Kinh tạng Tây Tạng (Kangyur Đại Học) — 089_རྒྱུད་འབུམ།_པ

ཞེས་བྱ་བ་བྱིན་ཏེ། ལྷ་མོ་ཆེན་མོ་
དབྱངས་ཅན་གྱིས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། ཕྱོགས་གཅིག་ཏུ་འདུག་གོ། །དེ་ནས་སློབ་དཔོན་ལུང་སྟོན་པ་བྲམ་ཟེ་ཀཽ་ཎྜི་ནྱས་ལྷ་མོ་དབྱངས་ཅན་དེ་བཀུག་གོ །ལྷ་མོ་ཆེན་མོ་དབྱངས་ཅན་མཆོད་འོས་དཀའ་ཐུབ་ཆེ། །འཇིག་རྟེན་ཀུན་དུ་

རྣམ་གྲངས་མཆོག་སྦྱིན་ཡོན་ཏན་ཆེ། །རྩེར་གནས་མཛེས་མ་དཱུར་བ་རྩྭ་ཡིས་གོས་བསྐུས་པ། །དཱུར་བའི་རྩྭ་ཡི་གོས་གྱོན་རྐང་པ་གཅིག་གི་གནས། །ལྷ་རྣམས་ཐམས་ཅད་ལྷགས་ནས་འདི་སྐད་ཚིག་སྨྲས་ཏེ། །སེམས་ཅན་རྣམས་ལ་དགེ་བའི་ཚིག་ཤོད་
ལྕེ་ཁྲོལ་མཛོད། །སཱདྱ་ཐེ་དན། མུ་རེ། ཙི་རེ། ཨ་བ་ཛེ། ཨ་བ་ཛ་བ་ཏི། ཧིངྒུ་ལེ། མིདྒུ་ལེ། པིངྒ་ལ་བ་ཏེ། མུངྒ་ཥེ། མ་མ་རཱི་ཙྱཻ། སྭ་མ་ཏི། ད་ཤ་མ་ཏི། ཨ་གྷྲི་ཏ་མ་གྷྲི། ཏ་ར་ཙི། ཏ་ར་ཙ་བ་ཏི། ཙི་ཙི་ཙི་རི། ཤི་རི་མི་རི། མ་རི་ཙྱཻ།
པྲཱ་ན་པྲི་ཡེ། ལོ་ཀ་ཛྱེཥྛེ། ལོ་ཀ་ཤྲེཥྛེ། ལོ་ཀ་པྲེ་ཡ། སིདྡྷ་པྲ་ཏེ། བྷཱི་མ་མུ་ཁི། ཤུ་ཙི་ཙ་རི། ཨ་པྲ་ཏི་ཧ་ཏེ། ཨ་པྲ་ཏི་ཧ་ཏ་བུདྡྷི། ན་མུ་ཙི། མ་ཧཱ་ན་མུ་ཙི། མ་ཧཱ་དེ་བྱི། པྲ་ཏི་གྲཱི་ཧཱ། ན་མ་སྐ་རཱ་ན། བདག་གི་བློ་ཐོགས་པ་མེད་པར་གྱུར་ཅིག །བསྟན་བཅོས་
དང་། ཚིགས་སུ་བཅད་པའི་རྒྱུད་དང་། སྡེ་སྣོད་དང་། སྙན་དངགས་ལ་སོགས་པ་ལ། བདག་གི་རིག་སྔགས་དངོས་གྲུབ་ཏུ་གྱུར་ཅིག །ཏདྱ་ཐཱ། མ་ཧཱ་པྲ་བྷཱ་བེ། ཧི་ལི་ཧི་ལི། མི་ལི་མི་ལི། བཅོམ་ལྡན་འདས་མ་ལྷ་མོ་དབྱངས་ཅན་གྱི་མཐུས་བདག་རྣམ་
པར་རྒྱལ་བར་གྱུར་ཅིག །ཀཱ་ར་ཏེ། ཀེ་ཡཱུ་རེ། ཀེ་ཡཱུ་ར་མ་ཏེ། ཧི་ལི་མི་ལི། ཧི་ལི་མི་ལི། སངས་རྒྱས་ཀྱི་བདེན་པ་དང་། ཆོས་ཀྱི་བདེན་པ་དང་། དགེ་འདུན་གྱི་བདེན་པ་དང་། དབང་པོའི་བདེན་པ་དང་། ཆུ་ལྷའི་བདེན་པས་ལྷ་མོ་ཆེན་མོ་དགུག་པར་བྱའོ། །
གང་དག་འཇིག་རྟེན་ན་བདེན་པ་སྨྲ་བ་དེ་དག་གི་བདེན་པ་དང་། བདེན་པའི་ཚིག་གིས་ལྷ་མོ་ཆེན་མོ་དབྱངས་ཅན་དགུག་པར་བྱའོ། །ཏདྱ་ཐཱ། ཧི་ལི་མི་ལི། ཧི་ལི་མི་ལི། ཧི་ལི་མི་ལི། བདག་རྣམ་པར་རྒྱལ་བར་གྱུར་ཅིག །བཅོམ་ལྡན་འདས་མ་ལྷ་མོ་ཆེན་མོ་དབྱངས་ཅན་
ལ་ཕྱག་འཚལ་ལོ། །བདག་ལ་གསང་སྔགས་ཀྱི་ཚིག་རྣམས་གྲུབ་པར་གྱུར་ཅིག་སྭཱ་ཧཱ། དེ་ནས་ལྷ་མོ་དབྱངས་ཅན་གྱི་གསང་སྔགས་ཀྱི་ཚིག་དེ་དག་སྨྲས་ནས། ཡང་བྲམ་ཟེ་ཀཽ་ཎྜི་ནྱ་ལ་འདི་སྐད་ཅེས་སྨྲས་སོ། །སྐྱེས་བུ་ཆེན་པོ་ཁྱོད་སེམས་ཅན་ཐམས་ཅད་ལ་སྤོབས་པ་

དམ་པ་དང་། རྫུ་འཕྲུལ་དང་། མངོན་པར་ཤེས་པ་དང་། ཤེས་རབ་ཆེ་བ་དང་། ནོར་དང་། དབྱིག་ལ་སོགས་པ་སྦྱིན་པས་ཕན་འདོགས་ཤིང་། མྱུར་དུ་བླ་ན་མེད་པའི་བྱང་ཆུབ་ཐོབ་པར་བྱེད་པ་ལེགས་སོ་ལེགས་སོ། །མདོ་སྡེ་འདི་འཛིན་པའི་ཆོ་ག་
བསྟན་པའི་ཕྱིར་ཚིགས་སུ་བཅད་པ་འདི་དག་སྨྲས་སོ། །གཟུངས་འདི་དང་པོར་སུ་འདོན་པས། །དཀོན་མཆོག་གསུམ་ལ་ཕྱག་འཚལ་ཏེ། །འཁྲུལ་པ་མེད་པར་བཟླས་བྱས་ན། །དངོས་གྲུབ་དམ་པ་ཐོབ་པར་འགྱུར། །སངས་རྒྱས་རྣམས་དང་དམ་ཆོས་
དང་། །བྱང་ཆུབ་རང་རྒྱལ་ཉན་ཐོས་དང་། །ཚངས་པ་དང་ནི་བརྒྱ་བྱིན་དང་། །རྒྱལ་ཆེན་བཞི་ལ་ཕྱག་འཚལ་ཞིང་། །རྟག་ཏུ་ཚངས་པར་སྤྱོད་པ་ཡང་། །རིམ་གྲོ་གུས་པར་བསམ་བྱས་ཏེ། །ཞི་ལ་དབེན་པའི་གནས་སུ་ནི། །སྒྲ་བསྐྱེད་གཟུངས་དང་བསྟོད་པ་བརྗོད། །
ཇི་སྙེད་སངས་རྒྱས་ལྷ་ཀླུ་ལ། །མཆོད་པ་རྒྱ་ཆེར་བཤམ་པར་བྱ། །སྐྱེ་བོའི་རིགས་ནི་མང་པོ་ལ། །སྙིང་རྗེའི་སེམས་ཀྱང་བསྐྱེད་པར་བྱ། །བཅོམ་ལྡན་གསེར་མདོག་མཚན་རབ་ཅན། །རྩེ་གཅིག་སེམས་ཀྱིས་བསམ་བྱ་ཞིང་། །བཅོམ་ལྡན་
གསུང་རབ་དམ་ཆོས་ཀྱིས། །དབང་པོ་སོ་སོར་ངེས་མཛད་པའི། །དེ་ཡི་ཚིག་དོན་ལེགས་བསམས་ཏེ། །སྟོང་ཉིད་བསྒྲུབ་ལའང་གནས་པར་བྱོས། །བཅོམ་ལྡན་ཐམས་ཅད་མངོན་སུམ་དུ། །རྩེ་གཅིག་སེམས་ཀྱིས་བསམ་བྱས་ན། །ཏིང་ངེ་འཛིན་དང་ཡེ་ཤེས་དང་། །
གཟུངས་མཆོག་དམ་པ་ཐོབ་པར་འགྱུར། །བཅོམ་ལྡན་དཔལ་མགུར་གསུང་ཆོས་ཀྱིས། །དམ་པའི་དབྱངས་དེས་འཁོར་རྣམས་འདུལ། །ལྗགས་ཀྱིས་སྟོང་གསུམ་ཁེབས་མཛད་ཅིང་། །སོ་སོར་ཅི་རིགས་ཡ་མཚན་སྟོན། །དེ་ལྟའི་གསུང་མཆོག་དམ་པ་ལ། །
རྟག་པར་བསམ་ཞིང་འཇིགས་པ་སྤོངས། །བསམ་གྱིས་མི་ཁྱབ་ལྗགས་མཚན་འདི། །སྨོན་ལམ་རྒྱ་ཆེན་དབང་གིས་བརྙེས། །ཆོས་རྣམས་མེད་པར་སྟོན་མཛད་པ། །ཇི་ལྟར་མཁའ་ལ་མ་ཆགས་བཞིན། །སངས་རྒྱས་ལྗགས་མཚན་གསུང་སྒྲ་ལ། །དེ་བསམས་

སྨོན་ལམ་ཚད་མེད་འགྲུབ། །གང་ཞིག་དབྱངས་ཅན་མངོན་མཆོད་དམ། །ཡང་ན་སློབ་མས་མན་ངག་བཞིན། །ལུང་བཞིན་ཆོས་དེ་གང་སྒྲུབ་པ། །བཀུར་སྟིའི་མཆོག་རྣམས་ཐོབ་པར་འགྱུར། །གང་ཞིག་ཡེ་ཤེས་མཆོག་སྒྲུབ་པའང་། །རྩེ་གཅིག་སེམས་ཀྱིས་ཆོས་འདི་
གཟུང་། །བསོད་ནམས་ཡེ་ཤེས་ཚོགས་འཕེལ་ཞིང་། །ངེས་པར་འགྲུབ་ལ་ཡིད་གཉིས་སྤོངས། །གང་ཞིག་ནོར་སྒྲུབ་ནོར་དང་ལྡན། །ཁེ་དང་གྲགས་པའང་དེ་བཞིན་འགྲུབ། །འབྱུང་བར་འདོད་པའང་རྣམ་གྲོལ་བར། །ངེས་པར་འགྲུབ་པས་ཡིད་གཉིས་སྤོངས། །
ཡོན་ཏན་མང་པོ་ཚད་མེད་པའང་། །བསམ་པ་བཞིན་དུ་ཀུན་གྲུབ་པས། །འདི་ལ་ཚུལ་བཞིན་གང་གནས་པ། །ངེས་པར་འགྲུབ་པས་ཡིད་གཉིས་སྤོངས། །དབེན་པར་གཙང་མའི་གོས་གྱོན་ཏེ། །དཀྱིལ་འཁོར་ཅི་རན་བྱས་པ་དེར། །བུམ་པ་རྒྱས་པ་བཞི་བཞག་
སྟེ། །དུས་བཞིན་མེ་ཏོག་བདུག་པས་མཆོད། །བ་དན་གདུགས་དང་ལྡ་ལྡི་བྲེ། །ཕྱེ་མ་བྱུག་པས་རྒྱས་པར་བརྒྱན། །སངས་རྒྱས་དང་ནི་དབྱངས་ཅན་མཆོད། །ལྷ་དེ་མཐོང་འདོད་མཐོང་བར་འགྱུར། །དབྱངས་ཅན་ལྷ་མོ་དེ་མདུན་དུ། །ཞག་བདུན་གསུམ་དུ་
བཟླས་བརྗོད་དེ། །གལ་ཏེ་ལྷ་དེ་མ་མཐོང་ན། །བསམ་པ་བརྟན་པས་ཞག་དགུར་བཟླས། །དེ་ཡི་ནུབ་མོའང་མ་མཐོང་ན། །གཞན་དུ་ཤིས་པའི་གནས་བཙལ་ཏེ། །ཚུལ་བཞིན་ལྷ་མོའི་གཟུགས་བྲིས་ལ། །མཆོད་ཅིང་བཟླས་བརྗོད་རྒྱུན་མི་གཅད། །
བདག་དང་གཞན་དོན་ཚད་མེད་ལ། །ཉིན་མཚན་རྒྱུན་ཏུ་བརྩོན་བསྐྱེད་དེ། །དེ་ཡི་འབྲས་བུ་གཞན་ལ་སྟོབས། །དེ་ནི་བསམ་པ་འགྲུབ་པར་འགྱུར། །དེ་སྟེའང་བསམ་པ་མ་གྲུབ་ན། །ཟླ་བ་གསུམ་དང་དྲུག་དང་དགུ། །ཡང་ན་བརྩོན་པས་ལོར་བཟླས་ན། །
མངོན་ཤེས་དྲུག་ལ་སོགས་པའང་འཐོབ། །དེ་ནས་བྲམ་ཟེ་ཀཽཎྜི་ནྱས། དེ་སྐད་ཅེས་བཤད་པ་ཐོས་ནས་དགའ་བ་དང་། རངས་པ་ཚད་མེད་པ་སྐྱེས་ཏེ། འཁོར་འདུས་པ་དེ་དག་ལ་འདི་སྐད་ཅེས་སྨྲས་སོ། །ལྷ་དང་མི་ལ་སོགས་པའི་འཁོར་ཐམས་ཅད་ཀྱིས།

སེམས་མ་གཡེང་བར་བདག་ལ་ཉོན་ཅིག་དང་། བདག་གིས་ཀུན་རྫོབ་ཀྱི་བདེན་པ་ལ་བརྟེན་ཏེ། དབྱངས་ཅན་ལྷ་མོ་མཆོག་ལ་བསྟོད་པའི་ཕྱིར། ཚིགས་སུ་བཅད་དེ་སྨྲ་བར་བགྱིའོ། །ཕྱག་འཚལ་ལྷ་མོ་མཐུ་ཆེན་ལ། །འཇིག་རྟེན་ཁམས་
འདིར་དབང་བརྙེས་པར། །སྔོན་གྱི་དྲང་སྲོང་གིས་བཤད་པས། །དེ་ཕྱིར་བདག་གིས་ཁྱོད་ལ་བསྟོད། །དཔལ་ལྡན་ཐུགས་ནི་བདེ་བ་དང་། །ཐོས་འཛིན་མཛེས་ལྡན་གྲགས་ལྡན་པ། །འཇིག་རྟེན་འདི་སྐྱེད་ཡུམ་ཡང་ཡིན། །རྟག་ཏུ་དཔལ་ལ་བརྩོན་ཆེན་
སྤྱོད། །གཡུལ་གྱི་གནས་ལས་རྟག་ཏུ་རྒྱལ། །སྙིང་རྗེ་བཟོད་ལ་དུལ་བས་བསྐྱེད། །གཤིན་རྗེའི་སྲིང་མོར་ལུས་སྟོན་ཅིང་། །རྟག་ཏུ་དར་གོས་སྔོན་པོ་མནབས། །མཛེས་དང་མི་མཛེས་ཀུན་སྟོན་ཅིང་། །སྤྱན་མིག་སུས་མཐོང་དང་བ་སྐྱེད། །སྤྱོད་པ་ཚད་མེད་
འཇིག་རྟེན་འདས། །སྐྱབས་སུ་སུ་འོངས་རྗེས་སུ་འཛིན། །བར་འགའ་རི་དང་བྲག་ལ་གནས། །བར་འགའ་ཕུག་དང་ཆུ་བོའི་འགྲམ། །ཡང་ན་ལྗོན་སྡོང་ནགས་རྣམས་སུ། །གནས་དེ་དག་ནི་ལྷ་མོའི་རྟེན། །ཅི་ལྟར་རི་བྲགས་མི་རྣམས་ཀྱིས། །རྨ་བྱའི་མདོངས་ལས་
གདུགས་བྱས་ཤིང་། །རྟག་ཏུ་ལྷ་མོ་དེ་མཆོད་ན། །ཐམས་ཅད་དུས་སུ་འཇིག་རྟེན་སྐྱོབ། །སྟག་དང་སེང་གེས་འཁོར་བྱས་ཤིང་། །བྱ་དང་ཕྱུགས་ཀྱང་དེ་ལ་བརྟན། །དྲིལ་ཆེན་སྒྲ་དག་མངོན་བསྒྲགས་པས། །བིན་དྷུའི་རི་ལའང་གྲག་པར་གྱུར། །ཕྱག་ན་རྩེ་གསུམ་
ཐོར་ཚུགས་དབུ། །ཡང་ན་ཉི་ཟླའི་རུ་མཚོན་བསྣམས། །ཟླ་བ་མར་ངོ་བཅུ་གཅིག་གམ། །དགུ་ཡི་དུས་སུ་མཆོད་པ་བྱ། །གཡུལ་འགྱེད་དུས་སུ་ཐུགས་བརྩེ་བས། །འཇིག་རྟེན་ཀུན་ལ་གཟིགས་པའི་ཕྱིར། །ལྷ་མོ་བ་སུའི་གཟུགས་སྟོན་པས། །ལྷ་མོའི་མཆོག་སྟེ་དཔེ་མེད་པའོ། །
ཕྱུགས་རྫི་རྒན་མོའི་གཟུགས་སྟོན་ཅིང་། །ལྷ་དག་འཐབ་པའང་རྟག་ཏུ་རྒྱལ། །ཡུན་རིང་འཇིག་རྟེན་བདེ་བར་གནས། །བར་འགའ་ཁྲོས་ཤིང་བར་འགའ་ཞི། །བྲམ་ཟེར་སྨྲ་ཞིང་ཆོས་བཞི་དང་། །རྫུ་འཕྲུལ་གསང་སྔགས་ཀུན་ལ་མཁས། །དྲང་སྲོང་ལྷ་ཡི་དབང་བརྙེས་པས། །

