Luận tạng Tây Tạng (Tengyur) — Tập 61

ི་སྔགས་བརྗོད་ཅིང་རིམ་བཞིན་གདབ་པར་བྱ་སྟེ། དེ་ནི་མཐའ་ཡས་དང་རྣམ་པར་རྒྱལ་བ་ལ་སོགས་པ་ཞེས་གྲགས་པའི་ཕུར་བུས་གནས་ལྔར་བཏབ་ནས་ཕྱོགས་བཅིང་ཞིང་ར་བ་བྱ་བ་ལ་སོགས་པ་ཇི་ལྟ་བ་བཞིན་དུ་བྱའོ། །སྟང་སྟབས་
ལ་སོགས་པ་ལ་དང་པོར་རང་གི་མིང་ནས་སྨོས་པ་སྔོན་དུ་འགྲོ་བས་ཡི་གེ་ཧཱུྃ་ཞེས་བྱ་བའི་སྒྲ་བརྗོད་པར་བྱའོ། །འདི་ཉིད་འཁོར་ལོ་ཐམས་ཅད་ལ་སྦྱར་བར་བྱའོ་ཞེས་བསྟན་པར་བྱ་བའི་ཕྱིར་སྔགས་ཀྱི་ཆོ་ག་འདི་ནི་ཞེས་བྱ་བ་ལ་སོགས་པ་གསུངས་སོ། །དེ་ནས་ཞེས་བྱ་བ་ལ་སོགས་པ་ལ་སའི་ལྷ་
མོ་ཇི་ལྟ་བ་བཞིན་དུ་བྱུང་བར་བསམས་ལ་ཡིད་ཀྱིས་སྤྱན་དྲངས་ནས་མཆོད་དེ་དབུས་སུ་གནས་པ་ལ། སྐྱོབ་པ་སངས་རྒྱས་ཐམས་ཅད་ཀྱིས། །ཞེས་བྱ་བ་ལ་སོགས་པས་ལན་གསུམ་དུ་བསྐུལ་ལ་གཤེགས་སུ་གསོལ་ལོ། །དེ་ནས་བདུག་སྤོས་དབུལ་བ་སྔོན་དུ་འགྲོ་བ་དང་། ཐུགས་བརྩེ་
ཕན་པའི་དགོངས་པ་ཅན། །ཞེས་བྱ་བ་ལ་སོགས་པས་སངས་རྒྱས་དང་བྱང་ཆུབ་སེམས་དཔའ་རྣམས་ལྷག་པར་གནས་པར་བྱ་སྟེ། དྲི་ལ་སོགས་པ་རྣམས་ཀྱིས་བྱུགས་ལ་ལྷ་ཐམས་ཅད་ཀྱི་གནས་སུ་ཡི་གེ་ཧཱུྃ་དང་བཅས་པའི་མཚན་ནས་སྨོས་པ་སྔོན་དུ་འགྲོ་བས་སྤོས་ཀྱི་དཀྱིལ་
འཁོར་བྱའོ། །དེ་ནས་སྤྱོད་པས་བསྐྱོད་ནས་སྒོ་བཞིའི་གོ་སྐབས་ནས་བྱུང་བའི་ཡི་གེ་ཧཱུྃ་དང་ཨ་ལས་དཀྱིལ་འཁོར་པའི་ལྷའི་འཁོར་ལོ་ཕྱུང་ལ་གནས་ཇི་ལྟ་བ་བཞིན་དུ་གཞག་སྟེ། སྤྱན་དྲང་བ་ལ་སོགས་པ་བཤད་པའི་རིམ་གྱིས་སྐུ་བྱིན་གྱིས་བརླབ་པ་ལ་སོགས་པ་སྔོན་དུ་འགྲོ་བས་
རང་གི་ཕྱག་རྒྱ་སྔགས་དང་བཅས་པས་ཉེ་བར་བསྟན་ཏེ། དབང་བསྐུར་ལ་མཆོད་ཅིང་ཡང་དག་པར་བསྟོད་ནས་ཕྱག་བྱས་ལ་ཚིམ་པར་བྱ་བའི་ཕྱིར་སྦྱིན་སྲེག་བྱས་ནས་ཕྱོགས་ཀྱི་གཏོར་མ་སྦྱིན་ནོ། །དེ་ནས་རྩ་བའི་བུམ་པ་ལྷག་པར་གནས་པ་ཇི་ལྟ་བ་བཞིན་དུ་བྱས་ནས་སློབ་མ་ལྷག་

པར་གནས་པར་བྱ་སྟེ་ཡི་གེ་ཧཱུྃ་བཟླས་པའི་སྤོས་ཆུས་སྙིང་ག་ལ་སོགས་པར་གཏོར་ཏེ། དེ་ཉིད་ཀྱིས་རྡོ་རྗེ་དང་བཅས་པའི་ལག་པ་གཡས་པས་རེག་པར་བྱས་ལ་སྙིང་གར་རྡོ་རྗེ་རྩེ་ལྔ་པ་དང་སྤྱི་བོར་སྣ་ཚོགས་རྡོ་རྗེ་བསམས་ཏེ་གསུམ་ལ་སྐྱབས་སུ་བཏང་བ་ལ་སོགས་པ་བྱེད་དུ་བཅུག་ནས་
ཡི་གེ་ཧཱུྃ་གིས་ཡོངས་སུ་བཟླས་པའི་སྲུང་སྐུད་དཔུང་པ་ལ་བཅིངས་ལ་སོ་ཤིང་ལ་སོགས་པ་བྱིན་ཏེ་དེ་རྣམས་ལ་ཆོས་བཤད་པར་བྱའོ། །དེ་ནས་དཀྱིལ་འཁོར་གྱི་གནས་སུ་ཞུགས་པ་གཤེགས་སུ་གསོལ་བའི་ཕྱིར་སྔར་བཤད་པ་བཞིན་དུ་མཆོད་པ་ལ་སོགས་པ་བྱས་ལ་དཀྱིལ་འཁོར་གྱི་ལྷ་རྣམས་
ཇི་ལྟ་བ་བཞིན་དུ་རྡོ་རྗེའི་ལམ་ནས་སྙིང་གའི་རྡོ་རྗེའི་ལྟེ་བའི་ནང་དུ་གནས་པར་བྱའོ། །དེ་ནས་ཕྱི་དེ་ཉིན་རྣམ་པར་སྣང་མཛད་ཀྱི་སྦྱོར་བ་དང་ལྡན་པས་མི་བསྐྱོད་པ་ལ་སོགས་པའི་སྙིང་པོས་ཕྱུང་ལ་སྔོན་པོ་ལ་སོགས་པའི་ཚོན་སྐུད་ལྔ་དེའི་རང་བཞིན་དུ་བྱས་ཏེ་ཡི་གེ་ཧཱུྃ་འདོན་བཞིན་པས་བསྒྲིལ་
ལ་དེ་བརྒྱ་རྩ་བརྒྱད་བཟླས་པར་བྱའོ། །དེ་བཞིན་དུ་ཚོན་རྣམས་ལ་ཡང་ཅི་རིགས་པར་བྱའོ། །དེ་ཉིད་བསྟན་པར་བྱ་བའི་ཕྱིར། ཚོན་དང་ཐིག་ལ་སངས་རྒྱས་ལྔའི། །ཞེས་བྱ་བ་ལ་སོགས་པ་གསུངས་ཏེ། དཀྱིལ་འཁོར་ཇི་ལྟ་བ་བཞིན་དུ་ཐིག་གདབ་ལ་དང་པོར་སློབ་དཔོན་
གྱིས་ཚོན་རྩི་དགྱེ་བར་བྱ་སྟེ་ཕྱི་ནས་སློབ་མས་བྱའོ། །དེ་ཡང་ཕྱིའི་དཀྱིལ་འཁོར་དུ་སྔོན་པོ་དང་དམར་པོ་དང་དཀར་པོ་དང་ལྗང་གུ་དང་སེར་པོའི་ཚོན་རྣམས་ཀྱིས་ར་བ་ལྔ་བྱའོ། །གཉིས་པར་ནི་སྔོན་པོ་དང་། དམར་པོ་དང་། དཀར་པོ་རྣམས་ཀྱིས་སོ། །འཁོར་ལོ་གསུམ་པ་ལ་ནི་ཚོན་
རྩི་དཀར་པོས་སོ། །འཁོར་ལོའི་ལྟེ་བ་ལ་ནི་སེང་གེའི་གདན་ལ་གནས་པའི་པདྨ་དང་ཟླ་བའི་གདན་ལ་བཞུགས་པའི་རྣམ་པར་སྣང་མཛད་དགོད་པར་བྱའོ། །ཤར་ལ་སོགས་པའི་རེའུའི་ཆ་རྣམས་ལ་ནི་མི་བསྐྱོད་པ་ལ་སོགས་པའོ། །འཁོར་ལོའི་བྱང་ཤར་ལ་སོགས་པར་ནི་སྤྱན་ལ་
སོགས་པའོ། །རིམ་པ་གཉིས་པའི་ཤར་ཕྱོགས་ལ་སོགས་པར་ནི་རྡོ་རྗེ་སེམས་མ་ལ་སོགས་པའོ། །མཚམས་རྣམས་སུ་ནི་སྐུལ་བྱེད་མ་ལ་སོགས་པའོ། །རིམ་པ་གསུམ་པའི་ཤར་ལ་སོགས་པའི་སྣམ་བུ་ལ་ནི་བྱམས་པ་ལ་སོགས་པའོ། །ཤར་ལ་སོགས་པའི་སྒོ་རྣམས་

སུ་གཤིན་རྗེ་གཤེད་ལ་སོགས་པའོ། །མཚམས་རྣམས་སུ་མི་གཡོ་བ་ལ་སོགས་པའོ། །དབང་བསྐུར་བའི་དཀྱིལ་འཁོར་ནི་གོ་སླའོ། །དེ་ལྟར་དཀྱིལ་འཁོར་མངོན་པར་བྲིས་ནས་ཇི་ལྟ་བ་བཞིན་དུ་མངོན་པར་འདུས་བྱས་པའི་བུམ་པ་ལ་བཟླས་བརྗོད་བརྒྱ་རྩ་བརྒྱད་བྱས་ཏེ། རྩ་
བའི་བུམ་པ་ལ་རྣམ་པར་སྣང་མཛད་ཀྱི་སྔགས་སྟོང་རྩ་བརྒྱད་བཟླས་ཤིང་ཡི་གེ་ཧཱུྃ་བརྒྱ་རྩ་བརྒྱད་བཟླ་བ་དང་ལྷག་མ་རྣམས་ཀྱི་བུམ་པ་བཞི་ལ་ནི་སྤྱན་ལ་སོགས་པ་བཞིའི་སྔགས་བཟླ་བ་དང་། ལྷ་ཐམས་ཅད་ཀྱི་ལ་ནི་རིགས་ཀྱི་དབྱེ་བས་སོ། །ལས་ཐམས་ཅད་པ་བཟླས་པ་སྒོར་གཞག་པ་
ནི་བསང་གཏོར་གྱི་བུམ་པ་བྱའོ། །དེ་ནས་ལུས་ཁྲུས་བྱས་ཤིང་གོས་ལ་སོགས་པའི་རྒྱན་གྱིས་བརྒྱན་ལ་བདག་པོའི་སྦྱོར་བ་དང་ལྡན་པའི་རྣལ་འབྱོར་དམ་པས་ལྷའི་འཁོར་ལོ་ཐམས་ཅད་དང་བདག་ཉིད་ནང་དུ་བསྒོམས་ལ། དེའི་ང་རྒྱལ་དང་ལྡན་པས་མཆོད་ཡོན་དང་མཆོད་པ་ལ་ཡོངས་
སུ་བཟླས་ཏེ། སྒོ་ཕྱེ་ནས་གནས་ཇི་ལྟ་བ་བཞིན་དུ་བུམ་པ་ལེགས་པར་བཞག་ལ། དཀྱིལ་འཁོར་གྱི་ལྷ་རྣམས་སྔ་མ་བཞིན་དུ་ཕྱུང་སྟེ་རང་གནས་སུ་གནས་པར་བྱས་ལ། འཁོར་ལོའི་ལྷ་རྣམས་རྡོ་རྗེ་ཁྲོ་བོའི་ལྕགས་ཀྱུའི་ཕྱག་རྒྱ་དང་། ཨོཾ་བཛྲ་ཨཾ་ཀུ་ཤ་ཨཱ་ཀཪྵ་ཡ་ཧཱུྃ་ཛཿཞེས་
བརྗོད་ལ་སྤྱན་དྲང་ངོ་། །རྡོ་རྗེ་སེམས་མ་ལ་སོགས་པ་བཞི་དང་སྤྱན་ལ་སོགས་པའི་རིགས་ཀྱི་ཡུམ་རྣམས་དང་། སྐུལ་བྱེད་མ་ལ་སོགས་པ་ཕོ་ཉ་རྣམས་ནི་ལྕགས་ཀྱུའི་ཕྱག་རྒྱས་སོ། །འཕགས་པ་མི་གཡོ་བ་ལ་སོགས་པ་བྲན་རྣམས་ནི་ཞགས་པའི་ཕྱག་རྒྱས་སོ། །གཤིན་རྗེ་གཤེད་
ལ་སོགས་པ་ཁྲོ་བོ་རྣམས་ནི་ཞལ་གྱི་ཕྱག་རྒྱས་སོ། །ཧཱུྃ་བཾ་ཨཱཿཞེས་བརྗོད་པ་སྔོན་དུ་འགྲོ་བས་ནི་ཐམས་ཅད་གཞུག་པ་དང་བཅིང་བ་དང་། དབང་དུ་བྱའོ། །དེ་ནས་ལངས་ནས་ཕུར་བུ་དང་ར་བ་ལ་སོགས་པས་གནས་སྲུང་བ་བྱས་ལ་པདྨའི་གདན་དང་། མཆོད་ཡོན་དང་ཞབས་བསིལ་
དག་ཕུལ་ལ་སྐུ་ལ་སོགས་པ་བྱིན་གྱིས་བརླབ་པའི་ཕྱག་རྒྱ་རྣམས་ཀྱིས་བྱིན་གྱིས་བརླབས་ཏེ་རང་གི་ཕྱག་རྒྱ་བསྟན་ནས། རང་གི་དབང་བསྐུར་བས་དབང་བསྐུར་ལ་ཏིང་ངེ་འཛིན་ལ་གནས་པར་བསམས་ནས་སྒེག་མོ་ལ་སོགས་པ་མཆོད་པ་ཐམས་ཅད་དང་སིལ་སྙན་དང་། གླིང་བུ་

ལ་སོགས་པ་ཡིད་དགའ་བར་བྱེད་པའི་རང་བཞིན་གྱི་མཆོད་པའི་ཁྱད་པར་ཐམས་ཅད་ཀྱིས་ཡང་དག་པར་མཆོད་ནས་ཐལ་མོ་སྦྱར་ཏེ་རོལ་མོའི་ཁྱད་པར་གཞན་རྣམས་ཀྱིས་ཀྱང་མཆོད་པ་དང་། ལན་གསུམ་གྱི་བར་དུ་རྡོ་རྗེའི་གླུ་བླངས་པས་ཡང་དག་པར་བསྟོད་ནས་
ཕྱག་བྱས་ཏེ། ལྷ་རྣམས་ཚིམ་པར་བྱ་བའི་ཕྱིར་བཤད་པའི་སྦྱིན་སྲེག་ཕུལ་ལ་བཟོད་པར་གསོལ་ཏེ། དེའི་འོག་ཏུ་དངོས་གྲུབ་ཀྱི་ཕྱིར་གསོལ་བ་བཏབ་ནས་བདག་ཉིད་འཇུག་པ་ལ་སོགས་པ་རྫོགས་པར་བྱའོ། །དེའི་འོག་ཏུ་སློབ་མ་ཁྲུས་བྱས་ཤིང་རྒྱན་གྱིས་བརྒྱན་ལ་ཛི་ན་ཛིཀ་ཅེས་བྱ་བ་
ལ་སོགས་པའི་སྙིང་པོ་དང་། སྐུ་ལ་སོགས་པ་བྱིན་གྱིས་བརླབ་པའི་ཕྱག་རྒྱ་རྣམས་ཀྱིས་བྱིན་གྱིས་བརླབས་ཏེ་མཛུབ་མོ་དཀྲི་བའི་ཐལ་མོ་སྦྱར་བ་དང་། བཛྲ་ཀ་ཝ་ཙ་ཧཱུཾ་ཞེས་བྱ་བ་བརྗོད་ཅིང་གནས་ལྔར་གོ་ཆ་དང་བཅས་པར་བྱས་ནས་གདོང་གོས་ཀྱིས་གཡོགས་ཏེ་རྡོ་རྗེ་སེམས་
མའི་ཕྱག་རྒྱས་མེ་ཏོག་འཛིན་པས་ཧཱུྃ་ཞེས་བྱ་བ་ཉིད་ཀྱིས་གཞུག་ཅིང་ཐུན་མོང་གི་ཆོ་ག་ཐམས་ཅད་བྱས་ནས། སློབ་མ་དེའི་ཐུགས་ཀར་རྡོ་རྗེ་སེམས་དཔས་བྱིན་གྱིས་བརླབས་པའི་རྣམ་པར་སྣང་མཛད་དུ་བྱིན་གྱིས་བརླབས་ལ། དྲི་དང་མེ་ཏོག་ལ་སོགས་པས་བརྒྱན་ནས་ལྷ་
ཐམས་ཅད་ཀྱི་བུམ་པ་ལ་སོགས་པ་ཇི་ལྟ་བ་བཞིན་དུ་དབང་བསྐུར་ལ་རྣམ་པར་རྒྱལ་བའི་བུམ་པས་དབང་བསྐུར་རོ། །འདི་དག་ཀྱང་ག་ལས་ཤེ་ན། དང་པོར་གྱི་སྒྲ་ནི་གཙོ་བོར་བསྟན་པ་ཡིན་པའི་ཕྱིར་ཏེ་དེ་བཞིན་གཤེགས་པ་རྣམས་ལྷའི་བདུད་རྩིས་གང་བའི་བུམ་པ་ཕྱག་ན་བསྣམས་
པ་ཕྱུང་ནས་དེ་རྣམས་ཀྱིས་དབང་བསྐུར་བར་གྱུར་པར་བསམ་མོ། །དེ་ནས་ཡང་གོས་ལ་སོགས་པས་བརྒྱན་ནས་རྡོ་རྗེ་སེམས་མ་ལ་སོགས་པའི་དབང་བསྐུར་ཏེ། སངས་རྒྱས་རྣམས་རིན་པོ་ཆེའི་དབུ་རྒྱན་གྱི་གཟུགས་སུ་གྱུར་པར་བསམས་ནས། དར་དཔྱངས་དང་། ཕྲེང་བ་དང་།
རྡོ་རྗེ་དང་། བདག་པོ་དང་། རྡོ་རྗེ་མིང་གི་དབང་བསྐུར་བས་དབང་བསྐུར་ལ་གསེར་ལ་སོགས་པའི་ཐུར་མ་དང་། ཇི་ལྟར་མིག་མཁན་རྒྱལ་པོ་ཡིས། །ཞེས་བྱ་བ་ལ་སོགས་པའི་ཚིགས་སུ་བཅད་པས་མི་ཤེས་པའི་རབ་རིབ་བསལ་ལ་མེ་ལོང་བླངས་ཏེ། རྡོ་རྗེ་སེམས་དཔའི་རང་

