Kinh tạng Tây Tạng (Kangyur Đại Học) — 089_རྒྱུད་འབུམ།_པ

ས་པར་བརྒྱན་པ་བཤམ་པར་བགྱིའོ། །ཕྱོགས་དེར་གདུགས་དང་། རྒྱལ་མཚན་དང་། བ་
དན་སྣ་ཚོགས་ཀྱིས་ལེགས་པར་བརྒྱན་པར་བགྱིའོ། །མིའི་རྒྱལ་པོ་དེས་ལུས་བཀྲུ་བར་བགྱིའོ། །གོས་དྲི་རབ་ཏུ་བདའ་བ། གོས་སར་པ་མཛེས་པ་བགོས་ནས། རྒྱན་སྣ་ཚོགས་ཀྱིས་བརྒྱན་པར་བགྱིའོ། །བདག་གི་སྟན་རབ་ཏུ་དམའ་བ་གདིང་
བར་བགྱི་སྟེ། སྟན་དེ་ལ་མཆིས་ནས། རྒྱལ་པོའི་རྒྱགས་པས་དྲེགས་པར་མི་བགྱིའོ། །དེར་རྒྱལ་སྲིད་ཀྱི་དབང་ཕྱུག་ལ་ཆགས་པར་མི་བགྱིའོ། །རྒྱགས་པ་དང་། ང་རྒྱལ་དང་། དྲེགས་པ་ཐམས་ཅད་རྣམ་པར་སྤངས་པའི་སེམས་ཀྱིས། གསེར་འོད་དམ་
པ་མདོ་སྡེའི་དབང་པོའི་རྒྱལ་པོ་འདི་མཉན་པར་བགྱིའོ། །དགེ་སློང་ཆོས་སྨྲ་བ་དེ་ལ་ཡང་སྟོན་པར་འདུ་ཤེས་བསྐྱེད་པར་བགྱིའོ། །མིའི་རྒྱལ་པོ་དེས་དེའི་ཚེ་དེའི་དུས་ན། བཙུན་མོ་དམ་པ་དང་། རྒྱལ་བུ་རྣམས་དང་། རྒྱལ་པོའི་བུ་མོ་རྣམས་དང་། བཙུན་མོའི་
འཁོར་གྱི་ཚོགས་རྣམས་ལ་སྡུག་པ་དང་། ཕན་པས་བལྟ་བར་བགྱིའོ། །བཙུན་མོ་དམ་པ་རྣམས་དང་། རྒྱལ་བུ་རྣམས་དང་། རྒྱལ་པོའི་བུ་མོ་རྣམས་ལ་ཚིག་སྙན་པ་སྨྲ་བར་བགྱིའོ། །བཙུན་མོའི་འཁོར་གྱི་ཚོགས་ཐམས་ཅད་ལ་ཡང་ཚིག་སྙན་པ་སྨྲ་བར་
བགྱིའོ། །ཆོས་མཉན་པའི་ཕྱིར་མཆོད་པ་རྣམ་པ་སྣ་ཚོགས་སྦྱོར་དུ་སྩལ་བར་བགྱིའོ། །དགའ་བ་བསམ་གྱིས་མི་ཁྱབ་ཅིང་མཚུངས་པ་མ་མཆིས་པས། བདག་ཚིམ་པར་བགྱིའོ། །དགའ་བ་དང་བདེ་བ་བསམ་གྱིས་མི་ཁྱབ་པས་བདེ་བར་བགྱིའོ། །དབང་པོ་བདེ་

བར་བགྱིའོ། །བདག་ཉིད་དོན་ཆེན་པོ་ཐོབ་པར་བསམ་པར་བགྱིའོ། །བདག་དགའ་བ་ཆེན་པོས་དགའ་བར་བགྱིའོ། །རབ་ཏུ་དགའ་བ་ཆེན་པོ་བསྐྱེད་ནས། ཆོས་སྨྲ་བ་བསུ་བར་བགྱིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་
ཀྱིས་རྒྱལ་པོ་ཆེན་པོ་བཞི་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་དག་དེའི་ཚེ་དེའི་དུས་ན། མིའི་རྒྱལ་པོ་དེས་གོས་ཐམས་ཅད་དཀར་པོ་སར་པ་མཛེས་པ་བགོ་བར་བྱའོ། །སྤུད་པ་དང་། རྒྱན་སྣ་ཚོགས་ཀྱིས་བདག་ལེགས་པར་བརྒྱན་པར་བྱའོ། །གདུགས་
དཀར་པོ་ཡང་གཟུང་བར་བྱའོ། །རྒྱལ་པོའི་མཐུ་ཆེན་པོ་དང་། རྒྱལ་པོའི་བཀོད་པ་ཆེན་པོས་བཀྲ་ཤིས་ཐ་དད་པ་སྣ་ཚོགས་ཐོགས་ཏེ། རྒྱལ་པོའི་ཕོ་བྲང་དེ་ནས་བྱུང་ལ་ཆོས་སྨྲ་བ་དེ་བསུ་བའི་ཕྱིར་དེར་འགྲོ་བར་བྱའོ། །དེ་ཅིའི་ཕྱིར་ཞེ་ན། མིའི་རྒྱལ་པོས་དེར་གོམ་པ་ཇི་
སྙེད་བོར་བ། དེ་སྙེད་ཀྱི་བསྐལ་པ་བྱེ་བ་ཁྲག་ཁྲིག་ཕྲག་འབུམ་གྱི་འཁོར་བ་ཕྱིར་བསྙིལ་བར་འགྱུར། དེ་སྙེད་ཀྱི་འཁོར་ལོས་སྒྱུར་བའི་རྒྱལ་རིགས་བྱེ་བ་ཁྲག་ཁྲིག་འབུམ་ཕྲག་འཐོབ་པར་འགྱུར། དེར་གོམ་པ་ཇི་སྙེད་བོར་བ་དེ་སྙེད་དུ་ཚེ་འདི་ལ་རྒྱལ་སྲིད་ཀྱི་དབང་ཕྱུག་ཆེན་པོ་
བསམ་གྱིས་མི་ཁྱབ་པ་འཕེལ་བར་འགྱུར། བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་གནས་ཡངས་ཤིང་རྒྱ་ཆེ་བ། ལྷའི་གཞལ་མེད་ཁང་རིན་པོ་ཆེ་སྣ་བདུན་ལས་བྱས་པ་དག་འཐོབ་པར་འགྱུར། མི་རྣམས་ཀྱིས་རྒྱལ་རིགས་དང་། ལྷའི་རྒྱ་ཆེ་ཞིང་རྒྱ་ཆེ་བ་འབུམ་
ཕྲག་དུ་མ་འཐོབ་པར་འགྱུར། སྐྱེ་བ་ཐམས་ཅད་དུ་དབང་ཕྱུག་ཆེན་པོ་ཐོབ་པར་འགྱུར། ཚེ་རིང་བར་འགྱུར། ཡུན་རིང་དུ་འཚོ་བར་འགྱུར། སྤོབས་པ་དང་ལྡན་པར་འགྱུར། ཚིག་གཟུང་བར་འོས་པར་འགྱུར། གྲགས་པ་དང་ལྡན་པར་འགྱུར། བརྗོད་པ་ཤིན་ཏུ་རྒྱ་
ཆེ་བར་འགྱུར། བསྔགས་པར་འོས་པར་འགྱུར། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ལ་ཕན་པར་འགྱུར། ལྷ་དང་མི་རྣམས་ཀྱི་བདེ་བ་རྒྱ་ཆེ་ཞིང་རྒྱ་ཆེ་བ་ཐོབ་པར་འགྱུར། སྟོབས་ཆེ་བར་འགྱུར། ཚན་པོ་ཆེ་ཆེན་པོའི་སྟོབས་ཀྱི་ཤུགས་དང་ལྡན་ཞིང་གཟུགས་

བཟང་བར་འགྱུར། མཛེས་པ་དང་། བལྟ་ན་སྡུག་པ་དང་། ཁ་དོག་བཟང་པོ་རྒྱས་པ་མཆོག་དང་ལྡན་པར་འགྱུར། སྐྱེ་བ་ཐམས་ཅད་དུ་དེ་བཞིན་གཤེགས་པ་དང་ཕྲད་པར་འགྱུར། དགེ་བའི་བཤེས་གཉེན་རྣམས་རྙེད་པར་འགྱུར། བསོད་ནམས་ཀྱི་ཕུང་པོ་དཔག་
ཏུ་མེད་པ་ཡོངས་སུ་གཟུང་བར་འགྱུར་ཏེ། རྒྱལ་པོ་ཆེན་པོ་དག་ཡོན་ཏན་གྱི་ཕན་ཡོན་འདི་ལྟ་བུ་དག་མཐོང་ནས། མིའི་རྒྱལ་པོ་དེས་དཔག་ཚད་ཙམ་དུ་ཆོས་སྨྲ་བ་ལ་བསུ་བར་བྱ། དཔག་ཚད་བརྒྱ་དང་། དཔག་ཚད་སྟོང་དུ་ཡང་བསུ་བར་བྱ། ཆོས་སྨྲ་བ་དེ་ལ་སྟོན་
པར་འདུ་ཤེས་བསྐྱེད་པར་བྱའོ། །ཡང་འདི་སྙམ་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེང་བདག་གི་རྒྱལ་པོའི་ཕོ་བྲང་འདིར་འཇུག་པར་འགྱུར་རོ། །དེང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཤཱཀྱ་ཐུབ་པ། བདག་གི་རྒྱལ་པོའི་ཕོ་བྲང་འདིར་བཤོས་གསོལ་བར་འགྱུར་རོ། །དེང་བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་ཆོས་འཇིག་རྟེན་ཐམས་ཅད་དང་མི་མཐུན་པ་མཉན་པར་བྱའོ། །
དེང་བདག་གིས་ཆོས་མཉན་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱའོ། །དེང་བདག་གིས་དེ་བཞིན་གཤེགས་པ་བྱེ་བ་ཁྲག་ཁྲིག་འབུམ་ཕྲག་དུ་མ་མཉེས་པར་བྱས་པར་འགྱུར་རོ། །དེང་བདག་གིས་འདས་པ་དང་། མ་བྱོན་
པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ། མཆོད་པ་ཆེན་པོ་བསམ་གྱིས་མི་ཁྱབ་པ་ཡངས་ཤིང་རྒྱ་ཆེ་བ་བྱས་པར་འགྱུར་རོ། །དེང་བདག་གིས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་གྱི་སྡུག་
བསྔལ་ཐམས་ཅད་ཤིན་ཏུ་རྒྱུན་ཆད་པར་འགྱུར་རོ། །དེང་བདག་གིས་ཚངས་པའི་དབང་པོའི་རྒྱལ་པོ་ཉིད་ཀྱི་ལུས་བྱེ་བ་ཁྲག་ཁྲིག་འབུམ་ཕྲག་དུ་མ་འཐོབ་པ་དག་གི་དགེ་བའི་རྩ་བའི་ས་བོན་བསྐྱེད་པར་འགྱུར་རོ། །དེང་བདག་གིས་བརྒྱ་བྱིན་ཉིད་ཀྱི་ལུས་བྱེ་བ་ཁྲག་ཁྲིག་འབུམ་

ཕྲག་དུ་མ་འཐོབ་པ་དག་གི་དགེ་བའི་རྩ་བའི་ས་བོན་བསྐྱེད་པར་འགྱུར་རོ། །དེང་བདག་གིས་འཁོར་ལོས་སྒྱུར་བའི་རྒྱལ་པོ་ཉིད་ཀྱི་ལུས་བྱེ་བ་ཁྲག་ཁྲིག་འབུམ་ཕྲག་དུ་མ་འཐོབ་པ་དག་གི་དགེ་བའི་རྩ་བའི་ས་བོན་བསྐྱེད་པར་འགྱུར་རོ། །དེང་བདག་གིས་
བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་འཁོར་བ་ལས་ཡོངས་སུ་ཐར་བར་བྱས་པར་འགྱུར་རོ། །དེང་བདག་གིས་བསོད་ནམས་ཀྱི་ཕུང་པོ་དཔག་ཏུ་མེད་པ་བླ་ན་མེད་པ་ཡངས་ཤིང་རྒྱ་ཆེ་བ་བསམ་གྱིས་མི་ཁྱབ་པ་ཡོངས་སུ་གཟུང་བར་འགྱུར་རོ། །དེང་བདག་གིས་བཙུན་
མོའི་འཁོར་གྱི་ཚོགས་ཐམས་ཅད་ལ་བསྲུང་བ་ཆེན་པོ་བྱས་པར་འགྱུར་རོ། །དེང་བདག་གིས་རྒྱལ་པོའི་ཕོ་བྲང་འཁོར་འདིར་ཞི་བ་དང་བདེ་ལེགས་སུ་འགྱུར་བ་བསམ་གྱིས་མི་ཁྱབ་པ། མཆོག་ཏུ་ཁྱད་པར་དུ་འཕགས་པ་བླ་ན་མེད་པ་བྱས་པར་འགྱུར་རོ། །དེང་བདག་གིས་ཡུལ་
འདི་དག་ཐམས་ཅད་ཀུན་ཏུ་བསྲུངས་པར་འགྱུར་རོ། །ཡོངས་སུ་བསྐྱངས་པ་དང་། གནོད་པ་མེད་པ་དང་། དགྲ་མེད་པ་དང་། ཕ་རོལ་གྱི་དམག་ཚོགས་ཐམས་ཅད་ཀྱིས་མི་བརྫི་བ་དང་། ནད་འགོ་བ་མེད་པ་དང་། འཁྲུག་པ་མེད་པར་འགྱུར་རོ་སྙམ་དུ་སེམས་བསྐྱེད་
པར་བྱའོ། །རྒྱལ་པོ་ཆེན་པོ་དག་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛིན་པ། དེ་དག་ལ་མིའི་རྒྱལ་པོ་དེ་དམ་པའི་ཆོས་ལ་གུས་པ་དེ་ལྟ་བུས་བསྟི་སྟང་བྱེད། བླ་མར་བྱེད། རིམ་གྲོར་
བྱེད། མཆོད་པར་བྱེད་ཅིང་། རྒྱལ་པོ་ཆེན་པོ་ཁྱེད་བཞི་དཔུང་དང་གཡོག་ཏུ་བཅས་པ་དང་། ལྷའི་ཚོགས་དེ་དག་དང་གནོད་སྦྱིན་འབུམ་ཕྲག་དུ་མ་དག་ལ་ཤས་ཀྱིས་དམ་པ་བྱིན་ན། མིའི་རྒྱལ་པོ་དེ་བསོད་ནམས་མངོན་པར་འདུ་བྱེད་པ་དང་། དགེ་བ་མངོན་པར་འདུ་བྱེད་པ་དེ་
དང་། ཚེ་འདིའི་ལུས་ཀྱི་རྒྱལ་སྲིད་ཀྱི་དབང་ཕྱུག་ཆེན་པོ་བསམ་གྱིས་མི་ཁྱབ་པ་དེས་རྣམ་པར་འཕེལ་བར་འགྱུར། ཚེ་འདི་ལ་རྒྱལ་པོའི་གཟི་བརྗིད་ཆེན་པོ་བསམ་གྱིས་མི་ཁྱབ་པ་དང་ལྡན་པར་འགྱུར་རོ། །དཔལ་དང་། ཕུན་སུམ་ཚོགས་པ་དང་། གཟི་བརྗིད་ཀྱིས་ཀྱང་

