Luận tạng Tây Tạng (Tengyur) — Tập 186

བརྟེན་པ་ལ་སོགས་པ་མེད་ན་མི་འབྱུང་
བ་ཅན་གྱི། རྟེན་ལ་སོགས་པ་ནི་གོ་བར་བྱེད་པ་ཡིན་གྱི་ཐམས་ཅད་ནི་མ་ཡིན་ནོ་ཞེས་འདོད་ན། དེ་ལྟ་ན་འོ་ན་རྒྱུ་དང་འབྲས་བུའི་མཚན་ཉིད་ཀྱི་འབྲེལ་པ་ཁོ་ན་གོ་བར་བྱེད་པའི་རྒྱུ་མཚན་ཡིན་གྱི། ལྡན་པ་ནི་མ་ཡིན་ནོ་ཞེས་བྱ་བར་འགྱུར་རོ། །འོན་ཏེ་གལ་ཏེ་ཡང་བརྟེན་པ་ལ་སོགས་པས། རྟེན་ལ་
སོགས་པ་ཙམ་ནི་གོ་བར་བྱེད་པ་མ་ཡིན་གྱི། འོན་ཀྱང་ཆུ་ལ་སོགས་པའི་བརྟེན་པས་བུམ་པ་ལ་སོགས་པའི་རྟེན་གོ་བར་བྱེད་པ་ཡིན་ནོ་ཞེ་ན། ལན་ནི་དེ་ལྟ་ན་འོ་ན་ཞེས་བྱ་བ་སྟེ། བརྟེན་པ་རྟེན་མེད་ན་མི་འབྱུང་བས་གོ་བར་བྱེད་པ་ཉིད་ཡིན་ན་དེ་དེ་ལྟ་ན་རྒྱུ་དང་འབྲས་བུའི་དངོས་པོ་ཉིད་གོ་བར་བྱེད་པ་
ཡིན་གྱི། ལྡན་པ་ནི་མ་ཡིན་ནོ། །དོགས་པ་བསུ་བ་ནི། མེད་ན་མི་འབྱུང་བ་ཉིད་ཅེས་བྱ་བ་སྟེ། རྒྱུ་དང་འབྲས་བུའི་དངོས་པོ་ལ་ཐ་དད་པའོ། །དེའི་ཕྱིར་ཞེས་མེད་ན་མི་འབྱུང་བའི་ཁྱད་པར་རྒྱུ་དང་འབྲས་བུའི། དངོས་པོ་ཡིན་པའི་ཕྱིར་རོ། །མེད་ན་མི་འབྱུང་བའི་ཁྱད་པར་ཅན་གྱི་འབྲེལ་པ་ཡོད་པ་ཡིན་ན་
ཡང་། མེད་ན་མི་འབྱུང་བའི་ཁྱད་པར་དེ་ཉིད་བསྒྲུབ་པར་བྱ་བ་རྟོགས་པའི་སྒྲུབ་བྱེད་ཡིན་ཏེ། ལྡན་པ་ལ་སོགས་པ་བརྟགས་པས་ཅི་བྱ། གང་གི་ཕྱིར་སྒྲུབ་པར་བྱེད་པ་བསྒྲུབ་པར་བྱ་བ་ལ་ངེས་པ་ཁོ་ན་འབྲེལ་པ་ཡིན་པ་དང་། མེད་ན་མི་འབྱུང་བའི་ཡང་དེ་ཉིད་ཡིན་པ་དང་། ངེས་པ་མེད་པ་ཡང་སྒྲུབ་
པར་བྱེད་པ་མ་ཡིན་པ་དེའི་ཕྱིར་མེད་ན་མི་འབྱུང་བ་ཁོ་ན་འབྲེལ་པ་ཡིན་ནོ། །འོན་ཏེ་མེད་ན་མི་འབྱུང་བ་ཡིན་མོད། དེ་རྒྱུ་དང་འབྲས་བུའི་དངོས་པོ་ནི་མ་ཡིན་ནོ་ཞེ་ན། གཞན་ལ་གཞན་ཞེས་བྱ་བའོ། །བཤད་ཟིན་ཏོ་ཞེས་བྱ་བ་ནི་འབྲས་བུའི་གཏན་ཚིགས་བཤད་པའི་སྐབས་སུའོ། །གལ་ཏེ་

དཀྱུས་འདི་ཙམ་གྱི་རྣམ་འགྲེལ་མཛད་པས་ཅི་ཞིག་བཤད་པ་ཡིན་ཞེ་ན། རང་བཞིན་དུ་འབྲས་བུ་ཞེས་བྱ་བའོ། །འོ་ན་ད་ཅི་འཆད་སྙམ་ན་བརྗོད་པ་ནི་ད་ནི་ཞེས་བྱ་བའོ། །གལ་ཏེ་འདི་གཉིས་མ་ངེས་པ་ཡིན་པའི་ཕྱིར་ཉེ་བར་བཀོད་པ་དོན་མེད་དོ་ཞེ་ན། གཞན་དག་ཅེས་
བྱ་བའོ། །དེ་ལ་ཞེས་བྱ་བ་ནི་ཁྱད་པར་ལ་སོགས་པ་ལའོ། །དེ་ཉིད་ནི་གོ་བར་བྱེད་པ་ཉིད་མ་ཡིན་པ་ཉིད་དུ་སྟེ་སློབ་དཔོན་ཕྱོགས་ཀྱི་གླང་པོས་གོ་བར་བྱེད་པ་ཉིད་མ་ཡིན་པར་བཤད་པའོ། །གཞུང་གང་གིས་ཤེ་ན། དེ་ལ་ཞེས་བྱ་བའོ། །རེ་ཞིག་ཐ་དད་པ་གོ་བར་བྱེད་པ་ཉིད་ཡིན་པའི་དོགས་པ་བསུ་ནས་
སེལ་བ་ནི། གལ་ཏེ་གཅིག་ཏུ་ལྡོག་པ་ཅན་ཞེས་བྱ་བ་སྟེ། སྲོག་ལ་སོགས་པ་ནི་གོ་བར་བྱེད་པ་ཁོ་ནར་རིགས་སོ་ཞེས་བྱ་བ་འདི་ནི་བདེན་པ་ཞིག་ནའོ། །གང་གི་ཞེ་ན། གལ་ཏེ་གཅིག་ཉིད་ལ་སྟེ་མི་མཐུན་པའི་ཕྱོགས་ཉིད་ལས་སོ། །གྲུབ་པ་ཁོ་ནའོ་ཞེ་ན། དེ་ནི་ཞེས་བྱ་བའོ། །ཅིའི་ཕྱིར་མ་གྲུབ་ཅེ་ན།
ཕྱོགས་ཉིད་ལས་ཏེ་གསོན་པོའི་ལུས་ཉིད་ལ་བདག་མེད་ཀྱང་སྲོག་ལ་སོགས་པ་འཇུག་གོ་ཞེས་བྱ་བ་རྣམ་པ་དེ་ལྟ་བུའི་བདག་ཉིད་འཁྲུལ་པར་དོགས་པ་ཡོད་པའི་ཕྱིར་རོ། །གལ་ཏེ་གཅིག་ཏུ་ལྡོག་པ་ཅན་ཁོ་ན་ཅི་ལྟར་གོ་བར་བྱེད་པ་ཉིད་ཀྱི་རྒྱུ་མཚན་ཡིན་ཞེ་ན། འདི་ལྟར་ཞེས་བྱ་བའོ། །གལ་ཏེ་
མེད་ན་མི་འབྱུང་བ་མེད་ན། སྲོག་ལ་སོགས་པ་མི་མཐུན་པའི་ཕྱོགས་ལ་ལྡོག་པ་གཅིག་ཏུ་ངེས་པ་ཅན་ཡིན་པར་ཇི་ལྟར་བརྗོད། ལྡོག་པ་གཅིག་ཏུ་ངེས་པ་ཅན་དེ་ཡང་། མ་འབྲེལ་པ་དག་ལ་སྲིད་པ་མ་ཡིན་ཏེ། དེས་ན་ལྡོག་པ་འདོད་པས་འབྲེལ་པ་ཡང་ཁས་བླང་བར་བྱའོ། །དེ་ཉིད་ཕྱིར་ན་ཞེས་བྱ་བ་
ནི་འབྲེལ་པ་ཉིད་ཀྱི་ཕྱིར་རྗེས་འགྲོ་གནས་སྟེ་དེ་ལྟ་མ་ཡིན་ན། འབྲེལ་པ་ཉིད་དུ་མི་འཐད་པའི་ཕྱིར་རོ། །དེ་ལྟ་ཡིན་ན་གོ་བར་བྱེད་པ་ཉིད་དུ་འཐད་པ་ཁོ་ནའོ་ཞེས་དོགས་པའོ། །རྣམ་པར་འགྲེལ་པ་ནི་སྲོག་ལ་སོགས་པ་ཞེས་བྱ་བའོ། །དེ་ཡང་ཞེས་བྱ་བ་ནི་ལྡོག་པ་གཅིག་ཏུ་ངེས་པ་ཉིད་དོ། །ཅིའི་ཕྱིར་
མི་འགྲུབ་ཅེ་ན། མི་མཐུན་པའི་ཞེས་བྱ་བའོ། །རང་གི་སྒོ་ནས་ཞེས་བྱ་བ་ནི། གཏན་ཚིགས་བདག་ཉིད་ཀྱི་སྒོ་ནས་སོ། །འདི་ཉིད་བརྗོད་པ་ནི་གང་གིས་ཞེས་བྱ་བའོ། །གལ་ཏེ་རང་གི་སྒོ་ནས་མི་ནུས་ན། འོ་ན་ཅི་ལྟར་རྟོགས་སྙམ་ན། རྗེས་སུ་འགྲོ་བའི་སྒོ་ནས་ནི་ཞེས་བྱ་བའོ། །ཅི་ལྟར་རུང་བ་ལ་

སོགས་པ་ལ་རྗེས་སུ་འགྲོ་བའི་སྒོ་ནས་ལྡོག་པ་འགྲུབ་པ་དེ་བཞིན་དུ། གལ་ཏེ་འདི་ལ་ཡང་རྗེས་སུ་འགྲོ་བ་ཡོད་ན་དེའི་ཚེ་ལྡོག་པར་འགྱུར་བ་ཁོ་ནའོ། །རྗེས་སུ་འགྲོ་བའི་སྒོ་ནས་ཀྱང་ལྡོག་པ་ཅི་ལྟར་རྟོགས་ཤེ་ན། གང་གི་ཕྱིར་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་ལྡོག་པ་མི་འཕེན་ནའོ། །དོན་
འདི་ཉིད་གཞུང་འཛུགས་པ་ནི། འདི་ལྟར་ཞེས་བྱ་བའོ། །གཞན་རྒྱུ་མ་ཡིན་པར་འདོད་པའོ། །དེ་ནི་འབྲས་བུའོ། །རྒྱུར་འདོད་པ་དེ་ཡོད་ནའོ། །གཞན་རྒྱུ་མ་ཡིན་པར་འདོད་པ་མེད་ན་ཡང་འབྲས་བུ་མེད་པ་ཡིན་པའོ། །དེས་འབྲས་བུར་མངོན་པར་འདོད་པའི་རྒྱུ་ཉིད་དུ་ངེས་པར་འགྱུར་རོ། །གང་གི་ཚེ་
ཞེས་བྱ་བ་ལ་སོགས་པ་ནི་རྣམ་པར་འགྲེལ་པའོ། །དེ་ཡོད་ན་ནི་ཙན་དན་ཡོད་ནའོ། །དེའི་སྟེ་ཙན་དན་གྱི་འབྲས་བུ་ཡིན་ནོ་ཞེས་སོ། །དེ་ཡང་ནི་དེ་ཡོད་ན་ཡོད་པའོ། །དེའི་ཞེས་བྱ་བ་རྗེས་སུ་འགྲོ་བའི་བདག་ཉིད་དུ་གྱུར་པའོ། །ཁྱད་པར་ཞེས་བྱ་བ་ནི་ཐམས་ཅད་བསྡུས་པར་རོ། །ཁྱབ་པའི་རྣམ་པར་བརྗོད་
པ་ནི་ཐམས་ཅད་དུ་ཞེས་བྱ་བའོ། །འདི་ཉིད་ལས་ནི་ཞེས་བྱ་བ་ལ་སོགས་པར་ནི་རྒྱུ་དང་འབྲས་བུའི་དངོས་པོ་ངེས་པར་རྗེས་སུ་འགྲོ་བ་ངེས་པར་བསྟན་པ་ཡིན་ནོ། །དེ་ཙམ་གྱིས་ཞེས་བྱ་བ་ནི་གསལ་བ་གཅིག་ལ་ལྟོས་པའི་རྒྱུ་དང་འབྲས་བུའི་དངོས་པོ་ངེས་པ་ཙམ་གྱིས་སོ། །དེ་ཞེས་བྱ་བ་ནི་ཁྱབ་པའི་
རྗེས་སུ་འགྲོ་བ་རྟོགས་པའོ། །གལ་ཏེ་ཡང་ད་ལྟ་མེ་ལས་དུ་བ་སྐྱེ་བར་རྟོགས་པ་ཡིན་ཡང་། གཞན་གྱི་ཚེ་གཞན་ལས་མི་འབྱུང་ངོ་ཞེས་ཅི་ལྟར་རྟོགས་ཤེ་ན། དེ་ཡང་ཞེས་བྱ་བའོ། །དེ་ལྟར་ཞེས་བྱ་བ་ནི་ཁྱབ་པ་ཉིད་དུའོ། །དེའི་ཚེ་ཉིད་ཅེས་བྱ་བ་ནི་མེ་ལས་སྐྱེ་བར་མཐོང་བའི་དུས་ཉིད་ནའོ། །གལ་ཏེ་
གཞན་ལས་མི་སྐྱེ་བ་ཉིད་དུ་རྟོགས་པ་ལ་ཅི་སྟེ་ལྟོས་ཤེ་ན། འདི་འདི་ལས་ཞེས་བྱ་བའོ། །གཞན་དུ་ཞེས་བྱ་བ་ནི་མེ་མ་ཡིན་པ་ལའོ། །འོ་ན་གོ་བར་བྱེད་པའི་རྒྱུ་མཚན་གང་ཡིན་ཞེ་ན། འོན་ཀྱང་ཞེས་བྱ་བའོ། །གལ་ཏེ་གཞན་ལས་དུ་བ་མི་འབྱུང་བར་རྟོགས་པ་ཉིད་ནི་འདི་ཉིད་ལས་དུ་བ་འབྱུང་ངོ་ཞེས་བྱ་བའི་
ངེས་པ་འགྲུབ་པར་འགྱུར་བ་ཡིན་ནོ། །གཞན་ལས་མི་འབྱུང་བའི་རྣམ་པ་ལ་ནི་རྟོགས་པ་ཡོད་པ་མ་ཡིན་ནོ་ཞེས་དོགས་པ་བསུ་ནས་བརྗོད་པ་ནི་དེ་ལྟར་ཡང་ཞེས་བྱ་བ་སྟེ། གཞན་ལས་དུ་བ་མི་སྐྱེ་བའི་རྣམ་པ་ལ་ཡང་། རྟོགས་པ་ཡོད་པ་ཉིད་དོ། །གང་དག་གིས་ཤེ་ན། བརྗོད་པ་དེ་ཡོད་ན་ཞེས་བྱ་བ་སྟེ།

གཞན་ཡོད་ན་དུ་བ་མེད་པ་དེ་མ་ཐག་ཉིད་དུ་སྟེ། གྱུར་པ་ཉིད་དུ་ངེས་པའི་རྟོགས་པ་པོ་རྣམས་ལའོ། །དེ་ཡོད་ན་མེད་པར་རྟོགས་པ་ཉིད་ཅི་ལྟར་ཞེ་ན། དེ་ལས་གཞན་ཆུ་ལ་སོགས་པ་ལས་མེ་ཉེ་བའི་སྔར་དུ་བ་མི་སྐྱེ་བར་མཐོང་བའི་ཕྱིར་རོ། །དེ་ལྟ་ན་ཡང་མི་མཐུན་པའི་ཕྱོགས་ལས་ལྡོག་
པར་ཐེ་ཚོམ་ཟའོ་ཞེས་དོགས་པ་ནི་གལ་ཏེ་ཞེས་བྱ་བའོ། །གཞན་གྱི་ཁྱད་པར་ནི་ཤ་ཟ་ལ་སོགས་པའོ། །འོན་ཏེ་གཞན་ཉིད་དུ་ཁྱད་པར་མེད་པའི་ཕྱིར། ཆུ་ལ་སོགས་པ་ལས་ཀྱང་ཅི་སྟེ་མི་འགྱུར་ཞེ་ན། གཞན་ཞེས་བྱ་བ་ཞེས་སྨྲས་སོ། །དེས་ན་ཞེས་བྱ་བ་ནི་དུ་བ་གཞན་གྱི་ཁྱད་པར་ལ་ཡོད་པས་ནའོ། །འོན་
ཏེ་མེ་ཡོད་པ་ཉིད་ལ་དུ་བ་ཡོད་དོ་ཞེས་ངེས་པ་ཡིན་ཏེ། དེས་ན་ལྡོག་པ་མེད་པར་ཅི་ལྟར་མ་ངེས་ཤེ་ན། དེ་ཡོད་ན་ཞེས་བྱ་བ་མེ་ཡོད་པ་ཉིད་ལ་དུ་བ་ཡོད་དོ་ཞེས་དེ་ལྟར་ལྡོག་པ་ཡང་མི་ངེས་ཏེ། རྗེས་སུ་འགྲོ་བ་འབའ་ཞིག་ཏུ་ནི་མ་ཟད་པའོ། །ཅིའི་ཕྱིར་ཞེ་ན། མ་མཐོང་ལ་ཡང་ཞེས་བྱ་བའོ། །རིག་པ་
ཅན་ཁྱེད་ཀྱིའོ། །འདི་ལྟར་ཞེས་བྱ་བ་ནི་དུ་བ་བཞིན་དུ་འབྲས་བུ་ཉིད་ཀྱིས་གཏན་ཚིགས་གོ་བར་བྱེད་པ་ཡིན་གྱི་གཞན་དུ་ནི་མ་ཡིན་ནོ་ཞེས་བྱ་བ་དེ་ལྟར་རོ། །ཁྱེད་ཉིད་རྗེས་སུ་འཛིན་པ་ཡིན་གྱི། གཉིས་མེད་པར་སྨྲ་བ་སངས་རྒྱས་པ་ནི་མ་ཡིན་ནོ། །གལ་ཏེ་རང་རྗེས་སུ་འཛིན་པ་ཡིན་ཡང་མི་འདོད་
ན་དེའི་ཚེ་རྣམ་པ་ཐམས་ཅད་དུ་ཁྱེད་ཉིད་ལ་གནོད་པར་འགྱུར་ཏེ། བདག་རྗེས་སུ་དཔོག་པ་ཡང་མེད་པར་ཐལ་བའི་ཕྱིར་དང་གཉིས་མེད་པར་ཐལ་བའི་ཕྱིར་རོ། །འཆད་པ་ནི་ཁྱེད་ཀྱི་ཞེས་བྱ་བའོ། །གཏན་ཚིགས་ནི་སྲོག་ལ་སོགས་པའོ། །འདི་ལྟར་ཞེས་བྱ་བ་ནི་དུ་བ་ལྟར་འབྲས་བུ་ཉིད་ཀྱིས་སོ། །
རྣམ་པ་གཞན་དུ་ཞེས་བྱ་བ་ནི་འབྲས་བུ་ཉིད་མ་ཡིན་ན། གོ་བར་བྱེད་པ་ཉིད་མི་སྲིད་པའི་ཕྱིར་རོ་ཞེས་བསྟན་པ་ཡིན་ནའོ། །དེ་ལྟར་ཞེས་བྱ་བ་དེའི་འབྲས་བུ་ཉིད་ཀྱིས་གོ་བར་བྱེད་པ་ཉིད་དུ་མི་འདོད་ན་དེའི་ཚེ་དེའི་འབྲས་བུ་ཉིད་ལ་རྟེན་གཞན་ཚོལ་ཅིག །རྟེན་གཞན་ནི་སྲིད་པ་ཡང་མ་ཡིན་ནོ། །གསལ་
ཞིང་འཛིན་པ་དང་འདྲ་བ་ནི་དུ་བ་མེའི་འབྲས་བུ་ཉིད་ཡིན་པར་འཁྲུལ་པར་བརྗོད་པའོ། །རྒྱུ་དང་འབྲས་བུའི་དངོས་པོ་ཁས་མ་བླངས་པར་འདི་སྐད་བརྗོད་པ་ཡིན་ནོ། །ད་ནི་མི་མཐུན་པའི་ཕྱོགས་ལས་ལྡོག་པ་གྲུབ་པའི་དོན་དུ་ཀུན་རྫོབ་ཏུ་རྒྱུ་དང་འབྲས་བུའི་དངོས་པོ་བསྒྲུབ་པ་ནི། གཞན་ཡང་

