Luận tạng Tây Tạng (Tengyur) — Tập 32

ྲུག་པ། །བདག་པོའི་གཟུགས་ཅན་རལ་གྲི་ཐོགས། །དེ་ཡི་དཀྱིལ་འཁོར་ཕྱི་རོལ་དུ། །ཕྱོགས་སྐྱོང་རྣམས་ནི་དགོད་པར་བྱ། །བ་སྣ་དང་ནི་གླང་སྣ་
དང་། །བཞིན་བཟངས་དང་ནི་བཞིན་མི་བཟང་། །དྲག་པོ་ལྕགས་ཀྱུ་ཐོགས་པ་སྟེ། །འཇིགས་སུ་རུང་བའི་འཇིགས་བྱེད་པ། །ཞལ་གཅིག་པ་དང་ཕྱག་གཉིས་པའི། །མེ་ཏོག་སྤོས་མ་ལ་སོགས་བྲི། །རོལ་མོ་རྣམ་པ་སྣ་ཚོགས་པའི། །དཀྱིལ་འཁོར་ལ་ནི་མཆོད་ཕྱིར་བྲི། །དེ་ནས་དཔའ་
བོ་སྒྲུབ་པ་པོས། །རྡོ་རྗེ་ཧེ་རུ་གཟུགས་འཆང་བ། །དུང་ཆེན་པོས་ནི་བརྒྱན་བྱས་ནས། །ཅོད་པན་ཐོད་པ་རྣམས་ཀྱིས་བྱ། །དེ་ལ་ཅང་ཏེའུ་བརྡུང་བྱ་སྟེ། །གར་བྱེད་པས་ནི་གྲོང་དུ་འཇུག །སྔགས་རྣམས་ཀྱིས་ནི་ལུས་བཅིངས་པ། །དེ་ལ་ཕྱི་སྒྲ་སྒྲོགས་པར་བྱ། །ཁྲག་ཆེན་པོས་ནི་བསང་གཏོར་
ནས། །དཀྱིལ་འཁོར་མཆོག་ནི་མཆོད་པར་བྱ། །དཔལ་ལྡན་རྡོ་རྗེ་ཧེ་རུ་ཀའི། །སྒྲུབ་པ་པོས་ནི་སྔགས་ཆེན་བཟླས། །ཁྲོ་དང་བཅས་པའི་རོ་ལངས་ཀྱིས། །ཧ་ཧ་དགོད་པ་སྒྲོགས་པར་བྱེད། །སྔགས་པ་ཆེན་པོས་འཇིགས་མི་བྱ། །རྡོ་རྗེ་ཧེ་རུ་ཡང་དག་དྲན། །རོ་ལངས་དེ་ནི་ལངས་ནས་སུ། །སྒྲུབ་
པ་པོ་ལ་འདི་སྐད་སྨྲ། །དཔའ་བོ་ཆེན་པོ་བདག་ཅི་བྱེད། །རྡོ་རྗེ་ཅན་མཆོག་བཀའ་ལུང་སྦྱིན། །རལ་གྲི་མིག་སྨན་ས་འོག་དང་། །མཁའ་སྤྱོད་ཉིད་དང་རྒྱལ་བ་ཉིད། །སྒྲུབ་པ་པོ་ནི་གང་འདོད་པ། །ལས་ནི་དེ་ཉིད་སྒྲུབ་པར་བྱེད། །དེ་ནས་སྒྲུབ་པ་པོས་སྨྲས་པ། །གང་དང་གང་ནི་ཡིད་ཀྱིས་
འདོད། །པདྨ་རྒྱས་པའི་མཱ་མ་ཀཱི། །དེ་དེ་ཐམས་ཅད་སྒྲུབ་པར་བྱེད། །རྡོ་རྗེ་བདུད་རྩི་ལས་བྱུང་བའི། །རོ་ལངས་སྒྲུབ་པ་མཆོག་ཡིན་ནོ། །ལུས་དང་ངག་ཡིད་དག་པའི་ཕྱིར། །སྒྲུབ་པ་པོ་ལ་བདེ་བསྐྱོད་པའོ། །རྡོ་རྗེ་བདུད་རྩི་བདེ་བ་ཆེ། །བཅོམ་ལྡན་རྡོ་རྗེས་དེ་སྐད་གསུངས། །ཞེས་འབྱུང་ངོ་། །རྫས་ལྔ་དེ་
དག་བསྡུས་ནས་རླུང་དང་མེའི་དཀྱིལ་འཁོར་གྱི་སྟེང་དུ་ཡི་གེ་ཨ་ལས་བྱུང་བ་ཁ་དོག་དམར་པོ་པདྨའི་སྣོད་བསྒོམས་ནས། དེའི་སྟེང་དུ་བདུད་རྩི་ལྔའི་ས་བོན་ལས་བསྐྱེདཔའི་རྫས་བསམས་ལ། །དེ་རྣམས་ལ་ཡང་ཡིག་འབྲུ་བཀོད་ནས། དེ་ཡོངས་སུ་གྱུར་པ་ལས་དེ་བཞིན་གཤེགས་པ་མི་

བསྐྱོད་པ་ལ་སོགས་པ་ལྔ་བསྒོམས་ཏེ་རྣལ་འབྱོར་དང་རྗེས་སུ་རྣལ་འབྱོར་དང་ཤིན་དུ་རྣལ་འབྱོར་དང་རྣལ་འབྱོར་ཆེན་པོ་བྱས་ལ་དེ་བཞིན་གཤེགས་པ་ཐམས་ཅད་འཇུག་པ་སྔོན་དུ་འགྲོ་བར་རྗེས་སུ་ཆགས་པའི་ཏིང་ངེ་འཛིན་དམ་པས་བཞུས་པའི་གཟུགས་ཅན་རྣམ་པར་བསམས་ལ་དེ་
ཡོངས་སུ་གྱུར་པ་ལས་འོ་མའི་རྒྱ་མཚོའི་དབའ་རླབས་ལྟར་དཀར་ལ་བྱང་ཆུབ་ཀྱི་སེམས་ཉིད་དུ་བསྒོམ་པར་བྱའོ། །དེ་ནས་བཅོམ་ལྡན་འདས་ཡི་གེ་གསུམ་གྱིས་སྦྱང་བ་ལ་སོགས་པ་བྱས་ལ་དེ་ཉིད་ཀྱིས་བྱིན་གྱིས་བརླབས་པ་དཀྱིལ་འཁོར་པ་རྣམས་ལ་དམིགས་ནས། ཨོཾ་སརྦ་ཏ་ཐཱ་ག་ཏ་པྲི་ཎ་ཡ་མེ་སྭཱ་ཧཱ།
ཞེས་བྱ་བའི་སྔགས་ཀྱིས་དབུལ་བར་བྱའོ། །བདག་ཉིད་ཀྱི་ལག་པ་དང་གདོང་པ་ལ་སོགས་པ་སྦྱངས་ནས་ལུས་ཀྱི་དཀྱིལ་འཁོར་ཡང་ཚིམ་པར་བྱའོ། །དེ་ཉིད་བསྟན་པར་བྱ་བའི་ཕྱིར་ལྷ་བཤོས་སུ་གྱུར་པས་དཀྱིལ་འཁོར་གྱི་འཁོར་ལོ་ལ་བསྟབས་པར་བྱ་ཞིང་ཞེས་བྱ་བ་སྨོས་ཏེ། སྔགས་ཀྱིས་བྱིན་གྱིས་
བརླབས་པའི་ཁྱད་པར་གྱི་རྫས་དང་བཅས་པའི་སྣོད་ནི་ལྷ་བཤོས་སུ་གྱུར་པ་དེ་ཉིད་ཀྱིས་བསམས་པས་སོ། །དེ་ཉིད་ཀྱིས་བདག་ཉིད་ཚིམ་པར་བྱའོ་ཞེས་པ་ནི་བདག་རང་གིས་ཀྱང་དེ་ཉིད་བཟའ་བར་བྱའོ། །དེ་ལྟར་བྱ་བ་ལ་སོགས་པས་ནང་གི་བདག་ཉིད་ཀྱི་མཆོད་པའི་ཕན་ཡོན་བསྟན་ཏོ། །
གཟུགས་ཀྱི་ཕུང་པོ་ལ་སོགས་པ་ཞེས་པ་ནི་དེ་རྣམས་དག་པར་གྱུར་ན། སངས་རྒྱས་ཀྱི་ངོ་བོ་འབྱུང་བར་འགྱུར་བ་དང་། རང་བཞིན་གྱིས་ཀྱང་ཆོས་ཐམས་ཅད་དེ་བཞིན་གཤེགས་པའི་ངོ་བོ་ཡིན་པའི་ཕྱིར་རོ། །འདིར་རྣམ་པར་དག་པ་ནི་རྣམ་པ་གཉིས་དེ་ཁྱབ་པར་བྱེད་པ་དང་ཉི་ཚེ་བའོ། །དེ་ལ་
ཁྱབ་པར་བྱེད་པ་ནི་གཟུགས་ཀྱི་ཕུང་པོ་ལ་སོགས་པ་སྟོང་པ་ཉིད་དུ་གྲགས་པའོ། །ཉི་ཚེ་བ་ནི་སོ་སོར་ངེས་པ་ཉིད་ཀྱིས་རྣམ་པར་སྣང་མཛད་ལ་སོགས་པའི་མཚན་ཉིད་དོ། །འདིར་ནི་གཉིས་ཀ་ཡང་གཟུང་བར་བྱའོ། །མདོར་བསྡུས་པས་ནི་ཕུང་པོ་ལྔ། །སངས་རྒྱས་ལྔར་ནི་རབ་ཏུ་
གྲགས། །རྡོ་རྗེ་སྐྱེ་མཆེད་ཉིད་དག་ཀྱང་། །བྱང་ཆུབ་སེམས་དཔའི་དཀྱིལ་འཁོར་མཆོག །ཅེས་འབྱུང་ངོ་། །དེ་ཉིད་བསྟན་པར་བྱ་བའི་ཕྱིར། །མིག་ལ་སོགས་པའི་སྐྱེ་མཆེད་དེ། །ཞེས་བྱ་བ་ལ་སོགས་པ་སྨོས་སོ། །གྲགས་པ་ཆེ་ཞིང་ཞེས་པ་ནི་མངོན་པར་ཤེས་པའི་ཡེ་ཤེས་ཐོབ་པའོ། །

སྤྱོད་པ་བཟང་པོ་དེ་རྣམས་ཞེས་པ་ནི་སྐད་ཅིག་ཙམ་གྱིས་བསྐལ་པའི་དངོས་པོ་རྣམས་མཐོང་བ་ལ་གཞོལ་བའོ། །མཉེས་ཤིང་ཞེས་བྱ་བ་ལ་སོགས་པས་འགྲོ་བའི་མིག་ལ་བདེ་བ་སྟེར་བར་འགྱུར་ཏེ་ཆོག་མི་ཤེས་པ་ཡིན་པའི་ཕྱིར་རོ། །དེ་དུས་བརྩམས་ནས་དེ་ནི་རྟོག་མེད་པ། །དེ་ཡི་དབྱིབས་
དང་ཁ་དོག་མཚན་ཅི་བཞིན། །བསམ་གྱིས་མི་ཁྱབ་རྣམ་པར་སྨིན་པའི་སྐུ། །སྡོམ་པ་དེ་ལས་བྱ་བ་བྱས་པས་ཐོབ། །ཅེས་འབྱུང་ངོ་། །དེ་བཞིན་དུ། མི་བསྐྱོད་བསྟེན་པའི་རྣལ་འབྱོར་པ། །ནད་རྣམས་ཀུན་དང་བྲལ་བར་འགྱུར། །ཞེས་བྱ་བ་ལ་སོགས་པ་བཤད་པའི་རྒྱུད་ལས་གསུངས་སོ། །དྲང་བའི་
དོན་ཏོ་ཞེས་པ་ནི། །བསྐྱེད་པའི་རིམ་པ་གཙོ་བོར་གྱུར་པའི་དཀྱིལ་འཁོར་བསྟན་པའི་ཕྱིར་རོ། །ལུང་གི་བཤད་པ་བརྗོད་པར་བྱ་བ་ཞེས་པས་དཀྱིལ་འཁོར་གྱི་རྣམ་པར་དག་པའི་མཚན་ཉིད་ཀྱི་དེ་ཁོ་ན་ཉིད་བསྟན་པར་བྱ་བའི་ཕྱིར་བདག་ཉིད་ཀྱི་ཡེ་ཤེས་ནི་དཀྱིལ་འཁོར་ལྟ་བུར་སྣང་ངོ་ཞེས་བསྟན་
པར་བྱ་སྟེ། དེ་ནས་ཞེས་བྱ་བ་ནི་སྡུད་པ་པོའི་ཚིག་གོ། །ཐུགས་ཀྱང་ཡིན་ལ་ཐུགས་ཉིད་དཀྱིལ་འཁོར་ཡིན་པས་ཐུགས་ཀྱི་དཀྱིལ་འཁོར་དེ་ལས་འཛིན་པའོ། །འདིར་རང་བཞིན་གྱིས་སམ་རྣམ་པར་དག་པའི་རིམ་པས་དག་པའི་སེམས་གང་ཡིན་པ་དེ་ཉིད་སྙིང་པོ་ལེན་པས་ན་དཀྱིལ་འཁོར་
ཞེས་བྱའོ། །རྡོ་རྗེ་ཡེ་ཤེས་ནི་ཡེ་ཤེས་ལྔ་སྟེ་དེ་དང་འདྲ་བ་ནི་དེའི་རང་བཞིན་ཏེ་དེའི་བདག་ཉིད་དུ་འཇུག་པ་ཞེས་བྱ་བའི་དོན་ཏོ། །ལུས་ལ་སོགས་པ་ཐ་མལ་པའི་ངོ་བོ་སྤངས་ནས་འོད་གསལ་བའི་རང་བཞིན་དུ་གྱུར་པ་གང་ཡིན་པ་དེ་ཉིད་ཐུགས་ཀྱི་ངོ་བོ་ཡིན་ནོ་ཞེས་བྱ་བའི་སྙིང་པོ་ལེན་པས་ན་སྐུ་གསུང་
ཐུགས་ཀྱི་དཀྱིལ་འཁོར་ཞེས་བྱ་བའི་དོན་ཏོ། །གཞན་ཡང་ཇི་ལྟ་བུ་ཡིན་ཞེ་ན། འདི་ནི་དགུའི་བདག་ཉིད་ཅེས་པ་ནི་སྣང་བ་དང་སྣང་བ་མཆེད་པ་དང་སྣང་བ་ཉེ་བར་ཐོབ་པ་དང་སྟོང་པ་དང་ཤིན་དུ་སྟོང་པ་དང་སྟོང་པ་ཆེན་པོ་དང་ཤེས་རབ་དང་ཐབས་དང་མ་རིག་པའི་རང་བཞིན་ནོ། །ཡང་ན་གསུང་རབ་ཡན་
ལག་དགུ་པའི་རང་བཞིན་ཞེས་ཁ་ཅིག་ཟེར་རོ། །དེའི་ཕྱིར་མཆོག་ཡིན་ནོ། །སྣ་ཚོགས་ལུང་གི་བརྡར་གྱུར་པ། །ཞེས་པ་ནི་རྣམ་པ་སྣ་ཚོགས་པའི་ལུང་གིས་ཉེ་བར་མཚོན་པའི་སེམས་ཞེས་བྱ་བའི་ཐ་ཚིག་གོ། །དེ་ལ་སེམས་ནི་གཅིག་ཡིན་ཏེ་ཉན་ཐོས་ལ་སོགས་པའི་རིགས་སྣ་ཚོགས་པའི་

གདུལ་བྱའི་དབང་གིས་ངོ་བོ་ཐ་དད་པར་སྣང་སྟེ། ངོ་བོ་སྣང་བ་ཐམས་ཅད་སེམས་ཀྱི་མེ་ལོང་ལ་གཟུགས་བརྙན་དུ་སྣང་སྟེ། ཤེལ་གྱི་ནོར་བུ་ལ་སྔོན་པོ་ལ་སོགས་པ་བཞིན་ནོ། །ལྷ་རྣམས་ལ་ནི་དམིགས་པའི་ཕྱིར། །སེམས་ཅན་མོས་པ་སྣ་ཚོགས་པ། །སེམས་རྡོ་རྗེ་ལས་རྣམ་གྲོལ་
བའི། །ལྷ་གཞན་གྲུབ་པ་མ་ཡིན་ནོ། །སེམས་ཀྱི་བྱང་ཆུབ་རྙེད་བྱ་བ། །སེམས་ཀྱིས་འགྲོ་བ་ལྔར་འགྲོ་བ། །སེམས་ལས་མ་གཏོགས་ཁ་ཅིག་ནི། །བདེ་དང་སྡུག་བསྔལ་མཚན་ཉིད་མེད། །ཅེས་འབྱུང་ངོ་། །ཀུན་རྫོབ་ནི་བཏགས་པའི་ཚུལ་དུ་སོ་སོར་སྣང་བ་སྟེ་དངོས་པོའི་ཚོགས་སོ། །དོན་
དམ་པ་ནི་དངོས་པོ་ཐམས་ཅད་ཀྱི་ཆོས་ཉིད་ཀྱི་མཚན་ཉིད་དེ་སྟོང་པ་ཉིད་དོ། །རྣམ་པར་རྟོག་པ་གཞན་མེད་པ། །རྣམ་པར་རྟོག་པ་ཀུན་རྫོབ་བཤད། །རྣམ་པར་རྟོག་པ་ལྡོག་པ་ཡིན། །དོན་དམ་པ་ནི་དེ་ཉིད་ཡིན། །ཞེས་བཤད་དོ། །ཀུན་རྫོབ་དང་ནི་དོན་དམ་པ་དེ་དག་ཕན་ཚུན་མེད་པར་མི་འབྱུང་
བས་འཇུག་པ་ཡིན་ཏེ། །འཕགས་པ་བརྒྱད་སྟོང་པའི་ཤེས་རབ་ཀྱི་ཕ་རོལ་དུ་ཕྱིན་མ་ལས། ཇི་སྐད་དུ། རབ་འབྱོར་གཟུགས་ནི་རང་བཞིན་གྱིས་སྟོང་པ་ཉིད་དང་། གཟུགས་ཀྱང་སྟོང་པ་ཉིད་དང་། །སྟོང་པ་ཉིད་ཀྱང་གཟུགས་སོ། །གཟུགས་ལས་སྟོང་པ་ཉིད་ཐ་དད་པ་མ་ཡིན། སྟོང་པ་ཉིད་
ལས་ཀྱང་གཟུགས་ཐ་དད་པ་མ་ཡིན་ཏེ། །གཉིས་སུ་མེད་པ་རྣམ་པ་གཉིས་མེད་པ་བཅད་དུ་མེད་པ་ཞེས་འབྱུང་ངོ་། །ཀླུ་སྒྲུབ་ཀྱི་ཞལ་སྔ་ནས་ཀྱིས་ཀྱང་། །མེད་པར་མི་འབྱུང་ངེས་པ་ནི། །བྱས་དང་མི་རྟག་པ་བཞིན་ནོ། །ཞེས་འབྱུང་ངོ་། །ཀུན་རྫོབ་དང་དོན་དམ་པ་དེ་དག་སེམས་གང་ལ་དབྱེར་མེད་པར་
སྣང་བ་དེ་གཉིས་པ་སྟེ། གཉིས་སུ་མེད་པའི་ཡེ་ཤེས་ཀྱི་ངོ་བོས་མཛེས་པ་ཞེས་བསྟན་ཏེ། རྣམ་པར་རྟོག་པ་གཉིས་ཀྱི་དྲི་མ་དང་བྲལ་བའི་ཕྱིར་རོ། །ཡང་ན་ཀུན་རྫོབ་ནི་ཡེ་ཤེས་ཀྱི་སྐུ་སྟེ། བདག་ལ་བྱིན་གྱིས་བརླབ་པའི་རིམ་པས་སོ། །དོན་དམ་པ་ནི་འོད་གསལ་བ་སྟེ། །མངོན་པར་བྱང་ཆུབ་ཀྱི་རིམ་
པས་སོ། །དེ་དག་གཉིས་སུ་མེད་པའི་ཟུང་དུ་འཇུག་པའི་རིམ་པས་ཐོབ་པར་བྱ་བའི་རྡོ་རྗེའི་སྐུ་སྟེ། མི་གནས་པའི་མྱ་ངན་ལས་འདས་པའི་དབྱིངས་ཀྱི་རང་བཞིན་ནོ། །དེ་ཉིད་མཛེས་པ་ནི་བསྐལ་པའམ་བསྐལ་པ་སྟོང་གི་བར་དུ་སེམས་ཅན་གྱི་དོན་མཛད་པ་ལ་བརྩོན་པས་སོ། །ཤེས་རབ་འདི་ནི་ཐིག་