བརྒྱན་པར་འགྱུར་རོ། །ཕྱིར་རྒོལ་བ་ཐམས་ཅད་དང་། དགྲ་ཐམས་ཅད་ཆོས་དང་མཐུན་པར་ཤིན་ཏུ་ཚར་ཆོད་པར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་རྒྱལ་པོ་ཆེན་པོ་བཞི་པོ་དེ་དག་གིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་
འདས་གང་ལ་ལ་ཞིག་མིའི་རྒྱལ་པོར་གྱུར་ལ། དེ་ཆོས་ལ་གུས་པ་དེ་ལྟ་བུས། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཉན་ལ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོའི་རྒྱལ་པོ་འདི་འཛིན་པ་དེ་དག་ལ་ཡང་
བསྟི་སྟང་བགྱིད། བླ་མར་བགྱིད། རིམ་གྲོར་བགྱིད། མཆོད་པར་བགྱིད་ཅིང་། རྒྱལ་པོ་ཆེན་པོ་བདག་ཅག་གི་སླད་དུ། རྒྱལ་པོའི་ཕོ་བྲང་དེ་ཤིན་ཏུ་དག་པར་ཕྱག་དར་བགྱིད། སྤོས་ཆབ་སྣ་ཚོགས་ཀྱིས་ཆག་ཆག་ལེགས་པར་འདེབས་ལ། བདག་ཅག་རྒྱལ་པོ་
ཆེན་པོ་བཞི་དང་། ལྷན་ཅིག་ཏུ་ཐུན་མོང་དུ་ཆོས་མཉན་པ་དེ་ཉན་ཅིང་བདག་དང་ལྷ་ཐམས་ཅད་ཀྱི་སླད་དུ་དགེ་བའི་རྩ་བའི་ཤས་ཅུང་ཟད་ཅིག་སྦྱིན་པར་བགྱིད་ན། བཙུན་པ་བཅོམ་ལྡན་འདས་དགེ་སློང་ཆོས་སྨྲ་བ་དེ་ཆོས་ཀྱི་སྟན་ལ་མཆིས་མ་ཐག་ཏུ། མིའི་རྒྱལ་པོ་དེས་
བདག་ཅག་རྒྱལ་པོ་ཆེན་པོ་བཞིའི་དོན་གྱི་སླད་དུ། སྤོས་སྣ་ཚོགས་ཀྱིས་བདུག་པར་བགྱིའོ། །བཙུན་པ་བཅོམ་ལྡན་འདས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་དེ་ལ་མཆོད་པའི་སླད་དུ། བདུག་པས་བདུགས་མ་ཐག་ཏུ་སྤོས་སྣ་ཚོགས་རྣམས་ལས།
སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་འབྱུང་བར་འགྱུར་ཏེ། དེ་དག་སྐད་ཅིག་ཐང་ཅིག་ཡུད་ཙམ་དེ་ལ། རྒྱལ་པོ་ཆེན་པོ་བདག་ཅག་བཞིའི་རང་རང་གི་ཁང་པའི་སྟེང་གི་བར་སྣང་ལ། སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་གི་གདུགས་རྣམས་སུ་གནས་
པར་འགྱུར་རོ། །སྤོས་ཀྱི་དྲི་རྒྱ་ཆེན་པོ་ཡང་མནམ་པར་འགྱུར། གསེར་གྱི་ཁ་དོག་ལྟ་བུའི་སྣང་བ་འབྱུང་བར་འགྱུར་ཞིང་སྣང་བ་དེས་བདག་ཅག་གི་ཁང་པ་རྣམས་ཀྱང་སྣང་བ་བགྱིས་པར་འགྱུར་རོ། །བཙུན་པ་བཅོམ་ལྡན་འདས་སྤོས་དང་། བདུག་པ་སྣ་ཚོགས་ཀྱི་འཁྲི་

ཤིང་དག་སྐད་ཅིག་ཐང་ཅིག་ཡུད་ཙམ་དེ་ལ་མི་མཇེད་ཀྱི་བདག་པོ་ཚངས་པ་དང་། ལྷ་རྣམས་ཀྱི་དབང་པོ་བརྒྱ་བྱིན་དང་། ལྷ་མོ་ཆེན་མོ་དབྱངས་ཅན་དང་། ལྷ་མོ་ཆེན་མོ་བརྟན་མ་དང་། གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་དང་། གནོད་སྦྱིན་གྱི་
སྡེ་དཔོན་ཆེན་པོ་ཉི་ཤུ་རྩ་བརྒྱད་དང་། ལྷའི་བུ་དབང་ཕྱུག་ཆེན་པོ་དང་། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དང་། གནོད་སྦྱིན་གྱི་སྡེ་དཔོན་ཆེན་པོ་ནོར་བུ་བཟང་དང་། འཕྲོག་མའི་བུ་ལྔ་བརྒྱ་འཁོར་དང་ལྡན་པ་དང་། ཀླུའི་རྒྱལ་པོ་ཆེན་པོ་མ་དྲོས་པ་དང་། ཀླུའི་རྒྱལ་པོ་
ཆེན་པོ་རྒྱ་མཚོ་དང་། དེ་དག་རང་རང་གི་ཁང་པའི་སྟེང་གི་བར་སྣང་ལ་བྱུང་སྟེ། སྤོས་དང་བདུག་པ་སྣ་ཚོགས་ཀྱི་འཁྲི་ཤིང་གི་གདུགས་རྣམས་སུ་གནས་པར་འགྱུར། སྤོས་དྲི་སྣ་ཚོགས་རྒྱ་ཆེན་པོ་ཡང་མནམ་པར་འགྱུར། ཁང་པ་རྣམས་ཀྱི་ནང་དུ་གསེར་དུ་སྣང་བ་འབྱུང་བར་
འགྱུར་ཞིང་། སྣང་བ་དེས་གནས་ཐམས་ཅད་སྣང་བ་བགྱིས་པར་འགྱུར་རོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་དག་རྒྱལ་པོ་ཆེན་པོ་ཁྱེད་བཞིའི་རང་རང་གི་ཁང་པ་རྣམས་ཀྱི་སྟེང་གི་བར་
སྣང་ལ། སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དེ་དག་གདུགས་རྣམས་སུ་གནས་པར་མ་ཟད་དོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་དག །མིའི་རྒྱལ་པོ་དེས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལ་མཆོད་པའི་ཕྱིར། སྤོས་སྣ་ཚོགས་དེ་དག་གིས་བདུགས་མ་ཐག་
ཏུ་ལག་ན་པོག་སྣོད་ཅིག་ཐོགས་པ་དེ་ལས། སྤོས་དང་བདུག་པ་སྣ་ཚོགས་ཀྱི་འཁྲི་ཤིང་རྣམས་འབྱུང་བར་འགྱུར་ཏེ། དེ་དག་སྐད་ཅིག་ཐང་ཅིག་ཡུད་ཙམ་དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དག་ཐམས་ཅད་ན་གང་ན་ཟླ་བ་བྱེ་བ་ཕྲག་བརྒྱ་དང་། ཉི་མ་བྱེ་བ་ཕྲག་
བརྒྱ་དང་། རྒྱ་མཚོ་ཆེན་པོ་བྱེ་བ་ཕྲག་བརྒྱ་དང་། རིའི་རྒྱལ་པོ་རི་རབ་བྱེ་བ་ཕྲག་བརྒྱ་དང་། རིའི་རྒྱལ་པོ་འཁོར་ཡུག་དང་། འཁོར་ཡུག་ཆེན་པོ་བྱེ་བ་ཕྲག་བརྒྱ་དང་། གླིང་ཆེན་པོ་བཞི་པའི་འཇིག་རྟེན་གྱི་ཁམས་བྱེ་བ་ཕྲག་བརྒྱ་དང་། རྒྱལ་ཆེན་བཞིའི་རིས་ཀྱི་ལྷ་བྱེ་བ་ཕྲག་བརྒྱ་དང་

སུམ་ཅུ་རྩ་གསུམ་བྱེ་བ་ཕྲག་བརྒྱ་ནས། འདུ་ཤེས་མེད་འདུ་ཤེས་མེད་མིན་དུ་ཉེ་བར་སོང་བའི་བར་གྱི་ལྷ་བྱེ་བ་ཕྲག་བརྒྱ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་དག་ཐམས་ཅད་དུ་སུམ་ཅུ་རྩ་གསུམ་གྱི་ལྷའི་རིས་བྱེ་བ་ཕྲག་བརྒྱ་པོ་ཐམས་ཅད་ན། ལྷ་དང་། ཀླུ་དང་།
གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོའི་ཚོགས་རྣམས་ཀྱི་རང་རང་གི་ཁང་པ་དག་གི་སྟེང་གི་བར་སྣང་ལ། སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དེ་དག་གདུགས་རྣམས་སུ་གནས་པར་འགྱུར། སྤོས་དྲི་
རྒྱ་ཆེན་པོ་ཡང་མནམ་པར་འགྱུར། ལྷའི་ཁང་པ་རྣམས་སུ་གསེར་གྱི་ཁ་དོག་ལྟ་བུའི་སྣང་བ་ཡང་འབྱུང་བར་འགྱུར་ཞིང་སྣང་བ་དེས་ཀྱང་ལྷའི་ཁང་པ་རྣམས་སྣང་བ་བྱས་པར་འགྱུར་རོ། །རྒྱལ་པོ་ཆེན་པོ་དག་འདི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན།
ལྷའི་ཁང་པ་ཐམས་ཅད་ཀྱི་སྟེང་གི་བར་སྣང་ལ། སྤོས་དང་བདུག་པའི་འཁྲི་ཤིང་དེ་དག་གདུགས་རྣམས་སུ་གནས་པ་དེ་བཞིན་དུ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལ་མཆོད་པའི་ཕྱིར། མིའི་རྒྱལ་པོ་དེས། སྤོས་སྣ་ཚོགས་དེ་དག་གིས་བདུགས་མ་
ཐག་ཏུ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདིའི་གཟི་བརྗིད་ཀྱི་མཐུས། སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་འབྱུང་བར་འགྱུར་ཏེ། དེ་དག་སྐད་ཅིག་ཐང་ཅིག་ཡུད་ཙམ་དེ་ལ་ཀུན་ཏུ་ཕྱོགས་བཅུའི་འཇིག་རྟེན་གྱི་ཁམས་དུ་མ། གང་གཱའི་ཀླུང་གི་
བྱེ་མ་སྙེད་དག་གི་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་རྣམས་སུ་དེ་བཞིན་གཤེགས་པ་བྱེ་བ་ཁྲག་ཁྲིག་འབུམ་ཕྲག་དུ་མ། གང་གཱའི་ཀླུང་གི་བྱེ་མ་སྙེད་དག་གི་བར་སྣང་ལ། སྤོས་དང་བདུག་པ་སྣ་ཚོགས་ཀྱི་འཁྲི་ཤིང་རྣམས་སུ་གནས་པར་འགྱུར། དེ་དག་
ཀྱང་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དུ་མ་ལ། སྤོས་དང་བདུག་པ་སྣ་ཚོགས་རྒྱ་ཆེ་ཞིང་རྒྱ་ཆེ་བ་མནམ་པར་འགྱུར། གསེར་གྱི་ཁ་དོག་ལྟ་བུའི་སྣང་བ་འབྱུང་བར་འགྱུར་ཞིང་། སྣང་བ་དེས་ཀྱང་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་དུ་མ་གང་གཱའི་ཀླུང་གི་

བྱེ་མ་སྙེད་དག་སྣང་བ་བྱས་པར་འགྱུར་རོ། །རྒྱལ་པོ་ཆེན་པོ་དག་ཆོ་འཕྲུལ་ཆེན་པོ་དེ་ལྟ་བུ་དེ་དག་བྱུང་མ་ཐག་ཏུ་དེ་བཞིན་གཤེགས་པ་བྱེ་བ་ཁྲག་ཁྲིག་འབུམ་ཕྲག་དུ་མ་གང་གཱའི་ཀླུང་གི་བྱེ་མ་སྙེད་དག་ཆོས་སྨྲ་བ་དེ་ལ་དགོངས་པར་འགྱུར་ཏེ།
སྐྱེས་བུ་དམ་པ་ལེགས་སོ་ལེགས་སོ། །སྐྱེས་བུ་དམ་པ་ཁྱོད་གསེར་འོད་དམ་པ་མདོ་སྡེའི་དབང་པོའི་རྒྱལ་པོའི་ཚུལ་འདི་ལྟ་བུ་ཟབ་མོའི་དོན་འདི་ལྟ་བུ་ཟབ་མོར་སྣང་བ་འདི་ལྟ་བུ་ཡོན་ཏན་བསམ་གྱིས་མི་ཁྱབ་པ་དང་ལྡན་པ་འདི་ལྟ་བུ་འདི་རྒྱ་ཆེར་ཡང་དག་པར་རབ་ཏུ་
འཆད་པར་འདོད་པ་ཁྱོད་ཡང་ལེགས་སོ་ལེགས་སོ། །ཞེས་བྱ་བ་སྦྱིན་པར་འགྱུར་རོ། །སུ་ཐ་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པའི་སེམས་ཅན་དེ་དག་ཀྱང་། དགེ་བའི་རྩ་བ་ངན་ངོན་དང་ལྡན་པར་མི་འགྱུར་ན། གང་དག་འཛིན་པ་དང་། འཆང་
བ་དང་། འཆད་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། འཁོར་ལ་རྒྱ་ཆེར་ཡང་དག་པར་རབ་ཏུ་སྟོན་པ་ལྟ་སྨོས་ཀྱང་ཅི་དགོས། །དེ་ཅིའི་སླད་དུ་ཞེ་ན། སྐྱེས་བུ་དམ་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཐོས་ནས་ཐོས་མ་ཐག་ཏུ། བྱང་ཆུབ་སེམས་དཔའ་
བྱེ་བ་ཁྲག་ཁྲིག་འབུམ་ཕྲག་དུ་མ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བའི་ཕྱིར་རོ། །དེ་ནས་ཕྱོགས་བཅུ་ཀུན་དུ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་དུ་མ་གང་གཱའི་ཀླུང་གི་བྱེ་མ་སྙེད་དག་ན། དེ་བཞིན་གཤེགས་པ་བྱེ་བ་
ཁྲག་ཁྲིག་འབུམ་ཕྲག་དུ་མ་རང་རང་གི་སངས་རྒྱས་ཀྱི་ཞིང་ན་བཞུགས་པ་དག་གིས། དེའི་ཚེ་དེའི་དུས་ན། ཚིག་མཐུན་པ་དང་། ངག་མཐུན་པ་དང་། སྒྲ་སྐད་མཐུན་པས་དགེ་སློང་ཆོས་སྨྲ་བ་ཆོས་ཀྱི་ཁྲི་སྟན་ལ་འདུག་པ་དེ་ལ་འདི་སྐད་ཅེས་བཀའ་སྩལ་ཏོ། །སྐྱེས་བུ་དམ་པ་
ཁྱོད་མ་འོངས་པའི་དུས་ན་བྱང་ཆུབ་ཀྱི་སྙིང་པོར་འགྲོ་བར་འགྱུར། སྐྱེས་བུ་དམ་པ་ཁྱོད་བྱང་ཆུབ་ཀྱི་སྙིང་པོ་མཆོག་དམ་པར་སོང་སྟེ། ཤིང་གི་རྒྱལ་པོའི་དྲུང་དུ་འདུག་ནས། འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པ་སེམས་ཅན་ཐམས་ཅད་ལས་རབ་ཏུ་

འདས་པའི་བརྟུལ་ཞུགས་དང་། དཀའ་ཐུབ་སྤྱོད་པའི་སྟོབས་སྐྱེད་པའི་བྱིན་གྱིས་བརླབས་དཀའ་བ་སྤྱོད་པ་བྱེ་བ་ཁྲག་ཁྲིག་འབུམ་ཕྲག་དུ་མ་དག་སྟོན་པར་འགྱུར། སྐྱེས་བུ་དམ་པ་ཁྱོད་བྱང་ཆུབ་ཀྱི་སྙིང་པོར་ལེགས་པར་བརྒྱན་པར་བྱེད་པར་འགྱུར། སྐྱེས་བུ་
དམ་པ་ཁྱོད་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཡོངས་སུ་སྐྱོབ་པར་འགྱུར། སྐྱེས་བུ་དམ་པ་ཁྱོད་ཤིང་གི་རྒྱལ་པོའི་དྲུང་དུ་འདུག་སྟེ། བདུད་ཀྱི་སྡེ་བསམ་གྱིས་མི་ཁྱབ་པ། གཟུགས་རབ་ཏུ་འཇིགས་འཇིགས་ལྟར་འདུག་པ།
མི་སྡུག་པ་སྟོན་པ། གཟུགས་མི་སྡུག་པ་སྣ་ཚོགས་དག་ལས་རྒྱལ་བར་འགྱུར། སྐྱེས་བུ་དམ་པ་ཁྱོད་བྱང་ཆུབ་ཀྱི་སྙིང་པོ་མཆོག་དམ་པར་སོང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་དཔེ་མེད་པར་རབ་ཏུ་ཞི་བ་རྡུལ་དང་བྲལ་བ་ཟབ་མོ་མངོན་པར་
རྫོགས་པར་འཚང་རྒྱ་བར་འགྱུར། སྐྱེས་བུ་དམ་པ་ཁྱོད་རྡོ་རྗེའི་གདན་སྙིང་པོ་བརྟན་པ་ལ་འདུག་སྟེ། ཆོས་ཀྱི་འཁོར་ལོ་རྒྱལ་བ་ཐམས་ཅད་ཀྱིས་མངོན་པར་བསྟོད་པ། མཆོག་ཏུ་ཟབ་པ། བླ་ན་མེད་པ་རྣམ་པ་བཅུ་གཉིས་རབ་ཏུ་བསྐོར་བར་འགྱུར། སྐྱེས་བུ་དམ་པ་
ཁྱོད་ཆོས་ཀྱི་རྔ་ཆེན་པོ་བླ་ན་མེད་པ་བརྡུང་བར་འགྱུར། སྐྱེས་བུ་དམ་པ་ཁྱོད་ཆོས་ཀྱི་དུང་བླ་ན་མེད་པ་འབུད་པར་འགྱུར། སྐྱེས་བུ་དམ་པ་ཁྱོད་ཆོས་ཀྱི་རྒྱལ་མཚན་ཆེན་པོ་བསྒྲེང་བར་འགྱུར། སྐྱེས་བུ་དམ་པ་ཁྱོད་ཆོས་ཀྱི་སྒྲོན་མ་བླ་ན་མེད་པ་འབར་བ་བྱེད་པར་འགྱུར།
སྐྱེས་བུ་དམ་པ་ཁྱོད་ཆོས་ཀྱི་ཆར་བླ་ན་མེད་པ་འབེབས་པར་འགྱུར། སྐྱེས་བུ་དམ་པ་ཁྱོད་ཉོན་མོངས་པའི་དགྲ་འབུམ་ཕྲག་དུ་མ་ལས་རྒྱལ་བར་འགྱུར། སྐྱེས་བུ་དམ་པ་ཁྱོད་སེམས་ཅན་བྱེ་བ་ཁྲག་ཁྲིག་འབུམ་ཕྲག་དུ་མ་ཤིན་ཏུ་འཇིགས་སུ་རུང་བ། འཇིགས་པ་ཆེན་པོའི་རྒྱ་
མཚོ་ལས་སྒྲོལ་བར་འགྱུར། སྐྱེས་བུ་དམ་པ་ཁྱོད་སེམས་ཅན་བྱེ་བ་ཁྲག་ཁྲིག་འབུམ་ཕྲག་དུ་མ་དག །འཁོར་བའི་འཁོར་བ་ལས་ཡོངས་སུ་ཐར་བར་བྱེད་པར་འགྱུར། སྐྱེས་བུ་དམ་པ་ཁྱོད་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དུ་མ་དག་མཉེས་པར་བྱེད་པར་འགྱུར་རོ། །

དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་རྒྱལ་པོ་ཆེན་པོ་བཞི་པོ་དེ་དག་གིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་མིའི་རྒྱལ་པོ་གསེར་འོད་དམ་པ་མདོ་སྡེའི་དབང་པོའི་རྒྱལ་པོའི་ཡོན་ཏན་ཚེ་འདི་དང་། མ་འོངས་པ་ན་འབྱུང་
བ་འདི་ལྟ་བུ་འདི་དག་མཐོང་བ། སངས་རྒྱས་འབུམ་ཕྲག་དུ་མ་ལ་དགེ་བའི་རྩ་བ་སྐྱེད་པ། བསོད་ནམས་ཀྱི་ཕུང་པོ་དཔག་ཏུ་མ་མཆིས་པ་ཡོངས་སུ་འཛིན་པ་མཐོང་ནས། སྙིང་བརྩེ་བའི་སླད་དུ། བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་དཔུང་དང་
གཡོག་ཏུ་བཅས་པ་དང་། གནོད་སྦྱིན་འབུམ་ཕྲག་དུ་མ་རང་རང་གི་ཁང་པ་ན་མཆིས་པ་དག །སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་གི་གདུགས་ཀྱིས་བསྐུལ་མ་ཐག་ཏུ། ལུས་མི་གདའ་བར་བགྱིས་ཏེ། མིའི་རྒྱལ་པོ་དེའི་ཁང་པ་བརྩེགས་པ་ཕྱག་དར་མ་མཆིས་
པ། ལེགས་པར་ཕྱག་དར་བགྱིས་པ། སྤོས་ཆབ་སྣ་ཚོགས་ཀྱིས་ཆག་ཆག་ལེགས་པར་བཏབ་པ་རྒྱན་སྣ་ཚོགས་ཀྱིས་ལེགས་པར་བརྒྱན་པའི་རྒྱལ་པོའི་ཕོ་བྲང་ག་ལ་བ་དེར་ཆོས་མཉན་པའི་སླད་དུ་མཆིས་པར་བགྱིའོ། །མི་མཇེད་ཀྱི་བདག་པོ་ཚངས་པ་དང་། ལྷ་རྣམས་ཀྱི་དབང་
པོ་བརྒྱ་བྱིན་དང་། ལྷ་མོ་ཆེན་མོ་དབྱངས་ཅན་དང་། ལྷ་མོ་ཆེན་མོ་དཔལ་དང་། སའི་ལྷ་མོ་བརྟན་མ་དང་། གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་དང་། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་། ལྷའི་བུ་དབང་ཕྱུག་ཆེན་པོ་དང་། གནོད་སྦྱིན་གྱི་སྡེ་
དཔོན་ཆེན་པོ་ལག་ན་རྡོ་རྗེ་དང་། གནོད་སྦྱིན་གྱི་སྡེ་དཔོན་ཆེན་པོ་ནོར་བུ་བཟང་དང་། འཕྲོག་མའི་བུ་ལྔ་བརྒྱའི་འཁོར་ཅན་དང་། ཀླུའི་རྒྱལ་པོ་མ་དྲོས་པ་དང་། ཀླུའི་རྒྱལ་པོ་རྒྱ་མཚོ་དང་། ལྷ་བྱེ་བ་ཁྲག་ཁྲིག་འབུམ་ཕྲག་དུ་མ་དག་ལུས་མི་གདའ་བར་བགྱིས་ཏེ། མིའི་རྒྱལ་པོ་དེའི་
ཕོ་བྲང་རྒྱན་སྣ་ཚོགས་ཀྱིས་བརྒྱན་པ་དེ་ག་ལ་བ་དང་། ཆོས་སྨྲ་བ་དེའི་ཆོས་ཀྱི་ཁྲི་སྟན་མཐོན་པོ་རྒྱན་སྣ་ཚོགས་ཀྱིས་ལེགས་པར་བརྒྱན་པ། མེ་ཏོག་བཀྲམ་པའི་ས་ལ་བཤམས་པར་འགྱུར་བ་ག་ལ་བ་དེར་ཆོས་མཉན་པའི་སླད་དུ་མཆིས་པར་འགྱུར་རོ། །བཙུན་པ་བཅོམ་ལྡན་འདས་

བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ། གནོད་སྦྱིན་འབུམ་ཕྲག་དུ་མ་དེ་དག་ཐམས་ཅད་མཐུན་པར་བགྱིས་ཏེ། མིའི་རྒྱལ་པོ་དགེ་བའི་གྲོགས་བགྱིད་པ། དགེ་བ་ཐོབ་པར་བགྱིད་པ། བླ་ན་མེད་པ་ཆོས་ཀྱི་སྦྱིན་པ་ཆེན་པོ་སྦྱིན་པ་དེ་ལ། ཆོས་བདུད་
རྩིའི་ཁུ་བ་འདིས་ཚིམ་པར་གྱུར་མ་ཐག་ཏུ། མིའི་རྒྱལ་པོ་དེ་ལ་ཀུན་དུ་བསྲུང་བར་བགྱིའོ། །ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཞི་བ་དང་། བདེ་ལེགས་སུ་འགྱུར་བར་བགྱིའོ། །མིའི་རྒྱལ་པོའི་ཕོ་བྲང་དེ་དང་། གྲོང་ཁྱེར་དེ་དང་།
ཡུལ་དེ་ཡང་ཀུན་དུ་བསྲུང་བར་བགྱིའོ། །ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཞི་བ་དང་བདེ་ལེགས་སུ་འགྱུར་བར་བགྱིའོ། །ཆད་པ་སྤང་བར་ཡང་བགྱིའོ། །ཡུལ་དེར་ཡང་འཇིགས་པ་དང་། གནོད་པ་དང་། ནད་འགོ་བ་དང་།
འཁྲུག་པ་ཐམས་ཅད་ལས་ཡོངས་སུ་ཐར་བར་བགྱིའོ། །བཙུན་པ་བཅོམ་ལྡན་འདས་གང་ལ་ལ་ཞིག་མིའི་རྒྱལ་པོར་གྱུར་ཏེ། མིའི་རྒྱལ་པོ་དེའི་ཡུལ་དུ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འབྱུང་ལ། བཙུན་པ་བཅོམ་ལྡན་འདས་མིའི་རྒྱལ་པོ་དེ། དགེ་སློང་
ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛིན་པ་དག་ལ་བསྟི་སྟང་མི་བགྱིད། བླ་མར་མི་བགྱིད། རིམ་གྲོར་མི་བགྱིད། མཆོད་པར་མི་བགྱིད་ན། བདག་ཅག་རྒྱལ་པོ་ཆེན་པོ་བཞི་དང་།
གནོད་སྦྱིན་བྱེ་བ་ཁྲག་ཁྲིག་འབུམ་ཕྲག་དུ་མ་ལ་ཆོས་མཉན་པ་འདི་དང་ཆོས་བདུད་རྩིའི་ཁུ་བ་འདིས་ཚིམ་པར་མི་བགྱིད། རིམ་གྲོར་མི་བགྱིད། ལྷའི་ལུས་འདི་དག་གི་གཟི་བྱིན་ཡང་རྣམ་པར་འཕེལ་བར་མི་བགྱིད་དོ། །བདག་ཅག་གི་བརྩོན་འགྲུས་དང་། མཐུ་དང་སྟོབས་
ཀྱང་མི་སྐྱེད། བདག་ཅག་གི་ལུས་ལ་གཟི་བརྗིད་དང་། དཔལ་དང་ཕུན་སུམ་ཚོགས་པ་ཡང་རྣམ་པར་འཕེལ་བར་མི་བགྱིད་པ་ལགས་སོ། །བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ་དང་། གནོད་སྦྱིན་བྱེ་བ་ཁྲག་ཁྲིག་

འབུམ་ཕྲག་དུ་མ་དག་གིས་ཡུལ་དེ་ཡལ་བར་དོར་བར་བགྱིའོ། །བཙུན་པ་བཅོམ་ལྡན་འདས་བདག་ཅག་གིས་ཡུལ་དེ་ཡལ་བར་བོར་ན། ཡུལ་ན་གནས་པའི་ལྷའི་ཚོགས་ཐམས་ཅད་ཀྱིས་ཀྱང་། ཡུལ་དེ་ཡལ་བར་འདོར་བར་འགྱུར་རོ། །བཙུན་པ་
བཅོམ་ལྡན་འདས་ལྷ་རྣམས་ཀྱིས་ཡུལ་དེ་ཡལ་བར་བོར་ན། ཡུལ་དེར་ཡུལ་རྣམ་པར་འཁྲུག་པ་སྣ་ཚོགས་འབྱུང་བར་འགྱུར། རྒྱལ་པོའི་འཁྲུག་པ་མི་བཟད་པ་དག་འབྱུང་བར་འགྱུར། ཡུལ་གང་ན་གནས་པའི་སེམས་ཅན་ཐམས་ཅད་ཀྱང་འཐབ་པ་སྐྱེ་བ་དང་། མཚང་
འདྲུ་བ་སྐྱེ་བ་དང་། རྩོད་པ་སྐྱེ་བར་འགྱུར། དངོགས་པ་དང་འགྱེད་པར་འགྱུར་བ་དང་། གཟའ་དང་ནད་རྣམ་པ་སྣ་ཚོགས་ཡུལ་དུ་འབྱུང་བར་འགྱུར་རོ། །ཕྱོགས་ཐ་དད་པ་ནས་སྐར་མདའ་ལྟུང་བར་འགྱུར། གཟའ་དང་རྒྱུ་སྐར་རྣམས་ཀྱང་ཕན་ཚུན་མི་མཐུན་པར་གདའ་བར་འགྱུར།
དགུང་ཟླ་འཆར་བ་ན་ཉི་མ་ལྟ་བུར་གདའ་བར་འགྱུར། ཟླ་བའི་གཟའ་དང་། ཉི་མའི་གཟའ་འབྱུང་བར་འགྱུར། ཉི་མ་དང་ཟླ་བ་ནམ་མཁའ་ལ་གནས་པ་ཡང་རྟག་པར་རྒྱུན་དུ་སྒྲ་གཅན་གྱི་གནོད་པ་དང་ལྡན་པར་འགྱུར། དུས་དུས་སུ་ནམ་མཁའ་ལ་འཇའི་ཁ་དོག་ལྟ་བུ་འཁྱིལ་བར་འགྱུར།
ས་ཡང་གཡོ་བར་འགྱུར། ས་ལ་གནས་པའི་ཁྲོན་པ་ཡང་སྒྲ་འབྱིན་པ་གྲག་པར་འགྱུར། ཡུལ་དུ་རླུང་དྲག་པོ་ལྡང་བར་འགྱུར། ཆར་པ་དྲག་པོ་འབབ་པར་འགྱུར། ཡུལ་དུ་མུ་གེའི་ཡ་ང་བ་འབྱུང་བར་འགྱུར། ཕ་རོལ་གྱི་དམག་ཚོགས་ཀྱིས་ཡུལ་འཇོམས་པར་འགྱུར།
ཡུལ་དེ་ཕུང་བར་འགྱུར་སེམས་ཅན་དེ་དག་ཀྱང་ཉོན་མོངས་པ་མང་བར་འགྱུར། ཡུལ་དེ་ཉམས་མི་དགའ་བར་འགྱུར་རོ། །བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་དུ་བཅས་པ་དང་། གནོད་སྦྱིན་འབུམ་ཕྲག་དུ་མ་དང་ཡུལ་ན་གནས་
པའི་ལྷ་དང་ཀླུ་རྣམས་ཀྱིས་ཡུལ་དེ་ཡལ་བར་བོར་ན། ཡུལ་དེར་འདི་ལྟ་བུའི་གནོད་པ་རྣམ་པ་སྣ་ཚོགས་བརྒྱ་དང་། གནོད་པ་སྟོང་འབྱུང་བར་འགྱུར་རོ། །བཙུན་པ་བཅོམ་ལྡན་འདས། གང་ལ་ལ་ཞིག་མིའི་རྒྱལ་པོར་གྱུར་ལ། དེ་བདག་ཉིད་ལ་ཀུན་དུ་བསྲུང་བ་ཆེན་པོ་

བགྱིད་འཚལ་བར་གྱུར། རྒྱལ་པོའི་བདེ་བ་སྣ་ཚོགས་ཡུན་རིང་པོར་མྱོང་བར་འཚལ་བར་གྱུར། བདེ་བ་ཐམས་ཅད་བསྟབས་པའི་སེམས་ཀྱི་རྒྱལ་པོ་ཉིད་བགྱིད་འཚལ་བར་གྱུར། ཡུལ་ན་གནས་པའི་སེམས་ཅན་ཐམས་ཅད་བདེ་བར་བགྱིད་འཚལ་བར་གྱུར། ཕ་རོལ་གྱི་དམག་
ཚོགས་ཐམས་ཅད་ཕམ་པར་བགྱིད་འཚལ་བར་གྱུར། ཡུལ་ཐམས་ཅད་དུ་ཡུན་རིང་དུ་ཡོངས་སུ་སྐྱོང་འཚལ་བར་གྱུར། ཆོས་ཀྱི་རྒྱལ་པོ་ཉིད་བགྱིད་འཚལ་བར་གྱུར། རང་གི་ཡུལ་ཡང་འཇིགས་པ་དང་། གནོད་པ་དང་། ནད་འགོ་བ་དང་། འཁྲུག་པ་ཐམས་ཅད་ལས་
ཡོངས་སུ་ཐར་བར་བགྱིད་འཚལ་བར་གྱུར་ན། བཙུན་པ་བཅོམ་ལྡན་འདས་མིའི་རྒྱལ་པོ་དེས་གདོན་མི་འཚལ་བར་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་པར་བགྱི། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་
པོ་འཛིན་པ་དེ་དག་ལ་ཡང་བསྟི་སྟང་བགྱི། བླ་མར་བགྱི། རིམ་གྲོར་བགྱི། མཆོད་པ་བགྱི། བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ་རྣམས་ཀྱང་། ཆོས་མཉན་པའི་དགེ་བའི་རྩ་བ་བསགས་པ་འདི་དང་། ཆོས་བདུད་རྩིའི་ཁུ་བ་འདིས་ཚིམ་པར་བགྱི།
བདག་ཅག་གི་ལྷའི་ལུས་འདི་དག་གི་གཟི་བྱིན་ཆེན་པོ་ཡང་རྣམ་པར་འཕེལ་བར་བགྱིའོ། །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས། མིའི་རྒྱལ་པོ་དེས་གདོན་མི་འཚལ་བར། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་པར་བགྱི་སྟེ། བཙུན་པ་
བཅོམ་ལྡན་འདས་ཚངས་པའི་དབང་པོས་འཇིག་རྟེན་པ་དང་། འཇིག་རྟེན་ལས་འདས་པའི་བསྟན་བཅོས་རྣམ་པ་སྣ་ཚོགས་ཇི་སྙེད་པ་བསྟན་པ་དག་དང་། ལྷའི་དབང་པོ་བརྒྱ་བྱིན་གྱིས་བསྟན་བཅོས་རྣམ་པ་སྣ་ཚོགས་ཇི་སྙེད་པ་བསྟན་པ་དག་དང་། དྲང་སྲོང་མངོན་པར་ཤེས་པ་
ལྔ་ཅན་རྣམ་པ་སྣ་ཚོགས་དག་གིས་སེམས་ཅན་དག་གི་དོན་གྱི་སླད་དུ། འཇིག་རྟེན་པ་དང་། འཇིག་རྟེན་ལས་འདས་པའི་བསྟན་བཅོས་རྣམ་པ་སྣ་ཚོགས་ཇི་སྙེད་བསྟན་པ་དག་པས་ཆེས་མཆོག་ཆེས་ཁྱད་པར་དུ་འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ནི། བཙུན་

