Kinh tạng Tây Tạng (Kangyur Đại Học) — 067_མདོ་སྡེ།_འ

མས་དཔའ་ཡང་དག་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ལོག་པར་དད་སེལ་ལ་ཕྱག་འཚལ་ལོ། །བྱང་ཆུབ་སེམས་
དཔའ་ལྷའི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་འཕྲོ་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་འཕྲོ་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ལམ་སྟོན་པ་ལ་ཕྱག་འཚལ་ལོ། །བྱང་ཆུབ་སེམས་
དཔའ་བཟོད་པ་ཆེན་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་པད་མའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་པད་མ་བརྩེགས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་རྒྱ་མཚོ་ལ་ཕྱག་འཚལ་ལོ། །

བྱང་ཆུབ་སེམས་དཔའ་བློ་བརྟན་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤག་གིས་ཕྱག་བྱས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་གྱི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཐུགས་
རྗེ་རྒྱུན་མི་འཆད་ལ་ཕྱག་འཚལ་ལོ། །བྱང་ཆུབ་སེམས་དཔའ་བླ་མེད་ཆོས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་ཀྱི་དབྱིག་ལ་ཕྱག་འཚལ་ལོ། །བྱང་ཆུབ་སེམས་དཔའ་རིའི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་རི་ལ་ཕྱག་འཚལ་ལོ། །བྱང་ཆུབ་སེམས་
དཔའ་སྣང་བ་ཆེན་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་གྱི་གཟུངས་ལ་ཕྱག་འཚལ་ལོ། །བྱང་ཆུབ་སེམས་དཔའ་རིའི་ཟོམ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱལ་ཐབས་ཅན་ལ་ཕྱག་འཚལ་ལོ། །བྱང་ཆུབ་སེམས་དཔའ་རི་རྩེ་ལ་ཕྱག་འཚལ་ལོ། །བྱང་ཆུབ་
སེམས་དཔའ་རྒྱལ་མཚན་རི་ལ་ཕྱག་འཚལ་ལོ། །བྱང་ཆུབ་སེམས་དཔའ་རིའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་བདུད་འདུལ་ལ་ཕྱག་འཚལ་ལོ། །བྱང་ཆུབ་སེམས་དཔའ་འབྲུག་སྒྲ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆར་པའི་རྒྱལ་པོ་ལ་ཕྱག་འཚལ་ལོ། །བྱང་
ཆུབ་སེམས་དཔའ་འབྲུག་གི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་འཁོར་ལོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་མཆོག་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་མགོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་སྙིང་པོ་ལ་
ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་སྣང་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་ཏིང་ངེ་འཛིན་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་ཕྱག་རྒྱ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་དཀྱིལ་འཁོར་ལ་ཕྱག་འཚལ་ལོ། །བྱང་ཆུབ་སེམས་
དཔའ་རིན་ཆེན་བཀོད་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་ཆུ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་གནོན་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་བརྟན་ལ་ཕྱག་འཚལ་ལོ། །བྱང་ཆུབ་སེམས་

དཔའ་རིན་ཆེན་མཛད་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་ཆོས་མོས་ལ་ཕྱག་འཚལ་ལོ། །བྱང་ཆུབ་སེམས་དཔའ་གཙང་མའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་གཙུག་གི་རྒྱལ་མཚན་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་གྱི་འོད་ལ་ཕྱག་
འཚལ་ལོ། །བྱང་ཆུབ་སེམས་དཔའ་བློ་དབྱིབས་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་གཙུག་ཏོར་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་བརྟན་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་སྟོང་དམིགས་ལ་ཕྱག་འཚལ་ལོ། །བྱང་ཆུབ་སེམས་དཔའ་
ཟླ་བ་རྟོགས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་ཀྱི་དཀྱིལ་འཁོར་ལ་ཕྱག་འཚལ་ལོ། །བྱང་ཆུབ་སེམས་དཔའ་ངོས་གཟར་ལ་ཕྱག་འཚལ་ལོ། །བྱང་ཆུབ་སེམས་དཔའ་བློ་རྟོགས་ལ་ཕྱག་འཚལ་ལོ། །བྱང་ཆུབ་སེམས་དཔའ་
རྣམ་དག་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རྟག་ཏུ་སྦྱིན་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་ཏུ་ཡོན་ཏན་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་ཏུ་སྣང་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱལ་བའི་རྒྱལ་མཚན་ལ་ཕྱག་འཚལ་ལོ། །བྱང་ཆུབ་
སེམས་དཔའ་འཇམ་པའི་དབྱངས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཡོན་ཏན་འབར་ལ་ཕྱག་འཚལ་ལོ། །བྱང་ཆུབ་སེམས་དཔའ་མཚན་གྱི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱ་མཚོའི་ཟླ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱ་མཚོའི་སྙིང་པོ་ལ་ཕྱག་འཚལ་ལོ། །
བྱང་ཆུབ་སེམས་དཔའ་རྒྱལ་བའི་ཟླ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་དང་བའི་ཤེས་རབ་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་འདས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་བའི་ཡོན་ཏན་ལ་ཕྱག་འཚལ་ལོ། །བྱང་ཆུབ་སེམས་དཔའ་ཉི་མའི་འོད་ལ་ཕྱག་
འཚལ་ལོ། །བྱང་ཆུབ་སེམས་དཔའ་རྡོ་རྗེ་ལ་ཕྱག་འཚལ་ལོ། །བྱང་ཆུབ་སེམས་དཔའ་འབར་བའི་རྒྱལ་མཚན་ལ་ཕྱག་འཚལ་ལོ། །བྱང་ཆུབ་སེམས་དཔའ་ཡོན་ཏན་བླ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྣང་བའི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་

རྒྱ་མཚོའི་རྒྱལ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤྱོད་ཡུལ་དམིགས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་སྣང་ལ་ཕྱག་འཚལ་ལོ། །བྱང་ཆུབ་སེམས་དཔའ་བསོད་ནམས་སྣང་ལ་ཕྱག་འཚལ་ལོ། །བྱང་ཆུབ་སེམས་དཔའ་མངོན་དུ་རྟོགས་
ལ་ཕྱག་འཚལ་ལོ། །བྱང་ཆུབ་སེམས་དཔའ་གསང་བ་སྟོན་ལ་ཕྱག་འཚལ་ལོ། །བྱང་ཆུབ་སེམས་དཔའ་རབ་ཏུ་སྦྱིན་ལ་ཕྱག་འཚལ་ལོ། །བྱང་ཆུབ་སེམས་དཔའ་གཟུགས་ཀྱི་སྟོབས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁ་ལོ་སྒྱུར་ལ་ཕྱག་འཚལ་ལོ། །བྱང་ཆུབ་སེམས་དཔའ་
གསང་བའི་སྐུ་ལ་ཕྱག་འཚལ་ལོ། །བྱང་ཆུབ་སེམས་དཔའ་གཅིག་ལ་ཕྱག་འཚལ་ལོ། །བྱང་ཆུབ་སེམས་དཔའ་བཅུ་ལ་ཕྱག་འཚལ་ལོ། །བྱང་ཆུབ་སེམས་དཔའ་བརྒྱ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྟོང་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲི་ལ་ཕྱག་འཚལ་
ལོ། །བྱང་ཆུབ་སེམས་དཔའ་ཁྲི་ཕྲག་བཅུ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲི་ཕྲག་བརྒྱ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲི་ཕྲག་ཉིས་བརྒྱ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲི་ཕྲག་སུམ་བརྒྱ་
ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲི་ཕྲག་བཞི་བརྒྱ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲི་ཕྲག་ལྔ་བརྒྱ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲི་ཕྲག་དྲུག་བརྒྱ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲི་ཕྲག་བདུན་བརྒྱ་ལ་ཕྱག་འཚལ་ལོ། །བྱང་ཆུབ་
སེམས་དཔའ་ཁྲི་ཕྲག་བརྒྱད་བརྒྱ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲི་ཕྲག་དགུ་བརྒྱ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲི་ཕྲག་སྟོང་གི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕྱག་འཚལ་ལོ། །བྱང་ཆུབ་སེམས་དཔའ་དེ་རྣམས་ལ་ཕྱག་འཚལ་ན་བསྐལ་
པ་དཔག་ཏུ་མེད་པ་ཚུན་ཆད་ཀྱི་འཁོར་བའི་སྡིག་ལྕི་བ་ཡང་བསལ་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་འབུམ་ཕྲག་གཅིག་ལ་ཕྱག་འཚལ་ལོ། །བྱང་ཆུབ་སེམས་དཔའ་འབུམ་ཕྲག་བཅུ་ལ་ཕྱག་འཚལ་ལོ། །བྱང་ཆུབ་སེམས་དཔའ་འབུམ་ཕྲག་བརྒྱ་ལ་ཕྱག་

འཚལ་ལོ། །བྱང་ཆུབ་སེམས་དཔའ་འབུམ་ཕྲག་སྟོང་ལ་ཕྱག་འཚལ་ལོ། །བྱང་ཆུབ་སེམས་དཔའ་འབུམ་ཕྲག་ཁྲི་ལ་ཕྱག་འཚལ་ལོ། །བྱང་ཆུབ་སེམས་དཔའ་འབུམ་ཕྲག་འབུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ལ་ཕྱག་འཚལ་ན་བསྐལ་
པ་དཔག་ཏུ་མེད་པ་ཚུན་ཆད་ཀྱི་འཁོར་བའི་སྡིག་ལྕི་བ་ཡང་འབྱང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཁྲག་ཁྲིག་ཕྲག་གཅིག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲག་ཁྲིག་ཕྲག་བཅུ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲག་ཁྲིག་ཕྲག་བརྒྱ་ལ་ཕྱག་
འཚལ་ལོ། །བྱང་ཆུབ་སེམས་དཔའ་ཁྲག་ཁྲིག་ཕྲག་སྟོང་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲག་ཁྲིག་ཕྲག་ཁྲི་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲག་ཁྲིག་ཕྲག་འབུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ལ་ཕྱག་འཚལ་ན།
བསྐལ་པ་དཔག་ཏུ་མེད་པ་ཚུན་ཆད་ཀྱི་འཁོར་བའི་སྡིག་ལྕི་བ་ཡང་བསལ་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་གཱ་གཅིག་གི་བྱེ་མ་སྙེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གང་གཱ་གཉིས་ཀྱི་བྱེ་མ་སྙེད་ལ་ཕྱག་འཚལ་ལོ། །བྱང་ཆུབ་སེམས་
དཔའ་གང་གཱ་གསུམ་གྱི་བྱེ་མ་སྙེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གང་གཱ་བཞིའི་བྱེ་མ་སྙེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གང་གཱ་ལྔའི་བྱེ་མ་སྙེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གང་གཱ་དྲུག་གི་བྱེ་མ་སྙེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གང་
གཱ་བདུན་གྱི་བྱེ་མ་སྙེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གང་གཱ་བརྒྱད་ཀྱི་བྱེ་མ་སྙེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གང་གཱ་དགུའི་བྱེ་མ་སྙེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གང་གཱ་བཅུའི་བྱེ་མ་སྙེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གང་
གཱ་བརྒྱའི་བྱེ་མ་སྙེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གང་གཱ་སྟོང་གི་བྱེ་མ་སྙེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གང་གཱ་ཁྲིའི་བྱེ་མ་སྙེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གང་གཱ་འབུམ་ཕྲག་བརྗོད་ཀྱིས་མི་ལང་བའི་བྱང་ཆུབ་སེམས་དཔའ་སེམས་དཔའ་

ཆེན་པོ་རྣམས་ལ་ཕྱག་འཚལ་ལོ། །དེ་རྣམས་ལ་ཕྱག་འཚལ་ན་བསྐལ་པ་དཔག་ཏུ་མེད་པ་ཚུན་ཆད་ཀྱི་འཁོར་བའི་སྡིག་ལྕི་བ་ཡང་དག་པར་བསལ་བར་འགྱུར་རོ། །གང་ཟག་ལ་ལས་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཀྱི་མཚན་ཐོས་ན། མི་
དེ་བསྐལ་པ་འབུམ་ཕྲག་བཞི་བཅུའི་བར་དུ་སེམས་ཅན་དམྱལ་བའི་སྡུག་བསྔལ་དུ་མི་ལྟུང་ཞིང་། ཁམས་གསུམ་གྱི་འཁོར་བ་ལ་མི་གཏོགས་ཏེ། རྟག་ཏུ་རྣམ་པར་ཐར་པའི་རྒྱལ་པོའི་ཁམས་སུ་གཏོགས་པར་འགྱུར་རོ། །མཐའ་འཁོབ་ཡུལ་དུ་ཡོངས་མི་སྐྱེ། །དགེ་མེད་ཡུལ་དུ་འང་དེ་བཞིན་
ཏེ། །ལུས་ངན་ལེན་པར་མི་འགྱུར་ཞིང་། །ལོག་པར་ལྟ་བར་མི་སྐྱེའོ། །མ་རབས་རིགས་སུ་མི་སྐྱེ་སྟེ། །མུ་སྟེགས་ཅན་དུའང་མི་སྐྱེ་ཞིང་། །ལུས་ཀྱི་ཡན་ལག་ཀུན་དང་ལྡན། །དམ་པའི་ཆོས་ནི་རྟག་ཏུ་ཐོས། །དཀའ་ཐུབ་སྡོམ་པ་མ་བླངས་ཀྱང་། །འདི་དག་རྟག་ཏུ་ལྡན་འགྱུར་
ཏེ། །ཐེག་པ་ཆེན་པོའི་སྤྱོད་ལམ་མཛེས། །རྟག་པར་སངས་རྒྱས་བདག་ཉིད་མཐོང་། །དེ་ཕྱིར་གུས་པར་ཕྱག་འཚལ་ཏེ། །བཅོམ་ལྡན་ཆོས་ལ་བདེ་བར་གནས། །མ་འོངས་དུས་ན་སངས་རྒྱས་འགྲུབ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཀྱི་མཚན་བསྒྲགས་པ་
ན་རིགས་ཀྱི་བུ་ཕོ་དང་། རིགས་ཀྱི་བུ་མོ་འབུམ་ཕྲག་བརྒྱད་ཅུ་རྩ་བརྒྱད་ཀྱིས་ལན་ཅིག་ཕྱིར་འོང་བའི་འབྲས་བུ་ཐོབ་པར་གྱུར་ཏོ། །ལྷ་དང་མི་འབུམ་ཕྲག་བཞི་བཅུ་རྩ་དགུས་ཕྱིར་མི་འོང་བའི་འབྲས་བུ་ཐོབ་བོ། །སེམས་སྟོར་བའི་དགེ་སློང་འབུམ་ཕྲག་བདུན་ཅུ་རྩ་བརྒྱད་ཀྱིས་སེམས་ཀྱི་
བདག་ཉིད་སླར་རྙེད་དེ་དགྲ་བཅོམ་པའི་འབྲས་བུ་ཐོབ་བོ། །བྱང་ཆུབ་སེམས་དཔའ་སེམས་དཔའ་ཆེན་པོ་འབུམ་ཕྲག་བཅུས་གཟུངས་ཆེན་པོ་རྙེད་ནས་མ་འོངས་པའི་དུས་ན་བྱང་ཆུབ་ཀྱི་སྙིང་པོར་མངོན་པར་རྫོགས་པར་འཚང་རྒྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་
དཔའ་ཆེན་པོ་སེང་གེ་སྒྲས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱིས་བཀའ་སྩལ་པ་ལྟར་ན་ཐེག་པ་ཡང་གཅིག་ཏུ་བས་ཏེ་གཉིས་དང་གསུམ་དུ་མ་མཆིས་སོ། །རྟོགས་པ་ཆེན་པོ་ཡོངས་སུ་རྒྱས་པའི་འགྱོད་ཚངས་ཀྱི་མདོ་འདི་ནི་སངས་རྒྱས་བཅོམ་ལྡན་

