Kinh tạng Tây Tạng (Kangyur Đại Học) — 096_རྒྱུད་འབུམ།_ཝ

མདོ་
སྡེ་འདི་མཚན་ཉིད་གང་གིས་ན་ཇི་ལྟར་དེ་བཞིན་གཤེགས་པའི་སྤྲུལ་པ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཕགས་པ་སྤྱན་རས་གཟིགས་དབང་ཕྱུག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་དུས་ཀྱི་ཚེ་དེ་བཞིན་གཤེགས་
པའི་ལས་རྣམས་མདོ་སྡེ་འདིས་བྱེད་པར་འགྱུར་ཏེ། མཚན་ཉིད་དེས་ན་དེ་བཞིན་གཤེགས་པའི་སྤྲུལ་པ་ཞེས་བྱའོ། །མདོ་སྡེ་འདི་ཡོངས་སུ་ནུབ་པའི་ཚེ། དེ་དེ་བཞིན་གཤེགས་པའི་བསྟན་པ་ཡོངས་སུ་ནུབ་པར་འགྱུར་ཏེ། མཚན་ཉིད་དེས་ན་དེ་བཞིན་གཤེགས་

པའི་སྤྲུལ་པ་ཞེས་བྱའོ། །མདོ་སྡེ་འདི་འཚོ་ཞིང་སྡོད་ན་དེ་བཞིན་གཤེགས་པའི་བསྟན་པ་ཡང་འཚོ་ཞིང་སྡོད་དེ། མཚན་ཉིད་དེས་ན་དེ་བཞིན་གཤེགས་པའི་སྤྲུལ་པ་ཞེས་བྱའོ། །དེ་བཞིན་གཤེགས་པ་ཐམས་ཅད་ཀྱང་མདོ་སྡེ་འདི་ཉིད་ལ་ཕྱག་འཚལ་ཏེ།
མཚན་ཉིད་དེས་ན་དེ་བཞིན་གཤེགས་པའི་སྤྲུལ་པ་ཞེས་བྱའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་བཅོམ་ལྡན་འདས་ལ་རྗེས་སུ་ཡི་རངས་ནས་བཀའ་ལུང་བཞིན་བགྱི་ཞིང་། སུ་མདོ་སྡེ་འདི་འཆང་བའི་གན་དུ་མཆིའོ་ཞེས་གསོལ་པ་དང་། བཅོམ་ལྡན་འདས་
ཀྱིས་བཀའ་སྩལ་པ། མདོ་སྡེ་འདི་ཉིད་ཀྱི་མཐུས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། ལྷ་ཐམས་ཅད་ཀྱང་འོང་ངོ་། །ལྷ་ཐམས་ཅད་ཀྱིས་འདི་སྐད་ཅེས་གསོལ་ཏོ། །ལེགས་སོ་ལེགས་སོ། །བདག་ཅག་ཀྱང་དམ་པ་སྩལ་བར་མངོན་པར་དགའ་སྟེ།
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་དམ་པ་འདི་ཉིད་སྩོལ་བ་མཛད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། གསང་བ་པའི་བདག་པོ་ལག་ན་རྡོ་རྗེ་སྟོབས་པོ་ཆེའི་གསང་བའི་སྙིང་པོ་ནི་སེམས་ཅན་ཐམས་ཅད་ལ་བདེ་བ་ཐམས་ཅད་སྦྱིན་པར་
བྱེད་པའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་མཚན་ཉིད་གང་གིས་ན་མདོ་སྡེ་འདི་ཆོས་ཀྱི་དབྱིངས་སྔོན་དུ་འགྲོ་བ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ།
རིགས་ཀྱི་བུ་དེ་བཞིན་གཤེགས་པ་ཐམས་ཅད་བྱུང་ནས་ཞག་སུམ་ཅུ་རྩ་གཉིས་ལོན་པའི་ཉིན་མོ་རི་བཏང་བཟུང་ཆེན་པོར་མདོ་སྡེ་འདི་ཉིད་ཀྱི་ཆོས་བསྟན་ཏེ། མཚན་ཉིད་དེས་ན་ཆོས་ཀྱི་དབྱིངས་སྔོན་དུ་འགྲོ་བ་ཞེས་བྱའོ། །མདོ་སྡེ་འདི་ཉིད་ཀྱི་མཐུས་སངས་རྒྱས་དང་བྱང་ཆུབ་སེམས་
དཔའ་ཐམས་ཅད་སེམས་དང་པོ་བསྐྱེད་པ་ལ་གནས་ཏེ། མཚན་ཉིད་དེས་ན་ཆོས་ཀྱི་དབྱིངས་སྔོན་དུ་འགྲོ་བ་ཞེས་བྱའོ། །མདོ་སྡེ་འདི་ཉིད་ཀྱི་མཐུས་ལྷའི་བུ་གྲངས་མེད་དཔག་ཏུ་མེད་པ་དག་རྒྱུན་དུ་ཞུགས་པར་གྱུར་ཏོ། །རིགས་ཀྱི་བུ་སུ་མདོ་སྡེ་འདི་འཆང་བ་དང་ཀློག་པ་དེ་ལ་

དེ་བཞིན་གཤེགས་པ་ཐམས་ཅད་སྲས་སུ་འདུ་ཤེས་བསྐྱེད་དོ། །འཁོར་དེ་ཉིད་དུ་འཆི་བའི་དུས་བྱས་ནས་མྱ་ངན་ལས་འདས་པའི་ལམ་ལ་འཇོག་པར་མཛད་དོ། །ལག་ན་རྡོ་རྗེས་གསོལ་པ། སངས་རྒྱས་འཁོར་བ་བགྲོད་དཀར་སེམས་ཅན་གྱི། །སྲིད་པའི་ཕུར་བ་འབྱིན་ཅིང་ཤེས་
རབ་ཀྱིས། །སྲིད་ཕུར་སེམས་ཀླུང་འཇོམས་ཤིང་ཐུབ་པ་ཡི། །ཆོས་བསྟན་པས་ནི་སྡིག་འཇོམས་ཆོས་ལེགས་སྤྱོད། །བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེས་ལེགས་པར་རབ་ཏུ་བཤད་པ་ལེགས་སོ་ལེགས་སོ། །ལག་ན་རྡོ་རྗེས་གསོལ་པ། སུ་མདོ་སྡེ་
འདི་འཆང་བ་དང་། ཀློག་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པས་བསོད་ནམས་ཀྱི་ཕུང་པོ་ཅི་ཞིག་འཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སུ་མདོ་སྡེ་འདི་འཆང་བ་དང་། ཀློག་པ་དང་། གཞན་དག་ལ་
ཡང་རྒྱ་ཆེར་ཡང་དག་པར་རབ་ཏུ་སྟོན་པ་ནི་ཏིང་ངེ་འཛིན་བྱེ་བ་འཐོབ་པར་འགྱུར་རོ། །སངས་རྒྱས་དང་། བྱང་ཆུབ་སེམས་དཔའ་འཁོར་དང་བཅས་པ་བྱེ་བ་མཐོང་བར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱེ་བ་ཁྲག་
ཁྲིག་བརྒྱ་སྟོང་ཕྲག་མང་པོ་མཐོང་ནས། བསམ་པ་རྒྱ་ཆེན་པོས་བསྟི་སྟང་བྱེད་པར་འགྱུར་རོ། །བླ་མར་བྱེད་པར་འགྱུར་རོ། །རིམ་གྲོར་བྱེད་པར་འགྱུར་རོ། །མཆོད་པར་བྱེད་པར་འགྱུར་རོ། །ཆོས་གོས་དང་། བསོད་སྙོམས་དང་། མལ་ཆ་དང་། ན་བའི་གསོས་སྨན་
དང་། ཡོ་བྱད་རྣམས་ཀྱང་འབུལ་ལོ། །བྱང་ཆུབ་སེམས་དཔའ་ལ་ཡང་བདེ་བར་སྦྱར་བ་སྒྲུབ་བོ། །དགེ་འདུན་གྱི་ཚོགས་ལ་ཡང་རིམ་གྲོ་བྱེད་པར་འགྱུར་རོ། །དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་དོ། །
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་བསྙེན་བཀུར་བྱེད་པར་འགྱུར་རོ། །དེ་དག་གིས་ཆོས་བསྟན་པ་དེ་ལ་ཡང་བསྟི་སྟང་དུ་བྱས་ཏེ་ཉན་ཏོ། །འཛིན་ཏོ། །ཀློག་གོ། །བྱང་ཆུབ་སེམས་དཔའ་ལག་ན་རྡོ་རྗེ་ཇི་ལྟ་བ་དང་།

མཚུངས་པར་སྟོབས་ཀྱི་ཕ་རོལ་གནོན་པར་འགྱུར་རོ། །སྟོབས་པོ་ཆེ་ཕ་རོལ་གནོན་པའི་ཁྲོ་བོ་འདིའི་མཐུས་བདག་དང་སེམས་ཅན་ཐམས་ཅད། སྭ་སྟི་སྭ་སྟི། སིད་དྷི་སིད་དྷི་སྭཱ་ཧཱ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། འཕགས་པ་
བྱམས་པ་དང་། འཇམ་དཔལ་དང་། འཕགས་པ་སྤྱན་རས་གཟིགས་དབང་ཕྱུག་ལ་སོགས་པ་བསྐལ་བ་བཟང་པོའི་བྱང་ཆུབ་སེམས་དཔའ་ཐམས་ཅད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་སོགས་པ། ཕྱོགས་བཅུའི་འཇིག་རྟེན་གྱི་
ཁམས་ནས་འདུས་པ་དེ་དག་ཐམས་ཅད་དང་། ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དེ་དག་ཐམས་ཅད་དང་། ཐམས་ཅད་དང་
ལྡན་པའི་འཁོར་དེ་དང་། ལག་ན་རྡོ་རྗེ་ཡང་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ།། །།འཕགས་པ་སྟོབས་པོ་ཆེ་ཞེས་བྱ་བའི་ཐེག་པ་ཆེན་པོའི་མདོ་རྫོགས་སྷོ།། །།རྒྱ་གར་གྱི་མཁན་པོ་ཤཱི་ལེནྡྲ་པོ་དྷི་དང་། ཛི་ནམ་ཏྲ་དང་། ཞུ་
ཆེན་གྱི་ལོ་ཙྪ་བ་བནྡ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅༅། །རྒྱ་གར་སྐད་དུ། །ཨཱརྱ་བཛྲ་ཤྲི་ཁ་ལ་སྱ་ཏནྟྲ་ཀལྤ། བོད་སྐད་དུ། འཕགས་མ་
རྡོ་རྗེ་ལུ་གུ་རྒྱུད་མའི་རྒྱུད་ཀྱི་རྟོག་པ། དཔལ་འཇིག་རྟེན་དབང་ཕྱུག་ལ་ཕྱག་འཚལ་ལོ། །དེ་ནས་ཡང་དག་བཤད་བྱ་བ། །དཔལ་བསྐྱེད་སྡུག་བསྔལ་སེལ་བྱེད་ཅིང་། །སྡང་བ་འཆིང་ཚོགས་ལས་གྲོལ་བའི། །ཆོ་ག་མཛེས་མས་ལེགས་པར་ཉོན། །ཁྲུས་དང་གཙང་སྦྲ་དང་
བྲལ་ཞིང་། །དཀའ་ཐུབ་སྤྱོད་པ་རྣམ་སྤངས་ནས། །དྲག་ཤུལ་སེམས་ཀྱིས་གསང་སྔགས་འདི། །བརྗོད་པ་ཙམ་གྱིས་མྱུར་དུ་འགྲུབ། །དད་པ་བརྩོན་འགྲུས་ཀྱིས་བརྒྱན་ཅིང་། །བག་ཡོད་སྙིང་རྗེ་ཆེར་ལྡན་པ། །དེས་ནི་བླ་མ་མི་སྤོང་ལ། །དཔའ་བརྟུལ་ཤེས་རབ་དེས་པ་

ཆེ། །འགྲོ་ལ་བྱམས་སེམས་ཆ་བ་དེས། །སྔགས་དང་ཏིང་འཛིན་ཕྱག་རྒྱ་སོགས། །བརྩམས་པ་ཙམ་ལ་དངོས་གྲུབ་འབྱུང་། །དད་མེད་ལེ་ལོ་རྣམ་འཚེ་ཅན། །བླ་མ་ལ་ནི་མི་གུས་ཤིང་། །ཤེས་རབ་ཞན་ཅིང་སྟོབས་ཆུང་ལ། །བག་མེད་གཞན་ལ་གནོད་
སེམས་བཅས། །དབང་བསྐུར་གནང་བ་མཐོ་བ་ན། །དེས་ནི་བསྐལ་པ་སྟོང་ཕྲག་ནི། །བྱེ་བ་དུ་མར་བསྒྲུབས་བྱས་ཀྱང་། །འབྲས་བུ་ཡོད་པར་མི་འགྱུར་ཏེ། །དཔེར་ན་བྱིས་པ་བླུན་པོ་འགས། །འབྲས་འདོད་ཕུབ་མ་བརྡུངས་པ་ལ། །ཤ་ཐང་ཆད་པ་ཉིད་ལས་
ནི། །ནམ་ཡང་འབྲས་ཡོད་མི་འགྱུར་རོ། །གསང་སྔགས་རྒྱལ་པོ་རྒྱལ་ཆེན་འདི། །བྱིན་བརླབས་རྣམ་མང་འབྱུང་བའོ། །དེ་ནས་བཅོམ་ལྡན་བདེ་ཆེན་པོ། །ངེས་པར་འགྲུབ་པ་ཞེས་བྱ་བ། །ཏིང་ངེ་འཛིན་ལ་སྙོམས་ཞུགས་ནས། །ཉིད་ཀྱི་སྐུ་དང་གསུང་དང་
ཐུགས། །རྡོ་རྗེ་བླ་ན་མེད་པ་ལས། །གསང་སྔགས་རྒྱལ་པོ་འདི་ཕྱུང་ངོ་། །ན་མོ་བྷ་ག་ཝ་ཏྱཻ། བཛྲ་ཤྲྀཾ་ཁ་ལེ། ཧ་ན་ཧ་ན། ད་ར་ད་ར། ཙྪིནྡ་ཙྪིནྡ། བྷ་ཉྩ་བྷཉྩ། མཱ་ར་ཡ་མཱ་ར་ཡ། བ་ས་ཡ་ཏི་ནི། རཀྟ་ཨ་ཀྵཱི་བཛྲ་གྷོ་ཎི། ན་མོ་བྷ་ག་ཝ་ཏྱཻ། བཛྲ་ཤྲྀཾ་ཁ་ལ། པཱུ་རྦྦ་
དི་ཤི། བཛྲ་བྲཱ་ཀཱ་རེ་ཎ་བན་དྷ། དཀྵི་ཎ་དི་ཤཾ་ད་ཎྦ་པྲཱ་ཀཱ་རེ་ཎ་བན་དྷ། བཤྩི་མ་དི་ཤཉྫ་ལ་བྲཱ་ཀཱ་རེ་ཎ་བན་དྷ། ཨུ་ཏྟ་ར་དི་ཤཾ་ས་ར་པྲཱ་ཀཱ་རེ་ཎ་བན་དྷ། ཨ་གྣི་དི་ཤཾ་ཨ་གྣི་པྲ་ཀཱ་རེ་ཎ་བ་ན་དྷཿ། ནཻ་རྀ་ཏྱ་དི་ཤཾ། ཁ་ཌྒ་པྲཱ་ཀཱ་རེ་ཎ་བན་དྷ། བཱ་ཡ་བྱ་དི་ཤཾ་བཱ་ཏ་པྲཱུ་ཀཱ་རེ་ཎ་བ་ན་དྷ། ཨཱི་
ཤ་ན་དི་ཤཾ་ཏྲི་ཤཱུ་ལཾ་པྲཱ་ཀཱ་རེ་ཎ་བན་དྷ། བཱ་ཏཱ་ལ་དི་ཤཾ་ནཱ་ག་པཱ་ཤེ་ན་བན་དྷ། ཨུ་ར་ཏྷ་དི་ཤཾ་བཛྲ་ཤྲིཾ་ཁ་ལ་པྲཱ་ཀཱ་ར་ཎ་བ་ན་དྷ། ཨུར་དྷྭ་བ་ན་དྷ། ཧཱུྃ་ཧཱུྃ་ཕཊ་སྭཱ་ཧཱ། ཨི་དཾ་བཛྲ་ཤྲྀཾ་ཁཱ་ལ། མེནྟྲ་ཎ་ད་ཤ་དི་ཤཾ་བན་དྷ། ཨཀྵ་རཱཀྵ་སཾ་བན་དྷ། བྲཏྨ་རཱཀྵ་སཱ་དི་ནཾ་བན་དྷ། དྷཱུ་ཏ་
པྲེ་ཏ་པི་ཤཱ་ཙི་བན་དྷ། གན་དྷརྦཾ་བན་དྷ། གན་དྷརྦ་ཀུ་ལཾ་བན་དྷ། ས་ན་ཏ་ཀུ་མཱ་རཾ་བན་དྷ། སན་ཏ་ཀུ་མཱ་རཾ་བྷུ་བ་ནཾ་བན་དྷ། བི་དྱཱ་དྷ་རཾ་བན་དྷ། མཱ་ཀན་ཤྲ་མ་ཎ་མཾ་བན་དྷ། ནཱ་ག་ཤྲ་མ་ཎཾ་ད་རྴ་ནཾ། མནྟྲ་དྷ། སརྦ་ཏཱི་ཪྠི་ཀ་དརྴ་ནཾ་བན་དྷ། སིཾ་ཧ་བྱཱ་གྷྲཾ་བན་དྷ། ཡཀྵི་ཎིཾ་བན་དྷ།

