Luận tạng Tây Tạng (Tengyur) — Tập 56

ིན་དུ་སངས་རྒྱས་ཀྱི་མཛད་པ་བྱེད་པར་འགྲུབ་པོ་ཞེས་བྱ་བ་ཇི་སྐད་གསུངས་པའོ། །དེས་ཀྱང་ཚོགས་ཡོངས་སུ་རྫོགས་ནས་མ་འོངས་པའི་དུས་ན་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་སྟེ་འདི་ནི་བསོད་ནམས་ཀྱི་དངོས་
གྲུབ་ཀྱི་རྒྱུད་དོ། །ད་ནི་རྟོག་པ་ཐམས་ཅད་ཀྱི་ཤེས་རབ་ཀྱི་དངོས་གྲུབ་ཀྱི་རྒྱུད་སྟོན་ཏེ། རྟོག་པ་ཐམས་ཅད་ཀྱི་སྤྱིར་ཤེས་རབ་ཀྱི་དངོས་གྲུབ་ཐོབ་པའི་རྒྱུད་གང་དུ་སྟོན་པ་དེ་ནི་རྟོག་པ་ཐམས་ཅད་ཀྱི་ཤེས་རབ་ཀྱི་དངོས་གྲུབ་ཀྱི་རྒྱུད་དོ། །དེ་ལས་ཀྱང་དང་པོར་སྙིང་པོའི་ཤེས་རབ་ཀྱི་དངོས་གྲུབ་ཀྱི་རྒྱུད་སྟོན་ཏེ་སྙིང་པོ་རྣམས་ཀྱི་ཤེས་
རབ་ཀྱི་དངོས་གྲུབ་ཀྱི་རྒྱུད་གང་དུ་སྟོན་པ་དེ་ནི་སྙིང་པོའི་ཤེས་རབ་ཀྱི་དངོས་གྲུབ་ཀྱི་རྒྱུད་དོ། །ཤེས་རབ་གང་གིས་སྙིང་པོ་འགྲུབ་པར་བྱེད་པའི་ཤེས་རབ་དེ་གང་ཡིན་ཞེ་ན་དེའི་ཕྱིར། ཡི་གེ་ཨ་ལ་འཇུག་བྱེད་ཅིང་། །ཞེས་བྱ་བ་གསུངས་ཏེ། ཨ་ཞེས་བྱ་བའི་ཡི་གེ་འདི་ནི་ཡི་གེ་ཐམས་ཅད་ཀྱི་གནས་ཡིན་ཏེ། གང་གི་ཕྱིར་ཀ་
ལ་སོགས་པའི་ཡི་གེ་རྣམས་ཡི་གེ་ཨ་ལ་བརྟེན་པ་དང་། ཡི་གེ་ཐམས་ཅད་ལ་ཡང་འཇུག་པར་བྱེད་པ་ཡིན་ཏེ། བརྗོད་པའི་དུས་ན་ཨ་ཞེས་བྱ་བས་མངོན་སུམ་མམ་བརྒྱུད་དེ་ཡི་གེ་ཐམས་ཅད་འདོད་པ་ལ་སོགས་བྱེད་པ་དང་། དོན་དམ་པར་མ་སྐྱེས་པའི་དོན་སྟོན་པའི་ཕྱིར་དང་། ཡི་གེ་ཐམས་ཅད་ཀྱི་དོན་སྟོན་པའི་
ཕྱིར་ཏེ་དཔེར་ན་ཀ་ཞེས་བྱ་བ་ནི་ལས་དང་རྣམ་པར་སྨིན་པ་ཉིད་ཀྱིས་སོ། །ཁ་ཞེས་བྱ་བ་ནི་ནམ་མཁའ་དང་མཚུངས་པ་ཉིད་དོ། །ག་ཞེས་བྱ་བ་ནི་འགྲོ་བ་ཉིད་དང་། གྷ་ཞེས་བྱ་བ་ནི་བུམ་པ་དང་མཚུངས་པ་ཉིད་དང་། ང་ཉ་ཎ་ན་མ་རྣམས་ནི་རང་གི་སྡེ་ཚོགས་ཀྱི་དོན་གསལ་བར་བྱེད་པ་ཡིན་གྱིས་བརྡ་སྤྲོད་པའི་ཚིག་ཅན་ནི་
མ་ཡིན་ནོ། །ཙ་ནི་གཡོ་བ་ཉིད་དེ་དེ་དག་ལ་སོགས་པ་མདོ་སྡེ་དག་ལས་ཇི་སྐད་གསུངས་པ་ལྟ་བུ་སྟེ། དེ་ལྟར་དེ་ལ་སོགས་པ་ཀུན་རྫོབ་དང་དོན་དམ་པར་སྟོན་པ་ཡིན་པས་ན་ཡི་གེ་ཨ་ཉིད་ཀྱི་ནང་དུ་ཡི་གེ་ཐམས་ཅད་ཆུད་པར་ཨའི་དོན་རྟོགས་པར་བྱས་ལ། རང་གི་ཁ་ནས་གཞན་ཞལ་དུ། །ཞེས་བྱ་བ་སྟེ་རང་གི་ཁ་ནས་
འང་སྙིང་པོ་འབྱུང་བ་དང་། གཞན་གྱི་ཞལ་ཞེས་བྱ་བ་ལྷའི་ཞལ་ནས་ཀྱང་སྙིང་པོ་འདི་འབྱུང་བ་དེ་ལྟར་བསྒོམས་ན་གང་གི་ཕྱིར་ལྷ་དེར་བཀུག་པ་དང་བཅུག་ནས་འཇོག་པའི་ཕྱིར་རོ། །དེ་བས་ན་ལྷའི་ཞལ་ནས་སྙིང་པོ་འབྱུང་བ་རང་བཞིན་གྱིས་གྲུབ་པ་ཉིད་ཡིན་པ་དེ་བཞིན་དུ་བདག་གི་ཁ་ནས་འབྱུང་བ་དེ་

ཡང་དེ་དང་འདྲའོ་ཞེས་དེ་ལྟར་བསྒོམས་ན་དངོས་གྲུབ་འཐོབ་པར་འགྱུར་རོ་ཞེས་བཅོམ་ལྡན་འདས་བྱང་ཆུབ་སེམས་དཔའ་ཆེན་པོ་འཇམ་དཔལ་གྱིས་གསུངས་སོ། །ད་ནི་ཤེས་རབ་ཅེས་བྱ་བ་ལ་སོགས་པས་ཕྱག་རྒྱའི་ཤེས་རབ་ཀྱི་དངོས་གྲུབ་ཀྱི་རྒྱུད་སྟོན་ཏེ། ཕྱག་རྒྱ་རྣམས་ཤེས་རབ་ཀྱིས་
གྲུབ་པར་རྒྱུད་གང་དུ་སྟོན་པ་དེ་ནི་ཕྱག་རྒྱའི་ཤེས་རབ་ཀྱི་དངོས་གྲུབ་ཀྱི་རྒྱུད་དོ། །ཤེས་རབ་ངེས་འབིགས་ཞེས་བྱ་བ། །ཏིང་ངེ་འཛིན་ཞེས་གྲགས་པ་སྟེ། །ཞེས་བྱ་བ་ལ་རབ་ཏུ་ཤེས་པའི་ཕྱིར་ན་ཤེས་རབ་པོ། །ངེས་པར་འབིགས་པའི་ཕྱིར་ན་ངེས་འབིགས་ཏེ་འབིགས་པ་ནི་རྟོགས་པའོ། །དེ་ཡང་ངེས་པར་
འབིགས་པར་བྱེད་པས་ངེས་འབིགས་ནི་གང་ལ་མིང་དེ་སྐད་ཅེས་བྱ་བ་དེ་ནི་ངེས་འབིགས་ཞེས་བྱའོ། །དེ་ཡང་། ཏིང་ངེ་འཛིན་ཅེས་གྲགས་པ་སྟེ། །ཞེས་བྱ་བ་སྟེ། གང་གི་ཕྱིར་ལྷག་མཐོང་ལྷག་པར་གྱུར་པ་དེ་ཉིད་ནི་ཏིང་ངེ་འཛིན་ཅེས་བྱ་བ་ཡིན་པའི་ཕྱིར་རོ། །དེ་ལྟ་བུའི་ཤེས་རབ་དེས་ནི་ཕྱག་རྒྱ་མྱུར་འགྲུབ་པར།
བསྒོམས་ན་ཉིད་དུ་འགྲུབ་པར་འགྱུར། །ཅེས་བྱ་བ་ཡིན་ནོ། །འདི་སྐད་སྟོན་ཏེ་ཆོས་ཀྱི་དེ་ཁོ་ན་ཉིད་ཀྱི་དོན་རྟོགས་པར་གྱུར་ན་ཕྱག་རྒྱ་སྟེ་ཕྱག་རྒྱ་ཆེན་པོ་ལ་སོགས་པ་མངོན་སུམ་དུ་བྱས་ཤིང་དེ་ལ་སེམས་རྩེ་གཅིག་པར་བཞག་ན་མྱུར་དུ་འགྲུབ་པར་འགྱུར་རོ་ཞེས་བཅོམ་ལྡན་འདས་ཤེས་རབ་ཀྱི་མཆོག་འཕགས་པ་
འཇམ་པའི་དཔལ་གྱིས་གསུངས་སོ། །ད་ནི་སྔགས་ཀྱི་ཤེས་རབ་ཀྱི་དངོས་གྲུབ་ཀྱི་རྒྱུད་སྟོན་ཏེ་སྔགས་རྣམས་ཀྱི་ཤེས་རབ་ཀྱིས་འགྲུབ་པར་རྒྱུད་གང་དུ་སྟོན་པ་དེ་ནི་སྔགས་ཀྱི་ཤེས་རབ་ཀྱི་དངོས་གྲུབ་ཀྱི་རྒྱུད་དོ། །ཤེས་རབ་ཀྱི་སྒྲ་ནི་རྗེས་འབྲང་ཞེས་བྱ་བ་ལ་ཤེས་རབ་ནི་བཤད་ཟིན་ཏོ། །སྒྲ་ནི་དབྱངས་ཏེ་ཤེས་རབ་གང་སྒྲའི་རྗེས་
སུ་རྒྱུག་ལ་སྒྲ་ལ་དམིགས་པ་སྟེ། གང་ལ་མིང་དེ་སྐད་ཅེས་བྱ་བ་དེ་ནི། ཤེས་རབ་སྒྲའི་རྗེས་སུ་འབྲང་། །ཞེས་བྱའོ། །དེ་ཡང་། ཏིང་འཛིན་ཚིག་ནི་རབ་སྤྲོས་ན། །ཞེས་བྱ་བ་སྟེ་ཏིང་འཛིན་ཚིག་ཅེས་བྱ་བ་ནི་གང་གི་ཕྱིར་རྟོག་པ་དང་བཅས་ཤིང་དཔྱོད་པ་བཅས་པའི་ཏིང་ངེ་འཛིན་ལ་གནས་པ་དེ་ལ་སྨྲ་བ་ལྟ་བུའི་སྣང་བ་སྐྱེས་ཏེ། དེ་
བས་ན་མཉམ་པར་གཞག་པའི་སེམས་ལ། ཏིང་འཛིན་ཚིག་ནི་རབ་སྤྲོས་ན། །ཞེས་བྱའོ། །དེ་ཡང་འདིས་དོན་རྣམས་རབ་ཏུ་སྤྲོ་ཞིང་དཔྱོད་པས་ན་ཡི་གེ་ཉིད་ལ་སྤྲོས་པ་ཞེས་བྱའོ། །དེ་ལྟ་བུའི་ཤེས་རབ་ཀྱིས་ཤིན་ཏུ་བསྒོམས་པ་ལས་མྱུར་དུ་སྔགས་ཀྱི་དངོས་གྲུབ་འཐོབ་པར་འགྱུར་རོ་ཞེས་བཅོམ་ལྡན་འདས་རྡོ་རྗེ་

བློས་གསུངས་སོ། །ད་ནི་རིག་པའི་ཤེས་རབ་ཀྱི་དངོས་གྲུབ་ཀྱི་རྒྱུད་སྟོན་ཏེ། རིག་པ་རྣམས་ཀྱི་ཤེས་རབ་ཀྱིས་འགྲུབ་པར་རྒྱུད་གང་དུ་སྟོན་པ་དེ་ནི་རིག་པའི་ཤེས་རབ་ཀྱི་དངོས་གྲུབ་ཀྱི་རྒྱུད་དོ། །རིག་དང་སྔགས་གཉིས་ཁྱད་པར་དུ། །ཁྱད་པར་ཡོད་པ་མ་ཡིན་ཏེ། །ཞེས་བྱ་བ་ནི་དོན་དམ་པར་དངོས་པོ་མེད་པའི་ཕྱིར་ཆོས་
ཐམས་ཅད་ཆ་ཤས་སུ་ཕྱེ་ནས་རྣམ་པར་དཔྱད་ན་མཚུངས་པར་ལྡན་པ་ཡོད་པ་མ་ཡིན་ནོ། །དེ་བས་ན་དེ་དག་གི་དོན་ཡང་མི་རྙེད་དོ། །གཏན་ཚིགས་དེས་ན་རིག་པ་དང་སྔགས་རྣམས་ཀྱི་ཁྱད་པར་ཡོད་པ་མ་ཡིན་ནོ་ཞེས་གསུངས་སོ། །དེ་ལྟར་རིག་པ་དང་སྔགས་ཁྱད་པར་མེད་པ་ཡིན་ན་སངས་རྒྱས་བཅོམ་ལྡན་འདས་དང་
བྱང་ཆུབ་སེམས་དཔའ་རྣམས་ཀྱིས་འདི་དག་ནི་རིག་པའོ། །འདི་དག་ནི་སྔགས་སོ་ཞེས་ཅིའི་ཕྱིར་རྣམ་པར་འཇོག་པར་མཛད་ཅེ་ན། དེ་ནི་དེ་ཁོ་ན་ཉིད་ལ་དཔྱད་པ་མ་མཛད་པར་འཇིག་རྟེན་པ་རྣམས་ཇི་ལྟར་མོས་པ་བཞིན་དུ་གདུལ་བྱའི་སྐྱེ་བོའི་དབང་གིས་ཇི་ལྟ་བར་ཟད་དོ། །དེ་ལྟར་ཤེས་ནས། ཤེས་རབ་བསྒོམས་ན་མྱུར་
བར་ནི། །ངེས་པར་དངོས་གྲུབ་འཐོབ་པར་འགྱུར། །ཞེས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཀྱི་ཡེ་ཤེས་ཀྱིས་གསུངས་སོ། །ད་ནི་ཚོགས་ཀྱི་དངོས་གྲུབ་ཀྱི་རྒྱུད་སྟོན་ཏེ་གཅིག་ནི་བསོད་ནམས་ཀྱི་ཚོགས་ཀྱི་དབང་དུ་མཛད་ནས་སྟོན་ཏོ། །གཉིས་པ་ནི་ཤེས་རབ་
ཀྱི་དབང་དུ་མཛད་ནས་སྟོན་ཏོ། །ད་ནི་སྤྱིའི་ཚོགས་ཀྱི་དངོས་གྲུབ་ཀྱི་རྒྱུད་སྟོན་ཏེ། དེ་ལ་དང་པོ་ཁོ་ནར་མཆོད་པ་ཞེས་བྱ་བ་ལ་སོགས་པས་སྙིང་པོ་ཐམས་ཅད་ཀྱི་ཚོགས་ཀྱི་དངོས་གྲུབ་ཀྱི་རྒྱུད་སྟོན་ཏེ། མཆོད་པ་ཐམས་ཅད་རབ་བྱས་ན། །ཞེས་བྱ་བ་ལ་མཆོད་པ་ཡང་ཡིན་ལ་ཐམས་ཅད་ཀྱང་ཡིན་པས་
མཆོད་པ་ཐམས་ཅད་དོ། །ཡང་ན་ཐམས་ཅད་ཀྱི་མཆོད་པ་ཡིན་པས་ན་མཆོད་པ་ཐམས་ཅད་དེ། ཕྱོགས་བཅུ་དུས་གསུམ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་མཆོད་པའོ། །ཡང་ན་རྟོག་པ་ཐམས་ཅད་དུ་གསུངས་པའི་མཆོད་པ་སྟེ་ཐེག་པ་ཆེན་པོ་མངོན་པར་རྟོགས་
པའི་རྟོག་པར་ཆོས་ཀྱི་མཆོད་པ་བཅུ་དྲུག་ཇི་སྐད་དུ་སྨོས་པ་དང་། ལས་ཀྱི་དཀྱིལ་འཁོར་དུ་སྒེག་མོ་ལ་སོགས་པའི་མཆོད་པའི་ལྷ་མོ་བརྒྱད་གསུངས་པ་ལྟ་བུ་དང་། དེ་བཞིན་དུ་རྡོ་རྗེ་རིགས་སུ་ཡང་གསང་བའི་དཀྱིལ་འཁོར་དུ་མཆོད་པ་རྣམ་པ་བཅུ་དྲུག་དང་རྣམ་པ་བརྒྱད་དུ་གསུངས་སོ། །དེ་ལྟ་བུ་ལ་

