Kinh tạng Tây Tạng (Kangyur Đại Học) — 072_མདོ་སྡེ།_ས

་ཟབ་མོའི་ཚིག་དང་ཡི་གེ་དག་
ཤེས་རབ་ཀྱིས་སོ་སོར་འབྱེད་པར་བྱེད་དོ། །དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པ་འཁོར་ལྔ་བརྒྱ་དང་ཡི་གེའི་སློབ་དཔོན་སྲིན་བུ་གོ་ཆ་ལ་ཡི་གེ་སློབ་པར་བཏང་ནས་ཡི་གེའི་སློབ་དཔོན་སྲིན་བུ་གོ་ཆས་བྱང་ཆུབ་སེམས་དཔའ་ལ་ཡི་གེར་བྲིས་ནས་ཕོག་པ་དང་། བྱང་ཆུབ་སེམས་

དཔས་སྨྲས་པ། འདི་ནི་ངས་ཤེས་སོ། །དེ་ནས་དེས་ཡི་གེ་གཉིས་དང་གསུམ་ནས་དེ་བཞིན་དུ་ལྔ་བརྒྱའི་བར་བྲིས་ནས་ཕོག་པ་དང་། བྱང་ཆུབ་སེམས་དཔས་སྨྲས་པ། འདི་དག་ཐམས་ཅད་ཀྱང་ངས་ཤེས་ཀྱིས་གཞན་དག་སྨྲོས་ཤིག །སྲིན་བུ་གོ་ཆས་
སྨྲས་པ། འཇིག་རྟེན་ན་ནི་ཡི་གེ་འདི་ཙམ་སྤྱོད་ཀྱི་གཞན་ནི་བདག་གིས་མ་འཚལ་ཏོ། །དེ་ནས་བྱང་ཆུབ་སེམས་དཔའ་ཉིད་ཀྱིས་ཡི་གེ་བྲིས་ཏེ་སྲིན་བུ་གོ་ཆ་ལ་བྱིན་ནས་གསུངས་པ། ཡི་གེ་འདི་མིང་ཅི་ཡིན་སྨྲོས་ཤིག །དེས་སྨྲས་པ་མ་འཚལ་ཏོ། །བྱང་ཆུབ་སེམས་དཔས་
གསུངས་པ། འཇིག་རྟེན་དུ་གཉིས་ཤིག་བྱུང་ནས་མངོན་པར་འགྱུར་ཏེ་བྱང་ཆུབ་སེམས་དཔའ་དང་འཁོར་ལོས་སྒྱུར་བའོ། །ནམ་མཁའི་ངོས་ལ་གནས་པའི་ཚངས་པས་སྨྲས་པ། སྲིན་བུ་གོ་ཆ་བྱང་ཆུབ་སེམས་དཔས་ཇི་སྐད་གསུངས་པ་དེ་དེ་བཞིན་ཏེ། ཡི་གེ་འདི་ནི་
འཇིག་རྟེན་དུ་གཉིས་ཤིག་བྱུང་ན་མངོན་པར་འགྱུར་ཏེ་བྱང་ཆུབ་སེམས་དཔའ་འམ། འཁོར་ལོས་སྒྱུར་བའི་རྒྱལ་པོའོ། །བྱང་ཆུབ་སེམས་དཔས་ཡི་གེ་དེ་ཚངས་པའི་དབྱངས་ཀྱིས་བཀླགས་ལ་ནམ་མཁའི་ངོས་ལ་གནས་པའི་ཚངས་པས་དབང་བྱས་པས་ཚངས་པའི་ཡི་གེ་ཞེས་བྱ་
བར་གྱུར་ཏོ། །དེ་ནས་བྱང་ཆུབ་སེམས་དཔའ་ཡི་གེའི་མཐར་ཕྱིན་པ་དང་འཁོར་ལྔ་བརྒྱ་དང་བཅས་པར་བཟང་ལེན་དང་། ལྷར་བཅས་ཞེས་བྱ་བ་འཕོང་གི་སློབ་དཔོན་གྱི་གན་དུ་འཕོང་གི་གནས་སུ་གཏད་དོ། །དེ་ནས་བྱང་ཆུབ་སེམས་དཔའ་གནས་ལྔ་པོ་རྒྱང་ནས་ཕོག་པ་དང་། སྒྲ་
གྲག་པར་ཕོག་པ་དང་། གནད་དུ་ཕོག་པ་དང་། མི་འཆོར་བར་ཕོག་པ་དང་། ཚབས་ཆེ་བ་ལ་བྱང་བར་གྱུར་ཏོ། །དེ་ནས་བཟང་ལེན་དང་། ལྷར་བཅས་འདི་སྙམ་དུ་སེམས་ཏེ་བྱང་ཆུབ་སེམས་དཔའ་འདི་ནི་སྙིང་རྗེ་ཅན་ཡིན་པས་བསླབ་པར་བྱ་བ་ཐམས་ཅད་བསླབ་ཀྱི་ལྷ་སྦྱིན་འདི་ནི་གདུག་
པ་ཡིན་པས་འཇིག་རྟེན་ཐམས་ཅད་དུ་གནོད་པར་འགྱུར་ན་མི་རུང་གིས་འདི་ལ་གནད་དུ་བསྣུན་པར་བསླབ་པར་མི་བྱའོ་སྙམ་མོ། །དེ་ནས་དུས་གཞན་ཞིག་ན་ལྷ་སྦྱིན་གྱིས་ངང་པ་ལྕགས་མདས་བསྣུན་པ་དང་། བྱང་ཆུབ་སེམས་དཔའ་སྟེང་གི་ཁང་བཟངས་ཀྱི་གཞི་ལ་བཞུགས་པ་དེའི་པང་

པར་དེ་ལྷུ་ང་ངོ་། །དེ་ནས་བྱང་ཆུབ་སེམས་དཔས་བཟུང་ནས་མདའ་ཕྱུང་སྟེ་སྨན་གྱིས་བྱུགས་པས་སོས་སོ། །ལྷ་སྦྱིན་གྱིས་སྨྲས་པ། བྱང་ཆུབ་སེམས་དཔའ་ངང་པ་འདི་ནི་ངས་ཡོངས་སུ་བཟུང་བ་ཡིན་གྱིས་བསྐུར་ཅིག །བྱང་ཆུབ་སེམས་དཔས་སྨྲས་པ། ངས་ཆེས་སྔར་
ཡོངས་སུ་བཟུང་སྟེ་གང་གི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་ཁོ་ནའི་ཚེ་ཡོངས་སུ་བཟུང་ངོ་། །དེར་བྱང་ཆུབ་སེམས་དཔའ་ལ་ལྷ་སྦྱིན་གནོད་སེམས་དང་། བཟོད་པ་མ་ཡིན་པ་དང་། ཕེབས་པ་མ་ཡིན་པ་བྱུང་བར་གྱུར་ཏོ། །དེ་ནས་ལྷ་སྦྱིན་ལ་
སོགས་པ་ཤཱཀྱའི་གཞོན་ནུ་ལྔ་བརྒྱ་བྱུང་བ་དང་། ལྷ་སྦྱིན་གྱིས་རས་ཀྱིས་བཅིངས་ནས་ཤཱཀྱའི་གཞོན་ནུ་ལྔ་བརྒྱ་བསྒྱེལ་ཏོ། །ཅི་ཙམ་ན་བྱང་ཆུབ་སེམས་དཔའ་ཕྱོགས་དེར་བཞུད་པ་དང་། ལྷ་སྦྱིན་གྱིས་སྨྲས་པ། བྱང་ཆུབ་སེམས་དཔའ་ཅི་ལ་སྡོད། བྱང་ཆུབ་སེམས་དཔས་ཀྱང་
རས་བཅིངས་ཏེ་ཤཱཀྱའི་གཞོན་ནུ་ལྔ་བརྒྱ་བསྒྱེལ་ཏོ། །དེ་ནས་ལྷ་སྦྱིན་རས་ཀྱིས་བཅིངས་པ་དང་། བྱང་ཆུབ་སེམས་དཔས་ཀྱང་བཟུང་སྟེ་རྐང་པ་གྱེན་དུ་བསྟན་ནས་གན་རྒྱལ་དུ་བསྒྱེལ་པ་དང་། དེར་ཡང་བྱང་ཆུབ་སེམས་དཔའ་ལ་ལྷ་སྦྱིན་གནོད་སེམས་དང་། མི་བཟོད་པ་དང་།
བག་མི་ཕེབས་པའི་སེམས་གཉིས་པ་བསྐྱེད་པར་གྱུར་ཏོ། །དེ་ནས་ཤཱཀྱ་གཞོན་ནུ་ལྔ་བརྒྱ་མདའ་གཞུ་ཐོགས་ཏེ་ཕྱི་རོལ་དུ་བྱུང་ནས་ཏ་ལ་ལ་ཚབས་བྱེད་པ་ལ་ཞུགས་པ་དང་། ལ་ལས་ནི་ཏ་ལ་གཅིག་ཕིགས་སོ། །ལ་ལས་ནི་གཉིས་སོ། །ལྷ་སྦྱིན་གྱིས་ནི་གསུམ་མོ། །བྱང་ཆུབ་
སེམས་དཔས་ལྕགས་མདའ་འཕངས་པ་དང་ཤིང་ཏ་ལ་བདུན་ཕིགས་པ་ལས་ཇི་སྲིད་རླུང་གིས་བསྐྱོད་དེ་ཐམས་ཅད་འགྱེལ་བའི་བར་དུ་རྒྱ་ཆེར་སྦྱར་རོ། །དེ་ནས་གཙང་མའི་ལྷ་རྣམས་ཀྱིས་འབབ་ཆུ་རོ་ཧི་ཏ་ཀའི་འགྲམ་ན་ཤིང་དགེ་བའི་སྙིང་པོ་ཞེས་བྱ་བ་ཉི་མ་གཅིག་ཅིང་ཁྲུ་བརྒྱར་སྐྱེ་བ་མཚན་
མོ་ནི་སེན་མོས་ཀྱང་གཅད་དུ་རུང་ལ་ཉིན་པར་ནི་མཚོན་གྱིས་ཀྱང་གཅད་པར་མི་ནུས་པ་ཞིག་ཡོད་པ་དང་། གནས་གཙང་མ་པའི་ལྷ་རྣམས་ཀྱིས་གང་གིས་ཤིང་དགེ་བའི་སྙིང་པོ་རྩ་བ་སྟེང་དུ་བཏོན་ནས་རོ་ཧི་ཏ་ཀའི་ནང་དུ་བཅུག་པ་དེ་ལྟ་བུའི་རླུང་དང་ཆར་དྲག་ཅིག་སྤྲུལ་ཏོ། །དེ་རྒྱལ་པོ་ཟས་གཙང་མ་དང་།

ལེགས་པར་རབ་སད་ཀྱིས་ཐོས་ནས་ཤིང་འདིས་གྲོང་ཁྱེར་བརླག་པར་མ་གྱུར་ཏམ་སྙམ་ནས་སྲོག་ཆགས་བརྒྱ་སྟོང་དཔག་ཏུ་མེད་པ་དང་། ཤིང་དགེ་བའི་སྙིང་པོ་གང་ན་བ་དེར་སོང་སྟེ་ཕྱིན་པ་དང་། འཁོར་བརྒྱ་སྟོང་དཔག་ཏུ་མེད་པས་དྲངས་སུ་ཟིན་ཀྱང་ཅི་ཙམ་དུ་བསྐྱོད་
པར་ཡང་མ་ནུས་སོ། །འཆར་ཀས་སྨྲས་པ། ལྷ་བྱང་ཆུབ་སེམས་དཔའ་སྦྲོན་ཅིག །རྒྱལ་པོས་སྨྲས་པ། ཁོ་བོས་གཞོན་ནུ་ལ་བཀའ་སྩོལ་བར་མི་ནུས་སོ། །འཆར་ཀས་སྨྲས་པ། ཁྱེད་རྣམས་ཀྱིས་ཅ་ཅོའི་སྒྲ་གསང་མཐོན་པོ་སྒྲོགས་ཤིག །ཅི་ནས་ཀྱང་ངས་
བྱང་ཆུབ་སེམས་དཔའ་གཤེགས་པར་བྱའོ། །དེ་ནས་སྐྱེ་བོའི་ཚོགས་དེ་རྣམས་ཀྱིས་སྒྲ་གསང་མཐོན་པོ་དང་ཆེན་པོས་ཅ་ཅོའི་སྒྲ་བསྒྲགས་སོ། །འཆར་ཀ་བྱང་ཆུབ་སེམས་དཔའི་ཐད་དུ་སོང་བ་དང་། བྱང་ཆུབ་སེམས་དཔས་སྨྲས་པ། འཆར་ཀ་ཅ་ཅོའི་སྒྲ་འདི་ཅི་ཞིག་ཡིན།
འཆར་ཀས་རྣམ་པ་དེ་དག་རྒྱ་ཆེར་གསོལ་ཏོ། །དེ་ནས་བྱང་ཆུབ་སེམས་དཔས་གསུངས་པ། གལ་ཏེ་དེ་ལྟ་ན་འབྱིན་དུ་འདེང་། དེ་ནས་འཆར་ཀ་དང་། བྱང་ཆུབ་སེམས་དཔའ་ཆས་པ་དང་། ཅི་ཙམ་ན་ཁུང་ནས་སྦྲུལ་གདུག་པ་ཞིག་བྱུང་ངོ་། །འཆར་ཀས་བྱང་ཆུབ་སེམས་དཔའ་ཟིན་པར་
གྱུར་དུ་འོང་ངོ་ཞེས་རལ་གྲི་རྣོན་པོས་རྐེད་པ་བཅད་པ་དང་། སྦྲུལ་གྱི་དུག་གི་དབུགས་ཀྱིས་འཆར་ཀ་ལ་ཕོག་སྟེ་དེ་ནག་པོར་གྱུར་ནས་དེའི་མིང་ཡང་འཆར་ཀ་ནག་པོ་ཞེས་བྱ་བར་གྱུར་ཏོ། །དེ་ནས་བྱང་ཆུབ་སེམས་དཔའ་ཤིང་དགེ་བའི་སྙིང་པོ་གང་ན་བ་དེར་བཞུད་དེ་ཕྱིན་པ་དང་། ལྷ་སྦྱིན་ལ་
གསུངས་པ། ཁྱོད་ཀྱི་སྟོབས་ཅི་ཙམ་པ་བལྟ་ཡིས་བསྐྱོད་ཅིག །ལྷ་སྦྱིན་གྱིས་འབད་དེ་ཅུང་ཟད་ཅིག་བསྒུལ་ཏོ། །དགའ་བོས་ནི་ཅུང་ཟད་དྲངས་སོ། །ཇི་ཙམ་ན་བྱང་ཆུབ་སེམས་དཔའ་སྟོབས་ཀྱི་ཉམས་སད་པར་མཛད་ཅིང་ཤིང་དགེ་བའི་སྙིང་པོ་ཕྱག་གིས་བླངས་ཏེ་འབབ་ཆུ་རོ་ཧི་ཏ་ཀའི་འགྲམ་
ནས་འཕངས་ཏེ་བྱང་ཆུབ་སེམས་དཔས་གསུངས་པ། ཤེས་ལྡན་དག་ཤིང་དགེ་བའི་སྙིང་པོ་འདི་ནི་བསིལ་བའི་རང་བཞིན་ཡིན་པས་མཁྲིས་པའི་ནད་དང་། ཤུ་བ་དང་། ཕོལ་མིག་བྱུང་བ་ལ་བྱུགས་ན་ཞི་བར་འགྱུར་གྱིས་དུམ་བུར་བྱོས་ལ་ཁྱེར་ཏེ་རང་རང་གི་ཁྱིམ་དུ་ཞོག་ཤིག །ཡང་ཡངས་

པ་ཅན་དུ་གླང་པོ་ཆེ་རིན་པོ་ཆེ་ཞིག་སྐྱེས་པ་དང་། དེ་ནས་ཡངས་པ་ཅན་གྱི་ལིད་ཙ་བི་རྣམས་ཀྱིས་གླང་པོ་ཆེ་མཚན་དང་ལྡན་པ་ཞིག་རྙེད་ནས་དེ་རྣམས་ཀྱིས་བསམས་པ། རྒྱལ་པོ་ཟས་གཙང་གི་སྲས་མཚན་མཁན་རྣམས་ཀྱིས་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་པ་དེའི་
མཐུས་གླང་པོ་ཆེ་རིན་པོ་ཆེ་འདི་བྱུང་གིས་དོང་ལ་དེ་ཁོ་ན་ལ་དབུལ་ལོ་སྙམ་མོ། །དེ་རྣམས་ཀྱིས་གླང་པོ་ཆེ་དེ་རྒྱན་ཐམས་ཅད་ཀྱིས་བརྒྱན་ནས་ཁྲིད་དེ་དོང་བ་ལས་རིམ་གྱིས་སེར་སྐྱའི་གཞིར་ཕྱིན་ནས་རྒྱལ་པོའི་ཕོ་བྲང་གི་སྒོར་གླང་པོ་ཆེའི་དམ་པ་བཞག་ནས་སྡོད་པ་དང་། མ་སྟེས་ཏེ་གདུག་པའི་
ལས་ཅན་ལྷ་སྦྱིན་ཕྱིར་བྱུང་བ་དེས་གླང་པོ་ཆེའི་དམ་པ་དེ་དེ་ལྟར་རྒྱན་གྱིས་བརྒྱན་པར་མཐོང་ནས་དེ་དེས་ཕྲག་དོག་ཆེན་པོ་སྐྱེས་ཏེ་དེ་ཕྲག་དོག་དང་མི་བཟོད་པ་སྐྱེས་པས་དྲིས་པ། གླང་པོ་ཆེའི་དམ་པ་འདི་སུའི་ཡིན། དེ་རྣམས་ཀྱིས་སྨྲས་པ། གཞོན་ནུ་ཤཱཀྱ་ཐུབ་པ་མཚན་མཁན་རྣམས་
ཀྱིས་འཁོར་ལོས་སྒྱུར་བའི་རྒྱལ་པོར་ལུང་བསྟན་པ་དེ་ལ་ཡངས་པ་ཅན་གྱི་ཚོགས་རྣམས་ཀྱིས་གླང་པོ་རིན་པོ་ཆེ་འདི་སྐྱེས་སུ་ཕུལ་ལོ། །ལྷ་སྦྱིན་ལྷག་པར་མི་བཟོད་པ་སྐྱེས་ནས་སྨྲས་པ། རེ་ཞིག་དེ་འཁོར་ལོས་སྒྱུར་བར་མ་གྱུར་པར་ཇེ་ཁྱེད་ཅག་གླང་པོ་རིན་པོ་ཆེ་འབུལ་ལམ་ཞེས་སྨྲས་ནས་
ཐལ་ལྕག་གིས་གླང་པོ་ཆེ་བསད་དོ། །ཇི་ཙམ་ན་ཕྱོགས་དེར་དགའ་བོ་འོངས་པ་དེས་དེ་མཐོང་ནས་དྲིས་པ། ཤེས་ལྡན་དག་གླང་པོ་ཆེ་བཟང་པོ་འདི་སུས་བསད། དེ་རྣམས་ཀྱིས་སྨྲས་པ། ལྷ་སྦྱིན་གྱིས་སོ། དེས་བསམས་པ་གདོན་མི་ཟ་བར་འདི་ལ་ལྷ་སྦྱིན་གྱི་མཐུ་སད་ཀྱིས་མ་ལ་བདག་
གིས་ཀྱང་འདི་ལ་མཐུ་སད་པར་བྱའོ་སྙམ་ནས་མཇུག་མ་ནས་བཟུང་སྟེ་གོམ་པ་བདུན་དུ་བོར་རོ། །ཇི་ཙམ་ན་བྱང་ཆུབ་སེམས་དཔའ་ཤཱཀྱ་ཐུབ་པ་ཕྱིར་བྱུང་བ་དེས་དེ་གཟིགས་ནས་དྲིས་པ། གླང་པོ་ཆེ་འདི་གང་ནས་འོངས། དེ་རྣམས་ཀྱིས་ཇི་ལྟར་གྱུར་པ་སྨྲས་སོ། །སུས་བསད། ལྷ་སྦྱིན་
གྱིས་སོ། །མགྲོན་རྣམས་ལ་མགྲོན་གྱི་མཆོད་པ་བྱ་བ་ཡིན་ནམ་ལེགས་པ་ཞིག་བྱས་སོ། །ཕྱོགས་གང་དུ་བསད། ཕ་བིར་རོ། །འདིར་སུས་དྲུད། དགའ་བོས་སོ། །དེས་དགོངས་པ་འདིར་གདོན་མི་ཟ་བར་དེ་གཉིས་ཀྱིས་འདི་ལ་མཐུ་སད་ཀྱིས་མ་ལ་ངས་ཀྱང་འདི་ལ་མཐུ་སད་པར་བྱའོ་

