Kinh tạng Tây Tạng (Kangyur Đại Học) — 071_མདོ་སྡེ།_ཤ

ར་བྱེད་དོ། །གཞལ་ཡང་འདུལ་བས་རྒོད་པ་ཀུན་ནས་འཇོམས་པར་བྱེད་དོ། །འདི་ཡང་གང་དག་ཡིན་
ཞེ་ན་འདི་ལྟ་སྟེ་ཁྱིམ་རྣམས་སུ་དེ་འཇུག་པར་བྱེད་པ་ན་དེ་ན་གླུ་དང་གར་དང་རོལ་མོའི་སྒྲ་རྣམས་དང་གད་མོ་དང་འགྱིང་བག་དང་ཡོངས་སུ་སྤྱོད་པ་དང་གཞན་དག་གིས་རྗོད་པ་དང་ཕན་ཚུན་དུ་དགོད་པ་རྣམས་ལ་ཉན་པར་མི་བྱེད་དོ། །རོ་མྱོང་བར་ཡང་མི་བྱེད་དོ། །དེ་དག་རྣམས་ལ་སེམས་རབ་
ཏུ་སྨོན་པར་མི་བྱེད་དོ། །ཚོགས་པ་འདུས་པ་ལ་མངོན་པར་དགའ་བར་མི་འགྱུར་རོ། །ཁྱིམ་གཞན་དག་རྣམས་ཀྱི་སྤྱོད་ཚུལ་གཞན་དག་ཏུ་རྗོད་པར་མི་བྱེད་དོ། །ཤིན་ཏུ་མྱུར་བར་འགྲོ་བ་དང་འོང་བ་དང་རབ་ཏུ་འཇུག་པ་མང་བ་མ་ཡིན་ནོ། །ཧ་ཅང་སློང་བར་བྱེད་པའི་
རང་བཞིན་ཅན་མ་ཡིན་ནོ། །དེ་ལྟ་བུར་ཡང་དགེ་སློང་དེ་གཞན་གྱི་ཁྱིམ་དུ་འཇུག་སྟེ། སྦྱིན་པ་པོ་དང་སྦྱིན་བདག་དང་གཞན་ཡང་དེ་ལྟ་བུའི་རིགས་ཅན་རྣམས་ཀྱི་ཁྱིམ་དུ་འཇུག་པ་ནི་རྒོད་བག་རྣམས་ནི་འདུལ་བས་ཀུན་ནས་འཇོམས་སོ། །འཇིག་པར་བྱེད་དོ། །རྣམ་པར་
འབྱེད་དོ། །གཞན་ཡང་གལ་ཏེ་ཁྱིམ་རྣམས་སུ་ཞུགས་པར་གྱུར་ནས་དགེ་སློང་གིས་སྦྱིན་པ་པོ་དང་སྦྱིན་བདག་རྣམས་དང་གཏམ་ལ་ཞུགས་པར་གྱུར་པ་ན། ཆོས་དང་ལྡན་པའི་གཏམ་རྣམས་བཞག་ནས་འདོད་པ་རྣམས་ཀྱི་གཏམ་བྱེད་དོ། །ཡུལ་ལྗོངས་ཀྱི་གཏམ་རྣམས་

བྱེད་དོ། །མཐོ་རིས་ཀྱི་གཏམ་བྱེད་དོ། །གར་མཁན་དང་གར་དང་རོལ་མོ་བསྟན་པའི་གླུའི་གཏམ་རྣམས་བྱེད་དོ། །གྲོང་ཁྱེར་རྣམས་སམ་གཞན་གྱི་ཡང་རུང་སྟེ་ཀུན་ནས་ཉོན་མོངས་པ་ཅན་གྱི་གཏམ་རྣམས་བྱེད་དོ། །བུད་མེད་རྣམས་དང་ཀུན་ནས་འདྲེ་བར་གནས་པར་
བྱེད་ཅིང་རྣམ་པར་བཀྲ་བར་བྱས་པའི་ཆ་བྱད་ཀྱིས་ཀྱང་ཁྱིམ་རྣམས་སུ་རྒྱུ་བར་བྱེད་དོ། །དགེ་སློང་རྣམས་སམ་གཞན་ཡང་དེའི་རིགས་ཅན་རྣམས་ལ་རྒོད་བག་དེ་ལྟ་བུ་དག་ཀྱང་འབྱུང་བ་ཡིན་ནོ། །རྒོད་བག་དེ་ལྟ་བུས་རབ་ཏུ་ཞུགས་པར་གྱུར་པ་རྣམས་འདུལ་བ་ཇི་ལྟ་བ་རྣམས་ཀྱིས་
ཉེ་བར་སྤོང་བ་ཡིན་ན། འདི་ལྟ་སྟེ་དགེ་སློང་ངམ་གཞན་དག་དེའི་རིགས་ཅན་རྣམས་ཀྱང་རུང་སྟེ། ཁྱིམ་དུ་ལེགས་པས་ཉེ་བར་ཞུགས་པར་གྱུར་པ་ན་ལེགས་པ་ལ་རྟེན་པའི་གཏམ་རྣམས་བྱེད་པར་འགྱུར་བ་ཡིན་ནོ། །དཔེར་བྱ་ན་སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་དང་།
ཡེ་ཤེས་རབ་ཏུ་བསྔགས་པར་བྱ་བའི་གཏམ་རྣམས་དང་། ལོག་པར་ལྟུང་བའི་གཏམ་དང་། རྒས་པའི་གཏམ་དང་། ནད་ཀྱི་གཏམ་དང་། རྣམ་པར་འབྲལ་བར་འགྱུར་བའི་གཏམ་དང་། ལས་བདག་གིར་བྱ་བའི་གཏམ་དང་། རྒུད་པར་འགྱུར་བའི་གཏམ་དང་། འཆི་བའི་གཏམ་
རྣམས་དང་། ཡང་དག་པར་མགུ་བར་བྱ་བའི་གཏམ་དང་། ལེགས་པ་ལ་བརྟེན་པར་བྱ་བའི་གཏམ་དང་། སྡུག་བསྔལ་གྱི་གཏམ་དང་། ཀུན་འབྱུང་བའི་གཏམ་དང་། འགོག་པའི་གཏམ་དང་། ལམ་གྱི་གཏམ་རྣམས་དང་། ས་རྣམས་ཀུན་ཏུ་བགྲོད་པར་བྱ་བའི་གཏམ་རྣམས་
དང་། ཚུལ་ཁྲིམས་རབ་ཏུ་བསྔགས་པ་དང་དང་པོ་བྱུང་བའི་གཏམ་རྣམས་དང་། འདོད་ཆགས་དང་བྲལ་བའི་གཏམ་རྣམས་དང་། སེར་སྣ་ཡོངས་སུ་གཞིག་པར་བྱ་བའི་གཏམ་རྣམས་དང་། གཟུགས་ཀྱི་རྒྱགས་པས་མྱོས་པ་རྣམས་ལ་གཟུགས་ཚད་མེད་པ་བརྗོད་པའི་གཏམ་
རྣམས་དང་། བསླུ་བར་གྱུར་པའི་གཏམ་རྣམས་དང་། ལང་ཚོ་ལ་བབ་པ་ལ་སོགས་པ་རྣམས་ཀྱང་རྒ་བས་ངེས་པར་སླུ་བར་བྱེད་པའི་གཏམ་རྣམས་ཏེ། སྦྱིན་པ་པོ་དང་སྦྱིན་བདག་རྣམས་ཀྱི་བསམ་པ་ཀུན་ཏུ་རིག་པར་བྱས་ལ་དེ་ཁོ་ན་བཞིན་དུ་གཏམ་བྱའོ། །དེ་ལྟར་ན་དགེ་སློང་གིས་

རྒོད་བག་རྣམས་འདུལ་བས་ཉེ་བར་སྤོང་བ་ཡིན་ནོ། །གཞན་ཡང་རྒོད་པ་རྣམས་ནི་འདུལ་བས་ཉེ་བར་འཇོམས་པར་བྱེད་དེ། གང་ལ་ཟས་དང་སྐོམ་མང་བར་གྱུར་པ་དེ་དག་གིས་ཕེའུ་བཏབ་པར་གྱུར་ལ་དེར་ཡང་ལེགས་པར་ཉེ་བར་ཕྱིན་པ་ཡིན་ནོ། །གཞན་ཡང་གང་དག་འདོད་པ་
ཆེ་བར་གྱུར་པ་རྣམས་ཀྱང་རོ་ལ་མངོན་པར་དགའ་བའི་ཕྱིར་ན་ཕལ་ཆེ་བ་རྣམས་སུ་རབ་ཏུ་འཇུག་པར་བྱེད་དེ། བསྟེན་གྲོགས་པ་དེ་དག་ཏུ་ཉེ་བར་འགྲོ་བར་བྱེད་ལ། བསྟེན་གྲོགས་བྱ་བའི་དོན་དུ་ཡང་གང་དག་གིས་ཉེ་བར་སྒྲུབ་པར་བྱེད་དོ། །རྣམ་པ་གང་དག་གིས་ཉེ་བར་སྒྲུབ་
པར་བྱེད་པ་དང་ཇི་སྲིད་དུ་ཉེ་བར་སྒྲུབ་པར་བྱེད་པ་དེ་སྲིད་དུ་ཆོས་གོས་དང་བསོད་སྙོམས་དང་གནས་མལ་དང་ནད་ཀྱི་རྐྱེན་སྨན་དང་ཡོ་བྱད་རྣམས་ཀྱིས་ཀུན་ནས་དགའ་བར་བྱེད་དོ། །གང་གིས་འདིའི་བདེ་བ་རྣམས་ལ་ཀུན་ཏུ་དྲན་པར་མི་བྱེད་ཅིང་རོ་མྱོང་བར་ཡང་མི་བྱེད་དོ། །རྣམ་
པར་རྟོག་པར་ཡང་མི་བྱེད་དེ་ཡང་དེ་ལྟར་གཅིག་ཏུ་རྣམ་པར་རྒྱུ་བ་དང་ལེགས་པ་ལ་བརྟེན་ནས་རྣམ་པར་རྒྱུ་བ་དང་ཀུན་ནས་བསྡམས་ནས་རྣམ་པར་རྒྱུ་བ་ནི་འདུལ་བ་དང་ལྡན་པ་ཡིན་ནོ། །དགེ་སློང་ངམ་དེའི་རིགས་ཅན་གཞན་དག་རྣམས་ཀྱང་རུང་སྟེ། དེ་ལྟར་རྒོད་པ་རྣམས་
འདུལ་བས་ཉེ་བར་འཇོམས་པ་ཡིན་ནོ། །རྒོད་པ་རྣམས་ཐམས་ཅད་ཀྱང་བག་མེད་པ་ལས་རབ་ཏུ་འཕེལ་བར་འགྱུར་བ་ཡིན་ནོ། །དོན་མ་ཡིན་པའི་ཚོགས་རྣམས་ཐམས་ཅད་ཀྱང་བག་མེད་པའི་རྩ་བ་ལས་ཡིན་ནོ། །དེའི་ཕྱིར་ན་མྱ་ངན་ལས་འདས་པ་ཚོལ་བར་བྱེད་པ་རྣམས་
ཐམས་ཅད་ཀྱིས་བག་མེད་པ་ཁོ་ན་གཞོམ་པར་བྱ་བ་ཡིན་ནོ། །དེ་ལྟར་མུ་སུ་ལུན་དྷ་འདིས་སྔོན་གྱི་ལྷའི་དྲུང་དུ་ཐོས་པ་གང་ཡིན་པའི་ཆོས་དེ་དག་དང་ངང་པའི་རྒྱལ་པོ་དུས་བཟངས་དེ་དང་བདུད་ཀྱི་ཕྱོགས་སུ་གྱུར་པའི་བག་མེད་པ་དེ་དག་གི་མདུན་དུ་སྟོན་པར་བྱེད་དོ། །བཅོམ་ལྡན་འདས་
འོད་སྲུང་གིས་གསུངས་པ་དྲི་བ་བཅུ་གཅིག་པའི་མདོ་ལས་དྲི་བ་གཅིག་རྫོགས་སོ།། །།ཇི་ལྟར་དྲི་བ་གཉིས་པ་ཡིན་ན། འདི་ལྟ་སྟེ། མ་བསྡམས་པ་རྣམས་ནི་སེམས་རྩེ་གཅིག་པ་ཉིད་ཀྱིས་ཏེ་མ་བསྡམས་པ་རྣམས་ཀྱང་རྣམ་པ་གཉིས་ཡིན་ཏེ། འཇིག་རྟེན་པ་དང་།

འཇིག་རྟེན་ལས་འདས་པའོ། །བསྡམས་པ་ཡང་མདོར་བསྡུ་ན་སེམས་རྩེ་གཅིག་པས་འཛིན་པར་བྱེད་པའོ། །དེ་ལ་སྡོམ་པ་ཡང་རྣམ་པ་དུ་མ་ཡིན་ནོ། །མདོར་བསྡུ་ན་ནི་རྣམ་པ་གཉིས་ཡིན་ཏེ། རང་བཞིན་གྱི་ཁ་ན་མ་ཐོ་བ་དང་བཅས་པའི་ཁ་ན་མ་ཐོ་བའོ། །
དེ་ལ་རང་བཞིན་གྱི་ཁ་ན་མ་ཐོ་བ་ཉམས་པ་རྣམས་ནི་དགེ་སློང་མ་ཡིན་ཞིང་འོད་སྲུང་བ་ཡང་མ་ཡིན་ཏེ། སྲོག་གཅོད་པ་དང་། མི་ཚངས་པར་སྤྱོད་པ་དང་། མ་བྱིན་པར་ལེན་པ་ཡང་ཡོངས་སུ་རྫོགས་པ་ནི་ཀཱར་ཥཱ་པ་ཎ་གསུམ་གྱི་བློར་གྱུར་པས་ཆོས་དང་ལྡན་ན་ཡང་རུང་སྟེ་ཕྲོགས་
ནས་ཡོངས་སུ་ལོངས་སྤྱོད་ན་ནི། ཡུལ་གྱིས་དང་གཉེན་འབྲེལ་གྱི་མ་ཡིན་པ་དང་གནད་ལ་བསྒོ་བས་ཀྱང་རུང་སྟེ། དགེ་སློང་མ་ཡིན་ཞིང་འོད་སྲུང་བའི་མ་ཡིན་ནོ། །རུལ་པར་གྱུར་པ་མ་རུངས་པ་རྫུན་པ་རྟགས་འབའ་ཞིག་འཛིན་པར་བྱེད་པ་ཡིན་ནོ། །དེ་ལྟར་རང་བཞིན་གྱི་ཁ་ན་མ་
ཐོ་བ་ཚུལ་ཁྲིམས་འཆལ་པར་གྱུར་པ་དེ་ཡང་བག་མེད་པས་བྱས་པ་ཡིན་ནོ། །དེའི་ཕྱིར་ན་འོད་སྲུང་རབ་ཏུ་བརྩོན་པ་རྣམས་ཀྱིས་ཀྱང་བག་མེད་པ་ཡོངས་སུ་སྤང་བར་གྱིས་ཤིག །དེ་ལྟར་འཐབ་བྲལ་བ་རྣམས་ཀྱི་མངའ་བདག་མུ་སུ་ལུན་དྷ་འོད་སྲུང་གིས་གསུངས་པའི་མདོ། བྱང་ཆུབ་
སེམས་དཔའ་དུས་བཟངས་དང་སྨྲ་བ་པོར་གྱུར་པའི་ངང་པ་རྣམས་དང་། བདུད་ཀྱི་ཕྱོགས་ཀྱི་བག་མེད་པ་རྣམས་ལ་ཆོས་སྟོན་པར་བྱེད་ཅིང་པད་མའི་སྙིང་པོ་ལ་ཡང་དག་པར་གནས་ནས་བཤད་དོ། །གཞན་ཡང་བཅས་པའི་ཁ་ན་མ་ཐོ་བ་རྣམས་ནི་མདོར་བསྡུ་ན་རྣམ་པ་དགུ་ཡིན་ནོ། །མི་གཙང་
བ་རྣམ་པ་དགུ་པོ་རྣམས་ཀྱང་གང་ཞེ་ན། །གཅིག་སྤྱོད་པ་དང་། བཤགས་པས་ལྡང་བ་སྤྱོད་པ་དང་། བག་མེད་པས་བག་མེད་པ་སྤྱོད་པ་དང་། ཕྱེད་སྤྱོད་པ་དང་། ཕལ་ཆེར་སྤྱོད་པ་དང་། བཤགས་པ་དང་ལྡང་བ་ཡང་བར་སྤྱོད་པ་དང་། ལམ་སྟོན་པར་བྱེད་པ་དང་བསྒྲགས་པས་
སྤྱོད་པ་དང་། རླག་པར་སྤྱོད་པ་དང་ཐམས་ཅད་སྤྱོད་པའོ། །དེ་ལྟར་དགེ་སྦྱོང་རྣམས་སམ་གཞན་དག་དེའི་རིགས་ཅན་རྣམས་ཀྱང་རུང་སྟེ། བག་མེད་པའི་དབང་གིས་བྱིས་པའི་སྐྱེ་བོ་རྣམས་ཐམས་ཅད་བློ་ཉམས་པར་གྱུར་པ་དང་། ཇི་སྲིད་དུ་ཆོས་འདུལ་བ་མ་བསླབས་པ་རྣམས་ཀྱི་མདོར་

