Kinh tạng Tây Tạng (Kangyur Đại Học) — 046_མདོ་སྡེ།_ཁ

ོང་ཆེན་པོའི་བདག་པོ་ཚངས་པ་ཆེན་པོ་གཙུག་ཕུད་ཅན་སངས་རྒྱས་ཀྱི་མཐུས་དེ་བཞིན་གཤེགས་པའི་
ཐུགས་ཀྱི་རྣམ་པར་རྟོག་པ་སེམས་ཀྱིས་ཤེས་ཏེ། བཅོམ་ལྡན་འདས་ཐུགས་ལས་ཆུང་ངུ་ལ་ཐུགས་བཏུད་ཅིང་ཆོས་མི་སྟོན་པར་ཤེས་ནས། དེ་འདི་སྙམ་དུ་སེམས་ཏེ། བདག་སོང་ལ་དེ་བཞིན་གཤེགས་པ་ལ་ཆོས་ཀྱི་འཁོར་ལོ་བསྐོར་བར་བསྐུལ་གོར་མ་ཆག་སྙམ་མོ། །དེ་ནས་ཚངས་
པ་གཙུག་ཕུད་ཅན་གྱིས་དེའི་ཚེ། དེ་མ་ཡིན་པ་ཚངས་རིས་ཀྱི་ལྷའི་བུ་གཞན་དག་ལ་སྨྲས་པ། གྲོགས་པོ་དག་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཀྱང་། འདི་ལྟར་ཆོས་མི་སྟོན་པར་ཐུགས་ལས་ཆུང་ངུ་ལ་
ཐུགས་བཏུད་པས། ཀྱེ་མ་འཇིག་རྟེན་འདི་ནི་མ་རུང་ངོ་། །གྲོགས་པོ་དག་ཀྱེ་མ་འཇིག་རྟེན་འདི་ནི་རྣམ་པར་མ་རུང་ངོ་། །བདག་ཅག་དོང་སྟེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཆོས་ཀྱི་འཁོར་ལོ་བསྐོར་བར་བསྐུལ་གོར་མ་ཆག་གོ། །དགེ་སློང་

དག་དེ་ནས་ཚངས་པ་ཆེན་པོ་གཙུག་ཕུད་ཅན་ཚངས་པ་འབུམ་ཕྲག་དྲུག་ཅུ་རྩ་བརྒྱད་ཀྱིས་བསྐོར་ཏེ། མདུན་དུ་བདར་ནས་དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་པ་དང་། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། ཐལ་མོ་སྦྱར་ནས་དེ་བཞིན་གཤེགས་པ་ལ་འདི་
སྐད་ཅེས་གསོལ་ཏོ། །འདི་ལྟར་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཀྱང་ཆོས་མི་སྟོན་པར་ཐུགས་ལས་ཆུང་ངུ་ལ་ཐུགས་བཏུད་པས་ཀྱེ་མའོ་བཅོམ་ལྡན་འདས་འཇིག་རྟེན་འདི་ནི་མ་རུང་ངོ་། །ཀྱེ་མའོ་བཅོམ་ལྡན་འདས་
འཇིག་རྟེན་འདི་ནི་རབ་ཏུ་མ་རུང་ངོ་། །སེམས་ཅན་རྣམ་པ་བཟང་པོ་གོ་སླ་བ། བཅོམ་ལྡན་འདས་ཀྱིས་གསུངས་པའི་དོན་འཚལ་བར་རྔོ་ཐོགས་པ། སྐལ་བ་དང་ལྡན་པ། ནུས་པ་དང་ལྡན་པ་དག་མཆིས་ཏེ། དེ་ལྟ་ལགས་པས་བཅོམ་ལྡན་འདས་ཆོས་ལེགས་པར་བསྟན་དུ་གསོལ། བདེ་
བར་གཤེགས་པ་ཆོས་བསྟན་དུ་གསོལ། དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །ཡེ་ཤེས་ཆེན་པོ་མཆོག་གི་དཀྱིལ་འཁོར་བསྒྲུབས་ནས་ནི། །ཕྱོགས་བཅུ་དག་ཏུ་འོད་ཟེར་རྣམ་པར་འགྱེད་མཛད་དེ། །ཡེ་ཤེས་ཟེར་གྱིས་མི་ཡི་པད་མ་ཁ་འབྱེད་པ། །སྨྲ་བའི་ཉི་མ་དེ་རིང་ཅི་སླད་
བཏང་སྙོམས་བཞུགས། །འཕགས་པའི་ནོར་ལ་སེམས་ཅན་དག་ནི་འགྲོན་གཉེར་ཏེ། །སྲོག་ཆགས་བྱེ་བ་མང་པོ་དབུགས་ཕྱུང་མཛད་ནས་ནི། །གང་སླད་མི་གསུང་འགྲོ་ལ་བཏང་སྙོམས་མཛད་པ་འདི། །འཇིག་རྟེན་རྩ་ལག་ཁྱོད་ལ་རིགས་པ་མ་ལགས་སོ། །ཆོས་ཀྱི་དམ་པའི་རྔ་བོ་ཆེ་ནི་
བརྡུང་དུ་གསོལ། །དམ་པའི་ཆོས་ཀྱི་དུང་ནི་མྱུར་དུ་བུད་དུ་གསོལ། །ཆོས་ཀྱི་མཆོད་སྡོང་ཆེན་པོ་བསྒྲེང་བར་མཛད་དུ་གསོལ། །ཆོས་ཀྱི་མར་མེ་ཆེན་པོ་འབར་བར་མཛད་དུ་གསོལ། །ཆོས་ཆུ་མཆོག་གི་ཆར་པ་རབ་ཏུ་དབབ་ཏུ་གསོལ། །སྲིད་པའི་རྒྱ་མཚོར་གནས་པ་འདི་དག་བསྒྲལ་
དུ་གསོལ། །ནད་ཆེན་ཉོན་མོངས་འདི་དག་ཐར་བར་མཛད་དུ་གསོལ། །ཉོན་མོངས་མེས་གདུངས་རབ་ཏུ་ཞི་བར་མཛད་དུ་གསོལ། །བདེ་བ་ཤིས་པ་རིམས་མེད་མྱ་ངན་མེད་གྱུར་པ། །ཞི་བའི་ལམ་ནི་ཁྱོད་ཀྱིས་ངེས་པར་བསྟན་དུ་གསོལ། །མྱ་ངན་འདས་པའི་ལམ་དུ་མི་འགྲོ་མགོན་

མེད་པ། །ལོག་པའི་ལམ་དུ་གནས་ལ་མགོན་པོ་ཐུགས་རྗེ་མཛོད། །རྣམ་པར་ཐར་པའི་སྒོ་རྣམས་རབ་ཏུ་དབྱེ་བར་གསོལ། །ཆོས་ཚུལ་འཁྲུག་པ་མ་མཆིས་དེ་ནི་གཟུང་དུ་གསོལ། །སྐྱེ་བོ་དམུས་ལོང་དུ་ནི་གྱུར་པ་དེ་དག་ལ། །མགོན་པོ་ཁྱོད་ཀྱིས་ཆོས་མིག་དམ་པ་སྦྱང་དུ་
གསོལ། །མི་ཡི་ཟླ་བ་མགོན་པོ་ཁྱོད་ནི་མ་གཏོགས་པར། །འཇིག་རྟེན་དག་གི་སྐྱེ་དང་རྒ་བ་སེལ་བགྱིད་པ། །ཚངས་པའི་འཇིག་རྟེན་དང་ནི་ལྷ་ཡི་འཇིག་རྟེན་དང་། །གནོད་སྦྱིན་དྲི་ཟ་མི་ཡི་འཇིག་རྟེན་ན་མ་མཆིས། །ལྷ་རྣམས་ཐམས་ཅད་ལྟག་པར་སྤྱད་པར་བགྱིས་ནས་ནི། །བདག་ནི་
ཆོས་རྒྱལ་ཁྱོད་ལ་གསོལ་བ་འདེབས་པ་ལགས། །བསོད་ནམས་འདི་ཡིས་བདག་ཀྱང་རབ་ཏུ་མྱུར་བར་ནི། །ཆོས་ཀྱི་འཁོར་ལོ་དམ་པ་རབ་ཏུ་སྐོར་གྱུར་ཅིག །དགེ་སློང་དག་དེ་བཞིན་གཤེགས་པས་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་རྗེས་སུ་གཟུང་བའི་ཕྱིར། ཐུགས་བརྩེ་
བར་དགོངས་ཏེ། ཚངས་པ་ཆེན་པོ་གཙུག་པུད་ཅན་ལ་ཅང་མི་གསུང་བས་གནང་ངོ་། །དེ་ནས་ཚངས་པ་ཆེན་པོ་གཙུག་པུད་ཅན་གྱིས་དེ་བཞིན་གཤེགས་པས་ཅང་མི་གསུང་བས་གནང་བར་རིག་ནས། ལྷའི་ཙན་དན་གྱི་ཕྱེ་མ་དང་། ཨ་ག་རུའི་ཕྱེ་མས་དེ་བཞིན་གཤེགས་པ་ལ་མངོན་པར་
གཏོར་ནས་དགའ་བ་དང་མཆོག་ཏུ་དགའ་བ་སྐྱེས་ཏེ། དེ་ཉིད་དུ་མི་སྣང་བར་གྱུར་ཏོ། །དགེ་སློང་དག་དེ་ནས་དེ་བཞིན་གཤེགས་པས་ཆོས་ལ་འཇིག་རྟེན་གུས་པ་བསྐྱེད་པ་དང་། ཚངས་པ་ཆེན་པོ་གཙུག་པུད་ཅན་ཡང་དེ་བཞིན་གཤེགས་པ་ལ་ཡང་དང་ཡང་བསྐུལ་བས་དགེ་བའི་རྩ་བ་རྣམ་པར་
སྤེལ་བ་དང་། ཆོས་ཀྱང་ཤིན་ཏུ་ཟབ་པའི་ཕྱིར་ཡང་གཅིག་པུ་དབེན་པར་གཤེགས་ཏེ། ནང་དུ་ཡང་དག་བཞག་ནས། ཐུགས་ལ་འདི་ལྟ་བུར་རྣམ་པར་རྟོག་པར་གྱུར་ཏེ། བདག་གིས་ཆོས་ཟབ་པ། ཕྲ་བ། གསལ་བ། ཁོང་དུ་ཆུད་པར་དཀའ་བ། བརྟག་མི་ནུས་པ། རྟོག་གེའི་
སྤྱོད་ཡུལ་མ་ཡིན་པ། མཁས་པ་དང་མཛངས་པས་རིག་པ། འཇིག་རྟེན་ཐམས་ཅད་དང་མི་འཐུན་པ། མཐོང་བར་དཀའ་བ། ཕུང་པོ་ཐམས་ཅད་བོར་བ། འདུ་བྱེད་ཐམས་ཅད་ཉེ་བར་ཞི་བ། ཞི་གནས་ཀྱི་ལམ་གྱིས་ཆད་པ། སྟོང་པ་ཉིད་དམིགས་སུ་མེད་པ། སྲེད་པ་ཟད་པ།

འདོད་ཆགས་དང་བྲལ་བ། འགོག་པ། མྱ་ངན་ལས་འདས་པ་འདི་མངོན་པར་རྫོགས་པར་སངས་རྒྱས་ཏེ། གལ་ཏེ་བདག་གིས་ཆོས་འདི་བསྟན་ལ། གཞན་གྱིས་འདི་ཁོང་དུ་མ་ཆུད་ན་དེ་ནི་བདག་ལ་ཤིན་ཏུ་ཐོ་བཙམས་པར་འགྱུར་གྱིས་བདག་སྙིང་ལས་ཆུང་ངུར་གནས་པས་གནས་པར་བྱ་
གོར་མ་ཆག་སྙམ་མོ། །དགེ་སློང་དག་དེ་ནས་སངས་རྒྱས་ཀྱི་མཐུས། ཚངས་པ་ཆེན་པོ་གཙུག་ཕུད་ཅན་གྱིས་ཡང་དེ་བཞིན་གཤེགས་པའི་ཐུགས་ཀྱི་རྣམ་པར་རྟོག་པ་དེ་ལྟ་བུ་དེ་སེམས་ཀྱིས་ཤེས་ནས། ལྷའི་དབང་པོ་བརྒྱ་བྱིན་ག་ལ་བ་དེར་སོང་སྟེ་ཕྱིན་ནས། ལྷའི་དབང་པོ་བརྒྱ་བྱིན་ལ་འདི་
སྐད་ཅེས་སྨྲས་སོ། །ཀཽ་ཤི་ཀ་ཤེས་པར་གྱིས་ཤིག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཆོས་མི་སྟོན་པར་ཐུགས་ལས་ཆུང་ངུ་ལ་ཐུགས་བཏུད་དེ། །འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་མི་
སྟོན་པར་ཐུགས་ལས་ཆུང་ངུ་ལ་ཐུགས་བཏུད་པས། ཀཽ་ཤི་ཀ་ཀྱེ་མའོ་འཇིག་རྟེན་འདི་ནི་མ་རུང་བར་འགྱུར་རོ། །ཀཽ་ཤི་ཀ་ཀྱེ་མའོ་འཇིག་རྟེན་འདི་ནི་རྣམ་པར་མ་རུང་བར་འགྱུར་རོ། །ཀྱེ་མའོ་འཇིག་རྟེན་འདི་ནི་མ་རིག་པའི་མུན་པ་ཆེན་པོར་བཅུག་པར་འགྱུར་ན། བདག་ཅག་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཆོས་ཀྱི་འཁོར་ལོ་བསྐོར་བར་བསྐུལ་དུ་ཅིའི་ཕྱིར་མི་འདོང་། དེ་ཅིའི་ཕྱིར་ཞེ་ན། མ་བསྐུལ་བར་དེ་བཞིན་གཤེགས་པ་ཆོས་ཀྱི་འཁོར་ལོ་མི་སྐོར་བའི་ཕྱིར་རོ། །གྲོགས་པོ་ལེགས་སོ་ཞེས་ཏེ། བརྒྱ་བྱིན་དང་། ཚངས་
པ་དང་། ས་བླའི་ལྷ་རྣམས་དང་། བར་སྣང་བ་རྣམས་དང་། རྒྱལ་ཆེན་བཞིའི་རིས་དང་། སུམ་ཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། འོད་གསལ་དང་། འབྲས་བུ་ཆེ་དང་། དགེ་རྒྱས་དང་། གནས་
གཙང་མའི་རིས་ཀྱི་ལྷའི་བུ་བརྒྱ་སྟོང་རབ་ཏུ་མང་པོ་ཁ་དོག་མངོན་པར་འཕགས་པ་དག་ནམ་སྲོས་པ་དང་། ལྷའི་ཁ་དོག་དང་། ལྷའི་སྣང་བས་ཤིང་སྒྲོལ་རྒྱུའི་དྲུང་ཉེ་ཚེ་སྣང་བར་བྱས་ནས། དེ་བཞིན་གཤེགས་པ་ག་ལ་བ་དེར་དོང་སྟེ་ཕྱིན་པ་དང་། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ།

བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །ལྷའི་དབང་པོ་བརྒྱ་བྱིན་གྱིས་དེ་བཞིན་གཤེགས་པ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། དེ་བཞིན་གཤེགས་པ་ལ་ཚིགས་སུ་བཅད་པས་མངོན་པར་བསྟོད་དོ། །ཟླ་བ་ཉ་བ་གཟའ་ལས་ཐར་བ་ལྟར། །ཁྱོད་ཀྱི་ཐུགས་ནི་རྣམ་པར་གྲོལ་བ་
ལགས། །གཡུལ་ལས་རྣམ་པར་རྒྱལ་བ་བཞེངས་སུ་གསོལ། །འཇིག་རྟེན་མུན་པར་ཤེས་རབ་འོད་དབྱུང་གསོལ། །དེ་སྐད་ཅེས་གསོལ་པ་དང་། དེ་བཞིན་གཤེགས་པ་ཅང་མི་གསུང་བར་བཞུགས་སོ། །དེ་ནས་ཚངས་པ་ཆེན་པོ་གཙུག་པུད་ཅན་གྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་
སྨྲས་སོ། །ཀཽ་ཤི་ཀ་ཇི་ལྟར་ཁྱོད་ཀྱིས་བསྐུལ་བ་དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཆོས་ཀྱི་འཁོར་ལོ་བསྐོར་བར་གསོལ་བ་མི་གདབ་བོ། །དེ་ནས་ཚངས་པ་ཆེན་པོ་གཙུག་པུད་ཅན་གྱིས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་
ང་ས་ལ་བཙུགས་ནས། དེ་བཞིན་གཤེགས་པ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། དེ་བཞིན་གཤེགས་པ་ལ་ཚིགས་སུ་བཅད་པས་གསོལ་བ། གཡུལ་ལས་རྣམ་པར་རྒྱལ་བ་བཞེངས་སུ་གསོལ། །འཇིག་རྟེན་མུན་པར་ཤེས་རབ་འོད་དབྱུང་གསོལ། །ཀུན་ཏུ་འཚལ་བར་
འགྱུར་བ་མཆིས་ལགས་ཀྱིས། །ཐུབ་པ་ཁྱོད་ཀྱིས་ཆོས་ནི་བསྟན་དུ་གསོལ། །དགེ་སློང་དག་དེ་སྐད་ཅེས་གསོལ་བ་དང་། དེ་བཞིན་གཤེགས་པས་ཚངས་པ་ཆེན་པོ་གཙུག་པུད་ཅན་ལ་འདི་སྐད་ཅེས་བཀའ་སྩལ་ཏོ། །ཚངས་པ་ངས་ཆོས་ཟབ་པ་ཕྲ་བ། གསལ་བ་འདི་མངོན་པར་
རྫོགས་པར་སངས་རྒྱས་ཞེས་བྱ་བ་ནས། དེ་ནི་བདག་ལ་ཤིན་ཏུ་ཐོ་བཙམས་པར་འགྱུར་རོ་ཞེས་བྱ་བའི་བར་དུ་སྦྱར་རོ་ཚངས་པ་ཚིགས་སུ་བཅད་པ་འདི་དག་ང་ལ་རྒྱུན་དུ་སྣང་མོད་ཀྱི། ངའི་ལམ་རྒྱུན་ལས་བཟློག་པར་འགྲོ་བ་ཟབ་པ། མཐོང་བར་དཀའ་བ་དེ་ནི་འདོད་ཆགས་ཀྱིས་ལྡོངས་པ་
དག་གིས་མི་མཐོང་སྟེ། དེ་ལྟ་བས་ན་བསྟན་ཀྱང་མི་ཕན་ནོ། །སྐྱེ་དགུ་འདོད་པ་རྣམས་ལ་བཅིངས། །རྒྱུན་གྱིས་རབ་ཏུ་བདས་པ་ཡིན། །ངས་འདི་ཚེགས་ནི་ཆེན་པོས་རྙེད། །དེ་ལྟ་བས་ན་བསྟན་མི་ཕན། །དགེ་སློང་དག་དེ་ནས་ཚངས་པ་ཆེན་པོ་གཙུག་པུད་ཅན་དང་། ལྷའི་དབང་

