Tiểu Tụng (Khuddakapāṭha)

Khuddakapāṭha 1 
Saraṇattaya 
Namo tassa Bhagavato Arahato Sammāsambuddhassa. 
Buddhaṁ saraṇaṁ gacchāmi, 
Dhammaṁ saraṇaṁ gacchāmi, 
Saṅghaṁ saraṇaṁ gacchāmi. 
Dutiyampi buddhaṁ saraṇaṁ gacchāmi, 
Dutiyampi dhammaṁ saraṇaṁ gacchāmi, 
Dutiyampi saṅghaṁ saraṇaṁ gacchāmi. 
Tatiyampi buddhaṁ saraṇaṁ gacchāmi, 
Tatiyampi dhammaṁ saraṇaṁ gacchāmi, 
Tatiyampi saṅghaṁ saraṇaṁ gacchāmi. 
Saraṇattayaṁ. 

Khuddakapāṭha 2 
Dasasikkhāpada 
Pāṇātipātā veramaṇisikkhāpadaṁ samādiyāmi. 
Adinnādānā veramaṇisikkhāpadaṁ samādiyāmi. 
Abrahmacariyā veramaṇisikkhāpadaṁ samādiyāmi. 
Musāvādā veramaṇisikkhāpadaṁ samādiyāmi. 
Surāmerayamajjapamādaṭṭhānā veramaṇisikkhāpadaṁ samādiyāmi. 
Vikālabhojanā veramaṇisikkhāpadaṁ samādiyāmi. 
Naccagītavāditavisūkadassanā veramaṇisikkhāpadaṁ samādiyāmi. 
Mālāgandhavilepanadhāraṇamaṇḍanavibhūsanaṭṭhānā veramaṇisikkhāpadaṁ samādiyāmi. 
Uccāsayanamahāsayanā veramaṇisikkhāpadaṁ samādiyāmi. 
Jātarūparajatapaṭiggahaṇā veramaṇisikkhāpadaṁ samādiyāmi. 
Dasasikkhāpadaṁ. 

Khuddakapāṭha 3 
Dvattiṁsākāra 
Atthi imasmiṁ kāye—Kesā lomā nakhā dantā taco, maṁsaṁ nhāru aṭṭhi aṭṭhimiñjaṁ vakkaṁ, hadayaṁ yakanaṁ kilomakaṁ pihakaṁ papphāsaṁ, antaṁ antaguṇaṁ udariyaṁ karīsaṁ matthaluṅgaṁ, pittaṁ semhaṁ pubbo lohitaṁ sedo medo, assu vasā kheḷo siṅghāṇikā lasikā muttanti. 
Dvattiṁsākāraṁ. 

Khuddakapāṭha 4 
Kumārapañhā 
Ekaṁ nāma kiṁ? 
Sabbe sattā āhāraṭṭhitikā. 
Dve nāma kiṁ? 
Nāmañca rūpañca. 
Tīṇi nāma kiṁ? 
Tisso vedanā. 
Cattāri nāma kiṁ? 
Cattāri ariyasaccāni. 
Pañca nāma kiṁ? 
Pañcupādānakkhandhā. 
Cha nāma kiṁ? 
Cha ajjhattikāni āyatanāni. 
Satta nāma kiṁ? 
Satta bojjhaṅgā. 
Aṭṭha nāma kiṁ? 
Ariyo aṭṭhaṅgiko maggo. 
Nava nāma kiṁ? 
Nava sattāvāsā. 
Dasa nāma kiṁ? 
Dasahaṅgehi samannāgato “arahā”ti vuccatīti. 
Kumārapañhā. 