བཞིན་ཏེ། །ཞེས་བྱ་བ་ལ་སོགས་པའི་ཚིགས་སུ་བཅད་པ་རྣམས་ཀྱིས་ཆོས་ཀྱི་མཚན་ཉིད་བསྟན་པར་བྱའོ། །ཡི་གེ་ཨ་དང་གླེགས་བམ་སྦྱིན་ཞིང་ཨ་དང་དྲིལ་བུ་སྦྱིན་ལ་རྗེས་སུ་གནང་བ་སྦྱིན་པར་བྱ་བའི་ཕྱིར་འཁོར་ལོ་རྐང་པ་གཉིས་ཀྱི་བར་དུ་བཞག་ནས་ལག་པ་གཡས་པར་
དུང་བྱིན་ཏེ། <དི་‚དེ་>རིང་ཕན་ཆད་འཇིག་རྟེན་དུ། །ཆོས་ཀྱི་འཁོར་ལོ་བསྐོར་བར་གྱིས། །ཞེས་བྱ་བ་ལ་སོགས་པ་བརྗོད་དོ། །དེ་ནས། དེ་རིང་ཕན་ཆད་བུ་ཁྱོད་ཀྱིས། །ཞེས་བྱ་བ་ལ་སོགས་པས་དམ་ཚིག་བསྟན་ནས། བླ་མས་ཡོན་བླངས་ཏེ་ཞི་བའི་སྦྱིན་སྲེག་བྱས་ནས་
མཆོད་པ་དང་བསྟོད་པ་ལ་སོགས་པ་བྱས་ལ་ཧཱུྃ་མུཿ། ཞེས་བྱ་བ་བརྗོད་དེ་སེམས་མའི་ཕྱག་རྒྱ་སྤྱི་བོར་དཀྲོལ་ཏེ་ལྷའི་འཁོར་ལོ་གཤེགས་སུ་གསོལ་ལོ། །དེ་ནས་ཕུར་བུ་ཕྱུང་ལ་གསང་བའི་དཀྱིལ་འཁོར་དེ་བཞིན་དུ་གཤེགས་སུ་གསོལ་ནས་བྱ་བ་སྔ་མས་ཛཿཧཱུྃ་བཾ་ཧོཿཞེས་བརྗོད་ལ། ལྷག་མ་རྣམས་
རང་གི་གནས་སུ་ནང་དུ་བསྒོམ་མོ། །ཡི་གེ་ཧཱུྃ་གིས་ཚོན་རྩི་བསྡུ་བར་བྱ་སྟེ་བསྡུས་ནས་ཆུ་བོ་རྣམས་སུ་དོར་བར་བྱའོ་ལེའུ་གཉིས་པའི་བཤད་པའོ།། །།གསང་སྔགས་ཀྱི་རིམ་པར་ཕྱེ་བ་བསྟན་པར་བྱ་བའི་ཕྱིར་དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ།
ཇི་ལྟ་བ་བཞིན་དུ་ཕྱུང་ལ་སོ་སོའི་གསང་སྔགས་ཀྱི་ཡི་གེས་གནས་ཇི་ལྟ་བ་བཞིན་དུ་དཀྱིལ་འཁོར་གྱི་ལྷ་རྣམས་དགོད་པར་བྱའོ་ཞེས་གསུངས་པ་སྟེ་གསང་སྔགས་ཀྱི་ཡི་གེ་འདི་དག་གིས་དཀྱིལ་འཁོར་དགོད་པའོ། །དེ་དག་ལ་བརྟེན་ནས་ཞེས་བྱ་བ་ལ་སོགས་པས་ནི་གསང་སྔགས་
ཀྱི་ཆེ་བའི་བདག་ཉིད་སྟོན་པ་ཡིན་ནོ། །ལེའུ་གསུམ་པའི་བཤད་པའོ།། །།དེ་ནས་བཅོམ་ལྡན་འདས་ཞེས་བྱ་བ་ལ་སོགས་པས་ནི་ཏིང་ངེ་འཛིན་གྱི་དཀྱིལ་འཁོར་བསྟན་པ་ཡིན་ཏེ། ཡེ་ཤེས་ཆེན་པོ་ཉིད་སྟོབས་ཡིན་ལ། དེའི་རྣམ་པར་འཕྲུལ་པ་ནི་རྣམ་པར་སྣང་མཛད་ལ་སོགས་པའི་
ཏིང་ངེ་འཛིན་གྱི་མཚན་ཉིད་དོ། །དེ་ཉིད་མི་ཕྱེད་པས་ན་རྡོ་རྗེ་སྟེ་ཏིང་ངེ་འཛིན་གང་ལ་དེ་སྐད་ཅེས་བྱ་བ་དེ་ལ་སྙོམས་པར་ཞུགས་པའོ། །ཡི་གེ་ཨོཾ་ཉིད་ཡེ་ཤེས་ཏེ་ཐུགས་ཡིན་ལ་དེ་ལས་ཇི་ལྟ་བ་བཞིན་དུ་སྤྲུལ་ཏོ་ཞེས་བྱ་བའི་དོན་ཏོ། །ཤེས་རབ་ཡེ་ཤེས་རབ་རྒྱས་པ། །ཞེས་བྱ་བ་ནི་

ཤེས་རབ་དང་ཡེ་ཤེས་ཀྱིས་རབ་ཏུ་རྒྱས་པས་སེམས་ཅན་རྣམས་སངས་རྒྱས་ཉིད་དུ་བསྐྱེད་པའི་སངས་རྒྱས་ཀུན་མཆོག་ནི་རིན་པོ་ཆེའི་དབུ་རྒྱན་ཏེ་དེས་མཆོད་པ་ནི་བརྒྱན་པའོ། །ཞལ་གསུམ་ཞེས་བྱ་བ་ལ་དབུས་མ་ནི་གསེར་གྱི་མདོག་ཅན་ནོ། །གཡས་པ་ནི་སྔོན་
པོའོ། །གཡོན་ནི་དཀར་པོ་སྟེ་དེ་རྣམས་ཀྱིས་རྣམ་པར་མཛེས་པའོ། །བསམ་གཏན་ཕྱག་རྒྱ་ཅན་ཞེས་བྱ་བ་ནི་རྡོ་རྗེ་སྐྱིལ་མོ་ཀྲུང་གིས་བཞུགས་པའི་པང་པར་ཕྱག་གཡོན་པ་བརྐྱང་ལ་དེའི་སྟེང་དུ་ཕྱག་གཡས་པ་བརྐྱང་ནས་འཇོག་པའོ། །བགྲང་ཕྲེང་ལྡན་ཞིང་ཞེས་བྱ་བ་ནི་གཡས་
པའི་ཕྱག་གཉིས་ན་བགྲང་ཕྲེང་དང་བཅས་པའོ། །མདའ་ཡིས་བརྒྱན་ཅེས་བྱ་བ་ནི་གཡས་ཀྱི་གསུམ་པ་མདའ་དང་བཅས་པའོ། །ནུ་མ་འཛིན་ཅེས་བྱ་བ་ནི་ཕྱག་གཡོན་པའི་གཉིས་པ་ལྷ་མོའི་ནུ་མ་འཛིན་པའོ། །རྡོ་རྗེ་གཞུ་ཐོགས་ཤིང་ཞེས་བྱ་བ་ནི་གསུམ་པ་རྡོ་རྗེ་གཞུ་བསྣམས་
ཤིང་། འོག་ཏུ་ནི་ཀུན་དུ་དྲག་པོ་དང་ཁྱབ་འཇུག་ལ་སོགས་པའི་ལྷ་རྣམས་བྲེད་ཅིང་སྐྲག་པར་བྲིའོ། །དེ་ཉིད་སྤྱོད་ཡུལ་བསྒོམ་པར་གྱིས། །ཞེས་བྱ་བ་ནི་འདི་སྐད་སྟོན་པ་ཡིན་ཏེ་རྣམ་པར་སྣང་མཛད་ཀྱི་སྒྲུབ་པ་པོས་ཡིད་ལ་རང་གི་སྔགས་བཟླས་ཤིང་སྙོམས་པར་འཇུག་པ་ལས་
བྱུང་བའི་སངས་རྒྱས་ཐམས་ཅད་ཀྱི་སྤྲིན་རང་གི་རིགས་པ་དང་སྦྱོར་བ་སྤྲོ་བ་དང་བསྡུ་བ་ལ་སོགས་པས་བསྒོམ་པར་བྱའོ། །ཨཱ་ཞེས་བྱ་བའི་ཚིག་གི་ལམ། །ཞེས་བྱ་བ་ནི་ཨ་ལས་བྱུང་བ་འོད་དཔག་ཏུ་མེད་པའོ། །འཇིག་རྟེན་དབང་ཕྱུག་འོད་ཆེན་བསམ། །ཞེས་བྱ་བ་ནི་འཇིག་
རྟེན་དབང་ཕྱུག་གི་སྐུར་ཡོངས་སུ་བྱུང་བའོ། །དབུ་རྒྱན་ཐམས་ཅད་མཁྱེན་པས་བརྒྱན། །ཞེས་བྱ་བ་ནི་འོད་དཔག་ཏུ་མེད་པ་དབུ་ལ་འཇོག་པའོ། །ཞལ་གསུམ་འབར་བ་ལ་ཞེས་བྱ་བ་ནི་དང་པོ་ནི་དཀར་པོ། གཡོན་པ་ནི་གསེར་མདོག་གོ། །གཡས་པ་ནི་ཨུཏྤལའི་མདོག་ཅན་ནོ། །དེ་
རྣམས་ཀྱིས་འབར་བ་ཞེས་བྱ་བའི་བར་དུའོ། །ལྷ་མོ་བཞི་དང་གདན་གཅིག་པས་ན་འདུག་སྟངས་བཞི་པ་ཅན་ནོ། །པདྨའི་འཇོ་ཚུལ་ལྡན་ཞེས་བྱ་བ་ནི་གཡོན་པ་དཀུར་བརྟེན་པས་སྡོང་བུ་འཛིན་ཅིང་གཡས་པ་ཐུགས་ཀར་འབྱེད་པའོ། །བགྲང་ཕྲེང་རྡོ་རྗེ་འཆང་ཞེས་བྱ་བ་གཡས་

ཀྱི་གཉིས་ཀྱིས་བགྲང་ཕྲེང་དང་རྡོ་རྗེ་བསྣམས་པའོ། །ནུ་མ་འཛིན་ཞེས་བྱ་བ་ནི་སྔ་མ་བཞིན་ནོ། །གསུམ་པས་ནི་སྤྱི་བླུགས་བསྣམས་པའོ། །གཟུགས་རྣམས་ཐམས་ཅད་ཅེས་བྱ་བ་ནི་ལྟ་བ་ལ་སྤྱོད་པའི་སེམས་ཅན་རྣམས་གདུལ་བར་བྱ་བའི་ཕྱིར་ལྷ་ཐམས་ཅད་ཀྱི་གཟུགས་ཀྱིས་འདུལ་བའོ། །
ཟླ་བའི་གཟུགས་ཞེས་བྱ་བ་ནི་པདྨའི་གདན་ལ་བཞུགས་པའོ། །སེམས་ཀྱི་རྡོ་རྗེ་ཞེས་བྱ་བ་ནི་རྡོ་རྗེ་འཛིན་པའོ། །མཐིང་ཤུན་བཟང་པོ་ལྟ་བུའི་མདོག །ཅེས་བྱ་བ་ནི་མཐིང་ཤུན་གྱི་མདོག་ཅན་ནོ། །མི་འཁྲུགས་བཞུགས་ཞེས་བྱ་བ་ནི་མི་བསྐྱོད་པས་བརྒྱན་པའོ། །ཞལ་གསུམ་ཞེས་
བྱ་བ་ལ་ཞལ་དབུས་མ་ནི་སྔོན་པོའོ། །གཡས་ནི་དཀར་པོའོ། །གཡོན་ནི་སེར་པོའོ། །རིན་ཆེན་འབྱུང་ལྡན་ནི་དབུས་མ་དང་གཡས་གཡོན་དག་དམར་པོ་དང་སྔོན་པོ་དང་དཀར་པོའི་ཞལ་མངའ་བས་ན་ཞལ་གསུམ་པའོ། །ཏིང་ངེ་འཛིན་གྱི་ཕྱག་རྒྱ་ནི་སྔ་མ་བཞིན་ནོ། །གཡས་ན་ནི་
རྡོ་རྗེ་བསྣམས་པ་གཡོན་པས་ནི་རིན་པོ་ཆེ་བསྣམས་པ་སྟེ་ཕྱག་བཞི་པར་བསྒོམ་པར་བྱའོ་ཞེས་བྱ་བ་ནི་ལྷག་མའོ། །དོན་ཡོད་གྲུབ་པའི་རྡོ་རྗེ་ནི་ཕྱག་བཞི་པ་སྟེ། ཏིང་ངེ་འཛིན་གྱི་ཕྱག་རྒྱ་དང་ལྡན་ཞིང་། རལ་གྲི་དང་ལྕགས་ཀྱུ་བསྣམས་པ། ཡི་གེ་ཁཾ་ལས་བྱུང་བ་སྔོ་བསངས་
ཀྱི་མདོག་ཅན་ནོ། །སྤྱན་ནི་རྣམ་པར་སྣང་མཛད་དང་འདྲ་བའི་ཞལ་གསུམ་མངའ་བ་དང་། གཡོན་པ་སྡིགས་མཛུབ་ཞགས་པ་ཅན། །ཞེས་བྱ་བ་སྟེ་ཕྱག་གཡོན་པས་ཞགས་པ་ཐོགས་པ་དང་སྡིགས་མཛུབ་མཛད་པའོ། །བྱང་ཆུབ་ཡན་ལག་སྟོབས་བརྒྱན་པའི། །ཞེས་བྱ་བ་ནི་ཆོས་
རབ་ཏུ་རྣམ་པར་འབྱེད་པ་ལ་སོགས་པ་བྱང་ཆུབ་ཀྱི་ཡན་ལག་བདུན་དང་། གནས་དང་གནས་མ་ཡིན་པ་མཁྱེན་པ་ལ་སོགས་པ་སྟོབས་བཅུས་བརྒྱན་པའོ། །མཱ་མ་ཀཱིའི་ཞལ་གསུམ་ནི་མི་བསྐྱོད་པ་དང་འདྲའོ། །དངོས་དང་དངོས་མེད་མཚན་ཉིད་ཅན། །ཞེས་བྱ་བ་ནི་དངོས་པོ་དང་
དངོས་པོ་མེད་པ་དང་བྲལ་བའོ། །འདི་འདྲ་སྒོམ་པས་བསྒོམ་པར་བྱ། །ཞེས་བྱ་བ་ནི་འདི་ལྟ་བུའི་བསམ་པས་བསྒོམ་པར་བྱའོ། །གོས་དཀར་ཅན་གྱི་ཞལ་རས་གསུམ། །ཞེས་བྱ་བ་ནི་འོད་དཔག་ཏུ་མེད་པ་དང་འདྲ་བའོ། །སྒྲོལ་མའི་ཞལ་གསུམ་ནི་དོན་ཡོད་རྡོ་རྗེ་དང་འདྲ་བའོ། །མདའ་

ཡང་གསོར་ཞེས་བྱ་བ་ནི་མདས་གར་བྱེད་པའི་ཚུལ་ལོ། །རྡོ་རྗེ་སེམས་ལ་སོགས་པ་བཞི་ནི་རིམ་བཞིན་དུ་རྡོ་རྗེ་སེམས་དཔའ་དང་། རིན་ཆེན་དང་། ཆོས་དང་། ལས་ཀྱི་སེམས་དཔའ་དང་འདྲ་བར་ཉེ་བར་བསྟན་པར་བྱ་བའི་ཕྱིར་སྐྱེས་མཆོག་ཅེས་བྱ་བ་
ལ་སོགས་པ་གསུངས་ཏེ་དེ་རྣམས་ནི་ཞལ་གསུམ་པའོ། །སྐུལ་བྱེད་མའི་ནི། ཡི་གེ་དགུ་ཡི་ཐབས་དགུ་ཅན། །ལྷ་དགུ་རྣམས་ཀྱི་གནས་ཀྱང་ཡིན། །ཞེས་བྱ་བ་ནི་སྔགས་ཀྱི་སྒོ་ནས་ཡི་གེ་དགུ་ལ་སོགས་པ་གར་ཐབས་དགུ་དང་། དེ་བཞིན་གཤེགས་པ་ལ་སོགས་པ་ལྷ་
དགུའི་གནས་སུ་གྱུར་པ་ཡིན་པའི་ཕྱིར་རོ། །འབར་བའི་ཕྱག་ནི་ཉི་ཤུ་དྲུག །ཅེས་བྱ་བ་ནི་ཕྱག་འབར་བ་ཉི་ཤུ་རྩ་དྲུག་དང་ལྡན་པའོ། །རྩ་བའི་ཕྱག་རྒྱ་ནི་འོག་ནས་བཤད་པའི་མཚན་ཉིད་ཅན་ནོ། །བཅུ་གཉིས་པ་ནི་ཕུལ་དུ་བྱུང་བ་སྟེ། ངོ་མཚར་དུ་གྱུར་པའོ། །དེ་ཡང་མཛུབ་
མོ་དང་མཐེ་བོས་སྟོན་པ་ཡིན་ནོ། །ལྟུང་བ་ཞེས་བྱ་བ་དྲག་པོ་དང་ཁྱབ་འཇུག་ལ་སོགས་པའོ། །རིན་ཆེན་སྒྲོན་མའི་ཞལ་རས་གསུམ་ནི་རྣམ་པར་སྣང་མཛད་དང་འདྲ་བའོ། །ཕྱག་གཉིས་རིན་ཆེན་ཐལ་མོ་སྟེ། །ཞེས་བྱ་བ་ནི་ཐལ་མོ་སྦྱར་བ་ལ་ཡིད་བཞིན་གྱི་ནོར་བུ་ལྟ་བུའོ། །
ཁྲོ་གཉེར་ཅན་གྱི་ཞལ་རས་གསུམ་ནི་འཇིག་རྟེན་དབང་ཕྱུག་དང་འདྲ་བའོ། །རྡོ་རྗེ་ལུ་གུ་རྒྱུད་ཀྱི་ཞལ་རས་གསུམ་ནི་དོན་ཡོད་གྲུབ་པའི་རྡོ་རྗེ་དང་འདྲ་བའོ། །ཞལ་ནི་ཅུང་ཟད་བཞད་མཛད་པ། །ཞེས་བྱ་བ་ནི་ཞལ་དབུས་མ་ཅུང་ཟད་བཞད་པ་གང་ཡིན་པའོ། །བྱམས་པའི་ཞལ་གསུམ་
ནི་རྣམ་པར་སྣང་མཛད་དང་འདྲའོ། །འཇམ་དཔལ་གཞོན་ནུར་གྱུར་པའི་ཞལ་གསུམ་ཡང་རྣམ་པར་སྣང་མཛད་དང་འདྲ་བའོ། །བསྐལ་པ་བཟང་པོ་པ་ལྷག་མ་རྣམས་ཀྱང་འདི་དག་གི་རྗེས་སུ་འབྲངས་ནས་བསྒོམ་པར་བྱའོ་ཞེས་བསྟན་པར་བྱ་བའི་ཕྱིར་སྤོས་ཀྱི་གླང་པོ་ཞེས་བྱ་བ་ལ་
སོགས་པ་གསུངས་སོ། །ཁྲོ་བོ་གཤིན་རྗེའི་གཤེད་ཀྱི་གདན་ནི་འོག་ཏུ་པདྨའི་ཞེས་བྱ་བ་སྟེ། མ་ཧེའི་འོག་ཏུ་པདྨའི་གདན་བྱས་པ་གང་ཡིན་པ་དེ་ལ་དེ་སྐད་ཅེས་བྱ་བའོ། །སྐུ་གསུམ་ལ་ནི་རྣམ་པར་བཞུགས། །ཞེས་བྱ་བ་ནི་སྐུ་ལ་སོགས་པ་གསུམ་དང་ལྡན་པའོ། །འཇམ་པའི་དཔལ་