ས་ཆེན་འདི་དང་ས་བོན་བྱེད། །ལྷ་མོ་འདུ་བའི་དུས་སུ་ཡང་། །རྒྱ་མཚོ་ལུད་བཞིན་ངེས་པར་འདུ། །གནོད་སྦྱིན་ཀླུ་ལ་སོགས་རྣམས་ཀྱིས། །ཀུན་གྱི་གཙོ་བྱེད་འདུལ་བར་ནུས། །མོ་རྣམས་ཀུན་གྱི་ཚངས་སྤྱོད་མཆོག །འཇིག་རྟེན་གཙོ་སྦྱིན་བདག་ལ་
དགོངས། །རྒྱལ་པོའི་གནས་ལའང་པདྨོ་བཞིན། །ཆུ་བོ་ལ་ཡང་གྲུ་དང་གཟིངས། །ཟླ་བ་ཉ་བཞིན་ཞལ་ཡང་རྒྱས། །མང་དུ་ཐོས་ལྡན་རྟེན་ཡང་བྱེད། །རི་བོའི་རྩེ་བཞིན་སྤོབས་པ་འཕགས། །བསམས་པས་གླིང་དང་རབ་ཀྱང་སྟོན། །ལྷ་མིན་ལ་སོགས་
ལྷ་རྣམས་ཀྱིས། །ཀུན་གྱིས་ཡོན་ཏན་བསྟོད་ཅིང་བསྔགས། །སྤྱན་སྟོང་བརྒྱ་བྱིན་ལྷ་རྒྱལ་ཡང་། །གུས་པའི་སེམས་ཀྱིས་ཞལ་དུ་ལྟ། །སེམས་ཅན་གང་དག་ཅི་འདོད་པ། །དེ་ཀུན་བསམ་པ་མྱུར་དུ་སྐོང་། །བློ་མྱུར་ཐོས་པ་འཛིན་པ་ཡང་། །ས་ཆེན་འདི་
གནས་ཀུན་གྱི་མཆོག །ཕྱོགས་བཅུའི་འཇིག་རྟེན་ཁམས་དག་ཏུ། །རྟག་ཏུ་སྒྲོན་ཆེན་སྣང་བྱེད་བཞིན། །བྱ་དང་གཅན་གཟན་རི་དགས་ཀྱིའང་། །ཀུན་གྱི་བསམ་པ་ཡོངས་སུ་སྐོང་། །བུད་མེད་ཀྱི་མཆོག་རི་བོ་བཞིན། །དྲང་སྲོང་འཇིག་རྟེན་རི་གནས་
བཞིན། །ལྷ་མོ་གཞོན་བཞིན་འདོད་དང་བྲལ། །མི་མཇེད་བདག་བཞིན་བདེན་པར་སྨྲ། །འཇིག་རྟེན་མཐུན་པར་གཟུགས་སྟོན་ཅིང་། །འདོད་ཁམས་བར་གྱི་ལྷ་གནས་སུའང་། །ཁྱོད་ནི་ལྷ་མོའི་གཙོ་ཡིན་པས། །དེ་ལས་མཆོག་པའི་སེམས་ཅན་མེད། །
གལ་ཏེ་གཡུལ་དང་འཇིགས་པའི་གནས། །མེ་ཡི་དོང་དུ་ལྷུང་འགྱུར་རམ། །ཆུ་བོ་གཡང་ས་མི་རྒོད་ལས། །འཇིགས་པ་དེ་ལས་སྒྲོལ་བར་མཛད། །རྒྱལ་པོའི་ཆད་པས་བཅིངས་པའམ། །ཡང་ན་དགྲ་ཡིས་བསད་པར་ཡང་། །རྩེ་གཅིག་སེམས་ནི་མ་གཡོས་ན། །
སྡུག་བསྔལ་དག་ལས་ཐར་བར་འགྱུར། །དགེ་དང་མི་དགེ་ཀུན་ལ་སྐྱོབ། །བྱམས་དང་བརྩེ་བས་མདུན་དུ་གནས། །དེ་ཕྱིར་བདག་ནི་སེམས་བཏུད་དེ། །ཕྱག་འཚལ་ལྷ་མོ་ཆེན་མོ་ལའོ། །དེ་ནས་ཡང་སློབ་དཔོན་ལུང་སྟོན་པ་བྲམ་ཟེ་ཀཽཎྜི་ནྱས། ལྷ་མོ་ཆེན་མོ་

དབྱངས་ཅན་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འབྱུང་པོའི་ཚོགས་རྣམས་ཐམས་ཅད་ང་ལ་ཉན་པར་གྱིས། །ལྷ་དང་དྲི་ཟ་ལྷ་དབང་བཅས་པའི་འཇིག་རྟེན་ན། །བུད་མེད་དམ་པ་ལྷ་མོ་མཆོག་གི་རབ་གང་ཡིན། །
ལྷ་མོ་དམ་པ་མཆོག་ཏུ་མཛེས་པའི་ཞལ་ལ་བསྟོད། །ཡོན་ཏན་རྣམ་པ་སྣ་ཚོགས་བསགས་པས་ཡན་ལག་བརྒྱན། །དབྱངས་ཅན་ཞེས་བྱ་སྤྱན་ནི་ཡངས་ཤིང་བསོད་ནམས་འབར། །དྲི་མེད་ཡེ་ཤེས་ཡོན་ཏན་རྣམས་ཀྱིས་རྣམ་པར་བརྒྱན། །རིན་ཆེན་
སྣ་ཚོགས་ཐ་དད་ལྟ་བུར་བལྟ་བའི་ཕྱིར། །མཆོག་རབ་ངག་གི་ཡོན་ཏན་ཁྱད་པར་དེ་བསྟོད་དོ། །དམ་པ་མཆོག་གི་དངོས་གྲུབ་བྱེད་པ་དང་། །ཡང་དག་བསྔགས་པ་ཡོན་ཏན་བྱེད་པ་དང་། །དྲི་མེད་མཆོག་དང་པདྨ་འབར་བ་དང་། །མིག་མཆོག་དང་ནི་མིག་གི་དམ་པ་དང་། །དགེ་བའི་
གནས་དང་དགེ་བ་མཐོང་བ་དང་། །ཡོན་ཏན་བསམ་མི་ཁྱབ་པས་བརྒྱན་པ་དང་། །ཟླ་བ་འདྲ་དང་དྲི་མ་མེད་འོད་དང་། །ཡེ་ཤེས་འབྱུང་གནས་དྲན་པ་དམ་པ་དང་། །སེང་གེ་མཆོག་དང་མི་ལ་ཞོན་པ་དང་། །ལག་པ་བརྒྱད་རྣམས་ཀྱིས་ནི་བརྒྱན་པ་ལ། །མདའ་གཞུ་མདུང་
ཐུང་རལ་གྲི་དགྲ་སྟ་དང་། །བེ་ཅོན་ལྕགས་ཀྱི་འཁོར་ལོ་ཞགས་པ་བསྣམས། །ཟླ་བ་ཉ་བ་ལྟ་བུར་སྣང་བའི་ཞལ། །ཡིད་དུ་འོང་བའི་ངག་དང་དབྱངས་སྙན་དང་། །ཤེས་རབ་ཟབ་མོ་དང་ནི་ལྡན་པ་དང་། །དགོས་མཆོག་སྒྲུབ་བྱེད་སེམས་ཅན་དམ་པ་དང་། །ལྷ་དང་
ལྷ་མིན་དབང་པོས་མཆོད་པ་དང་། །ལྷ་དང་ལྷ་མིན་ཚོགས་ཀུན་གནས་བརྗོད་དང་། །འབྱུང་པོའི་ཚོགས་ཀྱི་གནས་རྟག་མཆོད་པའི་ཕྱིར། །སྭཱ་ཧཱ་བདག་ཅག་ལྷ་མོ་འདི་ལ་ཕྱག་བྱའོ། །བདག་ལ་ཡོན་ཏན་ཁྱད་པར་ཀུན་སྩོལ་ཅིག །དགོས་པ་ཀུན་ཏུ་བདག་ལ་དངོས་
གྲུབ་སྩོལ། །དགྲ་རྣམས་ཁྲོད་ན་བདག་ལ་རྟག་ཏུ་སྲུངས། །ཡི་གེ་རྫོགས་ཤིང་ཚིག་རྒྱས་འདི་དག་ནི། །ནང་པར་ལངས་ནས་གཙང་མར་བརྗོད་པར་བྱ། །བསམ་པ་དང་ནི་ནོར་འབྲུ་ཐམས་ཅད་རྙེད། །དངོས་གྲུབ་དགེ་བ་རྒྱ་ཆེན་ཐོབ་པར་འགྱུར། །དེ་ནས་བཅོམ་

ལྡན་འདས་ཀྱིས་བྲམ་ཟེ་ཀཽཎྜི་ནྱ་ལ་ལེགས་སོ་ཞེས་བཀའ་སྩལ་ཏེ། ཁྱོད་ཀྱིས་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར། ལྷ་མོ་དབྱངས་ཅན་ལ་བསྟོད་པ་དང་། དངོས་གྲུབ་དམ་པ་སློང་བས་བསོད་ནམས་ཚད་མེད་པ་དང་ལྡན་པར་འགྱུར་རོ།། །།
བམ་པོ་བརྒྱད་པ། དེ་ནས་སློབ་དཔོན་ལུང་སྟོན་པ་བྲམ་ཟེ་ཀཽཎྜི་ནྱས་བསྟོད་པ་དང་། གསང་སྔགས་ཀྱི་ཚིག་གིས། ལྷ་མོ་ཆེན་མོ་དབྱངས་ཅན་ལ་གསོལ་ནས། ཡང་འཁོར་དེ་དག་ལ་སྨྲས་པ། སྐྱེས་བུ་ཁྱེད་ཀྱིས་ལྷ་མོ་དབྱངས་ཅན་སྤྱན་དྲང་བ་དང་། དེའི་ཐུགས་རྗེས་
བསྐྱབ་ཅིང་། ཚེ་འདི་ཉིད་ལ་སྤོབས་པ་ཐོགས་པ་མེད་པ་དང་། ཐོས་པ་འཛིན་ཅིང་ཤེས་རབ་ཆེན་པོ་དང་ལྡན་པར་འགྱུར་བ་དང་། གཙུག་ལག་ཐམས་ཅད་ལ་མཁས་ཤིང་། ཚིག་སྦྱོར་བའི་རྒྱན་ལ་གསལ་ཞིང་ཐོགས་པ་མེད་པ་གྲུབ་པར་འདོད་པས། བསམ་པ་དེ་
དེས་ཤིང་གུས་པའི་སེམས་ཀྱིས་ལྷ་མོ་དབྱངས་ཅན་སྤྱན་དྲང་བའི་ཚིག་འདི་བརྗོད་པར་བྱའོ། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་ལ་སོགས་
པ། འདས་པ་དང་། མ་འོངས་པ་དང་། ད་ལྟར་བཞུགས་པའི་འཕགས་པ་ཐམས་ཅད་ལ་ཕྱག་འཚལ་ལོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཡང་དག་པར་བདེན་པའི་གསུང་ལ་གནས་པ། སོ་སོའི་དབང་པོ་དང་མཐུན་པ། བདེན་པ་སྟོན་པ་ལ་མི་སླུ་བར་
གསུང་བ། བསྐལ་པ་བྱེ་བ་ཚད་མེད་པར་ཡང་དག་པར་བདེན་པའི་ཚིག་རྟག་ཏུ་སྟོན་ཅིང་། གསུང་བ་དེ་དག་ལ་རྗེས་སུ་ཡི་རང་ངོ་། །བདེན་པ་གསུང་བས་ལྗགས་ཡངས་ལ་རིང་བ་བཀྲམ་སྟེ། ཞལ་དང་འཛམ་བུའི་གླིང་དང་། རྒྱལ་ཆེན་བཞི་དང་། སྟོང་གཅིག་དང་།
སྟོང་གཉིས་དང་། སྟོང་གསུམ་གྱི་འཇིག་རྟེན་གྱི་ཁམས་འདི་དང་། ཕྱོགས་བཅུའི་འཇིག་རྟེན་གྱི་ཁམས་ཚད་མེད་པ་ཐམས་ཅད་རྒྱས་པར་འགེངས་ཤིང་། ཉོན་མོངས་པའི་གདུང་བ་ཐམས་ཅད་སེལ་བའི་སངས་རྒྱས་བཅོམ་ལྡན་འདས་ཐམས་ཅད་ལ་ལུས་བཏུད་དེ་ཕྱག་འཚལ་

ལོ། །ལྗགས་ཀྱི་མཚན་དམ་པ་དེ་འདྲ་བ་དང་། སྤོབས་པ་ཚད་མེད་པ་དང་བདག་ལྡན་པར་གྱུར་ཅིག །ཕྱག་འཚལ་བཅོམ་ལྡན་དབྱངས་ཅན་མཆོག །བྱང་ཆུབ་ཆེན་པོ་དབྱངས་ཅན་མཆོག །འཕགས་པ་རང་རྒྱལ་དབྱངས་ཅན་མཆོག །ཟུང་
བཞི་ཡ་བརྒྱད་དབྱངས་ཅན་མཆོག །བདེན་པ་བཞི་གསུང་དབྱངས་ཅན་མཆོག །ཡང་དག་གཟིགས་པ་དབྱངས་ཅན་མཆོག །དྲང་སྲོང་ཚངས་འཁོར་དབྱངས་ཅན་མཆོག །ལྷ་མོ་ཨུ་མ་དབྱངས་ཅན་མཆོག །སྐེམ་བྱེད་ལྷ་ཡང་དབྱངས་ཅན་མཆོག །
གཟི་ཅན་ཀླུ་ཡང་དབྱངས་ཅན་མཆོག །མཚན་མོ་ལྷ་མོ་དབྱངས་ཅན་མཆོག །རྒྱལ་ཆེན་བཞི་པོ་དབྱངས་ཅན་མཆོག །བདེ་གནས་ལྷ་སྲས་དབྱངས་ཅན་མཆོག །རྡོ་རྗེ་གསང་བདག་དབྱངས་ཅན་མཆོག །ཁྱབ་འཇུག་ལྷ་ཡང་དབྱངས་ཅན་མཆོག །ལྷ་མོ་
པེ་མ་དབྱངས་ཅན་མཆོག །ཚོགས་བདག་ལྷ་ཡང་དབྱངས་ཅན་མཆོག །དཔལ་གྱི་ལྷ་མོ་དབྱངས་ཅན་མཆོག །དཔལ་གྱི་བློ་གྲོས་དབྱངས་ཅན་མཆོག །ཧི་རི་ཚིག་འཆང་དབྱངས་ཅན་མཆོག །མ་མོ་ཀུན་མཆོག་དབྱངས་ཅན་མཆོག །འཕྲོག་མ་མོ་
ཡང་དབྱངས་ཅན་མཆོག །གནོད་སྦྱིན་ཀུན་ཀྱང་དབྱངས་ཅན་མཆོག །ཕྱོགས་བཅུའི་རྒྱལ་པོ་དབྱངས་ཅན་མཆོག །བདག་ལ་ལས་མཆོག་ཀུན་གྱིས་སྟོབས། །མཐའ་མེད་དབྱངས་ཅན་མཆོག་ཐོབ་མཛོད། །སླུ་མེད་པ་ལ་ཕྱག་འཚལ་ལོ། །རྣམ་པར་
གྲོལ་ལ་ཕྱག་འཚལ་ལོ། །འདོད་ཆགས་བྲལ་ལ་ཕྱག་འཚལ་ལོ། །བཅིངས་པ་བཅད་ལ་ཕྱག་འཚལ་ལོ། །རྣམ་དག་སེམས་ལ་ཕྱག་འཚལ་ལོ། །འོད་སྣང་མཛད་ལ་ཕྱག་འཚལ་ལོ། །བདེན་ཚིག་གསུང་ལ་ཕྱག་འཚལ་ལོ། །རྡུལ་དང་བྲལ་ལ་ཕྱག་འཚལ་
ལོ། །དོན་དམ་གནས་ལ་ཕྱག་འཚལ་ལོ། །འཁོར་མང་གཙོ་ལ་ཕྱག་འཚལ་ལོ། །དབྱངས་ཅན་ལྷ་ལ་ཕྱག་འཚལ་ལོ། །བདག་ནི་ཚིག་ལ་ཐོགས་མེད་མཛོད། །བདག་གི་བསམ་པ་ཅི་མཆིས་པ། །ཐམས་ཅད་མྱུར་དུ་གྲུབ་པར་མཛོད། །ནད་མེད་རྟག་ཏུ་བདེ་བ་

