Phạn tạng Tự Sinh (Svayambhūpurāṇa)

tathā sarve mithyārthasādhanodyatāḥ /
satyadharma pratikṣipya ceruḥ kleśābhimānitāḥ // SvayambhuP_8.26 //
śilpino 'pi tathā sarve kavalabhṛtilālasāḥ /
avidhijñāḥ pramādāndhāścakruḥ karmma yaṃthecchayā // SvayambhuP_8.27 //
tathā nārījanāścāpi kāmakleśāḥ kulāśayāḥ /
svakuladharmamṛtsṛjya prācaranta yathepsitaṃ // SvayambhuP_8.28 //
evaṃ sarve 'pi lokāśca daśākuśalasaṃratāḥ /
svakulācāramutsṛjya prācaranta yathecchayā // SvayambhuP_8.29 //
tīrthikāścāpi ye duṣṭāste dṛṣṭvaivaṃ jinālayaṃ /
ninditvā paribhāṣantaḥ prācaranta yathecchayā // SvayambhuP_8.30 //
tadātra vahavo duṣṭā caurā dhūrttāḥ pragalbhikāḥ /
sādhujanāḥ pratikṣipya ceru mattadvīpā iva // SvayambhuP_8.31 //
sādhavaḥ sajjanāścāpi nīcakarmānucāriṇaḥ /
saddharmmaviratotsāhāśceru bhuktvaiva nīcavat // SvayambhuP_8.32 //
tadaivaṃ pāpasaṃcārāt sarvatrāpyacarat kaliḥ /
saddharmmo durvalī bhūto nīcavadvilayaṃ yayau // SvayambhuP_8.33 //
tadātra pravarībhūte kalisaṃcāra varttate /
dṛṣṭvā lokādhipāḥ sarve bhavanruṣṭaparānmukhāḥ // SvayambhuP_8.34 //
tato 'tra vimukhībhūya sarvalokādhipā api /
dhignṛpamiti bā danto draṣṭumapi na cecchire // SvayambhuP_8.35 //
tadātra lokapālānāṃ sudṛṣṭiviratotsave /
ītayaḥ samupākramya prāvarttitumupācarat // SvayambhuP_8.36 //
tato devā api krūrā ye duṣṭā mārapākṣikāḥ /
sarve tatra rūpālokya mahotpātaṃ pracakrire // SvayambhuP_8.37 //
vahnirapi tathālokya duṣṭavat kopitāśayaḥ /
dhūmākulārciṣā dagdhā mahotpātaṃ vyadhādiha // SvayambhuP_8.38 //
dharmarājāpi ruṣṭābhūn nirdayāṃ nirujānapi /
nihantuṃ prāṇinaḥ sarvān mahāmārīmacārayat // SvayambhuP_8.39 //
naiṛtyā rākṣasendro 'pi prakopitātinirdayaḥ /
sarvatrāpi praviṣṭo 'tra mahotpātaṃ vyadhātsadā // SvayambhuP_8.40 //
varuṇo nāgarājāpi praduṣṭaḥ krūracakṣuṣā //
dṛṣṭvā vārivahān meghān sarvān vṛṣṭiṃ nyavārayet // SvayambhuP_8.41 //
maruto 'pi tathālokya praruṣṭā nirdayā sthitāḥ /
asādhyaṃ pracarantātra mahotpātaṃ pracakrire // SvayambhuP_8.42 //
tathā yakṣāśca ye duṣṭāḥ kinnarā guhyakā api /
gṛhe gṛhe praviśyāpi rogotpātaṃ pracakrire // SvayambhuP_8.43 //
tathā bhūtāḥ piśācāśca vetālāḥ kaṭapūṭināḥ /
ḍākiṇyaḥ pramathāścāpi śākinyaḥ sagaṇā api // SvayambhuP_8.44 //
rudrā api sagandharvā kumbhāṇḍā garuḍā api /
sarvatra pracaranto 'tra mahotpātaṃ pracakrire // SvayambhuP_8.45 //
mātṛkā api sarvāśca sagaṇā aprasāditāḥ /
suduṣṭavālokya sarvān stān drakṣituṃ na samāhire // SvayambhuP_8.46 //
grahāstārāgaṇāḥ sarve viruddhā aprasāditāḥ /
anusaṃdarśanaṃ vāpi kartu naivāvavāṃñchire // SvayambhuP_8.47 //
kuleśā api sarvāśca devatā aprasāditāḥ /
saṃtrāta samarthāstān paśyaṃtya eva tasthire // SvayambhuP_8.48 //
evamanyepi devāśca sarvatrāṇaparāṅmukhāḥ /
teṣāṃ saṃdarśanaṃ kartumapi naiva vāṃchire // SvayambhuP_8.49 //
teṣāṃ trātuṃ tadekāpi na śaśāka kathaṃcana /
evamatra mahotpātaṃ prāvarttata samantataḥ // SvayambhuP_8.50 //
evamatra mahotpātaṃ prarvarttate 'pi sarvataḥ /
sarvakleśā hatātmānaḥ pracakru vigrahaṃ mithaḥ // SvayambhuP_8.51 //
tadevaṃ kalisaṃraktān sarvān lokān vilokya saḥ /
nṛpatiḥ suciraṃ dhyātvā manasaivaṃ vyacintayat // SvayambhuP_8.52 //
hā kaṣṭaṃ pāpajaṃ dhoraṃ jāyate 'trādhunā mama /
tatpāpaśamanāyāyaṃ ko dadhānmahitāśayaḥ // SvayambhuP_8.53 //
kathamiha mahadduḥkhaṃ śamīkarttuṃ vidhāsyate /
paśyannevamupekṣyaiva rameyaṃ sāmprataṃ ca kiṃ // SvayambhuP_8.54 //
yo hi rājā prajāduḥkhamupekṣya ramate sukhaṃ /
sa kiṃ rājā prabhurbhattāṃ duṣṭāhivadvigarhyate // SvayambhuP_8.55 //
yatra rājā prajāduḥkhamupekṣya na vicārayet /
svayameva sukhaṃ bhuktvāramaṃścareyathecchayā // SvayambhuP_8.56 //
tatra sarvaprajā lokāḥ kleśavyākulamānasāḥ /
satyadharmakulācāraṃ hitvā careyurauddhaṭāḥ // SvayambhuP_8.57 //
tataste duritāraktā daśakuśalacāriṇaḥ /
mahāpāpe 'pi nirlajjāḥ saṃcareran yathecchayā // SvayambhuP_8.58 //
etat sarva mahatpātaṃ rbhujīyānnṛpatirdhruvaṃ /
iti satyaṃ samākhyātaṃ nītivijñairmaharṣibhiḥ // SvayambhuP_8.59 //
ityetatpāpavaipākyaṃ bhoktavyaṃ hi mayā bhava /
tadatra kiṃ kariṣyāmi yadupāyaṃ na manyate // SvayambhuP_8.60 //
dhig janma me 'tra saṃsāre yasya rājye sadā kaliḥ /
durbhikṣādi mahātpātaṃ pravarttate divāniśaṃ // SvayambhuP_8.61 //
dhanyāste puruṣā ye hi niḥkleśā vimalāśayā /
vimukta bhava saṃcārā bhikṣavo brahmacāriṇaḥ // SvayambhuP_8.62 //
kiṃ me 'tra janma saṃsāre sukulamapi prabhornṛṇāṃ /
yadahaṃ paśuvad bhuktvā kāmameva rame gṛhe // SvayambhuP_8.63 //
tadetatapāpalipto 'haṃ kleśavyākulamānasaḥ /
narakeṣu bhraman duḥkhaṃ bhuṃjīyāṃ vividhaṃ sadā // SvayambhuP_8.64 //
tadā ko me suhṛt mitraṃ saṃrakṣitumupācarat /
dharmameva tadā trāṇaṃ sarvaduḥkhāpahaṃ bhave // SvayambhuP_8.65 //
dharmāṇāṃ pravaraṃ bauddhaṃ dharmaṃ sarvabhayāpahaṃ /
sarvārthasādhanaṃ siddhamityākhyātaṃ jagaddhitaṃ // SvayambhuP_8.66 //
ityahaṃ sāmprataṃ gatvā gośṛṅge parvate sthitaṃ /
śāntaśriyaṃ mahācāryaṃ prārthayeyaṃ samādarāt // SvayambhuP_8.67 //
sa eva hi mahācārya etadutpātaśāntaye /
vidhānaṃ samupādiśya kuryānme 'tra hitaṃ sadā // SvayambhuP_8.68 //
iti niścitya bhūpālaḥ purohitaṃ samantriṇaḥ /
mahājanāna sapaurāṃśca samāmantrayaivamādiśat // SvayambhuP_8.69 //
bho bhavanto yadatraivaṃ mahotpātaṃ pravarttate /
tacchāntikaraṇaṃ dharmaṃ karttumicchāmi sāṃprataṃ // SvayambhuP_8.70 //
tadācārya mahābhijñaṃ śāntiśriyaṃ samādarāt /
prārthayitvā tadā deśād dharttumicchāmi sadṛśaṃ // SvayambhuP_8.71 //
iti sarve vayaṃ tatra gośṛṅge 'gre samādarāt /
śāntaśriyaṃ mahācārya saṃprārthituṃ vajrāvahai // SvayambhuP_8.72 //
ityādiṣṭaṃ narendraṇa śrutvā purohitādayaḥ /
sarve tatheti vijñapya prābhyanandan prabodhitāḥ // SvayambhuP_8.73 //
tataḥ sa nṛpatī rājā samantrijanapaurikāḥ /
purohitaṃ purodhāya gośṛṅge 'gre mudācarat // SvayambhuP_8.74 //
tatra dṛṣṭvā tamācārya nṛpatiḥ saṃpramoditaḥ /
sametya sāñjalirnatvā pādābje samupāśrayat // SvayambhuP_8.75 //
tathā sarve 'pi lokāśca samīkṣyenaṃ prasāditāḥ /
sametya pādayornatvā samupatasthire mudā // SvayambhuP_8.76 //
tān sarvān samupāsīnān samīkṣya sa mahāmatiḥ /
śāntaśrīstaṃ mahīpālaṃ sampaśyannevamādiśat // SvayambhuP_8.77 //
rājan sadāstu vo bhadraṃ sarvatrāpi nirantaraṃ /
kimarthamiha prāyāsi tat me 'gre vaktuṃmarhasi // SvayambhuP_8.78 //
iti śāntaśriyā prokte nṛpatiḥ sa kṛtāñjaliḥ /
praṇatvā taṃ mahācārya paśyannevaṃ nyavedayet // SvayambhuP_8.79 //
bho śrīśāstayadarthe 'haṃ bhavaccharaṇamāvraje /
tadartha prārthayāmyatra me samupādeṣṭumarhati // SvayambhuP_8.80 //