སོགས་པ་ཡི། །མཆོད་པ་ཐམས་ཅད་རབ་བྱས་ན། །དགེ་བ་ཡི་ནི་ཆོས་རྣམས་ཀྱི། །ཚོགས་ནི་རྣམ་པར་འཕེལ་འགྱུར་ཏེ། །ཞེས་བྱ་བ་སྟེ་དགེ་བའི་ཆོས་རྣམས་ཀྱི་ཕུང་པོ་འཕེལ་བར་འགྱུར་ཞེས་བྱ་བའི་དོན་ཏོ། །དེ་ནས་ཚོགས་ནི་འགྲུབ་པར་འགྱུར། །ཞེས་བྱ་བ་ནི་ཚོགས་ཡོངས་སུ་རྫོགས་པར་
གྱུར་ན་འགྲུབ་པར་འགྱུར་ཞེས་བྱ་བའི་དོན་ཏོ། །ད་ནི་ཕྱག་རྒྱའི་ཚོགས་ཀྱི་དངོས་གྲུབ་ཀྱི་རྒྱུད་སྟོན་ཏེ། ཕྱག་རྒྱ་རྣམས་ཀྱི་ཚོགས་ཀྱིས་འགྲུབ་པ་རྒྱུད་གང་དུ་སྟོན་པ་དེ་ལ་ཕྱག་རྒྱའི་ཚོགས་ཀྱི་དངོས་གྲུབ་ཀྱི་རྒྱུད་སྟོན་ཏོ། །ཇི་ལྟ་ཞེ་ན། འཁོར་ལོ་མང་པོ་ཞུགས་པ་དང་། །དཀྱིལ་འཁོར་མང་པོ་བྲི་བའི་ཕྱིར། །
ཞེས་བྱ་བ་གསུངས་ཏེ། འཁོར་ལོ་མང་པོར་ཞུགས་པ་ནི་དཀྱིལ་འཁོར་མང་པོར་འཇུག་པ་སྟེ་རྒྱུད་ལས་གསུངས་པའི་གསང་ཞིང་སྦ་བའི་དངོས་གྲུབ་དང་ཕྱག་རྒྱ་བཞིའི་དངོས་གྲུབ་ཐོབ་པར་འདོད་པ་དང་། ཇི་ལྟར་གསུངས་པའི་དངོས་གྲུབ་རྣམས་ཐོབ་པར་འདོད་པས། རྟོག་པ་ཐམས་ཅད་དུ་གཏོགས་པའི་དཀྱིལ་
འཁོར་ཐམས་ཅད་དུ་འཇུག་པར་བྱའོ། །གང་དཀྱིལ་འཁོར་གང་དུ་འཇུག་པ་དེ་དཀྱིལ་འཁོར་དེ་བསྟན་ཅིང་དངོས་གྲུབ་དེ་ཡང་བསྟན་པར་བྱའོ། །གལ་ཏེ་གསང་ཞིང་སྦ་བར་འཛིན་པར་ནུས་པ་ཞིག་ན་གསང་ཞིང་སྦ་བའི་མན་ངག་སྦྱིན་པར་བྱའི་གཞན་དུ་ནི་མ་ཡིན་ནོ། །དེ་ལྟར་ཅི་མངོན་ཞེ་ན་གང་གི་ཕྱིར་དཀྱིལ་འཁོར་
རེ་རེ་ཞིང་ཡང་མནའི་སྙིང་པོ་རེ་རེ་བྱིན་ཏེ་གསང་ཞིང་སྦ་བའི་ལུང་དབོག་པར་བྱའོ་ཞེས་སྨོས་པའི་ཕྱིར་རོ། །གཞན་དུ་ན་དཀྱིལ་འཁོར་གཅིག་ཏུ་ཞུགས་པ་ཁོ་ནས་རྒྱུད་མ་ལུས་པའི་དོན་ཐོབ་པར་རུང་བ་ཡིན་ནོ་ཞེ་ན་དེས་ནི་མ་རྟོགས་པ་ཡིན་ཏེ། དེ་ལྟར་ཅི་མངོན་ཞེ་ན། གང་གི་དོན་དུ་མནའི་སྙིང་པོ་བྱིན་ནས་གདོང་
གསང་ཞིང་སྦ་བ་སྟོན་ཏོ། །དེ་ལྟ་བས་ན་དཀྱིལ་འཁོར་རེ་རེར་ཞུགས་ཤིང་མཉན་དགོས་པ་དང་མན་ངག་ཀྱང་གསོལ་བ་གདབ་པར་བྱ་དགོས་པར་མངོན་ནོ། །གཞན་ཡང་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཐམས་ཅད་དུ་འཇུག་པ་གསལ་བ་ཁོ་ན་གསུངས་པ་དང་། འདིར་ཡང་ཁོ་བོ་ཅག་གི་རྟོག་
པ་རེ་རེ་ཞིང་དཀྱིལ་འཁོར་ཆེན་པོར་ཞུགས་པ་ན་ཕྱག་རྒྱ་ཆེན་པོ་འགྲུབ་པ་དང་། དམ་ཚིག་གི་དཀྱིལ་འཁོར་དུ་ཞུགས་པས་དམ་ཚིག་གི་ཕྱག་རྒྱ་དང་། ཆོས་ཀྱི་དཀྱིལ་འཁོར་དུ་ཞུགས་པས་ཆོས་ཀྱི་ཕྱག་རྒྱ་དང་། ལས་ཀྱི་དཀྱིལ་འཁོར་དུ་ཞུགས་པས་ལས་ཀྱི་ཕྱག་རྒྱ་རྣམས་འགྲུབ་པོ་ཞེས་བཤད་པ་ཡིན་ལ། ཕྱག་རྒྱ་

བཞིའི་དཀྱིལ་འཁོར་ནི་དམ་ཚིག་གི་ཕྱག་རྒྱ་བསྒྲུབ་པ་དང་། དཀྱིལ་འཁོར་གྱི་ཡོ་བྱད་མི་འབྱོར་པ་དང་།རི་མོའི་ལས་མི་མཁས་པ་རྣམས་ཀྱི་ཕྱིར་རོ། །ཕྱག་རྒྱ་གཅིག་པའི་དཀྱིལ་འཁོར་ཡང་དེ་དང་འདྲ་སྟེ་ཕྱག་རྒྱ་ཆེན་པོའི་དཀྱིལ་འཁོར་དུ་བསྒྲུབ་པས་ཆོ་ག་འདི་དག་བྱའོ། །དེ་ལྟར་ཡང་དག་པར་དམ་ཚིག་འདོད་པ་རྣམས་
ཀྱིས་དཀྱིལ་འཁོར་ཐམས་ཅད་དུ་ཡང་འདི་བཞིན་དུ་འཇུག་པར་བྱའོ། །དེ་ལྟར་ན་འཁོར་ལོ་མང་པོར་ཞུགས་པ་དང་། དཀྱིལ་འཁོར་མང་པོ་བྲིས་པ་ཡིན་ཏེ་དཀྱིལ་འཁོར་མང་པོ་རྣམས་ཀྱི་རྟོག་པ་ཡིན་པས་ན་དཀྱིལ་འཁོར་མང་པོ་བྲི་བར་བྱ་སྟེ། རྒྱུད་འདིར་གྲགས་པ་ཉི་ཚེ་བྲི་བར་མ་ཟད་ཀྱི་རྒྱུད་གཞན་དག་ལས་
བྱུང་བ་རྣམས་ཀྱང་ཅི་ནུས་སུ་བྲིས་ན་ཚོགས་ཡོངས་སུ་རྫོགས་པར་འགྱུར་རོ། །ཚོགས་ཡོངས་སུ་རྫོགས་ན་ཕྱག་རྒྱ་རྣམས་ཀྱི་དངོས་གྲུབ་ཆེན་པོ་ཐོབ་པར་འགྱུར་རོ། །ད་ནི་སྔགས་ཀྱི་ཚོགས་ཀྱི་དངོས་གྲུབ་ཀྱི་རྒྱུད་སྟོན་ཏེ། སྔགས་རྣམས་ཀྱི་ཚོགས་ཀྱིས་འགྲུབ་པ་རྒྱུད་གང་དུ་སྟོན་པ་དེ་སྔགས་ཀྱི་ཚོགས་ཀྱི་དངོས་གྲུབ་ཀྱི་རྒྱུད་དོ། །ཇི་ལྟར་ན་
སྔགས་ཀྱི་ཚོགས་ཡོངས་སུ་རྫོགས་པར་འགྱུར་ཞེ་ན། རྗེས་སུ་ཡིད་རང་ལ་སོགས་ཚུལ། །ཞེས་བྱ་བ་སྟེ་སོགས་ཞེས་བྱ་བ་སྨོས་པས་ནི་བསྐུལ་བ་དང་གསོལ་བ་གདབ་པ་ལ་སོགས་པ་གཟུང་ངོ་། །དེ་བཞིན་དམ་པའི་ཆོས་བཀླགས་དང་། །ཞེས་པ་ནི་ཟབ་ཅིང་རྒྱ་ཆེ་བའི་མདོ་སྡེ་རྣམས་བཀླགས་པས་སོ། །
བཟླས་པ་མང་པོ་བྱས་ན་ནི། །ཞེས་བྱ་བ་ནི་བཟླས་བརྗོད་གྲངས་མང་པོ་བྱས་ནའོ། །དེ་ནས་ངེས་པར་སྔགས་ཀྱི་དངོས་གྲུབ་ཐོབ་པར་འགྱུར་རོ། །ད་ནི་རིག་པའི་ཚོགས་ཀྱི་དངོས་གྲུབ་ཀྱི་རྒྱུད་སྟོན་ཏེ། རིག་པ་རྣམས་ཀྱི་ཚོགས་ཀྱི་དངོས་གྲུབ་ཐོབ་པ་ནི་རྒྱུད་གང་དུ་སྟོན་པ་དེ་ནི་རིག་པའི་ཚོགས་ཀྱི་དངོས་གྲུབ་ཀྱི་རྒྱུད་དོ། །ཇི་
ལྟར་ན་ཚོགས་ཡོངས་སུ་རྫོགས་པར་འགྱུར་ཞེ་ན། མ་རིག་རབ་ཏུ་སྤངས་པ་དང་། །ཞེས་བྱ་བ་སྟེ་མ་རིག་པ་ནི་མི་ཤེས་པའོ། །དེ་རབ་ཏུ་སྤངས་པ་ནི་ཤིན་ཏུ་སྤངས་པས་ན་རབ་ཏུ་སྤངས་པའོ། །དེ་ལྟར་ན་མ་རིག་པ་རབ་ཏུ་སྤངས་པའི་ཕྱིར་དང་སྦྱིན་པའི་ཕ་རོལ་ཏུ་ཕྱིན་པའི་ཚུལ་འདི་ལས་ཚོགས་ཡོངས་སུ་རྫོགས་
པར་འགྱུར་ཏེ། འདི་ཡང་ས་ལ་སོགས་པ་ཡོངས་སུ་འཐོབ་ཅིང་དངོས་གྲུབ་དམ་པའི་ཡུལ་གྱི་ཚོགས་ཡོངས་སུ་རྫོགས་པ་ཡིན་པར་ཤེས་པར་བྱས་ལ་ཚོགས་ཡོངས་སུ་རྫོགས་ནས་ཀྱང་། མྱུར་དུ་དངོས་གྲུབ་འཐོབ་པར་འགྱུར། །ཞེས་བྱ་བ་སྟེ་འདི་ཚོགས་ཡོངས་སུ་རྫོགས་པའི་རྒྱུད་ཡིན་ཏེ་རྟོག་པ་ཐམས་ཅད་

ཀྱི་ཆོ་ག་རྒྱས་པའི་རྒྱུད་རྫོགས་སོ།། །།ད་ནི་རིགས་ཐམས་ཅད་ཀྱི་མཚན་མ་འབྱུང་བའི་ཡེ་ཤེས་ཀྱི་དངོས་གྲུབ་ཀྱི་རྒྱུད་སྟོན་ཏེ། མཚན་མ་ནི་ཕྱག་རྒྱ་སྟེ་ཕྱག་རྒྱ་ཐམས་ཅད་ཀྱི་ནང་ན་དང་པོ་རྡོ་རྗེ་ཡིན་པས་དེའི་ཕྱིར་དེ་ལས་ཇི་ལྟར་རྡོ་རྗེ་འབྱུང་ཞེ་ན་ཞེས་དྲིས་པ་ཡིན་ནོ། །འདིར། དེ་
ཉིད་བཅོམ་ལྡན་སེམས་དཔའ་སྟེ། །ཞེས་བྱ་བ་ལ་སོགས་པས་དེ་སྟོན་ཏོ། །དེ་ཉིད་བཅོམ་ལྡན་ཞེས་བྱ་བ་ནི་རྡོ་རྗེ་སེམས་དཔའི་དབང་དུ་མཛད་ནས་གསུངས་པའོ། །ཅི་ཞིག་གི་ངོ་བོ་ཉིད་ཡིན་ཞེ་ན་འདིར་ཐམས་ཅད་སེམས་ཏེ་ཞེས་བྱ་བས་སྟོན་ཏོ། །འདི་སྐད་སྟོན་ཏེ། གང་སེམས་ཅན་ཐམས་ཅད་ཀྱི་
སེམས་གང་ཡིན་པ་དེ་ཉིད་ལ་རྡོ་རྗེ་སེམས་དཔའ་ཞེས་བྱའོ། །དེ་གང་ལ་རག་ལས་པ་ཡིན་ཞེ་ན། དེའི་ཕྱིར་ཉིད་བདག་པོ་ཞེས་བྱ་བ་གསུངས་སོ། །འདི་སྐད་སྟོན་ཏེ་དེ་ལ་བདག་གམ་སེམས་ཅན་ནམ་དབང་ཕྱུག་གམ་བདག་པོར་གྱུར་པ་གཞན་ཡོད་པ་མ་ཡིན་གྱི་སྐུ་དང་། གསུང་དང་། ཐུགས་རྡོ་རྗེ་ནི་སེམས་དཔའ་
བརྟན་པ་རང་བྱུང་གི་ཞེས་བྱ་བ་གསུངས་ཏེ། དེ་ལྟ་བུའི་སེམས་དེ་ཉིད་སྐུ་དང་གསུང་དང་ཐུགས་སྣང་བ་ཐ་མི་དད་པར་ཡོངས་སུ་བསྒོམས་ན་སྐུ་དང་གསུང་དང་ཐུགས་རྡོ་རྗེར་འགྱུར་རོ། །ནི་ཞེས་བྱ་བའི་སྒྲ་ནི་ཉིད་ཅེས་བྱ་བའི་དོན་ཏོ། །དེ་ཉིད་ལེགས་པར་བསྒོམས་ན་སེམས་དཔའ་བརྟན་པ་ཞེས་བྱ་བའོ། །གང་གི་ཞེ་
ན་རང་བྱུང་གི་ཞེས་བྱའོ། །སེམས་དཔའ་ཀུན་གྱི་ནང་ན་སེམས་དཔའ་མཆོག །ཅེས་ཀྱང་དེ་ཉིད་ལ་བྱའོ། །དེ་ཉིད་ནི་ཡང་། སེམས་དཔའ་རྡོ་རྗེ་སྙིང་གར་རབ་བསྒོམས་ན། །རྡོ་རྗེ་སེམས་དཔའ་ཞེས་གྲགས་ཏེ། །འདི་ལ་རྡོ་རྗེ་རབ་ཏུ་གནས། །ཞེས་བྱ་བ་ནི་ཐུགས་ཀའི་ཟླ་བའི་དཀྱིལ་འཁོར་གྱི་
སེམས་དཔའི་སྟེང་ན་རྡོ་རྗེའི་གཟུགས་སུ་གནས་པས་ན་ཐུགས་རྡོ་རྗེ་ལ་གནས་སོ་ཞེས་བྱ་བའི་དོན་ཏོ། །དེ་ཉིད་སངས་རྒྱས་རྣམས་ཀྱི་ནི། །ཡེ་ཤེས་ཚུལ་ཏེ་མཉམ་མེད་འོད། །ཅེས་བྱ་བ་ལ་དེ་ཉིད་ཅེས་བྱ་བ་ནི་རྡོ་རྗེ་སེམས་དཔའོ། །ཡེ་ཤེས་ཚུལ་ཏེ་ཞེས་བྱ་བ་ནི་ཡེ་ཤེས་ཀྱི་ཁྱད་པར་མངོན་པར་འདུས་
བྱས་པའོ། །སུ་ཞིག་གི་ཡེ་ཤེས་ཀྱི་ཚུལ་གྱིས་ཤེ་ན། སངས་རྒྱས་རྣམས་ཀྱི་མཉམ་མེད་འོད། །ཅེས་བྱ་བ་སྟེ་མཚུངས་པ་མེད་པའི་གཟི་མདངས་གང་ལ་མངའ་བ་དེ་ནི་མཉམ་མེད་འོད་དོ། །དེ་རྣམས་ཀྱི་ཡེ་ཤེས་ཀྱི་ཁྱད་པར་དེ་ལྟ་བུ་ནི་སྙིང་ལས་ཀྱང་སྣ་ཚོགས་པའི་གཟུགས་སུ་འབྱུང་ཞིང་། སྣ་ཚོགས་པའི་

གཟུགས་ཅན་དུ་ཡང་འགྱུར་བ་ཡིན་ཏེ། ལྷ་ཡུལ་ས་དང་རླུང་དང་མཁའ། །རྒྱ་མཚོ་ཆུ་བོའི་ཕྱོགས་རྣམས་ནི། །ཞེས་བྱ་བ་ལ་སོགས་པ་སྣ་ཚོགས་པའི་གཟུགས་སུ་འགྱུར་བ་དང་། གཏོགས་འདོད་རྒྱལ་འདོད་ཐུབ་པ་ཆེ། །ཞེས་བྱ་བ་ལ་སོགས་པའི་གཟུགས་སུ་འགྱུར་བའོ། །ཁམས་ཀུན་གྱི་ནི་
རྡུལ་སྙེད་དུ། །དེ་དག་ཉིད་ནི་རྒྱལ་བ་ཡིན། །ཞེས་བྱ་བ་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་གྲངས་ཇི་སྙེད་ཡོད་པ་དེ་སྙེད་ཀྱི་དེ་བཞིན་གཤེགས་པའི་གཟུགས་སུ་འགྱུར་རོ་ཞེས་བྱ་བའི་དོན་ཏོ། །རྡོ་རྗེའི་སྐུ་ནི་དེ་རྣམས་ལས། །རྡོ་རྗེ་སེམས་དཔར་ཡང་དག་འགྱུར། །ཞེས་བྱ་བ་ནི་འཇིག་རྟེན་གྱི་
ཁམས་ཐམས་ཅད་ཀྱི་རྡུལ་ཕྲ་རབ་ཀྱི་གྲངས་དང་མཉམ་པའི་རྡོ་རྗེའི་སྐུ་སྟེ་དེ་བཞིན་གཤེགས་པའི་སྐུ་རྣམས་ལས་སོ། །ནི་ཞེས་བྱ་བའི་སྒྲ་ནི་ཉིད་ཅེས་བྱ་བའི་དོན་ཏེ་དེ་རྣམས་ཉིད་ལས་རྡོ་རྗེ་སེམས་དཔར་འགྱུར་བའོ། །དུས་གང་གི་ཚེ་ཞེ་ན་དཀྱིལ་འཁོར་སྤྲུལ་པའི་དུས་ནའོ། །སྔ་མ་ནི་རང་གི་ལྷའི་རྣལ་
འབྱོར་བྱེད་པའི་དུས་སུ་བསྟན་པ་ཡིན་པས་ན་བྱེ་བྲག་ནི་དེ་ཡོད་དོ། །སེམས་དཔའ་དང་པོ་དེ་ཉིད་ལས། །མཚན་མ་ཐམས་ཅད་ཡང་དག་འབྱུང་། །ཞེས་བྱ་བ་ནི་དཀྱིལ་འཁོར་སྤྲུལ་པའི་དུས་ཉིད་ན་ལྕགས་ཀྱུ་ལ་སོགས་པའི་མཚན་མ་ཐམས་ཅད་རིམ་གྱིས་འབྱུང་བའོ། །མཚན་མ་ལས་ཀྱང་སེམས་དཔའ་ཆེ། །
ཞེས་བྱ་བ་ནི་མདོར་བསྡུས་ནས་བསྟན་པ་ཡིན་ཏེ་མཚན་མ་ལས་ནི་འོད་ཟེར་རྣམས་སོ། །འོད་ཟེར་ལས་ནི་སངས་རྒྱས་ཀྱི་སྐུའོ། །དེ་ལས་ནི་སེམས་དཔའ་ཆེན་པོའོ། །དེ་རྣམས་ལས་ཀྱང་། དེ་ལས་ཚུལ་འདི་ཐམས་ཅད་འབྱུང་། །ཞེས་བྱ་བ་སྟེ་ཚུལ་ནི་སྔགས་སྤྱོད་པའི་ཚུལ་ནི་འདི་ཡིན་ནོ་ཞེས་བྱ་བའི་དོན་ཏོ། །
ད་ནི། གང་གིས་འདི་ནི་ཐོས་གྱུར་ལ། །ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་འབྱུང་བའི་ཡེ་ཤེས་ཀྱི་ཆོ་ག་རྒྱས་པ་འདི་མཉན་པ་དང་། དད་པ་དང་འཛིན་པ་དང་བསྒོམས་པ་རྣམས་ཀྱི་ཕན་ཡོན་སྟོན་ཏེ། ཐོས་གྱུར་ལ་ཞེས་བྱ་བ་ནི་མཉན་པ་སྟོན་ཏོ། །དད་ཅིང་ཞེས་བྱ་
བ་ནི་མངོན་པར་འདོད་པའོ། །འཛིན་བྱེད་ཅིང་ཞེས་བྱ་བ་ནི་ཁ་ཏོན་དུ་བྱས་ཏེ་འཛིན་པའོ། །སྙིང་གར་ཡང་རྟག་ཏུ་དགའ་བས་བསྒོམས་ན་ནི་ཞེས་བྱ་བ་སྒོམ་པའི་གང་ཟག་གིས་སོ། །དེ་ནི་མྱུར་དུ་གྲུབ་པ་ཐོབ། །ཅེས་བྱ་བ་ནི་དེས་སངས་རྒྱས་ཀྱིས་མྱུར་དུ་འཐོབ་པར་འགྱུར་རོ་ཞེས་བཅོམ་ལྡན་འདས་རྡོ་རྗེ་སེམས་

