Kinh tạng Tây Tạng (Kangyur Đại Học) — 072_མདོ་སྡེ།_ས

ིམ་ན་དཔག་ཏུ་མེད་པ་ཡོད་ཀྱིས་མ་འགྲོ་ཤིག་ཅེས་སྨྲས་པ་དང་། དེས་མའི་ངག་མཉན་ཏེ། མི་འགྲོ་བར་བྱས་ནས་དེའི་འོག་ཏུ་བཟའ་ཤིང་གི་ར་བར་ཕྱིན་པ་དང་། གྲོགས་པོ་རྣམས་ཀྱིས་དོན་དེ་ཉིད་ལ་ད་དུང་ཡང་གསོལ་བ་འདེབས་

སོ་ཞེས་སྨྲས་པ་དང་། དེས་དེ་ལྟར་བྱའོ་ཞེས་ནས་དེ་དག་གི་ངག་མཉན་ཏེ། ཡང་སོང་ནས་མ་ལ་དྲིས་པ་དང་མས་རྐང་པ་ནས་བཟུང་སྟེ་འདུག་པར་གྱུར་ནས། དེ་ལྟར་ལན་གསུམ་བྱས་པའི་འོག་ཏུ་བཟའ་ཤིང་གི་ར་བ་དེར་ཕྱིན་པ་དང་། གྲོགས་པོ་རྣམས་ཀྱིས་ངེས་པར་མི་འདོང་
དུ་མི་རུང་ངོ་ཞེས་བསྒོ་ནས། དེས་ཡང་མ་ལ་ཡུལ་གཞན་དུ་འགྲོའོ་ཞེས་ཞུས་པ་དང་། མས་བདོག་པ་ཐམས་ཅད་བསོགས་ནས་རྐང་པ་ཡ་གཅིག་ནས་བཟུང་སྟེ་མི་འགྲོ་བར་བྱས་པ་ལས། དུས་གཞན་ཞིག་ན་ཁྱེའུ་དེ་བཟའ་ཤིང་གི་ར་བ་དེར་ཕྱིན་པ་དང་གྲོགས་པོ་དག་གིས་སྨྲས་པ།
ཁྱོད་ཀྱིས་ཉེས་པས་བདག་ཅག་ཀྱང་ད་དུང་མ་དོང་སྟེ་ད་ནི་ཚེས་བཅུ་གསུམ་ལ་འདོང་ངོ་ཞེས་སྨྲས་པ་དང་། དེས་མ་ལ་མ་བྱས་པར་རྒྱ་རྫས་ཐམས་ཅད་ཕྱིར་བཏོན་ནས་དེ་ལམ་དུ་འཇུག་པར་བྱས་པ་དང་། དེའི་མས་སྒོ་ཁར་བསྡད་དེ་རྐང་པ་ནས་བཟུང་བ་དང་བུ་མ་འགྲོ་ཤིག་ཅེས་བྱས་པ་
དང་། དེ་ཁྲོས་ནས་མའི་མགོ་ལ་འགོམས་ཏེ་སོང་ནས་རྒྱ་མཚོའི་ངོགས་སུ་ཕྱིན་པ་དང་དེས་གྲོགས་པོ་རྣམས་ལ་བསྒོ་བ། རྒྱ་མཚོར་འཇུག་པར་ནི་བྱ་ན་འཚོ་འམ་མི་འཚོར་ཡང་གཏོལ་མེད་ཀྱིས། བདག་ཅག་ཀུན་གྱིས་ཁྲིམས་བརྒྱད་མནོད་པར་བྱའོ་ཞེས་སྨྲས་ནས། དེ་དག་
གིས་ཀྱང་དེའི་ངག་མཉན་ཏེ་ཁྲིམས་མནོས་སོ། །དེ་ལྟར་དེ་དག་རྒྱ་མཚོར་ཞུགས་ཏེ་དོང་དོང་བ་ལས་དབུས་སུ་ཕྱིན་པ་དང་རླུང་ཆེན་པོ་ལངས་ནས་གྲུ་བུབ་སྟེ། གཞན་ཐམས་ཅད་ནི་ཚེ་འཕོས། བྱམས་པ་མཆོད་སྦྱིན་ནི་ཟངས་ཀྱི་རལ་ཆེན་ཁ་སྐྱ་འདར་གྱིས་བཅད་པ་ཞིག་ལ། འཇུ་འཇུ་
ནས་རྒྱ་མཚོ་མཐར་ཕྱིན་ཏེ་འཕྱན་ཅིང་སོང་སོང་ན། གྲོང་ཁྱེར་གསེར་གྱི་ར་བ་ཅན་བཟའ་ཤིང་གི་ར་བ་དང་ལྡན་པ་རྫིང་བུ་དང་ལྡན་པ་བདུག་སྤོས་ཀྱིས་བདུགས་པ། མེ་ཏོག་སིལ་མས་གཏོར་བ་དར་གྱི་ལྡ་ལྡི་མང་པོ་བྲེས་པ་ཞིག་མཐོང་ནས། དེའི་ནང་ན་ལྷ་མོ་བཞི་ཞིག་འཐོན་ཏེ་དེ་དག་གིས་
ལག་ནས་བཟུང་སྟེ་ནང་དུ་ཁྲིད་དོ། །དེ་ནས་དེ་དག་དང་ལོ་མང་པོ་ལོ་བརྒྱ་ཕྲག་མང་པོ་ལོ་སྟོང་ཕྲག་མང་པོ་ལོ་བརྒྱ་སྟོང་ཕྲག་མང་པོར་རྩེ་རྩེ་ནས་ལྷ་མོ་དེ་དག་གིས་བསྒོ་བ། འཕགས་པའི་བུ་འདི་ནི་སྔན་ཅད་ཁྱོད་ལ་མེད་པའི་ཡུལ་ཡིན་གྱིས་འདི་ནས་ཕྱི་རོལ་ཏུ་བྱུང་ཏ་རེ། བརྒྱ་

ལ་འབྱུང་ན་ཡང་ཁ་བྱང་ཕྱོགས་སུ་བལྟས་ཏེ་བྱུང་ཤིག་ཅེས་སྨྲས་སོ། །དེ་དུས་གཞན་ཞིག་ན་དེ་ནས་ཕྱི་རོལ་ཏུ་བྱུང་སྟེ་ཡང་འཕྱན་ཅིང་སོང་སོང་བ་དང་། གྲོང་ཁྱེར་དངུལ་གྱི་ར་བ་ཅན་བཟའ་ཤིང་གི་ར་བ་དང་ལྡན་པ་རྫིང་བུ་དང་ལྡན་པ་བདུག་སྤོས་ཀྱིས་བདུགས་པ་མེ་ཏོག་
སིལ་མས་གཏོར་བ་དར་གྱི་ལྡ་ལྡི་མང་པོ་བྲེས་པ་ཞིག་མཐོང་ངོ་། །དེའི་ནང་ནས་ལྷ་མོ་བརྒྱད་འཐོན་ཏེ། སྔ་མ་བཞིན་དུ་རྩེ་རྩེ་ནས་དེ་ནས་ཀྱང་དུས་གཞན་ཞིག་ན་ཕྱིར་བྱུང་སྟེ་འཁྱམ་འཁྱམ་པ་ལས་གྲོང་ཁྱེར་བཻ་དཱུ་རྱའི་ར་བ་ཅན་ནས། དར་གྱི་ལྡ་ལྡི་མང་པོ་བྲེས་པ་སྔ་མ་བཞིན་དུ་མཐོང་ནས། །
དེའི་ནང་ནས་ལྷ་མོ་བཅུ་དྲུག་འཐོན་ཏེ་དེ་དག་གིས་ཀྱང་དེའི་ལག་ནས་བཟུང་སྟེ་ནང་དུ་ཁྲིད་དོ། །དེ་དག་དང་ཡང་ལོ་བརྒྱ་སྟོང་མང་པོར་རྩེ་རྩེ་ནས། དེ་ནས་ཀྱང་དུས་གཞན་ཞིག་ནས་ཕྱིར་བྱུང་སྟེ་འཁྱམ་འཁྱམ་པ་ལས། གྲོང་ཁྱེར་ཤེལ་གྱི་ར་བ་ཅན་ནས་དར་གྱི་ལྡ་ལྡི་མང་པོ་བྲེས་པའི་བར་དུ་
སྔ་མ་བཞིན་དུ་མཐོང་ནས། དེའི་ནང་ནས་ལྷ་མོ་སུམ་ཅུ་རྩ་གཉིས་འཐོན་ཏེ་དེ་དག་གིས་ཀྱང་ལག་ནས་བཟུང་སྟེ་ནང་དུ་ཁྲིད་དོ། །དེ་དག་དང་ཡང་སྔ་མ་བཞིན་དུ་རྩེ་རྩེ་བ་ལས་དེ་དག་གིས་བསྒོ་བ། འཕགས་པའི་བུ་འདི་ནི་ཁྱོད་ལ་མེད་པའི་ས་ཕྱོགས་ཡིན་གྱིས། གནས་འདི་
ནས་ཕྱི་རོལ་ཏུ་བྱུང་ཏ་རེ། བརྒྱ་ལ་འབྱུང་ན་ཡང་ཁ་བྱང་ཕྱོགས་སུ་ལྟོས་ཏེ་བྱུང་ཤིག་ཅེས་སྨྲས་པའི་འོག་ཏུ་དེ་ཁང་པ་དེ་ནས་བྱུང་སྟེ་ཁ་བྱང་ཕྱོགས་སུ་བལྟས་ནས་སོང་སོང་བ་ལས། ཚེར་མའི་ནགས་ཚལ་ཞིག་ཏུ་ཕྱིན་པ་དང་གྲོང་ཁྱེར་ལྕགས་ཀྱི་ར་བ་ནག་པོ་ཅན་ཞིག་མཐོང་སྟེ།
དེར་སོང་སོང་བ་དང་ནང་དུ་ཕྱིན་མ་ཐག་ཏུ་གྲོང་ཁྱེར་གྱི་སྒོ་འགགས་ནས། ར་བའི་གོང་དུ་བལྟས་ན་ཡང་མཐོ་བར་གྱུར་ཏེ་མཐར་སྒྲ་འཇིགས་པ་ཞིག་ཀྱང་ཐོས་ནས། དེ་ན་གནས་བཞིན་དུ་འདི་ཅི་ཞིག་སྙམ་དུ་བསམས་པ་དང་། རལ་གྲི་འཁོར་ལོ་མགོ་ལ་འཁོར་ཞིང་གཅོད་པའི་མི་
ཞིག་མཐོང་ནས་དངངས་ཏེ། ཀྱེ་མི་འདི་ཅི་ཞིག་ཅེས་དྲིས་པ་དང་། སེམས་ཅན་དམྱལ་བ་པའི་མི་དེས་འདི་ནི་ཉི་ཚེ་བའི་སེམས་ཅན་དམྱལ་བའོ་ཞེས་སྨྲ་བ་དང་། བྱམས་པ་མཆོད་སྦྱིན་གྱིས། ཁྱོད་ཀྱིས་སྡིག་པའི་ལས་ཅི་ཞིག་བྱས་ཞེས་སྨྲས་སོ། །དེས་སྨྲས་པ། འཛམ་བུའི་

གླིང་ན་གྲོང་ཁྱེར་ཀོ་ས་ལི་ཞེས་བྱ་བ་ཞིག་ཡོད་དེ། བདག་ཀྱང་དེ་ན་དེད་དཔོན་གྱི་བུ་ཞིག་ཏུ་གྱུར་ཅིང་འདུག་འདུག་པ་ལས། བདག་གྲོགས་ལྔ་བརྒྱས་བསྐོར་ཏེ་བཟའ་ཤིང་གི་ར་བ་ཆེན་པོར་ཕྱིན་པ་དང་། གྲོགས་པོ་དེ་དག་གིས་སྨྲས་པ། ཁྱོད་ཀྱི་ཕ་ནི་དེད་དཔོན་ཡིན་ཏེ། དེ་དག་
ལ་སོགས་པ་བདག་ཅག་གི་ཕ་རྣམས་ཡུལ་གཞན་དུ་དོང་ཞིང་ནོར་ལ་སོགས་པ་ཡང་བྱེད། གསེར་གནས་དང་། སིང་གྷ་ལའི་གླིང་ལ་སོགས་པ་གླིང་གཞན་དག་ཀྱང་ལྟ་ན། བདག་ཅག་ཀྱང་ཁྱོད་ཀྱིས་གཙོ་བོ་བྱས་ཏེ་ཡུལ་གཞན་དུ་འདོང་ངོ་ཞེས་སྨྲས་པ་དང་། དེ་དག་གིས་
མཉན་ཏེ་ཁྱིམ་དུ་ཕྱིན་ནས་མ་ལ་བདག་གྲུར་ཞུགས་ཏེ་ཡུལ་གཞན་དུ་འགྲོའོ་ཞེས་དྲིས་པ་དང་། བདག་གི་མས་སྨྲས་པ། བུ་ཁྱོད་ཀྱི་ཕ་ཡང་རྒྱ་མཚོ་ལས་གྲུར་ཞུགས་ཏེ་ཡུལ་གཞན་དུ་སོང་སོང་བ་ལས་ཚེ་འཕོས་ཏེ། བུ་ཡང་ཁྱོད་གཅིག་པུར་ཟད་ལ། ཁྱིམ་ཡང་ནོར་གྱིས་གང་
བར་ཡོད་ཀྱིས་མ་འགྲོ་ཤིག་ཅེས་ནས། བདག་གིས་ཀྱང་མི་འགྲོའོ་ཞེས་མའི་ངག་མཉན་ཏེ། དེ་ལྟར་ལན་གསུམ་མམ་བཞིར་མས་རྐང་པ་ནས་བཟུང་སྟེ་བསྒོ་ནས་འདུག་འདུག་པ་ནས། དུས་གཞན་ཞིག་ན་བདག་བཟའ་ཤིང་གི་ར་བར་ཕྱིན་པ་དང་གྲོགས་པོ་རྣམས་ཀྱིས་ངེས་
པར་འདོང་ངོ་། །ཞེས་སྨྲས་ནས། འོ་ན་འདོང་བར་བྱའོ་ཞེས་བདག་གིས་ཁས་བླངས་ཏེ་འགྲོ་བར་བྱས་པ་དང་། བདག་གི་མས་སྒོ་ཀར་རྐང་པ་ནས་བཟུང་སྟེ་བུ་ང་དོར་བའི་མི་རིགས་སོ་ཞེས་སྨྲས་པ་དང་། བདག་གི་མའི་མགོ་ལ་འགོམས་ཏེ་སོང་ནས་གྲོགས་པོ་ལྔ་བརྒྱ་དང་
བདག་ཅག་རྒྱ་མཚོའི་ངོགས་སུ་ཕྱིན་ཏེ། ཁྲིམས་བརྒྱད་མནོས་ནས་རྒྱ་མཚོར་ཞུགས་ཏེ། གསེར་གནས་སུ་དོང་དོང་བ་ལས་རླུང་ཆེན་པོ་ལངས་ནས་གྲུ་བུབ་སྟེ་གྲོགས་པོ་དེ་དག་ནི་ཚེ་འཕོས་པར་གྱུར། བདག་ནི་ཉི་མ་དུ་མ་ཞིག་ན་རྒྱ་མཚོའི་མཐར་ཕྱིན་ཏེ། འཁྱམ་ཞིང་
སོང་སོང་བ་ལས། གྲོང་ཁྱེར་གསེར་གྱི་ར་བ་ཅན། བཟའ་ཤིང་གི་ར་བ་དང་ལྡན་པ་རྫིང་བུ་དང་ལྡན་པ། བདུག་སྤོས་ཀྱིས་བདུགས་པ། མེ་ཏོག་སིལ་མས་གཏོར་བ། དར་གྱི་ལྡ་ལྡི་མང་པོ་བྲེས་པ་ཞིག་མཐོང་ངོ་། །དེའི་ནང་ནས་ལྷ་མོ་བཞི་ཞིག་འཐོན་པ་ནས། ལྷ་མོ་སུམ་