དཱ་ཀྵ་སཾ། གྷཱ་ཏ་ན་པ་ན་དྷ། ཀ་ཊ་ནྚ་ཀ་བན་དྷ། ཁེ་ཙ་རི་བན་དྷ། ཤ་ཀུ་ནི་མ་བན་དྷ། དེ་པཾ་བ་ན་དྷ། དེ་བཀུ་བ་ལཾ་བན་དྷ། ནཱ་གཾ་བ་ན་དྷ། ཨ་སུ་རཾ་བན་དྷ། ཨ་སུ་ར་ཀུ་ལཾ་བན་དྷ། ག་རུ་ཌ་བན་དྷ། ག་རུ་ཌ་ཀུ་ལཾ་བན་དྷ། བཀྵིས་བན་དྷ། བཀྵི་ག་ཎཾ་བན་དྷ།
ཀིནྣ་རཾ་བན་དྷ། ཀིནྣ་ར་བྷུ་བ་ནཾ་བན་དྷ། མ་ནུ་ཥྱཾ་བན་དྷ། མ་ནུ་ཥྱཾ་བྷུ་བ་བན་དྷ། ཨ་མ་ནུ་ཥྱ་བན་དྷ། ཨ་མ་ནུ་ཥཱ་བྷུ་བ་ནཾ་བ་ན་དྷ། ཙནྡཱ་དི་ཏྱ་བྷུ་བ་ནཾ་བན་དྷ། སརྦ་ཏཾ་བན་དྷ། སརྦ་ཏ་ཏ་ལཾ་བན་དྷ། བྲཀྵ་མ་བན་དྷ། བྲྀཀྵ་ཏ་ལཾ་བན་དྷ། སྭཱ་ཀུ་ལཾ་བན་དྷ། བར་ཀུ་ལཾ་བན་དྷ།
མནྪ་ཀ་པཾ་བན་དྷ། མ་ཤཱ་པ་བ་ན་དཾ་བན་དྷ། མ་ནི་མི་ཏྱཾ་བན་དྷ། ནི་ཏྱཾ་བན་དྷ། སརྦ་དུཥྚ་སཏྭཾ་བན་དྷ། བཛྲ་ཤྲི་ཁཱ་ལཱ། མ་ཎྚེ་ན་བན་དྷ། ཀུ་བྷི་རྃ་བན་དྷ། ས་སུ་མ་ཀ་རཾ་བན་དྷ། ཤྲི་སུ་མ་རཾ་བན་དྷ། ཛཱ་ལཾ་བན་དྷ། སྠ་ལཾ་བན་དྷ། ཨོཾ་ན་མོ་བྷ་ག་བ་ཏྱཻ་བཛྲ་ཤྲྀ་ཁ་ལེ། ཧཱུྃ་ཧཱུྃ་
ཧཱུྃ་ཧཱུྃ་ཧཱུྃ་ཧཱུྃ། སརྦ་དུ་ཥྚཱཾ་སརྦ་ག་བྲ་ཏྱཾ་གཾ་བན་དྷ། ཏྭཱ་ད་ད་ཤ་བྷུ་ཛཱི་ཡེ། དྭཱ་ད་ཤ་ནེ་ཏྲཱ་ཡི། བི་ཀཱི་རྵ་ཀེ་ཤཱ་ཡཻ། ཙཎྜ་ཡཻ། ས་ཧ་སྲ་པྲ་ཛྭ་ལི་ཏ་དཱི་བྷ་ཏེ་ཡཻ། ཨུ་གྲ་བི་བི་དྷ་བེ་ཤ་དྷ་རི་ཎཱི། ཨུར་དྷ་ཀེ་ཤཱ་ཡཻ། ཙ་བ་ལཱ་ཡེ། ཏ་ཐཱ་ག་ཏ་ཨ་པ་ཀ་རི་ས་ཏྭཱ་ནཱཾ་པ་ན་དྷ། ཨི་མཾ་བཛྲ་ཤྲྀ་ཁཱ་ལཱ། མནྟྲེ་
ཎ། བཉྩ་ཤ་ཏ། ཡོ་ཛ་ན་པ་རི་བི་ཤ་ཏཾ། བཛྲ་ཤྲྀ་ཁ་ལེན་པན་དྷ། བར་མུ་དྲཱ་ཙྪིནྡ་ཡེ་ན་བ་ལེག་ལཾ་བན་དྷ། ཨུ་དྲཱ་ཡ་ནིཾ་བན་དྷ། ཙ་ཏུ་ར་ཌཱ་ཀི་ནཾ་བན་དྷ། ཏིཥྛ་ཏིཥྛ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཧུ་ལུ་ཧུ་ལུ། ན་མཥྩ་ཎྜ་མ་ཧཱ་ཀྲོ་དྷ། ཧུ་ཧུ་ཨ་མྲྀ་ཏ་ཧུ་ཧུ་བན་དྷ། ཨ་ཤཱི་ཏི་དེ་བི་ཀོ་ཊི་
ནི་ཡུ་ཏ་ཤ་ཏ་ས་ཧ་སྲ་ནི་བཛྲ་ཤྲྀཾ་ཁ་ལ་ན་བན་དྷ། ཏྲི་ཀོ་ན་པྲྀ་ཐི་པིཾ་མུརྡྷ་ནི་བཛྲེ་ཎ་སྥོ་ཊ་ཡ། ཏྲི་སྭ་ར་གར་མཱ་ཏ་བཱ་ཏཱ་ལ་བཱ་སུ་ཀི་ཏྭཱ་ཌུ་ཡ་ཏི། བཱ་ཏཾ་བན་དྷ། མེ་གྷ་བན་ངྷ། སརྦ་ཏྲཾ་བན་དྷ། ཨནྡྲ་བནྡྷ། ཨིནྡྲཾ་བན་དྷ། ཨིནྡྲ་བྷུ་བ་ནཾ་བན་དྷ། བ་ནསྤ་ཏི་བན་དྷ། བ་ནསྤ་ཏི་དེ་བཾ་
བན་དྷ། ཨེ་ཀ་པཱ་དཾ་ན་དྷ། དྭི་པཱ་དཾ་བན་དྷ། ཏྲི་པཱ་དཾ་བན་དྷ། ཙ་ཏུ་ཤྦཱ་དཾ་བན་དྷ། པ་ཉྩ་པཱ་ཏཾ་དཾ་བ་ན་དྷ། ཤ་ཏཾ་བཱ་དཾ་བ་ན་དྷ། ལཀྵ་པཱ་དཾ་བ་ན་དྷ། སརྦ་བི་གྷྞ་བ་ན་དྷ། སརྦ་བི་གྷྣ་ཀུ་ལ་བ་ན་དྷ། བྲ་ཧྨ་བནྷ། བྲ་ཧྨ་བྷུ་བ་ནི་བ་ན་དྷ། པི་ཥྞུ་བན་དྷ། བིཥྜུ་བྷུ་བ་ན་བ་ན་དྷ། མ་

ཧེ་ཤྭ་རཾ། མ་ཧྭེ་ཤྭ་ར་བུ་བ་ནཾ་བན་དྷ། མ་ཧེ་དེ་བཾ་བན་དྷ། མ་ཧཱ་དེ་བ་ཛ་ཏ་བ་མཱ་པཱ་དེ་ན་བི་ཀྲ་མི་བན་དྷ། ཨོཾ་ན་མོ་བྷ་ག་ཝ་ཏྱཻ་བཛྲ་ཤྲྀཾ་ཁ་ལེ་ད་ཤ་དི་ཤཾ་བཛྲ་བྲཱ་ཀ་རེ་ཎ་བན་དྷ། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ་ཕཊ་ཕཊ་ཕཊ་སྭཱ་ཧཱ། རིག་སྔགས་འདི་ཉིད་གསུངས་ཙམ་གྱིས། །
རྒྱ་ཆེན་འཇིག་རྟེན་ཁམས་འདི་རྣམས། །རྣམ་པ་དྲུག་ཏུ་གཡོས་གྱུར་ནས། །ལྷ་དང་ལྷ་མིན་སྲིན་བཅས་དང་། །གནོད་སྦྱིན་དྲི་ཟ་གྲུལ་བུམ་དང་། །མཁའ་ལྡིང་ལྟོ་འཕྱེ་ལུས་སྲུལ་པོ། །ཀླུ་དང་མི་འམ་ཅི་ལ་སོགས། །ཚོགས་རྣམས་ཐམས་ཅད་རྨྱོས་བརྒྱལ་ཏེ། །ས་
སྟེང་ཁ་སྦུབ་ཏུ་འགྱེལ་ནས། །དབང་པོ་ཤིན་ཏུ་སྟོར་བ་ལ། །བདེ་བ་ཆེན་པོའི་འོད་ཟེར་གྱིས། །ཕོག་པའི་སྐད་ཅིག་དེ་མ་ཐག །དྲན་པ་སླར་རྙེད་གཟི་མདངས་སྐྱེས། །དེ་ནས་བསྟོད་པའི་རྒྱལ་པོས་བསྟོད། །ཨེ་མའོ་བདེ་བ་ཆེ་མཆོག་དཔལ་ཉིད་ལས། །རྒྱས་པ་སྟོབས་སྐྱེས་
བཀྲ་ཤིས་ཀྱིས། །ལྷ་མོས་ཧཱུྃ་བརྗོད་ཙམ་ཉིད་ལས། །ནམ་མཁའི་ཁམས་སུ་གྲགས་པར་འགྱུར། །བདེ་ཆེན་ཡེ་ཤེས་མངའ་བདག་ཉིད། །རྡོ་རྗེ་ཞེས་པའི་མཚན་ལྡན་པའི། །ལྷ་མོ་ལུ་གུ་རྒྱུད་མ་ལ། །བདག་ཅག་རྣམས་ཀྱིས་གུས་པར་འདུད། །སྐུ་ཡི་འོད་ཟེར་སྣ་ཚོགས་
ཀྱིས། །འགྲོ་བའི་ཉོན་མོངས་སེལ་བྱེད་པའི། །འོད་ཀྱིས་བདག་ལ་བདེ་བ་སྐྱེས། །ལྷ་མོ་བདེ་བ་ཁྱོད་ཕྱག་འཚལ། །སྟོང་ཉིད་སྨོན་བྱེད་མཚན་མ་བྲལ། །རྒྱལ་བ་ཀུན་གྱི་རིག་པ་ལས། །ཡ་མཚན་ལྷ་མོའི་རང་བཞིན་ཐུགས། །མི་རྟོག་རང་བཞིན་ཕྱག་འཚལ་ལོ། །
དེ་རྗེས་རྒྱལ་བ་ཀུན་འདུས་པའི། །གཟུགས་སོགས་རིག་པའི་ལྷ་མོ་ཡིས། །འཁོར་ལོ་འདི་ལ་ལེགས་མཆོད་ནས། །མགྲིན་གཅིག་ཏུ་ནི་འདུས་ནས་སུ། །སངས་རྒྱས་རྣམས་ཀྱིས་གསུངས་པ་ཡིས། །རྡོ་རྗེའི་ཚིག་གིས་སྟོད་པར་བྱེད། །རྡོ་རྗེ་ནམ་མཁའ་ལས་
བྱུང་བའི། །སངས་རྒྱས་ཐམས་ཅད་སྐྱེད་པའི་ཡུམ། །སྤྲོས་བྲལ་ནམ་མཁའི་རང་བཞིན་གསལ། །རྡོ་རྗེ་ཐུགས་ལ་ཕྱག་འཚལ་ལོ། །རྡོ་རྗེ་གཟུགས་ཀྱི་སྒྲ་ཡིས་ནི། །ལྷ་ཚོགས་མ་ལུས་རྣམས་འཆིང་མཛད། །བདུད་རྣམས་ཚར་གཅོད་རྡོ་རྗེ་སྒྲ། །ནམ་མཁའི་

གསུང་ལ་ཕྱག་འཚལ་ལོ། །འགྲོ་དྲུག་བདུད་འཇོམས་ཞལ་དྲུག་མ། །ཕྱི་ནང་རྟེན་འབྲེལ་དག་ཕྱིར་ཕྱག །སྒེག་ཅིང་ཅུང་ཟད་འཇིགས་པར་བྱེད། །རྡོ་རྗེའི་སྐུ་ལ་ཕྱག་འཚལ་ལོ། །དེ་སྐད་རྡོ་རྗེ་ལྷ་མོ་ལ། །ལྷ་ལ་སོགས་པ་ཐམས་ཅད་ཀྱིས། །རྨད་
བྱུང་བསྟོད་པའི་རྒྱལ་པོ་དེས། །བསྟོད་པའི་དེ་མ་ཐག་ཏུ་ནི། །ལྷ་མོ་གཟི་མདངས་ཆེར་སྐྱེས་ནས། །རང་གི་སྙིང་པོ་འདི་གསུངས་སོ། །ཨོཾ་བཛྲ་ཤྲྀཾ་ཁཱ་ལེ་ཧཱུྃ་ཧཱུྃ་ཕཊ་སྭཱ་ཧཱ། རིག་པ་གཟུངས་ཀྱི་ཕྲེང་བའམ། །གསང་སྔགས་འདི་ཉིད་བཤད་ཙམ་གྱིས། །རིམས་དང་ཤུ་བ་
གཡན་པ་དང་། །ལྷོག་པ་ཤ་བཀྲ་མཛེ་ནད་འབྲས། །ཀླད་ནད་མིག་ནད་རྣ་ནད་དང་། །ལྐོག་ནད་གློ་མཆིན་ནད་རྣམས་དང་། །རྒྱུ་གཟེར་སྙིང་ནད་མཁལ་ནད་དང་། །རྐང་ལག་ནད་དང་ཁྱབ་པར་ན། །ཆུ་སེར་ནད་དང་ཁྲག་ནད་དང་། །བད་ཀན་རླུང་དང་མཁྲིས་པ་དང་། །ཤིན་
ཏུ་འཁྲུགས་པའི་ནད་ལ་སོགས། །ཡམས་ནད་ཐམས་ཅད་ཞི་བར་བྱེད། །གཞན་ཡང་འབྱུང་པོ་བརྗེད་བྱེད་གདོན། །ཤ་ཟ་མཁའ་འགྲོ་མ་མོ་དང་། །གཟའ་དང་རྒྱུ་སྐར་ལོག་འདྲེན་དང་། །བྱད་སྟེམས་དྲག་པོ་ཕྱི་རོལ་གྱི། །རིག་སྔགས་གཏུམ་པོ་ལ་སོགས་པ། །འཇིགས་
པའི་གནོད་པ་ཐམས་ཅད་ཀུན། །རླུང་གིས་སྤྲིན་བཞིན་གཏོར་བར་བྱེད། །གཞན་ཡང་སྟག་གཟིག་དོམ་དྲེད་དང་། །འཕར་བ་སྤྱང་ཀི་གུང་པོ་ཆེ། །སྲེ་མོང་བྱི་བ་སྦྲུལ་བྱི་ལ། །སྦྲང་བུ་མཆུ་རིངས་པ་ཏྲེ་ཀ། །ཁྭ་དང་སེའུ་བྱུའུ་རྟ་ལ་སོགས། །འཇིགས་པ་རྣམ་མང་ཇི་སྙེད་པ། །
གསང་སྔགས་འདི་བརྗོད་ཐོས་ཙམ་གྱིས། །ཐག་རིངས་སུ་ནི་སྐྲོད་པར་བྱེད། །གནོད་པ་རྣམ་མང་ཐམས་ཅད་ཀྱང་། །སྔགས་ཀྱི་སྦྱོར་བས་སེལ་བར་བྱེད། །གནོད་བྱེད་རྣམས་ནི་གནོད་མེད་བྱེད། །གནོད་མེད་གནོད་དང་ལྡན་བྱེད་ཅིང་། །སྦྱོར་བ་ཡང་ནི་སྦྱོར་བ་འགས། །
གཞན་གྱི་སྦྱོར་བ་འཆིང་བར་བྱེད། །རྡོ་རྗེ་ལུ་གུ་རྒྱུད་ཀྱི་རྟོག་པ་ལས་གསང་སྔགས་བསྟན་པའི་ལེའུ་སྟེ་དང་པོའོ།། །།དེ་ནས་འདིར་ནི་བཤད་བྱ་བ། །མཛེས་མ་རྡོ་རྗེ་ཁྲོ་མོ་ཡིས། །ལྷ་ཡི་ཏིང་འཛིན་སྦྱོར་བ་རྣམས། །ཐིག་ལེ་ཆེན་མོས་མཉན་པར་གྱིས། །ཨོཾ་བཛྲ་ཤྲིཾ་ཁཱ་

ལེ། །ཨཱ་ཏྨཱ་རཀྵ་རཀྵ། ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། གསང་སྔགས་འདིས་ནི་བསྲུང་བ་དང་། །ཐ་མལ་རྟོག་པའི་ལུས་སྦྱོང་བྱེད། །སྙིང་གར་ཟླ་སྟེང་ཧཱུྃ་ཡིག་གི། །འོད་ཀྱིས་རིགས་ཀྱི་གཙོ་མོ་དང་། །བླ་མ་སངས་རྒྱས་སྤྱན་དྲངས་ནས། །མདུན་དུ་ལེགས་པར་དམིགས་ནས་ནི། །སྙིང་ག་
ས་བོན་འོད་རྩེ་ལས། །མེ་ཏོག་སོགས་འཛིན་ལྷ་མོས་མཆོད། །གཟུགས་སོགས་རྡོ་རྗེ་མ་རྣམས་ཀྱིས། །འདུད་ཅིང་སོ་སོར་ལེགས་པར་མཆོད། །ཐོག་མ་མེད་པའི་སྲིད་རྒྱུད་ནས། །ལུས་ངག་ཡིད་ཀྱིས་སྤྱད་པ་ཡི། །སྡིག་པའི་ཚོགས་རྣམས་མ་ལུས་ཀུན། །བགྱིས་རང་བགྱིད་
དུ་སྩལ་པ་དང་། །བགྱིད་ལ་རྗེས་སུ་ཡི་རང་པ། །སྡིག་པའི་ཚོགས་རྣམས་ལ་ལུས་ཀུན། །ཐམས་ད་སོ་སོར་བཤགས་པར་བགྱི། །སླན་ཆད་མི་བགྱིད་སྡོམ་པ་ཡང་། །རྒྱ་ཆེན་བདག་གིས་གཟུང་བར་བྱ། །རྒྱལ་བ་སྲས་བཅས་མཛད་པ་དང་། །འགྲོ་བའི་དགེ་ལ་རྗེས་
ཡི་རང་། །རྒྱལ་དང་བྱང་ཆུབ་སེམས་དཔའ་དང་། །རིགས་ལྡན་རྡོ་རྗེ་ལྷ་མོ་དང་། །སྔགས་རྒྱུད་རྒྱ་ཆེན་འཁོར་ལོ་ལ། །ཀུན་ནས་དང་བས་སྐྱབས་སུ་མཆི། །མི་རྟོག་བློ་གྲོས་བསྐྱེད་པའི་ཕྱིར། །ཆོས་ཀྱི་འཁོར་ལོ་བསྐོར་བ་དང་། །གདུལ་བྱ་ཇི་སྲིད་ཚིམ་པ་རུ། །མྱ་ངན་
མི་འདའ་གསོལ་བ་འདེབས། །རྣམ་པ་ཀུན་གྱི་མཆོག་ལྡན་པའི། །བྱང་ཆུབ་སེམས་ནི་བསྐྱེད་པར་བྱ། །གདོད་ནས་ཇི་སྲིད་ད་ལྟ་ཡི། །བར་དུ་ལུས་འདིས་ཅི་མ་བྱས། །ད་ནི་སྲིད་པའི་རླུང་རྟོགས་ནས། །རང་གི་ལུས་འདི་དབུལ་བར་བགྱི། །ཐེག་ཆེན་བླ་ན་མེད་པ་ཡི། །ལམ་
ཆེན་རྒྱ་མཚོ་གང་ཡིན་པ། །ཐེག་ཆེན་འབྲས་བུ་ཐོབ་བར་དུ། །རྒྱུན་མི་ཆད་པར་བསྟེན་པར་བྱ། །དེ་ལྟར་དད་སེམས་འདུན་བྱས་ཏེ། །བསོད་ནམས་རྒ་ཆེན་རྣམས་བསགས་པའི། །དགེ་བ་བླ་ན་མེད་པ་དེ། །ཐམས་ཅད་བྱང་ཆུབ་ཕྱིར་བསྔོའོ། །དང་པོ་བྱམས་པའི་འོད་
ཟེར་གྱིས། །འགྲོ་རྣམས་བདེ་ལ་དགོད་པར་བྱ། །གཉིས་པ་སྙིང་རྗེའི་འོད་ཟེར་གྱིས། །འགྲོ་བ་སྡུག་བསྔལ་འབྲལ་སེམས་བསྐྱེད། །གསུམ་པ་དགའ་བས་བདེ་བ་ཐོབ། །བཞི་པ་ཆགས་བྲལ་བཏང་སྙོམས་སོ། །དེ་རྗེས་རགས་པའི་སྟོབས་སྤོང་ཞིང་། །བག་ཆགས་