yat me 'tra pāpato rājye mahotpātaṃ pravarttate /
tacchāntikaraṇopāyaṃ samupādeṣṭumarhati // SvayambhuP_8.81 //
iti saṃprārthite rājñā śāntaśrī mantravit sudhīḥ /
nṛpate taṃ mahāsattvaṃ samālokyaivamādiśat // SvayambhuP_8.82 //
nṛpate pāpato 'traivaṃ mahotpātaṃ pravarttate /
tatpāpaśamanopāyaṃ vakṣāmi te śṛṇuṣva tat // SvayambhuP_8.83 //
yatvamatra nṛpā rājā sarvadharmānupālakaḥ /
nītidharmmānusāreṇa saṃpālayasi na prajāḥ // SvayambhuP_8.84 //
mantriṇo 'pi tathā sarvanītidharmaparāṅmukhāḥ /
bhuktvā kāmasukhānyeva pracaranti yathecchayā // SvayambhuP_8.85 //
tathā bhṛtyā janāścāpi paurāścāpi mahājanāḥ /
svakuladharmamutsṛjya pracaranti yathecchayā // SvayambhuP_8.86 //
evaṃ sarve 'pi lokāśca daśākuśalacāriṇaḥ /
saddharmāṇi pratikṣipya pracaranti pramādataḥ // SvayambhuP_8.87 //
tadaitat pāpavaipākyaṃ bhoktavyaṃmeva hi bhava /
yenaiva yatkṛtaṃ karmma bhoktavyaṃ tena tatphalaṃ // SvayambhuP_8.88 //
evaṃ matvā nṛpaḥ svāmī svayaṃ nītyā vicārayan /
bodhayitvā prayatnena lokān saṃpālayat sadā // SvayambhuP_8.89 //
yadyatra nṛpatiḥ samyaga vicārya pramādataḥ //
svayaṃ kāmasukhānyeva bhuktvā caradyathecchayā // SvayambhuP_8.90 //
tathā sarve 'pi lokāśca nṛpacaryānucāriṇaḥ /
bhuktvā kāmasukhānyeva pracareyuryathecchayā // SvayambhuP_8.91 //
tadā tatra mahotpātaṃ pravarttat pāpato dhruvaṃ /
pravarttite mahotpāta lokā syuḥ pāpaduḥkhitāḥ // SvayambhuP_8.92 //
tatra tān nṛpatiḥ paśyannupekṣyaṃ nirdayaścarat /
lokasaṃrakṣaṇe asaktaḥ sa sarvapāpabhāg bhavet // SvayambhuP_8.93 //
sarvāṇyapi hi pāpāni sarvalokaiḥ kṛtānyapi /
patitvā nṛpateragre pradadyustatphalāni hi // SvayambhuP_8.94 //
iti satyaṃ samākhyātaṃ sarvairapi munīśvaraiḥ /
natvā rājā svayaṃ nītyā vicārayan samācaret // SvayambhuP_8.95 //
iti tena samādiṣṭaṃ śāntaśriyā sumantriṇā /
śrutvā sa nṛpatīrbhītyā saṃtāpatāpitāśayaḥ // SvayambhuP_8.96 //
śāntaśriyaṃ tamācārya samīkṣya śaraṇaṃ gataḥ /
natvā pādāmbuje bhūyaḥ prārthayadevamādarāt // SvayambhuP_8.97 //
śāstaḥ sadā cariṣyāmi bhavadājñāṃ śirāvahan /
tat me yaducitaṃ dharmma tat samādeṣṭumarhati // SvayambhuP_8.98 //
iti saṃprārthitaṃ rājñā śrutvācāryaḥ sa satmatiḥ /
nṛpatiṃ taṃ mahāsattvaṃ sampaśyannevamādiśat // SvayambhuP_8.99 //
rājañchṛṇu samādhāya vakṣyāmi śubhakāraṇaṃ /
yadyasti te kṛpā loka tat kuru yanmayoditaṃ // SvayambhuP_8.100 //
tadyathaiteṣu tīrtheṣu snātvā nityaṃ yathāvidhi /
śuciśīlasamācāraḥ samāhitaḥ trimaṇḍalaḥ // SvayambhuP_8.101 //
sambodhiṃ praṇidhānena sarvasattvahitārthabhṛt /
triratnabhajanaṃ kṛtvā carasva poṣadhaṃ vrataṃ // SvayambhuP_8.102 //
tata imaṃ jagannāthaṃ dharmadhātuṃ jinālayaṃ /
yathāvidhi samārādhya saṃbhajasva sadādarāt // SvayambhuP_8.103 //
tathā sarvā imā pañca devatāśca yathāvidhi /
samārādhya samabhyarcya saṃbhajasva sadādarāt // SvayambhuP_8.104 //
imaṃ mañjuśrīyaṃścāpi caityamārādhya sarvadā /
yathāvidhi samabhyarcya saṃbhajasva mahotsavaiḥ // SvayambhuP_8.105 //
tathāṣṭau vītarāgāṃśca samārādhya yathāvidhi /
samabhyarcya mahotsāhaiḥ saṃbhajasva sadādarāt // SvayambhuP_8.106 //
tathā māheśvarīṃ devī khagānanāṃ samādarāṃ /
samārādhya samabhyarcya saṃbhajasva yathāvidhiṃ // SvayambhuP_8.107 //
ete sarve 'pi devā hi sarvalokādhipeśvarāḥ /
sarvasattvahitārthena prādurbhūtāḥ svayaṃ khalu // SvayambhuP_8.108 //
tadatraiteṣu deveṣu sarveṣu śraddhayā sadā /
vidhinā bhajanaṃ kṛtvā saṃcarasva jagaddhite // SvayambhuP_8.109 //
lokāṃścāpi tathā sarvān bodhayitvā prayatnataḥ /
sarveṣveteṣu tīrtheṣu snānadānādikaṃ sadā // SvayambhuP_8.110 //
kārayitvā mahatpuṇyaṃ jagadbhadrasukhārthadaṃ /
saṃbuddhaguṇasatsaukhyaṃ cāraya poṣadhaṃ vrataṃ // SvayambhuP_8.111 //
eteṣāṃ ca triratnādidevānāṃ bhajanaṃ sadā /
kārayitvā mahotsāhairbodhimārge pracāraya // SvayambhuP_8.112 //
tadaitatpuṇyabhāvena sarvatrāpi caracchubhaṃ /
tadā sarvamahotpātaṃ sarvatra vilayaṃ vrajet // SvayambhuP_8.113 //
tadā brahmamarendrādyāḥ sarve lokādhipā api /
sudṛśātra samālokya pālayeyuḥ sadā mudā // SvayambhuP_8.114 //
tadā saṃpālite 'smiṃna taiḥ savairlokādhipaiḥ punaḥ /
subhikṣaṃ śrīśubhotsāhaṃ pravarttayeddhi sarvadā // SvayambhuP_8.115 //
tadā sarbe 'pi lokāśca nīrogāḥ śrīguṇāśrayāḥ /
viramya pāpamārgebhyaḥ saṃcareran sadā śubhe // SvayambhuP_8.116 //
evaṃ dhṛtvā sadā rājan mahāpuṇya prabhāvataḥ /
ante bodhiṃ samāsādya saṃbuddhapadamāpnuyuḥ // SvayambhuP_8.117 //
evaṃ mahattaraṃ puṇyaṃ triratnabhajanād bhavaṃ /
vijñāyādau triratnānāṃ bhajasva śraddhayā smaran // SvayambhuP_8.118 //
tataḥ sarveṣu tīrtheṣu snātvā śuddhendriyāśayaḥ /
triratnaṃ śaraṇaṃ gatvā bhajasva poṣadhaṃ vrataṃ // SvayambhuP_8.119 //
tataḥ sarvānimān devān dharmmadhātumukhān sadā /
yathāvidhi samārādhya saṃbhajasva samarcayan // SvayambhuP_8.120 //
lokānapi tathā sarvān bodhayitvā prayatnataḥ /
sarveṣveteṣu tīrtheṣu snāpayitvā yathāvidhiṃ // SvayambhuP_8.121 //
triratnaśaraṇe sthāpya saṃbodhijñānasādhanaṃ /
bhadśrīsatguṇādhāraṃ cāraya poṣadhaṃ vrataṃ // SvayambhuP_8.122 //
eteṣāmapi devānāṃ kārayitvā sadārcanaṃ /
bodhimārge pratiṣṭhāpya cāraya pālayañchubhe // SvayambhuP_8.123 //
evaṃ kṛtvā mahatpuṇyaṃ prāpya śrīsadguṇāśrayaḥ /
bodhisattva mahāsattva mahābhijñā bhaveddhruvaṃ // SvayambhuP_8.124 //
tataḥ saṃbodhisaṃbhāraṃ pūrayitvā yathākramaṃ /
arhan bodhiṃ samāsādya saṃbuddhapadamāpnuyāḥ // SvayambhuP_8.125 //
iti śāntaśriyā śāstā samādiṣṭaṃ niśamya saḥ /
nṛpastatheti vijñapya kartumevaṃ samaicchata // SvayambhuP_8.126 //
tataḥ sa nṛpatiḥ sarvān mantriṇassacivāñjanān /
paurān mahājanāścāpi samāmantrayaivamādiśat // SvayambhuP_8.127 //
bho mantriṇo janāḥ sarve 'mātyāḥ paurā mahājanāḥ /
ācāryena yathādiṣṭaṃ tathā caritumarhatha // SvayambhuP_8.128 //
ahamapi tathā dhṛtvā sarvadā bhadrakāraṇaṃ /
triratnaśaraṇaṃ kṛtvā vrataṃ caritumutsahe // SvayambhuP_8.129 //
ityādiṣṭaṃ narendreṇa śrutvā te mantriṇo janāḥ /
paurā mahājanāḥ sarva tatheti pratiśuśruvuḥ // SvayambhuP_8.130 //
tataḥ sa nṛpatiḥ sarveḥ sapurohitamantribhiḥ /
amātyaiḥsacivaiḥ paurairmahājanaiḥ samanvitaḥ // SvayambhuP_8.131 //
sarveṣveteṣu tīrtheṣu snātvā yathāvidhi kramāt /
śuddhaśīlaḥ samādhāya prācarat poṣadhaṃ vrataṃ // SvayambhuP_8.132 //
tatassa vimalātmāna triratnaśaraṇaṃ gatāḥ /
dharmadhātuṃ samārādhya samabhyarcyabhijanmudā // SvayambhuP_8.133 //
tathā vāyupure vāyudevatāṃśca yathāvidhi /
agnipure 'gnidevaṃ ca nāgapure phaṇeśvarān // SvayambhuP_8.134 //
vasupure vasundhārāṃ saddharmmaśrīguṇapradāṃ /
