤེས་ལོག་པར་རྟོག་དང་ཐེ་ཚོམ་བཟློག་པའི་ཕྱིར། །མདོར་བསྡུས་འདི་ནི་བདག་གིས་དྲི་མེད་ལུང་བཞིན་བྲིས། །རྣལ་འབྱོར་བླ་ན་མེད་པའི་རྒྱུད་ཀྱི་དོན་ལ་འཇུག་པ་བསྡུས་པ་སློབ་དཔོན་ཤྲདྡྷཱ་ཀ་ར་ཝརྨས་མཛད་པ་རྫོགས་སོ།། །།
རྒྱ་གར་གྱི་མཁན་པོ་ཤྲདྡྷཱ་ཀ་ར་ཝརྨ་དང་། ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་བའོ།། ༄༅༅།།རྡོ་རྗེ་ཐེག་པའི་མཐའ་གཉིས་སེལ་བ་བཞུགས། ༄༅༅། །སངས་རྒྱས་ལ་ཕྱག་འཚལ་ལོ། །ཐེག་མཆོག་རྡོ་རྗེའི་ཐེག་པ་ལ། །སྒྲོ་འདོགས་པ་དང་སྐུར་པ་ཡི། །མཐའ་

གཉིས་རྣམ་པར་སྤང་བའི་ཕྱིར། །གསང་བའི་གྲུབ་མཐའ་དབྱེ་བར་བྱ། །དང་པོར་རེ་ཞིག་ལུང་གི་གསང་སྔགས་ཀྱི་ཐེག་པ་ཐུབ་པའི་བཀའ་ཉིད་དུ་བསྟན་ཏེ། འཕགས་པ་ཡོངས་སུ་མྱ་ངན་ལས་འདས་པ་ལས། བསྟན་བཅོས་སམ་རིག་སྔགས་སམ། གསང་སྔགས་གང་ཅི་ཡང་
རུང་བ་དེ་དག་ཐམས་ཅད་ནི་རྫོགས་པའི་སངས་རྒྱས་ཀྱིས་གསུངས་པ་ཡིན་པར་ཤེས་པར་གྱིས་ཤིག་ཅེས་གསུངས་སོ། །ཡང་འཕགས་པ་གསང་བ་ལུང་བསྟན་པའི་མདོ་ལས། རྒྱུ་ལ་སྦྱོར་བ་རྒྱུ་ཡི་ཆོས། །འཁོར་ལོ་ཤིན་ཏུ་བསྐོར་བྱས་ནས། །འབྲས་བུའི་ཐེག་པ་ཉེ་
ལམ་ཞིག །མ་འོངས་པ་ན་འབྱུང་བར་འགྱུར། །ཞེས་བྱ་བ་ལ་སོགས་པ་གསུངས་སོ། །དེ་བཞིན་དུ་འཕགས་པ་ལྷག་པའི་བསམ་པ་བསྐུལ་བའི་མདོ་ལས་ཀྱང་། བྱང་ཆུབ་སེམས་དཔའ་དྲུག་ཅུ་མ་འོངས་པའི་དུས་ན་བསྟན་དང་གསང་སྔགས་ལ་མཁས་པ་འབྱུང་བར་
འགྱུར་བར་ལུང་བསྟན་ཏེ། དེ་བས་ན་ཐུན་མོང་གི་ལུང་ཉིད་ལས་གསང་སྔགས་ཀྱི་ཐེག་པ་སངས་རྒྱས་ཀྱི་བཀའ་ཉིད་དུ་གྲུབ་བོ། །རིགས་པས་ཀྱང་གྲུབ་སྟེ། བདེན་པ་རྣམ་པ་གཉིས་ལ་གནས་ཤིང་བདག་དང་གཞན་གྱི་དོན་བསྒྲུབ་པའི་ཕྱིར་རོ། །ད་ནི་གསང་སྔགས་ཀྱི་ཆེ་བ་ཉིད་
བརྗོད་པའི་མཚན་བསྟན་ཏེ། དབྱེར་མེད་པ་དང་། འབྲས་བུ་ཉིད་ལམ་དུ་གྱུར་པ་དང་། ཐབས་ཀྱི་ཆེ་བ་ཉིད་དང་། ཤིན་ཏུ་གསང་བར་བྱ་བའི་ཕྱིར་རྡོ་རྗེའི་ཐེག་པ་དང་། འབྲས་བུའི་ཐེག་པ་དང་། ཐབས་ཀྱི་ཐེག་པ་དང་། གསང་བའི་ཐེག་པ་ཞེས་བྱའོ། །དེ་དག་ཀྱང་ཐབས་ཀྱི་
ཐེག་པ་ཉིད་ལས་བྱུང་བའོ། །ད་ནི་ཐབས་ཀྱི་ཆེ་བ་ཞེས་བྱ་བ་དེ་ཉིད་ལ་བསྟན་ཏེ། གསང་སྔགས་ཀྱི་ཐེག་པ་འདི་ཕ་རོལ་ཏུ་ཕྱིན་པའི་ཐེག་པ་ཆེན་པོ་དབུ་མ་ལས་ཀྱང་ཁྱད་པར་ཅི་ཡོད་པ་བསྟན་ཏེ། དམིགས་པ་བླ་ན་མེད་པ་ལ་དམིགས་པའི་ཐབས་དང་། སྒྲུབ་པ་བླ་ན་མེད་པ་དང་། ཡེ་
ཤེས་བླ་ན་མེད་པ་དང་། བརྩོན་འགྲུས་བླ་ན་མེད་པ་དང་། གདུལ་བྱ་མ་ལུས་པ་འཛིན་པར་ནུས་པ་དང་། ཉོན་མོངས་པ་བྱིན་གྱིས་རློབ་པ་དང་། བྱིན་གྱིས་རློབ་པ་མྱུར་བ་དང་། མྱུར་དུ་འབྱུང་བ་དང་། ཉོན་མོངས་པ་སྤོང་བ་དང་། བསམ་པ་བླ་ན་མེད་པ་དང་། སྤྱོད་པ་བླ་ན་མེད་པའི་ཐབས་

མཁས་པ་སྟེ། དེ་ལྟར་ཐབས་མཁས་པ་ཉིད་རྣམ་པ་བཅུ་གཅིག་གིས་ཁྱད་པར་དུ་འཕགས་སོ། །དེ་ལ་ཇི་ལྟར་ན་དམིགས་པ་བླ་ན་མེད་པ་ལ་དམིགས་པའི་ཐབས་མཁས་པ་ཡིན་ཞེ་ན། ལམ་དེར་ནི་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབུམ་པ་དང་། སྡོང་
པོ་བཀོད་པ་ལ་སོགས་པ་དམིགས་པ་ཡིན་ལ། ལམ་འདིར་ནི་དེ་དག་ཏུ་མ་གྲགས་པ་དཔལ་དགྱེས་པའི་རྡོ་རྗེ་འབུམ་ཕྲག་ལྔ་པ་དང་། དཔལ་གཤིན་རྗེ་དགྲ་ནག་པོ་འབུམ་ཉི་ཁྲི་ལྔ་སྟོང་པ་དང་། དཔལ་ནམ་མཁའ་དང་མཉམ་པ་འབུམ་པ་ལ་སོགས་པ་ཐུན་མོང་མ་ཡིན་པའི་
དམིགས་པ་ལ་དམིགས་པའི་ཕྱིར་རོ། །སྒྲུབ་པ་བླ་ན་མེད་པ་ནི་ལམ་དེར་ལུས་ཀྱི་བཀོད་པ་ཐོས་ནས་མངོན་སུམ་མ་ཡིན་པའི་དོན་བྱེད་ནུས་པ་ལྟར་འདིར་ནི་དེར་མ་ཐོབ་པར་ཏིང་ངེ་འཛིན་ཐོབ་པས་མངོན་སུམ་མ་ཡིན་པའི་དོན་བྱེད་པར་ནུས་པའོ། །སེམས་གནས་པར་བྱེད་པའི་ཏིང་ངེ་
འཛིན་ཁྱད་པར་ཅན་ལ་བརྟེན་པས། རྒྱུ་དང་ངོ་བོ་ཉིད་དང་། ལས་དག་ལས་ཡེ་ཤེས་ཀྱི་རྒྱུ་མྱུར་བ་ཉིད་བླ་ན་མེད་པའོ། །དམ་ཚིག་གི་དབང་གིས་བརྩོན་འགྲུས་ཆེན་པོ་རང་དབང་མེད་པར་བརྩམ་པས་བརྩོན་འགྲུས་བླ་ན་མེད་པའོ། །རིགས་ངན་སྨེ་ཤ་ཅན་ལ་སོགས། །གསོད་པ་དོན་
དུ་གཉེར་བ་ཡང་། །ཞེས་བྱ་བ་ལ་སོགས་པས་གདུལ་བྱ་ཐེག་པ་གཞན་ལས་སྤངས་པ་ཡང་འདིར་སྣང་བས་ན་གདུལ་བྱ་མ་ལུས་པ་འཛིན་པར་ནུས་པའོ། །ལྷའི་ཁ་དོག་དབྱིབས་ཀྱི་དམ་ཚིག་དང་ཐམས་ཅད་ཡུལ་ཁྱད་པར་ཅན་དུ་བྱས་པས་ཉོན་མོངས་པ་རང་བཞིན་གྱིས་སྤོང་
བས་ཉོན་མོངས་པ་སྤོང་བ་བླ་ན་མེད་པའོ། །མཆོད་པའི་རང་བཞིན་དང་བདེ་བ་ལ་བརྟེན་པའི་རྫོགས་པའི་རིམ་པས་ཉོན་མོངས་པ་བྱིན་གྱིས་རློབ་པའོ། །ལམ་དེར། དེ་བཞིན་གཤེགས་པས་དབང་བསྐུར་བ། །ས་ལ་ཞུགས་ནས་ཐོབ་པར་འགྱུར། །ཞེས་གསུངས་པ་ལྟ་བུ་མ་ཡིན་གྱིས།
ཐབས་མཁས་པ་ལ་བརྟེན་པས་ད་ལྟ་ཉིད་དུ་ནས། དེ་བཞིན་གཤེགས་པ་རྣམས་བྱིན་གྱིས་རློབ་པས་ན་བྱིན་གྱིས་རློབ་པ་མྱུར་བའོ། །སྔ་མ་དང་ཕྱི་མའི་ཁྱད་པར་ལ་གནས་པ་དེ་ནི་ཆེས་མྱུར་བར་འཁོར་བ་ལས་འབྱུང་བས་ན་མྱུར་དུ་འབྱུང་བ་སྟེ། དཔལ་མཆོག་དང་པོ་དང་གསང་བའི་

མཛོད་ལས་ཇི་སྐད་གསུངས་པ། བྱང་ཆུབ་སེམས་དཔའ་ཚེ་བཅུ་དྲུག་གིས་དེ་བཞིན་གཤེགས་པའམ་རྡོ་རྗེ་འཆང་བའི་དངོས་གྲུབ་ཐོབ་པོ་ཞེས་པ་དང་། དེ་ཡིས་སྐྱེ་བ་བདུན་ལ་ནི། །མ་བསྒྲུབས་པར་ནི་དངོས་གྲུབ་འཐོབ། །ཅེས་སོ། །ཡང་གཞན་ལས། སངས་རྒྱས་ཚེ་གཅིག་གིས་
འཐོབ་བོ། །ལ་སོགས་པ་གསུངས་པའོ། །བསམ་པ་བླ་ན་མེད་པ་ནི། །སྐུ་གསུང་ཐུགས་ལ་སྦྱོར་བ་སྟེ། །དེ་ཡང་སྐུ་ལ་སྦྱར་བས་ནི་ཡོན་ཏན་བཞི་བསྐྱེད་དེ། ཐ་མལ་པའི་སྤྲོས་པའི་བག་ཆགས་མྱུར་དུ་ལྡོག་པ་དང་། ལས་ཀྱི་རྣམ་པར་སྨིན་པ་མྱུར་དུ་འདོད་པ་དང་། བསོད་ནམས་ཀྱི་ཚོགས་ཆེན་པོ་
སྐྱེ་བ་དང་། ཆོས་བདག་མེད་པ་ལ་རང་བཞིན་གྱིས་འཇུག་པའོ། །དེ་ཡང་ཇི་ལྟར་ཞེ་ན། ཐ་མལ་པའི་རྟོག་པ་བཟློག་སྟེ་སངས་རྒྱས་ཀྱི་སྐུ་ལ་གནས་པས་ཐོག་མ་མེད་པའི་དུས་ཅན་གྱི་ལུས་དང་མིང་དང་རིགས་ལ་སོགས་པའི་རྟོག་པ་མྱུར་དུ་ལྡོག་པའོ། །ལྷའི་སྐུ་དེ་ནི་ཞི་གནས་དང་ལྷག་
མཐོང་དུ་འབྲེལ་པའི་ལམ་གྱི་མཆོག་ཡིན་ལ། ཏིང་ངེ་འཛིན་དེ་གཉིས་ཐོབ་ན་སྔོན་གྱི་ལས་ཀྱི་འབྲས་བུ་མྱུར་དུ་ལྡོག་པ་སྟེ། ཇི་སྐད་དུ་རྣམ་པར་སྣང་མཛད་མངོན་པར་བྱང་ཆུབ་པ་ལས། རྣམ་པར་སྨིན་པ་འདིར་སྨིན་པ། །ལས་རྣམས་ཀྱི་ནི་འབྲས་བུ་ཐོབ། །གང་གི་ཚེ་ན་གྲུབ་པ་ཐོབ། །
དེ་ཡི་ཚེ་ན་ལས་རྣམས་བཟློག །སེམས་ནི་རང་དངོས་མེད་ཕྱིར་དང་། །འབྲས་བུ་རྒྱུ་རྣམས་སྤངས་པའི་ཕྱིར། །ལས་ཀྱི་སྐྱེ་བ་རྣམས་ལས་ཐར། །སྐྱེ་བ་ནམ་མཁའ་ལྟ་བུ་ཡིན། །ཞེས་གསུངས་སོ། །སངས་རྒྱས་རྗེས་སུ་དྲན་པ་དང་། སངས་རྒྱས་ལ་ཤེས་ནས་དད་པར་འགྱུར་བ་དང་།
ལོངས་སྤྱོད་རྣམས་རྟག་ཏུ་མངོན་པར་འགྱུར་བས་བསོད་ནམས་ཀྱི་ཚོགས་ཆེན་པོ་སྐྱེ་བའོ། །ལྷའི་སྐུ་བསྒོམ་པ་མངོན་དུ་གྱུར་པ་ན་ཆོས་ཐམས་ཅད་རང་གི་སེམས་སྣང་བ་ཙམ་དུ་ཤེས་པར་འགྱུར་བ་ལ། ཡང་སེམས་དེ་ཡང་མ་གྲུབ་པར་ཤེས་པ་འབྱུང་བའི་ཕྱིར་དང་། གཞན་ཡང་
བསོད་ནམས་དང་ལྡན་པའི་སེམས་ཀྱི་རྒྱུད་ལ་ཡེ་ཤེས་སྐྱེ་བས་ན་བསོད་ནམས་ཉིད་ཡེ་ཤེས་ཀྱི་རྒྱུ་ལྟ་བུར་གནས་པ་སྟེ། ཇི་སྐད་དུ་འཕགས་པ་རྒྱ་ཆེར་རོལ་པ་ལས། བཅོམ་ལྡན་འདས་བྱང་ཆུབ་ཆེན་པོ་བརྙེས་ནས་གསུངས་པ། བསོད་ནམས་ལྡན་པའི་མི་ཡིས་བསམ་པ་རྣམས་ཀྱང་