Khuddakapāṭha 5 
Maṅgalasutta 
Evaṁ me sutaṁ—
ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme. 
Atha kho aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. 
Ekamantaṁ ṭhitā kho sā devatā bhagavantaṁ gāthāya ajjhabhāsi—
“Bahū devā manussā ca, 
maṅgalāni acintayuṁ; 
Ākaṅkhamānā sotthānaṁ, 
brūhi maṅgalamuttamaṁ”. 
“Asevanā ca bālānaṁ, 
paṇḍitānañca sevanā; 
Pūjā ca pūjaneyyānaṁ, 
etaṁ maṅgalamuttamaṁ. 
Patirūpadesavāso ca, 
pubbe ca katapuññatā; 
Attasammāpaṇidhi ca, 
etaṁ maṅgalamuttamaṁ. 
Bāhusaccañca sippañca, 
vinayo ca susikkhito; 
Subhāsitā ca yā vācā, 
etaṁ maṅgalamuttamaṁ. 
Mātāpituupaṭṭhānaṁ, 
puttadārassa saṅgaho; 
Anākulā ca kammantā, 
etaṁ maṅgalamuttamaṁ. 
Dānañca dhammacariyā ca, 
ñātakānañca saṅgaho; 
Anavajjāni kammāni, 
etaṁ maṅgalamuttamaṁ. 
Āratī viratī pāpā, 
majjapānā ca saṁyamo; 
Appamādo ca dhammesu, 
etaṁ maṅgalamuttamaṁ. 
Gāravo ca nivāto ca, 
santuṭṭhi ca kataññutā; 
Kālena dhammassavanaṁ, 
etaṁ maṅgalamuttamaṁ. 
Khantī ca sovacassatā, 
samaṇānañca dassanaṁ; 
Kālena dhammasākacchā, 
etaṁ maṅgalamuttamaṁ. 
Tapo ca brahmacariyañca, 
ariyasaccāna dassanaṁ; 
Nibbānasacchikiriyā ca, 
etaṁ maṅgalamuttamaṁ. 
Phuṭṭhassa lokadhammehi, 
cittaṁ yassa na kampati; 
Asokaṁ virajaṁ khemaṁ, 
etaṁ maṅgalamuttamaṁ. 
Etādisāni katvāna, 
Sabbattha maparājitā; 
Sabbattha sotthiṁ gacchanti, 
Taṁ tesaṁ maṅgalamuttaman”ti. 
Maṅgalasuttaṁ. 

Khuddakapāṭha 6 
Ratanasutta 
Yānīdha bhūtāni samāgatāni, 
Bhummāni vā yāni va antalikkhe; 
Sabbeva bhūtā sumanā bhavantu, 
Athopi sakkacca suṇantu bhāsitaṁ. 
Tasmā hi bhūtā nisāmetha sabbe, 
Mettaṁ karotha mānusiyā pajāya; 
Divā ca ratto ca haranti ye baliṁ, 
Tasmā hi ne rakkhatha appamattā. 
Yaṁ kiñci vittaṁ idha vā huraṁ vā, 
Saggesu vā yaṁ ratanaṁ paṇītaṁ; 
Na no samaṁ atthi tathāgatena, 
Idampi buddhe ratanaṁ paṇītaṁ; 
Etena saccena suvatthi hotu. 
Khayaṁ virāgaṁ amataṁ paṇītaṁ, 
Yadajjhagā sakyamunī samāhito; 
Na tena dhammena samatthi kiñci, 
Idampi dhamme ratanaṁ paṇītaṁ; 
Etena saccena suvatthi hotu. 
Yaṁ buddhaseṭṭho parivaṇṇayī suciṁ, 
Samādhimānantarikaññamāhu; 
Samādhinā tena samo na vijjati, 
Idampi dhamme ratanaṁ paṇītaṁ; 
Etena saccena suvatthi hotu. 
Ye puggalā aṭṭha sataṁ pasatthā, 
Cattāri etāni yugāni honti; 
Te dakkhiṇeyyā sugatassa sāvakā, 
Etesu dinnāni mahapphalāni; 
Idampi saṅghe ratanaṁ paṇītaṁ, 
Etena saccena suvatthi hotu. 
Ye suppayuttā manasā daḷhena, 
Nikkāmino gotamasāsanamhi; 
Te pattipattā amataṁ vigayha, 
Laddhā mudhā nibbutiṁ bhuñjamānā; 
Idampi saṅghe ratanaṁ paṇītaṁ, 
Etena saccena suvatthi hotu. 
Yathindakhīlo pathavissito siyā, 
Catubbhi vātehi asampakampiyo; 
Tathūpamaṁ sappurisaṁ vadāmi, 
Yo ariyasaccāni avecca passati; 
Idampi saṅghe ratanaṁ paṇītaṁ, 
Etena saccena suvatthi hotu. 
Ye ariyasaccāni vibhāvayanti, 
Gambhīrapaññena sudesitāni; 
Kiñcāpi te honti bhusaṁ pamattā, 
Na te bhavaṁ aṭṭhamamādiyanti; 
Idampi saṅghe ratanaṁ paṇītaṁ, 
Etena saccena suvatthi hotu. 
Sahāvassa dassanasampadāya, 
Tayassu dhammā jahitā bhavanti; 
Sakkāyadiṭṭhī vicikicchitañca, 
Sīlabbataṁ vāpi yadatthi kiñci. 
Catūhapāyehi ca vippamutto, 
Chaccābhiṭhānāni abhabba kātuṁ; 
Idampi saṅghe ratanaṁ paṇītaṁ, 
Etena saccena suvatthi hotu. 
Kiñcāpi so kamma karoti pāpakaṁ, 
Kāyena vācā uda cetasā vā; 
Abhabba so tassa paṭicchadāya, 
Abhabbatā diṭṭhapadassa vuttā; 
Idampi saṅghe ratanaṁ paṇītaṁ, 
Etena saccena suvatthi hotu. 
Vanappagumbe yatha phussitagge, 
Gimhānamāse paṭhamasmiṁ gimhe; 
Tathūpamaṁ dhammavaraṁ adesayi, 
Nibbānagāmiṁ paramaṁ hitāya; 
Idampi buddhe ratanaṁ paṇītaṁ, 
Etena saccena suvatthi hotu. 
Varo varaññū varado varāharo, 
Anuttaro dhammavaraṁ adesayi; 
Idampi buddhe ratanaṁ paṇītaṁ, 
Etena saccena suvatthi hotu. 
Khīṇaṁ purāṇaṁ nava natthi sambhavaṁ, 
Virattacittāyatike bhavasmiṁ; 
Te khīṇabījā avirūḷhichandā, 
Nibbanti dhīrā yathāyaṁ padīpo; 
Idampi saṅghe ratanaṁ paṇītaṁ, 
Etena saccena suvatthi hotu. 
Yānīdha bhūtāni samāgatāni, 
Bhummāni vā yāni va antalikkhe; 
Tathāgataṁ devamanussapūjitaṁ, 
Buddhaṁ namassāma suvatthi hotu. 
Yānīdha bhūtāni samāgatāni, 
Bhummāni vā yāni va antalikkhe; 
Tathāgataṁ devamanussapūjitaṁ, 
Dhammaṁ namassāma suvatthi hotu. 
Yānīdha bhūtāni samāgatāni, 
Bhummāni vā yāni va antalikkhe; 
Tathāgataṁ devamanussapūjitaṁ, 
Saṅghaṁ namassāma suvatthi hotūti. 
Ratanasuttaṁ. 