ཞེས་བྱ་བའོ། །དེ་མེད་པས་ཞེས་བྱ་བ་ནི་མེ་མེད་པས་དུ་བ་འདི་མེད་ལ། མེད་པར་ཅི་ལྟར་འགྱུར། དེ་མ་ཐག་ཏུ་ཞེས་བྱ་བ་དུ་བ་མེའི་དེ་མ་ཐག་ཏུ་མི་འགྱུར་བ་ཁོ་ནའོ། །གང་གི་ཚེ་གཉིས་པོ་འདིར་མི་འགྱུར་ཞེ་ན། གལ་ཏེ་ཤ་ཟ་ལ་སོགས་པ་གཞན་ཡང་རྒྱུ་ཡིན་ནའོ། །མཐུན་པའི་ཞེས་བྱ་བ་ནི་འཆད་
པའོ། །དེ་ཞེས་བྱ་བ་ནི་དུ་བ་ལ་སོགས་པ་འབྲས་བུའོ། །དེ་མེད་ན་ནི་ཞེས་བྱ་བ་མེ་མེད་ན་ནི་དེ་མ་ཐག་ཏུ་མེད་པར་འགྱུར་རོ་ཞེས་བྱ་བ་འདིར་ནི་སྲིད་པ་མ་ཡིན་ནོ། །གང་གི་ཚེ་ཞེ་ན་ཤ་ཟ་ལ་སོགས་པ་གཞན་ཞེས་བྱ་བའོ། །དབང་དུ་བྱས་པ་ཞེས་བྱ་བ་ནི་མེའི་རྗེས་སུ་འགྲོ་ལྡོག་གི་རྗེས་སུ་བྱེད་པའི་ཕྱིར་རོ། །འདོད་
རྒྱལ་བའི་ཞེས་བྱ་བ་ནི། རྒྱུ་མཚན་མེད་པར་དུ་བ་ལས་མེ་ཐོབ་པའོ། །གཏན་ཚིགས་དེའི་ཕྱིར་བྱང་གྲོལ་ལ་སོགས་པའི་སྒྲུབ་བྱེད་ཐབས་ཚོལ་བ་འབྲས་བུ་དང་འབྲས་བུ་ལ་ངེས་པའི་འབྲས་བུ་ལ་སོ་སོར་ངེས་པ་དེར་མི་འགྱུར་རོ། །འོ་ན་ཁྱེད་ཀྱི་ལྟར་ན་རྣམ་པ་ཐམས་ཅད་དུ་རྒྱུ་དང་འབྲས་བུའི་
དངོས་པོ་མེད་པའི་ཕྱིར་ན། འབྲས་བུ་སོ་སོ་ལ་ངེས་པའི་ཐབས་ཚོལ་བར་ཅི་ལྟར་འགྱུར་ཞེ་ན། གཉིས་སུ་མེད་པར་ཞེས་གསུངས་ཏེ། ཀུན་རྫོབ་ཏུ་ནི་རྒྱུ་དང་འབྲས་བུའི་དངོས་པོ་ཡོད་པ་ཁོ་ན་སྟེ། དེས་ན་སོ་སོར་ངེས་པས་འཇུག་པ་ཡིན་ནོ། །གང་གི་ཕྱིར་རྒྱུ་གཞན་ཡོད་ན། དེ་མེད་
པས་མེད་པ་ཞེས་བྱ་བ་ལ་སོགས་པ་དང་། འབྲས་བུ་སོ་སོ་ལ་ངེས་པའི་ཐབས་ཚོལ་བ་མི་འཐད་པ་དེའི་ཕྱིར་རོ། །དེ་ལྟ་ཡིན་མོད་དེ་ལྟ་ན་ཡང་སྲོག་ལ་སོགས་པ་དང་ལྡན་པ་ཉིད་ཅི་ལྟར་ལྡོག་པ་ཅན་མ་ཡིན་ཞེ་ན། གང་གི་ཕྱིར་ཞེས་གསུངས་སོ། །ལྡོག་པ་ཞེས་བྱ་བ་ནི་ཤ་པ་དང་དུ་བ་དག་
གོ། །བདག་ནི་གཏན་ཚིགས་སྲོག་ལ་སོགས་པ་ལ་ལྟོས་ཏེ། རང་གི་བདག་ཉིད་དམ་རྒྱུའི་དངོས་པོར་གྲུབ་པ་མ་ཡིན་ནོ། །དེའི་ཕྱིར་ན་ཞེས་བྱ་བ་ནི་རང་གི་བདག་ཉིད་ལ་སོགས་པ་མ་གྲུབ་པས་ནའོ། །ཁྱད་པར་ཐུན་མོང་མ་ཡིན་པ་ལ་རྗེས་སུ་འགྲོ་བ་དང་ལྡོག་པ་གཉི་ག་མེད་དོ། །ཅིའི་
ཕྱིར་དེ་ཁོ་ན་བཞིན་དུ་ལྡོག་པ་ཅན་ཉིད་དུ་འགྲུབ་ཅེ་ན། དེའི་བདག་ཉིད་ཅེས་བྱ་བའོ། །བསྒྲུབ་པར་བྱ་བའི་བདག་ཉིད་ལ་ངེས་པ་ཁོ་ན་དེ་མེད་པས་ལྡོག་པ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་དེ་ཁོ་ན་དེ་ལྟར་འགྱུར་ཞེ་ན། འབྲེལ་པ་མེད་པ་ནི་ཞེས་བྱ་བའོ། །དེ་ལྟ་ཡིན་དང་ཞེས་བྱ་བ་

ནི་འབྲེལ་པ་དང་ལྡན་པ་ཁོ་ན་ལྡོག་པར་བྱེད་པ་ཡིན་དང་ངོ་། །ཅི་ལྟར་གཏན་ཚིགས་མ་ཡིན་ཞེ་ན། མ་འབྲེལ་པ་ཞེས་བྱ་བའོ། །འོན་ཏེ་སྲོག་ལ་སོགས་པ་ནི་བདག་ལ་འབྲེལ་བ་ཁོ་ནའོ་ཞེ་ན། འབྲེལ་པ་དང་ལྡན་པ་ཞེས་བྱ་བའོ། །འོ་ན་ལྡན་པ་ཅན་ལ་སོགས་པའི་འབྲེལ་པ་
ལས་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་ཡིན་པ་ཁོ་ནའོ་ཞེ་ན། དེའི་བདག་ཉིད་དང་ཞེས་བྱ་བའོ། །དོགས་པ་བསུ་བ་ནི་ལྡན་པ་ཅན་ལ་སོགས་པ་རྣམ་པ་གཞན་གྱིས་ཀྱང་ཅི་སྟེ་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་མ་ཡིན་ཞེ་ན། འོན་ཏེ་རྣམ་པ་གཞན་གྱིས་ཁྱབ་པར་བྱ་བ་དང་ཁྱབ་
པར་བྱེད་པ་མ་ཡིན་ནོ། །ཅིའི་ཕྱིར་ཞེ་ན། དེའི་བདག་ཉིད་དང་དེ་ལས་བྱུང་བ་ལས་མ་གཏོགས་པ་ཁྱབ་པར་བྱ་བ་དང་ཁྱབ་པར་བྱེད་པའི་རྒྱུ་མཚན་རྣམ་པ་གཞན་མེད་པའི་ཕྱིར་རོ། །གལ་ཏེ་དེའི་བདག་ཉིད་དང་དེ་ལས་བྱུང་བ་ཁོ་ནས། སྲོག་ལ་སོགས་པ་དང་ལྡན་པ་ཉིད་གོ་བར་བྱེད་པ་ཡིན་པར་
འགྱུར་རོ་ཞེ་ན། རྣམ་པ་དེ་ཉིད་ཀྱང་ཞེས་བྱ་བ་སྟེ་དེའི་བདག་ཉིད་དང་དེ་ལས་བྱུང་བའི་མཚན་ཉིད་དོ། །སྲོག་ལ་སོགས་པ་ལ་ནི་དེ་ལྟར་ཡང་སྟེ་རྟོགས་པར་ཡང་མ་གྱུར་ཏེ། སྲོག་ལ་སོགས་པ་བདག་ལ་དེའི་བདག་ཉིད་དང་དེ་ལས་བྱུང་བ་ཉིད་དུ་རྟོགས་པ་མ་ཡིན་ནོ་ཞེས་བྱ་བའི་དོན་ཏོ། །དེས་ཞེས་
བྱ་བ་ནི་རང་གི་བདག་ཉིད་ལ་སོགས་པར་མ་གྲུབ་པས་ནའོ། །དེས་ཀྱང་ནི་སློབ་དཔོན་ཕྱོགས་ཀྱི་གླང་པོས་ཀྱང་ངོ་། །འདི་ཉིད་ཅེས་བྱ་བ་ནི་རྗེས་སུ་འགྲོ་བ་དང་ལྡོག་པ་དག་མེད་པའོ། །ཚིག་རྐང་བཞི་པ་འགྲེལ་པ་ནི། དེ་ལྟ་མ་ཡིན་ན་ཞེས་བྱ་བའོ། །དེ་ལྟ་ན་ཡང་ཞེས་བྱ་བ་ནི་གོ་བར་བྱེད་པ་ཡིན་ན་ཡང་
ངོ་། །དེའི་ཕྱིར་ན་མ་ངེས་པ་ཞེས་བྱ་བ་རྣམ་པར་འགྲེལ་པ་ནི་དེའི་ཕྱིར་ཞེས་བྱ་བ་ལ་སོགས་པའོ། །དེ་ཡང་ཞེས་བྱ་བ་ནི་སྲོག་ལ་སོགས་པ་མེད་པའོ། །གཏན་ཚིགས་དེའི་ཕྱིར་གསོན་པོའི་ལུས་ལ་ཡང་། ཁྱབ་པར་བྱ་བ་བདག་ལྡོག་པ་ཡོད་ན་གདོན་མི་ཟ་བར་ཁྱབ་པར་བྱེད་པ་སྲོག་ལ་སོགས་པ་མེད་པ་ཉིད་
ཀྱང་ཡོད་པར་འགྱུར་བ་ཞིག །ཡོད་པ་ཡང་མ་ཡིན་ཏེ་དེའི་ཕྱིར་ཁྱབ་པར་བྱེད་པ་སྲོག་ལ་སོགས་པ་ལོག་པས་ཁྱབ་པར་བྱ་བ་བདག་མེད་པ་ལྡོག་པས་ན་བདག་རྟོགས་པར་འགྱུར་རོ་ཞེས་བྱ་བའི་རྩོད་པ་རྗེས་སུ་བརྗོད་ནས་ལན་འདེབས་པ་ནི། སྲོག་ལ་སོགས་པ་མེད་པ་བདག་མེད་པའི་ཁྱབ་པར་བྱེད་པ་ཉིད་

ཡིན་པ་དེ་ཡང་མཐུན་པའི་ཕྱོགས་ཀྱི་ཁྱབ་པ་མེད་པར་མི་འགྲུབ་པོ། །རྗེས་སུ་འགྲོ་བ་ལ་མི་ལྟོས་པར་ཁྱབ་པར་བྱེད་པ་ཉིད་གྲུབ་པ་ཡིན་ན་ནི་དེ་ལོག་པས་བདག་མེད་པ་ལྡོག་པའི་ཕྱིར་བདག་རྟོགས་པར་འགྱུར་བ་ཡིན་ནོ་ཞེས་བརྗོད་པ་ནི་གལ་ཏེ་མི་མཐུན་པའི་ཕྱོགས་དག་ཅེས་བྱ་བ་སྟེ་སྲོག་ལ་སོགས་པ་མེད་པ་
དང་། བདག་མེད་པ་དག་གོ། །རྗེས་སུ་འགྲོ་བ་མེད་པར་ཞེས་བྱ་བ་ནི་སྲོག་ལ་སོགས་པ་བདག་ལ་འབྲེལ་པ་མ་ཡིན་ཡང་ངོ་། །འོ་ན་ཁྱབ་པ་དེ་གྲུབ་པ་ཁོ་ནའོ་ཞེ་ན། མི་མཐུན་པའི་ཞེས་བྱ་བའོ། །ཅིའི་ཕྱིར་མི་འགྲུབ་སྙམ་ན། བདག་དང་ཞེས་བྱ་བའོ། །བདག་ལྡོག་པར་བྱེད་པ་ཉིད་མ་ཡིན་མོད་དེ་ལྟ་ན་
ཡང་བདག་ལྡོག་པ་ལ་ནི་སྲོག་ལ་སོགས་པ་ལྡོག་པས་ཁྱབ་པ་འགྲུབ་པོ་ཞེ་ན། ལྡོག་པར་བྱེད་པ་མ་ཡིན་པ་ཞེས་སྨོས་སོ། །གང་གི་ཕྱིར་མཐུན་ཕྱོགས་ཀྱི་ཁྱབ་པ་མེད་པར་ལྡོག་པའི་ཁྱབ་པ་མི་འགྲུབ་པ་དེའི་ཕྱིར་རོ། །ཅི་ལྟར་ན་སྲོག་ལ་སོགས་པ་མེད་པའི་ཁྱབ་བྱེད་ཉིད་དུ་མི་འགྲུབ་ཅེ་ན། གཞན་
ཞེས་བྱ་བ་སྟེ་མ་འབྲེལ་པ་གཞན་ལོག་པས། འབྲལ་ཟླ་མ་ཡིན་པ་གཞན་ལྡོག་པ་ནི་མི་རུང་བའི་ཕྱིར་རོ། །གལ་ཏེ་ཅི་ལྟར་མི་རུང་ཞེས་གལ་ཏེ་ཞེས་བྱ་བའོ། །འབྲེལ་པ་ཡོད་པར་དོགས་པ་ནི་དེ་བདག་ཅེས་བྱ་བའོ། །ཅི་སྟེ་ཞེས་བྱ་བ་ནི་འཆད་པའོ། །རིག་བྱེད་ཀྱི་མཐར་སྨྲ་བ་རྣམས་ཀྱི་ལྟར་ན་ནི།
སྲོག་ལ་སོགས་པ་བདག་གི་རང་བཞིན་ཡིན་ཏེ་དེས་ན་རྣམ་འགྲེལ་དུ་དེའི་སྒྲས་བདག་བཟུང་བ་ཡིན་ལ་བདག་གི་སྒྲས་ནི་རང་བཞིན་བཟུང་བ་ཡིན་ནོ། །དེའི་བདག་སྟེ་རང་བཞིན་ག་ལ་ཡོད་པ་དེ་ལ་དེ་སྐད་ཅེས་ཚིག་སྦྱར་རོ། །བདག་དམིགས་པ་ན་སྲོག་ལ་སོགས་པ་དེ་དམིགས་ལ། བདག་རྟོགས་པ་མེད་ན་ཡང་
མིག་ལ་སོགས་པ་དེ་མ་རྟོགས་ན་བདག་གི་རང་བཞིན་དང་། བདག་ལས་བྱུང་བ་ཉིད་འདི་གྲུབ་པར་འགྱུར་རོ། །གལ་ཏེ་ཞེས་བྱ་བ་ནི་འཆད་པའོ། །དེའི་མཚན་ཉིད་ཡིན་པའི་ཕྱིར་ཞེས་བྱ་བ་ནི་བདག་གི་མཚན་ཉིད་ཡིན་པའི་ཕྱིར་རོ། །གཞན་ཡང་ཞེས་བྱ་བ་ནི་སྲོག་ལ་སོགས་པ་ཡང་ངོ་། །དེའི་རང་བཞིན་
ཞེས་བྱ་བ་ནི་བདག་གི་རང་བཞིན་ནོ། །དེ་ཉིད་ནི་བདག་གོ། །འདུ་བ་ཡང་ཞེས་བྱ་བ་ལ་སོགས་པས་ནི་དེ་ལས་བྱུང་བའི་ཕྱོགས་སུ་ནི་འབྱིན་པར་བྱེད་དོ། །མཇུག་སྡུད་པ་ནི་དེའི་ཕྱིར་དེའི་བདག་ཉིད་དང་དེ་ལས་བྱུང་བར་ཅི་ལྟར་འགྱུར་ཞེས་བྱ་བའོ། །མཐོང་དང་མ་མཐོང་ཞེས་བྱ་བ་ནི་ཡུལ་ཅན་གྱི་ཡུལ་བསྟན་

པའི་ཕྱིར་ན། རྒྱུ་དང་ཁྱབ་བྱེད་ཉིད་དུ་སྒྲུབ་པར་བྱེད་པ་རྗེས་སུ་འགྲོ་བ་དང་ལྡོག་པ་དག་མ་གྲུབ་པའོ། །གལ་ཏེ་བུམ་པ་ལ་སོགས་པ་ལ། བདག་ཤིན་ཏུ་ལྐོག་ཏུ་གྱུར་པའི་རྗེས་སུ་འགྲོ་བ་དང་ལྡོག་པ་དག་དང་མ་གྲུབ་པ་དེ་ལྟ་ན་ཡང་ལྡོག་པ་ནི་གྲུབ་པ་ཁོ་ན་ཡིན་ལ་དེ་གྲུབ་ན་
ཡང་སྲོག་ལ་སོགས་པ་ཡང་ལྡོག་པའི་ཕྱིར་ཁྱབ་པ་འགྲུབ་པ་ཅི་སྟེ་མ་ཡིན་ཞེ་ན། བུམ་པ་ལ་སོགས་པ་ཞེས་བྱ་བའོ། །ཅི་ལྟར་མ་ཡིན་ཞེ་ན། འདི་ལྟར་ཞེས་བྱ་བའོ། །བདག་ཤིན་ཏུ་ལྐོག་ཏུ་གྱུར་པ་ན་ནི་མ་དམིགས་པ་ལས་མེད་པ་མི་རྟོགས་སོ། །དེས་ན་བུམ་པ་ལ་སོགས་པ་ལ་བདག་མེད་པར་
གྲུབ་པ་མེད་པ་ན། བདག་དེའི་སྲོག་ལ་སོགས་པའི་ཁྱབ་པར་བྱེད་པ་ཉིད་ཅི་ལྟར་རྟོགས། འོ་ན་ནི་གང་ལ་རྒྱུ་དང་ཁྱབ་པར་བྱེད་པ་སྒྲུབ་པར་བྱེད་པའི་རྗེས་སུ་འགྲོ་བ་དང་ལྡོག་པ་ཡོད་ཅེ་ན་དམིགས་པའི་མཚན་ཉིད་ཀྱིས་ཞེས་སྨོས་སོ། །དེས་ན་ཞེས་བྱ་བ་ནི་དམིགས་པར་བྱ་བ་མ་ཡིན་པས་ནའོ། །
དེ་མ་ཡིན་ན་ཡང་ཞེས་བྱ་བ་ནི་རྒྱུ་དང་ཁྱབ་པར་བྱེད་པ་ཉིད་མ་ཡིན་ན་ཡང་ངོ་། །ཡུལ་ལམ་དུས་གཞན་འགའ་ལ་ཡང་མཐོང་བ་མེད་པའི་ངོ་བོ་ཅན་ཤ་ཟ་ལ་སོགས་པ་དང་འདྲ་བ་གང་ཡིན་པ་དེ་བུམ་པ་ལ་སོགས་པ་ལ་མེད་ཅེས་བྱ་བ་དེ་ལྟ་བུའི་དངོས་པོ་མེད་པ་ཉིད་དུ་ངེས་པར་མི་འགྱུར་རོ། །དེས་
ན་ལྡོག་པ་ཤེས་པ་མེད་པའི་བདག་གི་སྲོག་ལ་སོགས་པ་མེད་པ་ལྡོག་པ་སྲོག་ལ་སོགས་པའི་མཚན་ཉིད་ལ་ཁྱབ་པར་བྱེད་པ་ཡིན་པ་ཡང་ཅི་ལྟར་འགྱུར། གང་ཞིག་ཅེས་བྱ་བ་ལ་སོགས་པས་ཕྱེད་སྔ་མ་ལྡོག་པའི་སྒོ་ནས་བཤད་ནས། རྗེས་སུ་འགྲོ་བའི་སྒོ་ནས་འཆད་པ་ནི། གང་ཞིག་ནམ་ཡང་
ཞེས་བྱ་བའོ། །འདི་ཉིད་བརྗོད་པ་ནི་མཐོང་བ་མེད་པ་ལ་ཞེས་བྱ་བའོ། །རྟོགས་པ་ཡོད་དམ་མེད་ཅེས་བྱ་བར་འཇུག་པའོ། །འོ་ན་དེའི་བདག་ཉིད་དགག་པ་ཡང་མི་བྱ་བར་འགྱུར་རོ་ཞེ་ན། ཐམས་ཅད་ལ་ནི་ཞེས་བྱ་བ་སྟེ་མཐོང་བ་དང་མ་མཐོང་བ་ལ་ལྟོས་ནས་སོ། །ཕྱེད་ཕྱི་མ་འཆད་པ་ནི་དེ་ལྟར་ཞེས་བྱ་བའོ། །
རྟེན་པ་འགོག་པ་ནི་ཐམས་ཅད་ལ་ལྟོས་པ་ཅན་མ་ཡིན་ནོ་ཞེས་བརྗོད་པ་ནི། བུམ་པ་ལ་སོགས་པ་ལ་ཞེས་བྱ་བའོ། །སྤྱི་ལ་སོགས་པ་ནི་བདག་དང་འདྲ་བར་བལྟར་རུང་བ་མ་ཡིན་ཡང་བལྟར་རུང་བ་ཉིད་དུ་ཁས་བླངས་པ་ཁོ་ན་ལས་རང་བཞིན་མི་དམིགས་པ་རྟེན་པ་ཉིད་འགོག་པ་ཡིན་ལ་གཞན་དུ་