པོ་བརྒྱ་བྱིན་གྱིས་དེ་བཞིན་གཤེགས་པ་ཅང་མི་གསུང་བར་གྱུར་པར་རིག་ནས། ལྷའི་བུ་དེ་དག་དང་ལྷན་ཅིག་ཏུ་སྡུག་བསྔལ་ཞིང་ཡིད་མི་བདེ་ནས། དེ་ཉིད་དུ་མི་སྣང་བར་གྱུར་ཏོ། །ལན་གསུམ་གྱི་བར་དུ་དེ་བཞིན་གཤེགས་པ་ཐུགས་ལས་ཆུང་ངུ་ལ་ཐུགས་བཏུད་དོ། །དགེ་སློང་དག་དེའི་ཚེ་ཡུལ་མ་ག་དྷཱའི་
མི་རྣམས་ལ་སྡིག་པ་མི་དགེ་བའི་ལྟ་བར་གྱུར་པ་འདི་ལྟ་བུ་དག་བྱུང་བར་གྱུར་ཏེ། འདི་ལྟ་སྟེ། ཁ་ཅིག་ནི་འདི་སྐད་དུ་རླུང་ལྡང་བར་མི་འགྱུར་རོ་ཞེས་འཛེར་རོ། །ཁ་ཅིག་ནི་འདི་སྐད་དུ་མེ་འབར་བར་མི་འགྱུར་རོ་ཞེས་འཛེར་རོ། །ཁ་ཅིག་ནི་འདི་སྐད་དུ་ཆར་འབབ་པར་མི་འགྱུར་རོ་ཞེས་འཛེར་རོ། །
ཁ་ཅིག་ནི་ཆུ་འབབ་པར་མི་འགྱུར་རོ་ཞེས་འཛེར་རོ། །ཁ་ཅིག་ནི་ལོ་ཏོག་སྐྱེ་བར་མི་འགྱུར་རོ་ཞེས་འཛེར་རོ། །ཁ་ཅིག་ནི་བྱ་རྣམས་ནམ་མཁའ་ལ་འཕུར་བར་མི་འགྱུར་རོ་ཞེས་འཛེར་རོ། །ཁ་ཅིག་ནི་སྦྲུམ་མ་རྣམས་ནད་མེད་པར་བཙའ་བར་མི་འགྱུར་རོ་ཞེས་འཛེར་རོ། །དགེ་སློང་དག་དེ་ནས་
ཚངས་པ་ཆེན་པོ་གཙུག་པུད་ཅན་གྱིས་དེ་བཞིན་གཤེགས་པའི་ཐུགས་ཀྱི་རྣམ་པར་རྟོག་པ་དེ་ལྟ་བུ་དེ་ཡང་ཤེས། ཡུལ་མ་ག་དྷཱའི་མི་རྣམས་ཀྱི་ལྟ་བར་གྱུར་པ་དེ་དག་ཀྱང་རིག་ནས། ནམ་སྲོས་པ་དང་། ཁ་དོག་མངོན་པར་འཕགས་པ་དང་། ལྷའི་སྣང་བས་ཤིང་སྒྲོལ་རྒྱུའི་དྲུང་ཐམས་
ཅད་སྣང་བར་བྱས་ནས། དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་པ་དང་། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། དེ་བཞིན་གཤེགས་པ་ག་ལ་བ་དེ་ལོགས་སུ་ཐལ་
མོ་སྦྱར་བ་བཏུད་ནས། དེ་བཞིན་གཤེགས་པ་ལ་ཚིགས་སུ་བཅད་པ་གསོལ་པ། མ་ག་དྷཱར་ནི་སྔོན་ཆོས་མ་དག་པ། །དྲི་མར་བཅས་པར་སེམས་པའི་སྨྲ་བ་བྱུང་། །དེ་སླད་ཐུབ་པ་བདུད་རྩིའི་སྒོ་དབྱེ་གསོལ། །དྲི་མེད་སངས་རྒྱས་ཆོས་ནི་ཉན་ཅིང་མཆིས། །ཁྱོད་ནི་རང་གི་དགོས་མཛད་
རང་དབང་གྱུར། །སྡུག་བསྔལ་མངོན་པར་འདུ་བྱེད་དྲི་མ་སྤངས། །ཁྱོད་ཀྱི་དགེ་བ་འཕེལ་དང་འགྲིབ་མ་མཆིས། །ཁྱོད་འདིར་ཆོས་མཆོག་ཕ་རོལ་བྱོན་པར་གྱུར། །ཐུབ་པ་ཁྱོད་འདྲ་འཇིག་རྟེན་འདིར་མ་མཆིས། །དྲང་སྲོང་ཆེ་ཁྱོད་ལྷག་པ་ག་ལ་མཆིས། །སྲིད་གསུམ་འདི་ན་རྣམ་པར་ལྷང་

ངེ་སྟེ། །ལྷ་མིན་གནས་ན་མཆིས་པའི་རི་བོ་འདྲ། །སྡུག་བསྔལ་སྐྱེ་བོ་ཐུགས་རྗེ་ཆེ་བསྐྱེད་གསོལ། །ཁྱོད་འདྲ་ནམ་ཡང་བཏང་སྙོམས་མཛད་མི་རིགས། །ཁྱོད་ནི་མི་འཇིགས་སྟོབས་དང་ཡང་དག་ལྡན། །ཁྱོད་ནི་སྐྱེ་བོ་རབ་ཏུ་སྒྲོལ་བར་སྤྱོད། །ལྷ་དང་དགེ་སྦྱོང་བྲམ་ཟེར་བཅས་པ་
ཀུན། །སྐྱེ་དགུ་འདི་དག་རིང་ནས་ཟུག་རྔུར་བཅས། །ནད་རིམས་མ་མཆིས་ནད་མ་མཆིས་གྱུར་ཅིག །འདི་ན་དེ་དག་སྐྱབས་ནི་གཞན་མ་མཆིས། །ཆོས་དེ་རྒྱལ་བས་ཐུགས་སུ་ཆུད་གྱུར་ཏེ། །ཇི་ལྟ་བཞིན་དུ་མི་ཉུང་སྟོན་འགྱུར་ཞེས། །དགེ་བའི་སེམས་ཀྱིས་བདུད་རྩི་དོན་གཉེར་ཞིང་། །ལྷ་
དང་མི་རྣམས་ཁྱོད་ཕྱིར་རིང་ནས་འབྲང་། །དེ་སླད་མཐུ་རྩལ་བཟང་པོ་ཁྱོད་ལ་གསོལ། །རིང་ནས་ལམ་ལས་ཉམས་པའི་སེམས་ཅན་ཐུལ། །མ་ཐོས་དོན་རྣམས་རབ་ཏུ་ཐོས་པར་འཚལ། །ཤིན་ཏུ་ཉམ་ཆུང་རྟས་པར་འཚལ་དང་འདྲ། །རབ་ཏུ་སྐམ་པའི་ས་ལ་སྤྲིན་ལྟ་བུར། །འདྲེན་
པ་ཆོས་ཀྱི་ཆར་པས་ཚིམ་པར་མཛོད། །རིང་ནས་ཉམས་པའི་མི་རྣམས་སྲིད་པ་ན། །ལྟ་ངན་ཐིབས་པོ་ཚེར་མར་བཅས་པར་རྒྱུ། །གང་བསྒོམས་ན་ནི་བདུད་རྩི་ཐོབ་འགྱུར་བ། །ཚེར་མ་མ་མཆིས་དྲང་ལམ་དེ་བསྟན་གསོལ། །ལོང་བ་གཡང་ལྷུང་འདྲེན་པ་མ་མཆིས་པ། །འདི་
ན་དེ་དག་གཞན་གྱིས་དྲང་མི་ནུས། །བློ་ལྡན་ཁྱུ་མཆོག་ཁྱོད་ནི་མོས་བསྐྱེད་དེ། །གཡང་ས་ཆེན་པོར་ལྷུང་བ་གདོན་དུ་གསོལ། །ཐུབ་པ་ཁྱོད་དང་རིང་ནས་རྟག་མི་མཇལ། །ཨུ་དུམ་བཱ་རའི་མེ་ཏོག་བརྒྱ་ལམ་ལྟར། །འདྲེན་པ་རྒྱལ་བ་དག་ནི་ས་ལ་འབྱུང་། །མགོན་པོ་དལ་རྙེད་
སེམས་ཅན་དགྲོལ་དུ་གསོལ། །རང་རྒལ་ནས་ནི་བསྒྲལ་བར་བྱའོ་ཞེས། །སྔོན་སྲིད་ཁྱོད་ཀྱི་དགོངས་པ་འདི་འབྱུང་ངོ་། །ད་ལྟར་ཁྱོད་ནི་ཕ་རོལ་བྱོན་པར་ངེས། །བདེན་པའི་མཐུ་རྩལ་ཐུགས་དམ་མད་པར་མཛོད། །ཐུབ་པ་ཆོས་ཀྱི་སྒྲོན་མས་མུན་པ་སོལ། །དེ་བཞིན་
གཤེགས་པའི་རྒྱལ་མཚན་ཁྱོད་ཀྱིས་སྒྲེང་། །སྙན་པའི་གསུང་བརྗོད་པ་ཡི་དུས་ལ་བབ། །རྔ་སྒྲ་རི་དགས་དབང་ལྟར་བསྒྲག་ཏུ་གསོལ། །དགེ་སློང་དག་དེ་ནས་དེ་བཞིན་གཤེགས་པས་སངས་རྒྱས་ཀྱི་སྤྱན་གྱིས་ཐམས་ཅད་དང་ལྡན་པའི་འཇིག་རྟེན་ལ་གཟིགས་ན། སེམས་ཅན་

དམན་པ་དང་། འབྲིང་དང་། གྱ་ནོམ་དང་། མཐོ་བ་དང་། དམའ་བ་དང་། བར་མ་དང་། རྣམ་པ་བཟང་པོ་དང་། རྣམ་པར་སྦྱང་སླ་བ་དང་། རྣམ་པ་ངན་པ་དང་། །རྣམ་པར་སྦྱང་དཀའ་བ་དང་། ཟུར་ཙམ་གྱིས་གོ་བ་དང་། ཚིག་ལྷུར་ལེན་པ་དང་། སེམས་ཅན་གྱི་ཕུང་པོ་
གསུམ་སྟེ། གཅིག་ནི་ལོག་པ་ཉིད་དུ་ངེས་པ་དང་། གཅིག་ནི་ཡང་དག་པ་ཉིད་དུ་ངེས་པ་དང་། གཅིག་ནི་མ་ངེས་པ་གཟིགས་སོ། །དགེ་སློང་དག་འདི་ལྟ་སྟེ་དཔེར་ན། མི་ཞིག་རྫིང་གི་འགྲམ་ན་འདུག་པས་པད་མ་ཁ་ཅིག་ནི་ཆུའི་ནང་ནས་འཐོན། ཁ་ཅིག་ནི་ཆུ་དང་མཉམ། ཁ་
ཅིག་ནི་ཆུ་ལས་འཕགས་པ་དག་མཐོང་ངོ་། །དགེ་སློང་དག་དེ་བཞིན་དུ་དེ་བཞིན་གཤེགས་པས་སངས་རྒྱས་ཀྱི་སྤྱན་གྱིས་ཐམས་ཅད་དང་ལྡན་པའི་འཇིག་རྟེན་ན་སེམས་ཅན་ཕུང་པོ་གསུམ་དུ་རྣམ་པར་གནས་པ་དག་གཟིགས་སོ། །དགེ་སློང་དག་དེ་ནས་དེ་བཞིན་གཤེགས་པ་འདི་
སྙམ་དུ་དགོངས་ཏེ། ངས་ཆོས་བསྟན་ཀྱང་རུང་། མ་བསྟན་ཀྱང་རུང་སྟེ། གང་ལོག་པ་ཉིད་དུ་ངེས་པའི་ཕུང་པོ་འདི་ནི་ཆོས་འདི་ཤེས་པར་མི་འགྱུར་རོ། །ངས་ཆོས་བསྟན་ཀྱང་རུང་མ་བསྟན་ཀྱང་རུང་སྟེ། གང་ཡང་དག་པ་ཉིད་དུ་ངེས་པའི་ཕུང་པོ་འདི་ནི་ཆོས་འདི་ཤེས་པར་འགྱུར་
རོ། །མ་ངེས་པའི་ཕུང་པོ་གང་ཡིན་པ་འདི་ནི་གལ་ཏེ་ཆོས་བསྟན་ན་ནི་ཤེས་པར་འགྱུར། ཇི་སྟེ་ཆོས་མ་བསྟན་ན་ནི་ཤེས་པར་མི་འགྱུར་རོ་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པས་མ་ངེས་པའི་ཕུང་པོར་རྣམ་པར་གནས་པའི་སེམས་ཅན་རྣམས་ལས་བརྩམས་ཏེ་ཐུགས་
རྗེ་ཆེན་པོ་བསྐྱེད་དོ། །དེ་ནས་དེ་བཞིན་གཤེགས་པས་བདག་ཉིད་ཀྱི་ཡང་དག་པའི་ཡེ་ཤེས་འདིའི་དབང་དུ་མཛད་དེ། ཚངས་པ་ཆེན་པོ་གཙུག་ཕུད་ཅན་གྱིས་བསྐུལ་བ་ཡང་མཁྱེན་ནས། ཚངས་པ་ཆེན་པོ་གཙུག་པུད་ཅན་ལ་ཚིགས་སུ་བཅད་པས་བཀའ་སྩལ་པ། །
ཚངས་པ་མ་ག་དྷཱ་ཡི་སེམས་ཅན་གང་། །རྣ་བ་ལྡན་ཞིང་དད་དང་ལྡན་གྱུར་ལ། །མི་འཚེ་འདུ་ཤེས་རྟག་ཏུ་ཆོས་ཉན་པས། །དེ་དག་ལ་ནི་བདུད་རྩིའི་སྒོ་ཕྱེའོ། །དེ་ནས་ཚངས་པ་ཆེན་པོ་གཙུག་པུད་ཅན་གྱིས་དེ་བཞིན་གཤེགས་པས་གནང་བར་རིག་ནས་ཚིམ་ཞིང་མགུ་ལ་

ཡི་རངས་ཏེ། རབ་ཏུ་དགའ་ནས་དགའ་བ་དང་ཡིད་བདེ་བ་སྐྱེས་ཏེ། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ནས་དེ་ཉིད་དུ་མི་སྣང་བར་གྱུར་ཏོ། །དགེ་སློང་དག་དེ་ནས་དེའི་ཚེ་ས་བླའི་ལྷ་རྣམས་ཀྱིས་བར་སྣང་གི་ལྷ་རྣམས་ལ་ཚིག་ཏུ་བརྗོད་ཅིང་སྒྲ་བསྒྲགས་པ།
གྲོགས་པོ་དག་དོ་མོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཀྱི་འཁོར་ལོ་བསྐོར་བར་གནང་སྟེ། དེ་ནི་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་
ཀྱི་དོན་དང་། ཕན་པ་དང་། བདེ་བར་འགྱུར་རོ། །ཀྱེ་གྲོགས་པོ་དག་ལྷ་མ་ཡིན་གྱི་རིས་ནི་ཡོངས་སུ་འགྲིབ་པར་འགྱུར་རོ། །ལྷའི་རིས་ནི་ཡོངས་སུ་རྫོགས་པར་འགྱུར་རོ། །འཇིག་རྟེན་ན་སེམས་ཅན་མང་པོ་ཡོངས་སུ་མྱ་ངན་ལས་འདའ་བར་འགྱུར་རོ། །དེ་ལྟར་བར་སྣང་གི་ལྷ་རྣམས་
ཀྱིས་ས་བླའི་ལྷ་རྣམས་ལས་ཐོས་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ལ་སྒྲར་བརྗོད་དོ། །རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་སུམ་ཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་རྣམས་ལའོ། །དེ་དག་གིས་ཀྱང་
ཚངས་རིས་ཀྱི་ལྷ་རྣམས་ལ་ཚིག་ཏུ་བརྗོད་ཅིང་སྒྲ་བསྒྲགས་ཏེ། གྲོགས་པོ་དག་དོ་མོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཀྱི་འཁོར་ལོ་བསྐོར་བར་གནང་སྟེ། དེ་ནི་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་
རྟེན་ལ་ཐུགས་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་དོན་དང་ཕན་པ་དང་བདེ་བར་འགྱུར་རོ། །ཀྱེ་གྲོགས་པོ་དག་ལྷ་མ་ཡིན་གྱི་རིས་ནི་ཡོངས་སུ་འགྲིབ་པར་འགྱུར་རོ། །ལྷའི་རིས་ནི་ཡོངས་སུ་འཕེལ་བར་འགྱུར་རོ། །འཇིག་རྟེན་ན་སེམས་ཅན་མང་པོ་ཡོངས་སུ་མྱ་ངན་
ལས་འདའ་བར་འགྱུར་རོ། །དགེ་སློང་དག་དེ་ལྟར་སྐད་ཅིག་དེ་དང་། ཐང་ཅིག་དེ་དང་། ཡུད་ཙམ་དེ་ལ་ས་བླའི་ལྷ་རྣམས་ནས་བཟུང་སྟེ། ཚངས་རིས་ཀྱི་ལྷའི་བར་མན་ཆད་དུ་གྲོགས་པོ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་དོ་མོད་ཆོས་