སྙམ་དུ་དགོངས་ནས་མཇུག་མ་ནས་བཟུང་སྟེ་ར་བའི་ཁར་འཕངས་པ་ལས་ར་བ་རིམ་པ་བདུན་དང་། འོབས་རིམ་པ་བདུན་ལས་འདས་ཏེ་བོར་རོ། །དེ་ལྷུང་བས་གཤོང་བཏོད་པ་གླང་པོ་ཆེའི་གཤོང་གླང་པོ་ཆེའི་གཤོང་ཞེས་བྱ་བར་གྱུར་ཏོ། །འདིར་སྨྲས་པ།
ལྷ་སྦྱིན་གྱིས་ནི་གླང་ཆེན་དབང་པོ་བསད། །དགའ་བོས་དེ་ནི་གོམ་པ་བདུན་དུ་དྲུད། །བྱང་ཆུབ་སེམས་དཔས་ཕྱག་གིས་བར་སྣང་ལ། །རྡོ་བ་བཞིན་དུ་ཕྱི་རོལ་རྒྱང་རིང་འཕངས། །མཚན་མཁན་རྣམས་ཀྱིས་ལུང་བསྟན་པ། གལ་ཏེ་གཞོན་ནུ་ལོ་བཅུ་གཉིས་ཀྱི་བར་དུ་རབ་ཏུ་མ་
བྱུང་ན་འཁོར་ལོས་སྒྱུར་བའི་རྒྱལ་པོར་འགྱུར་རོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། མ་ལ་བདག་གིས་འདི་ལ་འདོད་པའི་ཡོན་ཏན་ལྔ་ཕལ་པོ་ཆེ་བྱིན་ན་དེ་ལྟ་ན་ནི་དེ་རྣམས་ལ་དགའ་བས་རབ་ཏུ་འབྱུང་བར་མི་འགྱུར་རོ་སྙམ་ནས་རྒྱལ་པོ་ཟས་གཙང་གིས་བྱང་ཆུབ་སེམས་དཔའི་
མདུན་དུ་གོས་དང་། རྒྱན་གྱི་ཕུང་པོ་བཞག་ནས་སྨྲས་པ། དེང་ཁྱེད་ཀྱིས་ཤཱཀྱའི་བུ་མོ་རྣམས་ལ་རྒྱན་དང་གོས་རྣམས་བྱིན་ཅིག །དེ་ནས་རྒྱལ་པོ་ཟས་གཙང་གིས་སེར་སྐྱའི་གྲོང་ཁྱེར་དུ་དེང་གཞོན་ནུ་གོས་དང་རྒྱན་རྣམས་སྟེར་བར་འགྱུར་གྱིས་ཤཱཀྱའི་བུ་མོ་ཐམས་ཅད་ཤོག་ཤིག་ཅེས་དྲིལ་
སྒྲོག་ཏུ་བཅུག་གོ། །དེ་ནས་ཤཱཀྱའི་གཞོན་ནུ་མ་ལྔ་བརྒྱ་འོངས་པ་དང་། ཐམས་ཅད་ལ་བྱང་ཆུབ་སེམས་དཔས་གོས་དང་རྒྱན་རྣམས་བྱིན་ནོ། །དེ་ནས་ཤཱཀྱ་དབྱིག་པ་ཅན་ལ་གྲགས་འཛིན་མ་ཞེས་བྱ་བའི་བུ་མོ་ཡོད་པ་དང་། དེས་དེ་ལ་སྨྲས་པ། ཁྱེད་ལ་ཡང་གཞོན་ནུ་གོས་དང་
རྒྱན་རྣམས་སྟེར་བར་འགྱུར་གྱིས་སོང་། དེ་ནས་གྲགས་འཛིན་མ་ཅི་བདག་ལ་བྱང་ཆུབ་སེམས་དཔའ་ལས་གཞན་སུ་ཞིག་ཁྱོར་འགྱུར་སྙམ་དུ་བསམས་ནས་བྱང་ཆུབ་སེམས་དཔའི་ཐད་དུ་སོང་བ་དང་། ཅི་ཙམ་ན་གོས་དང་རྒྱན་ཐམས་ཅད་བྱིན་ཟིན་ནས་ཅི་ཡང་མ་ལུས་པ་དང་། དེས་བྱང་
ཆུབ་སེམས་དཔའི་མགུལ་ན་ཤིན་ཏུ་མཛེས་ཤིང་རིན་ཆེ་བའི་མུ་ཏིག་ཕྲེང་གཅིག་ལུས་པ་མཐོང་ནས་དེ་དེ་ལ་དགའ་བས་བག་འཁུམས་པ་མེད་པར་རང་ཉིད་ཀྱིས་བཀྲོལ་ཏེ་རང་གི་མགུལ་དུ་བཏགས་ནས་བྱང་ཆུབ་སེམས་དཔའི་ཐད་ནས་སོང་ངོ་། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ་བུ་མོ་

འདི་ཕེབས་ཤིང་བརྟན་པ་ལས་ན་འདིས་གཞོན་ནུའི་ཐུགས་དང་བསྟུན་པར་ནུས་ཀྱིས་འདི་བླང་བར་བྱའོ་སྙམ་དུ་བསམས་ནས་གྲགས་འཛིན་མ་བུད་མེད་ཀྱི་འཁོར་ཉི་ཁྲི་དང་བྱང་ཆུབ་སེམས་དཔའི་བཙུན་མོར་བླངས་སོ། །རྒྱལ་པོ་ཟས་གཙང་མས་བྱང་ཆུབ་སེམས་དཔའ་ལ་སྨྲས་པ། སོང་ལས་
ཀྱི་མཐའ་ཅི་ཙམ་པ་ལ་ལྟོས་ཤིག །དེ་ནས་བྱང་ཆུབ་སེམས་དཔའ་རྒྱལ་པོ་ཟས་གཙང་མས་བསྒོ་བ་གསན་ཏེ་ཤིང་རྟ་བཟང་པོ་ལ་ཞུགས་ནས་ཕྱི་རོལ་དུ་གཤེགས་ཏེ་ཡབ་རྒྱལ་པོ་ཟས་གཙང་མའི་ལས་ཀྱི་མཐའ་གཟིགས་ཤིང་བྱང་ཆུབ་སེམས་དཔའ་ལས་ཀྱི་མཐའ་ལ་ཞུགས་པ་རྣམས་ཀྱི་གན་དུ་
བྱོན་པ་དང་། གཤོལ་ལྔ་བརྒྱ་དང་ཞིང་རྨེད་ཅིང་ཞིང་པའི་མི་དེ་རྣམས་ཀྱིས་ཀྱང་གཤོལ་གནོན་ཅིང་འདྲེན་པས་སྟོབས་ཉེ་བར་ཉམས་པ་མགོ་ལུས་རྡུལ་གྱིས་ཡོག་པ་དང་། རླུང་དང་ཐན་པས་ལུས་ལ་གདུངས་པས་ལུས་རྩུབ་ཅིང་མདོག་ངན་པ། རྐང་པ་དང་། ལག་པ་གས་པ་དང་། དེངས་
ཤིང་དྲི་མ་ཅན་གྱི་གོས་གྱོན་པ། རྐང་པ་དྲི་མ་ཅན། ལྟོགས་པ་དང་སྐོམ་པས་མདོག་ངན་ཞིང་། ལྐོག་མ་དང་། མཁུར་བ་དང་། མིག་གི་ལོགས་སྐམས་པ་དང་། གླང་དེ་རྣམས་ཀྱང་རྨོན་པ་ལྕགས་གཟེར་རྣོན་པོ་ཅན་གྱིས་ལུས་དྲལ་བས་རྒྱབ་དང་། མཇུག་དོའི་ཕྱོགས་ཁྲག་གིས་གཡོགས་
པ། ལྟོགས་པ་དང་སྐོམ་པས་དབུགས་བརྩེགས་ཤིང་སྙིང་གའི་ཕྱོགས་ནས་དབུགས་བརྩེགས་པ་རིང་དུ་འདྲེན་ལ་གཉའ་ཤིང་གིས་མནན་པའི་རྨ་ལས་རྣག་ཁྲག་འཛག་པ་ལ་སྦྲང་བུ་དང་། འབུའི་ཚོགས་ཀྱིས་ཟ་བ། ཐོང་ལྕགས་ཀྱིས་རྐང་པ་ལ་རྨ་བྱུང་ཞིང་ཁ་དང་སྣ་ནས་ཁ་ཆུ་དང་སྣ་ཆུ་འཛག་
པ་ལ་སྦྲང་མ་དང་། ཤ་སྦྲང་དང་། སྦྲང་བུ་མཆུ་རིངས་ཀྱིས་ཡོག་པ་རྣམས་གཟིགས་སོ། །གཟིགས་ནས་ཀྱང་ཐོག་མ་མེད་པའི་དུས་ནས་བསོད་ནམས་བསྐྱེད་ཅིང་བསགས་པའི་ཐུགས་རྗེས་ཀུན་ནས་བསྐྱོད་པའི་ཐུགས་ཀྱིས་ཞིང་པ་རྣམས་ལ་འདི་སྐད་ཅེས་གསུངས་སོ། །ཤེས་ལྡན་
དག་ཁྱེད་སུའི་ཡིན། དེ་རྣམས་ཀྱིས་གསོལ་པ། བྱང་ཆུབ་སེམས་དཔའི་ལགས་སོ། །དེས་གསུངས་པ། ཤེས་ལྡན་དག་ཁྱེད་དེང་ཕན་ཅད་བྲན་དུ་མི་བྱ། མངག་གཞུག་པར་མི་བྱ། རང་དབང་ཅན་གར་དགའ་བར་འགྲོ་བར་བྱས། བདེ་བ་ལ་རེག་པར་གནས་ཤིག །རྨོན་པ་

རྣམས་ཀྱང་བཀྲོལ་ནས་གསུངས་པ། ཁྱེད་ཅག་ཀྱང་དེང་ཕན་ཅད་རྩྭ་མཆོག་མ་ཉམས་པ་ཟ་ཞིང་ཆུ་མ་རྡུལ་མ་བརྙོགས་ཤིང་དང་བདག་ལ་འཐུང་ཤིག །ཁྱེད་ལ་ཕྱོགས་བཞི་ནས་ཀྱང་རླུང་བསིལ་བ་ལྡང་བར་གྱུར་ཅིག །དེ་ནས་བྱང་ཆུབ་སེམས་དཔའ་ཡིད་བྱུང་བ་
དེ་ཉིད་ཀྱིས་ཡབ་ཤཱཀྱ་ཟས་གཙང་གི་ཞིང་བླས་ཀྱི་མཐའ་ལ་གཟིགས་ནས་སྣུམ་ཞིང་སྔོ་ལ་འདབ་མ་མཐུག་ཅིང་གྲིབ་མ་བཟང་པོ་དང་ལྡན་པའི་འཛམ་བུའི་ཤིང་གི་གྲིབ་མ་གང་ན་བ་དེར་གཤེགས་ཏེ་བྱོན་ནས་ཤིང་འཛམ་བུའི་གྲིབ་མ་ལ་བཞུགས་ཏེ། འདོད་པ་ལས་དབེན་པ་སྡིག་པ་
མི་དགེ་བའི་ཆོས་རྣམས་ལས་དབེན་པ། རྟོག་པ་དང་བཅས་དཔྱོད་པ་དང་བཅས་ཤིང་དབེན་པ་ལས་སྐྱེས་པའི་དགའ་བ་དང་བདེ་བ་ཟག་པ་མེད་པ་དང་འདྲ་བའི་བསམ་གཏན་དང་པོ་ལ་སྙོམས་པར་ཞུགས་སོ། །སྐྱེ་བོའི་ཚོགས་ཆེན་པོ་ཡང་བྱང་ཆུབ་སེམས་དཔའ་སྤངས་ཏེ་མི་འགྲོ་བར་ཤིང་
གཞན་རྣམས་ཀྱི་དྲུང་ན་སྡོད་དོ། །རྒྱལ་པོ་ཟས་གཙང་གིས་བསམས་པ། བྱང་ཆུབ་སེམས་དཔའ་རིང་ཞིག་ཐོགས་ཏེ་འདི་ལྟར་དྲོའི་དུས་ལས་ཡོལ་གྱིས་བལྟར་འགྲོའོ་ཞེས་དེ་ཤིང་རྟར་ཞུགས་ནས་ཞིང་པའི་གྲོང་དུ་སོང་སྟེ་ཕན་ཚུན་དུ་བྱང་ཆུབ་སེམས་དཔའ་ཚོལ་ཞིང་ཤིང་འཛམ་
བུའི་དྲུང་དུ་ཕྱིན་ཏོ། །དེའི་ཚེ་ཉི་མའི་གུང་ཡོལ་ནས་ཤིང་གཞན་རྣམས་ཀྱི་གྲིབ་མ་ཤར་ཕྱོགས་སུ་གཞོལ། ཤར་ཕྱོགས་སུ་འབབ། ཤར་ཕྱོགས་སུ་བབ་པར་གྱུར་ཏོ། །བྱང་ཆུབ་སེམས་དཔའི་མཐུས་ཤིང་འཛམ་བུའི་གྲིབ་མ་ནི་བྱང་ཆུབ་སེམས་དཔའི་སྐུ་མི་གཏོང་ངོ་། །རྒྱལ་པོ་
ཟས་གཙང་གིས་ཉི་མའི་གུང་ཡོལ་ནས་ཤིང་གཞན་རྣམས་ཀྱི་གྲིབ་མ་ནི་ཤར་ཕྱོགས་སུ་གཞོལ། ཤར་ཕྱོགས་སུ་འབབ། ཤར་ཕྱོགས་སུ་བབ་པར་གྱུར་ན། ཤིང་འཛམ་བུའི་གྲིབ་མ་ནི་བྱང་ཆུབ་སེམས་དཔའི་སྐུ་མི་གཏོང་བ་མཐོང་ངོ་། །མཐོང་ནས་ཀྱང་དེ་འདི་སྙམ་དུ་སེམས་ཏེ།
གཞོན་ནུ་ནི་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། འདི་ལྟར་ད་ཉི་མའི་གུང་ཡོལ་ནས་ཤིང་གཞན་རྣམས་ཀྱི་གྲིབ་མ་ནི་ཤར་ཕྱོགས་སུ་གཞོལ། ཤར་ཕྱོགས་སུ་འབབ། ཤར་ཕྱོགས་སུ་བབ་པར་གྱུར་ན། ཤིང་འཛམ་བུའི་གྲིབ་མ་ནི་བྱང་ཆུབ་སེམས་དཔའི་སྐུ་མི་གཏོང་བ་ངོ་མཚར་ཆེའོ་སྙམ་

མོ། །དེ་ནས་དགའ་བའི་བསྟི་སྟང་བྱས་ཏེ་བྱང་ཆུབ་སེམས་དཔའི་ཞབས་གཉིས་ལ་གཏུགས་ནས་ཚིགས་སུ་བཅད་དེ་སྨྲས་པ། ཇི་ལྟར་བལྟམ་ཚེས་ནི་གཡོས་པ་ལྟར། །འཛམ་བུའི་གྲིབ་མ་ཁྱོད་སྐུ་མི་གཏོང་བ། །བློ་ཆེན་ཁྱོད་ཀྱི་ཡ་མཚན་གཉིས་འདི་སྟེ། །ཀུན་གཟིགས་ཁྱོད་ཀྱི་
ཞབས་ལ་ཕྱག་འཚལ་ལོ། །དེ་ནས་བྱང་ཆུབ་སེམས་དཔའ་ཏིང་ངེ་འཛིན་དེ་ལས་བཞེངས་ནས་ཤིང་རྟར་ཞུགས་པ་དང་། ཇི་ཙམ་ན་གཏེར་སྐྱོང་བ་སྐྲ་དང་ཁ་སྤུ་དང་སེན་མོ་རིང་བ་གཏེར་ཐོགས་ཏེ་བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་ལ་འདི་སྐད་
ཅེས་གསོལ་ཏོ། །ལྷ་གཏེར་འདི་རྣམས་བཞེས་ཤིག །བྱང་ཆུབ་སེམས་དཔས་གསུངས་པ། འདི་གང་གི་ལྷ་སྐྱེས་བུ་གང་ཞིག་དུས་ལས་འདས་པ་དེ་རྣམས་ཀྱི་ལགས་སོ། །བྱང་ཆུབ་སེམས་དཔས་གསུངས་པ། འདི་རྣམས་ཀྱིས་ཆོག་གིས་རེ་ཞིག་དེ་རྣམས་ཀྱི་བླུན་པོ་
ཡོངས་སུ་གཟུང་བ་བྱས་ནས་ཅི་ཞིག་བྱས་ཁྱེད་ང་ལ་དགོས་པ་མེད་ཀྱིས་སོང་ཤིག །ཚིགས་སུ་བཅད་པས་ཀྱང་གསུངས་པ། གང་གིས་ང་ལ་འཆི་བའི་གཏམ་སྨྲས་པ། །དེ་དག་ཀྱང་ཤི་གཏམ་དུ་གྱུར་པ་ཡིན། །བདག་ཀྱང་ཤི་ནས་རིང་པོར་མི་ཐོགས་པར། །གཞན་དག་གི་ཡང་
གཏམ་དུ་འགྱུར་བར་འོང་། །དེ་རྣམས་ཀྱིས་ཡང་སྒྲ་ཕྱུང་བ། གཞོན་ནུ་གལ་ཏེ་མི་བཞེས་ན་བདག་ཅག་རྒྱ་མཚོ་ཆེན་པོར་འཇུག་གོ། །བྱང་ཆུབ་སེམས་དཔས་ཅི་བདེ་བར་ཞུགས་ཤིག་ཅེས་གསུངས་པ་དང་། དེ་རྣམས་རྒྱ་མཚོ་ཆེན་པོའི་ནང་དུ་ཞུགས་སོ། །དེ་ནས་གནས་གཙང་མའི་
རིས་ཀྱི་ལྷ་རྣམས་འདི་སྙམ་དུ་སེམས་ཏེ། བྱང་ཆུབ་སེམས་དཔའ་རྣམས་ནི་རྒྱུའི་སྟོབས་ཅན་ཡིན་མོད་ཀྱི་འོན་ཀྱང་རྐྱེན་བསྒྲུབ་པར་བྱ་དགོས་ཏེ་འདི་ལྟར་རྒྱུའི་སྟོབས་ཆེན་པོ་ཡང་རྐྱེན་གྱི་སྟོབས་ལ་ལྟོས་སོ་སྙམ་ནས་བྱང་ཆུབ་སེམས་དཔའ་དུར་ཁྲོད་ཀྱི་ནང་ནས་གཤེགས་པ་ན། ལྷ་
རྣམས་ཀྱིས་མི་རོ་རྣམ་པར་སྔོས་པ་དང་། རྣམ་པར་རྣགས་པ་དང་། རྣམ་པར་འབུས་གཞིགས་པ་དང་། རྣམ་པར་བམ་པ་དང་། རྣམ་པར་ཟོས་པ་ཞིག་བསྟན་པ་དང་། བྱང་ཆུབ་སེམས་དཔས་གཟིགས་ནས་སྐྱོ་བ་འཁྲུངས་སོ། །དེ་ནས་རྒྱལ་པོ་ཟས་གཙང་མས་བྱང་ཆུབ་

