Kinh tạng Tây Tạng (Kangyur Đại Học) — 096_རྒྱུད་འབུམ།_ཝ

ྐྲག་པ་དེ་ལ་ནི། །སྒྲུབ་པས་མྱུར་དུ་དད་པར་གྱིས། །འཕགས་
པ་རྡོ་རྗེ་རྣམ་འཇོམས་སམ། །མྱུར་དུ་ཁྲོ་བོ་ཆེན་པོའམ། །ཡང་ན་མནོལ་བ་མེད་པ་ཡིས། །སྦྱིན་སྲེག་ལས་མཐར་མྱུར་དུ་བསྐུལ། །མཁས་པས་རིགས་གསུམ་དག་གིས་ཀྱང་། །འཕྲོགས་པ་སླར་ནི་དགུག་པའི་ཕྱིར། །དཀྱིལ་འཁོར་དག་ནི་ཆོ་ག་བཞིན། །གསང་སྔགས་
འདི་ནི་སྔོན་བཞིན་བྱ། །ན་མོ་ར་ཏྣ་ཏྲ་ཡཱ་ཡ། ནམཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོྃ་ཧ་ར་ཧ་ར་བཛྲ། མ་ཐ་མ་ཐ་བཛྲ། དྷུ་ན་དྷུ་ན་བཛྲ། ཧ་ན་ཧ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། དྷ་ར་དྷ་ར་བཛྲ། དྷ་ར་ཡ་དྷ་ར་ཡ་བཛྲ། དཱ་རུ་ཎ་དཱ་རུ་ཎ་བཛྲ། དཱ་
ར་ཡ་བི་དཱ་ར་ཡ་བཛྲ། ཙྪིནྡ་ཙྪིནྡ་བཛྲ། བྷིནྡ་བྷིནྡ་བཛྲ་ཧཱུྃ་ཕཊ། ཟློས་པས་གལ་ཏེ་རྫས་རྙེད་དམ། །ཡང་ན་གཞན་དག་ཐུབ་ཀྱང་རུང་། །དེ་ནི་སྔོན་བཞིན་དུས་མཚམས་ལ། །བསྲུང་བར་བྱ་སྟེ་སྦྱར་བར་བྱ། །གཞན་ཡང་དངོས་གྲུབ་འབྲིང་དག་དང་། །ཐ་མ་ཅུང་ཟད་ཙམ་
ལ་ཡང་། །ཆོ་ག་ཤེས་པས་ཅི་རིགས་པར། །དེ་ཡི་མོད་ལ་སྦྱར་བར་གསུངས། །བཅོམ་ལྡན་འདས་ཀྱི་སྐུ་སྐལ་དུ། །རྫས་ཀྱི་ཆ་གཅིག་ཐོག་མར་དབུལ། །བློ་དང་ལྡན་པས་བླ་མ་ལ། །ཕྱག་བྱས་ནས་ནི་གཉིས་པ་དབུལ། །གསུམ་པ་སྔར་གྲུབ་པ་རྣམས་ལ། །
དཀྱིལ་འཁོར་ཕྱི་རོལ་དག་ཏུ་དབུལ། །བཞི་པ་གྲོགས་པོ་རྣམས་ལ་སྦྱིན། །ལྔ་པ་བདག་ཉིད་སྤྱད་པར་བྱ། །དེ་ལའང་སྐལ་བ་ཕྱེད་ཕྱེད་དུ། །བགོས་ནས་བདག་གིས་ཕྱེད་བསྐུར་བ། །བརྟག་པར་བྱ་བའི་རྫས་རྣམས་ལ། །ཆོ་ག་འདི་དག་བཤད་པ་ཡིན། །བཅོམ་
ལྡན་སྐུ་སྐལ་བདག་ཉིད་ཀྱིས། །མཆོད་ཡོན་ཕུལ་ནས་བསྐུར་བར་བྱ། །སངས་རྒྱས་རྣམས་ལ་སླུ་བའི་ཕྱིར། །མཆོད་པའི་ཆོ་ག་ལ་སོགས་བཤད། །བླ་མ་མེད་པར་གྱུར་ན་ནི། །བླ་མའི་སྐལ་བ་བདག་གིས་བླང་། །དེ་ལ་ལྷག་པར་གུས་བྱ་བ། །དེ་ནི་དེ་ཡི་སླུ་བ་ཡིན། །

སྒྲུབ་པ་པོ་ཡིས་ཕྱི་རོལ་དུ། །མཆོད་ཡོན་དབུལ་ཞིང་གྲུབ་པ་ཁྱེད། །ཉིད་ཀྱི་རྫས་སྐལ་འདི་བཞེས་ཞེས། །ཚིག་ནི་ལན་གསུམ་བསྒྲག་པར་བྱ། །སྔགས་གྲུབ་པ་རྣམས་མེད་ན་ནི། །དེ་ཡི་སྐལ་བས་སྔགས་ཟློས་པས། །དོགས་མེད་པ་ཡི་སེམས་ཀྱིས་ནི། །གྲོགས་
པོ་རྣམས་ལ་སྦྱིན་པར་བྱ། །གསང་སྔགས་ཟློས་པའི་གྲོགས་རྣམས་ནི། །གུས་ཤིང་རྟག་པར་དོན་དུ་གཉེར། །དཀའ་ཐུབ་དག་དང་གྲོགས་བྱེད་པས། །ཐོག་མ་ཉིད་ནས་གྲུབ་པ་ཡིན། །དེ་བས་དེ་ཡིས་སྦྱིན་པ་ནི། །རྫས་ནི་བླང་བར་འོས་པས་ན། །བདག་ཅག་
སྔོན་ནས་གྲུབ་པ་ཞེས། །མཐུན་པར་སྨྲ་ཞིང་བླང་བར་བྱ། །གྲུབ་པའི་རྫས་རྣམས་དེ་ལྟ་བུར། །བགོ་བར་རབ་ཏུ་བསྒྲགས་པས་ན། །བདག་རང་ཉིད་ཀྱིས་དེ་རྣམས་ལ། །རྫས་ནི་རྣམ་པར་བགོ་བར་བྱ། །གྲུབ་པའི་རྫས་རྣམས་ཁ་ཅིག་ནི། །ཅི་རན་ཙམ་དུ་
བགོ་སྟེ་དཔེར། །ཨཉྫ་ན་ནི་ཐམས་ཅད་དང་། །གི་ཝང་ལ་སོགས་བཞིན་དུ་བཤད། །ཆོ་ག་ཤེས་པས་ལ་ལ་ནི། །ཡིད་ཀྱིས་བགོས་པ་བྱས་ཏེ་དཔེར། །རལ་གྲི་ལ་སོགས་མཐོང་བ་བཞིན། །དེ་ལ་ཕན་གདགས་བསམ་པར་བྱ། །གྲུབ་པའི་རྫས་རྣམས་ཁ་
ཅིག་ནི། །གཅིག་པུས་སྤྱད་པར་བྱ་སྟེ་དཔེར། །རས་ལ་སོགས་པ་མཐོང་བ་བཞིན། །དེ་ལ་ཕན་གདགས་བསམ་པར་བྱ། །གྲུབ་པའི་རྫས་ཀྱི་བྱེ་བྲག་ལས། །ཁ་ཅིག་མཉམ་པར་བགོ་སྟེ་དཔེར། །རིལ་བུ་ལ་སོགས་མཐོང་བ་བཞིན། །དེ་ལ་ཕྱེད་དུ་བགོ་བ་མེད། །རྫས་
རྣམས་ལ་ཡང་ཕལ་ཆེར་ཡང་། །གཅིག་པུས་མང་དུ་བསྐུར་བར་གསུངས། །སྐལ་བར་ནོར་རམ་མན་ངག་བསྟན། །རྒྱུད་ལས་གསུངས་པས་ཡིད་ཆེས་བྱ། །འདི་དག་ཁྱོད་ཀྱིས་བྱོས་ཤིག་ཅེའམ། །བདག་གི་ནོར་འདི་ཁྱོད་ཀྱིའོ་ཞེས། །བཟླས་བརྗོད་བྱེད་པས་གྲོགས་པོ་
ལ། །བགོ་བ་དག་ནི་དེ་ལྟར་བྱ། །གྲུབ་པར་གྱུར་ན་ཆོ་ག་བཞིན། །མཁས་པ་དག་གིས་ཕན་འདོགས་པ། །བདག་ཉིད་ཀྱིས་ནི་ཅི་རིགས་པར། །གང་ཡང་རུང་བས་རབ་ཏུ་བྱ། །དངོས་གྲུབ་རྣམ་པ་མང་པོ་དག །གྲུབ་པས་རྣམ་པར་བགོ་བ་ནི། །བྱེ་བྲག་ཏུ་ནི་བདག་ཉིད་

ཀྱིས། །དྲི་མེད་བློ་ཡིས་ཤེས་པར་བྱ། །སྐལ་བ་དབང་བ་མཆོག་གནས་སུ། །ཟློས་པས་གསོལ་བ་གདབ་པར་བྱ། །བཀའ་ལུང་གྲུབ་པར་ཤེས་པར་བྱ། །དེ་ཡི་འོག་ཏུ་བགོ་བར་གསུངས། །དེ་ལྟར་ཀུན་ལ་ཅི་རིགས་པར། །ལེགས་པར་བགོ་
བར་བྱ་བར་གསུངས། །དངོས་གྲུབ་དག་ནི་ཕལ་ལ་ཡང་། །མདོར་ན་ཆོ་ག་དེ་བཞིན་བྱ། །གུས་ཤིང་ནོར་དང་མཆོད་པ་བྱ། །བཀའ་བཞིན་བྱེད་པར་ཕན་འདོགས་པས། །རྫས་གྲུབ་བླ་མའི་སྐལ་ལ་སོགས། །སླུ་བ་དག་ནི་དེ་ལྟར་བཤད། །རང་གི་མཆོད་ཡོན་
ཕུལ་ནས་སུ། །རྫས་རྣམས་ལེགས་པར་ལུང་བཞིན་བགོ། །རིག་སྔགས་རྒྱལ་ལ་ཕྱག་བྱས་ནས། །རིག་རྒྱལ་མོ་ལའང་གུས་བྱས་ཏེ། །བློ་ཡིས་གསང་སྔགས་ལྷ་རྣམས་ལ། །གུས་པར་བསམ་སྟེ་སྤྱད་པར་བྱ། །བློ་ཅན་གྲུབ་ནས་ནམ་མཁའ་ལ། །ཅི་བདེ་
བར་ནི་འགྲོ་བར་བྱ། །འོན་ཏམ་གྲུབ་པ་རྣམས་དང་ནི། །ལྷན་ཅིག་འདུག་ཀྱང་ཅིས་མི་ཚུགས། །རྟག་ཏུ་རང་གི་ལྷ་ཉིད་ནི། །ཡིད་ལ་ཡོངས་སུ་བཟླས་པ་དང་། །བདག་གི་གྲུབ་པའི་རྫས་རྣམས་ལ། །རྟག་ཏུ་བལྟ་ཞིང་དྲན་བྱས་ན། །ཕ་རོལ་གནོད་པ་བྱེད་པ་ནི། །
སྡང་བ་རྣམས་ཀྱིས་ཡོངས་མི་ཚུགས། །མཁས་པས་རིག་སྔགས་བརྒྱ་བཟླས་ནས། །གྲུབ་པ་རྣམས་ཀྱིས་མཆོད་པར་འགྱུར། །རིགས་ཀྱི་རིག་སྔགས་བཟླས་ན་ནི། །སྒྲུབ་པོ་འཇིགས་པ་ཀུན་ལས་ཐར། །གཅིག་ལ་གཅིག་ནི་མཐོང་བ་ན། །མཁས་པས་
ལེགས་པར་སྨྲ་བར་བྱ། །ལེགས་པར་འོངས་སམ་བདེའམ་ཞེས། །མཐོང་ནས་དང་པོར་མངོན་པར་བརྗོད། །དམ་ཚིག་རིགས་ཀྱི་ཕྱག་རྒྱ་དང་། །གྲུབ་པའི་རྫས་ཀྱང་བསྟན་པར་བྱ། །གང་ནས་འོངས་ཞེས་ཟེར་ན་ཡང་། །དྲིས་པའི་ལན་ཡང་གདབ་པར་བྱ། །
ལྷ་ཡི་གནས་ནི་ཐམས་ཅད་དང་། །ཤིང་གཅིག་ལམ་གྱི་བཞི་མདོ་དང་། །དཀའ་ཐུབ་གནས་དང་བྱིན་ཅན་དང་། །མཆོད་སྦྱིན་པ་དང་བྲམ་ཟེའི་གནས། །མུ་སྟེགས་ལ་སོགས་གྲུབ་པ་དང་། །ནམ་ཡང་འདའ་བར་མི་བྱའོ། །ང་རྒྱལ་གྱིས་ནི་འདས་གྱུར་ན། །འཁྲུགས་

ནས་མོད་ལ་ལྟུང་བར་འགྱུར། །བག་མེད་དམ་ཚིག་ཉམས་པ་ཡིས། །ལྟུང་ངམ་ལྟུང་བར་གྱུར་ཀྱང་རུང་། །རིག་རྒྱལ་ཉིད་ཀྱིས་བཟླས་ན་ནི། །དེ་ནས་མོད་ལ་ལྡང་བར་འགྱུར། །ནམ་མཁའ་གཟུགས་མེད་པ་ལ་ཡང་། །རབ་ཏུ་གྲུབ་པ་ལྷ་མིག་ཅན། །རང་གི་
ལས་རྣམས་རིག་འགྱུར་ཏེ། །རྣལ་འབྱོར་ཅན་རྣམས་འགྲོ་བ་བཞིན། །དེ་བས་སྔོན་ཆད་སྤྲུལ་པ་ཡིས། །ལམ་ནས་འགྲོ་དང་འོང་བར་འགྱུར། །བསོད་ནམས་དབང་གིས་གནས་ཀྱི་ཕྱིར། །ཁྱིམ་ཡང་ཅི་ལྟར་འདོད་པ་འབྱུང་། །ཀུན་ནས་ལྗོན་ཤིང་མང་པོས་བརྒྱན། །
སྣ་ཚོགས་བྱ་རྣམས་འཕུར་ཞིང་ལྡིང་། །ལྷ་ཡི་བུ་མོ་རྒྱུ་བ་ཡི། །རྒྱན་གྱི་སྒྲ་ནི་སིལ་ཁྲོལ་ཅན། །དེ་ཡི་གླུ་གར་སིལ་སྙན་གྱིས། །མངོན་པར་དགའ་བའི་ཡོན་ཏན་གསལ། །མེ་ཏོག་བཟང་པོ་གསུམ་གྱིས་ཁྱབ། །མར་མེའི་འོད་ནི་རབ་ཏུ་གསལ། །གང་
དང་གང་དུ་ཀུན་བརྟགས་པ། །དེར་ཡང་དཔག་བསམ་ལྗོན་ཤིང་ཆེ། །འདོད་པ་ཐམས་ཅད་འབྱོར་པ་ཡི། །རྨད་དུ་བྱུང་བའི་མཚན་ཉིད་འབྱུང་། །རིན་ཆེན་རྡོ་ལེབ་ངལ་བསོའི་ཕྱིར། །ནོར་བུའི་གཞི་ལས་འབབ་ཆུ་ཅན། །ས་གཞི་ནེའུ་གསིང་གིས་བརྒྱན་པ། །
ཐམས་ཅད་དུ་ཡང་མངོན་པར་འབྱུང་། །རྒྱན་རྣམས་དང་ནི་གོས་རྣམས་དང་། །རྩེད་མོ་རྣམས་ཀྱི་ཆ་བྱད་དང་། །བདུད་རྩི་ལ་སོགས་འབྲས་ལྡན་པའི། །དཔལ་གྱི་ཤིང་ཡང་དེ་ལས་བྱུང་། །དེ་ལྟར་གྲུབ་པ་འདོད་པ་རྣམས། །ཅི་ལྟར་འདོད་པ་ཐམས་ཅད་འགྲུབ། །གྲུབ་
པར་གྱུར་ནས་དེ་ནས་ནི། །བསྲུང་བའི་ཕྱིར་ནི་འབད་པ་བྱ། །དབེན་པའི་སྐྱེད་མོས་ཚལ་དག་གམ། །རི་རྣམས་ཀྱི་ནི་རྩེ་མོའམ། །རྒྱ་མཚོ་ཡི་ནི་གླིང་དག་གམ། །མཚོ་ཆེན་དག་གི་གླིང་མའང་རུང་། །རང་འཕྲུལ་སྤྲུལ་པ་ལས་བྱུང་བ། །གྲུབ་པར་དགའ་ཕྱིར་
སྤྱོད་པར་བྱེད། །གྲུབ་པ་གཞན་དང་ལྷན་ཅིག་ཏུ། །སྔོན་གྲུབ་པ་ཡི་གནས་སུའང་རུང་། །དེ་ལྟར་གྲུབ་པ་བྱས་ན་ཡང་། །གལ་ཏེ་གྲུབ་པར་མ་གྱུར་ན། །རྫས་དེས་བསྲུངས་ཏེ་བཞག་པའམ། །ཆོ་ག་བཞིན་དུ་གནས་པར་བྱ། །སྔོན་དུ་བསྙེན་པ་ཅི་ལས་