པ་བཅོམ་ལྡན་འདས་ཚངས་པའི་དབང་པོ་འབུམ་ཕྲག་དེ་དག་དང་། བརྒྱ་བྱིན་བྱེ་བ་ཁྲག་ཁྲིག་འབུམ་ཕྲག་དུ་མ་དང་། དྲང་སྲོང་མངོན་པར་ཤེས་པ་ལྔ་ཅན་བྱེ་བ་ཁྲག་ཁྲིག་འབུམ་ཕྲག་དུ་མ་ཐམས་ཅད་པས་ཆེས་མཆོག་ཆེས་ཁྱད་པར་དུ་འཕགས་པའི་དེ་བཞིན་
གཤེགས་པས། སེམས་ཅན་རྣམས་ཀྱི་དོན་གྱི་སླད་དུ་རྒྱ་ཆེར་ཡང་དག་པར་རབ་ཏུ་བཤད་པ་ལགས་སོ། །ཅི་ནས་ཀྱང་འཛམ་བུའི་གླིང་ཐམས་ཅད་ན་གནས་པའི་མི་རྣམས་ཀྱི་རྒྱལ་པོས་རྒྱལ་པོ་ཉིད་བགྱི་བ་དང་། ཅི་ནས་སེམས་ཅན་ཐམས་ཅད་བདེ་བར་འགྱུར་བ་དང་། ཅི་ནས་རང་
གི་ཡུལ་ཀུན་དུ་བསྲུངས་པར་འགྱུར་བ་དང་། ཡོངས་སུ་བསྐྱངས་པར་འགྱུར་བ་དང་། ཅི་ནས་ཡུལ་ཐམས་ཅད་ན་གནོད་པ་དང་། དགྲ་མ་མཆིས་པར་འགྱུར་བ་དང་། ཅི་ནས་ཕ་རོལ་གྱི་དམག་ཚོགས་རྣམས་ཕམ་སྟེ། ཕྱིར་ཕྱོགས་པར་འགྱུར་བ་དང་། ཅི་ནས་ཡུལ་དེ་དག་
ན་ནད་འགོ་བ་མ་མཆིས་ཤིང་། འཁྲུག་པ་མ་མཆིས་པར་འགྱུར་བ་དང་། ཅི་ནས་ཡུལ་ཐམས་ཅད་ཆོས་ཀྱིས་འཁྲུག་པ་མ་མཆིས་ཤིང་། མི་རྫི་བར་འགྱུར་བ་དང་། ཅི་ནས་མིའི་རྒྱལ་པོ་དེ་དག་གིས། རང་རང་གི་ཡུལ་རྣམས་སུ་ཆོས་ཀྱི་སྒྲོན་མ་ཆེན་པོ་འབར་བར་བགྱིས་ཤིང་།
སྣང་བར་བགྱིས་པར་འགྱུར་བ་དང་། ཅི་ནས་ལྷའི་ཁང་ཁྱིམ་ཐམས་ཅད་ལྷ་དག་དང་། ལྷའི་བུ་རྣམས་ཀྱིས་གང་བར་འགྱུར་བ་དང་། ཅི་ནས་བདག་ཅག་རྒྱལ་པོ་ཆེན་པོ་བཞི་དཔུང་དང་གཡོག་ཏུ་བཅས་པ་དང་། གནོད་སྦྱིན་འབུམ་ཕྲག་དུ་མ་དང་། འཛམ་བུའི་གླིང་ན་གནས་
པའི་ལྷའི་ཚོགས་ཐམས་ཅད་ཚིམ་པ་དང་། རིམ་གྲོ་བགྱིད་པར་འགྱུར་བ་དང་། ཅི་ནས་བདག་ཅག་གི་ལྷའི་ལུས་འདི་དག་གཟི་བྱིན་ཆེན་པོས་རྣམ་པར་འཕེལ་བར་འགྱུར་བ་དང་། ཅི་ནས་བདག་ཅག་གི་ལུས་ལ་བརྩོན་འགྲུས་དང་སྟོབས་དང་། མཐུ་ཆེན་པོ་སྐྱེད་པར་འགྱུར་བ་དང་། ཅི་
ནས་བདག་ཅག་གི་ལུས་ལ་གཟི་བརྗིད་དང་། དཔལ་དང་། ཕུན་སུམ་ཚོགས་པ་རབ་ཏུ་འཇུག་པར་འགྱུར་བ་དང་། ཅི་ནས་འཛམ་བུའི་གླིང་ཐམས་ཅད་དུ་ལོ་ལེགས་ཤིང་ཉམས་དགའ་ལ། སྐྱེ་བོ་དང་མི་མང་པོས་གང་བར་འགྱུར་བ་དང་། ཅི་ནས་འཛམ་བུའི་གླིང་ཐམས་ཅད་ན་གནས་

པའི་སེམས་ཅན་རྣམས་བདེ་བར་འགྱུར་བ་དང་། དགའ་བ་སྣ་ཚོགས་མྱོང་བར་འགྱུར་བ་དང་། ཅི་ནས་སེམས་ཅན་ཐམས་ཅད་བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་ལྷ་དང་མིའི་བདེ་བ་རྒྱ་ཆེ་ཞིང་རྒྱ་ཆེ་བ་དག་མྱོང་བར་འགྱུར་བ་དང་། སངས་རྒྱས་བཅོམ་ལྡན་འདས་
རྣམས་དང་ལྷན་ཅིག་གནས་པར་འགྱུར་བ་དང་། མ་འོངས་པའི་དུས་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེ་དག་ཐམས་ཅད། ད་ལྟ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ཀྱིས་ཚངས་པའི་དབང་པོ་བྱེ་བ་ཁྲག་ཁྲིག་ཕྲག་འབུམ་དག་པས་ཆེས་འཕགས་པའི་ཐུགས་རྗེ་ཆེན་པོའི་སྟོབས་དང་ལྡན་པའི་བྱིན་གྱིས་བརླབས་དང་། བརྒྱ་བྱིན་བྱེ་བ་ཁྲག་ཁྲིག་ཕྲག་འབུམ་དག་གི་ལྷའི་ཤེས་པ་བས། ཆེས་འཕགས་པ་དེ་
བཞིན་གཤེགས་པའི་མཁྱེན་པ་བླ་ན་མེད་པ་དང་། དྲང་སྲོང་མངོན་པར་ཤེས་པ་ལྔ་ཅན་རྣམ་པ་སྣ་ཚོགས་ཀྱི་ཚོགས་བྱེ་བ་ཁྲག་ཁྲིག་འབུམ་ཕྲག་དུ་མ་ཐམས་ཅད་བས་ཆེས་འཕགས་པའི་བྱིན་གྱིས་བརླབས་ཀྱིས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་ཀྱིས། སེམས་ཅན་ཐམས་ཅད་ཀྱི་དོན་གྱི་སླད་དུ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི། འཛམ་བུའི་གླིང་འདིར་རྒྱ་ཆེར་ཡང་དག་པར་རབ་ཏུ་བཤད་དོ། །མིའི་རྒྱལ་པོའི་དགོས་པ་དང་། རྒྱལ་པོའི་བསྟན་བཅོས་དང་། རྒྱལ་པོའི་བགྱི་བ་
གང་དག་འཛམ་བུའི་གླིང་ཐམས་ཅད་ན་མཆིས་པ་དང་། གང་དག་གིས་སེམས་ཅན་འདི་དག་ཐམས་ཅད་བདེ་བར་འགྱུར་བ་དེ་དག་ཐམས་ཅད། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། གསེར་འོད་དམ་པ་མདོ་སྡེའི་
དབང་པོའི་རྒྱལ་པོ་འདི་ཉེ་བར་བསྟན། ཡོངས་སུ་བརྗོད། ཡང་དག་པར་རབ་ཏུ་བཤད་དོ། །བཙུན་པ་བཅོམ་ལྡན་འདས་རྒྱུ་དེ་དང་རྐྱེན་དེས་མིའི་རྒྱལ་པོ་དེས། གདོན་མི་འཚལ་བར། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་གུས་པར་མཉན་པར་བགྱི། གུས་པར་རིམ་གྲོར་

བགྱི། གུས་པར་མཆོད་པར་བགྱིའོ།། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལ་འདི་སྐད་ཅེས་བཀའ་སྩལ་ཏོ། །དེའི་ཕྱིར་རྒྱལ་པོ་ཆེན་པོ་ཁྱེད་བཞི་དཔུང་དང་གཡོག་ཏུ་བཅས་པས། གདོན་མི་ཟ་བར་མིའི་རྒྱལ་པོ་གསེར་
འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཉན་པ་དང་། རིམ་གྲོ་བྱེད་པ་དང་མཆོད་པ་བྱེད་པ་དེ་དག་ཀུན་ཏུ་བསྲུང་བའི་ཕྱིར་སྤྲོ་བ་རྒྱ་ཆེར་གྱིས་ཤིག །རྒྱལ་པོ་ཆེན་པོ་དག་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་མདོ་སྡེའི་དབང་པོ་འདི་འཛིན་པ་
དེ་དག་ཀྱང་། སངས་རྒྱས་ཀྱི་མཛད་པ་འཛིན་དུ་ཆུག་ཅིག་དང་། དེ་དག་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་འདི་ལ་སངས་རྒྱས་ཀྱི་མཛད་པ་བྱེད་པར་འགྱུར། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་རྒྱ་ཆེར་ཡང་དག་པར་རབ་ཏུ་འཆད་པར་འགྱུར་ཏེ།
རྒྱལ་པོ་ཆེན་པོ་ཁྱེད་བཞིས་ཅི་ནས་མདོ་སྡེའི་དབང་པོ་འཛིན་པའི་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་བསྲུང་བ་དང་། གནོད་པ་མེད་པ་དང་། ནད་མེད་པ་དང་། འཁྲུག་པ་མེད་པ་དང་། སེམས་བདེ་བར་འགྱུར་ཞིང་། གསེར་འོད་དམ་
པ་མདོ་སྡེའི་དབང་པོའི་རྒྱལ་པོ་འདི་ཡང་དག་པར་རབ་ཏུ་སྟོན་པར་འགྱུར་བར། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འཛིན་པ་དེ་དག་ཀུན་དུ་བསྲུང་བར་བྱ། ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་
སུ་བསྐྱང་བ་དང་། ཞི་བ་དང་། བདེ་ལེགས་སུ་འགྱུར་བར་བྱའོ། །དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་སྟན་ལས་ལངས་ཏེ། འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཡིད་བཞིན་གྱི་ནོར་བུ་ཞེས་བགྱི་བའི་གཟུངས་མཆིས་པ་འདི། སེམས་ཅན་གང་ལ་
ལ་དག་འཛིན་ཅིང་འཆང་བར་མོས་པ་དེ་ལ། བསོད་ནམས་དཔག་ཏུ་མ་མཆིས་པར་འགྱུར་བ་དང་། རྟག་ཏུ་དེ་ལ་བདག་གིས་བསྲུང་ཞིང་བསྐྱབས་པས། དེའི་སྡུག་བསྔལ་ཐམས་ཅད་བསལ་ཏེ། བདེ་བར་གནས་པར་བགྱིའོ། །བསོད་ནམས་དང་ཡེ་ཤེས་ཀྱི་ཚོགས་ཀྱང་

བསྐྱེད་པར་བགྱིའོ། །གང་གཟུངས་སྔགས་འདི་འཛིན་པར་འདོད་པས་ལུས་བསྲུང་བའི་ཕྱིར་སྔགས་འདི་སྔར་བརྗོད་པར་བྱའོ། །ན་མོ་བཻ་ཤྲ་བ་ཎཱ་ཡ། མ་ཧཱ་རཱ་ཛཱ་ཡ། ཏདྱ་ཐཱ། ར་ར་ར་ར། ཀུ་ནོ་ཀུ་ནོ། ཁུ་ནོ་ཁུ་ནོ། རུ་ནོ་རུ་ནོ། ས་བ་ས་བ། ཀ་ར་ཀ་ར། མ་ཧཱ་བི་
ཀ་རཾ། མ་ཧཱ་བི་ཀ་རཾ། མ་ཧཱ་ཀཱ་ལ། མ་ཧཱ་རཱ་ཛ། རཀྵ་རཀྵ་ཏུ་མཱཾ། སརྦ་སཏྭཱ་ནཱཉྩ་སྭཱ་ཧཱ། བཅོམ་ལྡན་འདས་སྔགས་འདི་སྐུད་པ་དཀར་པོ་ལ་སྔགས་ལན་རེ་བཟླས་ཤིང་མདུད་པ་ལན་རེ་བོར་ཏེ། དེ་ལྟར་ལན་བདུན་བྱས་ནས། དཔུང་པ་ལ་བཏགས་ན་དོན་དེ་ངེས་པར་
འགྲུབ་པར་འགྱུར་རོ། །དེ་ནས་ཁང་པ་དབེན་པའི་ནང་དུ་ཁྲུས་བྱས་ལ་གོས་གཙང་མ་གྱོན་ཏེ། སྤོས་གུ་གུལ་དང་། ཙནྡན་དང་། ག་བུར་དང་། དུ་རུ་སྐ་དང་། ཨ་ག་རུ་དང་། སྤོས་དཀར་པོ་ལ་སོགས་པ་འདི་དག་ཆ་མཉམ་པར་སྦྱར་བའི་སྤོས་ཀྱིས་མཆོད་ཅིང་། སྔགས་འདི་
བཟླས་པས་རྒྱལ་པོ་ཆེན་པོ་རྣམ་ཐོས་ཀྱི་བུ་སྤྱན་དྲང་བར་བྱའོ། །ན་མོ་བཻ་ཤྲ་བ་ཎཱ་ཡ། མ་ཧཱ་དྷ་ན་དཱ་ཡ། ཙཎྜེ་ཤྭ་རཱ་ཡ། ཨཱ་ཀརྵ། ཨ་པ་ར་ཛི་ཏ། ཙཎྜེ་ཤྭ་ར། པ་ར་མ། ཀཱ་རུ་ཎི་ཀ །སརྦ་སཏྭཱ། ཧི་ཏ་ཙིནྟཱ། མ་མ་དྷ་ན་བར་དྷོ། པརྱེ་ཤྭ་ར་སྭ་ཡམ། ཨཱ་ཀརྵ་ཡ་སྭཱ་ཧཱ།
སྔགས་འདི་ལན་བདུན་བཟླས་པའི་འོག་ཏུ་རྩ་བའི་སྔགས་བཟླས་པར་བྱའོ། །སྔགས་འདི་འདོན་པའི་དུས་སུ་དཀོན་མཆོག་གསུམ་དང་། རྒྱལ་པོ་ཆེན་པོ་རྣམ་ཐོས་ཀྱི་བུ་ལ་སྔར་ཕྱག་འཚལ་བར་བྱའོ། །རྒྱལ་པོ་ཆེན་པོ་རྣམ་ཐོས་ཀྱི་བུ་ནི་སེམས་ཅན་ཐམས་ཅད་ཀྱི་བསམ་པ་
སྐོང་ཞིང་ནོར་སྦྱིན་པས་སེམས་ཅན་ཐམས་ཅད་བདེ་བར་མཛད་པའི་ཕྱིར་ཡིད་བཞིན་གྱི་ནོར་བུ་ཞེས་བྱ་བའི་སྔགས་འདི་བཟླས་ན། སེམས་ཅན་དེ་དག་ཡིད་བཞིན་དུ་བདེ་བ་རྙེད་པར་འགྱུར་རོ། །དེ་ནས་ལྷའི་རྒྱལ་པོ་རྣམ་ཐོས་ཀྱི་བུས་བཅོམ་ལྡན་འདས་ཀྱི་སྤྱན་སྔར་ཡིད་བཞིན་གྱི་ནོར་བུ་ཞེས་
བྱ་བའི་སྔགས་ཀྱི་སྙིང་པོ་འདི་སྨྲས་སོ། །ན་མོ་རཏྣ་ཏྲ་ཡཱ་ཡ། ན་མོ་བཻ་ཤྲ་བ་ཎཱ་ཡ། མ་ཧཱ་རཱ་ཛཱ་ཡ། ཏདྱ་ཐཱ། སི་མི་སི་མི། སུ་མུ་སུ་མུ། ཙཎྜ་ཙཎྜ། ཙ་ར་ཙ་ར། ས་ར་ས་ར། ཀ་ར་ཀ་ར། ཀི་ལི་ཀི་ལི། ཀུ་རུ་ཀུ་རུ། མུ་རུ་མུ་རུ། ཙུ་རུ་ཙུ་རུ། སནྡྷུ་ཡ། ཨཱཏྨ་ནཱཾ།