འདས་ཐམས་ཅད་ཀྱི་ཡུམ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ནི་ལམ་ཆེན་པོའོ། །རྣལ་འབྱོར་པ་ཐམས་ཅད་ཀྱི་ནི་མིག །ལྟ་བ་ལོག་པ་ཐམས་ཅད་ཀྱི་ནི་སྡུད་པ། སེམས་ཉམས་པ་རྣམས་ཀྱི་ནི་སྐྱོང་བ། ངན་འགྲོ་གསུམ་གྱི་སྒོ་ནི་གཅོད་པ། བླ་ན་མེད་པ་བྱང་ཆུབ་
པའི་སྒོ་ནི་འབྱེད་པ། ཉན་ཐོས་རྣམས་ནི་རིམ་གྱིས་ཐེག་པ་ཆེན་པོ་ལ་གཞོལ་བར་འགྱུར་བ་ལགས་ཏེ། ད་བདག་གིས་ཀྱང་གཟུངས་སྔགས་ཆེན་པོ་འདི་གཟུང་ཞིང་བསྐྱབ་པར་བགྱིའོ། །གང་ཟག་ལ་ལས་ཚུལ་ཁྲིམས་ཀྱི་སྡོམ་པ་དང་། མདོ་སྡེ་འདི་ལ་སྒོམ་ཞིང་ཀློག་པར་བྱེད་ན་དེ་ལ་ཡང་དེ་
བཞིན་དུ་བསྲུང་ཞིང་བསྐྱབ་པར་བགྱིའོ། །གང་ལ་ལ་ཞིག་མདོ་སྡེ་འདི་ལ་མཆོད་ཅིང་རིམ་གྲོར་བྱེད་པ་དང་། ཞག་བདུན་གྱི་བར་དུ་སྤྱོད་ཅིང་སྒོམ་པར་བྱེད་པ་ལ། བདུད་སྡིག་ཏོ་ཅན་དཀྲུག་པའི་སྐབས་ཚོལ་བ་ཞིག་མཆིས་ན་ཡང་། བདུད་དེས་ཀྱང་འཁྲུག་པའི་སྐབས་མི་རྙེད་པར་བགྱིའོ། །
བཅོམ་ལྡན་འདས་བདག་གིས་མདོ་སྡེ་འདི་ཡུན་དུ་གནས་པ་དང་། བྱང་ཆུབ་ཀྱི་ངོ་བོ་ཉིད་མཐར་ཐུག་པའི་བར་དུ་ཡང་བསྐྱང་བར་བགྱིའོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་མདོ་སྡེ་འདི་སྲུང་བ་ནི་དཀོན་མཆོག་གསུམ་སྲུང་བ་ཡིན་ནོ། །ཡང་ངའི་བསྟན་པ་ཡང་སྲུང་
བ་ཡིན་ནོ། །དེ་ནས་བྱང་ཆུབ་སེམས་དཔའ་སེང་གེའི་སྒྲས་བཅོམ་ལྡན་འདས་ཀྱི་སྤྱན་སྔར་གཟུངས་སྔགས་སྨྲས་པ། ན་མོ་བུད་དྷཱ་ཡ། ན་མོ་དྷརྨཱ་ཡ། ན་མཿསང་གྷཱ་ཡ། ཨ་དན་ཏེ། དྷ་ར་ཎེ། ཏད་ཡ་ཐཱ། ཨཱ་ཀཱ་ཤ་ནི། སྭ་བྷཱ་བ། སརྦ་དྷརྨཱ་ཎི་སྭ་བྷཱ་བ། ཨི་ཤམ་
ད། པི་བ་ཤ་ན། བི་མ་ལ་སུ་པ་རི། དྷརྨ་ཨ་ཏི་ཀན། པཱ་ལ་ནི་ཤྩ། ཡ་ཐ་མ་ལེ། ཙཱ་ལེ་ཙཱ་ལེ། ཧུ་ལུ་ཧུ་ལུ། བི་ཤ་དེ། བི་ཤ་དེ། མན་ཏྲ་མན་ཏྲཿསྭཱ་ཧཱ། གཟུངས་སྔགས་འདི་དུས་གཅིག་ལ་ལན་བརྒྱ་རྩ་བརྒྱད་བཟླས་ཤིང་མཆོད་རྟེན་ལ་ལན་བདུན་བདུན་བསྐོར་བ་
དང་། དེ་བཞིན་དུ་ཞག་བདུན་གྱི་བར་དུ་མདོ་སྡེ་གཞན་ལ་མི་བསམ་པར་རྟོགས་པ་ཆེན་པོས་ཡོངས་སུ་རྒྱས་པའི་འགྱོད་ཚངས་ཀྱི་མདོ་སྡེ་འདི་ལ་སེམས་རྩེ་གཅིག་ཏུ་བྱའི་གཞན་དུ་མི་གཡེང་བར་བྱའོ། །གཟུངས་སྔགས་འདི་སངས་རྒྱས་འབུམ་ཕྲག་བརྒྱད་བརྒྱས་གསུངས་ཏེ། བདག་

གིས་ཀྱང་བཤད་དོ། །གལ་ཏེ་ལ་ལས་གཟུངས་སྔགས་འདི་ལ་སྐུར་ཅིང་སྨད་པ་བགྱིད་ན་སངས་རྒྱས་དེ་སྙེད་ལ་སྐུར་ཅིང་སྨད་པ་ལགས་སོ། །གཟུངས་སྔགས་འདི་ལ་སྐུར་བའི་གང་ཟག་ནི་ཚེ་རབས་སུ་ཡང་བསྒྲུབས་པའི་འབྲས་བུ་མི་འགྲུབ་པར་འགྱུར་ཏེ། ཁམས་
གསུམ་ལས་ཀྱང་མི་འདའོ། །དེ་ཅིའི་སླད་དུ་ཞེ་ན། གཟུངས་སྔགས་འདི་ནི་སེམས་སྟོར་བ་ལས་སླར་རྙེད་པར་འགྱུར་བ་དང་། གཟུངས་སྔགས་འདི་ལན་ཅིག་ཙམ་ཐོས་པའམ། ཐོས་ནས་ཡི་གེར་འདྲི་ཞིང་ཤ་དང་། ཆང་བཅད་དེ། ཟ་གཅིག་པར་བགྱིད་ཅིང་། ཁྲིམས་བསྲུང་བ་དང་།
བག་མ་མཆིས་པའི་རྩེད་མོ་གཡེང་བ་མི་བགྱིད་པ་དང་། འདུ་འཛིའི་ནང་དུ་མི་འཇུག་པ་དང་། རྟག་ཏུ་བྱམས་པ་ལ་སྒོམ་ཞིང་། བསམ་གཏན་ལ་དམ་པར་ལྟ་བའི་གང་ཟག་དེ་ནི་བསྐལ་པ་དཔག་ཏུ་མ་མཆིས་པ་ནས་སོགས་སོགས་པའི་སྒྲིབ་པ་གསུམ་དང་། སྡིག་ལྕི་བ་ལ་སོགས་པ་ཡང་གཟུངས་
སྔགས་འདི་ཐོས་ཏེ། སེམས་ཐག་པ་ནས་ཟློས་ཤིང་འཛིན་པ་དང་། ཉིན་གཅིག་བཞིན་དུ་ཀློག་ཅིང་ཁ་ཏོན་བགྱིད་པ་དང་། ཡི་དམ་དུ་མི་བརྗེད་པར་བགྱིད་ན་གང་ཟག་དེ་མངོན་པར་བྱང་ཆུབ་པའི་བར་དུ་ངན་སོང་དུ་མི་ལྟུང་ངོ་། །དེ་ནས་ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེང་གེའི་
སྒྲ་ལ་བཀའ་སྩལ་པ། ཁྱོད་དཀོན་མཆོག་གསུམ་སྐྱོང་བ་དང་། སྐྱེ་བོ་མང་པོ་ལ་ཡང་ཕན་པར་སེམས་ཤིང་། སྲིད་པ་གསུམ་ལས་བསྒྲལ་ཞིང་གདོན་པ་དང་། སློབ་པ་གྲངས་མེད་པ་ལ་ཕན་པ་ཆེན་པོ་བྱེད་པ་དང་། ལོག་པར་ལྟ་བ་ཐམས་ཅད་བཟློག་པའི་ཕྱིར་གཟུངས་སྔགས་ཕྱེ་ཞིང་བསྟན་པ་
ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱི་མིང་དང་། གཟུངས་སྔགས་ཀྱི་སྒྲ་འདི་སེམས་ཅན་ལ་ལས་ཐོས་ནས་མོས་པ་དང་གུས་པ་བསྐྱེད་དེ་མ་སྐུར་པའི་མི་དེ་ནི་ཚེ་འདི་ལ་ཡང་བདེ་བ་ནས་ཤི་འཕོས་ནས་ཀྱང་། རྟག་ཏུ་སངས་རྒྱས་མཐོང་ཞིང་ང་ཡང་མཐོང་ལ། ཁྱོད་དང་བྱང་ཆུབ་སེམས་དཔའ་
གཞན་ཡང་མཐོང་བར་འགྱུར་རོ། །དེ་ཐམས་ཅད་ཀྱིས་དེ་བཞིན་གཤེགས་པའི་སྙིང་པོ་སོ་སོ་རང་གིས་རིག་པ་མངོན་པར་འཚང་རྒྱ་བ་ཐེ་ཙོམ་མི་ཟ་བར་འགྱུར་རོ། །ཀུན་ནས་ཉོན་མོངས་པ་ཐམས་ཅད་སྤངས་ཤིང་། དགེ་བ་ཐམས་ཅད་ཀྱིས་དེ་བཞིན་གཤེགས་པའི་ལམ་གྲུབ་པ་ནི་ཀུན་ཀྱང་མོས་

པ་དང་། དང་བའི་དབང་གིས་སོ། །ང་འདས་པའི་ཕྱི་ན་རིགས་ཀྱི་བུ་དང་། རིགས་ཀྱི་བུ་མོ་གང་ལ་ལ་ཞིག་གིས་ཉིན་གཅིག་གམ། མཚན་གཅིག་གམ། དུས་གཅིག་གམ། སྐད་ཅིག་ལ་ཕྱོགས་བཅུ་ན་དུས་གསུམ་དུ་གཤེགས་པའི་སངས་རྒྱས་དང་། གསུང་རབ་མདོ་སྡེ་བཅུ་གཉིས་དང་།
བྱང་ཆུབ་སེམས་དཔའ་རྣམས་ལ་ཕྱག་འཚལ་ནུས་ཤིང་ཐེག་པ་ཆེན་པོ་ཚུལ་བཞིན་དུ་ཡིད་ལ་བྱེད་པ་དང་། དོན་དམ་པའི་བདེན་པ་ཇི་བཞིན་པར་ཡིད་ལ་བྱེད་པའི་གང་ཟག་དེ་ནི་ཐང་ཅིག་ཡུད་ཙམ་ཅིག་གིས་མི་དགེ་བ་བཅུ་དང་། མཚམས་མེད་པ་ལྔ་དང་། མཉམ་པ་ཉིད་ལ་སྐུར་བ་དང་། ཀུན་ནས་
ཉོན་མོངས་པའི་ལས་ཐམས་ཅད་ཀུན་མ་ལུས་པར་བྱང་བར་འགྱུར་རོ། །ཡང་དགེ་སློང་ཕའམ། དགེ་སློང་མའམ། བྱང་ཆུབ་སེམས་དཔའ་འམ། དགེ་ཚུལ་ཕའམ། དགེ་ཚུལ་མས་ངོ་བོ་ཉིད་ཀྱི་སེམས་སྟོར་བས་རང་གི་རྩ་བ་བཞི་གཞིག་པ་དང་། སྡོམ་པ་བརྒྱད་ཉམས་
པ་དང་། ལྕི་བ་དྲུག་དང་། མི་དགེ་བ་བཅུ་དང་། མཚམས་མེད་པ་ལྔ་བྱས་པ་དང་། མཉམ་པ་ཉིད་ལ་སྐུར་བ་ཡང་ཕྱོགས་བཅུ་དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་རྣམས་ཀྱི་མཚན་ལ་མོས་པ་བསྐྱེད་དེ་ཕྱག་འཚལ་ན་དེ་ལྟ་བུའི་ལས་མི་དགེ་བ་ཀུན་མ་ལུས་པར་
འབྱང་བར་འགྱུར་རོ། །དེ་སྐད་ཅེས་བཀའ་སྩལ་མ་ཐག་ཏུ་དེ་ནས་སངས་རྒྱས་འོད་ངེས་པ་ཞེས་བྱ་བ་དེའི་དྲུང་ནས་དེའི་ཚེ་རྒྱལ་བུ་དགེ་མཐོང་དང་མི་སུམ་སྟོང་པོ་རྣམས་བློ་བུར་དུ་སྐད་ཅིག་གཅིག་གིས་དུས་དེར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ། ཕྱག་འཚལ་ནས་
མགྲིན་གཅིག་ཏུ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་སོགས་པས་བསྐལ་པ་དཔག་ཏུ་མ་མཆིས་པ་ནས་མི་དགེ་བའི་ལས་བགྱིས་ཤིང་བསགས་པ་ནི་བརྗོད་ཀྱིས་ཀྱང་མི་རྫོགས་ཏེ། ལ་ལས་ནི་མི་དགེ་བ་བཅུ་བགྱིས། ལ་ལས་ནི་
མཚམས་མ་མཆིས་པ་ལྔ་བགྱིས། ལ་ལས་ནི་མཉམ་པ་ཉིད་ཀྱི་ཆོས་ལ་སྐུར་པ་ལ་སོགས་པ་བསམ་གྱིས་མི་ཁྱབ་ཅིང་བརྗོད་ཀྱིས་མི་རྫོགས་པའི་སྡིག་པ་བགྱིས་པ་དེ་དག་དུས་གསུམ་གྱི་དེ་བཞིན་གཤེགས་པ་རྣམས་དང་། གསུང་རབ་ཡན་ལག་བཅུ་གཉིས་ཀྱི་མདོ་སྡེ་ལ་བརྟེན་ནས།