ནི་མ་ཡིན་ནོ་ཞེས་བྱ་བ་ནི་རིགས་པ་ཡིན་ནོ། །འོན་ཏེ་བུམ་པ་ལ་སོགས་པ་ལ་བདག་གིས་དབེན་པར་དམིགས་པས་དེ་མེད་པར་ངེས་པ་ཡིན་ནོ་ཞེ་ན། དེས་དབེན་པར་ནི་ཞེས་བྱ་བའོ། །དེ་ལྟར་ཞེས་བྱ་བ་ནི་བདག་མེད་པར་རོ། །དེ་ཡང་ན་ལུས་སོ། །དེས་ནི་བདག་གི་དབེན་པར་རོ། །གང་གི་ཕྱིར་དབེན་པར་
དམིགས་པས་བུམ་པ་ལ་སོགས་པ་ལ་བདག་མེད་པར་འགྲུབ་ན་ལུས་ལ་ཡང་མེད་པར་འགྲུབ་པར་འགྱུར་བ་དེས་ནའོ། །སྲོག་ལ་སོགས་པ་མེད་པ་ལྡོག་པ་ནི་སྲོག་ལ་སོགས་པ་ཡོད་པ་ཉིད་དོ། །ཅིའི་ཕྱིར་བདག་ཁྱབ་པར་བྱེད་པ་ཉིད་མ་ཡིན་ཞེ་ན། བརྗོད་པ་དུ་བ་གང་ཞིག་ལྡོག་པས། མེ་གང་ལྡོག་
པ་ཁྱབ་པ་དུ་བ་ལྡོག་པ་དེ་ལྡོག་པ་ནི། མེ་ལྡོག་པ་ལྡོག་པའི་རང་བཞིན་དེས་ཁྱབ་པར་འགྱུར་བ་ཡིན་ནོ། །གལ་ཏེ་དེ་ལྟ་ཡིན་དུ་ཟད་མོད་དེས་ཅིར་འགྱུར་ཞེ་ན། བདག་ལྡོག་པ་ནི་ཞེས་བྱ་བའོ། །དེའི་ཕྱིར་ཞེས་བྱ་བ་ནི་ལྡོག་པ་དག་ཁྱབ་པ་མེད་པའི་ཕྱིར་རོ། །གང་གིས་ཞེས་བྱ་བ་ནི་ཁྱབ་པ་འགྲུབ་པ་
ཉིད་ཀྱིས་སོ། །དེའི་ཕྱིར་ཞེས་བྱ་བ་ནི་བདག་བལྟར་མི་རུང་བའི་ཕྱིར་རོ། །འདི་ལ་ནི་བུམ་པ་ལ་སོགས་པ་ལའོ། །སྲོག་ལ་སོགས་པ་ནི་བུམ་པ་ལ་སོགས་པ་ལ་ཡོད་པ་དང་མེད་པ་ཉིད་དུ་རྟོགས་པར་འགྱུར་རོ། །ཅི་ལྟར་ཞེ་ན། མཐོང་བ་དག་གིས་ཏེ་དམིགས་པའི་མཚན་ཉིད་དུ་གྱུར་པ་ཉིད་ཀྱིས་ཏེ། མི་
དམིགས་པ་ཙམ་གྱིས་ནི་མ་ཡིན་ནོ་དེ་ལྟར་ཞེས་བྱ་བ་ནི་སྲོག་ལ་སོགས་པ་བཞིན་དུའོ། །གསོན་པོའི་ལུས་མ་ཡིན་པ་ནི་བུམ་པ་ལ་སོགས་པ་ལའོ། །ཕྱེད་ཕྱི་མ་ལྡོག་པའི་སྒོ་ནས་རྣམ་པར་འགྲེལ་པ་ནི། བདག་ནི་ཞེས་བྱ་བའོ། །བུམ་པ་ལ་སོགས་པ་ལ་ནི། སྲོག་ལ་སོགས་པའི་ལྡོག་པར་བྱེད་པ་
བདག་མེད་པ་ཉིད་དང་འབྲེལ་པ་གང་ཡིན་པ་དེ་མཐོང་བའི་ཕྱིར་རོ། །བདག་མེད་པར་ནི་ལྡོག་པར་བྱེད་པ་མ་ཡིན་ནོ་ཞེས་འབྲེལ་ཏོ། །ཅིའི་ཕྱིར་ཞེ་ན། འབད་རྩོལ་ལ་སོགས་པ་གཞན་མེད་པའོ། །དེ་མེད་པ་ཞེས་བྱ་བ་ནི་སྲོག་ལ་སོགས་པ་མེད་པས་སོ། །འདི་ནི་བུམ་པ་ལ་སོགས་པ་ལའོ། །འོན་
ཏེ་བློ་ལ་སོགས་པ་ལུས་ལ་མེད་པ་ཁོ་ནའོ་ཞེ་ན། བློ་ལ་སོགས་པ་ནི་ཞེས་བྱ་བའོ། །ཆོས་མཚུངས་པ་སངས་རྒྱས་པའི་འདོད་པ་ཡིན་ནོ། །གལ་ཏེ་བློ་ལ་སོགས་པ་ཡོད་པ་དང་མེད་པས་བྱས་པའི་ཆོས་མི་མཚུངས་པ་ཡང་ཡོད་པ་མ་ཡིན་ནམ། དེས་ན་སྲོག་ལ་སོགས་པ་དང་འབྲལ་བར་ཅི་ལྟར་

འགྱུར་ཞེ་ན། གལ་ཏེ་ཞེས་བྱ་བའོ། །གང་ཞིག་བདག་མེད་པ་དེ་ནི་སྲོག་ལ་སོགས་པ་སྟོད་པ་ཡིན་སྟེ་དཔེར་ན་བུམ་པ་བཞིན་ནོ། །གསོན་པོའི་ལུས་ཀྱང་བདག་མེད་པ་ཡིན་ནོ། །དེས་ན་སྲོག་ལ་སོགས་པས་སྟོད་པར་འགྱུར་རོ། །ཐལ་བ་ལྡོག་པ་བརྗོད་པ་ནི། སྲོག་ལ་སོགས་པ་མེད་
པས་ཞེས་བྱ་བའོ། །གསོན་པོའི་ལུས་སྲོག་ལ་སོགས་པ་དང་ལྡན་པར་ཁས་ལེན་ན། དེ་བདག་དང་བཅས་པར་སངས་རྒྱས་པས་ཁས་བླང་བར་བྱ་བ་ཡིན་ནོ་ཞེས་བྱ་བའི་དོན་ཏོ། །ཐ་དད་པ་ཡང་ཞེས་བྱ་བ་ནི་བུམ་པ་ལས་ཐ་དད་པའི་ལུས་ལ་ཡང་། བདག་མེད་པ་ཙམ་ཅུང་ཟད་ཆོས་མཐུན་པས་སྲོག་
ལ་སོགས་པ་དང་མི་ལྡན་པ་དེར་རྟོགས་པར་བྱེད་ནའོ། །མི་འདོད་ཅེ་ན་ཞེས་བྱ་བ་ནི་གཞལ་བྱ་ཉིད་ཀྱི་བུམ་པ་ལ་སོགས་པ་བདག་དང་བཅས་པ་ཉིད་དུ་མི་འདོད་ནའོ། །ལན་ནི་ཚད་མ་ཉིད་ཅེས་བྱ་བའོ། །ཅི་ལྟར་ཚད་མ་ཉིད་འདོད་པའི་རྒྱུ་མཚན་ཡིན་ཞེ་ན། དེ་མེད་པར་ཞེས་བྱ་བ་ཆོས་ཅན་ཚད་མ་མེད་
པར་རོ། །འོན་ཏེ་བུམ་པ་ལ་སོགས་པ་ནི་བདག་དང་བཅས་པར་མི་འདོད་དེ་དེས་ན་མེད་པ་ཡིན་ནོ་ཞེ་ན། ཚད་མས་ཞེས་བྱ་བའོ། །ཟློག་པར་བྱེད་ཅེས་བྱ་བ་ནི་ཉེ་བར་མཚོན་པ་སྟེ་ཐེ་ཚོམ་དུ་ཡང་འགྱུར་བ་མ་ཡིན་ནོ། །འདི་ག་ལས་ཤེ་ན། ཚད་མ་ནི་ཞེས་བྱ་བའོ། །དེ་ལྟ་མ་ཡིན་ཏེ་འདོད་པས་དངོས་པོ་
དང་དངོས་པོ་མེད་པ་འདོར་ལེན་བྱེད་ན། དངོས་པོ་དང་དངོས་པོ་མེད་པ་འདོར་ལེན་བྱེད་པར་མི་འགྱུར་རོ་ཞེས་འབྲེལ་ཏོ། །ཅི་ལྟར་མི་འགྱུར་ཞེ་ན། ཚད་མ་ལས་རང་དབང་མེད་པར་རོ། །ཅི་ལྟར་འདོད་པས་དངོས་པོ་དང་དངོས་པོ་མེད་པ་འདོར་ལེན་བྱེད་ཅེ་ན། རྒོལ་བའི་ཞེས་བྱ་བའོ། །དེའི་ཕྱིར་དངོས་
པོ་དང་དངོས་པོ་མེད་པ་མ་མཆིས་པར་གནས་པ་མེད་དེ་འཆོལ་བ་ཁོ་ནའོ། །འོ་ན་ཞེས་བྱ་བ་ནི་དོགས་པར་བྱེད་པའོ། །སྲོག་ལ་སོགས་པ་འབའ་ཞིག་ཏུ་ནི་མ་ཟད་ཀྱི་བློ་ལ་སོགས་པ་ཡང་བདག་ལ་བརྟེན་པ་ཡིན་ཞེས་སོ། །དེས་ན་ཞེས་བྱ་བ་ནི་བློ་ལ་སོགས་པ་བདག་ལ་བརྟན་པ་ཉིད་ཀྱིས་སོ། །དེ་
མེད་ན་མེད་པས་ནའོ། །སངས་རྒྱས་པས་གང་བརྗོད་པ་དེའོ། །ལན་ནི་མི་རིགས་པ་མ་ཡིན་ཏེ་ཞེས་བྱ་བའོ། །གཞན་ཉིད་ཅེས་བྱ་བ་ནི། མིག་ལ་སོགས་པ་ཚོགས་པ་སྔ་མར་གྱུར་པ་རྣམས་ཉིད་ཕྱིས་ཀྱི་མིག་ལ་སོགས་པའི་ཚོགས་པ་དེ་ལའོ། །འོ་ན་ཅི་ལྟར་བློ་ལ་སོགས་པའི་ལྡོག་པར་བྱེད་པ་བདག་

ཡིན་པར་རིགས་ཤེ་ན། གལ་ཏེ་ཞེས་བྱ་བའོ། །དེ་ལྟ་ན་ནི་ཞེས་བྱ་བ་འཇུག་པར་བྱེད་པ་ཉིད་དུ་ངེས་པ་མ་ཡིན་པའོ། །དེ་དག་ཅེས་བྱ་བ་ནི་དྲན་པ་ལ་སོགས་པ་དག་ནིའོ། །དེའང་ཞེས་བྱ་བ་ནི། ཡུལ་དང་དབང་པོ་དང་བློའོ། །རང་གི་རིགས་དེ་ཉེ་བར་ལེན་པའི་རྒྱུ་ལས་བྱུང་བ་ཡིན་ནོ། །རང་གི་རིགས་ཙམ་ལས་འབྱུང་
བར་ཡང་མ་ཟད་དེ། ཕན་ཚུན་རྐྱེན་ལ་ནི་ལྟོས་པའི་ཞེས་བྱ་བ་སྟེ། བདག་ཉིད་ཅི་ལྟ་བ་ལྷན་ཅིག་བྱེད་པའི་རྒྱུ་ལ་ཡང་ལྟོས་པ་ཡིན་ནོ། །བློ་དྲུག་པོ་འདི་རྣམ་ལས། མིག་ལ་སོགས་པའི་བློ་དག་ལ་ནི་དེ་རྣམ་པར་འགྱུར་བའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པར་མཐོང་བ་ལས་མིག་ལ་སོགས་པའི་
ནུས་པ་འཇུག་པ་ཡིན་ལ། ཡིད་ལ་བྱེད་པའི་ནུས་པ་ནི་ཐམས་ཅད་ལ་ཡང་འཇུག་པ་ཡིན་ཏེ། དེ་མཐུན་པ་དང་མི་མཐུན་པ་དང་དག་ལས་ཕྱིས་ཀྱི་རྣམ་པར་ཤེས་པ་མཐུན་པ་དང་མི་མཐུན་པར་མཐོང་བའི་ཕྱིར་རོ། །འབྱུང་བ་དང་རྔུབ་པ་དང་དབང་པོ་ལ་སོགས་པ་རྣམས་ཀྱི་ཉེ་བར་ལེན་པའི་རྒྱུ་ནི་སྐལ་བ་
མཉམ་པ་སྔ་མ་ཡིན་ནོ། །བློ་ནི་རྐྱེན་ཡིན་ནོ། །དེ་དང་བ་དང་རྙོག་པ་དག་ལས་དབང་པོ་རྣམས་ལ་ཕན་པ་དང་གནོད་པ་མཐོང་བའི་ཕྱིར་རོ། །སྲོག་ལ་སོགས་པ་འཇུག་པ་དང་ལྡོག་པ་དག་ནི་བློ་དང་འབད་རྩོལ་གྱི་རྗེས་སུ་བྱེད་པ་ཡིན་ནོ། །ཕན་ཚུན་ལྟོས་པའི་རྒྱུ་དང་རྐྱེན་གྱི་ཚོགས་པ་དེ་ཙམ་ལས་བདག་གི་
དངོས་པོའི་རྗེས་སུ་འགྲོ་བ་དང་ལྡོག་པ་ལ་བརྟེན་པ་ཡིན་ཏེ། མཐོང་བའི་ཚོགས་པ་འདི་ལས་གཞན་དུ་བདག་རྒྱུར་རྟོགས་ན་ནི་གཞན་དང་གཞན་ཡང་བརྟག་པར་བྱ་བ་ཡིན་པའི་ཕྱིར་ཐུག་པ་མེད་པར་འགྱུར་རོ། །དེའི་ཕྱིར་ནུས་པ་མ་མཐོང་བའི་བདག་ལོག་པས་སྲོག་ལ་སོགས་པ་ལོག་པར་ཅི་ལྟར་འགྱུར།
མི་འདོད་པའམ་ཞེས་བྱ་བ་ནི་དྲི་ལ་སོགས་པ་མཐོང་བ་ལའོ། །དེ་ལས་གཞན་འགའ་ཞིག་ལ་ཞེས་བྱ་བ་ནི་འདོད་པ་ལའོ། །དེ་ལས་ཞེས་བྱ་བ་ནི་རྩོལ་བ་ལ་སོགས་པ་ལས་སོ། །ཡུལ་ལ་སོགས་པ་ཉིད་གང་ལ་འཇུག་སྙམ་ན། དེ་དག་ཀྱང་ཞེས་བྱ་བའོ། །དབང་པོ་དང་བློ་དག་ཀྱང་དེ་བཞིན་ནོ་ཞེས་བྱ་བ་ནི་
དབང་པོ་དང་ཡུལ་སྔ་མའི་རྒྱུ་ཅན་ཡིན་ནོ། །གལ་ཏེ་འདིར་བདག་ཉེ་བར་སྦྱོར་བ་མེད་དུ་ཆུག་མོད། དྲན་པ་ལ་ནི་ཉེ་བར་སྦྱོར་བ་ཡོད་པ་ཁོ་ནའོ་ཞེས་བརྩད་པ་གལ་ཏེ་ཞེས་བྱ་བའོ། །སྲོག་ལ་སོགས་པ་ལྟར་འདི་ཡང་ལྡོག་པ་ཙམ་ལ་གོ་བ་མ་ཡིན་ནོ་ཞེས་ལན་འདེབས་པ་ནི། འདི་ཡང་ཞེས་བྱ་བའི་

