108 Bài Tán Tụng Phật Giáo (108 Buddhist Stotras)

1) List of stotras (WITHOUT diacritics):
BuSto_1:   Adhyardhasataka
BuSto_2:   Adibuddhadvadasakastotra
BuSto_3:   Akasagarbhanamastottarasatastotra
BuSto_4:   (Arya)manjusrinamastottarasatakastotra
BuSto_5:   (Arya)taranamaskaraikavimsatistotra
BuSto_6:   (Arya)tarasragdharastotra
BuSto_7:   (Arya)tarastottarasatanamastotra
BuSto_8:   (Arya)tarastuti
BuSto_9:   Astamatrkastotra
BuSto_10:   Avadhanastotra
BuSto_11:   Avalokitesvarahayagrivadharani
BuSto_12:   Avalokitesvarastakastotra
BuSto_13:   Avalokitesvarastava
BuSto_14:   Avalokitesvarastotra
BuSto_15:   Avalokitesvarastotra
BuSto_16:   Avalokitesvarastottarasatanamastotra
BuSto_17:   Bhadracaripranidhanastotra
BuSto_18:   Bhaktisataka
BuSto_19:   Buddhabhattarakastotra
BuSto_20:   Buddhagandistava
BuSto_21:   Buddhastotra
BuSto_22:   Caityavandanastotra
BuSto_23:   Cakrasamvarastuti
BuSto_24:   Candikadandakastotra
BuSto_25:   Catuhsastisamvarastotra
BuSto_26:   Dasabhumisvaro nama mahayanasutraratnarajastotra
BuSto_27:   Dharmadhatunamastava
BuSto_28:   Dharmadhatuvagisvaramandalastotra
BuSto_29:   Gandistava
BuSto_30:   Ganesastotra
BuSto_31:   Guhyesvaristotra
BuSto_32:   Gururatnatrayastotra
BuSto_33:   Haratistotra
BuSto_34:   Kalyanapancavimsatistotra
BuSto_35:   Kalyanatrimsatikastotra
BuSto_36:   Kamalakarasarvatathagatastotra
BuSto_37:   Lokanathastotra
BuSto_38:   Lokatitastava
BuSto_39:   Lokesvarasataka
BuSto_40:   Lokesvarastotra
BuSto_41:   Madhyamakasastrastuti
BuSto_42:   Mahabodhibhattarakastotra
BuSto_43:   Mahabodhivandanastaka
BuSto_44:   Mahacakravartinamastottarasatastotra
BuSto_45:   Mahakalastotra
BuSto_46:   Mahapratisarastotra
BuSto_47:   Mahogratarastakastotra
BuSto_48:   Mahogratarastuti
BuSto_49:   Mangalasodasastuti
BuSto_50:   Mangalastaka
BuSto_51:   Manjusristotra
BuSto_52:   Manjuvajrastotra
BuSto_53:   Maravijayastotra
BuSto_54:   Nairatmastakastotra
BuSto_55:   Narakoddharastotra
BuSto_56:   Niraupamyastava
BuSto_57:   Pancaksarastotra
BuSto_58:   Pancaraksadevistotrani
BuSto_59:   Pancatathagatastotra
BuSto_60:   Pancatathagatastutigatha
BuSto_61:   Paramarthastava
BuSto_62:   Pithastava
BuSto_63:   Potalakastaka
BuSto_64:   Prajnaparamitastotra
BuSto_65:   Prajnaparamitastuti
BuSto_66:   Pratisarastotra
BuSto_67:   Raksakala(kara)stava
BuSto_68:   Ratnamalastotra
BuSto_69:   Rupastava
BuSto_70:   Sadabhijnastotra
BuSto_71:   Sadgatistotra
BuSto_72:   Saptabuddhastotra
BuSto_73:   Saptajinastava
BuSto_74:   Saptaksarastotra
BuSto_75:   Saptavidhanuttarastotra
BuSto_76:   Satparamitastotra
BuSto_77:   Sattrimsatsamvarastuti
BuSto_78:   Sattvaradhanagatha
BuSto_79:   Sakyasimhastotra (brahmana krtam)
BuSto_80:   Sakyasimhastotra (chando 'mrtoddhrtam)
BuSto_81:   Sakyasimhastotra (durgatiparisodhanoddhrtam)
BuSto_82:   Sakyasimhastotra (navagrahakrtam)
BuSto_83:   Sakyasimhastotra (sankarakrtam)
BuSto_84:   Sakyasimhastotra (surapatikrtam)
BuSto_85:   Sakyasimhastotra (visnukrtam)
BuSto_86:   Sakyasimhastotra (yasodharakrtam)
BuSto_87:   Saradastakastotra
BuSto_88:   Sragdharapancakastotra
BuSto_89:   Suprabhatastotra
BuSto_90:   Svayambhustava
BuSto_91:   Svayambhustotra
BuSto_92:   Vagisvaravarnanastotra
BuSto_93:   Vagvanistotra
BuSto_94:   Vajradevistotra
BuSto_95:   Vajramahakalastotra
BuSto_96:   Vajrapaninamastottarasatastotra
BuSto_97:   Vajrasattvastotra
BuSto_98:   Vajrasattvastuti
BuSto_99:   Vajravilasinistotra
BuSto_100:   Vajravilasinisadhanastava
BuSto_101:   Vajrayoginipranamaikavisika
BuSto_102:   Vajrayoginyah pindarthastuti
BuSto_103:   Vajrayoginyah stutipranidhana
BuSto_104:   Vasantatilakastuti
BuSto_105:   Vasudharanamadharanistotra
BuSto_106:   Vasudharastotra
BuSto_107:   Vidyaksarastotra
BuSto_108:   Advayaparamartha namasangiti
2) List of stotras (WITH diacritics):
BuSto_1:   Adhyardhaśataka
BuSto_2:   Ādibuddhadvādaśakastotra
BuSto_3:   Ākāśagarbhanāmāṣṭottaraśatastotra
BuSto_4:   (Ārya)mañjuśrīnāmāṣṭottaraśatakastotra
BuSto_5:   (Ārya)tārānamaskāraikaviṃśatistotra
BuSto_6:   (Ārya)tārāsragdharāstotra
BuSto_7:   (Ārya)tārāṣṭottaraśatanāmastotra
BuSto_8:   (Ārya)tārāstuti
BuSto_9:   Aṣṭamātṛkāstotra
BuSto_10:   Avadhānastotra
BuSto_11:   Avalokiteśvarahayagrīvadhāraṇī
BuSto_12:   Avalokiteśvarāṣṭakastotra
BuSto_13:   Avalokiteśvarastava
BuSto_14:   Avalokiteśvarastotra
BuSto_15:   Avalokiteśvarastotra
BuSto_16:   Avalokiteśvarāṣṭottaraśatanāmastotra
BuSto_17:   Bhadracarīpraṇidhānastotra
BuSto_18:   Bhaktiśataka
BuSto_19:   Buddhabhaṭṭārakastotra
BuSto_20:   Buddhagaṇḍīstava
BuSto_21:   Buddhastotra
BuSto_22:   Caityavandanāstotra
BuSto_23:   Cakrasaṃvarastuti
BuSto_24:   Caṇḍikādaṇḍakastotra
BuSto_25:   Catuḥṣaṣṭisaṃvarastotra
BuSto_26:   Daśabhūmīśvaro nāma mahāyānasūtraratnarājastotra
BuSto_27:   Dharmadhātunāmastava
BuSto_28:   Dharmadhātuvāgīśvaramaṇḍalastotra
BuSto_29:   Gaṇḍīstava
BuSto_30:   Gaṇeśastotra
BuSto_31:   Guhyeśvarīstotra
BuSto_32:   Gururatnatrayastotra
BuSto_33:   Hāratīstotra
BuSto_34:   Kalyāṇapañcaviṃśatistotra
BuSto_35:   Kalyāṇatriṃśatikāstotra
BuSto_36:   Kamalākarasarvatathāgatastotra
BuSto_37:   Lokanāthastotra
BuSto_38:   Lokātītastava
BuSto_39:   Lokeśvaraśataka
BuSto_40:   Lokeśvarastotra
BuSto_41:   Madhyamakaśāstrastuti
BuSto_42:   Mahābodhibhaṭṭārakastotra
BuSto_43:   Mahābodhivandanāṣṭaka
BuSto_44:   Mahācakravartināmāṣṭottaraśatastotra
BuSto_45:   Mahākālastotra
BuSto_46:   Mahāpratisarāstotra
BuSto_47:   Mahogratārāṣṭakastotra
BuSto_48:   Mahogratārāstuti
BuSto_49:   Maṅgalaṣoḍaśastuti
BuSto_50:   Maṅgalāṣṭaka
BuSto_51:   Mañjuśrīstotra
BuSto_52:   Mañjuvajrastotra
BuSto_53:   Māravijayastotra
BuSto_54:   Nairātmāṣṭakastotra
BuSto_55:   Narakoddhārastotra
BuSto_56:   Niraupamyastava
BuSto_57:   Pañcākṣarastotra
BuSto_58:   Pañcarakṣādevīstotrāṇi
BuSto_59:   Pañcatathāgatastotra
BuSto_60:   Pañcatathāgatastutigāthā
BuSto_61:   Paramārthastava
BuSto_62:   Pīṭhastava
BuSto_63:   Potalakāṣṭaka
BuSto_64:   Prajñāpāramitāstotra
BuSto_65:   Prajñāpāramitāstuti
BuSto_66:   Pratisarāstotra
BuSto_67:   Rakṣākāla(kara)stava
BuSto_68:   Ratnamālāstotra
BuSto_69:   Rūpastava
BuSto_70:   Ṣaḍabhijñastotra
BuSto_71:   Ṣaḍgatistotra
BuSto_72:   Saptabuddhastotra
BuSto_73:   Saptajinastava
BuSto_74:   Saptākṣarastotra
BuSto_75:   Saptavidhānuttarastotra
