Luận tạng Tây Tạng (Tengyur) — Tập 61

ིངས་ལ་མཆོད་ཡོན་དང་ཞབས་བསིལ་ལ་སོགས་པ་ཕུལ་ནས་གོ་ཆ་བསྐོན་ཏེ། ཕྱོགས་སུ་མདའ་འཕེན་པའི་ཚུལ་དང་། ཕུར་བུ་དང་ར་བས་སྲུང་བ་བྱས་ལ། རང་གི་ཕྱག་རྒྱས་བྱིན་གྱིས་བརླབ་ཅིང་
དབང་བསྐུར་ཏེ་གསང་བའི་མཆོད་པ་དང་རོལ་མོ་ལ་སོགས་པ་བསམ་ཞིང་བསྟོད་པ་དང་། ཕྱག་བྱ་བ་ལ་སོགས་པའི་རིམ་གྱིས་རང་གི་ལྷའི་གཟུགས་སུ་བསྒོམ་པར་བྱའོ། །བྱིན་གྱིས་བརླབས་པའི་རྣལ་འབྱོར་ལ་ནི་རང་གི་སྔགས་དང་ཕྱག་རྒྱས་བདག་ཉིད་བྱིན་གྱིས་བརླབས་
ལ་རང་གི་ལྷའི་ང་རྒྱལ་དུ་བྱའོ། །ཡོངས་སུ་རྟོག་པའི་རྣལ་འབྱོར་ནི་བྱང་ཆུབ་ཀྱི་སེམས་བསྒོམ་པ་ལ་སོགས་པའི་རིམ་གྱིས་རང་གི་ལྷར་བསྐྱེད་པའོ། །ཡོངས་སུ་རྫོགས་པའི་རྣལ་འབྱོར་ནི། སྐད་ཅིག་གིས་རྣམ་པ་ཐམས་ཅད་ཀྱི་མཆོག་དང་ལྡན་པའི་རང་གི་ལྷའི་གཟུགས་
སུ་སྤྲོ་བ་དང་། སྡུད་པར་བྱེད་པས་བསྒོམ་པའོ། །དམ་ཚིག་བྱིན་གྱིས་བརླབ་པ་ནི་ལྷར་བྱིན་གྱིས་བརླབ་པ་ཡིན་ཏེ་སྔར་བཤད་པའོ། །རྣལ་འབྱོར་སྤྱོད་པ་ཞེས་བྱ་བ་ནི་བཅོམ་ལྡན་འདས་ལྷ་ཐམས་ཅད་ཀྱི་རྣལ་འབྱོར་གྱིས་བྱུང་བ་ཡིན་པའི་ཕྱིར་རོ། །དེ་ཉིད་བརྟགས་པ་སྟེ་

སེམས་སོ་སོར་རྟོགས་པ་ལ་སོགས་པའི་རིམ་གྱིས་བྱུང་བའི་ཕྱིར་རོ། །བར་དུ་ཞེས་བྱ་བ་ནི་དབུས་སུ་བྱུང་བ་སྟེ་རྣམ་པར་སྣང་མཛད་ཀྱི་ཐུགས་ཀའི་ཟླ་བའི་དབུས་ན་གནས་པའི་གསང་སྔགས་ཀྱི་ཡི་གེ་ལས་ངེས་པར་བྱུང་བ་ཞེས་བྱ་བའི་བར་དུའོ། །ཡོངས་སུ་བརྟག་པ་ལ་སོགས་པ་རྣལ་འབྱོར་
གཉིས་བསྟན་པར་བྱ་བའི་ཕྱིར། བྱང་ཆུབ་སེམས་ནི་ཞེས་བྱ་བ་ལ་སོགས་པ་གསུངས་སོ། །དེ་ནི་འདི་ལྟར་སྟོན་པར་འགྱུར་ཏེ། དེ་ལ་དང་པོར་ཡི་གེ་ཧཱུྃ་གིས་ཐལ་མོ་གསུམ་བརྡབས་ལ་རང་གི་བྱང་ཆུབ་ཀྱི་སེམས་བསྒོམས་ནས་རང་བཞིན་གྱིས་དག་པར་མངོན་སུམ་དུ་བྱས་ལ་རང་གི་
སེམས་བྱང་ཆུབ་ཀྱི་ཚོགས་ཀྱིས་བསྒོས་པ་ཟླ་བའི་དཀྱིལ་འཁོར་ལྟ་བུར་སོ་སོར་བརྟགས་ལ། དེ་ཉིད་ཡོངས་སུ་རྫོགས་པ་དེ་ལ་ཡི་གེ་ཨོཾ་མྱུ་གུར་བྱས་ནས། དེ་ལས་དེ་བཞིན་གཤེགས་པ་ཐམས་ཅད་ཕྱུང་སྟེ། དེ་རྣམས་ཀྱིས་སེམས་ཅན་ཐམས་ཅད་བཏུལ་ནས་ནང་དུ་ཆུད་པ་སྔོན་དུ་འགྲོ་
བས་དེ་ལས་བྱུང་བའི་སྐུ་རྡོ་རྗེ་ལ་རང་གི་གདན་པཾ་ལས་བྱུང་བའི་པདྨ་ལ་གནས་པའི་མཚན་མ་ཐམས་ཅད་ཡོངས་སུ་རྫོགས་པར་བསྒོམས་ལ། གནས་ཇི་ལྟ་བར་ཡི་གེ་གསུམ་གྱིས་སྐུ་གཉིས་བྱིན་གྱིས་བརླབས་ལ། རང་དང་སྤྱན་གཉིས་བྱུང་བའི་རྒྱལ་མཚན་ལ་གནས་པའི་ཡི་
གེ་ཐམས་ཅད་ར་སའི་མེས་ཞུ་བར་བྱས་ལ་བྱང་ཆུབ་ཀྱི་སེམས་ཕྱུང་སྟེ་ཧཱུྃ་ལས་བྱུང་བའི་རང་གི་གསང་བའི་རྡོ་རྗེ་བྱས་ལ་དེ་ནས་སྔགས་ཀྱི་ཡི་གེ་གཉིས་ཡི་གེ་ཧོ་དམར་པོ་དང་སྤེལ་བ་རང་གི་ཁར་བཅུག་སྟེ། འདོད་ཆགས་ཆེན་པོའི་མེས་དེ་ཞུ་བར་གྱུར་ཅིང་། གཉི་ག་ཡང་ཞུ་བར་
གྱུར་པར་བལྟས་ལ་སྤྱན་ལ་སོགས་པས་བསླང་བའི་གླུ་དང་ཡང་དག་པར་བསྐུལ་བ་སྔོན་དུ་འགྲོ་བར་བྱས་པ་དང་། དེ་ནས་རྣམ་པར་སྣང་མཛད་དུ་གྱུར་ནས་ཐུགས་ཀའི་ཟླ་བའི་དཀྱིལ་འཁོར་ལ་རང་གི་གསང་སྔགས་དང་ལྡན་པས་རྡོ་རྗེའི་བདག་ཉིད་ནི་བདག་ཡིན་ནོ་ཞེས་བྱ་བའི་ང་
རྒྱལ་བསྐྱེད་ནས། མཚན་ཐམས་ཅད་ལ་སོགས་པ་ཡོངས་སུ་རྫོགས་ཤིང་འོད་ཀྱི་དཀྱིལ་འཁོར་དམ་པས་བརྒྱན་པ་དང་ཕྱག་རྒྱ་དང་ཉེ་བར་ལྡན་པའི་ཡེ་ཤེས་སེམས་དཔར་བདག་ཉིད་བསྒོམ་པར་བྱའོ། །ཆ་ཤས་ཀྱི་ནི་དྲ་བ་ཅན། །ཞེས་བྱ་བ་ནི་ས་ལ་སོགས་པ་སྤྱན་ལ་སོགས་པར་

རང་གི་ས་བོན་ལས་བྱུང་བ་དགོད་པར་བྱའོ། །ཕུང་པོ་དང་ཁམས་དང་སྐྱེ་མཆེད་ལ་སོགས་པ་རྣམས་ལ་ནི་དེ་བཞིན་གཤེགས་པ་རྣམས་དང་སའི་སྙིང་པོ་ལ་སོགས་པ་བཀོད་ལ། ཡང་ཡི་གེ་གསུམ་གྱིས་བྱིན་གྱིས་བརླབས་ཏེ་རྡོ་རྗེ་སེམས་དཔའ་ལ་སོགས་པའི་རང་
གི་སྔགས་དང་ཕྱག་རྒྱས་བྱིན་གྱིས་བརླབ་པོ། །དེ་ནས་གོ་ཆ་དང་མཚོན་ཆ་ལ་སོགས་པ་བརྟག་པར་བྱ་ཞིང་རྫོགས་པའི་སངས་རྒྱས་ལྔ་པོ་རིན་པོ་ཆེའི་དབུ་རྒྱན་དུ་གྱུར་པའི་ཅོད་པན་དང་། ཕྲེང་བ་རྣམས་ཀྱིས་དབང་བསྐུར་ལ། གསང་བའི་མཆོད་པ་རྣམས་ཀྱིས་མཆོད་དེ། དེའི་
འོག་ཏུ་སྒྱུ་མ་སྟེ་རང་གི་ལྷའི་གཟུགས་ཀྱི་མཚན་ཉིད་ཅན་སངས་རྒྱས་ཀྱིས་སྤྲུལ་པ་མཛད་པ་དེ་རྣམས་ཀྱིས་སེམས་ཅན་ཐམས་ཅད་འདུལ་ཞིང་། པདྨ་ལ་གནས་པ་རྡོ་རྗེ་འབར་བའི་འཕྲོ་བའི་བདག་ཉིད་ཅན་གྱི་ལུས་དང་ལྡན་པ་སྤྲོས་ནས། ཡང་དག་པར་
བསྡུས་ཏེ་རང་གི་གདན་ལ་གནས་པར་བྱ་སྟེ་རང་གི་ལྷའི་ང་རྒྱལ་བྱའོ། །འདིར་ཡང་རྡོ་རྗེ་སེམས་དཔའ་ལ་སོགས་པའི་སྦྱོར་བས་རྣལ་འབྱོར་གསུམ་ཆར་ཡང་སྟོན་པ་ནི་སྒྲུབ་པའི་ཐབས་གཞན་དག་ཉེ་བར་མཚོན་པའི་དོན་དུ་འདི་དག་བསྟན་པ་ཡིན་ཏེ་གཞན་དུ་ན་དེ་རྣམས་ཀྱི་མོས་པའི་
དབང་གིས་ཉེ་བར་དགོད་པ་དོན་མེད་པར་ཐལ་བར་འགྱུར་རོ། །དབང་བསྐུར་བ་བྱས་པས་ནི་སྒེག་མོ་ལ་སོགས་པ་ཡང་དག་པར་མཆོད་ལ་སྟོང་པ་ཉིད་དུ་བྱས་ཏེ། རྡོ་རྗེ་གླུ་ལ་སོགས་པ་རྣམས་ཀྱིས་བདག་ཉིད་ཀྱི་ལུས་བསྐྱེད་དོ། །ལ་ལ་ནི་ཡོངས་སུ་བརྟགས་པ་དང་གཞན་
གྱི་དབང་ལ་སོགས་པའི་དེ་ཁོ་ན་ཉིད་ཀྱི་དབྱེ་བ་དང་རང་གི་ལྷ་ཉིད་ཀྱི་སྦྱོར་བ་ཉིད་ཀྱིས་སེམས་ཅན་གྱི་བསམ་པའི་ང་རྒྱལ་གྱི་དབྱེ་བས་བྱང་ཆུབ་གསུམ་འདིར་གསུངས་པ་ཡིན་ལ། དེ་ནི་དང་པོ་ཕྱེ་སྟེ་སྤྲོས་པ་ཡིན་ལ་གཞན་དག་ནི་མ་བཤད་དོ། །བསྒོམ་པས་སྐྱོ་བར་གྱུར་ན་མྱུར་ཆེས་
པ་དང་བུལ་བ་ལ་སོགས་པ་དང་བྲལ་བའི་གསང་སྔགས་བཟླས་བརྗོད་བྱའོ། །བཟླས་པས་སྐྱོ་ན་གཡས་པས་རྡོ་རྗེ་གསོར་ལ་གཡོན་པ་དཀུར་བརྟེན་པའི་དྲིལ་བུ་གསིལ་ཞིང་རྡོ་རྗེའི་གླུ་བླངས་ལ་མཆོད་པ་བྱས་ཏེ། སྔ་མ་བཞིན་དུ་གཤེགས་སུ་གསོལ་ལ་བདག་ཉིད་བསྲུངས་ཏེ།

སྐུ་དང་གསུང་དང་ཐུགས་བསྒོམ་པ་ཅི་བདེ་བ་ལ་གནས་པར་བྱའོ། །བསྒོམ་པ་དང་བཟླས་པ་བར་ཆད་དུ་གྱུར་པས་ཀྱང་ཡི་གེ་བརྒྱ་བ་བརྗོད་པ་ཉེ་བར་བསྡུ་བར་བྱའོ། །ལེའུ་བདུན་པའི་བཤད་པའོ།། །།ལས་ཀྱི་ཚོགས་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་
ཞེས་བྱ་བ་ལ་སོགས་པ་གསུངས་ཏེ། ལྷ་ནི་གང་ཡང་རུང་བ་ཞིག །ཅེས་བྱ་བ་ལ་སོགས་པས་ནི་འདི་སྐད་སྟོན་པར་འགྱུར་ཏེ། དཀྱིལ་འཁོར་གྱི་དབུས་སུ་གང་གཞག་པར་གྱུར་པའི་དཀྱིལ་འཁོར་ཏེ་དེའི་མིང་འབྱུང་བ་ཞེས་བྱ་བར་འགྱུར་རོ། །བདག་པོ་ཉིད་ཀྱིས་ཞེས་བྱ་བ་ནི་རྣམ་པར་
སྣང་མཛད་ལ་སོགས་པའི་རྣལ་འབྱོར་གྱིས་ཞི་བ་ལ་སོགས་པའི་ལས་རྣམས་བྱ་བའོ། །འཁོར་ལོའི་རྒྱལ་མོ་རྣམས་བསྒོམས་ནས། །ཞེས་བྱ་བ་ནི་སྤྱན་ལ་སོགས་པའི་རྒྱལ་མོ་བསྒོམས་པས་ཏེ་ཞི་བའི་ལས་ནི་སྐུལ་བྱེད་མ་དང་སྤྱན་གཉིས་ཀྱིས་སོ། །རྒྱས་པ་ལ་ནི་རིན་ཆེན་སྒྲོལ་མ་
དང་གོས་དཀར་མོ་གཉིས་ཀྱིས་སོ། །དབང་ལ་ནི་སྒྲོལ་མ་དང་། རྡོ་རྗེ་ལུ་གུ་རྒྱུད་གཉིས་ཀྱིས་སོ། །ཡམས་ལ་སོགས་པ་རྣམ་པར་གཞིག་པ་ལ་ནི་འོད་ཟེར་ཅན་དང་རི་ཁྲོད་ཀྱི་ལོ་མ་ཅན་གྱིས་སོ། །མངོན་སྤྱོད་ལ་ནི་མཱ་མ་ཀཱི་དང་ཁྲོ་གཉེར་ཅན་གྱིས་སོ། །རོལ་པ་སྟེ་ཞེས་བྱ་བ་ནི་
དོན་དམ་པ་ལ་རོལ་པའི་ངང་ཚུལ་དང་ལྡན་པས་སོ། །ཆགས་པའི་རྡོ་རྗེས་རྗེས་ཆགས་པ། །ཞེས་བྱ་བ་ནི་སྙོམས་པར་འཇུག་པ་ལ་རྗེས་སུ་ཆགས་པའོ། །གསང་སྔགས་དེ་ཉིད་ཀྱིས་བསྐུལ་ན། །ཞེས་བྱ་བ་ནི་སྦྱོར་བས་སོ། །དང་པོ་ཏིང་འཛིན་གྱིས་སྤྲུལ་ནས། །ཞེས་བྱ་བ་ནི་
སྔ་མ་བཞིན་དུ་སྤྲུལ་པར་བསམས་ཏེ་རྣམ་པར་སྣང་མཛད་ཀྱི་སྦྱོར་བས་བསྐུལ་བ་དང་བཅས་པ་དེའི་སྔགས་བརྗོད་ལ་སྤྱན་ནམ་སྐུལ་བྱེད་མ་ཕྱུང་སྟེ། བྱང་ཆུབ་ཀྱི་སེམས་ཀྱི་བདུད་རྩིས་གང་བའི་ཟླ་བ་ལྟར་དཀར་བའི་བུམ་པ་ལག་པ་གཉིས་ཀྱིས་འཛིན་ཅིང་བགྲང་ཕྲེང་དང་རིལ་བ་
སྤྱི་བླུགས་བསྣམས་ལ། དབང་པོ་ཞི་ཞིང་ཟླ་བ་ལྟར་དཀར་བ་སྤྲོས་ལ་ནད་ལ་སོགས་པས་གདུངས་པའི་འཇིག་རྟེན་ལ་ལྡུགས་པར་བསམ་མོ་ཞེས་བྱ་བའི་བར་དུའོ། །དང་པོ་ཏིང་འཛིན་གྱིས་སྤྲུལ་ནས། །ཞེས་བྱ་བ་ནི་སྔ་མ་དང་འདྲའོ། །ལུས་ལ་སོགས་པ་རྒྱས་པར་བྱ་བ་ལ་ནི་

