Trưởng Lão Ni Kệ (Therīgāthā)

ā añjaliṁ akaṁ; 
‘Ehi bhadde’ti maṁ avaca, 
sā me āsūpasampadā. 
Ciṇṇā aṅgā ca magadhā, 
vajjī kāsī ca kosalā; 
Anaṇā paṇṇāsa vassāni, 
raṭṭhapiṇḍaṁ abhuñjahaṁ. 
Puññaṁ vata pasavi bahuṁ, 
Sappañño vatāyaṁ upāsako; 
Yo bhaddāya cīvaraṁ adāsi, 
Vippamuttāya sabbaganthehī”ti. 
… Bhaddā kuṇḍalakesā therī …. 

Therīgāthā 6.1 
Chakkanipāta 
Pañcasatamattātherīgāthā 
“Yassa maggaṁ na jānāsi, 
āgatassa gatassa vā; 
Taṁ kuto cāgataṁ sattaṁ, 
‘mama putto’ti rodasi. 
Maggañca khossa jānāsi, 
āgatassa gatassa vā; 
Na naṁ samanusocesi, 
evaṁdhammā hi pāṇino. 
Ayācito tatāgacchi, 
nānuññāto ito gato; 
Kutoci nūna āgantvā, 
vasitvā katipāhakaṁ; 
Itopi aññena gato, 
tatopaññena gacchati. 
Peto manussarūpena, 
saṁsaranto gamissati; 
Yathāgato tathā gato, 
kā tattha paridevanā”. 
“Abbahī vata me sallaṁ, 
duddasaṁ hadayassitaṁ; 
Yā me sokaparetāya, 
puttasokaṁ byapānudi. 
Sājja abbūḷhasallāhaṁ, 
Nicchātā parinibbutā; 
Buddhaṁ dhammañca saṅghañca, 
Upemi saraṇaṁ muniṁ”. 
Itthaṁ sudaṁ pañcasatamattā therī bhikkhuniyo … pe…. 

Therīgāthā 6.2 
Chakkanipāta 
Vāseṭṭhītherīgāthā 
“Puttasokenahaṁ aṭṭā, 
khittacittā visaññinī; 
Naggā pakiṇṇakesī ca, 
tena tena vicārihaṁ. 
Vīthi saṅkārakūṭesu, 
susāne rathiyāsu ca; 
Acariṁ tīṇi vassāni, 
khuppipāsāsamappitā. 
Athaddasāsiṁ sugataṁ, 
nagaraṁ mithilaṁ pati; 
Adantānaṁ dametāraṁ, 
sambuddhamakutobhayaṁ. 
Sacittaṁ paṭiladdhāna, 
vanditvāna upāvisiṁ; 
So me dhammamadesesi, 
anukampāya gotamo. 
Tassa dhammaṁ suṇitvāna, 
pabbajiṁ anagāriyaṁ; 
Yuñjantī satthuvacane, 
sacchākāsiṁ padaṁ sivaṁ. 
Sabbe sokā samucchinnā, 
pahīnā etadantikā; 
Pariññātā hi me vatthū, 
yato sokāna sambhavo”ti. 
… Vāseṭṭhī therī …. 

Therīgāthā 6.3 
Chakkanipāta 
Khemātherīgāthā 
“Daharā tvaṁ rūpavatī, 
ahampi daharo yuvā; 
Pañcaṅgikena turiyena, 
ehi kheme ramāmase”. 
“Iminā pūtikāyena, 
āturena pabhaṅgunā; 
Aṭṭiyāmi harāyāmi, 
kāmataṇhā samūhatā. 
Sattisūlūpamā kāmā, 
khandhāsaṁ adhikuṭṭanā; 
Yaṁ ‘tvaṁ kāmaratiṁ’ brūsi, 
‘aratī’ dāni sā mama. 
Sabbattha vihatā nandī, 
tamokhandho padālito; 
Evaṁ jānāhi pāpima, 
nihato tvamasi antaka. 
Nakkhattāni namassantā, 
aggiṁ paricaraṁ vane; 
Yathābhuccamajānantā, 
bālā suddhimamaññatha. 
Ahañca kho namassantī, 
sambuddhaṁ purisuttamaṁ; 
Pamuttā sabbadukkhehi, 
satthusāsanakārikā”ti. 
… Khemā therī …. 