གསུངས། །ལྷག་པར་ཡང་ནི་བྱས་ནས་སུ། །མཁས་པས་རྫས་དེ་སྔ་མ་བཞིན། །སླར་ཡང་བཟླས་ཏེ་བསྒྲུབ་པར་བྱ། །འོན་ཀྱང་གལ་ཏེ་རྫས་དེ་ནི། །བརྒྱ་ལ་གྲུབ་པར་མ་གྱུར་ན། །བརྩོན་འགྲུས་བརྟན་པར་བསྐྱེད་ནས་ནི། །དེར་ནི་ཕྱིར་
ཡང་བསྒྲུབ་པར་བྱ། །གལ་ཏེ་ལན་བདུན་བར་དུ་རྫས། །བསྒྲུབ་སྟེ་འོན་ཀྱང་མ་གྲུབ་ན། །གང་གི་ཆོ་ག་འདི་བྱས་པ། །དེས་ནི་ངེས་པར་འགྲུབ་པར་འགྱུར། །བསོད་སྙོམས་ཟས་ལ་ཟ་ཞིང་གནས། །སྒྲུབ་པོ་བཟླས་བརྗོད་བྱེད་ལ་བརྩོན། །སངས་རྒྱས་རྣམས་ལ་
དད་པ་ཡིས། །མཆོད་རྟེན་ཆེ་ལ་ཕྱག་བྱའོ། །གུས་པས་ཤེས་རབ་ཕ་རོལ་ཕྱིན། །བདུན་ནམ་ཡང་ན་ལན་བརྒྱར་བཀླག །ཡང་ན་ཡོན་ནི་ཁྱད་པར་ཅན། །དགེ་འདུན་རྣམས་ལ་དབུལ་བར་བྱ། །རྒྱ་མཚོར་འབབ་པའི་གླིང་མའམ། །ཡང་ན་རྒྱ་མཚོ་གླིང་མ་ལ། །མཆོད་
རྟེན་དག་ནི་ཁྲུ་གང་བ། །མཁས་པས་གུས་པས་བརྒྱ་བྱས་ཏེ། །རེ་རེའི་མདུན་ནས་འདུག་ནས་ནི། །བཟླས་བརྗོད་དག་ཀྱང་སྟོང་བྱས་ནས། །མཆོད་རྟེན་ཐ་མ་འབར་གྱུར་པ། །མཐོང་ནས་དེས་པར་འགྲུབ་པར་འགྱུར། །མཚམས་མེད་ལྔ་ནི་བྱས་པས་ཀྱང་། །སྟོང་དག་ལེགས་
པར་བྱས་ནས་ནི། །མཆོད་རྟེན་ངེས་པར་འབར་འགྱུར་ཞིང་། །གདོན་མི་ཟ་བར་འགྲུབ་པར་འགྱུར། །ཀུན་ལའང་བྱེ་བར་བཟླས་ན་ནི། །ངེས་བར་འགྲུབ་པར་རྣམ་པར་བསྟན། །ཉེས་པ་ཆེན་པོ་བྱས་པ་ཡང་། །ལོ་བཅུ་གཉིས་ཀྱིས་འགྲུབ་པར་འགྱུར། །ཆོ་ག་བཞིན་དུ་མ་བསྙེན་
པས། །རིག་སྔགས་དངོས་གྲུབ་མི་སྟེར་ན། །ཚིམ་པར་བྱ་ཕྱིར་བཤད་པ་ཡི། །སྦྱིན་སྲེག་དེ་ནི་བརྩམ་པར་བྱ། །ཡང་ན་ལས་དང་དོན་རྣམས་ཀུན། །སྒྲུབ་པར་བྱེད་པའི་དཀྱིལ་འཁོར་འདི། །བྲིས་ནས་དེ་ཡི་ནང་ཉིད་དུ། །སྦྱིན་སྲེག་རྣམ་པ་བཞི་བྱའོ། །རི་ཡི་རྩེ་མོ་འམ་ཕྱུགས་
ལྷས་སམ། །ཡང་ན་གང་གཱའི་གླིང་མའམ། །ཡང་ན་ས་གཞི་མཉམ་བྱས་པར། །དཀྱིལ་འཁོར་བཟང་པོ་སྔོན་བཞིན་བྱ། །འདི་ནི་བློ་དང་ལྡན་པ་ཡིས། །ཁྲུ་ནི་བརྒྱ་རྩ་བརྒྱད་པར་བྱ། །དེ་དང་མཉམ་པའི་བུམ་པ་ཡིས། །ཁོར་ཁོར་ཡུག་ཉེ་བར་བརྒྱན། །རྟ་བབས་བཟང་

པོ་བཞི་དག་ཀྱང་། །སྒོ་སྒོ་དག་ཏུ་ཡོངས་སུ་གཟུགས། །ཁོར་ཡུག་རྣམ་པར་རྒྱལ་བ་ཡི། །བ་དན་སྣ་ཚོགས་རྣམས་ཀྱིས་བརྒྱན། །རྟ་བབས་དག་ཀྱང་རྒྱལ་མཚན་དང་། །ལོ་མ་སར་པ་དག་གིས་བརྒྱན། །ཕྲེང་བ་བརྒྱུས་པ་གཤིབས་པ་དག །བློ་དང་ལྡན་པས་གཅད་
པར་བྱ། །ཕྱི་རོལ་ཁོ་ར་ཁོར་ཡུག་ཏུ། །མར་གྱི་མར་མེ་གསལ་བྱ་ཞིང་། །བདུག་སྤོས་རིགས་ནི་སྣ་ཚོགས་པས། །རྒྱུན་མི་འཆད་བར་བདུག་པར་བྱ། །དཀྱིལ་འཁོར་གཉིས་པ་ཁོར་ཡུག་ཏུ། །ཁྲུ་བདུན་དག་དང་ལྡན་པ་དང་། །གསུམ་པ་ཁྲུ་ནི་གསུམ་པ་
སྟེ། །ཆོ་ག་དེ་ལྟར་ཡོངས་སུ་གཟུང་། །མཆོད་སོགས་ཆོ་ག་གང་ཡིན་དང་། །དཀྱིལ་འཁོར་ཆོ་ག་སྔོན་བཞིན་བྱ། །གཞན་ཡང་ཆོ་ག་ལྷག་བར་ནི། །སྦྱིན་སྲེག་དག་ཀྱང་བྱ་བར་གསུངས། །དབུས་སུ་རང་གི་རིག་སྔགས་ཀྱིས། །བུམ་པ་གང་བ་བཞག་ནས་སུ། །དེ་ཡི་ཕྱོགས་
བཞི་དག་ཏུ་ཡང་། །སྦྱིན་སྲེག་ཆོ་ག་བཞིན་དུ་བྱ། །དེ་བཞིན་གཤེགས་པའི་རིགས་རྣམས་ཀུན། །ཤར་གྱི་ཕྱོགས་སུ་བྲི་བར་བྱ། །བྱང་ཕྱོགས་སུ་ནི་པདྨའི་རིགས། །ཆ་དང་མཐུན་པར་ལེགས་པར་བྲི། །མཁས་པས་ལྷོ་ཡི་ཕྱོགས་སུ་ནི། །རྡོ་རྗེའི་རིགས་ཀུན་བྲི་བར་བྱ། །
ནུབ་ཀྱི་ཕྱོགས་སུ་དྲག་པོ་དང་། །གཅིག་པུ་གནོད་སྦྱིན་རིགས་རྣམས་བྲི། །དེ་ཡི་ལྷག་པའི་ཆ་དག་ཀྱང་། །ནག་རིམ་བཞིན་དུ་ཕྱི་རོལ་བྲི། །དེ་ཡི་ཕྱི་རོལ་འཇིག་རྟེན་སྐྱོང་། །གཞན་དག་ཀྱང་ནི་བྱ་བར་བསྒྲགས། །གསང་སྔགས་ཟློས་པས་དང་པོར་ནི། །བདག་པོ་ལྔ་
རྣམས་དགོད་པར་བྱ། །དེ་ནས་རིག་སྔགས་རྒྱལ་པོ་དང་། །རིག་སྔགས་རྒྱལ་མོར་བསྒྲགས་པ་དང་། །ལས་ཀུན་བྱེད་པས་གསང་སྔགས་དང་། །དཀྱིལ་འཁོར་དག་ཏུ་གང་བསྟན་པའི། །ཕོ་ཉ་ཆེ་ཕྲ་གོ་རིམས་བཞིན། །དཀྱིལ་འཁོར་དུ་ནི་དགོད་པར་བྱ། །སྒོ་ཀར་
བགེགས་ཀྱི་སྡེ་དཔོན་དང་། །ཁྲོ་བོ་བདུད་རྩི་ཐབ་སྦྱོར་དང་། །ལྷ་མོ་གཞན་གྱིས་མི་ཐུབ་བཞག །ལྷག་མ་ཅི་དགར་བྱ་བར་བཤད། །དེ་ལྟར་རྒྱུད་དོན་མཐོང་བ་ཡིས། །དཀྱིལ་འཁོར་དགོད་པར་བྱས་ནས་ཀྱང་། །དེར་ནི་སྙིས་པོ་སྤྱན་དྲངས་ཏེ། །ཆོ་ག་ལྷག་མའང་བྱ་བར་

གསུངས། །མཁས་པས་ཕྱོགས་བཞི་རིགས་རེལ། །སྦྱིན་སྲེག་ཆོ་ག་བཞིན་བྱས་ནས། །ནུབ་ཀྱི་བུམ་བའི་དྲུང་དུ་ནི། །རང་གི་རིག་སྔགས་སྦྱིན་སྲེག་བྱ། །འདིར་ནི་སྦྱིན་སྲེག་ཆོ་ག་བཞིན། །བྱས་ན་ཐམས་ཅད་ཚིམ་པར་འགྱུར། །དེར་ནི་གཏོར་
མ་རྒྱ་ཆེར་བྱ། །དེས་ནི་ལྷ་རྣམས་མགུ་བར་འགྱུར། །དཀྱིལ་འཁོར་འདི་ནི་བྲིས་ནས་ཀྱང་། །བཟླས་བརྗོད་སྦྱིན་སྲེག་ཅི་དགར་བྱ། །རང་རིགས་རིག་པས་རིག་སྔགས་ལ། །མར་གྱི་སྦྱིན་སྲེག་དག་ཀྱང་བྱ། །འོ་ཐུག་མར་དང་སྦྱར་བའམ། །ཏིལ་
དང་མངར་གསུམ་སྦྱར་བ་ཡིས། །མཚན་མོའི་ལྷག་མ་རང་རིགས་ཀྱི། །རིག་པས་རིག་སྔགས་སྦྱིན་སྲེག་བྱ། །ལས་འདི་དག་གིས་ངེས་པར་ཡང་། །ལྷ་ཉིད་མྱུར་དུ་འགྲུབ་འགྱུར་ཞིང་། །ཚིམ་པར་འགྱུར་ཞིང་མཉེས་པར་འགྱུར། །ལེགས་པར་ཡང་ནི་སྐོངས་
པར་འགྱུར། །དཀྱིལ་འཁོར་འདི་ནི་བྲིས་ནས་ཀྱང་། །གསང་སྔགས་རྗེས་མཐུན་སྦྱིན་སྲེག་བྱ། །ལན་བདུན་ཁོ་ན་བྲིས་ནས་ཀྱང་། །ཐེ་ཚོམ་མེད་པར་ངེས་པར་འགྲུབ། །རིག་པའི་རྒྱལ་པོའི་རིག་སྔགས་སམ། །དེ་བཞིན་རིགས་ཀྱི་རིག་སྔགས་ཀྱིས། །རིག་སྔགས་
དག་ལ་དྲག་སྤྱད་པ། །ཐམས་ཅད་བཏུད་དེ་བྱ་བར་གསུངས། །སྤྲ་ཚིལ་ལས་ནི་གཟུགས་བྱས་ནས། །དེ་ཡང་རིག་སྔགས་ཀྱིས་བཟླས་ཏེ། །དྲག་ཤུལ་སྤྱོད་པའི་སྦྱིན་སྲེག་ནི། །ལས་ཀྱིས་ཆོ་ག་ཐམས་ཅད་བྱ། །སྐེ་ཚེ་ཡུངས་མར་གྱིས་བླུགས་ན། །རིམས་
ནད་དྲག་པོས་འདེབས་པར་འགྱུར། །ཁ་སྦུབ་ཏུ་ནི་བཞག་བྱས་ན། །ལུས་ལ་སྡུག་བསྔལ་ཚོར་བ་འབྱུང་། །མི་མཐུན་པ་ཡིས་བརྡེག་པ་དང་། །མེ་ཏོག་གིས་ཀྱང་བསྣུན་པར་བྱ། །དེ་ཉིད་ལ་ནི་སྤྱོ་པར་གསུངས། །ཐོ་འཚམ་པ་ཡང་ཅི་དགར་བྱ། །དཀྱིལ་
འཁོར་འདིར་ནི་གསང་སྔགས་དག །གདོན་བཞིན་དུ་ནི་ཚར་བཅད་ན། །ཆོ་ག་ལས་ནི་བསྟན་པ་ཡི། །དངོས་གྲུབ་དག་ཀྱང་སྩོལ་བར་འགྱུར། །འདིར་ནི་ལྷ་ཉིད་མངོན་གཤེགས་ནས། །ཉིད་ཀྱིས་བསྒྲུབ་པ་ཉིད་ལ་ནི། །དངོས་གྲུབ་མྱུར་དུ་སྦྱིན་པར་འགྱུར། །

བྱིན་ནས་ཞི་བའི་ཆོ་ག་བྱ། །གལ་ཏེ་ཅི་ཞིག་ལྟར་གྱུར་ན། །དུག་ཁྲག་ལན་ཚྭ་སྐེ་ཆེ་དང་། །ཡུངས་ཀར་སྦྱར་ནས་དཀྱིལ་འཁོར་འདིར། །མཚན་མོ་ལྷག་མ་བསྲེག་པར་བྱས། །རང་གི་རིག་སྔགས་ལྷ་ཉིད་ནི། །སྡུག་བསྔལ་བཞིན་དུ་མྱུར་གཤེགས་
ནས། །ཀྱེ་ཀྱེ་ང་ཡིས་མཆོག་སྦྱིན་ཞེས། །སྒྲུབ་པ་པོ་ལ་གཅུགས་པར་མཛད། །གལ་ཏེ་བག་མེད་མ་བྱོན་ན། །སྒྲུབ་པ་པོས་ནི་ཞག་གསུམ་དུ། །འཇིགས་པ་མེད་པས་རང་གི་ཤ། །སྲེག་བླུགས་གསུམ་ནི་དེར་བསྲེགས་ན། །དེ་ཚེ་ངེས་པར་
མངོན་གཤེགས་ནས། །སྒྲུབ་པ་པོ་ལ་ཆགས་མཛད་ཅིང་། །ཅི་འདོད་པ་ཡི་དངོས་གྲུབ་སྩོལ། །ཉེས་པ་མ་ལུས་བརྗོད་པར་མཛད། །མཚམས་མེད་ལྔ་ནི་བྱེད་པས་ཀྱང་། །ཞག་དགུར་ལས་འདི་དེས་བྱས་ན། །གདོན་མི་ཟ་བར་འགྲུབ་འགྱུར་
བས། །དེ་ཕྱིར་ལེགས་པར་བརྩམ་པར་བྱ། །ལས་འདི་དོན་ཡོད་བྱ་བའི་ཕྱིར། །རིག་སྔགས་དག་ལ་རྒོལ་བའི་ཚེ། །ཟློས་པ་འཇིགས་པ་མེད་པ་དང་། །བསྲུང་བ་དག་ཀྱང་བྱས་ཏེ་བྱ། །འདིར་ནི་དངོས་གྲུབ་ལེགས་བྱིན་ན། །ཆོ་ག་བཞིན་དུ་ཞི་བར་
བྱ། །ལས་ཀྱི་ཉེས་པ་ཅི་ཡོད་པ། །དེ་དག་རབ་ཏུ་བསྒྲིམས་ཏེ་གཤེགས། །གསང་སྔགས་དངོས་གྲུབ་ཐམས་ཅད་ལ། །དཀྱིལ་འཁོར་འདི་ནི་དམ་པ་ཡིན། །སྦྱིན་སྲེག་ལས་ལ་བསྟན་པ་ཡི། །སྦྱིན་སྲེག་རྣམ་གསུམ་བྱ་བར་གསུངས། །ལས་རྣམས་ཐམས་
ཅད་བྱས་ན་ནི། །དངོས་གྲུབ་རྣམ་གསུམ་ཐོབ་པར་འགྱུར། །ཟློས་པ་རང་གི་རིག་སྔགས་དག །གདོན་བཞིན་ཚར་གཅོད་བྱེད་པ་ན། །ཉིན་གཅིག་བཞིན་དུ་ཡོ་བྱད་ནི། །ཤིན་ཏུ་སར་པ་དག་གིས་བྱ། །མཁས་པས་བསྲུང་བ་བྱས་པ་དག །བག་ཡོད་པ་ལ་གཅར་བ་དང་། །
རྒྱུད་ཤེས་དཀའ་ཐུབ་ལྡན་པ་ཡིས། །རིག་སྔགས་ཚུལ་བཞིན་དྲག་ཤུལ་སྦྱད། །གཞན་དུ་བྱས་ན་ངེས་པར་འཆི། །ལེགས་པར་གྲུབ་པར་བྱེད་པའི་རྒྱུད་ཆེན་པོ་ལས་བསྒྲུབ་པའི་ཐབས་བསྡུས་པ་རྫོགས་སྷོ།། །།

