Tương Ưng Kosala (Kosala Saṃyutta)

arakkhito attā’ti? 
Tassa mayhaṁ, bhante, etadahosi: 
‘ye kho keci kāyena duccaritaṁ caranti, vācāya duccaritaṁ caranti, manasā duccaritaṁ caranti; 
tesaṁ arakkhito attā. 
Kiñcāpi te hatthikāyo vā rakkheyya, assakāyo vā rakkheyya, rathakāyo vā rakkheyya, pattikāyo vā rakkheyya; 
atha kho tesaṁ arakkhito attā. 
Taṁ kissa hetu? 
Bāhirā hesā rakkhā, nesā rakkhā ajjhattikā; 
tasmā tesaṁ arakkhito attā. 
Ye ca kho keci kāyena sucaritaṁ caranti, vācāya sucaritaṁ caranti, manasā sucaritaṁ caranti; 
tesaṁ rakkhito attā. 
Kiñcāpi te neva hatthikāyo rakkheyya, na assakāyo rakkheyya, na rathakāyo rakkheyya, na pattikāyo rakkheyya; 
atha kho tesaṁ rakkhito attā. 
Taṁ kissa hetu? 
Ajjhattikā hesā rakkhā, nesā rakkhā bāhirā; 
tasmā tesaṁ rakkhito attā’”ti. 
“Evametaṁ, mahārāja, evametaṁ, mahārāja. 
Ye hi keci, mahārāja, kāyena duccaritaṁ caranti …pe… 
tesaṁ arakkhito attā. 
Taṁ kissa hetu? 
Bāhirā hesā, mahārāja, rakkhā, nesā rakkhā ajjhattikā; 
tasmā tesaṁ arakkhito attā. 
Ye hi keci, mahārāja, kāyena sucaritaṁ caranti, vācāya sucaritaṁ caranti, manasā sucaritaṁ caranti; 
tesaṁ rakkhito attā. 
Kiñcāpi te neva hatthikāyo rakkheyya, na assakāyo rakkheyya, na rathakāyo rakkheyya, na pattikāyo rakkheyya; 
atha kho tesaṁ rakkhito attā. 
Taṁ kissa hetu? 
Ajjhattikā hesā, mahārāja, rakkhā, nesā rakkhā bāhirā; 
tasmā tesaṁ rakkhito attā”ti. 
Idamavoca …pe… 
“Kāyena saṁvaro sādhu, 
sādhu vācāya saṁvaro; 
Manasā saṁvaro sādhu, 
sādhu sabbattha saṁvaro; 
Sabbattha saṁvuto lajjī, 
rakkhitoti pavuccatī”ti. 

Saṁyutta Nikāya 3.6 
1. Paṭhamavagga 
Appakasutta 
Sāvatthinidānaṁ. 
Ekamantaṁ nisinno kho rājā pasenadi kosalo bhagavantaṁ etadavoca: 
“idha mayhaṁ, bhante, rahogatassa paṭisallīnassa evaṁ cetaso parivitakko udapādi: 
‘appakā te sattā lokasmiṁ ye uḷāre uḷāre bhoge labhitvā na ceva majjanti, na ca pamajjanti, na ca kāmesu gedhaṁ āpajjanti, na ca sattesu vippaṭipajjanti. 
Atha kho eteva bahutarā sattā lokasmiṁ ye uḷāre uḷāre bhoge labhitvā majjanti ceva pamajjanti ca kāmesu ca gedhaṁ āpajjanti, sattesu ca vippaṭipajjantī’”ti. 
“Evametaṁ, mahārāja, evametaṁ, mahārāja. 
Appakā te, mahārāja, sattā lokasmiṁ, ye uḷāre uḷāre bhoge labhitvā na ceva majjanti, na ca pamajjanti, na ca kāmesu gedhaṁ āpajjanti, na ca sattesu vippaṭipajjanti. 
Atha kho eteva bahutarā sattā lokasmiṁ, ye uḷāre uḷāre bhoge labhitvā majjanti ceva pamajjanti ca kāmesu ca gedhaṁ āpajjanti, sattesu ca vippaṭipajjantī”ti. 
Idamavoca …pe… 
“Sārattā kāmabhogesu, 
giddhā kāmesu mucchitā; 
Atisāraṁ na bujjhanti, 
migā kūṭaṁva oḍḍitaṁ; 
Pacchāsaṁ kaṭukaṁ hoti, 
vipāko hissa pāpako”ti. 