śāntapure maheśānaṃ sambaraṃ sagaṇaṃ kramāt // SvayambhuP_8.135 //
yathāvidhi samabhyarcya śraddhayā samupāśritaḥ /
tathā mañjuśrī yaścaityaṃ samabhyarcyābhajan sadā // SvayambhuP_8.136 //
tathāṣṭau vītarāgāṃśca śrīdevīṃśca khagānanāṃ /
yathāvidhi samārādhya samabhyarcyābhajat sadā // SvayambhuP_8.137 //
tathā sarve 'pi lokāste nṛpavṛttānucāriṇaḥ /
snātvā sarveṣu tīrtheṣu śuddhaśīlā samādarāt // SvayambhuP_8.138 //
triratnaśaraṇaṃ kṛtvā carantaḥ poṣadhaṃ vrataṃ /
dharmmadhātumukhān sarvān devāṃścābhyarcya prābhajan // SvayambhuP_8.139 //
tadaitatpuṇyabhāvena sarvatra śubhamācarat /
tataḥ sarva mahotpātaṃ krameṇa praśamaṃ yayau // SvayambhuP_8.140 //
tadā sarve 'pi te lokā nīrogāḥ puṣṭitendriyāḥ /
mahānandaṃ sukhaṃ prāpya babhūvu dharmmalālasāḥ // SvayambhuP_8.141 //
tad dṛṣṭvā na nṛpo rājā pratyakṣaṃ dharmasatphalaṃ /
aho saddharmamāhātmyamityuktvā nanditācarat // SvayambhuP_8.142 //
tadā suvṛṣṭirevātra na babhūva kathaṃcana /
tad dṛṣṭvā na nṛpaścāsīd durbhikṣaśaṃkitāśayaḥ // SvayambhuP_8.143 //
tataḥ sa karuṇāviṣṭahṛdayaḥ sa nṛpaḥ punaḥ /
śāntaśriyaṃ tamācārya natvaiva prāha sāñjaliḥ // SvayambhuP_8.144 //
ācārya kṛpayā te 'tra carate śubhatādhunā /
sarvadāpi mahotpātaṃ saṃśāmyata samantataḥ // SvayambhuP_8.145 //
suvṛṣṭireva nādyāpi pravarttate kathaṃcana /
suvṛṣṭikaraṇopāyaṃ tat samādeṣṭumarhati // SvayambhuP_8.146 //
iti saṃprārthitaṃ rājñā śrutvācāryaḥ sa satmatiḥ /
nṛpatiṃ taṃ mahāsattvaṃ saṃpaśyannevamabravīt // SvayambhuP_8.147 //
sādhu rājañchṛṇuṣvātra sadā subhikṣakāraṇaṃ /
suvṛṣṭikaraṇopāyamupadekṣyāmi sāṃprataṃ // SvayambhuP_8.148 //
likhitvā maṇḍalaṃ nāgarājānāṃ yadyathāvidhi /
tatra nāgādhipān sarvānāvāhyārādhayevahi // SvayambhuP_8.149 //
tadatra tvaṃ mahāvīrā bhavasvāttaraḥ sādhakaḥ /
yathā māyopadiṣṭāni tathā sarvāṇi sādhaya // SvayambhuP_8.150 //
ityācārya samādiṣṭaṃ śrutvā sa nṛpatirmudā /
tatheti prativijñapya tathā bhavitumaicchata // SvayambhuP_8.151 //
tataḥ sa vajradhṛg vārā nāgapuraṃ yathāvidhi /
likhitvā maṇḍalaṃ ramyaṃ pratiṣṭhāpya samārccayat // SvayambhuP_8.152 //
tatra nāgādhipān sarvānācāryaḥ sa yathākramaṃ /
samārādhya samāvāhya pūjayituṃ samālabhat // SvayambhuP_8.153 //
tatra nāgādhipāḥ sarve samāgatya yathākramaṃ /
svasvāsanaṃ samāśritya saṃtasthire prasāditāḥ // SvayambhuP_8.154 //
karkoṭako 'hirāḍeka eva na lajjayāgataḥ /
tatsamīkṣya sa śāntaśrīrmahācāryā maharddhimān // SvayambhuP_8.155 //
nṛpatiṃ taṃ mahāvīraṃ mahāsattvaṃ maharddhikaṃ /
mahābhijñaṃ samālokya samāmantrayaivamādiśat // SvayambhuP_8.156 //
rājan nāgādhipāḥ sarve samāgatā ihādhunā /
eka karkkoṭako nāgarāja eveha nāgataḥ // SvayambhuP_8.157 //
virūpo 'haṃ kathaṃ nāgarāja mahāsabhāsane /
gatvā tiṣṭheyamityevaṃ dhyātvā nāyāti lajjayā // SvayambhuP_8.158 //
atastaṃ sahasā rājan gatvā tatra mahāhrade /
karkkoṭakaṃ tamāmantraya saṃprārthyeha samānaya // SvayambhuP_8.159 //
yadi saṃprārthyamānāpi nāgachediha so 'hirāṭ /
tadā balena dhṛtvāpi sarvathā taṃ samānaya // SvayambhuP_8.160 //
ityācārya samādiṣṭaṃ śṛtvā sa nṛpatiḥ sudhīḥ /
śāntaśriyaṃ tamācārya paśyannevaṃ nyavedayat // SvayambhuP_8.161 //
ācārya kathamako 'haṃ tatrāgāḍhamahāhrade /
gatvā balena nāgendraṃ dhṛtvā netuṃ praśaknuyāṃ // SvayambhuP_8.162 //
iti nivedya taṃ rājñā śrutvācāryaḥ sa mantravit /
nṛpatiṃ taṃ mahāvīraṃ sampaśyannevamabravīt // SvayambhuP_8.163 //
haridaśvaṃ samāruhya puṣpamatmantraśodhitaṃ /
dhṛtvā braja praśaknoṣi mama mantrānubhāvataḥ // SvayambhuP_8.164 //
durvākuṇḍamidaṃ puṣpaṃ tatrādau kṣipa māṃ smaran /
bhraman yatra caren puṣpaṃ tat yathānusaran baja // SvayambhuP_8.165 //
ityupadeśya duvīkaṃ kuṇḍaṃ mantrābhiśodhitaṃ /
puṣpaṃ datvā narendrāya punarevamupādiśat // SvayambhuP_8.166 //
gatvaivaṃ nṛpate tatra nāgapure sametya taṃ /
karkoṭakaṃ samāmantraya madgiraivaṃ nivedaya // SvayambhuP_8.167 //
bho karkkoṭaka nāgendra yadarthedamihāvraja /
tadbhavānapi jānīyāt tathāpi vakṣyate mayā // SvayambhuP_8.168 //
gośṛṅge mahācāryaḥ śāntaśrī rvajrabhṛt kṛtī /
durbhikṣaśamanaṃ karttuṃ suvṛṣṭicāraṇe sadā // SvayambhuP_8.169 //
tatra nāgapure sarvān nāgādhipān yathāvidhi /
samārādhya samāvāhya pūjayituṃ samārabhat // SvayambhuP_8.170 //
sarve nāgādhipāstatra varuṇādyāḥ samāgatāḥ /
tvameva nāgataḥ kasmāt sahasā gantumarhati // SvayambhuP_8.171 //
evaṃ saṃprārthyamāno 'pi nāgachet so 'hirāḍ yadi /
valenāpi samākṛṣya sahasā nīyatāṃ tvayā // SvayambhuP_8.172 //
iti śāntaśriyā śāstā samādiśya samādarāt /
preṣito 'haṃ tadarthetra tat samagantumarhati // SvayambhuP_8.173 //
ityādiśya sa ācāryaḥ puṣpaṃ mantrābhiśodhitaṃ /
datvā taṃ nṛpatiṃ vīraṃ preṣayat tatra satvaraṃ // SvayambhuP_8.174 //
ityācārya samādiṣṭaṃ niśamya sa mahāmatiḥ /
durvāmuṇḍaṃ samādāya tathetyuktvā tato 'carat // SvayambhuP_8.175 //
tataḥ sa nṛpatirvīraḥ śāstu rājñāṃ śirāvahan /
haridaśvaṃ samāruhya saṃcaranstad hadaṃ yayau // SvayambhuP_8.176 //
tatra tīraṃ samāsādya paśyaṃ nṛpaḥ sa taṃ hadaṃ /
natvācāryamanusmṛtvā durvvākuṇḍaṃ jale 'kṣipat // SvayambhuP_8.177 //
tanprakṣiptaṃ jale 'gāḍhe bhraman nāgapure 'carat /
rājāpyaśvaṃ samāruhya tatpuṣpānusaran yayau // SvayambhuP_8.178 //
evaṃ nāgapure gatvā nṛpatiḥ sa vilokayan /
karkoṭaka mahīndraṃ taṃ sahasā samupācarat // SvayambhuP_8.179 //
tatra sametya sa vīrastaṃ karkoṭakamahīśvaraṃ /
yathācāryāya saṃdipṭaṃ tathā sarvaṃ nyavedayat // SvayambhuP_8.180 //
tat sanniveditaṃ sarva śrutvā nāgādhipāpi saḥ /
kiñcidapyuttaraṃ naiva dadau tasmai mahībhuje // SvayambhuP_8.181 //
tataḥ sa nṛpatiścaivaṃ nivedya taṃ mahīśvaraṃ /
saṃpaśyan samupāmantraya prārthayadamādarāt // SvayambhuP_8.182 //
nāgendro 'tra prasīda tvaṃ śāsturājñāṃ śirovahaṃ /
tvadāmantra na evāhaṃ prāgatastat samāvraja // SvayambhuP_8.183 //
iti saṃprārthyamāno 'pi rājā sa bhujagādhipaḥ /
kiñcitprāpyuttaraṃ naiva dadau tasmai mahībhuje // SvayambhuP_8.184 //
tato 'sau nṛpativīraḥ śāstrādiṣṭaṃ yathā tathā /
sarva nivedya tasyāgre punarevamabhāṣata // SvayambhuP_8.185 //
nāgendra nāparādhaṃ me yattvayā na śrutaṃ vacaḥ /
tanme śāstrā yathādiṣṭaṃ tathā nūnaṃ careya hi // SvayambhuP_8.186 //
ityuktepi narendreṇa karkoṭako hi yo 'pi saḥ /
kiñcidapyuttaraṃ naiva dadau rājñe mahībhṛte // SvayambhuP_8.187 //
tataḥ sa nṛpativīraḥ śāsturājñāṃ śirovahan /
dhṛtvā tamahimākṛṣya gurutmāniva prācarat // SvayambhuP_8.188 //
tato hayāt samānītāḥ guṇakāmadevena saḥ /
ānīte tena mārgeṇa vaśikācala ucyate // SvayambhuP_8.189 //
