Kinh tạng Tây Tạng (Kangyur Đại Học) — 028_ཉི་ཁྲི།_ག

མྱ་ངན་ལས་
འདས་པ་ཡོངས་སུ་མ་བཏང་བའི་ཕྱིར་མྱ་ངན་ལས་འདས་པའོ། །དེ་སྐད་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་སྟེ་བྱང་ཆུབ་སེམས་དཔའ་གཞན་གྱི་དོན་ལས་བརྩམས་
ཏེ། འཁོར་བ་ཡོངས་སུ་མི་གཏོང་ན། འཁོར་བ་ཡོངས་སུ་མ་བཏང་བས་དེས་ཇི་ལྟར་མྱ་ངན་ལས་འདས་པ་བཏང་བར་མི་འགྱུར་རོ། །བཅོམ་ལྡན་འདས་དེ་སྟེ་བྱང་ཆུབ་སེམས་དཔའ་བདག་གི་དོན་ལས་བརྩམས་ཏེ། མྱ་ངན་ལས་འདས་པ་ཡོངས་སུ་མི་
གཏོང་ན། དེས་ཇི་ལྟར་འཁོར་བ་ཡོངས་སུ་བཏང་བར་མི་འགྱུར། བཅོམ་ལྡན་འདས་ཀྱིས་བཀའ་སྩལ་པ། བྱམས་པ་འདི་ལ་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན། འཁོར་བ་ལ་འཁོར་བར་རྣམ་པར་མི་རྟོག །མྱ་ངན་ལས་འདས་

པ་ལ་ཡང་མྱ་ངན་ལས་འདས་པར་རྣམ་པར་མི་རྟོག་སྟེ། དེ་དེ་ལྟར་རྣམ་པར་མི་རྟོག་ན་འདི་ལྟར་འཁོར་བ་དང་མྱ་ངན་ལས་འདས་པ་གཉིས་མཚུངས་མཉམ་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་འཁོར་བ་ལ་འཁོར་བར་རྣམ་པར་མི་རྟོག་ན་
མྱ་ངན་ལས་འདས་པ་བཞིན་དུ་འཁོར་བར་མི་སྐྱོའོ། །མྱ་ངན་ལས་འདས་པ་ལ་མྱ་ངན་ལས་འདས་པར་རྣམ་པར་མི་རྟོག་ན། འཁོར་བ་བཞིན་དུ་མྱ་ངན་ལས་འདས་པ་ལ་ཞེན་པར་མི་འགྱུར་རོ། །དེ་ལྟར་རྣམ་པར་མི་རྟོག་པའི་དབྱིངས་ལ་གནས་པ་དེ་རིགས་པ་འདིས་འཁོར་བ་
ཡོངས་སུ་མི་གཏོང་བ་དང་། མྱ་ངན་ལས་འདས་པ་ཡོངས་སུ་མི་གཏོང་བར་རིག་པར་བྱའོ། །དེ་སྐད་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པས་འདི་སྐད་གསོལ་ཏོ། །བཅོམ་ལྡན་འདས་འོ་ན་བྱང་ཆུབ་སེམས་དཔའ་ཤེས་རབ་ཀྱི་ཕ་
རོལ་དུ་ཕྱིན་པ་ལ་སྤྱོད་པ། རྣམ་པར་མི་རྟོག་པའི་དབྱིངས་ལ་རབ་ཏུ་གནས་པས་ཇི་ལྟར་འཁོར་བ་མ་བཏང་བ་དེ་ལྟར་བླངས་པ་ཡང་མ་ལགས་སོ། །མྱ་ངན་ལས་འདས་པ་ཇི་ལྟར་མ་བཏང་བ་དེ་ལྟར་བླངས་པ་ཡང་མ་ལགས་སོ། །བཅོམ་ལྡན་འདས་དེ་སྟེ་མ་བླངས་ན་ཇི་ལྟར་
བཏང་བ་མ་ལགས། བཅོམ་ལྡན་འདས་ཀྱིས་བཀའ་སྩལ་པ། བྱམས་པ་ང་ནི་དེ་ལྟར་འཁོར་བ་བླང་བ་འམ། མི་བླང་བར་མི་སྨྲའི། བྱམས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་རྣམ་པར་མི་རྟོག་པའི་དབྱིངས་ལ་དམྱིགས་པའི་ཡེ་ཤེས་
ཀྱིས་སེམས་དབང་དུ་གྱུར་པ། ཕྱོགས་བཅུའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དུ་ཐབས་མཁས་པས་འཁོར་བ་བསྟན་པའི་ཕྱིར་བྱང་ཆུབ་སེམས་དཔའ་ཡོངས་སུ་མྱ་ངན་ལས་འདས་པ་རྣམས་འཁོར་བ་ཡོངས་སུ་མི་གཏོང་བར་ང་སྨྲའོ། །སྟོང་པ་ཉིད་
དམིགས་སུ་མེད་པ་ལ་གནས་པའི་ཕྱིར་མྱ་ངན་ལས་འདས་པ་ཡོངས་སུ་མི་གཏོང་བར་ང་སྨྲའོ། །དེ་སྐད་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པར་མི་རྟོག་པ་ལ་མཚན་ཉིད་

ཐམས་ཅད་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། བྱམས་པ་གཟུགས་གང་ཡིན་པ་དང་། ཚོར་བ་གང་ཡིན་པ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ནས། སངས་རྒྱས་ཀྱི་ཆོས་གང་ཡིན་པའི་བར་དང་། གཟུགས་
ཀྱི་སྟོང་པ་ཉིད་གང་ཡིན་པ་ནས་སངས་རྒྱས་ཀྱི་ཆོས་རྣམས་ཀྱི་སྟོང་པ་ཉིད་གང་ཡིན་པའི་བར་དུ་ཆོས་དེ་དག་དང་སྟོང་པ་ཉིད་དེ་དག་སྒོམ་པ་དང་། དངོས་པོ་གཉིས་སུ་མེད་པ་དང་། རབ་ཏུ་སྤྲོས་པ་མེད་པ་འདི་ནི་བྱམས་པ་ཐམས་ཅད་ཀྱི་མཚན་ཉིད་ཐམས་ཅད་དུ་བལྟའོ། །
དེ་སྐད་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པས་འདི་སྐད་གསོལ་ཏོ། །བཅོམ་ལྡན་འདས་ཅི་ལགས། ཉན་ཐོས་ཐམས་ཅད་ཕྱོགས་གཅིག་པ་འམ། ཤིན་ཏུ་མྱ་ངན་ལས་འདས་པ་ལ་གནས་པ་ལགས། བཅོམ་
ལྡན་འདས་ཀྱིས་བཀའ་སྩལ་པ། བྱམས་པ་དེ་ནི་མ་ཡིན་ནོ། །དེ་ཅིའི་ཕྱིར་ཞེ་ན། བྱམས་པ་འཇིག་རྟེན་པ་འདི་དག་ནི་ཁམས་སྣ་ཚོགས་པ་ཁམས་དུ་མ་པ་སྟེ། ཁམས་སྣ་ཚོགས་ཁམས་དུ་མ་པའི་འཇིག་རྟེན་པ་དེ་དག་ལ་སེམས་ཅན་གྱི་རིགས་དང་། རང་
བཞིན་རབ་ཏུ་མང་པོ་ཡོད་དེ། བྱམས་པ་སེམས་ཅན་གྱི་རུས་དང་། རིགས་དང་པོ་ནས་བཟང་པོའི་ཁྱད་པར་འདོད་ཅིང་བཟང་པོའི་ཁྱད་པར་ཉིད་ཐོབ་པ་དེ་ལྟ་བུ་ཡང་ཡོད་དོ། །སེམས་ཅན་གྱི་རུས་དང་རིགས་གང་དང་པོ་ནས་ཁྱད་པར་ངན་པ་འདོད་ཅིང་ངན་པ་ཉིད་འཐོབ་སྟེ།
དེ་ཉིད་ཀྱིས་མགུ་བར་འགྱུར་བ་དེ་ལྟ་བུ་ཡང་ཡོད་དོ། །རུས་དང་རིགས་གང་ཐོག་མ་ནས་ངན་པའི་བྱེ་བྲག་འདོད་ཅིང་ངན་པ་ཉིད་འཐོབ་སྟེ། ངན་པ་ཐོབ་ནས་དེ་ཙམ་གྱིས་མགུ་བར་མི་འགྱུར་ཞིང་། དེ་ནས་ཕྱིས་གོང་དུ་བཟང་པོའི་ཁྱད་པར་འདོད་ཅིང་བཟང་པོ་འཐོབ་པར་འགྱུར་
བ་དེ་ལྟ་བུ་དག་ཀྱང་ཡོད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་སེམས་ཅན་གྱི་རུས་དང་རིགས་གསུམ་པོ་དེ་དགྲ་བཅོམ་པ་ཐོབ་ནས། བླ་ན་མ་མཆིས་པ་

ཡང་དག་པར་རྫོགས་པའི་བྱང་ཆུབ་འཐོབ་པར་འཚལ་ན། བཅོམ་ལྡན་འདས་ཀྱིས་དེའི་སྐྱེ་བ་ཡང་མ་མཆིས་པར་ལུང་བསྟན་ཏེ། སྐྱེ་བ་མ་མཆིས་ན་ཇི་ལྟར་འཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། བྱམས་པ་དེའི་སྐྱེ་བ་ལས་
དང་ཉོན་མོངས་པའི་དབང་དུ་གྱུར་པ་ཡིན་པར་ནི་ང་མི་འདོགས་ཀྱི། དེའི་སྐྱེ་བ་ནི་བསམ་གྱིས་མི་ཁྱབ་པ་མྱ་ངན་ལས་འདས་པར་འགྱུར་བར་གདགས་སོ། །དེ་སྐད་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པས་འདི་སྐད་གསོལ་ཏོ། །བཅོམ་
ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་པ་རྒྱ་ཆེ་བ་དང་། ལྷག་པའི་བསམ་པ་མཐུ་ཆེ་བ་གང་ལ་དང་པོ་ཉིད་དུ་བཟང་པོའི་ཁྱད་པར་འཚལ་ཞིང་བཟང་པོའི་ཁྱད་པར་ཉིད་འཐོབ་པར་འགྱུར་བ་དེ་ངོ་མཚར་ཆེའོ། །བཅོམ་ལྡན་འདས་བྱང་ཆུབ་སེམས་དཔའ་
རྣམས་ཀྱི་བསམ་པ་རྒྱ་ཆེ་བ་དེ་དག་གང་ལགས། འདི་ལྟར་བྱང་ཆུབ་སེམས་དཔའ་རྣམས་དེ་ལ་མ་ཆགས་པའི་བདེ་བ་དང་། མི་འཛིན་པའི་བདེ་བ་དང་། མྱ་ངན་ལས་འདས་པའི་བདེ་བ་སེམས་ཅན་ཐམས་ཅད་དང་ཐུན་མོང་བར་འདོད་ཅིང་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་ཡོངས་སུ་བསྔོ་བ་འདི་ལྟར་འཁོར་བ་ཡོངས་སུ་མི་གཏོང་བའི་ཕྱིར་ཏེ། འདི་ནི་དེ་དག་གི་ལྷག་པའི་བསམ་པ་མཐུ་ཆེན་པོ་ཡིན་པར་བལྟའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པས་འདི་སྐད་ཅེས་
གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཆོས་ནི་ངོ་མཚར་རྨད་དུ་བྱུང་བའོ། །བྱང་ཆུབ་སེམས་དཔའ་རྣམས་ཀྱི་བསླབ་པ་ནི་ངོ་མཚར་རྨད་དུ་བྱུང་བ་སྟེ། རིགས་ཀྱི་བུ་འམ་རིགས་ཀྱི་བུ་མོ་ངོ་མཚར་རྨད་དུ་བྱུང་བའི་བྱང་ཆུབ་སེམས་དཔའི་ཆོས་
ཐོབ་པར་འཚལ་བས། བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །བྱང་ཆུབ་སེམས་དཔའི་བསླབ་པ་ལ་རབ་ཏུ་ཕྱེ་བའི་ལེའུ་སྟེ། བདུན་ཅུ་གཉིས་པའོ།། །།ཤེས་རབ་ཀྱི་ཕ་རོལ་ཏུ་ཕྱིན་པ་

སྟོང་ཕྲག་ཉི་ཤུ་ལྔ་པ། བམ་པོ་བདུན་ཅུ་བདུན་པ། དེ་ནས་བཅོམ་ལྡན་འདས་ཀྱིས། ཚེ་དང་ལྡན་པ་རབ་འབྱོར་ལ་བཀའ་སྩལ་པ། རབ་འབྱོར་རིགས་ཀྱི་བུ་ཕོའམ། རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཚོལ་འདོད་པའི་རིགས་ཀྱི་བུ་ཕོ་འམ།
རིགས་ཀྱི་བུ་མོ་དེས་རྟག་པར་རབ་ཏུ་ངུའི་བྱང་ཆུབ་སེམས་དཔའ་སེམས་དཔའ་ཆེན་པོས། ཇི་ལྟར་བཙལ་ཞིང་དེ་ལྟར་སྒྲ་དབྱངས་མི་ཟད་པར་སྒྲོགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་དྲུང་ན། ཚངས་པར་སྤྱོད་པ་དེ་ལྟར་བཙལ་བར་
བྱའོ། །དེ་སྐད་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་གསོལ་ཏོ། །བཅོམ་ལྡན་འདས་རྟག་པར་རབ་ཏུ་ངུ་བའི་བྱང་ཆུབ་སེམས་དཔའ་སེམས་དཔའ་ཆེན་པོས། ཤེས་རབ་ཀྱི་ཕ་རོལ་དུ་ཕྱིན་པ་འདི་ཇི་ལྟར་བཙལ། དེ་སྐད་
གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་བཀའ་སྩལ་ཏོ། རབ་འབྱོར་རྟག་པར་རབ་ཏུ་ངུ་བའི་བྱང་ཆུབ་སེམས་དཔའ་སེམས་དཔའ་ཆེན་པོས་སྔོན་ཤེས་རབ་ཀྱི་ཕ་རོལ་དུ་ཕྱིན་པ་ཚོལ་བ་ན། ལུས་མི་འཕངས་པ་དང་། སྲོག་ལ་མི་ལྟ་
བ་དང་། རྙེད་པ་དང་བཀུར་བསྟི་དང་། གྲགས་པ་ལ་མི་གནས་པས་བཙལ་ཏོ། །དེ་ཤེས་རབ་ཀྱི་ཕ་རོལ་དུ་ཕྱིན་པ་ཚོལ་བ་ན། དགོན་པ་ན་འདུག་པའི་ཚེ་བར་སྣང་ལས་འདི་སྐད་དུ་རིགས་ཀྱི་བུ་ཤར་ཕྱོགས་སུ་སོང་ཤིག་དང་། དེ་ནས་ཤེས་རབ་ཀྱི་ཕ་རོལ་དུ་ཕྱིན་པ་ཐོས་
པར་འགྱུར་རོ། །ཅི་ནས་ཀྱང་ལུས་ངལ་བའི་ཡིད་ལ་བྱེད་པ་མི་སྐྱེ་བ་དང་། རྨུགས་པ་དང་གཉིད་ཀྱི་ཡིད་ལ་བྱེད་པ་མི་སྐྱེ་བ་དང་། ཟས་ཀྱི་ཡིད་ལ་བྱེད་པ་མི་སྐྱེ་བ་དང་། སྐོམ་གྱི་ཡིད་ལ་བྱེད་པ་མི་སྐྱེ་བ་དང་། མཚན་མོའི་ཡིད་ལ་བྱེད་པ་མི་སྐྱེ་བ་དང་། ཉིན་པར་གྱི་
ཡིད་ལ་བྱེད་པ་མི་སྐྱེ་བ་དང་། གྲང་བའི་ཡིད་ལ་བྱེད་པ་མི་སྐྱེ་བ་དང་། ཚ་བ་ཡིད་ལ་བྱེད་པ་མི་སྐྱེ་བ་དེ་ལྟར་སོང་ཤིག། ཕྱི་རོལ་དང་ནང་གང་ལའང་སེམས་མ་འཇོག་ཤིག །རིགས་ཀྱི་བུ་གཡོན་དུ་ལྟ་ཞིང་མ་འགྲོ་ཤིག། གཡས་སུ་མ་ལྟ་ཞིག། ནུབ་ཕྱོགས་དང་

