Kinh tạng Tây Tạng (Kangyur Đại Học) — 038_ཕལ་ཆེན།_ཨ

ྒྱ་མཚོའི་ངོགས་ཀྱི་གྲོང་ཁྱེར་ཁང་པ་བརྩེགས་པ་འདི་ན་
གནས་སོ། །རིགས་ཀྱི་བུ་ཁོ་བོ་ནི་དེ་ལྟར་འགྲོ་བ་ལ་ཕན་པ་དང་། བདེ་བར་བརྩོན་པས་རྒྱ་མཚོ་ཆེན་པོའི་རིན་པོ་ཆེའི་གླིང་ཐམས་ཅད་ཀྱང་ཤེས་སོ། །རིན་པོ་ཆེའི་འབྱུང་གནས་ཐམས་ཅད་དང་། །རིན་པོ་ཆེའི་རིགས་ཐམས་ཅད་དང་། རིན་པོ་ཆེའི་གཏོས་ཐམས་ཅད་ཀྱང་རབ་ཏུ་
ཤེས་སོ། །ཀླུའི་གནས་ཐམས་ཅད་དང་། ཀླུའི་འཁྲུག་པ་ཐམས་ཅད་དང་། གནོད་སྦྱིན་གྱི་གནས་ཐམས་ཅད་དང་། གནོད་སྦྱིན་འཁྲུག་པ་ཐམས་ཅད་དང་། སྲིན་པོའི་གནས་ཐམས་ཅད་དང་། སྲིན་པོའི་འཇིགས་པ་ཐམས་ཅད་རབ་ཏུ་ཞི་བར་བྱ་བ་དང་། འབྱུང་པོའི་གནས་
ཐམས་ཅད་དང་། འབྱུང་པོའི་བར་ཆད་ཐམས་ཅད་རྣམ་པར་ཞི་བར་བྱ་བ་ཡང་རབ་ཏུ་ཤེས་ཏེ། གློང་ཡོད་པ་ཐམས་ཅད་གློང་ཐམས་ཅད་བཀོལ་བ་དང་དབའ་རླབས་ཆེན་པོ་ཡོངས་སུ་སྤང་བ་དང་། ཆུའི་ཁ་དོག་རྣམ་པ་ཐ་དད་པའང་རབ་ཏུ་ཤེས་སོ། །གཉི་ཟླ་དང་གཟའ་
སྐར་གྱི་ཚོགས་ཡོངས་སུ་འཁོར་བ་དང་། ཉིན་ཞག་དང་སྐད་ཅིག་དང་། ཡུད་ཙམ་དང་ཐག་ཅིག་ཀྱང་རབ་ཏུ་ཤེས་སོ། །ཕན་ཚུན་དུ་འགྲོ་བའི་ཤོལ་འདུམས་དང་། བདེ་མི་བདེ་དང་། གྲུའི་འཁྲུལ་འཁོར་བརྟན་པར་བྱ་བ་དང་། གྲུ་བཟུར་བ་དང་། གྲུ་ཕུལ་བ་དང་།

རླུང་བརྔོ་བ་དང་རླུང་བསྐྱེད་པ་དང་། གྲུ་བསྒྱུར་ཞིང་བཟློག་པ་དང་། གྲུ་བརྟོད་པ་དང་། གྲུ་བཏང་བ་ཡང་རབ་ཏུ་ཤེས་སོ། །རིགས་ཀྱི་བུ་དེ་ལྟར་ཁོ་བོ་ནི་ཤེས་པ་དེ་ལྟ་བུ་དང་ལྡན་པས་རྟག་ཏུ་སེམས་ཅན་གྱི་དོན་དང་དགོས་པ་བྱེད་དེ། ཚོང་པའི་ཚོགས་གྲུ་བརྟན་པོས་ལམ་བདེ་ཞིང་ཉེ་ཞོར་མི་འགྱུར་ལ་མི་
འཇིགས་པ་ནས། ཆོས་ཀྱི་གཏམ་གྱིས་དགའ་བ་དང་། སྤྲོ་བ་བསྐྱེད་ཅིང་བསམ་པ་ཇི་ལྟ་བ་བཞིན་དུ་རིན་པོ་ཆེའི་གླིང་དུ་ཕྱིན་པར་བྱས་ནས། དེ་དག་རིན་པོ་ཆེ་ཐམས་ཅད་ཀྱིས་ཚོགས་ཏེ། ཕུན་སུམ་ཚོགས་པར་གྱུར་པ་དང་། ཕྱིར་ཡང་འཛམ་བུའི་གླིང་དུ་འགྱེད་འགྱེད་ཀྱང་
རིགས་ཀྱི་བུ་ཁོ་བོའི་གྲུ་ནི་ནམ་ཡང་བུབ་པའམ། ཉེ་ཞོར་གྱུར་མ་མྱོང་སྟེ། སེམས་ཅན་གང་གིས་ཁོ་བོ་མཐོང་བར་གྱུར་པ་དང་། སེམས་ཅན་གང་གིས་ཁོ་བོའི་ཆོས་བསྟན་པ་ཐོས་པ་དེ་དག་ཀྱང་འཁོར་བའི་རྒྱ་མཚོ་ཐམས་ཅད་དུ་ཉེ་ཞོར་འགྱུར་བའི་འཇིགས་པ་དང་བྲལ་བར་
འགྱུར་རོ། །ཐམས་ཅད་མཁྱེན་པ་ཉིད་ཀྱི་རྒྱ་མཚོར་འཇུག་པའི་ཡེ་ཤེས་ཀྱང་མངོན་སུམ་དུ་འགྱུར་རོ། །སྲེད་པའི་རྒྱ་མཚོ་བསྐམ་པའི་དོན་དུའང་རབ་ཏུ་འཇུག་པར་འགྱུར་ཏེ། དུས་གསུམ་རྒྱ་མཚོའི་ཡེ་ཤེས་སྣང་བའང་རབ་ཏུ་ཐོབ་བོ། །སེམས་ཅན་ཐམས་ཅད་ཀྱི་སྡུག་བསྔལ་
རྒྱ་མཚོ་ཟད་པར་བྱ་བའི་ཕྱིར་ཡང་མངོན་པར་མོས་པར་འགྱུར་རོ། །སེམས་ཅན་ཐམས་ཅད་ཀྱི་སེམས་རྒྱ་མཚོའི་རྙོག་པ་དང་བར་བྱ་བའི་ཕྱིར་ཡང་རབ་ཏུ་བརྩོན་པར་འགྱུར་རོ། །ཞིང་རྒྱ་མཚོ་ཐམས་ཅད་རྣམ་པར་དག་པར་བྱ་བའི་ཕྱིར་ཡང་བརྩོན་འགྲུས་རྩོམ་པར་འགྱུར་རོ། །ཕྱོགས་
རྒྱ་མཚོ་ཐམས་ཅད་རྒྱས་པར་གང་བ་ལས་ཀྱང་ཕྱིར་མི་ལྡོག་པར་འགྱུར་རོ། །འགྲོ་བ་ཐམས་ཅད་ཀྱི་དབང་པོ་རྒྱ་མཚོ་ཐ་དད་པའང་ཁོང་དུ་ཆུད་པར་འགྱུར་རོ། །སེམས་ཅན་ཐམས་ཅད་ཀྱི་སྤྱོད་པ་རྒྱ་མཚོའི་རྗེས་སུའང་འབྲང་བར་འགྱུར་རོ། །འགྲོ་བའི་བསམ་པ་རྒྱ་མཚོ་
ཇི་ལྟ་བ་བཞིན་དུ་ཡང་གཟུགས་བརྙན་འབྱུང་བར་འགྱུར་རོ། །རིགས་ཀྱི་བུ་ཁོ་བོ་ནི་བྱང་ཆུབ་སེམས་དཔའི་རྣམ་པར་ཐར་བ་མཐོང་བ་དང་། ཐོས་པ་དང་འགྲོགས་པ་དང་། རྗེས་སུ་དྲན་པའི་ཆུ་ཀླུང་གི་དབྱངས་ཤེས་བྱ་བ་ཐོབ་པར་ཟད་ན་ཁོ་བོས་བྱང་ཆུབ་སེམས་

དཔའ་འཁོར་བའི་རྒྱ་མཚོ་ཐམས་ཅད་དུ་རྣམ་པར་སྤྱོད་པ་ཉོན་མོངས་པའི་རྒྱ་མཚོ་ཐམས་ཅད་ཀྱིས་གོས་པ་མེད་པ། ལྟ་བའི་རྣམ་པའི་རྒྱ་མཚོ་ཐམས་ཅད་ཀྱི་ཆགས་པའི་ཆུ་སྲིན་གྱི་འཇིགས་པ་དང་བྲལ་བ། ཆོས་རྒྱ་མཚོ་ཐམས་ཅད་ཀྱི་རང་བཞིན་དང་།
གཞི་ལས་རྣམ་པར་རྒྱུ་བ། འགྲོ་བ་རྒྱ་མཚོ་ཐམས་ཅད་བསྡུ་བའི་དངོས་པོས་ཡོངས་སུ་སྡུད་པའི་རྒྱ་མཚོ་དང་ལྡན་པ། ཐམས་ཅད་མཁྱེན་པ་ཉིད་ཀྱི་རྒྱ་མཚོ་དང་འགྲོགས་པ། སེམས་ཅན་གྱི་མངོན་པར་ཆགས་པའི་རྒྱ་མཚོ་ཐམས་ཅད་རབ་ཏུ་བསྲུབ་པ། དུས་རྒྱ་མཚོ་ཐམས་
ཅད་དང་། ཐ་མི་དད་པར་རྣམ་པར་སྤྱོད་པ། འགྲོ་བ་རྒྱ་མཚོ་ཐམས་ཅད་ཡོངས་སུ་སྨིན་པར་བྱ་བའི་དམིགས་པ་ཤེས་པ། འགྲོ་བ་རྒྱ་མཚོ་ཐམས་ཅད་ཀྱི་འདུལ་བའི་དབྲེས་ལས་མི་འདའ་བར་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་
ལྷོ་ཕྱོགས་ཀྱི་རྒྱུད་འདི་ཉིད་ན་གྲོང་ཁྱེར་དགའ་བའི་ཕྲེང་བ་ཞེས་བྱ་བ་ཡོད་དེ། དེ་ན་ཚོང་དཔོན་རྒྱལ་བ་དམ་པ་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་
ཚོང་དཔོན་གྱི་བུ་ནོར་བཟངས་ཀྱིས་མཉན་པ་དཔའ་བོའི་རྐང་པ་གཉིས་ལ་སྤྱི་བོས་ཕྱག་འཚལ་ནས། མཉན་པ་དཔའ་བོ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ། ཡང་དང་ཡང་བལྟས་ནས་གདོང་མཆི་མས་བཀང་སྟེ། ངུ་ཞིང་། དགེ་བའི་བཤེས་གཉེན་
བལྟ་བས་མ་ངོམས་བཞིན་དུ་མཉན་པ་དཔའ་བོའི་དྲུང་ནས་སོང་ངོ་།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་བཞི་བ། དེ་ནས་ཚོང་དཔོན་གྱི་བུ་ནོར་བཟངས་བྱམས་པ་ཆེན་པོས་སེམས་ཅན་གྱི་ཁམས་ཚད་
མེད་པར་རྒྱས་བའི་སེམས་དང་ལྡན་པ། སྙིང་རྗེ་ཆེན་པོའི་རླན་གྱིས་མངོན་པར་བརླན་པའི་རྒྱུད་ཅན། བསོད་ནམས་དང་ཡེ་ཤེས་ཀྱི་ཚོགས་རྒྱ་ཆེན་པོའི་རྒྱན་ཤིན་ཏུ་བསྩགས་པ་ཉོན་མོངས་པའི་རྡུལ་དང་མུན་པ་དང་དྲི་མ་དང་འདམ་ཐམས་ཅད་དང་བྲལ་བ། ཆོས་མཉམ་པ་ཉིད་ཁོང་དུ་ཆུད་

པས། ཐམས་ཅད་མཁྱེན་པ་ཉིད་ཀྱི་ལམ་གྱེན་ཐུར་མེད་པ་ལ་ཞུགས་པ། དགེ་བའི་ཆོས་ཚད་མེད་པ་ལ་འཇུག་པའི་སྒོར་ཞུགས་པ། མི་དགེ་བ་ཐམས་ཅད་ཀྱིས་མི་ཤིགས་པའི་བརྩོན་འགྲུས་བརྟན་པའི་མཐུ་སྔོན་དུ་འདོར་བ་དང་ལྡན་པ། བྱང་ཆུབ་སེམས་དཔའི་ཏིང་ངེ་འཛིན་བསམ་གྱིས་
མི་ཁྱབ་པ་རབ་ཏུ་བྱང་བ། རྒྱ་ཆེན་པོའི་བདེ་བ་རབ་ཏུ་ཐོབ་པ། ཤེས་རབ་ཀྱི་ཉི་མའི་འོད་ཟེར་སྣང་བས། མ་རིག་པའི་མུན་པ་མ་ལུས་པ་བསལ་བ། ཐབས་ཀྱི་སེར་བུ་བདེ་ཞིང་བསིལ་བས་བླགས་པའི་ཡེ་ཤེས་ཀྱི་མེ་ཏོག་གིས་རྒྱས་པ། སྨོན་ལམ་ཆེན་པོའི་རྒྱ་མཚོར་འབྱུང་བའི་ཡེ་
ཤེས་ཀྱི་ཚུལ་དང་མཐུན་པ། ཆོས་ཀྱི་དབྱིངས་ཐམས་ཅད་དུ་ཐོགས་པ་མེད་པར་རྒྱས་པར་འགེངས་པའི་ཡེ་ཤེས་དང་ལྡན་པ། ཐམས་ཅད་མཁྱེན་པ་ཉིད་ཀྱི་ཕོ་བྲང་དུ་ཐོགས་པ་མེད་པར་འགྲོ་བ་ལ་མངོན་དུ་གྱུར་པ། བྱང་ཆུབ་སེམས་དཔའི་ལམ་ལ་མངོན་པར་མོས་པ་དེ། གྲོང་
ཁྱེར་དགའ་བའི་ཕྲེང་བ་གང་ན་བ་དེར་ཕྱིན་ཏེ། ཚོང་དཔོན་རྒྱལ་བ་དམ་པ་ཡོངས་སུ་རྨེད་ཅིང་ཚོལ་ཚོལ་བ་ལས། གྲོང་ཁྱེར་དགའ་བའི་ཕྲེང་བའི་ཤར་ཕྱོགས་ལོགས་ཀྱི་འདབ་ཅིག་ན། ཤིང་ཨ་ཤོ་ཀའི་ནགས་ཚལ་རྒྱལ་མཚན་སྣ་ཚོགས་ཞེས་བྱ་བ་འདུག་པ་དེའི་
ནང་ན་ཁྱིམ་བདག་སྟོང་ཕྲག་དུ་མ་ཞིག་གིས་བསྐོར་ཏེ། གྲོང་ཁྱེར་གྱི་བྱ་བ་སྣ་ཚོགས་ཡོངས་སུ་འགྲོ་ཞིང་དེ་ལས་བརྟེན་ཏེ། བདག་ཏུ་བྱ་བ་ཐམས་ཅད་ཡང་དག་པར་གཞོམ་པ་དང་། ཡོངས་སུ་འཛིན་པ་ཐམས་ཅད་ཡོངས་སུ་གཏང་བ་དང་། དངོས་པོར་འཛིན་པ་ཐམས་ཅད་རབ་
ཏུ་སྤང་བ་དང་། མངོན་པར་ཞེན་པ་ཐམས་ཅད་ཤིན་ཏུ་གཞིག་པ་དང་། སྲེད་པའི་འཆིང་བ་ཐམས་ཅད་གཅད་པར་བྱ་བ་དང་། ལྟ་བའི་རྣམ་པ་ཐམས་ཅད་ཀྱི་སྒོ་གླེགས་གཅག་པ་དང་། ཐེ་ཙོམ་དང་ཡིད་གཉིས་དང་། ནེམ་ནུར་གྱི་རབ་རིབ་ཐམས་ཅད་རྣམ་པར་བསལ་བ་དང་།
གཡོ་སྒྱུའི་རྙོག་པ་ཤིན་ཏུ་གདང་བ་དང་། ཕྲག་དོག་དང་སེར་སྣའི་དྲི་མ་ཡོངས་སུ་སྦྱང་བ་དང་། སེམས་ཀྱི་མཚོ་ཤིན་ཏུ་གསལ་བར་བྱ་བ་དང་། སེམས་རྙོག་པ་མེད་པ་ལ་སེམས་ཅན་རབ་ཏུ་དགོད་པ་དང་། དད་པ་རྙོག་པ་མེད་པའི་སྟོབས་བསྐྱེད་དེ། སངས་རྒྱས་བལྟ་

