Luận tạng Tây Tạng (Tengyur) — Tập 32

འཛིན་མངོན་དུ་བྱས་ཏེ། སྲོག་ལ་སོགས་པའི་འཁོར་ལོ་དང་། ཡིད་དང་དེ་ཉིད་དུ་ཞུགས་པས་བརྟན་པ་དང་གཡོ་བའི་དངོས་པོ་ཐམས་ཅད་ཀྱི་རྣམ་པར་རྟོག་པ་ཞི་བས། ཡེ་ཤེས་ལྔའི་ངོ་བོ་ཉིད་དཔལ་རྡོ་རྗེ་སེམས་དཔའི་རང་བཞིན་འོད་གསལ་བ་ལ་རྣལ་འབྱོར་པས་
གནས་པར་བྱའོ་ཞེས་རྡོ་རྗེ་འཆང་ཆེན་པོའི་བཟླས་པའོ། །དེ་བཞིན་དུ་ཡང་མྱུར་བའི་ཏིང་ངེ་འཛིན་གྱིས་སངས་རྒྱས་སྤྱན་དང་སྙོམས་པར་ཞུགས་པའི་རྣམ་པར་སྣང་མཛད་དུ་བདག་ཉིད་བསྒོམས་ཏེ། སྤྱི་བོ་ལ་སོགས་པར་ཡི་གེ་གསུམ་རྣམ་པར་དགོད་དེ། དེའི་འོད་ཟེར་སྤྲོ་བ་དང་
བསྡུ་བའི་རིམ་པས་སེམས་ཅན་གྱི་དོན་བྱས་ལ། ཐུགས་དང་གསུང་གི་ས་བོན་སྐུའི་ས་བོན་ལ་འཇུག་པར་བྱ་སྟེ། ཡི་གེ་ཨོཾ་གཅིག་པུ་ལ་དམིགས་ཤིང་མེ་ལོང་ལྟ་བུའི་ཡེ་ཤེས་ཀྱི་ངོ་བོ་ཉིད་ཉོན་མོངས་པ་དང་ཤེས་བྱའི་སྒྲིབ་པ་རབ་ཏུ་ཞི་བར་གྱུར་པར་གནས་པར་བྱའོ་ཞེས་སྐུའི་བཟླས་
པའོ། །དེ་བཞིན་དུ་ཡང་མྱུར་བའི་ཏིང་ངེ་འཛིན་གྱི་གོས་དཀར་མོ་དང་སྙོམས་པར་ཞུགས་པ་འོད་དཔག་ཏུ་མེད་པར་བདག་ཉིད་བསྒོམས་ཏེ། ཡི་གེ་གསུམ་ལྐོག་མ་ལ་སོགས་པར་དགོད་དེ། དེའི་འོད་ཟེར་སྤྲོ་བ་དང་བསྡུ་བས་སེམས་ཅན་གྱི་དོན་བྱས་པས། ཐུགས་དང་སྐུའི་ས་བོན་
གསུང་གི་ས་བོན་ལ་འཇུག་པར་བྱས་ཏེ། ཡི་གེ་ཨཱཿགཅིག་པུ་ལ་དམིགས་ཤིང་སོ་སོར་རྟོག་པའི་ཡེ་ཤེས་ཀྱི་ངོ་བོ་ཉིད་དུ་རྟོག་པ་ཐམས་ཅད་ཉེ་བར་ཞི་བར་གནས་པར་བྱའོ་ཞེས་གསུང་གི་བཟླས་པའོ། །དེ་བཞིན་དུ་ཡང་མྱུར་བའི་ཏིང་ངེ་འཛིན་གྱིས་མཱ་མ་ཀཱི་དང་སྙོམས་པར་ཞུགས་པའི་

ཐུགས་ཀྱི་རྡོ་རྗེར་བདག་ཉིད་རྣམ་པར་བསྒོམས་ཏེ། ཐུགས་ལ་སོགས་པའི་ཡི་གེ་གསུམ་དགོད་དེའི་འོད་ཟེར་སྤྲོ་བ་དང་བསྡུ་བས་སེམས་ཅན་གྱི་དོན་བྱས་ལ་ལུས་དང་ངག་གི་ས་བོན་ཐུགས་ཀྱི་ས་བོན་ལ་འཇུག་པར་བྱ་སྟེ། ཡི་གེ་ཧཱུཾ་གཅིག་པུ་ལ་དམིགས་ཤིང་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་
ཉིད་དུ་རྟོག་པ་མ་ལུས་པར་རབ་ཏུ་ཞི་བར་གནས་པར་བྱའོ་ཞེས་ཐུགས་ཀྱི་བཟླས་པའོ། །དེ་བཞིན་དུ་ཡང་མྱུར་བའི་ཏིང་ངེ་འཛིན་གྱིས་མཱ་མ་ཀཱི་དང་སྙོམས་པར་ཞུགས་པ་རིན་ཆེན་འབྱུང་ལྡན་དུ་བདག་ཉིད་རྣམ་པར་བསྒོམས་ཏེ། སྤྱི་བོ་ལ་སོགས་པར་ཡི་གེ་གསུམ་དགོད་དེ། འོད་ཟེར་སྤྲོ་བ་དང་བསྡུ་བའི་
རིམ་པས་སེམས་ཅན་ཐམས་ཅད་ལ་དབུལ་བའི་སྡུག་བསྔལ་ཕྲོགས་ཏེ། ཡི་གེ་གསུམ་པོ་ཐིག་ལེ་ལ་འཇུག་པར་བྱ་སྟེ། ནམ་མཁའ་དང་མཚུངས་པའི་ཐིག་ལེ་ལ་སེམས་གཏད་དེ། མཉམ་པ་ཉིད་ཀྱི་ཡེ་ཤེས་ཀྱི་ངོ་བོ་ཉིད་དུ་དམིགས་པ་ཐམས་ཅད་ཉེ་བར་ཞི་བར་བྱའོ་ཞེས་རིན་པོ་ཆེའི་བཟླས་པའོ། །དེ་བཞིན་དུ་
ཡང་མྱུར་བའི་ཏིང་ངེ་འཛིན་གྱིས་དམ་ཚིག་སྒྲོལ་མ་དང་སྙོམས་པར་ཞུགས་པ་དོན་ཡོད་གྲུབ་པར་བདག་ཉིད་བསྒོམས་ཏེ། སྤྱི་བོ་ལ་སོགས་པར་ཡི་གེ་གསུམ་དགོད་དེ། འོད་ཟེར་སྤྲོ་བ་དང་བསྡུ་བའི་རིམ་པས་གཞལ་ཡས་ཁང་པ་དང་བཅས་པའི་དེ་བཞིན་གཤེགས་པ་སྤྲོས་ཏེ། སེམས་ཅན་
ཐམས་ཅད་ཀྱི་དོན་བྱས་ལ་ཐོ་རངས་ཀྱི་སྐར་མ་ལྟ་བུའི་ཐིག་ལེ་ལ་ཡི་གེ་གསུམ་བསྡུས་ཏེ། བྱ་བ་ནན་ཏན་གྱི་ཡེ་ཤེས་ཀྱི་ངོ་བོ་ཉིད་དུ་བྱ་བ་བྱས་པ་ཉིད་ཀྱིས་གནས་པར་བྱའོ་ཞེས་དོན་ཡོད་བཟླས་པའོ། །དེ་བཞིན་དུ་ཡང་མྱུར་བའི་ཏིང་ངེ་འཛིན་གྱིས་བདག་ཉིད་གཏི་མུག་རྡོ་རྗེར་སྙོམས་པར་ཞུགས་
པར་བསམས་ཏེ། སྤྱི་བོ་ལ་སོགས་པར་ཡི་གེ་གསུམ་དགོད་དེ། ས་བོན་གཉིས་ཡི་གེ་ཨོཾ་ལ་འཇུག་པར་བྱ་སྟེ། དེའི་འོད་ཟེར་གྱིས་གཏི་མུག་གི་རིགས་ཅན་གྱི་སེམས་ཅན་ཐམས་ཅད་བཀུག་ལ་དེ་ཉིད་དུ་འཇུག་པར་བྱ་སྟེ། གཏི་མུག་རྣམ་པར་དག་པའི་གནས་སུ་སེམས་ཅན་འཇོག་པར་
བྱའོ་ཞེས་ལྷག་པར་མོས་པས་གཏི་མུག་ཅེས་བྱ་བ་གཅིག་པ་དང་དུ་མ་མ་ཡིན་ཞེས་དཔྱོད་པས་གང་སེམས་རྩེ་གཅིག་པ་ཉིད་དེ་ནི་གཏི་མུག་གི་བཟླས་པའོ། །དེ་བཞིན་དུ་ཡང་མྱུར་བའི་ཏིང་ངེ་འཛིན་གྱིས་འདོད་ཆགས་རྡོ་རྗེར་བདག་ཉིད་སྙོམས་པར་ཞུགས་པར་བསྒོམས་ཏེ། སྤྱི་བོ་ལ་

སོགས་པར་ཡི་གེ་གསུམ་དགོད་ཅིང་ས་བོན་གཉིས་གསུང་གི་ཡི་གེ་ལ་བསྡུས་ཏེ། དེའི་འོད་ཟེར་གྱིས་འདོད་ཆགས་ཀྱི་རིགས་ཅན་གྱི་སེམས་ཅན་བཀུག་ཅིང་དེ་ཉིད་དུ་འཇུག་པར་བྱས་ལ། འདོད་ཆགས་རྣམ་པར་དག་པའི་གནས་སུ་དགོད་པར་བྱའོ་ཞེས་ལྷག་པར་མོས་པས་འདོད་ཆགས་
ཞེས་བྱ་བ་གཅིག་པ་དང་དུ་མ་མ་ཡིན་ཞེས་སྤྱོད་པས་གང་སེམས་རྩེ་གཅིག་པ་དེ་ནི་འདོད་ཆགས་ཀྱི་བཟླས་པའོ། །དེ་བཞིན་དུ་མྱུར་བའི་ཏིང་ངེ་འཛིན་གྱིས་བདག་ཉིད་ཞེ་སྡང་རྡོ་རྗེར་སྙོམས་པར་ཞུགས་པར་བསྒོམས་ཏེ། སྤྱི་བོ་ལ་སོགས་པར་ཡི་གེ་གསུམ་དགོད་དེ་ས་བོན་གཉིས་ཧཱུཾ་ལ་འཇུག་
པར་བྱས་ལ། དེའི་འོད་ཟེར་གྱིས་ཞེ་སྡང་གི་རིགས་ཅན་གྱི་སེམས་ཅན་བཀུག་ལ་དེ་ཉིད་དུ་འཇུག་པར་བྱ་སྟེ། ཞེ་སྡང་རྣམ་པར་དག་པའི་གནས་སུ་དགོད་པར་བྱ་ཞེས་ལྷག་པར་མོས་པས་ཞེ་སྡང་ཞེས་བྱ་བ་ནི་གཅིག་གམ་དུ་མར་མེད་ཅེས་དཔྱོད་པས་གང་སེམས་རྩེ་གཅིག་པ་དེ་ནི་ཞེ་སྡང་གི་བཟླས་
པའོ། །དེ་བཞིན་དུ་ཡང་མྱུར་བའི་ཏིང་ངེ་འཛིན་གྱིས་རང་འདོད་པའི་ལྷ་གང་ཡང་རུང་བ་སྙོམས་པར་ཞུགས་པར་བདག་ཉིད་རྣམ་པར་བསྒོམས་ཏེ། སྤྱི་བོ་ལ་སོགས་པར་ཡི་གེ་གསུམ་པོ་བཀོད་པ་དེ་ལ་དམིགས་པས་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་
རྣམས་བདག་གིས་སྔགས་བརྗོད་པར་གྱུར་པ་འདི་ཉོན་ཅིག་ཅེས་ལྷག་པར་མོས་པས་དངོས་གྲུབ་འདོད་པའི་སྒྲུབ་པ་པོས་རང་ངམ་གཞན་གྱིས་ཐོས་པར་གྱུར་པ་ཁྲོ་བར་བརྗོད་པས་ན་ཁྲོ་བོའི་བཟླས་པའོ། །དེ་བཞིན་དུ་མྱུར་བའི་ཏིང་ངེ་འཛིན་གྱིས་རྡོ་རྗེ་འཆང་ཆེན་པོ་ལ་སོགས་པ་གང་ཡང་རུང་
བ་རང་གི་ཤེས་རབ་མ་དང་སྙོམས་པར་ཞུགས་པར་བདག་ཉིད་བསམས་ཏེ། སྤྱི་བོ་ལ་སོགས་པར་ཡི་གེ་གསུམ་པོ་དགོད་ཅིང་། ལྟེ་བར་རྩིབས་བརྒྱད་པ་ཁ་དོག་དཀར་པོ་ཆོས་ཀྱི་དབྱིངས་ཀྱི་འཁོར་ལོ་དེའི་ལྟེ་བར་དབྱངས་ཡིག་དང་པོ་མར་མེ་དང་འདྲ་བ་ལ་དམིགས་ཏེ། དེའི་འོད་ཟེར་
སྤྲོ་བ་དང་བསྡུ་བའི་རིམ་པས་སེམས་ཅན་མ་ལུས་པའི་དོན་བྱས་ལ། སེམས་རྩེ་གཅིག་པར་གྱུར་པས་ཆ་དང་ཆའི་དབྱེ་བས་ཡི་གེ་གསུམ་པོ་སྐྱེ་བ་མེད་པའི་ཡི་གེ་ཨ་ལ་འཇུག་པར་བྱ་སྟེ། དེ་ཡང་རྩིབས་བརྒྱད་པའི་འཁོར་ལོ་ལ་ཐིམ་ཞིང་དེ་ཡང་ལྟེ་བའི་ནམ་མཁའ་ལ་དབྱེར་མེད་པར་

བསམས་ལ། རྣམ་པར་རྟོག་པའི་བག་ཆགས་རབ་ཏུ་ཞི་བ་སྒོ་ཐམས་ཅད་འགགས་པ་འགྲོ་བ་དང་འོང་བ་ལས་ངེས་པར་གྲོལ་བ་སྲོག་ལ་སོགས་པའི་རླུང་གི་འཁོར་ལོ་ཐམས་ཅད་རོ་གཅིག་པར་གྱུར་ན། དྲི་མ་མེད་པའི་མཐའ་ཡས་པའི་ནམ་མཁའ་དང་མཚུངས་པ་འོད་
གསལ་བའི་དེ་ཁོ་ན་ཉིད་འབའ་ཞིག་ཏུ་རྣལ་འབྱོར་པས་གནས་པར་བྱའོ། །འདི་ནི་ཐབས་དང་ཤེས་རབ་རོ་གཅིག་པའི་བདག་ཉིད་བུད་མེད་དང་སྐྱེས་པའི་ཐ་སྙད་དང་བྲལ་བའི་མ་ནིང་གི་བཟླས་པར་བཤད་དོ་ཞེས་རྡོ་རྗེ་བཟླས་པ་རྣམ་པ་བཅུ་གཅིག་པའོ། །རྡོ་རྗེ་འཆང་ཆེན་པོའི་བཟླས་པ་
ལ་ཡང་དབྱེ་བ་གཞན་བཤད་པར་བྱ་སྟེ། རེ་ཞིག་དང་པོ་རྡོ་རྗེ་འཆང་ཆེན་པོའི་ཕྱག་རྒྱ་ཆེན་པོའི་གཟུགས་སུ་བདག་ཉིད་བསམས་ཏེ། ལྐོག་མ་དང་སྙིང་ག་དང་ལྟེ་བ་དང་གསང་བ་དག་ཏུ་འབྱུང་བ་ཆེན་པོ་བཞིའི་རང་བཞིན་གྱི་དཀྱིལ་འཁོར་མྱུར་དུ་དགོད་དེ། དེ་རྣམས་ཀྱི་སྟེང་དུ་ཐུགས་
ཀྱི་རྡོ་རྗེའི་ས་བོན་གྱི་ཆ་རེ་རེ་རྣམ་པར་བཀོད་ལ། འཇུག་པ་ལ་སོགས་པའི་རིམ་པས་ཇི་སྲིད་སེམས་རྩེ་གཅིག་པའི་བར་དུ་བསམ་པར་བྱའོ། །དེ་ལ་ཆ་དགོད་པའི་རིམ་པ་འདི་ཡིན་ཏེ། སྙིང་གའི་པདྨར་ཡི་གེ་མགོ་མེད་དེ་དཔེར་ན་ཧའོ། །ལྐོག་མའི་པདྨར་མགོ་བོ་སྟེ། དཔེར་ན་ཨའོ། །
གསང་བའི་པདྨར་དབྱངས་ཏེ་དཔེར་ན་ཨུའོ། །ལྟེ་བའི་པདྨར་དབྱངས་ཀྱི་མཐའ་སྟེ་དཔེར་ན་དབྱངས་ཀྱི་མཐའོ། །ཇི་སྐད་དུ། ལྷ་མོ་བཞི་ཡིས་ཞུས་པ་ལས་ཀྱང་། མགོ་མེད་སྙིང་གའི་པདྨར་གནས། །ཁ་ཡི་པདྨར་མགོ་བོ་སྟེ། །གསང་བའི་པདྨར་དབྱངས་གནས་པ། །ལྟེ་བའི་
པདྨར་དབྱངས་མཐའོ། །འདི་ཉིད་འགྲོ་དང་འོང་བ་ཡིས། །ཐིག་ལེ་རྣལ་འབྱོར་ལ་འཇུག་པའོ། །ཞེས་འབྱུང་ངོ་། །རབ་ཏུ་བྱེད་པ་ལས་ཀྱང་། །ཐབས་ཀྱི་དམ་པ་རབ་འཇུག་པའོ། །རྣལ་འབྱོར་དངོས་གྲུབ་རབ་སྟེར་བའི། །གསང་བའི་ཡི་གེ་བཤད་པར་བྱ། །
གང་ཞིག་བསམས་པ་ཙམ་གྱིས་ནི། །རྣལ་འབྱོར་ཅན་ལ་མཆོག་སྟེར་འགྱུར། །དང་པོའི་ཡི་གེའི་སྦྱོར་བ་ཡིས། །རྟག་ཏུ་དབུགས་ནི་རྔུབ་པར་བྱེད། །བརྒྱད་པའི་མཐའ་དང་ཡང་དག་ལྡན། །ཡི་གེ་ཨུ་དང་ཐིག་ལེར་བཅས། །རྣལ་འབྱོར་པ་ཡིས་དབུགས་གཏོང་བྱེད། །འདི་ནི་ཅི་དགའི་བཟླས་