evaṃ dhṛtvā samākṛṣya sa vīrastaṃ mahīśvaraṃ /
sahasā nāgapure nītvā śāsturagre samācarat // SvayambhuP_8.190 //
ācārya bhavadādeśāt tathā karkkoṭako 'hirāṭ /
dhṛtvākṛṣya mayānītastaṃ samīkṣya prasīdatu // SvayambhuP_8.191 //
iti niveditaṃ rājñā śrutvācāryaḥ samāditaḥ /
nṛpatiṃ taṃ mahāvīraṃ sampaśyannevamādiśat // SvayambhuP_8.192 //
sādhu rājan mahāvīra yadānītastvayāhirāt /
tadenamāsane nītvā saṃsthāpaya yathākramaṃ // SvayambhuP_8.193 //
ityācārya samādiṣṭaṃ śrutvā sa nṛpatistathā /
nāgarājaṃ tamāmantraya svāsane saṃnyaveśayat // SvayambhuP_8.194 //
taṃ dṛṣṭvā svāsanāsīnāṃmācāryaḥ sa yathāvidhiṃ /
nāgendrān stān samāvāhya samārādhya samārcayat // SvayambhuP_8.195 //
tataḥ sa vrajadhṛkājña ācāryaḥ sa mahīpatiḥ /
sarvān nāgādhipān stutvā prārthayuccaivamādarāt // SvayambhuP_8.196 //
bho bhavanto mahānāgarājāḥ sarve mayāgrataḥ /
samārādhya samāvāhya yathāvidhi samarcitāḥ // SvayambhuP_8.197 //
tanme sadā prasīdantu dātumarhanti vāñchitaṃ /
sarvaloka hitārtheva ārādhyayāmi nānyathā // SvayambhuP_8.198 //
yadatra pāpasaṃcārād durbhikṣaṃ varttate 'dhunā /
tena sarve 'pi duḥkhārttā lokaścaranti pātakaṃ // SvayambhuP_8.199 //
taddurbhikṣābhiśāntyartha subhikṣakāraṇaṃ sadā /
suvṛṣṭicaraṇopāyaṃ karomīdaṃ jagaddhite // SvayambhuP_8.200 //
te bhavanto 'tra sarve 'pi sarvasattvābhirakṣaṇe /
cārayituṃ samarhanti suvṛṣṭimatra sarvadā // SvayambhuP_8.201 //
iti saṃprārthitaṃ tena śāntaśriyā niśamyata /
sarve nāgādhipāstasya tatheti pratiśuśruvuḥ // SvayambhuP_8.202 //
taistatheti pratijñātaṃ nāgarājairniśamya saḥ /
śāntaśrī nāgarājān stān prārthayadevamādarāt // SvayambhuP_8.203 //
bhavanto me prasīdantu yadahaṃ prārthaye punaḥ /
sarvasattvahite dātuṃ tadapyarhanti vāñchitaṃ // SvayambhuP_8.204 //
iti saṃprārthite tena śāntaśriyā niśamyate /
sarvvanāgādhipā tasmai tatheti pratiśuśruvuḥ // SvayambhuP_8.205 //
sarve nāgādhipaistaiḥ sampratijñātaṃ niśmya saḥ /
ācāryastānahīndrāṃśca prārthayedevamādarāt // SvayambhuP_8.206 //
bhavantaḥ śrūyatāṃ vākyaṃ yat mayā prārthyate punaḥ /
tadbhavadbhiḥ pratijñātaṃ saṃdhātavyaṃ tathā sadā // SvayambhuP_8.207 //
yadātra pāpasaṃcārād durvaṣṭiśca bhaved dhruvaṃ /
tadā suvṛṣṭisaṃsiddhirsādhanaṃ tat pranīyatāṃ // SvayambhuP_8.208 //
tadyathā bhavatāṃ paṭṭe likhitvā maṇḍalaṃ śubhaṃ /
yathāvidhi pratiṣṭhāpya saṃsthāpituṃ samutsahe // SvayambhuP_8.209 //
durvṛṣṭiḥ syādyadāpyatra tadevaṃ paṭṭamaṇḍalaṃ /
prasārya vidhinārādhya samāvāhya samarcayat // SvayambhuP_8.210 //
evaṃ prasārya paṭṭesmin saṃpūjite yathāvidhi /
suvṛṣṭiratra yuṣmābhiḥ saṃbharttavyā jagaddhite // SvayambhuP_8.211 //
iti saṃprārthite tena śāntaśriyā niśamyate /
sarvanāgādhipāstasmai tatheti pratiśuśruvuḥ // SvayambhuP_8.212 //
tataḥ sa mantravit prājñaḥ sarvanāgādhipājñayā /
likhitvā maṇḍalaṃ paṭṭe pratiṣṭhāpya yathāvidhi // SvayambhuP_8.213 //
paścāt kāle 'tra durvṛṣṭivṛtte suvṛṣṭisādhane /
nāgapure 'tra saṃsthāpya nirdagdha saṃpragopitaṃ // SvayambhuP_8.214 //
tato vajrī sa ācāryaḥ sarvān stān bhujagādhipān /
saṃprārthya vinayaṃ kṛtvā visasarjja vinodayan // SvayambhuP_8.215 //
tataḥ sarve 'pi te nāgarājāḥ svasvālayaṃ gatāḥ /
meghamālāṃ samutthāpya sarvatra samavarṣayan // SvayambhuP_8.216 //
tadā suvṛṣṭisaṃcārād durbhikṣaṃ vilayaṃ yayau /
subhikṣamaṃgalotsāhaṃ prāvarttata samantataḥ // SvayambhuP_8.217 //
tadā sarve 'pi lokāste mahānandapramoditaḥ /
triratnabhajanaṃ kṛtvā prācaranta sadā śubhe // SvayambhuP_8.218 //
tataḥ sa nṛpati rājā dṛṣṭasatyaḥ prasāditaḥ /
śāntiśriyaṃ tamācāryaṃ samabhyarcya yathāvidhi // SvayambhuP_8.219 //
natvāṣṭāṅgaiḥ prasannātmā kṛtvā pradakṣiṇāni ca /
kṛtāñjalipuṭaḥ paśyan prārthayaccaivamādarāt // SvayambhuP_8.220 //
bho bhagavan mahācārya bhavaddharmmānubhāvataḥ /
sarvotpātaṃ śamībhūta suvṛṣṭiḥ saṃpravarttate // SvayambhuP_8.221 //
tadatra sarvadā nūnaṃ nirutpātaṃ samantataḥ /
dharmaśrīmaṃgalotsāhaṃ bhavadeva nirantaraṃ // SvayambhuP_8.222 //
evaṃ sadā kṛpā dṛṣṭayā saṃpaśyan viṣaye mama /
nirutpātaṃ śubhotsāhaṃ kartumarhati sarvathā // SvayambhuP_8.223 //
sāmprataṃ saphalaṃ janma saṃsārajīvitaṃ ca me /
yallokāśca sukhībhūtāḥ saṃcaranta sadā śubhe // SvayambhuP_8.224 //
tadahaṃ sāmprataṃ śāstarbhavadājñāṃ śirāvahan /
svarājyāśramamāśritya careyaṃ pālayañjagat // SvayambhuP_8.225 //
tanmenugrahamādhāya kṛpayā saṃprasāditaḥ /
saṃbodhisādhane cittaṃ sa sthitiṃ karttumarhati // SvayambhuP_8.226 //
iti vijñapya bhūpālasta sya śāstuḥ padāmbuje /
natvānujñāṃ samāsādya mahotsāhaiḥ puraṃ yayau // SvayambhuP_8.227 //
tatra sa nṛpa āśritya samantri sacivo mudā /
bodhicaryāvrataṃ dhṛtvā tasthau kurvan sadā śubhaṃ // SvayambhuP_8.228 //
iti svayambhū caityāśramanāmasādhanasuvṛṣṭicāraṇo nāmāṣṭamo 'dhyāyaḥ /
navama adhyāyaḥ śrīmahācārya śāntikaraguṇasaṃsiddhimahātmyānubhāva prakathanapravartano nāma
atha maitreya ālokya samutthāya kṛtāñjaliḥ /
bhagavantaṃ tamānamya prārthayaccaivamādarāt // SvayambhuP_9.1 //
kadā śāntikaraṃ nāma tasyābhavat kathaṃ punaḥ /
taddhetuṃ śrotumicchāmi samupādeṣṭumarhati // SvayambhuP_9.2 //
iti saṃprārthite tena maitreyeṇa sa sarvavit /
bhagavāstaṃ mahāsattvaṃ sampaśyannevamādiśat // SvayambhuP_9.3 //
śṛṇu maitreya vakṣyāmi śāntaśriyāṃ mahadguṇaṃ /
saddharmmasādhanotsāhaṃ bhadraśrīsadgurṇārthadaṃ // SvayambhuP_9.4 //
yo 'sau rājā mahāsattvaḥ sadharmmaguṇalālasaḥ /
tyaktvā kāmasukhaṃ rājyaṃ tīrthayātrāmupācarat // SvayambhuP_9.5 //
sa sarveṣvapi tīrtheṣu snātvā dānaṃ vidhāya ca /
trisamādhisamācāraḥ saṃcara poṣadhaṃ vrataṃ // SvayambhuP_9.6 //
evaṃ sarveṣu pīṭheṣu bhraman saddharmmamānasaḥ /
yogacaryāvrataṃ dhṛtvā pracacāra samāhitaḥ // SvayambhuP_9.7 //
puṇyakṣetreṣu sarveṣu bhramannaivamihāgatāḥ /
dṛṣṭvaimaṃ maṇḍalaṃ ramye vismitaṃ samupāyayau // SvayambhuP_9.8 //
atraimaṃ dūrato dṛṣṭvā dharmmadhātuṃ jinālayaṃ /
mudāṣṭāṅgaiḥ praṇatvāśuḥ saṃdraṣṭuṃ samupāyayau // SvayambhuP_9.9 //
sametya saṃmahāsattvā jyotīrūpaṃ jinālayaṃ /
dharmmadhātumimaṃ dṛṣṭvā praṇatvā samupāśrayat // SvayambhuP_9.10 //
tataḥ samudito rājā nepāle 'tra manorame /
sarvatrāpi ca saṃdraṣṭuṃ pracacāra vilokayan // SvayambhuP_9.11 //
teṣu sarveṣu tīrtheṣu snātvā datvā yathepsitaṃ /
yathāvidhi samādhāya vrataṃ cara samāhitaḥ // SvayambhuP_9.12 //
tatoṣṭau vītarāgāṃśca dṛṣṭvā sa saṃpramoditaḥ /
yathāvidhi samārādhya samabhyarcya sadābhajan // SvayambhuP_9.13 //
tataścāsau mahādevī khagānanāṃ maheśvarīṃ /