བྱང་ཕྱོགས་དང་། བླ་དང་འོག་དང་མཚམས་རྣམས་སུ་ལྟ་ཞིང་མ་འགྲོ་ཤིག །རིགས་ཀྱི་བུ་ཅི་ནས་ཀྱང་འཇིག་ཚོགས་ལ་མི་གཡོ་བ་དང་། གཟུགས་ལ་མི་གཡོ་བ་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་
ཤེས་པ་ལ་མི་གཡོ་བ་དེ་ལྟར་སོང་ཤིག། གང་དེས་གཡོས་པ་དེ་ནི་འགལ་བར་གནས་སོ། །གང་ལས་འགལ་བར་གནས་ཤེ་ན། སངས་རྒྱས་ཀྱི་ཆོས་ལས་འགལ་བར་གནས་སོ། །གང་སངས་རྒྱས་ཀྱི་ཆོས་རྣམས་ལས་འགལ་བར་གནས་པ་དེ་འཁོར་བ་ན་སྤྱོད་
དོ། །གང་འཁོར་བ་ན་སྤྱོད་པ་དེས་ཤེས་རབ་ཀྱི་ཕ་རོལ་དུ་ཕྱིན་པ་མི་རྙེད་དོ་ཞེས་ཟེར་བའི་སྒྲ་ཐོས་པར་གྱུར་ཏོ། །སྒྲ་དེས་དེ་སྐད་སྨྲས་པ་དང་། རྟག་པར་རབ་ཏུ་ངུ་བའི་བྱང་ཆུབ་སེམས་དཔའ་སེམས་དཔའ་ཆེན་པོས་སྒྲ་དེའི་ལན་འདི་སྐད་སྨྲས་སོ། །དེ་ལྟར་བྱའོ། །
དེ་ཅིའི་ཕྱིར་ཞེ་ན། བདག་ནི་སེམས་ཅན་ཐམས་ཅད་ཀྱི་སྣང་བ་བྱེད་པར་འདོད་ཅིང་། སངས་རྒྱས་ཀྱི་ཆོས་བསྒྲུབ་པར་འདོད་པའི་ཕྱིར་རོ། །དེ་སྐད་སྨྲས་པ་དང་། སྒྲ་དེས་རྟག་པར་རབ་ཏུ་ངུ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་འདི་སྐད་སྨྲས་སོ། །
རྟག་པར་རབ་ཏུ་ངུ་བའི་རིགས་ཀྱི་བུ་ལེགས་སོ། །ལེགས་སོ། །དེ་ནས་ཡང་རྟག་པར་རབ་ཏུ་ངུ་བའི་བྱང་ཆུབ་སེམས་དཔའ་སེམས་དཔའ་ཆེན་པོས་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་སངས་རྒྱས་ཀྱི་ཆོས་ལ་ཁྱོད་ཀྱིས་མོས་པ་བསྐྱེད་དེ།
ཤེས་རབ་ཀྱི་ཕ་རོལ་ཏུ་ཕྱིན་པ་བཙལ་བར་བྱའོ། །མཚན་མ་སྤངས་པ་དང་། དངོས་པོ་སྤངས་པ་དང་། སེམས་ཅན་དུ་ལྟ་བ་ཁྱོད་ཀྱིས་སྤང་བར་བྱའོ། །རིགས་ཀྱི་བུ་ཁྱོད་ཀྱིས་སྡིག་པའི་གྲོགས་པོ་རྣམས་སྤང་བར་བྱའོ། །གང་སྟོང་པ་ཉིད་དང་། མཚན་མ་
མེད་པ་དང་སྨོན་པ་མེད་པ་དང་། མངོན་པར་འདུ་མི་བྱེད་པ་དང་། མ་བྱུང་བ་དང་། མ་སྐྱེས་པ་དང་། དངོས་པོ་མེད་པ་དང་། མ་འགགས་པའི་ཆོས་འཆད་པའི་དགེ་བའི་བཤེས་གཉེན་དག་བསྙེན་པར་བྱ། བསྟེན་པར་བྱ། བསྙེན་བཀུར་བྱའོ། །རིགས་ཀྱི་

བུ་ཁྱོད་ཀྱིས་དེ་ལྟར་བྱས་ན་ཤེས་རབ་ཀྱི་ཕ་རོལ་དུ་ཕྱིན་པ་གླེགས་བམ་དུ་གྱུར་པ་འམ། ཆོས་སྨྲ་བའི་དགེ་སློང་ལས་རིང་པོ་མི་ཐོགས་པར་ཐོས་པར་འགྱུར་རོ། །རིགས་ཀྱི་བུ་ཁྱོད་ཀྱིས་གང་ལས་ཤེས་རབ་ཀྱི་ཕ་རོལ་དུ་ཕྱིན་པ་མཉན་པ་དེ་ལ་སྟོན་པའི་འདུ་ཤེས་བསྐྱེད་
པར་བྱའོ། །ཁྱོད་ཀྱིས་དྲིན་དུ་གཟོ་བ་དང་། བྱས་པ་དྲན་པར་བྱའོ། །འདི་ནི་བདག་གི་དགེ་བའི་བཤེས་གཉེན་ཏེ། འདི་ལས་བདག་གིས་ཤེས་རབ་ཀྱི་ཕ་རོལ་དུ་ཕྱིན་པ་ཐོས་སོ། །གང་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་མྱུར་དུ་སླར་མི་
ལྡོག་པར་འགྱུར་བ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་ཉེ་བར་འགྱུར་བ་དང་། དེ་བཞིན་གཤེགས་པ་དང་མི་འབྲལ་བའི་སངས་རྒྱས་ཀྱི་ཞིང་དུ་སྐྱེ་བར་འགྱུར་བ་དང་། མི་ཁོམ་པ་རྣམས་སྤངས་པར་འགྱུར་བ་དང་།
དལ་འབྱོར་དང་ལྡན་པར་འགྱུར་རོ། །ཞེས་རིགས་ཀྱི་བུ་ཁྱོད་ཀྱིས་ཕན་ཡོན་འདི་དག་ཡོངས་སུ་བརྟག་ཅིང་ཆོས་སྨྲ་བའི་དགེ་སློང་ལ་སྟོན་པའི་འདུ་ཤེས་བསྐྱེད་པར་བྱའི། རིགས་ཀྱི་བུ་ཁྱོད་ཀྱིས་འཇིག་རྟེན་གྱི་ཟང་ཟིང་དང་ལྡན་པའི་སེམས་ཀྱིས་ཆོས་སྨྲ་བའི་དགེ་སློང་ལ་བསྙེན་
པར་མི་བྱའོ། །ཁྱོད་ཀྱིས་ཆོས་དོན་དུ་གཉེར་བ་དང་། ཆོས་ལ་གུས་པས་ཆོས་སྨྲ་བའི་དགེ་སློང་གི་རྗེས་སུ་འབྲང་བར་བྱའོ། །ཁྱོད་ཀྱིས་བདུད་ཀྱི་ལས་རྣམས་ཀྱང་ཤེས་པར་བྱ་སྟེ། རིགས་ཀྱི་བུ་བདུད་སྡིག་ཏོ་ཅན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ལ་གཟུགས་དང་། སྒྲ་དང་དྲི་དང་རོ་དང་རེག་པ་དག་བསྙེན་པ་དང་། བསྟེན་པ་དང་། སྤྱད་པའི་ཕྱིར་ཁྱེར་ཏེ་འོང་བ་དག་ཀྱང་ཡོད་དོ། །དེ་དག་ཀྱང་ཟིལ་གྱིས་མནན་ནས། ཐབས་མཁས་པས་སོར་བསྙེན་བསྟེན་ཡོངས་སུ་སྤྱོད་དོ། །དེ་ལ་ཡང་རིགས་ཀྱི་བུ་ཁྱོད་
ཀྱིས་ཆོས་སྨྲ་བ་ལ་སེམས་མ་དད་པ་མི་བསྐྱེད་པ་འདི་ལྟར་སེམས་བསྐྱེད་དོ། །བདག་ནི་ཐབས་མཁས་པ་དེ་རབ་ཏུ་མི་ཤེས་ཀྱི། འདི་ནི་ཐབས་མཁས་པས་རབ་ཏུ་ཤེས་སོ། །འདི་ནི་སེམས་ཅན་གྱི་ཚུལ་གྱིས་སེམས་ཅན་རྣམས་ཀྱི་དགེ་བའི་རྩ་བ་ཡོངས་སུ་གཟུང་བའི་

ཕྱིར་ཆོས་འདི་རྣམས་སོ་སོར་བསྙེན་བསྟེན་སྤྱོད་པར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གང་ལ་ཡང་ཆགས་པ་འམ་སྒྲིབ་པ་མེད་དོ། །དེའི་ཚེ་ཡང་རིགས་ཀྱི་བུ་ཁྱོད་ཀྱིས་ཆོས་རྣམས་ཀྱི་ཡང་དག་པའི་ཚུལ་སོ་སོར་
བརྟག་པར་བྱའོ། །རིགས་ཀྱི་བུ་ཆོས་རྣམས་ཀྱི་ཡང་དག་པའི་ཚུལ་ཡང་གང་ཞེ་ན། འདི་ལྟར་ཆོས་ཐམས་ཅད་ཀུན་ནས་ཉོན་མོངས་པ་མེད་པ་དང་། རྣམ་པར་བྱང་བ་མེད་པའོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་ངོ་བོ་ཉིད་ཀྱིས་སྟོང་ངོ་། །ཆོས་ཐམས་ཅད་ནི་
སེམས་ཅན་མེད་པ། སྲོག་མེད་པ། གང་ཟག་མེད་པ་སྟེ། སྒྱུ་མ་ལྟ་བུ་རྨི་ལམ་ལྟ་བུ་བྲག་ཆ་ལྟ་བུ་གཟུགས་བརྙན་ལྟ་བུའོ། །རིགས་ཀྱི་བུ་ཁྱོད་དེ་ལྟར་ཆོས་རྣམས་ཀྱི་ཡང་དག་པའི་ཚུལ་སོ་སོར་རྟོག་ཅིང་ཆོས་སྨྲ་བའི་རྗེས་སུ་འབྲང་ན། རིང་པོ་མི་ཐོགས་པར་ཤེས་རབ་ཀྱི་
ཕ་རོལ་དུ་ཕྱིན་པ་ལས་འབྱུང་བར་འགྱུར་རོ། །རིགས་ཀྱི་བུ་ཁྱོད་ཀྱིས་བདུད་ཀྱི་ལས་གཞན་དག་ཀྱང་ཤེས་པར་བྱ་བ་ནི་རིགས་ཀྱི་བུ་གལ་ཏེ་ཆོས་སྨྲ་བ་ཤེས་རབ་ཀྱི་ཕ་རོལ་དུ་ཕྱིན་པ་འདོད་པའི་རིགས་ཀྱི་བུ་ལ་གཤེ་ཞིང་མི་ལྟ་ན། དེ་ལ་ཡང་རིགས་ཀྱི་བུ་ཁྱོད་ཀྱིས་སླར་ཀྱལ་
བར་མི་བྱའི། གཞན་དུ་ན་ཆོས་དོན་དུ་གཉེར་བ་དང་། ཆོས་ལ་གུས་པ་དང་། སེམས་མི་སྐྱོ་བས་ཆོས་སྨྲ་བའི་དགེ་སློང་གི་རྗེས་སུ་འབྲང་བར་བྱའོ། །དེ་ནས་རྟག་པར་རབ་ཏུ་ངུ་བའི་བྱང་ཆུབ་སེམས་དཔའ་སེམས་དཔའ་ཆེན་པོས་སྒྲ་དེ་ལས་གདམས་པ་འདི་ལྟ་བུ་ཐོས་ནས།
ཤར་ཕྱོགས་ཀྱི་ཕྱོགས་ག་ལ་བ་དེར་སོང་ངོ་། །སོང་ནས་རིང་པོ་མ་ལོན་པར་ཡང་དེ་ལ་འདི་སྙམ་དུ་གྱུར་ཏོ། །བདག་གིས་སྒྲ་དེ་ལས་བདག་ཇི་སྲིད་དུ་འགྲོ་དགོས་ཤེས་མ་དྲིས་སོ་སྙམ་ནས། དེ་ས་ཕྱོགས་དེ་ཉིད་དུ་འདུག་སྟེ། ངུ་ཞིང་འབོད་པ་དང་། མྱ་ངན་བྱེད་སྨྲེ་
སྔགས་འདོན་ཅིང་འདི་སྙམ་དུ་སེམས་སོ། །ས་ཕྱོགས་འདི་ཉིད་དུ་ཉིན་ཞག་གཅིག་གམ་གཉིས་སམ། གསུམ་མམ་བཞི་འམ་ལྔ་འམ་དྲུག་གམ་ཉིན་ཞག་བདུན་འདས་པར་བྱས་ཏེ། ཤེས་རབ་ཀྱི་ཕ་རོལ་དུ་ཕྱིན་པ་མ་ཐོས་ཀྱི་བར་དུ་ལུས་ངལ་བའི་ཡིད་ལ་བྱེད་པ་མི་སྐྱེད།

རྨུགས་པ་དང་གཉིད་ཀྱི་ཡིད་ལ་བྱེད་པ་མི་སྐྱེད། བཟའ་བའི་ཡིད་ལ་བྱེད་པ་མི་སྐྱེད། བཏུང་བའི་ཡིད་ལ་བྱེད་པ་མི་སྐྱེད། མཚན་མོ་ཡིད་ལ་བྱེད་པ་མི་སྐྱེད། ཉིན་པར་གྱི་ཡིད་ལ་བྱེད་པ་མི་སྐྱེད། གྲང་བའི་ཡིད་ལ་བྱེད་པ་མི་སྐྱེད་དོ་སྙམ་དུ་སེམས་སོ། །
རབ་འབྱོར་འདི་ལྟ་སྟེ་དཔེར་ན་མི་ཞིག་བུ་གཅིག་པ་ཞིག་དུས་ལས་འདས་ཏེ་སྡུག་བསྔལ་དང་། ཡིད་མི་བདེ་བ་ཆེན་པོ་དང་ལྡན་པར་གྱུར་ཏེ། དེ་བུའི་མྱ་ངན་གྱིས་བུའི་མྱ་ངན་ལས་གཞན་པའི་ཡིད་ལ་བྱེད་པ་མི་འབྱུང་བ་དེ་བཞིན་དུ་རབ་འབྱོར་རྟག་པར་རབ་ཏུ་ངུ་བའི་བྱང་ཆུབ་སེམས་
དཔའ་སེམས་དཔའ་ཆེན་པོ་ཡང་དེའི་ཚེ། ནམ་ཞིག་བདག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ཐོས་པར་འགྱུར་སྙམ་པ་ལས་གཞན་པའི་ཡིད་ལ་བྱེད་པ་མི་འབྱུང་ངོ་། །རབ་འབྱོར་དེ་ནས་རྟག་པར་རབ་ཏུ་ངུ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཕོངས་ཤིང་
འདུག་པའི་མདུན་དུ། དེ་བཞིན་གཤེགས་པའི་སྐུ་བྱུང་ནས། རིགས་ཀྱི་བུ་ཁྱོད་དེ་སྐད་སྨྲ་བ་ལེགས་སོ། །ལེགས་སོ་ཞེས། ལེགས་པ་བྱིན་ཏེ། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་། སྔོན་བྱང་ཆུབ་
སེམས་དཔའི་སྤྱད་པ་སྤྱོད་པ་ན། ཤེས་རབ་ཀྱི་ཕ་རོལ་དུ་ཕྱིན་པ་ཇི་ལྟར་ད་ལྟར་ཁྱེད་ཚོལ་བ་དེ་བཞིན་དུ་བཙལ་ཏོ། །དེ་བས་ན་རིགས་ཀྱི་བུ་ཁྱོད་ཀྱིས་བརྩོན་འགྲུས་དེ་ཉིད་དང་། སྤྲོ་བ་དེ་ཉིད་དང་། དོན་དུ་གཉེར་བ་དེ་ཉིད་དང་། མོས་པ་དེ་ཉིད་ཀྱིས་རྒྱུན་ཆགས་པར་ཤར་ཕྱོགས་སུ་
སོང་ཤིག་དང་། འདི་ནས་དཔག་ཚད་ལྔ་བརྒྱ་ན། སྤོས་ཅན་ཞེས་བྱ་བའི་གྲོང་ཁྱེར་ཞིག་ཡོད་དེ་རིན་པོ་ཆེ་སྣ་བདུན་ལས་བྱས་པ། ར་བ་བདུན་རིམ་གྱིས་བསྐོར་བ། འོབས་བདུན་རིམ་གྱིས་བསྐོར་བ། ཤིང་ཏ་ལའི་ཕྲེང་བ་བདུན་གྱིས་བསྐོར་བ། ཆུར་དཔག་ཚད་བཅུ་
གཉིས། ཞེང་དུ་དཔག་ཚད་བཅུ་གཉིས། འབྱོར་ཅིང་དར་བ། བདེ་ཞིང་སྐྱིད་པ། ཉམས་དགའ་བ། མི་མང་པོས་གང་བ། སྲང་གི་ཚོང་ཁང་རི་མོ་ལ་བྲིས་པ་ལྟ་བུ་མཉམ་པ་ལྔ་བརྒྱ་ཡོད་པ། ཁྱོགས་དང་བཞོན་པ་མི་དོག་པར་འགྲོ་བའི་ཟམ་པ་དང་བཅས་པ།