ཡིན་ཏེ། །ཞེས་པ་ནི་ཆོས་ཐམས་ཅད་སྟོང་པ་ཉིད་ཀྱི་རང་བཞིན་སོ་སོར་རྟོག་པར་བྱེད་པའི་བདག་ཉིད་ཅན་གྱི་བློ་ནི་ཤེས་རབ་བོ། །དེ་ཉིད་ཐིག་བཏབ་པ་ཡིན་ཏེ་ཁམས་གསུམ་པ་སེམས་ཅན་དང་སྣོད་ཀྱི་འཇིག་རྟེན་གཉིས་སོ། །དེའི་རང་བཞིན་གྱིས་མཚོན་པས་སོ། །ཆད་པའི་ཕྱོགས་སྤང་བར་བྱ་བའི་
དོན་དུ་ཐབས་ནི་དེའི་རྗེས་སུ་འཇུག་པ་ཞེས་སྨོས་ཏེ། འགྲོ་བ་མ་ལུས་པའི་དོན་བྱེད་པའི་སྙིང་རྗེ་ཆེན་པོ་ནི་ཐབས་སོ། །དེ་ལ་རྗེས་སུ་འཇུག་པ་ནི་ལྡང་བའོ། །ཤེས་རབ་ཅེས་བྱ་བ་ནི་ཐིག་གདབ་པ་ཡིན་ཏེ། ཤེས་རབ་དང་སྙིང་རྗེ་དག་གིས་སེམས་ཅན་གྱི་དོན་འགྲུབ་པའི་ཕྱིར་རོ། །ཆོས་དང་ལོངས་
སྤྱོད་རྫོགས་པ་ཞེས་པ་ནི་སྐུ་གཉིས་ཀྱི་རང་བཞིན་གྱི་དཀྱིལ་འཁོར་ཏེ་ཐུགས་ཀྱི་དཀྱིལ་འཁོར་རོ། །དེ་ལ་ཟག་པ་མེད་པ་ཤེས་རབ་ཀྱི་ཕ་རོལ་དུ་ཕྱིན་པའི་རང་བཞིན་ནི་སངས་རྒྱས་རྣམས་ཀྱི་ཆོས་ཀྱི་སྐུ་ཉིད་དོ། །དེ་ཉིད་སེམས་ཅན་རྣམས་ཀྱི་དོན་མཛད་པའི་ཕྱིར་མཚན་དང་དཔེ་བྱད་ཀྱིས་མཛེས་
པ་ནི་ལོངས་སྤྱོད་རྫོགས་པའི་སྐུའོ། །ཤེས་རབ་ཐབས་ཀྱི་ཐིག་གཅིག་གིས། །ཞེས་པ་ནི་སྟོང་པ་ཉིད་དང་སྙིང་རྗེ་གཙོར་གྱུར་པའི་སེམས་ཀྱི་རྒྱུད་ཀྱིས་སོ། །ཐུགས་ཀྱི་དཀྱིལ་འཁོར་ཐིག་གདབ་བྱ། །ཞེས་པ་ནི་དེའི་བག་ཆགས་དང་ལྡན་པའི་སེམས་ཀྱི་རྒྱུད་བྱ་བ་གང་ཡིན་པ་དེ་ནི་ཐིག་
བཏབ་པ་ཞེས་བྱའོ། །རྟེན་འབྲེལ་ཡན་ལག་བཅུ་གཉིས་པ། །ཞེས་པ་ནི་འདི་ལྟ་སྟེ། མ་རིག་པ་དང་། འདུ་བྱེད་དང་། རྣམ་པར་ཤེས་པ་དང་། མིང་དང་གཟུགས་དང་། སྐྱེ་མཆེད་དྲུག་དང་། རེག་པ་དང་། ཚོར་བ་དང་། སྲེད་པ་དང་། ལེན་པ་དང་། སྲིད་པ་དང་། སྐྱེ་བ་དང་། རྒ་བ་དང་། ཤི་བའོ། །དེ་རྣམས་
ལས་དང་པོ་དང་བརྒྱད་པ་དང་དགུ་པ་ནི་ཉོན་མོངས་པའོ། །གཉིས་པ་དང་བཅུ་པ་ནི་ལས་སོ། །ལྷག་མ་བདུན་ནི་སྡུག་བསྔལ་ལོ། །གསུམ་པོ་དེ་དག་གིས་བསྡུས་པའི་ཡན་ལག་བཅུ་གཉིས་ཀྱིས་འགྲོ་བ་འདི་ཉིད་ཡོངས་སུ་འཁོར་ཏེ་འཁྲུལ་འཁོར་བཞིན་ནོ། །དེ་ལ་དབང་ཕྱུག་ལ་སོགས་
པ་བྱེད་པ་པོ་ཁ་ཅིག་ཡོད་པ་མ་ཡིན་ཏེ། གང་གིས་འདི་སྤྲུལ་པར་བྱ་བ་ཡིན། ཡན་ལག་བཅུ་གཉིས་པ་རྟེན་ཅིང་འབྲེལ་པར་འབྱུང་བའི་རང་བཞིན་གྱི་སྲིད་པ་འཁོར་ལོ་འདི་མཐོང་བ་དང་། བསྒོམ་པའི་ལམ་གང་གིས་སྦྱང་བར་བྱ་བ་དེ་ནི་སེམས་ཉིད་ཁྲུ་བཅུ་གཉིས་པའི་དཀྱིལ་འཁོར་ཞེས་

བྱའོ། །བདེན་པ་ནི་བཞི་སྟེ། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་མོ། །དེ་ལ་འཕགས་པ་རྣམས་ཀྱི་བདེན་པ་གཉིས་དང་། འཕགས་པ་རང་གི་བདེན་པ་གཉིས་སོ། །དེ་ལ་སྡུག་བསྔལ་ནི་ཉེ་བར་ལེན་པའི་ཕུང་པོ་ལྔ་སྟེ་འབྲས་བུའོ། །ཀུན་འབྱུང་ནི་མ་
རིག་པ་དང་སྲིད་པ་སྟེ་རྒྱུའོ། །འགོག་པ་ནི་ཉོན་མོངས་པ་དང་བྲལ་བའི་མཚན་ཉིད་དོ། །ལམ་ནི་རྣམ་པ་ལྔ་སྟེ། འཇིག་རྟེན་པ་དང་འཇིག་རྟེན་ལས་འདས་པའི་དབྱེ་བས་སོ། །དེ་རྣམ་པར་དག་པར་བྱེད་པ་སེམས་ཉིད་ནི་བཞི་ཞེས་བྱ་བའི་དོན་ཏོ། །ཚངས་པའི་གནས་བཞི་ཞེས་པ་ནི་བྱམས་པ་དང་སྙིང་
རྗེ་དང་དགའ་བ་དང་བཏང་སྙོམས་སོ། །དེ་ལ་སེམས་ཅན་ཐམས་ཅད་བདེ་བ་དང་ལྡན་པར་གྱུར་ཅིག་ཅེས་བསམ་པ་གང་ཡིན་པ་དེ་ནི་བྱམས་པ་སྟེ། རྣམ་པར་སྡང་བ་དང་ཁྲོ་བ་ལ་སོགས་པ་ལྡོག་པར་བྱེད་པའི་ལས་ཅན་ནོ། །སྡུག་བསྔལ་དང་ལྡན་པའི་སེམས་ཅན་རྣམས་སྡུག་བསྔལ་དང་
བྲལ་བར་གྱུར་ཅིག་ཅེས་བསམ་པ་ནི་སྙིང་རྗེའོ། །བསོད་ནམས་ཅན་གྱི་སེམས་ཅན་རྣམས་ཀྱི་དགེ་བ་ལ་རྗེས་སུ་ཡི་རང་བའི་བསམ་པ་གང་ཡིན་པ་དེ་ནི་དགའ་བའོ། །བསོད་ནམས་མེད་པའི་སེམས་ཅན་རྣམས་ལ་ཁོང་ཁྲོ་བ་དང་རྗེས་སུ་ཆགས་པ་དང་བྲལ་བའི་བསམ་པ་གང་ཡིན་པ་དེ་ནི་བཏང་
སྙོམས་སོ། །དེ་རྣམ་པར་དག་པའི་རྣལ་འབྱོར་པའི་སེམས་ཉིད་གྲྭ་བཞི་ཡིན་ཞེས་བྱ་བའི་དོན་ཏོ། །ཇི་སྐད་དུ་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་དང་བདེ་བ་དང་སྡུག་བསྔལ་བ་དང་བསོད་ནམས་དང་བསོད་ནམས་མེད་པའི་ཡུལ་ཅན་བསྒོམ་པས་སེམས་དག་པར་འགྱུར་རོ་ཞེས་འབྱུང་
བ་དང་། དེ་བཞིན་དུ། བསམ་གཏན་ཚད་མེད་གཟུགས་མེད་པས། །ཚངས་པ་ལ་སོགས་བདེ་ཐོབ་འགྱུར། །ཞེས་འབྱུང་ངོ་། །བསྡུ་བའི་དངོས་པོ་གྲངས་ནི་བཞི་སྟེ། སྦྱིན་པ་དང་། ཚིག་སྙན་པ་དང་། དོན་སྤྱོད་པ་དང་། དོན་མཐུན་པའོ། །ཡན་ལག་བཞི་པོ་དེ་དག་གི་རྣལ་འབྱོར་པས་སེམས་ཅན་
རྣམས་བསྡུ་བར་འགྱུར་རོ། །ལོངས་སྤྱོད་འདོད་པ་ལ་ནི་སྦྱིན་པས་བསྡུས་སོ། །ང་རྒྱལ་དང་ལྡན་པ་དང་ཞེ་སྡང་དང་བཅས་པ་ལ་ནི་ཚིག་སྙན་པས་སོ། །གཏི་མུག་དང་ལྡན་པ་ལ་ནི་དོན་སྤྱོད་པས་སོ། །དེ་དག་ཐམས་ཅད་ལ་ནི་དོན་མཐུན་པས་སོ། །རྣམ་པར་དག་པ་དེ་ཉིད་ཀྱིས་རྣལ་འབྱོར་པའི་

སེམས་ཉིད་ནི་སྒོ་བཞི་ཡིན་ཏེ། གང་གི་ཕྱིར་སྒོ་ནས་ཇི་ལྟར་སྲོག་ཆགས་རྣམས་ཁང་པ་ལ་སོགས་པ་ལ་འཇུག་པ་དེ་བཞིན་དུ་བསྡུ་བའི་དངོས་པོའི་སྒོ་ནས་ཐར་པའི་གྲོང་ཁྱེར་ལ་སེམས་ཅན་རྣམས་འཇུག་པ་ལ་འཇུག་གོ། །རེ་རེ་ནི་བསྡུ་བའི་དངོས་པོ་རེ་རེའི་གྲངས་ཀྱིས་བཞིའི་མིང་ཅན་ནི་སྒོ་བཞི་པོའི་
མིང་གི་ཐ་སྙད་དུ་བྱའོ། །ཆོས་ནི་ཀུན་རྫོབ་ཀྱི་བདེན་པའོ། །དེ་ཉིད་དོན་ནི་དོན་དམ་པའི་བདེན་པའོ། །དེ་དག་དབྱེར་མེད་པ་སྟེ་ཟུང་དུ་འཇུག་པའི་ཏིང་ངེ་འཛིན་གྱི་སྒོ་ནས་བརྡ་སྟེ་མིང་ཅན་ནོ། །འཁོར་ལོའི་ནང་གི་དཀྱིལ་འཁོར་རོ་ཞེས་པ་ནི་སྙིང་པོའི་དཀྱིལ་འཁོར་ཞེས་པ་སྟེ་ཀུན་རྫོབ་དང་དོན་དམ་པ་དབྱེར་མེད་པའི་ངོ་བོ་རྡོ་རྗེ་འཆང་ཆེན་པོའི་
དེ་ཁོ་ན་ཉིད་ནི་ནང་གི་དཀྱིལ་འཁོར་གྱི་རྣམ་པ་སོ་སོར་སྣང་བ་སྟེ་སེམས་ཉིད་ཅེས་བྱ་བའི་དོན་ཏོ། །མི་བྱེད་ཡེ་ཤེས་མཚན་མ་སྟེ། །ཞེས་པ་ནི་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་ནོ། །རྡོ་རྗེ་ཨིནྡྲ་ནཱི་ལ་རྒྱ། །ཞེས་པ་ལ་དབུས་སུ་མི་བསྐྱོད་པའི་ཕྱག་རྒྱ་གང་ཡིན་པ་དེ་ནི་སེམས་ཉིད་དོ་ཞེས་བྱ་བའི་དོན་ཏེ། །
མི་ཕྱེད་པའི་རང་བཞིན་ཡེ་ཤེས་དེ་ཉིད་སེམས་ཏེ་དེའི་རྣམ་པ་ལྔ་ཉིད་དུ་བསྟན་པར་བྱ་བའི་ཕྱིར། རྣམ་པ་ལྔ་ཡི་དབྱེ་བར་བཤད། །ཅེས་སྨོས་ཏེ་སེམས་ཉིད་གང་ཡིན་པ་དེ་ཉིད་མེ་ལོང་ལྟ་བུ་ལ་སོགས་པའི་ཡེ་ཤེས་ལྔའི་རང་བཞིན་ཏེ་དྲི་མ་རྣམས་གློ་བུར་བ་ཡིན་པའི་ཕྱིར་རོ། །ཆུ་ཁམས་གསེར་དང་ནམ་
མཁའ་ནི། །དག་པ་བཞིན་དུ་དག་པར་འདོད། །ཅེས་འབྱུང་ངོ་། །ཡེ་ཤེས་ལྔ་ནི་ཀུན་གཞི་ལ་སོགས་པ་རྣམ་པར་ཤེས་པ་ལྔའི་གཉེན་པོའི་ཕྱོགས་ཡིན་པས་རྩེ་མོ་འཁོར་བ་འཇིགས་བྱེད་པའོ། །ཡང་དག་མ་ཡིན་ཀུན་རྟོག་ནི། །སེམས་དང་སེམས་བྱུང་ཁམས་གསུམ་པའོ། །ཞེས་འབྱུང་ངོ་། །
རྒྱུད་ཕྱི་མ་ལས་ཀྱང་། །སྤང་བྱ་ལྔ་དང་རིག་པ་ལྔ། །རྡོ་རྗེ་ཞེས་ནི་བཤད་པ་ཡིན། །ཞེས་འབྱུང་ངོ་། །ཤར་ནས་ཞེས་བྱ་ལ་སོགས་པས་རྣམ་པར་སྣང་མཛད་ཀྱི་མཚན་མ་འབར་བ་དང་བཅས་པའི་འཁོར་ལོ་གང་ཡིན་པ་དེ་ནི་མེ་ལོང་ལྟ་བུའི་ཡེ་ཤེས་ཀྱི་རང་བཞིན་དུ་ཤེས་པར་བྱ་སྟེ། དེ་བས་ན་རྣལ་
འབྱོར་པའི་སེམས་ལ་བསྒོམ་པའི་དུས་སུ་ས་དང་པོར་མཐོང་བའི་ལམ་གྱི་མེ་ལོང་ལྟ་བུའི་ཡེ་ཤེས་འབྱུང་བར་འགྱུར་རོ། །དེ་བས་ན་ཕྱི་རོལ་དུ་ཡང་ཤར་ཕྱོགས་སུ་དེ་ཉིད་རྣམ་པར་དགོད་པར་བྱའོ། །དེ་བཞིན་དུ་ལྷོ་རུ་ཞེས་བྱ་བ་ལ་སོགས་པས་ལྷོ་ཕྱོགས་སུ་ཡིད་བཞིན་ནོར་བུ་རིན་ཆེན་གང་

ཡིན་པ་དེ་ནི་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་ཏེ་སེམས་ཉིད་དུ་རྟོགས་པར་བྱའོ། །བསྒོམ་པའི་ལམ་གྱི་ས་གཉིས་པ་དང་གསུམ་པ་དང་བཞི་པ་ལ་དེ་ཉིད་ཁམས་གསུམ་པ་དང་དབྱེར་མེད་པའི་སྣང་བས་སོ། །དེ་བས་ན་རིན་ཐང་མེད་པ་དང་། དཀོན་པས་ན་དེ་ཉིད་རིན་པོ་ཆེ་
ཞེས་བྱའོ། །ནུབ་ཏུ་ཞེས་བྱ་བ་ལ་སོགས་པས་ནུབ་ཀྱི་ཕྱོགས་སུ་ངག་གི་དབང་ཕྱུག་གི་མཚན་མ་པདྨ་གང་ཡིན་པ་དེ་ནི་ཀུན་དུ་སོ་སོར་རྟོག་པའི་ཡེ་ཤེས་ཀྱི་རང་བཞིན་གྱི་སེམས་ཉིད་དུ་ཤེས་པར་བྱ་བ་སྟེ། ས་ལྔ་པ་དང་དྲུག་པ་དང་བདུན་པ་ལ་ཁམས་གསུམ་ཡང་དག་པར་སོ་སོར་རྟོག་པའི་
བདག་ཉིད་དུ་སྐྱེས་པའི་ཕྱིར་རོ། །བྱང་དུ་ཞེས་བྱ་བ་ལ་སོགས་པས་བྱང་ཕྱོགས་སུ་རལ་གྲི་གང་ཡིན་པ་དེ་ནི་ཁམས་གསུམ་གྱི་ཡུལ་གྱི་རྣམ་པར་རྟོག་པ་གཅོད་པར་བྱེད་པས་ན་བྱ་བ་ནན་ཏན་གྲུབ་པའི་རང་བཞིན་གྱི་སེམས་ཉིད་དུ་ཤེས་པར་བྱ་སྟེ། ས་བརྒྱད་པ་དང་དགུ་པ་དང་། །བཅུ་པ་ལ་ཀུན་གཞི་
གནས་སུ་གྱུར་པ་དང་། ལས་ཀྱི་དབང་དང་ཡེ་ཤེས་ཀྱི་དབང་གིས་རང་བཞིན་དེ་སྐྱེས་པའི་ཕྱིར་རོ། །རྣམ་པར་མི་རྟོག་པའི་ཏིང་ངེ་འཛིན་ལ་ཞུགས་པའི་སངས་རྒྱས་བཅོམ་ལྡན་འདས་རྣམས་ཀྱི་སེམས་ཅན་གྱི་དོན་མཛད་ཀྱང་། སེམས་ཅན་རྣམས་ནི་མི་དམིགས་ཏེ། །སྐྱེས་བུ་ཡིད་
བཞིན་ནོར་བུ་བཞིན། །དེ་ཡི་ཕྲད་པ་ཙམ་གྱིས་ནི། །རྩིག་པ་ལ་སོགས་རྣམས་ལས་ཀྱང་། །ཇི་བཞིན་བསྟན་པ་རྣམས་འབྱུང་ངོ་། །ཞེས་འབྱུང་ངོ་། །ཤར་ལྷོ་ཞེས་བྱ་བ་ལ་སོགས་པ་ལ་མེའི་མཚམས་སུ་སངས་རྒྱས་སྤྱན་མའི་མཚན་མ་མིག་གང་ཡིན་པ་དེ་ནི་དགའ་བ་དང་སྦྱོར་བའི་འདོད་
པ་མཐོང་བའི་རང་བཞིན་ཚངས་པའི་གནས་བྱམས་པ་ཞེས་བྱ་བའི་ངོ་བོ་རང་གི་སེམས་ཉིད་དུ་ཤེས་པར་བྱའོ། །ལྷོ་ནུབ་ཅེས་བྱ་བ་ལ་སོགས་པ་ནི་བདེན་བྲལ་གྱི་མཚམས་སུ་མཱ་མ་ཀཱིའི་མཚན་མ་རྡོ་རྗེ་གང་ཡིན་པ་དེ་ནི་སྡུག་བསྔལ་བ་དང་བྲལ་བར་འདོད་པའི་མཚན་ཉིད་ཚངས་པའི་གནས་སྙིང་རྗེ་ཞེས་
བྱ་བའི་རང་བཞིན་རྣལ་འབྱོར་པའི་སེམས་ཉིད་དུ་ཤེས་པར་བྱ་སྟེ། སྡུག་བསྔལ་གྱི་ངོ་བོ་རྣམས་གཞོམ་པའི་ཕྱིར་རོ། །ནུབ་བྱང་ཞེས་བྱ་བ་ལ་སོགས་པ་ནི་རླུང་གི་མཚམས་སུ་གོས་དཀར་མོའི་མཚན་མ་པདྨ་གང་ཡིན་པ་དེ་ནི་སེམས་ཅན་ཐམས་ཅད་ཀྱི་དགེ་བའི་སྤྱོད་པ་རྗེས་སུ་ཡི་རང་བའི་མཚན་ཉིད་