བསྡུ་ན་ཁ་ན་མ་ཐོ་བ་རྣམ་པ་དགུ་ཡིན་ནོ། །ཁ་ཅིག་སྤྱོད་པ་ཇི་ལྟ་བུ་ཡིན་ཞིང་ཇི་ལྟར་ན་བཅས་པའི་ཁ་ན་མ་ཐོ་བ་ཡིན་ན། འདི་ན་བསླབ་པ་གང་དག་ཡང་མོར་གྱུར་པ་རྣམས་དང་ལྡང་བ་ཡང་བར་གྱུར་པ་དེ་དག་རྣམས་འདིས་ཁྱད་དུ་བསད་པར་གྱུར་ནས་བག་མེད་པའི་དབང་གིས་
རྒལ་བར་བྱེད་དེ། ཇི་ལྟར་བདག་གིས་འདི་དག་ལས་རྒལ་བར་བྱས་ལ་ཕྱི་ནས་ནི་བདག་གིས་ཀུན་ནས་ལྡང་བར་བྱའོ་སྙམ་པའོ། །དཔེར་ན་ས་རྐོ་བར་བྱེད་པ་དང་རྩྭ་གཅོད་པར་བྱེད་པའོ། །འདི་ནི་གཅིག་སྤྱོད་པ་ཞེས་བརྗོད་དེ། དགེ་སྦྱོང་ངམ་གཞན་ཡང་དེའི་རིགས་ཅན་
རྣམས་ཀྱང་རུང་ངོ་། །ཡང་ཇི་ལྟར་ན་བག་མེད་པ་སྤྱོད་པ་རྣམས་བཤགས་པས་ལྡང་བ་སྤྱོད་པ་ཡིན་ན། འདི་ན་དགེ་སྦྱོང་དག་བསླབ་པའི་གཞི་གཅིག་གམ་བསླབ་པའི་གཞི་གཉིས་སམ་གསུམ་ལ་སྤྱོད་པ་ལས་འདའ་བར་བྱེད་དོ། །ཇི་ལྟར་དེ་སྙེད་ཅིག་ལས་འདས་པར་བྱེད་
ཅིང་། འདའ་བར་བྱས་ནས་ཀྱང་ཁོ་བོས་ཕྱིས་ཡང་ལྡང་བར་བྱའོ་ཞེས་པ་སྟེ། དེ་རིམ་པ་དེ་ཉིད་ཀྱིས་དང་དེ་ཁྱད་དུ་གསོད་པར་བྱེད་པས་ཀྱང་རྟག་ཏུ་བཅས་པའི་ཁ་ན་མ་ཐོ་བ་རྣམས་བྱེད་དོ། །དེ་དག་ནི་ཆོས་ལ་གུས་པར་སྤྱོད་པ་ཉིད་ཀྱང་མ་ཡིན་ནོ། །བག་དང་ལྡན་པ་ཡང་
མ་ཡིན་ནོ། །རྟག་ཏུ་ཡང་རྣམ་པར་གཡེངས་པ་དང་བཅས་པའི་སེམས་སུ་འགྱུར་རོ། །འདི་ལ་ནི་བཤགས་པས་ལྡང་བར་སྤྱོད་པ་ཞེས་བྱའོ། །ཇི་ལྟར་ན་བག་མེད་པས་བག་མེད་པ་ཡོངས་སུ་འཕེལ་བར་སྤྱོད་པ་ཡིན་ན། འདི་ན་སེམས་ཡང་བར་འགྱུར་ཞིང་སེམས་སྟོབས་
ཀྱང་ཡང་བ་རྣམས་ཀྱིས་བསླབ་པའི་གཞི་རྣམས་ཀྱི་བཤགས་པར་བྱ་བ་རྣམས་ཀྱང་མངོན་པར་ཤེས་པར་འགྱུར་བ་མ་ཡིན་ནོ། །སྙིང་པོ་དང་སྙིང་པོ་མེད་པ་རྣམས་བཤགས་པར་བྱ་བ་དང་། ལྡང་བ་ཡང་མངོན་པར་མི་ཤེས་པ་ཡིན་ནོ། །དེ་ལ་ནི་བསླབ་པའི་གཞི་བཅས་པའི་ཁ་ན་མ་
ཐོ་བ་རྣམས་གང་ཡིན་པ་རྣམས་ཤིན་ཏུ་ཡང་མང་བར་འགྱུར་རོ། །དེ་དག་རྣམས་ཀྱང་འཛིན་པར་བྱེད་ཅིང་ཡང་གང་དག་དུས་ཤིན་ཏུ་རིང་བ་ན་དཀའ་བླས་ཆེན་པོས་ལྡང་བར་འགྱུར་ཏེ། དེ་དག་ཀྱང་འཛིན་པར་བྱེད་པ་ཡིན་ནོ། །ཡང་གང་དག་ཁ་ན་མ་ཐོ་བ་ཆུང་བར་གྱུར་པ་དེ་དག་ནི་

ལེགས་པར་འཛིན་པ་ཡང་མ་ཡིན་ནོ། །ཆོས་ལ་གུས་པར་གནས་པའི་རང་བཞིན་ཅན་མ་ཡིན་ནོ། །དགེ་སྦྱོང་རྣམས་སམ་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ། འདི་དག་ནི་བག་མེད་པས་བག་མེད་པ་རབ་ཏུ་འཕེལ་བར་སྤྱོད་པར་བརྗོད་པ་ཡིན་ནོ། །
ཡང་ཇི་ལྟར་ན་ཕྱེད་ལ་སྤྱོད་པ་ཡིན་ནོ། །འདི་ལ་བསླབ་པའི་གཞི་གང་དག་ཡང་བ་རྣམས་སམ་ལྕི་བར་གྱུར་པ་རྣམས་ཀྱང་རུང་སྟེ། དགེ་སློང་གིས་ཀུན་ནས་ལྡང་བ་འབའ་ཞིག་བྱེད་དུ་འགྲོ་བ་འམ། གལ་ཏེ་ན་འཛིན་པར་བྱེད་པ་འམ། གལ་ཏེ་ན་ཤིན་ཏུ་བསྲབས་པར་གྱུར་ཏེ་ལྡང་
བར་འགྱུར་བ་ཡིད་ལ་བྱས་ནས། དེ་རིགས་འཐུན་པའི་ཆ་རྣམས་མ་ལུས་པ་ཁོ་ན་ཕྱིར་ཟློག་པར་བྱེད་དེ། འདི་ནི་ཕྱེད་ལ་སྤྱོད་པ་ཞེས་བརྗོད་དོ། །གང་གི་ཕྱིར་ཕྱེད་ལ་ནི་སྤྱོད་པར་བྱེད་ལ་ཕྱེད་ལ་ནི་སྤྱོད་པར་བྱེད་པ་ཉིད་ཀྱང་མ་ཡིན་ཏེ་རིམ་པ་འདི་དག་གིས་ན་ཕྱེད་ལ་སྤྱོད་པ་བྱ་བ་ཡིན་ནོ། །
བག་མེད་པ་རྣམས་ཀྱིས་བག་མེད་པར་རྣམ་པར་རྒྱུ་བ་བག་མེད་པའི་དབང་གིས་འགྲོ་བ་བག་མེད་པའི་ཡུལ་ལ་གནས་པ་འདི་ནི་དགེ་སྦྱོང་དང་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ། ཕལ་ཆེར་སྤྱོད་པར་བྱེད་པ་ཡིན་ནོ། །བསླབ་པའི་གཞི་རྣམས་ཡོངས་སུ་རྫོགས་པར་འཛིན་པར་བྱེད་
པ་དགེ་སྦྱོང་མ་དང་། དགེ་ཚུལ་དང་། དགེ་བསྙེན་རྣམས་ཀྱང་རུང་སྟེ། ཤིན་ཏུ་མྱུར་བར་མྱ་ངན་ལས་འདས་པར་འགྲོ་བར་འགྱུར་བ་འདི་དག་དང་། རྣམ་པ་དེ་ལྟ་བུ་རྣམས་དང་། ཚུལ་མི་འཐུན་པ་དེ་དང་དེ་དག་ལ་རྒྱབ་ཀྱིས་ཕྱོགས་པར་གྱུར་པའི་ཕལ་ཆེར་སྤྱོད་པ་རྣམས་ཇི་ལྟ་བུ་ཞེ་ན།
འདི་ན་བཅས་པའི་ཁ་ན་མ་ཐོ་བའི་བསླབ་པའི་གཞི་རྣམས་ཤིན་ཏུ་ཕལ་ཆེར་འཛིན་པར་བྱེད་པ་རྣམས་མ་ཉམས་པ་དང་། མ་རལ་བ་དང་། མ་ཟགས་པ་དང་། མི་བརྟན་པ་དང་། སྙིང་པོ་མེད་པ་དང་། གཅིག་ཏུ་ལྷག་མ་མེད་པ་མ་ཡིན་པར་གལ་ཏེ་ཤེད་ན་འཛིན་པར་བྱེད་དོ། །གལ་ཏེ་
ཤེད་ན་མི་འཛིན་པར་བྱེད་དོ། །དགེ་སྦྱོང་དང་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ། འདི་ནི་ཕལ་ཆེར་སྤྱོད་པ་ཞེས་བརྗོད་དོ། །ཡང་ཇི་ལྟར་ན་བཤགས་པ་དང་ལྡང་བ་ཡང་བར་སྤྱོད་པ་ཡིན་ན། འདི་ན་བག་མེད་པའི་དབང་གིས་སམ། སྡིག་པའི་གྲོགས་པོ་ལ་རྟེན་པའི་དབང་གིས་

ཀྱང་གལ་ཏེ་ན་བསླབ་པའི་གཞི་རྣམས་ཉམས་པར་བྱེད་དོ། །དེ་མྱུར་བར་སོ་སོར་རིག་ནས་འགྱོད་པར་འགྱུར་བ་དང་། སེམས་རབ་ཏུ་དང་བར་གྱུར་པས་སམ། དམྱལ་བའི་འཇིགས་པས་འཇིགས་པར་གྱུར་པས་ཀྱང་རུང་སྟེ། བཤགས་པར་བྱེད། དགེ་འདུན་ལ་ཡང་མཐོལ་
བར་བྱེད་དོ། །ཇི་ལྟར་ན་བདག་གི་བསླབ་པའི་གཞི་ཉམས་པར་བྱས་པ་ནི་བདག་གིས་མཛེས་པ་མ་བྱས་ཀྱིས་དགེ་འདུན་རྣམས་ཀྱིས་དེ་ལས་ལྡང་བར་མཛད་དུ་གསོལ་ཞེས་བཤགས་པ་ལ་འཁོད་པར་བྱ་བ་དང་། གཉེན་པོས་ཀྱང་མཐོལ་ཞིང་བཤགས་པར་བྱེད་པ་དང་ལྡང་བར་བྱེད་པ་
ཞེས་བྱ་བས་ཀྱང་འཇིགས་པ་ཡིན་ནོ། །དེའི་ཕྱིར་དགེ་སློང་འདི་ནི་བཤགས་པ་དང་ལྡང་བ་ཡང་བར་སྤྱོད་པ་ཞེས་བརྗོད་པ་ཡིན་ནོ། །ཇི་ལྟར་ན་དགེ་སློང་ལམ་སྟོན་པར་བྱེད་པ་དང་བསྒྲགས་པས་སྤྱོད་པ་ཡིན་ན། འདི་ན་དགེ་སློང་ངམ་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ།
བརྒྱ་ལ་ཞིག་ན་བག་མེད་པའི་དབང་གིས་ཁ་ན་མ་ཐོ་བ་མང་པོར་གྱུར་པ། སྡུག་བསྔལ་གྱི་རྩ་བ་གཅོད་པར་བྱེད་པའི་བསླབ་པའི་གཞི་རྣམས་ལས་འདའ་བར་བྱེད་པའམ། ཉམས་དམས་པར་བྱས་པར་གྱུར་ན་ཡང་དེ་དག་བླ་མ་རྣམས་ལ་རྗོད་པར་བྱེད་དོ། །དགེ་འདུན་རྣམས་ལ་ཡང་
གསོ་སྦྱོང་གི་དུས་ཀྱི་ཚེ་ནའོ། །དེ་ལ་དགེ་འདུན་རྣམས་ཀྱིས་ལམ་འདོམས་པར་མཛད་ཅིང་དཀའ་བླས་རྣམས་ཀྱང་ཉེ་བར་སྟོན་པར་མཛད་ལ་ལྡང་བའི་འཇིགས་པ་རྣམས་ཀྱང་འགྲོ་བར་བྱེད་དོ། །དེ་དག་རྣམས་ཀྱང་ཐོས་ཤིང་གོ་བར་བྱས་ཏེ་ལངས་པ་ཡིན་ནོ་ཞེ་ནས། ཕྱི་ནས་ཡང་ནི་
བསླབ་པའི་གཞི་རྣམས་ལས་འདའ་བར་མི་བྱེད་དེ། དམྱལ་བ་དང་། ཡི་དགས་དང་། དུད་འགྲོ་རྣམས་ཀྱིས་འཇིགས་པའི་ཕྱིར་རོ། །དུས་བཟངས་འདི་ནི་ལམ་སྟོན་པར་བྱེད་པ་དང་བསྒྲགས་པས་སྤྱོད་པ་ཞེས་བརྗོད་དོ། །ཡང་ཇི་ལྟར་ན་བརླག་པར་སྤྱོད་པ་ཡིན་ན། རྒ་བ་དང་།
འཆི་བའི་དབང་དུ་སོང་བའོ། །འདི་ན་ཆོས་འདུལ་བ་རྣམས་བསླབས་པར་གྱུར་པ། བསམ་གཏན་གྱིས་བསམ་གཏན་དུ་མི་བྱེད་པར། བྱ་བ་དང་བྱེད་པ་རྣམས་ལ་མངོན་པར་དགའ་བར་གྱུར་ནས། རྟག་ཏུ་ཡང་ཁྱིམ་ནས་ཁྱིམ་རྣམས་སུ་དང་། གནས་ནས་གནས་རྣམས་སུ་དང་།

སྦྱིན་བདག་གི་ཁྱིམ་རྣམས་ནས་སྦྱིན་བདག་གི་ཁྱིམ་རྣམས་སུ་ཟས་དང་གོས་ཀྱི་དོན་ཁོ་ནར་རྒྱུ་བར་བྱེད་དོ། །ལེགས་པར་འགྲོ་ལ་ཞབས་འབྲིང་ཡང་བྱེད་དོ། །ཁྱིམ་པ་རྣམས་ཉིད་ཉེ་བར་སྟེན་པར་བྱེད་དོ། །འདི་ནི་བརླག་པར་སྤྱོད་པ་ཞེས་བརྗོད་དོ། །རྐུན་མ་དེ་
ནི་ཤི་བའི་འོག་ཏུ་དམྱལ་བའི་མཐར་ཐུག་པར་འགྱུར་རོ། །དུས་བཟངས་ཡང་ཇི་ལྟར་ན་ཐམས་ཅད་སྤྱོད་པ་ཡིན་ན། ཆོས་འདུལ་བ་རྣམས་ཐམས་ཅད་ལ་དད་པར་བྱེད་དོ། །རྗོད་དོ། །བྱེད་པར་འགྱུར་རོ། །གལ་ཏེ་ཤེད་ན་བསླབ་པའི་གཞི་གཅིག་གམ་གཉིས་ཀྱི་
ཡང་རུང་སྟེ། ཁ་ན་མ་ཐོ་བ་ཅུང་ཟད་ཅིག་བྱུང་ན་ཡང་གོམས་པ་མེད་པ་དང་། ཆོས་ལ་གུས་པའི་དབང་གིས་འཛིན་པར་བྱེད་མི་ནུས་པར་གྱུར་ནས། དེ་དག་ལས་ལྡང་བར་བྱེད་པ་ཡིན་ནོ། །དུས་བཟངས་འདི་ནི་ཐམས་ཅད་བཤགས་ཤིང་སྤྱོད་པ་ཞེས་བརྗོད་དོ། །དགེ་སློང་ངམ་
རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ། ཁ་ན་མ་ཐོ་བ་ཉུང་བ་རྣམས་ཀྱང་ཕྱི་ནས་འདི་དག་བསླབ་པའི་གཞི་གང་དག་ལས་འདའ་བར་བྱེད་པ་འདི་དག་ཀྱང་བག་མེད་པའི་ཉེས་པ་ཡིན་ནོ། །དེ་ལྟར་འཐབ་བྲལ་བ་རྣམས་ཀྱི་མངའ་བདག་དེ་པད་མའི་སྙིང་པོ་ལ་ལེགས་པར་གནས་ནས།
སྨྲ་བ་པོའི་ངང་པ་དེ་དག་རྣམས་དང་བདུད་ཀྱི་རིགས་ཀྱི་བག་མེད་པ་དེ་ལ་ཡང་ཆོས་བསྟན་ཏོ། །དེ་ནས་དེའི་དུས་ན་མུ་སུ་ལུན་དྷ་དེས་ཚིགས་སུ་བཅད་པ་བརྗོད་པ། ཇི་ལྟར། སྐྱེས་བུ་བག་མེད་པས་ལོང་བ། །བག་མེད་དུག་ནི་སྟེན་པ་པོ། །བག་མེད་ཞགས་པས་བཟུང་ནས་ནི། །དམྱལ་བར་རྗེས་སུ་ཉེ་བར་འཁྲིད། །
བག་མེད་སྐྱེས་བུ་འཇིག་རྟེན་པའི། །གཤེ་བ་ཐམས་ཅད་ཐོབ་པར་འགྱུར། །ངག་རྣམས་དོན་མེད་འགྱུར་བ་དང་། །དམྱལ་བར་ཡང་ནི་འདྲེ་བར་བྱེད། །རྨོངས་པ་ཉིན་མེད་མཚན་མེད་དང་། །ལམ་དུ་འགྲོ་དང་བརྗོད་པ་ནའང་། །བག་མེད་སྐྱེས་བུ་སྐད་ཅིག་ཀྱང་། །བདེ་བའི་སྐལ་
བ་ཡོད་མ་ཡིན། །འཁོར་ལོ་བཞིན་དུ་འགྲོ་བ་ལྔར། །གང་དག་འདོད་པའི་ཁམས་ན་འཁོར། །གང་ཡང་བསམ་གཏན་ལས་ལྟུང་བ། །དེ་ཡང་བག་མེད་པས་བྱས་སོ། །གཟུགས་མེད་པ་ཡི་གནས་བཞི་ཡང་། །འཇིག་རྟེན་པ་ནི་གང་ཐོབ་པ། །སྲིད་ན་འཕྱང་ཉུག་འཁོར་བ་ནི། །

དེ་ཡང་བག་མེད་པས་བྱས་སོ། །ཁམས་གསུམ་འདི་དག་མ་ལུས་པ། །བག་མེད་འཆིང་བས་བཅིངས་པ་ཡི། །སྲིད་པའི་ཞགས་པས་བསྡམས་བྱས་པ། །བློ་མེད་པས་ཀྱང་མི་རིག་གོ། །དེ་ལྟར་མུ་སུ་ལུན་དྷ་དེས་སྔོན་གྱི་ལྷ་རྣམས་ཀྱི་དྲུང་ནས། བཅོམ་ལྡན་འདས་འོད་སྲུང་
གིས་གསུངས་པའི་མདོ་བཤད་པར་བྱ་བའི་གནས་སྐབས་སུ་བབ་པས། ངང་པའི་རྒྱལ་པོ་དུས་བཟངས་དེ་དང་། སྨྲ་བ་པོར་གྱུར་པའི་ངང་པ་དེ་དག་རྣམས་དང་། བག་མེད་པ་དང་། རྒོད་པ་དང་། རྒྱགས་པ་དང་བཅས་པའི་བདུད་ཀྱི་རིགས་དེ་དག་རྣམས་ལ་ཆོས་བཅུ་གཅིག་པོ་
རྣམས་ལས་ཆོས་གསུམ་པ་བསྟན་ཏོ། །དེ་རྣམས་གང་དག་ཞེ་ན། འདི་ལྟ་སྟེ། རྒོད་པ་ན་འདུལ་བས་རབ་ཏུ་འཇོམས་པར་བྱེད་དོ། །མ་བསྡམས་པ་ནི་སེམས་རྩེ་གཅིག་པས་ཡིན་ལ། ཚུལ་ཁྲིམས་འཆལ་པ་རྣམ་པ་སྣ་ཚོགས་པ་རྣམས་ལས་རང་བཞིན་གྱི་ཁ་ན་མ་ཐོ་བ་ནི་སྐྱེས་
བུ་དམ་པ་ལ་བསྟེན་ནས་ཕྱི་ནས་དགེ་བའི་རྩ་བ་རྣམས་ཀྱིས་ཏེ། ཚུལ་ཁྲིམས་འཆལ་པར་བརྗོད་པར་བྱ་བའི་རང་བཞིན་གྱི་ཁ་ན་མ་ཐོ་བ་རྣམས་ཀྱང་སྐྱེས་བུ་དམ་པ་ལ་ལེགས་པར་བསྟེན་གྲོགས་བྱས་པས་འཁོར་བ་ལས་གྲོལ་བར་འགྱུར་ན། བཅས་པའི་ཁ་ན་མ་ཐོ་བ་རྣམས་ལྟ་སྨྲོས་ཀྱང་ཅི་
དགོས། དེས་ན་རབ་ཏུ་བརྩོན་པས་ཀྱང་སྐྱེས་བུ་དམ་པ་ལ་བསྟེན་པར་བྱ་བ་ཡིན་ནོ། །སྤང་བར་བྱ་བ་གང་དག་ཞེ་ན། འདི་ལྟ་སྟེ། ལེ་ལོ་ནི་བརྩོན་འགྲུས་བསྐྱེད་པས་སོ། །ལེ་ལོ་རྣམས་ཐམས་ཅད་ཀྱང་བརྩོན་འགྲུས་བསྐྱེད་པས་སྤོང་བར་འགྱུར་ཏེ། ཡང་ཇི་ལྟར་བག་མེད་པ་ནི་
དོན་མ་ཡིན་པ་རྣམས་ཐམས་ཅད་ཀྱི་དང་དགེ་བའི་བཤེས་གཉེན་སྟེན་པ་ནི་ཆོས་འདུལ་བ་རྣམས་ཀྱི་ཕུལ་དུ་ཕྱིན་པའི་རྩ་བ་ཡིན་ནོ། །གཞན་ཡང་ཆོས་བཞི་པ་ཆོས་བཞི་པས་ངེས་པར་འཇོམས་ཤིང་སྤོང་ལ་སྤང་བར་བྱ་བ་རྣམས་གང་ཞེ་ན། དེ་ནི་འདི་ལྟ་སྟེ། ལེ་ལོ་ནི་བརྩོན་འགྲུས་བསྐྱེད་
པས་ཏེ། ལེ་ལོ་རྣམས་ནི་ཐམས་ཅད་ཀྱང་བརྩོན་འགྲུས་བསྐྱེད་པས་འཇོམས་པར་འགྱུར་རོ། །དཔེར་ན་སྣང་བས་མུན་པ་འཇོམས་པར་བྱེད་པ་དེ་བཞིན་དུ། ལེ་ལོ་རྣམས་ཐམས་ཅད་ཀྱང་བརྩོན་འགྲུས་བསྐྱེད་པས་སྤོང་བ་ཡིན་ནོ། །དེ་ལ་ལེ་ལོས་ནི་ཆོས་རྣམས་ཐམས་ཅད་ཀྱི་བར་