རིན་ཆེན་ཏོག་གི་ཏིང་ངེ་འཛིན་དང་ལྡན་པས་རིན་ཆེན་སྒྲོལ་མ་དང་གོས་དཀར་མོ་གསེར་གྱི་མདོག་ཅན་ལ་བདུད་རྩི་ལ་སོགས་པས་ཡོངས་སུ་གང་བའི་གསེར་གྱི་བུམ་པ་ཕྱག་གཉིས་ཀྱིས་འཛིན་ཅིང་པདྨ་དང་རིན་པོ་ཆེ་བསྣམས་པ་བདུད་རྩིའམ་རིན་པོ་
ཆེའི་ཆར་འབེབས་པས་བསྒྲུབ་པར་བྱ་བའམ། དེའི་ཁྱིམ་འགེངས་པར་དེ་བཞིན་དུ་བསྒོམ་མོ། །བཀུག་སྟེ་མདའ་ཡིས་བསྣུན་ན་ནི། །ཞེས་བྱ་བ་འདི་སྐད་སྟོན་པར་འགྱུར་ཏེ། འོད་དཔག་མེད་ཀྱི་རྣལ་འབྱོར་པས་སྒྲོལ་མའམ་ལུ་གུ་རྒྱུད་མདོག་དམར་ཞིང་འོད་ཟེར་དམར་པོ་དང་
ལྡན་པ་ཞགས་པ་དང་ལྕགས་ཀྱུ་འཛིན་ལ། གཡོན་གྱིས་གཞུ་བཟུང་ནས་གཡས་ཀྱིས་རྩེ་དམར་བའི་མདའ་འདྲེན་པས་བསྒྲུབ་པར་བྱ་བའི་སྙིང་གའི་ལྟེ་བ་ལ་བསྣུན་པར་སྔ་མ་བཞིན་དུ་བསམས་ན་ངེས་པར་མངག་གཞུག་ཉིད་དུ་འགྱུར་རོ། །དོན་ཡོད་རྡོ་རྗེའི་རྣལ་འབྱོར་
པས་ནི་འོད་ཟེར་ཅན་ནམ། རི་ཁྲོད་ཀྱི་ལོ་མ་ཅན་མདོག་ལྗང་གུ་བྱང་ཆུབ་ཀྱི་སེམས་ཀྱི་ཆུས་གང་བའི་བུམ་པ་ཕྱག་ན་ཐོགས་ནས་ཡུལ་འཁོར་དུ་སྔ་མ་བཞིན་དུ་ལྡུགས་པར་བསམས་ན་བདུད་ལ་སོགས་པའི་ཉེ་བར་འཚེ་བ་སེལ་བར་འགྱུར་བས་ན་ཡམས་དང་གནོད་པ་ཞི་བར་
འགྱུར་རོ་ཞེས་གསུངས་སོ། །མརྒད་ལྟ་བུའི་མདོག་ཅན་ལ། །ཞེས་བྱ་བ་ནི་མརྒད་ཀྱི་འོད་ཀྱི་མདོག་ཅན་ནོ། །ཧཱུྃ་ཞེས་བྱ་བའི་སྒྲ་སྒྲོགས་པ། །ཞེས་བྱ་བ་ནི་ཁྲོ་གཉེར་ཅན་ནམ་མཱ་མ་ཀཱིས་ཧཱུྃ་གི་ང་རོའི་སྒྲ་སྒྲོགས་པའོ། །རྡོ་རྗེ་བསྡིགས་པར་བརྩོན་པ་ཡིས། །ཞེས་བྱ་བ་ནི་སྙིང་
གར་ཁྲོ་བོའི་སྡིགས་མཛུབ་ཀྱིས་བསྒྲུབ་བྱ་ལ་བསྡིགས་པར་བརྩོན་པའོ། །ཁྲོས་ནས་ནི་ཞེས་བྱ་བ་ནི་ཁྲོ་བོའི་ལྟ་བས་རྡོ་རྗེ་མེའི་ཆར་འབེབས་པར་མི་བསྐྱོད་པའི་རྣལ་འབྱོར་དང་ལྡན་པས་སྔ་མ་བཞིན་དུ་བསམ་པར་བྱ་ཞིང་བསྒྲུབ་པར་བྱ་བ་འཇིགས་པར་འགྱུར་བ་ལ་སྦྱར་བར་བྱའོ། །
སྦྱོར་བ་ཞེས་བྱ་བ་ནི་ཕྱག་རྒྱ་ལ་སོགས་པའི་སྦྱོར་བས་སོ། །རྡོ་རྗེ་སེམས་མ་ལ་སོགས་པ་བཞིས་རང་གི་རིགས་དང་ལྡན་པ་རྣམས་བྱིན་གྱིས་བརླབ་ཅིང་སྤྱན་དྲངས་ལ་དམ་ཚིག་ལ་བཞག་ནས། དབང་བསྐུར་བར་བྱའོ། །སྐལ་བ་བཟང་པོ་པ་རྣམས་ཀྱང་ཞི་བ་དང་རྒྱས་པ་ལ་སོགས་

པའི་ལས་ལ་སྦྱར་ན་དེས་རང་གི་ལས་ཞི་བ་དང་རྒྱས་པ་ལ་སོགས་པའི་འབྲས་བུ་དོན་ཡོད་པར་སྦྱིན་པར་བྱེད་པར་འགྱུར་རོ། །ཁྲོ་བོའི་རྒྱལ་པོར་སྦྱར་བར་བྱ། །ཞེས་བྱ་བ་ནི་གཤིན་རྗེ་གཤེད་ལ་སོགས་པའི་རྣལ་འབྱོར་པས་ལས་དེ་ཉིད་ལ་སྦྱར་བར་བྱའོ། །ཇི་ལྟར་ཞེ་ན། དམ་ཚིག་
ཅེས་བྱ་བ་ལ་སོགས་པ་གསུངས་ཏེ་རང་གི་ལྷའི་ང་རྒྱལ་གྱིས་བསྐུལ་བ་སྔོན་དུ་འགྲོ་བ་དང་། གསང་སྔགས་བརྗོད་ལ་དམ་ཚིག་སྤྱན་དྲང་བ་དང་བསྐྲད་པ་དང་། བསྲུང་བ་དང་མངོན་སྤྱོད་ལ་སོགས་པ་བྱའོ། །མངོན་སྤྱོད་ཉིད་བསྟན་པར་བྱ་བའི་ཕྱིར། རྐང་རྗེས་སའི་ཞེས་བྱ་བ་ལ་སོགས་
པ་གསུངས་ཏེ། དགྲ་བོའི་ཚ་བ་བསྐྱེད་པར་བྱ་བའི་ཕྱིར་ཇི་སྐད་དུ་བསྟན་པ་བཞིན་དེའི་གཟུགས་བརྙན་བྱས་ལ། རྣམ་པར་ཤེས་པ་དགུག་པ་ལ་སོགས་པ་སྔོན་དུ་འགྲོ་བས་དུག་དང་སྐེ་ཚེ་ལ་སོགས་པས་བཀང་ནས་ཤིན་ཏུ་སྡུག་བསྔལ་བར་གྱུར་པ་ལ། པོ་སོན་ཆའི་ཚེར་མས་ཁྲོ་བོའི་
སྔགས་བཟླས་པས་དབུག་གོ། །གསད་པ་ལ་ནི་མི་རུས་ཀྱི་ཕུར་བུས་དཔྲལ་བ་ལ་སོགས་པ་གནས་ལྔར་གདབ་བོ། །དེ་ཡང་འདི་ལྟར་ཕུར་བུས་བཏབ་ནས་བསྐམ་པར་བྱ་སྟེ། དེ་བཞིན་དུ་དེས་ཀྱང་མ་ནུས་ན་དུམ་བུར་གཏུབས་ནས་སྦྱིན་སྲེག་བྱའོ། །རུས་སྦལ་གྱི་རྐང་པས་ནི་སྔར་བཤད་
པའོ། །ཆོ་ག་བཞིན་དུ་དགུག་པར་བྱ། །ཞེས་བྱ་བ་ནི་ཡི་གེ་ཧཱུྃ་གིས་སྲུང་བ་དྲངས་ལ་དཔལ་དང་བྲལ་བར་བྱའོ། །བསྒྲུབ་བྱ་བསམས་ནས་ཞེས་བྱ་བ་ནི་རྡོ་རྗེ་ཁྲོ་བོ་ལ་ལས་ཞགས་པས་བཅིངས་ནས་ལྷོ་ཕྱོགས་སུ་ཁྲིད་པར་གྱུར་པ་དང་། ལ་ལས་རྡོ་རྗེས་བརྡེགས་བཞིན་པ་དང་།
ལ་ལས་རལ་གྲིས་གཏུབས་པར་གྱུར་པ་དང་། ཧཱུྃ་བཛྲ་རཱཀྵ། ཞེས་བྱ་བ་ལ་སོགས་པའི་བསྐུལ་ཚིག་སྔོན་དུ་འགྲོ་བས་རྡོ་རྗེ་སྲིན་པོས་བསྒྲུབ་པར་བྱ་བ་ཟོས་པར་བསྒོམས་ཤིང་། བྱ་རོག་དང་ཁྱི་ལ་སོགས་པས་ཀུན་ནས་བསྐོར་ནས་ཟ་ཞིང་འཐོག་པར་བསམས་མོ། །མིང་ནས་
བསྐུལ་བར་བྱ་ཞེས་བྱ་བ་ནི་དེའི་མིང་ནས་བསྐུལ་བས་སོ། །བསྐྲད་པའི་ཡང་ནང་གི་སྦྱོར་བ་བསྟན་པར་བྱ་བའི་ཕྱིར། །རླུང་གི་དཀྱིལ་འཁོར་ཞེས་བྱ་བ་ལ་སོགས་པ་གསུངས་ཏེ་རླུང་གི་དཀྱིལ་འཁོར་ལ་ཞོན་པ་ཧཱུྃ་དང་སྤེལ་བའི་ཨུ་ལས་བྱུང་བའི་རྡོ་རྗེ་རྔ་མོ་བསམས་ཏེ། དེའི་

རྒྱབ་ཏུ་བསྒྲུབ་པར་བྱ་བ་ཞོན་པར་ཡོངས་སུ་བརྟགས་ལ་རྡོ་རྗེ་ཁྲོ་བོས་གཟིར་བར་གྱུར་བཞིན་དུ་ལྷོ་ཕྱོགས་སུ་ཁྲིད་པར་གྱུར་པར་བསམ་མོ། །དེ་ཉིད་ལ་ཕྱིའི་ཆོ་ག་བསྟན་པར་བྱ་བའི་ཕྱིར་དེའི་རྐང་རྗེས་ཞེས་བྱ་བ་ལ་སོགས་པ་གསུངས་སོ། །དེ་ནི་འདི་སྐད་སྟོན་པ་ཡིན་ཏེ་རླུང་
གིས་བཙུགས་པའི་ཤིང་ལོ་ལ་ཁྲོ་བོའི་སྔགས་དང་སྤེལ་བའི་མིང་བྲིས་ལ་དེ་དང་། དེའི་རྐང་རྗེས་ཀྱི་ས་དང་བསྲེས་ལ་མིང་ནས་སྨོས་པ་སྔོན་དུ་འགྲོ་བས་བཀུག་ལ་རྡོ་རྗེ་སྣ་ཡོན་གྱི་རྐང་པའི་དྲུང་དུ་སྦའོ། །དེའི་མིང་གསང་སྔགས་དང་སྤེལ་ཏེ་ཞེས་བྱ་བ་ནི་འུག་པའི་སྒྲོ་ལ་བསྒྲུབ་པར་བྱ་
བའི་མིང་ཁྲོ་བོའི་སྔགས་དང་སྤེལ་ཏེ་བྲིས་ལ་དགེ་སྦྱོང་དང་བྲམ་ཟེའི་སྐྲ་ཡིས་དེ་དཀྲིས་ལ་སའི་འོག་ཏུ་བརྐོས་ནས་གཞུག་སྟེ་དེ་གཉིས་ཁྲོ་བོ་གཉིས་ཀྱིས་འཐབ་མོ་འགྱེད་པར་བསམ་པར་བྱ་སྟེ། དེས་ནི་ཕན་ཚུན་འབྱེ་བར་འགྱུར་རོ། །བསྒྲུབ་པར་བྱ་བའི་ལུས་བསྐམ་པར་བྱ་བའི་ཕྱིར་
ཧཱུྃ་ཞེས་བྱ་བ་ལ་སོགས་པ་གསུངས་ཏེ་ཁྲོ་བོའི་རྣལ་འབྱོར་དང་ལྡན་པས་རང་གི་སྣའི་རྩེ་མོ་ལ་གནས་པའི་ཧཱུྃ་ལས་བྱུང་བའི་རྡོ་རྗེ་ཕྲ་མོ་སྤྲོས་ལ་བསྒྲུབ་པར་བྱ་བ་བཀང་སྟེ་དེའི་ཡན་ལག་གི་ཚིགས་ཐམས་ཅད་དུ་སྣ་ཚོགས་རྡོ་རྗེ་རབ་ཏུ་འབར་བ་བསམས་ལ། དེ་འབར་བས་ལུས་
བསྐམས་ནས་ཨོཾ་བཛྲ་ཌཱ་ཀི་ནི། ཞེས་བྱ་བ་ལ་སོགས་པའི་སྔགས་བསྐུལ་བའི་ཚིག་སྔོན་དུ་འགྲོ་བས། རྡོ་རྗེ་མཁའ་འགྲོ་རྣམས་ཀྱིས་ཁྲག་ཀུན་ནས་གཞིབས་པར་གྱུར་པར་བསམ་མོ། །རླུང་བཅིང་བར་བྱ་བའི་ཕྱིར་མཁས་པས་རླུང་གི་ཞེས་བྱ་བ་གསུངས་ཏེ། རླུང་གི་
ཕྱོགས་སུ་དྲི་ནག་པོས་དཀྱིལ་འཁོར་གྲུ་བཞི་བྱས་པར་ཐིག་ལེ་བདུན་རེ་རེ་ཞིང་ཡི་གེ་ཡས་བསྐོར་བར་བྱས་ལ་དེའི་སྟེང་དུ་ཁམ་ཕོར་གྱིས་དགབ་ལ་དེ་ཡང་རི་རབ་རྩེ་མོ་བརྒྱད་པར་བསམས་ནས། དབུས་སུ་ལཾ་གྱིས་མཚན་པའི་དབང་ཆེན་གྱི་དཀྱིལ་འཁོར་རྡོ་རྗེ་ཆེན་པོས་མནན་
པའི་ནང་དུ་རླུང་རྣམས་ངེས་པར་ཆུད་པར་བསམས་ལ་གསང་སྔགས་བརྗོད་དེ་འདི་བྱའོ། །ཆར་དབབ་པའི་ཕྱིར་པདྨ་འདབ་བརྒྱད་ཅེས་བྱ་བ་ལ་སོགས་པ་གསུངས་ཏེ། པདྨ་འདབ་མ་བརྒྱད་པ་བྲིས་ཏེ་དེའི་འདབ་མ་བརྒྱད་ལ་མཐའ་ཡས་དང་རིགས་ལྡན་དང་། ནོར་རྒྱས་དང་།

དུང་སྐྱོང་དང་། འཇོག་པོ་དང་། པདྨ་ཆེན་པོ་དང་། ཀརྐོ་ཊ་དང་། པདྨ་ཞེས་བྱ་བ་གཉིས་གཉིས་ཤིང་ནག་པོ་དང་། དམར་པོ་དང་། སེར་པོ་དང་། དཀར་པོའི་མདོག་ཅན། ཨོཾ་ཤ་ལ་ས་ཧ་ཁ་ཞེས་བྱ་བ་དང་། རྐང་པ་ནས་བརྩམས་ཏེ་སྤྱི་བོའི་བར་དུ་ཀླུ་བརྒྱད་བྱིན་གྱིས་བརླབ་
ཅིང་པདྨའི་ལྟེ་བ་ལ་མཇུག་མ་རྣམས་གནས་པར་བྱས་ལ་རང་གི་གནས་ནས་བཀུག་སྟེ་མཆོད་ནས་ཁྲོ་བོའི་གཟུགས་འབར་བའི་ཕྲེང་བ་ཅན་དུ་བདག་ཉིད་དབུས་སུ་གནས་ལ་ཧཱུྃ་ནཱཾ་ཧཱུྃ་ཞེས་བརྗོད་ཅིང་རྟིང་པའི་མཐིལ་གྱིས་གཟིར་བར་གྱུར་པར་བསམས་ཤིང་། ཀླུ་རྣམས་ཀྱང་ཆར་འབེབས་
པ་ལ་བརྩོན་པར་བསམ་མོ། །ཆར་བཅད་པའི་ཕྱིར་ཉི་མའི་མདོག་ལྟར་ཞེས་བྱ་བ་ལ་སོགས་པ་གསུངས་ཏེ། བདག་ཉིད་ཉི་མ་དམར་པོའི་མདོག་དང་འདྲ་བའི་འོད་ཅན་གྱི་ཁྲོ་བོའི་གཟུགས་སུ་བསམས་ལ། རང་གི་ཁ་ནམ་མཁའི་ཚད་ཙམ་ལ་ཡི་གེ་ཧཱུྃ་གིས་འབར་བར་གྱུར་པའི་ལྕེ་དང་ལྡན་པ་
གདངས་ཏེ་ཆུས་ཡོངས་སུ་གང་བའི་སྤྲིན་བལྡགས་ལ་དབུགས་ཀྱིས་རྔུབས་ལ་དབུགས་ཕྱུང་བས་ཤིང་བལ་བཞིན་དུ་གཏོར་བར་བྱའོ། །ཡང་ན་རང་གི་ཕྱག་རྒྱའི་ཚོགས་ཁ་ནམ་མཁའི་ཚད་ཙམ་ལ་ལྕེ་འབར་བ་གདངས་ལ་ཆུས་ཡོངས་སུ་གང་བའི་སྤྲིན་བལྡགས་ཏེ་དབུགས་ཀྱིས་
དྲངས་ལ་དབུགས་ཕྱུང་བས་ཤིང་བལ་བཞིན་དུ་གཏོར་བར་བྱའོ། །གལ་ཏེ་ཡང་རང་གི་ཕྱག་རྒྱའི་ཚོགས་ཀྱི་འབར་བ་བཏང་བས། སྤྲིན་བཅད་ཅིང་གཏུབས་ལ་ཧཱུྃ་ཞེས་བྱ་བས་བསྡིགས་པ་ལ་བརྩོན་པར་བྱའོ། །བགེགས་ཐམས་ཅད་རྣམ་པར་གཞིག་པའི་ཕྱིར་མེའི་དཀྱིལ་འཁོར་
ཞེས་བྱ་བ་ལ་སོགས་པ་གསུངས་ཏེ། རྣམ་པར་སྣང་མཛད་ཀྱི་སྦྱོར་བ་དང་ལྡན་པས་རང་གི་དཔྲལ་བ་ལས་བྱུང་བའི་འཕགས་པ་མི་གཡོ་བ་མེའི་དཀྱིལ་འཁོར་ལ་གནས་པ་ཕྱག་དྲུག་པ་བསམས་ཏེ། དེ་ཉིད་ཁྲོ་བོ་གྲངས་མེད་པ་དང་བཅས་པས་བགེགས་ཐམས་ཅད་ཧཱུྃ་གི་སྒྲ་དང་རབ་ཏུ་
འབར་བའི་རལ་གྲི་ལ་སོགས་པ་འབེབས་པས་བགེགས་རྣམས་གཞིག་པར་བྱའོ། །མིའི་བགེགས་གཞོམ་པར་བྱ་བའི་ཕྱིར་རྐང་རྗེས་ས་དང་ཞེས་བྱ་བ་ལ་སོགས་པ་གསུངས་ཏེ། མིའི་རྐང་རྗེས་ཀྱི་ས་དང་མིའི་ཁྲག་གིས་བསྒྲུབ་པར་བྱ་བའི་གཟུགས་བརྙན་བྱས་ལ་མི་རུས་ཀྱི་ཕུར་བུ་