༄༅༅། །རྒྱ་གར་སྐད་དུ། །དྷྱནོཏྟར་པ་ཊ་ལ་ཀྲམ། བོད་སྐད་དུ། བསམ་གཏན་གྱི་ཕྱི་མ་རིམ་པར་ཕྱེ་བ། དཔལ་རྡོ་རྗེ་རྣོན་པོ་ལ་ཕྱག་འཚལ་ལོ། །གསང་སྔགས་རྒྱུད་ཀྱི་ཕྱོགས་ལ་ཡང་། །གང་གི་བློ་ནི་མི་ཞེན་པ། །དེ་ཡང་སྨྲ་བར་སྤྲོ་བ་ནི། །མ་སྨྲས་ན་ནི་མི་
འཚོའམ་ཅི། །གསང་སྔགས་རྒྱ་མཚོ་ཆེན་པོ་འདི། །དཔེ་དང་ཚད་མ་གཏན་ཚིགས་སམ། །རྗེས་སུ་དཔག་པའམ་ཤེས་རབ་ཀྱིས། །རྟོགས་པར་ནུས་པ་མ་ཡིན་ནོ། །ལུང་དང་མན་ངག་དོན་མེད་པར། །གང་ཞིག་ལམ་གཞན་འཇུག་པ་དེ། །བསྐལ་པ་དག་ནི་བརྒྱ་རུ་
ཡང་། །སྔགས་ལས་དངོས་གྲུབ་མི་འཐོབ་བོ། །ལུང་དང་མན་ངག་མ་ལུས་པ། །གང་གིས་ཡོངས་སུ་སྤངས་པ་དག །གྲུབ་པ་མྱོང་བ་ལ་ལ་ཞིག །ཡོད་དམ་དེ་ནི་མེད་པ་སྨྲོས། །དེ་ནས་གསང་སྔགས་བདག་ཉིད་ཆེ། །དངོས་གྲུབ་རླབས་ནི་འཁྲིགས་པ་ཅན། །
བསམ་ཡས་གཏིང་ནི་དཔག་དཀའ་བ། །རྟོགས་པར་ནུས་པ་སྨྲ་བའི་མཆོག །གལ་ཏེ་དེ་ལྟར་མི་ཤེས་ན། །ཚངས་པ་ཇི་ལྟར་ཤེས་པ་སྨྲོས། །ཡང་དག་སྨྲ་བར་མི་སྤྲོ་ན། །ང་ཡིས་བཤད་ཀྱིས་ང་ལ་ཉོན། །བྱང་ཆུབ་སེམས་དང་དེ་ཉིད་གསུམ། །གལ་ཏེ་ཤེས་ན་དངོས་
གྲུབ་སྣོད། །དེ་དག་ལེགས་པར་མི་ཤེས་ན། །ཁྱོད་ཀྱིས་དངོས་གྲུབ་ཅི་ཞིག་འཐོབ། །རིག་སྔགས་ལས་ནི་གྲུབ་པ་པོ། །གཞན་ནམ་གཞན་མིན་ཅི་ཞིག་ཉེས། །གལ་ཏེ་གཞན་ན་འགྲུབ་མི་འགྱུར། །འོན་ཏེ་གཞན་མིན་གྲུབ་པ་ཉིད། །གལ་ཏེ་གཞན་མིན་ཁྱོད་འགྲུབ་པས། །
མཁའ་ལ་སོགས་པར་ད་སོང་ཞིག །དེ་སྟེ་མིན་ན་བརྫུན་ཚིག་པས། །བ་ལང་རྫི་དང་ལྷན་ཅིག་སྨྲོས། །མི་འཆི་ཚངས་ཆེན་ཕ་མཆོད་ཀྱིས། །ཡོངས་སུ་བསམས་ནས་ཚིག་སྨྲས་པ། །མི་མཇེད་བདག་པོས་གང་སྨྲས་པ། །གཞན་བས་བདག་ལ་དངོས་གྲུབ་མེད། །རིགས་ལས་གྲུབ་
པ་གཞན་མིན་ན། །དངོས་གྲུབ་བདག་ལ་ཡོད་དམ་ཅི། །དེ་ལྟར་གྱུར་ན་ཅི་ཞིག་ཉེས། །འོན་ཏང་འགལ་བ་ཅི་ཞིག་ཡོད། །ཨེ་མའོ་ཚངས་པ་ཁྱོད་ཀྱི་བློ། །ཤིན་ཏུ་དྲི་མ་མེད་པ་དང་། །ཤེས་རབ་གསལ་བར་ངས་བསམས་ན། །ཚིག་རེ་ལ་ནི་རྟོགས་པ་བཞིན། །གཞན་པས་ཁྱོད་ལ་

དངོས་གྲུབ་མེད། །གཞན་མིན་པ་ནི་དངོས་གྲུབ་རྒྱུ། །གཞན་མིན་པ་ལས་གྲུབ་འདོད་ན། །སྨྱོན་པ་ཉིད་ནི་ཡིན་པར་འགྱུར། །འགྲོ་བའི་བདག་པོ་ཇི་ལྟར་ན། །དངོས་གྲུབ་ཡོད་པར་ཁས་འཆེ་བ། །ཡེ་ཤེས་སྒྲོན་མར་གྱུར་པ་ཁྱོད། །ཇི་ལྟར་ཕན་པ་བཤད་དུ་གསོལ། །བདག་གིས་རྣམ་
པར་དཔྱད་ན་ནི། །རིག་ལས་གཞན་ནམ་མི་གཞན་མིན། །གཞན་མིན་མི་གཞན་མ་ཡིན་པས། །བདག་ནི་གོམས་ལས་དངོས་གྲུབ་འཐོབ། །ཤེས་བྱ་བླ་མེད་གང་ཡིན་པའི། །ཡེ་ཤེས་དེ་ཡང་གོམས་འཐོབ་ན། །ལས་ཀྱི་ཆོ་ག་འདི་དག་གིས། །དངོས་གྲུབ་ཡོད་པ་ཅི་ཞིག་སྨོས། །
བཟླས་བརྗོད་ལྷ་ཡི་དེ་ཉིད་དང་། །བདག་གི་དེ་ཉིད་ཇི་ལྟ་བ། །གནས་རྟེན་གཞན་ལ་མེད་པར་ནི། །མཚུངས་པ་མེད་པར་བདག་གིས་རྟོགས། །ཚིག་ལས་ཚིག་ཏུ་འཕྲོས་པ་ལས། །ཚངས་ཆེན་མི་འཆི་ཞེས་བྱ་བ། །དངོས་གྲུབ་འདོད་པ་སྐལ་ཆེན་པོ། །གཙུག་ཏོར་རྒྱུད་ནི་ཉན་པར་
བྱེད། །དེ་ནས་ཚངས་པ་ཆེན་པོ་དེ། །རྡོ་རྗེ་གཙུག་ཏོར་ཉན་པ་ལ། །ས་ཡི་མེ་ཏོག་འཆར་བྱེད་པས། །བསམ་གཏན་གྱིས་ནི་བརྒྱན་པར་བཤད། །དེ་ནས་ཡེ་ཤེས་ཀུན་རྫོགས་པ། །རིག་སྔགས་གསང་སྔགས་ཐབས་ཆེན་དེ། །ཕྲ་བ་དེ་བཞིན་གཤེགས་པས་གསུངས། །
བསམ་གཏན་གྱིས་ཀྱང་ཤིན་ཏུ་བརྒྱན། །རྣལ་འབྱོར་ཐབས་ནི་ཀུན་བསྟན་པ། །སྡུག་བསྔལ་སྡིག་པ་སེལ་བ་སྟེ། །ཕྱག་ན་རྡོ་རྗེས་ཞལ་ནས་གསུངས། །སྐྱེ་དང་འཆི་བ་སྡིག་བྱེད་པ། །ཀུན་དུ་མི་ཚུགས་བརྟན་པ་སྟེ། །འདི་དང་ཕ་རོལ་བྱེད་པར་གནས། །དཀྱིལ་འཁོར་ཆེན་པོ་ལ་སོགས་
འབྱུང་། །འདོད་པའི་དོན་ནི་རྗེས་སུ་བསྒྲུབ། །ཆོ་ག་གང་དང་གང་དག་གིས། །བསམ་གཏན་ལས་ལ་གང་གནས་པ། །དེ་བཞིན་གཤེགས་ལ་ཕྱག་འཚལ་ནས། །དེ་དག་མ་ལུས་བཤད་པར་བྱ། །གསང་སྔགས་བསམ་གཏན་ཞེས་བྱ་བ། །མཆོག་ཏུ་གསང་བ་ཡང་དག་གསུངས། །
དྲང་སྲོང་དཀའ་ཐུབ་ཆེན་པོ་ཡང་། །དེ་དག་མེད་ན་མི་འགྲུབ་པོ། །གསང་སྔགས་རྣལ་འབྱོར་ཅན་རྣམས་ཀྱིས། །གསང་སྔགས་བཟླས་བརྗོད་མེར་འབར་བ། །སྐྱེ་དང་འཆི་བ་འཇིག་བྱེད་པ། །རྡོ་རྗེ་ཅན་གྱིས་སྔོན་གསུངས་སོ། །དེ་བས་དེ་འདིར་གསང་སྔགས་ཀྱི། །བསམ་གཏན་

ཚིམ་བྱ་མེ་དག་ལ། །དངོས་གྲུབ་འདོད་པ་དག་གིས་ནི། །རྟག་པར་རྒྱུན་དུ་སྦྱོར་བར་བྱ། །ལྷ་ཡི་སྐུ་ཡི་གནས་དེ་ལ། །དང་པོ་ཁོ་ནར་མཆོད་ནས་ནི། །རྣལ་འབྱོར་གནས་བཅས་ཤེས་རབ་ཅན། །བདེ་གཤེགས་མདུན་དུ་བསམས་ནས་ནི། །ཕྱི་ནས་
ཡན་ལག་རྣམ་གྲོལ་བའི། །མི་འབྱེད་འབྱེད་པའི་རྣམ་པར་སྤངས། །ཕྲ་མ་མི་གཡོ་གསལ་བ་སྟེ། །བློ་ཡི་སྤྱོད་པ་མདུན་ན་གནས། །བདག་ཉིད་འདི་འདྲར་བཞག་ནས་ནི། །སྔགས་ཀྱི་རྣམ་པར་ཤེས་པས་བསྒོམ། །བསྡམས་ནས་ཏིང་ངེ་འཛིན་ལ་གནས། །སྲོག་དང་
རྩོལ་བ་རབ་ཏུ་བསྡམས། །སྒྲ་དང་སེམས་དང་གཞི་ལ་གཞོལ། །གསང་སྔགས་མི་འགྱུར་གཞི་ལ་གནས། །ཡན་ལག་མ་ཉམས་གསང་སྔགས་བཟླས། །ངལ་ན་བདག་ལ་ངལ་སོ་ཤིག །མི་འགྱུར་བ་ནི་ཡི་གེར་ལྡན། །གཞི་ལས་གཞིར་འགྱུར་དེ་བཞིན་ཏེ། །
རང་སྔགས་ཕྱིར་ནི་གང་བརྟགས་པ། །ཡིད་ཀྱི་དག་པ་བསམ་པར་བྱ། །སླར་སྡུད་པ་ཡིས་བཀུག་ནས་ནི། །སྲོག་དང་རྩོལ་བ་བསྡམས་པའི་ཡིད། །གསང་སྔགས་རིག་པས་སྔགས་ལ་སྦྱར། །ཡིད་ཀྱི་བཟླས་བརྗོད་བརྩམ་པར་བྱ། །འདི་ཉིད་ཀྱིས་ནི་ཆོ་ག་ཡིས། །ཡང་
ན་ཤུ་བུར་བྱ་ཡང་རུང་། །སྔགས་རིག་དངོས་གྲུབ་འདོད་པ་ཡིས། །བཟླས་བརྗོད་གཞན་དུ་མི་བྱའོ། །རིག་སྔགས་དེ་ཉིད་མ་ལུས་དང་། །བདག་གི་དེ་ཉིད་ཆོ་ག་དང་། །བཟླས་བརྗོད་དེ་ཉིད་མཆོག་ཤེས་དང་། །མིས་ནི་དངོས་གྲུབ་ཐོབ་པར་འགྱུར། །དབེན་པའི་སྐྱེད་མོས་
ཚལ་དང་ངོགས། །ཕུག་དང་རི་བོར་ནགས་ཚལ་དུ། །བརྟུལ་ཞུགས་གནས་སམ་སྡོམ་པ་ཡིས། །སྔགས་པ་བསམ་གཏན་བྱེད་ཅིང་གནས། །གསང་སྔགས་མེ་གནས་དངོས་གྲུབ་སྟེ། །སྒྲ་གནས་རྣལ་འབྱོར་སྟེར་བར་དྲན། །སྒྲ་མཐར་ཐར་བ་སྟེར་བ་ཉིད། །འདི་དག་དེ་ཉིད་
གསུམ་པོ་ཡིན། །མི་འབྱེད་ལས་བྱུང་དངོས་པོ་རྣམས། །བློ་ཅན་གྱིས་ནི་བདག་ལ་བསྡམ། །སྔགས་པ་ཡན་ལག་འདས་ལ་གནས། །ཞེན་པ་མེད་པར་བསམ་པར་བྱ། །སྒྲ་ཞེས་བྱ་བ་ཕྲེང་བར་སྦྱར། །ཡི་གེ་བརྒྱུས་ལ་མི་འགྱུར་རྣམས། །དྲིལ་བུའི་སྒྲ་བཞིན་མ་ཆད་

པར། །ཡིད་ལ་ཞེན་པར་སེམས་པ་ན། །མེ་ཡི་ནང་ནས་ཞི་བ་སྟེ། །ཚིག་རྣམས་དག་པ་ཡན་ལག་ལྡན། །སྲོག་དང་རྩོལ་བའང་བཀག་པའི་བདག །གཉིད་སྤངས་ནས་ནི་རྣམ་པར་བསམ། །སྙིང་གར་གནས་པའི་ཕྲ་བ་ནི། །དྲི་མེད་ཟླ་བའི་དཀྱིལ་འཁོར་ཏེ། །
དེ་ནང་རབ་ཏུ་ཞི་བ་ཡི། །མེ་ལྕེ་རབ་ཏུ་འོད་བཟང་བ། །མི་འགྱུར་གཞི་ནི་དེར་བཞག་ནས། །བདེ་བར་འདུག་ནས་སྒྲ་བསམ་མམ། །མི་འགྱུར་བ་ལ་ཡི་གེ་གཞག །སྒྲ་ཉིད་འབའ་ཞིག་བསམ་པར་བྱ། །སྒྲ་ལ་དམིགས་པའི་བསམ་གཏན་ནི། །འབའ་ཞིག་བྱས་པ་
ཉིད་ཀྱིས་ཀྱང་། །དངོས་པོ་ཀུན་རྣམས་དམ་པའི་དཔལ། །སྒྲུབ་པའི་སྐྱེས་བུས་ཐོབ་པར་འགྱུར། །ལྟོས་བཅས་ཡན་ལག་གྱུར་བར་སྣང་། །སྒྲ་ཞེས་བྱ་དང་ཡིད་ཀྱི་དང་། །ཚིག་རྣམས་དག་པ་རིག་སྔགས་དབང་། །ཡན་ལག་སྤང་བ་རྒྱལ་བས་མཁྱེན། །སླར་སྡུད་
དཀའ་ཐུབ་བསམ་གཏན་དང་། །སྲོག་རྩོལ་ཆོ་གའི་བྱ་བ་དང་། །རྣམ་པར་ཤེས་པ་སྣ་ཚོགས་པའི། །སྔགས་པ་རེ་ཞིག་ལྟོས་བཅས་པའོ། །དཀའ་ཐུབ་ཆེན་པོ་དང་ལྡན་པར། །ཆོས་བསྐྱེད་བརྟུལ་ཞུགས་མཆོག་ལྡན་པ། །ལྟོས་བཅས་པ་ནི་ཡུལ་ལས་གྲོལ། །ཡན་
ལག་སྣང་བ་ནན་ཏན་བྱ། །དེ་ཡང་བརྟུལ་ཞུགས་བྱས་ནས་ནི། །དོགས་པའི་འཇིག་རྟེན་སྨད་པ་ཡི། །བསམ་གཏན་གཅིག་པུ་རབ་བསྡམས་ནས། །བློ་གྲོས་ཞི་བ་བརྟན་པ་སྤྱད། །ཁུ་བ་བཤང་གཅི་དག་དང་ནི། །འབགས་པ་དག་ནི་རྒྱུ་བ་ལའང་། །དོགས་པ་
ཡི་ནི་གཟུགས་ཀྱིས་ཀྱང་། །དབེན་པར་གཙང་སྦྲ་བརྩམ་པར་བྱ། །སྲང་དང་ཁྲོན་པ་ལུ་མ་དང་། །གྲོང་དང་ནགས་ལྷས་དག་ལ་ཡང་། །ངག་ལུས་ཡིད་ཀྱིས་སྤང་བ་ནི། །སེམས་ཅན་གནོད་པ་ཀུན་མི་སྤྱད། །བསམ་གཏན་དང་ནི་བཟླས་བརྗོད་དང་། །
གསང་སྔགས་གྲུབ་པར་བྱ་བ་དང་། །སྦྱིན་སྲེག་དབང་བསྐུར་ཐམས་ཅད་དང་། །ཡུལ་གྱི་བྱ་བ་རྣམས་ལ་ཡང་། །བརྟུལ་ཞུགས་གསུངས་པ་གང་ཡིན་པ། །དེ་ཡི་གནས་དང་ཚད་རྣམས་དང་། །སྔོན་ནི་བདག་ཉིད་འབའ་ཞིག་ལ། །མཐུ་ཆེན་རྡོ་རྗེ་འཛིན་གྱི་

ལྷས། །རབ་ཏུ་གསང་བ་གསུངས་པ་ཡིན། །ཉེར་འགྱུར་མངོན་དུ་ཕྱོགས་པ་དང་། །གསང་སྔགས་སྟེར་བར་འགྱུར་བ་དང་། །གཞན་དུ་ཕྱོགས་པ་གང་ཡིན་པ། །དེ་ཀུན་ཚངས་པ་ཁྱོད་ལ་བཤད། །གསང་སྔགས་ལ་སོགས་དང་ལྡན་པའི། །རིག་
སྔགས་ཁྲོ་བོ་མང་པོ་ཀུན། །རྒྱལ་བའི་སྐུ་ལ་མངོན་ཕྱོགས་པར། །བསམ་གཏན་ངོམས་ཕྱིར་རྟག་ཏུ་གནས། །དུས་གསུམ་དུ་ནི་ཕྲ་མོ་འདི། །གསང་སྔགས་སྒྲུབ་ལ་བརྟུན་པ་ཡིས། །ཚངས་པ་རྟག་ཏུ་རིག་བྱ་བ། །ཡན་ལག་བཅུ་ཡི་ཆོ་ག་ལས། །མ་དད་པ་དང་
སྙོམ་པ་དང་། །བཀྲེས་སྐོམ་ཟིལ་གནོན་དེ་བཞིན་ཏེ། །རྒོད་དང་ཡིད་ཀྱི་གདུང་བ་དང་། །ལས་ལ་ཐེ་ཚོམ་ཟ་བ་དང་། །བཟླས་བརྗོད་བསམ་གཏན་མི་ཞེན་དང་། །བསྡམ་པ་དག་ནི་བཤིག་པ་དང་། །ཅལ་ཅོལ་གཏམ་ལ་རབ་ཏུ་དད། །མི་བྱ་བ་ལ་འཇུག་པ་དང་། །
ལོག་འདྲེན་གྱིས་ནི་བརླམས་པ་དང་། །རྨི་ལམ་ངན་པ་རྣམས་ཀྱང་མཐོང་། །སེམས་ཅན་དག་ལ་གནོད་བྱེད་དང་། །ལྷ་རྣམས་ལ་ནི་སྨོད་པ་དང་། །སྒྲུབ་པ་པོ་ཡི་ཆོ་ག་ལ། །གང་ཚེ་འདི་དག་བྱེད་པ་ན། །རྟག་ཏུ་འཚེ་བ་འབྱུང་བར་འགྱུར། །གསང་སྔགས་དེ་ལས་
གཞན་དུ་ཕྱོགས། །གང་ཞིག་ཞི་བར་འདུག་པ་དང་། །སྒྲ་ཡི་ངོ་བོར་གྱུར་བ་ན། །དེ་ཚེ་སྔགས་པ་གསང་སྔགས་ལ། །ཉེ་བར་གྱུར་ཏེ་མངོན་དུ་ཕྱོགས། །ལྷ་དང་ལྷ་མིན་སེམས་ཅན་ནི། །དབང་ཕྱུག་ཡེ་ཤེས་འཇུག་པ་རྣམས། །མཐོང་ན་ཞི་བ་སྐྱེ་འགྱུར་བ། །དེ་
ནི་མངོན་དུ་གྱུར་པ་སྟེ། །རྒྱལ་པོ་དང་ནི་ཕྱུག་པོ་དང་། །སྐྱེ་བོ་བུད་མེད་དགེ་བ་རྣམས། །དབང་དུ་གྱུར་ཅིང་མངོན་དུ་ཕྱོགས། །བུས་མོ་འཛུགས་ཤིང་སྤྱི་བོས་འདུད། །དེ་ལ་ཤེས་པའང་སྐྱེ་བར་འགྱུར། །མ་ཐོས་པ་ཡང་ཤེས་པར་འགྱུར། །སྐད་ཅིག་དག་ལ་
ལུས་ལས་ནི། །བར་བར་མེ་བཞིན་འབར་བར་འགྱུར། །གླུ་དང་སིལ་སྙན་སྒྲ་རྣམས་དང་། །ལྷ་རྣམས་ཀྱིས་ནི་སྨྲ་བར་ཡང་། །ལྷ་མངོན་ཕྱོགས་པའི་སྔགས་པ་ཡིས། །དེ་དག་རྟག་ཏུ་ཐོབ་པར་འགྱུར། །གསང་སྔགས་ལྷ་ནི་མངོན་ཕྱོགས་པའི། །སྒྲུབ་པ་པོ་