ཆད་བྱེད་པ་པོ་ཡིན་ཏེ། དཔེར་ན་ཇི་ལྟར་བྱས་པ་དེ་ལྟ་དེ་ལྟར་མངོན་པར་འཕེལ་བ་ཡིན་ཞིང་འཇིག་རྟེན་པ་དང་འཇིག་རྟེན་ལས་འདས་པའི་ཆོས་རྣམས་ཀྱི་བར་ཆད་བྱེད་པར་འགྱུར་རོ། །འཇིག་རྟེན་འདི་དང་འཇིག་རྟེན་ཕ་རོལ་རྣམས་སུ་ཡང་བདེ་བར་འགྱུར་བ་མ་
ཡིན་པ་མང་པོ་དེ་དག་རྣམས་ཀྱི་མིང་ཡང་གཟུང་བར་སླ་བ་མ་ཡིན་ནོ། །ལེ་ལོ་ཅན་ཞེས་བྱ་བ་ནི་བརྩོན་འགྲུས་ཞན་པ་སྟེ། གཞན་གྱིས་ཉེ་བར་འཇོམས་པར་བྱེད་དོ། །གཞན་རྣམས་ཀྱི་ཞེ་ཟློགས་པར་འགྱུར་རོ། །གཞན་གྱིས་ཕམ་པར་བྱེད་ཅིང་ཚར་གཅོད་པར་འགྱུར་ཏེ།
ལེ་ལོ་ཅན་རྣམས་ནི་ཤིན་ཏུ་ཉེ་བར་འཇོམས་པས་ཤིན་ཏུ་དབུལ་བར་འགྱུར་རོ། །ལས་ཀྱི་མཐའ་རྣམས་ལ་སྒྲུབ་པར་མི་བྱེད་དོ། །ཁེ་སྤོགས་རྣམས་མི་བྱེད་དོ། །ཞིང་ལས་མི་བྱེད་དོ། །ཁྱིམ་གྱི་གཞིའི་བྱ་བ་གཞན་རྣམས་ཀྱང་མི་བྱེད་དོ། །སྐྱེས་བུ་ལ་སྟེན་པར་མི་བྱེད་ཀྱི་
སྙོམ་ལས་ཀྱི་བསམ་གཏན་གྱིས་བཟུང་བ་ཡིན་ནོ། །སྐྱེ་བོ་རྣམས་ཐམས་ཅད་ཀྱིས་མཚོན་པར་འགྱུར་རོ། །ཡེ་ཤེས་ལ་སྦྱོར་བར་མི་བྱེད་དོ། །དེ་ནི་མཁས་པ་མ་ཡིན་ནོ། །མཁས་པའི་རང་བཞིན་ཅན་རྣམས་ཀྱང་མ་ཡིན་ནོ། །ཡུལ་དང་དུས་ཤེས་པ་མ་ཡིན་ནོ། །བདག་
དང་གཞན་རྣམས་ཀྱི་ཁྱད་པར་ཤེས་པ་མ་ཡིན་ནོ། །རང་གི་སྟོབས་རྣམས་དང་གཞན་གྱི་སྟོབས་རྣམས་ཀྱི་ཁྱད་པར་ཤེས་པ་མ་ཡིན་ནོ། །དུས་སུ་ལེགས་པར་དགོས་པ་རྣམས་སྒྲུབ་པ་མ་ཡིན་ཏེ། དེའི་བྱ་བ་རྣམས་ཐམས་ཅད་ལ་བར་ཆད་འབྱུང་བར་འགྱུར་རོ། །གང་གི་ཚེ་འཇིག་
རྟེན་འདི་དང་འཇིག་རྟེན་ཕྱི་མ་རྣམས་ཀྱི་ཡང་ལེ་ལོ་དེ་དག་རྣམས་ཉིད་བརྩོན་འགྲུས་བསྐྱེད་པས་བཅོམ་པར་གྱུར་པ་དེའི་ཚེ་འདི་ལ་འཇིག་རྟེན་པ་རྣམས་ཀྱིས་མངོན་པར་བགྲོད་པར་བྱ་བར་འགྱུར་རོ། །སྔ་བར་ལངས་པར་བྱེད་པ་དང་། ངལ་དུབ་ལས་བརྒྱལ་བ་དང་། གཉིད་ལས་བརྒྱལ་
ཞིང་ལེགས་པར་སད་པ་དང་། དུས་སུ་ལངས་པ་དང་། དུས་སུ་སྐྱོ་བ་སྐྱེ་བ་དང་། ལྟོས་པ་དང་བྲལ་བས་བྱ་བ་རྣམས་རྩོམ་པར་བྱེད་དོ། །དེ་ལུས་ཀྱི་བརྩོན་འགྲུས་བརྟན་པ་དང་ལྡན་པས་ལེ་ལོའི་དྲི་མ་དེ་དག་རྣམས་དག་པར་བཀྲུས་པའི་བརྩོན་འགྲུས་ལེགས་པར་རྩོམ་པ་དེ་ནི་དོན་རྣམས་

ཐམས་ཅད་དྲི་མ་དང་ཀུན་ནས་བྲལ་བར་སྒྲུབ་པར་བྱེད་དོ། །དོན་རྣམས་ལ་བགེགས་བྱུང་བར་གྱུར་ན་ཡང་སྐྲག་པར་མི་འགྱུར་ལ་སྐྱོ་བ་སྐྱེ་བར་མི་འགྱུར་རོ། །གཞན་རྣམས་ཀྱིས་བར་ཆད་བྱེད་པ་ཡང་མ་ཡིན་ནོ། །རབ་ཏུ་བརྟན་པས་བྱ་བ་རྣམས་ཀྱང་རྩོམ་པར་བྱེད་དོ། །བརྩོན་འགྲུས་
དང་ལྡན་པས་གང་དག་སྒྲུབ་པར་བྱེད་པ་རྣམས་ནི་ཀུན་ནས་ཉམས་པར་ཡང་མི་འགྱུར་རོ། །གཞན་གྱི་དབང་གིས་བྱ་བ་རྣམས་ཀུན་ཏུ་རྩོམ་པ་ཡང་མ་ཡིན་ནོ། །མི་རྣམས་ཀྱི་ཁྱད་པར་ཡང་ཤེས་པར་འགྱུར་རོ། །བདག་གི་དཔུང་དང་གཞན་གྱི་དཔུང་རྣམས་ཀྱི་ཁྱད་པར་ཤེས་པར་
འགྱུར་རོ། །དེ་དེ་དག་རྣམས་ཀྱིས་ཀྱང་བསྔགས་པར་འགྱུར་རོ། །སྐྱེ་བོའི་ཚོགས་ཆེན་པོ་རྣམས་ཀྱིས་མཆོད་པར་ཡང་འགྱུར་རོ། །རྒྱལ་པོ་དང་རྒྱལ་པོའི་བློན་པོ་དག་གིས་ཀྱང་མཆོད་པར་བྱེད་དོ། །རྟག་ཏུ་ནོར་དང་ལྡན་པར་ཡང་འགྱུར་རོ། །སེམས་སྟོབས་དང་
སྟོབས་རྣམས་ཀྱང་ཉམས་པ་མེད་པར་འགྱུར་རོ། །གང་དག་དང་ལྷན་ཅིག་ཏུ་འགལ་བར་གྱུར་པ་དེ་དག་རྣམ་པར་ཕམ་པར་འགྱུར་རོ། །གང་གི་ཕྱིར་བརྩོན་འགྲུས་དང་ལྡན་པ་རྣམས་དང་ནི་ལྷན་ཅིག་ཏུ་འགལ་བར་བྱ་བར་མི་ནུས་སོ། །མཛའ་བོ་དག་ཀྱང་རྗེས་སུ་སྒྲུབ་པར་བྱེད་ལ།
དེས་ཀྱང་འདིའི་མཛའ་བོ་རྣམས་མངོན་པར་འཕེལ་བར་འགྱུར་རོ། །དེ་གྲོགས་པོ་མང་བ་དང་མཆོག་ཏུ་བདེ་བ་དང་མཆོག་ཏུ་སྟོབས་དང་ལྡན་པར་ཡང་འགྱུར་རོ། །གྲོང་ཁྱེར་གཞན་དག་ན་ཡང་མངོན་པར་དགའོ། །བྱེས་ན་ཡང་སྐྱེ་བོ་མང་པོ་རྣམས་ཀྱིས་མངོན་པར་ཤེས་པར་འགྱུར་
རོ། །དེ་དེའི་ཕྱིར་གང་དག་དང་བསྟེན་གྲོགས་བྱེད་པར་གྱུར་པ་དེ་དག་རྣམས་ཀྱིས་མཆོད་པར་བྱེད་དོ། །འཇིག་རྟེན་དག་ན་ཡང་འདི་ཀུན་གྱིས་ཤེས་པར་འགྱུར་རོ། །ལེ་ལོ་རྩ་བ་ནས་རྣམ་པར་སྤངས་པའི་སྐྱེས་བུ་རྣམས་ཀྱིས་ནི་ཡོན་ཏན་དུ་མ་ཐོབ་པར་འགྱུར་རོ། །དེ་ནས་བདག་ཉིད་ཆེན་
པོ་དེ་ཉིད་ཀྱིས་ཀྱང་གོ་ཆ་བརྟན་པོ་དེ་ལྟ་བུ་རྣམས་དང་། རྙོག་པ་དང་རྣམ་པར་བྲལ་བས་བདུད་ཀྱི་དཔུང་རྣམས་ངེས་པར་འཇོམས་པར་བྱེད་དོ། །འཁོར་བ་ཕྱིར་ཟློག་པའི་གཡུལ་ཤོམ་པ་སྐྱེ་བོ་དམ་པ་རྣམས་ཐམས་ཅད་དགའ་བ་དང་། བརྩོན་འགྲུས་རྩོམ་པ་དང་བཅས་པ་གང་གིས། འཇིག་

རྟེན་ལས་འདས་པ་ཟག་པ་མེད་པ་ཁ་ན་མ་ཐོ་བ་མེད་པ་མྱ་ངན་ལས་འདས་པའི་ནམ་མཁའ་ལེགས་པར་འཐོབ་པའི་དགོས་པ་ཀུན་ནས་རྩོམ་པར་བྱེད་དོ། །དེ་དང་པོ་ཁོ་ནར་རེ་ཞིག་ཤིན་ཏུ་བརྟན་པས་མཆོག་ཏུ་དཀའ་བར་གྱུར་པ། ཁྱད་པར་དུ་རོའི་གནས་དམན་
པ་རྣམས་ལས་དཀའ་བས་དགྲོལ་བ་འདི་ནི་འཁོར་བ་པ་རྣམས་ཐམས་ཅད་ཀྱི་འཆིང་བ་ཡིན་ཏེ། ཁྱིམ་ན་གནས་པ་བུ་དང་། ཆུང་མ་དང་། སྲིང་མོ་དང་། བྲན་ཕོ་དང་། བྲན་མོ་དང་། ཞིང་དང་། འབྲུ་དང་བང་མཛོད་རྣམས་ཀྱིས་གང་བའི་སྲེད་པའི་ཆུ་བོའོ། །བརྩོན་འགྲུས་
བརྩམས་པའི་གྲོགས་དང་ལྡན་པ་གང་དག་གིས་འཁོར་བའི་འཇིགས་པས་འཇིགས་པ་རབ་ཏུ་འཇོམས་པ་དེ་དག་གིས་ནི། རྣམ་པ་དེ་ལྟ་བུའི་ཁྱིམ་གྱི་གནས་རྣམས་བཏང་ནས་གོས་རྣམས་ངུར་སྨྲིག་ཏུ་བགོས་ཏེ། བརྩོན་འགྲུས་དང་ལྡན་པ་གང་ཡིན་པ་དེ་ཁྱིམ་གྱི་གནས་ནས་ངེས་
པར་བྱུང་ངོ་། །ཁྱིམ་གྱི་གནས་ཀྱི་འཆིང་བ་རྣམས་ལས་གྲོལ་བས། ཐར་པ་མཐར་ཕྱིན་པའི་ལམ་ཐོབ་ནས་བསམ་གཏན་དང་། ཁ་ཏོན་དག་ལ་བརྩོན་པ་དང་ལྡན་པ། བརྩོན་འགྲུས་ཕ་རོལ་གནོན་པ་རྣམས་མོས་པ་ཇི་ལྟ་བ་བཞིན་དུ་ཐར་པ་ལ་འཇུག་པར་བྱེད་དོ། །དེ་ལ་ལེགས་
པར་སྟོན་པ་བརྩོན་འགྲུས་དང་ལྡན་པ་དུས་རབ་ཏུ་ཤེས་པ་ལུས་དང་ངག་གི་དེ་ཁོ་ན་ཉིད་ཀྱི་མཚན་ཉིད་དང་སྐྱེ་བ་དང་འཇིག་པའི་དེ་ཁོ་ན་ཉིད་ཤེས་པ། རང་གི་མཚན་ཉིད་ཀྱི་དེ་ཁོ་ན་ཉིད་ཤེས་པ། ཕུང་པོ་རྣམས་ཀྱི་སྐྱེ་བ་དང་འཇིག་པའི་དེ་ཁོ་ན་ཉིད་ཤེས་པ། ཉིན་དང་མཚན་དུ་ཡང་
བརྩོན་པ་མི་འདོར་བ་དེས་རབ་ཏུ་བརྩོན་པས་ཀྱང་སློབ་དཔོན་ལ་ལེགས་པར་རྟེན་པས་དང་། ཡེ་ཤེས་མང་དུ་སྤེལ་བས་ཀྱང་ཀུན་ནས་རྩོམ་པར་བྱེད་དོ། །བརྟུན་པར་བྱེད། རབ་ཏུ་འབད་པར་བྱེད། ལམ་གོམས་པར་བྱེད། སྐྱོན་སྤོང་བར་བྱེད་དེ། ཐོག་མ་མེད་པའི་དུས་ནས་
ཞུགས་པར་གྱུར་པ་འཁོར་བའི་འཆིང་བར་གྱུར་པ། དོན་མེད་པ་རྣམས་ཐམས་ཅད་བྱེད་པ། མུན་པར་བྱེད་པའི་འོས་སུ་གྱུར་པ། དོན་མ་ཡིན་པ་རྣམས་ཐམས་ཅད་ཀྱི་རྒྱུར་གྱུར་པ། སྲོག་ཆགས་རྣམས་ལ་ཤིན་ཏུ་འཐས་པར་གྱུར་པ། དེ་དག་རྣམས་ཀུན་ནས་བརྩམས་པའི་བརྩོན་འགྲུས་

ཀྱིས་སྤོང་བར་བྱེད་དོ། །དེ་ཇི་ལྟ་ཇི་ལྟར་ལམ་རྣམས་ཐོབ་པར་གྱུར་པ་དེ་ལྟ་དེ་ལྟར་ཕྱིར་ཞིང་ཉིད་ཀྱང་སྤྲོ་བ་སྐྱེ་བར་བྱེད་པ་ཡིན་ནོ། །བརྩོན་འགྲུས་ཤིན་ཏུ་བརྩམས་པས་བྲལ་བའི་འབྲས་བུ་རྣམས་ཅི་ནས་ཀྱང་འབྱུང་བར་བྱེད་དོ། །ཀུན་ནས་ཉོན་མོངས་པའི་ཆོས་འཆིང་བར་གྱུར་པ། བྱིས་
པའི་སྐྱེ་བོ་རྣམས་ཐམས་ཅད་ཀྱི་ཡིད་ཀུན་ནས་འཕྲོག་པར་བྱེད་པའི་ཡུལ་རྣམས་ལ་ཆགས་པར་མི་བྱེད་དོ། །འདི་ལྟ་སྟེ། འདོད་པའི་རྗེས་སུ་འཐུན་པར་གྱུར་པ་སྒྲ་དང་། རེག་བྱ་དང་རོ་དང་། གཟུགས་དང་དྲི་རྣམས་ཀྱིས་དགེ་བའི་རྫས་གང་ཡིན་པ་རྣམས་རྐུ་བ་འདྲིད་པའི་ཆོས་ཅན་
རྣམ་པར་སླུ་བའི་ཆོས་ཅན་དོན་མ་ཡིན་པ་རྣམས་ཐམས་ཅད་བྱེད་པ་མི་འདོད་པའི་རྣམ་པར་སྨིན་པར་འགྱུར་བ་མི་འདོད་པའི་འཆིང་བའི་ཆོས་སུ་གྱུར་པའི་བྱིས་པ་སོ་སོའི་སྐྱེ་བོ་ཡོངས་སུ་མ་སྦས་པ་རྣམས་ཐམས་ཅད་ཀྱི་སེམས་རྣམ་པར་གཡེང་བར་བྱེད་པ་དང་། རྣམ་པར་རྨོངས་པར་བྱེད་པའི་
ཡུལ་གྱི་དགྲ་དེ་དག་རྣམས་ཐམས་ཅད་སྤོང་བར་བྱེད་དོ། །རོ་མྱོང་བར་མི་བྱེད་པ་དང་། ཐར་པའི་ལམ་སྒོམ་པར་བྱེད་དོ། །སེམས་དྲི་མ་མེད་པར་བྱེད་དོ། །དེ་ཇི་ལྟ་ཇི་ལྟར་དྲི་མ་རྣམས་མེད་པར་བྱེད་པ། དེ་ལྟ་དེ་ལྟར་བརྩོན་འགྲུས་དང་ལྡན་པ་དང་དྲན་པ་དང་ལྡན་པ་དང་། ངོ་མཚར་
བར་གྱུར་པ་ཤེས་བཞིན་ཅན་དགྲ་རབ་ཏུ་བཅོམ་པར་འགྱུར་རོ། །གཞན་ཡང་བརྩོན་འགྲུས་དེ་ཉིད་ཀྱིས་སྤྲོ་བ་དང་བཅས་པ་གང་ཡིན་པས་འདོད་ཆགས་ཞེ་སྡང་གཏི་མུག་རྣམས་རབ་ཏུ་འཇོམས་པར་བྱེད་དོ། །རྣམ་པར་བྲལ་བར་བྱེད་དོ། །རྒྱལ་བར་བྱེད་དོ། །ཡང་སྲིད་པ་མི་འབྱུང་
ངོ་། །དགྲ་རྣམས་ལས་རྒྱལ་བ་མི་འཐུན་པ་རྣམས་ལས་རྒྱལ་བ་དེ་ནི་དྲི་མ་མེད་པའི་ནམ་མཁའ་བཞིན་དུ་དང་རབ་ཏུ་དང་བའི་ཆུ་བཞིན་དུ་དང་སྤྲིན་གྱི་ཚོགས་རྣམས་དང་བྲལ་བར་གྱུར་པས། དྲི་མ་མེད་པའི་ཟླ་བ་བཞིན་དུ་དང་། ན་བུན་དང་བྲལ་བའི་འཛམ་བུའི་གླིང་གི་ཉི་མ་བཞིན་
དུ་སྟེ་དེ་ལྟ་དེ་ལྟར་རྣམ་པར་སྣང་ངོ་། །ཇི་ལྟ་ཇི་ལྟར་ནད་པ་ནད་རྣམས་ལས་གྲོལ་བ་བཞིན་དུ་དང་། དབུལ་པོ་རྣམས་ཀྱིས་རབ་ཏུ་ནོར་རྙེད་པ་བཞིན་དུ་དང་། མིག་མེད་པ་རྣམས་ལམ་སྟོར་ནས་ནགས་ཁྲོད་དུ་ཞུགས་པ་ལས་ལམ་དུ་བགྲོད་པར་བྱེད་པ་དེ་དག་རྣམས་བཞིན་དུ་འདིས་མཐར་