བྱང་ཆུབ་སེམས་དཔའ་མང་པོའི་མདུན་དུ་མཐོལ་ཞིང་བཤགས་པར་འཚལ་ན་དེ་གནང་བར་གསོལ་ལོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། འཇིགས་པའི་སེམས་བསྐྱེད་དཀའ་བ་དང་། དགེ་བའི་སེམས་བསྐྱེད་དཀའ་བ་ལས་བསྐྱེད་པ་ནི་ལེགས་སོ་ལེགས་སོ། །
ཁྱོད་ཀྱིས་མི་དགེ་བ་བཅུ་བཤགས་པ་དང་། མཚམས་མེད་པ་ལྔ་བཤགས་པ་དང་། འདོད་ཆེན་ལ་སོགས་པ་བཤགས་ནས་དེ་བཞིན་གཤེགས་པའི་སྙིང་པོ་དེ་མཐོང་བར་འདོད་པ་དེ་ལེགས་ཀྱིས་ཡིད་ལ་སེམས་པ་བཞིན་མཐོལ་ཅིག །དེ་ནས་རྒྱལ་བུ་དགེ་མཐོང་དང་མི་སུམ་སྟོང་གིས་བཅོམ་
ལྡན་འདས་ཀྱི་བྱམས་པའི་གསུང་ཐོས་ནས་ཆོས་གོས་ཚུལ་བཞིན་དུ་བགོས་ནས་ཐལ་མོ་སྦྱར་ཏེ་སྤྱི་བོས་བཏུད་ནས་ཕྲག་པ་གཡས་པ་ཆོས་བཞིན་དུ་ཕྱུང་། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ཅག་ལ་སོགས་པ་ཕྱོགས་
བཅུའི་སངས་རྒྱས་བཅོམ་ལྡན་འདས་རྣམས་ལ་ཕྱག་འཚལ་ཞིང་སྐྱབས་སུ་གསོལ་ལོ། །ཕྱོགས་བཅུའི་ཆོས་ལ་ཕྱག་འཚལ་ཞིང་སྐྱབས་སུ་གསོལ་ལོ། །ཕྱོགས་བཅུའི་དགེ་འདུན་ལ་ཕྱག་འཚལ་ཞིང་སྐྱབས་སུ་གསོལ་ལོ། །ཡང་ཤར་ཕྱོགས་ཀྱི་དེ་བཞིན་གཤེགས་པ་འཁྲུགས་མི་མངའ་ལ་
ཕྱག་འཚལ་ཞིང་སྐྱབས་སུ་གསོལ་ལོ། །ཡང་ལྷོ་ཕྱོགས་ཀྱི་དེ་བཞིན་གཤེགས་པ་རིན་ཆེན་འབྱུང་ལྡན་ལ་ཕྱག་འཚལ་ཞིང་སྐྱབས་སུ་གསོལ་ལོ། །ཡང་ནུབ་ཕྱོགས་ཀྱི་དེ་བཞིན་གཤེགས་པ་སྣང་བ་མཐའ་ཡས་ལ་ཕྱག་འཚལ་ཞིང་སྐྱབས་སུ་གསོལ་ལོ། །ཡང་བྱང་ཕྱོགས་ཀྱི་དེ་བཞིན་
གཤེགས་པ་གདོན་མི་ཟ་བར་གྲུབ་པ་ལ་ཕྱག་འཚལ་ཞིང་སྐྱབས་སུ་གསོལ་ལོ། །ཡང་སྟེང་གི་ཕྱོགས་ཀྱི་དེ་བཞིན་གཤེགས་པ་སྤོས་བརྩེགས་ལ་ཕྱག་འཚལ་ཞིང་སྐྱབས་སུ་གསོལ་ལོ། །ཡང་འོག་གི་ཕྱོགས་ན་དེ་བཞིན་གཤེགས་པ་འབུམ་གཟུགས་ལ་ཕྱག་འཚལ་ཞིང་སྐྱབས་སུ་གསོལ་ལོ། །
ཤར་ཕྱོགས་ན་འཕགས་པ་ཀུན་ཏུ་བཟང་པོ་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །ལྷོ་ཕྱོགས་ན་འཕགས་པ་འཇིག་རྟེན་གཟུངས་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །ནུབ་ཕྱོགས་ན་འཕགས་པ་སྤྱན་རས་གཟིགས་དབང་ཕྱུག་ལ་ཡང་ཕྱག་འཚལ་ཞིང་སྐྱབས་སུ་

གསོལ་ལོ། །བྱང་ཕྱོགས་ན་འཕགས་པ་ཟླ་རྒྱས་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །སྟེང་གི་ཕྱོགས་ན་འཕགས་པ་ནམ་མཁའི་སྙིང་པོ་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །འོག་གི་ཕྱོགས་ན་འཕགས་པ་ཡོན་ཏན་བརྟན་པ་ལ་ཡང་ཕྱག་འཚལ་ཞིང་སྐྱབས་
སུ་གསོལ་ལོ། །ཐོག་མའི་སྟོན་པ་བཅོམ་ལྡན་འདས་དེ་བཞིན་གཤེགས་པ་འོད་མི་འགྱུར་བ་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །མ་བྱོན་པའི་དེ་བཞིན་གཤེགས་པའི་སྙིང་པོ་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །འཇིག་རྟེན་གྱི་ཁམས་གཞན་ན་སྤྲུལ་པའི་
སྐུ་སངས་རྒྱས་བཅོམ་ལྡན་འདས་རྣམས་ལ་ཕྱག་འཚལ་ཞིང་སྐྱབས་སུ་གསོལ་ལོ། །ད་ལྟར་བདག་ཅག་གི་སྟོན་པ་བཅོམ་ལྡན་འདས་ཤཱཀྱ་ཐུབ་པ་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །བཅོམ་ལྡན་འདས་དྲི་མ་མེད་པར་གྲགས་པ་དང་། འཇམ་དཔལ་གཞོན་
ནུར་གྱུར་པ་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །ཀུན་དགའ་བོ་དང་འོད་སྲུང་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །འཕགས་པའི་ལམ་བཞིས་མངོན་དུ་བྱུང་བ་རྣམས་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །སེམས་བསྐྱེད་པ་དང་པོ་པ་རྣམས་ལ་ཡང་
ཕྱག་འཚལ་ཞིང་སྐྱབས་སུ་གསོལ་ལོ། །མཛོད་ཆེན་པོ་གསུང་རབ་མདོ་སྡེ་བཅུ་གཉིས་དང་། ཡང་དག་པ་མཉམ་པ་ཉིད་ཀྱི་མདོ་སྡེ་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །ཆོས་ཀྱི་མདོ་སྡེ་གཞན་ཇི་སྙེད་བཞུགས་པ་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །
སྐུ་གདུང་བརྒྱད་དུ་བགོས་པའི་གཟུགས་རྣམས་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །ད་ལྟར་བཞུགས་པའི་སངས་རྒྱས་རྣམས་ཀྱི་ཆོས་ཀྱི་དོན་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །ཕྱོགས་བཞིའི་རྒྱལ་པོ་ཆེན་པོ་བཞི་དང་། སུམ་ཅུ་རྩ་གསུམ་གནམ་
གྱི་ལྷ་དང་། བརྒྱ་བྱིན་དང་། ཚངས་པ་དང་། བར་སྣང་གི་ལྷ་དང་། གནམ་གྱི་སྟེང་དང་། སའི་སྟེང་དང་། སའི་འོག་གི་ལྷ་དང་། རིའི་ལྷ་དང་། ཚལ་གྱི་ལྷ་དང་། ཤིང་དྲུང་གི་ལྷ་དང་། རིག་སྔགས་འཆང་བ་དང་། རྫུ་འཕྲུལ་གྱི་རྐང་པ་དང་ལྡན་པ་

རྣམས་དང་། ལྷའི་མིག་དང་ལྡན་པ་དང་། ལྷའི་རྣ་བ་དང་ལྡན་པ་དེ་དག་ཐམས་ཅད་ཀྱིས་གཟིགས་ཤིང་གསོན་ཏེ་ཀུན་གྱིས་དབང་མཛད་པར་གསོལ་ལོ། །བདག་ཅག་ལ་སོགས་པ་སེམས་ཅན་ཐམས་ཅད་ལ་མ་མཐོལ་མ་བཤགས་པ་ཞིག་མཆིས་ན་ཡང་སྡིག་པ་ཐམས་
ཅད་བྱང་བར་གྱུར་ཅིག །བདག་ཅག་ལ་སོགས་པ་སེམས་ཅན་ཐམས་ཅད་འཁོར་བའི་ཁམས་ཚུན་ཆད་ནས། ད་ལྟར་གྱི་ལུས་ངན་པ་འདི་ཐོབ་པའི་བར་དུ་རྨོངས་ཤིང་བསླད་པའི་སེམས་ཀྱིས་ལོག་པར་མཐོང་བ་དཔག་ཏུ་མ་མཆིས་པས་ལས་དང་ཉོན་མོངས་པ་དང་། མི་དགེ་བའི་ལས་
བགྱིས་པ་ནི་བརྗོད་ཀྱིས་མི་རྫོགས་ཏེ་སྡིག་པ་མང་པོ་ཅི་བགྱིས་པ་རྣམས་བདག་ཉིད་ཀྱིས་མ་ཚོར་མ་རིག་པས་མི་དགེ་བའི་སེམས་རབ་ཏུ་རྒྱས་པའི་དབང་གིས་འཇིག་རྟེན་ཕ་རོལ་མ་མཐོང་ཞིང་། ཚེ་འདི་འབའ་ཞིག་མཐོང་བ་ལ་གནས་ཏེ། ཉོན་མོངས་པའི་བག་ཆགས་ལ་མོས་པས་དགེ་བའི་
རྩ་བ་དང་རིང་དུ་གྱུར་ཅིང་མི་དགེ་བའི་ལས་ཀྱིས་བར་ཆད་དུ་གྱུར་ཅིང་བསྒྲིབས་པའམ། སྡིག་པའི་གྲོགས་པོ་ལ་བརྟེན་པས་དགེ་སློང་ཕ་དང་། དགེ་སློང་མ་ལ་མི་རིགས་ཤིང་ཚུལ་མ་ལགས་པའི་ལས་བགྱིས་པའམ། ཕ་དང་མ་ལ་མི་རིགས་ཤིང་ཚུལ་མ་ལགས་པའི་ལས་བགྱིས་པ
འམ། ཡང་རང་ཉམ་གྱི་དབང་གིས་ཕྱོགས་བཅུའི་དགེ་འདུན་གྱི་ནོར་དང་། ཡོ་བྱད་ལ་སོགས་པ་སྤྱོད་པ་དང་དགེ་འདུན་སྡེ་ལྔ་ལ་ཡང་མི་རིགས་ཤིང་ཚུལ་མ་ལགས་པའི་ལས་བགྱིས་པའམ། འཇིག་རྟེན་གྱི་ཀུན་ནས་ཉོན་མོངས་པའི་འབྲས་བུ་དཔག་ཏུ་མེད་པ་སྙེད་བཤད་པ་དང་།
བྱང་ཆུབ་ཀྱི་དགེ་བའི་རྩ་བའི་སེམས་ཅན་ལའང་ངན་དུ་སྨད་པ་དང་། ཆོས་ཀྱི་མཁན་པོ་ལ་སྐུར་བའམ། དམ་པའི་ཆོས་ནི་ཆོས་མ་ལགས་པར་བཤད་པའམ། ཆོས་མ་ལགས་པ་ནི་དམ་པའི་ཆོས་ལགས་པར་བཤད་པའམ། དེ་བཞིན་གཤེགས་པ་ནི་མི་རྟག་ཅེས་བགྱིས་པའམ། དམ་པའི་ཆོས་
ཀྱང་མི་རྟག་གོ་ཞེས་བགྱིས་པའམ། དགེ་འདུན་དཀོན་མཆོག་ཀྱང་མི་རྟག་གོ་ཞེས་བགྱིས་པའམ། ཕན་པའི་སྦྱིན་པ་ལ་མ་དད་པའམ། ཆོས་ལོག་པ་ལ་དད་ཅིང་འཛིན་པ་དེ་ལྟ་བུའི་སླད་དུ། ད་འཇིགས་ཤིང་སྐྲག་པ་ནི་དཔག་ཏུ་མ་མཆིས་འཛེམ་ཞིང་གནོང་བ་བསམ་གྱིས་མི་ཁྱབ་སྟེ།

དཀོན་མཆོག་གསུམ་ལ་སྐྱབས་སུ་གསོལ་ལོ། །སངས་རྒྱས་བཅོམ་ལྡན་འདས་རྣམས་ནི་ཐུགས་རྗེ་དང་བྱམས་པའི་སེམས་མངའ་བས་ཀུན་ལ་སྙོམས་པའི་ཡབ་ཡུམ་ལགས། བྱང་ཆུབ་སེམས་དཔའ་རྣམས་ནི་དགེ་བའི་བཤེས་གཉེན་ལགས་ན། བདག་ཅག་ལ་སོགས་པས་བསྐལ་པ་དཔག་ཏུ་
མ་མཆིས་པ་ནས་སྲིད་པ་ན་འཁོར་བའི་ཚེ། སྡིག་ལྕི་བ་བགྱིས་པ་དེ་དག་ཐམས་ཅད་འགྱོད་ཅིང་བཤགས་པས་ཚངས་པ་གནང་བར་གསོལ་ཏེ། སླན་ཆད་ཀྱང་མི་བགྱིད་པར་གྱུར་ཅིག །ཡང་བཅོམ་ལྡན་འདས་བདག་ཅག་ལ་སོགས་པས་བསྐལ་པ་དཔག་ཏུ་མ་མཆིས་པ་ནས་མཚམས་མ་མཆིས་
པ་ལྔ་བགྱིས་པའམ། འདས་པ་དང་། མ་བྱོན་པ་དང་། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཀྱི་སྡོམ་པ་དང་། ཚུལ་ཁྲིམས་ཉམས་པའམ། འདོད་ཆེན་པའི་ལས་སྤྱད་པའམ། མི་དགེ་བའི་ཚིག་རྩུབ་པོ་སྨྲས་ནས་དགེ་བའི་ཆོས་ལ་སྐུར་བའི་སྡིག་ལྕི་བའི་ལས་བགྱིས་པ་ཡང་
སླར་འགྱོད་ཅིང་བཤགས་མ་མྱོང་བ་དང་། ཡིད་ལ་འཛེམ་པ་དང་། ངོ་ཚ་བ་མ་མཆིས་པས་མི་དགེ་བ་བཅུ་དང་། མཚམས་མ་མཆིས་པ་ལྔའི་དངོས་པོ་སྡིག་ལྕི་བ་ལ་སོགས་པ་བགྱིས་པའམ། ཐོག་མ་ནས་ཡིད་ལ་འཇིགས་ཤིང་འཛེམ་པ་མ་མཆིས་པས་དེ་ལྟ་བུའི་སྡིག་ལྕི་བ་བགྱིས་པར་བདག་ཉིད་
ཀྱིས་ངེས་པར་འཚལ་ཀྱང་། ནོངས་པ་བཅབས་ཤིང་དད་པས་བྱིན་པ་བླངས་པ་མཐོལ་ཤིང་བཤགས་མ་མྱོང་བའམ། དམ་པའི་ཆོས་ཡུན་རིང་དུ་གནས་པར་བགྱི་ཞིང་། རིམ་གྲོར་མཆོད་པའི་བསམ་པ་མ་མཆིས་ཏེ། དེ་ལ་མི་སྙན་པར་སྨད་ཅིང་ཡང་ལོག་པར་བལྟས་པའམ། ངག་གི་སྒོ་ནས་ཀུན་ནས་
ཉོན་མོངས་པའི་ཉེས་པ་མང་པོ་བགྱིས་པའམ། ཡང་འདི་སྐད་ཅེས་ཀྱང་སྨྲས་ཏེ། སངས་རྒྱས་དང་། ཆོས་དང་དགེ་འདུན་གསུམ་མ་མཆིས་ཞེས་བགྱིས་པ་ལ་སོགས་པ་མི་དགེ་བ་བཅུ་དང་། མཚམས་མེད་པ་ལྔའི་སྡིག་ལྕི་བ་དེ་ལྟ་བུ་བགྱིས་པའི་སླད་དུ། ད་འཇིགས་ཤིང་སྐྲག་པ་ནི་དཔག་ཏུ་མ་
མཆིས། འཛེམ་ཞིང་གནོང་བ་ནི་བསམ་གྱིས་མི་ཁྱབ་སྟེ། དཀོན་མཆོག་གསུམ་ལ་སྐྱབས་སུ་གསོལ་ལོ། །སངས་རྒྱས་བཅོམ་ལྡན་འདས་རྣམས་ནི་ཐུགས་རྗེ་དང་བྱམས་པ་མངའ་བས་ཀུན་ལ་སྙོམས་པའི་ཡབ་ཡུམ་ལགས། བྱང་ཆུབ་སེམས་དཔའ་རྣམས་ནི་དགེ་བའི་བཤེས་གཉེན་ལགས་

