Tương Ưng Phiền Não (Kilesa Saṃyutta)

Saṁyutta Nikāya 27.10 
1. Kilesavagga 
Khandhasutta 
Sāvatthinidānaṁ. 
“Yo, bhikkhave, rūpasmiṁ chandarāgo, cittasseso upakkileso …pe… yo viññāṇasmiṁ chandarāgo, cittasseso upakkileso. 
Yato kho, bhikkhave, bhikkhuno imesu pañcasu ṭhānesu cetaso upakkileso pahīno hoti, nekkhammaninnañcassa cittaṁ hoti. 
Nekkhammaparibhāvitaṁ cittaṁ kammaniyaṁ khāyati, abhiññā sacchikaraṇīyesu dhammesū”ti. 
Dasamaṁ. 
Kilesavaggo paṭhamo. 
Tassuddānaṁ 
Cakkhu rūpañca viññāṇaṁ, 
phasso ca vedanāya ca; 
Saññā ca cetanā taṇhā, 
dhātu khandhena te dasāti. 
Kilesasaṁyuttaṁ samattaṁ. 

Saṁyutta Nikāya 27.1 
1. Kilesavagga 
Cakkhusutta 
Sāvatthinidānaṁ. 
“Yo, bhikkhave, cakkhusmiṁ chandarāgo, cittasseso upakkileso. 
Yo sotasmiṁ chandarāgo, cittasseso upakkileso. 
Yo ghānasmiṁ chandarāgo, cittasseso upakkileso. 
Yo jivhāya chandarāgo, cittasseso upakkileso. 
Yo kāyasmiṁ chandarāgo, cittasseso upakkileso. 
Yo manasmiṁ chandarāgo, cittasseso upakkileso. 
Yato kho, bhikkhave, bhikkhuno imesu chasu ṭhānesu cetaso upakkileso pahīno hoti, nekkhammaninnañcassa cittaṁ hoti. 
Nekkhammaparibhāvitaṁ cittaṁ kammaniyaṁ khāyati, abhiññā sacchikaraṇīyesu dhammesū”ti. 
Paṭhamaṁ. 

Saṁyutta Nikāya 27.2 
1. Kilesavagga 
Rūpasutta 
Sāvatthinidānaṁ. 
“Yo, bhikkhave, rūpesu chandarāgo, cittasseso upakkileso. 
Yo saddesu … 
yo gandhesu … 
yo rasesu … 
yo phoṭṭhabbesu … 
yo dhammesu chandarāgo, cittasseso upakkileso. 
Yato kho, bhikkhave, bhikkhuno imesu chasu ṭhānesu cetaso upakkileso pahīno hoti, nekkhammaninnañcassa cittaṁ hoti. 
Nekkhammaparibhāvitaṁ cittaṁ kammaniyaṁ khāyati, abhiññā sacchikaraṇīyesu dhammesū”ti. 
Dutiyaṁ. 

Saṁyutta Nikāya 27.3 
1. Kilesavagga 
Viññāṇasutta 
Sāvatthinidānaṁ. 
“Yo, bhikkhave, cakkhuviññāṇasmiṁ chandarāgo, cittasseso upakkileso. 
Yo sotaviññāṇasmiṁ … 
yo ghānaviññāṇasmiṁ … 
yo jivhāviññāṇasmiṁ … 
yo kāyaviññāṇasmiṁ … 
yo manoviññāṇasmiṁ chandarāgo, cittasseso upakkileso. 
Yato kho, bhikkhave, bhikkhuno imesu chasu ṭhānesu cetaso upakkileso pahīno hoti, nekkhammaninnañcassa cittaṁ hoti. 
Nekkhammaparibhāvitaṁ cittaṁ kammaniyaṁ khāyati, abhiññā sacchikaraṇīyesu dhammesū”ti. 
Tatiyaṁ. 