དང་། །ཚེ་རིང་བ་ཡང་ཐོབ་པར་ཤོག །རིག་པའི་གནས་ལ་མཁས་པ་དང་། །བྱང་ཆུབ་ལམ་ལ་བརྩོན་པ་དང་། །སྐྱེ་བོ་ཀུན་ལ་ཕན་མང་མཛོད། །རེ་བ་ཐམས་ཅད་མྱུར་དུ་སྐོང་། །བདག་གི་ཡང་དག་བདེན་ཚིག་དང་། །བདག་གིས་མི་སླུ་ཚིག་སྨྲས་པ། །
དབྱངས་ཅན་ལྷ་མོ་མཆོག་གིས་ནི། །བདག་གི་དོན་དེ་གྲུབ་པར་མཛོད། །ལྷ་མོ་འདིར་ནི་གཤེགས་པར་གསོལ། །བདག་གི་ཚིག་ལ་ཐོགས་མེད་མཛོད། །ལུས་དང་ངག་ལ་མྱུར་ཞུགས་ཤིང་། །ཡིད་མྱུར་སྤོབས་པ་རྫོགས་པར་མཛོད། །བདག་གི་ལྕེ་ཡི་དབང་པོ་
ལ། །བདེ་གཤེགས་སྤོབས་པ་ལྡན་པར་མཛོད། །ཚིག་གི་གཟི་བརྗིད་མཐུ་དེས་ནི། །སེམས་ཅན་ཐམས་ཅད་འདུལ་བར་མཛོད། །བདག་གིས་ཚིག་ནི་ཅི་སྨྲས་པ། །དོན་དེ་ཐམས་ཅད་གྲུབ་པར་ཤོག །ཚིག་ལ་ཐམས་ཅད་གུས་སྐྱེད་ཅིང་། །བྱེད་པ་ཐམས་ཅད་ཆུད་མ་
གཟོན། །ནམ་ཞིག་བདག་གི་སྤོབས་འདོད་པ། །དོན་དེ་གྲུབ་པར་མ་གྱུར་ན། །ལྷ་མོ་ཁྱོད་ཀྱི་བདེན་ཚིག་ནི། །ཐམས་ཅད་བརྫུན་པ་ཉིད་དུ་འགྱུར། །མཚམས་མེད་ལྔ་ཡི་སྡིག་བགྱིས་པ། །སངས་རྒྱས་བཀས་ནི་འདུལ་བར་འགྱུར། །གང་ཡང་དགྲ་བཅོམ་པ་དག་དང་། །
བྱས་པ་གཟོ་བའི་ཚིག་རྣམས་དང་། །ཤཱ་རིའི་བུ་དང་མཽད་གལ་དང་། །བཅོམ་ལྡན་འཁོར་གྱི་གཙོ་བོ་སྟེ། །དེ་ལ་སོགས་པའི་བདེན་ཚིག་ཀྱང་། །ཐམས་ཅད་བདག་ལ་གྲུབ་པར་ཤོག །སངས་རྒྱས་ཉན་ཐོས་འཁོར་རྣམས་དག །བདག་གིས་དེང་འདིར་སྤྱན་དྲང་གིས། །
བདག་གི་རེ་བ་བསྐང་བའི་ཕྱིར། །ཐམས་ཅད་མྱུར་དུ་གཤེགས་པར་མཛོད། །ཡང་དག་བདེན་པའི་ཚིག་གསོལ་བ། །ཐམས་ཅད་སླུ་བ་མེད་པར་ཤོག །སྲིད་པའི་རྩེ་མོ་མན་ཆད་དང་། །གཙང་མའི་གནས་ནི་ཐམས་ཅད་དང་། །ཚངས་པ་ཚངས་ཆེན་མདུན་འདོན་དང་། །
ཚངས་པའི་རྒྱལ་འཁོར་ཐམས་ཅད་དང་། །སྟོང་གསུམ་འཁོར་བའི་བར་དག་དང་། །མི་མཇེད་འཇིག་རྟེན་གཙོ་བོ་དང་། །དེ་དང་དེ་ཡི་འཁོར་རྣམས་དང་། །དེ་ཀུན་དེང་འདིར་སྤྱན་དྲངས་ཏེ། །ཐུགས་རྗེས་བདག་ལ་དགོངས་མཛད་ཅིང་། །བརྩེ་བ་ཀུན་གྱིས་གཟུང་

བར་མཛོད། །གཞན་འཕྲུལ་དབང་བྱེད་ལྷ་དག་དང་། །གཞན་ཡང་འཕྲུལ་དགའི་ལྷ་དག་དང་། །བྱམས་པ་མངོན་པར་འཚང་རྒྱའི་གནས། །དགའ་ལྡན་གནམ་གྱི་ལྷ་རྣམས་དང་། །འཐབ་བྲལ་གྱི་ནི་ལྷ་རྣམས་དང་། །སུམ་ཅུ་རྩ་གསུམ་ལྷ་
རྣམས་དང་། །རྒྱལ་ཆེན་བཞི་ཡི་ལྷ་རྣམས་དང་། །གཞན་ཡང་ལྷ་འཁོར་ཐམས་ཅད་དང་། །ས་ཆུ་མེ་རླུང་ལྷ་དག་དང་། །རི་རབ་ལྷུན་ལ་གནས་པ་དང་། །ཆུ་བདུན་རི་བོ་ལྷ་རྣམས་དང་། །དེ་ཀུན་འཁོར་དང་བཅས་པ་དང་། །ཟུར་ཕུད་ལྔ་ཅན་
ནོར་རྒྱས་དང་། །ཉི་ཟླ་གཟའ་དང་རྒྱུ་སྐར་དང་། །དེ་ལ་སོགས་པའི་ལྷ་རྣམས་དང་། །འཇིག་རྟེན་བདེ་བར་མཛད་པའི་གནས། །དེ་ལ་སོགས་པའི་ལྷ་ཐམས་ཅད། །སྡིག་པའི་ལས་ལ་མ་མོས་པ། །སངས་རྒྱས་ལ་གུས་འབྱུང་བའི་མ། །བུ་རབ་
གཞོན་ལ་བྱམས་པ་དང་། །ལྷ་དང་ཀླུ་དང་གནོད་སྦྱིན་རྣམས། །དྲི་ཟ་དང་ནི་ལྷ་མ་ཡིན། །གཞན་ཡང་མི་འམ་ཅི་དག་དང་། །ལྟོ་འཕྱེ་ཆེ་ལ་སོགས་པ་རྣམས། །ཀུན་ཀྱང་བཅོམ་ལྡན་མཐུ་ཡིས་ནི། །བདག་གིས་དེང་འདིར་སྤྱན་དྲངས་ཏེ། །ཐུགས་
རྗེ་བརྩེ་བའི་དགོངས་པ་ཡིས། །བདག་ལ་ཐོགས་མེད་སྤོབས་པ་སྐྱེད། །ལྷ་དང་མི་རྣམས་ཐམས་ཅད་ཀྱིས། །གཞན་གྱི་སེམས་རིག་མཁྱེན་པ་རྣམས། །ཀུན་གྱི་མཐུ་ཡིས་བྱིན་བརླབས་ཤིང་། །བདག་ལ་སྤོབས་པའི་མཆོག་སྩོལ་ཅིག །ཇི་སྙེད་ནམ་
མཁའི་མཐས་གཏུགས་ཤིང་། །ཆོས་ཀྱི་དབྱིངས་ཀྱི་མུས་ཀླས་པའི། །སེམས་ཅན་དེ་དག་ཐམས་ཅད་ཀྱིས། །བདག་ལ་སྤོབས་པའི་མཆོག་སྩོལ་ཅིག །དེ་ནས་དབྱངས་ཅན་ལྷ་མོ་ལ་བྲམ་ཟེ་ཀཽཎྜི་ནྱས་དེ་སྐད་ཅེས་གསོལ་པ་དང་། ལྷ་མོས་སྐྱེས་བུ་ཆེན་པོ་དེ་ལ་
དགེའོ་ཞེས་སྨྲས་ཏེ། གང་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཚིགས་སུ་བཅད་པས་བསྟོད་པ་དང་། གསང་སྔགས་ཀྱི་ཚིག་དེ་དག་འཆང་ཞིང་འཛིན་པ་དང་། དཀོན་མཆོག་གསུམ་ལ་སྐྱབས་སུ་སོང་སྟེ། སེམས་འདུན་པས་རྗེས་སུ་དམིགས་

ཤིང་། ཅི་འདོད་པའི་དོན་ཆོ་ག་བཞིན་དུ་བསྒྲུབས་ན། ཆུད་ཟ་བར་མི་འགྱུར་རོ། །གཞན་ཡང་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཤིན་ཏུ་ཕྲ་ཞིང་། ཟབ་པ་འདི་འཛིན་པ་དང་། འཆང་བ་དང་། ཀློག་པ་དང་། འདོན་པ་དེ་བསམ་པ་ཐམས་ཅད་
མྱུར་དུ་འགྲུབ་པར་འགྱུར་ཏེ། སེམས་གཡེང་བས་བྱས་པ་ནི་མ་གཏོགས་སོ། །དེ་སྐད་ཅེས་སྨྲས་པ་དང་། བྲམ་ཟེ་ཀཽཎྜི་ནྱ་རབ་ཏུ་དགའ་བ་དང་། ཡིད་བདེ་བ་སྐྱེས་ཏེ། ཐལ་མོ་སྦྱར་བ་བྱས་ནས་རྗེས་སུ་འཛིན་ཏོ། །དེ་ནས་བཅོམ་ལྡན་འདས་ཀྱིས་ལྷ་མོ་དབྱངས་ཅན་
ལ་ལེགས་སོ་ཞེས་བཀའ་སྩལ་ཏེ། ལྷ་མོ་ཁྱོད་ཀྱིས་དམ་པའི་ཆོས་འདི་ཡོངས་སུ་བསྲུང་ཞིང་། ཡོངས་སུ་རྒྱས་པར་བྱ་བ་དང་། མདོ་འདི་འཛིན་པའི་སེམས་ཅན་ཐམས་ཅད་ལ་ཆོས་འདི་ལྟ་བུ་བསྟན་པས་བདེ་བ་དང་། བསོད་ནམས་དང་། སྤོབས་པ་ཚད་མེད་པ་
འཕེལ་བར་འགྱུར་ཏེ། གང་སེམས་བསྐྱེད་པ་རྣམས་ཀྱང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱས་པ་ལེགས་སོ་ལེགས་སོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ལྷ་མོ་དབྱངས་ཅན་གྱི་ལེའུ་ཞེས་བྱ་སྟེ་
བཅྭ་ལྔ་པའོ།། །།དེ་ནས་བཅོམ་ལྡན་འདས་ལ་ལྷ་མོ་ཆེན་མོ་དཔལ་གྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ལྷ་མོ་ཆེན་མོ་དཔལ་བདག་གིས་ཅི་ནས་ཀྱང་། ཆོས་སྨྲ་བའི་དགེ་སློང་དེ་ཡོ་བྱད་ཐམས་ཅད་ཕུན་སུམ་ཚོགས་
པར་འགྱུར་བ་དང་། བྲེལ་ཕོངས་པ་མ་མཆིས་པ་འཐོབ་པར་འགྱུར་བ་དང་། སེམས་བརྟས་པ་འཐོབ་པར་འགྱུར་བ་དང་། སེམས་བདེ་བར་གདུགས་མཚན་བས་པར་འགྱུར་བ་དང་། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཚིག་དང་། ཡི་
གེ་རྣམ་པ་ཐ་དད་པ་དག་ཆུབ་པར་འགྱུར་བ་དང་། རྣམ་པར་རྟོག་པར་འགྱུར་བ་དང་། ཡང་དག་པར་བརྗོད་པར་འགྱུར་བ་དང་། སངས་རྒྱས་འབུམ་ཕྲག་དག་ལ། དགེ་བའི་རྩ་བ་བསྐྲུན་པའི་སེམས་ཅན་དེ་དག་གི་དོན་གྱི་སླད་དུ། གསེར་འོད་དམ་པ་མདོ་སྡེའི་

དབང་པོའི་རྒྱལ་པོ་འདི་འཛམ་བུའི་གླིང་དུ་ཡུན་རིང་དུ་གནས་པར་འགྱུར་ཞིང་། མྱུར་དུ་ནུབ་པར་མི་འགྱུར་བ་དང་། སེམས་ཅན་རྣམས་ཀྱང་། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པར་འགྱུར་བ་དང་།
བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་ལྷ་དང་། མིའི་བདེ་བ་མྱོང་བར་འགྱུར་བ་དང་། མུ་གེ་མ་མཆིས་པར་འགྱུར་བ་དང་། ལོ་ལེགས་པར་འགྱུར་བ་དང་། སེམས་ཅན་རྣམས་ཀྱང་བདེ་བར་སྦྱར་བ་ཐམས་ཅད་ཀྱིས་བདེ་བར་འགྱུར་བ་
དང་། དེ་བཞིན་གཤེགས་པ་དང་འགྲོགས་པར་འགྱུར་བ་དང་། མ་འོངས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དང་། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་།
གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་ཤིན་ཏུ་རྒྱུན་ཆད་པར་འགྱུར་བ་འདི་ལྟ་སྟེ། གོས་དང་། ཟས་དང་། མལ་ཆ་དང་། སྟན་དང་། ན་བའི་གསོས་སྨན་དང་། སྨན་ཟོང་དང་། ཡོ་བྱད་དང་། འཚོག་ཆས་ཀྱི་བྱེ་བྲག་གཞན་དག་གིས་ཀྱང་
དགེ་སློང་ཆོས་སྨྲ་བ་དེ་སྤྲོ་བར་བགྱིའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མེ་ཏོག་ཡོན་ཏན་རྒྱ་མཚོ་བཻ་ཌཱུརྱ་དང་། གསེར་གྱི་རི་ཁ་དོག་བཟང་པོ་གསེར་དུ་སྣང་བའི་དཔལ་ཞེས་བྱ་བ་དེ་ལ། ལྷ་མོ་ཆེན་མོ་དཔལ་
གྱིས་དགེ་བའི་རྩ་བ་བསྐྱེད་དེ། དེས་ད་ལྟར་ཕྱོགས་གང་དང་། གང་དུ་སེམས་པ་དང་། ཕྱོགས་གང་དང་གང་དུ་ལྟ་བ་དང་། ཕྱོགས་གང་དང་། གང་དུ་འགྲོ་བའི་ཕྱོགས་དེ་དང་། དེར་སེམས་ཅན་བྱེ་བ་ཁྲག་ཁྲིག་འབུམ་ཕྲག་དུ་མ་དག་བདེ་བར་སྦྱར་
བ་ཐམས་ཅད་ཀྱིས་བདེ་བར་འགྱུར། ཟས་དང་། སྐོམ་དང་། ནོར་དང་། འབྲུ་དང་། འགྲོན་བུ་དང་། གསེར་དང་། ནོར་བུ་དང་། མུ་ཏིག་དང་། བཻ་ཌཱུརྱ་དང་། དུང་དང་། མན་ཤེལ་དང་། བྱི་རུ་དང་། དངུལ་དང་། ས་ལེ་སྦྲམ་དང་། ཡོ་

བྱད་གཞན་དག་གིས་ཀྱང་མི་ཕོངས་པར་འགྱུར། སེམས་ཅན་དེ་དག་ཡོ་བྱད་ཐམས་ཅད་འབྱོར་བར་འགྱུར་རོ། །ལྷ་མོ་ཆེན་མོ་དཔལ་གྱི་མཐུས་དེ་བཞིན་གཤེགས་པ་དེ་ལ་མཆོད་པར་བྱ། སྤོས་དང་། མེ་ཏོག་དང་། བདུག་པ་ཡང་དབུལ་བར་བྱ། ལྷ་མོ་
ཆེན་མོ་དཔལ་གྱི་མིང་ནས་ལན་གསུམ་བརྗོད་ཅིང་། དེ་ལ་སྤོས་དང་། བདུག་པ་དང་། མེ་ཏོག་ཀྱང་བྱིན་ལ། རོ་སྣ་ཚོགས་ཀྱང་བྱིན་ན། དེའི་འབྲུའི་ཕུང་པོ་ཆེན་པོ་རྣམ་པར་འཕེལ་བར་འགྱུར་རོ། །དེ་ལ་འདི་སྐད་ཅེས་བྱ་སྟེ། ས་ལ་ས་ཡི་བཅུད་
དག་རྣམ་པར་འཕེལ། །ལྷ་རྣམས་རྟག་ཏུ་རབ་ཏུ་དགའ་བར་འགྱུར། །འབྲས་བུ་ལོ་ཐོག་ལྡུམ་སྡོང་ལྗོན་ཤིང་རྣམས། །ལོ་ཐོག་ཤིན་ཏུ་སྣ་ཚོགས་རྣམས་ཀྱང་སྐྱེད། །གསེར་འོད་དམ་པ་མདོ་སྡེའི་དབང་པོའི་རྒྱལ་པོའི་མིང་བརྗོད་པའི་སེམས་ཅན་དེ་དག་ལ་ལྷ་
མོ་ཆེན་མོ་དཔལ་ནི་སེམས་པར་འགྱུར། དེ་དག་ལ་དཔལ་ཆེན་པོར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དཔལ་ལྷ་མོ་ཆེན་མོ་ལ་ལེགས་སོ་ཞེས་བཀའ་སྩལ་ཏེ། ལེགས་སོ་ལེགས་སོ། །ལྷ་མོ་ཁྱོད་ཀྱིས་སྔོན་བྱས་པ་རྗེས་སུ་དྲན་པས། དེ་
བཞིན་གཤེགས་པ་ལ་མཆོད་པ་དང་། སེམས་ཅན་ཚད་མེད་པ་རྣམས་ལ་ཕན་པ་དང་། བདེ་བས་ཕན་འདོགས་ཤིང་། མདོ་སྡེ་འདི་ཡང་ཡོངས་སུ་རྒྱས་པར་བྱེད་པའི་བསོད་ནམས་ཟད་མི་ཤེས་པ་དང་ལྡན་པར་འགྱུར་རོ། །གསེར་འོད་དམ་པ་མདོ་སྡེའི་
དབང་པོའི་རྒྱལ་པོ་ལས། ལྷ་མོ་དཔལ་གྱི་ལེའུ་ཞེས་བྱ་སྟེ་བཅུ་དྲུག་པའོ།། །།དེ་ནས་ལྷ་མོ་དཔལ་ཆེན་མོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ནས་བྱང་ཕྱོགས་སུ་མི་རིང་བ་ཞིག་ན། ལྷའི་རྒྱལ་པོ་རྣམ་ཐོས་
ཀྱི་བུའི་ཕོ་བྲང་ལྕང་ལོ་ཅན་གྱི་འཁོར་ན་སྐྱེད་མོས་ཚལ་དམ་པ་བསོད་ནམས་ཀྱི་མེ་ཏོག་འོད་ཅེས་བྱ་བ་ན། རིན་པོ་ཆེ་སྣ་བདུན་ལས་བྱས་པའི་ཁང་བཟངས་པདྨ་དམ་པ་གསེར་གྱི་རྒྱལ་མཚན་ཞེས་བྱ་བ་ན་བདག་གནས་ཏེ། མི་གང་ལ་ལ་འབྲུའི་ཕུང་པོ་སྤེལ་བར་འདོད་པ་