གྱིས་ལེགས་པར་བརྒྱན། །ཞེས་བྱ་བ་ནི་འཇམ་དཔལ་གྱི་སྐུས་མཚན་པའི་ཐོད་པའི་ཕྲེང་བ་ཡོད་པའི་ཕྱིར་རོ། །ལྷ་མོ་ཡིས་ནི་ཞེས་བྱ་བ་ལ་སོགས་པ་ལ་གཅིག་གིས་ནི་དེ་གཡས་ནས་འཁྱུད་པའོ། །གཉིས་པ་ནི་རྒྱབ་ཏུ་གནས་ནས་ཨུཏྤལ་ཐོགས་པའོ། །གསུམ་པ་ནི་གཡས་
ཕྱོགས་ན་འདུག་པ་སྟེ་པདྨ་ཐོགས་པའོ། །བཞི་པ་ནི་མདུན་དུ་གནས་པར་ཤེས་པར་བྱའོ། །ཁྲོ་བོ་གཞན་གྱིས་མི་ཐུབ་པའི་ཞལ་རས་གསུམ་ནི་རྣམ་པར་སྣང་མཛད་དང་འདྲའོ། །རྟ་མཆོག་གི་ཞལ་གསུམ་ནི་རིན་ཆེན་འབྱུང་ལྡན་དང་འདྲའོ། །ཁྲོ་བོ་བགེགས་ཀྱི་གཤེད་
ནི་ཞལ་གསུམ་དོན་ཡོད་རྡོ་རྗེ་ལྟ་བུ་སྟེ་ཞབས་གཡས་པས་བགེགས་གནོན་ཅིང་གཡོན་པས་པདྨ་ལ་བརྟེན་པའོ། །ཁྲོ་བོ་མི་གཡོ་བ་ནི་ཞལ་གསུམ་དཔལ་རྡོ་རྗེ་སེམས་དཔའ་དང་འདྲའོ། །རིན་ཆེན་རི་སྟེང་པདྨ་ལ། །ཞེས་བྱ་བ་ནི་པདྨའི་འོག་ཏུ་རིན་པོ་ཆེའི་རི་བོ་ཡོད་པའོ། །ཁྲོ་བོ་འདོད་
པའི་རྒྱལ་པོ་ནི་ཞལ་གསུམ་མི་གཡོ་བ་དང་འདྲ་བའོ། །འདོད་པའི་རྒྱལ་པོའི་ཕྱག་རྒྱ་ནི་འོག་ནས་བཤད་པའོ། །ཁྲོ་བོ་བེ་ཅོན་སྔོན་པོ་ཅན་ནི་ཞལ་གསུམ་འདོད་པའི་རྒྱལ་པོ་དང་འདྲའོ། །སྐུ་ནི་རི་སྔོན་འདྲ་བའོ་ཞེས་བྱ་བ་ནི་ཞལ་དབུས་མ་རི་བོ་སྔོན་པོ་དང་འདྲ་བ་མངའ་བའོ། །
དབུ་རྒྱན་ལ་ནི་སངས་རྒྱས་བཞུགས། །ཞེས་བྱ་བ་ནི་སྤྱི་བོར་སངས་རྒྱས་ཀྱི་དབུ་རྒྱན་དང་ལྡན་པའོ། །སྦྱོར་བའི་ཡེ་ཤེས་ཀྱིས་བསྐུལ་བའི། །ཞེས་བྱ་བ་ནི་སྙོམས་པར་ཞུགས་པ་ལས་བྱུང་བའི་བྱང་ཆུབ་ཀྱི་སེམས་ལས་སྐྱེས་ཞེས་བྱ་བའི་དོན་ཏོ། །ཁྲོ་བོ་སྟོབས་པོ་ཆེ་ནི་ཞལ་རས་
གསུམ་བདུད་རྩི་ཐབ་སྦྱོར་དང་འདྲའོ། །དྲག་པོ་ཚམ་ངམ་སྟང་སྟབས་ཅན། །ཞེས་བྱ་བ་ནི་ཞབས་ཚམ་ངམ་གྱི་སྟང་སྟབས་དང་བཅས་པའོ། །ཉི་མའི་དཀྱིལ་འཁོར་ནང་ན་བཞུགས། །ཞེས་བྱ་བ་ནི་ཉི་མའི་འོད་ཀྱི་དཀྱིལ་འཁོར་ལ་བཞུགས་པའོ། །བཅོམ་ལྡན་འདས་ནི་
རྡོ་རྗེ་སྐྱིལ་མོ་ཀྲུང་དང་ལྡན་པའོ། །སློབ་དཔོན་ལ་ལ་དག་ནི་རོལ་པའི་སྟང་སྟབས་ཀྱིས་བཞུགས་པར་འདོད་དོ། །བསྐལ་པ་བཟང་པོ་པ་རྣམས་དང་ལྷ་མོ་སྒྲོལ་མ་ལ་ཡང་དེ་བཞིན་ནོ། །ལྷག་མ་ནི་རོལ་པའི་སྟང་སྟབས་ཀྱིས་བཞུགས་སོ། །གཙུག་ཏོར་འཁོར་ལོས་སྒྱུར་

བའི་སྐུ་གསུམ་ཞེས་བྱ་བ་ནི་སྐུ་དང་གསུང་དང་ཐུགས་ཀྱི་དབྱེ་བས་སོ། །ཞལ་གསུམ་ནི་རྣམ་པར་སྣང་མཛད་དང་འདྲའོ། །རིན་ཆེན་རི་སྟེང་པདྨ་ལ། །ཞེས་བྱ་བ་ནི་པདྨའི་འོག་ཏུ་རིན་པོ་ཆེའི་རི་ཡོད་པའོ། །རིགས་ཀྱི་ཡུམ་ནི་སྤྱན་ལ་སོགས་པ་སྟེ་རིམ་བཞིན་དུ་རིན་པོ་
ཆེའི་སྙེ་མ་དང་། རྡོ་རྗེ་དང་། པདྨ་དང་ཨུཏྤལ་བསྣམས་པའོ། །ཆགས་ཕྱིར་སྤྲོ་ཞིང་རྩོལ་བ་ཅན། །ཞེས་བྱ་བ་ནི་ཆགས་པས་ནི་ཤིན་ཏུ་རྩོལ་བ་དང་བཅས་པའོ། །གནོད་གནས་ཀྱི་སྐུ་གསུམ་ཅན་ཞེས་བྱ་བ་ནི་སྔ་མ་བཞིན་ནོ། །ཞལ་རས་གསུམ་ནི་ཐུགས་རྡོ་རྗེ་དང་འདྲ་བའོ། །
པདྨའི་གདན་ལ་བཞུགས་པ་ཞེས་བྱ་བ་ནི་ཞབས་གཡས་པ་པདྨའི་གདན་ལ་བརྟེན་པས་བཞུགས་སོ། །བཟང་པོའི་འདུག་སྟངས་ཞེས་བྱ་བ་ནི་གཡོན་པས་བཟང་པོའི་འདུག་སྟངས་སུ་གནས་པ་སྟེ་བུམ་པ་བཟང་པོ་ལ་བརྟེན་པའོ། །ལ་ལ་ནི་རོལ་པའི་སྟང་སྟབས་སུ་གནས་
སོ་ཞེས་ཟེར་རོ། །ཕྱག་ན་རྡོ་རྗེ་བདུད་རྩི་ཡིས། །ཞེས་བྱ་བ་ནི་འདི་སྐད་སྟོན་པར་འགྱུར་ཏེ། རང་གི་ལྷ་སྤྱན་དྲངས་པ་ལ་སོགས་པ་སྔོན་དུ་འགྲོ་བས་ལག་པ་གཡས་པར་དང་པོའི་ཡི་གེ་ཨ་ལས་བྱུང་བའི་ཟླ་བའི་དཀྱིལ་འཁོར་ལ་གནས་པའི་ཡི་གེ་ལཾ་གྱིས་ཁྱབ་པའི་
ལག་པས་དྲི་བཟང་པོའི་ཆུ་ཇི་ལྟ་བ་བཞིན་དུ་བླུགས་པར་བྱའོ། །ལྷ་མོ་འོད་ཟེར་ཅན་གྱི་ཞལ་གསུམ་ནི་རྣམ་པར་མཛད་དང་འདྲ་བའོ། །ཧཱུྃ་མཛད་ཅེས་བྱ་བ་ནི་ཁྲོ་བོའི་སྟང་སྟབས་དང་ལྡན་པའོ། །རི་ཁྲོད་ཤིང་ལོ་ཅན་གྱི་ཞལ་རས་གསུམ་ནི་རྣམ་པར་སྣང་མཛད་དང་འདྲ་
བའོ། །དེ་ཡང་ཁྲོ་བོའི་མེ་འབར་བས་སྐྱེ་དགུ་རྣམས་ལ་འཚེ་བའི་གདོན་ཐམས་ཅད་ཐལ་བར་བྱས་ནས་སངས་རྒྱས་རྣམས་སྤྲོས་ཏེ་དེ་རྣམས་ཀྱིས་འགྲོ་བ་རྣམས་ལ་བདུད་རྩིའི་ཆར་འབེབས་པའོ། །དུག་སེལ་མའི་ཞལ་རས་གསུམ་ནི་རྣམ་པར་སྣང་མཛད་དང་འདྲ་བའོ། །བླུགས་
ཞེས་བྱ་བ་ནི་སངས་རྒྱས་ཀྱི་གཟུགས་རྣམས་སྤྲོས་ལ་དེ་དག་ཉིད་ཀྱིས་ཡི་གེ་ཛཿས་ཁ་རྣམ་པར་བརྒྱན་པའི་ཟླ་བའི་བུམ་པ་རྣམས་ཀྱིས་དུག་གིས་ཕོག་པ་རྣམས་ལ་ལྡུགས་སོ་ཞེས་པའི་བར་དུའོ། །ཧ་ལ་ཧ་ལའི་ཞལ་རས་གསུམ་ནི་འོད་དཔག་ཏུ་མེད་པ་དང་འདྲ་བའོ། །

ལྷ་རྣམས་ཀྱི་ཏིང་ངེ་འཛིན་ཉིད་ཀྱིས་ཇི་ལྟར་རང་གི་བསམ་གཏན་གྱི་ཚུལ་སྟོན་པ་བཞིན་དུ་ཤེས་པར་བྱའོ། །སྐྲ་ཚུགས་ཕྱེད་དུ་གཟར་ཞེས་བྱ་བ་ནི་དཔྲལ་བའི་བར་དུ་སྐྲ་འཁྱིལ་བའོ། །སྐྲ་རབ་ཅེས་བྱ་བ་ནི་སྐྲ་སྟེ་དེའི་མགོ་ལའོ། །འཇམ་པའི་རྡོ་རྗེ་ཁྲོ་བོ་ཡིས། །ཞེས་བྱ་བ་ནི་གཤིན་རྗེའི་
གཤེད་ཅེས་བྱ་བའི་ཁྲོ་བོ་དེའི་མགོ་ལ་གནས་པའོ། །དེ་ནི་འདི་སྐད་སྟོན་པར་འགྱུར་ཏེ། འཇམ་པའི་རྡོ་རྗེའི་རྣལ་འབྱོར་པས་མདུན་དུ་ཀྵིཾ་ལས་བྱུང་བའི་གནོད་སྦྱིན་མ་བསྐྱེད་ལ་དེ་དང་སྙོམས་པར་འཇུག་པ་ལས་ཡང་དང་ཡང་དུ་དེ་ཉིད་སྤྲོས་ནས་ནམ་མཁའ་གང་བར་བསྒོམས་ལ། མཾ་
ཨོཾ་ཨཱ་ཞེས་བྱ་བའི་ཡི་གེ་གསུམ་ལས་ཁྱབ་འཇུག་དང་། ལྷ་ཆེན་པོ་དང་། ཚངས་པ་སྟེ་དེ་དག་ཇི་སྐད་དུ་བསྟན་པའི་རང་གི་ཡི་གེ་ལས་བྱུང་བ་ལ་རྡོ་རྗེ་ཧཱུྃ་མཛད་ཀྱི་སྦྱོར་བ་དང་ལྡན་པའོ། །དགུག་པ་ལ་སོགས་པ་སྔོན་དུ་འགྲོ་བས་མནན་ལ་ཡི་གེ་ཧཱུྃ་བརྗོད་ཅིང་བསྒོམ་པར་བྱའོ། །
བརྒྱ་བྱིན་ལ་སོགས་པ་ཡང་རང་གི་ས་བོན་ལས་བྱུང་བའི་རིམ་པ་འདི་ཉིད་ཀྱིས་བསྒྲུབ་པར་བྱའོ་ཞེས་བསྟན་པར་བྱ་བའི་ཕྱིར་གཞན་ཡང་ཞེས་བྱ་བ་ལ་སོགས་པ་གསུངས་སོ། །འཕྲོག་བྱེད་ལས་སྐྱེས་པ་ཞེས་བྱ་བ་ནི། །ཡི་གེ་ཧ་ལས་བྱུང་བ་སྟེ། དེར་ཡང་རང་གི་
འཁོར་གྱིས་ཡོངས་སུ་བསྐོར་བ་ཇི་བཞིན་དུ་སྦྱོར་བ་དང་སྤྲོ་བ་ལ་སོགས་པས་བསྒྲུབ་པར་བྱའོ། །ལེའུ་བཞི་པའི་བཤད་པའོ།། །།དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་ནི་གསང་སྔགས་ཀྱི་ཡེ་ཤེས་རྣམ་པར་བསྒྱིངས་པ་རིམ་པར་ཕྱེ་བ་སྟོན་ཏེ། ཞི་བ་ཉིད་ནི་
ཉེས་པ་ཐམས་ཅད་དང་བྲལ་བས་ན་རྡུལ་དང་བྲལ་བའོ། །དེ་ཉིད་མཆོག་སྟེ་ཏིང་ངེ་འཛིན་གང་ལ་དེ་སྐད་ཅེས་བྱ་བ་དེ་ལ་སྙོམས་པར་ཞུགས་པའོ། །སངས་རྒྱས་རྡོ་རྗེ་ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཀྱི་གཟུགས་སུ་བྱུང་བ་སྟེ། དེ་བཞིན་དུ་འོག་མ་རྣམས་ལ་ཡང་
ཅི་རིགས་པར་རྗེས་སུ་སྦྱར་བར་བྱ་སྟེ། རྣམ་པར་སྣང་མཛད་ཀྱི་སྦྱོར་བ་དང་ལྡན་པས་ཡུམ་སངས་རྒྱས་སྤྱན་གསང་སྔགས་ཀྱི་ཡི་གེ་ལས་བདུད་རྩིས་གང་བའི་ཟླ་བའི་བུམ་པ་ཐོགས་པ་ཕྱུང་ལ་ནད་པ་ལ་ལྡུགས་པར་བསྒོམས་ན་ཞི་བ་བསྐྱེད་པར་འགྱུར་ཏེ། །ཞི་བ་རྣམས་ལ་ཡང་

སྲོག་སྦྱིན་པར་བྱེད་ཅིང་མ་གྲུབ་པ་རྣམས་ལ་གྲུབ་པ་སྩོལ་བར་འགྱུར་རོ། །ཅིའི་ཕྱིར་འདི་ལྟར་འགྱུར་ཞེ་ན། རྡོ་རྗེ་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་བཅིངས་པ་ལ་སོགས་པའི་དམ་ཚིག་གི་སྔགས་ཀྱིས་དབང་བསྐུར་བའི་བདག་ཉིད་ཅན་གྱིས་བསྐུལ་ཞིང་
མངོན་སུམ་དུ་བྱས་པ་ནི་རྡོ་རྗེ་དམ་ཚིག་གིས་བསྐུལ་བའོ། །སྐུ་གསུམ་འབར་བ་ཡིས་ནི་ཐུགས་རྗེ་སྟེ་མཆོག་གི་དམ་ཚིག་ནི་མཱ་མ་ཀཱིའི་མཚན་ཉིད་ཅན་ཏེ། ཏིང་ངེ་འཛིན་གང་ལ་དེ་སྐད་ཅེས་བྱ་བ་དེ་ལ་སྙོམས་པར་ཞུགས་པའོ། །རྡོ་རྗེའི་དཀྱིལ་འཁོར་ཞེས་བྱ་བ་ནི་རྡོ་རྗེའི་རིགས་ཀྱི་སྟེ་དེ་
ཡང་སྔགས་ཀྱི་ཡི་གེ་དཀར་པོ་ཕྱུང་ནས་དེ་བསྒྲུབ་པར་བྱ་བའི་ལུས་ཀུན་དུ་གང་བར་བསྒོམས་ན་སྡིག་པ་འཇོམས་པར་འགྱུར་རོ། །ནད་པ་ལ་ཞི་བ་ནི་སྤྱན་དང་འདྲ་བར་བྱའོ། །རྒྱས་པ་ལ་རིན་པོ་ཆེའི་བུམ་པས་རིན་པོ་ཆེའི་ཆར་འབེབས་པར་བསམ་པར་བྱའོ། །འདོད་ཆགས་ཆེན་
པོ་ནི་འོད་དཔག་ཏུ་མེད་པའོ། །དེ་སོ་སོར་རྟོག་པའི་མཚན་ཉིད་ཅན་གྱི་པདྨས་ཆགས་ཤིང་མཉེས་པར་བྱས་པས་གར་དེས་རྣམ་པར་འཕྲུལ་པའོ། །དེ་ཉིད་འཐོབ་པ་སྟེ་གོས་དཀར་མོ་ཞེས་བྱ་བས་སྒྲིབ་པ་རྣམས་འཐོར་བར་བྱེད་པའི་ཕྱིར་རོ། །དེ་ལ་དམིགས་པའི་ཏིང་ངེ་འཛིན་
རྡོ་རྗེ་དེ་ལ་དེ་སྐད་ཅེས་བྱའོ། །རྡོ་རྗེ་ཆོས་ནི་འོད་དཔག་ཏུ་མེད་པ་སྟེ་གསང་སྔགས་ཀྱི་ཡི་གེ་གསེར་གྱི་མདོག་ཅན་དུ་ཕྱུང་ལ་བསྒྲུབ་པར་བྱ་བ་དབང་བསྐུར་ན་རྒྱས་པ་ཆེན་པོ་སྐྱེད་པར་འགྱུར་རོ། །དེ་ཉིད་སྤྲོ་བ་དང་བསྡུ་བ་དག་ཏུ་བསྒོམ་པས་ཆོས་ཀྱི་མཛོད་རྣམ་པར་འཕེལ་བར་
བྱེད་དོ། །རང་གི་སྙིང་གའི་པདྨའི་ལྟེ་བ་ལ་བསྒྲུབ་པར་བྱ་བ་གཞག་སྟེ། གསང་སྔགས་ཀྱི་ཡི་གེའི་ཕྲེང་བས་བསྐོར་ལ། །སྣ་ཚོགས་རྡོ་རྗེ་སྤྱི་བོར་གནས་པར་བྱས་ནས་བཟླས་པ་ལ་སོགས་པ་ཇི་ལྟ་བ་བཞིན་དུ་བྱས་ན་སྲུང་བ་ཆེན་པོ་མཛད་པར་འགྱུར་རོ། །ཐམས་ཅད་དབང་དུ་བྱ་
བ་ནི་ཚེ་ལ་དབང་བ་ལ་སོགས་པ་བཅུའོ། །དེ་རྣམས་ཁོང་དུ་ཆུད་པར་བྱས་པ་ལས་བསྐྱེད་པ་ནི་དོན་ཡོད་རྡོ་རྗེ་ཅན་ནོ། །དེ་ཉིད་ནི་རྡོ་རྗེ་གསུམ་མཉམ་པ་ཉིད་དེ་དེའི་དགའ་བར་བྱེད་པ་ནི་རྡོ་རྗེ་དང་འདྲ་བར་<མ་‚མི་>ཕྱེད་པའི་ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་ནས་ཡི་གེ་