དྲི་མ་བསལ་ནས་ཀྱང་། །ནམ་མཁའ་ལྟ་བུར་སྒྲུབ་བྱེད་པའི། །དེ་ནས་དག་པ་རྗེས་དྲན་བྱ། །ཨོཾ་སྭ་བྷཱ་བ་ཤུད་དྷཱཿ སརྦ་དྷ་རྨཱཿསྭ་བྷཱ་བ་ཤུད་དྷོཧཱུྃ། དེ་ཡིས་དག་པར་བྱས་ནས་ནི། །སྟོང་ཉིད་རྗེས་སུ་བསྒོམ་པར་བྱ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་
ཨཱཏྨ་ཀོ་྅་ཧཾ། དངོས་པོ་ཐམས་ཅད་མ་ལུས་པར། །ནམ་མཁའ་ལྟ་བུར་བསྒོམ་པར་བྱ། །དེར་ནི་རྃ་སྐྱེས་ཉི་དཀྱིལ་འཁོར། །དམར་པོ་འོད་ཟེར་འཁྲིགས་པ་བསྒོམ། །དེ་དབུས་ཧཱུྃ་ཡིག་སྔོན་པོ་ཡི། །འོད་ཀྱིས་འགྲོ་བའི་བདུད་བསལ་ཏེ། །སླར་ཡང་ཡི་གེ་ལ་གཞུག་
པར། །རྡོ་རྗེ་ཁྲོ་མོ་ཡོངས་སུ་རྫོགས། །ཞལ་གསུམ་ཕྱག་དྲུག་མེ་ཕུང་བཞུགས། །ཐུགས་ཀར་ཉི་མར་ཧཱུྃ་སྔོན་བསམ། །འོད་ཀྱིས་བསྲུང་བའི་འཁོར་ལོ་བྱ། །ཤར་དུ་རྡོ་རྗེ་ལྷོར་ད་བྱུག་པ། །ནུབ་ཏུ་ཆུ་སྟེ་བྱང་དུ་མདའ། །བྱང་ཤར་རྩེ་གསུམ་ཤར་ལྷོ་མེ། །ལྷོ་ནུབ་
རལ་གྲི་ནུབ་བྱང་རླུང་། །འོག་ཏུ་སྣ་ཚོགས་རྡོ་རྗེ་བྲག །སྟེང་ཕྱོགས་རྡོ་རྗེ་རྩེ་ལྔའི་གུར། །གསང་སྔགས་བརྗོད་པས་བསྒོམ་པར་བྱ། །ཧཱུྃ་ལས་འོད་ཟེར་རབ་སྤྲོས་པས། །འཁོར་ལོ་བཀོད་པའི་ཕྱི་རོལ་དུ། །རྡོ་རྗེ་རྩེ་གསུམ་ར་བ་དང་། །གུར་ནི་རབ་ཏུ་བསྒོམ་པར་བྱ། །དེ་རྗེས་
རྡོ་རྗེ་ཁྲོ་མོ་ནི། །ཞུ་ནས་རང་བཞིན་མེད་པར་གྱུར། །དེ་ལས་ཉི་མའི་སྟེང་གནས་པའི། །བདུད་བཞི་མནན་ཅིང་ཉི་ཟླ་ནི། །ཨཱ་ལི་ཀཱ་ལི་ལས་བྱུང་བའོ། །བར་དུ་ཧཱུྃ་ལས་རྡོ་རྗེ་ནི། །ཁྲོ་མོའི་རང་བཞིན་འོད་ཀྱིས་བསྐོར། །ཁྲོ་མོ་དང་བཅས་འོད་ཟེར་རྣམས། །རྡོ་རྗེ་ལ་
བཞུགས་སྐུ་བཞེངས་ཏེ། །ཞལ་དྲུག་ཕྱག་དྲུག་ཞབས་དྲུག་གམ། །ཡང་ན་ཞབས་བཞེས་བདུད་བཞི་མནན། །ཞལ་ཀུན་སྔོ་ཞིང་ཁྲོ་གཉེར་ཅན། །དམར་སེར་གྱེན་སྐྲ་ཐོད་ཕྲེང་ཅན། །རྡོ་རྗེས་ལུས་བརྒྱན་ནམ་མཁའི་མདོག །བཅུ་གཉིས་ཕྱག་སྟེ་གཡས་པ་ན། །རྡོ་
རྗེ་ཞགས་པ་མདའ་གསོར་ཞིང་། །སྦྲུལ་དང་དགྲ་སྟ་གྲི་གུག་འཛིན། །གཡོན་པ་དྲིལ་བུ་སྡིགས་མཛུབ་གཞུ། །དབྱིག་པ་རྩེ་གསུམ་ཐོ་བའོ། །ཡང་ན་ཕྱག་དྲུག་གཡས་དང་པོས། །རྡོ་རྗེ་གཉིས་པས་ལྕགས་སྒྲོག་སྟེ། །གསུམ་པས་མདའ་ནི་གསོར་བར་

བྱེད། །གཡོན་གྱི་དང་པོས་སྡིགས་མཛུབ་སྟེ། །གཉིས་པ་སྦྲུལ་གྱི་ཞགས་པའོ། །གསུམ་པས་གཞུ་སྟེ་འགེངས་པའི་ཚུལ། །རྡོ་རྗེ་ལུ་གུ་རྒྱུད་མ་ཡི། །བསམ་གཏན་ཏིང་འཛིན་ལ་གནས་ན། །ཡོན་ཏན་ཀུན་གྱི་བདག་ཉིད་ཀྱི། །སྔགས་ཀྱི་རྩ་བར་འགྱུར་བའོ། །
སྔགས་ཀྱི་བདག་ཉིད་ཡོངས་བསྐྱེད་ཅིང་། །ལྷ་ཡི་རང་བཞིན་བསྒྲུབ་པ་ཡི། །རིན་ཆེན་གཟུངས་ཀྱི་ཕྲེང་བས་ནི། །ཆོས་རྣམས་མཐའ་དག་ཐོབ་འགྱུར་ཏེ། །རལ་གྲི་མིག་སྨན་རིལ་བུ་དང་། །རྐང་པ་བྱུག་དང་གཏེར་ཆེན་དང་། །ས་འོག་འགྲོ་དང་བཅུད་ལེན་
དང་། །ནམ་མཁར་འགྲོ་དང་གསེར་འགྱུར་དང་། །དེ་བཞིན་ས་གཞན་འགྲོ་བ་དང་། །ཞི་དང་རྒྱས་དང་དབང་མངོན་སྤྱོད། །རྨོངས་དང་རེངས་དང་བསྐྲད་པ་དང་། །དབྱེ་དང་དགུག་དང་རིག་སྔགས་འཆིང་། །བསྲུང་དང་ཕྱིར་བཟློག་ཆེན་པོ་དང་། །ཞ་དང་ལྐུགས་
དང་སེམས་བརྒྱལ་དང་། །ལོང་དང་སྣ་ཚོགས་ནད་སྐྱེད་པའི། །སྦྱོར་བ་རྒྱ་ཆེན་འགྲུབ་པ་དང་། །མངོན་ཤེས་དྲུག་པོ་ཡོངས་སྐྱེ་ཞིང་། །སྐུ་གསུང་ཐུགས་ཀྱི་རྡོ་རྗེ་ཡི། །ཕྱག་རྒྱ་ཆེན་པོ་ཐོབ་འགྱུར་ན། །ལྟས་མཐོང་ཙམ་ལ་སོགས་པ་ཡི། །དངོས་གྲུབ་ཕྲ་མོ་སྨོས་ཅི་
དགོས། །སྔགས་ཀྱི་སྦྱོར་བ་བསྐྱེད་པའི་ལྷ། །དམིགས་པའི་རྩ་བར་གྱུར་པ་ཡི། །ཧཱུྃ་ལས་སྐྱེས་པའི་ལྷ་མོ་ནི། །སྔོན་མོ་ཞལ་གསུམ་ཕྱག་དྲུག་མ། །གཡས་པ་སེར་ཞིང་གཡོན་པ་དམར། །སྤྱན་གསུམ་སྡང་མིག་ཁྲོ་གཉེར་ཅན། །དམར་སེར་གྱེན་སྐྲ་ཐོད་པས་
བརྒྱན། །རུས་པའི་རྒྱན་གྱིས་སྤྲས་ཤིང་འགྱིང་། །ཐོད་པའི་ཕྲེང་ཅན་ཀླུ་ཡིས་བརྒྱན། །ཞབས་གཉིས་བརྐྱང་བསྐུམ་རོ་ལ་བརྫིས། །ཕྱག་དྲུག་གཡས་ཀྱི་དང་པོ་ན། །རྡོ་རྗེ་གཉིས་པས་གྲི་གུག་སྟེ། །གསུམ་པ་སྦྲུལ་གྱི་ཞགས་པ་འཛིན། །གཡོན་གྱི་དང་པོ་
སྡིགས་མཛུབ་སྟེ། །གཉིས་པས་ཐོད་པ་གསུམ་པ་ན། སྦྲུལ་གྱི་ཞགས་པ་དཀར་པོའོ། །ཡང་ན་ཞལ་ཀུན་སྔོ་བསངས་ཉིད། །འདིས་ནི་འཆིང་དང་དབང་གི་ལས། །མཐའ་དག་རྫོགས་པར་བྱེད་པའོ། །སྲིད་པར་བྲམ་ཟ་སྐྱེས་ལྷ་མོ། །སྔོན་མོ་ཞལ་གཅིག་ཕྱག་

གཉིས་མ། །ཕྱག་གཡས་རྡོ་རྗེ་གཡོན་ལྕགས་སྒྲོག །གཅེར་བུ་རུས་པའི་རྒྱན་ལྡན་པ། །བསད་པའི་ལས་རྣམས་ཐམས་ཅད་ནི། །རྡོ་རྗེ་རྣལ་འབྱོར་མ་འདིས་བསྒྲུབ། །དེ་ནས་བཅོམ་ལྡན་རྡོ་རྗེ་ཅན། །ཆོས་རྣམས་ཐམས་ཅད་འབྱུང་བྱེད་ཅིང་། །དངོས་
གྲུབ་མྱུར་དུ་སྐྱེད་པ་ཡི། །ཕྱག་རྒྱ་འབྱུང་ཞེས་བྱ་བ་ཡི། །ཏིང་ངེ་འཛིན་ལ་སྙོམས་ཞུགས་ནས། །ཡན་ལག་ཕྱག་རྒྱ་བཀའ་སྩལ་པ། །ལག་གཉིས་ཐལ་མོ་སྦྱར་བྱས་ཤིང་། །སླར་ལ་ཁུ་ཚུར་བཅང་བྱས་ཏེ། །རྒྱབ་གཉིས་སྤྲད་ནས་མཛུབ་མོ་དང་། །མཐེའུ་ཆུང་ལྕགས་
སྒྲོག་བཅིང་བྱས་ཏེ། །ཁ་ཡི་ཐད་ཀར་བཞག་ནས་ནི། །རིག་པའི་ཕྲེང་བ་བརྗོད་པ་ཡིས། །འདོད་པ་ཐམས་ཅད་འགྲུབ་པར་བྱེད། །ཕྱག་རྒྱ་བཅིངས་ནས་གསང་སྔགས་ནི། །རྗེས་སུ་དྲན་པར་བྱས་ཙམ་གྱིས། །ལམ་དུ་འགྲོ་ཡང་བདེ་བར་ཐར། །གཞན་གྱི་རིག་སྔགས་
གཅོད་པར་བྱེད། །འཕགས་མ་རྡོ་རྗེ་ལུ་གུ་རྒྱུད་མའི་རྒྱུད་ཀྱི་རིག་སྔགས་ལས་ལྷ་དང་ཕྱག་རྒྱ་གཏན་ལ་དབབ་པའི་ལེའུ་སྟེ་གཉིས་པའོ།། །།དེ་ནས་ཡང་དག་བཤད་བྱ་བ། །རྫས་ཀྱི་སྦྱོར་བ་བླ་ན་མེད། །མཚུངས་པའི་ཚོགས་ཀུན་འགྲུབ་བྱེད་པ། །རྡོ་རྗེ་མཁའ་འགྲོ་མ་
ཡིས་ཉོན། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། དབང་བསྐུར་བ་ནི་བླ་ན་མེད། །དྲི་མའི་ཚོགས་རྣམས་དག་བྱེད་ཅིང་། །ཇི་སྲིད་ཡེ་ཤེས་ཚོགས་རྒྱས་ནས། །རིག་པའི་རྒྱལ་པོ་ཐོབ་པར་བྱེད། །ཛཿཧཱུྃ་བྃ་ཧོཿ།
ཨོཾ་བཛྲ་བུཥྦེ་ཨཱཿཧཱུྃ་སྭཱ་ཧཱ། དྷཱུ་པེ་དཱི་པེ་གན་དྷེ། ནཻ་ཝི་དྱེ་ཨཱཿཧཱུྃ་སྭཱ་ཧཱ། ཨོཾ་ཀྵཱི་ཧྲཱིཿས་ཀ་ལ། གྷ་ན་བི་ན་བ་རེ། ཤྱ་ཪྻ་ས་པ་རི་ཝཱ་ར་ཨ་ཨ་ཨ། ཨ་བྷི་ཏི་རནྟི། ཨ་བྷི་ཏ་ར་ནྟེ། ཨ་བྷི་ཏ་རན་ཏུ། ས་ཐ་ད་ཤ་དི་ཀ །ལོ་ཀ་པཱ་ལ། ལོ་ཀ་པཱ་ལི། ཨེ་མྃ་པ་ལི་གྲི་ཧྣཾ་
ཏུ། ཁཱ་ད་ན་ཏུ་པི་བནྟུ་ཧཱུྃ་ཕཊ། ཁ་ཁ་ཁཱ་ཧི་ཁཱ་ཧི། ལླཻ་ལླཻ་བཛྲ་དྷ་ར་ཡ། ཨཱ་ཛྙཱ་བ་ཡ་ཏི་སྭཱ་ཧཱ། ཡེ་ཤེས་སེམས་དཔའི་སྦྱོར་བ་ཡིས། །ཐ་དད་རྟོག་པ་སྤོང་བར་བྱེད། །མཆོད་པ་དང་ནི་གཏོར་མ་ཡིས། །བར་དུ་གཅོད་པ་ཀུན་སེལ་བྱེད། །ཨོཾ་ཀཱ་ཡ་བཛྲ་སྭ་བྷཱ་

བ་ཨཱཏྨ་ཀོ྅་ཧཾ། སྐུ་གསུང་ཐུགས་ཀྱི་རྡོ་རྗེ་ཡིས། །རྣམ་པར་སྤྲས་པའི་མཚན་མ་ལ། །མཚན་མ་མེད་པ་རྣམས་གནས་པ། །ཤེས་ནས་མཚན་ཉིད་རྣམ་པར་དག །ཨོཾ་སརྦ་ཏ་ཐཱ་ག་ཏ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ། གང་ཞིག་དབང་པོས་ཡུལ་མཚོན་པ། །མཚོན་
བྱ་མཚན་ཉིད་རྣམ་ཤེས་དང་། །ཡེ་ཤེས་ཉིད་ནི་མངོན་སུམ་དུ། །སྐྱེ་བ་ཉིད་ལ་ཐེ་ཙོམ་མེད། །དེ་ནས་རྒྱ་ཆེན་སྦྱོར་བའི་གཙོ། །འཁོར་ལོའི་ཆོ་ག་བཤད་པར་བྱ། །གྲོ་ག་རས་སམ་ཤིང་ཤུན་ལ། །གུར་གུམ་གི་ཝ་ཙནྡན་བཅས། །པུ་ཀ་སེར་པོས་འཁོར་ལོ་ནི། །
རྩིབས་བཅུ་པདྨའི་སྟེང་དུ་བྲི། །མཐའ་ནས་མེ་ཡི་ཕྲེང་བས་བསྐོར། །པདྨའི་འདབ་མ་བཅུ་ལ་ནི། །ཕྱོགས་བཅུ་ཀུན་དུ་བཅིང་བ་ཡི། །རྡོ་རྗེ་ལ་སོགས་བཅུ་པོ་བྲི། །དེ་ཡི་རྒྱབ་ཏུ་ཕྱོགས་བཅུ་རྣམས། །བཅིང་བའི་སྔགས་ནི་རིམ་བཞིན་བྲི། །འཁོར་ལོའི་རྩིབས་རྣམས་བཅུ་པོ་ལ། །
ཧཱུྃ་གཉིས་བར་དུ་བསྒྲུབ་བྱའི་མིང་། །བསྲུང་བ་དང་བཅས་བྲི་བར་བྱ། །ཕྱོགས་བཞིར་སྔགས་དང་ཕྱག་རྒྱ་དང་། །འཁྲུལ་འཁོར་གཅོད་དང་འཆིང་བ་དང་། །འགུགས་པའི་སྔགས་སུ་བཅས་པ་བྲི། །གཞན་ཡང་མཚམས་རྣམས་དྲུག་པོར་ནི། །ལྷ་དང་ཀླུ་དང་ལྷ་མིན་གྱི། །གནོད་
སྦྱིན་གྲུལ་བུམ་ལ་སོགས་པ། །བཅིང་བ་དྲུག་པོ་བྲི་བར་བྱ། །ལྟེ་བར་བསྒྲུབ་བྱའི་གཟུགས་བརྙན་ནི། །སྐྱིལ་ཀྲུང་ཐུགས་ཀར་ཐལ་མོ་སྦྱར། །མཛེས་པའི་གོས་ལྡན་བྲི་བར་བྱ། །དེ་རྗེས་གསང་སྔགས་ཕྲེང་བ་ཉིད། །སྟོང་ཕྲག་གཅིག་ཏུ་བརྗོད་བྱས་ནས། །དེ་རྗེས་བསྟོད་
པས་བསྟོད་བྱས་ཏེ། །གསེར་སོགས་དྲིལ་ནས་ལུས་སམ་མགུལ། །གང་བདེའི་གནས་སུ་གདགས་པར་བྱ། །དེས་ནི་རྣལ་འབྱོར་བསྲུང་དོན་དུ། །ཇི་ལྟར་བསམ་པ་ཀུན་འགྲུབ་སྟེ། །འཇིགས་པ་བརྒྱད་པོ་མེད་པར་བྱེད། །དེ་ནས་གཞན་ཡང་རྒྱལ་པོའི་རས། །གསེར་
ལ་ཙནྡན་ག་བུར་དང་། །དྲི་ཞིམ་རྣམས་ཀྱིས་བྱས་ནས་ནི། །རྒྱུ་སྐར་རྒྱལ་གྱི་ཉི་མ་ལ། །གུར་གུམ་གྱིས་ནི་འཁོར་ལོ་བྲི། །དབུས་སུ་པདྨ་འདབ་བརྒྱད་པའི། །ཕྱི་རོལ་མུ་ཁྱུད་གསུམ་ལྡན་པའི། །པདྨའི་ལྟེ་བར་བསྒྲུབ་བྱའི་གཟུགས། །ཡན་ལག་རྡོ་རྗེས་མཚན་པ་བྲི། །དེ་ལ་