BuSto_76:   Ṣaṭpāramitāstotra
BuSto_77:   Ṣaṭtriṃśatsaṃvarastuti
BuSto_78:   Sattvārādhanagāthā
BuSto_79:   Śākyasiṃhastotra (brahmaṇā kṛtam)
BuSto_80:   Śākyasiṃhastotra (chando 'mṛtoddhṛtam)
BuSto_81:   Śākyasiṃhastotra (durgatipariśodhanoddhṛtam)
BuSto_82:   Śākyasiṃhastotra (navagrahakṛtam)
BuSto_83:   Śākyasiṃhastotra (śaṅkarakṛtam)
BuSto_84:   Śākyasiṃhastotra (surapatikṛtam)
BuSto_85:   Śākyasiṃhastotra (viṣṇukṛtam)
BuSto_86:   Śākyasiṃhastotra (yaśodharākṛtam)
BuSto_87:   Śāradāṣṭakastotra
BuSto_88:   Sragdharāpañcakastotra
BuSto_89:   Suprabhātastotra
BuSto_90:   Svayaṃbhūstava
BuSto_91:   Svayambhūstotra
BuSto_92:   Vāgīśvaravarṇanāstotra
BuSto_93:   Vāgvāṇīstotra
BuSto_94:   Vajradevīstotra
BuSto_95:   Vajramahākālastotra
BuSto_96:   Vajrapāṇināmāṣṭottaraśatastotra
BuSto_97:   Vajrasattvastotra
BuSto_98:   Vajrasattvastuti
BuSto_99:   Vajravilāsinīstotra
BuSto_100:   Vajravilāsinīsādhanāstava
BuSto_101:   Vajrayoginīpraṇāmaikaviśikā
BuSto_102:   Vajrayoginyāḥ piṇḍārthastuti
BuSto_103:   Vajrayoginyāḥ stutipraṇidhāna
BuSto_104:   Vasantatilakāstuti
BuSto_105:   Vasudhārānāmadhāraṇīstotra
BuSto_106:   Vasudhārāstotra
BuSto_107:   Vidyākṣarastotra
BuSto_108:   Advayaparamārthā nāmasaṅgīti
___________________________________________________________________________
Digital Sanskrit Buddhist Canon, Stotra section, text no. 1:
Adhyardhaśatakaṃ nāma stotram
ācāryamātṛceṭaviracitam (Prasādapratibhodhava = Śatapañcāśatka of Mātṛceṭa)
1 upodghātaḥ
namo buddhāya
sarvadā sarvathā sarve yasya doṣā na santi ha /
sarve sarvābhisāreṇa yatra cāvasthitā guṇāḥ // BuSto_1.1 //
tameva śaraṇaṃ gantuṃ taṃ stotuṃ tamupāsitum /
tasyaiva śāsane sthātuṃ nyāyyaṃ yadyasti cetanā // BuSto_1.2 //
savāsanāśca te doṣā na santyekasya tāyinaḥ /
sarve sarvavidaḥ santi guṇāste cānapāyinaḥ // BuSto_1.3 //
na hi pratiniviṣṭo 'pi manovākkāyakarmasu /
saha dharmeṇa labhate kaścidbhagavato 'ntaram // BuSto_1.4 //
so 'haṃ prāpya manuṣyatvaṃ sasaddharmamahotsavam /
mahārṇavayugacchidrakūrmagrīvārpaṇopamam // BuSto_1.5 //
anityatāvyanusṛtāṃ karmacchidrasasaṃśayām /
āttasārāṃ kariṣyāmi kathaṃ nemāṃ sarasvatīm // BuSto_1.6 //
ityasaṃkhyeyaviṣayānavetyāpi guṇānmuneḥ /
tadekadeśapraṇayaḥ kriyate svārthagauravāt // BuSto_1.7 //
svayambhuve namaste 'stu prabhūtādbhutakarmaṇe /
yasya saṃkhyāprabhāvābhyāṃ na guṇeṣvasti niścayaḥ // BuSto_1.8 //
iyanta iti nāstyanta īdṛśā iti kā kathā /
puṇyā ityeva tu guṇānprati te mukharā vayam // BuSto_1.9 //
upodghātastavo nāma prathamaḥ paricchedaḥ /
hetustavaḥ
viṣahyamaviṣahyaṃ vetyavadhūya vicāraṇām /
svayamabhyupapannaṃ te nirākrandamidaṃ jagat // BuSto_1.10 //
avyāpāritasādhustvaṃ tvamakāraṇavatsalaḥ /
asaṃstutasakhāśca tvamanavaskṛtabāndhavaḥ // BuSto_1.11 //
svamāṃsānyapi dattāni vastuṣvanyeṣu kā kathā /
prāṇairapi tvayā sādho mānitaḥ praṇayī janaḥ // BuSto_1.12 //
svaiḥ śarīraiḥśarīrāṇi prāṇaiḥprāṇāḥ śarīriṇām /
jighāṃsubhirupāttānāṃ krītāni śataśastvayā // BuSto_1.13 //
na durgatibhyāṃ neṣṭā[bhyā] mabhiprārthayatā gatim /
kevalāśayaśuddhayaiva śolaṃ sātmīkṛtaṃ tvayā // BuSto_1.14 //
jihmāanāṃ nityavikṣepādṛjūnāṃ nityasevanāt /
karmaṇāṃ pariśuddhānāṃ tvamekāyanatāṃ gataḥ // BuSto_1.15 //
pīḍayamānena bahuśastvayā kalyāṇacetasā /
kleśeṣu vivṛtaṃ tejo janaḥ kliṣṭo 'nukampitaḥ // BuSto_1.16 //
parārthe tyajataḥ prāṇān yā prītirabhavat tava /
na sā naṣṭopalabdheṣu prāṇeṣu prāṇināṃ bhavet // BuSto_1.17 //
yadrujā nirapekṣasya cchidyamānasya te 'sakṛt /
vadhakeṣvapi sattveṣu kāruṇyamabhavat prabho // BuSto_1.18 //
samyaksambodhibījasya cittaratnasya tasya te /
tvameva vīra sārajño dūre tasyetaro janaḥ // BuSto_1.19 //
nākṛtvā duṣkaraṃ karma durlabhaṃ labhyate padam /
ityātmanirapekṣeṇa vīryaṃ saṃvardhitaṃ tvayā // BuSto_1.20 //
viśeṣotkarṣaniyamo na kadācidabhūt tava /
atastvayi viśeṣāṇāṃ chinnastaratamakramaḥ // BuSto_1.21 //
susukheṣvapi saṅgo 'bhūt saphaleṣu samādhiṣu /
na te nityānubaddhasya mahākaruṇayā hṛdi // BuSto_1.22 //
tvādṛśān pīḍayatyeva nānugṛhṇāti tat sukham /
praṇītamapi sadvṛtta yadasādhāraṇaṃ paraiḥ // BuSto_1.23 //
vimiśrāt sāramādattaṃ sarvaṃ pītamakalmaṣam /
tvayā sūktaṃ duruktaṃ tu viṣavat parivarjitam // BuSto_1.24 //
krīṇatā ratnasārajña prāṇairapi subhāṣitam /
parākrāntaṃ tvayā bodhau tāsu tāsūpapattiṣu // BuSto_1.25 //
iti tribhirasaṃkhyeyairevamudyacchatā tvayā /
vyavasāyadvitīyena prāptaṃ padamanuttaram // BuSto_1.26 //
hetustavo nāma dvitīyaḥ paricchedaḥ /
3 nirupamastavaḥ
akṛtverṣyāṃ viśiṣṭeṣu hīnānanavamatya ca /
agatvā sadṛśaiḥ spardhāṃ tvaṃ loke śreṣṭhatāṃ gataḥ // BuSto_1.27 //
hetuṣvabhiniveśo 'bhūd guṇānāṃ na phaleṣu te /
tena samyakpratipadā tvayi niṣṭhāṃ guṇā gatāḥ // BuSto_1.28 //
tathātmā pracayaṃ nītastvayā sucaritairyathā /
puṇyāyatanatāṃ prāptānyapi pādarajāṃsi te // BuSto_1.29 //
karśayitvoddhṛtā doṣā vardhayitvā viśodhitāḥ /
guṇāstena sunītena parāṃ siddhiṃ tvamadhyagāḥ // BuSto_1.30 //
tathā sarvābhisāreṇa doṣeṣu prahṛtaṃ tvayā /
yathaiṣāmātmasantāne vāsanāpi na śeṣitā // BuSto_1.31 //
tathā saṃbhṛtya saṃbhṛtya tvayātmanyāhitā guaṇāḥ /
pratirupakamapyeṣāṃ yathā nānyatra dṛśyate // BuSto_1.32 //
upaghātāvaraṇavanmitakālaṃ pradeśi ca /
sulabhātiśayaṃ sarvamupamāvastu laukikam // BuSto_1.33 //
advandvināmagamyānāṃ dhruvāṇāmanivartinām /
anuttarāṇāṃ kā tarhi guṇānāmupamā 'stu te // BuSto_1.34 //
goṣpadottānatāṃ yāti gāmbhīryaṃ lavaṇāmbhasaḥ /
yadā te buddhigāmbhīryamagādhāpāramīkṣyate // BuSto_1.35 //
śirīṣapakṣmāgralaghu sthairyaṃ bhavati pārthivam /
akampye sarvadharmāṇāṃ tvatsthairye 'bhimukhīkṛte // BuSto_1.36 //
ajñānatimiraghnasya jñānālokasya te mune /
na ravirviṣaye bhūmiṃ khādyotimapi vindati // BuSto_1.37 //
malinatvamivāyānti śaraccandrāmbarāmbhasām /
tava vāgbuddhiceṣṭānāṃ śuddhiṃ prati viśuddhayaḥ // BuSto_1.38 //
anena sarvaṃ vyākhyātaṃ yat kiñcitsādhu laukikam /
dūre hi buddhadharmāṇāṃ lokadharmāstapasvinaḥ // BuSto_1.39 //
yasyaiva dharmaratnasya prāptyā prāptastvamagratām /
tenaiva kevalaṃ sādho sāmyaṃ te tasya ca tvayā // BuSto_1.40 //
ātmecchācchalamātraṃ tu sāmānyopāṃśu kiṃcana /
yatropakṣipya kathyeta sā vakturatilolatā // BuSto_1.41 //
nirupamastavo nāma tṛtīyaḥ paricchedaḥ /
4 adbhutastavaḥ
pratanviva hi paśyāmi dharmatāmanucintayan /
sarvaṃ cāvarjitaṃ māravijayaṃ prati te jagat // BuSto_1.42 //
mahato 'pi hi saṃrambhāt pratihantuṃ samudyatāḥ /
kṣamāyā nātibhāro 'sti pātrasthāyā viśeṣataḥ // BuSto_1.43 //