དམར་པོའི་གསང་སྔགས་ཕྱུང་ལ་དེས་བསྒྲུབ་པར་བྱ་བ་ཀུན་དུ་བཀང་ལ་བཟླས་ན་མངག་གཞུག་པར་འགྱུར་རོ། །ཡེ་ཤེས་ལ་འཇུག་པས་སྒྲོལ་བར་བྱེད་པ་ཞེས་བྱ་བ་ནི། །ཡེ་ཤེས་ལ་འཇུག་པས་སྒྲོལ་བར་བྱེད་པས་ན་དེ་ལས་དམིགས་པའི་ཏིང་ངེ་འཛིན་དེ་ལ་ཡང་དེ་སྐད་ཅེས་
བྱའོ། །རྡོ་རྗེ་ནི་གཤིན་རྗེ་གཤེད་ལ་སོགས་པའི་ཁྲོ་བོ་རྣམས་ཏེ། དེ་དག་ཉིད་གདུག་པ་རྣམས་སྒྲིབ་པའི་ཕྱིར་དེ་རྣམས་ཀྱིས་དྲ་བར་བྱས་པའོ། །ཡེ་ཤེས་སྣ་ཚོགས་ཅན་ནི་འཇིག་རྟེན་ལས་འདས་པའི་ཡེ་ཤེས་སྣ་ཚོགས་དང་ལྡན་པའོ། །སྲུབས་གཅིག་པ་ནི་དུམ་བུ་གཅིག་པའོ། །
སྲུབས་གཉིས་པ་ནི་དུམ་བུ་གཉིས་པ་སྟེ་འདི་གཉིས་ཁོ་ན་བསྔགས་པ་ཡིན་པའི་ཕྱིར་རོ། །བཟང་པོ་ནི་ཡན་ལག་མ་ཉམས་པའོ། །རྐང་རྗེས་ས་ཡི་ཆོ་ག་ཡིས། །ཞེས་བྱ་བ་ལ་དེས་ནི་འདི་སྐད་སྟོན་པར་འགྱུར་ཏེ། །གཤིན་རྗེ་གཤེད་ཀྱི་རྣལ་འབྱོར་པས་ལྷ་མོ་བཞིའི་སྦྱོར་བ་དང་ལྡན་པས་དེ་
བཞིན་གཤེགས་པ་ལྔས་བྱིན་གྱིས་བརླབས་ལ་བསྒྲུབ་བྱའི་རྐང་རྗེས་ཀྱི་ས་ལས་དེའི་གཟུགས་བརྙན་བྱས་ཏེ། ཐོད་པར་བཞག་ལ་དེ་དགུག་པ་དང་། གཞུག་པ་དང་བཅིང་བ་བྱས་ལ་རྐང་པ་གཡོན་པས་མནན་ཏེ། བསྐུལ་བ་དང་བཅས་པར་ཇི་སྲིད་དུ་ཁུགས་པར་གྱུར་པ་དེ་སྲིད་ཀྱི་
བར་དུ་བཟླས་བརྗོད་བྱའོ། །སྐུ་གསུམ་དབྱེར་མེད་བསྒོམས་ནས་སུ། །ཞེས་བྱ་བ་ནི་རང་གི་ལྷའི་ང་རྒྱལ་བརྟན་པོ་དང་ལྡན་པའོ། །སྤྲིན་མཆོག་ནི་དོན་ཡོད་རྡོ་རྗེ་སྟེ་དེའི་ཡེ་ཤེས་རྡོ་རྗེ་ནི་མཆོག་གོ། །དེའི་ཡེ་ཤེས་དེ་ལས་རྡོ་རྗེ་བདུད་རྩིའི་ཁྲོ་བོའི་ཏིང་ངེ་འཛིན་གང་ཡིན་པ་དེ་ལ་དེ་
སྐད་ཅེས་བྱའོ། །ཚོགས་བདག་རྐང་པའི་དྲུང་དུ་གཞག །ཅེས་བྱ་བ་ནི་བདུད་རྩི་ཐབ་སྦྱོར་གྱི་སྦྱོར་བ་དང་ལྡན་པས་བསྒྲུབ་པར་བྱ་བའི་རྐང་རྗེས་ཀྱིས་ལས་དེའི་གཟུགས་བརྙན་བོང་བུའི་གཅིན་དང་སྦྲུས་ཏེ་བྱས་ལ་རླུང་གིས་ཁྱེར་བའི་འདབ་མ་ལ་ཁྲག་དང་བཏགས་པའི་དུར་
ཁྲོད་ཀྱི་སོལ་བས། ཁྲོ་བོ་དང་སྤེལ་བའི་བསྒྲུབ་པར་བྱ་བའི་མིང་བྲིས་ནས་གཟུགས་བརྙན་གྱི་གནས་ལྔའི་ནང་དུ་བཅུག་ལ། རྡོ་རྗེ་ཚོགས་ཀྱི་བདག་པོ་བཀུག་ནས་ལེགས་པར་མཆོད་དེ། དེའི་རྐང་པའི་འོག་ཏུ་དེ་གཞག་པ་བྱས་ལ་སྔགས་ཀྱི་མཐར་ཧཱུྃ་ཆེ་གེ་མོ་སྐྲོད་

ཅིག་ཕཊ་ཅེས་བྱ་བའི་བར་དུ་ཁྲོས་པས་བཟླས་བརྗོད་བྱའོ། །རིན་པོ་ཆེའི་སྒྲོལ་མ་ནི་རིན་ཆེན་འབྱུང་ལྡན་ནོ། །དེའི་ཁྲོ་བོའི་ཡེ་ཤེས་ནི་སྔ་མ་བཞིན་ནོ། །དེ་ལས་བྱུང་བའི་རྡོ་རྗེ་ནི་ཁྲོ་བོའི་བདག་ཉིད་ཅན་གྱི་ཏིང་ངེ་འཛིན་གང་ཡིན་པ་དེ་ལ་དེ་སྐད་ཅེས་བྱའོ། །རྡོ་རྗེས་
གཟིར་བའི་སྦྱོར་བ་ཡིས། །ཧཱུྃ་ཙམ་གྱིས་ཀྱང་ལས་བྱེད་དོ། །ཞེས་བྱ་བ་ནི་ཁྲོ་བོ་གཞན་གྱིས་མི་ཐུབ་པའི་སྦྱོར་བ་དང་ལྡན་པས་དེ་ཉིད་འབར་བའི་ཕྲེང་བས་འཁྲིགས་པ་ཕྱུང་ལ་སྔགས་ཀྱི་མཐར་ཧཱུྃ་ཞེས་བྱ་བ་བརྗོད་ནས་གནོད་སྦྱིན་ལ་སོགས་པ་གཟིར་བར་བྱའོ། །དཔག་ཏུ་མེད་
པ་ནི་འོད་དཔག་ཏུ་མེད་པའོ། །དེའི་ཡེ་ཤེས་ནི་རིན་པོ་ཆེ་དང་འདྲ་བས་ན་རིན་པོ་ཆེའོ། །དེ་ཉིད་ནི་ཡོན་ཏན་བསགས་པའོ། །དེ་ལས་བྱུང་བའི་རྡོ་རྗེ་ནི་ཁྲོ་བོའི་རང་བཞིན་ཏེ། ཏིང་ངེ་འཛིན་གང་ལ་དེ་སྐད་ཅེས་བྱ་བ་དེ་ལ་སྙོམས་པར་ཞུགས་པའོ། །བསམ་ཞེས་བྱ་བ་ནི་འདི་སྐད་སྟོན་
པར་འགྱུར་ཏེ། རྟ་མགྲིན་གྱི་རྣལ་འབྱོར་པས་ལག་པ་གཡས་པ་ལས་བྱུང་བའི་པདྨ་དཀར་པོ་འདབ་མ་བརྒྱད་པ་གནས་པར་བསམས་ལ། དེའི་ལྟེ་བ་ལ་གནས་པའི་ཡི་གེ་ཧ་འོད་ཟེར་འབར་བ་ལས་བསྒྲུབ་པར་བྱ་བའི་སྟེང་དུ། བདུད་རྩི་འབར་བར་བསམས་ལ། དེ་དང་
གསང་སྔགས་འདོན་པ་སྔོན་དུ་འགྲོ་བས་དུག་ཐམས་ཅད་དྲང་བར་བྱའོ། །དོན་ཡང་དག་པར་འབྱུང་བ་ནི་དོན་ཡོད་རྡོ་རྗེའོ། །དེའི་མཆོག་གི་ནོར་བུ་སྟེ་རྡོ་རྗེ་རིན་པོ་ཆེའོ། །དེ་ལས་བྱུང་བའི་རྡོ་རྗེ་ནི་ཁྲོ་བོ་ཆེན་པོའི་མཚན་ཉིད་ཅན་གྱི་ཏིང་ངེ་འཛིན་གང་ཡིན་པ་དེ་ལ་སྙོམས་པར་
ཞུགས་ཤིང་དམིགས་པ་ལ་སེམས་རྩེ་གཅིག་ཏུ་གྱུར་ལ་མངོན་དུ་མཛད་ཅེས་བྱ་བའི་བར་དུའོ། །གསོད་པར་བྱེད་དོ་ཞེས་བྱ་བ་ནི་ཁྲོ་བོ་བེ་ཅོན་སྔོན་པོ་ཅན་གྱི་རྣལ་འབྱོར་པས་བསྒྲུབ་པར་བྱ་བ་མདུན་དུ་གནས་པར་བསམས་ནས་ཁྲོ་བོ་མཚོན་ཆ་འབར་བ་ལག་ན་ཐོགས་པ་
ཕྱུང་ལ་དེ་དག་ཉིད་ཀྱིས་དེ་གསོད་པར་བསམས་ལ་ཁྲོ་བོའི་ཚིག་གིས་གསང་སྔགས་བརྒྱ་རྩ་བརྒྱད་བརྗོད་ན། ངེས་པར་གསོད་པར་བྱེད་དོ། །ཀུན་དུ་རྣམ་པར་འཕྲོ་བ་ནི་བྱང་ཆུབ་ཀྱི་སེམས་ཏེ་དེ་ཉིད་བཀོད་པའོ། །དེ་ལས་བྱུང་བའི་རྡོ་རྗེ་ནི་ཁྲོ་བོའི་བདག་ཉིད་ཅན་གང་ཡིན་

པ་སྟེ་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །ཆར་པ་<ཆེན་‚ཆེ་ན་>གཅོད་པར་འགྱུར། །ཞེས་པ་ནི་སྟོབས་པོ་ཆེའི་སྦྱོར་བ་དང་ལྡན་པས་ཁྲོ་བོ་མཚོན་ཆ་འབར་བ་ཐོགས་པ་ཕྱུང་ནས་སྤྲིན་རྣམས་བསྲེགས་པར་གྱུར་ཅིང་། ཆུ་རྣམས་སྐམས་པར་བསམས་ལ་ཁྲོ་བས་བཟླས་ན་ཆར་ཆེན་
པོ་གཅོད་པར་འགྱུར་རོ། །གདེངས་ཀ་ཅན་གྱི་ཀླུའི་གཟུགས་གྲོག་མཁར་གྱིས་ལས་བྱས་ནས་དགུག་པ་ལ་སོགས་པ་སྔོན་དུ་འགྲོ་བས་མནན་ལ་ཆར་ཕོབ་ཅིག་ཅེས་བསྐུལ་ཏེ་དེ་བཞིན་དུ་བཟླས་བརྗོད་བྱས་ན་ཆར་འབེབས་པར་འགྱུར་རོ། །ཀུན་དུ་འབར་བ་ཞེས་བྱ་བ་ནི་སྔ་
མ་བཞིན་ནོ། །དེ་ཉིད་སྙིང་པོ་ཅན་གྱི་ཁྲོ་བོ་གང་ཡིན་པ་སྟེ་དེ་ལ་དམིགས་པའི་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །བཀུག་ནས་ནི་ཞེས་པ་ནི་འདོད་པའི་རྒྱལ་པོའི་ཏིང་ངེ་འཛིན་དང་ལྡན་པས་རྐང་པ་གཡས་པར་སྣ་ཚོགས་རྡོ་རྗེ་འབར་བ་དགོད་པས་བཀུག་ནས་བསྒྲུབ་པར་
བྱ་བའི་མཚན་མ་མནན་ཏེ་ཁྲོ་གཉེར་རིམ་པར་བསྙེར་ཞིང་ཁྲོས་པས་བསྐུལ་བའི་ཚིག་དང་བཅས་པར་གསང་སྔགས་བཟླས་པ་བྱས་ན་ངེས་པར་ཁུགས་པར་འགྱུར་རོ། །ཡེ་ཤེས་འབར་བ་དང་འདྲ་བས་ན་ཡེ་ཤེས་རབ་ཏུ་འབར་བའོ། །དེ་ལས་རབ་ཏུ་འབར་བ་ནི་ཁྲོ་བོ་གཏུམ་
པ་སྟེ་དེ་ལ་དམིགས་པའི་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །ཁྲོ་བོའི་རྒྱལ་པོ་ཞེས་བྱ་བ་ལ་སོགས་པ་གསུངས་པ་ལ་མི་གཡོ་བའི་སྦྱོར་བ་དང་ལྡན་པས་དེ་ཉིད་མནན་ལ་ཞགས་པས་བཅིངས་ལ་དྲང་བར་བྱའོ། །ཡང་ན་ལས་འདི་དག་ཐམས་ཅད་ལ་ནི་རང་གི་བདག་པོའི་
སྦྱོར་བ་ཇི་ལྟ་བས་བྱའོ། །སྐུ་གསུམ་རྡོ་རྗེ་ནི་བཅོམ་ལྡན་འདས་རྣམ་པར་སྣང་མཛད་དོ། །དེའི་ཡེ་ཤེས་འབར་བའི་འོད་ཟེར་ལྟ་བུ་དེ་ལས་གནོད་མཛེས་ཀྱི་བདག་ཉིད་ཅན་ནི་རྡོ་རྗེ་སྟེ་དེ་ལ་དམིགས་པའི་ཏིང་ངེ་འཛིན་ལ་སྙོམས་པར་ཞུགས་པའོ། །སྐུ་གསུམ་རྡོ་རྗེ་མཆོག་མངའ་བས། །
ཞེས་བྱ་བ་ནི་རྣམ་པར་སྣང་མཛད་དོ། །དགུག་བྱ་བ་ཞེས་བྱ་བ་ནི་གནོད་མཛེས་ཀྱི་སྦྱོར་བ་དང་ལྡན་པས་བསྒྲུབ་པར་བྱ་བའི་སྙིང་གའི་པདྨའི་ལྟེ་བ་ལྕགས་ཀྱུས་ཕུག་ལ་དགྲ་བདུད་ཞགས་པས་བཅིངས་ནས་གསང་སྔགས་བརྗོད་དེ་དགུག་པར་བྱའོ། །ཡེ་ཤེས་ཆེན་པོ་ནི་སྔ་མ་བཞིན་ཏེ། རྡོ་རྗེའི་

སྔགས་ཀྱི་གཟུགས་ཀྱིས་དེ་རྣམ་པར་བསྒྱིངས་པ་ཉིད་ནི་དགའ་སྟོན་ཏེ། དེ་ལ་དམིགས་པའི་ཏིང་ངེ་འཛིན་ལ་ཡང་དེ་སྐད་ཅེས་བྱའོ། །སངས་རྒྱས་བྱང་ཆུབ་རྗེས་དྲན་པས། །ཞེས་བྱ་བ་ནི་སངས་རྒྱས་ཀྱི་བྱང་ཆུབ་ལ་སེམས་ཅན་ཐམས་ཅད་དགོད་པར་བྱའོ་ཞེས་
མངོན་དུ་བྱེད་པའོ། །འཁོར་ལོ་ཆེ་ལ་རྣམ་གནས་ནས། །ཞེས་བྱ་བ་ནི་འདི་སྐད་སྟོན་པར་འགྱུར་ཏེ། རྡོ་རྗེ་སེམས་དཔའི་རྣལ་འབྱོར་པས་འཁོར་ལོ་ཆེན་པོའི་དབུས་སུ་འདུག་སྟེ། ལྕགས་ཀྱུ་དང་ཞགས་པ་ཐོགས་པའི་སངས་རྒྱས་ཀྱི་སྤྲིན་ཕྱུང་སྟེ། <དས་‚དེས་>ནི་སངས་རྒྱས་རྣམས་
ཀྱང་འགུགས་པར་བྱེད་དོ། །རང་སྔགས་སྐྱེས་བུར་རྣམ་བསྒོམས་ནས། །ཞེས་བྱ་བ་ནི་རང་གི་ལྷའི་སྦྱོར་བ་དང་ལྡན་པའོ། །འགུགས་འགྱུར་ཏེ་ཞེས་བྱ་བ་ནི་མིའམ་ལྷ་མ་ཡིན་གྱི་བུ་མོ་རླུང་གི་དཀྱིལ་འཁོར་ལ་གནས་པར་བསམས་ལ་ལྕགས་ཀྱུས་སྙིང་ག་ཕུག་སྟེ་སྔགས་
བརྗོད་ནས་བཀུག་ན་ངེས་པར་ཁུགས་པར་འགྱུར་རོ། །ཟླ་བའི་དཀྱིལ་འཁོར་ལ་གནས་པ། །ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཟླ་བའི་མདོག་ཅན་སྐུ་ཆེན་པོ་དང་ལྡན་པ་བསམས་ལ་བསྒྲུབ་པར་བྱ་བ་ཟླ་བའི་དཀྱིལ་འཁོར་དེ་ལ་གནས་པར་བྱའོ། །རྡོ་རྗེ་བདུད་
རྩི་ཞེས་བྱ་བ་ནི་འདི་སྐད་སྟོན་ཏེ། རྡོ་རྗེ་བདུད་རྩི་ཞེས་བྱ་བའི་ཁྲོ་བོའི་སྦྱོར་བས་དེ་འོངས་པར་རྣམ་པར་བསམས་ལ་དེའི་གསང་སྔགས་ལན་བཅུ་བརྗོད་ན། ངེས་པར་ཁུགས་པར་འགྱུར་རོ། །གཞོན་ནུ་མ་དག་ངེས་པར་ཁུགས། །ཞེས་བྱ་བ་ནི་རྡོ་རྗེ་བདུད་རྩིའི་ཁྲོ་བོའི་སྦྱོར་བ་
ཉིད་ཀྱིས་རྡོ་རྗེ་ལྕགས་ཀྱུ་གཟུགས་ཆེན་པོ་དང་ལྡན་ཞིང་འབར་བ་དང་། རྡོ་རྗེ་རླུང་གི་དཀྱིལ་འཁོར་དེ་ལ་བསྒྲུབ་པར་བྱ་བ་གནས་པར་བསམས་ལ་ལྕགས་ཀྱུས་སྙིང་ག་ཕུག་སྟེ་གཞོན་ནུ་མ་དགུག་པར་བྱའོ། །ལྷ་མ་ཡིན་གྱི་བུ་མོ་དགུག་པའི་ཆོ་ག་ནི་སྔ་མ་བཞིན་ནོ། །ཁུགས་ཞེས་
བྱ་བ་ནི་འདི་སྐད་སྟོན་པར་འགྱུར་ཏེ། རྡོ་རྗེས་འོག་གི་རྣལ་འབྱོར་པས་དབུ་གསུམ་པ་ལ་ཞགས་པ་དང་། དགྲ་སྟ་དང་། རྩེ་གསུམ་པ་དང་། ལྕགས་ཀྱུ་ཐོགས་པས་མདུན་དུ་རང་གི་རིག་པས་བྱིན་གྱིས་བརླབས་པའི་ནུ་མ་པདྨའི་ལྟེ་བའི་ནང་ན་གནས་པར་བྱས་ལ། རྡོ་རྗེ་ལྕགས་