སྙིང་པོའི་སྔགས་ཀྱིས་བསྐོར། །དེ་རྗེས་ལྟེ་བའི་མུ་ཁྱུད་ལ། །སྟེང་འོག་བཅིང་བའི་སྔགས་ཀྱིས་བྲི། །ཕྱོགས་མཚམས་སྔགས་རྣམས་འདབ་མ་ལའོ། །ཕྱི་རོལ་མུ་ཁྱུད་དང་པོར་ནི། །རྩ་བའི་སྔགས་རིང་དགོད་པར་བྱ། །གཉིས་པར་འོད་ཀྱི་ར་བ་བྲི། །དྲི་ཞིམ་
དཀྱིལ་འཁོར་སྟེང་བཞག་སྟེ། །རང་ཉིད་ལྷ་ཡི་སྦྱོར་རྫོགས་བྱ། །ཐུགས་ཀའི་ས་བོན་འོད་ཀྱིས་ནི། །ནམ་མཁར་འཁོར་ལོ་སྦྱངས་བྱས་ཏེ། །ཡི་གེ་ཧཱུྃ་གི་རྣམ་པར་བསམ། །དེ་ཡོངས་གྱུར་ལས་སྐུ་ཚོགས་སྒོམ། །དེ་དབུས་ཤེས་རབ་རྣམ་པར་བསམ། །ཟླ་དབུས་སྟེང་དུ་ཧུྃ་ལས་
ནི། །འཁོར་ལོ་རྩིབས་ལྡན་བསྒོམ་པར་བྱ། །དེར་ནི་ཡི་གེའི་རྣམ་པ་ནི། །མར་མེ་ལྟ་བུ་གསལ་དམིགས་ལ། །མཁའ་འགྲོ་མ་དང་དབྱེར་མེད་བྱ། །རང་སྙིང་ས་བོན་ལས་བྱུང་བའི། །གསང་སྔགས་སྟོང་ཕྲག་བཟླས་བྱས་ནས། །གསེར་སོགས་དྲིལ་ནས་ལུས་སམ་མགུལ། །
བཏགས་ན་འཇིགས་པ་བརྒྱད་ལས་སྐྱོབ། །ཐམས་ཅད་དུ་ནི་བསྲུང་བར་ངེས། །ཡུངས་ཀར་བ་ཡི་རྣམ་ལྔ་དང་། །དཱུར་བའི་སྙེ་མར་བཅས་པ་ལ། །གསང་སྔགས་སྟོང་ཕྲག་བཟླས་ནས་ནི། །རྒན་མོ་མིང་མེད་སྦྱོར་བ་ཡིས། །གནས་གསུམ་ཐིག་ལེ་བྱས་བསྲུང་ན། །ཚེ་ནི་སྟོང་ཕྲག་
དུ་མར་འཕེལ། །ཀུ་ཤ་བ་མར་ཡུངས་ཀར་ཏིལ། །གསང་སྔགས་སྟོང་ཕྲག་བཟླས་བྱས་ཏེ། །ཤིས་པར་གྱུར་པའི་ཉི་མ་ལ། །མཆོད་རྟེན་སྤྱི་བོར་གདགས་བྱས་ན། །འགོ་བའི་ནད་རྣམས་འཆད་པར་འགྱུར། །ཁྲག་དང་ཁྲོ་ཆུར་བཅས་པ་ལ། །གསང་སྔགས་སྟོང་ཕྲག་
གསུམ་བཟླས་ཏེ། །ཟླ་བ་གཟས་གཟུང་དུས་སུ་ནི། །ཉེ་བསྙེན་རྫོགས་པར་བྱས་ནས་ནི། །རྫས་ནི་ཤིན་ཏུ་སྤ་བྱས་ཏེ། །ལྷ་ཚོགས་གནོད་པ་གང་དམིགས་པའི། །སྙིང་གར་སྔགས་ནི་བསྣུན་བྱས་ན། །གང་དམིགས་བགེགས་ནི་རྣམ་པར་འཇིག །རས་བལ་གསར་
པར་གྱུར་པ་ལ། །ཤེས་རབ་མཚན་ལྡན་ཁྲུས་བྱས་ཏེ། །ཤིས་པའི་ཉི་མ་ལ་བཀལ་ནས། །བཅིངས་པའི་གྲངས་ཀྱིས་མདུད་བྱས་ཏེ། །སྟོང་ཕྲག་གཅིག་གི་སྔགས་བཟླས་ནས། །ལུས་སམ་མགུལ་ལམ་སྤྱི་བོར་གདགས། །དེས་ནི་ཚེ་ལོ་སྟོང་ཕྲག་ཐུབ། །

ཡང་ན་རང་ལུས་རྣམས་བསྒྲིམས་ནས། །ཆུ་ཡི་ཚོགས་ཀྱིས་དག་བྱས་ཏེ། །ཉི་ཤུ་རྩ་གཅིག་གྲངས་ལྡན་པར། །གཟུངས་ཀྱི་ཕྲེང་བ་བརྗོད་བྱས་ན། །གསར་ཕྱག་ལག་ཏུ་མ་བླངས་ཤིང་། །བདེན་བྲལ་ཕྱི་རོལ་མ་སོང་བར། །གཞན་གྱི་འཇིགས་པ་མ་བསལ་ཞིང་། །
ཚེ་ལོ་བརྒྱ་ནི་རྩ་བརྒྱད་པར། །རིམས་ནད་ཙམ་ཡང་མི་གནོད་དོ། །གོས་དང་ཟས་དང་སྣོད་སྤྱད་དང་། །སྨན་ལ་སོགས་པའི་རྫས་རྣམས་ནི། །མི་འཁྲུགས་རྒྱལ་པོའི་ཕྱག་རྒྱ་ཡིས། །བསྲུངས་ན་ཅིས་ཀྱང་མི་ཤོད་དེ། །སེང་ཆེན་རྔམ་པའི་སྟབས་ཀྱིས་ནི། །འུག་པའི་སྒྲ་
གསུམ་བརྗོད་བྱས་ན། །ཕྱི་རོལ་རིག་སྔགས་སྟོང་ཕྲག་ནི། །དུ་མས་ཅིས་ཀྱང་མི་ཚུགས་སོ། །ཀླུ་ཡི་དབང་པོ་གནས་ལུགས་ཀྱིས། །རྩེ་གཅིག་རྡོ་རྗེའི་ཕྱག་རྒྱ་བཅས། །དེ་ནས་གསང་སྔགས་གསུམ་བརྗོད་ན། །ནད་དང་གདོན་ལ་སོགས་པ་སེལ། །རི་བོང་ནུ་མའི་
མཚམས་བྱས་ནས། །ཧཱུྃ་གིས་མནན་པའི་སྔགས་ཀྱིས་ནི། །དམིགས་མེད་ཏིང་འཛིན་ཡིད་བརྟན་ཞིང་། །འདིས་ཀྱང་གནོད་པ་ལས་བསྲུང་འགྱུར། །ཕྱི་རོལ་སོགས་པ་ཀུན་སྤངས་ནས། །སྣང་བ་ཡིད་ཀྱིས་བསླབས་བྱས་ཏེ། །མི་སྣང་བ་ལ་མངོན་དམིགས་ནས། །བསྲུང་བ་
རྣམས་ཀྱི་དམ་པ་བཤད། །དེ་ནས་གཞན་ཡང་སྦྱོར་བ་བཤད། །དུར་ཁྲོད་ལ་སོགས་འཇིགས་གནས་སམ། །མཚོ་དང་མཚེའུ་དང་དགོན་གནས་དང་། །གནས་དང་སྐྱེད་མོས་ཚལ་ཆེན་དང་། །མེ་ཏོག་ཚལ་ལམ་ཡུལ་འཁོར་ལྗོངས། །ཆུ་ཡི་འགྲམ་མམ་ཤིང་གཅིག་
གམ། །ཡང་ན་རང་གི་ཁྱིམ་ཉིད་དུ། །མཎྜལ་ལེགས་པར་བྱུགས་པ་ལ། །བརྟེན་ནས་ལྷ་ཡི་སྦྱོར་བ་སྒྲུབ། །རས་རིས་ལ་སོགས་མདུན་བྱས་ཏེ། །བདེ་བའི་སྟན་ལ་སྐྱིལ་ཀྲུང་གིས། །བསྡད་ནས་མཉམ་གཞག་བརྩམ་པར་བྱ། །ཐ་མལ་སྦྱངས་པའི་ལུས་ཀྱིས་ནི། །ཐར་
པ་ཆེན་པོ་ཐོབ་འགྱུར་ཏེ། །གཞན་དུ་དེ་ལྟར་མ་ཡིན་ནོ། །ས་གཞི་ཤིན་ཏུ་ཉམས་དགའ་ཞིང་། །ལེགས་པར་བཀོད་པའི་རི་བོ་ལ། །ནགས་ཚལ་ཤིན་ཏུ་སྡུག་པ་ལ། །བསིལ་བའི་ཆུ་རྒྱུན་འབབས་པའི་ཕྱོགས། །རྣམ་བཀོད་མེ་ཏོག་ཚལ་གསེབ་ཏུ། །ཤར་དུ་སྒོ་བསྟན་

ཁང་པ་ལ། །སྔགས་བཞིས་མཚམས་བཅིངས་ཆོ་ག་ཡིས། །གསལ་ཁུང་དང་བཅས་བརྩིགས་པའི་ཕྱོགས། །སྙན་པའི་བྱ་ཡིས་སྒྲ་སྒྲོགས་ཤིང་། །དྲི་ཞིམ་སྤོས་ངད་ལྡན་པ་ལ། །དྲིལ་བུ་སིལ་སིལ་སྒྲ་སྙན་སྒྲོགས། །ལྡ་ལྡི་གོས་ཀྱི་ཕྲེང་བས་དཀྲིས། །ལྷག་
པའི་འདུ་འཛི་རྣམ་སྤངས་ནས། །སྤྱོད་པ་མཐུན་པའི་གྲོགས་དང་ནི། །བདེ་བར་བྱང་ཆུབ་བསྒྲུབ་པར་བྱ། །འོན་ཀྱང་གནས་དང་གྲོགས་ལ་སོགས། །རྣལ་འབྱོར་ཡིད་འཇུག་ཕྱིར་བརྩམ་སྟེ། །མཐའ་དག་སྤངས་པའི་ཕ་རོལ་ན། །ལྷག་པའི་བྱང་ཆུབ་མ་མཆིས་སོ། །བདེ་དང་སྡུག་བསྔལ་
སྣ་ཚོགས་རྣམས། །རང་ག་སེམས་ལས་འབྱུང་མོད་ཀྱི། །སེམས་རྟོག་མ་ལུས་སྤང་བ་ལས། །ངས་ནི་ཆོས་གཞན་འགའ་མ་བཤད། །དེ་བས་སེམས་རྟོག་སྣ་ཚོགས་རྣམས། །སྤང་བར་བྱ་ཕྱིར་སྣ་ཚོགས་ཐབས། །སྔགས་དང་ཕྱག་རྒྱ་ཏིང་འཛིན་དང་། །སྦྱོར་བ་རྒྱ་ཆེན་རྣམས་
བཤད་དོ། །དྲག་པོ་སྒྲུབ་པའི་ཐབས་འགའ་ནི། །རིག་པའི་ཁྲོ་མོས་མཉན་པར་གྱིས། །ས་གཞི་བདུད་རྩི་ལྔ་ཡིས་བྱུགས། །མེ་ཡི་དཀྱིལ་འཁོར་ས་བོན་བཅས། །དུར་ཁྲོད་ཕ་གུས་བྲི་བར་བྱ། །དེར་ནི་ཕོ་མོ་ཐོད་པ་ལ། །ཕྱི་རོལ་དམར་ནག་ཚོན་གྱིས་བྱུགས། །ནང་དུ་
སྣ་ཚོགས་རྡོ་རྗེ་ནི། །མུ་ཁྱུད་གསུམ་ལྡན་བྲི་བར་བྱ། །དབུས་སུ་རྡོ་རྗེ་མཁའ་འགྲོ་མའི། །སྙིང་པོ་སྔགས་བཅས་བྲི་བར་བྱ། །རྡོ་རྗེ་རྭ་ནི་ཐམས་ཅད་ལ། །ཧཱུྃ་བྲི་མུ་ཁྱུད་གཉིས་ཕྲེང་སྔགས། །གསུམ་པར་ཁྲོ་བོའི་སྔགས་བྲིའོ། །ཐོད་པ་ཁ་སྦྱོར་ནང་དུ་ནི། །སྐེ་ཚེ་ཡུངས་
ཀར་བཙན་དུག་དང་། །ལན་ཚྭ་ཁྲག་དང་ཤ་ཆེན་དང་། །རྐང་རྗེས་ས་ལ་སོགས་པ་བླུགས། །གཅེར་བུ་རྣལ་འབྱོར་སྐྲ་བཤིག་ནས། །ལྷ་ཡི་སྦྱོར་ལྡན་ལྷོར་བལྟས་ནས། །ཞབས་ཀྱིས་ཐོད་པའི་འཁོར་ལོ་ནི། །མནན་ཏེ་སྔགས་ཕྲེང་བརྗོད་པར་བྱ། །ཁྲོ་བོ་ཆེན་པོའི་སྦྱོར་བ་ཡི། །
མཉམ་བཞག་ནས་ནི་སྟོང་ཕྲག་ཏུ། །བཟླས་པ་མཚན་ཕྱེད་པར་བྱས་ན། །བསད་པ་ཉིད་ལ་ཐེ་ཚོམ་མེད། །དུར་ཁྲོད་རས་ལ་འཁོར་ལོ་ནི། །དབུས་སུ་མེ་ཡི་དཀྱིལ་འཁོར་ཅན། །རྩིབས་བརྒྱད་མུ་ཁྱུད་གསུམ་ལྡན་པ། །དབུས་སུ་སྙིང་པོ་སྔགས་རྣམས་ལ། །ཧཱུྃ་

གཉིས་པར་དུ་བསྒྲུབ་བྱའི་མིང་། །བསད་པ་ཉིད་དང་ལྡན་པར་བྱ། །མུ་ཁྱུད་གཉིས་པ་ཕྲེང་སྔགས་ཀྱང་། །མིང་དང་བསད་པར་ལྡན་པའོ། །གསུམ་པ་ཁྲོ་བོའི་སྔགས་བྲིས་ཏེ། །འཁོར་ལོ་མཆོད་ཅིང་བྱིན་བརླབས་ནས། །དགྲ་གཟུགས་སོར་བརྒྱད་སྙིང་གར་གཞུག །
དེ་ཉིད་ཏིལ་མར་གྱིས་བྱུགས་ཏེ། །ཐོད་པ་གཉིས་ཀྱི་འཁོར་ལོ་ཡི། །བར་དུ་བཅུག་ནས་མེ་སྟེང་གཞག །སེང་ལྡེང་ཕུར་པ་སོར་བརྒྱད་པ། །མཉམ་གཞག་སྦྱོར་བས་སྔགས་དེ་གདབ། །བསད་པའི་སྦྱོར་བ་འདི་ཉིད་ཀྱིས། །ཤི་བར་འགྱུར་ལ་གཞན་དུ་མིན། །ཡང་ན་
བྱང་ཆུབ་ཡན་ལག་ལས། །དུར་ཁྲོད་ཁྲག་གིས་འཁོར་ལོ་བྲི། །གུ་གསུམ་བརྩེགས་པའི་གཟུགས་བྲིས་ཏེ། །དབུས་སུ་དགྲ་མིང་གསང་སྔགས་བཅས། །རྩིབས་ལ་བཅུ་གཉིས་བར་དུ་ནི། །མིང་དང་བསད་པ་བཅས་པ་བྲི། །མུ་ཁྱུད་དང་པོའི་སྔགས་ཕྲེང་ཡང་། །རྒྱས་
བའི་ཡན་ལག་ལྡན་པར་བྲི། །སྤྲ་ཚིལ་གཟུགས་བརྙན་སོར་བརྒྱད་པའི། །སྙིང་གར་བཅུག་ནས་སྐྲ་ཡིས་དཀྲི། །རྣལ་འབྱོར་པ་ཡི་ཉལ་བའི་ཞབས། །མགོ་བོ་ལྷོར་བསྟན་གཞག་པར་བྱ། །ཆུ་ཤེལ་མ་མཐོང་བར་དུ་ནི། །ཉི་ཤུ་རྩ་གཅིག་སྔགས་བརྗོད་ནས། །མི་ཡི་རྡོ་
རྗེའི་དར་གྱིས་བརྒྱན། །སྡང་བྱེད་ས་སྟེང་འདིར་མི་གནས། །ཀླུ་ཡི་གནས་སུ་གྲགས་པའམ། །ཆུ་ཡི་རྫིང་ལ་སོགས་འགྲམ་དུ། །དཀྱིལ་འཁོར་བ་ཡི་རྣམ་ལྔས་བྱུགས། །པདྨ་དམར་པོའི་རི་མོ་ལ། །ལྟེ་བ་རྡོ་རྗེ་མཁའ་འགྲོ་མ། །གསེར་གྱི་མདོག་ཅན་ཐལ་མོ་སྦྱར། །
ཀླུ་ཡི་གདེངས་ཀ་བདུན་ལྡན་པ། །ཟླ་བའི་དཀྱིལ་འཁོར་སྟེང་གནས་པ། །ཤིན་ཏུ་བལྟས་པས་གནས་པར་བྱ། །དགའ་བོ་ཉེར་དགའ་འཇོག་པོ་དང་། །མཐའ་ཡས་དུང་སྐྱོང་རིགས་ལྡན་གཟུགས། །པདྨ་པད་ཆེན་རྣམས་བྱས་ཏེ། །དཀར་དང་སེར་དང་ལྗང་བ་དང་། །
དམར་དང་ལྗང་སྐྱ་སྔོ་སྐྱ་དང་། །དམར་སེར་ལྗང་སེར་འཛུམ་པའི་གཟུགས། །གཙོ་ལ་ཐལ་མོ་སྦྱར་བཏུད་ནས། །རྒྱུ་སྐར་ཕྲེང་བ་དང་ལྡན་གནས། །འོ་མ་འབྲས་ཅན་མཁལ་ཞོ་ཤ། །པུས་ཀ་ཙ་ཏི་ལ་སོགས་སྨན། །ཁུར་བ་ཚོགས་བུ་དང་བཅས་པ། །རིན་ཆེན་