ནི་ཏ་ཏྱ་ན། ཨནྟརྡྷཱ་ཏུ་སྭཱ་ཧཱ། ན་མོ་བཻ་ཤྲ་བ་ཎཱ་ཡ་སྭཱ་ཧཱ། དྷ་ན་དཱ་ཡ་སྭཱ་ཧཱ། མ་ནོ་ར་ཐ་པ་རི་པཱུ་ར་ཡ་སྭཱ་ཧཱ། སྔགས་འདི་སྔར་ལན་སྟོང་བཟླས་པའི་འོག་ཏུ་ཁང་པ་དབེན་པའི་ནང་དུ་ལྕི་བས་དཀྱིལ་འཁོར་ཆུང་ངུ་ཞིག་བྱས་ཏེ་བཤོས་ཅི་འབྱོར་པས་མཆོད་པར་
བྱའོ། །སྤོས་དམ་པ་བསྲེགས་པའི་དུ་བའི་རྒྱུན་མི་འཆད་པར་བྱ་ཞིང་ཉིན་མཚན་དུ་སེམས་རྩེ་གཅིག་པས་སྔགས་ཀྱི་སྙིང་པོ་འདི་བདག་ཉིད་ཀྱིས་ཐོས་པ་ཙམ་དུ་བཟླས་པ་བྱས་ན། དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུའི་སྲས་ཛི་ནར་ཤ་བྷ་ཞེས་བྱ་བ་གཞོན་ནུའི་གཟུགས་ཀྱིས་
དེའི་གན་དུ་མཆིས་ཏེ་ངའི་ཡབ་ལ་ཅི་ཞིག་གསོལ་ཞེས་དྲི་བར་བྱེད་དོ། །དེ་ནས་དེས་བདག་ནི་དཀོན་མཆོག་གསུམ་ལ་མཆོད་པའི་ཕྱིར། ནོར་ཞིག་གསོལ་གྱིས་སྩོལ་ཅིག་ཅེས་སྨྲོས་ཤིག །དེ་ནས་སྲས་ཛི་ནར་ཤ་བྷས་ཡབ་ལ་གསོལ་བ། སྐྱེས་བུ་དམ་པ་ཞིག་དཀོན་
མཆོག་གསུམ་ལ་མཆོད་པའི་ཕྱིར། ནོར་ཞིག་གསོལ་ལོ་ཞེས་གསོལ་པ་དང་། ཡབ་ཀྱིས་ཁྱོད་མྱུར་དུ་སོང་ལ་ཉིན་གཅིག་བཞིན་དུ་ཀཱ་པ་ཎ་བརྒྱ་བརྒྱ་བྱིན་ཅིག་ཅེས་བཀའ་སྩལ་ཏོ། །དེ་ནས་སྔགས་སྒྲུབ་པ་དེས་ལྟས་དེ་ལྟ་བུ་མཐོང་ནས། དོན་དེ་གྲུབ་པར་ཤེས་ཏེ།
གནས་དབེན་པར་བདག་གཅིག་པུ་སྤོས་བསྲེགས་ལ་ཉལ་ཁར་སྔས་སུ་དྲིའི་ཟ་མ་ཏོག་གཅིག་བཞག་སྟེ་ཉལ་བར་བྱའོ། །དེ་ཕྱིན་ཆད་ནང་གཅིག་བཞིན་དུ་ཟ་མ་ཏོག་དེའི་ནང་ནས་ནོར་ཅི་འབྱུང་བ་ལས་ནོར་དེ་དེའི་ཉིན་པར་དཀོན་མཆོག་གསུམ་ལ་མཆོད་པའི་ཡོ་བྱད་མེ་ཏོག་
དང་། སྤོས་དང་། ཞལ་ཟས་ལ་སོགས་པར་སྦྱར་བ་དང་། བྲེལ་ཅིང་ཕོངས་པ་རྣམས་ལ་ཡང་སྦྱིན་ཞིང་ཟད་པར་བྱའོ། །སེམས་ཅན་ཐམས་ཅད་ལ་བྱམས་པར་བསམ་མོ། །ཁྲོ་བ་དང་འཚེ་བའི་བསམ་པ་བསྐྱེད་ན། དེ་ཉམས་པར་འགྱུར་བས། ཁྲོ་བའི་
སེམས་མི་སྐྱེ་བར་རྟག་ཏུ་བསྲུང་བར་བྱའོ། །དེ་ནས་ཡང་སྔགས་འདི་འཛིན་པ་དེས་ཉིན་གཅིག་བཞིན་དུ་ལྷའི་རྒྱལ་པོ་རྣམ་ཐོས་ཀྱི་བུ་དང་། གཞན་ཡང་སྲས་དང་། སྲས་མོའི་འཁོར་དུ་བཅས་པ་ལ། རྟག་པར་བསམ་ཞིང་། བསྟོད་པ་དང་། བསྔགས་པ་

བྱའོ། །རྟག་པར་དགེ་བ་བཅུའི་ལས་ཀྱི་ལམ་གྱིས་གཏོང་ཞིང་ལྷ་ལ་སོགས་པ་རྣམས་ཀྱི་མཐུ་དང་བསོད་ནམས་མངོན་པར་འཕེལ་བར་འགྱུར་བ་དང་། དགེ་བ་རྒྱས་པ་དང་། བླ་ན་མེད་པའི་བྱང་ཆུབ་ཀྱང་འཐོབ་པར་འགྱུར་རོ། །ལྷ་དེ་དག་གིས་དེ་ལྟར་བྱེད་པ་
དེ་མཐོང་ནས་ཀུན་དགའ་ཞིང་མགུ་རངས་པས་འོང་ཞིང་དེ་ལ་བསྲུང་བ་དང་། སྐྱོབ་པར་བྱེད་དོ། །སྔགས་མཁན་དེ་ཉིད་ཀྱང་ཚེ་ལོ་དཔག་ཏུ་མེད་པར་གནས་ཤིང་། ངན་སོང་གསུམ་ཡོངས་སུ་སྤོང་བ་དང་བགེགས་དང་། བར་ཆད་ཐམས་ཅད་ཀྱང་མེད་པར་
འགྱུར་རོ། །ཡིད་བཞིན་གྱི་ནོར་བུ་འདི་དང་། གཏེར་གཞན་དག་ཀྱང་ཐོབ་པར་འགྱུར་རོ། །རྫུ་འཕྲུལ་ལ་དབང་སྒྱུར་ཞིང་བསམ་པ་ཐམས་ཅད་ཀྱང་གྲུབ་པར་འགྱུར་རོ། །གལ་ཏེ་ལོངས་སྤྱོད་ཅན་དུ་འདོད་ན་ཡང་ཡིད་བཞིན་དུ་གྲུབ་པ་དང་། བྱ་དང་
གཅན་གཟན་གྱི་སྐད་ཐམས་ཅད་ཀྱང་ཤེས་པར་འགྱུར་རོ། །བཅོམ་ལྡན་འདས་སྔགས་སྒྲུབ་པ་དེས་བདག་མཐོང་བར་འཚལ་ན། ཚེས་བརྒྱད་དམ། ཚེས་བཅྭ་ལྔའི་ཉིན་པར་རས་དཀར་པོ་ལ་བཅོམ་ལྡན་འདས་ཀྱི་སྐུ་གཟུགས་ཀ་པི་ཏ་དང་སྦྱར་བའི་ཚོན་རྩིས་
རྒྱན་སྣ་ཚོགས་ཀྱིས་བརྒྱན་པ། རི་མོ་མཁན་གསོ་སྦྱོང་གི་ཡན་ལག་བརྒྱད་དང་ལྡན་པས། སངས་རྒྱས་ཀྱི་གཡོན་ཕྱོགས་སུ་ནི་དཔལ་གྱི་ལྷ་མོའི་གཟུགས་བྲི། སངས་རྒྱས་ཀྱི་གཡས་ཕྱོགས་སུ་ནི་རྒྱལ་པོ་ཆེན་པོ་རྣམ་ཐོས་ཀྱི་བུ་བདག་བུ་སྨད་དང་འཁོར་དུ་
བཅས་པ་བྲིས་ཏེ། གནས་དེར་བཀྲམ་ནས། མེ་ཏོག་སྣ་ཚོགས་དང་། དྲི་སྣ་མང་པོ་དང་། མར་མེ་དམ་པ་དང་། ཞལ་ཟས་བདའ་བ་སྣ་ཚོགས་ཀྱིས། ཉིན་མཚན་རྒྱུན་མི་འཆད་པར་མཆོད་པར་བྱའོ། །སྔགས་འདི་ཟློས་པས་སེམས་མི་གཡེང་བར་བྱ་ཞིང་།
རྒྱལ་པོ་ཆེན་པོ་རྣམ་ཐོས་ཀྱི་བུ་སྤྱན་དྲང་བའི་སྔགས་འདི་བཟླས་པར་བྱའོ། །ན་མཿཤྲཱི་ཀཎ་ཋཱ་ཡ། བུད་དྷཱ་ཡ། ན་མོ་བཻ་ཤྲ་བ་ཎཱ་ཡ། ཡཀྵ་རཱ་ཛཱ་ཡ། མ་ཧཱ་རཱ་ཛཱ་ཡ། ཨ་ཏི་རཱ་ཛཱ་ཡ། ན་མཿཤྲཱི། མ་ཧཱ་དེ་བྱཻ། ཏདྱ་ཐཱ། ཏ་ར་ཏ་ར། ཏུ་རུ་ཏུ་རུ། བ་ར་བ་ར། སུ་

ཤུདྡྷོ་སུ་ཤུདྡྷོ། ཧ་ན་ཧ་ན། མ་ཎི་ཀ་ན་ཀ །བཛྲ་བཻ་ཌཱུརྱ། མུཀ་ཏི་ཀ །ཨ་ལཾ་ཀྲྀ་ཀྲཱི་ཏ་ཤ་རཱི་རཱ་ཡ། སརྦ་སཏྭཱ། ཧི་ཏ་ཀཱ་མ། བཻ་ཤྲ་བ་ཎ་ཤྲཱི་ཡ་དེ་བཱི་པྲ་བྷཱ་ཡ། ཨེ་ཧི་ཨེ་ཧི། མཱ་བི་ལམྦ། གྷཱུརྞ་གྷཱུརྞ། པ་ར་སྱ་པ་ར་སྱ། ད་དཱ་ཧི་མ་མཱ།
དརྴ་ན་ཀཱ་མ་སྱ། དརྴ་ནྃ། མ་མ་མ་ན། པྲ་ལ་ཧ་དཱ་ཡ་སྭཱ་ཧཱ། བཅོམ་ལྡན་འདས་བདག་གིས་སྔགས་ཟློས་པ་དེ་དང་། མཆོད་པ་རྒྱ་ཆེན་པོ་མཐོང་ནས། བདག་བྱམས་པ་དང་། དགའ་བའི་བསམ་པ་སྐྱེས་ནས། བདག་དེའི་མདུན་དུ་བྱིས་པ་གཞོན་ནུའི་
གཟུགས་སམ། ཡང་ན་རྒན་པོའམ། དགེ་སློང་གི་གཟུགས་སུ་བྱས་ཏེ། བདག་ལག་ན་ཡིད་བཞིན་གྱི་ནོར་བུ་གསེར་གྱི་སྣོད་དང་བཅས་པ་ཐོགས་ཏེ། དཀྱིལ་འཁོར་གྱི་ནང་དུ་ཞུགས་ནས། ལུས་ཀྱིས་གུས་པ་སྟོན་ཅིང་། སངས་རྒྱས་ཀྱི་མཚན་གཅིག་ཏུ་
བརྗོད་དེ། སྔགས་མཁན་དེ་ལ་འདི་སྐད་ཅེས་སྨྲའོ། །ཁྱོད་ཅི་དང་ཅི་སློང་བ་དེ་དག་ཐམས་ཅད་གྲུབ་པར་བྱས་ཏེ། ནགས་ཚལ་དབེན་པར་འགྲོ་འདོད་པའམ། ནོར་བུ་རིན་པོ་ཆེ་འདོད་པའམ། མི་མང་པོའི་ཡིད་དུ་འོང་བར་འདོད་པའམ། གསེར་དང་། དངུལ་
ལ་སོགས་པའི་ནོར་འདོད་པའམ། སྔགས་གཞན་སྒྲུབ་པའི་དངོས་གྲུབ་འདོད་པའམ། རྫུ་འཕྲུལ་དང་། མངོན་པར་ཤེས་པ་དང་། ཚེ་རིང་བར་འདོད་པ་དང་། སྨན་བཅུད་ཀྱིས་ལེན་འདོད་པ་ལ་སོགས་པ་ཐམས་ཅད་བསམ་པ་བཞིན་དུ་གྲུབ་པར་བྱའོ། །བདག་
གིས་དངོས་པོ་དེ་དག་ལ་སོགས་པ་མདོ་ཙམ་ཞིག་སྨོས་པར་ཟད་ཀྱི། དེ་མ་ཡིན་པ་གཞན་ཞིག་འདོད་ན་ཡང་ཐམས་ཅད་བསམ་པ་བཞིན་དུ་ཡོངས་སུ་གྲུབ་པར་བྱ་སྟེ། རིན་པོ་ཆེའི་གཏེར་མི་ཟད་པ་དང་། བསོད་ནམས་ཚད་མེད་པ་དང་ལྡན་པར་འགྱུར་རོ། །
དཔེར་ན་ཉི་ཟླ་འདི་ས་ལ་ལྷུང་བར་འགྱུར་བ་དང་། ས་ཆེན་པོ་འདི་གཞན་དུ་འགྱུར་བའི་དུས་ནི་ཡོད་ཀྱང་སྲིད་ཀྱི། བདེན་པའི་ཚིག་འདི་ནི་ནམ་ཡང་སླུ་བར་མི་འགྱུར་བས་རྟག་ཏུ་བདེ་བ་དང་། ཡིད་བཞིན་དུ་སྐྱིད་པ་དང་ལོངས་སྤྱོད་པ་ཐོབ་པར་འགྱུར་རོ། །གཞན་

ཡང་བཅོམ་ལྡན་འདས་མདོ་སྡེའི་རྒྱལ་པོ་འདི་གང་ཞིག་འཛིན་ཅིང་འཆང་བ་དང་། ཀློག་ཅིང་འདོན་པ་ཡང་རུང་། སྔགས་འདི་སྒྲུབ་པ་ཡང་རུང་སྟེ། ཚེགས་ཆུང་ངུས་མྱུར་དུ་འགྲུབ་པར་འགྱུར་རོ། །བཅོམ་ལྡན་འདས་བདག་གིས་སེམས་ཅན་དབུལ་ཞིང་ཕོངས་
པའི་སྡུག་བསྔལ་གྱིས་ཉེན་པའི་སེམས་ཅན་རྣམས་ཀྱི་ཆེད་དུ་སྔགས་འདི་བཤད་པས། དེ་ཕྱུག་ཅིང་བདེ་བའི་མཆོག་དང་ཕུན་སུམ་ཚོགས་པ་ཚེ་གཅིག་ཏུ་འབྱོར་བར་འགྱུར་རོ། །བདག་གིས་ཀྱང་དེ་ཡོངས་སུ་བསྲུང་ཞིང་བསྐྱབ་པའི་ཕྱིར། རྗེས་སུ་འབྲང་ཞིང་གནོད་པ་
དང་། འཚེ་བ་ཐམས་ཅད་མ་མཆིས་པར་བགྱིའོ། །གཞན་ཡང་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་དེ་འཛིན་ཅིང་རྒྱས་པར་བྱེད་པ་དང་། སྔགས་འདི་འཆང་བའི་གང་ཟག་དེ་གོམ་པ་བརྒྱ་ཚུན་ཆད་འོད་ཀྱིས་སྣང་བར་བྱས་ཏེ། བདག་གི་འཁོར་གནོད་སྦྱིན་སྟོང་
རྣམས་ཀྱིས་ཀྱང་རྟག་ཏུ་དེའི་གཡོག་ཏུ་བསྐོ་ཞིང་མངག་གཞུག་ཡིད་བཞིན་དུ་བྱེད་དུ་གཞུག་གོ། །བདག་གི་བདེན་པའི་ཚིག་འདི་སླུ་བ་མེད་པར་ཡང་བཅོམ་ལྡན་འདས་ཀྱིས་དགོངས་སུ་གསོལ། དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུས་སྔགས་དེ་སྐད་ཅེས་སྨྲས་པ་དང་། བཅོམ་
ལྡན་འདས་ཀྱིས་ལེགས་སོ་ལེགས་སོ་ཞེས་བཀའ་སྩལ་ཏེ། རྒྱལ་པོ་ཆེན་པོ་ཁྱོད་ཀྱིས་སེམས་ཅན་ཐམས་ཅད་སྲེད་པས་གདུངས་པའི་སྡུག་བསྔལ་གྱི་དྲ་བ་ཐམས་ཅད་བྲལ་བས་ཕྱུག་ཅིང་བདེ་བར་བྱ་བའི་ཕྱིར་སྔགས་འདི་སྨྲས་པ་དང་། གཞན་ཡང་མདོ་སྡེ་འདི་འཇིག་རྟེན་དུ་
ཡོངས་སུ་རྒྱས་པར་བྱ་བའི་ཕྱིར། སྔགས་འདི་བཤད་པ་ནི་ལེགས་སོ་ལེགས་སོ། །དེ་ནས་རྒྱལ་པོ་ཆེན་པོ་བཞི་སྟན་ལས་ལངས་ནས། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་བ་བཏུད་ནས། ཞབས་
གཉིས་ལ་སྤྱི་བོས་ཕྱག་འཚལ་ཏེ། དེའི་ཚེ་མངོན་སུམ་དུ་ཚུལ་དང་མཐུན་པའི་ཚིགས་སུ་བཅད་པ་འདི་དག་གིས། བཅོམ་ལྡན་འདས་ལ་མངོན་པར་བསྟོད་དོ། །རྒྱལ་བ་ཟླ་བ་དྲི་མ་མེད་པའི་སྐུ། །རྒྱལ་བ་ཉི་མ་འོད་ཟེར་སྟོང་གི་འོད། །རྒྱལ་བ་པདྨ་དྲི་མ་མེད་པའི་སྤྱན། །རྒྱལ་བ་