ཀྱུའི་ཏིང་ངེ་འཛིན་ལས་བྱུང་བའི་བཙག་ལ་སོགས་པ་ལས་འོད་ཟེར་འབར་བ་དང་ལྡན་པའི་རྡོ་རྗེ་ལྕགས་ཀྱུ་ལ་སོགས་པ་ཡང་ནས་ཡང་དུ་བྱུང་སྟེ། ཧཱུྃ་ཞེས་བྱ་བའི་སྔགས་བརྗོད་ནས་སྤྲོས་པ་སྔོན་དུ་འགྲོ་བས་གཟས་ཟིན་པའི་ཚེ་མཚན་མ་བྱུང་གི་བར་དུ་དེ་བཟླས་པར་བྱའོ། །དེ་ནས་དེ་དང་
མིང་བྲིས་ན་གནོད་སྦྱིན་མོ་ལ་སོགས་པ་ངེས་པར་ཁུགས་པར་འགྱུར་རོ། །བཀུག་ནས་ཞེས་བྱ་བ་ནི་འཇམ་པའི་རྡོ་རྗེའི་ཏིང་ངེ་འཛིན་དང་ལྡན་པས་སངས་རྒྱས་ཀྱི་འཁོར་ལོའི་ནང་ན་གནས་ལ་གཤིན་རྗེ་གཤེད་སྐྲ་འབར་བས་འབར་བར་གྱུར་ཅིང་ལག་ན་རྡོ་རྗེ་ལྕགས་ཀྱུ་ཐོགས་པ་ཕྱུང་ལ་དེ་ཉིད་
ལྕགས་ཀྱུར་བྱས་ཏེ་གནོད་སྦྱིན་མོ་དགུག་པར་བྱའོ་ཞེས་བྱ་བའི་བར་དུའོ། །ཕྱག་རྒྱ་གསང་སྔགས་སྦྱོར་བ་དང་། །བསམ་གཏན་འཁོར་ལོའི་སྦྱོར་བ་ཡིས། །ཞེས་བྱ་བ་ནི་འགོག་པའི་རྡོ་རྗེ་བསྒོམ་པའི་སྦྱོར་བས་སོ། །བསྐུལ་བར་བྱ་ཞེས་བྱ་བ་ནི་ཡང་རྡོ་རྗེ་སེམས་དཔའི་ང་རྒྱལ་དང་
ལྡན་པའམ། །དེ་ཉིད་དབུ་རྒྱན་ལ་བསྒོམ་པར་བྱ་སྟེ་གནོད་མཛེས་བཞིན་དུ་སྦྱར་བར་བྱའོ། །ཡེ་ཤེས་ནི་བྱང་ཆུབ་ཀྱི་སེམས་སོ། །དེ་ལས་བྱུང་བའི་རྣམ་པར་རྒྱལ་བའི་རྡོ་རྗེ་ནི་དྲག་པོའི་རྡོ་རྗེ་སྟེ་དེ་ལ་དམིགས་པའི་ཏིང་ངེ་འཛིན་གང་ཡིན་པ་དེ་ལའང་དེ་སྐད་ཅེས་བྱའོ། །ཉེ་བར་སྤྱོད་པར་
བྱེད་ཅེས་བྱ་བ་ནི་རྣམ་པར་སྣང་མཛད་ཀྱི་སྦྱོར་བ་དང་ལྡན་པས་ཞལ་གསུམ་པ་ཐོད་པ་དང་། རྩེ་གསུམ་དང་། ཞགས་པ་དང་། ལྕགས་ཀྱུ་བསྣམས་པ་ཕྱག་གཉིས་ཀྱིས་གླང་པོའི་པགས་པ་འཛིན་ལ་རལ་པ་གཅིག་མ་དེའི་སྔགས་བརྗོད་པས་ཕྱུང་ལ་དེས་ཀླུའི་བུ་མོ་བཀུག་ནས་ཉེ་
བར་སྤྱད་པར་བྱའོ་ཞེས་བྱ་བའི་དོན་ཏོ། །ནམ་མཁའ་ཆེན་པོ་དང་འདྲ་བའི་ཤུགས་རྒྱ་མཚོ་ནི་མཐའི་རྒྱ་མཚོ་སྟེ་དེ་འཕྲོ་བའོ། །དམ་ཚིག་ནི་རྒྱུ་སྟེ་སྐུལ་བྱེད་མ་གང་ཡིན་པ་དེ་ལ་དམིགས་པའི་ཏིང་ངེ་འཛིན་དེ་ལ་ཡང་དེ་སྐད་ཅེས་བྱ་སྟེ། སྔ་མ་བཞིན་དུ་འདི་ཉིད་ཀྱིས་སམ་རང་གི་སྦྱོར་
བས་གསང་བ་ལ་སོགས་པའི་བུ་མོ་རྣམས་ལེགས་པར་བཀུག་ནས་བསྟེན་པར་བྱའོ། །ནམ་མཁའ་མཛོད་ནི་འོད་དཔག་ཏུ་མེད་པ་སྟེ་ཆོས་ཀྱི་མཛོད་ཀྱི་མཐུ་ཡིས་སོ། །དེའི་རྣམ་པར་རྒྱལ་བ་ནི་ཁྲོ་གཉེར་ཅན་གྱི་བདག་ཉིད་ཅན་ནོ། །དེ་ཉིད་མཆོག་སྟེ་ཏིང་ངེ་འཛིན་དེ་ལ་དམིགས་པའི་ཏིང་

ངེ་འཛིན་དེ་ལ་དེ་སྐད་ཅེས་བྱའོ། །འདི་ལ་ཡང་དེ་བཞིན་དུ་བཀུག་ནས་སྤྱད་པར་བྱའོ། །འགོག་པའི་རྡོ་རྗེ་བསྒོམ་པ་རྫོགས་པ་མ་ཐོས་པས་ནི་གསང་སྔགས་ཐམས་ཅད་ཀྱི་བཟླས་བརྗོད་བྱེ་བ་བྱའོ་ཞེས་བསྟན་པར་བྱ་བའི་ཕྱིར། ཡང་ན་ཞེས་བྱ་བ་ལ་སོགས་པ་གསུངས་
སོ། །སངས་རྒྱས་ཀྱང་ནི་ངེས་པར་འཇིག །ཅེས་བྱ་བ་ནི་ཁྲོ་བོའི་རྒྱལ་པོའི་རྣལ་འབྱོར་པས་ཁྲག་གིས་བརླན་པའི་གོས་ཀྱིས་ལུས་གཡོགས་པའམ་གཅེར་བུ་དང་། རྐང་པ་གཡོན་པས་མཚན་མ་མནན་ལ་ཡི་གེ་ཧཱུྃ་གིས་ཕྱོགས་བཅུའི་སེམས་ཅན་ཐམས་ཅད་ཁྲོ་བོར་བྱིན་
གྱིས་བརླབས་པར་བསམས་ནས། དེ་རྣམས་ཀྱིས་བསྒྲུབ་པར་བྱ་བ་གསོད་པར་བསྒོམས་ལ་ཁྲོ་བོའི་ཚིག་ཏུ་འདོན་པས་གསང་སྔགས་བརྒྱ་རྩ་བརྒྱད་བཟླས་ལ་གསད་པར་བྱའོ། །དེ་ལ་ཕྱོགས་བཅུའི་སེམས་ཅན་ཐམས་ཅད་ཡི་གེ་གསུམ་ལས་བྱུང་བའི་རྣམ་པར་སྣང་
མཛད་ལ་སོགས་པའི་ངོ་བོ་ཉིད་ཀྱིས་དང་པོར་དགྲ་བོ་བསད་པར་བསམས་ལ་དེའི་འོག་ཏུ་མངོན་སྤྱོད་ཀྱི་ལས་བྱ་སྟེ་དེས་ནི་ངེས་པར་སངས་རྒྱས་ཀྱང་འཇིག་པར་འགྱུར་རོ། །མངོན་སྤྱོད་ཀྱི་གནས་བསྟན་པར་བྱ་བའི་ཕྱིར་མ་མོའི་གནས་དང་ཞེས་བྱ་བ་ལ་སོགས་པ་གསུངས་
སོ། །མི་རུས་ལས་བྱས་ཞེས་བྱ་བ་ལ་སོགས་པ་ནི་འདི་སྐད་སྟོན་པར་འགྱུར་ཏེ། ཁྲོ་བོའི་སྦྱོར་བ་དང་ལྡན་པས་མི་རུས་ཀྱི་ཕུར་བུ་སོར་བརྒྱད་པ་དེའི་གསང་སྔགས་བརྒྱ་རྩ་བརྒྱད་བཟླས་པ་དང་བཅས་པས་བསྒྲུབ་པར་བྱ་བའི་རྐང་རྗེས་ཀྱིས་ལས་དེའི་གཟུགས་བརྙན་བྱས་ཏེ།
དགུག་པ་སྟོན་དུ་འགྲོ་བས་སྔགས་བརྗོད་ལ་སྙིང་གར་ཕུར་བུ་གདབ་པའམ་དེའི་ཁང་པའི་སྒོར་ས་བརྐོས་པར་སྦ་བར་བྱའོ། །ངེས་པར་སྐྲོད་ཅེས་བྱ་བ་ནི་ཡན་ལག་མ་ཉམས་པའི་ཐོད་པ་བླངས་ལ་ཁྲོ་བོའི་སྔགས་དང་སྤེལ་བ་བྱས་ནས་འདིར་བསྒྲུབ་པར་བྱ་བའི་མིང་བྲིས་ལ་རྡོ་རྗེའི་ཚིག་
དག་བཟླས་ནས་དགྲའི་སྒོ་ཁའམ་ཡུལ་གྱི་དབུས་སུ་སྦས་ན་ངེས་པར་སྐྲོད་པར་བྱེད་དོ། །དེ་བཞིན་དུ་ཏ་ལའི་ལོ་མའམ་དུར་ཁྲོད་ཀྱི་རས་ལ་བྲིས་ནས་དགྲའི་ཁྱིམ་སྒོ་ལ་སོགས་པར་སྦས་ན་འཆི་བའམ་སྐམས་པར་འགྱུར་རོ། །རྡོ་རྗེ་སེམས་དཔའ་རྣམ་པར་འཇིག །ཅེས་

བྱ་བ་ནི་སྐུ་ལ་སོགས་པའི་རྡོ་རྗེ་ཕུར་བུ་འདེབས་པའི་ཕྱིར་རོ། །འོད་བཟང་མེ་སྟག་འཁྲུགས་པ་ཅན། །ཞེས་བྱ་བ་ནི་འོད་ཀྱི་ཕྲེང་བས་འཁྲིགས་པ་ཧཱུྃ་ལས་བྱུང་བའི་ཕྱིར་རོ། །མཐས་གཏུགས་པ་ཞེས་བྱ་བ་ནི། སྤྱི་བོ་ནས་བརྩམས་ཏེ་རྐང་པའི་བར་དུའོ། །སྦྱོར་བ་གང་གིས་བྱ་བ་དེ་
བསྟན་པར་བྱ་བའི་ཕྱིར་རྣམ་སྣང་ཞེས་བྱ་བ་ལ་སོགས་པ་གསུངས་སོ། །སྐུ་རྡོ་རྗེ་ལ་སོགས་པ་བསྟན་པར་བྱ་བའི་ཕྱིར་དང་དེའི་ཕུར་བུ་ཉེ་བར་བརྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ་སྐུའི་ཡེ་ཤེས་ནི་རྣམ་པར་སྣང་མཛད་དེ། དེའི་རྣམ་པར་
བསྒྱིངས་པ་ཏིང་ངེ་འཛིན་གང་དུ་སྟོན་པ་དེ་ལ་དེ་སྐད་ཅེས་བྱའོ། །ཕན་ཚུན་དཀྲི་བའི་ཚུལ་གྱིས་ཞེས་བྱ་བ་ལ་སོགས་པ་གསུངས་ཏེ་སོར་མོ་རྣམས་རྒྱབ་ཏུ་ཕན་ཚུན་དཀྲིས་ལ། མཐེ་བོ་གཉིས་ལག་པ་གཡས་པའི་མཐིལ་དུ་ཁ་སྦྱར་བ་ནི་འཁོར་ལོའི་ཕུར་བུའི་ཕྱག་རྒྱའོ། །སྣང་
མཛད་ཞབས་ཀྱིས་མནན་ནས་སུ། །ཞེས་བྱ་བ་ནི་འདི་སྐད་སྟོན་པར་འགྱུར་ཏེ་ཕུར་བུའི་དབྱིབས་ཀྱི་ཕྱག་རྒྱ་རྣམ་པར་སྣང་མཛད་དུ་གྱུར་པར་བསམས་ལ་ཡིད་ཉིད་ཀྱིས་བཀུག་ནས་གསང་སྔགས་འདོན་པ་སྔོན་དུ་འགྲོ་བས་ཕུར་བུས་གདབ་པར་བྱའོ། །དམ་ཚིག་མཆོག་གིས་
བཞེངས་པར་མཛོད། །ཅེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཉིད་ཕུར་བུའི་དབྱིབས་སུ་དེར་འབྱུང་བར་འགྱུར་རོ་ཞེས་བྱ་བའི་བར་དུའོ། །སྦྱོར་བའི་ཆེ་བའི་བདག་ཉིད་བསྟན་པར་བྱ་བའི་ཕྱིར། གཞན་དུ་བྱས་ན་བརླག་པར་འགྱུར། །ཞེས་བྱ་བ་གསུངས་ཏེ།
རྡོ་རྗེ་ཐུགས་ཀྱི་ཡེ་ཤེས་ཆེན་པོ་ཞེས་བྱ་བ་ནི་རྣམ་པར་སྣང་མཛད་དེ། དེའི་རྣམ་པར་བསྒྱིངས་པ་སྟོན་པའི་ཏིང་ངེ་འཛིན་གང་ཡིན་པ་དེ་ལ་ཡང་དེ་སྐད་ཅེས་བྱའོ། །རྩེ་མོ་ལྔ་པ་ཞེས་བྱ་བ་ལ་སོགས་པ་ལ། ཐལ་མོ་སྦྱོར་བ་བཅིངས་ལ་སྲིན་ལག་སྦྱར་བ་ནང་དུ་གཞུག་སྟེ། གུང་མོ་
གཉིས་སྦྱར་བའི་ཚིགས་གསུམ་པར་མཛུབ་མོ་གཉིས་རྡོ་རྗེ་དང་འདྲ་བར་བཞག་ན་རྩེ་མོ་ལྔ་པར་འགྱུར་ཏེ། འདི་ལས་མེ་སྟག་འཕྲོ་བས་འཁྲིགས་པའི་རྡོ་རྗེ་ཕུར་བུར་བལྟས་ལ་སྟང་སྟབས་ཀྱིས་སྦྱར་བར་བྱའོ། །འཇིག་རྟེན་དབང་ཕྱུག་ཉིད་གསུང་གི་དམ་ཚིག་ཉིད་ཡིན་ཏེ་

དེའི་རྣམ་པར་འཕྲུལ་པ་སྟོན་པའི་ཏིང་ངེ་འཛིན་གང་ཡིན་པ་དེ་ལ་ཡང་དེ་སྐད་ཅེས་བྱའོ། །རྡོ་རྗེ་སོར་མོ་ཞེས་བྱ་བ་ལ་སོགས་པ་ལ། ཐལ་མོ་ཁོང་སྟོང་དུ་སྦྱར་བ་པདྨ་དང་འདྲ་བར་ཕྱེ་ན་པདྨ་ཁ་ཕྱེ་བར་འགྱུར་ཏེ། དེ་དག་ནི་རང་གི་བདག་པོའི་སྦྱོར་བ་གཙོ་བོར་བྱས་པས་སྦྱར་
བར་བྱའོ། །གསང་བའི་ཚིག་ནི་རྣམ་པར་སྣང་མཛད་ཀྱི་ངོ་བོ་ཉིད་ཡིན་པའི་ཕྱིར་རོ། །གསང་བ་ཀུན་བཏུས་པ་ནི་མི་བསྐྱོད་པའི་ངོ་བོ་ཉིད་ཡིན་པའི་ཕྱིར་རོ། །ཞི་བ་ཆོས་ཀྱི་ཚིག་ནི་འོད་དཔག་ཏུ་མེད་པའི་ངོ་བོ་ཉིད་ཡིན་པའི་ཕྱིར་རོ། །དེ་བས་ན་རྡོ་རྗེ་ཡེ་ཤེས་ངེས་པར་འཆི་བས་རྡོ་རྗེ་
ཡེ་ཤེས་སོ། །མངོན་སྤྱོད་ལ་ཡང་བསམ་པའི་ཁྱད་པར་གྱིས་རྡོ་རྗེ་ཕུར་བུས་གདབ་པ་ཇི་ལྟ་བ་བཞིན་དུ་སྦྱར་བར་བྱའོ། །རྐུན་མ་མདོངས་པར་བྱེད་པའི་རྡོ་རྗེ་ཞེས་བྱ་བ་ལ། རྐུན་མ་མདོངས་པར་བྱེད་པ་ནི་ལྷ་མོ་འོད་ཟེར་ཅན་ཏེ། དེ་ཉིད་མི་ཕྱེད་པས་ན་རྡོ་རྗེ་སྟེ་དེ་ལ་དམིགས་
པས་ན་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །དེ་ལ་འདིར་འོད་ཟེར་ཅན་གྱི་སྦྱོར་བ་དང་སྔགས་དང་ཕྱག་རྒྱར་བཅས་པས་རྣམ་པར་འཚེ་བར་བྱེད་པ་རྣམས་ཀྱི་ཁ་དང་མིག་བཙེམས་ལ་དེ་རྣམས་ལྐུགས་པ་དང་ལོང་བར་གྱུར་པར་བསམས་ན་ཆོམ་རྐུན་དང་སྡང་བ་རྣམས་བཅིངས་
པར་འགྱུར་རོ། །ནད་ཆེན་པོ་ཐམས་ཅད་དགུག་པ་ལས་རྣམ་པར་རྒྱལ་མ་དེ་ཉིད་ཡེ་ཤེས་ཡིན་པ་དེ་ལ་དམིགས་པའི་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །ཞི་བར་འགྱུར་ཞེས་བྱ་བ་ནི་དོན་ཡོད་རྡོ་རྗེའི་སྦྱོར་བ་དང་ལྡན་པས་རི་ཁྲོད་ཀྱི་ལོ་མ་ཅན་སྤྱན་དྲངས་ལ་དེའི་ཞལ་དུ་པདྨ་
དཀར་པོ་དང་མར་སྲང་བསྲེས་པའི་ཏིལ་དང་འོ་མ་ལ་སོགས་པ་ཇི་ལྟ་བ་བཞིན་དུ་སྦྱིན་སྲེག་བྱས་ལ། སེམས་ཅན་རྣམས་ཀྱི་ཡམས་དང་འཚེ་བ་ལ་སོགས་པ་དང་བྲལ་བར་བསམས་ན་ཞི་བར་འགྱུར་རོ། །ཡང་ན་འདི་ཉིད་ཕྱུང་ལ་ཀུན་དུ་སྤྲོས་ཏེ་བདུད་རྩིའི་ཆར་རབ་ཏུ་འབེབས་པར་
བསམ་མོ་ཞེས་བསྟན་པར་བྱ་བའི་ཕྱིར་ནམ་མཁའ་ཀུན་ནས་ཞེས་བྱ་བ་ལ་སོགས་པ་གསུངས་སོ། །ལེའུ་ལྔ་པའི་བཤད་པའོ།། །།ལག་པའི་ཕྱག་རྒྱ་ལ་སོགས་པའི་གླེང་བསླང་བར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། ལག་