ཅི་ལྟར་ལྡོག་པ་ཁོ་ན་ཡིན་ཞེ་ན། དྲན་པ་ཞེས་བྱ་བའོ། །འོ་ན་ངོ་ཤེས་པས་མཐོང་ཞེ་ན། དྲན་པ་ཡང་ཞེས་བྱ་བའོ། །ཚད་མ་མ་ཡིན་པ་ཡང་མངོན་སུམ་གྱི་གསལ་བ་ལ་འཇུག་པའི་ཕྱིར་རོ། །གལ་ཏེ་བདག་མེད་ན། གཞན་གྱིས་མཐོང་བ་གཞན་གྱིས་ཅི་ལྟར་དྲན་ཏེ། ལྷ་སྦྱིན་
གྱིས་མཐོང་བ་ནི་མཆོད་སྦྱིན་གྱིས་མཐོང་བ་མ་ཡིན་ནོ་ཞེ་ན། གལ་ཏེ་ཞེས་བྱ་བའོ། །གཞན་གྱི་ཁྱད་པར་གྱིས་ཞེས་བྱ་བ་ནི་དྲན་པ་སྐྱེད་པར་བྱེད་པའི་མྱོང་བ་དང་བཅས་པ་ཉེ་བར་ལེན་པར་གྱུར་པའི་ལུས་ཀྱི་སྐད་ཅིག་གི་ཁྱད་པར་ཅན་གྱི་དམིགས་པས་ཞེས་ཁ་བསྐངས་ཏེ་ཉེ་བར་ལེན་པར་གྱུར་པའི་ལུས་
ཀྱི་སྐད་ཅིག་གི་ཁྱད་པར་གྱིས་དྲན་པར་འགྱུར་རོ་ཞེས་སྦྱར་རོ། །གལ་ཏེ་མཐོང་བ་དང་བཅས་པ་གཞན་དག་ཀྱང་དྲན་པའི་རྒྱུ་ཅི་སྟེ་མ་ཡིན་ཞེ་ན། གང་གིས་ཞེས་བྱ་བའོ། །གཞན་མ་ཡིན་པ་ཞེས་བྱ་བ་ནི་རྒྱུ་ཐ་དད་པ་མ་ཡིན་པའོ། །གལ་ཏེ་དེ་ལྟ་ན་ཡང་བདག་དྲན་པའི་རྒྱུ་ཅི་སྟེ་མ་ཡིན་ཞེ་ན།
བདག་ཡོད་པ་ཞེས་བྱ་བའོ། །འོ་ན་ཅི་ལྟར་དྲན་ཞེ་ན། འོན་ཀྱང་ཞེས་བྱ་བའོ། །དེ་ལྟ་ན་མ་ཡིན་ན་ཞེས་བྱ་བ་ནི། བདག་ནི་ཡོད་པ་ཉིད་ཀྱིས་དྲན་པ་ཡིན་ནའོ། །འདི་ནི་ཉེ་བར་མཚོན་པ་སྟེ། བདག་གཞན་གྱིས་མྱོང་བ་ལ་ཡང་བདག་གཞན་གྱི་དྲན་པ་ཡང་ཐལ་བར་འགྱུར་རོ། །ཐམས་ཅད་ཀྱི་ཚེ་དང་
ཐམས་ཅད་ཀྱི་དྲན་པའི་ལན་གྱིས་དོགས་པ་ནི་གལ་ཏེ་ཞེས་བྱ་བའོ། །འོ་ན་ཅི་སྐད་བརྗོད་སྙམ་ན། གལ་ཏེ་ཞེས་བྱ་བའོ། །ཅིའི་ཕྱིར་དེ་སྐད་བརྗོད་སྙམ་ན། དྲན་པ་པོ་ཞེས་བྱ་བའོ། །དེ་ལྟ་མིན་ན་ཞེས་བྱ་བ་ནི། དེ་འགྱུར་ན་འགྱུར་བ་དང་རྗེས་སུ་འགྲོ་བ་དང་ལྡོག་པ་མེད་པ་ཡིན་ན། རྒྱུ་དང་འབྲས་
བུའི་རྣམ་པར་གཞག་པ་མེད་པར་འགྱུར་རོ། །དེ་བཞིན་དུ་བདག་ཀྱང་དྲན་པའི་རྒྱུ་ཅི་སྟེ་མ་ཡིན་ཞེ་ན། དྲན་པ་ནི་ཞེས་བྱ་བའོ། །མི་འགྱུར་ན་ཞེས་བྱ་བ་ནི་དྲན་པར་རོ། །དེ་ལྟ་ཡིན་ན་ཞེས་བྱ་བ་ནི་ཁྱབ་པ་དང་རྟག་པ་ཡིན་ནའོ། །ཁྱད་པར་ཡོད་པར་དོགས་པ་ནི། འོན་ཏེ་ཞེས་བྱ་བའོ། །དེ་ཞེས་བྱ་བ་
རྟག་པ་ལ་སོགས་པའི་ཡོན་ཏན་དང་ལྡན་པའོ། །དེ་ལྟར་ཡིན་པར་ཞེས་བྱ་བ་ནི། དྲན་པ་དང་ཉམས་སུ་མྱོང་བ་པོར་རོ། །དེ་ལྟ་ཡིན་དང་ཞེས་བྱ་བ་ནི་ཐུན་མོང་དུ་རྟོགས་པ་ནའོ། །དེ་ཡང་ནི་བདག་གོ། །ཅི་ལྟར་མི་མཐུན་པ་མ་ཡིན་ཞེ་ན། ཁྱབ་པ་དང་ཞེས་བྱ་བའོ། །མི་མཐུན་པ་ཡོད་པར་དོགས་པ་

བསུ་བ་ནི། འོན་ཏེ་ཞེས་བྱ་བའོ། །ལན་ནི་ངའོ་སྙམ་པའི་ཞེས་བྱ་བའོ། །ལུས་དང་མདོག་ལ་སོགས་པ་དང་བྲལ་བའི་བདག་ནི་སྣང་བ་མ་ཡིན་ནོ་ཞེས་བྱ་བའི་དོན་ཏོ། །འོན་ཏེ་ངའོ་སྙམ་པའི་བློ་ལ། ལུས་རྟག་པ་ནི་སྣང་བ་མེད་པ་བྱིས་པ་ལ་སོགས་པའི་རང་བཞིན་གྱིས་ཐ་དད་པའི་ཕྱིར་རོ་ཞེས་དོགས་པ་བསུ་
བ་ནི། ལུས་ནི་ཞེས་བྱ་བའོ། །ལན་ནི་མི་རྟག་པ་མ་ཡིན་ནོ། །ཅིའི་ཕྱིར་ཞེ་ན། ལུས་ཀྱི་ཞེས་བྱ་བའོ། །འོ་ན་རྟག་པ་གང་ཡིན་ཞེ་ན། གནས་སྐབས་ཅན་ཞེས་བྱ་བའོ། །ཕྱོགས་འདི་ནི་རྟག་པའི་བདག་དགག་པའི་དོན་དུ་ཁས་བླངས་པ་ཡིན་ནོ། །དེ་ཉིད་ཀྱི་ཕྱིར་བརྗོད་པ་རྟོགས་པ་འདི་ཉིད་བླའི། ལུས་ལས་
ཐ་དད་པར་གྱུར་པའི་བདག་རྟོགས་པ་ནི་མ་ཡིན་ནོ། །འོན་ཏེ་དྲན་པ་ལ་སོགས་པ་ནི་བདག་གིས་བྱིན་གྱིས་བརླབས་པར་རྟོགས་པའི་ཕྱིར་ཅི་ལྟར་དེར་མི་རྟག་སྙམ་ན་དྲན་པ་ལ་སོགས་པ་ནི་ཞེས་བྱ་བའོ། །དེ་ལྟ་ཡང་མི་འདོད་པ་ཐོག་ཏུ་བབ་པོ་ཞེས་དོགས་པ་བསུ་བ་ནི། འོན་ཏེ་ཞེས་བྱ་བའོ། །གང་གི་ཕྱིར་
གནས་སྐབས་ཀྱི་ཚོགས་ཉིད་ལུས་ཡིན་པ་དེ་ཉིད་ཀྱི་ཕྱིར་ངེད་ཀྱི་ཕྱོགས་གྲུབ་པ་ལ་གནོད་པ་མེད་དོ། །ཅིའི་ཕྱིར་དེ་ཉིད་ལུས་ཡིན་ཞེ་ན། གནས་སྐབས་ཅན་གྱི་ལུས་གཞན་རྟོགས་པ་ཡོད་པ་མ་ཡིན་པའི་ཕྱིར་རོ། །རྟག་པ་ལ་ནི་རིམ་གྱིས་འབྱུང་བའི་དྲན་པ་དང་མྱོང་བ་འཐད་པ་མ་ཡིན་ནོ་ཞེས་བརྗོད་པ་ནི།
གཞན་ཡང་ཞེས་བྱ་བའོ། །ཅི་སྟེ་མི་རིགས་ཤེ་ན། གལ་ཏེ་དེ་ཞེས་བྱ་བའོ། །དེ་ཉིད་ཅེས་བྱ་བ་ནི་དྲན་པར་བྱེད་པ་ཉིད་དོ། །དྲན་པར་བྱེད་པ་ཉིད་ཡིན་ན། ཉམས་སུ་མྱོང་བར་བྱེད་པ་ཉིད་དུ་མི་འཐད་དོ་ཞེས་བྱ་བའི་དོན་ཏོ། །ཉེས་པ་གཞན་ཡང་བརྗོད་པ་ནི། བདེ་བ་ལ་སོགས་པར་ཞེས་བྱ་བའོ། །འོན་ཏེ་
རྣམ་པར་འགྱུར་བ་ཁས་མི་ལེན་ནོ་ཞེ་ན། བདག་དེ་བདེ་བ་ལ་སོགས་པས་འགྱུར་བ་མེད་ན། བདེ་བར་གནས་པ་ཉིད་དུ་མི་འཐད་དོ། །འོན་ཏེ་བདག་མེད་ན་དྲན་པར་མི་འགྱུར་རོ་ཞེས་བརྒྱ་ལ་སྨྲ་བར་འགྱུར་དུ་འོང་བས་བརྗོད་པ་ནི། གང་གི་ཕྱིར་དྲན་པ་འབྲས་བུ་ཡིན་པ་དེས་ན་མྱོང་བ་ལས་ཅི་སྟེ་མ་ཡིན་
ཏེ་བདག་ཁས་བླངས་པས་ཅི་ཞིག་བྱ། རྒྱུ་དང་འབྲས་བུ་ཙམ་མ་ཡིན་ཞེས་བྱ་བ་ནི་བདག་ལྷག་པ་གཟུང་བའི་ཕྱིར་རོ། །འདི་ཉིད་བརྗོད་པ་ནི་འདི་ལྟར་ཞེས་བྱ་བའོ། །བྱེད་པ་ཉིད་ཅེས་བྱ་བ་ནི་དྲན་པ་དང་མྱོང་བ་ལ་ལྟོས་ནས་བདག་གོ། །རྟོགས་པ་བདག་ལ་སྐྱེས་པ་ཙམ་གྱིས་ནི་འདི་ཚད་མ་མ་ཡིན་ནོ། །

རྟོགས་པའི་རྣམ་པ་བརྗོད་པ་ནི་སྔོན་མཐོང་ཞེས་བྱ་བའོ། །ཅིའི་ཕྱིར་ཚད་མ་མ་ཡིན་ཞེ་ན། དེ་ལྟ་ཡིན་ན་ནི་རབ་རིབ་ཅན་ལ་སོགས་པའི་ཤེས་པ་ཀུན་ཚད་མར་གྱུར་ཏེ། དེ་ཡང་བདག་གི་འབྲས་བུ་ཡིན་པའི་ཕྱིར་རོ། །དེས་ན་རྣམ་གཞག་མེད་པར་འགྱུར་རོ། །ཐམས་ཅད་ཀྱི་ཞེས་བྱ་བ་ནི་རབ་
རིབ་ཅན་གྱིའོ། །དེས་ན་ཞེས་བྱ་བ་ནི་ཐམས་ཅད་ཀྱིས་ཐམས་ཅད་འགྲུབ་པས་ནའོ། །དེའི་ཕྱིར་ཞེས་བྱ་བ་ནི་ཤེས་པ་ཐམས་ཅད་ཚད་མར་ཐལ་བའི་ཕྱིར་རོ། །དེ་ལྟར་ཡིན་དང་ཞེས་བྱ་བ་ནི་དབང་པོའི་ཤེས་པ་ཚད་མ་ཡིན་དང་ངོ་། །འདི་ཉིད་ཅེས་བྱ་བ་ནི་བདག་གིའོ། །དྲན་པ་ནི་སྔར་མཐོང་བ་རྣམ་པར་རྟོག་
པའོ། །མཚམས་སྦྱོར་བ་ནི་སྔ་མ་དང་ཕྱི་མ་གཉིས་གཅིག་ཏུ་བྱེད་པའོ། །རྗེས་སུ་འབྲེལ་པ་ཞེས་བྱ་བ་སྔ་མའི་རང་བཞིན་དང་ཕྱི་མའི་རང་བཞིན་གཅིག་ཉིད་དུ་བཅས་པ་མེད་པའི་ཕྱིར་རོ། །གཅིག་ཏུ་རྟོགས་པ་ཞེས་བྱ་བ་ནི་མཐོང་བ་སྔ་མའི་ཡུལ་ཉིད་བདག་གིས་རྟོགས་སོ་ཞེས་བྱ་བ་བདེན་པར་ཇི་ལྟར་
འགྱུར་ཏེ། མངོན་སུམ་གྱིས་གསལ་བ་ལ་འཇུག་པའི་ཕྱིར་རོ། །ཅིའི་ཕྱིར་གཅིག་ཏུ་རྟོགས་པ་བདེན་པར་འགྱུར་དགོས་ཤེ་ན། ཚད་མར་འགྱུར་བའི་ཞེས་གསུངས་སོ། །དེས་ན་ཞེས་བྱ་བ་ནི་དབང་པོའི་མངོན་སུམ་གྱིས་གཅིག་ཉིད་མ་རྟོགས་པས་སོ། །དེས་ན་ཞེས་བྱ་བ་ནི་ཚད་མས་གྲུབ་པའི་
བདག་མེད་པས་སོ། །གལ་ཏེ་ཁྱད་པར་གྱི་སྒྲས་སྲོག་ལ་སོགས་པ་དང་ལྡན་པར་བརྗོད་པར་འདོད་ན། དོན་ཅིའི་ཕྱིར་གཏན་ཚིགས་ཀྱི་འཁོར་ལོར་མཉན་བྱ་ཉིད་བཀོད་ཅེ་ན། མཉན་བྱ་ཉིད་དང་མཚུངས་པས་ཀྱང་སྲོག་ལ་སོགས་པ་དང་ལྡན་པ་གོ་བྱེད་མ་ཡིན་པར་བསྟན་པའི་དོན་དུ་ཡིན་ནོ་ཞེས་བརྗོད་
པ་ནི་གཞན་ཡང་ཞེས་བྱ་བའོ། །དོགས་པ་ནི་མ་ཡིན་ཞེས་བྱ་བ་སྟེ་མཚུངས་པའོ། །དེའི་ཕྱིར་ཞེས་པ་མི་མཐུན་པའི་ཕྱོགས་ལས་ལྡོག་པ་ཅན་ཡིན་པ་མཉན་བྱ་འདི་ནི་འཁྲུལ་པའི་ཕྱིར་ཞེ་ན། གྲུབ་པའི་མཐས་ཅི་ལྟར་ཞེས་དྲིས་སོ། །གཞན་གྱིས་ལན་བཏབ་པ་ནི། བསྒྲུབ་པར་བྱ་བ་མིན་པ་ཉིད་ལ་མཉན་
བྱ་ཉིད་དུ་ལྡོག་པ་མིན་ཏེ། འོན་ཀྱང་བསྒྲུབ་པར་བྱ་བ་ལས་ཀྱང་ངོ་། །དེས་ན་ལྡོག་པ་ཅན་ཡིན་ཡང་འཁྲུལ་པ་ཡིན་ནོ་ཞེ་ན། གྲུབ་པའི་མཐའ་བརྗོད་པ་ནི། འོ་ན་ཞེས་བྱ་བའོ། །བསྒྲུབ་པར་བྱ་བ་མ་ཡིན་པ་ཁོ་ན་ལས་ལྡོག་པ་མ་ཡིན་ནོ་ཞེས་བྱ་བའི་དོན་གྱིས་མཉན་བྱ་ཉིད་མཐུན་པའི་ཕྱོགས་ལས་ཀྱང་ལྡོག་པ་

ཡིན་ནོ་ཞེས་དེ་ལྟར་བརྗོད་པར་འགྱུར་བའི་ཕྱིར་དེ་བསྒྲུབ་པར་བྱ་བའི་རྗེས་སུ་འཇུག་པ་མེད་པར་བརྗོད་པ་ཡིན་ནོ། །ཡིན་མོད་དེ་ལས་ཅིར་འགྱུར་ཞེ་ན། དེ་ནི་གཞན་ལའང་ཞེས་བྱ་བ་སྲོག་ལ་སོགས་པ་དང་ལྡན་པ་ལ་ཡང་མཐུན་པའི་ཕྱོགས་ལ་འཇུག་པ་མེད་པ་དེ་མཚུངས་སོ། །དེས་ན་སྲོག་ལ་སོགས་པ་
ནི་གོ་བར་བྱེད་པ་ཡིན་ལ། མཉན་བྱ་ཉིད་ནི་མ་ཡིན་ན་ཅི་ལྟར་མཚུངས་ཤེ་ན། མཉན་བྱ་ཉིད་དང་ཞེས་བྱ་བའོ། །ཅིའི་ཕྱིར་ཞེ་ན། ལྡོག་པ་ཞེས་བྱ་བའོ། །དེས་ན་ཞེས་བྱ་བ་ནི་ཁྱབ་པར་མེད་པས་ནའོ། །མ་ཡིན་ཞེས་བྱ་བ་རྣམ་པར་འགྲེལ་པ་ནི། གལ་ཏེ་ཞེས་བྱ་བའོ། །ཅི་ལྟར་ཡུལ་ཐ་དད་ཅེ་ན། མཉན་པ་
ཉིད་ནི་ཞེས་བྱ་བའོ། །སྲོག་ལ་སོགས་པ་ནི་གཉི་ག་ལ་ཡང་ལྡོག་པ་མ་ཡིན་ནོ་ཞེས་བྱ་བར་སྐབས་དང་སྦྱར་རོ། །ཅིའི་ཕྱིར་ཞེ་ན། བསྒྲུབ་པར་བྱ་བ་མ་ཡིན་པ་ཞེས་བྱ་བའོ། །འོ་ན་དོན་གྱིས་དེ་ཞེས་བྱ་བ་ལ་སོགས་པ་འཆད་པ་ནི། འོ་ན་ཞེས་བྱ་བ་ལ་སོགས་པའོ། །དེ་ནི་ཞེས་བྱ་བ་ནི་མཐུན་པའི་ཕྱོགས་ལ་
རྗེས་སུ་འཇུག་པར་བྱེད་པའོ། །ཅི་ལྟར་མཚུངས་ཤེ་ན། དེ་ཡང་ཞེས་བྱ་སྟེ་སྲོག་ལ་སོགས་པ་ཡང་ངོ་། །ཅི་སྟེ་ཡང་མཉན་བྱ་ཉིད་ལ་མཐུན་ཕྱོགས་ཡོད་དེ་དེས་ན་དེ་ལ་ཡོད་པའམ་མེད་པར་འགྱུར་གྱི། སྲོག་ལ་སོགས་པ་དང་ལྡན་པ་ལ་ནི་དེ་མེད་པ་དེས་ན་ཅི་ལྟར་དེ་ལ་མེད་པའམ་ཡོད་པར་འགྱུར་ཏེ། མེད་
པ་ནི་གཞི་ལ་སོགས་པར་མི་འཐད་པའི་ཕྱིར་རོ། །དེས་ན་རྗེས་སུ་འཇུག་པ་མེད་པར་ཅི་ལྟར་མཚུངས་སྙམ་ན། མཐུན་པའི་ཕྱོགས་ཞེས་བྱ་བའོ། །འདི་ཉིད་བརྗོད་པ་ནི། འདི་ལྟར་ཞེས་བྱ་བའོ། །གཏན་ཚིགས་མི་མཐུན་པའི་ཕྱོགས་ཉིད་ལས་རྣམ་པར་འཆད་པ་ཞེས་བྱ་བ་ལྡོག་པའི་ཚིག་གིས་མཐུན་པའི་
ཕྱོགས་ལ་གནས་པ་ཉིད་བརྗོད་པ་ཡིན་ནོ། །གལ་ཏེ་འདིས་ལྡོག་པ་བརྗོད་པའི་ཕྱིར་ཅི་ལྟར་མཐུན་པའི་ཕྱོགས་ལ་རྗེས་སུ་འགྲོ་བར་བརྗོད་པ་ཡིན་ཞེ་ན། དོན་གྱིས་གོ་བས་ཞེས་བྱ་བ་སྟེ་ངེས་པར་གཟུང་བའི་ཤུགས་ཀྱིས་སོ། །དེ་ཉིད་ཕྱིར་ཞེས་བྱ་བ་ནི་དོན་གྱིས་གོ་བས་ཡོད་པ་ཉིད་ཡིན་པའི་ཕྱིར་ན་ཁྱེད་
ཀྱིས་ཀྱང་ལྡོག་པ་བསྟན་པ་གཅིག་གིས་རྗེས་སུ་འགྲོ་བ་དང་ལྡོག་པ་གཉི་ག་བསྟན་པར་བྱ་བས་སོ། །དེ་ལྟར་མ་ཡིན་ན་ངེས་པར་གཟུང་བ་འབྲས་བུ་མེད་པར་འགྱུར་རོ། །ཕྱེད་སྔ་མ་འཆད་པ་ནི། ངེས་པར་ཞེས་བྱ་བའོ། །ངེས་པར་གཟུང་བར་བྱ་བ་ནི་ལྡོག་པ་ཡིན་ལ་དེ་ལས་བཟློག་པ་ནི་མཐུན་པའི་