བར་མོས་པ་བསྐྱེད་པ་དང་། བྱང་ཆུབ་སེམས་དཔའི་སྟོབས་བསྔགས་ཤིང་། སངས་རྒྱས་ཀྱི་ཆོས་ཡང་དག་པར་བླང་བ་དང་། བྱང་ཆུབ་སེམས་དཔའི་སྤྱོད་པ་སྨོས་ཏེ། བྱང་ཆུབ་སེམས་དཔའི་ཏིང་ངེ་འཛིན་གྱི་སྟོབས་ཡོངས་སུ་བསྐྱེད་པ་དང་། བྱང་ཆུབ་
སེམས་དཔའི་ཤེས་རབ་ཀྱི་སྟོབས་ཡང་དག་པར་སྟོན་ཅིང་། བྱང་ཆུབ་སེམས་དཔའི་དྲན་པའི་སྟོབས་རྣམ་པར་དག་པའི་མཐར་ཕྱིན་པར་བྱ་བའི་ཕྱིར། ཆོས་ཀྱི་གཏམ་བྱེད་ཅིང་འདི་ལྟ་སྟེ། བྱང་ཆུབ་ཏུ་སེམས་བསྐྱེད་པ་ལ་མངོན་པར་མོས་པར་བྱ་བའི་ཕྱིར་ཆོས་སྟོན་ཅིང་འདུག་
པ་མཐོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་གཏམ་དེའི་རྗེས་ཆད་ཆད་དུ་བསྡད་ནས་ཚོང་དཔོན་རྒྱལ་བ་དམ་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། རིང་མོ་ཞིག་ཏུ་བཏུད་ནས་ཆོས་ལ་ཤིན་ཏུ་གུས་པའི་བསམ་པས་ཚིག་འདི་སྐད་དུ་བརྗོད་དོ། །འཕགས་པ་བདག་ནི་
ནོར་བཟངས་ནོར་བཟངས་ཤེས་བགྱི་བ་སྟེ། བྱང་ཆུབ་སེམས་དཔའི་སྤྱོད་པ་ཡོངས་སུ་ཚོལ་ན་ཅི་ནས་ཀྱང་བདག་བྱང་ཆུབ་སེམས་དཔའི་སྤྱོད་པ་ལ་སློབ་པར་འགྱུར་བ་དང་། བསླབས་ནས་ཀྱང་ཅི་ནས་སེམས་ཅན་ཐམས་ཅད་ཡོངས་སུ་སྨིན་པར་བགྱི་བ་དང་། གདུལ་བའི་དོན་ལ་མངོན་དུ་མོས་པར་འགྱུར་བ་དང་། སངས་རྒྱས་ཐམས་ཅད་
ཀྱི་ཞལ་བལྟ་བ་ལས་མི་འཕང་བ་དང་། སངས་རྒྱས་ཐམས་ཅད་ཀྱི་ཆོས་ཐོས་པར་འགྱུར་བ་དང་། སངས་རྒྱས་ཐམས་ཅད་ཀྱི་ཆོས་ཀྱི་སྤྲིན་གྱི་ཆར་ཡོངས་སུ་གཟུང་བ་དང་། སངས་རྒྱས་ཐམས་ཅད་ཀྱི་ཆོས་ཀྱི་ཚུལ་ལ་ནན་ཏན་དུ་བགྱི་བ་དང་། འཇིག་རྟེན་གྱི་ཁམས་ཐམས་
ཅད་དུ་བྱང་ཆུབ་སེམས་དཔའི་སྤྱོད་པ་སྤྱད་པ་དང་། བསྐལ་པ་ཐམས་ཅད་དུ་གནས་ཀྱང་བྱང་ཆུབ་སེམས་དཔའི་སྤྱོད་པས་ཡོངས་སུ་མི་སྐྱོ་བ་དང་། དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་ཡོངས་སུ་བཙལ་བར་འགྱུར་བ་དང་། སངས་རྒྱས་ཐམས་
ཅད་ཀྱི་བྱིན་གྱི་རླབས་ཡང་དག་པར་མནོད་པ་དང་། དེ་བཞིན་གཤེགས་པ་ཐམས་ཅད་ཀྱི་སྟོབས་རྣམས་ལ་སྣང་བ་ཐོབ་པར་འགྱུར་བ་དེ་ལྟར་འཕགས་པས་བདག་ལ་བཤད་དུ་གསོལ། །དེ་ནས་ཚོང་དཔོན་རྒྱལ་བ་དམ་པས། ཚོང་དཔོན་གྱི་བུ་ནོར་བཟངས་ལ་

འདི་སྐད་ཅེས་སྨྲས་སོ། །རིགས་ཀྱི་བུ་དེ་ལྟར་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ལེགས་སོ་ལེགས་སོ། །རིགས་ཀྱི་བུ་ཁོ་བོ་ནི་འདི་ལྟ་སྟེ། དངོས་པོ་མེད་པ་ལ་གནས་པས་མངོན་པར་འདུ་བྱ་བ་མེད་པའི་རྫུ་འཕྲུལ་ཐོབ་པའི་མཐུས།
བྱང་ཆུབ་སེམས་དཔའི་སྤྱོད་པའི་སྒོ་ཐམས་ཅད་དུ་འགྲོ་བ་ཡོངས་སུ་སྦྱོང་སྟེ། དེ་ལྟར་ཁོ་བོ་བྱང་ཆུབ་སེམས་དཔའི་སྤྱོད་པ་ཡོངས་སུ་དག་པའི་སྒོ་ཐམས་ཅད་དུ་འགྲོ་བ་འདི་ལ་གནས་ཤིང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་སུམ་ཅུ་རྩ་གསུམ་གྱི་
ལྷའི་འཇིག་རྟེན་ཐམས་ཅད་དང་། མཚེ་མའི་ལྷའི་གནས་ཐམས་ཅད་དང་། དགའ་ལྡན་གྱི་ལྷའི་འཇིག་རྟེན་ཐམས་ཅད་དང་། འཕྲུལ་དགའི་ལྷའི་འཇིག་རྟེན་ཐམས་ཅད་དང་། གཞན་འཕྲུལ་དབང་བྱེད་ཀྱི་ལྷའི་འཇིག་རྟེན་ཐམས་ཅད་དང་། བདུད་ཀྱི་གནས་ཐམས་ཅད་
དང་། འདོད་པའི་ཁམས་ཀྱི་ལྷའི་རིས་སུ་གཏོགས་པ་ཐམས་ཅད་དང་། ལྷའི་གནས་ཐམས་ཅད་དང་། ཀླུའི་འཇིག་རྟེན་ཐམས་ཅད་དང་། ཀླུའི་གནས་ཐམས་ཅད་དང་། གནོད་སྦྱིན་གྱི་འཇིག་རྟེན་ཐམས་ཅད་དང་། གནོད་སྦྱིན་གྱི་གནས་ཐམས་ཅད་དང་། སྲིན་
པོའི་འཇིག་རྟེན་ཐམས་ཅད་དང་། སྲིན་པོའི་གནས་ཐམས་ཅད་དང་། གྲུལ་བུམ་གྱི་འཇིག་རྟེན་ཐམས་ཅད་དང་། གྲུལ་བུམ་གྱི་གནས་ཐམས་ཅད་དང་། ཡི་དགས་ཀྱི་འཇིག་རྟེན་ཐམས་ཅད་དང་། ཡི་དགས་ཀྱི་གནས་ཐམས་ཅད་དང་། དྲི་ཟའི་འཇིག་རྟེན་
ཐམས་ཅད་དང་། དྲི་ཟའི་གནས་ཐམས་ཅད་དང་། ལྷ་མ་ཡིན་གྱི་འཇིག་རྟེན་ཐམས་ཅད་དང་། ལྷ་མ་ཡིན་གྱི་གནས་ཐམས་ཅད་དང་། ནམ་མཁའ་ལྡིང་གི་འཇིག་རྟེན་ཐམས་ཅད་དང་། ནམ་མཁའ་ལྡིང་གི་གནས་ཐམས་ཅད་དང་། མིའམ་ཅིའི་འཇིག་རྟེན་ཐམས་
ཅད་དང་། མིའམ་ཅིའི་གནས་ཐམས་ཅད་དང་། ལྟོ་འཕྱེ་ཆེན་པོའི་འཇིག་རྟེན་ཐམས་ཅད་དང་། ལྟོ་འཕྱེ་ཆེན་པོའི་གནས་ཐམས་ཅད་དང་། མིའི་འཇིག་རྟེན་ཐམས་ཅད་དང་། མིའི་གནས་ཐམས་ཅད་དང་། གྲོང་དང་གྲོང་ཁྱེར་དང་། གྲོང་རྡལ་དང་། ལྗོངས་དང་།

ཁམས་དང་། རྒྱལ་པོའི་ཕོ་བྲང་འཁོར་དང་འདོད་པའི་ཁམས་སུ་གཏོགས་པའི་སེམས་ཅན་གྱི་རྒྱུད་ཐམས་ཅད་དུ་ཆོས་ནི་སྟོན་ཏོ། །ཆོས་མ་ཡིན་པ་ནི་བཟློག་གོ །རྩོད་པ་ནི་ཞི་བར་བྱེད་དོ། །འཐབ་པ་ནི་རྣམ་པར་བཟློག་གོ །འཁྲུག་པ་ནི་ཉེ་བར་ཞི་བར་བྱེད་དོ། །
གཡུལ་དུ་ལྷགས་པ་ནི་རྣམ་པར་བཟློག་གོ །ཤགས་འགྱེད་པ་ནི་ཞི་བར་བྱེད་དོ། །མདུད་པར་འཛིན་པ་ནི་རབ་ཏུ་སེལ་ཏོ། བཅིངས་པ་ཐམས་ཅད་ནི་ཡོངས་སུ་གཅོད་དོ། །བཙོན་ར་ཐམས་ཅད་ནི་མངོན་པར་འདྲལ་ལོ། །འཇིགས་པ་ནི་རྣམ་པར་བཟློག་གོ །མི་དགེ་བའི་ལས་ཀྱི་འདུ་
བྱེད་ནི་རྒྱུན་གཅོད་དོ། །སྲོག་གཅོད་པ་ལས་ནི་སེམས་ཅན་རྣམས་རྣམ་པར་ཟློག་གོ །མ་བྱིན་པར་ལེན་པ་དང་འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་ཕྲ་མ་དང་ཞེ་གཅོད་པ་དང་། ཚིག་ཀྱལ་པ་དང་ཆགས་སེམས་དང་། གནོད་སེམས་དང་ལོག་པར་ལྟ་བ་ལས་ནི་སེམས་
ཅན་རྣམ་པར་ཟློག་གོ །མི་བྱ་བ་ཐམས་ཅད་ནི་བྱེད་དུ་མི་འཛུད་དོ། །དགེ་བའི་ཆོས་བྱ་བ་ཐམས་ཅད་ནི་བྱེད་དུ་འཛུད་དོ། །སེམས་ཅན་ཐམས་ཅད་ནི་བཟོ་ཐམས་ཅད་ལ་སློབ་ཏུ་འཛུད་དེ། འཇིག་རྟེན་རྣམས་རབ་ཏུ་དགའ་བར་བྱ་བ་དང་། སེམས་ཅན་ཡོངས་སུ་སྨིན་པར་
བྱ་བ་དང་། ཞགས་པ་འཐུབ་པ་ཐམས་ཅད་ལ་གོང་མའི་ཡེ་ཤེས་ཁྱད་པར་དུ་འཕགས་པ་བརྗོད་པའི་ཕྱིར་རྗེས་སུ་འབྲང་བར་བྱ་བ་དང་། ལྟ་བའི་རྣམ་པ་ཐམས་ཅད་རྣམ་པར་བཟློག་པ་དང་། སངས་རྒྱས་ཀྱི་ཆོས་ཐམས་ཅད་བརྗོད་ཅིང་བསྟན་པའི་ཕྱིར་འཇིག་རྟེན་ལ་ཕན་པར་
འགྱུར་བའི་གཙུག་ལག་ཐམས་ཅད་ཀྱང་སྟོན་ཏོ། །རྣམ་པར་འགོད་དོ། །རབ་ཏུ་གསལ་བར་བྱེད་དོ། །བརྗོད་དོ། །དེ་བཞིན་དུ་ཚངས་པའི་འཇིག་རྟེན་གྱི་བར་དུ་གཟུགས་ཀྱི་ཁམས་ཀྱི་ལྷ་ཐམས་ཅད་ཟིལ་གྱིས་མནན་ཏེ་ཆོས་སྟོན་ཏོ། སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་འདིར་ཇི་ལྟ་བ་དེ་བཞིན་དུ་ཕྱོགས་བཅུར་ཡང་འཇིག་རྟེན་གྱི་ཁམས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དག་ཏུ་ཆོས་སྟོན་ཏེ། སངས་རྒྱས་ཀྱི་ཆོས་ཀྱང་སྟོན་ཏོ། །བྱང་ཆུབ་སེམས་དཔའི་

ཆོས་དང་ཉན་ཐོས་ཀྱི་ཆོས་དང་རང་སངས་རྒྱས་ཀྱི་ཆོས་ཀྱང་སྟོན་ཏོ། སེམས་ཅན་དམྱལ་བ་ཡང་སྟོན་ཏོ། སེམས་ཅན་དམྱལ་བར་འགྲོ་བའི་ལམ་དང་། སེམས་ཅན་དམྱལ་བ་པའི་སེམས་ཅན་གྱི་མི་བདེ་བའང་སྟོན་ཏོ། །བྱོལ་སོང་གི་སྐྱེ་གནས་ཀྱང་སྟོན་ཏོ། །བྱོལ་སོང་གི་སྐྱེ་གནས་ཀྱི་
ལམ་གྱི་རྒྱུད་ཐ་དད་པ་དང་། བྱོལ་སོང་གི་སྐྱེ་གནས་ཀྱི་ལམ་དུ་འགྲོ་བའི་ལམ་དང་། བྱོལ་སོང་གི་སྐྱེ་གནས་སུ་སྐྱེས་པའི་སྡུག་བསྔལ་ཡང་སྟོན་ཏོ། །གཤིན་རྗེའི་འཇིག་རྟེན་ཡང་སྟོན་ཏོ། །གཤིན་རྗེའི་འཇིག་རྟེན་དུ་འགྲོ་བའི་ལམ་དང་། གཤིན་རྗེའི་འཇིག་རྟེན་གྱི་
སྡུག་བསྔལ་ཡང་སྟོན་ཏོ། །མཐོ་རིས་ཀྱི་འཇིག་རྟེན་ཡང་སྟོན་ཏོ། །མཐོ་རིས་ཀྱི་འཇིག་རྟེན་དུ་འགྲོ་བའི་ལམ་དང་། མཐོ་རིས་ཀྱི་འཇིག་རྟེན་གྱི་དགའ་བ་སྤྱོད་པ་དང་། ལོངས་སྤྱོད་ཀྱང་སྟོན་ཏོ། །མིའི་འཇིག་རྟེན་ཡང་སྟོན་ཏོ། །མྱིའི་འཇིག་རྟེན་གྱི་ལམ་གྱི་རྒྱུད་དུ་འགྲོ་བའི་ལམ་དང་
མིའི་འཇིག་རྟེན་གྱི་བདེ་བ་དང་། སྡུག་བསྔལ་ཉམས་སུ་མྱོང་བ་སྣ་ཚོགས་ཀྱང་སྟོན་ཏེ། དེ་ལྟར་རིགས་ཀྱི་བུ་ཁོ་བོ་ནི་འཇིག་རྟེན་གྱི་ཆོས་ཀྱང་སྟོན་ཏོ། །འཇིག་རྟེན་ཀུན་འབྱུང་བ་དང་། འཇིག་རྟེན་ནུབ་པར་འགྱུར་བ་དང་། འཇིག་རྟེན་གྱི་ཁ་ན་མ་ཐོ་བ་དང་། འཇིག་རྟེན་ནས་
འབྱུང་པ་ཡང་སྟོན་ཏོ། །དེ་ཡང་འདི་ལྟར་བྱང་ཆུབ་སེམས་དཔའི་ལམ་ཡང་དག་པར་བསྟན་པ་དང་། འཁོར་བའི་སྐྱོན་རྣམ་པར་བཟློག་པ་དང་། ཐམས་ཅད་མཁྱེན་པ་ཉིད་ཀྱི་ཡོན་ཏན་ཡང་དག་པར་བརྗོད་པ་དང་། སྲིད་པའི་ལམ་གྱི་རྒྱུད་དུ་མགོ་འཁོར་བ་དང་སྡུག་བསྔལ་
དུ་གྱུར་པ་ཡང་དག་པར་སྟོན་པ་དང་། སྒྲིབ་པ་མེད་པའི་ཆོས་ཉིད་བརྗོད་པ་དང་། འཇིག་རྟེན་རྒྱུའི་བྱ་བ་ཡོངས་སུ་བསྟན་པ་དང་། འཇིག་རྟེན་འབྱུང་བ་དང་། ལྡོག་པའི་བདེ་བ་དང་། སྡུག་བསྔལ་ཐམས་ཅད་སྨོས་པ་དང་། འགྲོ་བ་ཐམས་ཅད་ཀྱི་གནས་ཀྱི་མིང་དུ་
བྱ་བ་རྣམ་པར་བསྒོམ་པ་དང་། དེ་བཞིན་གཤེགས་པའི་ཆོས་གནས་པ་མེད་པ་མངོན་པར་བསྟན་པ་དང་། ལས་དང་ཉོན་མོངས་པའི་འཁོར་ལོ་ཐམས་ཅད་རྣམ་པར་བཟློག་པ་དང་། དེ་བཞིན་གཤེགས་པའི་ཆོས་ཀྱི་འཁོར་ལོ་འཁོར་བ་ཤིན་ཏུ་བརྗོད་པའི་ཕྱིར་ཆོས་