གྲོང་ཁྱེར་དེའི་ཁོ་ར་ཁོར་ཡུག་གི་རྩིག་པ་ཡང་རིན་པོ་ཆེ་སྣ་བདུན་ལས་བྱས་པ། རིན་པོ་ཆེ་སྣ་བདུན་གྱི་རྩིག་པ་དེ་དག་གི་རིབ་མ་ཡང་འཛམ་བུ་ན་དའི་གསེར་ལས་བྱས་པ། ཚད་དང་ལྡན་ཞིང་འཕང་མཐོ་བ། རིབ་མ་དེ་དག་རེ་རེ་ལས་ཀྱང་རིན་པོ་ཆེ་
སྣ་བདུན་གྱི་ཤིང་། འབྲས་བུ་སྣ་ཚོགས་དང་ལྡན་པ་རྣམས་སྐྱེས་ཏེ། འབྲས་བུ་དེ་དག་ཐམས་ཅད་ལས་ཀྱང་རིན་པོ་ཆེ་ལས་བྱས་པའི་སྲད་བུས་སྦྲེལ་བའི་ཤིང་གཞན་དག་དང་ལྡན་པ་ཤ་སྟག་གོ །གྲོང་ཁྱེར་དེ་ཐམས་ཅད་ཀྱང་གསེར་གྱི་དྲིལ་བུའི་དྲ་བས་གཡོགས་ཏེ།
གསེར་གྱི་དྲིལ་བུའི་དྲ་བ་དེ་དག་རླུང་གིས་བསྐྱོད་པའི་སྒྲ་སྙན་ཅིང་ཡིད་དུ་འོང་བ་ཆགས་པར་འགྱུར་བ་དག་འབྱུང་སྟེ། དཔེར་ན་ཡན་ལག་ལྔ་དང་ལྡན་པའི་རྔ་རོལ་མོ་མཁན་མཁས་པ་རྣམས། ཚོགས་པས་བརྡུངས་པའི་སྒྲ་སྙན་ཅིང་ཡིད་དུ་འོང་ལ། ཆགས་པར་འགྱུར་བའི་
སྒྲ་འབྱུང་བ་དེ་བཞིན་དུ། དྲིལ་བུའི་དྲ་བ་དེ་དག་རླུང་གིས་བསྐྱོད་པའི་སྒྲ་སྙན་ཅིང་ཡིད་དུ་འོང་བ་ཆགས་པར་འགྱུར་བ་འབྱུང་ངོ་། །སེམས་ཅན་དེ་དག་ཀྱང་སྒྲ་དེ་དག་གིས་རྩེ་ཞིང་དགའ་བ་དང་ཡོངས་སུ་སྤྱོད་པར་བྱེད་དོ། །གྲོང་ཁྱེར་སྤོས་ཅན་དེའི་ཁོ་ར་ཁོར་ཡུག་གི་འོབས་
ཀྱང་ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་ཞིང་རྒྱུན་དུ་འབབ་སྟེ། ཧ་ཅང་ཡང་མི་གྲང་ཧ་ཅང་ཡང་མི་དྲོ་བའི་ཆུ་དེ་ལ་རིན་པོ་ཆེ་སྣ་བདུན་ལས་བྱས་པའི་གྲུ། སེམས་ཅན་དེ་དག་གི་སྔོན་གྱི་ལས་ཀྱི་རྣམ་པར་སྨིན་པ་ལས་བྱུང་བ། དེ་དག་ཏུ་སེམས་ཅན་དེ་དག་
ཞུགས་ནས། རྩེ་ཞིང་དགའ་བ་དང་། ཡོངས་སུ་སྤྱོད་པ་བྱེད་དོ། །ཆུ་དེ་དག་ཐམས་ཅད་ཀྱང་ཨུཏྤ་ལ་དང་། པད་མ་དང་ཀུ་མུ་ད་དང་། པུན་དཱ་རི་ཀས་ཁེབས་པ། གཞན་ཡང་མེ་ཏོག་རིགས་ཆེ་ཞིང་བསུང་ཞིམ་པ་དག་གིས་ཡོངས་སུ་ཁེབས་ཏེ། སྟོང་གསུམ་
གྱི་སྟོང་ཆེན་པོའི་འཇིག་རྟེན་གྱི་ཁམས་ན། མེ་ཏོག་གི་རིགས་གང་དང་གང་ཡོད་པ་དེ་དག་ཐམས་ཅད་སྤོས་ཅན་གྱི་གྲོང་ཁྱེར་ན་མེད་པ་གཅིག་ཀྱང་མེད་དོ། །གྲོང་ཁྱེར་དེའི་ཁོ་ར་ཁོར་ཡུག་ན། སྐྱེད་མོས་ཚལ་ལྔ་བརྒྱ་ཡོད་དེ། དེ་དག་ཐམས་ཅད་ཀྱང་རིན་པོ་ཆེ་སྣ་བདུན་

ལས་བྱས་པ། བཟང་ཞིང་བལྟ་ན་སྡུག་པ་ཤ་སྟག་གོ །སྐྱེད་མོས་ཚལ་དེ་རེ་རེ་ན་ཡང་རྒྱང་གྲགས་གཅིག་པའི་མཚོ་ལྔ་བརྒྱ་ཡོད་དེ། མཚོ་དེ་དག་ཐམས་ཅད་ན་ཡང་། རིན་པོ་ཆེ་སྣ་བདུན་གྱི་ཨུཏྤ་ལ་དང་། པད་མ་དང་ཀུ་མུ་ད་དང་། པུན་དཱ་རི་ཀ་མཛེས་ཤིང་བལྟ་ན་
སྡུག་པ་རྣམས་ཀྱིས་ཁེབས་པར་འཁོད་དོ། །ཨུཏྤ་ལ་དང་། པད་མ་དང་། ཀུ་མུ་ད་དང་། པུན་དཱ་རི་ཀ་དེ་དག་ཐམས་ཅད་ཀྱང་ཆུ་ཞེང་ཤིང་རྟའི་འཁོར་ལོ་ཙམ་ཤ་སྟག་སྟེ། མཐིང་ཀ་ལ་ཁ་དོག་མཐིང་ཁར་འདུག་པ། མཐིང་ཁ་འདྲ་ཞིང་མཐིང་ཁར་སྣང་བ།
སེར་པོ་ལ་ཁ་དོག་སེར་པོ། སེར་པོ་འདྲ་ཞིང་སེར་པོར་སྣང་བ། དམར་པོ་ལ་ཁ་དོག་དམར་པོ། དམར་པོ་འདྲ་ཞིང་དམར་པོར་སྣང་བ། དཀར་པོ་ལ་ཁ་དོག་དཀར་པོ། །དཀར་པོ་འདྲ་ཞིང་དཀར་པོར་སྣང་བ་ཤ་སྟག་གོ །མཚོ་དེ་དག་ཐམས་ཅད་ན་བྱ་ངང་མོ་དང་།
ཀ་རན་ད་བ་དང་། ཁྲུང་ཁྲུང་དང་། ས་ར་ས་དང་། ངུར་པའི་སྒྲས་ཁྱབ་པར་སྒྲོགས་སོ། །སྐྱེད་མོས་ཚལ་དེ་དག་ཐམས་ཅད་ཀྱང་བདག་གི་བྱ་བ་མེད་པ། ཡོངས་སུ་གཟུང་བ་མེད་པ། སེམས་ཅན་དེ་དག་ཉིད་ཀྱི་སྔོན་གྱི་ལས་ཀྱི་རྣམ་པར་སྨིན་པ་ལས་བྱུང་བ་སྟེ།
འདི་ལྟར་ཡུན་རིང་པོར་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱད་པ་དང་། ཆོས་ཟབ་མོ་ལ་རབ་ཏུ་མོས་པའི་རྣམ་པར་སྨིན་པ་ལས་བྱུང་བ་ཤ་སྟག་གོ །རིགས་ཀྱི་བུ་སྤོས་ཅན་གྱི་གྲོང་ཁྱེར་གྱི་ལམ་སྲང་གི་མདོའི་དབུས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་
ཀྱིས་འཕགས་པའི་ཁྱིམ་ཁོ་ར་ཁོར་ཡུག་ཏུ་དཔག་ཚད་གཅིག་ཡོད་པ། རིན་པོ་ཆེ་བདུན་ལས་བྱས་པ། རིན་པོ་ཆེ་སྣ་ཚོགས་ཀྱིས་མཛེས་པར་བྱས་པ། བལྟ་ན་སྡུག་པ། ར་བ་བདུན་དང་། ཤིང་ཏ་ལའི་འཕྲེང་བ་བདུན་གྱིས་བསྐོར་བའོ། །ཁྱིམ་དེ་ན་
ཁྱིམ་གྱི་ལོངས་སྤྱོད་དུ་སྐྱེད་མོས་ཚལ་བཞི་ཡོད་དེ། རྟག་པར་རབ་ཏུ་དགའ་བ་ཞེས་བྱ་བའི་སྐྱེད་མོས་ཚལ་དང་། མྱ་ངན་མེད་པ་ཞེས་བྱ་བ་དང་། མྱ་ངན་དང་བྲལ་བ་ཞེས་བྱ་བ་དང་། མེ་ཏོག་མཛེས་པ་ཞེས་བྱ་བའི་སྐྱེད་མོས་ཚལ་ལོ། །སྐྱེད་མོས་ཚལ་དེ་

དག་རེ་རེ་ན་ཡང་མཚེའུ་བརྒྱད་བརྒྱད་ཡོད་དེ། བཟང་མོ་ཞེས་བྱ་བ་དང་། བཟང་མོའི་མཆོག་ཅེས་བྱ་བ་དང་། དགའ་བ་ཞེས་བྱ་བ་དང་། དགའ་བའི་མཆོག་ཅེས་བྱ་བ་དང་། བདེ་བ་ཞེས་བྱ་བ་དང་། བདེ་བ་ཅན་ཞེས་བྱ་བ་དང་། ངེས་
པ་ཞེས་བྱ་བ་དང་། རྣམ་པར་མི་འབབ་པ་ཞེས་བྱ་བ་སྟེ། མཚེའུ་དེ་རྣམས་ཀྱི་ངོས་གཅིག་ནི་གསེར་ལས་བྱས། ངོས་གཉིས་པ་ནི་དངུལ་ལས་བྱས། ངོས་གསུམ་པ་ནི་བཻ་ཌཱུརྱ་ལས་བྱས། ངོས་བཞི་པ་ནི་ཤེལ་ལས་བྱས། ནང་གི་གཞི་ནི་ཀར་ཀེ་ཏ་ན་ལས་བྱས་ཤིང་
གཞི་གསེར་གྱི་བྱེ་མ་བཀྲམ་པའོ། །མཚེའུ་དེ་རེ་རེ་ལ་ཡང་འབབ་སྟེགས་ཁྲི་འཕང་ཅན་བརྒྱད་བརྒྱད་ཡོད་དེ། འབབ་སྟེགས་ཀྱི་ངོས་ཀུན་རིན་པོ་ཆེ་སྣ་ཚོགས་ཀྱིས་རབ་ཏུ་བརྒྱན་ཅིང་། འབབ་སྟེགས་ཀྱི་བར་ཐམས་ཅད་ནས་འཛམ་བུ་ན་དའི་གསེར་གྱི་ཆུ་ཤིང་དག་
སྐྱེས་སོ། །མཚེའུ་དེ་དག་ཐམས་ཅད་ན་མེ་ཏོག་ཨུཏྤ་ལ་དང་། པད་མ་དང་། ཀུ་མུ་ད་དང་། པུན་དཱ་རི་ཀ་སྣ་ཚོགས་ཀྱིས་ཁེབས་ཤིང་། བྱ་ངང་མོ་དང་། ས་ར་ས་དང་། ངུར་པའི་སྒྲ་སྒྲོགས་སོ། །མཚེའུ་དེ་དག་གི་ཁོ་ར་ཁོར་ཡུག་ན་མེ་ཏོག་གི་ཤིང་
རྣམ་པ་སྣ་ཚོགས་སྐྱེའོ། །མེ་ཏོག་གི་ཤིང་དེ་དག་རླུང་གིས་བཏབ་པའི་མེ་ཏོག་རྣམས་ཀྱང་མཚེའུ་ནང་དུ་ལྷགས་སོ། །མཚེའུ་དེ་དག་ཐམས་ཅད་ཀྱི་ཆུ་ཡང་ཙན་དན་གྱི་བསུང་ཅན་ལ་ཁ་དོག་དང་དྲི་དང་། རོ་དང་། རེག་པ་ཕུན་སུམ་ཚོགས་པའོ། །དེ་ན་བྱང་ཆུབ་
སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པའི་རྩེ་བའི་ས་ཡོད་དེ། དེ་འཁོར་དང་བཅས་པ། བུད་མེད་སྟོང་ཕྲག་དྲུག་ཅུ་རྩ་བརྒྱད་དང་ལྷན་ཅིག །འདོད་པའི་ཡོན་ཏན་ལྔ་དང་ལྡན་ཞིང་འབྱོར་པས། དེ་ན་རྩེ་དགའ་ཡོངས་སུ་སྤྱོད་དོ། །གྲོང་
ཁྱེར་དེ་ན་གནས་པའི་སེམས་ཅན་སྐྱེས་པ་འམ། བུད་མེད་གང་ཡིན་པ་དེ་དག་ཀྱང་རྟག་པར་རབ་ཏུ་དགའ་ཞིང་སྐྱེད་མོས་ཚལ་དང་། མཚེའུ་རྣམས་སུ་འདོད་པའི་ཡོན་ཏན་ལྔ་དང་ལྡན་ཞིང་འབྱོར་བས་རྩེ་དགའ་ཡོངས་སུ་སྤྱོད་དོ། །བྱང་ཆུབ་སེམས་དཔའ་