འགྲུབ། །ཅེས་པ་ལ་སོགས་པ་བསོད་ནམས་ཉིད་སངས་རྒྱས་པའི་རྒྱུར་བསྔགས་པའོ། །དེ་བས་ལྷའི་བསྒོམ་པ་དེ། ཆོས་བདག་མེད་པའི་དོན་ལ་རང་བཞིན་གྱིས་འཇུག་པར་བྱེད་དོ། །གསུང་ལ་སྦྱར་བས་ནི་ཡོན་ཏན་བཅུ་གཉིས་སྐྱེད་དེ། རྒྱལ་བའི་བཀའ་དམ་
པ་བཏོན་པར་འགྱུར་བ་དང་། ཆོས་རྗེས་སུ་དྲན་པར་འགྱུར་བ་དང་། ཆོས་ལ་ཤེས་ནས་དད་པར་འགྱུར་བ་དང་། ངག་བདེན་པའི་ཚིག་འགྲུབ་པ་དང་། ཤེས་རབ་དང་ལྡན་པའི་ཐབས་དང་ཡེ་ཤེས་དང་དྲན་པ་ཐོབ་པ་དང་། ཏིང་ངེ་འཛིན་རྩེ་གཅིག་པ་འཐོབ་པ་དང་། འཕགས་པ་
མཆོད་པར་འགྱུར་བ་དང་། འགྲོ་བའི་དོན་བྱས་པར་འགྱུར་བ་དང་། ལྷ་ཉེ་ཞིང་གྲུབ་པ་མྱུར་བར་འགྱུར་བ་དང་། ཆོས་ཐམས་ཅད་ཡི་གེའི་སྒྱུ་འཕྲུལ་དུ་དབང་སྒྱུར་བར་འགྱུར་བ་དང་། སྒྲ་ཐམས་ཅད་བྲག་ཅ་དང་འདྲ་བའི་ཤེས་པ་སྐྱེ་བ་དང་། ཆོས་བདག་མེད་པ་ལ་རང་བཞིན་གྱིས་འཇུག་
པར་འགྱུར་བའོ། །དེ་ཡང་ཇི་ལྟར་ཞེ་ན། དེ་བཞིན་གཤེགས་པའི་གསང་བའི་སྙིང་པོའི་འབྲུ་གཅིག་པ་ཞིག་ལན་ཅིག་བཏོན་པས་ཟབ་ཅིང་རྒྱ་ཆེ་བའི་མདོ་སྡེ་དག་བཏོན་པས་ཀྱང་བསྐྲུན་དུ་མེད་པའི་ཡོན་ཏན་འཐོབ་པས་ན་བཀའ་དམ་པ་བཏོན་པའི་ཡོན་ཏན་ཡོད་དོ། །གསང་སྔགས་
ཀྱི་མཐུ་ཡང་དང་ཡང་དུ་དྲན་པར་འགྱུར་བ་དང་། དེའི་མཐུ་ལ་ཡིད་ཆེས་ཤིང་དང་བའི་དད་པ་འབྱུང་བས་ན་ཆོས་རྗེས་སུ་དྲན་པ་དང་། ཆོས་ལ་ཤེས་ནས་དད་པར་འགྱུར་བའོ། །བཟླས་པ་གྲུབ་པའི་གསང་སྔགས་ཀྱི་ཚིག་ལས་སུ་ཡང་མི་འདའ་བས་ན། ངག་བདེན་པའི་ཚིག་གྲུབ་པའོ། །
གསང་སྔགས་དང་རིག་སྔགས་དང་གཟུངས་སྔགས་དག་གི་མཐུ་ནི་ཤེས་རབ་དང་ཐབས་དང་། ཤེས་རབ་དང་ཡེ་ཤེས་དང་། ཤེས་རབ་དང་དྲན་པ་ཐོབ་པར་བྱེད་པས་ན་ཡོན་ཏན་དེ་གསུམ་ཐོབ་པའོ། །དེ་ཡང་ལྷ་ཕོའི་ནི་གསང་སྔགས། མོའི་ནི་རིག་སྔགས། སྔགས་གཅིག་ཉིད་ལྷ་ཕོ་མོ་
གཉི་གའི་སྔགས་སུ་འགྱུར་བ་ནི་གཟུངས་སྔགས་སོ། །ཡང་སྔགས་གཅིག་ཉིད་ལ་དེ་གསུམ་ཆར་ཚང་བ་དང་། ལྷ་གཅིག་ཉིད་ལ་སྔགས་དེ་གསུམ་ཆར་ཚང་བ་ཡང་ཡོད་ལ། རིག་སྔགས་དང་གཟུངས་སྔགས་གཉི་ག་ལྷ་མོར་གཞག་པ་ཡང་ཡོད་པས་ཐམས་ཅད་དུ་ནི་གཅིག་

ཏུ་མ་ངེས་སོ། །བཟླས་པའི་སྔགས་ཀྱི་རྣམ་པར་རྟོག་པའི་རྣམ་པ་བློ་ལ་སྣང་བ་རྩེ་གཅིག་པ་དེ་རྡོ་རྗེ་བཟླས་པ་ལ་སོགས་པས་ཐོབ་པ། དེ་ཐོབ་པ་ནི་ཏིང་ངེ་འཛིན་རྩེ་གཅིག་པ་ཡིན་པས་ན། ཡོན་ཏན་དེ་ཐོབ་བོ། །གསུང་ཡིག་འབྲུ་ལས་འོད་ཟེར་འཕྲོས་པས་མཆོད་པར་གྱུར་པ་དེས་
འཕགས་པ་མཆོད་པ་དང་། འགྲོ་བའི་དོན་ཅི་རིགས་སུ་བྱེད་པས་ན་ཡོན་ཏན་དེ་གཉིས་འགྲུབ་པོ། །སྤྲོ་བསྡུ་དང་བཟླས་པའི་མཐུས་སྒྲིབ་པ་བྱང་ཞིང་སྒྲིབ་པ་བྱང་བ་ན་ཉེ་བར་བྱ་བ་ཉེ་ཞིང་བསྒྲུབ་པར་བྱ་བ་འགྲུབ་པས་ན་ལྷ་ཉེ་ཞིང་གྲུབ་པ་མྱུར་བའི་ཡོན་ཏན་འཐོབ་བོ། །གསུང་ཡིག་
འབྲུ་ལ་དམིགས་པ་ཐོབ་པ་ནི་སྣང་བ་ཐམས་ཅད་ཡི་གེའི་རང་བཞིན་དུ་མཐོང་བ་དང་། ཡི་གེའི་སྒྱུ་འཕྲུལ་སྟོན་པར་ནུས་པས་ན་ཆོས་ཐམས་ཅད་ཡི་གེའི་སྒྱུ་འཕྲུལ་དུ་དབང་སྒྱུར་བར་ནུས་པའི་ཡོན་ཏན་འཐོབ་བོ། །བཟླས་པ་བྱེད་པའི་དམ་ཚིག་ནི་སྒྲ་ཉིད་བྲག་ཅ་ལྟ་བུར་ཤེས་པར་བྱ་
བ་ཡིན་པས་ན་རང་བཞིན་གྱིས་འདྲིས་པའི་དབང་ལས་སྒྲ་ཐམས་ཅད་བྲག་ཅ་ལྟར་ཤེས་པའི་ཡོན་ཏན་འགྲུབ་བོ། །བཟླས་པའི་དམིགས་པ་ཐོབ་པ་ན་ཆོས་ཐམས་ཅད་རང་གི་སེམས་སྣང་བ་ཙམ་དུ་ཤེས་པར་འགྱུར་ལ། སེམས་དེ་ཡང་རང་བཞིན་མེད་པར་ཤེས་པར་འགྱུར་བའི་
ཕྱིར་དང་། སྙིང་པོ་འདི་ལན་ཅིག་བརྗོད་པས་ཀྱང་སྡིག་པ་ཐམས་ཅད་ངེས་པར་བསྲེག་གོ་ཞེས་བྱ་བ་ལ་སོགས་པ་གསུངས་པས་ན། བཟླས་པ་ནི་སྒྲིབ་པ་ཟད་པར་བྱེད་ལ། དེ་ཟད་པ་ན་དེའི་སེམས་ལ་རང་བཞིན་གྱིས་ཡེ་ཤེས་སྐྱེ་བ་སྟེ། དེ་བས་ན་བདག་མེད་པའི་དོན་ལ་རང་
བཞིན་གྱིས་འཇུག་པའི་ཡོན་ཏན་འགྲུབ་པོ། །ཐུགས་ལ་གནས་པས་ནི་ཡོན་ཏན་ཐམས་ཅད་བསྐྱེད་པ་སྟེ། དེ་ཡང་སྔགས་པ་དག་གི་ཐུགས་ལ་སྦྱོར་བ་ནི། དུས་དང་གནས་སྐབས་ཐམས་ཅད་དུ་ཆོས་ཐམས་ཅད་སྒྱུ་མ་དང་འདྲ་བར་བལྟ་བ་དང་། མི་འབྲལ་བར་གནས་པ་ཡིན་ཏེ།
ཇི་སྐད་དུ་གསུངས་པ། མང་དུ་སྨྲ་བ་ནི་འདིར་ཅི་དགོས། རྡོ་རྗེ་ཐེག་པའི་དེ་ཉིད་ནི། །རྣལ་འབྱོར་པ་ཡིས་གང་གང་དམིགས། །དེ་དང་དེར་ནི་སྒྱུ་མར་བལྟ། །ཞེས་སོ། །དེ་ལྟར་ཀུན་ནས་ཉོན་མོངས་པ་དང་རྣམ་པར་བྱང་བའི་ཆོས་ཐམས་ཅད་ལ་སྒྱུ་མ་དང་འདྲ་བར་བལྟ་བ་དང་། མ་བྲལ་བས་

ཉོན་མོངས་པ་ཚེགས་མེད་པར་སྤོང་བ་དང་། དགེ་བ་ལ་རློམ་སེམས་ལ་སོགས་པ་འདོར་ལ། དེ་ཉིད་ཀྱིས་དེའི་འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་མ་ལུས་པ་ཐོབ་པས་ན་ཐུགས་ལ་གནས་པའི་ཡོན་ཏན་དེ་འཐོབ་བོ། །དེ་ལྟ་ན། དེ་ཉིད་དབུ་མ་
དག་ཀྱང་འདོད་པ་ཉིད། །བདག་ནི་མཉམ་པར་གཞག་ཅེའམ་ལངས་ཞེས་རློམ་སེམས་མེད། །ཅེས་པ་དང་། ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་རྒྱལ་བས་དེ་འདྲར་གསུངས། །ཞེས་བྱ་བ་ལ་སོགས་པས་དུས་དང་གནས་
སྐབས་ཐམས་ཅད་དུ་ཀུན་ནས་ཉོན་མོངས་པ་དང་རྣམ་པར་བྱང་བའི་ཆོས་ཐམས་ཅད་སྒྱུ་མ་དང་འདྲ་བར་བལྟ་བར་གསུངས་ཀྱི་དེ་ལས་གཞན་དུ་མ་ཡིན་ནོ་ཞེ་ན། དེ་ནི་བདེན་མོད་ཀྱི་འོན་ཀྱང་ལམ་དེར་ནི་སྡོམ་པའི་དབང་དུ་བྱས་ཏེ། དེ་ལྟར་མ་བལྟས་ན་སྡོམ་པ་འདི་ཉམས་པ་ཞེས་
མ་བཞག་ལ། དེ་ཉིད་ཀྱིས་དེ་དག་ཤིན་ཏུ་གཡེལ་བས་བརྒྱ་ལམ་ན་ཤེས་པ་དེ་འབྱུང་བ་དང་འདྲ་བ་ཡིན་ལ། ལམ་འདིར་ནི་སྐུ་གསུང་ཐུགས་ཀྱི་དམ་ཚིག་ལས་ཤེས་པ་དེ་དང་མ་བྲལ་ན་ཐུགས་ཀྱི་དམ་ཚིག་ལས་ཉམས་པར་བཞག་པས་ན་དམ་ཚིག་ཉམས་པས་འཇིགས་པ་
བསྐུལ་ཏེ། རྟག་ཏུ་ཏིང་ངེ་འཛིན་དེ་དང་འབྲལ་བར་མི་བྱེད་ཅིང་བྲལ་བར་སྤྱད་པས་ནི་ཡང་བག་ཡོད་པས་སྡོམ་ཞིང་འཆགས་པ་ལ་ཡང་སྦྱོར་བ་ན་རྟག་ཏུ་མི་འབྲལ་བ་སྟེ། དེ་བས་ན་ཇི་ལྟར་དེ་བཞིན་གཤེགས་པའི་ཐུགས་དངོས་པོར་འཛིན་པ་ལས་རྟག་པར་དབེན་པ་ལྟར་སྔགས་
པའི་ཤེས་པ་ཡང་རྟག་པར་དངོས་པོར་འཛིན་པ་ལས་གྲོལ་ཞིང་སྒྱུ་མ་དང་འདྲ་བར་རང་བཞིན་གཅིག་པ་ལས་མི་ཕྱེད་པས་འདི་རྡོ་རྗེའི་ཐེག་པ་ཞེས་བྱ་ལ། ལམ་གཞན་པས་མྱུར་བ་ཡང་ཡིན་ནོ། །དེ་བས་ན་ཐེག་པ་ཆེན་པོ་འདི་ནི་དབང་པོ་རྣོན་པོའི་དབང་དུ་བྱས་པ་ཡིན་ནོ། །དེའི་ཕྱིར་
གསུངས་པ། རྒྱལ་བའི་གཞི་རྣམས་མ་ཐོབ་ཀྱང་། །ཡིད་བརྟན་པར་ནི་འགྱུར་མ་ཡིན། །ཇི་སྲིད་ས་བརྒྱད་ལ་གནས་པར། །ཐེག་པ་དམན་འཇིགས་དེ་ལ་ཡོད། །གསང་བའི་དཀྱིལ་འཁོར་ཆེན་པོ་འདིར། །རྒྱལ་བའི་སྲས་པོ་རབ་ངེས་ན། །ཡིད་ངེས་པར་ནི་གྱུར་པ་ཡིས། །ཐེག་

པ་ཆེ་ལ་གཞོལ་བ་ཡིན། །ཞེས་སོ། །སྤྱོད་པ་བླ་ན་མེད་པ་ནི་མི་མཐུན་པའི་སྤྱོད་པ་གསུམ་སྤངས་པ་སྟེ། དེ་ལ་ནུས་པ་ཆུང་བར་བྱེད་པའི་སྤྱོད་པ་ནི། དཀའ་ཐུབ་སྡོམ་པ་མི་ཟད་པ། །བསྟེན་པས་གྲུབ་པར་མི་འགྱུར་གྱི། །འདོད་པའི་ལོངས་སྤྱོད་ཐམས་ཅད་ལ། །བརྟེན་ནས་མྱུར་
དུ་འགྲུབ་པར་འགྱུར། །ཞེས་གསུངས་པ་སྟེ། ལུས་འདི་ནི་ཤིན་ཏུ་གསོས་ཤིང་སྟོབས་ཡོད་པར་བྱས་ལ་ཡིད་ཤིན་ཏུ་དགའ་བར་བྱས་ཏེ། དེ་ནས་དེ་གཉིས་ཤིན་ཏུ་དྲག་པར་དགེ་བ་སྤྱད་པས་ཚར་གཅད་ཀྱིས། ལུས་ཉམ་ཆུང་བ་དང་ཡིད་མི་དགའ་བས་ནི་རྣལ་འབྱོར་ག་ལ་འགྲུབ། བློའི་
སྟོབས་ཆུང་བ་དག་ནི་ལུས་ཤིན་ཏུ་གསོས་ཤིང་སྟོབས་ཅན་དུ་བྱས་ཀྱང་དགེ་བས་ཚར་གཅོད་པར་མི་ནུས་ཀྱི། འདོད་ཆགས་ཀྱི་མཐའ་ལ་སོགས་པར་གྱུར་དུ་དོགས་ནས་སྦྱངས་པའི་ཡོན་ཏན་ལ་སོགས་པ་བསྟེན་པར་གསུངས་སོ། །འདིར་ནི་བློའི་སྟོབས་ཡོད་པ་དག་ལ་དགོངས་པས་ལོངས་
སྤྱོད་ཉིད་གནང་ངོ་། །དགེ་བས་ཚར་གཅོད་པར་མི་ནུས་པ་ནི་སྔགས་པ་ཉིད་ཀྱང་མ་ཡིན་ནོ། །ལོངས་སྤྱོད་ཀྱང་མ་གནང་བ་ཉིད་ཡིན་ནོ། །གཡེང་བར་བྱེད་པའི་སྤྱོད་པ་ནི། །གལ་ཏེ་བྱང་ཆུབ་མཆོག་འདོད་ན། །གླེགས་བམ་བཀླག་པར་མི་བྱ་ཞིང་། །མཆོད་རྟེན་བསྐོར་བ་མི་བྱའོ། །བྱས་ན་
བྱང་ཆུབ་རྙེད་པར་དཀའ། །ཞེས་བྱ་བ་ལ་སོགས་པ་གསུངས་ཏེ། འདོད་པའི་འབྲས་བུ་བྱང་ཆུབ་སྒྲུབ་པ་ལ་རྒྱུའི་གཙོ་བོ་ནི། སེམས་ཡིན་པས་དང་པོར་ནི། སེམས་ཚར་གཅད་ཅིང་བྱ་བ་གཞན་གཙོར་མི་བྱའོ། །སེམས་ལ་དབང་མ་ཐོབ་པ་དག་ནི་གླེགས་བམ་བཀླག་པ་ལ་
སོགས་པ་ལུས་དང་ངག་གི་བྱ་བ་སྤྱོད་པ་ན་སེམས་གཡེང་བར་འགྱུར་བས་བྱ་བ་ཐམས་ཅད་བཏང་སྟེ། ཅི་བདེར་གནས་པས་སེམས་ལེགས་པར་བལྟ་སྟེ། སེམས་ཀྱི་དམིགས་པ་ཐོབ་ནས་ཉོན་མོངས་པ་རགས་པ་གཅོད་པའི་དབང་ཐོབ་པ་ན་བྱ་བ་ཕྱི་རོལ་པ་སྤྱད་པའམ། ཡང་ན་སེམས་
སྟོང་པ་ཉིད་འབའ་ཞིག་བསྒོམ་པས་ཆོག་གི་ལུས་དང་ངག་གི་བྱ་བ་མི་དགོས་ཏེ། རྣམ་པར་སྣང་མཛད་མངོན་པར་བྱང་ཆུབ་པ་ལས། མཚན་མར་བཅས་པས་མཚན་བཅས་ཀྱི། །དངོས་གྲུབ་རྒྱལ་བ་དམ་པ་བཞེད། །མཚན་མ་མེད་ལ་གནས་པ་ནི། །མཚན་མར་བཅས་པའང་