yathāvidhi samārādhya samabhyarcyābhajanmudā // SvayambhuP_9.14 //
tato mañjuśriyaścaityaṃ samīkṣya sa pramoditaḥ /
yathāvidhi samabhyarcya prābhajat samupasthitaḥ // SvayambhuP_9.15 //
tataḥ ścaitatmahatpuṇyaiḥ śāntiśrīśubhitendriyaḥ /
pravajyā saṃvaraṃ dhṛtvā brahmacārī babhūva saḥ // SvayambhuP_9.16 //
yattasya supraśāntaśrīśobhitānīndriyāni ṣaṭ /
taṃ nanāma prasiddhaṃ ca śāntaśrīrityabhūdyataḥ // SvayambhuP_9.17 //
tato 'sau satmatirvijño bodhisattvo jagaddhite /
vajracaryāvrataṃ gṛhaya pracacāra samāhitaḥ // SvayambhuP_9.18 //
tataśca śilayāchādya dharmmadhātuṃmimaṃ jinaṃ /
iṣṭikābhirmahatstūpaṃ vidhāya samagopayat // SvayambhuP_9.19 //
tataḥ pañcapureṣvatra sthāpitā pañca devatāḥ /
mañjuśrīyāmidaṃ caityamanena ca mahatkṛtaṃ // SvayambhuP_9.20 //
evaṃ kṛtvātra kāryāṇi sarvāṇi sa mahāmatiḥ /
bodhisattvā mahābhijñaḥ pracacāra jagaddhite // SvayambhuP_9.21 //
tataścātra mahatpātaṃ śamīkṛtya samaṃtataḥ /
bhadraśrīmaṅgalotsāhaṃ na śāntaśrīḥssadā vyadhāt // SvayambhuP_9.22 //
tataścāsau mahābhijño durvṛṣṭi parivarttate /
nāgarājān samārādhya suvṛṣṭi samacārayat // SvayambhuP_9.23 //
evaṃ sa triguṇābhijñāṃ mahotpāta praśāntikṛt /
śubhaṃkara sadā tena śāntikare iti smṛtaḥ // SvayambhuP_9.24 //
īdṛgmantrī mahābhijño vajrācāryā mahāmatiḥ /
samṛddhisiddhisaṃpannā na bhūtā na bhaviṣyati // SvayambhuP_9.25 //
evaṃ vidhāya sarvatra nirutpātaṃ śubhotsavaṃ /
bodhisattva sa śāntaśrīstrailokyamahitobhavat // SvayambhuP_9.26 //
evamasya mahatpuṇyaṃ bhadraśrīguṇasādhanaṃ /
vijñāya śaraṇaṃ gatvā savitavyaṃ śubhārthibhiḥ // SvayambhuP_9.27 //
yadyasya śaraṇaṃ gatvā śraddhayā samupāśritāḥ /
yathāvidhi samārādhya bhajeyuḥ sarvadā mudā // SvayambhuP_9.28 //
te sarve vimalatmāno niḥkleśā vijitendriyāḥ /
bhadraśrīguṇasaṃpattiṃ sarddhisiddhiṃ samāyayuḥ // SvayambhuP_9.29 //
ye ca tasya sadā smṛtvā dhyātvāpi ca samāhitāḥ /
nāmāpi ca samuccārya bhajeyuḥ śraddhayā sadā // SvayambhuP_9.30 //
te 'pi sarve vikalmāṣāḥ pariśuddhatrimaṇḍalāḥ /
tadguṇaśrīsamāpannā bhaveyu bodhicāriṇaḥ // SvayambhuP_9.31 //
ityevaṃ tatmahatpuṇyaṃ vijñāya tadguṇārthinaḥ /
tasyaiva śaraṇaṃ gatvā bhajantu te sadā mudā // SvayambhuP_9.32 //
ityādiṣṭaṃ munīndreṇa sarve 'pi te sabhāśritāḥ /
lokāstatheti vijñapya prābhyanandan prabodhitāḥ // SvayambhuP_9.33 //
evamasau mahāsattvo bhadraśrīsadguṇārthabhṛt //
sarvasattvahitaṃ kṛtvā saṃtasthe suciraṃ tathā // SvayambhuP_9.34 //
tataḥ kāle gate rājā vṛddhobhijīrṇṇitendriyaḥ /
niḥkleśo viratābhāgo dhyātvaiva samacintayat // SvayambhuP_9.35 //
ahaṃ vṛddhotijīrṇṇāṅgaḥ sthāsyāmyevaṃ kiyāccaraṃ /
avaśyaṃ daivayogeṇa yāsyāmi maraṇaṃ dhruvaṃ // SvayambhuP_9.36 //
tadatrāhaṃ svaputrāya yūne lokānupālane /
sābhiṣekamidaṃ rājyaṃ dātumarhāmi sāmprataṃ // SvayambhuP_9.37 //
iti dhyātvā sa bhūpālo narendradevamātmajaṃ /
abhiṣiṃcya nṛpaṃ kṛtvā bodhayannevamaṃnvaśāt // SvayambhuP_9.38 //
rājan putra samādhāya dharmanītyā samācaran /
triratnabhajanaṃ kṛtvā saṃcarasva sadā śubhe // SvayambhuP_9.39 //
adyārabhyāsi sarveṣāṃ lokānāmadhipaḥ prabhuḥ /
sarvadharmānuśāstā ca sarvasattvahitārthabhṛt // SvayambhuP_9.40 //
tadatra sakalān lokān dharmanītyānupālayan /
triratnabhajanaṃ kṛtvā saṃcaraṃsva sadā śubhe // SvayambhuP_9.41 //
ityanuśāsya tanputraṃ pitā sa bhavanispṛhaḥ /
sarvaparigrahānstyaktvā vanaprasthasamāśrayan // SvayambhuP_9.42 //
tatrasthāsau mahābhijñaḥ pariśuddhitrimaṇḍalaḥ /
samādhinihitaḥ svāntaḥ sasaṃcare bahmasaṃbaraṃ // SvayambhuP_9.43 //
tataḥ kāle gate mṛtyusamaye sa samāhitaḥ /
triratnaṃ sa smaraṃstyaktvā dehaṃ yayau sukhāvatīṃ // SvayambhuP_9.44 //
tataḥ sa nṛpatī rājā narendradeva indravat /
saṃbodhayan prayatnena sarvān lokānapālayat // SvayambhuP_9.45 //
so 'pi rājā viśuddhātmā saddharmmaguṇalālasaḥ /
śāntikaraṃ tamācārya sametya śaraṇaṃ yayau // SvayambhuP_9.46 //
tatra sa samupāśritya śāsturājñāṃ śirovahan /
triratnabhajanaṃ kṛtvā prācarat sarvadā śubhe // SvayambhuP_9.47 //
sadā sarveṣu tīrtheṣu snānaṃ kṛtvā yathāvidhi /
pitrebhyaḥ pradadau piṇḍaṃmarthibhyo 'pi yathepsitaṃ // SvayambhuP_9.48 //
tathāṣṭau vītarāgāṃśca kṣatralokādhipāmapi /
yathāvidhi samārādhya samārcayat sa parvasuḥ // SvayambhuP_9.49 //
tathā ca śrīmahādevīṃ khagānanāṃ yathāvidhi /
samārādhya samabhyarcya mahotsāhairmudābhajat // SvayambhuP_9.50 //
tathā mañjuśrīyaścaitye pṛcchāgresminnupāśrayat /
yathāvidhi samārādhya samabhyarcyābhajat sadā // SvayambhuP_9.51 //
tathā vāyupure vāyudevatāḥ sagaṇā api /
yathāvidhi samārādhya samabhyarcyābhajat sadā // SvayambhuP_9.52 //
tathā vahnipure vahnidevatāḥ sagaṇā api /
yathāvidhi samārādhya samabhyarcyābhajat sadā // SvayambhuP_9.53 //
tathā nāgapure nāgadevatāḥ sagaṇā api /
yathāvidhi samārādhya samabhyarcyābhajat sadā // SvayambhuP_9.54 //
tathā vasupure devīṃ vasudhārāṃ samaṇḍalām /
yathāvidhi samārādhya samabhyarcyā sadābhajat // SvayambhuP_9.55 //
tathā śāntipure śrīmatsambaraṃ sagaṇaṃ jinaṃ /
yathāvidhi samārādhya samabhyarcyā sadābhajat // SvayambhuP_9.56 //
tathā tasya dharmadhātoḥ sa narendraḥ samupāśritaḥ /
yathāvidhi samārādhya prābhajan sarvadārcayan // SvayambhuP_9.57 //
evaṃ sa nṛpatī rājā saddharmaguṇalālasaḥ /
triratnabhajanaṃ kṛtvā saṃprācarat sadā śubhe // SvayambhuP_9.58 //
evaṃ sa nṛpa eteṣu tīrthayātrādikarmasu /
bodhayitvā prayatnena sarvān lokān yayā jayat // SvayambhuP_9.59 //
tathā sarve 'pi te lokā dhṛtvā nṛpānuśāsanaṃ /
eteṣu tīrthayātrādikarmasu saṃpracerire // SvayambhuP_9.60 //
tathāṣṭau vītarāgāṃśca devīṃ khagānanāmapi /
pañcaitā devatāścāpi caityaṃ mañjuśriyo 'pi ca // SvayambhuP_9.61 //
jagadīśaṃ jagannāthaṃ dharmadhātuṃ jinālayaṃ /
yathāvidhi samabhyarcya prābhajanta sadā mudā // SvayambhuP_9.62 //
etaddharmānubhāvena sarvadātra sumaṅgalaṃ /
nirutpātaṃ mahotsāhaṃ prāvarttata samantataḥ // SvayambhuP_9.63 //
evaṃ sa nṛpatī rājā narendra deva ātmanaḥ /
bodhicaryāḥ vrataṃ dhṛtvā saṃpracara jagaddhite // SvayambhuP_9.64 //
parānapi tathā sarvān lokān yatnena bodhayan /
bodhimārge samāyujya prācārayajjagaddhite // SvayambhuP_9.65 //
evaṃ sa indravad rāja bodhisattvā jagatprabhuḥ /
sarvasattvahitaṃ kṛtvā tasthau ciraṃ śubhe raman // SvayambhuP_9.66 //
tataḥ śrīmān sa ācāryaḥ śāntikaro maharddhikaḥ /
kṛtakṛtyaḥ pravṛddho 'pi nirvātuṃ nābhivāṃchati // SvayambhuP_9.67 //
sarvasattvahitākāṃkṣī śāntipurāgratādhasi /
dhyānāgāre mahoddāre yājanaika pramāṇike // SvayambhuP_9.68 //
āropya śrīmahojvāle cintāmaṇi mahādhvajaṃ /