ཅུ་རྩ་གཉིས་འཐོན་པ་དང་། གྲོང་ཁྱེར་ལྕགས་ཀྱི་ར་བས་བསྐོར་བ་ཞིག་མཐོང་བའི་བར་དུ་སྔ་མ་བཞིན་ཏེ། བདག་དེའི་ནང་དུ་ཕྱིན་པ་དང་། དེ་མ་ཐག་ཏུ་སྒོ་ཡང་འགགས། དེ་ནི་མི་ཞིག་ཀྱང་རལ་གྲི་འཁོར་ལོ་མགོ་ལ་འཁོར་ཞིང་འདུག་པ་མཐོང་ནས། བདག་འདི་ན་
འདུག་འདུག་པའི་མགོ་ལ་འཁོར་ལོ་འཕོས་པར་གྱུར་ཏོ། །བདག་མའི་ཚིག་གིས་ལན་བཞི་ཕྱིར་ལོག་པ་དང་། ཁྲིམས་བརྒྱད་མནོས་པའི་ལས་ཀྱི་རྣམ་པར་སྨིན་པས། གྲོང་ཁྱེར་བཞིར་ཉི་ཚེ་བའི་མཐོ་རིས་ཉམས་སུ་མྱོང་བར་གྱུར་ཏོ། །བདག་གིས་མའི་མགོ་ལ་འགོམས་ཏེ་སོང་བའི་
ལས་ཀྱི་རྣམ་པར་སྨིན་པས་ནི། རལ་གྲི་འཁོར་ལོ་མགོ་ལ་འཁོར་ཞིང་གཅོད་པ་འདི་ཡིན་ནོ་ཞེས་བྱས་པ་དང་། བྱམས་པ་མཆོད་སྦྱིན་གྱིས་བསམས་པ། བདག་གིས་ཀྱང་སྔོན་ལས་དེ་ཁོ་ན་དང་འདྲ་བར་བྱས་ཀྱིས། བདག་གི་ལས་རྣམ་པར་སྨིན་པ་ཡང་ཉེ་བར་གནས་པར་གྱུར་པ་
ལྟའོ་སྙམ་པ་དང་། སེམས་ཅན་དམྱལ་བའི་མི་དེས་བྱམས་པ་མཆོད་སྦྱིན་ཁྱོད་གང་ནས་འོངས་ཞེས་སྨྲས་པ་དང་། བྱམས་པ་མཆོད་སྦྱིན་གྱིས་སྨྲས་པ། འཛམ་བུའི་གླིང་ན་གྲོང་ཁྱེར་ཏ་མ་ལི་བ་ཏི་ཞེས་བྱ་བ་ཞིག་ཡོད་དེ། བདག་ནི་དེ་ནས་འོངས་ཏེ། བདག་གིས་ཀྱང་ལས་དེ་དག་
ཐམས་ཅད་བྱས་སོ། །སེམས་ཅན་དམྱལ་བ་པའི་མི་དེས་སྨྲས་པ། དེ་བདེན་པ་ལྟ་སྟེ། བདག་གིས་ཀྱང་བར་སྣང་ལས་སྒྲ་ཐོས་ནས། ཁྱོད་ཀྱི་ལས་ཀྱི་རྣམ་པར་སྨིན་པ་ཟད་དེ། དེད་དཔོན་གྱི་བུ་བྱམས་པ་མཆོད་སྦྱིན་ཞེས་བྱ་བ། ལས་དེ་དང་འདྲ་བར་བྱས་པ་ཞིག་འོང་ངོ་ཞེས་
ཐོས་སོ། །བྱམས་པ་མཆོད་སྦྱིན་གྱིས་ཟས་སུ་ཅི་ཟ་ཞེས་སྨྲས་པ་དང་། དེས་མགོ་འདི་ཉིད་ཀྱི་ཤ་རྙིལ་བ་ལས། ཤ་དང་རྣག་ཁྲག་འོང་བཟའོ་ཞེས་སྨྲས་ནས། མི་དེ་ཡང་དེར་ཚེ་འཕོས་པར་གྱུར་ཏོ། །བྱམས་པ་མཆོད་སྦྱིན་འཇིགས་ཤིང་མི་དགའ་བས། མའི་དོན་དུ་སྨོན་ལམ་
བཏབ་སྟེ། འདི་སྐད་ཅེས་སྨྲས་སོ། །འཇིག་རྟེན་བགྲང་དུ་མེད་པ་ཐམས་ཅད་ཀྱི། །སྲིད་རྩེ་མན་ཅད་མནར་མེད་ཡན་ཅད་ན། །ལྷ་དང་ལྷ་མིན་ལྟོ་འཕྱེ་ཆེན་པོའི་ཚོགས། །བདེ་བར་གྱུར་ཅིག་སྡུག་བསྔལ་བདག་གིས་བླང་། །དེ་སྐད་ཅེས་སྨྲས་ནས། བསམ་པ་ཐག་པས་

ཕ་མ་ལ་ཕྱག་འཚལ་ཏེ་སྨོན་ལམ་བཏབ་བོ། །གར་སྐྱེས་གར་སྐྱེས་ཀྱང་ཕ་མའི་རིམ་གྲོ་བྱའོ། །ཉི་ཚེ་བའི་སེམས་ཅན་དམྱལ་བ་འདིར་སྐྱེ་བར་འགྱུར་བ་དེ་དག་གི་དོན་དུ་བདག་འདི་ན་གནས་སོ། །འཇིག་རྟེན་ན་རིགས་པ་དང་ལྡན་པ་དང་། གྲོལ་བར་གྱུར་པ་སུ་བཞུགས་པ་དེ་
དག་ལ་ཕྱག་འཚལ་ལོ། །དེ་དག་གིས་ཀྱང་བདག་བསྐྱབ་ཏུ་གསོལ་ཞེས་སྨྲས་ནས། སེམས་ཅན་དམྱལ་བ་པ་འདུག་འདུག་པ་དེར་འདུག་ནས། ཡང་ཕ་མའི་དོན་དུ་སྨོན་ལམ་བཏབ་པ། སེམས་ཅན་དམྱལ་བ་མནར་མེད་མཐའ་ནས་སྲིད་རྩེ་མན་ཆད་ནས། སེམས་ཅན་ཚེ་
འཕོའི་རྣམ་པ་འཆིང་བས་ཇི་སྙེད་བཅིངས་པ་དག །ཐམས་ཅད་མ་ལུས་ཆོས་དང་ལྡན་ཞིང་བདེ་བར་འཚོ་འགྱུར་ཏེ། རྒན་མེད་ཚེ་འཕོ་མེད་པའི་མྱ་ངན་འདས་པ་ཐོབ་གྱུར་ཅིག །དེ་སྐད་ཅེས་བརྗོད་དེ་བསྡད་པ་དང་། འཁོར་ལོ་དེ་མགོ་ལ་མ་རེག་པར་སྟེང་གི་ནམ་མཁའ་ལ་འཁོར་བར་
གྱུར་ཏོ། །དེའི་མས་ཀྱང་གལ་ཏེ་བདག་གི་སྦྱིན་པའམ་ཚུལ་ཁྲིམས་སམ་བདག་གིས་ཁྱིམ་ཐབ་ཀྱི་བརྟུལ་ཞུགས་བྱས་པའི་བསོད་ནམས་ཀྱི་འབྲས་བུ་ཞིག་ཡོད་ན། བསོད་ནམས་ཀྱི་འབྲས་བུ་དེས། བདག་གི་བུ་གང་དང་གང་ན་གནས་ཀྱང་བདེ་བར་གྱུར་ཅིག་ཅེས་རྟག་པར་སྨོན་ལམ་བཏབ་པས་
དེ་ལྟར་ཞི་བར་གྱུར་ཏོ། །དེ་ཡང་ཉི་ཚེ་བའི་སེམས་ཅན་དམྱལ་བ་དེ་ན་འདུག་འདུག་ནས། ལོ་དྲུག་ཅུ་ཡང་མ་ལོན་པར་ཚེ་འཕོས་པར་གྱུར་ཏེ། དཔེར་ན་རྒྱལ་པོ་མ་སྐྱེས་དགྲ་སེམས་ཅན་དམྱལ་བའི་ཚེ་ཡོངས་སུ་མ་རྫོགས་པར་ཚེ་འཕོས་པ་ལྟ་བུ་སྟེ། ལས་ཀྱི་འབྲས་བུ་ཆུད་ཟ་བ་
མེད་པའི་ཕྱིར་བར་བར་ཀླད་པ་ན་བར་གྱུར་ཏོ། །དེ་ནས་སྐབས་སུ་བབ་ནས། བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེའི་ཚེ་དེའི་དུས་ན་དེད་དཔོན་གྱི་བུ་བྱམས་པ་མཆོད་སྦྱིན་ཞེས་བྱ་བ་དེ་གཞན་ཞིག་ཡིན་པར་སེམས་ན་དེ་ནི་དེ་ལྟར་མི་བལྟ་
སྟེ། ང་ཉིད་དེའི་ཚེ་དེའི་དུས་ན་དེད་དཔོན་གྱི་བུ་བྱམས་པ་མཆོད་སྦྱིན་ཞེས་བྱ་བར་གྱུར་ཏོ། །དགེ་སློང་དག་དེ་ལྟ་བས་ན་ངའི་ཚིག་ལ་ཡིད་ཆེས་པར་བྱས་ཏེ་སངས་རྒྱས་བཅོམ་ལྡན་འདས་ལ་རིམ་གྲོ་ཡོད་པར་བྱའོ། །ཆོས་དང་དགེ་འདུན་ལ་རིམ་གྲོ་ཡོད་པར་བྱའོ། །ཕ་མ་དང་

མཁན་པོ་དང་སློབ་དཔོན་ལ་རིམ་གྲོ་ཡོད་པར་བྱའོ། །དགེ་སློང་དག་ཁྱེད་ཀྱིས་འདི་ལྟར་ཤེས་པར་བྱ་སྟེ། གང་ཡུལ་གཞན་དུ་སོང་ཞིང་བདེ་བ་དང་སྡུག་བསྔལ་ཉམས་སུ་མྱོང་བ་ཡོད་དེ། དཔེར་ན་བྱམས་པ་མཆོད་སྦྱིན་ཡུལ་གཞན་དུ་སོང་ནས་ཚེ་དེ་ཉིད་ལ་
ཉི་ཚེ་བའི་མཐོ་རིས་དང་། ཉི་ཚེ་བའི་སེམས་ཅན་དམྱལ་བ་མྱོང་བར་གྱུར་པ་ལྟ་བུ་སྟེ། དེ་ལྟར་ཡུལ་གཞན་དུ་བདེ་བ་དང་སྡུག་བསྔལ་ཉམས་སུ་མྱོང་བར་གྱུར་པའི་ལས་དེ་ལྟ་བུ་ནི་ཡུལ་གཞན་དུ་རྣམ་པར་སྨིན་པར་འགྱུར་བའོ། །དེ་ལ་ཡང་བཅོམ་ལྡན་འདས་ཀྱིས་དེ་སྐད་ཅེས་
གསུངས་ཏེ། ང་ལ་ཅི་བྱས་པ་དང་ཕ་མ་དང་མཁན་པོ་དང་སློབ་དཔོན་ལ་ཅི་བྱས་པ་དེ་དག་ནི་བྱེ་བྲག་མེད་ཅིང་མཚུངས་ཏེ་ཚེ་འདི་དང་ཕྱི་མ་ལ་ཡང་རྣམ་པར་སྨིན་པ་མི་མཉམ་པ་མེད་དོ། །ཇི་ལྟར་ན་ཚེ་འདི་འདི་ལ་རྣམ་པར་སྨིན་པ་མཚུངས་ཤིང་མཉམ་པ་ཡིན་ཞེ་ན། དཔེར་ན་མཉན་
དུ་ཡོད་པ་ན་བཅོམ་ལྡན་འདས་དང་ཉན་ཐོས་ཀྱི་དགེ་འདུན་བཤོས་གསོལ་བ་མི་ཕོངས་པ་གཅིག་ཅིག་གིས་མཐོང་ནས་སེམས་མོས་པར་བྱས་པས་དེས་བསོད་ནམས་ཀྱི་ཚོགས་ཆེན་པོ་ཡང་བསགས་པར་གྱུར། རྒྱལ་པོར་འགྱུར་བའི་ལས་ཀྱང་བྱས། དེ་ཉིད་ཐར་པའི་ས་བོན་དུ་
གྱུར་པ་དེ་ཐུགས་སུ་ཆུད་ནས། བཅོམ་ལྡན་འདས་ཀྱིས་ཚིགས་སུ་བཅད་དེ་གསུངས་པ། དེ་ལ་རྗེས་སུ་ཡི་རང་སུ་བྱེད་གང་། །དེ་ཡི་ལས་ནི་ཉམས་སུ་སུ་ལེན་པ། །ཞེས་བྱ་བ་ལ་སོགས་པ་གསུངས་པ་དང་། ཆོས་རྣམས་སྔོན་དུ་ཡིད་འགྲོ་སྟེ། །ཡིད་ཀྱིས་ཆོས་འགྱུར་ཡིད་
ཀྱིས་འགྲོ། །ཡིད་ནི་ལེགས་པར་མོས་འགྱུར་ན། །སྨྲ་བའམ་བྱེད་པ་ཀུན་དུ་འགྱུར། །གྲིབ་མ་རྗེས་སུ་འབྲང་བ་བཞིན། །དེ་ལས་བདེ་བ་འཐོབ་པར་འགྱུར། །ཞེས་གསུངས་པ་དང་། དེ་ནས་ཚེ་འཕོས་པའི་འོག་ཏུ་ལྷར་སྐྱེས་པ་ལྟ་བུ་དང་། དཔེར་ན་གྲོང་ཁྱེར་གཙུག་ཕུད་ཅེས་
བྱ་བའི་རང་སངས་རྒྱས་ལྟ་བུ་སྟེ། དེ་ལ་ལོ་ཉེས་པ་ཞིག་གི་ཚེ་མི་དབུལ་པོ་ཞིག་གིས་བསོད་སྙོམས་ཞིག་ཕུལ་བས། དེ་དེ་ཉིད་ཀྱི་ཚེ་རྒྱལ་པོར་དབང་བསྐུར་ནས། དུས་གཞན་ཞིག་ན་རང་སངས་རྒྱས་སུ་གྱུར་པ་ལྟ་བུའོ། །དེ་ཡང་མདོ་སྡེ་དག་ལས་གསུངས་པ། གྲོང་ཁྱེར་

གཙུག་ཕུད་ཅེས་བྱ་བ་དེ་དང་འདྲ་བར་སེམས་མོས་པའི་འབྲས་བུ་ཚེ་འདི་ཉིད་ལ་རྣམ་པར་སྨིན་པར་འགྱུར་རོ་ཞེས་གསུངས་པ་དང་། ཕ་མ་ལ་རིམ་གྲོ་བྱས་ན། དེད་དཔོན་གྱི་བུ་བྱམས་པ་མཆོད་སྦྱིན་གྱིས་མའི་ངག་མཉན་ཏེ་ལན་བཞི་ཕྱིར་ལོག་པས་གྲོང་ཁྱེར་ཆེན་པོ་བཞིར་ཉི་ཚེ་
བའི་མཐོ་རིས་མྱོང་བར་གྱུར་པ་དེ་དེའི་ཐར་པའི་ས་བོན་དུ་གྱུར་པ་ལྟར། ཚེ་འདི་ལ་འབྲས་བུ་རྣམ་པར་སྨིན་པར་འགྱུར་རོ་ཞེས་གསུངས་པ་ལྟ་བུའོ། །ཇི་ལྟར་ན་བཅོམ་ལྡན་འདས་དང་ཕ་མ་ལ་ཞེ་སྡང་བར་བྱས་པའི་སེམས་ཀྱིས། སེམས་ཅན་དམྱལ་བར་འགྲོ་བར་འགྱུར་ཞེ་ན། དེ་ནི་
དཔེར་ན་ལྷས་བྱིན་གྱིས་བཅོམ་ལྡན་འདས་ལ་ཞེ་སྡང་བའི་སེམས་བསྐྱེད་ནས་ཚེ་འཕོས་པའི་འོག་ཏུ་མནར་མེད་པའི་སེམས་ཅན་དམྱལ་བར་ལྷུང་བ་ལྟ་བུ་དང་། དཔེར་ན་ཡུལ་སིན་དུ་ན་འོ་དོད་ཅན་ཞེས་བྱ་བའི་གྲོང་ཁྱེར་ཞིག་ཡོད་པར་རྒྱལ་པོའི་བུ་ཨུ་ཏྲ་ཀ་ཞེས་བྱ་བས་ཕ་བསད་དེ་སེམས་
ཅན་དམྱལ་བར་ལྷུང་བ་ལྟ་བུ་སྟེ། དེ་ལྟར་ན་བཅོམ་ལྡན་འདས་དང་ཕ་མ་ལ་ཞེ་སྡང་བར་བྱས་པའི་སེམས་ཀྱིས་སེམས་ཅན་དམྱལ་བར་འགྲོ་བར་འགྱུར་རོ། །དེ་དག་ལ་བྱེ་བྲག་མེད་པ་ཡིན་ནམ་ཞེ་ན་བྱེ་བྲག་མེད་པའང་མ་ཡིན་ཏེ། བཅོམ་ལྡན་འདས་ནི་བསྐལ་པ་བརྒྱ་སྟོང་དུ་མར་དགེ་
བའི་རྩ་བ་བསྐྱེད་པ་ཚོགས་བསགས་པ་ལམ་མ་སྐྱེས་པ་རྣམས་ལ་ཆོས་སྟོན་ཅིང་བྱང་ཆུབ་ཏུ་སྟོབས་པ་སྟེ། དེ་ལ་མོས་པ་བསྐྱེད་ན། འབྲས་བུ་རྣམ་པར་སྨིན་པ་ཚད་མེད་པར་འགྱུར་ཏེ། དེ་མྱ་ངན་ལས་འདའ་བའི་ཚེ་ཡང་ཡབ་ཡུམ་ཐར་པའི་ལམ་ལ་བཀོད་དོ། །དེ་ལྟ་ཡིན་ཡང་
ཕ་མའི་ཚིག་ནི་ཐམས་ཅད་མཉན་པར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། ལ་ལ་ལོག་པར་ལྟ་བ་དང་ལྡན་པ་དག་བུ་ལ་འདི་སྐད་ཅེས་ཟེར་ཏེ། བུ་ངེད་ཁ་འཚོ་བའི་གནས་སུ་ཁྲིད་ཅིག་དང་ཁྱོད་ལ་ཕན་པ་དང་བདེ་བར་འགྱུར་རོ་ཞེས་ཟེར་བ་དང་། ངེད་གཡང་དུ་ཐོང་ཤིག་མེར་ཆུག་
ཤིག་ཅེས་ཟེར་ཡང་དེ་ལྟ་བུ་ནི་མི་བྱའོ། །དེ་ཅིའི་ཕྱིར་ཞེ་ན། ཕ་མ་བསད་པས་ནི་གདོན་མི་ཟ་བར་སེམས་ཅན་དམྱལ་བར་འགྲོའོ། །དེ་ལྟ་བས་ན་བཅོམ་ལྡན་འདས་ཀྱིས་ཀྱང་ཕ་མ་གསོད་པ་ནི་རབ་ཏུ་འབྱུང་བར་མི་བྱ་སྟེ། དེ་ལ་རབ་ཏུ་འབྱུང་བའི་རྒྱུ་མེད་བསྙེན་པ་རྫོགས་པར་