དག་ལ་འོད་ཟེར་ཅན་གྱི་སྔགས་ཉི་ཤུ་བཟླས་ལ་གཉིས་ཀྱིས་མིག་གཉིས་སུ་ཕུར་བུ་བཏབ་ལ་ཚོགས་ཀྱི་བདག་པོའི་ཁར་བཅུག་སྟེ། ཨོཾ་སུམྦྷ་བཛྲ་མུ་ས་ལ། ཞེས་བརྗོད་པ་སྔོན་དུ་འགྲོ་བས་རྡོ་རྗེ་གཏུན་ཤིང་གིས་རྒྱབ་ནས་བརྡུང་པར་བསམ་པར་བྱའོ། །མེ་མཆེད་པ་
བཟློག་པར་བྱ་བའི་ཕྱིར་སྟང་ཟིལ་ཁ་དོག་ཅེས་བྱ་བ་ལ་སོགས་པ་གསུངས་ཏེ། རང་གི་ཡེ་ཤེས་ཧཱུྃ་དང་སྤེལ་བ་ལས་བྱུང་བའི་ནམ་མཁའ་ལྡིང་མདོག་ནག་པོ་ལུས་ལ་ཀླུ་སྟོང་གིས་ཁྱབ་པར་བསམས་ལ། ཨོཾ་བཛྲ་ནཱ་ར་ཡཱ་ན་ཞེས་བྱ་བ་ལ་སོགས་པ་དང་། བསྐུལ་བ་སྔོན་དུ་འགྲོ་
བ་དེས་བརྒྱ་བྱིན་བསྐུལ་ལ་འདི་ལ་ཡང་སྤྲིན་གྱི་ཚོགས་ལས་ཆར་དབབ་པའི་ཕྱིར་བཀའ་བསྒོ་བར་བྱའོ། །བཀའ་ཐོས་ནས་ཆུའི་ཆར་འབེབས་པའི་སྤྲིན་རྣམས་ཀྱིས་མེ་གསོད་པ་ལ་བརྩོན་པར་བསམས་ལ་ནམ་མཁའ་ལྡིང་གིས་ཀྱང་གཤོག་པའི་ཆུ་དང་། མཆུས་བརྐོས་པས་
ཆུ་ཀླུང་གི་མཚམས་བྱེད་པར་བསམ་མོ། །རྡོ་རྗེ་ཐོག་ཐོག་བཟློག་པར་བྱ་བའི་ཕྱིར་ཞལ་རས་གསུམ་པ་ཞེས་བྱ་བ་ལ་སོགས་པ་གསུངས་ཏེ། དཔལ་རྡོ་རྗེ་སེམས་དཔའ་ཞལ་རས་གསུམ་པ་ཟླ་བའི་མདོག་ཅན་ཕྱག་བཞི་པ་འོད་དམར་པོ་སྣ་ཚོགས་འབར་བའི་འོད་དང་ལྡན་པ་
བསྙེམས་མ་ལ་སོགས་ལྷ་མོ་བཞིས་ཡོངས་སུ་བསྐོར་བ་བདག་ཉིད་རྣམ་པར་བསམས་ལ་གཡས་པས་རྡོ་རྗེ་བསྟོད་དེ་འཇོག་པ། ལག་པ་གཡོན་པས་རྡོ་རྗེ་དྲིལ་བུ་བསྣམས་པའི་རྡོ་རྗེ་སེམས་དཔའ་ལ་སོགས་པ་ཕྱུང་ལ་སྤྲོས་ཏེ། ནམ་མཁའི་ཁམས་སུ་སྤྲིན་བཞིན་དུ་ཁྱབ་
པར་བསམས་ནས་བསྒྲུབ་པར་བྱ་བའམ། ཨོཾ་མ་ཧཱ་སུ་ཁ་བཛྲ། ཞེས་བྱ་བ་ལ་སོགས་པས་རྣམ་པ་ཐམས་ཅད་ཀྱིས་བརྒྱན་པའི་རྡོ་རྗེ་ཅན་དུ་བྱིན་གྱིས་བརླབས་ལ་སངས་རྒྱས་ཀྱི་རིན་པོ་ཆེས་དབང་བསྐུར་ནས་ཅོད་པན་དང་ཕྲེང་བའི་དབང་བསྐུར་བར་བྱའོ། །ད་ནི་རྣམ་པར་སྣང་མཛད་
ཆེན་པོ་འགྲོ་བ་ཐམས་ཅད་ལ་གཟིགས་ནས་སྨིན་མ་མཛེས་པར་བསྐྱོད་ཅིང་། འཛུམ་པ་ལ་སོགས་པ་དང་ལྡན་པར་མཛད་པ་དང་ཕྱག་ན་རྡོ་རྗེས་གཟིགས་པ་ལ་སོགས་པའི་རྒྱུ་ཞུས་ཤིང་། བཅོམ་ལྡན་འདས་ཀྱིས་ཀྱང་བཀའ་སྩལ་པ་བསྟན་པར་བྱ་བའི་ཕྱིར། བསྒོམ་པའི་

ལམ་ལས་ཞེས་བྱ་བ་ལ་སོགས་པ་གསུངས་ཏེ་སེམས་ཅན་གྱི་དངོས་པོ་གང་ཡིན་པའི་དངོས་པོ་རྣམས་ནི་དངོས་པོ་མེད་ལ་སྐྱེ་བ་དང་འགག་པ་མཐའ་གཉིས་དང་བྲལ་བ་ཡིན་ཞིང་དེ་མེད་པས་དབུ་མ་ཡང་མེད་དོ། །དེ་བས་ན་ནམ་མཁའ་དང་འདྲ་བ་ཡིན་ན་བྱང་ཆུབ་ཇི་ལྟར་མངོན་སུམ་དུ་
བྱ་བའི་ཐབས་དེ་བསྟན་པར་བྱ་བའི་ཕྱིར་ཕུང་པོ་ཞེས་བྱ་བ་ལ་སོགས་པ་གསུངས་ཏེ། ཐབས་དང་ཤེས་རབ་ཀྱི་བདག་ཉིད་ཅན་གྱི་ལྷའི་ཕུང་པོ་དང་གཅིག་ཏུ་གྱུར་པར་བསྒོམས་པས་སྒོམ་པ་ནི་བསྒོམ་པ་གོམས་པར་བྱེད་པའོ། །བྱང་ཆུབ་སེམས་ནི་གྲོགས་འགྱུར་བས། །ཞེས་བྱ་
བ་ནི་བྱང་ཆུབ་ཀྱི་སེམས་སྒོམ་པ་སྔོན་དུ་འགྲོ་བས་སོ། །སྤྲུལ་པ་དང་ནི་བསྡུ་བ་ཡིས། །ཞེས་བྱ་བ་ནི་དེ་བཞིན་གཤེགས་པ་ཐམས་ཅད་མཆོད་པར་བྱ་བའི་ཕྱིར་སྤྲུལ་པ་སྤྲོ་བ་དང་བསྡུ་བ་དག་བྱེད་པ་སྟེ། དེ་ཡང་སེམས་ཙམ་ཡིན་པས་དེ་ཉིད་ཀྱི་ལྷ་རྣམས་ཀྱི་སྐུ་དང་གསུང་དང་བྱང་
ཆུབ་ཀྱི་མཚན་ཉིད་ཅན་གྱི་སེམས་འཐོབ་པར་འགྱུར་ལ་དེ་ཡང་སྒྱུ་མ་དང་འདྲ་སྟེ་བྱང་ཆུབ་ཀྱང་དེ་དང་འདྲའོ། །སྒྱུ་མ་ལྟ་བུ་ལས་ཇི་ལྟར་ན་འབྲས་བུ་འབྱུང་བར་འགྱུར་ཞེ་ན་དཔེར་ན་ཞེས་བྱ་བ་ལ་སོགས་པ་གསུངས་སོ། །ལྷག་མ་དང་བཅས་པའི་བྱང་ཆུབ་ནི་ཉན་ཐོས་ལ་སོགས་པ་
སྟེ་ཕུང་པོ་ལ་སོགས་པ་མེད་པའི་ཕྱིར་རོ། །ལྷག་མ་མེད་པ་ཡང་སྒྲིབ་པའི་བག་ཆགས་དང་བྲལ་བས་བླ་ན་མེད་པའི་བྱང་ཆུབ་བོ། །འདི་ཉིད་བསྐྱེད་པར་བྱ་བའི་ཕྱིར་ཀུན་རྫོབ་ཏུ་དེ་ཁོ་ན་ཉིད་རྣམ་པ་བཅུ་གསུངས་སོ། །ཇི་སྐད་དུ་བཤད་པའི་ཆོ་ག་བྱས་ཀྱང་མ་གྲུབ་ན་ལྷ་
རྣམས་ཚར་གཅད་པར་བྱ་བའི་དོན་དུ་ཇི་ལྟ་བ་བཞིན་དུ་ཕུར་བུས་གདབ་པར་བྱ་བའི་ཕྱིར། དེར་ལྕགས་ཀྱུས་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་ལྕགས་ཀྱུས་བཀུག་ནས་རྡོ་རྗེ་ཞགས་པས་བཅིངས་ལ། རྡོ་རྗེ་ནག་མོས་སྡིགས་མཛུབ་བྱས་ལ་
རྡོ་རྗེ་ཁུ་ཚུར་གྱིས་ཕུར་བུ་བཟུང་སྟེ། རྡོ་རྗེ་ཐོ་བས་ཕུར་བུའི་སྔགས་གདོན་བཞིན་དུ་གནས་ལྔར་ཕུར་བུས་གདབ་པར་བྱའོ། །ལེའུ་བརྒྱད་པའི་བཤད་པའོ།། །།དབབ་པ་ལ་སོགས་པའི་ལས་བསྟན་པར་བྱ་བའི་ཕྱིར་དེ་ནས་བཅོམ་ལྡན་འདས་ཞེས་བྱ་བ་ལ་སོགས་

པ་གསུངས་ཏེ། རྣམ་པར་སྣང་མཛད་ལ་སོགས་པའི་རྣལ་འབྱོར་པས་དབབ་པའི་སྣོད་སྐུལ་བྱེད་མ་ལ་སོགས་པའི་གཟུགས་སུ་རྣམ་པར་བསམས་ལ། གནས་ཇི་ལྟ་བར་གྱུར་པའི་ཡི་གེ་གསུམ་གྱིས་བྱིན་གྱིས་བརླབས་ལ། རང་གི་ས་བོན་ལས་བྱུང་བའི་
རླུང་དང་མེའི་དཀྱིལ་འཁོར་ལ་གནས་པ་རང་གི་རྡོ་རྗེ་འབར་བར་འགྱུར་བས་འབར་བཞིན་པར་བལྟས་ལ། རྡོ་རྗེ་བསྡམས་པ་དང་བཅས་པའི་དྲིལ་བུ་བསྐྱོད་ཅིང་གཟེངས་བསྟོད་པ་དང་བཅས་པར་གསང་སྔགས་བརྗོད་ན་འབར་བར་འགྱུར་རོ་ཞེས་གསུངས་སོ། །གནས་
པར་བྱ་བའི་དོན་དུ་སྦྱོར་པ་བསྟན་པར་བྱ་བའི་ཕྱིར་དབང་ཆེན་དཀྱིལ་འཁོར་ཞེས་བྱ་བ་ལ་སོགས་པ་གསུངས་སོ། །དེ་ནི་འདི་སྐད་སྟོན་པར་འགྱུར་ཏེ། རས་ལ་སོགས་པ་ལ་དབང་ཆེན་གྱི་དཀྱིལ་འཁོར་ཕྱོགས་དང་མཚམས་རྣམས་སུ་ཨོཾ་གྱིས་མཚན་པར་གི་ཝང་གིས་བྲིས་ལ། དབུས་
སུ་པདྨ་འདབ་མ་བརྒྱད་པ་ཨཱཿས་མཚན་པ་བྲིས་ཏེ། ལྟེ་བ་ལ་གནས་པའི་ཡི་གེ་ཧཱུྃ་བཞི། མཐའ་མ་བསྒྲུབ་པར་བྱ་བའི་མིང་དང་ལྡན་པ་བྲིས་ལ། དེ་ནས་དེར་དེའི་རྣམ་པར་ཤེས་པ་བཀུག་ནས་ཁམ་ཕོར་སེར་པོ་ཁ་སྦྱོར་གྱི་ནང་དུ་བཅུག་སྟེ་སྟེང་དུ་རྡོ་རྗེ་འཆང་བས་
མནན་ལ་བསྐུལ་ཚིག་དང་བཅས་པར་ཧཱུྃ་བརྒྱ་རྩ་བརྒྱད་བཟླས་པའི་རྡོ་རྗེའི་སྐུད་པས་དཀྲིས་ལ་གཞག་པར་བྱའོ། །དབང་དུ་བྱ་བའི་ཕྱིར་སྔགས་ལ་མཁས་པ་ཞེས་བྱ་བ་ལ་སོགས་པ་གསུངས་ཏེ། འདོད་ཆགས་ཆེ་དང་ལྡན་པའི་གཟུགས། །ཞེས་བྱ་བ་ནི་རྡོ་རྗེའི་
འདོད་ཆགས་ཏེ་དེའི་གཟུགས་ཅན་ལ་དེ་སྐད་ཅེས་བྱ་སྟེ། རྡོ་རྗེ་སེམས་དཔར་གྱུར་ནས་རྡོ་རྗེ་ཆགས་པར་གྱུར་པའོ། །དཔྱིད་ཅེས་བྱ་བ་ནི་མེ་ཏོག་དྲི་ཞིམ་པའི་ཕྲེང་བ་ལ་སོགས་པས་བརྒྱན་པའི་ཕྱིར་རོ། །འདོད་པ་དང་འདྲ་བ་ནི་མེ་ཏོག་གི་མདའ་དང་གཞུ་དང་ལྡན་
པའི་ཕྱིར་རོ། །སྐུ་གསུམ་ལྡན་པ་མདའ་ཐོགས་ཤིང་། །ཞེས་བྱ་བ་ནི་ལྟོང་དང་དབུས་དང་མདེའུ་ལ་ཨོཾ་ལ་སོགས་པ་གསུམ་བཀོད་པའི་མདས་བསྒྲུབ་པར་བྱ་བའི་བུད་མེད་ཀྱི་སྤྱི་བོར་ཆགས་པས་མནན་ལ་མར་སར་བཞིན་དུ་ཟགས་པར་གྱུར་པར་བསམས་

ཞིང་། འཛག་པར་བྱ་བའི་ཕྱིར་པདྨའི་ནང་དུ་ཞུགས་པའམ་ཡང་ན་འདོད་ཆགས་ཅན་མི་འཛག་པར་འགྱུར་བ་སྟེ། འདོད་པ་ཞུ་བ་བཞིན་དུའོ། །པདྨ་ནི་པདྨའི་ལྟེ་བར་རོ། །དེ་ལྟར་ན་འདིའི་འཛག་པར་འགྱུར་བའོ། །བུ་མོ་ཟས་སྦྱིན་མ་དགུག་པར་བྱ་བའི་
ཕྱིར་མི་ཐོད་ལས་བྱས་ཞེས་བྱ་བ་ལ་སོགས་པ་གསུངས་ཏེ། མི་ཐོད་ལས་བྱས་ཅང་ཏེའུ་ལ། །ཞེས་བྱ་བ་ནི་མི་ཐོད་ལས་བྱས་པའོ། །གཡོགས་ནས་ནི་ཞེས་བྱ་བ་ནི་ཁ་སྤྲེའུའི་པགས་པས་གཡོགས་པའོ། །བུད་མེད་ཁྲག་གིས་མཛེས་པར་བྱ། །ཞེས་བྱ་བ་ནི་
བུད་མེད་ཀྱི་ཟླ་མཚན་གྱིས་ངོས་གཉི་ག་ལ་ཡང་པདྨ་བྲིས་པས་མཛེས་པའོ། །བྲིས་ཏེ་ཞེས་པ་ནི་བུད་མེད་ཀྱི་ཁྲག་ཉིད་ཀྱིས་པདྨའི་ལྟེ་བ་གཉིས་སུའོ། །མི་ཡི་སྐྲ་ཡིས་བཏགས་ནས་ནི། །ཞེས་བྱ་བ་ནི་དུར་ཁྲོད་ཀྱི་སྐྲ་བླངས་པས་རུས་པ་གཉིས་བཅིང་ཞེས་བྱ་བའི་
དོན་ཏོ། །དཀྱིལ་འཁོར་བྲི་ཞེས་བྱ་བ་ནི་མཚན་མོ་ལམ་གྱི་བཞི་མདོར་རྐང་པ་གཡོན་པའི་མཐེ་བོས་དཀྱིལ་འཁོར་ཟུར་བཞི་པ་ལ་མཚམས་རྣམས་སུ་རྡོ་རྗེ་ལྕགས་ཀྱུ་བྲི་བར་བྱའོ་ཞེས་བྱ་བའི་བར་དུའོ། །བརྡུང་ཞེས་བྱ་བའི་བར་དུ་ནི་དེ་ལ་གནས་ནས་རྐང་པ་གཡོན་
པའི་རྟིང་པས་འགུགས་ཤིང་མིང་བརྗོད་པ་སྔོན་དུ་འགྲོ་བས། ཁྲོཾ་ཧཱུཾ་ཞེས་བརྗོད་ཅིང་ཐིང་རིལ་གྱི་རྐང་པའི་རུས་པས་སྒྲ་དབྱུང་བའི་ཕྱིར་བརྡུངས་ན་བུ་མོ་ཟས་སྦྱིན་མ་འགུགས་པར་འགྱུར་རོ། །རྣལ་འབྱོར་པ་འཁོར་ལོ་རྫོགས་པར་གྱུར་པས་བལྟས་པ་དང་། ཚིག་
ཙམ་གྱིས་ཀྱང་མངོན་པར་དད་པའི་འབྲས་བུ་ཐམས་ཅད་རྫོགས་པར་འགྱུར་རོ་ཞེས་བསྟན་པར་བྱ་བའི་ཕྱིར་གང་ཡང་རུང་བ་ཞེས་བྱ་བ་ལ་སོགས་པ་གསུངས་སོ། །སྦྱིན་སྲེག་གི་ལས་བསྟན་པར་བྱ་བའི་ཕྱིར་སྦྱིན་སྲེག་ཅེས་བྱ་བ་ལ་སོགས་པ་གསུངས་ཏེ། དགེ་བ་ཡི་ནི་
ལས་རྣམས་བྱེད། །ཅེས་བྱ་བ་ནི་ཞི་བ་དང་རྒྱས་པ་དང་དབང་དུ་བྱ་བ་ནི་གཡས་སུ་གཙུབས་པ་ལས་བྱུང་བའི་མེ་ལས་བྱའོ། །མངོན་སྤྱོད་ལ་ནི་དུར་ཁྲོད་ལས་བྱུང་བའི་མེ་ལས་བྱའོ། །ཐབ་ཁུང་ཞེས་བྱ་བ་ནི་ཟླུམ་པོ་དང་ཟུར་བཞི་དང་ཟླ་གམ་དང་ཟུར་གསུམ་པའི་ཐབ་ཁུང་གི་དབུས་སུ་གནས་པའི་དཀར་པོ་དང་། སེར་པོ་དང་།

