Kinh tạng Tây Tạng (Kangyur Đại Học) — 071_མདོ་སྡེ།_ཤ

་པ་ལས་ཡིན་ནོ། །མིག་བཙུམས་པའི་ཕུག་གི་རི་དེ་ལས་རིང་དུ་འདས་པ་ན་ཡང་ཟླ་བའི་རི་བོ་
ཞེས་བྱ་བའི་རི་གསེར་གྱི་མདོག་ཏུ་གྱུར་པ་དཔག་ཚད་ལྔ་བརྒྱ་པ་ཡིན་ནོ། །རི་བོ་རི་རབ་ལྷུན་པོ་ལ་འགྲན་པ་ཞེས་བྱ་བའི་རི་དཔག་ཚད་ལྔ་བརྒྱ་པ་ཡོད་པ་ཡིན་ཏེ། དེའི་བྱང་ཕྱོགས་ཀྱི་ལོགས་ལ་ཀེ་ཏ་ཀའི་ནགས་ཡོད་པ། དེ་ལ་ནི་རྨི་ལ་མ་མཐོང་བའི་བགེགས་ཞེས་བྱ་བའི་
སྲིན་མོ་རབ་ཏུ་གནས་པ་ཡིན་ཏེ། བང་ཤིན་ཏུ་མགྱོགས་པར་གྱུར་པས་མིག་ཚུམ་ཙམ་ལ་ཡང་དཔག་ཚད་བརྒྱ་སྟོང་ཕྲག་མང་པོ་རྣམས་སུ་འགྲོ་བར་བྱེད་དེ། དེས་ནི་སྐྱེས་བུ་དག་ལ་དོན་མེད་པ་དང་། མི་བདེ་བ་དང་། མི་ཕན་པ་རྣམས་བྱེད་དོ། །གཞན་ཡང་རྣལ་འབྱོར་
སྤྱོད་པ་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། གཞན་ཅི་བྱང་ཕྱོགས་སྒྲ་མི་སྙན་པ་དང་། འཛམ་བུའི་གླིང་པའི་བར་ན་རིའི་རིགས་སུ་གྱུར་པའམ། ཆུ་ཀླུང་གི་རིགས་སུ་གྱུར་པའམ། རྒྱ་མཚོའི་རིགས་སུ་གྱུར་པ་ནི་གཞན་གང་དག་ཡོད་ཅིང་། གང་

ལ་ཡང་བདག་ཅག་སྐྱེས་པར་མ་གྱུར་པའམ། ཤི་བར་མ་གྱུར་པའམ། འཆི་འཕོས་པར་མ་གྱུར་པའམ། སྐྱེས་པར་མ་གྱུར་པའམ། ལས་ཀྱིས་ཉེ་བར་འགྲོ་བ་མ་ཡིན་པར་གྱུར་པ་རྣམས་སམ། སྡུག་པ་དང་ཡིད་དུ་འོང་བ་རྣམས་ཐམས་ཅད་དང་ཡང་
ཐ་དད་དུ་གྱུར་པ་དང་། བྱེ་བ་དང་། བྲལ་བ་དང་། རྣམ་པར་བྲལ་བ་དང་ལྡན་པར་མ་གྱུར་པ་ཡོད་དམ་ཞེ་ན། དེ་ནི་སེན་མོའི་ཚད་ཙམ་གྱི་ཡུལ་གཅིག་ཀྱང་མ་མཐོང་ངོ་། །གང་ལ་འཐུན་པ་དང་ཡིད་དུ་འོང་བར་གྱུར་པ་རྣམས་ཐམས་ཅད་དང་ཐ་དད་དུ་གྱུར་པ་དང་། རྣམ་པར་ཞིག་
པ་དང་། རྣམ་པར་གྱེས་པ་དང་། རྣམ་པར་བྲལ་བ་དང་ལྡན་པར་མ་གྱུར་པ་ནི་མེད་དོ། །དེའི་ཕྱིར་ན་རིངས་པ་རིངས་པར་འདུ་བྱེད་ཐམས་ཅད་ལས་འདོད་ཆགས་དང་བྲལ་བར་གྱིས། རྣམ་པར་གྲོལ་བར་གྱིས། སྐྱོ་བ་མེད་པར་གྱུར་ཏ་རེ། འཁོར་བ་ལ་ཀུན་དུ་ཆགས་པར་
གྱུར་པ་སྐྱེས་པར་གྱུར་ཏ་རེ། སྲེད་པའི་ཞགས་པའི་དབང་དུ་ཀུན་ནས་འགྲོ་བར་མ་བྱེད་ཅིག །འཁོར་བ་ལ་མངོན་པར་དགའ་བར་མ་བྱེད་ཅིག །འཁོར་བ་འདི་ནི་རབ་ཏུ་འབར་བ་དང་། སྡུག་བསྔལ་དང་། ཡིད་མི་བདེ་བ་དང་། ཡོངས་སུ་ངལ་བ་ཡིན་ནོ། །མི་འཐུན་པར་གྱུར་
པ་རྣམས་དང་ཕྲད་པ་དང་། འཐུན་པ་རྣམས་དང་བྲལ་བར་འགྱུར་བའི་མེ་དག་གིས་དམྱལ་བ་དང་། ཡི་དགས་དང་། དུད་འགྲོ་རྣམས་སུའོ། །མི་དང་ལྷའི་གནས་རྣམས་སུ་བདེ་བ་ཉམས་སུ་མྱོང་བར་གྱུར་པ་རྣམས་ནི་གཡོ་བ་ཡིན་ལ་བདེ་བ་མ་ཡིན་ཡང་གཏི་མུག་གིས་ཀུན་
ནས་གཡོགས་པ་ཡིན་ནོ། །དེའི་ཕྱིར་ན་ཐམས་ཅད་ལ་ཡང་སྐྱོ་བ་སྐྱེ་བར་གྱིས་ཤིག །ད་འཁོར་བར་མ་འཁོར་བར་མ་བྱེད་དང་། བདུད་ཀྱི་ཡུལ་དེ་ལ་གནས་པར་གྱུར་ཏ་རེ། ཉོན་མོངས་པ་རྣམས་དང་ལྷན་ཅིག་ཏུ་རྩེ་བར་མ་བྱེད་དང་། ཕྱིས་འགྱོད་པ་སྐྱེ་བར་འགྱུར་
བར་མ་བྱེད་ཅིག་ཅེས་དེ་ལྟར་རྣལ་འབྱོར་སྤྱོད་པ་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་པ་རྣམས་ནི་བདུད་ཀྱི་དབང་དུ་འགྲོ་བར་མི་འགྱུར་རོ། །དེ་ཁོ་ན་ཉིད་ཇི་ལྟ་བ་བཞིན་དུ་མཐོང་བར་འགྱུར་བ་དང་། འདུ་བྱེད་རྣམས་ཐམས་ཅད་ལ་ཡང་ཆགས་པ་དང་བྲལ་བ་

དང་། ཉོན་མོངས་པ་རྣམས་རྣམ་པར་སྤོང་བ་དང་། ལས་ཀྱི་མཐའ་རྣམས་དང་བྲལ་བ་དང་། ཐེ་ཚོམ་དང་ཡང་རྣམ་པར་བྲལ་བར་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། སྒྲ་མི་སྙན་པ་དང་འཛམ་བུའི་གླིང་
པའི་བྱང་གི་ཕྱོགས་ན་རིའི་རིགས་སུ་གྱུར་པའམ། ཆུ་བོའི་རིགས་སུ་གྱུར་པ་གཞན་དག་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཁུ་བྱུག་གིས་གང་བའི་སྒྲ་དབྱངས་དང་ལྡན་པ་ཞེས་བྱ་བའི་རི་འཕང་དུ་ནི་དཔག་
ཚད་སུམ་ཅུ་པ་སྟེ། རྒྱར་ནི་དཔག་ཚད་བཅུ་པ་ཡིན་ནོ། །རི་དེ་ལ་ནི་ཁུ་བྱུག་བརྒྱ་ཕྲག་མང་པོས་ཀུན་དུ་གང་བར་གྱུར་པ། ཤིང་མྱ་ངན་མེད་སྔོན་པོ་དང་། མྱ་ངན་མེད་དམར་པོ་དང་། འདབ་མ་བདུན་པ་དང་། ཀོ་དཱ་ལ་དང་། ཀ་ད་མྦ་དང་། ཨ་ཤོ་ཀ་ལེ་བརྒན་དང་།
མེ་ཏོག་ཕྲེང་བ་གསར་པ་དང་། སཽ་བརྞ་ཡུ་ཐཱི་ཀ་དང་། སུ་མ་ནཱ་དང་། ཤལྤ་ལི་དང་། ཏཱ་ལ་པྲི་ཡཾ་དང་། གུཾ་ཀུ་ཊ་སྐྱེས་དང་། ཙམྦ་ཀ་དང་། ཀུ་ནྡ་དང་། བནྡྷུ་ཛཱི་པ་ཀ་དང་། དབྱར་གྱི་དུས་པ་དང་རྣམས་ཏེ། ཇི་ལྟར་ནམ་ཟླ་དང་དུས་ཚོད་ཀྱི་རྗེས་སུ་འཇུག་པར་བྱེད་པའི་
མེ་ཏོག་རྣམས་ཀྱིས་རི་དེ་ལ་ཀུན་དུ་གང་བ་ཡིན་ནོ། །ཕྲེང་བ་ཐོགས་པ་ཞེས་བྱ་བའི་ལྷ་རེས་འགའ་རང་གི་གནས་རི་རབ་ལྷུན་པོ་བཏང་ནས་དེ་ལ་རྩེ་དགའ་བར་བྱེད་དོ། །རི་དེ་ནི་དགའ་བ་ཡིན་པའི་ཕྱིར་ཡང་གླུ་དང་། གར་དང་། རོལ་མོའི་སྒྲ་རྣམས་ཀྱིས་ཀྱང་རི་དེ་ལ་ཡིད་
དགའ་བར་བྱེད་དེ། འོན་ཀྱང་ལྷ་དེ་དག་རྣམས་ཀྱི་སེམས་ཀུན་ནས་གཡེངས་པས་རྣམ་པར་གཡེངས་པར་ཡང་མི་འགྱུར་རོ། །ཁུ་བྱུག་གིས་གང་བར་གྱུར་པའི་རི་དེ་ལས་འདས་པར་གྱུར་ནས་ངང་པའི་ནགས་ཞེས་བྱ་བ་རྒྱ་མཚོའི་ཡུལ་ཕྱོགས་ན་ཡོད་དེ། ངང་པ་བརྒྱ་སྟོང་
ཕྲག་རྣམས་ཁྱུས་རྒྱུ་བར་བྱེད་དོ། །དེ་ཉེ་འཁོར་རྣམས་ཉིད་ན་པད་མ་རྣམས་ཀྱིས་ཀྱང་གང་བ་ཡིན་ཞིང་རྒྱ་མཚོ་འདིའི་ས་ཕྱོགས་རྣམས་ལ་ཀཱ་རཎྜ་བ་དང་། ཙཀྲ་པཱ་ཀ་དང་། ཀ་དམྦ་དང་རྣམས་ནོར་བུའི་མཆུ་དང་ཡུ་བ་འཇམ་པོའི་མགུལ་པ་ཅན་ལ་སོགས་པ་རྣམས་ཀྱིས་གང་བར་

གྱུར་པ་དང་། གསེར་འབར་བའི་མདོག་ལྟ་བུའི་པད་མ་རྣམས་ཀྱིས་ཀྱང་གང་བར་གྱུར་པས་དཔག་ཚད་སྟོང་ཕྲག་བཅུའི་ས་ཕྱོགས་ཁྱབ་པར་གྱུར་ཏོ། །ཉེ་འཁོར་གཞན་དེ་ལས་འདས་པར་གྱུར་ནས་རི་རབ་ལྷུན་པོའི་བྱང་གི་ཆའི་རྒྱ་མཚོའི་ཁོར་ཡུག་དཔག་ཚད་བརྒྱ་
ཕྲག་བཅུར་ཉ་དང་། ཉ་ཆེན་པོ་དང་། ཆུ་སྲིན་ན་ཀྲ་དང་། ཆུ་སྲིན་མ་ཀ་ར་དང་། ཆུ་སྲིན་བྱིས་པ་གསོད་དང་། རུས་སྦལ་རྣམས་ཀྱིས་ཡོངས་སུ་གང་བར་གྱུར་པ་ཡིན་ནོ། །ཉེ་འཁོར་ཀུན་ཡང་ཁ་དོག་ནམ་མཁའ་དང་མཚུངས་པར་གྱུར་པའི་ཆུ་སྔོན་པོ་ཡིན་ཏེ། ཟབས་སུ་
ནི་དཔག་ཚད་སྟོང་ཕྲག་བཅུ་ཡིན་ནོ། །དེ་ན་ཡང་མོ་དུང་རྣམས་གནས་ཏེ། བདག་ཉིད་ཀྱི་དངོས་པོའི་ཚད་ནི་རྒྱང་གྲགས་ཙམ་ཡིན་ནོ། །སྟོབས་ཆེན་པོ་དང་ལྡན་པ་རྣམས་ཡིན་ཏེ་ཆུའི་ནང་ནས་གང་དག་གནས་པའི་རིའི་རྩེ་མོ་དེ་དག་རྣམས་ཤུགས་ཀྱིས་བསྒུལ་ནས་ལྷུང་བར་
བྱེད་དོ། །གླང་པོ་ཆེ་སྟོང་གི་སྟོབས་རེ་རེས་འཛིན་པ་ཡིན་ནོ། །དེ་ལས་རིང་དུ་འདས་ནས་འོ་མའི་ཆུ་ཞེས་བྱ་བའི་རྒྱ་མཚོ་ཉེ་འཁོར་དུ་དཔག་ཚད་སྟོང་ཕྲག་ལྔ་ཡོད་པ་སྟེ། རྟག་ཏུ་རླབས་རྣམས་ཀྱིས་དཀྲུག་པར་བྱེད་པ། རྟག་ཏུ་སྤྲིན་དང་སྒྲ་སྒྲོགས་པར་བྱེད་པའི་ཤིན་ཏུ་ཁྲོ་
བར་གྱུར་པའི་ཀླུ་དུག་ཅན་རྣམས་ཀྱིས་གང་བར་གྱུར་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། འཛམ་བུའི་གླིང་གི་བྱང་ཕྱོགས་ངོས་ན་རིའི་རིགས་སམ། ཆུ་བོའི་རིགས་སམ། རྒྱ་མཚོའི་རིགས་གཞན་གང་
དག་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གསེར་དང་། གསེར་དམར་པོ་དང་། ཤེལ་གྱི་རང་བཞིན་གྱི་རི་བརྒྱ་ཕྲག་ལྔ་ཡོད་པས་བྱང་ཕྱོགས་སྒྲ་མི་སྙན་གྱི་གླིང་དེ་ནང་པར་གྱི་ཉི་མའི་མདོག་དང་འདྲ་བ་དང་། པད་མ་
དང་། པད་མའི་རྫིང་བུ་དག་གིས་ཀྱང་གང་བར་གྱུར་པ་སྟེ། ཡུལ་དེ་ནི་དཔག་ཚད་སུམ་སྟོང་པ་ཡིན་ནོ། །ཡུལ་དེ་ལས་འདས་པར་གྱུར་ནས་སྒྲ་མི་སྙན་དང་འཛམ་བུའི་གླིང་དག་གི་བྱང་ཕྱོགས་ངོས་ལ་འོ་མ་དང་མཚུངས་པར་འཇུག་པ་ཞེས་བྱ་བའི་ཡུལ་རྣམ་པར་བཀྲ་

བར་གྱུར་པ་རི་དང་། ནགས་དང་། ཉེ་བའི་ནགས་དང་། རི་དགས་དང་། བྱ་ཡང་རྣམ་པ་སྣ་ཚོགས་པ་རྣམས་ཀྱིས་ཀུན་དུ་གང་བར་གྱུར་པ་དང་། རྟག་ཏུ་དགའ་བར་གྱུར་པའི་ལྷ་གསང་བ་པ་རྣམས་ཀྱིས་གང་བར་གྱུར་པ། རྣམ་པ་སྣ་ཚོགས་པའི་ལྗོན་ཤིང་དང་མེ་ཏོག་གི་
ཚོགས་ཀྱིས་ཀུན་ནས་དུད་པར་གྱུར་པ་རྣམས་ཀྱིས་གང་བར་གྱུར་པས་ཉེ་འཁོར་ཉམས་དགའ་བ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་གི་སྒྲ་མི་སྙན་དང་འཛམ་བུའི་གླིང་གི་བྱང་ངོས་ན་རིའི་རིགས་སུ་
གྱུར་པའམ། ཆུ་བོའི་རིགས་སུ་གྱུར་པ་གཞན་ཅི་དག་ཡོད་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གླིང་གཉིས་པོ་འདི་དག་གཉིས་ཀྱི་བར་ན་ཡུལ་ཕྱོགས་འགའ་ཞིག་ཀྱང་ཡོད་པ་མ་ཡིན་ནོ། །བྱང་ཕྱོགས་སྒྲ་མི་སྙན་གྱི་
གླིང་ཆེན་པོ་ནི་མ་གཏོགས་ཏེ། རྒྱ་ཁྱོན་དུ་ནི་དཔག་ཚད་སྟོང་ཕྲག་བཅུ་ཡིན་ནོ། །གྲོང་བྱེ་བ་ཕྲག་སུམ་ཅུ་རྩ་དྲུག་གི་རྣམ་པ་རྣམས་ཀྱིས་ཉེ་འཁོར་རྣམས་ཀུན་དུ་གང་བར་གྱུར་པ་སྟེ། མཆོག་ཏུ་དགའ་བ་དང་སྐལ་བ་གཞན་རྣམས་ལ་ཡང་དགའ་བ་ཡིན་ནོ། །ཤ་དང་།
རུས་པ་དང་། ཆུ་སེར་རྣམས་དང་བྲལ་བར་གྱུར་པ་མ་གཏོགས་པ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་དྲུང་ན་ནི་འཇིགས་པ་མེད་པ་ཡང་ཡིན་ནོ། །ལྷ་རྣམས་ནི་མིག་མི་འཛུམས་པ་ཡིན་ལ། བྱང་ཕྱོགས་སྒྲ་མི་སྙན་པ་རྣམས་ནི་པགས་པ་དང་། ཤ་དང་། རུས་པ་དང་། ཆུ་
སེར་དང་། མིག་འཛུམས་པར་བྱེད་པ་དང་བཅས་པ་ཡིན་ཞིང་བདག་གི་བ་མེད་པ་དང་། ང་རྒྱལ་ཅན་མེད་པ་ཡིན་ཏེ། ཤི་ནས་ཀྱང་ངེས་པར་ལྷ་རྣམས་སུ་སྐྱེ་བར་འགྱུར་བ་ཡིན་ནོ། །སྒྱུ་དང་། གཡོ་དང་། ཕྲག་དོག་དང་། ཁེངས་པ་རྣམས་དང་བྲལ་བར་གྱུར་པ་དང་། རྟག་པར་
རབ་ཏུ་དགའ་བར་གྱུར་པ་ཡིན་ནོ། །སྲིན་མོ་དང་། ཤ་ཟ་དང་། གྲུལ་བུམ་དང་། སེང་གེ་དང་། སྟག་དང་། གུང་དང་། སྤྱང་ཀི་དང་། ཀླུ་དང་། ལྟོ་འཕྱེ་དང་། སྦྲུལ་གདེངས་ཀ་ཅན་དང་། མུ་གེ་དང་། ཚད་པ་དང་། གྲང་བ་དང་། ལྟོགས་པ་དང་། སྐོམ་པ་དང་། ནད་དང་། ལྷས་