yattu mārajayānvakṣaṃ sumahatkleśavaiśasam /
tasyāmeva kṛtaṃ rātrau tadeva paramādbhutam // BuSto_1.44 //
tamovidhamane bhānoryaḥ sahasrāṃśumālinaḥ /
vīra vismayamāgacchet sa tīrthyavijaye tava // BuSto_1.45 //
sarāgo vītarāgeṇa jitaroṣeṇa roṣaṇaḥ /
mūḍho vigatamohena tribhirnityaṃ jitāstrayaḥ // BuSto_1.46 //
praśaṃsasi ca saddharmānasaddharmān vigarhasi /
anurodhavirodhau ca na staḥ sadasatostava // BuSto_1.47 //
naivārhatsu na tīrthyeṣu pratighānunayaṃ prati /
yasya te cetaso 'nyatvaṃ tasya te kā stutirbhavet // BuSto_1.48 //
guṇeṣvapi na saṃgo 'bhūt tṛṣṇā na guṇavatsvapi /
aho te suprasannasya sattvasya pariśuddhatā // BuSto_1.49 //
indriyāṇāṃ prasādena nityakālānapāyinā /
mano nityaprasannaṃ te pratyakṣamiva dṛśyate // BuSto_1.50 //
ābālebhyaḥ prasiddhāste matismṛtiviśuddhayaḥ /
gamitā bhāvapiśunaiḥ suvyāhṛtasuceṣṭitaiḥ // BuSto_1.51 //
adbhutastavo nāma caturthaḥ paricchedaḥ /
5 rupastavaḥ
upaśāntaṃ ca kāntaṃ ca dīptamapratighāti ca /
nibhṛtaṃ corjitaṃ cedaṃ rupaṃ kamiva nākṣipet // BuSto_1.52 //
yenāpi śataśo dṛṣṭaṃ yo 'pi tatpūrvamīkṣate /
rupaṃ prīṇāti te cakṣuḥ samaṃ tadubhayorapi // BuSto_1.53 //
asecanakabhāvāddhi saumyabhāvācca te vapuḥ /
darśane darśane prītiṃ vidadhāti navāṃ navām // BuSto_1.54 //
adhiṣṭhānaguṇairgātramadhiṣṭhātṛguṇairguṇaḥ /
parayā saṃpadopetāstavānyonyānurupayā // BuSto_1.55 //
kvānyatra suniviṣṭāḥ syurime tāthāgatā guṇāḥ /
ṛte rupāttavaivāsmāllakṣaṇavyañjanojjvalāt // BuSto_1.56 //
dhanyamasmīti te rupaṃ vadatīvāśritān guṇān /
sunikṣiptā vayamiti pratyāhuriva tadguṇāḥ // BuSto_1.57 //
rupastavo nāma pañcamaḥ paricchedaḥ /
6 karuṇāstavaḥ
sarvamevāviśeṣeṇa kleśairbaddhamidaṃ jagat /
tvaṃ jagatkleśamokṣārthaṃ baddhaḥ karuṇayā ciram // BuSto_1.58 //
kaṃ nu prathamato vande tvāṃ mahākaruṇāmuta /
yayaivamapi doṣajñastvaṃ saṃsāre dhṛtaściram // BuSto_1.59 //
vivekasukhasātmyasya yadākīrṇasya te gatāḥ /
kālā labdhaprasarayā tat te karuṇayā kṛtam // BuSto_1.60 //
śāntādaraṇyād grāmāntaṃ tvaṃ hi nāga iva hradāt /
vineyārthaṃ karuṇayā vidhayevāvakṛṣyase // BuSto_1.61 //
paramopaśamastho 'pi karuṇāparavattayā /
kāritastvaṃ padanyāsaṃ kuśīlavakalāsvapi // BuSto_1.62 //
ṛddhiryā siṃhanādā ye svaguṇodbhāvanāśca yāḥ /
vāntecchopavicārasya kāruṇyanikaṣaḥ sa te // BuSto_1.63 //
parārthaikāntakalyāṇī kāmaṃ svāśrayaniṣṭhurā /
tvayyeva kevalaṃ nātha karuṇā karuṇābhavat // BuSto_1.64 //
tathā hi kṛtvā śatadhā dhīrā balimiva kvacit /
pareṣāmarthasiddhayarthaṃ tvāṃ vikṣiptavatī diśaḥ // BuSto_1.65 //
tvadicchayaiva tu vyaktamanukūlā pravartate /
tathā hi bādhamānāpi tvāṃ satī nāparādhyate // BuSto_1.66 //
karuṇāstavo nāma ṣaṣṭhaḥparicchedaḥ /
7 vacanastavaḥ
supadāni mahārthāni tathyāni madhurāṇi ca /
gūḍhottānobhayārthāni samāsavyāsavanti ca // BuSto_1.67 //
kasya na syādupaśrutya vākyānyevaṃvidhāni te /
tvayi pratihatasyāpi sarvajña iti niścayaḥ // BuSto_1.68 //
prāyeṇa madhuraṃ sarvamagatyā kiñcidanyathā /
vākyaṃ tavārthasiddhayā tu sarvameva subhāṣitam // BuSto_1.69 //
yacchlakṣaṇaṃ yacca paruṣaṃ yadvā tadubhayānvitam /
sarvamaivaikarasatāṃ vimarde yāti te vacaḥ // BuSto_1.70 //
aho supariśuddhānāṃ karmaṇāṃ naipuṇaṃ param /
yairidaṃ vākyaratnānāmīdṛśaṃ bhājanaṃ kṛtam // BuSto_1.71 //
asmaddhi netrasubhagādidaṃ śrutimanoharam /
mukhāt kṣarati te vākyaṃ candrāddravamivāmṛtam // BuSto_1.72 //
rāgareṇuṃ praśamayadvākyaṃ te jaladātaye /
vainateyāyate dveṣabhujaṅgoddharaṇaṃ prati // BuSto_1.73 //
divākarāyate bhūyo 'pyajñānatimiraṃ nudat /
śakrāyudhāyate mānagirīnabhividārayat // BuSto_1.74 //
dṛṣṭārthatvādavitathaṃ niṣkleśatvādanākulam /
gamakaṃ suprayuktatvāt trikalyāṇaṃ hi te vacaḥ // BuSto_1.75 //
manāṃsi tāvacchrotṝṇāṃ harantyādau vacāṃsi te /
tato vimṛśyamānāni rajāṃsi ca tamāṃsi ca // BuSto_1.76 //
āśvāsanaṃ vyasanināṃ trāsanaṃ ca pramādinām /
saṃvejanaṃ ca sukhināṃ yogavāhi vacastava // BuSto_1.77 //
viduṣāṃ prītijananaṃ madhyānāṃ buddhivardhanam /
timiraghnaṃ ca mandānāṃ sārvajanyamidaṃ vacaḥ // BuSto_1.78 //
apakarṣati dṛṣṭibhyo nirvāṇamupakarṣati /
doṣān niṣkarṣati guṇān vākyaṃ te 'bhipravarṣati // BuSto_1.79 //
sarvatrāvyāhatā buddhiḥ sarvatropasthitā smṛtiḥ /
avandhyaṃ tena sarvatra sarvaṃ vyākaraṇaṃ tava // BuSto_1.80 //
yannādeśe na cākāle naivāpātre pravartase /
vīryaṃ samyagivārabdhaṃ tenāmoghaṃ vacastava // BuSto_1.81 //
vacanastavo nāma saptamaḥ paricchedaḥ /
8 śāsanastavaḥ
ekāyanaṃ sukhopāyaṃ svanuvandhi niratyayam /
ādimadhyāntakalyāṇaṃ tava nānyasya śāsanam // BuSto_1.82 //
evamekāntakāntaṃ te dṛṣṭirāgeṇa bāliśāḥ /
mataṃ yadi vigarhanti nāsti dṛṣṭisamo ripuḥ // BuSto_1.83 //
anavabhuṅkthā yadasyārthe jagato vyasanaṃ bahu /
tat saṃsmṛtya virupe 'pi stheyaṃ te śāsane bhavet // BuSto_1.84 //
prāgeva hitakartuśca hitavaktuśca śāsanam /
kathaṃ na nāma kāryaṃ syādādīptaśirasāpi te // BuSto_1.85 //
bhujiṣyatā bodhisukhaṃ tvadguṇāpacitiḥ śamaḥ /
prāpyate tvanmatāt sarvamidaṃ bhadracatuṣṭayam // BuSto_1.86 //
trāsanaṃ sarvatīrthyānāṃ namucerupatāpanam /
āśvāsanaṃ nṛdevānāṃ tavedaṃ vīra śāsanam // BuSto_1.87 //
traidhātukamahābhaumamasaṅgamanavagraham /
śāsanena tavākrāntamantakasyāpi śāsanam // BuSto_1.88 //
tvacchāsananayajño hi tiṣṭhet kalpamapīcchayā /
prayāti tatra tu svairī yatra mṛtyoragocaraḥ // BuSto_1.89 //
āgamasyārthacintāyā bhāvanopāsanasya ca /
kālatrayavibhāgo 'sti nānyatra tava śāsanāt // BuSto_1.90 //
evaṃ kalyāṇakalitaṃ tadevamṛṣipuṅgava /
śāsanaṃ nādriyante yat kiṃ vaiśasataraṃ tataḥ // BuSto_1.91 //
śāsanastavo nāmāṣṭamaḥ paricchedaḥ /
9 praṇidhistavaḥ
śravaṇaṃ tarpayati te prasādayati darśanam /
vacanaṃ hlādayati te vimocayati śāsanam // BuSto_1.92 //
prasūtirharṣayati te vṛddhirnandayati prajñāḥ /
pravṛttiranugṛhṇāti nivṛttirupahanti ca // BuSto_1.93 //
kīrtanaṃ kilbiṣaharaṃ smaraṇaṃ te pramodanam /
anveṣaṇaṃ matikaraṃ parijñānaṃ viśodhanam // BuSto_1.94 //
śrīkaraṃ te 'bhigamanaṃ sevanaṃ dhīkaraṃ param /
bhajanaṃ nirbhayakaraṃ śaṃkaraṃ paryupāsanam // BuSto_1.95 //
śīlopasampadā śuddhaḥ prasanno dhyānasampadā /
tvaṃ prajñāsampadā 'kṣobhyo hradaḥ puṇyamayo mahān // BuSto_1.96 //
rupaṃ draṣṭavyaratnaṃ te śravyaratnaṃ subhāṣitam /
dharmo vicāraṇāratnaṃ guṇaratnākaro hyasi // BuSto_1.97 //
tvamoghairuhyamānānāṃ dvīpastrāṇaṃ kṣatātmanām /
śaraṇaṃ bhavabhīruṇāṃ mumukṣūṇāṃ parāyaṇam // BuSto_1.98 //
satpātraṃ śuddhavṛttatvāt satkṣetraṃ phalasampadā /