པས་ན། བདག་ཅག་ལ་སོགས་པས་འགྱོད་ཅིང་མཐོལ་བཤགས་པས་ཚངས་པ་གནང་བར་གསོལ་ཏེ། བསྐལ་པ་དཔག་ཏུ་མ་མཆིས་པ་ནས་སྲིད་པ་ན་འཁོར་བའི་ཚེ་སྡིག་ལྕི་བ་བགྱིས་པ་རྣམས་བསལ་ཅིང་སླན་ཆད་ཀྱང་མི་བགྱིད་པར་གྱུར་ཅིག །ཡང་བཅོམ་ལྡན་འདས་བདག་ཅག་ལ་སོགས་པས་
བསྐལ་པ་དཔག་ཏུ་མ་མཆིས་པ་ནས་ལོག་པར་མཐོང་བས་ལྕི་བ་བཞི་ནི་སྦོམ་པོར་བཤད། སྦོམ་པོ་ནི་ལྕི་བ་བཞིར་བཤད་པའམ། ཞིག་པ་ནི་མ་ཞིག་པར་བཤད། མ་ཞིག་པ་ནི་ཞིག་པར་བཤད་པའམ། ལྕི་བ་ནི་ཡང་བར་བཤད། ཡང་བ་ནི་ལྕི་བར་བཤད་པའམ། གཙང་བ་ནི་མི་གཙང་བར་མཐོང་། མི་གཙང་
བ་ནི་གཙང་བར་མཐོང་བ་ལ་སོགས་པ་ལོག་པར་མཐོང་བའམ། འཇིག་རྟེན་གྱི་གཙུག་ལག་ནི་བཤད་ཅིང་བསྟོད། སངས་རྒྱས་ཀྱི་བསྟན་པ་ལ་ནི་གུས་པར་མ་བགྱིས་ཤིང་མི་དགེ་བའི་དོན་རྣམས་ལ་གཞུང་བཟུང་ཞིང་བསམས་པ་དང་། མ་བརྟགས་པ་རྣམ་པ་བརྒྱད་འཆང་
བའམ། དེ་བཞིན་གཤེགས་པའི་བཀའ་ཡང་དག་པ་ནི་བདུད་ཀྱི་ཚིག་ཅེས་བགྱིས། བདུད་ཀྱི་ཚིག་ཡང་དག་པ་ནི་དེ་བཞིན་གཤེགས་པའི་བཀའ་ཞེས་བགྱིས་པའམ། བར་འགའ་ནི་མུ་སྟེགས་ཀྱི་སྟོན་པ་དྲུག་གིས་རྣམ་པར་བཤད་པ་ལ་མོས་ཤིང་བཟུང་བའམ། དེ་བཞིན་གཤེགས་
པ་ཡོངས་སུ་མྱ་ངན་ལས་འདས་པར་བཞུགས་ཏེ། དཀོན་མཆོག་གསུམ་ལ་རྟག་པ་མ་མཆིས་སྙམ་སེམས་ལ་འཁྲུལ་པ་བྱུང་བ་ལ་སོགས་པ་ལྟ་བ་ལོག་པ་བསམ་གྱིས་མི་ཁྱབ་སྟེ། དེ་ལྟ་བས་ན་ད་འཇིགས་ཤིང་དོགས་པ་དང་འཛེམ་ཞིང་གནོང་བ་ཡང་བསམ་གྱིས་མི་ཁྱབ་སྟེ། དཀོན་མཆོག་གསུམ་
ལ་སྐྱབས་སུ་གསོལ་ལོ། །སངས་རྒྱས་བཅོམ་ལྡན་འདས་རྣམས་ནི་ཀུན་ལ་སྙོམས་པའི་ཡབ་ཡུམ་ལགས། བྱང་ཆུབ་སེམས་དཔའ་རྣམས་ནི་དགེ་བའི་བཤེས་གཉེན་ལགས་ཏེ། བདག་ཅག་ལ་སོགས་པས་འགྱོད་ཅིང་འཐོལ་བཤགས་པས་ཚངས་པར་གནང་བར་གསོལ་ཏེ་སླན་
ཆད་ཀྱང་མི་བགྱིད་པར་གྱུར་ཅིག །བཅོམ་ལྡན་འདས་ཀྱིས་བཀའ་སྩལ་པ་ལས་གལ་ཏེ་རྩ་བ་བཞིའམ། མཚམས་མེད་པ་ལྔའམ། ཡང་དག་པའི་ཆོས་ལ་སྐུར་བ་བཏབ་པ་མ་མཐོལ་མ་བཤགས་ན་ངེས་པར་སེམས་ཅན་དམྱལ་བར་ལྟུང་སྟེ། དེ་བཞིན་གཤེགས་པ་

རྣམས་དང་། བྱང་ཆུབ་སེམས་དཔའ་རྣམས་དང་། ཉན་ཐོས་རྣམས་དང་། རང་རྒྱལ་བ་རྣམས་ཀྱིས་ཀྱང་དེ་ལ་སྐྱབས་མཛད་པར་མི་སྤྱོད་དོ། །དགེ་འདུན་དང་། ཕ་མ་དང་། ལྷ་རྣམས་དང་། འཇིག་རྟེན་གྱི་མིས་ཀྱང་དེ་ལ་སྐྱབས་བྱེད་མི་ནུས་སོ་ཞེས་ཐོས་པས་ན་དེའི་ཕྱིར་འཇིགས་
ཤིང་དོགས་པ་དང་། འཛེམ་ཞིང་གནོང་བ་ཡང་བསམ་གྱིས་མི་ཁྱབ་སྟེ། དཀོན་མཆོག་གསུམ་ལ་སྐྱབས་སུ་གསོལ་ལོ། །འདས་པའི་སངས་རྒྱས་རིན་ཆེན་མང་དང་། མ་གཤེགས་པའི་སངས་རྒྱས་སྟོང་དང་། ད་ལྟར་གྱི་སངས་རྒྱས་སྤྲུལ་པའི་བཅོམ་ལྡན་འདས་ཤཱཀྱ་ཐུབ་པ་རྣམས་དང་། སངས་རྒྱས་
བཅོམ་ལྡན་འདས་ཐམས་ཅད་ནི་ཐུགས་རྗེ་དང་། བྱམས་པའི་མངའ་བདག་ལགས་ཏེ། ཀུན་ལ་སྙོམས་པའི་ཡབ་ཡུམ་ལགས། བྱང་ཆུབ་སེམས་དཔའ་རྣམས་ནི་དགེ་བའི་བཤེས་གཉེན་ལགས་ན་བདག་ཅག་ལ་སོགས་པས་འགྱོད་ཅིང་མཐོལ་བཤགས་པས་ཚངས་པ་གནང་བར་གསོལ་ཏེ། བསྐལ་
པ་དཔག་ཏུ་མ་མཆིས་པ་ནས་ཉོན་མོངས་པའི་སྒྲིབ་པའམ། ལས་ཀྱི་སྒྲིབ་པའམ། རྣམ་པར་སྨིན་པའི་སྒྲིབ་པའམ། ལྕི་བ་བཞི་དང་། མཚམས་མེད་པ་ལྔ་དང་། མི་དགེ་བ་བཅུ་ལ་སོགས་པའི་སྡིག་ལྕི་བ་རྣམས་བསལ་བར་གྱུར་ཅིག །ཡང་བཅོམ་ལྡན་འདས་བདག་ཅག་ལ་སོགས་པས་བསྐལ་པ་
དཔག་ཏུ་མ་མཆིས་པ་ནས་སྲིད་པ་ན་འཁོར་བའི་ཚེ་སྡིག་ལྕི་བ་རྣམས་བསལ་ནས་སླན་ཆད་ཀྱང་མི་བགྱིད་པར་གྱུར་ཅིག །ཡང་བཅོམ་ལྡན་འདས་བདག་ཅག་ལ་སོགས་པས་བསྐལ་པ་དཔག་ཏུ་མ་མཆིས་པ་ནས་ད་ལྟར་གྱི་ཚེ་འདིའི་བར་དུ་དགེ་འདུན་གྱི་སྤྱིའི་ནོར་དང་། ཕྱོགས་བཅུའི་དགེ་འདུན་གྱི་སྤྱི་ནོར་
ལ་ཐུགས་ཐུབ་ཏུ་སྤྱད་པའམ། ད་ལྟར་གྱི་དགེ་འདུན་གྱི་ནོར་ལ་ཐུགས་ཐུབ་ཏུ་སྤྱད་པའམ། དགེ་འདུན་སྡེ་ལྔའི་ནོར་དང་། དགེ་སློང་ངོ་ཅོག་གི་ནོར་ལ་ཐུགས་ཐུབ་ཏུ་སྤྱད་པའམ། ཡོན་བདག་ཐམས་ཅད་ཀྱི་རྫས་ལ་ཐུགས་ཐུབ་ཏུ་སྤྱད་པ་དང་། བདག་གིས་ཡང་དག་པའི་ཆོས་དང་། བསམ་གཏན་བཞི་
དང་། འབྲས་བུ་བཞི་མ་ཐོབ་པར་ཐོབ་བོ་ཞེས་སྨྲས་པ་དེ་ལྟ་བུའི་ལས་ངན་པའི་རྒྱུ་དེས་ཀུན་ནས་ཉོན་མོངས་པའི་རྒྱུར་གྱུར་ཏེ། ཁྱིམ་ནས་རབ་ཏུ་བྱུང་ནས་རྩ་བ་བཞིའི་སྡོམ་པ་ཞིག་པ་དང་། ལྕི་བའི་ཆོས་བརྒྱད་དང་། སྡོམ་པ་དྲུག་དང་། དགེ་འདུན་གྱི་ལྷག་མ་བཅུ་གསུམ་དང་། མ་ངེས་པའི་ཆོས་

གཉིས་དང་། སྤང་བའི་ལྟུང་བྱེད་སུམ་ཅུ་དང་། ལྟུང་བྱེད་དགུ་བཅུ་རྩ་གཅིག་དང་། སོ་སོར་བཤགས་པའི་ཆོས་བཞི་དང་། བསླབ་པའི་ཆོས་མང་པོ་རྣམས་དང་། ཤིན་ཏུ་ལྕི་བའི་ཆོས་བདུན་རྣམས་དང་། ནོངས་པ་བགྱིས་ནས་ཕས་ཕམ་པ་བཞི་དང་། མཚམས་མེད་པ་ལྔ་ལ་ཐུག་
གི་བར་དུ་རེ་རེ་ནས་བགྱིས་པའམ། ཡང་དག་པའི་ཆོས་ཉིད་དང་། མདོ་སྡེ་ཟབ་མོ་ལ་སྐུར་པའམ། འདོད་ཆེན་པའི་ལས་བགྱིས་པ་ཡང་བཅབས་ཤིང་གསངས་ནས་ཉིན་ཞག་རེ་རེ་ཞིང་འཕེལ་བར་འགྱུར་བ་དེ་དག་ལ་སོགས་པ་དེ་རིང་སྐྱེ་བོ་མང་པོ་ལ་སྨན་པའི་སླད་དུ། བདག་ཅག་ཉིད་ཀྱིས་ཕྱོགས་
བཅུའི་སངས་རྒྱས་ཀྱི་སྤྱན་སྔར་འགྱོད་ཅིང་བཤགས་པར་འཚལ་ལོ། །སོ་སོའི་སྐྱེ་བོ་ཐམས་ཅད་ཀྱིས་བསྐལ་པ་དཔག་ཏུ་མ་མཆིས་པ་ནས། སངས་རྒྱས་དང་། ཕ་མའི་དྲིན་གློ་བར་མ་ཆུད་ཅིང་རྣམ་པར་བྱང་བའི་ཆོས་མ་འཚལ་བས་མི་དགེ་བའི་ལས་སྣ་ཚོགས་བགྱིས་པའམ། བདག་གི་རིགས་སྙེམས་
པས་དར་ཅིང་རྒྱགས་པའི་ཚེ་མི་དགེ་བའི་ལས་རྣམས་བསམས་པ་བཞིན་དུ་བགྱིས་ཀྱང་། ནོངས་པར་མ་མཐོང་བས་བྱིས་པ་ལྟ་བུར་བླུན་པའི་སུག་ལས་བགྱིས་པའམ། མི་དགེ་བའི་གཤེས་གཉེན་གྱི་དྲུང་དུ་ཉེ་བར་མཆིས་ཤིང་ཉོན་མོངས་པས་སེམས་དཀྲུགས་པས། འདོད་པའི་ཡོན་ཏན་ལྔ་ལ་
ཆོག་མ་འཚལ་ཏེ། མི་དགེ་བའི་ལས་རྣམས་བགྱིས་པ་དང་། འགྲོ་བ་བཟང་མོས་བསླུས་པའམ། འདོད་ཆགས་དང་། ཞེ་སྡང་དང་། གཏི་མུག་གི་མདུད་པས་སེམས་དཀྲུགས་ཤིང་བསྐྱོད་པ་དང་། ལུས་དང་། ངག་དང་། ཡིད་ལ་སོགས་པས་རྣམ་པར་བསྡུས་པའི་སྡིག་མང་པོ་དེ་རྣམས་འགྱོད་དེ་
ད་མ་ལུས་པར་བཤགས་སོ། །ཡང་སངས་རྒྱས་དང་། དམ་པའི་ཆོས་དང་། འཕགས་པའི་དགེ་འདུན་ལ་གུས་པའི་ཚུལ་གྱིས་བསྙེན་བཀུར་མ་བགྱིས་པ་དེ་ལྟ་བུའི་སྡིག་མང་པོ་དེ་དག་ཀུན་འགྱོད་དེ་མཐོལ་ཞིང་སོ་སོར་བཤགས་སོ། །ཡང་བྱང་ཆུབ་སེམས་དཔའ་རྣམས་དང་། རང་སངས་
རྒྱས་རྣམས་ལ་གུས་པའི་ཚུལ་གྱིས་རིམ་གྲོ་མ་བགྱིས་པ་དེ་ལྟ་བུའི་སྡིག་མང་པོ་དེ་དག་ཀུན་འགྱོད་དེ་མཐོལ་ཞིང་སོ་སོར་བཤགས་སོ། །གཏི་མུག་པས་རྨོངས་ཤིང་བསྒྲིབས་ཏེ་དྲེགས་ཤིང་ལེ་ལོ་དང་རང་ཉམ་གྱིས་མི་དགེ་བ་རྣམས་བགྱིས་པ་དེ་ལྟ་བུའི་སྡིག་མང་པོ་ཀུན་འགྱོད་དེ་མཐོལ་ཞིང་སོ་སོར་བཤགས་