ཐུག་པའི་ཚུལ་ཁྲིམས་ཤིས་པ་གང་ཡིན་པ་ཉེ་བར་ཐོབ་པའི་དབང་དུ་བྱས་ནས་བསྙེན་པར་རྫོགས་པར་བྱས་ཏེ་གནས་སོ། །ཇི་ལྟར་བདག་གི་སྐྱེ་བ་རྣམས་ནི་ཟད་དོ། །ཚངས་པར་སྤྱོད་པ་ནི་སྤྱད་དོ། །བདག་གི་འདི་ལས་སྲིད་པ་གཞན་ནི་མི་ཤེས་སོ། །དེ་ལྟར་
འདིའི་སྡིག་པ་རྣམས་རྣམ་པར་བྲལ་བ། འཆིང་བའི་ཞགས་པ་རྣམས་ཐམས་ཅད་ལས་གྲོལ་བ། ཆུ་ཀླུང་གི་ཕ་རོལ་ཏུ་ཕྱིན་པར་གྱུར་ནས་རྣམ་པར་རྒྱལ་ཞིང་མཛེས་སོ། །བརྩོན་འགྲུས་བརྩམས་པ་དང་ལྡན་པ་གང་གིས་བརྟན་པ་རྣམས་ཀྱི་དེ་དག་རྣམས་ཐམས་ཅད་ཡིན་ནོ། །དེའི་
ཕྱིར་ན་ཐམས་ཅད་ཀྱིས་ཀྱང་རབ་ཏུ་འབད་པས་བརྩོན་འགྲུས་བརྩམ་པར་བྱའོ། །འཁོར་བའི་འཆིང་བར་གྱུར་པའི་ལེ་ལོ་དང་བག་མེད་པ་རྣམས་ཀྱང་སྤང་བར་གྱིས་ཤིག །དེ་ནས་དེའི་ཚེ་ན་མུ་སུ་ལུན་དྷས་བཅོམ་ལྡན་འདས་འོད་སྲུང་གིས་གསུངས་པའི་ཚིགས་སུ་བཅད་པ་བརྗོད་པ། ཇི་
ལྟར། བརྩོན་འགྲུས་བརྩམས་པ་དྲན་ལྡན་པ། །དེ་ཚེ་གཅིག་ཏུ་མངོན་པར་དགའ། །སྡིག་པའི་ཆོས་ལས་རྣམ་པར་གྲོལ། །མཁས་པས་ཐར་པ་ཐོབ་པར་འགྱུར། །བརྩོན་འགྲུས་རྩོམ་པ་དང་ལྡན་པ། །གང་གིས་ལེ་ལོའི་དྲི་མ་སྤོང་། །ངན་འགྲོ་འཇིགས་ལས་
རྣམ་པར་གྲོལ། །སྐྱེ་བོ་དེ་ནི་མཐོ་རིས་འགྲོ། །ལེ་ལོ་ཆོས་རྣམས་ཐམས་ཅད་ཀྱི། །བར་ཆད་བྱེད་པ་ཡིན་པར་འདོད། །སྐྱོན་དེས་ཉེ་བར་བཅོམ་པ་ཡི། །མི་ནི་སྡུག་བསྔལ་སྐལ་ལྡན་ཡིན། །འདི་དང་ཕ་རོལ་བདེ་དོན་གཉེར། །དེ་ཡིས་དེ་ནི་སྤང་བར་གྱིས། །དེ་ཕྱིར་
དེས་ཟིན་སྐྱེས་བུ་དེ། །བཀྲ་ཤིས་དང་ཡང་དེ་མཚུངས་འདོད། །དེ་ལྟར་འཐབ་བྲལ་བ་རྣམས་ཀྱི་མངའ་བདག་དེས་སྨྲ་བ་པོའི་ངང་པ་དེ་དག་རྣམས་དང་། ངང་པའི་རྒྱལ་པོ་དུས་བཟངས་དེ་དང་བདུད་ཀྱི་རིགས་ཀྱི་བག་མེད་པ་དེ་དག་རྣམས་ལ་བཅོམ་ལྡན་འདས་འོད་སྲུང་གིས་གསུངས་
པའི་མདོ་གང་ཡིན་པ་སྔོན་གྱི་ལྷ་ལས་དེས་ཐོས་པ་རྣམས་སྟོན་པ་ཡིན་ནོ། །གཞན་ཡང་ཉོན་མོངས་པ་དྲི་མ་ཅན་གྱི་ཆོས་རྣམས་དཀར་པོའི་ཆོས་ཀྱིས་རབ་ཏུ་གཞོམ་པར་བྱའོ། །འདི་ཡང་གང་ཞེ་ན། འདི་ལྟ་སྟེ། གྲོང་དང་གྲོང་ཁྱེར་དུ་འཇུག་པ་ལ་དགའ་བའི་སྤྱོད་པ་རྣམས་སྤོང་བ་ནི་ཐམས་

ཅད་གཅིག་ཏུ་དགོན་པ་ན་གནས་པས་སོ། །གྲོང་དང་གྲོང་ཁྱེར་ན་སྤྱོད་པ་ལ་དགའ་བར་བྱེད་པ་གཅིག་ཏུ་གོམས་པར་གྱུར་པ་ནི། དགེ་སློང་ལ་གཅིག་ཏུ་བར་ཆད་བྱེད་པར་འགྱུར་རོ། །ཇི་ལྟར་གྱུར་པས་ཞེ་ན། དགེ་སློང་གི་བྱ་བ་ཉིད་དུ་གྱུར་པ་བསམ་གཏན་དང་ཁ་ཏོན་ཡོངས་
སུ་སྤངས་ནས་གྲོང་ངམ་གྲོང་ཁྱེར་དུ་འཇུག་པར་བྱེད་ཅིང་གནས་པར་ཡང་བྱེད་དོ། །ཁྱིམ་དེ་དང་དེ་དག་རྣམས་ལ་བློ་ཤིན་ཏུ་ལྷག་པར་ཆགས་པར་གྱུར་ནས། བུད་མེད་རྣམས་དང་ངམ་སྐྱེས་པ་དང་བཅས་པ་དང་ཡང་རུང་སྟེ། རྒྱུན་མི་འཆད་པར་འདུ་འཚོག་ཡང་བྱེད་པར་འགྱུར་
རོ། །དེ་གལ་ཏེ་བུད་མེད་དང་ལྷན་ཅིག་ཏུ་འཆིང་བར་འགྱུར་བ་རྣམས་ཐམས་ཅད་བྱེད་དོ། །དོན་ཐམས་ཅད་ལས་ཡོངས་སུ་ཉམས་པར་འགྱུར་ཞིང་། ཡིད་འདོད་ཆགས་ཀྱི་དབང་དུ་འགྱུར་བར་ཀུན་ནས་སྐྱེད་པར་བྱེད་དོ། །རྒྱུ་གང་གིས་བུད་མེད་ནི་མེ་དང་འདྲ་བ་ཡིན་ཏེ།
ཇི་ལྟར་གང་མེ་ལ་ཉེ་བ་ཉིད་དུ་གནས་པ་དེ་ནི་ཉེ་བར་སྲེག་པར་འགྱུར་རོ། །དེ་བཞིན་དུ་ཡང་གང་བུད་མེད་རྣམས་དང་ཉེ་བར་གནས་པར་བྱེད་པ་དེའི་སེམས་རྣམ་པར་འཁྲུལ་བར་འགྱུར་རོ། །རྒྱུ་མཚན་དེའི་ཕྱིར་ན་དགེ་སློང་གིས་གྲོང་དང་གྲོང་ཁྱེར་རྣམས་སུ་འཇུག་པར་མི་བྱའོ། །གལ་ཏེ་
སྐྱེས་པ་དག་དང་ལྷན་ཅིག་ཏུ་འདུ་འཚོག་པའམ་གཞན་རྣམས་དང་ཡང་ཀུན་རྗོད་པར་བྱེད་པ་དེ་དག་ནི་བྱ་བ་རྣམས་ཐམས་ཅད་ལས་ཡོངས་སུ་ཉམས་པར་འགྱུར་རོ། །འདིའི་སེམས་ཟག་པ་མེད་པའི་ཆོས་རྣམས་ལ་ཡང་དག་པར་རབ་ཏུ་དང་བར་འགྱུར་བ་ཡང་མ་ཡིན་ནོ། །དགེ་སློང་གྲོང་དང་
གྲོང་ཁྱེར་རྣམས་སུ་འཇུག་པ་ལ་དགའ་བའི་སྤྱོད་པའི་དབང་གིས་བར་ཆད་ཆེན་པོར་གྱུར་པ་གཞན་རྣམས་ཉིད་ཀྱང་འབྱུང་བར་འགྱུར་ཏེ། དེ་ལ་འདི་དག་རྣམས་ཀྱང་གང་ཞེ་ན། འདི་ལྟ་སྟེ། ཁྱིམ་ནས་ཁྱིམ་རྣམས་སུ་འཇུག་པའི་དགེ་སློང་ནི་སེམས་རྣམ་པར་གཡོས་པར་འགྱུར་རོ། །
ཁྱིམ་རྣམས་ཀྱི་ཉེ་བར་སྤྱོད་པར་བྱ་བ་རྣམས་ཡོངས་སུ་རྟོགས་ཤིང་ཟས་དང་སྐོམ་གྱི་ལོངས་སྤྱོད་དག་མངོན་པར་མཐོང་ནས་སྤངས་ཀྱང་དེ་ནམ་ཞིག་ན་སླར་ཡང་མི་མཉམ་པ་རྣམས་ལ་འཇུག་པར་རྩོམ་སྟེ། ནགས་ཀྱི་ནང་ནས་ཅི་ནས་ཀྱང་ཁྱིམ་པར་འགྱུར་རོ། །ནགས་ན་གནས་པའི་དགའ་བ་

ལས་ཡོངས་སུ་ཉམས་པར་གྱུར་ནས། དེ་ཕྱིར་ཡང་ཁྱིམ་གྱི་གནས་ཀྱི་འཆིང་བའི་སྐྱོན་དེ་ཉིད་ཀྱིས་ཀུན་ནས་བཅིངས་པར་གྱུར་ནས། འདོད་ཆགས་དང་ཞེ་སྡང་དང་གཏི་མུག་རྣམས་ལ་སྤྱོད་དོ། །དེ་ཉེས་པ་དེ་དག་རྣམས་ཀྱི་སྐྱོན་གྱིས་ཕྱིར་ཡང་དམྱལ་བ་དང་ཡི་
དགས་དང་དུད་འགྲོ་རྣམས་སུ་སྐྱེ་བ་ཡིན་ནོ། །སྡུག་བསྔལ་དེ་དག་རྣམས་ཀྱི་རྩ་བ་ཡང་གྲོང་དང་གྲོང་ཁྱེར་དུ་འཇུག་པའི་སྤྱོད་པ་ལ་དགའ་བ་ཡིན་ནོ། །དེའི་ཕྱིར་ཡང་དག་པའི་དགེ་སློང་ཡིན་པར་འདོད་པས་དེ་དག་རྣམས་ཡོངས་སུ་སྤོངས་ཤིག །རྣམ་པ་དེ་ལྟ་བུའི་སྐྱོན་དེ་དག་རྣམས་
ཀྱང་གང་གིས་སྤོང་ན། གཅིག་ཏུ་དགོན་པ་ན་གནས་པས་སོ། །དགོན་པ་ན་གནས་པ་དེ་ཡང་མཐར་ཐུག་པའི་ཡོན་ཏན་རྣམས་ཐམས་ཅད་ཀྱི་རྟེན་དུ་གྱུར་པ་མཆོག་ཏུ་བཟང་བ་ཡིན་ནོ། །གཅིག་པུ་དགོན་པ་ན་གནས་པར་དགའ་བའི་དགེ་སློང་ནི་དབང་པོ་རྣམས་ཞི་བ་དང་སེམས་ཤིན་
ཏུ་རབ་ཏུ་དང་བ་དང་། བློ་ལེགས་པར་བཏུལ་བའི་གསེར་དང་མཚུངས་པ་དང་། མཆོག་ཏུ་ཞི་བ་དང་དབང་པོ་རྣམས་མཆོག་ཏུ་བསྡམས་པ་དང་འཇིགས་པའི་དྲི་མ་རྣམས་དང་རྣམ་པར་བྲལ་བ་དང་། མཆོག་ཏུ་གཙང་བར་གྱུར་པའི་ཟག་པ་མེད་པའི་བདེ་བ་རྣམས་གང་ཡིན་པ་འཐོབ་
པར་བྱེད་དོ། །བདེ་བ་དེའི་ཁྱད་པར་རྣམས་ཀྱིས་ན་འདོད་པ་ན་སྤྱོད་པའི་ལྷའི་རིགས་དྲུག་པོ་འདི་དག་རྣམས་ཐམས་ཅད་ཀྱིས་ཀྱང་ཡང་དག་པའི་ལེགས་པ་དང་ལྡན་པར་གྱུར་ཅིང་ཀུན་གྱིས་ཀྱང་གང་སྔོན་ལས་རྣམས་གཅིག་ཏུ་བྱས་པར་གྱུར་ལ། དེ་ཡང་འདོད་པ་སྡུག་པ་ཡིད་དུ་འོང་
བ་མཆོག་ཏུ་མཚུངས་པ་མེད་པའི་ལྷ་གཅིག་གི་རྣམ་པར་སྨིན་པའི་འབྲས་བུར་གྱུར་ཅིང་འདོད་པ་ན་སྤྱོད་པ་འདི་དག་རྣམས་ཀྱི་བདེ་བ་རྣམས་དང་ཀུན་ནས་ལྡན་པར་གྱུར་པ་གང་ཡིན་པ་དེས་ཀྱང་། ཟག་པ་ཟད་པའི་བདེ་བ་གཅིག་གི་ཆར་ཡང་མི་ཕོད་ཅིང་དཔེར་ཡང་མི་བཟོད་དོ། །དཔྱད་
པར་གྱུར་པ་ན་ཐམས་ཅད་དུ་དཔེར་ཡང་མི་ཆོག་གོ། །དེའི་ཕྱིར་གང་འགའ་ཞིག་དོན་དམ་པའི་བདེ་བ་འདོད་པ་དེས་གྲོང་དང་གྲོང་ཁྱེར་དུ་འཇུག་པ་ལ་དགའ་བའི་བདེ་བ་དེ་དག་རྣམས་མཐོང་ལ་བསམ་གཏན་དང་སྙོམས་པར་འཇུག་པའི་བདེ་བ་རྣམས་དོན་དུ་གཉེར་ཞིང་རྟག་ཏུ་གཅིག་པུ་ཉིད་

མངོན་པར་དགའ་བས་རི་ཁྲོད་དང་རིའི་ཕུག་དང་དགོན་པ་རྣམས་སུ་རྩྭ་སོག་གི་སྟན་ལ་གཅིག་ཏུ་གནས་པར་འགྱུར་བར་གྱིས་ཤིག །ཟག་པ་མེད་པའི་བདེ་བ་ལ་མངོན་པར་དགའ་བས་གནས་པའི་དགེ་སློང་རྣམས་ནི་གྲོགས་པོ་དང་གཉེན་འབྲེལ་དང་རང་གི་སྐྱེ་བོ་རྣམས་ལྟ་བར་བྱེད་
པས་རྣམ་པར་རྒྱུ་བ་སྟེན་པར་འགྱུར་བ་ནི་མ་ཡིན་ནོ། །དེ་རང་གི་སྐྱེ་བོ་དང་གྲོགས་པོ་དང་གཉེན་འབྲེལ་རྣམས་ལ་ལྟ་བས་རྣམ་པར་རྒྱུ་བ་བསྟེན་པར་གྱུར་ན། དེ་རང་གི་སྐྱེ་བོ་དང་གྲོགས་པོ་དང་གཉེན་འབྲེལ་རྣམས་དང་འཕྲད་པ་ལས་བྱུང་བའི་བདེ་བ་རྣམས་ནི་འཇིག་པ་དང་མི་བརྟན་
པ་དང་མི་རྟག་པ་དང་མཐར་རྣམ་པར་འབྲལ་བ་དེ་དག་རྣམས་ནི་མཆོག་ཏུ་མཐར་ཕྱིན་པ་མ་ཡིན་ནོ། །ཉོན་མོངས་པ་རྣམས་དང་བཅས་པ་དང་དེ་ནི་དྲི་མ་དང་སྐྱོན་དང་གནོད་པ་དང་བཅས་པ་དང་གཅིག་ཏུ་ངེས་པ་མ་ཡིན་པ་འཇིགས་པ་དང་བཅས་པར་གཅིག་ཏུ་ངེས་པ་དཔེ་མེད་པ་རྣམས་
ལས་རྣམ་པར་མ་གྲོལ་བ་ཡིན་ནོ། །དེའི་ཕྱིར་ན་བློ་གྲོས་དམན་པར་གྱུར་པ་གང་འགའ་ཞིག་གིས་དོན་དམ་པའི་བདེ་བ་རྣམས་ཀུན་ནས་དོར་ནས་ཟག་པ་དང་བཅས་པའི་བདེ་བ་ཚུལ་དང་འཐུན་པ་མ་ཡིན་པ་སྡུག་བསྔལ་རྣམས་ཚོལ་བར་བྱེད་དོ། །དེ་ནི་འོད་བོར་བར་གྱུར་ནས་མུན་པ་ཚོལ་
བར་བྱེད་པ་ཡིན་ནོ། །དེ་ལས་ཀྱང་འཁྱམ་པར་གྱུར་ཏེ། བློ་དང་མི་ལྡན་ཞིང་ཡོན་ཏན་དང་ཡོན་ཏན་མ་ཡིན་པ་དང་སྐྱོན་གྱི་མཚན་ཉིད་ལ་བློ་གྲོས་ལྡོངས་པའི་ཕྱིར་རོ། །དེའི་ཕྱིར་གྲོང་དང་གྲོང་ཁྱེར་དུ་འཇུག་པར་དགའ་བའི་སྤྱོད་པ་རྣམས་སྤོངས་ལ། རྟག་པར་གཅིག་པུ་དགོན་པ་
ན་གནས་པ་ལ་མངོན་པར་དགའ་བར་འགྱུར་བར་གྱིས་ཤིག །དེ་ལྟར་ན་ཀུན་ནས་ཉོན་མོངས་པ་རྣམས་སྤངས་པ་ཤིན་ཏུ་མཐར་ཕྱིན་པའི་བདེ་བ་རྣམས་འཐོབ་པ་ཡིན་ནོ། །ཆོས་ལྔ་པ་དྲི་མ་དང་བཅས་པ་འདི་ནི་དྲི་མ་མེད་པའི་ཆོས་ཀྱིས་རབ་ཏུ་གཞོམ་པར་བྱའོ། །བདེ་བ་འདོད་པ་རྣམས་
དང་བདུད་ཀྱི་ཡུལ་ལ་མངོན་པར་མི་དགའ་བ་རྣམས་དང་དེའི་ས་ལ་འདུག་པར་མི་འདོད་པ་ཉིད་ཀྱིས་དེ་ལྟར་དྲི་མ་དང་བཅས་པའི་ཆོས་དེ་དྲི་མ་མེད་པའི་ཆོས་ཀྱིས་རབ་ཏུ་གཞོམ་པར་བྱའོ། །དེ་ལྟར་མུ་སུ་ལུན་དྷ་འདིས་ཀུན་ནས་བརྗོད་པ་དང་ལྡན་པའི་ངང་པ་དེ་དག་རྣམས་ཀྱི་བློ་ཡང་རྟོགས་པས་