སྣོད་དུ་དགྲམ་པར་བྱ། །གཟའ་དང་རྒྱུ་སྐར་རྣམས་དགའ་ཞིང་། །ཀླུ་རྣམས་བདེ་བའི་སེམས་ཐོབ་ཤོག །ལྷ་རྣམས་ཡིད་ནི་མཉམ་བཞག་ནས། །སྙིང་རྗེའི་བློ་ཆེན་སྐྱེ་བར་ཤོག །ལྷ་ཀླུ་གནོད་སྦྱིན་དྲི་ཟ་སོགས། །བྱང་ཆུབ་སེམས་ཆེན་དང་ལྡན་ནས། །
ཐུགས་རྗེ་ཉེ་བར་དགོངས་ནས་ཀྱང་། །དུས་སུ་ཆར་ཆེན་འབེབ་པར་ཤོག །སྨོན་ལམ་དེ་ཡི་རྗེས་སུ་ནི། །གཟུངས་ཀྱི་ཕྲེང་བ་བརྒྱ་རྩ་བརྒྱད། །བརྗོད་པའི་དེ་མ་ཐག་ཏུ་ནི། །ཆར་གྱི་རྒྱུན་ཡང་འབབ་པར་འགྱུར། །གལ་ཏེ་ཅུང་ཟད་མི་འབེབས་ན། །མེ་ལ་བསྡིགས་པ་ཙམ་
གྱིས་ནི། །གློག་གི་ཕྲེང་བ་གཏོར་བྱེད་ན། །ཆར་ཆེན་འབེབས་ལ་ཐེ་ཚོམ་མེད། །ཝ་ཡི་ཁྲག་གིས་གྲོ་ག་ལ། །གང་གི་འཁོར་ལོ་བསྐྲད་པ་ཡི། །ཐབས་དང་ལྡན་པར་བྲི་བྱས་ནས། །དུར་ཁྲོད་ས་ལས་བྱས་པ་ཡི། །རྔ་མོའི་སྙིང་གར་བཅུག་ནས་ཀྱང་། །རྐང་པ་
གཡོན་པས་མནན་ནས་ནི། །ལྷོར་བལྟས་བཀའ་ཡི་སྦྱོར་བ་ཡིས། །གསང་སྔགས་ཁྲི་ཕྲག་གཅིག་བརྗོད་ན། །བསྐྲད་པ་ཉིད་ལ་ཐེ་ཚོམ་མེད། །སྦྲུལ་དང་སྲེ་མོའི་ཁྲག་གིས་ནི། །རྟ་དང་མ་ཧེའི་པགས་པ་ལ། །མཉམ་དུ་གཉིས་ཀྱི་གཟུགས་བྲི་ཏེ། །དབྱེ་བའི་སྔགས་དང་
བཅས་པ་ཡི། །འཁོར་ལོ་ཐོད་པའི་གཟུགས་བྲིས་ལ། །པགས་པ་གཉིས་ཀྱིས་དཀྲིས་བྱས་པ། །ཟླ་གམ་བྱེ་བྲག་དཀྱིལ་འཁོར་ལ། །བརྟེན་པས་དབྱེ་བའི་སྦྱོར་བ་རྫོགས། །མཚལ་དང་ཙནྡན་ག་བུར་བསྲེས། །ཟླ་གམ་དབྱིབས་ཀྱི་དཀྱིལ་འཁོར་ལ། །སྙིང་པོ་དབང་
གི་སྦྱོར་བར་བཅས། །ནུབ་ཏུ་བལྟས་ནས་བསྒྲུབས་པ་ཡི། །ལྷ་ཡི་དབང་པོ་དབང་དུ་འགྱུར། །རྒྱུད་ཀྱི་ཁྱད་པར་སྦྱོར་བའོ། །དྲི་ཡི་རྒྱལ་པོ་སྣ་ཚོགས་ཀྱིས། །ཤིང་གི་ལོ་མ་དཀར་པོ་ལ། །རྡོ་རྗེ་རྒྱ་གྲམ་གཉིས་བརྩེགས་ཀྱི། །ཕྱོགས་ཀྱི་རྭ་རྣམས་ཧཱུྃ་གིས་སྤྲས། །
མཚམས་ཀྱི་རྭ་རྣམས་དབུ་མ་ལ། །ཧཱུྃ་བྲི་རཱ་ཡི་ཡན་ལག་ལ། །ཕཊ་ནི་ཕྱིར་ལ་བལྟས་པ་བྲི། །རྒྱ་ཆེན་གསོལ་བ་གདབ་པར་བྱ། །གོས་བཟང་ངམ་ནི་སྐགས་ཤིང་དུ། །བཙུག་ནས་རྒྱལ་མཚན་རྩེར་བཏགས་ན། །རླུང་དང་ཐོག་དང་སེར་བ་གཅོད། །དམད་པ་རྣམས་

དང་འབྲེལ་བ་སྤང་། །ཐལ་བ་ཆུ་དང་ཡུངས་ཀར་ལ། །སྔགས་ཀྱི་ཕྲེང་བ་བཟླས་བྱས་ཏེ། །སྤྲིན་ལ་སོགས་པ་འཁྲུགས་པའི་ཚེ། །གཏོར་བ་ཙམ་གྱིས་འཆད་པར་འགྱུར། །འབྲུ་མར་ཡུངས་ཀར་སེར་པོ་ལ། །སྔགས་ནས་ལུས་ལ་བྱུགས་ཙམ་གྱིས། །ཕྲན་ཚེགས་ནད་རྣམས་
ཐམས་ཅད་ལས། །མ་ཧེ་ཤིན་ཏུ་བརྟན་པར་བྱེད། །འཕགས་མ་རྡོ་རྗེ་ལུ་གུ་རྒྱུད་ཀྱི་འཁྲུལ་འཁོར་གྱི་ལེའུ་སྟེ་གསུམ་པའོ།། །།དེ་ནས་གཞན་ཡང་བཤད་བྱ་བ། །སྦྱིན་སྲེག་ཐབ་ཀྱི་སྦྱོར་བ་ཡིས། །དངོས་གྲུབ་ཐམས་ཅད་མྱུར་བྱེད་དེ། །སྣ་ཚོགས་ལྷ་མོས་མཉན་པར་
བྱོས། །སེར་སྣ་སྤངས་ཤིང་གཡོ་སྒྱུ་མེད། །དུལ་ལ་དཔའ་བརྟུལ་བཟོད་པ་ཆེ། །མཁས་ཤིང་རིག་པ་བརྩོན་འགྲུས་བཟང་། །སྔགས་ལ་མཁས་པས་སྦྱིན་སྲེག་བརྩམ། །ཐབ་ནི་ཉི་ཤུ་སོར་ཚད་ལ། །ཕྱེད་བརྐོས་ཁ་ཕྱིར་རྡོ་རྗེ་ནི། །རྩེ་གསུམ་དུར་ཁྲོད་ཚོན་གྱིས་བྲི། །
ཕྱི་རོལ་ཕྱག་རྒྱ་རྣམ་བཀོད་ནས། །དྲི་ཞིམ་མེ་ཏོག་གཅལ་དུ་བཀྲམ། །དེར་ནི་མཆོད་ཅིང་བསྲེག་པའི་རྫས། །ཚོགས་ནས་རྫས་རྣམས་བསང་གཏོར་བྱ། །བོང་བུ་རྔ་མོའི་རིལ་མ་དང་། །གསལ་ཤིང་ཆེར་བཅས་ཤིང་ལ་མེ། །ས་བོན་ལས་སྐྱེས་སྤར་བར་བྱ། །དེར་ནི་རྡོ་རྗེ་
ལུ་གུ་རྒྱུད། །བསྐྱེད་པའི་ཆོ་ག་རྫོགས་བྱས་ནས། །མཆོད་ཅིང་བསྟོད་ནས་དེར་རྗེས་སུ། །སྐེ་ཚེ་ཡུངས་ཀར་བཙན་དུག་དང་། །རུས་ཕྱེ་ཤ་ཆེན་ཏིལ་ནག་པོ། །དང་བཅས་སྦྱིན་སྲེག་སྟོང་ཕྲག་གཅིག །ཕྲེང་བའི་སྔགས་ཀྱིས་སྦྱོར་བར་བྱ། །ཐོག་མ་ཐ་མར་མར་ཆེན་
དང་། །ཏིལ་མར་བརྒྱ་ཕྲག་རེ་རེ་སྦྱིན། །སྦྱོར་བཅས་སྦྱིན་སྲེག་རྫོགས་པ་དང་། །ཞག་བདུན་གྱིས་ནི་བསྒྲུབ་བྱ་དེ། །ཤི་བར་འགྱུར་ལ་ཐེ་ཚོམ་མེད། །གླང་ཤ་སྦལ་ཤ་པྲི་ཡང་ཀུ། །སྦྱིན་སྲེག་སྟོང་གིས་བསྒྲུབ་བྱ་ཞིང་། །བ་བླ་ལྡོང་རོས་རུ་རྟ་དང་། །ལིང་ག་གླང་པོ་བསེ་ཤར་
བཅས། །སེར་པོར་བྱས་ལ་སྟོང་ཕྲག་ནི། །གཅིག་གིས་འཕྲལ་དུ་རེངས་པར་བྱེད། །སྦྲུལ་རྟ་ནེའུ་ལེ་མ་ཧེའི་ཤ། །བྱ་རོག་འུག་ཤ་སྟོང་ཕྲག་གཅིག །བསྲེགས་པས་བསྒྲུབ་བྱ་འབྱེར་བར་ངེས། །བྲ་བོ་འབྲས་བུ་ར་ཤ་ཁྲག །སྟོང་ཕྲག་གཅིག་གིས་ལྐུགས་པར་འགྱུར། །རྔ་

མོ་བྱ་རོག་རྒན་པོའི་ཤ། །སཱ་ལུ་དམར་ཏིལ་དཀར་པོ་དང་། །ཡུངས་ཀར་སེར་པོ་ལ་སོགས་པ། །སྟོང་དུ་བསྲེགས་པས་སྐྲོད་པར་བྱེད། །འབྲུ་ལྔ་སྨད་འཚོང་རང་བྱུང་གིས། །ནམ་ཕྱེད་ནུབ་ཏུ་ཁ་བལྟས་བྱུག །མེ་ཏོག་པདྨ་དང་བཅས་པའི། །ཁ་དོག་དམར་
དང་ལྡན་པ་ཡི། །འོད་ཟེར་དམར་ལྡན་སྟོང་ཕྲག་གིས། །ངེས་པར་འགུགས་དང་དབང་དུ་འགྱུར། །ཏིལ་བཅས་མར་གྱི་སྦྱིན་སྲེག་ནི། །སྟོང་ཕྲག་བྱས་ན་སྡིག་པ་འབྱང་། །མར་དང་དཱུ་ར་བ་ཙནྡན་བཅས། །སྦྱིན་སྲེག་སྟོང་གིས་ཚེ་འཕེལ་འགྱུར། །ཀུ་ཤ་བྱང་ཆུབ་ཤིང་འབྲས་
བུ། །ཡུངས་ཀར་དཀར་པོ་ལན་ཚྭ་ཡི། །སྟོང་བསྲེགས་འགོ་བའི་ནད་རྣམས་འཆད། །ཡུངས་ཀར་ཤ་ཆེན་ཕྱེ་མ་དང་། །དུར་ཁྲོད་ཐལ་བ་དུག་སྣ་ཚོགས། །ཁྲོ་ཆུ་ཕྱེ་མའི་སྦྱིན་སྲེག་སྟོང་། །ཁྲོས་པས་བྱས་ན་ལྷ་ཚོགས་འཇིག །ཨུཏྤལ་དམར་དང་ཡང་ན་དཀར། །གུར་གུམ་
བཟང་པོའི་སྦྱིན་སྲེག་ནི། །སྟོང་རྩ་བརྒྱད་ཙམ་བསྲེག་བྱས་པས། །རིགས་ལྡན་བུ་མོ་དབང་དུ་འགྱུར། །ཨ་རུ་ར་དང་ཡུངས་ཀར་དང་། །བ་ཡི་འོ་མ་སྟོང་བསྲེགས་ན། །རྣམ་ཐོས་རྒྱལ་པོའི་གཏེར་ཙམ་གྱིས། །ལོངས་སྤྱོད་ཆེན་པོ་འཐོབ་པར་བྱེད། །ཨོཾ་རཀྵ་རཀྵཾ་ཀུ་རུ་ཨོཾ། བསྲུང་
པའི་སྔགས་སོ། །ཨོཾ་ཤཱནྟིཾ་ཀུ་རུ་ཨོཾ། །ཐམས་ཅད་དུ་ཞི་བའི་སྔགས་སོ། །ཧཱ་བ་ཤཾ་ཀུ་ར་ཧཱ། མཐའ་དག་དབང་དུ་བྱ་བའོ།། །།སྭཱ་པུཥྚི་ཀུ་རུ་སྭཱ་ཧཱ། ཐམས་ཅད་དུ་རྒྱས་པར་བྱེད་པའི་སྔགས་སོ། །ཕཊ་ཧཱུྃ་མཱ་ར་ཡ་མཱ་ར་ཡ་ཧཱུྃ་ཕཊ། གསོད་པའི་སྔགས་སོ། །བཾ་བི་དེ་ཤ་ཡ་བཾ།
དབྱེ་བར་བྱེད་པའི་སྔགས་སོ། །ཨཱུ་ཨུཙྩ་ཊ་ཡ་ཨུཾ། བསྐྲད་པར་བྱེད་པའི་སྔགས་པོ། །ལཾ་སྟཾ་བྷ་ཡ། སྟཾ་བྷ་ཡ་ལྃ། རེངས་པར་བྱེད་པའི་སྔགས་སོ། རྃ་ཛྭ་ར་ཛྭ་ར་རྃ། རིམས་པ་སྐྱེད་པའི་སྔགས་སོ། །ཛ་ཨཱ་ཀརྵ་ཡ་ཧྲིཿཛ། དགུག་པའི་སྔགས་སོ། །ཨོཾ་པར་ཤ་པ་ཏ་ཡ་
པ་ཏ་ཡ་ཨོཾ། ཆར་བ་དབབ་པའི་སྔགས་སོ། །ལཾ་ཤཾ་ལཾ་བྷི་སྟཾ་བྷ་ཡ་ལཾ། སེར་བ་བཅད་པའི་སྔགས་སོ། །ཛྃ་ཛེ་ཏེ་ཡ་ཛེ་ཏེ་ཡ་ཛྃ། ཞི་བར་བྱེད་པའི་སྔགས་སོ། །ཧཱུྃ་ཡར་ཡཉྩ། མནྟྲ། ཏནྟྲ། ཙྪིནྡ། བྷིནྡ། བྷིནྡ། བྷིནྡ། བན་དྷ་བན་དྷ། ཞེས་པ་ནི་ཐམས་ཅད་དུ་རིག་

སྔགས་གཙད་པར་བྱེད་པའི་སྔགས་སོ། །རིག་པའི་རྒྱལ་པོ་བླ་མེད་ནི། །གསང་ཆེན་འདི་ལས་འབྱུང་བར་འགྱུར། །གསང་ཆེན་རྒྱུད་འདི་ངོ་མཚར་ཏེ། །རྨད་བྱུང་བས་ཆེས་རྨད་དུ་བྱུང་། །བསྟན་པའི་སྙིང་པོ་གསང་ཆེན་འདི། །གསུངས་པའི་དེ་མ་ཐག་ཏུ་ནི། ཕྱོགས་
བཅུའི་རིག་སྔགས་འཆང་བ་རྣམས། །ངོ་མཚར་བསྐྱེད་ནས་ཐལ་མོ་སྦྱར། །བདེ་བའི་སྙིང་པོ་ཤིན་ཏུ་ལེགས། །ལེགས་སོ་ལེགས་སོ་རྡོ་རྗེ་འཛིན། །གང་ལ་བདེ་བསྐྱེད་དཔལ་ཐོབ་བྱེད། །བདག་ཅག་རྣམས་ལ་ཐུགས་རྗེ་ཡིས། །རྒྱུད་ཀྱི་སྙིང་པོ་འདི་བཤད་པ། །རྗེ་
ཆེན་ལེགས་སོ་ངོ་མཚར་ཆེ། །འཕགས་མ་རྡོ་རྗེ་ལུ་གུ་རྒྱུད་ཀྱི་རྟོག་པ་ལས་སྦྱིན་སྲེག་གི་ལེའུ་སྟེ་བཞི་བའོ། །འཕགས་མ་རྡོ་རྗེ་ལུ་གུ་རྒྱུད་ཀྱི་རྟོག་པ་ཨོཊྱ་ན་ནས་འབྱུང་བ་རྫོགས་སྷོ།། །།པཎྜི་ཏ་ཨ་ཏུ་ལ་ད་ས་བཛྲ་ལ་ཞུས་ནས། བོད་ཀྱི་ལོ་ཙྭ་ང་མར་པ་
ཆོས་ཀྱི་དབང་ཕྱུག་གྲགས་པས་བསྒྱུར་བའོ།། ༄༅༅། །རྒྱ་གར་སྐད་དུ། བཛྲ་ཏུཎྜ་ནཱ་མ་ནཱ་ག་ས་མ་ཡ། བོད་སྐད་དུ། རྡོ་རྗེ་མཆུ་ཞེས་བྱ་བ་ཀླུའི་དམ་ཚིག་གོ། །ཐམས་ཅད་མཁྱེན་པ་ལ་ཕྱག་འཚལ་
ལོ། །དེ་ནས་བཅོམ་ལྡན་འདས་གྲོང་ཁྱེར་ཆེན་པོ་གཡོག་འདོར་ན་བཞུགས་ཏེ། འཁོར་འདུས་པ་ཆེན་པོ་འཇོག་པོ་ལ་སོགས་པ་ཀླུའི་འཁོར་དང་། ལྷ་དང་མིའི་ཚོགས་ཀྱི་འཁོར་ཆེན་པོ་ལ་སེམས་ཅན་རྣམས་ཀྱི་དོན་ཆེན་པོའི་ཕྱིར་ཏེ། བསམ་པ་དང་རེ་བ་ཐམས་ཅད་
ཡོངས་སུ་སྐོང་བ་བདེ་བར་བྱེད་པའི་ཆོས་སྟོན་ཏོ། །དེ་ནས་གྲོང་ཁྱེར་དེ་ནས་བྲམ་ཟེའི་ཁྱེའུ་ཁྱབ་མ་སྤྱན་ཞེས་བྱ་བ་ཕྱུག་པ་ནོར་ཆེ་བ། ལོངས་སྤྱོད་ཆེ་བ། རྫས་དང་ཡོ་བྱད་མང་པོ་ཕུན་སུམ་ཚོགས་པ། རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་ཏུ་ཕྱིན་པ། སྔགས་
ལ་འཇུག་པ། སྔགས་གྲུབ་པ་ཞིག་འདུག་སྟེ་དེ་ཡང་ཡང་དང་ཡང་དུ་ཀླུ་འགུགས་ཤིང་མེའི་སྦྱིན་སྲེག་བྱེད་དོ། །བྲམ་ཟེ་དེའི་ལོ་ཏོག་སྨིན་ཀར་ཆར་ཆད་པར་གྱུར་ནས། །དེས་ང་རྒྱལ་གྱི་སྒྲས་སྔགས་བརྗོད་པ་དང་མཐུན་པས་འདི་སྐད་ཅེས་བདག་གིས་ཆར་པའི་