པར་བཤད། །རྡོ་རྗེ་བཟླས་པ་རྣམ་པ་བཅུ་གཅིག་པོ་འདིས་ཐ་མལ་པའི་ངག་གི་བརྗོད་པའི་རྣམ་པར་རྟོག་པ་བཟློག་པས་འཇིག་རྟེན་ལས་འདས་པའི་ཏིང་ངེ་འཛིན་མངོན་དུ་གྱུར་པ་ན། གསུང་གི་རྡོ་རྗེའི་ཏིང་ངེ་འཛིན་ལ་འཇུག་པར་འགྱུར་རོ། །ཐ་མལ་པའི་ངག་ནི་རྣམ་པ་བཞི་སྟེ། མཚན་ཉིད་ཀྱི་
ངག་དང་། རྨི་ལམ་གྱི་ངག་དང་། གནས་ངན་ལེན་པའི་མངོན་པར་ཞེན་པའི་ངག་དང་། ཐོག་མ་མེད་པའི་དུས་ཀྱི་རྣམ་པར་རྟོག་པའི་ངག་གོ། །ཇི་སྐད་དུ། དེ་ལ་བློ་གྲོས་ཆེན་པོ་མཚན་ཉིད་ཀྱི་ངག་ནི་རང་གི་རྣམ་པར་རྟོག་པའི་གཟུགས་ཀྱི་མཚན་མ་ལ་མངོན་པར་ཞེན་པ་ལས་འབྱུང་བའོ། །བློ་
གྲོས་ཆེན་པོ་རྨི་ལམ་གྱི་ངག་ནི་སྔར་མྱོང་བའི་ཡུལ་རྗེས་སུ་དྲན་པས་རྟོག་པའི་ཡུལ་མེད་བཞིན་དུ་འབྱུང་བའོ། །བློ་གྲོས་ཆེན་པོ་གནས་ངན་ལེན་པའི་མངོན་པར་ཞེན་པས་བྱུང་བའི་ངག་ནི་སེམས་ཅན་གྱི་སྔོན་བྱས་པའི་ལས་ཀྱི་དབང་ལས་འབྱུང་ངོ་། །བློ་གྲོས་ཆེན་པོ་ཐོག་མ་མེད་པའི་དུས་ནས་རྣམ་པར་རྟོག་པའི་
ཚིག་ནི་ཐོག་མ་མེད་པའི་སྤྲོས་པ་ལ་མངོན་པར་ཞེན་པའི་གནས་ངན་ལེན་གྱི་རང་གི་ས་བོན་གོམས་པ་ལས་བྱུང་བ་སྟེ། བློ་གྲོས་ཆེན་པོ་ངག་གི་རྣམ་པར་རྟོག་པའི་མཚན་ཉིད་བཞི་པོ་འདི་དག་གོ་ཞེས་མིའམ་ཅིའི་རྒྱལ་པོས་ཞུས་པ་ལས་བྱུང་ངོ་། །དེ་བཟློག་པས་འཇིག་རྟེན་ལས་འདས་པའི་ངག་
མངོན་དུ་གྱུར་པས་རྡོ་རྗེ་ལྟ་བུའི་ངག་རྫོགས་པར་གྱུར་པ་དང་། བསྟོད་པ་དང་སྨད་པ་ལ་སོགས་པའི་ཚིག་གི་ཚོགས་ཐོས་ནས། ཡིད་བདེ་བ་དང་ཡིད་མི་བདེ་བར་མི་འགྱུར་རོ་ཞེས་རྡོ་རྗེ་བཟླས་པའི་རིམ་པ་བསྟན་ཏོ། །ངག་རྣམ་པར་དག་པའི་འོག་ཏུ་སེམས་རྣམ་པར་དག་པ་ལ་འབད་པར་བྱ་
སྟེ། དེ་ལ་ཐབས་ནི་གཉིས་ཏེ། སྔགས་ཀྱི་རིམ་པ་དང་། ཕྱག་རྒྱའི་རིམ་པའོ། །དེ་ལ་སྔགས་ཀྱི་རིམ་པ་ནི་འདི་ལྟར་རིག་པར་བྱ་སྟེ། དང་པོ་སེམས་ནི་རྣམ་པ་བརྒྱད་དེ་ཀུན་གཞི་རྣམ་པར་ཤེས་པ་དང་། ཉོན་མོངས་པ་ཅན་དང་། སྒོ་ལྔ་དང་། ཡིད་ཀྱི་རྣམ་པར་ཤེས་པའོ། །རྣམ་པར་
ཤེས་པ་བརྒྱད་པོ་དེ་དག་མདོར་བསྡུས་པས་གསུམ་དུ་འགྱུར་ཏེ། རྣམ་པར་སྨིན་པའི་རྣམ་ཤེས་དང་། །ཉོན་མོངས་པ་ཅན་གྱི་ཡིད་དང་། །འཇུག་པའི་རྣམ་པར་ཤེས་པའོ། །རྣམ་པར་ཤེས་པ་གསུམ་པོ་དེས་ནི་སེམས་ཅན་གྱི་ཁམས་འཁོར་བའི་ས་རུ་འགྲོ་བ་དང་། འོང་བ་དག་གིས་

འཁོར་བར་བྱེད་དོ། །ཇི་སྐད་དུ། དམྱལ་བ་ནས་ནི་ཡི་དགས་གནས་སུ་འགྲོ། །སླར་ཡང་ལྷ་ཡི་གནས་སུ་སྐྱེ་བར་འགྱུར། །ཞེས་འབྱུང་ངོ་། །དེ་རྣམས་གནས་གྱུར་པ་ལས་འོད་གསལ་བའི་དེ་ཁོ་ན་ཉིད་སྔོན་དུ་བྱས་པས་ཐར་པར་འགྱུར་ཏེ། ཇི་སྐད་དུ། འདོད་ཆགས་
ལ་སོགས་ཀྱིས་གོས་པའི། །སེམས་ཉིད་འཁོར་བར་བཤད་པ་སྟེ། །དེ་ལས་རྣམ་པར་དབེན་པ་ནི། །རྒྱལ་བས་མདོར་བསྡུས་ཐར་པ་གསུངས། །ཞེས་འབྱུང་ངོ་། །རྣམ་པར་ཤེས་པ་གསུམ་པོ་དེའི་བརྡ་འདི་དག་ཡིན་ཏེ།སེམས་དང་ཡིད་དང་རྣམ་ཤེས་དང་། སྣང་བ་དང་སྣང་བ་མཆེད་
པ་དང་སྣང་བ་འཐོབ་པ་དང་། ཤེས་རབ་དང་ཐབས་དང་ཉེ་བར་ཐོབ་པའོ། །ཟླ་བ་དང་ཉི་མ་དང་མུན་པའོ། །མཚན་མོ་དང་ཉིན་མོ་དང་མཚམས་དང་སྟོང་པ་དང་ཤིན་ཏུ་སྟོང་པ་དང་སྟོང་པ་ཆེན་པོ་ཞེས་བྱའོ། །དེ་ལ་འཇུག་པའི་རྣམ་པར་ཤེས་པ་གནས་གྱུར་པ་ལ་གཉེན་པོ་ནི་སྟོང་པ་ཉིད་དང་སྣང་
བའི་ཡེ་ཤེས་སོ། །ཉོན་མོངས་པ་ཅན་གྱི་ཡིད་གནས་གྱུར་པ་ལ་གཉེན་པོ་ནི་སྣང་བ་མཆེད་པ་དང་ཤིན་ཏུ་སྟོང་པའོ། །ཀུན་གཞི་རྣམ་པར་ཤེས་པ་གནས་གྱུར་པ་ལ་གཉེན་པོ་ནི་སྣང་བ་ཐོབ་པ་དང་ཆེན་པོ་སྟོང་པའོ། །ཡེ་ཤེས་གསུམ་པོ་དེ་རོ་གཅིག་པར་བྱེད་པ་འོད་གསལ་བའི་ཡེ་ཤེས་
ཐམས་ཅད་སྟོང་པའི་ངོ་བོའོ། །རྣམ་པར་ཤེས་པ་གསུམ་པོའི་རང་བཞིན་ནི་བརྒྱད་ཅུའོ། །དེ་ལ་འཇུག་པའི་རྣམ་པར་ཤེས་པའི་རང་བཞིན་ཤེས་རབ་ཀྱི་ངོ་བོ་སྟེ་སུམ་ཅུ་རྩ་གསུམ་མོ། །ཉོན་མོངས་པ་ཅན་གྱི་ཡིད་ཀྱི་རང་བཞིན་ནི་བཅུ་སྟེ། ཐབས་ཀྱི་རང་བཞིན་ནོ། །ཀུན་གཞི་རྣམ་པར་
ཤེས་པའི་རང་བཞིན་བདུན་པོ་ནི་མ་རིག་པའི་ངོ་བོ་ཉིད་དོ། །དེ་རྣམས་ཁོ་ན་ཉིན་མོ་དང་མཚན་མོའི་དབྱེ་བས་བརྒྱ་དྲུག་ཅུར་འགྱུར་རོ། །དེ་རྣམས་སྤང་བར་བྱ་བའི་ཕྱིར་སྔགས་ཀྱི་རིམ་པ་བསྟན་པར་བྱ་སྟེ། དང་པོར་ལྟེ་བར་རྩིབས་བརྒྱད་པའི་ཆོས་ཀྱི་དབྱིངས་ཀྱི་འཁོར་ལོའི་ལྟེ་བར་པདྨའི་སྟེང་
དུ་ཟླ་བའི་དཀྱིལ་འཁོར་ལ་ཐིག་ལེས་བརྒྱན་པའི་དབྱངས་ཡིག་དང་པོ་དགོད་པར་བྱས་ལ། སྤྱི་བོ་ལ་སོགས་པར་ཡི་གེ་གསུམ་ལ་དམིགས་ཏེ་ཨའི་ཐིག་ལེ་ལས་བྱུང་བའི་འོད་ཟེར་དཀར་པོས་སྤྱི་བོ་ནས་ཡི་གེ་ཨོཾ་འཇུག་པའི་རྣམ་པར་ཤེས་པའི་ངོ་བོ་ཉིད་བཀུག་ཅིང་དེ་ཉིད་དུ་འཇུག་པར་བྱ་སྟེ།

དེ་ལ་ཡིད་རྩེ་གཅིག་པར་གནས་པར་བྱའོ། །དེའི་ཚེ་རང་བཞིན་སུམ་ཅུ་རྩ་གསུམ་དང་ལྡན་པའི་འཇུག་པའི་རྣམ་པར་ཤེས་པ་ལོག་པ་ལས་ཟླ་བའི་སྣང་བ་དང་འདྲ་བའི་སྣང་བའི་ཡེ་ཤེས་སྐྱེ་བར་འགྱུར་རོ། །དེའི་འོག་ཏུ་ཆོས་ཀྱི་དབྱིངས་ཀྱི་འཁོར་ལོ་དེ་ཉིད་དུ་ཉི་མའི་དཀྱིལ་འཁོར་དང་རྡོ་རྗེའི་ཆང་ཟུངས་ཀྱི་
ནང་ན་གནས་པའི་ཐིག་ལེ་གཉིས་ཀྱིས་བརྒྱན་པའི་དང་པོའི་དབྱངས་ཡིག་ཁ་དོག་དམར་པོ་རྣམ་པར་བསམས་ཏེ། དེ་ལས་བྱུང་བའི་འོད་ཟེར་དམར་པོ་མགྲིན་པ་ན་གནས་པའི་ཡི་གེ་ཨ་ཉོན་མོངས་པ་ཅན་གྱི་ཡིད་ཀྱི་ངོ་བོ་ཉིད་བཀུག་ལ་དེ་ཉིད་དུ་འཇུག་པར་བྱ་སྟེ། དེ་ཉིད་དུ་ཡིད་རྩེ་གཅིག་པར་གནས་
པར་བྱའོ། །དེའི་ཚེ་རང་བཞིན་བཞི་བཅུ་དང་ལྡན་པའི་ཉོན་མོངས་པ་ཅན་གྱི་ཡིད་ལོག་པས་ཉི་མའི་སྣང་བ་དང་འདྲ་བའི་སྣང་བ་མཆེད་པའི་ཡེ་ཤེས་སྐྱེ་བར་འགྱུར་རོ། །དེའི་རྗེས་ལ་ས་བོན་དང་པདྨ་དང་ཟླ་བ་དང་ཉི་མ་དང་རྡོ་རྗེའི་དམིགས་པ་སྤངས་ཏེ། འཁོར་ལོ་ལ་གནས་པའི་ཐིག་ལེ་ཙམ་
ལ་བལྟས་ཏེ། དེ་ལས་བྱུང་བའི་མཚམས་ཀྱི་སྣང་བ་དང་མཚུངས་པའི་འོད་ཟེར་གྱི་སྙིང་ག་ན་གནས་པའི་ཐུགས་ཀྱི་རྡོ་རྗེའི་ས་བོན་བཀུག་ལ་དེ་ཉིད་དུ་འཇུག་པར་བྱ་སྟེ་དེ་ཉིད་དུ་ཡིད་རྩེ་གཅིག་པར་གནས་པར་བྱའོ། །དེའི་ཚེ་ཀུན་གཞི་རྣམ་པར་ཤེས་པ་རང་བཞིན་བདུན་དང་ལྡན་པ་ལོག་
པས་མཚམས་ཀྱི་སྣང་བ་དང་མཚུངས་པའི་སྣང་བ་ཐོབ་པའི་ཡེ་ཤེས་སྐྱེ་བར་འགྱུར་རོ། །དེ་ནས་ཀྱང་རིམ་གྱིས་ཐིག་ལེ་དང་འཁོར་ལོ་ལྟེ་བའི་མཁའ་ལ་ཐིམ་པས་རྟགས་ལྔའི་སྣང་བ་སྔོན་དུ་འགྲོ་བར་ལུས་ལ་སོགས་པའི་རྣམ་པར་རྟོག་པའི་བག་ཆགས་མ་ལུས་པ་ཟད་པས་སྤྲིན་མེད་
པའི་ནམ་མཁའ་དང་འདྲ་བའི་ཆོས་ཀྱི་དབྱིངས་ཀྱི་ཡེ་ཤེས་འོད་གསལ་བའི་དེ་ཁོ་ན་ཉིད་སྐྱེ་བར་འགྱུར་རོ། །དེ་དག་རིམ་པ་ཇི་ལྟ་བ་བཞིན་དུ་སྟོང་པ་དང་ཤིན་ཏུ་སྟོང་པ་དང་སྟོང་པ་ཆེན་པོ་དང་ཐམས་ཅད་སྟོང་པ་སྟེ། སྣང་བ་ལ་སོགས་པའི་ཡེ་ཤེས་རྣམས་ཀྱི་རྣམ་གྲངས་སུ་ཤེས་པར་བྱ་སྟེ།
ཀུན་ནས་ཉོན་མོངས་པ་དང་རྣམ་པར་བྱང་བ་དག་རང་བཞིན་གཅིག་པ་ཡིན་པའི་ཕྱིར་ཞེས་བྱ་བའི་ཐ་ཚིག་གོ་ཞེས་སྔགས་ཀྱི་རིམ་པས་སེམས་རྣམ་པར་དག་པའི་རིམ་པ་བསྟན་ཏོ། །ད་ནི་ཕྱག་རྒྱའི་རིམ་པ་བཤད་པར་བྱ་སྟེ། རེ་ཞིག་དང་པོ་རྣལ་འབྱོར་པས་མྱུར་བའི་ཏིང་ངེ་འཛིན་གྱིས་

རྡོ་རྗེ་འཆང་ཆེན་པོ་ལ་སོགས་པའི་ཕྱག་རྒྱ་བསྒོམས་ཏེ། སྨེ་ཤ་ཅན་ལ་སོགས་པའི་བུ་མོ་ལོ་བཅུ་གཉིས་པ་ལ་སོགས་པ་ན་སོ་དང་ལྡན་པའི་ཕྱག་རྒྱ་བླངས་ཏེ་དེ་ནི་མཱ་མ་ཀཱི་ལ་སོགས་པར་ལྷག་པར་མོས་ཏེ་མཆོག་གི་བསྙེན་པ་ལ་སོགས་པས་བདེ་བ་ཆེན་པོ་ཉེ་བར་མཚོན་པར་བྱ་བའི་
ཕྱིར་དེ་དང་ལྷན་ཅིག་སྙོམས་པར་ཞུགས་པར་བྱའོ། །དེ་ལ་རྡོ་རྗེ་དང་པདྨ་བསྐྱོད་པ་ལ་འཇུག་པ་ཚངས་པའི་བུ་ག་ནས་ཞུ་བའི་བྱང་ཆུབ་ཀྱི་སེམས་ཀྱི་གནས་སྐབས་སུ་སྣང་བའི་ཡེ་ཤེས་དང་རྣམ་པ་སྣ་ཚོགས་པའི་སྐད་ཅིག་དང་། འདོད་ཆགས་དང་བྲལ་བ་ལ་སོགས་པའི་རང་བཞིན་རྣམས་དང་། མཚན་མོ་དང་ཤེས་རབ་
དང་ཟླ་བའི་སྣང་བ་ལྟ་བུ་དང་འཇུག་པའི་རྣམ་པར་ཤེས་པ་རང་གི་རང་བཞིན་དང་ལྡན་པ་རྣམས་འགོག་པར་འགྱུར་རོ། །ཡན་ལག་གི་ཚིགས་ཐམས་ཅད་ཁྱབ་པའི་དུས་སུ་སྣང་བ་མཆེད་པའི་ཡེ་ཤེས་དང་། རྣམ་པར་སྨིན་པའི་སྐད་ཅིག་མ་དང་། འདོད་ཆགས་དང་འདོད་ཆགས་ཀྱི་རང་བཞིན་དང་བཅས་པ་དང་།
ཉིན་མོ་དང་ཐབས་དང་ཉི་མའི་འོད་ཟེར་སྣང་བ་ལྟ་བུ་དང་། ཉོན་མོངས་པ་ཅན་གྱི་ཡིད་རང་གི་རང་བཞིན་དང་བཅས་པ་འགོག་པར་འགྱུར་རོ། །དེའི་རྗེས་སུ་རྡོ་རྗེའི་ཆང་ཟུངས་སུ་གནས་པའི་བྱང་ཆུབ་ཀྱི་སེམས་ཀྱི་ཐིག་ལེ་གསུམ་གྱི་བདག་ཉིད་ཀྱི་སྐབས་སུ་སྣང་བ་ཐོབ་པའི་ཡེ་ཤེས་དང་རྣམ་པར་
འཇོམས་པའི་སྐད་ཅིག་མ་དང་། ཆགས་པ་བར་མ་རང་བཞིན་དང་བཅས་པ་དང་། མཚམས་ཀྱི་དུས་དང་། ཐབས་དང་ཤེས་རབ་སྙོམས་པར་ཞུགས་པ་དང་། མུན་པ་ལྟ་བུའི་སྣང་བ་དང་། ཀུན་གཞི་རྣམ་པར་ཤེས་པ་རང་གི་རང་བཞིན་བདུན་དང་བཅས་པ་འགོག་པར་འགྱུར་རོ། །དེའི་རྗེས་སུ་རྡོ་རྗེའི་
ནོར་བུའི་རྩེ་མོར་བྱང་ཆུབ་ཀྱི་སེམས་ཕྱིན་པའི་གནས་སྐབས་སུ་སྔ་མ་བཞིན་དུ་རྟགས་ལྔ་སྔོན་དུ་འགྲོ་བའི་ཐབས་དང་ཤེས་རབ་དང་། ཉེ་བར་ཐོབ་པ་དང་བྲལ་བ། ཟླ་བ་དང་ཉི་མ་དང་མཚམས་ཀྱི་མུན་པའི་སྣང་བ་ལ་སོགས་པ་ཆགས་པ་དང་ཆགས་བྲལ་དང་། ཆགས་པ་བར་མ་དང་བྲལ་ཞིང་། །
སྒོ་འགགས་པ་དང་འགྲོ་བ་དང་འོང་བ་དང་བྲལ་བ་སྣང་བ་ལ་སོགས་པའི་ཡེ་ཤེས་སྤངས་པ་སྤྲིན་མེད་པའི་ནམ་མཁའ་དང་འདྲ་བའི་འོད་གསལ་བའི་ཡེ་ཤེས་རྣལ་འབྱོར་པས་མཐོང་བར་འགྱུར་རོ། །ཇི་སྐད་དུ། དེ་ཉིད་ཡེ་ཤེས་གཉིས་མེད་དེ། །ཆོས་དབྱིངས་ཤེས་རབ་ཕ་རོལ་ཕྱིན། །