ཀྱི་འཁོར་ལོ་བསྐོར་བར་གནང་སྟེ་ཞེས་བྱ་བ་ནས་སྔ་མ་བཞིན་དུ་སྒྲ་སྐད་གཅིག་མངོན་དུ་བྱུང་བར་གྱུར་ཏོ། །དགེ་སློང་དག་དེ་ནས་བྱང་ཆུབ་ཀྱི་ཤིང་གི་ལྷ་ཆོས་སྲེད་ཅེས་བྱ་བ་དང་། ཆོས་འདོད་དང་། ཆོས་ཀྱི་བློ་གྲོས་དང་། ཆོས་སྤྱོད་དང་། བྱང་ཆུབ་ཀྱི་ཤིང་གི་ལྷ་བཞི་པོ་དེ་དག་གིས་དེ་བཞིན་གཤེགས་
པའི་ཞབས་གཉིས་ལ་གཏུགས་ཏེ། འདི་སྐད་ཅེས་གསོལ་ཏོ། །བཅོམ་ལྡན་འདས་གང་དུ་ཆོས་ཀྱི་འཁོར་ལོ་བསྐོར་བར་མཛད། དགེ་སློང་དག་དེ་སྐད་ཅེས་གསོལ་པ་དང་། དེ་བཞིན་གཤེགས་པས་ལྷ་དེ་དག་ལ་འདི་སྐད་ཅེས་བཀའ་སྩལ་ཏོ། །གྲོང་ཁྱེར་བཱ་རཱ་ཎ་སཱིར་དྲང་སྲོང་ལྷུང་བ་རི་
དགས་ཀྱི་ནགས་སུའོ། །དེ་དག་གིས་གསོལ་པ། བཅོམ་ལྡན་འདས་གྲོང་ཁྱེར་བཱ་རཱ་ཎ་སཱི་ནི་སྐྱེ་བོའི་ཚོགས་ཆུང་བ་ལགས། རི་དགས་ཀྱི་ནགས་ནི་ཞུགས་ཤིང་གི་གྲིབ་མ་ཆུང་བ་ལགས་ཏེ། བཅོམ་ལྡན་འདས་གྲོང་ཁྱེར་ཆེན་པོ་འབྱོར་པ། རྒྱས་པ། བདེ་བ། ལོ་ལེགས་པ།
ཉམས་དགྱེས་པ། མི་དང་སྐྱེ་བོ་མང་པོས་གང་བ། སྐྱེད་མོས་ཚལ་དང་། ནགས་དང་ནགས་འདབས་ཀྱིས་བརྒྱན་པ། གཞན་དག་ཀྱང་མཆིས་ན། བཅོམ་ལྡན་འདས་དེ་དག་ཅིག་ཏུ་ཆོས་ཀྱི་འཁོར་ལོ་བསྐོར་བར་གསོལ། དེ་བཞིན་གཤེགས་པས་བཀའ་སྩལ་པ། བཞིན་བཟངས་
དག་དེ་སྐད་མ་ཟེར་ཅིག །དེ་ཅིའི་ཕྱིར་ཞེ་ན། དེར་ནི་ང་ཡིས་མཆོད་སྦྱིན་སྟོང་ཕྲག་བྱེ་བ་ཁྲག་ཁྲིག་དྲུག་ཅུ་བྱས། །དེར་ནི་སངས་རྒྱས་སྟོང་ཕྲག་བྱེ་བ་ཁྲག་ཁྲིག་དྲུག་ཅུ་དེ་དག་མཆོད། །བཱ་རཱ་ཎ་སཱི་དམ་པ་དེ་ནི་སྔོན་གྱི་དྲང་སྲོང་རྣམས་ཀྱི་གནས། །ས་དེ་ལྷ་དང་ཀླུ་ཡིས་མངོན་བསྟོད་རྟག་ཏུ་ཆོས་ནི་
མངོན་པར་གཞོལ། །ངས་ནི་སྔོན་ཆད་སངས་རྒྱས་བྱེ་བ་སྟོང་ཕྲག་དགུ་བཅུ་རྩ་གཅིག་དྲན། །དེ་དག་དྲང་སྲོང་ཞེས་བྱ་ནགས་མཆོག་དེར་ནི་འཁོར་ལོ་དམ་པ་བསྐོར། །ཞི་ཞིང་ཉེར་ཞི་བསམ་གཏན་མངོན་གྱུར་རྟག་ཏུ་རི་དགས་རྣམས་ཀྱིས་བསྟེན། །དེ་ཕྱིར་དྲང་སྲོང་ཞེས་བྱ་ནགས་མཆོག་དེར་ནི་འཁོར་
ལོ་དམ་པ་བསྐོར། །བསྐུལ་བའི་ལེའུ་ཞེས་བྱ་བ་སྟེ། ཉི་ཤུ་རྩ་ལྔ་པའོ།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་བདུན་པ། དགེ་སློང་དག་དེ་ནས་དེ་བཞིན་གཤེགས་པ་བྱ་བ་མཛད་པ། བྱེད་པ་མཛད་པ།

བཅིངས་པ་ཐམས་ཅད་ཡང་དག་པར་ཆད་པ། ཉོན་མོངས་པ་ཐམས་ཅད་བསལ་བ། དྲི་མ་དང་ཉོན་མོངས་པ་སྦྱངས་པ། བདུད་ཕྱིར་རྒོལ་བ་བཅོམ་པ། སངས་རྒྱས་ཀྱི་ཆོས་ཐམས་ཅད་ཀྱི་ཚུལ་གྱི་རྗེས་སུ་ཞུགས་པ། ཐམས་ཅད་མཁྱེན་པ་ཐམས་ཅད་གཟིགས་པ། སྟོབས་བཅུ་
དང་ལྡན་པ། མི་འཇིགས་པ་བཞི་བརྙེས་པ། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་རབ་ཏུ་རྫོགས་པ། སྤྱན་ལྔ་དང་ལྡན་པ། སངས་རྒྱས་ཀྱི་སྤྱན་སྒྲིབ་པ་མི་མངའ་བས་འཇིག་རྟེན་ཐམས་ཅད་ལ་གཟིགས་ནས་འདི་སྙམ་དུ་དགོངས་ཏེ། ངས་ཐམས་ཅད་ཀྱི་ཐོག་མར་གང་ལ་ཡང་ཆོས་བསྟན་
པར་བྱ། སེམས་ཅན་དག་པ། རྣམ་པ་བཟང་བ། གདུལ་སླ་བ། གོ་སླ་བ། སྦྱང་སླ་བ། འདོད་ཆགས་དང་། ཞེ་སྡང་དང་། གཏི་མུག་ཆུང་བ། རྣམ་པར་ཤེས་པ་ལྐོག་ཏུ་མ་གྱུར་པ། གང་ཆོས་མ་ཐོས་ན་ཡོངས་སུ་ཉམས་པར་འགྱུར་བ། གང་དག་ལ་བདག་གིས་ཐོག་མར་ཆོས་
བསྟན་པར་བྱ། གང་ལ་ཆོས་འདི་བསྟན་ནས་ཀྱང་ཤེས་པར་འགྱུར་ཞིང་ཐོ་འཚམ་པར་མི་འགྱུར་བ་ནི་གང་ཡིན་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། རངས་བྱེད་ཀྱི་བུ་ལྷག་སྤྱོད་ནི་དག་པ། རྣམ་པ་བཟང་བ། གདུལ་སླ་བ། གོ་སླ་བ། སྦྱང་སླ་བ།
འདོད་ཆགས་དང་ཞེ་སྡང་དང་གཏི་མུག་ཆུང་བ། རྣམ་པར་ཤེས་པ་ལྐོག་ཏུ་མ་གྱུར་པ་སྟེ། དེ་ཆོས་མ་ཐོས་ན་ཡོངས་སུ་ཉམས་པར་འགྱུར་བའོ། །དེ་ནི་ཉན་ཐོས་རྣམས་ལ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བརྟུལ་ཞུགས་དང་འཐུན་པར་ཆོས་སྟོན་པ་ཡིན་ན། དེ་ད་ལྟར་ག་ལ་
འདུག་སྙམ་དགོངས་པ་དང་། དེ་འཆི་བའི་དུས་བྱས་ནས་དེང་དུ་ཞག་བདུན་ལོན་པར་མཁྱེན་ཏོ། །ལྷ་རྣམས་ཀྱིས་དེ་བཞིན་གཤེགས་པའི་ཞབས་ལ་གཏུགས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་ཏེ། རངས་བྱེད་
ཀྱི་བུ་ལྷག་སྤྱོད་གུམ་ནས་དེང་དུ་དགུང་བདུན་ལགས་སོ། །དགེ་སློང་དག་ངས་འདི་སྙམ་དུ་བསམས་ཏེ། ཨེ་མ་རངས་བྱེད་ཀྱི་བུ་ལྷག་སྤྱོད་དེ་ཆོས་ཤིན་ཏུ་བཟང་པོ་འདི་ལྟ་བུ་འདི་མ་ཐོས་པར་ཤི་བའི་དུས་བྱས་པ་ནི་ཆེར་ཉམས་སོ། །གལ་ཏེ་དེས་ཆོས་འདི་ཐོས་ན་ཤེས་པར་འགྱུར་ཏེ། དེ་ལ་

བདག་གིས་ཐོག་མར་ཆོས་བསྟན་པར་བྱ་ཞིང་དེ་ཡང་བདག་ལ་ཐོ་འཚམས་པར་མི་འགྱུར་རོ་སྙམ་མོ། །དགེ་སློང་དག་དེ་བཞིན་གཤེགས་པས་ཡང་འདི་སྙམ་དུ་དགོངས་ཏེ། སེམས་ཅན་དག་པ་གདུལ་སླ་བ་ཞེས་བྱ་བ་ནས། ངའི་ཆོས་བསྟན་པ་ཐོ་འཚམ་པར་མི་འགྱུར་བ་ཞེས་བྱ་བའི་བར་དུ་སྔ་
མ་བཞིན་ཏེ། དེ་ལྟ་བུ་གཞན་སུ་ཡོད་སྙམ་མོ། དགེ་སློང་དག་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། སྒྱུ་རྩལ་ཤེས་ཀྱི་བུ་རིང་འཕུར་ནི་དག་པ་ཞེས་བྱ་བ་ནས། ངའི་ཆོས་བསྟན་པ་ཐོ་འཚམ་པར་མི་འགྱུར་ཞེས་བྱ་བའི་བར་དུ་སྟེ། དེ་ད་ལྟར་ག་ལ་འདུག་སྙམ་དགོངས་ན། དེ་ཡང་འཆི་
བའི་དུས་བྱས་ནས་དེང་དུ་ཞག་གསུམ་ལོན་པར་མཁྱེན་ཏོ། གནས་གཙང་མའི་རིས་ཀྱི་ལྷ་རྣམས་ཀྱིས་ཀྱང་དོན་དེ་དེ་བཞིན་གཤེགས་པ་ལ་གསོལ་ཏེ། །བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་ཏེ། སྒྱུ་རྩལ་ཤེས་ཀྱི་བུ་རིང་འཕུར་གུམ་ནས་དེང་དུ་དགུང་
གསུམ་ལགས་སོ། །དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། ཨེ་མ་སྒྱུ་རྩལ་ཤེས་ཀྱི་བུ་རིང་འཕུར་དེ་ཆོས་ཤིན་ཏུ་བཟང་པོ་འདི་ལྟ་བུ་འདི་མ་ཐོས་པར་ཤི་བ་ནི་ཆེར་ཉམས་སོ་སྙམ་མོ། །དགེ་སློང་དག་དེ་བཞིན་གཤེགས་པས་ཡང་འདི་སྙམ་དུ་དགོངས་ཏེ། སེམས་ཅན་དག་པ་
རྣམ་པ་བཟང་བ་ཞེས་བྱ་བ་ནས་ངའི་ཆོས་བསྟན་པ་ཐོ་འཚམ་པར་མི་འགྱུར་ཞེས་བྱ་བའི་བར་དུ་སྔ་མ་བཞིན་ཏེ། དེ་ལྟ་བུ་གཞན་སུ་ཡོད་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པས་འདི་སྙམ་དུ་དགོངས་ཏེ། ལྔ་སྡེ་བཟང་པོ་རྣམས་ནི་དག་པ། རྣམ་པ་བཟང་བ། གདུལ་སླ་བ། གོ་སླ་
བ། རྣམ་པར་སྦྱང་སླ་བ། འདོད་ཆགས་དང་ཞེ་སྡང་དང་། གཏི་མུག་ཆུང་བ། རྣམ་པར་ཤེས་པ་ལྐོག་ཏུ་མ་གྱུར་པ་སྟེ། དེ་དག་ཆོས་མ་ཐོས་ན་ཡོངས་སུ་ཉམས་པར་འགྱུར་བའོ། །ང་དཀའ་བ་སྤྱད་པ་སྤྱོད་པ་ན་ཡང་དེ་དག་གིས་བསྙེན་བཀུར་བྱས་པར་གྱུར་ཏེ། དེ་དག་ངས་ཆོས་བསྟན་ན་
ཤེས་པར་འགྱུར་ཞིང་། ང་ལ་ཐོ་འཚམ་པར་མི་འགྱུར་རོ་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། བདག་གིས་ལྔ་སྡེ་བཟང་པོ་རྣམས་ལ་ཐོག་མར་ཆོས་བསྟན་པར་བྱ་གོར་མ་ཆག་སྙམ་མོ། །དགེ་སློང་དག་དེ་ནས་ཡང་དེ་བཞིན་གཤེགས་པ་འདི་

སྙམ་དུ་དགོངས་ཏེ། ལྔ་སྡེ་བཟང་པོ་དག་ད་ལྟར་གང་ན་འཁོད་སྙམ་མོ། །དེ་ནས་དེ་བཞིན་གཤེགས་པས་སངས་རྒྱས་ཀྱི་སྤྱན་གྱིས་ཐམས་ཅད་དང་ལྡན་པའི་འཇིག་རྟེན་ལ་རྣམ་པར་གཟིགས་ན་ལྔ་སྡེ་བཟང་པོ་དག་གྲོང་ཁྱེར་བཱ་རཱ་ཎ་སཱིའི་དྲང་སྲོང་ལྷུང་བ་རི་དགས་ཀྱི་ནགས་ན་འཁོད་
པར་གཟིགས་སོ། །གཟིགས་ནས་ཀྱང་དེ་བཞིན་གཤེགས་པས་འདི་སྙམ་དུ་དགོངས་ཏེ། བདག་གིས་ལྔ་སྡེ་བཟང་པོ་རྣམས་ལ་ཐམས་ཅད་ཀྱི་ཐོག་མར་ཆོས་བསྟན་པར་བྱ་གོར་མ་ཆག་གོ། །དེ་དག་གིས་ངས་ཐམས་ཅད་ཀྱི་ཐོག་མར་ཆོས་བསྟན་པ་ཀུན་ཤེས་པར་འགྱུར་རོ་སྙམ་མོ། །དགེ་
སློང་དག་དེ་ཅིའི་ཕྱིར་ཞེ་ན། དེ་དག་ནི་སྤྱད་པ་དང་ལྡན་པ་ཆོས་དཀར་པོ་རྣམས་ཤིན་ཏུ་ཡོངས་སུ་བསྡུས་པ། ཐར་པའི་ལམ་ལ་མངོན་དུ་ཕྱོགས་པ། བགེགས་དང་བྲལ་བ་དག་གོ། །དགེ་སློང་དག་དེ་ནས་དེ་བཞིན་གཤེགས་པས་དེ་སྙམ་དུ་དགོངས་ནས་བྱང་ཆུབ་ཀྱི་སྙིང་པོ་ལས་བཞེངས་
ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཤེགས་ནས། མཐར་གྱིས་ཡུལ་མ་ག་དྷཱར་རྒྱུ་ཞིང་ཡུལ་གསལ་ལྡན་དུ་གཤེགས་སོ། །དེ་ནས་རི་ག་ཡཱ་དང་། བྱང་ཆུབ་ཀྱི་སྙིང་པོའི་བར་དུ་ཀུན་དུ་འཚོ་བ་པ་གཞན་ཞིག་གིས་དེ་བཞིན་གཤེགས་པ་རྒྱང་རིང་པོ་ནས་
གཤེགས་པ་མཐོང་ངོ་། །མཐོང་ནས་ཀྱང་དེ་བཞིན་གཤེགས་པ་ག་ལ་བ་དེར་སོང་སྟེ། ཕྱིན་ནས་ཕྱོགས་གཅིག་ཏུ་འདུག་གོ། །དགེ་སློང་དག་ཕྱོགས་གཅིག་ཏུ་འདུག་ནས་ཀྱང་ཀུན་ཏུ་འཚོ་བ་པ་དེ་དེ་བཞིན་གཤེགས་པ་དང་ལྷན་ཅིག་ཏུ་ཡང་དག་པར་མགུ་བར་བྱ་བའི་གཏམ་རྣམ་པ་མང་པོ་བྱས་
ནས་འདི་སྐད་ཅེས་གསོལ་ཏོ། །ཚེ་དང་ལྡན་པ་གཽ་ཏ་མ་ཁྱོད་ཀྱི་དབང་པོ་རྣམས་ནི་ཤིན་ཏུ་གསལ་ལོ། །ཁྱོད་ཀྱི་པགས་པའི་མདོག་ནི་སེར་པོར་གདའ་ཞིང་ཡོངས་སུ་དག་ལ་ཡོངས་སུ་བྱང་བ་སྟེ། འདི་ལྟ་སྟེ་དཔེར་ན། སྟོན་ཀ་རྒྱ་ཤུག་ཁ་དོག་རྩ་སེར་ཞིང་འོད་གསལ་ཏེ། སེར་པོར་གདའ་བ་དེ་
བཞིན་དུ་གཽ་ཏ་མ་ཁྱོད་ཀྱི་དབང་པོ་རྣམས་ཡོངས་སུ་དག་ཅིང་། ཞལ་གྱི་དཀྱིལ་འཁོར་ཡང་ཡོངས་སུ་དག་ལ་ཡོངས་སུ་བྱང་བའོ། །འདི་ལྟ་སྟེ་དཔེར་ན། ཤིང་ཏ་ལའི་འབྲས་བུ་སྨིན་པ་རྩ་བ་ནས་ཆད་མ་ཐག་པའི་རྩ་བ་ལོགས་སེར་པོར་གདའ་བ་ལགས་ཏེ། ཡོངས་སུ་དག་ཅིང་ཡོངས་སུ་བྱང་བ་དེ་