Saṁyutta Nikāya 27.4 
1. Kilesavagga 
Samphassasutta 
Sāvatthinidānaṁ. 
“Yo, bhikkhave, cakkhusamphassasmiṁ chandarāgo, cittasseso upakkileso. 
Yo sotasamphassasmiṁ … 
yo ghānasamphassasmiṁ … 
yo jivhāsamphassasmiṁ … 
yo kāyasamphassasmiṁ … 
yo manosamphassasmiṁ chandarāgo, cittasseso upakkileso. 
Yato kho, bhikkhave, bhikkhuno …pe… 
abhiññā sacchikaraṇīyesu dhammesū”ti. 
Catutthaṁ. 

Saṁyutta Nikāya 27.5 
1. Kilesavagga 
Samphassajasutta 
Sāvatthinidānaṁ. 
“Yo, bhikkhave, cakkhusamphassajāya vedanāya chandarāgo, cittasseso upakkileso. 
Yo sotasamphassajāya vedanāya … 
yo ghānasamphassajāya vedanāya … 
yo jivhāsamphassajāya vedanāya … 
yo kāyasamphassajāya vedanāya … 
yo manosamphassajāya vedanāya chandarāgo, cittasseso upakkileso. 
Yato kho, bhikkhave, bhikkhuno …pe… 
abhiññā sacchikaraṇīyesu dhammesū”ti. 
Pañcamaṁ. 

Saṁyutta Nikāya 27.6 
1. Kilesavagga 
Saññāsutta 
Sāvatthinidānaṁ. 
“Yo, bhikkhave, rūpasaññāya chandarāgo, cittasseso upakkileso. 
Yo saddasaññāya … 
yo gandhasaññāya … 
yo rasasaññāya … 
yo phoṭṭhabbasaññāya … 
yo dhammasaññāya chandarāgo, cittasseso upakkileso. 
Yato kho, bhikkhave, bhikkhuno …pe… 
abhiññā sacchikaraṇīyesu dhammesū”ti. 
Chaṭṭhaṁ. 

Saṁyutta Nikāya 27.7 
1. Kilesavagga 
Sañcetanāsutta 
Sāvatthinidānaṁ. 
“Yo, bhikkhave, rūpasañcetanāya chandarāgo, cittasseso upakkileso. 
Yo saddasañcetanāya … 
yo gandhasañcetanāya … 
yo rasasañcetanāya … 
yo phoṭṭhabbasañcetanāya … 
yo dhammasañcetanāya chandarāgo, cittasseso upakkileso. 
Yato kho, bhikkhave, bhikkhuno …pe… 
abhiññā sacchikaraṇīyesu dhammesū”ti. 
Sattamaṁ. 

Saṁyutta Nikāya 27.8 
1. Kilesavagga 
Taṇhāsutta 
Sāvatthinidānaṁ. 
“Yo, bhikkhave, rūpataṇhāya chandarāgo, cittasseso upakkileso. 
Yo saddataṇhāya … 
yo gandhataṇhāya … 
yo rasataṇhāya … 
yo phoṭṭhabbataṇhāya … 
yo dhammataṇhāya chandarāgo, cittasseso upakkileso. 
Yato kho, bhikkhave, bhikkhuno …pe… 
abhiññā sacchikaraṇīyesu dhammesū”ti. 
Aṭṭhamaṁ. 

Saṁyutta Nikāya 27.9 
1. Kilesavagga 
Dhātusutta 
Sāvatthinidānaṁ. 
“Yo, bhikkhave, pathavīdhātuyā chandarāgo, cittasseso upakkileso. 
Yo āpodhātuyā … 
yo tejodhātuyā … 
yo vāyodhātuyā … 
yo ākāsadhātuyā … 
yo viññāṇadhātuyā chandarāgo, cittasseso upakkileso. 
Yato kho, bhikkhave, bhikkhuno imesu chasu ṭhānesu cetaso upakkileso pahīno hoti, nekkhammaninnañcassa cittaṁ hoti. 
Nekkhammaparibhāvitaṁ cittaṁ kammaniyaṁ khāyati, abhiññā sacchikaraṇīyesu dhammesū”ti. 
Navamaṁ.