སེམས་དཔའ་ལམ་གཞན་ནས་གྲོང་ཁྱེར་སེར་སྐྱའི་གཞིར་འཇུག་པར་བྱས་སོ། །དེ་ནས་གྲོང་ཁྱེར་སེར་སྐྱའི་གཞིའི་བུད་མེད་ཀྱི་ཚོགས་སྐར་ཁུང་དང་། སྐར་ཁུང་དྲ་བ་ཅན་དང་། བ་གམ་དག་ན་བྱང་ཆུབ་སེམས་དཔའ་ལ་ལྟ་ཞིང་འདུག་པ་དང་། ཤཱཀྱ་དུས་ལེགས་
ཀྱི་བུ་མོ་ས་འཚོ་མ་ཞེས་བྱ་བ་སྟེང་གི་ཁང་བཟངས་ཀྱི་གཞི་ལ་འདུག་པ་བྱང་ཆུབ་སེམས་དཔའ་ལ་རྟོག་པ་ན་རྐང་པའི་མཐེ་བོས་ས་ལ་བརྐོས་ཏེ་ཁྲག་བྱུང་ཡང་མ་ཚོར་རོ། །བྱང་ཆུབ་སེམས་དཔའ་ཡང་ས་འཚོ་མ་ལ་གཟིགས་པ་ན་ཕྱག་གཡས་ཀྱིས་མདའ་ཕྱེ་མར་རླགས་སོ། །ཁ་ལོ་བས་
ལྕགས་མདའ་ཕུལ་བ་དང་དེ་ཡང་ཕྱེ་མར་རླགས་སོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། འདིས་ནི་གཞོན་ནུའི་ཐུགས་དང་བསྟུན་པར་ནུས་སོ་སྙམ་མོ། །དེ་ནས་ཁ་ལོ་སྒྱུར་བས་ཤིང་རྟ་དྲངས་པ་དང་། ཤཱཀྱ་དྲིལ་བུ་སྒྲའི་བུ་མོ་རི་དགས་སྐྱེས་ཞེས་བྱ་བས་བྱང་
ཆུབ་སེམས་དཔའ་ཤིང་རྟར་ཞུགས་ཏེ་བྱོན་པ་མཐོང་བ་དང་། ཡང་སྟེང་གི་ཁང་བཟངས་ཀྱི་གཞི་ལ་འདུག་ནས་ཚིགས་སུ་བཅད་དེ་སྨྲས་པ། ཀྱེ་མ་འདི་ཡི་ཡུམ་བདེ་ཞིང་། །ཡབ་ཀྱང་ཤིན་ཏུ་བདེ་བ་ཡིན། །ཀྱེ་མ་གང་གི་ཁྱིམ་ཐབ་གྱུར། །བུད་མེད་དེ་ཡང་མྱ་ངན་འདས། །སྐྱེས་
མཆོག་བསམ་གཏན་པ་དེ་ཡིས། །མྱ་ངན་འདས་པའི་སྒྲ་གསན་ནས། །མྱ་ངན་འདས་པ་ཞི་ཉིད་དུ། །མཁྱེན་ནས་དེ་ལ་ཐུགས་དགྱེས་གྱུར། །དེ་ནས་བྱང་ཆུབ་སེམས་དཔས་མྱ་ངན་ལས་འདས་པའི་སྒྲ་གསན་པས་རི་དགས་སྐྱེས་ལ་དགྱེས་ཏེ་མགུལ་ནས་མུ་ཏིག་ཕྲེང་ཅིག་ཕོག་སྟེ།
འཕངས་ནས་ཤིང་རྟ་དེ་ལ་བསམ་གཏན་ལ་སྙོམས་པར་ཞུགས་པར་མཛད་དོ། །ཕྲེང་བ་དེ་ཡང་དེའི་མགུལ་དུ་འཁྲིས་པར་གྱུར་ཏོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། འདིས་ནི་བྱང་ཆུབ་སེམས་དཔའི་ཐུགས་དང་བསྟུན་པར་ནུས་སོ་སྙམ་ནས་ས་འཚོ་མ་བུད་མེད་ཉི་
ཁྲིས་བསྐོར་བ་དང་། རི་དགས་སྐྱེས་ཀྱང་བུད་མེད་ཉི་ཁྲིས་བསྐོར་བ་བྱང་ཆུབ་སེམས་དཔའི་བཙུན་མོར་བླངས་སོ། །དེ་ལྟར་ན་གྲགས་འཛིན་མ་དང་། ས་འཚོ་མ་དང་། རི་དགས་སྐྱེས་ལ་སོགས་པ་བཙུན་མོ་སྟོང་ཕྲག་དྲུག་ཅུ་བྱུང་བར་གྱུར་ཏོ། །མཚན་མཁན་རྣམས་ཀྱིས་གལ་ཏེ་བྱང་

ཆུབ་སེམས་དཔའ་ལོ་བདུན་གྱི་བར་དུ་རབ་ཏུ་མ་བྱུང་ན་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་ཏོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ་མ་ལ་བདག་གིས་བྱང་ཆུབ་སེམས་དཔའ་ལ་འདོད་པའི་ཡོན་ཏན་ལྔ་ལས་ཕལ་པོ་ཆེ་ཞིག་སྦྱིན་པར་བྱའོ་སྙམ་
ནས་ཕལ་པོ་ཆེ་བྱིན་ནོ། །མཚན་མཁན་གྱིས་གལ་ཏེ་བྱང་ཆུབ་སེམས་དཔའ་ཟླ་བ་བདུན་གྱི་བར་དུ་རབ་ཏུ་མ་བྱུང་ན་གདོན་མི་ཟ་བར་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་ཏོ། །དེ་ནས་རྒྱལ་པོ་ཟས་གཙང་མས་བྱང་ཆུབ་སེམས་དཔའ་ལ་འདོད་པའི་ཡོན་ཏན་ལྔ་ཤིན་ཏུ་
ཡང་མང་དུ་བྱིན་ཏེ་འདི་ལྟར་ཡང་འདི་ལ་མངོན་པར་དགའ་བས་རབ་ཏུ་འབྱུང་བར་མི་འགྱུར་རོ་སྙམ་མོ། །ཆོས་ཉིད་ཀྱིས་བྱང་ཆུབ་སེམས་དཔའ་སྐྱེད་མོས་ཚལ་གྱི་གཞིར་གཤེགས་བཞེད་པར་གྱུར་པ་དེའི་ཚེ་ཁ་ལོ་སྒྱུར་བ་ལ། ཀྱེ་ཁ་ལོ་སྒྱུར་བ་རེ་ཞིག་བཞོན་པ་བཟང་པོ་མྱུར་བར་ཤོམས་
ཤིག་དང་། དེར་ཞུགས་ནས་སྐྱེད་མོས་ཚལ་གྱི་གཞིར་འགྲོའོ། །ཞེས་གསུང་བར་འགྱུར་བས་དེ་ནས་བྱང་ཆུབ་སེམས་དཔས་ཁ་ལོ་སྒྱུར་བ་ལ་བསྒོ་བ། ཀྱེ་ཁ་ལོ་སྒྱུར་བ་རེ་ཞིག་བཞོན་པ་བཟང་པོ་མྱུར་དུ་ཤོམས་ཤིག་དང་དེར་ཞུགས་ནས་སྐྱེད་མོས་ཚལ་གྱི་གཞིར་འགྲོའོ། །ལྷ་
བཀའ་བཞིན་འཚལ་ཞེས་ཁ་ལོ་སྒྱུར་བས་བྱང་ཆུབ་སེམས་དཔའ་ཤཱཀྱ་ཐུབ་པའི་ལྟར་མཉན་ནས་བཞོན་པ་བཟང་པོ་མྱུར་དུ་བཤམས་ཏེ་བྱང་ཆུབ་སེམས་དཔའ་ཤཱཀྱ་ཐུབ་པ་གང་ན་བ་དེར་སོང་ནས་ཕྱིན་པ་དང་། བྱང་ཆུབ་སེམས་དཔའ་ཤཱཀྱ་ཐུབ་པ་ལ་འདི་སྐད་ཅེས་སྨྲས་སོ། །ལྷ་བཅིབས་
པ་བཟང་པོ་བཤམས་ལགས་ཀྱིས། ལྷ་ད་དེའི་དུས་ལ་བབ་པར་དགོངས་སུ་གསོལ། དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པ་བཞོན་པ་བཟང་པོར་ཞུགས་ནས་སྐྱེད་མོས་ཚལ་གྱི་གཞིར་བྱུང་བ་དང་། བྱང་ཆུབ་སེམས་དཔའ་ཤཱཀྱ་ཐུབ་པས་མི་རྒས་འཁོགས་གཏུགས་པ།
སྒུར་པོ་ཕྱམ་དགུ་པོ་ལྟར་ཀྱར་ཀྱོར་ཅན་མདུན་ནས་འཁར་བ་ལ་རྟེན་ཅིང་། ལུས་འདར་ཞིང་འགྲོ་བ་དེའི་སྐྲ་སེ་བ། ཇི་ལྟར་ཡང་མི་གཞན་དག་དང་མི་འདྲ་བ་ཞིག་གཟིགས་སོ། །གཟིགས་ནས་ཀྱང་ཁ་ལོ་སྒྱུར་བ་ལ་གསུངས་པ། ཁ་ལོ་སྒྱུར་བ་མི་རྒས་འཁོགས་གཏུགས་པ། སྒུར་

པོ་ཕྱམ་དགུ་པོ་ལྟར་ཀྱར་ཀྱོར་ཅན་མདུན་ནས་འཁར་བ་ལ་རྟེན་ཅིང་། ལུས་འདར་ཞིང་འགྲོ་བ་དེའི་སྐྲ་སེ་བ། ཇི་ལྟར་ཡང་མི་གཞན་དག་དང་མི་འདྲ་བ་འདི་ཅི་ཡིན། ལྷ་མི་འདི་ནི་རྒས་པ་ཞེས་བགྱིའོ། །ཁ་ལོ་སྒྱུར་བ་རྒས་པ་ཞེས་བྱ་བ་འདི་ཅི་ཡིན། ལྷ་མི་འདི་རིང་
པོར་མི་ཐོགས་པ་ཁོ་ནར་འགུམ་པར་འགྱུར་བས་དེ་རྒས་པ་ཞེས་བགྱིའོ། །ཁ་ལོ་སྒྱུར་བ་ང་ཡང་རྒ་བའི་ཆོས་དང་། རྒ་བའི་ཆོས་ཉིད་ལས་མ་འདས་སམ། ལྷ་ཡང་རྒ་བའི་ཆོས་དང་རྒ་བའི་ཆོས་ཉིད་ལས་མ་འདས་སོ། །ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག །ཕོ་བྲང་ཉིད་དུ་
འདོང་ངོ་། །འདི་ལྟར་ང་ཕོ་བྲང་དུ་ཕྱིན་ནས་ང་རྒ་བ་ལས་མ་འདས་སོ་ཞེས་གྲག་པའི་དོན་དེ་ཉིད་བསམ་པར་བྱའོ། །ཁ་ལོ་སྒྱུར་བས་ཤིང་རྟ་ཕྱིར་སྒྱུར་ནས་ཕོ་བྲང་ཉིད་དུ་ཆས་ཏེ་དེར་བྱང་ཆུབ་སེམས་དཔའ་ཤཱཀྱ་ཐུབ་པ་ཕོ་བྲང་གི་ནང་དུ་བྱོན་ནས་ང་ཡང་རྒས་པ་ལས་མ་འདས་པ་ལྟ་ཞིག་ཅེས་
མི་དགྱེས་ཤིང་ཐུགས་ངན་དགོངས་སོ། །འདིར་སྨྲས་པ། དར་ཡོལ་རྒས་ཤིང་སྒུར་ལ་མགོ་སྐྱ་བ། །ལག་ན་འཁར་བ་ཐོགས་པའི་མི་གཟིགས་ནས། །འདི་བདག་རྒས་ལས་མ་འདས་ཞེས་གྲག་ཅེས། །དེ་ནས་མི་དགྱེས་ཐུགས་ངན་དགོངས་པར་མཛད། །དེ་ནས་རྒྱལ་པོ་
ཟས་གཙང་གིས་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ་ཅི་གཞོན་ནུ་ཡིད་དགའ་བ་དང་མགུ་བས་སྐྱེད་མོས་ཚལ་གྱི་གཞིར་བྱུང་ངམ། སྐྱེད་མོས་ཚལ་ལ་མངོན་པར་དགའ་འམ། ལྷ་མ་ལགས་སོ། །དེ་ཅིའི་སླད་དུ་ཞེ་ན། ལྷ་གཞོན་ནུ་སྐྱེད་མོས་ཚལ་གྱི་གཞིར་གཤེགས་པ་ན།
མི་རྒས་འཁོགས་གཏུགས་པ་སྒུར་པོ་ཕྱམ་དགུ་པོ་ལྟར་ཀྱར་ཀྱོར་ཅན་མདུན་ནས་འཁར་བ་ལ་རྟེན་ཅིང་། ལུས་འདར་ཞིང་མཆི་ལ་དེའི་སྐྲ་སེ་བ། ཇི་ལྟར་ཡང་མི་གཞན་དག་དང་མི་འདྲ་བ་ཞིག་གཟིགས་སོ། །གཟིགས་ནས་ཀྱང་བདག་ལ་འདི་སྐད་ཅེས་བཀའ་སྩལ་ཏོ། །ཁ་ལོ་
སྒྱུར་བ་མི་རྒས་འཁོགས་གཏུགས་པ་སྒུར་པོ་ཕྱམ་དགུ་པོ་ལྟར་ཀྱར་ཀྱོར་ཅན་མདུན་ནས་འཁར་བ་ལ་རྟེན་ཅིང་། ལུས་འདར་ཞིང་འགྲོ་ལ་དེའི་སྐྲ་སེ་བ། ཇི་ལྟར་ཡང་མི་གཞན་དག་དང་མི་འདྲ་བ་འདི་ཅི་ཡིན། དེ་ལ་བདག་གིས་འདི་སྐད་ཅེས་གསོལ་ཏོ། །ལྷ་འདི་ནི་རྒས་པ་ཞེས་བགྱིའོ། །

དེས་འདི་སྐད་ཅེས་གསུངས་ཏེ། ཁ་ལོ་སྒྱུར་བ་རྒས་པ་ཞེས་བྱ་བ་འདི་ཅི་ཡིན། དེ་ལ་བདག་གིས་འདི་སྐད་ཅེས་གསོལ་ཏོ། །ལྷ་མི་འདི་རིང་པོ་མི་ཐོགས་པ་ཁོ་ནར་འགུམ་པར་འགྱུར་བས་ལྷ་དེ་ནི་རྒས་པ་ཞེས་བགྱིའོ། །དེས་འདི་སྐད་ཅེས་གསུངས་ཏེ། ཁ་ལོ་སྒྱུར་བ་ང་ཡང་རྒ་
བའི་ཆོས་དང་རྒ་བའི་ཆོས་ཉིད་ལས་མ་འདས་སམ། དེ་ལ་བདག་གིས་འདི་སྐད་ཅེས་གསོལ་ཏོ། །ལྷ་ཡང་རྒ་བའི་ཆོས་དང་། རྒ་བའི་ཆོས་ཉིད་ལས་མ་འདས་སོ། །དེས་འདི་སྐད་ཅེས་གསུངས་ཏེ། ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག །ཕོ་བྲང་ཉིད་དུ་འདོང་ངོ་། །
འདི་ལྟར་ཕོ་བྲང་དུ་ཕྱིན་ནས་ང་རྒ་བ་ལས་མ་འདས་སོ་ཞེས་གྲག་པའི་དོན་དེ་ཉིད་བསམ་པར་བྱའོ། །ལྷ་གཞོན་ནུ་དེ་ཕོ་བྲང་གི་ནང་དུ་གཤེགས་ཏེ། དེ་ནས་རྒ་བ་ལས་མ་འདས་པ་ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་
ཏེ། མཚན་མཁན་དང་ལྟས་མཁན་གྱི་བྲམ་ཟེ་དེ་རྣམས་ཀྱིས་ཚིག་ཡང་དག་པར་བདེན་པར་མི་འགྱུར་གྲང་། གཞོན་ནུ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་འགྱུར་དུ་འོང་གིས་མ་ལ་བདག་གིས་གཞོན་ནུ་ལ་
འདོད་པའི་ཡོན་ཏན་ལྔ་ལས་ཕལ་པོ་ཆེ་ཞིག་བྱིན་ལ་ཅི་ནས་ཀྱང་འདི་ལ་དགའ་ཞིང་རབ་ཏུ་འབྱུང་བར་མི་འགྱུར་བར་བྱའོ་སྙམ་མོ། །དེ་ནས་རྒྱལ་པོ་ཟས་གཙང་གིས་བྱང་ཆུབ་སེམས་དཔའ་ཤཱཀྱ་ཐུབ་པ་ལ་འདོད་པའི་ཡོན་ཏན་ལྔ་ལས་ཕལ་པོ་ཆེ་བྱིན་ཏེ་ཅི་ནས་ཀྱང་འདི་ལ་དགའ་ཞིང་རབ་ཏུ་འབྱུང་
བར་མི་འགྱུར་བར་བྱས་སོ། །འདིར་སྨྲས་པ། ཁ་ལོ་སྒྱུར་བའི་ཚིག་དེ་ཐོས་པ་དང་། །གཞོན་ནུ་ལ་ནི་ཡབ་དེ་དོགས་བཞིན་དུ། །དེ་ཚེ་སླར་དགའ་ནགས་སུ་མི་འགྲོའི་ཕྱིར། །འདོད་པའི་ཡོན་ཏན་ལྔར་བཅས་མང་དུ་བྱིན། །དེ་ནས་ཆོས་ཉིད་ཀྱིས་བྱང་ཆུབ་སེམས་དཔའ་སྐྱེད་མོས་ཚལ་
གྱི་གཞིར་གཤེགས་པར་བཞེད་པར་གྱུར་པ་དེའི་ཚེ་ཁ་ལོ་སྒྱུར་བ་ལ་ཀྱེ་ཁ་ལོ་སྒྱུར་བ་རེ་ཞིག་བཞོན་པ་བཟང་པོ་མྱུར་དུ་ཤོམས་ཤིག་དང་དེ་ལ་ང་ཞོན་ནས་སྐྱེད་མོས་ཚལ་གྱི་གཞིར་འགྲོའོ་ཞེས་གསུང་བར་འགྱུར་བས་དེ་ནས་བྱང་ཆུབ་སེམས་དཔས་ཁ་ལོ་སྒྱུར་བ་ལ་གསུངས་པ། ཀྱེ་ཁ་ལོ་སྒྱུར་བ་