བཞིན་དུ་གཽ་ཏ་མ་ཁྱོད་ཀྱི་དབང་པོ་རྣམས་ནི་ཡོངས་སུ་དག་ལ། ཞལ་གྱི་དཀྱིལ་འཁོར་ནི་ཡོངས་སུ་དག་ཅིང་ཡོངས་སུ་བྱང་བའོ། །འདི་ལྟ་སྟེ་དཔེར་ན། འཛམ་བུའི་ཆུ་བོའི་གསེར་གྱི་མགུལ་རྒྱན་ཐབ་ནས་ཕྱུང་སྟེ། མགར་བའི་བུ་མཁས་པས་ལེགས་པར་ཡོངས་སུ་སྦྱང་བ་བགྱིས་པ། ལ་
བ་དུར་ཀའི་ནང་དུ་སྩལ་ན། ཁ་དོག་དང་ལྡན་པར་འགྱུར་ཏེ། ཡོངས་སུ་དག་ཅིང་ཡོངས་སུ་བྱང་ལ། སེར་པོར་གདའ་ཞིང་འོད་གསལ་བར་འགྱུར་རོ། །དེ་བཞིན་དུ་གཽ་ཏ་མ་ཁྱོད་ཀྱི་དབང་པོ་རྣམས་ནི་ཤིན་ཏུ་གསལ། པགས་པའི་མདོག་ནི་ཡོངས་སུ་དག་ཞལ་གྱི་དཀྱིལ་འཁོར་ནི་ཡོངས་སུ་
བྱང་བ་ལགས་སོ། །ཚེ་དང་ལྡན་པ་གཽ་ཏ་མ་སུ་ལས་ཚངས་པར་སྤྱད་པ་སྤྱོད། དགེ་སློང་དག་དེ་སྐད་ཅེས་གསོལ་བ་དང་། དེ་བཞིན་གཤེགས་པས་ཀུན་ཏུ་འཚོ་བ་པ་དེ་ལ་ཚིགས་སུ་བཅད་པས་སླར་བཀའ་སྩལ་པ། ང་ལ་སློབ་དཔོན་གང་ཡང་མེད། །ང་དང་འདྲ་བ་ཡོད་མ་ཡིན། །
ང་ནི་གཅིག་པུ་རྫོགས་སངས་རྒྱས། །བསིལ་གྱུར་ཟག་པ་མེད་པ་ཡིན། །དེས་སྨྲས་པ། གཽ་ཏ་མ་བདག་ཉིད་དགྲ་བཅོམ་པར་ཞལ་གྱིས་འཆེའམ། དེ་བཞིན་གཤེགས་པས་བཀའ་སྩལ་པ། ང་ཉིད་འཇིག་རྟེན་དགྲ་བཅོམ་པ། །ང་ནི་སྟོན་པ་བླ་ན་མེད། །ལྷ་དང་ལྷ་མིན་དྲི་
ཟར་བཅས། །ང་ཡི་དོ་ཟླ་གང་ཟག་མེད། །དེས་སྨྲས་པ། གཽ་ཏ་མ་བདག་ཉིད་རྒྱལ་བ་ལགས་པར་ཞལ་གྱིས་འཆེའམ། དེ་བཞིན་གཤེགས་པས་བཀའ་སྩལ་པ། །གང་དག་ཟག་པ་ཟད་བརྙེས་པ། །ང་འདྲ་རྒྱལ་བར་ཤེས་པར་བྱ། །ང་ནི་སྡིག་པའི་ཆོས་ལས་རྒྱལ། །དེ་བས་
ཉེ་འགྲོ་ང་རྒྱལ་ཡིན། །དེས་སྨྲས་པ། ཚེ་དང་ལྡན་པ་གཽ་ཏ་མ་དགར་བཞུད། །དེ་བཞིན་གཤེགས་པས་བཀའ་སྩལ་པ། །ང་ནི་བཱ་རཱ་ཎ་སཱིར་འགྲོ། །གྲོང་ཁྱེར་གསལ་ལྡན་སོང་ནས་ནི། །ལོང་བ་ལྟ་བུའི་འཇིག་རྟེན་ལ། །མཚུངས་པ་མེད་པའི་འོད་བྱའོ། །ང་ནི་བཱ་རཱ་ཎ་སཱིར་འགྲོ། །
གྲོང་ཁྱེར་གསལ་ལྡན་སོང་ནས་ནི། །འོན་པ་ལྟ་བུའི་འཇིག་རྟེན་ལ། །བདུད་རྩིའི་རྔ་ཆེན་བརྡུང་བར་བྱ། །ང་ནི་བཱ་རཱ་ཎ་སཱིར་འགྲོ། །གྲོང་ཁྱེར་གསལ་ལྡན་སོང་ནས་ནི། །འཇིག་རྟེན་དུ་ནི་མ་བསྐོར་བའི། །ཆོས་ཀྱི་འཁོར་ལོ་བསྐོར་བར་བྱ། །ཀུན་དུ་འཚོ་བ་པ་དེས་གཽ་ཏ་མ་དེ་བཞིན་དུ་

འགྱུར་རོ། །དེ་བཞིན་དུ་འགྱུར་རོ་ཞེས་སྨྲས་ཏེ། ལྷོ་ཕྱོགས་ལོགས་སུ་སོང་ངོ་། །དེ་བཞིན་གཤེགས་པ་ནི་བྱང་ཕྱོགས་ལོགས་སུ་བཞུད་དོ། །དགེ་སློང་དག་དེ་ལྟར་དེ་བཞིན་གཤེགས་པ་རི་ག་ཡཱའི་ཀླུའི་རྒྱལ་པོ་ཤིན་ཏུ་བལྟ་མཛེས་ཀྱིས་བཞུགས་སུ་གསོལ་བ་དང་། བཤོས་
གསོལ་བར་སྤྱན་དྲངས་སོ། །དེ་ནས་དེ་བཞིན་གཤེགས་པ་ཉེ་གནས་སུ་གཤེགས་སོ། །དེ་ནས་ཀྱང་ལྟེང་རྒྱས་ལྟར་གཤེགས་སོ། །དེ་ནས་ཀྱང་ཙན་ད་ལྟར་གཤེགས་སོ། །དེ་ནས་གྲོང་ཁྱེར་ཁ་ལོ་སྒྱུར་དུ་གཤེགས་སོ། །དགེ་སློང་དག་དེ་དག་ཏུ་ཡང་ཁྱིམ་བདག་རྣམས་ཀྱིས་དེ་བཞིན་
གཤེགས་པ་བཞུགས་སུ་གསོལ་བ་དང་། བཤོས་གསོལ་བར་སྤྱན་དྲངས་ཏེ། མཐར་གྱིས་ཀླུང་ཆེན་པོ་གང་གཱའི་འགྲམ་དུ་གཤེགས་སོ། །དགེ་སློང་དག་དེའི་ཚེ་ཀླུང་ཆེན་པོ་གང་གཱ་ཤིན་ཏུ་བྲུག་སྟེ། མུ་དང་མཉམ་པར་འབབ་བོ། །དགེ་སློང་དག་དེ་ནས་དེ་བཞིན་གཤེགས་པ་ཕ་རོལ་ཏུ་
གཤེགས་པའི་ཕྱིར། མཉན་པའི་གན་དུ་གཤེགས་པ་དང་། དེས་གསོལ་པ། གཽ་ཏ་མ་གྲུ་བཙས་སྩལ་དུ་གསོལ། གྲོགས་པོ་ང་ལ་གྲུ་བཙས་མེད་དོ་ཞེས་བཀའ་སྩལ་ནས། དེ་བཞིན་གཤེགས་པ་ནམ་མཁའ་ལས་ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་གཤེགས་སོ། །
དེ་ནས་མཉན་པ་དེས་དེ་མཐོང་ནས་སྦྱིན་གནས་རྣམ་པ་འདི་ལྟ་བུ་འདི་བདག་གིས་མ་བསྒྲལ་ཏོ་ཞེས་ཤིན་ཏུ་འགྱོད་དེ། ཀྱི་ཧུད་མཚར་བྱས་སོ་ཞེས་སྨྲས་ནས་བརྒྱལ་ཏེ་ས་ལ་འགྱེལ་ཏོ། །དེ་ནས་མཉན་པས་རྒྱལ་པོ་གཟུགས་ཅན་སྙིང་པོ་ལ་ཇོ་བོ་དགེ་སྦྱོང་གཽ་ཏ་མ་ལ་གྲུ་བཙས་སྩལ་བར་གསོལ་ན།
གྲུ་བཙས་མེད་དོ་ཞེས་གསུངས་ཏེ། ནམ་མཁའ་ལས་ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་གཤེགས་སོ་ཞེས་དེའི་ལོ་རྒྱུས་བསྙད་དོ། །དེ་སྐད་ཐོས་ནས་རྒྱལ་པོ་གཟུགས་ཅན་སྙིང་པོས་དེ་ཕྱིན་ཆད་རབ་ཏུ་བྱུང་བ་ཐམས་ཅད་ལ་གྲུ་བཙས་མི་དབབ་པར་བྱས་སོ། །དགེ་སློང་དག་དེ་ལྟར་
དེ་བཞིན་གཤེགས་པ་མཐར་གྱིས་ཡུལ་རྒྱུ་བ་རྒྱུ་ཞིང་གྲོང་ཁྱེར་ཆེན་པོ་བཱ་རཱ་ཎ་སཱི་ག་ལ་བ་དེར་གཤེགས་སོ། །གཤེགས་ནས་ནང་པར་ཤམ་ཐབས་དང་ཆོས་གོས་གསོལ་ཏེ། ལྷུང་བཟེད་བསྣམས་ནས། གྲོང་ཁྱེར་ཆེན་པོ་བཱ་རཱ་ཎ་སཱིར་བསོད་སྙོམས་ཀྱི་ཕྱིར་གཤེགས་ཏེ། དེར་བསོད་སྙོམས་ཀྱི་

ཕྱིར་གཤེགས་ནས། བསོད་སྙོམས་ཀྱི་ཞལ་ཟས་མཇུག་ཏུ་གསོལ་ཏེ། ཟས་ཀྱི་བྱ་བ་བྱས་ནས་དྲང་སྲོང་ལྷུང་བ་རི་དགས་ཀྱི་ནགས་ག་ལ་བ་དང་། ལྔ་སྡེ་བཟང་པོ་ག་ལ་བ་དེར་གཤེགས་པ་དང་། ལྔ་སྡེ་བཟང་པོ་དག་གིས་དེ་བཞིན་གཤེགས་པ་རྒྱང་རིང་པོ་ནས་གཤེགས་པ་མཐོང་ངོ་། །
མཐོང་ནས་ཀྱང་འདི་སྐད་དུ་ཚེ་དང་ལྡན་པ་དག་དགེ་སྦྱོང་གཽ་ཏ་མ་ལྷོད་པ། མང་དུ་ཟ་བ། སྤོང་བ་ལས་ཉམས་པ་འདི་འོངས་ཏེ། འདིས་སྔོན་གྱི་དཀའ་བ་སྤྱད་པ་དེས་མིའི་ཆོས་བླ་མ་ལས་མཆོག་ཏུ་གྱུར་པ། འཕགས་པའི་ཡེ་ཤེས་མཐོང་བའི་ཁྱད་པར་ཅུང་ཟད་ཀྱང་མངོན་སུམ་དུ་བྱེད་མ་ནུས་
ནས། ད་ལྟར་ཁ་ཟས་རགས་པ་ཟ་ཞིང་བསོད་སྙོམས་ལ་སྦྱོར་བ་དང་ལྡན་པར་གནས་པ་ལྟ་སྨོས་ཀྱང་ཅི་དགོས་ཏེ། ལྷོད་པ་མང་དུ་ཟ་བ། འདི་ལ་སྐལ་བ་མེད་ཀྱིས་གང་གིས་ཀྱང་འདི་བསུ་བར་མི་བྱའོ། །ལྡང་བར་མི་བྱའོ། །ཆོས་གོས་དང་ལྷུང་བཟེད་བླང་བར་མི་བྱའོ། །སྟན་དང་ཡོངས་
སུ་སྤྱད་པར་འོས་པའི་བཏུང་བ་དང་། རྐང་པ་གཞག་པ་ཡང་སྦྱིན་པར་མི་བྱའོ། །སྟན་ལྷག་པ་གཞན་ནི་མ་གཏོགས་ཏེ། ཚེ་དང་ལྡན་པ་གཽ་ཏ་མ་སྟན་ལྷག་པ་གཞན་འདི་དག་ཡོད་ཀྱིས་ཇི་སྟེ་འདོད་ན་འདུག་ཤིག་པར་བརྗོད་དོ་ཞེས་འོག་ཁྲིམས་བཅས་སོ། །ཚེ་དང་ལྡན་པ་ཀུན་ཤེས་
ཀཽཎྜི་ནྱས་སེམས་ཀྱིས་ནི་ཁས་མ་བླངས་ཏེ་ཚིག་གིས་ནི་མི་རུང་ཞེས་མ་བྱས་སོ། །དགེ་སློང་དག་དེ་བཞིན་གཤེགས་པ་ཇི་ལྟ་ཇི་ལྟར་ལྔ་སྡེ་བཟང་པོ་ག་ལ་བ་དེར་གཤེགས་པ་དེ་ལྟ་དེ་ལྟར་དེ་དག་རང་རང་གི་སྟན་ལ་མི་དགའ་ཞིང་ལྡང་འདོད་པར་གྱུར་ཏེ། འདི་ལྟ་སྟེ་དཔེར་ན་འདབ་ཆགས་བྱ་སྐོན་པར་
བཅུག་པར་གྱུར་ལ། སྐོན་པ་དེའི་འོག་ནས་མེས་བདུགས་ན། དེ་མེས་གདུངས་པས་མྱུར་བ་མྱུར་བར་འཕར་བར་འདོད་ཅིང་འཕུར་འདོད་པ་དེ་བཞིན་དུ། དེ་བཞིན་གཤེགས་པ་ཇི་ལྟ་ཇི་ལྟར་ལྔ་སྡེ་བཟང་པོ་དག་གི་གན་དུ་གཤེགས་པ་དེ་ལྟ་དེ་ལྟར་ལྔ་སྡེ་བཟང་པོ་དག་རང་རང་གི་སྟན་ལ་མི་
དགའ་ཞིང་ལྡང་འདོད་པར་གྱུར་ཏོ། །དེ་ཅིའི་ཕྱིར་ཞེ་ན། གང་དག་དེ་བཞིན་གཤེགས་པ་མཐོང་ནས་སྟན་ལས་མི་ལྡང་བའི་སེམས་ཅན་དེ་ནི་སེམས་ཅན་གྱི་རིས་ན་གང་ཡང་མེད་དོ། །དེ་བཞིན་གཤེགས་པ་ཇི་ལྟ་ཇི་ལྟར་ལྔ་སྡེ་བཟང་པོ་དག་གི་གན་དུ་གཤེགས་པ་དེ་ལྟ་དེ་ལྟར་ལྔ་སྡེ་