ནི་མཐུ་ཆེན་པོ། །བློ་ཅན་དཀའ་ཐུབ་འགྲུབ་པ་ཡིས། །ཀུན་དུ་ཞེན་པར་རྟག་ཏུ་བྱ། །མངོན་དུ་ཕྱོགས་པའི་གནས་ཐོབ་ན། །ནམ་མཁའ་རྒྱུ་བ་མངོན་པའི་གནས། །དབང་ཕྱུག་མང་པོ་རྟག་གྱུར་ཀྱང་། །གང་ཞིག་མ་མྱོས་དེ་སྔགས་རིག །གསང་སྔགས་འབྲས་བུ་མ་ལུས་
པ། །ཡེ་ཤེས་དབང་ཕྱུག་བརྒྱན་པ་ཡང་། །དེ་མྱོས་གནས་ནི་མཆོག་ཏུ་འགྲོ། །རང་གི་མཐུ་ཡི་ཤེས་པས་གསལ། །རྡོ་རྗེ་ཅན་གྱི་གསང་བའི་མཆོག །ཚངས་པ་སྐྱོན་མེད་གང་ཡིན་པ། །གང་ཞིག་ཐོབ་ནས་བདེར་འགྱུར་བ། །ཡོངས་སུ་རྫོགས་པ་རྒྱལ་བ་བཞིན། །སྤྲོ་
ཞིང་སྟོབས་དང་ལྡན་པ་ནི། །བཟླས་བརྗོད་བསམ་གཏན་དཀའ་ཐུབ་མིས། །གསང་སྔགས་རང་བཞིན་མེ་ཡིས་ནི། །སྡིག་པ་ཐམས་ཅད་བསྲེག་པར་བྱ། །གནས་དང་ཟས་དང་གྲང་བ་དང་། །ཆར་དང་རླུང་དང་ཚ་བ་ལ། །ཅི་མི་སྙམ་པར་ནམ་འགྱུར་ན། །དེ་ཚེ་ལས་
ཀྱི་འབྲས་བུ་ངེས། །སྒྲའམ་ཡང་ན་གཟུགས་ལ་ཡང་། །གང་བརྩོན་པ་ནི་མི་རྨོངས་པ། །ཉེ་བར་གྱུར་པར་དེ་ཤེས་བྱ། །དཀའ་ཐུབ་ཅན་གྱིས་གནོད་པ་སྤངས། །གང་ཞིག་མཐོང་བ་ཙམ་གྱིས་ནི། །སེམས་ཅན་ཐམས་ཅད་བྱམས་འགྱུར་བ། །དེ་ནི་དངོས་གྲུབ་ཉེ་བར་འགྱུར། །
བགེགས་རྣམས་ཐམས་ཅད་རྣམ་པར་སྤངས། །བདེ་བ་དང་ནི་སྡུག་བསྔལ་མཐའ། །འདོད་དང་ཁྲོ་དང་འཇིགས་པ་དང་། །ནད་དང་འཆི་དང་གནོད་དག་གི། །རྒྱུ་ནི་སྔགས་པ་རྣམས་ལ་ཡོད། །ནམ་ཞིག་ཉེ་བར་གྱུར་པ་ན། །དུས་དང་ལུས་དང་བྱ་དང་ལས། །
ཆོས་དང་ཆོས་མིན་འབྲས་བུ་ལ། །དེ་ཚེ་སྔགས་ལ་མི་ལྟོས་སོ། །རིག་སྔགས་ཉེར་གྱུར་འདོད་པ་དང་། །གྲུབ་པ་དང་ནི་དེ་བཞིན་མཆོག །ཉེས་པ་སྟོང་དག་བྱས་པ་ཡང་། །བཟོད་པར་འགྱུར་བ་དོགས་པ་མེད། །རིག་བྱུང་རྫས་བྱུང་དངོས་གྲུབ་དང་། །སྨན་གྱི་ཡང་
ནི་ལུས་ཅན་ལ། །ཉེ་བར་གྱུར་དང་སྔགས་གྲུབ་པ། །དབང་དུ་གྱུར་པར་རྟག་པར་རོ། །བསམ་གཏན་གྱི་ཕྱི་མ་རིམ་པར་ཕྱེ་བ་རྫོགས་སྷོ།། །།སྤྱིར་ཤ་ལོ་ཀ་ལྔ་བཅུ་རྩ་གསུམ་མོ་སྐད།། །།

༄༅༅།། རྒྱ་གར་སྐད་དུ། ཨཱརྱ་སནྡྷི་མཱ་ལ་མ་ཧཱ་ཏནྟྲ་བོདྷི་སཏྭ་མ་ཧཱ་བི་ནི་ཤྩ་ཡ་ནི་རྡེ་ཤཱད་མ་ཧཱ་མ་ཎི་རཏྣ་ཀཽ་ཤ་ལྱ་ནི་རྡེ་ཤ་མ་ཧཱ་པ་རི་ཎཱ་མཾ་ནཱ་མ་རཱ་ཛཱ། བོད་སྐད་དུ། འཕགས་པ་དགོངས་པའི་རྒྱུད་ཀྱི་ཕྲེང་བ་ཆེན་པོ་བྱང་ཆུབ་སེམས་དཔའི་རྣམ་པར་ངེས་པ་ཆེན་པོ་བསྟན་
པ་ལས། ནོར་བུ་ཆེན་པོ་རིན་པོ་ཆེ་ལ་མཁས་པ་བསྟན་པ་ཡོངས་སུ་བསྔོ་བ་ཆེན་པོའི་རྒྱལ་པོ་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ནོར་བུ་རིན་པོ་ཆེ་རྡོ་རྗེ་རིན་པོ་ཆེའི་རྩེ་མོ་ལ་བཞུགས་ནས་བྱང་ཆུབ་སེམས་
དཔའ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ཀྱེ་རྒྱལ་བའི་སྲས་འདི་ལ་བྱང་ཆུབ་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱི་སྐྱབས་བྱེད་པར་འདོད་པ། བྱང་ཆུབ་སེམས་དཔའི་བསླབ་པའི་སྡོམ་པ་བླངས་པ། བྱང་ཆུབ་
ཏུ་སེམས་བསྐྱེད་པ། སྙིང་རྗེའི་བདག་ཉིད་ཅན། དེ་བཞིན་གཤེགས་པ་ཐམས་ཅད་མཉེས་པར་བྱེད་འདོད་པ། བྱང་ཆུབ་སེམས་དཔའ་ཆེན་པོའི་སྤྱོད་པའི་ཚོགས་ཉེ་བར་སོགས་པར་འདོད་པ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་རབ་ཏུ་ཐོབ་པར་འདོད་པ། སྒྲིབ་པ་མེད་པའི་
ཏིང་ངེ་འཛིན་དང་། གཟུངས་དང་། རྣམ་པར་ཐར་བའི་སྒོ་རྣམས་ཀྱིས་རྣམ་པར་རྩེ་བར་འདོད་པ། ནམ་མཁའ་མཛོད་ཉིད་དང་། ལག་ན་རིན་ཆེན་ཉིད་ཐོབ་པར་འདོད་པས་འདི་ལྟར་བསྔོ་བར་བྱ་སྟེ། སངས་རྒྱས་བཅོམ་ལྡན་འདས་རྣམས་དང་། ས་བཅུ་ལ་རབ་ཏུ་གནས་པའི་
བྱང་ཆུབ་སེམས་དཔའ་རྣམས་དང་། རྡོ་རྗེ་འཆང་རྣམས་བདག་ལ་དགོངས་སུ་གསོལ། བདག་བྱང་ཆུབ་ཏུ་སེམས་བསྐྱེད་པ། ལམ་ལ་རབ་ཏུ་གནས་པ་མིང་འདི་ཞེས་བགྱི་བ། དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ལ་དུས་ཐམས་ཅད་
དུ་ཡོང་ཡེ་འཕུལ་ཞིང་མཆིན། དེ་བཞིན་གཤེགས་པ་མངའ་ཆེན་པོ་ཅན་རྣམས་དང་། བྱང་ཆུབ་སེམས་དཔའ་སེམས་དཔའ་ཆེན་པོས་ཆེན་པོ་བརྙེས་པ་རྣམས་ཀྱིས་བཞེས་ཤིང་བདག་ལ་རྟག་ཏུ་བསོད་ནམས་ཀྱི་སྟོབས་ཆེན་པོ་དང་། ཡེ་ཤེས་ཀྱིས་ཉེ་བར་བརྟན་པ་དང་། བརྩོན་

འགྲུས་དང་། བརྩོན་པའི་བདག་ཉིད་དང་། ཞི་བ་དང་། དུལ་བ་དང་། ཉེ་བར་ཞི་བའི་གནས་དང་། མངོན་པར་ཤེས་པ་དང་། ཕ་རོལ་ཏུ་ཕྱིན་པ་རྣམས་ཡོངས་སུ་རྫོགས་པར་མཛད་དུ་གསོལ། དེའི་འོག་ཏུ་ཡང་འདི་སྐད་ཅེས་བརྗོད་པར་བྱ་སྟེ། ཐུགས་རྗེ་ཆེན་པོ་དང་ལྡན་
པ་དག་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ། འཁོར་བར་ལྷུང་བ། འཆིང་བས་བཅིངས་པ། བཙོན་རར་ཆུད་པ། ཆོས་ཀྱི་ལམ་སྟོར་བ། ཉོན་མོངས་པའི་དགྲ་བོ་བདོ་བས་མངོན་པར་གཙེས་པ། མགོན་མ་མཆིས་པ། སྐྱབས་མ་མཆིས་པ། སྐྱོབ་
པ་མ་མཆིས་པ། གནས་མ་མཆིས་པ། དཔུང་གཉེན་མ་མཆིས་པ། སྟོན་པ་མ་མཆིས་པ། ལམ་གོལ་བར་ཞུགས་པ། འཁོར་བ་ལ་མངོན་དུ་ཕྱོགས་པ། མྱ་ངན་ལས་འདས་པ་ལ་རྒྱབ་ཀྱིས་བལྟས་པ། ངན་སོང་ལ་གཞོལ་བ། ངན་སོ་པས་འབབ་
པ། ངན་སོང་ལ་བབ་པ། མི་དགེ་བའི་བཤེས་གཉེན་དང་འགྲོགས་པར་ལྷུང་བ། དགེ་བའི་བཤེས་གཉེན་དང་བྲལ་བ། སྨན་པ་ལ་མི་སྨན་པ་དང་། མཐུན་པ་ལ་མི་མཐུན་པ་དང་། དགེ་བ་ལ་མི་དགེ་བར་བཟུང་བ། སློབ་དཔོན་མ་མཆིས་པ། དེ་བཞིན་གཤེགས་པ་དང་། བྱང་ཆུབ་སེམས་
དཔའ་ལྟ་བ་ལ་རྒྱབ་ཀྱིས་ཕྱོགས་པ། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་གྱིས་འཚེ་བས་གཙེས་པ། བདེ་བ་མ་ཐོབ་པ། མི་སྐྲག་པ་མ་ཐོབ་པ། མི་འཇིགས་པ་མ་ཐོབ་པ། རྟག་ཏུ་མཉམ་པར་མ་བཞག་པ། ཞི་བ་དང་། དུལ་བ་དང་། སྦྱིན་
པ་དང་། ངེས་པ་དང་། ཡང་དག་པར་སྡོམ་པ་དང་། བག་ཡོད་པ་དང་བྲལ་བ། ཏིང་ངེ་འཛིན་དང་། གཟུངས་དང་། ས་དང་། བཟོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་རྣམས་ལ་གནས་པ་དང་བྲལ་བ། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་
ལ་གནས་པ་དང་བྲལ་བ། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་རྣམ་གསུམ་ལ་རྒྱབ་ཀྱིས་ཕྱོགས་པ། སྒྲིབ་པ་མེད་པའི་ཡེ་ཤེས་ཆེན་པོ་དང་བྲལ་བ། ཤིན་ཏུ་གནས་པའི་ཆོས་ཀུན་དུ་འབྱུང་བའི་རྒྱུ་ཉིད་ལ་མི་གནས་པ། མངོན་པར་ཤེས་པ་དང་བྲལ་བ། སྟོབས་

རྣམས་མ་ཐོབ་པ། མི་འཇིགས་པ་དང་མི་ལྡན་ཞིང་མི་གནས་པ། མི་བརྗེད་པའི་ཆོས་ཀྱི་རྗེས་སུ་འགྲོ་བའི་སྐབས་དང་མི་ལྡན་པ། ཡོན་ཏན་གྱིས་སྟོང་པ། བྱང་ཆུབ་ཀྱི་ཡན་ལག་བདུན་གྱི་གོས་ཀྱིས་མ་གཡོགས་པ། འཕགས་པའི་ལམ་ཡན་ལག་བརྒྱད་
ཀྱིས་བགྲོད་པ་དང་བྲལ་བ། སྡུག་བསྔལ་བརྒྱ་སྟོང་ཕྲག་དུ་མས་མངོན་པར་གཙེས་པ། རྟག་ཏུ་གདུངས་པ། རྟག་ཏུ་དམན་པ། རྟག་ཏུ་རྨོངས་པ། རྟག་ཏུ་མཉམ་པར་མ་བཞག་པ། རྟག་ཏུ་ཉོན་མོངས་པའི་རྗེས་སུ་ཞུགས་པ་ལགས་ན། ཐུགས་རྗེ་ཆེན་པོས་
དགོངས་ཏེ་བདག་གི་སྐྱབས་མཛད་དུ་གསོལ། བདག་གི་དཔུང་གཉེན་མཛད་དུ་གསོལ། བདག་གི་བྱང་ཆུབ་ཆེན་པོའི་ལམ་དང་། བྱང་ཆུབ་ཀྱི་ལམ་དང་། བྱང་ཆུབ་ཀྱི་ཚོགས་ཡོངས་སུ་རྫོགས་པར་མཛད་དུ་གསོལ། དེ་བཞིན་གཤེགས་པའི་སྟོབས་བཅུ་དང་།
མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་། སོ་སོ་ཡང་དག་པར་རིག་པ་བཞི་དང་། ཏིང་ངེ་འཛིན་དང་། རྣམ་པར་གྲོལ་བ་དང་། གཟུངས་རྣམས་སྐྱབས་མཛད་དུ་གསོལ། བདག་གི་ཕུན་སུམ་ཚོགས་པ་ཐམས་ཅད་ཡོངས་སུ་རྫོགས་
པར་མཛད་དུ་གསོལ། ཡོན་ཏན་ཐམས་ཅད་ཡོངས་སུ་རྫོགས་པར་མཛད་དུ་གསོལ། སངས་རྒྱས་བཅོམ་ལྡན་འདས་དང་། མཐུ་ཆེན་པོ་བརྙེས་པའི་བྱང་ཆུབ་སེམས་དཔའ་རྣམས་བདག་ལ་དགོངས་སུ་གསོལ། བདག་གིས་སངས་རྒྱས་དང་། བྱང་ཆུབ་སེམས་དཔའ་
ཐམས་ཅད་ལ་མཆོད་པ་དང་། བཀུར་སྟི་ཆེན་པོ་བགྱིས་ནས་བདག་འབུལ་ལོ། །ཕྱོགས་བཅུའི་འཇིག་རྟེན་གྱི་ཁམས་ན་བཀོད་པ་ཆེན་པོ་རྣམས་ཀུན་དུ་གནས་པའི་རིན་པོ་ཆེ་སྣ་ཚོགས་ཀྱི་རིན་པོ་ཆེའི་གཞལ་མེད་ཁང་རྣམས་དང་། རིན་པོ་ཆེའི་ཤིང་ལྗོན་པ་རྣམས་དང་། རིན་
པོ་ཆེའི་རི་རྣམས་དང་། རིན་པོ་ཆེའི་གདན་རྣམས་དང་། རིན་པོ་ཆེའི་ལན་ཀན་རྣམས་དང་། རིན་པོ་ཆེའི་ཕྲེང་བ་རྣམས་དང་། རིན་པོ་ཆེའི་གདུགས་རྣམས་དང་། རིན་པོ་ཆེའི་རྒྱལ་མཚན་རྣམས་དང་། རིན་པོ་ཆེའི་ཆུན་པོ་རྣམས་དང་། །རིན་པོ་ཆེའི་མུ་ཏིག་གི་དྲ་བ་