བྱ་བའི་རྒྱུ་མེད་དེ། དེ་ལྟ་བས་ན་དེ་དག་སྤང་བར་བྱའོ་ཞེས་གསུངས་སོ། །ཇི་ལྟར་ན་ཕ་མ་དང་མཁན་པོ་དང་སློབ་དཔོན་དག་ཏུ་མཉམ་ཞིང་མཚུངས་པ་ཡིན་ཞེ་ན། དེ་ནི་བཅོམ་ལྡན་འདས་ཀྱིས་ཕ་མ་བུ་ལ་བྱམས་པ་ནི་རྐང་དང་རུས་པའི་ཁོང་ནས་
བྱམས་སོ་ཞེས་གསུངས་ཏེ། དེ་ལྟ་བས་ན་ཕ་མས་མ་གནང་ན་རབ་ཏུ་མི་འབྱུང་ངོ་། །དེ་ཡང་དཔེར་ན་འཕགས་པ་ཕོ་བྲང་འཁོར་སྐྱོང་ལ་སོགས་པ་ཕ་མས་མ་བཀྱེ་ན་བཅོམ་ལྡན་འདས་ཀྱིས་ཀྱང་རབ་ཏུ་མ་ཕྱུང་བ་ལྟ་བུ་སྟེ། ད་དུང་ཡང་ཕ་མས་མ་གནང་བར་རབ་ཏུ་མི་དབྱུང་སྟེ།
དཔེར་ན་བཅོམ་ལྡན་འདས་རབ་ཏུ་བྱུང་བ་ལ། རྒྱལ་པོ་ཟས་གཙང་མ་སྲས་ཀྱི་མྱ་ངན་གྱིས་མིག་རུབ་པར་གྱུར་པ་ལྟ་བུའི་ཕ་མས་ནི་བུ་འདི་བདག་ཅག་གིས་བསྐྱེད་བསྐྱེད་ཀྱིས། སྐྱེས་ནས་རིམ་གྲོར་བྱེད་པར་འགྱུར་རོ། །བདག་ཅག་གི་དགོས་པ་བསྒྲུབ་པར་འགྱུར་རོ། །
ནོར་གྱི་བདག་པོར་འགྱུར་རོ། །ཚེ་འཕོས་ན་ཡང་གཏོར་མ་བྱེད་པར་འགྱུར་རོ། །རིགས་ཀྱི་རྒྱུད་འཚོབ་པར་འགྱུར་རོ་ཞེས་གནས་ལྔ་པོ་དེ་དག་ལ་རེ་ཞིང་ཕ་མ་བུ་འདོད་དོ། །མཁན་པོ་དང་སློབ་དཔོན་ནི་སྙིང་རྗེའི་སེམས་སྔོན་དུ་བཏང་ཞིང་ཇི་ལྟར་ན་ཐོག་མ་མེད་པ་ནས་འཁྱམ་
འཁྱམ་པ་འདི། ད་དུང་ཕ་མས་མ་གནང་ན་རབ་ཏུ་མི་འབྱུང་གི་བར་དུ་ཕྱིན་པར་བྱ་སྙམ་སེམས་ཏེ། དཔེར་ན་བཅོམ་ལྡན་འདས་ཀྱིས་འདུལ་བ་ལས་གསུངས་པ། མཁན་པོ་ནི་སློབ་མ་ལ་བུའི་འདུ་ཤེས་འཇོག་གོ། །སློབ་མ་ནི་མཁན་པོ་ལ་ཕའི་འདུ་ཤེས་འཇོག་གོ། །
དེ་བཞིན་དུ་ཕན་ཚུན་ཕ་མ་དང་བུའི་འདུ་ཤེས་འཇོག་གོ་ཞེས་གསུངས་པ་ལྟ་བུ་སྟེ། དེ་ལྟར་ན་མཁན་པོ་དང་སློབ་དཔོན་ནི་ཕ་མ་དང་མཚུངས་ཤིང་མཉམ་མོ། །དེ་ཡང་བཅོམ་ལྡན་འདས་ཀྱིས་འཁོར་ལོས་སྒྱུར་བའི་མདོ་ལས་གསུངས་པ། ལས་ཀྱི་རྣམ་པར་སྨིན་པ་
གང་གིས་འཁོར་ལོས་སྒྱུར་བའི་རྒྱལ་པོ་གླང་པོ་རིན་པོ་ཆེ་དང་རྟ་རིན་པོ་ཆེ་འཐོབ་ཅེ་ན། དེ་ནི་ཕ་མ་ཁུར་དུ་ཁྱེར་ཁྱེར་བ་དང་། གླང་པོ་དང་རྟ་དང་ཤིང་རྟ་ལ་སོགས་པ་ལ་བསྐྱོན་པ་དང་། མཁན་པོ་དང་སློབ་དཔོན་བདག་གིས་བཀུར་བ་དང་། གཞན་ལ་བསྐྱོན་པའི་ལས་ཀྱི་

རྣམ་པར་སྨིན་པས། འཁོར་ལོས་སྒྱུར་བའི་རྒྱལ་པོ་གླང་པོ་དང་རྟ་རིན་པོ་ཆེ་འཐོབ་བོ་ཞེས་གསུངས་པ་ལྟ་བུ་སྟེ། རྒྱུ་དེས་ཀྱང་ཕ་མ་དང་མཁན་པོ་དང་སློབ་དཔོན་དག་ཏུ་མཚུངས་ཤིང་མཉམ་མོ། །དེ་ལའང་ཁྱིམ་པ་དག་ལ་ནི་ཕ་མ་མཆོད་པའི་གནས་ཡིན་ནོ། །རབ་
ཏུ་བྱུང་བ་རྣམས་ལ་ནི་མཁན་པོ་དང་སློབ་དཔོན་མཆོད་པའི་གནས་ཡིན་ནོ། །དེ་ལྟར་ན་མཁན་པོ་དང་སློབ་དཔོན་དང་ཕ་མར་མཚུངས་ཤིང་མཉམ་པ་ཡིན་ནོ་ཞེས་གསུངས་པ་ལྟ་བུའོ། །དཔེར་ན་བཅོམ་ལྡན་འདས་ཀྱིས་དགེ་སློང་དག་ལ་བཀའ་སྩལ་པ། དགེ་སློང་དག་ལ་ལ་ཞིག་
གིས་ཕ་མ་ཕྲག་པ་ལ་བླངས་ཏེ་འཛམ་བུའི་གླིང་བསྐོར་བ་དང་འཚོ་བ་ཐམས་ཅད་སྦྱར་བ་དང་གླིང་བཞི་ཐམས་ཅད་ནོར་དབྱིག་དང་གསེར་གྱིས་བཀང་སྟེ་བྱིན་ཡང་ཕ་མ་ལ་ཕན་པའི་ལན་ལོན་པར་མི་འགྱུར་གྱི། ལ་ལ་ཞིག་གིས་སངས་རྒྱས་ལ་དད་པ་བསྐྱེད་པ་དང་། ཆོས་དང་དགེ་
འདུན་ལ་དད་པ་བསྐྱེད་པ་དང་། བསླབ་པ་ལྔ་ལ་གཞག་པ་དང་། འཕགས་པས་བསྔགས་པའི་ལམ་ལ་སྐྱབས་སུ་གཏོང་བའི་གང་ཟག་དེ་ལ་ནི། གུས་པར་སྨྲས་པ་དང་བསུ་བ་དང་། ཐལ་མོ་སྦྱར་བ་དང་གདིང་བ་དང་ཆོས་གོས་དང་བསོད་སྙོམས་དང་མལ་ཆ་དང་། ན་བའི་
སྨན་བྱིན་པ་ཙམ་གྱིས་ཕན་པའི་ལན་ལོན་པར་མི་ནུས་སོ་ཞེས་གསུངས་པ་ལྟ་བུ་སྟེ། དེ་ལྟར་ན་ཕ་མ་བས་ཀྱང་མཁན་པོ་དང་སློབ་དཔོན་ཁྱད་པར་དུ་འཕགས་སོ། །མདོར་ན་བཅོམ་ལྡན་འདས་མྱ་ངན་ལས་འདས་ཕྱིན་ཅད་དགེ་སློང་ངམ། དགེ་སློང་མའམ། དགེ་བསྙེན་ནམ་
དགེ་བསྙེན་མ་ཇི་སྙེད་ཅིག་མངོན་པར་མོས་པ་དང་དུལ་བར་གྱུར་པ་དེ་དག་ཐམས་ཅད་ཀྱང་། མཁན་པོ་དང་སློབ་དཔོན་གྱིས་མངོན་པར་མོས་ཤིང་དུལ་བར་བྱས་སོ། །དེའི་ཕྱིར་བཅོམ་ལྡན་འདས་ཀྱིས་གསུངས་པ། དགེ་སློང་དག་ངའི་ཚིག་ལ་ཡིད་ཆེས་པ་རྣམས་ཀྱིས་སངས་
རྒྱས་བཅོམ་ལྡན་འདས་ལ་དད་པ་མཆོག་བསྐྱེད་པར་བྱའོ། །ཆོས་དང་དགེ་འདུན་དང་། ཕ་མ་དང་མཁན་པོ་དང་སློབ་དཔོན་ལ་དད་པ་མཆོག་བསྐྱེད་པར་བྱའོ། །དེ་ནི་ཁྱོད་ལ་ཡུན་རིང་པོར་ཕན་པ་དང་བདེ་བའི་རྒྱུར་འགྱུར་རོ་ཞེས་གསུངས་པ་ལྟ་བུ་སྟེ། ལས་དེ་ལྟ་བུ་ནི་ཡུལ་གཞན་དུ་

རྣམ་པར་སྨིན་པར་འགྱུར་རོ། །དེ་ལ་ལས་གང་དང་ལྡན་ན་གང་ཟག་སྔར་བདེ་བར་གྱུར་ལ། ཕྱིས་སྡུག་བསྔལ་བར་འགྱུར་བའི་ལས་ཡོད་དེ། དེ་གང་ཞེ་ན་བཤད་པར་བྱ་སྟེ། འདི་ལ་ལ་ལ་ཞིག་སྦྱིན་པ་བསླངས་ན་རབ་ཏུ་དགའ་སྟེ། ཁས་ལེན་ཅིང་རབ་ཏུ་དགའ་
བས་བྱིན་ལ། བྱིན་ནས་དེའི་འོག་ཏུ་འགྱོད་པ་ཡིན་ཏེ། དེ་ནས་མིར་སྐྱེས་ན་ཡང་ཕྱུག་ཅིང་ལོངས་སྤྱོད་ཆེ་བའི་རིགས་སུ་སྐྱེ་སྟེ། ལོངས་སྤྱོད་དེ་དག་ཕྱིས་ཟད་ཅིང་དེངས་པར་འགྱུར་རོ། །དེ་ཕྱིས་དབུལ་པོར་འགྱུར་བ་ནི་ཁྱེའུ་གྲགས་པ་ཞེས་བྱ་བ་བཞིན་ཏེ། དེས་ཡང་དག་
པར་རྫོགས་པའི་སངས་རྒྱས་ལོག་པར་དད་སེལ་དང་། དགེ་སློང་གི་དགེ་འདུན་ལ་བ་བཞོན་གཅིག་ཕུལ་ནས། དེ་ཕྱིས་གཞན་དག་གིས་གྱོད་བཏབ་པ་དང་། དེ་ལྟར་བྱིན་པ་ནི་མ་ལེགས་པ་ཞིག་བྱས་སོ་སྙམ་ནས། དེ་སེམས་ལ་འགྱོད་པ་སྐྱེས་པས་དེ་གར་སྐྱེས་
ཀྱང་ཐོག་མ་ཕྱུག་པོར་ནི་གྱུར་ན། ཕྱིས་སེམས་འགྱོད་པ་སྐྱེས་པ་དེས་ཐ་མར་དབུལ་པོར་གྱུར་ཏོ། །དེ་ཕྱིས་རྒྱལ་པོའི་ཁབ་ཏུ་སྐྱེས་ཏེ། སྐྱེ་བ་ན་དེའི་མ་ཚེ་འཕོས་པར་གྱུར་པ་དང་། འདི་སྐྱེས་པས་མ་ཡང་ཚེ་འཕོས་ཏེ། འདི་ནི་སྐར་མ་སྣྲུབས་ལས་སྐྱེས་པས་རིགས་ཕུང་
བར་བྱེད་པར་འགྱུར་ཏེ། འདི་ནི་བཀྲ་མི་ཤིས་སོ་ཞེས་ནས་མ་དང་ལྷན་ཅིག་ཏུ་དུར་ཁྲོད་དུ་བོར་རོ། །དེ་ན་ཡང་དེའི་བསོད་ནམས་ཀྱི་མཐུས་མའི་ནུ་མ་ཡ་གཅིག་ནས་འོ་མ་བྱུང་སྟེ། དེས་གསོས་ནས་ཆེར་སྐྱེས་པ་དང་། བཅོམ་ལྡན་འདས་ཀྱི་གན་དུ་སོང་སྟེ་རབ་ཏུ་བྱུང་ངོ་། །དེ་ལྟར་
དེས་སྔར་དད་པ་སྐྱེས་ཏེ་བ་བཞོན་ཕུལ་ལ་ཕྱིས་འགྱོད་པར་གྱུར་པས་ལས་དེའི་འབྲས་བུས་སྔར་སེམས་དད་པས་ཕུལ་བས་ནི་དེ་ཉིད་དེའི་ཐར་པའི་ས་བོན་དུ་གྱུར་ཏོ། །ཕྱིས་འགྱོད་པས་ནི་ཐ་མ་དབུལ་པོར་གྱུར་པ་ལྟ་བུ་སྟེ། འདི་ནི་ལས་གང་དང་ལྡན་ན་གང་ཟག་སྔར་བདེ་ལ་ཕྱིས་
སྡུག་བསྔལ་བར་འགྱུར་བའོ། །དེ་ལ་ལས་གང་དང་ལྡན་ན་གང་ཟག་སྔར་སྡུག་བསྔལ་ལ་ཕྱིས་བདེ་བར་འགྱུར་བའི་ལས་ཡོད་དེ། །དེ་གང་ཞེ་ན། བཤད་པར་བྱ་སྟེ། འདི་ལ་ཁ་ཅིག་སྦྱིན་པ་བྱེད་དུ་བཅུག་ན་ཁ་སྲ་བ་ལས་ཁས་ལེན་ཅིང་། །ཁ་སྲ་བཞིན་དུ་སྦྱིན་པ་བྱེད་ལ།

སྦྱིན་པ་བྱིན་པའི་འོག་ཏུ་སེམས་དགའ་བ་སྐྱེད་དོ། །དེ་ནི་མིའི་ནང་དུ་སྐྱེས་ན་དབུལ་པོའི་རིགས་སུ་སྐྱེས་ཏེ་ཕྱིས་ལོངས་སྤྱོད་དེ་དག་འཕེལ་བར་འགྱུར་རོ། །དེ་བསླངས་ན་ཁ་སྲ་བར་ཁས་ལེན་པ་དང་། ཁ་སྲ་བཞིན་དུ་སྦྱིན་པ་བྱེད་ནས། ཕྱིས་དགའ་བར་གྱུར་པ་དེའི་རྒྱུས།
སྔོན་དབུལ་པོར་གྱུར་ལ་ཕྱིས་ནོར་མང་པོར་གྱུར་པ་ཡིན་ནོ། །འདི་ནི་གང་ཟག་ལས་གང་དང་ལྡན་ན། སྔར་སྡུག་བསྔལ་བར་གྱུར་ལ་ཕྱིས་བདེ་བ་ཡིན་ནོ། །དེ་ལ་གང་ཟག་ལས་གང་དང་ལྡན་ན། སྔར་ཡང་བདེ་ལ་ཕྱིས་ཀྱང་བདེ་བར་འགྱུར་བའི་ལས་ཡོད་དེ། དེ་གང་ཞེ་ན།
ཁ་ཅིག་བསླངས་མ་ཐག་ཏུ་དགའ་ཞིང་ཁས་ལེན། དགའ་བཞིན་དུ་སྦྱིན་པ་བྱིན་ནས་ཀྱང་དགའ་བར་འགྱུར་རོ། །དེ་ནས་མིའི་ནང་དུ་སྐྱེས་ན་ཕྱུག་ཅིང་ལོངས་སྤྱོད་ཆེ་བའི་རིགས་སུ་སྐྱེའོ། །འདི་ནི་གང་ཟག་ལས་གང་དང་ལྡན་ན་སྔར་ཡང་བདེ་ལ་ཕྱིས་ཀྱང་བདེ་བར་འགྱུར་
བའོ། །དེ་ལ་ལས་གང་དང་ལྡན་ན། གང་ཟག་སྔར་ཡང་སྡུག་བསྔལ་བར་གྱུར་ལ་ཕྱིས་ཀྱང་སྡུག་བསྔལ་བར་འགྱུར་བའི་ལས་ཡོད་དེ། དེ་གང་ཞེ་ན། འདི་ལ་གང་ཟག་ལ་ལ་དགེ་བའི་བཤེས་གཉེན་དང་བྲལ་བར་གྱུར་ཏེ། དེ་སུས་ཀྱང་སྦྱིན་པ་བྱེད་དུ་མ་བཅུག་དེས་ཀྱང་སྦྱིན་པ་ཅི་
ཡང་མ་བྱིན། དེས་སྡིག་པའི་ལས་ཀྱང་ཅི་ཡང་མ་བྱས་ཤིང་མ་བསགས་པ་ཡིན་ཏེ། གང་ཟག་དེ་གང་གི་ཚེ་མི་རྣམས་ཀྱི་ནང་དུ་སྐྱེས་ན། དབུལ་པོ་བཟའ་བ་དང་བཏུང་བ་ཉུང་བ་སྡུག་བསྔལ་བས་འཚོ་བའི་རིགས་སུ་སྐྱེ་བར་གྱུར་ཏེ། དེ་དེར་སྐྱེས་ནས་ཚེགས་ཆེན་པོས་
བཟའ་བ་དང་བགོ་བ་རྙེད་པར་འགྱུར་ལ། དེའི་ལོངས་སྤྱོད་དེ་དག་ཕྱིས་ཀྱང་མ་འཕེལ་བ་སྟེ། འདི་ལ་གང་ཟག་ལས་གང་དང་ལྡན་ན་སྔར་ཡང་སྡུག་བསྔལ་ལ་ཕྱིས་ཀྱང་སྡུག་བསྔལ་བར་འགྱུར་བའོ། །དེ་ལ་གང་ཟག་ལས་གང་དང་ལྡན་ན། ཕྱུག་ཅིང་སེར་སྣ་ཅན་དུ་
འགྱུར་བའི་ལས་ཡོད་དེ། དེ་གང་ཞེ་ན། འདི་གང་ཟག་ལ་ལས་ཚུལ་ཁྲིམས་དང་ལྡན་པ་སྦྱིན་གནས་སུ་གྱུར་པ་དག་ལ་སྦྱིན་པ་ཅུང་ཟད་ཙམ་ཡང་བྱིན་པ་ཡིན་ཏེ། དེ་ཡང་སྦྱིན་པ་ལ་སེམས་གོམས་པ་ནི་མ་ཡིན་ནོ། །དེ་ནས་མིའི་ནང་དུ་སྐྱེ་བ་ན། སྦྱིན་པ་དེའི་མཐུས་ཕྱུག་ཅིང་