སེམས་དཔའ་ཆེན་པོ་ཆོས་ཀྱིས་འཕགས་པ་དེ་ཡང་། འཁོར་དང་བཅས་པར་ལྷན་ཅིག་རྩེ་ཞིང་དགའ་བ་ཡོངས་སུ་སྤྱད་ནས། དེའི་འོག་ཏུ་དུས་གསུམ་དུ་ཤེས་རབ་ཀྱི་ཕ་རོལ་དུ་ཕྱིན་པ་འཆད་དོ། །གྲོང་ཁྱེར་སྤོས་ཅན་དེ་ན་འཁོད་པའི་སེམས་ཅན་གང་
ཡིན་པ་དེ་དག་ཀྱང་གྲོང་ཁྱེར་གྱི་ལམ་མདོའི་དབུས་སུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པའི་ཆོས་ཀྱི་ཁྲི་འཛུགས་ཏེ། རྐང་པ་གསེར་ལས་བྱས་པ་འམ། དངུལ་ལས་བྱས་པ་འམ། བཻ་ཌཱུརྱ་ལས་བྱས་པ་འམ། ཤེལ་ལས་བྱས་
པའི་སྟེང་། ཤིང་བལ་གྱི་སྟན་ནམ། འགོ་ལི་ཀའི་སྟན་ནམ། ཁོང་ཚང་ཅན་གྱི་སྟན་ནམ། ཀ་ཤི་ཀའི་གོས་བཏིང་བ། འཕང་དུ་རྒྱང་གྲགས་ཕྱེད་ཙམ་ཡོད་པ། སྟེང་གི་བར་སྣང་ལས་ཀྱང་མུ་ཏིག་གིས་བརྒྱན་པའི་བླ་རེ་བྲེས་པས། ཕྱོགས་དེ་ཁོ་ར་
ཁོར་ཡུག་ཏུ་ཡང་། མེ་ཏོག་ཁ་དོག་རྣམ་པ་ལྔས་འཐོར། མངོན་པར་འཐོར། རབ་ཏུ་མངོན་པར་འཐོར་རོ། །བདུག་སྤོས་བསུང་ཞིམ་པོ་སྣ་ཚོགས་ཀྱིས་ཀྱང་ས་ཕྱོགས་དེ་བདུག་པར་བྱེད་དོ། །དེ་འདི་ལྟར་ཆོས་ལ་གུས་པས་བྱང་ཆུབ་སེམས་དཔའ་སེམས་
དཔའ་ཆེན་པོ་ཆོས་ཀྱིས་འཕགས་པ་གང་ལ་འདུག་ནས། ཤེས་རབ་ཀྱི་ཕ་རོལ་དུ་ཕྱིན་པའི་ཆོས་འཆད་པ་ལ། བསུང་ཅན་ན་འཁོད་པའི་སེམས་ཅན་དེ་དག་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་དེ་ལྟ་བུའི་ཆོས་ལ་གུས་པའི་ཚུལ་
གྱིས་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉན་པ་ནི་སྲོག་ཆགས་བརྒྱ་ཕྲག་མང་པོ། སྲོག་ཆགས་སྟོང་ཕྲག་མང་པོ། །སྲོག་ཆགས་བརྒྱ་སྟོང་ཕྲག་མང་པོ་རྣམས་ལྷགས་པར་གྱུར་ཏེ། མི་དང་ལྷ་རྣམས་གང་ཉན་པ་དེ་དག་ལས་ཁ་ཅིག་ནི་ཀློག་སློབ། ཁ་ཅིག་ནི་ཁ་
ཏོན་སློབ། ཁ་ཅིག་ནི་ཡོངས་སུ་ཆུད་པར་བྱེད། ཁ་ཅིག་ནི་འཛིན། ཁ་ཅིག་ནི་འཆང་། ཁ་ཅིག་ནི་ཟློས། ཁ་ཅིག་ནི་འདྲི། ཁ་ཅིག་ནི་ཚུལ་བཞིན་ཡིད་ལ་བྱེད་པའི་རྗེས་སུ་འགྲོའོ། །སེམས་ཅན་དེ་དག་ཐམས་ཅད་ཀྱང་ལྟུང་བའི་ཆོས་ཅན་མ་ཡིན་ལ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཤ་སྟག་གོ །རིགས་ཀྱི་བུ་ཁྱོད་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་དེའི་དྲུང་དུ་སོང་ཤིག་དང་། དེ་ལས་ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་
ཐོས་པར་འགྱུར་རོ། །དེ་ནི་རིགས་ཀྱི་བུ་ཁྱོད་ཀྱི་ཡུན་རིང་པོའི་དགེ་བའི་བཤེས་གཉེན་སྟོན་པའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐུལ་མ་འདེབས་པ། གཟེང་བསྟོད་པ་རབ་ཏུ་སྤྲོ་བར་བྱེད་པའོ། །རིགས་ཀྱི་བུ་དེས་ཀྱང་སྔོན་ཤེས་རབ་ཀྱི་ཕ་རོལ་
དུ་ཕྱིན་པ་ད་ལྟར་ཁྱོད་ཚོལ་བ་བཞིན་དུ་བཙལ་ཏོ། །རིགས་ཀྱི་བུ་ཁྱོད་ཉིན་མཚན་དུ་ངལ་བསོ་བའི་ཡིད་ལ་བྱེད་པ་མ་སྐྱེད་པར་སོང་ཤིག་དང་། རིང་པོ་མི་ཐོགས་པར་ཤེས་རབ་ཀྱི་ཕ་རོལ་དུ་ཕྱིན་པ་ཐོས་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་
ཆེན་པོ་རྟག་པར་རབ་ཏུ་ངུ་བ་དེ་བཞིན་གཤེགས་པའི་བཀའ་འདི་ཐོས་ནས། དགའ་མགུ་ཡི་རངས་རབ་ཏུ་དགའ། མོས་ཤིང་ཡིད་བདེ་བར་གྱུར་པ་ནི་འདི་ལྟ་སྟེ་དཔེར་ན། མི་ཞིག་དུག་དང་བཅས་པའི་ཟུག་རྔུས་ཟུག་ན། ནམ་ཞིག་བདག་གིས་ཟུག་རྔུ་འབྱིན་པའི་
སྨན་པ་གང་། བདག་གི་ཟུག་རྔུ་འདི་འབྱིན་ཅིང་། གང་བདག་སྡུག་བསྔལ་འདི་ལས་ཐར་བར་བྱེད་པ་ན་མ་རྙེད་པར་འགྱུར་སྙམ་པ་ལས་གཞན་པའི་ཡིད་ལ་བྱེད་པ་མི་སྐྱེད་པ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་ཡང་། གང་བདག་
ལ་ཤེས་རབ་ཀྱི་ཕ་རོལ་དུ་ཕྱིན་པ་སྟོན་ཅིང་ཆོས་གང་བདག་གིས་ཐོས་ནས། དམིགས་པ་དང་བཅས་པའི་ཡིད་ལ་བྱེད་པ་སྤོངས་པར་འགྱུར་བའི་རིགས་ཀྱི་བུ་དེ་ནམ་མཐོང་བར་འགྱུར་སྙམ་པ་ལས་གཞན་པའི་ཆོས་ཅུང་ཟད་ཀྱང་ཡིད་ལ་མི་བྱེད་དོ། །དེ་ནས་བྱང་ཆུབ་
སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་ས་ཕྱོགས་དེ་ཉིད་དུ་འདུག་སྟེ། ཆོས་ཐམས་ཅད་ལ་མི་གནས་པའི་འདུ་ཤེས་སྐྱེས་པར་གྱུར་ཏོ། །དེ་ཤེས་རབ་ཀྱི་ཕ་རོལ་དུ་ཕྱིན་པའི་རྒྱུ་དང་། ཚེ་རབས་སྔ་མ་ལ་གོམས་པས་ཏིང་ངེ་འཛིན་གྱི་སྒོ་དུ་

མ་མངོན་དུ་གྱུར་པ་ནི་འདི་ལྟ་སྟེ་ཆོས་ཐམས་ཅད་ཀྱི་ངོ་བོ་ཉིད་རྣམ་པར་ལྟ་བ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་ཀྱི་ངོ་བོ་ཉིད་མི་དམིགས་པ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་ལ་ཡེ་ཤེས་འབྱུང་བ་ཞེས་བྱ་བའི་ཏིང་ངེ་འཛིན་དང་། ཆོས་
ཐམས་ཅད་ལ་ཐ་དད་པ་མེད་པ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་མི་འགྱུར་བར་མཐོང་བ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་སྣང་བར་བྱེད་པ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་མུན་པ་དང་བྲལ་བ་ཞེས་བྱ་བའི་ཏིང་ངེ་
འཛིན་དང་། ཆོས་ཐམས་ཅད་མི་ཤེས་པ་འཇིག་པ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་མི་དམིགས་པ་ཞེས་བྱ་བའི་ཏིང་ངེ་འཛིན་དང་། མེ་ཏོག་མངོན་པར་འཐོར་བ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་ཀྱི་བདག་ཉིད་མངོན་པར་སྒྲུབ་པ་ཞེས་བྱ་བའི་
ཏིང་ངེ་འཛིན་དང་། སྒྱུ་མ་རྣམ་པར་སྤངས་པ་ཞེས་བྱ་བའི་ཏིང་ངེ་འཛིན་དང་། མེ་ལོང་གི་དཀྱིལ་འཁོར་ལྟར་རབ་ཏུ་སྣང་བ་མངོན་པར་སྒྲུབ་པ་ཞེས་བྱ་བའི་ཏིང་ངེ་འཛིན་དང་། སེམས་ཅན་ཐམས་ཅད་ཀྱི་སྒྲ་འབྱིན་པ་ཞེས་བྱ་བའི་ཏིང་ངེ་འཛིན་དང་། སེམས་ཅན་
ཐམས་ཅད་མངོན་པར་དགའ་བ་ཞེས་བྱ་བའི་ཏིང་ངེ་འཛིན་དང་། སེམས་ཅན་ཐམས་ཅད་ཀྱི་སྒྲ་ལ་མཁས་པའི་རྗེས་སུ་འགྲོ་བ་ཞེས་བྱ་བའི་ཏིང་ངེ་འཛིན་དང་། སྒྲ་དང་ཚིག་དང་འབྲུ་སྣ་ཚོགས་མངོན་པར་འབྱིན་པ་ཞེས་བྱ་བའི་ཏིང་ངེ་འཛིན་དང་། མ་མནན་པ་ཞེས་བྱ་བའི་ཏིང་ངེ་
འཛིན་དང་། རང་བཞིན་གྱིས་ཐ་སྙད་མེད་པ་ཞེས་བྱ་བའི་ཏིང་ངེ་འཛིན་དང་། སྒྲིབ་པ་མེད་པའི་རྣམ་པར་ཐར་པ་ཐོབ་པ་ཞེས་བྱ་བའི་ཏིང་ངེ་འཛིན་དང་། རྡུལ་དང་བྲལ་བ་ཞེས་བྱ་བའི་ཏིང་ངེ་འཛིན་དང་། མིང་དང་ངེས་པའི་སྒྲ་དང་ཚིག་དང་འབྲུ་ཞེས་བྱ་བའི་ཏིང་ངེ་འཛིན་དང་།
ཆོས་ཐམས་ཅད་རྣམ་པར་མི་མཐོང་བ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་ངེས་པའི་སྒྲ་དང་ཚིག་དང་འབྲུ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་མི་སྒྲིབ་པའི་མཐའ་ཞེས་བྱ་བའི་ཏིང་ངེ་འཛིན་དང་། ནམ་མཁའ་ལྟ་བུ་ཞེས་བྱ་བའི་ཏིང་ངེ་འཛིན་དང་།

རྡོ་རྗེ་ལྟ་བུ་ཞེས་བྱ་བའི་ཏིང་ངེ་འཛིན་དང་། གཟུགས་ཀྱི་རྒྱལ་པོ་ཉེ་བར་གྱུར་པ་ཞེས་བྱ་བའི་ཏིང་ངེ་འཛིན་དང་། རྒྱལ་བ་ཐོབ་པ་ཞེས་བྱ་བའི་ཏིང་ངེ་འཛིན་དང་། ཕྱིར་མི་ལྡོག་པའི་མིག་ཅེས་བྱ་བའི་ཏིང་ངེ་འཛིན་དང་། ཆོས་ཀྱི་དབྱིངས་ལས་བྱུང་
བ་ཞེས་བྱ་བའི་ཏིང་ངེ་འཛིན་དང་། དབུགས་འབྱིན་པ་ཞེས་བྱ་བའི་ཏིང་ངེ་འཛིན་དང་། སེང་གེའི་སྒྲ་སྒྲོགས་པ་ཞེས་བྱ་བའི་ཏིང་ངེ་འཛིན་དང་། སེམས་ཅན་ཐམས་ཅད་ཟིལ་གྱིས་གནོན་པ་ཞེས་བྱ་བའི་ཏིང་ངེ་འཛིན་དང་། རྡུལ་དང་རྣམ་པར་བྲལ་བ་ཞེས་བྱ་བའི་
ཏིང་ངེ་འཛིན་དང་། ཀུན་ནས་ཉོན་མོངས་པ་མེད་པ་ཞེས་བྱ་བའི་ཏིང་ངེ་འཛིན་དང་། པད་མོའི་རྒྱན་ཅེས་བྱ་བའི་ཏིང་ངེ་འཛིན་དང་། ཐེ་ཚོམ་གཅོད་པ་ཞེས་བྱ་བའི་ཏིང་ངེ་འཛིན་དང་། སྙིང་པོ་ཐམས་ཅད་ཀྱི་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་དང་། ཆོས་
ཐམས་ཅད་ལས་མངོན་པར་འཕགས་པ་ཞེས་བྱ་བའི་ཏིང་ངེ་འཛིན་དང་། མངོན་པར་ཤེས་པ་དང་། སྟོབས་དང་། མི་འཇིགས་པ་ཐོབ་པ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་ངེས་པར་རྟོགས་པ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་
ཅད་ཀྱི་འབྱོར་བ་རྒྱ་མཚོ་ཞེས་བྱ་བའི་ཏིང་ངེ་འཛིན་དང་། ལེ་ལོ་ཐམས་ཅད་སྤངས་པ་ཞེས་བྱ་བའི་ཏིང་ངེ་འཛིན་དང་། ཆོས་ཟབ་མོའི་འོད་བྱེད་ཅེས་བྱ་བའི་ཏིང་ངེ་འཛིན་དང་། རི་རབ་ལྟ་བུ་ཞེས་བྱ་བའི་ཏིང་ངེ་འཛིན་དང་། མི་འཕྲོགས་པ་ཞེས་བྱ་བའི་ཏིང་ངེ་འཛིན་
དང་། བདུད་ཀྱི་འཁོར་འཇིག་པར་བྱེད་པ་ཞེས་བྱ་བའི་ཏིང་ངེ་འཛིན་དང་། ཁམས་གསུམ་ལ་མངོན་པར་མ་ཞེན་པ་ཞེས་བྱ་བའི་ཏིང་ངེ་འཛིན་དང་། འོད་ཟེར་འབྱུང་བ་ཞེས་བྱ་བའི་ཏིང་ངེ་འཛིན་དང་། དེ་བཞིན་གཤེགས་པ་མཐོང་བ་ཞེས་བྱ་བའི་ཏིང་ངེ་འཛིན་ཏེ།
དེ་ཏིང་ངེ་འཛིན་དེ་དག་ལ་གནས་པར་གྱུར་ནས། ཕྱོགས་བཅུའི་འཇིག་རྟེན་ན། སངས་རྒྱས་བཅོམ་ལྡན་འདས་ཚད་མེད་གྲངས་མེད་པ་རྣམས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་རབ་ཏུ་སྟོན་པ་རྣམས་མཐོང་ངོ་། །