བཟང་པོ་དག་གིས་དེ་བཞིན་གཤེགས་པའི་དཔལ་དང་གཟི་བརྗིད་མ་བཟོད་ནས་སྟན་གྱི་སྟེང་ན་འདར་ཞིང་ཀུན་གྱི་ས་འོག་ཁྲིམས་ཞིག་སྟེ། སྟན་ལས་ལངས་ནས་ལ་ལ་ནི་རིམ་གྲོ་བྱེད། ལ་ལས་ནི་བསུ་སྟེ་ན་བཟའ་ཆོས་གོས་དང་ལྷུང་བཟེད་བླངས། ལ་ལས་ནི་གདན་བཏིང་།
ལ་ལས་ནི་ཞབས་གཞག་པ་བཤམས། ལ་ལས་ནི་ཞབས་བཀྲུ་བའི་ཆུ་བཤམས་ཏེ། འདི་སྐད་ཅེས་ཀྱང་གསོལ་ཏོ། །ཚེ་དང་ལྡན་པ་གཽ་ཏ་མ་ཁྱོད་ལེགས་པར་བྱོན་ཏོ། །གདན་བཏིང་བ་འདི་ལ་བཞུགས་སུ་གསོལ། དགེ་སློང་དག་དེ་བཞིན་གཤེགས་པ་གདན་བཏིང་བ་ལ་
བཞུགས་ནས། ལྔ་སྡེ་བཟང་པོ་དག་དེ་བཞིན་གཤེགས་པ་དང་ལྷན་ཅིག་ཏུ་ཡང་དག་པར་མགུ་བར་བྱ་བ་དང་ཡང་དག་པར་ཆགས་པར་བྱ་བའི་གཏམ་རྣམ་པ་མང་པོ་བྱས་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཀྱང་དེ་བཞིན་གཤེགས་པ་ལ་ལྔ་སྡེ་བཟང་
པོ་དག་གིས་འདི་སྐད་ཅེས་གསོལ་ཏོ། །ཚེ་དང་ལྡན་པ་གཽ་ཏ་མའི་དབང་པོ་རྣམས་ནི་རབ་ཏུ་གསལ་ལོ། །པགས་པའི་མདོག་ནི་ཡོངས་སུ་དག་གོ། །ཞེས་བྱ་བ་ཐམས་ཅད་སྔ་མ་བཞིན་ནོ། །ཚེ་དང་ལྡན་པ་གཽ་ཏ་མ་ཁྱོད་ལ་མིའི་ཆོས་བླ་མ་ལས་མཆོག་ཏུ་གྱུར་པ་འཕགས་པའི་ཡེ་ཤེས་
མཐོང་བའི་ཁྱད་པར་ཆུང་ཟད་མངོན་སུམ་དུ་མཛད་པ་ལྟ་མངའ་འམ། དགེ་སློང་དག་དེ་སྐད་ཅེས་གསོལ་པ་དང་། དེ་བཞིན་གཤེགས་པས་ལྔ་སྡེ་བཟང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་ཁྱེད་དེ་བཞིན་གཤེགས་པ་ལ་ཚེ་དང་ལྡན་པ་ཞེས་མ་རྗོད་ཅིག །ཁྱེད་ལ་ཡུན་རིང་
པོར་གནོད་པ་དང་མི་ཕན་པ་དང་། མི་བདེ་བར་གྱུར་ཏ་རེ། དགེ་སློང་དག་ངས་ནི་བདུད་རྩི་དང་འཆི་བ་མེད་པར་འགྲོ་བའི་ལམ་མངོན་དུ་བྱས་སོ། །དགེ་སློང་དག་ང་ནི་སངས་རྒྱས་སོ། །ཐམས་ཅད་མཁྱེན་པའོ། །ཐམས་ཅད་གཟིགས་པའོ། །བསིལ་བར་གྱུར་པའོ། །ཟག་པ་ཟད་
པའོ། །ཆོས་ཐམས་ཅད་ལ་དབང་བའོ། །དགེ་སློང་དག་ངས་ཁྱེད་ལ་ཆོས་བཤད་ཀྱིས་ཚུར་ཤོག །ཉོན་ཅིག །ནན་ཏན་གྱིས་ཤིག །རྣ་བ་ལྷོགས་ཤིག་དང་། ངས་གདམས་ཤིང་རྗེས་སུ་བསྟན་ཏོ། །ངས་ཇི་ནས་ཡང་དག་པར་བཤད་ཅིང་ཡང་དག་པར་རྗེས་སུ་བསྟན་ན། ཁྱེད་ཀྱང་

ཟག་པ་རྣམས་ཟད་ནས་ཟག་པ་ཟད་པའི་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བ་ཚེ་འདི་ཉིད་ལ་རང་གི་མངོན་པར་ཤེས་པས་མངོན་དུ་བྱས་ཏེ་ཉེ་བར་བསྒྲུབས་ནས། བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྙེན་ཏོ། །བྱ་བ་བྱས་སོ། །འདི་ལས་སྲིད་པ་
གཞན་མི་ཤེས་སོ། །ཞེས་ཤེས་པར་འགྱུར་རོ། །དགེ་སློང་དག་ཁྱེད་ཚེ་དང་ལྡན་པ་དག་དགེ་སྦྱོང་གཽ་ཏ་མ་ལྷོད་པ། མང་དུ་ཟ་བ། སྤོང་བ་ལས་ཉམས་པ་འདི་འོངས་ཏེ་ཞེས་བྱ་བ་ནས་ཇི་སྟེ་འདོད་ན་འདུག་ཤིག་ཅེས་བྱ་བའི་བར་ཐམས་ཅད་སྔ་མ་བཞིན་ཏེ། དེ་སྙམ་དུ་མ་བསམས་སམ། དགེ་སློང་
དག་དེ་སྐད་ཅེས་མ་ཟེར་ཅིག་ཅེས་བཀའ་སྩལ་པ་དང་། དེ་དག་མུ་སྟེགས་ཅན་གྱི་རྟགས་དང་། མུ་སྟེགས་ཅན་གྱི་རྒྱལ་མཚན་གང་ཅི་ཡོད་པ་དེ་ཐམས་ཅད་སྐད་ཅིག་དེ་ཉིད་ལ་མེད་པར་གྱུར་ཏེ། ཆོས་གོས་གསུམ་དང་ལྷུང་བཟེད་དང་ལྡན་པར་གྱུར་ཅིང་། སྐྲ་ཡང་བྲེགས་པར་གྱུར་ཏེ། འདི་ལྟ་སྟེ་
དཔེར་ན། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་དང་འདྲ་བར་གྱུར་ཏོ། །དེ་ཉིད་ཀྱིས་དེ་དག་རབ་ཏུ་བྱུང་ཞིང་བསྙེན་པར་རྫོགས་ཏེ་དགེ་སློང་གི་དངོས་པོར་གྱུར་ཏོ། །དགེ་སློང་དག་དེ་ནས་དེའི་ཚེ་དགེ་སློང་ལྔ་པོས་དེ་བཞིན་གཤེགས་པའི་ཞབས་ལ་གཏུགས་ཏེ། ཉེས་པ་
བཤགས་ནས་དེ་བཞིན་གཤེགས་པ་ལ་སྟོན་པའི་འདུ་ཤེས་དང་། ཕངས་པར་བསམས་པ་དང་། དད་པ་དང་། གུས་པ་སྐྱེད་དེ། གུས་པ་བསྐྱེད་ནས་ཀྱང་རྫིང་ཁེབས་པར་དེ་བཞིན་གཤེགས་པའི་སྐུ་བསིལ་ཞིང་ཡོངས་སུ་སྦྱང་བའི་ལས་བྱེད་དོ། །དགེ་སློང་དག་དེ་བཞིན་གཤེགས་པ་སྐུ་བསིལ་
ཏེ་བྱུང་ནས་འདི་སྙམ་དུ་དགོངས་ཏེ། སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་གང་དུ་བཞུགས་ནས་ཆོས་ཀྱི་འཁོར་ལོ་བསྐོར། སྙམ་པ་དང་། དགེ་སློང་དག་ས་ཕྱོགས་གང་དུ་སྔོན་གྱི་དེ་བཞིན་གཤེགས་པ་རྣམས་ཀྱིས་ཆོས་ཀྱི་འཁོར་ལོ་བསྐོར་བར་གྱུར་པའི་ས་ཕྱོགས་དེར་རིན་པོ་ཆེ་སྣ་
བདུན་གྱི་ཁྲི་སྟོང་བྱུང་བར་གྱུར་ཏོ། །དེ་ནས་དེ་བཞིན་གཤེགས་པས་སྔོན་གྱི་དེ་བཞིན་གཤེགས་པ་རྣམས་ལ་གུས་པར་མཛད་པའི་ཕྱིར། ཁྲི་གསུམ་ལ་བསྐོར་བ་མཛད་ནས་སེང་གེ་ལྟར་བག་ཚ་བ་མི་མངའ་བར་ཁྲི་བཞི་པ་ལ་སྐྱིལ་མོ་ཀྲུང་བཅས་ཏེ་བཞུགས་སོ། །དགེ་སློང་ལྔ་པོས་ཀྱང་དེ་

བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། དེ་བཞིན་གཤེགས་པའི་སྤྱན་སྔར་འཁོད་དོ། །དགེ་སློང་དག་དེ་ནས་དེའི་ཚེ་དེ་བཞིན་གཤེགས་པས་སྐུ་ལས་རྣམ་པ་འདི་ལྟ་བུའི་འོད་ཕྱུང་སྟེ། འོད་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བ་
ཆེན་པོས་ཁྱབ་པར་གྱུར་ནས། སྣང་བ་དེས་འཇིག་རྟེན་གྱི་ཁམས་ཀྱི་བར་སྡིག་པ་སྡིག་པས་ཁྱབ་པ་མུན་པ་མུན་ནག་ཏུ་གྱུར་པ། གང་དུ་ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་དབང་ཆེ་བར་གྲགས་པ་འདི་གཉིས་ཀྱི་འོད་ཀྱིས་འོད་དང་ཁ་དོག་གིས་ཁ་དོག་དང་། གཟི་བརྗིད་ཀྱིས་
གཟི་བརྗིད་ལམ་མེར་མ་གྱུར་པ། ལྷང་ངེར་མ་གྱུར་པ་གང་ཡིན་པ་དེ་ན་སེམས་ཅན་གང་དག་སྐྱེས་པ་རང་རང་གི་ལག་པ་བརྐྱང་བ་ཡང་མི་མཐོང་བ་དེར་ཡང་དེའི་ཚེ་སྣང་བ་ཆེན་པོ་རྒྱ་ཆེར་བྱུང་བར་གྱུར་ཏོ། །དེར་སེམས་ཅན་གང་དག་སྐྱེས་པ་དེ་དག་ཀྱང་སྣང་བ་དེས་གསལ་བར་གྱུར་མ་ཐག་ཏུ་གཅིག་
གིས་གཅིག་མཐོང་ཞིང་གཅིག་གིས་གཅིག་ཤེས་ཏེ། འདི་སྐད་ཅེས་ཀྱེ་སེམས་ཅན་གཞན་དག་ཀྱང་འདིར་སྐྱེས་སོ། །ཀྱེ་སེམས་ཅན་གཞན་དག་ཀྱང་འདིར་སྐྱེས་སོ་ཞེས་འཛེར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་དང་ལྟས་ཆེན་པོ་བཅོ་བརྒྱད་དུ་
གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་སོ། །འགུལ། རབ་ཏུ་འགུལ། ཀུན་ཏུ་རབ་ཏུ་འགུལ་ཏོ། །ལྡེག་རབ་ཏུ་ལྡེག །ཀུན་ཏུ་རབ་ཏུ་ལྡེག་གོ། །འཁྲུགས་རབ་ཏུ་འཁྲུགས། ཀུན་ཏུ་རབ་ཏུ་འཁྲུགས་སོ། །འུར་འུར་རབ་ཏུ་འུར་འུར། ཀུན་ཏུ་རབ་ཏུ་འུར་འུར་རོ། །ཆེམ་
ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །མཐའ་དམའ་ན་དབུས་མཐོ་བར་གྱུར་ཏོ། །དབུས་དམའ་ན་མཐའ་མཐོ་བར་གྱུར་ཏོ། །ཤར་ཕྱོགས་དམའ་ན་ནུབ་ཕྱོགས་མཐོ་བར་གྱུར་ཏོ། །ནུབ་ཕྱོགས་དམའ་ན་ཤར་ཕྱོགས་མཐོ་བར་གྱུར་ཏོ། །བྱང་ཕྱོགས་དམའ་ན་ལྷོ་
ཕྱོགས་མཐོ་བར་གྱུར་ཏོ། །ལྷོ་ཕྱོགས་དམའ་ན་བྱང་ཕྱོགས་མཐོ་བར་གྱུར་ཏོ། །དེའི་ཚེ་དགའ་བར་འགྱུར་བ་དང་། ཚིམ་པར་འགྱུར་བ་དང་། མགུ་བར་འགྱུར་བ་དང་། དང་བར་འགྱུར་བ་དང་། བརྟག་པར་བྱ་བ་དང་། རབ་ཏུ་སིམ་པར་འགྱུར་བ་དང་། བསྔགས་པར་བྱ་བ་དང་།

བསྔགས་པ་ཟླ་མེད་པ་དང་། ངོམས་པར་མི་འགྱུར་བ་དང་། མི་འཐུན་པ་མེད་པ་དང་། སྐྲག་པར་མི་འགྱུར་བའི་སྒྲ་དག་ཀྱང་གྲག་སྟེ། སྐད་ཅིག་དེ་ལ་སེམས་ཅན་གང་ལ་ཡང་རྣམ་པར་འཚེ་བའམ། འཇིགས་པའམ་སྡང་བའམ་བག་ཚ་བ་མེད་པར་གྱུར་ཏོ། །སྐད་ཅིག་དེ་ལ་ཉི་མ་དང་། ཟླ་བ་
དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་ཀྱི་འོད་ཀྱང་མི་སྣང་ངོ་། །སེམས་ཅན་དམྱལ་བ་པ་དང་དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེས་པའི་སེམས་ཅན་ཐམས་ཅད་ཀྱང་སྐད་ཅིག་དེ་ལ་སྡུག་བསྔལ་རྣམས་དང་བྲལ་ཞིང་བདེ་བ་ཐམས་ཅད་དང་ལྡན་
པར་གྱུར་ཏོ། །སེམས་ཅན་གང་ལ་ཡང་འདོད་ཆགས་དང་། ཞེ་སྡང་དང་། གཏི་མུག་དང་། ཕྲག་དོག་དང་། སེར་སྣ་དང་། ང་རྒྱལ་དང་། འཆབ་པ་དང་། རྒྱགས་པ་དང་། ཁྲོ་བ་དང་། གནོད་སེམས་དང་། ཡོངས་སུ་གདུང་བའི་གནོད་པ་མེད་དེ་སྐད་ཅིག་དེ་ལ་སེམས་ཅན་ཐམས་ཅད་
གཅིག་ལ་གཅིག་བྱམས་པའི་སེམས་དང་། ཕན་པའི་སེམས་དང་། ཕ་མ་ཙམ་དུ་འདུ་ཤེས་པར་གྱུར་ཏོ། །འོད་བཀོད་པ་དེ་ལས་ཚིགས་སུ་བཅད་པ་འདི་དག་ཀྱང་བྱུང་ངོ་། །དགའ་ལྡན་རིས་ནས་ཤི་འཕོས་གང་། །ཡུམ་གྱི་ལྷུམས་སུ་ཞུགས་པར་གྱུར། །ལུམ་བི་ནི་ཡི་ཚལ་བལྟམ་ནས། །
བདེ་བ་སོགས་པའི་ཁྱོ་ཡིས་བླངས། །གང་ཞིག་སེང་གེའི་རྩལ་སྟབས་ཀྱིས། །མ་རྨོངས་གོམ་པ་བདུན་བོར་ནས། །ང་ནི་འཇིག་རྟེན་གཙོ་བོ་ཞེས། །ཚངས་པའི་དབྱངས་ཀྱིས་གསུང་ཕྱུང་ངོ་། །སེམས་ཅན་ཀུན་ལ་ཕན་པའི་ཕྱིར། །གླིང་བཞི་བཏང་སྟེ་རབ་ཏུ་བྱུང་། །དཀའ་ཐུབ་དཀའ་
བ་སྤྱད་ནས་ནི། །ས་ཡི་སྙིང་པོ་ག་ལར་གཤེགས། །དཔུང་དང་བཅས་པའི་བདུད་བཅོམ་ནས། །འཇིག་རྟེན་ཕན་ཕྱིར་བྱང་ཆུབ་བརྙེས། །བཱ་རཱ་ཎ་སཱིར་གཤེགས་ནས་ནི། །ཆོས་ཀྱི་འཁོར་ལོ་བསྐོར་བར་མཛད། །དེ་ལ་ཚངས་པ་ལྷར་བཅས་པས། །མཉམ་པའི་འཁོར་ལོ་བསྐོར་ཞེས་
བསྐུལ། །འཇིག་རྟེན་ཐུགས་རྗེས་བསྐྱེད་ནས་སུ། །ཐུབ་པ་ཡིས་ནི་སྣང་བ་མཛད། །དེ་ནི་ཐུགས་དམ་བརྟན་པ་སྟེ། །བཱ་རཱ་ཎ་སཱིར་རི་དགས་ནགས། །གཤེགས་ཏེ་འཁོར་ལོ་བླ་མེད་པ། །ཤིན་ཏུ་རྨད་བྱུང་དཔལ་ལྡན་བསྐོར། །རྒྱལ་བས་བསྐལ་པ་ཁྲག་ཁྲིག་བསྒྲུབས། །ཆོས་དེ་ཉན་པར་