ཞེས་འབྱུང་ངོ་། །རབ་ཏུ་བྱེད་པ་ལས་ཀྱང་། །སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཡེ་ཤེས་གསུམ་གྱི་དབྱེ་བ་ན། །འདི་ཉིད་དུ་ནི་གསལ་བར་མཚོན། །ཞེས་འབྱུང་ངོ་། །སེམས་རྣམ་པར་དག་པའི་རིམ་པ་འདིས་རྣལ་འབྱོར་པ་ས་བཅུ་པ་ལ་གནས་པར་
འགྱུར་རོ། །རབ་ཏུ་བྱེད་པ་ལས་ཀྱང་། དང་པོ་ལས་ཀྱི་སྦྱོར་བ་ཡིས། །ས་བརྒྱད་པ་ནི་ཐོབ་པར་འགྱུར། སྣང་བ་གསུམ་པོ་མཐོང་བ་ནི། །ས་བཅུ་ལ་ནི་གནས་པར་འགྱུར། །ཞེས་འབྱུང་ངོ་། །ས་བཅུའི་དབང་ཕྱུག་རྣལ་འབྱོར་པས་ཡེ་ཤེས་ལ་དབང་ཐོབ་པའི་དབང་
གིས་ཀུན་ལ་དབང་བྱེད་པར་འགྱུར་རོ་ཞེས་ཕྱག་རྒྱའི་རིམ་པས་སེམས་ལ་དམིགས་པ་ཐོབ་པའོ། །ད་ནི་ལུས་དང་ངག་དང་ཡིད་རྣམ་པར་དག་པས་དོན་དམ་པའི་བདེན་པ་ལ་འཇུག་པ་ཉིད་ཀྱིས་གཞན་གྱི་དོན་དང་བྲལ་བ་དང་། ཆད་པར་ཐལ་བར་འགྱུར་བ་དང་། སྔོན་གྱི་སྨོན་ལམ་གྱི་འབྲས་བུ་
མེད་པ་དང་། འགྲོ་བའི་དོན་མི་བྱེད་པས་ཉན་ཐོས་ཀྱི་བྱང་ཆུབ་བཞིན་དུ་རང་གི་དོན་ཙམ་ལ་ལྟ་བ་དེ་དག་བཟློག་པར་བྱ་བའི་ཕྱིར་དང་། ཀུན་རྫོབ་ཀྱི་བདེན་པ་ཡང་དག་པར་མཐོང་བའི་ཕྱིར་སྒྱུ་མ་ལྟ་བུའི་ཏིང་ངེ་འཛིན་ཞེས་བྱ་བ་བདག་བྱིན་གྱིས་རློབ་པ་མྱུར་བའི་རྣམ་པས་ཡོངས་སུ་རྫོགས་
པ་རྡོ་རྗེ་འཆང་ཆེན་པོའི་ཕྱག་རྒྱའི་གཟུགས་རིམ་པ་འདིས་བསྒོམ་པར་བྱའོ། །དེ་ལ་རྣལ་འབྱོར་གཉིས་ཏེ། མྱུར་བའི་རྣམ་པའི་རྣལ་འབྱོར་དང་། སྣང་བ་ཐོབ་པ་ལ་སོགས་པའི་རྣལ་འབྱོར་རོ། །དེ་ལ་དང་པོ་སེམས་རྣམ་པར་དག་པའི་རིམ་པས་འོད་གསལ་བ་ཐོབ་པ་གང་ཡིན་པ་དེ་ལས་
མི་དམིགས་པའི་སྙིང་རྗེའི་དབང་གིས་འབད་པ་མེད་པར་རྣམ་པ་ཐམས་ཅད་ཀྱི་མཆོག་དང་ལྡན་པ། ཞལ་གསུམ་པ་ལ་སོགས་པ་དང་ལྡན་པ། རིན་པོ་ཆེ་སྣ་ཚོགས་པའི་རང་བཞིན་གཞལ་ཡས་ཁང་པ་ལ་པདྨ་དང་ཟླ་བ་ལ་སོགས་པའི་གདན་ལ་བཞུགས་པ། དེ་བཞིན་གཤེགས་པ་དང་
ལྷ་མོ་དང་བྱང་ཆུབ་སེམས་དཔའ་དང་ཁྲོ་བོའི་ཚོགས་ཀྱིས་ཡོངས་སུ་བསྐོར་བ། དེའི་བ་སྤུའི་ཁུང་བུ་ནས་བྱུང་བའི་འོད་ཟེར་གྱི་འཁོར་ལོས་ཁམས་གསུམ་པ་རྣམས་ཀྱི་རེ་བ་སྐོང་བར་བྱེད་ལ། ཡིད་བཞིན་གྱི་ནོར་བུ་དང་དཔག་བསམ་གྱི་ཤིང་བཞིན་དུ་འདོད་པའི་དོན་སྟོབས་ཀྱིས་སྟེར་

བར་བྱེད་པ་སར་ཞིང་སར་པའི་དཀྱིལ་འཁོར་གྱི་འཁོར་ལོ་སྤྲོས་པས་ནམ་མཁའི་དབྱིངས་མཐའ་མེད་པ་མ་ལུས་པ་ཁྱབ་པར་བྱེད་པ། རྡོ་རྗེ་འཆང་ཆེན་པོ་ལ་སོགས་པའི་ཕྱག་རྒྱ་ཆེན་པོའི་གཟུགས་མྱུར་དུ་སྤྲོས་ཏེ། དེ་ཉིད་སྒྱུ་མ་ལ་སོགས་པའི་དཔེ་བཅུ་གཉིས་ཀྱིས་
ཡང་དག་པར་བལྟས་ཏེ། ཁམས་གསུམ་ཐམས་ཅད་ཀྱང་སྒྱུ་མ་ལྟ་བུར་ཤེས་ནས་སྔགས་དང་ཕྱག་རྒྱ་ལ་སོགས་པའི་སྦྱོར་བ་དང་། རབ་ཏུ་གནས་པ་དང་། སྦྱིན་སྲེག་དང་། དཀྱིལ་འཁོར་དང་། བཟླས་པ་དང་། སྐུ་ཁྲུས་དང་། གཏོར་མ་དང་། སྤྱན་དྲང་བ་དང་། བཞུགས་སུ་གསོལ་བ་
དང་། གཤེགས་སུ་གསོལ་བ་དང་། རིམ་པ་གཉིས་བསྒོམ་པ་ལ་སོགས་པ་དང་། ཕྲིན་ལས་ཐམས་ཅད་དང་། དེ་བཞིན་དུ་ཡང་གར་དང་གླུ་དང་རོལ་མོ་དང་། སྒེག་པ་ལ་སོགས་པ་ལོངས་སྤྱོད་པ་དང་། ཇི་སྲིད་སྤྱོད་ལམ་བཞིའི་བར་དུ་སྒྱུ་མ་དང་དྲི་ཟའི་གྲོང་ཁྱེར་དང་། བྲག་ཅ་
དང་སྨིག་རྒྱུ་དང་། ཆུ་ཟླ་དང་མེ་ལོང་གི་གཟུགས་བརྙན་དང་། ཆུ་ཤིང་དང་སེང་གེ་ཟླ་བའི་གྲོང་ཁྱེར་ལ་སོགས་པ་དང་འདྲ་བར་བལྟ་བར་བྱའོ། །ཏིང་ངེ་འཛིན་འདི་སྤྱོད་པར་གྱུར་པའི་རྣལ་འབྱོར་པས་རང་དང་གཞན་གྱི་དོན་ཐམས་ཅད་འབད་པ་མེད་པར་འགྲུབ་པར་འགྱུར་རོ། །
བསྐལ་པ་དང་བསྐལ་པ་སྟོང་གི་བར་དུ་གནས་པར་འགྱུར་རོ་ཞེས་འདི་ནི་མྱུར་བའི་ཏིང་ངེ་འཛིན་གྱིས་བདག་བྱིན་གྱིས་རློབ་པའི་རིམ་པ་གཅིག་གོ། །གཉིས་པ་ནི་རེ་ཞིག་དང་པོ་སྤྲིན་མེད་པའི་ནམ་མཁའ་འདྲ་བའི་འོད་གསལ་བ་ལ་དམིགས་ཏེ། དེ་ལས་མཚམས་ཀྱི་སྣང་བ་དང་འདྲ་བའི་ཆོས་ཀྱི་དབྱིངས་ཀྱི་འཁོར་
ལོ་ལ་གནས་པའི་ཐིག་ལེ་ལ་བལྟས་ཏེ། དེའི་རྗེས་སུ་ཉི་མ་དང་རྡོ་རྗེའི་སྟེང་དུ་ཨཿཚེག་དྲག་ཅན་དམར་པོ་བསམས་ཏེ། དེའི་རྗེས་ལ་པདྨ་དང་ཟླ་བའི་དཀྱིལ་འཁོར་གྱི་སྟེང་དུ་ཐིག་ལེ་དང་བཅས་པ་དབྱངས་ཡིག་དང་པོ་དཀར་པོ་ལ་བལྟས་ཏེ། དེ་དག་ཐམས་ཅད་ཡོངས་སུ་གྱུར་པ་ལས་སྔ་མ་བཞིན་དུ་ལྷའི་
གཟུགས་ཡོངས་སུ་རྫོགས་པ་ཞེས་བྱ་བའི་སྣང་བ་ཐོབ་པ་ལ་སོགས་པའི་རིམ་པས་བདག་བྱིན་གྱིས་རློབ་པའོ། །གལ་ཏེ་ཡང་ས་བོན་དང་མཚན་མ་ཡོངས་སུ་གྱུར་པ་ལས་བྱུང་བའི་རྣམ་པ་ཡིན་ཡང་། འོན་ཀྱང་སྒྱུ་མ་ལ་སོགས་པའི་དཔེ་རྣམས་ཀྱིས་ཉེ་བར་བརྒྱན་པས་ན་བསྐྱེད་པའི་རིམ་པ་ལས་

ཁྱད་པར་དུ་གྱུར་པའོ། །གང་གི་ཕྱིར་བསྐྱེད་པའི་རིམ་པ་ལས་སྒྱུ་མ་ཉིད་དུ་མཐོང་བ་མེད་དོ། །ལྷའི་ང་རྒྱལ་ཁོ་ན་དེར་བསྒྲུབ་པར་བྱ་བ་ཡིན་པའི་ཕྱིར་རོ། །ལྷའི་ང་རྒྱལ་དང་སྒྱུ་མ་ལྟ་བུར་མཐོང་བ་དག་ནི་ཕན་ཚུན་འགལ་བ་ཡིན་ནོ། །དེ་བས་ན་ལྷའི་རྣལ་འབྱོར་རྣམ་པ་གཉིས་ཏེ། རྟོག་པ་དང་
ཡོངས་སུ་རྫོགས་པའོ། །དེ་ལ་རྟོག་པའི་རྣལ་འབྱོར་ནི་ཟླ་བ་དང་རྡོ་རྗེ་ལ་སོགས་པ་ཡོངས་སུ་གྱུར་པ་ལས་སྐྱེས་པ། བསྐྱེད་པའི་རིམ་པའི་རྣལ་འབྱོར་པའི་སྤྱོད་ཡུལ་སྔགས་ཀྱི་སྐུའོ། །ཡོངས་སུ་རྫོགས་པའི་རྣལ་འབྱོར་ནི་མྱུར་བའི་ཏིང་ངེ་འཛིན་གྱིས་རྫོགས་པའམ། སྣང་བ་ཐོབ་པ་ལ་སོགས་
པའི་རིམ་པ་ལས་བསྐྱེད་པའི་ཡེ་ཤེས་ཀྱི་སྐུ་ཡིན་པས་ཁྱད་པར་ཡོད་པ་ཁོ་ནའོ་ཞེས་བདག་ལ་བྱིན་གྱིས་རློབ་པའོ། །ད་ནི་སྒྱུ་མ་ལྟ་བུའི་ཏིང་ངེ་འཛིན་ཡང་རྣམ་པར་དག་པར་བྱ་བ་ཡིན་ཏེ། རྟོག་པ་དང་བཅས་པ་ཡིན་པའི་ཕྱིར་རོ། །དེའི་ཕྱིར་དོན་དམ་པའི་བདེན་པའི་ངོ་བོ་ཉིད་མངོན་
པར་བྱང་ཆུབ་པའི་རིམ་པས་དེ་བཞིན་ཉིད་ཀྱིས་སྦྱང་བར་བྱ་བའི་ཕྱིར་མངོན་པར་བྱང་ཆུབ་པའི་རིམ་པ་བསྟན་པར་བྱ་སྟེ། དེ་ལ་ཡང་རྣམ་པ་གཉིས་ཡིན་ཏེ། ཕྱག་རྒྱ་དང་། ཏིང་ངེ་འཛིན་གྱི་བྱེ་བྲག་གིས་སོ། །ཕྱག་རྒྱའི་རིམ་པ་ལ་རྣམ་པ་གཉིས་ཏེ། ཕྱིའི་མངོན་པར་བྱང་ཆུབ་པ་དང་། ནང་
གི་མངོན་པར་བྱང་ཆུབ་པའོ། །ཏིང་ངེ་འཛིན་གྱི་མངོན་པར་བྱང་ཆུབ་པ་རྣམ་པ་གཉིས་ཏེ། རིལ་པོ་འཛིན་པ་དང་། རྗེས་སུ་གཞིག་པའོ། །དེ་ལ་ཕྱག་རྒྱའི་རིམ་པ་བསྟན་པར་བྱ་སྟེ། དང་པོ་རེ་ཞིག་སྒྲུབ་པ་པོས་སློབ་དཔོན་དང་གསང་བའི་དབང་ཐོབ་པས་ཤེས་རབ་ཀྱི་དབང་བསྐུར་
བ་ཐོབ་པར་བྱ་བའི་ཕྱིར་ཕྱི་དང་ནང་དང་གསང་བའི་མཆོད་པ་རྣམས་ཀྱིས་རྡོ་རྗེ་སློབ་དཔོན་མཆོད་པར་བྱ་སྟེ། དེ་ལ་ཕྱིའི་མཆོད་པ་ནི་མཆོད་པ་རྣམ་པ་ལྔའོ། །ནང་གི་མཆོད་པ་ནི་གོ་ཀུ་ད་ཧ་ན། མ་ར་བི་ཤ་མུ་ཞེས་བྱ་བའི་མཚན་ཉིད་དོ། །གསང་བའི་མཆོད་པ་ནི་ལོ་བཅུ་གཉིས་པ་གཟུགས་
བཟང་བ་རྒྱན་ཐམས་ཅད་ཀྱིས་བརྒྱན་པ། དྲི་དང་མེ་ཏོག་གིས་ཉེ་བར་མཛེས་པའི་ལུས་ཅན་རྡོལ་བའི་རིགས་ཀྱི་བུ་མོ་དམ་ཚིག་དང་སྡོམ་པ་ལ་གནས་པ། ཐོས་པ་དང་བསམ་པ་དང་སྒོམ་པའི་རིམ་གྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་མ་རྡོ་རྗེ་སློབ་དཔོན་ལ་དབུལ་བར་བྱའོ། །

དེའི་རྗེས་སུ་དཀོན་མཆོག་གསུམ་ཚིམ་པར་བྱ་བའི་ཕྱིར་ཚོགས་ཀྱི་འཁོར་ལོའི་ནང་དུ་ཡང་དེ་མཆོད་པར་བྱའོ། །དེ་ལ་དང་པོ་རེ་ཞིག་ཉན་ཐོས་ཀྱི་རིགས་མ་གཏོགས་པ་དགེ་སློང་དང་དགེ་ཚུལ་དང་རྡོ་རྗེ་སློབ་དཔོན་དང་དགེ་བསྙེན་རྣམས་སྤྱན་དྲངས་ཏེ། དེ་རྣམས་ལ་གོ་རིམས་
བཞིན་དུ་བརྟུལ་ཞུགས་ཀྱི་རྒན་གཞོན་གྱི་རིམ་པས་གདན་རྣམས་དབུལ་བར་བྱའོ། །དེ་ལ་རིམ་པ་གཅིག་ལ་དགེ་སློང་གི་ཚོགས་དགོད་པ་དང་། གཉིས་པ་ལ་དགེ་ཚུལ་གྱི་ཚོགས་དང་། གསུམ་པ་ལ་རྡོ་རྗེ་སློབ་དཔོན་གྱི་ཚོགས་དང་། དགེ་བསྙེན་གྱི་ཚོགས་སོ། །གལ་ཏེ་དགེ་སློང་
རྣམས་རྡོ་རྗེ་སློབ་དཔོན་དུ་གྱུར་ན་དེ་རྣམས་ཀྱི་མདུན་དུ་བརྟུལ་ཞུགས་ཅན་དང་བརྟུལ་ཞུགས་ཅན་མ་ཡིན་པ་རྣམས་དགོད་པར་བྱའོ། །གལ་ཏེ་དགེ་བསྙེན་རྡོ་རྗེ་སློབ་དཔོན་དུ་གྱུར་ན། དེའི་མདུན་དུ་དགེ་སློང་སློབ་མ་དང་སློབ་མ་མ་ཡིན་པ་རྣམས་དགོད་པར་བྱའོ། །རྣལ་འབྱོར་པའི་ཚོགས་
རྣམས་ནི་རབ་ཏུ་བྱུང་བའམ། རབ་ཏུ་མ་བྱུང་བ་རྣམས་རྣམ་པ་ཐམས་ཅད་དུ་གོང་དུ་དགོད་པར་བྱའོ། །དགེ་སློང་ངམ་དགེ་ཚུལ་ལམ་དགེ་བསྙེན་ཡིན་ཡང་རུང་ལ། རྣལ་འབྱོར་པས་རྟགས་དང་ལྡན་པ་ཡིན་ན་ཚོགས་ཀྱི་བདག་པོར་བྱའོ། །ཐམས་ཅད་རིམ་པ་བཞིན་དུ་བཞུགས་པར་མཐོང་ནས་
ལས་ཀྱི་རྡོ་རྗེ་མདུན་དུ་ཕྱིན་ཏེ་ཕྱག་འཚལ་བ་སྔོན་དུ་འགྲོ་བར་རྒན་གཞོན་གྱི་རིམ་པས་རེ་རེ་ལ་ཞབས་བསིལ་དབུལ་བར་བྱའོ། །དེའི་རྗེས་སུ་མཆོད་པ་རྣམ་པ་ལྔས་མཆོད་དེ་ལག་པ་གཡས་པས་བདུད་རྩི་ལྔས་བཀང་བའི་པདྨའི་སྣོད་བླངས་ཏེ། ལག་པ་གཡོན་པའི་སྲིན་ལག་དང་མཐེ་བོང་གིས་དེ་
རྣམས་ཀྱི་མདུན་དུ་གྲུ་གསུམ་པ་ཆོས་འབྱུང་བའི་ཕྱག་རྒྱ་བྲི་བར་བྱའོ། །དེའི་ནང་དུ་ཐིག་ལེ་ཟླུམ་པོ་བྲིས་ཏེ། དེའི་ཡང་ནང་དུ་དཀྱིལ་འཁོར་གྱི་འཁོར་ལོ་དག་བལྟ་བར་བྱའོ། །དཀྱིལ་འཁོར་གྱི་བདག་པོ་ལ་སོགས་པའི་ཐུགས་ཀར་སེམས་དཔའ་གཉིས་པོ་སྣོད་དང་བཅུད་ཀྱི་ངོ་བོ་ཉིད་མ་ལུས་
པར་བལྟ་བར་བྱའོ། །དེའི་ཤར་གྱི་ཟུར་གྱི་སྟེང་དུ་བདུད་རྩི་ལྔས་གང་བའི་སྣོད་དང་། ཐབས་དང་ཤེས་རབ་ཀྱི་ངོ་བོ་ཉིད་ཧྲི་ཧཱུཾ་དག་གིས་བྱིན་གྱིས་བརླབས་པ་མྱོས་བྱེད་དང་སྦྱར་བའི་ཆང་གིས་བཀང་བའི་སྣོད་གཉིས་ནི་དབུས་ཀྱི་སྣོད་ཀྱི་ལོགས་གཉིས་སུ་གཞག་པར་བྱས་ལ། ནག་པོ་དང་དམར་པོ་དང་