སོ། །ཕྱོགས་བཅུའི་སངས་རྒྱས་ཐམས་ཅད་ད་བདག་གིས་མཆོད་ནས་སེམས་ཅན་མ་ལུས་པ་ཐམས་ཅད་ས་བཅུ་ལ་གནས་པར་བགྱིས་ཏེ། ཀུན་གྱིས་དེ་བཞིན་གཤེགས་པའི་ཡང་དག་པ་ཉིད་ཐུགས་སུ་ཆུད་པ་དང་ལྡན་པར་བགྱིས་པར་གྱུར་ཅིག །དེ་ནས་བཅོམ་ལྡན་འདས་ཀྱིས་རྒྱལ་བུ་དགེ་མཐོང་ལ་
བཀའ་སྩལ་པ། ལེགས་སོ་ལེགས་སོ། །རྒྱལ་རིགས་དྲ་མ་ཆེན་པོ་རབ་ཏུ་ལེགས་སོ། །རྒྱལ་རིགས་དྲ་མ་ཆེན་པོ་བདག་ཉིད་ཀྱིས་དགེ་སྡིག་གི་ལས་ལ་རྟོག་པ་མཁས་ཏེ། འཇིགས་ཤིང་སྐྲག་པ་ཆེན་པོས་འགྱོད་ནས་སྡིག་པའི་ལས་རྣམས་མངོན་པར་བཤགས་ཀྱི་སྟེང་དུ། སེམས་
ཅན་ཐམས་ཅད་ཀྱི་ཕྱིར་ཡང་མཐོལ་ཞིང་སོ་སོར་བཤགས་པ་དེ་བས་ན་ཁྱོད་ནི་རྒྱལ་རིགས་དྲ་མ་ཆེན་པོ་ཉིད་ཡིན་ཏེ། བདག་སྡིག་པ་མི་དགེ་བ་དང་བྲལ་གྱི་སྟེང་དུ། སེམས་ཅན་ཐམས་ཅད་ཀྱང་སྡིག་པ་དང་བྲལ་བར་བྱས་པ་དང་། བདག་ཉིད་ཀྱི་ཕྱིར་སྨོན་ལམ་མ་བཏབ་པས་སྔར་སེམས་ཅན་ཐམས་ཅད་ཀྱི་དོན་
དུ་སྨོན་ལམ་བཏབ་སྟེ། དེ་བཞིན་གཤེགས་པའི་བཀའ་ཡང་དག་པ་ཉིད་ཐུགས་སུ་ཆུད་པ་དང་ལྡན་པར་བསྔོས་པས་ན་ཁྱོད་ནི་རྒྱལ་རིགས་དྲ་མ་ཆེན་པོ་ཡང་དག་པ་ཉིད་ཡིན་ནོ། །དེ་ནས་རྒྱལ་བུ་དགེ་མཐོང་དང་། མི་སུམ་སྟོང་གིས་མཐོལ་ཞིང་བཤགས་ཟིན་ནས་བཅོམ་ལྡན་འདས་ལ་
ཚིགས་སུ་བཅད་པས་བསྟོད་པ། བཅོམ་ལྡན་ཉག་གཅིག་རབ་ཀྱི་མཆོག །ཁམས་གསུམ་རྒྱན་ལགས་ཡབ་ཡུམ་དང་། །ཐམས་ཅད་སྙོམས་པའི་ཡེ་ཤེས་ལགས། །ཀུན་ལ་སྙོམས་པའི་དཔེ་མ་མཆིས། །སངས་རྒྱས་དཀོན་ལ་ཕྱག་འཚལ་ལོ། །བྱིས་པས་ཤེས་རབ་བདག་ཕྱིར་སྤྱད། །ནོར་
རྫས་བྱིན་ལ་ལན་འདོད་ཕྱིར། །བྱམས་ཆེན་སངས་རྒྱས་དེ་མིན་ཏེ། །དགྲ་སྡང་ཉེ་བྱམས་སྙོམས་མཛད་པའི། །བརྩོན་འགྲུས་ཆེ་ལ་བདག་སྐྱབས་མཆི། །རྐང་གཉིས་ཀུན་ལ་སངས་རྒྱས་གཙོ། །ཤེས་རབ་སྤྱན་ལྡན་མཁྱེན་གཟིགས་ཁྱབ། །ལྷ་རྣམས་ཤེས་རབ་དེ་མ་འཚལ། །དུས་གསུམ་སངས་རྒྱས་
ཐམས་ཅད་ལ། །བདག་ཅག་ཀུན་གྱིས་གུས་ཕྱག་འཚལ། །དེ་བཞིན་སངས་རྒྱས་བདག་སྐྱབས་མཆི། །དུས་གསུམ་སངས་རྒྱས་མཆོད་བྱས་འདྲ། །དེ་ནས་ཕྱོགས་བཅུའི་དེ་བཞིན་གཤེགས་པ་རྣམས་ཀྱིས་རྒྱལ་བུ་དགེ་མཐོང་དང་། མི་སུམ་སྟོང་ལ་ཚིགས་སུ་བཅད་དེ་བཀའ་སྩལ་པ། སངས་རྒྱས་ཆོས་ནི་ཚོགས་

འདོད་ན། །ཐོས་པ་མང་པོའི་མི་ཕྱིར་འབྲངས། །དགེ་བས་མཁན་པོ་བཞིན་དུ་བཀུར། །སངས་རྒྱས་མྱུར་དུ་འགྲུབ་པར་འགྱུར། །ཚུལ་ཁྲིམས་རྣམ་དག་སྲུང་བྱེད་ན། །མིང་ནི་དགེ་སློང་དེས་པ་ཡིན། །སྟོང་ཉིད་གང་གིས་བརྟགས་ནུས་ན། །དེ་མིང་རྣལ་འབྱོར་སྒྲུབ་པ་ཡིན། །བརྩོན་
འགྲུས་ལ་ལས་བསྒྲུབ་ནུས་ན། །དེ་མིང་འཕགས་ལམ་སྤྱོད་པ་ཡིན། །ལ་ལས་མྱ་ངན་འདས་བསྒྲུབས་ན། །དེ་མིང་ཡང་དག་བདེ་བ་ཡིན། །ཚུལ་ཁྲིམས་སྡོམ་པའི་དགེ་ཚུལ་དང་། །རྣམ་དག་ཁྲིམས་འཛིན་དགེ་སློང་དག །ཟླ་བ་ཕྱེད་ཅིང་གསོ་སྦྱོང་བྱ། །ཆོས་གོས་བརྟགས་པ་རྣམས་
བགོས་ཏེ། ལྷུང་བཟེད་འཁར་གསིལ་སོགས་བཀུར་ཞིང་། །དག་པས་བསོད་སྙོམས་གཙང་བླང་བྱ། །ལྷ་རྣམས་ཐམས་ཅད་དགའ་མགུ་སྟེ། །གུས་པས་ཕྱག་འཚལ་ཐལ་སྦྱར་ནས། །ལྷ་རྣམས་ངེད་ཀྱིས་མི་འདི་དག །དེ་ཡི་མངག་གཞུག་བསྒྲུབ་པར་བྱ། །དཔེར་ན་ལྷ་དབང་བརྒྱ་བྱིན་ལ། །
སུམ་ཅུ་རྩ་གསུམ་ལྷ་གཞན་རྣམས། །རིམ་གྲོ་གུས་པ་བྱེད་བཞིན་བྱ། །ཚེ་འདིར་ལེགས་པ་ཉིད་འཐོབ་སྟེ། །ཚེ་རབས་གཞན་གྱིའང་དཔག་མི་ཁྱབ། །རབ་ཏུ་བྱུང་ཞིང་ཚུལ་ཁྲིམས་ས་སྡོམ། །སངས་རྒྱས་བཀའ་དྲིན་ལན་བསྒྲུབས་ཡིན། །རྒྱལ་བུ་དགེ་མཐོང་ད་ཡང་ཉོན། །ང་དང་བྱང་ཆུབ་མ་
གཏོགས་པར། །འཇིག་རྟེན་མི་རྣམས་ཐམས་ཅད་ཀྱིས། །མོས་པ་རྣམ་དག་སེམས་བསྐྱེད་དེ། །ཕྱོགས་བཅུའི་སངས་རྒྱས་རྟག་བཞུགས་པར། །མྱ་ངན་འདས་པར་མངོན་པར་ཤེས། །ཆོས་དང་དགེ་འདུན་དེ་བཞིན་ཏེ། །དེ་ལྟ་བུ་ཡི་མི་རྣམས་ནི། །བཅོམ་ལྡན་དྲིན་ལ་ལན་བསྒྲུབས་ཡིན། །
དེ་ཡང་རྒྱལ་བུ་དགེ་མཐོང་ཉོན། །འཇིག་རྟེན་མི་རྣམས་ཐམས་ཅད་ལ། །བྱེ་བྲག་དབྱེ་བའི་སེམས་མེད་པར། །ཐེག་པ་གཅིག་ཆོས་མངོན་ཤེས་ཏེ། །ཕྱོགས་བཅུར་སྔ་མ་འདས་པ་དང་། །ད་ལྟར་མ་འོངས་དུས་རྣམས་ལ། །སངས་རྒྱས་ཐེག་ཆེན་གཅིག་པུ་ལས། །གཉིས་དང་གསུམ་ཞེས་བྱ་མེད་
པར། །བྱེ་བྲག་དབྱེ་བའི་སེམས་མེད་དེ། །དེ་ལྟར་མོས་སེམས་བསྐྱེད་ནུས་ན། །དེ་ལྟ་བུ་ཡི་མི་རྣམས་ནི། །སངས་རྒྱས་བཀའ་དྲིན་འཚོབ་པ་ཡིན། །རྒྱལ་བུ་དགེ་མཐོང་ད་ཡང་ཉོན། །ད་ནི་འདས་ཏེ་གཤེགས་ཕྱི་ན། །མི་ཡི་ནང་ན་ལ་ལ་ཞིག །སེམས་ཅན་རྣམ་པ་ཐམས་ཅད་ལའང་། །སངས་རྒྱས་སྙིང་པོ་ཉིད་ཡོད་

ཅེས། །རྟག་ཏུ་མོས་པའི་སེམས་བསྐྱེད་ན། །དེ་ལྟ་བུ་ཡི་མི་རྣམས་ནི། །བཅོམ་ལྡན་བཀའ་དྲིན་ལན་བསྒྲུབས་ཡིན། །ལ་ལས་ཐང་ཅིག་དགེ་སྤྱད་དེ། །འབྲས་བུ་སྲིད་པ་མི་བསྒྲུབ་ལ། །བླ་མེད་འབྲས་བུར་སྔོ་བྱེད་ན། །སངས་རྒྱས་བཀའ་དྲིན་འཚོབ་པ་ཡིན། །ད་ཡང་རྒྱལ་བུ་དགེ་མཐོང་ཉོན། །ང་ནི་མྱ་ངན་འདས་
འོག་ན། །མི་ཡི་ནང་ན་ལ་ལ་དག །དཀོན་མཆོག་གསུམ་ལ་རིམ་གྲོ་གུས། །སྐད་ཅིག་མདོ་སྡེ་འདི་བཀླགས་ཏེ། །མཁན་ལ་སྲི་ཞུ་ཡོན་ཕུལ་ན། །དེ་ལྟ་བུ་ཡི་མི་རྣམས་ནི། །བདེ་གཤེགས་དྲིན་ལ་ལན་བསྒྲུབས་ཡིན། །ལ་ལས་ནོར་རྫས་སྣ་འགའ་དང་། །གོས་དང་ཁ་ཟས་བདོག་རྣམས་ཀྱིས། །
ཀུན་ལ་ཁྱབ་པར་སྦྱིན་བྱས་ན། །བཅོམ་ལྡན་བཀའ་དྲིན་འཚོབ་པ་ཡིན། །རྒྱལ་བུ་དགེ་མཐོང་ད་ཡང་ཉོན། །ང་ཡི་ཆོས་འདི་ཐ་མའི་ཚེ། །ལ་ལས་མི་འགའ་གྲོས་བཏབ་ཅིང་། །ཐང་ཅིག་མདོ་སྡེ་འདི་ཉན་ན། །བྱང་ཆུབ་སེམས་དཔའ་འབུམ་བརྒྱ་ལ། །ཡོན་ཕུལ་བས་ནི་འདི་དོན་ཆེ། །ཐེག་
མཆོག་མདོ་སྡེ་འདི་ལྟ་བུ། །སངས་རྒྱས་བྱང་ཆུབ་ཡུམ་ཡིན་པས། །སངས་རྒྱས་བྱང་ཆུབ་དད་བསམས་ཤིང་། །འདི་ལ་རིམ་གྲོ་གུས་བསྐྱེད་ལ། །གཉིས་མེད་ཕན་ཚུན་སེམས་སྙོམས་ན། །སངས་རྒྱས་བཀའ་དྲིན་ལན་བསྒྲུབས་ཡིན། །རྒྱལ་བུ་དགེ་མཐོང་ད་ཡང་ཉོན། །ལ་
ལས་ཆོས་འདི་ཐ་མའི་ཚེ། །སངས་རྒྱས་བཀའ་དྲིན་བསྒྲུབས་བསམས་ཏེ། །ཐང་ཅིག་སངས་རྒྱས་ཐུན་ཞུགས་ན། །ཁམས་གསུམ་གནས་པའི་སེམས་ཅན་རྣམས། །སྲོག་བྱིན་པས་ནི་འདི་དོན་ཆེ། །དགེ་འདུན་བསམ་གཏན་དཀྲུགས་སྐུར་ན། །ཁམས་གསུམ་གང་བའི་མི་རྣམས་དང་། །སེམས་ཅན་ཐམས་ཅད་
བསད་དང་མཚུངས། །བསམ་གཏན་དགེ་འདུན་དཀྲུགས་སྐུར་ན། །དེ་ཡི་སྡིག་ཀྱང་དེ་བཞིན་ནོ། །ལ་ལས་དགེ་བ་སྤྱོད་མཐོང་ནས། །དཔྱས་ཤིང་སྐུར་ཏེ་མ་མོས་ན། །དཀོན་མཆོག་གསུམ་གྱི་རིགས་ཀྱང་གཅོད། །བཅོམ་ལྡན་བཀའ་དྲིན་བསྒྲུབ་པ་མིན། །དེ་ནས་རྒྱལ་བུ་དགེ་མཐོང་དང་། མི་སུམ་སྟོང་ལ་བཅོམ་
ལྡན་འདས་ཀྱིས་གནང་སྟེ། ཆོས་བསྟན་ཟིན་ནས་དགའ་མགུ་ཡི་རངས་ཏེ་བཅོམ་ལྡན་འདས་ཀྱི་ཞབས་སྤྱི་བོས་བླངས་སོ། །འཕགས་པ་རྟོགས་པ་ཆེན་པོ་ཡོངས་སུ་རྒྱས་པའི་མདོ་ལས་ཕྱག་འཚལ་བའི་ཆོ་ག་དང་། འགྱོད་ཚངས་ཀྱི་ལེའུ་ཉི་ཚེ་རྫོགས་སོ།།

༄༅༅། །རྒྱ་གར་སྐད་དུ། ཨཱརྱ་ཀུ་སུ་མ་སཉྩ་ཡ་ནཱ་མ་མ་ཧཱ་ཡཱན་སཱུ་ཏྲ། བོད་སྐད་དུ། འཕགས་པ་མེ་ཏོག་གི་ཚོགས་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་
གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་གི་དགེ་འདུན་ཆེན་པོ་བརྒྱ་ཕྲག་ཕྱེད་དང་བཅུ་གསུམ་གྱི་དགེ་སློང་དང་ཐབས་ཅིག་ཏུ་བཞུགས་ཏེ། དེ་ནས་ཚེ་དང་ལྡན་པ་ཤཱ་རིའི་བུ་སྟན་ལས་ལངས་ནས་བླ་གོས་ཕྱོགས་གཅིག་ཏུ་གཟར་ཏེ། པུས་མོ་གཡས་
པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཡང་བཅོམ་ལྡན་འདས་ད་ལྟར་སངས་རྒྱས་བཅོམ་ལྡན་འདས་བཞུགས་ལ་འཚོ་ཞིང་གཞེས་ཏེ་ཆོས་ཀྱང་སྟོན་པ་ཇི་སྙེད་ཅིག་བཞུགས། དེ་སྐད་
ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་དེའི་ཕྱིར་ལེགས་པར་ཤིན་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །བཅོམ་ལྡན་འདས་ལེགས་སོ་ཞེས་གསོལ་ནས། ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ཀྱི་ལྟར་ཉན་ཏོ། །བཅོམ་
ལྡན་འདས་ཀྱིས་བཀའ་སྩལ་པ། ཤཱ་རིའི་བུ་སངས་རྒྱས་ཀྱི་ཞིང་འདི་ནས་ཤར་ཕྱོགས་སུ་བྱེ་བ་བརྒྱ་ཕྲག་སྟོང་གི་ཡང་ཐ་མ་ན་སངས་རྒྱས་ཀྱི་ཞིང་མར་མེ་ཅན་ཞེས་བྱ་བའི་འཇིག་རྟེན་གྱི་ཁམས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འབྱུང་གནས་ཞེས་བྱ་བ་
བཞུགས་ཏེ། ཤཱ་རིའི་བུ་ཡང་དེ་བཞིན་གཤེགས་པ་རིན་ཆེན་འབྱུང་གནས་ཀྱི་མཚན་གང་དག་ཉན་པར་འགྱུར་བ་དང་། དད་པ་ཡང་སྐྱེད་པར་བྱེད་པ་དེ་དག་ཐམས་ཅད་ཡང་དག་པའི་བྱང་ཆུབ་ཀྱི་ཡན་ལག་རིན་པོ་ཆེ་བདུན་རྣམས་ཡོངས་སུ་འཛིན་པར་འགྱུར་བ་དང་། བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ལས་ཕྱིར་མི་ལྡོག་པར་འགྱུར་རོ། །བསྐལ་པ་དྲུག་ཅུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །འཇིག་རྟེན་གྱི་ཁམས་མར་མེ་ཅན་གྱི་མིའི་ཉི་མ་སངས་རྒྱས་རིན་ཆེན་འབྱུང་གནས་དེའི་མཚན་ཐོས་པར་དགའ་བ་ནི་བསྐལ་པ་དྲུག་ཅུར་འཁོར་བར་མི་འགྱུར་རོ། ཤཱ་རིའི་བུ་དེ་ལ་སོགས་པ་