མེ་ཏོག་པད་རྩ་རྡུལ་མེད་ཚེམས། །རྒྱལ་བའི་ཡོན་ཏན་རྒྱ་མཚོ་ལྟ་བུ་སྟེ། །རིན་པོ་ཆེ་ནི་དུ་མའི་འབྱུང་གནས་གྱུར། །རྒྱལ་བ་རྒྱ་མཚོ་ཡེ་ཤེས་ཆུ་ཡིས་གང་། །ཏིང་འཛིན་བརྒྱ་ཕྲག་སྟོང་གིས་ཀུན་དུ་གང་། །རྒྱལ་བའི་ཞབས་ནི་འཁོར་ལོས་བྲིས་འདྲ་
སྟེ། །ཁོར་ཡུག་མུ་ཁྱུད་དེ་བཞིན་རྩིབ་མ་སྟོང་། །ཕྱག་དང་ཞབས་ནི་དྲ་བས་སྤྲས་པ་སྟེ། །ཞབས་ཀྱི་དྲ་བ་ངང་པའི་དབང་པོ་བཞིན། །གསེར་གྱི་རི་བོ་ལྟ་བུར་རབ་ཏུ་གདའ། །རྒྱལ་བ་དྲི་མེད་གསེར་གྱི་རི་དབང་རྒྱལ། །ཡོན་ཏན་ཐམས་ཅད་རི་དབང་འདྲ་བ་སྟེ། །
སངས་རྒྱས་རི་དབང་རྒྱལ་ལ་ཕྱག་འཚལ་ལོ། །དེ་བཞིན་གཤེགས་པའི་ཟླ་བ་ཆུ་ཟླ་འདྲ། །ནམ་མཁའ་དང་ཡང་མཚུངས་ཤིང་འདྲ་བ་སྟེ། །སྒྱུ་མ་སྨིག་རྒྱུ་ལྟ་བུར་ཆགས་མེད་པ། །རྒྱལ་བ་དྲི་མ་མེད་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་རྒྱལ་པོ་
ཆེན་པོ་བཞི་ལ་ཚིགས་སུ་བཅད་དེ་བཀའ་སྩལ་པ། སྟོབས་བཅུ་དག་གིས་གསེར་འོད་དམ་པ་ཡི། །མདོ་སྡེའི་དབང་པོའི་རྒྱལ་པོ་རབ་མཆོག་འདི། །འཇིག་རྟེན་སྐྱོང་བ་ཁྱེད་ཅག་རྣམས་ཀྱིས་ནི། །བརྩོན་འགྲུས་རབ་ཏུ་བརྟན་པས་བསྐྱང་བར་བྱ། །འདི་ལྟར་
མདོ་སྡེ་དཀོན་མཆོག་ཟབ་མོ་འདི། །སེམས་ཅན་ཀུན་ལ་བདེ་བ་སྦྱིན་བྱེད་པ། །སེམས་ཅན་རྣམས་ལ་ཕན་དང་བདེ་བའི་ཕྱིར། །འཛམ་བུའི་གླིང་འདིར་ཡུན་རིང་གནས་པར་འགྱུར། །འདི་ལྟར་སྟོང་གསུམ་གྱི་ནི་སྟོང་ཆེན་གྱི། །འཇིག་རྟེན་དག་ན་ངན་སོང་སྡུག་བསྔལ་
དང་། །སེམས་ཅན་དམྱལ་བའི་སེམས་ཅན་རྣམས་ཀྱི་ནི། །སྡུག་བསྔལ་ཐམས་ཅད་ཞི་བར་བྱེད་པ་ཡིན། །འཛམ་གླིང་འདི་ན་འཛམ་གླིང་གནས་པ་ཡི། །རྒྱལ་པོ་གང་དག་ཡིན་པ་ཐམས་ཅད་ཀྱིས། །རབ་ཏུ་དགའ་བ་ཆེན་པོ་བསྐྱེད་ནས་ནི། །ཆོས་རྣམས་ཀྱིས་ནི་
ཡུལ་དག་བསྐྱང་བར་གྱིས། །གང་གིས་འཛམ་བུའི་གླིང་འདི་བདེ་བ་དང་། །ཤིན་ཏུ་ལོ་ལེགས་ཉམས་ཀྱང་དགར་འགྱུར་ཞིང་། །འཛམ་བུའི་གླིང་ནི་ཐམས་ཅད་དག་ན་ཡང་། །སེམས་ཅན་ཐམས་ཅད་བདེ་བར་འགྱུར་བར་གྱིས། །འདི་ན་མི་ཡི་དབང་པོ་གང་རྣམས་ནི། །

ཡུལ་ལ་དགའ་དང་བདག་བདེ་དགའ་བ་དང་། །རྒྱལ་སྲིད་རྣམ་པར་འབྱོར་པ་དགའ་བ་དེས། །མདོ་སྡེའི་དབང་པོ་འདི་ནི་མཉན་པར་བྱ། །མདོ་སྡེའི་དབང་འདི་མཆོག་ཏུ་དགེ་བར་བྱེད། །ཕ་རོལ་དགྲ་ནི་ཡང་དག་ཟད་པར་བྱེད། །ཕ་རོལ་དམག་ཚོགས་ཟློག་བྱེད་དགེ་བ་
བྱེད། །མཆོག་ཏུ་འཇིགས་པས་ཕོངས་པ་སེལ་བར་བྱེད། །དཔེར་ན་རིན་ཆེན་ཤིང་ལྗོན་རབ་མཛེས་པ། །ཡོན་ཏན་ཀུན་འབྱུང་ཁྱིམ་ན་ཡོད་པ་ལྟར། །རྒྱལ་པོ་ཡོན་ཏན་འདོད་པ་རྣམས་ཀྱིས་ཀྱང་། །མདོ་སྡེའི་དབང་པོའི་མཆོག་འདི་དེ་ལྟར་བལྟ། །དཔེར་ན་
ཆུ་གྲང་སྐོམ་པ་སེལ་བྱེད་པ། །ཚ་བས་ཉམ་ཐག་དེ་ནི་རྙེད་པ་ལྟར། །ཡོན་ཏན་དག་གིས་སྐོམ་པའི་རྒྱལ་པོ་ལ། །མདོ་སྡེའི་དབང་པོའི་མཆོག་འདི་དེ་བཞིན་ནོ། །དཔེར་ན་རིན་ཆེན་ཐམས་ཅད་འབྱུང་བའི་གནས། །རིན་ཆེན་སྣོད་ནི་ལག་མཐིལ་ཡོད་པ་ལྟར། །
མི་ཡི་དབང་པོ་ཚོགས་ལ་གསེར་འོད་མཆོག །མདོ་སྡེའི་དབང་པོའི་མཆོག་འདི་དེ་བཞིན་ནོ། །འདི་ནི་ལྷ་ཡི་ཚོགས་ཀྱིས་མངོན་མཆོད་པ། །མདོ་སྡེའི་དབང་པོ་ལྷ་དབང་ཕྱག་བྱས་པས། །འཇིག་རྟེན་སྐྱོང་བ་རྫུ་འཕྲུལ་ཆེན་པོ་པ། །བཞི་པོ་དག་གིས་ཀུན་དུ་བསྲུངས་པ་
ཡིན། །ཕྱོགས་བཅུ་དག་ན་སངས་རྒྱས་རྣམས་ཀྱིས་ཀྱང་། །མདོ་སྡེའི་དབང་པོ་འདི་ནི་རྟག་ཏུ་དགོངས། །མདོ་སྡེའི་དབང་པོ་འདི་ནི་བཤད་པ་ན། །སངས་རྒྱས་རྣམས་ཀྱིས་ལེགས་ཞེས་བརྗོད་པ་བྱིན། །གནོད་སྦྱིན་བྱེ་བ་སྟོང་ཕྲག་བརྒྱ་རྣམས་ཀྱིས། །ཕྱོགས་བཅུ་
དག་ཏུ་ཡུལ་ཡང་སྲུང་བར་བྱེད། །རབ་ཏུ་དགའ་ཞིང་རབ་ཏུ་མགུ་སེམས་ཀྱིས། །མདོ་སྡེའི་དབང་པོ་འདི་ནི་ཉན་པར་བྱེད། །འཛམ་བུའི་གླིང་ན་གནས་པར་གྱུར་པ་ཡི། །ལྷ་ཡི་ཚོགས་རྣམས་བསམ་གྱིས་མི་ཁྱབ་པ། །ལྷ་ཚོགས་དེ་དག་ཀུན་ཀྱང་རབ་དགའ་བས། །
མདོ་སྡེའི་དབང་པོ་འདི་ནི་ཉན་པར་བྱེད། །ཆོས་རྣམས་མཉན་པར་བྱ་བ་འདི་ཡིས་ནི། །གཟི་བརྗིད་དང་ནི་སྟོབས་དང་བརྩོན་འགྲུས་ཐོབ། །གཟི་བྱིན་ཆེན་པོ་ཡིས་ནི་ལྷ་ཡི་ལུས། །ཤིན་ཏུ་རྒྱས་ཤིང་རྣམ་པར་འཕེལ་བར་འགྱུར། །དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་

ལ་ཚིགས་སུ་བཅད་པ་འདི་ལྟ་བུ་འདི་དག་ཐོས་པ་དང་ངོ་མཚར་དུ་གྱུར། རྨད་དུ་བྱུང་བར་གྱུར། དགའ་བར་གྱུར་ཏེ། དེ་དག་ཆོས་ཀྱི་ཤུགས་ཀྱིས་ཡུད་ཙམ་ཞིག་ཏུ་ངུས་ནས་མཆི་མ་ཕྱིས་ཏེ། དེ་དག་ལུས་འཕར་ཡན་ལག་འདར་ཞིང་དགའ་བ་དང་། བདེ་
བ་དང་། ཡིད་བདེ་བ་བསམ་གྱིས་མི་ཁྱབ་པ་དང་ལྡན་པར་གྱུར་ནས། ཡང་བཅོམ་ལྡན་འདས་ལ་ལྷའི་མེ་ཏོག་མན་དཱ་ར་བ་དག་གིས་གཏོར། མངོན་པར་གཏོར་ཏོ། །མངོན་པར་གཏོར་ནས་ཀྱང་སྟན་རྣམས་ལས་ལངས་ཏེ། བླ་གོས་ཕྲག་པ་གཅིག་ཏུ་བགོས་ནས།
པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་རྒྱལ་པོ་ཆེན་པོ་རེ་རེ་ལ་ཡང་གནོད་སྦྱིན་ལྔ་
བརྒྱ་ལྔ་བརྒྱ་དང་། ཆོས་སྨྲ་བ་དེ་ལ་བསྲུང་བ་དང་། ཡོངས་སུ་བསྐྱང་བའི་སླད་དུ། རྟག་ཏུ་དགེ་སློང་ཆོས་སྨྲ་བའི་སླད་བཞིན་འབྲང་བར་བགྱིའོ། །གལ་ཏེ་མདོ་སྡེ་འདི་ལས་ཚིག་གི་དོན་འགའ་ཞིག་བརྗེད་པར་གྱུར་ན་ཡང་། བདག་ཅག་གིས་དེ་ལ་དྲན་པ་དང་། མི་བརྗེད་
པའི་མཆོག་གི་གཟུངས་ཆོས་ཀྱི་རྣམ་གྲངས་ཡོངས་སུ་རྫོགས་པར་བགྱིའོ། །མདོ་སྡེའི་དབང་པོ་འདི་དག་གང་ན་བཞུགས་པའི་གནས་དེ་དག་གི་སེམས་ཅན་རྣམས་ཀྱིས་ཡོངས་སུ་རྒྱས་པར་བྱེད་པས། ནམ་ཡང་ནུབ་པར་མི་འགྱུར་རོ། །དེ་ནས་བཅོམ་ལྡན་འདས་ཀྱིས་འཁོར་
འདུས་པ་དེ་དག་ལ་ཆོས་ཀྱི་རྣམ་གྲངས་འདི་བཤད་པའི་ཚེ། སེམས་ཅན་དེ་དག་གིས་ཡེ་ཤེས་དང་། སྤོབས་པ་དང་། བསོད་ནམས་ཀྱི་ཚོགས་ཚད་མེད་པ་ཐོབ་པས། ཉོན་མོངས་པ་སྤངས་པའི་བདེ་བ་དང་ལྡན་ཏེ། བསྟན་བཅོས་ཐམས་ཅད་ལ་མཁས་ཤིང་འཁོར་བ་
ཡོངས་སུ་སྤངས་ཏེ། བླ་ན་མེད་པའི་བྱང་ཆུབ་ལས་ཕྱིར་མི་ལྡོག་པ་མྱུར་དུ་ཐོབ་པར་འགྱུར་རོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས་རྒྱལ་པོ་ཆེན་པོ་བཞིས་ཡུལ་འཁོར་ཡོངས་སུ་སྐྱོང་བའི་ལེའུ་ཞེས་བྱ་སྟེ། བཅུ་གཉིས་པའོ།། །།

བམ་པོ་བདུན་པ། དེ་ནས་བཅོམ་ལྡན་འདས་ཀྱིས། ཚེ་དང་ལྡན་པ་ཤ་ར་དྭ་ཏིའི་བུ་ལ་བཀའ་སྩལ་པ། ཤ་ར་དྭ་ཏིའི་བུ་འདི་ལྟ་སྟེ། ཆགས་པ་མེད་པའི་གཟུངས་ཞེས་བྱ་བའི་ཆོས་ཀྱི་རྣམ་གྲངས་འདི་ནི། བྱང་ཆུབ་སེམས་དཔའ་ཆོས་ཐམས་ཅད་ལ་བསྒོམས་
པ་རྣམས་ཀྱི་མ་དང་། བྱང་ཆུབ་སེམས་དཔའི་སྔོན་གྱི་སྤྱོད་པ་དང་། བྱང་ཆུབ་སེམས་དཔའ་རྣམས་ཀྱིས་ཡོངས་སུ་འཛིན་པ་ཡིན་ནོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་
ལྡན་འདས་གཟུངས་ནི་ཡུལ་ན་མི་གནས། ཕྱོགས་ན་མི་གནས་པ་ལགས་ན། བཅོམ་ལྡན་འདས་གཟུངས་གཟུངས་ཞེས་བགྱི་བའི་གཟུངས་ཀྱི་ཚིག་གི་དོན་དེ་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་
ཅེས་བཀའ་སྩལ་ཏོ། །ཤ་ར་དྭ་ཏིའི་བུ་ཇི་ལྟར་ཁྱོད་ཐེག་པ་ཆེན་པོ་ལ་གནས་པ་དང་། ཐེག་པ་ཆེན་པོ་ལ་མོས་པ་དང་། ཐེག་པ་ཆེན་པོ་ལ་ལྷག་པར་བྱ་བ་བྱས་པ་ཡིན་ན། ཤ་ར་དྭ་ཏིའི་བུ་ཇི་ལྟར་ཁྱོད་གཟུངས་ནི་ཡུལ་ན་མི་གནས་ཕྱོགས་ན་མི་གནས་ཤིང་། ཆོས་ཀྱང་མ་ཡིན།
ཆོས་མ་ཡིན་པ་ཡང་མ་ཡིན། འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན། དངོས་པོ་ཅན་ཡང་མ་ཡིན། དངོས་པོ་མེད་པ་ཅན་ཡང་མ་ཡིན། རྐྱེན་ལས་བྱུང་བ་ཡང་མ་ཡིན། རྐྱེན་མེད་པ་ལས་བྱུང་བ་ཡང་མ་ཡིན། འགྲོ་བ་ལས་བྱུང་
བ་ཡང་མ་ཡིན། འགྲོ་བ་མེད་པ་ལས་བྱུང་བ་ཡང་མ་ཡིན། ཆོས་གང་གི་སྐྱེ་བ་ཡང་མ་ཡིན། འགོག་པ་ཡང་མ་ཡིན་པར་ཆོས་སྟོན་མོད་ཀྱི། བྱང་ཆུབ་སེམས་དཔའ་རྣམས་ལ་ཕན་པར་བྱ་བའི་ཕྱིར། འདི་ལྟ་སྟེ། སངས་རྒྱས་ཀྱི་ཡོན་ཏན་དང་། སངས་རྒྱས་ཀྱི་ཚུལ་ཁྲིམས་
དང་། སངས་རྒྱས་ཀྱི་བསླབ་པ་དང་། སངས་རྒྱས་ཀྱི་དགོངས་པ་དང་། སངས་རྒྱས་འབྱུང་བ་འདི་ལྟ་སྟེ། ཆགས་པ་མེད་པའི་གཟུངས་ཞེས་བྱ་བའི་ཆོས་ཀྱི་རྣམ་གྲངས་སྒྲུབ་པའི་ལམ་གྱི་རིག་པ་དང་། སྟོབས་ཀྱི་གནས་སྟོན་པ་ལེགས་སོ་ལེགས་སོ། །དེ་སྐད་ཅེས་བཀའ་སྩལ་