དང་དགེ་བའི་མཐའ་དང་ལྡན་པ་མཆོག་ཏུ་རྒྱ་ཆེ་བའི་བློ་གྲོས་ཅན་གྱི་བྱང་ཆུབ་སེམས་དཔའ་དུས་བཟངས་གཞན་ལ་ཕན་པ་ལ་རབ་ཏུ་ཞུགས་པ་དེ་དང་། བདུད་ཀྱི་ཕྱོགས་སུ་གྱུར་པའི་བག་མེད་པ་དེ་འཁོར་རྒྱགས་པ་དང་སྨྱོ་བ་དང་བཅས་པ་རྣམས་དང་། དེ་དག་རྣམས་
ཀྱི་བསམ་པ་རིག་ནས་བཅོམ་ལྡན་འདས་འོད་སྲུང་གིས་གསུངས་པའི་མདོ་འདི་ཡུལ་དང་དུས་སུ་རིགས་པར་བསྟན་ནོ། །དེ་ལ་ཆོས་བཅུ་གཅིག་པོ་རྣམས་ལས་ཆོས་ལྔ་པ་བསྟན་པ་ཡིན་ནོ། །ལྷག་མ་དྲུག་པ་དེ་ཡང་ཡུལ་དང་དུས་སུ་འོས་པར་ངས་བསྟན་པར་བྱ་ཡིས་ཁྱེད་རྣམས་
ཡིད་རྩེ་གཅིག་པ་དང་ཡང་དག་པར་ལྡན་པར་གྱིས་ཤིག །གང་གི་ཕྱིར་དལ་འབྱོར་ཕུན་སུམ་ཚོགས་པ་ཐོབ་པར་གྱུར་ནས། གང་དག་ཆོས་སྟོན་པར་མི་བྱེད་པ་དང་གང་ཡང་ཉན་པར་མི་བྱེད་པ་དེ་དག་ནི་ཤིན་ཏུ་མི་ཁོམ་པ་ཐོབ་པ་ཡིན་ནོ། །དེའི་ཕྱིར་ན་ཇི་སྲིད་དུ་དལ་འབྱོར་ཕུན་སུམ་
ཚོགས་པ་དང་དབང་པོ་ཀུན་ཚང་བར་གྱུར་པ་དེ་སྲིད་དུ་ཆོས་བསྟན་པར་བྱའོ། །གང་གི་ཕྱིར་ངན་སོང་གི་ས་གསུམ་པོ་དམྱལ་བ་དང་ཡི་དགས་དང་དུད་འགྲོ་རྣམས་ནི་ཤིན་ཏུ་སྡུག་བསྔལ་བའི་ཕྱིར་རོ། །དམྱལ་བ་ནི་ཇི་ལྟར་ཆོས་ཉན་པར་འགྱུར། དེ་བཞིན་དུ་ཡི་དགས་དང་དུད་འགྲོ་རྣམས་
ན་ཇི་ལྟར་ཆོས་འདུལ་བ་རྣམས་ཡོད། ཕན་ཚུན་དུ་གསོད་པར་བྱེད་པ་དང་སྐོམ་པ་དང་ལྟོགས་པའི་སྐྱོན་དང་ལྡན་པའི་ཕྱིར་རོ། །ལྷ་དང་མི་རྣམས་ཁོ་ན་ནི་ཆོས་སྒྲོགས་པ་ཡོད་པ་ཡིན་ཏེ། གང་དག་བག་མེད་པ་མ་ཡིན་ཞིང་བག་མེད་པར་རྒྱུ་བ་མ་ཡིན་པ་རྣམས་ཀྱིས་སོ། །དེ་ལ་
བདག་གིས་བག་མེད་པ་སྤངས་ལ། ཁྱེད་དད་པའི་མོས་པ་དང་ལྡན་པ་དགེ་བའི་བསམ་པ་ཅན་རྣམས་ཉིད་ལ་ངས་ཆོས་བསྟན་པར་བྱ་ཡིས། དེ་ཁྱེད་རྣམས་ཀྱིས་རབ་ཏུ་གུས་པར་གྱིས་ལ་མཉན་པར་གྱིས་ཤིག །དེ་ལྟར་ཆོས་འདུལ་བ་ནི་ཤིན་ཏུ་དཀོན་པ་དང་དལ་འབྱོར་ཕུན་སུམ་ཚོགས་པ་
ཡང་ཤིན་ཏུ་རྙེད་པར་དཀའ་བ་ཡིན་ནོ། །གཞན་ཡང་ཆོས་དྲི་མ་ཅན་མི་གཙང་བ་དང་བཅས་པ་གཞན་རྣམས་སླུ་བར་བྱེད་པ་ཡང་གང་ཞེ་ན། འདི་ལྟ་སྟེ་འདོད་པ་ཆེ་བའོ། །ཆོས་དེ་ཡང་མཆོག་ཏུ་དྲི་མ་ཅན་དུ་གྱུར་པ་འདོད་པ་ཆེ་བས་བྱིན་གྱིས་བརླབས་པ་གང་གིས་གཞོམ་པར་

བྱ་ན། འདི་ལྟ་སྟེ་ཆོག་ཤེས་པས་སོ། །འདོད་པ་ཆེ་བ་ཞེས་བྱ་བ་ནི་ཁྱིམ་པ་རྣམས་དང་རབ་ཏུ་བྱུང་བ་རྣམས་ཀྱང་བདེ་བར་རྒྱུ་བ་མ་ཡིན་ཏེ། གང་གི་ཕྱིར་འདོད་པ་ཆེ་བར་གྱུར་པ་རྣམས་ནི་ཁྱིམ་པའམ་རབ་ཏུ་བྱུང་བ་ཡང་རུང་སྟེ། ཉིན་མོ་དང་མཚན་མོར་ཡང་དེ་དག་རྣམས་
བདེ་བར་མི་འགྱུར་རོ། །རྫས་རྣམས་ཐོབ་པར་གྱུར་པས་ཀྱང་ཞི་བ་ཐོབ་པར་མི་འགྱུར་རོ། །ནོར་གང་རྙེད་པར་གྱུར་ཡང་དེས་མཐར་ཐུག་པའི་ཚིམ་པ་འབྱུང་བར་མི་འགྱུར་རོ། །འདོད་པ་ཆེ་བར་གྱུར་པ་དེ་ཡང་ཁྱིམ་གྱི་གནས་ནས་ངེས་པར་འབྱུང་བའི་རབ་ཏུ་བྱུང་བ་རྣམས་ལ་ཇི་
ལྟ་བར། དེ་ལྟར་ཁྱིམ་པ་རྣམས་ཀྱི་བར་ཆད་བྱེད་པར་ནི་མི་འགྱུར་རོ། །གང་གི་ཕྱིར་རབ་ཏུ་བྱུང་བ་འདོད་པ་ཆེ་བར་གྱུར་པ་གང་ཡིན་པ་དེ་ནི་ཁྱིམ་པ་ཡིན་གྱི་རབ་ཏུ་བྱུང་བ་ནི་མ་ཡིན་ནོ། །རབ་ཏུ་བྱུང་བ་ཞེས་བྱ་བ་ནི་རྒྱགས་པ་དང་ང་རྒྱལ་དང་འགྱིང་བ་དང་རྨོངས་པ་དང་ཕྲག་དོག་
རྣམས་བཅོམ་པ་དང་འདོད་པ་ཆེ་བ་དང་ཡང་རྣམ་པར་བྲལ་བ་ཡིན་ནོ། །སྤྱིར་སྐྱོན་དེ་དག་རྣམས་ཉིད་ལས་ཀྱང་དགེ་སློང་འདོད་པ་ཆེ་བའི་མིང་ཅན་རྣམས་ལ་ནི་གཞན་ཐམས་ཅད་འཕྱ་བར་འགྱུར་རོ། །གང་ཡང་འདོད་པ་ཆེ་བའི་བློ་ཅན་གྱི་དགེ་སློང་ནི། རྟག་ཏུ་བློ་ནོར་ལ་སོང་བར་གྱུར་
པས་ཉིན་མཚན་མེད་པར་དེའི་སེམས་དགེ་བའི་ཆོས་རྣམས་ལ་ལེགས་པར་རབ་ཏུ་དང་བར་མི་འགྱུར་རོ། །དེའི་བློ་རབ་ཏུ་མ་དང་བ་དང་དབང་པོ་རབ་ཏུ་མ་དང་བ་དང་བྱ་བ་རྣམས་རབ་ཏུ་མ་དང་བ་གང་ཡིན་པའི་གོམ་པ་འབོར་བར་གྱུར་པའམ་དགེ་འདུན་གྱི་ས་ལ་འཆག་པར་བྱེད་ཀྱང་དེར་དམྱལ་བར་
ཉེ་བར་འགྱུར་ན། གནས་མལ་དང་ནད་ཀྱི་རྐྱེན་སྨན་དང་ཡོ་བྱད་རྣམས་ཀྱིས་ནི་དང་པོ་ཁོ་ནར་བར་ཆད་བྱེད་པ་འབྱུང་བར་འགྱུར་བ་ཡིན་ནོ། །དེ་དམྱལ་བ་འབའ་ཞིག་ཏུ་འཚེད་པར་བྱེད་དེ། གང་ཚུལ་ཁྲིམས་འཆལ་བར་གྱུར་པ་འདོད་པ་ཆེ་བ་སྡིག་པའི་ཆོས་ཅན། དགེ་སྦྱོང་
མ་ཡིན་པར་དགེ་སྦྱོང་དུ་ཁས་འཆེས་པ། སེང་གེའི་པགས་པ་ཀུན་ནས་གྱོན་པའི་ཅེ་སྤྱང་སྒྱུ་མའི་ཟོང་དང་མཚུངས་པ། དུང་གི་སྒྲ་དང་མཚུངས་པར་སྤྱོད་པ་མཆོག་ཏུ་སྟོང་པ་ཤིན་ཏུ་སླུ་བ་ཤིན་ཏུ་ཆད་པར་གྱུར་པ་ཡིན་ནོ། །གང་འགའ་ཞིག་འདོད་པ་ཆེ་བར་གྱུར་པ་ཇི་ལྟར་ང་ནི་

དགེ་སློང་ཡིན་ཏེ་འོད་སྲུང་བ་ཡིན་ནོ། །འོད་སྲུང་གི་ཆོས་འདུལ་བ་ལ་རབ་ཏུ་བྱུང་བ་ཡིན་ནོ་ཞེས་དེ་ལྟར་དམ་འཆའ་བརྗོད་པར་བྱེད་པ་ན། འདོད་པ་ཆེ་བར་གྱུར་པ་དེ་ལྟར་མེས་ནི་མི་སྲེག་གོ། །ཇི་ལྟར་འདོད་པ་ཆེ་བས་བློ་གྲོས་ཆུང་བ་རྣམས་ན་བར་བྱེད་པ་དེ་ལྟར་
དུག་གིས་ལྷང་ཀྱོག་མི་བྱེད་དོ། །ཇི་ལྟར་འདོད་པ་ཆེ་བའི་རྒས་པས་རྒས་པར་བྱེད་པ་དེ་ལྟར་རྒ་བས་རྒས་པར་མི་བྱེད་དོ། །ཇི་ལྟར་དགེ་བའི་ལྗོན་ཤིང་རྣམས་འདོད་པ་ཆེ་བའི་མཚོན་གྱིས་རྩ་བ་ནས་གཅོད་པར་བྱེད་པ་དེ་ལྟར་མཚོན་གྱིས་ནི་རྩ་བ་ནས་མི་གཅོད་དོ། །ཇི་ལྟར་འདོད་
པ་ཆེ་བའི་ནད་རྣམས་ཀྱིས་ཉེ་བར་འཇོམས་པར་བྱེད་པ་དེ་ལྟར་ནད་རྣམས་ཀྱིས་ནི་ཉེ་བར་འཇོམས་པར་མི་བྱེད་དོ། །ཇི་ལྟར་འདོད་པ་ཆེ་བའི་དགྲས་ནང་དུ་གསེབ་ཏུ་ཉེ་བར་སོང་ནས་སྙིང་ལ་ཀུན་ཏུ་གནས་ཏེ་སྲོག་འཇིག་པར་བྱེད་པ་དེ་ལྟར་དགྲ་བོ་གླགས་ཚོལ་བ་རྣམས་ནང་གི་གསེབ་ཏུ་ཞུགས་
ཏེ། རྟག་ཏུ་ཉེ་བར་གླགས་སྐབས་ཚོལ་བ་རྣམས་ཀྱང་སྲོག་གཅོད་པར་མི་བྱེད་དོ། །དེའི་ཕྱིར་སྐྱོན་དེ་དག་རྟོགས་པར་གྱིས་ལ་གཉིས་འཇིག་པར་བྱེད་པའི་སྐྱོན་ཅན་དགེ་སློང་འདོད་པ་ཆེ་བ་རྣམས་ཀྱིས་འཇིག་རྟེན་གཉི་ག་འཇིག་པར་བྱེད་པ་དང་། དྲི་མ་རྣམས་དང་ལྡན་པ་དང་སྡིག་
པའི་རྩེ་མོར་གྱུར་པ་ཡིན་པས་རྣམ་པར་སྤང་བར་གྱིས་ཤིག །དེ་སྤྱད་པར་གྱུར་པ་ན་ཡང་ཉིན་མོའམ་མཚན་མོ་ཡང་རུང་སྟེ་འགའ་ཞིག་ཀྱང་བདེ་བར་མི་འགྱུར་རོ། །དེ་ནས་དེའི་ཚེ་ན་འཐབ་བྲལ་བ་རྣམས་ཀྱི་མངའ་བདག་མུ་སུ་ལུན་དྷ་དེས་བཅོམ་ལྡན་འདས་འོད་སྲུང་གིས་གསུངས་པའི་
ཚིགས་སུ་བཅད་པར་བརྗོད་པ། ཇི་ལྟར། འདོད་པ་ཆེ་བའི་མཚོན་ཆེན་ནི། །གང་གིས་གཏུབ་པ་བྱིས་པ་རྣམས། །དེ་ཕྱིར་མཚོན་ཆ་བཞིན་དེ་སྤོངས། །མིག་མེད་པ་ནི་དེས་བཅིངས་ནས། །འདོད་ཆེན་རྨ་ནི་མི་བཟད་པ། །གང་གི་སྙིང་ལ་སྐྱེ་བར་འགྱུར། །ཉིན་
དང་མཚན་མོ་མེད་པར་ཡང་། །འདོད་ལྡན་དེ་ནི་བདེར་མི་འགྱུར། །ཀུན་རྟོག་བུད་ཤིང་ལས་བྱུང་བའི། །སྲེད་པའི་རླུང་གིས་ཀུན་ཏུ་སྤར། །འདོད་ཆེན་རང་བཞིན་མེ་ཡིས་ནི། །མི་རྣམས་སྙིང་ནི་སྲེག་པར་བྱེད། །འདོད་པ་ཡིས་ནི་བསྐོར་བའི་ཡིད། །སེམས་ནི་ཡང་མོའི་