ཚངས་པའི་གནས་དགའ་བ་ཞེས་བྱ་བའི་ངོ་བོ་སེམས་ཉིད་དུ་ཤེས་པར་བྱ་སྟེ། པདྨ་ཁ་ཕྱེ་བ་ནི་དགའ་བ་དང་ལྡན་པའི་བདེ་བ་རྒྱས་པར་འགྱུར་བའི་ཕྱིར་རོ། །བྱང་ཤར་ཞེས་བྱ་བ་ལ་སོགས་པ་ནི་དབང་ལྡན་གྱི་མཚམས་སུ་བཅོམ་ལྡན་འདས་མ་སྒྲོལ་མའི་མཚན་མ་ཨུཏྤལ་སྔོན་པོ་གང་ཡིན་པ་དེ་ནི་དགེ་བ་དང་མི་
དགེ་བའི་དྲི་མ་གཉིས་དང་བྲལ་བ་བཏང་སྙོམས་ཀྱི་ངོ་བོའི་སེམས་ཉིད་དེ། ཨུཏྤ་ལ་བཞིན་དུ་འདམ་ལས་བྱུང་ན་ཡང་དེའི་སྐྱོན་གྱིས་མི་གོས་པའི་ཕྱིར་རོ། །དེ་བཞིན་དུ་སྦྱིན་པ་ལ་སོགས་པ་བསྡུ་བའི་དངོས་པོ་བཞི་དོན་དང་ལྡན་པའི་མིང་ཅན་སྔར་བཤད་པ་གང་ཡིན་པ་དེ་དག་ཤར་ལ་སོགས་པའི་སྒོ་
བཞི་ལ་གནས་པ་འཕགས་པ་གཤིན་རྗེ་མཐར་བྱེད་ལ་སོགས་པ་ཁྲོ་བོའི་རྒྱལ་པོ་བཞིའི་མཚན་མ་ཐོ་བ་ལ་སོགས་པ་བཞིའི་རང་བཞིན་གྱི་སེམས་ཉིད་དུ་ཤེས་པར་བྱའོ། །དེ་ཉིད་བསྟན་པར་བྱ་བའི་ཕྱིར། དེ་བཞིན་ཤར་སྒོར་ཞེས་བྱ་བ་ལ་སོགས་པས་བསྟན་ཏོ། །ཕྱག་རྒྱ་དགོད་པའི་མཚན་ཉིད་ནི་ཕྱི་རོལ་
གྱི་མཚན་མའི་ཕྱག་རྒྱ་དགོད་པའི་དེ་ཁོ་ན་ཉིད་ཅེས་བྱ་བའི་དོན་ཏོ། །ལེགས་པར་ཞེས་བྱ་བ་ལ་སོགས་པས་དཀྱིལ་འཁོར་གྱི་དེ་ཁོ་ན་ཉིད་ཉེ་བར་སྡུད་པར་བསྟན་ཏོ། །ལེགས་པར་བཤད་པ་ནི་ཇི་ལྟ་བ་བཞིན་དུ་གསལ་བར་བཤད་པའོ། །ཇི་ལྟ་བའི་དབྱིབས་ཀྱིས་མཆོད་པ་ཞེས་པ་ནི་དེ་དང་
འདྲ་བའི་རང་གི་སེམས་ཉིད་དོ། །རྣམ་གསུམ་བསྒོམས་པས་གྱུར་པ་ཡིན། །ཞེས་པ་ནི་སྣང་བ་ལ་སོགས་པའི་ཡེ་ཤེས་གསུམ་གྱི་མཆོད་པས་མཆོད་པར་བྱེད་དེ་འོད་གསལ་བ་ལ་འཇུག་གོ། །དེ་ཉིད་རྣམ་པ་གསུམ་གྱི་མཆོད་པ་ཡིན་ཏེ། །མཆོད་པའི་འབྲས་བུ་ཡིན་པས་སོ། །དང་པོར་
ཆེན་པོ་ཞེས་པ་ནི་མཆོད་པའི་ཁྱད་པར་རོ། །དེས་ན་སེམས་རྣམ་པར་དག་པའི་མཚན་ཉིད་ཀྱི་མཆོད་པ་ནི་མཆོད་པ་ཆེན་པོ་ཞེས་བྱའོ། །དེ་ཡི་བརྟུལ་ཞུགས་མི་བཤད་དེ། །བགྲང་ཕྲེང་མ་ཡིན་བཟླས་པ་མིན། །འཛིན་པ་དང་ནི་སྦྱིན་སྲེག་ལས། །གཞན་དག་ཀྱང་ནི་འཇུག་པ་མིན། །ཞེས་འབྱུང་
ངོ་། །ཕྱག་རྒྱའི་དཀྱིལ་འཁོར་ཡིན་པར་བཤད། །ཅེས་བྱ་བ་ལས། ཕྱག་རྒྱ་ནི་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་ཏེ་ཆོས་ཉིད་ཅེས་བྱའོ། །དེ་ཉིད་སྙིང་པོའི་དོན་ལེན་པས་ན་དཀྱིལ་འཁོར་ཞེས་བཤད་དོ། །ནང་ལ་སོགས་པའི་དབྱེ་བ་ཡིན། །ཞེས་པ་ནི་སྣང་བ་དང་སྣང་བ་མཆེད་བ་དང་

སྣང་བ་ཉེ་བར་ཐོབ་པ་དང་ཞི་བ་དང་སྟོང་པ་དང་ཤིན་དུ་སྟོང་པ་དང་ཆེན་པོ་སྟོང་པ་དང་ཐམས་ཅད་སྟོང་པ་དང་ཤེས་རབ་དང་ཐབས་དང་མ་རིག་པ་དང་འོད་གསལ་བ་དང་། ཉིན་མོ་དང་མཚན་མོ་དང་དུས་མཚམས་དང་དེ་དང་ལྡན་པའི་མཚན་ཉིད་དེ་སྐད་ཅིག་མ་བཅུ་དྲུག་གོ། །སྟོང་པ་
ཉིད་བཅུ་དྲུག་ཅེས་ཟེར་རོ། །དེའི་གྲངས་ཀྱིས་ལོ་བཅུ་དྲུག་ལོན་པའི་སེམས་ཉིད་དེ་ཤེས་རབ་བསྟན་ཏོ། །མ་སྐྱེས་པ་ཡི་ཞི་བ་གང་། །ཞེས་པ་ནི་གཟོད་མ་ནས་མ་སྐྱེས་པའི་དེ་ཁོ་ན་ཉིད་ནི་ཆོས་ཉིད་དོ། །སྤྲོས་པ་ཐམས་ཅད་དང་བྲལ་བས་ན་ཞི་བའོ། །རྐྱེན་གཞན་མེད་པ་ཞི་བ་ནི། །སྤྲོས་པ་རྣམས་ཀྱིས་མ་སྤྲོས་པ། །ཐ་དད་
མ་ཡིན་དུ་མ་མིན། །དེ་ནི་དེ་ཉིད་མཚན་ཉིད་དོ། །ཞེས་སོ། །བུད་མེད་ཅེས་པ་ནི། ཤེས་རབ་ཀྱི་ཕ་རོལ་དུ་ཕྱིན་པ་ཞེས་བཤད་དོ། །ཞི་བའི་ཆོས་དང་རྗེས་ལྡན་པ། །ཞེས་པ་ནི་འོད་གསལ་བ་ལ་འཇུག་པའི་སེམས་ཙམ་དེ་ཉིད་ཀྱི་ཞི་བའི་ཆོས་དང་རྗེས་སུ་འགྲོ་བའི་ཡོན་ཏན་གང་ཡིན་པ་དེ་ནི་མདངས་
བཟང་འོད་ཡིན་པར་བཤད་དོ། །རྟེན་འབྲེལ་བག་ཆགས་དྲི་ཡིན་ཏེ། །ཞེས་པ་ནི། ཤེས་རབ་ཀྱི་ཕ་རོལ་དུ་ཕྱིན་པ་དེ་ཉིད་རྟེན་ཅིང་འབྲེལ་པ་བཅོམ་པའི་མཚན་ཉིད་ཀྱི་བག་ཆགས་ཏེ་རང་རིག་པའི་ཆོས་གང་ཡིན་པ་དེ་ནི་སེམས་ཀྱི་རྒྱུད་དགའ་བར་བྱེད་པས་ན་དྲི་ཞེས་བྱའོ། །ཉོན་མོངས་པ་
ལས་རྣམ་གྲོལ་བའི། །སྣང་བ་གསུམ་དང་བྲལ་བའོ། །ཞེས་འབྱུང་བས་སོ། །ཡེ་ཤེས་ཁ་ཕྱེ་མེ་ཏོག་གོ། །ཞེས་པ་ནི། དེ་ལྟར་གྱུར་པའི་འོད་གསལ་བའི་ཡེ་ཤེས་ལས་ཁ་ཕྱེ་བ་ནི་ཅིག་ཅར་རམ་སྣང་བ་ཉེ་བར་ཐོབ་པ་ལ་སོགས་པའི་རིམ་པས་ཡེ་ཤེས་ཏེ་སྐུ་བསྐྱེད་པ་གང་ཡིན་པ་དེ་ནི་འགྲོ་
བ་མ་ལུས་པའི་རེ་བ་ཡོངས་སུ་རྫོགས་པར་བྱེད་པས་དགའ་བ་བསྐྱེད་པས་ན་མེ་ཏོག་ཅེས་བྱའོ། །དེ་དང་འདྲ་བའི་དྲི་དང་མེ་ཏོག་དག་གིས་བརྒྱན་པའི་ཤེས་རབ་ཀྱི་ཕ་རོལ་ཏུ་ཕྱིན་པ་བུད་མེད་ཅེས་བྱའོ། །དངོས་པོ་མེད་པ་རིགས་ཡིན་ཏེ། །ཞེས་པ་ནི་དེ་ཉིད་ཀྱི་ཐམས་ཅད་མཁྱེན་པའི་ཡེ་ཤེས་
མི་ཟད་པ་ཐོག་མ་དང་ཐ་མ་མེད་པ་ཆོས་ཀྱི་དབྱིངས་ཀྱི་དེ་ཁོ་ན་ཉིད་རང་བཞིན་མེད་པའི་རིགས་ཞེས་བྱ་བ་སྟེ། ཆོས་ཐམས་ཅད་ནི་འོད་གསལ་བ་ལས་བྱུང་བའི་ཕྱིར་རོ། །ཇི་ལྟར་ཆུ་བོ་དང་བ་ལས། །ཉ་དག་མྱུར་བར་ལྡང་བ་ལྟར། །ཐམས་ཅད་སྟོང་པ་དང་བ་ལས། །སྒྱུ་འཕྲུལ་དྲ་བ་འབྱུང་བར་

འགྱུར། །ཞེས་འབྱུང་ངོ་། །དེ་བཞིན་དུ། འོད་གསལ་དག་པ་དེ་ཉིད་ལས། །ཡེ་ཤེས་གསུམ་ནི་ཡང་དག་འབྱུང་། །ཞེས་འབྱུང་ངོ་། །ཆོས་དབྱིངས་ཞེས་བྱ་བ་ལ་སོགས་པ་ནི། །སྔར་བཤད་པའི་མཚན་ཉིད་ཅན་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་འོད་གསལ་གྱི་རང་བཞིན་བུད་མེད་དེ། ས་བཅུ་གཉིས་
པ་ལ་ཤེས་རབ་མཉམ་པར་བྱ་བ་ནི་སྔགས་དང་ཕྱག་རྒྱའི་རིམ་པས་མཉེས་པར་བྱའོ། །དེ་ཉིད་ཀྱི་ཕྱིར་ཤེས་རབ་ནི་སྔགས་ཀྱི་མཚན་ཉིད་དང་ཕྱག་རྒྱའི་མཚན་ཉིད་དང་ལྡན་པའི་ཤེས་རབ་ཀྱིས་སོ། །སྒྱུ་མ་ཐམས་ཅད་རྣམས་ཀྱིས་ནི། །བུད་མེད་སྒྱུ་མ་ཁྱད་པར་འཕགས། །ཡེ་ཤེས་གསུམ་གྱི་དབྱེ་བ་ནི། །དེ་
ལས་གསལ་བར་མཚོན་པར་བྱེད། །ཅེས་འབྱུང་ངོ་། །སེམས་རྣམ་པར་དག་པའི་རིམ་པས་འོད་གསལ་བའི་རང་བཞིན་གྱི་ཤེས་རབ་མཱ་མ་ཀཱིའི་མིང་གིས་ཐ་སྙད་བྱ་བའི་ཕྱིར། ནང་ན་མ་ཡིན་ཕྱི་ན་མིན། །ཞེས་སྨོས་ཏེ། ནང་ནི་མིག་ལ་སོགས་པའི་སྐྱེ་མཆེད་རྣམས་སོ། །ཕྱི་ནི་གཟུགས་ལ་
སོགས་པའི་ཡུལ་རྣམས་སོ། །གཉིས་ཀ་ནི་སེམས་ཅན་གྱི་འཇིག་རྟེན་དང་སྣོད་ཀྱི་འཇིག་རྟེན་དག་གོ། །རྣམ་པར་རྟོག་པ་དེ་དག་གསུམ་སྤངས་པས་གནས་མེད་པའི་འོད་གསལ་བའོ། །དེ་ལ་གནས་པའི་རྣལ་འབྱོར་ནི་འཇུག་པའི་མཚན་ཉིད་ཀྱི་འབྲེལ་པ་གང་ཡིན་པ་དེ་ནི་མཱ་མ་ཀཱི་ཞེས་
བྱའོ། །མཱ་མའི་སྒྲས་ནི་དགག་པ་གཉིས་རྗོད་པར་བྱེད་པ་དང་། ཀཱིའི་སྒྲས་ཀྱང་ཕུར་བུས་གདབ་པ་བཞིན་དུ་དགག་པ་ཉིད་བསྟན་པའི་ཕྱིར་རོ། །དེའི་ངོ་བོ་ཉིད་གཅིག་པ་ཞེས་པ་ནི་འོད་གསལ་བའི་རང་བཞིན་ལྷན་ཅིག་སྐྱེས་པའི་དགའ་བའི་མཚན་ཉིད་ཀྱི་དེ་ཁོ་ན་ཉིད་དོ། །གཅིག་ནི་གཉིས་
སུ་མེད་པ་སྟེ་རྣལ་འབྱོར་ལ་འཇུག་པ་གང་ཡིན་པ་དེ་ནི་བྱིན་གྱིས་བརླབ་པ་ཞེས་བྱའོ། །ནམ་མཁའ་དང་ནི་གཅིག་ཏུ་གནས། །ཞེས་པ་དེ་ནི་ནམ་མཁའི་དབྱིངས་དང་འདྲ་བ་མི་གོས་པ་དེ་ཁོ་ན་ཉིད་དོ། །སྤྲོས་པ་མེད་པས་ནི་ཞི་བའོ། །སངས་རྒྱས་ཐམས་ཅད་སྐྱེད་པའི་རྒྱུར་གྱུར་པས་ན་སངས་རྒྱས་
ཀྱི་གནས་སོ། །འགྱུར་ནི་བསྒོམ་པར་བྱའོ། །གང་གཱའི་བྱེ་མ་དང་མཚུངས་པའི། །འདི་ཉིད་ལས་ནི་སངས་རྒྱས་འགྱུར། །ཞེས་འབྱུང་ངོ་། །དེ་བས་ན་འོད་གསལ་བའི་དེ་ཁོ་ན་ཉིད་ལ་འཇུག་པའི་ཕྱིར་རོ། །ཡུལ་དུ་རྣམ་བརྟགས་པ་ཞེས་པ་ནི་མིག་ལ་སོགས་པས་ལོངས་སྤྱོད་པ་གཟུགས་ལ་