དམར་པོ་དང་། ནག་པོའི་པདྨ་ལ་གཞག་པའི་གཙུག་ཏོར་དང་། རིན་པོ་ཆེ་དང་། པདྨ་དང་། འབར་བའི་རྡོ་རྗེ་དེ་ཉིད་ཀྱི་མདོག་ཅན་བྱའོ་ཞེས་བྱ་བའི་དོན་ཏོ། །ལས་ཀུན་བྱེད་པས་བཟླས་ནས་སུ། །ཞེས་བྱ་བ་ནི་ཧཱུྃ་གིས་མངོན་པར་བཟླས་པའོ། །ལག་གཡོན་རྡོ་རྗེ་ཞེས་བྱ་བ་ནི་ལག་པ་གཡོན་པ་
རྡོ་རྗེ་རྩེ་གསུམ་པར་བྱས་པའོ། །ལས་ཀྱི་འོད་ཟེར་རྣམས་ཀྱིས་བརྒྱན། །ཅེས་བྱ་བ་ནི་ཞི་བ་ལ་སོགས་པའི་ལས་ཀྱི་མཆོག་གི་འོད་ཟེར་རྣམས་ཀྱིས་མཛེས་པར་འགྱུར་པའོ། །འབར་བའི་རྣམ་པར་བསྒྱུར་བར་བྱ། །ཞེས་བྱ་བ་ནི་འབར་བས་ལྷ་འབར་བའི་གཟུགས་ཀྱིས་དེ་བཞིན་ཉིད་ཀྱི་ཡེ་ཤེས་ངོ་བོ་ཉིད་དུ་འགྱུར་བར་བྱའོ། །
ཨོཾ་ཞེས་པ་དང་སྭཱ་ཧཱའི་མཐའ། །ཞེས་བྱ་བ་ནི་ཞི་བ་དང་རྒྱས་པ་དང་དབང་རྣམས་ལ་ནི་གསང་སྔགས་གཞན་གྱིས་མི་ཐོས་པར་བརྗོད་པར་བྱའོ། །མངོན་སྤྱོད་ལ་ནི་ཧཱུྃ་དང་ཕཊ་བཅས་ཤིང་ཁྲོ་བོའི་ཚིག་གིས་ཐོག་མ་དང་ཐ་མར་དགང་བླུགས་དབུལ་བར་བྱའོ། །ཞལ་བཀང་ནས་ཞེས་གསུངས་པས་ལྷ་
རྣམས་ཀྱི་ཞལ་གྱི་པདྨར་སྦྱིན་སྲེག་དབུལ་ལོ། །བཤང་གཅི་ལ་སོགས་པས་སྦྱིན་སྲེག་བྱས་པས་སྡིག་པར་འགྱུར་རོ་ཞེས་སོམ་ཉི་སྐྱེ་བར་མི་བྱ་སྟེ། གང་གི་ཕྱིར་འདི་དག་ཐམས་ཅད་རྣམ་པར་རྟོག་པ་ཙམ་ཡིན་གྱི་དོན་དམ་པར་ངོ་བོ་ཉིད་ཀྱིས་དག་པ་ཡིན་པའི་ཕྱིར་རོ། །དེ་བས་ན་དབང་པོ་གཉིས་
ཀྱི་སྙོམས་པར་འཇུག་པས་ཀྱང་། ལྷའི་ང་རྒྱལ་སྔོན་དུ་འགྲོ་བས་ཐབས་དང་ཤེས་རབ་རོ་གཅིག་པ་མངོན་གསུམ་དུ་བྱས་ན་ཟག་པ་མེད་པའི་ཡེ་ཤེས་སྐྱེད་པ་ཡིན་ནོ། །སྐུ་ལ་སོགས་པའི་དམ་ཚིག་བསྟན་པར་བྱ་བའི་ཕྱིར། ལས་ལས་བྱུང་བ་ཞེས་བྱ་བ་ལ་སོགས་པ་གསུངས་ཏེ། ལས་ལས་
བྱུང་བ་རྣམས་བསྟན་པའི། །ཞེས་བྱ་བ་ནི་དགེ་བ་དང་མི་དགེ་བའི་ལས་རྣམས་ཀྱིས་སོ། །ཤ་དང་རྐང་ལ་སོགས་པ་རྣམས་ནི་རྣམ་པར་སྣང་མཛད་དང་། མི་བསྐྱོད་པ་ལ་སོགས་པའི་ངོ་བོ་ཡིན་ཏེ་དེ་བས་ན་བསྟེན་པར་བྱའོ། །གང་ཡང་འདོད་ཆགས་དང་ཞེ་སྡང་ལ་སོགས་པའི་འདུ་བྱེད་
རྣམས་འཕེལ་བའི་བཤང་གཅི་ལ་སོགས་པ་འཛག་པ་རྣམ་པ་ལྔ་ནི་ས་ལ་སོགས་པ་འབྱུང་བ་ཆེན་པོ་བཞིའི་ངོ་བོ་ཉིད་དོ། །བསྒོམ་པའི་བློ་གྲོས་རྫོགས་པ་ཡིས། །ཞེས་བྱ་བ་ནི་རྟོག་པ་དང་བྲལ་བར་གྱུར་པའོ། །ལེའུ་དགུ་བའི་བཤད་པའོ།། །།དེ་ནས་བཅོམ་ལྡན་འདས་ཞེས་བྱ་བ་

ལ་སོགས་པ་གསུངས་པ་ནི་སྒྲུབ་པ་ཆེན་པོ་བསྒྲུབ་པ་ལ་སོགས་པ་བསྟན་པ་ཡིན་ཏེ། ཏིང་ངེ་འཛིན་ཐམས་ཅད་ཐོབ་ཅིང་འཁོར་ལོ་ལ་སོགས་པའི་དངོས་གྲུབ་མཆོག་ལ་དམིགས་པའི་ཏིང་ངེ་འཛིན་གང་ཡིན་པ་དེ་ལ་དེ་སྐད་ཅེས་བྱའོ། །རྣམ་པར་སྣང་མཛད་ཏིང་འཛིན་གནས། །ཞེས་བྱ་བ་ནི་སྤྱན་དང་
ལྡན་པའི་རྟོག་པའི་རྣལ་འབྱོར་དང་ལྡན་པས་སོ། །འཁོར་ལོ་བསྒྲུབ་པར་བྱ་ཞེས་བྱ་བས་ནི་འདི་སྐད་སྟོན་པར་འགྱུར་ཏེ། འཁོར་ལོ་བསྒྲུབ་པར་བྱ་བའི་ཕྱིར་སྟོན་དུ་བསྙེན་པ་བྱས་ལ། རང་གི་དཀྱིལ་འཁོར་གྱི་དབུས་སུ་རང་གི་མཚན་ཉིད་ཇི་ལྟ་བ་དང་ལྡན་པའི་འཁོར་ལོ་གཞག་སྟེ། འོད་ཟེར་
འབར་བའི་ཕྲེང་བས་འཁྲིགས་པ་རྣམ་པར་སྣང་མཛད་ལ་སོགས་པ་སྐུ་གསུམ་རྡོ་རྗེ་ཅན་གྱི་གཟུགས་འབར་བའི་ཕྲེང་བས་འཁྲིགས་པའི་འོད་དང་ལྡན་པ་སྙོམས་པར་འཇུག་པ་ལས་ཕྱུང་ལ་འཁོར་ལོ་ནང་དུ་ཞུགས་པར་བསྒོམས་ཏེ། ཇི་སྲིད་དུ་ཞུགས་ནས་འབར་བར་གྱུར་པ་དེ་སྲིད་དུ་
བསྒོམས་ལ། དེ་རང་གི་སྤྱན་གྱི་རིག་སྔགས་བཟླས་བརྗོད་བྱེད་བཞིན་དུ་བླང་བར་བྱའོ། །དེ་བཞིན་དུ་ཅི་རིགས་པར་མི་བསྐྱོད་པ་ལ་སོགས་པའི་སྒོམ་པས་རྡོ་རྗེ་ལ་སོགས་པ་བསྒྲུབ་པ་ཡང་ཉམས་སུ་བླང་བར་བྱའོ། །འདི་ཉིད་ཀྱི་སྐུ་གསུམ་དབྱེ་བའི་རང་གི་ངོ་བོ་བསྟན་པར་བྱ་བའི་ཕྱིར་རིམ་པ་བཞིན་
དུ་ཞེས་བྱ་བ་ལ་སོགས་པ་གསུངས་སོ། །ལས་ཀྱི་ཕྱག་རྒྱ་ནི་ལྕགས་ཀྱུ་ལ་སོགས་པའམ་སྔར་བཤད་པའི་མཚན་མ་ཐམས་ཅད་ཀྱང་ཕྱོགས་གཅིག་བསྟན་པའི་ཉེ་བར་མཚོན་པས་བདག་པོའི་སྦྱོར་བ་དང་ལྡན་པས་འཁོར་ལོ་དང་འདྲ་བ་ལྕགས་ཀྱུ་ལ་སོགས་པ་གྲུབ་པར་བྱ་བའི་ཕྱིར་འདིར་སྐུ་
ལ་སོགས་པ་ནང་དུ་གཞུག་པར་བྱའོ་ཞེས་བསྟན་པར་བྱ་བའི་ཕྱིར་རོ། །འདིས་ཞེས་བྱ་བ་ལ་སོགས་པ་སྤྱན་ལ་སོགས་པའི་གཟུགས་སུ་བསྟན་པར་བྱ་བའི་ཕྱིར་ས་ནི་ཞེས་བྱ་བ་ལ་སོགས་པ་གསུངས་སོ། །དེ་བཞིན་གཤེགས་པ་ཐམས་ཅད་མཉམ་པ་ཉིད་དུ་གནས་པའི་ཏིང་ངེ་འཛིན་གང་ཡིན་པ་དེ་ལ་དེ་
སྐད་ཅེས་བྱའོ། །གསང་བ་འདུས་པར་དབང་བསྐུར་བ་ནི་དེ་བཞིན་གཤེགས་པ་ཐམས་ཅད་བུམ་པའི་ནང་དུ་ཞུགས་ནས་བདེ་བ་ཆེན་པོར་ཞུ་བར་གྱུར་པར་རྣམ་པར་བསམས་ལ་དེ་སྤྱན་ལ་སོགས་པས་ཐོགས་ཏེ། འཁོར་ལོ་ཆེན་པོ་དབང་བསྐུར་བ། །ཞེས་བྱ་བ་ལ་སོགས་པའི་ཚིགས་སུ་བཅད་པ་དང་། གསང་སྔགས་

ཀྱི་བདག་ཉིད་ལ་སློབ་དཔོན་གྱིས་དབང་བསྐུར་བའི་ཕྱིར་རོ། །རྡོ་རྗེ་འཆང་ཐམས་ཅད་ཀྱི་དམ་ཚིག་སྟེ་རྒྱུ་དེ་ཉིད་ལ་དམིགས་པའི་ཏིང་ངེ་འཛིན་གང་ཡིན་པ་དེ་ལའང་དེ་སྐད་ཅེས་བྱའོ། །དེ་ཉིད་འཕགས་པ་སྟེ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་བདག་པོ་རྡོ་རྗེ་འཆང་ཆེན་པོར་གྱུར་པས་སོ། །གང་དུ་
ཡང་མི་གནས་སོ་ཞེས་བྱ་བ་ནི་དེ་རྣམས་བསྐྱེད་པ་ཉིད་དུ་མེད་པས་སོ། །སྟང་སྟབས་ནི་གཡས་བརྐྱང་བ་ལ་སོགས་པའོ། །འདུག་སྟངས་ནི་རྡོ་རྗེའི་སྐྱིལ་མོ་ཀྲུང་ལ་སོགས་པའོ། །ལས་ལ་སྦྱོར་བ་ནི་སྲུང་བ་དང་སྤྱན་དྲང་བ་ལ་སོགས་པའོ། །སླར་བསྡུ་བ་ནི་མཆོད་པ་དང་བསྟོད་པ་བྱ་བ་ལ་སོགས་པ་སྔོན་དུ་འགྲོ་བས་
གཤེགས་སུ་གསོལ་བའོ། །གསང་བ་དང་གསང་ཆེན་ཉིད་ཡེ་ཤེས་ཡིན་ལ་དེ་ཉིད་ནི་རྣམ་པ་གསུམ་སྟེ། བླ་ན་མེད་པའི་འབྲས་བུ་བསྐྱེད་པས་ན་སྙིང་པོ་སྟེ་དེ་ཉིད་བསྟན་པར་བྱ་བའི་ཕྱིར། རྣལ་འབྱོར་ཅེས་བྱ་བ་ལ་སོགས་པ་གསུངས་ཏེ་རྣལ་འབྱོར་ནི་བྱིན་གྱིས་བརླབ་པ་ལ་སོགས་པའི་བདག་ཉིད་ཅན་རྣམ་པ་གསུམ་མོ། །
དེ་བས་ན་གང་གིས་སྦྱོར་བ་དེ་ནི་ལྷག་པའི་རྣལ་འབྱོར་ཏེ་སྤྱན་ལ་སོགས་པའི་ལྷ་མོའི་ཁྱད་པར་རོ། །དེ་དག་ནི་སྙོམས་པར་འཇུག་པའི་བདག་ཉིད་ཅན་གྱི་རྣལ་འབྱོར་ནི་རྣལ་འབྱོར་ཆེན་པོའོ། །ཡང་ན་ལྷག་པའི་རྣལ་འབྱོར་དང་རྣལ་འབྱོར་ཆེན་པོ་འདིའི་ནང་དུ་ཆུད་པ་སྔོན་དུ་འགྲོ་བའི་དཀྱིལ་འཁོར་ལྷ་རྣམས་ཀྱི་ང་རྒྱལ་ཏེ་འདི་
དག་ནི་གོ་རིམས་བཞིན་དུ་སེམས་ཅན་རྣམས་ལ་བཤད་པར་བྱའོ། །བཤད་པ་འདི་ནི་ལེགས་བྲིས་ལས། །བདག་གིས་དགེ་བ་གང་བསགས་པ། །དེས་ནི་རབ་ཞི་བཤེས་གཉེན་བཅས། །འཇིག་རྟེན་རྡོ་རྗེ་འཛིན་པར་ཤོག །རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བའི་དཀའ་འགྲེལ་སློབ་དཔོན་རབ་ཏུ་ཞི་བའི་བཤེས་གཉེན་
གྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཤྲདྡྷ་ཀ་ར་ཝརྨ་དང་ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། ཤྲཱི་བཛྲ་མཎྜ་ལཾ་ཀཱ་རེ་མ་ཧཱ་ཏནྟྲ་པཉྩི་ཀཱ། བོད་སྐད་དུ། དཔལ་རྡོ་རྗེ་སྙིང་པོའི་རྒྱན་གྱི་རྒྱུད་ཆེན་པོའི་
དཀའ་འགྲེལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །མཐའ་ཡས་ཁམས་གསུམ་རབ་ཏུ་གཡེངས་ལ་བརྩེ་བ་དམ་པ་རྣམ་པར་དག་པའི་བློ། །འགྲོ་བའི་

ཉམ་ཐག་སེལ་ཅིང་རབ་ཏུ་འདོད་པའི་བདེ་བ་ལྡན་པར་སྒྲུབ་ལ་བརྩོན། །ཁྱབ་བདག་རྣམས་སངས་རྒྱས་ལ་རྟག་པར་རབ་ཏུ་ཕྱག་བགྱི་བདག་གི་བློ་གྲོས་<འད‚འདི>། མུན་པ་ལྟ་བུས་བརྩོན་པས་རྒྱུད་ཀྱི་དོན་ཆེན་སོ་སོར་དབྱེ་བར་ག་ལ་ནུས། །འོན་ཀྱང་སྤྱོད་ཡུལ་མ་ཡིན་ཡང་། །རྣམ་པར་བརྩོན་
པར་བྱེད་པ་ནི། སྐྱེ་བོས་བཞད་གད་ཆེད་དུ་དང་། བརྩེ་བས་གཞན་གྱི་དོན་དུའོ། །རྡོ་རྗེ་སྙིང་པོའི་རྒྱན་ཞེས་བྱ་བའི་དོན་གྱི་མིང་ཅན་འདི་ནི་རྒྱུད་དོ། །འདི་ལྟར་རྡོ་རྗེ་སྙིང་པོ་ནི་བྱང་ཆུབ་ཀྱི་སྙིང་པོ་སྟེ་སངས་རྒྱས་ཐམས་ཅད་ཀྱི་གནས་སོ། །དེའི་རྒྱན་ནི་བླ་ན་མེད་པའི་ཁང་པ་བརྩེགས་པ་གང་ཡིན་
པ་དེ་དེ་བཞིན་དུ་བརྗོད་པར་བྱའོ། །ཡང་ན་རྡོ་རྗེ་ནི་ཆོས་ཀྱི་སྐུའི་བདག་ཉིད་ཅན་ཏེ། དབྱེ་བར་བྱར་མེད་པ་ཉིད་ཀྱི་ཕྱིར་རོ། །སྙིང་པོ་ནི་ལོངས་སྤྱོད་རྫོགས་པའི་སྐུའི་རང་བཞིན་ཏེ་ཐམས་ཅད་ཀྱི་སྙིང་པོར་གྱུར་པ་ཉིད་ཀྱི་ཕྱིར་དང་། སེམས་ཅན་གྱི་དོན་རྫོགས་པའི་སྙིང་རྗེའི་ཕྱིར་ཡང་ངོ་། །སྣ་ཚོགས་
པའི་སྤྲུལ་པ་ནི་རྒྱན་ཏེ་བཅོམ་ལྡན་འདས་རྣམ་པར་སྣང་མཛད་དོ། །ཡང་ན་རྡོ་རྗེ་ནི་དབྱེ་བར་བྱར་མེད་པ་སྟེ་ཁང་པ་བརྩེགས་པའོ། །དེའི་སྙིང་པོ་ནི་འཛིན་པའི་ཕྱིར་རྡོ་རྗེ་སྟེ་བྱང་ཆུབ་ཀྱི་གདན་ནོ། །དེ་ལྷག་པར་གནས་པར་རྒྱས་པར་བྱེད་པའི་ཕྱིར་རོ། །དེ་ཉིད་དཀྱིལ་འཁོར་དང་ཕྱག་རྒྱ་ལ་སོགས་པའི་ངོ་བོ་མ་ལུས་
པ་སྟེ། དེའི་རྗོད་པར་བྱེད་པ་པོ་རྒྱུད་ལ་ཡང་དེའི་མིང་ཐོབ་པར་འགྱུར་ཏེ་སངས་རྒྱས་ཀྱི་སྤྱོད་པ་བཞིན་ནོ། །དེའི་ཕྱིར་ཡང་བཅོམ་ལྡན་འདས་དེ་འདིའི་མངོན་པར་རྗོད་པར་བྱེད་པར་གྱུར་པའོ་ཞེས་རྗོད་བྱེད་དང་བརྗོད་བྱའི་མཚན་ཉིད་ཀྱི་འབྲེལ་པའོ། །དགོས་པ་ཡང་དེ་སྐྱེ་བོའི་བྱེ་བྲག་ཏུ་རིག་པར་བྱས་པས་དེ་དང་
དེ་ཐོས་ནས་ཐོས་པ་ལ་སོགས་པའི་རིམ་གྱིས་བླ་ན་མེད་པའི་བྱང་ཆུབ་ཀྱི་མཚན་ཉིད་མཐུན་པའི་འབྲས་བུའོ་ཞེས་རྟོགས་པར་བྱའོ། །འདིར་ཡང་ཡང་དག་པར་བསྡུ་བར་བྱ་བའི་དོན་དུ་ཕྱག་ན་རྡོ་རྗེས་ཇི་ལྟར་ཐོས་པ་བསྟན་པའི་ཕྱིར་ཐོག་མར་འདི་སྐད་བདག་གིས་ཞེས་བྱ་བ་ལ་སོགས་པ་གསུངས་པ། འདི་སྐད་ཅེས་
བྱ་བ་ནི་རྒྱུད་ཀྱི་དོན་མཆོག་ཏུ་སྟོན་པའི་ཚིག་ཕྲད་དོ། །བདག་གིས་ཞེས་བྱ་བ་ནི་དངོས་ལ་སྟེ་གཞན་ལས་ཐོས་པ་དང་རྟོགས་པ་མ་ཡིན་པའོ། །དུས་གཅིག་ན་ཞེས་པ་འདིས་གཞན་གྱི་ཚེ་གཞན་ཐོས་ཞེས་ཐོས་པ་མང་བར་འདོན་པར་བྱེད་དོ། །དེ་ཡང་རྣ་བས་དེ་དང་དེའི་རྣམ་པ་ཐོས་ཤིང་སོ་སོར་རྟོགས་པའི་དོན་ནོ་