དཔས་གསུངས་སོ། །ད་ནི་རྟོག་པ་ཐམས་ཅད་འབྱུང་བའི་ཡེ་ཤེས་ཀྱི་ཆོ་ག་རྒྱས་པའི་རྒྱུད་སྟོན་ཏེ། ཡེ་ཤེས་གང་གིས་རྟོག་པ་ཐམས་ཅད་འབྱུང་བར་འགྱུར་བ་དེ་ནི་རྟོག་པ་ཐམས་ཅད་འབྱུང་བའི་ཡེ་ཤེས་སོ། །དེའི་ཆོ་ག་རྒྱས་པ་ནི་རྣམ་པར་རྒྱས་པའོ། །འདི་རྒྱུད་གང་དུ་སྟོན་པ་དེ་ནི་
རྟོག་པ་ཐམས་ཅད་འབྱུང་བའི་ཡེ་ཤེས་ཀྱི་ཆོ་ག་རྒྱས་པའི་རྒྱུད་ཅེས་བྱའོ། །དེ་ལས་ཀྱང་དང་པོ་ཁོ་ནར་སངས་རྒྱས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་རྟོག་པ་འབྱུང་བའི་ཡེ་ཤེས་ཀྱི་རྒྱུད་སྟོན་ཏེ། རྟོག་པ་མེད་པའི་ཡེ་ཤེས་རྟག་པ་ཉིད་འགྱུར་བས་ཞེས་བྱ་བ་ལ།
རྣམ་པར་རྟོག་པའི་སྤོ་པས་བ་ཐམས་ཅད་དུ་རྟོག་པ་དང་བྲལ་བ་ལས། རྣམ་པར་མི་རྟོག་པའི་ཡེ་ཤེས་སུ་གྱུར་པ་ནི་སངས་རྒྱས་རྣམས་ཀྱི་ཡེ་ཤེས་རྟག་པར་གནས་པ་ཡིན་ནོ། །རྣམ་པར་མི་རྟོག་པའི་ཡེ་ཤེས་དེ་ལ་རྣམ་པ་སྣ་ཚོགས་དུ་མར་བརྟགས་པའི་ཕྱིར་ན་རྟོག་པ་ཞེས་བྱའོ། །འདི་སྐད་སྟོན་ཏེ།
རྣམ་པར་མི་རྟོག་པའི་ཡེ་ཤེས་ལས་བརྟག་པ་ཡིན་པའི་ཕྱིར་རྟོག་པ་ཞེས་བྱའོ། །འདིས་ཀྱང་འདི་སྐད་སྟོན་ཏེ། མི་རྟོག་པའི་ཡེ་ཤེས་ལས་ཕྱག་རྒྱ་དང་དཀྱིལ་འཁོར་དང་རྟོག་པའི་ཡེ་ཤེས་རྣམས་འབྱུང་བ་ཡིན་ནོ་ཞེས་བྱ་བའི་དོན་ཏོ། །དེ་ནི་མི་རྟོག་ཅེས་བྱ་བ་ལ་སོགས་པས་དེ་བཞིན་གཤེགས་པའི་
རིགས་ཀྱི་རྟོག་པ་འབྱུང་བ་ཡེ་ཤེས་ཀྱི་རྒྱུད་སྟོན་ཏོ། །མི་རྟོག་གང་ལ་བདག་ཉིད་དུ། །ཞེས་བྱ་བ་ནི་འདི་ལ་རྟོག་པ་འབྱུང་བ་མེད་པའོ། །དེ་ལྟ་ན་ནི་བརྟག་པ་འདི་ལ་འཇུག་ཟིན་ཀྱང་འབྱུང་བར་འགྱུར་རམ་ཞེ་ན་འགྱུར་ཏེ་འདི་ཉིད་ནི་མི་རྟོག་པ་ཡིན་པའི་ཕྱིར་རོ། །རྟོག་བདག་ཉིད་ནི་རྟོག་པའི་རང་
བཞིན་ཏེ་གང་ལས་གདོན་མི་ཟ་བར་དངོས་གྲུབ་འདི་བརྟགས་ཤིང་རྣམ་པར་གཞག་ལ། རྟོག་ལས་བྱུང་བ་ཞེས་བྱ་བ་ལ་རྟོག་པ་ནི་ཏིང་ངེ་འཛིན་གྱི་རྗེས་ལས་ཐོབ་པའི་ཡེ་ཤེས་ཡིན་ཏེ་དེ་ལས་བྱུང་བ་གང་ཡིན་པ་དེ་ནི་རྟོག་པ་ལས་བྱུང་བའོ། །རྡོ་རྗེ་སེམས་དཔའ་སེམས་དཔའ་ཆེ། །དེ་ཕྱིར་རྟོག་པ་ཞེས་
བརྗོད་དོ། །ཞེས་བྱ་བ་ནི་བརྟགས་པའི་ཕྱིར་ན་རྟོག་པ་ཞེས་བྱའོ། །འདིས་ནི་འདི་སྐད་སྟོན་ཏེ་རྟོག་པ་ཐམས་ཅད་ཀྱི་ནང་ན་གཙོ་བོ་ནི་ཕྱག་རྒྱ་ཆེན་པོ་ཡིན་ལ། །ཕྱག་རྒྱ་ཆེན་པོ་ཐམས་ཅད་བསྡུས་ཏེ་བཞུགས་པ་ནི་རྡོ་རྗེ་སེམས་དཔའ་ཡིན་པས་ན། རྡོ་རྗེ་སེམས་དཔའ་སེམས་དཔའ་ཆེ། །དེ་ཕྱིར་རྟོག་པ་ཞེས་

བརྗོད་དོ། །ཞེས་བྱའོ། །དེ་ནི་ཆོ་ག་བཞིན་དུ་ཞེས་བྱ་བ་ལ་སོགས་པས་རྡོ་རྗེའི་རིགས་ཀྱི་རྟོག་པ་འབྱུང་བའི་ཡེ་ཤེས་ཀྱི་རྒྱུད་སྟོན་ཏེ། ཆོ་ག་བཞིན་དུ་རི་མོ་བྲིས། །རྟོག་པ་གྲུབ་བཞིན་ཞེས་རྟོག་པ། །ཞེས་བྱ་བ་ལ། རི་མོ་བྲིས་ཞེས་བྱ་བས་ནི་དཀྱིལ་འཁོར་གྱི་ལས་སྟོན་ཏོ། །ཆོ་ག་བཞིན་དུ་རྟོག་པ་ཞེས་བྱ་བ་
འདིས་ནི་སློབ་དཔོན་གྱི་ལས་ལ་སོགས་པ་སྟོན་ཏོ། །ཆོ་ག་དེ་ཇི་ལྟ་བུ་ཡིན་ཞེ་ན། གྲུབ་སྦྱིན་ཞེས་རྟོག་པ་ཞེས་བྱ་བ་གསུངས་སོ། །འདིའི་ངེས་པའི་ཚིག་བསྟན་པ་ནི་དེའི་ཕྱིར་རྟོག་པ་ཞེས་གསུངས་སོ་ཞེས་བྱ་བ་སྟོན་ཏོ། །སུ་ཞིག་གིས་གསུངས་ཤེ་ན། རྟོག་དང་བྲལ་བའི་བདག་ཉིད་ཀྱིས། །ཞེས་བྱ་བ་
གསུངས་ཏེ། རྣམ་པར་རྟོག་པ་དང་བྲལ་བའི་ཐུགས་གང་ལ་མངའ་བ་དེ་ནི་རྟོག་པ་དང་བྲལ་བའི་བདག་ཉིད་དེ་སངས་རྒྱས་བཅོམ་ལྡན་འདས་ཞེས་བྱ་བའི་དོན་ཏོ། །ད་ནི་པདྨོའི་རིགས་ཀྱི་རྟོག་པ་འབྱུང་བའི་ཡེ་ཤེས་ཀྱི་རྒྱུད་སྟོན་ཏེ་ཡེ་ཤེས་གང་ལས་རྟོག་པ་འབྱུང་བ་དེ་སྟོན་པའི་རྒྱུད་ཡིན་པས་ན་རྟོག་པ་འབྱུང་
བའི་ཡེ་ཤེས་ཀྱི་རྒྱུད་དོ། །རྟོག་པ་ལས་ནི་འདོད་ཆགས་འབྱུང་། །པདྨོ་ལ་ནི་དེ་གནས་ཏེ། །ཞེས་བྱ་བ་ལ་ཞེན་པའི་བདག་ཉིད་ཡིན་པས་ན་འདོད་ཆགས་ཏེ་སེམས་ཅན་སྨིན་པ་དང་གྲོལ་བའི་འདོད་ཆགས་སོ། །དེ་ཡང་རྣམ་པར་རྟོག་པ་ལས་འབྱུང་ངོ་། །རྟོག་པ་དེ་གང་ཞེ་ན། ཀྱེ་མའོ་སེམས་ཅན་འདི་དག་ནི་
སྡུག་བསྔལ་བའོ་ཞེས་པའོ། །དེ་ཡང་པདྨོ་ལ་གནས་པ་སྟེ་པདྨོ་ནི་བཅོམ་ལྡན་འདས་འཇིག་རྟེན་དབང་ཕྱུག་དང་དེའི་ཕྱག་རྒྱའོ། །དེ་ཕྱིར་རྟོག་པ་ལ་གནས་པ། །གྲུབ་པ་ཉིད་དུ་དེ་འགྱུར་རོ། །ཞེས་བྱ་བ་ནི་འཇིག་རྟེན་དབང་ཕྱུག་གི་པདྨོའི་ཕྱག་རྒྱའི་འདོད་ཆགས་ལ་རྟོག་པ་དེ་ལས་རྟོག་པ་ལ་གནས་པའི་དངོས་གྲུབ་
ཏུ་འགྱུར་བས་ཕྱག་རྒྱ་ལ་ཆགས་པར་འགྱུར་བ་ཞེས་བྱའོ་ཞེས་སྟོན་པ་ཡིན་ནོ། །ད་ནི་རྟོག་པ་མེད་པའི་ཞེས་བྱ་བ་ལ་སོགས་པའི་དཔེས་ནོར་བུའི་རིགས་ཀྱི་རྟོག་པ་འབྱུང་བའི་ཡེ་ཤེས་ཀྱི་རྒྱུད་སྟོན་ཏེ། རྟོག་པ་མེད་པའི་ནོར་བུ་ནི། །ཞེས་བྱ་བ་ནི་དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ནི་རྟོག་པ་མེད་མོད་ཀྱི་འོན་
ཀྱང་སེམས་ཅན་ཐམས་ཅད་ཀྱི་ཡིད་ལ་རེ་བ་རྣམས་ཡོངས་སུ་རྫོགས་པར་བྱེད་དོ། །དངོས་གྲུབ་ཀྱང་དེ་དང་འདྲ་བར་ཤེས་པར་བྱ་སྟེ་འདིས་ནི་དཔེས་མཚོན་པའི་དོན་སྟོན་ཏོ། །རྣམ་པར་མི་རྟོག་ཡེ་ཤེས་ལས། །ལྷ་རྫས་དངོས་གྲུབ་འབྱུང་བར་འགྱུར། །ཞེས་བྱ་བ་ནི་རྣམ་པར་མི་རྟོག་པའི་ཡེ་ཤེས་བསྒོམས་པའི་

མཐུ་ལས་ལྷའི་དངོས་གྲུབ་དམ་པ་རབ་ཏུ་འབྱུང་བར་འགྱུར་རོ་ཞེས་བཅོམ་ལྡན་འདས་རྡོ་རྗེ་འཛིན་པས་གསུངས་སོ། །ད་ནི་རྟོག་པ་ཐམས་ཅད་ཀྱི་སྙིང་པོ་འབྱུང་བའི་ཡེ་ཤེས་ཀྱི་རྒྱུད་སྟོན་ཏོ། །ཡེ་ཤེས་གང་གིས་རྟོག་པ་ཐམས་ཅད་ཀྱི་སྙིང་པོ་རྣམས་འབྱུང་བ་གང་ཡིན་པ་རྒྱུད་
གང་དུ་སྟོན་པ་གང་ཡིན་པ་དེ་ནི་རྟོག་པ་ཐམས་ཅད་འབྱུང་བའི་ཡེ་ཤེས་ཀྱི་རྒྱུད་དོ། །ཡིད་ཀྱི་འདོད་པའི་ཆོ་ག་ཡིས། །ཡིད་ཀྱི་འདོད་པ་འགྲུབ་འགྱུར་ཏེ། །ཞེས་བྱ་བ་ལ་ཡིད་ཀྱི་འདོད་པའི་ཆོ་ག་ནི་རྣམ་པ་གང་དང་གང་གིས་ཏིང་ངེ་འཛིན་གང་དང་གང་ཡིད་ལ་ཐོབ་པ་དེ་དང་དེ་ནི་ཡིད་ཀྱི་འདོད་
པའི་ཆོ་ག་ཞེས་བྱའོ། །ཡིད་ཀྱིས་འདོད་པ་འགྲུབ་འགྱུར་ཏེ། །ཞེས་བྱ་བ་ལ་ཡིད་ཀྱིས་འདོད་པ་མངོན་པར་འདོད་པ་ཇི་ལྟར་མངོན་པར་འདོད་པ་བཞིན་དུ་འགྲུབ་པ་སྟེ། དེ་ཡང་ཏིང་ངེ་འཛིན་གྱིས་འགྲུབ་སྟེ་ཡིད་ལ་འདོད་པའི་དོན་ཏིང་ངེ་འཛིན་གྱིས་འགྲུབ་པའི་ཕྱིར་ཏིང་ངེ་འཛིན་སྒྲུབ་པ་ཞེས་བྱ་བ་ལ་
དེ་བསྐུལ་བའི་སྒྲ་ཡང་ཏིང་ངེ་འཛིན་སྒྲུབ་པ་ཞེས་བྱའོ། །དེ་ཡང་སྙིང་ལ་གནས་ཞེས་བྱ་བ་ནི་ཐུགས་ལ་གནས་ཞེས་བྱའོ། །དེ་ལྟར་ཐུགས་ལ་གནས་པ་དེའི་ཕྱིར་སྙིང་པོ་ཞེས་བརྗོད་དོ་ཞེས་བྱ་བ་ཡིན་ནོ། །འདི་སྐད་སྟོན་ཏེ། གང་མངོན་པར་འདོད་པའི་དོན་དེ་སྙིང་ལ་ཇི་སྲིད་སྐམ་པ་དེ་སྲིད་དུ་མངོན་པར་
འདོད་པའི་དོན་རབ་ཏུ་སྒྲུབ་པར་བྱེད་དོ། །དེ་སྐུལ་བར་བྱེད་པའི་སྒྲ་དེ་ཡང་བཟླས་པར་གྱུར་ན་རང་གི་དོན་སྙིང་ལ་འཇོག་པར་བྱེད་ཅིང་བསྒོམས་པའི་དོན་དེ་ཡང་གང་དང་གང་གིས་སེམས་ཇི་ལྟ་ཇི་ལྟར་མཉམ་པར་གཞག་པ་དེ་དང་དེའི་ཆོ་གས་བསྒོམ་པར་གྱུར་ན་ཡིད་ལ་འདོད་པ་དེ་རབ་ཏུ་འགྲུབ་པར་འགྱུར་རོ། །
ཡེ་ཤེས་འདི་ནི་ཡང་དག་པར་རྟོགས་པ་ལས་ཀུན་དུ་འབྱུང་བའི་ཡེ་ཤེས་ཞེས་བྱའོ། །ད་ནི་ཕྱག་རྒྱ་འབྱུང་བའི་ཡེ་ཤེས་ཀྱི་རྒྱུད་སྟོན་ཏེ། ཕྱག་རྒྱ་རྣམས་ཀྱི་ཡེ་ཤེས་གང་གིས་འབྱུང་བ་རྒྱུད་གང་དུ་སྟོན་པ་དེ་ནི་ཕྱག་རྒྱ་འབྱུང་བའི་ཡེ་ཤེས་ཀྱི་རྒྱུད་དོ། །ཇི་ལྟར་རྒྱལ་པོའི་ཕྱག་རྒྱའི་མཆོག །ཁྲིམས་ནི་འདའ་
དཀའ་མི་ཕྱེད་བཞིན། །ཞེས་བྱ་བ་ནི་དཔེས་བསྟན་པ་ཡིན་ཏེ་དཀའ་བས་འདའ་བར་བྱ་བ་ཡིན་པས་ན་འདའ་བར་དཀའ་བའོ། །དེ་བཞིན་དུ་སུ་ཞིག་གིས་ཀྱང་གཞིག་པར་མི་ནུས་པའི་ཕྱིར་ན་མི་ཕྱེད་པའོ། །དེ་གང་ཡིན་ཞེ་ན། རྒྱལ་པོའི་ཕྱག་རྒྱ་མཆོག་གི་ཁྲིམས་ཏེ་རྒྱལ་པོས་རྒྱས་འདེབས་པའི་

ཁྲིམས་ཀྱི་མཆོག་ནི་རྒྱལ་པོའི་གཙིགས་ཞེས་བྱ་བའི་དོན་ཏེ་རྒྱལ་པོའི་ཁྲིམས་ནི་ལུང་བསྒོ་བ་ལ་བྱ་སྟེ། བྱ་བ་དང་མི་བྱ་བའི་རྣམས་ཆབས་འོག་གི་འབངས་རྣམས་ཀྱིས་འདའ་བར་མི་བྱེད་པའོ། །དེ་ཡང་སོར་གདུབ་ལ་སོགས་པའི་ཕྱག་རྒྱ་གང་ཡིན་པ་དེ་ནི་མི་ཕྱེད་པ་ཡིན་ཏེ། དེ་ལྟར་འདའ་བར་
དཀའ་ཞིང་མི་ཕྱེད་པའི་ཕྱིར་རྒྱལ་པོས་རྒྱས་འདེབས་པ་ལ་ཁྲིམས་ཞེས་བྱའོ། །དེ་བཞིན་དུ། བདག་ཉིད་ཆེན་པོའི་གཟུགས་བརྙན་གྱི། །མཚན་མ་ཕྱག་རྒྱ་ཞེས་པར་གྲགས། །ཞེས་བྱ་བ་ཡིན་ཏེ་བདག་ཉིད་ཆེན་པོ་ནི་སངས་རྒྱས་དང་བྱང་ཆུབ་སེམས་དཔའ་རྣམས་སོ། །དེའི་གཟུགས་བརྙན་གྱི་
མཚན་མ་ནི་ལག་པ་ལ་སོགས་པ་ཕྱག་རྒྱའི་ཐབས་སུ་བྱེད་པ་ལ་བྱས་ཏེ། སེམས་ཅན་ཕལ་པ་རྣམས་ཀྱིས་ཀྱང་བདག་ཉིད་སངས་རྒྱས་དང་བྱང་ཆུབ་སེམས་དཔའ་དེའི་སྐུར་སྣང་བ་ལ་སོགས་པ་ལྷག་པར་མོས་པར་བྱས་ལ་བདག་ཉིད་དེའི་ང་རྒྱལ་དུ་བསྐྱེད་དོ། །དེའི་ཡོན་ཏན་གྱི་ཚོགས་རྣམས་ཀྱང་ཅི་
ནུས་སུ་བསམས་ན་དེ་ལྟ་བུར་གནས་པ་དེའི་དབང་གིས་དེ་ལ་སུམ་ཅུ་རྩ་གསུམ་པའི་ལྷ་རྣམས་ཀྱིས་ཀྱང་ཕྱག་རྒྱ་དེ་ཕྱེད་པར་མི་ནུས་སོ། །གང་དེས་ཚིག་བརྗོད་པ་དེ་ཡང་དེའི་གསུང་བརྗོད་ལ། དེ་བཞིན་དུ་བདག་ཉིད་ཡིན་པའི་ང་རྒྱལ་བྱས་ན་རྒྱལ་པོའི་ཁྲིམས་བཞིན་དུ་དེ་ལས་འདའ་ནུས་པར་མི་འགྱུར་ཏེ།
ཚུལ་དེ་ལྟ་བུའི་ཡེ་ཤེས་ནི་ཕྱག་རྒྱ་འབྱུང་བའི་ཡེ་ཤེས་ཞེས་བྱའོ། །ད་ནི་འདའ་བར་བྱ་བ་མ་ཡིན་ཞེས་བྱ་བ་ལ་སོགས་པས་སྔགས་འབྱུང་བའི་ཡེ་ཤེས་ཀྱི་རྒྱུད་སྟོན་ཏེ། འདའ་བར་བྱ་བ་མ་ཡིན་ཞིང་། །ཞེས་བྱ་བ་ནི་ངེས་པར་བྱའོ། །དབྱེ་བར་དཀའ་བ་ནི་བསྒྲགས་པར་བྱ་བ་མ་ཡིན་པའོ། །གསང་བ་
ཉིད་ཅེས་བྱ་བ་ནི་འཇིག་རྟེན་ཐམས་ཅད་ཀྱིས་མི་ཤེས་པ་ཉིད་དུ་སྟོན་ཏོ། །གསང་སྒྲུབ་ཕྱིར་ནི་བརྗོད་པས་ན། །ཞེས་བྱ་བ་ནི་དཔེར་ན་རྒྱལ་པོས་བློན་པོ་དང་གྲོས་བྱེད་པ་ཡང་གསང་བར་བྱ་བའི་དོན་འགྲུབ་པར་བྱ་བའི་ཕྱིར་ཡིན་པས་ན་གྲོས་སུ་བརྗོད་པ་ཞེས་པའོ། །དེ་བཞིན་དུ་སངས་རྒྱས་དང་བྱང་
ཆུབ་སེམས་དཔའ་རྣམས་སངས་རྒྱས་དང་བྱང་ཆུབ་སེམས་དཔས་འདུལ་བའི་སེམས་ཅན་རྣམས་རྗེས་སུ་གཟུང་བར་བྱ་བའི་ཕྱིར་གང་འཁོར་གྱི་དཀྱིལ་འཁོར་དུ་ཚུལ་ཁྲིམས་དང་ཏིང་ངེ་འཛིན་དང་ཤེས་རབ་ལ་སོགས་པའི་ཡོན་ཏན་གྱིས་རྗེས་སུ་བསྡུས་པའི་གསུང་བརྗོད་པ་དེ་ལ་སྔགས་ཞེས་བྱ་བ་