གྲུབ་ཏུ་རུང་། །དེ་བས་རྣམ་པ་ཐམས་ཅད་དུ། །མཚན་མ་མེད་ལ་གནས་པར་བྱ། །ཞེས་གསུངས་སོ། །སློབ་དཔོན་ཡེ་ཤེས་སྙིང་པོས་ཀྱང་བདེན་པ་གཉིས་རྣམ་པར་འབྱེད་པའི་འགྲེལ་པ་ལས། ཆོས་ཀྱི་དབྱིངས་རྟོགས་ན་འཇིག་རྟེན་དང་འཇིག་
རྟེན་ལས་འདས་པའི་ཆོས་ཐམས་ཅད་བོས་པ་བཞིན་དུ་འདུ་སྟེ། ཟད་པ་ཤེས་པ་ཟག་བཅས་ཀྱང་། །ཞེས་པའི་ལུང་དང་ལྡན་པར་བཤད་དོ། །དེ་བས་ན། བདག་གི་ཉོན་མོངས་པ་སྤང་བ་དང་། གཞན་གྱི་དོན་རྩོལ་བ་དང་བཅས་པ་འབྱུང་བར་བྱ་བ་ལ་ནི་སྟོང་པ་ཉིད་འབའ་
ཞིག་བསྒོམ་པའམ། དང་པོར་སེམས་འབའ་ཞིག་དབང་དུ་བྱས་ལ་དེའི་རྗེས་ལ་བྱ་བ་གཞན་སྤྱད་པ་འདི་ནི་ཐབས་ཀྱི་མཆོག་གོ། །འདི་ནི་ཀྲྀ་ཡ་དང་། ཡོ་ག་དང་། ཨུ་པ་ཡོ་ག་དག་ལ་མེད་པས། རྣལ་འབྱོར་ཆེན་པོའི་ཚུལ་སྤྱོད་པ་རྣམ་པ་གསུམ་ལས་སྤྲོས་པ་མེད་པའི་
སྤྱོད་པའམ། ཤིན་ཏུ་སྤྲོས་པ་མེད་པའི་སྤྱོད་པ་དང་མཐུན་པའོ། །དངོས་པོར་འཛིན་པའི་སྤྱོད་པ་ནི། །ཤ་ལྔ་དང་ནི་བདུད་རྩི་ལྔ། །རྣམ་རྟོག་སྤང་ཕྱིར་ཅི་རིགས་བསྟེན། །ཞེས་བརྗོད་པ་སྟེ། འདི་ནི་གཙང་བའོ། །འདི་ནི་མི་གཙང་བའོ་ཞེས་རྟོག་པ་ཉིད་འཆིང་བ་ཡིན་པའི་ཕྱིར་
སྡིག་པ་མེད་པའི་ཤ་ཤིན་ཏུ་སྨད་པ་མི་དང་རྟ་དང་། བ་ལང་དང་། ཁྱི་དང་། གླང་པོ་ཆེ་དག་དང་། ཐབས་ཀྱིས་ཟིན་པར་སྤྱོད་པ་དག་གིས་འཆི་བ་ཟློག་པའི་བདུད་རྩི་ཁུ་བ་དང་། ཁྲག་དང་། བཤང་བ་དང་། གཅི་བ་དང་། མིའི་ཤ་དག་ཅི་རིགས་པའི་ཚུལ་གྱིས་སྟོང་པར་བསམ་ཞིང་།
ཡང་དེ་དག་ཉིད་ལྷའི་བདུད་རྩི་ལྟར་བསམས་ནས། ཆགས་པ་མེད་པར་སྤྱད་ན་རིམ་གྱིས་མི་གཙང་བ་དང་། གཙང་བའི་རྣམ་པར་རྟོག་པ་མི་འབྱུང་ལ། དེའི་ཚེ་ཆོས་ཐམས་ཅད་ལ་ཐ་དད་པའི་རྟོག་པ་འབྱུང་བ་བརྫུན་ཡིན་པར་ངེས་པའི་ཤེས་པ་འབྱུང་བ་དང་། མི་མ་ཡིན་པ་ཁ་ཅིག་དེ་
ཉིད་ཀྱིས་དེ་ལ་ཡོངས་སུ་དགའ་བ་འབྱུང་ཞིང་ཆོས་བཞིན་དུ་སྐྱོབ་པ་དང་དེའི་གདམས་ངག་འཛིན་པར་འགྱུར་བ་ཡོད་དོ། །ཤ་ལྔ་བདུད་རྩི་ལྔ་ནི་མཚོན་པ་སྟེ། ཡུལ་གང་ན་ཤ་ལ་སོགས་པ་མི་གཙང་བར་འཛིན་པ་དེ་དང་དེ་ཉིད་ལ་མ་ཆགས་པར་སྤྱོད་དོ། །མཉམ་པའི་ཤེས་པ་མཐོང་བ་ན་བདག་གི་

དོན་དུ་དེ་དག་སྤྱད་པར་བྱ་མི་དགོས་སོ། །འདི་ནི་སྤྱོད་པས་མྱུར་བའོ། །དེ་ལྟར་ཐབས་མཁས་པ་བཅུ་གཅིག་པོ་འདི་དག་གིས་འཕགས་པ་ན་འདི་ཐབས་ཀྱི་ཐེག་པ་ཞེས་བྱའོ། །ཐེག་པ་ཆེན་པོའི་ཡང་ཆེན་པོ་ཞེས་བྱའོ། །ཐབས་མྱུར་བ་དང་། སླ་བ་དང་། མང་བ་དང་། མཁས་པ་ཞེས་བྱའོ། །གང་
ཡང་། དོན་གཅིག་ཉིད་ནའང་མ་རྨོངས་དང་། །ཐབས་མང་དཀའ་བ་མེད་ཕྱིར་དང་། །དབང་པོ་རྣོན་པོའི་དབང་བྱས་པས། །སྔགས་ཀྱི་བསྟན་བཅོས་ཁྱད་པར་འཕགས། །ཞེས་བཤད་པ་དང་། དམིགས་པ་རྣམ་པར་དག་པ་དང་། །གྲོགས་ཀྱི་མཐུ་དང་སྤྱོད་པ་ཡིས། །བློ་ལྡན་རྣམས་
ཀྱི་ཐེག་པ་ནི། །ཆེན་པོའི་ཆེན་པོ་ཉིད་དུ་བསྒྲགས། །ཞེས་པ་ལ་སོགས་པས་ཐེག་པ་འདིའི་ཆེ་བ་ཉིད་བརྗོད་པ་ཡང་ཚུལ་སྔ་མ་དག་ཉིད་དུ་འདུས་པར་བལྟའོ། །མདོར་བསྡུས་པ་འདི་བརྗོད་དེ། གསང་སྔགས་ནི་གཉིས་ཏེ། ངོ་བོ་ཉིད་ཀྱི་གསང་སྔགས་ཐབས་དང་ཤེས་རབ་གཉིས་སུ་
མེད་པ་དང་། བཏགས་པའི་གསང་སྔགས་ལྷ་དང་སྔགས་དང་ཕྱག་རྒྱ་དང་ཕྲིན་ལས་དང་ཏིང་ངེ་འཛིན་གྱི་ཚོགས་དང་མཆོད་པ་དང་། བསྟོད་པ་ལ་སོགས་པའོ། །དེའི་དབང་གིས་གདུལ་བྱ་ཡང་གཉིས་ཏེ། མཆོག་དང་མཆོག་མ་ཡིན་པའོ། །མཆོག་གིས་ནི་སྔར་བཤད་པའི་ཐབས་
བཅུ་གཅིག་པོ་མ་ལུས་པ་བསྒྲུབ་བོ། །མཆོག་མ་ཡིན་པས་ན་རེ་ཞིག་རྣམ་པར་བྱང་བའི་སྒོ་ཁྱད་པར་ཅན་ལ་ཞུགས་པ་ཙམ་ལས་ཐབས་དེ་དག་བསྒྲུབ་པར་ནུས་པ་མ་ཡིན་ནོ། །འོན་ཀྱང་དེ་ལ་ཡང་བརྙས་པར་མི་བྱ་སྟེ། ཇི་ལྟར་གསུངས་པ། དཔེར་ན་མར་གྱིས་གང་བའི་སྣོད། །མེ་ཡི་དབུས་
སུ་བཞག་གྱུར་ན། །མར་སར་སྟེང་དུ་ཞུ་འགྱུར་ཞིང་། །སྣོད་ཀྱི་དྲི་མ་འཇིག་པར་འགྱུར། །དེ་བཞིན་ཤྲཱི་ཧེ་རུ་ཀ་ཡི། །མཚན་གྱིས་སྡིག་པ་འཇིག་པར་འགྱུར། །ཞེས་དཔལ་བདེ་མཆོག་ཕྱི་མའི་ཕྱི་མ་ལས་སོ། །འདི་ནི་སྐུར་པ་སྤང་བའོ། །འབྲས་བུ་ཡང་དག་པར་འགྲུབ་པ་དང་། ལས་ལ་ནི་
ཁྱད་པར་མེད་དེ། ཇི་སྲིད་ནམ་མཁའ་ཁྱབ་པར་སངས་རྒྱས་ཐམས་ཅད་ཀྱི་ཡེ་ཤེས་ཀྱིས་ཁྱབ་ལ། ཇི་སྲིད་ཡེ་ཤེས་ཀྱིས་ཁྱབ་པ་དེ་སྲིད་སྐུས་ཁྱབ་པའི་ཕྱིར་དང་། དང་པོ་སེམས་ཅན་མ་ལུས་པ་དང་། ཞིང་མ་ལུས་པ་སྦྱང་བའི་ཕྱིར་ཞུགས་པ་དང་། སྤངས་པ་དང་། ཡེ་ཤེས་ལ་ཁྱད་མེད་པ་དང་།

སློབ་པའི་གནས་སྐབས་ན་ཡང་ས་དང་པོ་མན་ཆད། བགྲོད་པ་ཐ་དད་པ་སྲིད་ཀྱང་། ས་དང་པོ་ཆོས་ཀྱི་དབྱིངས་མཐོང་ནས། ལམ་མ་ལུས་པ་རང་བཞིན་གྱིས་ངེས་པར་ཤེས་པའི་ཕྱིར་རོ། །འདི་ནི་སྒྲོ་འདོགས་པ་སྤང་བའོ། །དེ་ལྟར་གཞུང་འདི་བཀོད་པས་བདག །སྤྲོས་དང་བྲལ་
བའི་གནས་ཐོབ་ཤོག །འགྲོ་བའང་མཐའ་གཉིས་བྲལ་བ་ཡི། །ལམ་དུ་མྱུར་དུ་འཇུག་པར་ཤོག །རྡོ་རྗེ་ཐེག་པའི་མཐའ་གཉིས་སེལ་བ་ཞེས་བྱ་བ་སློབ་དཔོན་ཛྙཱ་ན་ཤྲཱིས་བཀོད་པ་རྫོགས་སོ།། ༄༅༅། །རྒྱ་གར་སྐད་དུ། ཏཏྟྭ་མཱརྒཱ་དརྴ་ན་ནཱ་མ། བོད་སྐད་དུ། དེ་ཉིད་
མཐོང་བའི་ལམ་ཞེས་བྱ་བ། སྤྱན་རས་གཟིགས་མགོན་དེ་ལ་ཕྱག་འཚལ་ལོ། །ཞི་ཞིང་འབྱོར་པ་འགྲོ་མགོན་ཐུགས་རྗེ་ཅན། །རི་ཁྲོད་ཞབས་ལ་གུས་པས་ཕྱག་འཚལ་ཏེ། །སྟོན་ལས་རྗེ་ཡིས་བྱིན་བརླབས་རྒྱུད་ཀྱི་དོན། །ཞབས་ཀྱི་རྡུལ་ལ་མ་རེག་ཆོས་འདི་ནི། །དད་བརྩོན་ལྡན་དང་བདག་
ཉིད་བརྗེད་འཇིགས་པས། །དེ་ཉིད་མཐོང་བའི་ལམ་འདི་འདིར་བཤད་བྱ། །ཐམས་ཅད་མཁྱེན་པས་འདི་གསུངས་པ། །གདུལ་བྱའི་རིམ་པས་གཞག་པ་སྟེ། །དང་པོར་གསོ་སྦྱོང་སྦྱིན་པར་བྱ། །དེ་རྗེས་བསླབ་པའི་གནས་བཅུ་ཉིད། །དེ་ནས་བྱེ་བྲག་སྨྲ་ལ་བསླབ། །མདོ་སྡེ་པ་ཡང་དེ་ནས་
བསྟན། །རྣལ་འབྱོར་སྤྱོད་པ་དེ་བཞིན་ཏེ། །དེ་ནས་དབུ་མ་པ་ཡང་བསྟན། །སྔགས་ཀྱི་རིམ་པ་ཀུན་ཤེས་ནས། །དགྱེས་པའི་རྡོ་རྗེའི་དབང་བསྐུར་སྦྱིན། །དགྱེས་རྡོར་རྒྱུད་ནས་དེ་བསྟན་པས། །གསོ་སྦྱོང་གནས་བཅུ་བྱེ་བྲག་དང་། །ཆུང་བའི་མདོ་སྡེ་ཉན་ཐོས་ལམ། །ཐེག་པ་ཆེན་པོའི་
མདོ་སྡེ་དང་། །རྣལ་འབྱོར་སྤྱོད་དང་དབུ་མའི་ཆོས། །སྔགས་གཞན་དགྱེས་རྡོར་བརྗོད་པ་ཉིད། །བདེ་བའི་ལམ་དང་འབྲས་བུར་བསྔགས། །དེ་ལ་དང་པོ་ཉན་ཐོས་དང་རང་སངས་རྒྱས་པ་དབང་པོ་རྣོན་པོས། མདོ་དང་འདུལ་བ་ལྟར་ཡང་ཤེས་པར་བྱའོ། །འདིར་རྒྱུད་ལྟར་སྐལ་བ་དང་
ལྡན་པས་བླ་མ་མཉེས་པས་བསྒྲུབ་སྟེ། དེ་ཡང་དང་པོ། ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་པས་ཐེག་པ་གསུམ་ལ་བསླབ་པར་བྱ་སྟེ། ཉན་ཐོས་དང་། རང་སངས་རྒྱས་གཉིས་ལ་འཇུག་པར་འདོད་པས་དང་པོ་གསོ་སྦྱོང་བྱ་བ་དང་།