ཆར་མི་འབེབས་པར་གྱུར་པ་རྣམས་དང་བྲལ་བ་དང་། ཕན་ཚུན་དུ་ཀུན་དགའ་བར་བྱེད་པ་རྣམས་ཡིན་ནོ། །དེ་དག་རྣམས་ལ་འཇིགས་པར་གྱུར་པ་རྒྱལ་པོ་དང་། ཆོམ་རྐུན་དང་། ཆུ་དང་། མེ་དང་། མཚོན་ཆ་འབེབས་པས་འཇིགས་པར་བྱེད་པ་རྣམས་ཀྱང་
མེད་པ་ཡིན་ནོ། །ཉིན་མོ་དང་མཚན་མོའི་ཁྱད་པར་ཡང་རྙེད་པ་མ་ཡིན་ཏེ། གསེར་གྱི་རང་བཞིན་གྱི་ལྗོན་ཤིང་རྣམས་ཀྱི་འོད་ཟེར་ཀུན་དུ་འཕྲོ་བའི་ཕྱིར་རོ། །དེ་ལ་ལྗོན་ཤིང་རྣམས་ནི་ཧི་ར་ཎྱའི་རང་བཞིན་དང་། གསེར་དམར་པོ་དང་། བྱི་རུ་དང་། དངུལ་གྱི་རང་བཞིན་རྣམས་ཡིན་
ནོ། །བྱ་རྣམས་ཀྱང་ལུས་རྣམ་པར་འགྱུར་བ་རྣམ་པ་སྣ་ཚོགས་པ་རྣམས་བྱེད་པ་དང་། རྟག་པར་ཀུན་ནས་རངས་པར་གྱུར་པ་ནི་རབ་ཏུ་དགའ་བའི་སྐྱེས་བུ་རྣམས་བཞིན་ནོ། །ཤིང་དེ་དག་རྣམས་ཀྱང་སེམས་དང་ལྡན་པ་བཞིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་
ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་གྱི་གླིང་ན་དགའ་བ་ཡོད་པ་དང་། དགའ་བ་ལས་ཀྱང་ཤིན་ཏུ་དགའ་བ་ཡོད་པ་གཞན་གང་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བྱང་ཕྱོགས་
སྒྲ་མི་སྙན་གྱི་གླིང་ན་ནི་རི་ཆེན་པོ་བཅུ་ཡོད་དེ། འདི་ལྟ་སྟེ་སང་ཀཱ་ཤ་ཀཱ་ཞེས་བྱ་བའི་རི་དང་། རྭ་མཉམ་པ་ཞེས་བྱ་བའི་རི་དང་། རི་དགས་ཀྱི་དགྲ་དུལ་བ་ཞེས་བྱ་བའི་རི་དང་། སྤྲིན་དཀར་པོ་འཛིན་པ་ཞེས་བྱ་བའི་རི་དང་། མཐོ་བར་བརྩེགས་པ་ཞེས་བྱ་བའི་རི་དང་། ཕྲེང་བའི་
ཉེ་འཁོར་ཞེས་བྱ་བའི་རི་དང་། དུས་ན་དགའ་བ་ཞེས་བྱ་བའི་རི་དང་། ཀུན་དགའ་བ་འཛིན་པ་ཞེས་བྱ་བའི་རི་དང་། ཡིད་ཀྱི་རྗེས་སུ་འཐུན་པ་ཞེས་བྱ་བའི་རི་དང་། པད་མ་ཀུ་ཤེ་ཤ་ཡ་དང་ལྡན་པ་ཞེས་བྱ་བའི་རི་དང་སྟེ། རི་ཆེན་པོ་བཅུ་པོ་དེ་དག་གིས་བྱང་ཕྱོགས་སྒྲ་མི་སྙན་གྱི་གླིང་
རྒྱ་མཚོའི་མཐར་ཐུག་པས་ཡོངས་སུ་བསྐོར་བ་ཡིན་ནོ། །དཔེར་ན་འཛམ་བུའི་གླིང་རི་བཞིས་ཡོངས་སུ་བསྐོར་བ་ཡིན་ཏེ། གངས་ཅན་དང་། འབིགས་བྱེད་དང་། མ་ལ་ཡ་དང་། ཏི་སེའོ། །དེ་ཁོ་ན་བཞིན་དུ་རི་བཅུས་བྱང་ཕྱོགས་སྒྲ་མི་སྙན་གྱི་གླིང་ཡོངས་སུ་བསྐོར་བ་ཡིན་

ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རི་དེ་དག་རྣམས་ལ་མེ་ཏོག་དང་འཁྲི་ཤིང་གི་ཚོགས་འཁྲིལ་བ་དང་། མཚོ་དང་། ཆུ་ཀླུང་དང་། བྱ་དང་། འབྲས་བུ་དང་། རི་དགས་ཀྱི་རིགས་ཅི་ཡོད་པ་རྣམས་དེས་ཐོས་པ་ལས་
བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སང་ཀཱ་ཤའི་རི་ལ་སང་ཀཱ་ཤཱ་ཞེས་བྱ་བའི་ལྗོན་ཤིང་དུས་དྲུག་ཏུ་མེ་ཏོག་འབྱུང་བར་འགྱུར་རོ། །ལྗོན་ཤིང་དེ་དག་རྣམས་ལ་ཉིན་མཚན་དུ་འོད་འབྱུང་བར་འགྱུར་ཏེ། འཛམ་བུའི་གླིང་གི་མཚན་མོའི་མར་མེ་རྣམས་བཞིན་
ནོ། །དྲི་ཡང་དཔག་ཚད་དུ་རབ་ཏུ་འཕྱུར་བ་ཡིན་ཏེ། ཇི་ལྟར་ཅུང་ཟད་ཅིག་ཀྱང་འཛམ་བུའི་གླིང་ནི་ཆ་འདྲ་བ་ནི་མེད་དོ། །སཾ་ཀཱ་ཤའི་རི་དེ་ལ་ནགས་ལྔ་ཡོད་པ་རྣམས་ནི་འདི་ལྟ་སྟེ། གྲིབ་མ་སྔོན་པོ་ཞེས་བྱ་བའི་ནགས་དང་། བྱ་ངེས་པར་གནས་པ་ཞེས་བྱ་བའི་ནགས་དང་། ཟབ་
མོ་ཞེས་བྱ་བའི་ནགས་དང་། སྤྲིན་དཀར་པོ་ཞེས་བྱ་བའི་ནགས་དང་། རྣམ་པར་འབབ་པ་ཞེས་བྱ་བའི་ནགས་རྣམས་སོ། །དེ་ལ་སཾ་ཀཱ་ཤའི་རི་དེ་ལས་སྤྲིན་དང་འདྲ་བར་གྱུར་པའི་མེ་ཏོག་རྣམས་རྒྱས་པའི་ཕྱིར་ན་འདི་ནི་ནམ་མཁའ་དང་མཚུངས་པ་ཡིན་ནོ། །དེས་ན་འདི་ནི་སཾ་ཀཱ་
ཤའི་རི་ཞེས་བྱའོ། །དེ་ལ་ཕྱོགས་གཅིག་ན་གྲིབ་མ་སྔོན་པོ་ཞེས་བྱ་བའི་ནགས་ཡོད་དོ། །དེ་ལ་གང་ཅུང་ཟད་དཀར་པོར་གྱུར་པའི་གཟུགས་སོང་ཞིང་འགྲོ་ལ་སོ་སོར་འགྲོ་བར་འགྱུར་བ་རྣམས་ཀྱང་ནགས་དེའི་འོད་ཀྱིས་ཀུན་དུ་སྣང་བར་བྱས་པའི་སྟོབས་ཀྱིས་བཻ་ཌཱུརྱ་སྔོན་པོའི་མདོག་
ཏུ་འགྱུར་རོ། །བྱ་རྣམས་ཀྱང་སྔོན་པོ་དེ་དག་ཉིད་ན་གནས་པ་ཡིན་ནོ། །འདི་ལྟ་སྟེ། ཡིད་ཀྱི་རྗེས་སུ་འཐུན་པ་ཞེས་བྱ་བའི་བྱ་ནི་བྱང་ཕྱོགས་སྒྲ་མི་སྙན་པའི་མི་རྣམས་གྲིབ་མ་སྔོན་པོའི་ནགས་སུ་ཞུགས་པར་གྱུར་ནས་ཡིད་ཀྱི་རྗེས་སུ་འཐུན་པ་གང་དག་སྤྱོད་པར་བྱེད་ན་དེ་དག་བྱ་དེ་དག་
རྣམས་ཀྱིས་རྩེ་བར་བྱེད་དོ། །རྟག་པར་རབ་ཏུ་དགའ་བ་ཞེས་བྱ་བའི་བྱ་ལེགས་པར་གནས་པས་ནི་དེ་མཐོང་བར་གྱུར་པས་ཀྱང་བྱང་ཕྱོགས་སྒྲ་མི་སྙན་གྱི་སྐྱེས་བུ་རྣམས་ཕྱིར་ཞིང་ཆེས་རབ་ཏུ་དགའ་བར་འགྱུར་རོ། །གྲང་བ་དང་དྲོ་བ་ཞེས་བྱ་བའི་བྱ་དེ་དག་མཐོང་བར་གྱུར་པས་ཀྱང་

སྐྱེས་བུ་གྲང་བས་ཉེན་པ་རྣམ་གྲང་བར་མི་འགྱུར་རོ། །དྲོ་བས་ཉེན་པར་གྱུར་པ་རྣམས་ཀྱང་ཤིན་ཏུ་ཚ་བར་མི་འགྱུར་ཏེ། བྱ་དེ་དག་རྣམས་ཀྱི་མཐུས་ཡིན་ནོ། །རླུང་གི་བང་ཡོད་པ་ཞེས་བྱ་བའི་བྱ་རྣམས་ཀྱིས་ནི་ཡུད་ཙམ་ཅིག་ལ་ཡང་དཔག་ཚད་སྟོང་དུ་འགྲོ་བ་ཡིན་
ཏེ། དེ་མཐོང་བར་གྱུར་པས་ཀྱང་སྐྱེས་བུ་རྣམས་གནས་གང་དང་གང་དུ་འགྲོ་འདོད་པ་དེ་དང་དེར་བྱ་དེ་དག་རྣམས་ཀྱི་སྟོབས་ཀྱིས་ཡུད་ཙམ་ལ་དཔག་ཚད་སྟོང་དུ་ཕྱིན་པར་འགྱུར་རོ། །ཤང་ཤང་ཏེའུ་ཞེས་བྱ་བའི་བྱ་རྣམས་ཀྱིས་ནི་གླིང་ཐམས་ཅད་ཀྱི་སྐྱེས་བུ་རྣམས་ཀྱིས་རྗོད་པར་བྱེད་
པའི་བརྗོད་པ་རྣམས་དང་ཆ་འདྲ་བའི་སྐད་འབྱིན་ནོ། །མིའི་བདེ་བའི་འཁྲིག་པས་རྟག་ཏུ་དགའ་བར་བྱེད་པ་རྣམས་ཡིན་ནོ། །ཁ་དོག་རྣམ་པ་སྣ་ཚོགས་པའི་སྒྲོ་རྣམས་ཀྱིས་ཉེ་བར་མཛེས་པར་གྱུར་ཅིང་རིན་པོ་ཆེ་བདུན་གྱི་རང་བཞིན་རྣམས་ལ་འདི་ལྟ་སྟེ། ཨིནྡྲ་ནཱི་ལ་དང་། མར་ཀ་ཏ་
དང་། རྡོ་རྗེ་དང་། མུ་ས་ར་གལྦ་དང་། ཤེལ་དང་། པད་མ་རཱ་ག་དང་འདྲ་བར་གྱུར་པའི་བྱི་རུ་དང་རྣམས་སོ། །བྱ་དེ་དང་དེ་དག་རྣམས་མཐོང་བར་གྱུར་ནས་རབ་ཏུ་དགའ་བར་མི་འགྱུར་བ་ནི་འགའ་ཡང་མེད་དོ། །དེས་སཾ་ཀཱ་ཤའི་རིའི་གྲིབ་མ་སྔོན་པོའི་ནགས་ལ་སོ་སོར་བརྟགས་
ནས་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་པའི་སཾ་ཀཱ་ཤའི་རི་དེ་ལ་གྲིབ་མ་སྔོན་པོའི་ནགས་རྒལ་བར་གྱུར་ནས་གཞན་ནགས་དག་ཡོད་དམ་ཞེ་
ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སཾ་ཀ་ཤའི་རི་ལ་བྱ་ངེས་པར་གནས་པ་ཞེས་བྱ་བའི་ནགས་གཉིས་པ་ཡོད་དོ། །དེ་ན་གནས་པར་གྱུར་པའི་བྱ་དག་ནི་རྟག་ཏུ་རབ་ཏུ་མགུ་རངས་པ་དང་པད་མའི་རྫིང་བུ་རྣམས་ཀྱང་རྟག་ཏུ་གངས་
བསིལ་མོའི་འཁྱག་པས་ལེགས་པར་བསྡམས་པ་ཡིན་ནོ། །འཛམ་བུའི་གླིང་ན་གནས་པ་གང་ཡིན་པ་ཆོས་ཀྱི་དུས་ན་འཆི་འཕོས་པར་གྱུར་པ་དེ་ལ་ངང་པའི་རྒྱལ་པོར་འགྱུར་ཏེ། དེ་དེ་ལ་རབ་ཏུ་གནས་པར་བྱེད་པ་ཡིན་ནོ། །དེ་བཞིན་དུ་མཚོ་མ་དྲོས་པའི་ངང་པའི་རྒྱལ་པོ་དང་། རྣམ་

པ་སྣ་ཚོགས་པའི་བྱ་གཞན་རྣམས་ཐམས་ཅད་རབ་ཏུ་གནས་པ་ཡིན་ནོ། །འདི་ལྟ་སྟེ། ཀཱ་རཎྜབཿདང་། ཧཱ་རཱི་ཏཱཿདང་། གཡུ་གུ་མ་ན་བཱ་དང་། བཱ་རཱ་བ་ཏཱ་དང་། ལ་ཊུཥ་ཀཱ་དང་། ཨི་ལྭ་ལི་ཀཱ་དང་། རྔ་སྒྲ་བ་དང་། སཾཧྲ་དཱཿདང་། དྲིས་དགའ་བ་དང་། སཾ་མྲཱ་ཛྱཱཿདང་། ལུས་པོ་པ་དང་།
སྒྲས་ཀུན་དུ་དགའ་བ་དང་། དུས་དྲུག་ཏུ་རྒྱུ་བ་དང་། ཟླ་བ་ཤར་བས་དགའ་བ་ཟླ་བ་ཤར་བས་དགའ་ལ་མ་ཤར་བ་ན་ཉི་མ་དང་མཚུངས་པའི་མདོག་གོ། །རྟག་ཏུ་ཕྱི་རོལ་དུ་སྒྲས་ཀུན་ནས་རངས་པ་དང་། ཙཀྲ་བཱ་ཀཱཿདང་། གསེར་དང་མཚུངས་པར་གྱུར་པའི་མདོག་དང་། ཀུ་ར་དང་།
ཀུ་ར་ཎ་གནས་པ་དང་། ཉི་མས་མི་རེག་པ་དང་། ནི་ཙུན་ལུནྡཱཿདང་། གཅིག་པུ་ཉོན་མོངས་པས་དགའ་བ་དང་། བུང་བ་འདུ་བ་རྣམས་ནི་གང་དག་གི་སྒྲ་རྣམས་དཔག་ཚད་དུ་སྙན་པར་ཐོས་པ་རྣམས་ཡིན་ཏེ། ཇི་ལྟར་འཛམ་བུའི་གླིང་གི་བུང་བ་རྣམས་ཀྱིས་བ་ལང་ལ་གེགས་མེད་
པར་ལྗོན་ཤིང་གི་རྩ་བ་ན་གནས་པ་བཞིན་ནོ། །ཀཾ་ཀཱ་དང་། རི་ལ་འཇུག་པར་བྱེད་པ་དང་། ཁོར་ཡུག་རྒྱུ་བ་དང་། སཱ་རཱ་དང་། ཁྱིམ་བྱ་དང་། བ་ར་སྟུ་རཱ་དང་། བ་ར་ཌཱཿདང་། ཟེའུ་འབྲུ་ལུས་ལ་གྱོན་ནས་པད་མའི་ནང་ན་གནས་པ་དང་། ཨུད་པ་ལ་སྔོན་པོ་གྲོལ་བར་གྱུར་པའི་མགྲིན་པ་
དང་། ཀོ་ཡཥྚི་ཀཱཿདང་། བྱེའུ་ནག་མོ་དང་། བྷྲྀངྒའི་སྐེ་དང་། བཉྫུ་ལ་ཀཱཿདང་། ཆུ་ལ་དགའ་དང་། རྟག་ཏུ་དགའ་བའི་སྒྲ་སྒྲོགས་པ་དང་པི་ཝང་དང་འདྲ་བའི་སྒྲ་དང་། སྤྲིན་ལ་དགའ་བ་དང་། དཔུང་འགྱེད་པ་ལ་དགའ་བ་དང་། ཟིལ་པའི་ཐིགས་པ་དང་། འདབ་མའི་མཐའ་ན་
གནས་པ་དང་རྣམས་ཏེ། དེ་དག་དང་གཞན་དག་རྣམས་ཀྱང་རྣམ་པ་སྣ་ཚོགས་པ་རྣམས་ཏེ་མཐོང་ན་ཡིད་ཀྱི་རྗེས་སུ་འཐུན་པའི་སྒྲ་འདོན་པར་བྱེད་པ། དགའ་བར་གྱུར་པའི་བྱ་ཁྲོ་བ་དང་རྣམ་པར་བྲལ་བ་རྣམས་བྱ་ངེས་པར་གནས་པའི་ནགས་ལ་བྱང་ཕྱོགས་སྒྲ་མི་སྙན་པའི་སྐྱེས་བུ་
རྣམས་དང་རྟག་པར་ལྷན་ཅིག་ཏུ་རབ་ཏུ་དགའ་བར་གྱུར་པས་རྩེ་དགའ་བར་བྱེད་དོ། །བྱ་ངེས་པར་གནས་པའི་ནགས་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ཕྱི་རོལ་གྱི་ལུས་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་