ལོངས་སྤྱོད་ཆེ་བའི་རིགས་སུ་སྐྱེ་སྟེ། ཡང་གཏོང་བ་ལ་སེམས་གོམས་པ་མ་ཡིན་པ་སྟེ། ལས་དེས་ཕྱུག་ལ་སེར་སྣ་ཅན་དུ་འགྱུར་རོ། །གང་ཟག་འདི་ནི་ལས་གང་དང་ལྡན་ན་ཕྱུག་ཅིང་སེར་སྣ་ཅན་དུ་འགྱུར་བའོ། །དེ་ལ་གང་ཟག་ལས་གང་དང་
ལྡན་ན་དབུལ་ཞིང་གཏོང་ཕོད་པར་འགྱུར་བའི་ལས་ཡོད་དེ། དེ་གང་ཞེ་ན། འདི་ལ་གང་ཟག་ཁ་ཅིག་དུད་འགྲོ་དང་མི་ལོག་པའི་ངང་ཚུལ་ཅན་ལ་སྦྱིན་པ་མང་དུ་བྱིན་པ་ཡིན་ཏེ། དེ་ནམ་མིའི་ནང་དུ་སྐྱེས་ན་ཡང་དབུལ་ཞིང་གཏོང་ཕོད་པར་འགྱུར་བ་ནི་སྔོན་སྦྱིན་པ་ལ་གོམས་
པས་དབུལ་ཡང་གཏོང་ཕོད་པར་འགྱུར་རོ། །འདི་ནི་གང་ཟག་ལས་གང་དང་ལྡན་ན་དབུལ་ཞིང་གཏོང་ཕོད་པར་འགྱུར་བའོ། །དེ་ལ་གང་ཟག་ལས་གང་དང་ལྡན་ན། ཕྱུག་ཅིང་གཏོང་ཕོད་པར་འགྱུར་བའི་ལས་ཡོད་དེ། དེ་གང་ཞེ་ན། འདི་ལ་གང་ཟག་ཁ་ཅིག་
གིས་ཚུལ་ཁྲིམས་དང་ལྡན་པ་སྦྱིན་གནས་སུ་གྱུར་པ་དག་ལ་སྦྱིན་པ་མང་དུ་བྱས་པ་ཡིན། སྦྱིན་པ་ལ་སེམས་གོམས་པ་ཡིན་ཏེ། དེ་ལས་དེས་མིའི་ནང་དུ་སྐྱེས་ན་ཡང་ཕྱུག་ཅིང་ལོངས་སྤྱོད་ཆེ་བར་འགྱུར་ཏེ། དཔེར་ན་ཁྱིམ་བདག་མགོན་མེད་པ་ལ་ཟས་བྱིན་པ་ལྟ་བུའོ། །
དེས་ཡང་དག་པར་རྫོགས་པའི་སངས་རྒྱས་ལོག་པར་དད་སེལ་ལ་རྒྱལ་བུ་རྒྱལ་བྱེད་ཀྱི་ཚལ་ཕུལ། གཙུག་ལག་ཁང་བརྩིགས་པ། དེ་བཞིན་དུ་ཡང་དག་པར་རྫོགས་པའི་སངས་རྒྱས་གསེར་ཐུབ་དང་འོད་སྲུང་དང་དོན་ཐམས་ཅད་གྲུབ་པ་དང་བྱམས་པ་ལ་གསེར་གྱི་ཡག་
མག་བཏིང་བ་ཕུལ་བ་ལྟ་བུ་སྟེ། འདི་ནི་གང་ཟག་ལས་གང་དང་ལྡན་པ་ཕྱུག་ཅིང་གཏོང་ཕོད་པར་འགྱུར་བའོ། །དེ་ལ་གང་ཟག་ལ་ལ་ཚེ་ཟད་ལ་ལས་མ་ཟད་པ་ཡོད་དེ། དེ་གང་ཞེ་ན། གང་ཟག་གང་སེམས་ཅན་དམྱལ་བ་ལས་ཚེ་འཕོས་ཏེ་སེམས་ཅན་དམྱལ་བ་
ཉིད་དུ་སྐྱེ་བ་དང་། དུད་འགྲོ་ལས་ཚེ་འཕོས་ཏེ་དུད་འགྲོ་ཉིད་དུ་སྐྱེ་བ་དང་། གཤིན་རྗེའི་འཇིག་རྟེན་ལས་ཚེ་འཕོས་ཏེ་གཤིན་རྗེའི་འཇིག་རྟེན་ཉིད་དུ་སྐྱེ་བ་དང་། ལྷ་ལས་ཚེ་འཕོས་ཏེ་ལྷ་ཉིད་དུ་སྐྱེ་བ་དང་། བྲམ་ཟེ་བེ་ཤྱ་ཀ་ར་ཡང་དང་ཡང་ཚེ་འཕོས་ཤིང་སྤྲེའུར་སྐྱེས་

པ་དང་། སྔར་སྨོས་པའི་ཁྱིམ་བདག་ཡང་དང་ཡང་ཕྱུགས་སུ་སྐྱེས་པ་བཞིན་ནོ། །མཉན་དུ་ཡོད་པ་ན་ཁྱིམ་བདག་དབུལ་པོ་གཅིག་ཚེ་འཕོས་པ་ནས། དེའི་ཁྱིམ་སྒོ་ན་གླང་སྒལ་པ་ཅན་ཞིག་ཡོད་དོ། །ཁྱིམ་བདག་དེ་སེམས་ཁྱིམ་ལ་ཆགས་པས་ཚེ་འཕོས་ནས་
གླང་དེའི་སྒལ་པའི་སྲིན་བུར་སྐྱེས་ཏེ། སྐྱེས་མ་ཐག་ཏུ་བྱ་རོག་གིས་ཟོས་པ་དང་། ཡང་དེ་ཉིད་དུ་སྲིན་བུར་སྐྱེས་སོ། །དེ་ལྟར་དེ་ཉིད་དུ་ཉིན་གཅིག་ལ་ལན་བདུན་ཚེ་འཕོས་ཤིང་སྐྱེས་པ་ལྟ་བུ་དང་། འཕགས་པ་མཽད་གལ་གྱི་བུ་ཆེན་པོ་ཡུལ་མ་ག་དྷཱར་བསོད་སྙོམས་
ལ་སོང་སོང་བ་ལས་ཁྱིམ་ཞིག་གི་སྒོའི་ནང་དུ་ཕྱིན་པ་དང་། ཁྱིམ་དེ་ན་ཁྱིམ་བདག་བུད་མེད་དང་བཅས་པ་ཞིག་པང་ན་བུ་ཐོགས་ཏེ། ཉ་ཤའི་བྱན་དང་བཅས་པའི་ཁ་ཟས་ཟ་ཞིང་མདུན་ན་ཁྱི་ནག་མོ་ཞིག་འདུག་པ་དེ་ལ་ཉའི་རུས་པ་འདོར་རོ། །དེ་ནས་ཁྱིམ་བདག་དེས་མཽད་
གལ་གྱི་བུ་ཆེན་པོ་མཐོང་ནས། འཕགས་པ་འདི་ན་སློང་བ་ལ་སྦྱིན་པ་སུ་ཡང་མ་མཆིས་ཀྱིས་སླར་བཞུད་ཅིག་ཅེས་སྨྲས་ཏེ་སླར་ལོག་པ་དང་། ཁྱིམ་དེའི་སྒོ་ན་ཡུལ་གཞན་ནས་འོངས་པའི་སྐྱེས་བུ་མཁས་པ་ཞིག་སྔ་ན་འདུག་འདུག་པ་དེས། དེས་དེ་མཐོང་ནས་ངོ་
མཚར་དུ་གྱུར་ཏེ། ཀྱེ་མ་བཙུན་པ་འདི་ནི་རྫུ་འཕྲུལ་ཅན་གྱི་མཆོག་སྟེ། ཀླུའི་རྒྱལ་པོ་དགའ་བོ་དང་ཉེར་དགའ་བོ་ནི་བཏུལ། ལྷའི་ཕོ་བྲང་རྣམ་པར་རྒྱལ་བ་ཡང་ཕྱག་གཡོན་པའི་མཐེ་བོས་བསྒུལ་ཏེ་བརྒྱ་བྱིན་ཡང་ངོ་མཚར་དུ་གྱུར། སྟོང་གསུམ་གྱི་སྟོང་ཆེན་པོའི་
འཇིག་རྟེན་གྱི་ཁམས་ཀྱང་མིག་བཙུམས་པ་ཙམ་གྱིས་བསྐོར་བ་ལགས་ན། བསོད་སྙོམས་མ་གསོལ་བར་སླར་བཏང་བ་ནི་ངོ་མཚར་ཆེའོ་ཞེས་བྱས་པ་དང་། དེ་ནས་གནས་བརྟན་གྱིས་དེ་དག་སྐྱོ་བར་བྱ་བའི་ཕྱིར་སྨྲས་པ། ཁྱེའུ་ངོ་མཚར་མི་ཆེའོ། །མི་དེས་
སྨྲས་པ་འོ་ན་ངོ་མཚར་ཆེན་པོ་ཅི་མཆིས། དེས་སྨྲས་པ་འདི་ན་ཁྱིམ་བདག་ཉ་ཤའི་བྱན་དང་བཅས་པའི་ཁ་ཟས་ཟ་བ་དེ། ཉ་དེ་ནི་ཁྱིམ་བདག་དེའི་ཕ་ཡིན་ཏེ། འདི་ནི་ཁྱིམ་གྱི་རྒྱབ་ན་རྫིང་ཉ་མང་པོ་ཞིག་ཡོད་པ་ནས་ཉ་རྣམས་བཅུས་ཤིང་བཅུས་ཤིང་ཟོས་ཏེ། མི་དེ་ཚེ་

འཕོས་པ་དང་ཉ་དེ་དག་ཉིད་ཀྱི་ནང་དུ་སྐྱེས་སོ། །དེའི་བུ་འདིས་ཀྱང་ལན་བརྒྱ་ཕྲག་དུ་མར་ཉ་དེ་བཅུས་ཤིང་བཅུས་ཤིང་ཟོས་ཏེ། འདི་ཉིད་དུ་ཡང་དང་ཡང་དུ་ལན་དུ་མར་སྐྱེས་སོ། །ཁྱི་མོ་འདི་ནི་ཁྱིམ་བདག་དེའི་མ་ཡིན་ཏེ། འདི་ཡང་ཆགས་པའི་ཟིལ་གྱིས་
ནོན་པས་སུ་ལ་ཡང་སྦྱིན་པ་ཡང་མ་བྱིན། ཚུལ་ཁྲིམས་ཀྱང་མ་བསྲུངས་པར་གྱི་ནར་རིགས་དང་རྒྱུད་ཀྱི་དོན་དུ་རྫས་རྣམས་བསྲུངས་ཏེ། དེ་ཡང་ཁྱིམ་འདི་ཉིད་ལ་སེམས་ཆགས་བཞིན་དུ་ཚེ་འཕོས་ནས་ཁྱི་མོ་དེར་སྐྱེས་ཏེ། དེ་ནས་ཚེ་འཕོས་ནས་ཀྱང་ཡང་དང་ཡང་དུ་འདི་ཉིད་དུ་སྐྱེས་
ཏེ། ཁྱིམ་འདིར་མི་གཞན་ཞུགས་སུ་དོགས་ནས་མཚན་ཐོག་ཐག་ཀྱང་ཁྱིམ་ཕྱི་སྐོར་རོ། །མི་དེའི་པང་ན་འདུག་པའི་བུ་དེ་ཡང་དེའི་ཆུང་མའི་བྱི་བོ་ཡིན་ཏེ། ཁྱིམ་བདག་འདིས་ཆུང་མ་མི་གཞན་དང་ཉལ་བར་ཐོས་ནས། ཁྱིམ་བདག་དེ་གྲོང་གཞན་དུ་འགྲོ་བ་ལྟར་བྱས་ཏེ་ཁྱིམ་
ནས་ཕྱིར་བྱུང་བ་དང་། བུད་མེད་དེ་ཡང་མི་གཞན་དང་ཉལ་བ་ལ་ཁྱིམ་བདག་འདི་སླར་ལྡོག་སྟེ་མི་དེ་བསད་དོ། །དེ་ཡང་བུད་མེད་དེ་ལ་ཆགས་ཤིང་སྡུག་པའི་རྒྱུས་བུད་མེད་འདིའི་རུམ་དུ་སྐྱེས་སོ། །ཁྱེའུ་ལྟོས། ཕ་གང་ཡིན་པ་དེའི་ཤ་ནི་ཟ། མ་གང་ཡིན་པ་དེ་ལ་ནི་ཉའི་རུས་པ་
དང་གྲ་མ་འདོར། བྱི་བོ་བྱེད་བྱེད་པའི་དགྲ་བོ་ཁྲོས་པས་བསད་པ་གང་ཡིན་པ་དེ་ནི་པང་དུ་བླངས་སོ། །དེ་ལྟ་བས་ན་འཁོར་བའི་ཉེས་པ་འདི་ལ་སྐྱོ་བར་བྱ་བའི་རིགས་ཏེ་ངོ་མཚར་ནི་འདི་ཆེའོ། །དེ་ནས་དགེ་སློང་མཽད་གལ་གྱི་བུ་དེས་ཕྱི་མའི་སྐྱེ་བོ་ཕལ་པོ་ཆེ་རྣམས་སྐྱོ་བར་བྱ་བའི་
ཕྱིར་དོན་འདི་ཉིད་ཚིགས་སུ་བཅད་པས་བསྟན་པ། དེ་ཡི་ཕ་ཡི་ཤ་ཟ་ཞིང་། །མ་ལ་རུས་པ་གྲ་མ་འདོར། །ཆུང་མའི་བྱི་བོ་གསོ་བྱེད་པ། །གཏི་མུག་དང་ནི་ཆགས་པས་བསྒྲིབས། །གང་ཟག་འདི་ནི་ཚེ་ཟད་ལ་ལས་མ་ཟད་པའོ། །དེ་ལ་གང་ཟག་ལ་ལ་ལས་ཟད་ལ་ཚེ་
མ་ཟད་པ་ཡོད་དེ། དེ་གང་ཞེ་ན། གང་ཟག་སྔར་བདེ་བར་གྱུར་ལ་ཕྱིས་སྡུག་བསྔལ་བར་གྱུར་པ་དང་། སྔར་སྡུག་བསྔལ་བར་གྱུར་ལ་ཕྱིས་བདེ་བར་གྱུར་པ་སྟེ། གང་ཟག་དེ་ནི་ལས་ཟད་ལ་ཚེ་མ་ཟད་པའོ། །དེ་ལ་གང་ཟག་ལས་ཀྱང་ཟད་ལ་ཚེ་ཡང་ཟད་པ་ཡོད་དེ། དེ་