དེ་བཞིན་གཤེགས་པ་དེ་དག་ཀྱང་། དེ་ལ་ལེགས་པ་སྦྱིན་ཞིང་དབུགས་ཕྱུང་ནས་འདི་སྐད་བཀའ་སྩལ་ཏོ། །རིགས་ཀྱི་བུ་ངེད་ཀྱིས་ཀྱང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཤེས་རབ་ཀྱི་ཕ་རོལ་ཏུ་ཕྱིན་པ་བཙལ་ཏེ། ཏིང་ངེ་འཛིན་འདི་དག་རབ་ཏུ་ཐོབ་པ་ནི་གང་
དེ་ལྟར་ཁྱོད་ཀྱིས་ཐོབ་པའོ། །ཏིང་ངེ་འཛིན་དེ་དག་རབ་ཏུ་ཐོབ་ནས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་རྟོགས་པར་གྱུར་ཏོ། །ཕྱིར་མི་ལྡོག་པའི་ཆོས་ལ་རབ་ཏུ་གནས་པར་གྱུར་ཏེ། ངེད་ཀྱིས་ཏིང་ངེ་འཛིན་འདི་དག་གི་རང་བཞིན་དང་ངོ་བོ་ཉིད་ལ་བལྟས་ན། སྙོམས་པར་
འཇུག་པ་འམ། ལྡང་བ་འམ། གང་བྱང་ཆུབ་ཏུ་སྤྱོད་པ་འམ། གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བའི་ཆོས་དེ་ལྟ་བུ་གང་ཡང་མ་མཐོང་ངོ་། །རིགས་ཀྱི་བུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཆོས་གང་ལ་ཡང་སེམས་
པ་མེད་དོ། །རིགས་ཀྱི་བུ་ངེད་ཀྱིས་སེམས་པ་མེད་པ་ལ་གནས་པས། ལུས་གསེར་གྱི་ཁ་དོག་ལྟ་བུ་འདི་ལྟ་བུ་དག་རབ་ཏུ་ཐོབ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་། འོད་འདོམ་གང་བ་དང་། སངས་རྒྱས་
ཀྱི་ཆོས་བསམ་གྱིས་མི་ཁྱབ་པ་རྣམས་དང་། སངས་རྒྱས་ཀྱི་ཡེ་ཤེས་དང་། སངས་རྒྱས་ཀྱི་ཤེས་རབ་དང་། བླ་ན་མེད་པའི་ཏིང་ངེ་འཛིན་རྣམས་དང་། ཡོན་ཏན་གྱི་ཕ་རོལ་ཏུ་ཕྱིན་པ་གང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
རྣམས་ཀྱིས་ཀྱང་ཚད་བཟུང་བ་འམ། མཐའ་བསྟན་པར་མི་ནུས་ན། ཉན་ཐོས་དང་། རང་སངས་རྒྱས་ཐམས་ཅད་ཀྱིས་ལྟ་སྨོས་ཀྱང་མི་དགོས་པ་དེ་ལྟ་བུའི་ཡོན་ཏན་གྱི་ཕ་རོལ་ཏུ་ཕྱིན་པ་དག་རབ་ཏུ་ཐོབ་བོ། །དེ་བས་ན་རིགས་ཀྱི་བུ་ཁྱོད་ཀྱིས་ཀྱང་ཆོས་འདི་དག་ཉིད་
ལ་གུས་པ་རབ་ཏུ་བསྐྱེད་པར་བྱའོ། །ལྷག་པར་དོན་དུ་གཉེར་བ་དང་། མོས་པར་བྱ་བ་བསྐྱེད་པར་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ་དོན་དུ་གཉེར་བ་དང་། མོས་པར་བྱེད་པ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མི་དཀོན་ནོ། །རིགས་ཀྱི་བུ་ཁྱོད་

ཀྱིས་དགེ་བའི་བཤེས་གཉེན་ལ་ཡང་གུས་པ་རབ་ཏུ་སྐྱེད་ཅིང་དགའ་བར་བྱའོ། །དེ་ཅིའི་ཕྱིར་ཞེ་ན། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་ནི་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །དེ་ནས་དེ་བཞིན་གཤེགས་པ་དེ་དག་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བས་འདི་སྐད་ཅེས་གསོལ་ཏོ། །བདག་གི་དགེ་བའི་བཤེས་གཉེན་གང་ལགས། དེ་བཞིན་
གཤེགས་པ་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་ལ་འདི་སྐད་བཀའ་སྩལ་ཏོ། །རིགས་ཀྱི་ཁྱོད་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པས་ཡུན་རིང་པོ་ནས་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བཟུང་། ཐབས་མཁས་པ་ལ་ཡང་བསླབས་ཏེ། དེ་ནི་རིགས་ཀྱི་བུ་ཁྱོད་ལ་ཕན་འདོགས་པ་ཡིན། དགེ་བའི་བཤེས་གཉེན་ཡིན་ནོ། །
རིགས་ཀྱི་བུ་ཁྱོད་ཀྱིས་དེའི་བྱས་པ་གཟུངས་སུ་བཟུང་ངོ་། །གལ་ཏེ་རིགས་ཀྱི་བུ་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་དེ། བསྐལ་པ་གཅིག་གམ། བསྐལ་པ་གཉིས་སམ། བསྐལ་པ་བརྒྱ་འམ།
བསྐལ་པ་སྟོང་ངམ། དེ་བས་ཀྱང་ལྷག་པར་རས་ཀྱི་ཐོད་བཞིན་དུ་མགོ་ལ་ཁྱེར་རམ། བདེ་བའི་ཡོ་བྱད་ཐམས་ཅད་བྱིན་ནམ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། གཟུགས་དང་། སྒྲ་དང་དྲི་དང་རོ་དང་རེག་པ་ཇི་སྙེད་
ཡོད་པ་དེ་དག་ཐམས་ཅད་བྱིན་ཡང་དེ་ཙམ་གྱིས་རིགས་ཀྱི་བུ་ཁྱོད་ཀྱིས་དེ་ལ་ལན་ལོན་པར་མི་འགྱུར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ་དེའི་མཐུས་ཁྱོད་འདི་ལྟ་བུའི་ཏིང་ངེ་འཛིན་རྣམས་ཐོབ་པར་གྱུར། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཁས་པ་

ཐོས་པར་གྱུར། ཤེས་རབ་ཀྱི་ཕ་རོལ་དུ་ཕྱིན་པ་རབ་ཏུ་ཐོབ་པར་འགྱུར་བའི་ཕྱིར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་ཉི་ཤུ་ལྔ་པ་ལས། བྱང་ཆུབ་སེམས་དཔའ་རྟག་པར་རབ་ཏུ་ངུ་བས། ཏིང་ངེ་འཛིན་གྱི་སྒོ་མང་པོ་ཐོབ་པའི་ལེའུ་སྟེ།
བདུན་ཅུ་རྩ་གསུམ་པའོ།། །།དེ་ནས་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་དབུགས་ཕྱུང་ནས་མི་སྣང་བར་
གྱུར་ཏོ། །རིགས་ཀྱི་བུ་དེ་ཡང་ཏིང་ངེ་འཛིན་དེ་རྣམས་ལས་ལངས་པར་གྱུར་ཏོ། །ལངས་ནས་ཀྱང་དེ་འདི་སྙམ་དུ་དེ་བཞིན་གཤེགས་པ་འདི་དག་ག་ནས་བྱོན། དེ་བཞིན་གཤེགས་པ་དེ་དག་གང་དུ་བཞུད་སྙམ་སེམས་པར་གྱུར་ཏོ། །དེས་དེ་བཞིན་
གཤེགས་པ་དེ་དག་མ་མཐོང་བ་དང་། མི་དགའ་ཞིང་གདུང་བ་ཆེན་པོར་གྱུར་ཏེ་འདི་སྙམ་དུ་སེམས་པར་གྱུར་ཏོ། །འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་དེ་གཟུངས་རབ་ཏུ་ཐོབ་ལ། ལྔ་མངོན་
པར་ཤེས་པ་སྔོན་གྱི་རྒྱལ་བ་ལ་བྱ་བ་བྱས་པ་སྟེ། བདག་ལ་ཕན་འདོགས་པ། བདག་གི་དགེ་བའི་བཤེས་གཉེན་ཏེ། ཡུན་རིང་པོར་དེས་བདག་གི་དོན་བྱས་པས། དེ་བཞིན་གཤེགས་པ་དེ་དག་གང་ནས་བྱོན། དེ་བཞིན་གཤེགས་པ་དེ་དག་
གར་བཞུད་ཅེས་བྱ་བའི་དོན་དེ་བདག་གིས་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་དེའི་དྲུང་དུ་ཉེ་བར་སོང་སྟེ། དྲི་བར་བྱའོ་སྙམ་དུ་སེམས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་
པར་རབ་ཏུ་ངུ་བ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་དེ་ལ་དགའ་བ་དང་། དང་བ་དང་། རྗེ་ས་དང་། གུས་པ་བསྐྱེད་ནས་སྔར་འདི་སྙམ་དུ་བསམས་སོ། །བདག་གིས་སྟི་སྟང་ཇི་ལྟ་བུ་ཞིག་གིས་འཕགས་

པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་བསྙེན་པར་བྱ། བདག་ཀྱང་དབུལ་བས་བདག་ལ་གོས་སམ། རིན་པོ་ཆེ་འམ། གསེར་རམ། མུ་ཏིག་གམ། བཻ་ཌཱུརྱ་འམ། དུང་ངམ། ཤེལ་ལམ།
བྱུ་རུ་འམ། དངུལ་ལམ། མེ་ཏོག་གམ། བདུག་པ་འམ། སྤོས་སམ། ཕྲེང་བ་དང་། བྱུག་པ་འམ། གདུགས་གང་གིས་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་དེ་ལ་སྟི་སྟང་དུ་བྱ་བར་འོས་པ་དེ་ལྟ་བུ་ཅུང་
ཟད་ཀྱང་མེད། བདག་དེ་བཞིན་དུ་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་དེའི་དྲུང་དུ་འགྲོ་བར་ཡང་མི་རིགས་ལ། བདག་དགའ་ཞིང་མགུ་བར་ཡང་མི་འགྱུར་རོ་སྙམ་ནས། དེ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་རྟག་པར་རབ་ཏུ་ངུ་བ་དེ་ལྟ་བུར་བླ་མ་ལ་གུས་ཤིང་རིམ་གྲོ་བྱ་བའི་དོན་ཡིད་ལ་བྱེད་པས། མཐར་གྱིས་སོང་སོང་ན། གྲོང་ཁྱེར་གཅིག་ཅིག་ཏུ་ཕྱིན་ཏེ། དེར་ཚོང་དུས་ཀྱི་དབུས་སུ་ཕྱིན་པ་དང་། འདི་སྙམ་དུ་བསམས་སོ། །བདག་གི་ལུས་འདི་
བཙོངས་ཏེ། དེའི་རིན་གྱིས་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་མཆོད་པ་བྱའོ། །ཡུན་རིང་མོ་ཞིག་ཏུ་བདག་གི་ལུས་སྟོང་ཙམ་ཞིག་པར་གྱུར། དེངས་པར་གྱུར། བཙོངས་རྨེག་མེད་པར་གྱུར་ཏེ་དཔག་ཏུ་
མེད་པའི་འཁོར་བར་ཡང་དང་ཡང་དུ་འཁོར་བ་ན། དཔག་ཏུ་མེད་པའི་སེམས་ཅན་དམྱལ་བ་དང་། བྱོལ་སོང་དང་། གཤིན་རྗེའི་འཇིག་རྟེན་གྱི་སྡུག་བསྔལ་མྱོང་བར་གྱུར་ཏེ། དེ་ཡང་འདོད་པའི་རྒྱུ་དང་འདོད་པའི་གཞིའི་ཕྱིར་གྱི། ཆོས་འདི་ལྟ་བུའི་ཕྱིར་རམ།
བྱང་ཆུབ་སེམས་དཔའ་འདི་ལྟ་བུ་དག་ལ་མཆོད་པའི་ཕྱིར་ནི་མ་ཡིན་ནོ། །སྙམ་མོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བས། ཚོང་དུས་ཀྱི་དབུས་སུ་མི་སུ་ཉོ་མི་སུ་ཉོ་ཞེས་བྱ་བའི་སྒྲ་ཕྱུང་སྟེ་བོས་སོ། །དེ་ནས་བདུད་སྡིག་ཏོ་

ཅན་འདི་སྙམ་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་འདི་ཆོས་འདོད་པའི་ཕྱིར་བདག་ཉིད་བཙོངས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་མཆོད་པ་བྱས་ནས། བྱང་ཆུབ་སེམས་དཔའ་སེམས་
དཔའ་ཆེན་པོས་ཇི་ལྟར་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མྱུར་དུ་རྫོགས་པར་འགྱུར། ཐོས་པ་རྒྱ་མཚོ་ལྟ་བུ་ཐོབ་པར་འགྱུར། བདུད་དང་བདུད་ཀྱི་རིས་སུ་གཏོགས་པའི་ལྷ་རྣམས་ཀྱིས་མི་ཚུགས་
པར་འགྱུར། ཡོན་ཏན་ཐམས་ཅད་ཀྱི་མཐར་ཕྱིན་པར་འགྱུར་ཞེས་ཤེས་རབ་ཀྱི་ཕ་རོལ་དུ་ཕྱིན་པ་ལ་ཐབས་མཁས་པས་ཡོངས་སུ་འདྲི་བར་འགྱུར་ཏེ། དེས་ཀྱང་སེམས་ཅན་མང་པོའི་དོན་བྱེད་པར་འགྱུར་དེ་དག་ཀྱང་བདག་གི་སྤྱོད་ཡུལ་ལས་འདས་པར་འགྱུར་
ལ། སེམས་ཅན་གཞན་དག་ཀྱང་བདག་གིས་སྤྱོད་ཡུལ་ལས་འདས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་གྱིས། དེའི་ཕྱིར་བདག་གིས་དེའི་བར་ཆད་བྱའོ་སྙམ་དུ་བསམས་སོ། །དེ་ནས་བདུད་སྡིག་
ཅན་གྱིས་བྲམ་ཟེ་དང་། ཁྱིམ་བདག་དེ་རྣམས་ལ་ཅི་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བས་མི་སུ་ཉོ་མི་སུ་ཉོ་ཞེས་བྱ་བའི་སྒྲ་བརྗོད་པ་དེ་མི་ཐོས་པར་འགྱུར་བ་དེ་ལྟ་བུར་ཟིལ་གྱིས་མནན་ཏོ། །དེ་ནས་བྱང་ཆུབ་སེམས་དཔའ་
སེམས་དཔའ་ཆེན་པོ་རྟག་པར་རབ་ཏུ་ངུ་བ་བདག་ཉོ་བ་མ་རྙེད་པ་དང་། ཕྱོགས་གཅིག་ཏུ་སོང་སྟེ་ངུས་ནས་འདི་སྙམ་དུ་ཨེ་མའོ་བདག་གི་ལུས་ཉོ་བ་ཡང་མེད་དེ། རྙེད་པ་རབ་ཏུ་མ་རྙེད་དོ་སྙམ་དུ་སེམས་སོ། །དེ་ནས་བརྒྱ་བྱིན་ལྷའི་དབང་པོ་འདི་སྙམ་དུ་བྱང་ཆུབ་
སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་འདི་ཆོས་འདོད་པའི་ཕྱིར། ཡང་དག་པའི་བསམ་པས་བདག་གི་ལུས་ཡོངས་སུ་གཏོང་ངམ། འོན་ཏེ་མ་ཡིན་པ་བདག་གིས་བརྟག་པར་བྱའོ་སྙམ་དུ་སེམས་སོ། །དེ་ནས་བརྒྱ་བྱིན་ལྷའི་དབང་པོ་བྲམ་ཟེའི་

ཁྱེའུ་ཞིག་ཏུ་མངོན་པར་སྤྲུལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་གང་ན་བ་དེར་སོང་སྟེ་ཕྱིན་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་ལ་འདི་སྐད་སྨྲས་སོ། །རིགས་
ཀྱི་བུ་ཁྱོད་ཅིའི་ཕྱིར་ཡིད་མི་དགའ་ཞིང་མྱ་ངན་བྱེད་ལ་ངུ་ཞིང་འདུག། རབ་ཏུ་ངུ་བས་བྲམ་ཟེའི་ཁྱེའུ་ལ་འདི་སྐད་སྨྲས་སོ། །བྲམ་ཟེའི་ཁྱེའུ་བདག་ནི་ཆོས་འདོད་པའི་ཕྱིར། བདག་གི་ལུས་བཙོངས་ཏེ་ཆོས་ལ་མཆོད་པར་འདོད་ན། བདག་ཉོ་བ་མ་རྙེད་དེ་
དེ་ལ་བདག་འདི་སྙམ་དུ་གང་བདག་གི་ལུས་བཙོངས་ནས། ཤེས་རབ་ཀྱི་ཕ་རོལ་དུ་ཕྱིན་པ་ལ་མཆོད་པ་བྱ་ཞིང་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་ཡང་། བཀུར་སྟིར་བྱ་བ་དེ་ལྟ་བུའི་ལུས་ཉོ་བ་ཡང་མ་རྙེད་པ་དེ།
ཨེ་མའོ་བདག་བསོད་ནམས་རེ་ཆུང་སྙམ་དུ་སེམས་སོ། །དེ་ནས་བྲམ་ཟེའི་ཁྱེའུ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་ལ་འདི་སྐད་སྨྲས་སོ། །རིགས་ཀྱི་བུ་བདག་ལ་མི་ནི་མི་དགོས་ཀྱི། བདག་མཆོད་སྦྱིན་ཞིག་
བྱེད་པས། དེར་མིའི་སྙིང་དང་། ཁྲག་དང་རུས་པ་དང་། རྐང་དགོས་ན་དེ་ཉོར་སྦྱིན་ནམ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་འདི་སྙམ་དུ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཁས་པར་བྱ་བའི་ཕྱིར།
ཁྱེའུ་འདི་ལ་བདག་གི་ལུས་དང་། སྙིང་དང་ཁྲག་དང་། རུས་པ་དང་། རྐང་ཉོ་བ་རྙེད་པ་ནི། བདག་གིས་རྙེད་པའི་མཆོག་རབ་ཏུ་རྙེད། བདག་གིས་ལུས་ཀྱང་དོན་ཡོད་པར་གྱུར་ཏོ་སྙམ་དུ་སེམས་ཏེ། དེ་དགའ་མགུ་རབ་ཏུ་དགའ་བའི་སེམས་
སུ་གྱུར་ནས། ཁྱེའུ་དེ་ལ་འདི་སྐད་སྨྲས་སོ། །ཁྱེའུ་ཁྱོད་ལུས་འདི་གང་གི་ཕྱིར་དགོས་པ་དེ་སྦྱིན་ནོ། །དེས་དེ་ལ་འདི་སྐད་སྨྲས་སོ། །རིགས་ཀྱི་བུ་ཁྱོད་ལ་རིན་ཅི་ཞིག་སྦྱིན། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བས་