དཀར་པོའི་རས་ཀྱིས་ཁ་བཀབ་ལ་མེ་ཏོག་སྙིམ་པས་གཏོར་བར་བྱས་ཏེ། ཐུགས་རྡོ་རྗེ་ལ་སོགས་པའི་སྔགས་ཀྱིས་བྱིན་གྱིས་བརླབ་པར་བྱའོ། །དེ་ནས་ཕྱག་བྱས་ཏེ་དབུས་ཀྱི་སྣོད་ལས་ཐིགས་པ་གསུམ་གསུམ་བླངས་ཏེ། གཡས་གཡོན་གྱི་སྣོད་དག་ཏུ་གཏོར་བར་བྱ་ཞིང་མྱོས་བྱེད་ཀྱི་སྣོད་དམ་ཆང་གི་སྣོད་
བླངས་ལ་རྣལ་འབྱོར་པ་རྣམས་ལ་ལས་ཀྱི་རྡོ་རྗེས་དང་པོ་བསྙོད་པར་བྱའོ། །དེའི་རྗེས་སུ་དགེ་སློང་དང་། དགེ་ཚུལ་དང་དགེ་བསྙེན་གྱི་ཚོགས་ལའོ། །གང་ལས་བཏུང་བ་བརྩམ་པ་ཐ་མར་དེ་ཉིད་ལ་བསྙོད་པར་བྱའོ། །དེ་ནས་རེ་རེའི་མདུན་དུ་ཚོད་མ་སྣ་ཚོགས་པ་དང་། ཤ་སྣ་ཚོགས་པ་དང་རོ་དྲུག་དང་ལྡན་པའི་རྒྱལ་
པོའི་སཱ་ལུ་ལ་སོགས་པས་བཀང་བའི་སྣོད་རྣམས་འབུལ་བས་ཚིམ་པར་བྱའོ། །ཕྱེད་ཟོས་པས་བཟའ་བཅའ་ཐམས་ཅད་སྣོད་གཅིག་ཏུ་བསྡུས་ཏེ་ཐམས་ཅད་ཀྱིས་གཅིག་ཏུ་བཟའ་བར་བྱའོ། །དེ་ནས་བཏུང་བའི་སྣོད་རྣམས་གཅིག་ཏུ་བསྲེས་ཏེ་བཏུང་བར་བྱའོ། །ལས་ཀྱི་རྡོ་རྗེས་ཀྱང་ཅང་ཏེའུ་
ལ་ཡི་གེ་གསུམ་གྱིས་མཆོད་པར་བྱ་སྟེ། ལག་པ་གཡས་པས་བླངས་ལ་ཧཱུཾ་ཕཊ་ཅེས་བྱ་བའི་སྒྲ་སྒྲོགས་པར་བྱའོ། །རྡོ་རྗེ་རྣལ་འབྱོར་མ་རྣམས་ཀྱིས་རྡོ་རྗེའི་གར་སྣ་ཚོགས་བྱའོ། །ཚོགས་ཀྱི་བདག་པོས་གར་བྱ་བ་དང་། གཞན་མ་རྣམས་ཀྱིས་གླུ་དང་རོལ་མོ་བྱའོ་ཞེས་ལ་ལ་འདོད་དོ། །ཐམས་
ཅད་ཀྱིས་ཀྱང་གར་བྱའོ་ཞེས་ལ་ལ་འདོད་དོ། །དམ་པར་དགའ་བ་སྐྱེས་པ་ན་གར་བྱ་བ་ཡིན་གྱི། གཞན་དུ་ན་སེམས་རྩེ་གཅིག་པར་གནས་པར་བྱའོ། །ཚོགས་ཀྱི་འཁོར་ལོའི་བྱིན་གྱིས་རློབ་པའི་རྟགས་ནི་ངང་པ་དང་བུང་བ་དང་ཁྱུ་མཆོག་དང་འུག་པ་ལ་ཞོན་པའི་མཁའ་འགྲོ་མ་རྣམས་འོང་བར་གྱུར་པ་ན་དེ་
རྣམས་ཀྱི་ལུས་ཀྱི་དྲི་སྒོག་སྐྱ་དང་ག་བུར་དང་པདྨ་དང་། ཤའི་དྲི་བྲོ་བ་དང་། ངང་པ་ལ་སོགས་པའི་སྒྲ་ཐོས་པས་སོ། །དེའི་ཚེ་དེ་རྣམས་ལ་ལྷག་མའི་གཏོར་མ་རྒྱས་པར་སྦྱིན་པར་བྱའོ། །ཚོགས་ཀྱི་ནང་དུ་རྩོད་པའམ་རྒོད་པའམ་རྟོག་པ་གང་གིས་བྱེད་པ་དེ་དེ་མ་ཐག་ཏུ་ཕྱི་རོལ་དུ་དབྱུང་
བར་བྱའོ། །བཟོད་པར་གསོལ་བ་བྱེད་ན་མཆོད་པའི་ལས་བྱེད་དུ་གཞུག་སོ།། །དེ་ནས་ལག་པ་ལ་སོགས་པ་བཀྲུས་ལ་མེ་ཏོག་གི་གཅལ་བཀྲམ་པར་བྱ་སྟེ། སོ་རྩི་ཕུལ་ལ་ཡོན་རྣམ་པ་བཞི་པོས་མཉེས་པར་བྱ་སྟེ། གཤེགས་སུ་གསོལ་བས་ཚིགས་སུ་བཅད་པས་ཚོགས་ཀྱི་འཁོར་ལོ་གཤེགས་

སུ་གསོལ་ལོ། །ཨོཾ་ཀུ་རུ་ཀུ་རུ་བཏྟ་ལེ་ཞེས་བྱ་བ་ལ་སོགས་པའི་སྔགས་ཀྱིས་ལྷག་མའི་གཏོར་མ་དུར་ཁྲོད་དུ་བསྐྱལ་བར་བྱའོ་ཞེས་ཚོགས་ཀྱི་འཁོར་ལོའི་ཆོ་གའི་རིམ་པའོ། །དེ་ལྟ་བུའི་མཆོད་པ་རྡོ་རྗེ་སློབ་དཔོན་ལ་བྱས་པས་མཉེས་པར་གྱུར་པའི་སློབ་དཔོན་
གྱིས་ཀྱང་སློབ་མས་ཕུལ་བའི་ཕྱག་རྒྱ་དང་ལྷན་ཅིག་སྙོམས་པར་ཞུགས་ཏེ་ཕྱག་རྒྱ་དེ་ཉིད་དམ། ཕྱག་རྒྱ་གཞན་གྱིས་སློབ་མ་དེ་ལ་ཤེས་རབ་ཀྱི་དབང་བསྐུར་བར་བྱའོ། །དེ་ལ་སློབ་མ་རྡོ་རྗེ་སློབ་དཔོན་ལ་འདུད་ཅིང་ཚིགས་སུ་བཅད་པ་འདིས་བསྟོད་པར་བྱ་སྟེ། ཁམས་གསུམ་ལས་ནི་
ངེས་སྒྲོལ་ཞིང་། །མཁའ་དང་མཉམ་པ་ཉིད་གྱུར་པ། །ཁྱོད་ནི་འདོད་པས་མ་གོས་པས། །མི་དམིགས་ཁྱོད་ལ་ཕྱག་འཚལ་བསྟོད། །ཕུང་པོ་དང་ནི་ཁམས་རྣམས་དང་། །སྐྱེ་མཆེད་རྣམས་ལ་མི་བརྟེན་པ། །ཕྱིན་ཅི་ལོག་ལས་ངེས་གྲོལ་བ། །དམིགས་མེད་ཁྱོད་ལ་ཕྱག་འཚལ་
བསྟོད། །ཇི་ལྟར་ནམ་མཁའ་གཞི་མེད་ཅིང་། །སྤྲོས་པ་མེད་ཅིང་སྣང་བ་མེད། །ཁྱོད་ཀྱི་ཐུགས་ནི་མཁའ་དང་མཚུངས། །མི་དམིགས་ཁྱོད་ལ་ཕྱག་འཚལ་བསྟོད། །དེ་ལྟར་བསྟོད་ནས་སླར་ཡང་མངོན་པར་བྱང་ཆུབ་པ་མཐོང་བར་འདོད་པའི་ཕྱིར་ཚིགས་སུ་བཅད་པ་འདི་དག་གིས་
གསོལ་བ་གདབ་པར་བྱ་སྟེ། མངོན་པར་བྱང་ཆུབ་མཐོང་བ་ནི། །མགོན་པོ་ཆེན་པོ་བདག་ལ་སྩོལ། །ལས་དང་སྐྱེ་བ་ལས་གྲོལ་ཞིང་། །སྣང་བ་གསུམ་པོ་རྣམ་པར་སྤངས། །རྡོ་རྗེ་ཡེ་ཤེས་བླ་མེད་པ། །སློབ་དཔོན་ཆེན་པོ་བདག་ལ་སྩོལ། །སངས་རྒྱས་ཀུན་གྱི་ཡེ་ཤེས་ཆེ། །དེ་
བཞིན་གཤེགས་པ་ཀུན་གྱི་གནས། །ལུས་ངག་ཡིད་ནི་དག་བྱེད་པ། །རྡོ་རྗེ་ཆེན་པོ་བདག་ལ་སྩོལ། །ཐོག་མ་ཐ་མ་མེད་ཞི་བ། །ཉོན་མོངས་ཐམས་ཅད་སྦྱོང་བྱེད་པ། །ཞེས་ཚིགས་སུ་བཅད་པས་མཉེས་པའི་སློབ་དཔོན་གྱི་རྡོ་རྗེ་དབྱིངས་ཀྱི་དབང་ཕྱུག་མའི་ངོ་བོ་ཉིད་ཀྱི་ཕྱག་རྒྱ་རྡོ་རྗེ་འཆང་
གི་རང་བཞིན་སློབ་མ་དེ་ལ་སྦྱིན་པར་བྱའོ། །དེ་ནས་ཡང་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་དམ་ཚིག་གི་ཕྱག་རྒྱ་རྒྱན་ཐམས་ཅད་ཀྱིས་བརྒྱན་པ་སྐྲ་གྲོལ་བ་གཅེར་བུར་གྱུར་ནས་ཁྲིའི་ཐོག་ཏུ་བཞུགས་ཏེ་སློབ་མ་བཀུག་ལ་འདི་ལྟར་དྲི་བར་བྱ་སྟེ། བཤང་གཅི་ལ་སོགས་བཟའ་བ་ནི། །རྡོ་རྗེ་ཅན་

ཁྱོད་ཅི་ནུས་སམ། ཁྲག་དང་ཁུ་བ་ཤ་དག་དང་། །བུད་མེད་རྣམས་ལ་དད་པ་དང་། །བྷ་གའི་འོ་བྱེད་མི་རྟོག་གམ། །བུ་ཁྱོད་སྨྲོས་ཤིག་རྡོ་རྗེ་ཅན། །སློབ་མས་ཀྱང་འདི་ལྟར་བརྗོད་དེ། །ཤུ་ཀྲ་ཁྲག་སོགས་བཟའ་བ་ནི། །ལྷ་མོ་ཅི་ཕྱིར་བདག་མི་ནུས། །རཀྟ་ཤུ་ཀྲ་ཤ་ཆེན་དང་། །བུད་
མེད་རྣམས་ལ་དད་དེ་བཞིན། །བྷ་གའི་པདྨར་ཙུམ་པ་ན། །ཐམས་ཅད་བདག་གི་ནུས་པ་ཉིད། །ཅེས་སློབ་མའི་ཚིག་ཐོས་ནས་ལག་པ་གཉིས་ཀྱིས་པདྨ་ཕྱེ་བར་བྱས་ཏེ། ནང་དུ་གནས་པའི་རྩའི་འཁོར་ལོ་བསྟན་པར་བྱེད་དེ།སྐྱེས་བུ་གསང་བའི་པདྨ་འདི་ལ་རེ་ཞིག་བལྟ་བར་
གྱིས་ཤིག །གང་གི་ནང་དུ་རྩ་རྣམ་པ་ལྔ་པོ་འདི་དག་ནམ་མཁའ་ལྔའི་ངོ་བོ་ཉིད་དུ་གནས་སོ། །དེ་ལ་འདོད་པའི་གདུགས་ཞེས་བྱ་བའི་རྩ་དབུ་མ་འདི་ནི་ཆུ་རྒྱུ་བ་ཐུགས་ཀྱི་རྡོ་རྗེའི་ངོ་བོ་ཉིད་དུ་ཤེས་པར་བྱའོ། །འདི་ནི་གཡོན་པའི་རྩ་སྟེ་རི་བོང་འཛིན་མ་ཞེས་བྱ་བ་ཤུ་ཀྲ་རྒྱུ་བ་སྟེ་བཅོམ་
ལྡན་འདས་འོད་དཔག་ཏུ་མེད་པའི་བདག་ཉིད་དུ་ཤེས་པར་བྱའོ། །གཡས་པའི་རྩ་འདི་ཡང་ཁྲག་རྒྱུ་བ་སྟེ་རུས་སྦལ་མོ་ཞེས་བྱ་བ་བཅོམ་ལྡན་འདས་རིན་འབྱུང་གི་ངོ་བོ་ཉིད་དུ་ཤེས་པར་བྱའོ། །དེ་བཞིན་དུ་མདུན་ན་གནས་པའི་རྩ་འདི་ཡང་ལྷ་སྦྱིན་མོ་ཞེས་བྱ་བ་དྲི་ཆེན་རྒྱུ་བ་སྟེ། བཅོམ་ལྡན་འདས་རྣམ་པར་སྣང་
མཛད་ཀྱི་ངོ་བོ་ཉིད་དུ་ཤེས་པར་བྱའོ། །དེ་བཞིན་དུ་ནུབ་ཀྱི་ཆ་ལ་གནས་པ་ནོར་རྒྱལ་མོ་ཞེས་བྱ་བ་རྩ་འདི་ནི་ཤ་རྒྱུ་བ་སྟེ་བཅོམ་ལྡན་འདས་དོན་ཡོད་གྲུབ་པའི་རང་བཞིན་དུ་ཤེས་པར་བྱའོ། །ནམ་མཁའ་ལྔའི་བདག་ཉིད་དེ་རྩ་བའི་འཁོར་ལོའི་ཕྱི་རོལ་དུ་འདབ་མ་བརྒྱད་པའི་པདྨ་འདི་འོད་གསལ་བའི་
རྡོ་རྗེ་འཆང་ཆེན་པོའི་གཞལ་ཡས་ཁང་ཡིན་པར་ཤེས་པར་བྱའོ། །ཇི་སྐད་དུ་རྡོ་རྗེ་བདུད་རྩི་ལས། བྷ་གའི་དབུས་སུ་ནམ་མཁའ་གང་། །ནམ་མཁའ་ལྔ་པོ་རྣམ་པར་བརྒྱན། །ལྟེ་བ་ཟེ་འབྲུ་རྣམས་དང་ལྡན། །འདབ་མ་བརྒྱད་པོས་ཉེ་བར་མཛེས། །དེར་གནས་རྟག་ཏུ་ཟག་པ་ནི། །
ཐིག་ལེ་བདུད་རྩིའི་ཚུལ་ཅན་ནོ། །ཞེས་འབྱུང་ངོ་། །དེ་བཞིན་དུ་དེ་ཉིད་ལས་ཀྱང་གསུངས་ཏེ། བདུད་རྩི་རྒྱུ་བའི་རྩ་གང་ནི། །བྷ་གའི་གནས་སུ་རྣམ་པར་གནས། །སུམ་ཅུ་རྩ་གཉིས་རྩ་གཞན་དག །དེ་རྣམས་ཀྱི་ནི་གཙོ་བོ་ཡིན། །ཞེས་འབྱུང་ངོ་། །གཞན་ཡང་། ཀྱེ་མའོ་ངའི་པདྨ་

འདི། །བདེ་བ་ཐམས་ཅད་ཡང་དག་ལྡན། །ཆོ་ག་བཞིན་དུ་གང་བསྟེན་པ། །དེ་ཡི་མདུན་ན་བདག་གནས་སོ། །འདི་ནི་ཆོས་དབྱིངས་རྣམ་པར་དག །སེམས་ཅན་ཁམས་ནི་གྲོལ་བར་བྱེད། །བདེ་ཆེན་རྡོ་རྗེ་རྒྱལ་པོ་ཉིད། །དངོས་ཀུན་གྱིས་ནི་འདི་ལ་གནས། །
ཞེས་སོ། །གཞན་ཡང་ནུ་མའི་སྣ་དང་པགས་པས་གཡོགས་པ་སོར་བཞི་པའི་ལྟེ་བ་འཇམ་པ་དེ་ཉིད་བུད་མེད་ཀྱི་དབང་པོའོ། །གང་གི་ཕྱིར་དེ་ལ་ནི་རྩ་སྟོང་ཕྲག་བདུན་ཅུ་རྩ་གཉིས་དེ་ཉིད་དུ་འདུས་པ་དེའི་ཕྱིར་བདེ་བ་ཆེན་པོའི་མཚན་ཉིད་ཅན་གསང་བ་འདུས་པ་ཞེས་བྱའོ། །དེ་ལྟར་གཏམ་
དག་སྨྲས་ཏེ་ལྷ་མོ་ཅང་མི་སྨྲ་བར་གྱུར་ཏོ། །སློབ་མས་ཀྱང་དེའི་པདྨར་ལག་པ་གཡོན་པའི་སོར་མོ་ཕྱག་རྒྱར་བཅིངས་ཏེ་འཇུག་པར་བྱ་སྟེ། མིག་དང་ལྕགས་ཀྱུ་དང་སྣམ་བུ་དང་བ་དན་ནོ། །ཕྱག་རྒྱའི་སྦྱོར་བ་དེས་དེ་སྲིད་བསྐྱོད་པར་བྱ་བ་ནི་ཇི་སྲིད་མཁུར་ཚོས་དམར་བ་དང་བ་སྤུ་ལྡང་བ་དང་། དགའ་
བ་དམ་པ་སྐྱེས་པའི་དམ་ཚིག་གི་ཕྱག་རྒྱ་སློབ་པའི་མགྲིན་པར་རང་ཉིད་ཀྱིས་འཁྱུད་པའི་བར་དུ་བྱའོ། །དེའི་རྗེས་སུ་རྡོ་རྗེ་མཁྲེགས་མོའི་སྟེང་དུ་ཉེ་བར་འདུག་སྟེ་མཆོག་གི་བསྙེན་པ་ལ་སོགས་པའི་རིམ་པ་ཡང་དག་པར་བཟླ་བར་བྱའོ། །དེ་ལ་བསྒྲུབ་བྱ་དང་སྒྲུབ་བྱེད་ཀྱི་སྦྱོར་བ་ནི་བསྙེན་པའོ། །
རྡོ་རྗེ་དང་པདྨ་མཉམ་པར་སྦྱོར་བ་ནི་ཉེ་བར་བསྒྲུབ་པའོ། །ས་བོན་གྱི་བྱིན་གྱིས་བརླབས་པའི་རྡོ་རྗེ་དང་པདྨས་བསྐྱོད་པ་ནི་སྒྲུབ་པའོ། །བདེ་བ་ཆེན་པོ་ཉམས་སུ་མྱོང་བ་ནི་སྒྲུབ་པ་ཆེན་པོའོ་ཞེས་མཆོག་གི་བསྙེན་པ་ལ་སོགས་པའོ། །རྒྱུད་ཕྱི་མ་ལས་ཀྱང་། བསྒྲུབ་བྱ་སྒྲུབ་བྱེད་སྦྱོར་བ་ནི། །གང་ཕྱིར་
བསྙེན་པར་བརྗོད་པ་སྟེ། །རྡོ་རྗེ་པདྨ་མཉམ་སྦྱོར་བས། །ཉེ་བར་སྒྲུབ་པ་ཞེས་སུ་བསྟན། །ཡི་གེ་ཧཱུཾ་དང་ཕཊ་ལྡན་པའི། །བསྐྱོད་པ་སྒྲུབ་པར་རབ་ཏུ་གྲགས། །རང་ཞི་རང་བདེ་རང་ངོ་བོ། །སྒྲུབ་པ་ཆེན་པོར་རབ་ཏུ་བཤད། །དཔལ་ལྡན་སངས་རྒྱས་ཀུན་གྱི་བདག །རྡོ་རྗེ་
འཆང་བའི་གོ་འཕང་ཆེ། །ཆོ་གའི་སྦྱོར་བ་འདི་ཡིས་ནི། །མྱུར་དུ་དངོས་གྲུབ་ཐོབ་པར་འགྱུར། །ཞེས་འབྱུང་ངོ་། །གནས་སྐབས་དེ་ལ་རྡོ་རྗེ་དབྱིངས་ཀྱི་དབང་ཕྱུག་མ་དང་། སྙོམས་པར་ཞུགས་པའི་སློབ་མ་མཐོང་ནས་རང་གི་སྙིང་ག་ནས་གཏི་མུག་དགའ་མ་ལ་སོགས་པ་བཞི་