རྣམས་དང་། རིན་པོ་ཆེའི་སྣོད་རྣམས་དང་། རིན་པོ་ཆེའི་ཕྲེང་བ་རྣམས་དང་། རིན་པོ་ཆེ་འབར་བའི་ཚོགས་རྣམས་དང་། རིན་པོ་ཆེའི་གླིང་བརྒྱ་དང་། ནོར་བུ་ཆེན་པོ་རྣམས་དང་། མར་མེའི་ལྡོང་བུ་གཙང་བ། ནོར་བུ་དང་། རིན་པོ་ཆེ་སྣ་ཚོགས་ཀྱིས་སྤྲས་པས་འཆོར་བ། གསེར་
གྱི་ཙོང་ཙོང་མང་པོས་བཏགས་པ་རྣམས་དང་། པདྨ་འཛམ་བུ་ཆུ་བོའི་གསེར་གྱི་གེ་སར་ཆེན་པོ་ཅན་རྣམས་དང་། གསེར་གྱི་ཕྲེང་བ་རྣམས་དང་། གསེར་གྱི་གཞལ་མེད་ཁང་རྣམས་དང་། རིན་པོ་ཆེའི་སྤྲིན་རྣམས་དང་། རིན་པོ་ཆེའི་འབྲུའི་ཆར་རྣམས་དང་། རིན་པོ་ཆེའི་
སྙིང་པོ་ཅན་གྱི་ཁང་བཟངས་རྩིག་པ་ནོར་བུ་རབ་མཆོག་སྣ་ཚོགས་ཀྱིས་སྤྲས་པ། རིན་པོ་ཆེའི་ལན་ཀན་ཅན་རྣམས་དང་། རིག་སྔགས་འཆང་ཆེན་པོའི་སྐྱེད་མོས་ཚལ་ཉམས་དགའ་བ་རྣམས་དང་། གནས་ཉམས་དགའ་བ་རྣམས་དང་། གཞལ་མེད་ཁང་ཉམས་དགའ་བ་རྣམས་དང་།
སྐྱེད་མོས་ཚལ་ཉམས་དགའ་བ་རྣམས་དང་། ལྷའི་ཉེ་བར་སྤྱད་པ་ཉམས་དགའ་བ་ཡོངས་སུ་མ་སྤྱད་པ་ཇི་སྙེད་མཆིས་པ་དེ་དག་ཐམས་ཅད་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་འབུལ་ལོ། །གང་དག་འཛམ་བུའི་གླིང་ན་མཆིས་པའི་སྨན་རྣམ་པ་སྣ་ཚོགས་པ་རྣམས་དང་།
བཅུད་ཀྱིས་ལེན་གྱི་རིགས་རྣམས་དང་། གང་དག་དུས་ཐམས་ཅད་པའི་ནོར་བུ་དང་། གང་དག་ཞལ་ཟས་རོ་ཞིམ་པོ་ཕུན་སུམ་ཚོགས་པ་ཁྱད་དུ་འཕགས་པ་རྣམས་དང་། གང་དག་དྲི་བདའ་བའི་ལྗོན་ཤིང་རྣམས་དང་། ཙནྡན་གྱི་ལྗོན་ཤིང་རྣམ་པ་སྣ་ཚོགས་དུས་ཀྱི་རྗེས་སུ་འབྲང་བ་
དང་། ཙནྡན་དམར་པོ་རྣམས་དང་། རྟག་ཏུ་མེ་ཏོག་དང་ལྡན་པའི་ནགས་ཚལ་ཆེན་པོ་རྣམས་དང་། སྤོས་ཀྱི་ངད་རྒྱས་པ་ཡིད་དུ་མཆི་བའི་དྲི་གདའ་བའི་ལྗོན་ཤིང་གི་རིགས་རྣམས་དང་། གང་དག་དཔག་བསམ་གྱི་ཤིང་བདག་གི་མ་མཆིས་ཤིང་ཡོངས་སུ་འཛིན་པ་མ་མཆིས་པ་རྣམས་དང་།
གང་དག་རྒྱ་མཚོའི་ནོར་བུ་རྣམ་པ་སྣ་ཚོགས་དང་། ཡིད་བཞིན་གྱི་ནོར་བུ་རྣམས་དང་། གང་དག་རི་ལྷུན་པོ་དང་། ཏི་སེ་དང་། སྤོས་ཀྱི་ངད་ལྡང་དང་། མ་ལ་ཡ་དང་། འབིགས་བྱེད་དང་། མན་དཱ་ར་དང་། རྡོ་རྗེའི་རི་ལ་སོགས་པའི་རིན་པོ་ཆེ་སྣ་ཚོགས་ཀྱི་ཐོམ་རྣམས་ལ། རིན་

པོ་ཆེ་སྣ་ཚོགས་ཀྱི་ཁང་པ་བརྩེགས་མ་རྣམས་དང་། རིན་པོ་ཆེ་སྣ་ཚོགས་ཀྱི་ཕུག་རྣམས་དང་། རིན་པོ་ཆེ་སྣ་ཚོགས་ཀྱི་བྲག་རྣམས་དང་། རིན་པོ་ཆེ་སྣ་ཚོགས་ཀྱི་ས་གཞི་ལ་བརྟན་པ་རྣམས་དང་། རིན་པོ་ཆེ་སྣ་ཚོགས་ཀྱི་གཞལ་མེད་ཁང་རྣམས་དང་། རིན་པོ་
ཆེ་སྣ་ཚོགས་ཀྱི་ཕུང་པོ་རྣམས་དང་། རིན་པོ་ཆེ་སྣ་ཚོགས་ཀྱི་ཐེམ་སྐས་རྣམས་དང་། ནོར་བུ་རིན་པོ་ཆེ་སྣ་ཚོགས་ཀྱི་ཀ་བ་རྣམས་དང་། རིན་པོ་ཆེ་སྣ་ཚོགས་ཀྱི་ཁང་པའི་ཚར་རྣམས་དང་། ནོར་བུ་བཻཌཱུརྱ་སྣ་ཚོགས་ཀྱི་སྒྲོན་མ་རྣམས་དང་། གང་དག་ལྷ་ཡུལ་གྱི་གཞལ་མེད་ཁང་
བལྟ་ན་སྡུག་པ་རྣམས་དང་། གང་དག་ལྷ་ཡུལ་གྱི་ལྷའི་གྲོང་ཁྱེར་གྱི་གཞལ་མེད་ཁང་ཡོངས་སུ་བཟུང་བ་མ་མཆིས་པ་རྣམས་དང་། གང་དག་ལྷ་ཡུལ་གྱི་མེ་ཏོག་བལྟ་ན་སྡུག་པ་རྣམས་དང་། གང་དག་ལྷ་ཡུལ་གྱི་གླུ་དབྱངས་ཀྱི་ཆ་སྤྱད་རྣམས་དང་། གཞལ་མེད་ཁང་སྟོང་པ་
རྣམས་ཀྱི་ཚར་རླུང་གིས་བསྐྱོད་པ་སྒྲ་སྙན་པ་འབྱིན་པ་རྣམས་དང་། རོལ་མོའི་ཆ་སྤྱད་ཀྱི་རྣམ་པ་མ་ཀྲོལ་བར་རང་སྒྲ་སྙན་པར་འབྱིན་པ་རྣམས་དང་། གང་དག་ལྷ་ཡུལ་གྱི་བྱའི་ཚོགས་གཞལ་མེད་ཁང་སྟོང་པ་རྣམས་ན་གནས་ཤིང་སྐད་སྙན་པ་འབྱིན་པ་རྣམས་དང་། གང་དག་རིན་པོ་ཆེའི་
སྤྲིན་སྒྲ་དབྱངས་ཆེན་པོ་སྙན་པར་འབྱིན་པ་རྣམས་དང་། གང་དག་ལྷའི་ནོར་བུ་རྣམས་དང་། གང་དག་གླུ་དབྱངས་རྣམས་དང་། གང་དག་དྲི་བདའ་བའི་མེ་ཏོག་གི་ལྗོན་ཤིང་རྣམས་དང་། ཕྲེང་པའི་ལྗོན་ཤིང་རྣམས་དང་། སྤོས་ཀྱི་ལྗོན་ཤིང་རྣམས་དང་། རྒྱལ་མཚན་གྱི་
ལྗོན་ཤིང་རྣམས་དང་། བ་དན་གྱི་ལྗོན་ཤིང་རྣམས་དང་། རིན་པོ་ཆེའི་ལྗོན་ཤིང་ཡོངས་སུ་ལོངས་མ་སྤྱད་པ་དེ་དག་ཐམས་ཅད་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་འབུལ་ལོ། །གང་དག་སངས་རྒྱས་ཀྱི་སྤྱན་གྱིས་གཟིགས་པའི་འཇིག་རྟེན་གྱི་ཁམས་ཐམས་ཅད་
ན་མཆོད་པ་ཆེན་པོའི་སྤྲིན་མེ་ཏོག་གི་སྤྲིན་རྣམས་དང་། དྲིའི་སྤྲིན་རྣམས་དང་། ཕྲེང་བའི་སྤྲིན་རྣམས་དང་། བདུག་པའི་སྤྲིན་རྣམས་དང་། ལྷབ་ལྷུབ་ཀྱི་སྤྲིན་རྣམས་དང་། བྱུག་པའི་སྤྲིན་རྣམས་དང་། རིན་པོ་ཆེའི་གདུགས་ཀྱི་སྤྲིན་རྣམས་དང་། རིན་པོ་ཆེའི་རྒྱལ་མཚན་གྱི་

སྤྲིན་རྣམས་དང་། རིན་པོ་ཆེའི་བ་དན་གྱི་སྤྲིན་རྣམས་དང་། རིན་པོ་ཆེའི་གོས་ཀྱི་སྤྲིན་རྣམས་དང་། རིན་པོ་ཆེའི་ལྗོན་ཤིང་གི་སྤྲིན་རྣམས་དང་། རིན་པོ་ཆེས་བཀང་བའི་སྣོད་ཀྱི་སྤྲིན་རྣམས་དང་། རིན་པོ་ཆེ་ནོར་བུ་ཆེན་པོ་སྤུངས་པའི་སྤྲིན་རྣམས་དང་། རིན་པོ་ཆེ་རྣམ་
པ་སྣ་ཚོགས་ཀྱི་སྤྲིན་རྣམས་དང་། མར་མེའི་སྣོད་སྟོང་གི་འཇིག་རྟེན་གྱི་ཁམས་ཀྱི་ཚད་ཙམ་ལ་དྲི་ཞིམ་པོའི་འབྲུ་མར་གྱིས་ཡོངས་སུ་བཀང་ཞིང་སྙིང་པོའི་རས་རི་རབ་བརྒྱའི་ཚད་ཙམ་རབ་ཏུ་འབར་བ་རྣམས་སངས་རྒྱས་བཅོམ་ལྡན་འདས་ཐམས་ཅད་དང་། བྱང་ཆུབ་སེམས་དཔའ་ཐམས་
ཅད་ལ་འབུལ་ལོ། །དེ་དག་ཐམས་ཅད་ལ་གསོལ་བ་ནི་བྱང་ཆུབ་ཀྱི་སྙིང་པོར་གཤེགས་པ་དང་། བདུད་འདུལ་བ་དང་། མངོན་པར་བྱང་ཆུབ་པ་དང་། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདའ་བར་བཞེད་པ་དེ་དག་རྣམས་ལ་སེམས་ཅན་རྣམས་ཀྱི་
དོན་དུ་བསྐལ་པ་མང་པོར་བཞུགས་པར་གསོལ་ལོ། །ཅི་ལྟར་དེ་བཞིན་གཤེགས་པ་རྣམས་ཀྱིས་མི་དམིགས་པར་བཞུགས་ཏེ་བསྔོས་པ་ལྟར་བདག་གིས་བསོད་ནམས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །དེ་བཞིན་གཤེགས་པ་ཐམས་
ཅད་དང་། བྱང་ཆུབ་སེམས་དཔའ་ཐམས་ཅད་དང་། སེམས་ཅན་ཐམས་ཅད་ཀྱི་བསོད་ནམས་ལ་རྗེས་སུ་ཡི་རང་ངོ་། །སྡིག་པ་ཐམས་ཅད་ཀྱང་སོ་སོར་བཤགས་སོ། །ཨོྃ་སྨ་ར་སྨ་ར། བི་མཱ་ན་སྐ་ར་མ་ཧཱ་ཛ་བ་ཧཱུྃ། དེའི་འོག་ཏུ་ཅི་ལྟར་འདོད་པ་བཞིན་ལྷ་རྫས་ཀྱི་མཆོད་པ་ཆེན་
པོའི་སྤྲིན་རྣམས་དེ་བཞིན་གཤེགས་པ་ཐམས་ཅད་ཀྱི་སྤྱན་སྔར་འབྱུང་བར་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་སངས་རྒྱས་དམིགས་པ་ཡིད་ལ་བྱེད་པས་ཡོངས་སུ་བསྔོ་བ་ཆེན་པོའི་འཁོར་ལོ་འདི་ཉིན་པར་རམ། མཚན་མོ་འདོན་ན། དེའི་སྡིག་པ་རྣམས་ཡོངས་སུ་ཟད་པར་
འགྱུར་ཞིང་ཉོན་མོངས་པ་ཐམས་ཅད་ཀྱང་བསྲབས་པར་འགྱུར་རོ། །གོང་དུ་སྨོས་པའི་ཡོན་ཏན་རྣམས་ཀྱང་འཐོབ་པར་འགྱུར་རོ། །ལན་ཅིག་བཟླས་བརྗོད་པར་བྱས་ན་ཚངས་པ་བརྒྱའི་བསོད་ནམས་འཐོབ་པར་འགྱུར་རོ། །རྨི་ལམ་ན་ཡང་རྟག་ཏུ་དེ་བཞིན་གཤེགས་པ་རྣམས་ཆོས་སྟོན་པ་མཐོང་

བར་འགྱུར་རོ། །རིག་སྔགས་རྣམས་ཀྱང་ཡང་དག་པར་གྲུབ་པར་འགྱུར་རོ། །རྡོ་རྗེ་འཆང་གིས་ཡོངས་སུ་གཟུང་བར་ཡང་འགྱུར་རོ། །ཇི་ལྟར་འདོད་པའི་སངས་རྒྱས་ཀྱི་ཞིང་རྣམས་སུ་ཡང་སྐྱེ་བར་འགྱུར་རོ།།འཕགས་པ་དགོངས་པའི་རྒྱུད་ཀྱི་ཕྲེང་བ་
ཆེན་པོ་བྱང་ཆུབ་སེམས་དཔའི་རྣམ་པར་ངེས་པ་ཆེན་པོ་བསྟན་པ་ལས། ནོར་བུ་ཆེན་པོ་རིན་པོ་ཆེ་ལ་མཁས་པ་བསྟན་པ། ཡོངས་སུ་བསྔོ་བ་ཆེན་པོའི་རྒྱལ་པོ་རྫོགས་སྷོ།། །།ཁ་ཆེའི་མཁན་པོ་དྷ་རྨཱ་ཀ་ར་དང་། ལོ་ཙྪ་བ་བནྡེ་དཔལ་འབྱོར་གྱིས་བསྒྱུར་བ་ལས།
རྒྱ་གར་གྱི་མཁན་པོ་བིདྱཱ་ཀ་ར་པྲ་བྷ་དང་། །ཞུ་ཆེན་གྱི་ལོ་ཙྪ་པ་བནྡེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅། །རྒྱ་གར་སྐད་དུ། ཨཱརྱ་མ་ཧཱ་པ་རི་ཎཱ་མ་རཱ་ཛ་སམནྟྲ་ཀ། བོད་སྐད་དུ།
འཕགས་པ་ཡོངས་སུ་བསྔོ་བའི་རྒྱལ་པོ་ཆེན་པོ་སྔགས་དང་བཅས་པ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཡོན་ཏན་རྒྱ་མཚོ་དཔག་མེད་པ། །སངས་རྒྱས་དམ་ཆོས་འཕགས་པ་ཡི། །དགེ་འདུན་དུས་གསུམ་བཞུགས་པ་
རྣམས། །མ་ལུས་པ་ལ་སྐྱབས་སུ་མཆི། །མི་དགེ་ཐམས་ཅད་བཤགས་པར་བགྱི། །འགྲོ་བའི་དགེ་ལ་རྗེས་ཡི་རང་། །ཆོས་ཀྱི་འཁོར་ལོ་རབ་བསྐོར་བར། །རྫོགས་སངས་རྒྱས་ལ་བསྐུལ་མ་འཚལ། །ཀུན་མཁྱེན་སྤྱན་གྱིས་གཟིགས་པ་ཡི། །བདག་དགེ་ཆུང་ངུ་
གང་མཆིས་པ། །དེས་ནི་གཏན་དུ་བྲལ་བ་དག །ཐམས་ཅད་ཉེ་བར་ཞི་གྱུར་ཅིག །རྣམ་པ་ཀུན་མཆོག་ལྡན་པ་ཡི། །སྟོང་པ་ཤེས་པའི་ཏིང་ངེ་འཛིན། །བྱང་ཆུབ་བར་གྱི་ཚེ་རབས་སུ། །རྟག་ཏུ་བདེ་དང་ལྡན་པར་ཤོག །རྣམ་པར་མི་རྟོག་ལྷུན་གྱིས་གྲུབ། །རྟག་ཏུ་མཉམ་
པར་བཞག་གྱུར་ཅིང་། །ཟླ་ཉི་ནོར་བུ་རོལ་མོ་ལྟར། །སེམས་ཅན་དོན་ལ་འཇུག་པར་ཤོག །ཇི་ལྟར་རྒྱལ་བ་མཁས་པ་རྣམས། །ཤེས་རབ་ཕ་རོལ་ཕྱིན་ཐབས་བས་བསྔོ། །དེ་ལྟར་བདག་གིས་དཀར་པོ་རྣམས། །བྱང་ཆུབ་ཏུ་ནི་བསྔོ་བར་བགྱི། །དཀོན་མཆོག་གསུམ་ལ་