སྟོན་ཏོ། །རིགས་ཀྱི་བུ་ཁོ་བོ་ནི་བྱང་ཆུབ་སེམས་དཔའི་སྤྱོད་པ་རྣམ་པར་དག་པའི་སྒོ་ཐམས་ཅད་དུ་འགྲོ་བ་དངོས་པོ་མེད་པ་ལ་གནས་པས་མངོན་པར་འདུ་བྱ་བ་མེད་པའི་རྫུ་འཕྲུལ་གྱི་མཐུས་བརྒྱན་པ་འདི་ཤེས་པར་ཟད་ན་ཁོ་བོས་བྱང་ཆུབ་སེམས་དཔའ་ཐམས་
ཅད་མངོན་པར་ཤེས་པ་ཞིང་གི་དབྱིངས་ཐམས་ཅད་དུ་སྒྱུ་མ་ལྟ་བུའི་ཡེ་ཤེས་ཀྱི་ལུས་ཀྱིས་རྒྱས་པར་འགེངས་པ་ཀུན་ཏུ་ལྟ་བའི་ཡེ་ཤེས་ཀྱིས་རབ་ཏུ་ཐོབ་པ་ཚིག་གི་ལམ་དང་། སྒྲ་ཐམས་ཅད་རྣམ་པར་དམྱིགས་པ་ལ་ཤིན་ཏུ་གཞོལ་བའི་རྣ་བ་དང་ལྡན་པ། དུས་གསུམ་རྒྱས་པར་འགེངས་
པའི་ཆོས་ཀྱི་སྒོ་སྣང་བ་ལ་དབང་རབ་ཏུ་ཐོབ་པ། ཆོས་ཐམས་ཅད་ལ་ཡང་དག་པར་གཞོལ་བའི་ཡེ་ཤེས་ལ་དབང་གིས་དབང་སྒྱུར་བའི་སྐྱེས་བུ་དཔའ་བོ་སེམས་ཅན་ཚད་མེད་བསམ་གྱིས་མི་ཁྱབ་པའི་བསམ་པ་ཇི་ལྟ་བ་བཞིན་དུ་རྣམ་པར་དམྱིགས་པར་བྱ་བ་ལམ་འདྲེས་པའི་
དབྱངས་ཀྱི་དཀྱིལ་འཁོར་དང་ལྡན་པའི་ལྕེ་ཡངས་ཤིང་སྲབ་ལ་ཡིད་དུ་འོང་བ་དང་ལྡན་པ། བསམ་པ་ཐ་དད་པའི་སེམས་ཅན་རྒྱ་མཚོའི་ཡིད་དུ་འོང་བའི་ཁ་དོག་དང་། དབྱིབས་སུ་ལྡན་པའི་བྱང་ཆུབ་སེམས་དཔའ་ཐམས་ཅད་དང་མཉམ་པའི་ལུས་སྒྱུ་མ་ལྟ་བུ་དང་ལྡན་པ། དེ་
བཞིན་གཤེགས་པ་ཐམས་ཅད་དང་མི་གཉིས་པའི་སྤྱོད་ལམ་གྱིས། བསམ་གྱིས་མི་ཁྱབ་པའི་ལུས་ལ་གཞོལ་བ། དུས་གསུམ་ཐམས་ཅད་དུ་རྗེས་སུ་འབྲང་བའི་ཡེ་ཤེས་ཀྱི་ལུས་དང་ལྡན་པ་ནམ་མཁའི་དབྱིངས་ལྟར་ཚད་མེད་པའི་སྤྱོད་ཡུལ་དཔག་ཏུ་མེད་པའི་ཡུལ་དང་ལྡན་པ་
དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ཀྱི་ཡུལ་ཤུ་མ་ཕྱི་མའི་མཐའ་ན། གྲོང་ཁྱེར་ཀ་ལིང་གའི་ནགས་ཚལ་ཞེས་བྱ་བ་ཡོད་ཏེ། དེ་ན་དགེ་སློང་མ་སེང་གེ་རྣམ་པར་བསྒྱིངས་བ་ཞེས་བྱ་བ་འདུག་
གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཚོང་དཔོན་རྒྱལ་བ་དམ་པའི་རྐང་པ་གཉིས་ལ་སྤྱི་བོས་ཕྱག་

འཚལ་ཏེ། ཚོང་དཔོན་རྒྱལ་བ་དམ་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། ཚོང་དཔོན་རྒྱལ་བ་དམ་པའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་མཐར་གྱི་ཡུལ་ཤུ་མ་ཕྱི་མའི་མཐའི་གྲོང་ཁྱེར་ཀ་ལིང་གའི་ནགས་ཚལ་གང་
ན་བ་དེར་སོང་སྟེ་ཕྱིན་ནས། དགེ་སློང་མ་སེང་གེ་རྣམ་པར་བསྒྱིངས་པ་ཡོངས་སུ་ཚོལ་ཞིང་སེམས་ཅན་ཀུན་ལ་རྨེད་པའི་ཚེ། གང་ནས་གང་དུ་སོང་བ་དེ་དང་དེར་རོགས་པ་བརྒྱ་ཕྲག་དུ་མ་དང་། བུ་མོ་བརྒྱ་ཕྲག་དུ་མ་ཞིག་སྲང་དང་ལམ་གྱི་བཞི་མདོ་དང་། ལམ་གྱི་སུམ་མདོ་དག་ན་ཚོགས་ཏེ།
རྗེས་སུ་འབྲང་ངོ་། །སྐྱེས་པ་བརྒྱ་ཕྲག་དུ་མ་དང་། བུད་མེད་བརྒྱ་ཕྲག་དུ་མ་ཞིག་གིས་ཀྱང་རིགས་ཀྱི་བུ་འདི་རེ་དགེ་སློང་མ་སེང་གེ་རྣམ་པར་བསྒྱིངས་པ་ནི། གྲོང་ཁྱེར་ཀ་ལིང་གའི་ནགས་ཚལ་འདི་ཉིད་ཀྱི་བཟའ་ཤིང་གི་ར་བ་ཆེན་པོ་རྒྱལ་བའི་འོད་ཀྱིས་བྱིན་པ་ཉི་མའི་མདོག་ན་སེམས་
ཅན་ཚད་མེད་པའི་དོན་དུ་ཆོས་སྟོན་ཅིང་འདུག་གོ་ཞེས་བསྟན་ཏོ། །དེ་ནས་ཚོང་དཔོན་གྱི་བུ་ནོར་བཟངས་བཟའ་ཤིང་གི་ར་བ་ཉི་མའི་མདོག་དེར་ཕྱིན་ནས་ཀུན་ཏུ་བཙལ་ཏེ། བལྟས་ན་བཟའ་ཤིང་གི་ར་བ་དེ་ན། ཤིང་ཟླ་བ་ཤར་བ་ཞེས་བྱ་བ་ཁང་པ་བརྩེགས་པའི་དབྱིབས་ལྟར་འདུག་
པ། འོད་སྣ་ཚོགས་ཀྱི་ཁ་དོག་ཅན་འོད་ཀྱི་མདོག་དང་ལྡན་པ། འཁོར་ཀུན་ཏུ་དཔག་ཚད་ཀྱི་ཁྱོན་ཙམ་དུ་འོད་ཀྱིས་རྒྱས་པར་འགེངས་པ་མང་པོ་དང་། ལོ་མའི་ཤིང་ཡོངས་སུ་འགེངས་པ་ཞེས་བྱ་བ་གདུགས་ཀྱི་རྣམ་པ་དང་དབྱིབས་སུ་འདུག་པའི་འདབ་མས་ཀུན་ནས་
ཁེབས་པ། བཻཌཱུརྱ་སྔོན་པོའི་ཁ་དོག་ལྟར་འདུག་པའི་སྤྲིན་གྱི་མདོག་དང་ལྡན་པ་མང་པོ་དང་མེ་ཏོག་གི་ཤིང་མེ་ཏོག་གི་མཛོད་ཅེས་བྱ་བ། རིའི་རྒྱལ་པོ་ཁ་བ་ཅན་ལྟར་མདངས་དགའ་བའི་དབྱིབས་སྣ་ཚོགས་དང་ལྡན་པ་ཁ་དོག་སྣ་ཚོགས་ཀྱི་མེ་ཏོག་མི་ཟད་པའི་ཆར་རབ་ཏུ་འབེབས་པ། སུམ་
ཅུ་རྩ་གསུམ་གྱི་ལྷའི་ཕོ་བྲང་གི་རྒྱན་གྱི་ཀུན་ནས་འདུ་བ་དང་། སུས་ཀྱང་མི་ཤིགས་པ་ལྟ་བུ་མང་པོ་དང་། ཤིང་ཏོག་གི་ཤིང་རྟག་ཏུ་སྨིན་པའི་རོ་དཔེ་མེད་པའི་འབྲས་བུའི་ཚོགས་ཤེས་བྱ་བ་གསེར་གྱི་རི་བོའི་ལྷུན་ལྟར་འདུག་པ། རྟག་ཏུ་ཤིང་ཏོག་ཕུན་སུམ་ཚོགས་

པར་གནས་པ་མང་པོ་དང་། རིན་པོ་ཆེའི་རྒྱལ་པོའི་ཤིང་རྣམ་པར་སྣང་བའི་མཛོད་ཅེས་བྱ་བ་རིན་པོ་ཆེའི་རྒྱལ་པོ་དཔེ་མེད་པའི་དབྱིབས་ལྟར་འདུག་པ། ལྷ་རྫས་ཀྱི་རིན་པོ་ཆེའི་ཕྲེང་བ་དང་། སེ་མོ་དོ་དང་། རྒྱན་རིན་པོ་ཆེ་ཡིད་བཞིན་གྱི་རྒྱལ་པོའི་མཛོད་ནས་བྱུང་བ་
ལྟར་ཕུན་སུམ་ཚོགས་པ་དང་ལྡན་པ། རིན་པོ་ཆེའི་ཁ་དོག་གྲངས་མེད་པའི་འབྱུང་གནས་སུ་གྱུར་པ་མང་པོ་དང་། གོས་ཀྱི་ཤིང་དགའ་བར་བྱེད་པ་ཞེས་བྱ་བ་ལྷ་རྫས་ཀྱི་གོས་རིན་པོ་ཆེའི་ཁ་དོག་སྣ་ཚོགས་ཀྱི་ཚོགས་རབ་ཏུ་འགྱེད་ཅིང་འཕྱང་བས་ཤིན་ཏུ་བརྒྱན་པ་མང་པོ་དང་། རོལ་
མོའི་ཤིང་དགའ་བསྐྱེད་པ་ཞེས་བྱ་བ་ལྷ་རྫས་ལས་ཀྱང་ལྷག་པའི་རོལ་མོ་ཡིད་དུ་འོང་བའི་སྒྲ་སྙན་པ་འབྱིན་པ་མང་པོ་དང་། སྤོས་ཀྱི་ཤིང་ཀུན་ཏུ་ཞིམ་པས་བརྒྱན་པ་ཞེས་བྱ་བ་ཕྱོགས་ཐམས་ཅད་དུ་ཐོགས་པ་མེད་པར་རྣམ་པ་ཐམས་ཅད་དུ་ཡིད་དུ་འོང་བའི་སྤོས་ཀྱི་ངད་འབྱུང་བ་མང་
པོ་དག་ཀྱང་ཡོད་པར་མཐོང་། མཚེའུ་དང་ལུ་མ་དང་། ལྟེང་ཀ་དང་། རྫིང་བུ་རིན་པོ་ཆེ་བདུན་གྱི་ཕ་གུས་མཐའ་བརྩིགས་པ། ཕྱོགས་བཞི་ནས་རིན་པོ་ཆེའི་ཐེམ་སྐས་བཙུགས་པ། རིན་པོ་ཆེ་སྣ་ཚོགས་ཀྱི་ཁྲི་འཕང་དུས་དང་འཐུན་པའི་ཙན་དན་གྱི་དྲི་ཞིམ་པོས་བསྐུས་པས་
ཀུན་ནས་བསྐོར་བ། གཞི་རིན་པོ་ཆེའི་རྒྱལ་པོ་བཻཌཱུརྱ་སྔོན་པོ་ལས་ལེགས་པར་བླངས་པ། འཛམ་བུ་ཆུ་ཀླུང་གི་གསེར་གྱི་བྱེ་མ་བདལ་བ་ཡན་ལག་བརྒྱད་དང་ལྡན་པའི་ཆུ་ལྷ་རྫས་ཀྱི་དྲི་ཡིད་དུ་འོང་བ་ཅན་གྱིས་ཡོངས་སུ་གང་བ། རིན་པོ་ཆེའི་པད་མོ་དང་། ཨུཏྤ་ལ་དང་།
ཀུ་མུ་ཏ་དང་། མེ་ཏོག་པུན་ད་རི་ཀ་ཁ་དོག་སྣ་ཚོགས་ལྷ་རྫས་ཀྱི་བསུང་དང་ལྡན་པས། ཆུ་ཀུན་ནས་ཡོག་པ། བྱ་བྲན་སྣ་ཚོགས་ཀྱི་ཁྱུ་ལྷ་རྫས་ལས་ཀྱང་འདས་པའི་གཟུགས་ཡིད་དུ་འོང་བ་དང་ལྡན་པ། སྒྲ་སྙན་པ་འབྱིན་ཅིང་བརྗོད་པས་གང་བ། ལྷ་རྫས་ཀྱི་
རིན་པོ་ཆེ་སྣ་ཚོགས་ཀྱི་ཤིང་གི་ཕྲེང་བ་ལེགས་པར་བཀྱེ་བས་ཡོངས་སུ་བསྐོར་ཅིང་བརྒྱན་པ་དང་ལྡན་པ་ཤིང་སྣ་ཚོགས་དེ་དག་གི་དྲུང་ཐམས་ཅད་དུའང་རིན་པོ་ཆེའི་སེང་གེའི་ཁྲི་སྣ་ཚོགས་ཡིད་དུ་འོང་བའི་གཟུགས་དང་ལྡན་པ། རིན་པོ་ཆེ་སྣ་ཚོགས་ཀྱི་རྒྱན་བསམ་གྱིས་མི་ཁྱབ་