སྤྲོས་ཏེ་སློབ་མའི་ཁ་ལ་འཇུག་པར་བྱས་ལ། །གཏི་མུག་དང་ཞེ་སྡང་དང་འདོད་ཆགས་དང་ཕྲག་དོག་གི་རྒྱུན་རྣམས་ཀྱིས་སློབ་དཔོན་གྱིས་རིམ་པ་འདིས་དབང་བསྐུར་བར་བྱ་སྟེ། རང་གི་སྙིང་གའི་ཡེ་ཤེས་སེམས་དཔའི་ཕྱག་མཚན་གྱི་ས་བོན་གྱི་ཐིག་ལེ་ལས་འོད་ཟེར་གྱི་སྒོ་ནས་སངས་རྒྱས་སྤྱན་
མ་དང་སྙོམས་པར་ཞུགས་པའི་རྣམ་པར་སྣང་མཛད་སེམས་དཔའ་གསུམ་གྱི་བདག་ཉིད་ཅན་རྣམ་པར་སྤྲོ་ཞིང་སློབ་མའི་ཁ་ལ་འཇུག་པ་སྟེ། དེའི་ཡང་སྙིང་གར་ནམ་མཁའི་དབྱིངས་ནས་རྣམ་པར་སྣང་མཛད་ཀྱི་ཚོགས་འཇུག་པར་བྱས་ལ། །བདེ་བ་ཆེན་པོ་འབབ་པའི་དབང་གིས་ཞུ་ཞིང་བྱང་
ཆུབ་ཀྱི་སེམས་ཀྱི་ཐིག་ལེའི་གཟུགས་སུ་གྱུར་པ་གཏི་མུག་གི་རྒྱུན་དེས་དབང་བསྐུར་བར་བྱའོ་ཞེས་གཏི་མུག་གི་རྒྱུན་གྱི་དབང་ངོ་། །དེ་བཞིན་དུ་སྙིང་གའི་འོད་ཟེར་གྱིས་གོས་དཀར་མོ་དང་སྙོམས་པར་ཞུགས་པའི་སྣང་བ་མཐའ་ཡས་སེམས་དཔའ་གསུམ་གྱི་བདག་ཉིད་ཅན་རྣམ་པར་སྤྲོས་ཤིང་།
སློབ་མའི་ཁ་ལ་བཅུག་སྟེ། དེའི་ཡང་སྙིང་གར་སྣང་བ་མཐའ་ཡས་ཀྱི་ཚོགས་ནམ་མཁའི་དབྱིངས་ནས་བཀུག་ཅིང་བཅུག་ལ་བདེ་བ་ཆེན་པོ་འབབ་པའི་དབང་གིས་ཞུ་ཞིང་བྱང་ཆུབ་ཀྱི་སེམས་ཀྱི་ཐིག་ལེའི་གཟུགས་སུ་གྱུར་པ་འདོད་ཆགས་ཀྱི་རྒྱུན་དེས་དབང་བསྐུར་བར་བྱའོ་ཞེས་འདོད་ཆགས་ཀྱི་
རྒྱུན་གྱི་དབང་ངོ་། །དེ་བཞིན་དུ་སྙིང་གའི་འོད་ཟེར་གྱིས་མཱ་མ་ཀཱི་དང་སྙོམས་པར་ཞུགས་པའི་མི་བསྐྱོད་པ་སེམས་དཔའ་གསུམ་གྱི་བདག་ཉིད་ཅན་རྣམ་པར་སྤྲོ་ཞིང་སློབ་མའི་ཁ་ལ་བཅུག་སྟེ། དེའི་ཡང་སྙིང་གར་མི་བསྐྱོད་པའི་ཚོགས་ནམ་མཁའི་དབྱིངས་ནས་བཀུག་ཅིང་བཅུག་ལ་བདེ་བ་ཆེན་པོ་
འབབ་པའི་དབང་གིས་ཞུ་ཞིང་བྱང་ཆུབ་ཀྱི་སེམས་ཀྱི་ཐིག་ལེའི་གཟུགས་སུ་གྱུར་པ་ཞེ་སྡང་གི་རྒྱུན་དེས་དབང་བསྐུར་བར་བྱའོ་ཞེས་ཞེ་སྡང་གི་རྒྱུན་གྱི་དབང་ངོ་། །དེ་བཞིན་དུ་ཡང་སྙིང་གའི་འོད་ཟེར་གྱིས་དམ་ཚིག་སྒྲོལ་མ་དང་སྙོམས་པར་ཞུགས་པའི་དོན་ཡོད་གྲུབ་པ་སེམས་དཔའ་གསུམ་གྱི་བདག་ཉིད་ཅན་
རྣམ་པར་སྤྲོས་ཞིང་སློབ་མའི་ཁ་ལ་བཅུག་སྟེ། དེའི་སྙིང་གར་དོན་ཡོད་གྲུབ་པའི་ཚོགས་ནམ་མཁའི་དབྱིངས་ནས་བཀུག་ཅིང་བཅུག་ལ་བདེ་བ་ཆེན་པོ་འབབ་པའི་དབང་གིས་ཞུ་ཞིང་བྱང་ཆུབ་ཀྱི་སེམས་ཀྱི་ཐིག་ལེའི་གཟུགས་སུ་གྱུར་པ་ཕྲག་དོག་གི་རྒྱུན་དེས་དབང་བསྐུར་བར་བྱའོ་ཞེས་ཕྲག་

དོག་གི་རྒྱུན་གྱི་དབང་ངོ་། །དེ་ལྟར་དབང་བསྐུར་བ་བཞིས་དབང་བསྐུར་བས་དེ་བཞིན་གཤེགས་པ་ཐམས་ཅད་ཀྱི་ངོ་བོ་ཉིད་ཀྱིས་ཕུང་པོ་དང་ཁམས་རྒྱས་པར་བྱས་པ་ཞེས་འབྱུང་བ་རྒྱས་པ་སྔོན་དུ་འགྲོ་བ་ཤེས་རབ་ཡེ་ཤེས་ཀྱི་དབང་ངོ་། །དེའི་རྗེས་སུ་སློབ་མ་ལངས་ཏེ་ཐལ་མོ་
སྦྱར་ཞིང་སློབ་དཔོན་གྱི་མདུན་དུ་འདུག་ནས་གསོལ་བ་འདེབས་པའི་སློབ་མ་ལ་མན་ངག་གདབང་བཞི་པ་འདི་བསྟན་པར་བྱ་སྟེ། ཐབས་དང་ཤེས་རབ་སྙོམས་པར་ཞུགས་པའི་དུས་སུ་ཚང་བའི་བུ་ག་ནས་འཕོ་བའི་བྱང་ཆུབ་ཀྱི་སེམས་ལས་འབྱུང་བ་ཁྱོད་ཀྱིས་གང་མྱོང་བ་དེ་ནི་སྣང་བའི་ཡེ་ཤེས་དང་
འདོད་ཆགས་དང་བྲལ་བ་དང་། རྣམ་པ་སྣ་ཚོགས་པའི་སྐད་ཅིག་མའི་བདག་ཉིད་དང་། དེ་ནས་བསྙེན་པ་དང་དགའ་བའི་རྣམ་གྲངས་ཅན་དུ་ཤེས་པར་གྱིས་ཤིག །དེའི་རྗེས་ལ་བྱང་ཆུབ་ཀྱི་སེམས་ཡན་ལག་ཐམས་ཅད་དུ་ཁྱབ་པ་ན་ཁྱོད་ཀྱིས་བདེ་བ་གང་མྱོང་བ་དེ་ནི་སྣང་བ་མཆེད་པའི་ཡེ་ཤེས་
ཏེ་རྣམ་པར་སྨིན་པའི་སྐད་ཅིག་མའི་བདག་ཉིད་ཅན་ཉེ་བར་སྒྲུབ་པ་དང་། མཆོག་ཏུ་དགའ་བའི་ངོ་བོ་ཉིད་དུ་ཤེས་པར་གྱིས་ཤིག །དེའི་འོག་ཏུ་རྡོ་རྗེའི་ནང་དུ་སོན་པའི་བྱང་ཆུབ་ཀྱི་སེམས་ལས་ཁྱོད་ཀྱིས་བདེ་བ་གང་མྱོང་བ་དེ་ནི་སྣང་བ་ཐོབ་པའི་ཡེ་ཤེས་ཏེ་རྣམ་པར་འཇོམས་པའི་སྐད་ཅིག་
མའི་བདག་ཉིད་ཅན་སྒྲུབ་པ་དང་། འདོད་ཆགས་བར་བའི་ངོ་བོ་ཉིད་དུ་ཤེས་པར་གྱིས་ཤིག །དེ་ནས་ཡང་རྡོ་རྗེ་ནོར་བུའི་རྩེ་མོར་ཕྱིན་པའི་བྱང་ཆུབ་ཀྱི་སེམས་ཀྱི་བདེ་བ་ཆེན་པོ་ཉམས་སུ་མྱོང་བས་སྒོ་རྣམས་འགགས་པས་སེམས་ཀྱི་རྣམ་པར་རྟོག་པའི་ཚོགས་ཐིམ་ཞིང་རབ་ཏུ་ཞི་བའི་གནས་ལ་
སོགས་པའི་ཚོགས་རོ་གཅིག་པར་གྱུར་པ་ཡེ་ཤེས་མཐོང་བ་གང་ཡིན་པ་དེ་ནི་སྣང་བ་ལ་སོགས་པ་གསུམ་དང་བྲལ་བ། འདོད་ཆགས་དང་། འདོད་ཆགས་དང་བྲལ་བ་དང་། འདོད་ཆགས་བར་སྤངས་པ་ཐབས་དང་ཤེས་རབ་གཉི་ག་ལས་འདས་པ་དེ་ནི་འོད་གསལ་བ་གཉིས་སུ་མེད་པའི་ཡེ་
ཤེས་སྒྲུབ་པ་ཆེན་པོ་མཚན་ཉིད་དང་བྲལ་བའི་སྐད་ཅིག་མ་བདེ་བ་ཆེན་པོར་ཤེས་པར་གྱིས་ཤིག །དེ་ལྟར་དྲི་མ་ཐམས་ཅད་དང་བྲལ་བའི་ཡེ་ཤེས་ཤེས་རབ་ཀྱི་ཕ་རོལ་ཏུ་ཕྱིན་པ་དང་ཆོས་ཀྱི་དབྱིངས་ཀྱི་ངོ་བོ་ཉིད་དུ་ཤེས་པར་གྱིས་ཤིག །སྐྱེས་བུ་མཚན་མོ་ཡང་མ་ཡིན། ཉིན་མོ་ཡང་མ་ཡིན།

མཚམས་ཀྱང་མ་ཡིན་ཏེ། སྣང་བ་ཡང་མ་ཡིན། སྣང་བ་མཆེད་པ་ཡང་མ་ཡིན། སྣང་བ་ཐོབ་པ་ཡང་མ་ཡིན་པ། གཉིད་ལོག་པ་ཡང་མ་ཡིན་པ། སད་པ་ཡང་མ་ཡིན། ཆགས་པ་དང་། ཆགས་པ་དང་བྲལ་བ་དང་། ཆགས་པ་བར་མའི་རང་བཞིན་རྣམས་དང་བྲལ་བའི་འོད་གསལ་བའི་ཡེ་ཤེས་ལ་
དུས་ཐམས་ཅད་དུ་གནས་པར་གྱིས་ཤིག །དེ་ནས་རྡོ་རྗེ་སློབ་དཔོན་གྱི་བཀའ་དྲིན་ཐོབ་པའི་སློབ་མ་ཐལ་མོ་སྦྱར་བར་གྱུར་པས་དེ་ཁོ་ན་ཉིད་ཐོབ་པ་ལ་རྗེས་སུ་ཡི་རང་ཞིང་བྱང་ཆུབ་ཀྱི་སེམས་ཀྱི་ཚིགས་སུ་བཅད་པ་འདི་རྗོད་པར་བྱེད་དེ། ཨོཾ་དངོས་པོ་ཐམས་ཅད་ལས་འདས་ཤིང་། །ཕུང་པོ་ཁམས་དང་སྐྱེ་
མཆེད་བྲལ། །གཟུང་དང་འཛིན་པ་རྣམ་སྤངས་པ། །ཆོས་རྣམས་བདག་མེད་མཉམ་ཉིད་ཀྱིས། །རང་སེམས་གདོད་ནས་མ་སྐྱེས་པ། །སྟོང་པ་ཉིད་ཀྱི་ངོ་བོ་ཡིན། །ཞེས་བྱ་བ་བྱང་ཆུབ་ཀྱི་སེམས་ཀྱི་སྔགས་འདི་བརྗོད་ཅིང་། བླ་མའི་ཞབས་ཀྱི་རྩ་བར་སྙིམ་པའི་མེ་ཏོག་དབུལ་བར་བྱའོ་ཞེས་འདི་ནི་ནང་
གི་མངོན་པར་བྱང་ཆུབ་པའི་རིམ་པའོ། །དེའི་དཔེ་ནི་ཉིན་མོ་སྣང་བ་མཆེད་པའི་ཡེ་ཤེས་སོ། །མཚན་མོ་ནི་སྣང་བའི་ཡེ་ཤེས་སོ། །ནུབ་ཀྱི་དུས་ཀྱི་མཚམས་ནི་སྣང་བ་ཐོབ་པའི་ཡེ་ཤེས་སོ། །སྐྱ་རེངས་ཀྱི་དུས་སུ་བཞི་པ་འོད་གསལ་བའི་ཡེ་ཤེས་ཏེ་ཕྱིའི་མངོན་པར་བྱང་ཆུབ་པའི་རིམ་པའོ། །རིམ་
པ་འདིས་ཀྱང་ནང་གི་མངོན་པར་བྱང་ཆུབ་པའི་རིམ་པ་བསྟན་པ་ཡིན་ཏེ། དཔེར་ན། སྨིག་རྒྱུ་དང་། དུ་བ་དང་། མཁའ་སྣང་དང་། མར་མེ་དང་། སྤྲིན་མེད་པའི་ནམ་མཁའ་དང་འདྲ་བའི་རྟགས་རྣམ་པ་ལྔའོ། །ཇི་སྐད་དུ། ལས་ཀྱི་མཐའ་རྣམ་པར་འབྱེད་པ་ལས། དང་པོ་ས་ནི་ཆུར་ཐིམ་ཞིང་། །
ཆུ་ནི་མེ་ལ་ཐིམ་པར་འགྱུར། །མེ་ནི་རླུང་གི་རྗེས་འགྲོ་ཞིང་། །རླུང་ནི་ནམ་མཁར་ཡང་དག་འཇུག །ནམ་མཁའ་འཛིན་པ་དེ་ཉིད་དེ། །ཡེ་ཤེས་གསུམ་པོ་རྣམ་སྤངས་པའོ། །ཞེས་འབྱུང་ངོ་། །ཡང་ན་དམ་ཚིག་གི་ཕྱག་རྒྱའི་སྒོ་ནས་ཕྱིའི་མངོན་པར་བྱང་ཆུབ་པ་དང་། ཡེ་ཤེས་ཀྱི་ཕྱག་རྒྱ་
དང་ཕྱག་རྒྱ་ཆེན་པོའི་སྒོ་ནས་ནི་ནང་གི་མངོན་པར་བྱང་ཆུབ་པར་ཤེས་པར་བྱའོ། །རིམ་པ་དེ་དག་གིས་དེ་ཁོ་ན་ཉིད་རྟོགས་པའི་རྣལ་འབྱོར་པས་བརྟན་པར་བྱ་བའི་ཕྱིར་ཏིང་ངེ་འཛིན་རྣམ་པ་གཉིས་ཀྱིས་ཀྱང་དེ་བཞིན་ཉིད་ལ་འདུན་པར་བྱའོ། །དེ་ལ་ལྟེ་བའི་ཕྱོགས་སུ་རྩིབས་བརྒྱད་པའི་ཆོས་