གང་ཞེ་ན། གང་ཟག་གང་སེམས་ཅན་དམྱལ་བ་ནས་ཚེ་འཕོས་ཏེ་དུད་འགྲོར་སྐྱེས་པ་དང་། དུད་འགྲོ་ལས་ཚེ་འཕོས་ཏེ་ཡི་དགས་སུ་སྐྱེ་བ་དང་། ཡི་དགས་ལས་ཚེ་འཕོས་ཏེ་ལྷ་མ་ཡིན་དུ་སྐྱེ་བ་དང་། ལྷ་མ་ཡིན་ལས་ཚེ་འཕོས་ཏེ་མིའི་ནང་དུ་སྐྱེ་བ་དང་། མི་ལས་ཚེ་
འཕོས་ཏེ་ལྷའི་ནང་དུ་སྐྱེ་བ་ལྟ་བུ་སྟེ། གང་ཟག་དེ་ནི་ཚེ་ཡང་ཟད་ལ་ལས་ཀྱང་ཟད་པའོ། །དེ་ལ་གང་ཟག་གང་ཚེ་ཡང་མ་ཟད་ཅིང་ལས་ཀྱང་མ་ཟད་ལ། དེའི་ཉོན་མོངས་པ་ཟད་པ་ཡོད་དེ། དེ་གང་ཞེ་ན། རྒྱུན་དུ་ཞུགས་པ་དང་ལན་ཅིག་ཕྱིར་འོང་བ་དང་ཕྱིར་མི་འོང་བ་དང་དགྲ་བཅོམ་
པ་ལྟ་བུ་སྟེ། གང་ཟག་དེ་ནི་ཚེ་ཡང་མ་ཟད་ཅིང་ལས་ཀྱང་མ་ཟད་ལ་དེའི་ཉོན་མོངས་པ་ཟད་པ་ཡིན་ནོ། །དེ་ལ་གང་ཟག་ལུས་བདེ་ལ་སེམས་མི་བདེ་བ་ཡོད་དེ། དེ་གང་ཞེ་ན། སོ་སོའི་སྐྱེ་བོ་ཕལ་པ་བསོད་ནམས་བྱས་པ་ནི་ལུས་བདེ་ལ་སེམས་མི་བདེ་སྟེ། དཔེར་ན་ཡུལ་མ་ག་དྷའི་བྲམ་
ཟེ་དང་ཁྱིམ་བདག་དང་རྒྱལ་པོ་མན་ཏ་ལ་སོགས་པ་ལྟ་བུ་སྟེ། གང་ཟག་འདི་ནི་ལུས་བདེ་ལ་སེམས་མི་བདེ་བའོ། །དེ་ལ་གང་ཟག་ལ་ལ་སེམས་བདེ་ལ་ལུས་མི་བདེ་བ་ཡོད་དེ། དེ་གང་ཞེ་ན། དཔེར་ན་དགྲ་བཅོམ་པ་ཀ་ར་མ་ཤ་ལྟ་བུ་ནི། སེམས་བདེ་ལ་ལུས་མི་བདེ་བ་ཡིན་ནོ། །འདི་ལྟ་
སྟེ་འཕགས་པ་ཤོ་ནོ་ཏ་རས་ཚེ་རབས་སྔ་མ་ལ་རང་སངས་རྒྱས་ཁྲུས་བྱེད་པ་ལ་བ་ལང་གི་ལྕི་བ་དང་ཀ་པི་ཏ་སུ་ཀ་ར་བསྲེགས་ཏེ་བཀྲུ་བའི་ཕྱིར་བྱིན་པས་དེའི་ལས་ཀྱི་རྣམ་པར་སྨིན་པས་ལུས་མཛེས་གང་བར་མཐོང་ངོ་། །འདི་ལྟར་ཚིགས་སུ་བཅད་པས་སྨྲས་པ། ལས་ནི་ཤིན་ཏུ་སྟོབས་
ཆེ་སྟེ། །རྡོ་རྗེ་ལྟ་བུའི་ལས་རྣམས་ལས། །གང་ལ་བདག་གི་དབང་བྱས་ཀྱང་། །སྡུག་བསྔལ་བ་ཡི་ལས་རྣམས་མྱོང་། །ཞེས་བྱ་བ་ལྟ་བུ་དང་། འཛང་ག་ཀ་ཤས། རང་སངས་རྒྱས་ཤིག་ཡུལ་བཱ་རཱ་ཎ་སཱིར་བྱོན་པ་ལ། ཟན་སྤྱད་དེ་སྦྱིན་ནོ་སྙམ་ནས། དེ་ལ་རིང་ཤིག་ལོན་ཏེ་དུས་ཡོལ་
བར་ཟས་བྱིན་ནོ། །དེ་ཡང་ལས་དེས་ཚེ་ཕྱི་མ་ལ་འཕགས་པར་གྱུར་ཀྱང་སྔ་དྲོ་བསོད་སྙོམས་བསླངས་ན། དུས་ཡོལ་ལ་ཐུག་པ་ན་ཟན་རྙེད་པ་ལྟ་བུ་སྟེ། གང་ཟག་དེ་ལྟ་བུ་ནི་སེམས་བདེ་ལ་ལུས་མི་བདེ་བའོ། །གང་ཟག་ལ་ལ་ལུས་ཀྱང་བདེ་ལ་སེམས་ཀྱང་བདེ་བ་ཡོད་དེ། དེ་གང་ཞེ་ན།

འདི་ལ་དགྲ་བཅོམ་པ་ཟག་པ་ཟད་པ་བསོད་ནམས་བྱས་པ་ཡིན་ཏེ། འདི་ལྟ་སྟེ་དཔེར་ན་རྒྱལ་པོ་ཆོས་གྲགས་ཀྱི་བུ་ལ་ཀུ་བ་ལྟ་བུ་སེང་གེའི་སྒྲ་སྒྲོག་ན། དེ་ནི་རབ་ཏུ་བྱུང་ནས་ལོ་བརྒྱད་ཅུ་ལོན་ཏེ། ནམ་ཡང་ཆུང་ངུ་ན་ཀླད་པ་ན་བ་ཙམ་ཡང་མ་མྱོང་ངོ་ཞེས་ཟེར་བ་ལྟ་
བུ་སྟེ། དེ་ཡང་སྔོན་ཡུལ་བཱ་རཱ་ཎ་སཱིར་སྤོས་འཚོང་ཞིག་ཏུ་གྱུར་ན། སངས་རྒྱས་ལོག་པར་དད་སེལ་ཉན་ཐོས་ཀྱི་དགེ་འདུན་དང་བཅས་པ་ལ་ན་བའི་གསོས་སྨན་ཕུལ་བ་དང་དགྲ་བཅོམ་པ་ལ་ཨ་རུ་ར་ཕུལ་བའི་ལས་ཀྱི་རྣམ་པར་སྨིན་པ་དེས་ནད་མེད་ཅིང་བདེ་བའི་མཆོག་ཐོབ་བོ་
ཞེས་གསུངས་པ་ལྟ་བུ་སྟེ། གང་ཟག་དེ་ནི་ལུས་ཀྱང་བདེ་ལ་སེམས་ཀྱང་བདེ་བའོ། །ལས་གང་དང་ལྡན་ན། གང་ཟག་ལུས་ཀྱང་མི་བདེ་ལ་སེམས་ཀྱང་མི་བདེ་བ་ཡོད་དེ། དེ་གང་ཞེ་ན། འདི་ལ་སོ་སོའི་སྐྱེ་བོ་བསོད་ནམས་མ་བྱས་པ་དག་རིགས་དང་རྒྱུད་ཀྱི་གོས་དང་ཟས་སྐོམ་
དང་བྲལ་བ་གཞན་གྱི་ཁྱིམ་རྒྱུ་བ་དག་ཡོད་དེ། འདི་ལྟ་སྟེ་ནད་མཛེ་དང་ལུད་པ་དང་རིམས་དང་ཤུ་བ་དང་གཡན་པ་ལ་སོགས་པའི་ནད་རྣམས་ཀྱིས་ཡོངས་སུ་གཟིར་ཅིང་རྐང་ལག་མེད་པ་མིག་དང་བྲལ་བ་དག་ཡོད་དེ། གང་ཟག་འདི་ནི་ལུས་ཀྱང་མི་བདེ་ལ་སེམས་ཀྱང་མི་བདེ་བ་ཡིན་
ནོ། །དེ་ལ་གང་ཟག་ལས་གང་དང་ལྡན་ན་ངན་སོང་རྣམས་སུ་སྐྱེས་ཀྱང་གཟུགས་བཟང་ཞིང་མཛེས་ལ་ལུས་སྣུམ་ཞིང་མདོག་འཚེར་ལ་མིག་ཏུ་སྡུག་ཅིང་བལྟ་ན་དགའ་བར་འགྱུར་བའི་ལས་ཡོད་དེ། དེ་གང་ཞེ་ན། གང་ཟག་གང་འདོད་ཆགས་ལས་བྱུང་བའི་ངང་ཚུལ་ངན་པ་དང་ལྡན་
པ་དེ་ནི་ངན་སོང་རྣམས་སུ་སྐྱེ་སྟེ། དཔེར་ན་རྨ་བྱ་དང་ནེ་ཙོ་དང་བྱ་ཤ་རི་ཀ་དང་བྱ་ཀཱ་རན་ཌ་བ་དང་། ངུར་པ་ལ་སོགས་པ་ལྟ་བུ་སྟེ། འདི་ནི་གང་ཟག་ལས་གང་དང་ལྡན་ན། ངན་སོང་རྣམས་སུ་སྐྱེས་ཀྱང་གཟུགས་བཟང་ཞིང་མཛེས་ལ་ལུས་སྣུམ་ཞིང་མདོག་འཚེར་བ་མིག་ཏུ་
སྡུག་ཅིང་བལྟ་ན་དགའ་བར་འགྱུར་བའོ། །དེ་ལ་གང་ཟག་ལས་གང་དང་ལྡན་ན། ངན་སོང་དུ་སྐྱེས་ལ་མདོག་མི་བཟང་ཞིང་ལུས་རྩུབ་པ་བལྟ་ན་མི་སྡུག་པར་འགྱུར་བའི་ལས་ཡོད་དེ། དེ་གང་ཞེ་ན། གང་ཟག་དེ་ནི་ཞེ་སྡང་ལས་བྱུང་བའི་ངང་ཚུལ་ངན་པ་དང་ལྡན་པས་ངན་སོང་

རྣམས་སུ་སྐྱེས་པ་སྟེ། འདི་ལྟ་སྟེ་སེང་གེ་དང་སྟག་དང་བྱ་རོག་དང་ཝ་དང་དྲེད་མོ་དང་སྦྲུལ་ནག་པོ་དང་ཡི་དགས་དང་ཤ་ཟ་ལ་སོགས་པ་ལྟ་བུའོ། །འདི་ནི་གང་ཟག་ལས་གང་དང་ལྡན་ན། ངན་སོང་རྣམས་སུ་སྐྱེས་ནས་མདོག་མི་བཟང་ཞིང་ལུས་རྩུབ་ལ་བལྟ་ན་མི་སྡུག་པའི་
ལས་ཡིན་ནོ། །གང་ཟག་ལས་གང་དང་ལྡན་ན། ངན་སོང་རྣམས་སུ་སྐྱེས་ནས་ལྕེའི་དབང་པོ་དྲི་ང་བར་འགྱུར་བ་ཡོད་དེ། དེ་གང་ཞེ་ན། གང་ཟག་དེ་ནི་གཏི་མུག་ལས་བྱུང་བའི་ངང་ཚུལ་ངན་པ་དང་ལྡན་པས་ངན་སོང་རྣམས་སུ་སྐྱེས་པ་སྟེ། འདི་ལྟ་སྟེ་སྲོག་ཆགས་ཚུ་ཚུན་
ད་རི་དང་སྲིན་བུ་དང་སྦྲུལ་དང་ཤིག་དང་། སྦྲང་མ་དང་མང་ཀུན་ལ་སོགས་པ་དང་། ལུས་ལ་སྲིན་བུའི་རིགས་ཉི་ཤུ་ཡོད་པ་ལྟ་བུ་སྟེ། འདི་ནི་གང་ཟག་ལས་གང་དང་ལྡན་ན། ངན་སོང་རྣམས་སུ་སྐྱེས་ནས་ལྕེའི་དབང་པོ་དྲི་ང་ཞིང་དབང་པོ་མི་གསལ་བར་འགྱུར་བའི་ལས་སོ། །
མི་དགེ་བའི་ལས་ཀྱི་ལམ་བཅུ་སྟེ། བཅུ་གང་ཞེ་ན། ལུས་ཀྱི་ལས་རྣམ་གསུམ་དང་། ངག་གི་ལས་རྣམ་བཞི་དང་། ཡིད་ཀྱི་ལས་རྣམ་གསུམ་སྟེ། མི་དགེ་བའི་ལས་ཀྱི་ལམ་བཅུ་པོ་འདི་དག་གི་རྣམ་པར་སྨིན་པས་ཕྱི་རོལ་གྱི་དངོས་པོ་བཅུ་རྒུད་པར་འགྱུར་ཏེ། སྲོག་གཅོད་
པ་མི་དགེ་བའི་ལས་ཀྱི་རྣམ་པར་སྨིན་པས་སའི་མདངས་དང་གཟི་བྱིན་ནུབ་པར་འགྱུར་རོ། །ལས་དེ་ཉིད་ཀྱི་རྣམ་པར་སྨིན་པས་ཚེ་ཐུང་བར་འགྱུར་རོ། །མ་བྱིན་པར་ལེན་པ་མི་དགེ་བའི་ལས་ཀྱི་རྣམ་པར་སྨིན་པས། ས་ལ་སེར་བ་དང་བྱ་དང་བ་ལང་དང་བྱི་བ་དང་སྲིན་བུ་ལ་
སོགས་པ་ལོ་ཐོག་ལ་ཟ་བ་རྣམས་འབྱུང་ངོ་། །ལས་དེ་ཉིད་ཀྱི་རྣམ་པར་སྨིན་པ་ལས་ལོངས་སྤྱོད་འཁྱམ་པར་འགྱུར་རོ། །འདོད་པ་ལ་ལོག་པར་གཡེམ་པ་མི་དགེ་བའི་ལས་ཀྱི་རྣམ་པར་སྨིན་པས། ས་ལ་རྩྭ་དྲི་ང་བ་དང་ནགས་ཚལ་དྲི་ང་བ་དག་སྐྱེ་བར་འགྱུར་རོ། །
ལས་དེ་ཉིད་ཀྱི་རྣམ་པར་སྨིན་པས་ལོ་ལེགས་པའི་ཁྱིམ་ན་གནས་པའི་རྟོག་པ་བརྗོད་པ། ཀ་ཤི་རྒྱལ་པོ་དགའ་བས་ལྷ་འོངས་པ་ལ། ནག་པོ་འཆར་ལྡན་གྱིས་ཚེ་རབས་སྔ་མའི་རྟོགས་པ་བརྗོད་པ་སྨོས་པ་རྣམས་བྱའོ། །བརྫུན་སྨྲ་བའི་མི་དགེ་བའི་ལས་ཀྱི་རྣམ་པར་སྨིན་

པས་ཁ་ན་བ་དང་ལྐོག་མ་ན་བ་དང་ཁ་མནམ་པ་ལ་སོགས་པར་འགྱུར་རོ། །ལས་དེ་ཉིད་ཀྱི་རྣམ་པར་སྨིན་པས། མི་བདེན་པས་བསླུས་པར་འགྱུར་བའོ། །ཕྲ་མ་ཟེར་བའི་མི་དགེ་བའི་ལས་ཀྱི་རྣམ་པར་སྨིན་པས། ས་ལ་གསེག་མ་དང་གྱོ་མོ་ལ་སོགས་པ་
རེག་ན་མི་བདེ་བ་རྣམས་འབྱུང་ངོ་། །ལས་དེ་ཉིད་ཀྱི་རྣམ་པར་སྨིན་པས། གཡོག་འཁོར་དབྱེར་རུང་བར་འགྱུར་རོ། །ཚིག་རྩུབ་པོ་མི་དགེ་བའི་ལས་ཀྱི་རྣམ་པར་སྨིན་པས། ས་ལ་རྡུལ་དང་ཉལ་ཉིལ་གྱི་རླུང་ལྡང་ཞིང་ཆར་ཆེན་པོ་ལ་སོགས་པ་འབབ་བོ། །ལས་དེ་ཉིད་ཀྱི་
རྣམ་པར་སྨིན་པས། ཡིད་དུ་མི་འོང་བའི་སྒྲ་ཐོས་པ་དང་། ཡིད་དུ་མི་འོང་བ་མཐོང་བར་འགྱུར་རོ། །ཚིག་ཀྱལ་པར་སྨྲ་བ་མི་དགེ་བའི་ལས་ཀྱི་རྣམ་པར་སྨིན་པས། ས་མཐོ་དམན་དང་། སྨན་ལྗོངས་དང་། ངམ་གྲོག་དང་གཡང་ས་ལ་སོགས་པ་འབྱུང་ངོ་། །ལས་དེ་
ཉིད་ཀྱི་རྣམ་པར་སྨིན་པས། ཚིག་མི་བཙུན་པར་འགྱུར་རོ། །ཆགས་སེམས་མི་དགེ་བའི་ལས་ཀྱི་རྣམ་པར་སྨིན་པས། འབྲས་དང་། ནས་དང་། གྲོ་ལ་སོགས་པའི་འབྲས་བུ་ཉུང་ཞིང་གྲ་མ་དང་སྤུན་པ་ལ་སོགས་པའི་སྐྱོན་མང་བར་འགྱུར་རོ། །ལས་དེ་ཉིད་ཀྱི་རྣམ་པར་སྨིན་
པས། ལོངས་སྤྱོད་གཞན་གྱིས་ཁྱེར་བར་འགྱུར་རོ། །གནོད་སེམས་མི་དགེ་བའི་ལས་ཀྱི་རྣམ་པར་སྨིན་པས། ལོ་ཏོག་དང་། འབྲས་བུ་དང་། ས་བོན་ཚ་བ་དང་། ཁ་བ་འབྱུང་བར་འགྱུར་རོ། །ལས་དེ་ཉིད་ཀྱི་རྣམ་པར་སྨིན་པས། མཐོང་ན་མི་སྡུག་པར་འགྱུར་རོ། །
ལོག་པར་ལྟ་བ་མི་དགེ་བའི་ལས་ཀྱི་རྣམ་པར་སྨིན་པས། འབྲས་བུ་མེད་པ་དང་། ཆུང་བ་དང་། དུག་དང་རྐུ་བ་ལ་སོགས་པ་འབྱུང་བར་འགྱུར་རོ། །ལས་དེ་ཉིད་ཀྱི་རྣམ་པར་སྨིན་པས། མེད་པར་སྨྲ་བ་དང་ཆད་པར་ལྟ་ཞིང་འཇིག་རྟེན་རྒྱང་པན་པའི་གཙུག་ལག་ལ་སོགས་པ་
ལ་དད་པར་འགྱུར་རོ། །མི་དགེ་བའི་ལས་ཀྱི་ལམ་འདི་བཅུ་ཇི་ལྟ་ཇི་ལྟར་བསྒོམས་པ་དེ་ལྟ་དེ་ལྟར་རབ་ཏུ་འཕེལ་བར་འགྱུར་ཏེ། དེའི་ཕྱིར་རྣམ་པར་འཇིག་པའི་ཚེ། ཏིལ་ཡོད་ཀྱང་ཏིལ་མར་མི་འབྱུང་བུ་རམ་ཤིང་ཡོད་ཀྱང་བུ་རམ་མི་འབྱུང་། བུ་རམ་ཡོད་ཀྱང་ཧྭགས་དང་ཁ་ར་