དམིགས་པ་ཡི། །བདག་གི་ལུས་ངག་ཡིད་དགེ་དང་། །སྦྱིན་པ་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ལས་བྱུང་གང་། །དེ་དག་ཀུན་གྱིས་བདག་ཉིད་ནི། །ཚངས་པར་སྤྱོད་པ་ལྡན་པ་དང་། །འཇིག་རྟེན་མགོན་གྱི་བསྟན་པ་ལ། །རབ་འབྱུང་མངོན་
དགའ་དབང་ལྡན་ཞིང་། །སངས་རྒྱས་ཀུན་གྱིས་གསུང་རབ་ཀྱི། །གཞུང་དོན་ཚིག་ལ་མཁས་གྱུར་ནས། །དམ་ཆོས་ཡོངས་སུ་འཛིན་པ་དང་། །ལུས་དང་སྲོག་ལ་དགའ་མེད་ཤོག །བདག་ནི་འགུམ་པའི་དུས་བགྱིད་ཚེ། །ཕྱིན་ཅི་མ་ལོག་ཡིད་ཀྱིས་སུ། །སངས་རྒྱས་
ཚེ་དཔག་མེད་མཐོང་ནས། །འདི་ནས་བདེ་བ་ཅན་དུ་མཆི། །བདུད་ཀྱི་སྤྱོད་ཡུལ་མངོན་གྱུར་ཚེ། །དྲང་སྲོང་ཆེན་པོ་ཚེ་དཔག་མེད། །རྟག་ཏུ་སྟོན་པ་མཛད་གྱུར་ཅིང་། །ས་བཅུ་ཐོབ་ནས་དེ་དག་གི། །རྣམ་པར་དག་པའི་རིམ་པ་ཡིས། །བྱང་ཆུབ་དམ་པ་ཐོབ་པར་ཤོག །
སངས་རྒྱས་ཀུན་དུ་བཟང་པོ་ཉིད་ཐོབ་ནས། །བག་ཆགས་བཅས་པ་ཉེས་བསགས་རྩ་ནས་བཏོན། །ཡེ་ཤེས་སྒྲིབ་མེད་སྙིང་རྗེར་ལྡན་ནས་སུ། །འགྲོ་བ་རྣམས་ལ་སྨན་དང་བདེ་བ་བགྱི། །ཕྱོགས་བཅུ་མཐའ་ཡས་པ་ན་ཤེས་བྱའི་དོན་མ་ལུས་པར་ཁྱབ་པའི་བློ་མངའ་བ་ཕྱོགས་
བཅུའི་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་རྒྱ་མཚོ་སྙེད་ལ་ཕྱག་འཚལ་ལོ། །སེམས་ཀྱི་རྙོག་མ་ཡིད་གཉིས་བསལ་ནས་དང་པོར་ནི། །ཤཱཀྱའི་རྒྱལ་པོ་ཐུབ་ལ་སྤྱི་བོས་ཕྱག་འཚལ་ལོ། །བདེ་བ་ཅན་ན་བཞུགས་པའི་རྒྱལ་བ་འོད་དཔག་མེད། །བླ་མ་ལ་ཡང་
དགའ་དང་གུས་པས་གདུང་བར་བགྱི། །གང་ཞིག་ཕྱོགས་ཀུན་དག་ན་ད་ལྟར་བྱུང་བ་ཡི། །འགྲོ་ལ་བྱམས་པའི་སངས་རྒྱས་ངེས་པར་བཞུགས་རྣམས་དང་། །འདས་དང་ཕྱིས་འབྱུང་བ་ཡི་རྒྱལ་བ་ཐམས་ཅད་ལ། །བདག་ནི་དགའ་བའི་ཡིད་ཀྱིས་ཡང་དག་མཆོད་པ་བགྱི། །འདི་ལྟ་སྟེ།
ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་དང་། སྐུ་མཆོག་གསེར་འོད་དང་། བདེན་པའི་དབྱངས་དང་། ལྷུན་པོ་བཟང་པོ་དང་། ལྷུན་པོ་ཆེན་པོ་དང་། དབང་པོའི་འབྱུང་གནས་དང་། པདྨའི་དབྱངས་དང་། ཕྱག་བཟང་དང་། འོད་ཀྱི་ཏོག་དང་། མཆོག་གི་

འབྱུང་གནས་དང་། རིན་ཆེན་ཟླ་འོད་དང་། དཔའ་བོའི་སྡེ་དང་། ཀུན་ནས་སྣང་བ་དང་། རྣམ་དག་ཞལ་དང་། རིན་ཆེན་ཏོག་དང་། མདོག་བཟང་འབྱུང་གནས་དང་། །སཱ་ལའི་རྒྱལ་པོ་དང་། རྣམ་དག་འོད་དང་། བདེ་མཛད་རྒྱལ་པོ་དང་། ཀུན་ནས་སྣང་བ་དང་།
ལྷུན་པོ་བཟང་པོ་གསལ་བ་དང་། འོད་ཀྱི་དཀྱིལ་འཁོར་དང་། དཀོན་མཆོག་བརྩེགས་དང་། ཀུན་ནས་འོད་དང་། དཔལ་བརྩེགས་དང་། བཀོད་པ་ཆེན་པོ་དང་། སྦྱངས་གསལ་བཻཌཱུརྱ་དང་། དབང་པོའི་རྒྱལ་མཚན་དང་། ཐོབ་པའི་སྡེ་དང་། རབ་ཏུ་ལྷན་ནེ་དང་། འོད་
མཛེས་དང་། མེ་ཏོག་ཚོམས་དང་། སྤྱན་བཟང་དང་། ཤིན་ཏུ་བཟང་པོ་དང་། འོད་བཟང་སྒྲོན་མ་དང་། དགོངས་པ་རྣམ་དག་དང་། ཆོས་ཀྱི་འོད་ཟེར་དང་། བརྩོན་འགྲུས་ཆེ་ལྡན་དང་། པདྨའི་སྙིང་པོ་དང་། ལྷག་པར་དགོངས་པ་བརྟན་པ་དང་། རྡོ་རྗེའི་སྡེ་དང་། ལེགས་
པར་འཁྲུངས་དང་། ཚུལ་བཟང་དང་། དབྱངས་སྙན་དང་། ཡོན་ཏན་དཔལ་འོད་དང་། འཇིག་རྟེན་ཏོག་དང་། མདོག་བཟང་གསལ་བ་དང་། རྟག་ཏུ་བརྩོན་དང་། ཙནྡན་ཟླ་འོད་དང་། རྒྱས་པའི་དཔལ་དང་། རྒྱ་མཚོ་དང་། དབང་པོ་ཆེན་པོ་དང་། རྒྱལ་བའི་དབང་པོ་དང་། འོད་
བཀོད་པ་དང་། བརྩོན་འགྲུས་སྦྱངས་པ་དང་། ཀུན་དུ་སྒྲོན་མ་དང་། གསུང་བ་ཆེན་པོ་དང་། རྡོ་རྗེའི་སྙིང་པོས་རབ་ཏུ་འཇོམས་པ་དང་། དྲང་སྲོང་ལྷ་དང་། མེའི་འོད་དང་། ཡིད་དུ་འོང་བ་དང་། རྣམ་འཇོམས་དང་། ཏོག་ཆེན་པོ་དང་། ཤིན་ཏུ་མཐོར་གཤེགས་དང་།
ཕན་པར་བཞེད་དང་། དྲང་སྲོང་ཆེན་པོ་དང་། རྣམ་པར་གཟིགས་དང་། གཙུག་ཏོར་ཅན་དང་། ཐམས་ཅད་སྐྱོབ་དང་། འོད་སྲུང་དང་། གསེར་མདོག་དང་། གཟི་བརྗིད་མཆོག་དང་། མཐོ་བ་དང་། བཀྲ་ཤིས་དང་། རིན་ཆེན་གྲགས་པ་དང་། གཟི་བརྗིད་འོད་
དང་། རྣམ་པར་སྣང་མཛད་དང་། དོན་ཡོད་གཟིགས་དང་། དབང་པོའི་ཏོག་དང་། གྲགས་པ་དང་། སྣང་མཛད་དང་། བིཥྞུ་བློ་གྲོས་དང་། སྐར་རྒྱལ་དང་། སྐག་དང་། འོད་འབབ་དང་། རིན་ཆེན་མཆོད་སྡོང་དང་། འབར་བའི་ཏོག་དང་། ཐུགས་གཞུངས་དང་། རབ་

ཞི་དབང་པོ་དང་། སྤྱན་དག་དང་། ཟླ་མཆོག་དང་། བདེན་པའི་ལྷ་དང་། དྲང་སྲོང་སྦས་པ་དང་། ཐུབ་པ་དང་། ཚངས་པའི་དབྱངས་དང་། ཀུན་དུ་ཞལ་དང་། མ་སྨད་པ་དང་། བདུད་འཇོམས་དང་། ལྷའི་རྒྱལ་པོ་དང་། ལེགས་སོན་དང་། གཟི་བརྗིད་བཟང་པོ་
དང་། ཚོགས་ཀྱི་དབང་པོ་དང་། ཤིན་ཏུ་རྣམ་པར་གནོན་པས་གཤེགས་པདང་། བསམ་ཡས་འོད་དང་། ཟླ་བའི་རྒྱལ་པོ་དང་། བདེ་བ་ཆེ་ཐོབ་དང་། སྣང་བར་གྱུར་པ་དང་། རྒྱ་མཚོ་ཆེན་པོ་དང་། མི་འཁྲུགས་པ་དང་། དབང་པོའི་མཆོག་དང་། མེ་ཏོག་ཏོག་དང་།
དེད་དཔོན་ཆེན་པོ་དང་། རྣམ་པར་རྒྱལ་བྱེད་དང་། མེ་ཏོག་བཟང་པོ་དང་། བཤེས་གཉེན་བཟང་པོ་དང་། རྒྱུ་སྐར་བཟང་པོ་དང་། ཉི་མའི་སྙིང་པོ་དང་། ཚོགས་ཀྱི་དཔལ་དང་། ནོར་གྱི་དཔལ་དང་། སྣང་བ་བཟང་པོ་དང་། འོད་དཔག་མེད་དང་། དཔལ་ཆེན་པོ་
དང་། སྟོབས་མཆོག་དང་། སྒྲོན་མ་སྟེ། དེ་དག་ལ་སོགས་པ་སྔོན་བྱུང་བ་དང་། ཕྱིས་འབྱུང་བའི་རྒྱལ་བ་གང་དག་ཡོན་ཏན་གྱི་ཀླུང་དཔག་ཏུ་མེད་པར་གྱུར་པ། འཁོར་བའི་ཆུ་བོའི་འདམ་རྫབ་ལས་ཡང་དག་པར་རྒལ་བ། གཏོང་བ་དང་ལྡན་ཞིང་ཚུལ་ཁྲིམས་རྣམ་པར་དག་
ལ་བཟོད་པ་ཆེན་པོའི་མཆོག་དང་ལྡན་པ། བརྩོན་འགྲུས་སྦྱངས་ཤིང་སྙིང་པོ་གཡོ་བ་མི་མངའ་བའི་བསམ་གཏན་ཆེན་པོ་དང་ལྡན་པ། མཁྱེན་རབ་རྣོ་བ་ཐོགས་པ་མེད་པ་དང་ལྡན་པ། སེམས་ཅན་ལ་ཐུགས་རྗེ་དང་། ཚོགས་དང་། རྫོགས་པའི་བྱང་ཆུབ་ཀྱི་ཐུགས་སྐྱེ་བ་རབ་ཏུ་འབྱུང་
བ། འཇིག་རྟེན་ཐམས་ཅད་ལ་ཐུགས་བརྩེ་བ། དོན་ལ་མངོན་པར་བརྩོན་པ། སེམས་ཅན་གྱི་སྙིང་པོ། སྐྱེ་དགུ་ལ་བྱམས་པ། གཡོ་མི་མངའ་བ། དགའ་བ་མི་མངའ་བ། ཆགས་པ་མི་མངའ་བ། བྱམས་པའི་ཐུགས་ཀྱི་བདག་ཉིད་ཅན། ལྷའི་ཡང་ལྷ་དང་། མིའི་མཆོག་
གིས་རྗེད་པ། ལྷའི་ཡང་ལྷ་སྟེ། རྒྱལ་བ་དེ་རྣམས་ལ་བདག་གི་ལུས་དང་། ངག་དང་། སེམས་གུས་པ་རྣམ་པ་དུ་མས་ཕྱག་འཚལ་ལོ། །རྒྱལ་བ་དེ་རྣམས་ཀྱིས་བདག་སྡིག་པ་ལས་རྣམ་པ་ཐམས་ཅད་དུ་བསྐྱབ་ཏུ་གསོལ། སྡུག་བསྔལ་དུ་མས་གདུངས་པའི་སེམས་ཅན་ཐམས་

ཅད་ཀྱང་རབ་ཏུ་བརྩོན་པས་དྲང་དུ་གསོལ། ཐུགས་རྗེ་ཆེན་པོ་དང་ལྡན་པས་བདག་ཀྱང་ངན་འགྲོ་དག་ལས་དྲང་ཞིང་དེ་བཞིན་དུ་རྫོགས་པའི་བྱང་ཆུབ་ཏུ་མྱུར་དུ་གཞག་ཏུ་གསོལ། དྲང་སྲོང་ཆེན་པོ་རྣམས་ཀྱི་མཚན་བརྗོད་པའི། དགེ་བ་བདག་གིས་བསྒྲུབས་པ་གང་
ལགས་པ། །དེ་ཡིས་བདག་ནི་ཚེ་རབས་ཐམས་ཅད་དུ། །ཐུབ་དབང་དེ་དང་ལྷན་ཅིག་འགྲོགས་པར་ཤོག །ཆོས་དང་ཟང་ཟིང་མཆོད་པས་བདེ་བར་གཤེགས། །དེ་ལ་ཉོན་མོངས་མེད་པར་བདག་གིས་མཆོད། །མཆོད་པ་བགྱིས་ཤིང་ལམ་གཉིས་ལ་བརྟེན་ནས། །འགྲོ་བ་
རྫོགས་པའི་སངས་རྒྱས་ཉིད་གྱུར་ཅིག །དེ་བཞིན་གཤེགས་པ་དེ་དག་གི་མཚན་ཐོས་པ་དང་། མོས་པ་དང་། འཛིན་པ་དང་། འཆང་བ་དང་། ཡོངས་སུ་བསྒྲགས་པས་སྒྲིབ་པ་ཐམས་ཅད་ཟད་པར་འགྱུར། ངན་འགྲོའི་འཇིགས་པ་ཐམས་ཅད་ལས་ཀྱང་ཐར་བར་འགྱུར།
བླ་ན་མེད་པ་ཐམས་ཅད་མཁྱེན་པ་ཉིད་དུ་ཡང་ངེས་པར་འགྱུར་རོ། །ཆོས་ཀྱི་དབྱིངས་ཀྱིས་ཀླས་པ་ནམ་མཁའི་ཁམས་ཀྱི་མཐས་གཏུགས་པའི་ཕྱོགས་ཐམས་ཅད་ན་དུས་གསུམ་ལྷག་མ་མེད་ཅིང་ལུས་པ་མེད་ལ་མ་ལུས་པའི་སངས་རྒྱས་བཅོམ་ལྡན་འདས་དེ་བཞིན་གཤེགས་པའི་སྤྱན་
ལྔས་ཐུགས་སུ་ཆུད་པ་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་བས་ཕྱག་འཚལ་ལོ། །སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་དེ་དག་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་བྱང་ཆུབ་ཀྱི་སྙིང་པོ་ལ་མཆིས་ཀྱི་
བར་དུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཐུགས་རྗེ་དང་ལྡན་པ། བྱམས་པ་དང་ལྡན་པ། ཕན་པར་བཞེད་པ། ཐུགས་བརྩེ་བ་ཅན། སྐྱེ་བ་མེད་པ་དང་། འགག་པ་མེད་པའི་ཆོས་དང་ལྡན་པ་དེ་ལ་ལུས་
ཐམས་ཅད་ཀྱིས་ཕྱག་འཚལ་ནས་བསམ་པ་དང་། ལྷག་པའི་བསམ་པ་རུས་པའི་ཁོང་ནས་དགའ་བ་དང་། རྐང་གི་ཁོང་ནས་དགའ་བའི་སེམས་ཐམས་ཅད་ཀྱིས་སྐྱབས་སུ་མཆིའོ། །དེ་བཞིན་དུ་བཅོམ་ལྡན་འདས་མྱ་ངན་མི་མངའ་བ་དེ་དང་། རྟག་ཏུ་མྱ་ངན་ལས་འདས་པ་དང་། སྲེག་

བླུགས་གསོལ་དང་། དེ་བཞིན་དུ་མཆོག་དགའ་དང་། མཆོག་གི་འབྱུང་གནས་དང་། དབང་པོའི་འབྱུང་གནས་དང་། མར་མེ་མཛད་དང་། སེང་གེ་སྒྲ་དང་། མདོག་བཟང་འབྱུང་གནས་དང་། རིན་ཆེན་འབྱུང་གནས་དང་། རིན་ཆེན་བླ་མ་དང་། རིན་ཆེན་ཟླ་བ་དང་། རིན་
ཆེན་འབྱུང་དང་། རིན་ཆེན་སྣང་བ་དང་། རིན་ཆེན་ཏོག་དང་། རིན་ཆེན་འོད་གསལ་དང་། རིན་ཆེན་རབ་གསལ་དང་། རིན་ཆེན་མང་དང་། རིན་ཆེན་མུ་ཁྱུད་དང་། རིན་ཆེན་པདྨ་དང་། རིན་ཆེན་པདྨས་རྣམ་པར་གནོན་དང་། རིན་ཆེན་མེ་དང་། རིན་ཆེན་མེའི་འཁོར་དང་།
རིན་ཆེན་ཀུན་གྱིས་སྐུ་བརྒྱན་ལྡན་པ་དང་། དགྲ་ལས་རྒྱལ་བ་དང་། སའི་སྟོབས་ཀྱི་ཤུགས་མངའ་བ་དང་། པདྨའི་མཆོག་དང་། སྐུ་མཆོག་དང་། ཟླ་མཆོག་དང་། ཆོས་མཆོག་དང་། བཅོམ་ལྡན་འདས་དེ་བཞིན་གཤེགས་པ་བརྗོད་ཀྱིས་མི་ལང་བ་དང་། རྣམ་པར་རྟོག་མེད་
དང་། དཔག་ཏུ་མེད་པ་དང་། རིན་ཆེན་མཐའ་ཡས་དང་། རིན་ཆེན་མཐའ་ཡས་དྲི་མ་མེད་པ་དང་། ཕྱག་མཐའ་ཡས་དང་། གྲགས་པ་མཐའ་ཡས་དང་། གྲགས་པ་ཆེན་པོ་དང་། བདེ་བྱེད་ཆེ་ཐོབ་དང་། མཐུ་ཆེན་བརྩོན་འགྲུས་ངེས་འབྱུང་དང་། ཡོན་ཏན་ཆེར་བགྲང་
དང་། དཔག་མེད་དབྱངས་དང་། བདེན་པའི་དབྱངས་དང་། རྣམ་པར་རྒྱལ་བའི་དབྱངས་དང་། ཟླ་བའི་དབྱངས་དང་། པདྨའི་དབྱངས་དང་། སེང་གེའི་དབྱངས་དང་། སེང་གེའི་སྒྲ་སྒྲོགས་དང་། རྡོ་རྗེའི་སྒྲ་སྒྲོགས་དང་། རྡོ་རྗེའི་སྙིང་པོས་རབ་ཏུ་འཇོམས་པ་དང་། ཟླ་འོད་དང་།
ཉི་འོད་དང་། སྐར་འོད་དང་། པདྨའི་འོད་དང་། བདུད་རྩིའི་འོད་དང་། སྤྲུལ་པའི་འོད་དང་། རིན་ཆེན་དཔག་མེད་སྤྲུལ་པའི་འོད་དང་། གྲོལ་བའི་འོད་དང་། ཡོངས་སུ་དག་པའི་འོད་དང་། རྣམ་པར་རྟོག་མེད་སྐར་འོད་དང་། སྐར་མ་སྒྲོན་མ་དང་། འཇིག་རྟེན་སྒྲོན་མ་དང་།
ནམ་མཁའི་ཆོས་ཀྱི་སྒྲོན་མ་དང་། ཟླ་བའི་སྒྲོན་མ་དང་། ཟླ་འོད་དང་། དྲི་མེད་བླ་མ་དང་། དྲི་མེད་གསལ་བ་དང་། གསེར་མདོག་གསལ་བ་དང་། གསེར་མདོག་སྣང་བ་དང་། གསེར་མདོག་རིན་ཆེན་གསལ་བ་དང་། དཔག་མེད་སྤོས་སྣང་དང་། སྤོས་ཀྱི་ཞལ་དང་། ཀུན་