ལ་རྗེས་སུ་ལྟ་ཞིང་གནས་ཏེ། སཾ་ཀཱ་ཤའི་རི་བོ་ལ་ནགས་གཞན་གསུམ་པ་གང་ཡོད་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གསུམ་པ་ནི་ཟབ་མོ་ཞེས་བྱ་བའི་ནགས་ཡོད་དེ། ལྗོན་ཤིང་ཕན་ཚུན་གྱི་ཉེ་འཁོར་རྣམས་ན་
ལྗོན་ཤིང་མཐུག་པོའི་གྲིབ་མ་རྣམས་ཀྱིས་མངོན་པར་ཁྱབ་པར་གྱུར་པ་ཡིན་ནོ། །དེ་ལ་ཡང་དྲོ་བ་དང་བསིལ་བའི་གྲིབ་མ་རྣམས་ཡིན་པས་བྱང་ཕྱོགས་སྒྲ་མི་སྙན་པའི་སྐྱེས་བུ་སྐྱེད་མོས་ཚལ་དུ་དགའ་བ་རྣམས་ཉིད་ཤིང་གི་གསེབ་ན་རྩེ་དགའ་བར་བྱེད་དོ། །དེ་ལ་ཤིང་གི་ཚོགས་འདི་དག་
རྣམས་ཡོད་པ་ཡིན་ཏེ། འདི་ལྟ་སྟེ། ཏི་ལ་ཀཱ་དང་། ཀླུའི་མེ་ཏོག་དང་། ཨེ་དྷཤལྤལ་དང་། ཀོ་བི་དཱ་རཱ་དང་། སཱལླཱལ་དང་། འདོད་པར་དགའ་བ་རྣམས་དང་། བྱ་ངལ་སོ་བ་དང་། སཱ་ལཱཿདང་། ཏཱ་ལཱ་དང་། ཤཱ་མཱ་དང་། ནི་ངྐའི་རྣམ་པ་དང་། ཨ་མྲ་དང་། ཀ་ར་བཱིར་ཀཱཿདང་། ཤི་ལིནྡྷཱཿདང་།
བ་ཀུ་ལཱཿདང་། དྲིས་རངས་པ་དང་། མ་དྷོ་མ་དྡྷཱ་མཱ་དང་། ཧིནྟཱ་ལཿདང་། ཏ་མཱ་ལཱཿདང་། ཀོ་ལ་ཀཱཿདང་། སིནྡྷུ་ཙཱ་རཱ་དང་། ན་ཀུ་མཱ་ལཱཿདང་། མཚུངས་པ་དང་། ཟླ་བ་འཁོར་བ་དང་། གཟའ་རྒྱུ་བ་དང་། རྟག་ཏུ་མེ་ཏོག་རྒྱས་པ་དང་། ནི་ཙུ་ལུནྡྷཿདང་། མུ་ཀུ་ལུནྡྷཿདང་། ཨ་ཤྭངྒྲདང་། ཀིཾ་ཤུ་
ཀཱཿདང་། སྔོ་བསངས་ཀྱི་སེམས་དང་། ཀ་པིཏྠཱཿདང་། པི་ཝཱ་དང་། ནཱ་ཌིཀེ་རཱཿདང་། པ་ན་སཱཿདང་། མོ་ཙཱ་དང་། སྲིད་སྒྲུབ་དང་། ཀ་དཾ་བཱཿདང་། སྔོན་པོ་དང་། ལྷ་ཤིང་དང་། རུ་ཛཱ་ཡཱ་ནའི་འདབ་མ་དང་། ཆུ་སྐྱེས་དང་། མནྡཱ་རཱཿདང་། པདྨ་ཀུ་ཤེ་ཤ་ཡཱཿདང་། ནི་ལྭ་ལཱ་དང་། གངས་
ཀྱི་མདོག་དང་། དངུལ་གྱི་མདོག་དང་། བཻ་ཌཱུརྱའི་འདབ་མ་དང་། རྩེ་མོ་ངལ་བསོ་དང་། ཡུལ་དུ་འཕོ་བ་དང་། སྙོམས་པར་གནས་པ་ཀླུང་དུ་སྐྱེས་པ་དང་། ཀཱ་ཤཱ་བ་ཀཱ་ཤི་རཱཿདང་། ཕན་ཚུན་དུ་མཐུག་པ་དང་། སྣུམ་པ་དང་། ཕྲག་པར་སྐྱེས་པ་དང་། ཨ་བྲ་ཎའི་མེ་ཏོག་དང་། ཨུཏྐུལི་
ནཿདང་། སཾ་ཤཱཊ་ཀཱ་དང་། བྱི་རུའི་ཤིང་དང་གུར་ཀུམ་གྱི་སྙིང་པོ་དང་། ཉེ་བར་བསླད་པ་དང་། རྗེས་སུ་བཙུགས་པའི་སྐྱེས་པ་དང་། དུ་བའི་མདོག་དང་། མར་མེའི་འོད་དང་། རླུང་གིས་ཤིན་ཏུ་བསྒུལ་བ་དང་། ཆུ་ཤིང་དང་། ཀཽ་ཀི་ལཱཿམྱོས་པ་དང་། མེ་ཏོག་གི་རྡུལ་མ་གྱོན་པ་དང་། མིག་དང་བཅས་

པ་བཙུམས་པ་དང་། ཆ་ཤས་སུ་ཕྱེ་བའི་ཆ་དང་། འབྲས་ཆན་དང་འདྲ་བ་དང་། ཨུད་དྲུ་མ་འཁྲུལ་བ་དང་། བུང་བ་འཁོར་བ་དང་། རྩེ་མོ་འགུལ་བ་དང་། རླུང་གིས་ངལ་བ་དང་། མྱ་ངན་མེད་པ་དང་། མིག་དགའ་བ་དང་དེ་དག་རྣམས་ཡིན་ནོ། །དེ་དག་ནི་ཇི་ལྟར་ཤིང་གི་རིགས་ཀྱི་གཙོ་བོར་གྱུར་པ་དྲུག་ཅུ་ཡིན་
ཏེ། གང་མ་བགྲངས་པའི་ཤིང་གི་རིགས་སུ་གྱུར་པ་བར་མ་དང་ཐ་མ་རྣམས་ནི་མ་གཏོགས་པ་ཡིན་ནོ། །དེ་ཁོ་ན་བཞིན་དུ་ཟབ་མོ་ན་རབ་ཏུ་ཕལ་ཆེ་བར་གྱུར་པའི་འབབ་ཆུ་དང་། མེ་ཏོག་དང་། འབྲས་བུ་དང་བཅས་པས་དགའ་བ་ཡིན་ཏེ། བྱང་ཕྱོགས་སྒྲ་མི་སྙན་པའི་མི་རྣམས་འཇིགས་པ་དང་ནད་དང་
གཞན་གྱི་དབང་དུ་གྱུར་པ་རྣམས་རྣམ་པར་བྲལ་བ་དང་། རིམས་ནད་མེད་པ་དང་། ཕན་ཚུན་དུ་ཕྲག་དོག་དང་འཐབ་རྩོད་ཀྱི་འཇིགས་པ་རྣམས་མེད་པར་གྱུར་ནས་རྩེ་དགའ་བར་བྱེད་དོ། །དེ་ལྟར་སཾ་ཀཱ་ཤའི་རི་ཟབ་མོའི་ནགས་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་
རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་གྱི་གླིང་གི་རི་དང་པོ་སཾ་ཀཱ་ཤའི་ནགས་བཞི་པ་ལ་གཞན་བསིལ་བའི་ཆུ་ཅི་ཡོད། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བསིལ་
བའི་ཆུའི་ཆུ་ཀླུང་ཆུ་རྣམས་ནི་རབ་ཏུ་ཕལ་ཆེ་བ་ཡོད་ལ། ཇི་སྐད་དུ་བརྗོད་པའི་ལྗོན་ཤིང་དང་། མེ་ཏོག་དང་འབྲས་བུ་རྣམས་ཀྱང་ཕུན་སུམ་ཚོགས་པ་ཡིན་ནོ། །ཆུ་ཀླུང་ཡོད་པ་རྣམས་ནི་འདི་ལྟ་སྟེ། བསིལ་བའི་ཆུ་ནི་རྒྱར་དཔག་ཚད་དུ་གྱུར་པའོ། །ཆུ་ཀླུང་ཟབ་མོའི་ཆུ་དང་། རབ་ཏུ་དང་བའི་ཆུ་དང་།
གཙང་བའི་ཆུ་དང་། འོ་མའི་ཆུ་དང་། རྒུན་འབྲུའི་ཆུ་དང་། ཟླ་བ་རྒྱུ་བ་དང་། འོ་ཐུག་གི་འདམ་དང་། གྲམ་སག་གི་ཆུ་དང་། ངང་ངུར་གྱིས་གང་བ་དང་། ངང་པ་ཀུན་དུ་སྒྲ་འབྱིན་པ་དང་། དབྱངས་སྙན་པ་དང་། མེ་ཏོག་རྒྱུ་བ་དང་། སེམས་འགྲོ་བ་དང་། འུ་རུ་རུའི་སྒྲས་འབབ་པ་དང་། རླབས་འབྱུང་
བ་དང་། བདེ་བའི་ཆུ་དང་། ཀ་དམྦ་འཁོད་པ་ཉིད་དང་། ནོར་བུའི་མཆུ་ཅན་རྣམས་ཀྱིས་འཛིན་པ་དང་། ཆུ་སྲིན་ཀཱུརྨ་མང་བ་ཉིད་དང་། ཉ་རོ་ཧི་འཁོར་བ་དང་རུས་སྦལ་གྱིས་གང་བ་དང་། ཆུ་སྲིན་ན་ཀྲས་བསྐོར་བ་དང་། ཡིད་བདེ་བར་འབབ་པ་དང་། དབུ་བའི་ཕྲེང་བ་དང་། རབ་ཏུ་དགའ་བར་གྱུར་

པའི་ཆུ་དང་རླུང་མཚུངས་པ་དང་། ཆར་དང་ཆར་གྱི་རྗེས་སུ་འབྱུང་བའི་ཆུ་ཀླུང་དང་། དབྱངས་ཅན་གྱི་མདོག་ཏུ་འབབ་པ་དང་། དུས་སུ་འབབ་པ་དང་། རིང་པ་དང་། རྩེ་མོའི་དང་། གསེར་གྱི་ཆུ་དང་། དངུལ་གྱི་མདོག་དང་། མུ་ཏིག་གི་བྱེ་མ་དང་ལྡན་པ་དང་། རི་བོ་ལ་རྒྱུ་བ་དང་།
སྤྲིན་འཁོར་བ་དང་། མུ་ས་ར་གལྦ་རྒྱན་དུ་བྱས་པ་དང་། བི་དྲུ་མའི་ཤིང་དང་ལྡན་པ་དང་། དཔྱིད་དགའ་བ་དང་། དབྱར་སྤྲིན་རབ་ཏུ་དང་བའི་ཆུ་འབབ་པ་དང་། རྩེ་མོ་ལ་འཇུག་པར་དགའ་བ་དང་། གངས་ཡོད་པ་དང་། ཉི་མ་ཤར་བར་གྱུར་པས་མི་རེག་པ་དང་། མྱུར་བའི་ཆུ་དང་། རླབས་རབ་ཏུ་འཇུག་པ་དང་།
ཨ་ཌུ་བཱ་དང་། ཙུ་ལུནྡ་འབབ་པ་དང་། དྲིའི་ཆུ་དང་། ཀེ་ཏ་ཀའི་དྲིས་བསྒོས་པ་དང་། དབྱར་དགའ་བ་དང་། དྷུ་ན་དྷུ་མཱ་རཱ་དང་། ཉེ་འཁོར་ན་ཁྱབ་པ་དང་། དཔག་ཏུ་མེད་པ་འབབ་པ་དང་། རྒྱབ་ནས་ཀླུང་ཀུན་དུ་གང་བར་རབ་ཏུ་འབབ་པ་དང་། དམའ་བའི་ཆུ་དང་། དགའ་བས་འཇུག་པ་དང་། སྔོན་གྱི་
དུ་བའི་སྟོབས་དང་། སྤྲིན་གྱི་འགྲོས་དང་། དྲི་ཟའི་དབྱངས་ཅན་དང་། རྔའི་སྒྲའི་དབྱངས་ཅན་དང་། སྐད་ཀྱི་དབྱངས་ཅན་དང་། ཀླུའི་བུ་མོ་མངོན་པར་དགའ་བ་དང་། གསང་བ་རྩེ་དགའ་བ་དང་། རིག་པ་འཛིན་པ་རྩེ་དགའ་བས་གནས་པ་དང་རྣམས་ཡིན་ནོ། །དེ་དག་ནི་རི་སཾ་ཀཱ་ཤའི་ནགས་བཞི་པ་
སྤྲིན་དཀར་པོ་ལ་ཇི་ལྟར་འབབ་ཆུའི་གཙོ་བོར་གྱུར་པ་བདུན་ཅུ་ཡིན་པར་རབ་ཏུ་བརྗོད་པ་ཡིན་ནོ། །བར་མ་ཐ་མའི་ཆུ་ཀླུང་རྣམས་ནི་མ་གཏོགས་པ་ཡིན་ནོ། །གཞལ་དུ་མེད་པ་དགའ་བར་གྱུར་པའི་ཤིང་དང་། མེ་ཏོག་དང་། བྱ་རྣམས་ཀྱི་ཡོན་ཏན་གྱིས་བླ་ན་མེད་པར་གྱུར་པའི་བསིལ་བའི་ཆུའི་
ནགས་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ཕྱི་རོལ་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སཾ་ཀཱ་ཤའི་
རི་ལ་བི་ཤྲཱ་མཾ་ཞེས་བྱ་བའི་ནགས་ལྔ་པ་ཡོད་པ་ཡིན་ཏེ། གང་ལ་ཀླུ་མི་བཟད་པ་འདི་དག་རྩེ་དགའ་བར་བྱེད་པའོ། །འདི་ལྟ་སྟེ། ཁྲོ་བ་བྲལ་བ་དང་། བཱ་སུ་ཀི་དང་། སྟཥྐ་ཀོ་དང་། མཆེ་བའི་དུག་དང་། གློག་གི་ཕྲེང་བ་དང་། སྤྲིན་གྱི་ཉེ་འཁོར་ཆོས་ལ་དབང་བ་དང་། རྣམ་པ་དེ་ལྟ་བུའི་ཀླུ་

སྟོང་ཕྲག་བདུན་རྩེ་དགའ་བར་བྱེད་དོ། །བྱང་ཕྱོགས་སྒྲ་མི་སྙན་གྱི་ཉེ་འཁོར་རྣམས་སུ་ཆོས་ཀྱི་ཆར་པ་འབེབས་པར་བྱེད་དོ། །ཇི་ལྟར་ས་གཞི་དང་ནམ་མཁའི་ཉེ་འཁོར་རྣམས་ཀྱང་ཤིན་ཏུ་བྱང་ཕྱོགས་སྒྲ་མི་སྙན་པའི་འཇིག་རྟེན་པ་རྣམས་དང་འདྲ་བ་ཡིན་ནོ། །གཞན་ཡང་རྣལ་འབྱོར་སྤྱོད་
པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ཅི་སཾ་ཀ་ཤཱའི་རིའི་ནགས་རྣམས་ནི་ཇི་སྐད་དུ་སྔར་བསྟན་པ་བཞིན་དུ་གྱུར་པ་ཡིན་ལ་ལྗོན་ཤིང་རེ་རེ་ལོ་མར་གྱུར་པ་རྣམས་དང་། མེ་ཏོག་ཏུ་གྱུར་པ་རྣམས་དང་། འབྲས་བུར་གྱུར་པ་རྣམས་དང་། ཆུ་ཀླུང་དུ་གྱུར་པ་རྣམས་དང་། རྡོའི་གསེབ་ཏུ་
གྱུར་པ་རྣམས་དང་། ས་ཕྱོགས་ཀྱི་ཆར་གྱུར་པ་རྣམས་དང་། རྩྭའི་གསེབ་ཏུ་གྱུར་པ་རྣམས་དང་། རིའི་ཁྲད་ཁྲོད་དང་ཁོང་གསེང་དུ་གྱུར་པ་རྣམས་དང་། འབབ་ཆུར་གྱུར་པ་ལ་ཡང་རུང་སྟེ། ཁབ་ཀྱིས་ཕུག་པའི་བར་ཙམ་གང་དག་ལ་ཡང་སེམས་ཅན་ཐམས་ཅད་ལན་བརྒྱ་དང་། གལ་ཏེ་ན་
ལན་བརྒྱ་སྟོང་དུ་ཡང་མ་སྐྱེས་པ་དང་། མ་ཤི་བ་དང་། འཆི་མ་འཕོས་པ་དང་། མ་སྐྱེས་པར་མ་གྱུར་པའམ། ཡིད་དུ་འོང་བ་རྣམས་ཐམས་ཅད་དང་ཐ་དད་དུ་མ་གྱུར་པ་དང་། རྣམ་པར་གྱེས་པར་མ་གྱུར་པ་དང་། རྣམ་པར་བྲལ་བར་མ་གྱུར་པ་དང་། གཞན་དུ་མ་གྱུར་པའམ། དགྲར་གྱུར་པའི་ལུས་འདི་
ལན་བརྒྱ་དང་། དེ་ནས་ལན་སྟོང་དུ་དང་། ལན་བརྒྱ་སྟོང་དུ་ཡང་སྐྱེས་པར་མ་གྱུར་པ་ནི་མེད་དོ། །གང་ལ་སེམས་ཅན་རྣམས་ཐམས་ཅད་ཀྱང་ཤི་བ་དང་སྐྱེས་པར་མ་གྱུར་པ་དེ་ནི་ཁབ་ཀྱི་བུག་པ་ཙམ་ཡང་གོ་སྐབས་མ་མཐོང་ངོ་། །དེས་སཾ་ཀཱ་ཤའི་རི་ལ་སོ་སོར་བརྟགས་པར་གྱུར་
པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་ན་དགའ་བར་གྱུར་པའི་རིའི་རིགས་གཞན་ཡོད་དམ་ཞེ་ན། གཞན་ཡང་རྣལ་འབྱོར་སྤྱོད་པ་
པས་ཐོས་པ་ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ་མཆོག་ཏུ་དགའ་བར་གྱུར་པའི་ལྷ་རྣམས་ཀྱི་དགའ་བའི་ཚལ་དང་འདྲ་བར་རྭ་མཉམ་པ་ཞེས་བྱ་བའི་རི་གཞན་ཡོད་དོ། །དེའི་ལྗོན་ཤིང་དང་། འབྲས་བུ་དང་། ཆུ་ཀླུང་དང་། རིའི་ཕུག་