པ་དུ་མས་བརྒྱན་པ། ལྷ་རྫས་ཀྱི་སྟན་རིན་པོ་ཆེ་སྣ་ཚོགས་འབེལ་བར་བཏིང་བ། ལྷ་རྫས་ཀྱི་སྤོས་དང་། བདུག་སྤོས་ཀྱི་རྣམ་པ་ཐམས་ཅད་ཀྱིས་བདུགས་པ། ལྷ་རྫས་ལས་ཀྱང་འདས་པའི་དར་རིན་པ་ཆེ་མངོན་པར་སྤྱངས་བ། རིན་པོ་ཆེ་སྣ་ཚོགས་ཀྱི་བླ་རེ་བཀྱེ་བ། རིན་པོ་ཆེ་སྣ་ཚོགས་
དང་འཛམ་བུ་ཆུ་ཀླུང་གི་གསེར་གྱི་དྲ་བ་སྣ་ཚོགས་ཀུན་ནས་བྲེས་པ། རིན་པོ་ཆེའི་དྲིལ་གྱི་དྲ་བ་ཡིད་དུ་འོང་ཞིང་སྙན་པའི་སྒྲ་འབྱིན་པ། མང་པོས་བརྒྱན་པ། འཁོར་དུ་ལྷ་རྫས་ཀྱི་རིན་པོ་ཆེའི་སྟན་བརྒྱ་ཕྲག་དུ་མ་བཏིང་ཞིང་བཤམས་པ་མཐོང་ངོ་། །རིན་པོ་ཆེའི་ཤིང་དྲུང་ལ་ལར་ནི་སེང་
གེའི་ཁྲི་རིན་པོ་ཆེའི་པདྨོའི་སྙིང་པོ་ཅན་བཤམས་པ་མཐོང་ངོ་། །ལ་ལར་ནི་སེང་གེའི་ཁྲི་ནོར་བུ་རིན་པོ་ཆེའི་སྤོས་ཀྱི་རྒྱལ་པོའི་པད་མོའི་སྙིང་པོ་བྱས་པ་བཤམས་པ་མཐོང་ངོ་། །ལ་ལར་ནི་སེང་གེའི་ཁྲི་རིན་པོ་ཆེའི་རྒྱལ་པོ་ཀླུའི་རྒྱན་གྱི་པད་མོས་སྙིང་པོ་བྱས་པ་བཤམས་པ་མཐོང་
ངོ་། །ལ་ལར་ནི་སེང་གེའི་ཁྲི་ནོར་བུ་རིན་པོ་ཆེའི་རྒྱལ་པོ་སེང་གེའི་བྱ་ལའི་པད་མོས་སྙིང་པོ་བྱས་པ་བཤམས་པ་མཐོང་ངོ་། །ལ་ལར་ནི་སེང་གེའི་ཁྲི་རིན་པོ་ཆེའི་རྒྱལ་པོ་རྣམ་པར་སྣང་བའི་པད་མོས་སྙིང་པོ་བྱས་པ་བཤམས་པ་མཐོང་ངོ་། །ལ་ལར་ནི་སེང་གེའི་ཁྲི་རིན་པོ་ཆེའི་
རྒྱལ་པོ་ཕྱོགས་རྣམ་པར་སྣང་བའི་པད་མོས་སྙིང་པོ་བྱས་པ་བཤམས་པ་མཐོང་ངོ་། །ལ་ལར་ནི་སེང་གེའི་ཁྲི་རིན་པོ་ཆེའི་རྒྱལ་པོ་དབང་པོའི་རྡོ་རྗེའི་པད་མོས་སྙིང་པོ་བྱས་པ་བཤམས་པ་མཐོང་ངོ་། །ལ་ལར་ནི་སེང་གེའི་ཁྲི་རིན་པོ་ཆེའི་རྒྱལ་པོ་འགྲོ་བའི་ཡིད་དུ་འོང་བའི་པདྨོས་
སྙིང་པོ་བྱས་པ་བཤམས་པ་མཐོང་ངོ་། །རིན་པོ་ཆེའི་ཤིང་དྲུང་ལ་ལར་ནི་སེང་གེའི་ཁྲི་རིན་པོ་ཆེའི་རྒྱལ་པོ་མདོག་དཀར་པོའི་པད་མོས་སྙིང་པོ་བྱས་པ་བཤམས་པ་མཐོང་ངོ་། །བཟའ་ཤིང་གི་ར་བ་དེའི་གཞི་ཐམས་ཅད་ཀྱང་རིན་པོ་ཆེ་སྣ་ཚོགས་ཀྱིས་ཡོངས་སུ་གང་ཞིང་རྒྱ་མཚོ་ཆེན་པོ་ལྟར་
རིན་པོ་ཆེའི་གླིང་གིས་ཡོངས་སུ་གང་བ་མཐོང་ངོ་། །བཻཌཱུརྱ་སྔོན་པོའི་དམ་པས་སྤྲས་ཏེ། རིན་པོ་ཆེ་ཐམས་ཅད་ཀྱིས་བརྒྱན་པའི་ས་ཕྱོགས་ཀ་ཙ་ལིན་ད་ལྟར་རེག་ན་བདེ་ཞིང་འཇམ་པ། གོམ་པ་བོར་ཞིང་བཏེག་པའི་ཚེ་མཐོ་དམན་མེད་པ། རྡོ་རྗེ་རིན་པོ་ཆེ་མཆོག་གི་

པདྨོའི་དྲི་ཡིད་དུ་འོང་བར་ཞིམ་ཞིང་རེག་ན་བདེ་བའི་སིལ་མ་ཀུན་ཏུ་བཀྲམ་པ། ང་ངུར་དང་། རྨ་བྱ་དང་། ཁྲུང་ཁྲུང་དང་། ཀུ་ན་ལ་དང་། ཀ་ལ་པིང་ཀ་དང་། ཀོ་ཀི་ལ་དང་། ཛི་བན་ཛི་བ་ཀ་སྒྲ་སྙན་ཅིང་ཡིད་དུ་འོང་བའི་ང་རོ་འབྱིན་པ་མང་པོས་གང་བ། ལྷ་རྫས་ཀྱི་རིན་པོ་
ཆེའི་ཙན་དན་གྱི་ཤིང་མང་པོའི་ནགས་ཚལ་ཤིན་ཏུ་ལེགས་པར་འགྲིགས་པས་བརྒྱན་པ། རིན་པོ་ཆེ་སྣ་ཚོགས་ཀྱི་པདྨོའི་སྤྲིན་གྱི་ཆར་དང་། རིན་པོ་ཆེའི་མེ་ཏོག་སྣ་ཚོགས་མི་ཟད་པའི་ཆར་རྒྱུན་ཏུ་འབབ་པ། འདྲེས་པའི་ནགས་ཚལ་ལས་ཀྱང་ཁྱད་པར་དུ་འཕགས་པ། རིན་པོ་ཆེ་སྣ་
ཚོགས་ཀྱི་ཁང་བུ་བརྩེགས་མ་བརྒྱན་པར་བཀོད་པའི་ནང་ནས། སྤོས་ཀྱི་རྒྱལ་པོའི་བདུག་སྤོས་རིན་ཐང་མེད་པ་རྟག་ཏུ་འཐུལ་ཞིང་ཞིམ་པ་ལྷའི་མདུན་ས་ཆོས་བཟང་པོའི་རྒྱན་ལས་ཀྱང་ལྷག་པར་བརྒྱན་པ། ལྷ་རྫས་ལས་ཀྱང་འདས་པའི་རིན་པོ་ཆེའི་དྲ་བ་སྣ་ཚོགས་ཀྱིས་
ཀུན་ནས་བྲེས་པ། མུ་ཏིག་རིན་པོ་ཆེའི་མེ་ཏོག་གི་ཕྲེང་བ་དང་། ལྡ་ལྡི་ཀུན་ནས་བྲེས་པས་རབ་ཏུ་བརྒྱན་པ། རིན་པོ་ཆེའི་དྲིལ་བུ་རྣམ་པ་སྣ་ཚོགས་སུ་རྣམ་པར་བཀྱེ་བའི་གསེར་གྱི་དྲ་བ་འབར་བས། ཀུན་ནས་དཀྲིགས་པ། རོལ་མོའི་ཤིང་དང་། རིན་པོ་ཆེའི་ཏ་ལ་
ལས་དྲིལ་བུའི་དྲ་བ་རླུང་གིས་ལེགས་པར་བསྐྱོད་པས་ཡིད་དུ་འོང་བའི་སྒྲ་སྙན་པའི་དབྱངས་འབྱུང་བ་དང་ལྡན་པ། དབང་བསྒྱུར་གྱི་ལྷའི་རྒྱལ་པོའི་ལྷ་མོ་དཔེ་ཚུལ་ཤིན་ཏུ་བཟང་བ་རྣམས་ཀྱིས་གླུ་སྙན་པའི་སྒྲ་རབ་ཏུ་ཡིད་དུ་འོང་བ་ལེན་མ། ལྷ་རྫས་ཀྱི་ཡིད་བཞིན་གྱི་
གོས་ཁ་དོག་སྣ་ཚོགས་ཀྱི་སྤྲིན་གྱི་ཆར་རབ་ཏུ་འབབ་པས་རྣམ་པར་མཛེས་པ། རྒྱ་མཚོ་ཆེན་པོ་ལྟར་ཁ་དོག་དང་། མདོག་སྣ་ཚོགས་སུ་ལྡན་པས་བལྟ་ན་གཏང་མྱི་བྲ་བ། ཁང་པ་བརྩེགས་པ་རིན་པོ་ཆེའི་རྒྱན་དང་ལྡན་པ་བརྒྱ་སྟོང་གྲངས་མྱེད་པས་རབ་ཏུ་བརྒྱན་པ།
སུམ་ཅུ་རྩ་གསུམ་གྱི་ལྷའི་ཕོ་བྲང་ལྟར་བལྟ་ན་བཟང་བ། རིན་པོ་ཆེ་སྣ་ཚོགས་རྣམ་པར་ཕྱེ་བས་རྣམ་པ་ཐམས་ཅད་དུ་བརྒྱན་པའི་གདུགས་ཤིན་ཏུ་ལེགས་པ། རྣམ་པར་བསྒྲེང་ཞིང་བཀྲམ་པས་ཀུན་ནས་བལྟ་ན་མཛེས་པ། དབང་པོ་ཆེན་པོའི་འཇིག་རྟེན་ལྟར་

ཤིན་ཏུ་མཛེས་པའི་དེའུ་སྣ་ཚོགས་ཀྱིས་བརྒྱན་པ། ཡིད་དུ་འོང་བའི་འོད་སྣང་བ་ཆེན་པོ་རྟག་པར་འབྱུང་བ། ཚངས་པ་ཆེན་པོའི་གཞལ་མྱེད་ཁང་ལྟར་ནོར་བུ་རིན་པོ་ཆེའི་རྒྱལ་པོ་འགྲོ་བ་ཡིད་དུ་འོང་བའི་འོད་ཀྱིས་འབར་བ་སྟེ། བཟའ་ཤིང་གི་ར་བ་ཆེན་པོ་ཉི་མའི་མདོག་ཅེས་བྱ་བ་
དེ། དགེ་སློང་མ་སེང་གེ་རྣམ་པར་བསྒྱིངས་པའི་རྫུ་འཕྲུལ་གྱི་མཐུ་སྟོབས་དང་། བྱིན་གྱི་རླབས་ཆེ་ཞིང་བསམ་གྱིས་མི་ཁྱབ་པས། འཇིག་རྟེན་གྱི་ཁམས་གྲངས་མེད་པའི་གནས་སུ་གྱུར་པའི་ནམ་མཁའི་དབྱིངས་ལྟར་ཡངས་ཤིང་ཚད་མེད་དེ། རྒྱ་ཆེན་པོ་དང་ལྡན་པ་མཐོང་
ངོ་། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་དེ་ལྟར་ཡོན་ཏན་ཚད་མྱེད། བསམ་གྱིས་མི་ཁྱབ་པ་ཚོགས་པའི་བཟའ་ཤིང་གི་ར་བའི་རྒྱན་བྱང་ཆུབ་སེམས་དཔའི་ལས་ཀྱི་རྣམ་པར་སྨིན་པས་ཡོངས་སུ་གྲུབ་པ། འཇིག་རྟེན་ལས་འདས་པའི་དགེ་བའི་རྩ་བ་རྒྱ་ཆེན་པོ་
ལས་སྐྱེས་པ། སངས་རྒྱས་ལ་མཆོད་ཅིང་རིམ་གྲོར་བྱས་པའི་རྒྱུ་འཐུན་པ་བསམ་གྱིས་མྱི་ཁྱབ་པ་ལས་བྱུང་བ། འཇིག་རྟེན་གྱི་ཁམས་ཐམས་ཅད་ན་ཡོད་པའི་དགེ་བའི་རྩ་བ་མ་ལུས་པས་མྱི་འཕྲོགས་པ། ཆོས་ཀྱི་རང་བཞིན་སྒྱུ་མའི་རྣམ་པ་ལྟ་བུས་གྲུབ་པ། དགེ་བའི་
བསོད་ནམས་དྲི་མ་མྱེད་པ་རྒྱ་ཆེན་པོས་གྲུབ་ཅིང་བྱུང་བ། དགེ་སློང་མ་སེང་གེ་རྣམ་པར་བསྒྱིངས་པའི་སྔོན་གྱི་སྤྱོད་པ་བཟང་པོ་ལེགས་པར་བྱས་པ་དང་། རྒྱུ་འཐུན་པའི་སྟོབས་དང་། ཤུགས་ཀྱིས་བྱུང་བ་ཉན་ཐོས་དང་། རང་སངས་རྒྱས་ཐམས་ཅད་དང་། ཐུན་མོང་མ་ཡིན་
པ། མུ་སྟེགས་ཅན་དང་། ཕས་ཀྱི་རྒོལ་བ་ཐམས་ཅད་ཀྱིས་མི་འཕྲོགས་པ། བདུད་ཀྱི་ལམ་ཡོངས་སུ་རྒྱུ་བ་ཐམས་ཅད་ཀྱིས་མྱི་ཚུགས་པ། བྱིས་པ་སོ་སོའི་སྐྱེ་བོ་ཐམས་ཅད་ཀྱིས་བལྟར་མེད་པ་མཐོང་སྟེ། ཤིང་སྣ་ཚོགས་དེ་དག་གི་དྲུང་གི་སེང་གེའི་ཁྲི་ཆེན་པོ་དེ་དག་ལ་
འང་དགེ་སློང་མ་སེང་གེ་རྣམ་པར་བསྒྱིངས་པ། ལུས་ཤིན་ཏུ་མཛེས་པ། སྤྱོད་ལམ་ཞི་བ། ཡིད་ཞི་བ། ཤིན་ཏུ་དབེན་པ། དབང་པོ་ཐུལ་བ། གླང་པོ་ལྟར་ཤིན་ཏུ་དུལ་བ། མཚོ་ལྟར་དང་ཞིང་གསལ་ལ་རྙོག་པ་མེད་པའི་སེམས་དང་ལྡན་པ། རིན་པོ་ཆེའི་རྒྱལ་པོ་

ཡིད་བཞིན་གྱི་ནོར་བུ་ལྟར་འདོད་པ་ཐམས་ཅད་སྒྲུབ་པ། པད་མོ་ལ་ཆུས་མི་ཆགས་པ་ལྟར་འཇིག་རྟེན་གྱི་ཆོས་ཀྱིས་མ་གོས་པ། སེང་གེ་ལྟར་འཇིགས་པ་དང་། སྐྱི་གཡའ་བ་མྱེད་པ། མི་འཇིགས་པ་རྣམ་པར་དག་པས། རིའི་དབང་པོ་ཆེན་པོ་ལྟར་མྱི་སྒུལ་
བ། ཚུལ་ཁྲིམས་རྣམ་པར་དག་པས་ཡིད་དུ་འོང་བའི་སྤོས་ཀྱི་རྒྱལ་པོ་ལྟར་འགྲོ་བའི་སེམས་ཚིམ་པར་བྱེད་པ། ཁ་བའི་ཙན་དན་ལྟར་ཉོན་མོངས་པའི་གདུང་བ་རབ་ཏུ་ཞི་བར་བྱེད་པ། སྨན་གྱི་རྒྱལ་པོ་བལྟ་ན་བཟང་བ་ལྟར་འགྲོ་བ་ཐམས་ཅད་ཀྱི་སྡུག་བསྔལ་རྣམ་པར་ཞི་བར་བྱེད་པ།
ཆུའི་ལྷའི་ཞགས་པ་ལྟར་བལྟ་ན་དོན་ཡོད་པ། དེ་བཞིན་གཤེགས་པའི་འོད་ལྟར་ལུས་དང་སེམས་ཀྱི་བག་ཡངས་བདེ་བ་བསྐྱེད་པ། ཚངས་པ་ཆེན་པོ་ལྟར་འདོད་ཆགས་དང་། ཞེ་སྡང་དང་། གཏི་མུག་གི་ཀུན་ནས་ལྡང་བ་དང་བྲལ་བ། རིན་པོ་ཆེའི་རྒྱལ་པོ་ནོར་བུ་ཆུ་
འདང་ལྟར་ཉོན་མོངས་པས་རྙོག་པ་ཅན་དུ་གྱུར་པའི་སེམས་ཅན་གྱི་སེམས་རབ་ཏུ་དང་བར་བྱེད་པ། ཞིང་གཤིན་པ་ལྟར་དགེ་བའི་རྩ་བ་རྣམ་པར་འཕེལ་བར་བྱེད་པ་འདུག་པར་མཐོང་ངོ་། །འཁོར་གྱི་སྟན་དེ་དག་ལའང་འཁོར་སྣ་ཚོགས་འཁོད་པར་མཐོང་སྟེ། འཁོར་
གྱི་སྟན་ལ་ལ་ལ་ནི་ལྷའི་བུ་དབང་པོ་ཆེན་པོ་ལ་སྩོགས་པ། གཙང་མའི་གནས་ཀྱི་རིགས་སུ་གཏོགས་པའི་ལྷའི་བུ་རྣམས་འཁོད་ཅིང་དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་རྣམ་པར་ཐར་པ་མྱི་ཟད་པ་ཡང་དག་པར་འབྱེད་པ་ཞེས་བྱ་བ་ཡང་དག་པར་
བསྟན་པ་མཐོང་ངོ་། །འཁོར་གྱི་སྟན་ལ་ལ་ནི་ཚངས་པ་ཡིད་དུ་འོང་བ་ལ་སྩོགས་པ། ཚངས་པའི་རིས་སུ་གཏོགས་པའི་ལྷའི་བུ་རྣམས་འཁོད་ཅིང་དགེ་སློང་མ་སེང་གེ་རྣམ་པར་བསྒྱིངས་པས། དབྱངས་ཀྱི་དཀྱིལ་འཁོར་རྣམ་པར་དག་པ། གཞི་ཀུན་
ནས་འབྱེད་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ནི་ལྷའི་རྒྱལ་པོ་དབང་སྒྱུར་ལ་སྩོགས་པ་གཞན་འཕྲུལ་དབང་བྱེད་ཀྱི་ལྷའི་བུ་དང་ལྷའི་བུ་མོའི་འཁོར་དང་བཅས་པ་དག་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་