རེ་ཞིག་བཞོན་པ་བཟང་པོ་མྱུར་དུ་ཤོམས་ཤིག །དེ་ལ་ང་ཞོན་ནས་སྐྱེད་མོས་ཚལ་གྱི་གཞིར་གཤེགས་སོ། །ལྷ་བཀའ་བཞིན་འཚལ་ལོ་ཞེས་ཁ་ལོ་སྒྱུར་བས་བྱང་ཆུབ་སེམས་དཔའ་ཤཱཀྱ་ཐུབ་པའི་ལྟར་མཉན་ནས་བཞོན་པ་བཟང་པོ་བཤམས་ཏེ། བྱང་ཆུབ་སེམས་དཔའ་
ཤཱཀྱ་ཐུབ་པ་གང་ན་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་ཤཱཀྱ་ཐུབ་པ་ལ་འདི་སྐད་ཅེས་གསོལ་ཏོ། །ལྷ་བཅིབས་པ་བཟང་པོ་བཤམས་ལགས་ན། ལྷ་ད་དེའི་དུས་ལ་བབ་པར་དགོངས་སུ་གསོལ། དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པ་བཞོན་པ་བཟང་པོར་ཞུགས་ནས་སྐྱེད་
མོས་ཚལ་གྱི་གཞིར་བྱུང་བ་དང་། བྱང་ཆུབ་སེམས་དཔའ་ཤཱཀྱ་ཐུབ་པས་མི་སྐྱ་བོ་རྦབ་རྦབ་པོ་རིད་པ་ཉམ་ཆུང་བ་དབང་པོ་ཉམས་པ། སྐྱེ་བོ་མང་པོའི་མིག་གིས་ལྟ་མི་ཕོད་པ་ཞིག་གཟིགས་སོ། །གཟིགས་ནས་ཀྱང་ཁ་ལོ་སྒྱུར་བ་ལ་གསུངས་པ། ཁ་ལོ་སྒྱུར་བ་མི་སྐྱ་བོ་རྦབ་རྦབ་པོ་རིད་པ་ཉམ་
ཆུང་བ་དབང་པོ་ཉམས་པ། སྐྱེ་བོ་མང་པོའི་མིག་གིས་ལྟ་མི་ཕོད་པ་འདི་ཅི་ཡིན། ལྷ་འདི་ནི་བྲོ་ནད་ཀྱིས་ཐེབས་པ་ཞེས་བགྱིའོ། །ཁ་ལོ་སྒྱུར་བ་བྲོ་ནད་ཀྱིས་ཐེབས་པ་ཞེས་བྱ་བ་འདི་ཅི་ཡིན། ལྷ་མི་འདི་གང་གིས་འགུམ་པར་འགྱུར་བའི་གནས་དེ་མཆིས་ཏེ། ལྷ་འདི་ནི་བྲོས་ཐེབས་པ་ཞེས་བགྱིའོ། །
ཁ་ལོ་སྒྱུར་བ་ང་ཡང་ནད་ཀྱི་ཆོས་དང་ནད་ཀྱི་ཆོས་ཉིད་ལས་མ་འདས་སམ། ལྷ་ཡང་སྙུན་གྱི་ཆོས་དང་སྙུན་གྱི་ཆོས་ཉིད་ལས་མ་འདས་སོ། །ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག །ཕོ་བྲང་ཉིད་དུ་འདོང་ངོ་། །འདི་ལྟར་ཕོ་བྲང་དུ་ཕྱིན་ནས་ང་ནད་ལས་མ་འདས་པ་ཞེས་བྱ་བའི་དོན་དེ་ཉིད་བསམ་
པར་བྱའོ། །ཁ་ལོ་སྒྱུར་བས་ཤིང་རྟ་ཕྱིར་བསྒྱུར་ནས་ཕོ་བྲང་ཉིད་དུ་ཆས་ཏེ། དེར་བྱང་ཆུབ་སེམས་དཔའ་ཤཱཀྱ་ཐུབ་པ་ཕོ་བྲང་གི་ནང་དུ་གཤེགས་ནས་བདག་ཀྱང་ནད་ལས་མ་འདས་པ་ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ། །འདིར་སྨྲས་པ། མི་ནི་ལུས་རིད་སྐྱ་བོ་རྦབ་རྦབ་པོ། །
རང་དབང་མེད་པའི་ནད་ཐེབས་འདིར་གཟིགས་ནས། །ནད་ལས་བདག་མ་འདས་པ་ལྟ་ཞིག་ཅེས། །དེ་ནས་མི་དགྱེས་ཐུགས་ངན་དགོངས་པར་མཛད། །དེ་ནས་རྒྱལ་པོ་ཟས་གཙང་གིས་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ་ཅི་གཞོན་ནུ་ཡིད་དགའ་བ་དང་མགུ་བས་སྐྱེད་མོས་ཚལ་གྱི་གཞིར་

བྱུང་ངམ། །སྐྱེད་མོས་ཚལ་ལ་མངོན་པར་དགའ་བར་གྱུར་ཏམ། །ལྷ་མ་ལགས་སོ། །དེ་ཅིའི་སླད་དུ་ཞེ་ན། ལྷ་གཞོན་ནུ་སྐྱེད་མོས་ཚལ་གྱི་གཞིར་བྱུང་བ་ན། མི་སྐྱ་བོ་རྦབ་རྦབ་པོ་རིད་པ་ཉམ་ཆུང་བ་དབང་པོ་ཉམས་པ། །སྐྱེ་བོ་མང་པོའི་མིག་གིས་ལྟ་མི་ཕོད་པ་ཞིག་གཟིགས་སོ། །
གཟིགས་ནས་ཀྱང་བདག་ལ་བཀའ་སྩལ་པ། ཁ་ལོ་སྒྱུར་བ་མི་སྐྱ་བོ་རྦབ་རྦབ་པོ་རིད་པ་ཉམ་ཆུང་བ་དབང་པོ་ཉམས་པ། སྐྱེ་བོ་མང་པོའི་མིག་གིས་ལྟ་མི་ཕོད་པ་འདི་ཅི་ཡིན། དེ་ལ་བདག་གིས་འདི་སྐད་ཅེས་གསོལ་ཏོ། །ལྷ་འདི་ནི་བྲོ་ནད་ཀྱིས་ཐེབས་པ་ཞེས་བགྱིའོ། །དེས་འདི་སྐད་ཅེས་
གསུངས་ཏེ། ཁ་ལོ་སྒྱུར་བ་ནད་ཀྱིས་ཐེབས་པ་ཞེས་བྱ་བ་འདི་ཅི་ཡིན། དེ་ལ་བདག་གིས་འདི་སྐད་ཅེས་གསོལ་ཏོ། །མི་འདི་གང་གནོད་པ་འདིས་འགུམ་པའི་གནས་མཆིས་ཏེ། ལྷ་དེ་ནི་བྲོས་ཐེབས་པ་ཞེས་བགྱིའོ། །དེས་འདི་སྐད་ཅེས་གསུངས་ཏེ། ཁ་ལོ་སྒྱུར་བ་ང་ཡང་ནད་ཀྱི་ཆོས་དང་
ནད་ཀྱི་ཆོས་ཉིད་ལས་མ་འདས་སམ། དེ་ལ་བདག་གིས་འདི་སྐད་ཅེས་གསོལ་ཏོ། །ལྷ་ཡང་སྙུན་གྱི་ཆོས་དང་སྙུན་གྱི་ཆོས་ཉིད་ལས་མ་འདས་སོ། །དེས་འདི་སྐད་ཅེས་གསུངས་ཏེ། ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག །ཕོ་བྲང་ཉིད་དུ་འདོང་ངོ་། །འདི་ལྟར་ང་ཕོ་བྲང་ཉིད་དུ་ཕྱིན་
ནས་ང་ནད་ལས་མ་འདས་ཞེས་གྲག་པའི་དོན་དེ་ཉིད་བསམ་པར་བྱའོ། །གཞོན་ནུ་དེ་ཕོ་བྲང་གི་ནང་དུ་གཤེགས་ནས་ང་ཡང་ནད་ལས་མ་འདས་པ་ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ་མཚན་མཁན་དང་ལྟས་མཁན་གྱི་བྲམ་
ཟེ་དེ་རྣམས་ཀྱི་ཚིག་ཡང་དག་པར་བདེན་པར་མི་འགྱུར་གྲང་ཞེས་བྱ་བ་ལ་སོགས་པ་སྔ་མ་བཞིན་ནོ། །འདིར་སྨྲས་པ། དེ་ཚེ་དགའ་ནས་བདག་ངོར་མི་གཞུག་ཕྱིར། །གཟུགས་དང་སྒྲ་དང་དྲི་དང་རོ་རྣམས་དང་། །རེག་བྱ་ཡིད་དུ་འོང་བ་གཙོ་རྣམས་ཀྱི། །འདོད་པའི་ཡོན་ཏན་ལྔ་པོ་ཡང་
བྱིན་ནོ། །ཆོས་ཉིད་ཀྱིས་བྱང་ཆུབ་སེམས་དཔའ་ཤཱཀྱ་ཐུབ་པ་སྐྱེད་མོས་ཚལ་གྱི་གཞིར་གཤེགས་པར་བཞེད་པར་གྱུར་པ་དེའི་ཚེ། ཁ་ལོ་སྒྱུར་བ་ལ་བཀའ་སྩལ་པ་ལ་སོགས་པ་སྔ་མ་བཞིན་ཏེ། བྱང་ཆུབ་སེམས་དཔའ་ཤཱཀྱ་ཐུབ་པས་རས་ཁ་དོག་སྣ་ཚོགས་ལས་བྱས་པའི་བླ་རེ་བྲེས་

པ་དང་། ཁྱོགས་ཁྱེར་བ་དང་། མདུན་ནས་མེ་སྒྲོན་ཐོགས་པ་དང་། སྐྱེ་བོའི་ཚོགས་ཆེན་པོ་མདུན་ནས་འགྲོ་བ་དང་། བུད་མེད་སྐྲ་བཤིག་པ་རྣམས་ངུ་ཞིང་རྗེས་བཞིན་དུ་འབྲང་བ་ཞིག་གཟིགས་སོ། །གཟིགས་ནས་ཀྱང་ཁ་ལོ་སྒྱུར་བ་ལ་གསུངས་པ།
ཁ་ལོ་སྒྱུར་བ་རས་ཁ་དོག་སྣ་ཚོགས་ལས་བྱས་པའི་བླ་རེ་བྲེས་པ་དང་། ཁྱོགས་ཁྱེར་བ་དང་། མདུན་ནས་མེ་སྒྲོན་ཐོགས་པ་དང་། སྐྱེ་བོའི་ཚོགས་ཆེན་པོ་མདུན་ནས་འགྲོ་བ་དང་། བུད་མེད་སྐྲ་བཤིག་པ་རྣམས་ངུ་ཞིང་རྗེས་བཞིན་དུ་འབྲང་བ་འདི་ཅི་ཡིན། ལྷ་འདི་ནི་གུམ་པ་ཞེས་བགྱིའོ། །
ཁ་ལོ་སྒྱུར་བ་ཤི་བ་ཞེས་བྱ་བ་འདི་ཅི་ཡིན། ལྷ་མི་འདིས་སླན་ཆད་སྡུག་པའི་ཕ་མ་མི་མཐོང་ཞིང་བུ་ཕོ་དང་། བུ་མོ་དང་། བྲན་ཕོ་དང་། བྲན་མོ་དང་། ལས་བགྱིད་པ་དང་། །ཞོ་ཤས་འཚོ་བའི་མི་རྣམས་ཀྱང་མ་ལགས་ལ་དེ་དག་གིས་ཀྱང་སླན་ཆད་འདི་མི་མཐོང་བས་ལྷ་འདི་ནི་གུམ་པ་ཞེས་བགྱིའོ། །
ཁ་ལོ་སྒྱུར་བ་ང་ཡང་འཆི་བའི་ཆོས་དང་འཆི་བའི་ཆོས་ཉིད་ལས་མ་འདས་སམ། ལྷ་ཡང་འཆི་བའི་ཆོས་དང་འཆི་བའི་ཆོས་ཉིད་ལས་མ་འདས་སོ། །ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག །ཕོ་བྲང་ཉིད་དུ་འདོང་ངོ་། །འདི་ལྟར་ང་ཕོ་བྲང་དུ་ཕྱིན་ནས་ང་འཆི་བ་ལས་མ་འདས་ཞེས་གྲག་པའི་
དོན་དེ་ཉིད་བསམ་པར་བྱའོ། །ཁ་ལོ་སྒྱུར་བས་ཤིང་རྟ་ཕྱིར་བསྒྱུར་ནས་ཕོ་བྲང་ཉིད་དུ་ཆས་ཏེ་དེར་བྱང་ཆུབ་སེམས་དཔའ་ཤཱཀྱ་ཐུབ་པ་ཕོ་བྲང་གི་ནང་དུ་གཤེགས་ནས་བདག་ཀྱང་འཆི་བ་ལས་མ་འདས་པ་ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ། །འདིར་སྨྲས་པ། ཚེ་ཟད་པ་ཡིས་
འདུ་ཤེས་བྲལ་གྱུར་ཅིང་། །སེམས་མེད་མི་ཡི་རོ་ཞིག་གཟིགས་ནས་ནི། །འཆི་ལས་བདག་མ་འདས་པ་ལྟ་ཞིག་ཅེས། །དེ་ནས་མི་དགྱེས་ཐུགས་ངན་དགོངས་པར་མཛད། །དེ་ནས་རྒྱལ་པོ་ཟས་གཙང་གིས་ཁ་ལོ་སྒྱུར་བ་ལ་སྨྲས་པ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །འདིར་སྨྲས་
པ། གྲོང་ཁྱེར་དམ་པ་དཔལ་ལྡན་ཡིད་འོང་དེར། །ལྷ་ཡི་ལྷར་གྱུར་སྒྲོན་མ་དང་མཚུངས་པ། །འདོད་པའི་ཡོན་ཏན་ལྔ་པོས་ཀུན་དགྱེས་པ། །མིག་སྟོང་དགའ་བའི་ཚལ་ན་གནས་པ་བཞིན། །དེ་ནས་གནས་གཙང་མའི་རིས་ཀྱི་ལྷ་རྣམས་འདི་སྙམ་དུ་སེམས་ཏེ། བྱང་ཆུབ་སེམས་དཔའ་

ནི་རྒྱུའི་སྟོབས་ཅན་ཡིན་མོད་ཀྱི་འོན་ཀྱང་རྐྱེན་བསྒྲུབ་པར་བྱ་དགོས་ཏེ་འདི་ལྟར་རྒྱུའི་སྟོབས་ཆེན་པོ་ཡང་རྐྱེན་གྱི་སྟོབས་ལ་ལྟོས་སོ་སྙམ་ནས་དེ་རྣམས་ཀྱིས་མི་སྐྲ་བྲེགས་ཤིང་གོས་ངུར་སྨྲིག་གྱོན་པ། ལག་པ་ན་ལྷུང་བཟེད་ཐོགས་པ་ཞིག་ཁྱིམ་ནས་ཁྱིམ་དང་། ཁང་པ་ནས་ཁང་པར་རྒྱུ་ཞིང་འགྲོ་
བ་ཞིག་སྤྲུལ་ཏོ། །ཆོས་ཉིད་ཀྱིས་བྱང་ཆུབ་སེམས་དཔའ་སྐྱེད་མོས་ཚལ་གྱི་གཞིར་གཤེགས་པར་བཞེད་པར་གྱུར་པ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །སྐྱེད་མོས་ཚལ་གྱི་གཞིར་བྱུང་བ་དང་། བྱང་ཆུབ་སེམས་དཔའ་ཤཱཀྱ་ཐུབ་པས་མི་སྐྲ་བྲེགས་ཤིང་གོས་ངུར་སྨྲིག་གྱོན་པ་ལག་
པ་ན་ལྷུང་བཟེད་ཐོགས་པ་ཞིག་ཁྱིམ་ནས་ཁྱིམ་དང་། ཁང་པ་ནས་ཁང་པར་རྒྱུ་ཞིང་འགྲོ་བ་ཞིག་གཟིགས་སོ། །གཟིགས་ནས་ཀྱང་ཁ་ལོ་སྒྱུར་བ་ལ་གསུངས་པ། ཁ་ལོ་སྒྱུར་བ་མི་སྐྲ་བྲེགས་ཤིང་ལག་པ་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་དང་། ཁང་པ་ནས་ཁང་པར་རྒྱུ་ཞིང་འགྲོ་ལ་
འདིའི་གོས་ཀྱང་ཁ་དོག་མི་མཚུངས་ཏེ་ཇི་ལྟར་ཡང་མི་གཞན་དག་གི་དང་མི་འདྲ་བ་ཅི་ཡིན། ལྷ་དེ་ནི་རབ་ཏུ་བྱུང་བ་ཞེས་བགྱིའོ། །ཁ་ལོ་སྒྱུར་བ་རབ་ཏུ་བྱུང་བ་ཞེས་བྱ་བ་འདི་ཅི་ཡིན། ལྷ་རབ་ཏུ་བྱུང་བ་དེ་ནི་དུལ་བ་ལེགས་པ་དང་། ཡང་དག་པར་སྡོམ་པ་ལེགས་པ་དང་། དོན་སྤྱོད་པ་
ལེགས་པ་དང་། ཆོས་སྤྱོད་པ་ལེགས་པ་དང་། དགེ་བ་སྤྱོད་པ་ལེགས་པ་དང་། དགེ་ལེགས་སྤྱོད་པ་ལེགས་པར་རིག་ནས་སྐྲ་དང་། ཁ་སྤུ་བྲེགས་ཏེ། གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་སྟེ། ལྷ་འདི་ནི་རབ་ཏུ་བྱུང་བ་ཞེས་
བགྱིའོ། །ཁ་ལོ་སྒྱུར་བ་དེའི་ཕྱིར་ཤིང་རྟ་འདི་རབ་ཏུ་བྱུང་བ་གང་ན་བ་དེ་ལོགས་སུ་སྒྱུར་ཅིག །ལྷ་བཀའ་བཞིན་འཚལ་ཞེས་ཁ་ལོ་སྒྱུར་བས་བྱང་ཆུབ་སེམས་དཔའ་ཤཱཀྱ་ཐུབ་པའི་ལྟར་མཉན་ནས་ཤིང་རྟ་དེ་རབ་ཏུ་བྱུང་བ་གང་ན་བ་དེར་བསྒྱུར་ཏོ། །དེ་ནས་བྱང་ཆུབ་སེམས་དཔའ་ཤཱཀྱ་ཐུབ་
པས་རབ་ཏུ་བྱུང་བ་དེ་ལ་འདི་སྐད་ཅེས་བཀའ་སྩལ་ཏོ། །ཀྱེ་མི་ཁྱོད་ཅིའི་ཕྱིར་སྐྲ་བྲེགས་ཤིང་ལག་པ་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་དང་། ཁང་པ་ནས་ཁང་པར་རྒྱུ་ཞིང་འགྲོ་ལ་ཁྱོད་ཀྱི་གོས་ཀྱང་ཁ་དོག་མི་མཚུངས་ཏེ་ཇི་ལྟར་ཡང་མི་གཞན་དག་གི་དང་མི་འདྲ་བ་ཡིན། དེས་འདི་