པ་གཉིས་ཀྱི་ནང་གི་ཁུ་ཚུར་བཅིངས་ཏེ་མཐེ་བོ་གཉིས་གཤིབས་ནས་བསྒྲེང་བར་བྱས་པ་འདི་དང་། མགོར་རང་གི་གསང་སྔགས་ཀྱིས་སྐུ་བྱིན་གྱིས་བརླབ་པར་བྱའོ། །འདི་ཉིད་ལས་གཡོན་པའི་མཐེ་བོ་ནང་དུ་བཅུག་པ་ནི་དེ་བཞིན་དུ་གསུངས་སོ། །འདི་ཉིད་ལས་གཡས་པའི་
མཐེ་བོ་ནང་དུ་བཅུག་ལ་གཡོན་པ་བཏེག་པ་ནི་དེ་བཞིན་དུ་ཐུགས་ཀྱི་སྟེ་རང་གི་སྟན་ལ་གནས་ནས་སྤྱི་བོ་ལ་སོགས་པར་ཡི་གེ་ཨོཾ་ལ་སོགས་པ་གསུམ་བསྒོམ་པ་ནས་བྱིན་གྱིས་བརླབ་པ་ལ་སོགས་པ་བྱའོ། །གཡོན་པའི་རྡོ་རྗེ་ཁུ་ཚུར་གྱི་མཛུབ་མོ་བསྒྲེང་ལ་གཡས་པའི་རྡོ་རྗེ་ཁུ་ཚུར་
གྱིས་རྩེ་མོ་བཟུང་བ་ནི་རྣམ་པར་སྣང་མཛད་ཀྱི་ཕྱག་རྒྱའོ། །སེམས་དཔའི་སྐྱིལ་མོ་ཀྲུང་དུ་འདུག་ནས་ལག་པ་གཡོན་པའི་ཁུ་ཚུར་པང་པར་གཞག་སྟེ་གཡས་པས་ས་གནོན་པ་ནི་མི་འཁྲུགས་པའིའོ། །གཡོན་པ་དེ་བཞིན་བཞག་ལ་གཡས་པ་མཆོག་སྦྱིན་ལྟར་བྱས་པ་
ནི་རིན་ཆེན་འབྱུང་གནས་ཀྱིའོ། །ལག་པ་གཉིས་པང་པར་བཞག་སྟེ་བསམ་གཏན་གྱི་ཚུལ་དུ་སྦྱར་བ་ནི་འོད་དཔག་མེད་ཀྱིའོ། །གཡོན་པ་སྔ་མ་བཞིན་དུ་བཞག་ལ་གཡས་པ་མི་འཇིགས་པའི་ཚུལ་དུ་གཞག་པ་ནི་གདོན་མི་ཟ་བར་གྲུབ་པའོ། །ལག་པ་གཉིས་རྡོ་རྗེ་བཅིང་
བར་བྱས་ལ་གུང་མོ་གཉིས་གཤིབས་ཏེ་བསྒྲེང་བ་ནི་རྡོ་རྗེ་སེམས་མའིའོ། །དེ་ཉིད་ལས་གུང་མོའི་ཚིགས་དང་པོ་དགུག་སྟེ། རིན་པོ་ཆེའི་ཚུལ་དུ་བྱས་པ་ནི། རྡོ་རྗེ་རིན་ཆེན་སེམས་མའིའོ། །གུང་མོ་སྦྱར་བ་པདྨའི་འདབ་མ་ལྟར་བྱས་པ་ནི་རྡོ་རྗེ་ཆོས་མའིའོ། །དེ་ཉིད་ལས་གུང་མོ་
སྦྱར་ཏེ་ཚིགས་བར་མ་རྩེ་བསྐུམ་ནས་རལ་གྲི་ལྟར་བྱས་པ་ནི་རྡོ་རྗེ་ལས་མའིའོ། །ཐལ་མོ་ཁོང་སྟོང་དུ་སྦྱར་བ་ལས་མཛུབ་མོ་གཉིས་གདུ་བུ་འདྲ་བར་ཟླུམ་པོར་བྱས་ཏེ་མཐེ་བོའི་སྟེང་དུ་མིག་དང་འདྲ་བར་གཞག་པ་ནི་སངས་རྒྱས་སྤྱན་གྱིའོ། །རྡོ་རྗེ་བཅིངས་པ་ལས་གུང་མོ་གཉིས་
གཤིབས་ཏེ་སྦྱར་བའི་ཚིགས་གསུམ་པར་མཛུབ་མོ་གཉིས་རྡོ་རྗེའི་ཚུལ་དུ་གཞག་པ་ནི་མཱ་མ་ཀཱིའིའོ། །ལག་པ་གཉིས་ཀྱི་ཐལ་མོ་གཉིས་ཁོང་སྟོང་དུ་སྦྱར་ཏེ་པདྨ་ཁ་བྱེ་བ་དང་འདྲ་བར་བྱས་པ་ནི་གོས་དཀར་ཅན་གྱིའོ། །ཐལ་མོ་ཁོང་སྟོང་དུ་སྦྱར་བ་ལས་མཛུབ་མོ་གཉིས་ཀྱིས་གུང་མོའི་

སེན་མོ་མནན་ཏེ་དབུས་སུ་གཞག་པ་ནི་སྒྲོལ་མའིའོ། །ཐལ་མོ་སྦྱར་ཏེ་མཛུབ་མོ་གཉིས་གུང་མོའི་ཚིགས་དབུ་མར་སྦྱར་ལ་མཐེ་བོ་གཉིས་གློར་གཞག་པ་ནི་སྐུལ་བྱེད་མའིའོ། །རྡོ་རྗེ་བཅིང་བ་བྱས་པ་ལས་མཐེ་བོ་གཉིས་བསྡམས་ཏེ་མཛུབ་མོ་གཉིས་ཀྱི་རྩེ་མོ་བཀུག་ནས་སྦྱར་བ་ནི་
རིན་ཆེན་སྒྲོལ་མའི་འོ། །ཐལ་མོ་ཁོང་སྟོང་དུ་སྦྱར་བ་ལས་མཐེ་བོས་སོ་སོའི་རང་གི་མཐེའུ་ཆུང་གི་སེན་མོ་མནན་ལ་ལྷག་མ་རྡོ་རྗེའི་མཚན་ཉིད་དུ་བྱས་པ་ཁྲོ་གཉེར་ཅན་གྱིའོ། །རྡོ་རྗེ་ཁུ་ཚུར་གཉིས་བཅིངས་པ་ལས་མཛུབ་མོ་དང་མཐེའུ་ཆུང་གཉིས་ལུ་གུ་རྒྱུད་ལྟར་བཅིངས་པ་ནི་རྡོ་རྗེ་ལུ་གུ་
རྒྱུད་ཀྱིའོ། །ལག་པ་གཉིས་ཁུ་ཚུར་ནང་དུ་བཅངས་པ་ལས་གུང་མོ་གཉིས་གཤིབས་ཏེ་སྦྱར་ལ་སྲིན་ལག་གཉིས་བཀྲོལ་ཏེ་བསྣོལ་བ་མཛུབ་མོ་གཉིས་ཀྱིས་དཀྲིས་ཏེ་མཐེ་བོ་གཉིས་བརྐྱང་ལ་རྩེ་སྦྱར་ཏེ་བཀུག་ལ་ཁ་དང་འདྲ་བར་བྱས་པ་ནི་གཤིན་རྗེ་གཤེད་ཀྱིའོ། །གཡོན་པའི་རྡོ་རྗེ་ཁུ་
ཚུར་བཅངས་པ་ལས་མཛུབ་མོ་བརྐྱང་ནས་སྙིང་གར་གཞག གཡས་པ་བཏེག་པ་ཐལ་ལྕག་གི་ཚུལ་དུ་བྱས་པ་ནི་གཞན་གྱིས་མི་ཐུབ་པ་ཞེས་བྱ་བའི་འོ། །རྡོ་རྗེ་ཁུ་ཚུར་གཉིས་མཐེའུ་ཆུང་ལུ་གུ་རྒྱུད་དུ་བྱས་ལ་མཛུབ་མོ་གཉིས་གཤིབས་ཏེ་རྩེ་མོ་སྦྱར་ལ་བཟློག་སྟེ་དཔྲལ་བར་གཞག་པ་
ནི་རྟ་མགྲིན་གྱིའོ། །ལག་པ་གཉིས་བརྐྱང་ལ་མཐེ་བོ་གཉིས་ཀྱིས་རང་རང་གི་མཐེའུ་ཆུང་གི་སེན་མོ་མནན་ནས་དཔུང་མགོའི་དྲུང་དུ་རྡོ་རྗེ་བཅིང་བའི་ཚུལ་དུ་བྱས་ནས་ཁྲོས་པས་སྦྱར་བ་ནི་བདུད་རྩི་ཐབ་སྦྱོར་གྱིའོ། །ལག་པ་གཉིས་བརྐྱང་ལ་མཐེ་བོས་རང་གི་སྲིན་ལག་དང་མཐེའུ་ཆུང་གི་
སེན་མོ་མནན་ཏེ་ཤུབས་ལས་ཕྱུང་ནས། གཡས་པས་རལ་གྲིའི་ཚུལ་དུ་གཞག་པ་ནི་མི་གཡོ་བའི་འོ། །ལག་པ་གཡོན་པའི་རྡོ་རྗེ་ཁུ་ཚུར་གྱི་རྒྱབ་ཏུ་ལག་པ་གཡས་པ་རྡོ་རྗེ་ཁུ་ཚུར་དུ་བྱས་ལ། མཐེའུ་ཆུང་གཉིས་ལུ་གུ་རྒྱུད་ལྟར་བཅིངས་ནས་མཛུབ་མོ་གཉིས་བཏེག་སྟེ་ཞགས་པར་བྱས་
པ་ནི་འདོད་པའི་རྒྱལ་པོའི་འོ། །གཡོན་པའི་རྡོ་རྗེ་ཁུ་ཚུར་ལས་བྱུང་བའི་མཛུབ་མོ་བསྒྲེང་ལ་སྙིང་གར་བཞག་ལ་གཡས་པའི་རྡོ་རྗེ་ཁུ་ཚུར་གྱི་མཛུབ་མོ་བེ་ཅོན་ལྟར་བརྡེགས་པ་ནི་བེ་ཅོན་སྔོན་པོ་ཅན་གྱིའོ། །ལག་པ་གཡོན་པའི་རྡོ་རྗེ་ཁུ་ཚུར་གྱི་རྩེ་གསུམ་པ་བྱས་ལ་གཡས་པའི་རྡོ་རྗེ་

བརྡེག་པའི་ཚུལ་དུ་གཏེག་པ་ནི་སྟོབས་པོ་ཆེའིའོ། །ཁུ་ཚུར་གཉིས་བཅིངས་ལ་མཐེ་བོ་དང་མཛུབ་མོ་དང་གུང་མོ་རྣམས་བསྒྲེང་སྟེ་སོ་སོ་ཞིང་ཕན་ཚུན་རྩེ་སྤྲད་པ་ནི་བྱམས་པའིའོ། །ཐལ་མོ་ཁོང་སྟོང་དུ་སྦྱར་ལ་མཛུབ་མོ་གཉིས་ཀྱིས་རང་གི་སྲིན་ལག་གི་སེན་མོ་མནན་ནས། ཨུཏྤ་
ལའི་ཚུལ་དུ་གཞག་པ་ནི་འཇམ་པའི་དབྱངས་ཀྱིའོ། །ལག་པ་གཡོན་པ་པང་པར་གནས་པར་བྱས་ལ་གཡས་པ་གླང་པོའི་སྣ་ལྟར་བྱས་པ་ནི་སྤོས་ཀྱི་གླང་པོ་ཆེའིའོ། །ལག་པ་གཡོན་པའི་རྡོ་རྗེ་ཁུ་ཚུར་བཏེག་པ་ལག་པ་གཡས་པ་བ་དན་གྱི་ཚུལ་དུ་གཞག་པ་ནི་ཡེ་ཤེས་ཏོག་གི་ཕྱག་རྒྱའོ། །
བཟང་པོའི་འདུག་སྟངས་སུ་འདུག་ལ་ཐལ་མོ་ཁོང་སྟོང་སྙིང་གར་སྦྱར་བ་ནི་བཟང་སྐྱོང་གིའོ། །ལག་པ་གཡོན་པ་བརྐྱང་བའི་རྒྱབ་ཏུ་ལག་པ་གཡས་པ་རུས་སྦལ་གྱི་ཚུལ་དུ་བྱས་ལ་སོར་མོ་རྣམས་ཆུ་རླབས་འདྲེན་པའི་ཚུལ་དུ་བྱེད་པ་ནི་བློ་གྲོས་རྒྱ་མཚོའིའོ། །གཡོན་པའི་རྡོ་རྗེ་ཁུ་ཚུར་སྙིང་
གར་བཅིངས་ལ་གཡས་པ་མཆོག་སྦྱིན་པའི་ཚུལ་དུ་གཞག་པ་ནི་བློ་གྲོས་མི་ཟད་པའི་འོ། །གཡོན་པའི་རྡོ་རྗེ་ཁུ་ཚུར་པང་པར་བཞག་ལ་གཡས་པས་སེ་གོལ་གཏོགས་པའི་ཚུལ་དུ་བྱེད་པ་ནི་སྤོབས་པ་བརྩེགས་པའིའོ། །ཐལ་མོ་གཉིས་ཁོང་སྟོང་དུ་སྦྱར་ལ་པདྨ་ཅུང་ཟད་ཁ་བྱེ་བ་ལྟར་བྱས་
པ་ནི་མཐུ་ཆེན་ཐོབ་པའིའོ། །ལག་པ་གཉིས་ཀྱིས་འཐོར་བ་ནི་ངན་སོང་ཐམས་ཅད་སྤོང་བའིའོ། །ལག་པ་གཉིས་ཐལ་མོ་སྦྱར་ལ་བསྣུན་པའི་ཚུལ་དུ་བྱེད་པ་ནི་མྱ་ངན་ཐམས་ཅད་ཀྱི་མུན་པ་ངེས་པར་འཇོམས་པའི་བློ་གྲོས་ཀྱིའོ། །ལག་པ་གཉིས་བརྐྱང་ལ་འབར་བའི་ཚུལ་དུ་བྱེད་པ་ནི་དྲ་བ་ཅན་གྱི་
འོད་ཀྱིའོ། །གཡས་པ་མཆོག་སྦྱིན་པར་བྱས་ལ་གཡོན་པའི་མཐེ་བོ་དང་མཛུབ་མོ་ཟླ་བ་ལྟར་བརྐྱང་པ་ནི་ཟླ་འོད་ཀྱི་ཕྱག་རྒྱའོ། །ལག་པ་གཉིས་བུམ་པའི་ཚུལ་དུ་གཞག་པ་ནི་འོད་དཔག་མེད་པའིའོ། །རྡོ་རྗེ་ཁུ་ཚུར་གཉིས་ནམ་མཁར་ཀུན་དུ་བསྐོར་བ་ནི་ནམ་མཁའ་མཛོད་ཀྱིའོ། །ལག་པ་
གཡོན་པ་ས་ལ་བརྐྱང་ནས་གཡས་པའི་མཐེ་བོ་དང་མཛུབ་མོ་སྤྲད་ལ། ཞུ་བའི་ཚུལ་དུ་བྱེད་པ་ནི་སྒྲིབ་པ་ཐམས་ཅད་རྣམ་པར་སེལ་བའི་ཕྱག་རྒྱ་སྟེ། དེ་དག་ནི་དཀྱིལ་འཁོར་བའི་ལྷ་རྣམས་ཀྱི་ཕྱག་རྒྱ་རྣམས་སོ། །གཡོན་པ་རྡོ་རྗེ་ཁུ་ཚུར་ལས་ཁྲོ་བོའི་མཛུབ་མོ་སྙིང་གར་རབ་ཏུ་བཞག་ལ།

ཧཱུྃ་ཞེས་སྨྲ་ཞིང་ལག་པ་གཡས་པའི་རྡོ་རྗེ་ཁུ་ཚུར་བརྡེག་པའི་ཚུལ་གྱིས་འདེགས་པར་བྱེད་པ་ནི་རི་ཁྲོད་ལོ་མ་ཅན་གྱིའོ། །གཡོན་པའི་མཛུབ་མོ་དང་མཐེ་བོས་སྐུད་པ་བཟུང་ལ་གཡས་པས་ཁབ་ཀྱིས་ཁ་དང་མིག་འཚེམས་པའི་ཚུལ་དུ་བྱེད་པ་ནི་འོད་ཟེར་ཅན་གྱིའོ། །ལག་པ་
གཉིས་སྤྱི་བོར་སྦྲུལ་མགོའི་གདེངས་ཀའི་ཚུལ་དུ་བྱས་ལ་ཕུཊ་ཅེས་བརྗོད་པ་ནི་དུག་སེལ་མའི་སྟེ་དུག་སེལ་མ་འདི་ཉིད་ཀྱི་སྦྱོར་བས་དུག་བསལ་བར་བྱའོ། །འདོད་པའི་རྒྱལ་པོའི་ཕྱག་རྒྱ་ལས་མཛུབ་མོ་གཉིས་བསྒྲེང་ནས་གཞག་པ་ནི་རྡོ་རྗེ་ཧཱུྃ་མཛད་ཀྱིའོ། །དེ་ཉིད་ལག་པ་གཡས་པའི་
མཛུབ་མོ་ལྕགས་ཀྱུའི་ཚུལ་དུ་བྱས་པ་ནི་རྡོ་རྗེའི་ཁྲོ་བོའི་ལྕགས་ཀྱུའི་ཕྱག་རྒྱ་སྟེ། དེ་བཞིན་གཤེགས་པ་ཐམས་ཅད་སྤྱན་འདྲེན་པ་ལ་ནི་ཛཿཞེས་བྱ་བ་དང་སྦྱར་བར་བྱའོ། །རྡོ་རྗེ་ཁུ་ཚུར་གཉིས་ཀྱི་མཐེའུ་ཆུང་གཉིས་ཁའི་གྲྭ་གཉིས་སུ་བཟློག་སྟེ་མཆེ་བར་བྱས་ལ་ལྕེ་བསྐུལ་ཞིང་ཁྲོ་བོའི་ལྟ་
བས་ལྟ་བར་བྱེད་པ་ནི་རྡོ་རྗེ་མཆེ་བའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱི་མཐེའུ་ཆུང་དང་མཛུབ་མོ་གཉིས་རྡོ་རྗེས་མནན་པའི་ལྕགས་ཀྱུ་བྱས་ལ་ཧཱུྃ་ཞེས་བརྗོད་ཅིང་ཁྲོ་བོའི་ལྟ་བ་དང་ལྡན་པས་ལུས་གཅུ་པ་ནི་རྡོ་རྗེ་མཁའ་འགྲོ་མའི་ཕྱག་རྒྱ་སྟེ། ཁྲག་ལ་སོགས་པ་དྲང་བ་ལ་སྦྱར་བར་
བྱའོ། །རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་གཉིས་བརྐྱང་ནས་བསྣོལ་ཏེ་གྱེན་དུ་འདེགས་པ་ནི་དཀྱིལ་འཁོར་གྱི་ཕྱག་རྒྱ་སྟེ། བཟླས་བརྗོད་འབུམ་བྱས་ནས་མཚན་མོ་ཐོག་ཐག་བསྒྲུབས་ལ་ཕྱག་རྒྱ་འདི་དང་བཛྲོད་ཏིཥྛ་ཞེས་བྱ་བ་དང་དཀྱིལ་འཁོར་བཏེག་ལ་བསྟན་པར་
བྱའོ། །དེ་ཉིད་ལས་མཁྲིག་མ་གཡོན་པ་ལ་མཁྲིག་མ་གཡས་པ་གཞག་སྟེ། །ཡང་སྒོ་ལོགས་སུ་བཏེག་པ་ནི་སྒོ་དབྱེ་བའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་བཟློག་ནས་བསྣོལ་ལ་མཆན་ཁུང་དུ་བསམས་ཏེ་ཁྲོ་བོའི་ལྟ་བ་དང་ལྡན་པ་ནི་གདོན་ཐམས་ཅད་སྐྲག་པར་བྱེད་པའི་ཕྱག་
རྒྱའོ། །ལག་པ་གཡོན་པ་བརྐྱང་སྟེ་ཁ་སྦུབས་ལ་དེའི་སྟེང་དུ་གཡས་པ་བཞག་ལ་གཉིས་གའི་མཐེ་བོ་བསྐྱོད་པ་ནི་ལྷ་མ་ཡིན་གྱི་སྒྱུ་དང་འཁྲུལ་འཁོར་དབྱེ་བ་དང་། ལྷ་མ་ཡིན་གྱི་བུ་མོ་སྨྲར་གཞུག་པའི་ཕྱག་རྒྱའོ། །ལག་པ་གཉིས་ཀྱི་མཐེ་བོ་དང་མཐེའུ་ཆུང་ལུ་གུ་རྒྱུད་དུ་བྱས་ལ་