དེས་རང་གི་ཁྱིམ་ཕྱག་དར་ལེགས་པར་བྱ། ཁྲུས་ལེགས་པར་བྱ། གོས་དཀར་པོ་གཙང་མ་བགོ་བར་བྱ། གོས་དྲི་རབ་ཏུ་ཞིམ་པ་བགོ་བར་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
རིན་ཆེན་མེ་ཏོག་ཡོན་ཏན་རྒྱ་མཚོ་བཻ་ཌཱུརྱ་དང་། གསེར་གྱི་རི་ཁ་དོག་བཟང་པོ་གསེར་དུ་སྣང་བའི་དཔལ་དེ་ལ་ཕྱག་འཚལ་ཞིང་མཚན་ནས་ཀྱང་ལན་གསུམ་བརྗོད། ལྷ་མོ་ཆེན་མོ་དཔལ་གྱི་ལག་ནས། དེ་བཞིན་གཤེགས་པ་ལ་མཆོད་པ་བྱེད། མེ་ཏོག་
དང་། བདུག་པ་དང་། སྤོས་ཀྱང་འབུལ། རོ་བྲོ་བ་སྣ་ཚོགས་ཀྱང་འབུལ། གསེར་འོད་དམ་པ་མདོ་སྡེའི་དབང་པོའི་རྒྱལ་པོའི་མིང་ཡང་ལན་གསུམ་བརྗོད། བདེན་པའི་ཚིག་ཀྱང་བརྗོད། ལྷ་མོ་ཆེན་མོ་དཔལ་ལ་ཡང་མཆོད་ཅིང་། མེ་ཏོག་དང་།
བདུག་པ་ཡང་འབུལ། རོ་བྲོ་བ་སྣ་ཚོགས་ཀྱང་འབུལ་ན། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཡི་མཐུས། དེའི་ཚེ་ལྷ་མོ་ཆེན་མོ་དཔལ་ཁྱིམ་དེ་ལ་སེམས་པར་འགྱུར། དེའི་འབྲུའི་ཕུང་པོ་ཆེན་པོ་ཡང་འཕེལ་བར་འགྱུར་རོ། །ལྷ་མོ་ཆེན་མོ་
དཔལ་འགུགས་པར་འདོད་པ་དེས་རིག་པའི་གསང་སྔགས་འདི་དག་དྲན་པར་བྱའོ། །འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་ཐམས་ཅད་ལ་ཕྱག་འཚལ་ལོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་
འཚལ་ལོ། །བཅོམ་ལྡན་འདས་དེ་བཞིན་གཤེགས་པ་རིན་ཆེན་གཙུག་ཏོར་ཅན་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པར་འབར་བ་རིན་ཆེན་འོད་ཟེར་སྣང་བའི་རྟོག་ལ་ཕྱག་འཚལ་ལོ། །དེ་བཞིན་གཤེགས་པ་འཛམ་
བུ་གསེར་གྱི་རྒྱལ་མཚན་གསེར་དུ་སྣང་བ་ལ་ཕྱག་འཚལ་ལོ། །དེ་བཞིན་གཤེགས་པ་གསེར་དུ་སྣང་བའི་སྙིང་པོ་ལ་ཕྱག་འཚལ་ལོ། །དེ་བཞིན་གཤེགས་པ་ཉི་མ་བརྒྱའི་འོད་ཟེར་སྣང་བའི་སྙིང་པོ་ལ་ཕྱག་འཚལ་ལོ། །དེ་བཞིན་གཤེགས་པ་གསེར་རི་རིན་

ཆེན་འབྱུང་གནས་གདུགས་བརྩེགས་ལ་ཕྱག་འཚལ་ལོ། །དེ་བཞིན་གཤེགས་པ་གསེར་གྱི་མེ་ཏོག་འབར་བའི་འོད་ཟེར་གྱི་ཏོག་ལ་ཕྱག་འཚལ་ལོ། །དེ་བཞིན་གཤེགས་པ་སྒྲོན་མ་ཆེན་པོ་ལ་ཕྱག་འཚལ་ལོ། །དེ་བཞིན་གཤེགས་པ་རིན་ཆེན་
ཏོག་ལ་ཕྱག་འཚལ་ལོ། །ཤར་ཕྱོགས་ཀྱི་དེ་བཞིན་གཤེགས་པ་མི་འཁྲུགས་པ་ལ་ཕྱག་འཚལ་ལོ། །ལྷོ་ཕྱོགས་ཀྱི་དེ་བཞིན་གཤེགས་པ་རིན་ཆེན་ཏོག་ལ་ཕྱག་འཚལ་ལོ། །ནུབ་ཕྱོགས་ཀྱི་དེ་བཞིན་གཤེགས་པ་ཚེ་དཔག་མེད་ལ་ཕྱག་འཚལ་
ལོ། །བྱང་ཕྱོགས་ཀྱི་དེ་བཞིན་གཤེགས་པ་རྔ་སྒྲ་ལ་ཕྱག་འཚལ་ལོ། །བྱང་ཆུབ་སེམས་དཔའ་བྱམས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་མཛེས་པའི་ཏོག་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་འོད་དམ་པ་
ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་གྱི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྟག་ཏུ་ངུ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་འཕགས་ལ་ཕྱག་འཚལ་ལོ། །བྱང་ཆུབ་སེམས་དཔའ་རབ་གནས་
ལ་ཕྱག་འཚལ་ལོ། །དེ་དག་ལ་ཕྱག་འཚལ་ནས་རིག་པ་འདི་དག་ལ་སྦྱོར་བར་བྱ་སྟེ། །རིག་སྔགས་འདི་བདག་ལ་འབྱོར་བར་གྱུར་ཅིག །སཱདྱ་ཐེ་དན། པྲ་ཏི་པཱུརྞ་ཙ་རེ། ས་མནྟཱ་དརྴ་ཎེ། མ་ཧཱ་བི་ཧཱ་ར་ག་ཏི། ས་མན་ཏ། བི་མཱ་ན་ག་ཏེ།
མ་ཧཱ་ཀཱརྱ། པྲ་ཏི་པྲཱ་བ་ཎི། ས་ཏྭཱ། ཨརྠ་ས་མ་ཏཱ་ནུ། པྲ་པཱུ་རེ། ཨ་ཡཱ་ན་དྷརྨ་ཏཱ། མ་ཧཱ་བྷོ་གི་ནི། མ་ཧཱ་མཻ་ཏྲི། ཨུ་པ་སང་ཧི་ཏེ། ཧི་ཏཻ་ཥི། སང་གྲྀ་ཧཱི་ཏེ། ས་མར་ཐཱ་ནུ་པཱ་ལ་ནེ་སྭཱ་ཧཱ། འདི་དག་ནི་སྤྱི་བོ་ནས་དབང་བསྐུར་བའི་ཆོས་ཉིད་ཀྱི་
གསང་སྔགས་ཀྱི་ཚིག་གཅིག་ཏུ་དེ་ཁོ་ན་ཡང་དག་པར་གྲུབ་པ་སྦྱིན་པ་མི་སླུ་བའི་དོན་གྱི་ཚིག་སྟེ། སེམས་ཅན་བར་མ་ལ་སྤྱོད་པ་རྣམས་དགེ་བའི་རྩ་བ་ཁ་ན་མ་ཐོ་བ་མེད་པ་དག་གིས། ལོ་བདུན་དུ་འདོན་ཅིང་། འཛིན་པ་དག་ཡན་ལག་བརྒྱད་པའི་བསྙེན་

པར་གནས་པ་ལ་བསྙེན་ཏེ། བདག་དང་སེམས་ཅན་ཀུན། ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱ་བ་ཡོངས་སུ་རྫོགས་པར་བྱ་བའི་ཕྱིར། སྔ་དྲོ་དང་། ཕྱི་དྲོ་སངས་རྒྱས་ཐམས་ཅད་ལ་མེ་ཏོག་དང་།
སྤོས་རྣམས་ཀྱིས་མཆོད་ནས། དེས་བདག་གི་བསམ་པ་འདི་འབྱོར་པར་གྱུར་ཅིག །མྱུར་དུ་འབྱོར་པར་གྱུར་ཅིག །གཙུག་ལག་ཁང་ངམ། དགོན་པའི་གནས་ཀྱང་རུང་སྟེ། ཁྱིམ་དེ་ཤིན་ཏུ་གཙང་མར་བྱས་ལ། ལྕི་བས་དཀྱིལ་འཁོར་བྱས་ཏེ།
སྤོས་དང་། བདུག་པ་ཡང་དབུལ་བར་བྱ། སྟན་གཙང་མ་ཡང་གདིང་བར་བྱའོ། །ས་ལ་མེ་ཏོག་སིལ་མ་བཀྲམ་སྟེ་བསྡད་པར་བྱའོ། །དེ་ནས་སྐད་ཅིག་དེ་ཉིད་ལ། ལྷ་མོ་ཆེན་མོ་དཔལ་འོངས་ནས། དེར་གནས་པར་འགྱུར་རོ། །དེ་ཕྱིན་ཆད་
ཁྱིམ་མམ། གྲོང་ངམ། གྲོང་ཁྱེར་རམ། གྲོང་རྡལ་ལམ། གཙུག་ལག་ཁང་ངམ། དགོན་པའི་གནས་སུ་ནམ་ཡང་བྲེལ་ཅིང་ཕོངས་པ་མེད་པར་འགྱུར་རོ། །འགྲོན་བུ་དང་། གསེར་དང་། རིན་པོ་ཆེ་དང་། ནོར་དང་། འབྲུ་དང་། ཡོ་བྱད་
ཐམས་ཅད་འབྱོར་པ་དང་། བདེ་བར་སྦྱར་བ་ཐམས་ཅད་ཀྱིས་བདེ་བར་འགྱུར་རོ། །དགེ་བའི་རྩ་བ་གང་དག་བྱེད་པ་དེ་དག་ཐམས་ཅད་ལས། ལྷ་མོ་ཆེན་མོ་དཔལ་ལ་ཤས་ཀྱི་མཆོག་སྦྱིན་པར་བྱ་སྟེ། དེས་ན་དེ་ཅི་སྲིད་འཚོ་བའི་བར་དུ་དེ་ན་གནས་པར་
འགྱུར། འཕང་བར་མི་འགྱུར། དེ་དག་གི་བསམ་པ་ཐམས་ཅད་ཡོངས་སུ་རྫོགས་པར་འགྱུར་རོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ལྷ་མོ་ཆེན་མོ་དཔལ་གྱིས་ནོར་ཡོངས་སུ་སྤེལ་བའི་ལེའུ་ཞེས་བྱ་སྟེ་བཅུ་བདུན་པའོ།། །།
དེ་ནས་བཅོམ་ལྡན་འདས་ལ་སའི་ལྷ་མོ་བརྟན་མས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི། ད་ལྟར་དང་། མ་འོངས་པའི་དུས་ན། གྲོང་ངམ། གྲོང་ཁྱེར་རམ། གྲོང་རྡལ་ལམ།

ལྗོངས་སམ། དགོན་པའི་ཕྱོགས་སམ། རིའི་སྨན་ལྗོངས་སམ། ཕོ་བྲང་འཁོར་གང་དུ་གནས་པར་འགྱུར་བའི་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། དགོན་པའི་ཕྱོགས་སམ། རིའི་སྨན་ལྗོངས་སམ། ཕོ་བྲང་འཁོར་
དེར། བཙུན་པ་བཅོམ་ལྡན་འདས་སའི་ལྷ་མོ་བརྟན་མ་བདག་མཆི་བར་བགྱིའོ། །བཙུན་པ་བཅོམ་ལྡན་འདས་གང་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རྒྱ་ཆེར་ཡང་དག་པར་རབ་ཏུ་འཆད་པར་འགྱུར་བ་དང་། ས་ཕྱོགས་གང་དང་གང་
ན། དགེ་སློང་ཆོས་སྨྲ་བ་དེའི་ཆོས་ཀྱི་ཁྲི་ཤོམ་པར་འགྱུར་བ་དང་། གང་དང་གང་དུ་ཆོས་སྨྲ་བ་སྟན་ལ་མཆིས་ནས། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རྒྱ་ཆེར་ཡང་དག་པར་རབ་ཏུ་བསྟན་པར་འགྱུར་བ་དེར། བཙུན་པ་བཅོམ་
ལྡན་འདས་སའི་ལྷ་མོ་བརྟན་མ་དག་ས་ཕྱོགས་དེ་དང་དེ་དག་ཏུ་མཆི་བར་བགྱིའོ། །ལུས་མི་གདའ་བར་ཆོས་ཀྱི་ཁྲིའི་འོག་ལོགས་སུ་མཆིས་ཏེ། ཡན་ལག་གི་དམ་པ་མགོས་དགེ་སློང་ཆོས་སྨྲ་བ་དེའི་རྐང་མཐིལ་ནས་བརྟེན་པར་བགྱིའོ། །བདག་ཀྱང་
ཆོས་མཉན་པ་དང་། ཆོས་བདུད་རྩིའི་ཁུ་བ་འདིས་ཚིམ་པར་བགྱི། ཡང་དག་པར་རིམ་གྲོར་བགྱི། ཡང་དག་པར་མཆོད་པར་བགྱིའོ། །བདག་ཚིམ་པར་གྱུར། རིམ་གྲོ་བགྱི་བ་བགྱིས་པར་གྱུར། རབ་ཏུ་དགའ་བར་གྱུར་ནས། སའི་ཕུང་
པོ་དཔག་ཚད་སྟོང་ཕྲག་དྲུག་ཅུ་བརྒྱད་པོ་འདི་ནས། སའི་གཞི་རྡོ་རྗེ་ལ་ཐུག་པའི་བར་དུ། སའི་བཅུད་ཀྱིས་རྣམ་པར་འཕེལ་བར་བགྱི། ཡང་དག་པར་ནི་རིམ་གྲོ་བགྱི། ཡོངས་སུ་རྫོགས་པར་བགྱིའོ། །སྟེང་དུ་ཡང་རྒྱ་མཚོའི་མཐའ་ལ་ཐུག་པའི་སའི་
དཀྱིལ་འཁོར་འདི། སའི་བཅུད་ཀྱི་སྣུམ་གྱིས་བརླན་པར་བགྱིའོ། །ས་ཆེན་པོ་འདི་རབ་ཏུ་གཟི་བྱིན་དང་ལྡན་པར་བགྱིའོ། །དེ་ནས་འཛམ་བུའི་གླིང་འདིར་རྩྭ་དང་། ཤིང་གེལ་པ་དང་། སྨན་དང་། ནགས་ཚལ་སྣ་ཚོགས་རྣམས་གཟི་བྱིན་དང་རབ་ཏུ་ལྡན་པར་

འཁྲུང་བར་འགྱུར། ཀུན་དགའ་ར་བ་དང་། ནགས་ཚལ་དང་། ཤིང་ལྗོན་པ་ཐམས་ཅད་དང་། ལོ་མ་དང་། མེ་ཏོག་དང་། འབྲས་བུ་དང་། ལོ་ཐོག་རྣམ་པ་སྣ་ཚོགས་ཐམས་ཅད་ཀྱང་། རབ་ཏུ་གཟི་བྱིན་དང་ལྡན་པར་
འགྱུར་བ་དང་། དྲི་དང་རབ་ཏུ་ལྡན་པ་དང་། སྣུམ་པ་དང་རབ་ཏུ་ལྡན་པ་དང་། རོ་ཞིམ་པོར་འགྱུར། བལྟ་ན་རབ་ཏུ་སྡུག་པ་དང་། རབ་ཏུ་ཆེ་བར་འགྱུར་རོ། །སེམས་ཅན་དེ་དག་ཀྱང་བཏུང་བ་དང་། བཟའ་བ་རྣམ་པ་སྣ་ཚོགས་དེ་དག་འཚལ་
ནས། ཚེ་དང་། སྟོབས་དང་། ཁ་དོག་དང་། དབང་པོ་རྣམས་རྣམ་པར་འཕེལ་བར་འགྱུར་རོ། །གཟི་བྱིན་དང་། སྟོབས་དང་། ཁ་དོག་དང་། གཟུགས་དང་རབ་ཏུ་ལྡན་པར་གྱུར་ནས་ཀྱང་། ས་ལ་མཆིས་པའི་དགོས་པ་རྣམ་པ་སྣ་ཚོགས་
ཐ་དད་པ་འབུམ་ཕྲག་དུ་མ་དག་བགྱིད་པར་འགྱུར། བརྩོན་པར་འགྱུར། འབད་པར་འགྱུར། སྟོབས་སུ་བགྱི་བའི་ལས་རྣམས་བགྱིད་པར་འགྱུར་རོ། །བཙུན་པ་བཅོམ་ལྡན་འདས་རྒྱུ་དེས་འཛམ་བུའི་གླིང་ཐམས་ཅད་ཞི་བར་འགྱུར་བ་དང་། ལོ་ལེགས་པ་
དང་། རྒྱས་པ་དང་། ཉམས་དགའ་བར་འགྱུར། སྐྱེ་བོ་དང་མི་མང་པོས་གང་བར་འགྱུར། འཛམ་བུའི་གླིང་གི་སེམས་ཅན་དེ་དག་ཐམས་ཅད་བདེ་བར་འགྱུར། དགའ་བ་རྣམ་པ་སྣ་ཚོགས་མྱོང་བར་འགྱུར། སེམས་ཅན་དེ་དག་གཟི་བྱིན་དང་། སྟོབས་
དང་། ཁ་དོག་དང་། གཟུགས་དང་ལྡན་པར་འགྱུར་རོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་སླད་དུ། དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འཛིན་པ་དེ་དག་ཆོས་ཀྱི་ཁྲི་སྟན་ལ་མཆིས་
པའི་གན་དུ་མཆི་བར་འགྱུར། མཆིས་ནས་ཀྱང་སེམས་རབ་ཏུ་དང་བས་སེམས་ཅན་ཐམས་ཅད་ཀྱི་དོན་དང་ཕན་པ་དང་བདེ་བ་དང་། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རྒྱ་ཆེར་ཡང་དག་པར་རབ་ཏུ་བཤད་པར་བགྱི་བའི་སླད་དུ། ཆོས་སྨྲ་བ་དེ་དག་