ཕྱོགས་ལ་རྗེས་སུ་འགྲོ་བ་སྟེ་དེ་སྒྲུབ་པའོ། །དོན་གྱིས་གོ་བས་ཞེས་བྱ་བ་དེ་རྣམ་པར་འགྲེལ་པ་ནི། དེ་ལྟར་མ་ཡིན་ན་ཞེས་བྱ་བའོ། །གལ་ཏེ་བསྒྲུབ་པར་བྱ་བ་མ་ཡིན་པ་ཁོ་ན་ལས་རྣམ་པར་ཆད་པ་ཞེས་ངེས་པར་གཟུང་བས། མཐུན་པའི་ཕྱོགས་ལས་ཀྱང་རྣམ་པར་ཆད་པ་ཡིན་ན། དེའི་
ཚེ་ངེས་པར་གཟུང་བ་འབྲས་བུ་མེད་དོ། །དེ་ཉིད་ཀྱི་ཕྱིར་ཞེས་བྱ་བ་ནི་འབྲས་བུ་མེད་པ་ཁོ་ནའི་ཕྱིར་ཁྱེད་ཀྱིས་ཀྱང་དོན་གྱིས་གོ་བས་ལྡོག་པ་བསྟན་པ་གཅིག་གིས་ཀྱང་གཉི་ག་བསྟན་པར་བྱས་པ་ཡིན་ནོ། །ལྡོག་པ་རྟོགས་པ་ག་ལས་ཤེ་ན། བསྒྲུབ་པར་བྱ་བ་མ་ཡིན་པ་ཉིད་ལས་ཞེས་བྱ་བའི་ངག་འདི་ལས་སོ། །དེའི་
ཕྱིར་དེ་ལྟར་རྗེས་སུ་འགྲོ་བ་དང་ལྡོག་པ་དག་ཕན་ཚུན་དེའི་བདག་ཉིད་ཡིན་པའི་ཕྱིར་ལྡོག་པས་རྗེས་སུ་འགྲོ་བ་འཕངས་པ་ཡིན་ནོ་ཞེས་བཤད་པ་ཡིན་ནོ། །ད་ནི་ལྡོག་པ་རྟོགས་པ་རྗེས་འགྲོ་ངེས་པ་མེད་པར་མི་འབྱུང་བ་ཡིན་ནོ་ཞེས་བཤད་པ་གཞན་བརྗོད་པ་ནི། ཡང་ན་ཞེས་བྱ་བའོ། །འོ་ན་ཅི་ལྟར་ལྡོག་
པ་རྟོགས་ཤེ་ན། རྗེས་སུ་འགྲོ་བའི་སྒོ་ནས་ནི་ཞེས་བྱ་བའོ། །ཅི་ལྟར་རྗེས་སུ་འགྲོ་བའི་སྒོ་ནས་ལྡོག་པ་རྟོགས་ཤེ་ན། བདག་ཉིད་ལ་ནི་ཞེས་བྱ་བའོ། །མི་མཐུན་པའི་ཕྱོགས་གཞན་ལས་སྲོག་ལ་སོགས་པར་ལྡོག་པར་འགྱུར་བ་ཡིན་ནོ། །འོན་ཏེ་གཞན་ལས་མི་ལྡོག་གོ་ཞེ་ན། དེ་ལས་གཞན་ལས་ཞེས་
བྱ་བའོ། །དེ་ལ་ནི་བདག་ལའོ། །དེ་ལྟ་ན་ཡང་རྗེས་སུ་འགྲོ་བ་དང་ལྡོག་པ་དང་ལྡན་པ་ཁོ་ན་གཏན་ཚིགས་ཡིན་ནོ་ཞེས་བྱ་བ་ནི་སྐབས་ཀྱི་དོན་ཏོ། །འདིའི་ལན་དོགས་པར་བྱེད་པ་ནི་འོན་ཏེ་ཞེས་བྱ་བའོ། །ལན་ནི་འོ་ན་ཞེས་བྱ་བའོ། །མི་འཁྲུལ་བ་ཡིན་ནོ། །ཅིའི་ཕྱིར་ཞེ་ན། འདི་ལྟར་ཅི་ལྟར་དགག་པ་འགོག་པ་
སྒྲུབ་པ་ཡིན་ནོ་ཞེ་ན། བསྒྲུབ་པར་བྱ་བ་མེད་པ་ཉིད་ལ་ཞེས་བྱ་བའོ། །འོ་ན་མེད་པར་ཡིན་པར་འགྱུར་བས་ཞེས་བྱ་བ་དེ་ལ་ལན་གྱི་དོགས་པ་བསུ་བ་ནི། ཅི་སྟེ་ཞེས་བྱ་བའོ། །སྲོག་ལ་སོགས་པ་ནི་མཐུན་པའི་ཕྱོགས་མེད་པ་ལས་ལྡོག་པ་དེས་ན། བསྒྲུབ་བྱ་མིན་པ་བུམ་པ་ལ་སོགས་མི་མཐུན་པའི་ཕྱོགས་
ཉིད་ལ་སྲོག་ལ་སོགས་པ་མེད་པ་ཡིན་ཏེ་དེས་ན་མི་འཁྲུལ་པ་འགྲུབ་བོ་ཞེ་ན་ལན་མེད་ཅེས་བྱ་བའོ། །འཆད་པ་ནི་ཅི་སྟེ་ཞེས་བྱ་བའོ། །དེ་ལས་ཞེས་བྱ་བ་ནི། མཐུན་པའི་ཕྱོགས་ལས་སོ། །ཕྱེད་ཕྱི་མ་འཆད་པ་ནི་གལ་ཏེ་ཞེས་བྱ་བའོ། །དོགས་པ་ནི་དེ་ཡང་ཞེས་བྱ་བ་སྟེ་ལྡོག་པའི་ལྡོག་པའོ། །ལན་ནི་གལ་

ཏེ་ཞེས་བྱ་བའོ། །འོན་ཏེ་དགག་པ་ལ་ལྟོས་ཏེ་འབྱུང་ཁུངས་སུ་འགྱུར་བ་ཁོ་ནའོ། །ལྡོག་པ་ལ་ལྟོས་ཏེ་མ་ཡིན་ནོ་ཞེ་ན། བཀག་པ་དང་ལྡོག་པ་ཞེས་བྱ་བའོ། །དོན་ཏེ་གཞིར་ནི་འཐད་ཀྱི་འབྱུང་ཁུངས་སུ་ནི་མ་ཡིན་ན། ལྡོག་པའི་ཞེས་སྨོས་སོ། །མེད་པ་ལ་ནི་འགའ་ཞིག་དང་ལྡན་པ་སྔོན་དུ་སོང་བའི་
བྲལ་བ་མེད་པའི་ཕྱིར་ན། འབྱུང་ཁུངས་མ་ཡིན་ནོ་ཞེས་ཟུར་ན་འདུག་པའི་རྩོད་པ་བརྗོད་པ་ནི་གལ་ཏེ་ཞེས་བྱ་བའོ། །ལྷས་བྱིན་དང་གྲོང་ལྡན་པ་ཡིན་ལ་དེ་དང་བྲལ་བ་ན་ཡང་གྲོང་འབྱུང་ཁུངས་ཡིན་ནོ། །དངོས་པོ་མེད་པ་དང་ནི་གཏན་ཚིགས་ལྡན་པ་མེད་པ་དེས་ན་ཅི་ལྟར་དེ་ལ་ལྟོས་ཏེ་འབྱུང་ཁུངས་ཡིན་
ཞེ་ན། གང་དང་ཞེས་བྱ་བ་ནི་ལན་ནོ། །ཅི་སྟེ་མ་ཡིན་ཏེ་འོན་ཀྱང་ཡིན་པ་ཁོ་ནའོ། །ཅི་ལྟར་ཞེ་ན། བྲལ་བ་ཙམ་ལ་ཞེས་བྱ་བའོ། །མི་འདོད་པ་བཟློག་པ་ནི་ལྡན་པར་ཡང་ནི་ཞེས་བྱ་བའོ། །གཞན་དུ་ཞེས་བྱ་བ་ནི། ལྡན་པ་སྔོན་དུ་འགྲོ་བས་གཞི་ཡིན་ནའོ། །དེར་ནི་ཞེས་བྱ་བ་ནི། སྡིག་པ་ལས་ཟློག་གོ་
ཞེས་བྱ་བ་སྡིག་པ་ལ། འདིར་ཡང་ཞེས་བྱ་བ་ལ་ནི་དངོས་པོ་མེད་པ་ལའོ། །དེས་ན་ཞེས་བྱ་བ་ནི་འདོད་པས་ནའོ། །དེ་ནི་ཞེས་བྱ་བ་ནི་དངོས་པོ་མེད་པའོ། །འདི་ཉིད་བརྗོད་པ་ནི་གང་ལ་ཞེས་བྱ་བ་སྟེ། དངོས་པོ་མེད་པ་ལའོ། །དོན་དེ་ན་གཏན་ཚིགས་སོ། །ཅི་ལྟར་དེ་དེའི་འབྱུང་ཁུངས་ཡིན་ཞེ་ན། མཐུན་
པའི་ཕྱོགས་མེད་པ་ལ་གཏན་ཚིགས་མེད་པ་ཡོད་པ་མ་ཡིན་ནོ་ཞེས་བྱ་བའི་ཚིག་འདིས། ལྡོག་པ་མེད་པ་སྒྲུབ་པ་ཉིད་དངོས་པོ་ཡོད་པའི་མཚན་ཉིད་ཅན་དུ་བསྟན་པར་འགྱུར་རོ། །དེ་ནི་མེད་པའང་ཡོད་པ་ཡིན་ལ། དངོས་པོ་མེད་པའི་མཚན་ཉིད་ལྡོག་པ་ནི་མེད་པ་ཡིན་ནོ་ཞེས་བྱ་བ་འདི་ནི། མི་ཤེས་
པའི་སྤྱོད་པ་ཡིན་ནོ། །བཟློག་ཀྱང་ཅིག་ཤོས་ནི་ཞེས་བྱ་བ་ནི། དངོས་པོ་ལ་དངོས་པོ་འཐད་པ་ཡིན་ཡང་མེད་དོ་ཞེས་འབྲེལ་ཏོ། །འདི་ལྟར་མཐུན་པའི་ཕྱོགས་བདག་དང་བཅས་པ་ལ། སྲོག་ལ་སོགས་པ་ཡོད་པ་འཐད་པ་ཡིན་ཡང་མེད་པ་ཡིན་ཏེ། མཐུན་པའི་ཕྱོགས་ཚད་མས་རབ་ཏུ་མ་གྲུབ་པ་ནི་ཡོད་
པར་ཐེ་ཚོམ་ཟ་བའི་ཕྱིར་རོ། །གལ་ཏེ་རྣམ་པ་གཞན་སྲིད་པའི་ཕྱིར་ཉེས་པ་འདིར་འགྱུར་ཞེ་ན། འདི་ལྟར་ཞེས་བྱ་བའོ། །ཅི་ལྟར་འདི་གཉིས་དེ་ལྟར་གནས་ཤེ་ན། རྣམ་གཞན་ཞེས་བྱ་བ་སྟེ། དེས་ན་གཉི་ག་མེད་ཅེས་བྱ་བ་ནི་མི་རིགས་སོ། །གལ་ཏེ་མེད་པ་ལ་སྒྲུབ་པར་བྱེད་པ་མེད་ཀྱང་ཅི་ལྟར་འཇུག་པ་ཡིན་

ཞེ་ན། བརྗོད་པ་མཐུན་པའི་ཕྱོགས་ལ་སྒྲུབ་པར་བྱེད་པའི་དངོས་པོ་ཡོད་པ་མ་ཡིན་ནའོ། །དེ་ཉིད་ནི་ཞེས་བྱ་བ་ནི་མེད་པ་ཉིད་དོ། །གལ་ཏེ་དངོས་པོ་ཡོད་པ་མ་ཡིན་ན། གོར་མ་ཆག་པར་མེད་པ་ཉིད་ཡིན་མོད། དེ་ལྟ་ན་ཡང་ཅི་ལྟར་དེ་ཉིད་དེ་ལས་ལྟོས་པ་ཡིན་ཞེ་ན། མཐུན་པའི་ཕྱོགས་དེ་ལས་
མེད་པ་ནི་མཐུན་པའི་ཕྱོགས་དེ་ལས་མི་ལྡོག་པ་མ་ཡིན་ཏེ་འོན་ཀྱང་ལྡོག་པ་ཁོ་ནའོ། །དོགས་པ་ནི་མེད་པ་ཉིད་ཀྱང་ཞེས་བྱ་བ་སྟེ། ལྡོག་པ་མི་འཐད་པ་འབའ་ཞིག་ཏུ་ནི་མ་ཟད་ཀྱི་སྒྲུབ་པར་བྱེད་པ་མེད་པ་ཉིད་ཀྱང་མེད་པ་ཁོ་ནའོ། །ཅིའི་ཕྱིར་ཞེ་ན། གཞི་ཉིད་དང་ཞེས་བྱ་བའོ། །ལན་ནི་མ་ཡིན་ཏེ་ཞེས་བྱ་བའོ། །
དོགས་པ་ནི་དེ་ཡང་ཞེས་བྱ་བ་སྟེ་དངོས་པོ་མེད་པ་ཡང་ངོ་། །ལན་ནི་མ་ཡིན་ཏེ་ཞེས་བྱ་བ་སྟེ་གཉི་ག་དགག་པ་ཞེས་འབྲེལ་ཏོ། །ཅིའི་ཕྱིར་ཞེ་ན། དངོས་པོ་དང་ཞེས་བྱ་བའོ། །གལ་ཏེ་ཕན་ཚུན་མེད་པའི་རང་བཞིན་ཡིན་ཡང་ཅི་ལྟར་གཉི་ག་དགག་པ་མ་ཡིན་ཞེ་ན། དངོས་པོ་ནི་ཞེས་བྱ་བའོ། །གལ་ཏེ་གང་གིས་
རྣམ་པ་གཞན་མེད་པར་འགྱུར་བ། དངོས་པོ་མེད་པ་བཀག་ན་ངེས་པར་དངོས་པོ་ཡོད་པ་ཅི་ལྟར་འགྱུར་ཞེ་ན། གང་གི་ཕྱིར་ཞེས་བྱ་བའོ། །དེ་ལྡོག་ན་ཞེས་བྱ་བ་ནི་དངོས་པོ་མེད་པ་ལྡོག་ནའོ། །འདི་ཉིད་ལྡོག་པའི་སྒོ་ནས་བསྟན་པར་བྱེད་པ་ནི། དེ་ལྟ་མ་ཡིན་ན་ཞེས་བྱ་བའོ། །མེད་པ་ཁོ་ནར་འགྱུར་རོ་ཞེས་
བྱ་བ་ནི་སྐབས་ཀྱིས་ན་དངོས་པོའོ། །འདི་ལྟར་ཞེས་བྱ་བ་ནི་བསྡུ་བའི་ཚིགས་སུ་བཅད་པ་བརྗོད་པའོ། །དོགས་པ་ནི་དེ་ཡང་ཞེས་བྱ་བ་སྟེ་དངོས་པོ་ཡང་ངོ་། །ལན་ནི་དགག་པ་ཞེས་བྱ་བའོ། །དེ་ཡང་མིན་ན་ཞེས་བྱ་བའི་དགག་པ་འདི་ལྟ་བུ་ནི་མི་དམིགས་པས་རྣམ་པར་གཞག་པར་བྱ་བ་ཡིན་ནོ། །མི་དམིགས་
པས་དངོས་པོ་མེད་པ་རྣམ་པར་འཇོག་པ་ཅི་ལྟར་ཞེ་ན། མེད་ཕྱིར་རོ་ཞེས་བྱ་བ་སྟེ་མི་དམིགས་པ་ནི་མེད་པའི་རང་བཞིན་ཅན་ཡིན་པའི་ཕྱིར་རོ། །འོ་ན་གཉི་ག་ཡང་མེད་དོ་ཞེ་ན་གཉི་ག་མེད་ན་ཞེས་བྱ་བའོ། །དངོས་མེད་ནི་ཞེས་བྱ་བར་སྒྲུབ་པར་བྱེད་པ་མེད་པའོ། །དངོས་པོ་བཀག་པ་ཉིད་དངོས་པོ་མེད་པ་ཡིན་ཏེ།
དེས་ན་དངོས་པོ་མེད་པ་ནི་ཟློག་ཏུ་མེད་པ་ཁོ་ནའོ། །ཅི་ལྟར་ཞེ་ན། གལ་ཏེ་ཞེས་བྱ་བའོ། །དངོས་པོ་མེད་པ་ཉིད་བསྟན་ནས། དངོས་པོ་མེད་པའི་མེད་པ་ཉིད་བརྗོད་པ་ནི། དེ་བཞིན་དུ་ཞེས་བྱ་བའོ། །དེ་ལྟ་ན་ཡང་དངོས་པོ་མེད་པར་བཟློག་ཏུ་མེད་པ་ཇི་ལྟར་ཞེ་ན། དངོས་པོར་ཡང་མི་འགྱུར་ན་ནི་ཞེས་བྱ་བའོ། །