ཞེས་རིག་པར་བྱའོ། །གང་ལས་གང་དུ་ཐོས་ཞེས་གླེང་གཞི་ངེས་པར་བསྟན་པའི་ཕྱིར་གསུངས་པ་བཅོམ་ལྡན་འདས་ཞེས་བྱ་བ་ལ་སོགས་པའོ། །རྡོ་རྗེ་ལ་སོགས་པ་རྣམས་ཀྱིས་བྱིན་གྱིས་བརླབས་པ་དེ་དམ་ཚིག་གི་ཡེ་ཤེས་ཏེ་རྒྱུར་གྱུར་པའི་ཡེ་ཤེས་སོ། །ཇི་ལྟར་མེ་ལོང་འདི་ཡེ་ཤེས་རང་
དངོས་དང་བརྒྱུད་པས་དེའི་གདུལ་བྱའི་དབྱེ་བ་ལས་ལྷའི་དཀྱིལ་འཁོར་དང་ཕྱག་རྒྱ་ལ་སོགས་པར་བྱས་པ་ནི་རྣམ་པ་སྣ་ཚོགས་པའི་ཁྱད་པར་རོ། །དེས་ཡང་དག་པར་ལྡན་པར་གྱུར་པ་ནི་རྗེས་སུ་སོན་པའོ། །གང་ལས་ཤེ་ན་གང་གི་ཕྱིར་མཉམ་པ་ཉིད་ཀྱི་ཡེ་ཤེས་ཀྱི་བྱིན་གྱིས་བརླབས་པས་རིན་པོ་ཆེའི་ཅོད་པན་གྱིས་
ཁམས་གསུམ་གྱི་རྒྱལ་པོར་དབང་བསྐུར་བ་ཐོབ་པའོ། །དེ་བཞིན་དུ་ཡང་ཅིའི་ཕྱིར་ཞེ་ན་གསུངས་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་དམ་ཚིག་ཅེས་བྱ་བ་ལ་སོགས་པ་སྟེ། དེ་བཞིན་གཤེགས་པ་རྣམ་པ་ཐམས་ཅད་ཡང་དག་པར་འབྲེལ་པ་དེ་ལས་འགོད་པར་བྱ་བ་མ་ཡིན་པ་ཉིད་ཀྱི་ཕྱིར་རོ། །ཡེ་ཤེས་
ནི་སོ་སོར་རྟོག་པའི་བདག་ཉིད་ཅན་ནོ། །དེའི་དོན་ནི་རྣལ་འབྱོར་ཆེན་པོའོ། །ཇི་སྙེད་ཡོད་པ་དེ་དང་ཇི་ལྟར་བརྗོད་པ་དེ་རྣམས་ཀྱི་དབང་ཕྱུག་སྟེ་མངའ་བདག་གོ། །དོན་དམ་པའི་རྣལ་འབྱོར་དུ་བྱ་བ་ཉིད་དུ་བལྟ་བར་བྱའོ་ཞེས་དོན་དམ་པ་ངེས་པར་བསྟན་པར་གསུངས་པ། དེ་བཞིན་གཤེགས་པ་ཐམས་ཅད་ཅེས་བྱ་བ་ལ་
སོགས་པའོ། །ཅིའི་ཕྱིར་གཞན་གྱི་དོན་ཁོ་ནར་མཛད་ཅེ་ན་གསུངས་པ། ཐུགས་རྗེ་ཆེན་པོ་ཞེས་པ་རྣམ་པར་སྣང་མཛད་ཆེན་པོ་ནི་དྲི་མ་མ་ལུས་པ་དང་བྲལ་བའི་ཕྱིར་རོ། །རྟག་པ་ནི་མི་གནས་པའི་མྱ་ངན་ལས་འདས་པའི་ཚུལ་ལས་སོ། །དུས་གསུམ་དུ་བཞུགས་པ་ནི་སྐད་ཅིག་རྟག་པ་ཉིད་ཀྱི་ཕྱིར་རོ། །ཕ་རོལ་གྱིས་ཀྱང་དབྱེ་བར་བྱ་བ་
མ་ཡིན་པ་ཉིད་ཀྱི་ཕྱིར་སྐུ་དང་གསུང་དང་ཐུགས་རྡོ་རྗེའོ། །གདུལ་བར་བྱ་བའི་རྗེས་སུ་མཐུན་པར་དེ་བཞིན་ཉིད་དུ་གནས་པར་གྱུར་པ་དེ་བཞིན་གཤེགས་པ་སྟེ་དེ་བཞིན་དུ་ཡང་དེའི་རྒྱུ་ཅན་གྱི་ཕྱག་རྒྱ་ཆེན་པོ་ལ་སོགས་པ་བཞི་པོ་བསྟན་ཏོ། །དེ་བཞིན་དུ་སྟོན་པ་པོའི་ཡོན་ཏན་དུ་བརྗོད་པའི་གནས་ཕུན་སུམ་ཚོགས་པ་གང་ཡིན་
པ་ངེས་པར་བསྟན་པ་གསུངས་པ་དེ་བཞིན་གཤེགས་པ་ཐམས་ཅད་ཀྱི་རྟེན་ཅིང་ཞེས་བྱ་བ་ལ་སོགས་པའོ། །འཁོར་ཕུན་སུམ་ཚོགས་པ་ཡང་སངས་རྒྱས་ཀྱི་ཞིང་ཞེས་བྱ་བ་ལ་སོགས་པས་སྟོན་པར་བྱེད་དོ། །ཡོངས་སུ་བསྐོར་ཅིང་ནི་མངའ་བདག་ཏུ་བྱས་པའོ། །མདུན་དུ་བདར་ཏེ་ནི་ཐོག་མར་གཞག་པའོ། །ཐོག་མ་དང་

བར་དང་ཐ་མ་ནི་ཐོས་པ་དང་། བསམ་པ་དང་། སྒོམ་པར་བྱེད་པའི་གནས་སྐབས་སོ། །དེ་རྣམས་སུ་དགེ་བ་ནི་ཕན་པ་ལ་གནས་པའོ། །དོན་བཟང་པོ་ནི་བྱང་ཆུབ་ཀྱི་ཐབས་ཀྱི་དོན་ཉིད་ཀྱི་ཕྱིར་རོ། །ཚིག་འབྲུ་བཟང་པོ་ནི་སྒྲའི་ཡོན་ཏན་ཕུན་སུམ་ཚོགས་པའོ། །མ་འདྲེས་པ་ནི་གང་ཟག་ལ་བདག་མེད་པར་སྟོན་པའི་
ཕྱིར་རོ། །ཡོངས་སུ་རྫོགས་པ་ནི་བླ་ན་ཡོད་པ་དང་བླ་ན་མེད་པའི་འབྲས་བུ་ཐོབ་པ་པོ་ཉིད་ཀྱི་ཕྱིར་རོ། །ཆོས་ཐམས་ཅད་བདག་མེད་པ་གསལ་བར་བྱེད་པ་ཉིད་ཀྱི་ཕྱིར་ཡོངས་སུ་དག་པའོ། །ཐེ་ཚོམ་གྱི་ཉེས་པ་ཐམས་ཅད་སེལ་བའི་རྒྱུ་ཉིད་ཀྱི་ཕྱིར་ཡོངས་སུ་བྱང་བའོ། །ཆོས་ཐམས་ཅད་ཀྱི་ཚུལ་ནི་ཐེག་པ་ཐམས་ཅད་ཅེས་
པའོ། །དེ་རྣམས་ཀྱི་ཐོབ་པར་བྱ་བ་རྣམ་པར་དག་པ་ནི། སྒྲིབ་པ་ཐམས་ཅད་རབ་ཏུ་བཅོམ་པའི་མཚན་ཉིད་དོ། །དེའི་སྒོ་ནི་ཐབས་ཏེ་སྟོན་པར་བྱེད་དོ་ནི་གསུང་བར་བྱེད་པའོ། །གང་གསུངས་བ་རྣམ་པ་སྣ་ཚོགས་པའི་ཁྱད་པར་ཡང་དག་པར་ལྡན་པར་གྱུར་པ་ཞེས་སོ། །དེ་ལ་ཆོས་ཀྱི་དབྱིངས་ཀྱི་དཀྱིལ་འཁོར་གྱི་སྒོ་ནས་
ཁྱད་པར་གང་ཡིན་པ་གསུངས་པ། དེ་ནས་བཅོམ་ལྡན་འདས་ཞེས་པ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཞེས་པ་ལ་སོགས་པས་མེ་ལོང་ལྟ་བུ་ལ་སོགས་པའི་ཡེ་ཤེས་ལྔའི་རང་བཞིན་བསྟན་ཏོ། །ཇི་སྐད་ལྷའི་གཙོ་བོའི་སྒོ་དཔག་མེད་དོ། །སྤྲུལ་པའི་སྐུ་ནི་ཆོས་ཀྱི་རྡོ་རྗེ་མ་
ཉིད་ལས་སོ། །ལས་མཉམ་པ་ཉིད་ཀྱི་སྐུ་ནི་གདོན་མི་ཟ་བའི་རྒྱལ་བ་རྒྱལ་བའི་གཙུག་ཏོར་ཉིད་ལས་སོ། །མི་ཤེས་ཅན་ནི་གཟི་བརྗིད་ཕུང་པོ་ཉིད་ལས་སོ། །ཆེན་པོ་ནི་རྣམ་པར་འཕྲོ་བ་ཉིད་ལས་སོ། །ཁྱབ་བདག་ནི་རྣམ་པར་རྒྱལ་བའི་གཙུག་ཏོར་ཉིད་ལས་སོ། །དེ་ལྟ་བུའི་ངོ་བོ་ཅི་ཞེ་ན་གསུངས་པ་རྣམ་པར་སྣང་མཛད་ཅེས་པ་
སྟེ་རྣམ་པར་སྣང་བ་ཁོ་ན་རྣམ་པར་སྣང་མཛད་དེ། དྲི་མ་མེད་པ་ཉིད་ལས་གསལ་བར་བྱེད་དོ་ཞེས་པའི་དོན་ནོ། །བཅོམ་ལྡན་འདས་ནི་དབང་ཕྱུག་ཆེན་པོར་གནས་པ་ཉིད་ལས་སོ། །ནམ་མཁའི་ཁམས་ཐམས་ཅད་དུ་མཉམ་པར་གནས་པའི་སྐུ་ལ་སོགས་པའི་རྡོ་རྗེ་ནི་ཁྱབ་ཅིང་དབྱེ་བ་མེད་པའི་སྐུ་ཉིད་ཀྱི་ཕྱིར་རོ། །རྡོ་རྗེ་སེམས་དཔའ་དང་རིན་
ཆེན་ལ་སོགས་པ་འཁོར་ལོས་སྒྱུར་བས་ཇི་ལྟར་རང་གི་དཀྱིལ་འཁོར་དུ་འདུས་པ་བསྐྱེད་པའི་རིམ་པ་དང་རང་བཞིན་གྱི་ལས་འདི་གཉིས་གསུངས་པ། དེ་བཞིན་གཤེགས་པ་ཐམས་ཅད་ཅེས་པ་ལ་སོགས་པ་སྟེ་དེ་བཞིན་གཤེགས་པ་ཐམས་ཅད་ནི་དེ་བཞིན་གཤེགས་པ་ཐམས་ཅད་ཀྱི་འོད་ཟེར་རོ། །དེ་ཉིད་ཡང་དག་པར་འདུ་བར་

བྱེད་པ་ནི་རྒྱུ་སྟེ་རྡོ་རྗེ་སེམས་དཔའ་གང་ཡིན་པ་དེ་དེ་བཞིན་དུ་བརྗོད་དོ། །བཅོམ་ལྡན་འདས་རྣམ་པར་སྣང་མཛད་ཀྱིས་རང་གི་ཐུགས་ཀའི་རྡོ་རྗེ་ཕྱག་ཏུ་བཞག་ནས་དེ་ལ་དེ་བཞིན་གཤེགས་པ་ཐམས་ཅད་ཀྱི་འོད་ཟེར་འཕྲོ་བར་བྱེད་པའོ། །ཡང་དག་པར་བསྡུས་ནས་རབ་ཏུ་ཞུགས་པས་རྡོ་རྗེ་སེམས་དཔར་ཡོངས་སུ་གྱུར་པར་
བྱེད་དོ། །དེ་ལས་ཕྱུང་ནས་རང་གི་གནས་སུ་ཀུན་དུ་གནས་སོ་ཞེས་པའི་ཇི་སྲིད་པར་ཏེ་དེའི་ངོ་བོ་ཕྱུང་ནས་སོ། །གང་རྡོ་རྗེའི་དབྱིབས་སམ་ཐམས་ཅད་ཁོང་དུ་ཆུད་པར་བྱེད་པ་སེམས་ཅན་ཐམས་ཅད་བྱང་ཆུབ་ཀྱི་སེམས་བསྐྱེད་བྱེད་པའམ་རྣམ་པར་སྣང་མཛད་ཐོབ་པར་བྱེད་པའོ། །དེའི་དོན་ནི་ཡེ་ཤེས་སེམས་དཔའ་སྟེ་འདིས་ཀྱང་
རྟོགས་པར་བྱེད་པའི་ལས་ཀྱི་ཕྱིར་དང་ཡེ་ཤེས་སེམས་དཔའི་རང་བཞིན་ཉིད་དུ་བསྟན་ནོ། །ནམ་མཁའི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་མོ་ཡང་དག་པར་འདུ་བར་བྱེད་པའི་རྡོ་རྗེ་ནི་རྡོ་རྗེ་སེམས་དཔའ་ཇི་ལྟ་བ་བཞིན་དུ་བརྗོད་དོ། །བསྐྱེད་པར་བྱས་པ་དང་སྤྲོ་བར་བྱེད་པའི་རིམ་པ་དེ་ཉིད་ཀྱང་བྱིན་གྱིས་བརླབས་ཏེ་དེའི་ཡེ་ཤེས་ཀྱི་
རང་བཞིན་གྱི་སྙིང་པོ་ནི་རྡོ་རྗེ་རིན་ཆེན་ནོ། །དེ་ཉིད་དེ་ལྟ་བུའི་རིམ་པས་རྫོགས་པའི་རྡོ་རྗེ་སེམས་དཔའ་རྣམ་པར་སྣང་མཛད་ཀྱི་ཐུགས་ཀ་ནས་ངེས་པར་བྱུང་སྟེ་སྤྲོས་ནས་རྡོ་རྗེ་རིན་ཆེན་གྱི་གཟུགས་ཀྱིས་ཀུན་དུ་གནས་སོ་ཞེས་པ་བསྐྱེད་པའི་རིམ་པ་ཡེ་ཤེས་སེམས་དཔའི་རང་བཞིན་ཉིད་དུའང་བསྟན་ནོ་ཞེས་པའོ། །རྡོ་རྗེ་རིན་ཆེན་ཆེན་པོའི་
མངོན་པར་དབང་བསྐུར་བའི་དམ་ཚིག་ནི་རྒྱུ་སྟེ། རྡོ་རྗེ་རིན་ཆེན་ཆེན་པོའི་དབང་བསྐུར་བའི་དམ་ཚིག་འདིས་ཀྱང་དེ་བཞིན་གཤེགས་པ་ཐམས་ཅད་མངོན་པར་དབང་བསྐུར་བའི་བདག་ཉིད་ཅན་གྱི་ལས་སུ་བསྟན་ཏོ། །དེ་བཞིན་གཤེགས་པའི་ཡེ་ཤེས་དེ་བཞིན་གཤེགས་པའི་ཕྱག་ན་གནས་པའི་རྡོ་རྗེ་དེའི་ཟེར་རྣམས་ཀྱིས་ཀྱང་ནམ་
མཁའ་ཐམས་ཅད་འཕྲོ་བར་བྱེད་པ་དེའི་མངོན་པར་བྱང་ཆུབ་པ་རྡོ་རྗེ་སེམས་དཔའ་གང་ཡིན་པ་དེ་དེ་བཞིན་དུ་གསུངས་སོ། །དེའི་ཕྱིར་མངོན་པར་བྱང་ཆུབ་པར་གྱུར་པ་ནི་མངོན་པར་བྱང་ཆུབ་པ་ཐོབ་པའི་རྡོ་རྗེ་ཆོས་སོ། །དེ་བཞིན་དུ་བསྐྱེད་པའི་རིམ་པར་བསྟན་ནོ། །དེ་བཞིན་གཤེགས་པ་ཐམས་ཅད་ཀྱི་ལུས་རྣམ་པར་དག་པ་ཁོ་ན་
ལུས་རྣམ་པར་དག་པ་ཉིད་དེ་སྒྲིབ་པ་ཐམས་ཅད་དང་བྲལ་བའོ། །དེ་ཡིས་ནི་རྒྱུར་གྱུར་པ་ཡིས་སོ། །ཆོས་ཐམས་ཅད་རང་བཞིན་གྱིས་དག་པ་ནི། རྒྱུ་གང་གིས་ན་དེ་བཞིན་གཤེགས་པ་ཐམས་ཅད་ཀྱི་ལུས་རྣམ་པར་དག་པའི་ཆོས་དེའི་ཕྱིར་ཡང་ཆོས་ཐམས་ཅད་རང་བཞིན་གྱིས་དག་གོ་ཞེས་པ་ཇི་སྲིད་པའོ། །དེ་ཁོ་ན་རྡོ་རྗེ་སེམས་དཔའོ་