ལ་སོགས་པ་བསྟན་ཏོ། །སྡུད་པ་དག་ནི་བཤད་པ་ཡིན། །ཞེས་པ་མིག་ལ་སོགས་པའི་དབང་པོ་ལ་འཇུག་པས་ན་དེ་ཁོ་ན་ཞེས་བྱའོ། །ཡེ་ཤེས་དབང་པོ་སྟོང་པ་གཅི། །ཞེས་པ་ནི་མིག་གི་རྣམ་པར་ཤེས་པ་ལ་སོགས་པ་དྲུག་དང་། དེ་བཞིན་དུ་མིག་ལ་སོགས་པའི་དབང་པོ་དྲུག་
གང་ཡིན་པ་དེ་རྣམས་ཀྱི་སྟོང་པ་ནི་འོད་གསལ་བའི་ཆོས་ཉིད་གཅི་བ་ཡིན་ཏེ་ཉོན་མོངས་པ་ཐམས་ཅད་ཟད་པར་བྱེད་པའི་ཕྱིར་རོ། །རྣམ་དག་ཆོས་ནི་ཞེས་པ་ནི་རང་བཞིན་བརྒྱ་དྲུག་ཅུའི་ཚོགས་སྤོང་བར་བྱེད་པའི་མཚན་ཉིད་དོ། །དེ་ཉིད་སྲིད་པ་ལ་འཁོར་བའི་མཚན་ཉིད་ཀྱི་མྱ་ངན་གཅོད་པས་ན་ཁུ་བ་ཞེས་
བྱའོ། །ཐམས་ཅད་མཁྱེན་པའི་ཡེ་ཤེས་ནི་འོད་གསལ་བ་ལ་རྟོགས་པའི་ཡེ་ཤེས་ཀྱི་མཚན་ཉིད་དོ། །སེམས་ཅན་གྱི་དོན་གྱི་བྱ་བ་ལ་རྗེས་སུ་ཆགས་པས་དེ་ཉིད་ཁྲག་ཅེས་བྱའོ། །གང་ཞིག་ཆོས་རྣམས་ཡོངས་བརྟགས་པ། །ཞེས་པ་ནི་ཕྱི་དང་ནང་གི་ཆོས་ཏེ་བདུད་རྩི་ལྔ་ལ་སོགས་པས་བརྡ་
རུ་བྱས་པས་དབང་པོ་ལ་སོགས་པའོ། །དེ་ཉིད་ལྷ་རྣམས་ཞེས་པ་ནི་ཆོས་ཉིད་ལ་འཇུག་པའི་ཕྱིར་རོ། །དངོས་པོ་མེད་པ་ནི་སེམས་རྣམ་པར་དག་པའི་མཚན་ཉིད་ཀྱི་སྟོང་པ་ཉིད་གང་ཡིན་པ་དེ་ལ་སྔར་བཤད་པའི་དེ་རྣམས་དབུལ་བ་ནི་འཇུག་པར་བྱའོ། །དེ་ནི་བདུད་རྩི་ལྔ་འབུལ་བ། །ཞེས་བཤད་དོ། །
དེ་བྱས་ཞེས་བྱ་བ་ལ་སོགས་པ་ནི་འདིར་སངས་རྒྱས་དང་རྒྱལ་སྲས་ནི་ཕུང་པོ་ལ་སོགས་པའོ། །ཁྱད་པར་དུ་ཞེས་པ་ནི་ཐེ་ཚོམ་མེད་པས་སོ། །མཉེས་པར་གྱུར་པ་ཞེས་པ་ནི་འོད་གསལ་བ་ཉིད་དུ་འགྱུར་རོ། །གང་ཡང་ཞེས་བྱ་བ་ལ་སོགས་པས་ཕྱིའི་དཀྱིལ་འཁོར་ལ་མངོན་པར་ཞེན་པའི་ལྟ་བ་
གང་ཡིན་པ་དེ་རྣམས་ཀྱིས་དེ་སྤང་བར་བྱ་བའི་ཕྱིར་དེ་ལྟར་སེམས་ཀྱི་ངོ་བོའི་མཚན་ཉིད་བསྟན་ཏེ། བཤད་པའི་རྒྱུད་ལས་བཅོམ་ལྡན་འདས་ཀྱིས་གསུངས་སོ་ཞེས་ཚིག་གི་ལྷག་མ་བསྟན་ཏོ། །དེ་ཉིད་བསྟན་པར་བྱ་བའི་ཕྱིར། །དེ་ལྟར་བྲི་བའི་དཀྱིལ་འཁོར་ལ་སོགས་པ་བསྟན་པས་ཞེས་
སྨོས་ཏེ། ཕྱིའི་དཀྱིལ་འཁོར་བྲི་བ་དང་མཆོད་པ་ལ་སོགས་པའི་རིམ་པས་སོ། །ཡོངས་སུ་དག་པའི་ལྷའི་ངོ་བོ་ཉིད་རབ་ཏུ་གནས་པ་ཡིན་ཏེ་ཞེས་པ་ནི་སེམས་རྣམ་པར་དག་པ་དང་བདག་ལ་བྱིན་གྱིས་བརླབ་པ་དག་གིས་ཐོབ་པར་བྱེད་པ་ཡིད་ཀྱི་རང་བཞིན་གྱི་སྐུ་བསྟན་ཏོ། །ངེས་པའི་དོན་ཏོ་ཞེས་

པ་ལ་སེམས་རྣམ་པར་དག་པ་དང་བདག་ལ་བྱིན་གྱིས་བརླབ་པའི་རིམ་པ་གཉིས་བསྟན་པའི་ཕྱིར་རོ། །ཐུགས་རྡོ་རྗེ་ཞེས་པ་ནི་ཐུགས་རྡོ་རྗེ་བདག་པོ་ཉིད་དུ་འཇུག་པ་འདྲི་བའི་དཀྱིལ་འཁོར་ཞེས་བྱ་བའི་ཐ་ཚིག་གོ། །དཀྱིལ་ནི་སྙིང་པོ་སྟེ་ཞེས་པ་ནི་རྟོག་པ་དང་བཅས་པའི་རྡུལ་ཚོན་ལ་སོགས་པ་
ཉིད་དུ་སྣང་བའོ། །ཀུན་རྫོབ་ཀྱི་བདེན་པའོ་ཞེས་པ་ནི་གཞིའི་དཀྱིལ་འཁོར་ཞེས་པའི་དོན་ཏོ། །དེ་ལེན་ཅིང་འཛིན་པས་ན་དཀྱིལ་འཁོར་ཏེ་ཞེས་པ་ནི་བྱིན་གྱིས་རློབ་པར་བྱེད་པ་གང་ཡིན་པ་དེ་ནི་ལྷའི་འཁོར་ལོའི་བདག་ཉིད་ཀྱི་རྟེན་པའི་དཀྱིལ་འཁོར་ཞེས་བྱ་བའི་དོན་ཏོ། །དྲང་བའི་དོན་ཏོ་ཞེས་པ་ནི་
རྟེན་དང་བརྟེན་པའི་རང་བཞིན་གྱི་དཀྱིལ་འཁོར་སོ་སོར་བསྟན་པས་སོ། །དཀྱིལ་འཁོར་ནི་སྙིང་པོ་དེ་དོན་དམ་པའི་བདེན་པའོ་ཞེས་པ་ནི་སེམས་རྣམ་པར་དག་པའི་རིམ་པ་ཐོབ་པར་བྱ་བའི་དེ་ཁོ་ན་ཉིད་བཞི་པའོ། །དེ་ལེན་ཅིང་འཛིན་པ་ན་དཀྱིལ་འཁོར་དེ་ཞེས་པ་ནི་དངོས་པོ་ཐམས་ཅད་ཀྱི་དེ་
ཁོ་ན་ཉིད་དུ་གྱུར་པའི་དོན་དམ་པའི་བདེན་པ་ལེན་པར་བྱེད་པ་ཏིང་ངེ་འཛིན་གྱིས་ཐོབ་པར་བྱེད་པའི་ཡེ་ཤེས་ཞེས་བྱ་བའི་དོན་ཏོ། །ལུང་གི་ཚད་མ་ཉིད་བསྟན་པར་བྱ་བའི་ཕྱིར། ཇི་སྐད་དུ་ཞེས་བྱ་བ་ལ་སོགས་པ་བསྟན་ཏོ། །བཤད་པའི་རྒྱུད་ཅེས་བྱ་བ་ནི་རྡོ་རྗེ་ཕྲེང་བ་ལས་སོ། །ཡན་ལག་ཀུན་བསྒོམ་
ལས་འདས་ཤིང་། །ཞེས་པ་ནི་དང་པོར་སྦྱོར་བ་དང་དཀྱིལ་འཁོར་རྒྱལ་བ་མཆོག་དང་ལས་ཀྱི་རྒྱལ་བ་མཆོག་སྟེ་བསྒོམ་པའི་ཡན་ལག་ཀུན་ནོ། །དེ་ལས་འདས་པ་ནི་དེ་དང་བྲལ་བ་ཞེས་བྱའོ། །རྟོག་པ་ནི་འཇུག་པ་དང་གནས་པ་དང་ལྡང་བའི་མཚན་ཉིད་ཀྱི་རླུང་གི་སྤྱོད་པའོ། །རྟོག་མིན་ནི་སྣང་
བ་གསུམ་དང་རང་བཞིན་རྣམ་པ་གསུམ་མོ། །དེ་དང་བྲལ་བ་རྣམ་པར་སྤངས་པ་ཞེས་པ་ནི་རང་བཞིན་སྣང་བ་རྣམ་པར་དག་པར་བྱེད་པའི་དེ་ཁོ་ན་ཉིད་ཀྱིས་དེ་རྣམས་སྤངས་པའོ། །གུག་སྐྱེད་ནི་ཨི་ལ་སོགས་པ་དབྱངས་བཅུ་དྲུག་གོ། །ཐིག་ལེ་ནི་སྙིང་ག་ལ་དགོད་པའི་ཡུངས་ཀར་ཕྲ་མོའི་ཚད་
ཙམ་མོ། །འདས་པ་ནི་དེ་དང་བྲལ་བའོ། །འདི་ནི་དཀྱིལ་འཁོར་ཞེས་པ་ནི་སྙིང་པོར་གྱུར་པའི་འོད་གསལ་བའི་དེ་ཁོ་ན་ཉིད་ཅེས་བྱ་སྟེ། ཐམས་ཅད་སྟོང་པ་འོད་གསལ་བ། །ཞེས་བཤད་པའི་ཕྱིར་རོ། །མཆོག་ཡིན་ནོ་ཞེས་པ་ནི་དོན་དམ་པའི་བདེན་པའི་རང་བཞིན་ཡིན་ནོ། །ངེས་པའི་དོན་ཏོ་

ཞེས་པ་ནི་སེམས་རྣམ་པར་དག་པས་འོད་གསལ་བའི་དེ་ཁོ་ན་ཉིད་བསྟན་པའི་ཕྱིར་རོ། །སྒྲོན་མ་གསལ་བར་བྱེད་པའི་ཊཱི་ཀཱ་ལས་ལེའུ་བཞི་པའོ།། །།རིམ་པ་གཉིས་ཞེས་བྱ་བ་ལ་སོགས་པས་ལེའུ་ལྔ་པའི་བཤད་པ་བརྩམ་པར་བྱ་སྟེ། དེ་ལ་ལེའུ་དང་པོ་ནས་རྣམ་པ་གཉིས་ཀྱི་ལྷའི་སྐུ་བསྟན་ཏོ། །ལེའུ་
གཉིས་པ་ནས་དོན་དམ་པའི་བདེན་པ་འབའ་ཞིག་ཏུ་བསྟན་ཏོ། །ལེའུ་གསུམ་པ་ནས་ལྷའི་སྐུའི་བདག་ཉིད་ཀུན་རྫོབ་ཀྱི་བདེན་པ་བསྟན་ཏོ། །ལེའུ་བཞི་པ་ནས་ཀུན་རྫོབ་དང་དོན་དམ་པའི་བདེན་པའི་བདག་ཉིད་ཀྱི་ཐུགས་ཀྱི་དཀྱིལ་འཁོར་བསྟན་ཏོ། །དེ་ལྟར་བསྒོམས་པས་རིམ་པ་གཉིས་ཡོངས་སུ་རྟོགས་པའི་རིམ་པ་གཉིས་
རྟོགས་པའོ། །དབང་བསྐུར་བ་ཐོབ་པས་ཀྱང་ཞེས་པ་ནི་ལེའུ་བཞི་པ་ནས་གསུངས་པའི་རིམ་པས་སོ། །སྤྱོད་པ་དང་བྲལ་བས་ནི་འགྲུབ་པར་མི་འགྱུར་རོ་ཞེས་པ་ནི་སྤྲོས་པ་ལ་སོགས་པའི་རྣམ་པ་གསུམ་གྱི་སྤྱོད་པ་སྤངས་ནས་རྣལ་འབྱོར་པས་དངོས་གྲུབ་ཐོབ་པར་མི་འགྱུར་རོ་ཞེས་བྱ་བའི་དོན་ཏོ། །གང་གི་ཕྱིར་
རིམ་གྱིས་བསྒོམ་པ་དང་གོམས་པས་བླ་ན་མེད་པའི་གོ་འཕང་ཐོབ་པར་འགྱུར་རོ། །སྤྱོད་པ་ནི་རྒྱུ་ཡིན་ཏེ་དེས་འབྲས་བུར་གྱུར་པའི་དེ་ཁོ་ན་ཉིད་ཁོང་དུ་ཆུད་པར་འགྱུར་རོ། །གོམས་པས་ཐོབ་པར་བྱ་བ་ཡིན་གྱི་རང་བཞིན་གྱིས་ཐོབ་པར་བྱ་བ་མ་ཡིན་ནོ། །གོམས་པའི་སྦྱོར་བས་ཅི་ཞིག་བྱ། །
གཟོད་ནས་གྲུབ་པའི་ངོ་བོ་ཉིད། །དེ་ཉིད་རང་བཞིན་གྱིས་གྲུབ་ཀྱི། །རྣམ་རྟོག་ལས་སྐྱེས་མ་ཡིན་ནོ། །ཡེ་ཤེས་རིམ་པ་སྤངས་ནས་ནི། །གང་ཞིག་འདི་ལྟར་རྟོག་བྱེད་པ། །དེ་ཡི་དབྱེ་བ་མི་ཤེས་པས། །ཕྱིར་ཡང་དེ་རྣམས་སློབ་བཞིན་འགྱུར། །ལས་དང་པོ་ཡི་འཇིག་རྟེན་འདི། །དོན་དམ་པ་ལས་
འཇུག་པའི་ཕྱིར། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་བཤད་པའི་ཕྱིར་རོ། །དེ་བཞིན་གཤེགས་པ་ཐམས་ཅད་ཀྱི་ཞེས་པ་ནི་སྐུ་རྡོ་རྗེ་འཆང་ལ་སོགས་པ་རྣམས་ཀྱིའོ། །སྐུ་དང་གསུང་དང་ཐུགས་ཀྱི་བདག་ཉིད་ཅན་གྱི་ཞེས་པ་ཉེ་བར་སྡུད་པར་བྱེད་པ་
དཔལ་རྡོ་རྗེ་སེམས་དཔའོ། །དེ་ལ། རིགས་ནི་རྣམ་པ་བརྒྱར་བསྟན་ཏེ། མདོར་བསྡུས་པ་ནི་རྣམ་པ་ལྔ། །སྐུ་གསུང་ཐུགས་ཀྱི་དབྱེ་བ་ཡིས། །ཕྱི་ནས་རྣམ་པ་གསུམ་དུ་འགྱུར། །ཞེས་འབྱུང་ངོ་། །དེ་ཉིད་ཀྱི་ཕྱིར་དེ་རྣམས་ཀྱི་བདག་པོ་ཡིན་པས་ན་རྒྱལ་པོ་སྟེ་ཁམས་གསུམ་གྱི་བདག་པོའོ། །ས་འོག་

དང་ས་སྟེང་དང་མཐོ་རིས་རྣམས་སུ་རྗེས་སུ་སྟོན་པར་མཛད་པས་ན་ཞེས་པ་ནི་མཐོ་རིས་དང་ས་བླ་དང་ས་འོག་ལ་གནས་པའི་སེམས་ཅན་གྱི་ཁམས་གདུལ་བ་ལ་བརྩོན་པས་སྟོན་པ་ཞེས་བྱའོ། །ཁྱབ་འཇུག་དང་ལྷ་ཆེན་པོ་ལ་སོགས་པ་འཇིག་རྟེན་གྱི་ལྷ་རྣམས་ཤེས་པ་ལ་མངོན་པར་ཤེས་པ་ལྔ་
ཐོབ་པའི་ཕྱིར་རོ། །ཉན་ཐོས་ལ་སོགས་པ་ཞེས་པ་ནི། །ཉན་ཐོས་པ་དང་རང་སངས་རྒྱས་དང་བྱང་ཆུབ་སེམས་དཔའ་རྣམས་སོ། །འཇིག་རྟེན་ལས་འདས་པ་ཞེས་པ་ནི་མངོན་པར་ཤེས་པ་དྲུག་ཐོབ་པའི་ཕྱིར་རོ། །ཡང་ན་བདག་དང་བཅས་པ་དང་བདག་མེད་པའི་ཕྱོགས་ཀྱི་ལྟ་བ་གཙོ་བོ་ཡིན་པས་
འཇིག་རྟེན་པ་དང་འཇིག་རྟེན་ལས་འདས་པ་ཉིད་དོ། །ཡང་ན་རྣམ་པར་འཚེ་བ་དང་བཅས་པ་དང་། རྣམ་པར་འཚེ་བ་མེད་པས་སོ། །རྫུ་འཕྲུལ་ལ་སོགས་པས་ཟིལ་གྱིས་གནོན་པར་མཛད་པས་ན་ཞེས་པ་ནི་འབར་བ་དང་སྣང་བ་ལ་སོགས་པ་ལུས་ཀྱི་རྫུ་འཕྲུལ་དང་། བསྟན་པ་ལ་སོགས་པ་གསུང་
གི་རྫུ་འཕྲུལ་དང་། རྩེ་གཅིག་པ་ལ་སོགས་པ་ཐུགས་ཀྱི་རྫུ་འཕྲུལ་གྱིས་དེ་རྣམས་ཟིལ་གྱིས་གནོན་པར་མཛད་པའི་ཕྱིར་རོ། །ཇི་སྐད་དུ། རྒྱ་མཚོ་ཡི་ནི་གཏིང་མི་རྙེད། །བ་ཡི་རྗེས་དང་འདྲ་བར་འགྱུར། །གང་ཚེ་ཁྱོད་ཀྱི་བློ་ཟབ་པ། །གཏིང་དང་ཕ་རོལ་མེད་མཐོང་ན། ཁྱོད་ཀྱི་བསྟན་པ་
མངོན་གྱུར་པས། །ཆོས་རྣམས་ཀུན་གྱིས་མི་གཡོ་བ། །ས་ཡི་ཁམས་ཀྱི་བརྟན་པ་ཉིད། །ཤིང་གི་འདབ་རྩེ་ལྟར་ཡང་འགྱུར། །ཞེས་འབྱུང་ངོ་། །བདག་དང་གཞན་གྱི་ཚོགས་ཀྱི་ཞེས་པ་ནི་དེ་ལ་བདག་གི་ཚོགས་ནི་སྔར་བཤད་པ་ཉན་ཐོས་ལ་སོགས་པའོ། །གཞན་གྱི་ཚོགས་ནི་གྲངས་ཅན་ལ་
སོགས་པའོ། །དེ་རྣམས་ཀྱི་སྤྱོད་པ་ནི་གང་ཟག་དང་ཆོས་ལ་བདག་མེད་པའི་སྤྱོད་པ་དང་། སྐྱེས་བུ་ལ་སོགས་པ་ཡོད་པའི་མཚན་ཉིད་ལ་སོགས་པའོ། །མཆོག་གི་ཆོས་ཤེས་པ་ནི་ཡོན་ཏན་མཆོག་དང་ལྡན་པའོ། །དེ་རྣམས་ཀྱིས་དོན་དུ་གཉེར་བར་བྱ་བའི་ཕྱིར་དོན་ཏོ། །དེ་ནས་ལས་འཛིན་པའོ། །དེ་
ལྟར་རང་དང་གཞན་གྱི་ཚོགས་ཀྱིས་མངོན་པར་འདོད་པར་བྱ་བ་བཅོམ་ལྡན་འདས་རྡོ་རྗེ་འཆང་ཆེན་པོ་ཞེས་བྱ་བའི་དོན་ཏོ། །དེ་ལ་སངས་རྒྱས་རྣམས་ཀྱི་འོད་ཟེར་གྱི་འཁོར་ལོས་བསྐུལ་བས་མུ་སྟེགས་པ་དང་ཉན་ཐོས་ལ་སོགས་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་ཏེ། བསོད་