ལ་གསོལ་བ་འདེབས་པར་འགྱུར་རོ། །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རབ་ཏུ་བཤད་པ་ན་སའི་ལྷ་མོ་བརྟན་མ་བདག་གཡོག་དང་བཅས་ཏེ། རབ་ཏུ་གཟི་བྱིན་དང་ལྡན་པ་དང་། རབ་ཏུ་
སྟོབས་དང་ལྡན་པར་འགྱུར་རོ། །བདག་ཅག་གི་ལུས་ལ་སྟོབས་དང་། བརྩོན་འགྲུས་དང་། མཐུ་ཆེན་པོ་བསྐྱེད་པར་འགྱུར། བདག་ཅག་གི་ལུས་ལ་གཟི་བྱིན་དང་། དཔལ་དང་། ཕུན་སུམ་ཚོགས་པ་ཡང་འཇུག་པར་འགྱུར་རོ། །བཙུན་པ་
བཅོམ་ལྡན་འདས་སའི་ལྷ་མོ་བརྟན་མ་བདག་ཆོས་བདུད་རྩིའི་ཁུ་བ་འདིས་ཚིམ་པར་གྱུར། གཟི་བྱིན་དང་། །སྟོབས་དང་། བརྩོན་འགྲུས་དང་། མཐུ་དང་། ཤུགས་ཆེན་པོ་ཐོབ་པར་གྱུར་ན། ས་ཆེན་པོ་དཔག་ཚད་སྟོང་ཕྲག་བདུན་པའི་འཛམ་བུའི་
གླིང་འདི་སའི་བཅུད་ཆེན་པོས་རྣམ་པར་འཕེལ་བར་འགྱུར་རོ། །ས་ཆེན་པོ་གཟི་བྱིན་དང་རབ་ཏུ་ལྡན་པར་འགྱུར་རོ། །བཙུན་པ་བཅོམ་ལྡན་འདས་ས་ལ་བརྟེན་པའི་སེམས་ཅན་འདི་དག་ཐམས་ཅད་ཀྱང་འཕེལ་ཞིང་རྒྱས་ལ་ཡངས་པར་འགྱུར། རྒྱ་ཆེན་པོར་ཡང་
འགྱུར་རོ། །ས་ལ་གནས་པའི་སེམས་ཅན་དེ་དག་ཆེན་པོར་གྱུར་ནས་ཀྱང་། ལོངས་སྤྱོད་དང་། ཡོངས་སུ་སྤྱོད་པ་སྣ་ཚོགས་ལ་སྤྱོད་པར་འགྱུར། བདེ་བ་དག་ཀྱང་མྱོང་བར་འགྱུར་རོ། །དེ་དག་ཐམས་ཅད་བཟའ་བ་དང་། བཏུང་བ་དང་བཅའ་བ་རྣམ་པ་སྣ་ཚོགས་
དང་། གོས་དང་། མལ་ཆ་དང་། སྟན་དང་། གནས་དང་། ཁང་པ་དང་། གཞལ་མེད་ཁང་དང་། སྐྱེད་མོས་ཚལ་དང་། ཆུ་བོ་དང་། རྫིང་དང་། ཆུ་མིག་དང་། མཚེའུ་དང་། མཚོ་དང་། ལྟེང་ཀ་དང་། འདི་ལྟ་བུའི་ཡོ་བྱད་བདེ་བ་རྣམ་པ་སྣ་ཚོགས་ས་ལ་
གནས་པ་ས་ལས་འབྱུང་བ་ས་ལ་རྟེན་པ་འདི་དག་ལ་སྤྱོད་པར་འགྱུར་རོ། །བཙུན་པ་བཅོམ་ལྡན་འདས་རྒྱུ་དེས་སེམས་ཅན་དེ་དག་ཐམས་ཅད་ཀྱིས་བདག་ལ་བྱས་པ་གཟོ་བར་བགྱིའོ། །གདོན་མི་འཚལ་བར་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་བསྟི་སྟང་དུ་

བགྱིས་ཏེ། མཉན་པར་བགྱི། བཀུར་སྟིར་བགྱི། བླ་མར་བགྱི། རིམ་གྲོར་བགྱི། མཆོད་པར་བགྱིའོ། །བཙུན་པ་བཅོམ་ལྡན་འདས་གང་གི་ཚེ་སེམས་ཅན་དེ་དག་ཆོས་སྨྲ་བའི་གན་དུ་མཆི་བའི་སླད་དུ། རིགས་ཐ་དད་པ་དང་། ཁྱིམ་
ཐ་དད་པ་དག་ནས་བྱུང་སྟེ་མཆིས་ནས། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པར་གྱུར་ལ། ཐོས་ནས་ཀྱང་རང་རང་གི་རིགས་དང་། ཁྱིམ་དང་། གྲོང་དང་། གྲོང་རྡལ་ཐ་དད་པ་དག་ཏུ་ཞུགས་ནས། རང་རང་གི་ཁྱིམ་ན་གནས་པ་
དག་ཕན་ཚུན་དུ་འདི་སྐད་ཅེས་བདག་ཅག་གིས་དེ་རིང་ཆོས་མཉན་པ་ཟབ་མོ་ཐོས་སོ། །དེ་རིང་བདག་ཅག་གིས་བསོད་ནམས་ཀྱི་ཕུང་པོ་བསམ་གྱིས་མི་ཁྱབ་པ་ཡོངས་སུ་བཟུང་ངོ་། །བདག་ཅག་གིས་ཆོས་མཉན་པ་དེས། དེ་བཞིན་གཤེགས་པ་བྱེ་བ་
ཁྲག་ཁྲིག་འབུམ་ཕྲག་དུ་མ་དག་མཉེས་པར་བྱས་སོ། །དེང་བདག་ཅག་གིས་ཆོས་མཉན་པ་འདིས་སེམས་ཅན་དམྱལ་བ་ལས་ཡོངས་སུ་ཐར་ཏོ། །དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ཡི་དགས་ཀྱི་ཡུལ་ལས་ཡོངས་སུ་ཐར་རོ། །
དེང་བདག་ཅག་གིས་ཆོས་མཉན་པ་འདིས་མ་འོངས་པའི་དུས་ན། ཚེ་རབས་འབུམ་ཕྲག་དུ་མར་ལྷ་དང་མིའི་སྐྱེ་བ་ཡོངས་སུ་བཟུང་བར་འགྱུར་རོ་ཞེས་གཏམ་ཟེར་བར་འགྱུར་རོ། །ཁྱིམ་ཐ་དད་པ་ན་གནས་པར་གྱུར་པ་དེ་དག་སེམས་ཅན་གཞན་དག་ལ། གསེར་
འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཐ་ན་དཔེ་གཅིག་ཙམ་བརྗོད་དམ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཐ་ན་ལེའུ་གཅིག་གམ། སྔོན་བྱུང་བ་གཅིག་གམ། ཐ་ན་བྱང་ཆུབ་སེམས་དཔའི་མིང་ངམ། དེ་བཞིན་གཤེགས་
པའི་མཚན་གཅིག་གམ། ཐ་ན་ཚིག་བཞི་པའི་ཚིགས་སུ་བཅད་པ་གཅིག་གམ། ཚིག་གཅིག་ཅིག་སེམས་ཅན་གཞན་དག་ལ་ཐོས་པར་བགྱིད་དམ། ཐ་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་མཚན་གཞན་དག་ལ་རབ་ཏུ་སྟོན་ཏམ། བཙུན་

པ་བཅོམ་ལྡན་འདས་གང་དང་གང་ན་སེམས་ཅན་རྣམ་པ་ཐ་དད་པ་དེ་དག་ཕྱོགས་རྣམ་པ་ཐ་དད་པ་དག་ཏུ་མདོ་སྡེའི་གཏན་ཚིགས་རྣམ་པ་སྣ་ཚོགས་འདི་ལྟ་བུ་འདི་དག་གཅིག་ལ་གཅིག་བརྗོད་དམ། ཐོས་པར་བགྱིད་དམ། གཏམ་རྒྱུད་བརྗོད་ན། བཙུན་པ་
བཅོམ་ལྡན་འདས་ས་ཕྱོགས་དེ་དག་ཐམས་ཅད་ཤིན་ཏུ་གཟི་བྱིན་དང་ལྡན་པ་དང་། ཤིན་ཏུ་སྣུམ་པར་འགྱུར་རོ། །ས་ཕྱོགས་དེ་དང་དེ་དག་ཏུ་སེམས་ཅན་དེ་དག་ཐམས་ཅད་ཀྱི་ཕྱིར། སའི་བཅུད་རྣམ་པ་སྣ་ཚོགས་དང་། ཡོ་བྱད་ཐམས་ཅད་རྒྱས་པར་སྐྱེ་བར་
འགྱུར། རྣམ་པར་འཕེལ་བར་འགྱུར། ཤིན་ཏུ་རྒྱས་པར་འགྱུར། སེམས་ཅན་དེ་དག་ཐམས་ཅད་ཀྱང་བདེ་བར་འགྱུར་རོ། །ནོར་ཆེ་བ་དང་། ལོངས་སྤྱོད་ཆེ་བ་དང་། སྦྱིན་པ་ལ་མོས་པར་འགྱུར། དཀོན་མཆོག་གསུམ་ལ་མངོན་པར་དད་པར་འགྱུར་རོ། །
དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་སའི་ལྷ་མོ་བརྟན་མ་ལ་འདི་སྐད་ཅེས་བཀའ་སྩལ་ཏོ། །སའི་ལྷ་མོ་སེམས་ཅན་གང་ལ་ལ་དག །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཐ་ན་ཚིག་གཅིག་ཉན་ན། དེ་དག་མིའི་འཇིག་
རྟེན་འདི་ནས་ཤི་འཕོས་ནས་སུམ་ཅུ་རྩ་གསུམ་ལྷའི་རིས་ཀྱི་ནང་དུ་ལྷའི་རིས་གང་ཡང་རུང་བ་ཞིག་ཏུ་སྐྱེ་བར་འགྱུར་རོ། །སའི་ལྷ་མོ་སེམས་ཅན་གང་ལ་ལ་དག །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་དག་ལ་མཆོད་པའི་ཕྱིར། གནས་དེ་དག་ལེགས་
པར་བརྒྱན་པར་བྱེད་དམ། ཐ་ན་གདུགས་གཅིག་གམ། བ་དན་གཅིག་གམ། རས་བཅོས་བུ་གཅིག་གིས་གཡོགས་ན། སའི་ལྷ་མོ་རྟག་ཏུ་བརྒྱན་པའི་གནས་དེ་དག་འདོད་པ་ན་སྤྱོད་པའི་ལྷའི་རིས་བདུན་པོ་དེ་དག་ཏུ་ལྷའི་རིན་པོ་ཆེ་སྣ་བདུན་གྱི་གཞལ་
མེད་ཁང་རྒྱན་ཐམས་ཅད་ཀྱིས་ལེགས་པར་བརྒྱན་པ་དག་ཏུ་གནས་པར་འགྱུར་རོ། །གང་གི་ཚེ་སེམས་ཅན་དེ་དག་མིའི་འཇིག་རྟེན་འདི་ནས་ཤི་འཕོས་ཏེ། རིན་པོ་ཆེ་སྣ་བདུན་གྱི་གཞལ་མེད་ཁང་དེ་དག་ཏུ་སྐྱེ་བ་དེའི་ཚེ། སའི་ལྷ་མོ་རིན་པོ་ཆེ་སྣ་བདུན་གྱི་གཞལ་

མེད་ཁང་རེ་རེར་ཡང་ལན་བདུན་བདུན་དུ་སྐྱེ་བར་འགྱུར་རོ། །ལྷའི་བདེ་བ་བསམ་གྱིས་མི་ཁྱབ་པ་དག་ཀྱང་མྱོང་བར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་སའི་ལྷ་མོ་བརྟན་མས་འདི་སྐད་ཅེས་གསོལ་
ཏོ། །བཙུན་པ་བཅོམ་ལྡན་འདས་དེས་ན་སའི་ལྷ་མོ་བརྟན་མ་བདག་དགེ་སློང་ཆོས་སྨྲ་བ། ཆོས་ཀྱི་ཁྲི་སྟན་ལ་མཆིས་པ་དེའི་ཚེ་ཆོས་ཀྱི་སྟན་གྱི་འོག་ལོགས་ཀྱི་ས་ཕྱོགས་དེ་དང་དེ་དག་ཏུ་གནས་པར་བགྱིའོ། །ཅི་ནས་ཀྱང་སངས་རྒྱས་འབུམ་ཕྲག་དག་
ལ་དགེ་བའི་རྩ་བ་བསྐྲུན་པའི་སེམས་ཅན་དེ་དག་གི་དོན་གྱི་སླད་དུ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛམ་བུའི་གླིང་དུ་ཡུན་རིང་དུ་གནས་ཤིང་མྱུར་དུ་ནུབ་པར་མི་འགྱུར་བ་དང་། སེམས་ཅན་རྣམས་ཀྱང་གསེར་འོད་དམ་པ་མདོ་སྡེའི་དབང་
པོའི་རྒྱལ་པོ་འདི་ཉན་པར་འགྱུར་བ་དང་། མ་འོངས་པའི་དུས་ན་བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་ལྷ་དང་། མིའི་བདེ་བ་བསམ་གྱིས་མི་ཁྱབ་པ་མྱོང་བར་འགྱུར་བ་དང་། དེ་བཞིན་གཤེགས་པ་དང་འགྲོགས་པར་འགྱུར་བ་དང་། མ་འོངས་པའི་
དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བ་དང་། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་ཤིན་ཏུ་རྒྱུན་ཆད་པར་འགྱུར་བར་
ལུས་མི་གདའ་བར་བགྱིས་ཏེ། དགེ་སློང་ཆོས་སྨྲ་བ་དེའི་རྐང་པ་ལ་ཡན་ལག་གི་དམ་པ་མགོས་བརྟེན་པར་བགྱིའོ། །དེ་ནས་སའི་ལྷ་མོ་བརྟན་མས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་སྔགས་ཀྱི་སྙིང་པོ་ཞིག་མཆིས་པ་འདི་ལྷ་དང་མི་
ཐམས་ཅད་ལ་ཕན་པ་དང་བདེ་བར་འགྱུར་བ་སྟེ། གང་སྐྱེས་པའམ། བུད་མེད་དམ། འཁོར་བཞི་པོ་གང་ལ་ལ་ཞིག་གིས། བདག་མངོན་སུམ་དུ་མཐོང་བར་འདོད་པ་དང་། ནོར་དང་། ནོར་བུ་རིན་པོ་ཆེ་དང་། དབྱིག་ལ་སོགས་པ་འདོད་པ་དང་།