དགག་པ་འདི་ཞེས་བྱ་བ་དེ་མཇུག་བསྡུ་བའི་སྒོ་ནས་རྣམ་པར་འགྲེལ་པ་ནི། དེའི་ཕྱིར་ཞེས་བྱ་བའོ། །འོན་ཏེ་དངོས་པོ་མེད་པའི་ཚད་མས་དགག་པ་རྣམ་པར་འཇོག་པ་ཡིན་ལ། དངོས་པོ་ནི་མངོན་སུམ་ཉིད་ཀྱིས་ཡིན་ནོ་ཞེ་ན། དེའི་ཕྱིར་ཚད་མ་ཞེས་བྱ་བ་སྟེ་གང་གི་ཕྱིར་མངོན་སུམ་གྱིས་བསྒྲུབ་པ་ལས་ཕྱི་
རོལ་ཏུ་གྱུར་པ་འདི་རྣམ་པར་འཇོག་པ་དེའི་ཕྱིར་ཚད་མ་གཅིག་འཇུག་པ་ཉིད་ཀྱིས་རྣམ་པ་གཞན་ལ་སྟེ་བཟློག་པ་ལ། རྣམ་པ་གཞན་གྱི་ངོ་བོར་ཏེ། དེ་ལས་བཟློག་པ་ཉིད་དུ་འཇོག་པ་ཡིན་ནོ། །དེ་ཉིད་ཀྱི་ཕྱིར་དངོས་པོ་དང་དངོས་པོ་མེད་པ་ལས་མ་གཏོགས་པའི་རྣམ་པ་གཞན་ནི་སྲིད་པ་མ་ཡིན་ནོ། །
ཅི་ལྟར་ཚད་མ་གཅིག་ཉིད་ཀྱིས་རྣམ་པ་གཞན་ལ་རྣམ་པ་གཞན་ཉིད་དུ་རྣམ་པར་འཇོག་ཅེ་ན། གང་ཞེས་བྱ་བའོ། །གལ་ཏེ་དེ་ལྟ་ན་ཡང་གང་གི་རྣམ་པ་གཞན་མེད་པ་ཉིད་དུ་འགྱུར་བ་ཅི་ལྟར་ན་གཞན་དེའི་ངོ་བོར་མེད་ཅེ་ན་དངོས་པོའི་ཞེས་བྱ་བའོ། །དེ་ལ་ནི་དངོས་པོའི་རང་བཞིན་ལའོ། །དེའི་ཞེས་
བྱ་བ་དངོས་པོའི་རང་བཞིན་དུའོ། །དེའི་རང་བཞིན་དུ་མེད་པ་ནི་དངོས་པོའི་རང་བཞིན་དུའོ། །དེ་ལྟར་དངོས་པོའི་རང་བཞིན་དུ་ཡོངས་སུ་མ་བཅད་པ་ནི་དངོས་པོ་མེད་པའི་རང་བཞིན་ཁོ་ན་ཡིན་ནོ་ཞེས་བསྟན་ནས། དངོས་པོ་མེད་པའི་རང་བཞིན་དུ་ཡོངས་སུ་མ་བཅད་པ་ཡང་དངོས་པོའི་རང་བཞིན་
ཉིད་ཡིན་ནོ་ཞེས་བརྗོད་པ་ནི། དངོས་པོ་མེད་པ་ཞེས་བྱ་བའོ། །དེ་ལྟར་ཞེས་བྱ་བ་ནི་དངོས་པོ་མེད་པའི་རང་བཞིན་དུའོ། །རྣམ་འགྲེལ་ལ་འཇུག་པར་བྱེད་པ་ནི། གལ་ཏེ་ཞེས་བྱ་བའོ། །མཐུན་པའི་ཕྱོགས་དེ་ནི་དངོས་པོའམ་དངོས་པོ་མེད་པར་གྱུར་པ་ཞིག་ཡིན་ནོ། །དེ་ལ་མེད་པའི་ཕྱོགས་ལ་རྩོད་པར་
སྨྲ་བ་སྐྱོན་བརྗོད་པ་ནི། མཐུན་པའི་ཕྱོགས་མེད་པ་ལ་གཏན་ཚིགས་མེད་དོ་ཞེས་དགག་པ་གཞི་དང་བཅས་པ་ཡོངས་སུ་བཅད་པར་མི་ནུས་སོ། །ཅིའི་ཕྱིར་ཞེ་ན། གཞི་ཉིད་དུ་འདོད་པའི་མཐུན་པའི་ཕྱོགས་དེ་ཉིད་བཅད་པ་མེད་པའི་ཕྱིར་རོ། །མ་བཅད་པའི་ཕྱིར་ཞེ་ན། མེད་པ་ནི་ཞེས་བྱ་བའོ། །དེ་ལ་ཞེས་བྱ་
བ་ནི་མཐུན་ཕྱོགས་མེད་པ་ལའོ། །དེའི་ཚེ་འཇུག་པར་འདོད་དམ་ཞེས་དྲི་བའོ། །གཞན་གྱིས་བརྗོད་པས་འཇུག་པ་དེ་ཡང་འདོད་པ་མིན་ན། ལན་བཏབ་པ་ནི། དེ་ཡང་མིན་ཞེས་བསྟན་པ་འདི་ཉིད་ནི་བཀག་པ་ཡིན་ཏེ། དེས་ན་ལྡོག་པ་ཅི་ལྟར་འགོག་ཏེ་མི་འགོག་པ་ཁོ་ནའོ། །ལྡོག་པ་བཀག་པ་

འཇུག་པ་ཅིའི་ཕྱིར་ཡིན་ཞེ་ན། རྣམ་པ་གཞན་ནི་ཞེས་གསུངས་སོ། །དེ་ཉིད་ཅི་ལྟར་ཞེ་ན། དེ་ལྟར་ན་ཞེས་བྱ་བའོ། །དོགས་པ་ནི་དེ་ཡང་ཞེས་བྱ་བ་སྟེ་འཇུག་པའོ། །ལན་ནི་འོ་ན་ཞེས་བྱ་བའོ། །ཅིའི་ཕྱིར་ཞེ་ན། གང་གི་ཕྱིར་ཞེས་བྱ་བའོ། །རྒྱུ་དེའི་ཕྱིར་མཐུན་པའི་ཕྱོགས་དེ་ལས་
གཏན་ཚིགས་ལྡོག་པ་ཅི་སྟེ་འགོག་པར་བྱེད་དེ་མི་བྱ་བ་ཁོ་ནའོ། །ཅིའི་ཕྱིར་ཞེ་ན། བསྒྲུབ་པ་ནི་ཞེས་བྱ་བའོ། །དེ་ནི་མཐུན་པའི་ཕྱོགས་མེད་པའོ། །དེས་ལས་མི་མཐུན་པའི་ཕྱོགས་ལས་སོ། །བརྒལ་ཞིང་བརྟག་པ་བྱེད་པའི་རྣམ་པར་བརྗོད་པ་ནི། སྲོག་ལ་སོགས་པ་ཞེས་བྱ་བའོ། །དེ་ན་གདོན་མི་ཟ་བར་བརྗོད་
པར་བྱ་དགོས་ཏེ་ཞེས་འབྲེལ་ཏོ། །བརྗོད་པའི་ཚུལ་སྨྲས་པ་ནི། མཐུན་པའི་ཞེས་བྱ་བའོ། །བརྒལ་ཞིང་བརྟགས་པ་ན་ཁྱེད་ཀྱིས་གོར་མ་ཆག་པར་འདི་སྐད་ཅེས་བརྗོད་པར་བྱའོ། །དེ་ལྟ་མ་ཡིན་ན་སྟེ་མ་སྨྲས་ན། དངོས་པོ་མེད་པའི་སྐབས་འདིར་ཁྱེད་མི་སྨྲ་བ་ཉིད་འཐོབ་པོ་མི་སྨྲ་བ་ཉིད་ཁས་ལེན་པར་
དོགས་པ་ནི། ཅི་སྟེ་ཡང་ཞེས་བྱ་བའོ། །དེ་བཞིན་ཁོ་ནར་ཞེས་བྱ་བ་ནི་དངོས་པོ་མེད་པ་ལ་མི་སྨྲ་བ་ཁོ་ནར་འགྱུར་བ་སྟེ་དེའི་ཡུལ་ཅན་གྱི་བློ་མེད་པའི་ཕྱིར་རོ་ཞེས་བྱ་བར་བསམས་པའོ། །ལན་ནི་དེའི་ཡུལ་ཅན་གྱི་བློ་མེད་པ་མ་ཡིན་ནོ། །ཅིའི་ཕྱིར་ཞེ་ན། རང་ཉིད་ཅེས་བྱ་བའོ། །མ་ཡིན་པའི་ཕྱོགས་ལ་དངོས་
པོའི་རང་བཞིན་དུ་གཅོད་པ་འབའ་ཞིག་ཏུ་ནི་མ་ཟད་ཀྱི། བྱེད་པ་དགག་པ་རང་ཉིད་ཀྱི་རྣམ་པ་འགའ་ཞིག་ལྟར་གཅོད་པ་སྲིད་པའི་ཕྱིར་རོ། །གལ་ཏེ་གང་གིས་ཡོངས་སུ་གཅོད་པར་འགྱུར་བ་ཚིག་བཞིན་དུ་དེའི་ཡུལ་ཅན་གྱི་བློར་ཡང་ཅི་ལྟར་འགྱུར་ཞེ་ན། ཚིག་ནི་ཞེས་བྱ་བའོ། །ཅི་ལྟར་ཞེ་ན། གདོན་མི་ཟ་
བར་ཞེས་བྱ་བའོ། །རྟོག་པར་འགྱུར་རོ་ཞེས་བྱ་བ་ནི་དངོས་པོ་མེད་པའི་རང་བཞིན་ཏེ། དེ་ལྟར་མ་ཡིན་ན་གོམ་གཅིག་ཀྱང་མི་འགྲོ་བར་འགྱུར་རོ། །དེས་ན་ཞེས་བྱ་བ་ནི་དགག་པའི་དོན་དངོས་པོ་མེད་པའི་རང་བཞིན་ཡིན་པ་ཉིད་ཀྱི་ཕྱིར་རོ། །ཅིའི་ཕྱིར་དངོས་པོ་མེད་པ་མ་རྟོགས་ན་དགག་པ་མི་སྦྱོར་ཞེ་ན།
འདི་ལྟར་ཞེས་བྱ་བའོ། །ཅིའི་ཆེད་དུ་སྦྱོར་ཞེ་ན། བརྗོད་པར་བྱ་བ་དེ་ཉིད་རྟོགས་པར་བྱེད་པའི་ཕྱིར་ཏེ་ངེས་པའི་ཆེད་དུའོ། །དེ་གཉིས་ཞེས་བྱ་བ་ནི་བློའི་ཡུལ་དང་རྗོད་པར་བྱེད་པ་སྦྱོར་བའོ། །དངོས་པོ་མེད་པ་བརྗོད་པར་བྱ་བར་བྱེད་པ་ན། དགག་པར་བྱ་བའི་དངོས་པོ་དང་བྲལ་བའམ། ཁྱད་

པར་དེ་དང་བཅས་པ་ཞིག་ཡུལ་དུ་བྱེད་གྲང་ན། ཕྱོགས་དང་པོ་ལ་ཉེས་པ་བརྗོད་པ་ནི། གལ་ཏེ་ཞེས་བྱ་བའོ། །གཉིས་པ་ལ་བརྗོད་པ་ནི། འོན་ཏེ་ཞེས་བྱ་བའོ། །འོན་ཏེ་རྟོགས་པ་ནི་ཞེས་བྱ་བ་ནི། ཤར་ཕྱོགས་ལ་སོགས་པའི་ཡུལ་དང་འབྲེལ་པ་ཉིད་དུ་རྣམ་པ་གཞན་དུ་ཡིན་ལ་མེད་པ་ཡང་རྣམ་པ་
གཞན་དུ་སྟེ་ཡུལ་གཞན་ན་གནས་པ་ཉིད་ཀྱིས་སོ། །ཡུལ་དུས་ཞེས་བྱ་བ་ནི། མངོན་པར་འདོད་པའི་ཡུལ་དང་དུས་སུ་བུམ་པ་འགོག་པ་ཡིན་གྱི། ཐམས་ཅད་དུ་ནི་མ་ཡིན་པའོ། །འདི་ནི་བུམ་པ་ལ་འདུ་བ་དང་། སྔོན་པོ་ལ་སོགས་པའི་ཆོས་འགོག་པའི་ཉེ་བར་མཚོན་བྱེད་དོ། །ཡང་ན་བུམ་པ་དང་འབྲེལ་
པའི་མངོན་པར་འདོད་པའི་ཡུལ་དང་དུས་དང་བུམ་པའི་སྔོན་པོ་ལ་སོགས་པའི་ཆོས་དང་འབྲེལ་པ་ཉིད་འགོག་པ་ཡིན་གྱི། ཐམས་ཅད་ནི་མ་ཡིན་པའོ། །དེ་ལྟར་རྩོད་པ་རྗེས་སུ་བརྗོད་ནས་ལན་འདེབས་པ་ནི། ཅི་ལྟར་ཡུལ་གཞན་ན་གནས་པ་ལ་སོགས་པས་བུམ་པ་དེ་ཡོད་པ་དེ་ལྟར་ནི་མི་
འགོག་ཏེ། ཡུལ་དགག་པ་མི་འཐད་པའི་ཕྱིར་རོ། །ཅི་ལྟར་མངོན་པར་འདོད་པའི་ཡུལ་ན་གནས་པ་ལ་སོགས་པར་བུམ་པ་མེད་པ་དེ་ལྟར་ཡང་འགོག་པ་མ་ཡིན་ཏེ། མེད་པ་ནི་བློའི་ཡུལ་མ་ཡིན་པའི་ཕྱིར་རོ། །ཡང་ན་ཅི་ལྟར་ཡུལ་ལ་སོགས་པ་བུམ་པ་དང་འབྲེལ་པ་ཉིད་དུ་ཡོད་པ་དེ་ལྟར་ནི་
འགོག་པ་མ་ཡིན་ལ། ཅི་ལྟར་བུམ་པ་དང་འབྲེལ་པ་ཉིད་དུ་ཡུལ་ལ་སོགས་པ་མེད་པ་དེ་ལྟར་ཡང་འགོག་པ་མ་ཡིན་ནོ། །འདི་ལྟར་ཞེས་བྱ་བ་ནི་སྔོན་པོ་ལ་སོགས་པ་དང་འདུ་བར་རོ། །རང་བཞིན་གང་ཞེས་བྱ་བ་ནི་སྔོན་པོ་ལ་སོགས་པའི་ཆོས་དང་འབྲེལ་པ་བུམ་པ་ལ་སོགས་པའི་རང་བཞིན་ནོ། །དེ་
ཞེས་བྱ་བ་ནི་བུམ་པ་དང་འབྲེལ་པའི་ཡུལ་ལ་སོགས་པའོ། །དེའི་ཚེ་ཅི་ལྟར་འགོག་སྟེ། མེད་པའི་ཕྱིར་མི་འགོག་པ་ཁོ་ནའོ། །འོན་ཏེ་བུམ་པ་དང་འབྲེལ་པའི་ཡུལ་ལ་སོགས་པའི་མེད་པ་ཉིད་ཡིན་ན་དེའི་ཚེ་བློས་ཡུལ་དུ་བྱེད་པ་མི་སྲིད་དོ། །ཅིའི་ཕྱིར་ཞེ་ན། མེད་པ་ཞེས་བྱ་བའོ། །ཅི་སྟེ་ཞེས་བྱ་བ་ལ།
བུམ་པ་དང་འབྲེལ་པའི་ཡུལ་ལ་སོགས་པ་མེད་ཀྱང་ཡུལ་དུ་བྱེད་ནའོ། །བུམ་པ་དང་འབྲེལ་པ་ཉིད་དུ་ནི་མ་ཟད་དེ། འོན་ཀྱང་གཞི་ལ་སོགས་པར་ཡང་ངོ་། །ཅིའི་ཕྱིར་བུམ་པ་ལ་སོགས་པ་དང་འབྲེལ་པ་ཉིད་དུ། ཡུལ་ལ་སོགས་པ་ཡུལ་དུ་བྱས་ན། གཞི་ལ་སོགས་པར་ཡང་ཡུལ་དུ་བྱེད་པར་

འགྱུར་ཞེ་ན། དེ་ལྟ་མ་ཡིན་ན་ཞེས་བྱ་བ་སྟེ། གཞི་ལ་སོགས་པར་ཡོངས་སུ་བཅད་པ་མེད་པར་དེ་དང་འབྲེལ་པ་ཅན་ཉིད་དུ་ཡུལ་དུ་བྱ་བར་མི་ནུས་པའི་ཕྱིར་རོ། །དེ་ཉིད་བརྗོད་པ་ནི། གདོན་མི་ཟ་བར་ཞེས་བྱ་བའོ། །གཞན་དུ་ཞེས་བྱ་བ་ནི་གཞི་ལ་སོགས་པར་ཡུལ་དུ་མ་བྱས་
ནའོ། །དེ་དང་འབྲེལ་པ་ཉིད་དུ་ཡོངས་སུ་གཅོད་པ་མི་སྲིད་པའི་ཕྱིར་རོ། །གཞིའི་ངོ་བོར་ཡུལ་དུ་བྱེད་མོད་སྙམ་ན། ཡུལ་འདི་ན་ཞེས་བྱ་བའོ། །གཞིའི་ངོ་བོར་མེད་པར་ཅི་ལྟར་འགྱུར། མེད་ན་ཞེས་བྱ་བ་ནི་མེད་པ་བློའི་ཡུལ་མ་ཡིན་པའི་ཕྱིར་རོ། །དེ་བཞིན་དུ་ཡུལ་ལ་སོགས་པ་དང་། འབྲེལ་པའི་
བུམ་པ་འགོག་པ་ལ་ཡང་ཉེས་པ་བརྗོད་པར་བྱ་བའོ། །འོན་ཏེ་ཞེས་བྱ་བ་ནི་དོགས་པའོ། །དེ་ལྟ་ཡིན་ན་ཞེས་བྱ་བ་ནི་ལན་ནོ། །མཐུན་པའི་ཕྱོགས་བདག་དང་བཅས་པ་ཡང་ངོ་། །དེའི་ཕྱིར་སྲོག་ལ་སོགས་པ་དང་ལྡན་པ་ནི་མཉན་བྱ་ཉིད་བཞིན་དུ་མཐུན་པའི་ཕྱོགས་ལ་འཇུག་པ་མེད་པ་ཡིན་ཏེ། དེས་
ན་མཉན་བྱ་ཉིད་དང་འདྲ་བར་སྲོག་ལ་སོགས་པ་ཡང་གོ་བར་བྱེད་པ་མ་ཡིན་པ་ཁོ་ནའོ་ཞེས་བྱ་བའི་དོན་ཏོ། །དེས་ན་ཞེས་བྱ་བ་ནི་ཡོད་པ་དང་མེད་པ་ལ་དགག་བསྒྲུབ་མི་འཐད་པས་ནའོ། །དེའི་ཕྱིར་ཞེས་བྱ་བ་ནི་མི་སྲིད་པའི་ཕྱིར་རོ། །ཅི་ལྟར་བསྒྲུབ་པ་མེད་ཅེ་ན། བུམ་པ་ཞེས་བྱ་བའོ། །གལ་ཏེ་བུམ་པའི་
སྒྲ་ལས་བུམ་པ་ཡོད་དོ་ཞེས་བདེན་པར་ཡོངས་སུ་འཛིན་ན་དེའི་ཚེ་དེ་ཉིད་བསྒྲུབ་པར་ཡིན་པའི་ཕྱིར་ཡང་ཡོད་དོ་ཞེས་བྱ་བའི་བསྒྲུབ་པ་བསྟན་ཟིན་པ་སྟོན་པས་ཅི་ཞིག་བྱ། འོན་ཏེ་བུམ་པའི་སྒྲ་ལ་བུམ་པ་མེད་པ་ཉིད་དུ་ཡོངས་སུ་འཛིན་ན་དེའི་ཚེ་དེ་ནི་ཞེས་བྱ་བའོ། །འདི་ཉིད་སྡུད་པ་ནི་གལ་ཏེ་ཞེས་བྱ་
བའོ། །འོ་ན་བསྒྲུབ་པ་དང་དགག་པའི་ཐ་སྙད་ཅི་ལྟར་ཞེ་ན། དེ་ཕྱིར་ཞེས་བྱ་བའོ། །གང་གི་ཕྱིར་ཕྱི་རོལ་ལ་བརྟེན་པའི་དགག་བསྒྲུབ་ཀྱི་ཐ་སྙད་མི་འཐད་པ་དེའི་ཕྱིར་རོ། །སྒྲ་དོན་རྣམ་པར་རྟོག་པའི་རྣམ་པ་ལའོ། །གལ་ཏེ་ཕྱི་རོལ་ལ་ངེས་པའི་ཕྱིར་ན། སྒྲའི་དོན་ཡོད་བསྒྲུབ་པ་དང་། དགག་
པའི་ཡུལ་ཅི་ལྟར་ཡིན་ཞེ་ན། གང་གི་ཕྱིར་ཕྱི་རོལ་ལ་རྟེན་པ་མིན་པས་སོ། །དེ་ཉིད་ཅི་ལྟར་ཞེ་ན། གང་གི་ཕྱིར་དངོས་པོ་དང་དངོས་པོ་མེད་པ་ལ་བརྟེན་པས་སོ། །གཉི་གའི་ཐུན་མོང་པ་ཡིན་པས་ཞེས་བྱ་བའི་དོན་ཏེ། དེ་ལྟ་བུར་གྱུར་པའི་སྒྲའི་དོན་དེ་ལ་བརྟེན་ནས་འགྲོ་བ་འདིར་ནི་བསྒྲུབ་པ་དང་དགག་