ཁྱེའུ་དེ་ལ་འདི་སྐད་སྨྲས་སོ། །ཁྱེའུ་ཁྱོད་ཀྱིས་གང་ཡོངས་སུ་བཏང་བ་དེ་བྱིན་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བས་མཚོན་རྣོན་པོ་ཞིག་ཐོགས་ཏེ་དཔུང་པ་གཡས་པ་ཕུག་ནས་ཁྲག་ཕྱུང་ངོ་། །བརླ་གཡས་པ་ཡང་
བཅད་ནས་ཤ་མེད་པར་བྱས་དེ། རྩིག་པ་ཞིག་གི་དྲུང་དུ་རུས་པ་གཅོག་ཏུ་སོང་ངོ་། །དེ་ནས་ཚོང་དཔོན་གྱི་བུ་མོ་ཞིག་ཁང་ཐོག་ན་འདུག་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ། བརླའི་ཤ་མེད་པར་བྱས་ནས། རྩིག་པའི་དྲུང་དུ་
རུས་པ་གཅོག་ཏུ་སོང་བ་མཐོང་བ་དང་། དེ་འདི་སྙམ་དུ་རིགས་ཀྱི་བུ་ཅིའི་ཕྱིར་བདག་གིས་བདག་ལ་གནོད་པར་བྱེད། དེ་བདག་གིས་རིགས་ཀྱི་བུ་དེའི་དྲུང་དུ་སོང་སྟེ་དྲིའོ་སྙམ་དུ་སེམས་སོ། །དེ་ནས་ཚོང་དཔོན་གྱི་བུ་མོ་དེ་བྱང་ཆུབ་སེམས་དཔའ་སེམས་དཔའ་
ཆེན་པོ་རྟག་པར་རབ་ཏུ་ངུ་བ་གང་ན་བ་དེར་སོང་སྟེ། དེར་ཕྱིན་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་ལ་འདི་སྐད་སྨྲས་སོ། །རིགས་ཀྱི་བུ་ཁྱོད་ཅིའི་ཕྱིར་འདི་ལྟར་བདག་ལ་བདག་གནོད་པར་བྱེད། ཁྲག་དང་རུས་པ་དང་
རྐང་དེ་དག་གིས་ཀྱང་ཅི་ཞིག་བྱ། རྟག་པར་རབ་ཏུ་ངུ་བས་བུ་མོ་དེ་ལ་འདི་སྐད་སྨྲས་སོ། །འདི་དག་ཁྱེའུ་དེ་ལ་བཙོངས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཆོད་ཅིང་། འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་
འཕགས་པ་ལ་ཡང་རིམ་གྲོར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་ལ་ཚོངས་དཔོན་གྱི་བུ་མོ་དེས་འདི་སྐད་སྨྲས་སོ། །རིགས་ཀྱི་བུ་ཁྱོད་ཀྱི་སྙིང་དང་། ཁྲག་དང་རུས་པ་དང་རྐང་བཙོངས་ཏེ། འཕགས་པ་
བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་རིམ་གྲོར་བྱས་ན་ཡོན་ཏན་ཅི་ཞིག་ཡོད། དེས་བུ་མོ་དེ་ལ་འདི་སྐད་སྨྲས་སོ། །བུ་མོ་རིགས་ཀྱི་བུ་དེ་ནི་གང་ལ་ངེད་ཀྱིས་བསླབས་ན། སེམས་ཅན་ཐམས་ཅད་རྗེས་སུ་འབྲང་

བར་འགྱུར་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སངས་རྒྱས་ནས། ལུས་གསེར་གྱི་ཁ་དོག་ལྟ་བུར་འགྱུར་བ་དང་། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་
བརྒྱད་ཅུ་དང་། འོད་འདོམ་གང་བ་དང་། འོད་ཟེར་མཐའ་ཡས་པ་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་དང་། མི་འཇིགས་པ་བཞི་དང་། སོ་སོ་ཡང་དག་པར་རིག་པ་བཞི་དང་།
དེ་བཞིན་གཤེགས་པའི་སྟོབས་བཅུ་དང་། སངས་རྒྱས་ཀྱི་ཆོས་མ་འདྲེས་པ་བཅྭོ་བརྒྱད་དང་། ཉམས་པར་མི་འགྱུར་བའི་མངོན་པར་ཤེས་པ་ལྔ་དང་། ཚུལ་ཁྲིམས་རྣམ་པར་དག་པ་བསམ་གྱིས་མི་ཁྱབ་པ་དང་། ཏིང་ངེ་འཛིན་རྣམ་
པར་དག་པ་བསམ་གྱིས་མི་ཁྱབ་པ་དང་། ཤེས་རབ་རྣམ་པར་དག་པ་བསམ་གྱིས་མི་ཁྱབ་པ་དང་། གཞན་ཡང་སངས་རྒྱས་ཀྱི་ཆོས་མ་འདྲེས་པ་བསམ་གྱིས་མི་ཁྱབ་པ་རྣམས་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་མངོན་པར་འཚང་རྒྱ་བ་དང་། གང་སེམས་ཅན་ཐམས་ཅད་ལ་བགོར་ཡོད་པ། བླ་ན་མེད་པའི་ཆོས་རིན་པོ་ཆེ་རབ་ཏུ་ཐོབ་པར་འགྱུར་བ། དེ་ལྟ་བུའི་ཤེས་རབ་ཀྱི་ཕ་རོལ་དུ་ཕྱིན་པ་ལ་ཐབས་མཁས་པ། བདག་ལ་སྟོན་ཏེ་དེ་ལ་
བདག་སློབ་བོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་ལ་ཚོང་དཔོན་གྱི་བུ་མོ་དེས་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་ཡོངས་སུ་བསྒྲགས་པའི་ཆོས་རྒྱ་ཆེན་པོ་དེ་དག་ནི་ངོ་མཚར་ཆེ་སྟེ། རིགས་ཀྱི་བུ་
ཆོས་དེ་ལྟ་བུ་རེ་རེའི་ཕྱིར་ཡང་གང་གཱའི་ཀླུང་གི་བྱེ་མ་སྙེད་ཀྱི་ལུས་ཀྱང་ཡོངས་སུ་བཏང་བར་འོས་ན། གཅིག་ལྟ་སྨོས་ཀྱང་ཅི་དགོས། རིགས་ཀྱི་བུ་ཁྱོད་ཀྱིས་སངས་རྒྱས་ཀྱིས་ཆོས་རྒྱ་ཆེན་པོ་བསམ་གྱིས་མི་ཁྱབ་པ། སེམས་ཅན་ཐམས་ཅད་ལ་

ཕན་པ་དང་། བདེ་བར་འགྱུར་བ་འདི་དག་ཡོངས་སུ་བསྒྲགས་སོ། །རིགས་ཀྱི་བུ་ཁྱོད་ཅི་དགོས་པ་གསེར་རམ། དངུལ་ལམ། བཻ་ཌཱུརྱ་འམ། ནོར་བུ་རིན་པོ་ཆེ་འམ། མུ་ཏིག་གམ། མེ་ཏོག་གམ། བདུག་པ་འམ། སྤོས་སམ།
ཕྲེང་བ་འམ། བྱུག་པ་འམ། ཕྱེ་མ་འམ། གོས་སམ། གདུགས་དང་། རྒྱལ་མཚན་དང་། བ་དན་གང་གིས་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་དེ་ལ་རིམ་གྲོར་བྱ་བར་འགྱུར་བ་དེ་དག་བདག་གིས་
ཕ་མ་ལས་བསླངས་ཏེ་སྦྱིན་གྱིས། བདག་ལ་བདག་འདི་ལྟ་བུའི་གནོད་པ་མ་བྱེད་ཅིག །བདག་ཀྱང་ཆོས་དེ་རྣམས་འདོད་དེ། བདག་ཀྱང་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་གང་ན་བ་དེར་ཁྱོད་དང་
ལྷན་ཅིག་ཏུ་འགྲོའོ། །བདག་ཀྱང་འདི་ལྟར་ཆོས་དེ་ལྟ་བུ་དེ་དག་ཐོབ་པར་བྱ་བའི་ཕྱིར་ཁྱོད་དང་ལྷན་ཅིག་ཏུ་དགེ་བའི་རྩ་བ་བསྐྱེད་དོ། །དེ་ནས་ལྷའི་དབང་པོ་བརྒྱ་བྱིན་བྲམ་ཟེའི་ཁྱེའུ་ཡི་ལུས་མི་སྣང་བར་བྱས་ནས། བདག་ཉིད་ཀྱི་ལུས་སུ་བྱང་ཆུབ་སེམས་
དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བའི་མདུན་དུ་འདུག་ནས་འདི་སྐད་སྨྲས་སོ། །རིགས་ཀྱི་བུ་འདི་ལྟ་བུར་ཡི་དམ་ལ་བརྟན་པ་ལེགས་སོ། །ལེགས་སོ། །རིགས་ཀྱི་བུ་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རྣམས་ཀྱིས་ཀྱང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། ཆོས་དོན་དུ་གཉེར་བའི་ཚུལ་འདི་ལྟ་བུས། ཤེས་རབ་ཀྱི་ཕ་རོལ་དུ་ཕྱིན་པ་ལ་ཐབས་མཁས་པས་བཙལ་ཅིང་དགེ་བའི་བཤེས་གཉེན་ལ་ཡོངས་སུ་དྲིས་ནས།
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །རིགས་ཀྱི་བུ་བདག་ལ་ནི་སྙིང་དང་། ཁྲག་དང་རུས་པ་དང་རྐང་མི་དགོས་ཀྱི། ཁྱོད་ལ་ཉམས་སད་པའི་ཕྱིར་འདིར་འོངས་ཀྱིས། རིགས་ཀྱི་བུ་ཁྱོད་ལ་མཆོག་

ཇི་ཙམ་ཞིག་སྦྱིན་པར་བྱ་བའི་མཆོག་སློངས་ཤིག །རྟག་པར་རབ་ཏུ་ངུ་བས་བརྒྱ་བྱིན་ལ་སྨྲས་པ། བརྒྱ་བྱིན་བདག་ལ་བླ་ན་མེད་པའི་སངས་རྒྱས་ཀྱི་ཆོས་བྱིན་ཅིག། བརྒྱ་བྱིན་གྱིས་སྨྲས་པ། རིགས་ཀྱི་བུ་ཡུལ་འདི་ནི་བདག་
གི་སྤྱོད་ཡུལ་མ་ཡིན་གྱི། ཡུལ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སྤྱོད་ཡུལ་ལོ། །དེ་བས་ན་མཆོག་གཞན་ཞིག་སློངས་ཤིག །བྱང་ཆུབ་སེམས་དཔའ་རྟག་པར་རབ་ཏུ་ངུ་བས་སྨྲས་པ། ལྷའི་དབང་པོ་འོ་ན་ཁྱོད་ཐུགས་ཁྲལ་ཆུང་ངུ་
གྱིས་ལ་བཞུགས་ཤིག། བདག་གིས་ལུས་ཡོངས་སུ་རྫོགས་པར་བྱ་བའི་ཕྱིར། བདག་རང་བདེན་པ་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་ལུང་བསྟན་ཅིང་། བདག་ལ་སྒྱུ་མེད་པ་དང་ལྷག་པའི་བསམ་པ་ཡོད་པར་བདེན་པའི་བྱིན་གྱིས་བརླབས་བྱའོ། །ལྷའི་དབང་པོ་བདེན་པ་དེ་དང་བདེན་པའི་ཚིག་དེས་བདག་གི་ལུས་སྔ་མ་བཞིན་དུ་གྱུར་ཅིག །དེ་ནས་སྐད་ཅིག་དེ་དང་། ཐང་ཅིག་དེ་དང་།
ཡུད་ཙམ་དེ་ཉིད་ལ་སངས་རྒྱས་ཀྱི་མཐུ་དང་། ལྷག་པའི་བསམ་པ་ཡོངས་སུ་དག་པས། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བའི་ལུས་སྔ་མ་བཞིན་དུ་གནས་པར་གྱུར་ཏོ། །དེ་ནས་ལྷའི་དབང་པོ་བརྒྱ་བྱིན་སྤོབས་པ་མེད་
པར་གྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་ལ་དེ་ལས་གཞན་ལན་འདེབས་མ་ནུས་ནས། གནས་དེ་ཉིད་དུ་མི་སྣང་བར་གྱུར་ཏོ། །དེ་ནས་ཚོང་དཔོན་གྱི་བུ་མོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་
རྟག་པར་རབ་ཏུ་ངུ་བ་ལ་འདི་སྐད་སྨྲས་སོ། །རིགས་ཀྱི་བུ་བདག་གི་ཁྱིམ་གང་ན་བ་དེར་བཞུད་ཀྱིས་ཚུར་སྤྱོན། བདག་གི་ཕ་མ་ལས་ནོར་བསླངས་ཏེ། ཁྱོད་ཆོས་འདོད་པའི་ཕྱིར་ཤེས་རབ་ཀྱི་ཕ་རོལ་དུ་ཕྱིན་པ་མཆོད་པ་དང་། འཕགས་པ་བྱང་ཆུབ་

སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་དེ་ལ་རིམ་གྲོར་བྱ་བའི་ནོར་དེ་ཁྱོད་ལ་སྦྱིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་ཚོང་དཔོན་གྱི་བུ་མོ་དེ་དང་ལྷན་ཅིག་ཏུ་དེའི་ཁྱིམ་གང་ན་བ་དེར་དོང་ངོ་། །དེ་
ནས་ཚོང་དཔོན་གྱི་བུ་མོ་དེ་བདག་གི་ཁྱིམ་དུ་སོང་ནས། ཕ་མ་ལ་འདི་སྐད་སྨྲས་སོ། །ཡབ་ཡུམ་བདག་ལ་ནོར་མང་པོ་སྩལ་དུ་གསོལ། །གསེར་དང་། དངུལ་དང་། རིན་པོ་ཆེ་དང་། ནོར་བུ་དང་། གོས་དང་། མེ་ཏོག་དང་། བདུག་པ་དང་།
སྤོས་དང་། ཕྲེང་བ་དང་བྱུག་པ་དང་ཕྱེ་མ་དང་། ཆོས་གོས་དང་། གདུགས་དང་རྒྱལ་མཚན་དང་། བ་དན་རྣམས་དང་སིལ་སྙན་གྱི་བྱེ་བྲག་རྣམ་པ་མང་པོ་རྣམས་བདག་ལ་སྩལ་དུ་གསོལ། ཁྱེད་ཀྱིས་བདག་ལ་འཁོར་དུ་སྩལ་པའི་བུ་མོ་ལྔ་
བརྒྱ་པོ་འདི་རྣམས་དང་། ལྷན་ཅིག་ཏུ་བདག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་དང་། ཤེས་རབ་ཀྱི་ཕ་རོལ་དུ་ཕྱིན་པ་མཆོད་ཅིང་། འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་
ཀྱིས་འཕགས་པ་ལ་རིམ་གྲོ་བགྱིད་དུ་མཆི་བར་ཅི་གནང་། དེས་བདག་ཅག་ལ་ཆོས་བཤད་ན། སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཐོབ་པར་འགྱུར་རོ། །དེ་ནས་བུ་མོ་དེའི་ཕ་མ་གཉིས་ཀྱིས་བུ་མོ་དེ་ལ་འདི་སྐད་སྨྲས་སོ། །བུ་མོ་
བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་ཞེས་བྱ་བ་དེ་སུ་ཞིག །ད་ལྟ་ག་ལ་འདུག །བུ་མོས་སྨྲས་པ། རིགས་ཀྱི་བུ་དེ་འོ་སྐོལ་གྱི་ཆབ་སྒོའི་དྲུང་ན་མཆིས་ཏེ། རིགས་ཀྱི་བུ་དེ་ཡང་ལྷག་པའི་བསམ་པས། བླ་ན་
མ་མཆིས་པ་ཡང་དག་པར་རྫོགས་པའི་བྱང་ཆུབ་ཏུ་རབ་ཏུ་ཞུགས་པ་ནི་འདི་ལྟ་སྟེ། སེམས་ཅན་ཐམས་ཅད་དཔག་ཏུ་མ་མཆིས་པའི་འཁོར་བའི་སྡུག་བསྔལ་གྱི་ཚོགས་ལས་ཐར་བར་འཚལ་བའི་སླད་དུ་དམ་པའི་ཆོས་འཚལ་བས། བདག་གི་ལུས་བཙོངས་ཏེ་དམ་