ཀྱི་སྒོ་བྱང་ཆུབ་སེམས་དཔའི་བསམ་པ་རྣམ་པར་དག་པའི་དབང་གིས་རྣམ་པར་བརྒྱན་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ལྷའི་རྒྱལ་པོ་རབ་འཕྲུལ་དགའ་ལ་སྩོགས་པ་འཕྲུལ་དགའི་ལྷའི་བུ་ལྷའི་བུ་མོའི་འཁོར་དང་བཅས་པ་རྣམས་འཁོད་ཅིང་།
དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་ཐམས་ཅད་དགེ་བས་རྣམ་པར་བརྒྱན་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ལྷའི་རྒྱལ་པོ་རབ་དགའ་ལྡན་ལ་སྩོགས་པ། དགའ་ལྡན་གྱི་རིས་སུ་གཏོགས་པའི་ལྷའི་བུ་ལྷའི་བུ་མོའི་འཁོར་
དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས་ཆོས་ཀྱི་སྒོ་རང་གི་སེམས་ཀྱི་མཛོད་ཀྱི་གློང་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ལྷའི་རྒྱལ་པོ་རབ་མཚེ་མ་ལ་སྩོགས་པ་ལྷའི་བུ་ལྷའི་བུ་མོའི་འཁོར་དང་བཅས་པ་རྣམས་
འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་རྒྱན་མཐའ་ཡས་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ལྷའི་རྒྱལ་པོ་བརྒྱ་བྱིན་ལ་སྩོགས་པ་སུམ་ཅུ་རྩ་གསུམ་གྱི་རིས་སུ་གཏོགས་པའི་ལྷའི་བུ་ལྷའི་
བུ་མོའི་འཁོར་དང་བཅས་པ་རྣམ་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་སྐྱོ་བའི་སྒོ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ཀླུའི་རྒྱལ་པོ་གང་ཆེན་མཚོ་ལ་སྩོགས་པ་ཀླུའི་རྒྱལ་པོ་འོད་བརྒྱ་པ་དང་། དགའ་བོ་
དང་བསྙེན་དགའ་བོ་དང་། ཡིད་དུ་འོང་བ་དང་། ཤུགས་ལྡན་དང་། མ་དྲོས་པ་ལ་སྩོགས་པ་ཀླུའི་བུ་མོའི་འཁོར་དང་བཅས་པ་ཀླུའི་བྱིས་པའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་སངས་རྒྱས་ཀྱི་རྫུ་
འཕྲུལ་དང་། ཡུལ་གྱི་འོད་ཀྱི་བརྒྱན་ཅེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་རྒྱལ་པོ་ཆེན་པོ་ངལ་བསོ་པོ་ལ་སྩོགས་པ་གནོད་སྦྱིན་གྱི་དབང་པོ་གནོད་སྦྱིན་གྱི་བུ་མོ་དང་། གནོད་སྦྱིན་གྱི་བྱིས་པའི་འཁོར་དང་བཅས་པ་རྣམས་འཁོད་ཅིང་།

དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་འགྲོ་བ་ཐམས་ཅད་ཡོངས་སུ་སྐྱོབ་པའི་མཛོད་ཅེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་དྲི་ཟའི་རྒྱལ་པོ་གནས་སྲུང་པོ་ལ་སྩོགས་པ་དྲི་ཟ་མང་པོ་དྲི་ཟའི་བུ་མོ་དང་། དྲི་ཟའི་བྱིས་པའི་
འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་དགའ་བ་མི་ཟད་པ་ཆར་རབ་ཏུ་འབེབ་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ལྷ་མ་ཡིན་གྱི་དབང་པོ་སྒྲ་གཅན་ལ་སྩོགས་པ་ལྷ་མ་ཡིན་རྣམས་
ལྷ་མ་ཡིན་གྱི་བུ་མོ་དང་། ལྷ་མ་ཡིན་གྱི་བྱིས་པའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་ཆོས་ཀྱི་དབྱིངས་ཤེས་པའི་ཚུལ་གྱི་ཤུགས་ཀྱིས་བརྒྱན་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་
ལ་ལ་ནི་ནམ་མཁའ་ལྡིང་གི་དབང་པོ་ཤུགས་འཛིན་ཆེན་པོ་ལ་སྩོགས་པ་ནམ་མཁའ་ལྡིང་གི་དབང་པོ་ནམ་མཁའ་ལྡིང་གི་བུ་མོ་དང་། ནམ་མཁའ་ལྡིང་གི་བྱིས་པའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་
སྲིད་པའི་རྒྱ་མཚོས་འཇིགས་པའི་ཡུལ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་མིའམ་ཅིའི་རྒྱལ་པོ་སྡོང་པོ་ལ་སྩོགས་པ། མི་འམ་ཅིའི་དབང་པོ་མིའམ་ཅིའི་བུ་མོ་དང་། མིའམ་ཅིའི་བྱིས་པའི་འཁོར་དང་བཅས་པ་རྣམས་འཁོད་
ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་སངས་རྒྱས་ཀྱི་སྤྱོད་པ་སྣང་བ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ལྟོ་འཕྱེ་ཆེན་པོའི་དབང་པོ་ཁྲོ་གཉེར་གདོང་ལ་སྩོགས་པ། ལྟོ་འཕྱེ་ཆེན་པོའི་བུ་མོ་དང་། ལྟོ་འཕྱེ་
ཆེན་པོའི་བྱིས་པའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་སངས་རྒྱས་ལ་དགའ་བ་སྐྱེ་བ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་སྐྱེས་པ་དང་། བུད་མྱེད་དང་། ཁྱེའུ་དང་བུ་མོ་

བརྒྱ་སྟོང་མང་པོ་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་ཁྱད་པར་དུ་འགྲོ་བ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་སྲིན་པོའི་དབང་པོ་རྟག་ཏུ་མདངས་འཕྲོག་པ་སྡོང་པོའི་རྒྱལ་པོ་ལ་སྩོགས་པ་སྲིན་པོའི་དབང་པོ་སྲིན་པོའི་
བུ་མོ་དང་སྲིན་པོའི་བྱིས་པའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་སྙིང་རྗེ་འབྱུང་བ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་སེམས་ཅན་ཉན་ཐོས་ཀྱི་ཐེག་པ་ལ་མོས་པ་རྣམས་འཁོད་ཅིང་། དགེ་
སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་ཡེ་ཤེས་ཁྱད་པར་དུ་འཕགས་པའི་མཐུ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་སེམས་ཅན་རང་སངས་རྒྱས་ཀྱི་ཐེག་པ་ལ་མོས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་
པར་བསྒྱིངས་པས། ཆོས་ཀྱི་སྒོ་སངས་རྒྱས་ཀྱི་ཡོན་ཏན་རྒྱ་ཆེན་པོའི་འོད་ཅེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་སེམས་ཅན་ཐེག་པ་ཆེན་པོ་ལ་མོས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་
འཛིན་གྱི་ཡེ་ཤེས་སྣང་བའི་སྒོ་ཀུན་ཏུ་སྒོ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ཐོག་མར་སེམས་བསྐྱེད་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་སངས་
རྒྱས་ཐམས་ཅད་ཀྱི་སྨོན་ལམ་གྱི་ཕུང་པོ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་གཉིས་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་རྡུལ་དང་བྲལ་བའི་
དཀྱིལ་འཁོར་ཅེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་གསུམ་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་རབ་ཏུ་ཞི་བའི་རྒྱན་ཅེས་བྱ་བ་ཡང་

དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་བཞི་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་ཐམས་ཅད་མཁྱེན་པའི་ཤུགས་ཀྱི་
ཡུལ་འབྱུང་བ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་ལྔ་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་སེམས་ཀྱི་རྒྱུད་མེ་ཏོག་གི་སྙིང་པོ་ཞེས་བྱ་བ་ཡང་
དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་དྲུག་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་རྣམ་པར་སྣང་བའི་སྙིང་པོ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་
ནི་བྱང་ཆུབ་སེམས་དཔའ་ས་བདུན་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་ས་ཀུན་ནས་བརྒྱན་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་བརྒྱད་པ་ལ་གནས་པ་རྣམས་
འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་ཆོས་ཀྱི་དབྱིངས་སུ་ལུས་ཤིན་ཏུ་རྣམ་པར་ཕྱེ་བའི་ཡུལ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་དགུ་པ་ལ་གནས་པ་རྣམས་འཁོད་ཅིང་། དགེ་
སློང་མ་སེང་གེ་རྣམ་པར་བསྒྱིངས་བས། ཆོས་ཀྱི་སྒོ་མི་དམིགས་པའི་སྟོབས་ཀྱི་གནས་ཀྱིས་བརྒྱན་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་བཅུ་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་
བསྒྱིངས་པས། ཏིང་ངེ་འཛིན་གྱི་སྒོ་སྒྲིབ་པ་མེད་པའི་དཀྱིལ་འཁོར་ཅེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ལག་ན་རྡོ་རྗེའི་འཁོར་གྱི་དཀྱིལ་འཁོར་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་

ཀྱི་སྒོ་ཡེ་ཤེས་རྡོ་རྗེ་མཐུ་བོ་ཆེའི་རྒྱན་ཅེས་བྱ་བ་ཡང་དག་པར་བསྟན་པ་མཐོང་ངོ་། །དེ་ལྟར་སྐྱེ་བའི་སྐྱེ་མཆེད་རྣམ་པ་ཐ་དད་པ་ཐམས་ཅད་ཀྱི་སེམས་ཅན་དུ་གདགས་པ་དང་། སེམས་ཅན་གྱི་ལམ་གྱི་རྒྱུད་ཇི་སྙེད་པ་དེ་དག་གི་སེམས་ཅན་ཡོངས་སུ་སྨིན་པ་རྣམ་པར་འདུལ་བ། སྣོད་དུ་གྱུར་
བ་ཇི་སྙེད་ཅིག་བཟའ་ཤིང་གི་ར་བ་དེར་འོངས་ཤིང་། འཁོར་གྱི་སྟན་ལ་སོ་སོར་འཁོད་པ། བསམ་པ་ཐ་དད་པ་མོས་པ་མི་མཚུངས་པ། བསམ་པ་ཤིན་ཏུ་གཞོལ་བར་གྱུར་བ། དད་པའི་རོ་རྔམས་ཆེན་པོ་དང་ལྡན་པ་རྣམས་ལ། དགེ་སློང་མ་སེང་གེ་རྣམ་པར་བསྒྱིངས་པས་ཅི་ནས་ཀྱང་
ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བ། དེ་ལྟ་དེ་ལྟར་ཆོས་བསྟན་པ་མཐོང་ངོ་། །དེ་ཅིའི་ཕྱིར་ཞེ་ན། དེ་ནི་དགེ་སློང་མ་སེང་གེ་རྣམ་པར་བསྒྱིངས་པ་དེས་ཀུན་ཏུ་ལྟ་བའི་བཏང་སྙོམས་དང་ལྡན་པ་ལ་སྩོགས་པ་དང་། སངས་རྒྱས་ཀྱི་ཆོས་ཐམས་
ཅད་ཤིན་ཏུ་བསྟན་པ་ལ་སྩོགས་པ་དང་། ཆོས་ཀྱི་དབྱིངས་ཀྱི་གཞི་ཐ་དད་པ་ལ་སྩོགས་པ་དང་། སྒྲིབ་པའི་དཀྱིལ་འཁོར་ཐམས་ཅད་རྣམ་པར་འཐོར་བ་ལ་སྩོགས་པ་དང་། འགྲོ་བ་ཐམས་ཅད་ཀྱི་དགེ་བའི་སེམས་ཡང་དག་པར་འབྱུང་བ་ལ་སྩོགས་པ་དང་། ཁྱད་པར་
ཡོད་པའི་རྒྱན་ལ་སྩོགས་པ་དང་། ཆགས་པ་མེད་པའི་ཚུལ་གྱི་སྙིང་པོ་ལ་སྩོགས་པ་དང་། ཆོས་ཀྱི་དབྱིངས་ཀྱི་དཀྱིལ་འཁོར་ལ་སྩོགས་པ་དང་། སེམས་ཀྱི་མཛོད་ལ་སྩོགས་པ་དང་། ཀུན་ཏུ་མོས་པ་མངོན་པར་སྒྲུབ་པའི་སྙིང་པོ་ལ་སྩོགས་པ་ཤེས་རབ་ཀྱི་ཕ་
རོལ་ཏུ་ཕྱིན་པའི་སྒོ་བརྒྱ་སྟོང་གྲངས་མེད་པ་ནོན་པའི་ཕྱིར་ཏེ། བཟའ་ཤིང་གི་ར་བ་ཉི་མའི་མདོག་དེར་བྱང་ཆུབ་སེམས་དཔའ་འམ། སེམས་ཅན་གཞན་ཇི་སྙེད་ཅིག་དགེ་སློང་མ་སེང་གེ་རྣམ་པར་བསྒྱིངས་པ་ལ་ལྟ་བ་དང་། ཆོས་མཉན་པའི་ཕྱིར་འོང་བ་དེ་དག་ཐམས་
ཅད་ཀྱང་སྔོན། དགེ་སློང་མ་སེང་གེ་རྣམ་པར་བསྒྱིངས་པས། དགེ་བའི་ཆོས་ཡང་དག་པར་བླང་བ་ལ་ཤིན་ཏུ་བཀོད་པ་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་བར་དུ་བྱས་པ་ཤ་སྟག་གོ །དེ་ནས་ཚོང་དཔོན་གྱི་བུ་ནོར་བཟངས་