sanmitraṃ hitakāritvāt sarvaprāṇabhṛtāmasi // BuSto_1.99 //
priyastvamupakāritvāt suratatvānmanoharaḥ /
ekāntakāntaḥ saumyatvāt sarvairbahumato guṇaiḥ // BuSto_1.100 //
hṛdyo 'si niravadyatvādramyo vāgarupasauṣṭhavāt /
dhanyaḥ sarvārthasiddhatvānmāṅgalyo guṇasaṃśrayāt // BuSto_1.101 //
praṇidhistavo nāma navamaḥ paricchedaḥ /
10 mārgāvatārastavaḥ
sthāyināṃ tvaṃ parikṣeptā viniyantāpahariṇām /
samādhātā vijihmānāṃ prerako mandagāminām // BuSto_1.102 //
niyoktā dhuri dāntānāṃ khaṭuṅkānāmupekṣakaḥ /
ato 'si naradamyānāṃ satsārathiranuttaraḥ // BuSto_1.103 //
āpanneṣvanukampā te prasvastheṣvarthakāmatā /
vyasanastheṣu kāruṇyaṃ sarveṣu hitakāmatā // BuSto_1.104 //
viruddheṣvapi vātsalyaṃ pravṛttiḥ patiteṣvapi /
raudreṣvapi kṛpālutvaṃ kā nāmeyaṃ tavāryatā // BuSto_1.105 //
gurutvamupakāritvānmātāpitroryadīṣyate /
kedānīmastu gurutā tvayyatyantopakāriṇi // BuSto_1.106 //
svakāryanirapekṣāṇāṃ viruddhānāmivātmanām /
tvaṃ prapātataṭasthānāṃ prākāratvamupāgataḥ // BuSto_1.107 //
lokadvayopakārāya lokātikramaṇāya ca /
tamobhūteṣu lokeṣu prajñālokaḥ kṛtastvayā // BuSto_1.108 //
bhinnā devamanuṣyāṇāmupabhogeṣu vṛttayaḥ /
dharmasambhogasāmānyāttvayyasambhedamāgatāḥ // BuSto_1.109 //
upapattivayovarṇadeśakālaniratyayam /
tvayā hi bhagavan dharmasarvātithyamidaṃ kṛtam // BuSto_1.110 //
avismitān vismitavatspṛhayanto gataspṛhān /
upāsate prāñjalayaḥ śrāvakānapi te surāḥ // BuSto_1.111 //
aho saṃsāramaṇḍasya buddhotpādasya dīptatā /
mānuṣyaṃ yatra devānāṃ spṛhaṇīyatvamāgatam // BuSto_1.112 //
mārgāvatārastavo nāma daśamaḥ paricchedaḥ /
11 duṣkarastavaḥ
khedaḥ śamasukhajyānirasajjanasamāgamaḥ /
dvandvānyākīrṇatā ceti doṣān guṇavadudvahan // BuSto_1.113 //
jagaddhitārthaṃ ghaṭase yadasaṅgeta cetasā /
kā nāmāsau bhagavati buddhānāṃ buddhadharmatā // BuSto_1.114 //
kadannānyapi bhuktāni kvacitkṣudadhivāsitā /
panthāno viṣamāḥ kṣuṇṇāḥ suptaṃ gokaṇṭakeṣvapi // BuSto_1.115 //
prāptāḥ kṣepāvṛtāḥ sevā veṣabhāṣāntaraṃ kṛtam /
nātha vaineyavātsalyāt prabhuṇāpi satā tvayā // BuSto_1.116 //
prabhūtamapi te nātha sadā nātmani vidyate /
vaktavya iva sarvairhi svairaṃ svārthe niyujyase // BuSto_1.117 //
yena kena cideva tvaṃ yatra tatra yathā tathā /
coditaḥ svāṃ pratipadaṃ kalyāṇīṃ nātivartase // BuSto_1.118 //
nopakārapare 'pyevamupakāraparo janaḥ /
apakārapare 'pi tvamupakāraparo yathā // BuSto_1.119 //
ahitāvahite śatrau tvaṃ hitāvahitaḥ suhṛt /
doṣānveṣaṇanitye 'pi guṇānveṣaṇatatparaḥ // BuSto_1.120 //
yato nimantraṇaṃ te 'bhūt saviṣaṃ sahutāśanam /
tatrābhūdabhisaṃyānaṃ sadayaṃ sāmṛtaṃ ca te // BuSto_1.121 //
akroṣṭāro jitāḥ kṣāntyā drugdhāḥ svastyayanena ca /
satyena cāpavaktārastvayā maitryā jighāṃsavaḥ // BuSto_1.122 //
anādikālaprahatā bahṛyaḥ prakṛtayo nṛṇām /
tvayā vibhāvitāpāyāḥ kṣaṇena parivartitāḥ // BuSto_1.123 //
duṣkarastavo nāmaikādaśaḥ paricchedaḥ /
12 kauśalastavaḥ
yatsauratyaṃ gatāstīkṣṇāḥ kadaryāśca vadānyatām /
krurāḥ peśalatāṃ yātāstat tavopāyakauśalam // BuSto_1.124 //
indriyopaśamo nande mānastabdhe ca saṃnatiḥ /
kṣamitvaṃ cāṅgulīmāle kaṃ na vismayamānayet // BuSto_1.125 //
bahavastṛṇaśayyāsu hitvā śayyāṃ hiraṇmayīm /
aśerata sukhaṃ dhīrāstṛptā dharmarasasya te // BuSto_1.126 //
pṛṣṭenāpi kvacinnoktamupetyāpi kathā kṛtā /
tarṣayitvā paratroktaṃ kālāśayavidā tvayā // BuSto_1.127 //
pūrvaṃ dānakathādyābhiścetasyutpādya sauṣṭhavam /
tato dharmo gatamale vastre raṅga ivārpitaḥ // BuSto_1.128 //
na so 'styupāyaḥ śaktirvā yena na vyāyataṃ tava /
ghorāt saṃsārapātālāduddhartṛṃ kṛpaṇaṃ jagat // BuSto_1.129 //
bahūni bahurupāṇi vacāṃsi caritāni ca /
vineyāśayabhedena tatra tatra gatāni te // BuSto_1.130 //
viśuddhānyaviruddhāni pūjitānyarcitāni ca /
sarvāṇyeva nṛdevānāṃ hitāni mahitāni ca // BuSto_1.131 //
na hi vaktuṃ ca kartuṃ ca bahu sādhu ca śakyate /
anyathānanyathāvādin dṛṣṭaṃ tadubhayaṃ tvayi // BuSto_1.132 //
kevalātmaviśuddhayaiva tvayā pūtaṃ jagadbhavet /
yasmānnaivaṃvidhaṃ kṣetraṃ triṣu lokeṣu vidyate // BuSto_1.133 //
prāgevātyantanaṣṭānāmanādau bhavasaṃkaṭe /
hitāya sarvasattvānāṃ yastvamevaṃ samudyataḥ // BuSto_1.134 //
kauśalastavo nāma dvādaśaḥ paricchedaḥ /
13 ānṛṇyastavaḥ
na tāṃ pratipadaṃ vedmi syādyayāpacitistava /
api ye parinirvānti te 'pi te nānṛṇā janāḥ // BuSto_1.135 //
tava te 'vasthitā dharme svārthameva tu kurvate /
yaḥ śramastannimittaṃ tu tava kā tasya niṣkṛtiḥ // BuSto_1.136 //
tvaṃ hi jāgarṣi suptānāṃ saṃtānānyavalokayan /
apramattaḥ pramattānāṃ sattvānāṃ bhadrabāndhavaḥ // BuSto_1.137 //
kleśānāṃ vadha ākhyāto māramāyā vighāṭitā /
uktaṃ saṃsāradaurātmyamabhayā digvidarśitā // BuSto_1.138 //
kimanyadarthakāmena sattvānāṃ karuṇāyatā /
karaṇīyaṃ bhaved yatra na dattānunayo bhavān // BuSto_1.139 //
yadi saṃcāriṇo dharmāḥ syurime niyataṃ tvayā /
devadattamupādāya sarvatra syurniveśitāḥ // BuSto_1.140 //
ata eva jagannātha nehānyo 'nyasya kārakaḥ /
iti tvamuktavān bhūtaṃ jagat saṃjñāpayanniva // BuSto_1.141 //
cirāya bhuvi saddharmaṃ prerya lokānukampayā /
bahūnutpādya sacchiṣyāṃstrailokyānugrahakṣamān // BuSto_1.142 //
sākṣādvineyavargīyān subhadrāntān vinīya ca /
ṛṇaśeṣaṃ kimadyāpi sattveṣu yadabhūt tava // BuSto_1.143 //
yastvaṃ samādhivajreṇa tilaśo 'sthīni cūrṇayan /
atiduṣkarakāritvamante 'pi na vimuktavān // BuSto_1.144 //
parārthāveva me dharmarupakāyāviti tvayā /
duṣkuhasyāsya lokasya nirvāṇe 'pi nidarśitam // BuSto_1.145 //
tathāhi satsu saṃkrāmya dharmakāyamaśeṣataḥ /
tilaśo rupakāyaṃ ca bhittvāsi parinirvṛtaḥ // BuSto_1.146 //
aho sthitiraho vṛttamaho rupamaho guṇāḥ /
na nāma buddhadharmāṇāmasti kiñcidanadbhutam // BuSto_1.147 //
upakāriṇi cakṣuṣye śāntavākkāyakarmaṇi /
tvayyapi pratihanyante paśya mohasya raudratām // BuSto_1.148 //
puṇyodadhiṃ ratnanidhiṃ dharmarāśiṃ guṇākaram /
ye tvāṃ sattvā namasyanti tebhyo 'pi sukṛtaṃ namaḥ // BuSto_1.149 //
akṣayāste guṇā nātha śaktistu kṣayiṇī mama /
ataḥ prasaṅgabhīrutvāt sthīyate na vitṛptitaḥ // BuSto_1.150 //
aprameyamasaṃkhyeyamacintyamanidarśanam /
svayamevātmanātmānaṃ tvameva jñātumarhasi // BuSto_1.151 //
na te guṇāṃśāvayavo 'pi kīrtitaḥ parā ca nastuṣṭiravasthitā hṛdi /
akarśanenaiva mahāhradāmbhasāṃ janasya tarṣāḥ praśamaṃ vrajanti ha // BuSto_1.152 //
phalodayenāsya śubhasya karmaṇo muniprasādapratibhodbhavasya me /
asadvitarkākulamāruteritaṃ prayātu cittaṃ jagatāṃ vidheyatām // BuSto_1.153 //
ānṛṇyastavo nāma trayodaśamaḥ paricchedaḥ /
adhyardhaśatakaṃ samāptam / kṛtirācāryamātṛceṭasya //