རྣམས་ཀྱི་དགའ་བ་ནི་རྒྱས་པར་སྔར་སཾ་ཀཱ་ཤ་ལ་ཇི་སྐད་བཤད་པ་བཞིན་ནོ། །དགའ་བར་གྱུར་པའི་དུས་ཀྱི་ཁྱད་པར་རྣམས་སོ་སོར་བྱེ་བྲག་ཏུ་བྱ་སྟེ། རྭ་མཉམ་པར་གྱུར་པའི་རི་གང་ལ་རྭ་བརྒྱ་ཕྲག་གསུམ་ནི་གསེར་གྱི་ཡིན་ཏེ། མཚུངས་པ་མེད་པ་ཡིན་ནོ། །འོད་ཟེར་རྣམས་
ཉི་མ་གཉིས་པ་བཞིན་དུ་གསལ་ལོ། །རྭ་བརྒྱ་ཕྲག་ལྔ་ནི་དངུལ་གྱི་རང་བཞིན་ཡིན་ཏེ། གང་ལ་དངུལ་གྱི་རང་བཞིན་དུ་གྱུར་པ་ནི་གང་སྔར་བཤད་པ་རྣམས་བཞིན་ནོ། །ཡོན་ཏན་རྣམས་ཐམས་ཅད་ལ་ཡང་ཁྱབ་པར་ཡོད་དེ། རྭ་མཉམ་པའི་རི་དེའི་ཉེ་འཁོར་རྣམས་ན་ཡང་བྱང་ཕྱོགས་སྒྲ་མི་
སྙན་པའི་སྐྱེས་བུ་རྣམས་ཟླ་བ་རྒྱས་པའི་འོད་དང་འདྲ་བ་ཡིན་ནོ། །དེ་དག་རྣམས་ནི་འཇིགས་པ་དང་བྲལ་བ་ཞེས་བྱ་བའི་མིང་དང་ལྡན་པ་ཡིན་ནོ། །འཇིགས་པ་དང་བྲལ་བའི་སྐྱེས་བུ་རྣམས་རྭ་མཉམ་པའི་རི་ལ་ནི་ཇི་ལྟར་རྒྱལ་ཆེན་རིས་བཞིའི་ལྷ་རྣམས་དགའ་བའི་ཚལ་ན་དབྱར་ཟླ་བ་བཞིར་
ལྷ་རྫས་ཀྱི་འདོད་པའི་ཡོན་ཏན་ལྔས་ཡོངས་སུ་ཚིམ་པ་ཡང་དག་པར་ལྡན་པར་གྱུར་པ་ལ་རྩེ་དགའ་བར་བྱེད་པ་དེ་བཞིན་དུ་མངོན་པར་རྩེ་དགའ་བར་བྱེད་དོ། །དེ་ལྟ་ན་ཡང་འཇིགས་པ་དང་བྲལ་བའི་སྐྱེས་བུ་རྣམས་དང་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་སོ་སོའི་ཁྱད་པར་གང་དག་ཡིན་ཞེ་ན། ལྷ་རྣམས་ནི་
ཤ་དང་། རུས་པ་དང་། ཆུ་སེར་དང་བྲལ་བ་ཡིན་ལ། འཇིགས་པ་དང་མ་བྲལ་བའི་སྐྱེས་བུ་རྣམས་ནི་ཤ་དང་། རུས་པ་དང་། ཆུ་སེར་དང་མ་བྲལ་བར་ཡོད་པ་ཡིན་ནོ། །ལྷ་རྣམས་དང་འཇིགས་པ་བྲལ་བའི་སྐྱེས་བུ་རྣམས་ཀྱི་ཁྱད་པར་ནི་དེ་ལྟར་ཡིན་ནོ། །སྐྱེས་བུ་འཇིགས་པ་དང་བྲལ་བ་
རྣམས་ནི་བདག་འཛིན་མེད་པ་དང་། ང་རྒྱལ་མེད་པ་དང་། ངེས་པར་གོང་དུ་འགྲོ་བར་འགྱུར་བ་ཡིན་ནོ། །ལྷ་རྣམས་ནི་དེ་ལྟར་ཡང་མ་ཡིན་ནོ། །ཡང་འཇིགས་པ་དང་བྲལ་བའི་སྐྱེས་བུ་རྣམས་དང་རྒྱལ་ཆེན་རིས་བཞིའི་ལྷ་རྣམས་ཀྱི་སོ་སོའི་ཁྱད་པར་གང་དག་ཡིན་ན། རྭ་མཉམ་པའི་རིའི་
ཉེ་འཁོར་རྣམས་ན་དཔག་བསམ་གྱི་ཤིང་ཉི་མ་གཉིས་པ་ལྟར་རབ་ཏུ་གསལ་བར་བྱེད་དོ། །གང་དང་གང་དག་འཇིགས་པ་དང་བྲལ་བའི་སྐྱེས་བུ་རྣམས་ཀྱིས་སེམས་ཀྱིས་བསམས་པར་གྱུར་པ་དེ་དག་རྣམས་ལྗོན་ཤིང་དེ་རྣམས་ལས་འབྱུང་བར་འགྱུར་རོ། །ཐག་པས་བཏགས་པའམ། ནོར་བུའི་རིགས་

རྣམས་སམ། རྒྱན་གྱི་རིགས་རྣམས་དང་། ཟས་དང་སྐོམ་གྱི་ཆུ་བོ་ཡང་བརྒྱ་ཕྲག་དང་། དེ་ནས་སྟོང་ཕྲག་ཀྱང་འབབ་བོ། །ཇི་སྐད་དུ་བཤད་པར་གྱུར་པའི་བྱ་རྒྱགས་པ་རྣམས་ཀྱང་རྩེ་དགའ་བར་བྱེད་དོ། །གསེར་གྱི་ལོ་མ་རྣམས་ཀྱིས་བརྒྱན་པར་གྱུར་པ་དང་། བཻཌཱུརྱ་སྔོན་པོ་རྣམས་ཀྱི་པད་
མའི་རྫིང་བུ་མང་པོ་བརྒྱ་ཕྲག་དང་། ཅི་སྟེ་ན་སྟོང་ཕྲག་རྣམས་ལ་ངང་པ་དང་ཀ་རཎྜ་བ་རྣམས་ཀྱིས་གང་བ། ཙཀྲ་བ་ཀ་རྗེས་སུ་རྒྱུ་བ་དང་། རི་དགས་ཀྱི་ཚོགས་རྣམས་རྗེས་སུ་བརྟེན་པར་གྱུར་པ་ནི་གསེར་གྱི་རི་དགས་རྣམས་བྱི་རུའི་རང་བཞིན་གྱི་རྭ་དང་། མུ་ས་རའི་མིག་དང་། རཱ་ཛ་པཊྚའི་རྨིག་པ་
སྟེ། རི་དགས་ཀྱི་རིགས་གཞན་རྣམས་ཀྱིས་ཀྱང་རྗེས་སུ་རྒྱུ་བར་བྱེད་པ་ཡིན་ནོ། །རི་དེའི་ཉེ་འཁོར་རྣམས་ན་མུ་ཏིག་གི་དྲ་བས་སྦྲེལ་བར་གྱུར་པའི་འཁྲི་ཤིང་གི་ཚོགས་ཕན་ཚུན་དུ་འཁྲིལ་བས་གཡོགས་པ་དང་། རྭ་མཉམ་པའི་རི་དེ་ལ་ཀོ་ཀི་ལ་དང་། རྨ་བྱ་དང་། ངང་པ་དང་རྣམས་སྒྲ་
འབྱིན་པར་བྱེད་པ་དང་། རི་འདི་ལ་འབབ་ཆུ་སྟོང་ཕྲག་བརྒྱས་ཀྱང་ཀུན་ཏུ་གང་བ་དང་། འདི་ལ་ཆུ་ཀླུང་དུ་མ་རྣམས་དང་ཤིང་ཀླུང་དུ་སྐྱེས་པ་རྣམས་ཀྱིས་གང་བར་གྱུར་པ་ཡིན་ཏེ། ཉེ་འཁོར་རྣམས་ན་ཡོན་ཏན་མཐའ་ཡས་པ་དང་ལྡན་པ་ཡིན་ནོ། །དེས་བྱང་ཕྱོགས་སྒྲ་མི་སྙན་པའི་རི་བོ་གཉིས་
པ་རྭ་མཉམ་པ་ལ་ཀུན་ཏུ་བལྟས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རྟོགས་སོ། །ཆུ་ཀླུང་གང་དང་གང་དག་འབབ་པར་གྱུར་པ་དེ་དག་རྣམས་ནི་མཚུངས་པར་ཡོན་ཏན་བརྒྱད་དང་ལྡན་པའི་ཆུ་ཡིན་ནོ། །འདི་ལྟ་སྟེ། རོ་ཕུན་སུམ་ཚོགས་པ་དང་། རབ་ཏུ་དང་བ་དང་།
དྲི་ཞིམ་པ་དང་། སྐོམ་པ་སེལ་བར་བྱེད་པ་དང་། བསིལ་བར་གྱུར་པ་དང་། འཐུངས་པར་གྱུར་པ་ན་ལུས་ན་བར་མི་བྱེད་པ་དང་། ཆུ་བལ་གྱིས་མི་གཙང་བར་མ་བྱས་པ་དང་། ཆུ་སྲིན་མ་ཀ་རས་མ་རེག་པ་དང་། དེ་འཐུངས་པས་ལུས་ཚིམ་པར་བྱེད་པ་དང་རྣམས་སོ། །ནད་ཀྱང་སྐྱེད་པར་
མི་བྱེད་དོ། །མཚོ་རྣམས་ཀྱང་རྣམ་པ་དུ་མ་ཡོད་དོ། །འདི་ལྟ་སྟེ། རྒྱ་མཚོ་ཆེན་པོའི་ས་ནུ་དང་། བྱེ་མས་མ་བཅོམ་པ་དང་། ཤིང་ལྔ་པ་དང་། ཀཱ་རཎྜ་བའི་ཀླུང་དང་། ངང་པའི་ཆུ་དང་། ཀ་དམྦའི་བྱ་རྣམས་ཀྱིས་བཅོམ་པ་དང་། བྱ་བརྒྱ་ཕྲག་གིས་ཀུན་ཏུ་གང་བ་དང་། ཆེན་པོ་རབ་

ཏུ་འབབ་པ་དང་། པད་མས་བཀབ་པར་གྱུར་པ་དང་། འོད་མ་སྐྱེས་པ་དང་། ཤིང་གིས་གཡོགས་པ་དང་། ཟབ་མོ་དང་ཟླ་བ་དགའ་བ་དང་། རྟག་ཏུ་ཟླ་བ་དང་འདྲེས་པའི་ཆུ་དང་། རླབས་འཁོར་བར་གྱུར་པ་དང་། འོད་མས་ཁྱབ་པར་གྱུར་པ་དང་། རིག་པ་འཛིན་པ་དགའ་
བ་དང་། ཤེལ་འཁོར་བར་བྱེད་པ་དང་། རླབས་གཡོ་བ་དང་། ཆུ་བརྟན་པ་དང་། ཉ་འཁོར་བ་དང་། ཉ་དང་ཀུན་ཏུ་འབྲེལ་པ་དང་། རྩེ་མོའི་གསེབ་དང་། ཁྲུས་ཀྱི་རྫིང་བུའི་ཕྲེང་བ་དང་། རླབས་རབ་ཏུ་འཇུག་པ་དང་། གཙང་བའི་ཆུ་དང་། ཟླ་བའི་ལུས་དང་། དཀྱིལ་འཁོར་དང་། དྲི་
མ་མེད་པ་དང་། འོད་མའི་ཆུ་དང་། རྫིང་བུའི་ཕྲེང་བ་དང་། རྔུལ་བ་ངལ་སོ་བ་དང་། ཟླ་བ་དགའ་བ་དང་། ཤེལ་འཇུག་པ་དང་། རླབས་གཡོ་བ་དང་། ཆུ་བརྟན་པ་དང་། རྟག་པའི་ཆུ་དང་། ལྷ་དགའ་བ་དང་། དགའ་བའི་ཆུ་དང་། རོ་བཟང་པོ་དང་། ཇི་ལྟར་འདོད་པའི་རོ་དང་།
ལོངས་སྤྱོད་དུ་གྱུར་པ་དང་། ཀཽ་ཊུབྷཿདང་། བདུད་རྩི་འབབ་པ་དང་། མཚོའི་མཆོག་དང་། ཀླུའི་བེ་རུཿདང་། མཛེས་པ་དང་། ཨརྫུ་ནཿདང་ཞེས་བྱ་བ་སྟེ། དེ་དག་རྣམས་ནི་མཚོ་བཞི་བཅུ་རྩ་བདུན་ཡིན་ནོ། །རིའི་མཆོག་ཏུ་གྱུར་པ་རྭ་མཉམ་པ་འདི་དག་ཐམས་ཅད་ཀྱང་ཡོན་ཏན་
བརྒྱད་པའི་ཆུ་སྔར་ཇི་སྐད་བཤད་པ་བཞིན་ནོ། །རྭ་མཉམ་པའི་རི་ཡང་མཐོ་བར་གྱུར་པ་ནི་ནམ་མཁའ་འབིགས་པ་བཞིན་དུ་གནས་པ་ཡིན་ནོ། །ནགས་རྣམས་ཀྱང་ཡོན་ཏན་དེ་དག་རྣམས་ཐམས་ཅད་དང་ལྡན་པར་གྱུར་པ་ཡིན་ཏེ། འདི་ལྟར་རྔུལ་བས་རེག་པའི་ནགས་དང་ཟླ་བའི་མདོག་
དང་དངུལ་གྱི་ལྗོན་ཤིང་ནི་དངུལ་གྱི་རང་བཞིན་གྱི་ལྗོན་ཤིང་རྣམས་ཀྱིས་བསྐོར་བ་དཔག་ཚད་བརྒྱ་ཡིན་ནོ། །ནོར་བུའི་འོད་ཀྱི་མདོག་དང་། ནགས་དེའི་ཉེ་འཁོར་ན་མཐོ་བར་གྱུར་པ་རྣམས་ནི་ནགས་དེ་ལ་ཡང་པད་མའི་རྫིང་བུ་འདི་དག་རྣམས་ཡིན་ནོ། །འདི་ལྟ་སྟེ། ཆུ་བལ་དང་། རྣམ་པར་
བྲལ་བ་དང་། བུང་བས་ཁྱབ་པ་དང་། དུང་གི་མདོག་དང་། རྟག་པའི་ཆུ་དང་། རྣམ་པར་མཐོང་བས་དགའ་བ་དང་། ཀཱ་དམྦའི་ཆུ་དང་། ངང་པའི་གཤོག་པས་བཅོམ་པ་དང་། རབ་ཏུ་རྩེ་བར་བྱེད་པ་དང་། སྐྱེ་བོ་རྣམས་མངོན་པར་དགའ་བ་དང་། མགོ་བོ་མཐོང་བ་དང་། བག་མེད་པ་

རྣམས་རྩེ་བ་དང་། རྟག་ཏུ་མངོན་པར་དགའ་བ་དང་། རྟག་ཏུ་པད་མ་རབ་ཏུ་དགའ་བ་དང་། ཆུ་ལ་སྤྱོད་པའི་ས་གཞི་དང་དེ་དག་རྣམས་ནི་ཇི་ལྟར་པད་མའི་རྫིང་བུའི་གཙོ་བོར་གྱུར་པ་བཅུ་དྲུག་ཡིན་ཏེ། གང་དག་གི་མིང་རྣམས་ཀྱང་ཤེས་པར་མི་འགྱུར་བའི་བར་མ་དང་ཐ་མར་གྱུར་པ་བརྒྱ་
ཕྲག་རྣམས་དང་དེ་ནས་སྟོང་ཕྲག་རྣམས་ནི་མ་གཏོགས་སོ། །ཐམས་ཅད་ཀྱང་འདམ་བག་མེད་པ་དང་། ཆུ་བལ་གྱིས་ཉེ་བར་མ་བཅོམ་པ་དང་། ངང་པ་དང་། ཀཱ་རཎྜ་བ་དང་། ངང་ངུར་རྣམས་སྒྲ་འདོན་པར་བྱེད་པ་ཡིན་ནོ། །རྟག་ཏུ་དགའ་སྟོན་གྱི་ཉི་མར་གྱུར་པ་བྱང་ཕྱོགས་སྒྲ་
མི་སྙན་པའི་སྐྱེས་བུ་རྣམས་བྱ་རྟག་ཏུ་མྱོས་པ་དང་། ཤང་ཤང་ཏེའུ་དང་། བྱ་བྷྲིང་ག་ར་ཛ་དང་། རྨ་བྱ་རྣམས་ནགས་དང་ཉེ་བའི་ནགས་རྣམས་ན་སྒྲ་འདོན་པར་བྱེད་པ་ནི་རྭ་མཉམ་པའི་རི་ཡིན་ནོ། །རྭ་མཉམ་པའི་རི་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ཕྱི་རོལ་
གྱི་ལུས་སོ་སོར་རིག་པར་བྱེད་དོ། །གཞན་ཡང་འཕགས་པའི་བདེན་པ་བཞི་ལ་ལྷག་པར་མོས་པར་གྱུར་པའི་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རྭ་མཉམ་པའི་རི་ལ་རྟག་པའམ། བརྟན་པའམ། བདེ་བའམ། བདག་དང་བཅས་པའམ། སྟོང་
པ་མ་ཡིན་པའི་གནས་དག་ཡོད་དམ་ཞེ་ན་སྔར་བཞིན་ནོ། །གང་ལ་ཡང་འཁོར་བར་རྟོགས་པར་གྱུར་པའི་སེམས་ཅན་རྣམས་ཐམས་ཅད་ཀྱང་མ་སྐྱེས་པ་དང་། མ་ཤི་བ་དང་། རྒས་པར་མ་གྱུར་པའམ། འཐུན་པ་དང་ཡིད་དུ་འོང་བ་རྣམས་ཐམས་ཅད་ཀྱང་ཐ་དད་དུ་གྱུར་པ་དང་། རྣམ་
པར་གྱེས་པ་དང་། རྣམ་པར་བྲལ་བ་དང་། སླུ་བ་དང་། ཀུན་ཏུ་ལྡན་པར་མ་གྱུར་པ་རྣམས་ནི་རྣལ་འབྱོར་སྤྱོད་པ་དེས་རྭ་མཉམ་པའི་རི་དེ་ལ་གནས་གཅིག་ཀྱང་མ་མཐོང་ངོ་། །གང་དག་རྟག་པའམ། བརྟན་པའམ། བདེ་བའམ། བདག་དང་བཅས་པར་གྱུར་པའམ། སྟོང་པ་མ་
ཡིན་པ་དང་། གང་ལ་སེམས་ཅན་རྣམས་ཐམས་ཅད་ཀྱང་མ་སྐྱེས་པ་དང་། མ་རྒས་པ་དང་། མ་ཤི་བ་ཡང་མེད་དེ། འཐུན་པར་ཡིད་དུ་འོང་བར་གྱུར་པ་རྣམས་ནི་ཐམས་ཅད་ཀྱང་མེད་པར་འགྱུར་བ་དང་། ཐ་དད་དུ་འགྱུར་བ་དང་། འབྲལ་བར་འགྱུར་བ་དང་། སླུ་བར་འགྱུར་བ་