གཉིས་པ་བསླབ་པ་བསྲུང་བ་དང་། གསུམ་པ་ཆོས་ལ་བསླབ་པའོ། །དེ་ཡང་བྱམས་པས་ཞུས་པའི་མདོ་ལས། དང་པོ་སྐྱབས་དང་གསོ་སྦྱོང་བྱ། །གཉིས་པ་བསླབ་པའི་རིམ་པ་བཞིན། །གསུམ་པ་ཆོས་དག་དེ་ལ་བསྟན། །ཞེས་པས་སོ། །སྐྱབས་ལ་བདུན་ཏེ། དང་པོ་དང་། ལུས་
ངག་ཡིད་ཀྱི་སྦྱོར་བ་དང་། རྟེན་དང་། དེ་ལ་མཆོད་པ་དང་། དུས་དང་། ཡོན་ཏན་དང་། མི་ཉམས་པར་བྱ་བའོ། །དང་པོ་ལ་གཉིས་ཏེ། ཤེས་པ་དག་པའི་མཁན་པོ་དང་། སློབ་དཔོན་ནོ། །སྦྱོར་བ་ནི་ལུས་གུས་པ་དང་། ངག་འཇམ་པས་བརྗོད་པ་དང་ཡིད་ཆོས་ལ་དག་པ་དང་གསུམ་མོ། །
རྟེན་མཆོག་ཏུ་གྱུར་པ་ནི་དཀོན་མཆོག་གོ། །རྟེན་ལ་མཆོད་པ་ནི་ཅི་འབྱོར་པའི་མཆོད་པས་ལུས་དབུལ་བའོ། །དུས་ནི་འདི་ནས་ཞེས་པ་དང་། ཇི་སྲིད་འཚོའི་བར་གཉིས་སོ། །ཡོན་ཏན་ནི་སྔོན་གྱི་སྡིག་པ་ཐམས་ཅད་འབྱང་ཞིང་ཕྱི་མའི་སྡུག་བསྔལ་ཐམས་ཅད་ཟད་པ་བདེ་བའོ། །མི་
ཉམས་པར་བྱ་བ་ལ་གསུམ་སྟེ། སངས་རྒྱས་ལ་སྐྱབས་ནས་འཇིག་རྟེན་པའི་ལྷ་སྤངས་པ་དང་། ཆོས་ལ་སྐྱབས་ནས་སྲོག་མི་གཅོད་པ་དང་། དགེ་འདུན་ལ་སྐྱབས་ནས་མུ་སྟེགས་དང་མི་འགྲོགས་པའོ། །བསླབ་པ་བསྲུང་བ་ལ་གཉིས་ཏེ། རྟེན་དང་བསླབ་པ་དངོས་སོ། །རྟེན་ལ་
གསུམ་སྟེ། གཞན་ལས་སྐྱེ་བ་དང་། རང་ལས་སྐྱེ་བ་དང་། གཉི་ག་ལས་སྐྱེ་བའོ། །གཞན་ལས་སྐྱེ་བ་ལ་གསུམ་སྟེ། མཁན་པོ་དང་སློབ་དཔོན་ཏེ། དང་པོ་བར་ཆད་མེད་པས་ཚུལ་ཁྲིམས་ཐོབ་པ་དང་། ནུས་པ་དང་ལྡན་པས་སྡོམ་པ་ལ་གནས་པ་དང་། བདག་དང་གཞན་གྱི་ཉེས་
པ་འཆོས་དགོས་པས་མཁས་པ་སྟེ། དེ་གསུམ་དང་ལྡན་པ་ལས་བསླབ་པ་སྐྱེའོ། །རང་ལས་སྐྱེ་བ་ལ་གཉིས་ཏེ། སྤྱི་དང་བྱེ་བྲག་གོ། །སྤྱི་ལ་དྲུག་སྟེ། འགྲོ་བ་ཁྱད་པར་འཕགས་པ་ནི་མི་ཙམ་མ་ཡིན་ཏེ། གླིང་ཁྱད་པར་དུ་འཕགས་པའི་གླིང་འདི་ཙམ་ཡིན་ཏེ། རིགས་ཁྱད་པར་དུ་
འཕགས་པ་རྒྱལ་རིགས་དང་། བྲམ་ཟེའི་རིགས་དང་། རྗེའུའི་རིགས་སོ། །རིགས་ཙམ་མ་ཡིན་ཏེ། གཟུགས་ཁྱད་པར་དུ་འཕགས་པ་སྐྱེས་པ་དང་བུད་མེད་ཙམ་ཡིན་ཏེ། ལུས་ཁྱད་པར་འཕགས་པ་དབང་པོ་ཚང་བ་ཙམ་གྱིས་མི་ཆོག་སྟེ། ཤེས་པ་དང་སེམས་ཁྱད་པར་དུ་འཕགས་པ་རྒན་

གཞོན་སྤངས་ནས་ལུས་དར་བའོ། །བྱེ་བྲག་སྤྱི་དང་ལྡན་པ་དེས་ནམ་བླངས་པའི་དུས་དེར་སྐྱེའོ། །གཉི་ག་ལས་སྐྱེ་བ་ལ་གསུམ་སྟེ། མཁན་སློབ་ལ་ཐེ་ཚོམ་མེད་པ་དང་། ཆོས་དང་ཆོས་ཀྱི་ཡོན་ཏན་ལ་ཐེ་ཚོམ་མེད་པ་དང་། བསླབ་པ་བསྲུངས་པ་དང་ཐོབ་པར་ཐེ་ཚོམ་མེད་
པས་སྐྱེའོ། །བསླབ་པ་དངོས་ལ་བརྒྱད་དེ། རྟེན་གྱི་ཁྱད་པར་གྱིས་བསླབ་པའི་རིམ་པ་དང་། བསླབ་པར་བྱ་བའི་ངོ་བོ་དང་། ཉེས་པའི་ཚད་དང་། བཅོས་པའི་ཐབས་དང་། ངེས་པ་སྐྱེས་པ་དང་། དུས་མ་ངེས་པར་བསླབ་པ་དང་། ཡོན་ཏན་དང་། ཐོབ་པའི་དུས་བསྟན་པའོ། །
བསླབ་པའི་རིམ་པ་ལ་སོ་སོ་ཐར་པ་རིགས་བདུན་གྱི་རིམ་པས་བསླབ་པ་སྟེ། སྡེ་པའི་འདོད་པ་མི་མཐུན་ཏེ། ཡང་འདིར་བསྙེན་གནས་དང་། དགེ་བསྙེན་ལ་བཞི་སྟེ་ལྔ་དང་། དགེ་ཚུལ་དང་། དགེ་སློང་དང་བདུན་གྱིས་བསླབ་པའོ། །ངོ་བོ་ལ་གཉིས་ཏེ་སྤྱི་དང་བྱེ་བྲག་གོ། །སྤྱི་ལ་
ཡང་གཉིས་ཏེ་རྩ་བའམ་རང་བཞིན་གྱི་སྡིག་པ་སྡོམ་པ་དང་། ཡན་ལག་གམ་བཅས་པའི་སྡོམ་པའོ། །བྱེ་བྲག་ནི་བསྙེན་གནས་ལ་རྩ་བ་བཞི་སྟེ་བརྒྱད་དོ། །སྣ་འགའ་བསྲུང་བའི་དགེ་བསྙེན་ལ་སྲོག་མི་གཅོད་པ་དང་། རྩ་བ་གཞན་གང་རུང་ཅིག །ཕལ་ཆེར་བསྲུང་བ་ལ་རྩ་བ་
གསུམ། ཡོངས་སུ་རྫོགས་པ་ལ་རྩ་བ་གསུམ་དང་འདོད་ལོག་བསྲུང་། ཚངས་པར་སྤྱོད་པའི་དགེ་བསྙེན་ནི་རྩ་བ་བཞི་དང་ཆང་བསྲུང་བའོ། །དགེ་ཚུལ་གྱིས་རྩ་བ་བཞི་ཡན་ལག་བདུན། ཆང་དང་གླུ་གར་རྩེ་འཇོ་དང་། །རྒྱན་དང་ཁ་དོག་འཆང་བ་དང་། །མལ་སྟན་ཆེན་པོ་གསེར་
དངུལ་གྱི་ཁྲི་དང་། ཁྲི་སྟན་མཐོན་པོ་ཁྲུ་གང་པ་ཡན་ཆད་སྤང་བ་དང་། ཕྱི་དྲོ་ཁ་ཟས་དང་། གསེར་དངུལ་འཆང་བ་སྤང་བའོ། །མཁན་པོ་ལས་ཐོབ་པའི་རྟགས་གསུམ་སྟེ། ཁྱིམ་པའི་རྟགས་གཙུག་ཕུད་དང་། གོས་དཀར་པོ་སྤངས་ཏེ། རབ་ཏུ་བྱུང་བའི་རྟགས་སྐྲ་དང་ཁ་སྤུ་བྲེགས་ནས་གོས་
ངུར་སྨྲིག་གོན་པའོ། །ཕྱི་རོལ་མུ་སྟེགས་པའི་རྟགས་སྟོད་གོས་གཡས་ལ་འགེལ་བ་དང་། སྨད་གོས་དཀྲིས་པ་སྤངས་ནས་ནང་པ་སངས་རྒྱས་པའི་རྟགས་སྟོད་གོས་གཡོན་དུ་འགེལ་བ་དང་། སྨད་གོས་ཆེ་བས་ཟུར་དུ་སྤུང་བའོ། །མི་དགེ་བ་འཇིག་རྟེན་པའི་རྟགས་དེ་དག་སྤངས་ནས་དགེ་བ་དགེ་འདུན་གྱི་

རྟགས་གསེག་ཤང་དང་ལྷུང་བཟེད་གྲི་ཁབ་ལ་སོགས་པ་མཁོ་བའི་རྫས་བཟུང་བའོ། །དགེ་སློང་གིས་ཤེས་རབ་ཅན་དང་། དངོས་ཀྱི་རྩ་བ་བཞི་དང་། ཁུ་བ་ཕྱུང་བ་ལ་སོགས་པ་ལྷག་མ་བཅུ་གསུམ་དབེན་པ་དང་། སྐྱབས་མ་ངེས་པ་གཉིས་དང་འཆང་བ་འབྲལ་བ་ལ་སོགས་སྤང་བའི་ལྟུང་བྱེད་
སུམ་ཅུ་དང་། ལྟུང་བྱེད་དགུ་བཅུ་དང་། གྲོང་དུ་ཉལ་བ་ལ་སོགས་པ་སོ་སོར་བཤགས་པ་བཞི་དང་། ཤམ་ཐབས་ལ་སོགས་པ་བསླབ་པར་བྱ་བ་བརྒྱད་ཅུ་རྩ་གཉིས་དང་། མངོན་སུམ་དུ་ང་རྒྱལ་མི་བྱ་བ་ལ་སོགས་ཏེ་ཉིས་བརྒྱ་ལྔ་བཅུ་རྩ་གསུམ་བཀའ་ལུང་ནས་ཤེས་པར་བྱའོ། །འདིར་འོག་ནས་
སྟོན་པའི་ལུས་ངག་ཡིད་ཀྱིས་མི་བྱ་བ་དང་བྱ་བ་རྣམས་སོ། །དེ་ནས་བསླབ་པའི་གནས་བཅུ་སྦྱིན། །ཞེས་པས་མི་དགེ་བ་བཅུ་སྤངས་ལ་དགེ་བ་བཅུ་བསྟེན་པའོ། །ཉེས་པའི་ཚད་ལ་གཉིས་ཏེ། རྩ་བ་དང་ཡན་ལག་གིའོ། །རྩ་བ་ལ་ལྔ། རྩ་བ་དང་འདྲ་བར་སྦྱོར་བ་དང་། དངོས་དང་མཇུག་
ཚང་ན་ལྟུང་བ་ཆེན་པོས་ཉམས། དངོས་མཇུག་གཉིས་བྱུང་ན་ལྟུང་བ་སྦོམ་པོ་སྟེ་ཉམས། སྦྱོར་བ་དང་དངོས་བྱུང་ན་ཆུང་ངུ་ན་ཏེ་ཉམས། སྦྱོར་བ་དང་མཇུག་བྱུང་ན་ལྟུང་བ་ཕྲ་མོ་སྟེ་ཉམས། རེ་རེ་བྱུང་ན་ལྟུང་བྱེད་དེ་ཉམས། ལྷག་མ་དང་མ་ངེས་པ་ལ་སོགས་པའི་ཡན་ལག་རྣམས་ལ་ཡང་
ལྔ་སྟེ། སྦྱོར་བ་དང་། དངོས་དང་མཇུག་རྫོགས་ན་ཉེས་པ་ཆེན་པོ་སྟེ་ཉམས། དངོས་མཇུག་གཉིས་བྱུང་ན་ཉེས་པ་སྦོམ་པོ་སྟེ་ཉམས། སྦྱོར་བ་དང་དངོས་བྱུང་ན་ཉེས་པ་ཆུང་ངུ་ན་ཏེ་ཉམས། སྦྱོར་བ་དང་མཇུག་གཉིས་བྱུང་ན་ཉེས་པ་ཕྲ་མོ་སྟེ་ཉམས། རེ་རེ་བྱུང་ན་ཉེས་པ་མེད་དོ། །བཅོས་
པའི་ཐབས་ལ་གཉིས་ཏེ། ཐབས་དངོས་དང་དུས་སོ། །ཐབས་ལ་བཅུ་གཅིག་སྟེ་རྩ་བ་དང་ཡན་ལག་གཉིས་ཡན་ཆད་དམ། བཞི་མན་ཆད་བྱུང་ན་འགྱོད་པས་ལན་གསུམ་དུ་བསྐྱར་ཞིང་བླང་། རྩ་བའི་སྦོམ་པོ་བྱུང་ན་སྔོན་བཞིན་དུ་བླང་། ཆུང་ངུ་ན་བྱུང་ན་སློབ་དཔོན་ལས་དེ་ཉིད་བླང་། ཕྲ་
མོ་བྱུང་ན་སློབ་དཔོན་ལ་བཤགས་པས་ཐུབ། ལྟུང་བྱེད་བྱུང་ན་འགྱོད་པ་དང་བསྡམས་སེམས་ཀྱིས་ཐུབ། ཉེས་པ་ཆེན་པོ་བྱུང་བ་སྔོན་བཞིན་བླང་། ཉེས་པ་སྦོམ་པོ་སློབ་དཔོན་ལས་བླང་། ཉེས་པ་ཆུང་ངུ་ན་སློབ་དཔོན་ལ་བཤགས། ཉེས་པ་ཕྲ་མོ་འགྱོད་པ་དང་བསྡམས་སེམས་ཀྱིས་ཐུབ་