ཤར་ཕྱོགས་ན་སངས་རྒྱས་བཅོམ་ལྡན་འདས། གང་གཱའི་ཀླུང་གི་བྱེ་མ་སྙེད་ཀྱི་མཚན་རིན་ཆེན་འབྱུང་གནས་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །འདི་ནས་སངས་རྒྱས་ཀྱི་ཞིང་བརྒྱའི་ཡང་ཐ་མ་ན་འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ཞེས་བྱ་བྱ་བ་ན། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དམ་པ་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་རིན་ཆེན་དམ་པའི་མཚན་གང་དག་ཉན་པར་འགྱུར་བ་དང་དད་པ་ཡང་སྐྱེད་ཅིང་ཐལ་མོ་སྦྱོར་བར་བྱེད་པ་ནི་ཡང་ཤཱ་རིའི་བུ་གང་གིས་སྟོང་གསུམ་གྱི་སྟོང་
ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། སངས་རྒྱས་བཅོམ་ལྡན་འདས་ལ་ཉིན་གཅིག་བཞིན་དུ་སྦྱིན་པ་ཕུལ་བ་དེ་བཞིན་དུ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་ཕུལ་བའི་བསོད་ནམས་ཀྱི་ཕུང་པོ་དེས་བསོད་ནམས་ཀྱི་ཕུང་པོ་འདིའི་བརྒྱའི་
ཆར་ཡང་ཉེ་བར་མི་འགྲོའོ། །གྲངས་སུའམ། ཆའམ། དཔེར་རམ། རྒྱུར་ཡང་ཉེ་བར་མི་འགྲོའོ། །དེ་བཞིན་དུ་འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ན་སངས་རྒྱས་རིན་ཆེན་དམ་པ་གཙོ་བོ་བཞུགས་ཏེ། དེའི་མཚན་ཐོས་པས་འདིར་སངས་རྒྱས་འབྱུང་བ་ཡིན་ནོ། །འདི་ནས་
སངས་རྒྱས་ཀྱི་ཞིང་བརྒྱ་ཕྲག་དྲུག་ཅུ་ན་འཇིག་རྟེན་གྱི་ཁམས་སྤོས་ལྡན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འབྱུང་བ་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་རིན་ཆེན་འབྱུང་བའི་མཚན་གང་དག་གིས་
ཐོས་པ་དེ་དག་ནི་བསྐལ་པ་བཅྭ་ལྔར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་གི་ཡང་ཐ་མ་ན་འཇིག་རྟེན་གྱི་ཁམས་འོད་ཟེར་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་སྣང་བ་ཞེས་བྱ་
བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་རིན་ཆེན་སྣང་བ་ཞེས་བྱ་བའི་མཚན་གང་དག་ཐོས་པ་དང་དད་པ་བསྐྱེད་པ་དེ་དག་ནི་ངན་སོང་གསུམ་དུ་འགྲོ་བར་མི་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ལྔ་བརྒྱ་བས་ཆེས་རིང་བ་འཇིག་རྟེན་གྱི་ཁམས་ཏོག་གི་རྒྱལ་མཚན་ཞེས་བྱ་བ་ན་

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་ཏོག་ཅེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་རིན་ཆེན་ཏོག་གི་མཚན་གང་དག་ཐོས་པ་དང་། དད་པ་བསྐྱེད་ཅིང་དེ་བཞིན་གཤེགས་པ་དེ་ལ་རྗེས་སུ་དྲན་པར་བྱེད་པ་དེ་དག་ཐམས་ཅད་
དཀོན་མཆོག་དང་འདྲ་བར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་གཉིས་ཀྱི་ཆེས་ཕ་རོལ་ན་འཇིག་རྟེན་གྱི་ཁམས་ཡོན་ཏན་ཐམས་ཅད་རབ་ཏུ་སྣང་བ་དང་ལྡན་པ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་རབ་སྣང་ཞེས་བྱ་བ་བཞུགས་ཏེ།
ཡང་ཤཱ་རིའི་བུ་དེ་བཞིན་གཤེགས་པ་རིན་ཆེན་རབ་སྣང་གི་མཚན་གང་དག་ཐོས་པ་དང་། ཐོས་ནས་ཀྱང་ལྷག་པའི་བསམ་པས་མོས་པར་བྱེད་ཅིང་ཡན་ལག་ལྔས་ཕྱག་འཚལ་བར་འགྱུར་བ་དེ་དག་ནི་བསྐལ་པ་ཉི་ཤུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །འདི་ནས་སངས་རྒྱས་ཀྱི་ཞིང་
སྟོང་བས་ཆེས་རིང་བ་འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་མི་འཁྲུགས་པ་དེའི་མཚན་གང་དག་ཐོས་པ་དང་དད་པ་བསྐྱེད་པར་
འགྱུར་བ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་ཅིང་བདུད་སྡིག་ཅན་རྣམས་ཀྱིས་ཀྱང་མི་འཁྲུགས་པར་འགྱུར་རོ། །ཡང་ཤཱ་རིའི་བུ་དེ་བཞིན་གཤེགས་པ་མི་འཁྲུགས་པ་དེའི་མཚན་དང་ཡོན་ཏན་བརྗོད་པ་བཤད་པ་ན། བདུད་སྡིག་ཅན་གྱིས་ཐོས་ནས་དཔུང་གི་
ཚོགས་ཐམས་ཅད་དང་བཅས་ཏེ་ངའི་དྲུང་དུ་འོངས་ནས་ཚིག་འདི་སྐད་དུ་སྨྲས་སོ། །ཡང་བཅོམ་ལྡན་འདས་སངས་རྒྱས་སྟོང་གི་མཚན་ཡོངས་སུ་བརྗོད་པ་ནི་མི་དངོའི། དེ་བཞིན་གཤེགས་པ་མི་འཁྲུགས་པའི་མཚན་ནི་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། དེ་ནི་བདག་གི་ཡུལ་དུ་འགྱུར་བ་མ་ལགས་
སོ། །དེ་བཞིན་གཤེགས་པ་དེའི་མཚན། གང་དག་ཉན་པར་འགྱུར་བ་དེ་ལ་ཡང་བདག་གིས་བར་ཆད་བགྱིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། །སྡིག་ཅན་ཁྱོད་ཀྱིས་གང་ཟག་གང་དག་ལ་བར་ཆད་བྱ་བ་དེ་དག་གང་

ཡིན། གསོལ་པ། བཅོམ་ལྡན་འདས་ཐེག་པ་ཆེན་པོ་ལ་ཞུགས་པ་གང་དག་དེ་བཞིན་གཤེགས་པ་དེའི་མཚན་ཐོས་པར་འགྱུར་བ་དེ་དག་ལགས་ཏེ། བཅོམ་ལྡན་འདས་འཇིག་རྟེན་གྱི་ཁམས་འདིར་གང་བཅོམ་ལྡན་འདས་དེའི་མཚན་དང་ཡོན་ཏན་ཡོངས་སུ་བརྗོད་པ་བག་ཚ་ཞིང་ཡོངས་སུ་གདུངས་
སོ། །འོན་ཀྱང་བདག་གིས་མཚན་ཉན་པ་དེ་རྣམས་ལ་བར་ཆད་བགྱི་བའི་སླད་དུ་གོ་བགོ་བར་བགྱིའོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པའི་མཚན་གང་གང་ཟག་གང་དག་གིས་ཐོས་པ་བདག་གི་དབང་དུ་མཆི་བར་འགྱུར་བ་དེ་ན་མཆིས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་
ཀྱིས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། །སྡིག་ཅན་ཁྱོད་གོ་བགོ་བར་མ་བྱེད་ཅིག །ཁྱོད་ཀྱིས་ནི་སྐྱེས་བུ་དམ་པ་དེ་དག་ལ་བར་ཆད་བྱ་བར་མི་ནུས་སོ། །དེ་ཅིའི་ཕྱིར་ཞེ་ན། དེ་དག་ནི་ངས་དེ་བཞིན་གཤེགས་པ་མི་འཁྲུགས་པ་ལ་གཏད་པ་དང་། དེ་བཞིན་གཤེགས་པ་གཞན་དག་
ལ་ཡང་གཏད་པས། དེ་དག་དེ་བཞིན་གཤེགས་པ་མི་འཁྲུགས་པས་དགོངས་ཤིང་བྱིན་གྱིས་རློབ་པར་འགྱུར་རོ། །དེ་ནས་ཚེ་དང་ལྡན་པ་ཤཱ་རིའི་བུས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདུད་སྡིག་ཅན་དེ་བཞིན་གཤེགས་པའི་སྤྱན་སྔ་ན་སྔར་མཆིས་ནས།
འདི་སྐད་དུ་སེང་གེའི་སྒྲ་སྒྲོགས་ན། དེ་བཞིན་གཤེགས་པ་མི་འཁྲུགས་པའི་མཚན་ཐོས་ལ་བདུད་སྡིག་ཅན་འདིའི་དབང་དུ་མཆི་བར་འགྱུར་བ་གང་དག་ལ་བར་ཆད་བགྱི་བའི་སླད་དུ་བདུད་སྡིག་ཅན་གྱིས་གོ་བགོས་པའི་གང་ཟག་དེ་དག་གང་ལགས། དེ་སྐད་ཅེས་གསོལ་པ་དང་། བཅོམ་
ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་འདི་ལྟ་སྟེ། དེ་བཞིན་གཤེགས་པ་མི་འཁྲུགས་པ་དེ་དང་དེའི་ཡོན་ཏན་ཡོངས་སུ་བརྗོད་པ་སེམས་ཅན་གང་དག་གིས་ཐོས་ནས་ད་ལྟར་སྤོང་བར་བྱེད་པ་རྣམས་སེམས་ཅན་དམྱལ་བར་འགྱུར་བའི་ཆོས་དམ་དུ་འཛིན་
པར་འགྱུར་བ་ངས་མཐོང་ངོ་། །གསོལ་པ། བཅོམ་ལྡན་འདས་ཡོངས་སུ་སྤོང་བར་བགྱིད་པའི་སེམས་ཅན་དུ་ཞིག་མཆིས་པ་ལེགས་པར་བཤད་དུ་གསོལ། བཀའ་སྩལ་པ། ཤཱ་རིའི་བུ་ཕྱོགས་བཅུར་དེ་བཞིན་གཤེགས་པ་དེའི་མཚན་ཐོས་པར་འགྱུར་བ་དང་། དེ་ལྟར་འཇིག་རྟེན་

གྱི་ཁམས་གཞན་ན་དེ་བཞིན་གཤེགས་པ་དེ་དག་གིས་དེ་དག་ལས་བརྩམས་ཏེ་ཆོས་སྟོན་ན་སེམས་ཅན་དེ་དག་ནི་ཤེས་རབ་ཆེ་ཞིང་ཤེས་རབ་རྒྱ་ཆེ་བས་དེའི་ཡོན་ཏན་ཡོངས་སུ་རྫོགས་པ་བཤད་ཀྱང་ངོམས་པར་མི་འགྱུར་རོ། །ཤཱ་རིའི་བུ་གང་དག་གིས་དེ་བཞིན་གཤེགས་པ་མངོན་སུམ་དུ་མཐོང་
བར་གྱུར་པ་དེ་དག་གིས་དེའི་ཡོན་ཏན་ཡོངས་སུ་བརྗོད་པ་ལ་སྤོང་བར་འགྱུར་བ་འདི་ནི་གནས་མ་ཡིན་སྐབས་མེད་དོ། །སངས་རྒྱས་བཅོམ་ལྡན་འདས་དེ་དག་ནི་ཉོན་མོངས་པའི་སྙིགས་མའི་དུས་སུ་འབྱུང་བ་ནི་གནས་མ་ཡིན་ནོ། །འདི་ལྟ་སྟེ་དཔེར་ན་ད་ལྟར་སྙིགས་མ་ལྔའི་དུས་སུ་ང་བྱུང་ན་མི་མཇེད་ཀྱི་
འཇིག་རྟེན་གྱི་ཁམས་ཀྱི་སེམས་ཅན་རྣམས་ཤེས་རབ་རབ་ཏུ་ཞན་པ་དེ་འདྲ་བདག་གིས་ཀྱང་ངས་བཤད་པའི་ཡོན་ཏན་ཁོང་དུ་ཆུད་ན། གང་དེ་བཞིན་གཤེགས་པ་མི་འཁྲུགས་པའི་སྟོང་གི་འཇིག་རྟེན་གྱི་ཁམས་ན་གནས་པས་ཤེས་པར་འགྱུར་བ་ལྟ་ཅི་སྨོས། ཤཱ་རིའི་བུ་དེ་ལྟ་མོད་ཀྱིས་ཡོན་ཏན་འདི་
ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ནི་མཐར་གྱིས་བྱང་ཕྱོགས་སུ་འགྲོ་བར་འགྱུར་ཏེ། དེ་ན་སྐྱེས་བུ་དམ་པ་གང་དག་ཐེག་པ་ཆེན་པོ་ལ་ཞུགས་པ་དེ་དག་གིས་ཆོས་ཀྱི་རྣམ་གྲངས་འདི་རྒྱས་པར་བྱེད་པར་འགྱུར་རོ། །དེ་ན་ཤཱ་རིའི་བུ་ཆོས་ཀྱི་རྣམ་གྲངས་འདི་ཉན་ཏོ། །ཐོས་ནས་ཀྱང་སྤོང་བར་འགྱུར་ཏེ་
སྐྱེས་བུ་དམ་པ་མ་ཡིན་པ་དེ་དག་ཅི་འདྲ་བ་ཉོན་ཅིག །བཅོམ་ལྡན་འདས་ལགས་སོ་ཞེས་གསོལ་ནས་ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བྱང་ཕྱོགས་ན་ཡུལ་ཁམས་གན་དྷ་ར་ཞེས་བྱ་བ་དེ་ན་ལོ་འབུམ་དུ་མནར་མེད་
པའི་ལས་ཡོངས་སུ་འཛིན་པར་འགྱུར་བ་ཡོད་དོ། །བྱང་ཕྱོགས་ཀྱི་རྒྱུད་དེ་ཉིད་ནས་ཁ་ཆེ་ཡུལ་གྱི་ལྗོངས་ཀྱི་ཕྱོགས་གང་ན་དམ་པའི་ཆོས་འདི་ཆེས་ཤིན་ཏུ་སྟོབས་དང་ལྡན་པར་འབར་བར་འགྱུར་བ་དེ་ན་སྤོང་བར་བྱེད་པ་ཁྲི་ཕྲག་ལྔ་འབྱུང་ངོ་། །སྤངས་ནས་ཀྱང་རིགས་ཀྱི་བུ་དེ་དག་གང་དུ་གནོད་པར་
འགྱུར་བའི་མཚམས་མེད་པར་འགྲོ་བར་འགྱུར་རོ། །གང་དུ་ཕལ་ཆེར་ཚོགས་ནས་མདོ་འདི་ལ་མངོན་དུ་སྨོད་པར་བྱེད་པ་དེ་དག་ཐམས་ཅད་མཚམས་མེད་པར་འགྲོ་བར་འགྱུར་རོ། །བྱང་ཕྱོགས་སུ་མདོ་འདི་ལ་བྱེ་བ་ཕྲག་བརྒྱད་དང་ལྔ་འབུམ་སྤོང་བར་འགྱུར་ཏེ། སྤངས་ནས་མནར་མེད་པར་རབ་ཏུ་