སྐད་ཅེས་སྨྲས་སོ། །གཞོན་ནུ་བདག་ནི་རབ་ཏུ་བྱུང་བ་ཞེས་བགྱིའོ། །ཀྱེ་མི་ཁྱོད་ཇི་ལྟར་ན་རབ་ཏུ་བྱུང་བ་ཞེས་བྱ། །གཞོན་ནུ་བདག་གིས་དུལ་བ་ལེགས་པ་དང་། ཡང་དག་པར་སྡོམ་པ་ལེགས་པ་དང་། དོན་སྤྱོད་པ་ལེགས་པ་དང་། ཆོས་
སྤྱོད་པ་ལེགས་པ་དང་། དགེ་བ་སྤྱོད་པ་ལེགས་པ་དང་། དགེ་ལེགས་སྤྱོད་པ་ལེགས་པར་རིག་ནས། སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་ལྟར་ན་བདག་རབ་ཏུ་བྱུང་བ་ཞེས་བྱའོ། །ཀྱེ་མི་
ཁྱོད་ཀྱིས་དུལ་བ་ལེགས་པ་དང་། ཡང་དག་པར་སྡོམ་པ་ལེགས་པ་དང་། དོན་སྤྱོད་པ་ལེགས་པ་དང་། ཆོས་སྤྱོད་པ་ལེགས་པ་དང་། དགེ་བ་སྤྱོད་པ་ལེགས་པ་དང་། དགེ་ལེགས་སྤྱོད་པ་ལེགས་པར་རིག་ནས་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་བགོས་ནས་དད་པ་
ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ལེགས་སོ། །དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པས་ཁ་ལོ་སྒྱུར་བ་ལ་གསུངས་པ། ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག །ཕོ་བྲང་ཉིད་དུ་འདོང་ངོ་། །འདི་ལྟར་ང་ཕོ་བྲང་ཉིད་དུ་ཕྱིན་ནས་དོན་འདི་ཁོ་ན་བསམ་
པར་བྱའོ། །ཁ་ལོ་སྒྱུར་བས་ཤིང་རྟ་ཕྱིར་སྒྱུར་ནས་ཕོ་བྲང་ཉིད་དུ་ཆས་ཏེ། དེར་ཕོ་བྲང་དུ་གཤེགས་པ་དང་། བྱང་ཆུབ་སེམས་དཔའ་ཤཱཀྱ་ཐུབ་པ་ཀྱེ་མའོ་བདག་ནི་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་
བར་བྱའོ་སྙམ་པའི་དོན་དེ་ཉིད་དགོངས་སོ། །དེ་ནས་རྒྱལ་པོ་ཟས་གཙང་གིས་ཁ་ལོ་སྒྱུར་བ་ལ་སྨྲས་པ་ལ་སོགས་པ་ནི་སྔ་མ་བཞིན་ནོ། །དེ་ནས་སྐྱེ་དགུའི་བདག་མོ་ཆེན་མོས་རྨི་ལམ་རྨིས་པ་དབང་པོའི་ཏོག་ལྷུང་བ་དང་། ཤཱཀྱ་རྣམས་ཕྱག་དར་གྱིས་ཁེངས་པ་དང་། ས་ལྡོག་
པ་དང་། དཔལ་ཁྱིམ་ནས་བྱུང་བ་དང་། ཕྱི་རོལ་ན་སྐད་ཅིག་ཅིང་ངུ་ཞིང་དགོད་པ་ལ་བདག་ཉིད་ལྟ་བ་དང་། ཉི་མ་གང་ནས་ཤར་བ་དེ་ཉིད་ནས་ནུབ་པའོ། །བྱང་ཆུབ་སེམས་དཔས་དེ་གསན་པ་དང་། དགོངས་པ་ང་ནི་ཤཱཀྱ་རྣམས་ཀྱི་དབང་པོའི་ཏོག་གི་གནས་ཡིན་པ་དང་།

ང་གྲོང་ཁྱེར་ནས་འབྱུང་ན་དཔལ་འབྱུང་བར་འགྱུར་རོ། །རྒྱལ་པོ་ཟས་གཙང་མས་ཀྱང་རྨི་ལམ་རྨིས་པ་དཔལ་གྱི་མལ་ཁྲི་ཆག་པ་དང་། ཕའི་རྒྱུད་ཆད་པའོ། །བྱང་ཆུབ་སེམས་དཔས་དེ་གསན་པ་དང་། དེ་དེ་བཞིན་ཏེ། ང་ནི་གྲགས་འཛིན་མའི་དཔལ་གྱི་གནས་སུ་
གྱུར་པ་དང་། ཟས་གཙང་མའི་ཕའི་རིགས་རྒྱུད་ཀྱི་གནས་སུ་གྱུར་པས་ང་རབ་ཏུ་བྱུང་ན་ཤཱཀྱ་རྣམས་ཀྱི་རིགས་རྒྱུད་ཆད་པར་འགྱུར་རོ། །མཚན་མཁན་རྣམས་ཀྱིས་རྒྱལ་པོ་ཟས་གཙང་མའི་མདུན་དུ་གལ་ཏེ་གཞོན་ནུ་ཞག་བདུན་གྱི་བར་དུ་རབ་ཏུ་མ་བྱུང་ན་འཁོར་ལོས་སྒྱུར་བའི་རྒྱལ་
པོར་འགྱུར་རོ་ཞེས་ལུང་བསྟན་ཏོ། །འདི་སྐད་ཅེས་ཀྱང་སྨྲས་སོ། །གལ་ཏེ་དེ་ཡི་བཟང་པོ་གཟིགས་བཞེད་ན། །དེ་སླད་དགུང་བདུན་བར་དུ་སྲུངས་ཤིག་དང་། །མི་དབང་གདུགས་ནི་བདལ་བར་གྱུར་པ་ལྟའི། །རིན་ཆེན་སྣ་བདུན་འབྱུང་བར་ཐེ་ཙོམ་མེད། །ཁྱོད་སྲས་
རིན་ཆེན་བདུན་པོ་ཡི། །དབང་ཕྱུག་གི་ནི་རྒྱལ་པོར་འགྱུར། །རྒྱ་མཚོ་ལ་ནི་ཐུག་པའི་ས། །ཆད་པ་མེད་པས་སྐྱོང་བར་འགྱུར། །འོན་ཏེ་ས་ནི་སྤངས་ནས་སུ། །བསྙེངས་མེད་ནགས་སུ་བཞུད་ན་ནི། །ཐམས་ཅད་མཁྱེན་པ་ཐོབ་གྱུར་ནས། །འགྲོ་བ་སྒྲོལ་བ་མཛད་
པར་འགྱུར། །ཞེས་ཐོས་སོ། །ཐོས་ནས་ཀྱང་ཟས་གཙང་དང་། ཟས་དཀར་དང་། བྲེ་བོ་ཟས་དང་། བདུད་རྩི་ཟས་བཞི་ལྷན་ཅིག་གཅིག་ཏུ་ཚོགས་ནས་གྲོས་བྱ་བར་བརྩམས་པ། ཤེས་ལྡན་དག་མཚན་མཁན་དང་ལྟས་མཁན་གྱི་བྲམ་ཟེ་རྣམས་ཀྱིས་བྱང་ཆུབ་སེམས་དཔའ་
ཤཱཀྱ་ཐུབ་པ་ལ་གལ་ཏེ་ཞག་བདུན་གྱི་བར་དུ་རབ་ཏུ་མ་བྱུང་ན་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་གྱིས་དེ་ལྟ་བས་ན་བདག་ཅག་གིས་བྱང་ཆུབ་སེམས་དཔའ་ཞག་བདུན་གྱི་བར་དུ་བསྒྲིམས་ཏེ་བསྲུང་བར་བྱ་ཞིང་གྲོང་ཁྱེར་ཡང་ལེགས་པར་བསྲུང་བར་བྱའོ། །དེ་ནས་
དེ་རྣམས་ཀྱིས་སེར་སྐྱའི་གཞིའི་གྲོང་ཁྱེར་ར་བ་རིམ་པ་བདུན་དང་། འོབས་རིམ་པ་བདུན་གྱིས་བསྐོར་ནས་གྲོང་ཁྱེར་གྱི་སྒོ་འཕར་ལྕགས་ལས་བྱས་ཤིང་སྒོ་འཕར་རྣམས་ལ་དྲིལ་བུ་ཤིན་ཏུ་སྒྲ་གསལ་བ་བཏགས་ཏེ། སྒོ་ཕྱེ་ན་དེའི་སྒྲས་དཔག་ཚད་གཅིག་ཁོར་ཡུག་ཏུ་གྲག་པར་འགྱུར་རོ། །

བྱང་ཆུབ་སེམས་དཔའ་ཁང་བཟངས་ཀྱི་གཞི་ན་བུད་མེད་ཡིད་འཕྲོག་པ། གཟུགས་བཟང་བ་རྣམས་དང་གར་དང་། གླུ་དང་། རོལ་མོ་རྣམས་ཀྱི་སྤྱོད་པས་བསྙེན་བཀུར་བྱེད་དུ་བཅུག་གོ། །སྐས་ཤིན་ཏུ་ཆེ་བ་སྤོར་རུང་བ་མི་ལྔ་བརྒྱས་བཏེག་པ་བྱས་སོ། །
ཆིབས་བསྔགས་ལྡན་གྱི་ས་ཕྱོགས་ནི་ཟངས་མའི་གླེགས་བུས་གཡོགས་ཤིང་གསེར་གྱི་སིལ་དཀྲོལ་གྱི་དྲ་བ་བཏགས་པས་བསྐོར་ཏོ། །བྱང་ཆུབ་སེམས་དཔའ་ནི་སྟེང་གི་ཁང་བཟངས་ཀྱི་གཞི་སྐྱེས་པ་མེད་པར་ཞུགས་ནས། པི་བང་དང་། གླིང་བུ་དང་། ཁར་རྔ་དང་། སྒྲ་
སྙན་ལ་སོགས་པ་རོལ་མོའི་ཆ་བྱད་དག་ཉེ་བར་ལེན་ཅིང་འབྱོར་པ་ཆེན་པོས་བཞུགས་སོ། །མཚན་མོ་ནི་རྒྱལ་པོ་ཟས་གཙང་ཡང་དཔུང་གི་ཚོགས་ཡན་ལག་བཞི་དང་ཤར་སྒོའི་ཕྱི་རོལ་ན་འདུག་གོ། །ལྷོ་ཕྱོགས་ན་ནི་བྲེ་བོ་ཟས་སོ། །ནུབ་ཕྱོགས་ན་ནི་ཟས་དཀར་རོ། །བྱང་ཕྱོགས་
ན་ནི་བདུད་རྩི་ཟས་སོ། །གྲོང་ཁྱེར་གྱི་དབུས་ཀྱི་འདྲམ་པོ་བྱེད་པ་ནི་ཤཱཀྱ་མིང་ཆེན་དཔུང་གི་ཚོགས་ཡན་ལག་བཞི་དང་ལྡན་པའོ། །དེ་ཤར་སྒོར་སོང་ནས་སྨྲས་པ། སུ་ཞིག་མེལ་ཙེ་བྱེད། སུ་ཞིག་མེལ་ཙེ་བྱེད། རྒྱལ་པོ་ཟས་གཙང་གིས་སྨྲས་པ། ཁོ་བོ་མེལ་ཙེ་བྱེད་
དོ། །ལྷ་མེལ་ཙེ་མཛོད་ཅིག །མེལ་ཙེ་མཛད་དང་ཁྱོད་ལ་ལེགས་པར་འགྱུར་ཞེས་སྨྲས་ཏེ་ཚིགས་སུ་བཅད་དེ་སྨྲས་པ། འཇིག་རྟེན་གཉིད་ལོག་རོ་དང་མཚུངས། །གཉིད་ལོག་བདུད་ཀྱི་དབང་དུ་སོང་། །འདི་ནི་མི་ཉལ་རྟག་ཏུ་མཁས། །དེ་བས་མ་ཉལ་མེལ་ཙེ་བྱོས། །ལྷོ་
སྒོར་སོང་ནས་སྨྲས་པ། སུ་ཞིག་མེལ་ཙེ་བྱེད། སུ་ཞིག་མེལ་ཙེ་བྱེད། བྲེ་བོ་ཟས་ཀྱིས་སྨྲས་པ། ཁོ་བོ་མེལ་ཙེ་བྱེད་དོ། །ལྷ་མེལ་ཙེ་མཛོད་ཅིག །མེལ་ཙེ་མཛད་དང་། ཁྱོད་ལ་ལེགས་པར་འགྱུར་རོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། འཇིག་རྟེན་གཉིད་
ལོག་རོ་དང་མཚུངས། །གཉིད་ལོག་བདུད་ཀྱི་དབང་དུ་སོང་། །གཉིད་ལོག་འཆི་བདག་དབང་དུ་སོང་། །དེ་བས་མ་ཉལ་མེལ་ཙེ་བྱོས། །ནུབ་སྒོར་སོང་ནས་སྨྲས་པ། སུ་ཞིག་མེལ་ཙེ་བྱེད། སུ་ཞིག་མེལ་ཙེ་བྱེད། ཟས་དཀར་གྱིས་སྨྲས་པ། ཁོ་བོ་མེལ་ཙེ་བྱེད་དོ། །

ལྷ་མེལ་ཙེ་མཛོད་ཅིག །མེལ་ཙེ་མཛད་དང་ཁྱོད་ལ་ལེགས་པར་འགྱུར་རོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། གཉིད་ལོག་པ་ནི་རྟག་ཏུ་མྱོས། །མྱོས་འགྱུར་བྲེ་བོས་འཐུངས་པ་ཉལ། །དགོན་པ་ནགས་སུ་ཉལ་བ་འདྲས། །དེ་བས་མ་ཉལ་མེལ་ཙེ་བྱོས། །བྱང་སྒོར་
སོང་ནས་སྨྲས་པ། སུ་ཞིག་མེལ་ཙེ་བྱེད། སུ་ཞིག་མེལ་ཙེ་བྱེད། བདུད་རྩི་ཟས་ཀྱིས་སྨྲས་པ། ཁོ་བོ་མེལ་ཙེ་བྱེད་དོ། །ལྷ་མེལ་ཙེ་མཛོད་ཅིག །མེལ་ཙེ་མཛད་དང་ཁྱོད་ལ་ལེགས་པར་འགྱུར་རོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། རི་ཉལ་རི་སུལ་ཉལ་བ་བཞིན། །རྒྱ་
མཚོའི་ཆུར་ནི་ཉལ་བ་དང་། ལྗོན་ཤིང་རྩེ་ལ་ཉལ་བ་བཞིན། །དེ་བས་མ་ཉལ་མེལ་ཙེ་བྱོས། །དབུས་ཀྱི་བཞི་མདོ་དང་། སུམ་མདོ་དག་ཏུ་སོང་ནས་སྨྲས་པ། སུ་ཞིག་མེལ་ཙེ་བྱེད། སུ་ཞིག་མེལ་ཙེ་བྱེད། སྲུངས་མ་རྣམས་ཀྱིས་སྨྲས་པ། བདག་ཅག་མེལ་ཙེ་བགྱིད་དོ། །
མེལ་ཙེ་བྱོས་ཤིག །མེལ་ཙེ་བྱས་དང་ལེགས་པར་འགྱུར་རོ། །ཞེས་སྨྲས་ནས་ཚིགས་སུ་བཅད་དེ་སྨྲས་པ། ཆོས་སྤྱོད་ཆོས་མ་ཡིན་མ་སྤྱོད། །བདེན་པར་སྨྲོས་ཤིག་བརྫུན་མ་སྨྲ། །མུན་པ་ཆེན་པོར་འཇུག་པར་འགྱུར། །དེ་བས་མ་ཉལ་མེལ་ཙེ་བྱོས། །དེ་ནས་ནམ་
ནངས་ནས་ཤཱཀྱ་མིང་ཆེན་གྱིས་རྒྱལ་པོ་ཟས་གཙང་ལ་སྨྲས་པ། ལྷ་དགུང་སངས་ལགས་ཏེ། དགུང་བདུན་ལ་དགུང་གཅིག་ནི་ཐལ་དགུང་དྲུག་ནི་ལུས་སོ། །རྒྱལ་པོ་ཟས་གཙང་གིས་སྨྲས་པ། ལེགས་ཀྱིས་ཞག་དྲུག་འདས་ནས་གཞོན་ནུ་འཁོར་ལོས་སྒྱུར་བར་གྱུར་ན་བདག་
ཅག་ནམ་མཁའི་ངོས་ལ་རྒྱུ་ཞིང་གླིང་བཞིར་ཕྱི་བཞིན་འདོང་ངོ་། །དེ་བཞིན་དུ་དགུང་གཅིག་ལུས་སོ་ཞེས་བྱ་བའི་བར་དུའོ། །དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ། མི་དབང་ཤཱཀྱའི་སྲས་པོ་ཐུབ་པ་འདི། །བདག་ཉིད་ཆེན་པོ་ཕ་རོལ་ཕྱིན་དྲུག་རྫོགས། །ཐུགས་
རྣམས་དགྱེས་པར་མཛད་པ་དཀའ་ཐུབ་ཚལ། །འཕགས་པ་དགྱེས་པའི་ནགས་སུ་གཤེགས་པར་བཞེད། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། བདག་ལ་གཞན་དག་གཞོན་ནུ་ཤཱཀྱ་ཐུབ་པ་ནི་སྐྱེས་པ་མ་ཡིན་ཏེ། གང་གི་ཕྱིར་གྲགས་འཛིན་མ་དང་།