ཉེས་མེད་ཕྱིས་མ་བྱས་པས་ཐུབ། ཆང་རྩ་བ་དང་འདྲའོ། །རྩ་བ་དང་ཡན་ལག་ལྟར་ཀུན་བཏང་སེམས་ཀྱིས་བཏང་ན་བླང་དུ་མེད། རྒས་པ་དང་ན་བ་དང་གཞན་གྱི་དབང་ལ་ཉེས་པ་མེད། དུས་ལ་བཞི་སྟེ། བསྙེན་གནས་ཀྱི་སྐབས་དང་ལྡན་ཏེ། ཉིན་སྐབས་མེད་ན་ཟླ་གཅིག་
གམ་ཕྱེད་དམ་བརྒྱད་ཀྱི་དུས་དེའོ། །དགེ་བསྙེན་སྐབས་དང་ལྡན་ན་ཐུན་གཉིས་པ་ལ་བླང་། སྐབས་མེད་ན་ཞག་ལྔ་ལ་བླང་། དགེ་ཚུལ་སྐབས་དང་ལྡན་ན་ཞག་ལྔ་ཚུན་ཆད་ལ་བླང་། མི་ལྡན་ན་ཟླ་བ་གཅིག་ཚུན་ཆད་ན་བླང་། དགེ་སློང་སྐབས་དང་ལྡན་ན་དེ་ཉིད་ནས་ཞག་བཅུ་མི་ལྡན་ན་ཟླ་བ་
བདུན་ཚུན་ཆད། ངེས་བསྐྱེད་པ་དུས་དེ་ལ་རྩ་བ་དང་། ཡན་ལག་ཉམས་པ། ཐབས་དེས་བཅོས་པས་ཐར་པ་ཐོབ་སྟེ། སྒྲུང་གི་དཔེ་རེ་རེ་བསྟན་པའོ། །དེ་ཡང་སྲོག་གཅད་པ་ལས་ཐར་པ། དགེ་སློང་ཟླ་བའི་འོད་བྱ་བ་རིགས་བྲམ་ཟེ་ཡིན་པས། ལོ་ཉི་ཤུ་རྩ་གཅིག་ནས་བཞི་བཅུའི་བར་ཉི་ཤུར་
སྡོམ་པ་བསྲུངས་ཏེ། བཞི་བཅུ་ལོན་ནས་ཕ་ཀུན་དུ་འཁོར་ཞེས་བྱ་བས་སྙན་ངག་ཡོད་པས་རྒྱལ་པོའི་ཕོ་བྲང་དུ་སྙན་ངག་བཏོན་པས། རྒྱལ་པོ་གཟུགས་ཅན་སྙིང་པོ་ཤིན་ཏུ་དགའ་ནས། གོ་ལ་བདུན་དང་བཅས་པ་བྱིན་ནས་བྲམ་ཟེ་གཞན་ཅིག་གིས་གཅིག་ལམ་དུ་ཁྱེར་བས་ཁྲོས་ནས་འཐབས་
པས་ཀུན་དུ་འཁོར་བ་གསོད་དོ། །བུ་དགེ་སློང་སེམས་འཁྲུགས་ཏེ་སྦྱོར་བ་གསང་བས་ལས་ཀྱི་སྤུ་གྲི་ཁྱེར་ཏེ། བྲམ་ཟེ་ཁྲུས་བྱེད་སར་བསྒུགས་ཏེ་སྤུ་གྲི་མངད་ནས་བདར་བ་དང་། བྲམ་ཟེ་ཁྲུས་ལས་བྱུང་བ་དང་སྤུ་གྲིས་སྐེ་བཅད་དེ་བསད་དོ། །མཇུག་འགྱོད་པ་མེད་པར་དགའ་བར་གྱུར་ཏེ།
རོ་ཡང་གར་དགར་གཞག་གོ། །དེར་ཀུན་གྱིས་རོ་མཐོང་ནས་འདི་སུས་བསད་སྙམ་ནས་ངས་ཕའི་མི་ཤར་བསད་ཅེས་བསྒྲགས་སོ། །དེར་ཀུན་གྱིས་ཀྱང་དཔྱས་པར་གྱུར། རྟགས་ཀྱང་གཞག་པ་ལས། ཡུལ་དེར་ནད་འགོ་བ་བྱུང་སྟེ། ཀུན་ཀ་ན་བ་དང་། དཀའ་ཐུབ་མེད་པ་དེ་ཡང་ན་བ་དང་
ནད་དྲག་པོས་གཟིར་བས་ཤིན་ཏུ་འགྱོད་པའི་སེམས་སྐྱེས་ཏེ། ལུང་ནས་སངས་རྒྱས་འོད་མའི་ཚལ་ན་བཞུགས་པ་ལ་གོང་གི་ཉེས་པ་རྣམས་ཞུས་པས་སངས་རྒྱས་ཀྱིས་གནད་ནས་བསླབ་པ་བསྐྱར་ཏེ། དགེ་སློང་དྲི་མ་དང་བྲལ་བར་གྱུར་ཏེ་མ་ལྟུང་ངོ་། །ཡུལ་ཡངས་པ་ཅན་གྱི་གྲོང་ན་རྗེའུའི་

རིགས་དགེ་སློང་རིན་ཆེན་སྲུང་ཞེས་བྱ་བ་ཅིག་ཡོད་པ་ལ་བསོད་སྙོམས་ལ་ཕྱིན་ནས་ཁྱིམ་བདག་གི་མཛོད་མཐོང་སྟེ། ལྷ་ཁང་གི་ལོགས་སུ་སྦྱོར་བ་ས་ལ་དོང་བརྐོས་ཏེ་གནས་དེ་ནས་མ་ག་དྷཱར་སངས་རྒྱས་ཀྱི་སྤྱན་སྔར་འགྲོ་ཞེས་དགེ་འདུན་ལ་བསྒྲགས་ནས་སོང་སྟེ། དེ་ནུབ་ནམ་ཕྱེད་ན་བང་
མཛོད་ཕུག་སྟེ། བཻ་ཌཱུརྱ་དང་། པདྨ་རཱ་ག་དང་། གསེར་དངུལ་རྐུས་ནས་ད་ཅིའི་དོང་དུ་སྦས་ཏེ། མཇུག་འགྱོད་པ་མེད་པར་དགའ་བར་གྱུར་ཏེ། དེ་ལོངས་སྤྱོད་སྤྱོད་པ་ལས་ནུབ་མོ་རྐུན་པོ་རྐུན་འཕྱན་གཞན་དང་ཕྲད་ནས་ནོར་ཁྱེར་རོ། །ལུས་གཏག་པ་ལས་ཤིན་ཏུ་འགྱོད་ནས་སངས་རྒྱས་ཀྱི་
སྤྱན་སྔར་ཕྱིན་ཏེ། གོང་གི་ཉེས་པ་བཤགས་ནས་སྡོམ་པ་བླངས་ཏེ་སངས་རྒྱས་ཀྱིས་གནང་ནས་དགེ་སློང་རིན་ཆེན་འབྱུང་གནས་སུ་གྱུར་ཏེ་ལྟུང་བ་མེད་དོ། །གྲོང་ཁྱེར་སེར་སྐྱར་དགེ་སློང་ཤེས་གྲགས་ཀྱིས་བསོད་སྙོམས་བྱེད་པ་ལས། རེ་ཞིག་ན་སྨད་འཚོང་བ་འབྱོར་པ་རྙེད་བྱ་བའི་སྒོར་ཕྱིན་ཏེ་
བསླངས་ནས་ཡོན་བྱིན་པས། སྨད་འཚོང་མ་དེ་ཤིན་ཏུ་ལེགས་པར་མཐོང་སྟེ། ཆགས་པའི་སེམས་ཀྱིས་སྦྱོར་བ་སླར་ལོག་ནས་ཀ་བྱ་རིའི་རས་གཡར་ནས་གྱོན་ཏེ། འགྲོན་བུ་ཀ་ཧོ་ན་ཅིག་ཁྱེར་ནས་སྲོད་ལ་ཕྱིན་ཏེ་ང་ཉོན་བྱས་པ་ལས་ཡར་ཤོག་ཟེར་ཏེ་ཕྱིན་ནས་ཆགས་པ་སྐྱེ་བའི་ཐབས་སྣ་
ཚོགས་བྱས་དངོས་སུ་ཉོན་མོངས་པ་ལ་ཞེན་ནས་བསྲུབས་ཏེ་ཁུ་བ་ཕྱུང་ངོ་། །མཇུག་བདེ་བར་ཚོར་ནས་ཕྱིས་ཀྱང་ཕྲད་དོ། །རིང་ཞིག་ན་རོ་མཛེ་བྱུང་སྟེ་སྡུག་བསྔལ་བར་གྱུར་ནས་འགྱོད་དེ་སངས་རྒྱས་ཀྱི་སྤྱན་སྔར་ཕྱིན་ནས་ས་ལ་འགྱེལ་ཏེ་ཉེས་པ་རྣམས་བཤགས་ནས་བསླབ་པ་བསྐྱར་
ཏེ། དགེ་སློང་ཞི་བའི་ཡེ་ཤེས་སུ་གྱུར་ཏེ་ལྟུང་བ་མེད་དོ། །རྒྱལ་བྱེད་ཀྱི་ཚལ་དུ་དགེ་སློང་བྱང་ཆུབ་འབྱུང་གནས་སུ་གྲགས་པ་རྒྱལ་རིགས་སུ་གྱུར་པ་ཅིག་བྱུང་བས་དད་པ་ཤིན་ཏུ་ཆེ་ནས་ཁརྶ་པ་ཎར་ཕྱིན་པས་སྤྱན་རས་གཟིགས་མཐོང་ནས་ཡུལ་དེ་ལ་ཁརྶ་པ་ཎ་ཞེས་བཏགས་སོ། །
སླར་ལོག་ནས་མ་ག་དྷཱར་ཕྱིན་ཏེ། བསྟན་བཅོས་མང་པོ་བྱས་ནས་དེ་ནས་ང་ལ་སངས་རྒྱས་མང་པོས་བསྟན་ཞེས་བསྒྲགས་པས། སློབ་མ་མང་པོ་ཡོད་པ་ལས། སངས་རྒྱས་ཀྱིས་མཁྱེན་ནས་མ་བཏང་བ་ལས་ནོར་ས་འོག་ཏུ་སྦས་ནས་ཕྱིན་པ་དང་། སྒྱུ་མ་བྱས་པའི་སྦྱོར་བ་མང་པོ་

བྱས་ནས་ཆོས་འཆད་པའི་སྦྱོར་བ་དང་། དངོས་སུ་ཀུན་བསྲུབས་པ་མང་བ་དང་། མཇུག་འགྱོད་པ་མེད་པར་དགའ་བས་ལོངས་སྤྱོད་སྤྱོད་པ་ལ་རྒྱལ་པོའི་ཆད་པ་བྱུང་ལ་ཁད་པ་དང་ཚོར་ནས་ཤིན་ཏུ་འགྱོད་པ་སྐྱེས་ཏེ། སངས་རྒྱས་ཀྱི་སྤྱན་སྔར་ཕྱིན་ཏེ་ཉེས་པ་ཀུན་བཤགས་ཏེ་
སླར་བསླབ་པ་གསོས་ནས་དགེ་སློང་རྡོ་རྗེ་སྙིང་པོར་གྱུར་ཏེ་ལྟུང་བ་མེད་དོ། །གཞན་ཡང་འདུལ་བ་དང་མདོ་ནས་འགྱོད་དེ། སླར་གསོས་པས་ཐར་པ་མང་པོ་དང་། གཏན་གྱི་ཐེ་ཚོམ་མེད་པར་ཕྱིར་བཅོས་སོ། །ཡན་ལག་གི་ཉེས་པ་ཚོ་ཡང་བཅོས་པས་ཡང་བར་ཤེས་པར་བྱའོ། །ཆང་རྩ་བ་
ལྟར་ཤེས་པར་བྱའོ། །འདིར་ཐེག་པ་ཆེན་པོ་དང་ཡང་སྦྱར་བར་བྱའོ། །དུས་མ་ངེས་པ་ལ་ཉིན་གཅིག་གམ་ཞག་གཅིག་གམ་ཞག་བདུན་ནས་ཇི་སྲིད་འཚོའི་བར་དུ་བསྲུང་བར་བྱའོ། །ཡོན་ཏན་ལ་ཤེས་རབ་ཅན་གྱིས་རེ་རེའི་བྱེ་བྲག་མདོར་བལྟའོ། །འདིར་སྤྱི་ཙམ་བསྟན་པ་ནི་དགེ་
བསྙེན་ལ་སོགས་ཀྱི་གཞི་མི་ལས་ཐོབ་པ་དང་། ལམ་རྟེན་དང་ལྡན་ནས་བསྲུང་བ། འབྲས་བུ་དགྲ་བཅོམ་པ་ཐོབ་པའོ། །དགེ་སློང་གི་ལས་ལ་དགེ་སློང་གི་མདོ་དང་འདུལ་བར་བལྟའོ། །འདིར་གསུམ་སྟེ། ཡོན་ཏན་ཆེ་བ་དང་། དུས་ངེས་པ་དང་། ཡོན་ཏན་ངེས་པའོ། །ཡོན་
ཏན་ཆེ་བ་ལ་གཉིས་ཏེ། བདུད་ཀྱིས་བར་མི་ཆོད་ཅིང་ལམ་ཉེ་བ་དང་། འབྲས་བུ་ཉེ་བའོ། །ལམ་ཉེ་བ་ལ་ཡང་གསུམ་སྟེ། སངས་རྒྱས་ལ་སྐྱབས་པས་འཇིག་རྟེན་པའི་ལྷ་སྤངས་པས། ཕྱི་མར་དགའ་ལྡན་དུ་བྱམས་པ་དང་མཇལ་ལོ། །ཆོས་ལ་སྐྱབས་པས་སྲོག་
གཅོད་པ་སྤངས་པས་བྱམས་པ་ལས་ཆོས་ཉན་པ་དང་། དགེ་འདུན་ལ་སྐྱབས་ཏེ་མུ་སྟེགས་དང་མ་འགྲོགས་པས་བྱམས་པའི་འཁོར་གྱི་དགེ་འདུན་དང་འགྲོགས་པའོ། །འབྲས་བུ་ལ་གསུམ་སྟེ། སོ་སོར་ཐར་པའི་བསླབ་པ་རིགས་བདུན་རྫོགས་པས་བདག་ཉིད་སངས་རྒྱས་སུ་
གྱུར་པ་དང་། ལུས་ངག་ཡིད་ཀྱིས་སངས་རྒྱས་ཀྱི་ཆོས་སྤྱད་པས་བདག་ཉིད་སངས་རྒྱས་པས་ཆོས་སྟོན་པའོ། །དབེན་པར་གཅིག་པུ་བསྟེན་པས་བདག་སངས་རྒྱས་ནས་དགེ་འདུན་གྱི་འཁོར་ཕྱུག་པའོ། །དུས་སྐྱེ་བ་བདུན་ན་དགྲ་བཅོམ་པ་ཐོབ་ངེས་སོ། །ཡོན་ཏན་ངེས་པ་

ལ་གཉིས་ཏེ། རྒྱུ་དང་འབྲས་བུའོ། །རྒྱུ་སྐྱེ་བ་བདུན་དུ་རྟེན་ཁྱད་པར་དུ་འཕགས་པ་དྲུག་དང་ལྡན་ངེས་ལ་འབྲས་བུ་ལྷག་བཅས་དང་ལྷག་མེད་གཉིས་མཐོང་ངེས་པའོ། །ཐོབ་པའི་དུས་ལ་གསུམ་སྟེ། སྦྱོར་བ་དང་། བླང་བ་དང་། ཐོབ་པ་དངོས་སོ། །སྦྱོར་བ་ལ་གཉིས་ཏེ། གོང་གི་དཔང་
པོ་ལ་སོགས་པའི་སྐྱབས་སུ་འགྲོ་བའི་སྦྱོར་བ་བདུན་པ་དང་། སྐྱབས་དངོས་སོ། །དངོས་ལ་སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག །ཕྱོགས་བཅུའི་སངས་རྒྱས་ལ་སྐྱབས་སུ་
མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཕྱོགས་བཅུའི་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །ཕྱོགས་བཅུའི་དགེ་འདུན་ལ་སྐྱབས་སུ་མཆིའོ་ཞེས་ལན་གསུམ་བསྐྱར་རོ། །དེ་ལ་ཡང་དབང་པོ་དང་། བསྐྱབ་པར་བྱ་བ་དང་། དུས་དང་། སྐྱོབ་མཁན་
དང་། གྲངས་དང་། དགོས་པ་ཤུགས་ཀྱིས་བསྟན་པ་སྟེ་དྲུག་གོ། །བླང་བ་དངོས་ལ་སྐྱབས་པའི་ཡོན་ཏན་ཤེས་པས་བླང་བ་ལས་སོ་སོར་ཐར་པའི་བསླབ་པའི་རིགས་བདུན་ཏེ། བསྙེན་གནས་བླང་བ་ལ་རང་བཟོ་མིན་པ་དང་། བླང་བ་གཉིས་རང་བཟོ་མིན་པ་ལ་ཡང་དཔང་པོ་ལ་
སོགས་པ་དྲུག་སྟེ། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་ནས། ཇི་སྲིད་འཚོའི་བར་དུ་སྔོན་གྱི་དགྲ་བཅོམ་པ་རྣམས་ཀྱི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ་ཞེས་ལན་གསུམ་བསྐྱར་རོ། །བླང་བ་ལ་
ཡང་དཔང་པོ་ལ་སོགས་པ་དྲུག་སྟེ། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་ནས་ཇི་སྲིད་དམ། ལོའམ་ཟླ་བ་སྔོན་དུ་བསྟན་པ་ལྟར་རོ། །ཟླ་བ་བྱུང་ངོ་ཅོག་གི་ངོ་ལ་སྟོང་ངམ། ཉའམ་བརྒྱད་ཀྱི་བསྙེན་གནས་སྲུང་བར་འཚལ་བས་དེའི་ཉིན་པར་
དང་མཚན་མོ་རྩ་བའི་དང་པོ་སྲོག་གཅོད་པ་སྤངས་ནས་སླར་ལྡོག་པར་བགྱིད་དོ་ཞེས་ལན་གསུམ་བརྗོད་དོ། །དེ་བཞིན་དུ་གཅིག་གམ་གཉིས་སམ་གསུམ་བསྲུང་བ་ལ་རྩ་བ་ནས་རེ་རེར་གསུམ་མམ་ཡན་ལག་ཏུ་བཅས་པར། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་