ནམ་མཁའ་ཐམས་ཅད་ལ་ཁྱབ་པ་པོ་གཟུགས་ཐམས་ཅད་ཀུན་དུ་སྟོན་པའི་ཡེ་ཤེས་ཀྱི་རང་བཞིན་ནོ། །དེའི་ཕྱིར་མ་ལུས་པ་ནི་འཇིག་རྟེན་གྱི་ཁམས་དང་། ལུས་པ་མེད་པ་ནི་སེམས་ཅན་གྱི་ཁམས་སོ། །འདུལ་བའི་སྤྱོད་པ་མཆོག་དང་ལྡན་པ་ནི་རྡོ་རྗེ་ལས་ཏེ་འདིས་བསྐྱེད་པའི་རིམ་པ་བསྟན་ནོ། །དེ་བཞིན་གཤེགས་པ་ཐམས་ཅད་
ཀྱི་བཀའ་ལུང་གདོན་མི་ཟ་བར་བྱེད་པ་དེ་རྣམས་སེམས་ཅན་ཐམས་ཅད་ལ་མཉམ་པ་ཉིད་དུ་བླ་ན་མེད་པའི་ལས་སྣ་ཚོགས་པ་གང་ཡིན་པ་དེ་དེ་བཞིན་དུ་བརྗོད་དོ། །རྒྱུ་གང་གིས་དེ་བཞིན་གཤེགས་པ་ཐམས་ཅད་ཀྱི་བཀའ་ལུང་གདོན་མི་ཟ་བར་བྱེད་པའི་རང་བཞིན་དེས་སེམས་ཅན་ཐམས་ཅད་ལ་མཉམ་པ་ཉིད་བླ་ན་མེད་པའི་ལས་སྣ་ཚོགས་
པའི་དོན་ནོ། །རྡོ་རྗེ་སྙིང་པོར་བརྗོད་པའི་འཁོར་ལོ་འདི་གཉིས་ཇི་ལྟར་གཙོ་བོ་ཉིད་ཀྱི་ཁྱད་པར་གང་ཡིན་པ་གསུངས་པ་རྣམ་པར་སྣང་མཛད་ཅེས་བྱ་བ་ལ་སོགས་པ་སྟེ། གང་གི་ཕྱིར་མི་འགྱུར་བ་ཡིན་པ་དེའི་ཕྱིར་མི་བསྐྱོད་པའོ། །གང་གི་ཕྱིར་རབ་ཏུ་སྣང་བར་བྱེད་པ་དེའི་ཕྱིར་རིན་ཆེན་ཏོག་གོ། །གང་གི་ཕྱིར་དགྲ་ལས་རྒྱལ་བའི་མགོན་པོ་ཡིན་པ་དེའི་
ཕྱིར་འོད་དཔག་མེད་དེ་གཞན་དུ་དེ་ཡང་དཔག་ཏུ་མེད་པའི་འོད་དོ། །གང་གི་ཕྱིར་ལས་ཐམས་ཅད་བྱེད་པ་དེའི་ཕྱིར་དོན་ཡོད་དོ། །དབང་ཆེན་ལ་སོགས་པའི་དཀྱིལ་འཁོར་གྱི་སྒོ་ནས་གསུངས་པ་དེ་བཞིན་གཤེགས་པ་ཐམས་ཅད་ཀྱི་མེ་ལོང་ཞེས་བྱ་བ་ལ་སོགས་པ་སྟེ། མེ་ལོང་ཡེ་ཤེས་ཀྱི་བདག་ཉིད་ཅན་དབང་ཆེན་གྱི་དཀྱིལ་འཁོར་གྱི་
རང་བཞིན་ཉིད་ཀྱི་ཕྱིར་དེ་བཞིན་གཤེགས་པ་ཐམས་ཅད་ཀྱི་མེ་ལོང་ཡེ་ཤེས་ཀྱི་དཀྱིལ་འཁོར་རོ། །མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་མེ་ལྷའི་དཀྱིལ་འཁོར་གྱི་ངོ་བོ་ཉིད་ཀྱི་ཕྱིར། དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་ཀྱི་ཤེས་རབ་ལ་རབ་ཏུ་གནས་པའོ། །སོ་སོར་རྟོག་པའི་ཡེ་ཤེས་ཀྱི་རང་བཞིན་ཆུ་ལྷའི་དཀྱིལ་འཁོར་གྱི་
བདག་ཉིད་ཅན་ཉིད་ཀྱི་ཕྱིར་དེ་བཞིན་གཤེགས་པ་ཐམས་ཅད་ཀྱི་སོ་སོར་རྟོག་པའི་ཡེ་ཤེས་ཀྱི་གནས་དང་གཉིས་སུ་མེད་པ་བརྙེས་པའོ། །བྱ་བ་རྗེས་སུ་སྒྲུབ་པའི་ཡེ་ཤེས་ཀྱི་རང་བཞིན་རླུང་ལྷའི་དཀྱིལ་འཁོར་གྱི་རང་བཞིན་གྱི་ཕྱིར་དེ་བཞིན་གཤེགས་པ་ཐམས་ཅད་ཀྱི་བྱ་བ་རྗེས་སུ་སྒྲུབ་པའི་ཡེ་ཤེས་ཡང་དག་པར་རྗེས་སུ་ཐོབ་པའོ། །
གཙུག་ཏོར་གྱི་དཀྱིལ་འཁོར་གྱི་རང་བཞིན་ཉིད་ཀྱི་ཕྱིར་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་དབྱིངས་རྣམ་པར་དག་པའོ། །ཁྲོ་བའི་འཁོར་ལོའི་བདག་ཉིད་ཅན་ཉིད་ཀྱི་ཕྱིར་ཆོས་ཐམས་ཅད་མཉམ་པ་ཉིད་ཀྱི་ཡེ་ཤེས་ཀྱི་སྤྱོད་ཡུལ་ལོ། །བྱང་ཆུབ་སེམས་དཔའི་དཀྱིལ་འཁོར་གྱི་ངོ་བོ་ཉིད་ཀྱི་ཕྱིར། དེ་བཞིན་གཤེགས་པ་ཐམས་ཅད་ཀྱི་

གཉིས་སུ་མེད་པའི་མཉམ་པ་ཉིད་ལ་དམིགས་པའི་ཡེ་ཤེས་ཡོངས་སུ་དག་པ་མཐར་ཕྱིན་པའོ། །གཟུགས་ཀྱི་དཀྱིལ་འཁོར་གྱི་བདག་ཉིད་ཅན་གྱི་ཕྱིར་སྟོང་པ་ཉིད་དང་དེ་བཞིན་ཉིད་ནས་སངས་རྒྱས་ཐམས་ཅད་ཀྱི་ཡུལ་ཞེས་པ་ཇི་སྲིད་པའོ། །དེ་ལྟར་བཅོམ་ལྡན་འདས་ཐམས་ཅད་དུ་གཞན་གྱི་དོན་ཁོ་ནར་གནས་སོ་ཞེས་
སྟོན་པས་གསུངས་པ། སངས་རྒྱས་ཐམས་ཅད་མཉམ་པ་ཉིད། །ཅེས་བྱ་བ་ལ་སོགས་པ་སྟེ་སངས་རྒྱས་རྣམས་ཀྱི་མཉམ་པ་ཉིད་སྟོང་པ་ཉིད་ལྷག་པར་གནས་པ་དམིགས་པ་མངོན་དུ་བྱས་ནས་སོ། །རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་ཉིད་ལ་བྱིན་གྱིས་བརླབས་ནས་ཞེས་པ་ནི་རང་གི་ཤེས་རབ་འཇམ་དཔལ་ཉིད་
དུ་མངོན་པར་རྫོགས་ནས་སོ། །འདི་ཉིད་ཐབས་བདེ་བས་རྩ་བའི་རྒྱུད་ཀྱིས་བསྡུ་བར་བྱ་བ་ནི་ཤེས་རབ་ཀྱི་སྒོ་ནས་ཉེ་བར་བསྟན་པ་གསུངས་པ། དེ་ནས་ཡང་ཞེས་བྱ་བ་ལ་སོགས་པ་སྟེ། བཅོམ་ལྡན་འདས་ཞེས་པ་ནི་རྣམ་པར་སྣང་མཛད་དོ། །དེ་བཞིན་གཤེགས་པ་ཐམས་ཅད་ནི་སངས་རྒྱས་དང་རྡོ་རྗེ་འཛིན་པ་ལ་སོགས་པ་
རྣམས་སོ། །དེ་རྣམས་ཀྱི་བསྡུ་བའི་སྙིང་པོ་བུདྡྷ་དང་། བཛྲ་ས་མཱ་ཛའི་སྒྲ་དག་གིས་དེ་བཞིན་གཤེགས་པ་ལ་བསྡུས་ཤིང་བཅུག་པའོ། །རྒྱུད་རབ་འབྱམས་རྒྱ་མཚོའི་སྤྲིན་གྱི་སྒྲས་འཇིག་རྟེན་གྱི་ཁམས་ཤར་ལ་སོགས་པའི་ཕྱོགས་སུ་ཀུན་དུ་གནས་པའི་དབྱེ་བས་ལྷག་པའི་གྲངས་རབ་འབྱམས་སུ་བརྗོད་པའི་རིམ་པའི་མཐར་
ཐུག་པ་ནི་རྒྱུད་གཉིས་པ་ཞེས་བྱ་བ་ལ་སོགས་པར་བལྟ་བར་བྱའོ། །ཡང་དག་པར་སྦྱོར་ནས་ནི་འདྲེས་པར་གྱུར་ནས་སོ། །རྡོ་རྗེའི་བློའི་ཡེ་ཤེས་ནི་བླ་ན་མེད་པའི་ཤེས་རབ་ཡེ་ཤེས་སོ། །ཡོངས་སུ་བསྐྱེད་དེ་ནི་མངོན་དུ་བྱ་སྟེའོ། །གནས་རྣམས་ཐམས་ཅད་དུ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་དང་ཐུགས་ཀ་
རྣམས་སུའོ། །བཅོམ་ལྡན་འདས་རང་གི་ཤེས་རབ་དེའི་གཟུགས་ཀྱིས་བྱིན་གྱིས་བརླབས་པ་གང་ཡིན་པ་དེའི་ཕྱིར་དེ་ཉིད་དུ་ཀུན་དུ་གནས་པའོ། །འཁོར་ལོས་སྒྱུར་བ་ཆེན་པོའི་སྙིང་པོ་ཞེས་པ་ནི་གཙུག་ཏོར་གྱི་སྙིང་པོ་ཡི་གེ་གཅིག་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་བྱིན་གྱིས་རློབ་པ་པོ་ཉིད་ཡིན་ལ་དེ་
གཙོ་བོའི་ང་རྒྱལ་གྱི་སྡུད་པ་པོ་ཉིད་འདིའི་ལུས་ཀྱི་ཐུགས་ཀའི་དཔལ་བེའུའི་རྣམ་པ་ནི་ཐུགས་དཔལ་གྱི་བེའུ་ལའོ། །བདེ་བ་ཐམས་ཅད་ཀུན་དུ་སྟོན་པར་བྱེད་པ་ནི་ཐམས་ཅད་བདེ་བ་ཀུན་དུ་སྟོན་པར་བྱེད་པའོ། །ཆགས་པས་ཆགས་པ་རབ་ཏུ་སྤང་བའི་ཕྱིར་དེ་ལ་སྤྱོད་པའི་དབང་དུ་བྱས་ནས་རྣམ་པར་སྣང་མཛད་

ཆེན་པོའི་དཀྱིལ་འཁོར་ངེས་པར་རྟོགས་པར་བྱ་བའི་དོན་དུ་གསུངས་པ་ཤིན་ཏུ་དགའ་བ་རྣམ་པར་དག་པ་ཞེས་པ་ལ་སོགས་པ་སྟེ། ཤིན་ཏུ་དགའ་བ་ནི་དབང་པོ་གཉིས་སྙོམས་པར་ཞུགས་པ་ལས་སྐྱེས་པའི་བདེ་བ་ལས་བྱུང་བའོ། །དེའི་རྣམ་པར་དག་པ་ནི་བག་ཆགས་བསལ་བའོ། །དེའི་གནས་ནི་རྟེན་ཏེ་བྱེད་པ་
པོའི་ཞེས་པའོ། །རེ་ཞིག་གང་ཞེ་ན་གསུངས་པ་འདི་ལྟ་སྟེ་ཞེས་བྱ་བ་ལ་སོགས་པའོ། །འདི་ཞེས་པ་བྱང་ཆུབ་ཀྱི་བདག་ཉིད་ཅན་གྱི་སེམས་དཔའ་གང་ཡིན་པ་འདི་རྣམ་པར་སྣང་མཛད་ཆེན་པོའི་གནས་ཏེ་ཕྱག་རྒྱ་ཆེན་པོ་ལ་སོགས་པའི་ཚུལ་ལོ། །དེའི་ཤིན་ཏུ་དགའ་བ་རྣམ་པར་དག་པའི་གནས་སོ། །དེ་བཞིན་དུ་ལྟ་བ་རྣམ་
པར་དག་པ་ནི་མི་བསྐྱོད་པ་དང་སེམས་མ་རྡོ་རྗེ་མ་དང་། རྡོ་རྗེ་སེམས་དཔའ་ལ་སོགས་པ་རྣམས་ཀྱིའོ། །དགའ་བ་རྣམ་པར་དག་པ་ནི་སྒེག་མོའིའོ། །སྲེད་པ་རྣམ་པར་དག་པ་ནི་ཕྲེང་བ་མའིའོ། །འདོད་ཆགས་རྣམ་པར་དག་པ་ནི་གླུ་མའིའོ། །ཞེ་སྡང་རྣམ་པར་དག་པ་ནི་གར་མའིའོ། །གཏི་མུག་རྣམ་པར་དག་པ་ནི་
བདུག་པ་མའིའོ། །བསྙེམས་པ་རྣམ་པར་དག་པ་ནི་མེ་ཏོག་མའིའོ། །མཚན་ཉིད་མེད་པ་རྣམ་པར་དག་པ་ནི་སྣང་བ་མའིའོ། །ཡིད་སིམ་པ་རྣམ་པར་དག་པ་མི་དྲི་མའིའོ། །སྣང་བ་རྣམ་པར་དག་པ་ནི་ལྕགས་ཀྱུའིའོ། །ལུས་རྣམ་པར་དག་པ་ནི་ཞགས་པའིའོ། །ངག་རྣམ་པར་དག་པ་ནི་ལྕགས་སྒྲོག་གིའོ། །ཡིད་
རྣམ་པར་དག་པ་ནི་འབེབས་པའིའོ། །གཟུགས་ལ་སོགས་པ་རྣམ་པར་དག་པ་ཡང་གཟུགས་ལ་སོགས་པ་རྣམ་པར་སྦྱར་བར་རིག་པར་བྱའོ། །རིམ་པ་ནི་འཛིན་པའི་མཐར་ཐུག་པ་དེ་སྲིད་དུ་ཤིན་ཏུ་དགའ་བའི་དོན་ནི་བདག་ཏུ་ལྟ་བས་ན་ཞེན་པའོ། །དེ་ནས་བདག་ལ་དགའ་འོ། །དེ་ནས་དོན་ལ་སྲེད་དོ། །དེ་བས་
འཁོར་ལ་ཆགས་སོ། །དེ་ནས་བདག་ལ་སོགས་པ་དང་འགལ་བ་ལ་ཞེ་སྡང་ངོ་། །འདི་དག་ཀུན་མི་ཤེས་པའི་ཕྱིར་རྨོངས་སོ། །དགའ་བ་དང་སྲིད་པ་དང་ཆགས་པ་རྣམས་ཀྱིས་བསྙེམས་སོ། །ཞེ་སྡང་ལས་མི་ཁོམ་མོ། །རབ་ཏུ་བྱུང་བ་རྣམས་ཀྱི་ལུས་ལས་སྐྱེས་པ་ལ་སོགས་པའི་སྡུག་བསྔལ་རྣམ་པར་དབེན་པའི་ཕྱིར་ཡིད་ཚིམ་
པའོ། །དེ་ནས་ཡེ་ཤེས་ཀྱི་སྣང་བའོ། །དེ་ནས་ཁྱད་པར་དུ་འཕགས་པའི་ལུས་དང་། ངག་དང་། ཡིད་ཀྱི་བདག་ཉིད་ཅན་དཔག་ཏུ་མེད་པའི་ཡུལ་རྣམས་ཀྱིས། འདོད་ཆགས་དང་བྲལ་བ་ཡང་རབ་ཏུ་འཇོམས་པར་བྱེད་དོ་ཞེས་བས་གཟུགས་ལ་སོགས་པ་རྣམས་སོ། །འདི་ཉིད་སོ་སོར་རྟོགས་པར་བྱ་བའི་

ཕྱིར་གསུངས་པ། དེ་ཅིའི་ཕྱིར་ཞེས་བྱ་བ་ལ་སོགས་པ་རྣམས་སོ། །རྣམ་པ་ཅིས་ཤེ་ན་གསུངས་པ། ཆོས་ཐམས་ཅད་རང་བཞིན་གྱིས་ཏེ་སྟོང་པ་ཉིད་ཀྱིས་ཞེས་པའོ། །གལ་ཏེ་དེ་ལྟར་ན་ཐམས་ཅད་དངོས་པོ་མེད་པར་ཐལ་བར་འགྱུར་རོ་ཞེས་གསུངས་པ། ཤེས་
རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཞེས་པ་དོན་དམ་པར་དེ་ལྟ་བུ་ཡིན་ལ་ཀུན་རྫོབ་ཏུ་ནི་འགལ་བར་བརྗོད་པའོ། །དེའི་ཕྱིར་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཉིད་བྱང་ཆུབ་སེམས་དཔའི་གནས་སོ། །ཆོས་ཐམས་ཅད་རྣམ་པར་དག་པ་བསྡུས་པ་ནི་ཤིན་ཏུ་
དགའ་བ་ལ་སོགས་པ་རྣམ་པར་དག་པ་ཐོབ་པའོ། །སྒྲིབ་པ་ཐམས་ཅད་དང་ཆོད་པ་ལ་སོགས་པ་དེ་རྣམས་ཉེ་བར་བསགས་ཀྱང་རྣམ་པར་སྣང་མཛད་ཆེན་པོས་བྱིན་གྱིས་བརླབས་པ་ལས་ཏེ། ཆོད་པ་ནི་འདོད་པའི་འདུན་པ་ལ་སོགས་པ་རྣམས་སོ། །སྙོམ་པའི་སྒྲིབ་པ་ནི་འདོད་ཆགས་ལ་
སོགས་པ་རྣམས་སོ། །ཆོས་ཀྱི་སྒྲིབ་པ་ནི་ཤེས་བྱའི་སྒྲིབ་པ་རྣམས་སོ། །ལས་ཀྱི་སྒྲིབ་པ་ནི་མཚམས་མེད་པའི་མཚན་ཉིད་ཏེ་དེ་རྣམས་ཉེ་བར་བསགས་པའོ། །རིམ་པ་བཞིན་དུ་མི་བསྐྱོད་པ་ལ་སོགས་པས་བྱིན་གྱིས་བརླབས་པས་དམྱལ་བ་ལ་སོགས་པའི་ངན་སོང་དུ་ལྷུང་བར་
མི་འགྱུར་རོ། །བྱས་པ་ཙམ་ན་ཡང་སྡུག་བསྔལ་དེ་ཟད་པར་འགྱུར་རོ། །འཆང་བ་ལ་སོགས་པ་ནི་རབ་ཏུ་འཇུག་པའོ། །ཆོས་ཐམས་ཅད་མཉམ་པ་ཉིད་རྡོ་རྗེ་ཏིང་ངེ་འཛིན་སོ་སོར་ཐོབ་པ་ནི་ཆོས་ཐམས་ཅད་སྟོང་པ་ཉིད་དབྱེར་མེད་པའི་ཏིང་ངེ་འཛིན་བརྙེས་པའོ། །ཆོས་ཐམས་ཅད་
ཀྱི་དབང་ཕྱུག་ནི་རྣམ་པར་སྣང་མཛད་ཆེན་པོར་འགྱུར་རོ། །དགའ་བ་ལ་སོགས་པ་ནི་བླ་ན་མེད་པ་ཞི་བ་དེའིའོ། །རང་དང་གཞན་དང་གཉིས་ཀའི་དོན་ལ་དམིགས་པའི་དབྱེ་བས་རྣམ་པ་གསུངས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེ་བ་བཅུ་དྲུག་རྣམས་ཀྱི་ནི་རྡོ་རྗེ་སེམས་
དཔའ་ལ་སོགས་པའི་ཏིང་ངེ་འཛིན་བཅུ་དྲུག་ཐོབ་པ་རྣམས་ཀྱིས་སོ།། །།ཞི་བ་ལ་སྤྱོད་པའི་སེམས་ཅན་འདུལ་བའི་དོན་དུ་རྣམ་པར་སྣང་མཛད་ཀྱི་དཀྱིལ་འཁོར་གྱི་དོན་བསྟན་པ་གསུངས་པ། དེ་ནས་བཅོམ་ལྡན་འདས་རྣམ་པར་སྣང་མཛད་ཞེས་པ་ལ་སོགས་པ་སྟེ། དེ་ནས་ཀྱི་སྒྲ་ནི་བར་མ་