ལྷག་མ་བརྐྱང་སྟེ་སྟང་སྟབས་དང་བཅས་པས་ཧཱུྃ་ཞེས་བྱ་བ་དང་སྦྱོར་བ་ནི་ཁྲོ་བོ་རྡོ་རྗེས་འོག་གི་ཕྱག་རྒྱ་སྟེ་འདིས་འཁྲུལ་འཁོར་བཤིག་ལ་ལྷ་མ་ཡིན་གྱི་གྲོང་ཁྱེར་དུ་འཇུག་པར་བྱའོ། །གཡོན་པའི་རྡོ་རྗེ་ཁུ་ཚུར་གྱིས་སྡིགས་མཛུབ་བྱས་པ་ནི། རྡོ་རྗེ་ནག་མོའི་ཕྱག་རྒྱའོ། །རྡོ་རྗེ་བཅིངས་པ་ལས་
མཛུབ་མོ་གཉིས་བརྐྱང་སྟེ་ཕུར་བུའི་ཚུལ་དུ་བྱས་པ་ནི་རྡོ་རྗེ་ཕུར་བུའི་ཕྱག་རྒྱའོ། །གཡས་པའི་རྡོ་རྗེ་ཁུ་ཚུར་བརྡུང་བའི་ཚུལ་དུ་བྱེད་པ་ནི་རྡོ་རྗེ་ཐོ་བའི་ཕྱག་རྒྱའོ། །ལག་པ་གཉིས་རྡོ་རྗེ་ཁུ་ཚུར་བྱས་ལ་མཛུབ་མོ་གཉིས་བརྒྱང་སྟེ་མདུད་པ་དོར་བའི་ཚུལ་དུ་བྱས་པ་ནི་དེ་བཞིན་གཤེགས་པ་
ཐམས་ཅད་ཀྱི་རྡོ་རྗེ་བཅིང་བའི་ཕྱག་རྒྱ་སྟེ་འདི་དང་བཾ་ཞེས་བྱ་བ་འདིས་དཀྱིལ་འཁོར་གྱི་ལྷ་རྣམས་བཅིང་བར་བྱའོ། །རྡོ་རྗེ་ཁུ་ཚུར་གཉིས་སོག་ལེས་བགེགས་འདྲ་བ་ལྟར་བྱེད་པ་ནི་རྡོ་རྗེ་སོག་ལེའི་ཕྱག་རྒྱ་སྟེ་བགེགས་འདྲ་བ་ལ་ནི་ཧཱུྃ་ཞེས་བརྗོད་ནས་སྦྱར་བར་བྱའོ། །ལག་པ་གཉིས་ཟླ་བ་
འདྲ་བར་བྱས་པས་གདོང་གཡོགས་ལ་ཨ་ལ་ལ་ཞེས་བརྗོད་ཅིང་མིག་སྟེང་དུ་བགྲད་པར་གྱུར་པ་ནི་རྡོ་རྗེ་སྲིན་མོའི་ཕྱག་རྒྱ་སྟེ་འདི་ནི་གདུག་པ་གནོན་པའོ། །ལག་པ་གཉིས་ལུ་གུ་རྒྱུད་དུ་བྱས་ལ། གུང་མོ་དང་མཛུབ་མོ་བརྐྱང་ནས་གྲི་གུག་ལྟར་བྱས་པ་ནི་ཆད་པའི་ཕྱག་རྒྱ་སྟེ་འདི་དང་སྟོབས་
པོ་ཆེའི་ཕྱག་རྒྱས་སྤྲིན་ཐམས་ཅད་གཏུབས་པར་འགྱུར་རོ། །ལག་པ་གཉིས་ཁུ་ཚུར་བཅངས་ལ་མཛུབ་མོ་གཉིས་སྐམ་པར་བྱས་ནས་དཔུང་པ་བརྐྱང་ལ་ཕུར་བུ་འབྱིན་པའི་ཚུལ་དུ་བྱེད་པ་ནི་སྐམ་པའི་ཕྱག་རྒྱ་སྟེ། ལག་པ་གཉིས་ཀྱི་མཐེ་བོ་རང་གི་ལག་མཐིལ་དུ་བཞག་ལ་རྐང་པ་
གཅིག་ས་ལ་བཙུགས་ནས་རྐང་པ་གཉིས་པ་རྒྱབ་ཏུ་བསྐུམ་ལ་ཁྲོ་བོའི་བལྟ་བས་ལྕེ་བསྐྱོད་ཅིང་ཧཱུྃ་ཕཊ་ཅེས་བརྗོད་ཅིང་གོམ་པ་འདོར་ཞིང་བསྐྱོད་པ་སྟེ། རང་གི་ལག་མཐིལ་དུ་མཐེ་བོ་གཞག་པའི་ལག་པ་གཉིས་ཀྱིས་གཤོག་པ་བསྐྱོད་པ་ལྟར་བྱེད་པ་ནི་རྡོ་རྗེ་ནམ་མཁའ་ལྡིང་གི་ཕྱག་རྒྱ་
སྟེ་རྡོ་རྗེ་ནམ་མཁའ་ལྡིང་དུ་བདག་ཉིད་བསམས་ལ་འདིས་ནད་ཐམས་ཅད་བསལ་བར་བྱའོ། །རྡོ་རྗེ་ཁུ་ཚུར་གྱིས་མདའ་གཟུང་ལ། གཡས་དང་གཡོན་དུ་བརྐྱང་བའི་ཚུལ་དུ་བྱས་ལ། སྟེང་དང་འོག་དང་ངོས་གཉིས་སུ་མདའ་འཕེན་པར་བྱེད་པ་ནི་རྡོ་རྗེ་མདའི་ཕྱག་རྒྱ་སྟེ་འདི་དང་ཧཱུྃ་ཕཊ་

ཅེས་བྱ་བས་གཞན་གྱི་དཔུང་གཞིག་པ་དང་། དེ་བཞིན་གཤེགས་པ་ཐམས་ཅད་མཉེས་པར་བྱས་ལ་ཧོཿཞེས་བྱ་བས་མཉེས་པར་བྱའོ། །རྡོ་རྗེ་ཁུ་ཚུར་གཉིས་བཅིངས་ལ་གུང་མོ་གཉིས་གཤིབས་ཏེ་བསྒྲེང་ལ་ཚིགས་གསུམ་པ་བཅག་སྟེ་རིན་པོ་ཆེ་དང་འདྲ་བར་བྱ། མཐེ་བོ་
གཉིས་བསྙམས་པའི་སྟེང་དུ་མཛུབ་མོ་གཉིས་གདུ་བུའི་ཚུལ་དུ་བྱས་པ་ནི་བཅོམ་ལྡན་འདས་འཁོར་ལོ་ཅན་གྱི་ཕྱག་རྒྱ་སྟེ་འདི་དང་དེའི་གཟུགས་སུ་བསྒོམས་ནས་འཁོར་ལོ་འབར་བ་ལྟ་བུ་འཛིན་པ་ནི་གཡུལ་ལས་སྒྲོལ་བར་བྱེད་པའོ། །ལག་པ་གཡོན་པའི་སོར་མོ་ཀུན་རང་གི་མཐེ་བོས་
མནན་ཏེ་གུང་མོ་བསྒྲེང་གཡས་པ་པདྨར་བྱ་བ་ནི་ཧ་ལ་ཧ་ལའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱི་མཐེའུ་ཆུང་གཉིས་ལུ་གུ་རྒྱུད་དུ་བྱས་ལ། མཛུབ་མོ་གཉིས་གཤིབས་ཏེ་བཟློག་ལ་དཔྲལ་བར་གཞག་པ་ནི་རྡོ་རྗེ་ཁྲག་འཐུང་གི་ཕྱག་རྒྱ་སྟེ་འདིས་དུར་ཁྲོད་དུ་ཞུགས་ལ་མཁའ་འགྲོ་མ་
རྣམས་བསྐྲད་པར་བྱའོ། །གཡོན་པས་ཐོད་པ་གཟུང་བའི་ཚུལ་དུ་བྱས་ལ། གཡས་པས་མདུང་རྩེ་གསུམ་པར་བྱས་ནས་རལ་པ་ལ་ཟླ་བས་བརྒྱན་ཏེ་བཅིངས་ནས་མཚན་མ་བསྒྲེངས་པ་མིག་གསུམ་པ་ལ་གར་སྟབས་ཀྱིས་གར་བྱེད་པར་བདག་ཉིད་བསྒོམས་པ་ནི་བདེ་བྱེད་ཀྱི་ཕྱག་རྒྱའོ། །
གཡོན་པའི་གུང་མོ་དང་མཐེ་བོ་འཇིགས་པའི་ཚུལ་དུ་བརྐྱང་ལ་གཡས་པའི་ཁུ་ཚུར་དབྱུག་ཏོ་འཛིན་པ་ལྟར་བྱས་པ་ནི་ཁྱབ་འཇུག་གི་ཕྱག་རྒྱའོ། །ལག་པ་གཉིས་ཐལ་མོ་སྦྱར་ནས་པདྨའི་ཚུལ་དུ་བརྐྱང་བར་བྱེད་པ་ནི་ཚངས་པའི་ཕྱག་རྒྱའོ། །ལག་པ་གཉིས་མེ་ཏོག་ཐོགས་པའི་ཕྱག་རྒྱར་
བྱས་པ་ནི་མ་མོ་ཐམས་ཅད་ཀྱིའོ། །རྡོ་རྗེ་སེམས་མ་ལ་སོགས་པ་དེ་དག་ཉིད་ནི་རིན་པོ་ཆེ་སྟེ་མེ་ལོང་ལྟ་བུ་ལ་སོགས་པའི་ཡེ་ཤེས་ཀྱི་ངོ་བོ་ཉིད་དེས་དཀྱིལ་འཁོར་གྱི་ལྷ་རང་གི་ཏིང་ངེ་འཛིན་ལ་གནས་པར་བསྒོམས་ལ་དབང་བསྐུར་བར་བྱ་སྟེ། དེ་ལ་བཅོམ་ལྡན་འདས་རྣམ་པར་སྣང་
མཛད་ཀྱི་ནི་རིན་པོ་ཆེའི་དབུ་རྒྱན་ཉིད་ཀྱིས་སོ། །གཞན་རྣམས་ཀྱི་ནི་མི་བསྐྱོད་པ་དང་། འོད་དཔག་ཏུ་མེད་པ་དང་། སངས་རྒྱས་ལྔའི་དབུ་རྒྱན་ཉིད་ཀྱིས་ཅི་རིགས་པར་བསྐྱེད་པར་བྱའོ། །དར་དཔྱངས་དང་ཕྲེང་བས་ཀྱང་དབང་བསྐུར་བར་བྱ་སྟེ་རྡོ་རྗེ་ཁུ་ཚུར་གཉིས་ལྟག་པར་མདུད་ལ་

མཐེའུ་ཆུང་ལ་སོགས་པ་སོར་མོ་ཐམས་ཅད་བཀྲོལ་ནས་འགྱིང་བག་དང་བཅས་པས་དར་དཔྱངས་ཀྱི་ཚུལ་དུ་བྱའོ། །གསང་བའི་མཆོད་པ་ཉིད་བསྟན་པར་བྱ་བའི་ཕྱིར་འགྱུར་ཞིང་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་ཁུ་ཚུར་གཉིས་དཀུར་བརྟེན་ནས་ཅུང་ཟད་འཇོ་སྒེག་གི་ཚུལ་གྱིས་
འགྱུར་ཞིང་གཡོན་ཕྱོགས་སུ་འདུད་པ་ནི་སྒེག་མོའིའོ། །དེ་ཉིད་ལས་ཕྲེང་བའི་ཚུལ་དུ་མགོ་ལ་འཆིང་བ་ནི་ཕྲེང་བ་མའིའོ། །གླུ་ལེན་ཅིང་རྡོ་རྗེའི་པི་ཝང་བརྡུང་བའི་ཚུལ་དུ་བྱེད་པ་ནི་རྡོ་རྗེ་གླུ་མའིའོ། །རྡོ་རྗེ་ཁུ་ཚུར་གཉིས་གར་བྱེད་པའི་ཚུལ་དུ་བསྐོར་བ་ནི་རྡོ་རྗེ་གར་མཁན་མའིའོ། །གསང་
བ་དང་ཕྱིའི་མཆོད་པ་གར་སྔོན་དུ་འགྲོ་བས་བྱའོ་ཞེས་བསྟན་པར་བྱ་བའི་ཕྱིར། འཇོ་སྒེག་ཐབས་ལ་སྤྲོ་བ་ཡིས། ཞེས་བྱ་བ་ལ་སོགས་པ་གསུངས་སོ། །མེ་ཏོག་ནི་ཐལ་མོ་དང་གར་གྱིས་མེ་ཏོག་དབུལ་བའི་ཚུལ་དུ་བྱེད་པ་ནི་མེ་ཏོག་མའིའོ། །ཕན་ཚུན་རྒྱབ་སྦྱར་ལ་གུང་མོ་
བསྒྲེང་ནས་སྤོས་ཀྱི་ཚུལ་དུ་བསྐོར་བ་ནི་བདུག་སྤོས་མའིའོ། །མཐེ་བོ་གཉིས་མར་མེའི་ཚུལ་དུ་གཞག་པ་ནི་མར་མེ་མའིའོ། །གར་སྔོན་དུ་འགྲོ་བས་བྱུག་པའི་ཚུལ་དུ་བྱེད་པ་ནི་བྱུག་པ་མའིའོ། །ལག་པ་གཉིས་དུང་གི་ཚུལ་དུ་སྦྱར་ལ་མཆོད་ཡོན་དབུལ་བར་བྱའོ། །ལག་པ་
གཉིས་ཀྱིས་བརྡེབས་པས་རྫ་རྔ་བརྡུང་བའི་ཚུལ་དུ་བྱ་བ་དང་། རང་གི་བུད་པའི་ཚུལ་གྱིས་གླིང་བུ་འབུད་པ་དང་། རྡོ་རྗེ་བསྡམས་པ་ནང་དུ་བཅིངས་ལ་མཐེ་བོ་གཉིས་གཤིབས་ལ་བརྐྱང་། མཐེ་བོ་གཉིས་གདུ་བུར་བྱས་པའི་དུང་འབུད་པ་དང་ལག་པ་གཡས་པ་བཏེག་སྟེ།
དེ་ཉིད་ཀྱིས་རྔ་ཡབ་གཡོབ་པ་ལྟར་བྱ་བ་དང་ལག་པ་གཡོན་པ་བཏེག་ལ་ལག་པ་གཡས་པ་རྒྱལ་མཚན་གྱི་ཚུལ་དུ་དཔྱངས་པ་དང་། དེ་བཞིན་དུ་གཉི་ག་བ་དན་དུ་བྱ་བའི་དོན་དུ་གཡོ་ཞིང་བསྐོར་བས་འོག་ཏུ་བྱ་བ་དང་ཚོན་འགྱེད་པའི་ཚུལ་གྱིས་ཕྲེང་བ་བྱ་བ་དང་ལག་པ་གཡོན་པ་པང་
བར་གཞག་སྟེ་སྣོད་དུ་བྱས་ལ། གཡས་པ་བཟུང་ནས་ལྷ་བཤོས་རྣམ་པ་སྣ་ཚོགས་པ་དབུལ་བ་དང་། ཟུར་བཞིའི་ཚུལ་གྱིས་ཁང་པ་བརྩེགས་མ་བྱ་བ་དང་། གོས་ཀྱི་ཚུལ་ཏེ་ན་བཟའ་འདྲ་བའི་ཚུལ་དང་། གདུ་བུ་དང་དོ་ཤལ་དང་། དཔུང་རྒྱན་དང་། རྐང་རྒྱན་དང་། རྣ་ཆ་རྣམས་ནི་

གནས་ཇི་ལྟ་བར་བརྒྱན་པར་བྱ་བ་དང་། ལག་པ་གཡོན་པའི་མཐེ་བོའི་རྩེ་མོའི་སྟེང་དུ་གཡས་པ་བརྐྱང་ལ་གདུགས་སུ་བྱ་བ་དང་། ལག་པ་གཡོན་པ་ཐད་ཀར་བརྐྱང་ལ་གཡས་པ་དེ་བཞིན་དུ་གཡོན་པའི་སྟེང་དུ་གཞག་སྟེ་ནམ་མཁའ་ལ་བསྐོར་ན་བླ་རེར་འགྱུར་རོ། །
མཚམས་རྣམས་སུ་དྲང་བ་ལ་སོགས་པ་བྱ་སྟེ་འདི་དག་ལ་ཡི་གེ་ཧཱུྃ་གིས་ཅི་རིགས་པར་བྱའོ། །དེ་ཁོ་ན་ཉིད་ཀྱི་མཆོད་པའི་དོན་དུ་ཤེས་རབ་ཀྱི་སྒོ་འཕར་དབྱེ་བར་བྱ་བའི་ཕྱིར་དབྱེ་བར་བྱའོ། །གང་རྣམ་པར་རྟོག་པ་དང་བྲལ་བ་དེ་རྣམས་ཀྱི་བྱང་ཆུབ་ཀྱི་སེམས་རྣམ་པར་བསྒོམས་པས་
ཐམས་ཅད་རྡོ་རྗེ་འཛིན་པའི་བདག་ཉིད་དུ་ཤིན་ཏུ་དད་པ་ནི་ལྷ་ཐམས་ཅད་ཀྱི་སྐུ་དང་གསུང་དང་ཐུགས་རྣམས་ལ་མཆོད་པ་བླ་ན་མེད་པ་བྱས་པར་འགྱུར་རོ། །དབུ་མའི་ཐེག་པ་བསྒོམས་པས་རྣམ་པར་མ་བསྒོམས་པ་ཡང་ཀུན་རྫོབ་ཀྱི་མཆོད་པ་ཡིན་པར་བལྟ་བར་བྱའོ། །དཀྱིལ་
འཁོར་བའི་ལྷ་རྣམས་ཀྱི་སྐུ་དང་གསུང་དང་ཐུགས་དང་དེ་བསྒྲུབས་པའི་འབྲས་བུ་མཉམ་པ་མེད་པས་ལེགས་སོ་ཞེས་གསུངས་སོ། །དེ་བཞིན་གཤེགས་པ་ལ་སོགས་པ་རིགས་ལྔ་ནི་སྐྱེ་བ་དང་འགག་པ་དང་བྲལ་བས་བཅོམ་ལྡན་འདས་ལ་བསྟོད་པ་བསྟན་པར་བྱ་བའི་ཕྱིར།
མཐའ་མ་མེད་ཅིང་ཞེས་བྱ་བ་ལ་སོགས་པ་གསུངས་སོ། །སྐུ་གསུམ་གྱི་བདེ་བའི་སྒོ་ནས་ལྷ་ཐམས་ཅད་ལ་བསྟོད་པ་བསྟན་པར་བྱ་བའི་ཕྱིར། བདེ་བ་ལས་འཁྲུངས་རྡོ་རྗེ་འཆང་བ་ཡི། །ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་ཡེ་ཤེས་ནི་བྱང་ཆུབ་ཀྱི་སེམས་ཀྱི་བདག་ཉིད་
ཅན་ཏེ་དེ་ལས་ཟླ་བ་དང་རྡོ་རྗེ་ལ་སོགས་པའི་རིམ་གྱིས་བདེ་བའི་ངོ་བོར་འཁྲུངས་པའོ། །ཇི་ལྟ་བུ་ཞེ་ན་དངོས་པོ་ཞེས་བྱ་བ་ལ་སོགས་པ་གསུངས་ཏེ། དངོས་པོ་རྣམ་པར་བསྒོམ་པ་ནི་རྣམ་པར་སྣང་མཛད་ལ་སོགས་པ་བདག་པོ་བསྐྱེད་པའི་སྒོ་ཡོད་པ་དེ་ཉིད་བསྟན་པར་བྱ་བའི་ཕྱིར།
གང་ཕྱིར་ཞེས་བྱ་བ་ལ་སོགས་པ་གསུངས་ཏེ་གང་གི་ཕྱིར་དང་པོར་ཏེ། ཐོག་མར་རྣམ་པར་སྣང་མཛད་ནི། །ཨོཾ་ལས་བྱུང་བར་སྤྲུལ་པའོ། །གང་གིས་ཤེ་ན་དག་ཅིང་ཞེས་བྱ་བ་ལ་སོགས་པ་གསུངས་ཏེ། དག་ཅིང་རྣམ་དག་ཅེས་བྱ་བ་ནི་ཉོན་མོངས་པ་དང་ཤེས་བྱའི་སྒྲིབ་པ་ལས་