ཡིན་ལ། དེ་ཡང་ལྷ་ལ་སོགས་པས་འདའ་བར་བྱ་བ་མ་ཡིན་ཞིང་། བདུད་ཀྱིས་དབྱེ་བར་དཀའ་ལ་ཐམས་ཅད་དུ་བསྒྲགས་པར་བྱ་བ་མ་ཡིན་པས་ན་གསང་བ་ཉིད་ཡིན་ནོ། །གང་དེ་ལྟ་བུའི་ཡེ་ཤེས་དེ་ནི་སྔགས་འབྱུང་བའི་ཡེ་ཤེས་ཡིན་ཏེ་གང་གི་ཕྱིར། དགོས་པ་འགྲུབ་
ཕྱིར་སྒྲོགས་པས་ན། །དེས་ན་སྔགས་ཞེས་བརྗོད་པ་ཡིན། །ཞེས་བྱ་བའོ། །ད་ནི་རིག་པ་འབྱུང་བའི་ཡེ་ཤེས་ཀྱི་རྒྱུད་སྟོན་ཏེ། རིག་པ་རྣམས་ཡེ་ཤེས་གང་ལས་འབྱུང་བ་དེ་ནི་རིག་པ་འབྱུང་བའི་ཡེ་ཤེས་ཏེ། དེ་རྒྱུད་གང་དུ་སྟོན་པ་དེ་ནི་རིག་པ་འབྱུང་བའི་ཡེ་ཤེས་ཀྱི་རྒྱུད་དོ། །མ་རིག་པ་ནི་གཞོམ་
པ་དང་། །ཞེས་བྱ་བ་ནི་མ་རིག་པ་སྤང་བའི་ཕྱིར་རོ། །ངག་གི་རིག་མཆོག་འགྲུབ་པའི་ཕྱིར། །ཞེས་བྱ་བ་ནི་ཚིག་གི་བདག་ཉིད་ཅན་གྱི་རིག་པ་གྲུབ་པའི་ཕྱིར་རོ། །རྟོག་ཅིང་རིག་པའི་དངོས་གྲུབ་སྟེ། །ཞེས་བྱ་བ་ནི་རྟོག་པ་ཁོང་དུ་ཆུད་པའི་དངོས་གྲུབ་སྟེ་ཁོང་དུ་ཆུད་པ་དེས་མ་རིག་པ་སྤངས་ཏེ།
སེམས་ཅན་རྣམས་ཀྱི་དགོས་པ་གྲུབ་པའི་ཕྱིར་ཚིག་ཏུ་བརྗོད་པ་གང་ཡིན་པ་དེའི་ཕྱིར་རིག་པ་ཞེས་བརྗོད་དོ་ཞེས་བཅོམ་ལྡན་འདས་རྡོ་རྗེ་འཛིན་པས་གསུངས་སོ། །ད་ནི་རྟོག་པ་ཐམས་ཅད་ཀྱི་ཡེ་ཤེས་འབྱུང་བའི་རྒྱུད་སྟོན་ཏེ་རྟོག་པ་ཐམས་ཅད་དུ་ཐབས་གང་གིས་ཡེ་ཤེས་འབྱུང་བར་འགྱུར་བ་དེ་ནི་རྟོག་
པ་ཐམས་ཅད་ཀྱི་ཡེ་ཤེས་འབྱུང་བའོ། །ཐབས་འདི་རྒྱུད་གང་དུ་སྟོན་པ་དེ་ནི་རྟོག་པ་ཐམས་ཅད་ཀྱི་ཡེ་ཤེས་འབྱུང་བའི་རྒྱུད་དོ། །དེ་ལས་ཀྱང་དང་པོར་སྙིང་པོའི་ཡེ་ཤེས་སྐྱེ་བའི་རྒྱུད་སྟོན་ཏེ། སྙིང་པོས་ཡེ་ཤེས་ཇི་ལྟར་སྐྱེ་བར་འགྱུར་བ་དེ་སྟོན་ཏོ། །སྙིང་པོ་བཟླས་ཏེ་བདག་གམ་ནི། །གཞན་
ཡང་རུང་སྟེ་བྱུང་བ་དང་། །ཞེས་བྱ་བ་ལ་སོགས་པས་འདི་སྐད་སྟོན་ཏེ། རྡོ་རྗེ་ཕྲ་མོ་སྒོམ་པ་གོམས་པར་བྱས་ནས་ཕྱག་རྒྱ་བཞི་དང་ཡང་དག་པར་ལྡན་པའི་རང་གི་ལྷའི་རྣལ་འབྱོར་བྱས་ལ། དེ་ནས་དེས་བཟླས་པ་བྱ་བའི་སྙིང་པོ་གང་ཡིན་པ་དེ་བརྒྱད་སྟོང་བཟླས་ན་བདེན་པའི་བྱིན་གྱིས་བརླབ་
བྱའོ། །གང་འཇུག་པའམ་བཟློག་པའི་མཚན་ཉིད་ཀྱི་ཆོས་རྣམས་ལས་གང་ལ་ལ་ཞིག་ངེས་པ་ཁོ་ནར་གོམས་པར་བྱ་བ་དེ་དང་དེས་འདི་སྐད་ཅེས་བརྗོད་པར་བྱ་སྟེ་བདག་གིས་ཆོས་འདི་སྐྱེས་ཚུན་ཆད་དམ། སྡོམ་པ་བླངས་ཚུན་ཆད་འཇུག་པའི་མཚན་ཉིད་དམ། ལྡོག་པའི་མཚན་ཉིད་ལེགས་པར་

བཅད་ཅིང་བར་ཆད་མེད་པར་ཉམས་སུ་བླངས་པ་འདིའི་བདེན་པ་དང་། བདེན་པའི་ཚིག་དང་སངས་རྒྱས་ཀྱི་བདེན་པ་དང་ཆོས་ཀྱི་བདེན་པ་དང་དགེ་འདུན་གྱི་བདེན་པ་དང་བདེན་པར་སྨྲ་བ་རྣམས་ཀྱི་བདེན་པས་བདག་གམ་གཞན་ནམ་བྱུང་བ་དང་འབྱུང་བ་དང་། འབྱུང་བར་འགྱུར་བ་གང་ཅུང་ཟད་ཡན་ཆད་
བདག་གིས་ཤེས་པར་འདོད་པ་དེ་བདག་ཉིད་མཉམ་པར་གཞག་པའི་སེམས་དཔའ་འདི་ལ་མཐོང་ཞིང་ཐོས་པ་སྣང་བར་གྱུར་ཅིག་ཅེས་བྱའོ། །དེ་ལྟར་རང་གི་ལྷའི་རྣལ་འབྱོར་གྱི་ཏིང་ངེ་འཛིན་གྱིས་གནས་པར་བྱའོ། །དེ་ནས་དེའི་ཡེ་ཤེས་ལ་དེ་དག་དེ་བཞིན་དུ་མཐོང་བ་དང་ཐོས་པའི་སྣང་བ་སྐྱེ་བར་
འགྱུར་ཏེ་འདི་ནི་སྙིང་པོའི་ཡེ་ཤེས་སོ། །ད་ནི་ཕྱག་རྒྱའི་ཡེ་ཤེས་འབྱུང་བའི་རྒྱུད་སྟོན་ཏེ། ཡིད་ཀྱིས་ཆོ་ག་ཇི་བཞིན་དུ། །ཞེས་བྱ་བ་ནི་སྨྲས་མ་ཐག་པའི་ཆོ་གས་སོ། །གང་ཡང་རུང་བའི་ཕྱག་རྒྱ་བཅིངས། །ཞེས་བྱ་བ་ནི་ཕྱག་རྒྱ་ཆེན་པོ་དང་དམ་ཚིག་གི་ཕྱག་རྒྱ་བཅིང་བའོ། །འཇིག་རྟེན་པ་ལས་
བལྟས་ན་ནི། །ཞེས་བྱ་བ་ནི་མཉམ་པར་གཞག་པའི་ཡིད་ཀྱིས་སོ། །གོང་མ་བཞིན་ཞེས་བྱ་བ་ནི་འདས་མ་ཐག་པ་བཞིན་དུ་ཤེས་པར་བྱའོ། །ཀུན་ཤེས་འགྱུར་ཞེས་བྱ་བ་ནི་མཐོང་བ་དང་ཐོས་པར་འགྱུར་བའོ། །ད་ནི་སྔགས་ཀྱི་ཡེ་ཤེས་འབྱུང་བའི་རྒྱུད་སྟོན་ཏེ། སྔགས་ཀྱི་ཡེ་ཤེས་འབྱུང་བས་ན་
སྔགས་ཀྱི་ཡེ་ཤེས་འབྱུང་བའོ། །ལན་ཅིག་ཙམ་ཡང་སྔགས་བརྗོད་ན། །ཞེས་བྱ་བ་ལ་སོགས་པ་ལ་རང་གི་ལྷའི་རྣལ་འབྱོར་བྱས་ལ་ལན་ཅིག་སྔགས་བརྗོད་པ་ནི་བཟླས་པར་བྱ་བའི་སྔགས་བརྗོད་ན་རང་གི་ལྕེ་ལ་སྨྲ་བར་འགྱུར་རོ། །ཅི་ཞིག་སྨྲ་བར་འགྱུར་ཞེ་ན། དེའི་ཕྱིར། འདས་དང་བྱུང་དང་
འབྱུང་གང་ཡིན། །དེ་དག་ཐམས་ཅད་བདེན་པར་འགྱུར། །ཞེས་བྱ་བ་གསུངས་ཏེ། དེ་ལྟར་ཡིད་ལ་བསྐུལ་བ་རྩེ་གཅིག་ཏུ་བྱས་ནས་ཕྱག་རྒྱ་བཞིའི་རྣལ་འབྱོར་པ་དེས་ཇི་ལྟར་གསོལ་བ་བཏབ་པའི་དོན་དེ་དག་ཐམས་ཅད་སྔགས་ཀྱི་མཐུས་དེའི་ལྕེ་ལ་གསལ་བ་ཉིད་དུ་སྨྲ་བར་འགྱུར་རོ་ཞེས་བཅོམ་
ལྡན་འདས་ཀུན་དུ་སྤྱན་རས་གཟིགས་ཀྱི་དབང་པོས་གསུངས་སོ། །ད་ནི་རིག་པའི་ཡེ་ཤེས་སྐྱེ་བའི་རྒྱུད་སྟོན་ཏེ། རིག་པ་ལན་ཅིག་བརྗོད་ན་ནི། །ཞེས་བྱ་བ་ནི་རང་གི་ལྷའི་རྣལ་འབྱོར་དུ་བྱས་པ་ལ་སོགས་པ་གོང་མ་བཞིན་དུ་བྱས་ནས་ཏིང་ངེ་འཛིན་ལ་གནས་ཏེ་རིག་པ་ལན་ཅིག་བརྗོད་པར་བྱའོ། །

ཡིད་ཀྱིས་དེ་ནི་ཤེས་པར་འགྱུར། །ཞེས་བྱ་བ་ལ་འདིར་ཁྱད་པར་འདི་ཡོད་དེ། སྔ་མ་ནི་ལྕེ་ཉིད་ལས་འདོད་པའི་དོན་སྟོན་པར་བྱེད་པའི་སྒྲ་ཐོས་པར་འགྱུར་ལ། དེ་ལྟར་འདིར་ནི་ཇི་ལྟར་བསམས་པའི་དོན་རྩེ་གཅིག་ཏུ་མཉམ་པར་གཞག་པའི་སེམས་ལ་སྣང་བར་འགྱུར་རོ། །ད་ནི་རིགས་
ཐམས་ཅད་ཀྱི་ཐུན་མོང་པའི་སྐུ་དང་གསུང་དང་ཐུགས་རྡོ་རྗེའི་ཕྱག་རྒྱ་བསྒྲུབ་པའི་རྒྱུད་སྟོན་ཏེ། སྐུའི་ཕྱག་རྒྱ་དང་གསུང་གི་ཕྱག་རྒྱ་དང་ཐུགས་ཀྱི་ཕྱག་རྒྱ་དང་རྡོ་རྗེའི་ཕྱག་རྒྱ་འདི་རྣམས་ཐུན་མོང་དུ་བསྒྲུབ་པའི་རྒྱུད་ཡིན་ནོ། །དེ་ལས་ཀྱང་དང་པོར་དེ་བཞིན་གཤེགས་པའི་གསང་བའི་སྐུའི་ཕྱག་རྒྱ་
བསྒྲུབ་པར་བཤད་དེ། ཇི་ལྟར་དེ་ལྟར་འདུག་ནས་ཀྱང་། །སྐྱིལ་མོ་ཀྲུང་བཅས་ཞེས་བྱ་བ་ནི་སྒྲུབ་པ་པོས་སྐྱིལ་ཀྲུང་གིས་འདུག་པར་བྱ་བ་ལ་སྐྱིལ་མོ་ཀྲུང་ལ་ནི་ངེས་པ་མེད་པས་ན་གང་ཡང་རུང་བའི་སྐྱིལ་མོ་ཀྲུང་དེས་འདུག་པར་བྱའོ། །བསྒྲུབ་པར་བྱ་སྟེ་ཞེས་བྱ་བ་ནི་དངོས་གྲུབ་ཐམས་ཅད་དོ། །ཇི་
ལྟར་རི་མོའི་ཚུལ་བྱས་ན། །ཞེས་བྱ་བ་ནི་སེམས་དཔའ་གང་ཡང་རུང་བའི་ཕྱག་རྒྱ་ཆེན་པོ་བཅིང་ལ་དངོས་གྲུབ་རྣམས་སྒྲུབ་ན་དེ་ལྟ་བུས་འགྲུབ་པར་འགྱུར་རོ་ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་བཞིན་དུ་རྡོ་རྗེའི་རིགས་ལ་ཡང་དངོས་གྲུབ་འདོད་པས་སྤྱིར་གཡོན་བརྐྱང་
པའི་ཚུལ་དུ་གནས་པར་བྱ་ཞིང་ཤིན་ཏུ་ཁྲོས་པར་བྱས་ལ་དེ་ལྟ་བུས་སྒྲུབ་པར་བྱས་ན་ཐེ་ཚོམ་མེད་པར་ཐམས་ཅད་འགྲུབ་པར་འགྱུར་རོ། །པདྨོའི་རིགས་ལ་ཡང་རྡོ་རྗེ་སྐྱིལ་མོ་ཀྲུང་གིས་གནས་པར་བྱ་སྟེ། རྡོ་རྗེ་སྐྱིལ་མོ་ཀྲུང་ནི་སྔར་བཤད་ཟིན་ཏོ། །དེ་ལྟར་སྐྱིལ་མོ་ཀྲུང་གིས་གནས་པས་ན་
སྐྱིལ་མོ་ཀྲུང་བཅས་ལ་ཞེས་བྱའོ། །དེ་ནས་དེའི་སྟེང་དུ། ལག་གཉིས་རྡོ་རྗེ་བཅངས་ནས་ཀྱང་། །ཏིང་ངེ་འཛིན་གྱི་སྐུར་འགྱུར་ལ། །ཞེས་བྱ་བ་ནི་རྡོ་རྗེ་བསྡམས་པའི་ལག་པ་གཉིས་བཀན་ཏེ་བཞག་ལ་ལུས་དྲང་པོར་བསྲངས་ཏེ་གནས་པར་བྱའོ་ཞེས་བྱ་བའི་དོན་ཏོ། །པདྨོ་འབྱུང་བ་བསྒྲུབ་
པར་བྱ། །ཞེས་བྱ་བ་ནི་གང་གི་དོན་དང་ཡེ་ཤེས་པདྨོའི་རིགས་ལས་བྱུང་བ་དེ་ནི་པདྨོའི་འབྱུང་བ་ཞེས་གསུངས་སོ། །ནོར་བུའི་རིགས་ལ་ཡང་ལུས་ཀྱི་གནས་པ་ངེས་པ་མེད་པས་ན་ཇི་ལྟར་འདུག་ཀྱང་རུང་བ་དེ་ལ་རྡོ་རྗེ་རིན་པོ་ཆེས་དབང་བསྐུར་ན་ཐེ་ཚོམ་མེད་པར་འགྲུབ་པར་འགྱུར་རོ། །ད་ནི་ལྕེ་རྩེ་