Therīgāthā 6.4 
Chakkanipāta 
Sujātātherīgāthā 
“Alaṅkatā suvasanā, 
mālinī candanokkhitā; 
Sabbābharaṇasañchannā, 
dāsīgaṇapurakkhatā. 
Annaṁ pānañca ādāya, 
khajjaṁ bhojjaṁ anappakaṁ; 
Gehato nikkhamitvāna, 
uyyānamabhihārayiṁ. 
Tattha ramitvā kīḷitvā, 
āgacchantī sakaṁ gharaṁ; 
Vihāraṁ daṭṭhuṁ pāvisiṁ, 
sākete añjanaṁ vanaṁ. 
Disvāna lokapajjotaṁ, 
vanditvāna upāvisiṁ; 
So me dhammamadesesi, 
anukampāya cakkhumā. 
Sutvā ca kho mahesissa, 
saccaṁ sampaṭivijjhahaṁ; 
Tattheva virajaṁ dhammaṁ, 
phusayiṁ amataṁ padaṁ. 
Tato viññātasaddhammā, 
pabbajiṁ anagāriyaṁ; 
Tisso vijjā anuppattā, 
amoghaṁ buddhasāsanan”ti. 
… Sujātā therī …. 

Therīgāthā 6.5 
Chakkanipāta 
Anopamātherīgāthā 
“Ucce kule ahaṁ jātā, 
bahuvitte mahaddhane; 
Vaṇṇarūpena sampannā, 
dhītā majjhassa atrajā. 
Patthitā rājaputtehi, 
seṭṭhiputtehi gijjhitā; 
Pitu me pesayī dūtaṁ, 
detha mayhaṁ anopamaṁ. 
Yattakaṁ tulitā esā, 
tuyhaṁ dhītā anopamā; 
Tato aṭṭhaguṇaṁ dassaṁ, 
hiraññaṁ ratanāni ca. 
Sāhaṁ disvāna sambuddhaṁ, 
lokajeṭṭhaṁ anuttaraṁ; 
Tassa pādāni vanditvā, 
ekamantaṁ upāvisiṁ. 
So me dhammamadesesi, 
anukampāya gotamo; 
Nisinnā āsane tasmiṁ, 
phusayiṁ tatiyaṁ phalaṁ. 
Tato kesāni chetvāna, 
pabbajiṁ anagāriyaṁ; 
Ajja me sattamī ratti, 
yato taṇhā visositā”ti. 
… Anopamā therī …. 

Therīgāthā 6.6 
Chakkanipāta 
Mahāpajāpatigotamītherīgāthā 
“Buddha vīra namo tyatthu, 
sabbasattānamuttama; 
Yo maṁ dukkhā pamocesi, 
aññañca bahukaṁ janaṁ. 
Sabbadukkhaṁ pariññātaṁ, 
Hetutaṇhā visositā; 
Bhāvito aṭṭhaṅgiko maggo, 
Nirodho phusito mayā. 
Mātā putto pitā bhātā, 
ayyakā ca pure ahuṁ; 
Yathābhuccamajānantī, 
saṁsariṁhaṁ anibbisaṁ. 
Diṭṭho hi me so bhagavā, 
antimoyaṁ samussayo; 
Vikkhīṇo jātisaṁsāro, 
natthi dāni punabbhavo. 
Āraddhavīriye pahitatte, 
Niccaṁ daḷhaparakkame; 
Samagge sāvake passe, 
Esā buddhāna vandanā. 
Bahūnaṁ vata atthāya, 
Māyā janayi gotamaṁ; 
Byādhimaraṇatunnānaṁ, 
Dukkhakkhandhaṁ byapānudī”ti. 
… Mahāpajāpatigotamī therī …. 

Therīgāthā 6.7 
Chakkanipāta 
Guttātherīgāthā 
“Gutte yadatthaṁ pabbajjā, 
hitvā puttaṁ vasuṁ piyaṁ; 
Tameva anubrūhehi, 
mā cittassa vasaṁ gami. 
Cittena vañcitā sattā, 
mārassa visaye ratā; 
Anekajātisaṁsāraṁ, 
sandhāvanti aviddasū. 
Kāmacchandañca byāpādaṁ, 
sakkāyadiṭṭhimeva ca; 
Sīlabbataparāmāsaṁ, 
vicikicchañca pañcamaṁ. 
Saṁyojanāni etāni, 
pajahitvāna bhikkhunī; 
Orambhāgamanīyāni, 
nayidaṁ punarehisi. 
Rāgaṁ mānaṁ avijjañca, 
uddhaccañca vivajjiya; 
Saṁyojanāni chetvāna, 
dukkhassantaṁ karissasi. 
Khepetvā jātisaṁsāraṁ, 
pariññāya punabbhavaṁ; 
Diṭṭheva dhamme nicchātā, 
upasantā carissatī”ti. 
… Guttā therī …. 