ས་འཚོ་མ་དང་། རི་དགས་སྐྱེས་དང་། བུད་མེད་དྲུག་ཁྲི་སྤངས་ནས་རབ་ཏུ་འབྱུང་ངོ་ཞེས་གཞི་དེ་ལས་ཁ་ཟེར་བར་འགྱུར་དུ་འོང་གིས་མ་ལ་བདག་གིས་གྲགས་འཛིན་མ་དང་ལྷན་ཅིག་དགའ་མགུར་སྤྱད་པར་བྱའོ་སྙམ་ནས་དེས་གྲགས་འཛིན་མ་དང་ལྷན་ཅིག་དགའ་མགུར་སྤྱད་
པ་དང་གྲགས་འཛིན་མ་སེམས་ཅན་དང་ལྡན་པར་གྱུར་ནས། དེ་འདི་སྙམ་དུ་སེམས་ཏེ། ནམ་ནངས་ནས་བྱང་ཆུབ་སེམས་དཔའི་སྙན་དུ་གསོལ་ལོ་སྙམ་མོ། །དེ་ནས་བྱང་ཆུབ་སེམས་དཔའ་དེའི་ཚེ་རྟེན་ཅིང་འབྲེལ་པར་འབྱུང་བ་དང་ལྡན་པས་ཚིགས་སུ་བཅད་དེ་གསུངས་པ། བུད་མེད་དང་
བདག་ཁྱིམ་ཉལ་བའི། །ཐ་མ་དེང་གི་འདི་ཡིན་ཏེ། །ཕྱིན་ཅད་ཁྱིམ་དུ་བུད་མེད་དང་། །ང་ནི་ལྷན་ཅིག་མི་གནས་སོ། །དེ་ནས་བུད་མེད་དེ་རྣམས་གར་དང་། གླུ་དང་། རོལ་མོས་ངལ་ཞིང་ལྕི་ལ་དུབ་ནས་ཁ་ནས་ཁ་ཆུ་འཛག་ཅིང་སྐྲ་ཞིག་ལ་གོས་དང་ལག་པ་དག་ལྷུག་པར་བཏང་ནས་བླ་
བའི་ཚིག་བྱུང་རྒྱལ་དུ་རྡོལ་ཞིང་གཉིད་ལོག་གོ། །བྱང་ཆུབ་སེམས་དཔས་བུད་མེད་དེ་དག་ཐམས་ཅད་ཁ་ནས་ཁ་ཆུ་འཛག་ཅིང་སྐྲ་ཞིག་ལ་གོས་དང་ལག་པ་དག་ལྷུག་པར་བཏང་ནས། བླ་བའི་ཚིག་བྱུང་རྒྱལ་དུ་རྡོལ་ཞིང་གཉིད་ལོག་པ་གཟིགས་སོ། །གཟིགས་ནས་ཀྱང་བཙུན་མོའི་
འཁོར་ལ་དུར་ཁྲོད་ཀྱི་འདུ་ཤེས་སྐྱེས་སོ། །དེ་ནས་བྱང་ཆུབ་སེམས་དཔའ་སྐྱོ་བ་འཁྲུངས་པ་དང་ཚིགས་སུ་བཅད་དེ་གསུངས་པ། རླུང་གི་ཤུགས་ཀྱིས་པད་མའི་ཚལ་ལྟར་ས་གཞི་འདིར། །ལག་པ་དག་དང་རྐང་པ་བརྐྱང་ནས་འགྱེལ་འགྱུར་ཏེ། །སྐྲ་རྣམས་ཞིག་ཅིང་
མདོམས་དང་རྐུབ་ཀྱི་ཕྱོགས་སྣང་བ། །ཤཱཀྱའི་སྲས་ཀྱིས་གཟིགས་ནས་རང་བཞིན་སྐྱོ་བར་འགྱུར། །ཚུལ་དང་བྲལ་བའི་བུད་མེད་ན་ཆུང་ཚོགས་འདི་དག །དུར་ཁྲོད་འཇིགས་སུ་རུང་བའི་རང་བཞིན་འདྲར་མཐོང་ནས། །སེམས་ཅན་བྱིས་པའི་སྤྱོད་ཡུལ་ལ་ནི་དེང་དགའ་ན། །སེམས་
དང་བློ་གྲོས་དྲན་དང་བྲལ་བ་ཡིན་ནམ་ཅི། །འདོད་པ་ཐ་ཆད་འདམ་དང་མདའ་མདུང་དུག་མེ་འདྲ། །རྨི་ལམ་ལྟ་བུ་ཡིན་ཏེ་ཚྭ་ཆུའི་རོ་དང་མཚུངས། །འདོད་པ་ཕུང་བྱེད་རྩོད་དང་སྡིག་པའི་རྒྱུར་གྱུར་པ། །མཐའ་ངན་སྦྲུལ་གྱི་ཁ་འདྲ་བདག་གིས་སྤང་བར་བྱ། །དེ་ནས་བྱང་ཆུབ་སེམས་

དཔའ་གཟིམས་མལ་ཆེན་པོ་ལ་གཟིམས་པ་ན། མཚན་མོ་དེ་ཉིད་ལ་རྨི་ལམ་ལྔ་རྨིས་པས་ཆེན་པོ་ཉིད་གཟིམས་མལ་དུ་བྱས་ཤིང་རི་རབ་རིའི་རྒྱལ་པོ་དབུ་རྟེན་དུ་བཅུག །ཕྱག་གཡོན་པ་ཤར་ཕྱོགས་ཀྱི་རྒྱ་མཚོ་ཆེན་པོར་འཇུག །ཕྱག་གཡས་པ་ནུབ་ཕྱོགས་ཀྱི་རྒྱ་མཚོ་ཆེན་པོར་འཇུག །
ཞབས་གཉིས་རྒྱ་མཚོ་ཆེན་པོར་འཇུག་པ་དང་། འགྲེང་བ་ཞེས་བྱ་བའི་རྩའི་རིགས་ལྟེ་བ་ནས་བྱུང་ནས་ནམ་མཁའི་བར་དུ་འཕགས་ཏེ་འདུག་པ་དང་། བྱ་ཀུན་ནས་དཀར་ལ་མགོ་ནག་པ་རྣམས་ཀྱིས་ཞབས་གཉིས་ལ་གཏུགས་ནས་པུས་མོའི་ལྷ་ང་ལ་ཐུག་པའི་བར་དུ་ལྟ་བ་དང་། བྱ་སྣ་ཚོགས་
ཕྱོགས་བཞི་ནས་འོངས་ནས་མདུན་དུ་ཁ་དོག་གཅིག་ཏུ་འདུག་པ་དང་། མི་གཙང་བའི་རོའི་སྟེང་ནས་བདག་ཉིད་མི་གཙང་བས་མ་གོས་པར་འཆག་པའོ། །དེ་ལྟ་བུ་རྨིས་ནས་ཀྱང་ཐུགས་དགྱེས་ཏེ་དགོངས་པ་ངའི་རྨི་ལམ་འདི་འདྲ་བ་རྨིས་པས་རིང་པོ་མི་ཐོགས་པ་ཁོ་ནར་བླ་ན་མེད་པའི་
ཡེ་ཤེས་ཐོབ་པར་འགྱུར་རོ་སྙམ་མོ། །གྲགས་འཛིན་མས་ཀྱང་རྨི་ལམ་དུ་མཐོང་བ་བདག་གི་སོ་ཀུན་ལྷགས་པ་དང་། དུང་གི་དཔུང་པ་ཆག་པ་དང་། ཟླ་བ་ས་ལ་ལྷུང་བ་དང་། སྐར་མ་རྣམས་ནི་ངུ་བའོ། །གྲགས་འཛིན་མས་ཀྱང་རྨི་ལམ་རྨིས་པ་དེ་བྱང་ཆུབ་སེམས་
དཔའ་ལ་གསོལ་པ་དང་། བྱང་ཆུབ་སེམས་དཔས་གསུངས་པ། ཁྱོད་ཀྱི་སོ་ནི་ཁ་ནང་གནས། །ཟླ་བ་འདི་ནི་མཁར་གནས་ཀྱིས། །ཡིད་ཀྱི་གདུང་བ་བསལ་ནས་ནི། །དོགས་མེད་བདེ་བར་གཉིད་ལོག་ཅིག །དེ་ནས་གྲགས་འཛིན་མ་འདི་སྙམ་དུ་སེམས་ཏེ། རྨི་ལམ་
འཇིགས་པ་རྨིས་པ་ན། །བདག་ཡིད་དོགས་དང་བཅས་པར་འགྱུར། །དེང་གི་མཚན་མོ་སྡུག་པ་དང་། །འབྲལ་བདག་ཏུ་མི་འགྱུར་གྲང་། །དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ། བྱང་ཆུབ་སེམས་དཔའ་རྣམས་ནི་ཇི་ལྟར་རྒྱུའི་སྟོབས་ཅན་ཡིན་མོད་ཀྱི་འོན་
ཀྱང་རྐྱེན་གྱིས་བསྒྲུབ་པར་བྱ་དགོས་ཏེ། འདི་ལྟར་རྒྱུའི་སྟོབས་ཆེན་པོ་ཡང་རྐྱེན་གྱི་སྟོབས་ལ་ལྟོས་སོ་སྙམ་ནས་བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་པ་དང་། ཁང་བཟངས་ཀྱི་གཞི་ལ་འདུག་སྟེ་བྱང་ཆུབ་སེམས་དཔའ་ལ་འདི་སྐད་ཅེས་གསོལ་ཏོ། །ནགས་ཀྱི་སྤྲེའུ་

ནི་སྤྱོད་ཡུལ་རྒྱུ་འདྲ་ཞིང་། །ཡན་པར་འདུག་པའི་རྟེའུ་དང་འདྲ་བའི་ཐུགས། །གལ་ཏེ་འདོད་པའི་ཡོན་ཏན་ལས་བཟློག་ན། །དེ་ལས་ཤིན་ཏུ་གསལ་བའི་སྣང་བ་གཟིགས། །བློ་གྲོས་བཟང་པོ་བཞེངས་ཤིག་བཞེངས། །ས་ནི་སྤངས་ཏེ་བཞུད་མཛོད་
ལ། །ཐམས་ཅད་མཁྱེན་ཉིད་བརྙེས་ནས་ནི། །འགྲོ་བ་དག་ནི་བསྒྲལ་བར་མཛོད། །བྱང་ཆུབ་སེམས་དཔས་གསུངས་པ་ནི། །ཀཽ་ཤི་ཀ་མ་མཐོང་ངམ། །ང་ནི་རི་དགས་བདག་པོ་རྒྱས་བསྐོར་ལྟར། །མི་ནི་མཐུ་ལྡན་གཞུ་མཚོན་རལ་གྲི་ཐོགས། །རྟ་གླང་ཤིང་རྟ་དཔུང་ཚོགས་
མང་པོ་ཡིས། །གྲོང་ཁྱེར་སེར་སྐྱ་ཀུན་ནས་ཡོངས་སུ་བསྐོར། །ཟས་གཙང་ལ་སོགས་ཤཱཀྱའི་ཚོགས་འདི་དག །གླང་ཆེན་རྟ་ཞོན་ལེགས་པར་གོ་བགོས་ལུས། །མི་སྡུག་སྣ་ཚོགས་ལག་ན་མཚོན་ཐོགས་ཏེ། །ཁྱམས་དང་རྟ་བབས་ཁང་བཟངས་གཞི་ནང་གནས། །
ཕོ་བྲང་དང་ནི་ཁྱིམ་སྒོ་དང་། །དེ་བཞིན་གྲོང་ཁྱེར་སྒོ་དག་ཀྱང་། །བཅད་ནས་གཏན་པ་དམ་བཅུག་སྟེ། །དེ་བཞིན་ཀུན་ནས་བསྲུངས་པར་གྱུར། །རུ་དུང་པ་ཊ་ཧ་སྒྲ་རྔ་སྒྲ་ཡིས། །ཁྱམས་དང་རྟ་བབས་ཁང་བཟངས་ནང་གནས་ཤིང་། །གླང་ཆེན་རྟ་དམག་འབད་པའི་སྐྱེ་བོའི་
ཚོགས། །རྒྱུན་དུ་ང་མི་གཏང་ཕྱིར་སྲུང་བར་བྱེད། །བརྒྱ་བྱིན་གྱིས་གསོལ་པ། དེས་པ་མར་མེ་མཛད་ཀྱིས་ལུང་བསྟན་དང་། །སྡུག་བསྔལ་གྱིས་གདུངས་འཇིག་རྟེན་འདི་དང་ཡང་། །ཁྱོད་ཀྱི་སྔོན་གྱི་དམ་བཅས་དགོངས་མཛོད་ལ། །ཁབ་དག་སྤངས་ཏེ་ངེས་པར་འབྱུང་བར་
མཛོད། །ཇི་ལྟར་ཁྱོད་ནི་བགེགས་མེད་པར། །དེང་ཉིད་ནགས་སུ་གཤེགས་འགྱུར་བ། །བདག་ཅག་ཚངས་སོགས་བཅས་པ་ཡི། །ལྷ་རྣམས་ཀྱིས་ནི་དེ་བཞིན་བགྱི། །བྱང་ཆུབ་སེམས་དཔས་ལེགས་སོ་ཞེས་གསུངས་ནས་ཐུགས་དགྱེས་པར་གྱུར་ཏོ། །དེ་ནས་ལྷ་རྣམས་ཀྱི་དབང་
པོ་བརྒྱ་བྱིན་གྱིས་གཉིད་ཀྱིས་མྱོས་པར་བྱས་ནས་གནོད་སྦྱིན་གྱི་སྡེ་དཔོན་ཆེན་པོ་ལྔས་རྩེན་ལ་བསྒོ་བ། གྲོགས་པོ་བྱང་ཆུབ་སེམས་དཔའ་སྟེང་གི་ཁང་བཟངས་ནས་བབས་ཀྱིས་སྐས་ལོང་ཤིག །དེས་སྐས་བླངས་པ་ལ་བྱང་ཆུབ་སེམས་དཔའ་བབས་པ་དང་དེ་ནས་བརྒྱ་བྱིན་གྱིས་བརྡ་བྱས་

མ་ཐག་ཏུ་ཞབས་འབྲིང་བ་འདུན་པ་གང་ན་བ་དེར་གཤེགས་ན་ཇི་ཙམ་ན་འདུན་པ་གཉིད་སྟུག་པོས་ནོན་པར་གཟིགས་ནས་བྱང་ཆུབ་སེམས་དཔས་བསྒྲིམས་ཏེ་བསླང་ནས་ཚིགས་སུ་བཅད་པའི་དབྱངས་ཀྱིས་གསུངས་པ། འདུན་པ་ལོངས་ཀྱེ་ཁྱིམ་ནས་མྱུར་བར་ནི། །ང་ཡི་རྟ་ཕོ་རིན་ཆེན་བསྔགས་
ལྡན་ལོང་། །སྔོན་གྱི་རྒྱལ་བས་ལོངས་སྤྱད་དཀའ་ཐུབ་ཚལ། །ཐུབ་རྣམས་དགྱེས་པ་མཛད་པར་ང་གཤེགས་སོ། །འདུན་པ་གཉིད་ལོག་པའི་མིག་ཕྱེ་ནས་སྨྲས་པ། ལྷ་ཁྱོད་སྐྱེད་མོས་ཚལ་གྱི་དུས་མ་བབ། །དེས་པ་ཁྱོད་དང་འགའ་ཡང་འཁོན་མ་མཆིས། །ཁྱོད་ལ་དགྲ་བོ་སུ་ཡང་མ་མཆིས་
ན། །དགུང་ཕྱེད་ཁྱོད་ལ་བཅིབས་པ་ཅི་ཞིག་བགྱི། །བྱང་ཆུབ་སེམས་དཔས་བཀའ་སྩལ་པ། འདུན་པ་ཁྱོད་ཀྱིས་ལན་འགའ་ཡང་། །ང་ཡི་ཚིག་ནི་མ་བཅག་ན། །ང་ཡི་དེང་དུས་ཐ་མ་ལ། །ང་ཡི་ཚིག་འདི་མ་གཅག་ཤིག །འདུན་པས་གསོལ་པ། གཞོན་ནུ་མཚན་མོ་འདི་ནི་འཇིགས་པ་དང་
འཇིགས་སུ་རུང་བ་མཆིས་པས་བདག་བཅིབས་པ་མི་ལེན་ནོ། །བྱང་ཆུབ་སེམས་དཔས་དགོངས་པ། ལན་དང་ཡང་ལན་གྱིས་གདོན་མི་ཟ་བར་སྐྱེ་བོས་ད་པར་འགྱུར་གྱིས་བདག་ཉིད་སོང་ལ་རྟའི་རྒྱལ་པོ་བསྔགས་ལྡན་སྟ་གོན་བྱའོ་སྙམ་ནས་དེ་ནས་ཉིད་ཀྱིས་ཕོ་བྲང་གི་སྒོ་ཕྱེ་ནས་
རྟའི་རྒྱལ་པོ་བསྔགས་ལྡན་གཟུང་བར་བརྩམས་པ་ན་མཇིང་ཀྱོག་བྱེད་ལ་ཕར་བྲོས་ཚུར་བྲོས་ཤིང་འདུག་ཏུ་མི་བཏུབ་བོ། །དེ་ནས་བྱང་ཆུབ་སེམས་དཔའི་ཕྱག་བསོད་ནམས་བརྒྱ་ཕྲག་དུ་མས་བསྐྱེད་པ་འཁོར་ལོ་དང་། བཀྲ་ཤིས་དང་། གཡུང་དྲུང་འཁྱིལ་པ་མངའ་བ། སྐྲག་པ་རྣམས་དབུགས་
འབྱིན་པར་མཛད་པས་མགོ་ལ་བྱུགས་ནས་གསུངས་པ། བསྔགས་ལྡན་ཐ་མ་ཡི་ནི་ཁུར་ལོང་སྟེ། །དཀའ་ཐུབ་ནགས་སུ་མ་ཐོགས་ང་སྐྱོལ་ཅིག །བྱང་ཆུབ་ཐོབ་ནས་མྱུར་དུ་འགྲོ་བ་ཀུན། །བསམ་གཏན་རྣམ་ཐར་ཆར་གྱིས་ཚིམ་པར་བྱ། །ཆོས་ཉིད་ཀྱིས་དུད་འགྲོ་ཡང་གདམས་ན་
ཕྱི་ལང་མི་བྱེད་པས་རྟའི་རྒྱལ་པོ་བསྔགས་ལྡན་མི་གཡོ་བར་འདུག་གོ། །དེ་ནས་བྱང་ཆུབ་སེམས་དཔའ་ཐུགས་དགྱེས་པ་སྐྱེས་ཏེ་རྟའི་རྒྱལ་པོ་བསྔགས་ལྡན་བསྟད་དོ། །ཇི་ཙམ་ན་ཤཱཀྱ་མིང་ཆེན་འདྲམ་པོ་བྱེད་པ་སྐྱེ་བོ་ཉུལ་ཞིང་ཕྱོགས་དེར་ཕྱིན་པ་དང་། བྱང་ཆུབ་སེམས་དཔའ་