ཀྱི་འཁོར་ལོའི་དཀྱིལ་འཁོར་དུ་མེའི་འོད་འཕྲོ་བའི་ཡི་གེ་རཾ་འབར་བ་བསྒོམས་ཏེ། དེའི་སྣང་བས་སྤྱི་བོ་ནས་ལུས་མ་ལུས་པ་ལ་ཁྱབ་པར་བྱ་སྟེ། སྟོང་པ་ཉིད་ཀྱི་རང་བཞིན་འོད་གསལ་བར་གནས་པར་བྱའོ་ཞེས་རིལ་པོར་འཛིན་པ་ཞེས་བྱ་བའི་ཏིང་ངེ་འཛིན་ཏོ། །དེ་བཞིན་དུ་ཡང་
བརྟན་པ་དང་གཡོ་བའི་རང་བཞིན་ཁམས་གསུམ་པོ་དང་པོ་འོད་གསལ་བར་བྱ་སྟེ། ཕྱིས་དེ་བཞིན་དུ་བདག་ཉིད་ལ་བྱ་བ་ནི་རྗེས་སུ་གཞིག་པའི་ཏིང་ངེ་འཛིན་ཏོ། །ཏིང་ངེ་འཛིན་གཉིས་ཀྱི་དཔེ་ནི་ཇི་སྐད་དུ། །ཆུ་བོའམ་ལྟེང་ཀའི་ཆུ་ནི་དྲི་མེད་དག་ལ་ཟླ་བ་གནས་པ་ལྟར། །དེ་བཞིན་དེ་ལ་རྗེས་
སུ་འཇིག་པར་བྱེད་པ་རྣལ་འབྱོར་པས་ནི་རྟག་ཏུ་བསམ། །མེ་ལོང་ལ་ནི་དབུགས་རླུང་རིམ་གྱིས་ཟད་འགྱུར་དེ་བཞིན་ཡང་དག་བལྟ། །རིལ་པོར་འཛིན་པའི་རིམ་པ་འདི་ཡང་རྣལ་འབྱོར་པ་ཡིས་རྟག་ཏུ་བརྟག །ཅེས་འབྱུང་ངོ་། །མངོན་པར་བྱང་ཆུབ་པའི་རིམ་པས་འདིས་ཡེ་ཤེས་ལྔའི་ངོ་བོ་
ཉིད་རྣམ་པར་རྟོག་པ་མ་ལུས་པ་རིང་དུ་སྤངས་པ་མཆོག་ཏུ་དགའ་བའི་རང་བཞིན་རྣལ་འབྱོར་པ་གསོན་བཞིན་གྲོལ་བར་གནས་པར་བྱའོ་ཞེས་མངོན་པར་བྱང་ཆུབ་པའི་རིམ་པའོ། །ད་ནི་ཟུང་དུ་འཇུག་པའི་རིམ་པ་བསྟན་པར་བྱ་སྟེ། དེ་ཡང་གཉིས་སོ། །རྒྱུའི་ཟུང་དུ་འཇུག་པ་དང་།
འབྲས་བུའི་ཟུང་དུ་འཇུག་པའོ། །རྒྱུའི་ཟུང་དུ་འཇུག་པ་ལ་རྣམ་པ་བཞི་སྟེ། ཉན་ཐོས་དང་། རང་སངས་རྒྱས་དང་། དབུ་མ་དང་། སྔགས་ཀྱི་ལྟ་བའི་བྱེ་བྲག་གིས་སོ། །དེ་ལ་རིམ་པ་བཞི་པོ་འོད་གསལ་བ་ཐོབ་ནས་དེའི་རྗེས་སུ་ཀུན་རྫོབ་དང་དོན་དམ་པ་དབྱེར་མེད་པ་དཔལ་རྡོ་རྗེ་འཆང་ཆེན་པོའི་ཕྱག་
རྒྱ་ཆེན་པོ་རྣམ་པ་ཐམས་ཅད་ཀྱི་མཆོག་དང་ལྡན་པ། སེམས་ཅན་མ་ལུས་པའི་དོན་བྱེད་པ་མྱུར་དུ་སྤྲོས་ཏེ་གཉིས་པ་ཐམས་ཅད་ཀྱི་སྣང་བ་དང་བྲལ་ཞིང་། བླ་ན་མེད་པའི་སྐུ་ཐོབ་པར་འགྱུར་ཞེས་ཟུང་དུ་འཇུག་པའི་ཏིང་ངེ་འཛིན་མདོར་བསྡུས་པའོ། །དེ་ལ་ནི་ལྷག་མ་དང་བཅས་པ་དང་ལྷག་མ་མེད་པའི་མྱ་ངན་
ལས་འདས་པའི་དབྱིངས་གཉིས་ཀྱི་རྣམ་པར་རྟོག་པ་དང་། གང་ཟག་ལ་བདག་མེད་པ་དང་ཆོས་ལ་བདག་མེད་པ་ཉིད་དང་། འདུ་ཤེས་མེད་པའི་སྙོམས་པར་ཞུགས་པ་དང་འགོག་པའི་སྙོམས་པར་ཞུགས་པ་དང་། རྣམ་པ་དང་བཅས་པ་དང་། རྣམ་པ་མེད་པ་དང་། རྟག་པ་དང་ཆད་པ་དང་།

ཀུན་རྫོབ་དང་། དོན་དམ་པ་དང་། རྟག་པ་དང་། མི་རྟག་པ་དང་། གཙང་བ་དང་མི་གཙང་བ་དང་། ཡོད་པ་དང་མེད་པ་དང་། དངོས་པོ་དང་དངོས་པོ་མེད་པ་དང་། སྔགས་ཀྱི་སྐུ་དང་། ཡེ་ཤེས་ཀྱི་སྐུ་དང་། བསྐྱེད་པ་དང་། རྫོགས་པ་དང་། རྟོག་པའི་རྣལ་འབྱོར་དང་། ཡོངས་སུ་རྫོགས་
པ་དང་། སྟོང་པ་ཉིད་དང་སྙིང་རྗེ་དང་། ཐབས་དང་ཤེས་རབ་ལ་སོགས་པའི་གཉིས་པར་འཛིན་པའི་བག་ཆགས་ཐམས་ཅད་མེད་པས་བཅུ་གཉིས་པ་ཀུན་ཏུ་འོད་ཅེས་བྱ་བ་ལ་གནས་པའོ། །དེ་བས་ན་དེ་ལས་ལྡང་བའི་དག་པ་འཇིག་རྟེན་པའི་ཡེ་ཤེས་ལ་གནས་པ་ས་བཅུ་གསུམ་པ་ཐོབ་པ་
ཡོངས་སུ་རྫོགས་པའི་སྤྱོད་པ་ཟུང་དུ་འཇུག་པའི་ངོ་བོ་ཉིད་དོ། །དཔེར་ན་བྲམ་ཟེ་དང་གདོལ་པ་དང་། སྨད་འཚོང་མ་དང་། བུ་མོ་དང་ཆུང་མ་དང་། ག་བུར་དང་། བཤང་བ་དང་། དྲག་པོ་དང་། རྡོ་རྗེ་འཆང་བ་དང་། མཐོ་རིས་དང་ངན་སོང་དང་། བདེ་བ་དང་སྡུག་བསྔལ་བ་དང་། གྲགས་པ་དང་
གྲགས་པ་མ་ཡིན་པ་དང་། རྙེད་པ་དང་རྙེད་པ་མ་ཡིན་པ་དང་། བསྟོད་པ་དང་སྨད་པ་ལ་སོགས་པ་དང་བྲལ་བ། རྗེས་སུ་དྲན་པ་དང་མ་འདྲེས་པའི་ཆོས་དང་ལྡན་པ། སངས་རྒྱས་ཀྱི་སྐུ་འཛིན་པ། སངས་རྒྱས་ཀྱི་ཞིང་གཅིག་ནས་གཅིག་ཏུ་སེམས་ཅན་གྱི་དོན་མཛད་པ་ལ་བརྩོན་པ་དཔལ་བདེ་བ་ཆེན་
པོའི་རྣམ་གྲངས་ཅན་རྡོ་རྗེ་སེམས་དཔའ་ཉིད་དུ་འགྱུར་རོ། །དེ་ལྟ་ན་གལ་ཏེ་འབྲས་བུ་དེ་ཡིན་ན་རྒྱུ་ཉིད་དུ་ཇི་ལྟར་འགྱུར་ཏེ། གང་གི་ཕྱིར་རིམ་པ་བཞི་པོ་ནི་ཐབས་ཏེ་རྒྱུའོ། །ལྔ་པ་ནི་མི་སློབ་པའི་ངོ་བོ་ཉིད་འབྲས་བུའོ། །དེ་ཅིའི་ཕྱིར་གཅིག་ལ་རྒྱུ་ཉིད་དང་འབྲས་བུ་ཉིད་འཐད་ཅེ་ན། སྨྲས་པ་རོ་
གཅིག་པའི་ཟུང་དུ་འཇུག་པ་ལ་བློས་བརྟགས་པའི་རྒྱུ་དང་འབྲས་བུའི་ཐ་སྙད་ཡིན་གྱི་དམ་པའི་དོན་དུ་ནི་མ་ཡིན་ནོ། །དེ་ལྟར་ཐམས་ཅད་མཁྱེན་པའི་ཡེ་ཤེས་ཐོབ་པའི་རྣལ་འབྱོར་པ་ལ་རྒྱུ་དང་འབྲས་བུའི་བྱེ་བྲག་ཏུ་གནས་པའི་དངོས་པོ་ཐམས་ཅད་ངོ་བོ་གཅིག་ཁོ་ན་ཡིན་གྱི་བྱེ་བྲག་ཏུ་དེ་ལ་དེ་
རྣམས་སྣང་བ་མ་ཡིན་ནོ། །བདག་ཅག་ལྟ་བུ་གཞལ་བར་བྱེད་པ་རྣམས་ཀྱིས་དེ་ལྟར་འདོད་པ་ལ་སྐྱོན་མེད་དོ། །ཡང་ན་སྲིད་པ་དང་མྱ་ངན་ལས་འདས་པའི་རྣམ་པར་རྟོག་པ་ཕན་ཚུན་བྱེ་བྲག་ཏུ་རབ་ཏུ་འཇུག་པ་དེ་རྣམས་ཁོ་ན་རོ་གཅིག་པར་ཤེས་པས་ཏིང་ངེ་འཛིན་མངོན་དུ་འགྱུར་ཞེས་རྒྱུ་དང་

འབྲས་བུའི་བྱེ་བྲག་འདི་ནི་བརྟགས་པ་ཡིན་པས་གནོད་པ་གང་ཡང་མེད་དོ། །དེ་ལྟ་ན་གལ་ཏེ་ཏིང་ངེ་འཛིན་འདི་ཡིན་ན། ཇི་ལྟར་ལྡང་བར་འགྱུར་ཏེ། ལྡང་བ་མེད་ན་དེའི་ཚེ་སེམས་ཅན་གྱི་དོན་མེད་ཅེས་ཕན་ཚུན་འགལ་བ་ཐོབ་པར་འགྱུར་ཞེ་ན། སྨྲས་པ་ལྡང་བ་ཞེས་
བྱ་བ་ནི་ཏིང་ངེ་འཛིན་ཉམས་པར་བྱེད་པ་ནི་མ་ཡིན་ཏེ། འོན་ཀྱང་ཏིང་ངེ་འཛིན་ལ་ཞུགས་པ་ཉིད་ཀྱིས་འགྲོ་བའི་དོན་མཛད་པའོ། །གང་གི་ཕྱིར་སངས་རྒྱས་བཅོམ་ལྡན་འདས་རྣམས་ཀྱི་སྤྱོད་ལམ་རྣམ་པ་བཞི་སྟེ། སྤྱོད་ལམ་གྱི་བཞུགས་པ་དང་། བསྟན་པའི་བཞུགས་པ་དང་། ཏིང་ངེ་འཛིན་གྱི་
བཞུགས་པ་དང་། སོ་སོར་ཡང་དག་པའི་འཇུག་པའི་བཞུགས་པའོ། །དེ་ལ་སངས་རྒྱས་རྣམས་ཀྱི་སྐུའི་ཕྲིན་ལས་རྟག་ཏུ་མཉམ་པར་གཞག་པ་གང་ཡིན་པ་དེ་ནི་སྤྱོད་ལམ་གྱི་བཞུགས་པའོ། །གང་གསུང་གི་ཕྲིན་ལས་རྟག་ཏུ་མཉམ་པར་གཞག་པ་གང་ཡིན་པ་དེ་ནི་བསྟན་པའི་བཞུགས་པའོ། །
གང་ཐུགས་ཀྱི་ཕྲིན་ལས་རྟག་ཏུ་མཉམ་པར་གཞག་པ་གང་ཡིན་པ་དེ་ནི་ཏིང་ངེ་འཛིན་གྱི་བཞུགས་པའོ། །གང་སངས་རྒྱས་རྣམས་ཀྱིས་མཐོང་བའི་ཆོས་ཀྱི་བདེ་བའི་བཞུགས་པ་དང་། ལྷ་ལ་སོགས་པའི་གནས་སུ་ཉེ་བར་གཤེགས་པ་ལ་ཐུགས་ཀྱི་ཕྲིན་ལས་རྟག་ཏུ་མཉམ་པར་གཞག་པ་གང་ཡིན་པ་དེ་
ནི་སོ་སོར་ཡང་དག་པར་འཇུག་པའི་བཞུགས་པའོ། །མཉམ་པར་གཞག་པའི་སྤྱོད་པ་ནི་བཞུགས་པ་སྟེ་གང་གི་ཕྱིར་སངས་རྒྱས་བཅོམ་ལྡན་འདས་རྟག་ཏུ་མཉམ་པར་གཞག་པས་སོ། །དེ་ལྟར་ཟུང་དུ་འཇུག་པའི་རིམ་པ་ལ་གནས་པའི་རྣལ་འབྱོར་པའི་ཏིང་ངེ་འཛིན་ལས་ལྡང་ཡང་རུང་མི་ལྡང་ཡང་
རུང་ཁྱད་པར་གང་ཡང་མེད་དེ་ཞེས་ཏིང་ངེ་འཛིན་ཁོ་ན་ཡིན་ཏེ། ཏིང་ངེ་འཛིན་མ་ཡིན་པ་ལས་ལོག་པའི་ཕྱིར་རོ། །གལ་ཏེ་ཕྱོགས་གཉིས་ཀ་ལ་མཚུངས་པ་ཡིན་ན་དེ་ཅིའི་ཕྱིར་རྣམ་པར་མི་རྟོག་པར་གྱུར་ནས་ཀྱང་སེམས་ཅན་གྱི་དོན་བྱེད་ཅེ་ན། སྨྲས་པ་སྔོན་གྱི་སྨོན་ལམ་དང་ཐུགས་རྗེ་ཆེན་པོའི་ཤུགས་
ཀྱིས་སེམས་ཅན་གྱི་དོན་མཛད་པ་ཡིན་གྱི་རྣམ་པར་རྟོག་པས་ནི་མ་ཡིན་ནོ། །སེམས་ཅན་རྣམས་ཀྱི་ཡང་དེ་ཕྲད་པ་ཙམ་གྱིས་རེ་བ་ཐམས་ཅད་ཡོངས་སུ་རྫོགས་པར་འགྱུར་ཏེ་ཡིད་བཞིན་གྱི་ནོར་བུ་དང་བུམ་པ་བཟང་པོ་བཞིན་ནོ། །ཇི་སྐད་དུ། དེ་ནི་ཕྲད་པ་ཙམ་གྱིས་ནི། །སྐྱེས་བུ་ཡིད་བཞིན་ནོར་བུ་ལྟར། །

རྩིག་པ་ལ་སོགས་རྣམས་ལས་ཀྱང་། །ཇི་འདོད་བསྟན་པ་རྣམས་ནི་འབྱུང་། །ཞེས་འབྱུང་ངོ་། །དེ་བས་ན་སངས་རྒྱས་ཀྱི་ས་ལ་ཉོན་མོངས་པའི་དྲ་བ་ཟད་ནས་ཀྱང་སྔོན་གྱི་སྨོན་ལམ་གྱི་འཕེན་པའི་དབང་གིས་སྐུར་བྱུང་བ་དང་སེམས་ཅན་གྱི་དོན་ཡང་འབྱུང་སྟེ། རྫ་མཁན་གྱི་འཁོར་ལོ་བཞིན་ནོ། །
ཇི་སྐད་དུ། སྐྱོན་རྣམས་སྐྱེད་བྱེད་འཇིག་ཚོགས་ལྟ་བུའི་བུད་ཤིང་སྲེག་བྱེད་གང་། །རང་གཞན་བྱེ་བྲག་ཡུལ་རྣམས་རྩ་ནས་འདོན་བྱེད་དེ་རྣམས་སྐྱོན་མེད་དེ། །སྐྱོན་མེད་པ་ཡང་ཐུགས་རྗེས་སྒྱུ་མའི་སྐྱེས་བུ་ལས་ལ་འཇུག །བློ་བཟང་སྔོན་གྱི་སྨོན་ལམ་དབང་གིས་འཁོར་ལོ་འཁོར་བཞིན་གནས། །
ཞེས་འབྱུང་ངོ་། །ཀམ་པ་ལའི་ཞལ་སྔ་ནས་ཀྱིས་ཀྱང་གསུངས་ཏེ། མི་ཤིགས་ཁྱོད་ཀྱིས་མངོན་པར་བྱང་ཆུབ་ཐོབ་ནས་ནི། །གང་ཚེ་མི་ཤིགས་ཉིད་ཀྱང་ཡི་གེར་གསུངས་པ་ནི། །དེ་ཚེ་རིང་དུ་ཉམས་པ་རྣམས་ཀྱི་ཇི་ལྟར་ནི། །ལྕགས་ཀྱུ་མེད་པ་རྣམས་ཀྱིས་ལོག་པའི་རྩོལ་བ་བྱེད། །ཅེས་འབྱུང་ངོ་། །ཟུང་དུ་འཇུག་པའི་རིམ་པའི་ཏིང་ངེ་
འཛིན་ཏེ་རྫོགས་པའི་རིམ་པའོ། །དེ་ལྟར་བསྐྱེད་པ་དང་རྫོགས་པའི་རིམ་པ་དག་ཡན་ལག་དང་དབྱེ་བར་བཅས་པ་ནི་རབ་ཏུ་བསྟན་ཏོ། །འགྲེལ་པ་མ་ལུས་པའི་དོན་དེ་ཉིད་ལ་བརྟེན་ཏེ་སློབ་དཔོན་ཟླ་བ་གྲགས་པས་འགྲེལ་པ་ལས་དོན་བསྟན་ཏོ། །དེ་བརྩམ་པ་ལ་དང་པོ་རྣམ་པ་གསུམ་ཡིན་
ཏེ། བྱ་བ་དང་བྱ་བའི་འབྲས་བུ་དང་། བྱ་བའི་འབྲས་བུའི་འབྲས་བུའོ། །དེ་ལ་རྡོ་རྗེ་ཕྲེང་བ་དང་། ལྷ་མོ་བཞིས་ཡོངས་སུ་ཞུས་པ་དང་། དགོངས་པ་ལུང་བསྟན་པ་དང་། ཡེ་ཤེས་རྡོ་རྗེ་ཀུན་ལས་བཏུས་པ་རྣལ་འབྱོར་གྱི་རྒྱུད་ཆེན་པོའི་བཤད་པའི་རྒྱུད་བཞི་པོ་ལས་ཡང་དག་པར་བཏུས་ཏེ།
དཔལ་གསང་བ་འདུས་པའི་འགྲེལ་པ་བྱེད་པ་གང་ཡིན་པ་དེ་བྱའོ། །བཤད་པའི་རྒྱུད་རྒྱས་པ་རྣམས་ལས་བློ་དམན་པ་རྣམས་ཀྱིས་དོན་གཟུང་བར་མི་ནུས་ཏེ། དེ་རྣམས་ཀྱིས་བདེ་བླག་ཏུ་གོ་བ་ནི་བྱ་བའི་འབྲས་བུའོ། །བདེ་བླག་ཏུ་གོ་བས་ཕན་ཚུན་སློབ་དཔོན་དང་སློབ་མ་དག་གི་འཆད་པ་པོ་
དང་ཉན་པ་པོའི་འབྲེལ་པ་དང་བསྙེན་བཀུར་བྱེད་པ་དང་། བསྙེན་བཀུར་བྱ་བ་དང་། ཐོས་པ་དང་བསམ་པ་དང་བསྒོམ་པས་རྟོགས་པས་ཟབ་ཅིང་རྒྱ་ཆེ་བ་བླ་ན་མེད་པས་སེམས་ཅན་མ་ལུས་པ་ལ་རྗེས་སུ་གཟུང་བར་བྱེད་པ་དཔལ་རྡོ་རྗེ་འཆང་ཆེན་པོའི་གོ་འཕང་ཐོབ་པ་ནི་བྱ་བའི་འབྲས་བུའི་འབྲས་བུའོ། །