ནམས་ཀྱི་ནི་ཚོགས་བསགས་ནས། །དེ་ཡང་འཇིག་རྟེན་འདྲེན་པར་འགྱུར། །ཞེས་བཤད་པའི་ཕྱིར་རོ། །ཐར་པ་འདོད་པ་ཐམས་ཅད་ཀྱིས་ཀྱང་། ཐམས་ཅད་མཁྱེན་པ་ཉིད་གསོལ་བ་གདབ་པར་བྱ་བ་ཡིན་པས་སོ་ཞེས་པ་ནི་མུ་སྟེགས་དང་ཉན་ཐོས་ལ་སོགས་པ་ཐམས་ཅད་
མཁྱེན་པ་ཉིད་འདོད་པས་སོ། །སེམས་ནི་རབ་ཏུ་འཇུག་པ་ལ། །སྤྱོད་པ་ལ་ནི་འཇུག་མི་བྱ། །འཁོར་བ་རབ་ཏུ་བཅོམ་པའི་ཕྱིར། །ཀུན་གྱི་བློ་ནི་མཉམ་པོ་ཡིན། །ཞེས་བཤད་དོ། །སྤྲོས་པ་དང་བཅས་པ་དང་སྤྲོས་པ་མེད་པ་དང་ཤིན་དུ་སྤྲོས་པ་མེད་པ་སྟེ་སྤྱོད་པ་རྣམ་པ་གསུམ་པོ་ཞེས་པ་ནི་
རིམ་པ་གཉིས་ལ་བརྟེན་ཏེ། རྣལ་འབྱོར་པ་རྣམས་ཀྱིས་སྤྱོད་པར་བྱའོ། །བསྐྱེད་པའི་རིམ་པའི་རྣལ་འབྱོར་པས་གཉིས་སྤྱོད་པ་དང་། རྫོགས་པའི་རིམ་པའི་རྣལ་འབྱོར་པས་གཅིག་སྤྱོད་པར་བྱ་སྟེ་ཁྱད་པར་རོ། །སྤྱོད་པས་ནི་ཁྱད་པར་རོ་ཞེས་པ་ནི་བརྟུལ་ཞུགས་ཀྱི་ཁྱད་པར་གང་གིས་སོ། །དེའི་
མཚན་ཉིད་ནི་རང་གི་ངོ་བོ་ཉིད་དེ་ཞེས་པ་ནི་འཆད་པར་འགྱུར་བའི་སྤྱོད་པ་གསུམ་གྱི་དེ་ཁོ་ན་ཉིད་དོ། །བཀའ་སྩལ་པ་སྟེ་ཞེས་པ་ནི་རིག་བྱེད་ཀྱི་ཚུལ་དུ་དུས་ལོག་པར་བསྟན་ཏོ། །སྒྲ་ཇི་བཞིན་པའོ་ཞེས་པ་ནི་སྤྱོད་པ་ཇི་ལྟ་ཇི་ལྟར་གསུངས་ཞེས་བསྟན་པའི་ཕྱིར་རོ། །གང་ལ་བརྟེན་ནས་སྤྱོད་པ་
རྡོ་རྗེ་ཐེག་པ་དེ་ཉིད་ཀྱི་ཁྱད་པར་བསྟན་པར་བྱ་བའི་ཕྱིར། །དོན་དམ་པའི་བདེན་པ་སྟེ་ཟབ་པའི་མཚན་ཉིད་དོ་ཞེས་པ་ལ། ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཆོས་ཐམས་ཅད་ཀྱི་ཆོས་ཉིད་ཀྱི་མཚན་ཉིད་འོད་གསལ་བའི་རིམ་པ་གཉིས་པ་དང་བཞི་པ་ཐོབ་པར་བྱ་བ་མན་ངག་བཞི་པ་དེ་ཁོ་ན་ཉིད་ཅེས་
བྱའོ། །ཀུན་རྫོབ་ཀྱི་བདེན་པ་སྟེ་ཞེས་པ་ནི་དོན་ཐམས་ཅད་བྱེད་པ་ལ་གཞོལ་བ། རིམ་པ་གསུམ་པ་དང་བཞི་པ་ཐོབ་པར་བྱ་བ་ཡེ་ཤེས་ཀྱི་སྐུ་འམ་རྡོ་རྗེའི་སྐུའི་མཚན་ཉིད་དེ་ལྷ་རྣམ་པ་གཉིས་ཀྱི་རྣལ་འབྱོར་གྱི་མཚན་ཉིད་དོ། །དེ་ཉིད་ཀྱི་ཕྱིར་རྒྱ་ཆེ་བའི་མཚན་ཉིད་དེ་ཞེས་བྱ་བ་འགྲོ་བའི་དོན་
བྱེད་པ་ལ་བརྩོན་པ། །སར་ཞིང་སར་པའི་དཀྱིལ་འཁོར་གྱི་འཁོར་ལོ་སྤྲོས་པས་ནམ་མཁའི་ཁམས་མ་ལུས་པ་རྫོགས་པར་བྱེད་པའི་རང་བཞིན་ནོ། །གཉིས་པོ་དེ་དག་ཅེས་པ་ནི་ཀུན་རྫོབ་དང་དོན་དམ་པའི་བདེན་པ་གཉིས་སོ། །གཉིས་སུ་མེད་པའི་རྣམ་པ་ཞེས་པ་ནི་མི་གནས་པའི་མྱ་

ངན་ལས་འདས་པའི་དབྱིངས་ཀྱི་རྣམ་པའོ། །ཡང་དག་པར་ནི་ཇི་ལྟར་བསྟན་པ་དེ་བཞིན་དུ་བསྒོམ་པའོ། །རྣལ་འབྱོར་པ་དེ་ཞེས་པ་ནི་དེ་ལྟ་བུའི་སྒྲུབ་པ་པོ་རྣམས་སོ། །འདོད་ཆགས་ལ་སོགས་པས་འཁྲུགས་ཀྱང་ཞེས་པ་ནི་འདོད་ཆགས་ཀྱི་སྤྱོད་པ་སྤྲོས་པ་དང་བཅས་པ་ཞེས་བྱ་བ་དང་ལྡན་པ་
ཡང་ངོ་། །ཐེག་པ་མཆོག་ནི་རྡོ་རྗེ་ཐེག་པ་ཞེས་པ་ལ་སྔགས་ཀྱི་ཐེག་པ་ཆེན་པོ་ཞེས་བྱའོ། །གཏན་ཚིགས་བཤད་པར་བྱ་བའི་ཕྱིར་ཐེག་པ་ཐམས་ཅད་ཀྱི་བླ་མར་གྱུར་པ་ཞེས་སྨོས་སོ། །དེ་ལ་ཉན་ཐོས་པའི་ཐེག་པ་ནི་ཐེག་པ་ཆུང་ངུ་ཞེས་བྱ་སྟེ། རང་གི་དོན་ཙམ་འགྲུབ་པ་དང་ཐབས་དང་ཐབས་
ལས་བྱུང་བའི་ལམ་དང་འབྲས་བུ་མ་དག་པའི་ཕྱིར་རོ། །དེ་ལ་རེ་ཞིག་མི་སྡུག་པའི་བསྒོམ་པ་ནི་ཀེང་རུས་བསྒོམ་པའི་བདག་ཉིད་ཡང་དག་པའི་ལམ་མ་ཡིན་ཏེ། དེ་དག་ངོ་བོ་ཉིད་ཀྱིས་མ་གྲུབ་པའི་ཕྱིར་རོ། །འབྲས་བུ་ཡང་འགོག་པའི་སྙོམས་པར་འཇུག་པའི་མཚན་ཉིད་ནི་ཡང་དག་པ་མ་
ཡིན་ཏེ་བག་ཆགས་དང་བཅས་པའི་ཕྱིར་དང་སླར་ཡང་དེ་རྣམས་བྱུང་ནས་འཁོར་བའི་རྒྱ་མཚོར་ལྷུང་བའི་ཕྱིར་རང་སངས་རྒྱས་ཀྱི་ཐེག་པ་ཡང་གཞན་གྱིས་དོན་དང་བྲལ་བས་ཆུང་བ་ཉིད་དེ། དེ་རྣམས་ཀྱི་ཐར་པས་ཀྱང་འདུད་པར་གྱུར་པ་རྣམ་པར་རིག་པ་ཙམ་ཡོད་པའི་མཚན་ཉིད་ཀྱིས་རྣམ་
པར་མི་རྟོག་པ་ཉིད་ཐོབ་པར་མི་འགྱུར་བས་མ་དག་པའོ། །བྱང་ཆུབ་སེམས་དཔའི་ལམ་ཡང་བསྐལ་པ་གྲངས་མེད་པ་གསུམ་གྱིས་བྱང་ཆུབ་ཐོབ་པའི་ཕྱིར་ཐབས་ཉིད་ཁོ་ན་མ་ཡིན་ནོ། །རྡོ་རྗེ་ཐེག་པ་ནི་ཐབས་དང་འབྲས་བུ་དག་ལ་མ་འཁྲུལ་བ་ཡིན་ཏེ་གང་གི་ཕྱིར་འདོད་པའི་ཡོན་ཏན་ལྔ་ཉེ་
བར་སྤྱོད་པ་དང་ཕྱག་རྒྱ་བསྟེན་པ་ལ་སོགས་པའི་བདེ་བའི་ཐབས་ཀྱིས་འབའ་ཞིག་དྲི་མ་མེད་པ་མཐའ་ཡས་པ་ནམ་མཁའ་དང་འདྲ་བ་ཆོས་ཀྱི་དབྱིངས་ཀྱི་ཡེ་ཤེས་སུ་གྲགས་པ་རྡོ་རྗེ་འཆང་ཆེན་པོའི་གོ་འཕང་རང་དང་གཞན་གྱི་དོན་གྲུབ་པ་ལ་བརྩོན་པ། སྐད་ཅིག་མ་གཅིག་གིས་སྣ་ཚོགས་སྤྲུལ་པ་
དང་བསྡུ་བར་མཛད་པ་འགྲོ་བ་མ་ལུས་པའི་རང་བཞིན་མངོན་དུ་བྱེད་པ་དེ་བཞིན་གཤེགས་པ་ཐམས་ཅད་ཀྱི་ངོ་བོ་དེ་ཁོ་ན་ཉིད་སྐད་ཅིག་མ་གཅིག་གིས་ཐོབ་པར་འགྱུར་ཏེ་རྒྱུ་དང་འབྲས་བུ་ལ་མ་འཁྲུལ་པའི་ཕྱིར་རོ། །ཐེ་ཚོམ་གྱི་བདག་ཉིད་ཀྱི་འཁྲུལ་པས་དེ་མངོན་དུ་བྱེད་པ་དང་ཡུན་ཡང་

རིང་བར་འགྱུར་རོ་ཞེས་བྱ་བ་དེ་ཡོད་ན་དག་པར་མི་འགྱུར་རོ། །སྦྱོང་བ་ནི་གང་དང་གང་འཁྲུལ་བའི་ངོ་བོ་སྣང་བ་གཏན་ཚིགས་ལ་སོགས་པ་དེ་དག་མ་འཁྲུལ་བའི་འབྲས་བུ་ལ་འབྲེལ་པ་མེད་དེ། བརྒྱ་བྱིན་གྱི་སྤྱི་བོ་ལ་སོགས་པ་ལས་བྱུང་བའི་དུ་བ་ལ་སོགས་པས་མེ་ལ་སོགས་པ་
བཞིན་ནོ། །ཉན་ཐོས་ཀྱི་ལམ་ལ་སོགས་པ་འཁྲུལ་པའི་རང་བཞིན་དུ་སྣང་བས་མི་འཁྲུལ་པའི་རྡོ་རྗེ་འཆང་ཆེན་པོའི་གོ་འཕང་འབྲས་བུར་གྱུར་པའི་སྒྱུ་མ་ཡིན་ནོ་ཞེས་རྒྱུ་མི་དམིགས་པའོ། །མ་འཁྲུལ་བའི་ངོ་བོ་སྣང་བའི་ལམ་གྱིས་ཐོབ་པར་བྱ་བ་དཔལ་རྡོ་རྗེ་འཆང་གི་གོ་འཕང་ཞེས་
ཉེ་བར་བསྡུ་བའོ། །དེ་བས་ན་ཐེག་པ་ཐམས་ཅད་ཀྱི་མཆོག་རྡོ་རྗེ་ཐེག་པ་ཞེས་བྱའོ། །གཅིག་ལ་གཅིག་ཅེས་ཞེས་པ་ནི་ཕན་ཚུན་ལ་ལྟོས་པས་སོ། །ཚིག་ལྷག་མ་ཞེས་པ་ནི་ཚིག་རྫོགས་པར་བྱེད་པའོ། །ཕུལ་དུ་ཕྱུང་བའི་དངོས་གྲུབ་སྟེ་ཞེས་པ་ནི་ཕྱག་རྒྱ་ཆེན་པོའི་དངོས་གྲུབ་རྡོ་རྗེ་འཆང་
ཆེན་པོའི་སྐུའོ། །སྐྱེད་པར་བྱེད་པ་ནི་མངོན་དུ་བྱེད་པ་སྟེ་སྤྲོས་པ་དང་བཅས་པའི་སྤྱོད་པས་རྡོ་རྗེ་འཆང་ཆེན་པོ་ཉིད་ཐོབ་པར་འགྱུར་རོ་ཞེས་བྱ་བའི་དོན་ཏོ། །དགོངས་པ་མ་ཡིན་པའོ་ཞེས་པ་ནི་གསལ་བའི་དེ་ཁོ་ན་ཉིད་བསྟན་པས་སོ། །རང་བཞིན་ཡོངས་སུ་ཞེས་བྱ་བ་ལ་སོགས་པས་རིགས་ལ་སོགས་
པ་བཀག་པར་བསྟན་ཏོ། །རྡོ་རྗེ་ཐེག་པ་ལ་བརྟེན་ནས་བླ་མའི་མན་ངག་བསྒོམ་པ་གང་ཡིན་པ་དེ་རྣམས་རིགས་ལ་སོགས་པ་དམན་པས་ཀྱང་བྱང་ཆུབ་ཐོབ་པར་འགྱུར་ཏེ། སྐྱེ་བ་སྣ་ཚོགས་རིགས་དང་ནི། །ཡུལ་དང་དུས་ལ་མ་ལྟོས་པ། །བཅོམ་ལྡན་ཁྱོད་ཀྱིས་བསྟན་བཅོས་ནི། །ཐམས་ཅད་
ལ་ནི་བསྟན་པ་ལགས། །ཞེས་བཤད་པའི་ཕྱིར་རོ། །སྐྱེ་གནས་ཀྱིས་སྨད་པ་ཉིད་དུ་བསྟན་པའོ་ཞེས་པས་ནི་རིགས་དམན་པ་བསྟན་ཏོ། །ལས་ཀྱིས་སོ་ཞེས་པ་ནི་བ་ལང་གི་པགས་པ་དང་གཞུ་ལ་སོགས་པ་བྱེད་པ་དང་མི་གཙང་བ་ལ་སོགས་པ་གདོན་པས་སོ། །སྒྱུ་ནི་ཡི་གེ་པ་རྣམས་ཀྱིས་གཞན་
གྱི་ཞིང་ལ་སོགས་པ་འཕྲོག་པས་ལོག་པར་འཚོ་བའོ། །འཁྲུལ་འཁོར་དང་ཞེས་པ་ནི། །བཙོན་རའི་ཁང་པ་ལ་ལག་པ་དང་རྐང་པ་ལ་སོགས་པ་འཆིང་བའི་ཤིང་ལ་སོགས་པའོ། །མཚོན་ནི་རལ་གྲི་ལ་སོགས་པའོ། །རྒྱ་ནི་རི་དགས་ལ་སོགས་པ་བཤོར་བའི་དོན་དུ་སྲད་བུའི་སྦྱོར་བའོ། །

སོགས་པའི་སྒྲས་ནི་རྩིག་པ་ཕུག་ནས་ནོར་རྐུ་བ་དང་ཆང་གི་ནང་དུ་དྷ་དུ་རའི་ཁུ་བ་བཏབ་ནས་བརྒྱལ་བར་བྱེད་པ་དང་། ལྕགས་ཀྱུས་ཉ་བཟུང་བ་དང་། གྲོང་ལ་སོགས་པ་ལ་མེ་གཏོང་བ་ཞེས་བྱའོ། །དགང་བར་ཞེས་པ་ནི་རང་གི་ལྟོ་བ་རྒྱས་པ་ཙམ་མོ། །སེམས་པས་ནི་བསམ་པར་བྱེད་པའོ། །ཐེག་
པ་ཆེན་པོ་བླ་ན་མེད་པའོ་ཞེས་པ་ནི་ཀུན་གྱི་མཆོག་ཅེས་བྱ་བའི་དོན་ཏོ། །བླ་ན་མེད་པའོ་ཞེས་པ་ནི་རྡོ་རྗེ་ཐེག་པ་སྟེ་བླ་ན་མེད་པའི་སྒྲ་དང་བྲལ་བས་སོ། །སྤྱི་བོའི་སྒྲ་ནི་ཁྱད་པར་དུ་འཇུག་པ་སྟེ་དོན་ལ་སོགས་པའི་འབྲེལ་པ་ཞེས་སྔར་བཤད་ཟིན་ཏོ། །རིན་པོ་ཆེའི་གང་ཟག་ཅེས་པ་ནི་ཙནྡན་ལ་སོགས་
པ་ལ་ལྟོས་པས་དམ་པ་ཆེན་པོ་ཡིན་པས་སོ། །དེ་ཉིད་ཀྱིས་འགྲོ་བས་ན་ཞེས་པ་ནི་ཉེ་བར་མཚོན་པའི་ཚིག་ཡིན་ཏེ་ཙནྡན་ལ་སོགས་པ་རྡོ་རྗེ་ཐེག་པས་མི་འགྲོ་བ་མ་ཡིན་ཏེ་དེས་ཐམས་ཅད་རྗེས་སུ་བཟུང་བས་སོ། །གཙོ་བོས་ཀྱང་ཐ་སྙད་མཐོང་བས་ཏེ་གང་འགྲོ་བ་རྒྱལ་པོ་ཞེས་པ་བཞིན་ནོ། །ཕ་
ཞེས་བྱ་བ་ལ་སོགས་པ་ལ་དེ་ལ་ཕ་གསོད་པ་ནི་རྒྱལ་བུ་ཁྱབ་འཇུག་བཞིན་དུ་སྟེ། དེས་ཕ་དང་དེའི་བློན་པོ་བསད་པས་སོ། །མ་གསོད་པ་ནི་སོར་འཕྲེང་ཅན་ནོ། །དགྲ་བཅོམ་པ་གསོད་པ་ནི་མྱ་ངན་མེད་པའི་རྒྱལ་པོ་གཏུམ་པོའོ། །སངས་རྒྱས་ཀྱི་སྐུ་འཇིག་ཅེས་པ་ནི་སྟག་གཟིག་རྣམས་སོ། །དམ་
པའི་ཆོས་སྤོང་བ་ཞེས་པ་ནི་གྲངས་ཅན་ལ་སོགས་པའོ། །མཚམས་མེད་པའི་དོན་བཤད་པའི་ཕྱིར། འཆི་བའི་དུས་བྱས་མ་ཐག་ཏུ་དམྱལ་བར་ལྷུང་བར་འགྱུར་བས་ན་ཞེས་པ་ནི་དམྱལ་བར་སྐྱེས་མ་ཐག་ཏུ་ལས་ཀྱི་འབྲས་བུ་མྱོང་བས་སོ། །ཉེ་བར་མཚོན་པ་ཞེས་བྱ་བ་ནི་དབྱེར་མེད་པའི་ཉེ་
བར་བརྟགས་པའི་མཚན་ཉིད་ཀྱི་ཆོས་ལས་སོ། །དེ་བྱེད་པ་ལ་འཇུག་གོ་ཞེས་པ་ནི་ལས་དང་བྱེད་པ་པོ་ལ་དབྱེར་མེད་པས་སོ། །མཚམས་མེད་པ་དང་ཉེ་བ་རྣམས་བཟུང་བ་ནི་མ་དང་དགྲ་བཅོམ་པ་མ་ཡིན་པ་ལ་བགྲོད་པ་དང་བྱང་ཆུབ་སེམས་དཔའ་དེས་གནས་དང་། སློབ་པ་གསོད་པ་དང་། དགེ་
སློང་གི་ནོར་འཕྲོག་པ་དང་། དགེ་སློང་འབྱེད་པ་དང་། མཆོད་རྟེན་བཤིག་པ་སྟེ། དེ་བྱེད་པའོ། །རྩ་བ་བཞིའི་ལྟུང་བ་ཞེས་པ་ནི་སྲོག་གཅོད་པ་དང་རྐུ་བ་དང་། གཞན་གྱི་བུད་མེད་ལ་བགྲོད་པ་དང་། བརྫུན་སྨྲ་བས་སོ། །ཏཱ་ལ་མགོ་བཅད་པ་ལྟར་ཞེས་པ་ནི་མགོ་བཅད་པའི་ཏཱ་ལའི་ཤིང་དྲུང་བཞིན་ནོ། །