ཀྱིས། དགེ་སློང་མ་སེང་གེ་རྣམ་པར་བསྒྱིངས་པའི་བཟའ་ཤིང་གི་ར་བ་ཕུན་སུམ་ཚོགས་པ་དང་། ནགས་ཚལ་ཕུན་སུམ་ཚོགས་པ་དང་། གཙུག་ལག་ཁང་ཕུན་སུམ་ཚོགས་པ་དང་། འཆག་ས་ཕུན་སུམ་ཚོགས་པ་དང་། ལོངས་སུ་སྤྱོད་ཕུན་སུམ་ཚོགས་པ་
དང་། མལ་ཆ་ཕུན་སུམ་ཚོགས་པ་དང་། འཁོར་གྱི་དཀྱིལ་འཁོར་ཕུན་སུམ་ཚོགས་པ་དང་། དབང་ཆེན་པོ་ཕུན་སུམ་ཚོགས་པ་དང་། རྫུ་འཕྲུལ་དང་རྣམ་པར་འཕྲུལ་པ་ཕུན་སུམ་ཚོགས་པ་དང་། དབྱངས་ཀྱི་རྒྱན་ཕུན་སུམ་ཚོགས་པ་རྣམ་པ་དེ་ལྟ་བུ་མཐོང་སྟེ། ཆོས་ཀྱི་ཚུལ་
བསམ་གྱིས་མི་ཁྱབ་པའང་ཐོས་ནས། ཆོས་ཀྱི་སྤྲིན་གྱི་ཆར་ཆེན་པོས་སེམས་མངོན་པར་བརླན་པ་དེའི་ཡིད་ལ་དགེ་སློང་མ་སེང་གེ་རྣམ་པར་བསྒྱིངས་པས། བསམ་པ་རྣམ་པར་དག་པ་ཕུན་སུམ་ཚོགས་པར་བྱས་ཀྱིས་ད་ནི་གཡས་ཕྱོགས་སུ་བསྐོར་བ་ལན་བརྒྱ་སྟོང་
དུ་མ་ཞིག་ཏུ་བྱའོ་སྙམ་པ་དང་། དེའི་མོད་ལ་དགེ་སློང་མ་སེང་གེ་རྣམ་པར་བསྒྱིངས་པས། བཟའ་ཤིང་གི་ར་བ་དང་། འཁོར་གྱི་དཀྱིལ་འཁོར་དུ་བཅས་པ་དེ་དག་ཐམས་ཅད་ཀྱང་སྣང་བ་ཆེན་པོས་ཁྱབ་པར་བྱས་སོ། །དེ་ལྟར་གཡས་ཕྱོགས་སུ་བསྐོར་བ་བྱའོ། །སྙམ་དུ་
བསམས་ནས་བསྐོར་བ་བྱེད་པའི་ཚེ། འཁོར་ཐམས་ཅད་ནའང་དགེ་སློང་མ་སེང་གེ་རྣམ་པར་བསྒྱིངས་པ་འདུག་པ་མཐོང་ནས་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་མ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་བདག་
གིས་ཐོས་ན། འཕགས་མ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ། དེས་སྨྲས་པ། རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་རློམ་སེམས་

ཐམས་ཅད་ཡོངས་སུ་བཅོམ་པ་ཞེས་བ་བ་ཐོབ་པའོ། །སྨྲས་པ། འཕགས་མ་བྱང་ཆུབ་སེམས་དཔའི་རྣམ་པར་ཐར་པ་རློམ་སེམས་ཐམས་ཅད་ཡོངས་སུ་བཅོམ་པ་དེའི་ཡུལ་ཇི་ལྟ་བུ་ཞིག་མཆིས། སྨྲས་པ་རིགས་ཀྱི་བུ་དེ་ནི་ཡེ་ཤེས་སྣང་བ་སྟེ། དུས་གསུམ་དུ་བྱུང་བའི་
རྒྱན་སེམས་སྐད་ཅིག་གི་ཆ་ཤས་ལ་རྣམ་པར་དམིགས་པའི་རང་བཞིན་ནོ། །སྨྲས་པ། འཕགས་མ་ཡེ་ཤེས་སྣང་བ་དེའི་ཡུལ་ཡང་ཇི་ལྟ་བུ་ཞིག་མཆིས། སྨྲས་པ། རིགས་ཀྱི་བུ་ཁོ་མོ་ཡེ་ཤེས་སྣང་བ་འདི་ལ་སྒྲུབ་པ་དང་ཡོངས་སུ་སྒྲུབ་པའི་ཚེ་ཆོས་ཐམས་ཅད་
རབ་ཏུ་འཐད་པ་ཞེས་བྱ་བའི་ཏིང་ངེ་འཛིན་སྐྱེས་ཏེ། ཏིང་ངེ་འཛིན་དེ་ཐོབ་མ་ཐག་ཏུ་ཡིད་ཀྱི་རང་བཞིན་གྱི་ལུས་ཀྱིས་ཕྱོགས་བཅུ་ཐམས་ཅད་ཀྱི་འཇིག་རྟེན་གྱི་ཁམས་ཐམས་ཅད་དུ། བྱང་ཆུབ་སེམས་དཔའ་སྐུ་ཚེ་གཅིག་གིས་ཐོགས་པ་དགའ་ལྡན་གྱི་ཕོ་བྲང་ན་བཞུགས་
པ། ཐམས་ཅད་རེ་རེ་ལ་ཡང་ལུས་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་མཆོད་པ་རྣམ་པ་ཐ་དད་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་མཆོད་པ་སྦྱར་བའི་ཕྱིར་འགྲོ་སྟེ། འདི་ལྟར་ལྷའི་ལུས་དང་ཀླུ་དང་
གནོད་སྦྱིན་དང་། དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པའི་དབང་པོའི་ལུས་མེ་ཏོག་གི་སྤྲིན་ཡོངས་སུ་འཛིན་པ་དང་། སྤོས་ཀྱི་སྤྲིན་ཡོངས་སུ་འཛིན་པ་དང་། བདུག་སྤོས་ཀྱི་སྤྲིན་ཡོངས་སུ་
འཛིན་པ་དང་། ཕྲེང་བའི་སྤྲིན་ཡོངས་ས་འཛིན་པ་དང་། བྱུག་པའི་སྤྲིན་ཡོངས་སུ་འཛིན་པ་དང་། ཕྱེ་མའི་སྤྲིན་ཡོངས་སུ་འཛིན་པ་དང་། ན་བཟའི་སྤྲིན་ཡོངས་སུ་འཛིན་པ་དང་། གདུགས་ཀྱི་སྤྲིན་ཡོངས་སུ་འཛིན་པ་དང་། རྒྱལ་མཚན་གྱི་སྤྲིན་ཡོངས་
སུ་འཛིན་པ་དང་། བ་དན་གྱི་སྤྲིན་ཡོངས་སུ་འཛིན་པ་དང་། རིན་པོ་ཆེའི་ལྷབ་ལྷུབ་ཀྱི་སྤྲིན་ཡོངས་སུ་འཛིན་པ་དང་། རིན་པོ་ཆེའི་དྲ་བའི་རྒྱན་གྱི་སྤྲིན་ཡོངས་སུ་འཛིན་པ་དང་། རིན་པོ་ཆེའི་གནམ་ཡོལ་གྱི་རྒྱན་གྱི་སྤྲིན་ཡོངས་སུ་འཛིན་པ་དང་། རིན་པོ་ཆེའི་རྒྱན་

རྣམ་པར་ཕྱེ་བའི་སྤྲིན་ཡོངས་སུ་འཛིན་པ་དང་། རིན་པོ་ཆེའི་སྒྲོན་མའི་རྒྱན་གྱི་སྤྲིན་ཡོངས་སུ་འཛིན་པ་དང་། རིན་པོ་ཆེའི་གདན་གྱི་རྒྱན་གྱི་སྤྲིན་ཡོངས་སུ་འཛིན་པ་མང་པོས་མཆོད་པ་སྦྱར་བའི་ཕྱིར་འགྲོའོ། །དགའ་ལྡན་གྱི་གནས་ན་བཞུགས་པའི་བྱང་ཆུབ་
སེམས་དཔའ་སྐུ་ཚེ་གཅིག་གིས་ཐོགས་པ་རྣམས་ལ་མཆོད་པ་བྱ་བའི་ཕྱིར། ཇི་ལྟར་འགྲོ་བ་དེ་བཞིན་དུ་ཡུམ་གྱི་སྐུར་གཤེགས་པ་དང་། བལྟམ་པ་དང་། བཙུན་མོའི་འཁོར་གྱི་ནང་ན་བཞུགས་པ་དང་། མངོན་པར་འབྱུང་བ་དང་། སྙིང་པོ་བྱང་ཆུབ་ཏུ་གཤེགས་པ་དང་།
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཤིང་སྙིང་པོ་བྱང་ཆུབ་ལ་བཞུགས་པ་དང་། ཆོས་ཀྱི་འཁོར་ལོ་རབ་ཏུ་བསྐོར་བའི་དེ་བཞིན་གཤེགས་པ་ཐམས་ཅད་དང་། དེ་བཞིན་དུ་ལྷའི་གནས་ན་བཞུགས་པ་དང་། ཀླུ་དང་། གནོད་སྦྱིན་དང་།
དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པའི་གནས་ན་བཞུགས་པ་དང་། འགྲོ་བ་ཐམས་ཅད་ཀྱི་སེམས་དང་བསམ་པ་ཡོངས་སུ་ཚིམ་པར་མཛད་ནས། ཡོངས་སུ་མྱ་ངན་ལས་འདའ་བའི་བར་དེ་
དག་ཐམས་ཅད་ལའང་ཡིད་ཀྱི་རང་བཞིན་གྱི་ལུས་རྣམ་པ་དེ་ལྟ་བུ་དག་གིས་རྣམ་པ་དེ་ལྟ་བུའི་མཆོད་པ་བྱེད་ཅིང་། དེ་བཞིན་གཤེགས་པ་ཐམས་ཅད་ཀྱི་དྲུང་དུ་འགྲོའོ། སེམས་ཅན་གང་གིས་ཁོ་མོས་སངས་རྒྱས་མཆོད་པ་དང་། རིམ་གྲོ་བྱེད་པའི་ལས་འདི་ཤེས་
པར་གྱུར་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་རོ། །སེམས་ཅན་གང་ཁོ་མོའི་དྲུང་དུ་འོང་བ་དེ་དག་ཐམས་ཅད་ལའང་ཁོ་མོ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་གདམས་ངག་དང་། རྗེས་སུ་བསྟན་པ་འདི་ཉིད་
སྟོན་ཏེ། རིགས་ཀྱི་བུ་ཁོ་མོ་ཡེ་ཤེས་ཀྱི་མིག་གིས་སེམས་ཅན་ཐམས་ཅད་ལ་ལྟ་ཡང་། སེམས་ཅན་གྱི་འདུ་ཤེས་ཀྱང་མི་བསྐྱེད་ལ། རློམ་སེམས་ཀྱང་མི་བྱེད་དེ། འགྲོ་བ་ཐམས་ཅད་ཀྱི་སྐད་རྒྱ་མཚོ་ཡང་ཉན་ཏེ། ཚིག་གི་ལམ་ཐམས་ཅད་ལ་མངོན་པར་

ཞེན་པ་མེད་པས། རློམ་སེམས་སུ་བྱེད་པ་མེད་དོ། །དེ་བཞིན་གཤེགས་པ་ཐམས་ཅད་ཀྱང་མཐོང་སྟེ། ཆོས་ཀྱི་ལུས་ཡོངས་སུ་ཤེས་པས་རློམ་སེམས་སུ་བྱེད་པ་མེད་དོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་ཡོངས་སུ་འཛིན་ཀྱང་། ཆོས་ཀྱི་རང་བཞིན་
ཁོང་དུ་ཆུད་པས་རློམ་སེམས་སུ་བྱེད་པ་མེད་དོ། །སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་ཐམས་ཅད་རྒྱས་པར་འགེངས་ཀྱང་། ཆོས་ཉིད་སྒྱུ་མའི་རང་བཞིན་ཁོང་དུ་ཆུད་པས་རློམ་སེམས་སུ་བྱེད་པ་མྱེད་དོ། །རིགས་ཀྱི་བུ་ཁོ་མོས་ནི་བྱང་ཆུབ་སེམས་དཔའི་རྣམ་པར་
ཐར་བ་རློམ་སེམས་ཐམས་ཅད་ཡོངས་སུ་བཅོམ་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་ཆོས་ཀྱི་དབྱིངས་མཐའ་དང་དབུས་མེད་པ་ལ་ཞུགས་པ། ཆོས་ཐམས་ཅད་ལ་རློམ་སེམས་མེད་པར་གནས་ཀྱང་སྐྱིལ་མོ་ཀྲུང་གཅིག་གིས་ཆོས་ཀྱི་དབྱིངས་
ཐམས་ཅད་རྒྱས་པར་འགེངས་པ། སངས་རྒྱས་ཀྱི་ཞིང་ཐམས་ཅད་རང་གི་ལུས་སུ་འདུས་པར་སྟོན་ཀྱང་། སྐད་ཅིག་གཅིག་གིས་དེ་བཞིན་གཤེགས་པ་ཐམས་ཅད་ཀྱི་དྲུང་དུ་འདོང་བ། ལུས་ལ་སངས་རྒྱས་ཀྱི་རྫུ་འཕྲུལ་ཐམས་ཅད་ལ་འབྱུང་ཞིང་རྒྱུ་བ། སངས་རྒྱས་
ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བ་སྤུའི་ཉག་མ་གཅིག་གིས་སྦམས་ཤིང་མངོན་པར་འཕེན་པ། རང་གི་བ་སྤུའི་བུ་གར་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་འདུ་བ་དང་། འཇིག་པའི་བསྐལ་པ་ཡོངས་སུ་སྟོན་པ། སྐད་ཅིག་
གཅིག་ལ་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་གནས་པ། མཉམ་པ་ཉིད་ཀྱིས་ཡང་དག་པར་འཛུད་པ། སྐད་ཅིག་གཅིག་གིས་བརྗོད་དུ་མེད་པའི་ཡང་བརྗོད་དུ་མེད་པའི་བསྐལ་པར་འཁོར་བ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་
པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ཀྱི་ཡུལ་བགྲོད་དཀའ་བ་ན། གྲོང་ཁྱེར་རིན་པོ་ཆེའི་རྒྱན་ཅེས་བྱ་བ་ཡོད་དེ། དེ་ན་བཅོམ་པ་མ་ལྷའི་བཤེས་གཉེན་མ་ཞེས་བྱ་བ་འདུག་གིས་དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་

ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་དགེ་སློང་མ་སེང་གེ་རྣམ་པར་བསྒྱིངས་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་སློང་མ་སེང་གེ་རྣམ་པར་
བསྒྱིངས་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། དགེ་སློང་མ་སེང་གེ་རྣམ་པར་བསྒྱིངས་པའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཤེས་རབ་ཀྱི་སྣང་བ་ཆེན་པོ་དེས་སེམས་སྣང་བར་གྱུར་པ་དེ་ཐམས་ཅད་
མཁྱེན་པའི་ཡེ་ཤེས་སྣང་བ་དེ་ལ་ནི་སེམས། ཆོས་ཉིད་ཀྱི་རང་བཞིན་གྱི་སྟོབས་སྣང་བ་དེ་ལ་ནི་ཡང་དག་པར་རྗེས་སུ་ལྟ། སེམས་ཅན་ཐམས་ཅད་ཀྱི་སྐད་རྣམ་པར་དམྱིགས་པའི་མཛོད་ཀྱི་གཟུངས་ཀྱི་ཚུལ་དེ་ནི་བརྟན་པར་བྱེད། དེ་བཞིན་གཤེགས་པ་ཐམས་ཅད་
ཀྱི་ཆོས་ཀྱི་འཁོར་ལོ་ཡང་དག་པར་འཛིན་པའི་གཟུངས་ཀྱི་ཚུལ་དེ་ནི་ཤིན་ཏུ་རྒྱ་ཆེ་བར་བྱེད། སྙིང་རྗེ་ཆེན་པོ་འགྲོ་བ་ཐམས་ཅད་ཀྱི་སྐྱབས་སུ་གྱུར་པའི་སྟོབས་དེ་ནི་ཉེ་བར་སྟོན། ཆོས་ཐམས་ཅད་ཀྱི་ཚུལ་སྣང་བའི་སྒོ་ནས་ཡང་དག་པར་འབྱུང་བའི་ཐམས་ཅད་མཁྱེན་པ་ཉིད་ཀྱི་
ཤུགས་དེ་ལ་ནི་རབ་ཏུ་རྟོག །ཆོས་ཀྱི་དབྱིངས་རྒྱ་ཆེན་པོའི་དཀྱིལ་འཁོར་རྒྱས་པར་འགེངས་པའི་སྨོན་ལམ་ཡོངས་སུ་དག་པ་དེའི་རྗེས་སུ་ནི་འབྲང་། ཆོས་ཐམས་ཅད་ཀྱི་ཕྱོགས་སྣང་བར་བྱེད་པའི་ཡེ་ཤེས་ཀྱི་འོད་དེ་ནི་ཤིན་ཏུ་གསལ་བར་བྱེད། ཆོས་ཐམས་ཅད་
ཀྱིས་ཕྱོགས་བཅུའི་འཇིག་རྟེན་གྱི་ཁམས་རྣམ་པར་ཕྱེ་བ་རྒྱས་པར་འགེངས་པའི་མངོན་པར་ཤེས་པའི་སྟོབས་དེ་ནི་མངོན་པར་སྒྲུབ། བྱང་ཆུབ་སེམས་དཔའི་ལམ་དང་། དྲན་པ་ཐམས་ཅད་ཉེ་བར་བླངས་པས་བརྩམས་པ་མཐར་དབྱུང་བའི་སྨོན་ལམ་དེ་ནི་ཡོངས་སུ་
རྫོགས་པར་བྱེད་ཅིང་། མཐར་གྱིས་ཡུལ་བགྲོད་དཀའ་བའི་གྲོང་ཁྱེར་རིན་པོ་ཆེའི་རྒྱན་གང་ན་བ་དེར་ཕྱིན་ཏེ། བཅོམ་པ་མ་ལྷའི་བཤེས་གཉེན་མ་ཡོངས་སུ་ཚོལ་ཚོལ་བ་དང་། དེ་ལ་བཅོམ་པ་མ་ལྷའི་བཤེས་གཉེན་གྱི་ཡོན་ཏན་མངོན་པར་མི་ཤེས་ལ་ཡེ་ཤེས་ཀྱི་