དེ་ཡོད་པས་ཉན་པ་པོ་འཇུག་པར་འགྱུར་རོ། །དེ་བཞིན་དུ་གཞན་ཡང་བརྗོད་པ་ལ་སོགས་པ་རྣམ་པ་ལྔ་པོ་ཉན་པ་པོ་འཇུག་པར་བྱ་བའི་ཕྱིར་སྨྲ་བར་བྱ་སྟེ། རྗོད་པ་དང་བརྗོད་པར་བྱ་བ་དང་། འབྲེལ་པ་དང་།དགོས་པ་དང་། དགོས་པའི་དགོས་པའོ། །དེ་ལ་རྗོད་པར་བྱེད་
པ་འགྲེལ་པའི་མིང་ནི་སྒྲོན་མ་རབ་ཏུ་གསལ་བར་བྱེད་པའོ། །དཔལ་གསང་བ་འདུས་པའི་རྣལ་འབྱོར་གྱི་རྒྱུད་ཆེན་པོ་ཐོས་པ་ཆུང་བའི་སློབ་དཔོན་གྱིས་བཤད་པའི་མུན་པས་ཁེབས་པའི་རྡོ་རྗེའི་ཚིག་རྣམས་སྒྲོན་མ་ལྟར་གསལ་བར་བྱེད་ཅིང་ཇི་ལྟ་བ་བཞིན་དུ་མངོན་པར་གསལ་བར་བྱེད་པས་ན་སྒྲོན་མ་
གསལ་བའོ། །མཐའ་དྲུག་ཅེས་བྱ་བ་ནི་དེ་ཉིད་ཀྱི་དོན་གྱི་སྒོ་ནས་མིང་ཡིན་ཏེ། བརྗོད་པར་བྱ་བ་དྲུག་དུ་བསྟན་པའི་ཕྱིར་རྗོད་པར་བྱེད་པའོ། །བརྗོད་པར་བྱ་བ་ནི་སྔོན་དུ་བཤད་པའི་རིམ་པ་གཉིས་ཏེ། དེ་ལ་ཡང་དང་པོ་ལ་རྣམ་པ་གསུམ་སྟེ། ལུས་རྣམ་པར་དབེན་པའི་བར་དུའོ། །གཉིས་པ་ནི་རྣམ་པ་ལྔ་སྟེ་ངག་རྣམ་པར་དབེན་པ་ནས་
བརྩམས་ཏེ་མི་གནས་པའི་མྱ་ངན་ལས་འདས་པའི་བར་དུའོ་ཞེས་བརྗོད་པར་བྱའོ། །འབྲེལ་པ་ཞེས་བྱ་བ་ནི་སྒྲ་དང་དོན་དག་གིས་ཐབས་དང་ཐབས་ལས་བྱུང་བའི་མཚན་ཉིད་དམ། རྒྱུ་དང་འབྲས་བུའི་ཚུལ་ལམ། རྗོད་པ་དང་བརྗོད་པར་བྱ་བའི་མཚན་ཉིད་ངེས་པར་ཤེས་པར་བྱའོ། །གལ་ཏེ་
སྒྲ་དང་དོན་དག་གིས་འབྲེལ་པ་གཙོ་བོ་ཡོད་པ་མ་ཡིན་ཡང་བློས་བྱས་པ་ཁོ་ནའོ། །གང་གི་ཕྱིར་སྒྲ་དང་དོན་དག་ལ་འབྲེལ་པ་མེད་དེ་རང་གི་མཚན་ཉིད་སྟོན་མི་ནུས་པའི་ཕྱིར་རོ། །འབྲེལ་པ་ཞེས་བྱ་བ་ནི་རྣམ་པ་གཉིས་ཏེ། དེའི་བདག་ཉིད་དང་། དེ་ལས་བྱུང་བའོ། །དེ་ལས་དེའི་བདག་ཉིད་
ཅེས་བྱ་བ་ནི་དབྱེར་མེད་པའི་དངོས་པོ་གཅིག་པོ་ཁོ་ན་ལ་ལྡོག་པས་བྱས་པའི་བྱེ་བྲག་ལ་བརྟེན་ཏེ་བསྒྲུབ་པར་བྱ་བ་དང་སྒྲུབ་པར་བྱེད་པ་དང་། རྟོགས་པར་བྱ་བ་དང་རྟོགས་པར་བྱེད་པའི་བསྒྲུབ་པ་དག་སོ་སོར་བསྟན་པ་ནི་རྨོངས་པའི་བློ་ཅན་རྣམས་ཀྱི་རྨོངས་པ་སེལ་བར་བྱེད་པའོ། །དཔེར་ན་ཤིང་དང་།
ཤ་བ་དག་དང་། བྱས་པ་དང་མི་རྟག་པ་དག་གི་དབྱེར་མེད་པ་ནི་ཤིང་དང་ཤ་བ་དག་དང་བྱས་པ་དང་མི་རྟག་པ་བཞིན་དུ་སྒྲ་དང་དོན་དག་ལ་དབྱེར་མེད་པ་ཉིད་མེད་དོ། །དཔེར་ན་སྒྲ་རྗོད་པར་གྱུར་པ་ན་སྐྱེས་བུའི་ཁ་ཡོངས་སུ་ཁེངས་པར་འགྱུར་བའི་དོན་གྱིས་ནི་མ་ཡིན་ནོ། །སྒྲ་ནི་སྐད་ཅིག་མ་ཡིན་པའི་

ཕྱིར་བརྗོད་མ་ཐག་ཏུ་རྣམ་པར་འཇིག་གོ། །དོན་ནི་བུམ་པ་ལ་སོགས་པའི་མཚན་ཉིད་ཕྱི་རོལ་དུ་ཡོད་པ་དེ་ཡང་སྐད་ཅིག་མ་ཅན་མ་ཡིན་ཞེས་དེ་དག་ཐ་དད་པའོ། །ཐ་དད་པ་དང་ཐ་མི་དད་པ་དག་གིས་ཕན་ཚུན་སྤངས་པའི་མཚན་ཉིད་ཅན་གྱི་འགལ་བས་དེའི་བདག་ཉིད་མེད་དོ། །གལ་ཏེ་སྐྱོན་དེ་བསལ་བར་
བྱ་བའི་ཕྱིར་ཐ་དད་པའི་དོན་ལ་ཡང་དོན་སྒྲར་མཚན་བརྡའི་སྒོ་ནས་རྗོད་པར་བྱེད་ཅེ་ན། དེ་ཡང་མི་རིགས་ཏེ། གང་གི་ཕྱིར་དངོས་པོའི་ཆོས་ཉིད་དུ་གནས་པའི་རང་གི་མཚན་ཉིད་མི་རྟོག་པའི་ཡེ་ཤེས་པའི་སྤྱོད་ཡུལ་ནི་བརྡས་བསྟན་པར་མི་ནུས་ཏེ། ཐ་དད་པ་དང་ཐ་མི་དད་པ་དང་། མིང་དང་རིགས་ལ་
སོགས་པའི་དབྱེ་བས་ཀྱང་བརྗོད་པར་བྱ་བ་མ་ཡིན་པའི་ཕྱིར་རོ། །རེ་ཞིག་བརྗོད་བྱ་ནི་སྐད་ཅིག་མ་ཡིན་པའི་ཕྱིར་མི་གནས་ཏེ། རྗོད་པར་བྱེད་པ་དེ་ཡང་དེ་བཞིན་ཏེ། དངོས་པོ་ཐམས་ཅད་སྐད་ཅིག་མས་ཁྱབ་པའི་ཕྱིར་རོ། །བརྡ་ནི་ཐ་སྙད་ལ་དགོས་པ་སྟེ། །གང་ལ་བརྟེན་པའི་ཐ་སྙད་དེ། །
གལ་ཏེ་གནས་པར་མི་འགྱུར་ན། །དེའི་ཚེ་གང་གི་བརྡ་ཡིན་ཏེ། །མོ་གཤམ་གྱི་བུའི་བརྡ་བཞིན་ནོ། །ཇི་སྐད་དུ་ཚད་མ་རྣམ་འགྲེལ་ལས། སྒྲ་རྣམས་ཀྱིས་ནི་བརྡ་ཅན་སྟོན། །དེ་ནི་ཐ་སྙད་ཕྱིར་བཤད་པ། །དེ་ཚེ་རང་གི་མཚན་ཉིད་མེད། །དེས་ན་དེ་ལ་བརྡ་མེད་དོ། །ཞེས་འབྱུང་ངོ་། །
དེ་བས་ན་དེའི་བདག་ཉིད་ཀྱི་འབྲེལ་པ་མེད་པ་ཁོ་ནའོ། །དེ་ལས་བྱུང་བའི་འབྲེལ་པ་ཡང་མེད་དེ། ཅིའི་ཕྱིར་ཞེ་ན། དེ་ལས་བྱུང་བའི་མཚན་ཉིད་ཀྱི་འབྲེལ་པ་ནི་ཐ་དད་པའི་དངོས་པོ་དག་ལ་ཡོད་དེ། དོན་གྱི་རྗེས་སུ་འགྲོ་བ་དང་། ལྡོག་པ་རྗེས་སུ་འཇུག་པའི་ཕྱིར་ཏེ། དུ་བ་དང་མེ་བཞིན་ནོ། །མེ་ཡོད་པས་དུ་བ་
ཡོད་པ་དང་། མེ་མེད་པས་བུད་ཤིང་ལ་སོགས་པ་རྒྱུ་རྣམས་མ་ཚང་བ་མེད་པ་ཡོད་པས་ཀྱང་དུ་བ་ཡོད་པར་མི་འགྱུར་ཞེས་རྒྱུ་ཡོད་པ་དང་མེད་པ་དག་གིས་འབྲས་བུ་ལ་ཡང་ཡོད་པ་དང་མེད་པ་ཉིད་དེ། དེ་ནི་རྒྱུའི་རྗེས་སུ་འགྲོ་བའི་ཕྱིར་རོ། །དེ་བས་ན་ཡོད་པ་དང་མེད་པ་དག་གིས་བྱས་པའི་བདག་ཉིད་ཡོད་པ་དང་
མེད་པ་ཅན་གྱི་དུ་བས་མེ་རྟོགས་པར་བྱེད་དོ། །རྟོགས་པ་དང་རྟོགས་པར་བྱ་བའི་དངོས་པོའམ། བསྒྲུབ་བྱ་དང་སྒྲུབ་པར་བྱེད་པ་དངོས་པོ་དག་གི་རྗེས་སུ་འགྲོ་བ་དང་ལྡོག་པ་ཁོ་ན་རྒྱུ་ཡིན་ནོ། །དེ་ལྟ་བུའི་རིགས་པ་སྒྲ་དང་དོན་དག་ལ་མེད་དེ། ཅིའི་ཕྱིར་ཞེ་ན། བུམ་པ་ལ་སོགས་པའི་དོན་ཡོད་པས་ཀྱང་

དངོས་པོ་གཅིག་ལ་ཡིད་འབྲེལ་པ་ཅན་གྱི་སྐྱེས་བུས་སྒྲ་བརྗོད་པར་མི་ནུས་པ་དང་། དོན་མེད་པས་ཀྱང་རྟོག་པ་དང་བཅས་པའི་རྣམ་པར་ཤེས་པ་རང་དབང་དུ་སྒྲ་རྗོད་པར་བྱེད་པ་སྟེ། འཁོར་ལོས་སྒྱུར་བ་དང་རྒྱ་མཚོ་ལ་སོགས་པའི་སྒྲ་བཞིན་ནོ། །དེའི་ཕྱིར་དོན་གྱི་རྗེས་སུ་
འགྲོ་བ་དང་ལྡོག་པ་མེད་པས་སྒྲ་དང་དོན་དག་གིས་དེ་ལས་བྱུང་བའི་འབྲེལ་པ་མེད་དོ། །དེ་ལ་སྨྲས་པ། རང་གི་མཚན་ཉིད་ཀྱི་འབྲེལ་པ་མེད་དེ་སྤྱིའི་མཚན་ཉིད་ཀྱིས་བྱས་པའི་འབྲེལ་པ་ཡོད་པ་ཉིད་དེ་དཔེར་ན་རྟོག་བཅས་ཀྱི་ཤེས་པ་ལ་སྤྱིའི་ཚུལ་དུ་དོན་གྱི་རྣམ་པ་གང་སྣང་བ་དེ་ཉིད་ཀྱིས་ཕ་
རོལ་པོ་ལ་རྟོགས་པར་བྱ་བའི་ཕྱིར་འབྲས་བུར་གྱུར་པའི་སྒྲ་སྐྱེད་པར་བྱེད་དོ། །སྤྱིའི་སྒྲའི་རྣམ་པ་དེས་ཀྱང་ཉན་པ་པོའི་རྒྱུད་ལ་རྟོག་པ་སྐྱེད་པར་བྱེད་དོ། །དེའི་ཕྱིར་སྒྲའི་ཡུལ་གང་ཡིན་པ་དེ་ཉིད་རྣམ་པར་རྟོག་པ་རྣམས་ཀྱི་ཡུལ་ལོ། །དེ་བས་སྒྲ་དང་དོན་རྣམས་ཀྱི་བཏགས་པ་པའི་འབྲེལ་པ་
ཡོད་པ་ཁོ་ནའོ། །དེ་ཉིད་ལ་བརྟེན་ཏེ་ཉེ་བར་བརྟགས་པས་རང་གི་མཚན་ཉིད་ལ་ཡང་སྒྲ་འཇུག་གི་འཇུག་པ་གཙོ་བོས་ནི་མ་ཡིན་ནོ། །འབྲེལ་པ་དེ་ཡང་རྣམ་པ་དྲུག་ཏུ་འགྱུར་ཏེ། དེ་བཞིན་གཤེགས་པ་དང་ལྷ་མོ་དང་བྱང་ཆུབ་སེམས་དཔའ་དང་། ལྷ་དང་། མིའམ་ཅི་དང་།
མི་རྣམས་ཀྱིའོ། །དེ་ལ་དང་པོ་འགྲོ་བ་འདི་དག་མུན་པར་གྱུར་པ་སྟོང་པ་ཉིད་ཀྱི་རང་བཞིན་དུ་ཡོད་དེ། དེ་ནས་བསམ་གཏན་བཞི་པའི་གཟུགས་ཁམས་སུ་གནས་པ་དང་། ནམ་མཁའ་མཐའ་ཡས་ཀྱི་སྐྱེ་མཆེད་དུ་གནས་པ་དང་། རྣམ་པར་ཤེས་པ་མཐའ་ཡས་སྐྱེ་མཆེད་
དང་། ཅི་ཡང་མེད་པའི་སྐྱེ་མཆེད་དང་། འདུ་ཤེས་ཡོད་མིན་མེད་མིན་སྐྱེ་མཆེད་དུ་གནས་པ་རྣམས་ཀྱི་ཡུན་རིང་བའི་དབང་གིས། ཆང་གིས་མྱོས་པའི་ནུས་པ་བཞིན་དུ་འདོད་ཆགས་ཀྱི་བག་ཆགས་འབྱུང་བར་འགྱུར་རོ། །དེའི་དེ་མ་ཐག་ཏུ་དེ་རྣམས་གཟུགས་ཅན་དུ་གྱུར་ཏོ། །
དེ་ནས་ཆགས་པ་དང་མངོན་པར་འབྲེལ་པའི་དབང་གིས་རང་གི་ལུས་ལས་བཅུད་ཀྱི་རང་བཞིན་ཆར་གྱི་རྒྱུན་འབབ་པར་འགྱུར་རོ། །བབ་པ་དེ་རྣམས་ཀྱིས་ཀྱང་ཁ་དོག་སེར་པོ་སའི་ཆ་འདམ་དུ་ཆགས་སོ། །ཡང་དུས་ཀྱི་དབང་གིས་དེ་དུམ་བུ་བཞིར་གས་ནས་གླིང་བཞི་དང་དཀྱིལ་དུ་རི་

རབ་ཀྱི་རྒྱལ་པོ་ཡང་དག་པར་བྱུང་བར་གྱུར་ཏོ། །དེ་ནས་དེ་དག་ཀྱང་དེ་ཉིད་དུ་བབས་སོ། །བག་ཆགས་ལྡང་བའི་ཤུགས་ཀྱིས་བུད་མེད་དང་སྐྱེས་པའི་རྟགས་སུ་གྱུར་པས་ཕན་ཚུན་འབྲེལ་པའི་དབང་གིས་སྐྱེ་དགུ་དང་རིགས་བཞིའི་ཐ་སྙད་ཀྱང་འབྱུང་ངོ་། །མ་
རྨོས་པར་སྨིན་པའི་འབྲས་ལ་སོགས་པའི་འབྲུ་རྣམས་དང་། དེ་དག་བསྲུང་བར་བྱ་བའི་ཕྱིར་མཐའ་ཡས་གྲགས་པ་ལ་སོགས་པ་རྒྱལ་པོ་རྣམས་བྱུང་ངོ་། །བདག་དང་གཞན་གྱི་དབྱེ་བའི་དབང་གིས་ང་དང་བདག་ཏུ་འཛིན་པ་བྱུང་ངོ་། །དེའི་རྩ་བ་ཅན་ནི་འདོད་ཆགས་ལ་སོགས་
པའི་ཉོན་མོངས་པ་དང་དེ་ལས་བྱུང་བའི་དགེ་བ་དང་མི་དགེ་བའི་ལས་དང་། དེའི་རྒྱུ་ཅན་བདེ་འགྲོ་དང་ངན་འགྲོ་དག་ཅེས་ཟོ་ཆུན་གྱི་འཁྲུལ་འཁོར་བཞིན་དུ་ཡོངས་སུ་འཁོར་བའི་དགོན་པར་འཁོར་བར་གྱུར་ཏོ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས་སྙིགས་མ་ལྔའི་དུས་སུ་
ཉོན་མོངས་པ་ལྔས་དཀྲུགས་པའི་སེམས་ཅན་གྱི་ཁམས་ལ་གཟིགས་ཏེ། ཉན་ཐོས་ལ་སོགས་པའི་ལམ་གཞན་གྱིས་འདི་དག་འདུལ་བར་མི་འགྱུར་ཏེ་ཞེས་མཁྱེན་ནས་ཉོན་མོངས་པ་ཉིད་ཀྱིས་ཉོན་མོངས་པ་ཐམས་ཅད་ཉེ་བར་ཞི་བར་འགྱུར་ཞེས་དགོངས་ནས་སྒེག་པ་ལ་སོགས་པའི་
ཆ་ལུགས་དང་ལྡན་པའི་དེ་བཞིན་གཤེགས་པ་ལྔ་ཡེ་ཤེས་ལྔའི་ངོ་བོ་ཉིད་སྤྲོ་བར་མཛད་དེ། དེ་བཞིན་གཤེགས་པ་དེ་དག་གིས་དགའ་ལྡན་གྱི་ལྷའི་གནས་སུ་རིན་པོ་ཆེ་སྣ་བདུན་གྱི་རང་བཞིན་གྱི་གཞལ་ཡས་ཁང་པ་ལ་བཞུགས་པའི་རྡོ་རྗེ་སེམས་དཔའ་ལ་གསོལ་བ་བཏབ་པར་
གྱུར་པས་བཅོམ་ལྡན་འདས་ཀྱིས་ཀྱང་རིག་མའི་ཆུ་སྐྱེས་ཀྱི་ནང་དུ་དཀྱིལ་འཁོར་སྤྲོས་ཏེ། དེ་བཞིན་གཤེགས་པ་རྣམས་ལ་རིག་མའི་དབང་བསྐུར་ནས་ཕྱི་རོལ་དུ་སྤྲོས་ཏེ། དེ་ཁོ་ན་ཉིད་བསྟན་ཏོ་ཞེས་པ་དེ་ནི་དེ་བཞིན་གཤེགས་པའི་འབྲེལ་པའོ། །བཅོམ་ལྡན་འདས་དེ་ཉིད་
ཀྱིས་འདོད་ཆགས་ཀྱི་རིགས་ཅན་རྗེས་སུ་གཟུང་བར་བྱ་བའི་ཕྱིར། ལྷ་མོ་བཞི་སྤྲོས་ཏེ། དེ་རྣམས་ཀྱིས་ཡོངས་སུ་ཞུས་པས་དེ་ཁོ་ན་ཉིད་གསུངས་པ་དེ་ནི་ལྷ་མོའི་འབྲེལ་པའོ། །དབང་པོ་རྣམས་ལ་མངོན་པར་ཞེན་པའི་ཉོན་མོངས་པ་ལ་གནས་པའི་སེམས་ཅན་རྗེས་སུ་གཟུང་བར་བྱ་བའི་