སངས་རྒྱས་ཀྱི་བསྟན་པ་ལས་ཉམས་ནས་ཞེས་པ་ནི་དེ་བཞིན་གཤེགས་པའི་ཐེག་པ་ཆེན་པོ་ལས་ལྟུང་བ་ཞེས་བྱ་བའི་དོན་ཏོ། །ཐེག་པ་ལས་ཉམས་པ་ནི་སྡིག་པ་ཆེན་པོའི་རྒྱུ་ཡིན་ཏེ། ཚུལ་ཁྲིམས་ལས་ཀྱང་ཉམས་པ་རུ། །ལྟ་བ་ལས་ནི་མ་ཡིན་ཏེ། །ཚུལ་ཁྲིམས་ཀྱི་ནི་
མཐོ་རིས་འགྲོ། །ལྟ་བས་གནས་ནི་དམ་པ་ཐོབ། །ཅེས་འབྱུང་ངོ་། །དམྱལ་བ་ལས་གཞོལ་བ་ཞེས་པས་ནི་སངས་རྒྱས་ཀྱི་བསྟན་པ་ལས་ཉམས་པའི་འབྲས་བུ་བསྟན་ཏོ། །དེ་རྣམས་ཀྱང་འདིར་ཞེས་པ་ནི་སྡིག་པ་ཆེན་པོ་བྱེད་པས་ཀྱང་ཞེས་བསྟན་ཏོ། །བླ་མའི་དྲིན་གྱིས་ཞེས་པ་ནི། །རྡོ་རྗེ་
སློབ་དཔོན་གྱི་ཞབས་རྗེས་སུ་བཟུང་བས་སོ། །རྫོགས་པའི་རིམ་པ་ཐོབ་ན་ཞེས་པ་ལ་ཟུང་དུ་འཇུག་པའི་ཏིང་ངེ་འཛིན་ཐོབ་ནས་སོ། །འགྲུབ་པར་འགྱུར་ཞིང་ཞེས་པ་ནི་འབྲས་བུའི་གཙོ་བོའི་སྒོ་ནས་བསྟན་ཏེ་བསྐྱེད་པའི་རིམ་པ་ལ་སོགས་པ་ཡང་འབྲས་བུ་ལ་མངོན་དུ་གྱུར་པའི་ཕྱིར་རོ། །སངས་
རྒྱས་ཐོབ་པར་གྱུར་ན་ཞེས་པ་ལ་རྡོ་རྗེ་འཆང་ཉིད་ཐོབ་པར་འགྱུར་རོ། །སངས་རྒྱས་རྡོ་རྗེ་སེམས་དཔའ་ཉིད། །དེ་བཞིན་ཀུན་གྱི་དབང་ཕྱུག་ཉིད། །རྡོ་རྗེ་ལྟ་བུའི་ཏིང་ངེ་འཛིན། །དེ་ནི་གཉིས་མེད་བསྟན་པའོ། །ཞེས་འབྱུང་བས་སོ། །རིགས་ངན་ལ་སོགས་པ་ལྟ་སྨོས་ཀྱང་ཅི་དགོས་ཞེས་
པ་ནི་གང་དེ་རྣམས་ཀྱི་སྐྱེ་གནས་ལ་སོགས་པ་ངན་པ་ཙམ་ཡོད་པའོ། །དེ་ལ་སྐྱེ་གནས་ཀྱི་སྐྱོན་ཙམ་གྱིས་སྐལ་བ་མེད་པ་མ་ཡིན་ཏེ། བསྟན་པ་ལ་མི་དམིགས་པའི་ཡན་ལག་མ་ཡིན་པའི་ཕྱིར་རོ། །དད་པ་ལ་སོགས་པའི་ཡོན་ཏན་རྣམས་ནི་བསྟན་པ་ལ་བརྟེན་པའི་རྗེས་སུ་མཐུན་པ་
ཡིན་གྱི་སྐྱེ་གནས་ལ་སོགས་པ་མ་ཡིན་ཏེ། ལྷ་སྦྱིན་དང་ཀོ་ཀ་ལི་ཀ་དག་གིས་དམྱལ་བར་འགྲོ་བ་དང་འཁོར་ལོས་སྒྱུར་བའི་གནས་ཐོབ་པ་བཞིན་ནོ། །དེ་ལྟར་ཞེས་བྱ་བ་ལ་སོགས་པས་ཉེ་བར་བསྡུས་པ་བསྟན་ཏོ། །སྣོད་དང་སྣོད་མ་ཡིན་པ་ལ་ལྟོས་པ་མེད་པར་དོན་མཛད་པས་ན་ཞེས་པ་
ནི་སྐལ་བ་དང་སྐལ་བ་མེད་པའི་སློབ་མའི་རྗེས་སུ་གཟུང་བར་བྱེད་པས་ཞེས་པའི་དོན་ཏོ། །ཐེག་པའི་ཆེ་བའི་བདག་ཉིད་གསལ་བར་སྟོན་པ་ཡིན་ནོ་ཞེས་པ་ནི་རྡོ་རྗེ་ཐེག་པའི་ཕུལ་དུ་བྱུང་བ་རབ་ཏུ་གསལ་བར་བསྟན་པ་ཡིན་ནོ་ཞེས་བྱ་བའི་དོན་ཏོ། །དེ་ལྟར་ཞེས་བྱ་བས་ལྡོག་པ་བསྟན་ཏོ། །

སྐྱེ་བོ་སྡིག་ཅན་མ་ལུས་པ། །ཞེས་པ་ནི་སྔར་བཤད་པའི་མཚམས་མེད་པ་བྱེད་པ་ལ་སོགས་པའོ། །རྣམ་པར་སྦྱོང་བ་ཞེས་པ་ནི་དེ་རྣམས་གྲོལ་བར་བྱེད་པའོ། །རྡོ་རྗེ་ཐེག་པ་ཞེས་བྱ་བ་ལ་སོགས་པས་བླ་མ་ལ་སྨོད་པ་འགྲུབ་པར་མི་འགྱུར་རོ་ཞེས་བསྟན་ཏོ། །དང་པོར་སློབ་དཔོན་ལ་བསྙེན་
བཀུར་བྱས་ཏེ་ཞེས་པ་ནི་སྔོན་གྱི་བསྙེན་པའི་རིམ་པ་དང་ཟླ་བ་ལ་སོགས་པའི་དུས་ཀྱི་དབྱེ་བས་དེ་ལ་བསྙེན་བཀུར་བྱས་ཏེ། མགུ་བར་འགྱུར་བ་དེ་ལས་རིགས་པའི་དབང་བསྐུར་བ་ལ་སོགས་པ་རྙེད་ནས་ཐོས་པ་ལ་སོགས་པའི་རིམ་གྱིས་མན་ངག་མངོན་དུ་བྱས་ལ་ལྷན་ཅིག་སྐྱེས་པའི་ཤེས་རབ་
དང་ལྡན་པའི་ཕྱིར་ངའི་བློའི་ཁྱད་པར་འདི་ཡིན་གྱིས་སློབ་དཔོན་གྱིས་ཅུང་ཟད་ཀྱང་ཕན་པ་མ་བྱས་སོ་ཞེས་བསམས་པས་དེ་ལ་སྨོད་པ་གང་ཡིན་པ་དེ་ནི་བླ་མ་ལ་བརྙས་པར་བྱེད་པའོ། །ཚོགས་ལ་མཐོང་ནས་རྒྱབ་ཀྱིས་ཕྱོགས་སུ་འགྲོ། །དབེན་པ་ལ་གནས་དེ་ལ་ཕྱག་བྱེད་པ། །དེ་ལྟར་བདག་
ཉིད་ངན་པའི་སློབ་མ་ནི། །རང་གི་བུ་འམ་འཕགས་པས་བཟུང་བ་སྟེ། །བྲམ་ཟེ་འམ་ནི་རྒྱལ་རིགས་རྗེའུ་རིགས་ལ། །བསྟན་པ་ཡི་ནི་གམ་དུ་མི་བྱའོ། །ཞེས་བཤད་པའི་ཕྱིར་རོ། །དེ་དང་ལྷན་ཅིག་ཟང་ཟིང་གི་ལོངས་སྤྱོད་ཀྱིས་ཞེས་པ་ནི་བཟའ་བ་ལ་སོགས་པའི་སྤྱོད་པས་སོ། །ཀུན་དུ་དགའ་
བར་བྱེད་པ་ནི་རོལ་པར་བྱེད་པའོ། །གང་ཡིན་པ་ཡང་ཞེས་བྱ་བ་ལ་སོགས་པའི་དེ་དག་ཀྱང་འགྲུབ་པར་མི་འགྱུར་ཏེ་སྡིག་པ་ཅན་དང་འབྲེལ་པའི་ཕྱིར་རོ། །སློབ་དཔོན་ཞེས་བྱ་བ་ལ་སོགས་པས་རང་སྡིག་པ་ཅན་བླ་མ་ལ་ཉེས་པར་བྱེད་པ་བཟུང་བར་བསྟན་ཏོ། །ངེས་པར་མཛད་པའོ་
ཞེས་པ་ནི་ངེས་པར་གཟུང་བར་མཛད་པའོ། །དེས་ནི་མངོན་སྤྱོད་ཀྱི་སྣོད་དུ་རུང་བ་ལ་སངས་རྒྱས་ཀྱིས་ཕྱོགས་མཛད་ན་ཡང་དངོས་གྲུབ་ཐོབ་པར་མི་འགྱུར་ཞེས་བསྟན་ཏོ། །སྲུང་བ་སོགས་དང་སྔགས་རྣམས་དང་། །ལྷ་རྣམས་ལ་ཡང་ཕུར་བུས་གདབ། །ཅེས་གསུངས་པའི་ཕྱིར་
རོ། །འགྲུབ་པར་མི་འགྱུར་བ་ཞེས་པ་ནི། །གདོལ་པ་ལ་སོགས་པས་འགྲུབ་པར་བྱེད་པ་ནི་འགྲུབ་པ་སྟེར་བས་འགྲུབ་པ་ནི་མ་ལུས་པ་ཉིད་དོ། །སྒྲུབ་པ་དེ་ལ་ཡང་འགྲུབ་པར་མི་འགྱུར་ན་ཞེས་པ་འདིས་བླ་མ་ལ་ཉེས་པ་བྱེད་པ་ལ་འགྲུབ་པ་ནི་མ་ཡིན་ནོ། །ཞེས་བསྟན་ཏོ། །གཞན་

དག་ཏུ་ཞེས་པ་ནི་བྱ་བའི་རྒྱུད་ལ་སོགས་པ་ལ་སྨོས་ཅི་དགོས་སོ། །ཇི་སྐད་དུ་ཞེས་བྱ་བ་ལ་སོགས་པས་ལུང་གི་ཚད་མ་ཉིད་བསྟན་ཏོ། །སློབ་དཔོན་ལ་སྨོད་པར་བྱེད་པའི་མི་རྣམས་ལ་གཉིད་ལོག་པའི་དུས་སུ་ཡང་དེ་བཞིན་གཤེགས་པ་མཐོང་བར་མི་འགྱུར་ཏེ། གང་གི་
ཕྱིར་དང་པོ་དེ་རྣམས་ཀྱིས་སློབ་དཔོན་ལ་སྨོད་པར་མི་བྱ་བ་དང་། དེ་བཞིན་དུ་དེ་རིང་ནས་བརྩམས་ཏེ། ལག་ན་རྡོ་རྗེ་བདག་གིས་ཁྱོད་ལ་སྨྲས་པ་གང་ཡིན་པ་དེ་ཁྱོད་ཀྱིས་བྱ་སྟེ་གཞན་དུ་ན་དུས་བྱས་ཏེ་དམྱལ་བར་ལྟུང་བར་འགྱུར་རོ། །ཞེས་མནས་བསྐྱལ་བ་སྔོན་དུ་འགྲོ་བར་ཁས་བླངས་ནས་ཡང་
རྡོ་རྗེ་འཆང་དང་འདྲ་བའི་བླ་མ་དེ་ཉིད་ལ་སྨོད་པ་ཞེས་རང་གི་ཚིག་གིས་དེའི་དམ་ཚིག་ཉམས་པ་དང་དེའི་འབྲས་བུ་དེ་བཞིན་གཤེགས་པ་ལ་སོགས་པས་བྱིན་གྱིས་མ་བརླབས་པར་འགྱུར་རོ་ཞེས་སྟོན་ཏོ། །མཐོང་བའི་ཆོས་ལ་མྱོང་བའི་ལས་ཀྱི་རྣམ་པར་སྨིན་པ་བཤད་པའི་ཕྱིར། སློབ་
དཔོན་སྨོད་པ་གང་ཡིན་དེ། །ཞེས་པ་ནི་བླ་མ་ལ་སྨོད་པར་བྱེད་པའོ། །བགེགས་དང་ལོག་འདྲེན་རྣམས་ཀྱིས་བཟུང་། །ཞེས་པ་ནི། ཚོགས་བདག་ལ་སོགས་པ་དང་། སྲིན་པོ་ལ་སོགས་པས་བཟུང་བར་འགྱུར་རོ། །ངན་པ་ནི་སྡིག་པའི་བསམ་པ་ཅན་ནོ། །གཏུམ་པོའི་ལས་ཅན་ཞེས་པ་
ནི་དྲག་པོའི་སྤྱོད་པ་དང་ལྡན་པའོ། །མཁས་པས་རྟག་ཏུ་སྤང་བར་བྱ། །ཞེས་པ་ནི་བླ་མ་དམ་པས་གམ་དུ་མི་བྱའོ་ཞེས་བྱ་བའི་དོན་ཏོ། །སྒྲ་ཇི་བཞིན་པ་ཞེས་པ་ནི་སོགས་པའི་སྒྲ་ཞེས་ཚིག་ལྷག་མའོ། །རྒྱུད་ཀྱི་རྒྱལ་པོ་ཁྱད་པར་དུ་གྱུར་པ་བསྟན་ནས་ཞེས་པ་ནི་སྤྱོད་པ་གསུམ་གྱི་གཞིར་
གྱུར་པའི་རྒྱུད་ཀྱི་རྒྱལ་པོ་བསྟོད་ནས་སོ། །སློབ་དཔོན་མེད་པར་འཇུག་པར་མ་གྱུར་ཅིག །ཅེས་པ་ནི་བླ་མའི་ཞལ་གྱི་མན་ངག་དང་བྲལ་བ་ཞེས་བྱ་བའི་ཐ་ཚིག་གོ། །བླ་མའི་ཞལ་གྱི་མན་ངག་མེད་པས་ཡང་དག་པར་གྱུར་པའི་དེ་ཁོ་ན་ཉིད་ཀྱི་མན་ངག་རྟོགས་པར་མི་འགྱུར་རོ། །སྤྱོད་པའི་
ཁྱད་པར་བསྟན་པའི་ཕྱིར་ཞེས་པ་ནི་སྤྲོས་པ་མེད་པའི་སྤྱོད་པའི་ཁྱད་པར་རོ། །བཤད་པའི་རྒྱུད་ནི་དགོངས་པ་ལུང་བསྟན་པའི་བཤད་པའི་རྒྱུད་ལས་སོ། །ཕུང་པོ་ལ་སོགས་པ་ཞེས་པ་ནི་སྔགས་དང་ཕྱག་རྒྱའི་རིམ་པས་དངོས་མེད་པ་ནི་འོད་གསལ་བའི་གོ་འཕང་ཐམས་ཅད་སྟོང་པའི་གནས་

ལ་འཇུག་པའོ། །ཞི་གནས་ལས་བྱུང་ཞེས་པ་ནི། །ཞི་གནས་ཀྱི་བསྒོམ་པས་བྱས་པ་གང་ཡིན་པ་དེ་རྣམས་ནི་སྲོག་གཅོད་པར་བྱེད་པ་སྟེ་སྲོག་ནི་རླུང་ཡོངས་སུ་གྱུར་པ་ལས་སྐྱེས་པའི་ཕུང་པོ་ལྔ་ལ་སོགས་པ་སྤོང་བའི་ཕྱིར་རོ། །དེས་སེམས་རྣམ་པར་དག་པའི་རིམ་པ་བསྟན་ཏོ། །ནང་ཞེས་བྱ་བ་
ལ་སོགས་པས་ནང་དང་ཕྱི་དང་གཉིས་ཀའི་རང་བཞིན་གྱིས་ཆོས་ཐམས་ཅད་སྟོང་པ་ཡིན་ནོ་ཞེས་ལྷག་པར་མོས་པས་ཡེ་ཤེས་ཀྱི་སྐུ་གཟུང་བ་སྔོན་དུ་འགྲོ་བར་བསྟན་པ་གང་ཡིན་པ་དེ་ལ་དགའ་བ་ནི་བརྫུན་སྨྲ་བ་ལ་དགའ་བ་ཞེས་བཤད་པར་བྱ་སྟེ། ལྷའི་བུ་ཆོས་ཐམས་ཅད་བརྫུན་དང་སྒྱུ་མ་ཡིན་
པ་དེ་སྐད་བདག་སྨྲ་བས་ན། དེས་ན་དེ་ནི་བརྫུན་སྨྲ་བ་ཡིན་ནོ་ཞེས་གསུངས་པའི་ཕྱིར་རོ། །གནས་མེད་ལ་གནས་རྣལ་འབྱོར་པའོ། །ཞེས་པ་ནི། སྒྱུ་མ་ལ་སོགས་པའི་དཔེ་བཅུ་གཉིས་ལ་གནས་པ་ཞེས་བྱ་བའི་དོན་ཏོ། །དེས་ནི་བདག་བྱིན་གྱིས་བརླབ་པའི་རིམ་པ་བསྟན་ཏོ། །རྫོགས་
སངས་རྒྱས་ཀྱི་ཡེ་ཤེས་གང་། །ཞེས་པ་ནི་མི་གནས་པའི་མྱ་ངན་ལས་འདས་པའི་རང་བཞིན་དེ་ཁོ་ན་ཉིད་རིམ་པ་ལྔ་པས་ཐོབ་པར་བྱ་བའི་རྡོ་རྗེ་འཆང་ཆེན་པོའི་གོ་འཕང་ཞེས་བྱ་བའི་དོན་ཏོ། །དེ་ཉིད་བསྟན་པས་ན་རྫས་ཞེས་བྱ་བ་སྟེ། བརྟན་པ་སྙིང་པོ་ཁོང་སྟོང་མེད། །ཅེས་པའི་ཕྱིར་རོ། །
དེ་འཕྲོག་ངང་ཚུལ་གང་ཡིན་པ། །ཞེས་པ་ནི་ཟུང་དུ་འཇུག་པའི་ཏིང་ངེ་འཛིན་སྒོམ་པར་བྱེད་པ་གང་ཡིན་པ་དེ་རྣམས་གཞན་གྱི་ནོར་ལ་ཆགས་པར་འདོད་པའི་རྣལ་འབྱོར་པས་བཤད་དོ། །དེས་ནི་ཟུང་དུ་འཇུག་པའི་རིམ་པ་གསལ་བར་བསྟན་པ་ཡིན་ནོ། །དེ་ཉིད་ཅེས་པ་ནི་སྔགས་དང་རླུང་གི་དེ་
ཁོ་ན་ཉིད་རྟོགས་པ་སྔོན་དུ་འགྲོ་བར་མ་ནིང་གི་བཟླས་པའི་དུས་སུ་བྱུང་བའི་འོད་གསལ་བའོ། །དེ་ལ་དངོས་ཅིག་ནི་བསྒོམ་པ་གང་ལ་ཡོད་པ་དེ་ནི་དེ་ཉིད་དངོས་ཅིག་སྟེ་རྡོ་རྗེ་བཟླས་པའི་རྣལ་འབྱོར་པ་ཞེས་བསྟན་ཏོ། །དེ་བཞིན་ཉིད་ནི་ཕྱག་རྒྱ་དང་། །ཏིང་ངེ་འཛིན་གྱི་རིམ་པས་ཐོབ་པའི་འོད་
གསལ་བའི་གནས་སོ། །དེ་ལ་རྟག་ཏུ་སྦྱོར་བ་ནི་མངོན་པར་བྱང་ཆུབ་པའི་རིམ་པ་ཞེས་བྱ་བའི་དོན་ཏོ། །སེམས་ཅན་དེ་དེ་འདོད་པ་ལ་དགའ་ཞེས་པ་ནི་རིམ་པ་དང་པོ་དང་བཞི་པས་ཉེ་བར་བསྟན་པའི་དེ་ཁོ་ན་ཉིད་ལ་འདོད་པའི་རྣལ་འབྱོར་པ་ཞེས་བྱ་བའི་ཐ་ཚིག་གོ། །སྒྲུབ་པ་མཆོག་ལ་