ཆད་པའོ། །ཞི་བའི་ཆོས་ཉིད་ནི་དེ་བཞིན་ཉིད་དོ། །དེའི་མངོན་པར་བྱང་ཆུབ་པ་ནི་དེ་བཞིན་གཤེགས་པ་ཡེ་ཤེས་མཐའ་ཡས་པའོ། །དེའི་མངོན་པར་བསྒྲུབ་པ་ནི་ཐོབ་པར་བྱེད་པའོ། །དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལོ། །རྡོ་རྗེ་མཉམ་པ་ཉིད་ནི་འཛིན་པའི་རྣམ་པ་སྟོང་པ་ཉིད་
དོ། །དེའི་མངོན་པར་བྱང་ཆུབ་པ་ནི་རྟོགས་པའོ། །དེ་ཁོ་ན་བྱང་ཆུབ་ཆེན་པོ་སྟེ་རྣམ་པར་སྣང་མཛད་ཉིད་དོ། །ཅི་ལྟར་ཞེ་ན་གསུངས་པ་རྡོ་རྗེ་བསྟན་པས་ཞེས་ཏེ་དེའི་འཛིན་པ་སྟོང་པ་ཉིད་དུ་ལྷག་པར་རྟོག་པ་བསྟན་པ་ཉིད་ཀྱིས་སོ། །དོན་མཉམ་པ་ཉིད་ནི་གཟུང་བའི་རྣམ་པ་སྟོང་པ་ཉིད་དོ། །
དེའི་མངོན་པར་བྱང་ཆུབ་པ་དེ་ཁོ་ན་ཡང་བྱང་ཆུབ་ཆེན་པོ་ཞེས་ཏེ་སྔར་བཞིན་ནོ། །ཇི་ལྟར་ཞེ་ན་གསུངས་པ་དོན་གཅིག་པ་ཉིད་ཀྱི་ཞེས་པ་གཟུང་བྱ་སྟོང་པ་ཉིད་ལ་དམིགས་པའི་ཡེ་ཤེས་བསྟན་པ་ཉིད་ཀྱིས་སོ། །ཆོས་རྣམས་ནི་ལུང་དང་རྟོགས་པའི་མཚན་ཉིད་དོ། །དེ་མཉམ་པ་
ཉིད་ནི་དེ་སྟོང་པ་ཉིད་དོ། །དེའི་མངོན་པར་བྱང་ཆུབ་པ་ཁོ་ན་བྱང་ཆུབ་ཆེན་པོ་ཞེས་པ་སྟེ། སྔར་བཞིན་ནོ། །ཅི་ལྟར་ཞེ་ན་གསུངས་པ། རང་བཞིན་རྣམ་པར་དག་པས་ཞེས་པ་ཆོས་རང་བཞིན་གྱིས་རྣམ་པར་དག་པ་ལ་དམིགས་པའི་ཡེ་ཤེས་བསྟན་པ་ཉིད་ཀྱིས་སོ་ཞེས་པ་ཇི་སྲིད་
པའོ། །ཐམས་ཅད་མཉམ་པ་ཉིད་ནི་མིག་ལ་སོགས་པ་སྟོང་པ་ཉིད་དོ། །དེའི་མངོན་པར་བྱང་ཆུབ་པ་ཁོ་ན་བྱང་ཆུབ་ཆེན་པོའི་ཞེས་པ་སྔར་བཞིན་ནོ། །ཅི་ལྟར་ཞེ་ན་གསུངས་པ། ཐམས་ཅད་ཅེས་པ་ལ་སོགས་པ་སྟེ། མིག་ལ་སོགས་པའི་ཤེས་པ་རྣམ་པར་རྟོག་པ་སྟོང་
པ་ཉིད་ལ་དམིགས་པའི་ཡེ་ཤེས་མཆོག་གིས་སོ་ཞེས་པའི་དོན་ཏོ། །དེ་བཞིན་གཤེགས་པའི་རིགས་པ་ལ་སོགས་པ་ཡང་རྡོ་རྗེ་ལ་སོགས་པའི་སྒྲས་བརྗོད་པར་བྱའོ། །དེ་རྣམས་ཀྱི་མཉམ་པ་ཉིད་ཅེས་པ་ལ་སོགས་པ་ནི་སྔར་བཞིན་ནོ། །བྱང་ཆུབ་ཆེན་པོའི་རིམ་པ་བཞིན་དུ་མི་བསྐྱོད་པ་ལ་
སོགས་པའི་གོ་འཕང་གི་རང་བཞིན་དུ་ཆུད་པར་བྱའོ། །ཆོས་བསྒྲུབ་པ་ནི་སྣང་མཛད་ལ་སོགས་པའི་གོ་འཕང་ཐོབ་པར་བྱེད་པའམ་མི་བསྐྱོད་པ་ལ་སོགས་པ་སེམས་ཅན་ཉེ་བར་འདྲེན་པ་པོའོ། །ཞེ་སྡང་སྤྱོད་པ་རྗེས་སུ་གཟུང་བར་བྱ་བ་རྡོ་རྗེ་ཧཱུཾ་མཛད་ཀྱི་དཀྱིལ་འཁོར་གྱི་དོན་བསྟན་པ་

གསུངས་པ། དེ་ནས་བཅོམ་ལྡན་འདས་གདུག་པ་ཐམས་ཅད་ཅེས་བྱ་བ་ལ་སོགས་པ་སྟེ། གདུག་པ་ཐམས་ཅད་ནི་ལྷ་ཆེན་པོ་ལ་སོགས་པ་རྣམས་སོ། །དེ་རྣམས་འདུལ་བར་བྱེད་པ་གང་གིས་ཤཱཀྱ་ཐུབ་པ་རྡོ་རྗེ་ཧཱུཾ་མཛད་ཀྱི་གཟུགས་ཅན་དུ་བྱས་པ་དེའོ། །ཆོས་
ཐམས་ཅད་མཉམ་པ་ཉིད་འདོད་ཆགས་ལ་སྟོང་པ་ཉིད་ཀྱིས་སོ། །རྣམ་པར་རྒྱལ་བ་ནི་དེའི་བསམ་པ་ཉིད་ཀྱིས་འདོད་ཆགས་པ་རབ་ཏུ་བཅོམ་པའོ། །དེའི་ཡང་དག་པར་བསྡུས་པའོ། །གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་སྒྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚིག་
གིས་དེ་དེ་བཞིན་དུ་གསུངས་པ་དེའོ། །འདོད་ཆགས་ནི་ཞེན་པའི་མཚན་ཉིད་དོ། །དེའི་སྤྲོས་པ་དོན་དམ་པ་ཉིད་དུ་ཉེ་བར་མི་དམིགས་པའོ། །ཅི་ལྟར་ཞེ་ན་གསུངས་པ། འདོད་ཆགས་སྤྲོས་པ་མེད་པ་ཉིད་དེ་འདོད་ཆགས་ཀྱི་རྒྱུ་ཁ་དོག་ལ་སོགས་པ་ཉེ་བར་དམིགས་པ་མེད་པ་ཉིད་ཀྱིས་
སོ། །ཞེ་སྡང་ནི་ཀུན་དུ་འཇོམས་པའི་མཚན་ཉིད་དོ། །དེའི་སྤྲོས་པ་མེད་པ་ཁོ་ན་བཞིན་དུ། ཇི་ལྟར་ཞེ་སྡང་གི་སྤྲོས་པ་མེད་པ་ཉིད་ཀྱིས་ཤེ་ན་ཀུན་ནས་མནར་སེམས་པའི་གཞི་དགུ་ཉེ་བར་དམིགས་པ་མེད་པ་ཉིད་ཀྱིས་སོ། །གཏི་མུག་ནི་བདག་ཏུ་ལྟ་བ་ལ་སོགས་པའི་མཚན་ཉིད་དོ། །དེའི་
སྤྲོས་པ་མེད་པ་སྔར་བཞིན་དུ་ཉེ་བར་དམིགས་པ་མེད་པའོ། །ཇི་ལྟར་ཞེ་ན། གསུངས་པ་གཏི་མུག་གི་སྤྲོས་པ་མེད་པ་ཉིད་ཀྱིས་ནི་བདག་ལ་སོགས་པ་ཡོངས་སུ་དག་པའི་ཞིང་རྣམས་ཉེ་བར་མི་དམིགས་པའོ། །ཆོས་ཐམས་ཅད་ནི་ཁམས་གསུམ་པའི་སེམས་དང་སེམས་ལས་བྱུང་བའོ། །དེ་
རྣམས་ཀྱི་སྤྲོས་པ་དོན་དམ་པ་ཉིད་དུ་ཉེ་བར་དམིགས་པ་མེད་པའོ། །ཇི་ལྟར་ཆོས་ཐམས་ཅད་ཀྱི་སྤྲོས་པ་མེད་པ་ཉིད་ཅེ་ན་ཁམས་གསུམ་པའི་སེམས་དང་སེམས་ལས་བྱུང་བ་དེ་དག་ཏུ་ཡོངས་སུ་བརྟགས་པ་རྣམས་ཀྱི་དངོས་པོ་མེད་པ་ཉིད་ཀྱིས་སོ། །སྟོང་པ་ཉིད་ལ་སོགས་པའི་རང་བཞིན་ཅན་
མཆོག་ཏུ་མཐར་ཐུག་པ་འབྱེད་པའི་ཤེས་རབ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །འདིའི་སྤྲོས་པ་མེད་པ་ཉིད་ནི་དེ་ཁོ་ན་བཞིན་དུ་ཉེ་བར་དམིགས་པ་མེད་པའོ། །ཅི་ལྟར་ཞེ་ན་གསུངས་པ། ཤེས་རབ་ཀྱི་ཕ་རོལ་ཏུ་ཕྱིན་པ་སྤྲོས་པ་མེད་པ་ཉིད་ཀྱིས་ཏེ། རྣམ་པར་རྟོག་པ་དང་དེའི་དབྱེ་བ་

རྣམས་ཉེ་བར་དམིགས་པ་མེད་པ་ཉིད་ཀྱིས་སོ། །ཞེ་སྡང་གིས་དེ་སྤང་བ་ཉེ་བར་བསྟན་ནས་གཏི་མུག་ལ་སྤྱོད་པའི་སེམས་ཅན་འདུལ་བའི་དོན་དུ། དེ་ནས་བཅོམ་ལྡན་འདས་རང་བཞིན་དག་པ་ཞེས་པ་ལ་སོགས་པས་འཇིག་རྟེན་དབང་ཕྱུག་གི་དཀྱིལ་འཁོར་གྱི་དོན་བསྟན་པ་གསུངས་པ།
རང་བཞིན་དག་པའི་ཆོས་མ་ལུས་པ་ཀུན་དུ་གཟིགས་པའི་ཕྱིར། རང་བཞིན་དག་པའི་ཆོས་ཐམས་ཅད་དོ། །ཆོས་ཐམས་ཅད་ནི་འདོད་ཆགས་ལ་སོགས་པའོ། །དེ་རྣམས་ཀུན་དུ་གཟིགས་པ་ཉིད་ནི་མངོན་སུམ་དུ་བྱེད་པའོ། །དེ་ལ་དབང་བྱེད་བས་ན་དབང་ཕྱུག་གོ། །དེའི་ཡེ་ཤེས་
ནི་དཀྱིལ་འཁོར་ལ་སོགས་པ་ངེས་པའོ། །དེ་ལ་གང་གིས་རྒྱས་གདབ་པར་བྱ་ཞིང་མངོན་པར་བྱ་བ་ཡིན་པས་དེ་དེ་བཞིན་དུ་གསུངས་ཏེ་དེ་སྐད་བྱ་བའིའོ། །འདོད་ཆགས་ཐམས་ཅད་ནི་སྔར་གསུངས་པ་དེ་རྣམས་ཀྱི་རྣམ་པར་དག་པ་སྟེ། མི་དགེ་བ་བཅུའི་ལས་ཀྱི་ལམ་རྣམ་པར་དབེན་
པ་ཉིད་དོ། །དེ་ཞེ་སྡང་ཐམས་ཅད་རྣམ་པར་དག་པ་ཉིད་ཀྱིས་ཡང་དག་པར་འཇུག་པར་འགྱུར་ཏེ། རྒྱུད་ཉིད་དུ་འགྱུར་རོ། །ལུ་ཛྱེ་ཏེ་ཞེས་པ་ནི་འདིར་ཐོབ་པ་དང་སྐྱེ་བའོ། །ལྟ་བ་ཐམས་ཅད་ཀྱི་དྲི་མ་དེ་རྣམ་པར་དག་པ་སྟེ། དོན་དམ་པར་གདོད་མ་ནས་ཉེ་བར་དམིགས་པ་མེད་པ་
ཉིད་ཀྱིས་སོ། །སྡིག་པ་ཐམས་ཅད་རྣམ་པར་དག་པ་ནི་མི་དགེ་བའི་སེམས་པ་ཉེ་བར་དམིགས་པ་མེད་པས་སོ། །ཆོས་ཐམས་ཅད་ནི་སེམས་དང་སེམས་ལས་བྱུང་བ་རྣམས་སོ། །དེ་རྣམས་ཀྱི་རྣམ་པར་དག་པ་ནི་འཛིན་པ་ཉེ་བར་དམིགས་པ་མེད་པའོ། །དེ་ནི་སེམས་ཅན་
ཐམས་ཅད་རྣམ་པར་དག་པ་ཉིད་ཀྱི་ཡང་དག་པར་འཇུག་པར་འགྱུར་རོ། །ཐམས་ཅད་མཁྱེན་པའི་ཡེ་ཤེས་ནི་སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་དང་། ཀུན་རྫོབ་དང་། གཞན་གྱི་སེམས་དང་། ཆོས་དང་། རྗེས་སུ་དང་། ཟད་པ་དང་། མི་སྐྱེ་བ་ཤེས་པ་
རྣམས་སོ། །དེ་རྣམས་ཀྱི་ཡང་དག་པ་ནི་རྣམ་པར་རྟོག་པ་གཉིས་མེད་པའོ། །དེ་ནི་ཐམས་ཅད་མཁྱེན་པའི་ཡེ་ཤེས་རྣམ་པར་དག་པ་ཉིད་ཀྱིས་ཡང་དག་པར་འཇུག་པ་ནི་ཐོས་པ་དང་བསམ་པ་ལས་བྱུང་བའི་རྒྱུའི་གནས་སྐབས་ཡང་དག་པར་བསྡུས་པའི་སེམས་པའོ། །དེའི་རྣམ་

པར་དག་པ་ནི་ཉེ་བར་དམིགས་པ་མེད་པའོ། །དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཉིད་ཀྱིས། དེ་བཞིན་གཤེགས་པ་རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ཡང་དག་པར་ཐོབ་པར་ཤེས་པར་བྱའོ། །འདོད་ཆགས་ལ་སོགས་པ་རྣམས་ཀྱིས་དེ་སྤོང་བ་
ཉེ་བར་བསྟན་ནས་སེར་སྣའི་གཉེན་པོའི་དོན་ལ་ལྷག་པར་མོས་པ་རྣམས་ཡང་དག་པར་རྗེས་སུ་གཟུང་བའི་དོན་དུ་དེ་ནས་བཅོམ་ལྡན་འདས་ཞེས་བྱ་བ་ལ་སོགས་པས་རིན་པོ་ཆེའི་རིགས་ཀྱི་དཀྱིལ་འཁོར་གྱི་དོན་ཉེ་བར་བསྟན་པ་གསུངས་པ། ཉོན་མོངས་པ་ཅན་དང་། ཉོན་མོངས་པ་ཅན་མ་ཡིན་
པའི་མ་རིག་པ་དང་བྲལ་བ་ལས་ཁམས་གསུམ་པ་ཐམས་ཅད་ཀྱི་བདག་པོའོ། །དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་རིན་པོ་ཆེའི་ཅོད་པན་ཏེ། དེའི་འབྱུང་གནས་སོ། །གང་ལས་ཤེ་ན་ཡེ་ཤེས་ལས་སོ། །དེ་ཉིད་ཀྱི་སྙིང་པོ་གང་ཡིན་པ་དེ་ལ་དེ་སྐད་ཅེས་བྱའོ། །མངོན་པར་
དབང་བསྐུར་བ་བྱིན་པ་ནི་དཀྱིལ་འཁོར་རྣམས་སུ་བཀོད་པའི་ལྷ་རྣམས་དང་། སློབ་མ་རྣམས་ལ་ཡང་ཕྱག་རྒྱ་རྣམས་ཀྱིས་མངོན་པར་དབང་བསྐུར་བའོ། །དོན་ནི་གསེར་ལ་སོགས་པའོ། །ཆོས་ནི་མདོ་སྡེ་ལ་སོགས་པའོ། །དེའི་སྦྱིན་པ་ནི་ཉོན་མོངས་པ་མེད་པས་སྟོན་པར་བྱེད་པའོ། །ཟང་
ཟིང་ནི་བཟའ་བ་ལ་སོགས་པའོ། །དེ་ལྟར་རྣམ་པར་སྦྱོང་བར་བྱེད་པའི་དོན་དུ་སྔགས་ཀྱི་ཚུལ་ངེས་པར་སྦྱར་བ་རྣམས་ཀྱིས་སྐུ་ལ་སོགས་པ་གཅིག་པ་ཅན་དུ་བྱེད་པའི་མཚན་ཉིད་སྟོང་པ་ཉིད་རྗེས་སུ་དྲན་པའི་ཕྱག་རྒྱ་བསྒྲུབ་པར་བྱའོ་ཞེས་དེ་ནས་བཅོམ་ལྡན་འདས་ཞེས་བྱ་བ་ལ་སོགས་པས་རྡོ་རྗེ་ཁུ་
ཚུར་གྱི་དཀྱིལ་འཁོར་གྱི་དོན་ཉེ་བར་གསལ་བར་བྱེད་པ་གསུངས་པ། དེ་བཞིན་དེ་བཞིན་ཉིད་བདེན་གང་། །དེ་ནི་རྡོ་རྗེ་ཁུ་ཚུར་བརྗོད། །ཅེས་པ་འདི། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱ་ཉིད་དོ། །རབ་ཏུ་བརྙེས་པ་ནི་ལྷག་པར་རྟོགས་པ་དང་ལྡན་པའོ། །དེའི་གནས་
སྐབས་གསལ་བར་བྱེད་པའི་དམ་ཚིག་གི་ཁུ་ཚུར་གྱི་ཕྱག་རྒྱ་ནི་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་རོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱས་བྱིན་གྱིས་བརླབས་པ་ནི་བརྟན་པ་ཅན་དུ་བྱེད་པའོ། །དེ་ཉིད་རྡོ་རྗེ་སྟེ་དེ་སྐད་བྱ་བའོ། །དེ་བཞིན་གཤེགས་པ་ཐམས་