རྒྱུན་དབབ་ཅིང་ཀླུ་དགུག་པར་བྱའོ་ཞེས་སྨྲས་ཏེ། དེས་མེའི་སྦྱིན་སྲེག་བྱ་བར་བཤམས་ནས་ཏིལ་དང་། འབྲས་དང་། ཡུངས་ཀར་རྣམས་འབྲུ་མར་ཚ་བ་དང་བསྲེས་ཏེ་སྦྱིན་སྲེག་བྱེད་དོ། །དེ་ནས་ཀླུ་མི་སྲུན་པ་ཞིག་གི་གཟུགས་བྱས་ཏེ། དེས་ལྕགས་
ཀྱི་ཕུར་བུ་ལ་བསྔགས་ནས་ཀླུའི་སྤྱི་བོར་བཏབ་པ་དང་། ཀླུའི་སྤྱི་བོ་གས་ནས་སྡུག་བསྔལ་གྱི་ཚོར་བ་ཆེན་པོར་གྱུར་ཏོ། །ཀླུ་དེ་ཡང་ཆེར་འཁྲུགས་ཏེ་ཁྲོས་ནས་སྐད་ཅིག་ཐང་ཅིག་ཡུད་ཙམ་དེ་ལ་ཀླུས་ཁྱབ་པར་བྱེད་པའི་ཤུགས་ཀྱིས་ཆེར་གནོད་ཅིང་རྡུལ་འབྱུང་བའི་འོད་ཟེར་ཚ་བ་རང་
གི་ལུས་ལས་བཀྱེ་སྟེ་གནོད་པ་ཆེན་པོས་ཁེབས་པར་བྱས་ནས་བྲམ་ཟེ་དེའི་ཞིང་ཚིག་པར་བྱས་སོ། །དེ་ཡང་ལྕེ་འབབ་པའི་ཆར་གྱི་རྒྱུན་ཆེན་པོ་བྲམ་ཟེའི་ལུས་ལ་ཕབ་ནས་བྲམ་ཟེ་དེ་མགོན་མེད། སྐྱབས་མེད། དཔུང་གཉེན་མེད་དེ། མེའི་སྦྱིན་སྲེག་བྱེད་པ་བཏང་ནས་དེ་
བཅོམ་ལྡན་འདས་ལ་མགོན་དང་སྐྱབས་དང་དཔུང་གཉེན་བཙལ་ཏེ་འབྲོས་པར་བསམས་ནས་བཅོམ་ལྡན་འདས་ཀྱི་དྲུང་དུ་བརྒྱུགས་ཏེ། བཅོམ་ལྡན་འདས་ག་ལ་བ་དེར་སོང་ནས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་འདི་སྐད་ཅེས་གསོལ་ཏོ། །བཅོམ་ལྡན་
འདས་ཀླུ་ཁྲོ་བོ་དག་གིས་སྲོག་མ་རུངས་བར་བགྱིད་པར་འཚལ་ཏེ་སྐྱབས་སུ་ཡང་མ་མཆིས་ན། བཅོམ་ལྡན་འདས་བསྐྱབ་ཏུ་གསོལ། །བདེ་བར་གཤེགས་པ་བསྐྱབ་ཏུ་གསོལ། །དེ་ནས་བཅོམ་ལྡན་འདས་ཀྱིས་བྲམ་ཟེ་ཆེན་པོ་དེ་དབུགས་ཕྱུང་ནས་འདི་སྐད་ཅེས་
བཀའ་སྩལ་ཏོ། །བྲམ་ཟེ་ཆེན་པོ་མ་འཇིགས་ཤིག །ངས་ཁྱོད་ཀྱི་མགོན་དང་། སྐྱབས་དང་། དཔུང་གཉེན་བྱའོ་ཞེས་བཀའ་སྩལ་ནས་ཅང་མི་གསུང་བར་བཞུགས་སོ། །དེ་ནས་བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་
ཏོ། །བཅོམ་ལྡན་འདས་གཟིགས་སུ་གསོལ། མངོན་སུམ་དུ་གྱུར་བཞིན་དུ་ཡང་ཀླུ་མི་བགྲུངས་པས་ལོ་ཏོག་མ་རུངས་པར་བགྱིད་ན། བཅོམ་ལྡན་འདས་ཁྱོད་ཡོངས་སུ་མྱ་ངན་ལས་འདས་ཀྱི་སླད་ན་སླད་མའི་ཚེ་སླད་མའི་དུས་ན་སེམས་ཅན་ཐམས་ཅད་ཀྱི་རྟེན་ནི་སུ་ལགས།

ཇི་ལྟར་འགྱུར། བཅོམ་ལྡན་འདས་ལོ་ཏོག་ཐམས་ཅད་ཀྱི་དོན་དུ་ལོ་ཏོག་རྣམས་ཚིག་པར་མི་འགྱུར་བ་དང་། ཀུན་དུ་བསྲུང་བ་དང་། རབ་ཏུ་འཕེལ་བར་བགྱིད་པར་འགྱུར་བ་ལོ་ཏོག་ཡོངས་སུ་སྐྱོང་ཞིང་ཀླུ་བཟློག་པ་དེ་བཤད་དུ་གསོལ། དེ་ནས་བཅོམ་ལྡན་འདས་
ཀྱིས་གསང་བའི་བདག་པོ་ལག་ན་རྡོ་རྗེ་ལ་བཀའ་སྩལ་ཏོ། །ལག་ན་རྡོ་རྗེས་ཀླུ་རབ་ཏུ་འགྲོ་བར་བྱེད་པའི་སྙིང་པོ་སྦས་པ་རྡོ་རྗེ་ཞེས་བྱ་བའི་གཟུངས་དེ་བཞིན་གཤེགས་པའི་སྙིང་པོ་དང་ཕྱག་རྒྱ་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་རྣམས་ཀྱིས་གསུངས་པ་ཡོད་དེ་ངས་བཤད་པར་བྱའོ། །དེས་མྱུར་དུ་གནོད་པ་བཀག་པའི་ཕྱིར་ལོ་ཏོག་ཐམས་ཅད་མྱུར་དུ་བསྐྱང་བར་འགྱུར་རོ། །ལེགས་པར་བསྲུངས་པར་འགྱུར། མེའི་རི་སུལ་ཆེན་པོ་སོ་སོ་ཕྱོགས་བཅུ་ཀུན་ནས་ཀླུ་ཐམས་ཅད་ཀྱི་
མཚམས་བཅད་པར་འགྱུར་རོ། །མེ་ལྕེ་འབར་བའི་རིམ་པའི་སྤྲིན་ཆེན་པོ་ནམ་མཁའ་ལྡིང་འདབ་མ་གདེངས་པའི་ཤུགས་ཞེས་བྱ་བའི་སྤྲིན་གྱི་རིམ་པས་ནམ་མཁའ་ཁེབས་པར་བྱེད་དོ། །ལོ་ཏོག་དང་། མེ་ཏོག་དང་། འབྲས་བུ་ཐམས་ཅད་ཀུན་དུ་བསྲུང་སྟེ་གནས་པར་
འགྱུར་རོ། །དེས་ཀླུ་ལ་སོགས་པ་ཐམས་ཅད་ཀུན་དུ་རབ་ཏུ་འབར་བར་འགྱུར་རོ། །ཀླུ་མི་བགྲུངས་པ་རྣམས་ཕུང་བར་འགྱུར་རོ། །འདུམ་པར་འགྱུར་རོ། དེ་ནས་བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་
ལྡན་འདས་ཀྱིས་སེམས་ཅན་ཐམས་ཅད་ལ་སྨན་པའི་སླད་དུ་གཟུངས་ཆེན་པོ་འདིའི་སྔགས་ཀྱི་ཚིག་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་སྙིང་པོ་འདི་བཀའ་སྩལ་ཏོ། །ན་མོ་བྷ་ག་བ་ཏེ། སརྦ་བུདྡྷཱ་ནཱན། །ན་མོ་བྷ་ག་བ་ཏེ་ཤཱཀྱ་རཱ་ཛཱ་ཡ། ཨོཾ་ཛྭ་ལ་ཛྭ་ལ།
གི་རཱ་བ་བྷ་ནི། །དཱིབྟ་བེ་ག་མ་ཧཱ་བདེ་བྷ་ག་བ་ཏེ་མ་ཧཱ་ཙཎྜ་ཧྲྀ་ད་ཡ་ས་ལ་ནི། ཧུ་རུ་ཧུ་རུ། །ཧ་ར་ཧ་ར། །ད་ཧ་ད་ཧ། པ་ཙ་པ་ཙ། སརྦ་ས་སྱ་ནཱ་ཤ་ཡ། །ནཱ་ག་ཀུ་ལ་བཾ་ཤན་དྷ་ར་དྷ་ར་པྲ་ས་ར་ཙཎྜ་བེ་ག་མ་ཧཱ་བ་ལ་པརཱ་ཀྲ་མ་སྤུ་རི་ཏ་རཽ་དྲ་བཀྟྲ། མ་ཐ་མ་ཐ། པྲ་ཛྭ་ལ་མཱ་ལ།

དྷཱ་ར་ཎཱི། ཙཎྜ་བེ་ག་བ་ཏི། བྲ་པར་བི་མནྡྷ་ར་ཎཱི། ཧཱུྃ་ཧཱུྃ། བ་ལ་བ་ཏེ། བེ་ག་བ་ཏི། ས་ར་ས་ར། བི་ས་ར་བིས་ར་ས་རནྟི། སརྦ་ས་དྲི་སྱ་ན་ནཱ་མ་དྲི་བ་ན་ཡ་དྲི། པུ་ཡ་ཕ་ལ་ཕཊ། དྲ་སནྡྷ་ར་ཎཱི། ཡ་པས་རྦནྟུ་སརྦ་ནཱ་གཏོ་ངས་རྦ་བ་བྷ་བ་བྷ་ནི། བེ་ག་ཏ་བེ་ག་བ་
ཏི་སྭཱ་ཧཱ། ཧཱུྃ་ཧཱུྃ་ཕཊ། ནཱ་ག་བ་ས་ར་ཎི་ཕཊ། ཛྭ་ལ་མཱ་ལི་ནི་ཕཊ། ཛཱ་ལམཱ་ལི་ནི་ཕཊ། ཕཊ་ཕཊ་ཕཊ་སྭཱ་ཧཱ། བཅོམ་ལྡན་འདས་ཀྱིས་ཀླུ་ཐམས་ཅད་དང་། ཀླུ་མི་བགྲུངས་པ་ཐམས་ཅད་མ་རུངས་པར་བྱེད་པའི་རིག་པ་འདི་བཤད་མ་ཐག་ཏུ་ཀླུ་དང་ཀླུ་ཆེན་པོ་ཐམས་ཅད་ཀླད་པ་ན་
བར་གྱུར། ལུས་རུལ་ཏེ་ལུས་རྣགས་ཤིང་དྲི་མི་ཞིམ་པར་གྱུར་ནས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་སྔགས་ཀྱི་ཚིག་ཤིན་ཏུ་མི་བཟད་པ་དག་བཀའ་སྩལ་ཏོ། །བཅོམ་ལྡན་འདས་བདག་ཅག་གིས་ནོངས་
པ་བགྱིས་པ་མི་དྲན་དུ་ལགས་ཀྱིས་ཀྱང་། བཅོམ་ལྡན་འདས་རིག་འཛིན་གནོད་པ་བགྱིད་པས་བདག་ཅག་ལ་བརྙས་པ་དང་། རྡེག་པ་དང་། འཆིང་བ་དང་། སྐྲོད་པ་དང་། གནོད་པ་དེའི་ཚེ་བཅོམ་ལྡན་འདས་ཀླུ་མི་བགྲུངས་པ་རྣམས་འཁྲུགས་ཏེ། དེའི་ཚེ་ལོ་ཏོག་དང་། མེ་
ཏོག་དང་། འབྲས་བུ་མ་རུངས་པར་བགྱིད། སེར་བ་འབབ་པར་བགྱིད། སད་དང་རླུང་གིས་འཁྲུག་པར་བགྱིད། ཧ་ཅང་ཆར་ཆེ་བ་དང་། ཆར་མི་འབབ་པ་དང་། དུས་མ་ལགས་པར་ཆར་བབ་པར་བགྱིད་དོ། །བཅོམ་ལྡན་འདས་རིག་པ་འཛིན་པ་སྔགས་སྨས་པས་བྱམས་
པ་ལ་གནས་པར་བགྱི། བྱམས་པའི་གོ་བགོ་བར་བགྱི།། བྱམས་པའི་རལ་གྲི་ལག་ན་ཐོགས་པར་བགྱི་སྟེ། བྱམས་པས་གནོད་པ་བགྱིད་པ་ཐམས་ཅད་ཞི་བར་བགྱིའོ། །བཅོམ་ལྡན་འདས་དེང་སླན་ཆད་དེ་བཞིན་གཤེགས་པའི་སྤྱན་སྔར་བདག་ཅག་དམ་བཅའ་བར་འཚལ་
ཏེ། གང་ན་རིག་པའི་རྒྱལ་མོ་འདི་རབ་ཏུ་སྤྱོད་པ་དེར་བཅོམ་ལྡན་འདས་ཀླུ་རྩེ་བར་མི་བགྱིད་དོ། །གང་ན་སྙིང་པོའི་གཟུངས་འདིས་བསྲུང་བར་བགྱིས་པ་དང་། ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བར་བགྱིས་པ་དང་། སྲད་བུ་བྲེ་བ་དང་།

མཚམས་དགུམ་པ་དང་། དཀྱིལ་འཁོར་གྱིས་རིས་གཅད་པར་བགྱིས་པ་དེར་བཅོམ་ལྡན་འདས་བདག་ཅག་གིས་རྟག་པར་རྒྱུན་དུ་གནོད་པ་ཐམས་ཅད་བཟློག་པར་བགྱི་འཚལ་ལོ། །ལོ་ཏོག་དང་། མེ་ཏོག་དང་། འབྲས་བུ་ཐམས་ཅད་ཀུན་དུ་བསྲུང་བར་འཚལ་ལོ། །
ཡོངས་སུ་བསྐྱང་བར་འཚལ་ལོ། །ཐ་ན་རྐུན་པོ་དང་། གཡོ་ཅན་དང་། རི་དགས་དང་། བྱ་རྣམས་ཀྱང་ཀུན་དུ་བསྲུང་བར་འཚལ་ཏེ། སླད་ཀྱིས་ཀྱང་མ་རུངས་པར་མི་བགྱིད་དོ། །དེ་ནས་བཅོམ་ལྡན་འདས་ཀྱིས་ཀླུའི་བདག་པོ་དེ་དག་ལ་ལེགས་སོ་ཞེས་བྱ་བ་གནང་
སྟེ། ཀླུའི་བདག་པོ་དག་ལེགས་སོ་ལེགས་སོ། །ཁྱེད་ཀྱིས་དེ་ལྟར་གྱིས་ཤིག །ཁྱེད་ཀྱིས་འཛམ་བུའི་གླིང་འདི་ལེགས་པར་སྲུང་བས་བསྲུང་བར་གྱིས་ཤིག །དེ་ནས་དེའི་འོག་ཏུ་ཆོ་གར་བྱ་བ་ལས་ཐམས་ཅད་བྱེད་པ་དགེ་བར་བ་བ་བརྗོད་པར་བྱའོ། །ལོ་ཏོག་ལ་གནོད་
པར་བྱེད་ན་དེའི་ཚེ་རིག་པ་འཛིན་པས་ཞིང་གི་དབུས་སམ། ཁང་སྟེང་ངམ། གནས་མཐོན་པོར་དཀྱིལ་འཁོར་གྲུ་བཞི་པ་བྱས་ལ་ཕྱོགས་བཞིར་བུམ་པ་བཀང་བ་བཞི་བཞག་གོ། །མེ་ཏོག་སིལ་མས་གཅལ་བཀྲམ་སྟེ་བཞག་གོ། །གཟུགས་འཁྱིལ་པ་བདུན་
བྱའོ། །འབྲས་ལས་བྱས་པའི་འཁྱིལ་པ་བདུན་བྱས་ཏེ། གཟུགས་རེ་རེ་ཞིང་ཡང་གཟུགས་ཉི་ཤུ་རྩ་རེ་བྱའོ། །འབྲས་དང་འོ་ཐུག་བསྲེས་པ་དང་། ཞོ་དང་། འོ་མ་གཞག་པར་བགྱིའོ། །ཕྱོགས་བཞིར་དྲིལ་བུ་གཞག་པར་བྱའོ། །པདྨ་ལྟ་བུར་ཟན་གྱི་
གཏོར་མ་སྔ་མ་བཞིན་གཞག་པར་བྱའོ། །དཀྱིལ་འཁོར་གྱི་དབུས་སུ་བུམ་པ་ཆེན་པོ་བཞག་སྟེ་བ་ལས་བྱུང་བ་ལྔ་དང་། འོ་མ་དང་ཆུས་དགང་ངོ་། །ཡུངས་ཀར་དང་། འབྲས་ཡོས་བླུག་པར་བྱའོ། །སྔགས་ལན་དྲུག་ཅུར་ཡོངས་སུ་བཟླས་པར་བྱའོ། །
སེང་ལྡེང་གི་ཕུར་བུ་བཞི་དང་། ལྕགས་ཀྱི་ཕུར་བུ་གཅིག་བྱ་སྟེ། ཐམས་ཅད་སོར་བརྒྱད་ཀྱི་ཚད་དུ་བྱའོ། །བ་སེར་སྐྱའི་ལྕི་བ་འམ། བག་ཕྱེ་ལས་བྱས་པའི་ཀླུའི་གཟུགས་བཞི་བྱ་སྟེ། དཀྱིལ་འཁོར་གྱི་གྲྭ་བཞིར་གཞག་པར་བྱའོ། །སེང་ལྡེང་གི་