sa prājñaḥ sa mahāsattvo bodhisattvā jinātmajaḥ // SvayambhuP_9.69 //
samādhidhāraṇīvidyāyogadhyānasamāhitaḥ /
sambodhipraṇidhiṃ dhṛtvā tasthau niścaramānasaḥ // SvayambhuP_9.70 //
yadā saddharmmahīṇe 'tra lokapaṃca kaṣāyite /
tadotthāya samādheḥ sa saddharmma deśayiṣyati // SvayambhuP_9.71 //
yadā yadātra satmitraḥ śāstrā vidyādhipā na hi /
tadā tadā na sanmitraḥ śāstrāvidyādhipobhavan // SvayambhuP_9.72 //
sarvānlokān prayatnena nivārya pāpamārgataḥ /
bodhimārge pratiṣṭhāpya cārayiṣyati saddharme // SvayambhuP_9.73 //
evaṃ dhyātvā sa ācāryaḥ śāntikaraḥ samādhibhṛt /
sarvasattvahitārthena tasthau yogasamāhitaḥ // SvayambhuP_9.74 //
evaṃ sa triguṇācāryaḥ sarvasattvahitārthabhṛt /
bodhisattvamahābhijña tiṣṭha tatra jagaddhita // SvayambhuP_9.75 //
ye tasya śaraṇaṃ gatvā smṛtvā dhyātvā samādarāt /
nāmāpi ca samuccāryaṃ bhajanti śraddhayā sadā // SvayambhuP_9.76 //
te 'pi sarve mahābhijñā bodhisattvā vicakṣaṇāḥ /
bhadraśrīguṇasaṃpannā bhaviṣyanti sadā bhave // SvayambhuP_9.77 //
tataste vimalātmānaścaturbrahmavihāriṇaḥ /
bodhicaryāvrataṃ dhṛtvā cariṣyanti jagaddhite // SvayambhuP_9.78 //
tataste bodhisaṃbhāraṃ pūrayitvā yathākramaṃ /
arhanto bodhimāsādya prāpsyanti saugataṃ padaṃ // SvayambhuP_9.79 //
ye ca tadguṇamāhātmyaṃ śṛṇvanti śraddhayā mudā /
te 'pi tadguṇa saṃpatti saṃsiddhiṃ samavāpnuyuḥ // SvayambhuP_9.80 //
iti vijñāya vāñchanti yastasya guṇasaṃpada /
te sadguṇamāhātmyaṃ śrotumarhati sādaraṃ // SvayambhuP_9.81 //
ityādiṣṭaṃ muṇīndrena śrutvā sarvasabhāśritāḥ /
lokāstatheti saṃśrutya prābhyanandan prabodhitāḥ // SvayambhuP_9.82 //
iti śrīmahācāryaśāntikaraguṇasaṃsiddhimāhātmyānubhāvaprakathanapravṛtto nāmādhyāya navamaḥ /
daśama adhyāyaḥ śrī dharmmadhātusvayambhūtpattidharmmamāhātmyasubhāṣitasūtraṃ nāma
athāsau bhagavān bhūyo maitreyaṃ taṃ mahāmatiṃ /
samālokya sabhāṃ cāpi samāmantryaivamādiśat // SvayambhuP_10.1 //
śṛṇu maitreya vakṣyāmi mañjuśriyo jagadguroḥ /
saddharmaguṇamāhātmyaṃ saṃbodhijñānadāyakaṃ // SvayambhuP_10.2 //
yadiyaṃ bhikṣuṇī cūḍā suśīlā brahmacāriṇī /
idaṃ mañjuśriyaṃ ścaityaṃ śraddhayā samupāśritā // SvayambhuP_10.3 //
śuddhotpalasrajo nityaṃ samabhyarcya yathāvidhi /
smṛtvā dhyātvā samārādhya sabhaktyā śraddhayā sadā // SvayambhuP_10.4 //
ādyāṃ cale cule vande svāheti navamākṣaraṃ /
dhāraṇī paramāvidyāṃ paṭhantī bhajane sadā // SvayambhuP_10.5 //
etanpuṇyānubhāvena cūṇḍeyaṃ bhikṣuṇī satī /
pañcābhijñāvatī varṣairdvādaśabhirbhaved dhruvaṃ // SvayambhuP_10.6 //
tataśceyaṃ mahābhijñā śrīsamṛddhiguṇāśrayā /
sarvasattvahitaṃ kṛtvā pracared bodhisaṃvaraṃ // SvayambhuP_10.7 //
tato 'rhantī mahāprājñā pariśuddhatrimaṇḍalā /
trividhāṃ bodhimāsādya saṃbuddhapadamāpsyati // SvayambhuP_10.8 //
evamanyepi lokāśca caityamañjuśriyo traye /
paṭhantī dhāraṇīmenāṃ bhajanti śraddhayā sadā // SvayambhuP_10.9 //
te 'pi sarve vikalmāṣāḥ pariśuddhatrimaṇḍalāḥ /
bhadraśrīsadguṇādhārā bodhisattvā jitendriyāḥ // SvayambhuP_10.10 //
pañcābhijñapadaprāptāścaturbrahmavihāriṇaḥ /
sarvasattvahitādhārā careyurbodhisambaraṃ // SvayambhuP_10.11 //
tataste bodhisaṃbhāraṃ pūrayitvā yathākramaṃ /
jitvā māragaṇān sarvān niḥkleśā vimalendriyāḥ // SvayambhuP_10.12 //
arhanto 'pi mahābhijñāḥ saṃbodhisādhanāratāḥ /
trividhāṃ bodhimāsādya saṃbuddhapadamāpnuyuḥ // SvayambhuP_10.13 //
yūyamapiti matvātra caityamañjuśriyastathā /
paṭhanto dhāraṇīmenāṃ bhajadhvaṃ bodhimānasāḥ // SvayambhuP_10.14 //
etatpuṇyābhiliptā hi pariśuddhatrimaṇḍalāḥ /
yūyamapi tathā sarve bhaveta sugatātmajāḥ // SvayambhuP_10.15 //
bodhisattvā bhadraśrīsadguṇāśrayāḥ /
mahābhijñā jagannāthā bhaveta bhadracāriṇaḥ // SvayambhuP_10.16 //
tataḥ saṃbodhisaṃbhāraṃ pūrayitvā yathākramaṃ /
jitvā māragaṇān sarvāścaturbrahmavihāriṇaḥ // SvayambhuP_10.17 //
arhantastrividhāṃ bodhiṃ prāpya buddhā bhaviṣyatha /
iti satyaṃ parijñāya yadi saṃbodhimicchatha // SvayambhuP_10.18 //
asmin mañjuśriyaścaityaṃ bhajadhvaṃ sarvadā mudā /
ityādiṣṭaṃ munīndreṇa niśamya te sasāṃdhikāḥ // SvayambhuP_10.19 //
sarvalokāstathetyuktvā prābhyanandat prabodhitāḥ /
tataḥ sarve 'pi te lokā brahmāśakrādayo 'marāḥ // SvayambhuP_10.20 //
sarve lokādhipāścāpi sārddhaṃ parijanairmudā /
bhagavantaṃ munīndraṃ taṃ sasaṃgha saṃprasāditāḥ // SvayambhuP_10.21 //
natvā pradakṣiṇī kṛtvā svasvālayaṃ mudā yayuḥ /
sarve martyā nṛpādyāśca samantrijanapaurikāḥ // SvayambhuP_10.22 //
sasāṃdhikaṃ munīndraṃ taṃ natvā svasvālayaṃ yayuḥ /
hārīti yakṣiṇīśāpi sātmajā bauddharakṣaṇī // SvayambhuP_10.23 //
triratnabhajanaṃ kṛtvā dharmadhātorūpāśrayat /
tataḥ sa bhagavāṃścāpi samutthāya sasāṃdhikaḥ // SvayambhuP_10.24 //
prabhāsayañjagadbhāsā jaṭodyānāśrame yayau /
tatra sa trijagannātho vihāre sahasāṃdhikaiḥ // SvayambhuP_10.25 //
saddharmmasamupādiśya vijahāra jagaddhite /
iti te guruṇādiṣṭaṃ śrutaṃ mayā tathocyate // SvayambhuP_10.26 //
śrutvāpyetanmahārājā śraddhayābhyanumodaya /
iti śāstrārhatādiṣṭaṃ niśamya sa narādhipaḥ // SvayambhuP_10.27 //
prasāditastamarhanta natvā prāhaivamādarāt /
bhadantohaṃ samicchāmi saṃdraṣṭuṃ taṃ svayaṃbhuvaṃ // SvayambhuP_10.28 //
tannaipāle pragacchāmi tadanujñāṃ pradehi me /
iti saṃprārthitaṃ rājñā śrutvā sorhanyatirmudā // SvayambhuP_10.29 //
nṛpatiṃ taṃ mahāsattvaṃ saṃpaśyannevamādiśyat /
sādhu rājan samicchā te yadyasti taṃ svayambhuvaṃ // SvayambhuP_10.30 //
draṣṭuṃ gaccha samārādhya bhaja śraddhāsamanvitaḥ /
sarvatīrtheṣu ca snātvā datvā dānaṃ yathepsitaṃ // SvayambhuP_10.31 //
vītarāgāṃ samārādhya samabhyarcyabhijādarāt /
dharmodayāṃ mahādevīṃ khagānanāṃ jineśvarīṃ // SvayambhuP_10.32 //
śraddhayā samupāśritya samabhyarcya bhajādarāt /
pañcapurāsthitāḥ pañca devatāśca yathāvidhi // SvayambhuP_10.33 //
samārādhya samabhyarcya bhaja bhaktyā samādarāt /
mañjudevasya caityaṃ ca samālokya yathāvidhi // SvayambhuP_10.34 //
samārādhya samabhyarcya bhajenāṃ dhāraṇīṃ paṭhan /
ācārya ca guhāsīnaṃ samādhidhyānasaṃsthitaṃ // SvayambhuP_10.35 //
dhyātvārādhya samabhyarcya natvā bhaja samādarāt /
evamanyān mahāsattvān dharmmadhātorūpāsakān // SvayambhuP_10.36 //
sarvānapi samārādhya samabhyarcya praṇāmaya /
etatpuṇyaviśuddhātmā bhadraśrī sadguṇāśrayaḥ // SvayambhuP_10.37 //
bodhisattvā mahāsattvā jagadbharttā bhavedapi /
tataḥ saṃbodhisaṃbhāraṃ pūrayitvā yathākramaṃ // SvayambhuP_10.38 //
arhansaṃbodhimāsādya saṃbuddhapadamāpsyasi /
iti satyaṃ parijñāya saṃbodhi yadi vāñchasi // SvayambhuP_10.39 //