ནས་སྤོས་དང་། ཚངས་དབྱངས་རྒྱལ་པོ་དང་། །ཀླུའི་དབང་ཕྱུག་རྒྱལ་པོ་དང་། །དཔལ་གྱི་སྙིང་པོ་བརྩེགས་པ་སྒྲ་བསྒྲགས་རྒྱལ་པོ་དང་། །གློག་གི་སྒྲོན་མེ་ཏོག་གི་རྒྱལ་པོ་དང་། དགེ་བ་རབ་གནས་གཏེར་གྱི་རྒྱལ་པོ་དང་། བདུད་རྩི་དམ་པ་ལེགས་བྲལ་
རྒྱལ་པོ་དང་། བཟང་པོ་ཏོག་གི་རྒྱལ་མཚན་གྱི་རྒྱལ་པོ་དང་། མེ་ཏོག་ཀུན་གྱི་དྲིའི་དབང་ཕྱུག་རྒྱལ་པོ་དང་། རྔ་སྒྲའི་རྒྱལ་པོ་དང་། སཱ་ལའི་རྒྱལ་པོ་དང་། དེ་བཞིན་དུ་བཅོམ་ལྡན་འདས་མི་འཁྲུགས་པ་དེ་དང་། འོད་ཆེན་དང་། སྙིང་པོ་ཟིལ་གྱིས་གནོན་དང་། མེ་ཏོག་ཟིལ་
གྱིས་གནོན་དང་། ལྷུན་པོ་དང་། ལྷུན་པོ་ཆེན་པོ་དང་། ཤིན་ཏུ་ལྷུན་པོ་དང་། ལྷུན་པོ་བཟང་པོ་ལྟ་བུ་དང་། ལྷུན་པོ་བཟང་པོས་རྣམ་པར་གནོན་པ་དང་། ནམ་མཁའ་གསལ་པ་དང་། ཟླ་ཉི་གསལ་བ་དང་། མེ་གསལ་དང་། དཔལ་གྱི་སྙིང་པོ་ནོར་བུ་གསལ་བ་དང་།
བདུད་རྩི་སྤྲོ་གསལ་དང་། ཟླ་མཆོག་དཔལ་དང་། མཐའ་ཡས་དཔལ་དང་། རིན་པོ་ཆེ་འདུས་པའི་དཔལ་དང་། རིན་པོ་ཆེའི་ཕྱིར་མི་ལྡོག་པའི་མཐུ་ལ་གནས་པའི་དཔལ་དང་། རིན་པོ་ཆེ་དག་པ་འབྱུང་བའི་དཔལ་དང་། བཻ་ཌཱུརྱའི་སྙིང་པོ་མཆོག་གི་དཔལ་དང་། ཁྲེལ་ཡོད་དཔག་མེད་གསེར་
མཆོག་བཀོད་པའི་དཔལ་དང་། ཏ་ལའི་རྒྱལ་པོ་ལྟར་འཕགས་པའི་དཔལ་དང་། ལྗོན་པ་རྣམ་པར་འཕེལ་བའི་དཔལ་དང་། སྤྱོད་པ་གྲངས་མེད་པ་ལ་ཡང་དག་པར་གནས་པའི་དཔལ་དང་། དོན་ཡོད་དཔལ་དང་། དོན་ཀུན་གྲུབ་པའི་དཔལ་དང་། པདྨ་མཆོག་གིས་རྣམ་པར་
འཕྲུལ་པའི་དཔལ་དང་། ཡེ་ཤེས་གཙང་སྤས་དཔལ་དང་། ཚེ་དཔག་མེད་དང་། དབྱངས་དཔག་མེད་དང་། པདྨའི་དབྱངས་དང་། པདྨའི་སྡེ་དང་། དཔའ་སྡེ་དང་། མཚོན་ཆ་དཔའ་བརྟན་པའི་སྡེ་དང་། ཉོན་མོངས་སྤོང་དང་། ཤིན་ཏུ་ཡོངས་དག་ཏོག་དང་། ཤིན་ཏུ་དྲི་མེད་འབར་
བའི་ཏོག་དང་། ཐུགས་དམ་ཀུན་ཆུབ་ཐེ་ཚོམ་གཅོད་པ་དང་། ཀུན་དུ་རྣམ་པར་སྣང་མཛད་རྣམ་དག་བརྙེས་པ་དང་། ཀུན་དུ་ཡོན་ཏན་རྣམ་གནོན་དང་། ཀུན་དུ་ཡོན་ཏན་འབྱུང་བ་དང་། དེ་བཞིན་དུ་བཅོམ་ལྡན་འདས་རིན་པོ་ཆེ་སྣང་བ་རྣམ་པར་གནོན་པ་བསམ་གྱིས་མི་ཁྱབ་པ་དེ་

དང་། རིན་པོ་ཆེ་གསལ་བ་དང་། རིན་པོ་ཆེ་མང་པོ་དང་། དེ་ལ་སོགས་པ་སྐྱེ་བ་མེད་པ་དང་། འགག་པ་མེད་པའི་ཆོས་དང་ལྡན་པ། འདས་པ་དང་། མ་འོངས་པ་དང་། ད་ལྟར་བྱུང་བའི་ཡང་དག་པར་རྫོགས་པའི་སངས་རྒྱས་རྣམས་ལ་སེམས་ཅན་ཐམས་ཅད་ཀྱིས་བྱང་ཆུབ་ཀྱི་
སྙིང་པོ་ལ་མཆིས་ཀྱི་བར་དུ་སྐྱབས་སུ་མཆིའོ། །དེ་བཞིན་དུ་བཅོམ་ལྡན་འདས་དེ་དག་གི་ཆོས་སྤྲོས་པ་མེད་པ། ཡི་གེ་མེད་པ། འཕགས་པ་རྣམས་ཀྱི་སོ་སོ་རང་རིག་པར་བྱ་བ། སེམས་ཅན་མེད་པ་དང་སེམས་ཅན་གྱི་རྡུལ་དང་བྲལ་བ། བདག་མེད་པ། འདོད་ཆགས་
ཀྱི་རྡུལ་དང་བྲལ་བ། སྲོག་མེད་པ། སྐྱེ་བ་དང་འཆི་བ་དང་བྲལ་བ། གང་ཟག་མེད་པ་སྔོན་གྱི་མཐའ་དང་། ཕྱི་མའི་མཐའ་ཉེ་བར་ཞི་བའི་མཚན་ཉིད་དང་ལྡན་པ། འདོད་ཆགས་དང་བྲལ་བ། དམིགས་པ་མེད་པའི་ཚུལ་ཅན། ཡི་གེ་མ་ཡིན་པ། ངག་ཐམས་
ཅད་ཆད་པ། བརྗོད་དུ་མེད་པ། དབའ་རླབས་ཐམས་ཅད་དང་བྲལ་བ། ཐམས་ཅད་ཀྱི་རྗེས་སུ་འགྲོ་བ། ནམ་མཁའ་དང་འདྲ་བ། ཁ་དོག་མེད་པ། རྟགས་དང་། དབྱིབས་དང་། རྒྱུ་བ་ཐམས་ཅད་དང་བྲལ་བ། བདག་མེད་པ། བདག་ཏུ་འཛིན་པ་དང་དྲལ་བ། རྣམ་
པར་རིག་པ་མེད་པ་སེམས་དང་། ཡིད་དང་རྣམ་པར་ཤེས་པ་དང་བྲལ་བ། ཟླ་མེད་པའི་ཕྱིར་འདྲ་བ་མེད་པ། རྒྱུའི་མཚན་ཉིད་དང་བྲལ་བ། རྐྱེན་གྱིས་སྒྲོ་བཏགས་པ་མེད་པ། ཆོས་ཀྱི་དབྱིངས་དང་མཉམ་པ། ཆོས་ཐམས་ཅད་མཉམ་པར་བཞག་པ། འགྲོ་བ་མེད་པའི་
ཚུལ་གྱིས་དེ་བཞིན་ཉིད་ཀྱི་རྗེས་སུ་སོང་བ། ཤིན་ཏུ་གཡོ་བ་མེད་པའི་ཕྱིར་ཡང་དག་པའི་མཐའ་ལ་གནས་པ། ཡུལ་དྲུག་ལ་གནས་པ་མེད་པའི་ཕྱིར་མ་གཡོས་པ། གནས་མེད་པའི་ཕྱིར་གར་ཡང་འོང་བ་དང་། འགྲོ་བ་མེད་པ། སྟོང་པ་ཉིད་ལ་མཉམ་པར་བཞག་པ། མཚན་
མ་མེད་པས་རབ་ཏུ་ཕྱེ་བ། སྨོན་པ་མེད་པའི་མཚན་ཉིད་ཅན། རྟོག་པ་དང་སེལ་བ་དང་བྲལ་བ། གཞག་པ་དང་འདེག་པ་མེད་པ། སྐྱེ་བ་དང་འཇིག་པ་དང་བྲལ་བ། ཀུན་གཞི་མེད་པ། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ལས་ཡང་དག་པར་

འདས་པ། མཐོ་བ་མེད་ཅིང་དམའ་བ་མེད་པ། གཡོ་བ་མེད་པར་གནས་པ་བརྙེས་པ། སྤྱོད་པ་ཐམས་ཅད་དང་བྲལ་བ། མདོར་ན་ཡང་དག་པར་སྐྱེད་པ་མེད་པ། སྐྱེས་པ་མེད་པ། འགགས་པ་མེད་པ། འགག་པ་མེད་པ། འདུས་མ་བྱས་པའི་ཆོས་དེ་ལ་
ལུས་ཐམས་ཅད་ཀྱིས་ཕྱག་འཚལ་ནས། བསམ་པ་དང་། ལྷག་པའི་བསམ་པ་རུས་པའི་ཁོང་ནས་དགའ་བ་དང་། རྐང་གི་ཁོང་ནས་དགའ་བའི་སེམས་ཐམས་ཅད་ཀྱིས་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་སྐྱབས་སུ་མཆིའོ། །དེ་བཞིན་དུ་ཐོགས་པ་མེད་ཅིང་ཆད་པ་
མེད་པའི་སྤོབས་པ་དང་ལྡན་པ། བཅོམ་ལྡན་འདས་དྲི་མ་མེད་པར་གྲགས་པ་དེ་ལ་སྐྱབས་སུ་མཆིའོ། །དེ་བཞིན་དུ་རྡོ་རྗེའི་ལྟེ་བ་དང་། རྡོ་རྗེའི་སྡེ་དང་། ལྷའི་དབུ་རྒྱན་ལྗོན་པ་དང་། སྤོས་ཀྱི་གླང་པོ་དང་། བདེན་པ་པོ་དང་། ཡེ་ཤེས་ཏོག་དང་། ཆོས་ཀྱི་ཏོག་དང་། ཟླ་བའི་
ཏོག་དང་། ཉི་མའི་ཏོག་དང་། མཐའ་ཡས་ཏོག་དང་། ཚིག་མེད་པ་དང་། བརྗོད་དུ་མེད་པ་དང་། དམིགས་པ་མེད་པ་དང་། རྩོམ་པ་མེད་པ་དང་། བུད་མེད་འགྱུར་བ་དང་། སྐར་མའི་རྒྱལ་མཚན་དང་། རི་རབ་རྒྱལ་མཚན་དང་། མེ་ཏོག་རྒྱལ་མཚན་དང་། ཆགས་
མེད་རྒྱལ་མཚན་དང་། དེ་དག་ལ་སོགས་པའི་ཕྱིར་མི་ལྡོག་པའི་བྱང་ཆུབ་སེམས་དཔའི་ཚོགས་ཀྱི་མཆོག་ལ་ལུས་ཐམས་ཅད་ཀྱིས་ཕྱག་འཚལ་ནས་བསམ་པ་དང་། ལྷག་པའི་བསམ་པ་རུས་པའི་ཁོང་ནས་དགའ་བ་དང་། རྐང་པའི་ཁོང་ནས་དགའ་བའི་སེམས་ཐམས་ཅད་ཀྱིས་བྱང་ཆུབ་
ཀྱི་སྙིང་པོ་ལ་མཆིས་ཀྱི་བར་དུ་སྐྱབས་སུ་མཆིའོ། །དེ་བཞིན་གཤེགས་པ་ཞི་བའི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། ཤཱནྟེ་ཤཱནྟེ། རཱ་ག་ཀྵ་ཡཱ་ཡ། ཤཱནྟེ་ཤཱནྟེ། དྭེ་ཥཀྵ་ཡཱ་ཡ། ཤཱནྟེ་ཤཱནྟེ། མོ་ཧ་ཀྵ་ཡཱ་ཡ། དེ་ལྟར་ལན་གཉིས་ལན་གསུམ་དུའོ། །ཏདྱ་ཐཱ། མུ་རུ་ལུ།
མུ་རུ་ལུ། ཨཱ་བ་ཧ། མུ་རུ་ལུ། བི་ཛ་ཡཱ་ཡ་སྭཱཧཱ། དེ་ལྟར་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་མཆིས་ནས་སེམས་ཅན་ཐམས་ཅད་ལ་སྨན་པ་དང་། བདེ་བ་དང་། མགོན་མ་མཆིས་པ་རྣམས་ཀྱི་མགོན་དང་། སྐྱབས་མ་མཆིས་པ་རྣམས་ཀྱི་སྐྱབས་དང་། དཔུང་གཉེན་

མ་མཆིས་པ་རྣམས་ཀྱི་དཔུང་གཉེན་དང་། འདོད་ཆགས་དང་ཞེ་སྡང་དང་། གཏི་མུག་གི་མུན་པར་གྱུར་པ་རྣམས་ལ་སྣང་བ་བགྱི་བ་དང་། ལམ་ངན་པ་ལ་གནས་པ་རྣམས་ལ་ལམ་བསྟན་པ་ནས་ཁམས་གསུམ་གྱི་སེམས་ཅན་གྱི་ཁམས་ཐར་བར་བགྱི་བའི་སླད་དུ་བསམ་
པ་དང་ལྷག་པའི་བསམ་པའི་སེམས་ཐམས་ཅད་ཀྱིས་སྙིང་རྗེ་ཆེན་པོ་མངོན་དུ་བགྱིས་ནས་བྱང་ཆུབ་ཀྱི་སེམས་བསྐྱེད་པར་བགྱིའོ། །ཇི་ལྟར་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་རྣམས་ཀྱིས་
བསྐྱེད་པ་དང་། སྐྱེད་པར་འགྱུར་བ་དང་། སྐྱེད་པ་དེ་ལྟར་བདག་གིས་ཀྱང་བསྐྱེད་པར་བགྱི་སྟེ། བསམ་པ་དང་། ལྷག་པའི་བསམ་པའི་རྒྱུད་དེས་དེ་ལྟར་བསྐྱེད་པར་བགྱིའོ། །གང་འགོག་པ་མ་མཆིས་པ་དང་། བསགས་པ་མ་མཆིས་པ་དང་། བསགས་པ་མ་ལགས་
པར་བསྟན་པ་དང་། བསྒྲུབ་པ་མ་མཆིས་པ་དང་། རྟོག་པ་མ་མཆིས་པ་དང་། རྣམ་པར་རྟོག་པ་མ་མཆིས་པ་དེ་ལྟར་བསྐྱེད་པར་བགྱིའོ། །གང་ན་ལུས་མ་མཆིས་པ་དང་། ལུས་སུ་གདགས་པ་མ་མཆིས་པ་དང་། ངག་མ་མཆིས་པ་དང་། ངག་ཏུ་གདགས་པ་མ་མཆིས་པ་དང་།
སེམས་མ་མཆིས་པ་དང་། ཡིད་ཀྱི་རྣམ་པར་ཤེས་པ་མ་མཆིས་པ་དང་། རྣམ་པར་རིག་པ་མ་མཆིས་པ་དང་། དེ་བཞིན་ཉིད་དུ་མ་ལགས། ཆོས་ཀྱི་དབྱིངས་སུ་མ་ལགས། ཡང་དག་པའི་མཐར་མ་ལགས། སངས་རྒྱས་སུ་མ་ལགས། བྱང་ཆུབ་ཏུ་མ་ལགས་ཏེ། གང་
དུ་འདི་དག་ཏུ་མངོན་པར་ཞེན་པ་མ་མཆིས་པ་དེ་ལྟར་བསྐྱེད་པར་བགྱིའོ། །ཀུན་རྫོབ་ལ་བརྟེན་ནས་སྡིག་པ་ཐམས་ཅད་བཤགས་སོ། །བསོད་ནམས་ཐམས་ཅད་ལ་རྗེས་སུ་ཡི་རང་ངོ་། །དེ་བཞིན་གཤེགས་པ་ཐམས་ཅད་ལ་བསྐུལ་མ་འདེབས་སོ། །སྡིག་པ་ཐམས་
ཅད་བཤགས། བསོད་ནམས་ཐམས་ཅད་ལ་རྗེས་སུ་ཡི་རང་། དེ་བཞིན་གཤེགས་པ་ཐམས་ཅད་ལ་བསྐུལ་མ་བཏབ་ནས་གཟུངས་འདི་དག་བརྗོད་པར་བགྱིའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་བཞིན་གཤེགས་པ་ཙནྡན་