ཤིན་ཏུ་ཞེས་བྱ་བ་ལ་སོགས་པས་དེ་བཞིན་གཤེགས་པའི་གསང་བའི་གསུང་གི་ཕྱག་རྒྱ་བསྒྲུབ་པའི་རྒྱུད་སྟོན་ཏེ། ལྕེ་རྩེ་ཤིན་ཏུ་མི་བསྒུལ་ཞིང་། །ཞེས་བྱ་བ་ནི་ལྕེའི་རྩེ་མོ་ཤིན་ཏུ་གཡོ་བར་མི་བྱའོ་ཞེས་པའི་དོན་ཏོ། །སོ་དང་མཆུ་གཉིས་སྦྱར་ནས་ནི། །ཞེས་བྱ་བ་ནི་སོ་དང་མཆུ་གཉིས་ཧ་ཅང་
དམ་དུ་མི་སྦྱར་བའོ། །དེ་ལྟ་བུའི་སྒྲ་དང་བྲལ་བའི་རྡོ་རྗེའི་ཚིག་གིས་རྟོག་པ་ཐམས་ཅད་བསྒྲུབ་པར་བྱའོ་ཞེས་པའོ། །ད་ནི་རྡོ་རྗེ་རིགས་ཀྱི་གསང་བའི་གསུང་གི་ཕྱག་རྒྱ་བསྒྲུབ་པའི་རྒྱུད་སྟོན་ཏེ། རྡོ་རྗེ་རིགས་ཀྱི་གསང་བའི་གསུང་གི་ཕྱག་རྒྱ་བསྒྲུབ་པའི་རྒྱུད་གང་དུ་སྟོན་པ་དེ་ནི་རྡོ་རྗེ་རིགས་ཀྱི་གསང་
བའི་གསུང་གི་ཕྱག་རྒྱ་འདི་བསྒྲུབ་པའི་རྒྱུད་དོ། །རྡོ་རྗེའི་རིགས་ཀྱི་གསང་བའི་གསུང་གི་ཕྱག་རྒྱ་འདིའི་མཚན་ཉིད་ཇི་ལྟ་བུ་ཡིན་ཞེ་ན། ཧཱུཾ་ཞེས་བྱ་བ་འབྲུག་ལྟར་སྒྲོགས། །ཁྲོ་བོའི་ངག་ནི་ཟབ་ཅིང་བརྟན། །ཞེས་བྱ་བ་གསུངས་ཏེ། ཁྲོ་བོའི་ཚིག་གང་འབྲུག་སྒྲ་ལྟར་སྒྲོགས་པའི་ཧཱུཾ་ཞེས་བྱ་བ་གང་
ཡིན་པ་དེ་ནི་ཧཱུཾ་ཞེས་བྱ་བ་འབྲུག་ལྟར་བསྒྲགས། །ཁྲོ་བོའི་ངག་ཅེས་བྱའོ། །ཧཱུཾ་ཞེས་བྱ་བ་འབྲུག་ལྟར་བསྒྲགས་པ་ཡང་ཡིན་ལ་ཟབ་པ་ཡང་ཡིན་ཏེ། ཟབ་པ་ནི་ས་འོག་གི་གཏིང་རུམ་ཡན་ཆད་དུ་གྲག་པ་སྙམ་དུ་བྱེད་པའོ། །བརྟན་པ་ནི་ཡུན་རིང་བར་འཇུག་ཅིང་རྗེས་སུ་འབྲེལ་པའོ། །
ཁྲོ་བོ་གསལ་ཞེས་བྱ་བ་འདི་ནི་ཁྲོ་བོས་ཁྱབ་པའི་ཁྲོ་བོ་ཆེན་པོའི་ཚིག་ཡིན་ནོ། །དེ་ལྟར་ཤེས་པར་བྱས་ནས་བརྗོད་ན་འགྲུབ་པར་འགྱུར་རོ་ཞེས་བཅོམ་ལྡན་འདས་རྡོ་རྗེ་ཧཱུཾ་ཞེས་བྱ་བས་གསུངས་སོ། །ད་ནི་པདྨོའི་རིགས་ཀྱི་གསང་བའི་གསུང་གི་ཕྱག་རྒྱ་བསྒྲུབ་པའི་རྒྱུད་སྟོན་ཏེ། དབུགས་མི་འབྱིན་པ་
ལྟར་དབུགས་འབྱིན་པའི་ཚིག་གང་ཡིན་པ་དེ་ནི་ཕྲ་བའི་ཚིག་སྟེ་ཤིན་ཏུ་གསལ་བ་ཡང་དེ་ཉིད་ཡིན་ནོ། །འདི་སྐད་སྟོན་ཏེ། དབུགས་དལ་བ་ཡང་ཡིན་ལ་ཡི་གེ་གསལ་བའི་ཚིག་ཀྱང་ཡིན་པས་ན་ཕྲ་བའི་ཚིག་སྟེ་ཁ་ཅིག་ཏུ་ནི་ཆོས་ཀྱི་ཚིག་ཅེས་ཀྱང་སྟོན་ཏོ། །ཚིག་དེས་ཟློས་པ་པོ་ཀུན་ཞེས་བྱ་སྟེ་
ཆོས་ཀྱི་རིགས་ཀྱི་བཟླས་བརྗོད་བྱེད་པ་ཐམས་ཅད་དོ། །ཇི་ལྟ་བུ་དེས་ཟློས་པ་པོ་འགྲུབ་པར་འགྱུར་ཞེ་ན་དེའི་ཕྱིར། ཏིང་འཛིན་ཡེ་ཤེས་སྙིང་པོ་ཡིས། །ཞེས་གསུངས་ཏེ་ཏིང་ངེ་འཛིན་གྱི་ཡེ་ཤེས་ཡིན་པས་ན་ཏིང་ངེ་འཛིན་ཡེ་ཤེས་སོ། །དེ་ཉིད་གང་གི་སྐྱེ་གནས་ཡིན་པ་དེ་ནི་ཏིང་ངེ་

འཛིན་ཡེ་ཤེས་སྙིང་པོ་སྟེ། སྙིང་པོ་ནི་སྐྱེ་བའི་རྒྱུ་ཡིན་ལ་དེ་ཟློས་པ་པོ་ཀུན་འགྲུབ་པར་འགྱུར་རོ། །དེ་སྐད་སུས་གསུངས་ཤེ་ན། དེའི་ཕྱིར་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་གྱི་ཡེ་ཤེས་ཀྱི་སྙིང་པོས་གསུངས་སོ་ཞེས་བྱ་བ་སྟོན་ཏོ། །འཇིག་
རྟེན་དབང་ཕྱུག་ཅེས་བྱ་བའི་དོན་ཏོ། །ད་ནི་ནོར་བུའི་རིགས་ཀྱི་གསང་བའི་གསུང་གི་ཕྱག་རྒྱ་བསྒྲུབ་པའི་རྒྱུད་སྟོན་ཏེ། ནོར་བུའི་རིགས་ཀྱི་གསང་བའི་གསུང་གི་ཕྱག་རྒྱ་ནི་གསང་བ་ཡིན་ལ་གསུང་གི་ཕྱག་རྒྱ་ཡང་ཡིན་པས་ན་གསང་བའི་གསུང་གི་ཕྱག་རྒྱ་སྟེ། དེ་བསྒྲུབ་པ་རྒྱུད་གང་དུ་སྟོན་པའི་རྒྱུད་དེ་
ནི་གསང་བའི་གསུང་གི་ཕྱག་རྒྱ་བསྒྲུབ་པའི་རྒྱུད་ཅེས་བྱའོ། །གསུང་དེ་ཇི་ལྟ་བུ་ཡིན་ཞེ་ན། ཤིན་ཏུ་ཡོངས་སུ་གསལ་ཚིག་གིས། །རྟག་ཏུ་འདུད་ལས་བརྩོན་བྱེད་ཅིང་། །ཞེས་བྱ་བ་གསུངས་ཏེ། རབ་ཏུ་གསལ་བས་ན་ཤིན་ཏུ་ཡོངས་སུ་གསལ་བ་སྟེ། ཤིན་ཏུ་ཡོངས་སུ་གསལ་བའི་ཚིག་
དེས་རྟག་ཏུ་འདུད་པའི་དམ་པ་ལ་བརྩོན་པར་བྱེད་པའོ། །ཚུལ་ཞེས་བྱ་བ་ནི་སེར་སྣ་ཡོངས་སུ་སྤང་བ་ལ་སོགས་པའི་ཚུལ་གྱིས་སོ། །བཟླས་པར་གྱུར་ན་ནི་ཞེས་བྱ་བ་ནི་ཕྱག་རྒྱ་བཞིའི་ཚུལ་གྱིས་རྒྱུན་མི་འཆད་པར་ཟློས་ཤིང་རྟག་ཏུ་བཟླ་བའོ། །མྱུར་དུ་ཐམས་ཅད་འགྲུབ་པར་འགྱུར། །ཞེས་བཅོམ་ལྡན་
འདས་དེ་བཞིན་གཤེགས་པ་ཐམས་ཅད་ཀྱི་མཆོད་པའི་ཆོ་ག་རྒྱས་པའི་ཕྲིན་ལས་ཀྱིས་གསུངས་སོ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱིར་གཏོགས་པའི་མཆོད་པའི་ཆོ་ག་རྒྱས་པའི་ཕྲིན་ལས་མངའ་བས་ན་དེ་བཞིན་གཤེགས་པ་ཐམས་ཅད་ཀྱི་མཆོད་པའི་ཆོ་ག་རྒྱས་པའི་ཕྲིན་ལས་སོ། །ད་ནི་དེ་
བཞིན་གཤེགས་པའི་རིགས་ཀྱི་གསང་བའི་སེམས་ཀྱི་ཕྱག་རྒྱའི་རྒྱུད་སྟོན་ཏེ། དེ་བཞིན་གཤེགས་པའི་རིགས་ཀྱི་གསང་བ་ཡང་ཡིན་ལ་སེམས་ཀྱི་ཕྱག་རྒྱ་ཡང་ཡིན་པས་ན་དེ་བཞིན་གཤེགས་པའི་རིགས་ཀྱི་གསང་བའི་སེམས་ཀྱི་ཕྱག་རྒྱའོ། །དེ་བསྒྲུབ་པ་རྒྱུད་གང་དུ་སྟོན་པ་དེ་ལ་ཡང་འདི་སྐད་ཅེས་བྱའོ། །
རྟག་ཏུ་འདོད་པ་བཅོམ་ལྡན་འདས། །ཞེས་བྱ་བ་ལ་རྟག་པ་ནི་ཡུན་རིང་བ་སྟེ་རྒྱུན་དུ་གནས་པ་ཞེས་བྱ་བའི་དོན་ཏོ། །འདོད་པ་བཅོམ་ལྡན་འདས་ཞེས་བྱ་བ་ནི་བྱང་ཆུབ་ཀྱི་སེམས་སོ། །སེམས་ཅན་ཐམས་ཅད་བདེ་སྦྱིན་པ། །རྡོ་རྗེ་སེམས་དཔའི་བདག་ཉིད་དུ། །ཞེས་བྱ་བ་ནི་འདི་ལྟ་བུར་བསྒོམས་ན་མྱུར་

དུ་འགྲུབ་པར་འགྱུར། །ཞེས་བཅོམ་ལྡན་འདས་འདོད་པས་གསུངས་སོ་ཞེས་བྱ་བ་སྟེ་རྡོ་རྗེ་སེམས་དཔའ་ཞེས་བྱ་བའི་དོན་ཏོ། །སྔ་མ་ནི་རྡོ་རྗེ་སེམས་དཔའ་ཡིན་པར་ང་རྒྱལ་བསྐྱེད་པ་འབའ་ཞིག་ཏུ་མ་ཟད་ཀྱི་འདི་ནི་རྟོག་པ་དང་སེམས་ཅན་ཐམས་ཅད་ལ་བདེ་བ་སྦྱིན་པ་དང་རྡོ་རྗེ་སེམས་དཔའ་ཡང་བདག་ཡིན་ནོ་
ཞེས་ཁྱད་པར་དུ་འཕགས་པའི་རྡོ་རྗེ་སེམས་དཔར་ང་རྒྱལ་བསྐྱེད་པ་སྟེ་བྱེ་བྲག་ནི་དེ་ཡོད་དོ། །ད་ནི་རྡོ་རྗེ་རིགས་ཀྱི་གསང་བའི་སེམས་ཀྱི་ཕྱག་རྒྱ་བསྒྲུབ་པའི་རྒྱུད་སྟོན་ཏེ། སེམས་ཅན་ཀུན་ཞེས་བྱ་བ་ལ་སོགས་པ་ལ་གདུག་པ་རྣམས་ཀྱིས་གཙེས་པའི་སེམས་ཅན་ཐམས་ཅད་ལ་ཕན་གདགས་པའི་ཕྱིར་ཁྲོ་བོ་
ཆེན་པོར་བྱའོ་ཞེས་བྱ་བ་དང་། སེམས་ཅན་མ་རུངས་པ་རྣམས་ཆད་པས་གཅད་ཅིང་ང་རྒྱལ་གཞོམ་པའི་ཕྱིར་དང་། སངས་རྒྱས་ཀྱི་བསྟན་པ་བསྲུང་བར་བྱ་བའི་ཕྱིར་བདག་ཁྲོ་བོར་བྱའོ་ཞེས་དེ་ལྟ་བུས་ཁྲོ་བོར་བྱེད་ན་ཤིན་ཏུ་ཡང་དངོས་གྲུབ་ཐོབ་པར་འགྱུར་རོ་ཞེས་པའོ། །ད་ནི་པདྨོའི་རིགས་ཀྱི་གསང་
བའི་སེམས་ཀྱི་ཕྱག་རྒྱའི་བསྒྲུབ་པའི་རྒྱུད་སྟོན་ཏེ། ཇི་ལྟར་པདྨོ་ཞེས་བྱ་བ་ལ་སོགས་པས་ནི་དཔེ་སྟོན་ཏེ་རབ་ཆགས་ལ། བསྒོམས་པའི་སྐྱོན་གྱིས་མི་གོས་ལ། །ཞེས་བྱ་བ་ནི་ཇི་ལྟར་པདྨ་དམར་པོ་ཡིན་དུ་ཟིན་ཀྱང་ཆུའི་ཉེས་པས་མི་གོས་པ་བཞིན་དུ་དེ་བཞིན་དེ་དག་ཀྱང་འཁོར་བའི་སྐྱོན་གྱིས་མི་
གོས་པའོ། །སྲིད་ལ་ཆགས་པ་ཞེས་བྱ་བ་ནི་འཁོར་བ་ལ་ཆགས་པ་སྟེ། འདི་ནི་དཔེས་བསྟན་པའི་དོན་ཡིན་པ་དེ་ལྟར་ཤེས་ན་དེ་འགྲུབ་པར་འགྱུར་རོ་ཞེས་བཅོམ་ལྡན་འདས་པདྨོ་འདོད་པས་གསུངས་སོ། །ད་ནི་ནོར་བུའི་རིགས་ཀྱི་གསང་བའི་སེམས་ཀྱི་ཕྱག་རྒྱ་བསྒྲུབ་པའི་རྒྱུད་
སྟོན་ཏེ། ནོར་བུའི་རིགས་ཀྱི་གསང་བའི་སེམས་ཀྱི་ཕྱག་རྒྱ་ཞེས་བྱ་བ་ལ་གཞན་གྱིས་མི་ཤེས་པའི་ཕྱིར་གསང་བའོ། །སེམས་བསྐྱེད་པ་ཉིད་ཕྱག་རྒྱ་ཡིན་པས་ན་སེམས་ཀྱི་ཕྱག་རྒྱ་སྟེ་དེའི་བསྒྲུབ་པ་རྒྱུད་གང་དུ་སྟོན་པ་དེ་ནི་གསང་བའི་སེམས་ཀྱི་ཕྱག་རྒྱ་བསྒྲུབ་པའི་རྒྱུད་ཅེས་བྱའོ། །དེ་ཇི་ལྟ་བུ་ཞེ་ན།
ནམ་ཞིག་སེམས་ཅན་ཐམས་ཅད་ཀྱི། །དགོས་པའི་དོན་ནི་ཀུན་སྒྲུབ་ཅིང་། །རིན་ཆེན་ཆར་ནི་འབེབས་འགྱུར་ཞེས། །གྲུབ་ན་ཞེས་བྱ་བ་གསུངས་ཏེ། དེ་ལྟར་བསམས་ན་དེ་མྱུར་བར་འགྲུབ་པོ་ཞེས་བཅོམ་ལྡན་འདས་ནམ་མཁའི་སྙིང་པོས་གསུངས་སོ། །ད་ནི་དེ་བཞིན་གཤེགས་པའི་རིགས་ཀྱི་

གསང་བའི་རྡོ་རྗེའི་ཕྱག་རྒྱ་བསྒྲུབ་པའི་རྒྱུད་སྟོན་ཏེ། རྡོ་རྗེའི་ཕྱག་རྒྱ་སྨོས་པས་ནི་འདིར་གཡོན་པའི་རྡོ་རྗེ་ཁུ་ཚུར་གཟུང་ངོ་། །ཇི་ལྟར་ལངས་སམ་ཞེས་བྱ་བ་ལ་སོགས་པས་ནི་རྒྱུད་ཀྱི་རྣལ་འབྱོར་སྟོན་ཏོ། །ལག་པ་གཡོན་པ་ཕྱག་རྒྱ་མཆོག །ཅེས་བྱ་བ་ནི་ལག་པ་གཡོན་པའི་རྡོ་རྗེ་
ཁུ་ཚུར་དུ་ཆིངས་ཤིག་ཅེས་བྱ་བའི་དོན་ཏོ། །ཐམས་ཅད་བྱེད་ན་འགྲུབ་པར་འགྱུར། །ཞེས་བྱ་བ་ནི་དགོས་པ་ཐམས་ཅད་བྱེད་བཞིན་དུ་བདུག་པ་ལ་སོགས་པའི་ཡོ་བྱད་ཐམས་ཅད་ཡིད་ཀྱིས་བྱེད་ན་འགྲུབ་པར་འགྱུར་རོ་ཞེས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གསང་བས་གསུངས་སོ་ཞེས་
བྱ་བ་སྟེ། དེ་བཞིན་གཤེགས་པ་ཐམས་ཅད་ཀྱི་གསང་བ་འཛིན་པས་ན་དེ་བཞིན་གཤེགས་པ་ཐམས་ཅད་ཀྱི་གསང་བའོ། །འདི་སྐད་སྟོན་ཏེ། དཀྱིལ་འཁོར་དུ་ཞུགས་ཏེ་དམ་ཚིག་ཐོབ་ནས་རྡོ་རྗེ་ཕྲ་མོ་བསྒོམ་པ་གོམས་པར་བྱས་ནས་རང་གི་ལྷའི་རྣལ་འབྱོར་བྱས་ཏེ། རྡོ་རྗེ་ཁུ་ཚུར་གཡོན་པས་བཅངས་
ལ་གོས་ཀྱིས་བཀབ་ནས་ཤིན་ཏུ་རྩེ་གཅིག་པའི་རྣལ་འབྱོར་གྱིས་ཁྱིམ་གྱི་ལས་ཐམས་ཅད་ཀྱང་བྱེད་ཅིང་འཇིག་རྟེན་གྱི་བྱ་བ་ཐམས་ཅད་བྱེད་བཞིན་དུ་ཡང་ཐ་སྙད་དུ་བྱ་བ་གང་དང་གང་བྱེད་པ་དེ་དང་དེ་རང་གི་ལྷའི་ཏིང་ངེ་འཛིན་དུ་གནས་ལ་ཡིད་ཀྱིས་བདུག་པ་ལ་སོགས་པའི་མཆོད་པ་བྱེད་པ་ན་དེའི་མཚན་མ་
ཐོབ་པར་གྱུར་ནས་སྒྲུབ་པ་ལ་ཞུགས་པར་འགྱུར་ན་འགྲུབ་པར་འགྱུར་རོ་ཞེས་པའོ། །ད་ནི་རྡོ་རྗེ་རིགས་ཀྱི་གསང་བའི་རྡོ་རྗེའི་ཕྱག་རྒྱ་བསྒྲུབ་པའི་རྒྱུད་སྟོན་ཏེ། ཇི་ལྟར་དེ་ལྟར་ཞེས་བྱ་བ་ལ་སོགས་པ་ནི་སྔ་མ་བཞིན་ཏེ། རྡོ་རྗེ་ཁྲོ་བོའི་མཛུབ་མོ་ཞེས་བྱ་བའི་ཁྱད་པར་འབའ་ཞིག་ཏུ་ཁྱད་པར་ཡོད་དུ་
ཟད་ཀྱི། ལག་པ་གཡོན་པའི་བྱ་བ་གཞན་ཐམས་ཅད་ཀྱང་འདྲ་བ་ཡིན་ནོ། །པདྨོའི་རིགས་ལ་ཡང་པདྨོའི་ཁུ་ཚུར་འབའ་ཞིག་ཏུ་ཁྱད་པར་ཡོད་དུ་ཟད་ཀྱི་གཞན་ཐམས་ཅད་ནི་སྔ་མ་བཞིན་ནོ། །རིན་པོ་ཆེའི་རིགས་ལ་ཡང་རིན་པོ་ཆེ་ཁུ་ཚུར་གྱི་ཁྱད་པར་དབྱེ་སྟེ་ལག་པ་གཡོན་པ་ཁུ་ཚུར་བཅངས་ལ་
མཛུབ་མོ་དང་མཐེ་བོ་ནོར་བུར་བྱས་ཏེ་གོས་ཀྱིས་གཡོགས་སོ། །རིམ་གྲོར་ཞེས་བྱ་བ་ནི་ལག་པ་ལེགས་པར་བཀྲུས་ཏེ་ཙནྡན་ལ་སོགས་པས་བྱུགས་ལ་ཁུ་ཚུར་བཅངས་ལ་རིམ་གྲོ་ལེགས་པར་བྱས་པ་ཡིན་ནོ། །ལྷག་མ་རྣམས་ནི་འདྲའོ། །ད་ནི་ཁུ་ཚུར་དེ་དག་ཐམས་ཅད་ཀྱི་ཐུན་མོང་གི་ཕྱག་རྒྱ་