སྤྱོད་ཡུལ་གྱི་ཚུལ་ལ་མི་མཁས་པའི་མི་ཇི་སྙེད་པ་དེ་དག་འདི་སྙམ་དུ་སེམས་ཏེ། མི་འདི་དེ་ལྟར་ཞི་ཞིང་དུལ་བའི་དབང་པོ་དང་ལྡན་ལ་དེ་ལྟར་ཤེས་བཞིན་དང་ལྡན་ཏེ། དེ་ལྟར་འཁྲུལ་པ་མེད་ཅིང་དེ་ལྟར་ཡིད་འཁྲུག་པ་མེད་ལ་དེ་ལྟར་གཉའ་ཤིང་གང་ཙམ་དུ་ལྟ་སྟེ། དེ་ལྟར་གནོད་
པས་མི་ཚུགས་ཤིང་དེ་ལྟར་མཚན་མར་མི་འཛིན་ལ། གཟུགས་ཀྱི་རྣམ་པ་ཐམས་ཅད་ལ་གཡེང་བ་མེད་པའི་མིག་དང་ལྡན་ཏེ། ཡིད་ལ་བྲེལ་བ་མེད་ཅིང་། བསམ་པ་ཟབ་ལ་མངོན་པར་མཛེས་ཏེ། རྒྱ་མཚོ་ལྟར་འདུག་ཅིང་སེམས་མི་ཉམས་མི་འཁྲུག་པ་དེ་ལ་བཅོམ་
པ་མ་ལྷའི་བཤེས་གཉེན་མས་ཀོ་ཅི་ཞིག་བྱ། འདི་ལྟ་བུ་དག་ནི་འདོད་ཆགས་ལ་དགའ་བ་མེད་དེ། སེམས་ཕྱིན་ཅི་ལོག་དང་ལྡན་ཡང་མི་སྲིད་དོ། །འདི་ལྟ་བུ་དག་ནི་སྡུག་ཅིང་གཙང་བའི་འདུ་ཤེས་ཡོངས་སུ་རྒྱུ་བ་མེད་དེ། འདི་ལྟ་བུ་དག་ནི་འདོད་པས་འཁོལ་ཀྱང་མི་
སྲིད་དོ། །འདི་ལྟ་བུ་དག་ནི་བུད་མེད་ཀྱི་དབང་དུ་འགྱུར་བ་མེད་དེ། འདི་ལྟ་བུ་དག་ནི་བདུད་ཀྱི་སྤྱོད་ཡུལ་ལ་སྤྱོད་ཀྱང་མི་སྲིད་དོ། །འདི་ལྟ་བུ་དག་ནི་བདུད་ཀྱི་སྤྱོད་ཡུལ་ལ་ཆགས་པ་མེད་དེ། འདི་ལྟ་བུ་དག་ནི་འདོད་པའི་འདམ་དུ་བྱིང་བ་ཡང་མི་སྲིད་དོ། །འདི་ལྟ་བུ་
དག་ནི་བདུད་ཀྱི་ཞགས་པས་བཅིངས་པར་འགྱུར་བ་མེད་དེ། མི་དགོས་པ་བྱེད་ཀྱང་མི་སྲིད་དོ་སྙམ་མོ། །གང་ཡང་བཅོམ་པ་མ་ལྷའི་བཤེས་གཉེན་མའི་ཡོན་ཏན་གྱི་ཁྱད་པར་མངོན་པར་ཤེས་ཤིང་། ཡེ་ཤེས་ཀྱི་སྤྱོད་ཡུལ་མངོན་དུ་གྱུར་པ་དེ་དག་ནི་འདི་སྐད་ཅེས་
འཛེར་ཏེ། རིགས་ཀྱི་བུ་དེ་ལྟར་ཁྱོད་བཅོམ་པ་མ་ལྷའི་བཤེས་གཉེན་མ་ལ་ཡོངས་སུ་དྲི་བར་སེམས་པ་ནི་ཁྱོད་ཀྱང་ཐོབ་པར་བྱ་བ་ལེགས་པར་ཐོབ་པ་སྟེ། ལེགས་སོ་ལེགས་སོ། །ཁྱོད་ནི་ངེས་པར་སངས་རྒྱས་སུ་སྨོན་པའོ། །ཁྱོད་ནི་བདག་ངེས་པར་སེམས་
ཅན་ཐམས་ཅད་ཀྱི་གནས་སུ་བསྒྱུར་བར་འདོད་པའོ། །ཁྱོད་ནི་ངེས་པར་སེམས་ཅན་ཐམས་ཅད་ཀྱི་འདོད་ཆགས་ཀྱི་ཟུག་རྔུ་དབྱུང་བར་འདོད་པའོ། །ཁྱོད་ནི་ངེས་པར་སྡུག་ཅིང་གཙང་བའི་འདུ་ཤེས་རྣམ་པར་གཏོར་བར་འདོད་པའོ། །རིགས་ཀྱི་བུ་འདེ་རེ་བཅོམ་པ་

མ་ལྷའི་བཤེས་གཉེན་མ་ནི་གྲོང་ཁྱེར་གྱི་ལམ་གྱི་སུམ་མདོའི་བྱང་ཕྱོགས་ལོགས་ཤིག་ན་རང་གི་ཁྱིམ་ན་འདུག་གོ །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཚིག་དེ་ཐོས་ནས་དགའ་རངས་ཏེ། མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་
སྐྱེས་ནས། བཅོམ་པ་མ་ལྷའི་བཤེས་གཉེན་མའི་ཁྱིམ་གང་ན་བ་དེར་ཕྱིན་ནས། དེའི་ཁྱིམ་ཆེ་ཞིང་ཡངས་ལ་རིན་པོ་ཆེའི་ར་བ་རིམ་པ་བཅུས་བསྐོར་བ། རིན་པོ་ཆེ་ཏ་ལའི་ཕྲེང་བ་རིམ་པ་བཅུས་ཀུན་ནས་བསྐོར་བ། འོབས་སྤོས་ཆུས་གང་བ། ལྷ་རྫས་ཀྱི་རིན་པོ་ཆེའི་
པད་མོ་དང་། ཨུཏ་པ་ལ་དང་། ཀུ་མུ་ཏ་དང་། མེ་ཏོག་པུན་ད་རི་ཀས་ཆུ་ཡོངས་སུ་ཁེབས་པ་ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་བ། གཞི་གསེར་གྱི་བྱེ་མ་བདལ་བ། སྤོས་ཡིད་དུ་འོང་བ་དང་། འདྲེས་པའི་ཆུདྲི་ཞིམ་པས་གང་བ། རིན་པོ་ཆེ་
སིལ་མ་མང་པོས་ཤིན་ཏུ་བརྒྱན་པ། རིམ་པ་བཅུས་ཀུན་ནས་བསྐོར་བ། རིན་པོ་ཆེ་ཐམས་ཅད་ལས་བྱས་པའི་ཁང་པ་དང་། གཞལ་མེད་ཁང་དང་། ཁང་པ་བརྩེགས་པས་རྣམ་པར་དགྲིགས་ཤིང་བ་གམ་དང་རྟ་བབས་དང་། སྐར་ཁུང་གི་ཤར་བུ་དང་། ཟླ་གམ་
སེང་གེའི་ཤིང་ཏགས་དང་། སྣང་བའི་རྒྱལ་མཚན་ལ་སྩོགས་པ། རིན་པོ་ཆེ་སྣ་ཚོགས་ཀྱི་འོད་ཀྱིས་འབར་བ་རིན་པོ་ཆེ་རྣམ་པ་སྣ་ཚོགས་གྲངས་མེད་པའི་འབྱུང་གནས་ཀྱིས་བརྒྱན་པ། རིན་པོ་ཆེའི་དག་བཻཌཱུཪྻས་སྦས་པའི་གཞི་དང་ལྡན་པ། ལྷ་རྫས་ཀྱི་སྤོས་
ཞིམ་པོ་ཐམས་ཅད་ཀྱིས་འཁོར་ཐམས་ཅད་ནས་བདུགས་ཤིང་བསངས་པ། ཨ་ཀ་རུ་ནག་པོ་མཆོག་གི་བདུག་སྤོས་ཀྱིས་དྲི་ཞིམ་པར་བདུག་པ། སྤོས་ཀྱི་བྱུག་པས་འཁོར་ཀུན་ནས་བྱུགས་པ། རིན་པོ་ཆེ་སྣ་ཚོགས་ཀྱི་ལན་ཀན་གྱིས་རྩིག་ངོས་ཀུན་ཏུ་བྲེས་པ།
སྟེང་འཛམ་བུ་ཆུ་ཀླུང་གི་གསེར་གྱི་དྲ་བ་རིན་པོ་ཆེ་སྣ་ཚོགས་ཀྱིས་རབ་ཏུ་སྤྲས་པས་ཀུན་ནས་བཀབ་པ། གསེར་གྱི་དྲིལ་གྱི་དྲ་བ་བརྒྱ་སྟོང་རླུང་གིས་བསྐྱོད་ཅིང་འཁྲོལ་བའི་སྒྲ་ཡིད་དུ་འོང་ཞིང་སྙན་པ་འབྱུང་བ། རིན་པོ་ཆེ་ཐམས་ཅད་ཀྱི་མེ་ཏོག་གི་སྤྲིན་སིལ་མ་

ཀུན་ཏུ་བཀྲམ་པས། རིན་པོ་ཆེའི་མེ་ཏོག་གི་རྒྱན་དང་ལྡན་པ། རིན་པོ་ཆེ་སྣ་ཚོགས་ཐམས་ཅད་ཀྱི་རྒྱལ་མཚན་བསྒྲེང་བས་སྒོ་ཤིན་ཏུ་བརྒྱན་པ། ནོར་བུ་རིན་པོ་ཆེ་སྣ་ཚོགས་ཀྱི་འོད་ཀྱི་དྲ་བ་སྣང་བ། མུ་མེད་པར་བརྗོད་དུ་ཡོད་པ། རིན་པོ་ཆེ་བྱུ་རུའི་སྡོང་པོ་དང་། རྡོ་རྗེ་དང་། མན་ཤེལ་
ལ་སྩོགས་པའི་གཏེར་བརྒྱ་སྟོང་ཀུན་གྱིས་ཤེས་པ། ཕུན་སུམ་ཚོགས་པས་མཛོད་མི་ཟད་པ་དང་ལྡན་པ། བཟའ་ཤིང་གི་ར་བ་ཆེན་པོ་བཅུས་བརྒྱན་པ་མཐོང་སྟེ། དེ་ནས་བཅོམ་པ་མ་ལྷའི་བཤེས་གཉེན་མ་གཟུགས་མཛེས་ཤིང་བཟང་ལ་བལྟ་ན་སྡུག་པ། གྱ་ནོམ་པའི་ཁ་
དོག་དམ་པ་རྒྱས་པ་དང་ལྡན་པ། གསེར་གྱི་ཁ་དོག་ལྟར་འདུག་པའི་མདོག་ཅན་སྐྲ་མཐོན་ཏིང་དུ་འདུག་པ། ལུས་ཀྱི་ཡན་ལག་དང་ཉིང་ལག་ཚུལ་དང་འདྲ་བར་རྣམ་པར་གྲུབ་པ། འདོད་པའི་ཁམས་ཀྱི་ལྷ་དང་མི་ཐམས་ཅད་ལས་འཕགས་པའི་ཁ་དོག་དང་
གཟུགས་དང་དབྱིབས་མཛེས་པ་དང་ལྡན་པ། ཚངས་པ་ལས་ཀྱང་འདས་པའི་དབྱངས་ཀྱི་ཡན་ལག་དང་ལྡན་པ། སེམས་ཅན་ཐམས་ཅད་ཀྱི་སྒྲ་སྐད་ཀྱི་ཚུལ་ལ་མཁས་པ། རྒྱན་ཐམས་ཅད་དང་ལྡན་ཞིང་ཡིད་དུ་འོང་བའི་དབྱངས་ཅན་རྣམ་པར་ཐར་པ་ཡི་གེའི་འཁོར་ལོའི་
རྒྱན་ལ་མཁས་པ་དང་ལྡན་པ། བཟོ་དང་གཙུག་ལག་ཐམས་ཅད་ལ་མཁས་པར་བྱུང་བ། ཆོས་ཀྱི་ཡེ་ཤེས་སྒྱུ་མ་ལ་མཁས་པར་བསླབས་པ། བྱང་ཆུབ་སེམས་དཔའི་ཐབས་དང་ཚུལ་རྣམ་པ་ཐམས་ཅད་དུ་ཐོབ་པ། རིན་པོ་ཆེའི་ལྷབ་ལྷུབ་སྣ་ཚོགས་
ཀྱིས་རྣམ་པར་བརྒྱན་པའི་ལུས་ཡིད་དུ་འོང་བ་དང་ལྡན་པ། རིན་པོ་ཆེ་ཐམས་ཅད་ལས་བྱས་པའི་དྲ་བ་འོད་ཤིན་ཏུ་གསལ་བས་ལུས་རབ་ཏུ་བརྒྱན་པ། ལྷ་རྫས་ཀྱི་ནོར་བུ་རིན་པོ་ཆེའི་རྒྱན་དང་། ལྷབ་ལྷུབ་གྲངས་མེད་པས་རབ་ཏུ་བརྒྱན་པས། ལུས་ཤིན་ཏུ་
འབར་བ། ནོར་བུ་རིན་པོ་ཆེ་དམ་པ་ཡིད་བཞིན་གྱི་རྒྱལ་པོའི་ཅོད་པན་ཐོགས་པ། རིན་པོ་ཆེ་བཻ་ཌཱུརྱའི་ཕྲེང་བ་མདོ་ཟུངས་རྡོ་རྗེ་རིན་པོ་ཆེ་སྣ་ཚོགས་དང་། ནོར་བུ་རིན་པོ་ཆེ་སེང་གེ་མཛེས་པ་སྣ་ཚོགས་བཀྱེ་བ་མགུལ་ན་ཐོགས་པ། དགེ་བའི་རྩ་བ་སྤྱད་པ་

ལ་སྐལ་བ་འཐུན་པ་དང་། སྨོན་ལམ་གཅིག་པའི་འཁོར་མང་པོ་གཞན་གྱིས་མི་ཕྱེད་ཅིང་ཡིད་དུ་འོང་བ་དང་ལྡན་པ། བསོད་ནམས་དང་ཡེ་ཤེས་ཀྱི་ཚོགས་ཆེན་པོའི་གཏེར་མི་ཟད་པའི་མཛོད་དང་ལྡན་པ་འདུག་པ་མཐོང་སྟེ། དེས་ཁྱིམ་དེ་དག་
ཐམས་ཅད་དང་། རིན་པོ་ཆེའི་གནས་དང་། གཞལ་མེད་ཁང་གི་རྒྱན་དེ་དག་ཐམས་ཅད་ཀྱང་རང་གི་ལུས་ལས་བྱུང་བའི་འོད་དགའ་བར་བྱེད་པ། ལུས་བདེ་བ་དང་སིམ་པ་སྐྱེད་པ། སེམས་ཁོང་ནས་དགའ་བར་བྱེད་པས་གསལ་ཞིང་སྣང་བར་བྱས་པ་མཐོང་ངོ་། །
དེ་ནས་ཚོང་དཔོན་གྱི་བུ་ནོར་བཟངས་ཀྱིས་བཅོམ་པ་མ་ལྷའི་བཤེས་གཉེན་མའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་མ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ་ཞེས་བདག་
གིས་ཐོས་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་འཕགས་མས་བདག་ལ་བསྟན་དུ་གསོལ། །དེས་སྨྲས་པ་རིགས་ཀྱི་བུ་ཁོ་མོས་ནི་བྱང་ཆུབ་སེམས་དཔའི་རྣམ་པར་ཐར་
པ་འདོད་ཆགས་དང་བྲལ་བའི་མཐར་ཕྱིན་པ་ཞེས་བྱ་བ་ཐོབ་སྟེ། རིགས་ཀྱི་བུ་དེ་ལྟར་ཁོ་མོ་ནི་ལྷ་རྣམས་ལ་ལྷ་མོའི་གཟུགས་དང་ཁ་དོག་དང་། དབྱིབས་དང་ཆུ་ཞེང་ལས་ཀྱང་ལྷག་པར་ཁ་དོག་གསལ་བ་དང་། རྣམ་པར་དག་པས་ཅི་ལ་མོས་པ་བཞིན་དུ་སྣང་
བར་བྱེད་དོ། །དེ་བཞིན་དུ་ཀླུ་དང་གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་ལ་ཡང་བུད་མེད་ཀྱི་གཟུགས་དང་། ཁ་དོག་དང་དབྱིབས་དང་། ཆུ་ཞེང་ལྷག་པར་