གྱི་བསུང་ལ་ཕྱག་འཚལ་ལོ། །ཏདྱ་ཐཱ། ཙི་ར་ཏེ། མ་རཱི་ཙི་ཀེ། དུརྡ་མེ། ངུར་ཨ་ནུ་པྲ་བིཥྚེ། ཙནྡྲ་ནཱ་གནྡྷེ། བི་ཤུདྡྷ་ཤཱི་ཡེ། ཙ་རི་ཏྲ་བ་ཏི། སརྦྦ་ཏ་ཐཱ་ག་ཏ་ཨ་དྷིཥྵིཏེ་སྭཱཧཱ། ཕྱོགས་བཅུའི་འཇིག་རྟེན་གྱི་ཁམས་སུ་འདུས་པ་ཡང་དག་པར་རྫོགས་པའི་
སངས་རྒྱས་དང་། བྱང་ཆུབ་སེམས་དཔའ་དེ་དག་བདག་ལ་དགོངས་སུ་གསོལ། གང་བདག་མི་ཤེས་པའི་རབ་རིབ་ཀྱིས་ཁེབས་ཏེ་མུན་པར་གྱུར་ནས། ཚེ་འདི་འམ། སྐྱེ་བ་གཞན་ནས་སྐྱེ་བ་ཐོག་མ་དང་ཐ་མ་མ་མཆིས་པའི་འཁོར་བ་ན་འཁོར་བའི་བར་དུ་སངས་རྒྱས་དང་། ཆོས་
དང་། དགེ་འདུན་དང་། ཕ་མ་དང་། བླ་མ་དང་། ཡོན་གནས་དང་། མཁན་པོ་དང་། སློབ་དཔོན་དང་། ཚངས་པ་མཚུངས་པར་སྤྱོད་པ་རྣམས་ལུས་དང་། ངག་དང་། ཡིད་ཀྱིས་ཉེས་པར་སྤྱད་པ་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བར་གྱུར་པ་
དང་། སངས་རྒྱས་ཀྱིའམ། ཆོས་ཀྱིའམ། དགེ་འདུན་གྱིའམ། ཕྱོགས་བཞིའི་དགེ་འདུན་གྱི་འདུ་བའི་སྒོ་ཆེན་པོ་ཕྲོགས་པ་དང་། འཕྲོག་ཏུ་སྩལ་བ་དང་། འཕྲོག་པ་ལ་རྗེས་སུ་ཡི་རང་བར་གྱུར་པ་དང་། སོ་སོར་ཐར་པའི་སྡོམ་པའམ། བྱང་ཆུབ་སེམས་དཔའི་ཚུལ་ཁྲིམས་
ཀྱི་སྡོམ་པ་ལས་ལྟུང་བ་ཆུང་ངུ་དང་། འབྲིང་དང་། ཆེན་པོ་བྱུང་བར་གྱུར་བ་བཤགས་པ་དང་། བཤགས་པར་འོས་པ་དེ་དག་ཕྱོགས་བཅུའི་འཇིག་རྟེན་གྱི་ཁམས་སུ་འདུས་པ། ས་ཆེན་པོར་ཆུད་པ་ཡེ་ཤེས་ཆེན་པོ་བརྙེས་པ། ཐུགས་རྗེ་དང་ལྡན་པ། བྱམས་པ་དང་ལྡན་པ་ཕན་པར་
བཞེད་པ། ཐུགས་བརྩེ་བ་ཅན། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སོགས་པ་དང་། དེ་བཞིན་དུ་རྣམ་པར་སྣང་མཛད་དང་། རྗེ་མཛད་དང་། དངོས་ཉིད་ཆོས་མཆོག་དང་། ངེས་པར་དྲི་མེད་འབྱུང་གནས་དང་། རིན་ཆེན་སྒྲོན་མ་འོད་ཟེར་དང་། ཟླ་བས་བརྒྱན་
པ་དང་། གློག་གི་གཟི་བརྗིད་དང་། དབྱངས་ཀྱི་དབང་ཕྱུག་རྒྱལ་པོ་དང་། མེ་ཏོག་ཀུན་དུ་རྒྱས་པ་སཱ་ལའི་རྒྱལ་པོ་དང་། མེ་ཏོག་སྐར་འོད་དང་། མངོན་པར་མཁྱེན་པས་རྣམ་པར་རོལ་བ་དང་། ཟླ་དཀྱིལ་རྣམ་དག་དང་། ཤིན་ཏུ་རབ་ཞི་མཁས་པ་དང་། ཟླ་དབྱངས་དབང་

ཕྱུག་རྒྱལ་པོ་དང་། བརྩོན་འགྲུས་གྲངས་མེད་དང་། ཡང་དག་རབ་གནས་དཔལ་དང་། བདག་ཉིད་ཐམས་ཅད་ཡོངས་གཏོང་དང་། ཐུགས་རྗེ་ཆེར་དགོངས་དང་། ཕྱག་ན་རིན་ཆེན་ཕྱག་རྒྱ་དང་། ཕྱག་ན་རིན་པོ་ཆེ་དང་། ཐུགས་བསྐྱེད་མ་ཐག་ཏུ་ཆོས་ཀྱི་འཁོར་ལོ་
བསྐོར་བ་དང་། ཐུབ་དཀའ་དང་། ཆུ་ལྷ་དང་། དྲི་མ་མེད་པ་དང་། ངན་སོང་སྤོང་བ་ལ་སོགས་པ་དེ་རྣམས་ཀྱི་སྤྱན་སྔར་ནོངས་པར་ནོངས་པར་མཐོལ་ལོ། །བཤགས་སོ། །རྣམ་པར་གཞིག་གོ། །རབ་ཏུ་གཞོམ་མོ། །སྨད་དོ། །བྱིས་པ་བླུན་པོ་ལྟ་བ་ལོག་པར་ཞུགས་
པ། འཁོར་བར་བྱིང་བའི་ནོངས་པ་ནོངས་པར་གཟུང་དུ་གསོལ། དེ་བཞིན་གཤེགས་པ་བདེན་པའི་བློ་གྲོས་ཏོག་གི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་གསེར་བསགས་སྟུག་པོ་དགེ་བ་རྒྱས་པའི་སྙིང་པོའི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ།
ས་ཏྱེ་ས་ཏྱེ། ས་ཏྱ་བི་ཤོ་དྷ་ནི། སཏྱ་ཨཾ་བུ་ཛ། བི་ལོ་ཙ་ནི། སརྦ་ཨཱ་བར་ཎ་ནི་བར་ཎ་བི་ཤོ་དྷ་ནི་སྭཱཧཱ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་ཐུགས་རྗེ་ཆེན་པོ་སྐྱེད་ནས་བདག་ལ་དགོངས་སུ་གསོལ། གང་བདག་གིས་ཚེ་འདིའམ་ཚེ་རྗེས་པ་དེ་དང་དེ་
དག་ཏུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་བསྐྱེད་པ་རྣམས་དང་། བྱང་ཆུབ་ཀྱི་སེམས་མ་བསྐྱེད་པ་རྣམས་དང་། མངོན་པར་འདོད་པ་རྣམས་དང་། ཐེག་པ་ལ་གསར་དུ་ཞུགས་པ་རྣམས་དང་། སེམས་དང་པོ་བསྐྱེད་པ་རྣམས་དང་། སྤྱོད་པ་དང་འབྲེལ་པ་རྣམས་དང་།
མི་སྐྱེ་བའི་ཆོས་ལ་བཟོད་པ་ཐོབ་པ་རྣམས་དང་། ཕྱིར་མི་ལྡོག་པ་རྣམས་དང་། སྐྱེ་བ་གཅིག་གིས་ཐོགས་པ་རྣམས་དང་། ས་བཅུར་ཞུགས་པ་རྣམས་དང་། དབང་མ་བསྐུར་བ་རྣམས་དང་། དབང་བསྐུར་བ་ཐོབ་པ་རྣམས་དང་། དབང་བསྐུར་བ་རྣམས་དང་། དགེ་བའི་
ཕྱོགས་ལ་བརྩོན་པ་རྣམས་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། དེ་ལས་གཞན་པའི་བྱང་ཆུབ་ཀྱི་ཕྱོགས་ཀྱི་ཆོས་ལ་བརྩོན་པ་དེ་དག་ལ་ལུས་དང་། ངག་དང་། ཡིད་ཀྱིས་ཉེས་པར་སྤྱོད་པར་བགྱིས་པ་དང་། བགྱིད་དུ་སྩལ་བ་དང་།

བགྱིད་པ་ལ་རྗེས་སུ་ཡི་རང་བ་དང་། དེ་བཞིན་དུ་འཕགས་པ་རང་རྒྱལ་བ་རྣམས་དང་། དེའི་ལམ་ལ་རབ་ཏུ་གནས་པ་རྣམས་དང་། འཕགས་པ་རྒྱུན་དུ་ཞུགས་པ་རྣམས་དང་། ལན་ཅིག་ཕྱིར་འོང་བ་རྣམས་དང་། ཕྱིར་མི་འོང་བ་རྣམས་དང་། དགྲ་བཅོམ་པ་
རྣམས་དང་། ཕྱི་རོལ་གྱི་མངོན་པར་ཤེས་པ་ལྔ་ཐོབ་པ་རྣམས་དང་། དེ་ལས་གཞན་པ་འདོད་ཆགས་དང་བྲལ་བ་རྣམས་དང་། དྲང་སྲོང་རྣམས་དང་། དེ་ལས་གཞན་པ་ལམ་ཡང་དག་པའམ། ལམ་ལོག་པ་ལ་ཞུགས་པ་ནས་དེ་བཞིན་གཤེགས་པའི་སྙིང་པོ་དང་ལྡན་པའི་བར་
རྣམས་དང་། ཆོས་ཀྱི་དབྱིངས་ཀྱི་ཁོངས་སུ་གཏོགས་པ་དེ་རྣམས་ལ་ལུས་དང་། ངག་དང་། ཡིད་རྣམ་པ་བཅུས་ཉེས་པར་སྤྱད་པ་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བར་གྱུར་པ་དེ་དག་ཕྱོགས་བཅུའི་འཇིག་རྟེན་གྱི་ཁམས་སུ་འདུས་པས་ཆེན་པོར་
ཆུད་པ། ཡེ་ཤེས་ཆེན་པོ་བརྙེས་པ། འདས་པ་དང་། མ་འོངས་པ་དང་། ད་ལྟར་བྱུང་བའི་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། ཡང་དག་པར་རྫོགས་པའི་སངས་རྒྱས་དང་བཅས་པ་དེ་རྣམས་ཀྱི་སྤྱན་སྔར་ནོངས་པ་ནོངས་པར་མཐོལ་ལོ། །
བཤགས་སོ། །རྣམ་པར་གཞིག་གོ། །རབ་ཏུ་གཞོམ་མོ། །སྨད་དོ། །བྱིས་པ་བླུན་པོ་ལྟ་བ་ལོག་པར་ཞུགས་པ། འཁོར་བར་བྱིང་བའི་ནོངས་པ་ནོངས་པར་གཟུང་དུ་གསོལ། ཟླ་འོད་གཞོན་ནུར་གྱུར་པ་ལ་ཕྱག་འཚལ་ལོ། །ཏདྱ་ཐཱ། པྲ་བྷེ་པྲ་བྷ་ཨཱ་ཀ་རེ། པྲ་བྷ་བ་ཏི། དྷརྨཱ་
བི་ཤུདྡྷེ། ཀརྨྨ་བི་ཤུདྡྷིརྦྷ་བ་ཏུ་མེ་སྭཱ་ཧཱ། སངས་རྒྱས་དང་བྱང་ཆུབ་སེམས་དཔའ་དེ་དག་བདག་ལ་དགོངས་སུ་གསོལ། གང་བདག་གིས་ཚེ་འདིའམ། སྐྱེ་བ་གཞན་དུ་སྐྱེ་བ་བརྒྱའམ། སྐྱེ་བ་སྟོང་ངམ། སྐྱེ་བ་ཁྲིའམ། སྐྱེ་བ་ཐོག་མ་དང་ཐ་མ་མ་མཆིས་པའི་འཁོར་བ་ན་འཁོར་
བའི་ཚེ་སངས་རྒྱས་འབྱུང་བ་མ་རུང་བར་བགྱིས་པའམ། དམ་པའི་ཆོས་སྤངས་པའམ། མཚམས་མ་མཆིས་པ་ལྔ་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བར་གྱུར་པ་དང་། ཆོས་ཆོས་མ་ལགས་པར་བསྟན་པ་དང་། ཆོས་མ་ལགས་པ་ཆོས་

སུ་བསྟན་པ་དང་། བྱང་ཆུབ་ཀྱི་སེམས་བཏང་བ་དང་། དགེ་བའི་བཤེས་གཉེན་མ་རུང་བར་བགྱིས་པ་ནས་དུད་འགྲོའི་སྐྱེ་གནས་སུ་གཏོགས་པའི་བར་གྱི་སེམས་ཅན་གྱི་ཡིད་དང་ཐང་ཅིག་ཙམ་ཡང་འགལ་བར་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་
ཡི་རང་བར་གྱུར་བ་དང་། སྒྲིབ་པ་གང་གིས་བསྒྲིབས་ནས་སའི་རྒྱུ་མི་འབྱུང་བ་དང་། ཏིང་ངེ་འཛིན་གྱི་རྒྱུ་དང་། གཟུངས་ཀྱི་རྒྱུ་དང་། མངོན་པར་ཤེས་པའི་རྒྱུ་དང་། སོ་སོ་ཡང་དག་པར་རིག་པའི་རྒྱུ་དང་། རྫུ་འཕྲུལ་གྱི་རྐང་པའི་རྒྱུ་དང་། དབང་གི་རྒྱུ་དང་། ཕ་རོལ་ཏུ་ཕྱིན་
པའི་རྒྱུ་དང་། དེ་ལས་གཞན་པ་བྱང་ཆུབ་ཀྱི་ཕྱོགས་ཀྱི་ཆོས་ནས་སྣང་བའི་བར་གྱི་རྒྱུ་མི་འབྱུང་བའི་ལས་ཀྱི་སྒྲིབ་པ་དང་། རྣམ་པར་སྨིན་པའི་སྒྲིབ་པ་དང་། ཤེས་བྱའི་སྒྲིབ་པ་དང་། ཉོན་མོངས་པའི་སྒྲིབ་པ་དེ་དག་ཐམས་ཅད་ཕྱོགས་བཅུའི་འཇིག་རྟེན་གྱི་ཁམས་སུ་འདུས་པ།
ས་ཆེན་པོར་ཆུད་པ། ཡེ་ཤེས་ཆེན་པོ་བརྙེས་པ། ཐུགས་རྗེ་དང་ལྡན་པ། བྱམས་པ་དང་ལྡན་པ། ཕན་པར་བཞེད་པ། ཐུགས་བརྩེ་བ་ཅན་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ལ་སོགས་པ་དང་། དེ་བཞིན་དུ་དྲི་མེད་སྣང་གསལ་དང་།
སྤོབས་པའི་རྒྱན་དགོངས་པ་དང་། དྲི་མེད་ཟླ་བ་དང་། མེ་ཏོག་གྲགས་དང་། མེ་ཏོག་བཀོད་པ་དང་། སྣང་མཛད་དང་། གསལ་མཛད་དང་། རིན་ཆེན་མཆོག་དང་། འཇིགས་མེད་གཟིགས་དང་། འཇིགས་པ་དང་། བག་ཚ་བ་དང་། སྤུ་ཟིང་མི་མངའ་བ་དང་། སེང་ག་བསྒྱིངས་བའི་
སྟོབས་དང་། ཡང་དག་པར་རྫོགས་པའི་སངས་རྒྱས་གསེར་འོད་གཟི་བརྗིད་རྒྱལ་པོ་ལ་སོགས་པ་དང་། དེ་བཞིན་དུ་བྱང་ཆུབ་སེམས་དཔའ་འཕགས་པ་ཀུན་ནས་འོད་ཟེར་དང་། དྲི་མེད་རྣམ་གནོན་དང་། སྒྲ་འབྱིན་དང་། ཆོས་ཀྱི་འཁོར་ལོ་ཐོགས་པ་མེད་པར་བསྐོར་
བ་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང་། སྒྲིབ་པ་མེད་པར་ཆོས་ཀྱི་འཁོར་ལོ་བསྐོར་བ་དང་། དྲི་མེད་གཙང་མ་དང་། མིག་ཡོངས་སུ་སྦྱོང་བ་དང་། སེམས་ཅན་ཀུན་ལ་སླུ་བ་མེད་པའི་བློ་དང་། སྒྲ་སྙན་ངེས་བསྒྲགས་དབྱངས་དང་། རྒྱལ་བའི་

བློ་གྲོས་དང་། བཟང་པོ་སྔོན་འབྱུང་དང་། སྤྲིན་སྒྲ་དང་། མཆོག་དགའ་རྒྱལ་པོ་དང་། དགའ་སྟོན་དང་། རྟག་ཏུ་བརྩོན་དང་། ལྷུན་པོ་རྩེ་འཛིན་ལ་སོགས་པ་སྐྱེ་བ་མེད་པ་དང་། འགག་པ་མེད་པའི་ཆོས་དང་ལྡན་པ། འདས་པ་དང་། མ་འོངས་པ་
དང་། ད་ལྟར་བྱུང་བ་དེ་རྣམས་ཀྱི་སྤྱན་སྔར་ནོངས་པ་ནོངས་པར་མཐོལ་ལོ། །བཤགས་སོ། །རྣམ་པར་གཞིག་གོ། །རབ་ཏུ་གཞོམ་མོ། །སྨོད་དོ། །བྱིས་པ་བླུན་པོ་ལྟ་བ་ལོག་པར་ཞུགས་པ། འཁོར་བར་བྱིང་བའི་ནོངས་པ་ནོངས་པར་གཟུང་དུ་གསོལ། །ཏདྱ་ཐཱ།
ས་མ་ཡོ