དམ་པར་འགྱུར། །ཞེས་པ་ནི་རྣལ་འབྱོར་པ་ལྔ་པོ་དེ་དག་སྔགས་ཀྱི་ཐེག་པ་ཆེན་པོ་ལ་སྣོད་དུ་གྱུར་པ་རང་དང་གཞན་གྱི་དོན་ཕུན་སུམ་ཚོགས་པར་བྱེད་པ་ཞེས་བྱ་བའི་ཐ་ཚིག་གོ། །དེའི་སྟོང་པ་ཉིད་གཏི་མུག་ལ་ཞེས་པ་ནི་སྟོང་པ་ཉིད་ཀྱི་གཏི་མུག་སྟེ་མི་ཤེས་པ་སྟེ་མ་རིག་པའོ། །
རྒྱུ་དེ་ལས་སྐྲག་པ་ནི་འཇིགས་པ་གང་ཡིན་པ་དེ་དག་གཅིན་གྱི་སྒྲས་ནི་དབང་པོ་རྣམས་བཤད་དོ། །ཡུལ་རྣམས་ལ་འཇུག་པའི་རང་བཞིན་ཡིན་པས་བཤད་པའི་སྒྲས་ནི་ཡུལ་རྣམས་བསྟན་ཏོ། །དེ་དག་ཞི་བ་ཟབ་པ་ཡིན། །ཞེས་པ་ནི་དབང་པོ་དང་ཡུལ་དག་ཡན་ལག་དྲུག་པའི་ཕྱོགས་གཅིག་པ་
སོ་སོར་སྡུད་པའི་རིམ་པས་སྦྱོར་བར་བྱེད་པ་ཞེས་བྱ་བའི་ཐ་ཚིག་གོ། །ཐེག་པ་ཆེན་པོའི་ཆོས་མཆོག་འདིར། །ཞེས་པ་ནི་སྒྲུབ་པར་བྱེད་པ་དཔལ་གསང་བ་འདུས་པ་ཞེས་པ་ཐེག་པ་ཐམས་ཅད་ཀྱི་མཆོག་ལ། །སྣོད་དུ་གྱུར་པ་ནི་སྐལ་བ་དང་ལྡན་པར་འགྱུར་རོ། །དགོངས་པས་བཤད་པ་ཞེས་
པ་ནི་སྲོག་གཅོད་པ་ལ་སོགས་པའི་སྒྲའི་འགལ་བའི་སྒོ་ནས་རིམ་པ་ལྔའི་མཚན་ཉིད་དང་། སོ་སོར་སྡུད་པ་ཞེས་བྱ་བས་དེའི་རང་བཞིན་བསྟན་པའི་ཕྱིར་རོ། །དེ་ནི་རིམ་པ་ལྔ་སྒོམ་པར་བྱེད་པའི་རྣལ་འབྱོར་པ་རྣམས་ལ་ཡེ་ཤེས་ཀྱི་ཕྱག་རྒྱ་དང་སྙོམས་པར་ཞུགས་པས། ཤིན་ཏུ་སྤྲོས་པ་
མེད་པའི་སྤྱོད་པ་བསྟན་ཏོ། །སྤྲོས་པ་དང་བཅས་པའི་སྤྱོད་པ་བསྟན་པར་བྱ་བའི་ཕྱིར། མ་དང་འདྲ་བར་རྗེས་སུ་མཐུན་པའི་ཞེས་པ་ལ་སོགས་པ་སྨོས་སོ། །རིགས་དང་རྗེས་སུ་མཐུན་པས་རྣལ་འབྱོར་པ་ལ་ཆགས་པ་ཉིད་དུ་བསྟན་ཏོ། །འདི་རྣམས་ལས་གང་ཡང་རུང་བ་ཞེས་པ་ནི་མི་བསྐྱོད་
པ་ལ་སོགས་པའི་རིགས་དང་རྗེས་སུ་མཐུན་པའོ། །རང་གི་རིགས་ཀྱི་བུད་མེད་ཅེས་པ་ལ། སྨེ་ཤ་ཅན་དང་། གར་མཁན་དང་ཁྲུས་མཁན་དང་བྲམ་ཟེ་མོ་ལ་སོགས་པའོ། །སྒྲུབ་པའི་ཐབས་ལས་བཤད་པའི་རིམ་པས་ཞེས་པ་ནི་དཀྱིལ་འཁོར་རྒྱལ་བ་མཆོག་གི་ཏིང་ངེ་འཛིན་གྱི་ཕྱོགས་གཅིག་
ཕྱག་རྒྱ་ལེགས་པར་སྦྱང་བས་སོ། །རིགས་ལྔ་བཀོད་པ་ཞེས་བྱ་བ་ལ་སོགས་པས་དེ་ཉིད་གསལ་བར་བསྟན་ཏོ། །མཉེས་པར་བྱས་པ་ནི་རིགས་དང་རྗེས་སུ་མཐུན་པ་ཤིང་གི་སྡོང་པོ་ལ་ཕྱག་ལ་སོགས་པ་བྱས་ནས་མཚལ་ལ་སོགས་པས་བྲིས་པ་ཇི་ལྟར་འདོད་པའི་བཟའ་བ་དང་བཅས་པ་རང་གི་

བརྟུལ་ཞུགས་དང་རྗེས་སུ་མཐུན་པའི་ཕྱག་རྒྱ་དང་བཅས་པའི་རྣལ་འབྱོར་པས་སྙོམས་པར་འཇུག་པར་བྱའོ། །དེ་དངོས་གྲུབ་རྒྱ་ཆེན་པོ་ཞེས་པ་ནི་རྡོ་རྗེ་འཆང་ཆེན་པོའི་གོ་འཕང་གི་མཚན་ཉིད་ཐོབ་པར་འགྱུར་རོ། །མཆོག་གི་ཆོས་ཞེས་པ་ནི་རྣམ་པར་མི་རྟོག་པའི་མཚན་ཉིད་གང་ལ་ཡོད་
པ་དེ་དག །ཐེག་ཆེན་མཆོག་གི་ཆོས་ཉིད་ཅེས་པ་ནི། །ཆོས་ཀྱི་དབྱིངས་ཀྱི་དེ་ཁོ་ན་ཉིད་སོ་སོར་རིག་པས་ཤེས་རབ་ཀྱི་ཕ་རོལ་དུ་ཕྱིན་པའི་རྣལ་འབྱོར་པ་ཞེས་བྱ་བའི་དོན་ཏོ། །དེ་ཡི་ནང་དུ་དངོས་གྲུབ་རྒྱ་ཆེ་ཞིང་། །ཞེས་པ་ལ་རྡོ་རྗེ་འཆང་ཆེན་པོའི་དངོས་གྲུབ་སྟེ་རང་དང་གཞན་གྱི་དོན་སྒྲུབ་
པར་བྱེད་པའི་མཚན་ཉིད་དོ་ཞེས་བྱ་བའི་དོན་ཏོ། །ཕ་རོལ་ཏུ་ཕྱིན་པའི་རྣལ་འབྱོར་པས་ནི་ཡང་དག་པར་རྫོགས་པའི་བྱང་ཆུབ་ཀྱང་རྒྱ་ཆེ་བ་མ་ཡིན་ཏེ། དུས་མང་པོས་ཐོབ་པའི་ཕྱིར་རང་དང་གཞན་གྱི་དོན་ཕུན་སུམ་ཚོགས་པ་ཆུང་བའི་ཕྱིར་རོ། །རྡོ་རྗེ་ཐེག་པ་ལས་དེ་ལས་ལྡོག་པ་ཐམས་ཅད་ཡིན་
ནོ་ཞེས་སྔར་བཤད་ཟིན་ཏོ། །ལྡོག་པ་བསྟན་པར་བྱ་བའི་ཕྱིར་རྗེས་སུ་མི་མཐུན་པའི་ཕྱག་རྒྱ་དང་མཉམ་པར་སྦྱོར་བ་ཞེས་བྱ་བ་ནི་མི་མཐུན་པའི་ཤེས་རབ་དང་འབྲེལ་བས་སོ། །རྗེས་སུ་མཐུན་པ་ནི་རིགས་དང་མཐུན་པ་ཉིད་གལ་ཏེ་རྟག་པར་བྱེད་ན་དེའི་ཚེ་དངོས་གྲུབ་རྟེན་པར་འགྱུར་ཏེ། གཞན་
དུ་ནི་མ་ཡིན་ནོ། །འཇིགས་ཤིང་འཁྲུལ་པའི་སེམས་ལྡན་གཡོ་སྒྱུ་ཅན་དང་གཞན་དབང་འགྱུར། །ཞེས་འབྱུང་ངོ་། །སེམས་གཡེང་བ་སྐྱེ་བར་འགྱུར་རོ་ཞེས་པ་ནི་རྩེ་གཅིག་པ་ཉིད་འཆད་པར་འགྱུར་བ་སྟེ་ཡིད་བདེ་བར་འགྱུར་བའི་ཕྱིར་རོ། །རྗེས་སུ་མཐུན་པ་དེ་ཡང་སྐྱེ་བ་གཞན་དག་ཏུའང་
ཡིད་གཅུགས་པར་འགྱུར་བ་ཞེས་པ་ནི་སྨོན་ལམ་གྱི་དབང་གིས་སོ། །སངས་རྒྱས་ཀྱིས་བྱིན་གྱིས་བརླབས་པའི་མཐུས་ལུང་བསྟན་དེ་དང་འདྲ་བའི་ཤེས་རབ་དང་ཕྲད་པར་འགྱུར་རོ་ཞེས་བྱ་བའི་ཐ་ཚིག་གོ། །དེས་ནི་སྤྲོས་པ་དང་བཅས་པའི་སྤྱོད་པ་བསྟན་ཏོ། །སྔགས་དང་རྒྱུད་ལ་སོགས་པ་ལ། །
ཞེས་པས་སྤྲོས་པ་མེད་པའི་སྤྱོད་པ་བསྟན་པར་བྱ་སྟེ། སྔགས་དང་རྒྱུད་ལ་སོགས་པ་ལ་ལེགས་པར་བསླབས་པའོ་ཞེས་པ་ནི་དབང་ཐོབ་པ་དང་སྔགས་ལ་སོགས་པའི་སྦྱོར་བ་ལ་མཁས་པའོ། །སྒྲུབ་པ་པོ་དང་རྗེས་སུ་མཐུན་པར་ཞེས་པ་ནི་ཕྱག་རྒྱ་ཆེན་པོའི་སྒྲུབ་པའི་ཡན་ལག་ཏུ་གྱུར་པ་

དམ་ཚིག་གི་ཕྱག་རྒྱ་ཞེས་བྱའོ། །མ་རྙེད་ན་ཞེས་པ་ནི་དཀོན་པའམ་སྒྲུབ་པ་པོ་དགེ་སློང་ཡིན་པས་སོ། །སངས་རྒྱས་ཀྱི་ཡུམ་ཤེས་རབ་ཀྱི་ཕ་རོལ་དུ་ཕྱིན་པ་ཞེས་པ་ནི། གང་ལས་སངས་རྒྱས་ཐམས་ཅད་འབྱུང་བ་དེ་ནི་སངས་རྒྱས་ཀྱི་ཡུམ་སྟེ། དེ་བཞིན་གཤེགས་པ་ཐམས་ཅད་
ཀྱི་ཡུམ་ཞེས་བྱ་བའི་དོན་ཏོ། །གང་ཞིག་ཀུན་མཁྱེན་ཉིད་ཀྱིས་ཞི་བར་འདོད་པའི་ཉན་ཐོས་པ་རྣམས་ཉེ་བར་ཞི་མཛད་པ། །གང་ཞིག་ལམ་མཁྱེན་ཉིད་ཀྱིས་འགྲོ་ལ་ཕན་འདོགས་མཛད་པས་སེམས་ཅན་དོན་རྫོགས་པ། །གང་དང་འབྲེལ་པས་རྣམ་པ་ཐམས་ཅད་སྣ་ཚོགས་འདི་ཉིད་ཐོབ་པ་རྣམས་
ཀྱི་རིགས། །ཉན་ཐོས་བྱང་ཆུབ་སེམས་དཔའི་ཚོགས་དང་ལྡན་པ་སངས་རྒྱས་ཀྱི་ཡུམ་དེ་ལ་འདུད། །ཅེས་འབྱུང་ངོ་། །དེ་ཉིད་བསྟན་པར་བྱ་བའི་ཕྱིར། །རང་གི་སྙིང་ལ་གནས་པ་ཞེས་སྨོས་ཏེ། བསྒོམ་པར་བྱ་བའི་ཐ་ཚིག་གོ། །ཕྱུང་ལ་ནི་ཡིད་ཀྱི་རང་བཞིན་ཉིད་དུ་རྫོགས་པར་བྱའོ་ཞེས་བྱ་བའི་
ཐ་ཚིག་གོ། །དེ་དང་ལྷན་ཅིག་སྙོམས་པར་འཇུག་པར་བྱ་སྟེ་ཞེས་པ་ནི་ནགས་ཚལ་དུ་སློང་མོ་ཟ་བའི་མཚན་ཉིད་ཅན་གྱི་རྫུ་འཕྲུལ་ཤུགས་དང་ཡེ་ཤེས་ཀྱི་ཕྱག་རྒྱ་དང་ལྷན་ཅིག་ཏུ་བདེ་བ་ཆེན་པོ་ཉམས་སུ་མྱོང་བར་བྱའོ་ཞེས་བྱ་བའི་དོན་ཏོ། །ལུང་གི་ཚད་མ་ཉིད་བསྟན་པར་བྱ་བའི་ཕྱིར་སྙིང་ལ་
གནས་པ་ཞེས་སྨོས་ཏེ། ཡིད་ཀྱི་ངོ་བོ་ཉིད་དུ་བསྒོམ་པའོ། །ལྷ་མོ་ཆེ་ཞེས་པ་ནི་ཡེ་ཤེས་ཀྱི་ཕྱག་རྒྱ་ཞེས་བྱའོ། །རྣལ་འབྱོར་པའི་ཞེས་པ་ནི་ཐབས་དང་ཤེས་རབ་སྙོམས་པར་འཇུག་པའི་མཚན་ཉིད་ཀྱི་སྦྱོར་བ་དང་ལྡན་པའོ། །རྣལ་འབྱོར་སྐྱེད་ཅེས་པ་ནི། །ཏིང་ངེ་འཛིན་གྱི་བདེ་བ་སྟེར་
བར་བྱེད་པའོ། །དེ་ཉིད་ཀྱི་ཕྱིར་སངས་རྒྱས་ཀུན་གྱི་ཡུམ་དུ་གྱུར་པ་ནི་སྔར་གྲུབ་པའི་དེ་བཞིན་གཤེགས་པ་རྣམས་ཀྱི་ཡུམ་སྟེ་སེམས་ཙམ་མོ། །ཤེས་རབ་ཀྱི་ཕ་རོལ་དུ་ཕྱིན་པའི་ངོ་བོ་ཡེ་ཤེས་ཀྱི་ཕྱག་རྒྱ་བླངས་ནས་བཅོམ་ལྡན་འདས་སངས་རྒྱས་རྣམས་ཀྱིས་དངོས་གྲུབ་ཐོབ་པར་གྱུར་
ཏོ། །རྡོ་རྗེ་དབྱིངས་ཀྱི་དབང་མོར་བཤད། །ཅེས་པ་ནི། རྡོ་རྗེ་ལྟར་མི་ཕྱེད་པའི་དབྱིངས་ནི་རྡོ་རྗེ་དབྱིངས་ཏེ། ཆོས་ཀྱི་དབྱིངས་ཀྱི་ཡེ་ཤེས་སོ། །དེ་ལ་དབང་མོ་ནི་ཆོས་ཉིད་ཀྱི་ངོ་བོས་བདག་པོ་ཉིད་དུ་གནས་པ་ཞེས་བྱའོ། །མཉེས་པར་བྱས་ཀྱང་ཞེས་བྱ་བ་ལ་སོགས་པས་དམ་ཚིག་དང་ཡེ་ཤེས་