སྨན་བཟང་པོས་ཚེ་རིང་ཞིང་ནད་མེད་པར་འདོད་པ་དང་། ཕས་ཀྱི་དགྲ་ཐམས་ཅད་དང་། ཕྱིར་རྒོལ་བ་ཐམས་ཅད་འཇིལ་བར་འདོད་ན། གནས་དབེན་པར་དཀྱིལ་འཁོར་བྱས་ཏེ། ཁྲུས་བྱས་གོས་སར་པ་བགོས་ཏེ། རྩྭ་བཏིང་བའི་སྟེང་དུ་འདུག་
ནས། སྐུ་གཟུགས་རིང་བསྲེལ་ཅན་གྱི་མདུན་ནམ། མཆོད་རྟེན་རིང་བསྲེལ་ཅན་གྱི་མདུན་དུ། མེ་ཏོག་དང་། བདུག་པ་དང་། ཞལ་ཟས་སྣ་ཚོགས་ཀྱིས་མཆོད་དེ། སྐར་མ་རྒྱལ་དང་སྦྱར་བའི་ཚེས་བརྒྱད་ལ་སེམས་རྩེ་གཅིག་གིས་གཟུངས་
སྔགས་འདི་བཟླས་པས་སྤྱན་དྲངས་པར་འགྱུར་ཏེ། སྔགས་ལ། ཏདྱ་ཐཱ། ཙི་ལི་ཙི་ལི། ཙུ་རུ་ཙུ་རུ། ཀུ་རུ་ཀུ་རུ། ཀུ་ཊུ་ཀུ་ཊུ། ཏོ་ཊུ་ཏོ་ཊུ། བ་ཧ་བ་ཧ། བ་རི་ཤེ། བ་རི་ཤེ་སྭཱ་ཧཱ། བཅོམ་ལྡན་འདས་འཁོར་བཞི་པོ་གང་ལ་ལ་ཞིག་གིས། བདག་སྤྱན་
དྲང་བའི་ཕྱིར་སྔགས་ཀྱི་ཚིག་འདི་བརྒྱ་རྩ་བརྒྱད་བཟླས་ན། བདག་དེའི་གན་དུ་མཆི་བར་བགྱིའོ། །གཞན་ཡང་བཅོམ་ལྡན་འདས་སེམས་ཅན་གང་ལ་ལ་ཞིག་བདག་དང་མཇལ་ཞིང་སྨྲ་བར་འཚལ་ན། ཆོ་ག་སྔ་མའི་ཚུལ་དུ་བཤམས་ཏེ། སྔགས་འདི་
བཟླས་པར་བྱའོ། །ཏདྱ་ཐཱ། ཨཉྩ་ནི། ཀྱ་ལིཀྵ་ནི། ཤི་ཤི་དྷ་རི། ཧ་ཧ། ཧི་ཧི། ཀུ་རུ་བ་རེ་སྭཱ་ཧཱ། བཅོམ་ལྡན་འདས་སྔགས་ཀྱི་ཚིག་འདི་བརྒྱ་རྩ་བརྒྱད་བཟླས་ཏེ། སྔགས་སྔ་མ་བཟླས་པ་བྱས་ན། དེའི་མདུན་དུ་ལུས་བསྟན་ཏེ། ངེས་པར་
བསམ་པ་རྫོགས་པར་བགྱིའོ། །གང་སྔགས་འདི་ཟློས་པར་འདོད་པས། སྔར་ལུས་བསྲུང་བའི་ཕྱིར་སྔགས་འདི་བརྗོད་དོ། །ཏདྱ་ཐཱ། ཤི་རི་ཤི་རི། བཱ་ཤ་ཀ་ཏི། ཏ་ཏི། ཀུཊྚི། པཱུ་ཏ། པཱུ་དེ་རི། པུ་དེ་རི་ཊི་ཊེ། པ་ཊི་ཀུ་ཀུ་ཊི། ཀ་པ་ཙི་ལི་སྭཱ་ཧཱ།
བཅོམ་ལྡན་འདས་གཟུངས་སྔགས་འདི་བསྒྲུབ་པའི་ཚེ་ཚོན་སྐུད་སྣ་ལྔ་ལ་སྔགས་ལན་རེ་གདབ་ཅིང་མདུད་པ་རེ་རེ་བཅིང་ངོ་། །དེ་འདྲ་བ་ལན་ཉི་ཤུ་རྩ་གཅིག་བཟླས་ཏེ། དཔུང་པ་གཡོན་པ་ལ་བཏགས་ན་འཇིགས་པ་ཐམས་ཅད་བསལ་ཏེ། ལུས་བསྲུངས་པར་

འགྱུར་རོ། །སེམས་མི་གཡེང་བར་སྔགས་འདི་བཟླས་ན། བསམ་པ་ཐམས་ཅད་འགྲུབ་པར་འགྱུར་རོ། །བདག་གི་ཚིག་འདི་མི་བསླུ་བར་ནི་སངས་རྒྱས་དཀོན་མཆོག་དང་། ཆོས་དཀོན་མཆོག་དང་། དགེ་འདུན་དཀོན་མཆོག་རྣམས་བདག་
ལ་མངོན་དུ་གཟིགས་ཤིང་དགོངས་པར་གསོལ། དེ་ནས་བཅོམ་ལྡན་འདས་ཀྱིས་སའི་ལྷ་མོ་བརྟན་མ་ལ་ལེགས་སོ་ཞེས་བཀའ་སྩལ་ཏེ། གང་ཁྱོད་ཀྱི་བདེན་པའི་སྔགས་ཀྱི་ཚིག་འདིས་མདོ་སྡེའི་དབང་པོ་འདི་དང་། ཆོས་སྨྲ་བ་དེ་ལ་བསྲུང་བ་བྱས་པ་དེ་ནི་
ལེགས་སོ་ལེགས་སོ། །དེའི་ཕྱིར་ཁྱོད་ཀྱང་བསོད་ནམས་ཀྱི་ཚོགས་དཔག་ཏུ་མེད་པ་དང་ལྡན་པར་འགྱུར་རོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། སའི་ལྷ་མོ་བརྟན་མའི་ལེའུ་ཞེས་བྱ་སྟེ་བཅྭ་བརྒྱད་པའོ།། །།དེ་ནས་
གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་ལྷན་ཅིག་ཏུ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བགོས་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་
སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ད་ལྟར་དང་། མ་འོངས་པའི་དུས་ན། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་
སམ། དགོན་པའི་ཕྱོགས་སམ། རིའི་སྨན་ལྗོངས་སམ། ཕོ་བྲང་འཁོར་གང་དུ་འབྱུང་བར་འགྱུར་བ་དེར། བཙུན་པ་བཅོམ་ལྡན་འདས་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་བདག་གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་པོ་དེ་དག་དང་ལྷན་ཅིག་ཏུ་
གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། དགོན་པའི་ཕྱོགས་སམ། རིའི་སྨན་ལྗོངས་སམ། ཕོ་བྲང་འཁོར་དེར་མཆི་བར་བགྱིའོ། །ལུས་མི་གདའ་བར་བགྱིས་ཏེ། དགེ་སློང་ཆོས་སྨྲ་བ་དེ་བསྲུང་བར་བགྱིའོ། །ཡོངས་སུ་བསྐྱབ་པ་དང་།

ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཆད་པ་སྤང་བ་དང་། ཞི་བ་དང་བདེ་ལེགས་སུ་འགྱུར་བར་བགྱིའོ། །སྐྱེས་པའམ། བུད་མེད་དམ། ཁྱེའུ་འམ། བུ་མོ་ཆོས་ཉན་པ་དེ་དག་ཐམས་ཅད་དང་། གང་སུ་དག་གསེར་འོད་དམ་པ་མདོ་སྡེའི་དབང་
པོའི་རྒྱལ་པོ་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཉན་པ་དང་། ཐ་ན་ཚིག་གཅིག་གམ། ཐ་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་བྱང་ཆུབ་སེམས་དཔའི་མིང་གཅིག་གམ། དེ་བཞིན་གཤེགས་པའི་མཚན་གཅིག་
ཙམ་ཐོས་པར་གྱུར་ཏེ། གཟུང་བ་དང་། ཐ་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་མིང་ཐོས་པར་གྱུར་ཏེ། གཟུང་བ་དེ་དག་ཐམས་ཅད་ཀུན་ཏུ་བསྲུང་བར་བགྱིའོ། །ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་།
ཞི་བ་དང་། བདེ་ལེགས་སུ་འགྱུར་བར་བགྱིའོ། །རིགས་དེ་དག་དང་། ཁྱིམ་དེ་དག་དང་། གྲོང་དེ་དག་དང་། གྲོང་ཁྱེར་དེ་དག་དང་། གྲོང་རྡལ་དེ་དག་དང་། དགོན་པ་དེ་དག་དང་། ཕོ་བྲང་འཁོར་དེ་དག་ཀྱང་ཀུན་དུ་བསྲུང་བར་བགྱིའོ། །ཡོངས་སུ་བསྐྱབ་པ་དང་། ཡོངས་
སུ་གཟུང་བ་དང་། ཡོངས་སུ་བསྐྱང་བ་དང་། ཆད་པ་སྤང་བ་དང་། ཞི་བ་དང་། བདེ་ལེགས་སུ་འགྱུར་བར་བགྱིའོ། །བཙུན་པ་བཅོམ་ལྡན་འདས་རྒྱུ་གང་གིས་བདག་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་ཞེས་མིང་དུ་ཆགས་པར་གྱུར་ཅེ་ན། འདི་ནི་བཙུན་པ་
བཅོམ་ལྡན་འདས་ཉིད་ཀྱི་མངོན་སུམ་ལགས་ཏེ། བཙུན་པ་བཅོམ་ལྡན་འདས་བདག་གིས་ཆོས་ཐམས་ཅད་འཚལ་ཏོ། །ཆོས་ཐམས་ཅད་ཡོངས་སུ་འཚལ་ཏོ། །ཆོས་ཐམས་ཅད་ཁོང་དུ་ཆུད་དོ། །ཆོས་ཐམས་ཅད་ཇི་སྙེད་པ་དང་། ཆོས་ཐམས་ཅད་ཇི་ལྟ་བ་
དང་། ཆོས་ཐམས་ཅད་གནས་པ་གང་ལགས་པ་དང་། ཆོས་ཐམས་ཅད་གང་དག་ལགས་པ་དང་། ཆོས་ཐམས་ཅད་ཀྱི་རིགས་གང་དག་ལགས་པ་དང་། བཙུན་པ་བཅོམ་ལྡན་འདས་ཆོས་ཐམས་ཅད་བདག་ལ་མངོན་སུམ་མོ། །བཙུན་པ་བཅོམ་ལྡན་འདས་ཆོས་

ཐམས་ཅད་ལ་བདག་གི་ཡེ་ཤེས་སྣང་བ་བསམ་གྱིས་མི་ཁྱབ་བོ། །ཡེ་ཤེས་ཀྱི་གསལ་བ་བསམ་གྱིས་མི་ཁྱབ་བོ། །ཡེ་ཤེས་ཀྱི་རྒྱུ་བ་བསམ་གྱིས་མི་ཁྱབ་བོ། །ཡེ་ཤེས་ཀྱི་ཕུང་པོ་བསམ་གྱིས་མི་ཁྱབ་བོ། །བཙུན་པ་བཅོམ་ལྡན་འདས་ཆོས་ཐམས་
ཅད་ལ་བདག་གི་ཡེ་ཤེས་ཀྱི་ཡུལ་འཇུག་པ་བསམ་གྱིས་མི་ཁྱབ་བོ། །བཙུན་པ་བཅོམ་ལྡན་འདས་ཇི་ལྟར་བདག་ཆོས་ཐམས་ཅད་ཡང་དག་པར་འཚལ་བ་དང་། ཡང་དག་པར་ཡོངས་སུ་བརྟགས་པ་དང་། ཡང་དག་པར་ཡོངས་སུ་འཚལ་བ་དང་། ཡང་དག་པར་
རྣམ་པར་བལྟས་པ་དང་། ཡང་དག་པར་ཁོང་དུ་ཆུད་པའི་རྒྱུ་དེས་ན། བཙུན་པ་བཅོམ་ལྡན་འདས་བདག་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་ཞེས་མིང་དུ་ཆགས་སོ། །བཙུན་པ་བཅོམ་ལྡན་འདས་བདག་གིས་དགེ་སློང་ཆོས་སྨྲ་བ་དེའི་ཚིག་བརྒྱན་པར་བགྱི་བའི་སླད་
དུ་སྤོབས་པ་ཉེ་བར་བསྒྲུབ་པར་བགྱིའོ། །ཅི་ནས་དགེ་སློང་ཆོས་སྨྲ་བ་དེའི་ལུས་མི་ངལ་བར་འགྱུར་བ་དང་། ལུས་ཀྱི་དབང་པོ་བདེ་བར་འགྱུར་བ་དང་། རབ་ཏུ་དགའ་བ་སྐྱེ་བར་འགྱུར་བ་དང་། གང་གི་སླད་དུ་སངས་རྒྱས་འབུམ་ཕྲག་དག་ལ་དགེ་བའི་རྩ་བ་བསྐྲུན་པའི་
སེམས་ཅན་རྣམས་ཀྱི་དོན་གྱི་སླད་དུ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛམ་བུའི་གླིང་དུ་ཡུན་རིང་དུ་གནས་ཤིང་། མྱུར་དུ་ནུབ་པར་མི་འགྱུར་བ་དང་། སེམས་ཅན་རྣམས་ཀྱང་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པར་འགྱུར་བ་དང་།
ཡེ་ཤེས་ཀྱི་ཕུང་པོ་བསམ་གྱིས་མི་ཁྱབ་པ་ཐོབ་པར་འགྱུར་བ་དང་། ཤེས་རབ་དང་ལྡན་པར་འགྱུར་བ་དང་། བསོད་ནམས་ཀྱི་ཕུང་པོ་རབ་ཏུ་འཛིན་པར་འགྱུར་བ་དང་། མ་འོངས་པའི་དུས་ན་བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་ལྷ་དང་། མིའི་བདེ་བ་བསམ་
གྱིས་མི་ཁྱབ་པ་དག་མྱོང་བར་འགྱུར་བ་དང་། དེ་བཞིན་གཤེགས་པ་དང་འགྲོགས་པར་འགྱུར་བ་དང་། མ་འོངས་པའི་དུས་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བ་དང་། སེམས་ཅན་དམྱལ་བ་དང་། དུད་

འགྲོའི་སྐྱེ་གནས་དང་། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་རབ་ཏུ་ཞི་བར་བགྱི་བའི་སླད་དུ། དེའི་སྤུའི་བུ་ག་རྣམས་སུ་གཟི་བྱིན་སྩལ་བར་བགྱིའོ། །དེའི་ལུས་ལ་མཐུ་དང་། སྟོབས་དང་། བརྩོན་འགྲུས་ཆེན་པོ་བསྐྱེད་པར་བགྱིའོ། །དེའི་ཡེ་ཤེས་ཀྱི་
སྣང་བ་བསམ་གྱིས་མི་ཁྱབ་པར་བགྱིའོ། །དེའི་དྲན་པ་ཁོང་དུ་ཆུད་པར་བགྱིའོ། །དེ་ཆེར་སྤྲོ་བར་བགྱིའོ། །དེ་ནས་གནོད་སྦྱིན་བདག་པོ་ཆེན་པོ་ཡང་དག་ཤེས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་གཟུངས་སྔགས་ཤིག་མཆིས་པ་འདི་སེམས་
ཅན་ཐམས་ཅད་ལ་ཕན་པ་དང་སྙིང་བརྩེ་བའི་ཕྱིར། བཅོམ་ལྡན་འདས་ཀྱི་སྤྱན་སྔར་བདག་ཉིད་ཀྱིས་སྔགས་འདི་གདོན་པར་བགྱིའོ། །སྔགས་ལ། ན་མོ་བུདྡྷཱ་ཡ། ན་མོ་དྷརྨཱ་ཡ། ན་མཿསཾ་གྷཱ་ཡ། ན་མོ་བྲཧྨ་ཡ། ན་མ་ཨིནྡྲཱ་ཡ། ན་མཤྩ་ཏུར་ཎྃ། མ་ཧཱ་རཱ་
ཛཱ་ནཱྃ། ཏདྱ་ཐཱ། ཧི་ལི་ཧི་ལི། མི་ལི་མི་ལི། གཽ་རི། མ་ཧཱ་གཽ་རི། གནྡྷ་རི། མ་ཧཱ་གནྡྷ་རི། དྲི་མི་ཌི། མ་ཧཱ་དྲི་མི་ཌི། དནྜ་ཁུ་ཁུན་ཏི། ཧ་ཧ་ཧ་ཧ། ཧི་ཧི་ཧི་ཧི། ཧུ་ཧུ་ཧུ་ཧུ། ཧ་ལོ་དྷ་མེ། གུ་དྷ་མེ། ཙ་ཙ་ཙ་ཙ། ཙི་ཙི་ཙི་ཙི། ཙུ་ཙུ་ཙུ་ཙུ། ཙཎྜེ་ཤྭ་ར། ཤི་ཁ་
ར། ཤི་ཁ་ར། ཨུ་ཏིཥྛ་ཧེ་བྷ་ག་བཱན། སཾ་བིད་ཛྙཱ་ཡེ་སྭཱ་ཧཱ། གང་ལ་ལ་ཞིག་གིས་རིག་སྔགས་འདི་འཆང་ཞིང་འཛིན་ན་བདག་གིས་དེ་ལ་འཚོ་བའི་ཡོ་བྱད་བསོད་སྙོམས་དང་། གོས་དང་། མེ་ཏོག་དང་། འབྲས་བུ་དང་། ནོར་དང་། རིན་པོ་ཆེ་ལ་སོགས་པ་ཐམས་ཅད་
སྩལ་བར་བགྱིའོ། །གང་ལ་ལ་ཞིག་བུ་ཕོ་མོ་སྨོས་པ་དང་། བྲན་ཕོ་དང་། བྲན་མོ་དང་། གསེར་དང་། དངུལ་དང་། རིན་པོ་ཆེ་དང་། རྒྱན་ལ་སོགས་པའི་ཡོ་བྱད་འདོད་ན་ཡང་། བདག་གིས་དེ་ལ་ཡིད་བཞིན་དུ་སོ་སོར་སྩལ་བར་བགྱིའོ། །རིག་སྔགས་འདིའི་མཐུ་དང་། གཟི་
བརྗིད་ཆེན་པོ་དང་ལྡན་པའི་ཕྱིར། གང་གསང་སྔགས་འདི་ཟློས་པའི་ཚེ། བདག་མྱུར་དུ་དེའི་གན་དུ་མཆི་སྟེ། ཅི་ཡང་ཐོགས་པ་མེད་པར་འགྲུབ་པར་བགྱིའོ། །གསང་སྔགས་འདི་སྒྲུབ་པའི་ཆོ་ག་ནི། ཐོག་མར་གནོད་སྦྱིན་གྱི་བདག་པོ་ཆེན་པོ་ཡང་དག་ཤེས་ཀྱི་གཟུགས། སྲིད་