gatvā tatra mahotsāhairdharmmadhātuṃ vilokya taṃ /
yathāvidhi samārādhya bhajasva samupāśritaḥ // SvayambhuP_10.40 //
gaccha te maṅgalaṃ bhuyāt sidhyatu te samīhitaṃ /
yathecchayā samālokya samāyāhi pramoditaḥ // SvayambhuP_10.41 //
iti śāstrā samādiṣṭaṃ śrutvā sa nṛpatirmudā /
taṃ guruṃ sāñjalirnatvā prāpyānujñāmanandataḥ // SvayambhuP_10.42 //
tataḥ sa nṛpatī rājā samantrijanapaurikāḥ /
rājarddhi maṃgalotsāhaiḥ saṃprasthito mudācarat // SvayambhuP_10.43 //
tatra mārge sa rājendraḥ sarvān lokān prasādayan /
mahotsāhaiścarannāśu naipālaṃ samupāyayau // SvayambhuP_10.44 //
tatra prāptaḥ samālokya dūrāt taṃ śrīsvayaṃmbhuvaṃ /
sāñjali praṇatiṃ kṛtvā pramanāḥ sahasā caret // SvayambhuP_10.45 //
tatra sarvatra saṃvīkṣya śubhotsāhapravarttitaṃ /
vismayānanditānsā sa nṛpatiḥ samupāsaret // SvayambhuP_10.46 //
tatra sarveṣu tīrtheṣu krameṇa sa narādhipaḥ /
snātvārthibhyo yathākāmaṃ dadau dānaṃ caran vrataṃ // SvayambhuP_10.47 //
tato 'ṣṭau vītarāgān sa nṛpatirvīkṣya harṣitaḥ /
yathāvidhi samārādhya bhajatyarcya yathāvidhi // SvayambhuP_10.48 //
tato mudācaran vīkṣya dharmmadhātuṃ jinālayaṃ /
yathāvidhi samārādhya samabhyarcyābhajan kramāt // SvayambhuP_10.49 //
tato vāyupure vāyudevatāṃ sagaṇāṃ mudā /
yathāvidhi samārādhya samabhyacyanitobhajata // SvayambhuP_10.50 //
tataścāgnipure vahnidevatāḥ sagaṇāmapi /
yathāvidhi samārādhya saṃpūjyābhajadādarāt // SvayambhuP_10.51 //
tato nāgapure nāgadevatāḥsagaṇā api /
yathāvidhi samārādhya samabhyarcyā mudābhajat // SvayambhuP_10.52 //
tato vasupure devīṃ sagaṇāṃ śrīvasundharāṃ /
yathāvidhi samārādhya bhajatyarcya samādarāt // SvayambhuP_10.53 //
tataḥ śāntipure śrīmatsambaraṃ sagaṇaṃ tathā /
yathāvidhi samārādhya samabhyarcya mudābhajat // SvayambhuP_10.54 //
tataḥ śāntikarācārya samādhidhyānasaṃsthitaṃ /
dhyātvārādhya samabhyarcya prābhajan saṃpramoditaḥ // SvayambhuP_10.55 //
tato dharmmodayā devī khagānanāṃ maheśvarīṃ /
yathāvidhi samārādhya samabhyarcya mudābhajat // SvayambhuP_10.56 //
sambuddhaṃ puṇḍarīkākṣaṃ sarvajña karuṇāspadaṃ /
samantabhadraśāstāraṃ śākyasiṃhaṃ namāmyahaṃ // SvayambhuP_10.57 //
śrīghanaṃ śrīmatiṃ śreṣṭhaṃ śīlarāśiṃ śivakaraṃ /
śrīmantaṃ śrīkaraṃ śāntaṃ śāntimūrti namāmyaham // SvayambhuP_10.58 //
nairātmavādinaṃ siṃhaṃ niravadyaṃ nirāśravaṃ /
nītijñaṃ nirmalātmānaṃ niṣkalaṃkaṃ namāmyaham // SvayambhuP_10.59 //
nirdvandvaṃ nirahaṃkāraṃ nirvikalpaṃ tathāgataṃ /
nirddhūtanikhilakleśaṃ niṣprapaṃcaṃ namāmyahaṃ // SvayambhuP_10.60 //
viśveśvaraṃ viśeṣo 'haṃ viśvarūpaṃ vināyakaṃ /
viśvalakṣaṇasaṃpūrṇṇa vītarāgaṃ namāmyahaṃ // SvayambhuP_10.61 //
vidhāvareṇa saṃpannaṃ viśveśamvimalaprabhaṃ /
vinītavegaṃ vimalaṃ vītamohaṃ namāmyahaṃ // SvayambhuP_10.62 //
dudantidamakaṃ śāntaṃ śuddhaṃ pañcajinālayaṃ /
sugatiṃ suśrutaṃ saumyaṃ śubhrakīrtti namāmyahaṃ // SvayambhuP_10.63 //
yogīśvaraṃ daśabalaṃ lokajñaṃ lokapūjitaṃ /
lokācārya lokamūrtiṃ lokānāthaṃ namāmyahaṃ // SvayambhuP_10.64 //
kalaṃkamuktiṃ kāmāriṃ sakalaikaṃ kalādharaṃ /
kāntamūrti dayāpātraṃ kanakābhaṃ namāmyahaṃ // SvayambhuP_10.65 //
tato mañjuśriyaścaityaṃ dharmadhātumupāśrayan /
yathāvidhi samārādhya samabhyarcyānatobhajat // SvayambhuP_10.66 //
tato mudā caran vīkṣya dharmadhātuṃ jinālayaṃ /
yathāvidhi samārādhya samabhyarcyābhajan mudā // SvayambhuP_10.67 //
bhaktyā paramayāstauṣījinālayaṃ svayaṃbhuvaṃ /
jyotīrūpāya caitanyaṃ rūpāya bhavate namaḥ // SvayambhuP_10.68 //
murādinidhanāya śrīdātre praṇavarupiṇe /
viśvatomukharupāya bhaktavatsala te namaḥ // SvayambhuP_10.69 //
pṛthvyādibhūtanirmātre jagadvaṃdyāyate namaḥ /
jagatsraṣṭe jagatpātre jagaddhartre namo namaḥ // SvayambhuP_10.70 //
dhyānagamyāya dhyeyāya cartuvargapradāyine /
evaṃ stutvā aśokaḥ sa punaḥ kṣamāpanaṃ vyadhāt // SvayambhuP_10.71 //
evaṃ sa nṛpatiḥ sarvān dharmadhātorupāsakān /
mahāsattvān samabhyarcya satkṛtya samatoṣayat // SvayambhuP_10.72 //
evaṃ sa nṛparājaḥ śrī dharmadhatorūpāśritaḥ /
triratnabhajanaṃ kṛtvā prācarad bodhisambaraṃ // SvayambhuP_10.73 //
tataḥ sa nandito rājā samantrijanapaurikaḥ /
natvā pradakṣiṇīkṛtya dharmmadhātuṃ mudācarat // SvayambhuP_10.74 //
tataścaran sa bhūmīndro mahotsāhaiḥ pramoditaḥ /
sahasā puramāsādya vihāra samupācarat // SvayambhuP_10.75 //
tatropetya tamarhantamupaguptasasāṃdhikaṃ /
samīkṣya sañjalirnatvā sabhaikāntaṃ samāśrayat // SvayambhuP_10.76 //
taṃ samāyātamālokya so 'rhe śāstā prasannadṛk /
svāgataṃ kuśalaṃ kaccinnṛpatiṃ paryapṛcchata // SvayambhuP_10.77 //
tacchutvā sa mahīpālaḥ śāstāraṃ taṃ kṛtāñjaliḥ /
praṇatvā suprasannāsyaḥ saṃpaśyannevamabravīt // SvayambhuP_10.78 //
samāgatosmyahaṃ śāstarbhavatkṛpānubhāvataḥ /
kuśalaṃ me kathaṃ na syāt sarvatrāpi sadāpi hi // SvayambhuP_10.79 //
bhavatkṛpānubhāvena nepāle 'haṃ mudācaran /
dṛṣṭvā sarveṣu tīrtheṣu snātvā dānaṃ yathepsitaṃ // SvayambhuP_10.80 //
tathāṣṭau vītarāgāśca samālokya pramāditaḥ /
yathāvidhi samārādhya samabhyarcyabhijaṃ kramāt // SvayambhuP_10.81 //
tataḥ samīkṣya taṃ śrīmaddharmmadhātuṃ svayaṃbhuvaṃ /
yathāvidhi samārādhya samabhyarcyābhajan mudā // SvayambhuP_10.82 //
tato vāyupure vāyudevatābhyarccitā mayā /
tataścāgnipure vahnirdevatāpi mayārccitā // SvayambhuP_10.83 //
tathā nāgapure nāgarājāṃścāpi mayārccitā /
tathā tathā vasupure devī vasundharāṃ samarccitā // SvayambhuP_10.84 //
tataḥ śāntipure śrīmatsambaraśca samarccitaḥ /
tataḥ śāntikarācāryaḥ samālokya mayārcitaḥ // SvayambhuP_10.85 //
devīṃ khagānanāṃ cāpi samārādhya samarcitā /
mañjudevasya caityaṃ ca yathāvidhi samarcitaṃ // SvayambhuP_10.86 //
evaṃ bhadanta tatropacchandohe puṇyabhūtale /
yathāvidhi samārādhya sarvadevā mayārcitāḥ // SvayambhuP_10.87 //
etatpuṇyaṃ mayā labdhaṃ bhavatkṛpānubhāvataḥ /
tadatra janmasāphalyaṃ jīvitaṃ cāpi me 'dhunā // SvayambhuP_10.88 //
tathātra sarvadā śāsta dharmadhātuṃ jinālayaṃ /
smṛtvā nāma samuccārya dhyātvā bhajeya mā bhavaṃ // SvayambhuP_10.89 //
iti rājñā samākhyātaṃ śrutvā so 'rha prasāditaḥ /
nṛpati taṃ samālokya punarevaṃ samādiśat // SvayambhuP_10.90 //
dhanyo 'si yatmahārājadharmadhātuṃ jinālayaṃ /
smṛtvā dhyātvāpi saṃbhaktuṃmicchase 'tra sadā bhaja // SvayambhuP_10.91 //
etatpuṇyaviśuddhātmā bhadraśrīsadguṇāśrayaḥ /
bodhisattvo mahāsattvaḥ sarvadharmādhipo bhaveḥ // SvayambhuP_10.92 //
tataḥ saṃbodhisaṃbhāraṃ pūrayitvā yathākramaṃ /
arhanstribodhimāsādya dhruvaṃ buddhapadaṃ labheḥ // SvayambhuP_10.93 //
samutpattikathāṃ tasya dharmadhātoḥ svayaṃbhuvaḥ /