གང་འདོད་པ། །དེ་ནི་རིངས་པར་ལ་གོར་དུ། །ཆོས་མཉན་པ་ཡི་ཕྱིར་ཤོག་ཤིག །མི་དང་སངས་རྒྱས་འབྱུང་རྙེད་དཀའ། །དད་པ་འང་ཤིན་ཏུ་རྙེད་པར་དཀའ། །མི་ཁོམ་བརྒྱད་སྤངས་རྙེད་པར་དཀའ། །ཆོས་ཉན་པ་ནི་གཙོ་བོ་ཡིན། །སངས་རྒྱས་འབྱུང་དང་དལ་བ་དང་། །དད་དང་
ཆོས་མཉན་དམ་པ་དང་། །དེ་དག་ཐམས་ཅད་ད་རྙེད་ཀྱིས། །བག་མེད་མ་ལུས་རྣམ་པར་སྤོངས། །གལ་ཏེ་བསྐལ་པ་ཁྲག་ཁྲིག་ཏུ། །ཆོས་ཐོས་མི་འགྱུར་སྲིད་པ་དེ། །ཁྱོད་ཀྱིས་དེ་རིང་རྙེད་ཟིན་གྱིས། བག་མེད་མ་ལུས་རྣམ་པར་སྤོངས། །འདྲེན་པ་བདུད་རྩིའི་འཁོར་ལོ་ནི། །སྐོར་བ་
མཛད་ཀྱིས་ཀུན་མྱུར་ཤོག །ས་བླའི་ལྷ་ཚོགས་ཚངས་པའི་བར། །དེ་དག་རྣམས་ལ་དེ་སྐད་བསྐུལ། །སྒྲ་ཆེན་གྱིས་ནི་ལྷ་བསྐུལ་ནས། །སྐད་ཅིག་དེ་ལ་ཐམས་ཅད་ཀྱིས། །ལྷ་ཡི་འབྱོར་པ་བོར་ནས་ནི། །དེ་དག་སངས་རྒྱས་གན་དུ་ལྷགས། །དགེ་སློང་དག་དེ་ལྟར་ས་བླའི་ལྷ་རྣམས་ཀྱིས་
གྲོང་ཁྱེར་བཱ་རཱ་ཎ་སཱིར་དྲང་སྲོང་ལྷུང་བ་རི་དགས་ཀྱི་ནགས་སུ་ཆོས་ཀྱི་འཁོར་ལོ་བསྐོར་བའི་ཕྱིར་དེ་བཞིན་གཤེགས་པའི་འཁོར་གྱི་ཁྱམས་ཆེན་པོ་བཀྲ་བ། བལྟ་ན་སྡུག་པ། ཡངས་པ་རྒྱ་ཆེ་བ། ཆུ་ཞེང་དུ་དཔག་ཚད་བདུན་བརྒྱ་ཡོད་པ་སྤྲུལ་ཏེ། ལྷ་རྣམས་ཀྱིས་སྟེང་གི་ནམ་མཁའི་དཀྱིལ་
དུ་གདུགས་དང་། རྒྱལ་མཚན་དང་། བ་དན་དང་། བླ་རེས་ལེགས་པར་བརྒྱན་པར་གྱུར་ཏོ། །འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷའི་བུ་རྣམས་ཀྱིས་སེང་གེའི་ཁྲི་བརྒྱད་ཁྲི་བཞི་སྟོང་དེ་བཞིན་གཤེགས་པ་ལ་ཕུལ་ཏེ། བདག་ཅག་ལ་ཐུགས་བརྩེ་བར་དགོངས་ཤིང་འདི་ལ་
བཞུགས་ནས་དོ་མོད་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་དུ་གསོལ་ཞེས་གསོལ་ཏོ། །དགེ་སློང་དག་དེ་ནས་དེའི་ཚེ་ཤར་དང་། ལྷོ་དང་། ནུབ་དང་། བྱང་དང་། སྟེང་དང་། འོག་དང་། ཕྱོགས་བཅུ་ཀུན་ནས་བྱང་ཆུབ་སེམས་དཔའ་སྔོན་གྱི་སྨོན་ལམ་དང་ལྡན་པ་བྱེ་བ་ཕྲག་མང་པོ་ལྷགས་
ཏེ། དེ་བཞིན་གཤེགས་པའི་ཞབས་ལ་གཏུགས་ནས། ཆོས་ཀྱི་འཁོར་ལོ་བསྐོར་བར་བསྐུལ་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་གང་དག་ཡོད་པའི་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། དེ་དག་མ་ཡིན་པ་གཞན་དབང་ཆེ་བ། དབང་

ཆེ་བར་གྲགས་པའི་ལྷའི་བུ་དེ་དག་ཐམས་ཅད་ཀྱང་དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ནས། དེ་བཞིན་གཤེགས་པ་ལ་སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་དོན་དང་། སྨན་པ་
དང་། བདེ་བའི་སླད་དུ་བཅོམ་ལྡན་འདས་ཆོས་ཀྱི་འཁོར་ལོ་བསྐོར་དུ་གསོལ། བདེ་བར་གཤེགས་པ་ཆོས་ཀྱི་འཁོར་ལོ་བསྐོར་དུ་གསོལ། བཅོམ་ལྡན་འདས་ཆོས་ཀྱི་མཆོད་སྦྱིན་མཛད་དུ་གསོལ། ཆོས་ཀྱི་ཆར་ཆེན་པོ་དབབ་ཏུ་གསོལ། ཆོས་ཀྱི་རྒྱལ་མཚན་ཆེན་པོ་བསྒྲེང་དུ་གསོལ།
ཆོས་ཀྱི་དུང་ཆེན་པོ་འབུད་དུ་གསོལ། ཆོས་ཀྱི་རྔ་ཆེན་པོ་བརྡུང་དུ་གསོལ། ཞེས་ཆོས་ཀྱི་འཁོར་ལོ་བསྐོར་བར་བསྐུལ་ཏོ། །དེ་ལ་འདི་སྐད་ཅེས་བྱ་སྟེ། སྟོང་གསུམ་འདི་ནས་ཚངས་པ་ལྷ་དབང་སྐྱོང་བ་མང་པོ་དག །དོང་ནས་རྒྱལ་བའི་ཞབས་ལ་གཏུགས་ཏེ་ཚིག་ཏུ་སྨྲས་པ་ནི། །ང་ནི་གཙོ་
བོ་དམ་པ་སྐྱེ་དགུའི་སྡུག་བསྔལ་ཟད་བྱ་ཞེས། །ཐུབ་ཆེན་ཁྱོད་ཀྱིས་གསུང་བརྗོད་སྔོན་གྱི་ཐུགས་དམ་དགོངས་པར་མཛོད། །ཐུབ་ཁྱོད་ཤིང་དབང་དྲུང་དུ་བཞུགས་ནས་སྡེར་བཅས་བདུད་བཏུལ་ཏེ། །བྱང་ཆུབ་དམ་པ་ཞི་བ་སངས་རྒྱས་ཉོན་མོངས་སྡོང་པོ་བསྒྱེལ། །བསྐལ་པ་བརྒྱ་ནས་
དགོངས་པའི་དགོངས་པ་མ་ལུས་རྫོགས་ལགས་ཀྱིས། །མགོན་མ་མཆིས་པའི་སྐྱེ་བོ་གཟིགས་ཏེ་འཁོར་ལོ་མཆོག་བསྐོར་གསོལ། །བདེ་བར་གཤེགས་པའི་འོད་ཀྱིས་ཞིང་སྟོང་ཕྲག་བརྒྱ་སྣང་བར་བགྱིས། །སངས་རྒྱས་སྲས་པོ་བརྒྱ་ཕྲག་མང་པོ་རྫུ་འཕྲུལ་སྟོབས་ཀྱིས་མཆིས། །བདེ་བར་
གཤེགས་ལ་མཆོད་པ་ཆེན་པོ་རྣམ་པ་མང་བགྱིས་ནས། །ཡང་དག་ཡོན་ཏན་དེ་བཞིན་གཤེགས་བསྟོད་ཐུགས་རྗེ་ཅན་ལ་བསྐུལ། །ཐུགས་རྗེ་སྤྲིན་དང་ཤེས་རབ་གློག་དང་ལྷག་མཐོང་རླུང་དང་འདྲ། །བསྐལ་པ་སྟོང་དུ་འགྲོ་བ་ཐམས་ཅད་འགྲོན་གཉེར་འབྲུག་བསྒྲགས་ཏེ། །ཡན་ལག་བརྒྱད་ལམ་
ཆར་གྱི་རྒྱུན་གྱིས་སྐོམ་པ་ཞི་བར་མཛོད། །དབང་པོ་སྟོབས་དང་བསམ་གཏན་རྣམ་ཐར་ལོ་ཏོག་ནགས་འཕེལ་མཛོད། །བསྐལ་པ་སྟོང་མང་སྟོང་པ་ལེགས་བསླབས་དེ་བཞིན་ཉིད་ལ་བཞུགས། །ཆོས་ལས་བྱུང་བའི་སྨན་བསྒྲུབས་སེམས་ཅན་རྣམས་ཀྱི་སྤྱོད་པ་མཁྱེན། །ཉོན་མོངས་ཚོགས་ཀྱི་ནད་བརྒྱས་

གཙེས་པའི་སྐྱེ་བོ་འདི་དག་ལ། །རྒྱལ་བ་སྨན་པ་འཁོར་ལོ་དམ་པ་བསྐོར་ཏེ་ཐར་མཛད་གསོལ། །ཁྱོད་ཀྱིས་རིང་ནས་ཕ་རོལ་ཕྱིན་པ་དྲུག་གི་མཛོད་འཕེལ་མཛད། །མཚུངས་མེད་མི་གཡོ་གྱ་ནོམ་ཆོས་ཀྱི་ནོར་ནི་ལེགས་པར་བསགས། །སྐྱེ་དགུ་མགོན་མེད་དབུལ་
པོ་འདྲེན་མེད་འདི་དག་ཀུན་གཟིགས་ནས། །ནོར་བདུན་བགོ་བཤའ་མཛོད་ཅིག་འདྲེན་པ་འཁོར་ལོ་བསྐོར་བར་གསོལ། །རྒྱལ་བ་བྱང་ཆུབ་བཙལ་ཕྱིར་ནོར་འབྲུ་དབྱིག་དང་གསེར་རྣམས་དང་། །གོས་བཟང་མེ་ཏོག་བདུག་པ་བྱུག་པ་ཕྱེ་མ་དམ་པ་དང་། །ཕོ་བྲང་མཆོག་དང་བཙུན་མོའི་
འཁོར་དང་རྒྱལ་སྲིད་ཕངས་པའི་སྲས། །དགྱེས་བཞིན་བཏང་བས་དེ་སངས་རྒྱས་ཀྱིས་འཁོར་ལོ་མཆོག་བསྐོར་གསོལ། །དེ་བཞིན་ཚུལ་ཁྲིམས་མ་ཉམས་མ་འདྲེས་བསྐལ་པ་བརྒྱར་ཡང་བསྲུངས། །རྟག་ཏུ་བཟོད་པ་ལེགས་བསྒོམས་ཁྱོད་ནི་བརྩོན་འགྲུས་མ་ཞུམ་གྱུར། །ཐུབ་པ་བསམ་
གཏན་མཆོག་དང་མངོན་ཤེས་ཤེས་རབ་ལྷག་མཐོང་ལྡན། །དགོངས་པ་ཡོངས་རྫོགས་རིམས་ནད་མ་མཆིས་འཁོར་ལོ་མཆོག་བསྐོར་གསོལ། །དགེ་སློང་དག་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ཞེས་བྱ་བས་དེའི་ཚེ་ཆོས་
ཀྱི་འཁོར་ལོ་ལྷའི་འཛམ་བུ་ཆུ་བོའི་གསེར་ལས་བྱས་པ། རིན་པོ་ཆེ་ཐམས་ཅད་ཀྱིས་སྤྲས་པ། རིན་པོ་ཆེ་ཐམས་ཅད་ཀྱིས་མཛེས་པར་བྱས་པ་རྒྱན་སྣ་ཚོགས་ཀྱིས་བརྒྱན་པ། བཀོད་པ་རྩིབས་སྟོང་དང་ལྡན་པ། འོད་ཟེར་སྟོང་ཕྲག་དང་ལྡན་པ། ལྟེ་བ་དང་བཅས་པ། མུ་ཁྱུད་དང་བཅས་པ།
མེ་ཏོག་གི་ལྡ་ལྡི་དང་བཅས་པ། །གསེར་གྱི་དྲ་བ་དང་བཅས་པ། དྲིལ་བུ་གཡེར་ཀ་དང་བཅས་པ། སྤོས་ཀྱི་ལག་རིས་དང་བཅས་པ། བུམ་པ་གང་བ་དང་བཅས་པ། གཡུང་དྲུང་འཁྱིལ་བ་དང་བཅས་པ། བཀྲ་ཤིས་ཀྱི་བརྒྱན་པ་དང་བཅས་པ། ལྷའི་གོས་ཚོན་སྣ་ཚོགས་སུ་བཅོས་པས་
མཛེས་པར་བྱས་པ། ལྷའི་མེ་ཏོག་དང་། སྤོས་དང་། ཕྲེང་བ་དང་། བྱུག་པས་བྱུགས་པ། རྣམ་པའི་མཆོག་ཐམས་ཅད་དང་ལྡན་པ། སྔོན་གྱི་སྨོན་ལམ་གྱིས་བསྒྲུབས་པ། བྱང་ཆུབ་སེམས་དཔའི་བསམ་པས་རྣམ་པར་སྦྱངས་པ། དེ་བཞིན་གཤེགས་པ་ལ་མཆོད་པའི་

འོས་སུ་གྱུར་པ། དེ་བཞིན་གཤེགས་པ་ཐམས་ཅད་ཀྱིས་དགོངས་པ། སངས་རྒྱས་ཐམས་ཅད་ཀྱི་བྱིན་གྱི་རླབས་ཀྱིས་མ་འཁྲུགས་པ། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་གཞེས་ཤིང་སྔོན་ཡང་བསྐོར་བ་ཆོས་ཀྱི་འཁོར་ལོ་བསྐོར་བའི་ཕྱིར་
དེ་བཞིན་གཤེགས་པ་ལ་ཕུལ་ལོ། །ཕུལ་ནས་ཀྱང་ཐལ་མོ་སྦྱར་ཏེ་ཚིགས་སུ་བཅད་པ་འདི་དག་གིས་དེ་བཞིན་གཤེགས་པ་ལ་མངོན་པར་བསྟོད་དོ། །མི་ཡི་སེང་གེ་སེང་གེ་ཁྱོད་ནི་སངས་རྒྱས་འགྱུར་རོ་ཞེས། །གང་ཚེ་མར་མེ་མཛད་ཀྱིས་སེམས་ཅན་དག་པ་ལུང་བསྟན་པ། །དེ་ཚེ་བདག་
གིས་སྨོན་ལམ་རྣམ་པ་འདི་འདྲ་འདི་བཏབ་སྟེ། །རྫོགས་པའི་བྱང་ཆུབ་བརྙེས་ནས་བདག་གིས་ཆོས་བཤད་བསྐུལ་ཞེས་བགྱིས། །ཕྱོགས་བཅུ་དག་ནས་སེམས་ཅན་དམ་པ་གང་དག་འདིར་ལྷགས་པ། །དེ་དག་ཐམས་ཅད་འཇུག་པས་བགྲང་བར་ནུས་པ་མ་ལགས་ཏེ། །བཏུད་ཅིང་ཐལ་
མོ་སྦྱར་ནས་ཞབས་གཉིས་ལ་ནི་གཏུགས་ནས་སུ། །ཆོས་ཀྱི་འཁོར་ལོ་བསྐོར་ཕྱིར་ཤཱཀྱའི་རིགས་ལ་དགྱེས་པ་བསྐུལ། །བྱང་ཆུབ་སྙིང་པོར་ལྷ་རྣམས་ཀྱིས་ནི་བཀོད་པ་གང་བགྱིས་དང་། །རྒྱལ་བའི་སྲས་པོ་ཀུན་གྱིས་བཀོད་པ་གང་དག་བགྱིས་པ་རྣམས། །འབྱོར་པ་དེ་ཀུན་ཆོས་ཀྱི་
འཁོར་ལོ་བསྐོར་ཕྱིར་འདིར་བཤམས་ཏེ། །བསྐལ་པ་ཡོངས་སུ་རྫོགས་པར་བརྗོད་ཀྱང་བས་པར་འགྱུར་མ་ལགས། །སྟོང་གསུམ་འཇིག་རྟེན་དག་གི་ནམ་མཁའ་ལྷ་ཡི་ཚོགས་ཀྱིས་བལྟམས། །དོག་སའི་སྟེང་ཡང་ལྷ་མིན་མིའམ་ཅི་དང་མི་ཡིས་བལྟམས། །ཡུད་ཙམ་དེ་ལ་ལུད་པའི་
སྒྲ་ཡང་གྲགས་པར་མ་གྱུར་ཏེ། །ཐམས་ཅད་རབ་ཏུ་དང་བའི་ཡིད་ཀྱིས་རྒྱལ་ལ་མངོན་དུ་བལྟ། །དགེ་སློང་དག་དེ་ལྟར་དེ་བཞིན་གཤེགས་པ་ནམ་གྱི་ཆ་སྟོད་ཀྱི་ཐུན་ལ་ནི་ཅང་མི་གསུང་བས་ཟད་པར་མཛད་དོ། །ནམ་གྱི་གུང་ཐུན་ལ་ནི་ཡང་དག་པར་ཆགས་པར་འགྱུར་བའི་གཏམ་
གསུང་ངོ་། །ནམ་གྱི་ཆ་སྨད་ཀྱི་ཐུན་ལ་ནི་ལྔ་སྡེ་བཟང་པོ་རྣམས་ལ་བོས་ཏེ་འདི་སྐད་ཅེས་བཀའ་སྩལ་ཏོ། །དགེ་སློང་དག་མཐའ་གཉིས་པོ་འདི་དག་ནི་རབ་ཏུ་བྱུང་བའི་འཇུག་པར་བྱ་བ་མ་ཡིན་པ་སྟེ། གང་འདོད་པ་རྣམས་ལ་བསོད་ཉམས་སུ་སྦྱོར་བ། དམན་པ། གྲོང་བའི་ཆ། སོ་སོའི་སྐྱེ་བོ་