བསྒྲུབ་བའི་རྒྱུད་སྟོན་ཏེ། ཕྱག་རྒྱ་ཆེན་པོའི་ཚུལ་དུ་ནི། །ཞེས་བྱ་བ་ནི་ལས་ཐམས་ཅད་ཀྱང་ཕྱག་རྒྱ་ཆེན་པོ་ལ་བརྟེན་པ་ཡིན་པས་ན་གལ་ཏེ་གཞན་གྱི་ཕྱག་རྒྱ་ཆེན་པོ་ལ་དམིགས་པར་བྱེད་པ་ཡང་སྲིད་པས་ན་དེའི་ཕྱིར། རང་གི་སེམས་དཔའི་ཏིང་འཛིན་གྱིས། །ཞེས་གསུངས་སོ། །ཕྱག་རྒྱ་
ཆེན་པོ་ལ་དེ་ལྟར་གནས་ཏེ་མཉམ་པར་མ་བཞག་པའི་སྦྱོར་བས་བཟླས་པའི་ཚིག་ཇི་ལྟར་སྦྱར་བར་བྱ་ཞེ་ན་རྡོ་རྗེའི་ངག་དང་ཞེས་བྱ་བ་གསུངས་སོ། །བལྟ་བ་ཡང་ཇི་ལྟར་བྱ་ཞེ་ན། རྡོ་རྗེའི་བལྟ་བ་ཞེས་གསུངས་སོ། །རྡོ་རྗེའི་ངག་དང་རྡོ་རྗེའི་བལྟ་བ་ཞེས་ཚིག་གཉིས་བསྟན་པ་ལས་ན་གཉི་ག་ཡང་ལས་གཅིག་ལ་
སྦྱར་བ་ཡིན་པར་ཤེས་པར་བྱའོ། །རིང་པོར་མི་ཐོགས་མཆོག་གྲུབ་པོ། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །རྟོག་པ་བཞི་ཆར་གྱི་ཁུ་ཚུར་བཞི་ཆར་དུ་ཡང་ཕྱག་རྒྱ་བཞི་དང་ལྡན་པའི་རང་གི་ལྷའི་རྣལ་འབྱོར་བྱས་ཏེ་ཁུ་ཚུར་བཅངས་ལ་རྡོ་རྗེའི་ལྟ་བས་འཇིག་རྟེན་ལ་བལྟ་ཞིང་
རྡོ་རྗེའི་ཚིག་གིས་སྙིང་པོ་བཟླས་ལ། འཇིག་རྟེན་གསུམ་གྱི་བྱ་བར་གཏོགས་པའི་དགོས་པ་ཐམས་ཅད་བསྒྲུབ་པར་བྱའོ། །འོན་ཏེ་རྒྱུན་དུ་ཟློས་པའི་སྦྱོར་བས་ཇི་སྐད་དུ་གསུངས་པའི་དངོས་གྲུབ་རྣམས་རབ་ཏུ་འཐོབ་པར་འགྱུར་རོ། །ད་ནི་རྒྱུད་ཕྱི་མའི་ཡང་ཕྱི་མ་བྱིན་གྱིས་བརླབ་པའི་ཕྱིར་བཅོམ་ལྡན་འདས་ཕྱག་ན་
རྡོ་རྗེས་དེ་བཞིན་གཤེགས་པ་རྣམས་ལ་གསོལ་བ་འདེབས་པ་ཡིན་ཏེ་འདི་དག་ཀྱང་སྔར་མང་དུ་བསྟན་ཟིན་ཏོ། །དེ་ཁོ་ན་ཉིད་བསྡུས་པའི་རྒྱ་ཆེར་བཤད་པ་ཀོ་ས་ལའི་རྒྱན་ལས་རྒྱུད་ཕྱི་མའི་ཡང་ཕྱི་མའི་འགྲེལ་པ་རྫོགས་སོ།། །།རྒྱུད་འདིའི་བདག་པོ་ནི་བཅོམ་ལྡན་འདས་རྣམ་པར་སྣང་མཛད་
དེ་དེས་རྒྱུད་འདི་བསྟན་པ་ཡིན་པའི་ཕྱིར་བཅོམ་ལྡན་འདས་རྡོ་རྗེ་སེམས་དཔའ་ལ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ཐམས་ཅད་ཀྱིས་མཚན་བརྒྱ་རྩ་བརྒྱད་ཀྱིས་བསྟོད་པ་ལན་མང་པོ་ཞིག་མཛད་པ་ཡིན་ནོ། །ད་ནི་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་དེ་
རྣམས་ཀྱིས་བསྐུལ་བ་དང་བྱིན་གྱིས་བརླབས་པས་རྒྱུད་དེ་བཤད་པ་དང་། རྒྱུད་ཀྱི་དོན་བཟང་པོ་མཐོང་བས་ཡོངས་སུ་མགུ་སྟེ་བཅོམ་ལྡན་འདས་རྣམ་པར་སྣང་མཛད་ལ་རྡོ་རྗེ་དབྱིངས་ཀྱི་ཞེས་བྱ་བ་ལ་སོགས་པ་མཚན་བརྒྱ་རྩ་བརྒྱད་པ་འདིས་བསྟོད་པ་མཛད་པ་ཡིན་ནོ། །རྡོ་རྗེ་དབྱིངས་

ཉིད་ཡིན་པས་ན་རྡོ་རྗེ་དབྱིངས་ཏེ་རྒྱུད་དེ་ལས་སྐྱེས་པའི་ཕྱིར་རོ། །དེ་ཉིད་སེམས་དཔའ་ཆེན་པོ་ཡིན་པའི་ཕྱིར་སེམས་དཔའ་ཆེ་སྟེ་སེམས་ཤེས་རབ་ཅན་དང་བཅས་པ་ལ་སེམས་དཔའ་ཆེ་ཞེས་པའོ། །སེམས་ཅན་ཐམས་ཅད་ཀྱི་དོན་མཛད་པ་དང་ལྡན་པས་ན་སེམས་ཅན་དོན་ནོ། །
མཆོག་གི་དོན་བདག་ཉིད་ཅན་ཡིན་པས་ན་མཆོག་གི་བདག་ཉིད་ཅན་ཏེ་རྣམ་པར་མི་རྟོག་པའི་ཡེ་ཤེས་མཆོག་དེའི་བདག་ཉིད་ཅན་ཞེས་བྱ་བའི་དོན་ཏོ། །ཤཱཀྱ་རྣམས་ཀྱི་རྒྱལ་པོ་ཡིན་པས་ན་ཤཱཀྱའི་རྒྱལ་པོའོ། །ཡེ་ཤེས་ཆེན་པོ་མངའ་བས་ན་ཡེ་ཤེས་ཆེ་སྟེ་ཤེས་བྱ་ཐམས་ཅད་ལ་ཁྱབ་པའི་ཕྱིར་རོ། །
རྡོ་རྗེའི་སྐུ་མངའ་བས་ན་རྡོ་རྗེའི་བདག་ཉིད་དེ་འདི་ནི་དེ་བཞིན་གཤེགས་པའི་རིགས་ཀྱི་དཀྱིལ་འཁོར་གྱི་སྒོ་ནས་བསྟོད་པའོ། །སེམས་དཔའ་རྣམས་འབྱུང་བ་ནི་དེ་བསྐུལ་བའི་སྔགས་ཀྱི་སྒོ་ནས་འབྱུང་བས་ན་སེམས་དཔའ་འབྱུང་བའོ། །དེ་ཁོ་ན་ཉིད་ཀྱི་ངོ་བོ་ཡིན་པས་ན་དེ་ཉིད་དོན་ནོ། །སེམས་
ཅན་རྣམས་ཀྱི་རྒྱུ་ཡིན་པས་ན་སེམས་ཅན་རྒྱུ་སྟེ་དེ་སྐྱེ་བའི་འབྱུང་གནས་ཡིན་པའི་ཕྱིར་རོ། །ཐེག་པ་ཆེན་པོའི་ཚུལ་ལ་འཇུག་པའི་རྒྱུ་ཡིན་པས་ན་ཚུལ་ཆེན་པོའོ། །སེམས་ཅན་མང་པོའི་དོན་མཛད་པས་ན་སེམས་ཅན་དོན་ཏོ། །དགོས་པའི་དོན་ཞེས་བྱ་བ་ལ་དགོས་པའི་དོན་ནི་བྱ་བའོ། །
དགོས་པ་ཉིད་དོན་ཡིན་པས་དགོས་པའི་དོན་ཏེ་གང་གི་ཕྱིར་རྩོམ་པ་འདི་ནི་སེམས་ཅན་རྣམས་ལ་ཕན་གདགས་པ་ཡིན་པའི་ཕྱིར་རོ། །སེམས་དཔའ་སེམས་དཔའ་ཞེས་བྱ་བ་ལ་སེམས་དཔའ་སྟེ་ཐུགས་ཀའི་ཟླ་བའི་དཀྱིལ་འཁོར་གྱི་སྟེང་ན་སེམས་དཔའ་འདི་ཡིན་པ་སྟེ་རྡོ་རྗེ་སེམས་དཔའ་
ཞེས་བྱ་བའི་དོན་ཏོ། །དེའི་ཕྱིར་སེམས་དཔའ་སེམས་དཔའ་ཞེས་བྱའོ། །འདི་ནི་རིན་པོ་ཆེའི་རིགས་ཀྱི་དཀྱིལ་འཁོར་གྱི་སྒོ་ནས་བསྟོད་པའོ། །སངས་རྒྱས་ཆོས་ནི་ཞེས་བྱ་བ་ལ་སངས་རྒྱས་ཀྱང་ཡིན་ལ། སངས་རྒྱས་སུ་བྱེད་པའི་ཆོས་ཀྱི་ངོ་བོ་ཉིད་ཡིན་པས་ན་སངས་རྒྱས་ཆོས་ཞེས་བྱའོ། །ཆོས་ཀྱི་
དབྱིངས་ཀྱི་སྒོ་ནས་ཐམས་ཅད་དུ་ཁྱབ་པས་ན་ཆོས་ཆེན་པོ་ཞེས་བྱའོ། །ཆོས་ཀྱི་འཁོར་ལོ་ནི་དཀྱིལ་འཁོར་གྱི་རང་བཞིན་ཏེ་དཀྱིལ་འཁོར་རྣམས་དེའི་ཐུགས་ཀྱིས་སྤྲུལ་པའི་རང་བཞིན་ཡིན་པས་ན་ཆོས་ཀྱི་འཁོར་ལོའོ། །རབ་བསྐོར་པ་ནི་ཆོས་ཀྱི་འཁོར་ལོ་དེ་ཉིད་དོ། །ཚིག་ཐམས་ཅད་ལ་འཇུག་པའི་

རྒྱུད་ཡིན་པས་སྨྲ་བ་ཆེན་པོའོ། །རབ་རིག་མཆོག་ཅེས་བྱ་བ་ནི་རིག་པ་བཟང་པོ་ཡིན་པས་ན་རབ་རིག་གོ། །རིག་པ་དམ་པ་དེ་རྣམས་ཀྱི་ནང་ན་མཆོག་ཡིན་པས་ན་རབ་རིག་མཆོག་སྟེ་ཟག་པ་ཟད་པའི་ཡེ་ཤེས་ལ་སོགས་པ་རིག་པ་རྣམས་ཀྱི་རང་བཞིན་ཡིན་པའི་ཕྱིར་རོ། །སེམས་དཔའ་ཆེན་པོ་ཞེས་བྱ་བ་ནི་
ཐམས་ཅད་ཀྱི་ནང་ན་མཆོག་ཡིན་པའི་ཕྱིར་དང་ཆོས་ཀྱི་དབྱིངས་ཀྱི་རང་བཞིན་ཡིན་པའི་ཕྱིར་ན་སེམས་དཔའ་ཆེན་པོའོ། །ཚིགས་སུ་བཅད་པ་འདི་ནི་རྣམ་པར་སྣང་མཛད་ཀྱི་ཆོས་ཀྱི་དཀྱིལ་འཁོར་གྱི་སྒོ་ནས་བསྟོད་པ་ཡིན་ཏེ་རྡོ་རྗེ་ཆོས་ལ་སོགས་པ་དེ་ནི་དེ་བཞིན་གཤེགས་པའི་ཡོན་ཏན་གྱི་ངོ་བོ་ཉིད་ཡིན་པས་ན་
དེའི་རང་བཞིན་གྱིས་དེ་བཞིན་གཤེགས་པ་ཉིད་ལ་བསྟོད་པ་ཡིན་ནོ། །ལས་ཆེན་ཞེས་བྱ་བ་ལ་སོགས་པ་ལ་རྡོ་རྗེ་ལས་ཀྱི་གཟུགས་སུ་ཞུགས་པས་ན་ལས་ཆེན་ནོ། །རྡོ་རྗེ་གོ་ཆའི་གཟུགས་སུ་ཞུགས་པས་ན་སྲུང་བ་ཆེན་པོ་སྟེ་ཞེས་བྱ་བའོ། །ལས་ལ་འཇུག་པའི་རྒྱུར་གྱུར་པས་ན་ལས་ཐམས་ཅད་
དོ། །དོན་གྱི་དངོས་གྲུབ་ལ་སོགས་པ་སྩོལ་བས་ན་རབ་བསྒྲུབ་པའོ། །རྡོ་རྗེ་གནོད་སྦྱིན་གྱི་གཟུགས་ཀྱིས་བཞུགས་པས་ན་བདག་ཉིད་ཆེན་པོའོ། །འགྲོ་སྤྱོད་མཆོག་ཅེས་བྱ་བ་ལ་སེམས་ཅན་རྣམས་ཀྱི་དོན་གྱི་ཕྱིར་སྤྱོད་པར་མཛད་པས་ན་འགྲོ་སྤྱོད་པའོ། །དེའི་མཐར་ཕྱིན་པ་བརྙེས་པས་ན་མཆོག་གོ། །
སེམས་དཔའ་རྒྱུ་ཡིན་པས་ན་སེམས་དཔའ་རྒྱུ་སྟེ་གང་གི་ཕྱིར་རྡོ་རྗེ་སེམས་དཔའི་ཏིང་ངེ་འཛིན་གྱི་རྗེས་ཐོགས་ལ་མངོན་པར་བྱང་ཆུབ་པ་བརྙེས་པ་ཡིན་ཏེ་དེ་བས་ན་སེམས་དཔའི་རྒྱུ་མངའ་བས་ན་སེམས་དཔའ་རྒྱུའོ། །འདི་ནི་སེམས་དཔའ་དང་སྔགས་དང་ལས་ཀྱི་དཀྱིལ་འཁོར་གྱི་སྒོ་ནས་བསྟོད་པ་ཡིན་
ནོ། །འདིས་ནི་ཕ་རོལ་ཏུ་ཕྱིན་པ་ཐམས་ཅད་བརྙེས་པས་ན་ཕ་རོལ་ཏུ་ཕྱིན་པ་ཀུན་བརྙེས་པའོ། །ཐམས་ཅད་ཐུགས་སུ་ཆུད་པས་ན་ཀུན་མཁྱེན་ནོ། །ཡེ་ཤེས་ཀྱི་རང་བཞིན་ཡིན་པས་ན་ཡེ་ཤེས་སོ། །དངོས་པོའི་དོན་ཐམས་ཅད་ཡང་དག་པར་མཁྱེན་པས་ན་མཁྱེན་པའོ། །སེམས་དཔའ་
ཐམས་ཅད་སྐྱེད་པར་མཛད་པས་ན་སེམས་དཔའ་ཀུན་ཏེའོ། །ཐབས་ཆེན་པོ་མངའ་བས་ན་ཐབས་ཆེན་པོའོ། །འདི་ལ་ཤེས་རབ་ཆེན་པོ་མངའ་བས་ན་ཤེས་རབ་ཆེན་པོའོ། །འདི་དག་ནི་ཚོགས་ཡོངས་སུ་རྫོགས་པའི་སྒོ་ནས་བསྟོད་པའོ། །ཐུགས་རྗེ་ཆེན་པོ་དང་ལྡན་པས་ན་ཐུགས་རྗེ་ཆེན་པོའོ། །