གཤེགས་པར་ཆས་པ་མཐོང་ངོ་། །དེ་ནས་སྐད་འཛེར་ཅིང་མིག་མཆི་མས་གང་བས་སྨྲས་པ། གཞོན་ནུ་འདི་ཅི་མཛད། མིང་ཆེན་འགྲོའོ་གཞོན་ནུ་འདི་ནི་རིགས་པ་མ་ལགས་སོ། །བྱང་ཆུབ་སེམས་དཔས་གསུངས་པ། མིང་ཆེན་འདི་ཉིད་རིགས་པ་ཡིན་ཏེ།
གང་གི་ཕྱིར་ངས་བསྐལ་པ་གྲངས་མེད་པ་གསུམ་དུ་དཀའ་བ་བརྒྱ་སྟོང་དུ་མས་སེམས་ཅན་རྣམས་ཀྱི་དོན་དུ་བྱང་ཆུབ་ཡང་དག་པར་བསྒྲུབས་པ་དེས་ན་དང་ཅི་ཁྱིམ་ན་འདུག་ཕོད་དམ། འདི་ནི་ངེས་ཏེ་དཀའ་ཐུབ་ཀྱི་ཚལ་དུ་འགྲོའོ། །གང་ཞིག་འབར་བའི་ཁྱིམ་ཆེན་ལས། །མཁས་རྣམས་
མྱུར་དུ་འབྱུང་བ་ལ། །ལེགས་མིན་སྨྲ་བར་མི་འོས་ཀྱི། །དེ་ནི་བསྔགས་པར་འོས་ཉིད་ཡིན། །དེ་བཞིན་རྒན་ད་འཆི་བ་ཡིས། །རབ་འབར་སྲིད་པའི་གཟེབ་ལས་ནི། །འབྱུང་བར་འདོད་གྱུར་གང་ཡིན་ལ། །འདིར་ནི་མི་རིགས་ཅི་ཞིག་མཐོང་། །དེ་ལྟར་གསུང་དྲག་པོས་སྤྱོས་པ་
དང་། མིང་ཆེན་གདོང་ལས་མཆི་མ་ཆར་བཞིན་དུ་འབབ་ཅིང་ཆོ་ངེ་འདེབས་པ་ལ་ཞུགས་ཏེ་ཀྱི་ཧུད། དེང་དུ་རྒྱལ་པོ་ཟས་གཙང་དང་། །ཤཱཀྱ་དག་ནི་ཐམས་ཅད་ཀྱིས། །ཡང་དང་ཡང་དུ་བསམ་པ་ཡི། །རེ་བ་འབྲས་བུ་མེད་པར་གྱུར། །དེང་དུ་རྒྱལ་པོ་ཟས་གཙང་ནི། །སྲས་ཀྱི་
མྱ་ངན་གྱིས་གདུངས་པ། །ལག་བསྒྲེང་བཞིན་དུ་སྡུག་བསྔལ་ཞིང་། །མི་བཟད་སྒྲ་ནི་འབྱིན་པར་འགྱུར། །ས་འཚོ་གྲགས་འཛིན་རི་དགས་སྐྱེས། །དེ་བཞིན་བཙུན་མོའི་འཁོར་རྒྱས་པའང་། །དོན་གྲུབ་དང་ནི་བྲལ་བ་ཡིས། །ཤིན་ཏུ་སྡུག་བསྔལ་མྱོང་བར་འགྱུར། །ཞེས་
སྨྲས་ནས། དེ་དངངས་པས་གྲགས་འཛིན་མ་བསླང་སྟེ་སྨྲས་པ། དོན་གྲུབ་འདི་ནི་ཤེས་གྱུར་གྱིས། །ཁྱིམ་ཐབ་སྡུག་བསྔལ་གྱིས་གདུངས་ནས། །སྡུག་བསྔལ་ཉམ་ཐག་དུ་མ་འོང་། །ཁྱིམ་ཐབ་སྡུག་པ་དེ་ཟློག་ཤིག །ཁྱེད་ཀྱི་ཁྱིམ་ཐབ་གཤེགས་གྱུར་འདི་ནི་མཐོང་དཀའ་སྟེ། །
ཁྱོད་ཀྱིས་འདི་ལྟོས་ཁྱིམ་ཐབ་མཐོང་བའི་ཐ་མ་ཡིན། །ཀྱི་ཧུད་ཕོངས་པ་བདག་གིས་མཚན་མོ་ཁུས་བཏབ་ཀྱང་། །སུས་ཀྱང་ལན་མ་སྟེར་བས་བདག་གིས་མ་ཉེས་སོ། །དེས་ནི་དེ་ལྟར་ཁུས་བཏབ་ཀྱང་། །འདི་ལྟར་ལྷ་རྣམས་བྱིན་བརླབས་ཀྱིས། །དགོན་པར་འོ་དོད་བོས་པ་བཞིན། །

འགའ་ཡང་སད་པར་མ་གྱུར་ཏོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། གང་བདག་གིས་ཡབ་ལ་མ་བལྟས་པར་འགྲོ་བ་ནི་ངའི་ཚུལ་དང་འཐུན་པ་མ་ཡིན་ནོ་སྙམ་ནས་རྒྱལ་པོ་ཟས་གཙང་མ་གང་ན་བ་དེར་གཤེགས་ཏེ་བྱོན་པ་དང་། རྒྱལ་པོ་ཟས་གཙང་མ་གཉིད་
ཀྱིས་ནོན་པར་གྱུར་ཏོ། །དེ་ནས་འདི་སྙམ་དུ་དགོངས་ཏེ་ཇི་ལྟར་ང་འཇིག་རྟེན་ཐམས་ཅད་ཀྱི་ཕར་གྱུར་ཅིང་འཇིག་རྟེན་གྱི་བླ་མ་དང་། འཇིག་རྟེན་གྱི་ཐུ་བོ་ཡིན་མོད་ཀྱི་དེ་ལྟར་ན་ཡང་ཕ་དང་མ་ནི་སྐྱེས་བུའི་སློབ་དཔོན་དུ་གྱུར་པ་དང་། ལྷར་གྱུར་པ་དང་། ཚངས་པར་གྱུར་པ་ཡིན་ཞིང་ཤིན་ཏུ་
ཕན་པ་བྱེད་པ་ཡིན་ནོ་སྙམ་དུ་དགོངས་ནས་ཡབ་ཀྱི་ཞབས་གཉིས་ལ་བཏུད་དེ་བསྐོར་བ་ལན་གསུམ་མཛད་ནས་འདི་སྐད་ཅེས་གསུངས་སོ། །བདག་ཀྱང་ཡིད་ལ་བརྩེར་ལྡན་ཞིང་། །བདག་ཀྱང་ཉེ་དུ་རྣམས་ལ་དགའ། །འོན་ཀྱང་འཁོར་བ་རང་བཞིན་ངན། །འདི་མཐོང་ནས་ནི་མཆི་བ་ལགས། །གལ་
ཏེ་རྒན་ད་འཆི་བ་དང་། །སྡུག་པའི་གཉེན་བྲལ་ལས་བྱུང་བའི། །གནོད་བྱེད་སྡུག་བསྔལ་མ་མཆིས་ན། །ཁྱོད་ནི་སྤོང་བར་སུ་ཞིག་བྱེད། །གང་ཕྱིར་མི་འདོད་བཞིན་དུ་ནི། །རབ་ཆེ་གཉེན་གྱི་དཀྱིལ་འཁོར་དང་། །མཛའ་བཤེས་ཆུང་མ་དབང་ཕྱུག་རྣམས། །ཡུན་མི་རིང་བར་འཁོར་བར་འགྱུར། །དེ་བས་མ་
ཆགས་ཡིད་ཀྱིས་ནི། །འཁོར་བ་ལས་ནི་རྣམ་གྲོལ་ཕྱིར། །བརྩེར་ལྡན་ཉེ་དུ་སྤངས་ནས་ནི། །སྐྱེ་བོ་མེད་ནགས་བསྟན་པ་ལགས། །ལུས་ཅན་འདུ་བ་ངེས་པར་ནི། །མཐར་ནི་འབྲལ་འགྱུར་ཉིད་ལགས་པས། །བདག་ནི་རྗེས་སུ་དགོངས་ནས་ནི། །རྨོངས་པས་ཐུགས་ངན་མ་མཛད་ཅིག །
ཅེས་གསུངས་ནས་ཆས་སོ། །དེ་ནས་མིང་ཆེན་གྱིས་རྒྱལ་པོ་ཟས་གཙང་མ་བསླང་སྟེ་སྨྲས་པ། དོན་གྲུབ་འདི་ནི་བཞུད་ལགས་ཀྱིས། །ས་བདག་དེ་ནི་ཟློག་པར་མཛོད། །སྲས་ཀྱི་མྱ་ངན་གྱིས་ཐེབས་ནས། །སྡུག་བསྔལ་གྱིས་གདུངས་བཤུམས་འགྱུར་མཆི། །མ་སྟེས་ཏེ་དེ་
ཡང་གཉིད་མ་སད་དོ། །དེ་ནས་ལྷའི་དབང་པོ་བརྒྱ་བྱིན་གྱིས་ལྷའི་བུ་མྱུ་གུ་དང་། མང་ཀུ་ར་དང་། འོད་ཟེར་ཅན་དང་། ལོ་མ་གྱོན་པ་སྟེ་བཞི་ལ་སྨྲས་པ། གྲོགས་པོ་དག་ཁྱེད་རྣམས་ཀྱིས་བྱང་ཆུབ་སེམས་དཔའ་གདེག་པར་ནུས་སམ། དེ་རྣམས་ཀྱིས་སྨྲས་པ། ཤིན་ཏུ་ཡང་ནུས་

ལགས་སོ། །ཁྱེད་རྣམས་ལ་སྟོབས་ཅི་ཙམ་ཡོད། མྱུ་གུས་སྨྲས་པ། བདག་གིས་ནི་ས་ལ་རི་ཇི་སྙེད་ཡོད་པ་དེ་ཕྲག་པ་གཅིག་ཏུ་ཐོགས་ཏེ་ཉམ་ང་བ་ཆུང་ངུས་འགྲོ་ནུས་པ་དེ་ཙམ་གྱི་སྟོབས་ཡོད་དོ། །མང་ཀུ་རས་སྨྲས་པ། བདག་གིས་ཀྱང་ས་ལ་ཆུ་ཇི་སྙེད་
ཡོད་པ་དེ་ཐམས་ཅད་ཕྲག་པ་གཅིག་ཏུ་ཐོགས་ནས་འགྲོ་ནུས་སོ། །འོད་ཟེར་ཅན་གྱིས་སྨྲས་པ། བདག་གིས་ཀྱང་ས་ལ་རྡུལ་ཇི་སྙེད་ཡོད་པ་དེ་ཐམས་ཅད་ཕྲག་པར་ཐོགས་ཏེ་ཉམ་ང་བ་ཆུང་ངུས་འགྲོ་ནུས་སོ། །ལོ་མ་གྱོན་པས་སྨྲས་པ། བདག་གིས་ཀྱང་ས་ལ་རྩྭ་དང་ཤིང་དང་
ཡལ་ག་དང་ལོ་མ་ཇི་སྙེད་པ་དེ་ཐམས་ཅད་ཕྲག་པ་གཅིག་ཏུ་ཐོགས་ཏེ་ཉམ་ང་བ་ཆུང་ངུས་འགྲོ་ནུས་སོ། །བརྒྱ་བྱིན་གྱིས་སྨྲས་པ། གྲོགས་པོ་དག་སྟོབས་འདི་དང་ལྡན་ན། བྱང་ཆུབ་སེམས་དཔའ་གདེག་པར་ནུས་ཀྱིས་དེ་ནས་མྱུ་གུ་དང་། མང་ཀུ་ར་དང་། འོད་ཟེར་ཅན་
དང་། ལོ་མ་གྱོན་པ་སྟེ། བཞིས་ཆིབས་རིན་པོ་ཆེ་བསྔགས་ལྡན་ཁྱེར་ཏེ། བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་ནས་སྨྲས་པ། བྱང་ཆུབ་སེམས་དཔའ་ཅི་ལ་བཞུགས། དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ་འདི་རྣམས་ནི་བདག་ཅག་གིས་བྱང་ཆུབ་
སེམས་དཔའ་བཏེག་སྟེ། བར་སྣང་ལ་ཁྱེར་རོ་ཞེས་དྲེགས་པ་སྐྱེ་བར་འགྱུར་རོ་སྙམ་ནས་བྱང་ཆུབ་སེམས་དཔའ་རྡོ་རྗེའི་སྐུར་བྱིན་གྱིས་བརླབས་པ་དང་། དེ་རྣམས་ཀྱིས་བསྒུལ་བར་ཡང་མ་ནུས་ནས་ངོ་མཚར་སྐྱེས་ཏེ་གསོལ་པ། གཞོན་ནུ་བདག་ཅག་གིས་ནི་བྱང་ཆུབ་སེམས་
དཔའ་རྣམས་ལ་སྟོབས་འདི་འདྲ་བ་མངའ་བར་མ་འཚལ་ཏོ། །དེ་ནས་བྱང་ཆུབ་སེམས་དཔའ་ཆིབས་རིན་པོ་ཆེ་བསྔགས་ལྡན་ལ་བཅིབས་ཏེ་འདི་ལྟར་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་མཐུ་དང་ལྷ་རྣམས་ཀྱི་ལྷའི་མཐུས་ཆིབས་རིན་པོ་ཆེ་བསྔགས་ལྡན་དང་འདུན་
པ་སྟེང་གི་ནམ་མཁའ་ལ་འཕགས་སོ། །དེ་ནས་བརྒྱ་བྱིན་དང་ཚངས་པ་ལ་སོགས་པ་ལྷ་རྣམས་ཀྱང་ལྷ་བརྒྱ་སྟོང་ཕྲག་དུ་མས་ཡོངས་སུ་བསྐོར་ནས་བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་པ་དང་། བྱང་ཆུབ་སེམས་དཔའ་བསྐོར་ཅིང་དོང་སྟེ་གཡས་ཕྱོགས་ནས་གཟུགས་ན་

སྤྱོད་པའི་ལྷ་རྣམས་ཀྱང་སྤྱོད་ལམ་ཞི་བ་དང་། གཡོན་ཕྱོགས་ནས་འདོད་པ་ན་སྤྱོད་པ་རྣམས་ཀྱིས་རྒྱལ་མཚན་དང་བ་དན་བསྒྲེང་ནས་ལྷའི་རོལ་མོའི་ཁྱད་པར་སྣ་ཚོགས་དང་། མདུན་ནས་བརྒྱ་བྱིན་དང་ཚངས་པ་ལ་སོགས་པ་རང་རང་གི་སྤྱོད་ལམ་གྱིས་དོང་ངོ་། །ནམ་མཁའི་ངོས་ལ་
གནས་པའི་ལྷ་བརྒྱ་སྟོང་དུ་མས་ནི་བྱང་ཆུབ་སེམས་དཔའི་སྟེང་ནས་ལྷའི་མེ་ཏོག་ཨུད་པལ་དང་། པད་མ་དང་། ཀུ་མུ་ད་དང་། པད་མ་དཀར་པོ་རྣམས་ཀྱིས་གཏོར་རོ། །ཨ་ག་རུའི་ཕྱེ་མ་དང་། ཙན་དན་གྱི་ཕྱེ་མ་དང་། ཏ་མ་ལའི་འདབ་མའི་ཕྱེ་མ་དང་། །ལྷའི་མེ་ཏོག་མན་དཱ་ར་
བས་ཀྱང་གཏོར་ཏོ། །ལྷའི་རོལ་མོའི་ཆ་སྤྱད་སྣ་ཚོགས་ཀྱང་བརྡུངས་སོ། །གོས་རྣམས་ཀྱང་གཏོར་རོ། །འདིར་སྨྲས་པ། མཁའ་ལ་ལྷ་རྣམས་ག་ཞའི་སྒྲ་ཆེན་འབྱིན་བྱེད་ལ། །དགའ་བའི་ཡིད་ཀྱིས་གོས་ཀྱི་གཡབ་མོ་འདེབས་བྱེད་ཅིང་། །ཁ་ཅིག་བྱང་ཆུབ་སེམས་དཔའ་ལ་
ནི་སྟོད་བྱེད་དེ། །ནམ་མཁའ་ལ་ནི་རོལ་མོ་བརྒྱ་ཕྲག་སྒྱུར་བར་བྱེད། །ཁ་ཅིག་དག་ནི་སྒོ་རྣམས་འབྱེད་བྱེད་ཅིང་། །མེ་ཏོག་མན་དཱ་ར་བས་འཐོར་བར་བྱེད། །ཁ་ཅིག་དག་ནི་བཅིབས་པའི་རྐང་འཛིན་ཅིང་། །བདེ་བར་གཤེགས་ལ་རྟོག་ཅིང་རྗེས་བཞིན་འབྲང་། །ཁ་ཅིག་དག་ཀྱང་
གཡས་ནས་རྗེས་བཞིན་འབྲང་། །གཡོན་ནས་འགྲོ་བ་དག་ཀྱང་རྗེས་བཞིན་འབྲང་། །བརྒྱ་བྱིན་དེ་བཞིན་ཚངས་པར་བཅས་པ་དང་། །ལུས་ངན་བདག་ཉིད་ཤུལ་ནི་མཚོན་པར་བྱེད། །ཟླ་བ་ཉ་བ་རྒྱུ་སྐར་ཚོགས་ཀྱིས་ལྟར། །བདག་ཉིད་ཆེན་པོ་ལྷ་ཚོགས་མདུན་བདར་
ནས། །དཀའ་ཐུབ་ནགས་ནི་ཐུབ་རྣམས་དགྱེས་བྱེད་པ། །འཕགས་པ་དགྱེས་པའི་ནགས་སུ་ཐུགས་དགྱེས་གཤེགས། །དེ་ནས་བྱང་ཆུབ་སེམས་དཔས་བསྔགས་ལྡན་ལ་དབུགས་དབྱུང་བའི་ཕྱིར་གསུངས་པ། མ་སྐྱོ་མ་སྐྱོ་སྟོབས་ནི་གཟུང་བར་གྱིས། །འགྲོ་དོན་དལ་
བ་གཅིག་ནི་དེ་རིང་ལོང་། །མི་རིང་བྱང་ཆུབ་ཐོབ་ནས་འགྲོ་བ་རྣམས། །བསམ་གཏན་རྣམ་ཐར་གྱིས་ཚིམ་བྱེད་པར་བྱ། །བྱང་ཆུབ་སེམས་དཔའ་དཔག་ཚད་བཅུ་གཉིས་སུ་བཞུད་ནས་ནང་པར་གྲོང་ཁྱེར་དཔེ་མེད་དུ་བྱོན་ཏོ། །དེ་ནས་ལྷ་རྣམས་ཀྱང་བྱང་ཆུབ་སེམས་དཔའ་