Therīgāthā 6.8 
Chakkanipāta 
Vijayātherīgāthā 
“Catukkhattuṁ pañcakkhattuṁ, 
vihārā upanikkhamiṁ; 
Aladdhā cetaso santiṁ, 
citte avasavattinī. 
Bhikkhuniṁ upasaṅkamma, 
sakkaccaṁ paripucchahaṁ; 
Sā me dhammamadesesi, 
dhātuāyatanāni ca. 
Cattāri ariyasaccāni, 
indriyāni balāni ca; 
Bojjhaṅgaṭṭhaṅgikaṁ maggaṁ, 
uttamatthassa pattiyā. 
Tassāhaṁ vacanaṁ sutvā, 
karontī anusāsaniṁ; 
Rattiyā purime yāme, 
pubbajātimanussariṁ. 
Rattiyā majjhime yāme, 
dibbacakkhuṁ visodhayiṁ; 
Rattiyā pacchime yāme, 
tamokhandhaṁ padālayiṁ. 
Pītisukhena ca kāyaṁ, 
Pharitvā vihariṁ tadā; 
Sattamiyā pāde pasāresiṁ, 
Tamokhandhaṁ padāliyā”ti. 
… Vijayā therī …. 
Chakkanipāto niṭṭhito. 

Therīgāthā 7.1 
Sattakanipāta 
Uttarātherīgāthā 
“Musalāni gahetvāna, 
dhaññaṁ koṭṭenti māṇavā; 
Puttadārāni posentā, 
dhanaṁ vindanti māṇavā. 
Ghaṭetha buddhasāsane, 
yaṁ katvā nānutappati; 
Khippaṁ pādāni dhovitvā, 
ekamantaṁ nisīdatha. 
Cittaṁ upaṭṭhapetvāna, 
ekaggaṁ susamāhitaṁ; 
Paccavekkhatha saṅkhāre, 
parato no ca attato”. 
“Tassāhaṁ vacanaṁ sutvā, 
paṭācārānusāsaniṁ; 
Pāde pakkhālayitvāna, 
ekamante upāvisiṁ. 
Rattiyā purime yāme, 
pubbajātimanussariṁ; 
Rattiyā majjhime yāme, 
dibbacakkhuṁ visodhayiṁ. 
Rattiyā pacchime yāme, 
tamokhandhaṁ padālayiṁ; 
Tevijjā atha vuṭṭhāsiṁ, 
katā te anusāsanī. 
Sakkaṁva devā tidasā, 
saṅgāme aparājitaṁ; 
Purakkhatvā vihassāmi, 
tevijjāmhi anāsavā”. 
… Uttarā therī …. 

Therīgāthā 7.2 
Sattakanipāta 
Cālātherīgāthā 
“Satiṁ upaṭṭhapetvāna, 
bhikkhunī bhāvitindriyā; 
Paṭivijjhi padaṁ santaṁ, 
saṅkhārūpasamaṁ sukhaṁ”. 
“Kaṁ nu uddissa muṇḍāsi, 
samaṇī viya dissasi; 
Na ca rocesi pāsaṇḍe, 
kimidaṁ carasi momuhā”. 
“Ito bahiddhā pāsaṇḍā, 
diṭṭhiyo upanissitā; 
Na te dhammaṁ vijānanti, 
na te dhammassa kovidā. 
Atthi sakyakule jāto, 
buddho appaṭipuggalo; 
So me dhammamadesesi, 
diṭṭhīnaṁ samatikkamaṁ. 
Dukkhaṁ dukkhasamuppādaṁ, 
Dukkhassa ca atikkamaṁ; 
Ariyaṁ caṭṭhaṅgikaṁ maggaṁ, 
Dukkhūpasamagāminaṁ. 
Tassāhaṁ vacanaṁ sutvā, 
vihariṁ sāsane ratā; 
Tisso vijjā anuppattā, 
kataṁ buddhassa sāsanaṁ. 
Sabbattha vihatā nandī, 
tamokhandho padālito; 
Evaṁ jānāhi pāpima, 
nihato tvamasi antaka”. 
… Cālā therī …. 