ལྟུང་བར་འགྱུར་རོ། །ཤར་ཕྱོགས་ན་ནི་དད་པར་འགྱུར་བ་ཉུང་ཟད་ཅིག་ཡོད་དེ། མནར་མེད་པའི་ལས་ཕལ་ཆེར་འཛིན་པར་འགྱུར་ཞིང་དེ་ན་བརྒྱ་སྟོང་ཕྲག་མང་པོ་མནར་མེད་པའི་སེམས་ཅན་དམྱལ་བར་འགྲོ་བར་འགྱུར་རོ། །ལྷོ་ཕྱོགས་སུ་སེམས་ཅན་ཉིས་འབུམ་གྱིས་ཆོས་ཀྱི་རྣམ་གྲངས་འདི་སྤོང་
བར་འགྱུར་ཏེ། སྤངས་ནས་མནར་མེད་པའི་སེམས་ཅན་དམྱལ་བ་ཆེན་པོར་འགྲོ་བར་འགྱུར་རོ། །ནུབ་ཕྱོགས་ནས་སེམས་ཅན་འབུམ་རྣམས་ཀྱིས་ཆོས་ཀྱི་རྣམ་གྲངས་འདི་སྤངས་ནས་མནར་མེད་པར་འགྲོ་བར་འགྱུར་རོ། །ཤཱ་རིའི་བུ་སངས་རྒྱས་ཀྱི་ཆོས་ནི་རང་སངས་རྒྱས་རྣམས་ཀྱིས་ཀྱང་མ་ཡིན་ན་ཉན་ཐོས་
རྣམས་ཀྱི་ལྟ་ཅི་སྨོས། སོ་སོའི་སྐྱེ་བོ་འཁོར་བ་འཕེལ་བར་བྱེད་པ་ལྟ་ཡང་ཅི་སྨོས། ཤཱ་རིའི་བུ་འདི་དང་འཚམ་པ་ནི་འདི་ཡིན་ཏེ། སངས་རྒྱས་ནི་བསམ་གྱིས་མི་ཁྱབ་བོ། །སངས་རྒྱས་ཀྱི་ཆོས་རྣམས་ཀྱང་བསམ་གྱིས་མི་ཁྱབ་སྟེ། སངས་རྒྱས་ཀྱི་ཆོས་རྣམས་ནི་སངས་རྒྱས་ཀྱི་ཆོས་ཉིད་ཀྱིས་རབ་ཏུ་
མཁྱེན་གྱི་བདག་གིས་མི་ཤེས་སོ། །མི་ཤེས་པར་ནི་སྤང་བར་མི་བྱ་སྟེ། མདོ་སྡེའི་ཚུལ་འདི་ལྟ་བུའི་ཚིག་བཞི་པའི་ཚིགས་སུ་བཅད་པ་ཙམ་ལ་ཡང་སྤང་བ་བྱས་ན་དེ་སྔ་མ་ཇི་ཙམ་དུ་གྱུར་པ་དེ་བཞིན་དུ་བསོད་ནམས་མ་ཡིན་པའི་ཕུང་པོ་ཡོངས་སུ་འཛིན་པར་འགྱུར་རོ། །ཤཱ་རིའི་བུ་དེ་བས་ན་རིགས་ཀྱི་བུའམ་
རིགས་ཀྱི་བུ་མོས་སྤང་བར་མི་བྱའོ། །དགའ་བར་བྱའོ། །མདོ་སྡེ་འདི་ལྟ་བུ་ལ་གང་བདག་གིས་མ་སྤངས་པས་བདག་བསྐལ་པར་གནས་པའི་ལས་ལས་གྲོལ་བར་གྱུར་ཏེ། དམ་པའི་ཆོས་སྤོང་བར་བྱེད་པ་སེམས་ཅན་དམྱལ་བ་པ་དེ་དག་གི་དྲུང་དུ་ནི་བདག་གནས་པར་མི་བྱའོ་སྙམ་དུ་སེམས་ཏེ། གང་
ཆོས་ཀྱི་རྣམ་གྲངས་འདི་ཉན་པ་དེ་དག་གིས་སངས་རྒྱས་ཀྱི་གསུང་དབྱངས་རབ་ཏུ་འཛིན་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་བཅུ་ན་འཇིག་རྟེན་གྱི་ཁམས་དཔག་མེད་ལྡན་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཆེན་པོ་
ཞེས་བྱ་བ་བཞུགས་ཏེ། ཡང་ཤཱ་རིའི་བུ་འོད་ཆེན་པོའི་མཚན་གང་དག་ཉན་པར་འགྱུར་བ་དང་། དད་པ་ཡང་སྐྱེད་པ་དེ་དག་ཐམས་ཅད་སངས་རྒྱས་བཅོམ་ལྡན་འདས་དང་མི་འབྲལ་བར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཀྱང་ཕྱིར་མི་ལྡོག་པར་འགྱུར་རོ། །འདི་ནས་སངས་

རྒྱས་ཀྱི་ཞིང་སྟོང་ཕྲག་དྲུག་ན་འཇིག་རྟེན་གྱི་ཁམས་མེ་ཏོག་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་དཔག་མེད་ཅེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་དབྱངས་དཔག་མེད་ཀྱི་མཚན་གང་དག་ཉན་པ་
དང་། ཐོས་ནས་ཀྱང་དད་པ་སྐྱེད་ཅིང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་ཕྱག་འཚལ་ལོ་ཞེས་ཆེད་དུ་བརྗོད་པ་ལན་གསུམ་བརྗོད་པ་དེ་དག་འདི་ལྟ་སྟེ། སངས་རྒྱས་ཀྱི་གསུང་དབྱངས་དཔག་ཏུ་མེད་པའི་དབྱངས་འཛིན་པར་འགྱུར་རོ། །འདི་ནས་
སངས་རྒྱས་ཀྱི་ཞིང་སྟོང་ཕྲག་བཞིན་འཇིག་རྟེན་གྱི་ཁམས་རྡུལ་མེད་ཅེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདུད་རྩི་དབྱངས་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་བདུད་རྩི་དབྱངས་ཀྱི་མཚན་གང་དག་ཐོས་པར་གྱུར་ལ་
ཐོས་ནས་ཀྱང་མོས་པར་བྱེད་པ་དེ་དག་ནི། བསྐལ་པ་བཅུ་གཉིས་ཀྱི་བར་དུ་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་ཉི་ཤུའི་ཕ་རོལ་ན་འཇིག་རྟེན་གྱི་ཁམས་གདུལ་དཀའ་ཞེས་བྱ་བ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་གྲགས་པ་ཆེན་པོ་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་གྲགས་པ་ཆེན་པོའི་མཚན་གང་དག་ཉན་པར་འགྱུར་བ་དང་ཡོངས་སུ་སྒྲོགས་ཤིང་འཛིན་པ་ནི་བདུད་སྡིག་ཅན་གྱིས་རབ་ཏུ་གདུལ་དཀའ་བར་འགྱུར་རོ། །འདི་ནས་སངས་རྒྱས་
ཀྱི་ཞིང་སྟོང་ཕྲག་བཅུ་གཉིས་ན་འཇིག་རྟེན་གྱི་ཁམས་བདེ་བ་ཅན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གྲགས་པ་མཐའ་ཡས་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་གྲགས་པ་མཐའ་ཡས་དེའི་མཚན་གང་དག་ཉན་པ་དང་། ཐལ་
མོ་སྦྱོར་ཞིང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གྲགས་པ་མཐའ་ཡས་ལ་ཕྱག་འཚལ་ལོ་ཞེས་ཚིག་ཏུ་སྨྲ་བ་དེ་དག་ནི་བསོད་ནམས་ཀྱི་ཕུང་པོ་ཚད་མེད་པ་དང་ལྡན་པར་འགྱུར་རོ། །རིན་པོ་ཆེའི་ཕུང་པོ་རི་རབ་དང་མཉམ་པ་ལོ་བརྒྱར་སྦྱིན་པ་བྱིན་པའི་བསོད་ནམས་

ཀྱི་ཕུང་པོ་འདིས་སྔ་མ་དེའི་བརྒྱའི་ཆར་ཡང་ཉེ་བར་མི་འགྲོ་བ་ནས་རྒྱུའི་བར་དུ་ཡང་མི་བཟོད་དོ། །འདི་ནས་སངས་རྒྱས་ཀྱི་ཞིང་སྟོང་ཕྲག་གསུམ་ན་འཇིག་རྟེན་གྱི་ཁམས་མན་ཤེལ་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་སྣང་ཞེས་བྱ་བ་བཞུགས་ཏེ།
ཡང་ཤཱ་རིའི་བུ་དེ་བཞིན་གཤེགས་པ་རིན་ཆེན་སྣང་འདིའི་མཚན་གང་དག་འཛིན་པ་དེ་དག་ནི་བསྐལ་པ་བཅུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཀྱང་ཕྱིར་མི་ལྡོག་པར་འགྱུར་རོ། །ཡང་གང་དག་དད་པར་མི་བྱེད་པ་དེ་དག་ནི་བསྐལ་པར་
མཚམས་མེད་པར་གནས་པའི་ལས་ཡོངས་སུ་འཛིན་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་བཅྭ་ལྔ་ན་འཇིག་རྟེན་གྱི་ཁམས་འོད་གསལ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བ་ཆེན་པོ་ཐོབ་པ་ཞེས་བྱ་བ་བཞུགས་ཏེ། ཡང་ཤཱ་རིའི་བུ་
དེ་བཞིན་གཤེགས་པ་བདེ་བ་ཆེན་པོ་ཐོབ་པའི་མཚན་གང་དག་ཉན་པར་འགྱུར་བ་དེ་དག་ཐམས་ཅད་ཀྱིས་སེམས་ཅན་ཐམས་ཅད་བདེ་བར་སྒྲོལ་བར་བྱེད་དོ། །བསོད་ནམས་ཀྱི་ཕུང་པོ་ཚད་མེད་པ་ཡང་ཡོངས་སུ་འཛིན་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་བདུན་ན་འཇིག་རྟེན་གྱི་ཁམས་
ནོར་བུ་སྣང་བ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐར་མ་མར་མེ་སྣང་བ་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་སྐར་མ་མར་མེ་སྣང་བ་དེའི་མཚན་གང་དག་ཉན་པ་དང་། དད་པར་གྱུར་པ་དེ་དག་གང་འདི་དེ་བཞིན་གཤེགས་
པའི་སྟོབས་ཞེས་བྱ་བའི་སྟོབས་དེ་དག་རབ་ཏུ་འཛིན་པར་འགྱུར་རོ། །འདི་ནས་སངས་རྒྱས་ཞིང་སྟོང་ཕྲག་བརྒྱད་ན་འཇིག་རྟེན་གྱི་ཁམས་བདེ་ལྡན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེན་པའི་དབྱངས་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་
གཤེགས་པ་བདེན་པའི་དབྱངས་དེའི་མཚན་གང་དག་ཉན་པར་འགྱུར་བ་དེ་དག་ཐམས་ཅད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པར་འགྱུར་རོ། །འདི་ནས་སངས་རྒྱས་ཀྱི་ཞིང་བརྒྱ་ཕྲག་ཉི་ཤུ་ན་འཇིག་རྟེན་གྱི་ཁམས་གསེར་ཅན་ཞེས་བྱ་བ་ན། དེ་བཞིན་གཤེགས་པ་དགྲ་

བཅོམ་པ་ཡང་དག་པར་རྫོགས་པའི་སངས་རྒྱས་དྲི་མེད་མཐའ་ཡས་ཞེས་བྱ་བ་བཞུགས་ཏེ། ཡང་ཤཱ་རིའི་བུ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ་སྦྱིན་པ་བྱིན་པ་བས། དེ་བཞིན་གཤེགས་པ་དྲི་མེད་མཐའ་ཡས་ཀྱི་མཚན་
ཉན་ཅིང་དད་པ་ཡང་སྐྱེད་པར་འགྱུར་བ་དེ་དག་ནི་དེ་བས་ཆེས་བསོད་ནམས་འདི་མང་དུ་འཕེལ་ལོ། །བསོད་ནམས་ཆུང་ངུས་ནི་དེ་བཞིན་གཤེགས་པ་དྲི་མེད་མཐའ་ཡས་ཀྱི་མཚན་ཐོས་པར་མི་ནུས་སོ། །གང་དག་དེ་བཞིན་གཤེགས་པ་དྲི་མེད་མཐའ་ཡས་ཀྱི་མཚན་ཐོས་པ་དེ་དག་ནི་སངས་རྒྱས་གཅིག་
ལ་དགེ་བའི་རྩ་བ་བསྐྱེད་པ་མ་ཡིན། གཉིས་དང་གསུམ་དང་བཞི་དང་ལྔ་ནས་བཅུའི་བར་དུ་མ་ཡིན་གྱི་སེམས་ཅན་དེ་དག་གིས་ནི་སངས་རྒྱས་བརྒྱ་ལ་དགེ་བའི་རྩ་བ་བསྐྱེད་པ་ཡིན་ནོ། །དེ་དག་ནི་བསྐལ་པ་ལྔ་བཅུ་རྩ་བརྒྱད་ཀྱི་བར་དུ་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །འདི་
ནས་སངས་རྒྱས་ཀྱི་ཞིང་སྟོང་ཕྲག་དགུ་ན་འཇིག་རྟེན་གྱི་ཁམས་དབྱངས་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་ལྟར་དཀར་བ་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་ཟླ་བ་ལྟར་དཀར་བའི་མཚན་གང་དག་ཉན་པ་
དེ་དག་ཐམས་ཅད་ཀྱི་ཆོས་དཀར་པོ་ཡང་ཟླ་བ་ལྟ་བུར་འགྱུར་ཞིང་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་གི་ཐ་མ་ན་འཇིག་རྟེན་གྱི་ཁམས་ཉི་མ་ཅན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཟླ་འོད་ཅེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་ཟླ་འོད་ཀྱི་མཚན་གང་དག་ཉན་ཅིང་ཐོས་ནས་ཀྱང་པུས་མོ་གཡས་པའི་ལྷ་ང་ས་ལ་བཙུགས་ཏེ། །དེ་བཞིན་གཤེགས་པ་ཟླ་འོད་དེ་ལ་ཕྱག་འཚལ་ལོ་ཞེས་ཆེད་དུ་བརྗོད་པ་ལན་གསུམ་དུ་བརྗོད་པ་དང་། ཡང་གང་
དག་གིས་ཆེད་དུ་བརྗོད་པར་བྱ་བ་རྗོད་པར་བྱེད་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་བར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་སུམ་ཅུ་ན་འཇིག་རྟེན་གྱི་ཁམས་དྲི་མ་མེད་པ་ཅན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་