པ་དང་། བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་སྟེ། གཟུངས་ཐོབ་པས་གང་ལ་གནས་ན། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་
ལྡོག་པར་འགྱུར་བ་དང་། ཡང་དག་པར་དམ་བཅས་པར་འགྱུར་བ་དང་། རྟེན་མེད་པའི་ཆོས་ཀྱི་རང་བཞིན་གྱི་སྤོབས་པ་ཅན་གྱི་སློབ་དཔོན་དང་། ལམ་ལ་ཤིན་ཏུ་གནས་པར་འགྱུར་བའི་གཟུངས་ཀྱི་ཆོས་ཀྱི་རྣམ་གྲངས་བཤད་དུ་གསོལ། བདེ་བར་གཤེགས་པ་
བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤ་ར་དྭ་ཏིའི་བུ་ལེགས་སོ་ལེགས་སོ། །ཤ་ར་དྭ་ཏིའི་བུ་དེ་དེ་བཞིན་ཏེ་གཟུངས་ཐོབ་པའི་བྱང་ཆུབ་སེམས་དཔའ་དེ་ལ་སངས་རྒྱས་
ཉིད་དུ་བརྗོད་པར་བྱ་སྟེ། ཤ་ར་དྭ་ཏིའི་བུ་གང་ལ་ལ་གཟུངས་ཐོབ་པའི་བྱང་ཆུབ་སེམས་དཔའ་ལ་བཀུར་སྟིར་བྱེད་པ་དང་། བླ་མར་བྱེད་པ་དང་། རིམ་གྲོར་བྱེད་པ་དང་། མཆོད་པར་བྱེད་པ་དེས་སངས་རྒྱས་ལ་བཀུར་སྟིར་བྱས་པར་འགྱུར་རོ། །ཤ་ར་དྭ་ཏིའི་བུ་གང་ལ་
ལ་གཟུངས་འདི་ཉན་པར་བྱེད་པ་དང་། གང་དག་གཟུངས་འདི་འཆང་བར་བྱེད་པ་དང་། གང་དག་མོས་པར་བྱེད་པ་དེ་རྣམས་ལ་བྱང་ཆུབ་ཀྱི་སེམས་དང་མ་བྲལ་བས། སངས་རྒྱས་ལ་ཇི་ལྟར་མཆོད་པ་དེ་བཞིན་དུ་འགྱུར་རོ། །ཤ་ར་དྭ་ཏིའི་བུ་གཟུངས་དེ་ནི་འདི་ཡིན་ཏེ་
ཏདྱ་ཐཱ། སན་དྷཱ་ར་ཎི། ཨུཏ་དྷཱ་ར་ཎི། སུ་སཾ་པྲ་ཏིཥྛི་ཏེ། སུ་ནཱ་མ། སུ་པྲ་ཏིཥྛི་ཏེ། བི་ཛ་ཡ་བ་ལ། སཏྟྱ་པྲ་ཏི་ཛྙཱ། སུ་ཨཱ་རོ་ཧ། ཛྙཱ་ན་པྲ་ཏི། ཨུཏྤཱ་ད་ནི། ཨ་བ་ནཱ་བ་ནི། ཨ་བྷི་ཥིཉྩ་ནི། ཨ་བྷི་བྱ་ཧཱ་ར། ཤུ་བྷ་བ་ཏི། སུ་ནིཿཤྲི་ཏ། བ་ཧུ་གུཾ་བྷ། ཨ་བྷི་བ་དཱ་སྭཱ་ཧཱ།
ཤ་ར་དྭ་ཏིའི་བུ་ཆགས་པ་མེད་པའི་གཟུངས་ཀྱི་ཚིག་འདི་བྱང་ཆུབ་སེམས་དཔའ་གང་གིས་ཤིན་ཏུ་གནས་པ་དང་། ལེགས་པར་གཟུང་བ་བྱས་ནས། འཆང་བར་བྱེད་པ་དེ་བསྐལ་པའམ། བསྐལ་པ་ལས་ལྷག་པའམ། བསྐལ་པ་སྟོང་ངམ། བསྐལ་པ་བརྒྱ་ཕྲག་སྟོང་

དུ་ཡང་སྨོན་ལམ་ཟད་པར་མི་འགྱུར་ལ། དེའི་ལུས་ལ་མཚོན་གྱིས་ཚུགས་པར་མི་འགྱུར་ཏེ། དུག་གིས་མ་ཡིན་ཞིང་སྦྲུལ་གྱིས་ཚུགས་པར་མི་འགྱུར་རོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་ཆགས་པ་མེད་པའི་གཟུངས་འདི་ནི། འདས་པའི་སངས་རྒྱས་
རྣམས་ཀྱི་ཡུམ། མ་བྱོན་པའི་སངས་རྒྱས་རྣམས་ཀྱི་ཡུམ། ད་ལྟར་བྱུང་བའི་སངས་རྒྱས་རྣམས་ཀྱི་ཡུམ་སྟེ། འདི་ལྟ་སྟེ། ཆགས་པ་མེད་པའི་གཟུངས་ཞེས་བྱ་བའི་ཆོས་ཀྱི་རྣམ་གྲངས་ཡིན་ནོ། །ཤ་ར་དྭ་ཏིའི་བུ་གང་དག་གིས་སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་གྲངས་མེད་པ་ཕྲག་བཅུ་རིན་པོ་ཆེ་སྣ་བདུན་གྱིས་བཀང་སྟེ། སངས་རྒྱས་བཅོམ་ལྡན་འདས་རྣམས་ལ་ཡོན་དུ་ཕུལ་ཞིང་སངས་རྒྱས་བཅོམ་ལྡན་འདས་དེ་རྣམས་ལ་བསྐལ་པ་གྲངས་མེད་པར་ན་བཟའ་དང་། ཞལ་ཟས་གྱ་ནོམ་པས་བཞུགས་པར་བྱེད་པ་བས།
གང་དག་གིས་ཆགས་པ་མེད་པའི་གཟུངས་ཀྱི་ཆོས་ཀྱི་རྣམ་གྲངས་འདི་ལས་ཚིག་གཅིག་ཙམ་འཛིན་པར་བྱེད་པའི་སེམས་ཅན་དེ་དག་དེ་བས་ཆེས་བསོད་ནམས་མང་དུ་སྐྱེད་པར་འགྱུར་རོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་ཤ་ར་དྭ་ཏིའི་བུ་འདི་ལ་ཆགས་པ་མེད་པའི་གཟུངས་ཀྱི་ཆོས་ཀྱི་
རྣམ་གྲངས་འདི་ནི། སངས་རྒྱས་ཐམས་ཅད་ཀྱི་ཡུམ་ཡིན་ནོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས་ཆགས་པ་མེད་པའི་གཟུངས་ཞེས་བྱ་བའི་ལེའུ་སྟེ་བཅུ་གསུམ་པའོ།། །།དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་
སྩལ་པ། ཀུན་དགའ་བོ་ཁྱོད་ཀྱིས་གློག་ཐམས་ཅད་ཟློག་པ། སོ་སོར་འབྲང་བ་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱིས་གསུངས་པ། ང་ཡང་ད་ལྟར་འཆད་ཀྱིས་ཟུང་ཤིག །ཀུན་དགའ་བོ་ཤར་ཕྱོགས་ན་འོང་བ་ཞེས་བྱ་བའི་གློག་ཡོད། ཀུན་དགའ་བོ་ལྷོ་
ཕྱོགས་ན་སྐད་བརྒྱ་པ་ཞེས་བྱ་བའི་གློག་ཡོད། ཀུན་དགའ་བོ་ནུབ་ཕྱོགས་ན་འོད་ཉམས་པ་ཞེས་བྱ་བའི་གློག་ཡོད། ཀུན་དགའ་བོ་བྱང་ཕྱོགས་ན་རྒྱུན་གྱི་བདག་པོ་ཞེས་བྱ་བའི་གློག་ཡོད་དེ། ཀུན་དགའ་བོ་གང་ལ་ལ་གློག་འདི་རྣམས་ཀྱི་མིང་ཤེས་པ་དང་། ཕྱོགས་རྣམ་པར་གནས་

པ་ཤེས་པ་དེ་ལ་གློག་གི་འཇིགས་པ་ཐམས་ཅད་མི་འབྱུང་བར་ཤེས་པར་བྱའོ། །གློག་གི་མིང་འདི་དག་ཡི་གེར་བྲིས་ཏེ། གནས་གང་དུ་བཞག་པའི་གནས་དེ་དག་ཏུ། གློག་ཐམས་ཅད་མི་འབབ་བོ། །དེ་ནས་བཅོམ་ལྡན་འདས་ཀྱིས་དེའི་ཚེ།
དྲཱ་བི་ཌའི་གསང་སྔགས་ཀྱི་ཚིག་འདི་དག་བཀའ་སྩལ་ཏོ། །ཏདྱ་ཐཱ། ནི་མི་ནི་མི། ནི་མིན་དྷ་རི། འཇིག་རྟེན་གསུམ་སྣང་བར་བྱེད་པ། ལག་ན་རྩེ་གསུམ་པས་ཕྱོགས་འདིར་གློག་ཐམས་ཅད་ལས་བདག་ལ་སྲུངས་ཤིག་སྲུངས་ཤིག་སྭཱ་ཧཱ། ཡང་དེའི་ཚེ་བྱང་ཆུབ་སེམས་
དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་འཁོར་དེ་ཉིད་དུ་འདུས་པར་གྱུར་ཏེ། འདུག་པ་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་ཆོས་ཀྱི་རྣམ་གྲངས་འདི་ལ། དྲཱ་བི་ཌའི་གསང་སྔགས་ཀྱི་
ཚིག་རྣམས་བརྗོད་པར་བགྱིའོ། །ཏདྱ་ཐཱ། ཀ་ཊེ་བི་ཀ་ཊེ། ནི་ཀ་ཊེ། པྲ་ཏྱ་རྠི་ཀེ །པྲཏྱ་མི་ཏྲེ། ཤུདྡྷེ། མུཀྟེ། བི་མ་ལེ། པྲ་བྷཱ་སྭ་རེ། ཨཎྜ་རེ། པཎྜ་རེ། ཤྭེ་ཏེ། པཎྜ་ར་བཱ་སི་ནི། ཧ་རི་ཀཎྜ་རི། ཀ་པི་ལི། པིཾ་ག་ལ། ཨཀྵི་ད་དྷི་མུ་ཁི། དུས་མ་ཡིན་
པར་འཆི་བ་ཐམས་ཅད་ལས་བདག་ལ་སྲུངས་ཤིག་སྲུངས་ཤིག །འཕགས་པ་སྤྱན་རས་གཟིགས་དབང་ཕྱུག་གི་གཟི་བརྗིད་ཀྱིས། བདག་དུས་མ་ཡིན་པར་འཆི་བ་ཐམས་ཅད་མཐོང་བར་མ་གྱུར་ཅིག་སྭཱ་ཧཱ། དེ་ནས་གསང་བ་པའི་བདག་པོ་ལག་ན་རྡོ་རྗེས། བཅོམ་
ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་ཆོས་ཀྱི་རྣམ་གྲངས་འདི་ལ་གཟུངས་ཀྱི་ཚིག་རྣམས་བརྗོད་པར་བགྱིའོ། །ཏདྱ་ཐཱ། མུ་ནི་མུ་ནི། མུ་ནི་ན་དྷ་རི་མུ་ནི།
མ་ཏི་མ་ཏི། སུ་མ་ཏི། མ་ཧཱ་མ་ཏི། ཧཱ་ཧཱ་ཧཱ་ཧཱ། ཁྱོད་ལ་སྡིག་པ་མེད་ཀྱིས་མ་འཇིགས་ཤིག་ཅེས་ལག་ན་རྡོ་རྗེས་སྨྲས་ཀྱིས་དྲཱ་བི་ཌ་སྭཱ་ཧཱ། བཅོམ་ལྡན་འདས་བདག་གི་བསྲུང་བ་གཞན་གྱིས་མི་ཐུབ་པ་འདི་སུའི་སྙིང་ལ་འཛིན་ཏམ། ཡི་གེར་བྲིས་པ་དེ་བདག་གིས་རྟག་

པར་རྒྱུན་དུ། འཇིགས་པ་ཐམས་ཅད་ལས་བསྲུང་བར་བགྱིའོ། །དུས་མ་ལགས་པར་འགུམ་པ་ཐམས་ཅད་ལས་ཐར་བར་བགྱིའོ། །དེ་ནས་མི་མཇེད་ཀྱི་བདག་པོ་ཚངས་པས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
བདག་གིས་ཀྱང་། སེམས་ཅན་ཐམས་ཅད་ཀྱི་དོན་དང་། ཕན་པ་དང་། བདེ་བ་བསྐྱེད་པའི་སླད་དུ། ཆོས་ཀྱི་རྣམ་གྲངས་འདི་ལ། གཟུངས་ཀྱི་གསང་སྔགས་ཀྱི་ཚིག་རྣམས་བརྗོད་པར་བགྱིའོ། །ཏདྱ་ཐཱ། ཧི་ལི་མི་ལི། ཙི་ལི་སྭཱ་ཧཱ། བྲཧྨ་པཱུ་རེ་སྭཱ་ཧཱ།
བྲཧྨ་སྭ་རེ་སྭཱ་ཧཱ། བྲཧྨ་བྷི་སུ་གརྦྷེ། པུཥྤ་སཾ་སྟ་རེ་སྭཱ་ཧཱ། བཅོམ་ལྡན་འདས་འདི་ནི་བདག་གི་བསྲུང་བ་ཚངས་པའི་ཆད་པ་ཞེས་བགྱི་སྟེ། དུས་མ་ལགས་པར་འགུམ་པ་ཐམས་ཅད་ལས་ཡོངས་སུ་སྐྱོབ་པ། སྡིག་པ་ཐམས་ཅད་རབ་ཏུ་ཞི་བར་བགྱིད་པ་ལགས་སོ། །
དེ་ནས་ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་ཆོས་ཀྱི་རྣམ་གྲངས་འདི་ལ་གཟུངས་ཀྱི་གསང་སྔགས་ཀྱི་ཚིག་རྣམས་
བརྗོད་པར་བགྱིའོ། །ཏདྱ་ཐཱ། ནི་བ་རཱ་ཎི། བནྡྷ་མཱ་རནྟེ་མ་ཏི་ཏི། ཏི་ཏི། གཽ་རཱི། གནྡྷ་རི། ཙཎྜཱ་ལི། མཱ་ཏངྒི། པ་རྞ་ལེ། ཧི་ན་མ་དྷྱ་མ་དྷ་རི་ཎི་མ་ལ་ནི། ད་ལ་མད་དེ། ཙཀྲ་བཱ་ཀྲཱི། ཤ་བ་རི། ཤ་བ་རི་སྭཱ་ཧཱ། བཙུན་པ་བཅོམ་ལྡན་འདས་
འདི་ནི་བདག་གི་རིག་སྔགས་རྡོ་རྗེའི་ལྕེ་འབེབས་པ་ཞེས་བགྱི་སྟེ། འཇིགས་པ་ཐམས་ཅད་ལས་ཐར་བར་བགྱིད་པ། དུས་མ་ལགས་པར་འགུམ་པ་ཐམས་ཅད་ལས་ཡོངས་སུ་སྐྱོབ་པ་ལགས་སོ། །དེ་ནས་རྒྱལ་པོ་ཆེན་པོ་ཡུལ་འཁོར་སྲུང་དང་། འཕགས་སྐྱེས་པོ་
དང་། མིག་མི་བཟང་དང་། རྒྱལ་པོ་ཆེན་པོ་རྣམ་ཐོས་ཀྱི་བུས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་། སྐྱེ་བོ་མང་པོ་ལ་ཕན་པ་དང་། སྐྱེ་བོ་

མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བའི་སླད་དུ། ཆོས་ཀྱི་རྣམ་གྲངས་འདི་ལ་གཟུངས་ཀྱི་གསང་སྔགས་ཀྱི་ཚིག་རྣམས་བརྗོད་པར་བགྱིའོ། །ཏདྱ་ཐཱ། པུཥྤེ་སུ་པུཥྤེ། དྷུ་མ་པ་རི་ཧཱ་རེ། ཨཱརྱ་པུ་ཤ་སྟེ། ཤཱན་ཏི། ནིརྨུཀ་ཏེ།
མངྒ་ལྱ། ཧི་ར་ཎྱ་གདྡྷེ་སྟུ་ཏེ། སྟ་བི་ཏེ་སྭཱ་ཧཱ། བཙུན་པ་བཅོམ་ལྡན་འདས་འདི་ནི་རྒྱལ་པོ་ཆེན་པོ་བཞི་པོ་བདག་ཅག་གི་བསྲུང་བ་འཇིགས་པ་མ་མཆིས་པ་ཞེས་བགྱི་སྟེ། འཇིགས་པ་ཐམས་ཅད་ལས་མི་འཇིགས་པར་བགྱིད་པ། ཚེ་སྐྱོང་བ་དུས་མ་ལགས་
པར་འགུམ་པ་ཐམས་ཅད་ལས་ཡོངས་སུ་སྐྱོབ་པ་ལགས་སོ། །དེ་ནས་ཀླུའི་རྒྱལ་པོ་རྒྱ་མཚོ་དང་། ཀླུའི་རྒྱལ་པོ་གློག་འོད་དང་། ཀླུའི་རྒྱལ་པོ་མ་དྲོས་པ་དང་། ཀླུའི་རྒྱལ་པོ་གློག་ལྕེ་དང་། ཀླུའི་རྒྱལ་པོ་འོད་ཟེར་བརྒྱ་པས། བཅོམ་ལྡན་འདས་ག་ལ་བ་དེ་
ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གི་སྲུང་བ་ཆེན་པོ་ཡིད་བཞིན་གྱི་ནོར་བུ་ཞེས་བགྱི་བ། གློག་ཐམས་ཅད་ཟློག་པ། དུས་མ་ལགས་པར་འགུམ་པ་ཐམས་ཅད་སེལ་བ། དུག་
རྣམས་མི་གདུག་པར་བགྱིད་པ། གཤེད་བྱེད་དང་། བྱད་སྟེམས་དང་། རོ་ལངས་དང་། བཀྲ་མི་ཤིས་པའི་འཇིགས་པ་ཞི་བར་བགྱིད་པ་མཆིས་ན། བཅོམ་ལྡན་འདས་བདག་ཅག་ཀླུའི་སྐྱེ་གནས་འདི་ནས་དབྱུང་བ་དང་། སེར་སྣ་སྤང་བའི་སླད་དུ་ཐུགས་བརྩེ་བར་དགོངས་
ཏེ་བཞེས་སུ་གསོལ། དེ་ཅིའི་སླད་དུ་ཞེ་ན། བཅོམ་ལྡན་འདས་བདག་ཅག་ཀླུ་རྣམས་ནི་སེར་སྣ་ཅན་ཏེ་སེམས་སེར་སྣས་བསྐོར་བ་ལགས་སོ། །ཏདྱ་ཐཱ། ཨཱརྱ་ཛེ་ཨ་མ་རེ་ཨ་མྲྀ་ཏེ། ཨཀྵ་ཡེ། ཨ་བྷི་ཡེ། པུཎྱཻ། བརྱ་བ་ཏེ། སརྦ་པཱ་པྃ། པྲ་ཤ་མཱ་ནི་ཡེ་སྭཱ་ཧཱ། ཨཱརྱ་པུཎྱ་
སོ་པཱ་ཀཱི་ཡེ་སྭཱ་ཧཱ། བཙུན་པ་བཅོམ་ལྡན་འདས་གསང་སྔགས་ཀྱི་ཚིག་འདི་དག་སྐྱེས་པའམ། བུད་མེད་གང་ལ་ལའི་ལྕེ་ལ་འདོན་པའམ། ཡི་གེར་བྲིས་པ་དེ་ལ་གློག་གི་འཇིགས་པ་ཐམས་ཅད་མ་མཆིས་པར་རིག་པར་བགྱིའོ། །རྩ་བའི་དུག་གམ། མཆེ་བའི་