བྱུང་ནས་འདི་སླར་ཡང་རང་གི་གྲོང་ཁྱེར་དུ་འཇུག་པར་མི་འགྱུར་རམ་སྙམ་པ་ལ་སྐུ་ཐམས་ཅད་ཀྱི་གཡས་ཕྱོགས་སུ་གླང་པོ་ཆེའི་ལྟ་སྟངས་ཀྱིས་གཟིགས་ནས། སངས་རྒྱས་རྣམས་ཀྱིས་བསྟན་པ་ཡི། །ལམ་གྱི་མཆོག་ནི་མ་ཐོབ་པར། །གྲོང་ཁྱེར་སེར་
སྐྱའི་གཞིར་ནི་སླར། །ང་ནི་འཇུག་པར་མི་བྱའོ། །ཞེས་གསུངས་སོ། །དེ་ནས་བྱང་ཆུབ་སེམས་དཔའི་ཞབས་ལ་བསྐོར་བ་ལན་གསུམ་བྱས་ནས་རང་རང་གི་གནས་སུ་སོང་ངོ་། །བྱང་ཆུབ་སེམས་དཔས་ཆིབས་ལས་བབས་ཏེ་རྒྱན་བཀྲོལ་ནས་འདུན་པ་ལ་བཀའ་སྩལ་
པ། འདུན་པ་རྒྱན་དང་རྟ་ཁྱེར་ལ་སླར་སོང་ཤིག །འདིར་སྨྲས་པ། ཁ་ལོ་སྒྱུར་ཁྱོད་ང་ཡི་རྟ་འདི་དང་། །རྒྱན་འདི་རྣམས་ཀྱང་གཉེན་པ་དག་ལ་བྱིན། །ང་ནི་འདོད་པ་རྒྱ་ཆེན་སྤངས་ནས་སུ། །ད་ལྟ་འདི་ཉིད་དུ་ནི་རབ་འབྱུང་བྱ། །འདོད་པ་འདི་ནི་སྤུ་གྲིའི་སོ་འདྲ་ཞིང་། །མེ་
འོབས་འབར་དང་མཚུངས་ཤིང་མཐའ་ངན་པ། །འཇིག་རྟེན་ཕན་ཕྱིར་སྙིང་རྗེས་ང་སྤངས་ཏེ། །དགོན་པར་སོང་ནས་ཁྱིམ་དུ་ཕྱིར་མི་ལྡོག །དེ་ནས་འདུན་པ་གདོང་ལ་མཆི་མ་ཆར་བཞིན་འབབ་པས་བྱང་ཆུབ་སེམས་དཔའ་ལ་གསོལ་པ། སེང་གེ་སྟག་གིས་གཏམས་པ་དང་།
ཕྱུགས་རྫིས་གཏམས་པའི་ནགས་ཚལ་དུ། །འབའ་ཞིག་སྐུ་གཉེན་དང་བྲལ་བས། །འཕགས་པ་ཇི་ལྟར་སྤྱོད་པར་འགྱུར། །བྱང་ཆུབ་སེམས་དཔས་གསུངས་པ། སྐྱེ་དགུ་འདི་ནི་སྐྱེ་ན་གཅིག་པུ་སྐྱེ། །དེ་བཞིན་འཆི་ནའང་གཅིག་པུ་འཆི་བར་འགྱུར། །འདི་ནི་གཅིག་
པུས་སྡུག་བསྔལ་མྱོང་འགྱུར་གྱི། །འཁོར་བ་ལ་ནི་གྲོགས་ཡོད་མ་ཡིན་ནོ། །འདུན་པས་གསོལ་པ། ཀྱི་ཧུད་གཞོན་ནུས་སྡུག་བསྔལ་མ་གཟིགས་ཏེ། །ཞབས་འཇམ་གླང་ཆེན་རྟ་ལ་ཆིབས་གོམས་པ། །ས་གཞི་རྩྭ་དང་རྡོ་བས་གཏམས་རྩུབ་པར། །ཇི་ལྟར་ཞབས་ཀྱིས་
གཤེགས་ཤིང་ནགས་སུ་རྒྱུ། །བྱང་ཆུབ་སེམས་དཔས་གསུངས་པ། འཆི་བདག་འཇིགས་པ་དེ་ནི་ལན་འགའ་ཡང་། །སྐྱིད་ལ་མེད་མིན་བདེ་བར་གོམས་ལ་མིན། །མགོན་བཅས་ལ་མིན་རིགས་བཙུན་ལ་མ་ཡིན། །དཔའ་དང་བཙུན་མིན་སྐྱེ་བོ་དགའ་ལ་མིན། །རྒ་བས་

འཆི་བདག་འཇིགས་པ་དག །བསྐྱེད་ནས་འོང་བར་འགྱུར་ཞེས་གྲག །དོན་མ་བྱས་ཤིང་མ་བརྩམས་པར། །འཆི་བར་ཡང་ནི་འགྲོ་བར་འགྱུར། འདུན་པས་གསོལ་པ། རྒྱལ་པོ་བགྲེས་པོ་ནི་སྲས་ཀྱི་མྱ་ངན་གྱིས་འགྲོངས་པར་འགྱུར་རོ། །འོན་ཀྱང་བྱང་ཆུབ་
སེམས་དཔའ་བྱང་ཆུབ་ཀྱི་ཚོགས་བསགས་པའི་ཕྱིར་འདུན་པའི་ཚིག་ཐུགས་ལ་མ་བབ་བོ། །དེ་ནས་བྱང་ཆུབ་སེམས་དཔས་ཨུད་པལ་སྔོན་པོ་འདྲ་བའི་རལ་གྲི་ཤུབས་ནས་ཕྱུང་ནས་གཙུག་ཕུད་བྲེགས་ཏེ། སྟེང་གི་ནམ་མཁའ་ལ་བོར་བ་དང་། ལྷ་རྣམས་ཀྱི་དབང་པོ་བརྒྱ་བྱིན་
གྱིས་བླངས་ནས་བཀུར་སྟི་ཆེན་པོ་བྱས་ཏེ་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་དུ་ཁྱེར་ནས་གཙུག་ཕུད་ཀྱི་མཆོད་པ་ཆེན་པོ་བཙུགས་སོ། །དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ་གཞོན་ནུ་ནི་རྒྱལ་རིགས་ཀྱི་མངོན་པའི་ང་རྒྱལ་གྱིས་འདི་བཟློག་པར་མི་ནུས་སོ་སྙམ་
ནས་དགའ་བར་གྱུར་ཏོ། །དེ་ནས་བྱང་ཆུབ་སེམས་དཔས་འདུན་པ་ལ་གསུངས་པ། ཁྱོད་ཀྱིས་བསྔགས་ལྡན་ཕོ་བྲང་གི་ནང་དུ་མ་བཀྲི་ཤིག །དེ་སྐད་ཅེས་གསུངས་པ་དང་། འདུན་པ་སྐད་འཛེར་ཅིང་མིག་མཆི་མས་གང་ནས་རྟའི་རྒྱལ་པོ་བསྔགས་ལྡན་ཁྲིད་དེ་ཡང་དང་
ཡང་དུ་བྱང་ཆུབ་སེམས་དཔའ་ལ་ལྟ་ཞིང་སོང་སྟེ་སེར་སྐྱའི་གཞིར་ཕྱིན་པ་དང་དེར་ཅ་ཅོ་སྐྱེས་ཏེ་ཇི་ཙམ་ན་རྒྱལ་པོ་ཟས་གཙང་མ་ལ་སྨྲས་པ། ལྷ་གཞོན་ནུ་བྱོན་གྱིས་དགྱེས་པ་བསྐྱེད་དུ་གསོལ། གྲོང་ཁྱེར་སེར་སྐྱའི་གཞིར་ཡང་སྒྲ་གསང་ཆེན་པོ་བསྒྲགས་སོ། །རྟའི་རྒྱལ་པོ་
བསྔགས་ལྡན་ཕོ་བྲང་གི་ནང་དུ་ཞུགས་པ་དང་། བཙུན་མོའི་ཚོགས་ཐམས་ཅད་ཀྱིས་བསྔགས་ལྡན་གྱི་མགུལ་དུ་འཇུས་ཏེ་ངུ་བར་བརྩམས་སོ། །བསྔགས་ལྡན་ཡང་དབུགས་ཁོང་དུ་སོང་སྟེ་དེ་ཉིད་དུ་དུས་བྱས་སོ། །ཤི་ནས་དེ་སྒྲ་ཅན་གྱི་བྲམ་ཟེ་ལས་དྲུག་ལ་བརྩོན་པ་
ཞིག་གི་རིགས་སུ་ཉིང་མཚམས་སྦྱོར་བ་བླངས་སོ། །དེ་ནས་བྱང་ཆུབ་སེམས་དཔའ་རིམ་གྱིས་དྲང་སྲོང་ངན་སྤོང་གི་བསྟི་གནས་སུ་གཤེགས་པ་དང་། དེའི་ཚེ་དྲང་སྲོང་ངན་སྤོང་གི་བུ་ལག་པ་འགྲམ་པ་ལ་གཏད་ནས་སེམས་ཁོང་དུ་ཆུད་ཅིང་འདུག་པ་དེ་ལྟ་བུ་དེ་བྱང་ཆུབ་སེམས་དཔས་

གཟིགས་ནས་གསུངས་པ། དྲང་སྲོང་ཆེན་པོ་ཅིའི་ཕྱིར་ལག་པ་འགྲམ་པ་ལ་གཏད་ནས་སེམས་ཁོང་དུ་ཆུད་ཅིང་འདུག །དེས་གསོལ་པ། བདག་གི་བསྟི་གནས་འདི་ན་ཤིང་ཏ་ལ་རྣམས་གསེར་གྱི་ལོ་མ་དང་། མེ་ཏོག་དང་། འབྲས་བུ་ཆགས་པ་ལས་
དེ་རྣམས་སྔ་མཁོ་བཞིན་དུ་མ་གྱུར་ཏོ། །བྱང་ཆུབ་སེམས་དཔས་གསུངས་པ། དྲང་སྲོང་ཆེན་པོ་གང་གི་མཐུས་བསྟི་གནས་འདི་ན་ཤིང་ཏ་ལ་རྣམས་གསེར་གྱི་ལོ་མ་དང་། མེ་ཏོག་དང་། འབྲས་བུར་ལྡན་པ་དེ་རྒ་བ་དང་ན་བ་དང་འཆི་བ་ཡང་དག་པར་མཐོང་ནས་ཡིད་བྱུང་སྟེ་
དཀའ་ཐུབ་ཀྱི་ནགས་སུ་གནས་པས་སོ། །གལ་ཏེ་དེས་རྒ་བ་དང་། ན་བ་དང་། འཆི་བ་ཡང་དག་པར་མཐོང་ནས་ཡིད་བྱུང་སྟེ་དཀའ་ཐུབ་ཀྱི་ནགས་སུ་གནས་པར་མ་གྱུར་ན་སྐྱེད་མོས་ཚལ་འདི་དེའི་ཡིན་པ་ཞིག །དེ་སྐད་ཅེས་གསུངས་པ་དང་། དྲང་སྲོང་ངན་སྤོང་གི་བུས་
བྱང་ཆུབ་སེམས་དཔའ་ལ་བརྟག་པར་བརྩམས་སོ། །དེ་ནས་གཟུགས་བཟང་ཞིང་ཞི་བའི་ཆ་བྱད་དུ་མཐོང་ནས་ཡུན་རིང་དུ་བརྟགས་ཏེ་ངོ་མཚར་སྐྱེས་ནས་གསོལ་པ། ཀྱེ་རབ་ཏུ་བྱུང་བ་དེ་ཁྱོད་ཁོ་ནམ་ལགས་གྲང་། བྱང་ཆུབ་སེམས་དཔས་གསུངས་པ། དྲང་སྲོང་
ཆེན་པོ་དེ་ལྟར་ངེས་སོ། །དེ་ནས་ངན་སྤོང་གི་བུ་ཡ་མཚན་སྐྱེས་པའི་མིག་བགྲད་དེ་བལྟས་ནས་བྱང་ཆུབ་སེམས་དཔའ་ཐོག་མར་གདན་ལ་སྤྱན་དྲངས་ཏེ། མེ་ཏོག་དང་། འབྲས་བུ་བསྟབས་སོ། །གྲོང་ཁྱེར་དཔེ་མེད་ན་ཁྱིམ་བདག་ཕྱུག་པ་དང་། ནོར་མང་ལ་ལོངས་སྤྱོད་ཆེ་བ་
ཞེས་བྱ་བ་ནས་དེ་ལ་ཁྱེའུ་བཅུ་བཙས་སོ་ཞེས་བྱ་བའི་བར་དུ་སྟེ། །དེ་དག་ཐམས་ཅད་ཀྱང་རབ་ཏུ་བྱུང་ནས་རང་སངས་རྒྱས་ཀྱི་བྱང་ཆུབ་མངོན་སུམ་དུ་བྱས་སོ། །ཇི་ཙམ་ན་བདག་ཉིད་ཆེན་པོ་དེ་རྣམས་ལ་མ་རྒན་མོས་ཤ་ནའི་གོས་དག་ཅིག་བྱིན་པ་དང་། དེ་རྣམས་ཀྱིས་སྨྲས་པ།
ཡུམ་མཁྱེན་པར་མཛོད་ཅིག །རྒྱལ་པོ་ཟས་གཙང་གི་སྲས་གཞོན་ནུ་དོན་ཐམས་ཅད་གྲུབ་པ་ཞེས་བྱ་བ་རྒ་བ་དང་། ན་བ་དང་། ཤི་བ་མཐོང་ནས་ཀུན་ཏུ་སྐྱོ་བའི་ཡིད་ཀྱིས་ནགས་སུ་སོང་ནས་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་

འགྱུར་ཏེ། དེ་བས་ན་བདག་ཅག་རྣམས་སངས་རྒྱས་ཀྱི་ཞིང་དུ་གནས་པར་མི་ནུས་པས་ན་བདག་ཅག་ཡོངས་སུ་མྱ་ངན་ལས་འདའོ། །ཤ་ནའི་གོས་འདི་རྒྱལ་པོ་ཟས་གཙང་མའི་སྲས་ལ་ཁྱེད་ཀྱིས་ཕུལ་ཅིག །བདག་ཉིད་ཆེན་པོ་དེ་ནི་བླ་ན་མེད་པའི་ཡེ་ཤེས་ཐུགས་སུ་ཆུད་པར་
འགྱུར་ལ་ཁྱེད་ཀྱིས་ཀྱང་འབྲས་བུ་ཆེན་པོ་འཐོབ་པར་འགྱུར་རོ་ཞེས་སྨྲས་ནས་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱས་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །རྒན་
མོ་དེས་ཀྱང་འཆི་ཀར་གོས་དེ་དག་བུ་མོ་ལ་གཏད་ནས་ཇི་ལྟར་གྱུར་པ་རྣམས་སྨྲས་སོ། །དེའི་བུ་མོ་དེ་ཡང་ནད་ཀྱིས་ཐེབས་ཏེ་འཆི་བར་ཤེས་ནས་དེས་ཀྱང་ཤིང་དྲུང་ཞིག་ཏུ་བཞག་ནས་ཤིང་དེ་ལ་གནས་པའི་ལྷ་གང་ཡིན་པ་དེ་ལ་ཁྱོད་ཀྱིས་འདི་དག་རྒྱལ་པོ་ཟས་གཙང་གི་སྲས་ལ་ཕུལ་
ཅིག་ཅེས་གསོལ་བ་བཏབ་བོ། །ལྷ་རྣམས་ཀྱི་དབང་པོ་བརྒྱ་བྱིན་གྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་དེས་དེ་དག་ཤེས་ནས་བླངས་ཏེ། དེ་ནས་རྔོན་པ་རྒས་འཁོགས་པ་ལྟ་བུ་ཞིག་ཏུ་བདག་ཉིད་མངོན་པར་སྤྲུལ་ནས་དེ་དག་བགོས་ཏེ། ལག་པ་ལ་མདའ་གཞུ་ཐོགས་
ནས་བྱང་ཆུབ་སེམས་དཔའ་གཤེགས་པའི་ལམ་ཀར་བསྡད་པ་དང་། བྱང་ཆུབ་སེམས་དཔའ་ཡང་རིམ་གྱིས་ལམ་དེར་བྱོན་ནས་རྔོན་པ་ལག་ན་མདའ་གཞུ་ཐོགས་ཤིང་གོས་ངུར་སྨྲིག་གྱོན་པ་ཞིག་གཟིགས་སོ། །གཟིགས་ནས་ཀྱང་མི་དེ་ལ་གསུངས་པ། ཀྱེ་ནང་རྗེ་ཤ་ནའི་
གོས་འོ་ནི་དག་ནི་རབ་ཏུ་བྱུང་བ་ལ་འཚམ་པ་ཡིན་གྱིས་ཀ་ཤི་ཀའི་རས་ཕྲན་འདི་དག་ཁྱེར་ལ་འོ་ནི་དག་ང་ལ་བྱིན་ཅིག །དེས་གསོལ་པ། གཞོན་ནུ་བདག་ལ་གཞན་དག་ཁྱོད་ཀྱིས་རྒྱལ་བུ་གཞོན་ནུ་བཀྲོངས་ནས་ཀ་ཤི་ཀའི་རས་ཕྲན་གྱི་གོས་འདི་དག་བླངས་སོ་ཞེས་གཞི་དེས་
གཡར་འཆི་བར་འགྱུར་ལགས་པས་བདག་འདི་དག་མི་འབུལ་ལོ། །བྱང་ཆུབ་སེམས་དཔས་གསུངས་པ། ཀྱེ་ནང་རྗེ་ང་ནི་མཐུ་ཇི་ལྟ་བུ་དང་ལྡན་པ་འཇིག་རྟེན་ཐམས་ཅད་ཀྱིས་ཤེས་ཏེ་སུ་ཞིག་གིས་ང་བཀྲོངས་པར་ནུས། ཁྱོད་ཀྱིས་ང་བཀྲོངས་པར་སུ་ཞིག་ཡིད་ཆེས་ཀ