བས་དུས་འདི་ནས་བཟུང་ནས་ཇི་སྲིད་འཚོའི་བར་དུ་ཟླ་བ་བྱུང་ངོ་ཅོག་གི་ངོ་ལ། ཉའི་བསྙེན་གནས་བསྲུང་བར་འཚལ་བས། དེའི་ཉིན་པར་དང་མཚན་མོ་རྩ་བའི་དང་པོ་སྲོག་གཅོད་པ་དང་། རྩ་བ་གཉིས་པ་མ་བྱིན་པར་ལེན་པ་དང་། རྩ་བ་གསུམ་པོ་མི་ཚངས་པར་སྤྱོད་པ་དང་།
རྩ་བ་བཞི་པ་བརྫུན་དུ་སྨྲ་བ་དང་། ཡན་ལག་གི་དང་པོ་འབྲུའི་ཆང་དང་། བཅོས་པའི་ཆང་དང་། མྱོས་པར་འགྱུར་བའི་ཆང་དང་། ཡན་ལག་གཉིས་པ་གླུ་གར་རྩེད་འཇོ་རྒྱན་ཁ་དོག་འཆང་བ་དང་། ཡན་ལག་གསུམ་པ་མལ་སྟན་དང་། ཁྲི་སྟན་དང་། ཡན་ལག་བཞི་པ་ཕྱི་དྲོའི་ཁ་ཟས་སྤངས་
ནས་སླར་ལྡོག་པར་བགྱིད་དོ། །སྔོན་གྱི་དགྲ་བཅོམ་པ་ཀུན་གྱི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཐབས་ཡིན་ནོ། །ལེགས་སོ་ཞེས་སོ། །བསྙེན་གནས་ཀྱི་བསླབ་པ་ལ་འཐོབ་བོ། །སློབ་དཔོན་གྱིས་བསྙེན་གནས་སུ་གཟུང་དུ་གསོལ་ལོ། །ཞེས་ལན་
གསུམ་བརྗོད་ནས་ཕྱག་ལན་གསུམ་བྱའོ། །ཐོབ་པ་དངོས་ལ་དྲུག་སྟེ། སྐྱབས་འགྲོ་སྦྱོར་བ་སྔོན་དུ་སོང་བ་དང་། བླང་བ་དང་། སློབ་དཔོན་ལ་ཐེ་ཚོམ་མ་ཟོས་པ་དང་། ཆོས་ལ་ཐེ་ཚོམ་མ་ཟོས་པ་དང་། མ་ཐོབ་པར་ཐེ་ཚོམ་མ་ཟོས་པ་དང་། དུས་དེ་ཉིད་དུ་ཐོབ་པའོ། །དགེ་བསྙེན་ལ་སོགས་པ་དྲུག་
པོ་ཡང་། དོན་དྲུག་པོ་དེ་དང་ལྡན་ནས་ཐོབ་སྟེ། འདྲ་བར་ཤེས་པར་གྱིས་ཤིག །དགེ་བསྙེན་གྱི་སྐྱབས་འགྲོ་ཡང་གོང་ལྟར་བླང་བ། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་འཚོའི་བར་དུ་སྔོན་གྱི་དགྲ་བཅོམ་པ་རྣམས་ཀྱི་བསླབ་པ་
ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ་ཞེས་ལན་གསུམ་བརྗོད་དེ། དང་པོ་ལ་སོགས་པ་དྲུག་གོང་བཞིན་ལྡན་ནོ། །སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་འཚོའི་བར་དུ་སྣ་འགའ་བསྲུང་བའི་དགེ་བསྙེན་བགྱིད་པས་
རྩ་བའི་དང་པོ་སྲོག་གཅོད་པ་སྤངས་ནས་སྲོག་གཅོད་པ་ལས་སླར་ལྡོག་པར་བགྱིད་དོ་ཞེས་ལོ་ཟླ་བའི་གྲངས་ཀྱིས་གསུམ་དུ་བརྗོད་དོ། །སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་འཚོའི་བར་དུ་སྣ་འགའ་བསྲུང་བའི་དགེ་བསྙེན་བགྱིད་པས་རྩ་

བ་གཉིས་མ་བྱིན་པར་ལེན་པ་སྤངས་ནས་སླར་ལྡོག་པར་བགྱིད་དོ། །སྔོན་གྱི་དགྲ་བཅོམ་པ་རྣམས་ཀྱི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་པོ། །རྗེས་སུ་བགྱིད་དོ། །ཐབས་ཡིན་ནོ། །ལེགས་སོ། །སྣ་འགའ་བསྲུང་བའི་དགེ་བསྙེན་དུ་གྱུར། སློབ་དཔོན་གྱིས་སྣ་འགའ་བསྲུང་བའི་
དགེ་བསྙེན་དུ་གཟུང་དུ་གསོལ་ཞེས་ལན་གསུམ་བརྗོད་དོ། །ཕྱག་གསུམ་བྱའོ། །ཕལ་ཆེར་བསྲུང་བའི་དགེ་བསྙེན་དུ་གྱུར་པ་སྐྱབས་འགྲོ་གོང་བཞིན་སོང་བ་དང་། རང་བཟོ་མེད་པའི་བསླང་བ་ཡང་འདྲ་བས་སོང་ནས་སློབ་དཔོན་དགོངས་སུ་གསོལ། །བདག་མིང་འདི་ཞེས་བགྱི་བ་དུས་འདི་
ནས་བཟུང་ནས་ཇི་སྲིད་འཚོའི་བར་དུ་ཕལ་ཆེར་བསྲུང་བའི་དགེ་བསྙེན་བགྱིད་པས་རྩ་བ་དང་པོ་སྲོག་གཅོད་པ་སྤངས་ནས་སླར་ལྡོག་པར་བགྱིད་དོ་ཞེས་ལན་གསུམ་བཟླའོ། །དེ་བཞིན་དུ་རྩ་བ་གཉིས་པ་མ་བྱིན་པར་ལེན་པ་དང་། གསུམ་པ་འདོད་པས་ལོག་པར་གཡེམ་པ་སྤངས་ནས་སླར་
ལྡོག་པར་བགྱིད་དོ་ཞེས་ལན་གསུམ་བརྗོད་ནས། སྔོན་གྱི་དགྲ་བཅོམ་པ་རྣམས་ཀྱི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཐབས་ཡིན་ནོ། །ལེགས་སོ། །ཕལ་ཆེར་བསྲུང་བའི་དགེ་བསྙེན་དུ་གྱུར་ཏོ། །སློབ་དཔོན་གྱིས་ཕལ་ཆེར་བསྲུང་བའི་དགེ་བསྙེན་དུ་
གཟུང་དུ་གསོལ་ཞེས་བརྗོད་ལ་ཕྱག་ལན་གསུམ་བྱའོ། །ཡོངས་སུ་རྫོགས་པའི་དགེ་བསྙེན་ལ་གཞན་སྔོན་དུ་སོང་བས། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་འཚོའི་བར་དུ་ཡོངས་སུ་རྫོགས་པའི་དགེ་བསྙེན་ལ་གནས་པས་རྩ་བའི་
དང་པོ་སྲོག་གཅོད་པ་དང་། གཉིས་པ་མ་བྱིན་པར་ལེན་པ་དང་། གསུམ་པ་འདོད་པས་ལོག་པར་གཡེམ་པ་དང་། བཞི་པ་བརྫུན་དུ་སྨྲ་བ་སྤངས་ནས་སླར་ལྡོག་པར་བགྱིད་དོ་ཞེས་རེ་རེ་ལ་གསུམ་གསུམ་བརྗོད་ལ། སྔོན་གྱི་དགྲ་བཅོམ་པ་རྣམས་ཀྱི་རྗེས་སུ་སློབ་བོ། །རྗེས་སུ་སྒྲུབ་བོ། །
རྗེས་སུ་བགྱིད་དོ། །ཐབས་ཡིན་ནོ། །ལེགས་སོ། །ཡོངས་སུ་རྫོགས་པའི་དགེ་བསྙེན་དུ་འགྱུར་རོ། །སློབ་དཔོན་གྱིས་ཡོངས་སུ་རྫོགས་པའི་དགེ་བསྙེན་དུ་གཟུང་དུ་གསོལ་ཞེས་བྱའོ། །ཚངས་པར་སྤྱོད་པའི་དགེ་བསྙེན་གྱིས་ཀྱང་གཞན་སྔོན་དུ་སོང་བས། སློབ་དཔོན་དགོངས་སུ་

གསོལ། །བདག་མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་འཚོའི་བར་དུ་ཚངས་པར་སྤྱོད་པའི་དགེ་བསྙེན་ལ་གནས་པས་རྩ་བའི་དང་པོ་སྲོག་གཅོད་པ་དང་། རྩ་བ་གཉིས་པ་མ་བྱིན་པར་ལེན་པ་དང་། གསུམ་པ་མི་ཚངས་པར་སྤྱོད་པ་དང་། བཞི་པ་བརྫུན་དུ་སྨྲ་བ་
དང་། ཡན་ལག་གི་དང་པོ་མྱོས་པའི་ཆང་དང་། བཅོས་པའི་ཆང་དང་། འབྲུའི་ཆང་དག་སྤངས་ནས་སླར་ལྡོག་པར་བགྱིད་པ་ལགས་སོ་ཞེས་རེ་རེ་ལ་གསུམ་གསུམ་བརྗོད་ན། སྔོན་གྱི་དགྲ་བཅོམ་པ་རྣམས་ཀྱི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཐབས་
ཡིན་ནོ། །ལེགས་སོ། །ཚངས་པར་སྤྱོད་པའི་དགེ་བསྙེན་དུ་འགྱུར་རོ། །སློབ་དཔོན་གྱིས་ཚངས་པར་སྤྱོད་པའི་དགེ་བསྙེན་དུ་གཟུང་དུ་གསོལ། །དགེ་ཚུལ་གྱིས་ཀྱང་གཞན་གོང་ལྟར་མཁན་པོ་སློབ་དཔོན་དད་པའི་དགེ་འདུན་གྱི་སྤྱན་སྔར་སློབ་དཔོན་དགོངས་སུ་གསོལ། བདག་
མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་འཚོའི་བར་དུ་དགེ་ཚུལ་ལ་གནས་པས་རྩ་བའི་དང་པོ་སྲོག་གཅོད་པ་དང་། གཉིས་པ་མ་བྱིན་པར་ལེན་པ་དང་། གསུམ་པ་མི་ཚངས་པར་སྤྱོད་པ་དང་། བཞི་པ་བརྫུན་དུ་སྨྲ་བ་དང་། ཡན་ལག་དང་པོ་འབྲུའི་ཆང་དང་། བཅོས་པའི་
ཆང་དང་མྱོས་པར་འགྱུར་བ་དང་། ཡན་ལག་གཉིས་པ་གླུ་གར་རྩེ་འཇོ་དང་། །ཡན་ལག་གསུམ་པ་རྒྱན་དང་ཁ་དོག་འཆང་བ་དང་། བཞི་པ་མལ་སྟན་མཐོན་པོ་དང་། ལྔ་པ་ཁྲི་སྟན་ཆེན་པོ་དང་། དྲུག་པ་ཕྱི་དྲོའི་ཁ་ཟས་དང་། བདུན་པ་གསེར་དངུལ་འཆང་བ་སྤངས་ནས་སླར་ལྡོག་པར་
བགྱིད་ལགས་སོ་ཞེས་རེ་རེ་ལ་གསུམ་གསུམ་བརྗོད་དོ། །སྔོན་གྱི་ཞེས་པ་ལ་སོགས་པ་གོང་ལྟར་བརྗོད་དོ། །དགེ་སློང་དངོས་ཀྱི་ལས་ཀྱི་ཆོ་གས་བླང་། འདིར་སྐྱབས་དང་ལེགས་པར་བརྗོད་པ་གོང་ལྟར་གསུམ་བརྗོད་པ་དང་། གོང་གི་རྩ་བ་བཞི་དང་། ལྷག་མ་དང་མ་ངེས་པ་གཉིས་
དང་། སྤང་བའི་ལྟུང་བྱེད་ལ་སོགས་པ་ལས་ལྡོག་པར་བརྗོད་དོ། །གསོ་སྦྱོང་ཞེས་བྱ་བ་ལོའམ། ཟླ་བའམ་ཉ་སྟོང་གསོ་ཞིང་སྦྱོང་བའོ། །ཉམས་པ་ཡང་བཅོས་སུ་ཡོད་པས་ཀྱང་གསོ་སྦྱོང་ངོ་། །དུས་མ་ངེས་པ་ཟླ་བའམ་ལོ་ཙམ་སྲུང་བ་ལ་ཡང་གསོ་ཞིང་སྦྱོང་བ་ལེགས་སོ། །འདིར་

འོག་གི་ཐེག་པ་གསུམ་འདོད་པས་དུས་སྙིང་པོ་བྱང་ཆུབ་ལ་མཆིས་ཀྱི་བར་དུ་བརྗོད་ཅིང་ཁས་བླང་ངོ་། །སེམས་བསྐྱེད་པའི་ཚེ་འོག་གི་གདམས་ངག་གིས་བྱང་ཆུབ་སྙིང་པོར་ཤེས་པར་བསྟན་པར་བྱའོ། །མདོ་ནས་ཀྱང་ཉེས་པ་སྐྱེ་བས་བལྟའོ། །གསུམ་པ་ཆོས་ལ་བསླབ་པ་ལ་བཞི་སྟེ།
སྤྱོད་ལམ་དང་། ལྟ་བ་དང་། བསྒོམ་པ་དང་། སྐྱོན་སྤང་བའོ། །སྤྱོད་ལམ་ལ་བཞི་སྟེ། བསྙེན་གནས་པས་སྤྱད་པ་དང་། དགེ་བསྙེན་གྱིས་སྤྱད་པ་དང་། དགེ་ཚུལ་པས་སྤྱད་པ་དང་། དགེ་སློང་གིས་སྤྱད་པའོ། །དེ་ལ་བསྙེན་གནས་པས་སྤྱད་པ་ནི་ཀུན་དུ་བཟང་པོའི་མདོ་ལས་བསྙེན་
གནས་པའི་གང་ཟག་གིས། དེ་དུས་ལུས་ངག་ཡིད་ཀྱིས་སྒྲིམ་ཞེས་པས་ལུས་ཀྱིས་ཁྲུས་དང་ཕྱག་བྱ་བ་དང་། ངག་གིས་འདོན་པ་དང་། སྙིང་པོ་བཟླས་པ་དང་། ཡིད་ཀྱིས་ཉེས་པ་ཤེས་པས་བསླབ་པ་བསྲུང་བའི་སེམས་དང་། ཡོན་ཏན་ཤེས་པས་ཡི་དམ་གྱི་ལྷ་དྲན་པ་དང་།
ལུས་ངག་གིས་དགེ་བ་བྱས་པ་དང་། བསྲུང་བའི་ཉི་མ་ཡིད་ལ་བྱ་བའོ། །དགེ་བསྙེན་གྱིས་སྤྱད་པ་ལ་བྱམས་པས་ཞུས་པའི་མདོ་ནས། དགེ་བསྙེན་དད་དང་ལྡན་པ་ཡིས། །ལས་མིན་སྤང་ཞིང་དགེ་བཅུ་བསྙེན། །ཞེས་པས་བ་ལང་དང་། བྱ་ཕག་གསོ་བ་ལ་སོགས་པ་བཅུ་མྱ་ངན་
ལས་འདས་པའི་ནང་ནས་བསྟན་པ་ལྟར་སྤང་བའོ། །དགེ་བ་བཅུ་ནི་ཀུན་དགའ་བོས་ཞུས་པའི་མདོ་ནས་བསྟན་པ་ལྟར་སྤྱད་དེ། སྲོག་བསྐྱབ་པ་དང་། འབྱོར་པ་སྦྱིན་པར་གཏང་བ་དང་། དཀོན་མཆོག་མཆོད་པ་དང་། མཆོད་རྟེན་དང་། སྐུ་གཟུགས་དང་ལྷ་ཁང་ལ་སོགས་པ་ལ་ན་
བཟའ་དབུལ་བ་དང་། བསྐོར་བ་དང་། ཕྱག་དང་། ཁ་ཏོན་ཀླག་པ་དང་། སྙིང་པོ་དང་། བསྟོད་པ་བྱ་བ་དང་། ཞིག་པ་གསོ་བ་དང་། སྐུ་དཀར་བྱུག་པ་དང་། ཉ་མོ་བཙུན་པའི་དགེ་བ་བྱ་བ་དང་། འོས་པའི་ཕ་མ་དང་དྲིན་ཅན་ལ་རིམ་གྲོ་བྱ་བའོ། །དགེ་ཚུལ་གྱིས་སྤྱད་པ་ལ་དགེ་
ཚུལ་དངོས་ཀྱི་འདུལ་བར་བལྟའོ། །འདིར་ཀཱ་རི་ཀཱ་ནས། ནམ་གྱི་ཆ་སྨད་མལ་ལངས་ནས། །ནམ་ལངས་བར་དུ་ཁ་ཏོན་བྱ། །གདོང་དང་སོ་ཡི་དྲི་བཀྲུས་ལ། །དེ་བཞིན་གཤེགས་ལ་གུས་ཕྱག་འཚལ། །ཞེས་པས་ལུས་ངག་ཡིད་ཀྱིས་བྱ་བ་སྟེ་ལུས་ཀྱི་ཉེས་པ་འཕེལ་བར་མི་བྱ་བ་ལ་