སྐྱེས་བུ་ནི། །ནོར་ལ་སྲེད་པར་གྱུར་པ་ཡིས། །གསོན་པའི་སྙིང་པོ་འཇོམས་པར་བྱེད། །གང་ཡང་སྡིག་པའི་ལས་རྣམས་ནི། །སྐྱེས་བུ་ཐ་ཤལ་གྱིས་བྱེད་དོ། །དེ་ཀུན་ནོར་སྲེད་ལས་ཡིན་པར། །མཁས་པས་རབ་ཏུ་བརྗོད་པ་ཡིན། །འབར་བ་གང་དུ་རྣམ་པར་
འཇུག །གང་གིས་མི་རིགས་པར་བྱེད་པ། །དེ་ཀུན་འདོད་པའི་སྐྱོན་གྱིས་ནི། །བདག་ལ་ཕན་མིན་བྱེད་པ་ཡིན། །འཁྲུག་པ་རྣམ་པ་སྣ་ཚོགས་དང་། །མཚོན་ཆའི་སྡུག་བསྔལ་ཤིན་ཏུ་ཡང་། །བསྟེན་པའི་སྐྱེས་བུ་རྨོངས་པ་གང་། །དེ་ཡི་རྒྱུ་ཡང་འདི་ཡིན་ནོ། །
འདོད་པའི་སྐྱོན་ལས་ཀུན་བྱུང་བའི། །ཉེར་འཚེ་འདི་དག་གོ་བར་གྱིས། །དེ་བསྟེན་ཕན་པ་བྱེད་མིན་པར། །ལམ་རིག་པས་ནི་ཡོངས་སུ་གསུངས། །དེ་ལྟར་མུ་སུ་ལུན་དྷ་དེས་སྨྲ་བ་པོའི་ངང་པ་དེ་དག་དང་ངང་པའི་རྒྱལ་པོ་དུས་བཟངས་དེ་དང་བག་མེད་པས་མགོ་དྲངས་པའི་བདུད་
ཀྱི་རིགས་སུ་གྱུར་པ་གསུམ་པོ་རྒྱགས་པ་དང་སྨྱོ་བ་དང་དེ་དག་རྣམས་ལ་བཤད་དོ། །རྣམ་པ་དེ་ལྟ་བུའི་སྐྱོན་ཆེན་པོ་རྣམས་དགེ་བའི་ཆོས་གང་དག་གིས་རབ་ཏུ་གཞོམ་པར་བྱ་བ་ཡིན་ན། འདི་ལྟ་སྟེ་འདོད་པ་ཆུང་བ་ཞེས་བྱ་བས་སོ། །འདོད་པ་ཆུང་བ་ཞེས་བྱ་བ་ནི་འདི་ལྟ་སྟེ། བདེ་
བ་རྣམས་ཐམས་ཅད་འབྱུང་བའོ། །དེ་གང་ལ་ཡོད་པའི་སྐྱེས་བུ་དེ་ནི་རྟག་ཏུ་བདེ་བའི་མཆོག་རྣམས་དང་ལྡན་པ་ཡིན་ལ། དེ་ལ་མེ་དང་རྒྱལ་པོ་དང་ཆོམ་རྐུན་དང་ཆུ་ལ་སོགས་པ་རྣམས་ཀྱི་འཇིགས་པ་མེད་དོ། །འདི་ནོར་གྱི་སྲེད་པ་རྣམས་ཀྱིས་རྣམ་པར་བསྲེགས་ནས་ཁྱིམ་ནས་ཁྱིམ་
དག་ཏུ་བསྟེན་པར་བྱ་བའི་དོན་དུ་སྨྲ་བར་མི་བྱེད་དོ། །བསྟེན་གྲོགས་རྣམས་ནི་རྐུན་མའི་བསྟེན་གྲོགས་ཡིན་ནོ། །དམན་པའི་གནས་རྣམས་ཀྱི་ཁྱིམ་སྒོར་གནས་པ་ཡང་མ་ཡིན་ནོ། །རྫུན་གྱིས་བསྟེན་གྲོགས་ཀྱི་ཚིག་དག་ཀྱང་སྨྲ་བར་མི་བྱེད་དོ། །གར་དང་རྒོད་པ་དང་འགྱིང་བག་རྣམས་
ཞབས་འབྲིང་གི་དོན་དུ་བྱེད་པ་ཡང་མ་ཡིན་ནོ། །ཚིག་རྣམས་སྨྲ་བར་མི་བྱེད་ཅིང་དོན་དག་ཀྱང་མི་བྱེད་དོ། །ནོར་གྱི་འདོད་པའི་མེ་རྣམས་ཀྱིས་མི་སྲེག་གོ། །གཞན་དག་དང་མཉམ་དུ་འགྲོགས་པ་ལ་སྤྲོ་བར་གྱུར་པ་རྣམས་ཀྱི་དབུགས་འབྱིན་པ་མེད་པའི་སྡུག་བསྔལ་མང་པོར་མི་འགྱུར་

རོ། །ནོར་གྱི་འདོད་པས་སྡིག་པའི་གྲོགས་པོ་རྣམས་སྟེན་པར་མི་བྱེད་དོ། །རྟག་ཏུ་དོགས་པ་དང་བཅས་པར་མི་འགྱུར་ཞིང་ལམ་དུ་འགྲོ་བར་གྱུར་པ་ན་ཆོམ་རྐུན་པའི་འཇིགས་པ་མེད་དོ། །གྲོགས་པོ་མ་ཡིན་པ་རྣམས་མང་བར་མི་འགྱུར་ཞིང་། སྐྱེ་བོ་རྣམས་
ཐམས་ཅད་ཀྱིས་རྟོག་དཔྱོད་བྱེད་པར་མི་འགྱུར་རོ། །ཆད་པའི་འཇིགས་པས་ཀྱང་རྣམ་པར་མི་འཇིགས་སོ། །དེ་ལྟར་ཁྱིམ་པར་གྱུར་ཀྱང་འཇིགས་པ་རྣམས་མེད་པར་འགྱུར་རོ། །སྐྱོན་གྱི་འཇིགས་པ་རྣམས་ཀུན་ཏུ་འགགས་པ་དང་ཐམས་ཅད་དུ་སོ་གསོད་པར་གནས་པ་དང་གང་
ཡང་ཁྱིམ་པ་རྣམས་ཀྱང་སྐྱོན་ལས་ཀུན་ཏུ་རྒལ་བ་ཡིན་ན་ནགས་ན་གནས་པ་རྣམས་ལ་ལྟ་ཅི་སྨོས། དེ་ཉིད་སླར་ཡང་འདོད་པ་ཆེ་བར་བྱེད་ན་ནི་དེ་སྐྱུགས་པ་ཟ་བ་དང་མཚུངས་པར་འགྱུར་རོ། །དགེ་སྦྱོང་གི་མཆོད་པའི་མཆོག་རྣམས་ནི་འདི་ལྟ་སྟེ། འདོད་པ་ཆུང་བ་ཞེས་བྱ་བ་ཡིན་ནོ། །
འདོད་པ་ཆུང་ཞིང་ཆོག་ཤེས་པའི་དགེ་སློང་རྣམས་ནི་གང་གི་ཕྱིར་ཤིན་ཏུ་ཡང་མཛེས་ཤིང་གསལ་ལ་རྣམ་པར་སྣང་ངོ་། །གདན་གཅིག་པ་འབའ་ཞིག་དང་། ཕྱག་དར་ཁྲོད་པ་འབའ་ཞིག་དང་། གཅིག་པུ་ཁོ་ན་རྒྱུ་བ་དང་། རིའི་ཁྲོད་དང་ཕུག་དག་དང་རྩྭའི་ཕུང་པོ་དང་། དུར་
ཁྲོད་འབའ་ཞིག་དུ་གནས་པ་དང་། གསུས་པའི་སུམ་ཆ་འབའ་ཞིག་གིས་ཆོག་ཤེས་པ་དང་། སུ་ཡང་མི་ཤེས་པ་འབའ་ཞིག་གིས་ཡུལ་ལྗོངས་རྒྱུ་བར་བྱེད་པ་དང་། གཉེན་བཤེས་དང་གྲོགས་པོ་དང་རང་གི་སྐྱེ་བོ་རྣམས་ལ་ཡང་བསོད་སྙོམས་འབའ་ཞིག་པ་དང་། ལྷུང་བཟེད་གོག་
པོ་ཅིག་འབའ་ཞིག་འཆང་བར་བྱེད་པ་དང་། ཤེས་རབ་ཀྱིས་ཕྱིན་ཅི་ལོག་འབའ་ཞིག་ཡོངས་སུ་སྤོང་བར་བྱེད་པ་དང་། ཡུལ་གང་ན་མཆོད་པར་བྱེད་པའི་ཡུལ་དེ་ཡོངས་སུ་སྤོང་བར་བྱེད་པ་དང་། ལམ་འབའ་ཞིག་ལ་ལེགས་པར་ལྟ་བ་དང་། གཉའ་ཤིང་གང་ཙམ་དུ་ལྟ་བ་དང་།
གཞན་དུ་མིག་མི་གཡེང་བ་དང་། རོ་ཞིམ་པོ་འབའ་ཞིག་ཟ་བ་ལ་སྟེན་པ་སྤོང་བ་དང་། ཆུ་ཞག་དུ་མ་བསྒྲངས་པ་འབའ་ཞིག་གི་བཏུང་བ་འཐུང་བ་དང་། ཡུལ་ལྗོངས་དང་གྲོང་དག་ཏུ་ཞག་གསུམ་དང་ཞག་བདུན་འབའ་ཞིག་གནས་པར་བྱེད་པ་དང་། གསེར་དང་འཁར་བ་དང་དངུལ་

གྱིས་མཛེས་པར་བྱས་པའི་ཉལ་ཁྲི་འཛིན་པར་མི་བྱེད་པ་ཁོ་ན་དང་། སྔོན་གྱི་ཁྱིམ་དང་གྲོགས་པོ་དང་གཉེན་བཤེས་ཀྱི་ལམ་ཀུན་ཏུ་ལྟ་བར་བྱེད་པ་སྤོང་བར་བྱེད་པ་འབའ་ཞིག་དང་། མཆོག་ཏུ་གྱུར་པའི་རྒྱལ་པོའི་བསོད་སྙོམས་དང་མལ་སྟན་དང་རྒྱལ་པོའི་སྒོར་སྟེན་པར་བྱེད་པ་རྣམས་
སྤོང་བ་ཁོ་ནར་སྤྱོད་པ་དང་། རིགས་ཀྱིས་ཆོག་ལས་རབ་ཏུ་བྱུང་བར་ཀུན་ནས་སྒྲོགས་པ་རྣམས་སྤོང་བ་ཁོ་ནར་བྱེད་པ་དང་། དེ་དང་རང་བཞིན་མཚུངས་པ་འབའ་ཞིག་དང་བརྗོད་པ་དང་གསོང་གསལ་དང་ཀུན་རྗོད་པར་བྱེད་པ་ཡིན་ནོ། །རྣམ་པ་དེ་ལྟ་བུར་གྱུར་པའི་དགེ་སློང་གི་
སྡོམ་པ་དང་དཀའ་ཐུབ་ནི་རྙོག་པ་རྣམ་པར་སྤངས་པ་མཆོག་ཏུ་ཆོག་ཤེས་པ། མཆོག་ཏུ་འདོད་པ་ཆུང་བས་ནི་བདུད་ཀྱི་འཆིང་བ་རྣམས་གཅོད་པར་ནུས་སོ། །འདོད་པ་ཆེ་བ་རྣམས་ནི་སྡུག་བསྔལ་གྱི་ཚུལ་ཁྲིམས་དང་ལྡན་པ་དགེ་སློང་གི་ཆ་བྱད་འཛིན་པ་ནད་དང་འདྲ་བ་རྐུན་མ་ཡིན་ཏེ།
ལྷ་དང་བཅས་པའི་མིའི་ཚོགས་ཀྱི་སྐྱེ་དགུ་རྣམས་ཉེ་བར་མགུ་བར་མི་བྱེད་པའི་སྡིག་པ་ཅན་ཡིན་ནོ། །དགེ་སློང་རྣམས་ཀྱང་ཆོག་ཤེས་པ་དང་ལྡན་པ་དང་འདོད་པ་ཆུང་བའི་དགེ་སློང་ནི་དགེ་སློང་ཡིན་ནོ། །སྒྲ་དང་རེག་བྱ་དང་རོ་དང་གཟུགས་དང་དྲི་དང་ཡུལ་རྣམས་ལ་དེའི་དབང་
པོ་རྣམས་རྒྱུ་བར་མི་བྱེད་དོ། །ཕྱི་ཁྱམས་དག་ཏུ་ཉལ་བ་དང་སེམས་ཅན་ཐམས་ཅད་ལ་ཕན་པར་གནས་པའི་ལུས་དང་ཆོས་དང་ཚོར་བ་དང་སེམས་རྣམས་ལ་དྲན་པ་ཉེ་བར་གཞག་པ་རྗེས་སུ་རྟོགས་པ་དང་། ཀུན་ནས་མཆོག་ཏུ་བློ་རྣམ་པར་བསྡུས་པ་དང་། འཁོར་བའི་ཚོགས་
རྣམས་ལས་དབང་པོ་གཅིག་ཏུ་བསྡམས་པ་དང་། ཆོག་ཤེས་པ་ནི་དགེ་སློང་དུ་བརྗོད་པ་ཡིན་ཏེ། ཇི་སྲིད་དུ་འདོད་པ་ཆུང་བར་གྱུར་པ་དེ་དག་རྣམས་ནི་ཁྱིམ་པའམ་རབ་ཏུ་བྱུང་བ་ཡིན་ཡང་རུང་སྟེ་བག་མེད་པར་མི་འགྱུར་རོ། །དེ་ནས་དེའི་ཚེ་ན་འཐབ་བྲལ་གྱི་བདག་པོ་དེས་ཚིགས་
སུ་བཅད་པའི་དབྱངས་བརྗོད་པ། ཇི་ལྟར། བག་ཡོད་འབྲས་བུ་ཐར་པ་ཡིན། །དམྱལ་བར་མི་རྣམས་བག་མེད་པས། །བག་ཡོད་བག་མེད་པ་དག་གི། །འདིས་ནི་ཁྱད་པར་བརྗོད་པ་ཡིན། །གང་ཡང་བཅིངས་དང་ཐར་པ་ཡི། །ཁྱད་པར་གང་ནི་ཟླ་དང་མུན། །བག་ཡོད་བག་

མེད་དེ་དག་གི། །ཁྱད་པར་འདི་ཉིད་ཁོ་ན་ཡིན། །བདེ་བ་འདོད་པ་ཆུང་ལ་མཐོང་། །སྡུག་བསྔལ་འདོད་ཆེན་མི་རྣམས་ཡིན། །བདེ་སྡུག་མཚན་ཉིད་འདི་ཡིན་པར། །ཡོངས་སུ་རྟོག་པར་བྱེད་པས་བཤད། །རྟག་ཏུ་འདོད་ཆེན་མི་རྣམས་ཀྱི། །མེ་ནི་
སྙིང་གནས་རང་བཞིན་ཡིན། །གང་དུ་འདོད་མེད་ཁྲུས་བྱེད་པའི། །འདོད་པ་ཆུང་བ་བསིལ་བའི་མཚོ། །ཇི་ལྟར་མེ་ནི་བུད་ཤིང་གིས། །རབ་ཏུ་ཞི་བར་འགྱུར་མ་ཡིན། །དེ་བཞིན་འདོད་ཆེན་མི་རྣམས་ནི། །ནོར་གྱིས་གང་བར་འགྱུར་མ་ཡིན། །འདོད་པ་ཅན་ལ་ཉིན་
དང་ནི། །མཚན་མོ་མེད་པར་བདེ་མི་འགྱུར། །སྐྱེས་བུ་འདོད་པ་ཆེ་བ་གང་། །སྲེད་པའི་ཟུག་རྔུས་རྣམ་པར་གནས། །རྒྱལ་པོ་ནོར་གྱིས་ངོམས་མེད་པར། །བྱེ་བ་ཕྲག་ཏུ་ཤི་ཞིང་སོང་། །གཞན་ཡང་མང་པོར་འགྲོ་བར་འགྱུར། །དེ་ཕྱིར་འདོད་པ་ཆུང་བ་བདེ། །
དེ་ལྟར་འཐབ་བྲལ་གྱི་མངའ་བདག་དེ་པད་མའི་སྙིང་པོ་ལ་ལེགས་པར་གནས་ཏེ། །དུས་བཟངས་དེ་དང་སྨྲ་བ་པོའི་ངང་པ་དེ་དག་རྣམས་ལ་འཆད་པར་བྱེད་དོ། །གཞན་ཡང་འཐབ་བྲལ་གྱི་བདག་པོ་དེ་ཉིད་ཀྱིས་བག་མེད་པ་དེའི་སྐྱོན་རྣམས་གཟུང་བར་བྱ་བའི་དོན་དུ་སྨྲ་བ་པོའི་བྱ་དེ་
དག་རྣམས་ཀྱི་མདུན་དུ་དང་དུས་བཟངས་དེའི་སྔོན་དུ་ཡང་། བཅོམ་ལྡན་འདས་འོད་སྲུང་གིས་གསུངས་པའི་མདོ་སྔོན་གྱི་ལྷའི་དྲུང་ནས་ཐོས་པ་རྣམས་འཆད་པ་ནི་ཇི་ལྟར་ཆོས་དྲི་མ་ཅན་རྣམས་བསྟན་པ་གང་ཡིན་པ་དེ་ནི་དཀར་པོའི་ཆོས་རྣམས་ཀྱིས་རབ་ཏུ་གཞོམ་པར་བྱའོ། །དེ་ལ་དྲི་མ་
ཅན་གྱི་ཆོས་བདུན་པ་བསྟན་པར་བྱ་བ་རྣམས་དང་། དཀར་པོའི་ཆོས་རྣམས་ཀྱིས་གཞོམ་པར་བྱ་བ་དང་། འདི་དག་ཀྱང་གང་དག་ཞེ་ན། འདི་ལྟ་སྟེ་གཉེན་བཤེས་བལྟ་བ་ལ་མངོན་པར་དགའ་བ་ནི་བྱེས་སུ་ཡུན་རིང་པོར་གནས་པས་སོ། །དེ་ལྟར་ཡང་གཉེན་བཤེས་དང་གྲོགས་པོ་
དང་། རང་གི་སྐྱེ་བོ་རྣམས་དང་ཕྲད་པ་ལ་མངོན་པར་དགའ་བའི་དགེ་སློང་ནི། བློ་དེ་ལ་སོང་བར་གྱུར་པ་དང་དེ་རྗེས་སུ་སྒྲུབ་པར་བྱེད་པ་དང་དེ་ལས་རབ་ཏུ་འབྱམས་པར་གྱུར་པ་དང་དེས་བྲེལ་དོག་ཏུ་གྱུར་ནས། ཉིན་མོ་དང་མཚན་མོ་མེད་པར་ཡང་བསམ་གཏན་བློ་ལ་བྱེད་པ་ཡང་མ་ཡིན་ནོ།

ཁ་ཏོན་ཡང་མི་བྱེད་ཅིང་བླ་མ་ལ་ལེགས་པར་བསྟེན་པའི་དབང་གིས་གནས་པ་ཡང་མ་ཡིན་ནོ། །དཀོན་མཆོག་གསུམ་ལ་མཆོད་པ་རྗེས་སུ་སྒྲུབ་པར་མི་བྱེད་དོ། །འཇིག་རྟེན་ཕ་རོལ་གྱི་ལུས་ཀྱི་ལས་སུ་བྱ་བ་རྣམས་རྗེས་སུ་དྲན་པར་བྱེད་པ་དང་གཞན་ལ་སྟོན་པ་དང་། ངག་
གི་ལས་དང་ཡིད་ཀྱི་ལས་དང་རྣམ་པ་གསུམ་བྱེད་པ་མ་ཡིན་གྱི། བློ་དེ་ལ་སོང་བ་འབའ་ཞིག་ཏུ་ཟད་དོ། །ཇི་ལྟ་བ་བཞིན་དུ་ང་དང་ངའི་གཉེན་བཤེས་རྣམས་དང་གྲོགས་པོ་དང་རང་གི་སྐྱེ་བོ་རྣམས་མ་མཐོང་ན། དེ་དག་རྣམས་ཀྱི་ཁྱིམ་གྱི་བྱ་བ་ནི་ཅི་དང་ཅི་ལྟར་གྱུར་རམ་ཡང་
དེ་དག་གི་གསོན་པ་རྣམས་ཀྱང་ཇི་ལྟར་གྱུར་རམ་ཞེས། དེ་དེ་ལྟར་ཡིད་ལ་བྱས་ནས་མྱ་ངན་གྱིས་གཟིར་བར་འགྱུར་ཏེ། གང་གི་དོན་དུ་དེ་ལྟ་བུ་རྣམས་ལས་ངེས་པར་གྲོལ་བར་བྱ་བའི་དོན་དུ་ནགས་སུ་གནས་པར་གྱུར་པ་ལས་དེ་ཉིད་ལ་རྗེས་སུ་འཇུག་པར་བྱེད་དོ། །བློ་གྲོས་
ངན་པར་གྱུར་པ་མི་གཡོ་བའི་མི་མྱ་ངན་ཅན་སྐྱེ་བ་དང་རྒ་བ་དང་། ན་བ་དང་འཆི་བས་བྱས་པའི་རང་གི་མྱ་ངན་རྣམས་ཡོངས་སུ་བཏང་ནས། གཞན་གྱི་མྱ་ངན་གྱིས་མྱ་ངན་དུ་བྱེད་པ་དང་། དེ་མི་མཉམ་པ་དང་མཉམ་པའི་རང་གི་སྐྱེ་བོ་རྣམས་དང་གཉེན་བཤེས་རྣམས་དང་ཕྲད་
པའི་དྲ་བ་འདིར་ངེས་པར་འཇུག་པར་བྱེད་དོ། །དེ་ནས་ཡང་དེས་གཉེན་བཤེས་དེ་རྣམས་མངོན་པར་མཐོང་ནས་གདུང་བས་གདུངས་ཤིང་གཞན་གྱི་ཟས་བསོད་པ་རྣམས་ཟ་བས། ཁྱིམ་ནས་ཁྱིམ་རྣམས་སུ་ཕེའུ་འདེབས་པའི་སྟོན་མོ་རྣམས་ལ་མངོན་པར་དགའ་བར་འགྱུར་
རོ། །ཁྱིམ་དེ་དང་འབྲེལ་པར་གྱུར་པའི་དོན་དག་ནི་བྱེད་ལ་ཉན་པར་ཡང་བྱེད་དོ། །དེས་དེ་དག་རྣམས་ཡིད་ལ་བྱས་ནས་དེ་དག་རྣམས་ལས་གཞན་ཡང་བྱེད་དོ། །དེ་ཁྱིམ་གྱི་འཚོ་ཆིས་རྣམས་བྱེད་པས་རང་གི་དོན་རྣམས་ལས་ཡོངས་སུ་ཉམས་པར་འགྱུར་རོ། །འཇིག་
རྟེན་ཕ་རོལ་ཏུ་གྱུར་པ་རྣམས་ཀྱི་འཇིགས་པ་དག་སེམས་པར་མི་བྱེད་དོ། །དམྱལ་བ་དང་ཡི་དགས་དང་དུད་འགྲོའི་འགྲོ་བ་པ་རྣམས་སུ་འཆི་འཕོ་བ་དང་སྐྱེ་བ་རྣམས་སེམས་པར་མི་བྱེད་དོ། །འདིའི་འཇིགས་པ་རྣམས་ཀྱང་སེམས་པར་མི་བྱེད་དེ། རྒ་བ་དང་ན་བ་དང་འཆི་