___________________________________________________________________________
Digital Sanskrit Buddhist Canon, Stotra section, text no. 2:
Ādibuddhadvādaśakastotram
om nama ādibuddhāya
namaste buddharūpāya dharmarūpāya te namaḥ /
namaste saṃgharūpāya pañcabuddhātmane namaḥ // BuSto_2.1 //
pṛthvīrūpāyābrūpāya tejorūpāya te namaḥ /
namaste vāyurūpāyākāśarūpāya te namaḥ // BuSto_2.2 //
brahmaṇesattvarūpāya rajorūpāya viṣṇave /
tamorūpamaheśāya jñānarūpāya te namaḥ // BuSto_2.3 //
prajñopāyātmarūpāya guhyarūpāya te namaḥ /
digrūpalokapālāya viśvarūpāya te namaḥ // BuSto_2.4 //
cakṣūrūpāya karṇāya ghrāṇarūpāya jihvake /
kāyarūpāya śrīdharmarūpāya manase namaḥ // BuSto_2.5 //
namaste rūparūpāya rasarūpāya te namaḥ /
gandharūpaśabdarūpasparśarūpāya te namaḥ // BuSto_2.6 //
dharmarūpadhārakāya ṣaḍindriyātmane namaḥ /
māṃsāsthimedamajjānāṃ saṃghātarūpiṇe namaḥ // BuSto_2.7 //
rūpāya jaṅgamānāṃ te sthāvarāṇāṃ ca murtaye /
tiraścāṃ moharūpāya rūpāyāścaryamūrtaye // BuSto_2.8 //
sṛṣṭikartre janmarūpa kālarūpāya mṛtyave /
bhavyāya vṛddharūpāya bālāya te namo namaḥ // BuSto_2.9 //
prāṇāpānasamānodānavyānamūrtaye namaḥ /
varṇāpavarṇarūpāya bhoktre tanmūrtaye namaḥ // BuSto_2.10 //
dinarūpāya sūryāya candrāya rātrirūpiṇe /
tithirūpāya nakṣatrayogavārādimurtaye // BuSto_2.11 //
bāhyābhyantararūpāya laukikāya namonamaḥ /
nairvāṇāya namastubhyaṃ bahurūpāya te namaḥ // BuSto_2.12 //
ādibuddhadvādaśakaṃ puṇyaṃ prātaḥ paṭhiṣyati /
yadicchati labhennūnaṃ manujo nityaniścayaḥ // BuSto_2.13 //
śrīmañjuśrīkṛtamādibuddhadvādaśakastotraṃ samāptam //
___________________________________________________________________________
Digital Sanskrit Buddhist Canon, Stotra section, text no. 3:
Ākāśagarbhanāmāṣṭottaraśatastotram
om namo buddhāya
ākāśagarbha sattvārtha mahāsattva mahādyute /
mahāratna suratnāgrya vajraratna namo 'stu te // BuSto_3.1 //
abhiṣekamahāratna mahāśuddha mahāśubha /
buddharatna viśuddhāṅga ratnaratna namo 'stu te // BuSto_3.2 //
ākāśākāśasaṃbhūta sarvākāśa mahānabha /
ākāśadhātusarvāśa sarvāśāgrya namo 'stu te // BuSto_3.3 //
ratnasaṃbhava ratnorṇa buddhorṇa sutathāgata /
sarvaratna susarvāgrya ratnakārya namo 'stu te // BuSto_3.4 //
ratnaratnāgrya ratnogra ratnasarva tathāgata /
ratnottama mahākāśa samākāśa namo 'stu te // BuSto_3.5 //
alaṅkāramahāśobha śobhākara suśobhaka /
śuddhasarvārtha śuddhārtha dānacarya namo 'stu te // BuSto_3.6 //
dharmaratna viśuddhāgrya saṅgharatna tathāgata /
mahābhiṣeka lokārtha pramodārtha namo 'stu te // BuSto_3.7 //
dāna pradāna dānāgrya tyāga tyāgāgrya dāyaka /
sarvasattvārtha tattvārtha mahārthārtha namo 'stu te // BuSto_3.8 //
cintārāja mahāteja dānapāramitānaya /
tathāgata mahāsattva sarvabuddha namo 'stu te // BuSto_3.9 //
tathāgata mahāratna tathāgata mahāprabha /
tathāgata mahāketo mahāhāsa namo 'stu te // BuSto_3.10 //
tathāgatābhiṣekājña mahābhiṣeka mahāvibho /
lokanātha trilokāgrya lokasūrya namo 'stu te // BuSto_3.11 //
ratnādhikādhikatara ratnabhūṣaṇa ratnadhṛk /
ratnāloka mahāloka ratnakīrte namo 'stu te // BuSto_3.12 //
ratnotkara suratnottha maṇe vajramaṇe guṇa /
ratnākara sudīptāṅga sarvaratna namo 'stu te // BuSto_3.13 //
mahātmayaṣṭi ratneśa sarvāśāparipūraka /
sarvābhiprāyasaṃprāptiratnarāśi namo 'stu te // BuSto_3.14 //
abhvagrya vyāpi sarvātma varaprada mahāvara /
vibhūte sarvasaṃpatte vajragarbhaṃ namo 'stu te // BuSto_3.15 //
yaḥ kaścid dhārayen nāmnāmidante 'ṣṭaśataṃ śivam /
sarvabuddhābhiṣekaṃ tu sa prāpnotyanaghaḥ kṣaṇāt // BuSto_3.16 //
śrī ākāśagarbhanāmāṣṭaśatādhyeṣaṇāstotraṃ saṃpūrṇam //
___________________________________________________________________________
Digital Sanskrit Buddhist Canon, Stotra section, text no. 4:
(Ārya)mañjuśrīnāmāṣṭottaraśatakastotram
praṇipatya muniṃ mūrdhnā suprasannena cetasā /
vakṣyāmyadya ca nāmāni saṃbuddhairanuvarṇitam // BuSto_4.1 //
surupo rūpadhārī ca sarvarūpo hyanuttaraḥ /
sarvalakṣaṇasampūrṇo mañjuśrīruttamaḥ śriyā // BuSto_4.2 //
acintyaścintyavigato 'cintyo 'dbhutavikramaḥ /
acintyaḥ sarvadharmāṇāmacintyo manasastathā // BuSto_4.3 //
śūnyatābhāvitātmākaḥ śūnyadharmasamanvitaḥ /
śūnyastvamadhimuktiśca śūnyatribhavadeśakaḥ // BuSto_4.4 //
sarvajñaḥ sarvadarśī ca sarvabhūmipatirvibhuḥ /
mañjuśrīvaśavartī ca padmākṣaḥ padmasaṃbhavaḥ // BuSto_4.5 //
padmakiñjalkavarṇaśca padmaparyaṅkavāsanaḥ /
nīlotpaladharaḥ pūtaḥ pavitraḥ śāntamānasaḥ // BuSto_4.6 //
pratyekabuddho buddhastvamādibuddho nirucyase /
ṛddhimān vaśitāprāptaścatuḥsatyopadeśakaḥ // BuSto_4.7 //
lokapālaḥ sahasrākṣa īśvarastvaṃ prajāpatiḥ /
śivastvaṃ sarvabhūtānāṃ tvaṃ vibhurguṇasāgaraḥ // BuSto_4.8 //
ṛṣistvaṃ puṇyaḥ śreṣṭhaśca jyeṣṭho jātismarastathā /
vināyako vinetā ca jinaputro jinātmajaḥ // BuSto_4.9 //
bhānuḥ sahasraraśmimastvaṃ somastvaṃ ca bṛhaspatiḥ /
dhanado varuṇaścaiva tvaṃ viṣṇustvaṃ maheśvaraḥ // BuSto_4.10 //
ananto nāgarājastvaṃ skandaḥ senāpatistathā /
vemacitrāsurendrastvaṃ bhaumaḥ śukro budhastathā // BuSto_4.11 //
sarvadevamayo vīraḥ sarvadevairnamaskṛtaḥ /
lokadharmamalātītastvaṃ loke cāgrapudgalaḥ // BuSto_4.12 //
lokajño lokavijñāto jñānināṃ pravaro varaḥ /
varado layanaṃ trāṇamadhṛṣyo mārakarmiṇām // BuSto_4.13 //
gambhīraścānavadyaśca kalyāṇamitrasaṃpadaḥ /
vaidyastvaṃ śalyahartā na naradamyaḥ susārathiḥ // BuSto_4.14 //
matimān gatimāṃścaiva buddhimāṃśca vicakṣaṇaḥ /
puṇyavān kalpavṛkṣaśca bodhyaṅgapuṣpamaṇḍitaḥ // BuSto_4.15 //
vimuktiphalasaṃpanna āśrayaḥ sarvadehinām /
manoharo manojñaśca anagho brahmacāriṇām // BuSto_4.16 //
ketustvaṃ grahaśreṣṭhaśca ṛṣibhirmunipuṅgavaḥ /
yuvarājñābhiṣiktasttvaṃ daśabhūmīśvaraḥ prabhuḥ // BuSto_4.17 //
sārthavāho gaṇaśreṣṭho nirvāṇottamadeśakaḥ /
khasamo madhyakalpastvaṃ tvaṃ tejo vāyureva ca // BuSto_4.18 //
cintāmaṇistvaṃ sattvānāṃ sarvāśāparipūrakaḥ /
namo 'stu te mahāvidya sarvabhūtanamaskṛta // BuSto_4.19 //
śrīāryamañjuśrīnāmāṣṭottaraśatakastotraṃ samāptam //
___________________________________________________________________________
Digital Sanskrit Buddhist Canon, Stotra section, text no. 5:
(Ārya)tārānamaskāraikaviṃśatistotram
om namo bhagavatyai āryaśrī-ekaviṃśatitārāyai
namastāre ture vīre kṣaṇadyutinibhekṣaṇe /
trailokyanāthavaktrābjavikasatkamalodbhave // BuSto_5.1 //
namaḥ śataśaraccandrasaṃpūrṇeva varānane /
tārāsahasrakiraṇaiḥ prahasatkiraṇojjvale // BuSto_5.2 //
namaḥ kanakanīlābjapāṇipadmavibhūṣite /