བཞི་སྟེ། ཉིན་པར་འཇིག་རྟེན་པ་མ་དད་པ་སྤང་བ་དང་། མཚན་མོ་ཕྱི་སྒོ་ཕྱིན་ཆད་དུ་མི་ཉལ་བ་དང་། འགྲོ་བའི་ཚེ་བསླབ་པ་དྲན་པས་བག་མ་ལྟར་འགྲོ་བ་དང་། ཟ་བ་དང་འདུག་པ་དག་བག་མེད་པར་མི་བྱའོ། །དགེ་བ་འཕེལ་བས་ཐོ་རངས་སྲོད་ཙོག་ཙོག་པོ་དང་། ཁྲུས་དང་
རྟེན་ལ་ཕྱག་དུས་དང་སྐབས་སུ་བྱའོ། །ངག་གིས་མི་སྨྲ་བ་དྲུག་སྟེ། མི་ཤེས་པ་དང་། མི་ཁྲོ་བ་དང་། མཚང་མི་འདྲུ་བ་དང་། ཕྱར་ཀ་མི་གཏང་བ་དང་། རྟ་གད་མི་བྱ་བ་དང་། གཙུག་ལག་ཁང་དང་དགེ་འདུན་མང་པོའི་གསེབ་ཏུ་གཅམ་བསྐྱུང་བའོ། །ངག་གིས་བརྗོད་པར་བྱ་བ་ཁ་དོན་དང་།
ཀླག་པ་དང་། སྙིང་པོ་བརྗོད་པ་དང་། བསྟོད་པས་བསྟོད་པ་དང་། ཞི་བས་བླང་བ་དང་། དང་བས་ཆོས་ཞུ་བ་དང་དྲུག་གོ། །ཡིད་ལ་གཉིས་ཀྱི་ཉེས་པ་སྤང་བ་ལ་ཡང་གཉིས་ཏེ། མཆོད་རྟེན་དང་། གཙུག་ལག་ཁང་དང་། དགེ་འདུན་གྱི་དཀོར་ལ་གནོད་སེམས་དང་། རྐུ་སེམས་སྤང་བ་
དང་། བསླབ་པ་ཉམས་པའི་ཉེས་པ་དྲན་པར་བྱས་ལ་བསླབ་པ་བསྲུང་བའོ། །ཡོན་ཏན་དྲན་པས་བསམ་པ་ལྔ་སྟེ། ལུས་ངག་གི་དགེ་བའི་ཡོན་ཏན་དྲན་པར་བྱ་བ་དང་། འཁོར་བ་སྡུག་བསྔལ་བར་ཤེས་པར་བྱ་བ་དང་། བྱས་པ་མི་རྟག་པ་དང་། མྱ་ངན་ལས་འདས་པ་ཞི་བ་དང་། སྟོང་པ་
བདག་མེད་པར་ཤེས་པར་བྱ་བའོ། །དགེ་སློང་གི་སྤྱད་པ་ལ་དགེ་སློང་དངོས་དང་། ཤེས་རབ་ཅན་གྱིས་འདྲུལ་བར་ཡང་བལྟའོ། །འདིར་ལྷའི་དབང་པོས་ཞུས་པའི་མདོ་ལས། དགེ་སློང་རྣམས་ཀྱིས་བྱ་བ་ནི། །མི་དགེ་བཅུ་སྤང་དགེ་བཅུ་བསྒྲུབ། །དེ་ཡང་ལུས་ངག་ཡིད་ཀྱིས་ཏེ། །མ་
ཡེངས་སྤྱོད་ལམ་རྣམ་བཞིར་སྤྱོད། །ཅེས་པ་དང་། དགྱེས་པའི་རྡོ་རྗེ་ནས། དེ་ནས་བསླབ་པའི་གནས་བཅུ་པོ་ཞེས་པས། དགེ་བ་བཅུ་བསྒྲུབ་སྟེ། དེ་ཡང་མི་དགེ་བ་བཅུ་མི་འཕེལ་བར་བྱ་བའི་ཕྱིར། དགའ་བོས་ཞུས་པ་དེ་ཉིད་ལས་མི་དགེ་བ་བཅུ་འཕེལ་བས་དགེ་སློང་རྣམས་ཉེས་བྱེད་
བཅུ་སྤོངས་ཤིག །བཅུ་གང་ཞེ་ན། སྲོག་གཅོད་པའི་ཉེས་བྱེད་མ་བསམས་པར་དགེ་སློང་རྣམས་ལུས་ཀྱི་བྱ་བ་བྱེད་པ་དང་། མ་བྱིན་པར་ལེན་པའི་ཉེས་བྱེད་གཞན་གྱི་གཟུགས་ཀྱི་ཡུལ་ལ་རེག་པ་དང་། མི་ཚངས་པར་སྤྱོད་པའི་ཉེས་བྱེད་བུད་མེད་ཀྱི་ཡུལ་ལྔ་ལ་སྤྱོད་པ་དང་། བརྫུན་གྱི་ཉེས་

བྱེད་མ་བསམས་པར་སྨྲ་བ་དང་། ཕྲ་མའི་ཉེས་བྱེད་མང་བར་སྨྲ་བ་དང་། ངག་འཁྱལ་པའི་ཉེས་བྱེད་བྲེ་མོར་སྨྲ་བ་དང་། ཚིག་རྩུབ་མོའི་ཉེས་བྱེད་མི་དགའ་བར་སྨྲ་བ་དང་། བརྣབ་སེམས་ཀྱི་ཉེས་བྱེད་བདག་ལ་དགོས་སེམས་འཆང་བ་དང་། གནོད་སེམས་ཀྱི་ཉེས་བྱེད་གཞན་ལ་ལོག་པར་
སྤྱོད་པའོ། །ལོག་པར་ལྟ་བའི་ཉེས་བྱེད་དངོས་པོ་ལ་ཆགས་པ་རྣམས་སྤོངས་ཤིག་ཅེས་བཀའ་སྩལ་པའོ། །མི་དགེ་བཅུ་འགགས་པས་མི་དགེ་བ་དང་བྲལ་ནས་དགེ་བཅུར་འགྱུར་བའོ། །དེ་ནི་བསླབ་པའི་གནས་བཅུ་ཞེས་པའོ། །དེ་ནས་བྱེ་བྲག་པ་ལ་བསླབ་ཅེས་པ་ལ་ཡང་དེ་ཉིད་ནས།
དགེ་བཅུ་རྒྱས་ཕྱིར་ཆོས་གཉིས་དང་། །སྤྱོད་ལམ་བཞི་རུ་དགེ་སློང་སྤྱོད། །ཅེས་པས། དེ་ཡང་ཆོས་གཉིས་པོ་ཉེས་པ་དང་། མི་དགེ་བ་སྤྱོད་ལམ་རྣམ་བཞིས་མི་བྱེད་པ་དང་། ཡོན་ཏན་དགེ་བ་འཕེལ་བ་སྤྱོད་ལམ་བཞིས་བྱ་བ་སྟེ། དེ་ཡང་དེ་ཉིད་ནས། དགེ་སློང་བྱང་ཆུབ་སེམས་
ལྡན་པས། །རྟག་ཏུ་དབེན་པར་བསྡད་པར་བྱ། །སེམས་ཀྱིས་བདག་གཞན་དོན་བྱེད་ལ། །དགེ་སློང་ཞེས་ནི་ངས་བརྗོད་དོ། །ཞེས་པས་དེ་ཡང་སེམས་གཉིས་བསྐྱེད་ནས་ཐེག་པ་གསུམ་དང་ལྡན་ཞིང་དབེན་པར་གནས་ནས་མི་དགེ་བ་མི་འབྱུང་ཞིང་དགེ་བ་འཕེལ་ཏེ། གལ་ཏེ་གཞན་
དོན་སེམས་ཀྱིས་བྱེད་ཀྱང་དངོས་སུ་མི་ནུས་པ་དང་། དབེན་པར་མི་གནས་པས་འདི་ལྟར་བྱ་སྟེ། སྤྱོད་ལམ་བཞིས་མི་བྱ་བ་ལ་གཉིས་ཏེ། ཡིད་ཀྱིས་དྲན་པ་ལུས་ཀྱིས་མི་བྱ་བ་དང་། ངག་གིས་མི་བྱ་བ་དང་། ལུས་ཀྱིས་གཞི་ལ་སྡོད་པ་དང་། འགྲོ་བ་དང་། ཟས་ཟ་བའི་ཚེ་དང་། ཉལ་
བའི་དུས་སོ། །སྡོད་པ་ལ་ཉེས་པ་འབྱུང་བ་དང་། ཉེས་པ་ཆེན་པོ་འབྱུང་ནས་མི་བསྡད་པ་གཉིས་ཀྱི་ཉེས་པ་འབྱུང་བས་མི་བསྡད་པ་ལ་བཅུ་གཉིས་ཏེ། འགྲེང་བ་དང་། ལྟོ་རྒྱལ་དང་། སྙེས་པ་དང་། ཁྱི་ཚུགས་དང་། ས་རྐོ་བ་དང་། རྩྭ་གཅོད་པ་དང་། ཆུ་དང་། མེ་དང་། ཁྱི་དང་།
བུ་ཆུང་ལ་རྩེ་བ་དང་། འཇིག་རྟེན་དང་བུད་མེད་ཀྱི་ནང་དུ་སྡོད་པ་སྤང་བའོ། །ཉེས་པ་ཆེན་པོ་འབྱུང་བས་མི་བསྡད་པ་ལ་གཉིས་ཏེ། བསྡད་ས་མིན་པ་དང་། རྟེན་ནོ། །རྟེན་ལ་དགུ། མཆོད་རྟེན་དང་། ལྷ་ཁང་དང་། སྐུ་གཟུགས་དང་། གླེགས་བམ་དང་། མཁན་པོ་དང་། སློབ་དཔོན་དང་།

དགེ་འདུན་དང་། ཕ་མ་དང་། རྒྱལ་པོ་དང་། རྒན་པོའོ། །བསྡད་ས་མིན་པ་ལ་གཉིས་ཏེ། གཡས་དང་མདུན་དུ་མི་བསྡད་པའོ། །འགྲོ་བ་ལ་གཉིས་ཀྱི་ཉེས་པ་འབྱུང་བས་མི་འགྲོ་བ་ལ་བཅུ་བདུན་ཏེ། མུ་སྟེགས་དང་འགྲོགས་ཏེ་མི་འགྲོ། རྒྱུག་ཅིང་རྒྱུག་ཅིང་མི་འགྲོ།
མུ་སྟེགས་ཀྱི་ནང་དུ་མི་འགྲོ །སྒྱུ་མ་མཁན་དང་མི་འགྲོགས་ནང་དུ་མི་འགྲོ །དེ་བཞིན་དུ་ཚོང་པ་དང་མི་འགྲོགས་ནང་དུ་མི་འགྲོ །དམག་དང་མི་འགྲོགས་ནང་དུ་མི་འགྲོ །ཤན་པ་དང་སྨད་འཚོང་མ་དང་མི་འགྲོགས་ནང་དུ་མི་འགྲོ །བུད་མེད་དང་མི་འགྲོགས་ནང་དུ་མི་འགྲོ །ཕྱོགས་སུ་ལྟ་བ་དང་
ཡུལ་ཡེངས་པས་མི་འགྲོ །གོས་མེད་པ་དང་། སྟོད་གོས་མེད་པ་དང་། གཞན་ཡང་རྩོད་པའི་སར་མི་འགྲོ་བ་དང་། འཇིགས་པ་དང་། དོན་མེད་པ་དང་། ཡ་ང་བ་དང་མི་འགྲོགས། ཡང་བའི་སར་མི་འགྲོ་བའོ། །ཉེས་པ་ཆེན་པོ་འབྱུང་བས་མི་བྱ་བ་གཉིས་ཏེ། རྟེན་གོང་ལྟར་དགུ།
མི་འགྲོ་བ་ལ་ལྔ། དངོས་སམ་གྲིབ་མ་ལ་མི་འགོམ། གཡོན་བསྟན་ལ་མི་འགྲོ །སྟེང་ནས་མི་འགྲོ །མདུན་ནས་མི་འགྲོ །རྗེས་ནོན་པས་མི་འགྲོ་བའོ། །ངག་ལ་ཡིད་ཀྱིས་ཟིན་པར་བྱ་སྟེ། མི་སྨྲ་བ་ལ་བཞི་སྟེ། སྡོད་པའི་ཚེ་མི་སྨྲ་བ་ལ་གཉིས་ཏེ། ཉེས་པ་དང་ཉེས་པ་ཆེན་པོ་ལས་
མུ་སྟེགས་ལ་སོགས་པ་བདེན་ཡང་མི་སྨྲ་བ་དང་། འདྲི་བའི་ལན་འདེབས་པ་དང་། ཞི་བ་དང་འཇམ་པ་དང་། ངལ་བས་སྨྲ་བའོ། །ཉེས་པ་ཆེན་པོ་འབྱུང་བས་མི་སྨྲ་བ་ལ་གསུམ་སྟེ། འགྲེང་སྟེ་སྡོད་པ་ལ་སོགས་པས་ཆོས་མི་བཤད་པ་དང་། མཆོད་རྟེན་ལ་སོགས་པ་ལ་རྒྱུ་
འབྲས་ལ་སྐུར་པ་དང་། བྲེ་མོའི་གཏམ་མི་བྱའོ། །བརྫུན་སོགས་གོང་དུ་བཀག་པ་རྣམས་ཀྱང་སྨྲ་བར་མི་བྱའོ། །འགྲོ་བ་ལ་ཡང་དེ་བཞིན་ཏེ། ཟ་བ་དང་ཉལ་བ་ལ་ཡང་དེ་བཞིན་ནོ། །ཉེས་པ་དང་། ཉེས་པ་ཆེན་པོ་དག་ཤེས་ཏེ་སྨྲ་བའི་ཚོད་རིག་པར་བྱའོ། །ལུས་ཀྱིས་ཟས་ཟ་
བའི་ཚེ་ན་ཡང་གཉིས་ཏེ། ཉེས་པ་ཉི་ཤུ་སྟེ། འགྲེང་བ་ལ་སོགས་པ་བཅུས་མི་བཟའ་བ་དང་། འགྲོ་ཞིང་མི་བཟའ་བ་དང་། སྨྲ་ཞིང་དང་། ཁམ་ཆེ་བ་དང་། ཆུང་བ་དང་། འགྲམ་པ་གཡས་གཡོན་སྤོ་བ་དང་། རྒན་སྨྲས་དང་། རིངས་པས་དང་། འཕྲོ་གཅོད་པ་དང་། མ་འགྲངས་