མཆོག་རྣམས་ཀྱི་ནང་ན་ཡང་མཆོག་ཡིན་པས་ན་མཆོག་གི་མཆོག་གོ། །ཐུགས་རྗེ་ཆེན་པོ་རྣམས་ཀྱི་ནང་ན་ཡང་ཐུགས་རྗེ་ཅན་ཡིན་པས་ན་ཐུགས་རྗེའོ། །ཐུགས་རྗེའི་ཡོན་ཏན་གྱི་རང་བཞིན་ཅན་ཡིན་པས་ན་ཐུགས་རྗེའི་བདག་ཉིད་ཅན་ཏེ་ཐུགས་རྗེའི་བདག་ཉིད་མངའ་
བའི་ཕྱིར་རོ། །ཕྱི་དང་ནང་གི་དངོས་པོ་ཐམས་ཅད་གཏོང་བར་མཛད་པས་ན་ཐམས་ཅད་གཏོང་བའོ། །འདི་ལ་བྱམས་པ་ཆེན་པོ་མངའ་བས་ན་བྱམས་པ་ཆེན་པོའོ། །སེམས་ཅན་ཐམས་ཅད་ཀྱི་དོན་ཡོངས་སུ་རྫོགས་པར་མཛད་པས་ན་ཀུན་མཛད་དོ། །འདི་དག་ནི་ཐུགས་རྗེའི་སྒོ་ནས་
བསྟོད་པའོ། །ཤཱཀྱའི་སེང་གེ་ཞེས་བྱ་བ་ནི་སེང་གེའི་སྤྱོད་པ་དང་རྗེས་སུ་མཐུན་པར་མཛད་པའི་ཕྱིར་ཏེ་ཤཱཀྱ་རྣམས་ཀྱི་ནང་ན་སེང་གེ་ཡིན་པས་ན་ཤཱཀྱ་སེང་གེའོ། །ཤཱཀྱ་ཡང་ཡིན་ལ་ཆེན་པོ་ཡང་ཡིན་པས་ན་ཤཱཀྱ་ཆེ་སྟེ་ཤཱཀྱའི་རིགས་སུ་སྐྱེ་བ་བཞེས་པའི་ཕྱིར་ན་ཤཱཀྱ་ཡིན་ལ་ཁམས་གསུམ་གྱི་
ཆོས་ཀྱི་རྒྱལ་པོར་མངའ་བརྙེས་པའི་ཕྱིར་ཆེན་པོའོ། །ཤཱཀྱ་རྣམས་དགའ་བར་མཛད་པའི་ཕྱིར་ན་ཤཱཀྱའོ། །ཤཱཀྱ་རྣམས་ཀྱི་ཐུབ་པ་ཡིན་པས་ན་ཤཱཀྱ་ཐུབ་པ་སྟེ་སྐུ་དང་གསུང་དང་ཐུགས་ཐུབ་པ་དང་ལྡན་པའི་ཕྱིར་ཐུབ་པ་ཆེའོ། །འདུལ་བ་ཆེན་པོ་མངའ་བས་ན་འདུལ་བ་ཆེན་པོའོ། །བཅོམ་ལྡན་
འདས་རྣམ་པར་སྣང་མཛད་ཀྱི་སྐུའི་ངོ་བོ་ཐམས་ཅད་དུ་ཁྱབ་པའི་ཕྱིར་ཁྱབ་པའོ། །བཀྲི་བའི་དོན་མངའ་བས་ན་བཀྲི་དོན་ཏེ་འདིའི་གསུང་ཕལ་ཆེར་དགོངས་བས་བཤད་པ་ཡིན་པའི་ཕྱིར་རོ། །འདུལ་བས་ཐུབ་པ་ཐམས་ཅད་ཀྱི་ནང་ན་མཆོག་ཏུ་ཁྱད་པར་དུ་འཕགས་པ་ཡིན་པས་ན་འདུལ་བ་མཆོག་གོ། །
འདི་ནི་ཕལ་ཆེར་རིགས་ཀྱི་སྒོ་ནས་བསྟོད་པ་ཡིན་ཏེ་འདིར་མཚན་ཉིད་ནི་བརྒྱད་ཡོད་དོ། །སྟོང་པ་ཉིད་ཀྱི་རང་བཞིན་རབ་ཏུ་བསྒོམས་པས་ན་ཆོས་དབྱིངས་སོ། །དངོས་པོ་ཐམས་ཅད་དུ་དེ་ཁོ་ན་ཉིད་དང་དབྱེར་མེད་པས་ན་མཉམ་མེད་བརྙེས་པ་སྟེ་བཅོམ་ལྡན་འདས་རྣམ་པར་སྣང་མཛད་ནི་དེ་ཁོ་ན་ཉིད་ཀྱི་རང་བཞིན་
ཡིན་པའི་ཕྱིར་རོ། །ཡེ་ཤེས་ཀྱི་སྐུ་ཆོས་ཀྱི་དབྱིངས་དང་འབྲེལ་བས་ན་ཆོས་ཀྱི་དབྱིངས་སོ། །དངོས་པོ་རྣམས་ཇི་ལྟར་གནས་པ་དེ་བཞིན་དུ་གཤེགས་ཤིང་ཐུགས་སུ་ཆུད་པའི་ཕྱིར་དེ་བཞིན་གཤེགས་པའོ། །རྡོ་རྗེ་མགོན་པོ་ཞེས་བྱ་བ་ལ་རྡོ་རྗེ་ནི་སེམས་དཔའ་ལ་སོགས་པའི་བྱང་

ཆུབ་སེམས་དཔའ་རྣམས་ཏེ་དེ་རྣམས་ཀྱི་མགོན་པོ་དང་བདག་པོ་ཡིན་པས་ན་རྡོ་རྗེ་མགོན་པོའོ། །མགོན་པོ་ཡང་ཡིན་ལ་ཆེན་པོ་ཡང་ཡིན་པས་ན་མགོན་པོ་ཆེ་སྟེ་ཆོས་ཀྱི་སྐུ་ནི་ཐམས་ཅད་ལས་ཁྱད་པར་དུ་འཕགས་པའི་ཕྱིར་རོ། །སེམས་ཅན་ཐམས་ཅད་སྡུད་པར་མཛད་པས་ན་སེམས་ཅན་
ཚོགས་སོ། །འདི་ནི་ཕལ་ཆེར་ཆོས་ཀྱི་དབྱིངས་ཀྱི་སྒོ་ནས་བསྟོད་པ་ཡིན་ནོ། །འདི་ལ་འོད་ཆེན་པོ་མངའ་བས་ན་འོད་ཆེན་ཏེ་སྐུའི་འོད་དོ། །འདི་ལ་སྣང་བ་ཆེན་པོ་མངའ་བས་ན་སྣང་བ་ཆེན་པོ་སྟེ་སྣང་བ་ནི་ཡེ་ཤེས་ཀྱི་སྣང་བའོ། །འདི་ལ་བརྩོན་འགྲུས་ཆེན་པོ་མངའ་བས་ན་བརྩོན་འགྲུས་ཆེན་པོ་སྟེ་
བརྩོན་འགྲུས་ནི་སྤྲོ་བ་ལ་བྱའོ། །འདི་ལ་སྟོབས་ཆེན་པོ་མངའ་བས་ན་སྟོབས་ཆེན་པོ་སྟེ་སྟོབས་ནི་སྐུའི་གཟི་བྱིན་ནོ། །དཔའ་བ་ཡང་ཡིན་ལ་ཆེན་པོ་ཡང་ཡིན་པས་ན་དཔའ་བ་ཆེན་པོ་སྟེ་རི་རབ་ལ་སོགས་པ་ཡང་མཛུབ་རྩེས་འཕེན་པར་མཛད་པའི་ཕྱིར་རོ། །ཉོན་མོངས་པའི་དགྲ་རྣམས་ལས་
རྣམ་པར་རྒྱལ་བར་མཛད་པའི་ཕྱིར་ན་རབ་དཔའ་མཆོག་གོ། །གདུལ་བྱ་རྣམས་ལ་དེའི་གཟུགས་སྟོན་པས་ན་བདེ་སྤྱོད་དོ། །དཔའ་བ་ནི་ཁྱབ་འཇུག་སྟེ་དེའི་གཟུགས་སྟོན་པར་མཛད་པས་ན་དཔའ་བའོ། །འདི་ནི་ཡོན་ཏན་གྱི་སྒོ་ནས་བསྟོད་པ་ཡིན་ཏེ་འདིར་ཡང་མཚན་བརྒྱད་ཡོད་དོ། །འདོད་
པའི་ཁམས་ཀྱི་འདོད་ཆགས་དང་བྲལ་བས་ན་ཚངས་པའོ། །ལུང་དབོག་པ་མེད་པར་ཡེ་ཤེས་ཐུགས་སུ་ཆུད་པར་མཛད་པས་ན་རང་བྱུང་ངོ་། །སྐལ་བ་དང་ལྡན་པའི་ཕྱིར་བཅོམ་ལྡན་འདས་ཏེ་སྐེལ་བ་ཞེས་བྱ་བའི་སྒྲ་ནི་བསོད་ནམས་དང་ཡེ་ཤེས་ཀྱི་ཚོགས་ལ་བཤད་དོ། །ཤཱཀྱའི་དཔའ་བོ་ཐུབ་པ་
ཆེ། །ཞེས་བྱ་བ་ལ་ཤཱཀྱའི་དཔའ་བོ་ཡང་ཡིན་ལ་ཐུབ་པ་ཆེན་པོ་ཡང་ཡིན་པས་ཤཱཀྱའི་དཔའ་བོ་ཐུབ་པ་ཆེ་ཐུབ་པ་ཐམས་ཅད་ལས་མཆོག་ཏུ་ཁྱད་པར་དུ་འཕགས་པའི་ཕྱིར་རོ། །དངོས་པོ་ཐམས་ཅད་ཀྱི་ངོ་བོ་ཉིད་ཡིན་པས་ན་ཀུན་བདག་གོ། །མི་གསུང་བར་བཞུགས་པས་ན་ཐུབ་པ་སྟེ་ངས་ནི་ཆོས་གཅིག་ཀྱང་མ་
བཤད་དོ་ཞེས་བཤད་པ་ལྟ་བུའོ། །ཆོས་ཀྱི་སྐུའི་དབང་དུ་བྱས་པས་ན་དག་པ་སྟེ་ཉོན་མོངས་པ་དང་ཤེས་བྱའི་སྒྲིབ་པའི་དྲི་མ་རྣམ་པར་དག་པའི་ཕྱིར་རོ། །ཁམས་གསུམ་གྱི་ཆོས་ཀྱི་རྒྱལ་པོ་བརྙེས་པས་ན་ཆོས་རྒྱལ་ལོ། །འདི་ནི་བདག་པོའི་སྒོ་ནས་བསྟོད་པ་ཡིན་ཏེ། །འདིར་ཡང་མཚན་བརྒྱད་ཡོད་དོ། །

ནམ་མཁའ་ཀུན་དུ་ཁྱབ་པ་བཞིན་དུ་ཐམས་ཅད་དུ་ཁྱབ་པའི་སྐུ་མངའ་བས་ན་ནམ་མཁའི་སྐུའོ། །སྐུས་མཆོག་ཏུ་གྱུར་པས་ན་སྐུའི་མཆོག་གོ། །སྐུ་གསུམ་དང་ལྡན་པས་ན་སྐུ་གསུམ་མོ། །སྐུ་གསུམ་ཆར་ཡང་བདག་མེད་པར་བསྒོམ་པའི་ཕྱིར་སྐུ་མིན་སྒོམ་པ་པོ་སྟེ། ཆོས་ཀྱི་སྐུ་ཡང་
རྟག་པའི་གཟུགས་ཀྱིས་བསྒོམ་པའི་ཕྱིར་རོ། །སྐུ་ཐམས་ཅད་སྟོན་པར་མཛད་པས་ན་ཀུན་གྱི་སྐུའོ། །རི་རབ་ལ་སོགས་པའི་ཚངས་པས་ཀྱང་ལྷག་པར་ཆེར་སྟོན་པའི་ཕྱིར་སྐུ་ཆེ་བའོ། །མི་ཤིགས་པའི་སྐུ་ཡིན་པས་ན་རྡོ་རྗེའི་སྐུའོ། །འདི་དག་ནི་སྐུའི་སྒོ་ནས་བསྟོད་པ་ཡིན་ནོ། །གསུང་མིན་གསུང་སྟེ་
ཞེས་བྱ་བ་ལ་འདི་ལ་གསུང་མ་ཡིན་པ་ཉིད་ཀྱི་གསུང་མངའ་བས་ན་གསུང་མིན་གསུང་སྟེ། ཆོས་ཀྱི་ལོངས་སྤྱོད་རྫོགས་པ་ལ་གནས་པའི་བྱང་ཆུབ་སེམས་དཔའ་རྣམས་ལ་རྣམ་པར་མི་རྟོག་པའི་ཡེ་ཤེས་ལ་བཞུགས་ཏེ། ཇི་ལྟར་མངོན་པར་འདོད་པ་བཞིན་དུ་ཆོས་སྟོན་པའི་རྣམ་པར་རིག་པ་སྐྱེད་པར་མཛད་
པའི་ཕྱིར་གསུང་མིན་གསུང་ངོ་། །ཚངས་པའི་དབྱངས་བརྙེས་པའི་ཕྱིར་སྨྲ་བའི་དམ་པར་གྱུར་པས་ན་གསུང་གི་མཆོག་གོ། །གདུལ་བྱའི་དབང་གིས་སང་སྐྲྀ་ཏ་དང་སྐད་ཐ་མལ་པ་དང་སྐད་ཟུར་ཆག་པའི་གསུང་གིས་ཆོས་སྟོན་པར་མཛད་པས་ན་སངས་རྒྱས་གསུང་གསུམ་མོ། །གསུང་འདི་གསུམ་ཆར་ཡང་
བདག་མེད་པར་སྟོན་པར་མཛད་པས་ན་གསུང་མིན་སྟོན་པའོ། །ཁམས་དང་འགྲོ་བ་དང་སྐྱེ་གནས་དང་། ཡུལ་གྱིས་ཆེ་བའི་སེམས་ཅན་གྱི་ཚོགས་ཐམས་ཅད་ཀྱིས་སྣ་ཚོགས་པ་དྲི་བ་དང་ཞུ་བ་ལ་ཞུགས་སུ་ཟིན་ཀྱང་གསུང་གཅིག་གིས་འདྲེས་གཅིག་ཏུ་ཐམས་ཅད་ཀྱི་ལན་སྟོན་པར་སྤྱོད་པས་ན་གསུང་
ཀུན་ཞེས་བྱའོ། །ཤིན་ཏུ་ཆེ་བའི་གསུང་མངའ་བས་ན་ཤིན་ཏུ་གསུང་ཆེ་བ་སྟེ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དང་མཉམ་པ་འགེངས་པར་མཛད་པའི་ཕྱིར་རོ། །སྲོག་ཆགས་སུ་གྱུར་པ་ཐམས་ཅད་ཀྱིས་ཀྱང་འདིའི་གསུང་ལས་འདའ་བར་མི་ནུས་པས་ན་རྡོ་རྗེའི་གསུང་ངོ་། །འདི་ནི་གསུང་གི་སྒོ་ནས་
བསྟོད་པའོ། །སེམས་མིན་སེམས་ཏེ་ཞེས་བྱ་བ་ལ་ཡུལ་སྣ་ཚོགས་སུ་སྣང་བ་དང་དགེ་བ་དང་མི་དགེ་བའི་བག་ཆགས་སྣ་ཚོགས་སུ་སྣང་བས་ན་སེམས་སོ། །སེམས་དེ་ལྟ་བུ་ཡིན་པ་ལས་གཟུང་བ་དང་འཛིན་པའི་འཁོར་བའི་དྲི་མ་དང་རྣམ་པར་བྲལ་ཞིང་དབེན་པ་དང་ཟག་པ་མེད་པའི་ཕྱིར་སེམས་མིན་ནོ། །སྔ་མའི་རྗེས་སུ་འབྲང་

བས་ན་སེམས་ཞེས་ཀྱང་བཤད་དེ་དེ་ལྟར་ན་སེམས་མིན་སེམས་ཞེས་བཤད་དོ། །སེམས་ཅན་ཐམས་ཅད་ལས་མཆོག་ཏུ་ཁྱད་པར་དུ་འཕགས་ཤིང་ཡོངས་སུ་དག་པ་ཡིན་པས་ན་སེམས་ཀྱི་མཆོག་གོ། །ཀུན་གཞིའི་རྣམ་པར་ཤེས་པ་དང་ཉོན་མོངས་པ་ཅན་གྱི་ཡིད་དང་། འཇུག་པའི་རྣམ་པར་ཤེས་པ་རྣམས་སྔོན་གྱི་རྗེས་
སུ་འབྲང་བ་ལ་ལྟོས་ནས་སེམས་རྣམ་པ་གསུམ་དང་ལྡན་པས་ན་སེམས་གསུམ་ཞེས་བྱའོ། །སེམས་གསུམ་ཆར་བདག་མེད་པར་སྟོན་པར་མཛད་པས་ན་སེམས་མིན་སྟོན་པ་པོའོ། །དོན་དམ་པར་སེམས་ཐམས་ཅད་ཡོངས་སུ་དག་ཅིང་སེམས་ཐམས་ཅད་ལས་དབེན་པ། ཐམས་ཅད་མཁྱེན་པའི་ཡེ་ཤེས་ཀྱི་
གནས་སྐབས་ནའང་སེམས་ཐམས་ཅད་རོ་གཅིག་པའི་ངོ་བོར་གནས་པས་ན་ཐམས་ཅད་སེམས་སོ། །སྤྲོས་པའི་གནས་སྐབས་སུ་སེམས་ཀྱིས་ནམ་མཁའི་ཁམས་འགེངས་པས་ན་སེམས་དཔའ་ཆེའོ། །སེམས་ཅན་ཐམས་ཅད་ཀྱིས་མི་ཕྱེད་པས་ན་རྡོ་རྗེའི་སེམས་སོ། །འདི་དག་ནི་ཐུགས་ཀྱི་སྒོ་ནས་བསྟོད་
པ་ཡིན་ནོ། །རྡོར་མིན་རྡོ་རྗེ་ཞེས་བྱ་བ་ལ་རྡོ་རྗེ་མ་ཡིན་པ་ཡང་རྡོ་རྗེ་མཛད་པ་སྟེ་སེམས་ཉིད་རྡོ་རྗེའི་གཟུགས་སུ་བསྒོམས་པས་ན་རྡོར་མིན་རྡོ་རྗེ་ཞེས་བྱའོ། །རྡོ་རྗེ་སྟེ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཆོག་ཏུ་གྱུར་ཅིང་རྣམ་པར་སྣང་མཛད་ཀྱི་ཆོས་ཀྱི་སྐུའི་རང་བཞིན་ཡིན་པས་ན་རྡོ་རྗེ་མཆོག་གོ། །
འདི་ལ་ནི་རྡོ་རྗེ་གསུམ་མངའ་བས་ན་རྡོ་རྗེ་གསུམ་པ་སྟེ་སྐུ་རྡོ་རྗེ་དང་གསུང་རྡོ་རྗེ་དང་ཐུགས་རྡོ་རྗེ་དང་རབ་ཏུ་ལྡན་པའི་ཕྱིར་རོ། །སོ་སོའི་སྐྱེ་བོའི་སེམས་རྡོ་རྗེ་མ་ཡིན་པ་དེ་ཡང་རྡོ་རྗེར་མཛད་པས་ན་རྡོ་རྗེ་མིན་སྐྱོང་ངོ་། །སྐུ་དང་གསུང་དང་ཐུགས་ཐམས་ཅད་རྡོ་རྗེའི་ངོ་བོ་ཉིད་མངའ་བས་ན་རྡོ་རྗེ་ཐམས་ཅད་དོ། །སྐུ་དང་
གསུང་དང་ཐུགས་རྡོ་རྗེ་ནམ་མཁའི་དབྱིངས་ཐམས་ཅད་དུ་ཁྱབ་པར་མཛད་པས་ན་རྡོ་རྗེ་ཆེའོ། །རྡོ་རྗེ་ལས་ཀྱང་རྡོ་རྗེ་ཡིན་པས་ན་རྡོ་རྗེ་རྡོ་རྗེ་སྟེ་རྡོ་རྗེ་ཡང་ཐུགས་བསྐྱེད་པ་ཙམ་གྱིས་ཕྱེ་མར་རློག་པར་མཛད་པའི་ཕྱིར་རོ། །འདི་ནི་ཡེ་ཤེས་ཀྱི་སྒོ་ནས་བསྟོད་པའོ། །ཐམས་ཅད་དུ་སོང་བས་ན་ཀུན་ཁྱབ་བོ། །སྲིད་
པའི་རྩེ་མོ་མཆོག་ཅེས་བྱ་བ་ལ་སྲིད་པའི་རྩེ་མོ་ཡིན་པས་ན་སྲིད་པའི་རྩེ་མོ་སྟེ་སེམས་ཅན་གང་སྲིད་པའི་རྩེ་མོར་སྐྱེས་པ་དེ་ལ་ནི་སྲིད་པའི་རྩེ་མོ་ཞེས་བྱ་ལ། དེ་རྣམས་ལས་ཀྱང་མཆོག་ཏུ་གྱུར་པས་ན་སྲིད་པའི་རྩེ་མོ་མཆོག་གོ། །བདེ་བར་གཤེགས་བདག་པོ་ཞེས་བྱ་བས་སྐུ་གསུམ་གྱི་ཚུལ་གྱིས་བདེ་བར་