མི་འབྱུང་། བ་ཡོད་ཀྱང་འོ་མ་མི་འབྱུང་། འོ་མ་ཡོད་ཀྱང་མར་མི་འབྱུང་། དེ་ལྟར་མི་དགེ་བ་བཅུའི་ལས་ཀྱི་རྣམ་པར་སྨིན་པས། ཕྱི་རོལ་གྱི་དངོས་པོ་རྣམས་རྒུད་པར་འགྱུར་རོ། །དགེ་བ་བཅུའི་ལས་ཀྱི་ལམ་རྣམས་ཡང་དག་པར་བླངས་པའི་རྒྱུས། ཕྱི་རོལ་གྱི་དངོས་པོ་
རྣམས་ཕུན་སུམ་ཚོགས་པར་འགྱུར་ཏེ། བཅུ་གང་ཞེ་ན། སྲོག་གཅོད་པ་སྤངས་པའི་རྣམ་པར་སྨིན་པས་ནི་སའི་མཐུ་དང་གཟི་བྱིན་མེད་པར་མི་འགྱུར་རོ། །མ་བྱིན་པར་ལེན་པ་སྤངས་པའི་རྣམ་པར་སྨིན་པས་ནི་སེར་བ་དང་། བྱི་བ་དང་། སྲིན་དང་། མུ་གེ་ལ་སོགས་
པ་འབྱུང་བར་མི་འགྱུར་རོ། །འདོད་པ་ལ་ལོག་པར་གཡེམ་པ་སྤངས་པའི་རྣམ་པར་སྨིན་པས་ནི། བཙའ་དང་ས་འབབ་པ་དང་། རྡུལ་དང་། རླུང་དང་། ཆར་དྲག་པོ་འབབ་པར་མི་འགྱུར་རོ། །བརྫུན་དུ་སྨྲ་བ་སྤངས་པའི་རྣམ་པར་སྨིན་པས་ནི་དྲི་མི་ཞིམ་པ་འབྱུང་བར་མི་
འགྱུར་རོ། །ཕྲ་མ་སྤངས་པའི་རྣམ་པར་སྨིན་པས་ནི་ངམ་གྲོག་དང་། གཡང་ས་དང་། འདམ་རྫབ་དང་། ངན་སྐྱུགས་ཀྱི་ལྗན་ལྗིན་དང་། དོང་ལ་སོགས་པར་འབྱུང་བར་མི་འགྱུར་རོ། །ངག་རྩུབ་པོ་སྤངས་པའི་རྣམ་པར་སྨིན་པས་ནི་གསེག་མ་དང་གྱོ་མོ་དང་གྱོ་དུམ་གྱིས་རེག་པ་
འབྱུང་བར་མི་འགྱུར་རོ། །ཚིག་ཀྱལ་པ་སྤངས་པའི་རྣམ་པར་སྨིན་པས་ནི་རྩྭ་ཚང་ཚིང་དང་ནགས་ཐིབས་པོ་དང་། ཚེར་མ་ཚང་ཚིང་རྣམས་འབྱུང་བར་མི་འགྱུར་རོ། །ཆགས་སེམས་སྤངས་པའི་རྣམ་པར་སྨིན་པས་ནི་ལོ་ཐོག་ལ་སོགས་པ་འབྲས་བུ་དང་བཅས་པ་འབྱུང་བར་འགྱུར་རོ། །
གནོད་སེམས་སྤངས་པའི་རྣམ་པར་སྨིན་པས་ནི། ལོ་ལེགས་པ་དང་། འབྲས་བུ་དང་། ས་བོན་མི་ཁ་བ་དང་མི་ཚ་བ་རྣམས་འབྱུང་བར་འགྱུར་རོ། །ལོག་པར་ལྟ་བ་སྤངས་པའི་རྣམ་པར་སྨིན་པས་ནི། འབྲས་བུ་མེད་པ་དང་འབྲས་བུ་ཆུང་བ་མ་ཡིན་པའི་ས་བོན་རྣམས་འབྱུང་བར་
འགྱུར་ཏེ། དགེ་བ་བཅུའི་ལས་ཀྱི་ལམ་བཅུ་པོ་འདི་དག་ཡང་དག་པར་བླངས་པའི་རྒྱུས་ཕྱི་རོལ་གྱི་དངོས་པོ་བཅུ་ཕུན་སུམ་ཚོགས་པར་འགྱུར་རོ། །དེ་ལ་སྲོག་གཅོད་པ་ལ་ཉེས་དམིགས་བཅུ་པོ་འདི་དག་འབྱུང་བར་རིག་པར་བྱ་སྟེ། བཅུ་གང་ཞེ་ན། དགྲ་མང་བ་དང་། མཐོང་ན་

ཡིད་དུ་མི་འོང་བ་དང་། སྡིག་པ་རྣམས་སེམས་པ་དང་། དེས་སེམས་ཅན་རྣམས་འཇིག་པར་འགྱུར་བ་དང་། མི་བདེ་ཞིང་ཉལ་ཞིང་མི་བདེ་བཞིན་སད་པ་དང་། སྡིག་པ་ཅན་གྱི་རྨི་ལམ་རྨི་བ་དང་། རྨུགས་ཏེ་ཚེ་འཕོ་བའི་དུས་བྱེད་པ་དང་། འགྱོད་པར་འགྱུར་བ་
དང་། ཚེ་ཐུང་བར་འགྱུར་བའི་ལས་བྱེད་ཅིང་བསོགས་པ་དང་། ལུས་ཞིག་སྟེ་ཚེ་འཕོས་པའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །མ་བྱིན་པར་ལེན་པ་ལ་ཉེས་དམིགས་བཅུར་རིག་པར་བྱ་སྟེ། བཅུ་གང་ཞེ་ན། འཁོན་
གཅུགས་སུ་འགྱུར་བ་དང་། དོགས་པར་འགྱུར་བ་དང་། དུས་མ་ཡིན་པར་རྒྱུ་བ་དང་། མཚན་མོ་རྒྱུ་བ་དང་། སྡིག་པའི་གྲོགས་པོས་ཡོངས་སུ་ཟིན་པ་དང་། དགེ་བའི་བཤེས་གཉེན་གྱིས་རྣམ་པར་སྤངས་པ་དང་། ཚུལ་ཁྲིམས་འཆལ་པར་འགྱུར་བ་དང་། རྒྱལ་པོའི་གནོད་པ་
དང་། ཆད་པའི་གནོད་པ་འབྱུང་བ་དང་། ལོངས་སྤྱོད་ཀྱིས་ཕོངས་པར་འགྱུར་བའི་ལས་བྱེད་ཅིང་སོག་པ་དང་། ལུས་ཞིག་ནས་ཚེ་འཕོས་པའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་བའོ། །འདོད་པ་ལ་ལོག་པར་གཡེམ་པ་ལ་
ཉེས་དམིགས་བཅུར་རིག་པར་བྱ་སྟེ། བཅུ་གང་ཞེ་ན། གང་དག་གི་ཆུང་མ་ལ་ཉལ་པོ་བྱེད་པ་དེ་དག་དེ་ལ་གླགས་ཚོལ་བར་འགྱུར་བ་དང་། དེ་ཆུང་མ་དང་རྩོད་པར་འགྱུར་བ་དང་། དེ་ལ་མི་དགེ་བའི་ཆོས་འཕེལ་བར་འགྱུར་བ་དང་། དེའི་དགེ་བའི་ཆོས་ཡོངས་སུ་འགྲིབ་ཅིང་ཡོངས་
སུ་ཟད་པར་འགྱུར་བ་དང་། བདག་མ་སྦས་ཤིང་མ་བསྲུངས་པ་དང་། དེའི་བུ་དང་། ཆུང་མ་དང་། ནོར་རྣམས་མ་སྦས་ཤིང་མ་བསྲུངས་པ་དང་། དོགས་པར་འགྱུར་བ་དང་། མཛའ་བཤེས་དང་། བློན་པོ་དང་། ཉེ་དུ་དང་། སྣག་གི་གཉེན་མཚམས་རྣམས་ཡིད་མི་རྟོན་པ་དང་། བྱི་བོ་
བྱེད་པ་དང་བཅས་པར་འགྱུར་བའི་ལས་བྱེད་ཅིང་སོག་པ་དང་། ལུས་ཞིག་ནས་ཚེ་འཕོས་པའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་བའོ། །བརྫུན་དུ་སྨྲ་བ་ལ་ཉེས་དམིགས་བཅུར་རིག་པར་བྱ་སྟེ། བཅུ་གང་ཞེ་ན། དེ་ཁ་མནམ་

པར་འགྱུར་བ་དང་། དེའི་ལུས་ལས་ལྷ་རྣམས་འཕང་བ་དང་། མི་མ་ཡིན་པ་རྣམས་ཀྱིས་དེ་ལ་གླགས་རྙེད་པར་འགྱུར་བ་དང་། བདེན་པ་སྨྲས་ཀྱང་དེ་ལ་སུ་ཡང་ཡིད་ཆེས་པར་མི་འགྱུར་བ་དང་། བརྫུན་སྨྲ་བར་འགྱུར་བ་དང་། ཡིད་ཆེས་པར་བྱ་བའི་གནས་རྣམས་སུ་མཁས་
པ་རྣམས་དེ་ལ་དྲི་བར་བྱ་བར་མི་སེམས་པ་དང་། དེའི་བདེན་པ་མ་ཡིན་པ་བསྔགས་པ་དང་། བརྗོད་པ་དང་སྒྲ་དང་། ཚིགས་སུ་བཅད་པ་མ་ཡིན་པ་འབྱུང་བ་དང་། གཟུང་བའི་ཚིག་ཏུ་མི་འགྱུར་བ་དང་། སྐུར་པ་འདེབས་པའི་ལས་བྱེད་ཅིང་སོག་པ་དང་། ལུས་ཞིག་ནས་ཚེ་འཕོས་
པའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བའོ། །འབྲུའི་ཆང་དང་སྦྱར་བའི་ཆང་བག་མེད་པའི་གནས་ལ། ཉེས་དམིགས་སུམ་ཅུ་རྩ་དྲུག་ཏུ་རིག་པར་བྱ་སྟེ། སུམ་ཅུ་རྩ་དྲུག་གང་ཞེ་ན། ཚེ་འདི་ལ་ནོར་ཟད་པ་དང་། ནད་ཀྱི་གཞིར་
འགྱུར་བ་དང་། འཐབ་པ་དང་། མཚང་འདྲུ་བ་དང་། རྩོད་པ་འཕེལ་བ་དང་། སྦ་བའི་གནས་སྟོན་པ་དང་། མི་སྙན་པ་སྐྱེད་པ་དང་། ཤེས་རབ་ཉམས་པར་བྱེད་པ་དང་། མ་ཐོབ་པའི་ལོངས་སྤྱོད་རྣམས་མི་འཐོབ་པ་དང་། ལོངས་སྤྱོད་ཐོབ་པ་རྣམས་ལས་ཡོངས་སུ་ཉམས་པར་
འགྱུར་བ་དང་། གསང་བ་རྣམས་སྨྲ་བ་དང་། ལས་སུ་བྱ་བ་རྣམས་ཡོངས་སུ་ཉམས་པ་དང་། མྱ་ངན་གྱི་རྩ་བར་འགྱུར་བ་དང་། ཉམ་ཆུང་བར་འགྱུར་བ་དང་། མར་མི་འཛིན་པར་འགྱུར་བ་དང་། ཕར་མི་འཛིན་པར་འགྱུར་བ་དང་། དགེ་སྦྱོང་དུ་མི་འཛིན་པར་འགྱུར་བ་དང་། བྲམ་ཟེར་མི་
འཛིན་པར་འགྱུར་བ་དང་། རིགས་ཀྱི་གཙོ་བོ་ལ་རིམ་གྲོ་མེད་པར་འགྱུར་བ་དང་། སངས་རྒྱས་ལ་གུས་པར་མི་འགྱུར་བ་དང་། ཆོས་ལ་གུས་པར་མི་འགྱུར་བ་དང་། དགེ་འདུན་ལ་གུས་པར་མི་འགྱུར་བ་དང་། སྡིག་པའི་གྲོགས་པོས་ཡོངས་སུ་ཟིན་པར་འགྱུར་བ་དང་། དགེ་བའི་བཤེས་
གཉེན་གྱིས་རྣམ་པར་སྤངས་པ་དང་། ངོ་ཚ་མེད་པར་འགྱུར་བ་དང་། འཛེམ་པ་མེད་པར་འགྱུར་བ་དང་། དབང་པོའི་སྒོ་མ་བསྡམས་པར་འགྱུར་བ་དང་། བུད་མེད་རྣམས་ལ་ཤིན་ཏུ་བག་མེད་པར་འགྱུར་བ་དང་། སྐྱེ་བོ་མང་པོའི་ཡིད་དུ་མི་འོང་བར་འགྱུར་བ་དང་། སྐྱེ་བོ་མང་པོ་དང་མི་

འཐུན་པ་དང་ཉེ་དུ་དང་སྣག་གི་གཉེན་མཚམས་བཙུན་པ་རྣམས་ཀྱིས་སྨད་པར་འགྱུར་བ་དང་། དམ་པའི་ཆོས་མ་ཡིན་པ་ཡོངས་སུ་འཛིན་པ་དང་། དམ་པའི་ཆོས་ཡོངས་སུ་སྤོང་བ་དང་། མཁས་པ་རྣམས་དེ་ལ་ཡིད་མི་འཇོག་པར་སེམས་པ་དང་། བག་བྱ་བ་
ལ་གཡེལ་བ་དང་དེ་མྱ་ངན་ལས་འདས་པ་ལས་རིང་དུ་འགྱུར་བ་དང་མྱོས་པར་འགྱུར་བའི་ལས་བྱེད་ཅིང་སོག་པ་དང་། ལུས་ཞིག་ནས་ཚེ་འཕོས་པའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བའོ། །དེ་བཞིན་གཤེགས་པའི་མཆོད་རྟེན་ལ་ཐལ་མོ་སྦྱོར་
བའི་ཕན་ཡོན་ནི་བཅུ་ཡོད་དེ། བཅུ་གང་ཞེ་ན། རྒྱ་ཆེན་པོའི་ཁྱིམ་དུ་སྐྱེ་བ་འཐོབ་པ་དང་རྒྱ་ཆེ་བའི་གཟུགས་དང་རྒྱ་ཆེ་བའི་གཡོག་འཁོར་དང་རྒྱ་ཆེ་བའི་མཆོད་པ་དང་བཀུར་སྟི་དང་ནོར་རྒྱ་ཆེ་བ་དང་ཐོས་པ་རྒྱ་ཆེ་བ་དང་དད་པ་རྒྱ་ཆེ་བ་དང་དྲི་བ་རྒྱ་ཆེ་བ་དང་ཤེས་རབ་རྒྱ་ཆེ་བ་དང་རྟོགས་
པ་རྒྱ་ཆེ་བ་འཐོབ་པ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་ཐལ་མོ་སྦྱར་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་ཕྱག་འཚལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། གཟུགས་བཟང་ཞིང་མདོག་གསེར་གྱི་ཁ་དོག་ལྟ་བུར་
འགྱུར་བ་དང་མཛེས་ཤིང་མིག་ཏུ་སྡུག་པར་འགྱུར་བ་དང་། སྐད་སྙན་ཅིང་གཟུང་བའི་ཆིག་ཏུ་འགྱུར་བ་དང་བག་ཚ་བ་མེད་པར་འཁོར་གྱི་ནང་དུ་འགྲོ་བ་དང་ལྷ་དང་མི་རྣམས་དགའ་བར་འགྱུར་བ་དང་གཟི་བྱིན་ཆེན་པོར་འགྱུར་བ་དང་གཟི་བྱིན་ཆེན་པོའི་གང་ཟག་འདི་ལྟ་སྟེ། སངས་
རྒྱས་བཅོམ་ལྡན་འདས་རྣམས་དང་བྱང་ཆུབ་སེམས་དཔའ་རྣམས་དང་སངས་རྒྱས་ཀྱི་ཉན་ཐོས་རྣམས་དང་འགྲོགས་པར་འགྱུར་བ་དང་ལོངས་སྤྱོད་ཆེ་བར་འགྱུར་བ་དང་མཐོ་རིས་སུ་སྐྱེ་བར་འགྱུར་བ་དང་མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་དེ་བཞིན་གཤེགས་
པའི་མཆོད་རྟེན་ལ་ཕྱག་འཚལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་ཕྱག་དར་བྱས་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། གཟུགས་བཟང་བ་དང་བལྟ་ན་སྡུག་པ་དང་མཛེས་པ་དང་སྐད་སྙན་པ་དང་དེའི་འདོད་ཆགས་དང་ཞེ་སྡང་དང་། གཏི་མུག་