སངས་རྒྱས་དྲི་མ་མེད་པའི་འོད་ཅེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་དྲི་མ་མེད་པའི་འོད་ཀྱི་མཚན་ལྷའམ་ཀླུའམ་མི་གང་དག་ཉན་པར་འགྱུར་བ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །དེ་དག་ལོག་པར་ལྟུང་བའི་
འཇིགས་པའང་དོགས་པར་མི་བྱའོ། །འདི་ནས་སངས་རྒྱས་ཀྱི་ཞིང་ཉིས་སྟོང་ལྔ་བརྒྱ་ན་འཇིག་རྟེན་གྱི་ཁམས་བཻ་དཱུརྱའི་སྣང་བ་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དག་པ་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་འོད་དག་
པའི་མཚན་ལྷའམ། ཀླུའམ། གནོད་སྦྱིན་ནམ། དྲི་ཟའམ། མི་འམ་ཅིའམ། ལྟོ་འཕྱེ་ཆེན་པོའམ། མིའམ། མི་མ་ཡིན་པ་གང་དག་ཉན་པར་འགྱུར་བ་དེ་དག་ཐམས་ཅད་མིར་འགྱུར་བ་འཐོབ་པར་འགྱུར་རོ། །འདོད་ཆགས་དང་ཞེ་སྡང་དང་གཏི་མུག་ཀྱང་ཡོངས་སུ་སྤྱོད་པར་བྱེད་དོ། །ཤཱ་རིའི་བུ་
གང་དག་དེ་བཞིན་གཤེགས་པ་འོད་དག་པ་དེའི་མཚན་ཐོས་པ་དད་ལྡན་པའི་དགེ་བའི་རྩ་བ་ལ་དེ་དག་དད་པར་མི་བྱེད་ཅིང་ཡིད་མ་ཆེས་པ་ལས་བྱུང་བ་མི་དགེ་བའི་ལས་ཀྱིས་དེ་ལྟ་བུར་ག་ལ་འགྱུར་ཞེས་ཚིག་ཏུའང་སྨྲས་ན། ལོ་སྟོང་ཕྲག་དྲུག་ཅུར་དམྱལ་བ་ཆེན་པོ་འོ་དོད་འབོད་པ་ཞེས་བྱ་བར་
བཙོ་བར་འགྱུར་རོ། །འདི་ནས་སངས་རྒྱས་ཀྱི་ཞིང་བརྒྱ་སྲིད་ན་འཇིག་རྟེན་གྱི་ཁམས་ལེགས་པར་ཐོབ་པ་དང་ལྡན་པ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་འོད་ཅེས་བྱ་བ་བཞུགས་ཏེ། ཡང་ཤཱ་རིའི་བུ་གང་དག་དེ་བཞིན་གཤེགས་པ་ཉི་འོད་
ལ་རྗེས་སུ་དྲན་པར་བྱེད་ན་དེ་དག་ཐམས་ཅད་ཀྱི་ཆོས་དཀར་པོ་ཉི་མའི་དཀྱིལ་འཁོར་ལྟ་བུར་འགྱུར་རོ། །བདུད་ཀྱི་སྡེ་ཐམས་ཅད་ཀྱང་རྣམ་པར་འཇིག་པར་བྱེད་དོ། །མུ་སྟེགས་གཞན་ཡང་ཕམ་པར་བྱེད་དོ། །བསྐལ་པ་སུམ་ཅུར་འཁོར་བ་ལ་རྒྱབ་ཀྱིས་ཕྱོགས་པར་འགྱུར་རོ། །འདི་
ནས་སངས་རྒྱས་ཀྱི་ཞིང་སྟོང་ཕྲག་དྲུག་ཅུ་བས་ཆེས་རིང་བ་འཇིག་རྟེན་གྱི་ཁམས་བྱང་ཆུབ་ཀྱི་ཡན་ལག་རབ་ཏུ་བརྒྱན་པ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མཐའ་ཡས་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་རིན་

ཆེན་མཐའ་ཡས་ཀྱི་མཚན་གང་དག་ཉན་པ་དེ་དག་ཐམས་ཅད་ཀྱིས་བྱང་ཆུབ་ཀྱི་ཡན་ལག་འཐོབ་པར་འགྱུར་རོ། །སེམས་ཅན་ཡང་དཀོན་མཆོག་དམ་པ་ལ་འགོད་པར་བྱེད་དོ། །དེ་དག་ཉིན་མཚན་དུ་ཡང་བསོད་ནམས་ཀྱི་ཕུང་པོ་ཚད་མེད་པར་འགྱུར་རོ། །འདི་ནས་སངས་རྒྱས་ཀྱི་ཞིང་ལྔ་
བརྒྱ་སྙེད་ན་འཇིག་རྟེན་གྱི་ཁམས་པད་མོ་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མོའི་བླ་མ་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་པད་མོའི་བླ་མའི་མཚན་གང་དག་ཉན་པ་དང་། དད་པ་ཡང་སྐྱེད་ནི་འཇིག་རྟེན་ན་དེ་དག་
ཐམས་ཅད་པད་མོ་དང་འདྲ་བར་འགྱུར་ཏེ། དགེ་བའི་ཆོས་ཀྱིས་མངོན་པར་འཕགས་པར་འགྱུར་རོ། །པད་མོ་ཆུའི་ནང་ནས་སྐྱེས་ཀྱང་ཆུ་མི་ཆགས་པ་བཞིན་དུ་བསྐལ་པ་ལྔ་བཅུ་རྩ་ལྔར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །འདི་ནས་སངས་རྒྱས་ཀྱི་ཞིང་བྱེ་བ་བརྒྱ་ཕྲག་སྟོང་བས་ཆེས་རིང་བ་
འཇིག་རྟེན་གྱི་ཁམས་མྱ་ངན་དང་གནོད་པ་ཐམས་ཅད་ལས་འདས་པ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡན་ལག་བླ་མ་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་ཡན་ལག་བླ་མའི་མཚན་གང་དག་ཉན་པར་འགྱུར་བ་དེ་དག་ཐམས་ཅད་ཀྱིས་
སྲེད་པའི་ཆུའི་རྒྱ་མཚོ་ཆེན་པོ་ལས་འཇིག་རྟེན་གྱི་ཁམས་མྱ་ངན་དང་གནོད་པ་ཐམས་ཅད་ལས་སྒྲོལ་བ་ཞེས་བྱ་བར་སྒྲོལ་བར་བྱེད་དོ། །འཇིག་རྟེན་ཐམས་ཅད་ཀྱི་སྦྱིན་གནས་སུ་ཡང་འགྱུར་རོ། །གང་དག་ཐོས་ནས་དད་པ་སྐྱེད་པ་དེ་དག་ཐམས་ཅད་མེ་ཏོག་དང་འདྲ་བར་གྱུར་ཏེ། འཇིག་རྟེན་ཐམས་ཅད་ཀྱི་
སློབ་དཔོན་དུ་འགྱུར་རོ། །མཐུ་བོ་ཆེའི་ལུས་ལྟར་མཁྲེགས་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཀྱང་ཕྱིར་ལྡོག་པར་མི་འགྱུར་རོ། །ཡང་བུད་མེད་གང་དག་དེ་བཞིན་གཤེགས་པ་ཡན་ལག་བླ་མའི་མཚན་ཉན་ཅིང་ཐོས་ནས་ཀྱང་དད་པ་སྐྱེད་པ་ནི་དེས་བུད་མེད་ལས་བསྒྱུར་
བར་འགྱུར་རོ། །ཤཱ་རིའི་བུ་དེ་བས་ན་རིགས་ཀྱི་བུའམ་རིགས་ཀྱི་བུ་མོས་ཕན་ཡོན་འདི་དག་འདོད་པ་དང་སེམས་ཅན་སྡུག་བསྔལ་བ་རྣམས་དགྲོལ་བར་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱ་ན། དེ་བཞིན་གཤེགས་པ་ཡན་ལག་གི་བླ་མའི་མཚན་མཉན་པར་བྱའོ། །

འདི་ནས་སངས་རྒྱས་ཀྱི་ཞིང་བརྒྱ་ཕྲག་ཉི་ཤུ་ན་འཇིག་རྟེན་གྱི་ཁམས་སྙིང་པོ་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་འོད་དམ་པ་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་གསེར་འོད་དམ་པའི་མཚན་གང་དག་ཉན་
ཅིང་ཐོས་ནས་ཀྱང་དད་པ་སྐྱེད་པ་དེ་དག་ཐམས་ཅད་ཀྱིས་འོད་འཐོབ་པར་འགྱུར་ཏེ། གང་འདི་སངས་རྒྱས་ཀྱི་འོད་དང་སྟོབས་རྣམས་ཀྱང་རབ་ཏུ་འཛིན་པར་འགྱུར་རོ། །མི་འཇིགས་པ་རྣམས་དང་། སངས་རྒྱས་ཀྱི་ཕན་ཡོན་རྣམས་ཀྱང་རབ་ཏུ་ཐོབ་པར་འགྱུར་རོ། །སངས་རྒྱས་ཐམས་ཅད་ལ་
དད་པར་བྱ་བ་དང་། བསོད་ནམས་རྒྱ་ཆེན་པོ་ཡང་བྱའོ། །བསོད་ནམས་ཆུང་དུས་ནི་འདི་ལ་རེ་བར་མི་བྱ་སྟེ། དེ་བཞིན་གཤེགས་པའི་བསྟན་པ་འདི་འདྲ་བས་རྡོ་རྗེ་ལྟ་བུའི་སེམས་བསྐྱེད་ནས་བྱང་ཆུབ་པར་བྱ་བའི་ཕྱིར་བྱང་ཆུབ་ཏུ་སེམས་སྐྱེད་པར་བྱེད་པ་ནི་མཚན་འདི་ཐོས་པར་མི་དཀའོ། །བསྐལ་
པ་བཅུ་གཉིས་སུ་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །འདི་ནས་སངས་རྒྱས་ཀྱི་ཞིང་བཅོ་བརྒྱད་ན་འཇིག་རྟེན་གྱི་ཁམས་མུ་ཏིག་གི་དྲ་བ་ཡོངས་སུ་དག་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚངས་པའི་དབང་ཕྱུག་རྒྱལ་པོ་ཞེས་བྱ་བ་
བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་ཚངས་པའི་དབང་ཕྱུག་རྒྱལ་པོའི་མཚན་གང་དག་ཐོས་པར་འགྱུར་ཞིང་ཐོས་ནས་ཀྱང་དད་པ་རབ་ཏུ་འཐོབ་པ་དང་། ཐལ་མོ་སྦྱར་བར་བྱེད་པ་དེ་དག་ཐམས་ཅད་དེ་བཞིན་གཤེགས་པ་དང་འབྲལ་བར་མི་འགྱུར་ཞིང་དེ་ནས་འཁོར་ལོས་
སྒྱུར་བའི་རྒྱལ་པོ་བྱེད་པར་འགྱུར་ཏེ། ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །འདི་ནས་སངས་རྒྱས་ཀྱི་ཞིང་བརྒྱ་ཕྲག་ཉི་ཤུ་ན་འཇིག་རྟེན་གྱི་ཁམས་ཟླ་བ་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་གསེར་ལྟར་སྣང་བ་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་གསེར་ལྟར་སྣང་བའི་མཚན་གང་དག་ཐོས་པར་འགྱུར་བ་དེ་དག་ཐམས་ཅད་ཐ་ན་རྨི་ལམ་ན་ཡང་ཆོས་ཀྱི་རང་བཞིན་མིག་ཡོར་དང་འདྲ་བར་རྒྱ་ཆེར་སྟོན་པར་འགྱུར་རོ། །ལོག་པར་ལྟུང་

བར་ཡང་མི་འགྱུར་ཏེ། བསོད་ནམས་ཀྱི་ཕུང་པོ་ཆེན་པོ་དང་ལྡན་པར་འགྱུར་རོ། །སེམས་ཅན་ཚད་མེད་པ་རྣམས་ལ་ཡང་བདེ་བ་དང་ཡིད་བདེ་བར་བྱེད་པར་འགྱུར། འཇིག་རྟེན་འཛིན་པར་བྱེད། ཐེག་པ་ཆེན་པོས་ཀྱང་ངེས་པར་འབྱུང་བར་འགྱུར་རོ། །སངས་རྒྱས་ཀྱི་ཞིང་བཅུའི་ཐ་མ་ན་
འཇིག་རྟེན་གྱི་ཁམས་མེ་སྒྲོན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་གྱི་འབྱུང་གནས་ཞེས་བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་གསེར་གྱི་འབྱུང་གནས་ཀྱིས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བདག་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་སངས་རྒྱས་པའི་སངས་རྒྱས་ཀྱི་ཞིང་དུ་སེམས་ཅན་གང་དག་སྐྱེ་བར་འགྱུར་བ་དང་། འཇིག་རྟེན་གྱི་ཁམས་གཞན་དག་གི་སེམས་ཅན་གང་དག་གིས་བདག་གི་མིང་ཐོས་པར་གྱུར་པ་དེ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱ་བའི་ཕྱིར།
དེ་ལྟར་བདག་གིས་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱའོ་ཞེས་དེ་སྙམ་དུ་བསམས་སོ། །འདི་ནས་སངས་རྒྱས་ཀྱི་ཞིང་བཅྭ་བརྒྱད་ན་འཇིག་རྟེན་གྱི་ཁམས་སྦྲང་རྩི་ཅན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀླུའི་དབང་ཕྱུག་རྒྱལ་པོ་ཞེས་
བྱ་བ་བཞུགས་ཏེ། ཡང་ཤཱ་རིའི་བུ་དེ་བཞིན་གཤེགས་པ་ཀླུའི་དབང་ཕྱུག་རྒྱལ་པོ་དེའི་མཚན་གང་དག་ཐོས་པར་འགྱུར་བ་ནི་ཀླུ་རྣམས་ཀྱིས་གང་གི་ཚེ་ན། གྲོང་ངམ་ཕྱོགས་སུ་ལྕེ་འབབ་པ་དེའི་ཚེ་ན། པུས་མོ་གཡས་པའི་ལྷ་ང་ས་ལ་བཙུགས་ཏེ་འདི་སྐད་དུ་སྨྲ་བར་བྱའོ། །བདེན་པ་གང་
དང་བདེན་པའི་ཚིག་གིས་དེ་བཞིན་གཤེགས་པ་ཀླུའི་དབང་ཕྱུག་རྒྱལ་པོས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཀླུར་གྱུར་པས། གང་ཀླུ་རྣམས་ཀྱི་ཉམ་ང་བ་ལས་བྱུང་བ་དེ་དང་དེ་ལས་ཐར་པར་བྱས། ཀླུ་མང་པོ་དང་། ཀླུ་མང་པོ་བརྒྱ་དང་། ཀླུ་མང་པོ་སྟོང་དང་། ཀླུ་
མང་པོ་བརྒྱ་སྟོང་རྣམས་ཉམ་ང་བ་ལས་ཐར་པར་བྱས་པས། དགེ་བའི་རྩ་བ་འདིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་གནས་པའམ། ཡོངས་སུ་མྱ་ངན་ལས་འདས་ཀྱང་རུང་སྟེ། འཇིག་རྟེན་གྱི་ཁམས་གཞན་དག་ཏུ་ཡང་ཀླུ་གང་

དང་གང་དག་གིས་ལྕེ་འབེབས་པའམ། གནོད་པའི་སེར་བ་འབེབས་པར་འགྱུར་བའམ། འཇིགས་པའམ། ནད་དམ། གནོད་པའམ། ནད་འགོ་བ་གཏོང་བ་དེར་བདག་གི་མིང་བརྗོད་ན་གནོད་པ་དེ་དག་ཐམས་ཅད་མེད་པར་གྱུར་ཅིག །བདེན་པའི་ཚིག་དེས་བདེ་བར་གྱུར་ཅིག་ཅེས་སྨོན་ལམ་བཏབ་
སྟེ། ཤཱ་རིའི་བུ་བདེན་པ་དང་བདེན་པའི་ཚིག་དེས་སེམས་ཅན་དེ་རྣམས་ཀྱི་རྣམ་པར་སྨིན་པ་ཡང་བདེ་བ་