Therīgāthā 7.3 
Sattakanipāta 
Upacālātherīgāthā 
“Satimatī cakkhumatī, 
bhikkhunī bhāvitindriyā; 
Paṭivijjhi padaṁ santaṁ, 
akāpurisasevitaṁ”. 
“Kiṁ nu jātiṁ na rocesi, 
jāto kāmāni bhuñjati; 
Bhuñjāhi kāmaratiyo, 
māhu pacchānutāpinī”. 
“Jātassa maraṇaṁ hoti, 
hatthapādāna chedanaṁ; 
Vadhabandhapariklesaṁ, 
jāto dukkhaṁ nigacchati. 
Atthi sakyakule jāto, 
sambuddho aparājito; 
So me dhammamadesesi, 
jātiyā samatikkamaṁ. 
Dukkhaṁ dukkhasamuppādaṁ, 
dukkhassa ca atikkamaṁ; 
Ariyaṁ caṭṭhaṅgikaṁ maggaṁ, 
dukkhūpasamagāminaṁ. 
Tassāhaṁ vacanaṁ sutvā, 
vihariṁ sāsane ratā; 
Tisso vijjā anuppattā, 
kataṁ buddhassa sāsanaṁ. 
Sabbattha vihatā nandī, 
tamokhandho padālito; 
Evaṁ jānāhi pāpima, 
nihato tvamasi antaka”. 
… Upacālā therī …. 
Sattakanipāto niṭṭhito. 

Therīgāthā 8.1 
Aṭṭhakanipāta 
Sīsūpacālātherīgāthā 
“Bhikkhunī sīlasampannā, 
indriyesu susaṁvutā; 
Adhigacche padaṁ santaṁ, 
asecanakamojavaṁ”. 
“Tāvatiṁsā ca yāmā ca, 
tusitā cāpi devatā; 
Nimmānaratino devā, 
ye devā vasavattino; 
Tattha cittaṁ paṇīdhehi, 
yattha te vusitaṁ pure”. 
“Tāvatiṁsā ca yāmā ca, 
tusitā cāpi devatā; 
Nimmānaratino devā, 
ye devā vasavattino. 
Kālaṁ kālaṁ bhavābhavaṁ, 
sakkāyasmiṁ purakkhatā; 
Avītivattā sakkāyaṁ, 
jātimaraṇasārino. 
Sabbo ādīpito loko, 
sabbo loko padīpito; 
Sabbo pajjalito loko, 
sabbo loko pakampito. 
Akampiyaṁ atuliyaṁ, 
aputhujjanasevitaṁ; 
Buddho dhammamadesesi, 
tattha me nirato mano. 
Tassāhaṁ vacanaṁ sutvā, 
vihariṁ sāsane ratā; 
Tisso vijjā anuppattā, 
kataṁ buddhassa sāsanaṁ. 
Sabbattha vihatā nandī, 
tamokhandho padālito; 
Evaṁ jānāhi pāpima, 
nihato tvamasi antaka”. 
… Sīsūpacālā therī …. 
Aṭṭhakanipāto niṭṭhito. 

Therīgāthā 9.1 
Navakanipāta 
Vaḍḍhamātutherīgāthā 
“Mā su te vaḍḍha lokamhi, 
vanatho āhu kudācanaṁ; 
Mā puttaka punappunaṁ, 
ahu dukkhassa bhāgimā. 
Sukhañhi vaḍḍha munayo, 
anejā chinnasaṁsayā; 
Sītibhūtā damappattā, 
viharanti anāsavā. 
Tehānuciṇṇaṁ isībhi, 
maggaṁ dassanapattiyā; 
Dukkhassantakiriyāya, 
tvaṁ vaḍḍha anubrūhaya”. 
“Visāradāva bhaṇasi, 
etamatthaṁ janetti me; 
Maññāmi nūna māmike, 
vanatho te na vijjati”. 
“Ye keci vaḍḍha saṅkhārā, 
hīnā ukkaṭṭhamajjhimā; 
Aṇūpi aṇumattopi, 
vanatho me na vijjati. 
Sabbe me āsavā khīṇā, 
appamattassa jhāyato; 
Tisso vijjā anuppattā, 
kataṁ buddhassa sāsanaṁ”. 
“Uḷāraṁ vata me mātā, 
patodaṁ samavassari; 
Paramatthasañhitā gāthā, 
yathāpi anukampikā. 
Tassāhaṁ vacanaṁ sutvā, 
anusiṭṭhiṁ janettiyā; 
Dhammasaṁvegamāpādiṁ, 
yogakkhemassa pattiyā. 
Sohaṁ padhānapahitatto, 
rattindivamatandito; 
Mātarā codito santo, 
aphusiṁ santimuttamaṁ”. 
… Vaḍḍhamātā therī …. 
Navakanipāto niṭṭhito.