ཕུར་བུ་དེ་དག་ཀྱང་སྙིང་གར་ནུབ་པར་གཟུགས་སོ། །སྔགས་བརྒྱ་རྩ་བརྒྱད་ཡོངས་སུ་བཟླས་པར་བྱའོ། །ཤར་ཕྱོགས་སུ་ཀླུ་མགོ་བདུན་པ་གཞག་པར་བྱའོ། །ནུབ་ཕྱོགས་སུ་མགོ་བརྒྱད་པའོ། །ལྷོ་ཕྱོགས་སུ་མགོ་ལྔ་པའོ། །བྱང་ཕྱོགས་སུ་མགོ་གསུམ་
པའོ། །དཀྱིལ་འཁོར་གྱི་དབུས་སུ་མགོ་དགུ་པ་གཞག་པར་བྱའོ། །པོག་ཕོར་རེ་རེ་སྟེ་ལྔ་གཞག་པར་བྱའོ། །ཡུངས་ཀར་དང་། བྲ་ཡོས་སུ་བསྲེས་པ་ལ་ལན་ཉི་ཤུ་རྩ་གཅིག་བཟླས་པ་བྱས་ཏེ། ཕྱོགས་བཞིར་གཏོར་རོ། །གཟུངས་འདི་བྲིས་ལ་རྒྱལ་མཚན་གྱི་རྩེ་མོ་
ལ་བཏགས་ཏེ་དཀྱིལ་འཁོར་གྱི་གྲྭ་བཞིར་གཟུགས་སོ། །ཞིང་གི་དབུས་སུ་ཡང་གཟུགས་སོ། །སྐྱེད་མོས་ཚལ་གྱི་དབུས་སུ་ཡང་གཟུགས་སོ། །དེ་བཙུགས་མ་ཐག་ཏུ་ཕྱོགས་བཞི་ཀུན་ནས་རི་སུལ་ཆེན་པོས་མཚམས་བཅད་པར་འགྱུར་རོ། །ཇི་སྲིད་དུ་ཕུར་བུ་མ་ཕྱུང་བ་
དེ་སྲིད་དུ་མཚམས་བཅད་པ་ཆེན་པོར་འགྱུར་རོ། །ལོ་ཏོག་ཐམས་ཅད་དང་། མེ་ཏོག་དང་། འབྲས་བུ་ཐམས་ཅད་ལེགས་པར་བསྲུངས་པར་འགྱུར་རོ། །ཐ་ན་འདབ་མ་གཅིག་ཀྱང་སྐམས་པར་མི་འགྱུར་ན། ཡལ་ག་དང་། སྡོང་བུ་སྐམས་པར་འགྱུར་བ་ལྟ་ཅི་
སྨོས། སྲོག་ཆགས་ཀྱི་རིགས་རི་དགས་དང་བྱ་ཐམས་ཅད་ཀྱང་ཁ་བཅིངས་པར་འགྱུར་རོ། །མ་རུངས་པར་བྱེད་ཀྱང་མི་ནུས་སོ། །གནས་དེར་རླུང་དང་། སྤྲིན་དང་། སེར་བ་དང་། སད་དང་། དུས་མ་ཡིན་པའི་རླུང་གིས་ཀྱང་མ་རུངས་པར་བྱེད་མི་ནུས་སོ། །ཀླུའི་གནོད་
པ་བྱས་ཀྱང་མ་རུངས་པར་བྱེད་མི་ནུས་སོ། །མ་རུངས་པ་ཞིག་ཏུ་གྱུར་ན་དེ་ཡང་སླར་རྟས་པར་འགྱུར་རོ། །ཡང་སྟོབས་དང་། རྟས་པ་དང་། འོད་ཡོད་པར་འགྱུར་རོ། །བུམ་པ་ཆེན་པོ་ནང་ན་ཡོད་པ་དེ་ཡང་ཞིང་དང་ཀུན་དགའ་ར་བ་དང་། སྐྱེད་མོས་ཚལ་གྱི་ཕྱོགས་བཞི་
ཀུན་དུ་གཏོར་བ་བྱས་ན་སྲོག་ཆགས་ཐམས་ཅད་མེད་པར་འགྱུར་རོ། །སྦྲུལ་དང་། བྱི་བ་དང་། ནེའུ་ལེ་དང་། བྱི་དུར་དང་། དོམ་དང་། སྦལ་པ་དང་། ཤ་སྦྲང་དང་། སྦྲང་བུ་དང་། བྱི་བ་དང་། འདབ་ཆགས་རྣམས་མེད་པར་འགྱུར་རོ། །གྲོག་སྦུར་ཐམས་

ཅད་མེད་པར་འགྱུར་རོ། །ཐ་ན་ཕྱེ་མ་ལེབ་ལ་སོགས་པ་ཡང་ནམ་ཡང་མི་འབྱུང་ངོ་། །དྲོད་གཤེར་ལས་སྐྱེས་པ་དང་། རྫུས་ཏེ་སྐྱེས་པ་དང་། སྒོ་ང་ལས་སྐྱེས་པའི་བར་གྱིས་ཀྱང་མ་རུངས་པར་བྱེད་མི་ནུས་སོ། །རླན་དང་མེ་ཏོག་ལས་སྐྱེས་པའི་སྲོག་ཆགས་ཀྱི་རྣམ་པ་དག་
ཀྱང་ཕུར་བུ་མ་ཕྱུང་གི་བར་དུ་ནམ་ཡང་མི་འབྱུང་ངོ་། །ཕུར་བུ་མ་ཕྱུང་གི་བར་དུ་ཀླུའི་ཉེས་པ་རྣམ་པ་སྣ་ཚོགས་མི་འབྱུང་ཞིང་རབ་ཏུ་འབྱུང་བར་མི་འགྱུར་རོ། །བདེ་བ་དང་ལོ་ལེགས་པ་དང་། ལོ་ཏོག་དང་། མེ་ཏོག་དང་། འབྲས་བུ་ཐམས་ཅད་ཡོངས་སུ་འགྲུབ་པར་
འགྱུར་རོ། །རོ་ཞིམ་པ་དང་འཇམ་པར་འགྱུར་རོ། །ཀླུ་ཐམས་ཅད་ཀྱང་རྟག་པར་རྒྱུན་དུ་སྲུང་བ་དང་། སྐྱོབ་པ་དང་། སྦེད་པ་བྱེད་པར་འགྱུར་རོ། །ཕྱེ་མ་ལ་ལན་ཉི་ཤུ་རྩ་གཅིག་བཟླས་པར་བྱས། ལོ་ཏོག་དང་། མེ་ཏོག་དང་། འདབ་མ་དང་། ཤིང་ལྗོན་པ་རྣམས་
ལ་གཏོར་ན་སྲོག་ཆགས་ཐམས་ཅད་ལྷུང་ཞིང་མེད་པར་འགྱུར་རོ། །སྲིན་བུ་ཏྲཻ་མ་བུ་ཀ་དང་། །ཏྲཻ་ལ་ཏ་དང་། སྦྲུལ་གདུག་པ་དང་། རྐང་བརྒྱད་པ་དང་། སྲོག་ཆགས་ཀྱི་རིགས་གཞན་དག་ཀྱང་ཕུར་བུ་མ་ཕྱུང་གི་བར་དུ་མེད་པར་འགྱུར་རོ། །མི་འབྱུང་བར་འགྱུར་རོ། །
ཞིང་གི་ཕྱོགས་བཞིར་ཞི་བའི་ལས་བྱ་སྟེ། ནས་དང་། གྲོ་དང་། ཏིལ་དང་། ཡུངས་ཀར་དང་། འབྲས་དང་མར་བསྲེས་ཏེ་སྦྱིན་སྲེག་བྱས་ན་ཞི་བ་ཆེན་པོར་འགྱུར་རོ། །ཐ་ན་དུད་འགྲོའི་སྐྱེ་གནས་སུ་སོང་བདག་གིས་ཀྱང་མ་རུངས་པར་བྱེད་མི་ནུས་སོ། །གཟུངས་འདི་
དང་། ཆོ་གར་བྱ་བ་འབྱུང་བ་མཐའ་དག་བྲི་བར་བྱ་སྟེ། སངས་རྒྱས་བཅོམ་ལྡན་འདས་དང་། དྲང་སྲོང་ཆེན་པོ་ཉེས་འདོར་དང་། རྡོ་རྗེ་འཛིན་བྲིས་ལ་རྒྱལ་མཚན་གྱི་རྩེ་མོ་ལ་བཏགས་ཏེ་གནས་མཐོན་པོར་གཟུགས་སོ། །གཏོར་མ་དང་། མེ་ཏོག་དང་། བདུག་པ་ཡང་
དབུལ་ལོ། །སེང་ལྡེང་གི་ཕུར་བུ་སོར་བརྒྱད་པ་ལ་ལན་སྟོང་ཡོངས་སུ་བཟླས་པ་བྱས་ཏེ། ཁང་སྟེང་དུ་བཙུགས་ན་རླུང་དང་། སད་དང་། སྤྲིན་དང་། སེར་བ་ཐམས་ཅད་ཐུབ་པར་འགྱུར་རོ། །ལོ་ཏོག་དང་། མེ་ཏོག་དང་། འབྲས་བུ་དང་། འདབ་མ་མ་རུངས་པར་བྱེད་

པའི་སྲོག་ཆགས་རྣམས་མེད་པར་འགྱུར་ཏེ། ཤ་སྦྲང་དང་། སྦྲང་བུ་དང་། པི་ཙི་ལི་ཀ་དང་། བྱི་བ་དང་། སྦྲང་མ་དང་། །ཏྲཻ་མ་བུ་ཀ་དང་། །ཏྲཻ་ལ་ཏ་དང་། བི་ཤ་ཀི་ཏ་ཀ་དང་། ཉ་ཕྱིས་ཅན་དང་། ཉ་དང་། ལོ་མི་ཀ་དང་། སྦལ་པ་དང་། ནེའུ་ལེ་དང་།
ཕག་དང་། ཀན་ཏི་ཀ་དང་། སེང་གེ་དང་། རྐང་མངས་དང་། རྐང་གཅིག་པ་དང་། རུ་སྦལ་དང་། གྲོག་མོ་དང་། སྦྲང་རྩིའི་སྦྲང་མ་དང་། ཐང་གི་སྦྲང་མ་དང་། བུང་བ་དང་། ནག་པོ་དང་། ཤང་ག་ནི་ཀ་དང་། སའི་འོག་ནས་བྱུང་བ་དང་། མ་ལུ་ཤི་ཀ་དང་། འུག་པ་དང་།
བྱི་བ་དང་། མཆུ་རིངས་ལ་སོགས་པའི་སྲོག་ཆགས་ཀྱི་རིགས་ཐམས་ཅད་མེད་པར་འགྱུར་རོ། །མི་འབྱུང་བར་འགྱུར་རོ། །ཐམས་ཅད་ཕུང་བར་འགྱུར་རོ། །བྱ་རོག་དང་། བྱེའུ་དང་། ཁུག་རྟ་དང་། ཕུག་རོན་དང་། མ་དུ་རི་ཀ་དང་། འུག་པ་དང་། ཁ་ན་ཛ་ན་དང་། ནེ་ཙོ་
དང་། རི་སྐེགས་ལ་སོགས་པ་ཐམས་ཅད་མེད་པར་འགྱུར་རོ། །སྔགས་འདིས་ཕུར་བུ་ལ་ཡོངས་སུ་བཟླས་པར་བྱ་སྟེ་ཕྱོགས་བཅིང་ངོ་། །ན་མོ་བུདྡྷཱ་ཡ། ཨོཾ་ཀི་ལི་མི་ལི་ཙཎྜེ། མེ་རེ་ལི་ཙཎྜ་ཙཎྜེ་བནྡྷ་ཡ་སྭཱ་ཧཱ། དེ་ནས་དྲང་སྲོང་ཆེན་པོ་ཉེས་འདོར་བཅོམ་ལྡན་འདས་དང་ཧ་
ཅང་མི་རིང་བ་ཞིག་ན་འདུག་པས་གཟུངས་འདི་ཐོས་ནས་དེ་སྟན་ལས་ལངས་ནས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་སྲོག་ཆགས་ཀྱི་རིགས་གནོད་པར་སེམས་པ། རབ་ཏུ་
གནོད་པར་སེམས་པ། དུག་འཆང་བ། ལོ་ཏོག་དང་། མེ་ཏོག་དང་། འབྲས་བུ་དང་། འདབ་མ་དང་། སྡོང་བུ་དང་། རྩ་བ་མ་རུངས་པར་བགྱིད་པ་ཐམས་ཅད་ཀྱི་ཁ་བཅིང་བར་བགྱིའོ། །བཟློག་པར་བགྱིའོ། །བསྡིགས་པར་བགྱིའོ། །ཕྱོགས་བཞི་ཀུན་ནས་
དཔག་ཚད་དུ་མཚམས་གཅད་པ་ཆེན་པོ་བགྱིའོ། །ཀུན་དུ་བསྲུང་བར་བགྱིའོ། །བཅོམ་ལྡན་འདས་སླད་མའི་ཚེ་སླད་མའི་དུས་ན་གནོད་པར་སེམས་པ། རབ་ཏུ་གནོད་པར་སེམས་པ་ཐམས་ཅད་བཟློག་པར་བགྱིའོ། །སྔགས་ཀྱི་ཚིག་རྗེས་སུ་སྩལ་བར་བགྱིའོ། །བཅོམ་ལྡན་

འདས་སེམས་ཅན་ཐམས་ཅད་ཀྱི་དོན་དང་། བདག་ལ་ཐུགས་བརྩེ་བའི་སླད་དུ་དེ་བྱིན་གྱིས་བརླབ་ཏུ་གསོལ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །དྲང་སྲོང་ཆེན་པོ་ངས་བྱིན་གྱིས་བརླབས་ཀྱིས། སེམས་ཅན་ཐམས་ཅད་ཀྱི་དོན་དང་། ལོ་
ཏོག་དང་། མེ་ཏོག་དང་། འབྲས་བུ་དང་། ལྡུམ་ར་ཡོངས་སུ་བསྲུང་བའི་ཕྱིར་གཟུངས་ཀྱི་སྔགས་ཀྱི་ཚིག་སྨྲོས་ཤིག །དེ་ནས་དྲང་སྲོང་ཆེན་པོ་རྣམས་ཀྱིས་བཅོམ་ལྡན་འདས་ཀྱི་སྤྱན་སྔར་འདུག་ནས་འདི་སྐད་ཅེས་སྨྲས་སོ། །ན་མོ་བྷ་ག་བ་ཏེ། ཤཱཀྱ་རཱ་ཛཱ་ཡ། ཏ་ཐཱ་
ག་ཏཱ་ཡ། ན་མོ་ཨ་ག་སྟཱ་ཡ། མ་ཧཱ་རྀ་ཥ་ཡེ། ཏདྱ་ཐཱ། ཀྵ་མི་ཙུ་ལི། ཙ་ལ་ཙ་ར་ཙ་ར། ཧོ་མི་ལི། བནྡྷ་ནི། ནཱ་ཤ་ནི། ད་ཧ་ད་ཧ། སུ་མ་རི་ཙ་རི། སརྦ་དུ་ཥྚཾ་བ་ནྡྷ་ནི་ཏུ་ཎྜ་བནྡྷ་ནི། ས་ར་ས་ར་ཎི། ཀྵུ་ཀྵུ་ཀྵུ། མ་ནི་ཤུ་རི་བི་ས་ར་ས་ར། ཧ་ལི་ཧུ་ལི། ཧུ་ཏི་ཧུ་
ཏི། ས་ར་མ་ཎི། ས་ར་ནྟུ། སརྦ་པཱ་པ་པཱ་ནག་ཀྵུ་དྷ་ལི་སྭཱ་ཧཱ། དྲང་སྲོང་ཆེན་པོ་ཉེས་འདོར་གྱིས་བཅོམ་ལྡན་འདས་ཀྱི་སྤྱན་སྔར་རིག་པ་འདི་སྨྲས་མ་ཐག་ཏུ་ཀླུ་དང་། གནོད་སྦྱིན་དང་། སྲིན་པོ་གནོད་པར་སེམས་པ་དེ་དག་ཐམས་ཅད་ཁས་བུབ་ཏུ་འགྱེལ་ནས་
བཅོམ་ལྡན་འདས་ལ་སྐད་ཀྱི་གསང་མཐོན་པོས་སྨྲེ་སྔགས་འདོན་ཏེ། བཅོམ་ལྡན་འདས་བདག་ཅག་མ་རུངས་ལགས་སོ། །དྲང་སྲོང་གི་དམོད་པ་བབ་པར་གྱུར་ཏོ། །བཅོམ་ལྡན་འདས་བདག་ཅག་དྲང་སྲོང་གི་དམོད་པའི་མེས་ཚིག་གོ། །ཀུན་དུ་ཚིག་གོ། །བཅོམ་ལྡན་
འདས་ཤཱཀྱ་ཐུབ་པ་བདག་ཅག་སླན་ཆད་འཛམ་བུའི་གླིང་དུ་སེམས་ཅན་རྣམས་ལ་རྣམ་པར་འཚེ་བར་མི་བགྱིད་དོ། །བཅོམ་ལྡན་འདས་བདག་ཅག་སླན་ཆད་ལོ་ཏོག་དང་། མེ་ཏོག་དང་། འབྲས་བུ་དང་། འདབ་མ་མ་རུངས་པར་མི་བགྱིད་དོ། །སྲོག་ཆགས་ཀྱི་རིགས་
ཐམས་ཅད་བཟློག་པར་བགྱིད་དོ། །བཅོམ་ལྡན་འདས་ཀྱིས་དེ་དག་ལ་བཀའ་སྩལ་པ། ཀླུའི་བདག་པོ་དག་ཁྱེད་ཀྱིས་དེ་ལྟར་གྱིས་ཤིག །འཛམ་བུའི་གླིང་བའི་སེམས་ཅན་ཐམས་ཅད་ལོ་ཏོག་དང་། མེ་ཏོག་དང་། འབྲས་བུ་དང་། འདབ་མ་དང་། ཡལ་ག་བདེ་བར་