dānavīryatapaḥśā(kṣā)ntititikṣādhyānagocare // BuSto_5.3 //
namastathāgatoṣṇīṣavijayānantacāriṇi /
śeṣapāramitāprāptajinaputraniṣevite // BuSto_5.4 //
namastutārahuṃkārapūritāśādigantare /
saptalokakramākrā[nte] aśeṣakaruṇā(ṇe)kṣaṇe // BuSto_5.5 //
namaḥ śakrānalabrahmamarudviśveśvarārcite /
bhūtavetālagandharvagaṇayakṣapuraskṛte // BuSto_5.6 //
namaḥ straditi phaṭkāra parajatra(yantra)pramardini /
pratyālīḍhapadanyāse śikhī(khi)jvālākulojjvale // BuSto_5.7 //
namasture mahāghore mālavīravināśini /
bhṛkuṭīkṛtavaktrābjasarvaśatrunisundanī(ṣūdini) // BuSto_5.8 //
namaḥ strīratnamudrāṅkahṛdayāṅgulibhūṣite /
bhūṣitāśeṣadikcakranikarasvakarākule // BuSto_5.9 //
namaḥ pramuditāśeṣamuktākṣīraprasāriṇi /
hasatprahasatuttāre māralolavaśaṅkari // BuSto_5.10 //
namaḥ samantabhūpālapata(ṭa)lākarṣaṇa(ṇe)kṣaṇe /
carabhṛkuṭihūṃkārasarvāpadavimocanī(cini) // BuSto_5.11 //
namaḥ śrīkhaṇḍakhaṇḍendu[su]muktābharaṇa(ṇo)jjvale /
amitābhajitābhārabhāsure kiraṇoddhruve(ddhure) // BuSto_5.12 //
namaḥ kalpāntahutabhugajvālāmālāntare(ra)sthite /
ālīḍhamudi(dri)tābaddharipucakravināśinī(ni) // BuSto_5.13 //
namaḥ karatarā(lā)ghāṭa(ta)caraṇāhatabhūtale /
bhṛkuṭīkṛtahuṃkārasaptapātālabhedinī(ni) // BuSto_5.14 //
namaḥ śive śubhe śānte śāntanirvāṇagocare /
svāhāpraṇavasaṃyukte mahāpātakanāśanī(śini) // BuSto_5.15 //
namaḥ pramuditābaddharigātraprabhedini /
daśākṣarapadanyāse vidyāhuṃkāradīpite // BuSto_5.16 //
nama[stāre] ture pādaghātahuṃkāravījite /
merumaṇḍalakailāśabhuvanatrayacāriṇī(ṇi) // BuSto_5.17 //
namaḥ sure sa(śa)rākārahariṇāṅkakare(ra)sthite /
haridviruktaphaṭkāra(re) aśeṣaviṣanāśiṇī(ni) // BuSto_5.18 //
namaḥ surāsuragaṇayakṣakinnarasevite /
abuddhamuditābhogakarī(ri) duḥsvapnanāśinī(ni) // BuSto_5.19 //
namaścandrārkasampūrṇanayanadyutibhāsvare /
tārādviruktatuttāre viṣamajvala(ra)nāśini // BuSto_5.20 //
namaḥ strītattvavinyāse śivaśaktisamanvite /
grahavetāra(la)yakṣoṣmanāśini pravare ture // BuSto_5.21 //
mantramūlamidaṃ stotraṃ namaskāraikaviṃśatiḥ(ti) /
yaḥ paṭhetprātaḥ(paṭhet prayataḥ) dhīmān devyābhaktisamanvite(taḥ) // BuSto_5.22 //
sāyaṃ vā prātarutthāya smaret sarvābhayapradam /
sarvapāpapraśamanaṃ sarvadurgatināśanam // BuSto_5.23 //
abhiṣikto bhavet tūrṇaṃ saptabhirjinakoṭibhiḥ /
māsamātreṇa caivāsau sukhaṃ bauddhapadaṃ vrajet // BuSto_5.24 //
viṣaṃ tasya mahāghoraṃ sthāvaraṃ cātha jaṅgamam /
smaraṇānna padaṃ yāti khāditaṃ pi(pī)tameva vā // BuSto_5.25 //
grahajo(jā)laviṣārtānāṃ parastrīviṣanāśanam /
anyeṣāṃ caiva sattvānāṃ dvisaptamabhivartitam // BuSto_5.26 //
putrakāmo labhet putraṃ ghanakāmo labheddhanam /
sarvakāmānavāpnoti na vighnaiḥ pratihanyate // BuSto_5.27 //
iti śrīsamyaksaṃbuddhavailo(ro)canabhāṣitaṃ bhagavatyāryatārādevyā namaskāraikaviṃśatināmāṣṭottaraśatakaṃ buddhabhāṣitaṃ parisamāptam //
___________________________________________________________________________
Digital Sanskrit Buddhist Canon, Stotra section, text no. 6:
(Ārya)tārāsragdharāstotram
ācārya sarvajñamitraviracitam
namastārāyai bālārkālokatāmrapravarasuraśiraścārucūḍāmaṇiśrī-
sampatsaṃparkarāgānaticiraracitālaktakavyakta bhaktī /
bhaktyā pādau tavārye karapuṭamukuṭāṭopabhugnottamāṅga-
stāriṇyāpaccharaṇye navanutikusumasragbhirabhyarcayāmi // BuSto_6.1 //
durlaṅdhye duḥkhavahnau vinipatitatanurdurbhagaḥ kāṃdiśīkaḥ
kiṃ kiṃ mūḍhaḥ karomītyasakṛdapi kṛtārambhavaiyarthyakhinnaḥ /
śrutvā bhūyaḥ parebhyaḥ kṣatanayana iva vyomni candrārkalakṣmī-
mālokāśānibaddhaḥ paragatigamanastvāṃ śraye pāpahantrīm // BuSto_6.2 //
sarvasmin sattvamārge nanu tava karuṇā nirviśeṣaṃ pravṛttā
tanmadhye tadgraheṇa grahaṇamupagataṃ mādṛśasyāpyavaśyam /
sāmarthyaṃ ca dvitīyaṃ sakalajagadaghadhvāntatigmāṃśubimbaṃ
duḥkhyevāhaṃ tathāpi pratapati dhigaho duṣkṛtaṃ durvidagdham // BuSto_6.3 //
dhigdhiṅ māṃ mandabhāgyaṃ divasakararucāpyapraṇūtāndhakāraṃ
tṛṣyantaṃ kūlakacche himaśakalaśilāśītale haimavatyāḥ /
ratnadvīpapratolyā vipulamaṇiguhāgehagarbhe daridraṃ
nāthīkṛtyāpyanāthaṃ bhagavati bhavatīṃ sarvalokaikadhātrīm // BuSto_6.4 //
mātāpi stanyahetorviruvati tanaye khedamāyāti putre
krodhaṃ dhatte pitāpi pratidivasamasatprārthanāsu prayuktaḥ /
tvaṃ tu trailokyavāñchāvipulaphalamahākalpavṛkṣāgravallī
sarvebhyo 'bhyarthitārthān visṛjasi na ca te vikriyā jātu kācit // BuSto_6.5 //
yo yaḥ klaiśaughavahnijvalitatanurahaṃ tāriṇī tasya tasye-
tyātmopajñaṃ pratijñāṃ kuru mayi saphalāṃ duḥkhapātālamagne /
vardhante yāvadete paruṣaparibhavāḥ prāṇināṃ dukhavegāḥ
samyaksaṃbuddhayāne praṇidhidhṛtadhiyāṃ tāvadevānukampā // BuSto_6.6 //
ityuccairurdhvavāhau nadati nutipadavyājamākrandanādaṃ
nārhatyanyo 'pyupekṣāṃ janani janayituṃ kiṃ punaryādṛśī tvam /
tvattaḥ paśyan pareṣāmabhimatavibhavaprārthanāḥ prāptakāmā
dahye sahyena bhūyastaramaratibhuvā santatāntarjvareṇa // BuSto_6.7 //
pāpī yadyasmi kasmāttvayi mama mahatī barddhate bhaktireṣā
śrutyā smṛtyā ca nāmnāpyapaharasi haṭhātpāpamekā tvameva /
tyaktavyāpārabhārā tadasi mayi kathaṃ kathyatāṃ tathyakathye
pathyaṃ glāne mariṣyatyapi vipulakṛpaḥ kiṃ bhiṣag rorudhīti // BuSto_6.8 //
māyāmātsaryamānaprabhṛtibhiradhamaistulyakālakramācca
svairdoṣairvāhyamāno maṭhakarabha ivānekasādhāraṇāṃśaḥ /
yuṣmatpādābjapūjāṃ na kṣaṇamapi labhe yattadarthe viśeṣā-
deṣā kārpaṇyadīnākṣarapadaracanā syānmamāvandhyakāmā // BuSto_6.9 //
kalpāntodbhrāntavātabhramitajalacalallolakallolahelā-
saṃkṣobhotkṣiptavelātaṭavikaṭacaṭatsphoṭamoṭṭāṭṭahāsāt /
majjadbhirbhinnanaukaiḥ sakaruṇaruditākrandaniṣpandamandaiḥ
svacchandaṃ devi sadyastvadabhinutiparaistīramuttīryate 'bdheḥ // BuSto_6.10 //
dhūmabhrāntābhragarbhodbhavagaganagṛhotsaṅgariṅgatsphuliṅga-
sphūrjajjvālākarālajvalanajavaviśadveśmaviśrāntaśayyāḥ /
tvayyābaddhapraṇāmāñjalipuṭamukuṭā gadgadodgītayācṣāḥ
prodyadvidyudvilāsojjvalajaladajavairādhriyante kṣaṇena // BuSto_6.11 //
dānāmbhaḥpūryamāṇobhayakaṭakaṭakālambirolambamālā-
hūṅkārāhūyamānapratigajajanitadveṣavahnerdvipasya /
dantāntottuṅgadolātalatulitatanustvāmanusmṛtya mṛtyuṃ
pratyācaṣṭe prahṛṣṭaḥ pṛthuśikharaśiraḥkoṭikoṭṭopaviṣṭaḥ // BuSto_6.12 //
prauḍhaprāsaprahāraprahatanaraśiraḥśūlavallyutsavāyāṃ
śūnyāṭavyāṃ karāgragrahavilasadasispheṭakasphītadarpān /
dasyūn dāsye niyuṅkte sabhṛkuṭikuṭilabhrūkaṭākṣekṣitākṣāṃ-
ścintālekhanyakhinnasphuṭalikhitapadaṃ nāmadhāma śriyāṃ te // BuSto_6.13 //
vajrakūraprahāraprakharanakhamukhotkhātamattebhakumbha-
ścyotatsāndrāsradhautasphūṭavikaṭasaṭāsaṅkaṭaskandhasandhiḥ /