པ་ཐམས་ཅད་ཀྱང་འདོད་པ་ཡིན་ནོ། །གལ་ཏེ་ཚད་མའི་ཡུལ་ཁོ་ན་སྒྲའི་དོན་མ་ཡིན་ནམ། དེ་ཅི་ལྟར་ན་དེ་ལ་ཡང་བསྒྲུབ་པ་དང་དགག་པ་འཐད་ཅེ་ན། ཚད་མའི་ཞེས་བྱ་བའོ། །མངོན་སུམ་གྱི་ཚད་མའི་དོན་ནི། གསལ་བའི་རྣམ་པ་ཅན་ཤེས་པའི་བདག་ཏུ་གྱུར་པར་གསལ་བ་གང་ཡིན་པའོ། །ཅི་ལྟར་གཞན་
ཡིན་ཞེ་ན། སྒྲའི་དོན་ནི་ཞེས་བྱ་བའོ། །ཅིའི་ཕྱིར་གཉི་ག་ལ་བརྟེན་པ་མ་ཡིན་ཞེ་ན། ཚད་མའི་དོན་ནི་ཞེས་བྱ་བའོ། །རྣམ་པ་གཞན་དུ་ནི་དངོས་པོ་ལས་གཞན་དུའོ། །འོ་ན་ཅི་ལྟར་སྒྲའི་དོན་གཉི་གའི་ཐུན་མོང་བ་ཡིན་ཞེ་ན། སྒྲ་ལས་ཞེས་བྱ་བའོ། །གང་གི་ཕྱིར་དེ་ལྟར་ཡིན་པ་དེས་ན། དངོས་པོ་དང་དངོས་པོ་
མེད་པ་ལ་བརྟེན་པ་ནི་སྒྲའི་དོན་ཡིན་ནོ། །མངོན་སུམ་གྱི་དོན་ཡང་དེ་འདྲ་བ་ཁོ་ནའོ་ཞེ་ན། མངོན་སུམ་གྱི་ཚད་མ་ནི་རྣམ་པར་རྟོག་པ་དང་འདྲ་བར་དེ་ལྟ་མིན་ཏེ། ཞིག་པ་དང་མ་ཞིག་པའི་དོན་ལ་ཡང་དེ་འདྲ་བ་ཉིད་མ་ཡིན་ན་གང་གིས་དེའི་དོན་ལས་གཉི་ག་ལ་ཐུན་མོང་བར་འགྱུར། དེས་ན་ཞེས་བྱ་བ་ནི་གཉི་ག་ལ་ཐུན་
མོང་ཡིན་པའི་ཕྱིར་རོ། །དེ་ལྟར་རྣམ་པར་རྟོག་པའི་ཡུལ་བསྒྲུབ་པ་དང་དགག་པའི་ཡུལ་ཉིད་དུ་བསྒྲུབས་ནས། ད་ནི་རྟོག་མེད་ཀྱི་བློ་འཁྲུལ་པའི་ཡུལ་ཟླ་བ་གཉིས་ལ་སོགས་པ་ཡང་དགག་པའི་ཡུལ་ཉིད་དུ་བརྗོད་པ་ནི། རྣམ་པར་རྟོག་པ་མེད་པ་ཡང་ཞེས་བྱ་བའོ། །གལ་ཏེ་རྣམ་པར་རྟོག་པ་མེད་པའི་
ཤེས་པ་མཐའ་དག་ཚད་མར་གྱུར་ན་དེའི་ཚེ་དེས་ཉེ་བར་བསྟན་པའི་དོན་དགག་པའི་ཡུལ་དུ་མི་འགྱུར་བ་ཞིག་ན། དེ་ལྟར་ནི་མ་ཡིན་ཏེ་དེས་ན་རྣམ་པར་རྟོག་པ་མེད་པ་འགའ་ཞིག་ཁོ་ན་ཚད་མ་ཡིན་པའི་ཕྱིར་དེའི་ཡུལ་དགག་པའི་ཡུལ་དུ་མི་འགྱུར་མོད་འཁྲུལ་པའི་རྣམ་པ་གཞན་དགག་པའི་ཡུལ་ཡིན་པ་ཡང་གོ་
འགལ་བ་ཅི་ཡོད། གལ་ཏེ་རྣམ་པར་རྟོག་པ་མེད་པ་སྒྲུབ་པའི་ཚུལ་དུ་ཞུགས་པ་ན་དེའི་དོན་ཇི་ལྟར་དགག་སྙམ་ན། གལ་ཏེ་ཞེས་བྱ་བའོ། །ཟླ་བ་གཉིས་ལ་སོགས་པ་སྒྲུབ་པའི་ཚུལ་དུ་ཞུགས་པ་གང་ཡིན་པ་དེ་ཚད་མ་མ་ཡིན་ན་ནི་དེའི་ཚེ་ཚད་མ་ཡིན་པ་དེས་ན་འཁྲུལ་པའི་ཤེས་པས་ཉེ་བར་བསྟན་པའི་ཟླ་བ་གཉིས་
ལ་སོགས་པ་དེ་ཚད་མ་མ་ཡིན་པར་བསྟན་པའི་ཕྱིར། ཟླ་བ་གཉིས་ལ་སོགས་པ་འདི་ནི་ཡོད་པ་མ་ཡིན་ནོ་ཞེས་དགག་པ་འཇུག་པར་བྱེད་དོ། །གང་གི་ཚེ་དེ་ཚད་མ་མ་ཡིན་ཞེ་ན་དགག་པའི་ཚུལ་གྱིས་ཞེས་བྱ་བའོ། །གལ་ཏེ་ཕྱི་རོལ་གྱི་ཟླ་བ་གཉིས་ལ་སོགས་པ་མེད་པའི་རང་བཞིན་དང་ཟླ་བ་གཉིས་ལ་

སོགས་པའི་རྣམ་པར་བསྒྲུབ་པ་འཇུག་པ་ཡིན་ན། དེའི་ཚེ་དེ་ཚད་མ་མ་ཡིན་ལ་གང་གི་ཚེ་དེ་ཚད་མ་མ་ཡིན་པ་དེའི་ཚེ་ཡང་དེས་ཉེ་བར་བསྟན་པའི་ཟླ་བ་གཉིས་ལ་སོགས་པ་ཕྱིའི་ཟླ་བ་གཉིས་ལ་སོགས་པའི་རང་བཞིན་གྱི་དགག་པ་ཡུལ་ཉིད་ཡིན་ནོ་ཞེས་བྱ་བའི་དོན་ཏོ། །གལ་ཏེ་
ཞེས་བྱ་བ་ལ་སོགས་པའི་རྩོད་པར་ནི་དོན་འདི་ཡིན་ཏེ། ཉེས་པ་འཁྲུལ་པ་ཉིད་ཉེ་བར་སྐྱེ་བ་ནི། རང་གི་དམིགས་པ་ཕྱི་རོལ་གྱི་རང་བཞིན་དུ་མེད་པར་སྟོན་པར་བྱེད་དེ། དེས་ན་བཏགས་ཟིན་པ་ལ་འཐག་པའི་ཚུལ་དུ་དགག་པ་གཞན་གྱིས་ནི་ཅི་ཡང་བྱར་མེད་དོ་ཞེས་བྱ་བའོ། །དེ་ལྟ་བུའི་
ཉིད་དུ་ཞེས་བྱ་བ་ནི། ཕྱིའི་དམིགས་པས་སྟོང་པ་ཁོ་ནར་རོ། །ཅིའི་ཕྱིར་ཞེ་ན། རང་རིག་པ་ཞེས་བྱ་བའོ་འདི་ཉིད་གཞུང་འཛུགས་པ་ནི་རང་གི་ཞེས་བྱ་བའོ། །གཞན་དུ་ཞེས་བྱ་བ་ནི་རྣམ་པ་གཞན་གྱིས་སོ། །ཅིའི་ཕྱིར་ཞེ་ན། ཐུག་པ་མེད་པས་རང་གི་ངོ་བོས་ལས་དམས་པར་ཐལ་བའི་ཕྱིར་རོ། །
གང་གིས་རང་གིས་ངོ་བོ་ལས་ཉམས་པར་འགྱུར་བ་ཅི་ལྟར་ཐུག་པ་མེད་ཅེ་ན། རྣམ་པ་གཞན་དུ་ཞེས་བྱ་བའོ། །དེ་ཉིད་ཀྱང་ཞེས་བྱ་བ་ནི་རྣམ་པ་གཞན་ནོ། །འོན་ཏེ་རྣམ་པ་གཉིས་པ་ཡང་རྣམ་པ་གཞན་དུ་སྣང་བ་ཡིན་ནོ་ཞེ་ན། དེར་ཡང་ཞེས་བྱ་བ་སྟེ། རྣམ་པ་གཉིས་པ་ལ་ཡང་རྣམ་པ་གཞན་དུ་སྣང་བ་
ཡིན་ན། དེ་ལྟར་ཞེས་བྱ་བ་རང་བཞིན་དེ་ཉིད་ཡིན་པར་འགྱུར་བའི་ཕྱིར་ཐུག་པ་མེད་པར་འགྱུར་རོ། །དངོས་པོ་ཉེ་བར་ལེན་པ་ཅན་ཉིད་ཀྱང་དགག་པར་མི་འཐད་དོ་ཞེས་བརྗོད་པའི་དོན་དུ་རང་གི་ངོ་བོར་ཞེས་སྨྲས་སོ། །གལ་ཏེ་ཆོས་ཅན་ཡིན་ན། དེའི་ཚེ་ཕྱི་རོལ་གྱི་ཉེ་བར་ལེན་པ་ཅན་ཡིན་པ་འགོག་
པར་འགྱུར་གྱི་གཞན་དུ་ནི་མ་ཡིན་ནོ་ཞེས་དེ་ལྟར་ནི་སངས་རྒྱས་པས་ཀྱང་ཁས་བླང་དགོས་སོ། །འོན་ཏེ་ཆོས་ཅན་ཡོད་པ་ཁོ་ནའོ་ཞེ་ན། ཆོས་ཅན་དེ་ཡང་ཞེས་བྱ་བ་སྟེ། སྒྲའི་དོན་གྱི་རང་བཞིན། དངོས་པོའི་ཉེ་བར་ལེན་པ་ཅན་དགག་པའི་གཞིར་གྱུར་པ་ཡང་རང་གི་ངོ་བོས་ཞེས་བྱ་བ་དངོས་པོའི་ཉེ་བར་
ལེན་པ་ཅན་མ་ཡིན་པའི་རང་བཞིན་དུ་རྟོགས་པས་ན་སྟེ། དངོས་པོའི་ཉེ་བར་ལེན་པ་ཅན་མ་ཡིན་པ་ནི་དེའི་རང་བཞིན་ཡིན་པའི་ཕྱིར། ཆོས་ཅན་རྟོགས་པ་ཉིད་ན་དངོས་པོའི་ཉེ་བར་ལེན་པ་ཅན་མ་ཡིན་པར་རྟོག་པར་འགྱུར་རོ། །དེས་ན་ཅི་ལྟར་ཆོས་ཅན་དེ་སྒྲུབ་པ་དང་དགག་པའི་ཐུན་མོང་པ་ཉིད་ཡིན་ཞེ་ན།

སྒྲའི་དོན་དང་མཚུངས་པ་དེ་འདྲ་བ་ཕྱི་རོལ་དང་ནང་གི་རང་བཞིན་མེད་ནའང་། སྒྲའི་དོན་གྱི་རང་བཞིན་གྱི་ཆོས་ཅན་དེ་ཉིད་སྒྲུབ་པ་དང་དགག་པ་དེ་དག་དང་འབྲེལ་བར་སྣང་ཞིང་ངེས་པ་ཡིན་གྱི། ཕྱི་དང་ནང་གི་རང་བཞིན་དག་ནི་མ་ཡིན་ནོ། །གལ་ཏེ་ཕྱི་དང་ནང་གི་རང་བཞིན་དང་བྲལ་བ་ཉིད་ཡིན་ན་རང་བཞིན་
མེད་པ་ཁོ་ན་མ་ཡིན་ནམ། ཅི་ལྟར་ན་ཡོད་ཅེས་ཐ་སྙད་བྱེད་སྙམ་ན་སྒྲ་འཇུག་པའི་གཏན་ཚིགས་ལ། སྒྲའི་དོན་གྱི་རང་བཞིན་གྱི་གཞན་སེལ་བ་དེ་ཡང་སྤྱི་ལ་སོགས་བརྗོད་པར་བྱ་བ་ཡིན་པར་འཛིན་པ་བཟློག་པའི་དོན་དུ་ཡོད་དོ་ཞེས་བྱ་བའི་ཐ་སྙད་ལ་བརྟེན་པར་འདོད་དོ། །ཅིའི་ཕྱིར་ཐ་སྙད་འདི་ཕྱི་
དང་ནང་གི་རང་བཞིན་ལ་བརྟེན་པ་མ་ཡིན་ཞེ་ན། སྒྲ་ཞེས་བྱ་བའོ་དེ་ལས་ཞེས་བྱ་བ་ནི་ཕྱི་དང་ནང་གི་རང་བཞིན་ལས་མ་གཏོགས་པའོ། །ལན་ནི་གཞན་སེལ་བ་ཞེས་བྱ་བའོ། །འོ་ན་སྒྲ་ལས་རྟོགས་པ་ཞེས་བྱ་བའི་ཐ་སྙད་དུ་ཅི་ལྟར་འགྱུར་ཞེ་ན། དེ་ལྟ་ན་ཡང་ཞེས་བྱ་བ་སྟེ་མ་རྟོགས་ན་ཡང་ངོ་། །དེ་ག་ལས་
ཤེ་ན་འདི་ལྟར་ཞེས་གསུངས་སོ། །མངོན་པར་ཡིན་ནོ་ཞེས་བྱ་བ་ནི་ལྷག་པར་ཞེན་པའོ། །ཅི་ལྟར་ན་སྒྲའི་དོན་འདི་ཕྱི་རོལ་ལ་སོགས་པའི་རང་བཞིན་དང་བྲལ་བ་ཡིན་ཞེ་ན། དེ་སྐད་དུ་ཡང་ཞེས་བྱ་བའོ། །འདི་ལ་ཞེས་བྱ་བ་ནི་གཞན་སེལ་བ་ལའོ། །སློབ་དཔོན་ཆོས་མཆོག་གི་ལུགས་ཀྱི་དོགས་པ་བསུ་བ་
ནི། གལ་ཏེ་ཞེས་བྱ་བའོ། །གང་ལ་ཤེས་པ་ལས་ཕྱི་རོལ་གྱི་རང་བཞིན་དུ་སྒྲོ་བཏགས་པའི་རང་བཞིན་ཡོད་པ་དེ་ལྟ་བུ་སྒྲའི་དོན་གྱི་རང་བཞིན་ཡོད་པ་མ་ཡིན་ནམ། དེས་ན་སྒྲའི་དོན་རང་བཞིན་མེད་པ་ཅི་ལྟར་ཡིན་ཞེ་ན། ལན་ནི་དེ་ལ་ནི་ཕྱི་རོལ་གྱི་རང་བཞིན་དུ་སྒྲོ་བཏགས་པའི་རང་བཞིན་ཡོད་པ་མ་ཡིན་
ནོ། །ཅིའི་ཕྱིར་ཞེ་ན། ཤེས་པ་དང་ཞེས་བྱ་བའོ། །གཞན་ཞེས་བྱ་བ་ནི་སྒྲོ་བཏགས་པའི་རང་བཞིན་ནོ། །དོགས་པ་ནི་འཁྲུལ་པའི་ཞེས་བྱ་བའོ། །སྒྲོ་བཏགས་པའི་རང་གི་ངོ་བོ་ནི་འཁྲུལ་པ་ཡིན་ནོ་ཞེས་བྱ་བའི་དོན་ཏོ། །ལན་ནི་དེ་ཡང་ཞེས་བྱ་བ་སྟེ། འཁྲུལ་པའི་རང་བཞིན་ཡང་ངོ་། །མ་
རྟོགས་ན་ཞེས་བྱ་བ་ནི་འཁྲུལ་པའི་རང་བཞིན་ནོ། །དོགས་པ་ནི་ཕྱིས་ཞེས་བྱ་བའོ། །དང་པོའི་ནི་འཁྲུལ་པའི་རང་བཞིན་རྟོགས་པ་ཁོ་ན་ཡིན་ལ། ཕྱིས་ནི་འཁྲུལ་པའི་རང་བཞིན་ཉིད་དུ་ངེས་པར་འགྱུར་རོ་ཞེས་བྱ་བའི་དོན་ཏོ། །རང་གི་ངོ་བོ་ཞེས་བྱ་བ་ནི་འཁྲུལ་པའི་རང་བཞིན་དུའོ། །མ་རྟོགས་ན་ནི་

འཁྲུལ་པའི་རང་བཞིན་དུ་ཡོད་དོ་ཞེས་བྱ་བ་ནི། རྣམ་པར་གཞག་པ་གང་ཡིན་པ་དེའི་ཡུལ་ཅི་ལྟར་ཡིན། འོན་ཏེ་དང་པོ་ནི་འཁྲུལ་པའི་རང་བཞིན་ལ། མ་འཁྲུལ་པ་ཉིད་དུ་རྟོགས་ཏེ། དེས་འཁྲུལ་པ་ཉིད་དུ་ངེས་པ་མ་ཡིན་ནོ་ཞེས་དོགས་ན་གཞན་གྱི་ཞེས་བྱ་བའོ། །གལ་ཏེ་དེ་ཉིད་
གཞན་གྱི་རང་གི་ངོ་བོར་རྟོག་ན། དེའི་ཚེ་རྟོགས་པ་འཁྲུལ་པར་འགྱུར་བ་ཡིན་གྱི། སྒྲོ་བཏགས་པ་དེ་ཉིད་ནི་འཁྲུལ་པའི་རང་བཞིན་དུ་རྟགས་པ་མ་ཡིན་ནོ། །བདེན་པ་ཉིད་དུ་ངེས་པས་ན་ཞེས་བྱ་བ་ནི་སྒྲོ་བཏགས་པ་མི་བདེན་ཡང་དང་པོ་བདེན་པ་ཉིད་དུ་སྣང་བས་ནའོ། །དེའི་ཞེས་བྱ་བ་ནི་ལན་ནོ། །དོགས་
པ་ནི་དོན་ལ་ཞེས་བྱ་བའོ། །ལན་ནི་དེ་ཉིད་ཅེས་བྱ་བ་སྟེ་དོན་ལ་མ་རེག་པ་ཉིད་དོ། །དེའི་ནི་སྒྲོ་བཏགས་པ་ཡིའོ། །དོན་ལ་མ་རེག་པ་དེ་ཡང་སྣང་བ་ཁོ་ན་ཡིན་པས་ཅི་ལྟར་མི་བདེན་པས། ཅིའི་ཕྱིར་ཞེ་ན། རང་བཞིན་ཞེས་བྱ་བའོ། །དོན་ལ་མ་རེག་ཀྱང་དོན་ལ་རེག་པ་ཉིད་དུ་ངེས་པ་སྐྱེད་པའི་ཕྱིར་མི་བདེན་
པ་ཉིད་དོ་ཞེས་དོགས་པ་བསུ་བ་ནི། རྣམ་པ་གཞན་དུ་ཞེས་བྱ་བའོ། །ལན་ནི་འོ་ན་ཞེས་བྱ་བའོ། །ཉིད་ཀྱི་ཚིག་གིས་ནི་དོན་ལ་མ་རེག་པ་བདེན་པར་བརྗོད་པའོ། །དོགས་པ་ནི་དེས་ཞེས་བྱ་བ་སྟེ། སྒྲོ་བཏགས་པས་ཕྱིན་ཅི་ལོག་ཏུ་ངེས་པ་སྐྱེད་པའི་ཕྱིར་རོ། །དེ་ཡང་ནི་སྒྲོ་བཏགས་པའོ། །མ་ཡིན་ཏེ་ཞེས་
བྱ་བ་ནི་ལན་ནོ་མངོན་སུམ་ལ་སྣང་བ་ངེས་པ་སྐྱེད་པར་བྱེད་པ་མ་ཡིན་པ་དེ་བཞིན་དུ་སྒྲོ་བཏགས་པ་ཡང་དེའི་སྐྱེད་བྱེད་མ་ཡིན་གྱི། འོན་ཀྱང་སྒྲོ་བཏགས་པ་ཉིད་དེ་སྐྱེད་བྱེད་ཡིན་ནོ། །གང་གིས་དེ་སྐྱེད་པས་དེའང་མི་བདེན་པར་འགྱུར་བ་ངེས་པ་ཡང་འཁྲུལ་པ་ནི་མ་ཡིན་ནོ་ཞེས་བརྗོད་པ་ནི། དེ་ལྟ་ཡིན་ན་ཞེས་
བྱ་བའོ། །དེ་ཡང་ནི་ངེས་པ་ཡང་ངོ་། །དེའི་ཕྱིར་ཞེས་བྱ་བ་ནི་ཤེས་པ་དང་ཤེས་བྱ་ལས་མ་གཏོགས་པའི་སྒྲོ་བཏགས་པ་མེད་པའི་ཕྱིར་རོ། །གཟུང་བའི་རྣམ་པ་དང་ལྡན་པའི་རྣམ་པར་རྟོག་པ་འབའ་ཞིག་ཡོད་ཀྱི་བཏགས་པ་གཞན་ནི་ཡོད་པ་མ་ཡིན་ནོ་ཞེས་དགོངས་པའོ། །གལ་ཏེ་རང་བཞིན་
མེད་ན། འོ་ན་ཅི་ལྟར་ཞེས་བྱ་བའོ། །ལན་ནི་སྒྲ་འཇུག་པའི་ཕྱིར་རོ་ཞེས་བྱ་བའོ། །འདི་ཉིད་ཀྱི་བཤད་པ་ནི་སྒྲ་འཇུག་པའི་ཞེས་བྱ་བའོ། །ཐ་སྙད་ལས་ཞེས་བྱ་བ་ནི། བསྒྲུབ་པ་དང་དགག་པའི་རང་བཞིན་ལས་སོ། །ཅིའི་དོན་དུ་ཞེ་ན། སྤྱི་ལ་སོགས་པ་ཞེས་བྱ་བའོ། །གལ་ཏེ་སྒྲ་ལས་ཅི་ཡང་