དུག་གམ། དབྱིག་དུག་གམ། གང་དག་གཞན་ཡང་ཡན་ལག་ལས་བྱུང་བའི་དུག་དེ་དག་གིས་དེ་འགུམ་པའི་དུས་བགྱིད་པར་མི་འགྱུར་རོ། །བདག་འཇིགས་པ་ཐམས་ཅད་དང་། གནོད་པ་ཐམས་ཅད་ལས་བདེ་ལེགས་སུ་གྱུར་ཅིག །དེ་ནས་བཅོམ་ལྡན་
འདས་ཀྱིས་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། ཀླུའི་དབང་པོ་དེ་དག་ལ་ལེགས་སོ་ཞེས་བྱ་བ་གནང་སྟེ། བཞིན་བཟངས་དག་ཁྱེད་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བའི་ཕྱིར་ཞུས་ཏེ། ཆོས་ཀྱི་རྣམ་གྲངས་འདི་རྗེས་སུ་ཡོངས་སུ་བཟུང་བའི་ཕྱིར།
དྲཱ་བི་ཌའི་གསང་སྔགས་ཀྱི་ཚིག་རྣམས་བཤད་པ་ལེགས་སོ་ལེགས་སོ། །ཕྱོགས་རྣམས་ནི་གཉིད་ལོག་པ་དང་། མྱོས་པ་དང་། རབ་ཏུ་མྱོས་པ་རྣམས་བསྲུང་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་དང་།
བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དེ་དག་དང་། ཀླུའི་དབང་པོ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །གསེར་འོད་དམ་
པ་མདོ་སྡེའི་དབང་པོའི་རྒྱལ་པོ་ལས། ཡིད་བཞིན་གྱི་ནོར་བུའི་གཟུངས་ཀྱི་ལེའུ་ཞེས་བྱ་སྟེ་བཅུ་བཞི་པའོ།། །།དེ་ནས་ལྷ་མོ་ཆེན་མོ་དབྱངས་ཅན་གྱིས་བླ་གོས་ཕྲག་པ་གཅིག་ཏུ་བགོས་ཏེ། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་
ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ལྷ་མོ་ཆེན་མོ་དབྱངས་ཅན་བདག་གིས་ཀྱང་། དགེ་སློང་ཆོས་སྨྲ་བ་དེའི་ཚིག་བརྒྱན་པའི་སླད་དུ། སྤོབས་པ་ཉེ་བར་བསྒྲུབ་
པར་བགྱི། གཟུངས་ཀྱང་སྩལ་བར་བགྱི། ངེས་པའི་ཚིག་གིས་བརྗོད་པ་ཀུན་ཏུ་གཞག་པར་བགྱི། དགེ་སློང་ཆོས་སྨྲ་བ་དེ་ལ་ཤེས་པའི་སྣང་བ་ཆེན་པོ་བགྱི། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ལས་ཚིག་འགའམ། ཡི་གེ་གང་ཡང་རུང་བ་དག་

གཅིག །ཡོངས་སུ་ཉམས་པར་གྱུར་ཏམ། བསྐྱུད་ན་བདག་གིས་དགེ་སློང་ཆོས་སྨྲ་བ་དེའི་ངེས་པའི་སྒྲ་དང་ཚིག་དང་། ཡི་གེ་དེ་དག་ཐམས་ཅད་བསྒྲུབ་པར་བགྱིའོ། །ཅི་ནས་སངས་རྒྱས་བཅོམ་ལྡན་འདས་འབུམ་ཕྲག་དག་ལ་དགེ་བའི་རྩ་བ་བསྐྲུན་
པའི་སེམས་ཅན་དེ་དག་གི་དོན་གྱི་སླད་དུ། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་འཛམ་བུའི་གླིང་ན་ཡུན་རིང་དུ་གནས་ཤིང་མྱུར་དུ་ནུབ་པར་མི་འགྱུར་བ་དང་། སེམས་ཅན་དུ་མ་དག་གིས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་ཐོས་ནས།
ཤེས་རབ་རྣོ་བ་བསམ་གྱིས་མི་ཁྱབ་པར་འགྱུར་བ་དང་། ཤེས་རབ་ཀྱི་ཕུང་པོ་བསམ་གྱིས་མི་ཁྱབ་པ་ཐོབ་པར་འགྱུར་བ་དང་། ཚེ་འདི་ལ་ཚེ་ཕུན་སུམ་ཚོགས་པ་རབ་ཏུ་ཐོབ་པར་འགྱུར་བ་དང་། སྲོག་ལ་ཕན་གདགས་པ་དང་། བསོད་ནམས་ཀྱི་ཕུང་པོ་དཔག་ཏུ་
མ་མཆིས་པ་རབ་ཏུ་འཛིན་པར་འགྱུར་བ་དང་། ཐབས་སྣ་ཚོགས་རབ་ཏུ་འཚལ་བར་འགྱུར་བ་དང་། བསྟན་བཅོས་ཐམས་ཅད་ལ་རབ་ཏུ་མཁས་པར་འགྱུར་བ་དང་། བཟོའི་བགྱི་བ་སྣ་ཚོགས་ཕུན་སུམ་ཚོགས་པ་འཐོབ་པར་འགྱུར་བ་དང་། བསྐྱུད་པ་མ་མཆིས་
པར་བགྱི་བའི་སླད་དུ། དེ་ལ་གཟུངས་ཀྱང་སྩལ་བར་བགྱིའོ། །དགེ་སློང་ཆོས་སྨྲ་བ་དེ་དང་། སེམས་ཅན་ཆོས་ཉན་པ་དེ་དག་གི་དོན་གྱི་སླད་དུ། སྔགས་དང་། སྨན་དང་ལྡན་པའི་ཁྲུས་ཀྱི་ལས་བརྗོད་པར་བགྱི་སྟེ། གཟའ་དང་། རྒྱུ་སྐར་དང་། སྐྱེ་བ་དང་།
འཆི་བའི་གནོད་པ་དང་། འཐབ་པ་དང་། རྙོག་པ་དང་། འཁྲུག་གློང་དང་། ཁྲག་ཁྲུག་དང་། རྨི་ལམ་ངན་པ་དང་། ལོག་འདྲེན་གྱི་གནོད་པ་ཐམས་ཅད་དང་། བྱད་དང་རོ་ལངས་ཐམས་ཅད་རབ་ཏུ་ཞི་བར་འགྱུར། གང་གིས་མཁས་པ་དག་ཁྲུས་བགྱིད་དུ་
སྩལ་བའི་སྨན་དང་སྔགས་ནི་འདི་དག་སྟེ། ཤུ་དག་གིའུ་ཝང་སྤྲྀ་ཀ་དང་། །ཤ་མྱ་ཤ་མྱི་ཤཱི་རི་ཤཱ། །ཨིནྡྲ་ཧསྟ་སྐལ་བ་ཆེ། །ཛྷ་མ་ཤིང་ཚ་ཨ་ག་རུ། །ཤི་རི་བི་སྟ་སྲ་རྩི་པོག །གུ་གུལ་ར་ས་ཤ་ལ་ཀི། །རྡོ་དྲེག་ལོ་མ་རྒྱ་སྤོས་དང་། །ཙནྡན་དང་ནི་ལྡོང་རོས་དང་། །

གིའུ་ཝང་བཅས་དང་རུ་རྟ་དང་། །གུར་གུམ་གླ་སྒང་ཡུངས་ཀར་དང་། །དབྱི་མོ་སུག་སྨེལ་ན་ལ་དང་། །ནཱ་ག་གེ་སར་ཨུ་ཤི་ར། །འདི་དག་ཆ་ནི་མཉམ་བགྱིས་ནས། །སྐར་མ་རྒྱལ་ལ་བཏག་པར་བགྱི། །ཕྱེ་མ་ལ་ནི་སྔགས་ཚིག་འདི། །ལན་བརྒྱ་མངོན་པར་
གདབ་པར་བགྱི། །ཏདྱ་ཐཱ། སུ་ཏེ་ཀྲྀ་ཏེ། ཀ་མ་ཏ་ལི། ན་ལེ་ཛ་ན་ཀ་ར་ཏེ། ཧངྐ་ར་ཏེ། ཨིནྡྲ་ཛ་ལི་ནི། ཤཾ་ཀ་ར་དྲི་པ་ཤད་དྲི། ཨ་བརྟ་ཀ །སེ་ཀེ་ན་ཀུ་ཏྲ་ཀུ། །ཀ་བི་ལ། ཀ་བི་ལ་མ་ཏི། ཤཱི་ལ་མ་ཏི། ཤཱི་ལ་མ་ཏི། སནྡྷི། དྷུ་དྷུ་མ་བ་ཏི།
ཤི་རི་ཤི་རི། སད་ཏྱ་སྠི་ཏི་སྭཱ་ཧཱ། ལྕི་བས་དཀྱིལ་འཁོར་བགྱིས་ནས་ནི། །མེ་ཏོག་སིལ་མ་དགྲམ་པར་བགྱི། །གསེར་གྱི་སྣོད་དང་དངུལ་སྣོད་དུ། །མངར་བའི་ཁུ་བ་གཞག་པར་བགྱི། །སྐྱེས་བུ་གོ་ཆ་བགོས་པ་ནི། །བཞི་ཞིག་དེར་ཡང་གཞག་པར་བགྱི། །
རབ་ཏུ་བརྒྱན་པའི་བུ་མོ་བཞི། །བུམ་པ་ཐོགས་པ་གཞག་པར་བགྱི། །རྟག་ཏུ་གུ་གུལ་བདུག་པར་བགྱི། །སིལ་སྙན་སྣ་ལྔ་བགྱིད་དུ་སྩལ། །གདུགས་དང་བ་དན་རྒྱལ་མཚན་གྱིས། །ལྷ་མོ་དེ་ནི་ལེགས་པར་བརྒྱན། །བར་བར་དག་ཏུ་མེ་ལོང་བཞག །
མདའ་དང་མདུང་རྩེ་སྣེ་སྤྲད་བཞག །དེ་ནས་མཚམས་ཀྱང་གཅད་པར་བགྱི། །དེ་ཡི་འོག་ཏུ་དགོས་པ་བརྩམ། །སྔགས་ཀྱི་ལས་ནི་འདི་དག་གིས། །མཚམས་གཅད་པ་ཡང་བརྩམ་པར་བགྱི། །སཱདྱ་ཐེད་ན། ཨ་ཀ་ར་ཀེ། ན་ཡ་ནེ། ཧི་ལེ་མི་ལེ། གི་ལེ། ཁི་
ཁི་ལེ་སྭཱ་ཧཱ། དེ་ནས་བཅོམ་ལྡན་འདས་ཀྱི་སྣ་མ་ལོགས་སུ་ཁྲུས་བགྱིས་ནས། སྔགས་འདི་བཟླས་བརྗོད་བགྱིས་ན་ཁྲུས་ཀྱིས་ཞི་བར་སྦྱར་རོ། །ཏདྱ་ཐཱ། ས་ག་ཌེ། བི་ག་ཌེ། བི་ག་ཏ་བ་ཏི་སྭཱ་ཧཱ། ཕྱོགས་བཞི་དག་ན་གང་གནས་པའི། །རྒྱུ་སྐར་དག་གིས་ཚེ་
སྲུངས་ཤིག །བཙས་པའི་སྐར་མའི་གནོད་པ་དང་། །ཕུང་པོའི་ལས་ཀྱི་འཇིགས་འབྱུང་དང་། །འབྱུང་པོའི་ཁམས་རྣམས་འཁྲུགས་བགྱིད་པ། །འཇིགས་པ་མི་བཟད་ཞི་གྱུར་ཅིག །ཏདྱ་ཐཱ། ས་མེ་བི་ཤ་མེ་སྭཱ་ཧཱ། ས་ག་ཌེ། བི་ག་ཌེ་སྭཱ་ཧཱ། བི་ག་ཌེ་བ་ཏེ་

སྭཱ་ཧཱ། སཱ་ག་ར་སྃ་བྷུ་ཏཱ་ཡ་སྭཱ་ཧཱ། སྐནྡྷ་མཱ་ཏཱ་ཡ་སྭཱ་ཧཱ། ནཱི་ལ་ཀཎྛཱ་ཡ་སྭཱ་ཧཱ། ཨ་པ་ར་ཛི་ཏ། བིརྱ་ཡ་སྭཱ་ཧཱ། ཧཱི་མ་བནྡྷ་སྃ་བྷུ་ཏཱ་ཡ་སྭཱ་ཧཱ། ཨི་ནི་བི་ལ་བག་ཏྲཱ་ཡ་སྭཱ་ཧཱ། ན་མོ་བྷ་ག་བ་ཏེ། བྲཧྨཱ་ཎེ། ན་མ་སྭ་ར་སྭ་ཏྱཻ། མ་ཧཱ་དེ་བཻ་སིན་ཏུ་མཱཾ། མནྟྲ་
པ་དཱ། ཏ་ར་ཏུ་བི་ཙི་ཏྃ། བྲ་ཧྨཱ་ནུ་མ་ནྱ་ཏུ་སྭཱ་ཧཱ། དགེ་སློང་ཆོས་སྨྲ་བ་དེ་ལ་བསྲུང་བ་དང་། ཆོས་མཉན་པ་དེ་དག་དང་། ཡི་གེར་འདྲི་བ་དེ་དག་གི་དོན་གྱི་སླད་དུ། ཁྲུས་ཀྱི་ལས་འདིས་བདག་ཉིད་དེར་མཆིས་པར་བགྱིའོ། །ལྷའི་ཚོགས་ཐམས་ཅད་དང་ལྷན་ཅིག་ཏུ་གྲོང་
ངམ། གྲོང་ཁྱེར་རམ། གྲོང་རྡལ་ལམ། གཙུག་ལག་ཁང་དེར་ནད་ཐམས་ཅད་རབ་ཏུ་ཞི་བར་བགྱིའོ། །ཅི་ནས་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་མདོ་སྡེའི་དབང་པོ་འཛིན་པ་དེ་དག་གི་སྲོག་ལ་ཕན་གདགས་པར་འགྱུར་བ་དང་།
འཁོར་བ་ལས་འབྱུང་བ་ཐོབ་པར་འགྱུར་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དང་།
གཟའ་དང་། འཐབ་པ་དང་། རྙོག་པ་དང་། བཙས་པའི་སྐར་མའི་གནོད་པ་དང་། རྨི་ལམ་ངན་པ་དང་། ལོག་འདྲེན་གྱི་གནོད་པ་ཐམས་ཅད་དང་། བྱད་དང་། རོ་ལངས་ཐམས་ཅད་རབ་ཏུ་ཞི་བར་བགྱིའོ། །དེ་ནས་བཅོམ་ལྡན་འདས་ཀྱིས་ལྷ་མོ་
དབྱངས་ཅན་ལ། ལྷ་མོ་ཆེན་མོ་དབྱངས་ཅན་ཁྱོད་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བའི་ཕྱིར་ཞུས་ཏེ། ཁྱོད་ཀྱི་སྔགས་དང་། སྨན་དང་ལྡན་པའི་ཚིག་འདི་འདྲ་བ་བཤད་པ་ནི། ལེགས་སོ་ལེགས་སོ། །