krudhyannāpitsurārādupari mṛgaripustīkṣṇadaṃṣṭrotkaṭāsya-
strasyannāvṛtya yāti tvaducitaracitastotradigdhārthavācaḥ // BuSto_6.14 //
dhūmāvartāndhakārākṛtivikṛtaphaṇisphāraphūtkārapūra-
vyāpāravyāptavaktrasphuradururasanārajjukonāśapāśaiḥ /
pāpātsambhūya bhūyastavaguṇagaṇanātatparastvatparātmā
dhatte mattālimālāvalayakuvalasragavibhūṣāṃ vibhūtim // BuSto_6.15 //
bhartṛbhrūbhedabhītodbhaṭakaṭakabhaṭākṛṣṭaduḥśliṣṭakeśa-
ścañcadvācāṭaceṭotkaṭaraṭitakaṭugranthipāśopagūḍhaḥ /
kṣuttṛṭkṣāmopakaṇṭhastyajati sa sapadi vyāpadaṃ tāṃ durantāṃ
yo yāyādāryatārācaraṇaśaraṇatāṃ snigdhabandhūjjhito 'pi // BuSto_6.16 //
māyānirmāṇakarmakramakṛtavikṛtānekanepathyamithyā-
rūpārambhānurūpapraharaṇakiraṇāḍambaroḍḍāmarāṇi /
tvattantroddhāryamantrasmṛtihṛtaduritasyāvahantyapradhṛṣyāṃ
pretaprotāntratantrīnicayaviracitasrañji rakṣāṃsi rakṣām // BuSto_6.17 //
garjajjīmūtamūrtitrimadamadanadībaddhadhārāndhakāre
vidhuddyotāyamānapraharaṇakiraṇe niṣpatadbāṇavarṣe /
ruddhaḥ saṅgrāmakāle prabalabhujabalairvidviṣadbhirdviṣadbhi-
stvaddattotsāhapuṣṭiḥ prasabhamarimahīmekavīraḥ pinaṣṭi // BuSto_6.18 //
pāpācārānubandhoddhṛtagadavigalatpūtipūyāsravisra-
tvaṅmāṃsāsaktanāḍīmukhakuharagalajjantujagdhakṣatāṅgāḥ /
yuṣmatpādopasevāgadavaraguṭikābhyāsabhaktiprasaktā
jāyante jātarūpapratinidhivapuṣaḥ puṇḍarīkāyatākṣāḥ // BuSto_6.19 //
viśrāntaṃ śrautapātre gurubhirupahṛtaṃ yasya nāmnāyabhaikṣyaṃ
vidvadgoṣṭhīṣu yaśca śrutadhanavirahānmūkatāmabhyupetaḥ /
sarvālaṅkārabhūṣāvibhavasamuditaṃ prāpya vāgīśvaratvaṃ
so 'pi tvadbhaktiśaktyā harati nṛpasabhe vādisiṃhāsanāni // BuSto_6.20 //
bhūśayyādhūlidhūmraḥ sphuṭitakaṭitaṭīkarpaṭoddyotitāṅgo
yūkāyūṃṣi prapiṃṣan parapuṭapurataḥ karpare tarpaṇārthī /
tvāmārādhyādhyavasyan varayuvativahaccāmarasmeracārvī-
mūrvī dhatte madāndhadvipadaśanaghanāmuddhṛttaikātapatrām // BuSto_6.21 //
sevākarmāntaśilpapraṇayavinimayopāyaparyāyakhinnāḥ
prāgjanmopāttapuṇyopacitaśubhaphalaṃ vittamaprāpnuvantaḥ /
daivātikrāmaṇīṃ tvāṃ kṛpaṇajanajananyarthamabhyarthya bhūme-
rbhūyo nirvāntacāmīkaranikaranidhīn nirdhanāḥ prāpnuvanti // BuSto_6.22 //
vṛtticchede vilakṣaḥ kṣatanivasanayā bhāryayā bhartsyamāno
dūrādātmambharitvāt svajanasutasuhṛdbandhubhirvarjyamānaḥ /
tvayyāvedya svaduḥkhaṃ turagakhuramukhotkhātasīmnāṃ gṛhāṇām
īṣṭe svāntaḥpurastrīvalayajhaṇajhaṇājātanidrāprabodhaḥ // BuSto_6.23 //
caṅkraddikcakracumbisphuradurukiraṇā lakṣaṇālaṅkṛtā strī-
ṣaṭdanto dantimukhyaḥ śikhigalakaruciśyāmaromā varāśvaḥ /
bhāsvadbhāsvanmayūkho maṇiramalaguṇaḥ koṣabhṛt svarṇakoṣaḥ
senānīrvīrasainyo bhavati bhagavati tvatprasādāṃśaleśāt // BuSto_6.24 //
svacchandaṃ candanāmbhaḥsurabhimaṇiśilādattasaṅketakāntaḥ
kāntākrīḍānurāgādabhinavaracitātithyatathyopacāraḥ /
tvadvidyālabdhasiddhirmalayamadhuvanaṃ yāti vidyādharendraḥ
khaṅgāṃśuśyāmapīnonnatabhujaparighaprollasatpārihāryaḥ // BuSto_6.25 //
hārākrāntastanāntāḥ śravaṇakuvalayasparddhamānāyatākṣyo
mandārodāraveṇītaruṇaparimalāmodamādyaddvirephāḥ /
kāñcīnādānubandhoddhatataracaraṇodāramañjīratūryās
tvannāthān prārthayante smaramadamuditāḥ sādarā devakanyāḥ // BuSto_6.26 //
ratnacchannāntavāpīkanakakamalinīvajrakiñjalkamālām
unmajjatpārijātadrumamadhupavadhūddhūtadhūlīvitānām /
vīṇāveṇupravīṇāmarapuraramaṇīdattamādhuryatūryāṃ
kṛtvā yuṣmatsaparyāmanubhavati ciraṃ nandanodyānayātrām // BuSto_6.27 //
karpūrailālavaṅgatvagagurunaladakṣodagandhodakāyāṃ /
kāntākandarpadarpotkaṭakucakuharāvartaviśrāntavīcyām /
mandākinyāmamandacchaṭasalilasaritkrīḍayā sundarībhiḥ
krīḍanti tvadgatāntaḥkaraṇapariṇatottaptapuṇyaprabhāvāḥ // BuSto_6.28 //
gīrvāṇagrāmaṇībhirvinayabharanamanmaulibhirvanditājñaḥ
svargotsaṅge 'dhirūḍhaḥ surakariṇi jhaṇadbhūṣaṇodbhāsitāṅge /
śacyā dordāmadolāviralavalayitoddāmaromāñcamūrtiḥ
pūtastvaddṛṣṭipātairavati suramahīṃ hīrabhinnaprakoṣṭhaḥ // BuSto_6.29 //
cūḍāratnāvataṃsāsanagatasugatavyomalakṣmīvitānaṃ
prodyadbālārkakoṭīpaṭutarakiraṇāpūryamāṇatrilokam /
prauḍhālīḍhaikapādakramabharavinamadbrahmarudrendraviṣṇuṃ
tvadrūpaṃ bhāvyamānaṃ bhavati bhavabhayacchittye janmabhājām // BuSto_6.30 //
paśyantyeke sakopaṃ praharaṇakiraṇodgīrṇadordaṇḍakhaṇḍa-
vyāptavyomāntarālaṃ valayaphaṇiphaṇādāruṇāhāryacaryam /
dviṣṭavyatrāsihāsoḍḍamaraḍamarukoḍḍāmarāsphālavelā-
vetālottālatālapramadamadamahākelikolāhalogram // BuSto_6.31 //
kecittvekaikaromodgamagatagaganābhogabhūbhūtalastha-
svasthabrahmendrarudraprabhṛtinaramarutsiddhagandharvanāgam /
dikcakrākrāmidhāmasthitasugataśatānāntanirmāṇacittaṃ
citraṃ trailokyavandayaṃ sthiracararacitāśeṣabhāvasvabhāvam // BuSto_6.32 //
lākṣāsindūrarāgāruṇatarakiraṇādityalauhityameke
śrīmatsāndrendranīlopaladalitadalakṣodanīlaṃ tathānye /
kṣīrābdhikṣubdhadugdhādhikataradhavalaṃ kāñcanābhaṃ ca kecit
tvadrūpaṃ viśvarūpaṃ sphaṭikavadupadhāyuktibhedād vibhinnam // BuSto_6.33 //
sārvajñajñānadīpaprakaṭitasakalajñeyatattvaikasākṣī
sākṣādvetti tvadīyāṃ guṇagaṇagaṇanāṃ sarvavit tatsuto vā /
yastu vyādāya vaktraṃ valibhujaraṭitaṃ mādṛśo rāraṭīti
vyāpat sā tīvraduḥkhajvarajanitarujaścetaso hāsyahetuḥ // BuSto_6.34 //
yanme vijñāpyamānaṃ prathamataramadastvaṃ viśeṣeṇa vettrī
tadvayāhārātirekaśramavidhirabudhasvāntasantoṣahetuḥ /
kintu snigdhasya bandhorviṣamiva purato duḥkhamudgīrya vācāṃ
jñātārthasyāpi duḥkhī hṛdayalaghutayā svasthatāṃ vindatīva // BuSto_6.35 //
kalyāṇānandasindhuprakaṭaśaśikale śītalāṃ dehi dṛṣṭiṃ
puṣṭiṃ jñānopadeśaiḥ kuru dhanakaruṇe dhvaṃsaya dhvāntamantaḥ /
tvatstotrāmbhaḥpavitrīkṛtamanasi mayi śreyasaḥ sthānamekaṃ
dṛṣṭaṃ yasmādamoghaṃ jagati tavaguṇastotramātraṃ prajānām // BuSto_6.36 //
saṃstutya tvadguṇaughāvayavamaniyateyattamāptaṃ mayā yat
puṇyaṃ puṇyārdravāñchāphalamadhurarasāsvādamāmuktibhogyam /
lokastenāryalokeśvaracaraṇatalasvastikasvasticihnā-
mahnāyāyaṃ prayāyāt sugatasutamahīṃ tāṃ sukhāvatyupākhyām // BuSto_6.37 //
śrī sarvajñamitraviracitamāryatārāsragdharāstotraṃ samāptam //
___________________________________________________________________________
Digital Sanskrit Buddhist Canon, Stotra section, text no. 7:
(Ārya)tārāṣṭottaraśatanāmastotram
om namaḥ śrī āryatārāyai /
śrīmatpotalake ramye nānādhātuvirājite /
nānādrumalatākīrṇe nānāpakṣinikūjite // BuSto_7.1 //
nānānirjharabhāṅkārairnānāmṛgasamākule /
nānākusumajātībhiḥ samantādadhivāsite // BuSto_7.2 //
nānāhṛdyaphalopetaṣaṭpadodgītaniḥsvanaiḥ /
kinnarairmadhurodgītairmattaravāraṇasaṃkulaiḥ // BuSto_7.3 //