དང་ཀུན་ཏུ་ལྡན་པར་འགྱུར་བ་ཡིན་ནོ། །རབ་ཏུ་ལྡན་པར་གྱུར་པ་ཡིན་པ་ཉིད་ཀྱི་ཕྱིར་འཁོར་བ་འདི་ཐམས་ཅད་ནི་མི་རྟག་པ་ཡིན་ནོ། །དེ་ལྟར་མི་རྟག་པར་གྱུར་པའི་གནས་རྣམས་ཐམས་ཅད་གང་ལ་ཡང་སེམས་ཅན་རྣམས་ཐམས་ཅད་ཀྱང་མ་སྐྱེས་པ་དང་། མ་ཤི་བ་དང་།
སྐྱེས་པར་མ་གྱུར་པ་ནི་ཁབ་ཀྱིས་ཕུག་པ་ཙམ་གྱི་ཡུལ་ཕྱོགས་ཀྱང་མེད་དོ། །འཕགས་པའི་བདེན་པ་བཞིར་གྱུར་པའི་དྲན་པ་དང་ལྡན་པས་བྱང་ཕྱོགས་སྒྲ་མི་སྙན་པ་རྣམས་ཀྱི་རི་བོ་གཉིས་པར་གྱུར་པ་རྭ་མཉམ་པར་གྱུར་པ་ཐམས་ཅད་ལ་ཀུན་ཏུ་བལྟས་པར་གྱུར་པས་ཀྱང་ཕྱི་རོལ་གྱི་ལུས་ལྟ་
བར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་ན་ནགས་དགའ་བར་གྱུར་པ་གཞན་དག་དམིགས་སམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་རི་གསུམ་པ་
ཡང་ཡོད་པ་ཡིན་ཏེ། རི་དགས་ཀྱི་དགྲ་དུལ་བ་ཞེས་བྱ་བའི་རིའོ། །དེ་ལ་དགའ་བར་གྱུར་པ་ཁྱད་པར་མེད་པ་གང་དག་ཡིན་པ་དེ་དག་རྣམས་ནི་སཾ་ཀཱ་ཤའི་རི་དང་རྭ་མཉམ་པར་གྱུར་པའི་རི་ལ་ཡོངས་སུ་བསྒྲགས་པར་ཟད་དོ། །རི་དགས་ཀྱི་དགྲ་དུལ་བའི་རི་བོ་དེ་ལ་ནི་འབབ་ཆུ་དང་ཆུ་བོ་རྣམས་
ཕུན་སུམ་ཚོགས་པ་དང་། ཆང་གི་ཆུ་ཀླུང་ཕུན་སུམ་ཚོགས་པ་དང་། གོས་ཀྱི་ལྗོན་ཤིང་ཕུན་སུམ་ཚོགས་པར་གྱུར་པ་རྣམས་དང་། འདི་དག་ཀྱང་ཁྱད་པར་ཡིན་ཏེ། འདི་ལྟར་གསེར་དང་དངུལ་གྱི་ལྗོན་ཤིང་རྣམས་ལ་རྟག་པར་དུས་དྲུག་ཏུ་མེ་ཏོག་གི་ཕྲེང་བ་རྣམས་ཀྱིས་ཕྱུག་པར་གྱུར་
ནས་ཀུན་དགའ་བ་དང་ལྡན་པ་བཞིན་དུ་རྒྱས་པ་ཡིན་ནོ། །ཤིང་རྣམས་ནི་རང་གི་འོད་དང་ལྡན་པར་ཉི་མ་བཞིན་དུ་རབ་ཏུ་གསལ་བར་ཡང་བྱེད་དོ། །ཕན་ཚུན་དུ་འོད་འཕྲོ་བར་གྱུར་པས་ཀྱང་རི་དགས་ཀྱི་དགྲ་དུལ་བའི་རི་བོ་འདི་རབ་ཏུ་གསལ་བར་བྱེད་དོ། །དེ་ལ་ནགས་འདི་དག་རྣམས་ཡོད་
དོ། །འདི་ལྟ་སྟེ། གསེར་དང་ལྡན་པ་དང་། དངུལ་མཐོན་པོར་བརྩེགས་པ་དང་། མྱོས་པ་སྒོ་ང་ལས་སྐྱེས་པའི་ངོས་དང་། མནན་ན་ནམ་ལ་བཏེག་ན་འཕར་བ་དང་རྣམས་སོ། །དེ་ལ་གསེར་དང་ལྡན་པ་ཞེས་བྱ་བའི་ནགས་ནི་དཔག་ཚད་བརྒྱ་པ་སྟེ། གསེར་གྱི་ལྗོན་ཤིང་རྣམས་ལ་

བུང་བས་ལེགས་པར་ཁྱབ་པར་གྱུར་པ་ཡིན་ནོ། །དངུལ་མཐོན་པོར་བརྩེགས་པའི་ནགས་དཔག་ཚད་སུམ་བརྒྱ་པ་སྟེ། དངུལ་གྱི་རང་བཞིན་གྱི་ལྗོན་ཤིང་རྣམས་ཀྱིས་ཀུན་ཏུ་གང་བར་གྱུར་ནས་ཟླ་བ་བརྒྱ་སྟོང་བཞིན་དུ་རྣམ་པར་གསལ་བར་བྱེད་དོ། །སེང་གེ་རྣམས་ཀྱིས་ཀྱང་ཀུན་ཏུ་
གང་བ་ཡིན་ནོ། །ནགས་དེ་ཡང་ཐམས་ཅད་ནས་དཀར་པོར་ཀུན་ཏུ་སྣང་བ་ཡིན་ཏེ། རྟག་པར་རབ་ཏུ་དགའ་བར་གྱུར་པའི་བྱ་རྣམས་ཀྱིས་ཀྱང་ཀུན་ཏུ་གང་བ་རྣམས་ནི་ཇི་ལྟར་སྔར་བཤད་པ་བཞིན་ནོ། །རི་དགས་ཀྱི་དགྲ་དུལ་བའི་རི་བོའི་ནགས་གསུམ་པ་ནི་མྱོས་པའི་སྒོ་ང་ལས་སྐྱེས་
པའི་ངོས་ཞེས་བྱ་བ་སྟེ། དེ་ལ་ནགས་དེ་ན་ནི་བག་མེད་པས་རབ་ཏུ་དགའ་བའི་བྱ་རྣམས་ཡོད་དོ། །ནགས་དེའི་ཉེ་འཁོར་རྣམས་ན་ཡང་སྐྱེས་བུ་གང་དང་གང་དག་རབ་ཏུ་གནས་པར་གྱུར་པ་དེ་དག་རྣམས་ཀྱང་རྟག་ཏུ་དུལ་བ་ཞེས་བྱ་བའི་མིང་དུ་འགྱུར་རོ། །སྐྱེས་བུ་དག་རྟག་ཏུ་མྱོས་པ་སྒོ་
ང་ལས་སྐྱེས་པའི་ནགས་ན་རབ་ཏུ་དགའ་བར་གྱུར་པ་ཡིན་ཏེ། རང་འདོད་པ་བཞིན་དུ་གྱུར་པའི་གཟི་བརྗིད་ཀྱིས་ལྷའི་ཚོགས་རྣམས་དང་འདྲ་བ་ཡིན་ནོ། །རི་དགས་ཀྱི་དགྲ་དུལ་བའི་རི་ལ་ནགས་བཞི་པ་ནི་མནན་ན་ནེམ་ལ་བཏེག་ན་འཕར་བ་ཞེས་བྱ་བ་སྟེ། ནེམ་པ་དང་འཕར་བའི་ནགས་
དེ་ན་ལྗོན་ཤིང་གང་དག་གསེར་དང་གསེར་རབ་ཏུ་འབར་བ་དང་། བི་དྲུ་མའི་རང་བཞིན་ཡིན་པ་རྣམས་ལ་ནི་མ་བཅིངས་པའི་བྱ་རྣམས་ཀྱིས་རྟག་ཏུ་གང་བ་ཡིན་ནོ། །ནེམ་ལ་འཕར་བའི་ནགས་ནི་དཔག་ཚད་ལྔ་ཡིན་ནོ། །ནགས་དེའི་ཉེ་འཁོར་རྣམས་ན་སྐྱེས་བུ་གང་དག་རབ་ཏུ་གནས་པར་གྱུར་
པ་དེ་དག་རྣམས་ཀྱི་ཐ་སྙད་ནི་རབ་ཏུ་ཕལ་ཆེ་བར་མྱོས་པ་ཞེས་བྱ་བ་ཡིན་ནོ། །རབ་ཏུ་ཕལ་ཆེ་བར་མྱོས་པའི་སྐྱེས་བུ་རྣམས་གལ་ཏེ་ནེམ་ཞིང་འཕར་བར་གྱུར་པའི་ནགས་སུ་རྩེ་དགའ་བར་བྱེད་ན། ས་དེ་དག་ནི་ཀཱ་ཤི་ལྟར་དཀར་ཞིང་འཇམ་པ་དང་ཤིང་བལ་འདྲ་བར་གཞི་མནན་ན་ནེམ་ལ་བཏེག་ན་
འཕར་བ་ཡིན་ནོ། །ཇི་སྐད་དུ་བརྗོད་པའི་མེ་ཏོག་དང་། འབྲས་བུ་དང་། ལྗོན་ཤིང་དང་། པད་མ་དང་། པད་མའི་རྫིང་བུ་དང་། སྒྲ་སྒྲོགས་པའི་བུང་བའི་ཚོགས་ཀྱིས་གང་བར་གྱུར་པ་རྣམས་ནི་ནེམ་ཞིང་འཕར་བའི་ནགས་དེ་ལ་ཡང་སྔར་གྱི་བཞིན་ནོ། །དེས་བྱང་ཕྱོགས་སྒྲ་མི་སྙན་

གྱི་རི་གསུམ་པ་ན་རི་དགས་ཀྱི་སྒྲ་དུལ་བ་ལེགས་པར་མཐོང་བར་གྱུར་པས་ཀྱང་ཡང་དག་པ་ཇི་ལྟ་བར་ལུས་སོ་སོར་རིག་པར་བྱེད་དེ་སྔར་བཞིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། གཞན་ཡང་བྱང་ཕྱོགས་སྒྲ་མི་སྙན་ན་
དགའ་བར་གྱུར་པ་གཞན་ཅི་དམིགས་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་སྤྲིན་དཀར་པོ་རྒྱུ་བ་ཞེས་བྱ་བའི་རི་བོ་ཉེ་འཁོར་དུ་དཔག་ཚད་སྟོང་ཡིན་ནོ། །ཤིན་ཏུ་དཀར་བར་གྱུར་པའི་དངུལ་གྱི་རང་བཞིན་ཡིན་ཏེ། རི་གང་གི་འོད་ཟེར་གྱིས་ཟླ་བའི་འོད་
ཀྱང་གསལ་བར་མི་འགྱུར་རོ། །དཔེར་ན་འཛམ་བུའི་གླིང་དུ་ཟླ་བ་ཤར་བར་གྱུར་པ་ན་གཟའ་དང་། རྒྱུ་སྐར་དང་། སྐར་ཕྲན་གྱི་འོད་ཀྱང་མེད་པར་འགྱུར་བ་དེ་བཞིན་དུ་སྤྲིན་དཀར་པོ་རྒྱུ་བའི་རིས་ཀྱང་ཟླ་བའི་འོད་མི་གསལ་བར་བྱེད་དོ། །སྤྲིན་དཀར་པོ་རྒྱུ་བའི་རི་བོའི་དྲུང་དུ་ཡང་སྐྱེས་བུ་གང་དག་
རབ་ཏུ་གནས་པར་བྱེད་པ་དེ་དག་རྣམས་ནི་མེ་ཏོག་གི་ཕྲེང་བ་གྱོན་པ་ཞེས་བྱ་བའི་མིང་དུ་འགྱུར་རོ། །སྐྱེས་ནས་སྤྲིན་དཀར་པོ་རྒྱུ་བའི་རི་བོ་ལ་རྟག་ཏུ་རྩེ་བ་ལ་ཆེད་ཆེར་བྱེད་པ་རྣམས་མེ་ཏོག་གི་ཟེ་འབྲུ་གྱོན་པར་གྱུར་ནས་རྟག་ཏུ་གླུས་དགའ་བར་གྱུར་པ་དང་། རྒྱུན་དུ་ཡང་པད་མའི་ཚལ་རྣམས་ན་
མངོན་པར་དགའ་བར་བྱེད་དོ། །སྡུག་གུ་དང་བཅས་པར་གྱུར་པ་དང་། རབ་ཏུ་གཡོ་བར་བྱེད་པ་དང་། རྣམ་པར་འཁྲུལ་པ་དང་། རྣམ་པར་འཁོར་བ་དང་། རྟག་ཏུ་ཀུན་ནས་འཆིང་བ་མེད་པ་རྒྱགས་པ་དང་། རྟག་ཏུ་མྱ་ངན་དང་རྣམ་པར་བྲལ་བ་རྣམས་ཡིན་ནོ། །གཞན་ཡང་སྤྲིན་དཀར་པོ་
རྒྱུ་བའི་རི་དེ་ལ་ནགས་འདི་དག་རྣམས་ཡོད་དོ། །འདི་ལྟ་སྟེ། རྔ་སྒྲ་འབྱིན་པའི་སྒྲ་དང་། ངང་ངུར་རྣམས་ཀྱིས་རྗེས་སུ་བསྒྲགས་པར་བྱེད་པ་དང་། ཡིད་ཀྱི་རྗེས་སུ་འཐུན་པ་དང་། ཆུ་སྒྲ་ཀུན་ནས་སྒྲོགས་པ་དང་རྣམས་སོ། །རྔ་སྒྲ་ཀུན་ནས་སྒྲོགས་པའི་ནགས་སུ་ཕྲེང་བ་ཐོགས་པའི་ལྷ་རྣམས་
ཀྱིས་རྔ་སྒྲ་དག་སྒྲོགས་པར་བྱེད་དོ། །སྒྲ་སྙན་པར་གྱུར་པ་ནི་དཔེར་ན་འཛམ་བུའི་གླིང་གི་པི་ཝང་དང་། གླིང་བུ་དང་། རྔ་པ་ཎ་བ་དང་། དུང་གི་སྒྲ་ལ་ཆགས་པར་འགྱུར་བ་ཡིན་ལ། དེ་བཞིན་དུ་རྔ་སྒྲ་ཀུན་ནས་སྒྲོགས་པའི་ནགས་ན་ལྷ་རྣམས་རྔ་སྒྲ་སྒྲོགས་པར་བྱེད་པ་ཡིན་ནོ། །དེ་དག་རྣམས་