བ་དང་སྡུག་པ་རྣམས་དང་བྲལ་བ་དང་མི་སྡུག་པ་རྣམས་དང་ཕྲད་པ་དང་། སྡུག་པ་དང་ཡིད་དུ་འོང་བ་རྣམས་ཐམས་ཅད་ཀྱང་ཐ་དད་དུ་འགྱུར་བ་མེད་པར་འགྱུར་བ་རྣམ་པར་འབྲལ་བ་སོ་སོར་གནས་པ་རྣམས་སེམས་པར་མི་བྱེད་དོ། །དེ་སྲིད་པ་དེ་སྲིད་དུ་
གཉེན་དང་གྲོགས་པོ་རྣམས་ཀུན་ཏུ་སྟེན་པར་བྱེད་དོ། །གཉེན་བཤེས་དང་གྲོགས་པོ་རྣམས་ལྟ་བར་བྱེད་པ་མངོན་པར་འདོད་པ་འཐུན་པར་བྱེད་པ་གཞན་གྱི་ཟས་ཟ་བ་གཞན་གྱི་ཁྱིམ་སྒོ་སྟོན་པར་བྱེད་པ་གང་ཡིན་པ་རྣམས་ནི་ལུས་ཞིག་ནས། ངན་སོང་དང་ངན་འགྲོ་ལོག་པར་
ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །ཡི་དགས་ཀྱི་ཡུལ་རྣམས་དང་དུད་འགྲོའི་སྐྱེ་གནས་རྣམས་སུ་ཡང་ངལ་དུབ་དང་བཅས་པའི་འགྲོས་བླ་ལྷག་པར་གྱུར་པས་དེ་སྲིད་དུ་ཡོངས་སུ་འཁྱམ་མོ། །དམྱལ་བ་རྣམས་སུ་སྐྱེས་པ་ན་ཡང་ཚོར་བ་དྲག་པོ་རྣམས་ཀྱིས་
ཟིལ་གྱིས་མནན་པ་རྣམས་ལ་གྲོགས་པོས་མ་ཡིན་ཞིང་གཉེན་བཤེས་རྣམས་ཀྱིས་ཀྱང་བསིལ་བར་གྱུར་པའི་དངོས་པོ་རྣམས་ནི་ཅུང་ཟད་ཀྱང་མི་བྱེད་དོ། །དེའི་ཕྱིར་ན་དགེ་སློང་རྣམས་ཐམས་ཅད་ཀྱིས་ཚུལ་རྣམས་ཐམས་ཅད་ནས་དམྱལ་བ་དང་ཡི་དགས་དང་དུད་འགྲོའི་འགྲོ་བ་
པའི་འཇིགས་པས་འཇིགས་པ་རྣམས་ཀྱིས་ཀྱང་གཉེན་བཤེས་དང་གྲོགས་པོ་རྣམས་དང་ཕྲད་པར་འདོད་པར་མི་བྱའོ། །དེ་དག་རྣམས་དང་འདུ་འཚོག་བྱས་པས་ཀྱང་ནི་དོན་མ་ཡིན་པ་དྲག་པོ་རྣམས་བྱེད་པར་འགྱུར་རོ། །དེ་ལ་དམིགས་པར་བྱེད་པ་དང་། དོན་དེས་ཀྱང་
གང་གི་ཕྱིར་སྲེད་པ་རྣམས་ཟད་པར་བྱ་བའི་དོན་དུ་རབ་ཏུ་བྱུང་བ་ལས་སྲེད་པ་དེ་ཉིད་ལ་སྲེད་པས་སྟེན་པར་བྱེད་པ་ན། དེ་ནི་མཆོག་ཏུ་ཡང་བྱིས་པར་གྱུར་པ་རྣམས་ཀྱིས་བསྟེན་པ་ཡིན་ནོ། །གང་དག་ཁོ་ན་བཅོམ་ནས་རབ་ཏུ་བྱུང་བ་ཡང་དྲ་བ་དེ་ཉིད་དུ་བློ་འཇུག་པ་ནི་བློ་གྲོས་དམན་པ་ཡིན་
ཏེ། ཡང་འགའ་ཞིག་ཇི་ལྟར་མེའི་འཇིགས་པ་སྤངས་པ་ལས་མེ་དེ་ཉིད་དུ་ཉེ་བར་སྟེན་པར་བྱེད་དོ། །དེ་བཞིན་དུ་ཁྱིམ་གྱི་གནས་རྣམས་འཇིགས་ནས་སྤངས་པ་ཡང་འཇིགས་པ་དེ་ཉིད་དུ་ཉེ་བར་འཇུག་པར་བྱེད་དོ། །དེ་བཞིན་དུ་གང་འགའ་ཞིག་གཉེན་བཤེས་རྣམས་ཀྱི་ཀླུང་ཆེན་

པོར་ཉེ་བར་འགྲོ་ཞིང་། སླར་ཡང་དེ་དག་རྣམས་ཉིད་ལ་ཉེ་བར་སྟེན་པར་བྱེད་པ་དེ་དག་རྣམས་ནི་མིག་མེད་པ་དང་བློ་གྲོས་བཀབ་པ་དང་དབང་པོ་རྣམས་ཀུན་ནས་མ་བསྡམས་པ་ཡིན་ནོ། །དེ་ལྟར་ཀུན་ནས་ཉོན་མོངས་པ་ཅན་གྱི་ཆོས་འདི་དག་ཆོས་གང་གིས་རབ་ཏུ་གཞོམ་པར་བྱ་
ན། འདི་ལྟ་སྟེ་གང་ཤེས་རབ་ཅན་རྣམས་ཀྱིས་ཀྱང་སྤང་བ་དང་གཟུང་བར་ཡང་ནུས་པ་མ་ཡིན་ཏེ། དེ་ཡུན་རིང་དུ་བྱེས་ན་གནས་པ་ལ་མངོན་པར་དགའ་བ་རྣམས་ཀྱིས་ནི་རབ་ཏུ་གཞོམ་པ་དང་གཟུང་བར་ཡང་ནུས་པ་ཡིན་ནོ། །རིང་དུ་འགྲོ་ན་ལམ་ལ་གནས་པ་ཡང་འདི་ལྟ་
སྟེ་བློ་གྲོས་ཞན་པ་རྣམས་དང་གཉེན་པོ་གཞན་གྱིས་ཀྱང་གཉེན་བཤེས་དང་གྲོགས་པོ་དང་རང་གི་སྐྱེ་བོ་རྣམས་ལ་གདུང་སེམས་སོ་སོར་བཟློག་པར་བྱ་བར་མི་ནུས་ཀྱིས། དེ་ཡང་ཡུན་རིང་དུ་འགྲོན་དུ་འགྲོ་བར་གྱུར་པས་ཐ་མར་ནི་གདུང་སེམས་དེ་དག་རྣམས་རབ་ཏུ་འཇོམས་ཏེ། བརྩེ་
བའི་སེམས་ནི་གནས་སྐབས་རྣམས་ཐམས་ཅད་དང་ཐམས་ཅད་དུ་མ་ཕྲད་པས་རབ་ཏུ་འཇོམས་པ་ཇེ་དང་པོར་ནི་གདུང་སེམས་དེ་ཉིད་ཀྱི་གཉེན་པོ་རྣམས་གནས་སྐབས་ཐམས་ཅད་དུ་རིག་པར་འགྱུར་བ་འདི་ནི་འདི་ལྟ་སྟེ། འདུས་པ་རྣམས་ཐམས་ཅད་ཀྱི་མཐའ་ནི་འབྲལ་བ་སྟེ། འཆི་
བའི་ཡུལ་དང་དུས་རྣམས་སུ་འགའ་ཞིག་གིས་ཀྱང་འགའ་ཞིག་དམིགས་པར་འགྱུར་བའམ་ཡོངས་སུ་སྐྱོབ་པར་འགྱུར་བ་ཡང་མ་ཡིན་ནོ། །འཆི་བའི་ཡུལ་དང་དུས་རྣམས་སུ་ནི་ལས་ཉིད་ཁོ་ན་གནས་སྐབས་རྣམས་ཐམས་ཅད་དུ་ཡོངས་སུ་སྐྱོབ་པར་བྱེད་པ་ཡིན་ནོ། །སྐྱེ་བ་གཞན་
དག་བརྒྱ་སྟོང་དུ་མ་རྣམས་སུ་ཡང་ལས་ཉིད་སྐྱབས་སུ་འགྱུར་ཏེ། རྣམ་པ་ཐམས་ཅད་ཀྱི་ཐམས་ཅད་དུ་གཉེན་བཤེས་རྣམས་བཞིན་དུ་འགྱུར་རོ། །གཉེན་བཤེས་རྣམས་ཀྱིས་མ་ཡིན་ཞིང་རྩད་འབྲེལ་རྣམས་སམ་གཞན་དག་རྣམས་ཀྱིས་ཀྱང་མ་ཡིན་ནོ། །གཉེན་བཤེས་
རྣམས་གང་འགའ་ཞིག་གིས་ཀྱང་སྐྱོབ་པར་བྱེད་པ་མ་ཡིན་པས་གཅིག་ཏུ་མངོན་པར་དགའ་ཞིང་། གཉེན་བཤེས་ཀྱི་དབང་དུ་བྱ་བའམ་རང་གི་སྐྱེ་བོ་རྣམས་ཀྱི་དབང་དུ་བྱས་ནས་དེ་ལྟར་དཔྱོད་པར་བྱེད་དོ། །དེའི་ཕྱིར་ན་ཀུན་ནས་ཉོན་མོངས་པ་ཅན་གྱི་ཆོས་གཞན་འདི་ནི་གཅིག་

པུ་མངོན་པར་དགའ་བའི་དགེ་སློང་གིས་རབ་ཏུ་གཞོམ་པར་བྱ་བ་ཡིན་ནོ། །འཆི་བའི་ཡུལ་དང་དུས་རྣམས་སམ་ན་བའི་དུས་དང་རྒས་པའི་དུས་ན་ཡང་འགའ་ཞིག་ཀྱང་འགའ་ཞིག་ལ་ཅུང་ཟད་ཀྱང་མི་བྱེད་དོ། །ཡོངས་སུ་སྐྱོབ་པར་བྱེད་པ་ནི་སུ་དག་
ཀྱང་མ་ཡིན་ནོ་ཞེས་དེ་ལྟར་སེམས་པར་བྱེད་དོ། །དགེ་སློང་འདིའི་རང་གི་སྐྱེ་བོ་རྣམས་ཀྱིས་བྱས་པའི་བརྩེ་གདུང་གང་ཡིན་པ་འདི་ལས་དེ་དག་རྣམས་ཐམས་ཅད་དུ་ཉམས་པར་འགྱུར་བའམ་མགོ་སྨད་པར་འགྱུར་རོ། །དེ་ལྟར་དགེ་སློང་གཉེན་བཤེས་ལ་ཕྲད་པའི་བརྩེ་
གདུང་རྣམས་ནི་བྱེས་སུ་འགྲོ་བས་རབ་ཏུ་འབྲལ་བར་འགྱུར་རོ། །གཞན་ཡང་ཀུན་ནས་ཉོན་མོངས་པ་ཅན་གྱི་ཆོས་ངེས་པར་འབྱུང་བས་རབ་ཏུ་གཞོམ་པར་བྱའོ། །འདི་ཡང་གང་ཞེ་ན། འདི་ལྟ་སྟེ་དོན་མེད་པར་སྨྲ་བ་སྟེ། ཁྱིམ་པ་ཡིན་ཡང་རུང་གང་དང་གང་སྐྱེ་བོ་
ཐམས་ཅད་ཀྱང་རྩྭ་དང་འདྲ་བ་ཁོ་ནར་འགྱུར་རོ། །འདི་ལྟ་སྟེ་གང་གི་ཕྱིར་ངག་གི་ཚིག་རྣམས་ནི་ནོར་ཡིན་གྱི་ནོར་གཞན་ནི་ཐ་མ་ཡིན་ནོ། །སྐྱེས་བུ་རྣམས་ནི་ངག་གིས་སྙིང་པོ་ཅན་དུ་འགྱུར་རོ། །དེ་དང་རྣམ་པར་བྲལ་བ་ནི་སྙིང་པོ་མེད་པ་དང་ནོར་དང་ཀུན་ནས་བྲལ་བར་
འགྱུར་ཏེ། གསོག་གསོབ་སྙིང་པོ་མེད་པ་ཕྱུགས་རྣམས་དང་མཚུངས་པར་འགྱུར་རོ། །ངག་གི་ནོར་རྣམས་དང་བྲལ་བ་ངག་དང་བྲལ་བའི་སྐྱེ་བོ་རྣམས་ནི་སྐྱེས་བུའི་མིང་ཅན་གྱི་ཕྱུགས་རྣམས་ཡིན་ནོ། །མཁས་པའི་སྐྱེ་བོ་རྣམས་ཐམས་ཅད་ཀྱིས་སྤངས་པ་དང་། བཙོག་
པར་གྱུར་པ་དང་ཤིན་ཏུ་ཡང་ཐ་ཤལ་ཡིན་ནོ། །རྣམ་པ་དེ་ལྟ་བུ་བྱེད་པའི་ཆོས་རྣམས་ཆོས་གང་དག་གིས་རབ་ཏུ་གཞོམ་པར་བྱ། དོན་མེད་པར་སྨྲ་བའི་ཆོས་དེ་ཡང་རབ་ཏུ་གཞོམ་པར་བྱའོ། །ཆོས་གང་དག་གིས་ཞེ་ན། འདི་ལྟ་སྟེ་ངག་བསྡམས་པས་སོ། །ངག་བསྡམ་
པ་ཡང་རྣམ་པ་གཉིས་ཡིན་ཏེ། འདི་ལྟ་སྟེ་གང་ཡང་ཅང་མི་སྨྲ་བའམ་སྡོམ་པ་རྣམ་པ་བཞི་དག་པའོ། །གང་དག་ཞེ་ན། འདི་ལྟ་སྟེ་རྫུན་གྱི་རང་བཞིན་དང་ཕྲ་མ་དང་ཚིག་རྩུབ་པོ་དང་འབྲེལ་པ་མེད་པར་སྨྲ་བར་བྱེད་པ་རྣམས་རྣམ་པར་སྤངས་པས་ངག་ཀུན་ནས་བསྡམ་པར་བྱའོ། །

དེ་ལྟར་ན་ཡང་ཡང་མོར་མི་འགྱུར་རོ། །དགེ་སློང་ངམ་གཞན་ཡང་དེའི་རིགས་ཅན་རྣམས་ཀྱང་རུང་སྟེ། རྒྱུ་དྲུག་གིས་སྐྱེས་བུ་རྣམས་སྐད་ཅིག་ལ་ཡང་མོ་དང་རྣམ་པར་ཞེ་སྡང་བར་ཡང་འགྱུར་རོ། །གང་དག་ཞེ་ན་འདི་ལྟ་སྟེ། དོན་མེད་པར་སྨྲ་བར་བྱེད་པས་དང་ཇི་ལྟར་
རབ་ཏུ་ཞུགས་པར་བྱེད་པ་དང་ཡང་དང་ཡང་དུ་ཟས་ལ་དགའ་བ་དང་རྒན་པོའི་སྟན་ཆེན་པོ་ལ་ཉེ་བར་གནས་པ་དང་གསོང་གསལ་རྗོད་པ་དང་ལབ་ལོབ་བྱེད་པ་དང་རྒྱུ་དེ་དག་གིས། དེ་ལྟར་མི་རྣམས་ཐམས་ཅད་ཀྱང་དར་ཅིག་ལ་ཡང་མོར་འགྱུར་ཞིང་རབ་ཏུ་དགའ་བར་ཡང་མྱུར་
བར་འགྱུར་རོ། །དེའི་ཕྱིར་ན་དགེ་སློང་ངམ་ཁྱིམ་པ་རྣམས་ཀྱིས་ཀྱང་ཆོས་དེ་རྣམ་པར་སྤང་བར་བྱའོ། །ཡང་ཆོས་གཞན་ཡང་ཤིན་ཏུ་དྲི་མ་ཅན་དུ་གྱུར་པ་ཀུན་ནས་ཉོན་མོངས་པ་ཅན་རྣམས་དཀར་པོའི་ཆོས་ཀྱིས་རབ་ཏུ་གཞོམ་པར་བྱའོ། །འདི་དག་ཀྱང་གང་ཞེ་ན། འདི་ལྟ་
སྟེ་རྐོ་ཏྲོག་ནི་བརྟན་པས་སོ། །གང་གི་ཕྱིར་རྐོ་ཏྲོག་གི་ཆོས་རྣམས་ནི་རབ་ཏུ་གཞོམ་པར་བྱ་སྟེ། རྐོ་ཏྲོག་གིས་ཀྱང་ཆོས་རྣམས་ཐམས་ཅད་ཀྱི་བར་དུ་གཅོད་པར་འགྱུར་བའི་ཕྱིར་རོ། །རང་བཞིན་གྱིས་ཀྱང་སེམས་རྩབ་ཧྲལ་ཅན་དུ་གྱུར་པ་དེ་སླར་ཡང་ཆེས་གཡོ་བར་སོན་
པའི་ཕྱིར་ན་ཆོས་འདི་དག་རྣམས་ཐམས་ཅད་ལ་ཡང་དེ་ཀུན་ནས་ཡིད་ཆེས་པ་མ་ཡིན་ནོ། །སོ་སོར་རྟོགས་པ་མེད་དོ། །བརྟན་པར་འཛིན་པ་མེད་དོ། །རབ་ཏུ་དགག་པར་བྱ་བ་ཡང་མེད་དོ། །སྤྱོད་པ་བསྡམ་པར་བྱ་བ་ཡང་མེད་དོ། །མངོན་པར་བརྗོད་པར་བྱ་བ་མེད་དོ། །
སྡོམ་པ་འཐོབ་པ་མ་ཡིན་ནོ། །མངོན་པར་རྟོགས་པ་དང་འཇིག་རྟེན་པ་རྣམས་ཀྱང་མེད་དོ། །འཇིག་རྟེན་པའི་ལམ་རྣམས་ཐམས་ཅད་བཀྲ་བར་བྱེད་པ་ལ་སོ་སོར་རྟོགས་པ་མེད་དོ། །ལས་སུ་རུང་བ་མ་ཡིན་ནོ། །རྩབ་ཧྲལ་ཅན་ནི་བག་མེད་པ་ཡིན་པ་དེའི་ཕྱིར་རྩབ་ཧྲལ་
དེ་སྐྱོན་དང་བཅས་པར་གོ་བར་བྱས་ལ། དོན་རྣམས་ཐམས་ཅད་ཆུད་གཟོན་པར་བྱེད་པ་པོ་འདི་དང་ཕྱི་མར་ཡང་ཕན་པ་མ་ཡིན་པར་བྱེད་པའི་མཆོག་ཡིན་པས། དགེ་སློང་ངམ་གཞན་ཡང་དེའི་རིགས་ཅན་རྣམས་ཀྱིས་ཀྱང་རབ་ཏུ་གཞོམ་པར་བྱའོ། །གང་གིས་དེ་རབ་ཏུ་སྤོང་