ཅད་ཀྱི་སྐུའི་ཕྱག་རྒྱ་ཡོངས་སུ་འཛིན་པ་ནི། ཕྱག་རྒྱ་ཆེན་པོ་འཆིང་བའོ། །གསུང་གི་ཕྱག་རྒྱ་ཡོངས་སུ་འཛིན་པ་ནི་ལྕེ་ལ་ཟླ་བ་བསྒོམ་པ་སྔོན་མ་ཅན་གྱི་སྔགས་བཟླའོ། །ཆོས་ཐམས་ཅད་སོ་སོར་ཐོབ་པ་ནི་སོ་སོ་ཡང་དག་པའི་རིག་པ་བཞི་བརྙེས་པའོ། །ཐུགས་ཀྱི་ཕྱག་རྒྱ་ཡོངས་སུ་འཛིན་
པ་ནི་རང་གི་སྙིང་གར་ཟླ་བ་ལ་རྡོ་རྗེ་རྩེ་ལྔ་པ་བསྒོམས་པ་སྔོན་མ་ཅན་གྱི་དམ་ཚིག་གི་ཕྱག་རྒྱ་འཆིང་བའོ། །རྡོ་རྗེའི་ཕྱག་རྒྱ་ཡོངས་སུ་འཛིན་པ་ནི་རང་གི་སྙིང་གར་ཟླ་བ་ལ་སྣ་ཚོགས་རྡོ་རྗེ་སྔོན་དུ་འདྲེན་པས་ལས་ཀྱི་ཕྱག་རྒྱའི་འཆིང་བའོ། །ཤེས་རབ་ཀྱི་བློ་བསྒྲུབ་པར་བྱའོ་ཞེས་པས་དེ་
ནས་བཅོམ་ལྡན་འདས་ཆོས་ཐམས་ཅད་སྤྲོས་པ་མེད་པ་ཞེས་བྱ་བ་ལ་སོགས་པ་སྟེ། དེའི་ཐབས་འཇམ་དཔལ་གྱི་དཀྱིལ་འཁོར་གྱི་དོན་ཉེ་བར་བསྟན་པ་གསུངས་པ། ཆོས་ཐམས་ཅད་དེའི་རྒྱུ་དང་འབྲས་བུ་དོན་དུ་གཉེར་བའི་བདག་ཉིད་ཅན་ནོ། །དེ་རྣམས་ཀྱིས་སྤྲོས་པ་ནི་འབྱུང་བའི་རྟོག་
པ་ཡང་དག་པར་གཅོད་པའོ། །དེའི་རྗེས་སུ་མ་དམིགས་པས་ན་སྤྲོས་པ་མེད་པར་བྱེད་དོ་ཞེས་པས་སྤྲོས་པ་མེད་པའོ། །ཡི་གེའི་འཁོར་ལོ་ནི། ཨ་ར་པ་ཙ་ན་ལ་སོགས་པའོ། །ཡོངས་སུ་སྐོར་བར་བྱེད་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གང་ཡིན་པ་དེ་དེ་བཞིན་དུ་བརྗོད་པ་
དེའོ། །ཆོས་ཐམས་ཅད་ནི་འབྲས་བུའི་ངོ་བོ་ཕུང་པོ་ལྔ་པོ་དེ་རྣམས་དོན་དམ་པར་སྟོང་པར་དངོས་པོ་མེད་པའི་རང་བཞིན་ནོ། །ཅི་ལྟར་ཞེ་ན་རང་བཞིན་མེད་པའི་ཚུལ་གྱིས་ཞེས་ཏེ་གང་གི་ཕྱིར་དེ་རྣམས་དོན་དམ་པ་ཉིད་དུ་རང་བཞིན་ཉེ་བར་དམིགས་པར་བྱ་བ་མེད་དོ། །དེ་ཉིད་ནི་མཚན་མ་མེད་པ་
སྟེ། ཅིའི་ཕྱིར་ན། མཚན་མ་མེད་པས་ཉེ་བར་བཟུང་བ་སྟེ། གང་གི་ཕྱིར་དོན་དམ་པ་ཉིད་དུ་དེ་རྣམས་ཀྱི་མཚན་མ་སྟེ་རྒྱུའི་རང་བཞིན་ཉེ་བར་ཐོབ་པར་བྱར་མེད་དེ་དེའི་ཕྱིར་མཚན་མ་མེད་པའོ། །སླར་ཡང་ཁོ་ན་སྨོན་པ་མེད་པ་སྟེ་དོན་དུ་གཉེར་བ་མེད་པའོ། །ཅི་ལྟར་ཞེས་སྨོན་པ་མེད་པའི་
ཚུལ་གྱིས་ཏེ་གང་གི་ཕྱིར། དེ་རྣམས་དོན་དམ་པར་དོན་དུ་གཉེར་བ་རྙེད་པར་མི་འགྱུར་རོ། །དེ་གསུང་པར་འགྱུར་བ་འབྲས་བུའི་ངོ་བོ་དེ་སྙེད་རང་བཞིན་གྱི་སྟོན་པས་འབྲས་བུ་མེད་པའི་ཕྱིར་དང་དེའི་རྒྱུ་ཡང་ཉེ་བར་མ་དམིགས་པའི་ཕྱིར་མཚན་མ་མེད་པ་དང་དེའི་སྨོན་པར་བྱ་བའི་ཡུལ་མེད་པའི་ཕྱིར་

སྨོན་པ་མེད་པའོ། །དེའི་ཕྱིར་ཡང་རང་བཞིན་གྱིས་འོད་གསལ་བའོ། །ཅི་ལྟར་ན་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་ནི་དོན་དམ་པར་ན་དེ་དེ་བཞིན་ནོ། །ཀུན་རྫོབ་ཏུ་ནི་རྗེས་སུ་འཇུག་པ་ཁོ་ནའོ་ཞེས་སོ། །ཚིག་དེ་རྣམས་ཀྱིས་ཀྱང་རིམ་པ་ལས་སྟོང་པ་ཉིད་དང་
མཚན་མ་མེད་པ་དང་སྨོན་པ་མེད་པ་དང་། རང་བཞིན་གྱིས་འོད་གསལ་བའི་རྣམ་པར་ཐར་བའི་སྒོ་བསྟན་པ་དང་མེ་ལོང་ལ་སོགས་པའི་ཡེ་ཤེས་བཞིའོ་ཞེས་ཁོང་དུ་ཆུད་པར་བྱའོ། །དཀྱིལ་འཁོར་དུ་འཇུག་པ་མེད་ན་གྲུབ་པར་མི་འགྱུར་རོ་ཞེས་པས་དེ་ནས་བཅོམ་ལྡན་འདས་ཞེས་པ་ལ་སོགས་
པས་གྲུབ་པའི་ཐབས་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་དཀྱིལ་འཁོར་གྱི་དོན་ཀུན་དུ་བསྟན་པ་གསུངས་པ། དེ་བཞིན་གཤེགས་པ་ཐམས་ཅད་ནི་སངས་རྒྱས་དང་བྱང་ཆུབ་སེམས་དཔའ་སྟེ། དེ་རྣམས་ཀྱང་འཁོར་ལོ་ནི་དཀྱིལ་འཁོར་རོ། །དེའི་ནང་དུ་གནས་པ་ནི་
གང་དུ་ཐམས་ཅད་དེ་རྣམས་སུའོ་ཞེས་དེ་བཞིན་དུ་བརྗོད་པར་བྱའོ། །གང་གིས་འཁོར་ལོ་ཆེན་པོ་རབ་ཏུ་འཇུག་པ་དེ་འཁོར་ལོ་ཆེན་པོ་རྣམས་སུ་རབ་ཏུ་འཇུག་པའོ། །རབ་ཏུ་འཇུག་པ་ཡང་ཕྱི་དང་གསང་བའི་དབྱེ་བས་རྣམ་པ་གཉིས་ཏེ་ཕྱི་ནི་ཕྱག་རྒྱ་རྣམས་ཀྱིས་སོ། །གསང་བ་ནི་རབ་ཏུ་
ཞུགས་པ་དང་འདི་ལ་དཀྱིལ་འཁོར་ལ་སོགས་པའི་དེ་ཁོ་ན་ཉིད་ཀུན་དུ་རྟོགས་པ་ལ་དེ་སྐད་ཅེས་བྱའོ། །རྡོ་རྗེ་མཉམ་པ་ཉིད་ནི་འཛིན་པའི་རྣམ་པ་དང་བྲལ་བ་ཉིད་དོ། །དེ་ལ་རབ་ཏུ་ཞུགས་པ་ནི་ལྷག་པར་རྟོགས་པའོ། །དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ལ་རབ་ཏུ་ཞུགས་
པའི་ཆེདུ་དེ་བཞིན་གཤེགས་པ་ལ་འཇུག་པའོ། །ཡང་དག་པར་འཇུག་པར་འགྱུར་རོ་ནི་སྐྱེ་བར་འགྱུར་རོ། །དོན་མཉམ་པ་ཉིད་འཇུག་པ་ནི་གཟུང་བྱའི་རྣམ་པ་སྟོང་པར་ལྷག་པར་རྟོགས་པ་སྟེ། དེ་ནི་བྱང་ཆུབ་སེམས་དཔའ་ཆེན་པོ་ཐམས་ཅད་ཀྱི་དོན་དུ་འཁོར་ལོ་ལ་རབ་ཏུ་ཞུགས་པའི་
ཕྱིར། བྱང་ཆུབ་སེམས་དཔའ་ཆེན་པོ་ཉིད་ཀྱི་དོན་དུ་འགྱུར་རོ། །ཆོས་ནི་ཉན་ཐོས་པའི་ལུང་གི་ཆོས་ཏེ་སྟོང་པ་ཉིད་དུ་རྟོགས་པས་དམ་པའི་ཆོས་ཀྱི་འཁོར་ལོ་ལ་འཇུག་པའི་ཕྱིར་ཏེ་དམ་པའི་ཆོས་ཀྱི་འཁོར་ལོ་ནི་ལན་གསུམ་དང་རྣམ་པ་གཅིག་ཉིད་ཀྱི་མཚན་ཉིད་མངོན་དུ་ཕྱོགས་པར་

བྱེད་པའི་དོན་དུ་སྐྱེ་བར་འགྱུར་རོ། །ལས་ནི་མཆོད་པ་ལ་སོགས་པའི་བྱ་བའོ། །དེ་སྟོང་པ་ཉིད་དུ་རྟོགས་པས་འཇིག་རྟེན་པའི་དཀྱིལ་འཁོར་ཐམས་ཅད་ཀྱི་དོན་རབ་ཏུ་འཇུག་པའི་དོན་དུ་འགྱུར་རོ། །དེ་བཞིན་གཤེགས་པ་ཐམས་ཅད་མཆོད་པ་ཞེས་བྱ་བ་ལ་སོགས་པས་ཞུགས་པའི་
འཁོར་ལོ་རྣམས་ཀྱིས་གྲུབ་པའི་ཐབས་མཆོད་པའི་དཀྱིལ་འཁོར་གྱི་དོན་བསྟན་པ་གསུངས་པ། དེ་བཞིན་གཤེགས་པ་ཐམས་ཅད་མཆོད་པ་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པའི་མཚན་ཉིད་དོ། །དེ་དག་གི་ཆོ་ག་རྒྱས་པ་ནི་རྣམ་པ་སྣ་ཚོགས་པ་ཉིད་དོ། །དེའི་སྣོད་ནི་
རྟེན་ནོ། །དེ་བཞིན་གཤེགས་པ་ཐམས་ཅད་ཀྱི་མཆོད་པ་ཉིད་དམ་པ་སྟེ་དེ་གང་ལ་དེ་དེ་བཞིན་དུ་གསུངས་པ་དེ་ལ་དེ་སྐད་ཅེས་བྱའོ། །སྨོན་པ་དང་འཇུག་པ་བྱང་ཆུབ་ཀྱི་རང་བཞིན་གྱི་སེམས་ནི་བྱང་ཆུབ་ཀྱི་སེམས་སོ། །དེ་བསྐྱེད་པ་ཉིད་དོ། །ངན་སོང་བ་ལ་སོགས་པའི་སྡུག་
བསྔལ་དང་སྒྲིབ་པ་རྣམས་ཡོངས་སུ་སྐྱོབ་པའོ། །ཉན་ཐོས་དང་བྱང་ཆུབ་སེམས་དཔའ་དང་། སངས་རྒྱས་ཀྱི་ཆོས་ནི་དམ་པའི་ཆོས་སོ། །དེ་ཐོས་པ་ལ་སོགས་པ་རྣམས་ཀྱིས་ཡོངས་སུ་བཟུང་བའོ། །ཤེས་རབ་ཀྱི་ཕ་རོལ་ཏུ་ཕྱིན་པ་བྲི་བ་ལ་སོགས་པ་ནི་གོ་སླའོ། །དེ་ནས་
བཅོམ་ལྡན་ཞེས་པ་ལ་སོགས་པ་བགེགས་ཀྱི་གཉེན་པོའི་ཕྱོགས་ཏེ་རྡོ་རྗེ་གནོད་སྦྱིན་གྱི་དཀྱིལ་འཁོར་གྱི་དོན་བསྟན་པ་གསུངས་པ། གདུག་པ་རྣམ་པ་ཐམས་ཅད་འདུལ་བ་སྟེ་ཉེས་པར་སྤྱོད་པའོ་ཞེས་པས་སྒྲིབ་པའོ། །དེའི་མཐས་ཡོད་པ་ནི་ནུས་པ་སྟེ། སེམས་ཅན་ཐམས་
ཅད་ཉེས་པར་སྤྱོད་པ་ལ་རབ་ཏུ་ཞེན་པ་དེ་རྣམས་འདུལ་བ་ནི་དེ་དག་ཡོངས་སུ་སྤོང་བའོ། །དེའི་དོན་གྱི་ཡེ་ཤེས་ནི་སེམས་ཅན་ཐམས་ཅད་འདུལ་བའི་ཡེ་ཤེས་ཏེ། ཁྲོ་བོའི་གཟུགས་ཀུན་དུ་སྟོན་པར་ནུས་པའོ། །དེ་ཉིད་སྙིང་པོ་སྟེ་དེ་སྐད་ཅེས་བྱ་བ་ཅན་ནོ། །སེམས་ཅན་ཐམས་ཅད་
ནི་དགྲ་བོ་དང་མཛའ་བོ་ལ་སོགས་པ་རྣམས་སོ། །མཉམ་པ་ཉིད་ཀྱི་སྟེ་མཚུངས་པ་ཉིད་ཀྱི་ཁྲོ་བོ་ཡང་མཉམ་པ་ཉིད་དེ་ཐམས་ཅད་རིག་པ་རྣམས་སུ་གོར་མ་ཆག་པར་འཇུག་པ་དང་ལྡོག་པའོ། །ནམ་གྱི་ཚེ་སོ་སོར་དུལ་བར་འགྱུར་ཞེ་ན་སེམས་ཅན་ཐམས་ཅད་འདུལ་བ་ཉིད་པས་

ཞེས་བྱ་བ་ལ་སོགས་པས་གསུངས་པ། ཇི་སྲིད་དུ་སེམས་ཅན་རྣམས་ཐམས་ཅད་དུལ་བར་གྱུར་པ་དེ་སྲིད་དུ་ཁྲོ་བོའི་སྐབས་སུ་དུལ་བ་ནི་ཁྲོ་བོའི་ཡང་འདུལ་བ་ཉིད་དུ་མི་འཇུག་པར་འགྱུར་རོ་ཞེས་བྱ་བའི་དོན་ཏོ། །དེའི་ཕྱིར་ཉེས་པའི་བདག་ཉིད་འདི་ཡང་སྔོན་དུ་བྱས་པའི་ཕྱིར་ཉེས་
པ་མེད་པ་ཉིད་དུ་བསྟན་པ་གསུངས་པ། །སེམས་ཅན་ཐམས་ཅད་ཆོས་ཉིད་པས་ཏེ་དེ་ཁོ་ན་ནི་སེམས་ཅན་ཐམས་ཅད་ནི་སེམས་དང་སེམས་ལས་བྱུང་བའི་རང་བཞིན་ནོ། །ཆོས་ཉིད་ནི་སྟོང་པ་ཉིད་དེ་ཁྲོ་བ་ཡང་དེ་ཉིད་དོ། །དེའི་ཕྱིར་ཡང་ཁྲོ་བ་ཡང་རྡོ་རྗེའི་སྒྲས་བརྗོད་དོ། །ཅིའི་ཕྱིར་ཞེ་ན་
གསུངས་པ། སེམས་ཅན་ཐམས་ཅད་འདུལ་བའི་བྱང་ཆུབ་བོ་ཞེས་པ་ནི་གང་གི་ཕྱིར་བྱང་ཆུབ་ཀྱི་མཚན་ཉིད་འདི་ཁོ་ན་སེམས་ཅན་ཐམས་ཅད་འདུལ་བ་ཡིན་ཏེ། དེའི་ཕྱིར་སེམས་ཅན་ཐམས་ཅད་མཉམ་པ་ཉིད་ལས་ཁྲོ་བ་མཉམ་པ་ཉིད་ནས་ཇི་སྲིད་དུ་རྡོ་རྗེ་ཉིད་དོ་ཞེས་སོ།། །།ད་ནི་དོན་
ཡོད་རྒྱལ་པོ་ལ་སོགས་པ་ནས་རྡོ་རྗེ་ཁུ་ཚུར་གྱི་མཐར་ཐུག་པའི་དཀྱིལ་འཁོར་གྱི་དོན་བསྟན་པ་གསུངས་པ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པས་ཐམས་ཅད་མཉམ་པ་ཉིད་ནི་ཇི་ལྟར་གསུངས་པའི་དཀྱིལ་འཁོར་བཅུ་མཚུངས་པ་ཉིད་དོ། །དེ་ལས་
དཀྱིལ་འཁོར་ཐམས་ཅད་ཀྱི་རང་བཞིན་ཡོངས་སུ་གྱུར་པར་ཀུན་དུ་གནས་པ་ནི་ཐམས་ཅད་མཉམ་པ་ཉིད་ལས་རབ་ཏུ་གནས་པའོ། །དཀྱིལ་འཁོར་ཐམས་ཅད་ནི་ཆོས་ཐམས་ཅད་མཉམ་པ་ཉིད་དོ། །དེ་ཁོ་ན་མཆོག་སྟེ་གང་དུ་དེ་བཞིན་དུ་གསུངས་པ་དེ་ལ་དེ་སྐད་ཅེས་བྱའོ། །ཐམས་ཅད་
མཉམ་པ་ཉིད་ནི་དཀྱིལ་འཁོར་ཐམས་ཅད་མཚུངས་པ་ཉིད་དེ། དེས་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དེ། དོན་དམ་པར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དཀྱིལ་འཁོར་ཐམས་ཅད་ལྟ་བུར་ལྷག་པར་སྒྲོ་བཏགས་ནས་དེ་བཞིན་ཁོ་ནར་བརྗོད་པར་འགྱུར་བའི་ཕྱིར་རོ། །དཀྱིལ་
འཁོར་རྣམས་ཐམས་ཅད་ནི་རྟེན་དེ་མངོན་པར་བྱུང་བའི་མཚན་ཉིད་ནི་དོན་ཉིད་དོ། །ག