ལ་ནི་འཛམ་བུའི་གླིང་གི་གླུ་མཁན་རྣམས་ཀྱིས་བཅུ་དྲུག་གི་ཆར་ཡང་མི་ཆོག་གོ། །ཇི་སྐད་དུ་བཤད་པར་གྱུར་པའི་རི་དགས་དང་། བྱ་དང་། པད་མ་དང་། ལྗོན་ཤིང་དང་། ནགས་དང་། ཉེ་བའི་ནགས་དང་། ཁྲུས་ཀྱི་རྫིང་བུ་དང་། མཚེའུ་དང་། གསེར་དང་དངུལ་གྱི་ས་
གཞིའི་ཆ་རྣམས་དང་། འབབ་ཆུ་དང་རྣམས་ཀྱི་ཡོན་ཏན་རྣམས་ནི་དེ་ལྟ་དེ་ལྟར་གྱིས་རྔ་སྒྲ་སྒྲོགས་པའི་ནགས་ན་ཡོན་ཏན་རྣམས་ཐམས་ཅད་ཀྱང་ཡོད་པ་ནི་སྔར་བཞིན་ནོ། །ཕྲེང་བ་གྱོན་པར་གྱུར་པའི་སྐྱེས་བུ་རྣམས་ནི་རྔ་སྒྲ་ཀུན་ནས་སྒྲོགས་པར་བྱེད་པའི་གདངས་ཀྱིས་རྟག་ཏུ་འདོད་པ་རྣམས་
ལ་རྣམ་པར་ཆགས་པ་ཡིན་ཏེ། དཔེར་ན་གཞོང་པ་ཐོགས་པའི་ལྷ་རྣམས་ཀྱི་དགའ་བའི་ཚལ་གྱི་ཉེ་བའི་ནགས་བཞིན་དུ་རྟག་ཏུ་འདོད་པའི་སྒྲ་དང་རོ་དང་གཟུགས་དང་དྲི་རྣམས་སྤྱོད་པར་བྱེད་དོ། །ནགས་གཉིས་པ་ངང་ངུར་རྣམས་ཀྱིས་ཡོངས་སུ་སྒྲོགས་པར་བྱེད་པ་ཞེས་བྱ་བ་སྟེ། ནགས་དེ་ལ་ནི་ངང་ངུར་རྣམས་ཀྱིས་ཡོངས་
སུ་སྒྲོགས་པར་བྱེད་པ་དང་པད་མའི་རྫིང་བུ་རྣམས་ཀྱང་བརྒྱ་ཕྲག་རྣམས་དེ་ནས་སྟོང་ཕྲག་རྣམས་ཡོད་དོ། །དེ་དག་རྣམས་ཀྱི་ནི་མིང་ཡང་བརྗོད་ཅིང་གཟུང་བར་མི་ནུས་སོ། །ངང་ངུར་རྣམས་ཀྱིས་རྗེས་སུ་སྒྲོགས་པའི་ནགས་ལ་རི་དགས་ཀྱི་རིགས་འདི་དག་རྣམས་ཡོད་པ་ནི་འདི་ལྟ་སྟེ། རྣམ་པར་བཀྲ་བའི་བཻ་ནཱཿདང་། རིན་པོ་
ཆེ་སྣ་བདུན་གྱིས་བརྒྱན་པའི་ལུས་འདུལ་བ་ཞེས་བྱ་བའི་རི་དགས་དང་། ཀུ་རང་གཱ་དང་། མ་ཀ་ར་དང་། མ་ཀཱ་འདོད་པ་དང་། ཤིན་ཏུ་དགའ་བ་དང་། སམ་བཱ་བི་ནཿདང་། རྩེ་མོ་གཡོ་བ་རྣམས་འཛིན་པར་བྱེད་པ་དང་། ཁོར་ཡུག་གི་མིག་དང་། ཀར་ཀེ་ཏའི་ལྟེ་བ་དང་། གསེར་གྱི་
རྭ་དང་། ལོགས་དངུལ་གྱི་ལོགས་དང་། རླུང་གི་ཤུགས་དང་། ཤིང་གི་རྩ་བ་ན་རྒྱུ་བ་དང་། ཆུའི་སྒྲ་འབབ་པར་འགྲོ་བར་བྱེད་པ་དང་། ནགས་ཀྱི་ཕྲེང་བར་བགྲང་བ་དང་། བི་དྲུ་མའི་ལུས་དང་། ལགྣའི་ལོགས་དང་། ལྟོ་ལྟིར་བ་དང་། བར་པོ་ཏཱཿདང་། ཤང་ཤ་རཱ་ཎཱཿདང་། པགས་
པ་ནག་པོ་དང་། རྩ་བའི་འོད་དང་། ལང་ཚོ་ལ་བབ་པ་དང་། ཤིན་ཏུ་འཇམ་པ་དང་། དཀར་པོའི་ཚོགས་དང་རྣམས་ཡིན་ཏེ། དེ་དག་རྣམས་ནི་རི་དགས་ཀྱི་རིགས་ཉི་ཤུ་རྩ་ལྔ་ཡིན་ནོ། །ཕྲེང་བ་གྱོན་པའི་སྐྱེས་བུ་རྣམས་དང་ལྷན་ཅིག་ཏུ་རྩེ་དགའ་བར་བྱེད་དེ། རང་གི་ལས་དང་འདྲ་བར་

གྱུར་པ་རྣམ་པ་སྣ་ཚོགས་པ་རྣམས་ཉམས་སུ་མྱོང་བར་བྱེད་དོ། །སྤྲིན་དཀར་པོ་རྒྱུ་བའི་རི་ལ་ཡིད་ཀྱི་རྗེས་སུ་འཐུན་པ་ཞེས་བྱ་བའི་ནགས་ཡོད་དོ། །ནགས་དེ་ནས་ནི་ཕྲེང་བ་གྱོན་པའི་མི་རྣམས་ཀྱི་ཡིད་ཀྱི་རྗེས་སུ་འཐུན་པར་གྱུར་པ་གང་དང་གང་དག་ཡིན་པ་དེ་དག་རྣམས་ཉིད་ལྗོན་ཤིང་རྣམས་
ལས་འཐོབ་པར་འགྱུར་རོ། །ནགས་དང་ཉེ་བའི་ནགས་རྣམས་གང་དག་ཡིན་པ་ཐམས་ཅད་ཀྱང་དགའ་བ་རྣམས་ཡིན་ཏེ་སྔར་བཞིན་ནོ། །སྤྲིན་དཀར་པོ་རྒྱུ་བའི་རི་བོ་ལ་ནགས་བཞི་པ་ཆུའི་སྒྲ་ཀུན་ནས་སྒྲོགས་པ་ཞེས་བྱ་བ་ཡོད་དོ། །དེ་ལ་ནི་རྣམ་པ་སྣ་ཚོགས་པའི་གཟུགས་འཛིན་པར་གྱུར་
པའི་རིག་པ་འཛིན་པ་རྣམས་རྩེ་བར་བྱེད་དོ། །ཡང་གང་གི་ཚེ་རྡུལ་གྱིས་གནོད་པར་གྱུར་པ་ན་དེའི་ཚེ་རང་འདོད་པའི་ཆ་བྱད་ཀྱིས་ཆུར་འཇུག་སྟེ། ཆུ་ལ་ཀུན་ཏུ་འཕྱོ་བར་བྱེད་དོ། །དེ་ལ་རིག་པ་འཛིན་པའི་རིགས་འདི་དག་རྣམས་ཡོད་དེ། འདི་ལྟ་སྟེ། བདེ་བ་ལ་ཆགས་པའི་ཤུགས་དང་།
འགོར་བ་མེད་པར་འགྲོ་བ་དང་། ནམ་མཁའི་སྟོབས་དང་། སྤྲིན་རབ་ཏུ་འབྱེད་པར་བྱེད་པ་དང་། ཉི་མའི་ལམ་དུ་ལེགས་པར་རྒྱུ་བ་དང་། རི་དགས་ཀྱི་འགྲོས་དང་། པཽ་རྭཿདང་། ཤིན་ཏུ་དུད་པ་དང་། ཀུ་ཤི་ཀཱཿདང་། རི་རྣམས་ལ་ཀུན་ཏུ་ཆགས་པ་དང་། རྟག་ཏུ་མྱོས་པའི་དྲི་
དང་། ནམ་མཁའ་ལ་རྒྱུ་བར་བྱེད་པ་དང་། མཱ་ཥཱ་ཌའི་ནང་ན་གནས་པ་དང་། ཙི་མི་ཤའི་ཕུག་ན་རྒྱུ་བ་དང་། རྟག་པའི་ཤུགས་དང་། ངང་པའི་ཤིང་རྟ་དང་། གླང་པོའི་ཤིང་རྟ་དང་། གློག་འཁྱུག་པར་བྱེད་པ་དང་། མ་ལ་ཡ་ན་གནས་པ་དང་། ཀེ་ཏ་ཀའི་ཕྲེང་བ་མཆོག་དང་ལྡན་
པ་དང་། བུད་མེད་ལ་སྲེད་པ་དང་། ཆང་པ་རྣམས་ཀྱིས་བཏུང་བ་དང་། རི་རབ་ལྷུན་པོ་ལ་གནས་པ་དང་། ཀུན་ཏུ་ཁྱབ་པའི་ཞེན་པ་དང་། རྟག་ཏུ་དགའ་བ་དང་། མེ་ཏོག་གི་ཕྲེང་བ་འཕྱང་བ་དང་། ས་གཞི་ལ་རྒྱུ་བ་དང་། སྔགས་གསང་བ་པ་དང་རྣམས་ཏེ། དེ་དག་ནི་རིག་པ་འཛིན་
པའི་རིགས་སུམ་ཅུ་རྩ་གཉིས་ཡིན་ལ། སྤྲིན་དཀར་པོ་རྒྱུ་བའི་རིའི་ཆུ་སྒྲ་ནས་སྒྲོགས་པའི་ནགས་དེ་ཉིད་ལ་གནས་ནས་དགའ་བར་བྱེད་དོ། །རྣམ་པ་སྣ་ཚོགས་པའི་རྒྱན་རྣམས་ཀྱིས་རབ་ཏུ་བརྒྱན་ཅིང་རྣམ་པ་སྣ་ཚོགས་པའི་རྒོད་པ་དང་འགྱིང་བ་དང་རྩེ་བ་དང་། ཀུན་ཏུ་སྤྱོད་པར་ཡང་བྱེད་དེ། དེའི་

ལས་ཀྱི་མཐུས་ཡིན་ནོ། །དེ་འདྲ་བར་གྱུར་པའི་བུད་མེད་དང་ལྷན་ཅིག་ཏུ་ཞེན་པར་བྱེད་དོ། །དེ་ལྟར་སྤྲིན་དཀར་པོ་འཛིན་པའི་ནགས་དང་ཉེ་བའི་ནགས་དང་བཅས་པ་རྣམས་ཐམས་ཅད་ཀྱང་ཡང་དག་པ་ཇི་ལྟ་བ་བཞིན་དུ་སོ་སོར་རིག་པར་བྱེད་དེ། སྤྲིན་དཀར་པོ་འཛིན་པའི་རི་བོ་འདི་ལ་གཅིག་
ཏུ་ངེས་པར་གྱུར་པ་དང་། རྟག་པ་དང་། བརྟན་པ་དང་། ཐེར་ཟུག་དང་། མྱ་ངན་ལས་འདས་པར་འགྲོ་བ་ཐོབ་པའི་བདེ་བ་ཡོད་དམ་ཞེ་ན། དེས་རྟག་པ་དང་། བརྟན་པ་དང་། ཐེར་ཟུག་དང་། ཡོངས་སུ་མི་འགྱུར་བའི་ཆོས་ཅན་དུ་གྱུར་པའི་བདེ་བ་ནི་གཅིག་ཀྱང་མ་མཐོང་སྟེ་ཇི་
ལྟར་ཉི་མ་ལ་མུན་པ་བཞིན་ནོ། །དེ་ལྟར་འཇིག་རྟེན་པའི་བདེ་བ་རྣམས་ཀྱང་མྱང་བར་མངར་བ་དང་། རྣམ་པར་སྨིན་པ་རྩུབ་པ་དང་། ཀུན་ནས་ཉོན་མོངས་པ་ཅན་དུ་གྱུར་པ་དང་། སྲེད་པ་ལས་ངེས་པར་འབྱུང་བ་མ་ཡིན་པ་དང་། འབྲས་བུ་རྩུབ་པ་ཡིན་ཏེ། ཀིམ་པ་ཀའི་འབྲས་བུ་
འདྲ་བ་དུག་དང་། མཚོན་དང་། མེ་དང་མཚུངས་པར་གྱུར་པ་དང་། དུས་དེ་ཙམ་དུ་དགའ་བར་གྱུར་པ་ཡིན་ནོ། །གར་མཁན་གྱི་ཚོན་རྩི་བཞིན་དུ་ཡུད་ཙམ་ཅིག་དགའ་བ་ཡིན་ནོ། །གློག་དང་མཚུངས་པར་ཤིན་ཏུ་གཡོ་བ་ཡིན་ནོ། །རིའི་འབབ་ཆུའི་ཤུགས་དང་འདྲ་བ་དང་། ཉེ་བར་
འཚེ་བ་དང་བཅས་པ་དང་། དྲི་ཟའི་གྲོང་ཁྱེར་དང་མཚུངས་པར་སླུ་བར་བྱེད་པ་དང་། སྐྱེ་བོ་རྣམས་ཐམས་ཅད་ཀྱང་རྣམ་པར་འཇོམས་པར་བྱེད་པ་དང་། ཤིང་ཏོག་རྣམས་ཐམས་ཅད་བཞིན་དུ་ཅི་ནས་ཀྱང་ལྟུང་བར་འགྱུར་བར་མཚུངས་པ་དང་། དུག་གི་ཟས་དང་འདྲ་བར་ཡོངས་སུ་སྨིན་
པར་འགྱུར་བ་དང་། སྤུ་གྲིའི་སོའི་མྱང་བ་བཞིན་དུ་ཤིན་ཏུ་རྣོ་བ་དང་། ལན་བརྒྱ་སྟོང་དུ་མ་རྣམས་སུ་ཡང་སླུ་བར་བྱེད་པ་ཡིན་པ་དང་། ཆུ་ཀླུང་གི་འགྲམ་གྱི་ཤིང་བཞིན་དུ་ངེས་པ་ཁོ་ནར་ལྟུང་བར་འགྱུར་བར་མཚུངས་པ་ཡིན་ནོ། །རྣམ་པ་དེ་ལྟ་བུའི་འདོད་པ་རྣམས་ལ་ཀུན་ཏུ་བལྟས་པར་
གྱུར་ནས་རྣལ་འབྱོར་སྤྱོད་པ་པ་ངེས་པར་སྐྱོ་བ་སྐྱེ་བར་འགྱུར་རོ། །ཡང་ཇི་ལྟ་བ་བཞིན་དུ་མཐོང་བར་གྱུར་པ་དང་། ཚུལ་བཞིན་ཡིད་ལ་བྱེད་པ་མཐོང་བ་དང་ལྡན་ཞིང་རྣམ་པར་བྱང་བར་གྱུར་པའི་མཐོང་བ་དང་ཡང་དག་པར་ལྡན་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་

ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་ན་དགའ་བར་གྱུར་པའི་རི་དགས་ཀྱི་རིགས་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་མཐོ་བར་བརྩེགས་པ་ཞེས་བྱ་བའི་རི་དཔག་ཚད་སྟོང་ཡོད་པ་ཡིན་ཏེ།
ཉེ་འཁོར་རྣམས་དགའ་བར་གྱུར་པ་དང་འོད་ཀྱི་ཕྲེང་བ་དང་ལྡན་པ་ཡིན་ནོ། །དེ་ལ་ཤིང་གི་རིགས་ནི་འདི་དག་རྣམས་ཡོད་དེ། འདི་ལྟ་སྟེ། བཻ་ཌཱུརྱའི་འདབ་མ་དང་། གསེར་འབར་བའི་སྡོང་བུ་དང་། བྱི་རུའི་འདབ་མ་ཅན་རྣམས་དང་། དངུལ་གྱི་སྡོང་བུ་དང་། གསེར་གྱི་འདབ་མ་དང་ལྡན་པ་མར་
མེའི་གོང་བུ་རྩ་བརྒྱད་འདྲ་བ་རྣམས་ཡིན་ནོ། །རི་རྣམ་པ་དུ་མ་དང་ཤིང་གི་རིགས་གཞན་དག་རྣམས་དང་། པད་མའི་རིགས་རྣམས་དང་། སྐྱེད་མོས་ཚལ་གྱི་རིགས་རྣམས་དང་། རི་དགས་ཀྱི་རིགས་རྣམས་དང་། རིའི་རྩེ་མོའི་རིགས་རྣམ་པ་དུ་མ་རྣམས་ཀྱང་སྔར་བཞིན་ནོ། །མཐོ་
བར་བརྩེགས་པའི་ཡན་ལག་གི་བརྩེགས་པའི་རྒྱར་ནི་དཔག་ཚད་ཉིས་བརྒྱའོ། །དེའི་བརྩེགས་པ་གཅིག་ལ་རི་རབ་ལྷུན་པོ་ལ་གནས་པའི་ཕྲེང་བ་ཐོགས་པ་ཞེས་བྱ་བའི་ལྷ་དང་པི་ཝང་གསུམ་པ་ཞེས་བྱ་བའི་ལྷ་རྣམས་རྩེ་དགའ་བར་བྱེད་དོ། །པི་ཝང་གསུམ་པའི་ལྷ་ནི་ལྷུན་པོའི་བང་རིམ་བཏང་
བར་གྱུར་ནས་མཐོ་བར་བརྩེགས་པའི་རི་ལ་རྩེ་དགའ་བར་བྱེད་དེ། རི་བོ་དེ་དགའ་བར་གྱུར་པའི་ཕྱིར་རོ། །མཐོན་པོ་དེའི་ཡན་ལག་གི་བརྩེགས་པའི་ཉེ་འཁོར་རྣམས་ནི་རིན་པོ་ཆེའི་རང་བཞིན་ཡིན་ཏེ། འཕང་དུ་ནི་དཔག་ཚད་ལྔ་བཅུ་ཡིན་ནོ། །བརྩེགས་མ་ལྔ་ཡོད་པའི་ཡན་ལག་གི་བརྩེགས་
པའི་རྒྱར་ནི་དཔག་ཚད་ཉིས་བརྒྱ་ཡིན་ནོ། །དེ་ལ་བརྩེགས་མ་གཅིག་ནི་གསེར་ལ་ནོར་བུའི་ཁྲོད་ཡིན་ཏེ། རིན་པོ་ཆེ་རྣམས་ཐམས་ཅད་ཀྱང་ཁྲོད་དེ་ལས་སྐྱེ་བར་འགྱུར་རོ། །འདི་ལྟ་སྟེ། བི་དྲུ་མ་དང་། བྱི་རུ་དང་། བཻ་ཌཱུརྱ་དང་། མུ་ས་ར་གལྦ་དང་། ཤེལ་དང་། པད་མ་རཱ་ག་དང་།
སུ་ཀུ་མཱ་རི་ཀཱ་དང་། ཨིནྡྲ་ནཱི་ལ་དང་། ནཱི་ལ་ཆེན་པོ་དང་། མ་བཏགས་པའི་གོས་ཀྱང་འབྱུང་ངོ་། །གཉིས་པ་ནི་དངུལ་གྱི་རང་བཞིན་ཡིན་ཏེ། དངུལ་གྱི་ལྗོན་ཤིང་རྣམས་ཕུན་སུམ་ཚོགས་པ་གོ་ཤིཪྵ་ཞེས་བྱ་བའི་ཙན་དན་སྐྱེ་བ་ཡིན་ནོ། །ལྷ་དང་ལྷ་མ་ཡིན་གྱི་འཁྲུག་པ་གང་ཡིན་པ་ལྷ་རྣམས་