ཀྱི་ཕྱག་རྒྱ་དག་ཉེ་བར་བསྡུས་པ་དག་བསྟན་ཏོ། །མཆོག་ཏུ་དགའ་བའི་བདེ་བ་ཉམས་སུ་མྱོང་བར་བྱས་པས་ནི་ཞེས་པ་ལ་བདེ་བ་ཆེན་པོས་ཡང་དག་པར་རིགས་པས་སོ། །འདོད་ཆགས་ལ་སོགས་པའི་ཉོན་མོངས་པས་གོས་པར་མི་འགྱུར་བའོ་ཞེས་པ་ནི་འདོད་ཆགས་ལ་སོགས་པ་རྣམ་པར་སྦྱང་
བར་བྱ་བའི་ཕྱིར་ཕྱག་རྒྱ་རྣམས་བླང་བར་བྱའོ། །ཇི་སྐད་དུ། སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཡེ་ཤེས་གསུམ་གྱི་དབྱེ་བས་ནི། །གསལ་བར་འདི་ལས་མཚོན་པས་སོ། །རྡོ་རྗེ་པདྨ་ཡང་དག་སྦྱར། །ཀུན་རྫོབ་ཏུ་ནི་གང་ལའང་མེད། །ལན་ཅིག་ཏུ་ནི་
ཉམས་མྱོང་བས། །རྣལ་འབྱོར་སྟོབས་ཀྱིས་འགྲུབ་པར་འགྱུར། །ཡེ་ཤེས་འཇུག་པའི་རང་བཞིན་ནི། །ཇི་ལྟར་དབྱེ་བ་ཤེས་ནས་ནི། །སླར་ཡང་རང་བཞིན་དེ་ཉིད་དེ། །རྣལ་འབྱོར་པས་ནི་རྟག་ཏུ་མཚོན། །འདོད་ཆགས་ལ་སོགས་ཞེས་བྱ་བ་ལ་སོགས་པས་འདོད་ཆགས་ལ་སོགས་པ་རྣམ་པར་
སྦྱོང་བ་འབའ་ཞིག་ཏུ་མི་འགྱུར་གྱི་འོན་ཀྱང་སངས་རྒྱས་ཉིད་ཀྱང་ཐོབ་པར་འགྱུར་རོ་ཞེས་བསྟན་ཏོ། །ལེགས་པར་བསླབས་པའི་ཕྱག་རྒྱ་ཞེས་པ་ནི། །ཤེས་རབ་ཀྱི་རྣམ་གྲངས་ཡིན་པས་སོ། །ངོ་བོ་ཉིད་ཤེས་པས་ཞེས་པ་ནི་གང་གི་དོན་དུ་འཇུག་པ་དེ་ཉིད་མངོན་དུ་བྱས་པས་སོ། །དེ་ཡི་
རང་བཞིན་མི་ཤེས་པས། །མི་ཤེས་མུན་པས་བསྒྲིབས་པ་རྣམས། །དགེ་དང་མི་དགེའི་ལས་བྱས་ནས། །འགྲོ་བ་ལྔར་ནི་འཁོར་བར་འགྱུར། །ཞེས་འབྱུང་ངོ་། །བདག་ཉིད་རྫོགས་པར་འགྱུར་བ་སྟེ། །ཞེས་པ་ནི་འབད་པ་མེད་པར་འགྲུབ་པར་འགྱུར་རོ། །དངོས་པོའི་ཆོས་ནི་འདི་ཉིད་
ཡིན་ཏེ་དམ་ཚིག་གི་ཕྱག་རྒྱ་དང་ཡེ་ཤེས་ཀྱི་ཕྱག་རྒྱ་འབྲེལ་པས་དེ་ཁོ་ན་ཉིད་སྣང་ངོ་། །དྲང་བའི་དོན་ནི་སྤྲོས་པ་མེད་པའི་སྤྱོད་པ་བཤད་པས་སོ། །ཡང་ལུང་གིས་བརྗོད་པར་བྱ་སྟེ་ཞེས་པ་འདིས་ཤིན་དུ་སྤྲོས་པ་མེད་པའི་སྤྱོད་པ་བསྟན་པར་བྱ་སྟེ། ཆོས་སྐུར་མཚན་ཉིད་གཅིག་པའོ་ཞེས་པ་ནི་
ཆོས་ཀྱི་སྐུའི་རང་བཞིན་ཉིད་དེ་དེ་བཞིན་ཉིད་ཅེས་བྱ་བ་ཡུམ་མོ། །ཇི་སྐད་དུ། གཅིག་མིན་དུ་མ་མ་ཡིན་རང་གཞན་ཕན་འདོགས་ཕུན་སུམ་ཚོགས་ཆེན་གཞིར་གྱུར་པ། །དངོས་མིན་དངོས་མེད་མ་ཡིན་མཁའ་བཞིན་རོ་གཅིག་ངོ་བོ་རྟོགས་པར་དཀའ། །གོས་མེད་འགྱུར་མེད་ཞི་བ་

མི་མཉམ་དང་མཚུངས་ཁྱབ་བྱེད་སྤྲོས་པ་མེད། །རང་གིས་རིག་པ་དཔེ་མེད་རྒྱལ་བའི་ཆོས་ཀྱི་སྐུ་ལ་རྟག་ཏུ་འདུད། །ཅེས་འབྱུང་ངོ་། །ཤེས་རབ་ཀྱི་ཕ་རོལ་དུ་ཕྱིན་པ་ཞེས་པ་ནི་སེམས་རྣམ་པར་དག་པའི་རིམ་པས་ཐོབ་པར་བྱེད་པའི་ཐབས་སྟོང་པའོ། །དེ་ཉིད་ཡུམ་
སྟེ་བསྒོམས་པའི་རང་བཞིན་གྱི་འབྲས་བུར་གྱུར་པ་དང་དེ་ལས་ཆོས་ཐམས་ཅད་འབྱུང་བའི་ཕྱིར་རོ། །དབྱིབས་དང་ཁ་དོག་སྣ་ཚོགས་པའི། །ཇི་ལྟར་སྤྲིན་རྣམས་དུ་མ་སྟེ། །ནམ་མཁའི་ཁམས་ནས་བྱུང་ནས་ནི། །དེ་ཉིད་དུ་ནི་ཐིམ་པར་འགྱུར། །དེ་བཞིན་རང་བཞིན་ཐམས་ཅད་ནི། །སྣང་བ་གསུམ་
གྱི་རྒྱུར་གྱུར་པ། །ཡུལ་ནི་མ་ལུས་ལ་འཇུག་ནས། །འོད་གསལ་བར་ནི་ཞུགས་པར་འགྱུར། །ཇི་ལྟར་ཆུ་བོ་དང་བ་ལས། །ཉ་ནི་མྱུར་དུ་ལྡང་བར་འགྱུར། །ཐམས་ཅད་སྟོང་པ་དམ་པ་ལས། །དེ་བཞིན་སྒྱུ་འཕྲུལ་དྲ་བ་འབྱུང་། །ཞེས་བཤད་པས་སོ། །གཉིས་མེད་དེ་བཞིན་ཉིད་སྦྱོར་བས། །ཞེས་
པ་ནི་སེམས་རྣམ་པར་དག་པའི་རིམ་པས་སོ། །དངོས་མེད་ཅེས་བྱ་དོན་སྤྱོད་པའོ་ཞེས་པ་ནི་མངོན་དུ་བྱའོ། །དེས་ནི་སེམས་རྣམ་པར་དག་པའི་རིམ་པ་བསྟན་ཏོ། །ལོངས་སྤྱོད་རྫོགས་དང་མཉམ་གང་ཡིན། །ཞེས་པ་ནི་ཅིག་ཅར་རམ་སྣང་བ་ཉེ་བར་ཐོབ་པ་ལ་སོགས་པའི་རིམ་པས་
སྤྲོས་པའི་སྐུའོ། །དེ་ཉིད་སྲིང་མོ་ནི་སྒྱུ་མའི་དཔེ་བཅུ་གཉིས་ཀྱིས་ཉེ་བར་མཚོན་པའོ། །རང་ལྷའི་རྣལ་འབྱོར་ལྡན་པ་ཡིས། །ཞེས་པ་ནི་མི་བསྐྱོད་པ་ལ་སོགས་པ་དེ་བཞིན་གཤེགས་པའི་མོས་པ་དང་ལྡན་པས་སོ། །གསང་སྔགས་ལུགས་ཀྱིས་མཉེས་པར་ཞེས་
པ་ནི་ཡེ་ཤེས་ཀྱི་སྐུ་བསྒོམ་པར་བྱའོ། །དེས་ནི་བདག་ལ་བྱིན་གྱིས་བརླབ་པའི་རིམ་པ་བསྟན་ཏོ། །སྤྲུལ་སྐུའི་གཟུགས་ཅན་བུ་མོ་ཞེས་པ་ནི་མིག་ཡོར་དང་སྒྱུ་མ་དང་འདྲ་བའི་རྡོ་རྗེའི་སྐུའི་མཚན་ཉིད་ཀྱི་ཟུང་དུ་འཇུག་པའི་རིམ་པས་ཐོབ་པར་བྱ་བའི་སྐུ་ཞེས་པའི་དོན་ཏོ། །སྒྲུབ་པ་པོས་ནི་བསྒོམ་པ་
ཞེས་པ་ཉེ་བར་བསྡུས་པའོ། །མ་དང་ཞེས་བྱ་བ་ལ་སོགས་པ་སྔ་མ་བཞིན་དུ་ཕན་ཡོན་བསྟན་ཏོ། །དེས་ནི་ཟུང་དུ་འཇུག་པའི་རིམ་པ་བསྟན་པ་ཡིན་ནོ། །ངེས་པའི་དོན་ཏོ་ཞེས་པ་ནི་སེམས་རྣམ་པར་དག་པ་དང་བདག་ལ་བྱིན་གྱིས་བརླབ་པ་དང་ཟུང་དུ་འཇུག་པའི་རིམ་པ་བསྟེན་པས་སོ། །དེས་ནི་

སེམས་ཤིན་ཏུ་སྤྲོས་པ་མེད་པའི་སྤྱོད་པ་བསྟན་ཏོ། །ཆོས་འབྱུང་མངོན་པར་བྱང་ཆུབ་པ། །ཆགས་སོགས་རོལ་མོ་རྒྱ་ཆེ་བས། །ཆོས་དབྱིངས་མངོན་པར་བྱང་ཆུབ་པ། །ཇི་ལྟར་རྙེད་པའི་སྤྱོད་པ་ཡིས། །བླ་མེད་མངོན་པར་བྱང་ཆུབ་པ། །མངོན་པར་བྱང་ཆུབ་སྦྱོར་བ་ཡིས། །སྤྲོ་བ་ལ་
སོགས་སྤྱོད་པ་ནི། །རྣལ་འབྱོར་པ་རྣམས་སློབ་པར་བྱེད། །ཅེས་འབྱུང་ངོ་། །རིགས་ངན་ལ་སོགས་པ་ཞེས་བྱ་བ་ལ་སོགས་པས་སྣོད་དུ་མ་གྱུར་པ་རྣམས་ཀྱིས་ཀྱང་འབད་པ་ཆེན་པོས་བསྒྲུབ་པར་བྱ་བ་སངས་རྒྱས་ཀྱི་གོ་འཕང་སྣོད་མ་ཡིན་པའི་སྐྱེ་བོས་ཐོབ་པ་ཐོས་ན་ངོ་མཚར་ལ་སོགས་པ་འགྱུར་
བ་བསྟན་ཏོ། །སྒྲིབ་པ་རྣམ་པར་སེལ་བ་ལ་སོགས་པ་ཞེས་པ་ནི་ལས་ཀྱི་རིགས་ཅན་གྱི་བྱང་ཆུབ་སེམས་དཔའ་གཟུང་བ་སྟེ་སྤྱོད་པ་དང་མཐུན་པའི་ཕྱིར་རོ། །སྤྱད་པ་ནི་སྤྱོད་པའི་མཚན་ཉིད་དེ་བྱ་བ་ནན་ཏན་གྲུབ་པའི་ཡེ་ཤེས་ཀྱི་རང་བཞིན་དང་རླུང་གི་ཁམས་རྣམ་པར་དག་པའི་ངོ་བོ་ཉིད་ཀྱིས་
སོ། །གཞན་དུ་ན་འཇམ་དཔལ་ལ་སོགས་པ་ཅི་སྟེ་མ་བླངས་སོ་ཞེས་ཚིག་གི་དོན་ཏོ། །པདྨ་དཀར་པོ་ལྟ་བུའི་གང་ཟག་ལ་སོགས་པ་དབང་པོ་རྟུལ་པོ་ཞེས་པ་ནི་མ་འོངས་པའི་སེམས་ཅན་དང་མཐུན་པའི་རོལ་མོ་རབ་ཏུ་བསྟན་པར་བྱེད་པའི་བྱང་ཆུབ་སེམས་དཔའ་རྣམས་ཀྱིས་དེ་དག་རྗེས་སུ་གཟུང་
བར་བྱ་བའི་དོན་དུ་དེ་ལྟ་བུའི་སྤྱད་པ་སྤྱོད་དེ། གཞན་དུ་ན་འཁྲུལ་པ་དང་ཉོན་མོངས་པ་མེད་པའི་བྱང་ཆུབ་སེམས་དཔའ་རྣམས་ཀྱིས་སྔར་མེད་པའི་ཐོབ་པར་བྱ་བ་ཅི་ཡོད་དོ། །གང་ཐོས་པས་དེ་རྣམས་ངོ་མཚར་བ་དང་རྨད་དུ་བྱུང་བ་ཐོབ་པར་འགྱུར་རོ། །བདེ་བ་ཆེན་པོ་ཞེས་བྱ་གཙོ་བོས་ནི། །རྣམ་
པ་སྣ་ཚོགས་རོལ་མོའི་མཆོག་ལ་འཇུག །གང་དུ་སྤྲོས་པ་ཐམས་ཅད་དང་བྲལ་བས། །གཅིག་ཀྱང་དུ་མའི་རོ་ཡིས་གར་མཛད་པའོ། །ཞེས་འབྱུང་ངོ་། །རྡོ་རྗེའི་ཚིག་རྣམས་ཤེས་པ་ནི། །དོན་ཟབ་པ་ཡི་ཚིག་རྣམས་སོ། །དགོངས་པས་བཤད་པ་ལ་ཞེས་པ་ནི་འཇིག་རྟེན་དང་འགལ་བའི་ཚིག་གིས་དེ་
ཁོ་ན་ཉིད་སོ་སོར་སྟོན་པར་བྱེད་པའོ། །སྒྲ་ཇི་བཞིན་པའི་དོན་ལ་ཞེས་པ་ནི་བརྗོད་པར་བྱ་བའི་ཚུལ་དུ་དོན་གཟུང་བར་བྱ་བ་ཡིན་གྱི་གསལ་བར་བྱ་བའི་ཚུལ་དུ་མ་ཡིན་ནོ། །བརྗོད་པར་བྱ་བ་དང་གསལ་བར་བྱ་བ་ནི་སྒྲའི་དོན་གཉིས་ཏེ་སྔར་གཏན་ལ་ཕབ་པའོ། །ཅི་ཞེས་པ་ནི་སྨོད་པའི་དོན་ལ་སྦྱོར་བས་

སྨད་པར་བྱ་བ་བསྟན་པ་ཞེས་དགོངས་པའོ། །བཅོམ་ལྡན་འདས་ནི་ཚོགས་གཉིས་དང་ལྡན་པ་ཞེས་པ་ནི་ཀུན་རྫོབ་དང་དོན་དམ་པའི་བདག་ཉིད་ཀྱི་རྒྱུ་དང་འབྲས་བུ་མངོན་དུ་མཛད་པ་དང་སེམས་ཅན་རྣམས་ལ་དེ་སྟོན་པར་མཛད་པའོ། །འཕགས་པར་གྱུར་པ་ཞེས་པ་ནི་མི་བསྐྱོད་པ་ལ་
སོགས་པ་དེ་བཞིན་གཤེགས་པའི་ནང་ནས་གཙོ་བོར་གྱུར་པ་དེ་ཇི་ལྟར་དེ་བཞིན་དུ་བསྟན་པའོ་ཞེས་པས་སྨོད་དོ། །ཚིག་འདི་ཉིད་ཀྱིས་ནི་ཞེས་པ་ནི། །སྔར་བཤད་པས་སོ། །རང་མཐོང་བཞིན་དུ་གཞན་རྣམས་ལ། །ངེས་པར་བསྐྱེད་པར་བྱ་བའི་ཕྱིར། །དམ་པ་རྣམས་ཀྱིས་འཇུག་པ་སྟེ། །
རྟག་ཏུ་སླུ་བ་མེད་པས་སོ། །ཞེས་བྱང་ཆུབ་སེམས་ཀྱི་རྣམ་འགྲེལ་ལས་འབྱུང་ངོ་། །དེ་བཞིན་དུ། སྐྱོབ་པ་རང་མཐོང་ལམ་སྟོན་པའོ། །ཞེས་འབྱུང་ངོ་། །དེ་ལྟར་གྱུར་པ་གང་ཡིན་པ་དེས་ནི་ཚིག་ངན་པ་སྟོན་པ་མི་རིགས་སོ་ཞེས་བྱ་བས་ཚིག་ངན་པ་གསུངས་པའི་གནས་མ་ཡིན་པར་བསྟན་ཏོ་ཞེས་
བཤད་དོ། །རྫོགས་པ་དང་མ་རྫོགས་པ་ཞེས་པ་ནི་ཙནྡན་ལ་སོགས་པ་དང་རིན་པོ་ཆེ་ལྟ་བུའི་གང་ཟག་རྣམས་སོ། །དེའི་ཚུལ་རྗེས་སུ་བྱེད་པ་བྱང་ཆུབ་སེམས་དཔའ་དང་དེ་བཞིན་གཤེགས་པ་རྣམས་ཡིན་ཏེ་ས་བཅུ་པ་དང་བཅུ་གཅིག་པ་ཐོབ་པའི་ཕྱིར་རོ། །དེར་ཡང་ཞེས་བྱ་བ་ལ་སོགས་པ་འདིས་
གསུང་བ་ནི་མི་རིགས་སོ་ཞེས་བསྟན་ཏོ། །འཕགས་པ་མ་ཡིན་པ་རབ་ཏུ་འཇུག་པའི་ལས་ཀྱི་མཚན་ཉིད་དོ། །ཞེས་པ་ནི་མི་དགེ་བའི་ལས་ཏེ་ལུས་ལ་སོགས་པའི་རྣམ་པ་བཅུ་མི་དགེ་བའི་ལས་རྣམ་པ་བཅུ་ཞེས་བྱ་བའི་དོན་ཏོ། །དེ་གསུང་བས་ན་གསུངས་པ་སྟེ། །ཞེས་པ་ནི་བཅོམ་ལྡན་འདས་
ཀྱི་བཀའ་ལུང་ངོ་། །ཚིག་ངན་པ་ཞེས་བྱ་བ་ལ་སོགས་པ་ནི་ལས་འཛིན་པའི་བསྡུ་བའོ། །མི་བསྐྱོད་པ་ལ་སོགས་པས་ཞེས་པ་ནི་ཐུགས་རྡོ་རྗེ་ལ་སོགས་པས་སོ། །དེ་ལ་འདི་སྐད་ཅེས་བཀའ་སྩལ་ཏོ། །ཞེས་པ་ནི་བྱང་ཆུབ་སེམས་དཔའ་རྣམས་ལ་ལན་སྟོན་ཏེ་རྡོ་རྗེ་འཆང་ཆེན་པོ་དང་དེ་བཞིན་
གཤེགས་པ་ལ་སོགས་པ་རྣམས་ཀྱང་དབྱེར་མེད་པའི་ཕྱིར་རོ། །གཞན་དུ་ན་རྡོ་རྗེ་འཆང་ཆེན་པོ་གསུང་བ་པོ་ཡིན་ན། དེ་ཉིད་ཀྱིས་ཐེ་ཚོམ་སེལ་བར་བྱ་བའི་རིགས་པ་ཡིན་ནོ་ཞེས་པ་ཅིའི་ཕྱིར་དེ་བཞིན་གཤེགས་པ་རྣམས་ཀྱིས་ལན་བཏབ་པར་འགྱུར་རོ། །བཟློག་པ་སྟེ་ཞེས་པ་ནི་ཡོངས་སུ་རྫོགས་

པས་བཟློག་པ་ཞེས་བྱའོ། །ཁྱེད་རྣམས་ཀྱི་བསམ་པ་ཤེས་ཀྱིས་ཞེས་བྱ་བ་ལ་སོགས་པས་དོན་དེ་ཉིད་བསྟན་ཏོ། །དགོངས་པ་དེ་ཉིད་བསྟན་པའི་ཕྱིར། །བཅོམ་ལྡན་འདས་ཀྱི་དགོངས་པས་བཤད་པའི་ཞེས་བྱ་བ་ལ་སོགས་པས་དེ་ཉིད་ཀྱི་དོན་སྟོན་པར་བྱེད་པའི་དགོངས་པས་བཤད་པས་བརྗོད་པར་
བྱ་བའི་ཚིག་རྣམས་ནི་ཟབ་པ་མ་ཡ