རྟོགས་པ་མེད་དོ་ཞེས་བརྗོད་ཀྱང་སྤྱི་ལ་སོགས་པར་འཛིན་པ་ནི་ལྡོག་པར་འགྱུར་བ་ཉིད་མ་ཡིན་ནམ། དེས་ན་གཞན་སེལ་བ་ཞེས་བསྟན་པས་ཅི་བྱ་ཞེ་ན། གལ་ཏེ་ཞེས་བྱ་བའོ། །གང་གི་ཕྱིར་སྒྲ་འཇུག་པའི་ཕྱིར་ཡོད་དོ་ཞེས་ཐ་སྙད་དུ་བྱེད་པ་དེ་ཉིད་ཀྱི་ཕྱིར། རྣམ་འགྲེལ་མཛད་པས་དེ་ཡང་ཞེས་གསུངས་ཏེ།
སྒྲའི་དོན་རང་བཞིན་མེད་པ་ཉིད་བསྒྲུབ་པ་དང་། དགག་པའི་ཐ་སྙད་ལ་བརྟེན་པར་འདོད་པ་ཡིན་ནོ། །དེ་ལྟར་མ་ཡིན་ན་ཞེས་བྱ་བ་ནི་དེའི་ཐ་སྙད་ལ་བརྟེན་པར་མི་འདོད་ན། རང་བཞིན་མེད་པ་སྒྲའི་དོན་ཡིན་པ་ལ་ཤེས་པར་བྱེད་པ་མེད་པའི་ཕྱིར་ན་ཡོད་དོ་ཞེས་བྱ་བའི་ཐ་སྙད་ཆད་པ་ཁོ་ནར་འགྱུར་རོ། །དེས་
ན་རིགས་པ་ཅན་ལ་སོགས་པ་སྒྲའི་དོན་རང་བཞིན་མེད་པ་ཅི་ལྟར་ཡིན་ཞེས་སྤོང་བར་འགྱུར་རོ། །གལ་ཏེ་སྒྲོ་བཏགས་པ་མི་བདེན་ཡང་རང་བཞིན་མེད་པར་སྒྲའི་དོན་ཅི་ལྟར་ཡིན་ཏེ། དངོས་པོའི་རང་བཞིན་བརྗོད་བྱ་ཡིན་པའི་ཕྱིར་རོ་ཞེ་ན། འདི་ལྟར་ཞེས་བྱ་བའོ། །གང་གི་ཕྱིར་མེའི་སྒྲ་ལས་མེ་མ་ཡིན་
པ་ལས་ལྡོག་པ་མ་ལྡོག་ཀྱང་། མེ་མ་ཡིན་པ་སྤངས་ནས་འཇུག་པ་ཉིད་གཞན་བཟློག་པ་ཡིན་ནོ། །འོན་ཏེ་འདི་འདྲ་བའི་གཞན་བཟློག་པ་ནི། སྒྲ་ལས་དངོས་པོའི་རང་བཞིན་རྟོགས་པའི་དབང་གིས་འགྱུར་བ་མ་ཡིན་ནོ་ཞེ་ན། རྟོགས་པ་རྣམས་ཀྱིས་ཞེས་བྱ་བའོ། །ཕན་ཚུན་གྱི་ཞེས་བྱ་བ་ནི། སྒྲས་
ནི་གཞན་ལས་ལྡོག་པའི་རྣམ་པར་རྟོག་པ་སྐྱེས་ལ་དེས་ནི་འཇུག་པའི་རྣམ་པར་རྟོག་པའོ་ཞེས་བྱ་བ་ལ་སོགས་པའོ། །འོན་ཏེ་མེའི་སྒྲ་ལས་མེའི་རང་བཞིན་རྟོགས་པ་ཉིད་ཀྱི་ན་འཇུག་པ་ཡིན་ནོ་ཞེ་ན། སྒྲ་ལས་ནི་ཞེས་བྱ་བའོ། །དེ་ལས་ནི་ཞེས་བྱ་བ་ནི་རྣམ་པར་རྟོག་པ་ལས་སོ། །འཇུག་པའི་རྣམ་
པར་རྟོག་པ་ནི་བདག་འཇུག་གོ་ཞེས་བྱ་བའི་རྣམ་པ་ཅན་ནོ། །དེ་ལས་ཞེས་བྱ་བ་ནི་འཇུག་པའི་རྣམ་པར་རྟོག་པ་ལས་སོ། །འགྲོ་བའི་རང་བཞིན་ཞེས་བྱ་བ་ནི་ཡུལ་གཞན་དང་གཞན་དུ་སྐྱེ་བའི་ཆོས་ཅན་གྱི་ལུས་ཉིད་འགྲོ་བ་པོ་ཡིན་ལ། དེའི་རང་བཞིན་ཉམས་སུ་མྱོང་བ་པོ་ཞེས་བྱ་བ་ནང་གི་རེག་བྱ་
ལུས་ཀྱི་དབང་པོས་ཉམས་སུ་མྱོང་བའོ། །འགྲོ་བའི་རང་བཞིན་ཉམས་སུ་མྱོང་བ་དེ་ལས་ནི་ཡོད་ན་མེ་ཐོབ་པའམ། གལ་ཏེ་མེད་ན་མི་ཐོབ་པ་ཞེས་བྱ་བ་དེ་ལྟ་བུར་མེའི་རང་བཞིན་མ་གཏོགས་པས་ཁོ་ནར་ཐ་སྙད་ཡོངས་སུ་རྫོགས་པ་ཡིན་ནོ། །དེ་ཉིད་ཀྱི་ཕྱིར་བརྗོད་པར་བྱ་བ་དང་ཞེས་བྱ་བའོ། །མེད་

མོད་ཀྱི་དེ་ལྟ་ན་ཡང་ཐ་སྙད་ནི་འགྲུབ་པོ་ཞེས་བྱ་བའི་དོན་ཏོ། །དེས་ན་སྒྲའི་དོན་ནི་རང་བཞིན་མེད་པ་ཁོ་ནའོ། །གལ་ཏེ་སྒྲའི་དོན་དངོས་པོའི་རང་བཞིན་ཉིད་ཀྱིས་ངོ་བོ་དང་བཅས་པ་ཡིན་ན་ཅི་སྐྱོན་སྙམ་ན། དེ་ལྟ་མིན་ན་ཞེས་བྱ་བའོ། །གལ་ཏེ་སྒྲའི་དོན་རང་བཞིན་མེད་པ་མ་ཡིན་
གྱི། འོན་ཀྱང་དངོས་པོའི་རང་བཞིན་ཉིད་ཡིན་ན། དེའི་ཚེ་དོན་རྣམས་ཀྱི་ཆོས་གཅིག་བསྒྲུབས་སམ་བཀག་པ་ན། བདག་ཉིད་ཐམས་ཅད་བསྒྲུབས་པ་དང་བཀག་པར་འགྱུར་རོ། །ཅིའི་ཕྱིར་ཞེ་ན། བདག་ཐ་སྙད་མེད་པའི་ཕྱིར་ཏེ། ཆོས་དང་ཆོས་ཅན་དག་ཐ་མི་དད་པའི་ཕྱིར་རོ། །འོན་ཏེ་
ཐ་དད་པ་འདོད་པ་ཡིན་ན། དེའི་ཚེ་བསྒྲུབ་པ་དང་ནི་དགག་པ་དག་ཆོས་ཅན་གཅིག་ལ་འདུ་བར་མི་འགྱུར་རོ། །ཅི་དང་འདྲ་བར་ཞེ་ན། གཞན་དང་གཞན་བཀག་པ་དང་ནི་བསྒྲུབས་པ་བཞིན་ཞེས་བྱ་བའོ། །གལ་ཏེ་ཞེས་བྱ་བ་ནི་འཆད་པའོ། །ཅི་ཏེ་དེ་ལྟར་འགྱུར་ཞེ་ན། དེས་ཞེས་བྱ་བ་སྟེ། བ་
ལང་ཞེས་བྱ་བ་ལང་བསྒྲུབས་པ་ན་བ་ལང་དེའི་བདག་ཉིད་དཀར་པོ་ཉིད་ལ་སོགས་པ་མ་བསྒྲུབས་པ་ནི་མ་ཡིན་ཏེ། བསྒྲུབས་པ་ཁོ་ནའོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། དེ་ཡང་ཞེས་བྱ་བའོ། །མ་བཀག་པ་ལ་ཡང་དེ་བཞིན་ནོ་ཞེས་བྱ་བ་ནི། གལ་ཏེ་ཆོས་གཅིག་བཀག་པས་
ཐམས་ཅད་མ་བཀག་ན་དེའི་ཚེ་བཀག་པ་ཡང་མ་བཀག་པར་ཐལ་བའི་ཕྱིར་རོ། །འདི་སྐད་བརྗོད་པ་ཡིན་ཏེ། གལ་ཏེ་ཆོས་རྣམས་ཆོས་ཅན་ལས་ཐ་མི་དད་པ་ཡིན་ན་དེའི་ཚེ་ཆོས་བརྗོད་པ་ན་ཆོས་ཐམས་ཅད་བརྗོད་པའི་ཕྱིར་ཆོས་གཞན་སྟོན་པར་བྱེད་པའི་སྒྲ་གཞན་དག་དོན་མེད་པར་འགྱུར་རོ་
ཞེས་བྱ་བའོ། །ཅིའི་ཕྱིར་བསྒྲུབས་པ་དང་བཀག་པ་དག །མ་བསྒྲུབས་པ་དང་མ་བཀག་པར་ཐལ་ཞེ་ན། དུམ་བུར་ཞེས་བྱ་བའོ། །འོན་ཏེ་གཅིག་བསྒྲུབས་པའམ་བཀག་པ་ན། དེའི་བདག་ཉིད་ཡིན་པ་ཡང་གཞན་དག་ནི་བསྒྲུབས་པའམ་བཀག་པ་མ་ཡིན་ནོ་ཞེ་ན། དེ་སྒྲུབ་པ་དང་འགོག་པའི་སྒྲ་
གཞན་དག་དོན་མེད་པ་མ་ཡིན་ནོ་ཞེ་ན། སྒྲ་དེས་ཞེས་བྱ་བའོ། །དེ་ཞེས་བྱ་བ་ནི་དོགས་པའོ། །འོ་ན་ཞེས་བྱ་བ་ནི་ལན་ནོ། །གལ་ཏེ་ཐམས་ཅད་མ་ངེས་ན། དེའི་ཚེ་ཁྱེད་བསྒྲུབས་པར་འདོད་པ་གང་ཡིན་པ་དེ་ཡང་མ་ངེས་པར་འགྱུར་རོ། །ངེས་པར་ཡུལ་དུ་བྱས་པ་མ་ངེས་པ་ཞེས་བྱ་བར་ནི་འཐད་པ་མ་ཡིན་

ནོ། །རྣམ་པར་དབྱེ་བ་མེད་པའི་ཕྱིར་ཞེས་བྱ་བ་ནི་ཐ་དད་པ་མེད་པའི་ཕྱོགས་ཀྱི་དབང་དུ་བྱས་པའི་ཕྱིར་རོ། །གལ་ཏེ་རྣམ་པར་དབྱེ་བ་མེད་ཀྱང་རྣམ་པར་དབྱེ་བར་ཅི་སྟེ་མི་དམིགས་ཞེ་ན་དམིགས་པ་ཉིད་ཅེས་བྱ་བའོ། །འདིར་ནི་སྐབས་ཀྱིས་ཡང་དམིགས་པའི་སྒྲར་བརྗོད་དོ། །དེ་ཞེས་བྱ་བ་ནི་དམིགས་པ་
རྣམ་པར་དབྱེ་བས་ནའོ། །གང་གི་ཕྱིར་དམིགས་པའི་རྣམ་པར་དབྱེ་བས་ཡོད་པ་རྣམ་པར་དབྱེ་བར་འགྱུར་བ་དེས་ནའོ། །གཅིག་ཉིད་ལ་ཞེས་བྱ་བ་ནི་ཆོས་དུ་མ་དང་ཐ་མི་དད་པའི་ཆོས་ཅན་ནོ། །གཞན་ནི་ཞེས་བྱ་བ་ནི་དཀར་པོ་ཉིད་ལ་སོགས་པའོ། །འདི་ནི་ཞེས་བྱ་བ་ནི་གཅིག་ཉིད་ལ་ངེས་པ་དང་མ་ངེས་པ་ཉིད་
དོ། །གཅིག་ལ་ཡང་ངེས་པ་དང་མ་ངེས་པ་ཉིད་མི་འགལ་བ་ཁོ་ནའོ་ཞེས་དོགས་པ་བསུ་བ་ནི་གལ་ཏེ་ཞེས་བྱ་བའོ། །འོན་ཏེ་འདི་ནི་མི་འཐད་དོ་ཞེ་ན། མཐོང་བ་ནི་ཞེས་སྨྲས་སོ། །དེ་ལ་ཡང་ཞེས་བྱ་བ་ནི། ངེས་པ་དངོས་པོའི་ཡུལ་ཅན་ཡིན་པ་འབའ་ཞིག་ལ་བ་ལང་ཉིད་དང་དཀར་པོ་ཉིད་ངེས་པ་དང་མ་
ངེས་པར་འགལ་བར་མ་ཟད་ཀྱི་འོན་ཀྱང་སྔོན་པོ་དང་སྐད་ཅིག་མ་དག་ལ་ཡང་ངོ་། །ཅི་ལྟར་འགལ་ཞེ་ན། དངོས་པོའི་རང་བཞིན་པའི་ངེས་པས་གལ་ཏེ་སྔོན་པོ་ཉིད་དུ་རྟོགས་པ་གང་ཡིན་པ་དེ་ནི་སྐད་ཅིག་ཉིད་དུ་གནས་པར་བསྒྲུབ་པ་དང་བྲལ་བར་ཏེ། སྐད་ཅིག་མ་ཉིད་གནོད་པའི་སྔོན་པོ་རྟོགས་ན་ཞེས་བྱ་
བའི་དོན་ཏོ། །དེའི་ཚེ་བྱས་པ་ཉིད་ལ་སོགས་པའི་སྒྲུབ་པར་བྱེད་པ་གཞན་གྱིས་སྐད་ཅིག་མ་ཉིད་འགྲུབ་པར་མི་འགྱུར་རོ། །ཚད་མས་ཏེ་ངེས་པར་གྲུབ་པའི་སྔོན་པོའི་རང་བཞིན་སྐད་ཅིག་མ་ཉིད་དང་བྲལ་བ་ནི། ཡོད་པ་ལ་སོགས་པའི་སྒྲུབ་པར་བྱེད་པ་གཞན་གྱིས་གནོད་པ་མ་ཡིན་ནོ། །ཅིའི་ཕྱིར་
ཞེ་ན། གལ་ཏེ་ཞེས་བྱ་བའོ། །དེ་ཡང་ནི་གནོད་པར་བྱེད་པའོ། །གཞན་གྱིས་ནི་གནོད་བྱེད་ཀྱིས་སོ། །དེས་ན་ཚད་མས་གྲུབ་པ་ལ་ནི་གནོད་པ་མེད་དོ། །དེས་ན་སྔོན་པོའི་རང་བཞིན་ངེས་པ་ནི། མ་ངེས་པ་སྐད་ཅིག་མ་ཉིད་ཀྱི་རང་བཞིན་དང་འགལ་བ་ཁོ་ནའོ། །སྔོན་པོ་ངེས་པ་དེས་སོ། །དེ་ཞེས་བྱ་བ་སྐད་
ཅིག་མ་ཉིད་བསྒྲུབས་པས་ཀྱང་ངོ་། །སྔོན་པོ་དང་སྐད་ཅིག་མར་ངེས་པ་དག་ནི་ཕན་ཚུན་གནོད་བྱ་གནོད་བྱེད་ཀྱི་དངོས་པོ་མ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། བསྡུ་བའི་ཞེས་བྱ་བའོ། །གཉི་གའི་ནི་སྔོན་པོ་དང་སྐད་ཅིག་མའི་ཉིད་དོ། །ཅི་གང་གིས་བསྡུ་བའི་ཞེས་བརྗོད་པ་རྣམ་པ་གཞན་ཡང་

ཡོད་དམ་ཞེ་ན། ལྡན་པ་ནི་ཞེས་བྱ་བའོ། །དེ་ལ་བསྡུ་བའི་རང་བཞིན་བརྗོད་པ་ནི། བསྡུ་བ་ནི་ཞེས་བྱ་བའོ། །ཅི་ལྟར་འདི་བསྡུ་བ་ཡིན་ཞེ་ན། ཆོས་ཞེས་བྱ་བའོ། །གང་གི་ཕྱིར་དེ་ལྟར་ལྡན་པ་རྣམ་པ་དུ་མ་ཡོད་པ་དེའི་ཕྱིར་སྐབས་འདིར་རོ། །གནོད་པའི་མཚན་ཉིད་ཅེས་བྱ་བ་ནི་
གནོད་པར་བྱ་བས་དབེན་པ་ཉིད་དོ། །སྔོན་པོ་གང་ལ་དེ་དང་འབྲེལ་པ་ཡོད་པ་ནི་ལྡན་པའི་ཕྱིར་སྔོན་པོ་འདིར་ནི་དེ་ལྷན་ཅིག་མི་རྟག་པ་ཉིད་ཅི་ལྟར་སྡུད་པ་དེ་མ་ཡིན་པ་ཁོ་ནའོ། །ཡང་གནོད་པའི་མཚན་ཉིད་གནོད་པར་བྱ་བས་དབེན་པར་འཛིན་པ་ཡིན་ལ། དེ་དང་ལྡན་པ་ནི་སྔོན་པོར་ངེས་པ་གང་ཡིན་
དེས་ན། ཅི་ལྟར་འདིར་སྔོན་པོ་ཉིད་དང་སྐད་ཅིག་མ་ལྷན་ཅིག་ཅི་ལྟར་སྡུད་པ་དེ་ཡང་མ་ཡིན་པ་ཁོ་ནའོ། །ཅིའི་ཕྱིར་ཞེ་ན། གང་གི་ཕྱིར་གནོད་བྱ་སྐད་ཅིག་