པའི་ཆོས་ཀྱི་ཚུལ་ཤེས་རབ་ཀྱི་ཕ་རོལ་དུ་ཕྱིན་པ་དང་། འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་རིམ་གྲོ་བགྱི་བར་འཚལ་ན། དེའི་ལུས་ཉོ་བ་ཡང་མ་རྙེད་ནས། དེ་སྡུག་བསྔལ་བར་གྱུར་
ཡིད་མི་དགའ་སེམས་ཁོངས་སུ་ཆུད། ཡི་ཆད་ནས་ངུ་ཞིང་འདུག་པ་དང་། ལྷའི་དབང་པོ་བརྒྱ་བྱིན་བྲམ་ཟེའི་ཁྱེའུ་ཞིག་གི་ལུས་སུ་སྤྲུལ་ནས། དེ་ལ་ཉམས་སད་པའི་ཕྱིར་རིགས་ཀྱི་བུ་ཁྱོད་སྡུག་བསྔལ་ཞིང་ཡིད་མི་དགའ་བ་དང་། སེམས་ཁོངས་སུ་ཆུད་
དེ་ཡི་ཆད་ནས། ཅིའི་ཕྱིར་ངུ་ཞིང་འདུག་ཅེས་སྨྲས་པ་དང་། དེས་དེ་ལ་བདག་ནི་བདག་གི་ལུས་འཚོང་ན། དེ་ཉོ་བ་ཡང་མེད་དོ་ཞེས་སྨྲས་སོ། །བརྒྱ་བྱིན་ཁྱེའུའི་ལུས་སུ་བསྒྱུར་བས་སྨྲས་པ་རིགས་ཀྱི་བུ་ཁྱོད་ཅིའི་ཕྱིར་བདག་གི་ལུས་འཚོང་། རྟག་
པར་རབ་ཏུ་ངུ་བས་སྨྲས་པ། ཤེས་རབ་ཀྱི་ཕ་རོལ་དུ་ཕྱིན་པ་ལ་མཆོད་པ་དང་། འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་རིམ་གྲོར་བྱ་བའི་ཕྱིར་རོ། །དེ་ཡང་འདི་ལྟར་ཆོས་འདོད་པའི་ཕྱིར་ཏེ། དེ་ལ་བདག་
སངས་རྒྱས་ཀྱི་ཆོས་ཀྱི་རག་ལུས་སོ། །ཁྱེའུའི་གཟུགས་སུ་བསྒྱུར་བའི་བརྒྱ་བྱིན་གྱིས་སྨྲས་པ། རིགས་ཀྱི་བུ་བདག་ལ་མི་ནི་མི་དགོས་ཀྱི། བདག་མཆོད་སྦྱིན་ཞིག་བྱེད་པས། དེར་བདག་ལ་མིའི་སྙིང་དང་། ཁྲག་དང་རུས་པ་དང་རྐང་དག་དགོས་
སོ། །དེ་ནས་རིགས་ཀྱི་བུ་དེ་སེམས་མ་ཞུམ་པར་གྱུར་ནས། དེ་ཡང་སྦྱིན་ནོ་ཞེས་སྨྲས་ཏེ། དེ་མཚོན་རྣོན་པོ་ཞིག་ཐོགས་ཏེ། བདག་གི་དཔུང་པ་ཕུག་སྟེ་ཁྲག་ཕྱུང་བརླ་ཡང་ཤ་མེད་པར་བྱས་ནས། རྩིག་པ་ཞིག་གི་དྲུང་དུ་རུས་པ་གཅོག་ཏུ་སོང་སྟེ།
རུས་པ་དང་རྐང་སྦྱིན་ནོ་སྙམ་པ་ལས། དེ་ཁྲག་ཟག་ཅིང་འདུག་པ་བདག་གིས་ཁང་ཐོག་ནས་མཐོང་བ་དང་། དེ་ལ་བདག་འདི་སྙམ་དུ་མི་འདི་ཅི་བྱེད་པ་ཞིག། འདི་ལྟར་བདག་ལ་བདག་གནོད་པར་བྱེད་སྙམ་ནས། དེའི་དྲུང་དུ་བདག་མཆིས་ཏེ་འདི་སྐད་

སྨྲས་སོ། རིགས་ཀྱི་བུ་ཁྱོད་ཅིའི་ཕྱིར་བདག་ལ་བདག་ཁྲག་འབྱིན། དེ་ནས་རིགས་ཀྱི་བུ་དེས་བདག་ལ་འདི་སྐད་སྨྲས་སོ། །བྲམ་ཟེའི་ཁྱེའུ་འདི་ལ་ཁྲག་དང་སྙིང་དང་རུས་པ་དང་རྐང་སྦྱིན་ནོ། །དེ་ཅིའི་ཕྱིར་ཞེ་ན། བདག་ནི་དབུལ་བས་ནོར་གཞན་ཅུང་ཟད་ཀྱང་
མེད་དོ། །དེ་ལ་བདག་གིས་འདི་སྐད་སྨྲས་སོ། །ནོར་དེས་ཁྱོད་ལ་ཅི་ཞིག་བྱ། དེས་བདག་ལ་འདི་སྐད་སྨྲས་སོ། །ཤེས་རབ་ཀྱི་ཕ་རོལ་དུ་ཕྱིན་པ་ལ་མཆོད་ཅིང་ཆོས་འདོད་པའི་ཕྱིར། འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་
ཀྱིས་འཕགས་པ་ལ་རིམ་གྲོར་བྱའོ། །དེ་ལ་བདག་གིས་འདི་སྐད་སྨྲས་སོ། །རིགས་ཀྱི་བུ་ཁྱོད་དེ་ལས་ཡོན་ཏན་གྱི་རིགས་དང་། ཡོན་ཏན་གྱི་བྱེ་བྲག་ཅི་ཞིག་འབྱུང་། དེས་བདག་ལ་འདི་སྐད་སྨྲས་སོ། །དེ་ནི་བདག་ལ་སངས་རྒྱས་ཀྱི་ཆོས་དང་སངས་
རྒྱས་ཀྱི་ཡོན་ཏན་བསམ་གྱིས་མི་ཁྱབ་པ་རབ་ཏུ་སྟོན་པར་འགྱུར་ཞིང་། དེ་བཞིན་གཤེགས་པའི་ཆོས་དཔག་ཏུ་མེད་པ་མི་འཕྲོགས་པ་དེ་ལྟ་བུའི་ཆོས་རྣམས་དེ་ལས་ཐོབ་པར་འགྱུར་རོ། །དེ་བདག་གིས་ཐོབ་པ་དང་། དགའ་ཞིང་མགུ་བ་ཆེན་པོ་སྐྱེས་ཤིང་།
སངས་རྒྱས་ཀྱི་ཆོས་བསམ་གྱིས་མི་ཁྱབ་པ་དེ་དག་ཐོས་པ་དང་བདག་འདི་སྙམ་དུ་གྱུར་ཏོ། །གང་འདི་ལྟ་བུ་དག་བྱེད་ནུས་པ་ནི། རིགས་ཀྱི་བུ་འདི་དཀའ་བ་སྤྱོད་པ་སྟེ་ངོ་མཚར་ཆེའོ། །རིགས་ཀྱི་བུ་འདི་ནི་ཆོས་འདོད་པའི་ཕྱིར་བདག་གིས་ལུས་ཡོངས་སུ་
གཏོང་ན། བདག་ཅག་གིས་ཅིའི་ཕྱིར་ཆོས་འདི་མཆོད་པར་མི་བྱ་འདི་ལྟ་བུ་དག་གི་གནས་སུ་ཅིའི་ཕྱིར་སྨོན་ལམ་མི་གདབ། བདག་ཅག་ལ་ལོངས་སྤྱོད་རྒྱ་ཆེན་པོ་རབ་ཏུ་མང་དུ་ཡོད་དོ་སྙམ་ནས། བདག་གིས་རིགས་ཀྱི་བུ་འདི་ལ་འདི་སྐད་སྨྲས་སོ། །
རིགས་ཀྱི་བུ་ཁྱོད་བདག་ལ་གནོད་པ་འདི་ལྟ་བུ་མ་བྱེད་ཅིག། བདག་གིས་ནོར་མང་པོ་ཕ་མ་ལས་བསླངས་ཏེ་སྦྱིན་ནོ། །དེས་ཁྱོད་ཤེས་རབ་ཀྱི་ཕ་རོལ་ཏུ་ཕྱིན་པ་དང་། འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་

རིམ་གྲོ་བྱོས་ཤིག། བདག་ཀྱང་ཁྱོད་དང་ལྷན་ཅིག་ཏུ། འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་གང་ན་བ་དེར་སོང་སྟེ། བདག་གིས་ཀྱང་རིགས་ཀྱི་བུ་དེ་ལ་མཆོད་པ་བྱའོ། །བདག་ཀྱང་
འདི་ལྟར་སངས་རྒྱས་ཀྱི་ཆོས་བླ་ན་མེད་པ་ཐམས་ཅད་མཁྱེན་པའི་བར་དུ་གང་ཁྱོད་ཀྱིས་བཤད་པ་དེ་ལྟ་བུའི་སངས་རྒྱས་ཀྱི་ཆོས་རྣམས་ཡོངས་སུ་རྫོགས་པར་བྱའོ་ཞེས་སྨྲས་སོ། །དེ་བས་ན་ཡབ་ཡུམ་ནོར་མང་པོ་ཕལ་ཆེར་བདག་ལ་སྩལ་ཏེ། བདག་རིགས་
ཀྱི་བུ་འདི་དང་ལྷན་ཅིག་ཏུ་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་མཆོད་པ་བགྱིད་དུ་མཆི་བར་ཅི་གནང་།། །།ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་ཉི་ཤུ་
ལྔ་པ། བམ་པོ་བདུན་ཅུ་བརྒྱད་པ། དེ་ནས་བུ་མོ་དེའི་ཕ་མ་གཉིས་ཀྱིས་བུ་མོ་དེ་ལ་འདི་སྐད་སྨྲས་སོ། །བུ་མོ་ཁྱོད་ཀྱིས་རིགས་ཀྱི་བུ་དེའི་གཏམ་བྱས་པ་ནི་རབ་ཏུ་དཀའོ། །འཇིག་རྟེན་ཐམས་ཅད་ལས་འཕགས་པ་སེམས་ཅན་ཐམས་ཅད་
བདེ་བར་བྱེད་པའི་ཆོས་གང་གི་ཕྱིར་རིགས་ཀྱི་བུ་དེ་འདི་ལྟ་བུའི་དཀའ་བ་ཉམས་སུ་ལེན་པའི་ཆོས་དེ་དག་ཀྱང་ཤིན་ཏུ་བསམ་གྱིས་མི་ཁྱབ་བོ། །དེ་བས་ན་བུ་མོ་ཁྱོད་ངེད་ཀྱིས་གནང་ངོ་། །ངེད་ཀྱང་ཁྱོད་དང་ལྷན་ཅིག་ཏུ་འཕགས་པ་བྱང་ཆུབ་སེམས་དཔའ་སེམས་
དཔའ་ཆེན་པོ་ཆོས་ཀྱིས་འཕགས་པ་དེ་བལྟ་བ་དང་། མཆོད་པ་བྱེད་དུ་འདོང་གིས་སྐབས་བྱིན་ཅིག། དེ་ནས་བུ་མོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་མཆོད་པ་དང་། བཀུར་སྟིར་བྱེད་དུ་འདོང་འདོད་པའི་ཕ་མ་གཉིས་
ལ་འདི་སྐད་སྨྲས་སོ། །བདག་ནི་སུ་ལ་ཡང་དགེ་བའི་བར་ཆད་མི་བགྱིད་དོ། །དེ་ནས་ཚོང་དཔོན་གྱི་བུ་མོ་དེ་དང་དེའི་ཕ་མ་ལ་སྩོགས་པས་ཤིང་རྟ་ལྔ་བརྒྱ་བརྒྱན། བུ་མོ་ལྔ་བརྒྱ་པོ་དེ་ཡང་བརྒྱན་ནས། མེ་ཏོག་སྣ་ཚོགས་རྣམས་ཐོགས། གོས་རྣམ་པ་སྣ་

ཚོགས་དང་། བདུག་པ་དང་། སྤོས་དང་ཕྲེང་བ་དང་བྱུག་པ་དང་ཕྱེ་མ་དང་ཆོས་གོས་དང་གདུགས་དང་རྒྱལ་མཚན་དང་བ་དན་རྣམས་ཐོགས། གསེར་གྱི་མེ་ཏོག་དང་། དངུལ་གྱི་མེ་ཏོག་རྣམས་ཐོགས། རིན་པོ་ཆེ་རྣམ་པ་སྣ་ཚོགས་དང་། གསེར་དང་
ནོར་བུ་དང་མུ་ཏིག་དང་། བཻ་ཌཱུརྱ་དང་། དུང་དང་ཤེལ་དང་བྱི་རུ་རྣམས་ཐོགས། བཟའ་བ་དང་། བཅའ་བ་དང་། བཏུང་བ་མང་པོ་ཐོགས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་དང་ལྷན་ཅིག་ཏུ་ཤིང་རྟ་གཅིག་
ལ་ཞོན། བུ་མོ་ལྔ་བརྒྱ་པོ་དེ་དག་ཀྱང་ཤིང་རྟ་ལྔ་བརྒྱ་ལ་ཞོན་པས་ཡོངས་སུ་བསྐོར། མདུན་དུ་བྱས་ནས་འཁོར་མང་པོ་དང་ལྷན་ཅིག་ཏུ་ཤར་ཕྱོགས་ཀྱི་ཕྱོགས་གང་ན་བ་དེར་ལོགས་སུ་དོང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་
མཐར་གྱིས་སོང་སོང་ན། རྒྱང་རིང་པོ་ཞིག་ནས་སྤོས་ཅན་གྱི་གྲོང་ཁྱེར་རིན་པོ་ཆེ་སྣ་བདུན་ལས་བྱས་པ་མཛེས་ཤིང་ལྟ་ན་སྡུག་པ། རིན་པོ་ཆེ་སྣ་བདུན་ལས་བྱས་པའི་ར་བ་བདུན་གྱིས་བསྐོར་བ། རྟ་བབས་བདུན་དང་ལྡན་པ། འོབས་བདུན་དང་།
ཤིང་རྟ་ལའི་ཕྲེང་བ་བདུན་གྱིས་བསྐོར་བ། ཆུར་དཔག་ཚད་བཅུ་གཉིས་ཡོད་པ། ཞེང་དུ་ཡང་དཔག་ཚད་བཅུ་གཉིས་ཡོད་པ། ཕྱུག་ཅིང་དར་བ། བདེ་ཞིང་སྐྱིད་པ། མི་མང་པོས་རྒྱས་པ། ཚོང་འདུས་ཀྱི་སྲང་རི་མོ་ལ་བྲིས་པ་ལྟ་བུ་ལྔ་བརྒྱ་
དང་ལྡན་པ། བཞོན་པ་ལྷན་ཅིག་ཏུ་གཤིབས་ཏེ་འགྲོ་བའི་ཟམ་པ་དང་བཅས་པ་དེ་ལྟ་བུ་མཐོང་ངོ་། །ལམ་གྱི་མདོའི་དབུས་ན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ཆོས་ཀྱི་སྟན་གྱི་སྟེང་ན། འཁོར་བརྒྱ་སྟོང་དུ་མས་ཡོངས་
སུ་བསྐོར་ཅིང་མདུན་དུ་བྱས་ནས་ཆོས་འཆད་ཅིང་འདུག་པ་མཐོང་ངོ་། །དེས་མཐོང་མ་ཐག་ཏུ་འདི་ལྟ་བུའི་བདེ་བ་ཐོབ་པ་ནི་དཔེར་ན། བསམ་གཏན་དང་པོ་ལ་མཉམ་པར་བཞུགས་པའི་དགེ་སློང་སེམས་རྩེ་གཅིག་ཏུ་བཞག་པ་དེ་ལྟ་བུའི་བདེ་བ་ཐོབ་པར་གྱུར་ཏོ། །