Khuddakapāṭha 7 
Tirokuṭṭasutta 
Tirokuṭṭesu tiṭṭhanti, 
sandhisiṅghāṭakesu ca; 
Dvārabāhāsu tiṭṭhanti, 
āgantvāna sakaṁ gharaṁ. 
Pahūte annapānamhi, 
khajjabhojje upaṭṭhite; 
Na tesaṁ koci sarati, 
sattānaṁ kammapaccayā. 
Evaṁ dadanti ñātīnaṁ, 
ye honti anukampakā; 
Suciṁ paṇītaṁ kālena, 
kappiyaṁ pānabhojanaṁ. 
Idaṁ vo ñātīnaṁ hotu, 
sukhitā hontu ñātayo; 
Te ca tattha samāgantvā, 
ñātipetā samāgatā. 
Pahūte annapānamhi, 
sakkaccaṁ anumodare; 
Ciraṁ jīvantu no ñātī, 
yesaṁ hetu labhāmase. 
Amhākañca katā pūjā, 
dāyakā ca anipphalā; 
Na hi tattha kasī atthi, 
gorakkhettha na vijjati. 
Vaṇijjā tādisī natthi, 
hiraññena kayākayaṁ; 
Ito dinnena yāpenti, 
petā kālagatā tahiṁ. 
Unname udakaṁ vuṭṭhaṁ, 
yathā ninnaṁ pavattati; 
Evamevaṁ ito dinnaṁ, 
petānaṁ upakappati. 
Yathā vārivahā pūrā, 
paripūrenti sāgaraṁ; 
Evamevaṁ ito dinnaṁ, 
petānaṁ upakappati. 
Adāsi me akāsi me, 
ñāti mittā sakhā ca me; 
Petānaṁ dakkhiṇaṁ dajjā, 
pubbe katamanussaraṁ. 
Na hi ruṇṇaṁ vā soko vā, 
yā caññā paridevanā; 
Na taṁ petānamatthāya, 
evaṁ tiṭṭhanti ñātayo. 
Ayañca kho dakkhiṇā dinnā, 
saṅghamhi suppatiṭṭhitā; 
Dīgharattaṁ hitāyassa, 
ṭhānaso upakappati. 
So ñātidhammo ca ayaṁ nidassito, 
Petāna pūjā ca katā uḷārā; 
Balañca bhikkhūnamanuppadinnaṁ, 
Tumhehi puññaṁ pasutaṁ anappakanti. 
Tirokuṭṭasuttaṁ. 