པ། འཕགས་པ་ལ་མི་མཁོ་བ། གནོད་པ་དང་ལྡན་པ། ཕྱི་མ་ལ་ཚངས་པར་སྤྱོད་པར་མི་འགྱུར་བ། ཡིད་འབྱུང་བར་མི་འགྱུར་བ། འདོད་ཆགས་དང་བྲལ་བར་མི་འགྱུར་བ། །འགོག་པར་མི་འགྱུར་བ། མངོན་པར་ཤེས་པར་མི་འགྱུར་བ། རྫོགས་པའི་བྱང་
ཆུབ་ཏུ་མི་འགྱུར་བ། མྱ་ངན་ལས་འདའ་བར་མི་འགྱུར་བ་དང་། གང་ཡང་དབུ་མའི་ལམ་མ་ཡིན་པ། ལུས་ངལ་བར་སྦྱོར་བ། སྡུག་བསྔལ་བ། གནོད་པ་དང་ལྡན་པ། ཚེ་འདི་ལ་ཡང་སྡུག་བསྔལ་ལ། ཕྱི་མ་ལ་ཡང་སྡུག་བསྔལ་རྣམ་པར་སྨིན་པ་སྟེ། དགེ་སློང་དག་མཐའ་
གཉིས་པོ་འདི་དག་སྤངས་ནས་དབུ་མའི་ལམ་ཉིད་ཀྱིས་དེ་བཞིན་གཤེགས་པ་ཆོས་སྟོན་ཏེ། འདི་ལྟ་སྟེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་
དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏོ། །དགེ་སློང་དག་བཞི་པོ་འདི་དག་ནི་འཕགས་པའི་བདེན་པ་དག་སྟེ། བཞི་གང་ཞེ་ན། སྡུག་བསྔལ་བ་དང་། སྡུག་བསྔལ་ཀུན་འབྱུང་བ་དང་། སྡུག་བསྔལ་འགོག་པ་དང་། སྡུག་བསྔལ་འགོག་པར་འགྲོ་བའི་ལམ་མོ། །དེ་ལ་
སྡུག་བསྔལ་གང་ཞེ་ན། སྐྱེ་བའི་སྡུག་བསྔལ་དང་། རྒ་བ་དང་། ན་བ་དང་། འཆི་བ་དང་། མི་སྡུག་པ་དང་ཕྲད་པ་དང་། སྡུག་པ་དང་བྲལ་བའི་སྡུག་བསྔལ་དང་། གང་ཡང་འདོད་པ་བཙལ་ཏེ་མ་རྙེད་པ་དེ་ཡང་སྡུག་བསྔལ་ལོ། །མདོར་ན་ཉེ་བར་ལེན་པའི་ཕུང་པོ་ལྔ་པོ་དག་ནི་སྡུག་བསྔལ་ཏེ། འདི་ནི་སྡུག་བསྔལ་
ཞེས་བྱའོ། །དེ་ལ་སྡུག་བསྔལ་ཀུན་འབྱུང་བ་གང་ཞེ་ན། གང་འདི་ཡང་འབྱུང་བའི་སྲེད་པ་དང་། དགའ་བའི་འདོད་ཆགས་དང་ལྡན་པ་དང་། དེ་དང་དེར་མངོན་པར་དགའ་བ་སྟེ། འདི་ནི་སྡུག་བསྔལ་ཀུན་འབྱུང་བ་ཞེས་བྱའོ། །དེ་ལ་སྡུག་བསྔལ་འགོག་པ་གང་ཞེ་ན། གང་ཡང་འབྱུང་བ་དེའི་སྲེད་པ་
དང་། དགའ་བའི་འདོད་ཆགས་དང་ལྡན་པ་དང་། དེ་དང་དེར་མངོན་པར་དགའ་བ་དང་། སྐྱེད་པ་དང་། སྒྲུབ་པ་འདི་ཉིད་ལ་འདོད་ཆགས་མ་ལུས་པ་དང་བྲལ་བ་དང་། འགོག་པ་འདི་ནི་སྡུག་བསྔལ་འགོག་པའོ། །དེ་ལ་སྡུག་བསྔལ་འགོག་པར་འགྲོ་བའི་ལམ་གང་ཞེ་ན། འཕགས་པའི་ལམ་ཡན་

ལག་བརྒྱད་པ་འདི་ཉིད་དེ། འདི་ལྟ་སྟེ། ཡང་དག་པའི་ལྟ་བ་ནས། ཡང་དག་པའི་ཏིང་ངེ་འཛིན་གྱི་བར་དུ་སྟེ། འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་ཞེས་བྱའོ། །དགེ་སློང་དག་བཞི་པོ་འདི་དག་ནི་འཕགས་པའི་བདེན་པ་དག་ཅེས་བྱའོ། །དགེ་སློང་དག་ངས་
སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་ལོ་ཞེས་ཚུལ་བཞིན་ཡིད་ལ་བྱས་ཤིང་མང་དུ་བྱས་པས་ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་ཤེས་པ་སྐྱེས། ཡིད་གཞུངས་པ་སྐྱེས། ཤེས་རབ་སྐྱེས་སོ། །སྣང་བ་བྱུང་ངོ་། །དགེ་སློང་དག་ངས་སྔོན་མ་ཐོས་པའི་ཆོས་
རྣམས་ལ་འདི་ནི་སྡུག་བསྔལ་ཀུན་འབྱུང་བའོ་ཞེས་ཚུལ་བཞིན་ཡིད་ལ་བྱས་ཤིང་མང་དུ་བྱས་པས་ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་ཤེས་པ་སྐྱེས། ཡིད་གཞུངས་པ་སྐྱེས། ཤེས་རབ་སྐྱེས་སོ། །སྣང་བ་བྱུང་ངོ་། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་འདི་ནི་
སྡུག་བསྔལ་འགོག་པའོ་ཞེས་ཚུལ་བཞིན་ཡིད་ལ་བྱས་ཤིང་མང་དུ་བྱས་པས་ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་ཤེས་པ་སྐྱེས། ཡིད་གཞུངས་པ་སྐྱེས། ཤེས་རབ་སྐྱེས་སོ། །སྣང་བ་བྱུང་ངོ་། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་འགོག་པར་འགྲོ་
བའི་ལམ་མོ་ཞེས་བྱ་བ་ནས་སྣང་བ་བྱུང་ངོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དགེ་སློང་དག་སྡུག་བསྔལ་ཡོངས་སུ་ཤེས་པར་བྱའོ་ཞེས་བྱ་བ་ནས་སྣང་བ་བྱུང་ངོ་། །ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བ་འདི་
སྤང་བར་བྱའོ་ཞེས་བྱ་བ་ནས་སྣང་བའི་བར་དུ་ཐམས་ཅད་སྔ་མ་བཞིན་ནོ། །དགེ་སློང་དག་སྡུག་བསྔལ་འགོག་པ་འདི་མངོན་དུ་བྱའོ་ཞེས་བྱ་བ་ནས་སྣང་བའི་བར་དུ་སྔ་མ་བཞིན་ནོ། །དགེ་སློང་དག་སྡུག་བསྔལ་འགོག་པར་འགྲོ་བའི་ལམ་འདི་བསྒོམ་པར་བྱའོ་ཞེས་བྱ་བ་ནས་སྣང་བ་ཞེས་བྱ་བའི་བར་དུ་སྔ་མ་བཞིན་ནོ། །
དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འདི་ཡོངས་སུ་ཤེས་སོ་ཞེས་བྱ་བ་ནས་དེ་བཞིན་དུ་སྦྱར་རོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བ་འདི་སྤངས་སོ་ཞེས་བྱ་བ་ནས་དེ་བཞིན་དུ་སྦྱར་རོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་

བསྔལ་འགོག་པ་འདི་མངོན་དུ་བྱས་སོ་ཞེས་བྱ་བ་ནས་དེ་བཞིན་དུ་སྦྱར་རོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པར་འགྲོ་བའི་ལམ་འདི་བསྒོམས་སོ་ཞེས་ཚུལ་བཞིན་ཡིད་ལ་བྱས་ཤིང་མང་དུ་བྱས་པས། ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་
ཤེས་པ་སྐྱེས། ཡིད་གཞུངས་པ་སྐྱེས། ཤེས་རབ་སྐྱེས་སོ། །སྣང་བ་བྱུང་ངོ་། །དགེ་སློང་དག་དེ་ལྟར་ངས་འཕགས་པའི་བདེན་པ་བཞི་པོ་འདི་དག་ལ་འདི་ལྟར་ཚུལ་བཞིན་ཡིད་ལ་བྱེད་པ་ན་ཇི་སྲིད་དུ་ལན་གསུམ་དུ་བཟླས་ཏེ། རྣམ་པ་བཅུ་གཉིས་སུ་བསྐོར་བའི་ཡེ་ཤེས་མཐོང་བ་མ་སྐྱེས་པ་དེ་སྲིད་དུ་དགེ་སློང་
དག་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་ཁས་མ་འཆེས་ཏེ་ང་ལ་ཡེ་ཤེས་མཐོང་བ་མ་སྐྱེས་སོ། །དགེ་སློང་དག་གང་ཚུན་ཆད་ངས་འཕགས་པའི་བདེན་པ་བཞི་པོ་འདི་དག་ལ་དེ་ལྟར་ལན་གསུམ་དུ་བཟླས་ཏེ། རྣམ་པ་བཅུ་གཉིས་སུ་བསྐོར་བའི་ཡེ་ཤེས་
མཐོང་བ་སྐྱེས་ནས་ངས་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བ་མི་འཁྲུགས་པ་མངོན་དུ་བྱས་པ་དེ་ཚུན་ཆད་དགེ་སློང་དག་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་ཁས་འཆེས་ཏེ། ངའི་ཡེ་ཤེས་མཐོང་བ་ཡང་སྐྱེས་སོ། །ངའི་སྐྱེ་བ་
ཟད་དོ། །ཚངས་པར་སྤྱད་པ་བསྙེན་ཏོ། །བྱ་བ་བྱས་སོ། །འདི་ལ་སྲིད་པ་གཞན་མི་ཤེས་སོ། །དེ་ལ་འདི་སྐད་ཅེས་བྱ་སྟེ། དེ་ནི་ཚངས་དབྱངས་མིའམ་ཅི་ཡི་སྐད་ཀྱིས་གསུང་། །ཡན་ལག་ཁྲག་ཁྲིག་སྟོང་འཕགས་བསྐལ་པ་བྱེ་མང་དུ། །རྟག་ཏུ་བདེན་པ་ཤིན་ཏུ་བསྒོམས་པས་རང་བྱུང་བ། །ཤཱཀྱ་
ཐུབ་པས་ཀཽཎྜི་ནྱ་ལ་བཀའ་སྩལ་པ། །མིག་དང་རྣ་བ་སྣ་ནི་མི་རྟག་མི་བརྟན་ཏེ། །ལྕེ་དང་ལུས་དང་ཡིད་ཀྱང་སྡུག་བསྔལ་བདག་མེད་སྟོང་། །བེམས་པོ་རང་བཞིན་རྩྭ་དང་རྩིག་པ་ལྟར་མི་གཡོ། །འདི་ལ་བདག་མེད་མིང་དང་སྲོག་ཀྱང་ཡོད་མ་ཡིན། །ཆོས་འདི་ཐམས་ཅད་རྒྱུ་ལ་བརྟེན་ནས་བྱུང་བ་སྟེ། །
མཐའ་དང་མཐའ་མེད་ལྟ་དང་བྲལ་ཞིང་ནམ་མཁའ་འདྲ། །བྱེད་པ་པོ་མེད་དེ་བཞིན་ཚོར་བ་པོ་ཡང་མེད། །དགེ་དང་མི་དགེ་བྱས་པའི་ལས་ནི་ཆུད་མི་ཟ། །ཕུང་པོ་རྣམས་ལ་བརྟེན་ནས་འདི་ལྟར་སྡུག་བསྔལ་འབྱུང་། །སྲེད་པ་ཆུ་ཡིས་རྣམ་པར་འཕེལ་ནས་འབྱུང་བར་འགྱུར། །ལམ་གྱིས་ཆོས་རྣམས་

མཉམ་པ་ཉིད་དུ་རྣམ་མཐོང་ནས། །ཤིན་ཏུ་ཟད་ཅིང་བྱང་བའི་ཆོས་ཉིད་ཀྱིས་ནི་འགགས། །ཀུན་རྟོག་རྟོག་པས་བསྐྱེད་པའི་ཚུལ་བཞིན་མ་ཡིན་པས། །མ་རིག་བྱུང་སྟེ་འདི་ལ་འབྱུང་བྱེད་གང་ཡང་མེད། །འདུ་བྱེད་རྒྱུ་ཡང་འབྱིན་ཏེ་འཕོ་བ་ཡོད་མ་ཡིན། །འཕོ་བར་འགྱུར་ལ་བརྟེན་ཏེ་རྣམ་པར་ཤེས་པ་
འབྱུང་། །རྣམ་པར་ཤེས་ལས་དེ་ལྟར་མིང་དང་གཟུགས་ཀྱང་འབྱུང་། །མིང་དང་གཟུགས་ལས་དབང་པོ་དྲུག་ནི་ཡང་དག་འབྱུང་། །དབང་པོ་དེ་དག་འདུས་པ་ལ་ནི་རེག་ཅེས་བརྗོད། །རེག་པ་ལས་ནི་ཚོར་བ་རྣམ་གསུམ་འབྱུང་བར་འགྱུར། །ཆུང་ཟད་ཚོར་བ་གང་ཡིན་དེ་ཀུན་སྲེད་པར་བཤད། །
སྲེད་པས་ལས་ནི་སྡུག་བསྔལ་ཕུང་པོ་ཐམས་ཅད་འབྱུང་། །ཉེ་བར་ལེན་པ་ལས་ནི་སྲིད་པ་ཐམས་ཅད་འབྱུང་། །སྲིད་པའི་རྐྱེན་གྱིས་དེ་ཡི་སྐྱེ་བ་འབྱུང་བར་འགྱུར། །སྐྱེ་བའི་གཞི་ལས་རྒ་དང་ན་དང་སྡུག་བསྔལ་འགྱུར། །སྲིད་པའི་དྲ་བ་འདི་ནི་སྐྱེ་བའི་རྣམ་པ་མང་། །དེ་ལྟར་འགྲོ་བ་འདི་རྣམས་ཐམས་
ཅད་རྐྱེན་བྱུང་ཉིད། །བདག་གམ་གང་ཟག་འཕོ་བ་པོ་ནི་གང་ཡང་མེད། །གང་ན་རྟོག་དང་རྣམ་རྟོག་མེད་དེ་ཚུལ་བཞིན་བརྗོད། །ཚུལ་བཞིན་གང་ན་ཡོད་དེར་མ་རིག་གང་ཡང་མེད། །གང་ན་མ་རིག་པ་ནི་འགགས་པར་གྱུར་དེ་ན། །སྲིད་པའི་ཡན་ལག་ཀུན་ཟད་བྱུང་ཞིང་ཟད་ནས་འགགས།
དེ་ལྟར་རྐྱེན་འདི་དེ་བཞིན་གཤེགས་པས་ཐུགས་སུ་ཆུད། །དེས་ན་རང་བྱུང་བདག་ཉིད་བདག་ལ་ལུང་སྟོན་ཏོ། །རྒྱུ་རྣམས་རྟོགས་པ་སངས་རྒྱས་ཡིན་པ་མ་གཏོགས་པར། །ཕུང་པོ་སྐྱེ་མཆེད་ཁམས་རྣམས་སངས་རྒྱས་ཡིན་མི་སྨྲ། །འདི་ལ་ཕ་རོལ་མུ་སྟེགས་ཅན་རྟེན་གནས་མེད་དེ། །
ཆོས་སྦྱོར་འདི་འདྲ་འདི་ལ་རབ་ཏུ་རྩོད་པ་སྟོང་། །ཡང་དག་མངོན་སངས་རྒྱས་ལས་སྤྱད་ཅིང་རབ་དག་པ། །སེམས་ཅན་དེ་དག་ཆོས་འདི་ཤེས་པའི་སྐལ་བ་ཡོད། །དེ་ལྟར་རྣམ་པ་བཅུ་གཉིས་ཀྱིས། །ཆོས་ཀྱི་འཁོར་ལོ་རབ་བསྐོར་བ། །ཀཽཎྜི་ནྱས་ནི་ཀུན་ཤེས་ཏེ། །དཀོན་མཆོག་གསུམ་ནི་
མངོན་དུ་གྲུབ། །སངས་རྒྱས་ཆོས་དང་དགེ་འདུན་ནི། །དེ་དག་དཀོན་མཆོག་གསུམ་ཡིན་ཏེ། །ཚངས་པའི་གྲོང་ཁྱེར་གནས་ཀྱི་བར། །གཅིག་ནས་གཅིག་ཏུ་སྒྲ་སོང་བ། །འཇིག་རྟེན་མགོན་པོ་སྐྱོབ་པ་ཡིས། །རྡུལ་མེད་འཁོར་ལོ་རབ་ཏུ་བསྐོར། །གང་དག་འཇིག་རྟེན་རབ་དཀོན་པ། །