ཀུན་དུ་འཕེལ་བར་གྱུར་པ་རྗེས་སུ་སྲུངས་ཤིག །དེ་ནས་དྲང་སྲོང་ཆེན་པོ་དེས་ཆོ་གར་བྱ་བ་སྨྲས་པ། བཅོམ་ལྡན་འདས་ཁ་ཤར་ཕྱོགས་སུ་བལྟས་ཏེ་མཆིས་ལ། རིག་པ་དྲང་སྲོང་ཆེན་པོའི་སྙིང་པོ་འདི་རིལ་བ་བྷྲྀང་གར་ཆབ་བཅུས་ལ་ལན་བརྒྱ་རྩ་བརྒྱད་ཡོངས་
སུ་བཟླས་པ་བགྱི་སྟེ། དྲང་སྲོང་གི་མི་སྨྲ་བས་ཕྱོགས་བཞིར་གཏོར་བར་བགྱིའོ། །ཨ་བ་ས་ར་ས་ར། ཤ་པ་ཏ་པ་དཱ་མ། ཧྲྀ་ད་ཡ་ཀྲོ་དྷ། ཨ་མུ་ཀ་བནྡྷ་ཡ། པྲ་ཎ་ཙ་ར། སུ་མུ་རུ་ཙ་ལ་སྭཱ་ཧཱ། སྔགས་འདི་ལན་བདུན་སྟོང་བཟླས་པ་བགྱི་སྟེ། བཟླས་པ་ཙམ་གྱིས་ཀླུ་གནོད་
པར་སེམས་པ་ཐམས་ཅད་ཚ་བས་གདུངས་པར་འགྱུར་རོ། །རྐང་གཉིས་པ་དང་། རྐང་བཞི་པའི་བར་གྱི་སྲོག་ཆགས་ཀྱི་རིགས་ཐམས་ཅད་དམོད་པས་གདུངས་པར་གྱུར་ཏེ་ཐམས་ཅད་འབྱེར་རོ། །སླར་ཡང་ཕྱོགས་དེར་ལོ་ཏོག་ལ་གནོད་པ་མི་བགྱིད་དོ། །སྲོག་ཆགས་ཀྱི་རིགས་
ཐམས་ཅད་མ་མཆིས་པར་འགྱུར་རོ། །སྲོག་ཆགས་ཀྱི་རིགས་ཐམས་ཅད་ཕྱིས་ཀྱང་མ་མཆིས་པར་འགྱུར་རོ། །ཡང་ལོ་ཏོག་དང་། མེ་ཏོག་དང་། འབྲས་བུ་དང་འདབ་མ་མ་རུངས་པར་མི་བགྱིད་དོ། །དེ་ནས་བཅོམ་ལྡན་འདས་ཀྱིས་དྲང་སྲོང་ཆེན་པོ་ལ་ལེགས་
སོ་ཞེས་བྱ་བ་གནང་སྟེ་དྲང་སྲོང་ཆེན་པོ་ལེགས་སོ་ལེགས་སོ་ཁྱོད་ཀྱིས་ཅི་ནས་ཀྱང་སེམས་ཅན་ཐམས་ཅད་ལ་ལེགས་པར་བསྲུང་བར་འགྱུར་བ་དང་། ལོ་ཏོག་དང་། མེ་ཏོག་དང་། འབྲས་བུ་ཐམས་ཅད་ལེགས་པར་བསྲུང་བར་འགྱུར་བ་དེ་ལྟར་གྱིས་ཤིག །དེ་ནས་
བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །སླད་མའི་ཚེ་སླད་མའི་དུས་ན་རྗེས་སུ་སྲུང་བར་བགྱིད། ཡོངས་སུ་བསྲུང་བར་བགྱིད་ན་བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ། ལག་ན་རྡོ་རྗེ་ལེགས་སོ་ལེགས་
སོ། །སེམས་ཅན་ཐམས་ཅད་ཡོངས་སུ་སྲུངས་ཤིག །ལོ་ཏོག་ལ་གནོད་པར་བྱེད་པ་ཀླུའི་ཆ་ག་རྫོགས་སྟོ།། །།དེ་ནས་དེའི་འོག་ཏུ་བཅོམ་ལྡན་འདས་ཞམ་རིང་ཆེན་པོ་དང་། འཁོར་འདུས་པ་ཆེན་པོ་དང་། བཀོད་པ་ཆེན་པོ་དང་། ཡོན་ཡོད་པའི་

མཐུ་ཆེན་པོ་དང་། ཆོ་འཕྲུལ་ཆེན་པོས་ཀུན་དུ་སྟོན་པས་རྒྱལ་པོ་ཆེན་པོ་རྣམ་ཐོས་ཀྱི་བུའི་གནས་སུ་གཤེགས་སོ། །དེ་ནས་བཅོམ་ལྡན་འདས་རྣམ་ཐོས་ཀྱི་བུའི་གནས་དང་ཧ་ཅང་ཡང་མི་རིང་བ་ཞིག་ཏུ་བྱོན་པ་དང་། ས་ཕྱོགས་དེ་ན་འབྲོག་གི་ནགས་ཉི་ཤུ་པ་ཞེས་བྱ་བ་ཞིག་ཡོད་དེ།
ནགས་དེའི་མཐོངས་ན་རྫིང་བུ་ཞིག་ཡོད་ལ། རྫིང་བུ་དེའི་མཐུས་ལྕང་ལོ་ཅན་གྱི་ཕོ་བྲང་འཁོར་གྱི་ཞིང་དང་། ཀུན་དགའ་དང་། ནགས་དང་། འདབ་མ་དང་། མེ་ཏོག་དང་། འབྲས་བུ་རྣམས་ཀུན་དུ་ཚིམ་པར་གྱུར་ཏོ། །སྐྱེས་པ་དང་བུད་མེད་དང་། ཁྱེའུ་དང་། བུ་མོ་དང་།
བ་ལང་དང་། རྟ་དང་། རྟ་རྒོད་མ་དང་། མ་ཧེ་དང་། གླང་པོ་ཆེ་དང་། བོང་བུ་དང་། སྐྱེ་བོའི་ཚོགས་ཐམས་ཅད་བདེ་བས་ཚིམ་པར་གྱུར་ཏོ། །རྫིང་བུ་དེ་ཡང་ཕྱོགས་བཞི་ཀུན་དུ་རྒྱར་དཔག་ཚད་གཉིས་ཀྱི་ཚད་དོ། །རྫིང་བུ་དེ་ཡང་མེ་ཏོག་ཨུཏྤ་ལ་དང་། པདྨ་དང་། ཀུ་མུད་དང་།
བུན་ད་རི་ཀ་སྣ་ཚོགས་ཀྱིས་ཀུན་དུ་ཁེབས་ཤིང་། ཉ་སྣ་ཚོགས་དང་། ཆུ་བྲན་དང་། ཉ་མིད་དང་། ཆུ་སྲིན་བྱིས་པ་གསོད་པ་དང་། བུང་བ་གཟུགས་སྣ་ཚོགས་ཅན་ནོ། །དེ་ནས་དེའི་འོག་ཏུ་ཐན་པ་བྱུང་བ་དེའི་ཚེ་ནགས་ཚལ་དང་། མེ་ཏོག་དང་འབྲས་བུ་དང་། འདབ་མ་དང་།
ཡལ་ག་ཐམས་ཅད་སྐམས་ཏེ་མེ་ཏོག་དེ་དག་རྙིངས་སོ། །ཉ་དང་ཆུ་སྲིན་དང་། ཉ་མིད་དང་། ཆུ་སྲིན་བྱིས་པ་གསོད་དང་། བུང་བ་གཟུགས་སྣ་ཚོགས་པ་དེ་དག་ཀྱང་ཆུ་བྲི་སྟེ་ཅུང་ཟད་ཅིག་ལུས་པས་ཕྱོགས་བཅུར་རྒྱུག་ཀུན་དུ་རྒྱུག་རབ་ཏུ་རྒྱུག་སྟེ། སྲོག་འགགས་ལ་ཐུག །སྲོག་
ཆད་ལ་ཐུག་པས་སྙིང་འཕར་ཞིང་རྒྱུག་གོ། །དེ་ནས་བཅོམ་ལྡན་འདས་ཞ་མ་རིང་བ་ཆེན་པོ་དང་རྫིང་བུ་དེར་བྱོན་པ་དང་། དེ་ན་ཉ་དང་ཆུ་སྲིན་དང་། ཆུ་སྲིན་བྱིས་པ་གསོད་པ་དང་། བུང་བ་བརྒྱ་སྟོང་དུ་མ་སྲོག་འགགས་ལ་ཐུག །སྲོག་ཆད་ལ་ཐུག་སྟེ་ཕྱོགས་བཅུར་རྒྱུག་ཅིང་སྙིང་རྗེ་རྗེ་ལྟར་
གཟིགས་ནས་བཅོམ་ལྡན་འདས་ཀྱིས་བྱམས་པའི་དམིགས་པ་སྙིང་རྗེས་དབུགས་ཕྱུང་སྟེ་སེ་གོལ་གྱི་སྒྲས་ཀླུ་རྣམས་འབོད་ཅིང་ལན་གཉིས་ལན་གསུམ་དུ་སེ་གོལ་རྡོབ་ཅིང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་སྒྲ་གྲག་པར་མཛད་དོ། །སྔོན་གྱི་ལས་ཀྱི་

རྐྱེན་འགའ་ཞིག་གིས་སྲོག་ཆགས་དེ་དག་ཀྱང་སྲོག་མ་ཆད་དོ། །ཀླུ་ཆེན་པོ་དེ་དག་གིས་སྒྲ་དེ་ཡང་མ་ཐོས་བཅོམ་ལྡན་འདས་ཀྱང་རྗེས་སུ་མ་དྲན་ནོ། །དེ་ནས་བདུད་ཀྱི་རིས་ཀྱི་གནོད་སྦྱིན་རྣམ་པར་འཐོར་རླུང་ཞེས་བྱ་བ་དེས་སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་སུ་སྒྲ་བསྒྲགས་པ་ཞག་བདུན་གྱི་ཉིན་པར་སྲེག་པའི་བསྐལ་པ་འབྱུང་སྟེ། འདི་ནི་སྲིད་པའི་རྩེ་མོ་ནས་མནར་མེད་པའི་སེམས་ཅན་དམྱལ་བ་མནར་མེད་པ་ལ་ཐུག་པའི་བར་དག་ལས་གང་ཚིག་པར་མ་གྱུར་པ་ཅུང་ཟད་ཀྱང་མི་སྲིད་དོ། །འཇིག་རྟེན་དུ་འཇིགས་པ་ཆེན་
པོ་བྱུང་ཞེས་སྒྲ་གྲག་གོ། །དེ་ནས་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་། མི་འམ་ཅི་དང་ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དེ་དག་ཐམས་ཅད་ཀྱིས་སྒྲ་དེ་ཐོས་ནས་ཀྱི་ཧུད་ཀྱི་ཧུད་འཇིག་རྟེན་མ་རུང་བར་གྱུར་ཏོ་ཞེས་ངུའོ། །དེ་ནས་
བཅོམ་ལྡན་འདས་ཀྱིས་ལས་ཀྱི་རྐྱེན་གྱིས་འདི་མྱོང་བར་མཁྱེན་མོད་ཀྱི། འོན་ཀྱང་དགོངས་པ་མཛད་དེ། བཅོམ་ལྡན་འདས་ཀྱི་སྨིན་མཚམས་ཀྱི་མཛོད་སྤུ་ནས་འོད་ཟེར་བྱུང་ནས་འོད་ཟེར་དེས་ཀླུའི་ཁྱིམ་ཐམས་ཅད་སྣང་བར་བྱས་ནས་ཀྱང་སླར་ལོག་སྟེ་སྤྱི་བོའི་གཙུག་ཏུ་ནུབ་པར་
གྱུར་ཏོ། །དེ་ནས་ཀླུའི་རྒྱལ་པོ་ཀུན་ནས་གདུགས་ཀྱི་རྣམ་པས་བསྐོར་བ་ཞེས་བྱ་བས་ཀླ་ཐམས་ཅད་བསྡུས་ནས་འདི་སྐད་ཅེས་སྨྲས་སོ། །ཀྱེ་ཀླུ་དང་ཀླ་ཆེན་པོ་དག་ཅིའི་ཕྱིར་འོད་ཟེར་བྱུང་ཞིང་རྐྱེན་གང་གིས་འཇིག་རྟེན་དུ་བྱུང་། དེ་ནས་ཀླུའི་རྒྱལ་པོ་ཆེན་པོ་རྒྱ་མཚོས་བསམས་ན་
བཅོམ་ལྡན་འདས་ཀྱི་མཐུས་འོད་ཟེར་བྱུང་བར་མཐོང་ངོ་། །དེ་ནས་ཀླུའི་རྒྱལ་པོ་རྒྱ་མཚོ་དང་། གཞན་ཡང་ཀླུའི་རྒྱལ་པོ་མཐུ་ཆེ་བ་བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་གཏུགས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་
འོད་ཟེར་རབ་ཏུ་བཀྱེ་བའི་རྒྱུ་གང་ལགས་རྐྱེན་གང་ལགས་འོད་ཟེར་རབ་ཏུ་བཀྱེ་སྟེ། ཁང་པ་ཐམས་ཅད་སྣང་བར་བགྱིས་ཏེ། སླར་ལྡོག་པར་བྱེད་པའི་རྒྱུ་གང་ལགས་རྐྱེན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀྱེ་ཀླུའི་བདག་པོ་དག་སྲོག་ཆགས་བརྒྱ་སྟོང་

ཕྲག་མང་པོ་སྲོག་འགགས་པས་འགག་པར་འགྱུར་བའོ། །དེ་ནས་ཀླུའི་རྒྱལ་པོ་རྒྱ་མཚོས་སྐད་ཅིག་ཐང་ཅིག་ཡུད་ཙམ་དེ་ལ་རྫིང་བུ་ཆར་གྱི་རྒྱུན་གྱི་ཆུས་བཀང་ནས་བདེ་བས་ཚིམ་པར་བྱས་སོ། །དེ་ནས་ཕྱོགས་དེར་གོ་སྐབས་ཆེན་པོ་བྱུང་བར་གྱུར་ནས་ས་ཕྱོགས་དེར་བཅོམ་ལྡན་
འདས་འཁོར་ཆེན་པོས་ཀུན་ནས་བསྐོར་ཏེ་མདུན་དུ་བདར་བའི་དབུས་ན་བཞུགས་སོ། །ཀླུའི་འཁོར་ཆེན་པོ་འདུས་པ་ནི་འདི་ལྟ་སྟེ། ཀླུའི་རྒྱལ་པོ་སྟོང་ཕྲག་བརྒྱད་ཅུ་སྟེ། ཀླུའི་རྒྱལ་པོ་རྒྱ་མཚོ་ལ་སོགས་པ་ཀླུའི་རྒྱལ་པོ་ཀུན་ནས་གདུགས་ཀྱི་རྣམ་པས་བསྐོར་བ་དེ་སྟན་ལས་ལངས་
ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་གཏུགས་ཏེ་ཕྱག་འཚལ་ནས་ལན་གསུམ་བསྐོར་བ་བྱས་ནས་མེ་ཏོག་དང་། བདུག་པ་དང་། ཕྲེང་བ་དང་། སྤོས་དང་། བྱུག་པ་དང་། རྒྱན་དང་། ལྷབ་ལྷུབ་དང་། ན་བཟའ་སྣ་
ཚོགས་ཀྱིས་བཅོམ་ལྡན་འདས་ལ་མཆོད་དེ་བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་ནས་རྒྱལ་པོ་ཆེན་པོ་བཞེས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིགས་པ་
ཆེན་པོ་མི་བཟད་པ་འཇིག་རྟེན་དུ་བྱུང་སྟེ། འདི་ལྟར་ཐན་པ་བྱུང་ཞིང་མུ་གེའི་དགོན་པར་གྱུར་པ་ལགས་སོ། །བཅོམ་ལྡན་འདས་སྡུག་བསྔལ་འདིས་སེམས་ཅན་ཐམས་ཅད་མགོན་མ་མཆིས་སྐྱབས་མ་མཆིས་དཔུང་གཉེན་མ་མཆིས་པར་གྱུར་ན། བཅོམ་ལྡན་འདས་ཀྱིས་
དེ་ལྟ་བུ་དང་མཐུན་པའི་སྔགས་ཀྱི་ཚིག་བཤད་དུ་གསོལ། གང་གིས་སླད་མའི་ཚེ་སླད་མའི་དུས་ན་སྡུག་བསྔལ་སྣ་ཚོགས་སུ་ལྟུང་བའི་འཇིག་རྟེན་ཀུན་དུ་སྒྲོལ་བ་དང་། ཧ་ཅང་ཆར་ཆེ་བ་དང་། ཆར་མ་མཆིས་པ་དང་། དུས་མ་ལགས་པའི་ཆར་དང་། སེར་བ་དང་།
སད་དང་། ཚ་བ་མ་མཆིས་པར་བགྱིད་པ་དང་། མུ་གེའི་དགོན་པ་རབ་ཏུ་མ་མཆིས་པར་བགྱིད་པ་དང་། བཟློག་པ་དང་། ཡོངས་སུ་བསྐྱང་བའི་སླད་དུ་གཟུངས་ཀྱི་སྔགས་ཀྱི་ཚིག་བཤད་དུ་གསོལ། དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་རྣམ་ཐོས་ཀྱི་བུ་

དང་རྒྱལ་པོ་ཆེན་པོ་ཡུལ་འཁོར་སྲུང་དང་། རྒྱལ་པོ་ཆེན་པོ་འཕགས་སྐྱེས་པོ་དང་། རྒྱལ་པོ་ཆེན་པོ་མིག་མི་བཟང་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་དག་ཀླུའི་སྙིང་པོའི་གཟུངས་ཀྱི་སྔགས་ཀྱི་ཚིག་སྐུལ་མ་འདེབས་པ་ཀུན་ནས་འབར་བའི་གློག་
ཅེས་བྱ་བ་ཡོད་དེ། དེ་དྲན་པ་ཙམ་གྱིས་ཀླུ་ཐམས་ཅད་ཀྱི་ཁྱིམ་དང་། །ཀླུ་ཐམས་ཅད་ཀྱི་ལུས་འབར་བར་འགྱུར་རོ། །ཀླུ་མི་བགྲུངས་པ་ཐམས་ཅད་ཀྱི་སྙིང་འཕར་བར་འགྱུར་རོ། །ཀླུ་ཐམས་ཅད་ཀྱི་མགོ་ཚལ་པ་བདུན་དུ་འགས་པར་འགྱུར་རོ། །མིག་དང་མགོ་རྣམས་
གས་ནས་དུམ་བུ་དུམ་བུར་ཆད་ཅིང་འབྲུལ་བར་འགྱུར་རོ། །རྒྱལ་པོ་ཆེན་པོ་དག་ཀླུ་གནོད་པར་སེམས་པ་དང་། རབ་ཏུ་གནོད་པར་སེམས་པ་རྣམས་ཀྱི་དོན་དང་སེམས་ཅན་ཐམས་ཅད་ཀྱི་ཕྱིར་ཟུང་ཤིག །དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ཀྱི་ཞབས་གཉིས་
ལ་གཏུགས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀླུའི་སྙིང་པོའི་སྔགས་ཀྱི་ཚིག་སྐུལ་མ་འདེབས་པ་ཀུན་ནས་འབར་བའི་གློག་ཅེས་བགྱི་བ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་ཀླུའི་ལྟ་སྟངས་དང་། དེ་བཞིན་གཤེགས་པའི་གཟིགས་སྟངས་
ཀྱིས་རྣམ་པར་གཟིགས་ནས་ཀླུའི་འཁོར་འདུས་པ་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །ཀླུའི་བདག་པོ་དག་ང་ལས་གཟུངས་ཀྱི་ཚིག་གི་སྔགས་ཀྱི་ཚིག་ཉོན་ཅིག །ཏདྱ་ཐཱ། ཨོཾ་པི་བུ་ལེ། པྲ་བ་རེ། ནཱ་གེ་མ་ཧཱ་ནཱ་ག་ཧྲྀ་ད་ཡ། ཨཱ་བརྟེ། ཛྭ་ལ་ཛྭ་ལ། སརྦ་ནཱ་ག་
ཧྲྀ་ད་ཡཱ་ནི། ཀི་མི་ཀི་མི། ནཱ་ག་ཀུ་ལ་བི་དྷྭ་ནདྷན་ནི། ཧ་ན་ཧ་ན། སརྦ་ནཱ་ག་དུ་ཥྚཱཾ་ཧྲྀ་ད་ཡཱ་ནི། ཧ་ན་ཧ་ན། སརྦ་དུཥྚཱཾ་ནཱ་ག་བྷ་བ་ནཱ་ནི། པ་ཙ་པ་ཙ་པ་ཙ་ཡ། སརྦ་དུཥྚཱཾ་ནཱ་གཱ་ནཱྃ། ཨ་ཀྲྀ་མ་ཨ་ཀྲྀ