བསྲབས་པར་འགྱུར་བ་དང་ལམ་དུ་འགྲོ་ན་རྩྭ་དང་གྱོ་མོ་དང་གསེག་མ་རྣམས་མེད་པར་འགྱུར་བ་དང་བཙུན་པའི་རིགས་སུ་སྐྱེ་བར་འགྱུར་བ་དང་ལོངས་སྤྱོད་ཆེ་བར་འགྱུར་བ་དང་མཐོ་རིས་སུ་སྐྱེ་བར་འགྱུར་བ་དང་མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་དེ་བཞིན་
གཤེགས་པའི་མཆོད་རྟེན་ལ་ཕྱག་དར་བྱས་པའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་གདུགས་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་ན་གདུགས་ལྟ་བུར་འགྱུར་བ་དང་ལུས་ལ་ཚ་བས་གདུང་བ་མེད་པར་འགྱུར་བ་དང་སེམས་ལ་
གདུང་བ་མེད་པར་འགྱུར་བ་དང་འཇིག་རྟེན་གྱི་རྟེན་དུ་འགྱུར་བ་དང་བདག་པོར་འགྱུར་བའི་ལས་བྱེད་ཅིང་སོག་པ་དང་འཁོར་ལོས་སྒྱུར་བའི་རྒྱལ་སྲིད་ཡང་དག་པར་འཐོབ་པ་དང་དབང་ཆེ་བར་གྲགས་པར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་
དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་གདུགས་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་དྲིལ་བུ་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། གཟུགས་བཟང་བར་འགྱུར་བ་དང་
སྐད་སྙན་པར་འགྱུར་བ་དང་ཡིད་དུ་འོང་བ་སྨྲ་བ་དང་ལྡན་པར་འགྱུར་བ་དང་ཀ་ལ་པིང་ཀའི་སྒྲ་ལྟ་བུ་སྨྲ་བ་དང་ལྡན་པར་འགྱུར་བ་དང་གཟུང་བའི་ཚིག་ཏུ་འགྱུར་བ་དང་རབ་ཏུ་དགའ་བར་འགྱུར་བ་དང་། ཀུན་ཏུ་དགའ་བ་རྒྱ་ཆེན་པོའི་སྒྲ་འཐོབ་པ་དང་ལོངས་སྤྱོད་ཆེ་བར་འགྱུར་བ་དང་མཐོ་རིས་སུ་སྐྱེ་བར་
འགྱུར་བ་དང་མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་དྲིལ་བུ་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་བ་དན་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་ན་རྒྱལ་མཚན་ལྟ་བུར་འགྱུར་བ་དང་
མཛའ་བཤེས་དང་བློན་པོ་དང་ཉེ་དུ་དང་སྣག་གི་གཉེན་མཚམས་རྣམས་བསྟི་སྟང་བྱེད་བླ་མར་བྱེད་རི་མོར་བྱེད་མཆོད་པར་བྱེད་པ་དང་། ཕྱོགས་དང་ཕྱོགས་མཚམས་རྣམས་སུ་དེའི་གྲགས་པ་དང་བརྗོད་པ་དང་སྒྲ་དང་ཚིགས་སུ་བཅད་པ་མངོན་དུ་འབྱུང་བ་དང་གཟུགས་བཟང་ཞིང་བལྟ་ན་སྡུག་ལ་

མཛེས་པར་འགྱུར་བ་དང་སྐྱེ་བ་གཞན་རྣམས་སུ་ཚེ་རིང་ཞིང་རིང་དུ་གནས་པར་འགྱུར་བ་དང་། དབང་ཆེ་བར་གྲགས་པར་འགྱུར་བ་དང་རིགས་བཙུན་པར་སྐྱེ་བར་འགྱུར་བ་དང་ལོངས་སྤྱོད་ཆེན་པོར་འགྱུར་བ་དང་མཐོ་རིས་སུ་སྐྱེ་བར་འགྱུར་བ་དང་མྱུར་དུ་ཡོངས་སུ་མྱ་ངན་
ལས་འདའ་བར་འགྱུར་བ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་བ་དན་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་ན་བཟའ་དབུལ་བའི་ཕན་ཡོན་བཅུ་གཉིས་ཡོད་དེ། བཅུ་གཉིས་གང་ཞེ་ན། མཛེས་ཤིང་བལྟ་ན་སྡུག་པར་འགྱུར་བ་དང་།
པགས་པ་འཇམ་པ་དང་། པགས་པ་སྣུམ་པ་དང་། པགས་པ་སྲབ་པ་དང་། དེའི་ལུས་ལ་རྡུལ་དང་དྲི་མ་མི་འཆགས་པ་དང་དེའི་གོས་བཟང་པོར་འགྱུར་བ་དང་། གདིང་བ་དང་། བགོ་བ་ཕྲ་མོ་རྙེད་པར་འགྱུར་བ་དང་། ངོ་ཚ་ཤེས་པ་དང་། ཁྲེལ་ཡོད་པ་ཕུན་སུམ་ཚོགས་པར་འགྱུར་
བ་དང་། མཐོང་ན་དགའ་བར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། ཡོངས་སུ་མྱ་ངན་ལས་འདའ་བ་སྟེ། བཅུ་གཉིས་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་ན་བཟའ་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་
མཆོད་རྟེན་ལ་མེ་ཏོག་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་ན་མེ་ཏོག་ལྟ་བུར་འགྱུར་བ་དང་། དེའི་སྣའི་དབང་པོ་ནམ་ཡང་ཉམས་པར་མི་འགྱུར་བ་དང་། ལུས་ལ་དྲི་ང་བ་མེད་པར་འགྱུར་བ་དང་། ལུས་ལ་དྲི་ཞིམ་པོ་འབྱུང་བར་འགྱུར་བ་དང་།
ཕྱོགས་དང་ཕྱོགས་མཚམས་རྣམས་སུ་དེའི་ཚུལ་ཁྲིམས་ཀྱི་དྲིའི་ངད་ལྡང་བར་འགྱུར་བ་དང་། འཇིག་རྟེན་པ་རྣམས་འཁོར་ཞིང་འདུ་བར་འགྱུར་བ་དང་། ཡིད་དུ་འོང་བའི་ཆོས་རྣམས་འཐོབ་པར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་
སུ་མྱ་ངན་ལས་འདའ་བ་སྟེ། ཆོས་བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་མེ་ཏོག་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་ཕྲེང་བ་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་ན་ཕྲེང་བ་ལྟ་བུར་འགྱུར་བ་དང་། ལུས་ཀྱི་

དྲི་ང་བ་མེད་པར་འགྱུར་བ་དང་། ཕྱོགས་དང་ཕྱོགས་མཚམས་རྣམས་སུ་ཚུལ་ཁྲིམས་ཀྱི་དྲི་ཞིམ་པོའི་ངད་ལྡང་བ་དང་། རྟག་ཏུ་དྲི་ཞིམ་པར་འགྱུར་བ་དང་། བརྒྱན་པར་འགྱུར་བ་དང་། གཡོག་འཁོར་མི་ཕྱེད་པར་འགྱུར་བ་དང་། སྐྱེས་པ་དང་བུད་མེད་རྣམས་ཀྱི་ཡིད་དུ་འོང་
བར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་ཕྲེང་བ་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་མར་
མེ་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་ན་མར་མེ་ལྟ་བུར་འགྱུར་བ་དང་། ཤའི་མིག་རྣམ་པར་དག་པར་འགྱུར་བ་དང་། ལྷའི་མིག་འཐོབ་པར་འགྱུར་བ་དང་། དགེ་བ་དང་མི་དགེ་བའི་ཆོས་རྣམས་ལ་ཤེས་རབ་འབྱུང་བར་འགྱུར་བ་དང་། མ་རིག་པ་དང་
གཏི་མུག་གི་མུན་པ་སེལ་བ་དང་། ཤེས་རབ་ཀྱི་སྣང་བ་འཐོབ་པར་འགྱུར་བ་དང་། དེ་འཁོར་བ་ན་འཁོར་བའི་ཚེ་ནམ་ཡང་མུན་པ་ན་གནས་པར་མི་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་
པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་མར་མེ་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་བྱུག་སྤོས་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་ན་བྱུག་སྤོས་ལྟ་བུར་འགྱུར་བ་དང་། སྣའི་དབང་པོ་རྣམ་པར་དག་པར་འགྱུར་བ་དང་།
ལུས་ལ་དྲི་མི་ཞིམ་པ་མེད་པར་འགྱུར་བ་དང་། རྟག་ཏུ་དྲི་ཞིམ་པར་འགྱུར་བ་དང་། གཟུགས་བཟང་བར་འགྱུར་བ་དང་། འཇིག་རྟེན་པ་རྣམས་འཁོར་ཞིང་འདུ་བར་འགྱུར་བ་དང་། ཡིད་དུ་འོང་བའི་ཆོས་རྣམས་ཐོས་པར་འགྱུར་བ་དང་། ལོངས་སྤྱོད་ཆེན་པོར་འགྱུར་བ་དང་། མཐོ་རིས་
སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། ཆོས་བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་བྱུག་སྤོས་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་རོལ་མོ་དང་སིལ་སྙན་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན།

གཟུགས་བཟང་ཞིང་བལྟ་ན་སྡུག་པར་འགྱུར་བ་དང་། སྐད་སྙན་པར་འགྱུར་བ་དང་། ཡིད་དུ་འོང་བ་སྨྲ་བ་དང་ལྡན་པར་འགྱུར་བ་དང་། གྲགས་པ་དང་ལྡན་པར་འགྱུར་བ་དང་། གཟུང་བའི་ཚིག་ཏུ་འགྱུར་བ་དང་། རྟག་ཏུ་དགའ་བར་འགྱུར་བ་དང་། ཐམས་ཅད་
དགའ་བའི་སྒྲ་རྒྱ་ཆེན་པོ་འཐོབ་པར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། ཡོངས་སུ་མྱ་ངན་ལས་འདའ་བར་འགྱུར་བ་སྟེ། བཅུ་པོ་དེ་དག་ནི། དེ་བཞིན་གཤེགས་པའི་མཆོད་རྟེན་ལ་རོལ་མོ་སིལ་སྙན་ཕུལ་བའི་ཕན་ཡོན་ནོ། །
དེ་བཞིན་གཤེགས་པའི་མཆོད་རྟེན་བྱེད་པའི་ཕན་ཡོན་བཅོ་བརྒྱད་ཡོད་དེ། བཅོ་བརྒྱད་གང་ཞེ་ན། རྒྱ་ཆེན་པོའི་རིགས་སུ་སྐྱེ་བར་འགྱུར་བ་དང་། གཟུགས་བཟང་བར་འགྱུར་བ་དང་། མཛེས་ཤིང་མིག་ཏུ་སྡུག་པར་འགྱུར་བ་དང་། དབང་ཆེ་བར་གྲགས་པར་འགྱུར་བ་དང་། གཡོག་
འཁོར་རྒྱ་ཆེན་པོར་འགྱུར་བ་དང་། གཡོག་འཁོར་མི་ཕྱེད་པར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། འཇིག་རྟེན་པ་རྣམས་འཁོར་ཞིང་འདུ་བར་འགྱུར་བ་དང་། ཀུན་གྱི་རྟེན་དུ་འགྱུར་བ་དང་། ཕྱོགས་བཅུར་བརྗོད་པ་དང་། སྒྲ་དང་ཚིགས་སུ་བཅད་པ་རྒྱ་ཆེན་པོ་མངོན་
དུ་འབྱུང་བར་འགྱུར་བ་དང་། ལྷ་དང་མིས་མཆོད་པར་འགྱུར་བ་དང་། ཕྱུག་ཅིང་ནོར་མང་པོ་དང་ལྡན་པར་འགྱུར་བ་དང་། འཁོར་ལོས་སྒྱུར་བའི་རྒྱལ་སྲིད་འཐོབ་པར་འགྱུར་བ་དང་། ཚེ་རིང་བར་འགྱུར་བ་དང་། ལུས་རྡོ་རྗེ་ལྟར་མཁྲེགས་པར་འགྱུར་བ་དང་། ལུས་མཚན་དང་
དཔེ་བྱད་དང་ལྡན་པར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅོ་བརྒྱད་པོ་དེ་དག་ནི་དེ་བཞིན་གཤེགས་པའི་མཆོད་རྟེན་བྱེད་པའི་ཕན་ཡོན་ནོ། །ཁྲི་སྟན་བྱིན་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་
གྱི་བླ་མའི་གནས་སུ་འགྱུར་བ་དང་། བསྔགས་པར་འགྱུར་བ་དང་། སྐྱེ་བོ་མང་པོ་ལ་གྲགས་པ་དང་། བརྗོད་པ་དང་། སྒྲ་དང་ཚིགས་སུ་བཅད་པ་མང་པོ་མངོན་དུ་འབྱུང་བར་འགྱུར་བ་དང་། བདེ་བ་དང་། ཡིད་བདེ་བ་མང་བར་འགྱུར་བ་དང་། བཞོན་པ་དང་། ཁྲི་སྟན་དང་།

རིམ་གྲོ་བྱེད་པ་དང་ལྡན་པར་འགྱུར་བ་དང་། འཇིག་རྟེན་པ་རྣམས་འཁོར་ཞིང་འདུ་བར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། དབང་ཆེ་བར་གྲགས་པར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་
དག་ནི་ཁྲི་སྟན་བྱིན་པའི་ཕན་ཡོན་ནོ། །ལྷམ་བྱིན་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། དེ་བཞོན་པ་རྣམས་ཀྱིས་བྲེལ་བར་མི་འགྱུར་བ་དང་། རྐང་པ་ལེགས་པར་གནས་པར་འགྱུར་བ་དང་། ལམ་དུ་འགྲོ་ན་སྟོབས་དང་ལྡན་པར་འགྱུར་བ་དང་། དེའི་ལུས་ངལ་བར་
མི་འགྱུར་བ་དང་། དེ་འགྲོ་ན་ཚེར་མ་དང་གསེག་མ་དང་གྱོ་མོ་རྣམས་ཀྱིས་རྐང་པ་སྣད་པར་མི་འགྱུར་བ་དང་། རྫུ་འཕྲུལ་ཐོབ་པར་འགྱུར་བ་དང་། དེ་ལ་རིམ་གྲོ་བྱེད་པ་དང་ལྡན་པར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ།
བཅུ་པོ་དེ་དག་ནི་ལྷམ་བྱིན་པའི་ཕན་ཡོན་ནོ། །སྣོད་སྤྱད་བྱིན་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་གྱི་ཡོན་ཏན་གྱི་སྣོད་ལྟ་བུར་འགྱུར་བ་དང་། མདོག་སྣུམ་པར་འགྱུར་བ་དང་། སེམས་ཀྱི་རྒྱུད་མཉེན་པར་འགྱུར་བ་དང་། སྐོམ་པར་མི་འགྱུར་བ་དང་།
སྐོམ་ན་ཡང་ཆུ་འབྱུང་བར་འགྱུར་བ་དང་། ཡི་དགས་སུ་སྐྱེ་བར་མི་འགྱུར་བ་དང་། ལྷ་དང་མི་རྣམས་དགའ་བར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་སྣོད་སྤྱད་བྱིན་
པའི་ཕན་ཡོན་ནོ། །ཁ་ཟས་སྦྱིན་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། ཚེ་རིང་བར་འགྱུར་བ་དང་། མདོག་བཟང་བར་འགྱུར་བ་དང་། སྟོབས་དང་ལྡན་པར་འགྱུར་བ་དང་། དྲན་པ་དང་ལྡན་ཞིང་སྤོབས་པ་དང་ལྡན་པར་འགྱུར་བ་དང་། བག་ཚ་བ་མེད་པར་འཁོར་གྱི་ནང་
དུ་འགྲོ་བ་དང་། འཁོར་འདུན་པར་འགྱུར་བ་དང་། ལྷ་དང་མི་རྣམས་དགའ་བར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་ཁ་ཟས་བྱིན་པའི་ཕན་ཡོན་ནོ། །བཞོན་

པ་བྱིན་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། རྐང་པ་ཤིན་ཏུ་གཞོན་ཤ་ཆགས་པར་འགྱུར་བ་དང་། རྐང་པ་ཤིན་ཏུ་གནས་པར་འགྱུར་བ་དང་། རྐང་པས་འགྲོ་བ་ན་ལུས་ངལ་བར་མི་འགྱུར་བ་དང་། བདེ་བར་འགྱུར་བ་དང་། མི་མཛའ་བ་མང་བར་མི་འགྱུར་
བ་དང་། རྫུ་འཕྲུལ་གྱི་རྐང་པ་རྒྱ་ཆེན་པོ་འཐོབ་པར་འགྱུར་བ་དང་། བཞོན་པ་རྣམས་ཀྱིས་བྲེལ་བར་མི་འགྱུར་བ་དང་། རིམ་གྲོ་བྱེད་པ་དང་ལྡན་པར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་བཞོན་པ་བྱིན་པའི་
ཕན་ཡོན་ནོ། །གནས་བྱིན་པའི་ཕན་ཡོན་ནི་རབ་ཏུ་མང་སྟེ། མང་པོ་གང་ཞེ་ན། དེ་ལ་འཇིགས་པ་མི་འབྱུང་ངོ་། །གདིང་བ་དང་བགོ་བ་ཤིན་ཏུ་འཇམ་པོ་རྙེད་པར་འགྱུར་རོ། །ལྷ་དང་མི་རྣམས་ཀྱི་འདོད་པའི་ཡོན་ཏན་ལྔ་རྙེད་པར་འགྱུར་རོ། །གལ་ཏེ་འདོད་དེ་རྒྱལ་རིགས་ཆེ་ཞིང་
མཐོ་བའི་རིགས་སུ་སྐྱེ་བར་གྱུར་ཅིག་ཅེའམ། བྲམ་ཟེའི་རིགས་ཆེ་ཞིང་མཐོ་བའི་རིགས་སུ་སྐྱེ་བར་གྱུར་ཅིག་ཅེ་འམ། ཁྱིམ་བདག་ཆེ་ཞིང་མཐོ་བའི་རིགས་སུ་སྐྱེ་བར་གྱུར་ཅིག་ཅེ་ན། དེའི་སྨོན་པ་དེ་འགྲུབ་པར་འགྱུར་རོ། །གལ་ཏེ་འདོད་དེ་བདག་གྲོང་གི་གཙོ་བོར་གྱུར་ཅིག་
ཅེའམ། གྲོང་ཁྱེར་གྱི་གཙོ་བོར་གྱུར་ཅིག་ཅེ་འམ། གྲོང་རྡལ་གྱི་གཙོ་བོར་གྱུར་ཅིག་ཅེའམ། རི་བྲགས་ཀྱི་རྒྱལ་པོར་གྱུར་ཅིག་ཅེ་འམ། རྒྱལ་ཕྲན་དུ་གྱུར་ཅིག་ཅེའམ། རྒྱལ་པོ་བཙན་པར་གྱུར་ཅིག་ཅེ་ན། དེའི་སྨོན་ལམ་དེ་བཞིན་དུ་འགྲུབ་པར་འགྱུར་རོ། །གལ་ཏེ་འདོད་
དེ་གླིང་གཅིག་པའི་རྒྱལ་པོར་གྱུར་ཅིག་ཅེའམ། གླིང་གཉིས་ཀྱི་རྒྱལ་པོར་གྱུར་ཅིག་ཅེ་འམ། གླིང་གསུམ་གྱི་རྒྱལ་པོར་གྱུར་ཅིག་ཅེའམ། འཁོར་ལོས་སྒྱུར་བའི་རྒྱལ་པོར་གྱུར་ཅིག་ཅེ་ན། དེའི་སྨོན་པ་དེ་འགྲུབ་པར་འགྱུར་རོ། །གལ་ཏེ་འདོད་དེ། རྒྱལ་ཆེན་བཞིའི་རིས་ཀྱི་ལྷ་
རྣམས་དང་སྐལ་བ་མཉམ་པར་སྐྱེ་བར་གྱུར་ཅིག་ཅེ་ན་ཡང་དེའི་སྨོན་པ་དེ་འགྲུབ་པར་འགྱུར་རོ། །སུམ་ཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་གྱུར་ཅིག་ཅེ་ན་ཡང་དེའི་