siddhavidyādharagaṇairgandharvaiśca ninādite /
munibhirvītarāgaiśca satataṃ suniṣevite // BuSto_7.4 //
bodhisattvagaṇaiścānyairdaśabhūmīśvarairapi /
āryatārādibhirdevairvidyārājñīsahasrakaiḥ // BuSto_7.5 //
krodharājagaṇaiścānyairhayagrīvādibhirvṛte /
sarvasattvahite yukto bhagavānavalokitaḥ // BuSto_7.6 //
vyājahāra tataḥ śrīmān padmagarbhāsane sthitaḥ /
mahatā tapasā yukto maitryā ca kṛpayānvitaḥ // BuSto_7.7 //
dharmaṃ dideśa tasyāṃ ca mahatyāṃ devaparṣadi /
tatrāpaviddhamāgamya vajrapāṇirmahābalaḥ // BuSto_7.8 //
parayā kṛpayā yuktaḥ papraccha cāvalokitam /
taskaroragasiṃhogragajavyāghrādisaṃkule // BuSto_7.9 //
sīdantyamī mune sattvā magnāḥ saṃsārasāgare /
baddhāḥ sāṃsārikaiḥ pāśai rāgadveṣatamomayaiḥ // BuSto_7.10 //
mucyante yena sattvāste tanme brūhi mahāmune /
evamukto jagannāthaḥ sa śrīmānavalokitaḥ // BuSto_7.11 //
uvāca madhurāṃ vāṇīṃ vajrapāṇiṃ prabodhinīm /
śṛṇu guhyakarājendra amitābhasya tāyaṇīḥ(ṇīm) // BuSto_7.12 //
praṇidhānavaśotpannāṃ mamājñāṃ lokamātaram /
mahākaruṇayopetāṃ jagaduddharaṇoddhṛtām // BuSto_7.13 //
uditādityasaṃkāśāṃ purṇenduvadanaprabhām /
bhāṣayantīmimāṃ tārāṃ sadevāsuramānuṣān // BuSto_7.14 //
kampayantīṃ ca trīn lokān trāsayantīṃ yakṣarākṣasān /
nīlotpalakarāṃ devīṃ mā bhairmā bhairiti bruvan // BuSto_7.15 //
jagatsaṃrakṣaṇārthayāhamutpāditā jinaiḥ /
kāntāre śastrasaṃpāte nānābhayasamākule // BuSto_7.16 //
smaraṇādeva nāmāni sattvān rakṣāmyahaṃ sadā /
tārayiṣyāmyahaṃ sattvān nānābhayamahārṇavāt // BuSto_7.17 //
tena tāreti māṃ loke gāyanti munipuṃgavāḥ /
kṛtāñjalipuṭo bhūtvā tataḥ sādarasādhvasaḥ // BuSto_7.18 //
jvalayatyantarikṣe tāmidaṃ vacanamabravīt /
nāmāṣṭaśatakaṃ brūhi yatpurā kīrtitaṃ janaiḥ // BuSto_7.19 //
daśabhūmīśvarairnāthairbodhisattvairmaharddhikaiḥ /
sarvapāpaharaṃ puṇyaṃ māṅgalyaṃ kīrtivarddhanam // BuSto_7.20 //
dhanadhānyakaraṃ caiva ārogyaṃ puṣṭivardhanam /
āyurārogyajanakaṃ sarvasattvasukhāvaham // BuSto_7.21 //
lakṣmyāḥ śriyaḥ sthāpakaṃ ca sarvasattvavivarddhanam /
maitrīmālambya sattvānāṃ tatkīrtaya mahāmune // BuSto_7.22 //
evamukte jagannāthaḥ prahasannavalokitaḥ /
vyavalokya diśaḥ sarvā maitrīspharaṇayā dṛśā // BuSto_7.23 //
dakṣiṇaṃ karamuddhṛtya puṇyalakṣaṇamaṇḍitam /
tamuvāca mahāprājñaḥ sādhu sādhu mahātapa // BuSto_7.24 //
nāmāni śṛṇu mahābhāga sarvasattvaikavatsare /
yāni saṃkīrtya manujā sampadā syurdhaneśvarāḥ // BuSto_7.25 //
sarvavyādhivinirmuktāḥ sarvaiśvaryaguṇānvitāḥ /
akālamṛtyunirdagdhāścyutā yānti sukhāvatīm // BuSto_7.26 //
tānyahaṃ sampravakṣyāmi devasaṃghāḥ śṛṇuta me /
anumodadhvametadvā bhaviṣyadhvaṃ sunirvṛtāḥ // BuSto_7.27 //
om locane sulocane tāre tārodbhave sarvasattvānukampini sarvasattvatāriṇi
sahasrabhuje sahasranetre / om namo bhagavate avalokaya avalokaya māṃ
sarvasattvāṃśca huṃ huṃ phaṭ phaṭ svāhā / om śuddhe viśuddhe sugatātmaje
maitrīhṛdaye nirmale śyāme śyāmarūpi mahāprājñe prabalavarabhūṣite /
aparājitā mahāraudrī viśvarūpī mahābalā / om suśriye // BuSto_7.28 //
om kalyāṇī mahātejā lokadhātrī mahāyaśāḥ /
sarasvatī viśālākṣī prajñā śrīrbuddhivardhinī // BuSto_7.29 //
dhṛtidā puṣṭidā svāhā omkārā kāmarūpiṇī /
sarvasattvahitodyuktā saṃgrāmottāriṇī jayā // BuSto_7.30 //
prajñāpāramitā devī āryatārā manoramā /
dundubhī śaṅkhinī pūrṇā vidyārājñī priyamvadā // BuSto_7.31 //
candrānanā mahāgaurī ajitā pītavāsasā /
mahāmāyā mahāśvetā mahābalaparākramā // BuSto_7.32 //
mahāraudrī mahācaṇḍī duṣṭasattvaniṣūdinī /
praśāntā śāntarūpā ca vijayā jvalanaprabhā // BuSto_7.33 //
vidyunmārī dhvajī khaṅgī cakrī cāpodyatāyudhā /
jambhano stambhanī kālī kālarātrirniśācarī // BuSto_7.34 //
rakṣaṇī mohanī śāntā kāntārī drāvaṇī śubhā /
brahmāṇī vedamātā ca guhyā ca guhyavāsinī // BuSto_7.35 //
māṅgalyā śāṅkarī saumyā jātavedā manojavā /
kapālinī mahāvegā sandhyā satyā 'parājitā // BuSto_7.36 //
sārthavāhakṛpādṛṣṭirnaṣṭamārgapradarśinī /
varadā śāsanī śāstrī surūpā 'mṛtavikramā // BuSto_7.37 //
śarvarī yoginī siddhā caṇḍārī(lī)amṛtā dhruvā /
dhanyā puṇyā mahābhāgā śubhagā priyadarśanā // BuSto_7.38 //
kṛtāntatrāsinī bhīmā ugrā ugramahātapā /
jagaddhite sadodyuktā śaraṇyā bhaktavatsalā // BuSto_7.39 //
vāgīśvarī śivā sūkṣmā nityā sarvakramānugā /
sarvārthasādhanī bhadrā goptrī dhātrī dhanapradā // BuSto_7.40 //
abhayā gautamī puṇyā śrīmallokeśvarātmajā // BuSto_7.iti // BuSto_7.(108)
tārānāmaguṇānantā sarvāśāparipūrakā // BuSto_7.41 //
om tāre kṛpāvare śrīkleśaśravaṇīye svāhā /
nāmnāmaṣṭottaraśataṃ hyetadyatkīrtitaṃ mayā /
rahasyabhūtaṃ guhyaṃ ca devānāmapi durlabham // BuSto_7.42 //
saubhāgyabhogakaraṇaṃ sarvakilviṣanāśanam /
sarvavyādhipraśamanaṃ sarvasattvasukhāvaham // BuSto_7.43 //
trikālaṃ yaḥ paṭheddhīmān śucisthāne samāhitaḥ /
so 'cireṇaiva kālena rājyaśriyamavāpnuyāt // BuSto_7.44 //
duḥkhī syāttu sukhī nityaṃ daridro dhanavān bhavet /
putro bhavenmahāprājño medhāvī ca na saṃśayaḥ // BuSto_7.45 //
bandhanānmucyate baddho vyavahāre jayoa bhavet /
śatravo mitratāṃ yānti śṛṅgiṇaḥ śunakā api // BuSto_7.46 //
saṃgrāme saṃkaṭe durge nānābhayasamucchrite /
smaraṇādeva nāmāni sarvānbhayānapohati // BuSto_7.47 //
nākālamṛtyurbhavati prāpnoti vipulāśayam /
mānuṣye saphalaṃ janma tasyaikasya mahātmanaḥ // BuSto_7.48 //
yaścedaṃ prātarutthāya mānavaḥ kīrtayiṣyati /
sa dīrghakālamāyuṣmān śriyaṃ ca labhate naraḥ // BuSto_7.49 //
devā nāgāstathā yakṣā gandharvā kaṭhapūtanāḥ /
piśācā rākṣasā bhūtā mātaro raudratejasāḥ // BuSto_7.50 //
ḍākinyastārakāḥ pretāḥ skandomādyā mahāgrahāḥ /
chāyāpasmārakāścaiva kheṭakā khārdakādayaḥ // BuSto_7.51 //
vetālāściṃcakā preṣyā ye cānye duṣṭacetasaḥ /
chāyāmapi na laṅghanti kiṃ punastasya vigraham // BuSto_7.52 //
duṣṭasattvā na bādhante vyādhayo nākramanti ca /
sarvaiśvaryaguṇairyukto vaṃśavṛddhiśca jāyate // BuSto_7.53 //
jātismaro bhaved dhīmān kulīnaḥ priyadarśanaḥ /
prītimāṃśca mahāvāgmī sarvaśāstraviśāradaḥ // BuSto_7.54 //
kalyāṇamitrasaṃsevī bodhicittavibhūṣitaḥ /
sadā 'virahito buddhairyatra yatropapadyate // BuSto_7.55 //
śrīāryatārābhaṭṭārikāyā nāmāṣṭottaraśataṃ buddhaparibhāṣitaṃ parisamāptam //
___________________________________________________________________________
Digital Sanskrit Buddhist Canon, Stotra section, text no. 8:
(Ārya)tārāstutiḥ
ācārya candradāsakṛtā
namastārāyai
sukhadacakracārucūḍāmaṇiruciramarīcisaṃcaya-
pracuraśikhāpracāraparicumbitacarcitacaraṇacandrake /
jagati carācare 'pi sācīkṛtacakitakṛpālulocane
stutivacanopacāramucitā