པར་དང་། ཡང་བའི་སར་ཟ་བ་སྤང་བའོ། །ཉེས་པ་ཆེན་པོ་འབྱུང་བས་སྤང་བ་ལ་ལྔ། དཀོན་མཆོག་ལ་བསྔོས་པ་ཟ་བ་དང་། མཁན་པོ་དང་སློབ་དཔོན་ལ་དད་པས་བསྔོས་པ་ཟ་བ་དང་། ཕ་དང་མ་ལ་བསྔོས་པ་ཟ་བ་དང་། གཏོར་མ་དང་བྱིན་གྱིས་རློབ་པ་ཟ་བ་དང་། རྒྱལ་པོ་དང་གྲོང་དཔོན་ལ་
བསྔོས་པ་ཟ་བ་སྤང་བའོ། །ཉལ་བའི་ཚེའི་ལུས་ལ་ཡང་གཉིས་ཏེ། ཉེས་པ་ལ་དགུ་སྟེ། གན་རྐྱལ་དུ་མི་ཉལ། ཁ་བུབ་དང་། གོས་མེད་པ་དང་། དབང་པོ་ལག་པས་གཟུང་བ་དང་། ནུབ་ཏུ་མགོ་བསྟན་པ་དང་། འཇིག་རྟེན་པའི་གྲོང་དང་། འཇིག་རྟེན་པའི་མི་མང་པོ་ནང་དང་། ནད་
འཕེལ་བའི་ས་དང་། གྲོགས་མེད་པར་མི་ཉལ་བའོ། །ཉེས་པ་ཆེན་པོ་འབྱུང་བས་མི་ཉལ་བ་ལ་གསུམ་སྟེ། གོང་གི་ལྷ་ཁང་ལ་སོགས་པའི་རྟེན་དུ་འོས་པའི་སྟེང་དང་། རྐང་པ་བསྟན་པ་དང་། རྒྱབ་བསྟན་པས་མི་ཉལ་བའོ། །ནའམ་ས་ཡེ་མ་རྙེད་དམ། སྲོག་གི་བར་ཆད་དུ་འགྱུར་
རམ་དབང་མེད་ན། མདོ་བཟང་པོ་འཕེལ་བ་ནས། དང་པོ་པ་ཡི་ཆོས་རྣམས་ནི། །བར་ཆད་མེད་པར་ཤེས་བྱས་ལ། །གསོ་སྦྱོང་བྱ་ཞིང་བསླབ་པ་བསྲུང་། །རིམ་གྱིས་རིམ་གྱིས་གོམས་ཏེ་བླ། །ཞེས་པ་དང་། གསོ་སྦྱོང་བྱ་ཞིང་སྐབས་དང་སྦྱར་རོ། །བྱེ་བྲག་ཁོ་ན་དབང་དུ་བྱས་ནས་
འདོད་པ་དང་། དུས་གཉིས་སུ་བསྡུས་ཏེ། འདོད་པ་སངས་རྒྱས་དང་། སྡོམ་པས་རྒན་པ་ལ་ཕྱག་བྱེད་པ་དང་། ལུས་ངག་གི་དགེ་བ་རང་གི་དོན་དུ་འདོད་པ་གཉིས་སོ། །དུས་ལ་གསུམ་སྟེ། དུས་འདི་ཇི་སྲིད་འཚོའི་བར་དང་། ལམ་སྐྱེ་བ་བདུན་དང་། འབྲས་བུ་བསྐལ་པ་གཅིག་
ནས་ཆོས་སྟོན་པའི་དུས་སོ། །འདིར། ཆོས་ཀྱི་དབྱིངས་ལ་དབྱེར་མེད་ཕྱིར། །ཐེག་པ་གསུམ་དུ་དབྱེར་མེད་ཀྱང་། །གཙོ་བོས་ཐེག་པ་གསུམ་བསྟན་པ། །ང་ཡི་ཐབས་ལ་མཁས་པའོ། །ཞེས་པས་ཐེག་པ་གསུམ་ལ་གནས་པར་བྱ་ཞིང་། སྡོམ་པ་གསུམ་དང་ལྡན་པར་བྱས་པས་
ཡོན་ཏན་དང་དགེ་བ་འཕེལ་བའི་ཕྱིར་སྤྱོད་ལམ་བཞིས་སྤྱད་པར་བྱ་བ་ཡང་སྡོད་པ་ལ་སོགས་པ་ཐུན་བཞིར་བསྒྲུབ་སྟེ། སྔ་དྲོའི་ཐུན་ལ་གསུམ་སྟེ། ལྡང་བ་དང་། ཁྲུས་དང་། ཆོས་སྤྱད་པའོ། །ལྡང་བ་ལ་སྦྱོར་བ་དང་། དངོས་དང་། མཇུག་གསུམ་སྟེ། སྦྱོར་བ་ཡིད་ངག་ལུས་གསུམ་

སྟེ། ཡོད་སྔོན་ཡང་ལེ་ལོ་དང་གཉིད་ཁོ་ན་ལ་བརྟེན་ནས་འདི་འདྲའོ་ཞེས་བསམས་ཏེ་ནམ་སྨད་ལྡང་ངོ་། །གང་གི་ན། ན་མོ་བུདྡྷཱ་ཡ། ན་མོ་མཉྫུ་ཤྲཱི། ན་མོ་བཛྲ་པཱ་ཎི། ན་མོ་ལོ་ཀེ་ཤྭ་རཱ་ཡ། ན་མཿཏཱ་ར། ཞེས་རང་གི་ཡི་དམ་གྱི་ལྷ་བསྐུལ་ལོ། །ལུས་དལ་ནས་
ཙོག་ཙོག་ཏུ་ལྡང་ངོ་། །དངོས་ལུས་ལེགས་པར་ལངས་ལ་སྟོད་གོས་དང་སྨད་གོས་བགོ་བ་དང་། ངག་སྙིང་པོ་སྒྲ་དང་བཅས་པས་སྦྲུལ་དང་སེམས་ཅན་བསྐྲད་པ་དང་། ཡིད་དགེ་བ་བྱ་བའི་ཕྱིར་ཆོས་དྲན་པའོ། །མཇུག་ལེ་ལོ་དང་ཐེ་ཚོམ་མེད་པའོ། །ཁྲུས་ལ་ཡང་སྦྱོར་བ་
དངོས་མཇུག་གསུམ་སྟེ། སྦྱོར་བ་བཤང་བ་ཆེ་ཆུང་དང་། སྣབས་ལུད་སེམས་ཅན་ལ་གནོད་པ་དང་། ས་མིན་སར་མི་འདོར་ཞིང་ལེགས་པར་བྱས་པ་དང་། ཆུ་སྲོག་ཆགས་དང་དྲི་མ་མེད་པས་སྣོད་བཀང་བ་དང་། བཀྲུ་ས་ཡང་མི་གནོད་པ་དང་། ས་མ་ཡིན་པར་བཀྲུ་བ་དང་། ཆུ་
བྱིན་གྱིས་བརླབ་པ་ཆུ་སྣོད་དེའི་ཆུ་ལ་ཨ་དཀར་པོ་བསམས་ལ། ཨའི་འོད་ཀྱིས་འཕགས་པ་སྤྱན་རས་གཟིགས་སྤྱན་དྲངས་ཏེ། མདུན་ན་གསལ་བའི་འོད་ཀྱིས་ཕྱོགས་བཅུའི་སངས་རྒྱས་ཐམས་ཅད་སྤྱན་དྲངས་ཏེ། སྤྱན་རས་གཟིགས་ལྟ་བུར་གྱུར་པས་ནམ་མཁའ་ཁེངས་པ་ཕྱག་
མཚན་ཀུན་དེའི་མཐུས་སྔར་གྱི་ཆུས་བཀང་ནས་འོ་མ་ལྟར་བདུད་རྩིའི་ཆུར་གྱུར་པར་བསམས་ཏེ་བཀྲུའོ། །བཀྲུ་བ་དངོས་ནི་ཨོཾ་མ་ཎི་པདྨེ་སྭ་བྷཱ་བ་ཧཱུྃ། ཞེས་བརྗོད་ཅིང་ཁ་དང་ལག་པ་དང་། གདོང་བཀྲུའོ། །ཡིད་ཀྱིས་སྒྲིབ་པ་གཉིས་སངས་རྒྱས་ཀྱི་མཐུ་དང་། བྱིན་གྱིས་བརླབས་པའི་ཆུ་
དང་། སྔགས་ཀྱི་ནུས་པས་དག་པར་བསམ་མོ། །མཇུག་མདུན་གྱི་སངས་རྒྱས་རྣམས་གཞན་དོན་ལ་སླར་གཤེགས་པར་བསམ་མོ། །རང་ཉེས་པ་དང་སྒྲིབ་པ་དག་པས་དགེ་བ་བྱས་པར་གནས་པར་བསམ་ཞིང་དོན་ཆེ་བར་བསམ་མོ། །ཆོས་སྤྱད་པ་ལ་བསམ་གཏན་དང་། ཁ་ཏོན་དང་།
ཆུ་སྦྱིན་དང་། འབྱུང་པོ་ལ་གཏོར་མ་གཏང་བ་དང་། མཎྜལ་བྱ་བ་དང་ལྔའོ། །བསམ་གཏན་ལ་ཡང་གསུམ་སྟེ། སྦྱོར་བ་ལུས་ཙོག་ཙོག་གམ་སྐྱིལ་ཀྲུང་དུ་བསྡད། ངག་ཨོཾ་ཨཱཿཧཱུྃ་ཞེས་བརྗོད། ཡིད་ཨོཾ་གྱི་འོད་ཁ་དོག་ལྔས། དངོས་པོ་སངས་རྒྱས་ཀྱི་སྐུའི་ངོ་བོར་བྱས། ཨཿའི་འོད་

དཀར་པོས་སྐུའི་ངོ་བོ་དེ་སངས་རྒྱས་ཀྱི་གསུང་དང་ལྡན་པར་བྱས། ཧཱུྃ་གི་འོད་ནག་པོ་དེས་སྐུ་གསུང་གི་ངོ་བོ་དེ་ཐུགས་དང་ལྡན་པར་བྱས་ཏེ། ཐམས་ཅད་མཉམ་པོར་བསྒྲུབས་པས་གནས་དང་བདག་དང་ཏིང་ངེ་འཛིན་དག་སྟེ་བསྲུང་བར་ཡང་དེ་འགྱུར་རོ། །དེ་ནས་བསམ་གཏན་དངོས་རྟོགས་པ་དང་མན་
ངག་དང་ཡིད་མོས་པ་ལ་ཐུན་དང་ནུས་ཚད་དུ་གནས་པར་བྱའོ། །ཁ་དོན་ལ་ལྔ་སྟེ། བར་ཆད་ཞི་བར་བྱ་བའི་ཕྱིར་གཙུག་ཏོར་དང་། རྡོ་རྗེ་རྣམ་པར་འཇོམས་པ་གདོན། སྒྲིབ་པ་བསལ་ཞིང་དགེ་བ་བསྡུ་བའི་ཕྱིར་ལྟུང་བཤགས་གདོན། དགེ་བ་རྒྱས་པར་བྱ་བའི་ཕྱིར་བྱམས་པ་དང་སྤྱན་རས་གཟིགས་
དང་། བཟང་སྤྱོད་ཀྱི་སྨོན་ལམ་གདོན། དགེ་བ་མི་ཉམས་པར་བྱ་བའི་ཕྱིར་ཤེས་རབ་སྙིང་པོ་གདོན། བསྟན་པ་རྒྱས་པར་བྱ་བའི་ཕྱིར་འཇམ་དཔལ་གྱི་མཚན་བརྗོད་དང་། མགོན་པོ་ནག་པོའི་མདོ་གདོན་ནོ། །དེ་ཡང་གཙུག་ཏོར་རྒྱལ་བའི་མདོ་ལས། བགེགས་རྣམས་གཙུག་ཏོར་རྡོ་རྗེས་
འཇོམས། །ཀུན་དུ་དགེ་བ་ཞུས་པ་ཡིས། །སྒྲིབ་སེལ་བསོད་ནམས་སྡུད་པ་དང་། །བྱམས་པ་སྨོན་དང་བཟང་པོར་སྤྱོད། །དགེ་བ་རྒྱས་ཕྱིར་ང་ཡིས་བསྐུལ། །ཤེས་རབ་ཕ་རོལ་ཕྱིན་དེ་དག །དེ་རྣམས་ཀུན་གྱི་སྙིང་པོ་བརྗོད། །བསྟན་པ་རྒྱས་བྱེད་འཇམ་དཔལ་དང་། །ང་ལ་ཁས་བླངས་
མགོན་ནག་པོ། །ཞེས་སོ། །དེ་ལ་ཡང་སྦྱོར་བ་ལྷ་རྣམས་མདུན་དུ་གསལ་བ་དང་། དག་པ་དང་གསལ་བ་དང་བར་མ་ཆོད་པར་གདོན་པ་དངོས་དང་། ཡོན་ཏན་ལ་ཐེ་ཚོམ་མི་ཟ་བ་དངོས་སོ། །རྒྱས་པར་བཤད་པའི་སྦྱོར་བ་དངོས་མཇུག་ཀྱང་ཤེས་པར་བྱའོ། །ཆུ་སྦྱིན་ནི་རྟེན་སྣོད་དུ་གཞག་པའམ།
མེད་ན་ཡང་རང་ཡི་དམ་གྱི་ལྷ་གང་ཡིན་པ་དེར་བསྒོམས་ལ། ཨོཾ་ཨཱཿཧཱུྃ་བརྗོད་པས་ཧཱུྃ་གི་འོད་དེས་སྣོད་ཀུན་སྟོང་པར་བསམ། སྟོང་པ་ལས་པཾ་ལས་པདྨ་སེར་པོ་འདབ་མ་བརྒྱད་པ། དེའི་ལྟེ་བ་ལ་ཨ་ལས་ཟླ་བ་རྒྱས་པ་འོད་དང་བཅས་པ། དེའི་སྟེང་དུ་ཛཾ་སེར་འོད་དང་བཅས་པ། ཛཾ་དེ་གྱུར་པ་
ལས་ནོར་སྦྱིན་སེར་པོ་པདྨ་དང་ཟླ་བའི་སྟེང་དུ་གཡས་བརྐྱང་བའི་འོག་ན་ཡིད་བཞིན་གྱི་ནོར་བུ་མནན་པ། གཡོན་བཀུམ་པའི་པུས་མོའི་འོག་ན་རིན་པོ་ཆེ་སྣ་ཚོགས་ཀྱི་བུམ་པ་མནན་པ། མདོག་སེར་པོ་གསེར་བསྲེགས་པ་འདྲ་བ། རལ་པ་གྱེན་དུ་བརྫེས་ནས་རིན་པོ་ཆེའི་ཟེ་པྲོག་ཅན། ཞལ་རྣམ་

པར་སྣང་མཛད་ལྟར་མདངས་དང་ལྡན་པ། སྙན་ཆ་མགུལ་རྒྱན། དབུ་རྒྱན་ཕྱག་གདུབ། ཞབས་གདུབ་རིན་པོ་ཆེ་སྣ་ཚོགས་ཀྱིས་བྱས་པ་གཅིག་བསྒོམས་ལ། དེའི་ཐུགས་ཀ་ན་པདྨོའི་སྟེང་ན་ཟླ་བ། དེའི་སྟེང་ན་ཛཾ་སེར་པོ་ཡོད་པ་དེས་རང་བཞིན་གྱི་ནོར་ལྷ་དེ་ཉིད་
འདྲ་བ་སྤྱན་དྲངས་ཏེ་དངོས་སམ་ཡིད་ཀྱིས་མཆོད་སྦྱིན་ཕུལ་ལ་བདག་གཞན་གྱི་འདོད་པ་སྐོངས་ཤིག་ཅེས་བརྗོད་དེ། དེ་ལ་བཅུག་ལ་གཉིས་མེད་དུ་གྱུར་པའི་ཐུགས་ཀའི་ཟླ་བའི་ཛཾ་གིས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་སྤྱན་དྲངས་ཏེ་མཆོད་པ་རྣམས་ཀྱིས་མཆོད་ནས་དབང་མནོས་རྣམ་པར་
སྣང་མཛད་ཀྱི་རྒྱན་དང་ལྡན་པའོ། །སྦྱོར་བ་དེས་ནོར་སྦྱིན་བསྐྱེད་ནས་ཆུ་སྣོད་ཆུ་དང་བཅས་པ་ལ་སྔོན་དུ་བསྟན་པའི་ཁྲུས་ཀྱི་སྐབས་ལྟར་བྱིན་གྱིས་བརླབས་ལ་སྦྱོར་བ་དེ་དང་ལྡན་པས་སྦྱིན་པ་དངོས་གཡས་པའི་སོར་མོ་ལས་བདུད་རྩིའི་རྒྱུན་གྱིས་སྦྱིན་པ། ཨོཾ་ཛཾ་བྷ་ལ་ཛ་ལནྡ