སྨོན་པ་དེ་འགྲུབ་པར་འགྱུར་རོ། །གལ་ཏེ་འདོད་དེ། བདག་ཚངས་རིགས་ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་གྱུར་ཅིག་ཅེ་ན་ཡང་དེའི་སྨོན་པ་དེ་འགྲུབ་པར་འགྱུར་རོ། །ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་
དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་ནམས་སྐྱེས་དང་། འབྲས་བུ་ཆེ་བ་དང་། མི་ཆེ་བ་དང་། མི་གདུང་བ་དང་། གྱ་ནོམ་སྣང་དང་། ཤིན་ཏུ་མཐོང་དང་། འོག་མིན་གྱི་ལྷ་རྣམས་དང་སྐལ་བ་མཉམ་པར་སྐྱེ་བར་གྱུར་ཅིག་ཅེ་ན་ཡང་དེའི་
སྨོན་པ་དེ་འགྲུབ་པར་འགྱུར་རོ། །གལ་ཏེ་འདོད་དེ། ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་དང་། ཆུང་ཟད་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་
གྱུར་ཅིག་ཅེ་ན་ཡང་དེའི་སྨོན་པ་དེ་འགྲུབ་པར་འགྱུར་རོ། །གལ་ཏེ་འདོད་དེ། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱའོ་ཞེ་ན་ཡང་དེའི་སྨོན་པ་དེ་འགྲུབ་པར་འགྱུར་རོ། །གལ་ཏེ་འདོད་དེ། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པའི་
འབྲས་བུ་དང་བྱང་ཆུབ་མངོན་དུ་བྱའོ་ཞེ་ན་ཡང་དེའི་སྨོན་པ་དེ་འགྲུབ་པར་འགྱུར་རོ། །གལ་ཏེ་འདོད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་བྱང་ཆུབ་པར་གྱུར་ཅིག་ཅེ་ན་ཡང་དེའི་སྨོན་པ་དེ་འགྲུབ་པར་འགྱུར་ཏེ། །མང་པོ་དེ་དག་ནི་གནས་བྱིན་པའི་ཕན་ཡོན་ནོ། །
བཏུང་བ་བྱིན་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། དབང་པོ་ཐམས་ཅད་ཡོངས་སུ་ཚང་བར་འགྱུར་བ་དང་། དཔྲལ་བ་དག་ཅིང་འཛུམ་པའི་བཞིན་དུ་འགྱུར་བ་དང་། ཡོན་ཏན་དང་ལྡན་པར་འགྱུར་བ་དང་། སེམས་ཀྱི་རྒྱུད་མཉེན་པར་འགྱུར་བ་དང་། སྐོམ་པར་མི་འགྱུར་བ་དང་།
སྐོམ་ན་ཡང་ཆུ་འབྱུང་བར་འགྱུར་བ་དང་། ཡི་དགས་སུ་སྐྱེ་བར་མི་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་བཏུང་བ་བྱིན་པའི་ཕན་ཡོན་ནོ། །རབ་ཏུ་བྱུང་བའི་ཕན་ཡོན་བཅུ་ཡོད་

དེ། བཅུ་གང་ཞེ་ན། དེ་བུ་དང་ཆུང་མ་དང་ནོར་ལ་སྲེད་པར་མི་འགྱུར་བ་དང་། དེ་འདོད་པའི་ཡོངས་སུ་འཛིན་པར་མི་འགྱུར་བ་དང་། དགོན་པར་གནས་པ་ལ་དགའ་བ་དང་། སངས་རྒྱས་ལ་གུས་པར་འགྱུར་བ་དང་། བདུད་ཀྱི་སྤྱོད་ཡུལ་རྣམ་པར་སྤོང་བ་དང་། བདེ་འགྲོ་
ཐོབ་པར་བྱེད་པའི་ཆོས་རྣམས་ཡོངས་སུ་ཚོལ་བ་དང་། ངན་འགྲོ་འཐོབ་པར་བྱེད་པའི་ཆོས་རྣམས་སྤོང་བ་དང་། ལྷ་དང་མིར་སྨོན་པ་མེད་པ་དང་། རྟག་ཏུ་དེ་བཞིན་གཤེགས་པའི་གསུང་རབ་ལ་རབ་ཏུ་འབྱུང་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་
སུ་མྱ་ངན་ལས་འདའ་བ་སྟེ། ཆོས་བཅུ་པོ་དེ་དག་ནི་རབ་ཏུ་བྱུང་བའི་ཕན་ཡོན་ནོ། །དགོན་པ་ལ་གནས་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། འདུ་འཛི་རྣམ་པར་སྤོང་བ་དང་། རབ་ཏུ་དབེན་པ་ལ་སྟེན་པ་དང་། དེའི་སེམས་བསམ་གཏན་ལ་དམིགས་པར་འགྱུར་བ་དང་།
སངས་རྒྱས་བཅོམ་ལྡན་འདས་རྣམས་ལ་སྨོན་པ་དང་། དགའ་བ་དང་། བདེ་བ་དང་། ཡིད་བདེ་བ་ལུས་ལ་སྐྱེད་པ་དང་། དེ་ལ་བར་དུ་གཅོད་པར་མི་འགྱུར་བ་དང་། ཇི་ལྟར་ཐོས་པའི་ཆོས་རྣམས་ཀྱི་དོན་རྒྱ་ཆེར་ཤེས་པར་འགྱུར་བ་དང་། ཞི་གནས་འཐོབ་པ་དང་། ལྷག་མཐོང་
ཐོབ་པ་སྟེ། བཅུ་པོ་དེ་དག་ནི་དགོན་པ་ལ་གནས་པའི་ཕན་ཡོན་ནོ། །བསོད་སྙོམས་ལེན་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། དེ་འགྲོ་བ་ལ་གོམས་པར་འགྱུར་བ་དང་། དེ་སྤྱོད་ཡུལ་ལ་གོམས་པར་འགྱུར་བ་དང་། ང་རྒྱལ་བཅག་པར་འགྱུར་བ་དང་། བདག་རྙེད་པ་ལ་
སྦྱོར་བ་དང་། གཞན་དག་ཀྱང་བསོད་ནམས་ལ་རབ་ཏུ་འགོད་པ་དང་། སྟོན་པའི་བསྟན་པ་ཡོངས་སུ་སྟོན་པ་དང་། ཕྱི་མའི་སྐྱེ་བོ་ལ་སྣང་བར་བྱས་པར་འགྱུར་བ་དང་། ཚངས་པ་མཚུངས་པར་སྤྱོད་པ་རྣམས་ལ་ཉམ་ང་བ་མེད་པར་བྱས་པར་འགྱུར་བ་དང་། དམའ་བའི་སེམས་ཉེ་
བར་གཞག་པར་འགྱུར་བ་དང་། བསོད་སྙོམས་ཀྱིས་ཡོངས་སུ་དུལ་བའི་དགེ་སྦྱོང་གི་ཕྱོགས་ལ་མུན་པ་མེད་པར་སྣང་བའོ། །འཇིགས་པ་མེད་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིགས་པ་མེད་པར་གྲོང་དུ་འཇུག་པ་དང་། འཇིགས་པ་མེད་པར་གྲོང་ནས་

འབྱུང་བ་དང་། འཇིགས་པ་མེད་པར་ཁྱིམ་རྣམས་སུ་འགྲོ་བ་དང་། འཇིགས་པ་མེད་པར་འཁོར་རྣམས་ལ་ཆོས་སྟོན་པ་དང་། འཇིགས་པ་མེད་པར་དགེ་འདུན་གྱི་ནང་དུ་འཇུག་པ་དང་། འཇིགས་པ་མེད་པར་སློབ་དཔོན་དང་མཁན་པོའི་དྲུང་དུ་འགྲོ་བ་དང་། འཇིགས་
པ་མེད་པར་བྱམས་པའི་སེམས་ཀྱིས་སློབ་མའི་གན་དུ་འགྲོ་བ་དང་། འཇིགས་པ་མེད་པར་གོས་དང་། ཟས་དང་། མལ་ཆ་དང་། ན་བའི་གསོས་སྨན་དང་། ཡོ་བྱད་རྣམས་ཡོངས་སུ་སྤྱོད་པ་དང་། འཇིགས་པ་མེད་པར་ཁ་ཏོན་འདོན་པ་དང་། འཇིགས་པ་མེད་པར་
ཚེ་འཕོ་བའི་དུས་བྱེད་པའོ། །བྲམ་ཟེའི་ཁྱེའུ་དེ་ལྟར་ན། སེམས་ཅན་རྣམས་ནི་བདག་གི་ལས་ལས་གྱུར་པ། ལས་ཀྱི་རྒྱུ་ལས་སྐྱེས་པ། ལས་ཀྱི་སྐལ་བ་ལ་སྤྱོད་པ། ལས་ལ་རྟེན་པ་ཡིན་ཏེ། སེམས་ཅན་རྣམས་ནི་ལས་ཀྱིས་རབ་དང་། འབྲིང་དང་། ཐ་མར་རྣམ་
པར་ཕྱེ་བའོ་ཞེས་ངས་གང་སྨྲས་པ་དེ་ནི་འདི་ལས་དགོངས་ཏེ་སྨྲས་སོ། །ཆོས་ཀྱི་རྣམ་གྲངས་འདི་བཤད་པ་ན། བྲམ་ཟེའི་ཁྱེའུ་ཤུ་ཀ་བཅོམ་ལྡན་འདས་ལ་སེམས་མངོན་པར་དད་དོ། །དེ་ནས་བྲམ་ཟེའི་ཁྱེའུས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
གཽ་ཏ་མ་ཁྱོད་མཉན་དུ་ཡོད་པར། དགེ་བསྙེན་གཞན་དག་གི་ཁྱིམ་དུ་གཤེགས་པར་དགོངས་ན། བདག་གི་ཕ་བྲམ་ཟེ་ཏོའུ་དེ་ཡའི་ཁྱིམ་དུ་ཡང་གཤེགས་པར་དགོངས་སུ་གསོལ། དེ་ནི་བྲམ་ཟེ་ཏོའུ་དེ་ཡའི་ཁྱིམ་དུ་ཡུན་རིང་པོའི་དོན་དུ་བདེ་བ་དང་ཕན་པར་འགྱུར་རོ། །བཅོམ་ལྡན་
འདས་ཅང་མི་གསུང་བས། བྲམ་ཟེའི་ཁྱེའུ་ཤུ་ཀ་ལ་གནང་བ་མཛད་དོ། །དེ་ནས་བྲམ་ཟེའི་ཁྱེའུ་ཤུ་ཀས། བཅོམ་ལྡན་འདས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ། རྗེས་སུ་ཡི་རངས་ནས་བཅོམ་
ལྡན་འདས་ཀྱི་གན་ནས་སོང་ངོ་། །ལས་རྣམ་པར་འབྱེད་པ་རྫོགས་སོ།། ༄༅། །རྒྱ་གར་སྐད་དུ། ཀརྨ་བི་བྷངྒ་ནཱ་མ་དྷ་རྨ་གྲནྠ། བོད་སྐད་དུ། ལས་ཀྱི་རྣམ་པར་འགྱུར་བ་ཞེས་བྱ་བའི་ཆོས་ཀྱི་གཞུང་།

བམ་པོ་གཅིག་གོ། །སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་
ན། དགེ་སློང་གི་དགེ་འདུན་ཆེན་པོ་བརྒྱ་ཕྲག་ཕྱེད་དང་བཅུ་གསུམ་དང་ལྷན་ཅིག་ཏུ་བཞུགས་ཏེ། དེ་ནས་ཏོའུ་ཏེ་ཡའི་བུ་ཤུ་ཀོ་མ་ན་བ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དང་ལྷན་ཅིག་ཏུ་ཡང་དག་པར་མགུ་བ་དང་། ཡང་དག་པར་རངས་
པའི་གཏམ་རྣམ་པ་མང་པོ་བཤད་དེ་ཕྱོགས་གཅིག་ཏུ་འདུག་གོ། །ཏོའུ་ཏེ་ཡའི་བུ་ཤུ་ཀོ་མ་ན་བ་ཕྱོགས་གཅིག་ཏུ་འདུག་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གཽ་ཏ་མ་ཁྱོད་ལ་བདག་ཅུང་ཤས་ཤིག་འདྲི་ན་དྲིས་པའི་ལན་སླར་བཀའ་སྩལ་དུ་གསོལ། དེ་
སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཏོའུ་ཏེ་ཡའི་བུ་ཤུ་ཀོ་མ་ན་བ་ལ་འདི་སྐད་ཅེས་གསུངས་སོ། །མ་ན་བ་ཇི་ལྟར་འདོད་པ་བཞིན་དུ་དྲིས་ཤིག །ངས་ཁྱོད་ལ་བཤད་པར་བྱའོ། །དེ་ནས་ཏོའུ་ཏེ་ཡའི་བུ་ཤུ་ཀོ་མ་ན་བས་བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །ཀྱེ་གཽ་ཏ་མ་སེམས་ཅན་རྣམས་ལ་ཚེ་ཐུང་བ་དང་། ཚེ་རིང་བ་དང་། ནད་མང་བ་དང་། ནད་ཉུང་བ་དང་། མི་སྡུག་པ་དང་། བཟང་པོ་དང་། དབང་ཆུང་བ་དང་། དབང་ཆེ་བ་དང་། མ་རབས་ཀྱི་རིགས་དང་། ཡ་རབས་ཀྱི་རིགས་དང་། དབུལ་པོ་དང་། ཕྱུག་
པོ་དང་། ངན་པ་དང་། ཤེས་རབ་ཆེ་ཆུང་དང་། སྐྱིད་སྡུག་ལ་སོགས་པ་རྣམ་པ་མང་དུ་མཆིས་ན། ཀྱེ་གཽ་ཏ་མ་ལས་ཀྱི་རྣམ་པར་སྨིན་པ་གང་གི་ཕྱིར་ན་སེམས་ཅན་སྣ་མང་པོར་འགྱུར། བཅོམ་ལྡན་འདས་ཀྱིས་བཀའ་སྩལ་པ། མ་ན་བ་ཁྱོད་ཉོན་ལ་དགེ་བར་ཤིན་ཏུ་ཡིད་
ལ་ཟུང་ཤིག་དང་། དེའི་ཕྱིར་ངས་བཤད་དོ། །མ་ན་བ་སེམས་ཅན་རྣམས་ནི་ཚེ་རབས་ཀྱི་ལས་ལས་གྱུར་ཏེ། སྦྱིན་པའི་རྣམས་ཀྱང་ལས། སྐྱེ་བའི་རྣམས་ཀྱང་ལས། སོ་སོར་རྒྱུ་བ་ཡང་ལས་ཏེ། མ་ན་བ་སེམས་ཅན་རྣམས་ནི་ལས་ཀྱིས་རྣམ་པར་བསྒྱུར་རོ། །དེ་བས་

ན་ངན་པ་དང་། བར་མ་དང་། བཟང་པོའི་ཕྱིར་སེམས་ཅན་རྣམ་པ་མང་པོ་ཡང་ལས་རྣམ་པ་མང་པོ་དང་། མྱ་ངན་རྣམ་པ་མང་པོ་དང་། ལྟ་བ་རྣམ་པ་མང་པོར་སྦྱར་བ་དེ་འདི་ལྟར་ནག་པོ་དང་། དཀར་པོ་ལས་རྣམ་པར་སྨིན་པའི་འབྲས་བུ་བཤད་དོ། །མ་ན་བ་འདི་ལྟ་
སྟེ། ལས་ནག་པོ་རྣམས་ཀྱིས་ནི་སེམས་ཅན་དམྱལ་བ་དང་། བྱོལ་སོང་དང་། ཡི་དགས་དང་། རིང་དུ་འཁྱམས་པ་དང་། ཨ་སུ་ར་ལ་སོགས་པ་ངན་སོང་དུ་སྐྱེའོ། །ལས་དཀར་པོ་བགྱིས་པ་རྣམས་ཀྱིས་ནི་ལྷ་དང་མིར་སྐྱེའོ། །མ་ན་བ་དེ་ལྟ་བས་ན། ལས་ཀྱི་རྣམ་
པར་སྨིན་པས་ཚེ་ཐུང་བ་ཡང་