དང་། ལྷ་མ་ཡིན་རྣམས་ལྷན་ཅིག་ཏུ་གཡུལ་བཀྱེ་བར་གྱུར་པས་མཚོན་གྱིས་རྨས་པ་རྣམས་དང་ལྷན་ཅིག་ཏུ་འགྱེལ་བར་གྱུར་པ་རྣམས་ཉིད་ཀྱི་ལྷ་རྣམས་ཀྱི་ལུས་ནད་མེད་པར་བྱེད་པ་ཡིན་ནོ། །གོ་ཤིཪྵ་པ་ཞེས་བྱ་བ་ནི་རི་དེའི་ལྷན་ཅིག་སྐྱེས་པའི་མིང་ཡིན་ནོ། །དེའི་ཙན་དན་ཡང་གོ་ཤིཪྵ་པའི་
མིང་ཡིན་ནོ། །རིའི་རྩེ་མོ་གསུམ་པ་ནི་ལྷའི་བུ་མོ་དགའ་བ་ཞེས་བྱ་བ་ཡིན་ཏེ། གང་ལ་ལྷའི་བུ་མོ་རྣམས་རྩེ་དགའ་བར་བྱེད་པ། ནགས་དང་ཉེ་བའི་ནགས་རྣམས་དང་། གསེར་དང་། དངུལ་དང་། བཻཌཱུརྱ་རྣམས་ཀྱིས་ཟེ་འབྲུ་དང་གཞི་འཇམ་པོ་རྣམས་ལ་རྟག་ཏུ་རྟེན་པར་བྱེད་པ་དང་།
རབ་ཏུ་དགའ་བར་གྱུར་པས་རྒོད་པ་དང་། རོལ་པ་དང་། རྩེ་བར་བྱེད་པས་རྣམ་པར་གྱུར་པའི་དགའ་བ་རྣམས་ལ་སྲེད་པས་རྣམ་པར་བསླད་པར་གྱུར་པའི་བྱིས་པ་སོ་སོའི་སྐྱེ་བོ་རྣམས་དམ་པའི་ཆོས་ཉན་པ་ལ་ཁ་ཕྱིར་ཕྱོགས་པར་འགྱུར་ཞིང་རྟག་ཏུ་འདོད་པ་ལ་རྣམ་པར་ཆགས་པར་གྱུར་པས་རྭ་
དེའི་རྩེ་ལ་རྟག་ཏུ་འཁོད་པར་བྱེད་དོ། །རྭ་བཞི་པ་ནི་གང་ལ་རྒྱལ་པོ་ཆེན་པོ་བཞི་རྒུན་འབྲུའི་ནགས་དང་ཉེ་བའི་ནགས་རྣམས་ལ་རྩེ་དགའ་བར་བྱེད་པ་ཡིན་ནོ། །དེ་ལ་ཡང་རྟག་ཏུ་མྱོས་པའི་རི་དགས་དང་། བྱ་དང་། གསང་བ་པའི་ལྷ་དང་། རིག་པ་འཛིན་པ་དང་། མི་རྣམས་དང་། ཉེ་
འཁོར་རྣམས་ན་ཡང་རྒུན་འབྲུའི་ཆུ་ཀླུང་རྣམས་རབ་ཏུ་འབབ་པ་ཡིན་ནོ། །ཁ་ཅིག་ནི་སྦྲང་རྩིའི་རོ་ཡིན་ནོ། །ཁ་ཅིག་ནི་བདུག་པ་མ་ཡིན་པ་དང་ལྡན་པའི་རོ་ཡིན་ནོ། །ཁ་ཅིག་ནི་འདྲེས་པར་གྱུར་པའི་རོ་སྟེ། རྭ་དེ་ལ་ནི་ཆུ་ཀླུང་གི་འགྲམ་རྣམས་ལས་གསེར་ས་ལེ་སྦྲམ་སྐྱེའོ། །བ་ལང་དང་།
མ་ཧེ་ཥ་དང་། ཕག་པ་དང་། གླང་པོ་ཆེ་དང་། ཅེ་སྤྱང་དང་། རྔ་མོ་དང་། ཕྱུགས་དང་། སྤྱང་ཀུ་དང་། ཀླུ་དང་། གུང་དང་། སེང་གེ་དང་། དྲེད་དང་། ཝ་དང་། བྱ་དང་། དེ་དང་དེ་དག་རྣམས་དང་འདྲ་བར་གྱུར་པའི་གཟུགས་རྣམས་དང་། ཁ་དོག་དུ་མར་གྱུར་པའི་
རིན་པོ་ཆེའི་རང་བཞིན་ཕལ་ཆེ་བ་རྣམས་མཐོང་ངོ་། །གང་གི་ཕྱིར་གང་ལ་གསེར་ས་ལེ་སྦྲམ་རྣམས་སྐྱེ་བར་འགྱུར་བ་ནི་རིའི་རྩེ་མོ་དེའི་ཀླུས་གསེར་ས་ལེ་སྦྲམ་འདི་དག་རྣམས་ཡིན་ནོ། །བརྩེགས་མ་ལྔ་པ་གང་ལ་གསེར་གྱི་འདབ་མ་དང་། བཻ་ཌཱུརྱའི་ཡུ་བ་ཅན་ཤིན་ཏུ་འཇམ་པར་གྱུར་པའི་

པད་མ་རྣམས་སྐྱེའོ། །ཉེ་འཁོར་ཀུན་ནས་ཡང་བཻ་ཌཱུརྱའི་ལྗོན་ཤིང་རྣམས་ཀྱིས་གང་བ་ཡིན་ནོ། །དེ་ལ་པད་མའི་རྫིང་བུ་འདི་དག་རྣམས་ཡོད་དོ། །འདི་ལྟ་སྟེ། ཀུན་དགའ་ར་བའི་རྒྱས་པ་དང་། པད་མས་ཁྱབ་པར་གྱུར་པ་དང་། པད་མ་དུས་སུ་རྒྱུ་བ་དང་། པད་མ་དམར་
པོས་ཀུན་ཏུ་ཁྱབ་པ་དང་། ཉི་མ་སྟེན་པ་དང་། གཞི་འཇམ་པ་དང་། མི་གཡོ་བ་དང་། ལྗོན་ཤིང་དང་། ཟབ་པ་དང་། མེ་ཏོག་དྲི་ཞིམ་པ་འབྱུང་བ་དང་། བརྟན་པའི་ཆུ་དང་སྟེ། དེ་དག་རྣམས་ནི་པད་མའི་རྫིང་བུ་བཅུ་གཅིག་ཡིན་ནོ། །རྭ་དེའི་མིང་ཡང་པད་མས་ཀུན་ཏུ་ཁྱབ་པ་ཞེས་བྱ་བ་
ཡིན་ནོ། །ཆུ་ཀླུང་རྣམས་ཀྱང་རྣམ་པ་སྣ་ཚོགས་པའི་དྲི་དང་རོས་ལེགས་པར་གང་བར་གྱུར་པ་རྣམས་ཉེ་འཁོར་རྣམས་ན་འབབ་སྟེ། རོ་དྲུག་དང་ལྡན་པ་ཡིན་ནོ། །འདོད་པའི་ལྗོན་ཤིང་རྣམས་ཐམས་ཅད་དང་། ཉེ་བར་སྐྱེས་པ་དང་། ལྗོན་ཤིང་དང་། མེ་ཏོག་དང་། ཆུ་བོ་དང་། ཁྲུས་
ཀྱི་རྫིང་བུ་དང་ལྡན་པ་རྣམས་ནི་སྔ་མ་བཞིན་ནོ། །དེས་རྭ་ལྔ་པ་ལ་ཀུན་ཏུ་བལྟས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ཕྱི་རོལ་གྱི་ལུས་ལ་ཀུན་ནས་ལྟ་བར་བྱེད་དོ། །དེས་བྱང་ཕྱོགས་སྒྲ་མི་སྙན་པ་རྣམས་ཀྱི་རི་ལྔ་པ་མཐོ་བར་བརྩེགས་པ་ཞེས་བྱ་བ་ལ་མངོན་པར་བལྟས་པར་གྱུར་པས་ཀྱང་
ཡང་དག་པ་ཇི་ལྟ་བ་བཞིན་དུ་ཕྱི་རོལ་གྱི་ལུས་སོ་སོར་རེག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ལས་དང་ཆོས་དག་གི་རྣམ་པར་སྨིན་པའི་དབང་དུ་བྱས་ནས་མཐོན་པོར་བརྩེགས་པའི་རི་ལ་ཀུན་ཏུ་ལྟ་སྟེ། སེམས་ཅན་འདི་དག་རྣམས་ནི་ལས་ཀྱི་ཆོས་ཀྱི་རྣམ་པར་སྨིན་པ་ཅན་ཡིན་ཏེ། རང་གི་
ལས་ཀྱི་བགོ་སྐལ་ལ་སྤྱོད་པར་བྱེད་པ་དང་། རང་གི་ལས་རྣམས་བརྟན་པར་བྱས་པ་དང་། རང་གིས་ལེགས་པར་བྱས་པ་རྣམས་ཀྱིས་ནི་འདིར་སྐྱེས་པ་ཡིན་ལ། རང་གི་ལས་དེ་དག་ཟད་པར་གྱུར་ནས་ངེས་པར་ལྟུང་བར་འགྱུར་ཏེ། མི་དགེ་བའི་ལས་རྣམས་ཀྱིས་ནི་དམྱལ་བ་དང་། ཡི་དགས་དང་།
དུད་འགྲོ་རྣམས་སུ་འགྱུར་རོ། །ལེགས་པར་བྱས་པ་རྣམས་ཀྱིས་ནི་ལྷ་དང་མི་རྣམས་ཀྱི་ནང་དུའོ། །མཐོ་བར་བརྩེགས་པའི་རིའི་ཉེ་འཁོར་ན་གང་དག་གནས་པ་དེ་དག་རྣམས་ནི་བདེ་བ་ལ་དགའ་བ་ཞེས་བྱ་བ་ཡིན་ནོ། །བདེ་བ་ལ་དགའ་བའི་སྐྱེས་བུ་རྣམས་ནི་རྟག་ཏུ་འདོད་པ་ལ་མངོན་པར་དགའ་

བ་རྣམས་ཡིན་ཏེ། རྟག་ཏུ་འདོད་པ་རྣམས་ཀྱིས་ངོམས་པ་མེད་པ་རྣམས་ཡིན་ནོ། །འདི་ལྟར་ཚིགས་སུ་བཅད་པ། མེ་ལ་བུད་ཤིང་རྣམས་དང་ནི། །རྒྱ་མཚོ་ལ་ནི་ཆུ་བོ་ལྟར། །སྲེད་ལྡན་འདོད་པས་ངོམས་པ་མེད། །དེ་ཕྱིར་འདོད་པ་ཞི་བ་མིན། །ཞེས་བྱ་བ་ཡིན་ཏེ། འདི་ན་སེམས་
ཅན་འདི་དག་རྣམས་ནི་ངེས་པ་ཁོ་ནར་ངུ་བར་བྱ་བ་ལ་དགའ་བར་བྱེད་པ་ཡིན་པར་རྣལ་འབྱོར་པ་དེས་དྲི་མ་དང་རྣམ་པར་བྲལ་བའི་མིག་གིས་མཐོང་ངོ་། །དེ་དག་རྣམས་ཀྱིས་ནི་ཤེས་པ་ཡང་མ་ཡིན་ཏེ། འདུས་བྱས་འདི་དག་རྣམས་ཐམས་ཅད་ནི་སྡུག་བསྔལ་གྱི་བདག་ཉིད་ཡིན་ནོ། །ཐམས་ཅད་
ཀྱང་འཛད་ཅིང་འགོག་པའི་ཆོས་ཅན་ཡིན་ནོ། །སྙིང་པོ་མེད་པ་དང་སྒྲོན་མ་མེད་པ་ཡིན་ནོ། །འདི་དག་རྣམས་ལ་ནི་མཐར་ཐུག་པའི་བདེ་བ་ཡོད་པ་མ་ཡིན་ནོ། །ཤིས་པ་མ་ཡིན་ཞིང་ཞི་བ་ཡང་མ་ཡིན་ནོ། །སེམས་ཅན་འདི་དག་རྣམས་ཐམས་ཅད་ཀྱི་སྲོག་དང་། ལང་ཚོ་དང་།
ནད་མེད་པ་དང་། ཕུན་སུམ་ཚོགས་པ་དང་། འདི་དག་རྣམས་ཐམས་ཅད་ཀྱང་བདེ་བ་མ་ཡིན་ཞིང་གཙང་བ་མ་ཡིན་ལ་མི་རྟག་པ། བདག་མེད་པ་སྙིང་པོ་མེད་པ་དབུ་བ་རྡོས་པ་དང་། ཆུའི་ཆུ་བུར་ལྟ་བུ་ཡིན་ཏེ། གསོན་པ་རྣམས་ནི་ཐམས་ཅད་ཀྱང་འཆི་བའི་མཐར་ཐུག་པར་འགྱུར་བ་
ཡིན་ལ། ཕུན་སུམ་ཚོགས་པ་རྣམས་ཐམས་ཅད་ཀྱང་རྒུད་པའི་མཐར་ཐུག་པར་འགྱུར་བ་ཡིན་ནོ། །གནས་དེ་དག་རྣམས་ནི་དམྱལ་བ་དང་། ཡི་དགས་དང་། དུད་འགྲོ་དང་། མི་རྣམས་མི་སླུ་བའི་ཡིན་ཏེ། དཔེར་ན་ཇི་ལྟར་ཉི་མ་ཤར་བར་གྱུར་པ་དེ་ནི་ངེས་པར་ནུབ་པར་འགྱུར་བ་ཡིན་
ནོ། །དེ་ཁོ་ན་བཞིན་དུ་སྐྱེས་པ་རྣམས་ནི་ངེས་པར་འཆི་བར་བྱ་བ་ཡིན་ནོ། །ཡང་ཇི་ལྟ་ཇི་ལྟར་ས་གཞི་གཞོན་ཞིང་ལང་ཚོ་ལ་བབ་པར་གྱུར་ན། ལྗོན་ཤིང་དང་། ནགས་དང་། ཉེ་བའི་ནགས་དང་། ནེའུ་གསིང་དང་བཅས་པར་འགྱུར་རོ། །ས་གཞི་དེ་རྙིངས་པར་གྱུར་ན་ལྗོན་ཤིང་
དང་། ནགས་དང་། ཉེ་བའི་ནགས་དང་། མཚེའུ་དང་། པད་མ་དང་བཅས་པ་རྣམས་ཀྱང་དེ་ལྟར་འགྱུར་རོ། །དེ་ཁོ་ན་བཞིན་དུ་སོས་ཀའི་དུས་སུ་ལང་ཚོ་ལ་བབ་པ་རྣམས་སྟོན་ཀའི་དུས་སུ་རྙིངས་པར་འགྱུར་བ་དང་། གཞོན་པ་རྣམས་ཐམས་ཅད་ཀྱང་རྒས་པའི་མཐར་ཐུག་པར་

འགྱུར་བ་འདི་བྱང་ཕྱོགས་སྒྲ་མི་སྙན་པའི་མི་རྣམས་ཀྱིས་གོ་བ་ཡང་མ་ཡིན་ནོ། །ཡང་ཇི་ལྟ་ཇི་ལྟར་མཚན་མོ་ཆར་བབ་པར་གྱུར་ན་ཆུ་ཀླུང་རྣམས་ཕུན་སུམ་ཚོགས་པར་འགྱུར་ཏེ། ཆར་བབ་པའི་དབང་གིས་ངོས་གཉི་གར་ཡང་མང་དུ་འབབ་པར་འགྱུར་རོ། །ཕུན་སུམ་
ཚོགས་པར་གྱུར་པ་རྣམས་ཀྱང་སྟོན་ཀ་ཟད་པ་དང་འགྲིབ་པའི་སྒོ་ནས་ཆུ་ཆུང་བར་འགྱུར་རོ། །དེ་ཁོ་ན་བཞིན་དུ་དབྱར་གྱི་མཚན་མོ་ཆར་འབབ་པར་གྱུར་པ་དང་མཚུངས་པ་ནི་ཕུན་སུམ་ཚོགས་པ་རྣམས་ཡིན་ནོ། །དབྱར་གྱི་ཆར་འགགས་པར་གྱུར་ནས་སྟོན་གྱི་དུས་ན་ཆུ་ཀླུང་རྣམས་ཟད་ཅིང་
འགྲིབ་པའི་སྒོ་དང་མཚུངས་པ་ནི་རྒུད་པ་རྣམས་ཡིན་ནོ། །འདི་ལྟ་སྟེ། ཕྱི་རོལ་གྱི་དངོས་པོ་པད་མ་རྣམས་ཀྱང་སོས་ཀའི་དུས་སུ་རྒྱས་པར་འགྱུར་ཞིང་ནད་མེད་པ་དང་། བུང་བ་རྣམས་ཀྱིས་ཀྱང་སྟེན་པར་བྱེད་དོ། །དགུན་གྱི་དུས་ན་ནི་ཁ་བ་དང་བད་དག་གིས་བུང་བ་རྣམས་ཀྱང་ན་བས་མི་
སྟེན་ནོ། །སོས་ཀའི་དུས་ཀྱི་པད་མ་དེ་ཁོ་ན་བཞིན་དུ་ནད་མེད་པ་ཡིན་ནོ། །དགུན་གྱི་དུས་དང་མཚུངས་པར་གྱུར་པ་ནི་ནད་མེད་པ་མ་ཡིན་པའོ། །དགུན་གྱི་དུས་ན་ནད་མེད་པ་མ་ཡིན་པས་བུང་བ་རྣམས་དང་མཚུངས་པ་ནི་ཕུན་སུམ་ཚོགས་པ་རྣམས་ཡིན་ནོ། །དེ་བཞིན་དུ་སེམས་ཅན་འདི་
དག་རྣམས་ཀྱང་སྲེད་པས་ཤིན་ཏུ་རྣམ་པར་ཉམས་པར་གྱུར་ནས་བདག་ཉིད་ཀྱི་རྒུད་པ་རྣམས་ནི་གཏན་རིག་པར་མི་འགྱུར་རོ། །དེས་མཐོ་བར་བརྩེགས་པའི་རིའི་ནགས་དང་། ཉེ་བའི་ནགས་དང་། ལྗོན་ཤིང་དང་། འབབ་ཆུ་དང་། ཁྲུས་ཀྱི་རྫིང་བུ་དང་། ནེའུ་གསིང་དང་། རིག་པ་
འཛིན་པ་དང་། རི་དགས་དང་། བྱ་དང་། རི་ཁྲོད་དང་། ཆུ་གཤལ་དང་བཅས་པ་རྣམས་ལ་ལེགས་པར་བལྟས་པར་གྱུར་པས་ཀྱང་ཡང་དག་པར་ཇི་ལྟ་བ་བཞིན་དུ་ཕྱི་རོལ་ལ་ཡང་དག་པར་ལྟ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་
གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་བྱང་ཕྱོགས་སྒྲ་མི་སྙན་ན་དགའ་བ་དང་། དགའ་བའི་རིགས་སུ་གྱུར་པ་དང་། དགའ་བར་གྱུར་པ་རིའི་ཕྲེང་བ་འཛིན་པ་ཞེས་བྱ་བ་གཞན་ཡོད་པ་མཐོང་ངོ་། །རི་བོ་དེ་ནི་རྣམ་པར་བཀྲ་བའི་ཕྲེང་བ་རྣམས་འཛིན་པ་ཡིན་