śrutvāpi yatmahatpuṇyaṃ saṃbodhisādhanaṃ labhet // SvayambhuP_10.94 //
iti matvā samutpattikathāṃ tasya svayaṃbhuvaḥ /
satkṛtya śraddhayā martyāḥ śrotumarhanti sarvathā // SvayambhuP_10.95 //
samutpattikathāṃ tasya dharmadhātoḥ svayaṃbhuvaḥ /
śṛṇvanti ye narā bhaktyā satkṛtya śraddhayā mudā // SvayambhuP_10.96 //
durgatiṃ te na gacchanti kutrāpi hi kadācan /
sadā sadgatisaṃjātā bhadraśrīsadguṇāśrayāḥ // SvayambhuP_10.97 //
sarvasattvahitādhānabodhicaryāvratāratāḥ /
mahābhijñā jagannāthā bhaveyuḥ sugatātmajāḥ // SvayambhuP_10.98 //
krameṇa bodhisambhāraṃ pūrayitvā jagaddhite /
arhantatrividhāṃ bodhiṃ prāpyeyuḥ saugataṃ padaṃ // SvayambhuP_10.99 //
iti matvā mahārāja śrotavyaṃ śraddhayādarāt /
svayambhūguṇamāhātmyaṃ durllabhaṃ bodhivāñchibhiḥ // SvayambhuP_10.100 //
śṛṇvanti ye narā bhaktyā satkṛtya śraddhayā mudā /
svayaṃbhūguṇamāhātmyasaddharmaśrīguṇārthadaṃ // SvayambhuP_10.101 //
te 'pi na durgatiṃ yāyuḥ sadāsadgatisaṃgatāḥ /
bhadraśrīsadguṇādhārā bhaveyurbodhilābhinaḥ // SvayambhuP_10.102 //
tasmādetatmahatpuṇyaṃ śrutvā dhyātvā sadādarāt /
smṛtvā nāma samuccārya saṃbhaktavyaṃ svayaṃbhuvaṃ // SvayambhuP_10.103 //
ahamapi purā rājan dharmmadhātoḥ svayaṃbhuvaḥ /
śrutvā sadguṇasāṃkathyaṃ babhūva saṃpramoditaḥ // SvayambhuP_10.104 //
tato 'haṃ sahasā tatra nepāle samupācaraṃt /
snātvā sarveṣu tīrtheṣu dadau dānaṃ yathepsitaṃ // SvayambhuP_10.105 //
aṣṭau tān vītarāgāṃśca samārādhya mayārcitāḥ /
devīṃ khagānanāṃ cāpi samārādhya samarcitā // SvayambhuP_10.106 //
mañjudevasya caityaṃ ca samārādhya samarcitaṃ /
pañca purā sthitā pañca devatāśca samarcitāḥ // SvayambhuP_10.107 //
tathā śāntikarācāryaḥ samālokya samarcitaḥ /
tataḥśaraṇamāśritya dharmadhāto svayaṃbhuvaḥ // SvayambhuP_10.108 //
satkṛtya śraddhayā nityaṃ samārādhya mudā bhajaṃ /
evaṃ tatra sadāśritya dharmadhātorūpāsakaḥ // SvayambhuP_10.109 //
triratnabhajanaṃ kṛtvā prācaran bodhisaṃbaraṃ /
etatpuṇyaviśuddhātmā pariśuddhatrimaṇḍalaḥ // SvayambhuP_10.110 //
ahaṃ bodhiṃ samāsādya jinātmajā bhave 'dhunā /
iti vijñāya mānuṣyā vāñchanti ye sunirvṛtiṃ // SvayambhuP_10.111 //
dharmadhātuṃ samārādhya bhajantu te sadā mudā /
smṛtvā dhyātvā ca nāmāpi samuccārya samādarāt // SvayambhuP_10.112 //
samālokya praṇatvāpi bhajantu taṃ jinālayaṃ /
ye bhajanti sadā smṛtvā dhyātvā natvā jinālayaṃ // SvayambhuP_10.113 //
drutaṃ saṃbodhimāsādya saṃbuddhapadamāpnuyuḥ /
iti satyaṃ samākhyātaṃ sarvairapi munīśvaraiḥ // SvayambhuP_10.114 //
śrutvānumodya taṃ dharmadhātuṃ smṛtvā bhajantvalaṃ /
subhāṣitamidaṃ yepi śrutvānumoditāśayāḥ // SvayambhuP_10.115 //
dharmadhātumanusmṛtvā dhyātvā bhajanti sarvadā /
te 'pi caitatmahatpuṇyapariśuddhatrimaṇḍalāḥ // SvayambhuP_10.116 //
bhadraśrīsadguṇādhārāścaturbrahmavihāriṇaḥ /
bodhisattvā mahāsattvā mahābhijñāḥ śubhendriyāḥ // SvayambhuP_10.117 //
drutaṃ saṃbodhimāsādya saṃbuddhapadamāpnuyuḥ /
iti me guruṇādiṣṭaṃ śrutaṃ mayā tathocyate // SvayambhuP_10.118 //
tvamapīdaṃ sadā lokā śrāvayitvānumodaya /
etatpuṇyānubhāvena sarvatra sarvadāpi te // SvayambhuP_10.119 //
nirutpātaṃ śubhotsāhaṃ bhavennūnaṃ narādhipaḥ /
iti tenārhatādiṣṭaṃ śrutvāśoko nṛpo mudā // SvayambhuP_10.120 //
tatheti prativijñapya prābhyanandat sapārṣadaḥ /
tataḥ sarve 'pi te lokā niśamyaitatsubhāṣitaṃ // SvayambhuP_10.121 //
anumodya mahotsāhaiḥ saṃcerire śubhe sadā /
tadaitatpuṇyabhāvena sarvatra tatra sarvadā // SvayambhuP_10.122 //
nirutpātaṃ śubhotsāhaṃ prāvarttata nirantaraṃ /
ityādiśya mahābhijño jayaśrīḥ sa mahāmatiḥ // SvayambhuP_10.123 //
sarvānstān sāṃdhikān paśyan punarevaṃ samādiśat /
yatredaṃ dharmmasāṃkathyaṃ prāvarttayet kalāvapi // SvayambhuP_10.124 //
bhāṣetya śṛṇuyādyaśca śrāvayedyaḥ pracārayet /
eteṣāṃ tatra sarveṣāṃ saṃbuddhāḥ sakalāḥ sadā // SvayambhuP_10.125 //
kṛpā dṛṣṭyā samālokya prakuryurbhadramābhavaṃ /
sarvā pāramitā devyasteṣāṃ tatra sadā śivaṃ // SvayambhuP_10.126 //
kṛtvā saṃbodhisaṃbhāraṃ pūrayeyuryathākramaṃ /
sarve 'pi bodhisattvāśca pratyekasugatā api // SvayambhuP_10.127 //
arhanto yoginasteṣāṃ prakuryurmaṅgalaṃ sadā /
sarve lokādhipāścāpi sarve cāpi maharṣayaḥ // SvayambhuP_10.128 //
tatra teṣāṃ hi sarveṣāṃ kuryuḥ samīkṣya maṅgalaṃ /
sarve devādhipāścāpi sarvadaityādhipā api // SvayambhuP_10.129 //
tathā sarve 'pi gandharvāḥ sarvayakṣādhipā api /
garuḍā nāgarājāśca kumbhāṇḍādhīśvarā api // SvayambhuP_10.130 //
samīkṣya sarvadā teṣāṃ rakṣāṃ kuryuḥ samantataḥ /
sarvāśca mātṛkā devyaḥ sabhairavagaṇā api // SvayambhuP_10.131 //
kṛtvā rakṣāṃ sadā teṣāṃ kuryurbhadraṃ samantataḥ /
sarve grahāśca tārāśca siddhā vidyādharā api // SvayambhuP_10.132 //
sādhyāścāpi sadālokya teṣāṃ kuryuḥ sumaṅgalaṃ /
bhūtapretapiśācāśca duṣṭā māragaṇā api // SvayambhuP_10.133 //
vīkṣya teṣāṃ prasannāste rakṣāṃ kuryuḥ sadā mudā /
svayambhūguṇamāhātmya sāṃkathyaṃ yo 'likhet mudā // SvayambhuP_10.134 //
tenāpi likhitaṃ sarva mahāyānasubhāṣitaṃ /
lekhāpitaṃ ca yenedaṃ dharmadhātusubhāṣitaṃ // SvayambhuP_10.135 //
tenāpi sakalaṃ sūtraṃ lekhāpitaṃ bhaved dhruvaṃ /
likhitaṃ cāpi yecedaṃ pratiṣṭhāpya yathāvidhi // SvayambhuP_10.136 //
śuddhasthāne gṛhe sthāpya pūjāṅgaiḥ sarvadārcitaṃ /
tenārhanto jināḥ sarve pratyekasugatā api // SvayambhuP_10.137 //
sasaṃghā bodhisattvāśca bhavanti pūjitāḥ khalu /
yaścāpīdaṃ svayaṃ dhṛtvā parebhyo 'pi samādiśat // SvayambhuP_10.138 //
bhāvayet satataṃ smṛtvā dhyātvāpi praṇamenmudā /
tasya sarvamunīndro hi pratyekasugatā api // SvayambhuP_10.139 //
arhanto bodhisattvāśca tuṣṭā dadyuḥ samīhitaṃ /
yaścaitadupadeṣṭāraṃ sarvāśca śrāvakānapi // SvayambhuP_10.140 //
yathāvidhi sa samabhyarcya bhājanaiḥ samatoṣayet /
tena sarve 'pi saṃbuddhāḥ pratyekasugatā api // SvayambhuP_10.141 //
arhanto bhikṣavaḥ sarve yogino brahmacāriṇaḥ /
bodhisattvāśca sarve 'pi vratino yatayo 'pi ca // SvayambhuP_10.142 //
arcitā bhojitāstuṣṭā bhaveyuranumoditāḥ /
kimevaṃ vahunoktena sarve buddhā munīśvarāḥ // SvayambhuP_10.143 //
sarvāstārāśca devyo 'pi sarvasaṃghā jinātmajāḥ /
nityaṃ teṣāṃ kṛpā dṛṣṭayā samālokyānumoditāḥ // SvayambhuP_10.144 //
rakṣāṃ vidhāya sarvatra varaṃ dadyuḥ samīhitaṃ // SvayambhuP_10.145 //
sarve lokādhipāścāpi sarve devā surādhipāḥ /
rakṣāṃ kṛtvā varaṃ dadyusteṣāṃ saddharmasādhane // SvayambhuP_10.146 //
rājāno 'pi sadā teṣāṃ rakṣā kṛtvānumoditāḥ /
yathābhivāñchitaṃ datvā pālayeyuḥ sadādarāt // SvayambhuP_10.147 //
mantriṇo 'pi sadā teṣāṃ sāmātyasacivānugāḥ /
sabhṛtyasainy