གཤེགས་པ་རྣམས་བཞུགས་ལ། དེ་དག་ལས་ཀྱང་ཆོས་ཀྱི་སྐུ་ཤིན་ཏུ་ཁྱད་པར་དུ་འཕགས་པ་ལ་བཞུགས་པས་ན་བདག་པོའོ། །འདིས་ཉོན་མོངས་པ་རྣམས་ལས་རྒྱལ་བས་ན་རྒྱལ་བའོ། །ཁམས་གསུམ་གྱི་ངོ་བོ་ཡིན་པའམ་སེམས་དང་སེམས་ལས་བྱུང་བའི་རང་གི་
ཚོགས་ཁམས་གསུམ་པར་ཡང་དག་པར་སྟོན་པར་མཛད་པས་ན་ཁམས་གསུམ་པའོ། །རྒྱལ་པོ་ཡང་ཡིན་ལ་ཆེན་པོ་ཡང་ཡིན་པས་རྒྱལ་པོ་ཆེའོ། །དུས་ཐམས་ཅད་དུ་ཕྱོགས་ཀུན་དུ་རྣམ་པར་སྣང་མཛད་པས་ན་རྣམ་པར་སྣང་མཛད་དོ། །མཚན་བརྒྱ་རྩ་བརྒྱད་འདི་དག་ནི། །ཞེས་བྱ་བ་ལ་སོགས་
པས་ནི་ཇི་སྐད་གསུངས་པའི་མཚན་བརྒྱ་རྩ་བརྒྱད་པ་འདི་ཉན་པ་དང་། བཀླགས་པ་དང་། བསྒོམས་པའི་ཕན་ཡོན་སྟོན་ཏེ། ཀུན་གྱིས་སངས་རྒྱས་ཉིད་ཐོབ་འགྱུར། །ཞེས་བྱ་བ་ནི་དེ་བཞིན་གཤེགས་པ་ལྔའི་ངོ་བོ་ཉིད་ཀྱི་ཆོས་ལྔས་བསྡུས་པའི་སངས་རྒྱས་ཀྱི་སའི་རང་བཞིན་ཐོབ་པར་འགྱུར་རོ་ཞེས་
བྱ་བའི་བར་དུ་གསུངས་པ་ཡིན་ནོ། །ད་ནི་མགོན་པོ་ཁྱེད་ལ་ཞེས་བྱ་བ་ལ་སོགས་པས་བཅོམ་ལྡན་འདས་རྣམ་པར་སྣང་མཛད་ལ་མཚན་བརྒྱ་རྩ་བརྒྱད་པས་དེ་ལྟར་བསྟོད་ནས་རྒྱུད་དང་། རྒྱུད་ཀྱི་དོན་དང་རྡོ་རྗེ་དབྱིངས་ཀྱི་དཀྱིལ་འཁོར་ལ་སོགས་པ་རྒྱས་པར་བྱ་བའི་ཕྱིར་བཅོམ་ལྡན་འདས་ཕྱག་ན་རྡོ་རྗེས་
གསོལ་བ་འདེབས་པ་ཡིན་ཏེ། མགོན་པོ་ཞེས་བྱ་བ་ནི་རྗེ་སར་འབོད་པའོ། །ཅི་ཞིག་གསོལ་བ་འདེབས་ཤེ་ན། ཆོས་ཀྱི་འཁོར་ལོ་རབ་ཏུ་བསྐོར། །ཞེས་བྱ་བ་སྟེ་འདི་ནི་གསོལ་བའོ། །ཅིའི་ཕྱིར་ཞེ་ན། སེམས་ཅན་ཀུན་ལ་ཕན་པའི་ཕྱིར། །ཞེས་གསུངས་པ་ཡིན་ནོ། །དགོས་པ་གང་གིས་ཤེ་ན།
ཐུགས་རྗེ་ཆེན་པོ་བསྐྱེད་ནས་ཀྱང་། །ཞེས་བྱ་བ་གསུངས་པ་ཡིན་ནོ། །འདི་སྐད་སྟོན་ཏེ་རྙེད་པ་དང་བཀུར་སྟིའི་ཕྱིར་ནི་མ་ཡིན་གྱི། གཞན་དུ་ན་ཐུགས་རྗེས་སེམས་ཅན་ཐམས་ཅད་ལ་ཕན་པའི་དོན་བསྒྲུབ་པའི་ཕྱིར་ཆོས་ཀྱི་འཁོར་ལོ་བསྐོར་བར་མཛོད་ཅིག་པའོ། །དེ་ལྟར་གསོལ་བ་བཏབ་པ་དང་བཅོམ་ལྡན་འདས་
རྣམ་པར་སྣང་མཛད་ཀྱིས་དེ་བཞིན་གཤེགས་པ་ཐམས་ཅད་ཀྱི་བདག་པོས་བཀའ་སྩལ་པའི་ཚིག་གསན་ནས་ཞེས་བྱ་བ་ལ་དེ་བཞིན་གཤེགས་པ་ཐམས་ཅད་ཀྱི་བདག་པོ་ནི་བཅོམ་ལྡན་འདས་རྡོ་རྗེ་སེམས་དཔའ་སྟེ། བྱང་ཆུབ་ཀྱི་སེམས་ཀྱི་རང་བཞིན་ཡིན་པའི་ཕྱིར་བྱང་ཆུབ་ཀྱི་སེམས་ནི་དེ་བཞིན་གཤེགས་པ་

ཐམས་ཅད་ཀྱི་ཡབ་ཡིན་ནོ་ཞེས་གསུངས་པ་ཡིན་ནོ། །དེ་ལྟ་བས་ན་དེ་བཞིན་གཤེགས་པ་ཐམས་ཅད་ཀྱི་བདག་པོས་བཀའ་སྩལ་པའི་ཚིག་ཐོས་པ་དང་། དེ་བཞིན་གཤེགས་པ་ཐམས་ཅད་ལ་བོས་ནས་ཞེས་བྱ་བ་ནི་མི་བསྐྱོད་པ་ལ་སོགས་པའི་དེ་བཞིན་གཤེགས་པ་ཐམས་ཅད་ལ་བོས་ཏེ་སྙན་གཏོང་བ་ལ་
བཙུད་ནས་འདི་སྐད་ཅེས་གསུངས་ཏེ་ཅི་ཞིག་གསུངས་ཤེ་ན། བཅོམ་ལྡན་འདས་དེ་བཞིན་གཤེགས་པ་རྣམས་གཅིག་ཏུ་འདུས་པར་གསོལ་ཞེས་བྱ་བ་སྟེ། མཛད་པར་གསོལ་ཞེས་བྱ་བ་ནི་སྤྲོ་བར་མཛོད་ཅིག་པའོ། །ཅི་ཞིག་མཛོད་ཅེ་ན་གཅིག་ཏུ་འདུ་བར་མཛོད་ཅིག་ཅེས་གསུངས་པ་སྟེ་ཚོགས་པར་མཛོད་ཅིག་
ཅེས་བྱ་བའི་དོན་ཏོ། །བཅོམ་ལྡན་འདས་རྣམ་པར་སྣང་མཛད་ཀྱིས་དེ་སྐད་ཅེས་གསུངས་པ་དང་། མི་བསྐྱོད་པ་ལ་སོགས་པའི་དེ་བཞིན་གཤེགས་པ་ཐམས་ཅད་ཀྱང་གཅིག་ཏུ་འདུ་བར་མཛད་ནས་ཚིགས་སུ་བཅད་པ་འདི་གསུངས་སོ། །ཚིགས་སུ་བཅད་པ་དེ་གང་ཡིན་ཞེ་ན། རྟག་པར་འཇིག་རྟེན་
ཐམས་ཅད་དུ། །ཞེས་བྱ་བ་ལ་སོགས་པའོ། །སེམས་ཅན་ཀུན་ལ་ཕན་པའི་ཕྱིར། །ཞེས་བྱ་བ་ལ་ཕན་པ་ནི་གང་མ་འོངས་པ་ན་བདེ་བར་འགྱུར་བའི་དགེ་བའི་ལས་རྣམས་སོ། །དེར་ཅི་ཞིག་བྱ་ཞེ་ན། རྟག་པར་འཇིག་རྟེན་ཐམས་ཅད་དུ། །ཞེས་བྱ་བ་གསུངས་ཏེ། རྟག་པར་ཞེས་བྱ་བ་ནི་རྒྱུན་མི་
འཆད་པར་རོ། །འཇིག་རྟེན་ཐམས་ཅད་དུ་ཞེས་བྱ་བ་ནི་འཇིག་རྟེན་གྱི་ཁམས་ཐམས་ཅད་དུ་སྟེ་རྡུལ་ཕྲ་རབ་ཀྱི་དཀྱིལ་འཁོར་རྣམས་སོ་ཞེས་བྱ་བའི་དོན་ཏོ། །ཇི་ལྟར་འདུལ་བ་ཞེས་བྱ་བ་གདུལ་བའི་སྐྱེ་བོ་རྣམས་ཀྱི་ཆེད་དུ་ཞེས་བྱ་བའི་དོན་ཏོ། །སྣ་ཚོགས་པའི་ཆོས་ཀྱི་འཁོར་ལོ་རབ་ཏུ་བསྐོར་ཞེས་བྱ་བ་སྣ་
ཚོགས་པ་ནི་རྣམ་པ་དུ་མ་སྟེ་དེ་ལྟ་བུའི་ཆོས་ཀྱི་འཁོར་ལོ་རབ་ཏུ་སྐོར་ཅིག་ཅེས་བྱ་བའི་དོན་ཏོ། །བཅོམ་ལྡན་འདས་ཕྱག་ན་རྡོ་རྗེས་དོན་གང་གི་ཕྱིར་གསོལ་བ་བཏབ་པ་དང་། མི་བསྐྱོད་པ་ལ་སོགས་པའི་དེ་བཞིན་གཤེགས་པ་ཐམས་ཅད་ཀྱིས་འདུས་པ་མཛད་ནས་ཀུན་དུ་བགྲོས་ཏེ་དོན་དེ་ཉིད་ཀྱང་ཚིགས་སུ་
བཅད་པས་སྟོན་ཏོ། །དེ་ནས་བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་དང་། རྡོ་རྗེ་སེམས་དཔའི་བསྐུལ་བའི་ཚིག་གསན་པ་དང་བཀའ་མཉན་ཏེ། སངས་རྒྱས་ཀྱི་ཞིང་ཐམས་ཅད་དང་ཞེས་བྱ་བ་སངས་རྒྱས་མི་བཞུགས་པའི་འཇིག་རྟེན་གྱི་ཁམས་ཐམས་ཅད་ཀྱིའོ། །འཇིག་

རྟེན་གྱི་ཁམས་ཐམས་ཅད་ཅེས་བྱ་བ་ནི་ཡུལ་ཐམས་ཅད་ཀྱིའོ། །སེམས་ཅན་ཐམས་ཅད་ཀྱི་མདུན་དུ་ཞེས་བྱ་བ་ནི་མིག་སྔར་རོ། །རྡུལ་ཕྲ་མོ་ཐམས་ཅད་ཇི་སྙེད་པའི་དཀྱིལ་འཁོར་ཀུན་དུ་ཞེས་བྱ་བ་ནི་ཡུལ་དང་གྲོང་དང་གྲོང་ཁྱེར་དང་ཞིང་དང་དགོན་པ་དང་རྡུལ་ཕྲ་རབ་ཀྱི་དཀྱིལ་འཁོར་
ཐམས་ཅད་ཀྱི་བར་དུ་སྟེ་རྡུལ་ཕྲ་མོ་ཐམས་ཅད་ཇི་སྙེད་པའི་དཀྱིལ་འཁོར་ཡིན་པར་ཤེས་པར་བྱས་ལ། ཀུན་དུ་ཁྱབ་པར་བྱས་པ་ནི་རྒྱས་པར་བྱས་པ་སྟེ་བཅོམ་ལྡན་འདས་རྣམ་པར་སྣང་མཛད་ཀྱི་གནས་ན་བཞུགས་པའི་བཅོམ་ལྡན་འདས་ཤཱཀྱ་ཐུབ་པས་ཆོས་ཀྱི་འཁོར་ལོ་རབ་ཏུ་བསྐོར་བར་གྱུར་པ་སྟེ། ཆོས་ཀྱི་
འཁོར་ལོ་ནི་གཞུང་གི་ཚུལ་དུ་བསྐོར་བའོ། །དོན་གྱི་ཚུལ་ནི་རྡོ་རྗེ་དབྱིངས་ལ་སོགས་པའི་དཀྱིལ་འཁོར་གྱི་ཚུལ་དུ་བསྐོར་བའོ། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་ཡང་ཚིགས་སུ་བཅད་པས་བཅོམ་ལྡན་འདས་རྣམ་པར་སྣང་མཛད་ལ་གསོལ་བ་བཏབ་པ་ཡིན་ནོ། །ཚིགས་སུ་བཅད་
པ་ནི་སྔར་བཤད་པ་ཉིད་དོ། །རྡོ་རྗེ་འཁོར་ལོ་ཞེས་བྱ་བ་ནི་རྡོ་རྗེ་དབྱིངས་ལ་སོགས་པའི་དཀྱིལ་འཁོར་གྱི་འཁོར་ལོ་ཡིན་པར་ཤེས་པར་བྱའོ། །དེ་ནས་འདིར་ཞེས་བྱ་བ་ལ་སོགས་པ་ཐམས་ཅད་ནི་གོ་སླའོ། །དེ་བཞིན་གཤེགས་པ་རྡོ་རྗེ་དབྱིངས་ཞེས་བྱ་བ་ནི་བཅོམ་ལྡན་འདས་ཤཱཀྱ་ཐུབ་པ་ཉིད་ལ་བྱའོ། །
རྡོ་རྗེ་དབྱིངས་ལ་སོགས་པའི་དཀྱིལ་འཁོར་ཐམས་ཅད་ཀྱང་རབ་ཏུ་བསྐོར་བར་གྱུར་ཏོ་ཞེས་བྱ་བ་ནི་བསྐོར་བར་མཛད་དོ་ཞེས་བྱ་བའི་དོན་ཏོ། །དེ་ལྟར་ཐེག་པ་ཆེན་པོ་མངོན་པར་རྟོགས་པས་རྟོག་པའི་དཀྱིལ་འཁོར་ཀུན་དུ་ཁྱབ་པར་མཛད་ནས། བཅོམ་ལྡན་འདས་རྡོ་རྗེ་སེམས་དཔའ་དེ་ཉིད་རྡོ་རྗེ་ཧཱུཾ་མཛད་ཀྱི་ཏིང་ངེ་
འཛིན་ལ་ཞུགས་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པའི་དཀྱིལ་འཁོར་རྒྱས་པར་བྱ་བའི་ཕྱིར། བཅོམ་ལྡན་འདས་རྣམ་པར་སྣང་མཛད་ལ་ཚིགས་སུ་བཅད་པས་གསོལ་བ་འདེབས་པ་ཡིན་ནོ། །ཚིགས་སུ་བཅད་པ་དེ་ནི་སྔ་མ་ཉིད་དེ། དེ་ལས་ཁྲོ་བོའི་འཁོར་ལོ་ཞེས་
བྱ་བ་འབའ་ཞིག་ཐ་དད་པར་ཟད་དོ། །ཁྲོ་བོའི་འཁོར་ལོ་ཞེས་སྨོས་པས་ནི་འཇིག་རྟེན་གསུམ་ལས་རྣམ་པར་རྒྱལ་བ་ལ་སོགས་པའི་དཀྱིལ་འཁོར་རྣམས་ཡིན་པར་ཤེས་པར་བྱའོ། །དེ་ལྟར་གསོལ་བ་བཏབ་པའི་ཚིག་གསན་པ་དང་། བཅོམ་ལྡན་འདས་དེ་བཞིན་གཤེགས་པ་འཇིག་རྟེན་

གསུམ་ལས་རྣམ་པར་རྒྱལ་བས་ཞེས་བྱ་བ་ནི་བཅོམ་ལྡན་འདས་ཤཱཀྱ་ཐུབ་པ་དེ་ཉིད་འཇིག་རྟེན་གསུམ་ལས་རྣམ་པར་རྒྱལ་བ་ལྟ་བུའོ། །ཁྲོ་བོའི་འཁོར་ལོ་རབ་ཏུ་བསྐོར་བར་གྱུར་ཏོ་ཞེས་བྱ་བ་ནི་བསྐོར་བར་མཛད་དོ་ཞེས་བྱ་བའི་དོན་ཏོ། །ད་ནི་འགྲོ་བ་འདུལ་བའི་དཀྱིལ་འཁོར་གྱི་འཁོར་ལོ་རྒྱས་པར་བྱ་བའི་
ཕྱིར། བཅོམ་ལྡན་འདས་འཕགས་པ་ཀུན་དུ་སྤྱན་རས་གཟིགས་ཀྱི་དབང་པོས་ཀྱང་ཚིགས་སུ་བཅད་པས་བཅོམ་ལྡན་འདས་རྣམ་པར་སྣང་མཛད་ལ་གསོལ་བ་བཏབ་པོ། །པདྨོའི་འཁོར་ལོ་ཞེས་བྱ་བ་ནི་པདྨོས་མཚན་པའི་འཁོར་ལོ་ཡིན་པས་ན་པདྨོའི་འཁོར་ལོའོ། །དེ་ལྟར་བསྐུལ་བའི་ཚིག་
གསན་པ་དང་། བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་རྒྱལ་པོས་ཞེས་བྱ་བ་ནི་བཅོམ་ལྡན་འདས་ཤཱཀྱ་ཐུབ་པ་ཉིད་དེ་ཆོས་ཀྱི་རིགས་ཀྱི་སྒོ་ནས་དེ་སྐད་ཅེས་བཏགས་པ་ཡིན་ནོ། །པདྨོའི་འཁོར་ལོ་རབ་ཏུ་བསྐོར་རོ་ཞེས་བྱ་བ་ནི་བསྐོར་བར་མཛད་དོ་ཞེས་པའོ། །ད་ནི་ནོར་བུའི་དཀྱིལ་འཁོར་གྱི་
འཁོར་ལོ་རྒྱས་པར་བྱ་བའི་ཕྱིར་བྱང་ཆུབ་སེམས་དཔའ་ཆེན་པོ་འཕགས་པ་ནམ་མཁའི་སྙིང་པོས་ཀྱང་ཚིགས་སུ་བཅད་པས་བཅོམ་ལྡན་འདས་རྣམ་པར་སྣང་མཛད་ལ་གསོལ་བ་འདེབས་པ་ཡིན་ཏེ། ནོར་བུའི་འཁོར་ལོ་རབ་ཏུ་བསྐོར། །ཞེས་བྱའོ། །བཅོམ་ལྡན་འདས་རྣམ་པར་སྣང་མཛད་ཀྱིས་ཀྱང་
སངས་རྒྱས་ཀྱི་ཞིང་ཐམས་ཅད་དང་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་མོ་ཀུན་གྱི་ཇི་སྙེད་པའི་རྡུལ་གྱི་དཀྱིལ་འཁོར་ཀུན་དུ་ཁྱབ་པར་བྱས་ནས་ནོར་བུའི་འཁོར་ལོ་བསྐོར་བར་མཛད་དོ། །དང་པོར་རྡོ་རྗེ་སེམས་དཔའ་ལ་སོགས་པ་འཁོར་ལོས་སྒྱུར་བ་བཞིས་རྣམ་པར་སྣང་མཛད་ལ་སོགས་པའི་དེ་
བཞིན་གཤེགས་པ་ཐམས་ཅད་ལ་གསོལ་བ་བཏབ་པ་ནི་སེམས་ཅན་རྣམས་ལ་ཕན་གདགས་པའི་ཕྱིར་རང་རང་གི་དཀྱིལ་འཁོར་དང་། རང་རང་གི་ལྟག་པར་རང་རང་གི་རིགས་བསྐྱེད་ཅིང་རྟག་པར་གསོལ་ཞེས་སོ་སོ་ནས་གསོལ་བ་བཏབ་པ་དང་དེ་དག་གིས་ཀྱང་རང་རང་གི་རིགས་བསྐྱེད་ཅིང་རང་རང་གི་དཀྱིལ་འཁོར་
དང་རང་རང་གི་རྟོག་པ་བཤད་པ་ཡིན་ནོ། །རྒྱུད་ཕྱི་མ་དང་ཕྱི་མའི་ཕྱི་མ་དག་ཏུ་ནི་དེ་དང་དེར་སངས་རྒྱས་ཀྱི་བཀའ་བསྒ