ཆག་བཞི་པའམ། ལྔ་པ་ལག་ན་དགྲ་སྟ་ཐོགས་པ་བྲིས་པའི་མདུན་དུ་དཀྱིལ་འཁོར་གྲུ་བཞིར་བྱས་པའི་གྲྭ་བཞིར་སྦྲང་རྩིའམ། བུ་རམ་ཆུས་གང་བའི་བུམ་པ་བཞི་ཞོག་ལ། བྱུག་པ་དང་། ཕྱེ་མ་དང་། བདུག་པ་བསྲེག་ཅིང་། མེ་ཏོག་གི་ཕྲེང་
བས་ཀྱང་མཆོད་པར་བྱའོ། །ཡང་དཀྱིལ་འཁོར་དེའི་མདུན་དུ་སྦྱིན་སྲེག་གི་ཐབ་ཁུང་བརྐོས་པ་ལ་དུད་པ་མེད་པའི་མེའི་ནང་དུ། མར་དང་ཡུངས་ཀར་དུ་བསྲེས་ལ། སྔགས་ལན་རེ་བཟླས་ཤིང་ཐབ་དེའི་ནང་དུ་སྦྱིན་སྲེག་བྱའོ། །དེ་ལྟར་ལན་བརྒྱ་རྩ་བརྒྱད་
བསྲེགས་པ་དང་། བདག་དེ་ལ་ལུས་མངོན་པར་བསྟན་ཏེ། ཁྱོད་ཅི་འདོད་ཅེས་དྲི་བར་བྱའོ། །དེ་ནས་སྒྲུབ་པ་པོ་དེས་ཀྱང་ཅི་འདོད་པ་དེ་ལ་སྨྲོས་ཤིག་དང་། ཅི་འདོད་པ་དེ་དག་སྦྱིན་པར་བྱེད་དོ། །གང་གསེར་དངུལ་འདོད་པ་དང་། གཏེར་ཚོལ་བར་འདོད་པ་དང་། ལྷའི་དྲང་
སྲོང་འདོད་པ་ཡང་འགྲུབ་སྟེ། ནམ་མཁའ་ལ་འགྲོའོ། །གཞན་ཡང་ལྷའི་མིག་དང་། ཕ་རོལ་གྱི་སེམས་ཤེས་པ་ལ་སོགས་པའི་མངོན་པར་ཤེས་པ་ཐམས་ཅད་ཀྱང་ཐོབ་པར་བྱེད་དོ། །སེམས་ཅན་ཐམས་ཅད་ལ་ཡིད་བཞིན་དུ་དབང་སྒྱུར་ཞིང་ཉོན་མོངས་པ་ཐམས་ཅད་
ཀྱི་རྒྱུན་བཅད་དེ། རྣམ་པར་གྲོལ་བ་ཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་ལ་ལེགས་སོ་ཞེས་བཀའ་སྩལ་ཏེ་ལེགས་སོ་ལེགས་སོ། །གང་ཁྱོད་ཀྱིས་སེམས་ཅན་ཐམས་ཅད་ལ་ཕན་ཞིང་བདེ་བ་དང་། དམ་པའི་
ཆོས་འདི་ཡོངས་སུ་བསྲུང་བའི་ཕྱིར། གསང་སྔགས་ཀྱི་ཚིག་འདི་སྨྲས་པས་བསོད་ནམས་དཔག་ཏུ་མེད་པ་འཕེལ་བར་འགྱུར་རོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས་གནོད་སྦྱིན་གྱི་དབང་པོ་ཡང་དག་ཤེས་ཀྱི་ལེའུ་ཞེས་བྱ་སྟེ་བཅུ་དགུ་པའོ།། །།
དེ་ནས་སའི་ལྷ་མོ་བརྟན་མ་ཞེས་བྱ་བ་དེ་འཁོར་མང་པོ་དེའི་ནང་ན་འདུག་པ་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། ཐལ་མོ་སྦྱར་བ་བཏུད་དེ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ཡུལ་འཁོར་ན་མིའི་རྒྱལ་པོ་བྱེད་པས་ཡང་དག་པའི་

ཆོས་མི་སྤྱོད་ན། ཡུལ་གྱི་སྲིད་འཛིན་ཅིང་སེམས་ཅན་མང་པོ་ལ་བདེ་བ་དང་རང་གི་ལུས་རྒྱལ་ཐབས་མཐོན་པོའི་ས་ན་ཡུན་རིང་པོར་གནས་པར་མི་འགྱུར་བས། བཅོམ་ལྡན་འདས་ཐུགས་རྗེ་དང་ལྡན་པས་རྒྱལ་པོའི་བསྟན་བཅོས་ཡང་དག་པས། ཡུལ་གྱི་སྲིད་ཇི་ལྟར་འཛིན་པ་བཤད་པར་
གསོལ། དེ་ཐོས་པས་མིའི་རྒྱལ་པོ་རྣམས་ཆོས་དེ་ལྟ་བུས་འཇིག་རྟེན་སྐྱོང་ཞིང་རྒྱལ་ཐབས་དམ་པ་ལ་ཡུན་རིང་དུ་གནས་པས་བདེ་བར་འགྱུར་བ་དང་། ཡུལ་འཁོར་གྱི་སྐྱེ་བོ་དེ་དག་ཐམས་ཅད་ཀྱང་ཡོངས་སུ་བདེ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་འཁོར་མང་པོའི་
ཚོགས་ཀྱི་ནང་ན་སའི་ལྷ་མོ་ལ་འདི་སྐད་ཅེས་བཀའ་སྩལ་ཏོ། །སའི་ལྷ་མོ་ཁྱོད་དེའི་ཕྱིར་ཤིན་ཏུ་ལེགས་པར་ཉོན་ཅིག །སྔོན་བྱུང་བ་འདས་པའི་དུས་ན་རྒྱལ་པོ་སྟོབས་ཀྱི་དབང་པོའི་ཏོག་ཅེས་བྱ་བ་ལ་བུ་མཛེས་པའི་ཏོག་ཅེས་བྱ་བ་དེ། སྤྱི་བོ་ནས་དབང་བསྐུར་ནས་རིང་པོར་མ་ལོན་པ་
ཞིག་ན། ཡབ་མཆོག་གི་རྒྱལ་པོ་དབང་པོའི་ཏོག་ལས་བླངས་པ། རྒྱལ་པོའི་བསྟན་བཅོས་ལྷའི་དབང་པོའི་དམ་ཚིག་ཅེས་བྱ་བ་ཞིག་ཡོད་དེ། ངས་སྔོན་རྒྱལ་པོའི་བསྟན་བཅོས་ལྷའི་དབང་པོའི་དམ་ཚིག་དེས་ལོ་ཉི་ཁྲིའི་བར་དུ་རྒྱལ་པོ་ཉིད་བྱས་པར་གྱུར་ཏེ། ཐ་ན་སེམས་ཀྱི་སྐད་
ཅིག་གཅིག་ཙམ་གྱི་ཚོད་ཀྱང་སྔོན་ཆོས་མ་ཡིན་པའི་ཕྱོགས་འགའ་ཞིག་ལ་གནས་པར་མ་ཤེས་སོ། །བུ་རྒྱལ་པོའི་བསྟན་བཅོས་ལྷའི་དབང་པོའི་དམ་ཚིག་ཅེས་བྱ་བ་དེ་གང་ཞེ་ན། དེ་ནས་རིགས་ཀྱི་ལྷ་མོ་དེའི་ཚེ་དེའི་དུས་ན་རྒྱལ་པོ་སྟོབས་ཀྱི་དབང་པོའི་ཏོག་གིས། བུ་རྒྱལ་པོ་
མཛེས་པའི་ཏོག་ལ། རྒྱལ་པོའི་བསྟན་བཅོས་ལྷའི་དབང་པོའི་དམ་ཚིག་ཅེས་བྱ་བ་ཚིགས་སུ་བཅད་པ་འདི་དག་གིས། རྒྱ་ཆེར་ཡང་དག་པར་རབ་ཏུ་བསྟན་ཏོ། །སེམས་ཅན་ཀུན་ལ་ཕན་བྱེད་པ། །ཐེ་ཚོམ་ཐམས་ཅད་གཅོད་པ་པོ། །ཉེས་བྱས་ཐམས་ཅད་འཇིག་བྱེད་
པ། །རྒྱལ་པོའི་བསྟན་བཅོས་བཤད་པར་བྱ། །རྒྱལ་པོ་ཐམས་ཅད་སོ་སོ་ནས། །དགའ་བའི་སེམས་སུ་འགྱུར་བྱོས་ལ། །ལྷ་ཡི་དབང་པོའི་དམ་ཚིག་ཀུན། །ཐལ་མོ་སྦྱར་ཏེ་མཉན་པར་བྱོས། །རྡོ་རྗེའི་འབྱུང་གནས་རི་དབང་འདིར། །ལྷ་ཡི་དབང་པོ་འདུས་པ་ན། །ཚངས་དབང་ལ་ནི་དྲི་བའི་ཕྱིར། །འཇིག་རྟེན་

སྐྱོང་བ་རྣམས་ཀྱང་ལངས། །ཁྱོད་ནི་ལྷ་གཙོ་ཚངས་པ་སྟེ། །ཁྱོད་ནི་ལྷ་རྣམས་དབང་ཕྱུག་ལགས། །ཁྱོད་ནི་བདག་ཅག་ཐེ་ཚོམ་གཅོད། །བདག་ཅག་དོགས་པ་བཅད་དུ་གསོལ། །མིར་སྐྱེས་པ་ཡི་རྒྱལ་པོ་ལ། །ཇི་ལྟ་བུར་ན་ལྷ་ཞེས་བགྱི། །གང་གི་རྒྱུས་ན་རྒྱལ་
པོ་ལ། །ལྷ་སྲས་ཞེས་ནི་བགྱི་བར་འགྱུར། །གལ་ཏེ་ལྷ་ནི་ཇི་ལྟ་བུར། །མི་ཡི་འཇིག་རྟེན་འདིར་སྐྱེ་ཞིང་། །མི་བདག་གྱུར་ཏེ་མི་རྣམས་ལ། །རྒྱལ་པོ་ཉིད་ནི་བགྱིད་པར་འགྱུར། །འཇིག་རྟེན་སྐྱོང་བས་ཚངས་དབང་ལ། །དེ་སྐད་ཡོངས་སུ་དྲིས་པ་དང་། །ལྷ་ཡི་གཙོ་བོ་ཚངས་པ་དེས། །
འཇིག་རྟེན་སྐྱོང་ལ་འདི་སྐད་སྨྲས། །དེ་ལྟར་འཇིག་རྟེན་སྐྱོང་རྣམས་ཀྱིས། །དེ་ལྟར་བདག་ལ་དྲིས་པས་ན། །སེམས་ཅན་ཀུན་ལ་ཕན་པའི་ཕྱིར། །བསྟན་བཅོས་དམ་པ་ཁོ་བོས་བསྟན། །མི་ཡི་གནས་སུ་སྐྱེས་པ་ནི། །རྒྱལ་པོ་རྣམས་ཀྱི་སྐྱེ་བ་དང་། །རྒྱུ་གང་གིས་ན་ཡུལ་རྣམས་སུ། །
རྒྱལ་པོར་གྱུར་པ་བཤད་པར་བྱ། །ལྷ་དབང་རྣམས་ཀྱི་བྱིན་བརླབས་ཀྱིས། །མ་ཡི་རུམ་དུ་འཇུག་འགྱུར་ཏེ། །ལྷ་ཡིས་སྔར་ནི་བྱིན་བརླབས་ནས། །ཕྱི་ནས་མངལ་དུ་འཇུག་པར་འགྱུར། །མི་ཡི་འཇིག་རྟེན་སྐྱེས་ཀྱང་ནི། །མི་ཡི་དབང་པོར་གྱུར་པ་ཡིན། །ལྷ་ལས་སྐྱེས་པར་གྱུར་
པས་ན། །དེ་ནི་ལྷ་ཡི་སྲས་ཞེས་བྱ། །ཁྱོད་ནི་ལྷ་ཀུན་བུ་ཡིན་ཞེས། །སུམ་ཅུ་རྩ་གསུམ་ལྷ་དབང་གིས། །རྒྱལ་པོའི་སྐལ་བ་བྱིན་ནས་ནི། །མི་རྣམས་ཀྱི་ནི་དབང་པོར་སྤྲུལ། །ཉེས་པར་བྱས་པ་རྣམས་འགོག་པ། །ཆོས་མ་ཡིན་པ་གཞིག་པ་དང་། །སེམས་ཅན་ལེགས་བྱེད་
དགོད་པ་དང་། །ལྷ་ཡི་གནས་སུ་དགྱེ་བའི་ཕྱིར། །མི་ཡི་དབང་པོ་མི་ཤས་དང་། །ལྷ་ཡི་ཤས་དང་དྲི་ཟའི་ཤས། །གདོལ་པའི་ཤས་དང་སྲིན་ཤས་ཀྱིས། །ཉེས་པར་བྱེད་པ་ཟློག་པར་བྱེད། །ལེགས་པར་བྱ་བ་བྱེད་རྣམས་ལ། །མི་ཡི་དབང་པོ་ཕ་མའི་ཤས། །རྣམ་སྨིན་འབྲས་
བུ་བསྟན་པའི་ཕྱིར། །ལྷ་ཡིས་རྒྱལ་པོར་བྱིན་གྱིས་བརླབས། །ཚེ་འདི་ལེགས་པར་བྱས་པ་དང་། །ཉེས་པར་བྱས་པའི་ལས་རྣམས་ཀྱིས། །རྣམ་སྨིན་འབྲས་བུ་བསྟན་པའི་ཕྱིར། །ལྷ་ཡིས་རྒྱལ་པོར་བྱིན་གྱིས་བརླབས། །ཡུལ་ན་ཉེས་བྱེད་གནས་པ་དག །གང་ཚེ་རྒྱལ་པོས་

ཡལ་བོར་ཞིང་། །སྡིག་པ་ཅན་གྱི་སྐྱེ་བོ་ལ། །མཐུན་པའི་ཆད་པས་མི་གཅོད་ཅིང་། །ཉེས་པར་བྱེད་པ་ཡལ་བོར་བ། །དེ་ཚེ་ཆོས་མིན་ཤིན་ཏུ་འཕེལ། །ཐབ་མོ་དང་ནི་གཡོ་རྣམས་ཀྱང་། །ཡུལ་འཁོར་དེར་ནི་ཕྱི་ཕྱིར་འབྱུང་། །སུམ་ཅུ་རྩ་གསུམ་ཁང་པ་ན། །ལྷ་ཡི་དབང་པོ་
འཁྲུག་པར་འགྱུར། །ཡུལ་ན་ཉེས་བྱེད་གནས་པ་དག །གང་ཚེ་རྒྱལ་པོས་ཡལ་བོར་བ། །དེ་ཚེ་གཡོ་ནི་མི་བཟད་པ། །དྲག་པོ་རྣམས་ཀྱིས་ཡུལ་འཇོམས་འགྱུར། །ཕ་རོལ་དམག་ཚོགས་ལྷགས་ནས་སུ། །ཡུལ་འཁོར་དེ་ནི་རྣམ་པར་འཇིག །ལོངས་སྤྱོད་རྣམས་དང་རིགས་
ཀྱང་འཇིག །གང་གི་ནོར་བསགས་ཡོད་པ་ཡང་། །གཡོ་བྱེད་རྣམ་པ་མང་པོ་ཡིས། །ཕན་ཚུན་དུ་ནི་འཕྲོག་པར་འགྱུར། །བྱ་བ་གང་གིས་རྒྱལ་པོ་ཉིད། །བྱ་བ་དེ་ནི་མི་བྱེད་ན། །གླང་ཆེན་དབང་པོས་རྫིང་བུ་བཞིན། །རང་གི་ཡུལ་འཁོར་རྣམ་པར་འཇིག །མ་རུངས་པ་ཡི་རླུང་
ལྡང་ཞིང་། །མ་རུངས་པ་ཡི་ཆར་པ་འབབ། །ཉི་མ་དང་ནི་ཟླ་བ་དང་། །གཟའ་དང་རྒྱུ་སྐར་མ་རུངས་འགྱུར། །རྒྱལ་པོས་ཡལ་བར་བོར་ན་དེར། །ས་བོན་ལོ་ཏོག་མེ་ཏོག་འབྲས། །ལེགས་པར་སྨིན་པར་མི་འགྱུར་ཞིང་། །མུ་གེ་དག་ཀྱང་འབྱུང་བར་འགྱུར། །ཡུལ་ན་ཉེས་བྱེད་
གནས་པ་དག །གང་ཚེ་རྒྱལ་པོས་ཡལ་བོར་ན། །དེ་ཚེ་ལྷ་རྣམས་ཁང་པ་ན། །ཡིད་ནི་དགའ་བར་མི་འགྱུར་རོ། །ལྷ་རྒྱལ་དབང་པོ་དེ་དག་ཀུན། །རྒྱལ་འདི་ཆོས་དང་མི་ལྡན་ཏེ། །ཆོས་མིན་ཕྱོགས་ལ་གནས་པའོ་ཞེས། །ཕན་ཚུན་དུ་ནི་སྨྲ་བར་འགྱུར། །རྒྱལ་འདིས་རིང་པོར་
མི་ཐོགས་པར། །ལྷ་རྣམས་འཁྲུག་པར་བྱེད་པར་འགྱུར། །ལྷ་རྣམས་རབ་ཏུ་འཁྲུགས་པས་ན། །དེ་ཡི་ཡུལ་ནི་རྣམ་པར་འཇིག །ཡུལ་དུ་ཆོས་མིན་འབྱུང་འགྱུར་ཞིང་། །མཚོན་ཆས་ཀྱང་ནི་འཇིག་པར་འགྱུར། །གཡོ་རྣམས་དང་ནི་ཐབ་མོ་དང་། །ནད་ཀྱང་ཀུན་ཏུ་འབྱུང་
བར་འགྱུར། །ལྷ་དབང་རྣམས་ནི་རབ་ཁྲོས་ཤིང་། །ལྷ་རྣམས་ཀྱིས་ཀྱང་ཡལ་བར་འདོར། །ཡུལ་འཁོར་དེ་ནི་འཇིག་པར་འགྱུར། །རྒྱལ་པོ་དེ་ནི་མྱ་ངན་རྙེད། །སྤུན་ནམ་ཡང་ན་བུ་ཡང་རུང་། །སྡུག་པ་རྣམས་དང་བྲལ་བར་འགྱུར། །སྡུག་པའི་ཆུང་མ་དང་ཡང་བྲལ། །ཡང་ན་