ཕྱིར་བྱང་ཆུབ་སེམས་དཔའི་ཚོགས་སྤྲོས་ཏེ་དེ་ཁོ་ན་ཉིད་བསྟན་པ་ནི་བྱང་ཆུབ་སེམས་དཔའི་འབྲེལ་པའོ། །བརྒྱ་བྱིན་གྱིས་ཡོངས་སུ་ཞུས་པ་ལ་སོགས་པའི་བཤད་པའི་རྒྱུད་ལ་སོགས་པ་གང་གསུངས་པ་དེ་ནི་ལྷའི་འབྲེལ་པའོ། །མིའམ་ཅི་དང་ཀླུ་དང་དྲང་སྲོང་ལ་སོགས་པ་
རྣམས་ལ་སྒྲོལ་མ་འབྱུང་བ་ལ་སོགས་པའི་རྒྱུད་བསྟན་པ་གང་ཡིན་པ་དེ་ནི་མི་འམ་ཅིའི་འབྲེལ་པའོ། །རབ་གསལ་ཟླ་བ་ལ་སོགས་པའི་རྒྱལ་པོ་རྣམས་ཡུལ་དབུས་སུ་གྲོང་ཁྱེར་བཅོ་བརྒྱད་ལ་ཆོས་གསུངས་པ་དེ་ནི་མིའི་འབྲེལ་པའོ། །དེ་ལྟར་འབྲེལ་པ་དྲུག་པོ་རྒྱས་པ་དེ་མདོར་བསྡུས་
པས་རྣམ་པ་གཉིས་སུ་འགྱུར་ཏེ། སྒྲ་དང་དོན་གྱི་འབྲེལ་པ་དང་། སྟོན་པ་དང་འཁོར་གྱི་འབྲེལ་པའོ། །ཇི་སྐད་དུ། བསྟན་བཅོས་གང་ཟག་དབྱེ་བ་ཡིས། །འབྲེལ་པ་རྣམ་པ་གཉིས་སུ་འདོད། །བསྟན་བཅོས་སྒྲ་དང་དོན་འབྲེལ་པ། །འཆད་དང་ཉན་པའི་ཅིག་ཤོས་ཡིན། །གཉིས་
པའི་བྱེ་བྲག་དྲུག་ཡིན་ཏེ། །གཅིག་ནས་གཅིག་ཏུ་བརྒྱུད་རིམ་འོངས། །དེ་བཞིན་གཤེགས་སོགས་དབྱེ་བ་ཡིས། །བློ་ལྡན་གྲགས་པ་རྣམས་ཀྱིས་གསུངས། །ཞེས་འབྱུང་ངོ་། །འདིར་ནི་དེ་བཞིན་གཤེགས་པའི་འབྲེལ་པ་གཅིག་པུ་ཡིན་ཏེ། དེ་བཞིན་གཤེགས་པ་ལྔས་དབུས་ཀྱི་
གཙོ་བོ་ལ་གསོལ་བ་བཏབ་པས་སོ་ཞེས་འབྲེལ་པ་བསྟན་ཏོ། །དགོས་པ་ཞེས་བྱ་བ་ནི་ཐོས་པ་དང་བསམ་པ་དང་བསྒོམ་པའི་རིམ་པས་བསྒྲུབ་བྱར་གྱུར་པའི་རྡོ་རྗེ་འཆང་ཆེན་པོའི་གནས་ཐོབ་པའོ། །དེ་ཐོབ་ནས་ཁམས་གསུམ་པ་ཐམས་ཅད་ཀྱང་དེའི་གནས་སུ་དགོད་པ་ནི་བྱ་བ་བྱས་པའི་ཕྱིར་དགོས་པའི་
དགོས་པའོ། །གཞན་དག་ན་རེ་ཐོས་པ་ལ་སོགས་པའི་རིམ་གྱིས་རྟོགས་པ་ནི་དགོས་པའོ། །དེ་ལས་ཀྱང་ཐ་མལ་པའི་ལུས་བཟློག་པས་འཇིག་རྟེན་ལས་འདས་པའི་ལྷའི་རྣམ་པ་བསྒྲུབ་པ་ནི་དགོས་པའི་དགོས་པ་ཡིན་ནོ་ཞེས་བརྗོད་པ་དེ་ནི་མི་རིགས་ཏེ། གང་གི་ཕྱིར་བྱང་ཆུབ་སེམས་
དཔའ་རྣམས་ཀྱིས་རང་གི་དོན་སྒྲུབ་པ་ལ་འབད་པ་མ་ཡིན་ཏེ། དེ་རྣམས་ཀྱིས་ནི་གཞན་གྱི་དོན་གཙོ་བོ་ཡིན་གྱི་རང་གི་དོན་ནི་མ་ཡིན་ནོ། །ཇི་སྐད་དུ། འགྲོ་བ་མ་ལུས་རང་གཞན་དོན་མཛད་པའི། །དེ་བཞིན་གཤེགས་ཉིད་དེ་ཡི་ཞར་ལ་འབྱུང་། །ཞེས་འབྱུང་ངོ་། །དེའི་ཕྱིར་གཞན་གྱི་དོན་ཁོ་ན་

དགོས་པའི་གཙོ་བོ་ཡིན་གྱི། གཞན་དུ་ན་རང་གི་དོན་ནི་དགོས་པ་ཉིད་དུ་མི་འགྱུར་རོ། །སྒྲུབ་པར་སྣང་བ་དང་། དོན་གྱི་བྱ་བར་སྣང་བའི་ཤེས་པ་གཉིས་བཞིན་ནོ། །དཔེར་ན་དང་པོ་མིག་ཕྱེ་བའི་དུས་སུ་སྲེག་པ་དང་འཚེད་པ་ལ་སོགས་པའི་དོན་གྱི་བྱ་བ་བྱེད་ནུས་པ་ཡང་མེ་ལ་སོགས་པ་ཙམ་དུ་
སོ་སོར་སྣང་བ་ཡིན་ཏེ། དོན་གྱི་བྱ་བ་མེད་པའི་ཕྱིར་རོ། །མེ་ལ་སོགས་པ་ཐོབ་ནས་སྲེག་པ་དང་འཚེད་པ་ལ་སོགས་པའི་བྱ་བ་དངོས་སུ་བྱེད་པའི་ཤེས་པ་ནི་དོན་གྱི་བྱ་བ་སྣང་བར་བཤད་དོ། །དེ་ཉིད་དུ་བྱ་བ་བྱས་པའི་ཕྱིར་རོ། །གང་དོན་གྱི་བྱ་བ་བྱེད་པ་དེ་ཉིད་དམ་པའི་དོན་དུ་ཡོད་ཅེས་འབྱུང་ངོ་། །
འདིར་ཡང་དགོས་པ་ནི་སྒྲུབ་པར་སྣང་བའོ། །དགོས་པའི་དགོས་པ་ནི་དོན་གྱི་བྱ་བར་སྣང་བ་ཡིན་ཞེས་རྒྱས་པས་ཆོག་གོ། །དགོས་པ་ལ་སོགས་པའི་སྒོ་ནས་གདུལ་བྱ་འཇུག་པ་ཡིན་པས་དེ་དག་བསྟན་པར་བྱ་བའི་ཕྱིར་གང་ཟག་ལྔ་བརྟག་པར་བྱ་སྟེ། དེ་ཡང་ཙནྡན་ལ་སོགས་པའི་
གོང་དུ་བཤད་པ་སྟེ། དེ་ལ་ཙནྡན་ཞེས་བྱ་བ་ནི་གཏི་མུག་འབའ་ཞིག་གི་རིགས་ཅན་ཐོས་པ་ཆུང་ཞིང་ང་རྒྱལ་གྱི་དབང་གིས་གཞན་རྣམས་སྐྱོ་བར་བྱེད་པ་དེ་ལས་གཞན་དང་རང་གི་དོན་སྒྲུབ་པར་མི་ནུས་ཏེ། བླུན་པོ་ཡིན་པའི་ཕྱིར་རོ། །ཨུཏྤ་ལ་ཞེས་བྱ་བ་ནི་ཐོས་པ་ལ་སོགས་པའི་
རིམ་གྱིས་འཇུག་པ་ཡང་བརྗེད་ངས་པའི་ངང་ཚུལ་ཅན་ཡིན་ཏེ། དབང་པོ་དམན་པ་ཡིན་པའི་ཕྱིར་རོ། །དེའི་རང་གི་དོན་སྐྱེ་བ་འདི་ལ་མེད་དེ་སྐྱེ་བ་གཞན་ལ་འབྱུང་བར་འགྱུར་བའི་ཕྱིར་རོ། །པདྨ་དཀར་པོ་ནི་ཐོས་པ་ལ་སོགས་པ་རང་གི་སེམས་ལ་འཛིན་ཅིང་གཞན་ལ་སྟོན་
པར་མི་ནུས་པས་རང་གི་དོན་ཙམ་ཡོད་དེ། དབང་པོ་བར་བ་ཡིན་པའི་ཕྱིར་རོ། །པདྨ་ཞེས་བྱ་བ་ནི་གཞན་རྣམས་ལ་སྟོན་པར་བྱེད་ནུས་ཏེ། དབང་པོ་རྣོན་པོ་ཡིན་པའི་ཕྱིར་རོ། །རིན་པོ་ཆེ་ཞེས་བྱ་བ་ནི་རང་གི་དོན་དང་གཞན་གྱི་དོན་ཕུན་སུམ་ཚོགས་པ་དང་ལྡན་པ་ཚུལ་
ཁྲིམས་ལ་སོགས་པའི་ཡོན་ཏན་དང་བཅས་པ་བྱང་ཆུབ་སེམས་དཔའི་རིགས་ཅན་དབང་པོ་རབ་ཀྱི་རབ་ཡིན་པའི་ཕྱིར་རོ། །བཞི་པོ་ནི་ཀུན་རྫོབ་ཀྱི་ཕྱོགས་ཀྱི་བཤད་པ་ལ་སྣོད་དུ་རུང་བ་དང་། གཅིག་ནི་དོན་དམ་པའི་མཆོག་གི་བཤད་པའི་སྣོད་དུ་རུང་བའོ། །དེ་ཡང་ཤིན་ཏུ་རྒྱས་པར་

འོག་ནས་འཆད་པར་འགྱུར་རོ། །གཞན་དག་ན་རེ་གང་ཟག་བཞི་ཡོད་དེ། མི་ཤེས་པ་དང་། ཐེ་ཚོམ་ཟ་བ་དང་། ཕྱིན་ཅི་ལོག་པའི་བློ་དང་། ངེས་པ་ཅན་གྱི་བློ་ཅན་ནོ། །དེ་ལ་མི་ཤེས་པ་ནི་རྣམ་པ་གཉིས་ཏེ། ཚད་མའི་རྗེས་སུ་འབྲང་བ་དང་། ཚད་མ་མ་ཡིན་
པའི་རྗེས་སུ་འབྲང་བའོ། །དེ་ལ་ཚད་མའི་རྗེས་སུ་འབྲང་བ་ནི་གཞན་གྱི་རིགས་པ་ལེན་ཅིང་ཐོས་པ་ལ་སོགས་པའི་རིམ་གྱིས་ལམ་ལ་བརྟེན་པའོ། །ཚད་མ་མ་ཡིན་པའི་རྗེས་སུ་འབྲང་བ་ནི་མཁས་པའི་ཚིག་ལ་བརྟེན་ཏེ་ལམ་ལ་འཇུག་པའོ། །དེ་དག་གཉིས་ཀ་ཡང་ལམ་གྱི་
སྣོད་དུ་རུང་བའོ། །ཐེ་ཚོམ་ཟ་བ་ལ་ཡང་རྣམ་པ་གཉིས་ཏེ་སྔ་མ་བཞིན་ཏེ། ཐེ་ཚོམ་ཟ་བ་ཚད་མའི་རྗེས་སུ་འབྲང་བ་ནི་ཡང་དག་པར་ཚད་མ་བརྗོད་པས་ཐེ་ཚོམ་ལས་ལོག་ཅིང་ཡང་དག་པའི་ལམ་ལ་གཞག་པར་བྱ་བ་ཞེས་རྗེས་སུ་གཟུང་བར་བྱའོ། །ཚད་མའི་རྗེས་སུ་མི་འབྲང་བའི་ཐེ་ཚོམ་
ཟ་བ་ནི་བཅོམ་ལྡན་འདས་དེ་བཞིན་གཤེགས་པས་ཀྱང་རྗེས་སུ་གཟུང་བར་མི་སྤྱོད་དོ། །ཇི་སྐད་དུ། མི་ཤེས་པ་ནི་བདེ་བར་མགུ་གྱུར་ཅིང་། །ཁྱད་པར་ཤེས་པ་དེ་བས་མྱུར་བར་མགུ། །དུམ་གཅིག་ཤེས་པས་མེ་ཡིས་ཕྱེད་ཚིག་པ། །མེ་དེ་སངས་རྒྱས་ཀྱིས་ཀྱང་མགུ་བྱ་མིན། །དེ་
བས་ན་བཏང་སྙོམས་ཀྱི་གནས་སུ་བཤད་དོ། །ཕྱིན་ཅི་ལོག་པའི་བློ་ཅན་ནི་རྣམ་པ་གསུམ་སྟེ། ཐེ་ཚོམ་ཟ་བ་ལ་ཕྱིན་ཅི་ལོག་པ་དང་། མི་ཤེས་པ་ལ་ཕྱིན་ཅི་ལོག་པ་དང་། ཤེས་པ་ལ་ཕྱིན་ཅི་ལོག་པའོ། །དེ་ལ་ཐེ་ཚོམ་ཟ་བ་ལ་ཕྱིན་ཅི་ལོག་པ་ནི་ཉན་ཐོས་ལྟ་བུ་སྔགས་ནི་
ཡང་དག་པ་མ་ཡིན་ནོ་ཞེས་ཟེར་བ་ཐབས་གང་གིས་ཀྱང་རྗེས་སུ་གཟུང་བར་བྱ་བ་མ་ཡིན་པས་བཏང་སྙོམས་ཀྱི་གནས་ཁོ་ནའོ། །མི་ཤེས་པ་ལ་ཕྱིན་ཅི་ལོག་པ་ནི་ཆོས་བསྟན་པ་ཙམ་གྱིས་ཕྱིན་ཅི་ལོག་པ་ལས་ལོག་ཅིང་ལམ་དུ་འཇུག་པར་བྱའོ། །ཤེས་པ་ལ་ཕྱིན་ཅི་ལོག་པ་
ལ་ཡང་གཉིས་ཏེ། ཚད་མའི་རྗེས་སུ་འབྲང་བ་དང་། ཚད་མའི་རྗེས་སུ་འབྲང་བ་མ་ཡིན་པའོ། །དེ་ལ་ཤེས་པ་ལ་ཚད་མའི་རྗེས་སུ་འབྲང་བ་མ་ཡིན་པའི་ཕྱིན་ཅི་ལོག་པའི་བློ་ཅན་ནི་གང་གིས་ཀྱང་ལམ་དུ་འཇུག་པར་བྱེད་མི་ནུས་ཏེ། ཕྱིན་ཅི་ལོག་པའི་ལྟ་བ་དང་ལྡན་པ་ཡིན་པའི་ཕྱིར་

རོ། །ཤེས་པ་ལ་ཚད་མའི་རྗེས་སུ་འབྲང་བ་ཕྱིན་ཅི་ལོག་པའི་བློ་ཅན་ལ་རྣམ་པ་དྲུག་སྟེ། གྲངས་ཅན་པ་དང་། རིགས་པ་པ་དང་། འཇིག་རྟེན་རྒྱང་པན་པ་དང་། མཆོད་འོས་པ་དང་། ཞི་བ་པ་དང་། དཔྱོད་པ་པའོ། །གཡོ་བ་དང་མི་གཡོ་བ་འདི་དག་ཐམས་ཅད་དེ་ཁོ་ན་ཉིད་ཉི་ཤུ་རྩ་ལྔ་
པའོ། །བློའི་དབང་པོ་ལྔ་ནི་མིག་ལ་སོགས་པ་ལྔའོ། །ལས་ཀྱི་དབང་པོ་ལྔ་ནི། ངག་དང་། ལག་པ་དང་། རྐང་པ་དང་། བཤང་ལམ་དང་། གསང་བའི་དབང་པོའོ། །གཟུགས་ལ་སོགས་པ་ཡུལ་ལྔ་དང་། ས་ལ་སོགས་པ་འབྱུང་བ་ཆེན་པོ་ལྔ་དང་། ནང་གི་བྱེད་པ་
གསུམ་སྟེ། ཡིད་དང་། བློ་དང་། ང་རྒྱལ་ལོ། །གཙོ་བོའི་རྣམ་གྲངས་ཅན་རང་བཞིན་དང་སྐྱེས་བུའོ། །དེ་ལ་དེ་ཁོ་ན་ཉིད་ཉི་ཤུ་རྩ་གསུམ་ནི་འབྲས་བུ་ཡང་ཡིན་ལ་རྒྱུ་ཡང་ཡིན་ནོ། །རང་བཞིན་ནི་རྒྱུ་ཁོ་ནའོ། །སྐྱེས་བུ་ནི་རྒྱུ་ཡང་མ་ཡིན་འབྲས་བུ་ཡང་མ་ཡིན་ནོ། །ཇི་སྐད་དུ། རྩ་བའི་རང་
བཞིན་བྱ་བ་མ་ཡིན་ཏེ། །ཆེན་པོ་ལ་སོགས་བདུན་པོ་རྒྱུ་འབྲས་ཡིན། །བཅུ་དྲུག་པོ་ནི་འབྲས་བུ་ཉིད་ཡིན་ཏེ། །རྒྱུ་མིན་འབྲས་མིན་སྐྱེས་བུ་དེ་ཡིན་ནོ། །དེའི་དོན་ནི་འདི་ཡིན་ཏེ། ཡོན་ཏན་གསུམ་གྱི་བདག་ཉིད་ཅན་ལུས་ཅན་ཐམས་ཅད་ཀྱི་རྒྱུར་གྱུར་པའི་རང་བཞིན་ནི་གཙོ་བོའོ། །སྙིང་
སྟོབས་དང་། རྡུལ་དང་མུན་པ་གསུམ་ནི་ཡོན་ཏན་ནོ། །དེ་ལ་སྙིང་སྟོབས་ནི་ཡང་ཞིང་གསལ་བར་བྱེད་པ་དགེ་བའི་བག་ཆགས་གཙོར་གྱུར་པ་སྟེ་མཐོ་རིས་ཀྱི་རྒྱུའོ། །རྡུལ་ནི་གཡོ་བ་སྟེ་གཡོ་ཞིང་འཆིང་བར་བྱེད་པ་སྟེ་དམྱལ་བའི་རྒྱུའོ། །མུན་པ་ནི་ལྕི་ཞིང་སྒྲིབ་པར་བྱེད་པ་མི་དགེ་བའི་བདག་
ཉིད་དམྱལ་བ