དཀོན་མཆོག་གསུམ་ནི་བྱུང་བར་གྱུར། །ཀཽཎྜི་ནྱ་ལ་སོགས་པ་དག །དགེ་སློང་དག་ནི་ལྔ་པོ་དང་། །ལྷ་ནི་བྱེ་བ་དྲུག་ཅུ་རྣམས། །ཆོས་ཀྱི་མིག་ནི་རྣམ་པར་སྦྱངས། །ཆོས་ཀྱི་འཁོར་ལོ་བསྐོར་བ་ན། །གཟུགས་ཀྱི་ཁམས་ན་འཁོད་པའི་ལྷ། །གཞན་ཡང་བྱེ་བ་བརྒྱད་ཅུ་པོ། །དེ་
དག་མིག་ནི་རྣམ་པར་སྦྱངས། །བརྒྱད་ཁྲི་བཞི་སྟོང་མི་ཡི་རྣམས། །གང་དག་ལྷགས་པ་དེ་དག་ཀྱང་། །མིག་ནི་རྣམ་པར་སྦྱངས་གྱུར་ཏེ། །ཐམས་ཅད་ངན་པར་འགྲོ་ལས་གྲོལ། །སྐད་ཅིག་དེ་ལ་ཕྱོགས་བཅུ་མཐའ་ཡས་པར་ནི་སངས་རྒྱས་གསུང་སོང་སྟེ། །སྟོབས་བཅུ་ཤཱཀྱའི་ཁྱུ་མཆོག་
འདི་ནི་དྲང་སྲོང་ལྷུང་བར་གཤེགས་ནས་སུ། །བཱ་རཱ་ཎ་སཱིར་ཆོས་ཀྱི་འཁོར་ལོ་དམ་པ་གཞན་མིན་བསྐོར་ཏོ་ཞེས། །གསུང་སྙན་ཡིད་དུ་འོང་ཞིང་དགེ་བ་བར་སྣང་ཀུན་ཏུ་གྲགས་པར་གྱུར། །ཕྱོགས་བཅུ་དག་ན་སངས་རྒྱས་གང་དག་ཇི་སྙེད་ཐམས་ཅད་མི་གསུང་གྱུར། །ཐུབ་པ་དེ་དག་རྣམས་ཀྱི་རིམ་གྲོ་
པ་དག་ཀུན་གྱིས་རྒྱལ་བ་ལ། །སྒྲ་གསན་ནས་ནི་ཅི་སླད་སྟོབས་བཅུས་ཆོས་ཀྱི་བཀའ་མཆིད་རྒྱུན་ཀྱང་བཀུམ། །ཅི་ཡི་སླད་དུ་མི་གསུང་བཞུགས་པར་གྱུར་པ་མྱུར་དུ་ལེགས་པར་གསུངས། །སྔོན་གྱི་སྲིད་པ་བརྒྱར་ནི་བརྩོན་འགྲུས་སྟོབས་ཀྱིས་བྱང་ཆུབ་བསྒྲུབས་ནས་སུ། །བྱང་ཆུབ་སེམས་དཔའ་
བརྒྱ་སྟོང་ཕྲག་མང་རྣམས་ཀྱང་ཕྱིར་ནི་བསྙིལ་བ་མཛད། །དེས་ན་ཕན་པ་མཛད་པས་ཤིན་ཏུ་སྦྱངས་པས་བྱང་ཆུབ་ཤིས་པ་བརྙེས། །འཁོར་ལོ་གསུམ་དུ་བསྐོར་བ་རབ་ཏུ་བསྐོར་བས་དེས་ནི་མི་གསུང་གྱུར། །ཐུབ་པ་དེ་དག་རྣམས་ཀྱི་གསུང་འདི་ཐོས་ནས་སེམས་ཅན་བྱེ་བ་བརྒྱ། །བྱམས་པའི་
སྟོབས་བསྐྱེད་ནས་ནི་བྱང་ཆུབ་དམ་པ་ཤིས་པར་ཡང་དག་ཞུགས། །བདག་ཅག་རྣམས་ཀྱང་ཐུབ་པ་དེ་ལས་བརྩོན་འགྲུས་མཐུས་འཕགས་རྗེས་བསླབས་ཏེ། །འཇིག་རྟེན་ལ་ནི་འཇིག་རྟེན་མཆོག་གི་ཆོས་མིག་སྦྱིན་པར་མྱུར་གྱུར་ཅིག །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་
སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ནི་བཅོམ་ལྡན་འདས་ལ་ཆོས་ཀྱི་འཁོར་ལོ་བསྐོར་བའི་རྣམ་པར་འཕྲུལ་བའི་ཕྱོགས་ཉན་པར་འཚལ་

བ་ལགས་ན། དེའི་སླད་དུ་བཅོམ་ལྡན་འདས་དེ་བཞིན་གཤེགས་པས་ཆོས་ཀྱི་འཁོར་ལོ་རྣམ་པ་ཇི་ལྟ་བུ་ཞིག་བསྐོར་བ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ལེགས་པར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། བྱམས་པ་ཆོས་
ཀྱི་འཁོར་ལོ་དེ་ནི་གཏིང་མི་དམིགས་པའི་ཕྱིར་ཟབ་པའོ། །འཁོར་ལོ་དེ་ནི་གཉིས་དང་བྲལ་བའི་ཕྱིར་མཐོང་བར་དཀའ་བའོ། །འཁོར་ལོ་དེ་ནི་ཡིད་ལ་བྱེད་པས་ཡིད་ལ་བྱ་བ་མ་ཡིན་པའི་ཕྱིར། ཁོང་དུ་ཆུད་པར་དཀའ་བའོ། །འཁོར་ལོ་དེ་ནི་ཡེ་ཤེས་དང་རྣམ་པར་ཤེས་པ་མཉམ་པ་ཉིད་དུ་
རྟོགས་པའི་ཕྱིར། རྣམ་པར་ཤེས་པར་དཀའ་བའོ། །འཁོར་ལོ་དེ་ནི་སྒྲིབ་པ་མེད་པའི་རྣམ་པར་ཐར་པ་ཐོབ་པའི་ཕྱིར། རྙོག་པ་མེད་པའོ། །འཁོར་ལོ་དེ་ནི་དཔེ་གཞག་པ་དང་བྲལ་བའི་ཕྱིར་ཕྲ་བའོ། །འཁོར་ལོ་དེ་ནི་རྡོ་རྗེ་ལྟ་བུའི་ཡེ་ཤེས་ཀྱིས་ཐོབ་པའི་ཕྱིར་སྙིང་པོའོ། །འཁོར་ལོ་དེ་ནི་སྔོན་གྱི་
མཐར་མ་བྱུང་བའི་ཕྱིར་མི་ཕྱེད་པའོ། །འཁོར་ལོ་དེ་ནི་སྤྲོས་པའི་སྐྱོན་ཐམས་ཅད་དང་བྲལ་བའི་ཕྱིར་སྤྲོས་པ་མེད་པའོ། །འཁོར་ལོ་དེ་ནི་ཤིན་ཏུ་མཐར་ཐུག་པའི་ཕྱིར་མི་འཁྲུགས་པའོ། །འཁོར་ལོ་དེ་ནི་ནམ་མཁའ་དང་མཚུངས་པའི་ཕྱིར་ཐམས་ཅད་ཀྱི་རྗེས་སུ་སོང་བའོ། །བྱམས་པ་
ཆོས་ཀྱི་འཁོར་ལོ་དེ་ནི་ཆོས་ཐམས་ཅད་ཀྱི་རང་བཞིན་དང་ངོ་བོ་ཉིད་ཀུན་ཏུ་བསྟན་པ་འཇིག་པའི་འཁོར་ལོའོ། །སྐྱེ་བ་མེད་པ་དང་། འགག་པ་མེད་པ་དང་། འབྱུང་བ་མེད་པའི་འཁོར་ལོའོ། །ཀུན་གཞི་མེད་པའི་འཁོར་ལོའོ། །རྟོག་པ་མེད་པ་དང་། རྣམ་པར་རྟོག་པ་མེད་པའི་
ཆོས་ཀྱི་ཚུལ་ལ་རྟོགས་པའི་འཁོར་ལོའོ། །སྟོང་པ་ཉིད་ཀྱི་འཁོར་ལོའོ། །མཚན་མ་མེད་པའི་འཁོར་ལོའོ། །སྨོན་པ་མེད་པའི་འཁོར་ལོའོ། །མངོན་པར་འདུ་བྱ་བ་མེད་པའི་འཁོར་ལོའོ། །དབེན་པའི་འཁོར་ལོའོ། །འདོད་ཆགས་དང་བྲལ་བའི་འཁོར་ལོའོ། །འགོག་པའི་
འཁོར་ལོའོ། །དེ་བཞིན་གཤེགས་པས་ཐུགས་སུ་ཆུད་པའི་འཁོར་ལོའོ། །ཆོས་ཀྱི་དབྱིངས་འདྲེས་པ་མེད་པའི་འཁོར་ལོའོ། །ཡང་དག་པའི་མཐའ་རྣམ་པར་མི་འཁྲུགས་པའི་འཁོར་ལོའོ། །ཆགས་པ་མེད་ཅིང་སྒྲིབས་པ་མེད་པའི་འཁོར་ལོའོ། །རྟེན་པ་ལ་འཇུག་ཅིང་གཉིས་སུ་ལྟ་བ་

ལས་ཡང་དག་པར་འདའ་བའི་འཁོར་ལོའོ། །ཆོས་ཀྱི་དབྱིངས་མཐའ་དང་དབུས་མེད་པར་རྣམ་པར་མི་འཁྲུགས་པའི་འཁོར་ལོའོ། །སངས་རྒྱས་ཀྱི་མཛད་པ་ལྷུན་གྱིས་གྲུབ་པར་རྒྱུན་མི་གཅོད་པའི་འཁོར་ལོའོ། །འཇུག་པ་མེད་ཅིང་མངོན་པར་གྲུབ་པ་མེད་པའི་འཁོར་ལོའོ། །
ཤིན་ཏུ་དམིགས་སུ་མེད་པའི་འཁོར་ལོའོ། །བླང་བ་མེད་པ་དང་དོར་བ་མེད་པའི་འཁོར་ལོའོ། །བརྗོད་དུ་མེད་པའི་འཁོར་ལོའོ། །རང་བཞིན་གྱིས་ཇི་ལྟ་བ་བཞིན་གྱི་འཁོར་ལོའོ། །ཡུལ་གཅིག་ལ་ཆོས་ཐམས་ཅད་མཉམ་པ་ཉིད་དུ་འཇུག་པའི་འཁོར་ལོའོ། །སེམས་ཅན་འདུལ་བའི་ཕྱིར་
ཕྱད་པར་བྱིན་གྱིས་རློབ་ཅིང་ལྡོག་པ་མེད་པའི་འཁོར་ལོའོ། །གཉིས་སུ་མེད་ཅིང་སྒྲོ་བཏགས་པ་མེད་པ་དོན་དམ་པའི་ཚུལ་ལ་འཇུག་པའི་འཁོར་ལོའོ། །ཆོས་ཀྱི་དབྱིངས་སུ་ཡང་དག་པར་འདུ་བའི་འཁོར་ལོའོ། །འཁོར་ལོ་དེ་ནི་ཚད་ཐམས་ཅད་ལས་ཤིན་ཏུ་འདས་པས་དཔག་ཏུ་མེད་པའོ། །
འཁོར་ལོ་དེ་ནི་གྲངས་ཐམས་ཅད་དང་བྲལ་བས་གྲངས་མེད་པའོ། །འཁོར་ལོ་དེ་ནི་སེམས་ཀྱི་ལམ་ལས་ཡང་དག་པར་འདས་པས་བསམ་གྱིས་མི་ཁྱབ་པའོ། །འཁོར་ལོ་དེ་ནི་གཞལ་བ་དང་བྲལ་བས་མཚུངས་པ་མེད་པའོ། །འཁོར་ལོ་དེ་ནི་སྒྲ་སྐད་ཀྱི་ཚིག་གི་ལམ་ཐམས་ཅད་དང་བྲལ་བས་
བརྗོད་དུ་མེད་པ་སྟེ། ཚད་མེད་པ། དཔེ་མེད་པ། དཔེ་དང་བྲལ་བ། ནམ་མཁའ་དང་མཚུངས་ཤིང་འདྲ་བ། ཆད་པ་མེད་པ། རྟག་པ་མེད་པ། རྟེན་པ་ལ་འཇུག་པ་དང་མི་འགལ་བ། ཞི་བ། ཤིན་ཏུ་ཉེ་བར་ཞི་བ། དེ་ཁོ་ན། དེ་བཞིན་ཉིད། མ་ནོར་བ་དེ་བཞིན་ཉིད། གཞན་མ་ཡིན་པ། གཞན་
དུ་མི་འགྱུར་བ། སེམས་ཅན་ཐམས་ཅད་ཀྱི་སྒྲར་བརྗོད་པ། བདུད་རྣམས་ཚར་གཅོད་པ། མུ་སྟེགས་ཅན་རྣམས་ཕམ་པར་བྱེད་པ། འཁོར་བའི་ཡུལ་ལས་འདའ་བ། སངས་རྒྱས་ཀྱི་ཡུལ་ལ་འཇུག་པ། འཕགས་པའི་གང་ཟག་རྣམས་ཀྱིས་ཡོངས་སུ་ཤེས་པ། རང་སངས་རྒྱས་
རྣམས་ཀྱིས་རྟོགས་པ། བྱང་ཆུབ་སེམས་དཔའ་རྣམས་ཀྱིས་ཡོངས་སུ་བཟུང་བ། དེ་བཞིན་གཤེགས་པ་ཐམས་ཅད་དང་དབྱེར་མེད་པའོ།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅོ་བརྒྱད་པ་སྟེ་ཐ་མ། བྱམས་པ་དེ་

བཞིན་གཤེགས་པས་ཆོས་ཀྱི་འཁོར་ལོ་རྣམ་པ་འདི་ལྟ་བུ་བསྐོར་ཏེ། དེ་བསྐོར་བས་དེ་བཞིན་གཤེགས་པ་ལ་དེ་བཞིན་གཤེགས་པའོ་ཞེས་བྱའོ། །ཡང་དག་པར་རྫོགས་པའི་སངས་རྒྱས་ཞེས་བྱའོ། །རང་བྱུང་ཞེས་བྱའོ། །ཆོས་ཀྱི་རྗེ་ཞེས་བྱའོ། །འདྲེན་པ་ཞེས་བྱའོ། །རྣམ་པར་འདྲེན་པ་ཞེས་
བྱའོ། །ཡོངས་སུ་འདྲེན་པ་ཞེས་བྱའོ། །དེད་དཔོན་ཞེས་བྱའོ། །ཆོས་ཐམས་ཅད་ལ་དབང་སྒྱུར་བ་ཞེས་བྱའོ། །ཆོས་ཀྱི་དབང་ཕྱུག་ཅེས་བྱའོ། །ཆོས་ཀྱི་འཁོར་ལོ་བསྐོར་བ་ཞེས་བྱའོ། །ཆོས་ཀྱི་སྦྱིན་བདག་ཅེས་བྱའོ། །མཆོད་སྦྱིན་རྗེ་ཞེས་བྱའོ། །མཆོད་སྦྱིན་ལེགས་པར་མཛད་པ་ཞེས་
བྱའོ། །བརྟུལ་ཞུགས་གྲུབ་པ་ཞེས་བྱའོ། །དགོངས་པ་རྫོགས་པ་ཞེས་བྱའོ། །འཆད་པ་པོ་ཞེས་བྱའོ། །དབུགས་འབྱིན་པ་ཞེས་བྱའོ། །བདེ་བ་མཛད་པ་ཞེས་བྱའོ། །དཔའ་བོ་ཞེས་བྱའོ། །ཉོན་མོངས་པ་སྤོང་བ་ཞེས་བྱའོ། །གཡུལ་ལས་རྣམ་པར་རྒྱལ་བ་ཞེས་བྱའོ། །གདུགས་
དང་རྒྱལ་མཚན་དང་བ་དན་བསྒྲེང་བ་ཞེས་བྱའོ། །སྣང་བ་མཛད་པ་ཞེས་བྱའོ། །འོད་མཛད་པ་ཞེས་བྱའོ། །མུན་པ་སེལ་བ་ཞེས་བྱའོ། །སྒྲོན་མ་འཛིན་པ་ཞེས་བྱའོ། །སྨན་པའི་རྒྱལ་པོ་ཆེན་པོ་ཞེས་བྱའོ། །ཡང་དག་པའི་གསོ་བ་མཛད་པ་ཞེས་བྱའོ། །ཟུག་རྔུ་འབྱིན་པ་ཆེན་པོ་ཞེས་
བྱའོ། །ཡེ་ཤེས་གཟིགས་པ་རབ་རིབ་མི་མངའ་བ་ཞེས་བྱའོ། །ཀུན་ཏུ་གཟིགས་པ་ཞེས་བྱའོ། །ཀུན་ཏུ་རྣམ་པར་གཟིགས་པ་ཞེས་བྱའོ། །ཀུན་ནས་སྤྱན་ཅེས་བྱའོ། །ཀུན་ནས་འོད་ཅེས་བྱའོ། །ཀུན་ཏུ་སྣང་བ་ཞེས་བྱའོ། །ཀུན་ནས་སྒོ་ཞེས་བྱའོ། །ཀུན་ཏུ་བཟང་པོ་ཞེས་བྱའོ། །
ཀུན་ཏུ་མཛེས་པ་ཞེས་བྱའོ། །གནས་པ་མེད་ལ་བླང་བ་མེད་ཅིང་དོར་བ་མེད་པ་ཞེས་བྱའོ། །མཐོ་བར་སེམས་པ་དང་། དམའ་བར་སེམས་པ་མེད་པའི་ཕྱིར་ས་དང་མཚུངས་པ་ཞེས་བྱའོ། །རབ་ཏུ་མི་གཡོས་པའི་ཕྱིར་རིའི་དབང་པོ་དང་འདྲ་བ་ཞེས་བྱའོ། །ཡོན་ཏན་ཐམས་ཅད་དང་ལྡན་པའི་ཕྱིར།
འཇིག་རྟེན་ཐམས་ཅད་ཀྱི་དཔལ་ཞེས་བྱའོ། །འཇིག་རྟེན་ཐམས་ཅད་ལས་མངོན་པར་འཕགས་པའི་ཕྱིར། སྤྱི་གཙུག་བལྟར་མི་མཐོང་བ་ཞེས་བྱའོ། །ཟབ་ཅིང་གཏིང་དཔག་དཀའ་བའི་ཕྱིར་རྒྱ་མཚོ་དང་མཚུངས་པ་ཞེས་བྱའོ། །བྱང་ཆུབ་ཀྱི་ཕྱོགས་ཀྱི་ཆོས་རིན་པོ་ཆེ་ཐམས་ཅད་རྫོ