Saṁyutta Nikāya 3.7 
1. Paṭhamavagga 
Aḍḍakaraṇasutta 
Sāvatthinidānaṁ. 
Ekamantaṁ nisinno kho rājā pasenadi kosalo bhagavantaṁ etadavoca: 
“idhāhaṁ, bhante, aḍḍakaraṇe nisinno passāmi khattiyamahāsālepi brāhmaṇamahāsālepi gahapatimahāsālepi aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe kāmahetu kāmanidānaṁ kāmādhikaraṇaṁ sampajānamusā bhāsante. 
Tassa mayhaṁ, bhante, etadahosi: 
‘alaṁ dāni me aḍḍakaraṇena, bhadramukho dāni aḍḍakaraṇena paññāyissatī’”ti. 
“Evametaṁ, mahārāja, evametaṁ, mahārāja. 
Yepi te, mahārāja, khattiyamahāsālā brāhmaṇamahāsālā gahapatimahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā kāmahetu kāmanidānaṁ kāmādhikaraṇaṁ sampajānamusā bhāsanti; 
tesaṁ taṁ bhavissati dīgharattaṁ ahitāya dukkhāyā”ti. 
Idamavoca …pe… 
“Sārattā kāmabhogesu, 
giddhā kāmesu mucchitā; 
Atisāraṁ na bujjhanti, 
macchā khippaṁva oḍḍitaṁ; 
Pacchāsaṁ kaṭukaṁ hoti, 
vipāko hissa pāpako”ti. 

Saṁyutta Nikāya 3.8 
1. Paṭhamavagga 
Mallikāsutta 
Sāvatthinidānaṁ. 
Tena kho pana samayena rājā pasenadi kosalo mallikāya deviyā saddhiṁ uparipāsādavaragato hoti. 
Atha kho rājā pasenadi kosalo mallikaṁ deviṁ etadavoca: 
“atthi nu kho te, mallike, kocañño attanā piyataro”ti? 
“Natthi kho me, mahārāja, kocañño attanā piyataro. 
Tuyhaṁ pana, mahārāja, atthañño koci attanā piyataro”ti? 
“Mayhampi kho, mallike, natthañño koci attanā piyataro”ti. 
Atha kho rājā pasenadi kosalo pāsādā orohitvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho rājā pasenadi kosalo bhagavantaṁ etadavoca: 
“idhāhaṁ, bhante, mallikāya deviyā saddhiṁ uparipāsādavaragato mallikaṁ deviṁ etadavocaṁ: 
‘atthi nu kho te, mallike, kocañño attanā piyataro’ti? 
Evaṁ vutte, bhante, mallikā devī maṁ etadavoca: 
‘natthi kho me, mahārāja, kocañño attanā piyataro. 
Tuyhaṁ pana, mahārāja, atthañño koci attanā piyataro’ti? 
Evaṁ vuttāhaṁ, bhante, mallikaṁ deviṁ etadavocaṁ: 
‘mayhampi kho, mallike, natthañño koci attanā piyataro’”ti. 
Atha kho bhagavā etamatthaṁ viditvā tāyaṁ velāyaṁ imaṁ gāthaṁ abhāsi: 
“Sabbā disā anuparigamma cetasā, 
Nevajjhagā piyataramattanā kvaci; 
Evaṁ piyo puthu attā paresaṁ, 
Tasmā na hiṁse paramattakāmo”ti. 

Saṁyutta Nikāya 3.9 
1. Paṭhamavagga 
Yaññasutta 
Sāvatthinidānaṁ. 
Tena kho pana samayena rañño pasenadissa kosalassa mahāyañño paccupaṭṭhito hoti, pañca ca usabhasatāni pañca ca vacchatarasatāni pañca ca vacchatarisatāni pañca ca ajasatāni pañca ca urabbhasatāni thūṇūpanītāni honti yaññatthāya. 
Yepissa te honti dāsāti vā pessāti vā kammakarāti vā, tepi daṇḍatajjitā bhayatajjitā assumukhā rudamānā parikammāni karonti. 
Atha kho sambahulā bhikkhū pubbaṇhasamayaṁ nivāsetvā pattacīvaramādāya sāvatthiṁ piṇḍāya pavisiṁsu. 
Sāvatthiyaṁ piṇḍāya caritvā pacchābhattaṁ piṇḍapātapaṭikkantā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ: 
“idha, bhante, rañño pasenadissa kosalassa mahāyañño paccupaṭṭhito hoti, pañca ca usabhasatāni pañca ca vacchatarasatāni pañca ca vacchatarisatāni pañca ca ajasatāni pañca ca urabbhasatāni thūṇūpanītāni honti yaññatthāya. 
Yepissa te honti dāsāti vā pessāti vā kammakarāti vā, tepi daṇḍatajjitā bhayatajjitā assumukhā rudamānā parikammāni karontī”ti. 
Atha kho bhagavā etamatthaṁ viditvā tāyaṁ velāyaṁ imā gāthāyo abhāsi: 
“Assamedhaṁ purisamedhaṁ, 
sammāpāsaṁ vājapeyyaṁ; 
Niraggaḷaṁ mahārambhā, 
na te honti mahapphalā. 
Ajeḷakā ca gāvo ca, 
vividhā yattha haññare; 
Na taṁ sammaggatā yaññaṁ, 
upayanti mahesino. 
Ye ca yaññā nirārambhā, 
yajanti anukulaṁ sadā; 
Ajeḷakā ca gāvo ca, 
vividhā nettha haññare; 
Etaṁ sammaggatā yaññaṁ, 
upayanti mahesino. 
Etaṁ yajetha medhāvī, 
eso yañño mahapphalo; 
Etañhi yajamānassa, 
seyyo hoti na pāpiyo; 
Yañño ca vipulo hoti, 
pasīdanti ca devatā”ti.