ཞེ་ན། འདི་ལྟར་དགེ་བའི་ཆོས་གང་ཡིན་པས་ཏེ། འདི་ལྟར་བརྟན་པར་གྱུར་པས་སོ། །བརྟན་པར་གྱུར་པ་ནི་དགེ་སློང་ངམ་དེའི་རིགས་ཅན་གཞན་དག་རྣམས་ཀྱང་རུང་སྟེ། སྐྱེ་བོ་རྣམས་ཐམས་ཅད་ཀྱིས་མཆོག་ཏུ་ཡང་མཆོད་པར་འགྱུར་རོ། །བརྟན་
པའི་ཚུལ་ཁྲིམས་དང་བརྟན་པའི་ཤེས་རབ་དང་བློ་གྲོས་བརྟན་པ་དང་བློ་བསྡམས་པ་དང་གཅིག་ཏུ་རྒྱུ་བ་རྣམས་ཀྱིས་ནི་བདུད་ཀྱི་ཡུལ་རྣམས་རབ་ཏུ་འཇོམས་པར་བྱེད་དོ། །མྱ་ངན་ལས་འདས་པའི་གྲོང་ཁྱེར་དུ་ཕྱིན་པར་བྱེད་པ་འདིའི་དགེ་བའི་ཆོས་རྣམས་ཕུན་སུམ་ཚོགས་པར་
འགྱུར་རོ། །འཇིག་རྟེན་པའི་དོན་རྣམས་ལ་ཡང་བརྟན་པར་གྱུར་པའི་སྐྱེས་བུ་ནི་མཁས་པ་རྣམས་ཀྱིས་རབ་ཏུ་བསྔགས་པར་བྱེད་དོ། །དེས་ཀྱང་འཇིག་རྟེན་པའི་དོན་དེ་དག་རྣམས་བསྒྲུབ་པར་ནུས་པ་ཡང་ཡིན་ནོ། །ཐམས་ཅད་དུ་ཡང་སྐྱེ་བོ་རྣམས་ཐམས་ཅད་ཀྱིས་ཤིན་ཏུ་
ཡང་མཆོད་པར་འགྱུར་རོ། །རབ་ཏུ་བསྟོད་པར་ཡང་འགྱུར་རོ། །མིང་རྣམ་པར་ཐོས་པས་ཀྱང་ཐམས་ཅད་དུ་ཡང་བདེ་བ་དང་ལྡན་པར་འགྱུར་རོ། །དོན་གང་དང་གང་རྩོམ་པར་བྱེད་པ་དེ་དང་དེ་དག་འགྲུབ་པར་འགྱུར་རོ། །དེའི་ཕྱིར་བློ་གཅིག་ཏུ་ངེས་པ་དང་བློ་ཀུན་
ནས་བསྡམས་པ་དང་བློ་གྲོས་བརྟན་པ་དང་ལྡན་པར་གྱུར་པའི་སྐྱེས་བུ་དེ་དག་ནི་འཇིག་རྟེན་པ་ལ་ཡང་རབ་ཏུ་བསྔགས་པ་ཡིན་ནོ། །དེ་ལྟ་བས་ན་སྐྱེས་བུ་རྣམས་སམ་དགེ་སློང་གིས་ཀྱང་རུང་སྟེ། རྩབ་ཧྲལ་སྤངས་ལ་བློ་གྲོས་བརྟན་པ་དང་དཔའ་བ་དང་ཤེས་རབ་དང་ལྡན་
པར་བྱའོ། །གཞན་ཡང་མུ་སུ་ལུན་དྷ་དེ་ཉིད་ཀྱིས་སྨྲ་བ་པོའི་ངང་པ་དེ་དག་རྣམས་དང་ངང་པའི་རྒྱལ་པོ་དུས་བཟངས་དེ་དང་། བདུད་ཀྱི་རིགས་ཀྱི་བག་མེད་པ་དང་སྨྱོ་བ་དེ་ལ་ཡང་། བཅོམ་ལྡན་འདས་འོད་སྲུང་གིས་མདོ་འདི་སྔོན་གྱི་ལྷའི་དྲུང་ནས་ཐོབ་པར་གྱུར་པ་ཕན་
པའི་དོན་དུ་སྟོན་པར་བྱེད་པ་ལས་འདི་ལྟ་སྟེ། སྨྲེ་བར་གྱུར་པའི་ཆོས་གཞན་དྲི་མ་ཅན་མཁས་པའི་སྐྱེ་བོ་རྣམས་ཐམས་ཅད་ཀྱིས་སྤངས་པ་དག་རབ་ཏུ་གཞོམ་པར་བྱའོ། །འདི་ཡང་གང་ཞེ་ན། འདི་ལྟ་སྟེ་དབུལ་བོའོ། །དབུལ་བོར་གྱུར་པ་ཞེས་བྱ་བ་ཡང་རྣམ་པ་གཉིས་ཏེ།

ཤེས་རབ་ཀྱིས་དབུལ་བ་དང་ཚུལ་ཁྲིམས་ཀྱིས་དབུལ་བའོ། །གཞན་ཡང་རྣམ་པ་གཉིས་ཏེ། སྦྱིན་པས་དབུལ་བ་དང་བློ་གྲོས་ཀྱིས་དབུལ་བའོ། །གཞན་ཡང་རྣམ་པ་གཉིས་ཏེ། རིགས་ཀྱིས་དབུལ་བ་དང་ལྟ་བས་དབུལ་བའོ། །གཞན་ཡང་རྣམ་པ་གཉིས་ཏེ།
སྡོམ་པ་ལ་བརྩོན་པས་དབུལ་བ་དང་བླ་མས་དབུལ་བའོ། །གཉེན་བཤེས་དང་རང་གི་སྐྱེ་བོ་རྣམས་ཀྱིས་དབུལ་བའོ། །དེ་ལ་དབུལ་པོ་དེ་དག་རྣམས་ཐམས་ཅད་ཀྱང་མཆོག་ཏུ་ཞེ་ཟློག་པ་ཡིན་ཏེ། རིགས་ཀྱི་བུའམ་རིགས་ཀྱི་བུ་མོའམ་རིགས་ཀྱི་བུའི་ཉེ་གནས་ཀྱིས་ཀྱང་མ་ལུས་
པ་རྣམས་སྤང་བར་བྱའོ། །གང་གིས་འདི་དག་ཐམས་ཅད་རབ་ཏུ་འཇོམས་པར་བྱེད་ཅེ་ན། འདི་ལྟ་སྟེ་སྦྱིན་པས་སོ། །སྦྱིན་པ་ཉིད་གཅིག་པུ་ཞིག་གིས་དབུལ་བ་རྣམས་ཐམས་ཅད་འཇོམས་པར་འགྱུར་རོ། །དཔེར་ན་མར་མེ་རྣམས་ཐམས་ཅད་ཀྱིས་ཀྱང་མུན་པ་རྣམས་
ཐམས་ཅད་རབ་ཏུ་བསལ་བར་བྱེད་པར་འགྱུར་རོ། །ཤེས་རབ་རྣམས་ཐམས་ཅད་ཀྱིས་ཀྱང་མི་ཤེས་པ་རྣམས་ཀུན་ཏུ་འཇོམས་པར་འགྱུར་རོ། །ལྟ་བ་རྣམས་ཐམས་ཅད་ནི་ཡང་དག་པའི་ལྟ་བས་ཉེ་བར་འཇོམས་པར་བྱེད་དོ། །དེ་ལ་མཆོག་ཏུ་མཛེས་པར་གྱུར་པའི་ཆོས་མཆོག་ཏུ་རྒྱ་
ཆེ་བ་དང་ལྡན་པ་མཁས་པའི་སྐྱེ་བོ་རྣམས་ཐམས་ཅད་ཀྱིས་ཡོངས་སུ་བཟུང་བ། ངན་འགྲོ་ཐམས་ཅད་སྤོང་བར་བྱེད་པ། བདག་ཅག་གི་འཇིག་རྟེན་ནས་འཇིག་རྟེན་ཕ་རོལ་ཏུ་ལེགས་པར་སྒྲོལ་བར་བྱེད་པའི་ཆོས་ཀྱི་མཆོག་འདིས་འཇོམས་པར་བྱེད་དོ། །གང་དག་གིས་
འཇོམས་ཞེ་ན། འདི་ལྟ་སྟེ་སྦྱིན་པས་སོ། །སྦྱིན་པ་ཡང་རྣམ་པ་མང་དུ་ཡོད་དོ། །འདི་ལྟ་སྟེ་ཤེས་པའི་སྦྱིན་པ་དང་། ཚུལ་ཁྲིམས་ཀྱི་སྦྱིན་པ་དང་། ཆོས་ཀྱི་སྦྱིན་པ་དང་། བློ་བསྲོ་བའི་སྦྱིན་པ་དང་། ལམ་ཉེ་བར་སྟོན་པའི་སྦྱིན་པ་དང་། ལམ་གྱིས་ཉོན་མོངས་པ་
རྣམས་ལ་ཁྲུས་ཀྱི་རྫིང་བུའི་སྦྱིན་པ་དང་། བྱ་བའི་སྦྱིན་པ་དང་། སྲོག་གི་སྦྱིན་པ་དང་། ཟང་ཟིང་གི་སྦྱིན་པ་དང་། མི་འཇིགས་པའི་སྦྱིན་པ་དང་། བདེན་པའི་སྦྱིན་པ་དང་། ཐེ་ཚོམ་གཅོད་པའི་སྦྱིན་པ་དང་། སྦྱིན་པ་ལྔ་ལ་ཉོན་མོངས་པ་མེད་པའི་སྦྱིན་པ་དང་།

རབ་ཏུ་དབྱུང་བའི་སྦྱིན་པ་དང་། དེ་བསྙེན་པར་རྫོགས་པའི་སྦྱིན་པ་དང་། ནད་པ་ལ་སྨན་གྱི་སྦྱིན་པ་དང་མིག་གི་སྦྱིན་པ་སྟེ། རྣམ་པ་དེ་ལྟ་བུའི་སྦྱིན་པ་རྣམས་ནི་འཇིག་རྟེན་ཕ་རོལ་ལེགས་པར་སྒྲོལ་བར་བྱེད་པ་སྦྱིན་བདག་ཐམས་ཅད་ལ་རྟག་ཏུ་མ་དང་ཕ་དང་
འདྲ་བ་ཡིན་ནོ། །དེ་ཡང་སེམས་རྣམས་ཀྱིས་དང་སེམས་ཀྱིས་ལེགས་པར་བསྒོམས་ནས་བྱིན་པར་གྱུར་པས་དབུལ་བ་རྣམས་ཐམས་ཅད་བཅོམ་ཞིང་ངན་འགྲོ་རྣམས་ཐམས་ཅད་ཀྱང་བཅད་ནས། ལྷ་དང་མི་གཉིས་ཀྱི་བདེ་བ་ལ་ཉེ་བར་ལོངས་སྤྱད་པར་གྱུར་ནས། ཐ་མར་
ཇི་སྲིད་དུ་མྱ་ངན་ལས་འདས་པ་ཐོབ་པར་འགྱུར་ཏེ། སྐྱེས་བུ་དེས་རྟག་ཏུ་དེ་ལྟ་བུའི་ལས་བྱའོ། །དེ་བས་ན་དབུལ་བ་ཞེས་བྱ་བའི་ཆོས་གཞན་འདི་མཆོག་ཏུ་དགེ་བ་རྣམས་དང་མཁས་པའི་སྐྱེ་བོ་རྣམས་ལ་མཆོག་ཏུ་དགའ་བ་དག་གིས་རབ་ཏུ་གཞོམ་པར་བྱའོ། །འདི་
ལྟ་སྟེ་སྦྱིན་པ་དང་སེམས་དང་དངོས་པོ་དང་ཞིང་རྣམས་ཕུན་སུམ་ཚོགས་པས་སོ། །གཞན་ཡང་ཆོས་ཐམས་ཅད་དང་འཁོར་བ་ཐམས་ཅད་ཀྱི་འཆིང་བའི་རབ་ཏུ་གྱུར་པ་ཆོས་རྣམས་ཐམས་ཅད་ཀྱི་མུན་པ་ལྟ་བུར་གྱུར་པའོ། །འདི་ཡང་གང་ཞེ་ན། འདི་ལྟ་སྟེ་མི་ཤེས་
པའོ། །དེ་ལ་ཇི་སྲིད་དུ་མ་རིག་པའི་མུན་པ་ཡིན་པའི་བར་དུ་མི་ཤེས་པ་རྣམ་པ་དུ་མ་ཡིན་ཏེ། འཁོར་བ་ཐམས་ཅད་ཀྱི་འཆིང་བས་མུན་པ་ཐམས་ཅད་ཀྱི་ཚོགས་སུ་གྱུར་པའི་མུན་ནག་གི་ཞེན་པའི་རྡུལ་དུ་གྱུར་པའི་འཆིང་བ་དང་། ཤིན་ཏུ་འཆིང་བར་བྱེད་པས་མཚོན་ཆ་
དང་དུག་དང་མེ་དང་མཚུངས་པའི་མི་ཤེས་པ་རྣམས་ཐམས་ཅད་ནི་མ་རིག་པ་དང་འདྲ་བ་ཐམས་ཅད་མ་རིག་པས་ཀུན་ནས་བསླང་བ། དམྱལ་བ་དང་ཡི་དགས་དང་དུད་འགྲོ་རྣམས་ཐམས་ཅད་དུ་ཡོངས་སུ་འཁྱམ་པ། འཆིང་བ་གང་ཁོ་ནས་ངེས་པར་བཅིངས་ནས་སེམས་ཅན་
འདི་དག་རྣམས་འོབས་ན་ཡོངས་སུ་འཁོར་རོ། །རྣམ་པ་དེ་ལྟ་བུའི་དགྲར་གྱུར་པའི་དྲི་མ་འདི་དག་རྣམས་རྣམ་པ་ཅི་ལྟ་བུ་དག་གིས་རབ་ཏུ་འཇོམས་པར་འགྱུར་ན། འདི་ལྟ་སྟེ་སྒྲོན་མར་རུང་བ་སྐྱབས་སུ་གྱུར་པ་སྐྱོབ་པར་གྱུར་པ་ཡོངས་སུ་འདྲེན་པར་གྱུར་པ། སེམས་ཅན་

རྣམས་ཐམས་ཅད་ཀྱི་ཡང་མ་དང་ཕ་ལྟ་བུར་གྱུར་པ་དང་། སྨན་པ་དང་སྨན་ལྟ་བུར་གྱུར་པའི་ཟག་པ་མེད་པའི་ཡེ་ཤེས་སུ་གྱུར་པས་འཆིང་བ་རྣམས་ཐམས་ཅད་གཅོད་པར་བྱེད་པར་གྱུར་པའི་ཡེ་ཤེས་ཀྱིས་རབ་ཏུ་འཇོམས་པར་འགྱུར་རོ། །མ་རིག་པ་རབ་ཏུ་སྤངས་པ་
རྣམས་ནི་སླར་ཉིད་ཀྱང་རབ་ཏུ་འབྱུང་བར་འགྱུར་བ་ནི་མ་ཡིན་ཏེ། དཔེར་ན་ལྗོན་ཤིང་རྩ་བ་ནས་བཏོན་པ་རྣམས་ནི་སླར་ཡང་རབ་ཏུ་སྐྱེ་བར་འགྱུར་བ་ནི་མ་ཡིན་ནོ། །ཇི་ལྟར་མེས་ཚིག་པར་གྱུར་པའི་ཤིང་རྣམས་ནི་སླར་ཡང་ལེགས་པར་སྐྱེ་བར་མི་འགྱུར་རོ། །ཇི་ལྟར་ཆུ་ཀླུང་
གི་ཆུར་སོང་བ་རྣམས་སླར་ཡང་ཕྱིར་ལོག་ནས་འོང་བ་ནི་མེད་དོ། །དེ་བཞིན་དུ་ཟག་པ་མེད་པའི་ཡེ་ཤེས་ཀྱིས་བསྲབས་པ་རྣམས་ཡང་ཕྱིར་འབྱུང་བར་མི་འགྱུར་རོ། །དེའི་ཕྱིར་ན་རབ་ཏུ་བརྩོན་པ་ཁོ་ནས་ཐམས་ཅད་ཀྱིས་གནས་སྐབས་ཐམས་ཅད་དང་དུས་ཐམས་ཅད་དུ་
མི་ཤེས་པ་ཐམས་ཅད་ཀྱང་ཡེ་ཤེས་ཐམས་ཅད་ཀྱིས་རབ་ཏུ་གཞོམ་པར་བྱའོ། །ཆོས་བཅུ་གཅིག་པ་དེ་དག་རྣམས་ཐམས་ཅད་ཀྱང་། བག་མེད་པའི་རྩ་བ་ཅན་དང་བག་མེད་པའི་གནས་སྐབས་དང་བག་མེད་པའི་རིགས་ཅན་ཡིན་ནོ། །དེའི་ཕྱིར་ན་གནས་སྐབས་རྣམས་
ཐམས་ཅད་དུ་དང་། རྣམ་པ་རྣམས་ཐམས་ཅད་ཀྱིས་བག་མེད་པ་ཉིད་རེ་ཞིག་ཡོངས་སུ་སྤང་བར་བྱ་བ་ཡིན་ནོ། །བག་མེད་པ་རྣམས་ཀྱི་རྩ་བ་ལས་ཀྱང་ཐམས་ཅད་གནས་སྐབས་ཐམས་ཅད་དུ་དོན་མ་ཡིན་པར་འགྱུར་ཏེ། དེ་ཡོད་པའི་ལས་འབྱུང་བ་ཡིན་ནོ།