བུ་མོ་འཆི་བར་འགྱུར། །སྐར་མདའ་དག་ཀྱང་ལྷུང་བར་འགྱུར། །དེ་བཞིན་ཉི་མ་འདྲ་བ་འབྱུང་། །ཕ་རོལ་གྱི་ནི་དམག་ཚོགས་དང་། །མུ་གེ་ཤིན་ཏུ་འབྱུང་བར་འགྱུར། །དེ་ཡི་གླང་པོ་ཕངས་པ་དང་། །བློན་པོ་ཕངས་པ་འཆི་བར་འགྱུར། །དེ་ཡི་འོག་ཏུ་རྔ་མོ་
ནི། །ཕངས་པ་དག་ཀྱང་འཆི་བར་འགྱུར། །ཁྱིམ་དང་ལོངས་སྤྱོད་ནོར་རྣམས་ཀྱང་། །ཕན་ཚུན་དུ་ནི་འཕྲོག་པར་འགྱུར། །ཡུལ་ཡུལ་དུ་ནི་མཚོན་ཆ་ཡིས། །ཕན་ཚུན་དུ་ནི་འདེབས་པར་འགྱུར། །ཐབ་མོ་དག་དང་རྩོད་དང་གཡོ། །ཡུལ་རྣམས་སུ་ནི་འབྱུང་བར་འགྱུར། །ཡུལ་
འཁོར་དུ་ནི་གདོན་འཇུག་ཅིང་། །མི་བཟད་པ་ཡི་ནད་ཀྱང་འབྱུང་། །དེ་ཡི་འོག་ཏུ་སྦྱིན་གནས་ཀྱང་། །ཆོས་དང་ལྡན་པ་མ་ཡིན་འགྱུར། །དེ་ཡི་འཁོར་དང་བློན་པོ་ཡང་། །ཆོས་དང་ལྡན་པ་མ་ཡིན་འགྱུར། །ཆོས་དང་མི་ལྡན་སྐྱེ་བོ་ལ། །དེ་ཡི་འོག་ཏུ་མཆོད་བྱེད་འགྱུར། །ཆོས་དང་
ལྡན་པའི་སེམས་ཅན་ལ། །རྟག་ཏུ་ཆད་པས་གཅོད་པར་འགྱུར། །ཆོས་དང་མི་ལྡན་སྐྱེ་བོ་བཀུར། །ཆོས་ལྡན་ཆད་པས་བཅད་པས་ན། །དེར་ནི་ཆུ་དང་རྒྱུ་སྐར་རླུང་། །རྣམ་གསུམ་རྣམ་པར་འཁྲུག་པར་འགྱུར། །ཆོས་མིན་སྐྱེ་བོ་བཟུང་བས་ན། །དམ་ཆོས་རོ་ཡི་སྙིང་པོ་མདངས། །
སེམས་ཅན་མདངས་དང་ས་ཡི་བཅུད། །དངོས་པོ་རྣམ་གསུམ་རྣམ་པར་འཇིག །སྐྱེ་བོ་ངན་པ་རབ་བཀུར་ཅིང་། །སྐྱེ་བོ་དམ་པ་སྨད་པས་ན། །འཆི་དང་ལྕེ་འབབ་མུ་གེ་དང་། །རྣམ་པ་གསུམ་ནི་དེར་འབྱུང་འགྱུར། །འབྲས་བུ་ལོ་ཐོག་རོ་དང་མདངས། །དེ་ཡི་འོག་ཏུ་མེད་
པར་འགྱུར། །སེམས་ཅན་ནད་པ་མང་པོ་དག །ཡུལ་རྣམས་སུ་ནི་འབྱུང་བར་འགྱུར། །མངར་ཞིང་ཆེ་བའི་འབྲས་བུ་དག །ཡུལ་རྣམས་ན་ནི་ཡོད་པ་ཡང་། །ཁ་བ་དང་ནི་ཚ་བ་དང་། །ཆུང་བ་དག་ནི་ཉིད་དུ་འགྱུར། །རྩེ་དང་དགོད་དང་དགའ་བ་དང་། །སྔན་ཆད་དགའ་
བའི་དངོས་པོ་དང་། །དགའ་བ་ཉམས་ཤིང་མི་དགར་འགྱུར། །ཉོན་མོངས་བརྒྱ་ཡིས་རྣམ་པར་འཁྲུགས། །ལོ་ཐོག་རྣམས་དང་འབྲས་བུ་ཡི། །སྣུམ་དངོས་ཁུ་བ་ཟད་པས་ན། །ལུས་དང་ཁམས་དང་དབང་པོ་ལ། །དེ་ལྟར་ཚིམ་པར་མི་འགྱུར་རོ། །སེམས་ཅན་

རྣམས་ནི་མདོག་ངན་ཅིང་། །མཐུ་ཆུང་ཤིན་ཏུ་རིད་པར་འགྱུར། །ཁ་ཟས་མང་པོ་ཟོས་ཀྱང་ནི། །ཚིམ་པར་འགྱུར་བ་མ་ཡིན་ནོ། །སྟོབས་དང་མཐུ་དང་བརྩོན་འགྲུས་ཀྱང་། །དེ་ཡི་འོག་ཏུ་མེད་པར་འགྱུར། །སེམས་ཅན་བརྩོན་འགྲུས་ཉམས་པ་དག །ཡུལ་རྣམས་
སུ་ནི་འབྱུང་བར་འགྱུར། །སྣ་ཚོགས་ནད་ཀྱིས་གཟིར་བ་ཡི། །སེམས་ཅན་ནད་མང་འབྱུང་བར་འགྱུར། །སྲིན་པོ་སྣ་ཚོགས་ལས་གྱུར་པའི། །གཟའ་དང་རྒྱུ་སྐར་འབྱུང་བར་འགྱུར། །ཆོས་མིན་ཕྱོགས་ལ་རབ་གནས་ཏེ། །རྒྱལ་པོ་ཆོས་དང་མི་ལྡན་པས། །འཇིག་རྟེན་
གསུམ་གྱི་དཀྱིལ་འཁོར་ན། །ཁམས་གསུམ་རྣམ་པར་འཇིག་པར་འགྱུར། །གང་ཚེ་རྒྱལ་པོ་ཕྱོགས་གནས་ཏེ། །ཉེས་བྱེད་ཡལ་བར་འདོར་བའི་ཚེ། །འདི་འདྲའི་ཉེས་པ་དུ་མ་དག །ཡུལ་རྣམས་སུ་ནི་འབྱུང་བར་འགྱུར། །ལྷ་དབང་རྣམས་ཀྱིས་དགོས་གང་ཕྱིར། །
རྒྱལ་པོའི་བྱིན་གྱིས་བརླབས་པ་ཡི། །རྒྱལ་པོ་ཉིད་ནི་མི་བྱེད་ཅིང་། །ཉེས་བྱེད་ཡལ་བར་འདོར་ན་ནི། །ལེགས་པར་བྱས་པས་སེམས་ཅན་རྣམས། །ལྷ་ཡི་གནས་སུ་ལྷར་ཡང་སྐྱེ། །ཉེས་པར་བྱས་པས་ཡི་དགས་དང་། །སེམས་ཅན་དམྱལ་དང་དུད་འགྲོར་སྐྱེ། །གང་
ཚེ་རྒྱལ་པོ་ཡུལ་རྣམས་ན། །ཉེས་བྱེད་ཡལ་བར་འདོར་བའི་ཚེ། །སུམ་ཅུ་གསུམ་གྱི་ལྷ་གནས་ནས། །ཉེས་པ་བྱས་པས་ལྟུང་བར་འགྱུར། །རྒྱལ་པོ་ཉིད་ནི་མི་བྱེད་ན། །དེ་ཡི་བུ་ཡང་མ་ཡིན་ལ། །ལྷ་ཡི་རྒྱལ་པོ་ཕ་རྣམས་ཀྱི། །གནས་ལ་ཉེས་དང་བཅས་པར་འགྱུར། །
གཡོ་ནི་ཤིན་ཏུ་མི་བཟད་པས། །གང་ཚེ་ཡུལ་འཁོར་འཇིག་འགྱུར་བ། །དེ་ཕྱིར་ལྷ་ཡི་དབང་རྣམས་ཀྱིས། །མིའི་གནས་རྒྱལ་པོ་བྱིན་གྱིས་བརླབས། །ཉེས་པར་བྱས་པ་ཞི་བྱའི་ཕྱིར། །ལེགས་པར་བྱེད་ལ་འཛུད་པ་སྟེ། །ཚེ་འདི་ལ་ནི་སེམས་ཅན་ལ། །ཡུལ་གྱི་
ཆོས་ཀྱི་དོན་གྱི་ཕྱིར། །རྣམ་སྨིན་སྐྱེད་པ་རྒྱལ་པོ་ཡིན། །ལེགས་བྱས་དང་ནི་ཉེས་བྱས་ཀྱི། །ལས་ཀྱི་རྣམ་པར་སྨིན་པའི་འབྲས། །རྣམ་པ་ཐ་དད་བསྟན་པའི་ཕྱིར། །བྱེད་པ་གང་ཡིན་རྒྱལ་པོར་བརྗོད། །བདག་གི་དོན་དང་གཞན་དོན་དང་། །ཡུལ་གྱི་ཆོས་

ཀྱི་དོན་གྱི་ཕྱིར། །ལྷ་ཚོགས་རྣམས་ཀྱིས་བྱིན་གྱིས་བརླབས། །ལྷ་རྣམས་དག་ཀྱང་རྗེས་ཡི་རང་། །ཡུལ་འཁོར་རྣམས་ན་སྐྱེ་བོ་ནི། །སྡིག་ཅན་གཡོན་ཅན་འདུལ་བ་དང་། །ཡུལ་གྱི་ཆོས་ཀྱི་དོན་གྱི་ཕྱིར། །སྲོག་དང་རྒྱལ་སྲིད་རྣམས་ཀྱང་བཏང་། །ཆོས་མ་ཡིན་
པ་བཟོད་བྱེད་ཅིང་། །ཤེས་བཞིན་ཡལ་བར་འདོར་བ་ནི། །ཡུལ་ན་འཇིགས་པ་མི་བཟད་པ། །དེ་འདྲ་གཞན་དུ་ཡོད་མ་ཡིན། །ཇི་ལྟར་གཡོ་རྣམས་བྱུང་བ་ལ། །གཡོ་བྱེད་ཆད་པས་མ་བཅད་ན། །ཡུལ་དུ་ཤིན་ཏུ་མི་བཟད་པའི། །གཡོ་རྣམས་ཕྱིར་ནི་འབྱུང་བར་འགྱུར། །
གླང་ཆེན་རྣམས་ཀྱིས་རྫིང་ཆེན་བཞིན། །ཡུལ་འཁོར་དེར་ནི་རྣམ་པར་འཇིག །ལྷ་དབང་རྣམས་ཀྱང་འཁྲུག་པར་འགྱུར། །ལྷ་ཡི་གནས་ནི་རྣམ་པར་འཇིག །ཡུལ་དུ་དངོས་པོ་ཐམས་ཅད་ནི། །མ་རུངས་པར་ཡང་འགྱུར་བས་ན། །དེ་ཕྱིར་སྡིག་པ་བྱེད་པ་རྣམས། །ཉེས་པའི་
རིམ་བཞིན་གདུལ་བར་བྱ། །ཆོས་ཀྱིས་ཡུལ་འཁོར་བསྐྱང་བར་བྱ། །ཆོས་མ་ཡིན་པ་སྤྱད་མི་བྱ། །སྲོག་ཀྱང་ཡོངས་སུ་གཏང་བྱ་ཞིང་། །ཉེས་མགོན་བྱ་བར་མི་བྱའོ། །སྐྱེ་བོ་གཉེན་དང་སྐྱེ་བོ་གཞན། །ཡུལ་འཁོར་སྐྱེ་བོ་ཐམས་ཅད་ལ། །རྒྱལ་པོས་ཕྱོགས་ཀྱང་གཅིག་བྱ་ཡི། །
ཕྱོགས་སུ་ལྷུང་བར་གྱུར་ཏ་རེ། །རྒྱལ་པོ་ཆོས་དང་ལྡན་པ་ཡི། །གྲགས་པ་འཇིག་རྟེན་གསུམ་གང་སྟེ། །སུམ་ཅུ་གསུམ་གྱི་གནས་རྣམས་ན། །ལྷ་ཡི་དབང་པོ་དགར་གྱུར་ཏེ། །འཛམ་བུའི་གླིང་ན་ངེད་ཀྱི་བུ། །འདི་ལྟར་ཆོས་ལྡན་རྒྱལ་པོ་ཡིན། །ཆོས་ཀྱི་ཡུལ་འཁོར་དེར་བསྟན་
ནས། །ལེགས་པར་བྱུང་ལ་སྐྱེ་བོ་བཀོད། །རྒྱལ་པོ་དེ་ནི་ལེགས་བྱེད་པས། །སྐྱེ་བོ་དག་ནི་འདིར་འགྱེད་དེ། །ལྷ་དང་ལྷ་ཡི་བུ་རྣམས་ཀྱིས། །ལྷ་གནས་གང་བར་བྱེད་སྙམ་མོ། །ཆོས་ཀྱི་ཡུལ་འཁོར་དེར་བསྟན་ནས། །རྒྱལ་པོ་རྣམས་ནི་རབ་ཏུ་དགའ། །ལྷ་དབང་རབ་
ཏུ་དད་གྱུར་པས། །མི་ཡི་རྒྱལ་པོ་དེ་ལ་སྲུང་། །ཉི་ཟླ་དང་ནི་དེ་བཞིན་དུ། །རྒྱུ་སྐར་ལེགས་པར་རྒྱུ་བར་འགྱུར། །རླུང་ཡང་དུས་སུ་ལྡང་འགྱུར་ཞིང་། །ཆར་པའང་དུས་སུ་འབབ་པར་འགྱུར། །ལྷ་གནས་རྣམས་དང་དེ་བཞིན་དུ། །ཡུལ་འཁོར་རྣམས་སུ་ལོ་ལེགས་བྱེད། །

ལྷ་དང་ལྷ་ཡི་བུ་རྣམས་ཀྱིས། །ལྷ་ཡི་གནས་རྣམས་གང་བར་བྱེད། །དེ་ལྟ་བས་ན་རྒྱལ་པོ་ཡིས། །བདག་གི་ཕངས་པའི་སྲོག་བཏང་གིས། །གང་གིས་འཇིག་རྟེན་བདེར་འགྱུར་བ། །དཀོན་མཆོག་ཆོས་ནི་མི་བཏང་སྟེ། །ཡོན་ཏན་རྣམས་ཀྱིས་གང་བརྒྱན་པ། །ཆོས་དང་ལྡན་
པ་བསྟེན་པར་བྱ། །རང་གི་སྐྱེ་བོས་རྟག་དགའ་བ། །རྟག་པར་སྡིག་པ་རྣམ་པར་སྤོངས། །ཆོས་ཀྱིས་ཡུལ་འཁོར་བསྐྱང་བར་བྱ། །ཆོས་ཀྱང་ཡང་དག་བསྟན་པར་བྱ། །ལེགས་པར་བྱེད་ལ་སེམས་ཅན་དགོད། །ཉེས་བྱེད་ལས་ནི་བཟློག་པར་བྱ། །གང་ཚེ་སྡིག་པ་བྱེད་པ་
རྣམས། །ཚུལ་བཞིན་གདུལ་བར་བྱེད་པའི་ཚེ། །ཡུལ་འཁོར་དུ་ནི་ལོ་ལེགས་ཤིང་། །རྒྱལ་པོ་གཟི་བརྗིད་ལྡན་པར་འགྱུར། །རྒྱལ་པོ་གྲགས་དང་ལྡན་འགྱུར་ཞིང་། །སྐྱེ་དགུ་རྣམས་ཀྱང་བདེ་བར་སྐྱོང་། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས་རྒྱལ་པོའི་བསྟན་བཅོས་
ལྷའི་དབང་པོའི་དམ་ཚིག་ཅེས་བྱ་བའི་ལེའུ་སྟེ་ཉི་ཤུ་པའོ།། །།བམ་པོ་དགུ་པ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །གང་ཚེ་འཁོར་ལོས་སྒྱུར་བའི་རྒྱལ་པོར་གྱུར། །དེ་ཚེ་རྒྱ་མཚོར་བཅས་པའི་ས་རྣམས་དང་། །གླིང་
བཞི་རིན་ཆེན་གང་བར་བཅས་པ་ཡང་། །སྔོན་གྱི་རྒྱལ་བ་དག་ལ་ངས་ཕུལ་ལོ། །ཆོས་ཀྱི་སྐུ་དེ་ཡོངས་སུ་བཙལ་བའི་ཕྱིར། །གང་སྔོན་ཡིད་དུ་འོང་ཞིང་ཕངས་པ་ཡི། །དངོས་པོ་དེ་དག་ངས་ནི་མ་བཏང་མེད། །བསྐལ་པ་དུ་མར་ཕངས་པའི་སྲོག་ཀྱང་བཏང་། །ཇི་ལྟར་སྔོན་གྱི་བསྐལ་
པ་བསམ་ཡས་ན། །རིན་ཆེན་གཙུག་ཏོར་ཅན་གྱི་བདེ་བར་གཤེགས། །མྱ་ངན་འདས་པའི་བདེ་བར་གཤེགས་དེ་ཡི། །བསྟན་ལ་ལེགས་བྱུང་ཞེས་བྱའི་རྒྱལ་པོ་བྱུང་། །དེ་ནི་གླིང་བཞིའི་དབང་ཕྱུག་འཁོར་ལོས་སྒྱུར། །རྒྱ་མཚོར་ཐུག་པའི་ས་ལ་རབ་ཏུ་སྟོན། །རྒྱལ་དབང་གསུང་
ཕྱིར་རྒྱལ་པོའི་ཕོ་བྲང་ན། །དེ་ཚེ་རྒྱལ་པོ་དམ་པ་གཉིད་ཀྱིས་ལོག །རྨི་ལམ་དུ་ནི་སངས་རྒྱས་ཡོན་ཏན་ཐོས། །ཆོས་སྨྲ་རིན་ཆེན་སོགས་ཀྱི་རྨི་ལམ་ན། །རྣམ་པར་ལྷང་