Khuddakapāṭha 8 
Nidhikaṇḍasutta 
Nidhiṁ nidheti puriso, 
gambhīre odakantike; 
Atthe kicce samuppanne, 
atthāya me bhavissati. 
Rājato vā duruttassa, 
corato pīḷitassa vā; 
Iṇassa vā pamokkhāya, 
dubbhikkhe āpadāsu vā; 
Etadatthāya lokasmiṁ, 
nidhi nāma nidhīyati. 
Tāvassunihito santo, 
gambhīre odakantike; 
Na sabbo sabbadā eva, 
tassa taṁ upakappati. 
Nidhi vā ṭhānā cavati, 
saññā vāssa vimuyhati; 
Nāgā vā apanāmenti, 
yakkhā vāpi haranti naṁ. 
Appiyā vāpi dāyādā, 
uddharanti apassato; 
Yadā puññakkhayo hoti, 
sabbametaṁ vinassati. 
Yassa dānena sīlena, 
saṁyamena damena ca; 
Nidhī sunihito hoti, 
itthiyā purisassa vā. 
Cetiyamhi ca saṅghe vā, 
puggale atithīsu vā; 
Mātari pitari cāpi, 
atho jeṭṭhamhi bhātari. 
Eso nidhi sunihito, 
ajeyyo anugāmiko; 
Pahāya gamanīyesu, 
etaṁ ādāya gacchati. 
Asādhāraṇamaññesaṁ, 
acorāharaṇo nidhi; 
Kayirātha dhīro puññāni, 
yo nidhi anugāmiko. 
Esa devamanussānaṁ, 
sabbakāmadado nidhi; 
Yaṁ yadevābhipatthenti, 
sabbametena labbhati. 
Suvaṇṇatā susaratā, 
susaṇṭhānā surūpatā; 
Ādhipaccaparivāro, 
sabbametena labbhati. 
Padesarajjaṁ issariyaṁ, 
cakkavattisukhaṁ piyaṁ; 
Devarajjampi dibbesu, 
sabbametena labbhati. 
Mānussikā ca sampatti, 
devaloke ca yā rati; 
Yā ca nibbānasampatti, 
sabbametena labbhati. 
Mittasampadamāgamma, 
yonisova payuñjato; 
Vijjāvimuttivasībhāvo, 
sabbametena labbhati. 
Paṭisambhidā vimokkhā ca, 
yā ca sāvakapāramī; 
Paccekabodhi buddhabhūmi, 
sabbametena labbhati. 
Evaṁ mahatthikā esā, 
yadidaṁ puññasampadā; 
Tasmā dhīrā pasaṁsanti, 
paṇḍitā katapuññatanti. 
Nidhikaṇḍasuttaṁ. 

Khuddakapāṭha 9 
Mettasutta 
Karaṇīyamatthakusalena, 
Yanta santaṁ padaṁ abhisamecca; 
Sakko ujū ca suhujū ca, 
Sūvaco cassa mudu anatimānī. 
Santussako ca subharo ca, 
Appakicco ca sallahukavutti; 
Santindriyo ca nipako ca, 
Appagabbho kulesvananugiddho. 
Na ca khuddamācare kiñci, 
Yena viññū pare upavadeyyuṁ; 
Sukhino va khemino hontu, 
Sabbasattā bhavantu sukhitattā. 
Ye keci pāṇabhūtatthi, 
Tasā vā thāvarā vanavasesā; 
Dīghā vā ye va mahantā, 
Majjhimā rassakā aṇukathūlā. 
Diṭṭhā vā ye va adiṭṭhā, 
Ye va dūre vasanti avidūre; 
Bhūtā va sambhavesī va, 
Sabbasattā bhavantu sukhitattā. 
Na paro paraṁ nikubbetha, 
Nātimaññetha katthaci na kañci; 
Byārosanā paṭighasañña, 
Nāññamaññassa dukkhamiccheyya. 
Mātā yathā niyaṁ puttam 
Āyusā ekaputtamanurakkhe; 
Evampi sabbabhūtesu, 
Mānasaṁ bhāvaye aparimāṇaṁ. 
Mettañca sabbalokasmi, 
Mānasaṁ bhāvaye aparimāṇaṁ; 
Uddhaṁ adho ca tiriyañca, 
Asambādhaṁ averamasapattaṁ. 
Tiṭṭhaṁ caraṁ nisinno va, 
Sayāno yāvatāssa vitamiddho; 
Etaṁ satiṁ adhiṭṭheyya, 
Brahmametaṁ vihāramidhamāhu. 
Diṭṭhiñca anupaggamma, 
Sīlavā dassanena sampanno; 
Kāmesu vinaya gedhaṁ, 
Na hi jātuggabbhaseyya punaretīti. 
Mettasuttaṁ. 
Khuddakapāṭhapāḷi niṭṭhitā.