པས་དམར་པོ་དང་། སྔོན་པོ་དང་། དཀར་པོ་དང་། མཐིང་ག་དང་། སེར་པོ་དང་། རྣམ་པ་སྣ་ཚོགས་རྣམས་འདྲེས་པའི་མདོག་གི་ཁ་དོག་དང་ཡང་ལྡན་པའི་ལྗོན་ཤིང་གི་རིགས་རྣམས་ཡོད་དོ། །འདི་ལྟ་སྟེ། སྟ་བ་ཀའི་ཤིང་དང་། མྱ་ངན་མེད་དང་། གསེར་གྱི་ལོ་མ་དང་ལྡན་པ་
དང་། འཁྲི་ཤིང་དང་། ཤིང་གེལ་པས་གཡོགས་པར་གྱུར་པ་རྣམས་སོ། །འདི་ལྟ་སྟེ། ཤིན་ཏུ་གྲོལ་བར་གྱུར་པའི་འཁྲི་ཤིང་རྣམས་དང་། དགའ་བའི་ལོ་མ་དང་རླུང་གི་ཤུགས་ཀྱིས་རབ་ཏུ་གཡོ་བའི་ལོ་མ་རྣམས་སོ། །འདི་ལྟ་སྟེ། ཤིང་ནི་ཙུ་ལ་དང་། བཻ་ཌཱུརྱའི་འདབ་མ་དང་།
ཆུ་ལ་སྐྱེས་པ་དང་རྣམས་སོ། །འདི་ལྟ་སྟེ། བརྒྱ་ལ་ཅུང་ཟད་དང་བི་དྲུ་མའི་འདབ་མ་དང་ཉི་མ་མཐོང་བས་དགའ་བར་འགྱུར་བ་རྣམས་སོ། །འདི་ལྟ་སྟེ། ཏི་ལ་ཀཱ་ས་དང་ཟླ་བའི་འོད་ཀྱིས་དགའ་བ་དང་རྣམས་སོ། །འདི་ལྟ་སྟེ། ཀུ་མུ་དའི་ཚོགས་དང་ཉི་མ་འཕོ་བ་དང་རྣམས་སོ། །
འདི་ལྟ་སྟེ། དུས་སུ་འདོད་པ་དང་ཟླ་བ་ཕྱེད་པ་དང་བཅས་པ་ན་དགའ་བ་རྣམས་སོ། །འདི་ལྟ་སྟེ། ཨུད་པ་ལ་མཚན་མོ་དགའ་བའོ། །འདི་ལྟ་སྟེ། བནྡྷུ་ཛཱི་བི་ཀ་དང་དེའི་རྗེས་ཐོགས་ལ་འབྲས་བུ་འབྱུང་བ་དག་གོ། །འདི་ལྟ་སྟེ། ཨ་མྲ་དང་དུ་བའི་དྲིས་ལྷག་པས་བསྒོས་པ་དག་གོ། །
འདི་ལྟ་སྟེ། མྱ་ངན་མེད་སྔོན་པོ་དང་རེག་པར་བཟོད་པ་དག་གོ། །འདི་ལྟ་སྟེ། ཀུནྡཱ་དང་ཤིན་ཏུ་འཇམ་པ་དང་རྣམས་སོ། །འདི་ལྟ་སྟེ། ཤི་རཱི་ཥཱཿ དང་གོམ་པ་བོར་བར་བཟོད་པ་དག་གོ། །འདི་ལྟ་སྟེ། སེམས་པ་དང་དྲོ་བས་དགའ་བར་འགྱུར་བའི་དྲིའོ། །འདི་ལྟ་སྟེ། ཀུངྐུ་
མ་དང་། ཀུ་སུ་མཱ་དང་། ཡུལ་གཞན་དུ་རྣམ་པར་རྒྱུ་བ་རྣམས་སོ། །འདི་ལྟ་སྟེ། ཀོ་བི་ད་རཱ་དང་བཟང་པོ་མཐོང་བ་དག་གོ། །འདི་ལྟ་སྟེ། ཡིད་བདེ་བ་དང་ལྷའི་སྐྱེ་བོ་རྣམས་དགའ་བའོ། །འདི་ལྟ་སྟེ། ནཱི་ལ་ཨུད་པ་ལ་དང་། པད་མ་དང་། པད་མ་མཚོ་སྐྱེས་དང་། དུས་ཐམས་
ཅད་ཀྱི་མེ་ཏོག་ཅན་རྣམས་སོ། །འདི་ལྟ་སྟེ། སེངྒེ་སྭ་བྲཱཿ དང་ཀ་དམྦ་དགའ་བ་དག་གོ། །འདི་ལྟ་སྟེ། ཆུས་དགའ་བར་འགྱུར་བ་དང་རྐང་པའི་མཐིལ་གྱིས་བརྒྱབ་པས་མེ་ཏོག་འབྱུང་བའོ། །འདི་ལྟ་སྟེ། མྱ་ངན་མེད་དང་རང་བཞིན་གྱིས་དྲི་དང་ཁ་དོག་རྣམས་དགའ་བར་གྱུར་པའོ། །

འདི་ལྟ་སྟེ། ཨ་ཌ་ཀ་དང་སྟེ། དེ་ལྟར་དེ་དག་རྣམས་ནི་ཇི་ལྟར་གཙོ་བོར་གྱུར་པའི་ལྗོན་ཤིང་མེ་ཏོག་གིས་ཕྱུག་པ་རྣམས་ཡོངས་སུ་བསྒྲགས་པ་ཡིན་ཏེ། མེ་ཏོག་གི་ལྗོན་ཤིང་གི་རིགས་ཉི་ཤུ་རྩ་གཉིས་ཡིན་ནོ། །ཕྲེང་བ་འཛིན་པའི་རི་བོའི་ཉེ་འཁོར་རྣམས་ན་ཕན་ཚུན་
དུ་བསྐྱོད་པས་ལོ་འདབ་རྣམས་འཁྲིལ་བར་འགྱུར་བའི་ལྗོན་ཤིང་རྣམས་ཡིན་ནོ། །བུང་བའི་རིགས་ཀྱི་ཚོགས་རྣམས་ཀྱིས་ཉེ་བར་གང་བ་ཡིན་ཏེ། བུང་བ་དེ་དག་རྣམས་ཀྱང་ལ་ལ་བཻ་ཌཱུརྱའི་མདོག་ཡིན་ནོ། །ལ་ལ་ནི་གསེར་གྱི་མདོག་ཡིན་ནོ། །ཁ་ཅིག་ནི་དངུལ་གྱི་མདོག་ཏུ་རྣམ་པར་སྣང་ངོ་། །
ཁ་ཅིག་ནི་གུར་གུམ་གྱི་མདོག་གོ། །ཁ་ཅིག་ནི་སྔོན་པོའོ། །ཁ་ཅིག་ནི་རྣམ་པར་འདྲེས་པར་གྱུར་པའོ། །ཁ་ཅིག་ནི་མཚོ་ལ་རྒྱུ་བའོ། །ཁ་ཅིག་ནི་ལྗོན་ཤིང་ལ་རྒྱུ་བའོ། །ཁ་ཅིག་ནི་ཤིང་གེལ་བ་ལ་རྒྱུ་བའོ། །ཁ་ཅིག་ནི་ཐམས་ཅད་ལ་རྒྱུ་བའོ། །བྱ་རྣམས་ཀྱང་ཁ་ཅིག་ནི་
གསེར་འབར་བའི་ལུས་ལ་དངུལ་གྱི་མདོག་གི་སྒྲོའོ། །ཁ་ཅིག་ནི་དངུལ་གྱི་ལུས་ལ་གསེར་གྱི་སྒྲོའོ། །ཁ་ཅིག་ནི་བི་དྲུ་མའི་ལུས་ལ་བཻ་ཌཱུརྱའི་སྒྲོའོ། །ཁ་ཅིག་ནི་བཻ་ཌཱུརྱ་དང་འདྲ་བར་གྱུར་པའི་ལུས་ལ་ཨིནྡྲ་ནཱི་ལའི་སྒྲོ་རྣམས་སོ། །ཁ་ཅིག་ནི་ཤེལ་གྱི་མདོག་གི་ལུས་ལ་སྒྲོ་རྣམས་གསེར་
གྱི་སྒྲོའི་རང་བཞིན་ནོ། །ཁ་ཅིག་ནི་རིན་པོ་ཆེ་གསུམ་གྱི་ལུས་སུ་གྱུར་པ་འདི་ལྟ་སྟེ། ལུས་ནི་གསེར་གྱི་མདོག་གོ། །སྒྲོ་རྣམས་ནི་དངུལ་གྱི་མདོག་གོ། །རྒྱབ་ནི་བཻ་ཌཱུརྱའི་མདོག་གོ། །ཁ་ཅིག་ནི་རིན་པོ་ཆེ་བདུན་གྱི་མདོག་གི་བྱ་རྣམས་ལ་འདི་ལྟ་སྟེ། ཨིནྡྲ་ནཱི་ལ་དང་། མ་ར་ཀ་ཏ་
དང་། ཤེལ་དང་། མུ་ས་ར་གལྦ་དང་། བི་དྲུ་མ་དང་། སུ་ཀུ་མཱ་རི་ཀཱ་དང་། པདྨ་ར་གའི་མདོག་རྣམས་སོ། །དེ་ལྟར་རང་གི་ལས་ཀྱིས་རྣམ་པར་བཀྲ་བའི་ལུས་ཅན་རྣམས་ཡིན་ཏེ། གཟུགས་རྣམ་པ་དུ་མར་གྱུར་པའི་བུང་བ་རྣམས་དང་བྱ་རྣམས་ཀྱང་རྣམ་པ་སྣ་ཚོགས་པའི་སྒྲོ་དང་ལྡན་
པ་དང་རྗེས་སུ་འཐུན་པ་རྣམ་པ་སྣ་ཚོགས་པའི་སྐད་རྗོད་པར་བྱེད་པ་ཡིན་ནོ། །ལས་སྣ་ཚོགས་པ་རྣམས་ཀྱི་ལུས་རྣམ་པར་བཀྲ་བར་གྱུར་པ་ཡིན་ནོ། །ཁ་དོག་དང་དྲི་དང་ཕྲེང་བ་དང་ལྡན་པའི་མེ་ཏོག་དུ་མ་རྣམས་འབྱུང་བ་ཡང་འདི་ལྟ་སྟེ། གཟུགས་དུ་མ་རྣམས་ཡིན་ནོ། །སྐྱེས་བུ་རྣམས་

ཀྱིས་རང་གིས་ལས་བྱས་པར་གྱུར་པའི་རང་བཞིན་ཇི་ལྟ་བ་བཞིན་ནོ། །ལྗོན་ཤིང་རྣམས་ཀྱང་གཟུགས་དང་དྲི་སྣ་ཚོགས་པ་ཡིན་ཞིང་། བྱང་ཕྱོགས་སྒྲ་མི་སྙན་པ་རྣམས་ཀྱི་དབང་གིས་ཤིང་རྒྱན་རྒྱུ་དང་། རྡོ་བ་དང་། ཆུ་ཀླུང་དང་། ཁྲུས་ཀྱི་རྫིང་བུ་རྣམས་ཀྱང་རྣམ་པ་དུ་མར་དགའ་
བར་གྱུར་པ་དང་། ཡིད་ལ་སྨོན་པ་བཞིན་དུ་རྣམ་པར་བཀྲ་བ་ཡིན་ཏེ། སྔོན་ལེགས་པར་བྱས་པའི་ལས་རྣམས་ཀྱི་རྒྱུ་མཚན་གྱིས་རིན་པོ་ཆེ་རྣམས་དང་ཡང་ལྡན་པ་དང་། ཟས་སྐོམ་གྱི་ཆུ་བོ་རྣམས་ཀྱིས་རྣམ་པར་བརྒྱན་པ་དང་། ལྗོན་ཤིང་དགའ་བར་གྱུར་པ་དང་། སའི་ཉེ་འཁོར་
གྱི་ཆ་དེ་དང་དེ་དག་རྣམས་ལ་བྱང་ཕྱོགས་སྒྲ་མི་སྙན་པའི་སྐྱེས་བུ་རྣམས་རྩེ་དགའ་བར་བྱེད་དོ། །ཕྲེང་བ་འཛིན་པའི་རིའི་ཉེ་འཁོར་རྣམས་ན་རབ་ཏུ་གནས་པའི་སྐྱེས་བུ་གང་ཡིན་པ་དེ་དག་རྣམས་ལ་རྟག་ཏུ་འགྱིང་བག་ཅན་ཞེས་བྱ་བའི་མིང་འབྱུང་བར་འགྱུར་རོ། །ཕྲེང་བ་འཛིན་པའི་ཉེ་འཁོར་
རྣམས་ལ་སྐྱེས་བུ་གང་དག་འགྱིང་བག་ཅན་ཡིན་ཏེ། ཇི་ལྟར་ཡོངས་འདུ་ས་བརྟོལ་གྱི་རྩ་བ་ན་ལྷ་རྣམས་ཀྱི་དབྱར་ཟླ་བ་བཞི་པོ་རྣམས་མ་གཏོགས་པ་དང་། ལྷ་རྣམས་ལ་མིག་འཛུམས་པ་མེད་པ་དང་། ཤ་དང་། རུས་པ་དང་། ཆུ་སེར་དང་། པགས་པ་མེད་པ་རྣམས་དང་འདི་དག་
རྣམས་མ་གཏོགས་པ་ལྷ་རྣམས་དང་བྱང་ཕྱོགས་སྒྲ་མི་སྙན་གྱི་སྐྱེས་བུ་རྟག་ཏུ་འགྱིང་བག་ཅན་རྣམས་ནི་ཐམས་ཅད་ཀྱང་མཚུངས་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་པ་ལས་དང་ཆོས་ལ་ཡང་དག་པར་ཀུན་ཏུ་ལྟ་བར་བྱེད་དེ། སེམས་ཅན་དེ་དག་རྣམས་ནི་རྒྱགས་པ་རྣམ་པ་གསུམ་གྱིས་
རྒྱགས་པར་གྱུར་ནས་ལེགས་པར་སྤྱོད་པ་རྣམས་སྤྱོད་པར་མི་བྱེད་དོ། །འདི་ལྟ་སྟེ། གཟུགས་ཀྱིས་རྒྱགས་པ་དང་། ལང་ཚོའི་རྒྱགས་པ་དང་། གསོན་པའི་རྒྱགས་པ་རྣམས་ཀྱིས་རྒྱགས་པར་གྱུར་པའི་ཕྱིར་ན། ལུས་ཀྱིས་ལེགས་པར་སྤྱད་པ་རྣམས་མི་སྤྱོད་དོ། །ངག་གིས་ལེགས་
པར་སྤྱད་པ་རྣམས་མི་སྤྱོད་དོ། །ཡིད་ཀྱིས་ལེགས་པར་སྤྱད་པ་རྣམས་མི་སྤྱོད་དོ། །ལེགས་པར་བྱས་པའི་ལས་ཀྱི་ལྷག་མ་རྣམས་ཀྱིས་ལྷ་རྣམས་སུ་སྐྱེའོ། །ལྷའི་འཇིག་རྟེན་དེ་ལས་ཤི་འཕོས་པར་གྱུར་ནས་དམྱལ་བ་དང་། ཡི་དགས་དང་། དུད་འགྲོ་དང་། མི་རྣམས་སུ་སྐྱེ་བར་

འགྱུར་ཏེ། གང་གི་ཕྱིར་སྲེད་པ་ནི་དུག་གི་མཆོག་ཟས་དང་འདྲེས་པ་ཡིན་པའི་ཕྱིར་སེམས་ཅན་རྣམས་ལ་མཆོག་ཏུ་རྩུབ་པ་དང་། མཆོག་ཏུ་འཆིང་བ་དང་། མཆོག་ཏུ་ཉམ་ང་བ་ཡིན་ནོ། །དེས་བཅིངས་པའི་ཕྱིར་ན་སེམས་ཅན་འདི་དག་རྣམས་ཀྱིས་ནི་ངེས་པ་ཁོ་ནར་
སྔོན་གྱི་མཐའ་དང་། ཕྱི་མའི་མཐའ་དག་ཀུན་ཏུ་མི་ཤེས་པ་ཡིན་ནོ། །མངར་བའི་མཆོག་ཏུ་གྱུར་པ་ལ་འབྲས་བུ་རྩུབ་པའི་འདོད་པ་རྣམས་ཐམས་ཅད་ནི་ཀིམ་པ་ཀ་སྨིན་པ་དང་འདྲ་བ་དང་། ས་འོག་གི་ཞགས་པ་དང་འདྲ་བ་ཡིན་པ་དེ་དག་སེམས་ཅན་གྱིས་མ་རིག་གོ། །གཡང་ས་
དང་འདྲ་བ་དང་། ཐམས་ཅད་ཀྱང་རྣམ་པར་འབྲལ་བ་དང་། འཆི་བའི་སྡུག་བསྔལ་དང་། སྡུག་བསྔལ་རྣམས་ལ་ཡང་དཔེ་མེད་པ་ཡིན་ནོ། །རི་ཆེན་པོའི་འབབ་ཆུའི་ཤུགས་ལྟར་གཡོ་བ་ཡིན་པས་ལང་ཚོ་ཡང་འདི་ན་རྟག་པ་མ་ཡིན་ཏེ། བརྟན་པ་དང་ཡོངས་སུ་མི་འགྱུར་བའི་ཆོས་
ཅན་གྱིས་གནས་སྐབས་གཅིག་ཀྱང་འགྲོ་བ་ལྔ་ན་ཡོད་པ་མ་ཡིན་ནོ། །འདི་ལྟར་ཉེས་པ་བྱས་པ་ལས་ཀྱི་འཁོར་ལོའི་རླུང་གིས་ཡང་དང་ཡང་འཁོར་བར་གྱུར་དུ་ཟིན་ཀྱང་སྲོག་ཆགས་འདི་དག་རྣམས་ནི་སྐྱོ་བ་ཡང་སྐྱེ་བར་མི་འགྱུར་རོ། །ཕྲེང་བ་འཛིན་པའི་རི་དང་ཉེ་འཁོར་གྱི་སྐྱེས་བུ་རྟག་ཏུ་
འགྱིང་བག་ཅན་རྣམས་ལ་ཡང་ཡང་དག་པར་བལྟས་པར་གྱུར་པས་ཀྱང་ཡང་