འོད་གསལ་ཞིང་རྣམ་པར་དག་པས་ཅི་ལ་མོས་པ་བཞིན་དུ་སྣང་བར་བྱེད་དོ། །སེམས་ཅན་གང་འདོད་ཆགས་ཀྱིས་ཀུན་ནས་འཁོར་བའི་སེམས་དང་ལྡན་པ་དག །ཁོ་མོའི་དྲུང་དུ་འོང་ནའང་དེ་དག་ཐམས་ཅད་ལ་ཁོ་མོ་ནི་འདོད་ཆགས་དང་འབྲལ་བར་འགྱུར་བའི་ཕྱིར་ཆོས་
སྟོན་ཏེ། དེ་དག་གིས་ཆོས་དེ་ཐོས་ནས་ཀྱང་འདོད་ཆགས་དང་བྲལ་བ་ཐོབ་པར་འགྱུར་རོ། །བྱང་ཆུབ་སེམས་དཔའི་ཏིང་ངེ་འཛིན་ཆགས་པ་མེད་པ་ཞེས་བྱ་བ་ཡང་རབ་ཏུ་འཐོབ་བོ། །ལ་ལ་ནི་ཁོ་མོ་མཐོང་མ་ཐག་ཏུ་འདོད་ཆགས་དང་བྲལ་བར་འགྱུར་ཏེ།
བྱང་ཆུབ་སེམས་དཔའི་ཏིང་ངེ་འཛིན་དགའ་བ་དང་ལྡན་པ་ཞེས་བྱ་བ་ཡང་རབ་ཏུ་འཐོབ་བོ། །ལ་ལ་ནི་གཏམ་བྱས་པ་ཙམ་གྱིས་འདོད་ཆགས་དང་བྲལ་བ་ཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་ཆགས་པ་མེད་པའི་དབྱངས་ཤེས་བྱ་བ་
ཡང་རབ་ཏུ་འཐོབ་བོ། །ལ་ལ་ནི་ལག་ནས་བཟུང་བ་ཙམ་གྱིས་འདོད་ཆགས་དང་བྲལ་བ་ཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་ཐམས་ཅད་དུ་རྗེས་སུ་འགྲོ་ཞིང་གནས་པ་ཞེས་བྱ་བའང་རབ་ཏུ་འཐོབ་བོ། །ལ་ལ་ནི་
གཅིག་ཏུ་འགྲོགས་པ་ཙམ་གྱིས་འདོད་ཆགས་དང་བྲལ་བ་ཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་བྲལ་བས་སྣང་བ་ཞེས་བྱ་བ་ཡང་རབ་ཏུ་འཐོབ་བོ། །ལ་ལ་ནི་བལྟས་པ་ཙམ་གྱིས་འདོད་ཆགས་དང་བྲལ་བ་ཐོབ་པར་འགྱུར་ཏེ།
བྱང་ཆུབ་སེམས་དཔའི་ཏིང་ངེ་འཛིན་རབ་ཏུ་ཞི་བའི་རྣམ་པར་བརྒྱན་ཅེས་བྱ་བ་ཡང་རབ་ཏུ་ཐོབ་བོ། །ལ་ལ་ནི་གླེལ་བ་ཙམ་གྱིས་འདོད་ཆགས་དང་བྲལ་བ་ཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་ཕས་ཀྱི་རྒོལ་བ་རྣམ་པར་འཐོར་
པ་ཞེས་བྱ་བ་ཡང་རབ་ཏུ་འཐོབ་བོ། །ལ་ལ་ནི་མྱིག་བཙུམས་པ་ཙམ་གྱིས་འདོད་ཆགས་དང་བྲལ་བ་ཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཡུལ་སྣང་བ་ཞེས་བྱ་བ་ཡང་རབ་ཏུ་འཐོབ་བོ། །ལ་ལ་ནི་པང་དུ་འཁྱུད་

པ་ཙམ་གྱིས་འདོད་ཆགས་དང་བྲལ་བ་འཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་འགྲོ་བ་ཐམས་ཅད་ཡོངས་སུ་སྡུར་ཅིང་མྱི་གཏོང་བའི་སྙིང་པོ་ཞེས་བྱ་བ་ཡང་རབ་ཏུ་འཐོབ་བོ། །ལ་ལ་ནི་འོ་བྱས་པ་ཙམ་གྱིས་འདོད་
ཆགས་དང་བྲལ་བ་འཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་འགྲོ་བ་ཐམས་ཅད་བསོད་ནམས་ཀྱི་མཛོད་ལ་རེག་པར་བྱེད་པ་ཞེས་བྱ་བ་ཡང་རབ་ཏུ་འཐོབ་བོ། །དེ་ལྟར་ཁོ་མོ་ནི་སེམས་ཅན་གང་ཇི་སྙེད་ཅིག་ཁོ་མོའི་དྲུང་དུ་འོང་བ་དེ་དག་ཐམས་
ཅད་ཀྱང་བྱང་ཆུབ་སེམས་དཔའི་རྣམ་པར་ཐར་པ་འདོད་ཆགས་དང་བྲལ་བའི་མཐར་ཕྱིན་པ་ཐམས་ཅད་མཁྱེན་པའི་ས་ཆགས་པ་མེད་པ་ལ་མངོན་དུ་གྱུར་པ་འདི་ཉིད་ལ་རབ་ཏུ་འགོད་དོ། །སྨྲས་པ། འཕགས་མ་ཁྱོད་དེ་ལྟ་བུའི་ཕུན་སུམ་ཚོགས་པ་དང་ལྡན་པ་དེ་ཁྱོད་
ཀྱིས་དགེ་བའི་རྩ་བ་ནི་གང་དུ་བསྐྱེད། ཕྲིན་ལས་ནི་ཇི་ལྟ་བུ་ཞིག་བསྩགས། སྨྲས་པ། རིགས་ཀྱི་བུ་ཁོ་མོས་དྲན་ན་འདས་པའི་དུས་ཤིག་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ།
བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མིའི་སྟོན་པ་སངས་རྒྱས་བཅོམ་ལྡན་འདས་ཤིན་ཏུ་མཐོ་བར་གཤེགས་པ་ཞེས་བ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་ཤིན་ཏུ་
མཐོ་བར་གཤེགས་པ་དེ་སེམས་ཅན་རྣམས་ལ་ཐུགས་བརྩེ་བའི་སྐུ་དོན་ཏུ་རྒྱལ་པོའི་གནས་སྒོ་བཟང་པོ་ཞེས་བྱ་བར་གཤེགས་ནས་སྒོའི་ཐེམ་པ་ལ་ཞབས་ཀྱིས་གནོན་པའི་ཚེ། གྲོང་ཁྱེར་དེ་ཐམས་ཅད་ཀྱང་། རབ་ཏུ་གཡོས་ནས་ཡངས་ཤིང་རྒྱ་ཆེ་ལ་རིན་
པོ་ཆེ་དུ་མ་ལས་བྱས་པར་ཡོངས་སུ་གྲུབ་པར་གྱུར་ཏེ། སྟེང་གི་བར་སྣང་ཡང་རིན་པོ་ཆེ་མང་པོའི་འོད་ཀྱིས་རྣམ་པར་བརྒྱན་པ་དང་། རིན་པོ་ཆེའི་མེ་ཏོག་སྣ་ཚོགས་ཀྱིས་ཡོངས་སུ་གང་བ་དང་། ལྷ་རྫས་ཀྱི་རོལ་མོ་སྣ་ཚོགས་ཀྱི་སྒྲ་རབ་ཏུ་འབྱུང་བ་དང་། ལྷའི་ལུས་ཀྱི་

སྤྲིན་ཚད་མེད་པ་རྒྱ་ཆེ་བས་ཁེབས་པར་གྱུར་ཏོ། །རིགས་ཀྱི་བུ་ཁོ་མོ་ཡང་དེའི་ཚེ་ཚོང་དཔོན་གྱི་ཆུང་མ་ཞིག་ཏུ་གྱུར་ཏེ། བློ་གྲོས་བཟང་མོ་ཞེས་བྱའོ། །དེ་ནས་ཁོ་མོ་ཆོ་འཕྲུལ་གྱིས་ཡང་དག་པར་བསྐུལ་ནས་ཁྱིམ་ཐབ་དང་ལྷན་ཅིག་ཏུ་དོང་དོང་སྟེ། དེ་བཞིན་
གཤེགས་པ་གྲོང་བར་གྱི་སྲང་དུ་གཤེགས་པ་ལ་དད་པ་རྒྱ་ཆེན་པོ་སྐྱེས་ཏེ། ཁོ་མོས་ནི་རིན་པོ་ཆེའི་དྲིལ་བུ་གཅིག་ཅིག་ཕུལ་ལོ། །དེའི་ཚེ་འཇམ་དཔལ་གཞོན་ནུར་གྱུར་པ་ཡང་བཅོམ་ལྡན་འདས་དེ་བཞིན་གཤེགས་པ་ཤིན་ཏུ་མཐོ་བར་གཤེགས་པའི་ཞམ་འབྲིང་
ན་འདུག་ཏེ། དེས་ཁོ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་འདོད་ཆགས་དང་བྲལ་བའི་མཐར་ཕྱིན་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའི་
ཐབས་དང་ཡེ་ཤེས་མཐའ་ཡས་པ་ལ་གནས་པ། བསོད་ནམས་རྒྱ་ཆེ་ཞིང་ཡངས་པའི་མཛོད་དང་ལྡན་པ། ཡེ་ཤེས་ཀྱི་ཡུལ་ལ་ཐུབ་པ་མེད་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་
འདི་ཉིད་ན་གྲོང་ཁྱེར་དགེ་བའི་ཕ་རོལ་ཏུ་ཕྱིན་པ་ཞེས་བ་བ་ཡོད་དེ། དེ་ན་ཁྱིམ་བདག་ནན་ཁུགས་ཤེས་བྱ་བ་དེ་བཞིན་གཤེགས་པའི་མཆོད་རྟེན་ཙན་དན་གྱི་ཁྲི་འཕང་ཅན་ལ་མཆོད་པ་བྱེད་པ་ཞིག་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་
སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་བཅོམ་པ་མ་ལྷའི་བཤེས་གཉེན་མའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། བཅོམ་པ་མ་ལྷའི་
བཤེས་གཉེན་མ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། བཅོམ་པ་མ་ལྷའི་བཤེས་གཉེན་མའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་གྲོང་ཁྱེར་དགེ་བའི་ཕ་རོལ་ཏུ་ཕྱིན་པར་

ཁྱིམ་བདག་ནན་ཁུགས་ཀྱི་ཁྱིམ་ག་ལ་བ་དེར་ཕྱིན་ནས། ཁྱིམ་བདག་ནན་ཁུགས་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མདུན་དུ་འདུག་ནས་ཐལ་མོ་སྦྱར་ཏེ། འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་
པ་མཛད་དོ། །ཞེས་བདག་གིས་ཐོས་ནས། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་འཕགས་པས་བདག་ལ་བཤད་དུ་གསོལ། དེས་སྨྲས་པ་རིགས་ཀྱི་བུ་ཁོ་བོ་ནི་བྱང་ཆུབ་
སེམས་དཔའི་རྣམ་པར་ཐར་བ་ཡོངས་སུ་མི་ཟད་པ་ཐོབ་པ་སྟེ། རིགས་ཀྱི་བུ་ཁོ་བོའི་སེམས་ཀྱི་རྒྱུད་ལས་ནི། འཇིག་རྟེན་གྱི་ཁམས་ཐམས་ཅད་ནས་ཀྱང་། སེམས་ཅན་འདུལ་བའི་དབང་དུ་མཛད་པ་མ་གཏོགས་པར་འཇིག་རྟེན་གྱི་ཁམས་ཐམས་ཅད་ནས་
ཀྱང་ཤིན་ཏུ་མྱ་ངན་ལས་འདས་པའི་ཚུལ་དུ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་མེད་དོ། །ཡོངས་སུ་མྱ་ངན་ལས་འདའ་བ་མེད་དོ། །ཡོངས་སུ་མྱ་ངན་ལས་འདའ་བར་འགྱུར་བ་མེད་དོ། །རིགས་ཀྱི་བུ་དེ་ལྟར་ཁོ་བོ་ནི་དེ་བཞིན་གཤེགས་པའི་
མཆོད་རྟེན་ཙན་དན་གྱི་ཁྲི་འཕང་གི་སྒོ་འབྱེད་པ་སྟེ། ཁོ་བོ་མཆོད་རྟེན་གྱི་སྒོ་འབྱེད་འབྱེད་པས་བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་རིགས་མི་ཟད་པའི་རྒྱན་ཅེས་བྱ་བ་ཐོབ་བོ། །རིགས་ཀྱི་བུ་ཁོ་བོ་ནི་ཏིང་ངེ་འཛིན་འདི་ཉིད་ལ་སེམས་ཀྱི་སྐད་ཅིག་སྐད་ཅིག་ཏུ་མཉམ་
པར་གཞོག་སྟེ། སེམས་ཀྱི་སྐད་ཅིག་ཐམས་ཅད་ལའང་ཁྱད་པར་གྱི་རྣམ་པ་དུ་མ་རབ་ཏུ་འཐོབ་བོ། །སྨྲས་པ། འཕགས་པ་ཏིང་ངེ་འཛིན་དེའི་ཡུལ་ཇི་ལྟ་བུ་ཞིག་མཆིས། སྨྲས་པ་རིགས་ཀྱི་བུ་ཁོ་བོ་ཏིང་ངེ་འཛིན་འདི་ལ་སྙོམས་པར་ཞུགས་པའི་ཚེ། འཇིག་

རྟེན་གྱི་ཁམས་ཀྱི་རྒྱུད་འདི་སངས་རྒྱས་གཅིག་ནས་གཅིག་ཏུ་བརྒྱུད་པོ་བསོད་སྐྱབས་ལ་སྩོགས་པ་དེ་བཞིན་གཤེགས་པ་ཐམས་ཅད་དང་། གསེར་ཐུབ་དང་། ལོག་པར་དད་སེལ་དང་། ཐམས་ཅད་མངའ་བ་དང་། གཙུག་ཏོར་ཅན་དང་། རྣམ་པར་གཟིགས་དང་། རྒྱལ་དང་།
རྫོགས་མཛད་དང་། གྲགས་མཆོག་དང་། པད་མོའི་བླ་ལ་སྩོགས་པ་དེ་བཞིན་གཤེགས་པ་ཐམས་ཅད་ཀྱང་སངས་རྒྱས་མཐོང་བའི་མཚམས་འབྲེལ་པས། སངས་རྒྱས་གཅིག་ནས་གཅིག་ཏུ་བརྒྱུད་པ་རྒྱུན་མི་འཆད་པའི་ཚུལ་གྱིས་མངོན་སུམ་དུ་མཐོང་སྟེ།
སེམས་ཀྱི་སྐད་ཅིག་གཅིག་ལ་སངས་རྒྱས་བརྒྱ་ཡང་མཐོང་ངོ་། །དེའི་འོག་མའི་སེམས་ཀྱིས་སངས་རྒྱས་སྟོང་ཡང་མཐོང་ངོ་། །དེའི་འོག་མའི་སེམས་ཀྱིས་སངས་རྒྱས་བརྒྱ་ཕྲག་སྟོང་ཡང་མཐོང་ངོ་། །དེ་བཞིན་དུ་སངས་རྒྱས་བྱེ་བ་དང་། སངས་རྒྱས་བྱེ་བ་
ཕྲག་བརྒྱ་དང་། སངས་རྒྱས་བྱེ་བ་ཕྲག་སྟོང་དང་། སངས་རྒྱས་བྱེ་བ་བརྒྱ་ཕྲག་སྟོང་དང་། སངས་རྒྱས་བྱེ་བ་ཁྲག་ཁྲིག་དང་། སངས་རྒྱས་བྱེ་བ་དུང་ཕྱུར་དང་། སངས་རྒྱས་བྱེ་བ་ཐམས་ཅད་དང་། སངས་རྒྱས་བྱེ་བ་ཁྲག་ཁྲིག་དང་། དེའི་