མཐོང་ནས་ཀྱང་འདི་སྙམ་དུ་བདག་ཤིང་རྟ་ལ་ཞོན་བཞིན་དུ་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པའི་དྲུང་དུ་འགྲོ་བ་མི་རིགས་སོ་སྙམ་དུ་བསམས་ནས། དེ་ཤིང་རྟ་ལས་བབས་སོ། །
ཚོང་དཔོན་གྱི་བུ་མོ་ལ་སྩོགས་པ་བུ་མོ་ལྔ་བརྒྱ་པོ་དེ་དག་ཀྱང་ཤིང་རྟ་དེ་དག་ལས་བབས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་དེ་ཚོང་དཔོན་གྱི་བུ་མོ་ལ་སྩོགས་པ་བུ་མོ་ལྔ་བརྒྱས་ཡོངས་སུ་བསྐོར། མདུན་དུ་
བྱས་ནས་དཔག་ཏུ་མེད་པའི་རྒྱན་རྣམས་ཐོགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་གང་ན་བ་དེར་སོང་ངོ་། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པས་ཤེས་རབ་ཀྱི་
ཕ་རོལ་དུ་ཕྱིན་པའི་ཁང་པ་རྩེག་མ་རིན་པོ་ཆེ་སྣ་བདུན་ལས་བྱས་པ་ཞིག་བྱས་ཏེ། ཙན་དན་དམར་པོས་བརྒྱན་པ། མུ་ཏིག་གི་དྲ་བ་བྲེས་པ། རྩེག་ཁང་གི་གྲུ་བཞིར་མེ་མར་གྱིས་སྣང་བ་བྱ་བའི་ཕྱིར། ནོར་བུ་རིན་པོ་ཆེ་འོད་གསལ་བ་རྣམས་བཀོད་དོ། །
དངུལ་གྱི་པོག་ཕོར་བཞི་ཡང་བར་སྣང་ལས་འཕྱང་དུ་བཅུག་སྟེ། དེ་ན་ཨ་ཀ་རུ་ནག་པོ་གཙང་མའི་བདུག་པ་རྣམས་འཐུལ་བ་ནི་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ལ་མཆོད་པའི་ཕྱིར་རོ། །རྩེག་ཁང་དེའི་ནང་ན་རིན་པོ་ཆེ་སྣ་བདུན་ལས་བྱས་པའི་ཁྲི་བཞག་སྟེ།
དེའི་སྟེང་དུ་རིན་པོ་ཆེའི་སྒྲོམ་བཞི་བཞག་གོ །དེའི་ནང་ན་ཤེས་རབ་ཀྱི་ཕ་རོལ་དུ་ཕྱིན་པ་གསེར་གྱི་གླེགས་བམ་ལ་བཻ་ཌཱུརྱ་མཐིང་ཀ་ཞུན་མས་བྲིས་པ་བཞུགས་སོ། །རྩེག་ཁང་དེ་ཡང་མེ་ཏོག་དང་དར་སྣ་ཚོགས་ཀྱི་ཕྲེང་བ་རྣམས་ཀྱིས་སྤྱངས་པས་རབ་ཏུ་བརྒྱན་
ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་དེ། ཚོང་དཔོན་གྱི་བུ་མོ་ལ་སྩོགས་པ་བུ་མོ་ལྔ་བརྒྱ་དང་བཅས་པས་ཁང་པ་རྩེག་མ་དེ་དཔག་ཏུ་མེད་པའི་རྒྱན་གྱིས་བརྒྱན་པ་མཐོང་ངོ་། །ལྷ་སྟོང་ཕྲག་དུ་མ་རྣམས་ཀྱང་མཐོང་།

ལྷའི་དབང་པོ་བརྒྱ་བྱིན་ཡང་ལྷའི་མེ་ཏོག་མན་དཱ་ར་བ་དང་། ལྷའི་ཙན་དན་གྱི་ཕྱེ་མ་དང་། ལྷའི་གསེར་གྱི་ཕྱེ་མ་དང་། ལྷའི་དངུལ་གྱི་ཕྱེ་མས་ཁང་པ་རྩེག་མ་དེ་དག་ལ་ཀུན་དུ་མཐོར། མངོན་པར་འཐོར། རབ་ཏུ་མངོན་པར་འཐོར་བ་དང་། ལྷའི་
སིལ་སྙན་དག་སྒྲོག་པ་ཐོས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བས། ལྷའི་དབང་པོ་བརྒྱ་བྱིན་ལ་འདི་སྐད་སྨྲས་སོ། །ལྷའི་དབང་པོ་ཁྱོད་ཅིའི་ཕྱིར་ལྷ་སྟོང་ཕྲག་དུ་མ་དང་། ལྷན་ཅིག་ཏུ་རིན་པོ་ཆེའི་ཁང་པ་རྩེག་མ་འདི་
ལ། མེ་ཏོག་མན་དཱ་ར་བ་དང་། ཙན་དན་གྱི་ཕྱེ་མ་ལ་སྩོགས་པས་འཐོར། མངོན་པར་འཐོར། ལྷའི་སིལ་སྙན་འདི་དག་ཀྱང་བར་སྣང་ལས་ལྷ་རྣམས་ཅིའི་ཕྱིར་སྒྲོགས། དེ་སྐད་སྨྲས་པ་དང་། ལྷའི་དབང་པོ་བརྒྱ་བྱིན་གྱིས། བྱང་ཆུབ་
སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་ལ་འདི་སྐད་སྨྲས་སོ། །རིགས་ཀྱི་བུ་ཁྱོད་མི་ཤེས་སམ། འདི་ནི་ཤེས་རབ་ཀྱི་ཕ་རོལ་དུ་ཕྱིན་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཅེས་པའི་ཡུམ། སྐྱེད་པར་
མཛད་པ་བསྐྲུན་པ། གཙོ་མོ་ཡིན་ཏེ་གང་ལ་བསླབས་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡོན་ཏན་ཐམས་ཅད་ཀྱི་ཕ་རོལ་དུ་ཕྱིན་པ་དང་། སངས་རྒྱས་ཀྱི་ཆོས་ཐམས་ཅད་དང་། ཐམས་ཅད་མཁྱེན་པ་ཉིད་ཐོབ་པར་
འགྱུར་བའོ། །དེ་སྐད་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བས། ལྷའི་དབང་པོ་བརྒྱ་བྱིན་ལ་འདི་སྐད་སྨྲས་སོ། །ཀཽ་ཤི་ཀ་ཤེས་རབ་ཀྱི་ཕ་རོལ་དུ་ཕྱིན་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ཀྱི་གཅེས་པའི་ཡུམ་སྐྱེད་པར་མཛད་པ་སྐྲུན་པའི་གཙོ་མོ་དེ་གང་ན་བཞུགས། བརྒྱ་བྱིན་གྱིས་སྨྲས་པ། འོ་ན་ལྟ་ཁང་པ་རྩེག་མའི་ནང་ན། གསེར་གྱི་གླེགས་བམ་ལ་བཻ་ཌཱུརྱ་མཐིང་ཀ་ཞུན་མས་བྲིས་པ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་

ཀྱིས་འཕགས་པས། རྒྱ་བདུན་གྱིས་བཏབ་སྟེ་བཞག་པས། དེ་བདག་ཅག་གིས་ཁྱེད་ལ་བསྟན་དུ་མི་རུང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ། ཚོང་དཔོན་གྱི་བུ་མོ་ལ་སོགས་
པ། བུ་མོ་ལྔ་བརྒྱ་དང་ལྷན་ཅིག་ཏུ་ཚོགས་པས། མེ་ཏོག་དང་ཕྲེང་བ་དང་། གོས་དང་རིན་པོ་ཆེ་དང་བདུག་པ་དང་། སྤོས་དང་བྱུག་པ་དང་། ཕྱེ་མ་དང་ཆོས་གོས་དང་། གདུགས་དང་། རྒྱལ་མཚན་དང་། བ་དན་དང་། གསེར་དང་། དངུལ་
གྱི་མེ་ཏོག་བདག་ཅག་གིས་ཁྱེར་ཏེ་འོངས་པ་དེ་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཆོད་པ་བྱས་ཏེ། དེ་དག་ལས་ཁ་ཅིག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་མཆོད་པའི་ཕྱིར་བཞག་གོ །དེ་ནས་བྱང་
ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བས། མེ་ཏོག་དང་བདུག་པ་དང་སྤོས་དང་ཕྲེང་བ་དང་། བྱུག་པ་དང་། ཕྱེ་མ་དང་གོས་དང་། གདུགས་དང་། རྒྱལ་མཚན་དང་། བ་དན་དང་། སིལ་སྙན་རྣམ་པ་སྣ་ཚོགས་ཀྱིས་ཤེས་རབ་
ཀྱི་ཕ་རོལ་ཏུ་ཕྱིན་པ་སྔར་མཆོད་པ་བྱས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་གང་ན་བ་དེར་སོང་ངོ་། །སོང་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་མེ་ཏོག་དང་། བདུག་པ་དང་།
སྤོས་དང་། ཕྲེང་བ་དང་བྱུག་པ་དང་ཕྱེ་མ་དང་། གོས་དང་གདུགས་དང་རྒྱལ་མཚན་དང་། བ་དན་དང་ཙན་དན་གྱི་ཕྱེ་མ་དང་། གསེར་དང་དངུལ་གྱི་མེ་ཏོག་རྣམས་ཀྱིས་ཆོས་ལ་མཆོད་པ་ཉིད་ཀྱི་ཕྱིར་ཀུན་ཏུ་གཏོར། མངོན་པར་གཏོར། རབ་ཏུ་མངོན་
པར་གཏོར་ཏོ། །དེ་ནས་མེ་ཏོག་དེ་དག་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པའི་སྟེང་དུ་མེ་ཏོག་གི་རྩེག་ཁང་དུ་གནས་པར་གྱུར་ཏོ། །གསེར་དང་དངུལ་གྱི་མེ་ཏོག་ཁ་དོག་སྣ་ཚོགས་པ་དེ་དག་ཀྱང་ནམ་མཁའ་ལ་གཞལ་ཡས་ཁང་དུ་གནས་

པར་གྱུར་ཏོ། །ཆོས་གོས་དང་། གོས་རིན་པོ་ཆེ་དེ་དག་ཀྱང་བར་སྣང་ལ་རིན་པོ་ཆེ་སྣ་ཚོགས་ཀྱི་སྤྲིན་ལྟ་བུར་གནས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་དང་། ཚོང་དཔོན་གྱི་བུ་མོ་ལ་སོགས་པ་བུ་མོ་ལྔ་བརྒྱ་པོ་དེ་
དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པའི་རྫུ་འཕྲུལ་དང་། ཆོ་འཕྲུལ་དེ་ལྟ་བུ་མཐོང་ནས་འདི་སྙམ་དུ་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་འདི་དེ་ལྟར་རྫུ་འཕྲུལ་ཆེ་བ་དང་། དེ་ལྟར་
མཐུ་ཆེ་བ་དང་། དེ་ལྟར་གཟི་བརྗིད་ཆེ་བ་ངོ་མཚར་ཆེའོ། །རིགས་ཀྱི་བུ་འདི་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་། དེ་ལྟ་བུའི་རྫུ་འཕྲུལ་དག་རྣམ་པར་སྤྲུལ་ན། ནམ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་པར་གྱུར་ན།
ལྟ་སྨོས་ཀྱང་ཅི་དགོས། དེ་ནས་ཚོང་དཔོན་གྱི་བུ་མོ་ལ་སོགས་པ་བུ་མོ་ལྔ་བརྒྱ་པོ་དེ་དག་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་དགའ་བ་དང་། གུས་པ་སྐྱེས་ནས་དེ་དག་ཐམས་ཅད་ཀྱིས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་སེམས་བསྐྱེད་ནས། བདག་ཅག་དགེ་བའི་རྩ་བ་འདིས་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་གྱུར་ཅིག། བདག་ཅག་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་ཆོས་གང་བྱང་ཆུབ་སེམས་
དཔའ་སེམས་དཔའ་ཆེན་པོ་ཆོས་ཀྱིས་འཕགས་པས་ཐོབ་པའི་ཆོས་དེ་དག་ཉིད་ཐོབ་པར་གྱུར་ཅིག། འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་དེ་ཇི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ལ་བཀུར་བསྟི་བྱེད་པ་དེ་ལྟར་བདག་ཅག་ཀྱང་
ཤེས་རབ་ཀྱི་ཕ་རོལ་དུ་ཕྱིན་པ་ལ་བཀུར་བསྟི་བྱེད་པར་གྱུར་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་འདི་ཇི་ལྟར་འགྲོ་བ་མང་པོ་ལ་རབ་ཏུ་སྟོན་པ་དེ་ལྟར་བདག་ཅག་ཀྱང་འགྲོ་བ་མང་པོ་ལ་རབ་ཏུ་སྟོན་པར་གྱུར་ཅིག །འཕགས་པ་བྱང་ཆུབ་

སེམས་དཔའ་སེམས་དཔའ་ཆེན་པོ་འདི་ཤེས་རབ་ཀྱི་ཕ་རོལ་དུ་ཕྱིན་པ་ལ་ཐབས་མཁས་པ་དང་ལྡན་ཞིང་ཡོངས་སུ་རྫོགས་པར་གྱུར་པ་དེ་བཞིན་དུ་བདག་ཅག་ཀྱང་ཐབས་མཁས་པ་དང་ལྡན་ཞིང་ཡོངས་སུ་རྫོགས་པར་གྱུར་ཅིག་ཅེས་དེ་ལྟ་བུའི་
སྨོན་ལམ་དག་ཀྱང་བཏབ་བོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བ་དང་། ཚོང་དཔོན་གྱི་བུ་མོ་ལ་སོགས་པ་བུ་མོ་ལྔ་བརྒྱ་པོ་དེ་དག་གིས། ཤེས་རབ་ཀྱི་ཕ་རོལ་དུ་ཕྱིན་པ་ལ་མཆོད་པ་བྱས། བྱང་ཆུབ་སེམས་
དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་ཡང་བཀུར་བསྟི་བྱས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། རྗེ་ས་དང་བཅས་རིམ་གྲོ་དང་བཅས། ཐལ་མོ་སྦྱར་ནས་
ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རབ་ཏུ་ངུ་བས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱིས་འཕགས་པ་ལ་འདི་སྐད་སྨྲས་སོ། །རིགས་ཀྱི་བུ་བདག་ཤེས་རབ་ཀྱི་ཕ་
རོལ་དུ་ཕྱིན་པ་ཚོལ་བ་ན། དགོན་པ་ཞིག་ནས་སྒྲ་ཐོས་པ། རིགས་ཀྱི་བུ་ཤར་ཕྱོགས་སུ་སོང་ཤིག་དང་། དེ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ཐོས་པར་འགྱུར་རོ་ཞེས་ཟེར་རོ། །དེ་ནས་བདག་གིས་སྒྲ་དེ་ཐོས་པ་དང་། ཤ