དབེན་ཞིང་། སྒྲིབ་པ་ཐམས་ཅད་སྤངས་པ་ཡིན་པས་ན་དེ་སྐད་ཅེས་བྱའོ། །གཟུངས་མང་ཚུལ་གྱིས་ཞེས་བྱ་བ་ནི་ཡང་དག་པའི་རིག་པ་བཅུ་མཚན་ཉིད་ཅན་གྱི་ཕྲེང་བས་བཅིངས་པ་ནི་བསྐྱེད་པ་སྟེ། ཀུན་ནས་ཉོན་མོངས་པ་ཟིལ་གྱིས་གནོན་པའི་བདག་ཉིད་ཅན་གྱི་བསྟོད་པའི་རྣམ་པའོ། །དེ་
བས་ན་སྒྱུ་འཕྲུལ་དྲ་བའི་རྒྱུད་ཀྱི་ངོ་བོ་བཅོམ་ལྡན་འདས་དེ་ཉིད་ལ་ཕྱག་འཚལ་བའོ། །གསུང་སྙན་ཞེས་བྱ་བ་ལ་སོགས་པ་ལ་ཡི་གེ་ཀུན་ནི་པདྨའི་རིགས་ཀྱི་ལྷ་མོ་རྣམས་ཀྱིས་ཏེ་དེ་ཀུན་དུ་བསྟེན་ཅིང་ཁྱབ་པའི་བར་གྱིས་གསུངས་སྙན་ཅེས་གསུངས་སོ། །གསུང་ནི་ཡི་གེ་ཨཱཿསྟེ། དེ་ཉིད་སྐྱེ་བ་
མེད་པ་སྟོན་པས་སྤྲོས་པ་མེད་པར་སྟོན་པའོ། །དེ་ལ་འཇིག་རྟེན་དབང་ཕྱུག་བཞུགས་པ་ནི་དེ་ལས་བྱུང་བའི་ཕྱིར་ཏེ། སྔ་མ་བཞིན་དུ་དེ་ལ་ཡང་བདག་ཕྱག་འཚལ་ལོ་ཞེས་བྱ་བར་སྦྱར་རོ། །དེས་བྱས་པའི་མིག་གསུམ་པ་ལྷ་མོ་དང་བཅས་པ་ཁྲོ་བོའི་རྒྱལ་པོའི་སྐུས་བཏུལ་བར་མཛད་པ་དང་།
རྫུ་འཕྲུལ་གྱི་རྐང་ཚུལ་མང་བ་དང་ལྡན་པ་གང་ཡིན་པ་དེ་ལྟ་བུ་གཞན་འགའ་ཡང་མཉམ་པ་མེད་པ་དང་བདེ་བ་ཆེན་པོའི་རང་བཞིན་གྱི་རྗེས་སུ་ཆགས་པས་བཞུགས་པ་སྟེ། ན་ཆུང་དག་དང་ལྷན་ཅིག་བཞད་ཅིང་རོལ་པ་ནི་བདེན་པ་མ་ཡིན་པས་ཀུན་རྫོབ་ཏུ་བཞུགས་པར་སྟོན་པའི་བར་དུའོ། །ད་ནི་
འདི་སྐད་སྟོན་པར་འགྱུར་ཏེ་ཡི་གེ་གསུམ་གྱི་རྣམ་པ་ལས་རིམ་གྱིས་འབྲས་བུའི་སྒོ་ནས་བདག་ཉིད་ཆེན་པོའི་འབྱུང་བ་སྔོན་དུ་འགྲོ་བས་ཕྱག་འཚལ་བ་སྟོན་པ་ཡིན་ཏེ་དེ་ལ་ཡང་སྔ་མ་བཞིན་ནོ། །འདིའི་ཡང་ཕྱག་གཡས་པས་ཐུགས་ཀར་རྡོ་རྗེ་བསྟོད་དེ་འཇོག་ལ། གཡོན་པ་
དཀུར་བརྟེན་ནས་དྲིལ་བུ་འཁྲོལ་བར་མཛད་ཅིང་། ཡང་གཡས་དང་གཡོན་གྱིས་མདའ་དང་གཞུ་གསོར་ཞིང་བསྣམས་པ། ཟླ་བའི་མདོག་ཅན་ལ་ཅུང་ཟད་དམར་བས་མཛེས་པའི་མདངས་ཅན་ལྷ་མོ་བཞིའི་བཙུན་མོས་བསྐོར་བ་སྟེ། དེ་ཡང་གཅིག་ནི་ལྷ་མོ་ཀཱི་ལི་ཀཱི་ལ་སྟེ་མཆོག་ཏུ་
དབུས་ཀྱི་རང་གི་ལྷའི་དམ་ཚིག་པ་ལ་འཁྱུད་པའོ། །གཉིས་པ་ནི་ཆུ་སྲིན་གྱི་རྒྱལ་མཚན་ཅན་ཏེ་རྒྱབ་ཏུ་གནས་ཤིང་རྗེས་སུ་ཆགས་པ་བདེ་བ་ཆེན་པོའི་མཐུ་དང་ལྡན་པའོ། །གསུམ་པ་ནི་བསྙེམས་མ་ཞེས་བྱ་བ་སྟེ་མེ་ཏོག་གི་ཕྲེང་བས་བདག་པོ་ལ་ཀུན་ནས་འཕེན་པའོ་ཞེས་བྱ་བ་ནི་

ལྷག་མའོ། །བཞི་པ་ནི་མེ་ཏོག་གི་མིག་ཅན་ཏེ། གཡས་ནས་བདེ་བའི་མདའ་འཕེན་པ་སྟེ་འདོད་པའི་མདའ་ཞེས་བྱ་བའི་དོན་ཏོ། །གང་ཞིག་གླུ་འདི་ལེན་ཅིང་སྟོད་པར་བྱེད་པ་དང་། སྒོམ་པར་བྱེད་པ་དེས་ནི་བདེ་བའི་རྡོ་རྗེ་ཅན་དང་མཉམ་པ་ཐོབ་པར་འགྱུར་རོ། །དེ་རྣམས་ཀྱིས་
ཕྱིའི་མཆོད་པ་རྣམ་པ་སྣ་ཚོགས་དང་ཡིད་ཀྱི་མཆོད་པ་རྣམས་ཨོཾ་ཨ་ནུཏྟ་ར་ཞེས་བྱ་བ་ལ་སོགས་པས་བྱིན་གྱིས་བརླབ་པར་བྱའོ་ཞེས་གསུངས་པ་ཡིན་ནོ། །ལེའུ་དྲུག་པའི་བཤད་པའོ།། །།ད་ནི་བྱང་ཆུབ་ཀྱི་སེམས་བསྟན་པར་བྱ་བའི་དོན་དུ། རྒྱུད་ཕྱི་མ་བཤད་པར་བྱ་བའི་
ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། སེམས་ནི་ལུས་ཀྱི་རྣམ་པ་ཡིན་ལ་ཞེས་བྱ་བ་ནི་དེ་ལྟ་བུའི་རྣམ་པར་སྣང་བ་ཡིན་ཏེ། དེ་སྐད་དུ་ཁམས་གསུམ་པོ་འདི་དག་ནི་སེམས་ཙམ་མོ་ཞེས་གང་གསུངས་པས་སོ། །ཆོས་རྣམས་ཞེས་བྱ་བ་ནི་དེ་བཞིན་
གཤེགས་པའི་རིགས་རྣམས་ལའོ། །སྐྱེ་བ་མེད་པས་བརྗོད་དུ་མེད་པ་ནི་ཡི་གེ་མེད་པའོ། །ཡི་གེ་མེད་པས་ན་གནས་པ་མེད་པའོ། །དེ་བས་ན་དེ་ཁོ་ན་ཉིད་དུ་མེད་པའོ། །རྟོག་པ་དང་བརྗོད་པ་ཐམས་ཅད་ཀྱི་གནས་མ་ཡིན་པས་ན་རྟོག་པ་དང་བརྗོད་པའི་ཚུལ་སྤངས་པའོ། །གསུང་
གི་སྤྲོས་པ་ཙམ་ཉིད་རྡོ་རྗེ་ཡིན་པས་ན་དེ་ལ་དམིགས་པའི་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །དངོས་པོ་ཞེས་བྱ་བ་ནི་རྡོ་རྗེའི་རིགས་རྣམས་སོ། །དེ་མ་བསྐྱེད་པ་ཡིན་ཏེ། དེ་བས་ན་ཆོས་ཅན་དང་ཆོས་ཉིད་དང་བྲལ་བས་ཆོས་ཐམས་ཅད་མེད་པ་སྟེ། ཡང་དག་པར་རིག་པ་བཅུའི་
མཚན་ཉིད་ཅན་དང་ཆོས་ཉིད་མེད་པ་སྟེ་ཡིད་དུ་འོང་བའི་དོན་ཐོབ་པའི་བདག་ཉིད་ཅན་མེད་པའོ། །དེ་བཞིན་གཤེགས་པ་ཐམས་ཅད་ཀྱི་དམིགས་སུ་མེད་པའི་ཏིང་ངེ་འཛིན་གང་ཡིན་པ་དེ་ལ་དེ་སྐད་ཅེས་བྱའོ། །དངོས་པོ་འདི་དག་ཅེས་བྱ་བ་ནི་རིན་པོ་ཆེའི་རིགས་དང་ལྡན་པ་རྣམས་
སོ། །ཆོས་ཀྱི་མཚན་ཉིད་སྤངས་པ་ཡིན། །ཞེས་བྱ་བ་ནི་དཀྱིལ་འཁོར་ལ་སོགས་པའི་ཆོས་རྣམས་ནི་རང་གི་མཚན་ཉིད་དང་བྲལ་བའི་ཕྱིར་རོ། །ཇི་ལྟར་ན་འདི་ལྟར་འགྱུར་ཞེ་ན། བདག་མེད་ཆོས་ལས་ལེགས་བྱུང་བའི། །ཞེས་བྱ་བ་གསུངས་ཏེ་མཉམ་པ་ཉིད་ཀྱི་ཡེ་ཤེས་ཀྱི་

བདག་པོ་ལས་སྐྱེས་ཞེས་བྱ་བའི་དོན་ཏོ། །མེ་ལྕེ་འབར་བ་ནི་ཆོས་ཐམས་ཅད་རང་བཞིན་གྱིས་དག་པའོ། །དེ་ཉིད་རྡོ་རྗེ་འབར་བ་སྟེ་དེ་ལ་དམིགས་པའི་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །དངོས་པོ་ཞེས་བྱ་བ་ནི་པདྨའི་རིགས་དང་ལྡན་པ་རྣམས་སོ། །དེ་ནི་སྐྱེ་བ་མེད་པ་ཡིན་ལ་དེ་བས་
ན་དངོས་པོ་མེད་པ་སྟེ། ལྷ་རྣམས་དང་སྒོམ་དུ་མེད་པ་སྟེ་བསྒོམ་པར་བྱ་བའང་མེད་པའི་ཕྱིར་རོ། །དངོས་པོ་ཞེས་རབ་ཏུ་བརྗོད་པ་ནི་ཀུན་རྫོབ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་བླ་ན་མེད་པའི་རང་བཞིན་གྱིས་འོད་གསལ་བའོ། །དེ་ཉིད་རྡོ་རྗེ་སྟེ་དེ་ལ་དམིགས་པའི་ཏིང་ངེ་
འཛིན་གང་ཡིན་པ་དེ་ལ་ཡང་དེ་སྐད་ཅེས་བྱའོ། །ཆོས་རྣམས་ཞེས་བྱ་བ་ནི་ལས་ཀྱི་རིགས་དང་ལྡན་པ་རྣམས་སོ། །གཟོད་ནས་དག་པ་ནི་ཐོག་མ་ནས་སྐྱེ་བ་མེད་པའི་ཕྱིར་རོ། །རྙོག་པ་མེད་པ་ནི་ཉེས་པ་ཐམས་ཅད་ལས་དབེན་པའི་ཕྱིར་རོ། །དེ་བས་ན་སེམས་ཅན་མེད་པ་སྟེ་ཟླ་
བའི་དཀྱིལ་འཁོར་གྱི་ངོ་བོ་དང་སྲོག་ཀྱང་མེད་པ་སྟེ་ཕྱག་མཚན་གྱི་གཟུགས་མེད་པ་དང་སངས་རྒྱས་ཉིད་མེད་པ་སྟེ་རིགས་ཀྱི་བདག་པོའི་མཚན་ཉིད་ཅན་དང་། བྱང་ཆུབ་མེད་པ་སྟེ་བྱ་བ་སྒྲུབ་པའི་ཡེ་ཤེས་ཀྱི་བདག་ཉིད་ཅན་དངོས་པོ་མེད་པའོ། །སངས་རྒྱས་དང་དག་པ་དང་། ཆོས་
བསྟན་པ་རྣམས་ནི་སྐུ་དང་ཐུགས་དང་གསུང་གི་སྒོ་ནས་སོ། །ཆོས་ཐམས་ཅད་བདག་མེད་པ་བསྒོམ་པའི་བདག་ཉིད་ཅན་ཡིན་པས་ན། བདག་མེད་ཆོས་ལས་ལེགས་བྱུང་སྟེ། །འདི་དག་ནི་སངས་རྒྱས་ལ་སོགས་པའི་རྒྱུ་དང་འབྲས་བུར་གྱུར་པ་ཡིན་ནོ། །བྱང་ཆུབ་ཅེས་བྱ་བ་ལ་སོགས་
པ་ནི་ཕྱག་འཚལ་བ་སྟོན་པ་ཡིན་ཏེ། ཇི་ལྟར་འབྱུང་ཞེ་ན་བྱང་ཆུབ་ཚོགས་ཀྱིས་བསྒོམས་པ་ཡིས། །ཞེས་བྱ་བ་སྟེ་བྱང་ཆུབ་ཀྱི་སེམས་བསྒོམས་པའི་བསོད་ནམས་དང་ཡེ་ཤེས་ཀྱི་ཚོགས་བླ་ན་མེད་པའི་བསོད་ནམས་དང་ཡེ་ཤེས་ཀྱི་ཚོགས་དེས་རྒྱུད་བསྒོས་པའི་ཕྱིར་རོ། །མི་
གཡོ་ཡི་གེ་ལས་འབྱུང་ཞིང་། །ཞེས་བྱ་བ་ནི་ཟླ་བ་ལ་གནས་པའི་ཡི་གེ་ཧཱུྃ་ལས་འབྱུང་བའི་ཕྱིར་རོ། །དེ་ནི་འདི་སྐད་སྟོན་པར་འགྱུར་ཏེ། བྱང་ཆུབ་ཀྱི་སེམས་བསྒོམ་པ་སྔོན་དུ་འགྲོ་བས་ཟླ་བའི་དཀྱིལ་འཁོར་ལ་སོགས་པ་བསྒོམ་པར་བྱའོ། །ཐུགས་རྡོ་རྗེའི་སྦྱོར་བས་དང་པོར་བཟླས་

པ་ལ་སོགས་པ་ལ་རང་གི་ལྷ་སྤྱན་དྲང་བ་ལ་སོགས་པ་བྱའོ་ཞེས་བསྟན་པར་བྱ་བའི་ཕྱིར། གནས་དང་ཞེས་བྱ་བ་ལ་སོགས་པ་གསུངས་ཏེ་འདི་དག་ག་ལས་ཤེས་ཤེ་ན། འཁོར་ལོས་སྒྱུར་བ་ཆེན་པོར་གྱུར་པས་ཆོས་ཀྱི་མཐར་ཡང་དམ་ཚིག་རྡོ་རྗེ་ཅན་དུ་གྱུར་ནས་རང་གི་ལྷ་སྤྱན་
དྲང་བར་བྱའོ་ཞེས་བསྟན་པར་བྱ་བའི་ཕྱིར་རོ། །རྣལ་འབྱོར་བདག་ཉིད་ཅན་གྱིས་བརྟག །ཅེས་བྱ་བ་ནི་འདི་སྐད་སྟོན་པར་འགྱུར་ཏེ། སེམས་དཔའི་སྐྱིལ་མོ་ཀྲུང་དང་ལྡན་པར་འདུག་ལ་རང་བཞིན་གྱིས་དག་པའི་ཆོས་ཉིད་མངོན་དུ་བྱས་ཏེ། རང་གི་ཕྱག་རྒྱ་བྱིན་གྱིས་བརླབ་པ་སྔོན་དུ་འགྲོ་བ་དང་། རྡོ་རྗེ་
སེམས་མས་བྱིན་གྱིས་བརླབས་ལ་ཧཱུྃ་ཞེས་བྱ་བ་བརྗོད་དེ། རང་གི་ལུས་ཀྱི་རིན་པོ་ཆེ་ལ་བདག་ཉིད་རྡོ་རྗེ་ཅན་ཡིན་ནོ་ཞེས་ང་རྒྱལ་བསྐྱེད་ལ་ཇི་སྐད་དུ་བཤད་པའི་གནས་དང་སྟན་ལ་སོགས་པ་རྫོགས་ནས། རྡོ་རྗེའི་ལྕགས་ཀྱུས་རང་གི་ལྷ་སྤྱན་དྲངས་ལ་གདན་ཇི་ལྟ་བ་བཞིན་དུ་བསྟབས་ཏེ།
རིགས་ཀྱི་ཡུམ་གྱི་དམ་ཚིག་ཉེ་བར་བསྟན་ནས་ཕྱག་རྒྱ་བསྐོར་བས་ཕྱོགས་བཅ